PƆLU ’LƐTRƐ ꞊LWA ’LA ꞊KPAA TIMOTE NI
Pɔlu ’lɛtrɛ ꞊lwa ’la ꞊kpaa Timote ni ’bhɛ ŋgblo
Timote ‑yaa da Likaoni ’klɛɛn ’ɛ ’yi ‑wa ’la ‑o ‑yaa ’bhɛ sii Lisitri ’bhɛɛ‑ ꞊nɔɔ (Klɛza 14.6). ‑O ’bhɛɛ‑ ’klɛɛn ’ɛ sii ‑zɔn Tuuki. Timote dɛ ‑yaa ’ke Grɛki mi ’le, ’bhɛɛ‑ ‑a nɛɛ ‑yaa ’ke Zuufu le ’le. Pɔlu Zesu Krisi a ‑Jan ’Nrale‑ ’ɛ ꞊woa Lisitri ‑wa ’ɛ ta, ’bhɛɛ‑ Timote ’pegee ‑a nɛɛ Enisi, ’bhɛɛ‑ ‑a ‑jie Loisi ’mu ’mu ’gbu ꞊naa Zesu ni. Pɔlu ge gbɛ drɛɛwole Lisitri, ’kee‑ Timote ’kunle dɔɔ ’bhɛ ’bhɔ ’a ba Mɛɛzan a ye ’ɛ ’wolele, ’bhɛɛ‑ ‑o ‑ja yrɛkpɛn‑ ꞊nɔɔ (Klɛza 16.1-3).
’Lɛtrɛ ’lɛɛ‑ ’yi, ’wa ye ’bhii‑ Pɔlu ‑gwa Azi ’klɛɛn ’ɛ ’yi ‑wa ’la ‑o ’bhɛ sii Efɛzi ’bhɛ ta, ’bhɛɛ‑ ‑e ꞊nwa Masedwani ’klɛɛn ’ɛ ’yi. ‑A ge bhla ’ɛ zi, ‑e Timote ꞊twa Efɛzi, ’kooko‑ ’bhɛ bhɔ ’bhɛ ꞊nɔɔ Zesu ’yi mu ’ɛ ba bhla ma mɛɛ daan mu ’ɛ ‑zayi’ (1 Timote 1.3). Pɔlu ’lɛtrɛ ’lɛɛ‑ ꞊dia, ’kooko‑ ‑e ’fuudɔ‑ Timote ta, ’bhɛɛ‑ ’ke ‑ya lia ‑e ‑yaa ye ’la ’wo zii’ ‑Waanbhaa’ a mɛɛ ‑lɛdo’ ’ɛ ’pleŋ‑ Efɛzi ‑wa ’ɛ ta ’bhɛ ‑za ’ɛ ’le. ’Yee‑ ’lɛtrɛ ’lɛɛ‑ ’yi ‑jan mu ’ɛ ’mu ‑le ‑gɛ:
Pɔlu ‑o ‑we ’zi mɛɛ ’la zan mu ‑yaa wlan ma mɛɛ daangbɛya ’ɛ to ‑a nɔɔ‑, ’bhɛɛ‑ ‑o bhla ma mɛɛ daangbɛya klɛ (1 Timote 1.3-7; 4.1-3; 6.3-5). ‑O ‑yaa ’bhɛ bhla ma mɛɛ daangbɛya ’ɛ klɛ ‑Waanbhaa’ a ’toŋ ’pegee ’kpaleya Zesu ’yi ’mu ‑la ta.
‑A ‑lɛ plɛ mi ’ɛ ’yi, Pɔlu Zesu ’yi mu ’ɛ ‑daanna ‑o ’seriwolele, ’bhɛɛ‑ ‑yoo ‑liala dɔɔ ‑o bo ‑o ’seriwole ma (1 Timote 2).
‑A ‑lɛ yaga mi ’ɛ ’yi, Pɔlu ‑o daan ’zi zilɛɛ‑ mu ’ɛ waa ’taawogbɛya ‑lrele’ ɛ ba zayi’ (1 Timote 3).
‑E ’fuudwa‑ Timote ta ‑Waanbhaa’ a ye ’ɛ ’wolele (1 Timote 4‑7; 6-21). Timote ’yaa sɔ a klɛle‑ gɔnɛ‑ ’la gbɛɛn‑ ’bhɛɛ‑ ‑e mɛɛ ‑lɛ ‑glɔɔn ‑bebe ’ɛ ‑gblakun ’elrele ’bhii‑ Zesu Krisi a ‑klaŋlanɛ kplankplan do ‑Waanbhaa’ a mɛɛ ‑lɛdo’ ’ɛ ba, Pɔlu ’bhɛ ‑jan ’ɛ ꞊woa ‑a ni.
’Lɛtrɛ ’lɛɛ‑ ’lɛyanyrɛ ’ɛ ’yi (1 Timote 6.11-21), Pɔlu zruwlaa‑ Timote ’kpee dɔɔ ‑e ’kpaleya ’ɛ ma gwle ‑lrele’ ’ɛ dan.
1Pɔlu ‑o Timote ’pubɔ‑ ’zi
1’Mi Pɔlu ‑o ’ke Zesu Krisi a *winbɔwo mi ’le, ‑amasrɔyi ‑kɔɔ’ ’Bhee Mi ‑Waanbhaa’ ’pegee ‑kɔɔ’ ’yrikpale ‑o Zesu Krisi ’la ta, ’mu ‑le ’a ꞊pia ’ŋ ni dɔɔ ’ŋ klɛ ’kɛle‑.
2’Mi ‑o ’lɛtrɛ ’lɛɛ‑ ’kpa zii’ ’bhi Timote ‑la ni, ’bhi ’la ’bhi ‑o ’ke ’ŋ gbe ‑zeze ’gbu ’ɛ ’le ’kpaleya a pɛ zi ’ɛ ta bhe. Bhaa ‑kɔɔ’ Dɛ ‑Waanbhaa’ ’pegee ‑kɔɔa’ Mɛɛzan Zesu Krisi ‑li ’e ma, ’bhɛ ’pegee ‑o yilabla ’na ’e ni, ’bhɛɛ‑ ’e ’yrɛnkla‑ ‑o ma.
Bhla ma mɛɛ daan mu
3’Ŋ ge bhla ’ɛ zi Masedwani ’klɛɛn ’ɛ ’yi, ’ŋ zruwlaa‑ ’e ’kpee dɔɔ ’e bo Efɛzi ‑wa ’ɛ ta. ‑Amasrɔyi mɛɛ ’ke mu ‑o mɛɛ mu daan ’zi ’ke bhla ma daangbɛya ’yɔɔ‑ mu ’le. ‑A pe ’mu ni dɔɔ ’mu ’ploo‑ ’bhɛ bhla ma daangbɛya ‑glɔɔn mu ’ɛ ma. 4‑A pe ‑o ni dɔɔ ‑o blɔɔle laa bolɛ ’elwaleta ‑za ’yifleŋ mu ’ɛ ma, ’bhɛ ’pegee ‑o ’ploo‑ ‑zaabɔle ma ‑o ‑gbɔɔ ’saa mu ’ɛ ’tɔ mu ’ɛ ta. ’Bhɛ ‑za mu ’ɛ ’mu ‑o zaa ‑wlɛnpɛ’ mu ’te ‑la ‑le ’ka ’pleŋ, ’bhɛɛ‑ ‑o ‑lɛbɛŋgole laa ‑o ’ke ‑Waanbhaa’ zru maza ‑lɛdulale ’ɛ ’bhɛ ’le, ’bhɛ ’pegee waa ’ka ’kpaleya ’ɛ Krisi ’yi ’bhɛ baan’ kla ’bhɛ ba. 5’Ŋ ’bhɛ ‑jan ’lɛɛ‑ ’wo zii’ ’e ni win ’la ma, ’bhɛ ‑le dɔɔ ’ke ’sɔniya klɛ bhaaplɛŋ mu ’ɛ pleŋ‑; ’sɔniya ’la ’bhɛ da zru ’weŋ do ’pegee ’kpee ’fleele‑ do ’yi, ’bhɛ ’pegee ’kpaleya ’la ‑yoo ’ke ’kpaleya ‑zeze ’gbu ’ɛ ’le ’bhɛɛ‑ ’yi. 6Mɛɛ ’ke mu ‑gwa gban ’bhɛ wlan ma zi ‑lrele’ ’ɛ ta. ’Bhɛɛ‑ ‑o bole ‑o zaabɔle ’gbansaan ’te ‑la ma ’ke ‑woo ’gbu ’yini‑ ‑sɔ. 7‑Wa zi ’bhii‑ ‑o klɛ Moizi a ’toŋ mu ’ɛ daan mu ’le, ’duŋ‑ waa ‑o ’gbu ’wojan‑ mu ’ɛ ’yima‑; ’bhɛɛ‑ ‑woo mɛɛ mu daan ’zi ‑za mu ’la ’le ‑o zru ’ɛ ’kpɛn ’le, ‑o ’gbu ’laa ’mu ’yidɔ‑.
8‑Kɔɔ’ ’a ’yaango‑ ’bhii‑ *’Toŋ ’ɛ ‑yoo ’ke ‑za ’lrele’ ’le ’ke mɛɛ ’a ’yi za ‑kla ’elrele. 9’Bhɛɛ‑ ‑kɔɔ’ ’a ’yaango‑ ’bhii‑ waa ’Toŋ ’ɛ klɛlɛ mɛɛ ‑lɛdɔɔle mu ’kaama‑. ‑Wa ꞊kla mɛɛ ‑yɔɔ’ mu ’pegee ‑kala’ mɛɛ mu, ’bhɛɛ‑ mɛɛ ’kpee ’yɔɔ‑ mu ’pegee ‑za ’yɔɔ‑ klɛ mu ‑la ’kaama‑. ‑Wa ‑kla mɛɛ ’la zan mu laa gblaan ‑Waanbhaa’ ‑lɛɛ, ’bhɛ ’pegee ‑a ’tɔsiɛ mu, ’bhɛɛ‑ mɛɛ ’la zan mu ’mu dɛ ’pegee ’mu nɛɛ dɛ, ’bhɛ ’pegee mɛɛ dɛ mu ‑la ’kaama‑. 10’Bhɛɛ‑ ‑yanbhɔɔya dɛ mu oo, ’gwlaan‑ mu ’la yilaa’ ’mu ’tanyɔɔn ’gwlaan‑ mu ba oo; lu gɔn mu oo, bhlanii‑ mu oo, mɛɛ ’la zan mu ‑o ’siɛnwo‑ ‑Waanbhaa’ ma bhla ’le oo, ’bhɛ ’pegee mɛɛ ’la zan mu ’kpɛn ‑za mu ’oo ‑za mu ’la klɛ ’ke ’mu ’pegee daangbɛya ’lɛdɔɔle ’ɛ ’lɛbɛŋgole laa ‑o, ‑o *’Toŋ ’ɛ ꞊kla ’mu ’kpɛn ‑la ’kaama‑. 11‑O ‑Jan ’Nrale‑ ’la gbɛkpaa‑ ’mi ’kɔɔ, ’bhɛ daangbɛya ’ɛ ‑daa ’yee‑ daangbɛya dɔɔle ’ɛ ’yela‑ ‑yi. ’Yee‑ ‑Jan ’Nrale‑ ’ɛ ‑e ‑Waanbhaa ’la ’duma na ‑kɔɔ’ ni ’bhɛ a ’tɔbhɔleya ’ɛ ’bhɛɛ‑ wo.
Pɔlu ‑o ‑Waanbhaa’ ’pubɔ‑ ’zi ’bhɛ a ’lileya ’ɛ ‑zayi’
12’Mi ‑kɔɔa’ Mɛɛzan Zesu Krisi ’pubɔ, ’yele‑ faŋgandwa ’ŋ ta ’bhɛɛ‑ ’ŋ ꞊swa ‑yaa’ ye ’ɛ ’wole. ’Mi ’an ’pubɔ‑ ’ezin‑, ‑amasrɔyi ‑ye ’ŋ ꞊ya ‑yaa’ ye ’ɛ ’wo mi ’le. 13’Mi ’la ’mi ’yaa‑ ’elwale ‑sɔ ‑Waanbhaa’ ’tɔsiɛ mi ’le ’ke ’ŋ ‑yrɛnkpa’ Zesu ’yi mu ’ɛ ta, ’bhɛɛ‑ ’ŋ ’yaa‑ ‑za klɛ yran ma. ’Duŋ‑ ’ŋ ’yrɛnklaa‑ ‑Waanbhaa’ ma, ‑amasrɔyi ’ŋ ’yaa‑ ‑za mu ’ɛ klɛ ‑zadɔkleya ’pegee ’kpalekleya ‑la ma Krisi ’yi. 14Mɛɛzan ‑Waanbhaa’ ‑lia ’ŋ ma ’egbɛnɛle ’ke ’mi ’ŋ kpa Zesu Krisi ’yi, ’bhɛɛ‑ ’ke ‑a ‑za sɔ ’ŋ ni. 15’Ŋ ’yoo‑ zan ‑jan ’la ’wolɛ‑ ‑gɛ ’bhɛ ‑o ’ke wlan ’le, ’bhɛɛ‑ ‑a ‑gaale’ ‑o mɔkpɛn’ ba ’ke ‑o dɔ ’bhɛ ꞊la; ’bhɛ ‑le dɔɔ: Zesu Krisi ꞊nwa ’drunyan ’yi ‑za ’yɔɔ‑ klɛ mu ‑la gole ‑za ’yi. ’Mi Pɔlu ‑le ‑o ’kpɛn ba ‑za ’yɔɔ‑ klɛ mi ‑gbɛnɛ ’gbu ’ɛ ’le. 16’Duŋ‑ ’ŋ ’yrɛnklaa‑ ‑Waanbhaa’ ma ’egbɛnɛle. ’Bhɛɛ‑ ‑e ‑yaa zi ’bhii‑ ’mi Pɔlu ’la ’mi ‑o ’ke ‑za ’yɔɔ‑ klɛ mu ’ɛ ’kpɛn ba ‑za ’yɔɔ‑ klɛ mi ‑gbɛnɛ ’gbu ’ɛ ’le bhe, Zesu Krisi ’bhɛ a zrubakpaa ‑gbɛnɛ ’ɛ zrɔn ’mi ni. ‑E ’bhɛ ’kla‑ bhe, ’kooko‑ mɛɛ ’la zan mu ‑o ‑kpaa ‑a ‑yi, ’bhɛ ‑za ’ɛ klɛ ’mu daanpɛ ’le, ’bhɛɛ‑ ’mu bole ‑yrɛ ma ‑si ’la ‑daŋ’ ’laa ‑o ’bhɛ ma ’bhɛ ’srɔɔwo‑. 17‑Bhleŋgbe ‑Waanbhaa’ ’la ‑ya ‑yrɛ ma ’waati ’ɛ ’kpɛn ba, bhaa ‑kɔɔ’ ’a ’lɛdɔ‑ ‑a ma, ’bhɛɛ‑ ‑kɔɔ’ ’a ’tɔbhɔ. Yaa ga ‑titi, ’bhɛ ’pegee mɛɛ laa ye ’e ‑yrɛ ’le, ’bhɛɛ‑ ’yele‑ ’ke ‑Waanbhaa’ do ‑kplɛn ’le ‑zɔn ’pegee ‑yikpɛnsee ta. Amiina!
Pɔlu ‑o Timote ꞊lia zii dɔɔ ‑a blɔɔle bo ‑a ’kpaleya ’ɛ ma Krisi ’yi
18’Ŋ ’nɛ Timote, ’ŋ ’yoo‑ zan ’ŋ zi jan ’la ’wolɛ‑ ’e ni ’saanibhe, ’bhii‑ ‑Waanbhaa’ ‑lɛla’ janwo mu ’ɛ ‑janwoa ’e ba zayi’ gɔnɛ‑ ’la gbɛɛn‑ ‑sɔ; bhaa ’bhɛ ‑jan ’ɛ klɛ ’fuudɔpɛ ’le ’e ta, ’bhɛɛ‑ ’yee ’gbu ma gwle ‑lrele’ ’ɛ dan. 19’E ’kpale‑ bo Krisi ’yi, ’e ’kpee ’fleele‑ ’le. ’Bhɛ ’kpee ’fleeleya ’ɛ ’bhɛ ’laa ‑o ‑li mɛɛ ’ke mu ’yi. Waa ‑o ’trɔnkpalɛ ’elrele ‑o ’kpeejan‑ mu ’ɛ ꞊la, ’bhɛla‑ ‑yile ‑waa’ ’kpaleya Krisi ’yi ’ɛ ’bhɛ ’siɛla‑ ’bhii‑ ‑yitakoŋ do ’siɛgbɛya gbɛɛn‑ ‑yi ta. 20’Bhɛ mɛɛ ‑glɔɔn mu ’ɛ ’ke mu ‑le ’ke Imene ’pegee Alɛzandri ’le. ’Bhɛla‑ ‑zayile, ’mi ‑o ‑lɛnaa ‑Setran’ ni, ’kooko‑ ’bhɛ ‑o ’krowo‑, ’bhɛɛ‑ ‑wa ’yaango‑ ’bhii‑ ‑Waanbhaa’ ’tɔ ’siɛle‑ laa lele ‑titi.
2‑Liaza’ ’Seriwogbɛya ba zayi’
1’Ŋ ’yoo‑ ‑za ’lɛɛ‑ ’bhɛɛ‑ ’yrɛwole ma ’elwale ’pe dɔɔ ‑ka pɛ mu ‑yrɛwo’ ‑Waanbhaa’ ma, ’ke ’ka ’ka ’seriwo a ni, ’bhɛ ’pegee ’ke ’kaa ’sromabɔ, ’bhɛɛ‑ ’ke ’kaa ’pubɔ‑ bhaaplɛŋ mu ’kpɛn ba zayi’. 2‑Ka ’ka ’seriwo ‑bhleŋgbe mu ’pegee mɛɛ gblaan mu ’ɛ ’kpɛn ma, ’kooko‑ ‑kɔɔ’ ’yrɛ ba ’kpaale‑ klɛ, ’ke ‑kɔɔ’ bo ’edɔɔle, ’bhɛ ’pegee ’ke ‑kɔɔ’ blɔɔle bo ‑Waanbhaa’ ma, ’bhɛɛ‑ ’ke ‑kɔɔ’ ’taawogbɛya ’ɛ klɛ ’elrele bhaaplɛŋ mu ’ɛ ’pleŋ‑. 3’Bhɛ ‑le ’elrele ’bhɛ ’pegee ’bhɛ ‑le sɔ mɛɛ ‑Bhee Mi ‑Waanbhaa’ ni. 4’Yee‑ ‑Waanbhaa’ ‑o ‑a zi ’bhii‑ bhaaplɛŋ mu ’kpɛn go ‑za ’yi, ’bhɛɛ ‑o sɔ wlan ’ɛ dɔle‑. 5‑Amasrɔyi ‑Waanbhaa’ ‑o do ’kpɔ, ’bhɛɛ‑ mɛɛ ’la zan ‑Waanbhaa’ ’pegee bhaaplɛŋ mu kpa do ma ’bhɛ ‑o do ’kpɔ: ’bhɛ ‑le ’ke Zesu Krisi ’le, ’bhɛ ‑le ꞊kla bhaaplɛŋ do ’le. 6’Yele‑ ’a ’gbu ’naa‑ bhaaplɛŋ mu ’kpɛn ta gbawopɛ ’le; ‑e ’bhɛ ’kla‑ ‑Waanbhaa’ ’waati ’la ‑dwa ’bhɛɛ‑ ba, ’bhɛ gbɛɛn‑ bhe, ‑ya ‑zrɔnna dɔɔ ‑Waanbhaa’ ‑o ‑a zi ’bhii‑ bhaaplɛŋ mu ’kpɛn go ‑za ’yi. 7’Bhɛla‑ ‑zayi’, ‑Waanbhaa’ ’mi ꞊kla ’ke ‑yaa’ ‑jan ’ɛ ’wo mi ’le ’bhɛ ’pegee ‑yaa’ winbɔwo mi ’le. ’Ŋ ’yoo‑ wlan ‑la pe ’zi ’ka ni, bhla laa ’kɛle‑! ‑Waanbhaa’ ’mi ’winbwa‑ ’kaa ’ŋ Zuufu kle mu ’ɛ daan ’kpaleya ’pegee wlan ’le.
8’Ŋ ’yoo‑ ‑a zi ’gbu ’bhii‑ ’gwlaan‑ mu ‑o ’seriwo yrɛ ’ɛ ’kpɛn ꞊nɔɔ ’ke ‑woo gbɛ wlɛn laanima. ‑Wa klɛ ‑o ’fleele‑ ’le, ’bhɛɛ‑ waa klɛlɛ ’ke yran ’le ‑o zru ba, ’bhɛ ’pegee sra ’le.
Zesu ’yi mu ’taawogbɛya
9’Mi ‑o ‑a zi ’ezin‑ ’bhii‑ le mu ‑o ‑baa’ ’elrele. Waa ‑o ‑taakpalɛ ‑o ‑baa gbɛya ’ɛ ’zi ’ke ‑wa kan ‑a ‑daŋ’ ta. Waa ‑o ‑taakpalɛ ‑o wintangbɛya ’ɛ zi; ’bhɛɛ‑ waa ‑o ‑baalɛ’ ’ke ‑can pɛ mu ’pegee blina‑ ’yrɔnnɛ ’plɛɛle‑ mu ’le, ’bhɛɛ‑ waa tapɛ ’plɛɛle‑ mu ’klalɛ‑ ‑o ta. 10’Duŋ‑ ‑woo ‑lreleya ’ɛ zrɔn ’ke ‑za ’lrele‑ mu ‑la klɛle ’le. Le mu ’oo le mu ’la ‑wa pe dɔɔ ‑o ‑gasikpa ‑Waanbhaa’ ‑lɛɛ, ‑wa klɛ ’bhɛɛ‑ klɛgbɛya ’ɛ gbɛɛn‑. 11’Bhɛɛ‑ ’ezin‑, ’ke ’ka ‑o ‑Waanbhaa’ a ’fɛ ’ɛ ꞊la, le mu yaale bo ‑o tagalele, ’bhɛɛ‑ ’ke ‑woo ’trɔnkpa‑ ‑o daangbɛya ’ɛ ꞊la; ’bhɛɛ‑ ‑woo ’gbu ŋgblo ’kpala ’gwlaan‑ mu ꞊la. 12’Naa ‑a zi ’bhii‑ le mu mɛɛ daan ‑Waanbhaa’ a ’fɛ ’ɛ ꞊la, ’bhɛɛ‑ ’ke ‑woo ’gbu kpa ’gwlaan‑ mu wiiŋ‑. ’Duŋ‑ le mu tagale bo, ’bhɛɛ‑ ‑woo ’trɔnkpa daangbɛya ’ɛ ꞊la. 13Wlan ’gbu ’ɛ ni, ‑Waanbhaa’ Adamu ‑la ‑kla ’elwale ’pe, ’bhɛɛ‑ ‑e Ɛvu ‑kla boolazi. 14‑Setran’ ’laa Adamu ‑yidanlɛ, ’bhɛɛ‑ ‑e ’bhɛ ’yinia‑; ’duŋ‑ ‑Setran’ Ɛvu ‑la ’yidaan‑, ’bhɛɛ‑ ‑e ’bhɛ ’yinia꞊. ’Bhɛ klɛgbɛya ’ɛ ’yi Ɛvu ’laa ‑Waanbhaa’ a ‑jan ’ɛ ’klɔsikunlɛ. 15’Bhɛɛ‑ ’duŋ‑, le nu ‑nɛ mu yalɛ; ‑Waanbhaa’ nu ‑a golɛ ‑za ’yi ’ke ‑a ’kpale ꞊bwa Krisi ’yi, ’bhɛ ’pegee ’ke ‑o blɔɔle ꞊bwa ’sɔniya ’ɛ ma. ’Bhɛɛ‑ ’ke ‑o ’taawogbɛya ’ɛ bakanle ꞊kla ’weŋ, ’bhɛɛ‑ ’ke yaa ‑taakpa’ ‑za zi.
3Zesu ’yi mu ‑lɛɛ mu ’taawogbɛya
1Wlan ma jan do ’gbu ‑le ‑gɛ dɔɔ: ’ke mɛɛ do ‑o ‑a zi’ ’bhii‑ ‑e klɛ Zesu ’yi mu ‑lɛ mu a zilɛɛ‑ ’lɛɛ mu ’ɛ do ’le, ’bhɛ zan ‑o ye kplankplan ’gbu ‑la zi ’bhɛ ’le bhe. 2Zesu ’yi mu ‑lɛ mu ’ɛ ‑waa’ zilɛɛ‑ mu ’ɛ ’taawogbɛya ’ɛ klɛ ’elrele, ’bhɛɛ‑ ’ke waa ‑za ’yɔɔ‑ do ’kpɔ ye ‑o zi. ‑A na klɛ do ’kpɔ, ‑e ’sɔ ‑a ’gbu ’yikunle ‑za ma, ’ke yaa ‑a ‑taakpa’ ‑za zi, ’ke ‑o ‑gasikpa ‑a ‑lɛɛ, ‑e ’cie mu ’kun ’elrele, ’bhɛɛ‑ ‑e ’sɔ mɛɛ mu daanle‑ ’elrele. 3Yaa klɛlɛ ‑wɛɛn mi ’le, gwle laa ’sɔlɛ‑ ‑a ni. ’Duŋ‑ ‑a ‑yi klɛ ’edɔɔle, ’bhɛɛ‑ ‑e klɛ mɛɛ ’kpa mi ’le ’eke‑ ma. ’Bhɛɛ‑ yaa ‑gɔli’ ’flɛn ’laa klɛlɛ. 4’Bhɛɛ‑ ’ezin‑, ‑e ’sɔ ‑a ’gbu a ’fa ‑la mu ’ɛ ’lɛdɔɔle ’elrele. ’Bhɛɛ‑ ‑e ’sɔ ‑a klɛle‑ ’ke ‑a ‑nɛ mu ’ɛ ’mu ’a ’weli‑ ma, ’bhɛɛ‑ ’ke ‑o ‑gasi ‑gbɛnɛ kpa ‑a ‑lɛɛ. 5‑Amasrɔyi ’ke mɛɛ do laa sɔ ‑a ’gbu a ’fa ‑la mu ’ɛ ’lɛdɔɔle ’elrele, ‑e nu ’sɔlɛ‑ ‑Waanbhaa’ a mɛɛ ‑lɛdo’ ’ɛ ‑gblakunle ’nale‑ ‑a ma ’elrele ɛɛ? 6Yaa klɛlɛ ’duŋ‑ Zesu ’yi mi drɛɛ ’le; ’kebhlaale, ‑e nu ‑a ’gbu ’yelɛ‑ mɛɛ gblaan ’le mɛɛ mu ‑yrɛ ta, ’bhɛɛ‑ ’bhɛ klɛgbɛya ’ɛ ’yi, ‑kpan ’la ‑balaa’ ‑Setran’ ta, ’bhɛ ‑glɔɔn nu baalɛ ‑a ta. 7’Bhɛɛ‑ ’ezin‑ ’duŋ‑, mɛɛ ’la zan mu laa ‑o Zesu ’yi, ’mu ’sɔ ‑a ’tɔ wlan pele‑; ’kooko‑ waa mafinyanwo, ’bhɛɛ‑ ‑e bɔ ‑Setran’ a bhee mu ’ɛ ’yi.
Zesu ’yi mu ‑lɛ mu ’ɛ ‑waa’ ’bhɔŋba‑ mu ’ɛ
8’Bhɛ klɛgbɛya do ’ɛ ’yi, Zesu ’yi mu ‑lɛ mu ’ɛ ‑waa’ ’bhɔŋba‑ mu ’ɛ ’ezin‑, ’mu klɛ mɛɛ kplankplan mu ’le, ’bhɛɛ‑ ‑o ‑liiwli’ laa klɛlɛ plɛ mu ’le; waa klɛlɛ ‑wɛɛn ’mi mu ’le ’bhɛ ’pegee waa ‑gɔli’ ’srɔɔwolɛ ‑dawli’ ’kpalele mɛɛ mu gbɛ ta. 9‑O blɔɔle bo ‑o ’kpee ’fleele‑ ’le ‑waa’ ’kpaleya wlan ’la tagaanle ‑yaa ’elwale ‑sɔ ’bhɛ ma. 10‑O ’woo‑ ’bhɔŋba‑ mu ’ɛ ’yrɛglin‑ ’elwale ’pe; ’bhɛɛ‑ ’ke waa ‑za ’yɔɔ‑ do ’kpɔ ’yelɛ‑ ‑o zi, ’bhɛɛ‑ ‑o sɔ ‑waa’ bhɔŋba ye ’ɛ ’wole ’tɛ. 11’Bhɛ klɛgbɛya do ’ɛ ’yi, bhɔŋba le mu klɛ le kplankplan mu ’le, waa klɛlɛ mɛɛ ’tɔ ’yɔɔ‑ ’pe le mu ’le, ‑o ’sɔ ‑o ’gbu ’yikunle ‑za ma, ’bhɛɛ‑ ’ke ‑o zru klɛ do ‑za ’kpɛn ’yi. 12’Bhɔŋba‑ ’gwlaan‑ ’ɛ, ’bhɛ klɛ le do ’kpɔ ‑la ‑nɔɔ ’le, ’bhɛɛ‑ ‑e ’sɔ ‑a ’gbu ’nɛ mu ’ɛ ’pegee ‑yaa’ ’fa ꞊la mu ’ɛ ’lɛdɔɔle ’elrele. 13’Ke mɛɛ ’la zan mu ‑waa’ ’bhɔŋba‑ ye ’ɛ ꞊woa ’elrele, ‑o nu ‑o ‑lɛdɔlɛ ‑a ma; ’bhɛɛ‑ ‑o zrubazinale klɛ ’egbɛnɛle ‑waa’ ’kpaleya ’ɛ ’yi Krisi ’yi.
Gaanyiza ’la ‑yoo ‑Jan ’Nrale‑ ’ɛ ’yi
14Timote, ’ŋ ’yoo‑ ’lɛtrɛ ’kpa zii’ ’e ni, ‑amasrɔyi ’ŋ ’yri ‑a ta ’bhii‑ ‑a ‑vinbwa sa ’bhɛɛ‑ ’ŋ ge ’pwɛlɛ‑ ’e ta ye. 15’Duŋ‑ ’ke ’ŋ ꞊mwa ’ke ’naa nu ’e ta, ’ŋ ’lɛtrɛ ’la ꞊dia ’e ni ‑gɛ bhe, ’e nu ‑za yɛkɛ‑ ’la klɛlɛ ‑Waanbhaa’ a mɛɛ ‑lɛdo’ ’ɛ ’pleŋ‑, ’e nu ’bhɛ dɔlɛ ’bhɛ ma. ’Bhɛ ‑Waanbhaa’ a mɛɛ ‑lɛdo’ ’ɛ ’bhɛ ‑le ’ke ‑Waanbhaa’ ’la ‑ya ‑yrɛ ma ’bhɛ a ’fa ꞊la mu ’ɛ ’le. ‑Yaa’ mɛɛ mu ‑lɛdo’ ’ɛ ’bhɛ ‑le ’bhii‑ wlan ’ɛ ꞊la yri ’pegee ‑a ‑yitɛnpɛ ’le. 16Waa sɔ zaabɔle ’bhɛ ta, ‑Jan ’Nrale‑ ’la tagaanle ‑yaa ’elwaleta ‑sɔ, ’bhɛɛ‑ ’ke ’bhɛ a klɛ ’bhɛɛ‑ Zesu ’yi mu ’ɛ ‑gasikpa ‑Waanbhaa’ ‑lɛɛ ’bhɛ ‑o ’egbɛnɛle. ’Yee‑ ‑Jan ’Nrale‑ ’ɛ ’bhɛ ‑le ‑gɛ:
Krisi ’gbu ’pwɛla‑ ‑a ‑yi bhaaplɛŋ do ’le;
‑Waanbhaa’ Lii ’Weŋ ’ɛ ’bhɛ ’a ‑zrɔnna mɛɛ mu ni ’bhii‑ ‑a ‑lɛdɔɔle ‑o. ‑E ‑pwɛla ‑mlɛkɛ’ mu ba;
’bhɛɛ‑ ‑o ‑yaa ‑janwoa ’trɛ ta ’si mu ’ɛ pleŋ‑;
’bhɛɛ‑ ‑woo ‑kpaa ‑a ‑yi ’drunyan ’lɛɛ‑ ’yi;
’bhɛɛ‑ ‑Waanbhaa’ ’a ꞊sia ’bhɛɛ‑ ’bhɛ ‑ja ’kɛle‑ laflɛ’ ’yi ’tɔbhɔleya ’yi.
4Bhla ma mɛɛ daan mu
1*Lii ’Weŋ ’ɛ ‑ya ꞊pia kpataakpa dɔɔ ’ke ’drunyan ’yan bhla ’ɛ ꞊bhwa ‑wa ‑din ’waati ’la ba, mɛɛ ’ke mu nu ’ploolɛ‑ ‑o ’kpaleya ’ɛ ma Krisi ’yi; ’bhɛɛ‑ ‑o nu dɔlɛ mɛɛ ‑yini’ lii mu ’ke mu zi, ’bhɛ ’pegee ’mu a daangbɛya ’la da ‑Setran’ ba ’bhɛ zi. 2Mɛɛ ‑yrɛkɔɔza klɛ mu ’pegee bhla ma mɛɛ daan mu ’ɛ nu ‑o ‑yinilɛ. ‑O ’kpee ’ɛ ’tilale ‑o ’bhii‑ ‑gla tilagbɛya gbɛɛn‑ ‑za ’yɔɔ‑ mu ’ɛ ’kɔɔ. 3‑O mɛɛ mu daan dɔɔ waa yaalɛ gwlɛn na, ’bhɛɛ‑ ‑wa pe ‑o ni dɔɔ ‑o pɛle ’ke mu ’to ‑o ’sɔɔn ’le. ‑Waanbhaa’ ’duŋ‑ ’bhɛ pɛbhle mu ’ɛ ꞊kla, ’kooko‑ ’ke Zesu ’yi mu ’la ‑o wlan ’ɛ dɔ, ‑o ‑Waanbhaa’ ’pubɔ‑ ’mu ma ’bhɛɛ‑ ‑woo bhle. 4‑Amasrɔyi, ‑Waanbhaa’ pɛ ’oo pɛ ’la ꞊kla ’bhɛ ’kpɛn lele; ‑kɔɔ’ ’laa ‑kɔɔ’ ‑baŋgolɛ pɛbhle ’kedo‑ ’kpɔ ’yi; ’ke ‑kɔɔ’ ‑o pɛ ’oo pɛ ’la ’bhlele, ‑kɔɔ’ ‑Waanbhaa’ ’pubɔ‑ ’bhɛ ma ’pe, ’bhɛɛ‑ ‑kɔɔ’ ’a bhle ’tɛ. 5‑Amasrɔyi pɛbhle ’tɔle‑ pɛbhle, ‑Waanbhaa’ ’bhɛ klɛ ’weŋ ‑yaa’ ‑jan ’ɛ ’pegee ’seriwole ’le.
Zesu Krisi ‑a yewonɛ ’lrele‑
6Timote, ’kee ‑kɔɔ’ nɛɛnɛ‑ mu ’ɛ ‑daanna ‑za mu ’la bhe ‑o ’kpɛn ’le, ’e nu klɛlɛ Zesu Krisi a yewonɛ ’lrele‑ ’gbu ’le. ’E nu ‑a zrɔnlɛ ’bhɛ gbɛɛn‑ ’tɛ ’bhii‑ ’yoo‑ ’e zru ’ɛ ’lɛbɔ ’zi ’ke ’kpaleya ma ‑jan ’ɛ ’le, ’bhɛɛ‑ ’yoo‑ ’taawo zii’ daangbɛya ‑lrele’ ’ɛ ’bhɛɛ‑ zi. 7’Duŋ‑ ’elwaleta can mu ’la ‑woo ’ke bhla ma jan mu ’le, ’bhɛɛ‑ ’ke ‑o gole ‑o ’kpaleya a pɛ jan mu ’ɛ ma, ’yaa ’e ’trɔnkpalɛ ’mu ‑la ‑titi. 8’Duŋ‑ dɔ klɛn ’kee blɔɔle bo ‑Waanbhaa’ ma; ‑amasrɔyi ’flɛ yikan’ maza klɛle ‑za sa ‑la ‑yanwo’ mɛɛ ma. ’Bhɛɛ‑ ’duŋ‑ ’kee blɔɔle ꞊bwa ‑Waanbhaa’ ma ’bhɛ ‑o ’elrele mɛɛ ma ‑za ’kpɛn ’yi; ‑amasrɔyi ’bhɛ ‑zɔn bole ‑yrɛ ma ‑si ’ɛ na ‑kɔɔ’ ni, ’bhɛ ’pegee ‑e boolazi bole ‑yrɛ ma ‑si ’ɛ ’naza‑ pe ‑kɔɔ’ ni. 9’Bhɛ ‑jan ’ɛ ’bhɛ ‑o ’ke wlan ’le, ’bhɛɛ‑ mɔkpɛn’ sɔ ’e ’kpale ‑a ‑yi. 10’Bhɛla‑ ‑yile, ’woo‑ yewo ’zi ’eglɔɔle ’ke ’woo ’sɛnɛ wla, ‑amasrɔyi ‑Waanbhaa’ ’la ‑ya ‑yrɛ ma ’bhɛ ‑le ’o ’yrikpapɛ ’le; ’bhɛɛ‑ ’yele‑ ’ke bhaaplɛŋ mu ’kpɛn ’Bhee mi ’le, ’bhɛɛ‑ ’duŋ‑ mɛɛ ’la zan mu ’gbu ’mu ’kpaa‑ Krisi ’yi, ‑e ’mu go ‑za ’yi ‑zɔn ’pegee yikpɛnsee ta.
11‑A pe ‑o ni ‑o ’bhɛɛ‑ ‑za ’ɛ klɛ, ’bhɛɛ‑ ’yoo‑ daan ’kɛle‑. 12’Yaa ’tolɛ‑ ’ke mɛɛ ’kedo‑ ’e mafinyanwo ’yaa‑ ‑zwannɛya ’ɛ ma. ’Duŋ‑ ‑a ’to ’ke mɛɛ ’la zan mu ’kpale‑ ‑o Krisi ’yi, ‑o ’yaa‑ ‑janwo’ gbɛya ’ɛ ’pegee ’e ’taawogbɛya ye, ’bhɛɛ‑ ‑o ’yaa‑ ’sɔniya ‑glɔɔn ’pegee ’e ’kpaleya ’ɛ, ’bhɛɛ‑ ’e ’kpee ’fleeleya ’ɛ ’mu ye; ’kooko‑ ‑o sɔ ‑o ’kpale ’e ma ’mu ’kpɛn ’yi. 13’Sani‑ ’ŋ gele pleŋ‑ ’e ta ye, dɔ klɛn ’kee‑ ‑Waanbhaa’ a ’Sɛwɛ ’ɛ tape mɛɛ mu ni, ’ke ’yoo‑ lia ’bhɛ ’pegee ’ke ’yoo‑ daan ’kɛle‑. 14’E Lii ’seŋ ’la ’srɔɔwoa‑ bhe, ’ke ‑Waanbhaa’ ’bhɛ ’naza‑ ’ɛ ꞊kpaa ‑a ‑lɛla’ janwo mu ’ɛ ’lii, ’yaa ’e ’yrɛ zi ‑gblaanlɛ’ yewole ma ’bhɛ ’le‑. ‑Ya naza ’ɛ ’pelawoa ‑a ‑lɛla janwo mu ’ɛ ni, ’bhɛɛ‑ Zesu ’yi mu ’ɛ ‑waa’ zilɛɛ‑ mu ‑lɛdo’ ’ɛ ’mu ’mu gbɛkpaa‑ ’e ta ’mu ’seriwolele, ’bhɛɛ‑ ‑ya ’srɔɔwoa‑ ’tɛ. 15Dɔ klɛn ’kee ’bhɛ ‑za mu ’ɛ ’kpɛn klɛ ’ke ’yoo‑ ’lɛyan‑ ‑a ma; ’bhɛɛ‑ ’e ’gbu ’na ’yee‑ ye ’ɛ ni ’e nii‑ ’ɛ ’kpɛn ’le. ’Ke ’bhɛ ꞊kla, mɔkpɛn’ nu ‑a yelɛ ’bhii‑ ’yoo‑ ge ’zi zilɛɛ‑ ‑Waanbhaa a ye ’ɛ ’yi. 16’Yaa‑ ’taawogbɛya ’pegee ’yaa‑ daangbɛya ’ɛ ‑o ‑klɔsikun ’elrele. Dɔ klɛn ’bhɛ klɛle ma. ’Ke ’ya ꞊kla ’bhɛ gbɛɛn‑ bhe, ’e nu ’e ’gbu golɛ ‑za ’yi, ’bhɛ ’pegee mɛɛ ’la zan mu ‑o ’trɔnkpa zii’ ’e ni, ’mu nu golɛ ‑za ’yi ’ezin‑.
5‑Liawli’ glaanle mu ’pegee zilɛɛ‑ mu, ’bhɛɛ‑ ’bhɔŋba‑ mu ba zayi’
1’Yaa ‑jan ‑glɔɔ ’wolɛ‑ ’gwlaan‑ gblaan ’kedo‑ ’kpɔ ni, ’duŋ‑ zruwla ‑a ’kpee ’bhii‑ ’e dɛ. ’Bhɛɛ‑ ‑zwannɛ mu ’ɛ ’kun ’bhɛ ’kungbɛya do ’kpɔ ’ɛ ’yi, ’bhii‑ ’e ’gbu nɛɛnɛ‑ mu gbɛɛn‑. 2’Bhɛ ya ’ɛ ’yi ’ezin‑, le gblaan mu ’ɛ ’kun ’bhii‑ ’e nɛɛ mu, ’bhɛɛ‑ le ’seebaanɛ mu ’ɛ ’kun ’bhɛ klɛgbɛya do ’kpɔ ’ɛ ’yi ’bhii‑ ’e nɛɛnɛ‑ ‑le mu ’e ’kpee ’fleele‑ ’le.
Glaanle mu ’kungbɛya
3Le mu ’la ‑woo glaanle ‑zeze mu ’gbu ’le, ‑o ‑lɛdɔ’ ‑a ma. 4’Duŋ‑ ’ke glaanle mu ’la ’nɛ mu ’pegee ‑o ’nranɛ‑ mu ‑o, ’bhɛ ‑nɛ mu ’ɛ ‑woo ‑gasi ’la ’kpa zii’ ‑Waanbhaa’ ‑lɛɛ bhe, ‑o ’bhɛ ’kpa ’elwale ’pe ’ke ‑o bhɔ ‑o ’gbu a ’fa ‑la mu ’ɛ ba. ‑O yapɛ mu ’ɛ ‑za ’la ꞊kla ‑o ni ’elwale gban ‑sɔ, ‑o ’bhɛ yɛkɛ‑ za mu klɛ ’mu ni. ’Bhɛ klɛgbɛya ‑glɔɔn ’ɛ ’bhɛ ‑le sɔ ‑Waanbhaa’ ni. 5Le ’la ’bhɛ ‑o ’ke glaanle ‑zeze ’gbu ’le, ’bhɛɛ‑ ’ke ’bhɔŋba‑ mi do ’kpɔ ’laa ‑o ’bhɛ ’kɔɔ, ‑ya ‑yrikpa’ ‑Waanbhaa’ ta, ’bhɛɛ‑ ‑e bo pɛ ‑yrɛwole ma ’bhɛ ma ’seri ’yi ‑bi zi ’pegee ‑yrekpaa’. 6’Duŋ‑ glaanle ’la ’bhɛ bole ‑o ’bhɛ ’gbu ’nrayiza mu klɛle ma, ’bhɛ ‑o ’bhii‑ ’bhɛ ‑gaa gban ’ali‑ ’ke ‑ya ‑yrɛ ma ‑li. 7’Bhɛ ‑jan ’lɛɛ‑ ’wo ‑o ni, ’kooko‑ waa ‑za ’yɔɔ‑ ’kedo‑ ’kpɔ ye ‑o zi. 8’Ke mɛɛ ’la zan laa ‑yaa’ mɛɛ mu ‑gblakun’ ’elrele, ’ali‑ ’ke ’bhɛ kpa ‑yaa’ pɛ ’fa ꞊la mu ’gbu ’ɛ ta ’elwale ’pe, ’bhɛ zan laa ‑o ‑li ’kpaleya zi ’ɛ ta; ’ali‑ ‑a ‑yɔɔ’ ‑yiya’ mɛɛ ’la zan laa ‑Waanbhaa’ dɔ ’bhɛ zan ni.
9’Ke glaanle ’la ’bhɛ ’ya lɛɛ ‑lii ’ɛ ꞊kaan lɛɛ mia yaga ta, ’bhɛɛ‑ ’ke ‑a yaale ‑yaa ’gwlaan‑ do ’kpɔ ‑la ’kɔɔ; ’e sɔ ’bhɛɛ‑ glaanle ‑glɔɔn ’ɛ ’tɔ ’ɛ sɛwɛwole glaanle mu ’tɔ ’ɛ ba. 10’Ke mɔkpɛn’ ’a dɔ ‑a klɛza ‑lrele’ mu ’ɛ ma: ’ke ‑wa ’yaango‑ ’bhii‑ ‑ya ‑nɛ mu ’ɛ ’trola‑ ’elrele, ’kee‑ ‑yaa’ ’cie mu kun ’elrele, ‑e ‑Waanbhaa’ a mɛɛ ’weŋ mu ’ɛ gaan mafia‑, ’kee‑ ‑yaa bhɔ ‑yrɛn ma mɛɛ mu ba, ’bhɛɛ‑ ‑e ‑yaa ‑za ’wlan ‑glɔɔn ’ɛ ’kpɛn ‑la klɛyrɛ glin mɛɛ mu ni.
11’Duŋ‑ ’yaa dɔlɛ glaanle ’seebaanɛ mu ’ɛ ’mu ’tɔ ’sɛwɛwole ‑la. ‑Amasrɔyi ’ke ’drunyan ta pɛ ‑lrɔ ’ɛ ‑dwa ‑o ma, ’bhɛɛ‑ ‑wa pe dɔɔ ‑o yaale’ gwlɛn na; ’bhɛ klɛ gbɛya ’ɛ ’yi, ‑o ploo Krisi a zi ’ɛ ma. 12’Bhɛɛ‑ ’bhɛla‑ ‑yile, ‑kpan balaa’ ‑o ’gbu ta, ‑amasrɔyi ‑woo ‑liiwli’ ’la ’naa‑ ‑Waanbhaa’ ni dɔɔ ‑o nu bolɛ Krisi a pɛ ’le, waa bo ’bhɛ ta ’bhɛɛ‑ ‑o ’bhɛ ’yisiɛ‑. 13’Bhɛɛ‑ ’ezin‑, ‑o woye laa ‑o, ’bhɛla‑ ‑yile ‑o kanaa’ ’fɛ mu ’ɛ ’kpɛn ꞊la; ’duŋ‑ ‑za ’la ’bhɛ ‑o ’eyɔɔle ’ezin‑ ’bhɛ ‑le ‑o ‑lɛ ma nra, ’bhɛ ’pegee ‑o ‑lɛ ta laa ga ‑jan ta ‑titi. ’Bhɛɛ‑ ‑o wo jan laa ’kɛla ’bhɛ ’le ‑o ’bhɛɛ‑ wo. 14’Bhɛla‑ ‑yile, ’ŋ ’yoo‑ ‑a zi ’bhii‑ glaanle ’seebaanɛ mu ’ɛ ‑o yala‑ gwlɛn na, ’bhɛɛ‑ ’ke ‑o ‑nɛ mu ‑srɔɔwo’, ’bhɛɛ‑ ’ke ‑o waa ’fa ‑la mu ’ɛ ’lɛdɔɔ‑ ’elrele; ’kooko‑ ‑kɔɔ’ ’sɔɔnnii ’laa sɔ ‑o ’tɔ ’yɔɔ‑ peyrɛ ’kedo‑ ’kpɔ ’srɔɔwole. 15’Naa ’o ’bhɛ ’pe zii’ bhaama, ‑amasrɔyi ’woo‑ glaanle mu ’ɛ ’ke mu ‑ploola gban ‑Waanbhaa ’a zi dɔɔle ’ɛ ma, ’bhɛɛ‑ ’mu gbaanle ‑o ‑Setran’ zi. 16’Ke Zesu ’yi le do dɛ ‑nɛ mu ’ke mu ‑o ’ke glaanle mu ’le, ‑e ‑yaa’ glaanle mu ’ɛ ‑gblakun’, ’kooko‑ ’bhɛ glaanle mu ’ɛ waa bo Zesu ’yi mu ’ɛ ta ’kwe ’le, ’bhɛɛ‑ ’mu sɔ bhɔle‑ glaanle mu ’la mɛɛ ’kedo‑ ’kpɔ ’laa ‑o ’mu ’kɔɔ ’bhɛ mu ba.
Zesu ’yi mu a zilɛɛ‑ mu ’kungbɛya
17Zesu ’yi mu ’ɛ ‑waa’ zilɛɛ‑ mu ’la ’mu ‑o ’mu a ye ’ɛ ’wo zii’ ’elrele, ‑ka ’mu ’lɛdɔ‑ ‑a ma ’eke‑ trala plɛ, ‑ka ’bhɛ klɛ ’kɛ mu ’gbu ’la ‑Jan ’Nrale‑ ’ɛ wo, ’bhɛɛ‑ ‑o mɛɛ mu daan ’kɛle‑ ’mu ‑la ni. 18‑Amasrɔyi ‑a pele ‑o ‑Waanbhaa’ a ’sɛwɛ ’ɛ ’yi dɔɔ: «’Ke dri ’ɛ ‑yoo pɛbhɛ ’taan zii’ ‑a gaan ’ɛ ’le ’waati ’la ba, ’yaa ‑a ‑lii ’yrelɛ‑;» ’bhɛɛ‑ ‑a yɔɔndɛle ‑o ’ezin‑ dɔɔ: «Yewonɛ ’ɛ ‑yaa’ pɛ ‑le ’ke ‑a ‑sra ’ɛ ’le.»19’Ke mɛɛ do ‑o ‑la ’zi Zesu ’yi mu a zilɛɛ‑ mi do ta ‑za do ’yi, ’yaa dɔlɛ ’bhɛ ꞊la; ’fɔke mɛɛ plɛ, mɛɛ yaga ’sii, ’bhɛɛ‑ ’mu klɛ ’e ’srɛ ’le ’yee‑ ‑za ’ɛ ma. 20Zesu ’yi mu ’ɛ ‑waa’ zilɛɛ‑ mu ’la bole ‑o ‑za ’yɔɔ‑ mu klɛle ma, ’bhɛ ‑jan ’ɛ ’wo mɔkpɛn’ ’yrɛ ma kpataakpa; ’kooko‑ mɛɛ ‑vin mu ’ɛ ’mu gblaan ‑za ’yɔɔ‑ klɛle ma.
21’Ŋ ’yoo‑ ‑jan ’lɛɛ‑ ’bhɛɛ‑ ’kwlanwole ’e ma ’eglɔɔle ‑Waanbhaa’ ’pegee Zesu Krisi ’bhɛɛ‑ ‑Waanbhaa’ ‑mlɛkɛ’ mu ’la makwan‑ ’mu ’yrɛ ma dɔɔ: Dɔ klɛn ’kee ’toŋ mu ’lɛɛ‑ ’kpɛn ’klɔsikun, ’bhɛɛ‑ ’yaa ‑a do mabhaabhɔlɛ ‑a do ta; ’bhɛ ’pegee ’yaa bhaaplɛŋ mu golɛ ’eke‑ ma. 22’Yaa ’kɔɔlɛ‑ ’e gbɛkpale ma mɛɛ ’kedo‑ ’kpɔ ta, ’bhɛɛ‑ ’e ye gbɛkpa ‑a ’kɔɔ Zesu ’yi mu ‑lɛdo’ ’ɛ ’pleŋ‑. ’Bhɛɛ‑ ’ka ’pegee mɛɛ ’kedo‑ ’kpɔ ’laa ’kpalɛ‑ do ma ‑za ’yɔɔ‑ klɛ zayi’. ’E ’gbu ’bo ’e zru ’weŋ ’le.
23’Yaa bolɛ ‑yi do ‑kplɛn ’mile‑ ma; ‑wɛɛn sanɛ‑ ’mi ’e ’kpee ’la za ’ɛ ’pegee ’e ma yikpɛn‑ ta ga ’fiɛntrɔnnɛ mu ’ɛ ‑zayi’.
24Mɛɛ ’ke mu a ‑za ’yɔɔ‑ mu ’ɛ gaanle laa ‑o ’mu ma ’sani‑ ‑woo ’kitikan; ’duŋ‑ mɛɛ ’ke mu a pɛ ‑za ’yɔɔ‑ mu ’ɛ ‑o ’mu ye boolazi ‑a ma. 25’Bhɛ klɛgbɛya do ’kpɔ ’ɛ ’yi, klɛza ‑lrele’ mu ’ɛ gaanle laa klɛ ’mu ma, ’mu ’pwɛle‑ klɛ ‑gbaklaa ’edile; ’ali‑ ’ke ’kɛ mu ’la ’mu ta laa ’pwɛle‑ veŋ‑, ’mu tagaanle laa bo.
6Lu mu ’ɛ ‑woo zan mu ‑lɛdɔ’ a ma
1Zesu ’yi mu ’la ’kpɛn ‑o ’ke lu mu ’le, ‑o ‑gasikpa ‑o zan mu ’ɛ ’lɛɛ ’ke ‑woo ‑lɛdɔ’ a ma gbɛ ’ɛ ’kpɛn ma; ’kooko‑ mɛɛ ’kedo‑ ’kpɔ ’laa sɔ ‑Waanbhaa’ ’tɔ ’ɛ ’siɛle ’bhɛ ’pegee ’ke waa sɔ ‑za ’yɔɔ‑ pele‑ ‑kɔɔa’ daangbɛya ’ɛ ma. 2Lu mu ’la ’mu zan mu ‑o ’ke Zesu ’yi mu ’le, ‑o ‑gasikpa ’mu ’lɛɛ, ’bhɛɛ‑ waa pelɛ dɔɔ ‑o ’kpɛn ‑o ’ke nɛɛnɛ‑ ma do mu ’le. Drɔɔn’ ‑o yewo ’mu ni ’elrele gbɛ ’ɛ ’kpɛn ma; ‑amasrɔyi ‑woo yewo ’zi mɛɛ ’la zan mu ni, ’bhɛ mu ‑o ’ke ‑o ‑yiɛnii’ Zesu ’yi mu ’le. Mɛɛ mu ’ɛ daan ’bhɛ ‑jan mu ’la bhe ’mu ‑le, ’bhɛɛ‑ ’ya ’kpankpanyan ‑o ma.
‑Gɔli’ ’flɛn ’pegee bhla ma daangbɛya mu
3’Ke mɛɛ ’ke mɛɛ mu daan daangbɛya ’bhɛɛke ’le, ’bhɛɛ‑ ’ke yaa ’taawo‑ ‑kɔɔa’ Mɛɛzan Zesu Krisi ’wojan‑ ’weŋ mu ’ɛ ta, ’bhɛɛ‑ ’ke yaa ’taawo‑ daangbɛya ’la ’bhɛ ’a klɛ ’bhɛɛ‑ Zesu ’yi mu ‑gasikpa ‑Waanbhaa’ ‑lɛɛ ’bhɛ ta, 4’bhɛ zan ‑o ’bhɛ ’gbu magbaandɛ ’zi, ’bhɛɛ‑ yaa ‑za ’kedo‑ dɔ. ’Duŋ‑ zaabɔ ‑lrɔ ’ɛ ’bhɛ ‑o ‑a ma ’bhii‑ ga, ’bhɛɛ‑ gwle ’kanle sɔ ‑a ni jan ’le bhaama. ’Bhɛ ‑za mu ’la bhe, ’mu nu ’ke zranwole ’pegee sra ’le, ’bhɛɛ‑ ‑zwanwole ’pegee ’kpee jan ‑yɔɔ’ mu ’le; 5’bhɛɛ‑ zaabɔle mu ’la waa yan. ’Bhɛ zaabɔle mu ’la waa yan ’mu da mɛɛ la zan mu ’nii‑ ’ɛ ‑gaa, ’mu ‑la ba; ’bhɛɛ‑ waa wlan dɔ ‑titi. ‑O ’kpee ma, ‑Waanbhaa’ ‑lɛɛgblaanya ’ɛ ’bhɛ ‑o ’ke ‑naflo ‑glinza’ ‑la ‑le.
6Wlan ’gbu ’ɛ ni, ‑Waanbhaa’ ‑lɛɛgblaanya ’ɛ ’bhɛ ‑o ‑za ’wlan ’srɔɔwo zi ’le, ’ke mɛɛ ’e zru ‑kpalaa’ pɛ yɛkɛ‑ ’la ‑ya ’kɔɔ ’bhɛ ma. 7‑Amasrɔyi ‑kɔɔ’ ’laa nulɛ pɛ ’kedo‑ ’kpɔ ’le ‑kɔɔ’ ’kɔɔ ’trɛ ta ‑gɛ, ’bhɛɛ‑ ’duŋ‑ ‑kɔɔ’ ’laa nu gelɛ pɛ ’kedo‑ ’kpɔ ’le ‑kɔɔ’ ’kɔɔ. 8’Bhɛla‑ ‑yile, ’ke ‑kɔɔ’ ‑kɔɔ’ ’le pɛle ’pegee ‑kɔɔ’ ta pɛ mu ‑srɔɔwoa ’bhɛ ‑kɔɔ’ ’yibhɔ‑. 9’Duŋ‑ ’ke mɛɛ ’la zan mu ‑o ‑a zi ’bhii‑ ‑o klɛ pɛzan mu ’le, ‑o balaa’ ‑za ’yɔɔ‑ ’yi, ’bhɛɛ ‑Setran’ a bhee ‑o kun. ’Bhɛ bhee ’ɛ ’bhɛ ‑le ’ke ’truu‑ maza mu ‑bebe ’pegee zrubhɔ maza ’yɔɔ‑ mu ’le; ’bhɛ mu ‑o siɛ ’bhɛɛ‑ ‑o ni ’feŋfeŋ. 10Wlan ’ɛ ni, ‑gɔli’ ’flɛn ’ɛ ’bhɛ ‑le ’ke ‑za ’yɔɔ‑ mu ’ɛ ’kpɛn ‑glɔɔn kli ’le. ’Yee‑ ‑gɔli’ ’flɛn ’ɛ ’kɔɔ, mɛɛ ’ke mu ꞊nia ’kpaleya zi ’ɛ ma ’egbɔɔnle; ’bhɛɛ‑ ‑o ’ŋgami ‑gbɛnɛ ’srɛ kpa ‑o ’gbu ma.
’Kpaleya ‑Waanbhaa’ ’yi ’bhɛ ta gwle ‑lrele’
11’Duŋ‑ ’bhi Timote, ’bhi ’la ’bhi ‑o ’ke ‑Waanbhaa’ a mɛɛ ’le bhe, blasan‑ ’bhɛ ‑za mu ’la bhe ’mu ’kpɛn ’lɛɛ. ’Bhɛɛ‑ ‑lɛdɔɔleya zi oo, ‑Waanbhaa’ ‑lɛɛgblaanya oo, ’kpaleya oo, ’sɔniya oo, zrubakpaaleya oo, ’bhɛ ’pegee ‑yidɔɔya ’mu ’kpɛn ‑la ziglin‑. 12Dɔ ’eglɔɔle ’bhɛɛ‑ ’e ’kpaleya Krisi ’yi ’ɛ ’bhɛ ta gwle ‑lrele’ ’ɛ dan. ’Bhɛɛ‑ bole ‑yrɛ ma ‑si ’la ‑daŋ’ ’laa ‑o ’bhɛ ma ’bhɛ ’kun. ‑Waanbhaa’ ’e ’siila‑ ’bhɛɛ‑ bole ‑yrɛ ma ‑si ’ɛ ’kaama‑; ’bhɛɛ‑ ’yee ’kpalawoa Krisi ’yi ’ɛ ’bhɛ ba jan ‑lrele’ ꞊woa mɛɛ ’srɛ ’yrɛ ma kpataakpa. 13’Mi jan ’lɛɛ‑ ’kwlanwo‑ ’e ma ‑Waanbhaa’ ’la ‑si na pɛ mu ’kpɛn ni, ’bhɛ ’yrɛ ma; ’bhɛ ’pegee Zesu Krisi ’la ‑a ’gbu ta ‑jan ’lrele‑ ‑woa Pɔnsi Pitalti ’yrɛ ma. 14’Mi ‑o ‑jan ’lɛɛ‑ ’kwlanwo zii’ ’e ma ’eglɔɔle dɔɔ ‑a ‑klɔsikun ’elrele, ’bhɛɛ‑ waa ‑za ’yɔɔ‑ do ’kpɔ ’yelɛ‑ ’e zi, ’bhɛ ’pegee bo ’weŋ ’ke ’bhɛ ge ’tɛnle‑ ‑kɔɔa’ Mɛɛzan Zesu Krisi ’pwɛ yi ’ɛ ma. 15’Yee Krisi ’pwɛ yi ’ɛ nu klɛlɛ ’waati ’la ‑Waanbhaa’ ’bhɛ ’lɛdulaa ’bhɛɛ‑ ba. ’Yela‑ do ‑kplɛn ’kpaale‑ ‑o pɛ ’kpɛn ’wiiŋ‑, ’bhɛɛ‑ ’yele‑ ’ke ‑bhleŋgbe mu ’kpɛn a ‑bhleŋgbe ’le, ’bhɛ ’pegee Mɛɛzan mu ’kpɛn a Mɛɛzan ’le. 16’Yela‑ do ‑kplɛn ’laa ga ‑titi; ‑a boyrɛ ’ɛ ’bhɛ ‑o ’ke ’tɛbhile ’la ’ke mɛɛ ’kedo‑ ’kpɔ ’laa sɔ ’e ’mabɛɛnle ’bhɛ ‑din ’bhɛɛ‑ ’le. Bhaaplɛŋ ’kedo‑ ’kpɔ ’laa ’bhɛ ’yelɛ‑ ‑lido’, ’bhɛɛ‑ bhaaplɛŋ ’kedo‑ ’kpɔ ’laa sɔ ’bhɛ ’yele. ‑Yaa’ pɛ ‑le ’ke ’tɔbhɔleya ’pegee ‑glɔɔya’ ’la ’ke ‑daŋ’ ’laa ‑o ’bhɛ ma ’mu ’le! Amiina!
Pɛzan mu ‑liale’
17‑Jan ’lɛɛ‑ ’bhɛ ’kwlanwo ’eglɔɔle ‑zɔn ’drunyan ’lɛɛ‑ ’yi pɛzan mu ’ɛ ma dɔɔ waa ‑o ’gbu ’wasowolɛ, ’bhɛɛ‑ ‑o ‑yrikpale laa bolɛ ‑naflo pɛ mu ’la waa mɔ ’mu ta; ’duŋ‑ ‑o ‑yrikpale bo ‑Waanbhaa’ ‑la ta. ’Yele‑ ‑kɔɔ’ gba pɛ ’kpɛn ba ’ebebele, ’kooko‑ ‑kɔɔ’ ‑kɔɔ’ zrukpalaa ’bhɛ ma. 18‑A ’kwlanwo ‑o ma ’eglɔɔle dɔɔ ‑o ‑za ’wlan klɛ, ’bhɛɛ‑ ‑o klɛza ‑lrele’ mu ’ɛ klɛ ’esrɛle; ‑o ’kɔɔ ’laa klɛlɛ ’eglɔɔle, ’bhɛɛ‑ ‑o dɔ ‑a ‑la ’ke ‑woo ’kɔɔpɛ‑ mu ’ɛ ’yiciɛn‑ mɛɛ ‑bhɛɛke’ mu ma. 19’Ke ‑o ’bhɛ ꞊kla, ‑o nu ‑o ’gbu ‑lɛɛ ‑naflo zrɛ dɔlɛ ’bhɛ gbɛɛn‑ bhe boolazi; ’bhɛ ‑naflo ’ɛ ’bhɛ lele ’bhɛɛ‑ ’bhɛ ’laa ’siɛ ‑titi. ’Bhɛ klɛgbɛya ’ɛ ’yi, ‑o nu bole ‑yrɛ ma ‑si ‑zeze ’gbu ’ɛ ’bhɛ ’srɔɔwolɛ.
Pɔlu ‑o ‑a ‑srawo’ zii’ Timote ma
20’Ŋ ’nɛ Timote, ‑Waanbhaa’ ‑za mu ’la gbɛkpaa‑ ’e ’kɔɔ, ‑o ’kun ’e gbɛ plɛ ’le. ’Ploo‑ bhaama ‑janwole mu ’la waa ‑o ’ke ’kpaleya zi ’ɛ ta janwo gbɛya mu ’le ’mu ma; ’bhɛ ’pegee ’yaa ’e ’lɛbɔlɛ bhaama zaabɔle mu ’yi; ’bhɛ zaa ‑glɔɔn ’ɛ bɔ mu ’ɛ ‑woo ’gbu ’kun ’bhii‑ ‑zadɔ’ mu, ’duŋ‑ waa ‑o ’ke ’bhɛ ’le. 21Mɛɛ ’ke mu ’kpee ma ‑o ’bhɛ ‑zadɔleya ’ɛ ’srɔɔwoa‑, ’bhɛɛ‑ ’duŋ‑ ‑o ’kpaleya zi ’ɛ ’bhɛ ꞊twa ‑a nɔɔ‑.
Bhaa ‑Waanbhaa’ ‑lileya ’ɛ zina‑ ’ka ta!