PIƐRI ’LƐTRƐ PLƐ MI ’LA YƆƆNDIA‑
Piɛri a ’Lɛtrɛ plɛ mi ’ɛ ŋgblo
Piɛri ’lɛtrɛ plɛ mi ’lɛɛ‑ ꞊dia Zesu ’yi mu ’ɛ ’kpɛn ‑la ni. ‑Ya ꞊pia ‑o ni dɔɔ ‑yaa’ pɛ ’trɛ yan bhla ’ɛ ꞊bhwa ‑wa ‑din. ’Bhɛla ‑zayile, ‑yoo ‑daanna ‑za mu ’la ’le, ‑e ’mu dɔ gbɛ drɛɛwo ’zi ‑o ’kpee ’ezin‑. ’Lɛtrɛ ꞊lwa mi ’ɛ ’yi, Piɛri ’a ꞊pia Zesu ’yi mu ’ɛ ni dɔɔ ‑o bo ’eglɔɔle ‑waa’ ’kpaleya ’ɛ ’yi, ’ali‑ ’ke mɛɛ mu ’ɛ ‑yrɛnkpaa ‑o ta. ’Lɛtrɛ plɛ mi ’lɛɛ‑ ’yi, ‑yoo ‑liala dɔɔ ‑o mɛɛ daangbɛya ‑lrele’ ’la ‑o ’bhɛ ꞊maa ’ɛ ‑o bo ’bhɛɛ‑ ta ’taŋii; ’bhɛɛ‑ waa dɔlɛ bhla ma mɛɛ daangbɛya mu ’ɛ zi. (Piɛri Plɛ mi 1.1-15), ’lɛtrɛ ’lɛɛ‑ win ‑le ’kɛla ’le ’bhɛ ‑le ’yee‑ Piɛri Zesu ’yi mu ’ɛ ‑daanna ‑za mu ’la ’le, ‑e ’mu dɔ ’zi ’mu ’kpee ’ezin.
’Elwale ’pe (Piɛri Plɛ mi 1.16-21), ‑e Zesu Krisi ba Jan ‑Nrale’ ’ɛ ’bhɛ ‑dwa ‑o ’kpee. ’Yee‑ Piɛri ’gbu ’pegee Zesu a Winbɔwo mu ‑vin mu ’ɛ ‑woo ’bhɛ ‑Jan ’Nrale‑ ’ɛ ’srɛ ’le. ‑Waanbhaa’ ‑jan ꞊kpaa ‑a ‑lɛla’ janwo mu ’ɛ ’lii Lii ’Weŋ ’ɛ ’le, ’bhɛɛ‑ ’mu ‑yaa’ ’Sɛwɛ ’Weŋ ’ɛ yɔɔndia‑. ’Bhɛ mu ‑o ’ezin‑ ‑a ’srɛ ’le.
Piɛri bhla ma mɛɛ daan mu ’ɛ ‑o ’taawogbɛya ’ɛ tapwɛla mɔkpɛn’ ni kpataakpa (Piɛri Plɛ mi 2). Zudi ‑jan ’kpankpanyaan bhla ma mɛɛ daan mu ’ɛ ma gɔnɛ‑ ’la gbɛɛn‑, Piɛri ’bhɛɛ‑ ’yansi za ꞊kla ’ezin‑ ’woo‑ bhla ma mɛɛ daan mu ’ɛ ma ‑yaa’ ’lɛtrɛ plɛ mi ’ɛ ’yi.
‑A ‑lɛ yaga mi ’ɛ ’yi, mɛɛ ’la zan mu ‑yaa pe ’zi dɔɔ Mɛɛzan Zesu ’laa nu nulɛ, ’bhɛɛ‑ ‑e ’drunyan ’yi mu ’ɛ ’kitikan, Piɛri ‑jan zikpaa‑ ’mu ni. ‑Ya ꞊pia Zesu ’yi mu ’ɛ ni dɔɔ ’ke Zesu ‑o ‑a nule ’ɛ tadɔ ’zi, ‑wa ’yaango‑ ’bhii‑ ‑Waanbhaa’ ‑o ‑a zrubakpaa zii’ bhaaplɛŋ mu zi. ‑Amasrɔyi, yaa ‑o ‑a zi ’bhii‑ mɛɛ ’kedo‑ ’kpɔ klɛ nipɛ ’le. ’Duŋ‑ ‑ya zi ’bhii mɔkpɛn’ ’ploo‑ ‑za ’yɔɔ ma, ’bhɛɛ‑ ‑woo zru niinaa’ (Piɛri Plɛ mi 3.9).
’Lɛtrɛ ’lɛɛ‑ ’lɛyanyrɛ ’ɛ ’yi, Piɛri ‑o ‑a zi ’bhii‑ Zesu ’yi mu ’ɛ ‑o ’taawogbɛya ’ɛ klɛ ’weŋ, ’bhɛɛ‑ ’ke waa ‑la yrɛ ‑srɔɔwo’ ‑o ta ‑za ’kedo‑ ’yi Krisi ’nu yi ’ɛ ’le (Piɛri Plɛ mi 3.11-18).
1Piɛri a ’pubɔwli
1’Mi Simɔ Piɛri ’la ’ŋ ’yoo‑ ’ke Zesu Krisi a yewonɛ ’pegee ‑yaa’ winbɔwo mi ’le bhe, ’mi ‑le ’lɛtrɛ ’lɛɛ‑ dɛ ’zi. ’Mɛɛ ’la zan mu ’yee‑ ’kpaleya ‑za ‑glɔɔ do ’kpɔ ’la ‑yoo ’o mɔɔ ’kɔɔ ’bhɛ ’srɔɔwoa‑ ‑kɔɔa’ ‑Waanbhaa’ ’pegee ‑kɔɔ’ ’Bhee Mi Zesu Krisi ’lɛdɔɔleya ’ɛ ma, ’mi ‑o ’yee‑ ’lɛtrɛ ’lɛɛ‑ ’kpa zii’ ’bhɛ zan mu ’kpɛn ‑la ni. 2Bhaa ‑Waanbhaa’ ‑lileya ’pegee yilabla na ’ka ni ’bhɛɛ‑ ‑yoo pa ’ka ta ’ebebele, ’ke ‑ya klɛ ’bhɛɛ‑ ’ka ’yee‑ ‑Waanbhaa’ ’pegee ‑kɔɔa’ Mɛɛzan Zesu dɔ!
‑Waanbhaa’ ‑kɔɔ’ ’siila‑ ’bhɛɛ‑ ‑e ‑kɔɔ’ makwan‑ ye ’la ’kaama‑
3‑Waanbhaa’ a ‑glɔɔya’ ’ɛ ma, ‑e ‑kɔɔ’ ‑gbaa pɛ ’oo pɛ ’la ’bhɛ sɔ ‑a klɛle‑ ’bhɛɛ‑ ‑kɔɔ’ bo ‑kɔɔ’ ’yrɛ ma, ’bhɛ ’pegee ‑kɔɔ’ blɔɔle bo ’yee‑ ma, ’bhɛ ’kpɛn ba. ‑Ya ꞊kla, ’bhɛɛ‑ mɛɛ ’la zan ‑kɔɔ’ ’siila‑ dɔɔ ‑kɔɔ’ dɔ klɛ ’bhɛ ’gbu a ’tɔbhɔleya ’pegee ’bhɛ a wlanya ‑gbɛnɛ ’ɛ ba ‑kɔɔ’ ’bhɛ zan dɔ. 4’Bhɛ ’tɔbhɔleya ’pegee ’bhɛ wlanya ’ɛ ma, ‑Waanbhaa’ ’a ’liiwli‑ mu ’la ‑za ‑o ’eglɔɔle, ’bhɛɛ‑ ’ke ‑woo ’egblaanle ’mu ꞊naa ‑kɔɔ’ ni. ‑E ‑yaa zi ’bhii‑ ’bhɛ ‑liiwli’ mu ’ɛ ’srɔyi ’ka sɔ gole‑ ’drunyan ’la ’siɛle‑ ‑o ’ke bhaaplɛŋ zrubhɔ ma ‑za ‑yɔɔ’ mu ’ɛ ’le ’mu ’lɛɛ, ’bhɛɛ‑ ’ka zru mu ’ɛ klɛ ’bhii‑ ’yee‑ ‑Waanbhaa’ ’gbu zru ’ɛ gbɛɛn‑. 5-7’Bhɛla‑ ‑zayile, ‑ka dɔ klɛn ’ke ’ka ’kpaleya ’ɛ ’taawogbɛya ‑lrele’ na ’ka ni, ’bhɛɛ‑ ’ka ’taawogbɛya ‑lrele’ ’ɛ ’bhɛ ’a klɛ ’bhɛɛ‑ ’ka ‑Waanbhaa’ dɔ; ’bhɛɛ‑ ’kaa‑ ‑Waanbhaa’ dɔle ’ɛ ’bhɛ ’a klɛ ’bhɛɛ‑ ’ka sɔ ’ka ’gbu ’yikunle ‑za klɛle ma. ’Ka ’gbu ’yikunle ’ɛ ’bhɛ zrubakpaa na ’ka ni, ’bhɛɛ‑ ’ka zrubakpaa ’ɛ ’bhɛ ‑Waanbhaa’ ‑lɛɛgblaan wla ’ka zru ’ɛ ’yi. ’Bhɛɛ‑ ‑Waanbhaa’ ‑lɛɛgblaan ’ɛ ’bhɛ ’a klɛ ’bhɛɛ‑ ’ka ‑za sɔ ’eke‑ ni ’bhii‑ nɛɛnɛ‑ ma do mu; ’bhɛ ’sɔlekeniya ’ɛ ’bhɛ ‑le ’sɔniya ’la ’bhɛ ’laa mɛɛ bago ’bhɛ na ’ka ni. 8’Ke ’bhɛ ‑za mu ’la bhe ’mu ‑o ’ka zru ’yi ’ebebele, ’mu nu ‑a klɛlɛ ’bhɛɛ‑ ’ka ’laa bo bhaama; ’ka nu ‑kɔɔa’ Mɛɛzan Zesu Krisi baandɔlɛ ’taŋii, ’bhɛɛ‑ ’ka nu klɛlɛ mɛɛ ‑yrɛbakanle mu ’le. 9’Duŋ‑ ’bhɛ ‑za mu ’la bhe, ’ke ’mu ’laa ‑o mɛɛ ’la zan zru ‑yi, ’bhɛ zan ‑o ’bhii‑ ‑yrɛ ’wi mi do gbɛɛn‑, ’bhɛɛ‑ yaa sɔ yrɛ ma yele‑. ‑Waanbhaa’ ’a dɔgbɛya gwe ’la ’yaa‑ ‑za ’yɔɔ‑ ’yi ’bhɛ golawoa ‑a ’kɔɔ, ’bhɛ ‑za ’ɛ ꞊nia ‑a ’kpee.
10’Bhɛla‑ ‑zayile, ’ŋ nɛɛnɛ‑ mu, ‑ka dɔ klɛn ’ke ’kaa zrɔn ’bhii‑ ‑Waanbhaa’ ’ka ’siila‑, ’bhɛɛ‑ ‑e ’ka makwan‑ wlan ma yaa pɛ ’le. ’Ke ’ka ’bhɛ ꞊kla, ’bhɛ gbɛɛn‑ bhe, ’ka ’laa nu baalɛ ‑za ’yɔɔ‑ yi ‑titi. 11’Bhɛ klɛgbɛya ’ɛ gbɛɛn‑ bhe, ‑Waanbhaa’ nu ‑kɔɔa’ Mɛɛzan ’pegee ‑kɔɔ’ ’Bhee mi Zesu Krisi ‑a ‑bhleŋgbeya ‑wa ’la ‑daŋ’ ’laa ‑o ’bhɛ ma ‑titi, ’bhɛ ’liigolɛ ’egbɛnɛle ’ka ni, ’bhɛɛ‑ ’ka wla ’bhɛ nɔɔ‑.
12’Bhɛla‑ ‑zayile, yi ’oo yi, ’ŋ bo ’bhɛ ‑za mu ’la bhe ’mu ‑la ‑za dɔle ma ’ka ’kpee, ’ali‑ ’ke ’ka ‑o dɔ, ’bhɛɛ‑ ’ke ’ka blɔɔle ‑o ’ka wlan ’la ’srɔɔwoa‑ ’bhɛ ma ’eglɔɔle. 13’Ŋ ’yoo‑ ‑li ’ŋ ’yrɛ ma ’ŋ ’flɛ ’lɛɛ‑ ’yi ’trɛ ’lɛɛ‑ ta ‑gɛ ’waati ’la ba, ’an ꞊ya ’bhii‑ ‑za wlan ’le ’ke ’ŋ bo ’bhɛ ‑za mu ’ɛ dɔle ma ’ka ’kpee, ’kooko‑ ’ka ’yri ’laa go ’ka ’gbu ‑za ’le, 14‑amasrɔyi, ’bhii‑ ‑kɔɔa’ Mɛɛzan Zesu Krisi ’gbu ’a ‑zrɔnna ’ŋ ni gɔnɛ‑ ’la gbɛɛn‑ bhe, ’an pɛ ’trɛ ta bole ’ɛ ’yan bhla ꞊bhwa ‑wa ‑din. 15’Duŋ‑, ’ŋ nu dɔlɛ ’eglɔɔle ’ke ’ŋ ’ka daan ’bhɛ ‑za mu ’ɛ ’le, ’kooko‑ ’an pɛ ’trɛ ta ’ɛ ’yanle‑ blaan, ’woo‑ ‑za mu ’ɛ dɔ ’ka ’kpee.
Mɛɛ ’la zan mu Krisi a ’tɔbhɔleya ’ɛ ꞊ya
16Wlan ’ɛ ni, ’o ’ka ‑daanna ‑kɔɔa’ Mɛɛzan Zesu Krisi a ‑glɔɔya’ ma nu gbɛ plɛ mi ’ɛ ’la ’le, ’waa ’ɛ bhɛ ’silɛ‑ bhaaplɛŋ a yikanleya ma can mu zi. ’Duŋ‑ ’o ’yee Zesu ’ɛ ꞊ya kpataakpa ’o ’yrɛbhɛ‑ mu ’le ‑yaa’ ’tɔbhɔleya ’ɛ ’kpɛn ’yi. 17‑Amasrɔyi, ‑a Dɛ ‑Waanbhaa’ ’tɔbhɔle ’ɛ ’bhɛ ’a ’lɛdwa‑ ‑a ma, ’bhɛɛ‑ ’bhɛ ’a ’tɔbhwa‑ ’waati ’la ba, ’bhɛ ꞊kla ’o mɔɔ ’gbu ’yrɛ ma, ’bhɛɛ‑ ’bhɛ ’weli‑ ’ɛ ‑daa laflɛ’ ma ’ke ’bhɛ ’a ’pele dɔɔ: «’Ŋ Gbe ’la ‑za sɔ ’ŋ ni ’egbɛnɛle, ’yele‑ ‑gɛ; ’ŋ ’yela‑ makwan‑ ’bhɛɛ‑ ’yele‑ ’ŋ zrukpalaa ’egbɛnɛle.»18’O mɔɔ ’pegee ’yee‑ ’gbu ’yaa‑ ’waati ’la ba vlɛ gɔɔn ’weŋ ’ɛ ’wiiŋ‑, ’o mɔɔ ’gbu ’bhɛ mɛɛ ‑weli’ ’ɛ ꞊maa ’ke ’bhɛ da laflɛ’ ma.
19’Bhɛ ya ’ɛ ’yi, ’wa ’yaango‑ ’bhii‑ ‑Waanbhaa’ ‑lɛlajanwo mu ’ɛ ’wojan‑ ’ɛ ’bhɛ ‑o ’ke wlan ’le. ‑Ka ’ka ’trɔnkpa ’bhɛ ꞊la ’elrele. ‑Amasrɔyi, ’ke Zesu ꞊nwa ’tɛ ‑yaa’ ’tɔbhɔleya ’ɛ nu ‑bhilɛ’ ‑kɔɔ’ zru mu ’ɛ ’yi ’weŋ ’bhii‑ ‑laŋbha do ’la ’bhi zii’ yrɛ do nɔɔ‑ ‑gblo ’yi, ’bhɛɛ‑ ‑e nu ’ka zru mu ’ɛ bakanlɛ ’bhii‑ zrwanzi ‑buŋbhaa yrɛ ma kan gɔnɛ‑ ’la gbɛɛn‑ ’weŋ. 20‑Kaa ’yaango‑ ’elwale ’pe dɔɔ: ‑Waanbhaa’ ‑lɛlajanwo mu ’ɛ ‑jan mu ’la ’kpɛn ꞊woa, ’mu ’laa ’mu do ’kpɔ ’wolɛ‑ ’mu ’gbu ’winta‑. 21Wlan ’ɛ ni, ’woo‑ ‑Waanbhaa’ ‑lɛlajanwole mu ’ɛ ’kedo‑ ’kpɔ ’laa dalɛ ‑lido’ bhaaplɛŋ ’gbu zru maza ba, Lii ’Weŋ ’ɛ ’bhɛ ‑le ’seŋ ꞊naa bhaaplɛŋ mu ni, ’bhɛɛ‑ ‑o ‑Waanbhaa ‑lɛlajanwoa.
2Bhla ma ‑Waanbhaa ‑lɛla’ ‑janwo’ mu
1’Elwaleta, bhla ma ‑Waanbhaa’ ‑lɛla’ janwo mu ‑yaa Izraɛli mɛɛ mu ’ɛ ’pleŋ‑ gɔnɛ‑ ’la gbɛɛn‑, ’bhɛ klɛgbɛya do ’kpɔ ’ɛ ’yi, bhla ma mɛɛ daan mu nu ‑wlɛnlɛ’ ’ka ’pleŋ‑ ’bhɛɛ‑ gbɛɛn‑ ’ezin‑. ‑O nu ‑dawli’ ’kpalɛ‑ ’ka gbɛ ta, ’bhɛɛ‑ ‑o nu wlalɛ ’ka ’pleŋ‑ ’ke bhla ma mɛɛ daangbɛya mu ’le, ’bhɛɛ‑ ‑o ’ka ’siɛ‑. Zesu ’la ’bhɛ ‑o Mɛɛzan ’le ’bhɛɛ‑ ’ke ’bhɛ ‑o tagbawoa, ‑o nu ‑o ‑baŋgolɛ ’bhɛ ’yi. ’Bhɛ ’yi bhe, ‑o ’gbu ’siɛ ‑yrɛn nu baalɛ ‑o ’gbu ta blaale‑, ’bhɛɛ‑ ’bhɛ ‑o siɛ. 2Mɛɛ ‑bebe nu dɔlɛ ‑o zi, ’bhɛɛ‑ ’mu nu ‑waa’ ‑yanbhɔɔya maza mu ’ɛ ’yansi klɛlɛ. ‑O klɛza ‑yɔɔ’ mu ’ɛ ma, mɛɛ mu nu ‑Waanbhaa’ a wlan ma zi ’ɛ ’tɔ ’siɛlɛ‑. 2.2 Elwaleta, ‑o ‑yaa mɛɛ dɔle Zesu ꞊la ’ɛ ’bhɛ sii ‹Wlan ma zi›3‑Gɔli’ ’flɛnya‑ ’ɛ ma, ’woo‑ bhla ma mɛɛ daan mu ’ɛ ‑o nu ’ka ’yinilɛ ’ke bhla ma jan mu ’le, ’bhɛɛ‑ ‑o ’ka tabhle. ’Duŋ‑, ’kiti ’la ’bhɛ ‑o ‑lɛɛ, ‑zɔn ’laa ’bhɛ ’kan yi ’ɛ dɔlɛ, ’bhɛɛ‑ ‑o ’siɛ ‑yrɛn ’ɛ ’bhɛ nu ’klalɛ‑ ‑o ba blaale‑.
4Wlan ’ɛ ni, ‑mlɛkɛ’ mu ’la ‑za ’yɔɔ‑ ꞊kla ’elwaleta ‑sɔ, ‑Waanbhaa’ laa ’tolɛ‑ ’mu ma, ‑yoo ‑yrela ’ke kpɛlɛ‑ mu ’le, ’bhɛɛ‑ ‑yoo ‑blinna ‑gluu ’trole‑ ‑gbɛnɛ ’ɛ ’yi ‑gblo ’ɛ yi. ‑O ’kpale‑ ‑o ’bhɛɛ‑ yrɛ ’ɛ ꞊nɔɔ ye ’ke ‑o ’kitikan yi ’ɛ magbɛn. 5’Bhɛɛ‑ ’elwaleta ‑sɔ, mɛɛ ’la zan mu ‑za ’yɔɔ‑ ‑kla Noe a pɛ ’waati ’ɛ ba, ‑Waanbhaa’ laa ’tolɛ‑ ’mu ma ’ezin‑. ‑E la gblɔ ‑gbɛnɛ ’ɛ ‑baan, ’bhɛɛ‑ ‑yi ’ɛ ‑kpaa ’drunyan ’ɛ ’pegee ‑a ‑yi mɛɛ ‑yɔɔ’ mu ’ɛ ’kpɛn ta. Noe ’la ’bhɛ ’yaa‑ zi ‑lɛdɔɔle ’ɛ ba janwo ’zi mɛɛ mu ’ɛ ni, ‑Waanbhaa’ ’bhɛ do ‑kplɛn ’pegee ’bhɛɛ‑ a ’fa ‑la mu ’srwaplɛ‑ ‑la ‑gwa ‑za ’yi. 6’Bhɛ trala ’ezin‑, ‑Waanbhaa’ a ’kiti ’ɛ ‑balaa’ Sodɔmu ’pegee Gomɔɔ ‑wa mu ’ɛ ta, ’bhɛɛ‑ ‑yoo ’kpaciela ’feŋfeŋ ’ke ’tɛ ’le. ’Bhɛ ‑za ’ɛ ꞊kla ‑za ’la ’yaa‑ nu ’tɛnlɛ‑ mɛɛ ’la zan mu laa gblaan ‑Waanbhaa’ ‑lɛɛ ’mu ma ’bhɛ ma ‑tɔɔmasie ’le. 7’Duŋ‑ ‑Waanbhaa’ mɛɛ ‑lɛdɔɔle Lɔti ‑gwa ‑za ’yi ’yee‑ ‑wa mu ’ɛ ’siɛ ’waati ’ɛ ba. ‑A yaayɔɔn’ mu a ‑yanbhɔɔya ma ’taawogbɛya ‑yɔɔ ’ɛ, ’bhɛ ’pegee ’mu a ‑Waanbhaa’ ‑lɛɛgblaankleya ’ɛ, ’mu ’a ’trɛbhwa꞊ ’eyɔɔle. 8Wlan ’ɛ ni, ’yee‑ mɛɛ ‑lɛdɔɔle Lɔti yaale ’la ‑yaa ‑o ba, ‑e ‑yaa ‑o klɛza ‑yɔɔ mu ’la ye, ’bhɛ ’pegee ‑e ‑yaa ‑o wojan mu ’la ma yi ’oo yi, ’bhɛ ’yaa‑ ‑yrɛnkpa’ zii’ ‑a nii‑ ’ɛ ta. 9’Wa ’yaango‑ ’bhɛ ‑za mu ’la bhe ’mu ma dɔɔ ’ke mɛɛ ’la zan mu gblaan ‑Waanbhaa ‑lɛɛ, Mɛɛzan sɔ ‑o gole‑ ‑o zrubaglin ‑za ‑glɔɔ ’ɛ ’yi, ’bhɛ ’pegee ’yee ‑Waanbhaa mɛɛ ’yɔɔ‑ mu ’ɛ kpa ’edaŋma ‑o ’krowo‑ zayi’ ‑yaa’ ’kitikan yi ’ɛ ’bhɛɛ‑ ’le. 10Mɛɛ ’la zan mu dɔle ‑o ‑o ’gbu ’flɛ zrubhɔ maza ‑yɔɔ’ mu ’ɛ zi, ’bhɛɛ‑ ’ke ‑o ‑Waanbhaa’ a gblaanya ’ɛ mavɛɛ, ‑e nu ’bhɛ zan mu ‑la ’krowolɛ ’eyɔɔle.
’Ŋ bhla ma mɛɛ daan mu ’la ‑waa’ ‑janwoa ’ka ni ’elwale bhe, ‑woo ’gbu magbaandɛ, ’bhɛɛ‑ ‑o ’gbu ’kpee ma ‑o sɔ ‑za ’kpɛnsee klɛle‑. ’Bhɛɛ‑ laflɛ’ ’yi mɛɛ ’tɔbhɔle mu ’la ’kpaale‑ ‑o bhaaplɛŋ mu wiiŋ‑, waa gblaan ’mu ‑zwanwole ma. 11’Ali‑ ‑mlɛkɛ’ mu ’la ’mu faŋgan‑ ’pegee ’mu ‑glɔɔ ’yiya‑ ’woo‑ bhla ma mɛɛ daan mu ’ɛ ni, ’mu laa ’bhɛ laanima mɛɛ ’tɔbhɔle mu ’ɛ ’kitikan, ’bhɛɛ‑ waa ’mu ‑zwanwo’ Mɛɛzan ‑Waanbhaa’ ‑yrɛ ꞊la. 12’Duŋ‑, ’woo‑ bhla ma mɛɛ daan mu ’la bhe, ‑woo ‑zadɔkle mu ’le ’bhii‑ wi mu ’la ‑o ’mu ꞊kla ’mu ’kunza‑ ’pegee ’mu dɛza zayi’. Waa pɛ ’la dɔ, ‑o ’bhɛɛ‑ ‑zwanwo; ’bhɛɛ‑ ‑o klɛza ‑yɔɔ’ ’kwe ’ɛ nu baalɛ ‑o ’gbu ta, ’bhɛɛ‑ ‑o ga. 13‑O ’gbu nu ‑o klɛza ‑yɔɔ’ mu ’ɛ ma ‑sra ’srɔɔwolɛ. ‑O ’gbu zrubhɔ maza ‑yɔɔ’ mu ’ɛ ’mu ‑la klɛle sɔ ‑o ni mɔkpɛn’ ’yrɛ ma ‑yrekpaa’ kpataakpa. ’Ke ’ka ’pegee ’woo‑ mu ‑o pɛbhle ’zi ’eke‑ ta, ‑o ‑yraladɔ mɛɛ ma ‑waa’ ’triŋdɔ‑ maza mu ’ɛ ’le. ’Bhɛ ’yi, ‑o zrukpaale klɛ ‑waa’ mɛɛ ‑yini’ maza mu ’ɛ ’yi. 14‑Yanbhɔɔya klɛle ’te ‑la dɔle ‑o ‑yrɛ ta, ’bhɛɛ‑ ‑o ’trɛ ’laa bhɔ ‑za ’yɔɔ‑ klɛle ma. Faŋgan‑ ’laa ‑o mɛɛ ’la zan mu ta ‑Waanbhaa’ a pɛ zi ’ɛ ta, ‑o ‑dawli’ kpa ’mu gbɛ ta, ’bhɛɛ‑ ‑o ’mu ’yini‑. ‑Gɔli’ ’flɛn ‑o zru ba, ’bhɛɛ‑ ‑Waanbhaa’ a ’daŋgan ‑o ma. 15‑O zi ‑lɛdɔɔle ’ɛ bhɛ ꞊twa ‑a nɔɔ‑, ’bhɛɛ‑ ‑woo ’gbu ’yinia꞊. ‑O Bosɔɔ gbe Balaamu a pɛ ’taawogbɛya ‑yɔɔ’ ’ɛ ’bhɛɛ‑ ꞊sia. Wlan ’ɛ ni, ’yee‑ Balaamu ’laa dɔlɛ ‑a ‑la ’kee‑ ’taawo‑ ‑Waanbhaa’ ‑weli’ ta, ’bhɛɛ‑ ‑e ‑dwa ‑a ꞊la ’ke ‑ya ’gbu bɔ ‑za ’yɔɔ‑ klɛle ’yi ‑gɔli’ ’flɛn ma. 2.15 ‑Nɔɔle’ ’sɛwɛ 22.4’Elwaleta ‑sɔ, ‑o ‑yaa ‑bhleŋgbe do sii Balaki. ’Bhɛ ’yaa‑ zi ’bhii‑ ’bhɛ ‑gɔli’ ’wla ’yee‑ Balaamu gbɛ ꞊la, ’kooko‑ ‑e sɔ Izraɛli ‑nɛ mu ’ɛ ’daŋganwole. ’Yee‑ Balaamu ’laa dɔlɛ ’mu ’daŋganwole ‑la. ’Bhɛɛ‑ ’duŋ‑, ‑ya ꞊wlaa Izraɛli ‑nɛ mu ’ɛ zi ’bhɛɛ‑ ’mu ‑yanbhɔɔya klɛle ’pegee yo mu gbale ‑saan ’si ’bhɛɛke mu ’le.16’Duŋ‑, ‑Waanbhaa’ ‑jan sa ‑kpan ’kpalaa ‑a ‑lii ’bhɛ ’weli‑ ’kafawoza ’ɛ ’yi. Wlan ’ɛ ni, ‑soofali ’la ’bhɛ ’laa sɔ ‑janwole, ’bhɛ ‑janwoa ‑a ni ’bhii‑ bhaaplɛŋ do gbɛɛn‑. ’Bhɛ ’yi, ’bhɛ ’a ꞊kla ’bhɛɛ‑ ’yee‑ ‑Waanbhaa’ ‑lɛlajanwo mi ’ɛ ‑ploola ‑yaa’ klooya maza ’ɛ ma.
17’Woo‑ bhla ma mɛɛ daan mu ’ɛ, ‑woo ’bhii‑ ’tɔ ŋgblo mu ’la ’yi ‑yi ’ɛ ’bheela‑. ’Bhɛɛ‑ ‑woo ’ezin‑ ’bhii‑ la ‑gblo mu ’la ’ke ‑ploo ’ɛ ‑yoo blin la banle ‑lɛɛ ’mu gbɛɛn‑. ‑Waanbhaa’ ’woo‑ mɛɛ mu ’ɛ ’lɛtwa꞊ yrɛ ’la ’bhɛ ‑o ‑gblo ’tilale ‑gbɛnɛ ’ɛ ’yi ’bhɛɛ‑ ba. 18‑Jan ‑gbɛnɛ ‑gbɛnɛ ’pegee ’waso ma jan mu ‑le da ‑o ‑lii. Mɛɛ ’la zan mu ‑gwa ‑za ’yɔɔ‑ klɛ mu ’ɛ ’pleŋ‑ ’edrɛɛ drɛɛle, ’bhɛɛ‑ ’ke ’mu dɔle‑ ‑o Zesu zi, ‑o ’mu ’lɛkan‑ ‑o ’gbu ’flɛ zrubhɔ maza ‑yɔɔ’ mu ’ɛ ’le, ’bhɛ ’pegee ‑waa’ ‑yanbhɔɔya maza mu ’ɛ ’le. 19‑Woo ‑liiwli’ na ’mu ni dɔɔ ’mu nu bolɛ ’mu ’gbu ma, ’bhɛɛ‑ ’duŋ‑, ’woo‑ mu ’gbu ‑o ‑o ’gbu zrubhɔ maza ‑yɔɔ’ mu ’ɛ ’mu ‑laa’ lu mu ’le. ‑Amasrɔyi ’ke mɛɛ ’la zan ’seŋgwa‑ ’e ’le, ’e klɛ ’bhɛ zan a lu ‑la ‑le. 20Wlan ’gbu ’ɛ ni, mɛɛ ’la zan mu ‑o ’niigwa‑ ’drunyan ’lɛɛ‑ ’yi mɛɛ ’triŋdɔ‑ maza pɛ mu ’ɛ ’yi, ‑o ‑kɔɔa’ Mɛɛzan ’pegee ‑kɔɔ’ ’Bhee Mi Zesu Krisi dɔlawoa bhɛ ‑zayi’; ’bhɛɛ‑ ’ke ‑wa ’twa‑ ’ke ’bhɛ pɛ mu ’ɛ blɔɔ gbɛ drɛɛwo ‑o nii‑ ta, ’bhɛ zan mu ’ɛ ‑si ’ɛ klɛ ’eyɔɔle ’kee‑ kan ‑a ‑lwa ’ɛ ta. 21’Ke ’bhɛ zan mu laa ‑lɛdɔɔleya ma zi ’ɛ dɔlɛ bi, ’bhɛ mabhaa ‑yaa nu bhɔlɛ ‑o ’gbu ma ’ke ‑o ’yee‑ zi ’ɛ dɔ ’bhɛɛ‑ ‑woo ‑baŋgo’ ‑woo ‑daanna ‑Waanbhaa’ ’toŋ ’weŋ mu ’la ’le ’mu ’yi. 22’Woo‑ mɛɛ mu ’la bhe ‑o ‑gɔɔn plɛ ’lɛɛ‑ ’mu ’yi jan ’ɛ ’lɛsɔ‑: «‑Gbaan’ ’ɛ ‑ya ‑piila pɛ ’la ’le, ‑e ‑niinaa’ ’bhɛɛ‑ ’bhlele‑ ta.» ’Bhɛɛ‑: «‑O ‑yaan ꞊swa ’la ’fɛlele, ‑e ‑ja ‑a ‑glɔɔ gbɛ drɛɛwolɛ ‑pɛɛ ’ɛ ba ’ezin‑.» ’Woo‑ ‑gɔɔn plɛ ’la bhe ‑o ‑yi ‑le ’ke ’woo‑ mɛɛ mu ’la bhe ‑o klɛza ’ɛ ’bhɛɛ‑ ’le.
3Mɛɛzan Zesu ’nu yi ’ɛ ma ‑tɔɔmasie
1’Ŋ ’yiɛnii mu, ’an ’sɛwɛ dɛ gbɛ plɛ mi ‑le ’ka ni ’kɛlɛɛ‑ ’le. ’Woo‑ ’sɛwɛ plɛ ’ɛ ’kpɛn ’yi, ’ŋ ’ka ‑daanna ‑za mu ’la ’le ’ŋ ꞊bwa ’mu dɔle ma ’ka ’kpee, ’ka ’liaza‑ ‑zayi’, ’kooko‑ ’ka ’kpeejan‑ mu ’ɛ ’lɛdɔɔle klɛ. 2’Ŋ ’yoo‑ ‑a zi ’bhii‑ ‑Waanbhaa’ *‑lɛla’ janwo mu ’weŋ mu ’ɛ ‑o ‑jan mu ’la ꞊woa ’ka ni ’elwaleta ‑sɔ, ’bhɛ ‑jan mu ’ɛ dɔ ’ka ’kpee. ’Bhɛɛ‑ *’Toŋ ’la ‑kɔɔa’ Mɛɛzan ’pegee ‑kɔɔ’ ‑Bhee mi Krisi ’bhɛ ꞊naa ‑yaa winbɔwo mu ’ɛ ni ’ka daanpɛ ’le, ’ŋ ’yoo‑ ‑a zi ’bhii‑ ’ŋ ’bhɛ ’Toŋ ’ɛ ‑zadɔ’ ’ka ’kpee ’ezin‑. 3‑Kaa ’yaango‑ ’elwale ’pe ’bhii‑ ’ke ’drunyan ’yan bhla ’ɛ ꞊bhwa ‑wa ‑din, mɛɛ ’ke mu nu ’pwɛlɛ‑ ‑a ‑yi, ’bhɛɛ‑ ‑o nu mɛɛ ’la zan mu ’kpale‑ ‑o Zesu ’yi ’mu malrɔgolɛ. ‑O nu ’taawolɛ ‑o ’gbu zrubhɔ maza mu ’te mu ‑la zi. 4’Bhɛɛ‑ ‑o nu ‑a pelɛ ’ka ni dɔɔ: «Zesu pe ‑e nu nu gbɛ drɛɛwolɛ, ’bhɛɛ‑ ‑a ’gbu ‑o ’naa‑ ɛɛ? ’Bhɛɛ‑ ’o ‑gbɔɔ mu ’a ’nule‑ ’ɛ magbian‑ ’fruu, ’bhɛɛ‑ ’mu ‑gaa; ‑a ’san ’drunyan klɛle ma, pɛ ’kpɛn ‑o ’bhɛ bogbɛya ’ɛ ’bhɛɛ‑ ’yi, ’bhɛɛ‑ ‑za ’kedo‑ ’kpɔ ma laa bɔɔlɛ ‑li!» 5‑Wa pe ’zi ’bhɛ ’pegbɛya ’ɛ gbɛɛn‑ bhe, ‑amasrɔyi waa ‑o ‑a zi ’bhii‑ ‑o ‑za ’lɛɛ‑ ’bhɛɛ‑ dɔ: ’Elwaleta ‑sɔ, ‑Waanbhaa’ laflɛ’ ’pegee ’trɛ ꞊kla ‑a ‑liijan’ ’le. ‑E ’trɛ ’pleŋgwa‑ ‑yi mu ’ɛ ma; ’bhɛɛ‑ ‑e ’trɛ ’ɛ ’lɛkpaa‑ ’eke‑ ta ‑yi mu ’ɛ pleŋ‑. 6’Bhɛ klɛgbɛya do ’ɛ ’yi, ‑Waanbhaa’ ’elwaleta ’drunyan ’ɛ ’siɛla‑ ’ke la gblɔ ‑gbɛnɛ do ‑la ‑le. 7’Duŋ‑, ‑Waanbhaa’ laflɛ’ ’pegee ’trɛ ’ɛ ꞊kpaa ’edaŋma ‑yaa’ ‑jan do ’kpɔ ’ɛ ’le ‑o ’kpacie zayi’ ’tɛ ’le. ‑O ’kpacie yi ’ɛ nu klɛlɛ mɛɛ ‑yɔɔ’ mu ’ɛ ’kitikanlɛ yi ’ɛ ’pegee ‑o ’siɛ yi ’ɛ ’bhɛɛ‑ ’le.
8’Bhɛ ’kpɛn ’yi bhe, ’ŋ ’yiɛnii mu, ‑za ’lɛɛ‑ ’bhɛ ‑za ’laa golɛ ’ka ’kpee ‑titi: Mɛɛzan ‑Waanbhaa’ ‑yrɛ ’yi, ‑yrekpaa’ do ‑o ’bhii‑ ‑yrekpaa’ ’waa do; ’bhɛɛ‑ ‑yrekpaa’ ’waa do ‑o ’bhii‑ ‑yrekpaa’ do. 9Mɛɛ ’ke mu ‑o ‑a pe ’zi dɔɔ Mɛɛzan ‑o ‑a gbɛtadɔ ’zi ‑a ‑liiwli’ ’ɛ ’lɛsɔle ma. Wlan laa ’bhɛ ’le! ’Yee‑ Mɛɛzan ‑Waanbhaa’ ‑o ‑a zrubakpaa zii’ ’ka zi, ’bhɛɛ‑ ‑ya zi ’bhii‑ ’ka ’kpɛn go ‑za ’yi, ’bhɛɛ‑ ’ka ’kedo‑ ’kpɔ ’laa klɛ ’ke ’siɛ pɛ ’le. Wlan ’ɛ ni, ‑ya zi ’bhii‑ mɔkpɛn’ ’ploo‑ ’mu klɛza ‑yɔɔ’ mu ’ɛ ma, ’bhɛɛ‑ ‑woo zru niinaa’ ’yee‑ ’gbu ba.
10’Bhɛɛ‑ ’duŋ‑, Mɛɛzan Zesu ’nu yi ’ɛ nu ’klalɛ‑ ‑kɔɔ’ ba ’bhii‑ ‑faannii’ kla mɛɛ ba gɔnɛ‑ ’la gbɛɛn‑. ’Bhɛ yi ’ɛ ’le, laflɛ’ nu ’kanlɛ‑ ’ke mɛɛ ‑gblaan pɛ ‑weli’ ‑gbɛnɛ do ’le; ’tɛ nu bɔlɛ laanima pɛ mu ’ɛ ’kpɛn ’yi ’bhɛɛ‑ ‑o yie, ’trɛ ’pegee ‑a ta pɛ mu ’ɛ ’kpɛn nu ’kpacielɛ. 3.10 ’Ke ‑wa ꞊pia Mɛɛzan a yi ’ɛ, ‑woo ‑we ’zi ’ezin‑ ‑Waanbhaa’ a ’kitikan yi gblaan ’ɛ ’bhɛɛ‑ ’le. ’Bhɛ yi ’ɛ ’le, ‑e nu bhaaplɛŋ mu ’kpɛn ’kitikanlɛ.11’Ke pɛ ’kpɛn nu ’siɛlɛ‑ ’bhɛ klɛgbɛya ’ɛ gbɛɛn‑ bhe, ‑ka dɔ klɛn ’ke ’ka ’taawogbɛya klɛ ’weŋ ‑Waanbhaa’ ‑yrɛ ’yi, ’bhɛɛ‑ ’ke ’ka blɔɔle bo ’eglɔɔle ‑a ma. 12‑Kaa nu yi ’ɛ magbɛn, ’bhɛɛ‑ ’ke ’ka sɔ ‑za ’la klɛle‑ ‑ka ’bhɛ klɛ, ’bhɛɛ‑ ’kaa ’nu yi ’ɛ ’lasi‑. ’Bhɛ yi ’ɛ ’le, ’tɛ nu bɔlɛ laflɛ’ ’pegee ‑a ‑yi pɛ mu ’ɛ ’kpɛn ’yi, ’bhɛɛ‑ ‑o nu ‑yielɛ’. 13’Duŋ‑ ‑Waanbhaa’ ’a ’liiwli‑ ‑naa ‑kɔɔ’ ni dɔɔ ‑e nu laflɛ’ drɛɛ ’pegee ’trɛ drɛɛ nalɛ ‑kɔɔ’ ni. ‑Lɛdɔɔleya maza ’te ‑le nu klɛlɛ ’bhɛ yrɛ drɛɛ ’ɛ ꞊nɔɔ. ’O mɔɔ ‑o ’bhɛɛ‑ magbɛn ’zi ’tɛ.
14’Bhɛla‑ ‑zayile, ’ŋ ’yiɛnii mu, ’ka ‑o ’bhɛ yi ’ɛ malagbɛn ’zi bhe, ‑ka dɔ klɛn ’ke ‑Waanbhaa ’ka ye ’ka ’kpee ’fleele‑ ’le, ’ke waa ’joo ’yɔɔ‑ ’kedo‑ ’kpɔ ye ’ka zi; ’bhɛɛ‑ ’ke yilabla klɛ ’ka ’pegee ‑Waanbhaa’ pleŋ‑. 15‑Kaa ’yaango‑ ’bhii‑ ‑kɔɔa’ Mɛɛzan ‑o ‑a zrubakpaa zii’ ‑kɔɔ’ zi, ’kooko‑ ‑kɔɔ’ go ‑za ’yi; ’bhii‑ ‑kɔɔ’ nɛɛnɛ‑ Pɔlu ’la ‑za sɔ ‑kɔɔ’ ni ’bhɛ ’sɛwɛ ꞊kpaa ’ka ni gɔnɛ‑ ’la gbɛɛn‑ bhe ’ezin‑, ‑Waanbhaa’ ‑zadɔleya ’la ‑naa ‑a ni, ’bhɛ ’le. 16‑E ‑janwoa ’bhɛɛ‑ gbɛɛn‑ ‑yaa’ ’lɛtrɛ mu ’ɛ ’kpɛn ’yi ’yee‑ ‑za ’ɛ ba zayi’. ‑Yaa’ ’lɛtrɛ mu ’ɛ ’yi yrɛ ’ke mu ‑yimale la. ’Bhɛla‑ ‑yile, ‑zadɔkle mɛɛ mu ’la ’ke waa dɔlɛ ‑li ’eglɔɔle ‑o ’kpaleya ’ɛ ’yi, ‑o ’bhɛ yrɛ mu ’ɛ ꞊nɔɔ jan mu ’ɛ mabɔɔla. ‑Wa klɛlawo zii’ ’bhɛ gbɛɛn‑, ‑woo ’gbu ’siɛyrɛ‑ ‑la ‑glin ’zi bhe.
17’Duŋ‑ ’ka mu ’ŋ ’yiɛnii mu, ’mi ’ka ’kpeelɛkaan ‑zɔn. ’Ka ’yri bo ’ka ’gbu ‑za ’le, ’bhɛɛ‑ ’ka ’laa ’tolɛ‑ ’ke mɛɛ ‑yɔɔ’ mu ’ɛ ‑waa’ ’yinileya ’ɛ ’tɛn ’ka ma, ’bhɛɛ‑ ’bhɛ ’ka go ’ka dulayrɛ ‑lrele’ ’ɛ ꞊nɔɔ. 18’Duŋ‑, ‑ka dɔ klɛn ’ke ’ka ‑kɔɔa’ Mɛɛzan ’pegee ‑kɔɔ’ ’Bhee Mi Zesu Krisi a ‑lileya ’ɛ baandɔ yi ’oo yi, ’bhɛɛ‑ ‑a dɔleya ’ɛ ’ka ’kɔɔ ’bhɛ baan’ kla ’bhɛ ba. Bhaa ’tɔbhɔleya bo ‑a ni ‑zɔn ’pegee yikpɛnsee ta! Amiina.