FILIPU MU

PƆLU ’LƐTRƐ ’LA ꞊KPAA ZESU ’YI MU ’LA ’YAA‑ FILIPU ’MU NI

Pɔlu ’lɛtrɛ ’la ꞊kpaa Filipu ‑wa ’ɛ ta Zesu ’yi mu ’ɛ ni ’bhɛ ŋgblo

Filipu ‑wa ’ɛ ’yaa‑ Masedwani ’klɛɛn ’ɛ ’yi ‑wa ‑gbɛnɛ do ‑la ‑le. ’Bhɛɛ‑ Masedwani ’klɛɛn ’ɛ ’bhɛ ’yaa‑ Grɛki mu a ’klɛɛn ’ɛ ’faŋgayi. Filipu ‑wa ’ɛ ta Zesu ’yi mu ‑lɛdo’, ’mu ‑le ‑yaa Pɔlu Zesu ’yi mu ꞊lwa ’la ꞊kla ’bhɛ ’klɛɛn ’ɛ ’yi ’bhɛɛ‑ ’le (Klɛza 16.11-40). Pɔlu gelawoa Mɛɛzan a ye ’ɛ ’wolɛ‑ ‑wa ’bhɛɛke mu ’ɛ ta, Filipu Zesu ’yi mu ’ɛ ’mu ‑le bhɔŋba ‑gɔli’ ꞊kpaa ‑a ni. ’Lɛtrɛ ’lɛɛ‑ ’yi, Pɔlu ‑o ’pubwa‑ ‑wa glaan’ mu ’la ꞊kpaa ‑o nɛɛnɛ‑ Epafroditi ’kɔɔ ’bhɛ ma. ’Bhɛ glaan’ mu ’kpa bhla ’ɛ ba, Pɔlu ‑yaa ‑kaso ’yi, ’duŋ‑ ‑e ’bhɛ glaan’ mu ’ɛ ’srɔɔlawoa, ’mu ’a zrukpalaa.

‑A ‑lɛ ꞊lwa mi ’ɛ ’yi (Filipu 1.1-26), Pɔlu Filipu Zesu ’yi mu ’ɛ waa ‑za ’wlan ’ɛ ’yidwa‑, ’bhɛɛ‑ ‑yoo ’pubwa‑ ’bhɛ ma. ‑E ‑yaa ‑kaso ’la ’yi, ‑e ’bhɛ ‑janwoa ‑o ni. ’O ’yee‑ ’lɛtrɛ ’lɛɛ‑ ’yipele ‑a ‑lɛ do do ’ɛ ma:

Pɔlu pe Filipu Zesu ’yi mu ’ɛ ni dɔɔ ‑o ’kpale‑ klɛ do ma, ’bhɛ ’pegee ‑woo ŋgblo ’kpala ‑o ‑lɛɛ mu ’ɛ ꞊la, ’bhɛɛ‑ ‑o ‑gasikpa ’eke‑ ‑lɛɛ (Filipu 1.27–2.18).

’Bhɛ blaan, Pɔlu Timote ’pegee Epafroditi ’winbɔza ’ɛ Filipu ’bhɛ ba janwoa‑ (Filipu 2.19-30).

‑Ya ꞊pia Filipu Zesu ’yi mu ’ɛ ni dɔɔ ‑o yri bo ‑o ’gbu ‑za ’le Zuufu mu a bhla ma ’toŋ mu ’ɛ daan ’mu ma (Filipu 3). ‑Amasrɔyi, ’mu ’yaa‑ pe ’zi dɔɔ Zesu ’yi mu ’la ’mu ’laa ’wlalɛ‑ ’klɛɛn ’yi ’kaa ‑o ’mu ’wla ’klɛɛn ’yi kpaŋma, ’kooko‑ ’mu go ‑za ’yi, ’bhɛɛ‑ ’mu ’lɛdɔɔle klɛ ‑Waanbhaa ‑yrɛ ’yi.

Pɔlu ’a ꞊pia Filipu Zesu ’yi mu ’ɛ ni dɔɔ ‑wa blaanta gɔɔn ‑a ’taawogbɛya ’ɛ ’yi, ’bhɛ ’yi ‑le ‑yaa dɔɔ ‑woo ’gbu gbɛkpa’ Zesu Krisi ’kɔɔ (Filipu mu 4).

’Yee‑ ’lɛtrɛ ’lɛɛ‑ ’lɛyanyrɛ ’ɛ ’yi, ‑e Filipu Zesu ’yi mu ’ɛ ’liala‑, ’bhɛɛ‑ ‑yoo ’pubwa ’ezin‑ ‑o glaan’ mu ’la ꞊kpaa ‑a ni ’mu ma.

Pɔlu a ’pubɔwli

¹Mi Pɔlu ’pegee Timote ’woo‑ Zesu Krisi a yewonɛ mu ’le. ’O mɔɔ ‑le ’lɛtrɛ ’lɛɛ‑ ’kpa zii’ mɛɛ ’la zan mu ‑o ‑Waanbhaa’ a pɛ ’le Zesu Krisi ’srɔyi Filipu ‑wa ’ɛ ta ’mu ‑la ni. ’Bhɛɛ‑ ’o ’yee‑ ’lɛtrɛ ’lɛɛ ’kpa zii’ ’ezin‑ Filipu ‑wa ’ɛ ta Zesu ’yi mu ‑lɛdo’ ’ɛ ‑o ‑lɛɛ mu ’ɛ ’pegee ’mu ’bhɔŋba‑ mu ’ɛ ’mu ‑la ni. ²Bhaa ‑kɔɔ’ Dɛ ‑Waanbhaa’ ’pegee Mɛɛzan Zesu Krisi ‑li ’ka ma, ’bhɛɛ‑ ‑o yilabla na ’ka ni.

Pɔlu ‑a ’seriwo zii’ Filipu Zesu ’yi mu ‑lɛdo’ ’ɛ waa ‑za ma

³’Waati ’oo ’waati, ’ke ’ka ‑za ‑dwa ’ŋ ’kpee, ’ŋ ‑Waanbhaa’ ’pubɔ‑ ’kaa‑ ‑za ma. ⁴’Waati ’oo ’waati, ’ke ’ŋ ’yoo ’ŋ ’seriwo zii’ ’ka ’kpɛn a ‑za ma, ’ŋ ’bhɛ klɛ ’ŋ zrukpaale ’le. ⁵‑Amasrɔyi ’ka ꞊bhwa ’ŋ ba ‑Jan ’Nrale‑ ’ɛ ’wole ’le mɛɛ mu ni, ’kee‑ san ‑a zisanle ’ɛ ma, ’kee‑ nu ’tɛnlɛ‑ ‑zɔn ma. ⁶’Mi ’gbu ’kpale‑ ‑o ‑za ’lɛɛ‑ ’bhɛɛ‑ ’yi dɔɔ ‑Waanbhaa’ ’la ’yee‑ ye ‑lrele’ ’ɛ zisaan‑ ’ka zru mu ’ɛ ’yi ’bhɛ klɛgbɛya ’ɛ gbɛɛn‑ bhe, ‑e nu bhɔlɛ ’ka ba ’ke ’ka ’bhɛ ye ’ɛ wo ’kee‑ ge ’tɛnlɛ‑ ‑a ‑lɛyanle ma Zesu Krisi ’nu yi ’ɛ ’le. ⁷’Ke ’mi ’ŋ ’kpeelɛdaan ’ka ’kpɛn ‑a ‑za ma ’bhɛ gbɛɛn‑ bhe ’bhɛ lele. ‑Amasrɔyi ’ka ‑za ‑o ’ŋ ’kɔɔ ’eglɔɔle ’taŋii. ’Bhɛɛ‑ ‑Waanbhaa’ ’duma ’la ’naa‑ ’mi ni, ‑kɔɔ ’kpɛn ’bhɛ sasa ‑srɔɔwoa. ’Ke ’ŋ ꞊kla ‑kaso ’yi ‑zɔn oo, ’ke ’ŋ ‑ja ‑klu ta Zesu a ‑jan ’ɛ ’lɛɛ zaabɔ yrɛ nɔɔ‑ oo, ‑a wlan pe yrɛ nɔɔ‑ mɔkpɛn’ ’yrɛ ma oo, ’yee‑ ye do ’kpɔ ’ɛ ‑kɔɔ ’kpɛn ’a ꞊woa ’eke‑ zi. ⁸‑Waanbhaa’ ‑o ’ŋ ’srɛ ’le, ‑a ’gbu ’a ’yaango‑ ’bhii‑ ’ka ’kpɛn ‑za sɔ ’ŋ ni ’ebebele ’bhii‑ ’ka ‑za sɔ Zesu Krisi ni gɔnɛ‑ ’la gbɛɛn‑.

⁹’Ŋ ‑za ’lɛɛ‑ ’bhɛɛ‑ ’yrɛwo‑ ‑Waanbhaa ma ’an ’seri mu ’ɛ ’yi ’ka ba zayi’, ’an ’yrɛwo‑ ‑a ma dɔɔ ’kaa‑ ’sɔniya ’ɛ baan’ kla ‑a ba, ’ke ’ka ‑zadɔleya ‑srɔɔwo’, ’bhɛɛ‑ ’ka yikan’ maza dɔ. ¹⁰’Kooko‑ ’ke ’ka sɔ ‑za ’lrele‑ bagole ‑za ’yɔɔ‑ ma. ’Ke ’ka ’bhɛ ꞊kla bhe, ’ka nu klɛlɛ mɛɛ ’weŋ mu ’le, ’bhɛɛ‑ waa nu ‑za ’yɔɔ‑ ’kedo‑ ’kpɔ ’yelɛ‑ ’ka zi Krisi ’nu yi ’ɛ ’le. ¹¹’Bhɛɛ‑ Zesu Krisi ’srɔyi, ’ka nu ‑lɛdɔɔleya maza mu ‑la klɛlɛ. ’Ke ’bhɛ ꞊kla, ’ke mɛɛ mu ’ɛ ‑o ’ka klɛza ‑lrele’ mu ’ɛ ꞊ya, ‑o nu ‑Waanbhaa’ ’tɔbhɔlɛ, ’bhɛɛ‑ ‑wa magbaandɛ.

Krisi ‑le bole ‑yrɛ ma ‑si kplankplan ’gbu ’ɛ ’le

¹²’Ŋ nɛɛnɛ‑ mu, ’mi ‑a zi ’bhii‑ ’kaa ’yaango‑ ’bhii‑ ’ŋ ‑yrɛn ‑glɔɔn ’la ꞊bhla bhe, ’bhɛ ’a ꞊kla ’bhɛɛ‑ mɛɛ ‑bebe ‑Jan ’Nrale‑ ’ɛ baan’ ꞊maa. ¹³Wlan ’ɛ ni, ‑janmatii ’ɛ ‑yaa ’fa ꞊la mu ’ɛ ’kpɛn ’pegee mɛɛ ‑bhɛɛke’ mu ’ɛ ‑wa ’yaango‑ ’bhii‑ ’ŋ ’yoo‑ ‑kaso ’yi Krisi ’tɔ ’ɛ ’bhɛɛ‑ ma. ¹⁴‑Woo ’ŋ ’yelawoa ‑kaso ’yi bhe, ’ŋ nɛɛnɛ‑ ‑bebe Zesu ’yi mu ’ɛ ‑woo ’kpa baanwoa‑ Mɛɛzan ’yi. ’Bhɛɛ‑ ‑o ŋgblo ‑dwa ‑o ‑lii ‑Waanbhaa’ ‑jan ’woyrɛ‑ ’ɛ ꞊nɔɔ, ’ke ‑gblaan ’laa kla ‑o ‑yi.

^15-17Wlan ’ɛ ni, ‑a ’ke mu ‑o Krisi a ‑jan ’ɛ wo zii’ mɛɛ mu ni ‑o zru ‑lrele’ ’le, ‑wa klɛ ’zi ’sɔniya ‑la ‑le ‑o zru mu ’ɛ ’yi. ‑Wa ’yaango‑ ’bhii‑ ‑Waanbhaa’ ’ŋ ꞊kpaa ’ŋ ’kpayrɛ‑ ’lɛɛ‑ ꞊nɔɔ, ’kooko‑ ’ŋ klɛ ‑yaa’ ‑Jan ’Nrale‑ ’ɛ ta wlan pe mi ’le. ’Duŋ‑ ‑a ’ke mu ‑o ’yee‑ Krisi a ‑za ’ɛ ’wo zii’ ‑o ’kpee ’yɔɔ‑ ’pegee zranwolele ‑o zru ba. ‑Wa zi ’bhii‑ ‑o gwle bɔ ’mi ma, ’bhɛɛ‑ ’ke mɛɛ mu ‑o ’tɔbhɔ‑ ’ke ’bhɛ kan ’mi ta. ’Bhɛ klɛgbɛya ’ɛ gbɛɛn‑ bhe, ’ŋ ’yoo‑ ‑kaso ’la ’yi bhe, ‑woo ’an ‑yrɛn ’ɛ baan’ ‑la ’kla zii’ ’a ba.

¹⁸’Bhɛ ’laa ‑za ’ke klɛ. ’Ke ‑o ’kpeejan‑ mu ꞊kla ’eyɔɔle oo, ’ke ‑o ’kpeejan‑ mu ꞊kla ’elrele oo, ‑woo Krisi a ‑za ’ɛ ’wolawo zii’ mɛɛ mu ’ɛ ni gbɛ ’ɛ ’kpɛn ma bhe ’bhɛ ‑le ’mi zrukpaa’ zii’. ’Bhɛɛ‑ ’ŋ nu bolɛ ’ŋ zrukpaale ’le ’ezin‑. ¹⁹‑Amasrɔyi ’an ’yaango‑ ’ka ‑o ’ka ’seri mu ’la ’wo zii’ ’ŋ ma bhe, ’bhɛ ’pegee Zesu Krisi Lii ’la ’bhɔ zii’ ’ŋ ba bhe, ’woo‑ ‑za mu ’ɛ ’kpɛn nu klɛlɛ ’ŋ ’bheeyrɛ‑ ’le, ’bhɛɛ‑ ’ŋ ’pwɛyrɛ‑ ’le ‑kaso ’ɛ ’yi. ²⁰Wlan ’ɛ ni, ’mi ‑o ’bhɛɛ‑ magbɛn ’zi ’ŋ zru ’ɛ ’kpɛn ’le, ’bhɛɛ‑ ’ŋ ’yri ‑o ’bhɛɛ‑ ta. ‑Za ’kedo‑ ’kpɔ ’laa nu klɛlɛ ’ŋ ma ’ke ‑yrala’ ’le. ’Bhɛɛ‑ drɔɔn’, ‑zɔn ’pegee ’waati ’ɛ ’kpɛn ba, ’ŋ nu Krisi magbaandɛlɛ ’ŋ zrubakpaale ‑gbɛnɛ ’le ’ŋ ’flɛ ’ɛ ’yi, ’ali‑ ’ke ’ŋ ‑gaa oo, ’ke ’ŋ ꞊bwa ’ŋ ’yrɛ ma oo, ’bhɛ ’kpɛn ‑o ’ŋ ma do. ²¹‑Amasrɔyi Krisi ‑le ’ŋ bole ’ŋ ’yrɛ ma ’trɛ ’lɛɛ‑ ta ‑gɛ ’bhɛ ’win ’le, ’bhɛɛ‑ ga ‑o ’ŋ ma ’ke ‑trɔn ’le. ²²’Duŋ‑ ’ke ’ŋ sɔ bole ’ŋ ’yrɛ ma, ’bhɛɛ‑ ’ŋ ye ’ke wo ’ke ’bhɛ klɛ ’elrele mɛɛ ma, ’bhɛ ’yi, ’ŋ ’kɛ ’gbu ’la si ‑o plɛ ’ɛ ba ’naa ’bhɛ dɔ ’dɛ. ²³’Ŋ ’klina‑ ’tɛ ’ŋ zru maza plɛ ’ɛ pleŋ‑: ‑A ‑lrɔ ’ŋ ma ’bhii‑ ’ŋ ga ’bhɛɛ‑ ’ŋ ge Krisi ba. ’Ŋ ’yoo‑ ’bhɛɛ‑ zi ’gbu. ²⁴’Duŋ‑ ’ka mu ‑za ’yi, ’ke ’ŋ ꞊bwa ‑sɔ ’ŋ ’yrɛ ma ’trɛ ’lɛɛ‑ ta ‑gɛ, ’bhɛ ‑o ‑za ’lrele‑ ’le ’ka mu ma. ²⁵’Ŋ ’gbu ’kpale ‑o ‑a ‑yi, ’bhɛɛ‑ ’an ’yaango‑ ’bhii‑ ’ŋ nu bolɛ ’drunyan ’lɛɛ‑ ’yi ‑gɛ ’waati sa ’ka ’kpɛn ‑din ’ezin‑. ’Kooko‑ ’ke ’ŋ bhɔ ’ka ba, ’bhɛɛ‑ ’kaa‑ ’kpaleya ’ɛ baan’ kla ‑a ba, ’bhɛ ’pegee ’ke ’ka zrukpaale klɛ ’kaa‑ ’kpaleya ’ɛ ’yi.

²⁶’Bhɛ ’yi, ’ke ’ŋ ’niinaa ’ka ba ye, ’bhɛ klɛgbɛya ’ɛ ’yi, ’ka nu ’ka ‑baalɛ’ ’ka ’pegee Zesu Krisi a ’kpaledomaya ’ɛ ’yi ’mi ba zayi’.

²⁷’Duŋ‑ ’kɛla ’bhɛ ‑o ‑a ‑yi ’eglɔɔle, ’bhɛ ‑le dɔɔ ’kaa ’taawogbɛya ’ɛ ‑gaale’ klɛ Krisi ‑a ‑Jan ’Nrale‑ ’ɛ ba. ’Bhɛ klɛgbɛya ’ɛ ’yi, ’ke ’ŋ ꞊nwa ’pwɛlɛ‑ ’ka ta oo, ’ke ’naa ’nulɛ‑ oo, ’ŋ nu ‑jan ’nrale‑ malɛ ’ka ta dɔɔ ’ka bole ‑o ’eglɔɔle ’kaa‑ ’kpaleya ’ɛ ’yi, ’bhɛɛ‑ ’ka ’kpale‑ ‑o do ma, ’bhɛ ’pegee ’ka ’kpeejan‑ ‑o do. ’Bhɛɛ‑ ’ŋ ’yoo‑ ‑a zi ’bhii‑ ’an ma ’ka ta ’ezin‑ dɔɔ ’ka ‑o yewo ’zi ’eke‑ zi ’ka zru do ’le, ’kooko‑ mɛɛ mu ’ɛ ‑o ‑Jan ’Nrale‑ ’ɛ ma ’bhɛɛ‑ ‑woo kpa Krisi ’yi. ²⁸’Kee‑ ꞊kla gɔn ’oo gɔnɛ‑ ’la gbɛɛn‑, ’ka ’laa ’tolɛ‑ ’ke ‑gblaan kla ’ka ’yi ’ka ’sɔɔnnii mu ’ɛ ’lɛɛ. ‑O klɛza mu ’ɛ ’mu a zrɔn ’bhii‑ ‑woo ‑o ni zi ’ɛ ’bhɛɛ‑ ta, ’bhɛɛ‑ ’ka mu ’taawogbɛya ’ɛ ’bhɛ ’a zrɔn ’bhii‑ ’ka mu ‑gwa ‑za ’yi. ’Bhɛ ‑za mu ’ɛ ’kpɛn da ‑Waanbhaa’ ‑la ba. ²⁹‑Amasrɔyi ‑Waanbhaa’ laa ‑lilɛ’ ’ka ma, ’kooko‑ ’ke ’ka ’ka kpa drɔŋ Krisi ’yi, ’duŋ‑ ‑e ‑lia ’ka ma, ’kooko‑ ’ke ’ka ‑yrɛnbhle’ ‑a ni. ³⁰’Ka ’ŋ ꞊ya gwle ’la dan yrɛ nɔɔ‑ ’elwale ‑sɔ Krisi ’sɔɔnnii mu ’ɛ ba, ’mi ’pegee ’ka mu ‑o ’bhɛɛ‑ gwle do ’kpɔ ’ɛ dan ’zi ’eke‑ zi ‑zɔn; ’ali‑ ’ŋ ’yoo‑ ’bhɛɛ‑ gwle ’ɛ dan ’zi ‑zɔn ‑li ’bhii‑ ’kaa‑ ma ’zi ’ŋ ’lii gɔnɛ‑ ’la gbɛɛn‑ bhe.

Zesu Krisi ’a ’gbu mazinaa, ’bhɛɛ‑ ‑Waanbhaa’ ’a magbaandia

¹’Kaa ’kpaledomaya ’ɛ Krisi ’yi ’bhɛ ‑o faŋgandɔ ’zi ’ka ta ɛɛ? ‑Yaa’ ’sɔniya ’ɛ zruwla ’zi ka ’kpee ɛɛ? ’Ka ’pegee Lii ’Weŋ ’ɛ ’kpale‑ ‑o do ma ɛɛ? ’Ka ‑o ’eke‑ ma ’ewlanle ɛɛ? ’Bhɛɛ‑ ’ka ’eke‑ ‑yrɛnkla’ ɛɛ? ²’Bhɛ ’yi ’tɛ, ‑ka ’an zrukpaa ’ɛ ’lɛsɔ ’ke ’ka ’kpale klɛ do ma, ’ke ’ka ‑za sɔ ’eke‑ ni, ’ke ’ka zru klɛ do, ’bhɛɛ‑ ’ke ’ka ’kpeejan‑ klɛ do. ³’Ka ’laa ‑za ’kedo‑ ’kpɔ klɛlɛ ’ke zaabɔlele ’ke ’ka ’kanyrɛ‑ glin ’eke‑ ta, ’bhɛ ’pegee ’ke ’ka ’ka ’gbu ’tɔbhɔyrɛ ‑glin bhaama ‑za ’kpɛn ’yi; ’duŋ‑ ‑ka ’ka ’gbu mazina. ’Bhɛɛ‑ ‑ka ’eke‑ ye ’bhii‑ ’ka gblaan ‑yiya’ ’eke‑ ni. ⁴’Ka ’laa ’ka do ‑kplɛnnɛ’ ‑nrayiza klɛyrɛ ‑glinlɛ’, ‑ka ’eke‑ ’nrayiza klɛyrɛ ‑la ‑glin ’ezin‑. ⁵’Ka ’taawogbɛya ’ɛ klɛ ’bhii‑ mɛɛ mu ’la ’pegee Zesu Krisi ’kpale‑ do ma ’mu ’taawogbɛya ’ɛ gbɛɛn‑.

⁶’Yee‑ ’la ‑o ’pegee ‑Waanbhaa’ dɔgbɛya ‑yaa do ’taŋii, ’duŋ‑ ‑o ’pegee ‑Waanbhaa’ dɔgbɛya ’la ’yaa‑ do bhe, ‑a blɔɔle laa bolɛ ’bhɛ dɔgbɛya ’ɛ ma.

⁷Drɔɔn’ ‑ya nii‑ ‑gwa ’bhɛ ’kpɛn ’yi, ’bhɛɛ‑ ‑ya ’gbu ꞊kla ’bhii‑ lu do gbɛɛn‑. ‑Ya ’gbu ꞊kla bhaaplɛŋ do ’le, ’bhɛɛ‑ ‑ya ’gbu ꞊kla ’bhii‑ bhaaplɛŋ dɔgbɛya ’ɛ gbɛɛn‑.

⁸‑Ya ’gbu mazinaa, ’bhɛɛ‑ ‑e ’taawoa꞊ ‑Waanbhaa’ ‑weli’ ta ’ke ’bhɛ ge ’tɛnlɛ‑ ‑a gale ma. ’Ali‑ ‑e ‑dwa ‑a ‑la ’kee ga ‑yrigbɛɛle ’ɛ ta, (’bhɛ ga gbɛya ‑glɔɔn ’la ’yaa‑ ’ke ‑yraladɔ maza ’le bhe).

⁹’Bhɛla‑ ‑zayile, ‑Waanbhaa’ ’a ’yalaa‑ laflɛ’ ’yi ’yaayrɛ‑ ‑gbɛnɛ ’ɛ ’bhɛɛ‑ ꞊nɔɔ. ’Bhɛɛ‑ ’bhɛ ’tɔ do ‑naa ‑a ni, ’bhɛ ’tɔ ’ɛ gblaan ‑yiya’ ’tɔ ’kpɛn ni,

¹⁰’kooko‑ Zesu ’tɔ ma, ‑Waanbhaa’ gbɛ klɛpɛ ’tɔle‑ ‑a gbɛ klɛpɛ, ’kee‑ ꞊kla laflɛ’ ’yi oo, ’kee‑ ꞊kla ’trɛ ta ‑gɛ oo, ’bhɛɛ‑ ’kee‑ ꞊kla ’trɛ ꞊la oo, ‑o ’kpɛn ‑o ’kpɔ zɛn ‑a ꞊la, ’bhɛɛ‑ ‑wa gba.

¹¹’Ke mɔkpɛn’ ’a pe kpataakpa ‑o ‑lii dɔɔ Zesu Krisi ‑o ’ke Mɛɛzan ’le, ’bhɛɛ‑ ‑wa Dɛ ‑Waanbhaa’ ’tɔbhɔ‑.

Zesu ’yi mu ’taawogbɛya ’drunyan ’lɛɛ ’yi

¹²’Bhɛ ’yi, ’ŋ ’yiɛnii mu, ’ka ’taawoa꞊ ’taŋii ’ŋ ’weli‑ ’ɛ ta gɔnɛ‑ ’la gbɛɛn‑ ’ŋ ’yaa ’ka ‑din ’waati ’la ba, ’ali‑ ’naa ‑o ’ka ‑din ’waati ’la ba bhe, ‑ka ’taa baanwoa‑ ’ŋ ’weli‑ ’ɛ ta. ‑Waanbhaa’ ’ka golawoa ‑za ’yi, ‑ka dɔ klɛn ’ke ’ka ’bhɛ ’wlata‑ ’taawogbɛya klɛ ’ke ‑Waanbhaa’ ‑lɛɛgblaan ’le ’ka ’yi, ’ke ’ka ‑gasikpa ‑a ‑lɛɛ. ¹³‑Amasrɔyi ‑Waanbhaa’ ‑le bhɔ ’zi ’ka ba, ’kooko‑ ‑a zru maza klɛle ’sɔ ’ka ni, ’bhɛɛ‑ ’ka sɔ ’bhɛ klɛle‑, ’ke ’bhɛ ’pegee ’yee‑ ‑Waanbhaa’ ’gbu ‑za ’lrele‑ yɛkɛ‑ ’la ’lɛdulaa ’mu klɛ do.

¹⁴’Ka ’laa ‑za ’kpɛn klɛlɛ ’ka ’la ma janwole, ’pegee zaabɔlele. ¹⁵’Kooko‑ mɛɛ ’laa ‑za ’yɔɔ‑ do ’kpɔ ye ’ka zi, ’bhɛɛ‑ ’ka klɛ ’weŋ. ’Ke ’ka klɛ ‑Waanbhaa’ a ‑nɛ mu ’la ’ke waa ‑sɔŋ’ do ’kpɔ ye ’mu zi ’mu ’le. ’Ka ‑o ’saanigɛ bhaaplɛŋ mu ’la ’pleŋ‑ bhe, ‑o ‑lɛbiile ‑o, ’bhɛɛ‑ ‑woo ’eyɔɔle. ‑Ka mu ‑bhile’ klɛ ’woo‑ ’drunyan ’lɛɛ‑ ’yi mu ’ɛ ’pleŋ‑ ’bhii‑ mlɛklɛn‑ mu bhi gɔnɛ‑ ’la gbɛɛn‑ laflɛ’ ’yi. ¹⁶‑Jan ’Nrale‑ ’la bole ‑yrɛ ma ‑si na mɛɛ ni, ‑ka ’bhɛ ’wo ‑o ni. ’Ke ’ka ’bhɛ ꞊kla, ’ŋ ŋgblo ma ’wleŋwleŋ nu wolɛ ’ka mu ba zayi’ Krisi ’nu yi ’ɛ ’le. ’Bhɛ nu ‑a zrɔnlɛ ’bhii‑ ’ŋ ’trɛbhɔ ’la ꞊bhla, ’bhɛ ’pegee ’ŋ ye ’la ꞊woa, ’mu ’laa bolɛ bhaama za ’le.

¹⁷’Kaa‑ ’kpaleya ’ɛ Krisi ’yi, ’bhɛ ‑o ’bhii‑ ’ka ‑o ’sraka ‑la go ’zi ‑Waanbhaa’ ni. ’Duŋ‑ ’ali‑ ’ke ‑o ’mi ꞊dia, ’mi ’an pɛ yiɛn ’ɛ ’bhɛ ‑le nu klɛlɛ ‑yi ‑dɔɔ ’le ’bhɛ ’sraka ’ɛ ta. ’Kee‑ ‑kla ’bhɛ gbɛɛn‑ bhe, ’ŋ zrukpaale ‑o, ’bhɛɛ‑ ’ŋ ’yoo‑ ’ka ’kpɛn ’kpa zii’ ’an pɛ zrukpaa’ ’ɛ ba. ¹⁸’Bhɛ klɛgbɛya do ’ɛ ’yi, ’ka mu, ’ka zrukpaale klɛ, ’bhɛɛ‑ ‑ka ’mi ’kpa ’kaa pɛ zrukpaa’ ’ɛ ba ’ezin‑.

Timote ’pegee Epafroditi ’woye‑

¹⁹’Ke Mɛɛzan Zesu ‑dwa ‑la, ‑a ‑vinbwa ’waati sa ’bhɛɛ‑ ’ŋ Timote ’winbɔ‑ ’ka ta ye. ’Kooko‑ ’kee‑ ‑ja ’ka ba ye, ’bhɛɛ‑ ’kee‑ ꞊nwa ’ka ta jan mu wolɛ ’ŋ ni, ’bhɛ nu faŋgandɔlɛ ’ŋ ta. ²⁰Mɛɛ ’kedo‑ ’kpɔ ’laa ‑o ’ŋ ‑din ‑gɛ ’ke ’mi ’pegee ’bhɛ zru klɛ do ’bhii‑ ’yee‑ Timote gbɛɛn‑. ’Yele‑ ’ka mu ’gbu yiɛnkan ’egbɛnɛle. ²¹Mɛɛ mu ’ɛ ’kpɛn bole ‑o ’gbu ’nrayiza ‑la klɛle ma, ’duŋ‑ waa Zesu Krisi ’nrayiza klɛ. ²²’Duŋ‑ ’ka ’gbu ’a ’yaango‑ ’bhii‑ Timote ’a ‑zrɔnna ’bhii‑ ‑yoo ’ke yewonɛ ’lrele‑ ’le. ‑Ya ’gbu ꞊twa ‑Jan ’Nrale‑ ’ɛ ’wole ni, ’bhɛɛ‑ ’mi ’pegee ’yee‑ ’bhɛ ye ’ɛ ꞊woa ’eke‑ zi ’bhii‑ ‑nɛ do ’pegee ‑a dɛ. ²³’Bhɛ ’yi ’tɛ, ’ke ’mi ’an pɛ ‑za ’ɛ ’lɛwlagbɛya ꞊ya yi ’la ’le, ’ke ‑Waanbhaa’ ‑dwa ‑a ‑la, ’ŋ nu ’yee Timote winbɔlɛ ’ka ta ye. ²⁴’Bhɛɛ‑ ’duŋ‑, ’mi ’gbu ’kpale‑ ‑o Mɛɛzan ’yi ’bhii‑ ‑a ‑vinbwa ’waati sa ’bhɛɛ‑ ’mi ’gbu ge ’ka ba ye.

²⁵’Sani‑ ’bhɛ ’waati ’ɛ ’bhɔle‑ pleŋ‑, ’mi ’a ꞊ya zi ’le ’ke ’mi ’ŋ nɛɛnɛ‑ Epafroditi winbɔ ’ka ba. ’Yele‑ ’ŋ yewoyɔɔn ’pegee ’ŋ ’bhɔŋba‑ mi ’le ‑Jan ’Nrale‑ ’ɛ ta gwledanlele. ’Ŋ maza ‑yaa pɛ mu ’la ma, ’ka ’yela‑ winbwa‑ ’bhɛɛ‑ ‑e ꞊nwa ’mu ’le ’ŋ ni. ²⁶’Ka ’kpɛn ’lrɔ ‑o ‑a dɛ ’zi ’egbɛnɛle, ‑amasrɔyi ’kaa ’malawoa ’kaa‑ ga ‑yaa ‑a ma, bhɛ ’a zrubatɛdwa. ²⁷Wlan ’ɛ ni, ga ‑yaa ‑a ma, ‑a ‑lɛ ꞊bwa sa ’kee‑ klɛ siɛle’. ’Duŋ‑ ‑e ‑bheelawoa, ’yee‑ do ‑kplɛnnɛ’ ’yrɛn ’laa ’klalɛ‑ ‑Waanbhaa’ ma, ’mi ‑la ‑yrɛn ꞊klaa ’bhɛ ma ’ezin‑ ’bhɛ gbɛɛn‑ bhe. ’Kooko‑ yaa klɛ ’ŋ wlɛyisriwole keta plɛ ’le. ²⁸’Bhɛla‑ ‑yile, ’ŋ ’yoo‑ ’ŋ ‑gbaanwo’ zii’ ’bhɛɛ‑ ’an ’winbɔ‑ ’ka ba. ’Kooko‑ ’ke ’kaa ꞊ya ’ka zrukpalaa, ’bhɛɛ‑ ’mi a pɛ wlɛyisriwole ’ɛ mazinaa ’tɛ. ²⁹’Kee‑ ꞊bhwa ’ka ba ye, ‑kaa ’kun ’tɛ ’ka gbɛ plɛ ’pegee ’ka zrukpaale ’le, ’bhɛ ’pegee Mɛɛzan ’tɔ ’ɛ ‑zayi’. ‑Ka ’bhɛɛ‑ mɛɛ ‑glɔɔn mu ’ɛ ’lɛdɔ‑ a ma. ³⁰‑Amasrɔyi, ‑a ‑lɛ ꞊bwa sa ’kee‑ ga Krisi ‑a ye ’ɛ ‑za ma. ’Ka ’ŋ glaan’ ꞊kpaa pɛ mu ’la ba, ’ka mu ’gbu ’laa ‑yaa sɔ nule‑ ’mu ’le ’ŋ ni; ‑a nu bhla ’ɛ zi ’bhɛ pɛ mu ’ɛ ’le ’ŋ ni, ‑a win ‑yaa zan bolɛ ‑a ‑yi.

‑Lɛdɔɔleya ‑zeze ‑Waanbhaa’ ‑yrɛ ’yi

¹’An ‑jan ’ɛ ’lɛyanyrɛ ‑yoo ’kɛla ’le ’bhɛ ‑le dɔɔ ’ŋ nɛɛnɛ‑ mu, ’ka zrukpaale klɛ ’ka ’pegee Mɛɛzan a ’kpaledomaya ’ɛ ’yi. ’Ke ’ŋ ꞊bwa ’ŋ ‑jan do ’la ’ŋ ’bhɛ ꞊woa ’ka ni ’elwale gban ’bhɛ ta ’ezin‑, ’bhɛ ’laa mi ’trɛbhɔ‑. ’Bhɛ klɛ ’ka mu ’gbu ‑la ma ‑trɔn ’le. ²‑Ka ’ka ’gbu ’kun ’elrele ye ‑yɔɔ wo mu ’ɛ ma, ‑woo ’eyɔɔle ’bhii‑ ‑gbaan’ mu. ‑Ka ’ka ’gbu ’kun ’ezin‑ ’elrele ‑o ma: ’Woo‑ ’kpee ma wlale ’klɛɛn ’yi ’ɛ ’bhɛ ‑le mɛɛ klɛ ‑Waanbhaa’ ‑nɛ kplankplan ’le. ³Wlan ’ɛ ni, ‑kɔɔ’ mu Zesu ’yi mu ’ɛ, ‑kɔɔ’ mu ’gbu ‑le ‑Waanbhaa’ ‑nɛ ‑zeze mu ’ɛ ’le. ‑Amasrɔyi ‑kɔɔ’ ‑Waanbhaa’ gba ‑a *Lii ’Weŋ ’ɛ ‑glɔɔya’ ’ɛ ’le. ‑Kɔɔ’ ‑kɔɔ’ ’gbu baa Zesu Krisi ‑la ‑yi. ’Bhɛɛ‑ ‑kɔɔ’ ’kpale laa bo bhaaplɛŋ mu a ’sinii ta za mu ’yi. ⁴’Mi ’duŋ‑, ’mi ’yaa‑ sɔ ’ŋ ’kpale bhaaplɛŋ mu a ’sinii ta ‑za mu ’ɛ ’yi dɔɔ ‑o sɔ ’mi gole ‑za ’yi. ‑Dele sɔ a pele dɔɔ ’bhɛ ’woo ’sinii ta za mu ’ɛ ꞊kla ’ke ’bhɛ kan ’mi ta ɛɛ? ⁵‑O ’mi ꞊wlaa ’klɛɛn ’yi ’ŋ ’ya le blaan ‑yrekpaa’ ’srwaa‑ mi ma. ’Ŋ ’yoo‑ Izraɛli mi ‑kpɔsɔɔ ’le ’kee‑ san ’ŋ ꞊ya yi ’ɛ ma, ’bhɛɛ‑ ’ŋ da Bɛnzamɛ a ‑gbaa ’bhɛɛ‑ ’lii, ’bhɛ ’pegee ’ŋ ’yoo‑ Ebre ’kpee yi ’le. Farizi mu ’la Zuufu mu ’si ta ’toŋ mu ‑za ’ɛ kun ’eglɔɔle, ’ŋ ’yaa‑ ’duŋ‑ ’mu do ’le. ⁶’Bhɛ ’waati ’ɛ ba, ’ŋ ’yaa‑ Zuufu mu a ’toŋ mu ’ɛ ‑vavadɛ ’kee‑ kan a ‑daŋ’ ta. ’Bhɛla‑ ‑yile, ’ŋ ’yaa‑ ‑yrɛnkpa’ Zesu ’yi mu ’ɛ ta. ’Bhɛɛ‑ ’ke mɛɛ do Zuufu mu a ’toŋ mu ’ɛ ’klɔsikwan, ’bhɛɛ‑ ‑a ‑lɛdɔɔle klɛ ‑Waanbhaa’ ‑yrɛ ’yi, ’ke ‑yoo ’mu ’le bi ’ŋ sɔ a pele‑ dɔɔ waa ‑sɔŋ’ ’kedo‑ ’kpɔ ’yelɛ‑ ’ŋ ma ’mu ’yi. ⁷’Duŋ‑ ’bhɛ ‑za mu ’la ’yaa‑ ‑nafan maza mu ’le ’mi ma, ’ŋ ’mu ye ’saanigɛ ’bhii‑ bhaama za mu Krisi ‑zayi’. ⁸’Bhɛɛ‑ ’ezin‑ ’gbu, ’mi ’drunyan ta za mu ’ɛ ’kpɛn ye ’bhii‑ bhaama za mu, ’ŋ Mɛɛzan Zesu Krisi dɔlawoa ’bhɛ ‑zayi’. Mɛɛzan Zesu Krisi dɔle ’ɛ, ’bhɛ mabhaabhɔ ‑za ’kpɛn ta. ’Bhɛla‑ ‑zayile ’mi ’ŋ ’niigwa‑ ’woo‑ ‑za mu ’ɛ ’kpɛn ’yi, ’bhɛɛ‑ ‑woo ’ŋ yrɛ ’yi ’bhii‑ blinpɛ, ’kooko‑ ’ŋ ’srɔɔwopɛ klɛ ’ke Krisi do ‑kplɛnnɛ’ ’le. ⁹’Bhɛɛ‑ ’kooko‑ ’o ’pegee ’yee‑ ’kpale‑ klɛ do ma. ’Ŋ ’lɛdɔɔle ’laa klɛ ‑Waanbhaa’ ‑yrɛ ’yi ’toŋ mu ‑klɔsikunle ma. ’Duŋ‑ ’mi ’ŋ ’kpale‑ ’la ‑yoo Krisi ’yi bhe, ’bhɛ ‑le ’ŋ ’lɛdɔɔla ‑Waanbhaa’ ‑yrɛ ’yi. ’Bhɛɛ‑ ’duŋ‑, ‑lɛdɔɔleya ’la da ‑Waanbhaa’ ba ‑o ’bhɛ ’srɔɔwo‑ ’kpaleya ‑la ma. ¹⁰’Ŋ ’yoo‑ ‑za do ’kpɔ ’la zi, ’bhɛ ‑le Krisi dɔle ’le, ’bhɛ ’pegee ’ke ‑glɔɔya’ ’la ’bhɛ ’a ‑bwela ga le ba ’ŋ ’bhɛ dɔ ’ezin‑. ’Ŋ ’yoo‑ ‑a zi ’bhii‑ ’mi yaa ‑yrɛn ’ɛ ’ke ’bhle, ’bhɛɛ‑ ‑e klɛ ’ŋ ni ’bhii‑ ’mi ’pegee ’yee‑ ‑gaa ’eke‑ ’yi. ¹¹’Bhɛ klɛgbɛya ’ɛ ’yi, ’ŋ ’yrikpale ‑o ‑a ta ’bhii‑ ’ŋ nu bwelɛ gale ba.

’Taawole ‑Waanbhaa’ a zi ’ɛ ta ’ke ’ya ’lɛyan‑ a ma

¹²Yaa klɛlɛ ’e ’pegee‑ ’ŋ ꞊tian ’an pɛ ’taawole ’ɛ ’lɛyanyrɛ ma, ’bhɛɛ‑ ’ŋ ’bhɛ ma ‑trɔn ’ɛ ’srɔɔwoa‑ gban. ’Bhɛɛ‑ yaa klɛlɛ ’ezin‑ ’e ’pegee ’ŋ ꞊kla gban ’ŋ ’yoo‑ ‑a zi ’bhii‑ ’ŋ klɛ ’kɛla ’le ’bhɛɛ‑ ’le. ’Duŋ‑ mi ‑o dɔ ’zi klɛn ’ke ’ŋ ge ’an ’taawole ’ɛ zi, ’kooko‑ ’an ma ‑trɔn ’ɛ ’srɔɔwo‑, ‑amasrɔyi Krisi ’mi makwan‑ gban ‑yaa’ pɛ ’le. ¹³’Ŋ nɛɛnɛ‑ mu, yaa klɛlɛ ’e ’pegee ’mi ꞊tian ’an pɛ ’taawole ’ɛ ‑daŋ’ ma, ’bhɛɛ‑ ’an ma ‑trɔn ’ɛ ’srɔɔwoa‑ gban. ’Duŋ‑ ’ŋ ’yoo‑ ‑za ’lɛɛ‑ ’bhɛɛ‑ klɛ zi: ’Mi ’ŋ ’niigo‑ ’ŋ ‑zanta’ pɛ mu ’ɛ ’yi, ’bhɛɛ‑ ’mi ’ŋ ’sɛnɛ gbaan zii’ ’ŋ ’lɛɛ pɛ mu ’ɛ ’srɔɔwole‑ zi. ¹⁴’Bhɛ ’yi, ’ŋ ’yoo‑ ’ŋ ’yrɛgbaan‑ ’zi ’an ’taawole ’ɛ ‑lɛyanyrɛ ’ɛ ’bhɛɛ‑ ta, ’ke ’ŋ ge ‑a ‑daŋ’ ma, ’kooko‑ ‑Waanbhaa’ ’ŋ ’siila‑ ‑jara ’la ma Zesu Krisi ’srɔyi, ’ŋ ’bhɛ ’srɔɔwo‑ laflɛ’ ’ɛ ’yi.

¹⁵’Bhɛ ya ’ɛ ’yi, ‑kɔɔ’ mu Zesu ’yi mu ’la ’kpɛn ’yrɛbakanle ‑o Zesu a pɛ zi ’ɛ ta bhe, ’bhɛ ’kpeelɛdangbɛya ‑glɔɔn ’ɛ ’bhɛ ‑le klɛ ‑kɔɔ’ ’kpɛn ’yi. ’Duŋ‑ ’ke ’ka ’kpeelɛdangbɛya ’ɛ yaa ‑o ’bhɛ gbɛɛn bhe, ‑Waanbhaa’ nu a klɛlɛ ’bhɛɛ‑ ’kaa ’yima‑ kplankplan. ¹⁶’Kee‑ ꞊kla gɔn ’oo gɔnɛ‑ ’la gbɛɛn‑, ‑kɔɔ’ ’taawoa꞊ ‑Waanbhaa’ a zi ’ɛ ta gɔnɛ‑ ’la gbɛɛn‑ ’kee‑ nu ’tɛnlɛ‑ ‑zɔn ma, ‑kɔɔ’ ge ‑kɔɔa’ ’taa ’ɛ zi ’yee‑ klɛgbɛya do ’ɛ gbɛɛn‑.

¹⁷’Ŋ nɛɛnɛ‑ mu, ’mi ‑o ’taawo zii’ ‑Waanbhaa’ a zi ’ɛ ta gɔnɛ‑ ’la gbɛɛn‑, ‑ka ’taawo ’bhɛɛ‑ gbɛɛn‑ ’ezin‑. ’O mɔɔ ’bhɛ ’taawogbɛya ’ɛ ‑zrɔnna ’ka ni. Mɛɛ ’la zan mu ‑o ’taawo zii’ ’bhii‑ ’bhɛ ’taawogbɛya ’ɛ gbɛɛn‑, ‑ka ’ka ’yrɛkpa ‑waa’ ’taawogbɛya ’ɛ zi, ’bhɛɛ‑ ’kaa klɛ ’bhii‑ ’woo mu gbɛɛn‑. ¹⁸‑Amasrɔyi, ’ŋ ’yoo‑ zan ‑jan ’la ’wolɛ‑ ’ka ni ‑gɛ, ’ŋ ’bhɛ ꞊woa gban ’ka ni ’elwale, ’bhɛɛ‑ ’ŋ ’yoo‑ bɔ ’zi ‑a ta ’ezin‑ ’ke wisile ’le dɔɔ mɛɛ ‑bebe ’taawogbɛya ’ɛ ’bhɛ ‑o ’bhii‑ Krisi ‑gaa ‑yrigbɛɛle ’ɛ ta win ’la ma waa ’bhɛ ’klɔsikun. ¹⁹’Duŋ‑ ’bhɛ mɛɛ mu ’ɛ ’lɛyanyrɛ ‑le ’ke ‑jranama ’tɛ ’ɛ ’bhɛɛ‑ ’le. ‑Amasrɔyi ‑o yri bo ‑o bhle pɛle ta ’bhii‑ mɛɛ yri bo ‑Waanbhaa’ ta gɔnɛ‑ ’la gbɛɛn‑, ’bhɛɛ‑ ’kɛla ’bhɛ ‑o ’ke ‑yraladɔ maza ’le, ‑woo baa ’bhɛɛ‑ ’yi. ‑O ’trɛ ta za mu ’te ‑la yiɛnkan. ²⁰’Duŋ‑ ’o mɔɔ a pɛ yaayrɛ ’ɛ ’bhɛ ‑o ‑Waanbhaa’ ba laflɛ’ ’yi. ’Woo‑ ’Bhee Mi Mɛɛzan Zesu Krisi magbɛn ’zi, ’kee‑ da ’bhɛ ꞊nɔɔ ye, ’bhɛɛ‑ ‑e nu ‑gɛ. ²¹’Bhɛ ’yi ’tɛ, ‑e nu ‑kɔɔa’ ‑yrɛndɛ’ ma ’flɛ mu ’ɛ mabɔɔlɛ, ’bhɛɛ ‑yoo klɛ ’flɛ drɛɛ mu ’le ’bhii‑ ‑yaa’ pɛ ’flɛ ’tɔbhɔle ’la yaa ga ‑titi ’bhɛ gbɛɛn‑, ‑yaa’ ‑glɔɔya’ ’la ’kee nu pɛ ’kpɛn ŋgblo ’kpaalɛ‑ ‑a ’gbu ꞊la ’bhɛ ’le ’bhɛɛ‑ ’le.

¹’Bhɛ ya ’ɛ ’yi bhe, ’ŋ nɛɛnɛ‑ mu, ’bhɛɛ‑ ’ŋ ’yiɛnii mu, ’ka ’lrɔ ‑o ’ŋ ma ’egbɛnɛle. ’Ka mu ‑le ’mi a pɛ zrukpaa’ win ’ɛ ’le, ’bhɛɛ‑ ’mi ’ŋ baa ’ka mu ‑la ‑yi. ‑Ka dɔ klɛn, ’ŋ ’yiɛnii mu ’ke ’ka bo ’ka ’pegee Mɛɛzan a ’kpaledomaya ’ɛ ’yi.

Pɔlu a ‑daŋma’ ‑liawli’

²Evodi ’pegee Sɛntisi, ’mi ‑sromabɔ ’ka ni dɔɔ ‑ka ’kpa do ma, ’ka ’pegee Mɛɛzan a ’kpaledomaya ’ɛ ’yi. ³’Bhɛɛ‑ ’ezin‑ ’bhi ’ŋ yewoyɔɔn ’la zru ‑o do ’mi ni, ’mi ‑sromabɔ ’bhi ni dɔɔ bhɔ ’woo‑ le plɛ ’la bhe ‑o ba. ‑Amasrɔyi ‑woo ’sɛnɛ ’gbu ‑gbaanna ’ŋ zi ‑Jan ’Nrale‑ ’ɛ zɛnlele, ’woo‑ mu ’pegee Klema, ’bhɛɛ‑ ’an yewo ’yɔɔn ‑vin mu ’ɛ. ‑O ’tɔ mu ’ɛ yɔɔndɛle ‑o bole ‑yrɛ ma ‑si ’la ‑daŋ’ ’laa ‑o ’bhɛ ma ’bhɛ ’sɛwɛ ’yi.

⁴’Ka zrukpaale klɛ ’taŋii ’ka ’pegee Mɛɛzan a ’kpaledomaya ’ɛ ’yi. ’Mi ‑o bɔ ’zi ’yee‑ ‑jan do ’kpɔ ’ɛ ta dɔɔ: ’Ka zrukpaale klɛ!

⁵‑Kaa ’to ’ke mɔkpɛn’ ’kaa‑ ‑yidɔɔya ’ɛ ye. Mɛɛzan nu bhla ‑o zan bhɔlɛ.

⁶’Ka ’laa ’ka ’ŋgamiwolɛ ‑za ’kedo‑ ’kpɔ ’yi. ’Duŋ‑ ’ke ’ka maza ‑o pɛ ’oo pɛ ’la ma, ‑ka ’bhɛ ’yrɛwo ‑Waanbhaa’ ma ’seri ’yi, ’bhɛɛ‑ ’kaa ’pubɔ‑ ’bhɛ ta ’ezin‑.

⁷’Bhɛɛ‑ ‑Waanbhaa’ a yilabla ’la kan bhaaplɛŋ mu sɔ ‑za mu ’la yimale ’mu ’kpɛn ta, ’bhɛ nu ’ka zrubakpaalɛ, ’bhɛɛ‑ ’bhɛ ’ka ’nii‑ zɛn ’ka ta ’ka ’pegee Zesu Krisi a ’kpaledomaya ’ɛ ’yi.

⁸’Ŋ nɛɛnɛ‑ mu, ’ŋ zi jan ’la ꞊bwa ’bhɛ ‑le gɛ: Wlan maza oo, ‑gasikpale oo, ‑lɛdɔɔle oo, ‑za bakanle oo, ‑za ’la sɔ ‑Waanbhaa ni oo, ‑za ’lrele‑ oo, ’bhɛ ’pegee mɛɛ ’tɔbhɔ maza, ’ka ’yri bo ’bhɛ ‑za ‑glɔɔn mu ’lɛɛ‑ ’mu ‑la ’kpɛn ta. ⁹’Ka ‑za ’la ‑daanna ’ŋ ba, ’bhɛɛ‑ ’ka ‑za ’la ’srɔɔwoa‑ ’ŋ ’kɔɔ, ’bhɛ ’pegee ’ka ‑za ’la ꞊maa ’ŋ ta, ’bhɛɛ‑ ’ka ‑za ’la klɛle ‑ya ’ŋ ’kɔɔ, ‑ka ’bhɛ ’yi za mu klɛ. ’Bhɛɛ‑ ‑Waanbhaa’ ’la yilabla na mɛɛ ni, ’bhɛ nu klɛlɛ ’ka ba.

Pɔlu ‑o Filipu mu ’ɛ ’pubɔ‑ ’zi waa glaan’ mu ’ɛ ma

¹⁰’Ŋ zrukpaale ‑o ’egbɛnɛle ’mi ’pegee Mɛɛzan a ’kpaledomaya ’ɛ ’yi; ‑amasrɔyi, ’kaa zrɔn gbɛ drɛɛwoa‑ ’bhii‑ ’ŋ ‑za ‑o ’ka ’kpee ’ezin‑. ’Ka ’kpeelɛdanle ‑yaa ‑a ta ’bhii‑ ’ka ‑za ’wlan klɛ ’ŋ ni. ’Duŋ‑ ’bhɛ ’seŋ ‑le ’laa ‑yaa ’ka ni. ¹¹Yaa klɛlɛ ’bhii‑ ’ŋ maza ‑o pɛ ’ke ma ’bhɛɛ‑ ’ŋ ’yoo‑ ’bhɛ ‑jan ’ɛ ’wo zii’. Drɔɔn’, ’ke pɛ ’oo pɛ ’la ’bhɛ ‑o ’ŋ ’kɔɔ, ’kee‑ ꞊kla ’ebebele oo, ’kee‑ ꞊kla sanɛ‑ oo, ’mi daanle ‑o ’bhɛ ’le ’ke ’mi ’ŋ zrukpalaa pɛ yɛkɛ‑ ’la ‑yoo ’ŋ ’kɔɔ ’bhɛ ma. ¹²’Ŋ sɔ bole‑ ’bhii‑ ’kɔɔfleŋzan, ’bhɛɛ‑ ’ŋ sɔ bole bhii’ pɛzan ’ke pɛ ‑paa ’ŋ ta. ’Waati ’ɛ ’kpɛn ba, ’bhɛ ’pegee yrɛ ’kpɛn nɔɔ‑, ’ŋ daanle ‑o ’ke ’ŋ zrukpaale ’le ‑za ma: ’Ke ’ŋ kpɛ dɔle ‑kla oo, ’ke gbɔn ‑o ’ŋ dɛ ’zi oo, ’ke ’ŋ ’kɔɔ ’paa‑ oo, ’ke ’ŋ ’kɔɔfleŋ‑ ‑kla oo, ’ŋ daanle ‑o ’ŋ zrukpaalele ‑za ’kpɛn ’yi ’waati ’kpɛn ba. ¹³’Ŋ sɔ ‑za ’kpɛn klɛle‑, Krisi ’la faŋgandɔ ’mi ta ’bhɛ ’srɔyi.

¹⁴’Bhɛɛ‑ ’duŋ‑, ’ŋ ’yrɛbatɛ ’yaa‑ ’waati ’la ba, ’ka ’bhɔlawoa ’ŋ ba, ’bhɛ ‑o ’ke ‑za ’lrele‑ ’le.

¹⁵’Ka mu Filipu mu, ’ka ’gbu ’a ’yaango‑ ’bhii‑ ‑a ’san ’ŋ ‑Jan ’Nrale‑ ’ɛ ’wole‑ zisaan, ’bhɛɛ‑ ’ke ’ŋ go Masedwani ‑wa ’ɛ ta, Zesu ’yi mu ‑lɛ ’bhɛɛke do ’kpɔ ’laa ’bhɔlɛ‑ ’ŋ ba ‑o ’kɔɔpɛ‑ mu ’le, ’bhɛ ’pegee ’ke ‑o ’mi a ye ’ɛ ma ‑trɔn ’ɛ ’ke ’srɔɔwo‑, ’ke yaa ’e go ’ka mu a Zesu ’yi mu ‑lɛdo’ ’ɛ ’bhɛɛ‑ do ‑kplɛn ba. ¹⁶’Ka mu ‑le ’bhɛ ꞊kla. ’Ali‑ ’ŋ ’yaa‑ bhla ’la ba Tesaloniki ’ka ’ŋ glaan’ ꞊kpaa ’ŋ maza ‑yaa pɛ mu ’la ba ’mu ’le, ’bhɛɛ‑ ’ka ’bhɛ ꞊kla ‑glɔɔn plɛ. ¹⁷Yaa klɛlɛ ’bhii‑ ’mi ‑o ’ka ’kɔɔpɛ‑ mu ‑la ‑glin ’zi. ’Mi ‑o pɛ ’la ’bhɛ zi ’bhɛ ‑le dɔɔ ’ke ’ka ’ka klɛza ‑lrele’ mu ’ɛ ma ‑trɔn ’srɔɔwo‑, ’bhɛɛ‑ ‑o pa ’ka ta. ¹⁸’Ka ’ŋ glaan’ ’kpaa‑ pɛ mu ’la ba, ’ŋ ’mu ’kpɛn ’srɔɔwoa‑, ’bhɛɛ‑ drɔɔn’, ‑o ‑paa ’ŋ ta. ’Kee‑ ’san Epafroditi ꞊nwa ’woo‑ pɛ mu ’ɛ ’le ’ŋ ni, ’ŋ ’kɔɔ ’pale‑ ‑o. ‑Woo ’bhii‑ ’sraka ’la ‑gblɛn nra ’bhii‑ ‑lasiklɔɔ gbɛɛn‑. ’Bhɛ ’sraka ‑glɔɔn ’ɛ ’bhɛ ‑le sɔ ‑Waanbhaa ni, ’bhɛɛ‑ ‑ya ‑lɛkun’. ¹⁹’Mi ’kpale‑ ‑o ’mi a ‑Waanbhaa’ ’yi, ’bhii ‑e nu ’ka maza ‑o pɛ ’oo pɛ ’la ma ’mu ’nalɛ‑ ’ka ni, ’bhɛɛ‑ e ’mu pa ’ka ta Zesu Krisi ’srɔyi, ‑yaa’ ’tɔbhɔleya ‑gbɛnɛ ’ɛ ma. ²⁰‑Kɔɔ’ ‑kɔɔ Dɛ ‑Waanbhaa’ ’ɛ ’tɔbhɔ yikpɛnsee ta! Amiina!

Pɔlu ‑a ‑srawoyrɛ

²¹‑Ka ‑Waanbhaa’ a mɛɛ ’weŋ mu ’ɛ ’kpɛn ’pubɔ‑ ’ŋ ni ‑kɔɔ’ ’pegee Zesu Krisi a ’kpaledomaya ’ɛ ma. ‑Kɔɔ’ nɛɛnɛ‑ Zesu ’yi mu ’la ‑woo ’ŋ ‑din ‑gɛ ’mu ’ka ’pubwa‑ ’ezin‑. ²²‑Waanbhaa’ a mɛɛ ’weŋ mu ’la ’kpɛn ‑o ‑gɛ, ’mu ’kpɛn ’ka ’pubwa‑; ’bhɛ ’pegee mɛɛ ’la zan mu ‑o yewo ’zi ‑Bhleŋgbe ‑gbɛnɛ Sezaa ’ɛ ’fɛ ’ɛ ꞊la, ’mu ’ka ’pubwa‑ ’egbɛnɛle ’ezin‑.

²³Bhaa Mɛɛzan Zesu Krisi a ‑lileya ’ɛ bo ’ka ta.