FILIP RÃMBA

¹ Maam a Pol ne a Timote, Krista Zezi sõgen-kamba, tõnd n pʋʋsd nin-sõma wã fãa, Soaala Zezi Krista tũudba, sẽn zĩ Filip vẽenemẽ, ne b kãsem-dãmba la b sõangdba. ² Bɩ d fãa Ba a Wẽnde la d Soaal a Zezi Krista kõ yãmb laafi la barka! ³ Mam pʋʋsda m Wẽnda bark wakat buud fãa, m sã n tẽeg y yelle. ⁴ La yaa m sũ-noogo tɩ m pʋʋsd y fãa gill yĩnga n ka vʋʋsdẽ ye, ⁵ tɩ m ket n tẽra yãmb me tʋʋmdã sẽn yɩ a soaba Koe-nooga moonegẽ, a sɩngrẽ n ta rũnna. ⁶ Mam pʋs n miime tɩ sẽn sɩnga tʋʋmd sõnga ne yãmbã, yẽ soab bal n na n kell n dabs a baasgo tɩ ta Krista a Zezi daare. ⁷ Segdame tɩ m tags woto y fãa gill poorẽ tɩ m sũura kɛla y fãa zãnga; la rẽ yaa y fãa sẽn naag maam n kok Wẽnd kũuna, m bãeensa balgr wakato, Koe-nooga mooneg sɩngrẽ, bɩ a sẽn waa n kɩɩd a yẽgna wakato. ⁸ N-ye! Wẽnd bal n mi tɩ m nong-y la waare ne Krista meng nonglem! ⁹ Ad-m sẽn ket n kot Wẽmde: tɩ y nonglma tar yãngr n dabda n wa fudg n daag bãngr menga, la sɩlem sõngo, ¹⁰ tɩ woto y na bao sẽn ya neer n yɩɩda la y tall y mens ne pʋ-peelem n gũud Soaala raare. ¹¹ Woto-me la y paamd n dɩ yõod ka tɛka ne Krista a Zezi meng sõmblem, la rẽ pʋgẽ la Wẽnd tog ne waoogre la b tog ne pẽgre! ¹² M saam-biisi, m datame tɩ y bãng tɩ m yella kɩtame tɩ Koe-nooga moonego le wɩng n paase. ¹³ Sɩd me, gũudba fãa sikẽ la zĩig zãnga, b bãngame tɩ yaa Krista yĩnga la b balg maam. ¹⁴ D saam-biisa wʋsg paamame tɩ b sũy lebg kegemse ne Soaala, b sẽn yãend m balgrã, tɩ b bas rabeem n na n le wɩng ne raoodo n moon Koe-noogã n yɩɩd pĩnda. ¹⁵ Neb kẽere, yaa sɩda, tʋmda ne wags taab yam wẽnga; kẽer yẽ moonda Krista ne sũ tɩrga. ¹⁶ Bãmb dãmb tũuda Wẽnd nonglem sẽn be b sũurẽ n mi neer tɩ mam nengẽ wã Koe-nooga mooneg bal la m tʋʋm pakre. ¹⁷ Pipi rãmba yẽ sẽ, b moonda Krista ne no-rɩkr bala; bãmb pa tar pʋ-peelem ye. B tẽedame tɩ b sẽn maand woto b na zɩsg m bãeensã n paase. ¹⁸ La bõe n sãame? Yaa ne yam wẽnga bɩ ne pʋ-peelem, b yee n moon Krista; la m kɩdemdame la m na kell n kɩdem dẽ yĩnga. ¹⁹ M miime tɩ rẽ n na n fãag maam, yãmb pʋʋsg yĩnga la Krista Vʋʋsem Vẽnegrã m sẽn na n paama yĩnga. ²⁰ Woto-me la m saagr menga: m kõn yãe yãnde, m sũur na kell n yɩ kẽnkẽ, tɩ marsa la wakat fãa, Krista na paam pẽgre m yĩngẽ, m vɩ bɩ m kida. ²¹ Mam nengẽ wã, Krista bal la vɩɩm la ki bãmb yĩng yaa yõodo. ²² La ade, vɩɩnd ne yĩnga sã n na n kõ maam pãnga tɩ m tʋm tʋʋmd sẽn be yõodo, mam pa le mi mam sẽn na n yãk ye. ²³ M yɛsa sʋka n wẽnesdẽ: maam n dat n loog n tɩ bʋʋg Krista, la m neeme tɩ rẽ n sãoẽ wʋsgo; ²⁴ maam n dat n pa ne m yĩngã, tɩ rẽ n wẽnd y yell na maneg tao-tao n yɩɩda. ²⁵ La ade, m gãdame tɩ m na n paame la m zĩnd y fãa sɛɛgẽ n paas y bãngre la sũ-noog y tẽeba pʋgẽ. ²⁶ La wotoone lɛɛg n wa y sʋka, la zĩnd yãmb sɛɛgẽ, na le zẽk y zug n paas, Krista a Zezi taoore. ²⁷ Sõng-y tɩ y manesem tũ Krista Koe-nooga bala, tɩ m waoonga raare bɩ m sã n ka tõog n wa me, bɩ m wʋm tɩ yãmb ket n yɛsa y nao zutu la y yaa yam yɛnga la sũ-yɛnga n tʋmd Koe-nooga yĩnga. ²⁸ Y pa yɛɛsd y bɛɛba ba bilfu, woto la b bãngd vẽenega tɩ yaa b sãoongo n sɩnge, la yãmb tɩlgre waame, la Wẽnd bala n tõe rẽnna. ²⁹ Bãmb n maan-y neere tɩ y paam n tẽed Krista la b le maan y neere tɩ y sakd namsg bãmb yĩnga. ³⁰ Woto la yãmb me takd zab-sõng ninga sẽn yɩ m dẽnna, la y sẽn ne tɩ m ket n tar a soab rũnna wã.

¹ M yõkda y sɛɛga la m kot-y lame ne Krista bool toogã, ne b nonglem sẽn ka be sãmb-sãmbã, ne Vʋʋsem Sõng lagmen-taarã, sẽn ya zood la nimbãan-zoeerã, ² m kotame tɩ y pids m sũ-nooga zãnga n zems y tagsga ne taaba: n ya sũ-yɛnga, raab yɛnga, yam yɛnga. ³ Da sak-y welgr lɛ-lɛ, da sak-y tɩtaam ye: ned kam bao yam-sulgri la a tagse t’a taab são yẽ menga. ⁴ Da bao-y y meng yõod ye, ned kam fãa tags a to rẽnna. ⁵ Tall-y y lagmen-taara pʋgẽ zʋg ning sẽn ya Krista a Zezi rẽnna. ⁶ Bãmb sẽn zem Wẽnnaam, b ka tags tɩ b tog n gãda ne zoe-bõne, bũmb ning sẽn kɩt tɩ b zem bãmba ye. ⁷ B basa b meng yõodã n lebg wa yamba; n wẽneg ninsaal bala, n na n vɩɩnd ninsaal vɩɩm, ⁸ n tol n sulg b menga n yɩɩge al n sak kũum n na n deeg noore, al n sak kũum pik zugu! ⁹ Ya rẽ yĩng la Wẽnd zẽk-ba n pʋd-b yʋʋr sẽn zʋʋg yʋy a taaba fãa. ¹⁰ Woto b sã n pʋd a Zezi yʋʋra bala bũmb fãa sẽn be yĩngri, sẽn be tẽng zugu, sẽn be bʋg-tẽnga, b fãa tara yĩgimdg bala, ¹¹ la zelemd fãa moondame t’a Zezi yaa Soaala, Wẽnnaam Ba pẽgr yĩnga. ¹² Woto wã, m kom-sõma, mao-y n tʋm y fãagra tʋʋmde ne m sẽn bãng-y ne sakr ningã. Sakr kãng n tog n yɩ y rẽnna, m sẽn be y sɛɛgẽ wakato, wala marsã, m sẽn zãr ne yãmbã. Mao-y ne rabeem la rigbu n maan y sɩɩg fãagre. ¹³ Sɩd me, Wẽnd n be ne yã n sõngd-y ne tʋʋmda raab la b zaoolgd yãmb tʋmda zugu n pidsd b meng nimbãan-zoeera sẽn da sede. ¹⁴ Yãmb me, maan-y bũmba fãa ne yamleoogo la y vẽ yẽgengo la kɩɩsgo. ¹⁵ Woto ned kõn yãend bũmb n dogl y zug ye la y na n lebg neb sẽn ya pʋ-peelem dãmba. Y na yɩ Wẽnnaam kom-sõma sẽn vɩ zamaan kãnga wala vẽenem sẽn vẽnegd neb fãa, ¹⁶ n kõt b Koe-nooga sẽn wat ne vɩɩm. Woto la y segend y mense n na n yɩ mam zu-zẽkre, Krista raarã; tɩ m zoeesa la m tʋʋlgã ka yɩ zaalem ye. ¹⁷ La sɩd me, m sã n tog n daag m zɩɩma menga wa maoong bũmbu, yãmb tẽeba yĩnga, m sũur yaa noogo la m naagda yãmb n kɩdemne, ¹⁸ wala yãmb me sẽn tog n maan sũ-noogo la y naag-m n kɩdem. ¹⁹ M tẽedame tɩ Soaala Zezi Krista sã n sõnge, m kõn kaoos n tʋm a Timote y nengẽ, tɩ m paam yãmb kibare, tɩ m sũura yaa n gãande. ²⁰ Sɩda, m pa tar ned a to sẽn tõe n ges yãmb yell neere la ne pʋ-peelem wa yẽ ye. ²¹ Wʋsg sẽn ne yaa b meng yõod bala, b pa baood Krista a Zezi rẽnd ye. ²² Yẽ wilga a sẽn ya a soaba, a tʋma ne maam Koe-nooga tʋʋmde wa biig bal sẽn be ne a ba. ²³ Yẽ la m dat n tʋm y nengẽ, m sã n wa bãng m yɛla sẽn na n yɩ a soaba. ²⁴ M pʋs n saagda wʋsgo ne Soaala maasem tɩ m meng na wa m toore. ²⁵ M tagsdame tɩ togame tɩ m lebs yãmb a Epafrodit; saam-bi kãng me sõnga maam n tʋm la a namse la yaa yãmb n da tʋm-a t’a wa koll-ma, m naonga pʋgẽ. ²⁶ A rata y fãa yãabo, n ka le tõe n zĩnd sɩɩ ye, y sẽn wʋm t’a lʋɩɩ bãaga tɛka. ²⁷ Sɩd me bãag n yõk-a la kellẽ la bilf t’a maanẽ yõore; Wẽnd n zoe a nimbãanega, la ka yẽnd bal ye, yɩɩ maam me la b kũm yã, n pa sak tɩ m sũ-sãamsa tong taab ye. ²⁸ Dẽ yĩnga m tʋmd-a la tao tao yãmb nengẽ tɩ y mens yãend-a la y sũur lebg noogo; la woto-me n woogd m sũ-sãanga. ²⁹ Deeg-y ned a woto buudu ne sũ-noogo, Soaala yʋʋr yĩnga, la y waoog-a. ³⁰ Yaa Krista tʋʋmd yĩnga la a ra na n kiẽ; a ra na n kiẽ lame n sõng maam ne sõngre yãmb mens sẽn da ka tõe ye.

¹ M saam-biisi, noog-y y sũur Soaala yĩnga; m kõn yɛ ne yãmb saglg kãng abada! Rẽ n pʋs n são. ² Gũus-y ne nin-wẽnse, ne baasã, ne tʋʋm-tʋmdb yoodã, ne zirẽ-be-zũnsã. ³ Zũns bal la tõndo tɩ tõnd waoogra n tũud Wẽnd Vʋʋsem sẽn date. La tõnd basa kʋdemdã teegre n na n teeg Krista a Zezi bala. ⁴ Mam yaool n da tõe n teegẽ la kʋdemdã; ned sã n beẽ n teeg rẽnna, m tẽed tɩ maam n ket n yɩɩda. ⁵ M dog tɩ rasem a nii, b kẽes-m la bãongo; maam la Israyɛl biiga, a Bẽzame yagenga, Ebre bil memga, maam la Farizẽ sã n ya ne Noora tũudem. ⁶ Sã n ya yik n zab ne buuda bɛɛbã, m namsa So-paala rãmba; sã n ya ne sõmblem ning Noor tũudem sẽn kõt a soabã, m pa tar m toorẽ yell ye. ⁷ La m sẽn da pid ne yõod niynsa fãa, m gesa rẽ wa bõne, Krista yĩnga. ⁸ Yɩɩd rẽ, m geta bũmb fãa marsã wa zaalem t’a Zezi Krista, m Soaala, bãngr n lʋɩ taoore. Bãmb yĩnga m saka sẽn keta fãa menesgo, m geta fãa wa tãmpʋʋr sagdo tɩ woto la m tõogd n paam Krista. ⁹ M datame n menes m sõmblema, sõmblem ning Noora reegr sẽn kõt a soabã, n lagem Krista ne sõmblem ning bãmb tẽeba sẽn kõt a soabã, sõmblem ning sẽn yita Wẽnd nengẽ la sẽn tobd tẽeba yẽgrẽ. ¹⁰ M datame n bãng Soaala, n bãng b vʋʋgra pãnga, n bãng naag bãmb n namsa yõodo, n wẽneg bãmb b kũumẽ, ¹¹ tɩ sã n tõe bɩ m naag n vʋʋg. ¹² M pa yet tɩ m yãee m sora tɛka, m ka yet tɩ m sõmblem sekame ye, ayoo! M ningda tĩiga n dat n wa paam Krista n yõke wa Krista Zezi sẽn paam maam n yõkã. ¹³ M saam-biisi, ad-y m ka na n belg m meng wa m zoe n paama Krista n sog ye. Woto bal la m yeta: m yĩma m sẽn zoe n kẽna, m teesa m sẽn dabdẽ wã tɩrga, ne m pãng fãa, ¹⁴ n zoet n pʋgd kũun ning Wẽnd sẽn boond-d tɩ d wa reege, al yĩngri, Krista a Zezi nengẽ. ¹⁵ Tõnd fãa sẽn paam n bɩɩs d yama, yaa woto la d tog n tagse. Bũmb sã n beẽ tɩ y tagsd toor a poorẽ, Wẽnd n wat n vẽneg yã. ¹⁶ Sẽn ya zĩig ning fãa la d zoe n kẽn n ta, d da golem d sora ye. ¹⁷ Togs-y mam vɩɩma; m saam-biisi, togs-y sẽn be-b yãmb sʋka n vɩ wa maama. ¹⁸ Kẽer n be, b sõora labsa, la m togs-y la rẽ naoor yaka, la m le togsd-y la rũnna ne nintãm, b vɩɩ wala Krista pika bɛɛba. ¹⁹ Bãmb dãmb kõn baas neer ye; yaa b pʋgã n lebg bãmb wẽnde la b pa zoet rẽ yãnd ye; la b yãnda la b zu-zẽkre: b sẽn pẽgd bala yaa tẽng zug yɛla. ²⁰ Sã n ya tõndo, arzãn la d tẽnga: be bala la d gũud wala d Fãagda, Soaal a Zezi Krista. ²¹ Bãmb n na n tedg tõnd nimbãan yĩngã t’a lebg ziir yĩnga wa bãmb dẽnna, tɩ b tara pãnga n tõe tɩ bũmb fãa tũ b raabo.

¹ Woto wã, m saam-bi-nongdse, m kom-sõma, m sũ-noog la m dolbo, gãd-y Soaala kẽnkẽ, m kom-nongdse. ² Mam kota a Evodi la m wɩngda ne a Sẽntikɛ, tɩ b wʋm taab moore, Soaala yʋʋr yĩnga. ³ La foom me Sizig, m tũud-n-taag menga, bɩ f mao n sõng-ba; ad pʋg-kãensa sõnga maam wʋsgo ne Koe-nooga tʋʋmde, bãmb ne a Klema la m sõangdb a taaba: bãmb yʋya gʋlsa vɩɩm sebra pʋgẽ. ⁴ M saam-biisi, noog-y y sũur wakat fãa, Soaala maasem la b pãng yĩnga. N-yẽe! Maam n le yet yã: noog-y y sũuri! ⁵ Yɩ-y nin-bʋgse ne neba fãa gilli. Soaala waoong yaoome. ⁶ Da bʋ-y bũmb ba a ye yĩng ye. Zu-loɛɛg sã n beẽ, bɩ y wɩng ne pʋʋsgo, n wɩng ne Wẽnd sɛɛg yõkr sẽn naag ne bark pʋʋsgo, la zu-loeesa wilgri. ⁷ La Wẽnd na zĩndg yãmb fãa b laafi pʋgẽ, laafi ninga sẽn zʋʋg tõnd sẽn tõe n mamsã, laafi kãng n na n maas yãmb sũuri la y yam, Krista a Zezi pʋgẽ. ⁸ Ade, m saam-biisi, bũmb ning sẽn pak yãmb marsã tɩ y tog n lʋɩɩs y toogo, yaa bũmb ning fãa sẽn ya sɩda, n waoogd neda, n ka tar goalenga, n ka be rẽgdo, n be yamleoogo, n tog ne pẽgre, n wat ne minim sõma, n wat ne ninsaal pẽgre. ⁹ Mam sẽn zãms yãmb bũmb ninga ne m goama la m vɩɩm, yaa rẽ la yãmb tog n deege la y tũ; woto Wẽnd sẽn ya laafi kõata na zĩnd ne-yã. ¹⁰ M kɩdma sũ-noog ne Soaala, m sẽn yãe tɩ y le nekd la y yalgd y pʋtẽer m yĩnga. M miime tɩ yãmb zɩ n yĩm m yell ye; sẽk sẽn na paam n wilga bal n mii n paoog yã. ¹¹ M me pa gomd woto tɩ yaa bũmb n paoog-m ye, m zãmsa m sẽn na maane tɩ bũmb sek-m wakat buud fãa. ¹² M saka a mong m menga wala m sẽn sak a rɩ n tɩge. Wakat fãa la ne yɛl wʋsgo m zãmsa kom la pʋg pidungu, tɩgr la fare. ¹³ Mam tõe fãa ne ned ning sẽn kõta maam pãngã. ¹⁴ Baasg zãnga, yãmb maana neere y sẽn waa n zoe m nimbãanegã. ¹⁵ Yãmb mens miime, Filip neba, tɩ Koe-nooga mooneg sɩngrẽ, m sẽn waa n yi Masedoan, Tigeng ba a ye pa tol n sõng maam ne ligd buudu sã n ka yãmb bal tãa. ¹⁶ Yãmb bal n tẽeg m yelle, m sẽn ta Tesalonik, n tol n tʋm bũmb naoor a yiibu, m sõngr yĩnga. ¹⁷ Pa kũun la mam baood ye. M sẽn baood yaa yãmb dolb yee n dogend n paasdẽ. ¹⁸ Marsã m tara sẽn sek n zʋʋg menga; sɩda marsã, m galame, a Epafrodit sẽn wa ne yãmb kũuna tɛka; kũun kãng yaa wa yũ-noogo la maoong sõng Wẽnnaam sẽn deegde la b yet tɩ ta-la b yam. ¹⁹ Wẽnd na tũ Krista a Zezi maasem n kõ yãmb me tɩ gale, tɩ b pãng labsa la sẽn be b nugẽ ka paood ye. ²⁰ Bãmb bal la d Ba, bɩ b paam pẽgre marsã la daar fãa! Ami! ²¹ Pʋʋs-y nin-sõma wã fãa Krista yʋʋr yĩnga. M sẽn be ne saam-biis niynsa fãa tɩ b pʋʋs-y neere! ²² Nin-sõma wã fãa tɩ b pʋʋs-yãmb, bũmb zãnga Rom naaba nebã. ²³ Soaala Zezi Krista bark sig yãmba!