VẼNEGRE

VẼNEGRE

¹ Ad Krista a Zezi sẽn puk yɛl niyns sẽn da solg b nengẽ: Wẽnd n yeel-b tɩ b wilg b kambã bũmb ning waoonga sẽn zoe n seglã; b sõgna Zã nengẽ, la bãmb meng tʋm b Malɛka; ² la sɩd yaa Wẽnd Koɛɛga ne Krista meng kaseto la a Zã paam yã ne a sẽn yãend bũmb ninga fãa. ³ Sũ-noog soab la ned ninga sẽn karm-a bɩ sẽn kelg-a goama sẽn ya bãngr goama la a bĩng-ba a sũurẽ; ad-y Soaala Waoong yaoome. ⁴ Maam a Zã n pʋʋsd Azi Tigengu sẽn sẽeg tẽns a yopoe wã. Bɩ y paam bark la laafi, Pĩnd ne Rũnda la Beoog soaba maasem yĩnga; malɛgs a yopoe, sẽn yeg-b zaoorã maasem yĩnga, ⁵ la a Zezi Krista maasem yĩnga; bãmb la kaset sɩd soaba, a Adem buud bi-kẽeng la dũni dĩm dãmb Dĩma: bãmb n nong-do, la b waas d yel-wẽna rẽgdo ne bãmb meng zɩɩm. ⁶ Bãmb n kɩt tɩ tõnd lebg maan-kʋʋdb buudu, b Wẽnnaam la b Ba yĩnga; bãmb bal n tar ziir la naam, marsã la daar fãa. Ami! ⁷ Ad-b sẽn wat sawadg zugu tɩ ned kam fãa na n yãend-ba, ba neb niyns sẽn kõs-b ne kãndã; Adem biis fãa na n kaasa b poorẽ. N-ye! Sɩd ne sɩda! ⁸ Ad Soaala Wẽnnaam sẽn yeele: «Yaa maam la Sɩngre la Baasgo!» Maam la Zaamẽ, Rũnna la Beoog Soaba: bũmb fãa Soaala! ⁹ Maam a Zã, yãmb saam-biiga, sẽn naaga yãmb n nams a Zezi yĩnga, n nams b Rĩunga yĩnga, n ka bas raood ne bãmb pʋgbã, ¹⁰ ad-y m da bee tẽng a ye sẽn puk mogr sʋka, la sẽn boond tɩ Patmos, Wẽnnaam Gomdã la Krista kaset yĩnga. La mam yama fʋsga mam yĩnga daar a ye, Soaala raare, la m wʋma koɛɛg sẽn tãs m poorẽ wala tõntõogo: ¹¹ «Fo sẽn ne bũmb ningã bɩ f gʋls-a sebr pʋgẽ n tool Tigenga tẽns a yopoe wã: Efɛɛz, Smirn, Pergam, Tiyatir, Sard, Filadelfi la Laodise.» ¹² La mam sẽn wẽneg m poorẽ tɩ m na n bãng koɛɛga sẽn yitẽ, mam yãee fitils a yopoe sẽn bolg sãnem, ¹³ b ra gũbga Ned Biiga sẽn yer fu-woko, tɩ sãnem sẽbdg be b sɛɛgẽ. ¹⁴ Ned Biiga zug ra yaa pɛɛlga wa pe-kõbdo bɩ lamdo. B nina da zirda wa bugum. ¹⁵ B naoã da pɩnda wa zũudu sẽn yẽneg boaagẽ, la b koɛɛga ra sãta wa ko-wi kẽems rãamde. ¹⁶ B rɩtg nug ra zãada ãds a yopoe, la sʋ-sɩleng sẽn dɩt a noya a yiiba fãa n da be b noorẽ. B nenga ra yãgda wa wĩntoogo sẽn yãgd wĩnto-sʋka. ¹⁷ La mam sẽn yãe woto, mam lʋɩɩ vãna, bãmb taoore, wala m kiime; la b tika maam ne b rɩtg nugu la b yeelame: «Da zoe rabeem ye, yaa maam, Pipi soaba la Yaoolem soaba, Vɩɩm soaba. ¹⁸ M da kiime la ad-m sẽn le vɩ vɩɩm sẽn kõn sɛ; maam n tar Kũum loko la m zãad bʋg-tẽng kʋɩlen-bila. ¹⁹ Bɩ f gʋls fo sẽn ne rũnna wã la fo sẽn na n yaool n yãend nindaare. ²⁰ Sã n ya ãds a yopoe wã fo sẽn yãe m dɩtg nugẽ, ne sãnem fitils a yopoe wã, ad-b võore: ãds a yopoe wã yaa m Tigenga sẽn sẽeg tẽns a yopoe wã Malɛgse, la sãnem fitils a yopoe wã makda Tigenga tẽns a yopoe wã.

¹ Gʋls Efɛɛz Tigeng Malɛka woto: ‹Ad sẽn zãad-a ãds a yopoe a rɩtg nugẽ la sẽn kẽnd-a sãnem fitils a yopoe wã sʋka koɛɛga. ² Mam mii fo manesem fãa, f namsgo la f raoodo; m miime tɩ f ka pẽnegd nin-wẽns ye, f fɛɛsa neb niyns sẽn yet tɩ b yaa Soaala tʋʋm-tʋmdba la f bãngame tɩ b yaa zirẽ-be-rãmba. ³ F sũ-tõog me la sẽn ka paoode, tɩ m ne tɩ f kell n saka namsgo mam yʋʋr yĩnga. ⁴ La bũmb n be tɩ m sũur ka noom ne foom, yaa f sẽn maage ne f pĩnd nonglma. ⁵ Aya! Le tẽeg f sẽn da zao zĩig ning pĩndã; maan tuubgu, la f le rɩk f pĩnd sorã, ka rẽ m na n waame la m sã n mikame tɩ tekr ka be f sũurẽ, m na n luka f sãnem fitila n teem zĩiga. ⁶ Bũmb a ye pʋgẽ la m nand foo, yaa f yam sẽn lak ne a Nikola neba tʋʋm-wẽna wala m me yam sẽn lak ne-bã. ⁷ Sẽn tar-a tʋb bɩ a kelg Wẽnd Vʋʋsem sẽn gomd ne Tigengu. Sẽn tõog-b fãa, m na kɩt tɩ b rɩ vɩɩm tɩɩga biisi, tɩɩg ning sẽn sel Wẽnd zẽedẽ.› ⁸ Gʋls Smirn Tigengu Malɛka woto: ‹Ad Pipi la Yaoolem soaba koɛɛg, sẽn da ki-a n le vʋʋg-a soab koɛɛga. ⁹ Mam mii fo namsga fãa la fo naongã – mik fo yaool n gãe ne laogo – la neb niyns sẽn boond b mens tɩ Zʋɩf rãmbã – Sʋtãan sɛk roog rãmbã – ad-m mii b sẽn wɩt-f ne wɩds niynsi. ¹⁰ Da zoe toog ning sẽn nan ket poorẽ wã ye; Sʋtãan zoe n gomda a na sui yãmb neb kẽer doto, n kʋɩɩb yãmba la a mak yãmb pãng dasem piiga. Fo yee n tall f tẽeba neere n ta f kũum tɩ m na kõ-f vɩɩm dolbo. ¹¹ Sẽn tar-a tʋb bɩ a kelg Wẽnd Vʋʋsem koɛɛga ne Tigengu. Sẽn tõog-b fãa kõn le zoe kũum a yiib soaba dabeem ye.› ¹² Gʋls Pergam Tigengu Malɛka woto: ‹Ad sẽn zãad-a sʋ-bɛɛga a noorẽ wã goama: ¹³ Mam miime, fo sẽn ti f roog zĩig ninga: yaa Sʋtãan soolmẽ, la fo nanda mam yʋʋre, fo pa zãgs m tẽeb ye, ba wakat ning b sẽn waa n kʋ yãmb tẽngẽ, Sʋtãan soolmẽ, m nin-sõng la m kaset soab a Antipas. ¹⁴ Bũmb sẽn be tɩ m zabd ne foom, yaa tɩ fo nengẽ neb n be n kẽ a Balaam: ned ning sẽn sagl a Balak t’a belg Israyɛl kamb tɩ b wãb maand nemdo la b sak yoobo. ¹⁵ Neb me n be fo nengẽ sẽn deeg a Nikola neba zãmsgo. ¹⁶ Aya! Ning pãng n tuubi ka rẽ mam kõn kaoos la m wa fo nengẽ n tak zabr ne sʋʋg ning sẽn be m noorẽ wã. ¹⁷ Sẽn tara tʋb bɩ a kelg Wẽnd Vʋʋsem koɛɛga ne Tigengu. Sẽn tõog-b fãa m na n kõ-b la yĩngr dɩɩb sẽn solge; la m na kõ-b kug peele sẽn gʋls yʋ paalle ned a to sẽn ka sakde, b sã n boole, sã ka b sẽn pʋd a soabã.› ¹⁸ Gʋls Tiyatir Tigengu Malɛka woto: ‹Ad nin sẽn zird wa bugma, t’a naoã pɩnd wa zũud sẽn dʋʋg soaba goama, ad Wẽnd Biiga goama: ¹⁹ Mam mii fo manesem, f nonglem, f tẽebo, f sẽn tar sũur ninga ne tʋʋmde, f sũ-tõog f vɩɩma pʋgẽ, f tʋʋm sõma sẽn tar paasgo n dabda. ²⁰ La m sẽn tar yell ninga ne foom yaa f sẽn bas paga, a Zezabel, t’a yagd zirẽ n yet t’a yaa bãngd poaka n kʋɩɩbd mam nebã tɩ b bʋdg m sore n wãbd maand nemdo. ²¹ Mam yaool n kõ-a-la wakato t’a maan tuubgu la a tõdgame t’a kõn bas a yooba ye. ²² Woto ya a namsg gãag zug la m na n gãneg-a la m na n sɩbga sẽn yood-b ne-a wã tɩ sek-ba, b sã n ka tuub b manesma. ²³ Mam na n kʋ-la a kamba fãa; woto Tigeng fãa na bãnge tɩ mam mii ninsaal pʋga la a sũuri la m na n yaoo ned kam fãa n zems a tʋʋma. ²⁴ Sã n kella yãmb sẽn be Tiyatir, la y zãgsa wẽnga, la y tõdga b sẽn boond tɩ Sʋtãan zãmsg zulungã, mam meng n yet tɩ m kõn zɩlg-y zɩɩb a to. ²⁵ Yãmb wee gãd y sẽn deeg neerã n gũud m waoongo. ²⁶ Sẽn tõog-ba la b kell n tʋma mam tʋʋmna n ta a tɛka, m na n kõ-b tõog ning m sẽn paam m Ba nengẽ, b na rɩ naam Bu-zẽmba fãa zutu. ²⁷ B na n legl-b lame ne kut rasaare la b na n bõgs-b lame wa b sẽn bõgsd tãnd laase. ²⁸ Ya woto la mam menga paam tõogo m Ba nengẽ. Maam n na n ning b nugẽ Tõd-beoog Ãdga. ²⁹ Sẽn tara tʋba bɩ a kelg Wẽnd Vʋʋsem koɛɛga ne Tigengu.›

¹ Gʋls Sard Tigengu Malɛka woto: ‹Ad sẽn so-a Malɛgs a yopoe la a zãad ãds a yopoe wã koɛɛga: Mam mii fo manesem; fo kẽnda wa bõn-vɩɩga mik fo kiime. ² Nek tao! La f yẽeg f gĩina sẽn nan ka ki zãnga; sɩda m ka ne tɩ fo vɩɩma bee yõod wʋsg mam Wẽnnaam nifẽ ye. ³ Aya! Tẽeg fo sẽn da reeg gomda ne pʋ-peelem ninga, gãd-a neere, maan sɩbgre. Mik fo sã n ka gũusi mam na n siga wa wagdre wakat ning fo sẽn pa tẽeda, m na n ling-f lame. ⁴ Bala, Sard pʋgẽ, yãmb neb kẽere n be tɩ b fut ka rẽgem ye; bãmb bal n yãagd maam ne fu peelse la rẽ n tog ne-ba. ⁵ Sẽn maand-b raoodo, yaa fu-pɛɛlg la m na n yeelg-ba la b yʋʋr kõn yẽes abada Vɩɩm sebrẽ wã ye, m na wilg tɩ m mi-b lame, m Ba ne b malɛgsa taoore. ⁶ Sẽn tara tʋba bɩ a kelg Wẽnd Vʋʋsem koɛɛga ne b Tigengu!› ⁷ Gʋls Filadelfi Tigengu Malɛka woto: ‹Ad Sõmblem Naaba, Sɩd soaba, sẽn zãada a Daviid kʋɩlen-bila t’a sã n pak bɩ ned ka be n pagdẽ, la a sã n page bɩ ned ka bee n pakdẽ, goama. ⁸ Mam mii fo manesem: m paka noor fo yĩnga tɩ ned ka be n pagd-a ye, la m mi tɩ ba fo pãng paooda, fo reega m koɛɛga la fo pa kɩɩs-m ye. ⁹ Mam na n modga sẽn kẽed-b Sʋtãana sɛk roogo – yaa zirẽ-be-rãmba sẽn boond b mens tɩ Zʋɩf rãmba – n-ye! M na n modg-b lame tɩ b wa wõgemd fo taoore la b bãng tɩ m nonga foo. ¹⁰ Dɩlla fo sẽn deeg mam noorã f namsg pʋgẽ, mam me na n fãag-f la ne yɩɩr ninga dũnia sẽn na n paame, Adem biisa fãa fɛɛsga wakato. ¹¹ M lebgra yaoome; gãd f sẽn tar-a neere tɩ ned da wa zuk f rolb ye. ¹² Sẽn tõog-ba, m na n lugl-b wa roog ra-nif kẽengo, m Wẽnnaama roogẽ; b kõn luk abada. M na n gʋlsa m Wẽnda yʋʋr b zugu la b bark tẽnga yʋʋre: Zerizalɛɛm paalga sẽn yit arzãna, m Wẽnnaam nengẽ, n paas Yʋ paall ning m sẽn tarã. ¹³ Sẽn tar-a tʋba bɩ a kelg Wẽnd Vʋʋsem koɛɛg ne Tigengu!› ¹⁴ Gʋls Laodise Tigengu Malɛka woto: ‹Ad Krista, Kaset sɩda la Wẽnd bõn-naandsa fãa Kãsma sẽn gomde. ¹⁵ Mam mii fo manesem: fo ka maasga, fo ka tʋʋlga; fo kõn yɩẽ tʋʋlg bɩ maasga! ¹⁶ La woto wã, fo sẽn ya zalzalã, n ka tʋʋlga, n ka maasga, mam na n wʋba foo m noorẽ. ¹⁷ Fo zĩi n geendame la f gomda: Mam yaa dakãagre, m paama laog wʋsgo, bũmb ka paoog-m ye; fo ka ne tɩ yaa foom bala la nimbãan neda, neba taaba sẽn tog n kũmi; fo ka ne tɩ f yaa naong soaba, zoanga la ned sẽn zĩ a kãre. ¹⁸ Bɩ f reeg mam saglsã: wa m nengẽ n da sãnem sẽn yɩlge ne bugum, n lebg rakãagre; ra fu-peelse n yeelge n lud f yãnde, la f ra nin tɩɩm n ning f nini n paam n yãe vẽenega. ¹⁹ Mam sagenda m sẽn nong b rãmba la m sɩbgd-b lame. Aya! Nang pãng bilfu, maan tuubgu. ²⁰ Ad-m sẽn yɛs dignoorẽ n kabsdẽ; ned ninga sẽn wʋma mam koɛɛga la a pak a roog noore, m na n kẽeme, m na n dɩɩ ne yẽ soaba, la yẽ ne maam na n sõsa ne taaba. ²¹ Sẽn tõog-ba, m na kõ-b la weere tɩ b zĩnd ne maam, m zaoorẽ, wala mam me sẽn tõoge, la m paam n zĩnd m Ba zaoorẽ wã ne bãmba. ²² Sẽn tar-a tʋba bɩ a kelg Wẽnd Vʋʋsem koɛɛg ne Tigengu!› »

¹ Dẽ poore m sẽn yãe la woto. Noor n pak saag zugu la koɛɛg ning sẽn tãs wa baorgo tɩ mam wʋma, yeela maam: Dʋ yĩngr ka tɩ m wilg-f bũmb ning sẽn wate! ² Wakat kãnga yɩɩ wa m yama fʋsga m yĩngã la ade, zaoor n da lugl saag zugu la Ned n da zao a zugu. ³ Sẽn da zĩ-a zaoorẽ wã ra tãoosda vẽenem wa kug peesem kẽer sẽn tãoosde vẽenem n ya kẽeg lima la moomd yʋdʋd; saag gomtɩʋʋg n tão gũbri n gilg zaoorã la a ra yaa kẽeg toenɛɛga. ⁴ Zaoora meng ra gũbga ne goeels pisi la a naase tɩ Nin-kẽems pisi la a naas da zĩ-b zutu ne fut sẽn ya wogd la peelse; Nin-kẽemsa zut ra fõga sãnem pugli. ⁵ Zaoora meng ra tãoosda sa-yagdo ne koees la sa-tãse; fitils rãmb a yopoe n da yõgne, zaoora taoore: bãmb la Wẽnnaam malɛgs a yopoe wã. ⁶ Zaoora taoor ra gãnega wa mogre sẽn yãgda la a pɩn wa kugr sẽn saas sõmb-sõmbo; Bõn-vɩɩs a naase n da gũbg zaoorã tɩ b mensa ya nin bala a yeyn-ye, poorẽ la taoore. ⁷ Pipi Bõn-vɩɩga ra wẽnda gɩgemde; Bõn-vɩɩg a yiib soaba da wẽnda loalga, a tãab soaba ra tara neng sẽn wẽnd ninsaal dẽnna, la a naas soaba da yaa sɩlga sẽn laand yĩngri. ⁸ La Bõn-vɩɩs a naasa fãa ra tara pɩgs a yoobe la b yĩnga da yaa nin bala zĩig zãnga, poorẽ la taoore; b da moondame, wĩntoog la yʋngo, n ka yalsdẽ ye: «Yãmb la Sõmblem, yãmb la Sõmblem, yãmb la Sõmblem! Bũmb fãa Soaala. Yãmb la Pĩnda, Rũnna la Beoog Soaba.» ⁹ La wakat ning fãa Bõn-vɩɩsa sẽn pẽg la b waoog, la b pʋʋs Ned ninga sẽn zĩ-a zaoorẽ wã n vɩ a vɩɩm sẽn kõn sɛ wã, ¹⁰ Nin-kẽems pisi la a naasa me da wõgemdeda a taoore n waoogd ka sɩng kõn zĩnd sɛɛbo Soabã la b ra lobda b sãnem pugli wã zaoora taoore n yetẽ: ¹¹ «D Soaala la d Wẽnnaam, yãmb toga ne pẽgre la ne waoogre la ne ziiri, tɩ yãmb n naan dũniya la yaa ne yãmb pãnga la bũmb sẽn da ka be zĩnd yã.»

¹ M yãeeme tɩ sẽn da zĩ-a zaoora zug ra zãada a rɩtg nugẽ sebr sẽn pili la sebra ra gʋlsa a nens a yiiba fãa la soagds a yopoe n da sog-a. ² M yãee Malɛk sẽn wɩɩd pãnga sẽn moon ne koe kãsenga: «Ãnda n na n tõog n lak sebrã, n soka soagdsã?» ³ La ned ba a ye ra ka be, saag zugu, tẽng zug bɩ bʋg-tẽnga, sẽn tõe n lak sebrã la a karm-a ye. ⁴ La m kiiga nintãm tɩ b pa yãend ned sẽn da segd n lak sebrã la a karm-a ye. ⁵ Nin-kẽemsa nin-yend yeela maam: «Da yãb ye; ad-a Zɩɩda buudẽ gɩgemdã, a Daviid yagengã, tõeeme; yẽ n na n pilg sebrã la a sok a soagdsã a yopoe wã fãa.» ⁶ Zaoora yegende, Bõn-vɩɩs a naasã la Nin-kẽemba sʋka, m yãee Pe-bil sẽn yɛse tɩ yaa wa b kodg-a lame la a ra tara yɩɩl a yopoe la nin a yopoe; bãmb la Wẽnd tõogã, b yama sẽn tʋmd b tʋʋmda tẽng zugu, zĩis fãa wã. ⁷ Pe-bila kolga sẽn da zĩ-a zaoora n deeg sebrã a sẽn da zãad, a rɩtg nugẽ. ⁸ A sẽn deege la Bõn-vɩɩs a naasa sẽn wõgemd Pe-bila taoore; Nin-kẽems pisi la a naasa me wõgemdame, ned kam fãa ne a pɛndga, ne a sãnem laag sẽn nukd tɩdare bug-zõose: tẽedba pʋʋsg makre. ⁹ B pʋda yɩɩn paalle: «Yãmb sɩd togame, n deeg sebrã la y sogs a soagdsã tɩ yãmb la b kodg yã, la yaa ne yãmb zɩɩm la y reeg ninsaalba n lebs-b Wẽnnaam, bãmb ne b buud toɛ-toɛ yã, ne b goam, ne b rog-n-mik, ne b soolem. ¹⁰ Yãmb kɩtame tɩ b lebg d Wẽnnaama yĩnga, maan-kʋʋr nanams buudu, maan-kʋʋr naam sẽn dɩt tẽng zugu.» ¹¹ M da ket n getame la ade, m wʋma rãamd kãsenga; Malɛk rãmb zãma n da gũbg zaoorã ne Bõn-vɩɩsã la Nin-kẽemsã. B sõora yaa tus kẽema belem tus kẽema n paam n zage. La b ra moonda ne koe kãsenga: ¹² «Pe-bila sẽn kodgã n tog ne tõogo, ne Wẽndlem, ne bãngr pidungu, ne naam, ne waoogre, ne ziiri, ne pẽgre.» ¹³ Bõn-naand buud fãa sẽn be saag zugu, bɩ tẽnga, bɩ bʋg-tẽnga, bɩ mogrẽ, dũniya tõre, m wʋma b fãa sẽn moonde: «Sẽn zĩ-a a zaoorẽ wã la Pe-bila, paam pẽgre, waoogre, naam la ziiri yʋʋm sẽn kõn sɛ!» ¹⁴ Bõn-vɩɩs a naasa ra leokdame: «Ami!» Tɩ Nin-kẽemsa na n wõgemd tẽng n waooge.

¹ M yaool n yãee Pe-bila t’a sokd pipi soagdga; tɩ pipi Bõn-vɩɩga koɛɛg na n tãs wa saaga: «Wa-y!» ² M gesame la m yãee wed bolle; wedʋʋda ra zãada tãpo; b kõ-a-la naam pugla n le yet t’a yi n tɩ maan daoodo. ³ Pe-bila le soka soagdg a yiib soaba tɩ m wʋm Bõn-vɩɩg a yiib soaba kɛlenga: «Wa-y!» ⁴ Yɩɩ wed moomd menga n puki; wed-dʋʋda paama sore n na n menes laafi tẽng zugu, n bas tɩ ninsaalb kood taaba; b kõ-a-la zãngoogo. ⁵ Pe-bila sẽn sok soagdg a tãab soaba, mam wʋma Bõn-vɩɩg a tãab soaba sẽn kelme: «Wa-y!» La m yãee wed sablg sẽn yi t’a wed-dʋʋda zãad bũmb sẽn tar m magd zɩslem; ⁶ la m wʋma koɛɛg sẽn tãse, Bõn-vɩɩs a naasa sʋka, la a mooname: «Zom pɛɛlg wũmbl yaa wakɩ koɛɛnga, zom pugsg wũmbl a tãab yaa wakɩ koɛɛnga; sã n kella kaama la rãama, da paas-y bũmb ye.» ⁷ Pe-bila sẽn sok soagdg a naas soaba, m wʋma Bõn-vɩɩg a naas soaba sẽn kelme: «Wa-y!» ⁸ Ade, weef ning sẽn yi-a wã yaa kẽeg-toenoɛɛga tɩ wed-dʋʋda yʋʋr boond tɩ Kũum; la bʋg-tẽnga n da yãagd-a. B kõ-a-la tõogo t’a soog tẽnga boag a naasa bogr a ye, la a kʋ neba ne sʋʋga, ne kom, ne bã-longdem, ne we-rũmsi. ⁹ Pe-bila soka soagdg a nu soaba tɩ m tool n yãe b sẽn da kʋ b rãmba sɩɩse, sẽn da ki-b Wẽnnaam Gomda yĩnga la b kaseta yĩnga. ¹⁰ La bãmb me sɩnga kɛlenga ne b pãng fãa: «D Soaala, Sõmblem la Sɩd soaba, yãmb na n gũu wakat bʋgo n yaool n kao y bʋ-sɩdã la y rok y sũur ne tẽng zug rãmba sẽn daag d zɩɩma?» ¹¹ Dẽ la b kõ ned kam fãa fu-wok pɛɛlga la b yeel-b tɩ b gãneg b yam bilf nanda tɩ b tũud-n-taasã la b ma-bi-taasã sẽn tʋm-b wa bãmba la sẽn tog n kood wa bãmba sõor lebg ka tɛka. ¹² Mam leb n gesame: Pe-bila sẽn waa n sok soagdg a yoob soaba, tẽnga miima ne pãnga la wĩntoog sobgame n lebg wa vũundu, tɩ kiuug moog zãng wa zɩɩm. ¹³ Ãdsa fãa rʋʋga tẽnga wa sɩlmand sẽn wẽnend kankang wila n sʋʋgd a bi-kãse; ¹⁴ saaga pilga wa seb-vãoogo n menem, tãmsa ne tẽns niyns sẽn puk-b mogrẽ wã fãa vigsa b zĩisẽ. ¹⁵ Tẽng zug nanamse la nin-bɛdã ne tãnsoaben-dãmbã la rakãagba, la pãng rãmba, b fãa bala: yamb bɩ burkĩna, b zoeeme n soond tãmsã la pĩisã bogdẽ. ¹⁶ B ra yeta tãmsã la pĩisã: «Sirg-y n solg-y tõndo tɩ d põs sẽn Zao-a a zaoorẽ wã la d tɩlg Pe-bila beem.» ¹⁷ Dũnna la Wẽnd sũ-puur da-kãsenga, la ãnna n na n yalse?

¹ Dẽ poore mam yãee malɛgs a naase sẽn yɛs tẽnga kɩrems a naasã; b ra gãda tẽnga sob-raad a naasã tɩ b ra fʋʋs tẽng bɩ mogre, bɩ tɩɩg meng ye. ² Mam yãee malɛk a to sẽn lik Yaanga. Yẽ n wat n na n ning Vɩɩm naaba kamba makre; a kelmame n yeel malɛgs niyns sẽn da paam-b sore n na n dãmb tẽnga la mogrã: ³ «Da yãg-y nanda n dãmb tẽnga la mogre bɩ tɩɩse tɩ tõnd ka reng n ning makre d Wẽnda kamba fãa rĩirẽ ye.» ⁴ M bãnga neb niyns fãa sẽn paam-b makra sõore: tus koabg la pis naase la a naase a Israyɛl kambẽ. ⁵ A Zɩɩda roogẽ: tus piig la a yiib n paame; a Rubẽ roogẽ: tus piig la a yi; a Gad roogẽ: tus piig la a yi; ⁶ a Asɛr roogẽ: tus piig la a yi; a Neftali roogẽ: tus piig la a yi; a Manase roogẽ: tus piig la a yi; ⁷ a Simeõ roogẽ: tus piig la a yi; a Levi roogẽ: tus piig la a yi; a Isakar roogẽ: tus piig la a yi; ⁸ a Zabulõ roogẽ: tus piig la a yi; a Zozɛf roogẽ: tus piig la a yi; a Bẽzame roogẽ: tus piig la a yi n paame. ⁹ Dẽ poore m yãee zãma kõn bãng n sõde, tẽns toɛ-toɛ rãmba, buud toɛ-toɛ, rog-n-mik toɛ-toɛ, goam biis toɛ-toɛ; m yãend-b lame tɩ b yɛs yĩngri, zaoora taoore la Pe-bila taoore, n yer fu-wogd peelse la b zãad kãase la b moon ne koe kãsenga: ¹⁰ «Tõnd Wẽnnaam sẽn zao b zaoorẽ la Pe-bila soog waoogre!» ¹¹ Malɛgsa fãa sẽn da gũbg zaoorã ne Nin-kẽemsã la Bõn-vɩɩs a naasã, b fãa wõgemd n waooga Wẽnnaam, ¹² b ra maandame: «Sɩda tõnd Wẽnda toga ne pẽgre ne ziiri, b pida ne yam, b toga ne bark pʋʋsgo, ne waoogre, ne naam, ne tõogo tɩ yʋʋma tong taab koabg koabga n tõt sɛɛbo. Ami!» ¹³ Nin-kẽem a yembr yaool n sok-m lame: «Nin-bãmba sẽn yer fu wogd peelsã, fo mi b sẽn ya b rãmba, la b sẽn yitẽ?» ¹⁴ Tɩ mam leoke: «M Naa, yãmb n mi wɛ!» T’a yeele: «Yaa neb niyns sẽn tɩlg-b pɛt kãsenga; b pegsa b futu la b los-b la Pe-bila zɩɩmẽ tɩ b pelge. ¹⁵ Yaa rẽ yĩng la b yɛs Wẽnnaam zaoora taoore, n tʋmd b tʋʋma wĩndg la yʋngo, b roogẽ. Sẽn zao-a zaoorã na n kẽes-b-la a zãnd maasmẽ. ¹⁶ La bada! B kõn le nams kom bɩ ko-yũud ye, wĩndg bɩ pems tʋʋlg ye, ¹⁷ tɩ Pe-bila sẽn yɛs tẽnsʋka, zaoora taoore, yẽ n na n yɩ b Pe-kɩɩma la b taas b vɩɩm ko-bundem zĩigẽ, la Wẽnnaam na n yẽesa b nintãma fãa.»

¹ Pe-bila sẽn sok soagdg a yopoe soaba la fãa sẽn yɩ sɩɩ saag zugu n kaoose, n ta wakat pʋɩ-sʋka. ² M yaool n yãee malɛgs a yopoe wã sẽn yɛs-b Wẽnnaam taoorã la b kõ-b-la bard a yopoe. ³ Malɛk a to yaool n yaasa zaoora taoore ne sãnem kaorgo la b kõ-a-la tɩdar wʋsgo t’a naag ne nin-sõma wã pʋʋsgo n dɩgl sãnem maan-kugra zug, zaoora taoore; ⁴ la woto tɩdara bug-zõos ruka malɛka nugẽ n dʋ yĩngri, Wẽnnaam taoore, n naag ne Nin-sõma wã pʋʋsgo. ⁵ Malɛka leb n dɩka kaorgã n pids-a ne maan-kugra bugum; a fẽega bugma tẽnga la yɩɩ sa-tãs la bʋrga, ne sa-yãgdo la bũmb fãa miimame. ⁶ Malɛgs a yopoe ne bard a yopoe tɩ seglame n na n peebe. ⁷ Pipi baorga peebame. Yɩɩ sapɩlem ne bugum sẽn kalem ne zɩɩm n dʋʋg tẽng zugu la dũniya bogr a tãab soaba, tɩɩsa fãa bogr a tãab soaba, mo-maasa bogr a tãab soaba, fãa gill rɩɩ bugum. ⁸ Malɛk a yiib soaba peeba a baorgo. La bõn-kẽemde sẽn zem tãnga n wit wa bugum, yii yĩngri n lʋɩ mogrẽ la mogr a bogr a tãab soab lebga zɩɩm. ⁹ Mogra pʋgẽ bõn-vɩɩsa bogr a tãab soab kiime; koom kogenda bogr a tãab soab bõra koomẽ. ¹⁰ Malɛk a tãab soaba peebame. La ãd bedre sẽn dɩt wa bug-vɩlenga yii yĩngri n lʋɩ kʋɩlsa bogr a tãab soaba la ko-bundsa pʋga. ¹¹ Ãdga yʋʋr la a «Tɩɩsem»; kooma bogr a tãab sob lebga tɩɩsga la neb wʋsg sẽn yũ kooma sẽn lebg toog liga kiime. ¹² Malɛk a naas soaba peebame. Tɩ yell na n paam Wĩntoogo, kiuug la ãdsa bogr a tãab soaba. Wĩndga, kiuug la ãdsa vẽenem bogr a tãab soab n wooge; daara konga a vẽenema bogr a tãab soaba. Vẽenem ning sẽn mii n kees yʋngã, yẽ me bogr a tãab soabã n wooge. ¹³ La mam sẽn da ket n getẽ m wʋma sɩlg sẽn lug yĩngr-yĩngr sẽn kelem ne pãnga: «Bʋko, bʋk wɛɛ, bʋk bal ne dũni wã bõn-vɩɩse, bard a tãaba sã n wa tãse, bard niyns malɛgs a tãabã sẽn ket n zãad b nusẽ wã sã n wa tãse!»

¹ Malɛk a nu soaba peebame. La mam yãee ãdg a yembre sẽn yi yĩngri n lʋɩ tẽnga la b kõ-a-la bul-zulunga kʋɩlen-bila. ² A sẽn pak kʋɩlengã, bug-zõos n yi, wala wʋng kẽeng sẽn widg rẽnna – la a sobga wĩndga la zĩiga fãa. ³ Bug-zõosa pʋgẽ, sʋy n yɩke n lʋɩ dũniya zãnga; la b kõ-b-la zẽnem wala tẽng zug namsa rẽnna. ⁴ B kõ-b-la noor tɩ b bas pʋt la moog buud fãa, la tɩɩs buud fãa la b rɩ neb niyns bala sẽn da ka tar b Wẽnd makrã b rĩirẽ. ⁵ B da ka tar sor n kʋ neb ye, yaa b nams-b bal kiis a nu tõre; la b rũmba zabr da yaa wa nang rẽnna. ⁶ Dasem kãense, neb wʋsg na n baoo kũum n konge, b na n tʋlga kũum la kũum na n zoe n bas-b lame. ⁷ Mik fo sã n ges sʋya, b wẽnda wiidi sẽn bob zabre, b zuta fõga sãnem pugli tɩ b nens ya wa ninsaal nenga. ⁸ B zoobda yaa wa pagb rẽnna, tɩ b yẽna ya gɩgemd yẽna. ⁹ B da rɩka kut n pil b yãoogo la b pɩgsa rãamd da fõta wa bilim-bilm ka tɛk b sẽn sog wiidi n dabd zabre. ¹⁰ B zʋya nee wa nang zʋʋre, n tar kõse; yaa kiis a nu la b paam sore n na n nams ninsaalba. ¹¹ B ra tara b naaba, yẽ la bul-zulunga dĩma, a yʋʋr ne Ebre rãmb goam la a Wãabo, a Abadõ, tɩ Grɛk rãmb boond-a tɩ Wãab naaba, a Apolliõ. ¹² Bʋk a yembre ka looge t’a yiib nan pʋgda. ¹³ Malɛk a yoob soaba peebame. La m wʋma koɛɛga; a yii sãnem maan-kugra sẽn vigl Wẽnd taoora kɩrems a naasã; ¹⁴ la Koɛɛga yeela malɛk a yoob soaba sẽn zãad baorgo: «Lood Malɛgs a naasã b sẽn da loe Efrat kʋɩl kãsengẽ wã n base.» ¹⁵ La b basa malɛgs a naasã sẽn da yɛs n gũud wakatã, daarã, kiuugã la yʋʋmdã n na n kʋ ninsaalba fãa bogr a tãab soabã. ¹⁶ B tãb-biisa da yaa wed-dʋʋdb tus kẽems kobsi: woto la b sõorã b sẽn togs-ma. ¹⁷ Ad-y yaa woto la m yãend wed-dʋʋdba ne b wiidi wã: wed-dʋʋdba ra teega b yãoog ne kut sẽn wit bug-kẽega la bug-kõodre. Wed-bãmb zuta ra yaa wa bõnyẽeg rẽnna tɩ b noor pursd bugum, bug-zõose la kidbri. ¹⁸ Bugma, bug-zõosã la kidbrã wiida sẽn da pursd b noorẽ, kʋʋ ninsaalba bogr a tãab soaba zãnga. ¹⁹ Wed bãmb wẽnem da bee b noorẽ la b zʋʋrẽ me; zʋya ra baasda ne wiis zutu la rẽ la b ra tar n wɩɩbd ninsaalba. ²⁰ Ne rẽ fãa neb niyns sẽn põs-b tẽn-kũuma ka lak ne b yel-wẽna ba bilfu. B ka vẽ ne b sʋtãamba waoogre, bõn-yood niyns sen naan ne sãnem, wanzurf, kugri, bɩ raoogo, bõn-yood sẽn ka nini, n ka tʋba n ka nao. ²¹ B ka vẽ ba bilfu ne b nin-kʋʋre, ne b tɩto, ne b yoobo la ne b wagdma ye.

¹ Dẽ poore mam yãee malɛk a to sẽn tar pãng sẽn sigi; a menga zãng pila sawadgo, tɩ saag gomtɩʋʋg tão gũbri, a zugẽ, t’a nenga ya wa wĩntoog, t’a karsa wit bugum. ² A da zãada a nugẽ, seb bil sẽn lake la rẽ t’a rɩtg naoor teega mogre, t’a goabg naoor teeg tẽn-koɛɛnga. ³ A kelma ne koe yaanga wa bõnyẽega. La rẽ poore sa-tãs a yopoe n gom b goama. ⁴ B sẽn gom n sɛ la m sẽn sɩng n na n gʋls, la koɛɛg n yi yĩngri n yeel-ma: «Bĩng sa-tãs a yopoe wã goama f yamẽ bala la f ra gʋls-b ye.» ⁵ La m sẽn da yãend malɛk ninga t’a teeg mogra la tẽngã n yɛsẽ wã zẽka a rɩtg n tees yĩngri, ⁶ la a wẽena ne Vɩɩm sẽn kõn sɛ Naaba, sẽn naana yĩngr ne a teeda fãa, sẽn naana tẽnga ne a teeda fãa, sẽn naana mogr ne a pʋgẽ teeda fãa, a wẽename n yeele: «Wakat taame! ⁷ Raar ning b sẽn na n wʋm malɛk a yopoe soabã, a baorga peebg raare, ba raare la Wẽnnaam yɛla fãa na n puk zãnga, wala b bãngdba, b sõgen-kamba, sẽn togs Koe-noog ningã.» ⁸ Dẽ poore, koɛɛg ning sẽn yi a yĩngr tɩ m wʋma le goma ne m yɛsa: «Kẽng n tɩ reeg seb bila malɛka sẽn zãad a nugẽ, malɛk ning sẽn teega mogra la tẽngã.» ⁹ La m kẽngame, n kos malɛka t’a kõ-m sebrã la a yeela maam: «Deeg la f vele; a na n pidsa f pʋga ne tɩɩsem la f noorẽ, a naa n yɩɩ noog wa sɩɩdo.» ¹⁰ La m deega seb bilã malɛka nugẽ la m vel-a lame; m noorẽ a ra yaa wa sɩɩdo, la m sẽn vel n sɛ, a taa m pʋgẽ n lebg toogo. ¹¹ B le yeel-m lame: «Fo tog n le goma bãngr gom-beedo ne ninsaalb buud ka tɛka, ne tẽns ka tɛka, tɩ b zɛlma ya toore, tɩ b nanams me ya toore.»

¹ Dẽ poore b kõ-m la moogo, mo-sĩdimdi wa ribla la b yeel-m lame: «Yik n tɩ mag Wẽnd doogã ne a maan-kugrã la bãng wẽn-pʋʋsdba fãa sẽn be a pʋgẽ sõore; ² da mag yɩnga ye, tɩ rẽ basa ne bu-zẽmba la yaa kiis pis naase la a yiibu tõre la b na n saag Tẽn-Sõngã. ³ M na n kõ-la m kaset dãmb a yiibã noore tɩ b yeelg sũ-pa-noang futu n gom bãngr goam dasem tusr la kobsi la pisoob pʋgẽ.» ⁴ Bãmb makre la oliviye tɩɩs a yiib la fitils a yiiba sẽn be dũni Soaala taoore. ⁵ Ned sã n baood nin-bãmba namsgo, bugum n na n yi b noorẽ n dɩ b bɛɛbã. N-ye! Sẽn baood-a b namsg, yaa woto la yẽ soab na n ki. ⁶ B sã n yi n na n tʋm b tʋʋmna, b kõ-b la sore tɩ b pag saaga tɩ koom da tosg ye; b tara pãng me n tõe tɩ koom lebg zɩɩm la b tõe n bẽnega tẽnga tõrẽ ne yel-beed tusri, b sẽn dat wakat ning fãa. ⁷ La b sã n wa baas b wilgrã, bõn-ninda sẽn yi-a bul-zulungẽ wã n na n tak zabre ne-ba, n tõog-ba la a kʋ-ba. ⁸ B na n daaga b yĩnsã n bas yɩng woto dasem a tãabo la pʋɩ-sʋka, Tẽn-kãsenga pʋga, Sodom bɩ Ezipt, wala neb kẽer sẽn bɩnd n boondẽ, zĩig ning b sẽn ka b Soaala pika; ⁹ b na n daaga b yĩnsã n bas ninsaalb ka tɛka, nin-zẽmba, gãgnense, la tẽn-zãorgẽ dãmb nini, dasem a tã la pʋɩ-sʋka, la b ka tar sor n dɩk-ba n tɩ mum ye. ¹⁰ Adem biis fãa kɩdemdame la b pʋʋsd taab zu-noogo, n pʋʋsd taab ne kũuni, tɩ bãngdba a yiibã ra nams b la wʋsgo. ¹¹ La dasem a tã la pʋɩ-sʋka sẽn looge, Wẽnnaam le kõo b bãngdba vɩɩm tɩ b le tik n yiki, tɩ sẽn get-ba yɛs marsã ne rabeem kãsenga. ¹² La m wʋma koɛɛg kãseng sẽn yi yĩngri n bool-ba: «Dʋ-y yĩngr ka!» La b dʋʋ yĩngr ne sawadgo, tɩ b bɛɛba yɛs n getẽ. ¹³ La wakat kãnga tẽnga miima ne pãnga la na-tẽnga bogr piig soaba bõrame n lʋɩ, la rẽ waa ne neb tus a yopoe kaalem. Rabeem yõka sẽn põs-ba fãa tɩ b na n pʋʋs yĩngr Soaala barka. ¹⁴ Bʋk a yiib soaba ka looge, keta a tãab soaba! ¹⁵ Malɛk a yopoe soaba peebame. Yĩngri, yɩɩ koees n tãs woto: «Tõnd Soaala ne b Krista n so dũniya, b na n dɩɩ naam tɩ yʋʋma tong taab n tõt sɛɛbo!» ¹⁶ Nin-kẽems pisi la a naasã sẽn zĩ-b Wẽnnaam taoorã yika b goeelsa zutu la b wõgemdame n waoog Wẽnnaam woto: ¹⁷ «Tõnd pʋʋsda yãmb barka, Soaala-Wẽnnaam, bũmb fãa Naanda, yãmba, Zaamẽ la Rũnna la Beoog soaba, yãmb waa ne y pãn-kẽoongã n deeg y soolem zãnga n na n dɩ y naam. ¹⁸ Nin-zẽmba da yika ne sũ-puuri la yãmb me waa ne y rẽnna n taas sẽn kiba bʋʋda wakato, la y taas y rolba wakato y bãngdba, y sõgen-kamba yĩnga, y tʋʋm-tʋmdba, y nin-sõma yĩnga, neb niyns fãa, nin-bɛd la nin-bi sẽn waoogd-b yãmb yʋʋra yĩnga, la y taas y sɩbgra wakato tẽn-wãadba yĩnga.» ¹⁹ Wẽnd dooga noor yaool n paka yĩngri tɩ b na n yãend b zooda kaseto a pʋgẽ; la yɩɩ sa-yãgdo ne koeese ne sa-tãse, ne tẽng miuungu, ne sapɩlem sẽn dʋʋgd barar.

¹ Yell bãnd kãsenga n puk yĩngri: pag sẽn yɛse tɩ wĩndga vẽenem buiid-a, t’a naoor tabg kiuugu, t’a zug teeg ãds piig la a yiibu. ² A ra tʋtame n tol n kũmd rogum. ³ Dẽ poore yell bãnd a to n puk yĩngri: Wag-bãnde, moomde zãnga, ne zut a yopoe la yɩɩl piiga, tɩ zug fãa fõgen naam pugla. ⁴ A zʋʋra kãaga yĩngr ãdsa bogr a tãab tõre n dʋʋg tẽnga; a waa n yalsa paga sẽn kũmd dogma taoore n gũud t’a rog a biigã t’a rɩk n vele. ⁵ Paga roga bi-ribla la bi-kãng n na n dɩ naam bu-zẽmba zutu la a naama rasaar yaa kutu. ⁶ Biiga pɩsgame n ta Wẽnnaam nengẽ, zaoora taoore, tɩ paga zoe n dig weoogo n tɩ soond zĩig ning Wẽnnaam sẽn da segl a yĩnga la b rɩlg-a-la be dasem tusri la kobsi la pisoobe. ⁷ Dẽ marsã la zabr kaoog yĩngri: a Mikayɛl ne a malɛgs yika zabre ne Wag-bãndã tɩ yẽ me yi ne a malɛgse, ⁸ la bãmb n kong pãnga tɩ b rig-ba n yiis arzãna. ⁹ B teeba Wag-bãndã, wag kʋdrã, sẽn boond tɩ Sʋtãana, bɩ bɛyã, dũni belgda, b teeb-a B teeba Wag-bãndã, Wag-kʋdrã lame n fabg tẽnga, yẽ ne a malɛgsa fãa. ¹⁰ M wʋma koɛɛg sẽn tãs yĩngri: «Marsã tɛka tõnd Wẽndã n so tõogo, naam la ziiri, la b Krista zaoo bũmb fãa zugu, tɩ tõnd saam-biisa rõatã, sẽn da rõta bãmb Wẽnd taoor, wĩntoog la yʋngo, b lub-a-la tẽnga. ¹¹ Bãmb tõog-a-la ne Pe-bila zɩɩma, ne b noor kaseto, n pa ges b vɩɩma wa bũmb la b sak kũum ye. ¹² Dɩlla kɩdm-y sũ-noogo, yãmba, yĩngr kamba. Yãb-y, tẽnga la mogre, tɩ Sʋtãan siga yãmba la a sũura puudame, a sẽn mi t’a raara sõdame.» ¹³ La a sẽn mik tɩ b lub-a la tẽnga, Wag-bãndã yikame n na n bʋʋg pagã, bi-ribla ma wã. ¹⁴ Paga paama Sɩl-kãseng pɩgs a yiibu n yɩk n tud weoogo n paam n ta zĩig ning a sẽn na soond Wag-bãndã la a paam tɩ b rɩlg-a yʋʋmde n le paas yʋʋm a yi la pʋɩ-sʋka. ¹⁵ Waafa yaool n sẽnesa a kolkoodo tɩ lebg kʋɩlga n pʋgd pagã n na n dɩ-a. ¹⁶ Tẽnga fãaga pagã: a yaaga a noor n vel kʋɩlgã sẽn yi waafa noorẽ. ¹⁷ Waafa lɛɛgame t’a sũur kãbd ne pagã, t’a kong n na n tɩ maan zabre ne a kamb a taabã, kamb niyns sẽn da reeg-b Wẽnnaam noya la b paam a Zezi kasetã. ¹⁸ A waa n yalsa mogra noore.

¹ La m yãenda Rũng sẽn puk koomẽ ne zut a yopoe la yɩɩl piiga; yɩɩl piiga da fõga naam pugli piiga la zut a yopoe wã ra gʋla zab yʋy sẽn tʋʋsd Wẽnde. ² Rũnga ra wẽnda ãbga, t’a nao wẽnd tãntur nao, t’a noor wẽnd gɩgemd noore; Wag-bãnda kõ-a-la a pãnga la a naama zaoore, n kõ-a rĩung sẽn tar yalem. ³ Rũnga zug a ye ra nee wa a poglame n sek a kũum, la a poglgã sẽn da sek a kʋʋma wẽneg n sãoogame; dẽ la ãndũni rãmba yik n pʋgd-a ne pɛlen-yɩka. ⁴ B wõgemdame n waoog Wag-bãndã a sẽn dɩk a naama n kõ Rũngã, la b wõgemda Rũnga me taoore n yetẽ: «Ãnda n zem Rũngã la ãnd n tõe n tak zabr ne-a?» ⁵ Rũnga paamame n na n gom tɩtaam goama la a tʋʋs Wẽnde; a paamame n na n tʋm a tʋʋmde kiis pis naas la a yiibu. ⁶ T’a sɩd na n sɩng n tʋʋs Wẽnde, n tʋʋs b yʋʋre la b roogo la sẽn be-b arzãna fãa. ⁷ Rũnga paamame n na n maan beem ne nin-sõma la a tõog-ba; a paama tõog ninsaalb fãa zugu, tẽns toɛ-toɛ rãmba, tɩ b goam la b rog-n-mik ya toɛ-toɛ yã. ⁸ Ada sẽn na n paam waoogr neb niyns nengẽ: yaa sẽn wa-b moogo n yaool n ka paam, dũni sɩngra wakato, tɩ b yʋʋr gʋls vɩɩm sebra pʋgẽ, Pe-bil ning b sẽn kodgã vɩɩma sebr pʋgẽ. ⁹ Sẽn tar-a tʋb bɩ a kelg! ¹⁰ B balg bãnga sẽn toga ne bãnga! B kʋ ne sʋʋga sẽn toga n kʋ ne sʋʋga! Woto wã, nin-sõma wã maanda sũ-keelem la b zĩ ne saagre. ¹¹ Ad-y m yãee Rũng a to sẽn yi tẽngã ne yɩɩl a yiibu wa Pe-bila dẽnna t’a koɛɛg ya wa Wag-bãnda koɛɛg. ¹² A reega a tʋʋmna pipi Rũnga nengẽ, la a saa n vigla a naama zaoor zĩig zãnga n kɩt tɩ dũnia tõre ne a neba ka tɛkã waoog pipi Rũngã, rũng ning zug a ye sẽn pogle n wẽneg n sãoogã. ¹³ A maana tʋʋm bãna sẽn yɩkd pɛlense; a tol n kɩtame tɩ saag bugum sig tẽnga neb fãa nifẽ. ¹⁴ La a sẽn kẽ pipi Rũngã, rẽ tudga tẽnga rãmba n ning b yamẽ tɩ b maan nin-naande, Rũng ning sʋʋga sẽn pogle tɩ nodra wẽneg n maaga soab nin-naande, n tar n waoogdẽ. ¹⁵ B kõ-a-la tõogo t’a kɩt tɩ Rũnga nin-naand lebg wa bõn-vɩɩg menga n gomda, la a modg tɩ b kʋ neb niyns fãa sẽn na n zãgs a waoogre. ¹⁶ A na n kɩtame tɩ rĩm biis wa talse, rakãagb la naong rãmba, yamba la burkĩna, wa reeg a makrã b nug-rɩtg bɩ b rĩir zugu. ¹⁷ Ned ba a ye kõn le paam sore n kẽ raagẽ n da rɩɩbo bɩ a koos bũmbu, b sã n ka reng n mak-a ne Rũnga yʋʋr menga bɩ ne Rũnga sõadg yʋʋre. ¹⁸ Yaa sõdba zĩigẽ la geel mitba na n yõs taaba: Yʋʋra yaa rao yʋʋre, yʋʋra yaa 666, kobs-yoob la pisoob la a yoobe.

¹ La ad-m sẽn leb n yãe: Pe-bil sẽn yɛs Siõ tãnga zugu ne a neb tus koabg la pis naas la a naase n tar b rĩirẽ a yʋʋre la a Ba wã me yʋʋre. ² La m wʋma rãamde sẽn yi yĩngri wala kʋɩl kãseng rãamde, bɩ wala sob-raoog sẽn fõta; m tagsa pɛnds wẽedb sẽn zĩ n wẽed b pɛndga. ³ B yɩɩnda yɩɩn paalle, Zaoora taoore ne Bõn-vɩɩs a naasã la Nin-kẽemsã; ned da ka tõe n zãms yɩɩlã sã n ka bãmb tus koabg la pis naas la a naasã sẽn põs tẽnga velbo. ⁴ Bãmb dãmb zɩ n lagem ne pagb ye, yaa zɩ n lagem pagb zãnga; bãmb n pʋgd Pe-bila a sẽn tʋgdẽ fãa; ninsaalba sʋka, bãmb la Wẽnd la Pe-bila kood-rẽems. ⁵ Zirẽ-beed zɩ n yi b noorẽ ye; b yaa zɩ yell dãmba. ⁶ Mam yãee malɛk a ye sẽn yɩgd yĩngri. Yaa koɛɛg sẽn ya noogo n na n kell n yɩ noogo la a wat n na n wilg tẽng zug rãmba, ned kam fãa ne a buudu, ne a goam, ne a tẽnga. ⁷ A ra moonda ne koe-kãsenga: «Zoe-y Wẽnde, la pẽg-y ba; ad-y bʋʋda wakat taame; waoog-y sẽn naana yĩngr la tẽnga ne mogre la ko bundem fãa.» ⁸ Malɛk a to, malɛk a yiib soaba, n pʋg-a, a me tar kɛlenga: «A lʋɩɩme yee! Na-tẽnga sẽn boond tɩ Babilon Kãsengã! Yẽ bal n belg ninsaalb buud fãa n yũnug-b ne Wẽnd sɩbgr dãam.» ⁹ Malɛk a to, a tãab soaba, n le pʋg-a; a me kelma ne koe-kãsenga: «Ned ning fãa sẽn na n waoog-a Rũnga ne a nin-naandã la a reeg-a makre a rĩirẽ bɩ a nugẽ, ¹⁰ yẽ soab na yũ Wẽnd sũ-puura rãam, rãam sẽn ka pul koom n tẽg ne b sũ-puura wamde. Yaa ne bugum la kidbri la b na n nams-a, Malɛgs sõma la Pe-bila nifẽ. ¹¹ La ad-b namsga bug-zõos sẽn dukd yĩngri yʋʋm sẽn kõn sɛ. Sɩda, sugr kõn zĩndi, wĩndg bɩ yʋngo, ne neb niyns sẽn waoog-b Rũngã ne a nin-naandã, la b reeg a yʋʋra makrã.» ¹² La rẽ me yĩng la nin-sõma wã maand sũ-keelem, neb niyns sẽn deeg-b Wẽnnaam noya la b tar a Zezi tẽebã. ¹³ M wʋma koɛɛg sẽn zĩnd yĩngr n yeel-ma: «Gʋlse: Sũ-noog rãmba la sẽn kiid-b ne Soaala barka. N-ye! Marsã tɛka – ya a Vʋʋsem Sõng n gomde – bɩ b vʋʋse ne b zaamẽ yaamse tɩ b tʋʋm sõma yãagd-b lame.» ¹⁴ La ad-m sẽn le yãe: Sawad-pɛɛlg n puki tɩ m ne wa ninsaal Biiga sẽn zao a zugu, b fõgna naam pugla n zãad goeoog b nugẽ, goeoog sẽn dɩte. ¹⁵ Malɛk a to yii wẽnd doogẽ la a tool n tãsa ne pãnga sẽn da zĩ a sawadgẽ wã n yeel-a: «Lob f goeoogã la f wʋre tɩ tigsig taame, dũniya kood bɩɩme.» ¹⁶ Sẽn da zi-a sawadgẽ wã loba a goeoog dũniya la dũniya kood tigsame. ¹⁷ Malɛk a to n le yi wẽnd dooga yĩngri, a me zãad goeoog sẽn dɩte. ¹⁸ Malɛk a to me n yi maan-kugrã zugu: yẽ la maan-kugra bugma gũuda, la a tool n tãsa sẽn da zãada goeoogã, n yeel-a: «Lob f goeoogã la f tigs tẽnga bugsuntung sõng biisi tɩ bɩɩme.» ¹⁹ Malɛka loba a goeoog dũni wã pʋga la a tigsa bugsuntung biisi la a rʋʋga fãa Wẽnnaam sũ-puura koglgẽ, koglg kẽengo. ²⁰ La b yii ne-a, tẽnga kɛɛnga, n tɩ wẽk a biisa koom; la yɩɩ zɩɩm n daage n zẽk n tat weoof zãndlem, la yaa madgr meng la a madg zĩigã.

¹ M leb n yãee yel-bãnd yĩngri. Yaa yel kãsenga sẽn yɩkd pɛlenga: Malɛgs a yopoe n zãad tẽn-kũum a yopoe; bãmb n na n baas Wẽnnaam sũ-puura tʋʋmde. ² M yãenda mogr sẽn pɩnd wa nin-gɛtga tɩ bug-witem zomb-a; n paas neb niyns sẽn tõog-b Rũngã, n tõdg a nin-naanda waoogre, n bãnga yʋ-sõtra võore, tɩ b yɛs yĩngr, mogra yegende. B yɛs n wãagda ruuds ³ la b yɩɩn Wẽnd sõgen a Moyiiz yɩɩn noogo la Pe-bila me rẽnna: «Yãmb tʋʋma labsa la b bee neere, Wẽnnaam, bũmb fãa Soaala; y sẽn tũud soy niynsa yaa tɩrse, Adem biis Rĩma! Ãnd n be, Soaala, n ka rigd-a la a tõt yãmb yʋʋra pẽgre? ⁴ Yãmb bal n tar Sõmblem, yãmb bal n pid ne Sõmblem; la bu-zẽmba fãa na n wa wõgemda yãmb taoore, tɩ y yikame n dok y sũur la y sɩbg-ba, tɩ b neẽ.» ⁵ Dẽ poore m le gesame, la ade: Yĩngri wẽnd doogã, sɛka zãnda lakame, ⁶ la be la tẽn-kũum a yopoe Malɛgs a yopoe wã yi yã; b ra yera beren-dɩgr gĩ-bãanes fu-neeba la sãnem sẽbdse n da be b sɛɛgẽ. ⁷ Bõn-vɩɩs a naasa nin-yend kõo malɛgs a yopoe wã sãnem laase. Laasa ra pida ne Vɩɩm sẽn ka be sɛɛba soab sũ-puuri. ⁸ Wẽnd dooga wulumda ne bug-zõose: yaa Wẽnd ziira ne b pãnga kaseto. La woto ned ka le tõog n kẽ rooga pʋga, tɩ Malɛgs a yopoe wã ka reng n sɛɛs b tẽn-kũum a yopoe wã zãng ye.

¹ M wʋma koɛɛg sẽn tãs wẽnd dooga pʋga n yeel Malɛgs a yopoe wã: «Aya! Saag-y tẽngã n daal Wẽnnaam sũ-puura sẽn pid y laasã.» ² Pipi malɛka tɩ ralga a rẽnna tẽng zug la neb niyns sẽn deeg-b Rũnga makre la b wõgemda nin-naanda taoore bẽe nod-tãoodi toose. ³ A yiib soaba tɩ ralga a rẽnna mogra zugu: yɩɩ zɩɩm – wa ned la b kodg yã – la mogra bõn-vɩɩl fãa kiime. ⁴ A tãab soaba ralga a rẽnna kʋɩlsa la ko-bundsa fãa zugu tɩ fãa lebg zɩɩm. ⁵ M wʋma malɛk ning sẽn da gũud kooma sẽn yeele: «Yãmb yãee neere, Zaamẽ la Rũnna soaba, Sõmblem naaba, y sɩd bãnga sɩbgr sẽn toge. ⁶ B daaga nin-sõma la bãngdba zɩɩm, dẽ me la yãmb yũnug-b zɩɩm, la rẽ n segde.» ⁷ Koees n zĩnd maan-kugra tẽngr n deese: «Sɩda Soaala-Wẽnnaam, bũmb fãa Naanda, yãmb sɩbgr tũuda sɩda la zemsgo!» ⁸ Malɛk a naas soaba ralga a rẽnna wĩntoog zugu la wĩntooga bugum paama tõogo n na n dɩ ninsaalba. ⁹ La waoolg sẽn ka bilfu n sɩd yõog ninsaalbã. Ne rẽ fãa b zãgsa b yel-wẽna tuubgu la Wẽnd pẽgre, n na n tʋʋs-ba, b sẽn tõe n yiis tẽn-kũum a woto buud yĩngã. ¹⁰ A nu soaba ralga a rẽnna Rũnga zaoor zugu la a soolma fãa lebga lik tam t’a neba noor vam ne sũ-toogo. ¹¹ La ninsaalba zãgsa b bas b tʋʋm wẽna n le yik ne yĩngr Wẽnda tʋʋre, b namsgã la nod-tãoodra yĩnga. ¹² A yoob soaba ralga a rẽnna kʋɩl kãseng sẽn boond tɩ Efrat zugu. A kʋɩɩ zãnga n bas sor tɩ Yaang nanams tũud n loaada. ¹³ Dẽ poore, m yãee sẽn yit Wag-bãnda noorẽ, Rũnga noorẽ la zirẽ-be-bãngda noorẽ, sʋtãan dẽgd a tãabo, sẽn wẽnd loms buudu; ¹⁴ – la sɩd me yaa sʋtãamba sẽn tõe tʋʋm-bãna, n yi n na n saag n tigs dũniya tõr dĩm dãmba. Yaa tigs-ba n wa tõog n zab ne bũmb fãa Soaala, b ra-kãsenga raare. ¹⁵ (Ad-m sẽn wat wa wagdre: sũ-noog soab la sẽn gũusd m waoongo, n kell n yeelg fuugu, n ka kẽnda kãre tɩ b yãet a yãnd ye.) ¹⁶ B kɩtame tɩ dĩm dãmba tigim taab Megido tãnga, zĩig ninga sẽn boond tɩ Armagedõ ne Ebre rãmb goama. ¹⁷ Malɛk a yopoe soaba fẽega a rẽnna yĩngri la koɛɛg n zĩnd wẽnd doogẽ wã n tãse: «Sɛyã!» ¹⁸ La yɩɩ sa-yãgdo la sa-tãse, la tẽng miuung kãsenga; sɩda ninsaalb sẽn wa tẽng zug tɛka, b zɩ n yãend a taar ye! ¹⁹ Na-tẽng kãsenga wãa boag a tã; bu-zẽmba tẽns rʋʋga zãnga; la Babilon, na-tẽn-kãsengã, Wẽnd tẽega a yelle n yũnug-a ne b sũ-puura rã-toose. ²⁰ Tẽns niyns fãa sẽn puk-b mogra zug menemame, la tãmsa fãa sirgame. ²¹ Sapɩlem bɛd-bɛd sẽn zem yɩga, yii yĩngri n lab ninsaalba; tɩ ninsaalb na n tʋʋs Wẽnnaam, sapɩlma sẽn lebg tẽn-kũuma yĩnga, tɩ sɩda, a waa ne tẽn-kũum kãsenga.

¹ Malɛgs a yopoe wã sẽn tar sãnem laasa sʋka nin-yend n yeel maam: «Wa tɩ m wilg-f pʋg yoodr kãsenga, pag ning sẽn zĩ kʋɩl kãsenga noore, wa tɩ m wilg foom a bʋʋda sẽn yɩ a soaba. ² Yaa ne yẽnda la dũni dĩm dãmba yo yã, a tɩgsa dũnia neba ne a rãam, a yooba.» ³ Malɛka tall-m lame n kẽng weoogẽ – yɩla m sɩɩgã – la be, m yãee pag sẽn zomb Rũn-moomde, t’a yĩnga zãng gʋls zab yʋya, n tar zut a yopoe la yɩɩl piiga. ⁴ Paga da yera murfu la nufa, n yãgd sãnem yãgbo n yãgd lʋlʋʋgo la muizãan neeb yãgbo; a ra zãada a nugẽ sãnem laaga sẽn da pid ne a yooba rẽgdo la a tʋʋm-wẽna waoosa. ⁵ A yʋʋr da gʋlsa a rĩirẽ, yʋ bãnde: «Babilon, na-tẽng kãsenga, dũnia pʋg-yoaad wẽna fãa fãa ma.» ⁶ La mam nifẽ, paga ra tɩgsda a meng ne zɩɩm, ne nin-sõma wã zɩɩm, ne sẽn ki-ba a Zezi yĩnga zɩɩm. M sẽn yãend woto, m yɛɛsa wʋsgo. ⁷ Tɩ Malɛka na n yeel-ma: «Bõe yĩng tɩ fo yɛɛsd woto? Bas tɩ m wilg-f pʋg kãnga sẽn ya a soab taki, la m wilg-f Rũngã a sẽn zombã, Rũnga sẽn tar zut a yopoe la yɩɩl piigã, sẽn ya a soaba. ⁸ Rũn kãng ra beeme la marsã a ka ye; a na n yii bul-zulungẽ wã la na n yɩ-la a bõne; neb niyns faa sẽn ka paam tɩ b gʋls b yʋy al dũni sɩngrẽ, vɩɩm sebra pʋgẽ, bãmb fãa pɛlens na n yɩka Rũngã poorẽ, a sẽn da beẽ, n wa kaẽ, n na n le wa pukã. ⁹ Yaa marsã la yam dãmb la sɩlem dãmb na n paam taaba! Zut a yopoe wã yaa tãn-bi a yopoe tɩ paga zao b zugu. ¹⁰ Leb n yaa dĩm dãmb a yopoe la a makda; a nu zoe n loogame, t’a yembr be marsã, t’a to nan watẽ. A sã n wa, a na n kaoosa bilfu bala. ¹¹ Sã n kella Rũnga sẽn da be la a ka marsã, yẽ n tõkd a nii, n yaool n ya a yopoe wã nin-yende; baad-y a rigda a yõor yãkre. ¹² Yɩɩl piiga yaa dĩm dãmb piiga; b nan ka paam naam ye la b na n wa naaga Rũngã n dɩ naam wakat a ye bala. ¹³ B fãa gesame tɩ segdame tɩ b lebs Rũngã b naama la b tõogo. ¹⁴ B na n taka zabre ne Pe-bila la Pe-bila n na n tõoge t’a yaa soaalba Soaala la dĩm dãmba Dĩma, ye ne a poorẽ dãmba, Wẽnd sẽn bool b rãmba, Wẽnd sẽn tũus b rãmba, Wẽnd tẽedba.» ¹⁵ Malɛka le paasame: «Kʋɩl kãseng ning Pʋg-yoodrã sẽn zĩ a soab noorã makda Adem biisa ne b zãma, tɩ b tẽns ya toor-toore, tɩ b goam ya toor-toor e. ¹⁶ Yɩɩl piigã ne Rũngã menga na n dɩɩ beem ne Pʋg-yoodrã, b na n yeesa a futu, n fʋk-a a zãnde, n dɩ a nemdã la b yõog-a bugum. ¹⁷ Soaala meng n ning dĩm dãmba yamẽ tɩ b pids bãmb a Wẽnd daabo la b sed ne taaba n lebs b naama fãa Rũnga nugẽ n tãag Wẽnd gomda pidsg raare. ¹⁸ Paga la tẽn-kãsengã sẽn dɩt naam dũni dĩm dãmba zutã.»

¹ Dẽ poore m yãee Malɛk a to sẽn yi yĩngr n sigd ne pãn-kãsenga; a vẽenema bui tẽnga tõre. ² A kelma ne a pãng fãa: «A wãame! Babilon na-tẽn-kãsenga wãame! A lebga sʋtãamb doogo, yam yood dãmb soondg zĩiga, lʋɩɩn-dẽgd la lʋɩɩn-yood buud fãa tʋɩ-la b tʋgd a pʋgẽ. ³ Ninsaalb buud fãa waame t’a tɩgs-b ne a rãama, a yoobã. Dũniya rãmb gãanda ne-a; dũniya tẽnse ne b dĩm dãmb yoo ne-a, la yaa a arzɛka sẽn labsã la a fẽeg dũniya toandba fãa.» ⁴ M wʋma koɛɛg a to sẽn zĩnd yĩngri n yeele: «Yii-y tẽn-kãnga pʋgẽ, m neba, n da wa reeg a yel-wẽna taale t’a sɩbgra me lʋɩ y zug ye. ⁵ A tʋʋm beeda samame n tãag saaga; Wẽnnaam le tẽega a yel-wẽna. ⁶ Bɩ y sɩbg-a waa a sẽn sɩbg a taaba, bɩ y lebs-a a tʋʋm wẽna naoor a yiibu. Kalem-y naoor a yiibu rẽgd ning a sẽn da pidsd a wamdã n lebs-a! ⁷ Kɩt-y t’a sɩbgra zeng a nagrã la a tɩtaama. Ka yẽ n gomd ne a meng woto: ‹Ad-ma! M ka rĩm-poak bɩ? M yaa pʋg-kõor laa? M kõn yãb kʋʋr abada.› ⁸ Yaa rẽ yĩng la raar a ye bala yel-beed na n yẽeg-a: kũum, nintãm la kom, tɩ bugum yet tɩ b bas n kõ yẽ. A bãng tɩ Soaala Wẽnd sẽn kao a bʋʋdã sɩd yaa Pãng soaba.» ⁹ B na n wiisame, b na n kũmame, dũniya dĩm dãmb sẽn naag-b yẽ n vɩɩnd faong la yoob vɩɩma, b sã n wa yãend a bugma bug-zõose. ¹⁰ B na n tara yɩɩg n get a sɩbgra ne rabeem la b maanẽ: «Kato, kato, Babilon, tẽn-kãseng a woto, na-tẽng a woto! Babilon sẽn ka tar mak-n-taaga! Wakat yɛng bala tɩ fo bʋʋd zoe n kao!» ¹¹ Tɩ dũniya toandba na n sɩng wiisgu la kũmbu tɩ ned ka le be n daad b koom kogend teed ye. ¹² Bõe n da ka be b kogendẽ: ad sãnem, wanzurfu, lʋlʋʋgo, muizãan neeba, peen-neeba, peen-gʋnem, murfu la nufa, ra-nɛɛb buud toor-toore. Ad wob-yẽn sẽn maneg n peese, ad raad sẽn tar keglem la neerem, n paas yõg-teed buud fãa, kutu la zũudu, n paas kug sẽn yãgd wa nin-gɛtse. ¹³ Ad zẽed noosd toor toore, ad yũ-noodo la ka-noodo buud toor toore, ad tɩdare. Ad rãam la ka-rɩtem, zom pɛɛlga, zom pugsgu, koodo. Ad niigi, piisi, wiidi ne b bilim-bɩlm. Ad yem-daad la ninsaalb sẽn lebg bõn-koosem. ¹⁴ Fo sẽn da geend yõod ninga, fãa menemame n bas foom; f faongã, ne f ziira, fãa sɛɛ sõmpi! ¹⁵ Ad toandba sẽn da maand leebg ne foo n dɩt-b rɩɩbã, fo sɩbgra na n kẽes-b la rabeem tɩ b tar yɩɩg n yãbd nintãm la b wiisdẽ: ¹⁶ «Kato, kato! Tẽn-kãseng a woto fãa sẽn yer futu sẽn wʋg ne gɩ-bãanese, n yer murfu la nufa, n nags ne sãnem la lʋlʋʋgo la muizãan neeba! ¹⁷ Ad wakat a ye bal n sek faonga woto fãa sãango!» Koom kogenda gɛtba, neb niyns fãa sẽn togd soɛ koom zugu, sẽn dɩt-b mogra yõodo, fãa da yɛsa yɩɩga ¹⁸ n get bugma bug-zõosã la b maanẽ: «Bõe n da zem tẽn-kãseng kãngã?» ¹⁹ B ra yugda b zut tom, la b yãbda la b wiisd n yetẽ: «Kato, kato! Tẽn-kãseng a woto fãa! Yẽ faong n da rɩlgd mogra zug kogenda soaalba, ges-y wakat a ye bal sẽn wa ne a wãabo!» ²⁰ Arzãn dãmb fãa, kɩdm-y sũ-noogo, nin-sõma, tʋʋm-tʋmdba, bãngdba, bɩ y la n kaase tɩ Wẽnnaam sẽn paalg-a bʋʋdã yaa yãmb la b kõ bʋʋm. ²¹ Malɛk a ye n yaool n tebg ne a pãn-kẽengo kugri sẽn zem neere, n lob-a mogrẽ n yetẽ: «Yaa woto, vugr bala la b na n lobg Babilon, tẽn-kãsengã, la ned nif kõn le yãend-a. ²² Fo nengẽ b kõn le wʋm ruudsã ne yʋʋmbã, wɩ-pɛɛbdba la tõntõoda abada. Tʋʋm-tʋmd ba a ye kõn le tag f pʋgẽ t’a rabda tʋʋmd ye; neer rãamde kõn le wʋm f pʋgẽ ye; ²³ fitil vẽenem kõn le yãend f pʋgẽ abada; b kõn le wʋm kãad paal sẽn gomd ne pʋg paal abada! Toandba da yaa dũniya dĩm dãmba la fo manesma n kẽes b gill moogo.» ²⁴ La yaa fo tẽn-peelmẽ la b raag zɩɩm, bãngdba, nin-sõma la b sẽn kood b rãmb fãa tẽng zuga zɩɩm.

¹ La rẽ poore m wʋma rãamde wa zãma kãseng rãamde sẽn yi yĩngri la sẽn maamde: «Alleluia! Tõnd Wẽnnaama reeg waoogre, pẽgre la naam! ² B bʋʋd tũuda sɩda la zemsgo; b bʋʋ Pʋg-yoodr kãsenga sẽn da sãamd dũniya ne a yoob tʋʋma la b roka b sũuri t’a raaga b sõgen-kamba zɩɩm.» ³ La b fãa le reegame: «Alleluia! N-ye, a bug-zõos ruk yʋʋm kõn zĩnd sɛɛbo!» ⁴ Wakat kãng la Nin-kẽems pisi la a naasã la Bõn-vɩɩs a naasã wõgemd tẽnga n waoog Wẽnnaam sẽn zĩ b zaoorẽ n yeele: «Ami! Alleluia!» ⁵ Koɛɛg n zĩnd zaoorẽ wã n yeele: «Pẽg-y tõnd Wẽnnaam, yãmb fãa sẽn nong-ba la sẽn zoet-b bãmba, talse la na-biisi!» ⁶ La m wʋma zãma kãseng rãamde, rãamd wa kʋɩl-kãseng sẽn fõt bɩ saag sẽn tãsd ne pãnga; b ra maandame: «Alleluia! Soaala bũmb fãa Naanda sɩnga a naam dɩɩbo. ⁷ Bɩ d lang sũ-noogo la d pẽg Wẽnnaam tɩ yaa Pe-bila, Wẽnd Biiga, kãadem la pʋg paala ninga a fan teedo; ⁸ yaa gĩ-bãaneg fu-pɛɛlg fadadad la b kõ-a t’a yeelge; gĩ-bãanega makda nin-sõma yel-sõma.» ⁹ Koɛɛgã n yeel maam: «Gʋls woto: Sũ-noog rãmb la b sẽn bool b rãmba Pe-bila, Wẽnd Biiga, yikãadem. La a le paasame: Wẽnd gom-kãensa yaa sɩda.» ¹⁰ M wõgemdame n me na n waoog sẽn gomda soabã la a yeela maam: «Ayo, vẽ! Ad mam me yaa Wẽnd yamb wa foo la m wẽnda fo saam-biisa fãa sẽn tar-b a Zezi kaseto. Yaa Wẽnnaam la fo tog n waooge.» Tõog tɩ Krista kaseta pid bala n tog n be bãngd yamẽ. ¹¹ M yãeeme tɩ yĩngr pakame la wed-boll n yi, la wed-dʋʋda yʋʋr da pʋda woto: «Ra-Teem-Dĩma» la a «Sɩdyɛsa»; a kaooda bʋʋdo la a maanda zabre ne a sẽn tog n zab ne b rãmba. ¹² A nina zirda wa bugum. Naam pugli n lagem n fõg a zugã la b gʋlsa a yʋʋre, yẽnda a ye bal sẽn mi. ¹³ Fuug ning a sẽn yerã losa zɩɩm la ad wed-dʋʋda yʋʋre: Wẽnd Gomde. ¹⁴ Yĩngr tãb-biisa ka tɛk ra pʋgd-a lame, n zao wed kaala la b yer gĩ-bãanes futu sẽn ya wogd la sẽn ya peels fadadad; ¹⁵ sʋʋg sẽn dɩte la a ra rũm a noorẽ la yẽ la a na n tall n kɛ bu-zẽmbã; yaa ne naam dasaar sẽn ya kutu la a na n legl bu-zẽmbã; leb n yaa yẽ n na n kẽ koglgã n fẽd bugsuntunga biisi la a yoog Wẽnnaam, bũmb fãa Soaala, sũ-puura rãam, b sũ-puur sẽn dɩt wa bugma rãam. ¹⁶ Yʋʋr n gʋls a fuuga zugu la a gera zugu: dĩm dãmba Dĩma, la soaalba fãa Soaala. ¹⁷ Dẽ poore m yãee malɛk a yembre sẽn teeg Wĩntoogo n yɛsẽ; a tãsame n yeel luiili wã fãa sẽn yɩgd yĩngrã: «Wa-y, kõ-y taab sɛk Wẽnd kibs kãseng rɩɩba zĩigẽ. ¹⁸ Yaa dĩm dãmb nemdo la y na n vele, n paas tãnsoaben-dãmb nemdo, gãndaad nemdo, wiidi ne b wed-dʋʋdb nemdo, yem-daad la burkĩn-bi, tals la na-biisi nemdo!» ¹⁹ La m wẽneg n yãee Rũnga ne dũniya dĩm dãmb la b tãb-biisi sẽn tigimd taaba n na n tak zabre ne Wed-dʋʋdã la a poorẽ dãmba. ²⁰ Yaa Rũnga ne a zirẽ-be-bãngda la b yõk yã; zirẽ-be-bãngd kãng n da kẽ Rũnga tãpẽ la a maand bõn-bãna n tudgd neb niyns sẽn deeg-b Rũnga makre la b waoogd a nin-naandã. B losa bãmb b yiib fãa vɩɩse bugmẽ, kidbri bugum sẽn da yɛdg wa kʋɩlga. ²¹ Sẽn ket-ba fãa, yaa Wed-dʋʋda sʋʋg n kood-b: sʋʋg ning sẽn da be malɛka noorẽ wã. Ad-y luiili wã tɩga b nemdo.

¹ Dẽ poore m yãee, yĩngri, malɛk a yembre sẽn sigd la a zãad Bul-zulunga kʋɩlen-bila ne bãn-soagdg sẽn ya bedre; ² A luba Wag-bãndã, Wag-kʋdrã, Sãamdã, Sʋtãan mengã, la a balg-a la bãng yʋʋm tusr yĩnga. ³ A lob-a-la Bul zulungẽ wã n page n tol n sog bãeensã la a ning makre; la woto Rũnga kõn le tõog n bels ninsaalba, yʋʋm tusr sã n ka loog ye; dẽ poore b na yaool n bas-a wakat fĩifu. ⁴ M yãenda neb sẽn wa n zaoond goeels zutu tɩ b kõ-b bʋʋda kaoobo. M yãenda neb sẽn le vʋʋge n na n dɩ naam ne Krista yʋʋm tusri: yaa b sẽn fiuus b rãmb zut a Zezi kaset yĩnga la Wẽnd Gomda yĩnga, yaa sẽn zãgs-b Rũnga waoogre, n zãgs a nin-naanda waoogre, n zãgs tɩ b kõn deeg a makrã b rĩrẽ bɩ b nugẽ. ⁵ Bãmb n yɩ pipi n vʋʋge. Kɩɩms a taaba kõn tõog n vʋʋge, tɩ yʋʋm tusra ka pids ye. ⁶ Sũ-noog la bark soaba la sẽn paam-a pipi vʋʋgrã; kũum a yiib soaba ka le tar bãmb gaab ye; bãmb n na n yɩ Wẽnd la Krista maan-kʋʋdba n dɩ naam ne bãmba, yʋʋm tusri. ⁷ Yʋʋm tusra sã n looge Sʋtãan na n le paama a menga, ⁸ a na n yiime n le sɩng ninsaalb belgre dũniya kɩrms a naasã: Gog la Magog; a na n tigsa a zabr yĩnga tãb-biis ka tɛka, wa bĩisr sẽn be mogr noore. ⁹ B yii b tẽnga tõre n wa gũbg nin-sõma wã sika, bark tẽngã. La bãng-y tɩ bugum yi yĩngri n dɩ-b zãnga. ¹⁰ B loba Sʋtãana, kʋɩɩbdã, kidbra bugmẽ t’a tɩ naag ne Rũngã ne a zirẽ-be-bãngda n nams be wĩntoog la yʋngo n poog zamaan ne zamaan ka tɛka. ¹¹ Dẽ poore mam yãee naam zaoor sẽn ya pɛɛlga la kãsenga; a soaba ra zao a zugu. Yĩngr la tẽnga yõbga a taoore n menem zãnga. ¹² M yãee kɩɩmsa fãa, bɛd la bõonese, sẽn yɛs zaoora taoore; b talla sɛb n wa lagse, b waa ne vɩɩm sebrã me, la kɩɩmsa bʋʋd kaoome, ned kam fãa ne a sẽn maane, wa sẽn da be sɛba pʋga. ¹³ Mogra me yiisa kɩɩmsa sẽn da gãe a pʋgẽ; kũum la bʋg-tẽnga me yiisa b rẽnna la ned kam fãa bʋʋd kaoome, ned kam fãa ne a yɛla. ¹⁴ B yaool n tusa kũum la bʋg-tẽng n lub kidbra bugmẽ sẽn tond wa kʋɩlgã. Kʋɩl kãng bugma la kũum a yiib soaba. ¹⁵ Ned ning fãa yʋʋr sẽn ka gʋls vɩɩma sebrẽ, yẽ soab lobda bug-kãng pʋga.

¹ Dẽ poore m yãee sa-paalle la tẽn-paalga, tɩ pipi saaga la pipi tẽnga da menemame la mogra ra fẽbgame. ² M yãee bark tẽnga, m yãee Zerizalɛɛm paalga sẽn yit arzãna, Wẽnnaam nengẽ, n sigda; a ra manega a meng neere wa pʋg-paal sẽn manegd a menga a sɩd yĩnga. ³ M wʋma koɛɛg sẽn yi zaoorẽ wã n moone: «Ad Wẽnd zak sẽn ti ninsaalb sʋka; Wẽnd waa n mee bãmb sʋka, tɩ b na n lebg Wẽnd kamba tɩ Wẽnd-be-ne-ba na n legb bãmb Wẽnde. ⁴ B na n yẽesa nintãm buud fãa la b kõn le wʋm kũum yelle ye; yãbre bɩ kɛlenga, bɩ sũ-sãang me kõn le zĩnd ye tɩ dũni kʋdga menema zãnga.» ⁵ La sẽn da zĩ-a zaoorẽ wã gomame: «Ade, m le sigla dũni paalle!» A le yeelame: «Gʋls tɩ Gom-kãnga yaa sɩda la sɩd menga!» ⁶ A le paasame: «N-ye! Maam la A la O, Sɩngre, la Baasgo, Tʋɩɩsgo la Kʋʋbo; ko-yũud sẽn tara soab bɩ a wa tɩ m na kõ-a vɩɩm kooma t’a yũ zaalem. ⁷ Sẽn maan-a raood fãa pʋɩɩr na n yɩɩ woto; M na yɩla a Wẽnnaam tɩ yẽ yɩ m biiga! ⁸ Sã n kella rabɛɛmbã, zãmb dãmb la nin-yoodã, nin-kʋʋdba la yoaadba, bagba la sẽn waoogd-b naande, zirẽ-be-rãmba, bãmb dãmb pʋɩɩr bee bugma kʋɩlgẽ, kʋɩlg ning sẽn kɛɛd ne kidbr bugum, la rẽ la kũum a yiib soaba.» ⁹ Malɛgs a yopoe wã sẽn da zãad-b tẽn-kũum a yopoe wã nin-yend wẽneg n yeela maam: «Wa tɩ m wilg-f Pe-bila, Wẽnd Biiga, sẽn kẽed kãadem ne a soaba, m wilg fu b pʋg-paala.» ¹⁰ A kɩtame tɩ mam dʋ ne m yam tãn lug-lug a yembr zugu t’a wilg-m bark tẽnga, Zerizalɛɛm sẽn yit yĩngri, Wẽnnaam nengẽ, n sigda. ¹¹ A waa ne Wẽnnaam meng pẽgre, al t’a yãgbã da yɩɩd kug-neeba buud fãa yãgbo. ¹² A da gũbga ne lal-gũbri sẽn zãnde, n tar rɩgnoy piig la a yiib sẽn gũnug malɛgs piig la a yiibu, la sẽn da gʋls yʋya, a Israyɛl dot piig la a yiiba yʋya. ¹³ Yaang yaa noy a tãabo; goabg noy a tãabo; rɩtg noy a tãabo; nin-taoor yaa noy a tãabo. ¹⁴ Lal-gũbra meeb sɩnga ne kug ma rãmb piig la a yiibu, sẽn gʋls Pe-bila Tʋʋm-tʋmdba piig la a yiiba yʋya. ¹⁵ Sẽn da gomda ne maama ra zãada sãnem rasaar magdga n na n mag tẽngã ne a noya la a lalgã. ¹⁶ Tẽnga sõoga tɩrga, a ka maka, a ka goalenga, t’a woglma ne a yalma zem taaba. ¹⁷ A maga tẽnga lal-gũbrã ne dasaarã la yɩɩ magb tɛka; malɛka sẽn zãad magdg ninga ne ninsaal dẽnd da ya a ye. ¹⁸ – Lal-gũbra meng ra mee ne kug sẽn yãgd b toore, n ya kõaada, la tẽnga tõr mee ne sãnem yulli sẽn pɩnd wa nin-gɛtga. ¹⁹ Lal-gũbra mee rũnug rũnuga la rũnug fãa kug yaa toore. Pipi rũnuga kug yaa kõada, a yiib soaba togsda salsang kõbgo; a tãab soaba yaa miuug sẽn lʋʋs kẽega; a naas soaba: kẽeg toenɛɛga. ²⁰ A nu soba: sɩɩga; a yoob soaba: miuug yʋdʋd; a yopoe soaba: rõodo; a nii soaba: kẽeg sẽn lʋʋs sabla; a wɛ soaba: kõodr sẽn liʋʋs moomde; piig soaba: kẽeg pespele; piig la a ye soaba: miuug sẽn lʋʋs sabla; piig la a yiib soaba: mismiuugu. ²¹ Rignoy piig la a yiibã da pagda ne kug sẽn saase n pɩnd wa muizãanfo, noor fãa ne a rẽnda. Tẽnga sõasg zĩig da yaa sãnem yull bala, neer wa nin-gɛtga. ²² M ka yãend Wẽnd doog be ye; Soaala-Wẽnnaam pãng soaba meng n da yaa b roogo, bãmb ne Pe-bilã. ²³ Tẽnga ra pa tar wĩntoog ne kiuug vẽenem tʋʋmd ye tɩ Wẽnnaam pẽgra vẽenem n da buiid-a, la Wẽnd Pe-bila n da ya a bugum. ²⁴ A vẽenema n na n wilg bu-zẽmba sore la dũniya dĩm dãmb na n waa ne b arzɛka. ²⁵ Noya na n paka wakat fãa tɩ beelẽ yʋng ka ye. ²⁶ Be la ninsaalb fãa na n wa ne b laogo la b naam teedo. ²⁷ Bõn-dẽgd kõn tõog n kẽ be abada; d kõn gom sẽn tʋmd-b tʋʋm wẽna la tʋʋm beeda ye; neb nins yʋy sẽn gʋls Pe-bila vɩɩm sebra pʋgẽ bala n na n kẽ be.

¹ Dẽ poore malɛka wilga maam vɩɩm kʋɩlga; a yaa pɛɛlg wa nin-gɛtga la a ra bunda Wẽnd la Pe-bila zaoora tẽngre. ² Yaa tɩɩs sẽn kõt vɩɩm la b ra sel tẽnga tẽnsʋka, kʋɩlga foole; tɩɩsa ra womda naoor piig la a yiibu; kiuug fãa pʋgẽ b ra womdame; b vãada ra tõe n sãooga bu-zẽmbã. ³ Kãab-wẽng kõn le kãab be ye; Wẽnd ne Pe-bila zaoor na n lugla tẽnga sʋka tɩ b kamba wat be n waoogd-b. ⁴ Kamba nif na n teega Wẽnde; Wẽnd yʋʋr na n gʋlsa b rĩirẽ. ⁵ Lik kõn le zĩndi; b ka le tar wĩntoog bɩ fitl vẽenem tʋʋmd ye; Soaala Wẽnd vẽenema n na n bui-ba la b na n dɩɩ naam sẽn kõn sɛ. ⁶ Malɛka yeela maam: «Gomd bãmba yaa sɩd menga; yaa Soaala-Wẽnd menga, yaa bãngdba sẽn deegd-b bãngrã a soab nengẽ wã, bãmb n tʋm tɩ b wa wilg b yemsã bũmb ning sẽn yao waoongo. ⁷ Ade, m waoong yaoome; sũ-noog soab la sẽn deeg-a bãngra goama sẽn gʋls seb kãnga pʋga.» ⁸ Maam a Zã n da ne la m da wʋmd woto fãa; la m sẽn deeg dẽ fãa n sɛ, m wõgemda malɛka sẽn wilga maam woto fãa wã taoore tɩ m na n waoog-a, ⁹ la a yeel-m lame: «Ayoo! Gũus tɩ mam me yaa Wẽnd yamba wa foo la bãngdbã, f ma-bi-taasã; m yaa wa neb niyns sẽn deeg-b sebr kãnga goama. Yaa Wẽnnaam bal n tog ne waoogre.» ¹⁰ La a le paasame: «Da solg bãngra goam sẽn be sebr kãnga pʋgẽ wã ye, sɩd ne sɩda, wakat yaoome! ¹¹ Yel-wẽn maand nong bɩ a tʋm wẽnga la nin-dẽgd nong bɩ a pa ne a rẽgdo; nin-tɩrg yee n wɩng ne a pʋ-peelem tɩ nin-sõng me mao ne a sõmblem. ¹² Ade, m lebgr wakat yaoome, la m wata ne ned kam fãa yaoodo la yaooda zemsda ned kam fãa ne a tʋʋmde. ¹³ Maam la A la O, maam la Pipi soaba la Yaoolem soaba, Tʋɩɩsgo la Kʋʋbo. ¹⁴ Sũ-noog rãmb la sẽn pegs-b futu; bãmb n na n soog vɩɩm tɩɩgã, bãmb n tũud dignoya n kẽed bark tẽnga. ¹⁵ Yãmb fãa gilli, ba-raado, tɩt rãmba, yoaadba, nin-kʋʋdba, sẽn waoogd-b naande, neb niyns sẽn dat-b wẽnga, pa-y yɩnga! ¹⁶ Maam a Zezi n tʋm m malɛk t’a wa togs bũmb ning sẽn wat beoog Tigenga yĩnga; m ya a Daviid yagenga, yibeoog ãdg pɛɛlga.» ¹⁷ Wẽnd Vʋʋsem la pʋg-paala yeta me: «Wa!» Sẽn tar-a tʋb n kelgdẽ me yetame: «Wa!» Bɩ ko-yũud sẽn tar a soab fãa kolge; sẽn dat-a n deeg vɩɩm kooma n yũ, a wa reeg-a zaalem, n ka yiis lagf ye. ¹⁸ Maam n yete: ned ning sẽn kelga bãngr goama sẽn be seb kãnga pʋga la a saagame n paas bũmb be, bɩ Wẽnd tʋka zugu, yel-beeda fãa sẽn gʋls a pʋgẽ. ¹⁹ Sẽn saag-a me n yiis bũmb be, bɩ Wẽnd me yiis bũmb a pʋɩɩrẽ, vɩɩm tɩɩga la bark tẽnga sẽn kõt bũmb ning tɩ b gomd sebr kanga pʋga. ²⁰ Sẽn kɩt-a tɩ goam kãensa fãa tar kaset sɩdã n yeele: «Sɩda, m waoong yaoome!» N-ye! Soaal a Zezi, wa-y wɛ! ²¹ Soaal a Zezi barka sig y fãa gilli. Ami!