MATYE

MATYE

¹ A Zezi Krista, a Daviid biiga, a Abraam biiga roog sebre. ² A Abraam n doga Izaak. A Izaak n doga Zakoob, a Zakoob n doga Zɩɩda ne a yaopa, ³ a Zɩɩda n dog a Fares ne a Zara, tɩ b ma yaa Tamar, a Fares n dog a Esrom, a Esrom n dog a Aram, ⁴ a Aram n doga Aminadab, a Aminadab n dog a Naason, a Naason n dog a Salmon, ⁵ a Salmon n dog a Booz, a ma la a Raab, a Booz n dog a Zobɛɛd, a ma la a Rut, a Zobɛɛd n dog a Zese, ⁶ a Zese n dog dĩm a Daviid. A Daviid n dog a Salomo, a ma a Uri paga, ⁷ a Salomo n dog a Roboam, a Roboam n dog a Abia, a Abia n dog a Asa, ⁸ a Asa n dog a Zozafat, a Zozafat n dog a Zoram, a Zoram n dog a Oziyas, ⁹ a Oziyas n dog a Zoatam, a Zoatam n dog a Akaz, a Akaz n dog a Ezekiyas, ¹⁰ A Ezekiyas n dog a Manase, a Manase n dog a Amon, a Amon n dog a Zoziyas, ¹¹ a Zoziyas n dog a Zekoniyas ne a yaopa. Bãmb wakatẽ la b vʋk Israyɛl kamb n kẽng Babilon. ¹² Babilon yembd poore, a Zekoniyas n dog a Salatiyɛl, a Salatiyɛl n dog a Zorobabɛl, ¹³ a Zorobabel n dog a Abiud, a Abiud n dog a Eliakim, a Eliakim n dog a Azor, ¹⁴ a Azor n dog a Sadok, a Sadok n dog a Akim, a Akim n dog a Eliyud, ¹⁵ a Eliud n doga Eleazar, a Eleazar n dog a Matan, a Matan n dog a Zakoob, ¹⁶ a Zakoob n dog a Zozɛf, a Maryam sɩda la a Maryam n dog a Zezi, sẽn boond tɩ Krista. ¹⁷ Dẽnna yaab rãmba ne b rot sõta woto: a Abraam n taa Daviid, yaa rot piig la a naase. A Daviid n ta Babilon yembdo, yaa rot piig la a naase. Babilon yembdo n ta Krista yaa rot piig la a naase. ¹⁸ A Zezi Krista dogma kibar la woto: a ma, a Maryam, da ya a Zozɛf pʋg-bila. La a Maryam sẽn waa n nan ka kul a Zozɛf, a mikame, tɩ ne a Vʋʋsem Sõng raabo, a lebga zɩsgo. ¹⁹ A sɩda, a Zozɛf, sẽn da ya nin-tɩrgã, pa tʋlg n gom tɩ yi yɩng ye a tʋlgame bal n soos n bas a Maryam. ²⁰ La rẽ sẽn waa n be a yamẽ, la a sẽn yãe Soaala malɛk a zãmsdẽ, sẽn yeel-a: «Zozɛf, Daviid biiga, da zoe rabeem n deeg f pʋg-bila, a Maryam, f zakẽ ye, tɩ biig ning sẽn sig a pʋgẽ wã yita a Vʋʋsem Sõng nengẽ. ²¹ Bi-ribl la a na n doge la f na n pʋda a yʋʋr a Zezi: tɩ yaa yẽ n na n sɩd yiis a buuda neba yel-wẽnd pʋgẽ.» ²² La yella yɩɩ woto, n taas Soaala sẽn da togs ne bãngdba noore: ²³ Pa-kul na n dɩka pʋga n dog biiga, la b na n pʋda a biigã tɩ Emmanwɛl, dat n yeelame tɩ Wẽnd bee d sʋka. ²⁴ A Zozɛf sẽn neke, a maana wala malɛka sẽn wilgi, a peega a paga, a zakẽ, ²⁵ la a tol n doga a biigã tɩ b pa bãng taab ye; la a Zozɛf pʋda biiga yʋʋr a Zezi.

¹ A Zezi doga Bɛtelyɛɛm, Zɩɩde tẽnga, dĩm a Erod naamẽ, la ade, neb sẽn bʋgd ãds yii yaanga n wa Zerizalɛɛm ² n sok woto: «Zʋɩf rãmb dĩma sẽn dog paalma bee yɛ? Tõnd yãenda b ãdg sẽn puki tɩ d wa n na n waoog-ba.» ³ B sẽn wʋm dẽ, dĩm a Erod ne Zerizalɛɛm tõre yɛɛsame. ⁴ Dĩma tigma maan-kʋʋdba kãsem dãmba ne sẽn karem-ba n sikã la a sok-b lame n bãng Wẽnd Nedã sẽn na n dog zĩig ninga. ⁵ «Yaa Bɛtelyɛɛm, Zɩɩde tẽnga, tɩ bãngda gʋlsame: ⁶ Zɩɩda tẽn-peelmẽ Bɛtelyɛɛm, ka foo la tẽn-bil Zɩɩda ye, tɩ dĩm ning sẽn na n gũ m buuda Israyɛl, na n yila f pʋgẽ.» ⁷ A Erod soos n boola ãdsa bagbã n na n bãng wakat bʋg taki la ãdga puk-ba, ⁸ la a tees-b la Bɛtelyɛɛm sore n yetẽ: «Kẽng-y n tɩ sok-y biiga yelle, la y sã n bãng vẽenega, bɩ y lɛɛg n wa togs-ma tɩ m me kẽng n tɩ waoog-a.» ⁹ Ãdsa bagba sẽn paam dĩma koɛɛga, b rɩka sore; b le yãee ãdgã t’a kẽnd b taoore la a waa n tɩ yalsa sus biiga sẽn da be zĩig ningã. ¹⁰ B sẽn yãe ãdgã b sũur yɩɩ noog wʋsgo. ¹¹ B kẽe roogã n yãend biiga ne b ma, a Maryam, la b wõgemdame n waoog-ba; b pagsa b kogendo n yiis b kũuni n kõ-ba: sãnem, tɩdare, ne tɩ-kaam sẽn tar yũ-noogo. ¹² Dẽ poore b bãnga b zãmsdẽ tɩ b ka tõe n leb n tũ a Erod nengẽ ye, la b bao sor a to n leb b tẽngẽ. ¹³ Bãmb loogr poore, Soaala malɛk lika a Zozɛf a gũeemẽ n yeel-a: «Yik n dɩk biiga ne a ma n zoe n kẽng Ezipt tẽnga la f pa be n ta wakat ning m sẽn na n wilg fu; a Erod na n baoo biigã n kʋ.» ¹⁴ A Zozɛf yika ne yʋngo n dɩk biiga ne a ma n zoe n kẽng Ezipt tẽnga, ¹⁵ la a paa be n tãag a Erod kaalem. Woto la Soaala koɛɛg tõog n taase: M boola m biiga Ezipt tẽnga. ¹⁶ A Erod sẽn mik tɩ bagba belg-a lame, a sũur puuga al wʋsgo, dẽ la a tʋm tɩ b kẽng Bɛtelyɛɛm la Bɛtelyɛɛm weoogo n kʋ kamb niyns fãa yʋʋm sẽn pa yɩɩd a yiibu, wala neba sẽn da mak n wilgã. ¹⁷ La woto yɩɩ bãngd a Zeremi koɛɛg taasgo: ¹⁸ Kɛleng n kelem Rama yãbr la waasgo n waas be: ya a Rasɛl n yãbd a kamba la a tõt belegre tɩ b le ka ket ye. ¹⁹ La a Erod kũum poore, Soaala malɛk lika a Zozɛf a gõeemẽ, Ezipt tẽnga, ²⁰ n yeel-a: «Yik n dɩk biiga ne a ma n leb Israyɛl tẽnga tɩ sẽn da baood-b biigã n na n kʋ wã fãa kiime.» ²¹ A Zozɛf yikame n dɩk biiga ne a ma n leb Israyɛl tẽnga. ²² A sẽn wʋm t’a Arkelawus n dɩt naam Zɩɩda tẽn-peelmẽ, a ba, a Erod, zĩigẽ, a Zozɛf zoe rabeem ne be lebre, la a sẽn paam koɛɛg a zãmsdẽ, a zãagame n tees Galile baobgo, ²³ a waa n kẽe tẽng a ye sẽn boond tɩ Nazarɛt. Woto me la bãngda koɛɛg tõog n taase: B na n bool-a lame tɩ Nazarɛt daoa.

¹ Rao n da kõt soobo, a yʋʋr a Zã; a waa n bee Zɩɩda weoogẽ n karemd neba ² n yetẽ: «Tuub-y y yel-wẽna tɩ Wẽnd Rĩung kolgame.» ³ Ad-y yaa yẽ yell la bãngd a Izai da gomda: Sẽn moond-a weoogẽ wã koɛɛg la woto: segl-y Soaala sor, kɩt-y tɩ b so-bugsa lebg tɩrse. ⁴ A Zã ra yera fuug sẽn wʋg ne yʋgem kõbdo la a ra sẽga gãndo. A rɩɩb da yaa sʋya la weoog sɩɩdo. ⁵ Zerizalɛɛm ne Zɩɩda la Zʋrdẽ baobga rãmb fãa gill da kẽnda a nengẽ. ⁶ B ra togsda b yel-wẽna n deegd soobo, Zʋrdẽ koomẽ. ⁷ A Zã sẽn yãend Farizẽ la Saduseẽ rãmba tɩ b wat wʋsgo n na n deeg soobo, a yeel-b lame: «Wag-bi buudu, ãnda n wilg yãmb tɩ y zoe n põs Wẽnd beem sẽn wat y zutu? ⁸ Bɩ y tʋm tʋʋm sõma n wilg tɩ y teema zʋgo, ⁹ la y ra saag n yeel y sũurẽ: ‹Tõnd yaa a Abraam kamb ye.› M yet-y lame tɩ kuga sẽn dɩgã, Wẽnd tõe n yiisa a Abraam kamb b pʋsẽ. ¹⁰ Lar zoe n dɩga tɩɩga sɛɛga; tɩɩg ninga fãa sẽn pa womda bi-sõma, b na n kɛɛg-a lame n yõog bugum. ¹¹ Mam yẽ kõt-y la soob koomẽ y zʋg tekr yĩnga la mam sẽn deng a soab taoorã yɩɩda maam; paam n lodg a neodr gĩs menga looga maam; yẽ na n soo yãmb ne a Vʋʋsem Sõng la bugum. ¹² A zãada kaorg a nugẽ n na n yelg a kood zɛɛgẽ; ka-bɛɛla na n suii baoorẽ, la fɩɩba na n yõoga bugum ning sẽn ka kiida pʋgẽ.» ¹³ A Zezi yii Galile n wa Zʋrdẽ kʋɩlga, a Zã nengẽ, n na n deeg soobo. ¹⁴ A Zã ra pa rat n sak ye, n yetẽ: «Yaa maam n tog n deeg soob yãmb nengẽ, tɩ yãmb baas n wat mam nengẽ!» ¹⁵ A Zezi leok-a lame: «Bas tɩ m maan woto nanda tɩ yaa woto la d tog maan tɩ fãa zemse.» T’a Zã yaool n na n sak. ¹⁶ A Zezi sẽn deeg soob n yit koomẽ, la saaga pilg a gãongo, la b yãee a Vʋʋsem Sõng sẽn sigd a Zezi zugu wa walle, ¹⁷ la koɛɛg me n sãd yĩngri: «Ada yaa mam bi-nongre, mam yam kẽe-a la zãnga!»

¹ A Vʋʋsem Sõng talla a Zezi n kẽ we-raoogẽ tɩ Sʋtãan kʋɩɩb-ba. ² B maana rasem pisnaase la yʋnd pisnaase n ka rɩ, n ka yũ ye. ³ Dẽ la kʋɩɩbda kolg n yeele: «Fo sã n ya Wẽnd Biiga bɩ f kɩt tɩ kug kãensa lebg buri.» ⁴ A Zezi leok-a lame: «B gʋlsame: Ninsaal ka rɩlgd a meng ne bur bal ye, yaa ne koɛɛg ning fãa sẽn yit Wẽnnaam noorẽ.» ⁵ La Sʋtãan tall-b lame n kẽ Zerizalɛɛm n dʋʋs-b wẽnd dooga zugu, ⁶ n yeel-ba: «Fo sã n ya Wẽnd Biiga bɩ f yɩk n tiimd tẽnga, tɩ b gʋlsame: B na n kõ-la b malɛgsa noore tɩ b põk foom b nugẽ tɩ f naoor da sɩɩs kugr ye.» ⁷ A Zezi leok-a Sʋtaana: «B le gʋlsame: Da kʋɩɩb Wẽnnaam, f Soaala ye.» ⁸ Sʋtãan tall-b lame n dʋ tãn wok zugu n wilg-b dũni wã ne a zɩɩri, ⁹ n yeel-ba: «M na n kõ-f la woto fãa, f sã n wõgemd m taoore n waoog maam.» ¹⁰ Dẽ la a Zezi yeel-a: «Looge, Sʋtãana! Tɩ b gʋlsame: Wẽnnaam, f Soaala, bal taoore la f na n wõgemd Bãmb bal la f na n waooge.» ¹¹ Sʋtãan bas-b lame n looge tɩ malɛgsa kolg n na n ges b yelle. ¹² A Zezi sẽn wʋm tɩ b yõka a Zã, b leba Galile. ¹³ B yii Nazarɛt tẽnga n wa kẽed Kafarnaom, Tiberiyad mogr noore, Zabulõ la Neftali satmẽ. ¹⁴ Woto la bãngda Izayi toagsga taasyã: ¹⁵ Zabulõ tẽnga, Neftali tẽnga, mogr sorẽ dãmba, Zʋrdẽ rʋʋnd dãmba, Galile bu-zẽmb rãmba! ¹⁶ Baad-y likẽ dãmba yãee vẽenem kãsenga, vẽenem n bui lik la kũum sẽn da reeg tẽns niyns n yãmbã. ¹⁷ A Zezi sɩnga marsã n karemd neba n yetẽ: «Teem-y zʋgo tɩ Arzãn Rĩung kolgame.» ¹⁸ A Zezi waa n looda Galile mogra noore, n yãe ned ne a yao: a Simo, b sẽn boond a soab t’a Piyɛr, ne a Andre, a ba-biiga; b ra lobda b zulumsi tɩ b da yaa zĩm yõgdba. ¹⁹ B yeel-b lame: «Pʋg-y maam tɩ m na sõng-y tɩ y paam ninsaalba.» ²⁰ La bãmb wẽneg n basa b zulumsa be n pʋg a Zezi. ²¹ B sẽn ta taoore, b le yãee ned a to ne a yao, a Zak la a Zã, a Zebede kamba, tɩ b be koglg pʋgẽ ne b ba, n manegd b zulumsi; ²² b bool-b lame. Bãmb me basa b ba la b zulumsi n pʋg a Zezi. ²³ A Zezi ra saada Galile tẽnse n maand karengo pʋʋsg rotẽ, n wilgd Wẽnd Rĩung Kibar noogã, la b sãoogd bãas la pa-keem buud fãa. ²⁴ B yʋʋr yiime n ta Siri zamaana; tẽng fãa ra wata ne b nimbãan dãmba la b bãad dãmb buud toɛ toɛyã, wala sẽn yikd-b kisenkiiri, zut sẽn lebg rãmba, nao sẽn ki rãmba. B ra wata ne-ba t’a Zezi sãoog ba. ²⁵ Sɩd yɩɩ zãma kãseng n sɩng b pʋgbo; neb sẽn yit Galile la Tẽns piig sẽn tot taaba, n yit Zerizalɛɛm la Zɩɩda la Zʋrdẽ rʋʋnde.

¹ A Zezi sẽn yãe zãma wã, b rʋʋ tãnga zugu. B zĩndame tɩ b karen-biisa na n kolg-ba. ² A Zezi kõ-b la koɛɛga n yetẽ: ³ «Sũ-noog rãmba la sẽn teeg-b Wẽnd bala tɩ Wẽnnaam Rĩunga yaa bãmb soolem. ⁴ Sũ-noog rãmba la nin-bʋgse tɩ tẽnga na n yɩɩ bãmb soolem. ⁵ Sũ-noog rãmba la sũ-beed sẽn tar b rãmba, tɩ b na n paama belgda. ⁶ Sũ-noog rãmb la sẽn yãbd-b sõmblem kom la ko-yũudu, tɩ b na n tɩgame. ⁷ Sũ-noog rãmb la sẽn zoet-b b taab nimbãanega, tɩ b na n zoee bãmb me nimbãanega. ⁸ Sũ-noog rãmb la pʋ-peelem dãmba tɩ b na n yãee Wẽnnaam. ⁹ Sũ-noog rãmb la sẽn mi-b sugri, tɩ b na n boola bãmb tɩ Wẽnd kamba. ¹⁰ Sũ-noog rãmba la sẽn sakd-b namsgo b tʋʋm sõma yĩnga, tɩ Wẽnd Rĩunga yaa bãmb soolem. ¹¹ Yãmb la sũ-noog rãmba b sã n wa tʋʋsd-y la b namsd-y la b rõt-y rõadg buud fãa mam tũudma yĩnga. ¹² Noog-y y sũuri la y kɩdem tɩ y pʋɩɩr na n yɩɩ kãseng arzãna. Ad-y yɩɩ boto la bãngdba nams pĩnda. ¹³ Yãmb yaa mooga yamsem. Yamsem sã n sãbge, bõe n tõe n le wa ne a noosem? A ka le be yõod ye la a sẽn tog yaa b lob-a yɩnga tɩ neb tabe. ¹⁴ Yãmb yaa dũni vẽenem; tẽng sẽn zao tãng zug ka tõe n solg a meng ye. ¹⁵ Fitil ka widigdi n dɩk koglg n lill-a ye, b ningd-a la zĩig ninga a sẽn na n tõog n kõ zaka rãmb vẽenem. ¹⁶ Woto me yãmb vẽenema tog n yãga y taab nini tɩ b yãe y tʋʋm sõma n tõog n pẽg y Ba sẽn be arzãna. ¹⁷ Da ning-y y yamẽ tɩ m waame n na n sɛɛs Noora ne bãngdbã sẽn wilga ye; m waame n na n maneg n baase. ¹⁸ Sɩd-sɩda m yet-y lame tɩ gomde, gomd pɛdg meng kõn zĩnd Wẽnnaam noora pʋgẽ n pa taase tɩ saaga la tẽnga ket n be b zĩigẽ ye. ¹⁹ Dɩlla ned ning fãa sẽn na n tõdg-a, ba noor sẽn ya bilfu, Wẽnnaam noya sʋka la a wilg a taab tɩ b tõdg wa yẽnda, b na ges yẽ soab me wa nin-bila, Wẽnd Rĩunga pʋgẽ. Ned ninga sẽn na n deeg-ba la a zãms a taab tɩ b maan wa yẽ, b na ges yẽ soab wa nin-kãsenga Wẽnnaam Rĩunga pʋgẽ. ²⁰ M yet-y lame, tɩ y sõmblem sã n pa yɩɩd sẽn karen-ba-n-sikã la Farizẽ rãmba rẽnna, y kõn kẽ Arzãn ye. ²¹ Y wʋmame tɩ b yeela pĩnd dãmba: da kʋ ned ye, la sẽn kʋ-a a to bɩ b kẽes-a bʋʋdo; la mam yet-y lame tɩ ned ning fãa sẽn na n puuga sũuri ne a to, dẽ seka bʋʋd kẽesgo. ²² La ned sã n yeel a to tɩ yalma, dẽ sekda a wa bʋʋd-bɛda rãmb taoore. La a sã n yeel-a tɩ pʋlum-sãamda, yẽ soab paalgda a meng bugum bʋʋdo. ²³ Dɩlla fo sã n wa ne f kũuni maanda zĩigẽ, n tẽeg tɩ bũmb n be foo ne f to sʋka, ²⁴ bɩ f bas f kũuna maanda zĩigẽ la f lɛɛg tɩ y tɩ zems taaba tɩ f na yaool n wa kõ f kũuna. ²⁵ Fo sã n seg f zabd-n-taaga, bɩ f ning pãng tɩ y zems taaba sora zugu, sã n ka rẽ a wat n bool-f la bʋʋdo tɩ bʋʋda soab paalg-f ne gũudã, tɩ gũuda yõk fo n pag roogo. ²⁶ Sɩd-sɩda, mam yet-f lame tɩ f kõn tõog n yi roogã, samd pɛdg meng sã n ket f zug ye. ²⁷ Yãmb wʋmame tɩ b yeelame: Da ro f to pag ye. ²⁸ La mam yet-y lame: Ned ninga sẽn gesa a to pag ne raabo, a soab zoe n yoo ne-a a sũurẽ. ²⁹ F rɩtg nif sã n kʋɩɩbd-fo, bɩ f kɩdg-a n lob yɩɩga; fo yĩnga wilg a ye bõne, são yĩnga tõr sẽn na n lob bugmẽ. ³⁰ F nug rɩtg sã n kʋɩɩbd-fo, bɩ f kʋʋg-a n lob yɩɩga; fo yĩnga wilg a ye bõne, são yĩnga tõr sẽn na n lʋɩ bugmẽ. ³¹ B yeelame yɛsa: Ned ninga sẽn yiisa pag tog n kõ-a-la a rigb sebre. ³² Mam yet-y lame tɩ sã n ka pagã n bao ned a to, ned ninga sẽn yiis-a wã wilgd-a-la yoob sore. Ned ninga me sẽn na n dɩk pʋg kãnga, yaa yoob la a maanda. ³³ Yãmb le wʋma b sẽn yeel pĩnd dãmbã: Da sãam f pʋlong ye, la pids kãabg ning fãa f sẽn kãab Soaalã. ³⁴ Mam yet-y lame: da wẽen ba bilfu, da wẽen ne yĩngr tɩ yaa Wẽnd zaoore. ³⁵ Da wẽen ne tẽnga tɩ yaa Wẽnd nao palgr zĩiga. Da wẽen ne Zerizalɛɛm tɩ yaa Na-kãseng tẽnga. ³⁶ Da wẽen ne f zugu tɩ f ka tõe tɩ f zoobg a ye pelg bɩ sob ye. ³⁷ Y sã n tog n leok tɩ N-yẽe! Bɩ y leok tɩ N-yẽe! Sã n tog n leok tɩ Ayoo! Bɩ yɩ Ayoo! Sẽn zʋʋg rẽ yita yam-beeda soab nengẽ. ³⁸ Yãmb wʋmame tɩ b yeelame: Nif n dond nifu, yẽnd n dond yẽnde. ³⁹ Mam yet-y lame tɩ y ra rok y sũur ne y bɛ ye. Ned sã n wẽ f rɩtg yɛgdg pɛka bɩ f wẽneg f goabgã n tees-a; ⁴⁰ a sã n dat n kẽes-f bʋʋdo n deeg f fu woko, bɩ f paas-a f fu taoko. ⁴¹ Ned sã n modg-f tɩ f yãag-a naoyakem tusr bala, bɩ f yãag-a naoyakem tus a yiibu. ⁴² Ned sã n kos foo bɩ f kõ-a; a sã n dat n peng bɩ f ra zãgs ye. ⁴³ Yãmb wʋmame tɩ b yeela pĩnda: Nong f zoa la f kisg f bɛyã. ⁴⁴ Mam yet-y lame: nong-y y bɛɛba la pʋʋs-y sẽn namsd-b yãmba yĩnga. ⁴⁵ Woto yãmb na n yɩɩ Ba ning sẽn be-a arzãna kamba, tɩ b basda b wĩndg t’a pukd nin-sõma la nin-wẽnse, la b basda b saaga t’a niid nin-sõma la nin-wẽns yĩnga. ⁴⁶ Yãmb sã n nong sẽn nong-b yãmb bala, bõe rolb la y na n le gũ yɛsa? Sẽn deesd-b fadga ka maan dẽ sɩda? ⁴⁷ Yãmb sã n pʋʋsd y saam-biisa bala, bõe la toogo, bu-zẽmba ka maand boto sɩda? ⁴⁸ Yãmb me modg n yɩ sõma wa y yĩngr Ba wã sẽn ya sõmb zãngã.

¹ Gũus-y n da maan y tʋʋm sõma neb a taaba taoore nagr yĩng bal ye. Ka rẽ y kõn paam dolbo y Ba sẽn be arzãna nengẽ ye. ² Fo sã n na n yols ned nimbãanega bɩ f ra yi n moon yɩnga wa ninsaan-kazukem kẽere sẽn maand pʋʋsg rotẽ la sotiisẽ n baood neb pẽgr ye, tɩ m togsd-y la vẽenega, bãmb dãmb zoe n paama b rolbo. ³ Fo sã n dat n yols ned nimbãanega bɩ f ra sak tɩ f goabg bãng f rɩtg sẽn maand bũmb ning ye. ⁴ Woto ned kõn bãng fo sẽn maan-a ye la f Ba Sõng sẽn ne likẽ wã na rol-fo. ⁵ Y sã pʋʋsdẽ bɩ y ra maan wa zãmb rãmba sẽn maanda ye; bãmb sã n na n pʋʋse, b baooda zĩig ning neb wʋsg sẽn tõe n yãend-ba, pʋʋsg roto la sobadse. M yet-y lame tɩ b zoe n paama b rolbo. ⁶ Fo sã n pʋʋsdẽ bɩ f kẽ f roogẽ n lɛɛg n pag f kʋɩlenga la f pʋʋs f Ba, lillẽ, tɩ f Ba sẽn ne likẽ wã na rol-fo. ⁷ Y pʋʋsg pʋgẽ bɩ y ra baam wala bu-zẽmba ye; b tẽedame tɩ b sã n gomd n pa yɛɛdẽ la Wẽnd kelgd b pʋʋsgo. ⁸ Da maan-y wa bãmb bada, tɩ y Ba zoe n mii y sẽn tar bũmb ning tʋʋmde tɩ y nan ka yaag y noor ye. ⁹ Dẽ yĩngã pʋʋs-y woto: ‹Tõnd Ba sẽn be arzãnẽ, y yʋʋr paam pẽgre, ¹⁰ tɩ y Rĩung yalse, tɩ b maan y yam tẽng zug, wẽnd b sẽn maand arzãna. ¹¹ Kõ-y tõnd dũnna d beoog-beoog fãa rɩɩbo. ¹² Kõ-y tõnd d yel-wẽna sugri wẽnd d sẽn kõt d taab sugri, ¹³ la y ra bas tɩ d lʋɩ kʋɩɩbg pʋgẽ ye la y fãgd-d wẽnem soaba nugẽ.› ¹⁴ N-ye! Yãmb sã n kõ y taab sugri, y Ba sẽn be arzãna me na kõ yãmb sugri. ¹⁵ La yãmb sã n pa kõ y taab sugri, y Ba wã me kõn bas-y taal ye. ¹⁶ Y sã n loet y noor bɩ y ra gãnem y neng wa zãmb rãmba sẽn maanda ye; b takda b nenga tɩ neba tõog n yãe tɩ b sɩd maanda no-loeere. M yet-y lame tɩ b zoe n paama b rolbo. ¹⁷ Fo sã n loet f noore bɩ f zɛ f zug kaam la f pek f nenga, ¹⁸ woto ned kõn bãng tɩ f loee noore sã n ka f Ba wã bal sẽn yɛs lillẽ wã, la bãmb sẽn ne likẽ wã na rol-fo. ¹⁹ Tẽng zug ka, bɩ y ra tigs arzɛk ye tɩ bugd la zũnzũur dɩtame, tɩ wagdb pood roto n zuuda. ²⁰ Tigs-y y arzɛka arzãnẽ, tɩ be, bugd la zũnzũur ka n dɩtẽ ye la wagdb me ka pood n zuud ye. ²¹ F arzɛk sẽn be zĩig ninga, be me la f sũura na n zĩndi. ²² Nif la yĩnga fitila. Fo nif sã n ya sõmbo, fo yĩnga fãa bee vẽenemẽ. ²³ La f nif sã n sãame, f yĩnga zãng bee likẽ. Fo vẽenem sã n lebg lika, fo lik yɩta a wãna? ²⁴ Ned ka tõe n maan zu-soaben-dãmb a yiib raab ye, f na kisga a ye, n nong a ye, f na n basa a ye n tũ a ye. Yãmb me ka tõe n pʋg Wẽnnaam la y pʋg Ligd ye. ²⁵ Yaa rẽ yĩng la m yet-y: da bʋ-y y vɩɩma poorẽ, n sokd-y y sẽn na n dɩ bũmb ning ye; la y ra bʋ y yĩnga poorẽ n sokd-y y sẽn na n yeelg fuug ning ye. Vɩɩma ka yɩɩd dɩɩbo la yĩnga ka são fuugu? ²⁶ Ges-y luiili sẽn yɩgd yĩngri: b ka bʋte, b ka kẽebde, b ka suiid baoorẽ ye, la y Ba sẽn be arzãna dɩlgd-b lame. Yãmb pa yɩɩd bãmb sɩda? ²⁷ Yãmb sʋka ãnda n tõe n zĩnd n bʋ n paas a vɩɩma woglem kãntɩɩg a ye? ²⁸ La fut poorẽ, bõe yĩng la y na n bʋ? Ges-y pʋt puudu: ges-y b sẽn yit toto, b pa namsde, b ka wĩid lamdo. ²⁹ La m yet-y lame t’a Salomo ne a zɩɩra sẽn yɩ a soaba, ka tõog n paam fu neer wa bãmb dẽnda buud n yeelg ye. ³⁰ Wẽnd sã n yeelgd pʋt mood woto, bũmb sẽn be rũnna n na n yɩ bugum dɩɩb beoogo, b kõn maan tɩ yɩɩg boto yãmb yĩnga, tẽeb kɩdg rãmba? ³¹ Da bʋ-y n yetẽ: d na n dɩɩ bõe la d na n yũu bõe la d na n yeelga bõe ye, ³² tɩ bu-zẽmbã n zĩi n bʋʋd boto. Yãmb Ba sẽn be yĩngrã miime tɩ y tara rẽ fãa tʋʋmde. ³³ Deng-y n bao-y arzãn Rĩungã ne a sõmblem tɩ sẽn keta fãa b na kõ-y rẽ wa lɛnga. ³⁴ Da sũk-y beoog poorẽ tɩ beoog na baoo a rẽnna. Daar fãa ne a zɩɩbo, sekd-a lame.

¹ Da kao-y y taab bʋʋdo tɩ b kõn kao y me bʋʋd ye. ² Y sẽn kaood y taab bʋʋda toto, boto me la b na n kao yãmb bʋʋdo. Makr ning y sẽn makd n kõt y taaba, makr kãng me n yɩt yãmb dẽnna. ³ Bõe tɩ f get mooga sẽn be f to nifẽ? Fo yaool n ka ne ra-giiga sẽn be f nifẽ ye. ⁴ Fo na n yɩɩ wãna n yeel f to: ‹Yaas tɩ m yiis moogo f nifẽ,› tɩ ra-giig yaool n be f rẽnnẽ? ⁵ Zãmb soaba, deng n yiis ra-giiga f nifẽ tɩ f na tõog marsã n yãe moogã n yãk f to nifẽ. ⁶ Da rɩk-y maand nemd n kõ baag ye, da rɩk-y kĩndfu n lob kurkuy taoor ye: b wat n tab-a lame n yaool n lɛɛg n kẽ yãmba, n na n wãb yãmb. ⁷ Kos-y tɩ b na kõ-y, bao-y tɩ y na yãe. Kabs-y tɩ b na pak tɩ y kẽ. ⁸ Sẽn kota n paamde, sẽn baooda n yãete, sẽn kabsda la b pakda. ⁹ Yãmb sʋka ãnd n be t’a biig sã n kos-a buri bɩ a kõ-a kugri? ¹⁰ Ka rɩll bɩ a kos-a kʋɩl-zẽoogo t’a kõ-a waafo? ¹¹ Dɩlla yãmb ne y wẽnema, y sã n mii y kamb bõn-sõma kũuni, bãng-y tɩ Ba Sõng na maan neere n yɩɩd ne neb niyns sẽn bõsd-b bãmba. ¹² Yãmb sẽn dat tɩ y taab maan bũmb ninga y yĩnga, bɩ y maan boto ne y taaba: dẽ n be Noora sebrẽ la bãngdba me rẽnnẽ. ¹³ Tũ-y so sẽka n kẽ. Menesg sor tuka yalenga, tɩ wʋsg rɩkd-a. ¹⁴ Vɩɩma sor tuka sẽka la a tãagda kʋɩleng sẽn pa yalem t’a yãetb sõor ya bilfri bala. ¹⁵ Gũus-y ne zirẽ-be-bãngdba. B sã n be yãmb sʋka, bãng-y piis sẽn ka tar b toorẽ yell ye, mik yaa digd-n-yĩid-toose. ¹⁶ B tʋʋma n na n wilg yãmba b sẽn ya bũmb ninga. Sib na wob gõaag zugu? La kankam na tõs kãgrẽ? ¹⁷ Ade, tɩ-sõng faa womda bi-sõma la tɩ-wẽng fãa womda bi-wẽnse. ¹⁸ Tɩ-sõng pa tõe n wom bi-wẽns ye la tɩ-wẽng me ka tõe n wom bi-sõng ye. ¹⁹ Tɩɩg ninga fãa sẽn ka womda bi-sõma, b kɛɛgd-a lame n yõog bugum. ²⁰ Dɩlla b tʋʋmẽ wã la y na n bãng-b n bake. ²¹ Ka sẽn boond-a maam: ‹Soaala, Soaala,› n kẽed arzãn ye, yaa sẽn maand-a m Ba sẽn be arzãna yamleoogo. ²² Wʋsg wat n yeela maam daar a ye: ‹Soaala, Soaala, tũu ne yãmb maasem tɩ d paam n wilg sẽn na n yaool n wa, la d dig sʋtãamba, la d maan bõn-bãna.› ²³ La m kõn zoe b nif n leok-b ye: ‹Mam zɩ n bãng yãmb ye, yi-y m taoore, tʋʋm yood dãmba!› ²⁴ Ned ninga sẽn na n kelg goam niyns m sẽn togs mars marsã la a maand boto, m tõe n mak-a la ne sɩlem soaba sẽn me a roog kugr kegemd zugu. ²⁵ Saag niime, koom fõdame, sob-raoog yikame tɩ b fãa tãag-a la a pa lʋɩ ye, b sẽn me-a kugra zug yĩnga. ²⁶ Ned ning me sẽn wʋmd-a mam koɛɛga la a pa maand wa m sẽn datã, b tõe n maka yẽ soab ne gãeenga sẽn me a roog bĩsr zugu. ²⁷ Saag niime, koom waa ne pãnga, sob-raoog yikame tɩ b tãag-a la a lʋɩɩme la a wãab ka yɩ bilfr ye!» ²⁸ A Zezi sẽn gom n sɛ, la zãma wã sẽn wẽ siri b karenga poorẽ; sɩda a Zezi pa gomd wa sẽn karen-ba-n-sika ye, ²⁹ b gomda wa naab sẽn gomd ne a soolem dãmba.

¹ A Zezi siga tãngã tɩ neb wʋsg sɩng b pʋgbo. ² Yĩng soab a ye n waa n wõgemd b taoore n yeel-ba: «Yãmb sã n dat waa, m Soaala, y tõe n sãoog-m lame.» ³ B tẽega b nus n sɩɩs-a n yetẽ: «Sãoog tɩ m nonga rẽ.» Wakat kãng bala a yĩnga yɩlgame. ⁴ T’a Zezi na n yeel-a: «Sõng n da gom tɩ neb wʋm ye, kẽng tɩ maan-kʋʋda yãend-fo la f kɩs kũun ning a Moyiiz sẽn yet tɩ b kɩs a soaba tɩ yɩ f sãoogr kaseto.» ⁵ B sẽn kẽ Kafarnaom tẽnga la tãnsoab a ye sẽn bʋʋg-ba n na n kos-b bũmbu. A yeelame: ⁶ «Soaala, m dakõor n gãe yiri, a nus la a nao kiime la a namsda wʋsgo.» ⁷ A Zezi yeel-a lame: «M na kẽng n tɩ sãoog-a!» ⁸ Tãnsoaba leokame: «Soaala, m zema bõe tɩ y na n kẽ m zakẽ? Yeel-y gomd a ye bala tɩ m dakõora na sãooge. ⁹ Ade, maam ne m sẽn pa na-kãsengã, m soo tãb-biisi, m sã n yeel a ye: kẽnge! A kẽngdame, m sã n yeel a to: wa! A watame; m sã n yeel m dakõorã: maan woto! A maandame.» ¹⁰ A Zezi wʋma gomdã la kẽ-la b sũurẽ tɩ b yeel b poorẽ dãmba: ¹¹ «Mam yeta yãmba, m pa yãend tẽeb a woto buud Israyɛl kamb sʋk ye. Wʋsg na n yii yaanga la taoore n wa paam tɩgra roog n kẽ ne a Abraam, a Izaak la a Zakoob arzãn Rĩung pʋgẽ, ¹² tɩ Rĩunga kamb mens na n yaool n pa yɩnga, likẽ, n yãbd tɩ b yẽn kẽrsdẽ.» ¹³ B yaool n yeela tãnsoabã: «Dɩk f sore, la Wẽnd na kõ foom f sẽn tẽede.» Wakat kãng bala dakõora paama laafi. ¹⁴ A Zezi sẽn kẽ a Piyɛr zakẽ, a mikame tɩ yẽ reem-poak gãeeme n pa keemẽ. ¹⁵ B sɩɩsa reem-poaka nug la a sãoogame la a yikame n segl-ba. ¹⁶ Zĩig sẽn waa n sobge, b talla neb wʋsgo n wa b taoore; sʋtãamba n da be b pʋsẽ; b yiisa gomd bala n dig sʋtãamba, la bãad dãmb sãoogame. ¹⁷ La yɩɩ woto la bãngd a Izayi gomda taasyã: A rɩka tõnd komslem, tõnd bãase n tʋk a menga. ¹⁸ A Zezi mikame tɩ sẽn pʋgd-b bãmbã da yaa wʋsgo tɩ b na n kõ noor tɩ b rʋʋg kʋɩlgã. ¹⁹ Sɛb-mit a ye kolg-b lame n leok-ba: «Soaala, y sẽn dabd zĩig ning fãa m na tũ-y lame.» ²⁰ T’a Zezi yeel-a: «Waas tara b roto, tɩ yĩngr luiili tar b tʋgdo; Ned Biiga bala n ka tar gãag zĩiga.» ²¹ B karen-biig a ye n waa n yeele: «Soaala, m kota sor n deng n tɩ solg m ba.» ²² La a Zezi leok-a lame: «Tũ maam la f bas kɩɩmsa ti b mum taaba.» ²³ Dẽ poore b kẽe koom koglg ne b karen-biisi. ²⁴ Ko-wiis rãmba bɛd-bɛda tɩ koglga rat n lisi. Dẽ t’a Zezi gõeeme. ²⁵ Karen-biisa kolgame n nek a Zezi n yeel-ba: «Soaala, wa-y tɩ d na n kiime!» ²⁶ A Zezi leok-b lame: «Bõe yĩng la y zoet dabeem, tẽeb bilf rãmba?» B sẽn yiki, b tãsa mogrã ne sobgã la bũmb fãa lebga sɩɩ. ²⁷ Neba pɛleng yɩkame tɩ b yeele: «Nin-kãnga la a bõe tɩ sobd la mogr meng deegd a noore?» ²⁸ A Zezi sẽn dʋʋg mogrã n ta Gadar tẽnga la neb a yiibu, sẽn tar Sʋtãan b pʋsẽ, yi yaadẽ n seg-ba. B ra yaa nin-toose al wʋsgo, al tɩ ned ba a ye ra pa le saagd n tũ sor ning sẽn yegd-a be wã ye. ²⁹ B sɩnga moonego: «Wẽnd Biiga baooda bõe ne-do? A wat n na n zoe n nams-d lame tɩ wakat nan ka yao?» ³⁰ Sẽn vẽsg be bilfu, kurkuy wʋsgo n da wãbd yamdo. ³¹ Sʋtãamba yeela a Zezi: «D kotame tɩ f sã n dig-d ka n yiis bɩ d tɩ kẽ kurkuya!» ³² B yeel-b lame tɩ b kẽnge la b yiime n tɩ kẽ rũmsã tɩ b kaoog vugr bala n sig n kẽ mogrã tɩ kooma rɩ-b gilli. ³³ Rũm-kɩɩmba ninga tĩiga n ta n togs tẽnga rãmba rũmsa sãoongo la neb a yiiba sãoogre. ³⁴ Tẽnga tõr yiime n na n seg a Zezi; b sẽn yãend-ba, b kos-b lame tɩ b yi b tẽngẽ.

¹ B kẽe koom koglg yɛsa n dʋʋg kʋɩlgã n leb b tẽngẽ. ² B talla põor n wa b taoore. Põora da gãe a gãag zugu. A Zezi sẽn yãend neba tẽebã, b yeela põorã: «Da le bʋ ye, m biiga, tɩ f paama f yel-wẽna sugri.» ³ Sɛb-mitba kẽer yeela b sũurẽ: «Yãoã yaa wẽn-tʋʋsa.» ⁴ A Zezi sẽn mi b sũur tagsgã leoka woto: «Bõe yĩng la y bilgd wẽng y sũurẽ? ⁵ Gomd bʋg togsg la naana n yɩɩda: f paama f yel-wẽna sugri, bɩ: yik n kẽne? ⁶ Sẽn na n yɩlẽ tɩ y bãng tɩ Ned Biiga tara tõog n kõ yel-wẽnd sugr, tẽng zug ka, ade, põore, m yet-f lame: tik n yik, dɩk f gãaga, leb f yiri!» ⁷ Põora yikame n dɩk a gãaga n leb a zakẽ. ⁸ La rẽ kẽesa rabeem kãsenga neb niyns sẽn yãend-ba sũurẽ, la b pẽga Wẽnnaam b sẽn kõ ninsaalb tõog a woto buudu. ⁹ A Zezi waa n yiime n loogdẽ, n yãe ned sẽn zĩ fadg reesg zĩigẽ, n boond tɩ Matiye. A Zezi yeel-a lame: «Tũ maam!» La a yik n tũ-b lame. ¹⁰ B sẽn ta a zakẽ n sɩng rɩɩbo la fadg rɛɛsdb ne yel-wẽn-maandb wʋsg sẽn waa n naag a Zezi ne b karen-biisã. ¹¹ La rog-n-mika tũudba, Farizẽ rãmba, sẽn yãend rẽndã, b yeela karen-biisã: «Yaa wãn tɩ yãmb karen-saamba dɩt ne fadg rɛɛsdb la yel-wẽn-maandba?» ¹² Mik a Zezi meng ra wʋmame tɩ b na n yeele: «Ka sẽn tar-b laafi n baood tɩɩm soab zĩig ye, yaa sẽn bẽed-ba. ¹³ Kẽng-y n tɩ zãms-y gomd kãnga võore: nimbãan-zoeer la m nong n yɩɩd maoongo. Ka nin-sõma wã la m waa n na n boole, yaa yel-wẽn-maandbã.» ¹⁴ Dẽ poore a Zã karen-biisa kolg-b lame n sok-ba: «Bõe yĩng la tõnd ne Farizẽ rãmba loet noore tɩ yãmb karen-biisa pa loetẽ?» ¹⁵ T’a Zezi na n leok-ba: «Pʋg sɩd zo-rãmb tõe n gãnema b nens wa ku-biisi tɩ pʋg-sɩda ket b sʋk bɩ? Wakat ning n wat n zĩndi tɩ b na n loog ne pʋg-sɩdã, wakat kãng la b na n loe b noore.» ¹⁶ Ned ka rɩkd peen-paalg sẽn ka wẽ koasla n sũk fu-kʋɩdg ye. Peen-paalga na n zɩsga fuugã t’a le kẽeg n paase. ¹⁷ Woto me waoog sẽn kʋdg ka rɩkd n sui dã-paalg ye. Ning tɩ pusgi, tɩ rãam daage, tɩ waoog yɩ bõne. Wao-paalg la b suiid dã-paalga, woto bõne ka ye. ¹⁸ B sẽn da ket n gomd la nin-naab a ye sẽn kolge n wõgemd b taoore n yeel-ba: «Ad-y m bi-pugl n ki mars-mars noogã, wa-y n tik-a ne y nugu t’a na vʋʋge.» ¹⁹ La a Zezi yikame n tũ-a, bãmb ne b karen-biisã. ²⁰ Pag a ye sẽn da bẽed mende al yʋʋm piig la a yiibu, kolga b poorẽ n sɩɩs b fuuga noore. ²¹ A ra gomda a sũurẽ: «M sã n sɩɩs b fuugã, m na n paama laafi.» ²² A Zezi sẽn wẽneg b poorẽ b yãend-a lame n yeel-a: «Teeg maam, m biiga, tɩ f tẽeb fãag-f lame.» La wakat kãng bala paga wẽneg n paama laafi. ²³ B sẽn ta nin-naaba zakẽ, b yãee neb sẽn peeb-d wɩɩse la neb wʋsg sẽn gũmi, tɩ zak wulumdi. ²⁴ A Zezi yeel-b lame: «Yi-y tɩ bi-pugla nan ka ki ye, a gõeeme bala. Neba da laad-b lame.» ²⁵ La b sẽn yiis neba yɩnga, a Zezi kẽeme n gãd bi-pugla nugu, t’a yik. ²⁶ La kibara sãaga tẽnga fãa. ²⁷ A Zezi sẽn yik tɩ b loogda, la zoeens a yiib sẽn sɩng pʋgbo la b moonẽ: «Daviid biiga, zoe-y d nimbãanega!» ²⁸ B sẽn ta yiri, la zoeensã sẽn kolg-ba tɩ b na n sok-ba: «Yãmb tẽedame tɩ m tõe rẽnna?» Tɩ b leoke: «N-yẽe, Soaala!» ²⁹ Tɩ b na n sɩɩs b nina la b yetẽ: «Bɩ yɩ wa y sẽn tẽede!» B nina pukame. ³⁰ T’a Zezi na n leok-b pãr pãre: «Maan-y gũusgu, tɩ ned da bãng ye!» ³¹ Zoeensa sẽn yi, pa kaoos ye, b sɩnga b yʋʋra yelegr beelẽ baobgã. ³² Bãmb sẽn looge, ka kaoos ye, tɩ b tall ned a ye n wa la Sʋtãan-muk n da be a pʋgẽ. ³³ B sẽn dig Sʋtãana la neda sẽn sɩng goama. Zãma wã pɛleng yɩkame tɩ b yetẽ: «Ned zɩ n yãe woto taar Israyɛl tẽng ye.» ³⁴ Farizẽ rãmba yẽ ra yetame: «Ad-y yaa ne Sʋtãamba naab pãnga la a rigd sʋtãamba.» ³⁵ A Zezi ra kẽeda tẽn-bɛd la tẽn-bõonese, n maand karengo pʋʋsg rotẽ, n togsd Rĩunga kibar noogã la b sãoogd bãag la pa-keem buud fãa. ³⁶ A Zezi gesa zãma wã n wẽ siri tɩ b ra yɛɛ zãnga, tɩ b nensa surẽ wa piis sẽn pa tar pe-kɩɩma. ³⁷ Dẽ la b yeel b karen-biisi: «Kooda sẽn ta kɛɛba labsa, la kɛɛdba sõor paooda. ³⁸ Kos-y pʋʋga soaba t’a tʋm ka-kɛɛdba a pʋʋgẽ.»

¹ B boola b Tʋʋm-tʋmdb piig la a yiibã la b kõ-b-la tõog tɩ b rig Sʋtãamba la b sãoog bãag la pa-keem buud fãa. ² Tʋʋm-tʋmdb piig la a yiibã yʋy la woto: pipi yaa a Simo, b sẽn boond a soab tɩ Piyɛr; yẽ poore, a yao, a Andre, n paas a Zak ne a yao, a Zã, bãmb ba la a Zebede; ³ le yaa a Filip, a Bartelemi, a Toma, a Matiye, yẽ da reegda fadgo; le paasa a Zak, a Alfe biiga ne a Taade, ⁴ n paas a Simo a to: yẽ la m sũur bee ne buuda bɛ fãa; n baasd ne a Zɩɩda, Iskariyot tẽng neda; yẽ n sõng a Zezi bɛɛba tɩ b paam-ba n yõke. ⁵ Bãmb piig la a yiibã la a Zezi yeel tɩ b saag n ges tẽnsã, n sagl-b woto: «Da tũ-y bu-zẽmba sor ye, la ra kẽ-y Samari rãmb tẽngẽ ye. ⁶ Pʋg-y Israyɛl kamba sẽn kẽ-b weoog wa piisã. ⁷ Sor zug bɩ y moon tɩ Wẽnd Rĩung kolgame. ⁸ Sãoog-y bãad dãmba, vʋʋg-y kũum, tõog-y yĩng bãase, dig-y Sʋtãamba. B kõo yãmb zaalem, bɩ yãmb me kõ zaalem. ⁹ Da bao-y sãnem bɩ wanzurf ye, da sui-y bõonego y gɩfẽ ye. ¹⁰ Da bob-y korgo n kẽnd ye, da zɩ-y fut a yiib ye, da widi neooda ye, da zã-y dasaar ye. Tʋʋm-tʋmd toga ne yaoodo. ¹¹ Y sã n kẽ tẽn-bil bɩ tẽn-kãsenga, bɩ y kos tɩ b wilg-y nin-sõng zaka tɩ y yõg gãag-sobend be, n ta y loogr daare. ¹² Y sã n wa kẽed zaka pʋga bɩ y kãab-a laafi, ¹³ la a sã n sɩd tog ne-a, y laafi na sig a pʋgẽ, la y laafi kõn sig-a, a sã n pa tog ne-a ye. ¹⁴ Ned sã n mong-y gãag-sobendo, a sã n zãgs y koɛɛg kelgre, bɩ y yi a zakẽ, bɩ a tẽngẽ, la y fugumd y neooda tom. ¹⁵ La m yet-y lame tɩ bʋʋda raare, Sodom la Gomor nimbãanega kõn zeng tẽn-kãng rẽnd ye. ¹⁶ Ad-y m tʋmd-y-la wa pe-yãans digd-n-yĩids sʋka, bɩ y sɩlem yɩ waaf sɩlem, la y yɩ neb sẽn ka tar b toorẽ yelle wa walle. ¹⁷ Maan-y gũusgu ne ninsaalba; b na n kẽes-y-la bʋʋdo bʋ-kaood bɛda taoore, b na n pãb-y la ne kaase, b pʋʋsg rotẽ. ¹⁸ Mam yĩnga, b na n vu-y lame n kẽng dĩm dãmb la kombɛɛmba taoore, tɩ m datame tɩ y yɩ m kaset dãmba, bãmb la bu-zẽmba taoore. ¹⁹ La b sã n wa yõg-y bɩ y ra nams y menga n bao y sẽn na n leok to-to, bɩ y sẽn na n togs bũmb ning ye; y sẽn na n togs bũmb ningã, y na bãng-a wakat kãng bala, ²⁰ tɩ ka yãmb n na n gome, yaa y Ba wã Vʋʋsem n na n gom y zĩigẽ. ²¹ Ned na n kɩsa a ba-biiga, tɩ b kʋ, tɩ ba na n kɩs a meng bi-roaka, tɩ kamb na n yik ne b ba rãmba, n kʋ-ba. ²² B fãa na n kisga yãmb, mam yĩnga, la ned ninga sẽn na n kell n modga a yõor tɛka, yẽ soab n na n paam fãagre. ²³ B sã n digd yãmb tẽn kãngã, bɩ y zoe n kẽ tẽng a to, b sã n pʋg-y be, bɩ y zoe n kẽ tẽng a to; la m yet-y lame tɩ y kõn saag Israyɛl tẽnsã n sɛ, tɩ Ned Biiga nan ka wa ye. ²⁴ Karen-biig pa yɩɩd a karen-saamb ye, la rakõor pa yɩɩd a zu-soab ye. ²⁵ Karen-biig sã n Wẽnd a karen-saamba, tɩ dakõor wẽnd a zu-soaba, sekame. B sẽn bool zak soab t’a Beelzebul, bõe la b ka n a n yeel a zaka rãmb poorẽ? ²⁶ Da zoe-y neba ye. Sẽn solg na n pukame la sẽn lud fãa na n lakame. M sẽn togs yãmb bũmb ning fãa likẽ, bɩ y yi n moon yɩnga, ²⁷ la m sẽn walem-y bũmb ning y tʋbrẽ bɩ y rʋ roog zugu n pãr-a. ²⁸ Da zoe-y lɛ-lɛ sẽn tõe n kʋ-b yĩngã n yaool n pa tõe n kʋ sɩɩga ye. Zoe-y bala, ned ning sẽn tõe n lub bugmẽ sɩɩga la yĩngã. ²⁹ Yirsa yiib yɩɩda tãma sɩda? La yirg ba a ye ka lʋɩt tẽnga tɩ y Ba zɩ tiir ye. ³⁰ Dɩlla yɩta a wãn ne yãmba. Ad-y y zoobda fãa, Wẽnd tara b sõore! ³¹ Da bʋ-y ye, tɩ yãmb sãoo luin-sugri. ³² Ned ninga sẽn na n yeel-a neb taoore t’a kẽeda maam, m Ba sẽn be arzãna taoore, mam me na yeel tɩ m kẽeda a soaba. ³³ Ned ninga sẽn na n yeel-a neb taoore t’a ka mi maam, mam me na yeele, m Ba sẽn be arzãna taoore, tɩ m ka mi-a ye. ³⁴ Da tẽ-y tɩ m talla laafi n wa tẽng zug ye, ka laafi la m tall n wa, yaa zabr sʋʋga. ³⁵ M waame n na n zablg ned ne a ba, bi-pugl ne a ma, pag ne a bi-paga. ³⁶ Fo bɛɛba na n yii f buudẽ. ³⁷ Sẽn nong-a a ba bɩ a ma n yɩɩd maam, ka tog ne maam ye; sẽn nong-a a bi-ribl bɩ a bi-pugl n yɩɩd maam, yẽ soab ka tog ne maam ye. ³⁸ Sẽn ka rɩkd-a a pika n pʋg maam, ka tog ne maam ye. ³⁹ Sẽn baood-a a yõore na n menes-a lame; la sẽn menesa a yõor mam yĩnga, na n le paam-a lame. ⁴⁰ Sẽn deegd-a yãmb sãando, yaa maam la a reegda; sẽn deegd-a maam sãando deegda ned ning sẽn tʋm-a maam. ⁴¹ Ned ninga sẽn maand-a bãngd sãando a sẽn ya bãngda yĩnga, yẽ soab na n paama bãngd dolbo. Ned ning sẽn maand-a nin-sõng sãando a sẽn ya nin-sõnga yĩnga, yẽ soab na n paama nin-sõng dolbo. ⁴² Ned ninga sẽn na n kõ m kom-bãmba nin-yend ko-maasg wamde, a sẽn ya m karen-biiga yĩnga, m yet-y lame t’a kõn kong a rolb ye.»

¹ A Zezi sẽn waa n sagl b Tʋʋm-tʋmdb piig la a yiibã n sɛ, b yiime n kẽ tẽnsã n le sɩng zãmsgo. ² Mik a Zã zĩnda bi-bees roogẽ n wʋm Wẽnd Neda tʋʋma yelle. ³ A yiisa a karen-biis tɩ b tɩ sok a Zezi: «Yãmb la sẽn tog n waa soaba bɩ d tog n gũ-la a to?» ⁴ A Zezi leok-b lame: «Tɩ togs-y y karen-saamb a Zã y sẽn wʋme la y sẽn yãe bũmb ninga: ⁵ Zoeens neeme, wobs kẽndame, wãoob sãoogdame, wʋms wʋmdame, sẽn ki-b vʋʋgdame, la b togsda Koe-noogã naong rãmba; ⁶ zu-noog soaba la sẽn ka lakd-a maam wa sor zug kugri n lʋɩ.» ⁷ A Zã sẽn tʋm b rãmba sẽn lɛɛg n kuiisẽ la a Zezi sẽn leok woto a Zã poorẽ: «Bõe la y tɩ yãe weoogẽ, tɩ-pol sobg sẽn lengde? ⁸ Bõe la y tɩ yãend sẽ? Ned sẽn yer faong fuugu bɩ? Ad-y sẽn yer-b faong futa vɩɩ nanams zagsẽ. ⁹ Bõe la y tɩ yãend sẽ, y tɩ yãee bãngda? N-ye! La m yet-y lame: yɩɩda bãngda. ¹⁰ Ad-y yaa yẽ poorẽ la b gʋlsyã: M na n yiisa ned n ning m taoore t’a maneg sor ning m sẽn na n tũ wã. ¹¹ Sɩd-sɩda, m yet-y lame tɩ pagba kamb sʋka, ned ka yɩɩd a Zã, rao ning sẽn kõta sooba ye, la ne rẽ fãa sẽn ya-a yao zʋʋg Arzãn Rĩunga pʋgẽ, yɩɩd-a lame. ¹² A Zã sẽn sɩng sooba tɛka n dabd marsã, Arzãn Rĩunga waa ne wɩsg-m-menga, lebga sẽn tara pãng tus n kẽ. ¹³ Sebr sõng la bãngdba talla wilgri, n tãag a Zã. ¹⁴ La sã n yaa a Zã, m ka mi y sã na n deega m goama, ad-y yẽ la Eli ning sẽn na n lɛɛg n wa wã. ¹⁵ Sẽn tar-a tʋbr bɩ a wʋm! ¹⁶ Bõe la m na n yãe n mak zamaan kãnga? A wẽnda yãas sẽn kõ taab sɛk tẽnga tẽnsʋka, n na n gom taab beedo, ¹⁷ n yetẽ: ‹Tõnd peeba wɩɩse, tɩ y zãgs saooga, tɩ tõnd kelem kʋʋre, tɩ y zãgs y yãoog toosgo!› ¹⁸ A Zã sɩd waame n pa rɩtẽ la a pa yũud ye, tɩ b yet tɩ Sʋtãan n be a pʋgẽ. ¹⁹ Ned Biiga waame, n dɩtẽ la a yũuda, tɩ b yet tɩ b baad dɩ-rɩta la rã-yũuda, tɩ b baad fadg rɛɛsdba la yel-wẽn-maandba zoa. La b tʋʋm sõma wã waa n kõo kaseto tɩ Yam Pidunga soab bee ne-ba. ²⁰ Dẽ poore b yika zabre ne tẽns niyns sẽn yãend-b bõn-bãna n yɩɩd tẽns a taaba n yaool n ka tek b zʋgã. ²¹ Yel-beed ne foo, Korozein tẽnga! Yel-beed ne foo, Bɛtsayid tẽnga! Wẽnd makr niyns sẽn maan yãmb pʋgẽ sã n da maanẽ Tir la Sidõ, yaa daar zãr la be rãmba yeelgẽ sũ-pa-noang futu la b bilmẽ b mens tompɛglemẽ, n teemẽ zʋgo. ²² Yaa rẽ yĩng la m yet-y: bʋʋda raare, Tir ne Sidõ sɩbgr kõn ta y rẽnd ye. ²³ La foo, Kafarnaom, fo tẽedame tɩ f na n lugame n tãag saaga? Ade, bʋg-tẽng la f na n sirg n lʋɩ. Bãng tɩ bõn-bãn-niyns sẽn maan f pʋgẽ sã n da maanẽ Sodom tẽnga, a ket n yɛsẽ la rũnna. ²⁴ Yaa rẽ yĩng la m yet-fo: bʋʋda raare, a Sodom sɩbgr kõn ta f rẽnd ye.» ²⁵ A Zezi waa n zẽka b koɛɛg n gom woto: «M Ba, yĩngr la tẽng Soaala, m pʋʋsd-y la barka y sẽn solg woto sɩlem dãmba la yam dãmba n yaool n togs nin-bõonese. ²⁶ N-ye! Woto n sɩd yɩ y raabo, m Ba sõngo! ²⁷ M sẽn tar fãa yaa m Ba n kõ-ma. Ned ka mi Biiga sã n ka Ba, la ned me ka mi Ba sã n ka Biigã, bɩ ned ninga sẽn paam-a Biiga wilgri. ²⁸ Wa-y m nengẽ, yãmb fãa sẽn tar-b pɛta la sẽn zɩt-b zɩɩb n yõrdẽ, tɩ m na yols y fãa. ²⁹ Tʋk-y m zɩɩbã la lebg-y m karen-biisi, tɩ m yaa ned sẽn ka mi sũ-toog la zẽk-m-menga, la y sɩɩga zu-loees na paam yolsgo. ³⁰ Bãng-y tɩ m sẽn na n tʋk-y zɩɩb ninga yaa faasga la tʋʋsga bʋgsa.»

¹ Sibr daar a ye, a Zezi waa n loogda kood sẽn bɩ sʋka. Kom da tara b karen-biisã tɩ b kũus ka-zut n tẽg n wãbe. ² Farizẽ rãmb yãeeme n yeel-ba: «Yãmb karen-biisa maanda sẽn kis vʋʋsg daare!» ³ T’a Zezi na n yeel-ba: «Dɩlla yãmb pa karen a Daviid sẽn maan bũmb ninga, kom sẽn waa n yõk-a, yẽnda ne a tũud-n-taase? ⁴ Ad-y b kẽe wẽnd doogẽ n dɩ buri niyns sẽn da rɩk n kõ Wẽndã. Yẽ ne a tũud-n-taasa yaool n da pa tõe n dɩ bur kãens ye, tɩ maan-kʋʋdba bal n da tar sor n dɩ-ba. ⁵ Bũmb a to, y pa karem Noora sebrẽ tɩ vʋʋsga daare maan-kʋʋdba tʋmda wẽnd doogẽ tɩ ka yel-wẽnd bɩ? ⁶ M yet-y lame: sẽn yɛs-a yãmb taoorã yɩɩda wẽnd doogã. ⁷ Yãmb sã n dag n wʋme gomd kãnga võore: m nonga nimbãan-zoeere n yɩɩd maoongo, y kõn sak n ningẽ taale neb sẽn ka maan yel-wẽnd ye. ⁸ Bãng-y tɩ Ned Biigã n so vʋʋsga daare.» ⁹ B sẽn looge, pʋʋsga roogẽ la b tɩ kẽ. ¹⁰ Zemsg neere, nug kɩɩng a ye soab n da be be la Farizẽ rãmba soka a Zezi: «Bãad tõe n sãooga vʋʋsga daar bɩ?» B soka woto n na n kẽes a Zezi yellẽ. ¹¹ Dẽ la a Zezi leok-ba: «Yãmb sʋka, ãnd n tar pe-yãang a ye tãa, t’a lʋɩ bokẽ vʋʋsga daare t’a zãgs a tɩ gãd-a n yiisi? ¹² Y mi tɩ ninsaal yɩɩda pesg al zĩig sẽn zãre. Dẽnna bõn-sõng maaneg ka kis vʋʋsga daar ye.» ¹³ Dẽ poore b yeela koamsã: «Tẽeg f nug.» A tẽega a nugu, nuga vʋʋgame n ya kɛgeng wala a yembrã. ¹⁴ Farizẽ rãmba yiime la b yẽsa ne taaba b sẽn na n maanega n paam a Zezi n kʋ. ¹⁵ B sẽn bãng rẽ, a Zezi yiime. Wʋsg tũ-b lame. ¹⁶ B sãooga koms rãmba fãa la b yeel-b lame tɩ b ra gom tɩ ned wʋm ye. ¹⁷ Woto taasa bãngda Izayi gomde: ¹⁸ Ad ned ning m sẽn yãk m tʋʋmda yĩnga. Yaa m zoa nongre, m yam kẽe-a la zãnga. M na n sika m Vʋʋsem a zugu, t’a wilg bu-zẽmba sõmblem la sɩd sore. ¹⁹ A kõn yɩ zab baooda la bʋrg soab ye. Ned kõn wʋm a koɛɛg sotiisẽ ye. ²⁰ Tipol sẽn kaooge, a kõn kũk-a n baas ye fitil laong sẽn ket n nukd bug-zõose, a kõn kiis-a n baas ye al n wa tõog tɩ sɩd la sõmblem reeg zĩig zãng n yãmbe. ²¹ Yẽnda la dʋni rãmba fãa na n maan b teegda. ²² Sʋtãan n da kẽ neda t’a soaba ya zoanga la muka la b tall-a lame n wa a Zezi taoore la bãmb sãoog-a lame t’a gomd la a neẽ. ²³ Zãma wã yɛɛsame n yetẽ: «Nin kãnga kaa Daviid biigã?» ²⁴ Farizẽ rãmba wʋmame n leoke: «A sã n digd sʋtãamba, yaa ne Sʋtãamba naab, a Beelzebul, pãnga.» ²⁵ A Zezi sẽn mi b pʋga yeel-b lame: «Rĩung buud fãa sẽn welg sagse, rĩung kãng baooda a wãabo. Tẽng a ye rãmba bɩ zak a ye rãmb sã n welg taaba, tẽng kãng bɩ zak kãng ka tõe n yals ye. ²⁶ Sʋtãan sã n digd a sʋtãan taaga, a welga a yiibu, a naam na n yɩɩ wãn n vigli? ²⁷ Sã n yaa ne a Beelzebul pãng la mam digd Sʋtãamba, yãmb neba rigd-b la ne ãnda rẽnna? Dɩlla bãmb n na n kao y bʋʋdo. ²⁸ La sã n ya ne a Vʋʋsem Sõng pãng la m digd sʋtãamba, bɩ y bãng tɩ Wẽnd Rĩunga taa yãmba. ²⁹ Bũmba to yɛsa: ned yɩta a wãn n kẽ gãndaoog zakẽ n zɛ a teedo, a sã n ka reng n yõk-a n sẽbe? Sẽbdame n yaool n zɛ teedo. ³⁰ Sẽn ka-a mam zoa, yaa mam bɛyã, sẽn ka suiid-a mam sẽn suiidẽ, sẽegdame. ³¹ Yaa rẽ la m yeta: ninsaalba na n paam b yel-wẽnd la wẽn-tʋʋr buud fãa sugri la a Vʋʋsem Sõng tʋʋda kõn paam sugr ye. ³² Sẽn tʋʋs-a Ned Biiga na paam sugri, la sẽn tʋʋs-a Vʋʋsem Sõngo kõn paam sugr dũni kãnga la dũni ninga sẽn pʋgda ye. ³³ Tɩ-sõngo womda bi-sõma. Tɩ-yoog biis me na yɩ yoodo. Tɩɩg biig n wilgd a sã n yaa sõng bɩ yoogo. ³⁴ Wag-bi buudu, y goama yɩta a wãn n yɩ sõma tɩ y mens ya wẽnse? Sẽn pid sũuri n wat noorẽ! ³⁵ Nin-sõng yiisda bõn-sõma tɩ bõn-sõma la a bĩng a baoorẽ, la nin-wẽng sẽn bĩng bõn-wẽnsã, yiisda bõn-wẽnse. ³⁶ M yet-y lame, gomd yaalg buud fãa ned sẽn na n yiis a noorẽ, b na sok-a bʋʋda raare. ³⁷ Yaa f sẽn yiis f noorẽ n na n yiis foo bʋʋdẽ bɩ n na n paalg-fo.» ³⁸ Noor sebra mitba la Farizẽ rãmb kẽere yeel-b lame: «Soaala, d tʋllame tɩ y maan bõn-bãnd tɩ d yãende.» ³⁹ B leok-b lame: «Zãmb la yoob zamaan kamba rata wẽnd makre la b ka na n paam wẽnd makr a to ye; a Zonas makra bal la m na n kõ-ba. ⁴⁰ Wala a Zonas sẽn pa mogra Bõn-nind pʋg rasem a tã la yʋnd a tã, wotome Ned Biiga na n paa tẽng pʋgẽ rasem a tã la yʋnd a tãabo. ⁴¹ Bʋʋda raare, Niniv rãmb na n yika ne rũnna zamaana rãmba la b na n mong-b-la bʋʋm, tɩ bãmb sẽn wʋm a Zonas koɛɛga, b sɩbga b mense; sẽn yɛs-a ka wã yɩɩda a Zonas. ⁴² Bʋʋda raare, tẽn-zãorgẽ Dĩmpoaka na n yika ne rũnna zamaana rãmba la a na n mong-b-la bʋʋm tɩ yẽ yii al Mooga sɛtmẽ n wa kelg gom-minim naab, a Salomo, la sẽn be-a ka wã yɩɩda a Salomo! ⁴³ Sʋtãan dẽgd sã n yi n bas a sẽn da kẽ a soaba, a gõoda weoogo n baood vʋʋsg zĩiga n ka yãetẽ ye. ⁴⁴ A yeta a sũurẽ: m na n leba m zĩ-kʋdgẽ. A watame n mik t’a yaa vɩʋʋgo, mik tɩ b maneg pɩɩs-a lame, tɩ bũmb fãa be a zĩigẽ. ⁴⁵ T’a na n lɛɛg n wa ne a sʋtãan taas a yopoe sẽn yɩɩd yẽ ne wẽnem, tɩ b wa kẽ-a. Bãng-y tɩ nin-kãng yell lebgda wẽng n yɩɩg pĩnda. Dũnna zamaan yooka yell na n yɩɩ boto.» ⁴⁶ A Zezi ra ket n sõsda ne zãma wã la b ma ne b saam-biisa waa n bee yɩng n dat n gom ne-ba. [ ⁴⁷ Ned a ye n wilgi: y ba la y ma n be dignoorẽ la b rat n leok-y la bũmbu.] ⁴⁸ A Zezi yeela sẽn waa n togsa wã: «Ãnda la mam ma, la m saam-biisi?» ⁴⁹ La b zẽka b nug n tees b karen-biisã, n yetẽ: «Ad m ma la m saam-biisi. ⁵⁰ Ned ninga sẽn maand-a m Ba sẽn be arzãna yam, yẽ yaa saam-biiga, la tão, la ma, m yĩnga.»

¹ A Zezi yii yiri n kẽng mogra noore n tɩ zĩi. ² Neb wʋsg sɩnga bãmb gũbgri tɩ b kong n kẽ n zĩnd koglg pʋga, tɩ zãma wã be kʋɩlga noore. ³ B goma bũmb wʋsg yell ne-ba la ra yaa ne yelbũna. Ad-b sẽn da yete: «Bʋt n yi n na n bʋde, ⁴ la a sẽn waa n bʋtẽ, bõn-buuda kẽer lʋɩɩ sor noor la luiili waa n dɩgs-b-la zãnga n dɩ. ⁵ Kẽer lʋɩɩ kug zĩigẽ, n ka paam n bus neer ye; la b sẽn ka paam n bus neerã b pa kaoos yiib ye. ⁶ La wĩntoog sẽn puki, a waolga yõog-b lame. La b sẽn ka tar yẽgen yĩnga, b kʋɩɩme. ⁷ Kẽer me lʋɩɩ gõosẽ la gõosa tobame n wulumd-ba n kʋ. ⁸ Kẽer lʋɩɩ zĩ-sõngẽ n wom biisi, kẽer koabg-koabga, kẽer pisoobsoobe, kẽer pistã-tã. ⁹ Sẽn tar-a tʋbr bɩ a wʋm!» ¹⁰ Karen-biisa kolgame n sok-ba: «Bõe yĩng la y gomd ne yelbũna?» ¹¹ Tɩ b leoke: «Sã n ya yãmba, yãmb paamame n bãng Wẽnd Rĩungã yel-soalma la neb a taaba ka paam dẽ ye. ¹² Sẽn zoe n tar-a, b na n kõ-a lame n paas a paoongo, la sẽn ka tar-a wʋsgo, a sẽn tar-a zãng la b na n deege. ¹³ Yaa rẽ yĩng la m gomd ne neb a taaba ne yelbũna: tɩ b neeme la yaa waa b pa ne ye; b wʋmdame la yaa waa b pa wʋmde, wa ka kẽed b yamẽ ye. ¹⁴ Bãmb me taasa bãngda Izayi koɛɛga: Y na n kelgame la y kõn wʋm fɩ, y na n gesame la y kõn yãe fɩ. ¹⁵ B yam lebga lika; b paga b tʋba la b nini tɩ b pa rat tɩ b nin yãe, tɩ b tʋbr wʋm, tɩ b yam deeg tɩ b teem tɩ m kõ b laafi ye. ¹⁶ Yãmb yẽ, yãmb yaa zu-noog rãmba tɩ y tara nin sẽn ne la tʋb sẽn wʋmde. ¹⁷ Sɩd-sɩda, m yet-y lame tɩ bãngdb wʋsgo la nin-sõma tʋlgame n yãe y sẽn yãete, la b ka paam ye, n wʋm y sẽn wʋmde la b ka paam dẽ ye! ¹⁸ Bɩ yãmb kelg bʋta yelbũndã. ¹⁹ Ned sã n kelg Wẽnd Rĩunga gomde n ka wʋm a võore, wẽnema naab kẽeda a sũurẽ n vaag a sẽn wʋm-a n looge. Yẽ soab makr la sor noorẽ bõn-buudã. ²⁰ Bõn-buud ninga sẽn lʋɩ-a kuglaagẽ makda ned ninga sẽn wʋm-a koɛɛgã n deeg-a tao tao ne sũ-noogo. ²¹ La a sẽn ya ned sẽn ka tar yẽgna, ned sẽn ka tar a meng võorã, toog sã n wa bɩ b sã n namsd-a, Gomda yĩnga, tao tao t’a pãs n lʋɩɩme. ²² Bõn-buud ninga sẽn lʋɩ-a gõosẽ makda ned ninga sẽn wʋmd-a Koɛɛgã la a bas tɩ dũni zu-loeese la arzɛk tʋlsem wulumd-a t’a ka tõe n wom biis ye. ²³ Bõn-buud ninga sẽn lʋɩ-a zĩ-sõngẽ makda ned ning sẽn wʋm-a Koɛɛgã a tʋbrẽ la a yamẽ; yẽ soab womda biisi, yẽ soab n womd koabg-koabga, pisoobsoobe, pistã-tã.» ²⁴ B le wẽe yelbũnd a to: «Arzãn Rĩunga wẽnda ned sẽn bʋd bõn-buud sõng a pʋʋgẽ. ²⁵ La neb sẽn waa n kẽ gõeem, a bɛ yiime n tɩ fẽeg bõn-buud yoogo n bas n looge. ²⁶ Kooda sẽn waa n tob vãado la b wek biisi la b sẽn yẽnd bõn-buud yoog me. ²⁷ Woto rakõapa tɩ yeela pʋʋga soaba: ‹Zu-soaba, ka bõn-buud sõng la y bʋd y pʋʋgẽ laa? Tũu ne bõe tɩ bõn-buud yoog me wa beẽ?› ²⁸ Pʋʋga soab leok-b lame: ‹Yaa bɛ nina n maan dẽ.› Tɩ rakõapa le sok: ‹Y ka rat tɩ d kẽng n tɩ võ ba?› ²⁹ Pʋʋga soab yeelame: ‹Ayoo! Bõn-buud yoogo võob wakato y wat n tudg n võo kood sõnga me. ³⁰ Bas-y tɩ b bɩ n ta ka-kɛɛrã la ka-kɛɛra wakato m na yeel kɛɛdba: deng n tigs-y kood yoogã n kals n yõog bugmẽ. Dẽ poor marsã y na kẽeb buud sõngã n sui m baoẽ.› » ³¹ B le paasa yelbũnd a to: «Arzãn Rĩunga wẽnda tɩɩg a ye biisi, seneve tɩɩga, b sẽn dɩk n bʋd pʋʋgẽ. ³² Tɩɩsa biis sʋka seneve rẽnd n paood n yɩɩda la a sã n yi, yẽ n zʋʋgd zẽed tɩɩs a taaba la a wat n tol n lebga bedre tɩ luiili wat n soond a wilẽ.» ³³ B le wẽe yelbũndi: «Arzãn Rĩunga wẽnda rabɩll pag sẽn dɩk n ning zom moena a tã pʋgẽ tɩ fãa wuki.» ³⁴ A Zezi goma woto ne yelbũna. B pʋs n dag n ka gomda tɩ ka ne yelbũn ye. ³⁵ Yaa woto la bãngda gomd tõog n taase: «M na n yaaga m noor n wẽ yelbũna, m na n puka yɛla sẽn solg al dũni sɩngrẽ.» ³⁶ B basa nebã n leb yiri. B karen-biisa kolgame n kose: «Wilg-y tõnd vẽenega bõn-buud yooga yelbũnda võore.» ³⁷ B yeel-b lame: «Sẽn bʋt-a bõn-buud sõnga yaa Ned Biigã. ³⁸ Pʋʋga yaa dũni wã. Bõn-buud sõnga yaa Rĩunga kẽedba. Bõn-buud yooga la sẽn kẽed-b nin-wẽngã. ³⁹ Bɛyã sẽn bʋd bõn-buud yooga yaa Sʋtãana. Ka-kɛɛra yaa dũni sɛɛbo. Ka-kɛɛdba yaa malɛgse. ⁴⁰ Wala b sẽn kɛɛd nadẽnse n yõogd bugma, dʋni wã sɛɛb me na n yɩɩ boto. ⁴¹ Ned Biiga na n tʋma malɛgs tɩ b kẽ b Rĩunga pʋgẽ n wʋk ye-lwẽna la yel-wẽn-maandba fãa ⁴² n lob bug-toaagẽ tɩ b be be n yãbd, tɩ b yẽn kɛɛd taaba. ⁴³ Wẽnd kãng la nin-sõma wã na n yãg wa wĩntoogo, b Ba Rĩunga pʋgẽ. Bɩ sẽn tar-a tʋbr fãa wʋm! ⁴⁴ Arzãn Rĩunga wẽnda arzɛk sẽn bus pʋʋgẽ tɩ ned wa buk-a. A le lɛɛg n bus-a lame la a kula ne sũ-noogo n tɩ koos a sẽn tar fãa n dɩk n da pʋʋgã. ⁴⁵ Arzãn Rĩung wẽnda toanda sẽn baood muizãan neba. ⁴⁶ A waa n yãenda a ye sẽn ya sõmb wʋsgo t’a kẽng n tɩ koos a sẽn tar fãa n paam n da-a. ⁴⁷ Arzãn Rĩunga sẽn wẽnd a soab yɛsa: yaa zulunga, b sẽn lob mogrẽ n yaasd zĩm buud fãa. ⁴⁸ Zulunga sã n pidi, kʋɩl-zẽ-yẽedba yiisd-a-la kʋɩlga noore n tũus kʋɩl-zẽed niyns sẽn ya-b sõma n ning b yaasẽ la b lob sẽn ka-b sõmbã. ⁴⁹ Dũni saab daar na n yɩɩ woto: malɛk rãmba na n waame n welg nin-wẽns la nin-sõma. ⁵⁰ B na n loba nin-wẽnsa bug-toaagẽ, yãbr la yẽn kẽrsgo zĩigẽ.» ⁵¹ «Y wʋma fãa?» «N-yẽe!» ⁵² Tɩ b na n paas: «Sɛb-mit fãa sẽn na n lebg-a Arzãn Rĩunga karen-biiga, wẽnda dakãagr sẽn tõe n yiis a arzɛk pʋgẽ, bõn-paal la bõn-kʋda.» ⁵³ A Zezi wẽ b yelbũna n sɛ, n yi, ⁵⁴ n kẽng b ba-yiri n tɩ kẽ pʋʋsga roogẽ n zãmsd neba. B goama ra yɩkda neba pɛlense. B ra yetame: «Yɛ la a paam bãngr la tõog a woto? ⁵⁵ Ka yẽ la ra-wãada biig laa? Ka yẽ ma la a Maryam, t’a Zak, a Zozɛf, a Simo la a Zɩɩd yaa a saam-biis laa? ⁵⁶ A saam-bi-pogsa ka ket n be d sʋk laa? Yɛ la a paam woto fãa?» ⁵⁷ B ra yɛɛsdame. La a Zezi yeel-b lame: «Bãngd ka yãet paoore sã n ka a tẽngẽ la a zakẽ ye.» ⁵⁸ B pa sak n maan wẽnd makr wʋsg be ye, neba tẽeba sẽn da paood yĩnga.

¹ Komber, a Erod, waa n wʋmdame tɩ b tar a Zezi yʋʋra pẽgre ² t’a yeel a sõsd-n-taase: «Ad-y yaa Zã ning sẽn da kõt-a soobã; a vʋʋga kɩɩms sʋka, la rẽ n so la a maand wẽnd makr dãmba.» ³ Sɩd me, a Erod n da kɩt tɩ b yõk a Zã n balg bãnga, n pag roogo. Yɩ-la a Erodiad, a Filip paga, poorẽ, ⁴ t’a Erod n da rɩk a yao, a Filip, paga t’a Zã yet tɩ rẽ pa segd ye. ⁵ A Erod tʋlgame meng n kʋ a Zã la a zoe neba nifu, tɩ b ra geta a Zã wa bãngda. ⁶ A Erod waa n tẽega a rogem daare n maan kibsa. A Erodiad bi-pugl waa n saoo neere neba fãa nifẽ n noog a Erod sũuri al wʋsgo. ⁷ Dẽ la a kãab bi-pugla t’a sẽn na n kos bũmb ning fãa a na paame. ⁸ A ma saglg yĩnga, biiga yeelame: «Kõ-y maam mars marsã bala, laag pʋgẽ, a Zã zugu.» ⁹ A Erod sũur sãama wʋsgo la a sẽn da kãab neba taoor yĩnga, a yeelame tɩ b maan biiga sẽn datã ¹⁰ la a tʋmame tɩ b kẽng bi-bees roogẽ, n tɩ fiuug a Zã zugu. ¹¹ B sɩd talla a Zã zuga ne laag n wa kõ bi-puglã t’a reeg n kõ a ma. ¹² A Zã karen-biisã n waa n dɩk a Zã yĩngã n tɩ mum, n lɛɛg n wa wilg a Zezi. ¹³ A Zezi wʋma a Zã kaalem, n kẽ koglg, n vẽsge, n tees weoogo. Neba bãnga rẽ n yi b tẽnsẽ ne nao n bʋʋg-ba. ¹⁴ A Zezi sẽn yet tɩ b yit koglgã, b yãee neb ka tɛka, tɩ b nimbãaneg na n yõk-ba. La b sãooga bãad dãmba fãa. ¹⁵ Zĩig sẽn sobge b karen-biis kolg-b lame n yeele: «Ade, ka yaa weoogo la lebga zĩ-sobdo. Bas-y neba tɩ b le b tẽnsa pʋgẽ n tɩ ra rɩɩb n dɩ.» ¹⁶ Dẽ la a Zezi leok-ba: «Ka modgre tɩ b leb tẽng pʋgẽ ye, y mens y toore bao rɩɩbã n kõ-ba.» ¹⁷ Karen-biisa me leokame: «Bur a nu la kʋɩl-zẽed a yiib bala la d tara.» T’a Zezi yeel-ba: ¹⁸ «Tall-y n wa-y yã.» ¹⁹ B kɩtame tɩ b zĩndig nebã, moodẽ, n dɩk bur a nu wã la kʋɩl-zẽed a yiibã n zẽk b neng yĩngri, n pʋʋs bark pʋʋsgo, n wes burã n dɩk n kɩs karen-biisã tɩ b pʋɩ zãma wã. ²⁰ B fãa rɩɩme n tɩge. B wʋka burã neba sẽn dɩ n kellã la pet piig la a yiibu la b pids yã. ²¹ Bãng-y tɩ rɩtba sõor da taa tus a nu, pagba la kom-bõonega toog sẽn ka ye. ²² Dẽ poore b modga b karen-biisã tɩ b kẽ koglg n deng taoore, tɩ b meng yaas n kuls nebã. ²³ B sẽn waa n kuls nebã n sɛ, a Zezi rʋʋ tãnga zugu, kɛɛnga, n na n pʋʋse; yʋng waa n paam-b-la be. ²⁴ Dẽ tɩ karem-biisa koglgã da paam n taa ko-sʋka tɩ ko-wiis lengd-a, tɩ sobg wẽed lebende. ²⁵ Beoog sẽn waa n kolg vẽegre, a Zezi kẽna kooma zugu n babs-ba. ²⁶ B sẽn yãend t’a Zezi kẽnd kooma zugu, rabeem yõka karen-biisã; b tẽeme tɩ yaa kɩɩma, n na n sɩng kɛlenga. ²⁷ A Zezi yeel-b lame: «Bas-y yam-yoaaga, yaa mam menga, da zoe-y rabeem ye!» ²⁸ T’a Piyɛr na n leoke: «Soaala sã n ya yãmba, bɩ y kõ-m noor tɩ m kẽn kooma zug n seg-y.» ²⁹ A Zezi yeel-a lame: «Wa!» T’a Piyɛr yi koglgã n sɩng kẽnd kooma zugu n babsd a Zezi. ³⁰ La sobga sẽn da vũud wʋsg yĩnga rabeem yõk-a lame t’a sɩng lisbu, n na n kelem: «Soaala, fãag-y-ma.» ³¹ A Zezi wẽneg n tuda b nugu n gãd-a, n yeel-a: «Tẽeb kɩdg soaba, f yam yooda bõe yĩnga?» ³² B sẽn kẽ koglga pʋga la sobga sẽn yõke. ³³ Sẽn da be-b koglga pʋg fãa wõgemda b taoore n yetẽ: «Sɩd-sɩda yãmb yaa Wẽnnaam Biiga.» ³⁴ B rʋʋga mogrã n sig Zenezarɛt. ³⁵ Be rãmba sẽn bãng tɩ yaa a Zezi, b saag n togsa b yagsa fãa. B talla b bãad dãmb fãa n wa b nengẽ. ³⁶ B ra kotame tɩ b bas tɩ b sɩɩs b fuuga noor bala. Sẽn sɩɩs-b fuuga fãa sãoogame.

¹ Zerizalɛɛm Farizẽ rãmbã la sẽn karen-ba-n-sikã kolga a Zezi n sok-ba: ² «Bõe yĩng la yãmb karen-biisa sãamd yaab rãmba dog-n-miki? Bãmb pa rengd n pek b nus n yaool n sɩng rɩɩb ye.» ³ Dẽ la a Zezi leok-ba: «Bõe tɩ yãmb me tõdgd Wẽnnaam noor ne y rog-n-miki? ⁴ Ade, Wẽnd yeelame: ‹Waoog f ba la f ma, la ned ninga sẽn kãabd a ba bɩ a ma wẽnga, bɩ b kʋ a soaba.› ⁵ Yãmb nengẽ lebga ned ning fãa sẽn na n yeel a ba bɩ a ma: ‹Ade, bũmb ning m sẽn da tog n dɩk n sõng foo wã, m dɩkd-a lame n kõt Wẽnde.› ⁶ Woto ba la ma zãab taal wẽneg n doka y zugu. Y pa ne tɩ yãmb dog-n-mik kãng kɩtame tɩ Wẽnd gomd lebg zaalem? ⁷ Pʋlik rãmba! A Izayi n bãng y yelle a sẽn waa n togse: ⁸ ‹Nin bãmba waoogda maam ne noore, la b sũur zãra ne maam. ⁹ M geta b waoogr wa zaalem; la zãmsg ning b sẽn zãmsd neb a taaba yaa ninsaal dẽnd bala.› » ¹⁰ B kɩtame tɩ neba kolge tɩ b yeele: «Kelg-y la y wʋm neere! ¹¹ Ka sẽn kẽed ninsaal noorẽ, n dẽgemd ninsaal ye, yaa sẽn yit a noorẽ.» ¹² Dẽ la karen-biisa kolg n yeel-ba: «Yãmb miime tɩ y sẽn gom woto wã, Farizẽ rãmba yeelame tɩ y gomda gom-yood bɩ?» ¹³ Tɩ b yeele: «Tɩɩg ning m yĩngr Ba wã sẽn ka sele, na n võogame. ¹⁴ Bas-y-ba tɩ yaa zoeens sẽn tat b zoen-taase! La bãng-y tɩ zoang sã n tat a zon-taaga, b fãa na n naaga taab bokẽ.» ¹⁵ A Piyɛr goma woto: «Wilg-y tõnd y yelbũnda võore.» ¹⁶ T’a Zezi yeele: «Yãmb yama ket n ka puk ba bilfu la? ¹⁷ Y ka mi tɩ sẽn kẽed noorẽ tata pʋgẽ n sãag n yi we-kɛɛng bɩ? ¹⁸ Sẽn yit noorẽ yita sũurẽ la sẽn yit sũurẽ n dẽgemd ninsaala. ¹⁹ Yaa sũurẽ la tʋls wẽns yita, n paas nin-kʋʋr, yoobo, yoob nonglem, wagdem, kaset-zirẽ, taab yʋʋr sãoongo. ²⁰ Yaa yell kãens n dẽgemd ninsaala. La ka pek nus n yaool n sɩng rɩɩbo, ka tõe n dẽgem ninsaal ye.» ²¹ A Zezi sẽn yi be, b kẽnga Tir la Sidõ baobgo. ²² La ade, Kanaã pag n da yi a tẽngẽ n wa yɛs n moonẽ: «Zoe-y m nimbãaneg wɛ, Soaala, Daviid biiga! Ad-y Sʋtãan n tar m biiga n yaannẽ.» ²³ A Zezi pa leok-a tɩ bũmb ye. Karen-biisa yẽ kolgame n yeel-ba: «Deeg-y yã a kosg t’a wekda d tʋba.» ²⁴ T’a Zezi leoke: «B tʋma maam Israyɛl pe-yãansa yĩng bala.» ²⁵ Dẽ tɩ paga taame n wõgemd b taoore n yetẽ: «Soaala, wa-y n sõng-y-ma!» ²⁶ Tɩ b leok-a: «Pa tog tɩ b rɩk zaka kamb dɩɩbo n kõ ba-bi ye.» Paga zĩnda tẽngr n yeele: ²⁷ «Yaa sɩda, la baasg fãa ba-bi tõe n dɩgsa zeremsã b zu-soaba sẽn basd tɩ rʋʋgd tẽngã.» ²⁸ T’a Zezi na n yeel marsã: «Paga, f tẽeb labsa, bɩ yɩ wa f sẽn date.» La wakat kãng bala a bi-pugla paama laafi. ²⁹ A Zezi yii be n leb Galile mogr noore. B rʋʋ tãng zug n zĩndi. ³⁰ Neb wʋsg babs-b lame ne wobse, ne zoeense, ne mugs la koms rãmb buud a taaba, n dɩgl-ba a Zezi taoore la a Zezi sãoog-b lame. ³¹ Neba wẽe siri b sẽn wʋm tɩ mugs gomda la b ne koms rãmba sẽn paam pãnga, tɩ wobs kẽnd tɩrga tɩ zoeens neẽ la neba pẽga Israyɛl Wẽnnaam. ³² A Zezi boola b karen-biisã n yeel-ba: «Nin-bãmba nimbãaneg tar-m lame, yaa rasem a tãab rũnna la b ka serg mam taoore la b pa tar sẽn na n dɩ ye. M pa rat n kuls-b ne kom ye; kẽer wat n lʋɩɩ sorẽ.» ³³ Tɩ karen-biisa na n yeele: «La we-raoogẽ ka, d yãeta bur yɛ n kõ zãma a woto t’a rɩ n tɩge?» ³⁴ La b sokame: «Bur a wãn la y tara?» Tɩ b leok tɩ yaa bur a yopoe la kʋɩl-zẽ-bõoneg bilf bala. ³⁵ A Zezi kõo neba noor tɩ b zĩnd tẽnga. ³⁶ B rɩka bur a yopoe wã la kʋɩl-zẽedã, n maan pʋʋsgo, n wes-ba, n dɩk n kɩs tɩ b pʋɩ nebã. ³⁷ B fãa rɩɩme n tɩge la b wʋka gɩrsa sẽn kellã n pid pet a yopoe. ³⁸ Bãng-y tɩ sẽn dɩ-ba yɩɩ tus a naase, pagb la kamb toog sẽn ka ye. ³⁹ A Zezi kulsa nebã n yaool n kẽ koom koglg n wa Magadan tẽnga.

¹ Farizẽ la Saduseẽ rãmba sẽn da rat n bẽd-ba n yõk, kolgame n yeel a Zezi tɩ b sõng-b ne Wẽnd makre sẽn yit yĩngri. ² A Zezi leok-b lame: «Zĩ-sobdo yãmb yetame: saag ka ye tɩ wĩntoog yaa moomd yʋdʋd. ³ Yibeoogo, yãmb yetame: yĩngr lobda sabla, dɩlla saag na n nii rũnna. Woto, tẽng zug yɛlã, yãmb mi-b lame la y tara b võore, zamaan paalga yɛl bala la y pa tar b võore! ⁴ Nin-yaals la yoaadb buudu, y rata makre la ya a Zonas makra bala la m na n kõ yãmba.» La b loogame n bas-ba. ⁵ B sẽn dʋʋg kʋɩlgã, karen-biisa yãeeme tɩ b ka zɩ bur ye. ⁶ A Zezi sẽn yaool n yeel-bã: «Puk-y y nini la y gũus ne Farizẽ la Saduseẽ rãmba rabɩlle,» ⁷ b tẽe b yamẽ tɩ yaa b sẽn ka zɩ burã yĩnga. ⁸ A Zezi bãnga b tagsgo n yeel-ba: «Tẽeb kɩdg rãmba, bõe la y tagsd tɩ yaa y sẽn ka zɩ burã? ⁹ Y ket n nan pa wʋmde? Y pa tẽr bur a nu wã sẽn dɩlg neb tus a nu, la y pa tẽr peta sõore b girsã sẽn pids laa? ¹⁰ Y pa le tẽr bur a yopoe wã sẽn dɩlg neb tus a naase la y pa tẽr peta sõore b kɛla sẽn pids laa? ¹¹ Yaa a wãna tɩ y ka ne tɩ ka bur yelle la m dat n gome? Gũus-y, wala m sẽn leokd yãmbã, ne Farizẽ la Saduseẽ rãmba rabɩlle.» ¹² B yaoolame marsã n wʋm tɩ b yeel-b lame tɩ b gũus ne Farizẽ la Saduseẽ rãmba zãmsgo, ka yet tɩ b gũus ne rabɩll sẽn tar n wẽed bura ye. ¹³ B sẽn ta komber a Filip tẽng sẽn boond tɩ Sezare, a Zezi soka b karen-biisã: «Neba yeta me tɩ Ned Biiga yaa ãnna?» ¹⁴ Tɩ b yeele: «Kẽer nengẽ b ya a Zã ning sẽn da kõta soobã, kẽer nengẽ b yaa Eli, kẽer nengẽ b yaa Zeremi bɩ bãngdba nin-yende.» ¹⁵ T’a Zezi paas: «La sã n ya yãmba, y yetame tɩ maam la a bõe?» ¹⁶ A Piyɛr leokame: «Yãmb la Wẽnd Nedã, Wẽnnaam vɩɩga Biigã.» ¹⁷ T’a Zezi na n yeel-a: «Fo yaa zu-noog soaba, Simo, Zonas biiga, tɩ f bãngrã, ka ninsaal nengẽ la f paam-a ye, yaa m Ba sẽn be arzãna nengẽ. ¹⁸ La ade, m yet-f lame tɩ f yaa Kugri la kug kãng zug la m na n me m Tigungu, la kũuma ne a pãngã kõn maan daood a taoor ye. ¹⁹ M na n kõ-f la arzãn Rĩung kʋɩlem-biisi. Fo sẽn na n loe bũmb ning fãa tẽng zug, bõn-kãng me na n loe arzãnẽ. Fo sẽn na n lodg bũmb ning fãa tẽng zugu, bõn-kãng me na n lodga arzãnẽ.» ²⁰ B yaool n sagla b karen-biisã tɩ b ra wilg ned ba a ye tɩ bãmb la Krista ye. ²¹ Badaare tɛka a Zezi sɩngame n wilg b tũud-n-taasã tɩ wat n yɩɩ tɩlɛ ne bãmba tɩ b kẽng Zerizalɛɛm, n yãe toogo wʋsgo, nin-kẽemsã, maan-kʋʋdba kãsem dãmba la Sẽn karen-ba-n-sikã nengẽ, tɩlɛ tɩ b ki menga la b vʋʋg dasm a tãab daare. ²² A Piyɛr veoog-b lame, n zabd ne-ba, n yetẽ: «Wẽnd na laas-y ne rẽ fãa, Soaala, ayoo, dẽ kõn tõog ye!» ²³ A Zezi wẽnegame n yeel a Piyɛr: «Leb poorẽ, Sʋtãana! Fo lebga m lakr kugri, fo tagsga yaa ninsaal dẽnna, ka Wẽnnaam tagsg ye.» ²⁴ Dẽ poore b yeela b karen-biisã: «Sẽn data n pʋg maam, bɩ a ra bao a meng ye, a tʋk a pik n tũ maam. ²⁵ Ned ninga sẽn dat-a n ligl a yõore na n kiime la sẽn na n ki-a mam yĩnga na n vɩɩndame. ²⁶ Dũni wã soogre manegda ned wãn wãna, f vɩɩm sã n tũ rẽ n sãam? Bõe la ned tõe n tek ne a vɩɩm? ²⁷ Bãng-y tɩ Ned Biiga na n lɛɛg n waa ne a Ba zɩɩri n lebs ned kam fãa a vɩɩm sẽn tog ne. ²⁸ La m yet-y lame tɩ yãmb sʋka, kẽer beeme n ka na n wʋm kũum yũugu tɩ b pa reng n yãend Ned Biiga tɩ b wat ne b Rĩunga ye.»

¹ Dasem a yoob sẽn maane, a Zezi peega a Piyɛr, a Zak, la a yao, a Zã, bãmb b naasa bala; b zãaga ne zãma wã, tãn-wok zugu. ² La a Zezi tedga bãmb nifẽ: b nenga ra yãgda wa wĩntoogo, tɩ b fut pɩnda. ³ La a Moyiiz ne a Eli waa n sõsda ne-ba. ⁴ A Piyɛr zẽka a koɛɛg n yeele: «Soaala, tõnd sẽn be ka wã yaa-d-la noogo, y sã n data m na ti rot a tãabo, n kõ yãmb a yembre, a Moiz a ye, a Eli me a ye.» ⁵ A Piyɛr pa yãee n gom n sɛ la sawad-pɛɛlg sẽn waa n bui-ba, tɩ koɛɛg zĩnd sawadga pʋga n moone: «Nin-kãnga yaa m Bi-nongre, m yam kẽ-b la zãnga, kelg-y-ba.» ⁶ Karen-biisa sẽn wʋm goama la b sẽn lʋɩ b yãnvabga n digd dabeem. ⁷ A Zezi kolgame n sɩɩs-ba n yeel-ba: «Yik-y la y bas rabeem!» ⁸ Karen-biisa puka b nini, b pa le yãend neda to n paas a Zezi ye. ⁹ B sẽn waa n sigd tẽn-nabrẽ, a Zezi kõ-b-la noor kãngã: «Da gom-y likr kãnga yelle tɩ Ned Biiga nan pa vʋʋg ye.» ¹⁰ Karen-biisa sok-b lame: «Bõe marsã la sẽn karen-ba-n-sikã yet t’a Eli n na n deng wa?» ¹¹ Tɩ b yeele: «N-ye, a Eli na n deng n wa, n wa lebs bũmb fãa a zĩigẽ. ¹² La m yet-y lame, a Eli zoe n waame la neba pa bãng tɩ yaa yẽ ye, n zã-a wa b sẽn date. Dẽ n so tɩ Ned Biiga me na n yãe toogo.» ¹³ Karen-biisa wʋmame marsã tɩ yaa Zã ning sẽn da kõta sooba yell la b gom yã. ¹⁴ B sẽn leb zãma wã sʋka la nin-yend sẽn kolg n yĩgimd b taoore n yeel-ba: ¹⁵ «Soaala, zoe-y m biiga nimbãanega t’a bẽeda kisenkiiri la yaa toogo. Naoor wʋsgo, a lʋɩta bugmẽ, n lʋɩt koomẽ. ¹⁶ M tall-a lame n wa y karen-biisa nengẽ la b pa tõog t’a sãoog ye.» ¹⁷ T’a Zezi yeel: «Wẽn-kɩɩsdb la nin-yaals buudu, m na n paa ne yãmb n ta wakat bʋgo? Tall-y bãadã n wa ka!» ¹⁸ A Zezi tãsa Sʋtãana la a yiime n bas biigã tɩ laafi wẽneg n wa. ¹⁹ Karen-biisa kolga a Zezi la nebã sẽn waa n looge, b sok-b lame tɩ yaa bõe yĩng la bãmb pa tõog n dig Sʋtãana n yiisi. ²⁰ Tɩ b na n leoke: «Ya y tẽebã sẽn ya bilfra yĩnga; sɩd-sɩda m yet-y lame tɩ yãmb tẽeba bedrem sã n ta seneve biiga, y na yeel tãnga sẽn tõndã: ‹Luk ka n ta ka.› A na luk a zĩigẽ la bũmb ba a ye kõn yɩ toog ne y ye. [ ²¹ Sʋtãamb a woto buud ka tõe n dig n yiis tɩ pʋʋsg la no-loeer ka naag ye.]» ²² Daar a ye, a Zezi ne b karen-biisa ra bee Galile t’a Zezi yeel-ba: «Ned Biiga na n lʋɩɩ ninsaalb nusẽ, ²³ la b na n kʋ-b lame la dasm a tãab daare b na n vʋʋgame.» La rẽ sãama karen-biisa sũur wʋsgo. ²⁴ B taa Kafarnaom tɩ sẽn deesda wẽnd dooga ligd kolg a Piyɛr n sok-a: «Yãmb karen-saamba yẽ pa yaood wẽnd dooga yaood la?» ²⁵ T’a leoke: «A yaoodame sẽ!» B sẽn ta yiri, a Zezi yɩɩ tao n yeel a Piyɛr: «Fo yetame tɩ wãna, Simo? Tẽnsa nanams reegda ligda bɩ fadgã ãnd dãmb nengẽ: b kambã n yaood bɩ yaa neb a taabã?» ²⁶ B leokame tɩ ka b zaka rãmb nengẽ la b reegd ligd ye. T’a Zezi yeel: «Dɩlla zaka kamb pa yaood ye. ²⁷ Baasg zãnga, m sẽn pa rat tɩ b yeel tɩ m pa maand wa neb a taaba, kẽng kʋɩlgẽ n tɩ lob f loɛɛga; gãd pipi zĩifã f sẽn na n yõkã, yaag a noorã tɩ f na yãe ligdi maam ne foom yaood yĩnga, tɩ f kɩs fadg a soaba.»

¹ Karen-biisa waa n kolga a Zezi n sok-ba: «Arzãn Rĩunga pʋgẽ, ãnda n lʋɩt a taab taoore?» ² B boola bi-bilfu n yals-a sʋka n yeele: ³ «Sɩd-sɩda, y sã n ka põd n lebg yãase, y kõn tõog n kẽ Arzãn Rĩunga pʋg ye. ⁴ Sẽn na n lʋɩ-a a taab taoor Arzãn Rĩunga pʋgẽ, yaa sẽn na n lebg-a bi-bilfu wa ad-a. ⁵ Ned ninga sẽn na n ges bi-bilf wa bi-kãnga yelle mam yĩnga, yaa mam meng yell la a ges yã. ⁶ Ned ninga me sẽn na n kɩt tɩ kom-bõonesã maan wẽnga, ad-y sãoo ne a soaba, tɩ b bao kugri wa neguug kugri, bõeensa sẽn gilgd ne kugr ning n werd zoma, n loe nin-kãng yubla, n tus-a n lub mogrẽ, tɩ kooma rɩ-a. ⁷ M yãbd dũni rãmba, b sẽn kʋɩɩbd taab yĩnga! M mi tɩ kʋɩɩbg ka tõe n ka zĩnd ye la m yãbd ned ninga sẽn ya-a kʋɩɩbda. ⁸ F nug bɩ naoor sã n lubd foo yell pʋgẽ, bɩ f fiuug-a n lob yɩɩga; fo sã n ya nug fiungu bɩ kar fiungu n paam vɩɩm, são b sẽn na n lob-f ne nus a yi bɩ ne nao a yi, bugum sẽn ka kiid pʋgẽ. ⁹ Sã n yaa f nif n lubd foom yel-wẽnd pʋgẽ, kɩdg-a n lob yɩɩga, tɩ f sã n ya ni-feoogo n kẽ vɩɩm zĩigẽ, são f sẽn na n lʋɩ ne f nin a yiibu bugum sẽn ka kiid pʋgẽ. ¹⁰ Da sak-y n paoog bi-bilfu ba a ye tɩ m yet-y lame tɩ arzãnẽ, b malɛk rãmb yɛsa wakat buud fãa, m Ba wã taoore. [ ¹¹ Ned Biiga waa n fãaga sẽn da menem-ba.] ¹² Yãmb yamẽ, ned na n maana a wãna, a sã n tar pe-yãans koabga t’a ye wa menem? A kõn bas piswɛ la a wɛ wã tãnga zugu la a saa n gẽes sẽn menem-a wã sɩda? ¹³ A sã n yãend-a, m yet-y lame t’a sũur na tos kaam a poorẽ n yɩɩd piswɛ wã sẽn ka menem-ba. ¹⁴ Woto me, y Ba ninga sẽn be arzãnẽ ka rat tɩ kom-bãmba nin-yend menem ye. ¹⁵ F to sã n beege, babs-a, la yẽnda, a ye, taoore, wilg-a a kongre. A sã n kelg foom, f manega a yelle. ¹⁶ A sã n ka reege, bɩ f bao nin-yend bɩ neb a yiibu n paase tɩ yella kʋʋb paam neb a yiib bɩ neb a tãab kaseto. ¹⁷ A sã n zãgs b kelgre bɩ f togs Tigungu. A sã n zãgs Tigungu kelgre, bɩ f ges-a marsã wa bu-zẽnd la fadg rɛɛsda. ¹⁸ Sɩdem sɩdem, y sẽn loe bũmb ning fãa tẽng zug, bõn-kãng loee yĩngri me. Y sẽn lok bũmb ning fãa tẽng zug, loka yĩngri me. ¹⁹ M le togsd-y lame tɩ sɩd-sɩda, neb a yiibu, yãmb sʋka, sẽn na n naag taaba, tẽng zugu ka, n kos bũmb ning fãa, m Ba sẽn be arzãna na kõ-ba. ²⁰ Neb a yiib bɩ a tãab sã n tigim taaba, mam yĩnga, mam meng bee b sʋka.» ²¹ A Piyɛr kolgame n yeel a Zezi: «M to sã n beeg-ma, naoor a wãn la ya tɩlɛ tɩ kõ-a sugri? M na yaa n ta naoor a yopoe bɩ?» ²² T’a Zezi na n leoke: «M pa yet tɩ naoor a yopoe bal ye, yaa naoor pisopoe la a yopoe. ²³ Ad-y Arzãn Rĩung wẽnda dĩm sẽn tʋlg t’a sõgen-kamb wa, t’a pʋg a arzɛk nao. ²⁴ Gɛɛlga sẽn sɩnge, b waa ne ned a ye sẽn tar dĩma samde, la samda yaa sãnem gil sẽn ta neb tus piig zɩɩbo. ²⁵ A sẽn da ka tar n na n yao yĩnga, dĩma yeelame tɩ b koos yẽ ne a pag la a kamba la a sẽn tar fãa, tɩ samda tõog n yao. ²⁶ Sõgna wa-la a zu-soaba taoore n vabende, n yeel-a: ‹Bas-y tɩ yɩ bilf tɩ m na bao n yao fãa.› ²⁷ A zu-soaba zoe-la a nimbãanega n bas-a, n tol kiis a samda zãnga. ²⁸ Nin-kãng yiime n seg a tũud-n-taag a ye sẽn da tar samde; Yẽ samda zemsa neb koab zɩɩbo. A soga a kokoɛ wã n wẽoogdẽ, n na n sãr-a la a yetẽ: ‹Wa ne f sẽn tog n kõ maama gilli.› ²⁹ T’a tũud-n-taaga me yĩgimd a taoore n yeel-a: ‹Bas tɩ yɩ bilfu, tɩ m na bao n yao.› ³⁰ A zãgsame n kɩt tɩ b kẽes-a roogo, n gũud t’a yao samda zãnga. ³¹ Dẽ la tũud-n-taas a taaba sũur sãam wʋsgo tɩ b tɩ togs b zu-soaba rao kãng manesma. ³² Tɩ zu-soaba na n bool-a n yeel-a: ‹Sõgen yoogo, fo sẽn da tog n yao bũmb ningã, m basa fãa taale, f sẽn kosa yĩnga. ³³ Mam sẽn zoe fo nimbãanega, fo me ra tõee lame n zoe f tũud-n-taaga nimbãanega.› ³⁴ Zu-soaba sũur puuga wʋsgo la a kɩtame tɩ b yõk-a n kɩs kambõe naaba tɩ b nams-a tɩ samda wa yao zãnga. ³⁵ Yaa woto la m Ba sẽn be arzãna na n maan ne yã, yãmb me sã n ka kõt y taab sugri ne pʋ-peelem.»

¹ B sẽn kõ b koeesa Galile rãmb n sɛ, a Zezi yii be n dʋʋg Zʋrdẽ kʋɩlga n kẽ Zɩɩda soolmẽ, ² Neb wʋsg pʋg-b lame la b sãoog-b la beenẽ. ³ Farizẽ rãmb kolgame n sok-ba la b sokra ra yaa bẽdgo: «Ned tõeeme n yiis a pag yaar bɩ?» ⁴ Tɩ b leoke: «Dɩlla yãmb pa karem tɩ sɩngrẽ Wẽnnaam naana rao ne paga ⁵ la b yeelame: ‹Raoã tog n basa a ba la a ma n zĩnd ne a paga la b yiiba tog n lebga bõn-yɛnga?› ⁶ B pa leb n ya yĩns a yiib ye, b yaa yĩng a ye. Bãng-y tɩ Wẽnd sẽn lagem bũmb ningã, ninsaal ka tog n welg-a ye.» ⁷ Farizẽ rãmba le sokame: «Yaa bõe yĩng marsã la a Moyiiz kõ noor tɩ b sã n na n yiis paga bɩ b kɩs-a a yiisg sebre?» ⁸ T’a Zezi yeele: «Yaa y tʋb-pa-wʋmdma yĩnga la a Moiz kõ-y sor tɩ y yiis y pagba; la baad-y da ka boto sɩngrẽ ye. ⁹ Yaa rẽ yĩng la m yet yãmba, tɩ sã n ka b mikame tɩ b zĩnd-n-taara yaa kisgu, rao ning sẽn dig a paga, n lɛɛg n dɩk a to, maanda yoob bala.» ¹⁰ Karen-biisa yeel-b lame: «Rao ne pag yell sã n ya a woto, dẽnd f sẽn ka kẽed kãadem n são!» ¹¹ Tɩ b leoke: «Ka neb fãa n wʋmd dẽ ye, yaa Wẽnd sẽn kõ b rãmb bala. ¹² Neb kẽer beeme n pa tõe n kẽ kãadem ye, tɩ b roga boto; kẽer beeme n pa tõe n kẽ kãadem tɩ Zamaana rãmb n wa ne gɩdgr kãnga; kẽer beeme n pa tõe n kẽ kãadem ye la yaa bãmb n tʋlg rẽ ne b yamleoogo, Arzãn Rĩunga yĩnga. Sẽn tõe-a n wʋm, bɩ a wʋm!» ¹³ Kom-bõoneg la b tall n wa a Zezi taoore tɩ b ning-b barka; b tẽega b nus b zutu n pʋʋs b yĩnga. Karen-biisa da rigda kambã. ¹⁴ Dẽ la a Zezi yeel-ba: «Bas-y kom-bõonegã tɩ b wa m nengẽ la y da rig-b ye tɩ yaa sẽn wẽnd-b bãmb bala n na n soog Arzãn Rĩungã.» ¹⁵ B tẽega b nus b zutu n yaool n le rɩk b sore. ¹⁶ Ade, ned n kolg a Zezi n sok-ba: «Karen-saamba, bõn-sõng bʋg la m na n maane, n paam vɩɩm sẽn kõn sɛ?» ¹⁷ T’a Zezi yeel-a: «Bõe yĩng la f sokd maam bõn-sõng poorẽ? Nin-yend bal la sõngo. F sã n dat n kẽ vɩɩmẽ, deeg Wẽnnaam noyã.» ¹⁸ T’a na n yeele: «Noy bʋse?» T’a Zezi leoke: «Da kʋ ye, da yo ye, da zu ye, da maan kaset-zirẽ ye, ¹⁹ waoog f ba la f ma, n paas yɛsa: nong f to n wẽnd f menga.» ²⁰ Tɩ bi-bɩɩga na n yeele: «Mam deega rẽ fãa al m yãadmẽ. Bõe n ket marsã?» ²¹ T’a Zezi yeele: «Fo sã n dat n yɩ sõng zãnga, bɩ f kẽng n tɩ koos f sẽn tar fãa n pʋɩ naong rãmba tɩ f na paam dolb arzãnẽ, la wa pʋg maam.» ²² A sẽn wʋm dẽ, rasãnga looga ne sũ-sãanga t’a ra yaa rakãagre. ²³ A Zezi yaool n yeela b karen-biisã: «Sɩd-sɩda m yet-y lame tɩ arzãn kõom na yɩ toog ne arzɛk soaba. ²⁴ N-yẽe, m le togsd-y lame n paas tɩ yʋgemd sẽn na n tũ supĩim yõorẽ n looge yaa naana n yɩɩd arzɛk soaba sẽn na n kẽ Wẽnd Rĩunga pugẽ.» ²⁵ Karen-biisa yɛɛsame, n yetẽ: «Sã n ya woto ãnda n na n põse?» ²⁶ T’a Zezi ges-ba n yeel-ba: «Dẽ wẽnda toog ne ninsaala la Wẽnnaam nengẽ, bũmb pa toog ye.» ²⁷ A Piyɛr goma woto: «Tõnd basa fãa n pʋg yãmba, bõe n na n yɩ tõnd dolbo?» ²⁸ T’a Zezi yeele: «Sɩd-sɩda m yeta yãmb fãa sẽn pʋg maama, tɩ dũni tekr wakato, Ned Biiga sẽn wat n zĩnd a zɩɩr goeela zugu, yãmb me na zĩnd n yegl-ba, goeels piig la a yiib zutu, n kao Israyɛl sags piig la a yiiba bʋʋdo. ²⁹ Ned ninga fãa sẽn na n bas a yiri, a yaopa, a tãopa, a ba, a ma, a kamba bɩ a pʋto, mam yĩnga, a na paam sẽn yɩɩd rẽnna, a na paam vɩɩm sẽn ka tar sɛɛbo. ³⁰ Pipi rãmba wʋsg na n lebga poorẽ dãmba tɩ yaoolem dãmb wʋsg lebg pipi rãmba.

¹ Arzãn Rĩunga wẽnda koaag soaba sẽn sãd beoogo n bao tʋʋm-tʋmdba sẽn na n fãs a bugsuntung sõng biisi. ² Tɩɩsa soab yẽsa ne tʋʋm-tʋmdba t’a na n yao-b la waki koɛɛnga, raar a ye, n yaool n yeel-b marsã tɩ b kẽng tʋʋmna. ³ Sõor sẽn zẽke, a yãee neb a taaba sẽn zĩ zaalem tẽnga sʋka, ⁴ t’a yeel-ba: ‹Yãmb me kẽng tʋʋmna tɩ m na yao-y wa sẽn segde.› ⁵ B kẽngame. A le yii wĩnto-sʋka la zĩig sẽn maage n sed ne neb a taab me. ⁶ Wĩndg sẽn waa n kɩlle, a le yiime n tɩ yãe neb tɩ b zĩ, t’a yeel-ba: ‹Bõe yĩng tɩ y zĩ al beooga sẽn vẽegã n ka tʋm fɩ?› ⁷ B leoka woto: ‹Ned ba a ye ka rɩk tõnd tʋʋmd ye.› Tɩ tʋʋmda soab na n yeele: ‹Bɩ y me kẽng m tʋʋmna.› ⁸ Tʋʋmda sẽn sigi, bugsuntunga soab yeela sẽn gesa tʋʋmna: ‹Bool tʋʋm-tʋmdbã n kõ ned kam fãa a yaood, la sɩng ne yaoolem dãmbã n wat tõd-beoogẽ dãmbã.› ⁹ Sẽn yaool-b waoongã kolgame n deeg b wakɩr koɛɛnga. ¹⁰ Sẽn waa n ta pipi rãmbã, b tẽeme tɩ b na n paamame n yɩɩg b taaba, mik yaa koɛɛng a ye la bãmb me na n deege. ¹¹ Dẽ la b reeg b wakirã la b guglumd ne tɩɩsa soaba: ¹² ‹Sẽn yaool n wa-ba tʋma wakat a ye bala la b paama wa tõnd sẽn sɩng yibeoogo, n nams tʋʋlgo.› ¹³ Tɩ bugsuntunga soab na n yeel bãmb nin-yende: ‹M zoa, m ka maan f zãmb ba bilfu; tõnd da seda wakɩ-koɛɛng daar a ye. ¹⁴ Deeg f wakirã n looge. Maam n dat la m kõ sẽn yaool-b waoongã wala foom; ¹⁵ fo yetame tɩ m ka tõe n maan m sẽn dat ne m sẽn so bɩ? Mam sẽn ya sõngã n wa ne fo sũ-kiiri bɩ?› ¹⁶ Ad-y yaa woto la pipi rãmba na n lebg poorẽ dãmba, tɩ poorẽ dãmba lebg pipi rãmba.» ¹⁷ Waa n yɩɩ tɩlɛ t’a Zezi leb Zerizalɛɛm tɩ b na peeg Tʋʋm-tʋmdba bala; la sor zugu b yeel-b lame: ¹⁸ «Tõnd dabda Zerizalɛɛm; b na n yõka Ned Biigã n kõ Maan-kʋʋdba kãsem dãmba la Noora sebr Mitba; bãmb na n kao-la b bʋʋdo n yeel tɩ b toga ne kũum. ¹⁹ B na n bas-b-la ne bu-zẽmbã, tɩ bu-zẽmba na n yaal ba, n pãb-b ne kaase, n ka-b pika. La b kũum dasm a tãab rare, b na n vʋʋgame.» ²⁰ A Zebede kamba ma waa a Zezi taoore n wõgemd n na n kos bũmbu. ²¹ A Zezi sok-a lame: «Yaa bõe la f rata?» A yeelame: «Ad-m kamb a yiibã, sõng-y t’a ye zĩnd y rɩtgo, a ye y goabga, y Rĩunga pʋgẽ.» ²² Dẽ la a Zezi leok-a: «Yãmb ka mi y sẽn kot bũmb ning ye. Wamd ning mam sẽn na n tuglã, yãmb tõe n tugl-a lame bɩ?» B leokame: «N-yẽe! D tõeeme.» ²³ T’a Zezi me na n paase: «Dɩlla y na yũ mam sẽn na n yũ bũmb ningã la kella a ye zĩnd m dɩtgo, a ye zĩnd m goabga, dẽ ka be me maam ye, tũuda m Ba sẽn kãab b rãmba.» ²⁴ Tʋʋm-tʋmdb piiga kelga goama la b sũur puuga ne a Zebede kamb a yiibã. ²⁵ A Zezi kosame tɩ b fãa kolge la b kõ-b-la koɛɛga: «Y miime tɩ bu-zẽmba nanams nongame n soog b nebã la b wẽoog-b kẽnkẽ. ²⁶ Pa tog n yɩ boto yãmb nengẽ ye. Sẽn dat-a naam yãmb sʋka bɩ a yɩ yãmb sõgne. ²⁷ Sẽn dat-a n yɩ pipi soab yãmb sʋka, bɩ a lebg yãmb yamba. ²⁸ Dẽ n so tɩ Ned Biiga ka wa n na n dɩ naam, a waame n na n yɩ sõgne la a rɩk a vɩɩm n kõ neb wʋsgo, n fãag-ba.» ²⁹ A Zezi waa n yita Zeriko tɩ neb wʋsg pʋgd-ba. ³⁰ La ade, zoeens a yiib n da zĩ sora noore; b sẽn bãng tɩ yaa a Zezi n loogdã, b mooname: «Soaala, Daviid biiga, zoe-y d nimbãanega!» ³¹ Neba tãs-b lame tɩ b bas bʋʋre, tɩ bãmb na n nadg pãng n paas: «Soaala, Daviid biiga, zoe-y d nimbãanega!» ³² A Zezi yaasame; b bool-b lame n yeel: «Bõe la y rat tɩ m maan y yĩnga?» ³³ Tɩ b yeele: «Soaala, kɩt-y tɩ d nina puki.» ³⁴ B nimbãanega yõka a Zezi tɩ b rɩk b nug n sɩɩs b nina. Nina puka zĩ kãng bala tɩ b na n sɩng a Zezi pʋgbo.

¹ B sẽn waa n kolg Zerizalɛɛm n ta Bɛtfaze la bala, Oliviye tãnga zug, a Zezi tʋma neb a yiibu. ² B yeel-b lame: «Kẽng-y tẽnga sẽn tondã, tɩ y na yãe bõang b sẽn loe t’a biig yɛs a sɛɛgẽ; lok-y ba la y tall-b n wa kõ-ma. ³ B sã n sok-y bɩ y yeele tɩ yaa Soaala n tar b tʋʋmde, tɩ b na bas tɩ y loog ne-ba.» ⁴ B maana woto n na n taas bãngda koɛɛga: ⁵ «Yeel-y Siõ bi-pugla, ad-f dĩm sẽn wat f nengẽ, a sẽn ka baood faongã, a zomba bõanyãanga, a zomba zɩɩb-zɩt biiga.» ⁶ Sẽn tʋm b rãmba kẽngame. ⁷ B tɩ waa ne bõangã ne a biigã, wala Soaala sẽn togs-bã. ⁸ Karen-biisa rɩka b fut n palg bõeensã t’a Zezi zomb. Neb wʋsg sɩngame n yɛdg b fut sora zugu, tɩ kẽer kɛɛd tɩɩs wila n tʋɩt sorã. ⁹ Sẽn da be-b a Zezi taoor la b poorẽ da naaga taab n moonẽ: «A Daviid biiga paam pẽgre, kilill! Wẽnd sẽn tʋm a soaba paam pẽgre, b pẽgr kul sa-gãndo! Kilill!» ¹⁰ B sẽn poog Zerizalɛɛm la tẽnga sẽn wulumd ne bʋʋre tɩ ned kam fãa sokdẽ: «Yaa ãnda?» ¹¹ Tɩ zãma wã na n leoke: «Yaa bãngd a Zezi, Galile Nazarɛt Zezi.» ¹² A Zezi kẽe wẽnd doogẽ n dig sẽn da be-b be n koosdẽ la b raadẽ. B tusa sẽn da tekd-b ligda te-roagensã n lubi, n lub sẽn da koosd-b wala goeelse. ¹³ B yeelame: «B gʋlsa me: mam dooga na n boolame tɩ pʋʋsg roogo, la yãmb dɩk-a lame n maand fãadb roogo.» ¹⁴ Zoeens la wobs me waa n bʋʋg-b la wẽnd dooga pʋga la b sãoog-b lame. ¹⁵ Maan-kʋʋdba kãsem dãmba la Sɛb-mitba yãee bõn-bãna la b wʋma kom-bõonegã sẽn moonde: «A Daviid biiga paam pẽgre!» B sũur puuga wʋsgo. ¹⁶ B yeela a Zezi: «Y wʋmda kom-bãmba sẽn togsd bũmb ningã?» B leokame: «M wʋmda neere, la bas-y tɩ m soke, yãmb nan ka karem sẽn gʋlsa ye: ‹Pẽgr neerem yita kom-bõoneg la sẽn yẽsemd-b bĩisim noorẽ?› » ¹⁷ La a Zezi bas-b lame n kẽng Betani n tɩ gãand. ¹⁸ Yibeoog pĩnda b yii Betani n lebd Zerizalɛɛm, tɩ kom tar-b. ¹⁹ Tɩ b yãend kankang sora noore n bʋdg n ges-a, n mik tɩ yaa vãad bal la a yɛs ne. B yeela kankangã: «Fo kõn le wom biig bada.» Zĩig pʋgẽ bala, kankanga wẽneg n kʋɩɩme. ²⁰ Dẽ yɛɛsa karen-biisã tɩ b sok tɩ maana a wãn tɩ kankanga wẽneg n kʋɩ vugr bala? ²¹ A Zezi yeel-b lame: «Sɩd-sɩda m yet-y lame tɩ y sã n tar tẽeb sẽn ka mi sãmbg ba bilfu, ka mam sẽn maan kankanga bal la y na n tõog n maan ye; ba y sã n yeel tãngã sẽn tondã: ‹Yɩk n lʋɩ koomẽ wã›, na n yɩɩ boto. ²² Bũmb ning fãa y sẽn na n kos ne tẽeb kãsenga, y na n paam-a lame.» ²³ A Zezi kẽe Wẽnd doogẽ n zãmsd nebã tɩ maan-kʋʋdba la tẽnga nin-kẽemb babs-b be n yeel-ba: «Sor bʋg la y paamyã n maand y sẽn maandã? Ãnda n kõ yãmb sorã?» ²⁴ A Zezi leok-b lame: «Yaas-y tɩ m me sok-y bũmbu, bũmb a ye bala, la y sã n leok maam, mam me na wilg-y m sẽn paam sorã zĩig ninga n maand m sẽn maandã: ²⁵ A Zã sooba yita yɛ? Wẽnnaam nengẽ bɩ ninsaalb nengẽ? Tɩ b na n yeel b sũurẽ: ‹Tõnd sã n leok t’a yita Wẽnnaam nengẽ, b na n sokame tɩ yaa bõe yĩng marsã la tõnd pa tẽ a Zã. ²⁶ D sã n leok t’a yita ninsaal nengẽ, zãma wã beem na rɩ-do, tɩ neba fãa geta a Zã wa bãngda.› ²⁷ Dẽ la b kong n yeel a Zezi tɩ b pa mi ye.» A Zezi leok-b lame: «Mam me kõn togs yãmba m sẽn paam ned ning sor ye.» ²⁸ «Togs-y maam yãmb me sẽn tagsde: ned n da tar a kamb a yiibu. A yeela pipi soaba: ‹M biiga, kẽng rũnna n tɩ tʋm m pʋʋgẽ.› ²⁹ T’a leoke: ‹M pa rabd ye.› La sẽn yɩ bilfu, a mikame tɩ ka neere, n tuubi, la a kẽnga pʋʋgẽ wã. ³⁰ Ba wã goma ne a yiib soaba, tɩ yẽ leok: ‹M dabdame, m zu-soaba› n yaool n pa kẽng ye. ³¹ Bãmb b yiiba sʋka, ãnda n maan a ba raabo?» Tɩ b leoke tɩ yaa pipi biigã. A Zezi yeel-b lame: «Yaa sɩd la m sẽn togsdã: fadg rɛɛsdba la pʋg-yoaadb na n lʋɩɩ y taoor Wẽnnaam Rĩunga pʋgẽ. ³² Ade, a Zã waa yãmb sʋk ne sõmblem la y pa tẽe-a ye, tɩ fadga rɛɛsdb la pʋg-yoaadb yaool n tẽe-a. Bãmb manes-sõnga ka kẽes tuubg bilfr menga y sũurẽ tɩ y sak n tẽ ye. ³³ Kelg-y yelbũnd a to. Ned n da tar a pʋʋgo n sel bugsuntung sõngo, n wẽ yãgr n gũbg tɩɩsã, n maneg zĩig ning b sẽn na n wẽkd tɩɩsa biis tɩ lebg rãam, n ning gũudb ro-lug-lug a ye sʋka, n bao neb n gũnug pʋʋgã n bas n tog sore. ³⁴ Tɩɩsa biis sẽn waa n kolg tõsbo, tɩɩsa soab tʋma a rakõapa tɩ b wa reeg biis n wa. ³⁵ Sẽn get-b pʋʋga yõka rakõor a ye n pãbe, n kodg a ye, n lab a ye ne kuga. ³⁶ Pʋʋga soab le tʋm a zak kamb a taaba; b sõor yɩɩga pipi rãmbã, la b maana ne bãmb wa b sẽn maan ne pipi rãmbã. ³⁷ A kong n tʋma a meng biiga n yet a sũurẽ: ‹B na waoog m bigã.› ³⁸ Mik bãmb sẽn yãe pʋʋga soab biiga, b yeelame: ‹Yẽ n na n soog a ba raboogo, dɩlla wa-y tɩ d kʋ-a n soog a paoongo.› ³⁹ B yõka biigã n lob-a yãgra poore n kʋ-a. ⁴⁰ Pʋʋga soab sã n wa, a na n maana a wãn ne gũudbã?» ⁴¹ Tɩ b leoke: «A na kɩt tɩ b ki kũ-toogo la a na bao neb a taab n gũnug a pʋʋgã, neb sẽn na n wa ne a pʋɩɩre, wakat fãa sẽn ta.» ⁴² A Zezi yeel-b lame: «Yãmb zɩ n karem sebr sõng pʋgẽ: ‹Kugr ning metba sẽn bas kɛɛngã, kug kãng n lebg rooga sũuri. Dẽ yaa Wẽnnaam tʋʋmde, la d neeme t’a toga ne pẽgre.› ⁴³ M yet-y lame tɩ Wẽnd Rĩunga tʋʋmde, b na n deeg-a-la y nugẽ n kõ neb a taaba sẽn na n sõng t’a wom biisi. [ ⁴⁴ B sẽn gom kugr ninga yellã, f lʋɩɩ a zugu, f bũmb na kao, a lʋɩɩ f zugu bũmb na bedse.]» ⁴⁵ Maan-kʋʋdba la Farizẽ rãmba sẽn wʋm goama, b bãngame tɩ yaa bãmb poorẽ la b togs boto. ⁴⁶ B ra baood n na n yõk-b lame la b ra zoeta zãma wã, tɩ neba ra geta a Zezi wa bãngda.

¹ A Zezi le sɩnga b yelbũna wẽebo: ² «Arzãn Rĩung wẽnda dĩm a ye sẽn maan kibsa, a biig yikãadem yĩnga. ³ A yiisa sõgen-kamba tɩ b saa n bool neb tɩ b wa yikãadma la b sẽn bool b rãmba pa tʋlg waoong ye. ⁴ A tʋma kamb a taab yɛsa la a goma ne b woto: ‹Yeel-y m sẽn bool b rãmbã: Ade, kibsa rɩɩb seglame: lolse la dũm-wubdsa koodame, bũmb fãa beeme, wa-y yikãadma!› ⁵ B sẽn bool b rãmba maana wa b toog ka ye. Kẽer kẽng a b pʋtẽ, tɩ kẽer kẽng leebgo. ⁶ Kẽer yõga sõgen-kambã n nams-ba, n kʋ-ba. ⁷ Dĩma sũur puugame t’a yiis tãb-biisi tɩ b kʋ bãmb me la b yõog b tẽnga. ⁸ A yaool n yeela sõgen-kambã: ‹Dɩɩba segl n sɛɛme, la m sẽn bool b rãmba yɩɩ nin-yoodo. ⁹ Kẽng-y sotiisẽ, n kãas y sẽn yãe b rãmb fãa tɩ b wa kibsã.› ¹⁰ Sõgen-kamba yiime, n wool b sẽn paam b rãmb fãa sor zugu, nin-sõma la nin-wẽnse, n pids roogã. ¹¹ Dɩma kẽe rɩɩba roogẽ n na n ges nebã la a mika ned a ye sẽn pa yeelg a sẽn tog n yeelg fuug ninga ye. A yeel-a lame: ¹² ‹M zoa, bõe tɩ fo wa ka n ka yer f sẽn tog n yeelge?› La yẽ pa tõog n leok tɩ bũmb ye. ¹³ Dẽ la dĩma yeel a sõgen-kamba: ‹Za-y nin-kãnga nao la a nus n lob-a yɩnga, likẽ, yãbr la yẽn kẽrsg zĩigẽ.› ¹⁴ Yaa kʋʋnga zãng la b boonda la bilfr bala n na n paam n kẽ b sẽn tũus b rãmba sʋka.» ¹⁵ Farizẽ rãmba seda ne taaba n na bẽd a Zezi n yõk ne b meng noor gomde. ¹⁶ B yiisa b karen-biis kẽere, n paas a Erod kẽedba kẽere, ne sokr kãnga: «Soaala, d miime tɩ y zãmsg yaa akɩka la y ka wilgd Wẽnnaam sor ne zoe-nif ye. ¹⁷ Y ka bak nin-bedr ne nin-bil ye, dẽ la d kot tɩ y leok-do: togame bɩ ka toge tɩ d yao Rom naaba yaoodo?» ¹⁸ A Zezi sẽn mi b wẽnema leok-b lame: «Zãmb rãmba yaa bõe la y bẽt-m bẽdgo? ¹⁹ Wilg-y maam yaooda ligdi!» B kɩs-b la wakɩr koɛɛng a yembre. ²⁰ T’a Zezi na n sok-ba: «Ãnd neng la ãnd yʋʋre la b bẽeg wakɩra zugu?» Tɩ b leoke: ²¹ «Yaa Rom naaba dẽnna!» Dɩlla, kɩs-y Rom naaba, y sẽn tog n kɩs-ba, la y kɩs Wẽnd me b sẽn tog ne. ²² A Zezi leokra ling-b lame tɩ b na n bas ba n looge. ²³ Yaa badaare la Saduseẽ rãmba, neb niyns sẽn gãd-b tɩ kũum ka tõe n vʋʋgã, kolg a Zezi n gom ne-b woto: ²⁴ «Soaala, a Moyiiz yeela woto: ‹Ned sã n ki n ka bas biiga, bɩ yaoã rɩk a kẽema pag n dog biig n kõ a kẽema.› ²⁵ Ade, tõnd zamaanẽ wã neb a yopoe n zĩndi n da ya ba-biisi. Pipi soaba yii kãadem ne paga la a kiime n pa rog biig ye, n bas paga ne a ba-biig a yiib soabã. ²⁶ Yɩɩ woto ne yiib soabã, la tãab soabã n wa ta a yopoe soabã. ²⁷ Bãmb fãa loogr poore, paga waa n kiime. ²⁸ Vʋʋgra raare, paga paada ne bʋgo, b fãa yɩla a sɩdb rãmb la?» ²⁹ A Zezi leok-b lame: «Yãmb bee tudgr pʋgẽ tɩ y ka mi Wẽnnaam pãnga la y ka reeg sẽn gʋls sebr sõng pʋg ye. ³⁰ Bãng-y tɩ vʋʋgr poore rao pa le rɩkd paga, la pag ka le kuiis rao ye, b vɩɩ wa malɛk rãmba sẽn vɩ toto arzãnẽ. ³¹ La yĩnsa vʋʋgr poorẽ, y pa karem gomd ning Wẽnd sẽn kõ-y wã la? B yeelame: ³² ‹Maam la a Abraam Wẽnnaam, a Izaak Wẽnnaam, a Zakoob Wẽnnaam?› B pa kiid n pa vʋʋgdẽ rãmb Wẽnnaam ye, b yaa sẽn vɩ-b Wẽnnaam.» ³³ A Zezi zãmsga pãng yɛɛsa sẽn wʋm-bã. ³⁴ B sẽn wʋm t’a Zezi kʋɩdga Saduseẽ rãmba, Farizẽ rãmba me sũu taaba n wa. ³⁵ B nin-yend soka a Zezi la sokra yɩɩ no-baoor meng-menga: ³⁶ «Soaala, bʋg la no-kãsenga Wẽnnaam noya sʋka?» ³⁷ T’a Zezi yeel-a: «Yaa nong Wẽnnaam, f Soaala, ne f sũur fãa, ne f sɩɩg fãa, nef yam fãa. ³⁸ Yẽ la no-kãsenga la pipi soaba. ³⁹ Sẽn pʋgda yẽ wẽnd-a lame, yaa nong f to wala f menga, ⁴⁰ Noora la bãngdba sẽn togsa waa n soga noy bãmba b yiibã pʋgẽ.» ⁴¹ A Zezi sẽn mik tɩ Farizẽ rãmba ra tigma taab wʋsgã, bãmb me sok-b lame: ⁴² «Yamb yetame tɩ bõe, Wẽnd Nedã poorẽ? B yaa ãnda biiga?» Tɩ b leoke: «A Daviid biiga.» ⁴³ Dẽ la a Zezi yeel yã: «Sɩngame tɩ bõe marsã t’a Daviid sẽn gomd ne a Vʋʋsem Sõng vẽnegr baas n boond-b tɩ Soaala: ⁴⁴ ‹Zu-soaba yeela m Soaala, zĩnd m dɩtgo tɩ m wa zõneg f bɛɛba fãa f taoore tɩ f teeg-b ne f nao?› ⁴⁵ A Daviid sã n boond-b t’a Soaala, bãmb na n yɩ-la a wãn yɛsa n le yaa a Daviid biiga?» ⁴⁶ Ned ba a ye ka tõog n leok-b tɩ bũmb ye. Badaar tɛk me, b pa le saag n bao b noor ye.

¹ A Zezi yeela zãma wã la b karen-biisã: ² «Noora Mitba la Farizẽ rãmba reega a Moyiiz karen-boko. ³ Dɩlla b sẽn yet bũmb ninga bɩ y reeg la y maan boto, b menga manesma bala la y ka tog n tũ. B yetame tɩ woto n toge la b ka maand ye. ⁴ B loeta zɩɩb bɛd n zɩlgd b taab bãgdo, la b menga nug-bil ka sɩɩsd-b ye. ⁵ B sẽn maand bũmb ninga fãa yaa sẽn na yɩlẽ tɩ neba yãend-b bala. Yaa woto la b loet b rĩir bɩ b kamse sɛb gãna, la basd b futa zerd wogd-wogdo. ⁶ B baooda pipi zĩiga, rɩɩb rotẽ la pʋʋsg rotẽ. ⁷ B nongame tɩ neb waoog-b kʋʋng sʋka, b nongame tɩ b bool-b tɩ karen-saamba. ⁸ Yãmb da saag n bas tɩ b bool-y tɩ karen-saamb ye, tɩ yãmb karen-saamb ya a ye bala la y fãa yaa ba-biisi. ⁹ Da bool-y ned ba a ye tɩ y ba tẽng zugu, tɩ y ba ya a ye tãa la yaa Ba ninga sẽn be-b arzãna. ¹⁰ Da saag-y n bas tɩ b bool-y tɩ zu-soab ye, tɩ yãmb tara zu-soab a ye tãa: yaa Krista. ¹¹ Sẽn yɩɩd-a a taab yãmb sʋka na n yɩla a taab sõgne. ¹² Sẽn zẽkd-a a menga, b na n sik-a lame. Sẽn sulgd-a a menga, b na n zẽk-a lame. ¹³ Yell na pak yãmba, Sɛb-mitba la Farizẽ, zãmb rãmba, tɩ y pagda arzãn Rĩung neba taab yĩnga; yãmb n pa kẽede la y pa na n bas sẽn dat-ba me tɩ b kẽ ye. [ ¹⁴ Yell na pak yãmba, Noora sebr mitba la yãmba, Farizẽ rãmba! Yãmb n pʋʋsde n ka yɛɛdẽ ye n yaool n sɛɛsd pʋg-kõap paoongo. Dẽ me la y sɩbgr na n zʋʋg y taab rẽnna.] ¹⁵ Yell na pak yãmba, Sɛb-mitba la Farizẽ, zãmb rãmba, tɩ y rʋʋgda kʋɩlse la y saagda moog tõre n na n bao karen-biiga, la y sã n wa paam-a, y kɩtdame t’a tog ne bugum n yɩɩd yãmb naoor a yi. ¹⁶ Yell na pak yãmba, so-wilgdb sẽn ya zoeense, tɩ y yetame tɩ f sã n wẽen ne wẽnd doogo, ka ye, la f sã n wẽen ne wẽnd dooga sãnem, yaa moodgr tɩ f pids f pʋlemde. ¹⁷ Yam koees rãmba la zoeense, bõe n yɩɩde: sãnema bɩ wẽnd doogã sẽn kɩt tɩ sãnema lebg Wẽnd bũmbã? ¹⁸ Yãmb yetame yɛsa tɩ f sã n wẽen ne maan-kugri, ka ye, la f sã n wẽen ne maoongã sẽn dɩg a zugã, lebga pakre tɩ f pids f pʋlemde. ¹⁹ Zoeense, bõe n yɩɩde, maoongã bɩ maan-kugrã sẽn kɩt tɩ bũmb ning sẽn waa a zugu bɩ a lebg Wẽnd kũuna? ²⁰ Fo sã n wẽen ne maan-kugrã, fo wẽena ne bũmb ning fãa sẽn dog a zugu. ²¹ Fo sã n wẽen ne wẽnd doogo, fo wẽena ne doogã la ne Wẽnd menga sẽn be a pʋgẽ. ²² Fo sã n wẽen ne yĩngri, f wẽena ne Wẽnnaam zaoorã la ne Wẽnnaam meng sẽn zao a zugu. ²³ Yell na pak yãmba, Sɛb-mitba la Farizẽ, zãmb rãmba, yãmb sakd n kɩta dʋr a ye piig zugu, y zẽ-vãad la y zẽ-biis sẽn tar yũ-noodo n yaool n basd Noora sẽn wilg bũmb niyns wa pakre n yɩɩdã, wala zemsgo, nimbãan-zoeere la pʋ-peelem. Dẽ n segdẽ pipi tɩ sẽn keta yaool n wa paasẽ. ²⁴ Zoeens sẽn dat n wilg sore, ad-y y venda sẽn zem yʋgʋmde n yaool n yoogd zõaag n lobda. ²⁵ Yell na pak yãmba, Sɛb-mitba la Farizẽ, zãmb rãmba, yãmb nedgda wamd la lengr poore, t’a pʋg yaool n pid ne wagdem la yão-beed dẽgdo. ²⁶ Zoeense, deng-y n pek-y wamda la lengra pʋga, n yaool n tõog n pẽg a poora neerem. ²⁷ Yell na pak yãmba, Sɛb-mitba la Farizẽ, zãmb rãmba, yãmb wẽnda yaad sẽn fẽ goore, yɩnga b yaa neere, la pʋgẽ wã b pida ne kõab la yũugu buud fãa. ²⁸ Yãmb me yaa boto: yɩnga, neb nifẽ, yãmb wẽnda nin-tɩrse, la pʋgẽ, yãmb pida ne zãmbo la rẽgdo. ²⁹ Yell na pak yãmba, Sɛb-mitba la Farizẽ, zãmb rãmba, yãmb meta bãngdba yaado la y manegd nin-sõma wã rẽnna, ³⁰ n yetẽ: ‹Tõnd sã n da vɩɩnẽ d yaab rãmba wakato, d kõn naagẽ bãmb n daag bãngdba zɩɩm ye.› ³¹ La woto wã, y meng y toore n togs tɩ y yaa sẽn kʋ-b bãngdba yagense. ³² Aya! Modg-y n yɩɩg y saam-dãmba ne wẽnem! ³³ Wiisi la wag-bi buudu, yãmb yɩta a wãn n põs bugum sɩbgre? ³⁴ Yaa rẽ yĩng la m sẽn tʋmd y nengẽ bãngdba, sɩlem dãmba la sɛb-mitba; yãmb na n kʋʋ kẽere, n ka kẽer pika, n pãb kẽer pʋʋsg rotẽ, n dig-b tɩ b kẽ tẽng a ye tɩ y ta be n yis-ba. ³⁵ La woto y na rɩ zɩɩm ning fãa sẽn daag tẽng taale, sẽn sɩng a ka-yell-soab a Abɛl zɩɩm, n ta a Zakari, a Baraki biigã, y sẽn kʋ wẽnd doogẽ, maan-kugra taoore. ³⁶ Sɩd-sɩda, m yet-y lame, y zamaana na rɩ zɩ kãng fãa taale! ³⁷ Zerizalɛɛm, Zerizalɛɛm sẽn kʋʋd bãngdba la f labd ne kuga b sẽn tʋm a soab fãa f nengẽ, m tʋlga naoor yaka n tigs f kamba wa noaag sẽn põgend a kamba, la kamba pa sak ye. ³⁸ Ad-y y roogã na n lebga ro vɩʋʋgo. ³⁹ M yet-y lame tɩ y kõn le yãend-m yɛsa n tãag y sẽn na n moon daare: ‹Wẽnd sẽn tʋm a soaba paam pẽgre!› »

¹ A Zezi sẽn yi wẽnd doogẽ wã n looda, la b karen-biisa sẽn kolg n yeel-b tɩ b ges wẽnd dooga sẽn me to-to. ² T’a Zezi leoke: «Y ka gesa rẽ fãa neer la? Sɩd-sɩda m yet-y lame tɩ kugr kõn pa kugra to zug ye, fãa na n sirgame.» ³ B sẽn waa n zĩ Oliviye tãnga zugu, a Zezi karen-biisa bal kolg-b lame n le sok-ba: «Soaala, d kotame tɩ y togs-do sẽn ya wakat ning la rẽ fãa na n yɩ la bũmb ning bũmb ning sẽn na n wilg y waoongo la dũni wã sɛɛbo.» ⁴ T’a Zezi na n yeel-ba: ⁵ «Maan-y gũusgu tɩ b ra wa tudg-y ye. Wʋsg na n zuka mam yʋʋre n wa yeelyã: ‹Mam la Wẽnd Nedã,› tɩ wʋsg na n tudg n tẽ. ⁶ Y na wʋm tɩ b gomd zabr yelle, zabr rãamde na lʋɩ y tʋbrẽ, la ra bas-y tɩ b bondg y yam ye. ⁷ Dẽ fãa na n sɩd zĩndame la nan ka rẽ la dũni sɛɛb ye. Tẽns na n yika zabr ne taaba, tɩ rĩung wulumd ne rĩung; kom na n lʋɩɩ ka la a lʋɩ ka, tẽng na n miimame, ⁸ la rẽ fãa nan yaa dogma waasg sɩngr bala. ⁹ B na n yõga yãmb n namse, n yõg-y n kʋ. Mam yĩnga dũni wã ninsaalb fãa na n kisg-y lame. ¹⁰ Wakat kãng la wʋsg na n lʋɩ. Wʋsg na n zãmba taaba la b na n dɩɩ beem ne taaba. ¹¹ Zirẽ bãngdba na n yɩɩ ka tɛka n tudg neb wʋsgo. ¹² Yel-wẽna sẽn paasd n dabd yĩnga, taab nonglem na n wooga wʋsg sũurẽ. ¹³ La sẽn na n modg-a n ka tol n lʋɩ, yẽ soab na põse. ¹⁴ Wẽnd Rĩunga Koe-noogã na n moana dũni fãa pʋgẽ, ninsaalb fãa yĩnga. Dẽ poor bala la dũni wã na n sɛ. ¹⁵ Y sã n wa ne Yel-yoog ninga a Daniyɛl sẽn goma t’a be wẽnd dooga pʋga (sẽn karemda ning pãng ne wʋmbo), ¹⁶ bɩ Zɩɩde rãmb zoe n dʋ tãmse; ¹⁷ sẽn be-a roog zugu bɩ a ra sig a roogẽ n nog a teed ye; ¹⁸ sẽn be-a pʋʋgẽ me ra lɛɛg n wa bao a fuug ye! ¹⁹ Yell na pak pagb niyns sẽn tʋt-b, bɩ sẽn tar b kamba sẽn ket bĩsrẽ wakat kãnga. ²⁰ Pʋʋs-y tɩ y zoees da seg waood bɩ vʋʋsg daar ye. ²¹ Yel-beed ninga sẽn na n wa, wakat kãngã, wẽnem na n yɩɩga yel-beed niyns fã sẽn wa-b al dũni sɩngre n ta rũnna la b kõn le yãend a taar ye. ²² B sã n da ka boogẽ dasem kãens sõore, ned ba a ye kõn põsẽ ye, la nin-sõma wã yĩnga, daara sõor na n boogame. ²³ Ned sã n yeel yãmba: ‹Ade, Krista bee ka,› bɩ: ‹Ade, b bee ka sẽnẽ,› bɩ y ra tẽ ye. ²⁴ Zirẽ-be-krist rãmba la zirẽ-be-bãngdba na n yikame n maan makre la bõn-bãn wʋsgo sẽn na n tudgẽ nin-sõma wã mense, dẽ sã n da tõẽ. ²⁵ Ade, m wilg-y la woto tɩ y bãng tiiri. ²⁶ Dɩlla b sã n yeelyã: ‹Ned Biiga bee weoogẽ bɩ y ra kẽng ye.› B sã n yeele: ‹B soonda ka,› bɩ y ra tẽ fɩ. ²⁷ Wala saag bugum sẽn yãngd yaanga n wẽneg n ta taoore, Ned Biiga waoong na n yɩɩ boto. ²⁸ Ad-y kɩɩng rɩgr kõn solg yibreg ye. ²⁹ Yel-beed kãens poore, wĩntoog na n sobame, kiuug ka na n le kõ vẽenem ye, ãds na n dʋʋgame, bũmb fãa na n yogsa a zĩigẽ yĩngri. ³⁰ Wakat kãng la Ned Biiga makr na n puk yĩngri tɩ Adem biig fãa tood a yãoogo. B na yãend Ned Biiga tɩ b zao sawato n sigd ne pãng la zɩɩr kãsenga. ³¹ B na n yiisa b malɛk rãmba ne tõntõog sẽn kũmd wʋsgo tɩ b tigim dũni wã taoor la a yaang nin-sõma zãnga. ³² Kelg-y kankang yelbũndi. A sã n tãood wil poala la a tobd vã-miinim, y miime tɩ tʋʋlg kolgame. ³³ Woto-me y sã n yãe yell kãensa fãa bɩ y bãng tɩ Ned Biiga wata a naam dɩɩbo. ³⁴ M yet-y lame tɩ zamaan kãnga kamb kõn loog tɩ m sẽn wilga fãa ka taas ye. ³⁵ Yĩngr la tẽng na n loogame, la mam sẽn togsa na n yalsame. ³⁶ Dũni sɛɛb daare la a wakato ned ba a ye ka mi ye, sã n ka Ba: ned ka mi, malɛk ka mi, Ned Biiga ka mi. ³⁷ Sẽn zĩnd a Nowe wakatã n na n wilg-d Ned Biiga waoong sẽn na n yɩɩ a soaba. ³⁸ Sa-kẽenga sẽn waa n dag n nan ka ni wã, b ra rɩtame la b yũuda, tɩ rap rɩgsd pagba, tɩ pagb kuiis rapa. Yɩɩ woto n tãag a Nowe sẽn kẽ koom koglg kẽenga raare. ³⁹ Neba ra pa tẽed tɩ bũmb na maan ye, n tãag sa kẽengã sẽn wa n loog ne b fãa gilli. Ned Biiga waoong me na n yɩɩ boto. ⁴⁰ Rap a yiib na n kooda pʋʋgẽ, tɩ b yãk a ye n bas a ye; ⁴¹ pagb a yiib na n werda neerẽ, tɩ b yãk a ye n bas a ye. ⁴² Maan-y gũusgu tɩ y ka mi y Zu-soaba waoong raar ye. ⁴³ Tags-y neer tɩ zak soab sã n da miẽ sẽn ya wakat ning la wagdr na n waẽ yʋngo, a kõn gũsẽ ye, a kõn basẽ tɩ b poog a roog ye. ⁴⁴ Yãmb me, bob-y n dõbẽ tɩ yaa wakat ning yãmb sẽn pa tẽedã la Ned Biiga na n wa. ⁴⁵ M ba bõe la sõgen sõngo la yẽesenga, t’a zu-soaba rɩk a zak n gũnug-a, t’a kõt zaka rãmb rɩɩbo, wakat sẽn ta? ⁴⁶ Zu-noog soab la sõgen kãnga, a zu-soaba sã n yi sor n wa mik t’a maanda boto. ⁴⁷ Sɩda m yet-y lame t’a na gũnug-a a paoong fãa. ⁴⁸ La Sõgna sã n ya sõgen yoogo, n yeel a sũurẽ: ‹M zu-soaba kaoosda waoongo›, ⁴⁹ t’a na n yik n pãbd a taaba, n na n dɩtẽ la a tɩgd rãam ne rã-yũudba, ⁵⁰ yaa daar ning la wakat ning a sẽn pa tẽedã la a zu-soaba na n wa; ⁵¹ a na yiis-a, a na tɩ naag-a ne zãmb rãmba; be yaa yãbre la yẽn kẽrsg zĩiga.

¹ Arzãn Rĩung na n wẽnega pʋg-sɛdb piig sẽn yi ne b fitils n na n tɩ seg yikãad paalga. ² Bãmb sʋka, pʋg-sɛdb a nu n ya yalemse, t’a nu ya yẽesense. ³ Yalemsa dɩka b fitils la b pa tẽeg n sui kaam n zɩ ye. ⁴ Yẽesensã dɩka b fitils la b tẽeg n zɩɩ kaam, la-bõones pʋga. ⁵ Pʋg-sɩd sẽn kaoos waoongo, b fãa sɩnga suusgu, n wa baas ne gõeem. ⁶ Yʋn-sʋka, b wʋmame tɩ b moonda: ‹Ad pʋg-sɩda, yik-y tɩ d seg-a.› ⁷ Pʋg-sɛdba fãa nekame tɩ ned kam fãa na n yõgen a fitila. ⁸ Yalemsa yeela yẽesensã: ‹Sõng-y-d ne kaam tɩ d fitilsa kiidame!› ⁹ Tɩ bãmb na n leok-ba: ‹Kaama ka tõe n sek tõnd ne yãmb ye, kẽng-y raagẽ n tɩ ra.› ¹⁰ Bãmb me sẽn kẽng raabo la pʋg-sɩda sẽn ta, tɩ sẽn tar-b kaama naag n kẽ kibsa roogẽ, tɩ kʋɩleng wẽneg n page. ¹¹ Yalemsa lɛɛg n waame n yetẽ: ‹Soaala, soaala, pak-y tɩ d kẽ!› ¹² T’a na n zĩnd pʋgẽ n leoke: ‹Mam ka mi yãmb ye.› ¹³ Sõng-y n da gũs ye tɩ y ka mi raare la wakat ye. ¹⁴ Yaa wala ned sẽn togd sore n bool a rakõapa n dɩk a laog n gũnug-ba. ¹⁵ A kɩsa a ye, sãnem gil a nu, a to wã a yiibu, a tãab soaba a ye: ned kam fãa ne a dabaar sẽn tõe to-to la a loogame. La ka yãee n kaoos ye, ¹⁶ sẽn deeg-a sãnem gil a nu wã tɩ leebame n dok a nu. ¹⁷ Sẽn deeg-a a yiibã maana rabaare a me roka a yiibu. ¹⁸ Sẽn deeg-a a ye wã tɩ tuka boko n bus zu-soaba ligdi. ¹⁹ Sẽn waa n kaoose, zu-soaba lɛɛg n waame la b zĩndame n maan b geelse. ²⁰ Sẽn dag n deeg-a a nu wã n dogl a nu wã kolg n yeelame: ‹M zu-soaba, yãmb da basa ne maam sãnem gil a nu la ade, m paama a nu n paase.› ²¹ Tɩ zu-soaba na n leok-a: ‹Yaa neere, sõgen sõng la ka mi kʋɩɩm soaba, fo sẽn ka maan kʋɩɩm ne sẽn pa zem bũmbã, bũmb wʋsgo la m na n gũnug-fu; wa naag f zu-soabã n kɩdme.› ²² Sãnem gila yiiba soab n pʋge la a yeelame: ‹M zu-soaba, y da basa ne-m sãnem gil a yiibu, la ade, m paama a yiib n paas.› ²³ Zu-soaba leok-a lame: ‹Yaa neere, sõgen sõng la ka mi kʋɩɩm soaba, fo sẽn pa maan kʋɩɩm ne sẽn pa zem bũmbã, bũmb wʋsg la m na n gũnug-fu; wa naag f zu-soabã n kɩdme.› ²⁴ Sẽn deeg-a a ye wã me waame n yeel: ‹M zu-soaba, m paam n bãnga yãmb neere wala ned sẽn baood ne a sũuri; yãmb kẽebda y sẽn pa bʋdẽ, la y wʋkda y sẽn pa yedgẽ. ²⁵ Dẽ n kɩt tɩ m zoe rabeem n dɩk y sãnema n bus tẽnga, la ade, deeg-y y soolem.› ²⁶ Dẽn la zu-soaba leok yã: ‹Nin-yoogo la kʋɩɩm daolgo, fo ra mii tɩ m kẽebda m sẽn pa bʋdẽ, la m wʋkda m sẽn pa yɛdgẽ, ²⁷ bõe yĩng la f pa rɩk m ligdã n bas ligd tɛkd nengẽ, woto m sẽn waẽ wã, m deegdẽ la m dẽnd zugu tɩ roaglg le paas. ²⁸ Deeg-y nin-kãnga sãnem gilgã n kõ sẽn tar-a piiga soaba. ²⁹ Sẽn tar-a, b kõt-a lame t’a pʋɩɩr fɩɩge, la sẽn ka tar-a wʋsgo, b na reeg bilfrã a sẽn tarã. ³⁰ La yõk-y bõn-yaalgã n lob yɩnga, likẽ, yãbr la yẽn kẽrsg zĩigẽ.› ³¹ Ned Biiga wat n siga ne zɩɩr kãsenga, t’a malɛk rãmb yãagd-a. Wakat kãng la b na n zĩnd b naama zaoor zugu. ³² Ninsaalb fãa na n tigma b taoore tɩ b welg-ba wa rũm-kɩɩm sẽn bakd pe-yãans ne boeese. ³³ B na n ninga pe-yaansa rɩtgo, n ning boeesã b goabga. ³⁴ Dĩma na n yeela sẽn beb rɩtgã: ‹Wa-y wɛ, m Ba sẽn bark b rãmba, n deeg pʋɩɩr b Rĩunga pʋgẽ, Rĩung ning b sẽn segl y yĩng al dũni sɩngrẽ. ³⁵ Ade, kom yõka maam la y rɩlg-m lame, ko-yũud yõk-m lame la y kõ-m lame tɩ m yũ; m yɩɩ sãana la y maan-m la sãando. ³⁶ M yɩɩ m zaala la y kõ-m la fuugu, m yɩɩ bãada la y waa n pʋʋs-m la tarem; b kẽes-m la roogo la y wa n ges-m lame.› ³⁷ Wakat kãnga nin-sõma na n leok-b lame: ‹Soaala, da-bʋr la tõnd mik tɩ kom tar yãmba tɩ d kõ-y rɩɩbo, tɩ ko-yũud tar-y, tɩ d kõ-y koom, ³⁸ tɩ y ya sãana tɩ d maan-y sãando, tɩ ya y zaala tɩ d yeelg-y fuugu, ³⁹ bãad bɩ bi-bees roogẽ neda tɩ d wa ges yãmba?› ⁴⁰ La dĩma na n yeelame: ‹Sɩd-sɩda m yet-y lame tɩ y bãng tɩ y sẽn maan dẽ ne m yaopa fãa yao zʋʋga, yaa mam meng la y maan yã.› ⁴¹ Dẽ poore b na n yeela b goabg rãmbã: ‹Zãag-y ne maam, ka bark rãmba, n lʋɩ bugum sẽn ka kiid abada pʋgẽ, b sẽn segl Sʋtãana la a tũud-n-taas yĩnga. ⁴² Ade, kom yõka maam la y pa kõ-m tɩ m dɩ ye, ko-yũud yõk-m lame la y pa kõ-m tɩ m yũ ye, ⁴³ m yɩɩ sãana la y pa maan-m sãand ye, m yɩɩ m zaala la y pa kõ-m fuug ye, m yika pa-keem, la b pag-m la roogo la y pa lɩk n ges-m ye.› ⁴⁴ Dẽ la b me na n sok-ba: ‹Soaala, wakat bʋgo la y tall kom la ko-yũudu, la y yɩ sãan, la y zĩnd y zaal, la y yik pa-keem bɩ b kẽes-y la roogo, tɩ tõnd pa tol n sõng yãmba?› ⁴⁵ B na n leok-b lame: ‹Sɩd-sɩda m yet-y lame tɩ y sẽn pa maan bũmb ning fãa ne mam yaopa yao zʋʋg ba a ye, yaa mam meng la y mong yã.› ⁴⁶ La bãmb na n kẽnga namsg sẽn ka sɛt zĩigẽ tɩ nin-sõma wã kẽng vɩɩm sẽn ka sɛɛb zĩigẽ.»

¹ A Zezi sẽn gom woto n sɛ la b sẽn yeel b karen-biisã: ² «Y miime tɩ pak keta rasem a yiibu, la b na n yõka Ned Biiga n kɩs tɩ b ka-b pika.» ³ Maan-kʋʋdba kãsem dãmba la tẽnga nin-kẽemba tigma taaba maan-kʋʋd kãseng a Kaif zakẽ. ⁴ B yẽsa ne taaba sɩlem ning b sẽn na n sɩlem n paam n yõk a Zezi n kʋ. ⁵ B yalsa woto: «Ka tog tɩ yɩ kibsa pʋgẽ ye tɩ tẽnga na n wa naag n wulumdame.» ⁶ A Zezi da bee Betani, wãoor a Simo zakẽ. ⁷ La pag n kolg-b ne a yubla, kug peesem yubl neere; yaa kaam sẽn tar yũ-noog wʋsgo la sẽn koosd toogo n da be a pʋgẽ. Paga sudga kaama a Zezi zug. Wakat kãng tɩ b ra rɩtame. ⁸ Karen-biisa yãee rẽ n puug b sũuri n yetẽ: «Yaa bõe tɩ b sãamd bõn-sõng a woto? ⁹ B ra tõe n koosa kaama n paam ligd wʋsgo n kõ naong rãmba.» ¹⁰ A Zezi wʋmame n yeel-ba: «Bõe tɩ y maan mo-beed ne pʋg kãngã? Yaa tʋʋmd sõng la a tʋm mam yĩnga. ¹¹ Y na kell n yãe naong rãmb y sʋka la mam ka na n kell n pa y sʋk ye. ¹² Paga sẽn daag yũ-noogã m zugã, yaa mam mumb la a sɩɩl n wilgi. ¹³ Sɩd-sɩda m yet-y lame tɩ zĩig ning fãa kibar kãnga sẽn na n taẽ, dũni wã fãa pʋgẽ, b na tẽeg n gom n pẽg paga sẽn maam marsã wã.» ¹⁴ Yaa wakat kãng la Tʋʋm-tʋmdb piig la a yiiba nin-yend sẽn boond t’a Zɩɩda, Iskariyot tẽng neda, kẽng maan-kʋʋdba kãsem-dãmb nengẽ n tɩ yeel-ba: ¹⁵ «Bõe la y na n kõ-m tɩ m yõk-ba n kõ yãmba?» B kõ-a-la wakɩ koeems pistã. ¹⁶ Dẽ tɛka a sɩng n baooda a sẽn na n bẽd bũmb ning n yõk-b n kɩse. ¹⁷ Bur sẽn ka le ningd bɩlla pipi raare, la karen-biisa waa n sok a Zezi: «Y ratame tɩ d segl pak rɩɩb yɛɛlẽ?» ¹⁸ B leokame: «Kẽng-y tẽnga pʋgẽ, a Zagl nengẽ n yeel-a: ‹Zagla, Soaala tɩ d wilg-fu: Mam wakat taame, la yaa fo zakẽ la m na dɩ pak rɩɩbo ne m karen-biisã.› » ¹⁹ Karen-biisa kẽngame n maan wa a Zezi sẽn yeele la b segla pakã. ²⁰ Zaabr taame tɩ b kẽ ne b Tʋʋm-tʋmdbã n na n dɩ. ²¹ Rɩɩba wakato b yeelame: «Sɩd la m togsda, yãmb nin-yend n na n yõk maam n kõ m bɛɛba.» ²² Sũ-sãang bondga b Tʋʋm-tʋmdba yam tɩ b na n sok, a yeyn-ye: «Soaala, na n yɩɩ maam bɩ?» ²³ Tɩ b leoke: «Sẽn naagd-a maam n tʋmd laagẽ wã, yaa yẽ n na n zãmb-ma! ²⁴ Ned Biiga lebre na n yɩɩ wa b sẽn gʋlse la yell na pak ned ning sẽn na n zãmba wã. A sẽn ka waẽ moogo n sãoẽ a yĩnga!» ²⁵ Sẽn waa n ta a Zɩɩda, ned ning sẽn na n yõk-b n kɩs bɛɛbã, yẽ me sokame: «Wat n yɩɩ maam bɩ, Soaala?» La a Zezi leok-a lame: «Fo togs n sɛɛme.» ²⁶ B sẽn waa n dɩtẽ, a Zezi rɩka buri, n pʋʋs bark pʋʋsgo, n wes burã n kõ b Tʋʋm-tʋmdbã n yetẽ: «Deeg-y n dɩɩ-y, woto yaa mam yĩnga.» ²⁷ Dẽ poore yaa laog neer la b rɩk yã la b sẽn pʋʋs barka, b kɩs-a-la b Tʋʋm-tʋmdbã n yetẽ: ²⁸ «Yũ-y, yãmb fãa, tɩ woto yaa m zooda zɩɩm, zood sẽn yõg ne zɩɩma m sẽn daag neb fãa yĩnga, b yel-wẽna sugr yĩnga. ²⁹ La sɩd wa m sẽn yetã, m kõn leb n yũ bugsuntung sõng biis rãam n tãag raar ning m sẽn lebd n wa yũ a rã-paalgã ne yãmba, m Ba Rĩunga pʋgẽ.» ³⁰ B sẽn yɩɩl n sɛ, b rɩka Oliviye tãng sore. ³¹ A Zezi yeel-b lame: «Yʋnga bala m na n yɩɩ kugr ninga y fãa sẽn na n lak n lʋɩ. B gʋlsame: ‹M na n wẽe pe-kɩɩma la piisa fãa na n sẽegame.› ³² La m vʋʋgr poore, m na reng-y Galile tẽnga.» ³³ A Piyɛr yeelame: «Ba b fãa gill sã n na n lak yãmb wa kugr n lʋɩ, kõn yɩ maam ye.» ³⁴ T’a Zezi na n leok-a: «Sɩd wa m sẽn yetã, yʋnga bala, no-raoog sẽn wat n nan ka kelem dẽ tɩ f yeela naoor a tã tɩ f ka mi maam ye.» ³⁵ T’a Piyɛr na n leoke: «Ba m na naag yãmb n ki, m kõn yeel tɩ m ka mi-y ye.» Taaba fãa me yeela boto. ³⁶ B waa n taa zĩig a ye sẽn boond tɩ Zɛtsemani t’a Zezi yeel b karen-biisã: «Yaas-y ka tɩ m ta taoor n pʋʋs.» ³⁷ B boola a Piyɛr la a Zebede kamb a yiibã. Wakat kãnga sũ-sãang la yĩnsirg yõk-b lame, ³⁸ tɩ b yeele: «Sũ-sãang n na n kʋ-ma, yaas-y ka n pak-ma.» ³⁹ B sẽn zãag bilfu, b lʋɩɩ b yãnvabga n sɩng pʋʋsg woto: «M Ba, sã n tõe, bɩ y kɩt tɩ tooga zãag ne maam. La ade, ka mam daab n so taoor ye, yaa yãmb dẽnna.» ⁴⁰ B sẽn leb b karen-biisa nengẽ, b mikame tɩ b gõe, tɩ b yeel a Piyɛr: «Woto yãmb pa tõog n pak maam wakat yɛng menga? ⁴¹ Bas-y gõeem la y pʋʋs n da lʋɩ ye tɩ ninsaal sũur data la a pãng paooda.» ⁴² B le zãagame yɛsa n na n pʋʋse: «M Ba, tooga sã n ka tõe n zãag tɩ m pa yũ-a bɩ yɩ wa y sẽn date.» ⁴³ B le lɛɛg n waame n le mik tɩ karen-biisa gõe: b nina ra zɩsga ne gõeem. ⁴⁴ B bas-b lame n le zãag n na n pʋʋs, naoor a tãab soaba, wala b sẽn da zoe n pʋʋse. ⁴⁵ Dẽ poore b lɛɛgame n wa yeel-ba: «Y tõe n gũsame marsã, n vʋʋse. Ned Biiga sẽn na n lʋɩ yel-wẽn-maandba nusẽ wakat taame. ⁴⁶ Yik-y tɩ d looge tɩ sẽn na n kɩta tɩ b yõk maama waame bala!» ⁴⁷ A Zezi ka paam n gom n sɛ ye, t’a Zɩɩda, Tʋʋm-tʋmdb piig la a yiiba nin-yende, wẽneg n poog ne neb ka tɛka sẽn zãad sʋʋs la rasaba; yaa maan-kʋʋdba kãsem-dãmb la tẽnga nin-kẽembã n da yiis-b. ⁴⁸ Zãmbda ra kõ-b-la makr kãngã: «M sẽn na n mobg a soab wala m zoa wã, yaa yẽnda, yõk-y yẽe.» ⁴⁹ A sɩd kolga a Zezi n yetẽ: «Soaala, m pʋʋsda!» La a mobg-b lame, ⁵⁰ t’a Zezi yeel-a: «M zoa, maan f tʋʋmde.» Tɩ neba na n kolg marsã n yõk-ba. ⁵¹ A Zezi tũud-n-taasa nin-yend taka a sʋʋg n wõog, la a kɛɛ maan-kʋʋd kãsma sõgen a ye tʋbre n fiuug. ⁵² T’a Zezi na n yeel-a: «Lebs f sʋʋga a wʋʋgẽ tɩ sẽn zãada sʋʋg fãa, sʋʋg n kʋʋd-a. ⁵³ F tẽedame tɩ m ka tõe n yõk m Ba sɛɛga, tɩ b ko maam mars-marsã bala, malɛk rãmb sẽn taẽ tus kobs-yopoe la a yi? ⁵⁴ La sẽn gʋls tɩ kall tɩ yɩ boto wã maandẽ-la a wãn n taase?» ⁵⁵ B lɛɛg n goma ne zãma wã: «Mam yaa so-gɩt laa, tɩ y yi ne sʋʋs la rasaba n na n yõk ma? Beoog sẽn vẽeg fãa m da zĩi wẽnd doogẽ n zãmsd-y la y ka yõk-m ye. ⁵⁶ Yɩɩ woto tɩ sẽn gʋls Sebr pʋgẽ tõog n pidsi.» Wakat kãnga karen-biisa fãa bas-b lame n zoe. ⁵⁷ Sẽn yõk-ba a Zezi wã tall-b lame n kẽng maan-kʋʋd kãseng a Kayif nengẽ; be, Sɛb-mitba la nin-kẽembã waa n tigma taaba. ⁵⁸ A Piyɛr da pʋgda yɩɩg-yɩɩga n wa ta maan-kʋʋd kãsenga yiri; a tol n kẽe pʋgẽ n zĩnd ne sõgen-kambã n na n ges yella sẽn na n baas to-to. ⁵⁹ Bãng-y tɩ maan-kʋʋdba kãsem-dãmb ne bʋʋda rãmba da baooda rõadga n na n dõd a Zezi n paam n kʋ-ba la ra ka naana ye. ⁶⁰ Sẽn wa-ba yaool n yɩɩ wʋsgo. Baasgo neb a yiibu n ta ⁶¹ n togs woto: «Nin-kãnga yeelame: ‹M tõeeme n wã wẽnd doogã n lebs n me-a ra-yɩten-daare.› » ⁶² Maan-kʋʋd kãsenga yikame n yeel a Zezi: «Fo ka leokd tɩ bũmbu, bõe la b yet tɩ foo n maane?» ⁶³ T’a Zezi sĩnd b noore. Maan-kʋʋd kãsenga yeel-b lame: «M kot-f lame tɩ f togs-do sã n yaa foom la Krista, Wẽnnaam Biigã.» ⁶⁴ A Zezi leok-a lame: «F togs n sɛɛme, la m yet-y lame tɩ y na n yãee Ned Biiga t’a zĩ Wẽnnaam pãng soab rɩtgo, n zao sawadgo n sigd tẽnga.» ⁶⁵ Maan-kʋʋd kãsenga kẽesa a fut n yetẽ: «A tʋʋsa Wẽnde, d le baooda kaset dãmb n na n maan bõe? Yãmb sẽ n ka wʋme, a tʋʋsa Wẽnde. ⁶⁶ Y yetame tɩ bõe?» B naaga taab n leoke: «A toga ne kũum.» ⁶⁷ B sɩngame n tʋbsd b neng kolkoodo la b pãbd-b pegse; kẽer da soosd n pãbd-b lame la b yetẽ: ⁶⁸ «Bãng wɛ, Wẽnd Nedã, ãnda n wẽ foom?» ⁶⁹ A Piyɛr da zĩi zakẽ tɩ yem-poak a ye kolg n sok-a: «Foo, fo ra ka be ne Galile Zezi wã?» ⁷⁰ A Piyɛr kɩɩsa neba fãa taoore n yetẽ: «Ad mam ka mi fo sẽn dat n yeel tɩ bũmb ning ye.» ⁷¹ A Piyɛr sẽn serge n lebd dignoorẽ, la yem-poak a to sẽn yãe-a n yeel neb a taaba: «Ad-y nin-kãnga ra bee ne a Zezi, Nazarɛt Raoã.» ⁷² La a Piyɛr le kɩɩsame la a wẽnnẽ: «Mam pa mi nin-kãnga ye.» ⁷³ Sẽn yɩ bilfu, zaka noor dãmb kolga a Piyɛr n yeel-a: «Kɩɩsg ka ye, fo ra tũud-a lame, fo goama bal n lukd f bãongo.» ⁷⁴ T’a Piyɛr tar kɩɩsgo la wẽenego: «Mam ka mi nin-kãnga ye.» La no-raoog wẽneg n kelmame. ⁷⁵ A Piyɛr tẽega Krista sẽn da yeelã: «Noaag ne a na n kelem tɩ f yeela naoor a tã tɩ f ka mi maam ye.» La a yiime la a kiigd nintãm.

¹ Beoog sẽn vẽege, maan-kʋʋdba la nin-kẽemba le tigma taaba la yaa b yẽsgã na baas ne a Zezi kũum bala. ² B sẽba a Zezi n tall-ba n tɩ bas ne a Pilat tɩ yẽ n da ya kombere. ³ Zãmb soab a Zɩɩda sẽn bãng tɩ b paalga a Zezi bʋʋdo, a zaba ne a menga n tall sãnem wakɩ pistã wã n wa lebs maan-kʋʋdba la tẽnga nin-kẽembã, ⁴ n yetẽ: «Ade, m kongame n kɩt tɩ b na n daag ned sẽn ka tar a toorẽ yell zɩɩm.» La b yeel-a lame: «Dẽ ka pak tõnd ye, foo n na bãnge.» ⁵ T’a na n lob ligda wẽnd doogẽ la a yi n tɩ luul. ⁶ B sẽn wʋk ligdã, la maan-kʋʋdba sẽn yeele: «Ligd kãnga ka tõe n yɩ wẽnd doog ligd ye, t’a yaa zɩɩm ligdi.» ⁷ B yẽsa ne taaba la b rɩka ligdã n da yagda pʋʋgo n na n mumd sãamba. ⁸ Yaa rẽnd me yĩnga la al ba rũnna b ket n boonda pʋʋgã tɩ «Zɩɩm pʋʋgo.» ⁹ Woto taasa bãngda Zeremi gomde: B rɩka wakɩ pistã wã, Israyɛl kamb sẽn da saag sẽn zʋʋga saagrã ¹⁰ la b raa yagd pʋʋgo, wala m Soaala sẽn wilg-ma. ¹¹ B talla a Zezi n ta kombera taoore tɩ yẽ na n sok-ba: «Yaa foo la Zʋɩf rãmba dĩma bɩ?» T’a Zezi na n leok-a: «Fo togsame.» ¹² Maan-kʋʋdba kãsẽm-dãmb la nin-kẽemba ra rõt-b lame tɩ b sĩnda. ¹³ Dẽ la a Pilat le sok-ba: «Fo ka wʋmd b sẽn togsd f poorẽ laa?» ¹⁴ La a Zezi ka leok-a tɩ bũmb ye, al t’a Pilat yɛɛs wʋsgo. ¹⁵ Yʋʋmd-yʋʋmd fãa, kibsa yĩnga, a Pilat da mii n yiisda bi-bɛɛg a ye roogo, la yaa tẽnga rãmb sẽn kos tɩ b yiis a soaba. ¹⁶ Mik bi-be-maasr a ye n dag n be roogẽ yʋʋmd kãnga t’a yʋʋr boond tɩ Barabas. ¹⁷ Dẽ la a Pilat sok zãma wã: «Bʋg la y rat tɩ m yiis roog n base, a Barabas bɩ a Zezi, b sẽn boond a soab tɩ Krista?» ¹⁸ A yaool n mii neere tɩ yaa sũ-kiir yĩng bala la b yõk a Zezi. ¹⁹ A Pilat paga tʋmame tɩ b wa yeel-a bʋʋda zĩigẽ: «Da lʋɩɩs f toog yell kãnga pʋgẽ ye tɩ yaa nin-tɩrga; yʋngẽ m zãmsa a poorẽ la ka yɩ-m noog ye.» ²⁰ Maan-kʋʋdba kãsẽm-dãmb la tẽnga nin-kẽemba sagla zãma wã tɩ b kos a Barabas la b kɩt tɩ b kʋ a Zezi. ²¹ Dẽ la Kombera sok-ba: «Ãnda la y rat tɩ m base?» B leokame t’a Barabas. ²² A Pilat yeel-b lame: «La a Zezi, b sẽn boond a soab tɩ Krista, m maanda yẽ soab bõe?» Tɩ b fãa leoke: «Ka-y yẽe pika!» ²³ T’a Pilat me leok ba: «Bõe la a maanyã tɩ ya wẽnga?» La b naaga taab n moon tɩ yɩɩd pĩnda: «Ka-y yẽe pika.» ²⁴ A Pilat sẽn mik t’a makda zaalem la bʋʋra bal n wulumd n dabda, a rɩka koom n nudg a nus neba fãa nifẽ la a yetẽ: «M yiisa m toog zɩ kãnga raagrẽ, yãmb n na bãnge.» ²⁵ B le naaga taab n yeele: «Bɩ a zɩɩma taal pa d zug la d kamba zugu.» ²⁶ A Pilat kong n basa a Barabas; a kɩtame tɩ b pãb a Zezi la a kõo neba sore tɩ b ka-b pika. ²⁷ A Pilat tãb-biisa talla a Zezi n kẽ bʋʋdba sikẽ la neb sẽn ta kobs-yoob gũbg-b lame. ²⁸ B yeega b fuugã n yeelg-b fu miuugu, n gõd gõos gʋle n teeg b zugu; n bao kãnkãr n ning b nugẽ, (wa naam dasaare) n yĩgimd b taoor marsã n laad ba: ²⁹ «Y zĩig be neere, Zʋɩf rãmb dĩma!» ³⁰ B ra tʋbsda b nenga kolkoodo la b mii n deeg kãnkãrã n va b zugu. ³¹ B sẽn waa n yaal-ba n tɩge, b yeega fu-miuugã n yeelg-b b meng fuugu, la b tall-b lame n na n tɩ ka pika. ³² B sẽn waa n dabda, b sega Sirɛn ned a ye, a yʋʋr a Simo, la b modg-a lame t’a sõng a Zezi n zɩ b pika. ³³ B sẽn ta Golgota (zu wang tãnga) b kalma rãam ne rũng yam n kõ-b tɩ b yũ. ³⁴ La b sẽn lembe, b pa tʋlg n yũ ye. ³⁵ B sẽn ka a Zezi n sɛ, b pʋɩɩ taab b futu, ned kam ne a zu-noog sẽn tʋʋg-a soaba. ³⁶ B ra zĩi woto marsã n gũudẽ. ³⁷ B ra gʋlsa bũmb n yagl a Zezi zugẽ, n na n wilg sẽn ya bũmb ning n wa ne b kʋʋbo; ra gʋlsa woto: «Wã la a Zezi, Zʋɩf rãmb dĩma.» ³⁸ Naaga so-gɩtba a yiib me n ka, a yembre b rɩtgo, a yembre b goabga. ³⁹ Neba ra loogda pika tẽngre n yĩgsdĩ la b tʋʋsd-b. ⁴⁰ B ra yetame: «Sẽn tõe-a n wã wẽnd doogã la a lebs n me-a ra-yɩten-daar soaba, fãag f menga, f sã n ya Wẽnnaam Biiga la f sig pika zugu.» ⁴¹ Maan-kʋʋdba kãsem-dãmb me ra laad-b lame; b me naaga Sɛb-mitba la tẽnga nin-kẽemba n yetẽ: ⁴² «A fãaga a taaba n yaool n ka tõe n fãag a meng ye. A yaa Israyɛl Dĩma: bɩ a sig pika marsã tɩ d na tẽe-a! ⁴³ A yet t’a teega Wẽnd la, Wẽnd sã n geta yelle, bɩ b fãag-a. Ka yẽ meng n yeele: ‹Mam yaa Wẽnd Biiga!› » ⁴⁴ So-gɩtba sẽn da ka pika me ra naagame n tʋʋsd ba. ⁴⁵ Wĩnto-sʋk n ta zafare, zĩiga lebga lika. ⁴⁶ Zafare, a Zezi tãsa ne pãnga: «Eli, Eli! Lema Sabaktani.» La rẽ rat n yeelame: M Wẽnnaam, m Wẽnnaam! Bõe yĩng la y bas-ma? ⁴⁷ Neb kẽer sẽn zĩnd be n wʋm b goama ra yetame: «Nin-kãnga boondaa Eli!» ⁴⁸ Dẽ la nin-yend wudg n dɩk bũmb sẽn fõogd koom n los rã miisg pʋgẽ, n yaag n loe tãnwĩiga n kõ-b tɩ b yũ. ⁴⁹ La neb a taaba yeel-a lame: «Yaas tɩ d ges a Eli na wa n fãag-a sɩda!» ⁵⁰ A Zezi le tãsame la b kiime. ⁵¹ Wẽnd dooga peend kãsenga kẽega yĩngr n ta tẽnga. Tẽnga miimame, pĩis tãsa mugnum, ⁵² yaad pagsame la nin-sõma wʋsg sẽn da ki yĩns vʋʋgame. ⁵³ A Zezi vʋʋgr poore nin-bãmb kẽe Tẽn-sõnga pʋga la neb wʋsg yãend-b lame. ⁵⁴ Sã n ya tãnsoaba la neb niyns sẽn da be-b pika sɛɛga n gũud a Zezi wã, b sẽn yãend tẽnga miuungu la yɛl a taaba, b pɛlens yɩkame tɩ b yeele: «Ad-y nin-kãnga sɩd da yaa Wẽnd Biiga.» ⁵⁵ Pagb wʋsg ra yɛsa yɩɩga n getẽ. Yaa pagb niyns sẽn da pʋgd-b al Galile tẽnga la b ra get b yelle, ⁵⁶ wala Magdala Mari, n paas a Mari a Zak la Zozɛf ma, n paas a Zebede kamba ma. ⁵⁷ Zĩ-sobd noorẽ, Arimati arzɛk soab a ye sẽn boond tɩ Zozɛf la sẽn da tũud a Zezi, ⁵⁸ kẽnga a Pilat nengẽ n tɩ kos a Zezi yĩngã. La a Pilat yeelame tɩ b kɩs-a. ⁵⁹ A Zozɛf reega kũuma n sẽb ne peen-paalga, ⁶⁰ la a mum-a-la a meng yaoogẽ, a sẽn nan tuk paalem kugsẽoogẽ. A baoo kug bedre n pag yaooga noor la a kuli. ⁶¹ Sã n yaa Magdala Mari la Mari a to wã bãmb waa yaoogẽ wã n da zĩi n get-a. ⁶² Vẽkembeoogo, dat n yeelame tɩ paka seglg sẽn baase, maan-kʋʋdba kãsem dãmba la Farizẽ rãmba sũu taab n wa a Pilat nengẽ n yeel-a: ⁶³ «Dĩma, d tẽegame tɩ zirẽ-be-neda sẽn waa n ket n vɩ, a yeelame: ‹M kũum dasm a tãab poore, m na n vʋʋgame.› ⁶⁴ Dɩlla kɩt-y tɩ b gũ yaooga dasm a tã, sã n ka rẽ, a karen-biisa wat n soos n dɩka a yĩnga n yaool n yeel neba t’a vʋʋgame, la ziri kãng wẽnem na n yɩɩga pipi soabã.» ⁶⁵ A Pilat yeel-b lame: «Ad tãb-biisi, tɩ yals-y-ba tɩ b gũ wa y sẽn datã.» ⁶⁶ Tao-tao bala b kẽngame n tɩ ges yaoogã, n ning makre a linga zugu la b yals gũudba n gilg.

¹ Sibra raar sẽn looge t’a vẽkembeoog sõor nan pukdẽ, Magdala Mari ne Mari a to wã waame n na ges yaoogã. ² La ade, tẽnga miima wʋsgo la Soaala malɛk sigame n wa lak kugrã n maneg n zĩ a zugu. ³ Malɛka ra yãgda wa saag sʋʋga la a fuuga ra yaa pɛɛlg wa sapɩlem. ⁴ Sẽn da gũud-b yaoogã yãend-a lame n yɛɛse n lebg wa kũum. ⁵ Malɛka yeela pagbã: «Yãmb yẽ, ra maan-y rabeem ye, m miime tɩ yaa Zezi ning sẽn ka pika la y baooda; ⁶ b ka le ket ka ye, b vʋʋgame, wala b sẽn da yeele. Waa-y n ges-y b sẽn da gãneg-b zĩig ninga. ⁷ La kẽng-y tao n tɩ yeel b karen-biisã: ad-y b vʋʋgame la b na n deng-y la Galile tẽnga, la yaa be la y na n yãend-ba. M sẽn da tar n na n wilg-y la woto.» ⁸ Pagba basa yaooga tao-tao tɩ b sũur sidgd ne sũ-noogo tɩ b zoe n tɩ togs karen-biisã. ⁹ A Zezi sega pagbã, n yeel-ba: «Y yɛɛl ba!» Tɩ pagba na n kolg n wõgemd n mobg b nao. ¹⁰ A Zezi yeel-b lame: «Da zoe-y rabeem ye la yeel-y m yaopã tɩ b rɩk Galile sore tɩ yaa be la b na n yãend-ma.» ¹¹ Pagba sẽn looge, yaooga gũudb kẽer kẽ tẽnga pʋga n togs maan-kʋʋdba bũmb ning fãa sẽn maane. ¹² Dẽ la b tigim taaba, bãmb ne tẽnga nin-kẽemba la b sẽn yẽs n sɛ, b kõo tãb-biisa ligd wʋsgo, ¹³ la b yeel-b lame: «Y na n togsa woto: ‹A Zezi karen-biisã soos n waa ne yʋngo, tõnd sẽn waa n gõe, n zuk ba.› ¹⁴ Kombera sã n bãnge d na kabs-a t’a ra maan-y bũmb ye.» ¹⁵ Tãb-biisa reega ligdã la b maana wala b sẽn wilg-bã, b yelga kibar kãnga Zʋɩf rãmba sʋka n tãag rũnna. ¹⁶ Tʋʋm-tʋmdb piig la a ye wã kẽnga Galile, a Zezi sẽn da yeel tɩ b seg taab tãng ninga zugu. ¹⁷ B sẽn yãend-ba, b wõgemda b taoore, kẽer me yaool n da ket n sãmbdame. ¹⁸ A Zezi kolgame n yeel-ba: «M paama tõog buud fãa yĩngr la tẽng zugu. ¹⁹ Kẽng-y, kɩt-y tɩ mooga ninsaalb buud fãa lebg m karen-biisi, n kõt-b soobo: Ba la Biiga la Vʋʋsem Sõng yʋʋr yĩnga, ²⁰ la y zãms-b tɩ b reeg bũmb ning fãa m sẽn wilg-y. Ade m na n paa ne yãmb, daar fãa, n ta dũni sɛɛbo.»