ROM RÃMBA

ROM RÃMBA

¹ Maam, a Pol, n pʋʋsde; maam la Krist a Zezi sõgne, bãmb Tʋʋm-tʋmda, Wẽnd sẽn bool la b welg toore Koe-nooga mooneg yĩnga. ² Koe-noog kãnga la sẽn da kãab al-pĩnd pĩnd ne bãngdba noor tɩ be Sebr sõng pʋgẽ. ³ Kãabga kãaba b Biiga poorẽ, biig ning sẽn yit a Daviid buudẽ sã n ya ne tẽng zug rogma, ⁴ n yaool n ya Wẽnd bi-roaka, rogm a to wã pʋgẽ, tɩ Sõmblem Vʋʋsma puk rẽ ne kaset sẽn tar pãnga, ne b vʋʋgr kɩɩms sʋka, bãmb la a Zezi Krista tõnd Soaalã. ⁵ Tũu ne bãmba tɩ d paam n lebg b tʋʋm-tʋmdã n na n moon la d bao b yʋʋra pẽgre, n wilg tɩ tẽeba yaa bũmb sẽn pake, la d taas-a bu-zẽmba fãa, ⁶ la d taas-a yãmba, tɩ y me paama a Zezi Krista boolle. ⁷ Bɩ Wẽnd kom-nongdsã sẽn be Rom tẽnga, Wẽnd sẽn welg b rãmb sõmblem welgrã paam kũun buud fãa la laafi, d Ba a Wẽnd la d Soaala Zezi Krista maasem yĩnga. ⁸ M na n deng n kudga Krista a Zezi kãntɩɩga tɩ b pʋʋs Wẽnd bark y yĩnga tɩ mooga tõr kilsda y tẽebo. ⁹ M sẽn waoogd Wẽnd ning m yamẽ la m moond b Biiga Koe-noogã, bãmb meng n ya m kaseto, tɩ m tẽegda y yelle wakat buud fãa, ¹⁰ la m kota m pʋʋsg pʋʋgẽ, n wa paam vɩʋʋg n ta y nengẽ, bãmb sã n data. ¹¹ M rata ne m sũur fãa n yãend yã n paam n kõ-y ye Wẽnd kũun bilfu tɩ y tẽeba sĩdi, ¹² la sẽn yɩɩda, m datame n le paas m daood yãmb nengẽ la yãmb sɛɛgẽ tɩ d fãa paam n gãda tẽeb a ye, yãmb wala maam. ¹³ M saam-biisi, m ka rat n solg yã tɩ yaa naoor yak la m tʋlg n wa y sʋka – la gɩdgr n zĩnd n ta marsã, – m saagdame tɩ yãmb me nengẽ m na paam bũmb sẽn be yõodo wala m sẽn paam bu-zẽmb a taaba nengẽ. ¹⁴ M tog n tʋma Grɛk rãmb yĩnga wa wetẽ dãmba yĩnga, zolg yĩng wa mit yĩnga. ¹⁵ Dẽ me yĩng la m data, Rom dãmba, n wa taas yãmb me Koe-noogã. ¹⁶ Yãnd ka tar-m ne Wẽnd Koe-nooga ye, a yaa Wẽnd pãnga n fãagd ned ning fãa sẽn tar-a tẽebo, Zʋɩf pipi tɩ sẽn ka a Zʋɩf yaool n pʋgda. ¹⁷ Koe-nooga kɩtdame tɩ tẽeb tũud tẽeb n pukd Wẽnd sõmblem wala sẽn gʋlse: Tẽeb n na n dɩlg nin-sõng vɩɩm. ¹⁸ Wẽnnaam beema sẽn sigd a soab zugu, yaa wẽn-kɩɩsa, sẽn nong-a wẽnga la sẽn baood-a zãmb loɛɛg n loe sɩda. ¹⁹ Wẽnnaam beelma kaset yaa vẽeneg ne-ba. Wẽnd ka solg-b fɩ. ²⁰ Bũmb ning sẽn be Wẽnd nengẽ n solg al dũni sɩngrẽ, ninsaal tõe n yãend-a la ne a yam tɩ Wẽnd tʋʋma n pukd b pãnga la b wẽndlem, al tɩ f sã n yeel marsã tɩ f ka ne, yaa fo yelle. ²¹ Ad-y yaa b sẽn bãng Wẽnd sẽn ya a soaba la b ka pẽg-bã, la b ka pʋʋs-b barka wala sẽn segdã, ad-y yaa rẽ la b yam kɩdga sob zãnga. ²² B sẽn yeel tɩ b baooda bãngr zulunga yaa gãeemd la b paam yã. ²³ Woto b rɩka Wẽnnaam ne b zɩɩrã la b sõmblema sẽn ka tɛkã, m mams-b ne bõn-yaals wẽnego, n tol n kõ Wẽnd sẽn ka kiidã ninsaal, luiila, rũnga, bɩ bõn-vuudr yĩn-kidgã. ²⁴ Yaa rẽ yĩng la Wẽnnaam bas-b ne b sũura raab yaalse tɩ b lʋɩ yoob pʋgẽ n yaal b toorẽ yĩnga zãnga. ²⁵ Wẽnnaam bas-b lame tɩ yaa bãmb n deng n bas Wẽnde, n dɩk Wẽnnaam sɩda n tek ne zirẽ-beedo, n lɛɛg n kẽ bõn-naands n waoog-ba, n yaool n bas Naanda sẽn tog ne pẽgr wakat buud fãa. (Ami!) ²⁶ Dẽ n so tɩ Wẽnnaam bas-ba ne b minim wẽnse, al tɩ b pagba tek vɩɩm ning b sẽn da segdẽ n vɩɩnde, n sak sẽn kisi. ²⁷ B rapa me basa sẽn ka kis bãmb ne b pagbã, n na n tʋlg taab ne raab kãsenga, n sak wɩɩbd ne taaba la b reega b tudgr kãng yaoodo, yaood sẽn da ka tõe n ka yao ye. ²⁸ B sẽn pa modg n tall Wẽnd bãngr akɩka, wala bũmb sẽn be yõodo, Wẽnnaam bas-b lame ne yam kɩdga tɩ b maan sẽn ka segd. ²⁹ B sũur sẽn pid ne bũmb ningã, yaa wẽnem buud fãa, fɩglem, raab wagla, pu-toogo; b sẽn mi yaa sũ-kiiri, taab yõor yãkre, zaba, zãmbo, taab bẽdgo; b nonga b taab yʋʋr sãoongo, ³⁰ taab wɩdga. Bãmb la Wẽnd bɛɛba, mo-be-neba, zẽk-m-meng rãmba, wʋglem dãmba, sɩlem wẽns rãmba, kõn-sak-b-ba rãmba, ³¹ yam kaoolg rãmba, kõn-togs-m-pʋg rãmba, ka mi nimbãan-zoeer dãmba, ka mi sugr dãmba. ³² Ne b sẽn mi tɩ Wẽnd yeelame tɩ wẽng a woto buud maandb toga ne kũum, b ka baas n maandẽ bal ye, b le be tẽngre n pẽgd sẽn maand-b wẽnga menga.

¹ F sẽn ya a soaba, f na n konga bʋʋm f sã n dat n bʋ f taaba. Fo sã n baood n na n ning f to taale, yaa f meng la f na n paalg, tɩ foo ne yẽ soab manesem yaa a ye. ² D miime tɩ Wẽnd sã n kẽesd yell a woto rãmb bʋʋdo, b tũuda b sɩdã n bʋʋdẽ. ³ Dɩlla fo sã n maand wa f taaba n yaool n zĩ n kaood b bʋʋdo, fo tẽedame tɩ Wẽnnaam na bʋ foo n bas-f taal bɩ? ⁴ Da maan wa f sãbsda Wẽnnaam ne b sõmblema sẽn ka be tɛkã, ne b tõog-m-mengã, ne b kõt-yaara ye; ad-b sõmblema ratame tɩ f ning pãng n teem zʋgo. ⁵ F sã n kʋɩɩs f sũuri, f sã n zãgs tuubgu, Wẽnnaam beem la f samd f zugu, la b beema na n puka b bʋ tirsa kaoob raare, ⁶ raar ning b sẽn na n kõ ned kam fãa a tʋʋmda keoore. ⁷ Na n yɩɩ vɩɩm sẽn kõn sɛ la b na n kõ neb niyns sẽn modg-b ne neer maanego, n baood pẽgre, waoogre, vɩɩm sẽn ka tar goalenga. ⁸ Neb niyns sẽn ya-b tõatba, sẽn kɩɩsd-b sɩda, n yaool n sakd wẽnga, Wẽnd sũ-puura na n dɩɩ bãmb dãmba, b na n paama Wẽnd zabre. ⁹ Ned ning fãa sẽn maand-a wẽnga, a pʋɩɩr na n yɩɩ pɛta la yɩɩre, Zʋɩf pipi, tɩ sẽn ka-a Zʋɩf yaool n pʋgd. ¹⁰ La sẽn maand-a neere, ziir la pẽgr n yɩt a pʋɩɩre, Zʋɩf pipi tɩ sẽn ka-a Zʋɩf yaool n pʋgd. ¹¹ Wẽnd ka yɛs n get fo sẽn ya buud ninga ned ye. ¹² Ade, neb niyns fãa sẽn maan-b yel-wẽnde, b na n dɩ-la b yel-wẽnda taale, ba b sã n ka Zʋɩf. Neb niyns sẽn mi-b a Moyiiz Noorã n maan wẽnga, bãmb dãmb bʋʋd na n yɩɩ wala a Moyiiz Noora sẽn yalse. ¹³ Ka sẽn mi-b noora la nin-sõma, Wẽnnaam taoor ye, yaa sẽn maand-b noora sẽn wilgã. ¹⁴ Bu-zẽmba sẽn ka mi-b Noorã n yaool n maand wala Noora sẽn datã, b bãng tɩ wakat kãnga b manes sõngã n lebg bãmb noore, ¹⁵ wakat kãnga b wilgdame tɩ noor n be n gʋls b sũurẽ la rẽ n so tɩ ned kam fãa wʋmd koɛɛg a pʋgẽ, la koɛɛg sẽn leokd d taab tʋʋma poorẽ, b sã n toga ne sãbsgo bɩ ne pẽgre. ¹⁶ Ad-y yaa sẽn maand-b Noora sẽn data bʋʋdo la Wẽnd na n tũ a Zezi Krista n bʋ sẽn solg fãa ninsaalb sũurẽ, wala m Koe-nooga sẽn wilgdã. ¹⁷ Fo sã n zẽkd f menga, f sẽn ya Zʋɩf yĩnga, fo sã n yet tɩ f yaa Wẽnd Noora biiga, tɩ Wẽnd la fo zu-zẽkre, ¹⁸ tɩ f mii b raabo, tɩ yaa sẽn be yõod la f mi la f pʋgda, tɩ f mii sor ning f sẽn tog n dɩke, ¹⁹ tɩ f nin pukame, al tɩ f tõe n wilg zoeens sore, tɩ f tõe n lebg sẽn kẽnd-b likẽ vẽenem, ²⁰ n lebg zɩtba bãngre, n lebg sẽn ka mib neng karen-saamba, f sã n paam tɩ Wẽnnaam Noora tuk sɩd la bãngr sor n kõ-fo, ²¹ m na sok-f n gese, yaa bõe yĩng la f mi f taab zãmsgo n yaool n ka tõe n zãms f menga? ²² Bõe tɩ f zãmsd tɩ wagdem kisame la f zuuda? Ti yoob kisame, la f yooda? Bõe tɩ wẽn-naandsa yaand f sũuri tɩ f baas n kẽed b rotẽ n zɛɛdẽ? ²³ Foo tɩ Wẽnnaam Noora bãngr la f zu-zẽkre, bãng marsã tɩ f sã n pa reegd-a, yaa Wẽnnaam meng la f paoogda. ²⁴ La sɩd me wala sẽn gʋlse: Yaa yãmb yĩng la Wẽnnaam yʋʋra tar sãoong bu-zẽmba nengẽ n dabda. ²⁵ Bãong kõom bee yõodo fo sã n deegd Wẽnnaam noore; fo sã n kẽ bãong la f ka reegd Wẽnnaam noore, foo ne sẽn ka kẽ-a bãong zem taaba. ²⁶ Sẽn ka kẽ-a bãong sã n deegd Wẽnnaam noorã, a ka zem sẽn kẽ-a bãong sɩda? ²⁷ Ne a sẽn ka kẽ bãongã, yaa yẽ n na n kao fo bʋʋdo; yẽ sẽn deegd Wẽnnaam noorã n na n bʋ foo, fo sẽn ya bãnkoanga la f mi Wẽnd noore la f baas n tõdgd-a. ²⁸ Sẽn yaa Zʋɩf akɩk ka sẽn yaa Zʋɩf neb nifẽ bal ye, la bãong akɩk ka yĩnga sẽn kẽed a soaba ye. ²⁹ Zʋɩf akɩk yaa Zʋɩf a sũurẽ la sẽn kẽed-a bãong akɩk yaa sẽn kẽed-a a sũurẽ. Sẽn be sũuri wã n yɩɩd sẽn gʋls sebrẽ. Ad-y yẽ soaba pẽgre ka na n yi ninsaal nengẽ, a na n yii Wẽnd nengẽ.

¹ Yaa bõe pʋgẽ la Zʋɩf yɩɩd neb a taaba la bãong kõom yõod be-la a yɛ? ² Ad-y yaa bũmb wʋsg pʋgẽ. Pipi, yaa Zʋɩf rãmba la Wẽnnaam kõ b koeese. ³ Kẽer yɩɩ tõatba, la rẽ maana bõe? Wẽnd zooda tũu rẽ n sãam bɩ? ⁴ Ka boto ye! Wala sẽn gʋlse, yaa tɩlɛ tɩ Wẽnd pa b sɩd zĩigẽ tɩ ninsaal pa a zirẽ-beedẽ; la rẽ me la lebg pakre tɩ f gom n yiis f meng yellẽ la f gom n yiis f meng bʋʋdẽ. ⁵ Tõnd wẽnema sã n pukd Wẽnd sõmblem, koe bʋg la d le tara? D na tõog n le yeel tɩ Wẽnd ka maan neere b sã n bas tɩ b sũ-puura yõog-do? Ad-y yaa ninsaal zʋbsgo la m na n zʋbse. ⁶ B sã n ka tõe n puug b sũuri, b na n yɩɩ wãn n wilg dũni wã a bʋʋm la a kongre? ⁷ La mam zirẽ-beed sã n kɩt tɩ m bãng n paase tɩ Wẽnnaam yaa sɩd soaba, tɩ Wẽnnaam pẽgr tũ rẽ n lebg wʋsgo, m sok n gese ned le tara sor n ges maam wa yel-wẽn-maand bɩ? ⁸ La woto wã, wala rõatb kẽer sẽn gomd tɩ yii tõnd noorẽ wã, d kõn maan wẽng tɩ neer wa tũ rẽ n zĩndi? M mi tɩ rõadg a woto buud yẽ toga ne sɩbgre! ⁹ Bõe la m na n yeele, tɩ tond Zʋɩf rãmbã n são bɩ? Lɛ-lɛ! ¹⁰ Wala m sẽn zoe n wilgã, Zʋɩf ne sẽn ka-a Zʋɩf naaga taab n ya yel-wẽnd yemse. Tẽeg-y b sẽn gʋlse: «Nin-sõng ka ye, ba a ye. ¹¹ Yam soab ka ye, sẽn baood-a Wẽnnaam ka ye, ba a ye. ¹² B fãa gill bʋdga sore, b fãa gill wegmame. Sẽn maand-a neer ka ye, ayo! Ba a ye. ¹³ B kokor yaa wa yaoog sẽn ka tar limdi, b zelemd wʋgda zãmb sʋndo. Wag-toaag zẽnem n bee b noorẽ ¹⁴ B noor yiisda gom-miisg la kãab beedo. ¹⁵ B nao tʋʋla ne wudg n daag zɩɩm. ¹⁶ B sor yaa sãoong la far sore. ¹⁷ B ka bãng yĩin-maasma sor n dɩk ye. ¹⁸ B nin zɩ n kabs Wẽnnaam dabeem yĩng ye.» ¹⁹ Ade, tõnd yaool n miime tɩ yaa Wẽnnaam sẽn kõ b rãmb noore la noora modgda; la b maana woto tɩ ned ba a ye ra tõog n yaag a noor ye, tɩ b paalg ninsaalba fãa b bʋʋdẽ. ²⁰ Wẽnnaam taoore ned ba a ye ka na n tõog n kõ a meng bʋʋm b noya deegr poorẽ ye, tɩ Noor sẽn tõe ne bũmb ning yaa wa ne yel-wẽnd bãngr bala. ²¹ Dũnna-rũnna, ne noora sẽn teke, Wẽnnaam sõmblema ket n yaa vẽenega wala Noora la bãngdba zamaanẽ. ²² Neb niyns fãa sẽn tẽed-ba a Zezi Krista yãeta sõmblem kãnga – tɩ bũmb ba a ye ka teem bãmb nengẽ ye – ²³ b fãa beega Wẽnde tɩ Wẽnd sẽn pid ne ziira zãag ne-ba. ²⁴ La b sã n le paam b yell manegre tũu ne Wẽnd yamleoog la Krista maoonga yõodo. ²⁵ Wẽnd yãk-b lame tɩ b lebg, ne b meng zɩɩm, sugr bũmb, tẽedba yĩnga; la rẽ yaa b sẽn dat n wilg b sõmblem la b bas yel-wẽn niyns sẽn maan pĩnda taale, ²⁶ Wẽnd sũ-maasma wakato; la b sẽn dat n wilg rũnna tɩ b ket n zĩ b sõmblema zugu, yaa sẽn tẽed-ba a Zezi yelle la b manegda. ²⁷ Sã n ya woto, fo tara sor n zẽk f meng bɩ? Ayoo, sor ka ye! La bõe tɩ sor kaẽ? Be f tʋʋmẽ wã bɩ? Ayoo! Yaa f manegrã sẽn ya tẽeba bũmbã. Sɩda d tagsdame tɩ ninsaal manegr yita a tẽebẽ. Ka tũud a sẽn deegd noora ye. Ka rẽ d yetẽ lame tɩ Wẽnd yaa Zʋɩf rãmb bal Wẽnnaam. ²⁸ Sɩda, d tagsdame tɩ tẽeb fãagda neda tɩ ka tũ ne Noora reegr ye. ²⁹ Ka rẽ d na kong n yeel tɩ Wẽnnaam ka bu-zẽmba Wẽnnaam ye, b yaa Zʋɩf rãmb Wẽnnaam bala. La d miime tɩ Wẽnd yaa bu-zẽmba me Wẽnde, tɩ b yaa Wẽnd a ye tãa. ³⁰ B fãagda ned ning fãa sẽn tar-a tẽebo, sẽn kẽ-a bãongo wala sẽn ka kẽ-a bãongo. ³¹ Dɩlla tẽeb yãkda Noora bark bɩ? Ayoo! A kõt-a lame.

¹ D na n yeelame tɩ bõe d yaaba Abraam poorẽ? ² Sã n yaa Abraam tʋʋm sõma yĩng la a lebg nin-sõngo, a zug tõe n zẽkame, Wẽnnaam nengẽ wã la m ka mi. ³ Sebr sõng yetame tɩ bõe? A Abraam tẽe Wẽnnaam la rẽ n wa ne a yell manegre. ⁴ Ned sã n tʋm tɩ b kõ a yaoodo, ka kũun la b kõ a ye, yaa bũmb sẽn ya tɩlɛ ne-a. ⁵ La ned sã n ka teeg a tʋʋma n yaool n teeg ned ninga sẽn tõe tɩ nin-wẽng yell manegã, d yetame tɩ yaa tẽebã n sɩd maneg a yelle. ⁶ Pʋsẽ yaa rẽ yĩng la a Daviid boond tɩ zu-noog soaba ned ning Wẽnd sẽn maneg a soab yelle tɩ ka tũ ne a tʋʋm manesem: ⁷ Zu-noog rãmba la sẽn paam b beegre sugri la b yel-wẽna ludbu. ⁸ Zu-noog soaba la Wẽnd sẽn bas a soab taal zãnga. ⁹ B sẽn gomd zu-noog ningã, b gomd-a-la sẽn kẽ-b bãong yĩng bala bɩ yaa sẽn ka kẽ-b bãong me yĩnga? Sɩda d yetame t’a Abraam tẽebã n wa ne a yell manegre. ¹⁰ Manega wakat bʋgo, a sẽn waa n nan ka kẽ bãong bɩ a bãong kõom poore? Ka a sẽn lebg zũng poor ye, ya a sẽn waa n nan ka kẽ bãongo. ¹¹ A bãonga lebga wa kaseto t’a sẽn waa n nan ka kẽ bãongo, a ra zoe n tara tẽeb ning sẽn manegda ned yellã. Dẽ n so t’a na n lebg buud a yiib ba. A yaa ba pipi, sẽn na n tẽ-ba n yaool n ka kẽ bãonga yĩnga, tɩ tẽeb n maneg bãmb dãmb yelle, ¹² la a leb n yaa ba sẽn kẽ-b bãong yĩnga; b kẽe bãongo n yaool n ka get rẽ wa bũmb sẽn seke, n na n dɩk a Abraam tẽeba sore, tẽeb ning a sẽn da tare t’a nan ka kẽ bãongã. ¹³ Sɩda, a Abraam sẽn paam tɩ Wẽnd pids kãabg ning b sẽn da kãab-a, n yeel tɩ dũni wã na n yɩɩ yẽnda bɩ a kamb soolem, bãng-y tɩ ka tũ ne noor deegr ye. Tũu ne tẽeb yel-sõmde. ¹⁴ Sẽn paam-b pʋɩɩrã sã n da yaẽ la sẽn deeg-b noore, tẽeb yaẽ la zaalem la kãabga me yaẽ la belegre. ¹⁵ Noor yõod ya f tõdg-a tɩ Wẽnd puug b sũur ne fo; noor sã n kaẽ, tõdgr me ka ye; ¹⁶ Yaa rẽ la m yet tɩ tõnd zu-noogã, yaa tẽeb n wat ne-a, tɩ tẽeb la kũun akɩka la yaa tẽeb yĩng la Wẽnd pids b kãabg ne a Abraam yagens buud fãa: ka sẽn tũud-b noorã bala, yaa sẽn tar-b d fãa ba a Abraam tẽebo, ¹⁷ tɩ woto la b gʋls yã: M kɩtame tɩ f lebg neb ka tɛk saamba – tẽeb saamba – t’a tẽe Wẽnd ning sẽn tõe vʋʋg sẽn ki, la a tõe tɩ sẽn ka be, zĩndi. ¹⁸ A Abraam saaga a sẽn kõn saage, n tẽ Wẽnde; woto la a lebg neb ka tɛk saamba wala b sẽn yeele: F yagens na n yɩɩ ka tɛka. ¹⁹ A Abraam gesa ne tẽeb sẽn ka tõe n kɩlle a yĩnga kʋʋlem (a yʋʋma da zoe n pida koabga) n ges a Sara me kʋʋlem. ²⁰ A sẽn ne Wẽnd kãabga yĩnga, a ka zoe rabeem ye, a tẽeb kõ-a-la pãnga t’a pẽg Wẽnde, ²¹ n mii tɩ Wẽnd sã n pʋlme b tõogd n pidsa b pʋlengo. ²² Yaa rẽ yĩng la a paam t’a yell manege. ²³ La Sebr sõng sã n yet tɩ ya a Abraam tẽebã n maneg a yelle, ka yet tɩ yɩɩ yẽnda a yembr bal ye; goma tõnd me yelle, ²⁴ tɩ tẽeb n sɩd maneg d yelle, tõnd sẽn tẽed Wẽnd sẽn vʋʋg a soab kɩɩms sʋka, tõnd Soaala Zezi Krista. ²⁵ B ki-la d yel-wẽna yĩnga la b vʋʋga d yell manegr yĩnga.

¹ Tẽeba sẽn maneg d yell yĩnga, d zĩi ne laafi Wẽnnaam taoore, la rẽ tũu ne tõnd Soaala Zezi Krista maasem. ² Bãmb kɩtame tɩ d tũ tẽebo n paam kũun ning d sẽn zĩ ne a soabã; yaa kũun sẽn waoogd tõndo, t’a ka bũmb a to n zʋʋg Wẽnd ziira pʋɩɩr saagr ye. ³ Bõe la m na n paase? Ad-y d fara meng le yaa d zu-zẽkre tɩ d miime tɩ far yalsda ned yam zĩ yɛnga. ⁴ Ned sã n yals a meng zĩ yɛnga, a rɩkda tʋʋm sõma minugu la minim n tʋm neerã n wat ne saagre. ⁵ La sẽn saagd-a ka tõe n lʋɩ vɩʋʋgẽ ye tɩ Wẽnnaam kɩtame tɩ Vʋʋsem sõng ning d sẽn paama daagd Wẽnd nonglma tõnd sũurẽ. ⁶ Yaa tõnd sẽn dag n ka tõe n le maan fɩ wã wakato la Krista yãk b raare n ki wẽn-kɩɩsdba yĩnga. ⁷ – Daare ned tõe n sak n kii sẽn ka tar-a a toorẽ yelle yĩnga, n ki nin-sõng yĩnga, daare, rẽ tõeeme. ⁸ – Kaset ning d sẽn tare n mi tɩ Wẽnd nonga tõndã, yaa Krista sẽn ki d yĩnga tɩ d yaool n da ket n ya yel-wẽn-maandbã. ⁹ D miime tɩ marsã la d na n põs zabre d sẽn paam tɩ b raag b zɩɩm tɩ d yell tũ rẽ n maneg zãngã. ¹⁰ Beem sẽn waa n ket tõnd ne Wẽnd sʋka, Wẽnd Biiga kii tõnd yĩnga n kɩt tɩ d lebg Wẽnd zo-rãmba, tõnd sẽn lebg zood ne Wẽnda marsã d miime tɩ Wẽnd Biiga vɩɩm na tõog tɩ d yell le maneg n yɩɩg. ¹¹ La ka rẽnd bal ye, bũmb n le kɩt tɩ d kɩdemd Wẽnnaam taoore, yaa Krista sẽn sõng tɩ d zoe n be manegr pʋgẽ dũnna-rũnna. ¹² Ad-y yaa nin-yend n wa ne yel-wẽnd dũni pʋgẽ, tɩ yel-wẽnd me wa ne kũum, tɩ kũum me lebg neb fãa bũmbu tɩ yel-wẽnd me lebga neb fãa yel-wẽnde. ¹³ Wẽnnaam sẽn da waa n nan ka kõ b noora wakato, yel-wẽnd da bee dũni pʋgẽ, la wakat kãnga, Wẽnnaam noora sẽn da ka moon yĩnga, b ra basa yel-wẽnd taale. ¹⁴ Baasgo a Adem n ta a Moyiiz, kũum da rɩkdame, la sẽn pa beeg-ba a Adem beegr da kiidame; baad-y pipi Adema yaa Adem ninga sẽn pʋgda wã makre. ¹⁵ Kũun sẽn kõt to-to, la beegr sẽn beegd to-to ka a ye ye. Nin-yend beegr waa ne neb ka tɛk kũum, bãng-y tɩ Wẽnd kũuna b sẽn ning Krista b yembra nugẽ, kũun kãnga b sudg-a la zembala, ne yamleoogo, neb ka tɛk zutu. ¹⁶ Wẽnd kũuna sẽn wa ne bũmb ninga la nin-yend beegra sẽn wa ne a soaba me ka wẽnd taab ye. Yel-wẽnd a ye poore bʋʋd n bʋ la yɩɩ paalgr bʋʋdo la Wẽnd bas taala yɩɩ yel-wẽn ka tɛk bas taale. ¹⁷ Nin-yend yel-wẽnd waa ne kũum dũni pʋgẽ la kũum lebga naaba, nin-kãng manesem yĩnga, bãng-y tɩ sẽn paam-b nin-yend kũuni, tõnd Soaal a Zezi Krista manegrã, bãmb dãmb n na n yãmb moogo. ¹⁸ Nin-yend yel-wẽnd waa ne neb gill sɩbgre, tɩ nin-yend sugr kosg wa ne vɩɩm neb fãa yĩnga. ¹⁹ Nin-yend tõdgr kɩtame tɩ neb ka tɛk tũ rẽ n lebg yel-wẽn-maandba, ad-y nin-yend sakr n na n maneg neb ka tɛk yelle. ²⁰ Sã n ya Noorã, yẽ waame tɩ yel-wẽnd tũ yẽ n wek balbo la a sẽn wek balb zĩig ninga, be la Wẽnd kũuna me yɩ ka tɛka. ²¹ Tũu ne yel-wẽnde tɩ kũum lebg naab dũni pʋgẽ la Wẽnd maag Krista sugri, b kõt yaara yĩnga, sõmblem zamaan na n yalsa vɩɩm sẽn kõn sɛ yĩnga.

¹ M na n yeelame tɩ bõe? Tɩ d kell n pa yel-wẽnd pʋgẽ tɩ Wẽnnaam nimbãan-zoeerã tõog n yɩ wʋsgo d yĩnga? Ayoo! ² Tõnd sã n lebg bõn-kɩɩms yel-wẽnd yĩnga, d na n yɩɩ wãn n le vɩɩnd a pʋgẽ? ³ Bɩ yãmb ka mi tɩ tõnd sẽn so Krist a Zezi soobã, yɩla b kũuma pʋgẽ la b lis tõndo? ⁴ Tõnd sẽn deeg soobã, tõnd naaga ne bãmba n mum yaoogẽ, sẽn na n yɩlẽ tɩ Krista sẽn vʋʋg kɩɩms sʋka, Ba Pãng soaba maasem yĩnga, bɩ tõnd me paam n vɩɩnd vɩɩm paalga. ⁵ D sã n lebga bũmb a ye ne Krista, d kũuma sẽn wẽneg bãmb rẽnna, bɩ d bãng tɩ d na kell n wẽneg bãmba me ne vʋʋgr sẽn wẽnd bãmb dẽnna. ⁶ D bãng tɩ b naaga tõnd yĩn-kʋdrã n ka pik ne Krista, sẽn na n yɩlẽ n woog a wẽnema pãnga tɩ d da le yɩ yel-wẽnd yems ye. ⁷ Sẽn ki-a ka le ya yel-wẽnd yem-daoog ye. ⁸ La tõnd sã n naag Krista n ki, d tẽedame tɩ d naaga bãmb n vɩ. ⁹ Krista sẽn vʋʋgã, b ka tõe n le ki yɛs ye, kũum ka leb n tar b gaab yɛs ye. ¹⁰ B kũuma yɩɩ yel-wẽnd na menem zãng kũum; b vɩɩma yaa vɩɩnd ne Wẽnnaam vɩɩm. ¹¹ Dɩlla yãmb me ges y meng marsã wa neb sẽn ka le kĩ ne yel-wẽnde, la y vɩɩnd Wẽnnaam kamb vɩɩm tõnd Soaala Zezi Krista maasmẽ. ¹² Da sak-y tɩ yel-wẽnd le rɩ naam y yĩn-kiidga zug ye; da le sak yã a tʋls wẽnsa ye. ¹³ Da sak-y tɩ y yĩnga wils lebg yel-wẽnd zab-teed ye. Dɩk-y y mens n kõ Wẽnd tɩ y yaa bõn-kɩɩms sẽn lebg nin-vɩɩse. Dɩk-y y yĩnga wils n kẽ Wẽnd tãpẽ n zab sõmblem zabre. ¹⁴ Yel-wẽnd ka tog n le rɩ naam y zug ye tɩ y yii Noor zamaanẽ n kẽ sõmblem dẽnnẽ. ¹⁵ D na n maana bõe d sẽn paam tɩ b yiis-d Noor soolmẽ n kẽes-d sõmblem zamaanẽ, d tõe n le maana wẽng bɩ? Lɛ-lɛ! ¹⁶ Y ka mi tɩ y sã n bas tɩ ned kẽes y yembd pʋgẽ, y sɩd lebga yẽ yem-daoogo? Y sã n lebg wẽng yem-daado, y kũum la y bao yã, y sã n tũud Wẽnnaam, y manegr la y paam yã. ¹⁷ Wẽnd paam barka tɩ y sẽn da ya yel-wẽnd yembs pĩnda, y sakame n deeg zãmsg ninga b sẽn zãms yã, ¹⁸ n yi yel-wẽnd soolmẽ n kẽ sõmblem zamaanẽ. ¹⁹ Y yama sẽn pa waoog yĩnga m na n dɩka ninsaal makre. Wala y sẽn dɩk y yĩnga pĩnd n kẽes yel-wẽnd yembdẽ t’a yaal zãnga, woto-me bɩ y rɩk y meng rũnna n kõ neere n lebg sõma. ²⁰ Yãmb sẽn waa n ya yel-wẽnd yem-daado, neer maaneg ra ka pak-y ye. ²¹ La m na n sok-y lame n gese, y paama bõe y tʋʋm kãensa pʋgẽ sã n ka y sẽn zĩ rũnna tɩ b yãnd tar-y wã? B ka tar yõod n zʋʋg kũum ye. ²² Rũnna y sẽn paam n yi yel-wẽnd yembdẽ n kẽ Wẽnnaam, bãng-y tɩ y womda sõmblem biisi la rẽ n na n kẽes-y vɩɩm sẽn kõn sɛ pʋgẽ. ²³ Yel-wẽnd sẽn wat ne bũmb ninga yaa kũum bala; la Wẽnnaam kũuna sẽn wat ne a soaba, yaa vɩɩm sẽn kõn sɛ, tõnd Soaala Zezi Krista maasmẽ.

¹ M sok n gese, m saam-biisi, la yaa waa m gomda ne neb sẽn mi noor sẽn ya a soab taki, m sok-y n gese, y ka mi tɩ yaa ned sẽn ket n vɩ la noor modgd sɩda? ² Yaa a sɩd sẽn ket n vɩ noor la pʋg-kãad reegda; a sɩda sã n ki, a noor ka le modgd-a yɛs ye; ³ yaa sɩda sẽn ket n vɩ wakato t’a bas-a n kul dao a to la b na n bool-a tɩ kãad sãamda. A sɩd sã n ki, a yi-la a sɩd soolmẽ; dɩlla a sɩd kũum poore a sã n kul dao a to a ka sãamd kãadem ye. ⁴ Dẽ la m na n yeelyã, m saam-biisi, tɩ yãmb me sẽn naag Krista n ki wã y yii noora soolmẽ; tõnd bee ned a to soolmẽ: yaa sẽn vʋʋg-a kɩɩms sʋka soab soolmẽ la d be, la d na n woma bi-sõma n kõ Wẽnnaam. ⁵ Sɩda, d sẽn da waa n ket n vɩ d pĩnd vɩɩma, noora sõnga d yĩnga wilsi la d zʋg wẽnga tɩ d wom biis sẽn tak kũum n kõ-do. ⁶ Marsã noor ka le modgd tõnd ye, tõnd lebga noora bõn-kɩɩmse, n yi yembd buud faa pʋgẽ; d basa no kʋdra sẽn da gʋls bũmb ninga n pʋgd Wẽnd ne zʋg paalga. ⁷ Noor yaa wẽnga? M kõn yeel dẽ lɛlɛ, la sã n ya sɩda, yaa noor n kɩt tɩ d bãng yel-wẽnde. M tʋlla woto kõn waẽ m sũurẽ, noor sã n dag n ka yeelẽ lɛ-lɛ: da tʋlg ye! ⁸ Noora sẽn yet tɩ woto la woto kisame wã yĩnga, yel-wẽnd tũu rẽ n kẽes tʋlsem ka tɛk m sũurẽ. Noor sã n da kaẽ, yel-wẽnd me kaẽ ye. ⁹ Pĩnda noora sẽn waa n dag n nan ka kõ, m da yaa bõn-vɩɩga; noora waoong poore, yel-wẽnd n lebg bõn-vɩɩga, ¹⁰ tɩ mam põd n lebg bõn-kɩɩnga. Ade, noora sẽn da kõ maam vɩɩm yĩnga, a waa ne mam kũum. ¹¹ Yel-wẽnd dɩka noora sẽn da kis bũmb ningã n belg maam n paam n kʋ-ma. ¹² D sã n ges neere d mikdame tɩ noor yaa bõn-sõngo; m tõe n paasame t’a yaa bõn-neere, bũmb sẽn toge. ¹³ La bõn-sõng tõe n tiig n lebga kũum mam yĩng bɩ? Ayoo! Ka tõe ye. Ad-y yaa yel-wẽnd n tʋm dẽnna; sẽn na n yɩlẽ t’a wẽnema puk zãnga, yel-wẽnd dɩka bõn-sõng n kʋ maam. Yel-wẽnd tũu noor n wilg maam a wẽnema pãnga. ¹⁴ Sã n ya sɩda, sẽn tar-a yam la b kõt noore; mam yaool n tara yĩng sẽn lebg yel-wẽnd yem-daago. ¹⁵ M ka mi m sẽn maanda võor ye, m sẽn data ka rẽ la m maand ye, m sẽn pa rata la m maanda. ¹⁶ La m sã n maand m sẽn pa rata, m naaga Noorã n kõt kaseto t’a yaa sõmbo. ¹⁷ M sã n maan m sẽn pa rate, tʋʋmda ka le ya mam tʋʋmd yɛs ye, a yaa yel-wẽnd sẽn ti a roog mam pʋgẽ tʋʋmde. ¹⁸ M neeme tɩ bõn-sõng ba a ye ka be m nengẽ ye, ka be m yĩngẽ ye; neer tʋlsem ka toog ne maam ye, yaa maaneg n ya toog ne-ma, ¹⁹ dẽ n so tɩ m pa maand neere, m sẽn date, n yaool n maand wẽng m sẽn pa rate. ²⁰ La m sã n maand m sẽn pa rate, dẽ ka le ya mam tʋʋmd ye, a yaa yel-wẽnd sẽn ti a roog mam pʋgẽ tʋʋmde. ²¹ Dɩlla noor n be m yĩnga tɩ m sã n dat fãa n maan neere, maan wẽngã n yɛs m taoore. ²² M sũura pʋgẽ Wẽnnaam noora noom-m-la al wʋsgo; ²³ la m yĩnga wilsẽ, noora to n yɛse; la no-kãng yika zabre ne m sɩɩgã la a za-m la ne bãeense, yel-wẽnde sẽn be m yingẽ bãeense. ²⁴ M yãbda m menga! Ãnd n na n fãag maam ne m yĩnga sẽn dat m kũuma? ²⁵ Wẽnd paam pẽgr d Soaala Zezi Krista maasem yĩnga. Ad-y yaa maam bala n ne m yamẽ tɩ m tog n tũ Wẽnd sẽn yalse, n yaool n sakd m yĩngẽ wã, yel-wẽnd sẽn yalse.

¹ Bãng-y tɩ sẽn be-b ne a Zezi marsã wã ka le zoet bʋʋd paalgr ye. ² A Vʋʋsem Sõng noora n kõt vɩɩm a Zezi maasmẽ, la yẽ n fãag foom ne noor ninga sẽn wata ne yel-wẽnd la kũum. ³ Wẽnd pidsa a Moyiiz Noora sẽn da ka tõe bũmb ningã, ninsaal komslma sẽn mong-a bũmb ningã, n tõog yel-wẽnde ne ninsaal yĩnga. Ad-y b tʋma b meng Biiga sẽn wa ne yĩng sẽn wẽnd tõnd dẽnna n yaool n tar pãng n menesd yel-wẽnde. ⁴ Wẽnd maana rẽnna, tɩ d tõog n deeg Noorã, tõnd sẽn ka le vɩ wala d yĩnga sẽn datã, n vɩ wala a Vʋʋsem Sõng sẽn datã. ⁵ Sɩda neb niyns fãa sẽn tũud-b yĩnga raab baooda sẽn noom b yĩngã la neb niyns sẽn tũud-ba a Vʋʋsem Sõng raab baooda sẽn noom a Vʋʋsem Sõngo. ⁶ Bãng-y tɩ sẽn baood-a a yĩnga sẽn datã, baooda a kũum la sẽn baooda a Vʋʋsem Sõng sẽn datã, baooda a vɩɩm la laafi. ⁷ Yĩnga sẽn data baoob sẽn pak b rãmbã, lebgda Wẽnnaam bɛɛba, n pa rat n le reeg Wẽnnaam noor ye; b pʋs n ka tõe meng ye. ⁸ Yaa rẽ me yĩng la b ka tõe n ta Wẽnnaam yam ye. ⁹ Yãmb ka le ya neb sẽn tũud b yĩnga yamleoog ye, y pʋgda a Vʋʋsem Sõngo sẽn date, tɩ Wẽnd meng kõ yãmb a Vʋʋsem Sõngo. Sẽn ka tar-a Krista Vʋʋsma, Krista ka so yẽ soab ye. ¹⁰ La Krista sã n be ne yãmba, ba yel-wẽnd sã n da kɩt tɩ y yĩnga tog n ki, Vʋʋsma na n kõ-y-la vɩɩm, Wẽnd sẽn maneg d yell ne bãmba yĩnga. ¹¹ Wẽnd Vʋʋsem ninga sẽn vʋʋga a Zezi Krista kɩɩms sʋka, sã n be ne yãmbã, ad-y b sẽn vʋʋga a Zezi Krista kɩɩms sʋka, b na kõ y yĩn-kiidgã vɩɩm, b Vʋʋsma sẽn be ne yãmba yĩnga. ¹² M saam-biisi, pakr sã n beẽ me, kõn yɩ pakr bada tɩ d vɩɩnd wala d yĩnga sẽn data ye. ¹³ Yãmb sã n vɩ wala y yĩnga sẽn date, y na n kiime. La y sẽn paam Vʋʋsem ninga sã n kɩt tɩ y lak ne yĩnga raabo, y na n vɩɩndame. ¹⁴ Wẽnnaam Vʋʋsma sẽn be ne b rãmb fãa lebga Wẽnnaam kamba. ¹⁵ Vʋʋsem ning y sẽn paama ka bũmb sẽn kɩt tɩ y lebg yem-daado n zĩ ne rabeem ye; y lebga Wẽnd zak kamba al n tõe n bool Wẽnd Aba, dat n yeelame tɩ Ba. ¹⁶ A Vʋʋsem Sõng meng naaga tõnd n kõt kaset tɩ d lebga Wẽnnaam kamba. ¹⁷ La d sẽn ya Wẽnnaam kamba, d na paam pʋɩɩr ning b sẽn pʋlem b kamba; d na naag Krista n paam pʋɩɩr kãnga; d sẽn naag bãmb n namsã, d na naag bãmba n paam pẽgre. ¹⁸ M tagsdame tɩ zamaan kãnga namsgo ne rolb ninga sẽn na n yɩ tõnd dẽnd beoog raarã ka tõe n mak taab ye. ¹⁹ Bõn-naandsa fãa zĩ n gũuda ne yãgbo, Wẽnd kamba pẽgr sẽn na n puk raare. ²⁰ Ninsaal tʋls yaalsã sã n tiig n kẽes bõn-naandsa fãa yembd pʋgẽ, d bãng tɩ ka tũ ne bãmb daab ye, tũu ne ninsaalb tʋʋmde la bãmb me saagdame ²¹ tɩ b yembdã sɛɛb bee raare, tɩ b yĩnga komsg sɛɛb bee raare, la b gũuda b sẽn na n paam soog-m-menga ne ziir ning Wẽnd sẽn kõt b kamba. ²² D mii vẽenega tɩ al n ta marsã bõn-naandsa fãa waasda rogem waasgo; ²³ la ka bãmb bal ye, yaa tõnd me sẽn zoe n paam lɛng ninga a Vʋʋsem Sõng sẽn lemb tõndã; yaa tõnd fãa n naag n waasd d sũurẽ, n gũud d yĩnga fãagre. ²⁴ Tõnd fãagra yaa bũmb d sẽn tõe n saag. La fo sã n ne f sẽn saagda soaba, dẽ ka le ya saagr ye. Fo na n yɩɩ wãn n ne bũmb la f le yet tɩ f saagda a yãeebo? ²⁵ Saagr yaa fo sẽn ka ne bũmb ninga tɩ f kʋmb f yam n tar a gẽegre. ²⁶ A Vʋʋsem sõng me wata d sõngre, tɩ d ka mi d sẽn na n kos bũmb ning taki tɩ d pʋʋsg yɩ neer ye, la ad-y yĩnsir tara a Vʋʋsem Sõngo tɩ b yõkd sɛɛg d yĩnga la b wiisd wiis toogo. ²⁷ Bũmb-kõ-solg-m Wẽndã mi a Vʋʋsem Sõng sẽn dat d yĩnga la bãmb me sẽn yõkd sɛɛg Wẽnd kom-nongdsa yĩnga, zemsa ne Wẽnd meng raabo. ²⁸ D miime tɩ Wẽnd sẽn nong b rãmbã, Wẽnd sẽn welg b rãmb toorã ne b raabo, b sõngda bãmb tɩ b yɛla fãa welg neere. ²⁹ B sẽn welg b rãmb toor al pĩnd-pĩnda, b tʋlgame tɩ b rɩk b Biiga wẽnego la Biiga na n lebga kãsem sẽn tar yaop ka tɛka. ³⁰ B sẽn pʋlem b rãmb neera la b bool yã. B sẽn bool b rãmba yell la b maneg yã, b sẽn maneg b rãmb yell la b pids ne ziiri. ³¹ Bõe la m na n le paas yɛsa? Wẽnd meng sẽn yaa d sõangdã d zabd-n-taag na n yɩɩ ãnna? ³² Wẽnnaam ka zoe b Biiga nimbãaneg ye, b sakame t’a ki d yĩnga; b Biiga yĩnga, bõe la b ka na n kõ-d marsã? ³³ Wẽnd sẽn welg b rãmb toorã, ãnda n tõe n le kẽes-b bʋʋdo? Yaa Wẽnd n manegd ninsaal yelle. ³⁴ Woto wã tõe n le yɩ-la a Zezi Krista sẽn ki tõnd yĩnga, n vʋʋge la b zĩ b Ba rɩtg n pʋʋsd d yĩnga tõe n le yɩɩ bãmb n na n kẽes tõnd bʋʋd bɩ? ³⁵ Bõe n na n yiis tõnd a Zezi Krista nonglem pʋgẽ? Far bɩ, sũ-beed bɩ, namsg bɩ, kom la naong bɩ, bũmb sẽn tõe n yak yõor bɩ, sʋʋg bɩ? ³⁶ Kõn le yɩ wa d sẽn karemd Sebr sõng pʋgẽ ye: Yaa yãmb yĩng la b tar tõnd n koot wa piisi wakat buud fãa, beoog sẽn vẽege. ³⁷ Baad-y t’a Zezi nonglem yĩnga, tõnd n maand daoodo. ³⁸ N-ye! M sũur kegmame tɩ bũmb ba a ye ka le tõe n zãag d ne Wẽnnaam nonglma, a Zezi Krista sẽn wa ne a soaba ye. Kõn yɩ kũum bɩ vɩɩm ye, kõn yɩ malɛk bɩ dũni soaal ye, ³⁹ kõn yɩ rũnna bɩ beoog bũmb ye, kõn yɩ sẽn be sa-gãnẽ bɩ sẽn sud tẽng ye, kõn yɩ naand buud ba a ye.

¹ Ne Krista m togsda sɩda, m ka yagd ziri ye, – a Vʋʋsem Sõng meng kaset la m tar m sũurẽ – ² m togsdame tɩ sũ-sãang la toog n tar maam n namsd wakat buud fãa. ³ M tʋllẽ lame tɩ Wẽnnaam yãk m barka, m tʋllẽ lame n welg ne Krista, dẽ sã n tõe n nafẽ m saam-biisã, ⁴ sẽn ya-b bũmb a ye ne maam rogmẽ wã, sẽn ya-b Israyɛl kamba, Wẽnd kom-wubdsi, Wẽnd Ziira vẽenem sẽn bui b rãmba, Wẽnd sẽn yõg zood ne b rãmba, Wẽnd sẽn kõ b rãmb b noy, Wẽnd sẽn wilg b rãmb waoogr ning b sẽn dat ninsaalb nengẽ, Wẽnd sẽn kãab b rãmb noogo, ⁵ Wẽnd sẽn kãab b rãmb yaab sõma, yaab niyns sẽn dog Krista, sã n ya tẽng zug rogma, la Krista yɩɩda bũmb fãa, tɩ b yaa Wẽnd n tog ne pẽgr sẽn kõn sɛ. Ami! ⁶ Ka rat n yeel tɩ Wẽnd kãabga lʋɩɩ vɩʋʋgẽ ye. Y mens miime bala tɩ ka a Israyɛl kamba fãa la a Israyɛl ye. ⁷ Yaa wala y sẽn mi t’a Abraam yagensã fãa kaa Abraam sẽn dog a toor ye. Na n tũu ne a Izaak tɩ yagens kẽer na n ges foo wa b sɩgre, ⁸ dẽ rat n yeelame tɩ ka yĩnga sẽn dogd la Wẽnnaam kamb bal ye, kãabga kamb me yaa Wẽnd kamba. ⁹ Kãabga kãaba woto: Vẽer woto sasa, m na lɛɛg n wa, la a Sara na n doga biiga. ¹⁰ Ad bũmba to sẽn ya vẽenega n yɩɩda: a Rebeka waa n dɩka pʋga, d ba a ye maasmẽ, d ba a Izaak maasmẽ. ¹¹ La a sẽn waa n nan ka rog a kinkirsã, tɩ kinkirsã me nan ka mi wẽng la neere, ¹² sẽn na n yɩlẽ tɩ b bãng tɩ Wẽnd boolg tũuda ne Wẽnd raabo, la a ka tũud ninsaal tʋʋma, a Izaak wʋma b sẽn yeele: «Kãsma na n yɩɩ yao wã sõgne;» ¹³ la sɩda woto n be sebrẽ: «M nonga a Zakoob la m kisga a Ezayu.» ¹⁴ M yeelame tɩ bõe? Tɩ Wẽnd maanda sẽn ka zemsde? Ka boto ye. ¹⁵ B yeela a Moyiiz: «M zoeta m sẽn zoet a soab nimbãanega, m kũmda m sẽn kũmd a soaba.» ¹⁶ Ka sẽn nong-a, ka sẽn zoet-a n pʋgd Wẽnd pʋlengo n paamd-a ye, ya Wẽnd sẽn zoe a soab nimbãanega n paamd-a. ¹⁷ Ad sebra sẽn yet Ezipt naaba: M kõ-f la naama ne m daabo n na n tũ foo n wilg nebã m pãnga tɩ m yʋʋr paam pẽgr dũni fãa pʋgẽ. ¹⁸ Sɩda Wẽnd zoeta b sẽn dat a soab nimbãanega la b kidibda b sẽn dat a soab sũuri. ¹⁹ Fo na n yeel-m lame: «Yaa bõe la a le zĩi n sãbsdẽ yɛsa? Ãnda n tõe n kɩɩs Wẽnnaam daabo?» ²⁰ Ninsaal biiga, foo la a bõe n na n wẽ no-koeemd ne Wẽnde? Ninsaal sẽn naan bũmb ninga na yik n yeel-a: «Bõe yĩng tɩ f naan m woto?» ²¹ Yagda ka tõe n dɩk yagd yɛnga n yag laok sẽn tar neerem n zems bala bɩ laok sẽn be neer wʋsg sɩda? ²² Ad-y yaa Wẽnd sẽn tʋlg n wilg tɩ ba b sũur puuda, b tara pãnga n tõe n yõk b menga ne lagd kẽer sẽn da yikd b sũuri n tog ne wãabo, n yaool n ka wã-b ye. ²³ Ad-y yaa b sẽn dat n wilg b ziira la b pãnga, la lagd kẽer paam tɩ b kũm-b nimbãanegã n segl-b al pĩnda tɩ b ya ziir lagdo, lagd sẽn yag b pẽgr yĩnga. ²⁴ La yaa woto la b maan ne tõnd, n sʋk-do Zʋɩf rãmba la bu-zẽmba sʋka. ²⁵ Yaa woto la b gomd a Oze sebrẽ: «Sẽn da ka m buud neba la m na bool tɩ m buudu, la pʋg-beooga la m na n bool tɩ rʋmde, ²⁶ b sẽn deng n wʋm zĩig ning tɩ b ka Wẽnnaam neba, zĩ kãng la b na n bool-b tɩ Wẽnnaam vɩɩga kamba.» ²⁷ A Izayi yeela a Israyɛl poorẽ: «Ba a Israyɛl kamba sõor sã n da taẽ la bĩisri sẽn be mogr noore, ad-y yaa b sẽn kees b rãmba bala n na n fãage, ²⁸ tɩ tao tao la vugr bala Wẽnnaam na n pidsa b kãabga tẽng zugu.» ²⁹ Wala a Izayi sẽn pĩnd n yeele: «Tãnsoab a Wẽnd sã n da ka keesẽ buudu, tõnd lebgẽ la wala Sodom la Gomor.» ³⁰ M na n kʋʋ m koɛɛga wãn wãna? Ade, Bu-zẽmba sẽn da ka baood sõmblem paam-a lame la yaa tẽeb sẽn wat ne sõmblem ningã. ³¹ A Israyɛl sẽn da tũud noorã n tẽed ta na kõ-a sõmblem, a raaba ka pids ye. ³² La yɩɩ bõe yĩnga? T’a basa a tẽeba teegre n teeg a tʋʋma. La woto b laka b lʋɩɩs kugri, ³³ wala sẽn gʋlse: «Lakr kugr la m vigl Siõ pʋgẽ, m bẽd-y la ne pĩiga sẽn lubd neba, Siõ pʋgẽ; la ned ning sẽn yaool n dell-a pĩ-kãng kõn paam yãnd ye.»

¹ M sẽn dat bũmb ning ne m sũur fãa la m sẽn pʋʋsd bũmb ning yĩnga, yaa m saam-biisa maan b sɩɩg fãagre. ² M tõe n kõo kaset tɩ b ka tũud Wẽnnaam ne reem ye; bũmb sẽn be bala, yaa b yama n nan ka vẽneg tɩ seke. ³ B sẽn ka mi Wẽnd sõmblem sẽn ya a soaba, b ka bao-a ye, b bas-a lame n na n bao b toorẽ dẽnna. ⁴ B ka bãng tɩ Wẽnnaam kõ b noya tɩ b tall ninsaal n tãag Krista sẽn ya tẽed fãa manegd ye. ⁵ A Moyiiz gʋlsa noya sẽn wat ne manegr ninga poorẽ n yeel tɩ ninsaal sã n tũ-ba, b tõe n kõ-a la vɩɩm. ⁶ Tẽeb sen wat ne manegr ninga poorẽ, ad-a sẽn gʋlse: «Da yeel f sũurẽ: ãnda n tõe n dʋ yĩngri,» n dʋ yĩngr n sik Krista? ⁷ Bɩ ãnda n tõe n sig bʋg-tẽnga n yiis Krista kɩɩms sʋka. ⁸ Bõe la a pʋs n yeele? A yeelame: «Koɛɛga pẽ-f lame, a be f noorẽ, a be f sũurẽ,» yaa tõnd sẽn moond tẽeb ninga koɛɛga. ⁹ Sɩda, fo fãag n sɛɛme, f noor sã n togs t’a Zezi la Soaala tɩ f sũur deeg tɩ Wẽnd vʋʋg-b la kɩɩms sʋka. ¹⁰ Fo sẽn tẽed f sũurẽ n wat ne f manegre, la f noor toagsg wata ne f fãagre. ¹¹ Ka sebr sõng n togsd tɩ ned ning fãa sẽn tẽed-a kõn paam yãnd bɩ? ¹² Ad-y yaa rẽ yĩng la bũmb ka welg Grɛk ne Zʋɩf ye: b yiiba fãa tara Soaal a ye bala la Soaala kelgda neb niyns fãa sẽn yõkd b sɛɛga. ¹³ D karma sebr sõng pʋgẽ tɩ ned ninga sẽn na n yõka Soaala sɛɛga na n kẽe fãagr pʋgẽ. ¹⁴ B na n yɩɩ wãn n yõk Soaala sɛɛga tẽeb sã n ka reng n beẽ, la tẽeb na n yɩɩ wãn n zĩndi wʋmb sã n ka reng taoore, la b na n yɩɩ wãn n wʋm, koɛɛgã sã n ka reng n moone, ¹⁵ la koɛɛg na n yii yɛ sã n ka sẽn tʋm a soaba nengẽ, wala sebr sõng sẽn togsde: «Ad-y b sẽn tʋm b rãmb tɩ b saa n togs Koe-noogã, ad-b nao be neere.» ¹⁶ Da tẽ-y tɩ neba fãa n deeg Koe-nooga ye, t’a Izayi n yeele: «Ãnda n deeg d sẽn togs bũmb ningã?» ¹⁷ Sɩd yaa wilgri n dengd taoore tɩ tẽeb yaool n wa la wilgra yita Krista gomnẽ. ¹⁸ Bas-y tɩ m sok n gese, y tẽedame tɩ koɛɛga la b pa wʋme? Mooga tõr wʋma b rãamde la b gomda taa mooga yaanga. ¹⁹ Bas-y tɩ m le sok n gese, y tẽedame t’a Israyɛl ka wʋm bɩ? Bãng-y t’a Moyiiz reng n togsame: «M na n kɩtame tɩ buud sẽn ka bu-sõng yamleoog yõk yã; m na kɩt tɩ y wa sãbs buud a ye, a sẽn ka bãng yam yĩnga.» ²⁰ A Izayi saag n le paasame: «Sẽn da ka baood-b maam, yãend-m lame, m lika m meng sẽn da ka sokd-b mam yelle.» ²¹ Ad-a sẽn leok a Israyɛl poorẽ: «M tuda m nug beoog sẽn wẽege, m tud-a la tõatba la tʋb-pa-wʋmdba.»

¹ Dɩlla m sok n gese: Wẽnnaam yi-la b neba poorẽ bɩ? Ka boto ye. Mam meng ka Israyɛl ned laa, m ka a Abraam yageng laa, m ka rog a Bẽzamẽ buudẽ laa? ² Wẽnd ka tõe n yeel tɩ b yii buud ning b sẽn welg toor al pĩnda poorẽ ye. Bɩ y yĩma sẽn gʋls a Eli poorẽ, a sẽn waa n gomd woto ne Wẽnnaam n baood n na n paalg Israyɛl kamba: ³ «Soaala, ad-y b kʋ-la y bãngdba, n sarm y maan-kuga; maam m ye n põse, tɩ b baas n dat n yãk m yõore!» ⁴ Yaa bõe la Wẽnd leok-a? «M keesa m yĩnga neb tus a yopoe sẽn ka yĩgimd a Baal taoor ye.» ⁵ Woto-me kell n kees rũnna la Wẽnd n welg-a toore ne b yamleoogo. ⁶ La sã n yet ne b yamleoogo, ka yet tɩ tũu ne ninsaal tʋʋmd ye, ka rẽ b kõn gom yamleoog yell ye. ⁷ D na n kʋʋga d koɛɛga wãn wãna? A Israyɛl sẽn bao bũmb ningã, a ka paam-a ne a toorẽ tʋʋm ye, tɩ Wẽnd sẽn welg b rãmb toora yaool n paam-a. Sẽn ket-bã, b basa b sũura tɩ kidbi; ⁸ wala sẽn be sebr sõng pʋga: «Wẽnd kõ-b-la yam sẽn suusdi la nin sẽn ka ne, la tʋb sẽn ka wʋmde, n tãag rũnna.» ⁹ A Daviid me ra yeela woto: «Kɩt-y tɩ b rɩɩb zĩig lebg b bẽdgo, n lebg b wĩir, n lebg kugr b sẽn na n lak n lʋɩ, tɩ rẽ yɩ b rolbo! ¹⁰ Bɩ b nin kẽ kõaada tɩ b ra le tõog n yãe ye, kɩt-y tɩ b po-raoog zõond n ka le roog ye!» ¹¹ M le sok n gese: y tẽedame tɩ Zʋɩf rãmba lakame n na n lʋɩ lʋɩɩs meng bɩ? Ayoo! B lakr waa ne bu-zẽmba fãagre tɩ sũ-kiir na tũ rẽ n yõk-ba. ¹² B lakra sã n wa ne dũni manegre, la b sõora woogr sã n wa ne bu-zẽmba nafre, b zãng gill sã n lɛɛg n wa, yita wãna? ¹³ Yaa ne yãmba, bu-zẽmba, la m togsda, m yaa yãmb tʋʋm-tʋmda, la m maanda m tʋʋmda neere, ¹⁴ la rẽ yaa m sẽn dat tɩ m saam-biisa yãende n yik sũ-kiiri tɩ m paam n fãag kẽere. ¹⁵ Wẽnd sẽn bas b rãmb kɛɛnga sã n wa ne dũni manegre, b sã n le bool-b sʋka na n yɩɩ bõe sã n ka kɩɩms vʋʋgre? ¹⁶ Kood dẽeng zom sẽn yãk n kõ Wẽnd sã n ket n ya sõmbo, bura zãng na n yɩɩ sõngo. Tɩɩga yẽgend sã n ya sõngo, wila me yɩta sõmbo. ¹⁷ Tɩ-sõnga wil sã n kʋʋse, tɩ fo sẽn ya tɩ zaal willã paam n sel b zugu n vʋʋg n paam sɩɩlem sõng n yũ, ¹⁸ da wa nand f meng n yɩɩd wil sõnga meng ye. Bɩ f sã n pẽgd f menga, da yĩm tɩ ka foo n zãad yẽgendã, yaa yẽgenda n zãad foo. ¹⁹ Fo na n yeelame: «B kɛɛ wila tɩ mam tõog n sel b zĩigẽ.» ²⁰ Yaa sɩda, yaa b sẽn ka tar tẽeba yĩng la b kʋʋs-ba, la yaa fo tẽeba yĩng la f keta. Ne rẽ fãa da maan wilg-m-meng ye, maan dabeem n yɩɩda. ²¹ Wẽnd sã n kɩt tɩ b kʋʋs wil sẽn da be b zĩisẽ, fo me gũus tɩ b tõeeme n ka bas-f ye. ²² Bãng Wẽnd toolem la b nimbãan-zoeere. B yɩɩ toaag sẽn lʋɩ-ba yĩnga, n ya nimbãan-zoet ne foo, f sã n kell n pa b nonglma pʋgẽ; ka rẽ fo me yaa will sẽn na n kʋʋg. ²³ Sẽn bas b rãmb kɛɛnga sã n yi b kɩɩsg pʋgẽ, b me na paam n le sel tɩɩg a to zug: Wẽnd tara pãng tɩ seka le sel b yɛsa. ²⁴ Ade, b sã n kɛɛg foo tɩ zaalg zugu, la bee n da ya f zĩiga, n tɩ sel foo tɩɩg sẽn tũus zugu, la yaool n ka be la f zĩigã, fo zɩ tɩ b na lebs tɩ-sõnga wil n sel b zĩigẽ! ²⁵ Bũmb n ket n nan ka puk d yĩnga la m pa rat n solg-y ye, m saam-biisi, tɩ y ra wa yet tɩ y sẽn mi wã sek-y lame ye; Israyɛl bogr kidba a sũuri al tɩ bu-zẽmba fãa wa sak tẽebo, ²⁶ t’a zãng-zãnga yaool n paam n põse, wala sẽn gʋlse: «Fãagda na n yii Siõ, a na n peka a Zakoob rẽgda fãa. ²⁷ La m sã n pek b yel-wẽna n sɛ, yaa zood la m na n yõg ne-ba.» ²⁸ Zʋɩf rãmba sã n kɩɩs Koe-noogã n lebg Wẽnd bɛɛba, tɩ yãmb yell tũ rẽ n manege, ad-y Wẽnd boollã yĩnga, la b ba rãmb yĩnga, b ket n yaa Wẽnd zo-rãmba. ²⁹ Wẽnd ka kõt n le reeg ye, Wẽnd ka boond n le yeel tɩ vẽ ye. ³⁰ Yãmb n yɩ wẽn-kɩɩsdb pĩnda tɩ Wẽnd yik rũnna n maan-y nimbãan-zoeere, Zʋɩf rãmba tõdgr yĩnga. ³¹ Bãng-y tɩ yaa rẽnd me yĩnga la Zʋɩf rãmb me yik n lebg tõatba, n na n paam rũnna Wẽnd nimbãan-zoeerã. ³² Wẽnd kẽesa ninsaalb buud fãa kɩɩsg pʋgẽ sẽn na n yɩlẽ n wilg b fãa b nimbãan-zoeere. ³³ Wẽnnaam, y arzɛka geels toɛ yã, y minim la y bãngr zulma! Ad-y ned ka tõe n bãng y sẽn pʋɩt y yɛla toto ye, ned ka tar y soy wã buk ye! ³⁴ Ãnda n zoe n tõog n bãng Soaala tagsgo, ãnda n paam n yɩ b sagenda? ³⁵ Ãnda n yɩ pipi n paam n kõ Wẽnde tɩ bãmb na n yaool n bao n lebse? ³⁶ Fãa yita bãmb nengẽ, bãmb n maan fãa, fãa yaa b soolem. Bɩ b paam pẽgre sẽn ka be sɛɛbo. Amina!

¹ Wẽnd sẽn ya nimbãan-zoeta yĩnga, m saam-biisi, m kota ned kam fãa t’a rɩka meng n kõ Wẽnde n lebg maoong vɩɩga, maoong sõmbo, maoong sẽn tat b yam: woto la y na n waoog Wẽnnaam ne waoogr akɩka. ² Da wẽneg-y zamaana rãmb ye; modg-y n paam yam paale n tedg zãnga n tõog n bãng Wẽnnaam daabo, n bãng sẽn ya neere, sẽn ya sõmbo, sẽn ka tar goaleng ba bilfu. ³ M togsd-y la a yeyn-ye la y fãa gilli, ne Wẽnd sẽn maan-m nimbãan-zoeer ningã: ned ba a ye ra sak n pẽga meng tɩ loog ye. Ned kam fãa pa a zĩigẽ n zems tẽebã a sẽn paam Wẽnd nengẽ. ⁴ Tõnd ne d tar yĩng a ye wã, d yĩnga wils yaa kʋʋngo, la wilg fãa le tara a tʋʋmde. ⁵ Woto-me, tõnd ne d ya kʋʋngã, d naaga Krista n ya yĩng a ye; ned kam fãa yaa waa a to wilga. ⁶ Yaa kũun toɛ-toɛ la d paam Wẽnd nengẽ, dɩlla bɩ d modg tɩ sã n ya bãngr kũun la d paam yã bɩ d tʋm bãngr tʋʋmde wala d tẽeba sẽn tõe tɛka. ⁷ Sã n ya taab sõngre, bɩ d wɩng ne sõngre; sã n ya taab zãmsgo, bɩ d zãms-ba; ⁸ sã n ya taab saglgo, bɩ d sagl. Sẽn kõt-a kõ n da geel ye; sẽn deeg-a kãsengo maan moadg, sẽn kũmda a taab nimbãaneg yõgem a noore. ⁹ Modg-y tɩ belgr da zĩnd taab nonglma pʋgẽ ye, kisg-y wẽnga la tabend-y sẽn ya neer mepi! ¹⁰ Modg-y n nong taab wa ba-biisi la ned kam fãa ning a to sʋka. ¹¹ Yɩ-y neb sẽn tʋmd n ka vʋʋsdẽ ye, neb sũur sẽn kɛɛd ne Soaala tũumde. ¹² Y sũ-nooga yi y saagra pʋgẽ, y namsga wa ne y raoodo; y pʋʋsga ra yãk wakat ye, ¹³ nin-sõma wã yell gesg yɩ y tʋʋmd pakre, la sãamba fãa paam y gãag-sobendo. ¹⁴ Sẽn namsd-b yãmbã, kos-y tɩ Wẽnd bark sig b zugu; yeel-y tɩ Wẽnd na manege, da yeel-y tɩ Wẽnd na sãam ye. ¹⁵ Kɩdm-y sũ-noog ne ned ninga sẽn tar-a sũ-noogo; kiig-y nintãm ne sẽn yãbda. ¹⁶ Bʋk-y y sũur ne neba fãa gilli, kisg-y zẽk-m-menga; bao-y sulg-m-meng rãmba; da yeel-y tɩ y bãngra sekame ye. ¹⁷ Da maan-y wẽng n dol wẽng ye; bao-y neb fãa sẽn get wa bõn-sõng bala. ¹⁸ Modg-y wa y sẽn tõe tɛka tɩ y zĩnd-n-taar yɩ noog ne ned kam fãa. ¹⁹ Da kõ-y y meng bʋʋm ye, bas yã, m kom-sõma, tɩ b rɩ beem ne-yã, tɩ gʋlsa woto: Yaa maam n na n kao bʋʋdo, yaa maam n na n kõ rolbo. ²⁰ N yɩɩd rẽ, f bɛ sã n yãbd kom bɩ f kõ-a t’a rɩ, ko-yũud sã n tar-a bɩ f kõ-a t’a yũ. F maan dẽ, yaa yãnd la f ningd-a. ²¹ Da bas tɩ wẽng tõog-f ye, la ning pãng n tõog wẽnga ne neer maanego.

¹ Ned kam fãa sak taoor dãmbã. Ned ka so a to, Wẽnd sã n ka kõ a soab tõog ye. Tõog buud fãa yita Wẽnnaam nengẽ. ² Ned ning fãa sẽn ka reegd a soaal noor, tõdgda Wẽnd noore la tõat fãa baooda a meng paalgre. ³ Ad-y d sã n maand neere, d ka tog n zoe bʋ-kaoodba ye; sẽn zoet-a bʋ-kaood yaa sẽn maanda wẽnga; fo sã n ka rat n dig rabeem sẽn so-b fooma taoore, bɩ f maan neere n paam b pẽgre. ⁴ Wẽnd datame tɩ ned sã n so a to bɩ a sõng-a ne neer maanego; f sã n maand wẽnga bɩ f maan dabeem; bãng tɩ sʋʋga sẽn be soaalba nugẽ ka zaalem yĩng ye; sʋʋga yaa sõng Wẽnd n kao bʋʋdo, n sɩbg bɛɛgd buud fãa. ⁵ Ad-y noora ka reegd sɩbgr dabeem yĩng bala, reegd-a lame tɩ y sũurẽ wã, koɛɛg n zoe n leokd boto. ⁶ M sok n gese, y sẽn yaood yõor yaoodã, ka y sẽn ne tɩ segdame sɩda? Rẽ me la Wẽnd yãk neb tʋʋmd kãng yĩnga. ⁷ Kɩs-y ned kam fãa a sẽn sokd-y bũmb ninga: yõora yaood, sã n ya rẽ la a sokda, raag ligdi, sã n ya raag ligdi; zoe-y y sẽn tog n zoe a soaba, waoog-y y sẽn tog n waoog a soaba. ⁸ Da rɩɩ-y ned ba a ye samde sã n ka nong taab samdã. Sẽn nong-a a to pidsa noora zãnga. ⁹ Noor ning sẽn yet tɩ f ra yo ye, ra kʋ ye, da zu ye, da tʋlg f to bũmbu, la sẽn ket-ba fãa, kʋmsame n lebg woto: nong f to n wẽnd f menga. ¹⁰ Sẽn nonga a to ka maand-a kegr ye. Taab nonglem pidsda noɛ a taaba fãa gilli. ¹¹ Y mii tõnd sẽn vɩ zamaan ning pʋgẽ. Ad-y gõeema nekr taame, fãagra pẽneg-d la marsã n yɩɩd d sẽn paam tẽeba wakato. ¹² Zĩig zʋʋgame. Beoog yaoome. D bas d likẽ tʋʋma la d yi vẽenemẽ ne d zab teedo. ¹³ D tall d meng ne waoogr wa sẽn segd wĩndga. D da yɩ rɩ-rɩtb la kokoraad ye. D bas yoob la yaoolg buud fãa. D bas zab la sũ-kiiri. ¹⁴ D yeelg Soaal a Zezi Krista wa fuugu la d da tags d yĩngã yelle n baood n na n pids a tʋls yooda ye.

¹ Da bas-y ned kɛɛnga, a tẽeb sẽn pa sɩd yĩng ye la gãneg-y y no-koɛɛma. ² Kẽer beeme n yet tɩ rɩɩb ka be bãmb sẽn kis ye, tɩ kẽer bee n yet tɩ bãmb a ka pãng rãmbã dɩta vãad bala. ³ Sẽn dɩt-a ra sãbs sẽn ka rɩt-a ye. Sẽn ka rɩt-a me ra sãbs sẽn dɩt-a ye, tɩ Wẽnd ka reega a soab wẽng ye. ⁴ Foom la a bõe tɩ f to sõgen sẽn maand pak-fo? A yɛs yĩngri bɩ a gãe tẽnga, dẽ paka a zu-soab bala. A pʋs n na n yalsa yĩngri tɩ Soaala pãng seka a yĩngr yalsgo. ⁵ Yõaa soab pẽgda daar a ye n yɩɩd a to, yõaa soab nengẽ daar fãa zema a to, ned kam fãa maan wa a sũur koɛɛga sẽn yet t’a gãd bũmb ninga. ⁶ Ned ninga sẽn welgd-a raar ne a to welgd-a-la Soaala yĩnga. Ned ninga sẽn dɩt-a, dɩta Soaala yĩnga n pẽgd Wẽnde. La ned ninga sẽn ka rɩt-a, yaa Soaala yĩng la a basd rɩɩbo la a pẽgda Wẽnde. ⁷ Tõnd sʋka, ned ka be sẽn vɩ-a a meng yĩng ye la ned me ka be sẽn kiid-a a meng yĩng ye. ⁸ D sã n vɩ d vɩɩ Soaala yĩnga, d sã n kiidẽ, d kiida Soaala yĩnga. D vɩ bɩ d kiida, Soaala n so-do. ⁹ Krista kiime n le vʋʋge, n na n lebg sẽn ki-b la sẽn vɩ-b Soaala. ¹⁰ Foo la a bõe n na n bʋ f to, foo la a bõe n na n sãbs f to? Wẽnd bal n na n kao d fãa bʋʋdo wala sẽn gʋlse: ¹¹ M wẽenda (yaa Soaala meng n gomde) tɩ rũmd buud fãa na n yĩgimda m taoore la zelemd buud fãa na n pẽg-m lame. ¹² Dat n yeelame tɩ bũmb ning sẽn ya d zugẽ yelle, yaa tõnd ned kam fãa n na n togs-a Wẽnde, d toore. ¹³ D vẽ d taab bʋʋdo. D bãng bal tɩ d ka tõe n dɩgl bũmb d to taoore t’a wa lak n lʋɩ ye. ¹⁴ M miime, la Soaala taoore m sũur pa kiuusd ye, m miime tɩ rɩɩb ka be n kis a meng yĩng ye, a kisa sẽn yet-a tɩ kisame wã yĩnga. ¹⁵ Ade, fo sã n sãamd f to sũur dɩɩb poorẽ, fo ka le maand taab nonglem sẽn dat ye; da sak-y tɩ y sẽn gomd rɩɩb ninga yellã wa ne a kũum ye, tɩ Krista zoe n kila a yĩnga. ¹⁶ Da bas-y tɩ b wa sãbs y zu-nooga sẽn kõ-y ye. ¹⁷ Wẽnd Rĩunga ka rɩɩb la rãam yell ye, a yaa sõmblem, laafi ne sũ-noog sẽn paamd a Vʋʋsem Sõng nengẽ. ¹⁸ Ned ninga sẽn baooda Krista woto, yẽ soab noogd-a Wẽnd sũuri la a paamda ninsaalb pẽgre. ¹⁹ Woto wã bɩ d pʋg bũmb ning sẽn kõt laafi la sẽn paasd daoodo. ²⁰ Da saag n sãam Wẽnnaam tʋʋmd dɩɩb poorẽ ye. Dɩɩb ka be n ya yoog a meng yĩng ye, a sã ya yoogo yaa wala rɩ-rɩta tũu rɩɩbã n kʋɩɩb a taaba. ²¹ Sẽn be neere, yaa bas nemdo, rãam la bũmb fãa sẽn wat ne f taab lʋɩɩse, sẽn komsd f taaba pãnga. ²² Sõng n tall f tẽebã f sũurẽ la Wẽnd taoore. Pẽg-y ned ninga sẽn dengda n ges a tõeeme bɩ a ka tõe n yaool n sɩng bũmb maanego. ²³ La yell na pak ned ninga sẽn ges-a rɩɩbo wa ka rɩɩb a sẽn tõe n dɩ n baas n dɩt-a; wakat kãnga a ka rɩ ne pʋ-peelem ye, la bũmb ning fãa sẽn ka maan ne pʋ-peelem yaa yel-wẽnde.

¹ Yaa pakre ne tõnd a pãng rãmbã tɩ d sõng sẽn ka tar b tõnd pãngã; yaa pakr ne-do tɩ d bas d yamleoog maanego. ² Ned kam fãa modg n noog a to sũuri tɩ rẽ la neere la rẽ n paasd a raoodo. ³ Krista ka pʋg sẽn noom-b ye, tɩ yaa woto la b gʋlsyã: «Sẽn tʋʋs-b yãmba long n tʋʋsa maam.» ⁴ Sɩda, bũmb ning fãa sẽn zoe n gʋlse, b gʋlsa la tõnd vẽnegr yĩnga. Sebr sõng paasda tõnd daoodo la a maagda d sũuri la rẽ kɩtame tɩ d zĩ ne saagre. ⁵ Tõe-m-meng soab Wẽndã la sẽn mi a ninsaal nintãm yẽesgã na sõng yãmb tɩ y sũk nonglem sũkr y taab yĩnga wa Krista sẽn maan d yĩnga. ⁶ Woto y na tõog n pẽg Wẽnnaam, tõnd Soaal a Zezi Krista Ba, ne sũur a ye la noor a ye. ⁷ Ning-y pãng n koll taab wala Krista sẽn koll-y, Wẽnnaam pẽgr yĩnga. ⁸ M le yet-y lame, tɩ sẽn na n yɩlẽ tɩ Wẽnd pids b sẽn kãab d yaab rãmba, Krista gesa sẽn kẽ-b bãong yelle, ⁹ al tɩ bu-zẽmba pẽgd b nimbãan-zoeere wala sẽn gʋls sebr pʋgẽ: «M na n pẽg-y la bu-zẽmba sʋka la m na n kilsa y yʋʋre.» ¹⁰ D le karemda zĩig a to: «Bu-zẽmba, naag-y m neba n kɩdme.» ¹¹ Zĩig a to yɛsa: «Bu-zẽmba, pẽg-y Soaala la maan-y kibs b yĩnga.» ¹² T’a Izayi na n paas woto: «A na n waame, a Zese biiga na n waame n kẽes bu-zẽmba a soolmẽ la b fãa na n dɩka b yɛlã n bas ne bãmba.» ¹³ D sẽn teeg Wẽnd ninga na pids yãmba, y tẽeba yĩnga, ne sũ-noog la laafi. Wẽnd na kɩt tɩ y saagra pids zãnga ne a Vʋʋsem Sõng pãnga. ¹⁴ M mii vẽenega, m saam-biisi, tɩ y sũur pida ne raab sõma la y yam pida ne bãngre al tɩ y tõe n sagl y taaba. ¹⁵ Baasgo m sã n gʋls yã al tɩ zĩis kẽer bɩ y tõe n yɛɛse, bãng-y tɩ yaa m sẽn dat n le nek y pʋtẽerã. ¹⁶ M dat n le tẽeg y lame tɩ Wẽnd yeel-m lame tɩ m yɩ wa maan-kʋʋd bu-zẽmba sʋka, Wẽnd Koe-nooga maan-kʋʋda, n kɩt tɩ bu-zẽmba lebg kũuni, kũuni a Vʋʋsem Sõng sẽn maneg tɩ tat Wẽnd yam. ¹⁷ Wẽnnaam sora tʋʋmd poorẽ, m tõe n zẽka m zugu, Krista maasem yĩnga. ¹⁸ M kõn saag n gom bũmb a to yelle sã n ka Krista sẽn sõng-m tɩ m kẽes bu-zẽmba, tẽeba sor pʋgẽ, ne m goam la m tʋʋmde, ¹⁹ ne wẽnd makr dãmba la bõn-bãna, ne a Vʋʋsem Sõng pãnga. Bãng-y tɩ bãmb maasem yĩnga, m saaga Zerizalɛɛm la Illiri zãnga, n moon Krista Koe-noogã. ²⁰ La ade, m maana gũusgu; m sẽn kẽ tẽns niynsi, yaa zĩig ning b sẽn dag n nan ka pʋd Krista yʋʋr tɩ m da pa rat n me zĩig ning neda to sẽn dag n zoe n sɩng meeb ye. ²¹ M tʋlg n maana wa sẽn gʋls Sebr sõng pʋgẽ: B sẽn dag n zɩ n gom a soab yell ne b rãmbã na n yãend-a lame; neb niyns sẽn dag n zɩ n wʋm tɩ b gomd a yellã yam na n vẽnegame. ²² Ad-y yaa m tʋʋma n kɩt tɩ m nan ka tõog n ta y nengẽ ye. ²³ La marsã m tẽedame tɩ m na yaa n tõoge. M sẽn dat n wa y sʋka raar yaa n vẽsgame; la kaalẽ, rũna-rũna, m ka le tar tʋʋmd ye. ²⁴ M tẽedame tɩ m na tũ y nengẽ m sã n wa rabd Ispaniya. Sɩda, m saagdame tɩ d na yãend taaba n dɩ sõs ne taaba sũ-noogo, la m na paam y sõngre n tõog n ta Ispaniya. ²⁵ Marsã m dabda Zerizalɛɛm n na n tɩ sõng m saam-biisã. ²⁶ Masedoan la Akayi rãmb n tẽega b naonga yelle. B sõnga Zerizalɛɛm dãmb ne yamleoogo, yaa sɩda, ²⁷ la mam yamẽ wã, b maana sẽn ya tɩlɛ ne-ba. Zerizalɛɛm sõnga bu-zẽmbã ne Soaala kũuni la yaa rẽ yĩng la m yet tɩ togame tɩ bu-zẽmba lebs-ba ne bãmb mens sẽn tar b nugẽ. ²⁸ Dɩlla yell kãnga sã n welg n sɛ, m sã n ta m toor n kɩs ligdã, m na tũ yãmb tẽnga n yaool n ta Ispaniya. ²⁹ Bãng-y tɩ m sã n poog y tẽngã, yaa Krista kũun buud fãa la m na n zã n wa kõ yã. ³⁰ M saam-biisi, bũmb la m na n kos-y tõnd Soaal a Zezi Krista yĩnga la a Vʋʋsem Sõng nonglem yĩnga. M na n kos-y lame tɩ y sã n modgd n pʋʋsd m yĩnga, ³¹ bɩ y pʋʋs tɩ m põs wẽn-kɩɩsdba sẽn ket Zɩɩde tẽnga la m tõog n ta Zerizalɛɛm ne m kũuna n noog saam-biisa sũur be. ³² Woto m na lɛɛg n wa y sʋk ne sũ-noogo la m vʋʋs ne laafi, Wẽnd maasem yĩnga. ³³ Laafi Naaba-Wẽnd zĩnd ne yã. Ami!

¹ M kotame tɩ y sõng m tão nongr a Febe; a bee Sẽnkre, n ya be Tigeng sõangd poaka. ² Krista yĩnga, reeg-y pʋg kãnga sãando wala sẽn segd ne nin-sõma. A sẽn tar bũmb ning fãa tʋʋmd tɩ y tõe n sõng-a bɩ y sõng-a ne. Bãng-y t’a kolla neere Krist neb wʋsgo, la mam menga. ³ M Pʋʋs-y sõnga maam Krista tʋʋmda pʋgẽ, a Priska ne a Akilas. ⁴ B baoome n na n fãag maam la kellẽ la bilf bal tɩ b fiuus b zutu. Ka maam m ye n pʋʋsd bark ye, Tigeng ning fãa sẽn vigl bu-zẽmba sʋka me naaga maam n pʋʋsdẽ. ⁵ Pʋʋs-y neb niyns fãa sẽn tigimd bãmb zakẽ. Pʋʋs-y m zoa a Epenɛt: yẽ n yɩ pipi kũun Azi zamaana sẽn paam n kõ Krista. ⁶ Pʋʋs-y pag a Mari, sẽn sak yaams wʋsgo yãmb yĩnga. ⁷ Pʋʋs-y m saam-biis a Andronikus la a Zuniyas, sẽn naag-b maam bi-bees roogẽ, Ad-y yaa Krista tʋʋm-tʋmdb kãsense sẽn deng maam meng n kẽ Krista. ⁸ Pʋʋs-y m sẽn nong a soab Krista maasmẽ, a Ampliyatus. ⁹ Pʋʋs-y m sõangda, Krista tʋʋmda pʋgẽ, a Urbẽ la y naag m zoa a Stakis. ¹⁰ Pʋʋs-y rao ning kaset sẽn ya vẽeneg t’a kẽe Krista, rao a Apɛll. Taas-y m pʋʋsgo a Aristobul zaka rãmb fãa. ¹¹ Pʋʋs-y m doagda, a Erodiyõ, n paas a Narsis zak rãmba sẽn kẽ-b Krista. ¹² Pʋʋs-y sẽn sak-b yaams wusgo Soaala yĩnga, a Trifɛn la a Trifoz. Pʋʋs-y m tão sõng a Persis: pʋg kãnga me saka yaams wʋsgo, Krista yĩnga. ¹³ Pʋʋs-y Soaala zoa meng a Rufus, ne a ma wã sẽn ya mam me ma wã. ¹⁴ Pʋʋs-y nin-bãmba: a Asẽnkrit, a Flegõ, a Ermɛs, a Patrobas, a Ermas la saam-biisa sẽn be-b ne bãmba. ¹⁵ Pʋʋs-y nin-bãmba me: a Filolog ne a Zuli, a Nere ne a tão, a Olimpas la Krist neb niyns fãa sẽn be-b ne bãmba. ¹⁶ Ned kam fãa pʋʋs a to ne pʋʋs sõngo. Krista a Zezi Tigenga neb fãa toond-y pʋʋsem. ¹⁷ M saam-biisi, m kot-y lame tɩ y maan gũusgu ne neb niyns sẽn wat-b ne welg taaba la ne zãmsg sẽn ya toor ne yãmb sẽn paam a soabã. ¹⁸ Neba woto buud ka pʋgd Krista ye, b pʋga la b pʋgda. B noor gomda noogo n belgdẽ la b tuut yam sẽn nan ka puk tɩ sek rãmbã. ¹⁹ D wʋmdame tɩ b gomd zĩis fãa tɩ y yaa neb sẽn tũud neere la rẽ noogda m sũuri: m datame tɩ y yɩ sɩlem dãmba ne neer maanego la ka yõod dãmba ne wẽng pʋgbo. ²⁰ Laafi Wẽnda na kõ y nao pãnga tɩ y tab Sʋtãan n bedse. Wẽnd na kɩt tɩ Krista sik b kũuna y zutu. ²¹ M sõangd a Timote n toond-y pʋʋsem; n paas m doagdba a Lusiyus, a Zazõ la a Sozipatros. ²² Maam a Tersiyus, sẽn gʋlsa sebrã n pʋʋsd-y ne Soaala pʋʋsem. ²³ A Gayus n toond-y pʋʋsem: yaa maam ne Tigenga fãa gãag-soaba. A Erast n pʋʋsde: yẽ la tẽnga fãa arzɛka gũuda; d yao a Kuwartus me toond-y pʋʋsem. [ ²⁴ Tõnd Soaal a Zezi Krista yel-sõmda pa ne y fãa gilli. Amina!] ²⁵ Bɩ Wẽnd soog pẽgre tɩ bãmb n tõe n paas y tẽeba pãnga. La rẽnd me la m wilg yã ne a Zesi Krista Koe-nooga moonego. Koe-nooga puka bũmb sẽn da solge, bũmb sẽn da solg yʋʋm ka tɛka. ²⁶ Rũnna la ka sɩng kõn zĩnd sɛɛb Wẽnda lak b Sebr sõngo n wilg b sẽn da sede; la b maana boto tɩ Adem biis paam tẽeba so-tɩrg n dɩke. ²⁷ A Zezi Krista maasem yĩnga, bɩ bãngr pid bãngr soab Wẽnda paam pẽgr yʋʋm tõt sɛɛbo! Amina!