MARK

MARK

¹ A Zezi Krista, Wẽnd Biiga, Koe-nooga sɩngre. ² Yaa woto n be bãngd a Izayi sebrẽ: «Ade, m tʋmda m no-rɛɛs f taoore t’a segl f sore. ³ Yẽ Koɛɛg n sãt weoogẽ wã n yetẽ: ‹Maneg-y Soaala sore, sõng-y t’a so-bugsa lebg tɩrse.› » ⁴ Rao ning sẽn da kõta soobo n boond t’a Zã, ra bee weoogẽ, n moond tɩ yel-wẽna tõe n paama sugri ne tuubgu. ⁵ Zɩɩda tẽns rãmb fãa, n paas Zerizalɛɛm dãmba da zoetame n kẽnd a Zã nengẽ n deegd soobo, Zʋrdẽ kʋɩlga pʋga, la b togsd b yel-wẽna. ⁶ A Zã ra pila yʋgʋmd gãongo. Sʋya la weoog sɩɩd n da yaa a rɩɩbo. ⁷ A zãmsga pʋgẽ, a ra yeta nebã: «Ned n be mam poorẽ n watẽ la a soab pãng yɩɩda maam. M pa tog meng n yĩgimd a taoore n lok a neoodr gĩsg ye. ⁸ Mam kõta yãmb soob ne koom la bãmb na n kõo yamb soob ne a Vʋʋsem Sõngo.» ⁹ A Zezi waa n yii Nazarɛt, Galile soolmẽ, n wa reeg soob Zʋrdẽ kʋɩlga, a Zã nengẽ. ¹⁰ A Zezi sẽn deeg soobã n wẽneg n yit koomẽ, la a Zã sẽn yãend saag sẽn pake t’a Vʋʋsem Sõng sigd b zugu wa walle. ¹¹ La koɛɛg n zĩnd yĩngr n yeele: «Fo yaa mam Bi-nongre, m yam kẽ-f la zãnga.» ¹² A Zezi sẽn deeg soob n sɛ, a Vʋʋsem Sõng kɩtame tɩ b kẽng we-raoogẽ. ¹³ B paa be rasem pisnaase tɩ Sʋtãan kʋɩɩb-ba. B ra bee we-rũms sʋka, la yaa malɛk rãmb n da get b yelle. ¹⁴ B yõka a Zã n kẽes roogo la wakat kãng la a Zezi wa Galile n sɩng Wẽnd Koe-nooga moonego. B ra yetame: ¹⁵ «Wakat taame, Wẽnd Rĩunga kolgame, tuub-y y yel-wẽna, tẽ-y Koe-noogã.» ¹⁶ A Zezi ra yegda Galile mogrã, la b yãee a Simo ne a yao, a Andre tɩ b lobd zulung koomẽ. Bãmb tʋʋmd da yaa zĩm yõgbo. ¹⁷ A Zezi yeel-b lame: «Bɩ y bas la y wa tũ maam; mam na n kɩtame tɩ y bao neb n kõ-ma.» ¹⁸ Tao-tao bala, b basa b zulumsi n pʋg a Zezi. ¹⁹ B sẽn ta taoor bilfu, b yãee a Zebede kamba, a Zak ne a yao, a Zã. Bãmb da manegda b zulumsi koglg pʋga. ²⁰ A Zezi boola bãmb me, tao bala bãmb me basa b ba, a Zebede, ne sẽn da sõngd-b bãmbã, la b tũ-la a Zezi. ²¹ A Zezi ne b karen-biisã kẽe Kafarnaom tẽnga. La vʋʋsg daar sẽn ta, a Zezi kẽe pʋʋsg roogẽ n zãmsd neba. ²² B zãmsga ra yɩkda neb pɛlense tɩ b ra zãmsda wa ned sẽn tar a toorẽ tõogo, b ra ka zãmsd wa sẽn da karem-ba-n-sika ye. ²³ Rao a ye la Sʋtãamb ra kẽ yã t’a ra be pʋʋsga roogẽ n moonẽ ²⁴ la a yetẽ: «Nazarɛt Zezi, yaa bõe la y rat ne-do? Y wa-la d menesg bɩ? Ad tõnd mi-la y sẽn yaa a soaba: Wẽnd Nedã.» ²⁵ A Zezi zaba ne-ba, n yetẽ: «Bas-y bʋʋre la y yi nin-kãnga pʋgẽ.» ²⁶ Sʋtãamba kɩtame tɩ raoã yĩng rigimd wʋsgo. La rẽ poore b kelmame n yaool n yi. ²⁷ Neba fãa pɛlens yɩkame, al tɩ b sokd taaba: «Woto rat n yeelame tɩ bõe? Yẽ n zãmsd neb zãms paala, la wa nin-naaba; yẽ n le kõt Sʋtãamb noor tɩ b sɩd tũudẽ!» ²⁸ La a Zezi yʋʋr yii zĩis fãa, tao-tao bala, Galile tẽns pʋsẽ. ²⁹ A Zezi yii pʋʋsga roogẽ n wẽneg n kẽ a Simo la a Andre zakẽ ne a Zak la a Zã. ³⁰ Dẽ t’a Simo reem-poaka yĩns da wɩngame t’a gãe roogẽ; tao bala b goma a Zezi bãada yelle. ³¹ A Zezi kolgame n gãd bãada nugu n kɩt t’a yiki. Paga yĩn-wɩngra wẽneg n sɛɛme t’a yik n na n bao rɩɩbo n kõ-ba. ³² Zaabre, wĩndga sẽn waa n lʋɩ, b talla bãad dãmb wʋsgo n paas Sʋtãamba sẽn da be b rãmb pʋsẽ n wa a Zezi nengẽ. ³³ Yaa tẽnga tõr la bala n da tigim zaka noore. ³⁴ B sãooga bãad-dãmb sẽn da bẽed bãas buud toor toore la b riga Sʋtãamb wʋsgo. B ra ka basd Sʋtãamba tɩ b gom b yell ye tɩ Sʋtãamba ra mii b sẽn ya-la. ³⁵ Tõd-beoog pĩnda, zĩig sẽn waa n ket n ya pʋlum-pʋlum, a Zezi yikame n kẽng weoogẽ la b ra bee be n pʋʋsdẽ. ³⁶ A Simo la karen-biis a taaba yikame n babs-ba. ³⁷ B yãend-b lame n yeel-ba: «Ad-y neba fãa baooda yãmba.» ³⁸ A Zezi leok-b lame: «Bɩ d teem zĩiga, d kẽ tẽn-toosã, tɩ m tõog n zãms be me rãmba, tɩ yaa rẽ yĩng la m yi m sẽn da beẽ wã.» ³⁹ A Zezi saaga Galile tẽnsa fãa n karemd nebã b pʋʋsg rotẽ la b yiisd Sʋtãamba. ⁴⁰ Wãoor a yembre n waa a Zezi nengẽ n wõgemd b taoore n yetẽ: «Yãmb sã n data y tõe n kõo maam laafi.» ⁴¹ A Zezi zoela a nimbãanega n tẽeg b nugu n sɩɩs-a n yetẽ: «Mam datame, bɩ f paam laafi!» ⁴² Tao bala a wãooda sãoogame t’a yĩng lebg neer yɩlemde. ⁴³ A Zezi tãsa wãoora t’a looge. ⁴⁴ B ra yet-a lame: «Gũus n da gom ne ned ba a ye f sãoogra yell ye la kẽng n tɩ wilg f meng maan-kʋʋda la f kõ kũn ning a Moyiiz sẽn wilg tɩ b kɩse tɩ rẽ yɩ f laafi wã paoong kaseto.» ⁴⁵ Wãoora sẽn yi bala, a sɩngame n moone n togsd kibarã. Woto a Zezi ra pa le tõe n kẽ tẽng pʋgẽ, n da paad weoogẽ. Neba baas n yi zĩis fãa n babs ba.

¹ A Zezi waa n leba Kafarnaom. Pa yãee n kaoos tɩ neba bãng tɩ b lɛɛg n waa b yiri ye. ² Neba sũume n wa, tɩ vɩʋʋg ra ka le be ba bilf ye. Dignoora fãa ra pida ne neba, tɩ b kõt-b Koe-noogã. ³ Neb a naas põka põor a ye n wa. ⁴ La neba sẽn da ya wʋsgo, t’a Zezi kolgr ya toogo, b kɩbga võor doga zugu n tũnug be n sik põora ne a gãagã a Zezi taoore. ⁵ A Zezi sẽn yãe neba tẽebã, b yeela bãadã: «M biiga, f yel-wẽna paama sugri.» ⁶ Mik Mitb kẽer n da be neba sʋka la bãmb ra sokda b mense: ⁷ «Yaa bõe tɩ nin-kãnga gomd woto? A mamsa a meng ne Wẽnde! Sã n pa Wẽnnaam bala, ãnda n tõe n kõ yel-wẽnd sugri?» ⁸ A Zezi bãnga b sẽn da tagsd bũmb ninga b yamẽ la b sok-b lame: «Yaa bõe la yãmb tagsd woto y sũurẽ? ⁹ Yelsem bʋg la naana n yɩɩda, m sẽn na n yeel põorã: f paama f yel-wẽna sugri bɩ mam sẽn na n yeele: yik n dɩk f gãag n kuli? ¹⁰ Ade, sẽn na n yɩlẽ tɩ y bãng marsã tɩ Ned Biiga tara tõogo, tẽng zugu, n kõ yel-wẽna sugri, ¹¹ põore, m kõt f la noore: yik n dɩk f gãaga n kul f yiri.» ¹² Põora wẽneg n yikame n dɩk a gãag n tũud neba fãa taoore n yita. Neba fãa pɛlens yikame tɩ b ra pẽgd Wẽnd la b yetẽ: «Tõnd nan ka yãend yell kãnga to ye.» ¹³ A Zezi yiime yɛsa n le kẽng mogra noore; neba kaoogame n wa b nengẽ tɩ b zãmsd-b. ¹⁴ B waa n loodame n yãend ned a ye, a Alfe biiga, sẽn boond t’a Levi. A Levi da zĩi yaood deesg zĩigẽ la a Zezi yeel-a lame: «Yik n wa tũ maam!» T’a Levi sɩd yik n na n pʋg a Zezi. ¹⁵ A Zezi ne b karen-biisã la Farizẽ rãmb wʋsg da naaga taaba, a Levi zakẽ, n dɩtẽ. Yaa zãma kãseng n da pʋgd a Zezi. ¹⁶ Mitba la Farizẽ rãmba sẽn yãe t’a Zezi rɩta ne yel-wẽn-maandba la fadga rɛɛsdba, b yeela a Zezi tũud-n-taasã: «Bõe la woto? Bõe tɩ yãmb zu-soaba naagd yel-wẽn-maandb la sẽn deesd-b fadgã n dɩtẽ?» ¹⁷ A Zezi wʋma b goama n leok ba: «Ka sẽn be-b laafi n tar tɩɩm soab tʋʋmd ye, yaa sẽn bẽed-ba. M pa wa tẽng zug nin-sõma boolg yĩng ye, m waame n na n bool yel-wẽn-maandba.» ¹⁸ A Zã tũud-n-taasa la Farizẽ rãmba ra loeta b noore; rẽ la b sok a Zezi: «Yaa bõe yĩng la a Zã tũud-n-taasa la Farizẽ rãmb loet b noor tɩ yãmb tũud-n-taasa yaool n pa loetẽ?» ¹⁹ A Zezi leok-b lame: «Pʋg-sɩda tũud-n-taas tõeeme, n loe b noor tɩ pʋg-sɩda ket n be b sʋk bɩ? Pʋg-sɩda sã n ket b sʋka, b ka tõe n loe b noor ye. ²⁰ B sẽn wat n bak pʋg-sɩda ne bãmb daare, la b na n loe b noore. ²¹ Ned pa rɩkd peen-paalga sẽn ka wẽ koasla n sũk fu-kʋdg ye. Peend paalga na n yõbame n tak kʋdgã t’a pãrg n paase. ²² Ned pa suiid rã-paalg wao-kʋdg pʋg ye, rãama na n pusga waoogã tɩ lebg bõne. Woto yĩnga rã-paalg suiida wao-paalsẽ.» ²³ Daar a yembre a Zezi ra tũuda pʋt sʋk n looda. B karen-biisa kẽndame la b foosd ka-zutã n na n bas sore. ²⁴ Farizẽ rãmba sẽn yãend rẽnna b yeela a Zezi: «Gese, bõe yĩng tɩ b maand bũmb sẽn kis, vʋʋsg daare?» ²⁵ A Zezi leok-b lame: «Yãmb nan pa karem sebr sõng pʋgẽ a Daviid ne a tũud-n-taas sẽn maam bũmb ninga, yella sẽn waa n pak ba tɩ koma tar-b bɩ? ²⁶ A pa kẽ wẽnd doogẽ, maan-kʋʋd, a Abiatar, wẽnnẽ, n dɩk wẽnd dooga bur n wãb bɩ? A ra yaool n miime tɩ yaa maan-kʋʋdba bala n da tõe n wãb bur kãense. A pa saag n kõ a tũud-n-taasa tɩ b rɩ bɩ?» ²⁷ B ra yet-b lame: «Wẽnnaam naana sibr daar ninsaalb yĩnga. B pa naan ninsaal sibr daar yĩng ye. ²⁸ Ned Biiga soo ra kãng me.»

¹ Vʋʋsg daar a to, a Zezi le kẽe pʋʋsg roogẽ. Nug-kɩɩng soab a ye n da be be ² la neba fãa ra gũusdame n na n ges a Zezi sã n na n sãoog-a-la vʋʋsga raare, n paam yell n dogl b zugu. ³ A Zezi yeela nug-kɩɩngã: «Yik n wa sʋk ka.» ⁴ Dẽ poore b soka nebã: «Maan neer vʋʋsg daar pa são wẽng maaneg bɩ? Vɩɩm kũun vʋʋsg daar n são bɩ yõor yãkre n são?» Ned ba a ye pa leok-b tɩ bũmb ye. ⁵ A Zezi karg n ges-b lame tɩ b sũur kɛɛd ne-ba, b sẽn pa tar nimbãan-zoeer ba bilfã la b yeela raoã: «Tẽeg f nugã!» Tɩ raoã sɩd tẽege la a nuga wẽneg n sãoogame. ⁶ B sẽn yi, tao-tao bala, Farizẽ rãmba yẽsa ne a Erod kẽedbã n baood b sẽn na n yãend dabaar ninga n sãam a Zezi yelle. ⁷ A Zezi yii ne b karen-biisã n tees mogra sẽne; zãma kãseng n da yi Galile la Zɩɩda soolmẽ n tũ-ba. ⁸ Neb wʋsg me sẽn da wʋm a Zezi bõn-bãna kibare da yita tẽns wʋsg n wat b nengẽ, wala Idume tẽnse, Zʋrdẽ kʋɩlg rʋʋnde, Tir la Sidõ. ⁹ A Zezi yeela b karen-biisã tɩ b bao koglg bil a yembre n pẽneg yam-yam bãmb meng yĩnga, tɩ neba ra pẽdgd-b lame tɩ looge. ¹⁰ A Zezi ra sãooga bãad-dãmb wʋsgo, dẽ yĩnga bãad-dãmba fãa ra pẽdgdame n dat n sɩɩs-ba. ¹¹ Sʋtãamba sẽn da be b rãmb pʋsẽ da kolgda a Zezi n wõgemdẽ la b moonẽ: «Yãmb yaa Wẽnnaam Biiga!» ¹² La a Zezi ra tãsd-b lame tɩ b sĩndi la b ra moon b yʋʋra woto ye. ¹³ Dẽ poore a Zezi dʋʋ tãng a ye. B sẽn da rat neb kẽere, b bool-b lame la b waame. ¹⁴ Bãmb piig la a yiib la b tũusyã tɩ b na yɩ b Tũud-n-taase n tʋm b tʋʋmde: Koe-nooga moonego. ¹⁵ B kõ-b-la tõog tɩ b rig Sʋtãamba. ¹⁶ Piig la a yiiba sẽn yãkã yʋy la woto: a Simo, b pʋda yẽ yʋʋr a Piyɛr, Kugri, ¹⁷ n paas a Zebede kamba: a Zak ne a yao a Zã. B kõo bãmb yʋ-kãnga: Bonarzes (sa-tãs kamba) ¹⁸ Le paasa a Andre, a Filip, a Bartelemi, a Matiye, a Toma, a Alfe biig a Zak, a Tade, a Simo, yẽ la a ka yogd ne buuda bɛ, ¹⁹ la a Zɩɩda, Iskariyot tẽng neda, a Zezi zãmbdã. ²⁰ A Zezi lɛɛg n waa yiri la zãma kãseng tũ-b lame yɛsa, al tɩ b ra pa tar zĩig n na n zĩnd n dɩ ye. ²¹ A Zezi doagdba sẽn wʋm dẽ, b kẽngame n na n tɩ yõk-ba tɩ b ra yetame: «Ad-a zuga lebgame.» ²² Mitb n yi Zerizalɛɛm n wa n yetẽ: «Yaa Sʋtãan a Beelzebul n be nin-kãnga pʋga, la yaa ne Sʋtãamba naab pãnga, la a yiisd Sʋtãamba.» ²³ A Zezi wẽe yelbũndi n yetẽ: «Sʋtãan na n yɩ wãn n dig Sʋtãana? ²⁴ Rĩung a ye neb sã n wẽneg n zabd ne taaba, rĩung kãng na n yɩɩ wãn n ka wã zãnga? ²⁵ Yir a ye neb sã n wẽneg n zabd ne taaba, yi kãng kõn wã sɩda? ²⁶ Sʋtãan sã n zabd ne a menga, a sã n welg ne a menga, a pa tõe n yals yĩngr yɛs ye. Yẽ yell sɛɛme. ²⁷ M yeta yãmba tɩ ned ka tõe n kẽ nin-daoog zakẽ n wʋk a teed t’a pa reng n yõk-a n sẽb ye. ²⁸ Sɩd-sɩda m yeta yãmba tɩ Adem biisa yel-wẽna la b wẽn-tʋʋra na paam sugri, ba b sõora sẽn zem bũmb ninga. ²⁹ La ned ninga sẽn na n tʋʋs-a Vʋʋsem Sõngo, yẽ soab kõn paam sugr abada. Yel-wẽnda na n paa ne-a, raar fãa.» ³⁰ Yaa Farizẽ rãmba sẽn da yet tɩ Sʋtãan n be a Zezi pʋgẽ yĩngã la b gom woto. ³¹ A Zezi ma la b buuda neb waa n yaasa yɩnga n tʋm tɩ b bool a Zezi n kõ-ba. ³² Neb wʋsg da zĩ-la a Zezi sɛɛgẽ, wakat kãnga. B yeela a Zezi: «Ad-y y ma la y saam-biisi, rap la pagba n be yɩnga n baood-y.» ³³ A Zezi leokame: «Mam ma la ãndã, m saam-biis la ãnd dãmba?» ³⁴ La a Zezi gesa neb niyns sẽn da be-b bãmb sɛɛgẽ n yeele: «Ad-m ma, ad-m saam-biisi. ³⁵ Ned ninga fãa sẽn maand-a Wẽnnaam yam, yẽ soab la m yao, m tão la m ma.»

¹ A Zezi da leb n sɩnga neba zãmsgo mogra noore. Neb wʋsg ra tigma taab b sɛɛgẽ. La neba sẽn da ya wʋsg yĩnga, b kongame n kẽ koglg a ye pʋga, n ta ko sʋka. Nebã n pa tẽnga, mogra noore. ² A Zezi zãms-b la bũmb wʋsg ne yelbũna. B zãmsg pʋgẽ b ra yetame: ³ «Kelg-y yelbũndi. Ned a ye n da yii n na n bʋd a pʋʋgo. ⁴ A sẽn waa n bʋtẽ, bõn-buud kẽer dʋʋga sora noore la luiili wẽneg n dɩgs-b la zãnga. ⁵ Kẽer lʋɩɩ zẽgdg zugu, la bʋgsem sẽn da ka be wʋsg yĩnga, b yika tao-tao. ⁶ Wĩndg sẽn waa n wɩnge, bãmb wẽneg n kiime, tɩ b ra ka kɩ yẽgen wʋsg ye. ⁷ Kẽer lʋɩɩ gõos sʋka la gõos wulumd-b lame n kʋ tɩ b pa paam n wom biis ye. ⁸ Kẽer lʋɩɩ zĩ-sõngẽ la bãmb yikame n wom biis wʋsgo, kẽer pistã-tã, kẽer pisoobsoobe, kẽer koabg-koabga.» ⁹ A Zezi da yetame: «Ned ninga sẽn tar-a tʋba n na kelg bɩ a yoog a tʋb n kelge.» ¹⁰ A Zezi waa n bee kɛɛnga tɩ b sõsd-n-taasa ne Tʋʋm-tʋmdb piig la a yiibã na n sok-b b yelbũna poorẽ. ¹¹ Dẽ la b ra yet woto: «Sã n ya yãmba, yãmb paamame tɩ b wilg-y Wẽnd Rĩunga yɛla. Sã n ya ne sẽn be-b yɩngã, yaa ne yelbũn la b gomd ne bãmba, ¹² sẽn na n yɩla tɩ b sã n get neere me bɩ b ra yãe ye; b sã n kelgd neer me bɩ b ra wʋm ye, ka rẽ, raar a ye b wat n teemame n paam sugri.» ¹³ A Zezi yeela bãmba: «Yãmb sɩd ka wʋmd yelbũnd kãnga võore? La sã n ya woto, yãmb na n maana a wãn n wʋm a taaba võore? ¹⁴ Bʋta sẽn bʋtã, yaa Wẽnd Gomdã. ¹⁵ Sẽn be-b Gomda sẽn bʋd sor ninga noorã, la sẽn wʋm-b Gomdã tɩ Sʋtãan wẽneg n yiis-a b sũurẽ. ¹⁶ Zĩ kʋɩgdgẽ dãmba yaa neb niyns sẽn wʋm-b Gomdã n deeg-a tao-tao ne sũ-noogo. ¹⁷ La b meng sẽn ka kɩ yẽgna, yaa wakat yɛng bala la b ya rapa. La b sã n seg toog bɩ namsgo, Koe-nooga yĩnga, b kongda raoodo n pãs n lʋɩ. ¹⁸ Gõosẽ dãmbã, yaa neb niyns sẽn wʋm Gomdã ¹⁹ n yaool n bas tɩ dũni zu-loeese, arzɛgs tʋlsem, tʋls wẽns buud fãa, wulumd-ba, tɩ Gomda sẽn bʋda pa tõe n wom biis ye. ²⁰ Sẽn lʋɩb zĩ-sõngẽ, makda sẽn kelgd-b la b reegd Gomdã n paam n womd biisi, pistã-tã, pisoobsoobe, koabg-koabga.» ²¹ B ra leb n yet-b lame: «Fitil yõgendame n lud ne koglg bɩ n solg gãag tẽngr bɩ? Ka roagendga zuug la b ningd-a? ²² Bũmb ka be sẽn solg likẽ, tɩ b ka na n wa ne a vẽenemẽ ye. Sẽn sogl fãa tara a pukr daare. ²³ Sẽn tar-a tʋb fãa n na n kelge, bɩ a kelg.» ²⁴ A Zezi ra yet-b lame yɛsa: «Gũus-y ne y sẽn wʋmde! Yãmb sẽn na n dɩk makr ninga n mak n kõ y taaba, yãmb me rẽn na n maka boto la pʋs n na yɩɩg rẽnd me. ²⁵ Sẽn zoe n tar-a wã la b na n kõo n paase. Sẽn ka tar-a wã, bilfra a sẽn tarã la b na deege.» ²⁶ A Zezi ra yet-b lame yɛsa: «Wẽnd Rĩunga wẽnda bõn-buud ned sẽn bʋd a pʋʋgẽ. ²⁷ A gõeeme bɩ a neeme, yaa wĩntoog bɩ yaa yʋngo, bõn-buuda bundame n yi a toore t’a ka miẽ ye. ²⁸ Tẽnga meng n wat ne a yõodo: pipi yaa vãado, a yiib soaba yaa ka-zugu, la rẽ poore yaa biisi. ²⁹ La kood sã n bɩ n sɛ, yaa kɛɛbo tɩ kooda bɩɩme.» ³⁰ A Zezi le yeelame: «Mam na n maka Wẽnd Rĩunga ne bõe? M na n wẽe yelbũnd bʋgo n mak-a tɩ y wʋme? ³¹ Wẽnnaam Rĩunga wẽnda seneve tɩɩg biiga, a bʋdb wakato, a yaa bilfr wʋsgo bõn-buud a taab fãa sʋka. ³² La b sã n bʋd-a t’a yi n sɛ, a lebgda tɩ kãsenga al n tão wil bɛda tɩ yĩngr luiili wat n vʋʋsd a maasmẽ.» ³³ Yaa ne yelbũn wʋsg woto la a Zezi ra gomd ne nebã n zãmsd-ba b sẽn tõe n wʋm bũmb ninga. ³⁴ La a Zezi ra ka gomd ne bãmb tɩ ka ne yelbũn ye la b sã n da yaool n be ne b karen-biisa bala, b ra wilgda bãmb yelbũna võore. ³⁵ Baraare, zĩig sẽn waa n sobgdẽ, a Zezi yeela b tũud-n-taasã: «Wa-y tɩ d dʋʋg mogrã.» ³⁶ B basa nebã la b talla a Zezi ne koglg ning b sẽn da be a soab pʋgẽ wã n dʋʋge. Koom kogend a taab me yãag-b lame. ³⁷ Wakat kãng la sob-kãseng yik yã al tɩ ko-wiisa da rãmbd wʋsgo n buiid koglgã t’a rat n pidi. ³⁸ A Zezi menga ra bee poorẽ n kʋgl b zug zu-kʋka n gõe; karen-biisa nek-b lame n yeel-ba: «Soaala, yãmb pa ne tõnd sẽn na n ki wã la, n maand wa y toog ka be?» ³⁹ A Zezi sẽn neke, b zaba ne sobgã la b kõo mogra noor n yetẽ: «Yɩ sɩɩ la f bas bʋrga!» Sobga yõka vugr bala tɩ mogra zãng lebg sɩɩ. ⁴⁰ A Zezi yaool n yeela b karen-biisã: «Yaa bõe yĩng la y zoet dabeem woto? Yaa bõe tɩ y pa tar tẽebo?» ⁴¹ Dabeem kãseng yõka bãmb fãa tɩ b ra yet taaba: «Nin-kãnga yaa Ãnda tɩ sobg la mogr deegd b noore?»

¹ A Zezi sẽn ta mogra rʋʋnde, Gadar tẽnga. ² B sẽn sig koom kogenda bala, la ned a ye sẽn yi yaadẽ n zoet n segd-ba. Yaa Sʋtãan n da be nin-kãng pʋgẽ. ³ A ra gãee yaad pʋsẽ la neba ra ka ne bõn-zaadg ning b sẽn na n tall n zaa-a ye, ba ya bãeense. ⁴ Naoor wʋsgo b yõk-a lame n balg, n sẽb-a ne bãeense t’a kao bãeensã ne rabõangã; ned ba a ye ra ka tõe-a ye. ⁵ Wakat fãa, yʋng la wĩntoogo, a ra bee yaadẽ bɩ tãmsa zut n wiisdẽ la a bogd a meng ne kuga. ⁶ A sẽn yãe a Zezi tɩ b be yɩɩg n watẽ, a zoe n seg-b lame, n wõgemd b taoore n moon wʋsgo: ⁷ «Y rat-m la ne bõe, Zezi, yĩngr Wẽnda Biiga? M kot-y la ne Wẽnde, tɩ y ra maan-m bũmb ye!» ⁸ La rẽ yaa a Zezi sẽn da yeel-a: «Sʋtãan yoogo, yi nin-kãnga pʋgẽ.» ⁹ A Zezi sok-a lame: «Fo yʋʋr la a bõe?» T’a leoke: «M yʋʋr la a Kʋʋma, tɩ sɩda, d sõor yaa wʋsgo.» ¹⁰ Sʋtãan yõka sɛɛga tɩ b ra rig-a n yiis tẽnga pʋgẽ ye. ¹¹ Kurkuy wʋsgo n da be tãng a yembr zug be, n wãbd yamdo. ¹² Sʋtãana kosa a Zezi: «Bɩ y bas do tɩ d kẽ kurkuya pʋsẽ.» ¹³ A Zezi kõ-b la sore, la b sẽn paam dẽ, b yiime n tɩ kẽ kurkuya tɩ b kaoog n zoet n sigd tãngã n digd mogrã. Rũmsa sõor da taa tus a yiibu la b fãa lʋɩɩ mogrẽ tɩ kooma rɩ-ba. ¹⁴ Rũm-kɩɩmba zoee tao-tao n tɩ togs kibara tẽnga pʋga la tẽn-kɩremsa fãa. Tẽnga rãmb zoeeme n wa ges yellã sẽn yɩ to-to. ¹⁵ B sẽn ta, b yãenda Sʋtãana sẽn da kẽ-a soabã t’a zĩ a Zezi sɛɛgẽ n yer fuug la a gomd neere. B yãend-a lame tɩ rabeem kẽ-ba tɩ yaa sʋtãamb wʋsgo n sɩd da be nin-kãng pʋgẽ. ¹⁶ Neb niyns sẽn zĩnd-b be n yãend yella sɩngre, togsa b taaba bũmb ning fãa sẽn maane ne raoã la ne kurkuya. ¹⁷ Tɩ b naag taab n kos a Zezi tɩ b yi b tẽngẽ. ¹⁸ A Zezi sẽn yet tɩ b kẽed koglgã, la ned ninga sẽn paam-a sãoogra kos sor n na n tũ-ba. ¹⁹ A Zezi pa sak ye; b yeel-a lame: «Kul f yiri, f buud neb sʋka, la togs bãmb kibarã; gom ne-ba, nimbãan-zoeer tʋʋm niyns Soaala sẽn sak n maan f yĩnga.» ²⁰ Raoã sɩd kulame la a saaga Tẽns piiga sẽn tot taabã n moond a Zezi sẽn maan bũmb ning ne yẽnda. Neba fãa pẽgame. ²¹ A Zezi rʋʋga kʋɩlgã ne koglgã la zãma kãseng waa n gũma be. ²² Yaa wakat kãng la pʋʋsg roog a ye naab sẽn boond t’a Zayir pɩʋʋg be. ²³ A sẽn yãend a Zezi, a wõgemda b taoore n kot-b ne pẽdgre: «M bi-pugl n be yiri n ka laafi ye, la a pãnga sɛɛ fãa, m kotame tɩ y wa tẽeg y nug a zugu t’a paam laafi la a ra ki ye.» ²⁴ T’a Zezi sɩd na n tũ n kuli. Neb wʋsg kaoogame n pʋgd a Zezi n tol n lagsd b nao. ²⁵ Pag a ye n da bẽed mende, al yʋʋm piig la a yiibu. ²⁶ Pʋg-kãnga namsa wʋsgo tɩt rãmba buud toor-toor nusẽ. A sãama ligd wʋsgo la a ka paam laafi ye. A bãaga da paasdame n dabda. ²⁷ A sẽn wʋm tɩ b gomd a Zezi yelle, a soos n pʋga poorẽ n kẽ neba sʋka, n sɩɩs a Zezi fuugu. ²⁸ A ra tagsda a sũurẽ: «M sã n paam n sɩɩs a fuuga bala, m na n paama laafi.» ²⁹ Vugr bala zɩɩma yõkame tɩ paga bãng t’a sãoogame. ³⁰ Tao-tao bala, a Zezi me bãngame tɩ pãng n yi b nengẽ n sãoog neda. B wẽnegame n sok sẽn da pʋgd-b bãmbã: «Yaa ãnda n sɩɩs m fuugã?» ³¹ Tɩ b karen-biisa na n leoke: «Neb pẽdgd yãmb woto tɩ y le sokd tɩ ãnda n sɩɩs yãmba?» ³² A Zezi ra ket n geta b sɛɛgẽ, n baood ned ninga sẽn sɩɩs-a bãmbã. ³³ Paga sẽn mi tiirã, rabeem yõk-a lame t’a rigda. A kolgame n wõgemd a Zezi taoore n togs a pʋga. ³⁴ A Zezi yeel-a lame: «M biiga, fo tẽeba fãag-f lame. Kẽng ne laafi, f bãaga sẽn da yaand fooma na n kell n sãooga zãnga.» ³⁵ A Zezi ra ket n gomda ne pagã, la neb n yi naaba yiri n wa togs naaba: «Fo biiga konga pãnga, ra nams Soaala zaalem ye!» ³⁶ A Zezi sẽn wʋm b goama leoka naabã: «Da zoe rabeem ye, fo ye n tẽ bala.» ³⁷ B gɩdga neba tɩ b ra le pʋg-b ye, sã n ka a Piyɛr la a Zak ne Zã bala. ³⁸ B rɩka naaba yir sore; b sẽn ta yiri b yãee neb wʋsg sẽn yãbd la b kaasdẽ. ³⁹ A Zezi kẽeme n sok nebã: «Yaa bõe tɩ y yãbda la y maand bʋʋr woto? Biiga ka ki ye, a gõeeme bala.» ⁴⁰ Tɩ neba na n la a Zezi. A Zezi rig-b la zãnga, n peeg biiga ba ne a ma la b karen-biisã n kẽ bãada roogẽ. ⁴¹ B gãda biiga nug n yeel-a: «Talita koum!» Dat n yeelame: «Bi-pugla, m yet-f lame, yiki!» ⁴² Tao bala bi-pugla yikame n kẽnda. A ra tara yʋʋm piig la a yiibu. Dabeem kẽe nebã wʋsgo. ⁴³ A Zezi kõo noor tɩ b modg tɩ yella ra yi kɛɛng ye. B paasame tɩ b bao rɩɩb n kõ biiga t’a rɩ.

¹ A Zezi yii be n kẽng Nazarɛt, b ba-yiri. Karen-biisa me tũume. ² Vʋʋsg daare b kẽe pʋʋsg roogẽ n na n zãms neb karengo. Neb wʋsg wʋma b goama la b pɛleng yɩkame tɩ b yetẽ: «B zãmsa woto fãa yɛ? Ya ãnna kõ-b yam la tõog kãngã tɩ b maand bõn-bãna? ³ Ka bãmb la ra-wãada laa? Ka bãmb la a Maryam biiga laa? Ka a Zak, a Zoze, a Simo, a Zɩɩd saam-biig la bãmb laa. B saam-bi-pogsã ka vɩ ne tõnd bɩ?» B poorẽ da yaa no-koeemde. ⁴ A Zezi ra yet-b lame bala: «Bãngd buud fãa ka tõe n paam waoogr a tẽngẽ ye, a pa tõe n paam waoogr a tẽnga kamba nengẽ la a zakẽ ye.» ⁵ Beelẽ a Zezi ra ka maan wẽnd-makr dãmb wa zĩis kẽer ye. B tẽega b nus koms-rãmb kẽer zug bala, n kõ-b laafi. ⁶ A Zezi meng ra ka wʋmd neba sẽn pa tẽeda võor ye. Rẽ poore a Zezi sɩnga tẽn-kɩremsa saabo, neba zãmsg yĩnga. ⁷ A Zezi boola b Tʋʋm-tʋmdb piig la a yiibã la b tʋm-b la a yiib-yiibu; b ra kõ-b la tõogo tɩ b yiis sʋtãamba neb pʋsẽ. ⁸ B kõ-b la noore tɩ b sã n dabd b tʋʋmna bɩ b ra zɩ bũmb sã n ka rasaar bala. B yeel-b lame tɩ ra zɩ sor dɩɩbo, bɩ korgo, bɩ ligd b gɩfẽ ye. ⁹ B yeel-b lame tɩ b wid gãndalsa, la b ra yeelg fut a yiib ye. ¹⁰ B ra yet-b lame yɛsa: «Yãmb sẽn na n ta zĩig ning fãa bɩ y kẽ zak a yembre la y pa be n ta y loogre. ¹¹ Yãmb sẽn ta zĩig ninga tɩ b pa reeg yãmb la b pa sak n kelg yãmb zãmsgo, bɩ y yi n bas tẽn-kãnga. La y sã n yita bɩ y pĩng y nao tom, n ning tẽnga rãmb taale.» ¹² Tʋʋm-tʋmdba kẽngame n zãms nebã tɩ b tuub b yel-wẽna. ¹³ B riga sʋtãamb wʋsgo la b zɛɛ bãad-dãmb wʋsg ne kaam n sãoog-ba. ¹⁴ Dĩm a Erod wʋma a Zezi kibare, tɩ b yʋʋra ra yii wʋsgo. B ra yetame: «Zã ning sẽn da sooda neba kooma vʋʋga kɩɩms sʋka la yaa rẽnd yĩnga la a wẽn-makr dãmba ka be sõor ye.» ¹⁵ Neb kẽer da yetame: «Yaa a Eli» tɩ neb kẽer me yetẽ: «A yaa bãngda wa bãngdba a taabã.» ¹⁶ A Erod me ra wʋmda b yelle la yẽ ra yetame: «Yaa Zã ning m sẽn fiuug a soab zugã, n vʋʋg kɩɩms sʋka!» ¹⁷ Sɩd me a Erod n da kɩt tɩ b yõk a Zã, n sẽb-a, n kẽes-a roogo. A Erod da rɩka, a yao paga, a yao, a Filip, paga, a Erodiad, n maan a paga. ¹⁸ A Zã me ra yeta a Erod: «Pa segd tɩ yãmb dɩk y yao paga n maan y pag ye.» ¹⁹ A Erodiad sũur da puuda ne a Zã, al t’a da rat a kũum, la a ra pa tõe n kʋ-a ye, ²⁰ t’a Erod meng ra zoeta a Zã, a sẽn da ya nin-tɩrga la nin-sõngã, la a ra pa rat tɩ ned maan-a bũmb ye. A Zã goama bal n wa n kɩt t’a le ka mi a sẽn na n maanega. Baasg fãa, a ra ket n kelgda a Zã ne sũ-noogo. ²¹ Waa n sega daar a ye, t’a Erod maand a rogem daar tẽegr kibsa. A ra boola nanams bɛda, tãnsoabẽn-dãmb la Galile soolem nanamse. ²² Dẽ la a Erodiad bi-pugla kẽ rɩɩba roogẽ n sao, al t’a Erod ne sẽn da rɩt-ba fãa sũur yɩ noogo t’a na n yeel bi-puglã: «Bɩ f kos maam f sẽn dat bũmb ning fãa, tɩ m na kõ-fo.» ²³ A tol n paasame ne wẽenego: «Fo sẽn na n kos maam bũmb ninga fãa, ba yaa m rĩunga pʋɩ-sʋka, f na n paamame.» ²⁴ Bi-pugla yiime n zoe n tɩ sok a ma: «M ma, m na n kosa naab bõe?» A ma wã leokame: «Kos a Zã zugu.» ²⁵ Bi-pugla zoe lomb-lombe, n wa naaba nengẽ n wilg a kosgã: «M kotame tɩ y ning a Zã zugã laag pʋgẽ n kõ maam mars-marsã bala.» ²⁶ Naaba sũur sãama al wʋsgo, la a wẽenega yĩnga, n paas neba me yĩnga, a pa tõog n zãgs ye. ²⁷ Tao bala, a kõo tãb-biisa noor tɩ b fiuug a Zã zug n wa. ²⁸ Tãb-biisa kẽnga bi-beesa roogẽ n tɩ fiuug a Zã zug n ning laagẽ, n wa kɩs bi-puglã. La bi-pugla talla zugã n tɩ kɩs a ma. ²⁹ A Zã tũud-n-taas sẽn wʋm woto, b waa n dɩka a yĩngã n solg yaoogẽ. ³⁰ Karen-biisa yii b sorã n le wa bãmb sɛɛgẽ. B togsa b sẽn maan bũmb ninga, la b sẽn zãms bũmb ninga. ³¹ La a Zezi yeel-b lame: «Bɩ d tũ taab n zãag zĩig bilfu n paam n vʋʋse.» Neba ra pɩʋʋmda taab zĩ kãng al wʋsgo, tɩ b ra ka tõe n paam vɩʋʋg n dɩ meng ye. ³² Bãmb ne b Tʋʋm-tʋmdbã bal kẽe koom koglgo, n dʋʋg n ta neb sẽn da ka be zĩig ninga. ³³ Neba yãee b sẽn dʋʋg mogrã n digd weoogẽ wã, la b sẽn da zoe m mi b sẽn dabdẽ, wʋsg yii tẽnsa fãa pʋsẽ ne nao bala, n deng bãmb be. ³⁴ A Zezi sẽn ta rʋʋnde, b yãee neb wʋsg sẽn da tigim taab beene. B sẽn yãe nebã, b zoe b nimbãanega. B ra wẽnda piis sẽn ka tar pe-kɩɩm ye. La b sɩngame n zãms-ba n kaoose. ³⁵ Karen-biisa sẽn mik tɩ zĩiga ra zʋʋgame, b kẽng n tɩ wilg a Zezi: «Ka, tõnd bee weoogẽ, la zĩig me zʋʋgame. ³⁶ Bɩ y bas neba tɩ b kẽng pʋtẽ la tẽnsa pʋsẽ n da rɩɩb n dɩ.» ³⁷ Dẽ la b leok ba: «Bɩ yãmb mens bao rɩɩbo n kõ-b wɛ!» Tɩ karen-biisa yeele: «Na yaa n yɩ pakr tɩ d yiis wakɩ koeems sẽn ta kobsi n da bur n kõ-b tɩ b rɩ?» ³⁸ La a Zezi wẽneg n sok-b lame: «Yaa bur a wãna la y tara, tɩ sõd-y n gese.» Karen-biisa sẽn tɩ gese, b waa n togsame tɩ yaa bur a nu la kʋɩl-zẽed a yiib n kete. ³⁹ A Zezi kõ-b la noore tɩ b welg rɩt-n-taasa bal bale, mo maasa zugu. ⁴⁰ La bãmb kɩtame tɩ neba zĩnd sak saka, koabg koabga, pisnu-nu. ⁴¹ A Zezi deega bur a nu wã la kʋɩl-zẽed a yiibã, la b zẽka b neng yĩngr n maan bark pʋʋsgo n yaool n wes burã n kõ Tʋʋm-tʋmdbã tɩ b pʋɩ nebã. B pʋɩ neba zĩm a yiiba me. ⁴² Neba fãa paamame n dɩ n tɩge. ⁴³ Karen-biisa wʋka bura girse la kʋɩl-zẽedã sẽn kellã n pid pet piig la a yiibu. ⁴⁴ Sẽn da rɩba fãa sõor taa tus a nu. ⁴⁵ Neba sẽn dɩ n sɛ bala, a Zezi modga b Tʋʋm-tʋmdbã tɩ b kẽ koom koglga pʋga n deng bãmb rʋʋnde, Bɛtsayid sẽnẽ. Bãmb meng paame n na n yõdg n kuls nebã. ⁴⁶ B sẽn kuls nebã n sɛ, b kẽnga tãng a yembr zugu n tɩ pʋʋse. ⁴⁷ Zĩig waa n sobgame, la koglga me ra zoe n taa mogra sʋka, tɩ bãmb b ye bal ket b zĩigẽ. ⁴⁸ B sẽn yãe tɩ sobg ra segda Tʋʋm-tʋmdba tɩ b namsd wʋsg ne koglga rʋgsgu, tõd-beoog pĩnda, b yikame n kẽn kooma zug n babs-ba. B maana wala b da rat n loog-b lame. ⁴⁹ La bãmb sẽn yãe ned sẽn kẽnd koom zug woto, b yeela taaba: «Ad-y yaa kɩɩma!» ⁵⁰ B ra maanda bʋrga tɩ bãmb fãa sẽn yãe woto, rabeem yõk-b lame. A Zezi goma ne bãmba n yetẽ: «Keng-y y pelse, tɩ yaa maam; da zoe-y rabeem ye.» ⁵¹ La a Zezi meng kẽe b koglga pʋga. Wakat kãng bala sobga yõka vugr n lebg sɩɩ. Rabeem kãsenga da ket n bee ned kam fãa sũurẽ. ⁵² Bãmb da pa wʋm bura fɩɩr võor ye, da ket n yaa wa b bee likẽ. ⁵³ B sẽn dʋʋg mogrã, b tɩ kolga Zenezarɛt n yaase. ⁵⁴ B sẽn yi koglga pʋg n sɛ, neba bãnga tao-tao bal tɩ yaa a Zezi. ⁵⁵ Neba zoe n saaga tẽnga fãa n tʋk bãad-dãmb ne b gãase n wa a Zezi nengẽ. B sẽn da be zĩig ning fãa, neba ra watame. ⁵⁶ B sẽn da wʋm t’a Zezi bee zĩig ninga fãa, a Zezi sẽn ta tẽng ning fãa, tẽn-bõonego, tẽn-bɛda la tẽn-kɩremse, fãa ra tigimda b bãad-dãmba, tẽnga sɛk zĩigẽ, la b ra kota a Zezi tɩ b sak tɩ bãad-dãmb sɩɩs b fuuga zerd bala. La neb niins fãa sẽn da paam-ba n sɩɩs a Zezi fuuga ra sãoogdame.

¹ Farizẽ rãmba ne Mitba yii Zerizalɛɛm n tigim taab n wa a Zezi nengẽ. ² B yãe e Zezi karen-biisa kẽer sẽn da rɩt ne rẽgdo, dat n yeelame: ne nus sẽn ka peke. ³ Farizẽ la Zʋɩf rãmba fãa da pa rɩt rɩɩbo n pa reng n pek b nus n tãag kãntɩɩs ye. Dẽ yaa b rog-n-mik. ⁴ B sã n da yi raagẽ n wa b soodame n yaool n dɩ. B ra tara yɛl a taab wʋsgo, b rog-n-mika pʋgẽ, wala wama ne yʋya nedegre, yõg-laasa pekre. ⁵ Yaa rẽ la Farizẽ ne mitba sok a Zezi: «Bõe yĩng tɩ yãmb karen-biisã pa rɩt wala rog-n-mika sẽn date? Yaa bõe yĩnga tɩ b rɩt ne nus rẽgdo?» ⁶ A Zezi leok-b lame: «Zãmb rãmba, a Izayi n bãng n gom y yelle n gʋls woto: ‹Nin-bãmba waoogda maam ne noor bala, b sũya zãra ne maam. ⁷ B waoogr pa waoogd-m ye. B zãmsga tekda ninsaal sẽn mi bala.› ⁸ Yãmb basa Wẽnnaam noya n tũud neb rog-n-miki.» ⁹ A Zezi ra yet-b lame yɛsa: «Sɩd-sɩda yãmb kɩtame tɩ yãmb dog-n-mik reeg Wẽnnaam noya zĩiga. ¹⁰ A Moyiiz da yeelame: ‹Waoog f ba la f ma la ned ning sẽn sãbsda a ba la a ma, a soab toga ne kũum.› ¹¹ Yãmb nengẽ y gomdame: ‹Ned sã n yeel a ba bɩ a ma: ad-m sẽn da tõe n dɩk bũmb ning fãa n sõng foo lebga Wẽnd dẽnna›, ¹² yãmb pa le sakd t’a sõng a ba bɩ a ma ye. ¹³ Woto wã, yãmb dog-n-mika kɩtame tɩ Wẽnnaam goama lebg zaalem la yãmb maanda bũmb wʋsgo sẽn wẽnd boto.» ¹⁴ Dẽ poore, a Zezi le boola neba yɛsa n yeel-ba: «Yãmb fãa, bɩ y kelg mam sẽn na n togs-y bũmb ninga neere. ¹⁵ Bũmb ka be yɩnga sẽn tõe n kẽ ned pʋgẽ n dẽgem-a ye. Yaa f mengẽ la rẽgda yita n dẽgemd-f. [ ¹⁶ Ned ninga sẽn tar-a tʋb n tõe n wʋm bɩ a wʋm!»] ¹⁷ B sẽn waa n bas nebã n kẽ roogẽ, b karen-biisa sok-b lame n na n bãng b gomda võore. ¹⁸ A Zezi leok-b lame: «Yãmb me yam ket n paooda woto laa? Yãmb ka mi tɩ bũmb ning fãa sẽn zĩnd yɩnga n kẽ ninsaal pʋgẽ ka tõe n dẽgem-a bɩ? ¹⁹ Baad-y bõn-kãng ka kẽed a sũurẽ ye. Bõn-kãng kẽeda a pʋgẽ n yaool n le yi a sã n kẽng we-kɛɛnga.» Woto me la b wilg yã tɩ fãa tõe n yɩɩ rɩɩbo. ²⁰ A Zezi yeelame yɛsa: «Ya bũmb ning sẽn yit ninsaal sũurẽ, yaa bõn-kãng n dẽgemd-a. ²¹ Yaa ninsaal pʋgẽ, yaa a sũurẽ la tʋlg f to ne wẽng yita, n paas yoobo, wagdem, nin-kʋʋre, ²² to pag baoobo, arzɛk wʋsg baoobo, pu-toogo, zãmbo, reem yoodo, sũ-kiiri, to yʋ sãoongo, nagre, yẽs-põasa. ²³ Bõn-wẽens kãensã yita ninsaal sũurẽ la yaa bãmb n dẽgemd-a.» ²⁴ A Zezi yii b sẽn da be zĩig ningã n kẽng Tir tẽnga. B kẽe yir a ye; b ra ka rat tɩ neba bãng ye la b ka tõog n solg b meng ye. ²⁵ B sẽn ta bala, la pag a ye sẽn wʋm b yelle n zoe n wa wõgemd b taoore. Paga bi-pugla la Sʋtãan da kẽ n yãmbe. ²⁶ Pʋg-kãng ra yaa bu-zẽna, Sirofenisi rãmb neda. A kosa a Zezi tɩ b yiis Sʋtãana sẽn da kẽ a bi-puglã. ²⁷ A Zezi ra yet-a lame: «Bas tɩ kamba reng n dɩ n tɩge, tɩ pa segd tɩ b rɩk kamb dɩɩbo n kõ ba-bi ye.» ²⁸ Paga leok-b lame: «Rẽ yaa sɩda, Soaala, la yaa sɩd me tɩ ba-bi wã tõe n dɩgsa dɩ-zeremsã kamba sẽn basd tɩ rʋʋgd tẽngã.» ²⁹ A Zezi yeel-a lame: «Fo gomd kãnga yĩnga bɩ f kẽng tɩ Sʋtãana yiime n bas f biigã.» ³⁰ La paga yikame n kuli, la sɩda, a tɩ mikame tɩ Sʋtãana yiime n bas a bi-pugla t’a gãe a gãag zugu. ³¹ Wẽnd kãnga, a Zezi yii Tir tẽnga n tũud Sidõ soolme, n tees Galile Mogrã, n digd Tẽns piiga sẽn tot taabã. ³² La b sẽn waa n loogdẽ, neb n tall bãad a ye sẽn ya muk la wʋnga n wa b taoore. B kos-b lame tɩ b tẽeg b nug a zugu n sãoog-a. ³³ A Zezi taka bãadã n yi kɛɛnga la b rɩka b nus-bi n tʋm a tʋbẽ la b sɩɩs a zelemdã ne kolkoodo. ³⁴ B naka b neng yĩngri n wẽ siri n yetẽ: «Efata» dat n yeelame: tʋba, pak-y. ³⁵ La vugr bala a tʋba yoogame la a zelemd lakame t’a gomd neere. ³⁶ A Zezi wilg-b lame tɩ b ra gom ne ned ye; la a Zezi sẽn da kos-b bũmb ningã, bãmb pa tõog b noor ye; b da wãgda a Zezi yʋʋr n yɩɩd pĩnda. ³⁷ Neba pɛlens ra yɩgda wʋsgo tɩ b yetẽ: «B sẽn maan fãa yaa sõma: b kɩtame tɩ wʋms wʋmnẽ, tɩ mugs gomda.»

¹ Wakat kãnga neb kʋʋng da leb n tigma taab a Zezi sɛɛgẽ. La b sẽn da ka tar dɩɩb sẽn na n dɩ yĩnga, a Zezi boola b tũud-n-taase, n yeel-ba: ² «Mam zoeta bãndurba nimbãanega. Yãmb ne tɩ yaa rasma a tã rũnna la b be ne maam, la b pa tar dɩɩb n na n dɩ ye. ³ Mam sã n kuls-b woto tɩ b pa rɩ, wʋsg na n paa sorẽ. Bãmb kẽer yii al zĩig sẽn zãrẽ.» ⁴ B karen-biisa leokame: «D na n yãee bur yɛ tɩ sek nin-bãmba, we-raoogẽ ka?» ⁵ A Zezi sok-b lame: «Yãmb tara bur dãmb a wãna?» Tɩ b leoke: «Yaa a yopoe.» ⁶ A Zezi kɩtame tɩ neba fãa zĩnd tẽnga; dẽ marsã la b reeg bur a yopoe wã n pʋʋs bark pʋʋsgo n yaool n wes n kɩs b karen-biisã tɩ b pʋɩ nebã, la b maana boto. ⁷ Kʋɩl-zẽ-bõoneg bilf me n da kete. B ninga rẽ me barka n yet tɩ b pʋɩ nebã. ⁸ Neba fãa dɩɩme n tɩge la b sẽn wʋk girsã b pidsa pet a yopoe. ⁹ Neba sõor da taa tus a naase; la a Zezi yaoolame marsã n kuls-ba. ¹⁰ Dẽ poore, a Zezi ne b karen-biisa le kẽe koglgo n dʋʋg mogrã n kẽng Dalmanuta tẽnga. ¹¹ Farizẽ rãmb waame n wẽ no-koeemd ne a Zezi, la b da kota bãmba bõn-bãn sẽn yit yĩngri n na n ges b sã n sɩd tõeme. ¹² A Zezi wẽe siri n yetẽ: «Bõe yĩng la nin-bãmba kot wẽnd makre? Sɩd-sɩda m yeta yãmba tɩ m pa na n maan wẽnd makr zamaan kãnga neba yĩng ye.» ¹³ A Zezi yikame n bas-ba la b le kẽe koglg yɛsa, n dig rʋʋnde. ¹⁴ Karen-biisã ra yĩmame n pa zɩ bur ye. Da yaa bur a yembr tãa n da be b nengẽ, koglga pʋga. ¹⁵ A Zezi yaool n da sagend-b la woto: «Puk-y y nini la y gũus ne Farizẽ la a Erod kẽedba rabɩlle.» ¹⁶ Tɩ bãmb na n lɛɛg n leok taaba: «Daare yaa d sẽn ka zɩ burã la b gomd woto.» ¹⁷ A Zezi bãngame n yeel-ba: «Yaa bõe tɩ yãmb tagsd tɩ m gomda y sẽn pa zɩ burã? Yãmb ket n pa wʋmd laa? Y pa wʋmd m goama võore? Yãmb sũya bee zond pʋgẽ. ¹⁸ Yãmb tara nini la y ka ne ye, y tara tʋba la y ka wʋmd ye. Yãmb pa le tẽr laa? ¹⁹ Mam sẽn wes bur a nu n kõ neb tus a nu wã, y wʋka gɩrsa pet a wãna?» Tɩ b leok tɩ yɩɩ piig la a yiibu. ²⁰ «Mam sẽn waa n wes bur a yopoe n kõ tus a naasã, yɩɩ pet a wãna la y wʋk gɩrsã?» Tɩ b leoke: «A yopoe.» ²¹ Tɩ b na n yeel-b marsã: «Y yam ket n nan pa vẽnege?» ²² A Zezi ne b karen-biisa taa Bɛtsayid. Beene b talla zoang n wa a Zezi nengẽ la b kos-b lame tɩ b sɩɩs-a ne b nugu. ²³ A Zezi gãda zoanga nugu n tak-a n yi kɛɛnga la b taaga a nina ne kolkoodo. Dẽ poore b tẽega b nus zoanga zugu, n sok-a a sã n nee bũmbu. ²⁴ Zoanga sẽn da sɩng yãeeba, yeelame: «Mam nee neba, mam nee sẽn kẽnda, la wẽnda wa tɩɩse.» ²⁵ A Zezi le sɩɩsa zoanga nini ne b nusi la rẽ poore, a yãee vẽenega la a sɩngame n paam laafi. A ra yãeta bũmba fãa vẽenega la a ra nee yɩɩg me. ²⁶ A Zezi kʋls-a lame n yetẽ: «Da wɩɩg n kẽ tẽnga pʋgẽ meng ye.» ²⁷ Dẽ poore a Zezi ne b karen-biisa rɩka Sezare sore, komber a Filip soolmẽ. A Zezi sok-b la sokr kãnga: «Neba yetame tɩ mam yaa ãnna?» ²⁸ Karen-biisa leok-b lame: «B yetame tɩ yaa Zã ning sẽn da kõta soobã; kẽer me yetame tɩ yãmb yaa a Eli, kẽer tɩ yãmb yaa bãngdba nin-yende.» ²⁹ «La yãmba, yãmb yetame tɩ mam yaa ãnna?» A Piyɛr leok-b lame: «Yãmb yaa Krista, Fãagdã.» ³⁰ La a Zezi kõ-b la noore tɩ b ra sak n gom ne ned bãmb yell ye. ³¹ A Zezi sɩnga b karen-biisa zãmsgo n yeel-b tɩ yaa pakre tɩ Ned Biiga nams wʋsgo; tɩ nin-kẽemba, maan-kʋʋdba kãsẽm dãmba la Sɛb-mitba na n yi-la b poorẽ, n bas tɩ b kʋ-ba, la yaa tɩlɛ tɩ b vʋʋg b kũuma rasma tãab raare. ³² A Zezi wilga bãmb yell kãnga vẽenega neba fãa sʋka. A Piyɛr boola a Zezi n yi kɛɛnga la a sɩngame n zabd ne-ba, n yet tɩ b ra gom woto ye. ³³ A Zezi kedgame n ges b karen-biisã la b zaba ne a Piyɛr: «Kẽng n leb poorẽ, Sʋtãana. Fo tagsgo ka Wẽnnaam tagsg ye, fo tagsda wala ninsaal bala.» ³⁴ B kɩtame tɩ zãma wã ne b karen-biisa kolge tɩ b yeele: «Ned ning fãa sẽn dat-a n tũ maam, bɩ a soab sãbs a menga la a rɩk a pika n pʋg maam. ³⁵ Ned ning sẽn dat-a n fãag a yõore, na m menes-a lame, la sẽn na n menes-a a yõore, maam la Koe-nooga nonglem yĩnga, na n fãag-a lame. ³⁶ Ba ned sã n da tõeẽ n soog dũni wã gilli, rẽnda nafdẽ-la yẽnda wãn-wãna, a sɩɩga yell sã n sãam? ³⁷ Bõe la ned na n dɩk n tek ne a sɩɩgã? ³⁸ Ned ning fãa sẽn zoe-a yãnd ne mam tũudem la m zãmsgo, dũni nin-wẽnsa taoore, Ned Biiga me kõn saag n yeel tɩ b mii yẽ soaba, b sã n wa lɛɛg n wa ne b Ba ziiri tɩ b malɛgs sõma yãagd-b.»

¹ A Zezi ra gomda woto ne nebã: «Sɩd-sɩda mam yeta yãmba, yãmb neb kẽer pa na n ki tɩ b pa yãend Wẽnd Rĩunga sẽn wat ne pãng la ziir ye.» ² Dasem a yoob dẽ poore, a Zezi peega a Piyɛr, a Zak ne a Zã, n yi kɛɛnga, tãn-lug-lug a ye zugu. A Zezi tedga zãng fas bãmb taoore. ³ B futa ra pɩndame la tẽng zug ka, pɛgd-mit zɩ n tõog tɩ fuug paam bãmb dẽnda peelem ye. ⁴ A Eli ne a Moyiiz likame n gomd ne a Zezi. ⁵ T’a Piyɛr na n zẽk a koɛɛg n gom ne a Zezi: «Karen-saamba, tõnd sẽn be ka wã, d sũur yaa noogo. Tõnd na n tii zãn a tãabo: a ye yãmb yĩnga, a yembre, a Moyiiz yĩnga, a yembre, a Eli me yĩnga.» ⁶ Yẽ ra goma woto t’a ra ka mi a sẽn na n yeel bũmb ning ye. Rabeem yõk-b la wʋsgo. ⁷ Sawadg a yembr maasem luda bãmba. La Koɛɛg yii sawadgẽ wã n yetẽ: «Bãmb yaa mam Bi-nongre, bɩ y kelg-ba.» ⁸ B wẽnesame n ges la b pa le yãend ned a to n paas a Zezi ye. ⁹ B sẽn waa n sigd tãngã, a Zezi kõ-b la noore tɩ b ra sak n togs b taabã b sẽn yãend bũmb ninga ye, al tɩ Ned Biiga wa vʋʋg kɩɩms sʋka. ¹⁰ Karen-biisa reega saglgã, n baas n sokd b mense: «Vʋʋg kɩɩms sʋka» sẽn dat n yeel tɩ bũmb ninga. ¹¹ B waa n soka a Zezi woto: «Bõe yĩng la sɛb-mitba yet t’a Eli n na n deng n wa?» ¹² T’a Zezi leok-ba: «Sɩda, a Eli n dengd taoore n lebs bũmb fãa a sõmb zĩigẽ. Maana a wãn tɩ b gʋls marsã Ned Biiga poorẽ tɩ b na n namsame la b na n paama paoogr wʋsgo? ¹³ Mam yeta yãmba t’a Eli zoe n waame, la wala sẽn da gʋlse, neba maana b sẽn dat bũmb ning fãa, ne-a,» ¹⁴ B sẽn leb karen-biis a taaba nengẽ, b yãee zãma kãseng sẽn da tigmi. Sɛb-mitba me ra bee sʋka tɩ ya sogsgo ne sogsgo. ¹⁵ Neba yãenda a Zesi tɩ zĩiga wulumd tɩ ned kam fãa zoet n kolgdẽ n na n pʋʋs-ba. ¹⁶ A Zezi sok-b lame: «Yaa bõe koees la y ra leokd taaba?» ¹⁷ Ned a yembre zĩnda sʋka n yeele: «Karen-saamba, mam talla m biig n wa y nengẽ, la yaa Sʋtãan n be a pʋgẽ n kɩt t’a lebg muka. ¹⁸ Sʋtãana yõkd-a-la a sẽn paamẽ fãa, n lubd-a tẽnga, t’a tãntãmpuuda yita. A kẽrsda a yẽna la a yĩnga fãa tirdame. Mam kosa yãmb karen-biisã la b pa tõog n sãoog-a ye.» ¹⁹ A Zezi leokame: «Kɩɩsdb buudu, m na n paa ne yãmba n ta da-bʋre? M na n tõoga m sũur ne yãmb, n ta da-bʋre? Bɩ y tall y bãadã n wa!» ²⁰ B talla bãadã n wa a Zezi taoore. La Sutãana sẽn yãend a Zezi la a sẽn kɩt tɩ biiga yĩnga vɩgda. Biiga waa n tol n lʋɩɩ tẽnga, n gãe n bilimdẽ la a lasd tãntãmpuudu. ²¹ A Zezi soka biiga ba: «Yaa sẽn ta yʋʋm a wãna la a ya woto?» ²² Tɩ ba wã na n yeele: «Yaa al a yãadme. Naoor wʋsgo Sʋtãana lubd-a-la bugmẽ bɩ koomẽ n dat n kʋ-a. Yãmb sã n tõe bɩ y zoe d nimbãanega la y sõng-do.» ²³ T’a Zezi na n leoke: «Bõe tɩ f yet: sã n tõe? Ned ninga sẽn tẽeda, a sẽn dat fãa pitame.» ²⁴ Tao-tao bala biiga ba mooname: «Mam tẽedame la bɩ y sõng-ma tɩ m tẽeba paoodame.» ²⁵ A Zezi sẽn yãe tɩ neba zoet n watame b tãsa Sʋtãana: «Sʋtãan muk la wʋnga, m kõt-f la noor tɩ f yi bi-kãnga pʋgẽ la f ra leb n kẽ-a yɛs ye.» ²⁶ Biiga ra tara kaasgo t’a yĩnga wils vɩgd ne pãnga tɩ Sʋtãana na n loog n bas-a t’a gãe wa kũum la neba sɩd da gomda woto: «A kiime!» ²⁷ La a Zezi gãda biiga nug n yik-a yĩngri. ²⁸ A Zezi kẽe zakẽ tɩ b karen-biisa na n kolg n sok-ba: «Yaa bõe yĩng tɩ tõnd yẽ pa tõog n yiis Sʋtãana?» ²⁹ T’a Zezi leoke: «Sã n pa ne pʋʋsg bala, Sʋtãan kãnga buud ka tõe n dig ye.» ³⁰ A Zezi yii yirã n pãrgd Galile la b ra pa rat tɩ neba bãng ye. ³¹ Dẽ tɩ b ra tara b karen-biisa zãmsgo la b ra yet-b lame: «Neb na n yõka Ned Biiga la b na n kʋ-a lame. La b sã n kʋ-a, dasma a tãab poore, a na n vʋʋgame.» ³² B ra pa wʋmd b gomda võor ye. La sokr dabeem da tar-b lame. ³³ B taa Kafarnaom, la b sẽn kẽ zakẽ, a Zezi soka b karen-biisã: «Yaa bõe no-koeemde la y da wẽed sora zugu?» ³⁴ Tɩ b fãa sĩnda, tɩ sor zugu b da wẽeda no-koeemde ne taaba n na n bãng bãmb taoor soaba la ãnda. ³⁵ Dẽ la a Zezi zĩnd yã n bool b Tʋʋm-tʋmdb piig la a yiibã n yeel-ba: «Ned sã n dat n yɩ pipi soaba bɩ a pa a taab fãa poorẽ n yɩ a taab fãa sõgne.» ³⁶ Dẽ poore b gãda biig a ye n tak-a n yaas sʋka, n mobg-a la b yetẽ: ³⁷ «Ned ninga sẽn na n sak n deeg bi-bilf a woto mam yʋʋr yĩnga, yaa mam meng la a reeg yã. La ned ning sẽn na n deega maam, pa maam la a soab reegr ye, yaa sẽn tʋm-a maama.» ³⁸ A Zã yeela a Zezi: «Karen-saamba, tõnd yãee ned a ye sẽn digd Sʋtãamba, yãmb yʋʋr yĩnga, la a sẽn pa tũud tõndã, tõnd da rat n dig-a lame.» ³⁹ A Zezi leokame: «Bɩ y ra rig a soab ye tɩ ned pa tõe n maan wẽnd makr mam yʋʋr yĩnga n le wẽneg n gom wẽng mam poorẽ ye. ⁴⁰ Ned ninga fãa sẽn ka-a tõnd bɛ, yaa tõnd zoa. ⁴¹ Ned ning sẽn na n kõ-a yãmb koom ne wamde tɩ y yũ y sẽn kẽed Krista yĩnga, sɩda, mam yeta yãmba tɩ yẽ soab kõn kong a rolb ye. ⁴² La ned ning sẽn na n sãam-a bi-bilf a yembr bal sẽn tar tẽeb sɩɩga, ad-y sãoo ne yẽ soaba, b sã n dɩk bõeensã sẽn bilgd kugr ning n werd zoma n loe a yubla n tus-a n lub mogr pʋga. ⁴³ Fo nug sã n kɩt tɩ f lʋɩ yel-wẽnd pʋgẽ bɩ f fiuug-a tɩ fo sẽn na n kẽ vɩɩm sẽn kõn sɛ pʋgẽ ne nug yende, rẽ sãoo fo sẽn na n kẽ bugum sẽn ka kiid pʋgẽ ne f nus a yiibã. [ ⁴⁴ Be zũnzũur ka kiidi, be bugum me ka kiid ye.] ⁴⁵ Fo naoor sã n kɩt tɩ f lʋɩ yel-wẽnd pʋgẽ bɩ f kʋʋg naoorã, tɩ fo sã n kẽ vɩɩm sẽn kõn sɛ pʋgẽ ne nao yende, sãoo fo sẽn na n lʋɩ bugmẽ ne f naoa yiibu. [ ⁴⁶ Be zũnzũur ka kiidi, be bugum me ka kiid ye.] ⁴⁷ Fo nif sã n kɩt tɩ f lʋɩ yel-wẽnd pʋgẽ bɩ f kɩdg f nifã. Fo sã n kẽ Wẽnd Rĩung pʋgẽ ne nifr a ye, sãoo fo sẽn na n kẽ ne f nin a yiibã bug-toaagẽ. ⁴⁸ Beenẽ zũnzũur pa kiidi, la yaa wakat fãa la bugma me wita. ⁴⁹ Bugma na n kẽe nemsã wala yamsem. ⁵⁰ Yamsem yaa bõn sõngo, la a sã n sãbge, yaa bõe n na n le wa ne a noosem? Tall-y yamsem y pʋsẽ la y vɩɩma ne taab yɩ laafi vɩɩm.»

¹ A Zezi sẽn yi be, b waa Zɩɩda soolmẽ, Zʋrdẽ kʋɩlga rʋʋnde. Be me, zãma tigma b sɛɛgẽ. A Zezi le sɩngame n zãmsd nebã wa rasem kam. ² Farizẽ rãmba kolgame n sok a Zezi: «Rao tara sor n yiis a pag bɩ?» Bãmb da sokda a Zezi pʋto-sokre n dat n fɛɛs-ba. ³ A Zezi leok-b-la woto: «A Moyiiz kõo yãmb no-bʋg yell kãnga poorẽ?» ⁴ Tɩ b yeele: «A Moyiiz kõo sore tɩ b gʋls kãadma welgr sebre la b yaool n yiis pagã.» ⁵ A Zezi leok-b lame: «Yaa y sũura sẽn kɩʋʋlma, la a Moyiiz gʋls no-kãng y yĩnga. ⁶ Dũni sɩngrẽ, Wẽnd n zĩndig rao la paga. ⁷ Yaa rẽ yĩng la rao na n bas a ba la a ma n zĩnd ne a paga, ⁸ la raoã ne pagã na n lebga yĩng a ye. ⁹ Woto yĩnga, Wẽnnaam sẽn lagem bũmb ninga, pa tog tɩ ninsaal welg-a ye.» ¹⁰ A Zezi sẽn waa n le kẽ zakẽ, karen-biisa sok-b-la yell kãnga poorẽ. ¹¹ A Zezi leok b lame: «Ned ning sẽn yiisd-a a paga n le kẽ ne pag a to, yaa yoob la a maanda. ¹² Sã n ya pag n yi n bas a sɩda n tɩ rɩk rao a to, yaa yoob bal la a maanda.» ¹³ Neb wʋsg waa ne b kom-bõonego a Zezi nengẽ n kot-ba tɩ b sak n sɩɩs-ba. La karen-biisa zaba ne-ba. ¹⁴ A Zezi sẽn yãe woto, b sũur puugame tɩ b yeele: «Bas-y kom-bõonegã tɩ b wa mam nengẽ la y ra rig-b ye. Yaa neb niyns sẽn wẽnd-b bãmba n na n soog Wẽnd Rĩungã. ¹⁵ Sɩd-sɩda, mam yeta yãmba tɩ ned ninga fãa sẽn ka reegd-a Wẽnd Rĩunga wala bi-bilfu, a soab kõn kẽ a pʋgẽ ye.» ¹⁶ Dẽ poore, a Zezi mobga kambã, n tik ned kam fãa zug ne b nugu, n ning-b barka. ¹⁷ A Zezi sẽn dɩk sore, la rao a yembre sẽn zoe n seg-ba n wõgemd b taoore, n sokdẽ: «Karen-saamb sõngo, mam na n maana a wãn n paam vɩɩm sẽn kõn sɛ?» ¹⁸ A Zezi yeel-a lame: «Yaa bõe yĩng la fo boond maam tɩ karen-saamb sõngo? Sã n pa Wẽnnaam b ye bala, ned ka be n ya sõng ye. ¹⁹ Fo mii Wẽnnaam noya la: da kʋ ned ye, da yo ye, da zu ye, da kõ kaset ziri ye, da wẽg f to ye, waoog f ba la f ma.» ²⁰ La daoã leokame: «M zu-soaba, mam sɩng n maanda rẽ al m yãadmẽ.» ²¹ A Zezi ges-a-la ne nonglem, n yeel-a: «Bũmb a ye bala n paoog foo marsã: fo sẽn tar bũmb ning fãa, bɩ f rɩk n koos n kõ naong rãmba tɩ f na paam arzɛk arzãnẽ. Dẽ poore, bɩ f wa tũ maam.» ²² La raoã sẽn wʋm woto, a sũur sãamame t’a gãnem a neng n looge t’a ra tara laog wʋsgo. ²³ A Zezi gesa sẽn da be-b bãmb sɛɛgẽ wã la b yeela b karen-biisã: «Wẽnnaam Rĩung pugẽ kõom na n yɩɩ toogo ne neb niyns fãa sẽn tar-b arzɛka!» ²⁴ Gomda yɩka karen-biisa pɛlenga t’a Zezi na n le yeel-ba, n paase: «M kamba, ad-y Wẽnnaam Rĩunga pugẽ kõom na n yɩɩ toogo ne arzɛk rãmba! ²⁵ Yʋgemd sẽn na n tũ supĩim yõore n loog yaa naana n yɩɩd arzɛk soab sẽn na n kẽ Wẽnnaam Rĩungã pugẽ.» ²⁶ Tɩ bãmb na n le yɛɛs n paas la b yet taaba: «Sã n ya woto, ãnda n na n paam fãagre?» ²⁷ A Zezi ges-b-la pem, n yeel-ba: «Yaa toog ne ninsaalba, la ka toog ne Wẽnd ye tɩ bãmb tõee fãa.» ²⁸ A Piyɛr yeela a Zezi: «Ges-y, tõnd basa bũmba fãa n tũ yãmba.» ²⁹ A Zezi leokame: «Sɩd-sɩda, mam yeta yãmba, tɩ ned ning fãa sẽn sak-a n bas a yiri, a yaopa, a tãopa, a ma la a ba, a kamba bɩ a pʋto, mam yĩnga la Koe-nooga yĩnga, ³⁰ yẽ soab na n paama naoor koabga, marsã menga, doto, yaopa, tãopa, ma rãmba, kamba la pʋto. Namsg yẽ na naage, la zamaan ning sẽn pʋgdã, na n yɩɩ vɩɩm sẽn kõn sɛ. ³¹ Wʋsgo sẽn da ya pipi rãmba na n lebga poorẽ dãmba tɩ poorẽ dãmb na n lebg pipi rãmba.» ³² B ra rɩka sor n dabd Zerizalɛɛm. A Zezi meng ra lʋɩɩ bãmb taoore la b fãa ra kẽnda ne pɛlen-yɩka, b fãa ra pʋgda ne yɛɛsgo. A Zezi baka Piig la a yiibã la b sɩngame n wilgd-b yɛl niyns sẽn na n paam bãmb menga: ³³ «Ade, tõnd dabda Zerizalɛɛm la b na n yõka Ned Biigã n kɩs maan-kʋʋdba nanamse la Sɛb-mitba; bãmb n na n kao b kũum bʋʋdo, n bas-b bu-zẽmba nusẽ, ³⁴ tɩ b na n yaal-ba, n sẽnes b neng kolkoodo, n pãb-b ne kaase, n kʋ-ba, la dasma a tãab poore, b na n vʋʋgame.» ³⁵ A Zebede kamba, a Zak la a Zã, kolga a Zezi n yeel-ba: «Karen-saamba, d kotame tɩ y kõ-d d sẽn na n kos-y bũmb ningã.» ³⁶ T’a Zezi yeel-ba: «Yaa bõe la y rat tɩ m maan y yĩnga!» ³⁷ B leokame: «Y zɩɩra zĩigẽ, bɩ y sõng tɩ d nin-yend zĩnd y rɩtgo, t’a to wã zĩnd y goabga.» ³⁸ A Zezi yeel-b lame: «Yãmb pa mi y sẽn kot bũmb ning ye. Yãmb tõe n yũu wamd ning b sẽn na n tugl-ma la y so koom ning b sẽn na n so-ma?» ³⁹ B leok-b lame: «Tõnd tõeeme.» La a Zezi yeel-b lame: «Mam sẽn na n yũ wamd ningã yãmb me na yũ-a. Mam sẽn na n so soob ninga, yãmb me na so. ⁴⁰ La sã n kella mam goabg la rɩtg zĩigã, mam pa tõe n kõ yãmb rẽ ye. Zĩ-kãens yaa b sẽn segl b rãmb yĩnga.» ⁴¹ Tʋʋm-tʋmdb piiga sẽn wʋm a Zak la a Zã goama b sũur puuga ne-ba. ⁴² A Zezi boola bãmb fãa n yeel-ba: «Yãmb miime tɩ bu-zẽmba nanams rɩta naam b soolma rãmb zutu la b nin-bɛda maand-b la pãnga. ⁴³ Pa na n yɩ boto ne yãmb ye, ayoo! Yãmb sʋka, ned sã n dat n lebg nin-kãsenga, bɩ a reng n yɩ yãmb sõgne. ⁴⁴ La ned ninga sẽn dat-a n yɩ pipi soaba, yãmb sʋka, bɩ a soab reng n yɩ yãmb fãa yamba. ⁴⁵ Ned Biiga meng ka wa tẽng zugu n dat tɩ neb maana a yam ye; a waame n na n maan neb a taab yam, la a kõ a meng vɩɩm neb wʋsg fãagr yĩnga.» ⁴⁶ B taa Zeriko. La bãmb sẽn waa n yit be ne b karen-biisã la zãma kãsengã, a Bartime, a Time biiga, sẽn ya zoanga, ra zĩi sora noor n bõsdẽ. ⁴⁷ A sẽn wʋm tɩ b gomd tɩ yaa Nazarɛt Zezi, a mooname: «Zezi, Daviid biiga, zoe-y mam nimbãanega.» ⁴⁸ Neb wʋsg da zabda ne-a, n yet t’a sĩnd a noore. La yẽ da moondame n yɩɩd pĩnda: «Daviid biiga, zoe-y mam nimbãanega.» ⁴⁹ A Zezi yaasame n yeel: «Bool-y zoangã!» Tɩ b bool-a n yeel-a: «Keng f pɛlga, yik tɩ b boond-f lame.» ⁵⁰ La zoanga loba a fuug n wudg n ta a Zezi taoore. ⁵¹ A Zezi sok-a lame: «Fo ratame tɩ m maan-f bõe?» Tɩ zoanga yeele: «Karen-saamba, sõng-y tɩ m nina puki!» ⁵² La a Zezi yeel-a lame: «Bɩ f kẽng tɩ f tẽeb fãag-f lame.» La tao-tao bala, a nina pukame, t’a ra tũud a Zezi.

¹ B sẽn waa n kolg Zerizalɛɛm, Bɛtfaze la Betani sẽn ta la bala, Oliviye tãnga pennẽ, a Zezi tʋma b karen-biis a yiibu. ² B yeel-b lame: «Bɩ y kẽng tẽng ning sẽn tond y taoorã; y sã n ta, y na n yãe bõn-bil sẽn loe; ned ba a ye nan pa zomb-a ye. Bɩ y lok-a n wa ne. ³ Ned sã n yeel yã: ‹Yaa bõe la y maand woto?› bɩ y yeel: ‹Yaa Soaala n tar a tʋʋmde, la a na bas-y tɩ y wa ne a.› » ⁴ B kẽngame la b yãee bõn-bil sẽn loe, yir sɛɛgẽ la sor noore, la b lok-a lame. ⁵ Neb niyns sẽn da pẽ-ba sok-b lame: «Yaa bõe yĩng la y lokd bõn-bilã?» ⁶ Karen-biisa leokame wala a Zezi sẽn togs bãmbã la neba bas-b lame tɩ b looge. ⁷ B talla bõangã n wa a Zezi nengẽ, b palga bõangã b futu, t’a Zezi yaool n zomb-a. ⁸ Neb wʋsg yɛdga b fut sora zugu la kẽer me kɛɛ vãad, pʋtẽ, n gãneg sorã. ⁹ Neb niyns sẽn da lʋɩ-b a Zezi taoore la sẽn da pʋgd-b poorẽ, fãa ra moondame: «Kilill! Sẽn wata Soaala yʋʋr yĩnga paam barka! ¹⁰ D kils naam sẽn wate, d kils d ba a Daviid Naama! Kilill, Yĩngr soaba paam pẽgre!» ¹¹ A Zezi kẽe Zerizalɛɛm, wẽnd dooga pʋga, b gesa bũmb ning fãa sẽn da be wẽnd doogẽ wã, la zĩig sẽn da zoe n sɩng sobgr yĩnga, b yii ne b Tʋʋm-tʋmdb piig la a yiibã n dɩk Betani sore. ¹² Beoog sẽn vẽege, t’a Zezi yit Betani, tɩ kom tar-ba, ¹³ b yãee kankang a yembr yɩɩg ne vãado; b kolgame n na n ges b kõn yãend kankam a zugu. B sẽn ta, b pa yãend bũmb sã n pa vãad bala. Da pa kankam wakat ye. ¹⁴ A Zezi goma ne kankangã: «Dũnna tɛka ned ba a ye kõn le rɩ fo biig ye.» La b Tʋʋm-tʋmdba ra kelgdame. ¹⁵ A Zezi sẽn yi Betani n ta Zerizalɛɛm, b le kẽe wẽnd doogẽ wã, la b sɩngame n digd neb niyns sẽn da be-b be n koosdẽ bɩ n daad teedo. B rɩg-b-la fãa n yiis yɩnga. B tusa ligd tɛkdba teedo n lubi, la b luba wal-koaasdba me goeelse. ¹⁶ La b ra pa sakd tɩ b tʋk bũmb n tũ wẽnd doogẽ wã n loog ye. ¹⁷ B ra zãmsda nebã n yet-b woto: «B pa gʋls tɩ dooga yaa pʋʋsg roog Adem biis fãa yĩng bɩ? La yãmb dɩka mam doogo n maand wagdb solgr zĩiga.» ¹⁸ B rɩka b goama n taas maan-kʋʋdba nanamse la Sɛb-mitba la bãmb ra baooda b sẽn na n maan bũmb ning n sãam a Zezi yelle. Bãmb da zoeta a Zezi tɩ neba ra pẽgda b zãmsgo. ¹⁹ Zaabr sẽn waa n ta, a Zezi yii tẽngã. ²⁰ Yibeoogo b le rɩka b zaamẽ sorã la b mikame tɩ kankanga kʋɩɩ yĩngr n tãag tẽnga. ²¹ A Piyɛr tẽega a Zezi goama n yeel-ba: «Soaala, yãmb sẽn kãab kankanga wẽngã, ad-a kiime!» ²² A Zezi leokame: «Bɩ y tẽ Wẽnnaam. ²³ Sɩd la m sẽn yet yãmbã: ned ning sẽn na n yeel-a tãn-kãnga: ‹Yɩk n tɩ lʋɩ mogra pʋga,› sãmbg sã n ka be a sũurẽ, a sã n tar tẽebo, t’a sẽn yeela na n taasame, sɩd yita boto a yĩnga. ²⁴ Yaa rẽ yĩng la mam yet yãmba tɩ y sẽn na n pʋʋs n kos bũmb ning fãa, bɩ y tẽ tɩ y zoe n paam-a lame, la na n yɩɩ boto. ²⁵ Yãmb sã n yɛs yĩngr n pʋʋsdẽ tɩ bũmb be yãmb ne y to sʋka, bɩ y kõ sugri tɩ woto, yãmb Ba ning sẽn bɛ-a arzãna me na kõ-y sugri. [ ²⁶ Y sã n ka bas taale, y Ba sẽn be arzãna me kõn bas taal ye.]» ²⁷ A Zezi ne b karen-biisa le waa Zerizalɛɛm la b sẽn waa n kẽnd wẽnd dooga pʋga, maan-kʋʋdba la Sɛb-mitba ne karen-saam-dãmba waame ²⁸ n yeel-ba: «Yãmb sẽn maand bũmb niynsã, ãnda n kõ y sore?» ²⁹ B leok-b lame: «Ma me na reng n sok yãmb bũmb a yembre bala, la yãmb sã n leok-ma, m na yaool n togs m tõoga sẽn yit zĩig ninga. ³⁰ Leok-y-ma, a Zã sooba poorẽ, ra yita Yĩngri Soaba nengẽ bɩ a ra yita ninsaal nengẽ?» ³¹ La ad-b sẽn da tagsd b yamẽ: «Tõnd sã n yet t’a Zã sooba yita Wẽnnaam nengẽ, a na n wẽneg n leok-d lame: ‹Bõe yĩng tɩ yãmb pa tẽ a Zã?› ³² La d kõn saag me n yeel t’a yita ninsaal nengẽ ye.» B ra zoeta zãma wã. Neba fãa da tẽedame t’a Zã sɩd yaa bãngda. ³³ Woto wã, b kong n yeela a Zezi: «Tõnd ka mi ye.» T’a Zezi me na n yeel-ba: «Ma me kõn wilg yãmba m tõoga sẽn yit zĩig ning ye.»

¹ A Zezi sɩngame n gomd nebã ne yelbũna: «Ned a ye n da sel a bugsuntun-sõngo, n wẽ yãgr n gũbg-a, n me gũudb roogo, n maaneg tɩ-biisa wẽkr zĩiga. Dẽ poore a gũnug-a la neba n bas n tog sore. ² Bõn-bɩʋʋng sẽn waa n ta, yẽ tʋma a rakõor a ye gũudba nengẽ t’a tɩ reeg a pʋɩɩr n wa kõ-a. ³ Neba yõka rakõorã n pãb-a, n yaool n dig-a t’a kul zaalem. ⁴ A tʋma rakõor a to yɛs b nengẽ. B wẽe yẽ zugu, n yaal-a wʋsgo. ⁵ A le tʋma rakõor a tãab soaba, la b kʋʋ yẽnda. Dẽ poore, b namsa rakõap wʋsgo la b kʋʋ kẽere. ⁶ Pʋʋga soab meng bi-yend bala n da kete, la a tʋma bi-kãng n yetẽ: B na yaa n deeg m meng biigã ne waoogre wɛ! ⁷ Gũudba yeela taaba: Yaa yẽ la bi-kẽengã, yẽ n na n soog a ba laoga fãa. Wa-y tɩ d kʋ-a, tɩ sã n ya woto, tõnd na soog a laogã. ⁸ B sɩd kʋ-a lame la b lob-a la yɩnga, yãgra poore. ⁹ Pʋʋga soab na n maana a wãn ne nin-kãensã? A na n waame la a na n kʋʋ gũudbã la a bao neb a taab n gũnug a pʋʋgã. ¹⁰ Yãmb pa karem kibar kãnga sebr sõng pʋgẽ sɩda? Tãn-metba sẽn zãgs kugr ningã, yaa yẽ n lebg rooga kug ma. ¹¹ Yaa Soaala n tʋlg t’a lebg boto, a lebga pẽgr bũmb tõnd nifẽ.» ¹² Maan-kʋʋdba la Sɛb-mitba ra baoodame n na n yõk a Zezi la b ra zoeta zãma wã rabeem. B ra mii neer tɩ yaa bãmb yĩng la a Zezi wẽ yelbũnd kãnga. La b basa a Zezi n looge. ¹³ B tʋma Farizẽ rãmb la a Erod kẽedba tɩ b maan dabaare n yõk a Zezi b goam pʋgẽ. ¹⁴ Bãmb waa a Zezi nengẽ n sok-ba: «Zu-soaba, tõnd miime tɩ yãmb yaa sɩd soaba. Yãmb pa zoet ned nifu la y togs sɩd ye. Yãmb pa get ned neng la y yaool n kao bʋʋd ye. Yaa ne sɩd la yãmb zãmsd Wẽnnaam sore. La d dat n sok-y lame: Segdame tɩ tõnd yao yõor yaoodã bɩ pa segde? Yaa modgr ne tõnd bɩ pa modgre?» ¹⁵ A Zezi sẽn bãng b zãmbã, yeel-b lame: «Yaa bõe tɩ y rat n zãmb maam? Tall-y wakɩr a yembre n wa ka tɩ m gese.» ¹⁶ B sɩd tall n waame. La a Zezi yeel-b lame: «Yaa ãnda nenga la ãnda yʋʋre la b gʋls a zugu?» ¹⁷ Tɩ b leoke: «Yaa Rom naab dẽnna!» T’a Zezi na n yeel-ba: «Bɩ y kɩs Rom naab a sẽn so la y kõ Wẽnd me b rẽnna.» La leokr kãng yɩka b fãa pɛlense. ¹⁸ Saduseẽ rãmb me waa a Zezi nengẽ, bãmb da yetame tɩ kũum ka tõee n vʋʋg ye. ¹⁹ Bãmb n sok a Zezi: «Soaala, a Moyiiz ra kõo tõnd noor kãnga: ‹Ned yao bɩ a kẽem sã n ki n bas pag sẽn pa rog biiga, pakr ne kẽema bɩ ne yao wã tɩ b rɩk pʋg-kõorã n dog biig n kõ sẽn ki-a wã.› ²⁰ La ade, neb a yopoe n da ya ba-biisi la ma-biisi. Kẽema yii kãadem ne paga, la a kiime n bas pagã n ka paam biig ye. ²¹ Kãsem-pʋgdgã rɩka pagã la yẽ me kiime n pa tol n paam biig ne-a ye. ²² A tãab soaba la sẽn pʋg-ba fãa kẽe kãadem ne pagã; bãmb ned ba a ye ka paam biig ne-a ye. Bãmb fãa kũum poore la paga meng yaool n ki. ²³ Vʋʋgr wakato, bãmb fãa sã n vʋʋge, yaa ãnda n na n soog pagã? Yẽ yɩɩ bãmb b yopoe wã fãa pag la.» ²⁴ La a Zezi leok-b lame: «Bũmb a to ka wa ne y tudgri n zʋʋg y sẽn ka mi Sebr sõng la Wẽnnaam pãnga ye. ²⁵ Vʋʋgr wakato, neb sã n vʋʋg n sɛ, b pa le baood pag bɩ sɩd yɛs ye, b vɩɩ wa malɛk rãmb sẽn vɩ arzãnẽ. ²⁶ La sã n ya kũum vʋʋgr poorẽ, yãmb pa karem a Moyiiz sebr pʋgẽ, Wẽnnaam sẽn gom ne a Moyiiz tʋgr pʋga n yetẽ: ‹Maam la a Abraam Wẽnnaam, a Izaak Wẽnnaam, a Zakoob Wẽnnaam bɩ?› ²⁷ Woto wã b pa kɩɩms Wẽnnaam ye, b yaa nin-vɩɩs Wẽnnaam. Dɩlla yãmb tudga wʋsgo.» ²⁸ Sɛb-mit a yembre sẽn wʋm Saduseẽ rãmba sokre, la a Zezi leokr sẽn yɩ neer yĩnga, yẽ me kolga a Zezi n sok sokr kãngã: «Wẽnnaam noya sʋka, yaa bʋg la pipi soaba?» ²⁹ A Zezi leok-a lame: «Pipi soab la woto: ‹Israyɛl, kelg Soaala sẽn ya tõnd Wẽnnaam, bãmb b ye bala la Wẽnde. ³⁰ Nong f Wẽnnaam, f Soaala ne f sũur fãa, ne f sɩɩg fãa la ne f pãng fãa.› ³¹ Noor a yiib soaba la woto: ‹Nong f to n wẽnd f menga.› Wẽnnaam noor a to ka be n yɩɩd bãmb b yiiba ye.» ³² Sɛb-mita yeelame: «Yãmb sẽn togsã yaa sɩda, Wẽnnaam yaa b yembr bala la sẽn yɩɩda bãmb ka ye. ³³ Ned sã n nong bãmb ne a sũur fãa, ne a yam fãa, ne a pãng fãa, la a sã n nong a to wala a menga, rẽ yɩɩda maanda fãa gilli.» ³⁴ A Zezi sẽn yãe t’a leokra zemsame yĩnga, b yeel-a lame: «Fo pa zãr ne Wẽnd Rĩung ye.» Ned ba a ye pa le saag n sok bãmb yɛs ye. ³⁵ A Zezi ra ket n zãmsda neba wẽnd doogẽ la b zẽka b koɛɛg n yeele: «Yaa bõe yĩng tɩ Sɛb-mitba yet tɩ Krista yaa a Daviid biiga? ³⁶ A Daviid meng ra pa yeel ne a Vʋʋsem Sõng Vẽenem: ‹Zu-soaba yeela m Soaala: Zĩnd mam dɩtgo al tɩ tol ta m sẽn na n kɩte tɩ f tab f bɛɛba ne f nao.› ³⁷ A Daviid meng sã n boond bãmb t’a Soaala, b na yɩɩ wãna n le ya yẽ biig yɛsa?» Neb wʋsgo da kelgda b goama ne sũ-noogo. ³⁸ A Zezi zãmsga pʋgẽ, b ra yeta nebã: «Bɩ y gũus ne Sɛb-mitbã. Bãmb nonga b na yeelg fu-wogd wẽnd doogẽ, b nongame tɩ neb pʋʋs-b soy zutu, ³⁹ b baooda waoogr zĩis wẽnd dotẽ la rɩɩb rotẽ. ⁴⁰ B sɛta pʋg-kõap arzɛka. B nongame n pʋʋs pʋʋs wogdo. Bãmb sɩbgr n na n yɩ toog n yɩɩda.» ⁴¹ A Zezi da zĩime tɩ b neng tees ligda ningr zĩiga la b ra geta neb wʋsgo sẽn da ningd ligd zĩ kãnga. Arzɛk rãmba ra kõta wʋsgo. ⁴² Pʋg-kõor a yembr sẽn da ya naong soab waame la yẽ me ninga ligdi sẽn zems ne a paoongo. ⁴³ A Zezi boola b Tʋʋm-tʋmdba n yeel-ba: «Sɩd-sɩda mam yeta yãmba tɩ pʋg-kõor kãnga ninga ligd wʋsgo n yɩɩd sẽn ning-ba fãa. ⁴⁴ Bãmb fãa sẽn ningã, yaa b sẽn pa tar ligd ning tʋʋmde la b ning yã la pʋg kãnga sẽn ya naong soaba, yẽ ninga a sẽn da tar fãa, a sẽn teeg bũmb ning n na n vɩɩnde.»

¹ A Zezi sẽn yi wẽnd doogẽ wã la karen-biig a ye sẽn yeel-ba: «Soaala, ges-y rooga kugã la a meebã.» ² A Zezi yeel-a lame: «Fo geta wẽnd dooga meeb sẽn ya neer wʋsga laa? Ad kugr ba a ye ka na n kell a to zug ye, bãmb fãa na n viigame!» ³ A Zezi sẽn ta Oliviye Tĩngla zugu, b zĩndame tɩ b neng get wẽnd doogã. Wakat kãnga a Piyɛr ne a Zak n paas a Zã ne a Andre sẽn mik tɩ ned a to ka be ne bãmba, b yeela a Zezi: ⁴ «Bɩ y togs tõnd yell kãnga sẽn na n taas wakat ninga la bũmb ning sẽn na deng n maan dũni sɛɛb wakato.» ⁵ A Zezi leoka b karen-biisã: «Bɩ y gũus tɩ b ra tudg yãmb ye. ⁶ Neb wʋsg na n waa mam yʋʋr yĩnga n yetẽ: ‹Yaa maam la Krista,› la b na tudga neb wʋsgo. ⁷ Yãmb sã n wʋm tɩ b gomd zabr yelle, bɩ y sã n wʋma zabr rãamde, bɩ y ra zoe rabeem ye. Rẽ fãa na n deng waame la nan ka dũni sɛɛb ye. ⁸ Buud a yembr neba na n maana zabre ne bu-zẽnd dãmba, soolem a ye rãmba na n yika zabr ne soolm a to neba. Zĩis kẽere tẽnga na miimame; kom na n zĩnda wakat kãnga, bɩ y bãng tɩ rogma waasg n sɩnge. ⁹ Gũus-y y mense. B na yõka yãmb n kẽng bʋ-kaoodba nengẽ; b na n pãba yãmb ne kaase karen-dot pʋsẽ; b na n talla yãmb n kẽng tẽnga nanams la dĩm dãmb taoore, la b na n kẽes-y la bʋʋdo, y sẽn tũud maama poorẽ. ¹⁰ La yaa modgr tɩ Koe-nooga reng n moon zĩis fãa tɩ neba wʋm-a. ¹¹ B sã n wa yõg yãmba n kẽng bʋ-kaoodb taoore, bɩ y ra bʋ y sẽn na n leok bũmb ninga poorẽ ye. Bũmb ning sẽn na n wa yãmb yamẽ wakat kãnga, yaa bõn-kãng la y na n leoke. Pa yãmb mens n na n gom wakat kãng ye, yaa a Vʋʋsem Sõng n na n gom yãmb zĩigẽ. ¹² Ned na n yõka a ba-biig n kɩs tɩ b kʋ, tɩ ba na n kɩs a biiga, tɩ kamb na n kɩs b ba rãmba tɩ b kʋ. ¹³ Mam yĩnga, neb fãa na n kisga yãmba. La ned ning sẽn na n tall a tẽeb kẽnkẽ n ta namsga tɛka, yẽ soab na n fãaga a menga. ¹⁴ Yãmb sã n yãend yel-yooga sẽn wat ne Sũ-sãang kãsenga zĩig ninga a sẽn pa tog n zĩndĩ, ned ninga sẽn karemd-a bɩ a wʋme. Neb niyns sẽn be-b Zɩɩde tẽns pʋsẽ wakat kãnga, bɩ b zoe n dʋ tãmsã. ¹⁵ Sẽn zao-a gaosg zug wakat kãng bɩ a soab ra sig ye, ¹⁶ a ra kẽ a roogẽ n dɩk bũmb ye. Ned ninga sẽn be-a pʋʋgẽ wakat kãng bɩ a ra le wa yir n bao fuug ye. ¹⁷ Yell na pak tʋtr-pʋs la sẽn yẽsemd-b kamb wakat kãnga. ¹⁸ Bɩ y pʋʋs tɩ yell kãnga ra seg waood wẽnd ye. ¹⁹ Da kãens toolem na n yɩɩga toolem buud fãa. Al dũni sɩngre n ta marsã, b nan pa yãend a taar ye la b kõn le yãend me ye. ²⁰ Wẽnnaam sã n da pa woogẽ dasem kãens sõore, ned ba a ye kõn tõogẽ n põs ye. ²¹ La nin-sõma yĩnga, Wẽnnaam sẽn tũus b rãmba yĩnga, b sõora woogame. Ned sã n yeel yãmb wakat kãnga: ‹Ad Krista bee ka; wa-y tɩ b bee kaalẽ,› bɩ y ra tẽ a soab goam ye. ²² Zirẽ-be-neba, zirẽ-be-bãngdba na n zĩnda wʋsg wakat kãnga. B na n maana bõn-bãna la makr dãmb wʋsgo n tudg nin-sõma wã menga sã n da tõeẽ. ²³ Sã n ya yãmba, gũus-y y mense, tɩ m deng n wilga yãmb dẽ fãa tɩ nan ket n zãr. ²⁴ Dasem kãense, sũ-beed kãsenga sã n wa looge, wĩntoog bugum na n kiime, kiuug kõn le kõ vẽenem yɛs ye. ²⁵ Ãds na n vigsame n dʋʋge, la yĩngr pãensa fãa na menemame. ²⁶ Wakat kãnga b na yãe Ned Biiga sẽn zom sawadgo n wat ne pãng la zɩɩr kãsenga. ²⁷ B na n yaoolame marsã n tʋm b malɛgse tɩ b saag zĩis fãa n tigim b nin-sõma sẽn be ween-vɩɩs a naasã, tẽnga la saaga sẽn singd zĩig ninga n tãag b sɛtmẽ. ²⁸ Bɩ y rɩk kankang makre. Yãmb sã n mik t’a tãood wil poala la a tobd vãado, y miime tɩ tʋʋlg wẽnd kolgame. ²⁹ Woto-me yãmb sã n wa yãe mam sẽn gom bũmb niynsa fãa taasgo, bɩ y bãng tɩ wakat taame. ³⁰ Sɩd-sɩda m yeta yãmba: dũni kãnga neb kõn loog zãnga tɩ mam sẽn togsa ka taas ye. ³¹ Yĩngr la tẽng na n loogame la mam goama kõn loog ye. ³² Sã n yaa daara taki wã, ned ba a ye ka mi ye. Malɛk rãmb sẽn be yĩngr ka mi ye. Ned Biiga me ka mi daar kãng ye. Yaa Ba n mi bala. ³³ Gũus-y wakat fãa la y ra bao vʋʋsg ye tɩ yãmb ka mi wakat kãng taab daar ye. ³⁴ Yaa wa ned sẽn togd sore n bas a yir gũudem ne a sõgen-kamba. A kõo bãmb tõogo tɩ b yõdg n ges bũmba fãa la b kõo ned kam fãa a tʋʋmde a sẽn na n yõdg n maan. A yeela dig noora gũuda t’a yõdg n gũ neere. ³⁵ Yãmb me, gũus-y tɩ y pa mi yir soab waoong wakat ye. A na n waa yʋn-sʋka, tõd-beoogo, no-raoog kɛlenga, bɩ yibeoogo, y ka mi ye. ³⁶ A sẽn na n wa wakat ning fãa, sõng-y t’a ra mik tɩ y gõeeme ye. ³⁷ M sẽn gomdã yaa yãmb fãa la m gomd ne: gũus-y.»

¹ Da keta rasma a yiib bala tɩ bur sẽn pa le ningd bɩlle la Pak kibs ta. Maan-kʋʋdba kãsem dãmba la Sɛb-mitba fãa baoo b sẽn na n maan toto n yõk a Zezi n kɩt tɩ b kʋ-ba. ² B ra yeta taaba: «D da saag rẽ Kibsa raare tɩ tẽnga tõe n wa wulumda me.» ³ A Zezi da bee Betani, wãoor a yembre sẽn boond t’a Simo zakẽ, n dɩtẽ. Pag a ye waa zakẽ be ne kug peesem yʋbl pɛɛlga. Yʋbla ra pida ne yũ-noog ka-neem sẽn daad toogo. Paga wãaga yʋblã n daag kaama a Zezi zugu. ⁴ Rẽ puuga neb wʋsg sũuri tɩ b ra gomd ne taaba n yetẽ: «Yaa bõe yĩng tɩ b sãamd yũ-noog kaam a woto? ⁵ B ra tõe n koosa kaama n paam wakɩ koeems kobs-tã n dɩk n kõ naong rãmba.» ⁶ B ra pa gomd noog ne paga ye. A Zezi yeel-b lame: «Bas-y paga laafi. Yaa bõe yĩng la y sãamd y sũuri? A tʋma tʋʋmd sõngo mam yĩnga. ⁷ Naong rãmb na n kell n zĩnda yãmb sʋk daar fãa. Y sẽn dat wakat ning fãa, y na tõog n sõng-ba. La sã n ya maam, mam pa na n zĩnd ne yãmb daar fãa ye. ⁸ Pʋg kãnga maana a sẽn da tõe n maan bũmb ninga. A sẽn zɛ mam yĩnga ne kaama, a zoe n beoolame n segl m mumbu. ⁹ Sɩd-sɩda mam yeta yãmb tɩ dũni wã fãa pʋgẽ, b sẽn na n togs Kibar nooga zĩig ning fãa, b na gom pʋg kãnga sẽn maana me yelle.» ¹⁰ Dẽ poore, piig la a yiiba nin-yend sẽn boond tɩ Zɩɩda, Iskariyot tẽng neda, kẽngame n tɩ yẽs ne maan-kʋʋdba nanamse n yet t’a na yõk a Zezi n kõ-ba. ¹¹ B sẽn wʋm woto, b sũur yɩɩ noog wʋsgo tɩ b kãab-a ligdi. A Zɩɩda ra baooda marsã, wakat ning a sẽn na n yõk a Zezi. ¹² Bura sẽn pa le ningd bɩlla sɩngr daare, pe-bila kʋʋb daare, karen-biisa soka a Zezi: «Yãmb datame tɩ d segl pak rɩɩb yɛɛlẽ?» ¹³ A Zezi tʋma bãmb neb a yiibu: «Kẽng-y tẽnga pʋgẽ tɩ y na seg rao a ye sẽn zɩt yʋʋre ne koom. ¹⁴ Bɩ y pʋg-a n kẽ a sẽn na n kẽ zĩig ningã la beene, y na yeel zaka soaba: ‹Soaala n tʋm tõndo tɩ d wa sok yãmba n ges yaa do-bʋgo la b na n paam n dɩ pak rɩɩbo ne b karen-biisã?› ¹⁵ A na n wilg-y-la do-kãsenga sẽn dog a to zugu la sẽn be neere. Do-kãng pʋg zoe n manegame n sɛ. Segl-y paka rɩɩb be.» ¹⁶ Sẽn tʋm b rãmba yii n loogame la b yãee fãa w-a a Zezi sẽn pĩn n togsã la b segla paka rɩɩbo. ¹⁷ Zaabr sẽn ta, a Zezi waa ne b Tʋʋm-tʋmdb piig la a yiibã. ¹⁸ B sẽn waa n dɩtẽ, a Zezi yeel-b lame: «Ade m yeta yãmba tɩ yãmb nin-yend n na n zãmb maam. Yẽ soab rɩta ne maam marsã.» ¹⁹ Bãmb fãa ra zĩi ne sũ-sãanga la ned kam fãa ra sokdame: «Soaala, yaa maam bɩ?» ²⁰ A Zezi yeel-b lame: «Yaa yãmb piig la a yiibã nin-yende, yaa ned sẽn naaga maam n tʋmd a nug laagẽ. ²¹ Ned Biiga sɩd na n looga wa b sẽn da pĩnd n gʋls a poorẽ, la yell na pak Ned Biiga zãmbdã. Nin-kãng sã n da pa rogẽ n são.» ²² B sẽn waa n dɩtẽ, a Zezi rɩka bur n ning-a barka n wes n pʋɩ b karen-biisã n yetẽ: «Deeg-y tɩ woto yaa mam yĩnga.» ²³ B rɩka laog neere ne rãam n pʋʋs bark pʋʋsgo n yaool n dɩk n kõ-ba. Ned kam fãa reegame n yũ. ²⁴ A Zezi yaool n yeel-b lame: «Woto yaa m zooda zɩɩm, Zooda sẽn yõg ne zɩɩma m sẽn daag neb fãa yĩnga. ²⁵ Sɩd-sɩda mam yeta yãmba tɩ m kõn leb n yũ bugsuntung sõng biis rãam n tol n ta raar ning m sẽn na n leb n wa yũ a rã paalga Wẽnd Rĩunga pʋga.» ²⁶ B sẽn yɩɩl bark yɩɩl n sɛ, b yiime n dɩk Oliviye tãng sore. ²⁷ A Zezi waa n yeel-b lame: «Yãmb fãa na n basa raood ne mam pʋgbo tɩ b gʋlsame: M na pãba pe-kɩɩma la pe-yãansa na n sẽegame. ²⁸ La m sã n wa vʋʋge, m na reng yãmb Galile.» ²⁹ T’a Piyɛr na n leok-ba: «Ba m taaba fãa sã n na kɩɩs tɩ b ka mi yãmba, kõn yɩ maam ye.» ³⁰ A Zezi yeel-a lame: «Sɩd la m sẽn yet fooma: yʋnga bala no-raoog kõn kelem naoor a yiibu tɩ foom, a Piyɛr, pa kɩɩs naoor a tã tɩ f ka mi-m ye.» ³¹ La a Piyɛr le yeela ne pãnga n yɩɩd pĩnda: «Ba m na naag yãmba n ki, m kõn yeel abada tɩ m ka mi yãmb ye.» La karen-biis a taaba me yeela wa a Piyɛr. ³² B taa zĩig a ye sẽn boond tɩ Zɛtsemani la beene a Zezi yeela b karen-biisã: «Zĩnd-y ka tɩ m zãag n pʋʋs la m wa.» ³³ B peega a Piyɛr, a Zak ne a Zã n zãag bilfu. Wakat kãnga sũ-sãang la yɩɩr yõk-b lame. ³⁴ Dẽ la b yeel b karen-biisã: «Sũ-sãang n tar maam la sũ-sãanga seka m kũum. Bɩ y zĩnd ka la y ra gũs ye.» ³⁵ B zãaga bilfu n lʋɩ tẽng n sɩng pʋʋsgo, n kotẽ tɩ namsga wakata zãag ne-ba, sã n tõe. ³⁶ B ra pʋʋsda woto: «M Ba, bũmb ka be n ya toog ne yãmb ye. Y sã n dat bɩ y zãag namsg kãnga ne maam, la baasg fãa, bɩ y maan y sẽn dat la y ra tũ mam daab ye.» ³⁷ Dẽ poore b le waa b karen-biisa nengẽ la b mikame tɩ b gõe. A Zezi neka a Piyɛr n yeel-a: «Piyɛr, fo gõeeme laa? Fo ka tõe f meng wakat a ye pʋgẽ bal n ka gũsi? ³⁸ Bas-y gõeem la y pʋʋse n da wa lʋɩ kʋɩɩbg pʋgẽ ye. Ninsaal wɩɩda pãng a raabẽ, la yĩngẽ wã, a pãng paooda.» ³⁹ B leba b pʋʋsga zĩigẽ la b pʋʋsame n le togs pĩnd goama. ⁴⁰ B sẽn le lɛɛg n wa karen-biisa nengẽ, b le mikame tɩ b ket n gõe. Gõeem da tar-b la wʋsgo la b ra ka mi b sẽn leokd bũmb ning ye. ⁴¹ A Zezi le waa b nengẽ naoor a tãab soaba la b yeel-b lame: «Y sã n dat bɩ y gũs marsã la y vʋʋse tɩ fãa sɛɛme. Wakata taame; yaa marsã la b na n yõk Ned Biiga n kɩs yel-wẽn-maandba. ⁴² Aya! Yik-y tɩ d loog tɩ sẽn na n zãmba Ned Biiga kolgame.» ⁴³ A Zezi da ket n gomdame t’a Zɩɩda wẽneg n ta ne neb ka tɛk sẽn zãad sʋʋs la rasaba. Yaa tẽnga kãsem dãmba la maan-kʋʋdba nanamse n da tʋm-ba. ⁴⁴ Zãmbda ra pĩnd n kõ-b la makre: «Mam sẽn na n mobg ned ningã, yaa yẽ, bɩ y yõk-a la y tall-a ne gũusgu.» ⁴⁵ A Zɩɩda sẽn ta bala, a wẽneg n kolga a Zezi n yetẽ: «Soaala, m pʋʋsda yãmba.» La a mobg-b lame. ⁴⁶ La neba yõka a Zezi. ⁴⁷ Ned a yembr sẽn da be a Zezi sɛɛgẽ wõoga a sʋʋga n kɛ maan-kʋʋd kãsenga sõgen tʋbre n fiuugi. ⁴⁸ La a Zezi goma ne nebã n yetẽ: «Yãmb waa ne sʋʋse n na n yõk maam, wala mam yaa so-gɩta. ⁴⁹ Daar fãa mam da bee wẽnd doogẽ n zãmsd neba, la yãmb pa yõk maam wakat kãng ye. Dẽ fãa yaa sẽn na yɩla tɩ bãngdba gʋlsg tõog n taase.» ⁵⁰ Wakat kãnga karen-biisa fãa basa a Zezi n zoe. ⁵¹ Bi-bɩɩg a yembr n da pʋgd a Zezi. Yaa fu-goabg bal la a ra pil yã. Tãb-biisa sẽn yõk-a, ⁵² a fãagame n zoe a bɩlgemde, n bas fu-goabga bãmb nusẽ. ⁵³ B talla a Zezi n kẽng maan-kʋʋd kãseng yiri. Maan-kʋʋdba nanamse, tẽnga kãsem-dãmb la Sɛb-mitba fãa ra tigma be. ⁵⁴ A Piyɛr pʋg-b la yɩɩga n wa tol n kẽ kãsma zakẽ n tɩ zĩ ne tãb-biisã n woot bugum. ⁵⁵ Maan-kʋʋdba nanamse la tẽnga kãsem dãmba ra baooda yell sẽn na n dogl a Zezi zugu n yaool n tõog n kao b kũum bʋʋdo, la b ra pa yãet fɩ. ⁵⁶ Kaset-zirẽ dãmb wʋsg waa be, la b toagsga ra pa segd taab ye. ⁵⁷ Neb kẽer yikame n yagd zirẽ n yetẽ: ⁵⁸ «Tõnd wʋma a sẽn yeele: mam na n wãa wẽnd do-kãnga, neb nus sẽn me, la dasma a tãab pʋgẽ bala m na lebs n me a to sẽn pa na n yɩ ninsaal nug tʋʋmd ye.» ⁵⁹ Yell kãnga poorẽ me b yelsma da pa zemsd taab ye. ⁶⁰ Dẽ la maan-kʋʋd kãsenga yik a toore neba sʋka n sok a Zezi: «Y pa leokd tɩ bũmb laa? Yaa bõe kaset la b kõt yãmb poorẽ woto?» ⁶¹ A Zezi sĩnda b noore n pa leok tɩ bũmb ye. Maan-kʋʋd kãsenga yeela a Zezi: «Yaa foom la Wẽnnaam sẽn tʋm a soba bɩ?» ⁶² A Zezi leokame: «N-yẽe! Yaa mam menga. La yãmb na yãend Ned Biiga t’a zĩ Wẽnnaam pãng soab rɩtgo, la a yit sawat zug n watẽ.» ⁶³ Dẽ la maan-kʋʋd kãsenga kẽes a fut n yetẽ: «Tõnd tara kaset dãmb tʋʋmd yɛs bi? ⁶⁴ Yamb wʋma a sẽn tʋʋs Wẽnnaam yʋʋre, yãmb tagsdame tɩ bõe?» La b fãa yeelame t’a toga ne kũum. ⁶⁵ Neb kẽer sɩngame n tʋbsd a Zezi neng ne kolkoodo. B pila b neng ne pɛɛla n pãbd-b pegse n yetẽ: «Bɩ f bãng sẽn ya ned ninga n wẽ fooma!» Naab ka loog ka rãmba pãb-b la wʋsgo. ⁶⁶ A Piyɛr sẽn waa n be zakẽ wã, maan-kʋʋd kãseng zakẽ, bi-pugl n wa be. ⁶⁷ A yãenda a Piyɛr sẽn da zĩi n woot bugma, a gesa a neng n yetẽ: «Fo me ra bee ne a Zezi, Nazarɛt nedã.» ⁶⁸ A Piyɛr kɩɩsame n yetẽ: «Mam pa mi-a ye. Mam pa wʋmd fo sẽn dat n yeel tɩ bũmb ning ye.» A Piyɛr yiime n leb zãongẽ, la wakat kãnga no-raoog kelmame. ⁶⁹ Bi-pugla sẽn paam n ges neere, a yeela neb niyns sẽn da be-b be wã: «Ad-a sɩd yaa bãmb neda.» ⁷⁰ La a Piyɛr le kɩɩsame. Sẽn yɩ bilfu rẽ poore, sẽn da be-b be wã fãa yeela a Piyɛr: «Sã n ya sɩda, fo yaa bãmb neda, fo yaa Galile neda.» ⁷¹ La a Piyɛr sɩngame n kãabd a meng la wẽene: «Mam ka mi ned ning yãmb sẽn gomd a soab yella ye.» ⁷² La wakat kãng bala no-raoog kelma naoor a yiib soaba. A Piyɛr tẽega a Zezi sẽn da yeel yẽnd gomd ninga: «No-raoog kõn kelem naoor a yiibu tɩ fo pa kɩɩs maam naoor a tãab ye.» La a sɩnga yãbre.

¹ Beoog sẽn waa n vẽege, maan-kʋʋdb nanamse, tẽnga kãsem dãmba, Sɛb-mitba la bʋ-kaoodba tigma taaba n na n ges b sẽn na n maan bũmb ninga. B kɩtame tɩ b sẽb a Zezi ne wĩyã n tall-ba n kẽng a Pilat nengẽ. ² A Pilat soka a Zezi: «Yaa foom la Zʋɩf rãmba dĩma bɩ?» T’a Zezi leoke: «Yãmb meng yeelame.» ³ Maan-kʋʋdba nanams rõda a Zezi ne rõadg buud fãa. ⁴ A Pilat soka a Zezi yɛsa: «Fo pa leokd tɩ bũmb laa? Ges b sẽn dõt foo ne rõadg ning wɛ!» ⁵ La a Zezi kell n pa leok tɩ bũmb ye, al t’a Pilat pɛleng ra yɩgda. ⁶ Zʋɩf rãmba sã n da mii n maand kibs kãseng fãa, a Pilat da mii n yiisda roogo bi-bɛɛg ninga neba sẽn da kot-a t’a yiisi. ⁷ Zemsame tɩ wakat kãnga neb wʋsg tigma taab n kos a Pilat t’a yiis bi-bɛɛg a yembre, waa a sẽn mii n maand yʋʋmd fãa. ⁸ Bi-bɛɛg a yembre n da be bi-beesa roogẽ, t’a yʋʋr boond tɩ Barabas. Yẽ n da naag a tũud-n-taas n kʋ ned, zabr sẽn yik tẽnga pʋgẽ. ⁹ A Pilat sok-b lame: «Yãmb datame tɩ m yiis Zʋɩf rãmba dĩm n kõ-y bɩ?» ¹⁰ A Pilat meng ra miime tɩ yaa sũ-kiir yĩnga la maan-kʋʋdba nanams ra yõk a Zezi n wa yẽ nengẽ. ¹¹ Maan-kʋʋdba nanams sagla neba tɩ b kos a Barabas yiisgu. ¹² A Pilat soka neba yɛsa: «La mam maanda bõe ne yãmb sẽn boond a soab tɩ Zʋɩf rãmb dĩma?» ¹³ La neba mooname yɛsa: «Bɩ y ka-a pika.» ¹⁴ A Pilat sok-b lame: «A maana bõe sẽn ya wẽnga?» Zʋɩf rãmba mooname n yɩɩd pĩnda: «Bɩ y ka-a pika.» ¹⁵ A Pilat sẽn da rat n noog neba sũur yĩnga, a yiisa a Barabas n kõ-ba, dẽ poore, a kɩtame tɩ b pãb a Zezi ne kaase la a kõ-b la sor tɩ b ka-b pika. ¹⁶ Tãb-biisa talla a Zezi n kẽ zaka yaanga la b boola tãb-biisa fãa sẽn da beb be tɩ b wa tigim. ¹⁷ Dẽ poore, b yeelga a Zezi fu-miuugu la b kãama gõos gʋlle n teeg a Zezi zugu. ¹⁸ B ra pʋʋsd-b lame n yetẽ: «M pʋʋsda yãmb, Zʋɩf rãmba dĩma.» ¹⁹ B ra pãbda a Zezi zug ne tãnwĩiga la b sẽnesd b neng ne kolkoodo. B ra wõgemda b taoore n pʋʋsd-ba. ²⁰ B sẽn wa n yaal a Zezi n tɩge b yeega fu-miuugã n le pil-b b meng fuugu. ²¹ Dẽ poore, b talla a Zezi n na n tɩ ka-b pika. Sor zugu, b sega rao a yembre sẽn yi a weoogẽ n kuiisẽ, a yʋʋr la a Simo. A da yaa Sirɛn neda, a Aleksãndr la a Rufus baaba. B modg-a lame t’a reeg a Zezi pikã n zɩ. ²² B talla a Zezi n kẽng zĩig a yembr sẽn boond tɩ Golgota. Dat n yeelame tɩ zu-waanga. ²³ B kõ-la a Zezi rãam sẽn pul tɩdare la b pa sak n yũ ye. ²⁴ B ka a Zezi pika, la b rɩka b futã n pʋɩ taaba. B poeesame n na n bãng fuug fãa soaal sẽn na n yɩ a soaba. ²⁵ B sẽn waa n ka a Zezi n sɛ, dẽ tɩ yaa wĩnto-sʋka ²⁶ la b da gʋlsame n wilg b sẽn lʋɩɩs bũmb ning taoore n na n kʋ a Zezi: «Zezi, Zʋɩf rãmba dĩma.» ²⁷ B ra kaa wagda a yiibu n naag ne a Zezi, a yembre a Zezi rɩtgo, a yembre b goabga. [ ²⁸ Yaa woto la sẽn gʋls Sebra pʋgẽ tõog n taase: b sõd-a la nin-wẽens sʋka.] ²⁹ Sẽn da loogdeb be wã fãa ra tʋʋsda a Zezi la b gird b zutu n yetẽ: «Aya! Fo sẽn tõe n wã wẽnd doogã n le me-a rasem a tãab pʋgẽ wã, aya! Sig pika marsã n fãag f menga.» ³⁰ Maan-kʋʋdba nanamse, Sɛb-mitba ra laada ne taaba n yetẽ: ³¹ «A fãaga a taaba la a pa tõe n fãag a meng ye. ³² Wẽnnaam Tʋʋm-tʋmda la Israyɛl dãmba dĩma, sig pika zug marsã tɩ d yãend n yaool n tẽ.» Ba b sẽn da naag neb niyns n ka pika ne a Zezi wã, bãmb me ra laad-b lame. ³³ Wakat a yoob soab sẽn ta, lik bui tẽnga zãnga, al tɩ ta zaabre. ³⁴ Zafare, a Zezi moona ne koɛɛg kãsenga: «Eloi, Eloi, lema sabaktani?» (Eli, Eli, yaa bõe yĩng tɩ y basd maam?) ³⁵ Neb kẽer sẽn da pẽ wʋma a Zezi goama la b yeela taaba: «Ad-a boonda a Eli.» ³⁶ La ned a yembr wudgame n dɩk bũmb sẽn fõogd koom n los rã-miisgẽ n sel-a tãnwĩig n kõ a Zezi tɩ b yu. B ra yetame: «Bas woto tɩ d gese a Eli na waa n sik-a.» ³⁷ La a Zezi zẽka b koɛɛg n moon ne pãnga la b kii wakat kãnga. ³⁸ Wakat kãng bala, wẽnd doog peen-kãsenga kẽegame, al yĩngri n ta tẽnga. ³⁹ Tãnsoab n da yɛs pika tẽngre. A sẽn yãe t’a Zezi kiime a yeelame: «Sɩd-sɩda nin-kãnga ra yaa Wẽnnaam Biiga.» ⁴⁰ Pagb kẽer da yɛsa yɩga n getẽ. A Mari Madelɛn, a Mari, a Zak la a Zozɛf ma, n paas a Zebede kamba ma, ra bee bãmb sʋka. ⁴¹ A Zezi sẽn waa n be Galile, yaa bãmb n da tũud-b la b ra sõngd-b. Pʋs n yɩɩ pagb wʋsgo n da tũ ba n wa Zerizalɛɛm. ⁴² Zĩiga da zoe n sobgame, la sẽn da ya vʋʋsg ket tɩ beoog seglg yĩnga, ⁴³ Arimati ned a yembre sẽn boond t’a Zozɛf, da yaa nin-kãsenga bʋʋdba sʋka. Yẽ ra gũuda Wẽnd Rĩunga waoongo la yẽ n keng a sũuri n kẽng a Pilat nengẽ n tɩ kos a Zezi yĩnga. ⁴⁴ A Pilat pɛleng yɩka a sẽn wʋm t’a Zezi zoee n kiime t’a bool tãnsoabã n sok-a n bãng kũuma sẽn yɩ sasa ninga. ⁴⁵ A sẽn paam tãnsoaba leokre, a kɩsa kũuma a Zozɛf. ⁴⁶ A Zozɛf raa peende la a sika a Zezi yĩnga n vil-a ne peende n yaool n gãneg-a yaoog sẽn tuk pĩigẽ. Dẽ poore, a bilga kug bedre n pag yaooga noore. ⁴⁷ A Mari Madelɛn la a Mari, a Zozɛf ma, da geta b sẽn gãnegd a Zezi zĩig ningã.

¹ Sibri daar sẽn looge, a Mari Madelɛn la a Mari, a Zak ma, n paas a Salome, daa yũ-noog kaam n na n tɩ zɛ a Zezi yĩnga. ² Ata daar yibeoogo, wĩndg sẽn puk paalem, b waa yaoogẽ wã. ³ Bãmb da gomda ne taaba: «Yaa ãnna n na n bilg yaooga kugr n kõ-do?» ⁴ La b sẽn doog b nenga b yãeeme tɩ kugra billgame n dɩg kɛɛnga. Kugra ra bɛdma al wʋsgo. ⁵ B kẽe yaoogẽ wã la b yãee bi-bɩɩg sẽn da zĩ rɩtgo n yer fu pɛɛlga la rabeem kãseng yõk-b lame. ⁶ Daoa yeel-b lame: «Da zoe-y rabeem ye! Yãmb baooda a Zezi, Nazarɛt nedã b sẽn da ka pika, b vʋʋgame, b ka le be ka yɛs ye, ad-b sẽn da gãneg bãmb zĩig ninga. ⁷ La bɩ y kẽng n tɩ wilg b tũud-n-taasã la a Piyɛr n yɩɩda, tɩ b na n denga bãmb Galile, la yaa beene la y na n yãend-ba, wa b meng sẽn pĩnd n wilgi.» ⁸ B sẽn yi yaoogẽ wã, b zoeeme n zãag. Bãmb fãa ra rigdame, la b ra pa le so b meng yɛs ye. Dabeem sẽn da tar-b yĩnga, b pa sak n gom ne ned ba a ye. [ ⁹ A Zezi vʋʋga ata raar yibeoogo la b reng n lika a Mari Madelɛn. ¹⁰ Yaa yẽ pʋgẽ la a Zezi ra yiis Sʋtãamb a yopoe. A kẽngame n tɩ togs kibarã a Zezi tũud-n-taasã. Bãmb fãa sũr da sãamame al tɩ b ra ket n yãbda. ¹¹ Bãmb sẽn wʋm t’a Zezi vʋʋgame la a Mari Madelɛn yãend-b lame, b pa sak n tẽ ye. ¹² Dẽ poore, yaa bãmb neb a yiibu la a Zezi lik sor zugu ne yĩng sẽn da ka le wẽnd pind dẽnda; nin-bãmb da rabda b weoogẽ. ¹³ Bãmb lɛɛg n wa togsa kibarã b taaba la b pa sak n tẽ bãmb me ye. ¹⁴ Dẽn zugẽ yɩɩ Tʋʋm-tʋmb piig la a yembrã la a Zezi likyã. Bãmb da zĩi n dɩta wakat kãnga. A Zezi sãbsa bãmb me b sũ-keelma yĩnga la b sẽn pa sak n tẽ wã yĩnga. Bãmb pa tẽ neb niyns sẽn da yãend-b a Zezi sẽn yi kɩɩms sʋk ye. ¹⁵ A Zezi yeela b Tʋʋm-tʋmdbã: «Bɩ y kẽng dũni fãa pʋgẽ n zãms neb Kibar noogã. ¹⁶ Ned ninga sẽn na n saka n tẽ, la sẽn na n saka n deeg soobo, yẽ soab na n paama fãagre. La ned ning sẽn na n zãgsa tẽebo, yẽ soab na palga a menga. ¹⁷ Ad sẽn na n tẽbã sẽn na n maam bõn-bãn niynsi: mam yʋʋr yĩnga, b na n diga sʋtãamba. B na n goma bu-zẽmb goama. ¹⁸ Bãmb na n yõga wiis ne b nusi, la b sã n wa yũ zẽnem me, a kõn maan-b bũmb ye. B sã n sɩɩs bãad-dãmb ne b nusi, b na n paama laafi.» ¹⁹ A Zezi sẽn waa n gom ne bãmb n sɛ, b yɩkame n dʋ yĩngri. B zĩi Wẽnnaam dɩtgo. ²⁰ La Tʋʋm-tʋmdba saaga zĩis fãa n zãms Kibar noogã, la Soaala ra sõngd-b lame, la b da maanda wẽnd makr dãmba n paasdẽ.]