PƆLU ’LƐTRƐ PLƐ MI ’LA ꞊KPAA ZESU ’YI MU ’LA ’YAA‑ TESALONIKI ‑WA ’Ɛ TA ’MU NI
Pɔlu ’lɛtrɛ plɛ mi ’la ꞊kpaa Tesaloniki Zesu ’yi mu ’ɛ ni ’bhɛ ŋgblo
Pɔlu ’lɛtrɛ plɛ mi ’la ꞊kpaa Tesaloniki Zesu ’yi mu ’ɛ ni, ’bhɛ ’yi, ‑e ‑Waanbhaa’ ’pubwa‑ ’elwale ’pe ’mu a ‑za ma, ‑amasrɔyi, ’ali‑ mɛɛ mu ‑yrɛn mu ’la ꞊kpaa ’mu ta, ’mu ’laa ’ploolɛ‑ ’mu ’kpale‑ ma Krisi ’yi, ’bhɛɛ‑ Krisi ‑za sɔ ’mu ni ’egbɛnɛle. Pɔlu zruwlaa‑ ’mu ’kpee, ’ke ‑ya pe ’mu ni dɔɔ ‑za ’la ’bhɛ ’yaa‑ ’mu ‑yrɛbatɛdɔ ’zi ’mu dɔ klɛn ’bhɛ ’yikunlele.
‑A ‑lɛ ꞊lwa mi ’ɛ ’yi (2 Tesaloniki 1), Pɔlu zruwlaa‑ Tesaloniki Zesu ’yi mu ’ɛ ’kpee ‑o ta ‑yrɛn mu ’ɛ ba zayi’. ’Bhɛɛ‑ ‑e Mɛɛzan Zesu ’nuza‑ ’ɛ ’bhɛ dɔ gbɛ drɛɛwoa‑ ‑o ’kpee, ’bhɛ ’pegee ‑o gole ‑za ’yi, ’bhɛɛ‑ mɛɛ ’la zan mu ‑o ‑yrɛnkpa’ zii’ ‑o ta ’mu ’krowoza ’ɛ ‑Waanbhaa’ ’kɔɔ.
Pɔlu bɔ gbɛ drɛɛwoa‑ Mɛɛzan nuza ’ɛ ta ’ezin‑ (2 Tesaloniki 2.1-12). ‑Amasrɔyi, mɛɛ ’ke mu Zesu ’yi mu ’ɛ ‑gblɔzi’ ‑gaa ’ke ‑wa pe ’mu ni dɔɔ Mɛɛzan ꞊nwa gban. Pɔlu ’a ꞊pia ’mu ni kpataakpa ’kaa, ’sani‑ Zesu ’nule‑ ’ɛ pleŋ‑, mɛɛ ‑yɔɔ’ do nu ’pwɛlɛ‑ ‑a ‑yi ’elwale ’pe. ‑Za ’yɔɔ‑ klɛ ‑glɔɔya’ ‑o ‑a ’kɔɔ, ’bhɛɛ‑ ‑e nu ‑wlɛnlɛ’ ‑Waanbhaa’ ma. ’Duŋ‑ Mɛɛzan Zesu nu a klɛlɛ ’bhɛɛ‑ ’yee‑ mɛɛ ‑yɔɔ’ ’ɛ ga.
Pɔlu pe Zesu ’yi mu ’ɛ ni dɔɔ ‑o dɔ ’eglɔɔle ‑waa’ ’kpaleya ’ɛ ’yi, ’bhɛ ’pegee ‑o bo ‑o ’seriwole ma (2 Tesaloniki 2.13–3.5).
’Lɛtrɛ ’lɛɛ‑ ’lɛyanyrɛ ’ɛ ‑din (2 Tesaloniki 3.6-15), Pɔlu Zesu ’yi mu ‑lɛdo’ ’ɛ ba jan ‑bhɛɛke’ ꞊woa. ’Bhɛ ‑jan ’ɛ ’bhɛ ‑le ‑yaa dɔɔ ’woo‑ Tesaloniki Zesu ’yi mu ’ɛ ’ke mu laa ‑o dɔle‑ ‑a ‑la ’ke ‑o yewo. ’Bhɛɛ‑ ’yee‑ Pɔlu ’a ꞊pia ‑o ni dɔɔ ‑o ’bhɛ zan mu ’kpeelɛkan, ‑amasrɔyi, ‑o ’taawogbɛya ’ɛ gole ‑o ‑yoo ‑daanna ‑za mu ’le Krisi ba zayi’ ’mu ma.
’Lɛtrɛ ’lɛyanyrɛ ’ɛ ’yi, Pɔlu ’woo‑ Tesaloniki Zesu ’yi mu ’ɛ ’pubwa‑, ’bhɛɛ‑ ‑yoo ’dumawoa.
1Pɔlu ’pegee ‑yaa’ yewoyɔɔn mu ’ɛ ‑woo Tesaloniki mu ’ɛ ’pubɔ‑ ’zi
1Mi Pɔlu ’pegee Silasi ’bhɛɛ‑ Timote, ’o mɔɔ ‑le ’lɛtrɛ ’lɛɛ‑ ꞊dia. ’Bhɛɛ‑ ‑kɔɔ Dɛ ‑Waanbhaa’ ’pegee Mɛɛzan Zesu Krisi a mɛɛ ‑lɛdo’ ’la ‑woo Tesaloniki ‑wa ’ɛ ta, ’woo‑ ’lɛtrɛ ’lɛɛ‑ ’kpa zii’ ’ka mu ‑la ni. 2Bhaa ‑kɔɔ’ Dɛ ‑Waanbhaa’ ’pegee Mɛɛzan Zesu Krisi ‑li ’ka ma, ’bhɛɛ‑ ‑o waa yilabla ’ɛ ’na ’ka ni.
Bhaaplɛŋ ’kitikanza Krisi ’nu yi ’le
3’Ŋ nɛɛnɛ‑ mu, ’ke ’o ‑Waanbhaa’ ’pubɔ‑ ’taŋii ’kaa‑ ‑za ma, ’bhɛ ‑o ’ke ‑za ’lrele‑ ’le. ‑Amasrɔyi ’ka ’kpaleya ’ɛ ‑Waanbhaa’ ’yi ’bhɛ baan’ ‑o ’kla zii’ ’bhɛ ba, ’bhɛɛ‑ ’kaa‑ ’sɔlekeniya ’ɛ ’bhɛ baan’ ‑o ’kla zii’ ’bhɛ ba ’ezin‑. 4’Bhɛ ya ’ɛ ’yi, ’o mɔɔ ’o baa ’ka mu ’yi ‑Waanbhaa’ a mɛɛ ‑lɛdo’ ’ɛ ’pleŋ‑. ‑Amasrɔyi ‑o ‑yrɛn ’pegee ’trɛbhɔ mu ’la ’kpɛn ’kpa zii’ ’ka ta, ’ka ’mu ’yikun zii’ ’bhɛ ’pegee ’ka ’kpale‑ bole ‑o Krisi ’yi.
5’Ka ta ‑yrɛn mu ’ɛ ’mu ‑o ‑a zrɔn ’zi ’bhii‑ ‑Waanbhaa’ a bhaaplɛŋ mu ’kitikanle ’ɛ ’lɛdɔɔle ‑o wlan ’ɛ ni, ’bhɛɛ‑ ’bhɛ ’a zrɔn ’bhii‑ ’kaa‑ pɛ ‑le ‑Waanbhaa’ a ‑bhleŋgbeya ’ɛ ’le. ‑Amasrɔyi, ’ka ‑o ‑yrɛnbhle’ zii’ ’bhɛɛ‑ ‑bhleŋgbeya ’ɛ ma. 6Wlan ’ɛ ni, ‑Waanbhaa’ a ‑lɛdɔɔleya ’ɛ ma, mɛɛ ’la zan mu ‑o ‑yrɛnkpa’ zii’ ’ka ta; ‑e nu ’bhɛ ‑yrɛn yɛkɛ‑ ’ɛ ‑zigolɛ ’bhɛ zan mu ’ɛ ma ’ezin‑. 7‑O ‑yrɛnkpa’ zii’ ’ka mu ’la ta, ‑e nu ‑yitrɛ’ nalɛ ’ka mu ’pegee ’o mɔɔ ni, ’ke Mɛɛzan Zesu ’pwɛla‑ ‑a ‑yi yi ’la ’le ’kee‑ da laflɛ’ ma ’yee‑ ’pegee ‑yaa’ ‑mlɛkɛ’ ‑glɔɔ mu ’ɛ ’le. 8‑E nu nulɛ ’tɛ nrɛ ‑gbɛnɛ do ‑la ‑yi. Mɛɛ ’la zan mu laa ‑Waanbhaa’ dɔ, ’bhɛɛ‑ ’ke waa ’taawo‑ ‑kɔɔa’ Mɛɛzan Zesu Krisi a ‑Jan ’Nrale‑ ’ɛ ta, ‑e nu ’mu ’krowolɛ. 9’Bhɛ ‑yrɛn ’ɛ nu klɛlɛ ‑yrɛn ‑gbɛnɛ ’le. ‑O nu ’bhɛ mɛɛ mu ’ɛ ’pleŋgolɛ Mɛɛzan ‑Waanbhaa’ ma yikpɛnsee ta ’ke ‑daŋ’ ’laa klɛ ’bhɛ ma, ’bhɛɛ‑ waa nu ’sɔlɛ‑ ‑Waanbhaa’ a gblaanya ’ɛ ’yele ‑titi. 10’Bhɛ yi ’ɛ ’bhɛɛ‑ ’le, Mɛɛzan Zesu nu nulɛ ’tɛ. ’Ke ’bhɛ ꞊kla, ‑e ‑yaa’ mɛɛ ’weŋ mu ’la makwan‑ ‑yaa’ pɛ ’le ’mu nu ’a ’tɔbhɔlɛ; ’bhɛ ’pegee mɛɛ ’la zan mu ’ɛ ’e ’kpaa‑ ‑a ‑yi, ’mu ’kpɛn nu ’a ‑glinlɛ’, ’bhɛɛ‑ ’mu ’yrɛbhɔ ‑a zi. ’Ka mu nu klɛlɛ ’bhɛ mɛɛ mu ’ɛ ba, ‑amasrɔyi ’o ‑jan mu ’la ꞊woa ’ka ni, ’ka ’ka ꞊kpaa ’mu ’yi.
11’Bhɛla‑ ‑yile, ’waati ’ɛ ’kpɛn ba, ’woo ’seriwo ’kaa‑ ‑za ma. ’Wa ’yrɛwo‑ ‑Waanbhaa’ dɔɔ ‑e ’ka ’siila‑ ’taawogbɛya ‑glɔɔn ’la ’kaama‑, ’ka ’taawo‑ ’bhɛɛ‑ ta. ’Bhɛɛ‑ ’wa ’yrɛwo‑ ‑a ma ’ezin‑ dɔɔ yaa ‑glɔɔya’ ’ɛ ma, ’kaa‑ zi ’bhii‑ ’ka ’ka zru maza ’lrele‑ mu ’la klɛ ‑e bhɔ ’ka ba ’mu klɛlele; ’bhɛɛ‑ ’kaa‑ ’kpaleya ’ɛ ’bhɛ ’lɛsɔ‑. 12’Bhɛ ’yi ’tɛ, mɔkpɛn’ nu Mɛɛzan Zesu ’tɔbhɔlɛ ’ka klɛza mu ’ɛ ma; ’bhɛɛ‑ ’ka mu nu ’tɔbhɔleya ‑srɔɔwolɛ ’yee‑ ’kɔɔ ’ezin‑. ’Bhɛ ‑lileya ’ɛ da ‑kɔɔa’ ‑Waanbhaa’ ’pegee Mɛɛzan Zesu Krisi ‑la ba.
2‑Za mu ’la nu klɛlɛ Mɛɛzan Zesu ’nu yi ’ɛ ’lɛɛ
1’Ŋ nɛɛnɛ‑ mu, Mɛɛzan Zesu Krisi nu nulɛ. ’Bhɛɛ‑ ‑kɔɔ’ mu nu ‑kɔɔ’ ’lɛkpalɛ ’eke‑ ta ‑a ‑din. ’Bhɛla‑ ‑yile, ’woo‑ zan ‑za do ‑yrɛwolɛ ’ka ma dɔɔ: 2’Ka ’laa ’tolɛ‑ ’ke mɛɛ ’kedo‑ ’kpɔ ’ka zrubatɛdɔ, ’bhɛɛ‑ ‑e ‑gblaan kla ’ka ’yi, ’ke ‑ya pe ’ka ni dɔɔ Mɛɛzan nu yi ’ɛ ꞊bhwa. ’Ali‑ ’ke mɛɛ ’ke ’a ꞊pia ’ka ni ’kaa ‑Waanbhaa’ ’bhɛ ‑jan ’ɛ ꞊kpaa ‑a ‑lii oo, ’bhɛ ’pegee ’ke ‑ya ꞊pia dɔɔ ’bhɛ ‑jan ’ɛ ‑daa ’o mɔɔ ‑la ba oo, ’bhɛɛ‑ ’ke ‑ya ꞊pia dɔɔ ’o mɔɔ ‑le ’bhɛ ’lɛtrɛ ’ɛ ꞊kpaa ‑a ’kɔɔ oo, ’ka ’laa ’ka ’kpalɛ‑ ’bhɛ ’yi. 3’Ka ’laa ’tolɛ‑ ’ke ‑o ’ka ’yini‑ gbɛ do ’kpɔ ma. ‑Amasrɔyi ’sani‑ Mɛɛzan nu yi ’ɛ ’bhɔle‑ ’pleŋ‑, mɛɛ ‑bebe nu ‑wlɛnlɛ’ ‑Waanbhaa’ ma, ’bhɛɛ‑ ‑woo ‑baŋgo’ ‑yaa’ ‑jan ’ɛ ’klɔsikunle ’ɛ ’yi ’elwale ’pe. ’Bhɛ blaan, ‑o pɛ ’la sii ‹Mɛɛ ‑Yɔɔ’› ’bhɛ nu ’pwɛlɛ‑ ‑a ‑yi. ‑Yoo ’ke ’siɛ pɛ ’le ‑jranama ’tɛ ’yi ‑Waanbhaa’ ’kɔɔ. 4’Yee‑ Mɛɛ ‑yɔɔ ’ɛ nu ‑a ‑baŋgolɛ ‑Waanbhaa’ ’yi, ’bhɛ ’pegee ‑e nu ‑a ‑baŋgolɛ bhaaplɛŋ mu gba pɛ ’tɔle‑ gba pɛ ’bhɛ ’yi. ’Bhɛɛ‑ ‑e nu gelɛ yaalɛ *‑Waanbhaa’ Gba ’Fɛ ‑gbɛnɛ ’ɛ ꞊la, ’bhɛɛ‑ ‑ya pe ‑a ’gbu ma ’kaa ‑yoo ’ke ‑Waanbhaa’ ’le. 5’Ŋ ’yaa‑ ’ka ba ’waati ’la ba, ’ŋ ’yee‑ ‑jan mu ’lɛɛ‑ ꞊woa ’ka ni, waa ‑o ‑li ’ka ’kpee ɛɛ? 6’Duŋ‑ ‑zɔn pɛ ’la ’bhɛ ‑o ’yee‑ Mɛɛ ‑yɔɔ’ ’ɛ ’yikun zii’, ’kooko‑ ‑e nu ‑a nu ’yi ’ɛ dɔle ‑o ’waati ’la ba ’bhɛɛ‑ ba, ’ka ’gbu ’bhɛ dɔ. 7’Yee‑ ‑glɔɔya’ ‑yɔɔ’ ’la ‑yoo mɛɛ mu klɛ ’zi ‑kala’ mɛɛ mu ’le ‑Waanbhaa’ ma, ‑e yewole ꞊saan gban gaanyi’. ’Duŋ‑ pɛ ’la ’bhɛ ’a ’yikwan꞊ ’kee‑ nu ’tɛnlɛ‑ ‑zɔn ma, ’ke ’bhɛ ’laa golɛ ‑a ‑lɛɛ, yaa sɔ ’pwɛle ‑a ‑yi. 8’Ke ’bhɛ ‑gwa ’yee‑ Mɛɛ ‑Yɔɔ’ ’ɛ ‑lɛɛ ’waati ’la ba, ’bhɛɛ‑ ‑e ’pwɛ a ‑yi ’tɛ. ’Bhɛɛ‑ Mɛɛzan Zesu Krisi ‑lii ‑ploo ’ɛ nu ’yee‑ Mɛɛ ‑yɔɔ ’ɛ dɛlɛ. ’Bhɛɛ‑ ‑a nu bhla ’ɛ zi ’tɛbhile ‑yrayra ’ɛ nu ’yee‑ Mɛɛ ‑yɔɔ’ ’ɛ ’kpaciɛlɛ ’feŋfeŋ. 9’Yee‑ Mɛɛ ‑yɔɔ’ ’ɛ nu ’pwɛlɛ‑ ‑a ‑yi ’ke ‑Setran’ a ‑glɔɔya’ ’ɛ ’le ‑a ta. ’Bhɛɛ‑ ‑e nu ’sɔle‑ maza ‑glɔɔn ’ɛ ’kpɛn ’pegee ’kpeelɛni maza ‑tɔɔmasie mu ’ɛ ’kpɛn klɛlɛ, ’kooko‑ ’kee‑ sɔ mɛɛ mu ‑yinile. 10‑E nu ‑za ’yɔɔ‑ ‑glɔɔn ’ɛ ’kpɛn klɛlɛ, ’kooko‑ mɛɛ ’la zan mu ‑o ni ’zi ’ɛ ta, ‑e ’mu ’yini‑. ‑Woo ’ni ’zi ’ɛ ta, ‑amasrɔyi wlan ’la ’bhɛ ’yaa‑ sɔ ‑o gole‑ ‑za ’yi, ’bhɛ ‑za ’laa ’sɔlɛ‑ ‑o ni. 11’Bhɛla‑ ‑yile, ‑Waanbhaa’ ’a ꞊twa ’ke ‑glɔɔya’ ‑do ‑o ‑yini’, ’bhɛɛ‑ ‑woo kpa bhla ’yi. 12’Bhɛ klɛgbɛya ’ɛ ’yi, mɛɛ ’la zan mu laa ’mu ’kpalɛ‑ wlan ’ɛ ’yi, ’bhɛɛ‑ ’ke ‑za ’yɔɔ‑ klɛle ꞊swa ’mu ni, ‑Waanbhaa’ a ‑kpan nu baalɛ ’mu ta.
‑Waanbhaa’ Zesu ’yi mu ’ɛ makwan‑ ’mu gole ’kaama‑ ‑za ’yi
13’Ke ‑yoo ’o mɔɔ a pɛ ’le, ’o nɛɛnɛ‑ mu, ’waa sɔ ’ploole ‑Waanbhaa’ ’pubɔle ’kaa‑ ‑za ma, ’ka mu ’la ’ka ‑za sɔ Mɛɛzan ni ’egbɛnɛle bhe. ‑Amasrɔyi ‑Waanbhaa’ ’ka mu ‑la makwan‑ ’elwale ’pe, ’kooko‑ ’ka sɔ gole‑ ‑za ’yi Lii ’Weŋ ’la ‑ya klɛ ’bhɛɛ‑ ’ka ’taawogbɛya ’ɛ klɛ ’weŋ ’bhɛ ’srɔyi, ’bhɛ ’pegee ’ka ’kpale ’la ‑yoo ‑Waanbhaa’ a Wlan ’ɛ ’yi ’bhɛ ’srɔyi. 14‑Waanbhaa’ ’ka ’siila‑ ’bhɛɛ‑ ’kaama‑, ‑Jan ’Nrale‑ ’la ’o ’bhɛ ꞊woa ’ka ni ’bhɛ ’srɔyi. ‑E ‑yaa zi ’bhii‑ ’ka dɔ klɛ ‑kɔɔa’ Mɛɛzan Zesu Krisi a ’tɔbhɔleya ’ɛ ba. 15’Bhɛ ’yi ’tɛ, ’o nɛɛnɛ‑ mu, ‑ka bo ’eglɔɔle. ’O ‑jan ’oo ‑jan ’la ꞊woa ’ka ni, ’kee‑ ꞊kla ’o ’liijan‑ mu ’le oo, ’kee‑ ꞊kla ’o ’kɛ mu ’la yɔɔndia‑ ’lɛtrɛ ’yi ’mu ’le bhe oo, ’mu bo ’ka ’kpee ’eglɔɔle.
16Bhaa ‑kɔɔa’ Mɛɛzan Zesu Krisi ’pegee ‑kɔɔ’ Dɛ ‑Waanbhaa’ ’la ‑kɔɔ’ ‑za ꞊swa ’bhɛ ni, ’bhɛɛ‑ ’bhɛ ꞊lia ‑kɔɔ’ ma ’bhɛ ’fuudɔ‑ ‑kɔɔ’ ta, ’fuudɔle ’la ‑daŋ’ ’laa ’bhɛ ma, ’bhɛ ’pegee ‑e ‑yrikpaleya ‑lrele’ ’la ꞊naa ‑kɔɔ’ ni ’mu ’le. 17Bhaa ‑kɔɔa’ Mɛɛzan Zesu Krisi ’pegee ‑kɔɔ’ Dɛ ‑Waanbhaa’ ’ka zru ’ɛ pa ’fuudɔle ’le, ’bhɛɛ‑ ’kee‑ faŋgandɔ ’ka ta, ’kooko‑ ’ka sɔ klɛza ‑lrele’ ’tɔle‑ klɛza ’lrele‑ ’bhɛ klɛle‑, ’bhɛ ’pegee ’ke ’ka sɔ ‑jan ’lrele‑ ‑glɔɔn ’ɛ ’kpɛn ’wole.
3Pɔlu ‑o Tesaloniki Zesu ’yi mu ’ɛ ’lia zii’ ’kaa ’mu ’e ’seriwo ‑waa’ ‑za ma
1’Waa ‑jan ’lɛyanyrɛ ‑le dɔɔ ‑ka ’ka ’seriwo ’waa‑ ‑za ma, ’kooko‑ Mɛɛzan ‑a ‑jan ’ɛ zɛn blaale‑ ’yrɛkpɛn‑ ꞊nɔɔ, ’bhɛɛ‑ mɔkpɛn’ ’a ’lɛdɔ‑ ‑a ma ’bhii‑ ‑wa ‑lɛdwa ‑a ma gɔnɛ‑ ’la gbɛɛn‑ ’ka ba ye. 2‑Ka ’ka ’seriwo ’waa‑ ‑za ma ’ezin‑, ’kooko‑ ‑Waanbhaa’ mɛɛ ‑yɔɔ’ ’pegee mɛɛ yiɛnle mu kan ’o ma ’egbɔɔnle. ‑Amasrɔyi mɔkpɛn’ ’laa ’e kpa ‑Waanbhaa’ ’yi.
3’Duŋ‑ Mɛɛzan zru ‑o do. ‑E nu faŋgandɔlɛ ’ka ta, ’bhɛɛ‑ ‑e ’ka tagbin‑ ‑Setran’ ’lɛɛ. 4’O ’kpale‑ ‑o ‑a ‑yi ’ka ba ‑zayi’, dɔɔ ’o ‑za mu ’la ꞊pia ’ka ni, ’ka ‑o ’mu klɛ ’zi, ’bhɛɛ‑ ’ka nu bolɛ ’mu klɛlɛ ma yikpɛnsee.
5Bhaa Mɛɛzan bhɔ ’ka ba, ’kooko‑ ’ka ‑za sɔ ‑Waanbhaa’ ni gɔnɛ‑ ’la gbɛɛn‑, ’ka ’bhɛ dɔ, ’bhɛ ’pegee, ’kooko‑ ’ka ’ka zrubakpalaa ’bhii‑ Krisi ’bhɛ zrubakpalaa gɔnɛ‑ ’la gbɛɛn‑ ‑yrɛn ’yi.
Pɔlu ‑a ‑liawli’ yewole ba zayi’
6’Ŋ nɛɛnɛ‑ mu, ’o ‑za ’lɛɛ‑ ’bhɛ ’kpankpanyanle ’ka ma Mɛɛzan Zesu Krisi ’tɔ ’yi dɔɔ ‑kɔɔ’ nɛɛnɛ‑ ’tɔle‑ ‑kɔɔ’ nɛɛnɛ‑ ’la lrwawo, ’bhɛɛ‑ ‑a bole ‑o ’kaanle‑ ’te ma, ’bhɛ ’pegee ’ke yaa ’taawo ’o ’ka ‑daanna ‑za mu ’la ’le ’mu zi, ‑ka ’ka ’pleŋgo‑ ’bhɛ zan ’ɛ ma. 7’Kaa klɛ gɔnɛ‑ ’la gbɛɛn‑ ’bhɛɛ‑ ’ka ’ka klɛza kpa ’waa pɛ klɛza ’ɛ ma, ’ka ’gbu ’bhɛ dɔ. ‑Amasrɔyi ’o ’yaa‑ bhla ’la ba ’ka ba ye, ’waa lrwawolɛ. 8Waa mɛɛ ’kedo‑ ’kpɔ a pɛbhlelɛ bhaama. Drɔɔn’ ‑bi zi oo, ‑yrekpaa’ oo, ’o yewoa꞊ ’eglɔɔle, ’bhɛɛ‑ ’o ’trɛbhwa꞊; ’kooko‑ ’o sɔ ’o ’gbu mazagole, ’bhɛɛ‑ ’waa klɛ mɛɛ ’kedo‑ ’kpɔ ta ’kwe ’le. 9’Wa klɛlawoa ’bhɛ gbɛɛn‑ bhe, yaa klɛlɛ ’bhii‑ ’bhɛ ’seŋ ’laa ‑yaa ’o ni ’ke ’o pɛbhle ’ka ba. ’Duŋ‑ ’o yewoa‑ ’ke ’woo ’gbu mazago, ’kooko‑ ’ka ’bhɛɛ‑ yɛkɛ‑ za klɛ. 10’O ’yaa‑ ’ka ba ye ’waati ’la ba, ’o ’bhɛ ’toŋ ’ɛ ‑dwa ’ka ni dɔɔ «’Ke mɛɛ ’o mɛɛ ’la zan laa ‑a zi ’bhii‑ ‑e yewo ’bhɛ zan laa pɛlelɛ ‑titi.»
11’Wa ꞊maa dɔɔ ’ka ba mɛɛ ’ke mu ‑o lrwawo ’zi, ’bhɛɛ‑ ‑o bole ‑o ’kaanle‑ ma, ’ke ‑woo gaan bɔ mɛɛ ‑bhɛɛke’ mu a ‑za mu ’yi. 12’Bhɛla‑ ‑yile, ’wa ’pe zii’ ’bhɛ zan mu ni, ’ke ‑o zruwla ’mu ’kpee Mɛɛzan Zesu Krisi ’tɔ ’yi dɔɔ ‑o yewo ’taŋii, ’bhɛɛ‑ ‑woo ’gbu mazago.
13’Ka mu ’gbu ’o nɛɛnɛ‑ mu, ’ka mu gbɛ zi ’laa ’kanlɛ‑ ‑za ’wlan klɛle ma. 14’O ‑jan mu ’la ꞊woa ’ka ni ’lɛtrɛ ’lɛɛ‑ ’yi, ’ke mɛɛ ’la zan ’e ‑baŋgwa ’mu ‑klɔsikunle ma, ‑ka ’bhɛ zan ’kpa ’ka ’yrɛ ’le, ’bhɛɛ‑ ’kaa‑ ‑za ’ke ’laa klɛlɛ ’eke‑ ta ’bhɛ zan ’ɛ ’le, ’kooko‑ ‑yraladɔ ‑a ma. 15’Duŋ‑, ’ka ’laa ’kunlɛ‑ ’bhii‑ ’ka ’sɔɔnnii, ‑kaa ‑lia ’bhii‑ ’ka nɛɛnɛ‑ do gbɛɛn‑.
Pɔlu ’srawoyrɛ ’pegee yaa ’dumawoyrɛ
16’Ŋ nɛɛnɛ‑ mu, bhaa yilabla ‑o Mɛɛzan ’la ’kɔɔ, ’bhɛ ’gbu yilabla ’na ’ka ni ’waati ’ɛ ’kpɛn ba, ’bhɛ ’pegee yrɛ ’ɛ ’kpɛn ꞊nɔɔ! Bhaa Mɛɛzan ‑Waanbhaa’ klɛ ’ka ’kpɛn ba!
17’Mi ’gbu Pɔlu ‑le ’sɛwɛyɔɔn ’lɛɛ‑ dɛ ’zi ‑gɛ: «’Mi Pɔlu ’ka ’pubwa‑». ’Mi ’ŋ ’gbu gbɛblaan kpalaa’ ’an ’lɛtrɛ mu ’ɛ ’kpɛn ꞊la ’bhɛɛ‑ gbɛɛn‑ ‑gee’ bhe. ’Mi ’gbu gbɛblaan ‑le ’bhɛ ’le bhe.
18Bhaa ‑kɔɔa’ Mɛɛzan Zesu Krisi ‑li ’ka ’kpɛn ma!