PƆLU ’LƐTRƐ ꞊LWA ’LA ꞊KPAA ZESU ’YI MU ’LA ’YAA‑ TESALONIKI ‑WA ’Ɛ TA ’MU NI
Pɔlu ’lɛtrɛ ꞊lwa ’la ꞊kpaa Tesaloniki ‑wa ’ɛ ta Zesu ’yi mu ’ɛ ni ’bhɛ ŋgblo
Tesaloniki ‑o ’ke Masedwani ’klɛɛn ’ɛ ’yi ‑wa ‑gbɛnɛ mu ’ɛ do ’le. ‑O ‑yaa mɛɛ ’la zan sii Silivɛn, ’bhɛɛ‑ ’ke ‑wa ’tɔkpaa‑ Silasi ’bhɛ ’pegee Timote ‑le ꞊bhwa Pɔlu ba Tesaloniki Zesu ’yi mu ’ɛ ’klalele ’eke‑ ba. Pɔlu ’laa ’mɔlɛ‑ ‑a nɔɔ‑, ‑amasrɔyi Zuufu mu ’ɛ ’bhɛ ’saawoa‑ ‑a ’kɔɔ (Klɛza 17). ‑E gole Masedwani ’klɛɛn ’ɛ ’yi, ’kee‑ gele‑ Akayi ’klɛɛn ’ɛ ’bhɛ ’yi. ’Duŋ‑, ‑e gole Masedwani ’te, ’kee‑ Timote ’winbɔle Tesaloniki Zesu ’yi mu ’ɛ taglin‑ zayi’, ’kooko‑ ’ke ’mu ’laa ’ploolɛ‑ ’mu ’kpale‑ ma Zesu ’yi, ‑e sɔ ’bhɛ ’yaangole ’mu ta ‑yrɛn ’ɛ ’kɔɔ.
Timote dale ’mu taglinlɛ, ’bhɛɛ‑ ‑e ’mu ta jan ‑nrale’ mu ’ɛ ’klale‑ ’yee‑ Pɔlu ’kɔɔ, ‑a zrukpaagbɛya ‑yɔɔ’ ’ɛ ’kɔɔ, ’kee‑ ’lɛtrɛ ’lɛɛ‑ dɛle‑ ‑o ni. ’Lɛtrɛ ’lɛɛ‑ ’yi, ‑Waanbhaa’ ‑za ’brɛɛ mu ’la ꞊kla ‑a ni, ‑e ‑Waanbhaa’ ’pubwa‑ ’mu ma ’elwale ’pe. ’Bhɛɛ‑ ‑e Tesaloniki Zesu ’yi mu ’ɛ ‑liaala dɔɔ ‑o bo ‑o ’kpale ma Zesu ’yi, ’bhɛɛ‑ ’ke ‑waa’ ’kpaleya ’ɛ baan’ kla ’bhɛ ba.
Pɔlu yewoa‑ ’woo‑ Tesaloniki Zesu ’yi mu ’ɛ ’pleŋ‑ gɔnɛ‑ ’la gbɛɛn‑, ‑e ’bhɛ ‑dwa ‑o ’kpee. ‑A zrukpaale ‑o, ‑amasrɔyi, ’ali‑ mɛɛ mu ’ɛ ‑yrɛn mu ’la ꞊kpaa ‑o ta, ‑o blɔɔle ꞊bwa ‑o ’kpale ma Krisi ’yi, ’bhɛɛ‑ ‑o ye ‑lrɔ ‑yaa Pɔlu (1 Tesaloniki 1-3).
A ‑lɛ yiziɛ mi ’ɛ ’yi (1 Tesaloniki 4.1-12), Pɔlu ꞊bwa ’ezin‑ ‑o ’taawogbɛya ‑lrele’ ‑jan ’ɛ ’bhɛ ta, ’bhɛ ’pegee ‑o ’pleŋgoza ‑yanbhɔɔya klɛle ma, ’bhɛɛ‑ ’ke ‑o ‑za sɔ ’eke‑ ni.
‑A ‑lɛyanyrɛ ’ɛ ꞊nɔɔ (1 Tesaloniki 4.3–5.11), Pɔlu ꞊bwa Zesu ’nu gbɛ gaan plɛ mi ’ɛ ta, ’bhɛ ’pegee gbaa mu bwele gale ba ’ɛ ’bhɛ ‑za ’ɛ ta. Pɔlu ’yee‑ ’lɛtrɛ ’lɛɛ‑ ꞊yaan ‑o ‑liawli’ mu ’pegee ’pubɔwli, ’bhɛɛ‑ ‑o ’dumawole mu ‑la ‑le.
1Pɔlu ’pegee ‑yaa’ yewoyɔɔn mu ’ɛ ‑woo Tesaloniki Zesu ’yi mu ’ɛ ’pubɔ‑ ’zi
1’Mi Pɔlu ’pegee Silasi ’bhɛɛ‑ Timote, ’o mɔɔ ’gbu ‑le ’lɛtrɛ ’lɛɛ‑ ꞊dia ’ka mu Zesu ’yi mu ‑lɛdo’ ’la ’ka ‑o Tesaloniki ‑wa ’ɛ ta ’ka mu ni. ’Ka ‑o ‑kɔɔ’ Dɛ ‑Waanbhaa’ ’pegee Mɛɛzan Zesu Krisi a pɛ ’le. Bhaa ‑Waanbhaa’ ‑li ’ka ma, ’bhɛɛ‑ ‑e ‑yaa’ yilabla ’ɛ na ’ka ni.
Tesaloniki Zesu ’yi mu ’ɛ ’kpagbɛya ’ɛ ꞊swa Pɔlu ni.
2’O ‑Waanbhaa’ ’pubɔ‑ ’taŋii ’ka ’kpɛn ba zayi’, ’bhɛɛ‑ ’woo‑ ’seriwo ’taŋii ’kaa‑ ‑za ma. 3Wlan ’ɛ ni, ’ka ’ka ꞊kpaa Krisi ’yi gɔnɛ‑ ’la gbɛɛn‑, ’bhɛɛ‑ ’ka ’bhɛ ’yizakla; ’ka yewoa‑ ‑a ni gɔnɛ‑ ’la gbɛɛn‑ ’sɔniya ’le ’ka ’yi, ’bhɛ ’pegee ’ka ’yrikpale ’la ‑yoo ’eglɔɔle Mɛɛzan Zesu Krisi ta; ’bhɛ ‑za mu ’ɛ dɔ ’o ’kpee ’waati ’ɛ ’kpɛn ba ’ke ’woo‑ ’seriwo zii’ ‑kɔɔ’ Dɛ ‑Waanbhaa’ ni. 4’O nɛɛnɛ‑ mu, ’wa ’yaango‑ ’bhii‑ ’ka ‑za ꞊swa ‑Waanbhaa’ ni, ’bhɛɛ‑ ‑e ’ka makwan‑ yaa pɛ ’le. 5’O ‑Jan ’Nrale‑ ’la ꞊woa ’ka ni; ’waa ’bhɛ klɛlɛ ’o ’liijan‑ bhaama ’te ’wolele ’ka ni, ’duŋ‑ ’wa ꞊kla ’ke ‑Waanbhaa’ a ‑glɔɔya’ ’pegee *Lii ’Weŋ ’ɛ ’mu ‑la ‑le. ’Bhɛɛ‑ ’o ’kpale‑ ‑yaa ‑a ‑yi ’bhii‑ wlan ‑le ’kɛle‑. ’O ’taawoa꞊ ’ka ’pleŋ‑ gɔnɛ‑ ’la gbɛɛn‑ ’ka ’gbu ’bhɛ ’yaango‑ ’bhii‑ ’bhɛ ’yaa‑ ’ka ’gbu ’nrayiza ’le. 6’Ka mu ’gbu ’taawoa꞊ ’bhii‑ ’o mɔɔ ’gbu ’pegee Mɛɛzan Krisi ’taawogbɛya ’ɛ gbɛɛn‑. ’Ali‑ ’ka ’yaa‑ ’trɛbhɔ ‑bebe ’la ’yi, ’ka ‑dwa ‑Waanbhaa’ a ‑jan ’ɛ ꞊la ’ka zrukpaale ’la da Lii ’Weŋ a ‑glɔɔya’ ’ɛ ba ’bhɛɛ‑ ’le. 7’Bhɛ klɛgbɛya ’ɛ ’yi, Masedwani ’klɛɛn ’ɛ ’pegee Akayi ’klɛɛn ’ɛ ’yi Zesu ’yi mu ’ɛ, ’mu ’kpɛn nu ’taawolɛ ’kaa‑ pɛ ’taawogbɛya ’ɛ ’bhɛɛ‑ zi. 8Wlan ’ɛ ni, Mɛɛzan a ‑Jan ’ɛ dalawoa ’ka mu ba, ‑e ꞊zian Masedwani ’pegee Akayi ’klɛɛn mu ’ɛ ’yi; ’duŋ‑ yaa bolɛ ’mu do ‑kplɛn ta; ’ka ’kpagbɛya ’ɛ ‑Waanbhaa’ ’yi, ’bhɛ ‑jan ’ɛ ꞊zian yrɛkpɛn‑ ꞊nɔɔ ’ezin‑, ‑asiikɔɔ ’o maza laa ‑yaa ‑li ’bhɛ ‑jan ’ɛ ’wole‑ ma mɛɛ mu ’ɛ ni, ‑amasrɔyi ‑wa ‑maa gban. 9’Ka ’o ’cieya‑ ꞊kla ’elrele gɔnɛ‑ ’la gbɛɛn‑, mɔkpɛn’ ‑o ’bhɛ ’pe zii’. ’Bhɛɛ‑ ‑wa pe zii’ ’ezin‑ ’kaa ’ka ’ploola‑ ’kaa yo mu ’ɛ gbale ma, ’bhɛɛ‑ ‑Waanbhaa’ ’la ‑ya ‑yrɛ ma, ’ke ‑yee’ ’ewlanle, ’ka ’ka zru ‑niinaa’ ’bhɛ ba, ’bhɛɛ‑ ’ka ’bhɛ gba. 10’Bhɛɛ‑ ’ka ‑o ‑a Gbe Zesu ’la ‑e ’bhɛ ‑bwela gale ba, ’bhɛ ’magbɛn‑ ’zi ’ke ’bhɛ da laanima. ’Bhɛ Zesu ’ɛ, ’bhɛ ‑le ‑kɔɔ’ go ‑Waanbhaa’ a ’kiti ’ɛ ’yi.
2PƆLU ’PEGEE TESALONIKI ZESU ’YI MU ’Ɛ ’PLEŊZA‑
Pɔlu yelawoa Tesaloniki ‑wa ’ɛ ta
1’Ŋ nɛɛnɛ‑ mu, ’ka mu ’gbu ’a ’yaango‑ ’o gelawoa ’ka ba, yaa klɛlɛ ’ke bhaama za ’le. 2’Kaa ’yaango‑ ’ezin‑ ’bhii‑ mɛɛ mu ’o ‑zwanwoa, ’bhɛɛ‑ ‑o ‑yrɛnkpaa ’o ta ’elwale ’pe Filipu ‑wa ’ɛ ta. ’Duŋ‑ ‑Waanbhaa’ faŋgandwa ’o ta, ’bhɛɛ‑ ’o ꞊nwa ‑yaa’ ‑Jan ’Nrale‑ ’ɛ ’wolɛ‑ ’ka mu ni Tesaloniki ’tɛ, ’ali‑ ’ke mɛɛ mu ’ɛ waa ‑yaa dɔle‑ ‑a ꞊la ’ke ’o ’bhɛ wo bhe. 3Wlan ’ɛ ni, ’waa ‑o ’yee‑ ‑Jan ’Nrale‑ ’ɛ ’wo zii’ bhla ma, ’bhɛ ’pegee ’o ’kpee ’yɔɔ‑ ’le. ’Bhɛɛ‑ ’waa ‑o mɛɛ ’kedo‑ ’kpɔ ’yiniyrɛ ‑glin ’zi. 4Drɔɔn’ ‑Waanbhaa’ ‑a zi ’bhii‑ ’o ‑janwo’ ‑janwo’ gbɛya ’la ’yi, ’woo‑ ’bhɛɛ‑ klɛ ’zi. ‑Amasrɔyi, ‑a ’gbu ’a ꞊ya ’bhii‑ ‑a ‑gaale’ ’o ba ’kee‑ ‑yaa’ ‑Jan ’Nrale‑ ’ɛ gbɛkpa ’o mɔɔ ’kɔɔ. ’Waa ‑o ‑janwo’ zii’, ’kooko‑ ’o sɔ mɛɛ mu ni, ’duŋ‑ ’woo‑ ‑a zi ’bhii‑ ’o sɔ ‑Waanbhaa’ ’la mɛɛ zrubaglin ’bhɛɛ‑ ni. 5’Ka ’gbu ’a ’yaango‑ ’bhii‑ ’waa ’ka ’yini ma ‑janwolɛ ’ka ni; ’bhɛɛ‑ ’waa ’yee‑ ‑Jan ’Nrale‑ ’ɛ wolɛ ’ka ni ’waa ‑gɔli’ ’flɛŋya‑ ’ɛ ma, ‑Waanbhaa’ ’gbu ‑o ’o ’srɛ ’le. 6’Waa ’o ’gbu ’tɔbhɔyrɛ ‑glinlɛ’ ‑lido’ mɛɛ ’kedo‑ ’kpɔ ’kɔɔ: ’kee‑ ’kpa ’ka mu ta oo, ’kee‑ kpa mɛɛ ‑bhɛɛke’ mu ta oo, ’waa ’bhɛ klɛlɛ ‑lido’. 7’Bhɛɛ‑ ’duŋ‑, ’woo‑ Krisi a winbɔwo mu ’la ’le bhe, ’o ’yaa‑ sɔ ’waa‑ mɛɛ gblaanya ’ɛ gbiŋkpale ’ka ta ’bhii‑ ’kwe. ’Duŋ‑ ’waa ’bhɛ klɛlɛ, drɔɔn’ ’o ’yaa‑ ’ka ba ’waati ’la ba, ’o ’yaa‑ ’ka ’kun zii’ ’o ’yidɔɔ‑ ’le ’bhii‑ ’ke ‑nɛ nɛɛ do ‑o ‑yɔn ’na zii’ ’a ’nɛ ’ɛ ni ‑e ’bhɛ ‑gblakun’ gɔnɛ‑ ’la gbɛɛn‑. 8’Bhɛ ya ’ɛ ’yi, ’ka ‑za ’sɔ gbɛ ‑yɔɔ’ ’ɛ ’kɔɔ ’o ni, ’waa ‑yaa zi ’bhii‑ ’o bo ‑Waanbhaa’ a ‑Jan ’Nrale‑ ’te ’ɛ ’bhɛ ’wole‑ ma ’ka ni; ’duŋ‑ ’o ’yaa‑ zi ’bhii‑ ’woo ’gbu ’si ’ɛ ’na ’ka ni ’ka ‑za ’sɔ gbɛ ‑yɔɔ’ ’ɛ ’kɔɔ ’o ni. 9’Ŋ nɛɛnɛ‑ mu, ’o yewoa꞊ ’eglɔɔle gɔnɛ‑ ’la gbɛɛn‑, ’bhɛ ’pegee ’o ’trɛbhwa꞊ ’ebebele gɔnɛ‑ ’la gbɛɛn‑ ’bhɛ ‑o ’ka ’kpee: ‑bi zi oo, ‑yrekpaa’ oo, ’o yewoa꞊ ’eglɔɔle ’o gbɛ ma, ’kooko‑ ’woo ’gbu maza gopɛ ‑srɔɔwo’, ’bhɛɛ‑ ’waa klɛ ’ka ta ’kwe ’le, ’o ’yaa‑ ‑Waanbhaa’ a ‑Jan ’Nrale‑ ’ɛ ’wo zii’ ’ka ni bhla ’la ba.
10’Ka mu ’gbu ‑o ’o ’srɛ ’le, ’bhɛɛ‑ ‑Waanbhaa’ ‑o ’o ’srɛ ’le ’ezin‑. ’Ka mu ’la ’ka ’ka ꞊kpaa Krisi ’yi bhe, ’o ’taawoa꞊ ’ka ’pleŋ‑ ’o ’kpee ’fleele‑ ’le, ’bhɛ ’pegee ’o ’lɛdɔɔle ‑yaa, ’bhɛɛ‑ waa ‑za ’yɔɔ‑ ’kedo‑ ’kpɔ ’yelɛ‑ ’o zi. 11’Kaa ’yaango‑ ’ezin‑ dɔɔ ’o ’ka ’kpɛn do do ‑gblakwan ’elrele ’bhii‑ ‑nɛ dɛ ‑a ’gbu ’nɛ mu ‑gblakun’ ’elrele gɔnɛ‑ ’la gbɛɛn‑. 12’O zruwlaa꞊ ’ka ’kpee, ’bhɛɛ‑ ’o ꞊bwa ‑a pele ma ’ka ni dɔɔ ‑ka ’taawo ’elrele ’ke ’bhɛ sɔ ‑Waanbhaa’ ni. ’Yee‑ ‑Waanbhaa’ ‑le ’ka ’siila‑, ’kooko‑ ’ka dɔ klɛ ‑yaa’ ‑bhleŋgbeya ’pegee ‑yaa’ ’tɔbhɔleya ’ɛ ’mu ba.
13’O ‑Waanbhaa’ ’pubɔ‑ ’taŋii ‑za ’lɛɛ‑ ’bhɛɛ‑ ma ’ezin‑. ’O ’yee‑ ‑Waanbhaa’ a ‑jan ’la ꞊woa ’ka ni, ’ka ‑dwa ‑a ꞊la. ’Ka ’laa ’yelɛ‑ ’bhii bhaaplɛŋ mu wojan gbɛɛn‑; ’duŋ‑ ’kaa ꞊ya ’bhii‑ ‑Waanbhaa’ a ‑jan ’le. ’Bhɛɛ‑ ’duŋ‑ ‑yoo ’ke ’bhɛɛ‑ ’le kpataakpa. ’Bhɛɛ‑ ‑yoo yewo ’zi ’ka mu ’la ’ka ’ka ꞊kpaa ‑a ‑yi ’ka zru mu ’ɛ ’yi. 14Wlan ’ɛ ni, ’ŋ nɛɛnɛ‑ mu, ‑Waanbhaa’ a mɛɛ mu ’la ‑woo ’ke Zesu Krisi ’yi a pɛ ’le Zude ’klɛɛn ’ɛ ’yi, ’ka mu ’mu a ’taawogbɛya ’ɛ ’bhɛɛ‑ ꞊sia bhe; ‑amasrɔyi Zuufu ’ke mu ‑yrɛnkpaa ’mu ta gɔnɛ‑ ’la gbɛɛn‑, ’ka mu a pɛ mɛɛ mu ’ɛ ’mu ‑o ‑yrɛnkpa’ zii’ ’ka ta ’bhɛɛ‑ gbɛɛn‑ ’ezin‑. 15’Woo‑ Zuufu mu ’ɛ, ‑o ’ke mu ‑le ‑Waanbhaa’ a ‑lɛla’ janwo mu ’ɛ ꞊dia ’elwale ‑sɔ; ’bhɛɛ‑ ‑o ’ke mu ‑le ’a ꞊kla ’bhɛɛ‑ mɛɛ mu Mɛɛzan Zesu ꞊dia; ’bhɛ ’laa ‑mɔlɛ’ ‑li, ’wola‑ ’ke mu ‑yrɛnkpaa ’o mɔɔ ta ’ezin‑. Waa sɔ ‑Waanbhaa’ ni, ’bhɛɛ‑ ‑o ‑sɔɔnnii’ ‑o ’ke mɔkpɛn’ ’le. 16’Ke ’woo‑ ‑a zi ’bhii‑ ’o ‑Jan ’Nrale‑ ’ɛ ’wo Zuufu kle mu ’ɛ ni, ’bhɛɛ‑ ’mu go ‑za ’yi, ‑o ’bhɛ ’saawo‑ ’o ’kɔɔ. ’Bhɛ klɛgbɛya ’ɛ ’yi, ‑o waa ‑za ’yɔɔ‑ mu ’ɛ baan’ ‑la ’kla zii’ ’a ba. ’Duŋ‑ ’bhɛ ’lɛyanyrɛ ‑le ’ke ‑Waanbhaa’ a ’kiti ’yɔɔ‑ ’ɛ baayrɛ ’le ‑o ta.
Tesaloniki Zesu ’yi mu ’ɛ ’ye ‑lrɔ ‑o Pɔlu ma
17’O nɛɛnɛ‑ mu, ’o mɔɔ golawoa ’ka ‑din ’waati ’dama ta ’o ’flɛ ’ɛ ’yi, waa pelɛ ’o ’nii‑ ’ɛ ’yi, ’ka taglin‑ ’lrɔ ‑gbɛnɛ ‑dwa ’o ma ’eglɔɔle. 18’Bhɛla‑ ‑zayi’, ’o ’yaa‑ zi ’bhii‑ ’o ge gbɛ drɛɛwo ’ka ba ye ’ezin‑, ’ali‑ ’mi Pɔlu ’gbu ’bhɛ ’yidangbɛ ’damawoa; ’duŋ‑ ‑Setran’ ’bhɛ ’saawoa‑ ’o ’kɔɔ. 19’Bhɛ ya ’ɛ ’yi, ‑de mu ‑le ꞊kla ’o ’yrikpa pɛ ’le ɛɛ? ‑De mu ‑le ’o zrukpaa’ pɛ ’le ɛɛ? ’Bhɛɛ‑ ‑de mu ‑le ’o ’wasowo pɛ ’le ɛɛ? Mɛɛzan Zesu ’nu yi ’le, ’ka mu ‑le nu klɛlɛ ’o ’yrikpa pɛ ’le, ’bhɛ ’pegee, ’ka mu ‑le nu klɛlɛ ’waa‑ zrukpaa pɛ ’pegee ’o ’wasowo pɛ ’le Mɛɛzan Zesu ’lɛɛ. 20Wlan ’ɛ ni, ’ka mu ‑le ’o ’wasowo pɛ pegee ’o zrukpaa’ pɛ ’le.
31’Bhɛ ꞊nɔɔ ’mɔlawoa ’ke ’waa ’ka ye bhe, ’waa ‑yaa sɔ ‑li ’bhɛ ’yikunle; ’bhɛla‑ ‑yile, ’ke ’wa ’kpale do dɔɔ ’mi ’pegee Silasi bo ‑sɔ Atɛni ‑wa ’ɛ ta. 2’Bhɛɛ‑ ’ke ’woo nɛɛnɛ‑ Timote winbɔle ’ka ta ye. ’Yee‑ ’pegee ’o mɔɔ ‑o yewo ’zi ’eke‑ zi ‑Waanbhaa’ ni ’ke ’o Krisi a ‑Jan ’Nrale‑ ’ɛ wo. ’Wa ’winbwa‑ ’ka ta ye, ’kooko‑ ‑e ge zruwla ’ka ’kpee, ’bhɛɛ‑ ‑e faŋgandɔ ’ka ta ’kaa‑ ’kpaleya ’ɛ ’yi. 3’Bhɛɛ‑ ’kooko‑, ‑o ‑yrɛn mu ’la kpa zii’ ‑kɔɔ’ ta ’saanigɛ, ’ka ’kedo‑ ’kpɔ ’laa ploo ’bhɛ ’kpale‑ ma Zesu ’yi. ’Ka ’gbu ’a ’yaango‑ ’bhii‑ ‑yrɛn mu ’la ’mu ‑kɔɔ’ ta, ‑Waanbhaa’ ’kɔɔ ‑za ‑le ’mu ‑le. 4‑Amasrɔyi ’o ’yaa‑ ’ka ba ’waati ’la ba, ’o ’ka ’kpeelɛkaan dɔɔ mɛɛ mu nu ‑yrɛnkpalɛ ‑kɔɔ’ ta. ‑Kaa ’yaango‑ ’bhii‑ ’o ’ka ’kpeelɛkaan ‑za ’la mu ’le, ’mu ‑le bhɔ ’zi bhe. 5’Bhɛ ꞊nɔɔ ’mɔlawoa ’ke ’waa ’ka ye bhe, ’waa ‑yaa sɔ ‑li ’bhɛ ’yikunle, mi ’gbu Timote ’winbwa‑ ’ka ta ye, ’kooko‑ ’ka ’kpale‑ ‑o Krisi ’yi gɔnɛ‑ ’la gbɛɛn‑ ‑e ge ’bhɛ ’ye. ‑Amasrɔyi yiɛn ‑yaa ’kan zii’ ’ŋ ’kpee dɔɔ ‑Setran’ ’laa nu ’ka ’lɛkanlɛ, ’bhɛɛ‑ ‑e ’ka ’yini‑. ’Ke ’bhɛ ꞊kla, ’o ye ’la ꞊woa ’ka ba ye, ’bhɛ nu klɛlɛ bhaama yewole ’le.
Tesaloniki Zesu ’yi mu ’ɛ ’kpaleya ’ɛ Pɔlu zrukpalaa
6’Duŋ‑ Timote dalawoa ’ka taglin‑ yrɛ ’ɛ ꞊nɔɔ, ‑e ’ka ta jan ’nrale‑ ꞊woa ’o ni. ‑Ya ꞊pia ’o ni dɔɔ ’ka ’kpale‑ ‑o Krisi ’yi ’elrele, ’bhɛɛ‑ ‑a ‑za sɔ ’ka ni. ‑Ya ꞊pia ’o ni ’ezin‑ dɔɔ ’o ‑za ‑o ’ka ’kpee ’taŋii, ’bhɛ ’pegee ’ka mu ye ‑lrɔ ’o ma gɔnɛ‑ ’la gbɛɛn‑, ’o mɔɔ ye ‑lrɔ ‑o ’eglɔɔle ’ka mu ma ’bhɛɛ‑ gbɛɛn‑ ’ezin‑. 7’O nɛɛnɛ‑ mu, ‑o ’ka ta jan ’ɛ ’wolawoa ’o ni, ’ali‑ ’ke ’woo‑ ’trɛbhɔ ’pegee ‑yrɛn mu ‑la ‑yi, ’bhɛ faŋgandwa ’o ta, ’kaa‑ ’kpaleya ’ɛ ‑zayi’. 8’Bhɛ ya ’ɛ ’yi, ’ka dɔlela ‑yoo ’eglɔɔle ’ka ’pegee Mɛɛzan a ’kpaledomaya ’ɛ ’yi, ’o sɔ ’o ’trɛle ’tɛ. 9’Bhɛɛ‑ ’o sɔ ‑Waanbhaa’ ’pubɔle ’nale‑ ‑a ma ’ka ba zayi’, ’ka zrukpaa’ ‑gbɛnɛ ’la ‑zinaa’ ’o ta ’yee‑ ‑Waanbhaa’ ‑yrɛ ꞊la ’bhɛ ‑zayi’ ɛɛ? 10‑Bi zi ’pegee ‑yrekpaa’, ’o ‑sromabɔ ’eglɔɔle ‑Waanbhaa’ ni dɔɔ ‑e zi na ’o ni ’bhɛɛ‑ ’o sɔ gele‑ ’ka taglinlɛ. ’Ke ’bhɛ ꞊kla, ’waa ’sɔlɛ‑ ’ka daanle‑ ’kɛla ’le ’kpaleya a zi ’ɛ ta, ‑o nu ’ka daanlɛ ’bhɛ ’le, ’bhɛɛ‑ ’kaa‑ ’kpaleya Zesu ’yi ’bhɛ ’lɛpa‑.
11Bhaa ‑kɔɔ’ Dɛ ‑Waanbhaa’ ’gbu ’pegee Mɛɛzan Zesu Krisi zi na ’o ni, ’bhɛɛ‑ ’o sɔ gele‑ ’ka taglinlɛ. 12Bhaa Mɛɛzan kaa ’sɔlekeniya ’ɛ baan’ kla ’a ba, ’bhɛɛ‑ mɛɛ mu ’ɛ ’kpɛn baan’ sɔ ’ka ni, ’bhii‑ ’ka mu ‑za sɔ ’o mɔɔ ni gɔnɛ‑ ’la gbɛɛn‑. 13Bhaa ‑e faŋgandɔ ’kpaleya ’la ‑yoo ’ka ’yi bhe ’bhɛ ta; ’kooko‑ ’ka klɛ ’weŋ, ’bhɛɛ‑ waa ‑za ’yɔɔ‑ ’kedo‑ ’kpɔ ye ’ka zi ‑kɔɔ’ Dɛ ‑Waanbhaa’ ‑yrɛ ꞊la, Mɛɛzan Zesu ’pegee ‑Waanbhaa’ mɛɛ ’la zan mu ’kpɛn ’siila‑ ‑yaa’ pɛ ’le ’mu nu yi ’le.
4PƆLU A ‑LIAWLI’ MU
’Taawogbɛya ’la sɔ ‑Waanbhaa’ ni
1’O nɛɛnɛ‑ mu, ’kɛla ’bhɛ ‑o ‑jan ’lɛyanyrɛ ’le ’bhɛ ‑le dɔɔ ’ka sɔ ’taawole gɔnɛ‑ ’la gbɛɛn‑, ’bhɛɛ‑ ’ka sɔ ‑Waanbhaa’ ni, ’ka ’bhɛ ‑daanna ’o mɔɔ ‑la ’kɔɔ. ’Duŋ‑ ’ka ‑o ’taawo zii’ ’bhɛɛ‑ gbɛɛn‑. ’Kɛla ’bhɛ ‑o ‑a ‑yi ’eglɔɔle, ’bhɛ ‑le dɔɔ ’o ‑sromabɔ ’ka ni Mɛɛzan Zesu ’tɔ ’yi dɔɔ ‑ka ’ka ’taawogbɛya ‑lrele’ ’ɛ baan’ ’kla a ba. 2Wlan ’ɛ ni, ’o ’ka ‑daanna ‑za mu ’la ’le, ’bhɛɛ‑ ’wa ꞊pia ’ka ni ’ka ’mu klɛ ’ka ’mu dɔ; ’bhɛ ‑za mu ’ɛ ‑daa Mɛɛzan Zesu ‑la ba. 3‑Waanbhaa’ ‑o ‑a zi ’bhii‑ ’ka bo ’edaŋma ‑yaa’ pɛ mɛɛ ’weŋ mu ’le, ’bhɛɛ‑ ’ka ’ka ’pleŋgo‑ ‑yanbhɔɔya ma. 4’Bhɛɛ‑ ’ke ’ka ’kpɛn do do bo ’bhɛ ’na ’le ’weŋ ‑Waanbhaa’ ‑yrɛ ’yi, ’bhɛɛ‑ ’ke bhaaplɛŋ mu ’ka ‑lɛdɔ’ ‑a ma ’bhɛ ‑zayi’. 5’Ka ’laa ’tolɛ‑ ’ke zru maza ‑yɔɔ’ klɛ ‑lrɔ gbiŋkpa ’ka ta, ’ke ’ka bo ‑za ’yɔɔ‑ klɛle ma ’bhii‑ mɛɛ ’la zan mu laa ‑Waanbhaa’ dɔ ’mu gbɛɛn‑. 6’Kɛla ’bhɛ ‑o le ’pegee ’gwlaan‑ pleŋza ’ɛ ’le, ’bhɛ ‑le dɔɔ mɛɛ ’kedo‑ ’kpɔ ’laa ‑naanaa’ maza klɛlɛ ‑a nɛɛnɛ‑ Zesu ’yi mi na ’ɛ ’le, ’bhɛɛ‑ ’bhɛ ‑glin ’lrɔ ’laa dɔlɛ ‑a ma. ’O ’bhɛ ‑jan ’ɛ ꞊woa gban ’ka ni ’elwale, ’bhɛɛ‑ ’o ’bhɛ ’kpankpanyaan ’ka ma dɔɔ ’ke mɛɛ ’la zan ’bhɛ ‑za ‑glɔɔn ’ɛ klɛ, Mɛɛzan ‑Waanbhaa’ nu ’bhɛ zan ’ɛ ’krowolɛ. 7‑Amasrɔyi ‑Waanbhaa’ laa ‑kɔɔ’ ’siilɛ‑ ‑yanbhɔɔya klɛle ma, ’duŋ‑ ‑e ‑kɔɔ’ ’siila‑ ’ke ‑kɔɔ’ bo ’edaŋma ‑yaa’ pɛ mɛɛ ’weŋ mu ’le. 8’Bhɛ ’yi ’tɛ, ’ke mɛɛ ’oo mɛɛ ’la zan ’e ‑baŋgwa ’taawole ma ’ŋ ‑jan mu ’la ’woa‑ ’ka ni ’mu ta, ’bhɛ zan ’laa ’bhɛ ‑baŋgolɛ bhaaplɛŋ do ‑kplɛn ’liijan‑ ’yi; ’duŋ‑ ‑ya ‑baŋgwa ‑Waanbhaa’ ’la ’bhɛ Lii ’Weŋ ’ɛ ꞊naa ’ka ni ’bhɛɛ‑ ’liijan‑ ’ɛ ’yi ’ezin‑.
9’Kɛla ’bhɛ ‑o nɛɛnɛya ’yi ’sɔniya ’ɛ ’le, ’ka maza laa ‑o ’bhɛ ma ’ke ‑o ’bhɛ ’sɛwɛdɛ ’ka ni ’ezin‑; ‑amasrɔyi ‑Waanbhaa’ ’gbu ’ka ‑daanna gban dɔɔ ’ka ‑za ’sɔ ’eke‑ ni. 10’Bhɛɛ‑ ’ka ‑o ’bhɛɛ‑ klɛ ’zi wlan ’ɛ ni ’ka nɛɛnɛ‑ Zesu ’yi mu ’ɛ ’kpɛn ni Masedwani ’klɛɛn ’ɛ ’yi. ’Duŋ‑ ’o mɔɔ ‑o zruwla ’zi ’ka ’kpee dɔɔ ‑ka ’bhɛɛ‑ baan’ ’lrele‑ klɛ ’ezin‑. 11Bole ’ke ’yi ’edɔɔle ’ɛ, ’bhɛ ‑le klɛ ’ka zru maza ’le. ‑Ka dɔ ’eglɔɔle ’ezin‑ ’ke ’ka ’kpɛn do do ’e ’yrɛkpa‑ ’bhɛ ’gbu a ‑za mu ’ɛ ba, ’bhɛɛ‑ ‑ka yewo ’ka gbɛ ma ’ke ’ka sɔ ’ka ’gbu mazagole, ’bhii‑ ’wa ꞊pia ’elwale gban ’ka ni gɔnɛ‑ ’la gbɛɛn‑ bhe. 12’Ke ’ka ’bhɛ ꞊kla, mɛɛ ’la zan mu laa ’o Zesu ’yi ’mu nu ‑gasikpalɛ ’ka ’lɛɛ, ’bhɛɛ‑ ’ka ’laa nu klɛlɛ mɛɛ ’kedo‑ ’kpɔ ta ’kwe ’le.
Zesu ’yi mu ’la ‑gaa gban ’mu a ‑za ’pegee Mɛɛzan Zesu Krisi ’nuza‑
13’Ŋ nɛɛnɛ‑ mu, mɛɛ ’la zan mu ‑gaa gban, ’woo‑ ‑a zi ’bhii‑ ’ka wlan dɔ ’mu ba ‑zayi’, ’kooko‑ ’ka wlɛyisriwole laa bo ’bhii‑ mɛɛ ’la zan mu yrikpale laa ‑o bole ‑yrɛ ma ‑si ’ɛ ta ‑o gale blaan ’mu gbɛɛn‑. 14‑Amasrɔyi, ’o ’kpale‑ ‑o ‑a ‑yi ’bhii‑ Zesu ‑gaa, ’bhɛɛ‑ ‑Waanbhaa’ ’a ‑bwela gale ba. ’Bhɛ klɛgbɛya do ’ɛ ’yi, ’o ’kpale‑ ‑o ‑a ‑yi ’ezin‑ ’bhii‑ Zesu ’yi mu ’la ‑gaa, ‑Waanbhaa’ nu ’mu bwelɛ gale ba Zesu ’srɔyi, ’bhɛɛ‑ ‑o pegee Zesu nu klɛlɛ ’eke‑ zi.
15Mɛɛzan ‑jan ’la ꞊woa ’o ni kpataakpa, ’o mɔɔ ’mu ‑la wo zii’ ’ka ni ‑gɛ dɔɔ Zesu ’nu yi ’ɛ ’le, ‑kɔɔ’ mu ’la nu klɛlɛ ‑kɔɔ’ ’yrɛ ma ‑li ’bhɛ yi ’ɛ ’le, ‑kɔɔ mu laa nu ’kanlɛ‑ mɛɛ ’la zan mu ‑gaa gban ’mu ’lɛɛ. 16‑Amasrɔyi ‑a pele ‑o dɔɔ ’bhɛ yi ’ɛ ’le, Mɛɛzan ’gbu nu ‑janwolɛ ’eglɔɔle ’pe, ’bhɛ blaan, ‑kɔɔ’ nu ‑mlɛkɛ’ ‑kuŋlii do ‑gbekanwli ’ɛ ’malɛ‑. ’Ke ’bhɛ ‑gwa ‑a ‑yi, ‑o nu ‑Waanbhaa’ a ‑klɛloŋ’ ’ɛ ’pɛnlɛ‑. ’Ke ’bhɛ ꞊kla, Mɛɛzan Zesu ’gbu nu zinalɛ ’tɛ, ’kee‑ da laflɛ’ ma, ’bhɛɛ‑ ’bhɛ bhla do ’kpɔ ’ɛ ba, Zesu ’yi mu ’la ‑gaa ’elwale gban ‑sɔ, ’mu nu bwelɛ gale ba. 17’Bhɛ blaan, ‑kɔɔ’ mu Zesu ’yi mu ’la nu klɛlɛ ‑li ’kɔɔ‑ ’yrɛ ma ’bhɛ yi ’ɛ ’le, ‑Waanbhaa’ a faŋgan‑ ’ɛ nu ‑kɔɔ’ mu ’pegee ’woo‑ mu ’kpɛn binalɛ, ’bhɛɛ‑ ‑e ge ‑kɔɔ’ ’kpɛn ’le laanima Zesu ’lɛpayrɛ nɔɔ‑ laflɛ’ ‑gblo ’ɛ ’yi. ’Bhɛ ya ’ɛ ’yi, ‑kɔɔ’ nu bolɛ ’taŋii Mɛɛzan ‑Waanbhaa’ ’le. 18’Ŋ nɛɛnɛ‑ mu, ‑ka ’fuudɔ‑ ’eke‑ ta ’bhɛ ‑jan mu ’lɛɛ‑ ’le.
51’Ŋ nɛɛnɛ‑ mu, ’ka maza laa ‑o ’ke ’o ’sɛwɛdɛ ’ka ni ’woo‑ ‑za mu ’ɛ klɛ yi ’ɛ ’pegee ‑o klɛ ’waati ’ɛ ta. 2‑Amasrɔyi ’ka ’gbu ’a ’yaango‑ ’bhii‑ Mɛɛzan Zesu ’nule ’ɛ nu ’klalɛ‑ mɛɛ ba, ’bhii‑ ‑faannii’ kla mɛɛ ba ‑bi zi gɔnɛ‑ ’la gbɛɛn‑. 3’Ke ’drunyan ta mɛɛ ’a ꞊pia bhla ’la ba dɔɔ: «‑Kɔɔ’ ‑o yilabla ’yi ‑zɔn, ’bhɛɛ‑ ‑kɔɔ’ ‑gwa ‑za ’yɔɔ‑ ’kpɛn ’yi.» ’Bhɛ bhla do ’kpɔ ’ɛ ba ’tɛ, ‑yrɛn ‑gbɛnɛ do nu baalɛ ‑o ta, ’bhii‑ le kpɛle do ‑bla zɛnle ’ɛ kla ‑a ba gɔnɛ‑ ’la gbɛɛn‑; ’bhɛɛ‑ mɛɛ ’kedo‑ ’kpɔ ’laa nu ‑bhilɛ’ ‑a ‑yi ’bhɛ yi ’ɛ ’le. 4’Duŋ‑, ’ŋ nɛɛnɛ‑ mu, ’bhɛ yi ’ɛ yaa nu ’klalɛ‑ ’ka mu ba ’bhii‑ ‑faannii’ do balaa’ mɛɛ ta gɔnɛ‑ ’la gbɛɛn‑ ‑a ‑yibɛɛnnazi. ‑Amasrɔyi ’ka mu ’laa ‑o ’ke ‑gblo ’yi mu ’le. 5Wlan ’ɛ ni, ’ka ’kpɛn ‑o ’ke ’tɛbhile ba ‑nɛ mu ‑la ‑le, ’bhɛ ’pegee ’ka ‑o ’ke ‑yrekpaa’ ‑nɛ mu ‑la ‑le. ‑Kɔɔ’ ‑gwa ‑bi zi za mu ’pegee ‑gblo ’yi za mu ’ɛ zi. 6’Bhɛla‑ ‑yile, ‑kɔɔ’ ’laa bolɛ yidɛle ma ’bhii mɛɛ ’la zan mu laa ‑Waanbhaa’ dɔ ’mu gbɛɛn‑. ’Duŋ‑ ‑kɔɔ’ ’yakla‑ dulale klɛ, ‑kɔɔ’ ’laa ‑kɔɔ’ ’taakpalɛ ‑za ’kpɛn zi. 7‑Amasrɔyi, ’ka ’gbu ’a ’yaango‑ mɛɛ yidɛ ‑bi ‑la zi, ’bhɛɛ‑ ‑wɛɛn dɛ mu ’ɛ ‑wɛɛn ’mu dɛ ‑bi ‑la zi ’ezin‑. 8’Duŋ‑ ‑kɔɔ’ mu ’la ‑kɔɔ’ ‑o ‑yrekpaa’ a pɛ ’le bhe, ‑kɔɔ’ ’laa ‑kɔɔ’ ’taakpalɛ ‑za zi. ‑Kɔɔ’ ‑kɔɔa’ ’kpaleya ’ɛ ’pegee ‑Waanbhaa’ a ’sɔniya ’ɛ klɛ ‑kɔɔ’ tagaan pɛ mu ’le ’bhii‑ ’elwaleta ‑srwase’ mu ’ɛ ’yaa‑ ‑o ‑bɛɛ mu ’ɛ tagaan piibhɛ dunɛ‑ mu ’le gɔnɛ‑ ’la gbɛɛn‑ bhe. ’Bhɛɛ‑ ‑kɔɔ’ ’yri bo ‑Waanbhaa’ ta, ’bhɛɛ‑ ’bhɛ klɛ ‑kɔɔ’ go pɛ ’le ‑za ’yi, ’bhii‑ ‑srwase’ mu bhee ‑o ŋgblo ma piibhɛ ’faa mu ’ɛ ma gɔnɛ‑ ’la gbɛɛn‑ gwledan yrɛ nɔɔ‑. 9‑Amasrɔyi, ‑Waanbhaa’ laa ‑kɔɔ’ ’kpalɛ‑ ’edaŋma ‑kɔɔ’ ’krowo ‑zayi’. ’Duŋ‑ ‑e ‑kɔɔ’ mu ꞊kpaa ’edaŋma, ’kooko‑ ’ke ‑kɔɔ go ‑za ’yi ‑kɔɔa’ Mɛɛzan Zesu Krisi ’srɔyi. 10’Bhɛla‑ ‑yile, Zesu Krisi ‑gaa ‑kɔɔa’ ‑za ma, ’kooko‑ ’ke ‑kɔɔ’ ‑o ‑kɔɔ’ ’yrɛ ma oo, ’ke ‑kɔɔ’ ‑gaa oo, ‑kɔɔ’ ’pegee ’yee‑ bo ‑kɔɔ’ ’yrɛ ma ’eke‑ ’yi ‑a nu yi ’ɛ ’le. 11’Bhɛ ya ’ɛ ’yi, ‑ka zruwla ’eke‑ ’kpee ’ke ’ka faŋgandɔ ’eke‑ ta ’kaa‑ ’kpaleya ’ɛ ’yi ’bhii‑ ’kaa‑ klɛ zi gɔnɛ‑ ’la gbɛɛn‑ bhe.
Pɔlu a ‑liawli’ ’ɛ ‑lɛyanyrɛ
12’Bhɛ trala ’ezin‑, ’ŋ nɛɛnɛ‑ mu, ’o mɔɔ ‑sromabɔ ’ka ni dɔɔ mɛɛ ’la zan mu ‑o ’trɛbhɔ zii’ ’ka daanle ’le ’kpaleya zi ’ɛ ta, ’ke ‑woo ’ka ’lɛɛ mu ’le, ’bhɛɛ‑ ‑woo ’ka ’lia zii’ Mɛɛzan a zi ’ɛ ta bhe, ‑ka ‑gasikpa ’mu ’lɛɛ. 13‑Ka ‑o ’kun ’elrele, ’bhɛɛ‑ ‑o ‑za ’sɔ ’ka ni ’egbɛnɛle ‑waa’ ye ’ɛ ‑zayi’. ‑Ka bo ’eke‑ ’yi ’edɔɔle.
14’Ŋ nɛɛnɛ‑ mu, ’o mɔɔ ‑o ‑sromabɔ ’zi ’ka ni ’ezin‑ dɔɔ lrwanii‑ mu ’la bole ‑o ’kaanle‑ ma, ‑ka ’mu ’kpeelɛkan, ’kooko‑ ‑o yewo, ’bhɛɛ‑ ‑ka ’fuudɔ‑ ‑gblaannii’ mu ’ɛ ta, ’bhɛ ’pegee faŋgan‑ ’laa ‑o mɛɛ ’la zan mu ta ‑Waanbhaa’ zi ’ɛ ta, ‑ka bhɔ ’mu ba. ’Bhɛɛ‑ ‑ka ’ka zrubakpala mɔkpɛn’ zi. 15‑Ka ’ka ’yrɛkpa ’ka ’gbu ba ’elrele, ’ke mɛɛ ’kedo‑ ’kpɔ ’laa ‑za ’yɔɔ‑ ‑zigo’ ‑za ’yɔɔ‑ ’le. ’Duŋ‑ ’taŋii, ‑ka ‑za ’wlan ‑la klɛyrɛ ‑glin ’eke‑ ni, ’bhɛɛ‑ ‑ka ’bhɛ klɛ mɔkpɛn’ ni ’ezin‑ ’waati ’ɛ ’kpɛn ba.
16’Ka zrukpaale klɛ ’taŋii. 17’Bhɛɛ‑ ’ka ’laa ’ploolɛ‑ ’ka ’seriwole ma ‑Waanbhaa’ ni. 18‑Ka ‑Waanbhaa’ ’pubɔ‑ ‑za mu ’ɛ ’kpɛn ’yi. ‑Amasrɔyi ‑Waanbhaa’ ‑o ’bhɛɛ‑ ‑za ‑glɔɔn ’ɛ zi ’ka ’kɔɔ, ’ka mu ’pegee Zesu Krisi a ’kpaledomaya ’ɛ ’yi.
19’Ka ’laa Lii ’Weŋ ’ɛ ‑dewolɛ ’ka zru ’ɛ ’yi. 20‑Waanbhaa’ ‑jan mu kpa mɛɛ ’la zan mu ‑lii, ’bhɛɛ‑ ’mu ’a ‑lɛlajanwo mɛɛ mu ni, ’ka ’laa ’bhɛ ‑lɛlajanwole mu ’ɛ mavɛɛlɛ. 21‑Ka ‑jan mu ’ɛ ’kpɛn baglin‑ kplankplan, ’bhɛɛ‑ ’kɛla ’bhɛ ‑o wlan ’le ‑ka ’taawo ’bhɛɛ‑ ta. 22‑Ka ‑ka ’ka ’gbu ’kun ’elrele ‑za ’yɔɔ‑ ’kpɛn ‑glɔɔn ma.
Pɔlu ‑a ’pubɔ‑ ’seri
23Bhaa ‑Waanbhaa’ ’la ‑yoo yilabla zan ’le, ’bhɛ ’ka ’flɛ ’kpɛn klɛ ’weŋ. Bhaa ’ka ’si oo, ’ka ’nii‑ oo, ’ka ’gbu ’flɛ ’ɛ ’kpɛn bo ’weŋ ’fɔke ’bhɛ ge ’tɛnlɛ‑ ‑kɔɔa’ Mɛɛzan Zesu nu yi ’ɛ ma, ’ke waa ’triŋ‑ do ’kpɔ ye ’ka ma. 24Mɛɛ ’la zan ’ka ’gbu ’siila‑, ’bhɛ nu ’bhɛ ‑za ’ɛ klɛlɛ; ‑amasrɔyi ‑yoo ’ke zru do zan ’le.
25’Ŋ nɛɛnɛ‑ mu, ’ka mu ’ka ’seriwo ’ezin‑ ’waa‑ ‑za ma.
26’Ka ’kpɛn ’eke‑ ‑tuubɔ’ ’bhii‑ nɛɛnɛ‑ ma do mu.
27’Ŋ ŋgblo ‑o ’ka gaan ꞊la Mɛɛzan ’tɔ ’yi ’ɛ dɔɔ: ‑Ka ’lɛtrɛ ’lɛɛ‑ tape ‑kɔɔ’ nɛɛnɛ‑ Zesu ’yi mu ’ɛ ’kpɛn ni.
28Bhaa ‑kɔɔa’ Mɛɛzan Zesu Krisi ‑li ’ka ’kpɛn ma.