PƆLU ’LƐTRƐ PLƐ MI ’LA ꞊KPAA KORƐNTI ‑WA ’Ɛ TA ZESU ’YI MU ’Ɛ NI
Pɔlu ’lɛtrɛ plɛ mi ’la ꞊kpaa Korɛnti ‑wa ’ɛ ta Zesu ’yi mu ’ɛ ni ’bhɛ ŋgblo
Pɔlu ‑yaa’ ’lɛtrɛ ꞊lwa mi ’ɛ ’kpale‑ Korɛnti ‑wa ’ɛ ta Zesu ’yi mu ‑lɛdo’ ’ɛ ni, ’kee‑ Timote ’winbɔle ’kaa ’bhɛ ge ‑o taglin‑, ’kooko‑ ’ke ‑woo ’taawo zii’ gɔnɛ‑ ’la gbɛɛn‑ ’yee‑ Pɔlu ‑o ‑daanna ‑za mu ’la ’le ’mu ta ‑e ’bhɛ dɔ.
Timote dale blaan Korɛnti ‑wa ’ɛ ta, ‑e Zesu ’yi mu ’ɛ ta jan mu ’la ꞊klaa Pɔlu ’kɔɔ, ’mu ’laa ‑yaa lele. ’Bhɛla‑ ‑zayile, ’ke ’yee‑ Pɔlu ’gbu gele‑ ‑o ba ye, ’bhɛɛ‑ ’ke ‑ya ’kpankpanyanle ‑o ma dɔɔ ‑woo ’taawogbɛya ’ɛ mabɔɔ. ‑E bhɔlawoa ‑o ba, ’ke ‑o do ‑yraladɔle ‑a ma ’bhɛ ’taawogbɛya ’ɛ ma, ’bhɛɛ‑ ’bhɛ ’a wlɛyisriwoa (Korɛnti Plɛ mi 2.5-11; 7.12). ’Bhɛ klɛle ’tɛ, ’ke ’yee‑ Pɔlu ’niinale blaale‑ ‑a ‑zanta’ Efɛzi ‑wa ’ɛ ta, ’bhɛɛ‑ ’kee‑ wisile ’ebebele Korɛnti Zesu ’yi mu ‑lɛdo’ ’ɛ ’taawogbɛya ’ɛ ma. ’Bhɛ ’yi bhe ’tɛ, ’kee‑ ’lɛtrɛ ’bhɛɛke do ’kpale ‑o ni ‑gblaan ’kla zayi’ ‑o ‑yi (Korɛnti Plɛ mi 2.4; 7.8). ’Bhɛɛ‑ ’taalɛɛyi, ‑e Titi ‑la winbwa‑ dɔɔ ’bhɛ ge ’bhɛ ’lɛtrɛ ’ɛ ’le ‑o ni. ’Bhɛ ’lɛtrɛ ’ɛ ꞊nia zi ’lii. ’Bhɛ blaan, ’ke Pɔlu gele‑ Masedwani ’klɛɛn ’ɛ ’yi, ’kee‑ Titi ’la ’winbwa‑ Korɛnti ‑wa ’ɛ ta ’bhɛ ’yele ’bhɛ ꞊nɔɔ ye. ’Bhɛɛ‑ ’ke ’yee Titi ’woo‑ Korɛnti Zesu ’yi mu ’ɛ ta jan ‑nrale’ wole‑ Pɔlu ni dɔɔ ‑wa ’wojan‑ mu ’ɛ ꞊maa, ’bhɛ ’pegee ‑woo ’taawogbɛya ’ɛ mabɔɔla. Pɔlu ’bhɛ ’male‑ ’tɛ, ’kee‑ ’lɛtrɛ ’bhɛɛke do ’kpale ’woo‑ Korɛnti Zesu ’yi mu ’ɛ ni, ‑kɔɔ’ ’bhɛɛ‑ sii ‑zɔn dɔɔ: «Korɛnti mu a ’Lɛtrɛ Plɛ mi». ’Bhɛ ’lɛtrɛ ’lɛɛ‑ ’yi, Pɔlu ’a ’yipia꞊ ‑o ni dɔɔ ’yele‑ ’woo‑ Korɛnti Zesu mu ‑lɛdo’ ’ɛ ꞊klaa ’eke‑ ba, ’bhɛɛ‑ ‑yoo ‑liala dɔɔ ‑woo ’eke‑ ‑yima’, ‑o ‑za ’sɔ ’eke‑ ni, ’bhɛɛ‑ ‑o ’kpale‑ klɛ do ma. Pɔlu ’yee‑ ’lɛtrɛ plɛ mi ’lɛɛ‑ ’yiciɛnna ‑lɛ yaga.
‑A ‑lɛ ꞊lwa mi ’ɛ ’yi (Korɛnti Plɛ mi 1-7), ‑e ‑Waanbhaa’ ’pubwa‑ ’bhɛ ’fuu ’la ‑dwa ‑a ta ‑yaa’ ‑yrɛnbhle’ bhla ’ɛ zi ’bhɛ ‑zayi’, ’bhɛ ’pegee ‑za ’la ’yaa‑ ’yee‑ Pɔlu ’gbu ’pegee Korɛnti Zesu ’yi mu ’ɛ ’pleŋ‑ ’bhɛ ’yanle‑ ’ɛ ‑zayi’. ‑E ye yɛkɛ‑ ’la ꞊woa ‑o ba ye, ’bhɛ ’pegee ‑o ‑za sɔ ‑a ni gɔnɛ‑ ’la gbɛɛn‑, ‑e ’bhɛ ‑dwa ‑o ’kpee.
‑A ‑lɛ plɛ mi ’ɛ ’yi (Korɛnti Plɛ mi 8-9), Korɛnti Zesu ’yi mu ’ɛ nu ‑gɔli’ ’la ’kpalɛ‑ ’eke‑ ta, ’bhɛɛ‑ ‑o ’bhɛ kpa Zeruzalɛmu Zesu ’yi mu ’ɛ ni, ‑e bhɛ ‑jan ’ɛ ꞊woa ‑o ni. ’Bhɛla‑ ‑zayile, ‑yoo ‑liala dɔɔ ‑woo gbɛ ta klɛ taataa ‑gɔli’ ’nale‑ ma.
‑A ‑lɛ yaga mi ’ɛ ’yi (Korɛnti Plɛ mi 10-13), bhla ma ‑Waanbhaa’ ’lɛla janwo mu ’la ‑woo ‑la ’zi ’yee‑ Pɔlu ta, ‑yoo ‑a ’gbu ta janwo ’zi ’mu ni.
’Yee‑ ’lɛtrɛ ’lɛɛ‑ ’lɛyanyrɛ ’ɛ ꞊nɔɔ, Pɔlu ’a ’srawoa‑ Korɛnti Zesu ’yi mu ’ɛ ma, ’bhɛɛ‑ ‑yoo zan gelawolɛ ‑o ba ye bhe, ‑e ’bhɛ ‑janwoa ‑o ni ’ezin‑.
1’Lɛtrɛ ’ɛ zisanyrɛ
1’Mi Pɔlu ’la ‑e ꞊swa ‑Waanbhaa’ ni ’ke ‑yoo ’ŋ makun, ’bhɛɛ‑ ‑yoo ’ŋ klɛ Zesu Krisi a winbɔwo mi ’le; ’mi ’pegee ‑kɔɔ’ nɛɛnɛ‑ Timote ‑le ’lɛtrɛ ’lɛɛ‑ ’kpa zii’ ’ka ni. Zesu ’yi mu ‑lɛdo’ ’la ‑woo Korɛnti ‑wa ’ɛ ta, ’bhɛ ’pegee ‑yaa’ mɛɛ ’weŋ mu ’la ’kpɛn ‑o Akayi ’klɛɛn ’ɛ ’yi, ’woo‑ ’yee‑ ’lɛtrɛ ’lɛɛ‑ ’kpa zii’ ’mu ‑la ’kpɛn ni. 2Bhaa ‑kɔɔ’ Dɛ ‑Waanbhaa’ ’pegee Mɛɛzan Zesu Krisi ‑li ’ka ma, ’bhɛɛ‑ ‑o yilabla na ’ka ni.
Pɔlu ‑o ‑Waanbhaa’ ’pubɔ‑ ’zi
3‑Kɔɔ’ ‑Waanbhaa’ ’tɔbhɔ, ’yele‑ ‑kɔɔa’ Mɛɛzan Zesu Krisi a ‑Waanbhaa’ ’le ’bhɛ ’pegee ‑a Dɛ ’le. ’Bhɛɛ‑ ’yele‑ ‑kɔɔ’ Dɛ ’la ‑kɔɔ’ ’yrɛnkla‑ a ma ’bhɛ ’le, ’bhɛ ’pegee‑ Waanbhaa’ ’la faŋgandɔ ‑kɔɔ ta ’yele‑ ’bhɛ ’le. 4’Yee‑ ‑Waanbhaa’ zruwla ‑kɔɔ’ ’kpee ‑kɔɔa’ ‑yrɛn mu ’ɛ ’kpɛn ’yi. ‑E ’bhɛ klɛ ‑kɔɔ’ mu ni, ’kooko‑ ‑kɔɔ’ mu sɔ zruwlale mɛɛ ’la zan mu ‑o ‑yrɛn ‑glɔɔn ’ɛ ’kpɛn ’bhle zii’ ’mu ’kpee ’ezin‑. 5Wlan ’ɛ ni, Krisi ‑yrɛn mu꞊bhla ‑kɔɔ’ mu ni ’ebebele gɔnɛ‑ ’la gbɛɛn‑, ‑Waanbhaa’ ’duŋ‑ nu zruwlalɛ ‑kɔɔ’ mu ’kpee ’egbɛnɛle ’bhɛɛ‑ klɛgbɛya do ’ɛ ’yi Krisi ’srɔyi. 6’Ke ’woo‑ ‑yrɛn mu bhle ’zi, ’bhɛ ‑yrɛn mu ’ɛ ’mu ‑o ’ke zruwlapɛ ’le ’ka mu ’kpee, ’bhɛ ’pegee ’ka mu go pɛ ’le ‑za ’yi. ’Ke ‑Waanbhaa’ zruwlaa‑ ’o mɔɔ ’kpee, ‑e ’bhɛ klɛ ’zi, ’kooko‑ ’o mɔɔ sɔ zruwlale ’ka mu ’kpee, ’bhɛɛ‑ ’ka mu sɔ ’o ta ‑yrɛn mu ’ɛ yɛkɛ‑ ’yikunle ’ka zrubakpaale ’le. 7’Bhɛ ya ’ɛ ’yi, ’o ’kpale‑ ’la ‑yoo ’ka ’yi, ’bhɛ ‑o ’eglɔɔle. ‑Amasrɔyi ’wa ’yaango‑ ’bhii‑ ’ke ’ka ’waa‑ ‑yrɛn mu ’ɛ ’ke ꞊bhla, ‑Waanbhaa’ nu ’bhɛ yɛkɛ‑ zruwlalɛ ’ka ’kpee ’bhɛ klɛgbɛya do ’ɛ ’yi ’ezin‑.
8’Ŋ nɛɛnɛ‑ mu, ‑o ‑yrɛn ‑glɔɔn mu ’la ꞊bhla *Azi ’klɛɛn ’ɛ ’yi, ’woo‑ ‑a zi ’bhii‑ ’ka ’mu dɔ: ‑o ‑yrɛn ‑kpaa ’o ta ’eyɔɔle ’kee‑ kan ‑a ‑daŋ’ ta, ’fɔ ’o ’yri ’laa ‑yaa ‑li ‑a ta ’bhii‑ ’o nu bolɛ ’o ’yrɛ ma. 9’O mɔɔ ’gbu ’kpee ma ’o ga bhla ’ɛ ꞊bhwa. ’Bhɛ ’kla‑ ’bhɛ gbɛɛn‑ bhe, ’kooko‑ ’waa ’o kpa ’ezin‑ ‑li ’o ’gbu ’yi, ’duŋ‑ ’kooko‑ ’woo ’kpa ‑Waanbhaa’ ’la ’bhɛ gbaa mu bwe gale ba ’bhɛ do ‑kplɛn ‑la ‑yi. 10’Yee‑ ‑Waanbhaa’ ‑le ’o ‑gwa ’bhɛ ga ‑glɔɔn ’ɛ ’yi; ’bhɛɛ‑ ’yele‑ nu ’o golɛ ’ezin‑ ’bhɛ ’yansi ‑za ‑glɔɔn mu ’ɛ ’yi. Wlan ’gbu ’ɛ ni, ’o ’yri ‑o ‑a ta ’bhii‑ ‑e nu ’o golɛ ’ezin‑ ’bhɛ ’yansi ‑za ‑glɔɔn mu ’ɛ ’yi. 11’Ka mu ’gbu ‑o ’ka ’seriwo zii’ ’ezin‑ ’waa‑ ‑za ma. ’Bhɛ klɛgbɛya ’ɛ ’yi, mɛɛ ‑bebe ‑o ’seri mu ’la klɛ ’zi ’o ba zayi’, ‑Waanbhaa’ nu ’mu ’lɛkunlɛ, ’kooko‑ ’kee‑ ‑yaa’ ‑lileya ’ɛ ‑zrɔnna ’o ni, mɛɛ ‑bebe mu nu a ’pubɔlɛ ’bhɛ ‑zayi’ ’waa‑ ‑za ma.
PƆLU ’PEGEE KORƐNTI ZESU ’YI MU ’Ɛ ’PLEŊZA‑ MU
Pɔlu ‑o ‑yaa’ ’taa ’bhɛɛke ta geza wo ’zi
12Wlan ’ɛ ni, ’woo baa ‑za ’la ’yi ’bhɛ ‑le ‑gɛ: ’o ’gbu zru ’ɛ ’bhɛ ‑o ‑a pe ’zi ’o ni dɔɔ ’o ’taawoa꞊ ’drunyan ’lɛɛ‑ ’yi, ’bhɛ ’pegee ’o ’taawoa꞊ ’ka mu ’gbu ba ‑yrɛ ta, ’o ’kpee ’fleele‑ ’pegee ’o zru do ’le; ’bhɛ ’kpee ’fleeleya ’ɛ ’pegee ’o zru klɛle do ’ɛ ’mu ’yaa‑ da ’zi ‑Waanbhaa’ ‑la ba. ’Duŋ‑ ’o ’bhɛ ꞊kla ‑Waanbhaa’ ‑lilawoa ’o ma ’bhɛɛ‑ ’srɔyi, ’bhɛ ’laa dalɛ bhaaplɛŋ a pɛ ‑zadɔleya ba. 13Wlan ’gbu ’ɛ ni, ’waa‑ ’lɛtrɛ mu ’ɛ ’yi, ’waa ‑o ‑za ’bhɛɛke do ’kpɔ yɔɔndɛ ’zi ’ka ni, ’ke yaa ’e go ’ka ‑o ’kɛla tape ’zi, ’bhɛ ’pegee ’ka ’kɛla ’yima zii’ ’mu ‑la ba. ’Bhɛɛ‑ ’mi ’kpale‑ ‑o ‑a ‑yi ’bhii‑ ’ka nu ‑a ‑yimalɛ kplankplan ’ke ‑a ‑lɛyan’ ‑a ma. 14’Bhii‑ ’kaa ’ke ’yimaa‑ gɔnɛ‑ ’la gbɛɛn‑ dɔɔ: Mɛɛzan Zesu ’nu yi ’ɛ ’le, ’o nu ’o ‑baalɛ’ ’ka mu ’yi, ’bhɛɛ‑ ’ka mu nu ’ka ‑baalɛ’ ’o mɔɔ ’yi ’ezin‑.
15-16’Ŋ ’kpale ’la ’yaa‑ ‑a ‑yi ’bhii‑ ’ka ’kpeejan‑ ‑yaa ’bhɛ gbɛɛn‑ bhe, ’ŋ ’yaa‑ zi ’bhii‑ ’ŋ ge ‑trɛɛ ’ka ba ye ’elwale ’pe, ’sani‑ ’ŋ ge Masedwani, ’bhɛɛ‑ ’ŋ ’niina‑ bhla ’ɛ zi Masedwani, ’ŋ ’yaa‑ nu ’kanlɛ‑ ’ezin‑ ’ka ba ye, ’kooko‑ ’ka bhɔ ’ŋ ba ’ke ’ŋ sɔ gele‑ ’tɛnlɛ‑ Zude ’klɛɛn ’ɛ ma. ’Bhɛ klɛgbɛya ’ɛ ’yi, ’ŋ ’yaa‑ nu ‑Waanbhaa’ a ’duma ’ɛ ’nalɛ‑ ’ka ni ganyan‑ plɛ. 17’Naa ’sɔlɛ‑ gelawole ’ka ba ye, ‑o sɔ ‑a pele‑ ’bhɛ ma dɔɔ ’naa ’ka ba geza ’ɛ ’kunlɛ‑ ’eglɔɔle ɛɛ? Taa‑ ’ŋ ‑za ’la ’lɛdulaa, ’ŋ ’bhɛ klɛ ’bhii‑ ’drunyan ’yi bhaaplɛŋ gbɛɛn‑ ’ke ’ŋ klɛ ‑liijan’ plɛ wo mi ’le, ’bhɛɛ‑ ’ke ’an pe dɔɔ: «‑Aani’», ’bhɛɛ‑ ’an pe ’ezin‑ «’Ɔn ɔn ɛɛ?» 18‑Waanbhaa’ ‑o ’ke ’ŋ ’srɛ ’le, ’bhɛɛ‑ ’naa ‑o ’ke ‑liijan’ plɛ mi wo mi ’le ’ke ’an pe dɔɔ: «‑Aani’». ’Bhɛɛ‑ ’an pe ’ezin‑ «’Ɔn ɔn». 19‑Amasrɔyi ‑Waanbhaa’ Gbe Zesu Krisi ’la ’mi ’pegee Silivɛn ’bhɛɛ‑ Timote, ’o mɔɔ ’bhɛ ’la ’bhɛ a ‑Jan ’Nrale‑ ’ɛ ꞊woa ’ka ba ye, ’bhɛ ’laa klɛlɛ ’ke ‑liijan’ plɛ mi wo mi ’le ’ke ‑ya pe «‑Aani’» ‑jan do ma, ’bhɛɛ‑ ‑ya pe «’Ɔn ɔn» ’yee‑ ‑jan do ’ɛ ma. Drɔɔn’ ’ke ‑ya ꞊pia ’kɛla ma «‑Aani’», ‑e bo ’bhɛɛ‑ ta. 20‑Amasrɔyi ‑Waanbhaa’ ’bhɛ ’liiwli‑ ‑naa bhaaplɛŋ mu ni ‑za mu ’la klɛza ta, ’yee‑ Zesu Krisi ‑le ’mu ’kpɛn ’lɛswa꞊. ’Bhɛla‑ ‑zayile, ’yela‑ ’tɔ ’ɛ ’srɔyi ’bhɛɛ‑ ’o sɔ ‑a pele‑ «Amiina». ’Bhɛɛ‑ ’o sɔ ‑Waanbhaa’ ’tɔbhɔle. 21’Yee‑ ‑Waanbhaa’ ’gbu ‑le ’o mɔɔ ’pegee ’ka mu dɔ ’eglɔɔle. ’Yela‑ ’gbu ‑le ‑kɔɔ’ mu ‑kpaa ’edaŋma ‑yaa’ pɛ mu ’le. 22’Yee‑ ‑Waanbhaa’ ’gbu ‑le ‑a gbɛ blaan ‑kpalaa’ ‑kɔɔ’ ma, ’bhɛɛ‑ ’bhɛ ‑le ‑kɔɔ’ mu klɛ ‑yaa’ pɛ mu ’le. ’Bhɛɛ‑ ‑ya Lii ’Weŋ ’ɛ ꞊wlaa ‑kɔɔ’ zru mu ’ɛ ’yi. ‑E ‑kɔɔ’ ’lɛtwa꞊ pɛ ‑lrele’ mu ’la ba, ‑e Lii ’Weŋ ’ɛ ꞊kla ’mu ’yrɛ ’lɛɛ pɛ ’le.
23‑Waanbhaa’ ‑o ’ŋ ’srɛ ’le, ’naa dɔlɛ ‑a ‑la ’ke ’ŋ ge ’ezin‑ Korɛnti ‑wa ’ɛ ta, ‑amasrɔyi ’naa ‑yaa zi ’bhii‑ ’ŋ ’ka ta ‑yrɛn ’ɛ baankpa’ ’ezin‑. 24’Waa ‑o ‑a zi ’bhii‑ ’o klɛ ’ka ta ‑kuŋlii mu ’le ’kpaleya a pɛ zi ’ɛ ta. ‑Amasrɔyi ’ka kli gbaanle ‑o ’eglɔɔle ’kaa‑ ’kpaleya ’ɛ ’yi. ’Duŋ‑ ’woo‑ ‑a zi ’bhii‑ ’o ’pegee ’ka mu yewo ’eke‑ zi, ’kooko‑ ’ka zrukpalaa.
21’Bhɛ klɛgbɛya ’ɛ ’yi, ’mi ’gbu ’a ꞊kpaa ’ŋ ’kpee dɔɔ ’naa ‑o niinale ’ka ba ye, ’bhɛɛ‑ ’ŋ ’ka wlɛyisriwoza klɛ ’ezin‑. 2‑Amasrɔyi ’ke ’mi ’ka wlɛyisriwoa, ‑dele nu klɛlɛ ’mi zrukpaa mi ’le ɛɛ? ’Ka mu ’la ’ka ‑o ’mi zrukpaa’ pɛ ’le, ’ke ’mi ’ka mu wlɛyisriwoa, ’ka mu nu ’sɔlɛ‑ ’mi zrukpaale ’nale‑ ‑a ma ɛɛ? 3’Bhɛla‑ ‑zayile, ’mi ’lɛtrɛ ꞊kpaa ’ka ni ’bhɛ klɛgbɛya ’ɛ ’yi, ’kooko‑ ’ke ’ŋ ꞊bhwa ’ka ba ye, mɛɛ ’la zan mu ‑o ’ke ’mi zrukpaa pɛ le, ’mu ’laa ’mi wlɛyisriwo. ’Mi ’gbu ’kpale‑ ‑o ‑a ‑yi ’bhii‑ ’mi a pɛ zrukpaa’ ’ɛ ’bhɛ ‑o ’ezin‑ ’ka mu ’kpɛn a pɛ zrukpaa’ ‑la ‑le. 4Wlan ’gbu ’ɛ ni, ’ŋ ’lɛtrɛ ’la ꞊kpaa ’ka ni, ‑a klɛ bhla ’ɛ zi, ’ŋ ’yaa‑ ‑yrɛn ‑gbɛnɛ ’yi, ’bhɛɛ‑ ’ŋ blina‑ yiɛn ‑yaa, ’bhɛ ’pegee wisi’ ‑gbɔɔ ‑gbɛnɛ ‑yaa ’ŋ ’yrɛ ta. ’Naa ’lɛtrɛ ’ɛ ’kpalɛ‑ ’ka ni ’ka wlɛyisriwo zayi’, ’duŋ‑, ’ŋ ’yaa‑ zi ’bhii‑ ’kaa ’yaango‑ ’bhii‑ ’ka ‑za sɔ ’ŋ ni ’kee‑ kan ‑a ‑daŋ’ ta.
Pɔlu pe dɔɔ ‑o ‑za ’yɔɔ‑ klɛ mi ’ɛ mazato
5’Ke mɛɛ do ꞊kla mɛɛ mu wlɛyisriwo pɛ ’le, ’bhɛ zan laa ’mi do ‑kplɛn wlɛyisriwolɛ, ’duŋ‑ ’bhɛ zan ’ɛ ’ka ’kpɛn ‑la wlɛyisriwoa bhe. ’Duŋ‑ ’ke ’naa ’kanlɛ‑ ‑a ‑daŋ’ ta, ’ŋ sɔ ‑a pele‑ dɔɔ ‑e ’ka ’lɛdo‑ ’ɛ ta wlɛyisriwoa. 6’Ka ‑bebe ’a ꞊kpaa do ma dɔɔ ’ka nu ’bhɛ zan ’ɛ ’krowolɛ ’krowogbɛya ’la ’yi, ’bhɛ nu ’bhɛ zan ’ɛ ’yibhɔlɛ ’bhɛ ’le. 7’Bhɛɛ‑ drɔɔn’, ‑ka ’bhɛ zan ’ɛ mazato, ’bhɛɛ‑ ‑ka faŋgandɔ ‑a ta; ’kooko‑ ‑a wlɛyisriwole ’ɛ ’bhɛ ’laa kan ‑a ‑daŋ’ ta, ’bhɛɛ‑ ’bhɛ ge klɛlɛ ‑a faŋgan‑ ’kanpɛ‑ le. 8’Bhɛla‑ ‑zayile, ’mi ‑o zruwla ’zi ’ka ’kpee dɔɔ ‑kaa zrɔn ’bhɛ zan ’ɛ ni ’bhii‑ ‑a ‑za sɔ ’ka ni. 9‑Amasrɔyi ’mi ’lɛtrɛ ꞊kpaa ’ka ni win ’la ma, ’bhɛ ‑le ‑gɛ dɔɔ ’mi ’ka ’yidaan‑ ’ke ’ŋ sɔ ‑a ’yaangole wlan ’gbu ’ɛ ma ’bhii‑ ’ka ‑o ’ŋ ’wojan‑ mu ’ɛ ’klɔsikun zii’ ‑za mu ’ɛ ’kpɛn ’yi. 10’Ke ’ka mɛɛ ’oo mɛɛ ’la zan mazatwa, ’mi nu ’bhɛ zan ’ɛ mazatolɛ ’ezin‑. ’Bhɛɛ‑ ’ke ’mi mɛɛ do mazatwa ‑za do ’yi, ’mi ’bhɛ ꞊kla ’ka mu ‑la ‑zayi’, ’bhɛɛ‑ Krisi ‑o ‑kɔɔ’ ’srɛ ’le. 11’Bhɛ ’kpɛn win le dɔɔ ’ke ‑Setran’ ’laa ‑dawli’ ’kpaayrɛ‑ ‑srɔɔwo’ ‑kɔɔ’ gbɛ ta. ‑Amasrɔyi ‑za mu ’la klɛ ‑lrɔ ‑o ‑a ma ’o ’mu ’gbu dɔ.
Pɔlu ‑ja Titi ’lɛpalɛ Troasi
12’Mi ’bhɔlawoa Troasi ‑wa ’ɛ ta Krisi a ‑Jan ’Nrale‑ ’ɛ ’wo zayi’, ’an ꞊ya ’bhii‑ Mɛɛzan ‑za mu ’ɛ ’kpɛn ’lɛswa꞊ gban ’ŋ ’lɛɛ ’ke ’ŋ sɔ yewole ‑a ni ’bhɛ ꞊nɔɔ. 13’Duŋ‑ ’ŋ blina‑ yiɛn ‑yaa ’egbɛnɛle, ‑amasrɔyi ’ŋ ’yrɛ ’laa ‑yaa ’ŋ nɛɛnɛ‑ Titi ma. ’Bhɛla‑ ‑zayile, ’ŋ zi ‑yrɛwole Troasi ꞊nɔɔ mu ’ɛ ma, ’ke ’ŋ gele‑ Masedwani ‑wa ’ɛ ta. 2.13 ’Kee‑ san yrɛ ’lɛɛ‑ ma, Pɔlu ’laa nu ‑welɛ’ ‑li Titi ’le ’ke ’bhɛ ge ’tɛnlɛ‑ ’lɛtrɛ ’lɛɛ‑ ’lɛ ’srwaplɛ‑ mi ’ɛ ma. ’Yee‑ ’lɛtrɛ ’lɛ plɛ mi ’ɛ ’pegee ‑a ‑lɛ ’srwaplɛ‑ mi ’ɛ ’pleŋ‑, ‑e nu ‑welɛ’ Mɛɛzan ye ’la gbɛkpaa‑ ‑a ‑kɔɔ ’bhɛɛ‑ ’le.
Pɔlu ‑o ‑Waanbhaa’ ’pubɔ‑ ’zi ‑Waanbhaa’ bhɔlawoa ‑a ba ’bhɛ ‑zayi’
14‑Waanbhaa’ ’ŋcie! ‑Kɔɔ’ mu ’pegee Krisi a ’kpaledomaya ’ɛ ’yi, gwle ŋgblo ’la bole ‑o ‑a ni, ’bhɛ ‑o ’ezin‑ ‑kɔɔ mu a pɛ ’le ’taŋii. ‑Yoo ’o winbɔ ’kaa ’o ge Krisi dɔza ’ɛ mɛɛ mu ’kɔɔ ‑Jan ’Nrale‑ ’ɛ ’wo yrɛkpɛn‑ ꞊nɔɔ, ’bhɛ ‑Jan ’Nrale‑ ’ɛ zɛn ’bhii‑ ‑lasiklɔɔ ‑gblɛn ’nrale‑ ’ɛ zɛn yrɛkpɛn‑ ꞊nɔɔ gɔnɛ‑ ’la gbɛɛn‑. 15‑Amasrɔyi ’o ꞊kla Krisi a pɛ ’le, ’bhɛɛ‑ ’woo‑ ’bhii‑ Krisi a ‑lasiklɔɔ ‑gblɛn ’nrale‑ do gbɛɛn‑ ‑Waanbhaa’ ni. Mɛɛ ’la zan mu ‑o ‑bhee zi ’ɛ ta, ’bhɛ ’pegee mɛɛ ’la zan mu ‑o ni zi ’ɛ ta, ’yee‑ ‑lasiklɔɔ ‑gblɛn ’ɛ tɛn ’mu ’kpɛn ma. 16Mɛɛ ’la zan mu ‑o ni zi ’ɛ ta, ’yee‑ ‑lasiklɔɔ ‑gblɛn ’ɛ ‑yoo ’eyɔɔle ’mu yin zi, ’bhɛɛ‑ ‑e sɔ ‑o dɛle‑. ’Duŋ‑ mɛɛ ’la zan mu ‑o ‑bhee zi ’ɛ ta, ‑a ‑gblɛn ’ɛ nra ’mu yin zi, ’bhɛɛ‑ ‑e sɔ gele ’mu ‑le ‑si ’la ’ke ‑daŋ’ ’laa ‑o ’bhɛ ma, ’bhɛ a zi ’ɛ ta. ’Bhɛɛ‑ bhaaplɛŋ ’ɛ ‑de ’gbu ‑la faŋgan‑ sɔ ’bhɛ ye ‑glɔɔn ’ɛ ’wole‑ ta ɛɛ? 17’Duŋ‑ ’o mɔɔ ’gbu ‑le sɔ ’bhɛ ye ’ɛ ’wole, ‑amasrɔyi ’yee‑ ‑Waanbhaa’ ‑le ’o ’winbwa‑. ’Bhɛɛ‑ ’waa ‑o yaa ‑Jan ’Nrale‑ ’ɛ ’wo zii’ ‑gɔli’ ‑glin zayi’, ’bhii‑ mɛɛ ’ke mu ‑o ‑a klɛ ’zi gɔnɛ‑ ’la gbɛɛn‑. Drɔɔn’ ’yee‑ ‑Waanbhaa ’o mɔɔ winbwa‑ ’yee‑ ‑Jan ’Nrale‑ ’ɛ ’woyrɛ‑ nɔɔ‑ *Krisi ’tɔ ’yi. ’Bhɛla‑ ‑zayile, ’woo‑ ‑a wo ’zi ’o ’pegee Krisi a ’kpaledomaya ’ɛ ’yi, ’bhɛ ’pegee ’o ’kpee ’fleele‑ ’le ’yee‑ ‑Waanbhaa’ ‑yrɛ ꞊la.
3‑Bhoolaya drɛɛ ’ɛ ta yewonɛ mu
1’Ŋ ‑janwoa ’bhɛ gbɛɛn‑ bhe, ’bhɛ ’yi ‑le dɔɔ ’o mɔɔ ’gbu maza ‑o ’ke ’o ge ’o ’gbu zrɔn ’lɛtrɛ ’le ’o ’kɔɔ ’ka ba ye ’ezin‑ ɛɛ? ’Bhɛɛ‑ ’kaa‑ zi ’bhii‑ ’o ge ’ka ba ye ’o ’gbu zrɔn ’lɛtrɛ ’le ’ka ni ’bhii‑ mɛɛ ’ke mu ’a ꞊kla gɔnɛ‑ ’la gbɛɛn‑ bhe ɛɛ, taa‑ ’kaa‑ zi ’bhii‑ ’woo ’gbu dɔ ’lɛtrɛ ’yrɛwo ’ka ma ’ke ’o ’bhɛ zrɔn mɛɛ ‑bhɛɛke’ mu ni ’bhii‑ ’woo‑ ’ke Krisi a winbɔwo mu ‑zeze ’gbu ’le ɛɛ? 2’Lɛtrɛ ’la ’bhɛ ’a zrɔn ’bhii‑ ’o mɔɔ ‑o Krisi a winbɔwo mu ‑zeze mu ’gbu ’le ’bhɛ ‑le ’ka mu ’gbu ’le. ‑A yɔɔndɛle ‑o ’o zru mu ’ɛ ’yi, mɔkpɛn’ sɔ ‑a dɔle‑, ’bhɛɛ‑ mɔkpɛn’ sɔ ‑a tapele. 3Wlan ’gbu ’ɛ ni, ’ka mu ’gbu ‑le kpataakpa ’o mɔɔ zrɔn ’lɛtrɛ ’la Krisi ’bhɛ yɔɔndia‑ ’bhɛ ‑le ’waa ye ’ɛ ’srɔyi. Waa yɔɔndɛlɛ ’ke ’sɛwɛ yɔɔndɛpɛ ‑yi ’le, ’duŋ‑ ‑wa yɔɔndia‑ ’ke ‑Waanbhaa’ ’la ‑ya ‑yrɛ ma ’bhɛ Lii ’Weŋ ’ɛ ’bhɛɛ‑ ’le. Waa yɔɔndɛlɛ vlɛpee’ mu ta, ’duŋ‑ ‑wa yɔɔndia‑ bhaaplɛŋ mu ‑la zru mu ’ɛ ’yi.
4’O ’kpale‑ ‑o ’bhɛɛ‑ ‑jan ’ɛ ’yi Krisi ’srɔyi ‑Waanbhaa’ ‑yrɛ ꞊la. 5’Waa sɔ a pele‑ dɔɔ ’bhɛ ’seŋ ‑o ’o ’gbu ni ’ke ’o ’bhɛ ye ’lɛɛ‑ wo, ’duŋ‑ ’waa‑ pɛ ’seŋ ’ɛ ’bhɛ da ‑Waanbhaa’ ‑la ba. 6’Yele‑ ’a ꞊kla ’bhɛɛ‑ ’o mɔɔ ‑swa klɛle‑ ‑yaa’ yewonɛ mu ’le ‑bhoolaya drɛɛ ’ɛ ta. ’Bhɛ ‑bhoolaya drɛɛ ’ɛ kli gbaanle laa ‑o *’Toŋ ’la ‑o ’bhɛ yɔɔndia‑ ’bhɛ ta, ’duŋ‑ ’bhɛ kli ’ɛ gbaanle ‑o Lii ’Weŋ ’ɛ ’bhɛɛ‑ ta. ’Toŋ ’la ‑o ’bhɛ yɔɔndia‑ ’bhɛ ge mɛɛ ’le ga a pɛ zi ’ɛ ta, ’duŋ‑ Lii ’Weŋ ’ɛ ’bhɛ ‑si ’la ’ke ‑daŋ’ ’laa ‑o ’bhɛ ma ’bhɛɛ‑ na mɛɛ ni.
7’Toŋ ’la ’bhɛ ’sɛwɛbhɛ mu ’ɛ ’yɔɔndɛle ‑yaa vlɛpee’ mu ta, ’bhɛɛ‑ ’ke ’bhɛ ’woye‑ ‑le ‑yaa ’ke mɛɛ gelele ga a pɛ zi ’ɛ ta, ’bhɛ ’na bhla ’ɛ zi ‑Waanbhaa’ ’kɔɔ Moizi ni ’yee‑ ‑Waanbhaa’ a ’tɔbhɔleya ‑bhile’ ‑yrayra ’ɛ ’pwɛla‑ ‑a ‑yi. ’Bhɛɛ‑ ’bhɛ Moizi wlɛyi’ ’ɛ mabɔɔla ‑asiikɔɔ Izraɛli ‑nɛ mu ’ɛ waa ‑yaa ’sɔle ‑a wlɛyi’ ’ɛ ‑glinle’. ’Duŋ‑ ’bhɛ ’tɔbhɔleya ‑bhile’ ‑yrayra ’ɛ ’bhɛ ’laa ‑yaa ’ke ‑mɔpɛ’ ’le. 8’Ke ’Toŋ ’la ’bhɛ ’woye‑ ‑le ‑yaa ’ke mɛɛ gelele ga a pɛ zi ’ɛ ta, ’bhɛ ’tɔbhɔleya ‑bhile’ ‑yrayra ’ɛ ’yaa‑ ’bhɛ gbɛɛn‑ bhe, ’bhɛ ’yi ’tɛ, Lii ’Weŋ ’ɛ ’bhɛ ’woye‑ ’ɛ ’tɔbhɔleya ‑bhile’ ‑yrayra ’ɛ gblaan ‑yi ’laa nu yalɛ‑ ‑yaa’ pɛ ’ɛ ni ɛɛ?3.7-8 Pɔlu ‑o ‑bhoolaya gwe ’ɛ ’pegee ‑bhoolaya drɛɛ ’ɛ dan ’zi ’eke‑ ma. ‑Bhoolaya gwe ’ɛ ’bhɛ kli gbaanle ‑yaa ’toŋ mu ta, ’duŋ‑ ‑bhoolaya drɛɛ ’ɛ ’bhɛ kli gbaanle ‑o Lii ’Weŋ ’ɛ ’bhɛɛ‑ ta.9’Toŋ ’la ’bhɛ ’woye‑ ‑le ’ke ‑Waanbhaa’ a ‑kpan baalele bhaaplɛŋ ta, ’ke ’bhɛ a ’tɔbhɔleya ‑bhile’ ‑yrayra ’ɛ ’yaa‑ ’bhɛ gbɛɛn‑, Lii ’Weŋ ’la ’bhɛ bhaaplɛŋ ‑lɛdɔɔ’ ‑Waanbhaa’ ‑yrɛ ’yi, ’bhɛ a pɛ ’woye‑ ’tɔbhɔleya ‑bhile’ ‑yrayra ’ɛ gblaan ‑yi ’laa nu yalɛ‑ ‑yaa’ pɛ ’ɛ ni ɛɛ? 10Wlan ’ɛ ni, ’tɔbhɔleya ’la ꞊bhia ’elwaleta ‑sɔ ’bhɛ gbɛɛn‑ bhe, ’bhɛ ’laa ‑o ’ke ‑za ’kedo‑ ’kpɔ ’le ’ke ‑wa ‑kpaa ‑zɔn ’tɔbhɔleya ’la ‑gbɛnɛ ’yiya‑ ‑a ni ’yi ’bhɛ ma. 11‑Amasrɔyi, ’ke ’kɛla ’yaa‑ ’ke ’kanpɛ‑ ’le ’bhɛ ’tɔbhɔleya ’ɛ ’yaa‑ bhi, ’kɛla ’bhɛ ’laa ‑o ’ke ’kanpɛ‑ ’le ’sekeseke, ’bhɛ a pɛ ’tɔbhɔleya ’ɛ yaa nu ’kanlɛ‑ ’kɛla ’bhɛ ‑o ’ke ’kanpɛ‑ ’le ’bhɛ a pɛ ’ɛ ta ɛɛ?
12’O ’yrikpale ‑o ’bhɛ ta ’bhɛ gbɛɛn‑ bhe, ’bhɛla‑ ‑yile, ’waa gblaan mɛɛ ’kedo‑ ’kpɔ ’lɛɛ ‑Jan ’Nrale‑ ’ɛ ’woyrɛ‑ nɔɔ‑. 13’O mɔɔ laa ‑a klɛ ’bhii‑ Moizi gbɛɛn‑. ‑E sɔ ꞊klaa ‑a wlɛyi’, ’kooko‑ ‑Waanbhaa’ a ’tɔbhɔleya ’la ’yaa‑ ‑bhi ’zi ‑a wlɛyi’, Izraɛli mu ’ɛ waa ’bhɛ ’tɔbhɔleya ’la ’yaa‑ ’ke ’kanpɛ‑ ’le ’bhɛ ’liiyrɛ‑ ’ɛ ye. 14’Duŋ‑ Izraɛli mu ’ɛ ‑woo ’trɔn ’yi ‑dwa ’eglɔɔle ‑Waanbhaa’ ma. ‑Amasrɔyi ’ali‑ ‑zɔn ‑li, ’ke ‑woo ‑bhoolaya gwe ’ɛ ta ’sɛwɛ ’ɛ tape ’zi, ‑yoo ’bhii‑ sɔ do ’la ’klale‑ ‑yaa Moizi ŋgblo ma ’bhɛ ’yansi ‑glɔɔn ‑la ’kpale‑ ‑o yikan’ ’ɛ ’yrɛ ta. ’Bhɛɛ‑ waa ’yee‑ ’sɛwɛ ’ɛ ’yima‑. ’Bhɛ sɔ ’ɛ ’bhɛ ’laa sɔ gole‑ ’fɔke mɛɛ ꞊wlaa Krisi ’pegee bhaaplɛŋ mu a ’kpaledomaya ’ɛ ’yi; ’yee‑ Krisi do ‑kplɛn ‑le sɔ ’bhɛ sɔ ’ɛ gole‑ mɛɛ yikan’ ’ɛ ’yrɛ ta. 15’Ali‑ ‑zɔn ‑li, ’ke ‑woo Moizi ’sɛwɛ mu ’la ꞊dia ’mu tape ’zi, ‑yoo ’bhii‑ sɔ ’klale ‑o yikan’ ’ɛ ’yrɛ ta; ’bhɛɛ waa sɔ ‑o ‑yimale. 16’Duŋ‑ ‑a pele ‑o ‑Waanbhaa’ a ’Sɛwɛ ’ɛ ’yi dɔɔ: «’Ke mɛɛ ’la zan ’bhɛ zru ’ɛ ’niinaa‑ Mɛɛzan ba, ’bhɛɛ‑ ‑e ‑dwa ‑yaa’ ‑jan ’ɛ ꞊la, ‑e ’yee‑ sɔ ’ɛ go ’bhɛ zan ’ɛ yikan’ ’ɛ ’yrɛ ta.»17’Duŋ‑ ’woo‑ ‑we ’zi Mɛɛzan ’la le, ’bhɛ ‑le ’ke ‑Waanbhaa’ Lii ’Weŋ ’ɛ ’le. ’Bhɛɛ‑ ’ke Mɛɛzan Lii ’Weŋ ’ɛ ‑yoo mɛɛ ’oo mɛɛ ’la zan zru ’yi, ’bhɛ zan bo ’bhɛ ’gbu ma. 18‑Kɔɔ’ mu ’la ’kpɛn wlɛyi’ tapwɛle ‑o, ’kɔɔ‑ mu Mɛɛzan ‑Waanbhaa’ a ’tɔbhɔleya ’ɛ zrɔn mɛɛ mu ’ɛ ni ‑kpɔsɔɔ ’bhii‑ ‑dwaleŋ’ pɛ ’kpɛn tapwɛ gɔnɛ‑ ’la gbɛɛn‑ gbaklata. ’Bhɛ ’yi Mɛɛzan Lii ’Weŋ ’ɛ ‑kɔɔ’ zru mu ’ɛ mabɔɔ yi ’oo yi, ’kooko‑ ‑kɔɔ’ ’pwɛle‑ klɛ ’yee‑ Mɛɛzan ’le. ’Bhɛ ’yi, ‑kɔɔ’ go ’tɔbhɔleya do ’yi ’ezin‑, ’bhɛɛ‑ ‑kɔɔ’ ge ’tɔbhɔleya ‑bhɛɛke’ gblaan do ’yi. Mɛɛzan Lii ’Weŋ ’ɛ ’woye‑ ’ɛ ‑yoo ’bhɛɛ‑ gbɛɛn‑ bhe.
4Pɔlu ’pegee ‑yaa’ yewoyɔɔn mu ’ɛ ‑waa’ yewogbɛya
1’O ’yrɛnklalawoa ‑Waanbhaa’ ma, ‑e ‑yaa’ ‑Jan ’Nrale‑ ’ɛ ’wole‑ ’ɛ gbɛkpaa‑ ’o ’kɔɔ, ’bhɛla‑ ‑zayile, ’o ‑gblɔzi’ laa ga ’o ma. 2Bhaaplɛŋ mu ‑yraladɔ maza mu ’la ’kpɛn klɛ gaanyi’, ’woo ‑baŋgwa ’mu ’kpɛn klɛle ’yi. ’Bhɛɛ‑ ’waa ‑dawli’ maza mu klɛ, ’bhɛɛ‑ ’waa ‑Waanbhaa’ a ‑Jan ’ɛ mabɔɔ. Drɔɔn’ ’woo‑ wlan ’la ’pe zii’ kpataakpa ‑Waanbhaa’ ‑yrɛ ꞊la, ’ke wlan ‑le ’kɛle‑ oo, ’ke bhla ‑le ’kɛle‑ oo, bhaaplɛŋ ’tɔle‑ bhaaplɛŋ ’bhɛ ’bhɛ ye. 3’Bhɛɛ‑ ’duŋ‑, ’woo‑ ‑Jan ’Nrale‑ ’la ’wo zii’, ’ke ’bhɛ bakanle laa ‑o kplankplan mɛɛ ’ke mu ‑yrɛ ’yi; ’bhɛ bakanle laa ‑o mɛɛ ’la zan mu ‑o ’mu ’ni zi ’ɛ ta ’mu ‑la ‑yrɛ ’yi. 4’Bhɛ zan mu ’ɛ waa ‑o kpa Zesu ’yi, ‑amasrɔyi *‑Setran’ ’la gbɛblɔɔle ‑o ’drunyan ’lɛɛ‑ ta, ’bhɛ ‑gblo ꞊kpaa ‑o yikan’ ’ɛ ’yrɛ ta; ’kooko‑ waa sɔ Krisi a ‑Jan ’Nrale‑ ’ɛ ’bhɛ a ’tɔbhɔleya ‑lrele’ ’ɛ ’bhigbɛya ’ɛ ’yele. ’Yee‑ Krisi ‑le ’ke ‑Waanbhaa’ bhɔɔma ’ɛ ’le. 5Wlan ’ɛ ni, ’waa ‑o ‑Jan ’Nrale‑ ’ɛ ’wole‑ ’ɛ klɛ ’zi ’o ’gbu ma janwolele. ’Duŋ‑ ’woo‑ Mɛɛzan Zesu Krisi a ‑Jan ’ɛ ’bhɛɛ‑ ’wo zii’, ’ke ’wa pe ’o ’gbu ma dɔɔ ’woo‑ ’kaa‑ yewonɛ mu ’le Zesu ‑zayi’. 6‑Amasrɔyi ‑Waanbhaa’ ’la ‑ya ꞊pia dɔɔ: «’Tɛbhile klɛ ‑gblo ’ɛ ’yi!» ’Yee‑ ‑Waanbhaa’ do ’kpɔ ’ɛ ’yele‑ ’tɛbhile ꞊klaa ‑kɔɔ’ zru ’ɛ ’yi, ’kooko‑ ‑Waanbhaa’ a ’tɔbhɔleya ’la ‑yoo ‑bhi ’zi Krisi wlɛyi’, ’o ’bhɛ dɔ ’o zru mu ’ɛ ’yi.
Pɔlu ’pegee ‑yaa’ yewoyɔɔn mu ’ɛ ta ‑yrɛn mu
7’Bhɛ ’tɔbhɔleya ’ɛ dɔle ’ɛ ’o ’kɔɔ ’bhɛ ‑o ’bhii‑ ‑naflo ‑gbɛnɛ do ’la ’kpale‑ ‑o ’trɛ gbɔ mu ’yi. ’O mɔɔ ’la ’woo‑ ’bhɛ ‑naflo ’kwe ’ɛ ’si zii’, faŋgan‑ ’laa ‑o ’o ’gbu ta, ’bhɛɛ‑ ’woo‑ ’ke ’siɛpɛ‑ ’le ’bhii‑ ’trɛ gbɔ mu gbɛɛn‑; ’kooko‑ mɔkpɛn’ ’a ye ’bhii‑ ’bhɛ ‑glɔɔya’ ‑gbɛnɛ ’lɛɛ‑ ’bhɛ da ‑Waanbhaa’ ‑la ba, ’bhɛɛ‑ ’bhɛ ’laa da ’o mɔɔ ’gbu ba. 8Bhaaplɛŋ mu ‑o ‑yrɛn ‑glɔɔn ’ɛ ’kpɛn kpa zii’ ’o ta; ’duŋ‑ ’o faŋgan‑ ’ɛ yaa yan. ’O zru ba ’tɛ ‑o; ’duŋ‑ ’o ’yrikpale bo ‑Waanbhaa’ ‑la ta. 9‑Woo’ ’yrɛbatɛdɔ ’zi ’ke ‑o ‑yrɛnkpa’ ’o ta; ’duŋ‑ ‑Waanbhaa’ laa ’a ‑baŋgo’ ’o ’yi. ‑Woo’ balaa’ ’trɛ ma, ’bhɛɛ‑ ‑woo’ tafɛ; ’duŋ‑ ‑Waanbhaa ’o ’lawlɛn‑. 10’Waati ’ɛ ’kpɛn ba, ’ke ’o ‑ja yrɛ ’oo yrɛ ’la ꞊nɔɔ, ‑woo’ dɛyrɛ ‑la ‑glin ’zi ’bhii‑ ‑o Zesu ꞊dia gɔnɛ ’la gbɛɛn‑. ’Duŋ‑ ‑Waanbhaa’ gbɛ ‑o ta, ’kooko‑ mɔkpɛn’ ’a ye ’bhii‑ Zesu ‑o ‑a ‑yrɛ ma ’o ’flɛ mu ’ɛ ’yi. 11’Ali‑ ’woo‑ ’yrɛ ’la ma bhe, ‑woo ’o dɛyrɛ ‑la ‑glin ’zi ’taŋii Zesu ’tɔ ’ɛ ‑zayi’; ’kooko‑ ‑wa ye ’bhii‑ ’yee‑ Zesu ‑o ‑a ‑yrɛ ma ’o ’flɛ mu ’la ’mu ‑o ’ke gapɛ ’le bhe ’mu ’yi. 12‑Woo ’o mɔɔ dɛyrɛ ’la ‑glin ’zi bhe, ’bhɛɛ‑ ’duŋ‑, ’bhɛ blaan klɛ ’ka mu a pɛ bole ‑yrɛ ma ‑si drɛɛ ’ɛ ’srɔɔwolele.
13’Bhɛɛ‑ ‑Waanbhaa’ ‑lɛla’ janwo mi ’ɛ do ’a pia ‑Waanbhaa’ a ’Sɛwɛ ’ɛ ’yi dɔɔ: «’Mi ’ŋ ’kpalawoa ‑Waanbhaa’ ’yi, ’bhɛla‑ ‑zayile ’mi ‑janwoa ‑a ’tɔ ’ɛ ’yi.» ’O mɔɔ ’o ’kpalawoa ‑Waanbhaa’ ’yi ’ezin‑, ’bhɛla‑ ‑zayile ’woo‑ ‑yaa’ ‑Jan ’Nrale‑ ’ɛ ’wo zii’. 14Wlan ’ɛ ni, ’o ’kpale‑ ‑o ‑a ‑yi ’bhii‑ ‑Waanbhaa’ ’la Mɛɛzan Zesu ‑bwela gale ba, ’bhɛ ‑le nu ’o mɔɔ ’pegee ’yee‑ Zesu bwelɛ gale ba ’eke‑ ’yi ’ezin‑, ’bhɛɛ‑ ’bhɛ ‑le nu ’o mɔɔ ’pegee ’ka mu ’pwɛlɛ‑ ’eke‑ zi Zesu ’lɛɛ. 15’Woo‑ ‑za mu ’la ’kpɛn ’yikun zii’, ’o ’mu klɛ ’zi ’ka mu ‑la ‑zayi’, ’kooko‑ ‑Waanbhaa’ ‑yaa’ ‑lileya ’ɛ zrɔn mɛɛ ‑bebe ni, ’bhɛɛ‑ ’bhɛ gbɛɛn‑ bhe, mɛɛ ‑bebe nu ’yee‑ ‑Waanbhaa’ ’pubɔlɛ, ’bhɛɛ‑ ‑a ’tɔ ’ɛ baan’ nu bhɔlɛ.
’Taawole ’kpaleya ma
16’Bhɛla‑ ‑zayile, ’waa ‑o ’o ’gbu ‑gblɔzi’ gale‑. ’Ali‑ ’ke ’o ’flɛ ’lɛɛ‑ ’bhɛ ‑o ’siɛ zii’, faŋgan‑ drɛɛ ‑le dɔ ’zi ’o ’nii‑ ’ɛ ta yi ’oo yi. 17‑Amasrɔyi ‑yrɛn ’fiɛntrɔnnɛ ’la ’bhɛ ‑o ‑kɔɔ’ ta ‑zɔn, ’bhɛ nu ’kanlɛ‑. ’Bhɛ ‑yrɛn ’ɛ blaan’ nu klɛlɛ ’ke ’tɔbhɔleya ‑gbɛnɛ do ’la ’ke ‑daŋ’ ’laa ‑o ’bhɛ ma ‑titi ’bhɛɛ‑ ’le; ’bhɛ gblaan ‑yiya’ ’yee‑ ‑kɔɔ’ ta ‑yrɛn ’fiɛntrɔnnɛ ’lɛɛ‑ ni. 18’Bhɛ ’yi bhe, mɛɛ pɛ mu ’la ye ‑a ‑yrɛ ’le, ’o mɔɔ laa ‑o ’mu ‑glin ’zi. ’Duŋ‑ mɛɛ laa pɛ mu ’la ye ‑a ‑yrɛ ’le, ’bhɛɛ‑ ’ke ’mu ‑o ‑Waanbhaa’ ba, ’o mɔɔ ‑yrɛ ‑o ’mu ‑la ta. ‑Amasrɔyi ‑o pɛ mu ’la ye ‑o ‑yrɛ ’le, ’mu ‑o ’ke ’kanpɛ‑ ’le; ’duŋ‑ mɛɛ laa pɛ mu ’la ye ‑a ‑yrɛ ’le, ’bhɛɛ‑ ’ke ’mu ‑o ‑Waanbhaa’ ba, ’mu ’laa kan ‑titi.
51’Flɛ ’la ’bhɛ ‑o ’o ma ’trɛ ta ‑gɛ, ’bhɛ ‑o ’bhii‑ sɔ ’kpaa do gbɛɛn‑. ’Wa ’yaango‑ dɔɔ ’ke ’bhɛ ’siɛla‑ ’waati ’la ba, ’fɛ ’lrele‑ do dɔle ‑o ’o ’lɛɛ laflɛ’ ’yi. Bhaaplɛŋ mu laa ’bhɛ ’fɛ ’ɛ dɔlɛ ‑o gbɛ ’le. ’Duŋ‑ ‑Waanbhaa’ ’gbu ‑le ’bhɛ ‑dwa. ’Bhɛ ’fɛ ’ɛ yaa sɔ ’siɛle ‑titi. 2’Woo‑ ’saanigɛ ’drunyan ’la ’yi ‑gɛ bhe, ’woo wisi’ zii’, ‑amasrɔyi ‑a ‑lrɔ ‑gbɛnɛ ’gbu ‑o ’o ma ’ke ’o ge ‑Waanbhaa’ ba, ’bhɛɛ‑ ‑e ’waa‑ ’flɛ drɛɛ ’ɛ kla ’o ta. 3Wlan ’ɛ ni, ’ke ’o ’bhɛ ’flɛ drɛɛ ꞊klaa ’o ta ’waati ’la ba, ’o tafleŋ‑ ’laa nu bolɛ. 4’Ke ’woo ’waa‑ ’trɛ ta ’flɛ ’lɛɛ‑ ’yi ’waati ’la ba, yi ’oo yi ’trɛbhɔ ’pegee wisile ‑le ’o ta ’ke ’kwe ’le. Yaa klɛlɛ ’bhii‑ ’flɛ ’la ’bhɛ ‑le ’o ma ’trɛ ’lɛɛ‑ ta ‑gɛ, ’woo‑ ‑a zi ’bhii‑ ’o ’bhɛ go ’o ma. ’Duŋ‑ ’woo ‑a zi ’bhii‑ ’flɛ drɛɛ ’la ’bhɛ ‑o laflɛ’ ’yi, ’o ’bhɛɛ‑ kla ’o ta; ’kooko‑ ’waa‑ ’trɛ ta ’flɛ ’la ’bhɛ ‑o ’ke gapɛ ’le, ‑Waanbhaa’ ’bhɛ tabɔɔ ’ke ’flɛ drɛɛ ’la ’ke ‑daŋ’ ’laa ‑o ’bhɛ ’si ’ɛ ma ‑titi ’bhɛ ’le. 5‑Waanbhaa’ ’gbu ‑le ’bhɛ ’flɛ drɛɛ ’ɛ ꞊kla ’o ni. ‑E Lii ’Weŋ ’la ꞊naa ’o ni, ‑e ’bhɛɛ‑ ‑dwa ‑za ’wlan mu ’la ‑e nu ’mu klɛlɛ ’o ni laflɛ’ ’yi, ’mu ’yrɛ ’lɛɛ pɛ le.
6’Bhɛla‑ ‑zayile, yi oo yi, ’woo zru dɔ ’eglɔɔle. ’Wa ’yaango‑ ’ke ’o ꞊bwa ’o ’flɛ ’lɛɛ‑ ’yi ’trɛ ’lɛɛ‑ ta ‑gɛ, ’o ’pleŋgole ‑o Mɛɛzan ma ’egbɔɔnle. 7’Woo‑ ’taawo zii’ pɛ ’la ’o ’kpale‑ ‑o ’bhɛ ’yi ’bhɛɛ‑ zi, ’duŋ‑ ’waa‑ ‑o ’taawo zii’ pɛ ’la ’o ’bhɛ ye ’o ’yrɛ ’le ’bhɛ zi. 8Yi ’oo yi, ’woo‑ zru dɔ ’eglɔɔle. ’Woo ‑a zi ’bhii‑ ’flɛ ’la ’bhɛ ‑o ’o ma ’trɛ ’lɛɛ‑ ta ‑gɛ, ’o go ’bhɛ ’yi, ’bhɛɛ‑ ’o ge bolɛ Mɛɛzan Krisi ‑din. 9’Bhɛla‑ ‑zayile’, ’ke ’o ‑gaa oo, ’ke ’o ꞊bwa ’e ’yrɛ ma oo, ’woo‑ dɔ ’zi ’eglɔɔle, ’kooko‑ ’o ‑za sɔ ’yee‑ Mɛɛzan ni ’elwale ’pe. 10‑Amasrɔyi ‑kɔɔ’ ’kpɛn nu gelɛ dulalɛ Krisi a ‑klu ’ɛ ’lɛ ma, ’bhɛɛ‑ ‑e nu ‑kɔɔ’ ’kpɛn ’kitikanlɛ; ’kooko‑ ‑kɔɔ’ ’kpɛn do do ‑za ’oo ‑za ’la ꞊kla ’drunyan ta ‑gɛ, ’kee‑ ‑kla ‑za ’wlan ’le oo, ’kee‑ ‑kla ‑za ’yɔɔ‑ ’le oo, ‑kɔɔ’ ’bhɛ ma ‑sra ’srɔɔwo‑.
Krisi ‑le ‑Waanbhaa’ ’pegee bhaaplɛŋ mu kpa do ma
11’Wa ’yaango ’bhii‑ ‑gblaanle’ Mɛɛzan ‑lɛɛ ’bhɛ ‑o ’ke ‑za ’wlan ’le, ’bhɛla ‑zayile ’wa klɛ ’zi gbɛ ’ɛ ’kpɛn ma ’ke ‑yaa’ ‑jan ’ɛ dɔ mɛɛ mu ’ɛ ’yi, ’bhɛɛ‑ ’ke ‑wa ye ’ke wlan ’le. ’Yee‑ ‑Waanbhaa’ ’o mɔɔ ’gbu dɔ kpataakpa, ’bhɛɛ‑ ’mi ’kpale‑ ‑o ‑a ‑yi ’bhii‑ ’ka mu ’gbu ’o mɔɔ dɔ ’ezin‑ ’elrele ’ka ’gbu ’kpee. 12’Waa ‑o ’bhɛ ’pe zi, ’kooko‑ ’woo ’gbu ’tɔbhɔ‑ ’ka ’yrɛ ta ’ezin‑, ’duŋ‑ ’woo‑ ’bhɛ ’pe zii’ win ’la ma ’bhɛ ‑le dɔɔ ’ke ’ka sɔ ’ka ’wasowole ’o ’yi ’o ’woye‑ ’ɛ ‑zayi’. ’Ke ’bhɛ ꞊kla, mɛɛ ’la zan mu ‑o ’gbu ’wasowo zii’ ’kɛla ’yi ’pɛɛlii‑, ’bhɛɛ‑ ’duŋ‑, ’ke waa ‑o ’bhɛ ’le ‑o ’gbu ’kpee; ’ka sɔ ‑jan zikpale ’bhɛ zan mu ’ɛ ni gɔnɛ‑ ’la gbɛɛn‑, ’ka ’bhɛ dɔ. 13Wlan ’ɛ ni, ’ke mɛɛ ’ke mu ‑o ’o ’ye zii’ ’bhii‑ ‑kwanii’ mu, ’duŋ‑ ’waa ‑o ’bhɛ ’le, ‑Waanbhaa’ a ye ’ɛ ‑zayi’. ’Bhɛɛ‑ ’ke ‑woo’ ꞊kwan mɛɛ kplankplan mu ’le, ’bhɛ ‑o ’ka mu ’gbu ‑la ma ’ke ‑trɔn ’le. 14‑Amasrɔyi ’o ‑za ꞊swa Krisi ni gɔnɛ‑ ’la gbɛɛn‑ ’bhɛ ’a klɛ ’bhɛɛ‑ ’o ‑za ’kpɛn klɛ ’sɔniya ’le ’o ’yi. ’O mɔɔ ’kpale‑ ‑o ‑a ‑yi ’bhii‑ ’ke ’yee‑ do ‑kplɛn ‑gaa ‑kɔɔ’ ’kpɛn ‑zayi’, ’bhɛ bhla ’ɛ ba, ‑yoo ’bhii‑ ‑kɔɔ’ mu ’kpɛn ’pegee ’yee‑ ‑gaa ’eke‑ ’yi. 15‑E ‑gaa ‑kɔɔ’ mu ’kpɛn ni, ’kooko‑ mɛɛ ’la zan mu ‑o ’mu ‑yrɛ ma, ’bhɛ zan mu ’laa ’taawo ’mu ’gbu win ta ’ezin‑; ’duŋ‑ ‑o ’taawo Krisi ’la ‑gaa, ’bhɛɛ‑ ’kee‑ ‑bwela, ’bhɛ a pɛ zru maza ’ɛ ’bhɛɛ‑ ta.
16’Bhɛ klɛgbɛya ’ɛ ’yi ’saanigɛ, ’waa mɛɛ ’kedo‑ ’kpɔ kun ‑li bhaaplɛŋ a pɛ ’kungbɛya drɔŋ ’ɛ ’yi. ’Ali‑ ’ke ’elwaleta ‑sɔ ’o Krisi ‑kwan bhaaplɛŋ a pɛ ’kungbɛya drɔŋ ’ɛ ’yi, ’duŋ‑ ’saanigɛ ’waa‑ kun ‑li ’bhɛ ’kungbɛya ’ɛ gbɛɛn‑. 17‑Amasrɔyi ’ke mɛɛ do ’pegee Krisi ’kpale‑ ‑o do ma, ’bhɛ zan ’ɛ zru ’ɛ mabɔɔ, ’bhɛɛ‑ ‑e klɛ mɛɛ drɛɛ ’le. ‑A klɛza gwe mu ’ɛ ’mu ’truŋwo‑, ’bhɛɛ‑ ‑a klɛza mu ’ɛ ’kpɛn klɛ ’edrɛɛle ’tɛ. 18’Bhɛ ’kpɛn da ‑Waanbhaa’ ‑la ba, ’yele‑ ‑kɔɔ’ mu ’pegee ’yee‑ ’gbu ꞊kpaa do ma Krisi ’srɔyi. ’Bhɛɛ‑ ’yele‑ ’yee‑ ’pegee bhaaplɛŋ a ’kpaledomaya ye ’ɛ gbɛkpaa‑ ’o mɔɔ ’kɔɔ. 19‑Amasrɔyi ’yee‑ ‑Waanbhaa’ ’gbu ’yaa‑ Krisi ’yi bhe, ‑e ‑yaa ’yee‑ ’pegee bhaaplɛŋ mu ’kpɛn ’kpa zii’ do ma. Yaa ‑yaa ‑o klɛza ‑yɔɔ’ mu ’ɛ bɔ ’zi ‑klɔsi ’yi. ’Bhɛɛ‑ ‑ya ‑pia ’o ni dɔɔ ’o ’yee‑ ’pegee bhaaplɛŋ a ’kpaledomaya ye ’ɛ ’wo.
20’Bhɛla‑ ‑yile, ’o mɔɔ ‑o ‑janwo’ zii’ Krisi ’tɔ ’ɛ ’yi. ‑Yoo ’bhii‑ ’yee‑ ‑Waanbhaa’ ’gbu ‑le zruwla ’zi mɛɛ mu ’ɛ ’kpee ’o mɔɔ ‑liijan’ mu ’ɛ ’le. ’O ‑sromabɔ ’zi ’ka ni ’yee‑ Krisi ’tɔ ’ɛ ’yi dɔɔ ‑kaa ’to ’ke ’ka ’pegee ‑Waanbhaa’ kpa do ma. 21Krisi ’laa ‑za ’yɔɔ‑ do ’kpɔ klɛlɛ, ’duŋ‑ ‑za ’yɔɔ‑ ‑kpan ’la ’yaa‑ nu baalɛ ‑kɔɔ’ mu ta, ‑Waanbhaa’ ’bhɛ balaa’ ’a ta, ’kooko‑ ‑kɔɔ’ mu ’pegee ’yee‑ Krisi a ’kpaledomaya ’ɛ ’yi, ‑kɔɔ’ klɛ mɛɛ ‑lɛdɔɔle mu ’le ‑Waanbhaa’ ‑yrɛ ’yi.
61’O klɛlawoa ’ke yewoyɔɔn mu ’le ‑Waanbhaa’ ba, ’woo‑ ‑sromabɔ ’zi ’ka ni dɔɔ ’ka ’laa ‑yaa’ ‑lileya ’ɛ ’srɔɔwoza ’ɛ klɛlɛ ’ke bhaama za ’le. 2‑Amasrɔyi ‑Waanbhaa’ ’a ꞊pia dɔɔ:
«’Mi ’a pɛ ‑lileya zrɔn ’waati ’ɛ ’bhɔle‑, ’mi ’ŋ ’trɔnkpaa‑ ’kaa‑ ’seri ’ɛ ꞊la, ’bhɛɛ‑ ’an ’lɛkun,
’bhɛɛ‑ ’mi ’ka ‑gwa ‑za ’yi ’bhɛ yi ’ɛ ’le.» ’Bhɛ ’yi bhe, ‑zɔn ‑le ’ke ‑Waanbhaa’ a pɛ ‑lileya zrɔn yi kplankplan ’gbu ’ɛ ’le; ’bhɛɛ‑ ‑zɔn yi ’ɛ ’bhɛ ‑le ’ezin‑ ’ka go yi ’gbu ’ɛ ’le ‑za ’yi.
3’Waa‑ ‑o ‑a zi ’bhii‑ mɛɛ ’kedo‑ ’kpɔ ’waa‑ ye ’ɛ ’tɔ ’yɔɔ‑ pe. ’Bhɛla‑ ‑zayile ’waa‑ ‑o ‑a zi ’bhii‑ ’o klɛ ‑Waanbhaa’ a zi ’ɛ ’liitan pɛ ’le mɛɛ ’kedo‑ ’kpɔ ’lɛɛ. 4’Bhɛɛ‑ drɔɔn’, ’wa klɛ ’zi gbɛ ’ɛ ’kpɛn ma, ’kooko‑ ‑woo’ ye ’bhii‑ ‑Waanbhaa’ a yewonɛ kplankplan mu ’le. ’Bhɛla‑ ‑yile, ’woo‑ ‑yrɛn ’ɛ ’kpɛn ‑glɔɔn ’yikun zii’ ’o zrubakpaa ‑gbɛnɛ ’le, ’kee‑ ꞊kla wisi’ ‑gbɔɔ dɔza mu ’le oo, ’kee ꞊kla ’trɛbhɔza mu ’le ’oo, ’woo‑ ’mu ’kpɛn ’yikun zii’. 5‑Woo’ zita ꞊zwan, ’bhɛ ’pegee ‑woo ’o ꞊bwa ‑kaso ’yi, ’bhɛɛ‑ ‑o mɛɛ mu ‑lawlɛnna ’o ma. ’O ye ‑glɔɔ ‑glɔɔn ’yɔɔ‑ ’ɛ ’kpɛn ’yikwan꞊. Yidɛkleya ’pegee gbɔn yikunle, ’o ’mu ’kpɛn ’yikwan꞊. 6’O ’taawogbɛya mu ’ɛ bakanle ‑o, ’o ‑Waanbhaa’ dɔ, ’bhɛ ’pegee ’o zrubakpaale ‑o, ’o zru lele, Lii ’Weŋ ’ɛ ‑yoo ’o zru mu ’ɛ ’yi, ’bhɛ ’pegee mɛɛ mu ‑za sɔ ’o ni ’sɔniya ‑zeze ’gbu ’le. 7’O ‑Jan ’nrale‑ ’ɛ wo wlan ma, ’bhɛ ’pegee ‑Waanbhaa’ a ‑glɔɔya’ ’ɛ ’le. ’O ‑lɛdɔɔleya ‑la klɛ ’waa‑ gwledanpɛ ’le ’o ’sɔɔnnii ’ɛ ba, ’bhɛ ’pegee ’o ’gbu ta gwledanpɛ ’le. 8Mɛɛ ’ke mu ’o ’tɔbhɔ‑, ’bhɛɛ‑ ‑a ’ke mu ’o mavɛɛ ’ezin‑. ‑A ’ke mu ’o ’tɔ wlan pe, ’bhɛɛ‑ ‑a ‑bhɛɛke’ mu ‑o ’o ’tɔ ’yɔɔ‑ pe ’ezin‑. ‑Woo’ ye ’bhii‑ bhla pe mu, ’bhɛɛ‑ ’duŋ‑ ’woo‑ ’ke wlan pe mu ‑la ‑le. 9‑Woo’ glin ’bhii‑ waa ’o dɔ, ’bhɛɛ‑ ’duŋ‑ mɔkpɛn’ ’o dɔ. ‑Woo’ ye ’bhii‑ ga mu, ’bhɛɛ‑ ’duŋ‑, ’woo‑ ’o ’yrɛ ma ‑li kpataakpa. ‑O ‑yrɛnkpa’ ’o ta, ’bhɛɛ‑ ’duŋ‑ waa sɔ ’o dɛle‑. 10‑O wlɛyisriwoza klɛ ’o ni, ’bhɛɛ‑ ’duŋ‑ ’o zrukpaale ‑o ’egbɛnɛle ’taŋii. ‑Woo’ ye ’bhii‑ ’kɔɔfleŋzan mu, ’bhɛɛ‑ ’duŋ‑, ’woo‑ mɛɛ ‑bhɛɛke’ ‑bebe mu klɛ ’zi pɛzan mu ’le. ‑Woo’ ye ’bhii‑ pɛ ’kedo‑ ’kpɔ ’laa ‑o ’o ’kɔɔ, ’duŋ‑ ’waa‑ pɛ ‑le ’ke pɛ ’kpɛn ’le.
11’O ’yiɛnii Korɛnti mu, ’o ‑janwoa ’ka ni kpataakpa, ’bhɛɛ‑ ’waa ‑za ’kedo‑ ’kpɔ gaanlɛ ’ka ma ‑titi. 12’Ka mu ’gbu ‑za sɔ ’o ni ’o zru ’ɛ ’kpɛn ’le, ’bhɛɛ‑ ’duŋ‑ ’ka mu laa ’o mɔɔ ‑vavadɛ. 13’Bhɛ ya ’ɛ ’yi, ’mi ‑o ‑janwo’ zii’ ’ka ni ’bhii‑ ‑nɛ dɛ do ‑janwo’ ‑a ‑nɛ mu ni gɔnɛ‑ ’la gbɛɛn‑. ’Duŋ‑ ’ka mu ’ezin‑, ’o ‑za ’sɔ ’ka ni, ‑ka ’ka zru ’ɛ ’liiploo‑ ’o ni, ’bhɛɛ‑ ’ka ’laa ’ka ’kpee gaanlɛ ’o ma ‑titi.
Mɛɛ ’la zan mu laa ‑Waanbhaa’ dɔ ’mu ’pegee Zesu ’yi mu dɔ laa sɔ klɛle‑ ’eke‑ ta ‑za ’yɔɔ‑ ’yi
14Mɛɛ ’la zan mu laa ‑o kpa ‑Waanbhaa’ ’yi, ’ka ’pegee ’mu laa wlalɛ ‑za do ma. Taa‑ ‑lɛdɔɔleya ’pegee ‑yɔɔya’ ‑o do ɛɛ? Taa‑ ’tɛbhile ’pegee ‑gblo ‑o do ɛɛ? 15Krisi ’pegee Beliali ’sɔ ’kpale do ma ’nale‑ ‑a ma ɛɛ? Taa‑ mɛɛ ’la zan ’e kpa ‑Waanbhaa’ ’yi, ’bhɛ ’pegee mɛɛ ’la zan laa ’e kpa ‑Waanbhaa’ ‑yi ‑waa’ ‑za ’ɛ ‑dele ’eke‑ ta ɛɛ? 6.15 ‑Setran’ ’tɔ ‑le ’ezin‑ Ebre wli ’ɛ ’yi Beliali16‑Waanbhaa’ Gba ’Fɛ ‑Gbɛnɛ ’ɛ ’pegee yo mu ‑o do ɛɛ? ‑Amasrɔyi ‑Waanbhaa’ ’la ‑ya ‑yrɛ ma ’o mɔɔ ’flɛ ’ɛ ’bhɛ ‑le ’ke ‑a gba ’fɛ ‑zeze ’gbu ’ɛ ’le, ’bhii‑ ’yee‑ ‑Waanbhaa’ ’gbu ’a ꞊pia gɔnɛ‑ ’la gbɛɛn‑ dɔɔ:
«’Mi nu yaalɛ ‑o pleŋ‑, ’bhɛɛ‑ ’ŋ nu klɛlɛ ‑o ba ’ke ‑o ‑ja yrɛ ’oo yrɛ ’la ꞊nɔɔ.
’Mi nu klɛlɛ waa ‑Waanbhaa’ ’le, ’bhɛɛ‑ ’woo‑ nu klɛlɛ ’mi a pɛ mɛɛ mu ’le.»
17’Bhɛla‑ ‑zayile, Mɛɛzan ‑Waanbhaa’ pe ’ezin‑ dɔɔ:
«‑Ka ’ka go ‑o pleŋ‑; ’bhɛɛ‑ ‑ka ’ka ’pleŋgo‑ ‑o ma.
’Ka ’laa ’kunlɛ‑ pɛ ’la ’bhɛ ’laa ‑o ’weŋ ’bhɛ ma.
’Ke ’ka ’bhɛ ꞊kla, ’bhɛɛ‑ ’mi nu ’ŋ gbɛdɔlɛ ’ka ꞊la ’tɛ.
18’Mi nu klɛlɛ ’ka Dɛ ’le,
’bhɛɛ‑ ’ka mu nu klɛlɛ ’mi gbe mu ’pegee ’mi ’lu mu ’le.
Mɛɛzan ‑Waanbhaa’ ’Seŋkpɛnzan ’a ꞊pia ’bhɛɛ‑ gbɛɛn‑ bhe.»
71’Ŋ ’yiɛnii mu, ‑Waanbhaa’ ’a ’liiwli‑ nalawoa ‑za mu ’la ta ‑kɔɔ’ ni ’bhɛ gbɛɛn‑ bhe, ’bhɛla‑ ‑zayile, ‑kɔɔ’ ‑kɔɔ’ ’flɛ mu ’ɛ ’pegee ‑kɔɔ’ zru mu ’ɛ klɛ ’weŋ ’ke ‑kɔɔ’ go ’triŋdɔ‑ maza ’tɔle‑ ’triŋdɔ‑ maza ’bhɛ ’yi. ‑Kɔɔ’ dɔ klɛn ’ke ‑kɔɔ’ klɛle ’weŋ ’ɛ ’lɛpale klɛ, ’bhɛɛ‑ ’ke ‑kɔɔ’ ’taawo‑ ‑Waanbhaa’ a ‑lɛɛgblaanya ’ɛ ’yi.
Pɔlu zrukpaaza
2‑Ka ’ka zru mu ’ɛ ’liigo‑ ’o ni, ’bhɛɛ‑ ’o ‑za ’sɔ ’ka ni ’ka ’kpee! ’Waa ’siɛlɛ‑ mɛɛ ’kedo‑ ’kpɔ ba, ’bhɛ ’pegee ’waa mɛɛ kedo‑ ’kpɔ ŋgblo ’siɛlɛ‑, ’bhɛɛ‑ ’waa mɛɛ ’kedo‑ ’kpɔ tabhlelɛ. 3’Naa ‑o ’bhɛ ’pe zii’ ’ka ’tɔ ’yɔɔ‑ pe zayi’ ’dɛ, ’duŋ‑ ’mi ’a ꞊pia ’ka ni ’elwale gban dɔɔ ’ka ‑za sɔ ’mi ni ’egbɛnɛle ’kee‑ kan ‑a ‑daŋ’ ta. ’Ka ’sɔgbɛya ‑yɔɔ’ ’ɛ ’kɔɔ ’o ni, ‑asiikɔɔ pɛ ’kedo‑ ’kpɔ ’laa sɔ ‑kɔɔ’ ’pleŋgole ’eke‑ ma; ’ali‑ yaa dɔ ga ’kpee ’ke ’bhɛ ’bhɛ klɛ. 4’Mi ’gbu ’kpale‑ ‑o ’ka ’yi ’egbɛnɛle, ’mi sɔ ’ŋ ‑baale’ ’ka mu ’yi. ’Ŋ ’yoo‑ ‑yrɛn mu ’la ’kpɛn ’yi ‑gɛ bhe, ’duŋ‑ ’fuudɔle ‑o ’ŋ ta, ’bhɛɛ‑ ’ŋ zrukpaale ‑o ’kee‑ kan ‑a ‑daŋ’ ta.
5Wlan ’ɛ ni, ‑a ’san ’ŋ nule ’ɛ ma Masedwani ‑wa ’ɛ ta ‑gɛ, ’waa ’o ’yitrɛ‑ yrɛ sanɛ‑ ’gbu ’srɔɔwolɛ ‑lido’. ‑Woo’ ’yrɛbatɛdɔ ’zi gbɛ ’ɛ ’kpɛn ma. Mɛɛ ’ke mu ‑o gwledan ’zi ’o ba, ’bhɛɛ‑ ‑gblaan ‑o ’o zru ’yi. 6’Duŋ‑ ‑Waanbhaa’ ’la ’fuudɔ‑ mɛɛ ’la zan mu ‑gblɔzi’ gale ‑o ’mu ta, Titi ’nulawoa, ‑e ’fuudwa‑ ’o ta. 7Titi ’nule‑ do ‑kplɛn ’laa klɛlɛ ’fuudɔpɛ ’le ’o ta. ’Duŋ‑ ‑ya ꞊pia ’o ni dɔɔ ’kaa‑ ꞊kwan ’elrele gɔnɛ‑ ’la gbɛɛn‑ ’bhɛ ’fuudwa ‑a ta. ’Bhɛɛ‑ ‑ya ꞊pia ’o ni ’ezin‑ dɔɔ ’ŋ ’ye ‑lrɔ ‑o ’ka ma ’egbɛnɛle, ’bhɛ ’pegee ‑za mu ’la ꞊tian ’ŋ ma, ’mu ’ka wlɛyisriwoa, ’bhɛɛ‑ ’ka ’an ‑za ‑vavadɛ. ’Bhɛla‑ ‑zayile ’mi a pɛ zrukpaa’ ’bhɛ ‑o ’egbɛnɛle.
8’Ali‑ ’mi ’lɛtrɛ ’la ꞊kpaa ’ka ni, ’ke ’bhɛ ’ka wlɛyisriwoa, ’bhɛ ’laa ‑zadɔwɛɛ dɔlɛ ’mi ma ‑titi. ’Bhɛɛ‑ ’duŋ‑, ’an ’yelawoa ’bhii‑ ‑e ’ka wlɛyisriwoa ’waati sa, ’bhɛɛ‑ ‑zadɔwɛɛ ‑dwa ’mi ma ’tɛ. 9’Duŋ‑, ’mi zrukpaale ‑o ‑zɔn. ’Ka ’ka wlɛyisrilawoa ’bhɛ ’laa ‑o ’ke ’mi zrukpaaza ’le. ’Duŋ‑ ’kaa‑ wlɛyisriwoza ’ɛ ’bhɔlawoa ’ka ba, ’bhɛɛ‑ ’ka ’ploola‑ ’ka ’joo ’yɔɔ‑ mu ’ɛ ma, ’bhɛ ‑za ’ɛ ’bhɛ ‑le ’mi zrukpaaza ’le ‑zɔn. ’Kaa‑ wlɛyisriwoza ‑bɛŋgwa ’ke ‑Waanbhaa’ zru maza ’ɛ ’le; ’bhɛ ‑la ma ‑le ’o ‑za ’la ꞊kla ’ka ni, ’bhɛ ’laa klɛlɛ ‑za ’yɔɔ‑ ’le. 10Wlan ’gbu ’ɛ ni, wlɛyisriwoza ’la da ‑Waanbhaa’ ba, ’bhɛ ‑le ’a klɛ ’bhɛɛ‑ bhaaplɛŋ ploo ‑za ’yɔɔ‑ ma, ’bhɛɛ‑ ‑ya ’joo ’ɛ mabɔɔ; ’bhɛ klɛgbɛya ’ɛ ’yi bhe, ’bhɛɛ‑ ‑e go ‑za ’yi. ’Bhɛ wlɛyisriwoza ‑glɔɔn ’ɛ ’bhɛ ’laa ‑zadɔwɛɛ dɔ mɛɛ ma. ’Duŋ‑, ’drunyan ’yi wlɛyisriwoza ’ɛ, ’bhɛ ‑le ’ke mɛɛ nipɛ ’pegee mɛɛ dɛpɛ ’le ‑Waanbhaa’ ‑yrɛ ’yi, ‑amasrɔyi bhaaplɛŋ laa ploo ‑yaa’ ‑za ’yɔɔ‑ ’ɛ ma. 11’Yee‑ wlɛyisriwoza ’la da ‑Waanbhaa’ ba ‑e ‑za mu ’la ꞊kla ’ka zru mu ’ɛ ’yi ‑ka ’mu ‑glin doo! ‑E ’ka ꞊si ’ɛ mabɔɔla ‑zɔn, ’bhɛɛ‑ ’ka ‑o ‑Waanbhaa’ a ‑za ’ɛ ’kun zii’ ’elrele; ‑e ‑zadɔwɛɛ ‑dwa ’ka ma. ‑Za la ’ka zru ma; ’bhɛɛ‑ ’ka gblaan ‑za ’yɔɔ‑ klɛle ‑lɛɛ. ’Ŋ ’ye ‑lrɔ ‑o ’ka ma, ’bhɛɛ‑ ’ka ‑o dɔ ’zi ’eglɔɔle ‑Waanbhaa’ a zi ’ɛ ta. ’Bhɛɛ‑ ’ka takanle ‑o ‑za ’yɔɔ‑ ’ɛ ’krowo zayi’. ’Kaa ‑zrɔnna zrɔngbɛya ’ɛ ’kpɛn ’yi ’bhii‑ ’ka klɛza laa ‑yaa ’yee‑ ‑za ’ɛ ’le.
12’Mi ’lɛtrɛ ’la ꞊kpaa ’ka ni, ’naa klɛlɛ mɛɛ ’la zan ‑za ’yɔɔ‑ ’ɛ ꞊kla, ’bhɛ ’pegee ’yee‑ ‑za ’yɔɔ‑ ’ɛ ꞊tian mɛɛ ’la zan ma, ’mu do ‑kplɛn ’kaama‑. ’Duŋ‑, ’mi ’a ꞊kpaa ’ka ni, ’kooko‑ ’o ‑za ‑o ’ka ’kɔɔ ’egbɛnɛle gɔnɛ‑ ’la gbɛɛn‑ ‑Waanbhaa’ ‑yrɛ ’yi, ’ka ’kpɛn ’bhɛ dɔ. 13’Bhɛla‑ ‑zayile, ’ka ‑za ’la ꞊kla ’bhɛ ’fuudwa‑ ’o ta. ’Ka ’fuu la ’bhɛ ‑dwa ’o ta, ’bhɛ ’pegee ’ka faŋgan‑ ’la ‑dwa Titi ta, ’bhɛɛ‑ ‑a zrukpaale ’la ‑daa ’ka ba ye, ’bhɛ ’o mɔɔ a pɛ zrukpaa’ ’ɛ baan’ ꞊klaa ‑a ba. 14’Ke ’mi ’gbu ’ŋ ’wasowoa sa ’ka mu ’yi ‑a ‑yrɛ ma, ’ka ’laa ‑yraladɔlɛ ’ŋ ma. ’O ‑jan ’la wo ’ka ni ’taŋii wlan ma, ’bhɛ ’pegee ’woo ’waso sa ’la ꞊woa ’ka mu ’yi Titi ’yrɛ ma, ’bhɛ ’a ‑zrɔnna ’bhii‑ ’zoo ’yaa‑ ’o zi ’bhɛ klɛlele. 15‑Ayile ‑zɔn, ’ka za ’sɔle‑ ‑o Titi ni ’egbɛnɛle; ‑amasrɔyi ’ke ‑ya ’kpeelɛdaan ’ka mi ’wojan‑ ’ɛ ’klɔsikwan gɔnɛ‑ ’la gbɛɛn‑ ’bhɛ ma, ’bhɛ ’pegee ’kaa ’cieya‑ ꞊kla ’ke ’ka ‑gasi ‑gbɛnɛ kpa a ‑lɛɛ gɔnɛ‑ ’la gbɛɛn‑, ’ka ’sɔniya ’ɛ baan’ ’kla zii’ ‑a ba ‑a ’kpee. 16’Mi ’duŋ‑, ’ŋ zrukpaale ‑o ’ezin‑ ’egbɛnɛle, ‑amasrɔyi ’mi sɔ ’ŋ ’kpale‑ ’ka mu ’yi ‑za ’ɛ ’kpɛn ’yi.
8‑GƆLI’ ’KPAZA‑ ’EKE‑ TA ZERUZALƐMU ZESU ’YI MU ’Ɛ NI
Masedwani ’klɛɛn ’yi Zesu ’yi mu ’ɛ ‑waa’ ‑gɔli’ ’kpaza‑ ’eke‑ ta
1’Ŋ nɛɛnɛ‑ mu, ‑Waanbhaa’ ꞊lia Masedwani ’klɛɛn ’yi Zesu ’yi mu ’ɛ ma gɔnɛ‑ ’la gbɛɛn‑, ’woo‑ zan ’bhɛ ‑za ’ɛ ’wolɛ‑ ’ka ni. 2’Trɛbhɔ ‑gbɛnɛ mu ‑yaa ‑o ta. ’Duŋ‑ zrukpaa’ ’la ’yaa‑ ‑o ‑yi ‑daŋ’ ’laa ‑yaa ’bhɛ ma. ’Ali‑ ‑waa’ ’kɔɔfleŋya ’ɛ ’yi, ‑o ‑dwa ‑a ‑la ’ke ‑o ‑gɔli’ ‑bebe kpa ’eke‑ ta, ’bhɛɛ‑ ‑o bhɔ Zeruzalɛmu Zesu ’yi mu ’ɛ ba ’bhɛ ’le. 3’Mi ’gbu ‑o ’bhɛ ’srɛ ’le, ’bhɛɛ‑ ’ŋ sɔ ‑a pele dɔɔ ‑o gbɛ ‑swa ‑gɔli’ yɛkɛ‑ ’la ’srɔɔwole ta, ‑o ’bhɛɛ‑ ꞊naa. ’Ali‑ ’o yri ‑yaa gɔli’ yɛkɛ‑ ’la ta ‑o ‑pinaa’ ’bhɛ ta. Yaa klɛlɛ ’bhii‑ mɛɛ ‑le ’bhɛ ꞊wlaa ‑o zi, ’duŋ‑ ‑o ’gbu ‑le ’bhɛ ꞊naa ‑o ’gbu zru ma. 4‑Woo’ matɛdwa ‑sromabɔlele ’o ni dɔɔ ’o ‑dwa ‑a ‑la ’ke ‑o sɔ bhɔle ‑Waanbhaa’ a mɛɛ ’weŋ mu ’la ‑woo Zeruzalɛmu ’mu ba. 5‑O ‑za ’la ’bhɛ ꞊kla, ’bhɛ ’kaan‑ ’o mɔɔ ‑yri ‑yaa ‑za yɛkɛ‑ ’la klɛle ta ‑o ’kɔɔ ’bhɛ ta: ‑woo ’gbu ꞊naa ’elwale ’pe Mɛɛzan Zesu ni, ’bhɛɛ‑ ‑woo ’gbu ꞊twa ’o mɔɔ ’kɔɔ ’ezin‑, ’bhɛ ‑za ’ɛ ’kpɛn ‑daa ‑Waanbhaa’ zru maza ’ɛ ’bhɛɛ‑ ba.
Pɔlu a mɛɛ ‑liawli’ ’kɔɔ ‑glɔɔya’ ba zayi’
6’Bhɛla‑ ‑zayile, ’o ‑sromabwa Titi ni dɔɔ ‑e ge ’ka ba ye, ’kooko‑ ‑e ye ‑lrele’ ’la zisaan‑ ’ke ‑ya pe ’ka ni ’ka ‑gɔli’ ’kpa ’eke‑ ta, ‑e ge ’bhɛ ye ’ɛ zi ’kee‑ ’bhɛ ’lɛyan‑. 7’Bhɛ ya ’ɛ ’yi, ’ka ‑o mɔkpɛn’ ’lɛɛ ‑za ’kpɛn ’yi: ’e pe ’kpaleya ’yi oo, ‑janwo’ gbɛya ’yi oo, ‑zadɔleya ’yi oo, ‑za ’kpɛn ‑vavadɛle ’yi oo; ’bhɛɛ‑ ’o ‑za sɔ ’ka ni ’egbɛnɛle. ’Bhɛɛ‑ ’duŋ‑, ‑ka dɔ ’ezin‑ klɛn ’ke ’ka klɛ mɔkpɛn’ ’lɛɛ ‑za ’brɛɛ ‑glɔɔn ’lɛɛ‑ klɛle ’yi.
8’Naa ‑a zi ’bhii‑ ’kaa klɛ kpaŋma. ’Duŋ‑ Zesu ’yi mu ‑vin mu ’ɛ ‑woo ’kɔɔpɛ‑ mu ’ɛ ꞊naa gɔnɛ‑ ’la gbɛɛn‑ blaale‑, ’mi ‑o ’bhɛɛ‑ ‑jan ’ɛ ’wo zii’ ’ka ni drɔŋ. ’Ŋ ’bhɛ ’wo zii’ win ’la ma, ’bhɛ ‑le dɔɔ ’ke ’ka mu sɔ a zrɔnle‑ ’ka klɛgbɛya ’ɛ ma ’bhii‑ ’kaa‑ pɛ ’sɔniya ’ɛ ’bhɛ ‑o ’ke wlan ’le. 9‑Amasrɔyi ‑kɔɔa’ Mɛɛzan Zesu Krisi ’bhɛ a ‑lileya ’ɛ ‑zrɔnna ‑kɔɔ’ ni gɔnɛ‑ ’la gbɛɛn‑, ’ka ’gbu ’bhɛ dɔ. ’Tɔbhɔleya ‑yaa ‑a ’kɔɔ, ’bhɛ ’pegee ‑e ‑yaa’ pɛ ’kpɛn zan ’le laflɛ’ ’yi, ’duŋ‑ ’ka mu ‑zayi’ ‑e ‑nwa ‑a ’gbu klɛlɛ ’ke ‑yrɛn ma mɛɛ ’le ’trɛ ta ‑gɛ, ’bhɛɛ‑ ‑e ‑gaa, ’kooko‑ ’ka klɛ pɛzan ’le ‑Waanbhaa’ ‑yrɛ ’yi.
10’Bhɛ ya ’ɛ ’yi bhe, ’mi ‑o ’ŋ ’gbu ’kpeejan‑ ‑la wo zii’ ’ka ni ’yee‑ ‑za ’ɛ ta; ’bhɛɛ‑ ’mi pe dɔɔ: ’Ka ‑za ’la klɛle zisaan‑ lɛɛlii ’ɛ ’le, ‑ka ge ’bhɛɛ‑ ‑glɔɔn klɛle ’ɛ zi. ’Ka mu, ’ka laa klɛlɛ ‑a ꞊lwa klɛ mu ’te ’le, ’duŋ‑ ‑a klɛ ‑lrɔ ‑dwa ’ka mu ’la ma ’elwale ’pe, ’bhɛɛ‑ ’kaa ꞊kla. 11’Ka ’yee‑ ‑za ’la zisaan‑ ’ka zru ’ɛ ’kpɛn ’le, ‑ka dɔ klɛn ’ke ’kaa ’lɛyan‑ ’ka zru ’ɛ ’kpɛn ’le ’ezin‑, ’ke ’bhɛ ‑bɛŋgole klɛ ’ka ’fuu sɔ ‑za yɛkɛ‑ ’la klɛle ta ’bhɛɛ‑ ’le. 12‑Amasrɔyi, ’kee‑ pɛ na ’e zru ‑lrele’ ’le, ’bhɛ ‑le sɔ ‑Waanbhaa’ ni. ’Bhɛɛ‑ ’duŋ‑, ’kee gbɛswa‑ pɛ ’la ’nale‑ ta, ’bhɛ ‑le sɔ ‑a ni ’ke ’bhɛ kan ’e gbɛ laa ’sɔlɛ‑ pɛ ’la ’nale‑ ta a ni ’bhɛ ta.
13’Naa ’pelɛ‑ dɔɔ ’ka ’ka ’gbu klɛ ’kɔɔfleŋzan mu ’le ’ka ’bhɔ zayi’ mɛɛ ‑bhɛɛke’ mu ba. ’Mi ‑o ‑a zi ’bhii‑ ’kaa klɛ, ’kooko‑ ’ka ’kpɛn ’kɔɔpɛ‑ mu ’ɛ sɔ ’eke‑ ni. 14‑Zɔn ’ka mu ’kɔɔ ’pale‑ ‑o, ’bhɛɛ‑ ’bhɛ ’seŋ ‑o ’ka ni ’ke ’ka bhɔ ’kɔɔfleŋzan mu ba. ’Bhɛɛ‑ yi ’la ta, ’ke pɛ ’kedo‑ ’kpɔ ’laa ‑o ’ka mu ’kɔɔ, ’bhɛɛ‑ ’ke ’woo‑ mu ’kɔɔ ’pale‑ ‑o, ‑o nu ’sɔlɛ‑ bhɔle‑ ’ka mu ba. ’Ke ’bhɛ ꞊kla, ’ka ’kpɛn nu klɛlɛ do ’tɛ. 15’Bhɛ klɛ ’bhii‑ ‑a yɔɔndɛle ‑o ‑Waanbhaa’ a ’Sɛwɛ ’ɛ ’yi gɔnɛ‑ ’la gbɛɛn‑ dɔɔ:
«Mɛɛ ’la zan ’bhɛ pɛ ’srɛ ’wloola‑, ’bhɛ a pɛ ’ɛ ‑vin ’laa bolɛ;
’bhɛɛ‑ mɛɛ ’la zan ’bhɛ pɛ sa ‑wloola, ’bhɛ ’kɔɔpɛ‑ ’ɛ yaa ’kaanlɛ‑.»
Titi ’pegee ‑a madɔ mu
16’Mi ‑Waanbhaa’ ’pubɔ‑, ‑amasrɔyi ‑e ’ka mu ‑vavadɛ zruwlaa‑ Titi ’kpee ’bhii‑ ’mi ’ka mu ‑vavadɛ gɔnɛ‑ ’la gbɛɛn‑ bhe. 17’O ‑jan ’la ꞊woa ‑a ni, ‑e ‑dwa ’bhɛ ꞊la. ’Bhɛɛ‑ drɔɔn’, ’ka ‑za ’la ‑ya ’kɔɔ ’eglɔɔle bhe, ‑ya ‑dwa ‑a ’gbu ’kpee ’kaa ‑e gele‑ ’ka ba ye. 18’Woo‑ ’yee‑ Titi ’pegee ’o nɛɛnɛ‑ ’bhɛɛke do winbɔ ’zi ’ka ba ye. ’Bhɛ ‑kɔɔ’ nɛɛnɛ‑ ’ɛ ’bhɛ ‑o Krisi a ‑Jan ’Nrale‑ ’ɛ ’wo zii’ gɔnɛ‑ ’la gbɛɛn‑, Zesu ’yi mu ’ɛ ’kpɛn ‑o ‑a ’tɔ wlan ’pe ’zi ’bhɛ ma. 19’Bhɛ trala ’ezin‑, Zesu ’yi mu ‑lɛ mu ’ɛ ’kpɛn ’yee‑ ’o nɛɛnɛ‑ ’ɛ makwan‑ ’kaa ‑e ge ’o zi ’bhɛ ye ‑lrele’ ’ɛ wo ’taa ’ɛ ta. ‑E nu bhɔlɛ ’o ba ’o ‑gɔli’ yɛkɛ‑ ’la ’srɔɔwoa‑ ’bhɛ ’yiciɛnlele. ’Woo‑ ’bhɛ ye ’lɛɛ‑ ’wo zii’ ’yee‑ Mɛɛzan ‑Waanbhaa’ ’tɔ ’bhɔ zayi’; ’bhɛ ’pegee ’wa zrɔn ’zi ’bhɛ klɛgbɛya ’ɛ ma ’bhii‑ ’woo‑ ‑a zi ’bhii‑ ’o ’bhɔ ’o nɛɛnɛ‑ mu ’ɛ ba.
20’Woo‑ ’bhɛ ’kpɛn klɛ ’zi ’bhɛ gbɛɛn‑ bhe, ‑amasrɔyi ’waa ‑o ‑a zi ’bhii‑ ‑o ‑layrɛ’ ‑srɔɔwo’ ’o ta ‑za ’kedo‑ ’kpɔ ’yi ’yee‑ ‑gɔli’ ’lɛɛ ’kungbɛya ’ɛ ma, ‑amasrɔyi ‑gɔli’ sa laa ’kɛle‑. 21‑Amasrɔyi ’woo‑ ‑za ’brɛɛ ‑la klɛyrɛ ‑glin ’zi, ’waa ‑o ’bhɛ ‑glin ’zi Mɛɛzan ‑Waanbhaa’ do ‑kplɛn ’yrɛ ’yi, ’duŋ‑ ’woo‑ ’bhɛ klɛyrɛ ‑glin ’zi ’ezin‑ bhaaplɛŋ mu ‑la ‑yrɛ ’yi.
22’Woo‑ ’o nɛɛnɛ‑ yaga mi ’la ’kpa zii’ ‑o ba; ’o ’bhɛ ’yrɛglinna ’ke ’o ye ‑glɔɔn ’ɛ ’kpɛn kpa ‑a ta, ’duŋ‑ ‑ya ’kpɛn ꞊kla ‑a zru ’ɛ ’kpɛn ’le. ’Bhɛɛ‑ ’saanigɛ ’ezin‑, ‑a zru ’ɛ ’kpɛn ’nale‑ ‑o ‑Waanbhaa’ a ye ’ɛ ’bhɛɛ‑ ni ’ke ’bhɛ kan ’elwale pɛ ’ɛ ta, ‑amasrɔyi ‑a ’kpale‑ ‑o ’egbɛnɛle ’ka mu ’yi. 23’Kee‑ ꞊bwa Titi a pɛ ’ɛ ta, ’bhɛ ‑o ’ŋ ’madɔ‑ mi ’pegee ’ŋ yewoyɔɔn ’le ’ka mu ba. ’O nɛɛnɛ‑ ‑vin mu ’la ’mu ‑o ge ’zi ’a zi, Zesu ’yi mu ’ɛ ’kpɛn ‑le ’mu ’winbwa‑. 24’Bhɛla‑ ‑zayile, ‑kaa zrɔn ‑o ni ’bhii‑ ‑o ‑za sɔ ’ka ni ’egbɛnɛle, ’kooko‑ Zesu ’yi mu ’la ’mu ‑o winbwa‑, ’mu ’a ’yaango‑ ’bhii‑ ’zoo ’yaa‑ ’o zi ’ke ’woo baa ’ka ’yi.
9Bhɔza Zeruzalɛmu Zesu ’yi mu ’ɛ ba
1’Ka nu ‑gɔli’ ’la ’kpalɛ‑ ’eke‑ ta, ’bhɛɛ‑ ’ka bhɔ Zeruzalɛmu Zesu ’yi mu ’ɛ ba ’bhɛ ’le, ’mi ’a ꞊ya ’bhii‑ win laa ‑o ’bhɛ ma ’ke ’ŋ ’sɛwɛdɛ ’ka ni ’bhɛ ba ‑zayi’. 2‑Amasrɔyi ’ka ’yriwlale ‑o ’bhɛ ‑za ’ɛ klɛle ma gɔnɛ‑ ’la gbɛɛn‑, ’ŋ ’bhɛ dɔ. ’Mi ’yaa‑ ’ŋ ‑baa ’zi ’ka mu ’yi ’bhɛɛ‑ ‑zayi’ Masedwani mɛɛ mu ’ɛ ’yrɛ ma ’ke ’an pe ‑o ni dɔɔ: «’Kee‑ san lɛɛlii, ’ka mu Akayi ’klɛɛn ’yi Zesu ’yi mu ’ɛ, ’ka ’yriwlale ‑yaa ’ke ’ka bhɔ ‑Waanbhaa’ a mɛɛ ’weŋ mu ’la ‑woo Zeruzalɛmu ’mu ba.» ’Ka ’bhɛ ‑za ’ɛ klɛle ‑vavadia gɔnɛ‑ ’la gbɛɛn‑, ’bhɛ zruwlaa‑ ’ezin‑ mɛɛ ‑bebe ’kpee. 3’Bhɛɛ‑ ’duŋ‑, ’ŋ ’yoo‑ ‑kɔɔ’ nɛɛnɛ‑ mu ’la ’winbɔ‑ ’zi ’ka ta ye, ’kooko‑ ’ŋ ’ka ’tɔlabhwa ‑o ‑yrɛ ma, ’bhɛ ’laa klɛ bhaama za ’le. ’Duŋ‑ ‑ka dɔ klɛn, ’kooko‑ ’ka ’yriwlale bo ’sani‑ ‑o nule pleŋ‑ ’bhii‑ ’an ꞊pia ‑o ni gɔnɛ‑ ’la gbɛɛn‑. 4’Ke ’bhɛ ’laa klɛlɛ, ’ke ‑kɔɔ’ nɛɛnɛ‑ Masedwani Zesu ’yi mu ’la ꞊nwa ’ŋ zi ’ka ba ye, ’bhɛɛ‑ ’ke waa ’ka ’yriwlale yelɛ, ’ŋ ’yoo‑ ‑gblaan ’zi ‑za do ‑la ‑lɛɛ dɔɔ ’o mɔɔ ’la ’kpale‑ ‑o ’ka ’yi, ‑yrala’ nu dɔlɛ ’o ma, ’bhɛɛ‑ ‑e nu klɛlɛ ’ka mu ’gbu ma ‑yrala’ ’le ’ezin‑. 5’Bhɛla‑ ‑zayile, ’mi ’ŋ ’kpeelɛdaan, ’bhɛɛ‑ ’an ꞊ya zi ’le ’ke ’ŋ ‑sromabɔ ’ŋ nɛɛnɛ‑ mu ’lɛɛ‑ ni, ’bhɛɛ‑ ‑o kan ‑sɔ ’ŋ ’lɛɛ ’ke ‑o ge ’ka ba ye; ’kooko‑ ’ka ‑gɔli’ ’la ’naza‑ ꞊pia, ’ka ’bhɛ ‑za ’ɛ ’yrɛbago ’sani‑ ’ŋ ’nule‑ pleŋ‑ ’ka ba ye. ’Ke ’bhɛ ꞊kla, ‑e nu klɛlɛ ’bhii‑ ’kaa ꞊naa ’ka zru ’ɛ ’kpɛn ’le, ’bhɛɛ‑ ’ka ’laa ’nalɛ‑ ’klin ’yi.
6’Bhɛɛ‑ ‑ka ‑za ’lɛɛ‑ ’bhɛ dɔ ’ka ’kpee dɔɔ: ’Ke mɛɛ ’la zan gba sa ꞊kpaa, ’bhɛ zan nu pɛbhaa sa ‑la ‑srɔɔwolɛ. ’Ke mɛɛ ’la zan gba ‑gbɛnɛ ꞊kpaa, ’bhɛ zan nu pɛbhaa ‑bebe ‑la ’srɔɔwolɛ. 7’Ka ’kpɛn do do ‑gɔli’ yɛkɛ‑ ’la ’nale‑ ‑dwa ’ka ’kpɛn do do ’kpee, ‑ka ’bhɛɛ‑ ’na. ’Ka ’laa ’nalɛ klin ’yi, ’bhɛ ’pegee kpaŋma. ‑Amasrɔyi mɛɛ ’la zan pɛ na ’bhɛ zrukpaale ’le, ’bhɛ zan ‑la ‑za sɔ ‑Waanbhaa’ ni. 8’Ke ’ka pɛ ‑naa ’bhɛ gbɛɛn‑ bhe, ’bhɛ ’seŋ ‑o ‑Waanbhaa’ ni ’kee‑ ‑za ’wlan ‑glɔɔn ’ɛ ’kpɛn klɛ ’ka ni, ’kooko‑ ’waati ’ɛ ’kpɛn ba ’ka maza ‑o pɛ ’oo pɛ ’la ma ’ka ’bhɛ ’srɔɔwo‑, ’ke ’ka ’kɔɔ pa ’kɛle‑ ’ezin‑, ’bhɛɛ‑ ’ka sɔ ‑za ’wlan ‑glɔɔn ’ɛ ’kpɛn klɛle‑. 9’Bhii‑ ‑a yɔɔndɛle ‑o ‑Waanbhaa’ a ’Sɛwɛ ’ɛ ’yi gɔnɛ‑ ’la gbɛɛn‑ dɔɔ:
«Mɛɛ ’la zan gbɛ ta ‑o taataa ’bhɛ pɛ na ’kɔɔfleŋzan mu ‑la ni, ’bhɛɛ‑ ‑ya pa ‑o ta.
’Bhɛɛ‑ ‑yaa’ wlanya ’ɛ ‑daŋ’ ’laa ‑o ’bhɛ ma ‑titi.»
10‑Waanbhaa’ ’la gba ’kpa pɛbhɛ mu na gba ’kpa mi ’ɛ ni, ’bhɛ ’pegee ’ke ‑ya ‑lɛbɔ’ pɛbhle na ‑a ni, ’yee‑ do ’kpɔ ’ɛ nu ’ka maza ‑o pɛ ’oo pɛ ’la ma ’bhɛ ’nalɛ‑ ’ka ni, ’bhɛɛ‑ ‑e ’ka ’kɔɔ pa ’kɛle‑, ’kooko‑ ’ke mɛɛ ’la zan mu mazadwa ’ka ma, ’mu sɔ pɛ ‑bebe ’srɔɔwole ’ka ’kɔɔ. 11‑E nu ‑za ’wlan ‑glɔɔn ’ɛ ’kpɛn klɛlɛ ’ka ni, ’kooko‑ ’ka sɔ mɛɛ ‑vin mu ’ɛ gbale‑ pɛ ba ’waati ’ɛ ’kpɛn ba. ’Ke ’o ꞊nwa, ’bhɛɛ‑ ’ka ‑gɔli’ ’la ꞊kpaa ’eke‑ ta, ’ke ’o ’bhɛ ’lɛnaa‑ ’waati ’la ba, mɛɛ ‑bebe nu ‑Waanbhaa’ ’pubɔlɛ, ’bhɛɛ‑ ‑wa ’tɔbhɔ‑ ’kaa‑ ’bhɔŋbapɛ ’ɛ ‑zayi’. 12‑Amasrɔyi ’ka nu ‑gɔli’ ’la ’kpalɛ‑ ’eke‑ ta, ’bhɛ ’laa nu klɛlɛ ‑Waanbhaa’ a mɛɛ ’weŋ mu ’ɛ maza ‑yanwopɛ drɔŋ ’le; ’duŋ‑ ’bhɛ nu ‑a klɛlɛ ’bhɛɛ‑ mɛɛ ‑bebe nu ’pubɔ‑ ’seri klɛlɛ ‑Waanbhaa’ ni. 13’Kaa‑ ’bhɔŋbapɛ ’la ’o nu ’bhɛ ’lɛnalɛ Zeruzalɛmu Zesu ’yi mu ’ɛ ni, ’bhɛ nu a zrɔnlɛ mɛɛ mu ni ’bhii‑ ’ka blɔɔle ’la ‑yoo ‑Waanbhaa’ ma ’bhɛ ‑o ’ke wlan ’le. ’Bhɛ ꞊nɔɔ Zesu ’yi mu ’ɛ nu ‑Waanbhaa’ ’tɔbhɔlɛ ’bhɛ ma, ’bhɛɛ‑ ‑o nu a yelɛ ’bhɛ ma ’bhii‑ ’kaa‑ pelawo zii’ dɔɔ ’ka ’kpale‑ ‑o Krisi a ‑Jan ’Nrale‑ ’ɛ ’yi, ’ka ‑o ’taawo zii’ ’bhɛ ‑jan ’ɛ ta. ’Ke ’bhɛ ꞊kla, ‑o nu ‑Waanbhaa’ ’tɔbhɔlɛ, ’ka ‑o ’ka ’kɔɔpɛ‑ mu ’la ’yiciɛn‑ zii’ ’ke ’ka bhɔ ’woo‑ mu ’pegee ‑kɔɔ’ nɛɛnɛ‑ ‑vin mu ’ɛ ’kpɛn ba ’bhɛ ‑zayi’. 14‑Waanbhaa’ ‑lileya ‑gbɛnɛ ’la ‑zrɔnna ’ka ni, ’bhɛ ‑zayi’, ‑o nu ‑o ’seriwolɛ ‑Waanbhaa’ ni ’kaa‑ ‑za ma ’ke ‑wa zrɔn ’ka ni ’bhii‑ ’ka ‑za sɔ ‑o ni. 15’Ŋ nɛɛnɛ‑ mu, ‑kɔɔ’ ‑Waanbhaa’ ’pubɔ‑ ‑a Gbe ’ɛ ’nale‑ ma ‑kɔɔ’ ni! ‑E ’kɔɔ‑ ‑gbaa ‑a Gbe ’la ba, waa sɔ ’bhɛ ’kpale pɛ ’kedo‑ ’kpɔ ma.
10PƆLU ‑O ‑A KLƐLE ’Ɛ ZESU A WINBƆWO MI ’LE ’BHƐ TA GWLEDAN ’ZI
‑Waanbhaa’ Pɔlu ’siila‑ ye ’la ’kaama‑, ‑yoo ’bhɛ ta gwledan ’zi
1’Mi Pɔlu ’gbu ‑le ‑za do ‑yrɛwo’ zii’ ’ka ma ‑gɛ, ‑yidɔɔya ’pegee wlanya ’la ‑woo Krisi ’yi ’mu ‑zayi’. ‑Wa pe ’ŋ ma dɔɔ ’ŋ ’yrɛ ’laa sɔ mɛɛ ‑yrɛ ba ’ke ’ŋ ’yoo‑ ’ka ‑din ’waati ’la ba, ’bhɛɛ‑ ‑wa pe ’ŋ ma ’ezin‑ dɔɔ mɛɛ ‑yrɛ ma ‑glɔɔ, ’ke ’ŋ ’pleŋgole ‑o ’ka ma ’waati ’la ba. 2’Mi ‑o ‑sromabɔ ’zi ’ka ni dɔɔ ’ke ’ŋ ‑ja ’ka ba ’waati ’la ba, ’ka ’laa ’wlalɛ‑ ’ŋ zi ’bhɛɛ‑ ’ŋ ‑jan ‑glɔɔ wo ’ka ni. ‑Amasrɔyi mɛɛ ’la zan mu ‑o ‑a pe ’zi dɔɔ ’o mɔɔ ‑o ’taawo zii’ bhaaplɛŋ ’kpeelɛdan gbɛya zi, ’ŋ nu ‑jan ‑glɔɔ ’wolɛ‑ ’bhɛ zan mu ’ɛ ni. 3Wlan ’ɛ ni, ’woo‑ ’ke bhaaplɛŋ mu ’le; ’bhɛɛ‑ ’duŋ‑, ’waa ‑o gwledan ’zi ’bhii‑ bhaaplɛŋ mu a pɛ gwledan gbɛya ’ɛ gbɛɛn‑. 4‑Amasrɔyi ’o gwledan gwledanpɛ mu ’la ’le, ’bhɛ mu laa ‑o ’ke bhaaplɛŋ mu a pɛ ’le. ’Bhɛ gwledanpɛ mu ’ɛ ‑glɔɔya’ ’ɛ da ‑Waanbhaa’ ‑la ba, ’bhɛɛ‑ ‑o sɔ ‑Setran’ a faŋgan‑ ’ɛ ’pegee ‑yaa’ ‑dawli’ maza mu ’ɛ ’siɛle. ’Bhɛɛ‑ ’ezin‑ ‑o sɔ bhaaplɛŋ ’kpeelɛdangbɛya ‑yɔɔ’ mu ’ɛ ’siɛle. 5’Bhɛɛ‑ bhaaplɛŋ mu a magbaandɛle ’tɔle‑ magbaandɛle ’ke ’bhɛ a klɛ ’bhɛɛ‑ ‑o ‑vin mu laa ‑Waanbhaa’ dɔ, ’o mɔɔ ’bhɛ ’kpɛn ’yisiɛ‑. ’Bhɛɛ‑ bhaaplɛŋ mu ’kpeejan‑ mu ’la ‑woo ’eyɔɔle ‑Waanbhaa’ ma, ’o ’mu kun ’bhii‑ ‑kaso ’yi mu ’kungbɛya gbɛɛn‑; ’bhɛɛ ’o ’mu mabɔɔ, ’kooko‑ bhaaplɛŋ sɔ dɔle‑ Krisi a ‑jan ’ɛ ꞊la. 6’Bhɛɛ‑ ’ke ’wa ꞊ya ’bhii‑ ’ka ‑o ’taawo zii’ ’o ’wojan‑ mu ’ɛ ’kpɛn ta ’elrele ’waati ’la ba, ’ke mɛɛ ’oo mɛɛ ’la zan ’o ’wojan‑ mu ’ɛ ’kafawoa; ’o nu ’bhɛ zan ’ɛ ’krowolɛ.
7’Kɛla ’bhɛ ‑o wlan ’le ‑ka ’bhɛ ‑glin doo! ’Ke mɛɛ do ’kpale‑ ‑o ‑a ‑yi ’bhii‑ ‑yoo ’ke Krisi a pɛ ’le, ’bhɛ zan ’a ’yaango‑ ‑a ’gbu ’kpee dɔɔ ‑yoo Krisi a pɛ ’le gɔnɛ‑ ’la gbɛɛn‑, ’o mɔɔ ’gbu ‑o ’ezin‑ Krisi a pɛ ’le ’bhɛɛ‑ gbɛɛn‑. 8‑Amasrɔyi ‑Waanbhaa’ faŋgan‑ ’la ꞊naa ’o ni ’ka mu ta, yaa ’bhɛ ’nalɛ‑ ’o ni ’ka ’siɛ zayi’, ’duŋ‑ ‑e ’bhɛ ꞊naa ’o ni ’kooko‑ ’o ’bhɔ ’ka ba, ’bhɛɛ‑ ’kaa‑ ’kpaleya ’ɛ baan’ ge ’klalele ‑a ba. ‑E ’bhɛ faŋgan‑ ’la ꞊naa ’o ni, ’ali‑ ’ke ’mi ’ŋ magbaandia sa ’bhɛ ’yi, ’bhɛ ’laa ‑yraladɔ ’ŋ ma. 9Yaa klɛlɛ ’ka ni ’bhii‑ ’mi ‑a zi ’bhii‑ ’ŋ ‑gblaan ’kla ’ka ’yi ’ŋ ’lɛtrɛ mu ’la kpa ’ka ni ’mu ’le. 10‑Amasrɔyi mɛɛ ’ke mu ‑o ‑a pe ’zi dɔɔ ’mi Pɔlu ‑jan mu ’la kpa ’an ’lɛtrɛ mu ’ɛ ’yi ’mu ‑o ’eglɔɔle, ’bhɛɛ‑ ’mu la mɛɛ ma; ’bhɛɛ‑ ’duŋ‑ ’ke ’ŋ ‑yoo ‑o ’pleŋ‑ ’waati ’la ba, faŋgan‑ ’laa ‑o ’ŋ ’gbu ta, ’bhɛɛ‑ ’an ‑janwo’ gbɛya ’ɛ ’bhɛ ’laa mɛɛ zru kun. 11’Ke mɛɛ ’la zan mu ‑o ’bhɛ ’yansi jan mu ’ɛ wo zii’ ’mi ma bhe, ’mu ’a ’yaango‑ dɔɔ ’o ‑janwo’ gɔnɛ‑ ’la gbɛɛn‑ ’waa‑ ’lɛtrɛ mu ’ɛ ’yi, ’waa nu ’bhɛ ‑janwo’ gbɛya ’ɛ mabɔɔlɛ ’ke ’o ‑ja ’waati ’la ba ’ka ba ye.
12Wlan ’ɛ ni, mɛɛ ’la zan mu ‑o ’gbu ye mɛɛ gblaan mu ’le, yaa sɔ dɔle‑ ’o mɔɔ ’kpee ’ke ’wa pe ’o ’pegee ’bhɛ zan mu ‑o do, ’bhɛɛ‑ ’waa sɔ ’o ’gbu danle‑ ’mu ma. Waa ‑o dan pɛ ‑bhɛɛke’ ma, ’ke yaa ’e go ‑o ’gbu ba; ’bhɛ ‑za ’la bhe ’bhɛ ’laa ‑o ’ke ‑zadɔkleya ’le ɛɛ? 13’Ke ‑yoo ’o mɔɔ a pɛ ’le, ’waa nu ’o ’gbu magbaandɛlɛ, ’ke ’bhɛ kan ‑a ‑daŋ’ ’ɛ ta. ‑Waanbhaa’ ye yɛkɛ‑ ’la gbɛkpaa‑ ’o ’kɔɔ ’ke ’o ‑ja ’bhɛ ’wole‑ ’ɛ ’le ’fɔ ’ka ba ye, ’bhɛ ‑daŋ’ ‑o yrɛ ’la ꞊nɔɔ, ’waa‑ pɛ ’ɛ ‑daŋ’ ‑o ’bhɛɛ‑ ꞊nɔɔ. 14’O gelawoa ’ka ba, ’waa ’kanlɛ‑ ’o ‑daŋ’ ’ɛ ta; ‑amasrɔyi ’o mɔɔ ’gbu ‑le ‑ja ’ka ba ye Krisi a ‑Jan ’Nrale‑ ’wole‑ ’ɛ ’le. 15’Bhɛ ’yi bhe, ’waa ’kanlɛ‑ ’o ‑daŋ’ ’ɛ ta, ’bhɛɛ‑ ’waa ’o ’gbu magbaandɛlɛ mɛɛ ‑bhɛɛke’ mu ye ’la ꞊woa ’bhɛ ’yi. ’Bhɛɛ‑ drɔɔn’ ’o ’yri ‑o ‑a ta ’bhii‑ ’kaa‑ ’kpaleya ’ɛ baan’ nu ’klalɛ‑ ‑a ba, ’bhɛɛ‑ ’bhɛ klɛgbɛya ’ɛ ’yi, ’waa‑ ye ’ɛ baan’ nu ‑yidɛlɛ, ’duŋ‑ ’ke ’bhɛ ’laa kan ‑Waanbhaa’ ‑daŋ’ ’la ’kpalaa ’a ma ’bhɛ ta. 16’Bhɛ ’yi bhe ’tɛ, ’o nu gelɛ Krisi a ‑Jan ’Nrale‑ ’ɛ ’wolɛ‑ ’klɛɛn mu ’la ‑woo ’ka ‑zanta’ ’mu ’yi. ’Bhɛɛ‑ ’duŋ‑, ’waa‑ zi ’bhii‑ ’woo ’gbu magbaandɛ mɛɛ ‑bhɛɛke’ mu ’woye‑ ’ɛ ’yi.
17’Bhɛ ‑za ’ɛ ma jan yɔɔndɛle ‑o ‑Waanbhaa’ ‑a ’Sɛwɛ ’ɛ ’yi dɔɔ: «’Ke mɛɛ ’la zan ‑o ’bhɛ ’gbu magbaandɛle, ’bhɛ zan ’bhɛ ’gbu magbaandɛ Mɛɛzan ‑Waanbhaa’ ‑za ’la ꞊kla ’bhɛɛ‑ ’yi.»18Wlan ’ɛ ni, mɛɛ ’la zan ’a pe ‑a ’gbu ma dɔɔ ‑yoo ’ke mɛɛ wlan ’le, Mɛɛzan ‑Waanbhaa’ laa dɔ ’bhɛ zan a ‑za ꞊la; ’duŋ‑ ’yee‑ ‑Waanbhaa’ mɛɛ ’la zan ’tɔ wlan pe, ‑e dɔ ’bhɛɛ‑ zan a ‑za ꞊la.
11Pɔlu ’pegee bhla ma Zesu ’winbɔwo mu ’ɛ ’pleŋza‑.
1’E! ’Ke ’ka ’yaa sɔ bi ’an ‑kwa ’ɛ sa ’yikunle! ’Duŋ‑, ‑kaa sa ‑yikun’! 2’Ka ‑za ’sɔgbɛya ‑yɔɔ’ ’ɛ ’kɔɔ ’ŋ ni, ‑asiikɔɔ ’ŋ ’yoo‑ zrwanwo ’zi ’ka ta, ’bhɛ zranwole ’ɛ da ‑Waanbhaa’ ‑la ba. ’Ka ‑o ’bhii‑ ‑gblanɛ ’la yaa ’gwlaanza‑ ’yaango‑, ’bhɛɛ‑ ’ke ’mi ’ŋ ’liiwli‑ ꞊naa ‑a ’fluwoza ta ’gwlaan‑ do ’kpɔ ‑la ’kɔɔ, ’bhɛ ’gwlaan‑ ’ɛ ’bhɛ ‑le ’ke Krisi ’le. ’Mi ‑o ‑a zi ’bhii‑ ’ka klɛ ’weŋ. 3’Duŋ‑ ’ka blɔɔle ’la ‑yoo Krisi ma gɔnɛ‑ ’la gbɛɛn‑ bhe, ’mi ‑o ‑gblaan ’zi dɔɔ ’ke ’ka ’ka ’kpeejan‑ mu ’ɛ mabɔɔ, ’bhɛɛ‑ ’ka go ’yee‑ Krisi zi; ’bhii‑ ‑Setran’ lii ꞊wlaa mlɛ ’ɛ ’yi gɔnɛ‑ ’la gbɛɛn‑, ’bhɛɛ‑ ‑e Ɛvu ’yinia꞊ ‑dawli’ ma. 4‑Amasrɔyi ’ke mɛɛ do ꞊nwa ’ka ba, ’bhɛɛ‑ ’kee‑ Zesu ’bhɛɛke do ‑a ‑janwoa ’ka ni ’ke ’bhɛ gole ‑o ’o Zesu ’la ’bhɛ a ‑janwoa ’ka ni ’bhɛ ma, ‑ ’kee‑ lii ’bhɛɛke a ‑janwoa ’ka ni ’ke ’bhɛ gole ‑o Lii ’Weŋ ’la ’ka ’bhɛ ’srɔɔwoa꞊ ’ka zru ’ɛ ’yi ’bhɛ ma; ’bhɛɛ‑ ’kee‑ ‑Jan ’Nrale‑ ‑bhɛɛke’ do ꞊woa ’ka ni ’ke ’bhɛ gole ‑o ’o ’kɛla ’bhɛ ꞊woa ’ka ni ’bhɛ ma. ‑Mɛla ma ’bhɛɛ‑ ’bhɛ yrɛ do ’kpɔ ’ɛ ꞊nɔɔ bhe ’ka dɔ blaale‑ ’mu ꞊la ɛɛ?
5Wlan ’gbu ’ɛ ni, ’ka ’bhɛ winbɔwo mu ’la kun ’bhii‑ ’winbɔwo mu ’tɔbhɔle, ’mi ’kpee ma waa kan ’mi ta ‑za ’kedo‑ ’kpɔ ’yi. 6’Ali‑ ’ke ’naa ‑o ’ke ‑janwo’ mi ‑gbɛnɛ ’le mɛɛ mu ‑yrɛ ta; ’bhɛɛ‑ ’duŋ‑ ‑zayaangoleya a pɛ zi ’ɛ ta, ’mi ’a ’ke dɔ ’bhɛ ’yi. ’O ’bhɛ ‑zrɔnna ’ka ni ’waati ’ɛ ’kpɛn ba, ’bhɛ ’pegee klɛgbɛya ’ɛ ’kpɛn ’yi.
7’Mi ‑Waanbhaa’ a ‑Jan ’Nrale‑ ’ɛ ’wolawoa ’ka ni ’ke ’naa pɛ ’kedo‑ ’kpɔ kun ’ka ’kɔɔ, ’bhɛɛ‑ ’mi ’ŋ ’gbu mazinalawoa, ’kooko‑ ’ŋ ’ka mu ‑lawlɛn’, taa‑ ’mi ‑za ’yɔɔ‑ ‑la ꞊kla ’bhɛ ’le bhe ɛɛ? 8’Ŋ ’yaa‑ yewo ’zi ’ka mu ni ’ka ba ’waati ’la ba, ’mi ‑dwa ‑a ‑la ’ke ’ŋ Zesu ’yi mu ‑lɛ ‑bhɛɛke’ mu ’kɔɔpɛ‑ mu kun, ’kooko‑ ’ŋ sɔ bhɔle‑ ’ka mu ba. ’Ŋ ‑gɔli’ ꞊kwan ‑o ’kɔɔ, ’bhɛɛ‑ ’duŋ‑ ’naa yewolɛ ‑o ni, ’fɔ ’ŋ yewoa‑ ’ka mu ‑la ni. 9’Bhɛɛ‑ ’ŋ ’yaa‑ ’ka ba ’waati ’la ba, ’naa ’ŋ ’gbu ’kwe ’kpalɛ‑ mɛɛ ’kedo‑ ’kpɔ ’wiiŋ‑ ’ke ’ŋ maza ‑yaa dɔ ‑gɔli’ ma. ‑Amasrɔyi, ’o nɛɛnɛ‑ mu ’la ‑daa Masedwani ’mu ‑le ’ŋ maza ‑yaa pɛ ’oo pɛ ’la ma ’mu ꞊naa ’ŋ ni. ‑Za ’kpɛn ’yi, ’naa ’tolɛ‑ ’ke ’ŋ klɛ ’ka ta ’kwe ’le, ’bhɛɛ‑ ’ŋ nu ’bhɛɛ‑ klɛlɛ ’taŋii. 10’Bhɛ ‑le ’mi ‑baapɛ’ ’le. ’Duŋ‑ Krisi a pɛ wlan ’ɛ ma, mɛɛ ’kedo‑ ’kpɔ ’laa nu ’bhɛ ‑baaza’ ’ɛ ’saawole ’ŋ ’kɔɔ Akayi ’klɛɛn ’lɛɛ‑ ’kpɛn ’yi ‑gɛ. 11’Ŋ ’bhɛ pe zii’ win ’ɛ ‑dela ma ɛɛ? ’Bhɛ win le dɔɔ ’ka ‑za ’laa sɔ ’mi ni ɛɛ? ’Duŋ‑ ’ka ‑za sɔ ’ŋ ni gɔnɛ‑ ’la gbɛɛn‑ ‑Waanbhaa’ ’gbu ’bhɛ ’yaango‑.
12’Ŋ ’yoo‑ yewo ’zi ’ka ba gɔnɛ‑ ’la gbɛɛn‑, ’ŋ nu bolɛ ’bhɛɛ‑ yewogbɛya do ’kpɔ ’ɛ ta. ’Ke ’ŋ ’bhɛ ꞊kla, mɛɛ ’la zan mu ‑o ’a ’pe zii’ ‑o ’gbu ma ’kaa ‑woo ’ke Zesu a ’winbɔwo mu ’le, ’bhɛ ’pegee ’ke ‑wa pe ’zi ’ezin‑ dɔɔ ’waa‑ pɛ yewogbɛya ’ɛ ’pegee ‑waa’ pɛ mu ’ɛ ‑woo do, ’bhɛ zan mu laa sɔ ’mu ’gbu magbaandɛle. 13’Bhɛ mɛɛ ‑glɔɔn mu ’ɛ ‑woo ’ke bhla ma Zesu a ’winbɔwo mu ‑la ‑le, ‑o woye ’ɛ ’bhɛ ‑o ’ke mɛɛ ‑yini’ pɛ ’le. ‑Woo ’gbu klɛ ’bhii‑ Krisi a winbɔwo mu. 14’Bhɛ ’laa ‑o ’ke ’kpeelɛni maza ’le ’o ’yrɛ ’yi, ‑amasrɔyi ‑Setran’ ’a ’gbu mabɔɔ, ’bhɛɛ‑ ‑e klɛ ’bhii‑ ‑Waanbhaa’ a ‑mlɛkɛ’ do ’la bhi ‑yrayra ’bhɛ gbɛɛn‑. 15’Bhɛ ’laa ‑o ’ke ’kpeelɛni maza ’le ’ezin‑, ’ke ‑yaa’ pɛ yewonɛ mu ’ɛ ‑woo mabɔɔ, ’bhɛɛ‑ ‑woo ’gbu klɛ ‑Waanbhaa’ a yewonɛ ’lɛdɔɔle mu ’le. ’Duŋ‑ ‑o ‑lɛyanyrɛ nu klɛlɛ ’ke ‑Waanbhaa’ a ‑kpan baalele ‑o ta ‑o klɛza ‑yɔɔ’ mu ’ɛ ma.
Pɔlu ‑yrɛn mu ’la ’yikwan꞊ ‑yaa’ Zesu a ’winbɔwoleya ’ɛ ’yi
16’Mi ‑o bɔ ’zi ’ezin‑ ’bhɛ ‑jan do ’kpɔ ’ɛ ta ’ke ’an pe ’ka ni dɔɔ mɛɛ ’kedo‑ ’kpɔ ’laa ’mi ’kunlɛ‑ ’bhii‑ ‑kwanii’ do. ’Duŋ‑ ’ke ’ka ’mi ꞊kwan ’bhii‑ ‑kwanii’ do, ‑ka dɔ ‑a ‑la ’ke ’ka ’ka ’trɔnkpa ’mi ’wojan‑ ’ɛ ꞊la, ’kooko‑ ’mi sɔ ’ŋ ’wasowole sa. 17’Mi ‑o ’kɛla ’wo zii’ ’ke ’mi ’ŋ ’wasowo ’bhɛ ’laa ‑o da ’zi Mɛɛzan ‑Waanbhaa’ ba; ’ŋ ’yoo‑ ‑janwo’ zii’ ’bhii‑ ‑kwa ‑o ’ŋ ’yi. 18’Bhɛɛ‑ ’duŋ‑, mɛɛ ‑bebe mu ‑o ’wasowo zii’ ‑waa’ bhaaplɛŋya ’ɛ ma, ’mi sɔ ’ŋ ’gbu ’wasowole ’ezin‑. 19’E! Ka mu ’la ’ka ‑o ‑zadɔ’ mu ’le, ’ka dɔ ‑a ‑la ’ke ’ka ‑kwanii’ mu klɛza mu ‑yikun’ ɛɛ! 20Mɛɛ ’la zan mu ’ka klɛ ‑waa’ lu mu ’le, ’bhɛɛ‑ ‑o ’ka tabhle; ’bhɛ ’pegee ‑o ’ka ’kɔɔfleŋ balaa’ ’ka ’kɔɔpɛ‑ mu ’ɛ ’kpɛn ’silele; ’bhɛɛ‑ ’ke ‑woo ’ka mavɛɛ; ’bhɛ ’pegee ‑o ’ka ’trɔn zɔn, ’ka ’bhɛ zan mu ’ɛ klɛza mu ’ɛ ’yikun‑. 21‑Ɛɛ! ’Bhɛ klɛ ’waa‑ faŋgankleya ‑la ma, ’bhɛɛ‑ ’waa ’sɔlɛ‑ ’bhɛ ’yansi za mu ’ɛ klɛle‑ ɛɛ? ’Ŋ bhe ’bhɛ ‑yraladɔ ’mi ma ’dɛ.
’Bhɛɛ‑ ’duŋ‑, ’kee‑ sɔ dɔle‑ mɛɛ ’ke ’kpee ’bhɛɛ‑ ‑ya baa ‑za ’ke ’yi; ’mi ’ezin‑ ’mi ’gbu sɔ ’bhɛ klɛle‑; ’ali‑ ’ke ’ŋ ‑janwoa ’bhii‑ ‑kwanii’ do gbɛɛn‑. 22’Ke ‑wa ꞊pia dɔɔ ‑woo ’ke Ebre mu ’le, ’mi ’duŋ‑ ’mi ’gbu ‑o Ebre mi ’le ’ezin‑. ’Ke ‑wa ꞊pia dɔɔ ‑woo ’ke Izraɛli mu ’le, ’duŋ‑ ’mi ’gbu ‑o ’ezin‑ ’ke Izraɛli mi ’le. ’Bhɛɛ‑ ’ke ‑wa ꞊pia dɔɔ ‑woo ’ke Abraamu ’nranɛ‑ mu ’le, ’mi ‑o ’ezin‑ ‑a ‑nranɛ ‑kpɔsɔɔ ’ɛ do ’le. 23’Ke ‑wa ꞊pia dɔɔ ‑woo ’ke Krisi a yewonɛ mu ’le, ’mi ‑o ’ezin‑ ‑yaa’ yewonɛ ’le, ’bhɛɛ‑ ’mi kan ‑o ’kpɛn ta ’egbɔɔn gbɔɔnle’. ’Ŋ ’yoo‑ ‑janwo’ zii’ ’bhii‑ mɛɛ ’la zan ’gbu ŋgblo laa ‑o ’bhɛ ta. ’Mi yewoa꞊ ’ke ’bhɛ kan ‑o ’kpɛn ta, ‑o ’mi ꞊bwa ‑kaso ’yi ’ebebele ’ke ’bhɛ kan ‑o ta; ‑o ’mi tafia꞊ ’ebebele ’ke ’bhɛ kan ‑o ta. ‑A ‑lɛbwa sa ’ke ’ŋ ’winbo‑ ‑a ‑yi ’waati ’ke ba. 24Zuufu mu ’ɛ ‑woo ’ŋ ꞊zwan gaan ’soo. ’Bhɛɛ‑ ’duŋ‑, ’ŋ zɔn gbɛ do do ’ɛ ’yi, ‑woo ’ŋ tafia꞊ gbaŋbhlɛ yan mia do bhɛ vu ta ’srwayiziɛ. 25Romɛ mu ’ɛ ’mu ’ŋ tafia꞊ ‑glɔɔn yaga, ’bhɛɛ‑ mɛɛ mu kpoti mu ꞊paa ’ŋ ma ‑glɔɔn do ’ŋ dɛ zayi’. ‑Yitakoŋ ’ɛ ’siɛla‑ ’ŋ ’le ‑glɔɔn yaga wɛyi‑ ’ɛ ta, ’bhɛɛ‑ ’ŋ ‑bi do ’pegee ‑yrekpaa’ do ꞊kla ‑yi ’ɛ ta. 26’Ŋ ‑ja ’taa ‑bebe ta ’ŋ gaan ma; ’duŋ‑ ’bhɛ ꞊kla ’ebebele ’ke ’ŋ ’winbo‑ ‑a ‑yi bi yue ’pale‑ mu ’ɛ ba, ’bhɛ ’pegee mɛɛ dɛ mu ’ɛ ’kɔɔ. ’Ali‑ ‑a ‑lɛbwa sa ’ke ’ŋ ’winbo‑ ‑a ‑yi ’ŋ ’gbu a ’klɛɛn ’yi Zuufu mu ’ɛ ’pegee Zuufu kle mu ’ɛ ’kɔɔ. ’Kee‑ kpa ‑wa mu ta oo, ’kee‑ kpa ‑bɔnyi’ yrɛ mu nɔɔ‑ ta oo, ’kee‑ kpa wɛyi‑ ta oo, ’kee‑ kpa yrɛ ’ɛ ’kpɛn ta, ‑a ‑lɛbwa sa ’ke ’ŋ ’gbu winbo‑ ‑a ‑yi. ’Ali‑ ’o nɛɛnɛ‑ mu ’la ‑wa pe ‑o ’gbu ma dɔɔ ‑woo ’ke Zesu ’yi mu ’le, ’bhɛɛ‑ ’duŋ‑ ’ke waa ‑o ’bhɛ ’le wlan ’ɛ ma, ‑a ‑lɛbwa sa ’ke ’ŋ ’winbo‑ ‑a ‑yi ’mu ’kɔɔ. 27’Mi ye ‑glɔɔ mu ꞊woa, ’bhɛɛ‑ ’ŋ ’trɛbhwa꞊. ’Waati ‑bebe ba, yi laa ’sɔlɛ‑ ’kpale ’ŋ ’yrɛ ta. ’Mi gbɔn ’pegee ‑yi ’mi ‑lrɔ ’yikwan꞊. ’Bhɛɛ‑ ’waati ‑bebe ba, ’mi ’suŋwlaa‑ kpaŋma. ’Mi ꞊bwa ’ebebele ‑niinii’ ’yi ’ŋ tafleŋ‑ ’le. 28’Naa sɔ ‑a ’kpɛn ’pele. ’Bhɛɛ‑ ’ke ’bhɛ kpa ’kɛla bhe ’bhɛ ta, yi ’oo yi, Zesu ’yi mu ‑lɛ mu ’ɛ ’kpɛn ’klaŋkeba mu ’ɛ ’kpɛn ’ŋgami ‑o ’ŋ ma. 29’Ke Zesu ’yi mi do ’kpaleya faŋgan‑ ‑gwa ‑a ta, ’bhɛ ‑za ’ɛ la ’mi ma ’bhii‑ ’mi ’gbu ‑le ’ke ’bhɛ zan ’ɛ ’le. ’Ke mɛɛ do ‑balaa’ ‑za ’yɔɔ‑ ’yi, ’bhɛ ’la ’ŋ ma ’kee‑ kan a ‑daŋ’ ta.
30’Kee‑ ’kpa bi ’bhii‑ ’mi sɔ ’ŋ ’gbu magbaandɛle, ’mi ’yaa‑ nu ’ŋ magbaandɛlɛ ’mi ’gbu a faŋgankleya ’ɛ ’yi. 31Mɛɛzan Zesu Dɛ ‑Waanbhaa’ ’a ’yaango‑ ’bhii‑ ’naa bhla pe. Bhaa mɔkpɛn’ ’a ’tɔbhɔ ’waati ’ɛ ’kpɛn ba! 32‑Yrekpaa’ do, ’ŋ ’yaa‑ ’waati ’la ba Damasi, ’bhɛ ꞊nɔɔ ‑bhleŋgbe Aretasi a ‑janmatii ’ɛ ‑ya ꞊pia mɛɛ ’ke mu ni dɔɔ ’mu ’e ’yrɛkpa zi mu ’la wla ‑wa ’ɛ ’kpee ’mu ba ’mi kun zayi’. 33Zesu ’yi mu ’ɛ ’mu ’mi ꞊bwa ciɛ do ’yi, ’bhɛɛ‑ ‑o bhlɛ ‑yrela bhɛ ma; ’ke ‑woo ’ŋ ’kanle ’fɛgwlɛ‑ ’ɛ trala, ’bhɛɛ‑ ‑woo ’ŋ zinaa’ ‑a zanta’. ’Bhɛ klɛgbɛya ’ɛ ’yi, ’ŋ ꞊swa ‑bhile’ ’yee‑ ‑janmatii ’ɛ ’kɔɔ.
12Pɔlu pɛ ’la ꞊ya ‑yrɛ zi yele do ’yi
1’Ŋ sɔ ’ŋ ’gbu magbaandɛle ɛɛ? ’Duŋ‑ ’bhɛ ’laa ‑za ’ke ’yanwo‑ mɛɛ ma. ’Ŋ ’yoo‑ zan Mɛɛzan ‑Waanbhaa’ ‑za mu ’la ‑zrɔnna ’ŋ ni ‑yrɛ zi yele ’yi ’mu ba janwolɛ. 2’Mi Krisi ’yi mi do dɔ, ‑za do ꞊kla ‑a ni ’bhɛ lɛɛ vu ta yiziɛ ‑le ‑gɛ ‑zɔn. ’Bhɛ ‑za ’ɛ ’bhɛ ‑le dɔɔ ‑Waanbhaa’ ’a ꞊sia, ’bhɛɛ‑ ’bhɛ ‑ja ’kɛle‑ ’bhɛ ’yaayrɛ‑ ’ɛ ꞊nɔɔ laflɛ’ ‑daŋ’ ma. ’Ke ‑ya ꞊sia kpataakpa ‑a ’flɛ ’ɛ ’yi oo, ’ke ‑ya ꞊sia ‑Waanbhaa’ a ‑yrɛ zi yele ‑la ‑yi oo, ’naa ’bhɛ dɔ. ‑Waanbhaa’ do ‑kplɛn ‑le ’bhɛ dɔ. 3’Mi ’a ’yaango‑ ’bhii‑ ‑Waanbhaa’ ‑ja ’bhɛ ’gwlaan‑ ’ɛ ’le ’fɔpe laflɛ’ ‑daŋ’ ma. ’Duŋ‑ ’kee‑ ‑ja ‑a ’flɛ ’ɛ ’bhɛɛ‑ ’yi oo, ’ke yaa gelɛ ’bhɛ ’yi oo, ’naa ’bhɛ dɔ ’ke yaa ’e go ‑Waanbhaa’ do ‑kplɛn ba. 4‑Waanbhaa’ ’a ’silawoa, ’bhɛɛ‑ ’bhɛ ‑ja ’kɛle‑ ’bhɛ ba, ’kee‑ ‑jan ’ke mu male‑ ’bhɛ ꞊nɔɔ: yaa dɔ bhaaplɛŋ ’kpee ’kee‑ ’bhɛ ‑jan mu ’ɛ wo bhaaplɛŋ wli ’yi, ’bhɛɛ‑ ’bhɛ ’seŋ ’laa ‑o bhaaplɛŋ ni ’kee‑ ’bhɛ wo. 5’Mi sɔ ’mi ‑baale’ ’bhɛɛ‑ mɛɛ ‑glɔɔn ’ɛ ’yi; ’duŋ‑ ’mi ’naa sɔ ’ŋ ‑baale’ ’ŋ ’gbu ’yi. ’Mi sɔ ’ŋ ‑baale’ pɛ ’la ’yi ’bhɛ ‑le ’mi a pɛ faŋgankleya ’ɛ ’le. 6’Ke ’mi ’yaa‑ zi ’bhii‑ ’mi ’ŋ ’gbu magbaandɛ, ’naa ‑yaa nu klɛlɛ ‑kwanii’ ’le, ’ŋ ’yaa‑ nu wlan ’te ‑la pelɛ. ’Duŋ‑ ’naa ‑a zi ’bhii‑ ’mi ’ŋ ’gbu magbaandɛ, ’kooko‑ ’mi ‑o ‑za ‑glɔɔn ’la klɛ ’zi, ’bhɛ ’pegee ’mi ‑o ‑jan ‑glɔɔn ’la ’wo zii’ mɛɛ mu ‑yrɛ ma, waa nu ’ŋ ’yelɛ‑ mɛɛ gblaan do ’le ’ke ’bhɛ kan ’mu ta.
7’Bhɛ mɛɛ ’kpeelɛni maza ‑gbɛnɛ mu ’la ‑e ’mu ‑zrɔnna ’ŋ ni ‑yrɛ zi yele ’ɛ ’yi ’mu ‑zayi’, ’bhɛ ’pegee, ’kooko‑ ’naa ’ŋ ’gbu magbaandɛ ’mu ’yi, ’yee‑ ‑Waanbhaa’ ‑yrɛn ’yɔɔ‑ do ꞊kpaa ’ŋ ’flɛ ’ɛ ta; ’bhɛ ‑o ’bhii‑ ‑Setran’ a winbɔwo mi do ’la ’woye‑ ‑le ’ke ‑yrɛnkpalele ’ŋ ta, ’kooko‑ ’naa sɔ ’ŋ ’gbu magbaandɛle. 8’Mi ‑sromabwa Mɛɛzan ‑Waanbhaa’ ni ‑glɔɔn yaga dɔɔ ‑yoo ’ŋ go ’bhɛ ‑yrɛn ’ɛ ’yi; ’bhɛɛ‑ ‑yaa dɔlɛ ‑a ꞊la. 9Drɔɔn’ ‑ya ꞊pia ’ŋ ni dɔɔ: «’Ŋ lilawo zii’ ’e ma, ’bhɛ ’e ’yibhɔ‑, ‑amasrɔyi ’ke faŋgan‑ ’laa ‑o ’e ta ’waati ’la ba, ’mi a pɛ ‑glɔɔya’ ’ɛ zrɔn bhla ‑le ’bhɛɛ‑ ’le.»
’Bhɛla‑ ‑zayile, ‑e sɔ ’mi ni ’ke ’mi ’ŋ ’gbu baa ’ŋ ’gbu a faŋgankleya ’ɛ ’yi, ’kooko‑ Krisi a ‑glɔɔya’ ’ɛ ’bhɛ bo ’ŋ ta. 10’Bhɛla‑ ‑zayile, ’ŋ zrukpaale ‑o ’ke faŋgan‑ ’laa ‑o ’ŋ ta oo, ’ke ‑woo ’ŋ ‑zwanwoa oo, ’ke ‑za ‑glɔɔ ‑o ’ŋ ta oo, ’ke ‑o ‑yrɛnkpaa ’ŋ ta oo, ’bhɛɛ‑ ’ke ‑o ’trɛbhɔ ꞊kpaa ’ŋ ta oo, ’mi ’a ’yaango‑ ’bhii‑ ’ŋ ’mu ’kpɛn ’yikun zii’ Krisi ‑la ‑zayi’. ‑Amasrɔyi ’ke faŋgan‑ ’laa ‑o ’ŋ ta ’waati ’la ba, Krisi ’bhɛ a pɛ ‑glɔɔya’ ’ɛ wla ’ŋ ’yi, ’bhɛɛ‑ ’waati ’ɛ ba, ’bhɛɛ‑ ’ŋ dɔ ’eglɔɔle.
Pɔlu ’laa pɛ ’kedo‑ ’kpɔ ’kunlɛ‑ Korɛnti Zesu ’yi mu ’ɛ ’kɔɔ
11’Mi ‑o ‑janwo’ zii’ ’bhii‑ ‑kwanii’ do gbɛɛn‑! ’Duŋ‑ ’bhɛ ‑daa ’ka mu ’gbu ‑la ba. ’Ka mu ’gbu ‑le ‑yaa sɔ ’mi ’tɔ wlan pele‑ mɛɛ mu ‑yrɛ ma. ’Ali‑ ’ke ’naa ‑o ’ke pɛ ’kedo‑ ’kpɔ ’le ’ka ’yrɛ ’yi, ’ka ‑o ’kaa‑ winbɔwo mu ’tɔbhɔle mu ’la ‑za ’kun zii’ ’eglɔɔle, ’mu mabhaa laa bhɔ ’mi ta ‑za ’kedo‑ ’kpɔ ’yi. 12’Ŋ ’yaa‑ ’ka ba ye ’waati ’la ba, ’ka ’ŋ zrubakpaagbɛya ‑gbɛnɛ ’ɛ ꞊ya. ’Ka ‑Waanbhaa’ a ‑glɔɔya’ ’ɛ ’tɔɔmasie mu ’ɛ ‑glɔɔn ’ɛ ’kpɛn ꞊ya, ’bhɛ ’pegee ’kpeelɛni maza ‑gbɛnɛ mu ’pegee ’sɔle‑ maza mu. ’Bhɛ klɛza mu ’la bhe, ’mu ‑le ’a zrɔn ’bhii‑ ’mi ‑o ’ke Zesu a ’winbɔwo mi ’le. 13’Bhɛ ya ’ɛ ’yi, ’mi ‑mɛ pɛ ‑za ’wlan ‑la ꞊kla ‑Waanbhaa’ a mɛɛ ‑vin mu ’ɛ ni, ’bhɛɛ‑ ’naa ’bhɛ ’yansi za klɛlɛ ’ka mu ni ɛɛ? ’Ke yaa ’e go ’naa klɛlawolɛ ’ka ta ’kwe ’le ’bhɛ ba. ’Ke ‑yoo ’bhɛ ’le, ’ka ’zoole‑, ’ŋ ŋgblo ‑o ’ka gaan ‑la ’bhɛ ma.
14’Mi ‑o zan gelɛ ’an ’taa yaga mi ’la ta ’ka ba ye bhe, ’naa nu ’ŋ ’gbu ’lɛbɔ‑ ’kwe ’kpalɛ‑ ’ka ’wiiŋ‑. ’Naa ‑o ’ka ’kɔɔpɛ‑ mu ’ɛ zi, ’duŋ‑ ’ka mu ’gbu ‑la ‑za ‑o ’ŋ ma. Wlan ’ɛ ni, ‑nɛ ’fiɛntrɔnnɛ mu ’laa ‑gɔli’ glin ’bhɛɛ‑ ‑woo yapɛ mu ’ɛ ’lɛbɔ‑; ’duŋ‑ ‑o yapɛ mu ‑le ‑gɔli’ glin ’bhɛɛ‑ ’mu ‑o ‑lɛbɔ’ ’bhɛ ’le. 15’Ke ‑yoo ’mi a pɛ ’le, ’ŋ zru ‑o ’ŋ ’kɔɔpɛ‑ ’tɔle‑ ’ŋ ’kɔɔpɛ‑ nale ma ‑o ni, ’ke ’mi ’gbu kpa ’bhɛ ta. ‑Ayile, ’ke ’ka mu ‑za sɔ ’mi ni ’eglɔɔle ’bhɛ gbɛɛn‑ bhe, ’bhɛ ’laa sɔ ‑a klɛle‑ ’bhɛɛ‑ ’mi ‑za sɔ ’ka mu ni ’ezin‑ ɛɛ?
16’Ka ’gbu ’a ’yaango‑ ’bhii‑ ’naa ’ŋ ’gbu ’lɛbɔ‑ ’kwe ’ɛ dɔlɛ mɛɛ ’kedo‑ ’kpɔ ’wiiŋ‑. ’Duŋ‑ ‑dɔke’ ’ka ’pleŋ‑ mɛɛ ’ke mu nu ‑a pelɛ dɔɔ: «Pɔlu bakanle laa ‑o! ‑Yaa’ ‑dawliya ’ɛ ma, ‑yoo’ ’kɔɔpɛ‑ mu ’ɛ ꞊bhla.» 17’Mi mɛɛ ’la zan mu winbwa‑ ’ka ba ye, taa‑ ’mu ‑dawli’ ꞊kpaa ’ka gbɛ ta, ’bhɛɛ‑ ’mu ’ka tabhla‑ ɛɛ? 18’Mi ‑sromabwa Titi ni dɔɔ ’bhɛ ge ’pwɛ‑ ’ka ta ye, ’bhɛ ’pegee ’o nɛɛnɛ‑ ’la ’ka ’bhɛ dɔ bhe. Taa‑ Titi ‑dawli’ ꞊kpaa ’ka gbɛ ta ’bhɛɛ‑ ‑e ’ka ’kɔɔpɛ mu ’ɛ ꞊bhla ɛɛ? ’O mɔɔ ’pegee Titi ’kpeejan‑ mu ‑o do; ’bhɛɛ‑ ’o ’kpɛn ‑o ’taawo zii’ zi do ’kpɔ ‑la ta.
Pɔlu blina‑ yiɛn ‑o Korɛnti Zesu ’yi mu ’ɛ ba zayi’
19’Ka ꞊mwa gban ’sii ‑a pele ma ’ka ’gbu ’kpee dɔɔ ’o mɔɔ ’zoo ’na yrɛ ‑la ‑glin ’zi ’o ’gbu ni ’ka ’yrɛ ta; ’waa ‑o ’bhɛ klɛ ’zi. ’Woo ‑janwo’ zii’ ‑Waanbhaa’ ‑yrɛ ma ’o mɔɔ ’pegee Krisi a ’kpaledomaya ’ɛ ’yi. ’Ŋ ’yiɛnii mu, ’woo‑ ’bhɛ ’kpɛn ’pe zii’ ’ka ni ’kooko‑ ’kaa‑ ’kpaleya ’ɛ ‑Waanbhaa’ ’yi ’bhɛ baan’ kla ’bhɛ ba. 20Yiɛn ‑o ’kan zii’ ’mi ’kpee dɔɔ ’ke ’ŋ ‑ja ’ka ba ye, ‑dɔke’ ’naa nu bhɔlɛ ’ka ta klɛgbɛya ’la ’mi ‑o ‑a zi ’bhii‑ ’ka klɛ ’bhɛ gbɛɛn‑ ’bhɛ ’yi oo, ’bhɛɛ‑ ’ka mu laa nu ’mi ’yelɛ‑ yegbɛya ’la ’kaa‑ zi ’bhii‑ ’ka ’mi ’ye ’bhɛ ’yi ’sii oo. Yiɛn ’la ’bhɛ ‑o ’kan zii’ ’ŋ ’kpee ’bhɛ win ‑le dɔɔ, ’naa ‑o ‑a zi ’bhii‑ ’ŋ ’bhɔ ’ka ta ’ke sra mu ‑o ’ka ’pleŋ‑, ’bhɛ ’pegee zranwo maza mu, ’bhɛɛ‑ wiya plaza mu, ’bhɛ ’pegee zaabɔ za mu, ’bhɛɛ‑ ’eke‑ ’tɔpele ’pegee ’eke‑ ’tɔsiɛle, ’bhɛɛ‑ ’gbugblaanya ’pegee ‑za ’yaanmiwole mu. 21Yiɛn ‑o ’kan zii’ ’ŋ ’kpee ’ezin‑ dɔɔ ’ke ’ŋ ‑ja ’ka ba ye, ‑Waanbhaa’ laa nu ‑yraladɔlɛ ’ŋ ma ’ka ’yrɛ ma. Mɛɛ ‑bebe ’la ‑za ’yɔɔ‑ ꞊kla ‑sɔ, ’bhɛɛ‑ ‑zadɔwɛɛ ’laa dɔlɛ ’mu ma, ’bhɛɛ‑ ‑o bole ‑o ‑za ’yɔɔ‑ klɛle ma ’bhii‑ ‑o ‑yaa klɛ gɔnɛ‑ ’la gbɛɛn‑ ’elwale ‑sɔ. Waa ’ploolɛ ‑waa’ ’triŋdɔ‑ maza mu ’pegee ‑waa’ ‑yanbhɔɔya dɛza, ’bhɛɛ‑ waa ‑za ’yɔɔ‑ klɛ ’flɛn mu ’la ’yaa‑ ‑o ma ’elwale ‑sɔ ’mu ma; ’kee ’ŋ ꞊wlaa ’ka ba ye ’ŋ nu wisilɛ ’ebebele ’ka ‑bebe ’taawogbɛya mu ’ɛ ‑zayi’.
13Pɔlu a ‑daŋma’ ‑liawli’
1’Ŋ ’yoo‑ zan ’an ’taa yaga mi ‑la ’wolɛ‑ ’ka ba ’taalɛɛyi. ’Bhii‑ ‑a pele ‑o ‑Waanbhaa’ a ’Sɛwɛ ’ɛ ’yi gɔnɛ‑ ’la gbɛɛn‑ dɔɔ: «’Ke ’ka ‑o ‑za ’oo ‑za ’la ’kitikanle, ‑ka mɛɛ plɛ, mɛɛ yaga klɛ ’ka ’srɛ ’le ’bhɛ ‑za ’ɛ ma.»2’Ŋ ge gbɛ plɛ mi ’ɛ ma ’ka ba, mɛɛ ’la zan mu ‑za ’yɔɔ‑ ꞊kla ’elwale ‑sɔ ’ŋ ‑janwoa ’mu ni ’bhɛ ’pegee mɛɛ ‑vin mu ’ɛ ’kpɛn ni. ’Ali‑ ’ke ’naa ‑o ’ka ba ye ‑zɔn, ’ŋ ’bhɛ zan mu ’ɛ ’kpeelɛkan zii’ dɔɔ, ’ke ’ŋ ge gbɛ drɛɛwoa‑ ’ka ba ’ezin‑ ’waati ’la ba, ’woo‑ mɛɛ ’la zan ‑za ’yɔɔ‑ ꞊kla, ’naa nu ’mu ’pegee mɛɛ ’kedo‑ ’kpɔ maplaalɛ. 3’Kaa‑ zi ’bhii‑ ’kaa dɔ ’bhii‑ Krisi ‑le ‑jan ’kpa zii’ ’mi ’lii; ‑ka ’ka zrukpala, ’ka nu ’bhɛ dɔlɛ. Krisi ’laa ‑o faŋgan‑ kle zan ’le ’ka ba ye; ’bhɛɛ‑ drɔɔn’ ‑ya ‑glɔɔya’ ’ɛ zrɔn ’zi ’ka ’pleŋ‑ ye. 4Wlan ’gbu ’ɛ ni, ‑wa ‑gbaanna ‑yrigbɛɛle ’ɛ ta, ‑ya ’gbu klɛlawoa ’bhii‑ faŋgan‑ kle zan do ’bhɛɛ‑ ’yi. ’Duŋ‑ ‑e ‑bwela gale ba, ’bhɛɛ‑ ‑ya ‑yrɛ ma ‑zɔn ‑Waanbhaa’ a ‑glɔɔya’ ‑la ma. ’O mu ’ezin‑, ’o ’pegee ’yee‑ a ’kpaledomaya ’ɛ ’yi, faŋgan‑ ’laa ‑o ’o ta. ’Bhɛɛ‑ ’duŋ‑, ’o nu bolɛ ’o ’yrɛ ma ‑Waanbhaa’ a ‑glɔɔya’ ’bhɛɛ‑ ’srɔyi. ’Ka nu ’bhɛɛ‑ ‑glɔɔya’ ’ɛ ’yelɛ‑ ’o taawogbɛya ’ɛ ma ’ka ba ye.
5‑Ka ’ka ’gbu zrubaglin doo, ’kooko‑ ’kaa ’yaango‑ ’ke ’ka ‑o ’kpaleya zi kplankplan ’gbu ’ɛ ta. ‑Ka ’ka ’gbu zrubaglin kplankplan doo. ’Ka nu a ’yelɛ‑ ’bhii‑ Zesu Krisi ‑o ’ka ’yi. ’Fɔke ’ka ’ka ’gbu zrubaglinna, ’bhɛɛ‑ ’kaa ꞊ya ’bhɛ ma ’bhii‑ ’ka ‑baliwoa ’ka ’kpale‑ ma ‑a ‑yi. 6’Bhɛɛ‑ ’duŋ‑, ’mi ’kpale‑ ‑o ‑a ‑yi ’bhii‑ ’ka mu ’gbu nu ‑a dɔlɛ ’bhii‑ ’o mɔɔ ‑bali ’laa ’wolɛ‑ ’o ’kpale‑ ma ‑a ‑yi. 7’Duŋ‑ ’o ‑sromabɔ ‑Waanbhaa’ ni dɔɔ ‑e bhɔ ’ka ba ’bhɛɛ‑ ’ka ’laa ‑za ’yɔɔ‑ do ’kpɔ klɛ. ’Waa‑ zi ’bhii‑ ’wa zrɔn ’ka ni ’bhii‑ ’o sɔ ‑za klɛle‑. ’Duŋ‑ ’woo‑ ‑a zi ’bhii‑ ’o ’ka ’ye ‑za ’wlan klɛ yrɛ nɔɔ‑; ’ali‑ ’ke ’o mɔɔ ‑baliwoa ’bhɛ klɛle ma. 8Wlan ’ɛ ni, ’waa sɔ ‑za ’kedo‑ ’kpɔ klɛle‑ ’ke ’bhɛ ‑Waanbhaa’ a pɛ wlan ’ɛ ’lɛga‑. ’O sɔ ‑za ’la klɛle‑ ’bhɛ ‑le ’ke ‑Waanbhaa’ a wlan ’ɛ baan’ ge zi ‑lɛɛ. 9’Ali‑ ’ke faŋgan‑ ’laa ‑o ’o ta, ’bhɛɛ‑ ’ke faŋgan‑ ‑o ’ka mu ta, ’bhɛ ’o zrukpalaa. ’Duŋ‑ ’woo ’seriwo ‑Waanbhaa’ ni ’kaa‑ ‑za ma ’kɛla ’yi, ’bhɛ ‑le dɔɔ ’kee‑ bhɔ ’ka ba ’ke ’ka ’kpaleya ’ɛ baan’ kla ‑a ba, ’bhɛɛ‑ ‑a ‑lɛpa’. 10’Bhɛla‑ ‑zayile, ’ŋ ’pleŋgole ‑o ’ka ma ’waati ’la ba ’ŋ ’lɛtrɛ ’lɛɛ‑ ’kpa zii’ ’ka ni, ’kooko‑ ’ke ’ŋ ‑ja ’ka ba ’waati ’la ba ye, ’naa ‑jan ‑glɔɔ wo ’ka ni, Mɛɛzan Krisi gblaanya ’la ꞊naa ’ŋ ni ’ka mu ta ’bhɛ ma. Yaa ’bhɛ gblaanya ’ɛ ’nalɛ‑ ’ŋ ni ’ka ’siɛ zayi’, ’duŋ‑ ‑e ’bhɛ ꞊naa ’ŋ ni ’kooko‑ ’ŋ ’bhɔ ’ka ba ’bhɛɛ‑ ’kaa‑ ’kpaleya ’ɛ baan’ kla ‑a ba.
Pɔlu ’srawoyrɛ
11’Ŋ nɛɛnɛ‑ mu, ’kɛla ’bhɛ ‑o ’an ‑jan ’lɛyanyrɛ ’le, ’bhɛ ‑le dɔɔ ‑kɔɔ’ ‑o bhe oo, ’ka zrukpaale klɛ! ‑Za ’la ’bhɛ sɔ ’kaa‑ ’kpaleya ’ɛ baan’ ’klale ‑a ba, ’bhɛɛ‑ ‑ya ‑lɛpa’, ‑ka ’bhɛɛ‑ klɛyrɛ ‑glin. ‑Ka zruwla ’eke‑ ’kpee ’ke ’ka faŋgandɔ ’eke‑ ta; ’ka ’kpale‑ klɛ do ma; ‑ka bo ’eke‑ ’yi ’edɔɔle. ’Ke ’ka ’bhɛ ꞊kla, ’bhɛɛ‑ ‑Waanbhaa’ ’la mɛɛ ‑za sɔ ‑a ni, ’bhɛ ’pegee ‑e yilabla na mɛɛ ni, ’bhɛ nu klɛlɛ ’ka ba.
12‑Ka ’eke‑ ’pubɔ‑ ’ke ’ka ’eke‑ ‑tuubɔ’ ’bhii‑ nɛɛnɛ‑ ma do mu. ‑Waanbhaa’ a mɛɛ ’weŋ mu ’la ’kpɛn ‑o ‑gɛ, ’mu ’ka ’pubwa‑.
13Bhaa Mɛɛzan Zesu Krisi ‑li ’ka ma, ’bhɛɛ‑ bhaa ‑Waanbhaa’ ‑yaa’ ’sɔniya ’ɛ ’wla ’ka zru mu ’ɛ ’yi. ’Bhɛɛ‑ bhaa ’ka ’kpɛn bo Lii ’Weŋ ’ɛ ‑yaa’ ’kpaledomaya ’ɛ ’yi!