TIT

TIT

¹ Maam a Pol n pʋʋsde. M yaa Wẽnd sõgne; m kẽe a Zezi Krista tʋʋmde n na n sõng tɩ Wẽnd sẽn welg b rãmb toorã paam tẽebo. B paam n bãng sɩda n lebg wẽn-pẽgdba. ² B paam vɩɩm sẽn kõn sɛ saagre me. Vɩɩm kãng la Wẽnd sẽn ka mi zirẽ-beeda ra kãab tõnd al tɩ dũni nan ka naan ye. ³ B wakata sẽn ta, b pidsa b kãabgã ne b Koe-nooga moonego la maam la b kõ noor tɩ m maan tʋʋm-kãnga. ⁴ Dɩlla yaa maam a Pol n pʋʋsd a Tit, m bi-roak meng d fãa tẽeba pʋgẽ. Bɩ Wẽnd Ba nimbãan-zoeere la b laafi tũ Krista a Zezi, tõnd Fãagdã, n sig f zugu! ⁵ Mam sã n bas foo Krɛt tẽnga yaa sẽn na n yɩla tɩ f yõdg n sigl Tigenga n baase la f ning kãsem-dãmb tẽng-tẽnga wa m sẽn wilgi. ⁶ Kãsem-dãmba togame n yɩ neb sẽn ka tar yell b zugu; sã n ya kãadma, b kẽe-a la vugr bala la b kamb yaa tẽedba; b pa tõe n dõd-b ne wẽng ye, la b mii sakre. ⁷ A sẽn ya Wẽnd zag-gũuda, kãsem-soab tog n yɩɩ nin-tɩrga; a ka mi porbo, a ka mi zẽk-m-menga, a ka mi sũ-puuri, a ka rã-yũuda, a ka baood zaba, a ka baood arzɛk ne zãmb ye. ⁸ A mii gãag-sobendo, a nong n maana neere, a ka mi pir-pir ye, a mii zemsgo, a yaa wẽn-pʋʋsa, a tõe-la a menga. ⁹ A modgdame tɩ bũmb ra keoos a zãmsga pʋgẽ ye, a zãmsga tũudame. A tog n tõogame n sagl sagl tɩrse, n tõog n ning kɩɩsdba yãnde. ¹⁰ Neb wʋsg n be, la bãnkomsa sʋk la b be n yɩɩda, n ya tõatba, gom-faad-dãmba, la no-noom-dãmba. ¹¹ Da bas-b tɩ b gom ye. Yaa neb sẽn wãad b taab roto, n togsd sẽn pa sõmbe n na n paam n dɩ bala. ¹² Woto la b bãngd meng a ye togsd b poorẽ: «Krɛt tẽng rãmba, zirẽ-be-neb wakat buud fãa, ninsaan-yoodo, dɩt-n-pa-tʋmnẽ-dãmba.» ¹³ B bãngda toagsg yaa sɩda. Dẽnd yĩnga, togs-y bãmb vẽenega tɩ b ra bʋdg n bas tẽeb sɩdã. ¹⁴ B lak n bas Zʋɩf rãmba ne b soalma, n lak n bas sẽn wẽnemd-b kãar n tees sɩdã. ¹⁵ F ya pʋ-peen-neda, f yɛla fãa tũuda pʋ-peelem sore; f sã n ya nin-dẽgdo la f pa tar tẽebo, bõn-sõng me kõn zĩnd f yĩng ye. B yama la b pʋga zãng sobame. ¹⁶ B yetame tɩ b yaa neb sẽn mi Wẽnde, la bãmb meng n lɛɛg n kɩɩsd-b ne b vɩɩm: ad-y b yaa nin-yoodo, tõatba, neb sẽn ka tõe n maan bõn-sõng ba bilfu.

¹ Sã n ya foo, modg tɩ f zãmsg tũ Zãms-sõngã. ² Bɩ nin-kẽemba yɩ neb sẽn tõe b mense, neb sẽn tog ne pẽgre, maag-m-meng rãmba, n tar tẽeb sẽn kɩ yẽgna, n nong b taaba, n ka yɛɛd ne neer pʋgb ye. ³ Pʋg-yãansa me boto. B manesem yɩ pʋg-sõma manesem, b ra wɩd b taab ye, b ra yɩ rã-yũudba, b yɩ sagl-sõng rãmba. ⁴ Woto la b tõogd n zãms pʋg-bõonegã tɩ b nong b sɩdb rãmba la b kamba, ⁵ n vẽ ne yaare, ne yoodem, n mi b zak tallgo, n ka mi gãgs ye la b reegd b sɩdb rãmb noy; woto Wẽnnaam gomda kõn paam sãbsgo ned ba a ye nengẽ ye. ⁶ Sagl kom-bɩɩba neere tɩ b gũus ne yirgu buud fãa. ⁷ Fo meng nengẽ la b na n yãend vɩɩm sõng sor n dɩke, tɩ f zãmsg tũuda sɩda, tɩ f waoogda f menga, ⁸ tɩ f gomda ne gũusgu, tɩ bũmb ka keoosd f vɩɩmẽ ye; yaa woto la bɛɛba zĩ ne yãnde, n ka tõe n gom beed f poorẽ ye. ⁹ Bɩ yemsa sak b zu-soaben-dãmb bũmb fãa pʋgẽ. B bao n noog b sũuri, b ra kɩɩs b gomd ye. ¹⁰ B ra soos n zãmb-b ye, bũmb da woog b nonglem ne b ye. Woto b na yɩ neb niyns sẽn deegd Wẽnnaam d Fãagda gomdã. ¹¹ Wẽnd nimbãan-zoeerã sẽn fãagd Adem biisa fãa puka zãnga. ¹² A kɩtame tɩ d bãng tɩ d tog n basa bũmb ning fãa sẽn ka wat ne Wẽnd waoogre, n bas zamaana tʋls wẽnsã, n vɩɩnd marsã ne gũusgu, ne sõmblem, ne Wẽnd pẽgre. ¹³ D tog n gũu ne saagre, zu-noog wakat ninga d Wẽnnaam la d Fãagd a Zezi Krista, sẽn na n sig ne b pãng la ziiri. ¹⁴ Yaa bãmb n kõ b meng n fãag-do, n kɩt tɩ d tɩlg ne wẽng buud fãa, la b segl buud sõng n kõ b menga, buud sẽn wɩsg a menga n baood neere. ¹⁵ Yaa woto la f tog n gome, n sagle, n togs sɩda wa f sẽn tõe fãa. Bɩ ned da sãbs-f ye.

¹ Tẽeg b fãa gilli tɩ b togame n sak tẽnga taoor dãmba la kãsem-dãmba, n deeg b goama, n sak n tʋm tʋʋmd sõng buud fãa. ² B ra beeg ned ye, b bas zaba, b yɩ neb sẽn baood n na n noog b taab sũuri, b bʋk b sũuri ne neb fãa. ³ Ade, pĩnda tõnd me yɩɩ yalemse, kɩɩsdba; tõnd me ra bʋdgame; tʋls yood la sũ-nood yood n da balg tõndo tɩ d da vɩ ne yam wẽnga, ne sũ-kiiri, ne taab sãbsgo la taab kisgu. ⁴ Wakat n puki, yaa Wẽnnaam d Fãagda wakato, yaa b sũ-bʋgsem la b nimbãan-zoeer ne ninsaalb wakato. ⁵ B ka ges tʋʋm-sõma niyns d sẽn tʋma ye, yaa b nimbãan-zoeera bal n tus ba tɩ b na n fãag-do. Tũu ne koom soobo la rogem paalga ne a Vʋʋsem Sõngo pãnga. ⁶ B sudga tõnd Vʋʋsem kãnga n mabge, tõnd Fãagd a Zezi Krista pãng yĩnga. ⁷ Woto d sen paam tɩlgr ne bãmb kũuni, d na n tũu bãmb n dɩ Wẽnd yõodo, vɩɩm sẽn ka tar sɛɛb pʋgẽ. ⁸ Gomda yaa sɩd menga tɩ m dat wa fãa-fãa tɩ f bas sãmbse la f togs ne pãnga tɩ sẽn tẽed-b Wẽnda fãa wɩng ne neer maanego. Dẽ la sõmbo, dẽ n be yõod ninsaalb yĩnga. ⁹ Sã n kella vɛɛs yaalse, rogma sẽn tong zĩig ninga, Noora poorẽ zaba la no-koɛɛma, zoe-ba. B pa manegd fɩ, b pa wat ne yõod ye. ¹⁰ Ned sã n ya welgda, yãend-a tɩ ta naoor a yiibu, n wilg-a t’a maan gũusgu; dẽ poore lak ne ned a woto buudu. ¹¹ Fo mi tɩ ned a woto buud bʋdga zãnga, n lebg yel-wẽn-maanda, n tʋk a meng taal a zugu. ¹² M sã n wa tʋm f nengẽ a Artemas bɩ a Tisik, bãng tɩ f togame n wa bʋʋg-m Nikopolis tẽnga: yaa be la m na n zĩnd waooda wẽnde. ¹³ Pĩnd n ges bʋ-kaooda Zenas la a Apolos so-toaka yell neere, tɩ bũmb da wa paoog-b ye. ¹⁴ Tõnd neba me tog n wɩnga ne tʋʋm-sõma n paam n yiis b meng yell pakdem; b kõn zĩ woto tɩ b vɩɩm ka yõod ye. ¹⁵ Sẽn be-b ne maama fãa tɩ b pʋʋs-fo. Pʋʋs d saam-biisa sẽn nong-b tõnd, tẽeba pʋgẽ. Bɩ Wẽnd barka sig yãmb fãa!