LUK

LUK

¹ Ad-y yɛl niyns fãa sẽn maan tõnd sʋka, neb wʋsg n yik n na n gʋls ba, ² n gʋls-b tɩ tũ wala pipi Koe-nooga moandb sẽn yãend ne b nini. ³ Bãmb nao la m pʋgyã, n le vɛɛs yɛla fãa, al b sɩngrẽ n na n gʋls-b fo yĩnga, m nin-sõngo Teofil. ⁴ La woto wã f na bãng tɩ f sẽn paam zãmsgo ninga ka naag ne zirẽ lɛ-lɛ. ⁵ Zɩɩde naab a Erod zamaanẽ, maan-kʋʋd a ye n da be, a Abia sakẽ, n boond t’a Zakari, t’a pag sẽn boond t’a Elizabɛt yaa Aarõ yagenga. ⁶ Bãmb b yiiba da yaa nin-sõma Wẽnnaam taoore n da tũud Soaala noya la b raaba fãa, tɩ wɩdg ka ye. ⁷ B ra pa tar biig ye, t’a Elizabɛt ra yaa pɩg-kiiri; la bãmb b yiiba fãa ra kʋʋlame. ⁸ Sẽn waa n beẽ, maan-kʋʋra tʋʋmd gilgame n ta a Zakari saka. B poeesa wala b sẽn mii n maandẽ, ⁹ la lʋɩɩ yẽ zug, t’a kẽ Sõmblem Naab meng roogẽ n yõog wisdu. ¹⁰ Wisda yõogr wakato, zãma wã paa yɩnga n pʋsdẽ. ¹¹ La Soaala malɛka lika a Zakari, wisda maan-kugra rɩtgo. ¹² A Zakari sẽn yãe-a, a yɛɛsame la rabeem yõk-a lame. ¹³ Tɩ malɛka yeel-a: «Ra zoe rabeem ye, Zakari, tɩ f pʋʋsg reegame, fo pag na n doga biig n kõ-fo la f na n pʋda a yʋʋr a Zã. ¹⁴ A rogma na n pidsa fo menga la neb wʋsgo ne sũ-noog la na yɩ kɩdengo. ¹⁵ A Zã na n yɩɩ nin-kãseng Soaala taoore; a kõn yũ rãam la toos ye. A na n pida ne a Vʋʋsem Sõngo t’a ket a ma pʋgẽ. ¹⁶ A na n talla Israyɛl kamb wʋsgo tɩ b lɛɛg n wa kẽ Soaala, bãmb Wẽnnaam. ¹⁷ A na n lʋɩɩ Soaala taoore ne a Eli yam la a pãnga; a na wẽnemda ba rãmb la kamba sũur n tees taaba. A na n kõo kɩɩsdba nin-sõma wã yam sõngo, la woto a na n segl buud sõngo n kõ Soaalã.» ¹⁸ A Zakari yeela malɛkã: «Bõe n na n sõng-m tɩ m bãng rẽnna? M yaa nin-kẽema, m pag me kʋʋlame.» ¹⁹ La malɛka leok-a lame: «Mam la a Gabriyɛl sẽn yɛs Wẽnnaam taoore, la b tʋm-m lame tɩ m wa gom ne foo la m togs-f koe-noog kãnga. ²⁰ La ade, fo na n lebga muka, fo kõn le tõog n gome, n tol n tãag yɛl kãensa fãa taasg raare, fo sẽn pa tẽ m goama yĩnga, la b yaool n na n pidsame, b raara sã n ta.» ²¹ La neba fãa yaool n da gũuda a Zakari, tɩ b pɛlens yɩgda a sẽn kaoosd wẽnd doogẽ wã. ²² A sẽn waa n yi, a makame t’a na n gom ne nebã, n konge. Dẽ la b bãng t’a paama likr wẽnd doogẽ. Yẽ menga ra kong n bilgda ne nugu, la a kell n yɩɩ muka. ²³ A Zakari sẽn maan a tʋʋmna n pids a raare, a leba a yiri. ²⁴ Sẽn yɩ bilf rẽ poore, a paga, a Elizabɛt, dɩka pʋga; a solga a meng kiis a nu. La yẽ meng n waa n gomda: ²⁵ «Ad-y Soaala yaa n maana bũmb m yĩnga. Yaa n ta-la b raabo tɩ b rok m yãnd ninsaalb sʋka!» ²⁶ Kiis a yoob sẽn sõd dẽ poore, Wẽnnaam tʋma malɛk a Gabriyɛl Galile tẽng a ye sẽn boond tɩ Nazarɛt, ²⁷ bi-pugl a yembr nengẽ, b sẽn da kõ sɩd sẽn boond t’a Zozɛf n yaa a Daviid buud neda. Bi-pugla yʋʋr da boondame tɩ Maryam. ²⁸ La malɛka sẽn kẽ a nengẽ, a yeelame: «M pʋʋsda yãmba, pid ne kũun soaba! Soaala bee ne yãmba, yãmb paama barka, pagba fãa sʋka.» ²⁹ La a Maryam sẽn wʋm gomdã, a yɛɛsame; a ra bilgdame n baood pʋʋsg a woto võore. ³⁰ Malɛka yeelame: «Da zoe-y rabeem ye, Maryam, yãmb paama bark Wẽnnaam taoore. ³¹ Ade, yãmb na n dɩka pʋga, yãmb na n doga bi-ribla la y na pʋda a yʋʋr a Zezi. ³² Bãmb na n yɩɩ nin-kãsenga, la b na n bool-b lame tɩ yĩngr soab Biiga. Wẽnnaam na n kõ bãmba b saamba, a Daviid, zaoore, ³³ la b na n dɩ naam a Zakoob zakẽ daar fãa la b naam kõn zĩnd sɛɛb ye.» ³⁴ A Maryam soka malɛkã: «Dẽ na n yɩ-la a wãna, tɩ m ka mi rao ye?» ³⁵ Malɛka leokame: «A Vʋʋsem Sõng na n siga yãmb zugu la yĩngr soab pãng na n bui yãmba. Dẽ n so tɩ sõmblem biiga yãmb sẽn na n dogã, b na n bool-b lame tɩ yĩngr soab Biiga. ³⁶ Bɩ y gese! Yãmb doagda, a Elizabɛt, dɩka pʋga n na n dog biig a kʋʋlem pʋgẽ, lebga kiuusa yoob marsã, b sẽn da ket n boond-a tɩ pʋg-kiiri; ³⁷ tɩ bũmb ka be sẽn yɩɩd Wẽnnaam nug ye.» ³⁸ La a Maryam yeelame: «Mam yaa Soaala yem-poaka, bɩ kell n yɩ ne maam wala yãmb sẽ yeelã.» La malɛka bas-a lame n looge. ³⁹ A Mariyam waa n yika ne yãgbo n tees tẽng a yembre, Zɩɩda tãmsẽ. ⁴⁰ A tɩ kẽe a Zakari yiri n pʋʋs a Elizabɛt. ⁴¹ A Elizabɛt sẽn wʋm a Maryam pʋʋsma, biiga sẽn da be a pʋgẽ wã yĩng sidgame. La a Elizabɛt pida ne a Vʋʋsem Sõngo, ⁴² t’a zẽk a koɛɛg n moonẽ: «Fo paama barka, pagba fãa sʋka, la f pʋgẽ biiga me paama barka. ⁴³ Mam bee yɛ, tɩ m Soaala ma wat m nengẽ? ⁴⁴ Ade, fo pʋʋsma sẽn lʋɩ m tʋbrẽ la m biiga yĩng sẽn sidgi, sũ-noog keelem yĩnga. ⁴⁵ Foom la zu-noog soaba, tɩ fo tẽeme tɩ gomna b sẽn leok foom, Soaala yʋʋr yĩnga, na n taasame.» ⁴⁶ La a Maryam yeelame: «Mam sɩɩga pẽgda m Soaal, ⁴⁷ la m sũur kɩdemda sũ-noogo, Wẽnnaam m Fãagda yĩnga. ⁴⁸ Bãmb gesa b biiga paoodlem. Ad marsã tɛka ninsaal buud fãa na n boola maam tɩ zu-noog soaba. ⁴⁹ Tɩ Pãng soab maana yɛl kãsens mam yĩnga, la b yʋʋr yaa sõngo. ⁵⁰ Dũni sẽn yet t’a yaa dũniya, b nimbãan-zoeer bee sẽn zoet-b bãmb zutu. ⁵¹ B wilga b kang pãnga. B riga wakr dãmba n sẽege. ⁵² B sika pãens rãmb b zaoorẽ, b zẽka talse. ⁵³ Kom sẽn tar b rãmba, b tɩgs-b la ne kũuni, tɩ arzɛk rãmb yaool kul zaalem. ⁵⁴ B kogla b biig, a Israyɛl; tɩ b tẽega b nimbãan-zoeerã ⁵⁵ n na n pids zamaan woo zamaana b sẽn da kãab d saam-dãmba, a Abraam ne a kamba!» ⁵⁶ A Maryam zĩnda ne a Elizabɛt sẽn zems kiis a tã n yaool n kul a yiri. ⁵⁷ A Elizabɛt dogem taame; a roga bi-ribla. ⁵⁸ A yags la a buud dãmb wʋmame tɩ Soaala zoe-la a nimbãanega, tɩ b lagem ne-a, n kɩdemnẽ. ⁵⁹ Dasem a nii daare, b kẽesa bi-pɛɛlga bãongo. B pʋd-a la a ba yʋʋre: Zakari. ⁶⁰ T’a ma yeele: «Ayoo! A Zã la b na n bool-a.» ⁶¹ Tɩ b yeel-a: «Fo buudẽ wã, ned ka be sẽn pʋd yʋ-kãng ye.» ⁶² La b bilsa ne nus n sok biiga ba a sẽn dat tɩ b pʋd biiga yʋʋr ninga. ⁶³ A Zakari kosa walga n gʋls woto: «A yʋʋr la a Zã.» La b fãa pɛleng yɩkame. ⁶⁴ Wakat kãng bala, a Zakari yaaga a noor t’a zelemd lak t’a na n gom n pẽg Wẽnnaam. ⁶⁵ Dabeem yõka a yagsa fãa. A Zɩɩda soolma fãa tɛka, neba sõasg ra yaa yell kãnga. ⁶⁶ La neb niyns fãa sẽn wʋm-ba, yella kɛ-la b sũurẽ tɩ b ra yetẽ: «Bi-kãnga na n wa yɩɩ bõe?» Sɩd me Wẽnnaam nug ra tika biiga zugu. ⁶⁷ La biiga ba, a Zakari, ra pida ne a Vʋʋsem Sõngo, t’a gom bãngr goama n yeele: ⁶⁸ «Soaala, Israyɛl Wẽnnaam, paam pẽgre, tɩ b waa n gesa b buudu n fãag-a. ⁶⁹ Tõnd yĩnga b yiisa Fãagda, Pãng soaba, b biiga Daviid zakẽ. ⁷⁰ Wala b sẽn da pĩnd n togs ne tẽn-kʋdem wẽnnẽ bãngdb sõma noore, ⁷¹ yaa Fãagd sẽn na fãag tõndo d bɛɛba la sẽn kis-b tõnda nusẽ. ⁷² Yɩɩ woto la b maan b nimbãan-zoeere ne d yaab rãmba. B tẽega b bark zoodã, ⁷³ b tẽega kãabg ningã, b sẽn da kãab d ba, a Abraam. ⁷⁴ B kãabame tɩ b na zãag-d ne d bɛɛba, n zãag-d ne rabeem buud fãa, tɩ d tõog n waoog-ba, ⁷⁵ ne sõmblem la pʋ-peelem, bãmb maasmẽ, la d vɩɩma tõre. ⁷⁶ La foom, bi-pɛɛlga b na bool foom tɩ Yĩngr soab no-rɛɛsa, tɩ foom n na n lʋɩ Soaala taoore n segl b soya; ⁷⁷ n kɩt tɩ buuda bãng t’a na n paama fãagre ne a yel-wẽna yẽesgo, ⁷⁸ tõnd Wẽnda sũuri pida ne nimbãan-zoeer bala, b nimbãan-zoeer yĩnga, b yĩngr Ãdga ⁷⁹ na puki la a vẽneg sẽn zĩ-b likẽ sẽn zĩ-b kũum maasmẽ tɩ b nao wa paam n dɩk laafi so-tɩrga.» ⁸⁰ Biiga ra bɩtame t’a yam da paasdẽ. A zĩnda weoogẽ n tãag daar ning a sẽn vẽneg a meng a Israyɛl kamba.

¹ Wẽnd kãnga, dĩma, a Ogust, yiisa sebre tɩ b sõd dũniya neba fãa. ² Sõadg kãng n yɩ pipi sõadg la b maana-a-la a Kirinus, Siri kombera zamaanẽ. ³ Ned kam fãa ra lebda a tẽngẽ tɩ b sõd-a be. ⁴ A Zozɛf me yika Nazarɛt, Galile tẽnga, n kẽng Zɩɩda tẽng a ye sẽn boond tɩ Bɛtelyɛɛm, t’a ra ya a Daviid buuda neda. ⁵ La be la a tɩ sõde, yẽ ne a paga, a Maryam, sẽn da tʋte. ⁶ B sẽn waa n be Bɛtelyɛɛm, a Maryam dogem daar taame. ⁷ A doga a sãdem-biiga, n vil-a ne pɛɛla, n gãneg-a b sẽn kẽesd rũmsa zĩig ning n kõt b rɩɩbo, tɩ b ka paam weer sãamba dotẽ ye. ⁸ Pe-kɩɩmb n da be tẽnga noor n gũd b rũmsi ne yʋngo, ⁹ Soaala malɛk wa n pẽneg-b lame tɩ Soaala zɩɩra vẽenem bui-ba la rabeem kãseng yõk-b lame. ¹⁰ Malɛka yeel-b lame: «Da zoe-y rabeem ye tɩ yaa Kibar noog la m tara, yãmb la buuda fãa yĩnga: ¹¹ dũnna, a Daviid tẽngẽ, Fãagda doga yãmb yĩnga; bãmb la Wẽnd Nedã la Soaalã. ¹² Yaa ne makr kãnga la y na n bãng-ba: y na n yãee bi-pɛɛlg t’a gãe b sẽn kẽesd rũmsa zĩig ning n kõt-b rɩɩbã.» ¹³ Vugr bala yĩngr tãb-biisa ka tɛka wa n naaga malɛkã tɩ b pẽgd Wẽnd woto: ¹⁴ «Wẽnnaam paam pẽgr yĩngri la b yamleooga sẽn kẽ b rãmba paam laafi tẽng zugu!» ¹⁵ Malɛk rãmba bas-b lame n leb yĩngri tɩ pe-kɩɩmba yeel taaba: «Bɩ d ta Bɛtelyɛɛm n ges bũmb ning sẽn maane tɩ Soaala wilg tõndã.» ¹⁶ B kẽnga tao n tɩ mik a Maryam ne a Zozɛf la bi-pɛɛlg t’a gãe b sẽn kẽesd rũmsa zĩig ning n kõt-b rɩɩbã. ¹⁷ Pe-kɩɩmba yãenda ne b nifu, tɩ bãmb me na n sɩng n togs marsã, malɛka sẽn da zoe n wilg bãmb biiga poorẽ. ¹⁸ Ned ning fãa sẽn kelg-a, ra zĩi ne pɛlen-yɩka. ¹⁹ A Maryam ra bĩngda yɛl bãmb a sũurẽ, n bʋgsd-ba a yamẽ. ²⁰ Pe-kɩɩmba lebgame n kilsdẽ la b pẽgd Wẽnnaam b sẽn yãend la b sẽn wʋm yĩnga. Fãa sɩd yɩɩ wala b sẽn da togs-bã. ²¹ A rogem dasm a nii yĩnga, b kẽesa biiga bãongo, n pʋd biiga t’a Zezi, yʋʋr ninga malɛka sẽn pind n pʋde tɩ b ma nan ka tʋd b pʋgã. ²² B sẽn waa n segl b mens n taas daar ning Noora sẽn yalsã, b talla biigã n kẽng Zerizalɛɛm n tɩ rɩk-b n kõ Wẽnde, ²³ tɩ woto n be Soaala Noora sebrẽ: Bi-ribl fãa sẽn doge n yaa a ma pipi biiga, b rɩkd-a lame n kõ Soaala tɩ b sooge, ²⁴ la wala Soaala Noor sẽn le rat yɛsa, yaa malwal a yiibu bɩ wal a yiibu la b kɩs tɩ b kʋ maoongo. ²⁵ La ade, dao a ye n da be Zerizalɛɛm n boond t’a Simeõ. A ra yaa nin-tɩrga, nin-sõngo; a da gũuda Israyɛl yolsgo la a Vʋʋsem Sõng ra bee ne-a. ²⁶ A Vʋʋsem Sõng ra vẽneg-a lame t’a bãng t’a kõn ki t’a ka reng n yãe Krista, Wẽnd Neda ye. ²⁷ A Vʋʋsem Sõng kɩtame t’a kẽng wẽnd doogẽ. La biig a Zezi ba rãmb sẽn tall-b wakat ninga n wa pids noorã, ²⁸ a reeg-b la a nusẽ la a pẽga Wẽnnaam n yetẽ: ²⁹ «Soaala, wala y sẽn wilg y yambã, y tõeeme marsã n kõ-a sor t’a loog ne laafi; ³⁰ tɩ m nini yãe-la y fãagre, ³¹ y sẽn seglg ninsaalb buud fãa yĩnga. ³² A yaa vẽenem n vẽnegd bu-zẽmbã, a yaa yãmb buud, a Israyɛl, zu-zẽkre.» ³³ Biiga ma ne a ba pɛleng yika b sẽn da gomd b yell woto wã yĩnga. ³⁴ A Simeõ ning-b la barka la a yeela a Maryam, biiga ma: «Ade, bi-kãnga waa ne neb wʋsgo sãoong la neb wʋsg manegre, Israyɛl pʋgẽ. A na n yɩɩ wa bõn-bãnde n wa ne no-koeemde. ³⁵ La yãmb menga, yaa sʋʋga n na n kõs yãmb sũuri n kɩt tɩ y tũ rẽ n bãng sẽn be neb wʋsg rẽnnẽ.» ³⁶ Bãngd poak a ye me n da be be, a An, a Fanuwɛl biiga, a Azɛr buudẽ; a ra kʋʋla wʋsgo; a sẽn yi kãadem a pʋg-sademnẽ, a zĩnda ne a sɩda yʋʋm a yopoe bala, ³⁷ la a kell n paa pʋg-kõto t’a yʋʋm wa ta pisnii la a naase; a ra pa viigd wẽnd doogẽ ye; a ra waoogda Wẽnnaam yʋng la wĩntoogo, ne no-loeere la pʋʋsgo. ³⁸ A An me waa wakat kãng bala n pẽgd Wẽnnaam la a gomd biiga yelle ne neb niyns fãa sẽn da gũud-b Zerizalɛɛm fãagre. ³⁹ B sẽn maan fãa n sɛ wala Soaala noor sẽn date, b leba b tẽngẽ, Nazarɛt, Galile soolem. ⁴⁰ La Biiga ra bɩtame, t’a pãng paasdẽ, la a ra tara yẽesem, la Wẽnnaam yam da kẽe-a lame. ⁴¹ Yʋʋmd-yʋʋmd fãa, b ba ne b ma da kẽnda Zerizalɛɛm, pak kibsa yĩnga. ⁴² Biiga yʋʋm sẽn waa n ta piig la a yi, b kẽnga Zerizalɛɛm, wala b sẽn yib n maand kibs kãng wẽnde. ⁴³ Tigra rasem sẽn looge tɩ b lɛɛg n kuiisẽ, biiga paa Zerizalɛɛm tɩ b ba la b ma ka bãng ye. ⁴⁴ Bãmb sẽn da tẽed tɩ b bee ne so-toagdb a taaba, b kẽna daar a ye kẽnde n yaool n na n sɩng baoobo, b roagdba la b mitba sʋka ⁴⁵ la b ka yãend-b ye tɩ b leb Zerizalɛɛm n tar b baoobo. ⁴⁶ Sẽn maam dasem a tã, b yaool n tɩ yãend-b la wẽnd doogẽ tɩ b zĩ karen-saam-dãmb sʋka n kelgd-b la b sokd-b. ⁴⁷ La sẽn wʋm-b bãmba fãa da yɛɛsdame, b yẽesma la b leoba yĩnga. ⁴⁸ B ba ne b ma sẽn waa n yãend-ba, b pɛleng yɩkame. B ma yeel-b lame: «M biiga, yaa bõe yĩng la fo maan tõnd woto? Gese! Ad-f ba ne maam, tõnd da saad n baooda foo ne sũ-sãanga.» ⁴⁹ La b leokame: «Bõe yĩng la y baood maam? Yãmb da ka mi tɩ yaa pakr tɩ m tʋm m ba tʋʋmd laa?» ⁵⁰ La b sẽn gom woto wã, ba rãmba pa wʋm a võor ye. ⁵¹ La a Zezi yik n tũ-b lame n kul Nazarɛt la b ra sakda b noore. B ma ra bĩngda yɛla fãa a sũurẽ. ⁵² La biiga ra bɩtame tɩ b yam la sõmblem da paasdẽ, Wẽnnaam la ninsaalb nifẽ.

¹ A Tiber sẽn deeg Rom naam tɩ yʋʋm piig la a nu, t’a Põs Pilat so Zɩɩde, t’a Erod ya Galile naaba, t’a yao, a Filip, ya Iture la Trakonitid kombere, t’a Lizanias ya Abilɛn naaba, ² maan-kʋʋr kãsẽm-dãmb a An la a Kaif zamaanẽ, a Zakari biig a Zã, wʋma Wẽnnaam koɛɛg weoogẽ. ³ Dẽ la a wa Zɩɩde baobga fãa n moon sũur tekr soobo, yel-wẽna sugr paoong yĩnga, ⁴ wala b sẽn gʋls bãngd a Izayi sebrẽ: «Sẽn moond-a weoogẽ wã koɛɛg la woto: segl-y Soaala sore, maneg-y b soya n demse! ⁵ Tãn-long fãa sĩdi! Sarem-y tãmsa la kunkuba fãa! Rems-y so-golomse! So-rʋda legb saalse! ⁶ Tɩ woto ninsaal fãa na yãend Wẽnnaam fãagre.» ⁷ A Zã ra yeta zãma wã sẽn da wat a nengẽ t’a so-bã: «Wag-bi buudu, ãnna n wilg yãmb tɩ y zoe n põs sũ-puur ning sẽn watã? ⁸ Wom-y biis sẽn be yõodo, sũ-tekr biisi la y ra saag n yeele: ‹D ba la a Abraam ye.› Mam yeta yãmba tɩ Wẽnnaam tõe tɩ kugã sẽn digã, dog kamb n kõ a Abraam. ⁹ Marsã lar zoe n dɩga tɩɩs yẽgnẽ, tɩɩg ning sẽn pa womd-a bi-sõma fãa, b kɛɛgd-a lame n lob bugmẽ.» ¹⁰ Zãma wã ra sokd-a lame: «D na n maana bõe?» ¹¹ T’a leok-ba: «Sẽn tara fu-yord a yi bɩ a kõ sẽn pa tar-a, la sẽn tar-a sẽn na n dɩ bɩ yẽ me kõ sẽn pa tar-a!» ¹² Sẽn deesd-b yõor yaood me waame t’a so-ba. B me sokame: «Karen-saamba, d na n maana bõe?» ¹³ T’a leok: «Da reeg-y bũmb n dogl b sẽn kõ noor tɩ y reeg ye.» ¹⁴ Tãb-biisa me sok-a lame: «La tõnd yẽ, d maan bõe?» T’a yeel-ba: «Bɩ y ra maan ned ba a ye pãng ye, da luk-y ned bãong zaalem ye, la y ra tʋlg bũmb n zʋʋg y yaood ye.» ¹⁵ Zãma wã ra gũuda Fãagdã. Dẽ la ned kam fãa ra yet, a pʋgẽ: sãnd kaa a Zã la Wẽnd Nedã? ¹⁶ Dẽ la a Zã leok-b fãa: «Mam sooda yãmb koom; la ned n wate, tɩ b pãng yɩɩd maam; mam pa zem bũmb n na n lok b gãndalsa gĩs ye. Bãmb na n so-y la ne Vʋʋsem Sõngo la bugum. ¹⁷ B zãada kaorg b nugẽ, la b na n pɩɩga b zɛɛga n wʋk biisã n sui baoorẽ, la b yõog fɩɩba bugum sẽn ka kiid pʋgẽ.» ¹⁸ A Zã ra togsda neba Koe-noogã la a wɩngd b sũuri ne saglgo buud toor toore. ¹⁹ A Zã ra yika zabre ne naab a Erod. Zabra yɩ-la a Erodiad poorẽ. A Erodiad da yaa a Erod yao, a Filip, paga. Zabra yɩ-la a Erod tʋʋm wẽns a taaba me poorẽ. ²⁰ Dẽ kɩtame t’a Erod paas bõn-wẽng a to: a kɩtame tɩ b paga Zã roogo. ²¹ A Zã waa n soo nebã n sɛ, t’a Zezi meng tol n deeg soobo. A Zezi sẽn waa n ket n pʋʋsdẽ la arzãn sẽn pake, ²² tɩ Vʋʋsem Sõng sig b zug ne bũmb wẽnego, ne wall wẽnego. Koɛɛg n yi yĩngr n yetẽ: «Fo yaa mam bi-nongre, mam n dog foo rũnna bala.» ²³ A Zezi yʋʋm da zemsa pistã, b sẽn waa n sɩng b tʋʋmde. Sã n ya neba sẽn tẽedã, b ba yɩla a Zozɛf, a Eli biiga, ²⁴ a Matat biiga, a Levi biiga, a Melki biiga, a Zamayi biiga, a Zozɛf biiga, ²⁵ a Matatiyas biiga, a Amos biiga; a Nawum biiga, a Esli biiga, a Nagayi biiga, ²⁶ a Maat biiga, a Matatiyas biiga, a Semeyin biiga, a Zozɛf biiga, a Zoda biiga, ²⁷ a Zoanan biiga, a Resa biiga, a Zorobabɛl biiga, a Salatiyɛl biiga, a Neri biiga, ²⁸ a Melki biiga, a Addi biiga, a Kosam biiga, a Elmadam biiga, a Ɛr biiga, ²⁹ a Zezi biiga, a Eliezɛr biiga, a Zorim biiga, a Matat biiga, a Levi biiga, ³⁰ a Simeõ biiga, a Zɩɩda biiga, a Zozɛf biiga, a Zonam biiga, a Eliakim biiga, ³¹ a Melea biiga, a Menna biiga, a Matata biiga, a Natam biiga, a Daviid biiga, ³² a Zese biiga, a Zobɛɛd biiga, a Booz biiga, a Sala biiga, a Naason biiga, ³³ a Aminadab biiga, a Admin biiga, a Arni biiga, a Esrom biiga, a Farɛs biiga, a Zɩɩda biiga, ³⁴ a Zakoob biiga, a Izaak biiga, a Abraam biiga, a Tara biiga, a Nakor biiga, ³⁵ a Seruk biiga, a Ragawu biiga, a Falɛk biiga, a Ebɛr biiga, a Sala biiga, ³⁶ a Kayinam biiga, a Arpaksad biiga, a Sem biiga, a Nowe biiga, a Lamɛk biiga, ³⁷ a Matusala biiga, a Enok biiga, a Zarɛt biiga, a Maleleyɛl biiga, a Kayinam biiga, ³⁸ a Enos biiga, a Sɛt biiga, a Adem biiga, Wẽnnaam biiga.

¹ A Zezi ra pida ne Vʋʋsem Sõngo. B yii Zʋrdẽ kʋɩlgã n lɛɛg n wa. A Vʋʋsem Sõng waa n le kẽes-b la we-raoogẽ wã; ² b maana rasem pisnaas be la Sʋtãan kʋɩɩb-b lame. Dasem kãense, b pa rɩ fɩ; la dẽ me la kom waa n yõk-ba. ³ Ad Sʋtãana sẽn leok-ba: «Yãmb sã n ya Wẽnnaam Biiga, bɩ y yeel kugr kãnga t’a lebg buri.» ⁴ La a Zezi leok-a lame: «B gʋlsame: ‹Ka bur bal n dɩlgd ninsaal vɩɩm ye.› » ⁵ La Sʋtãan sẽn dʋʋs-b yĩngri bilfu, a wilg-b la vugr bala dũni wã rĩund zãnga, ⁶ n yeel-ba: «M na kõ-f tẽn-bãmba fãa ne b pãng la b zɩɩri tɩ b yaa m soolem, la m kõt-b la m sẽn dat a soaba. ⁷ Fo sã n wõgemd n waoog maam, f na soog-b zãnga.» ⁸ A Zezi leok-a lame: «B gʋlsame: ‹Pʋʋs Soaala, f Wẽnnaam, la f waoog bãmb bala.› » ⁹ Sʋtãana le tɩ rʋʋs-b la Zerizalɛɛm wẽnd dooga zugu, zĩig ninga sẽn lug n yɩɩd a taabã, n yeel-ba: «Fo sã n ya Wẽnnaam Biiga, bɩ f yɩk ka n tiimd tẽnga, ¹⁰ tɩ b gʋlsame: ‹Wẽnnaam na n kõo malɛk rãmb noore n yeel-b tɩ b gũ fo.› ¹¹ Woto me n le paase: ‹B na n kok-f-la b nusẽ, tɩ f naoor da wa lak kugr ye.› » ¹² A Zezi leok-a lame: «B yeelame: ‹Da fɛɛs Soaala, f Wẽnnaam ye.› » ¹³ Sʋtãana sẽn kʋɩɩb-b n sɛ, a bas-b lame n looge n gũud a zu-noog raar a to. ¹⁴ A Vʋʋsem Sõng pãng taasa a Zezi Galile tẽnga; beelẽ b yʋʋr yii zĩig zãnga. ¹⁵ B ra karemda neba pʋʋsg rotẽ la neba fãa ra pẽgd-b lame. ¹⁶ B kẽnga Nazarɛt, b sẽn wub tẽng ninga; vʋʋsg daare, b kẽe pʋʋsg roogẽ wala b sẽn da yib n maanẽ; b yikame n na n karem, ¹⁷ tɩ b kɩs-b bãngda, a Izayi sebre. B sẽn lak sebrã, sega sẽn gʋls woto: ¹⁸ «Wẽnd Vʋʋsem bee m zugu, tɩ b zɛɛ maam ne kaam sõngo, tɩ m tɩ togs naong rãmba Koe-noogo; b tʋm-m lame tɩ m moone n wilg yemse tɩ b tɩlga ne yembdo, la zoeense, tɩ b paama nini, la b sẽn tar b rãmb toogã tɩ b leb b zagsẽ ne laafi, ¹⁹ la b moon tɩ Soaala bark yʋʋmd vẽkame.» ²⁰ Dẽ poore b paga sebrã n lebs karen-saamba la b zĩndame. Dooga neba fãa ra tees n geta bãmba. ²¹ Tɩ b na n sɩng goama, n yeele: «Sebr sõng gomdã yãmb sẽn wʋm mars-marsã taasa rũnna.» ²² La b fãa ra kõta kaseto la b pẽgd goama sẽn da yit b noorẽ. B ra yetame: «Ka yẽ la a Zozɛf biiga wɛɛ?» ²³ A Zezi yeel-b lame: «Mam mi tɩ yãmb na wẽ-m yelbũn kãnga: ‹Tɩɩm soaba, reng n sãoog f menga. Wẽnd makr dãmba fãa sẽn maan Kafarnaom tɩ d wʋmnẽ wã, bɩ f maan-b ka me, fo ba-yiri.› » ²⁴ B tol n le paasame: «Sɩda, mam n togsd-y: bãngd buuda fãa zɩɩ n paam waoogr a ba-yir ye. ²⁵ Yaa sɩda la m sẽn togsd yãmbã, pʋg-kõapa ra waooga Israyɛl tẽnga, a Eli zamaanẽ, saag sẽn waa n pa tol n ni yʋʋm a tã la kiis a yoobe, ²⁶ b yaool n pa tʋm a Eli ned ba a ye nengẽ sã n pa pʋg-kõor a ye sẽn da be Sarepta, Sidõ soolmẽ. ²⁷ Wãooba me ra waooga Israyɛl tẽnga, bãngd a Elize wẽnnẽ, la baasgo bãmb ned ba a ye ka paam tɩ b sãoog-a, sã n ka Siri neda, a Naama bala.» ²⁸ Pʋʋsga roogẽ, b fãa sũur puuga al wʋsgo, b sẽn wʋm boto. ²⁹ B yikame n tus-ba tɩ b yi b tẽngẽ; b tẽnga da tii tãng zugu. Woto b tall-b lame n ta tãnga rĩ-sɩlengẽ n na n tus-ba n lub vɩʋʋgẽ. ³⁰ La a Zezi pɩʋʋga bãmb sʋk n looge. ³¹ A Zezi kẽnga Kafarnaom, Galile soolmẽ, la b ra karemda nebã vʋʋsg daare. ³² B karenga yɩka neba pɛlenga, tɩ b ra gomda wa ned sẽn tar naam la tõogo. ³³ Dao a ye n da be pʋʋsga roogẽ n tar Sʋtãan a pʋgẽ, a kelma ne pãnga: ³⁴ «Ey! Y bõe toog n be ne tõndo. Mam mii yãmb sẽn yaa a soaba: Wẽnnaam Nin-sõngo!» ³⁵ A Zezi tãs-a lame: «Sĩnd f noore, yi la f bas daoã!» La Sʋtãana tusa raoã n lub neba sʋka, n bas-a n yi la bũmb pa maan-a ye. ³⁶ Dabeem yõka neba fãa tɩ b ra tar ne taaba: «Yɛ ned n gomd woto? A kõta sʋtãan-yood noor ne tõog la pãnga la b yitame.» ³⁷ A Zezi yʋʋra sɩd yii zĩig zãnga. ³⁸ A Zezi yii pʋʋsga roogẽ n kẽng a Simo yiri. A Simo reem-poaka yĩns ra wɩnga bas-base la b yõka a Zezi sɛɛga tɩ b sõng-a. ³⁹ A Zezi zõondame n tãs yĩn-wɩngrã la a sigame. Paga yika zĩig pʋgẽ n segend-b. ⁴⁰ Wĩndg sẽn kẽ, b talla bãad-dãmb ka tɛka n wa a Zezi nengẽ. B tẽega b nus bãmb ned kam fãa zugu n sãoog-ba. ⁴¹ Sʋtãamba ra yita neb wʋsg pʋsẽ n kelemdẽ la b moonẽ: «Yãmb yaa Wẽnnaam Biiga.» La a Zezi ra tãsd-b lame. B ra pa sakd tɩ b gome, tɩ sʋtãamba ra miime tɩ b yaa Wẽnd Nedã. ⁴² Zĩig sẽn yẽege, b yii n kõsa weoogo. Zãma wã saame n bao-ba, n wa yãend-ba, n da rat n gõog-ba tɩ b ra loog n bas-b ye. ⁴³ La a Zezi yeel-b lame: «Yaa modgr tɩ m tɩ togs tẽns a taaba me, Wẽnd Rĩung Koe-noogã, tɩ b tʋm-m la rẽnd yĩnga.» ⁴⁴ B ra zãmsda neba Galile pʋʋsg rotẽ.

¹ Daar a ye, Zãma wã ra pẽdgda a Zezi, Zenezarɛt mogra noor, n na n kelg Wẽnnaam gomde. La mogra noore, ² b yãenda koom-kogend bõones a yiibu. Kʋɩl-zẽ-yẽedba da yi n pegda b zulumsi. ³ A Zezi kẽe koglg a ye, a Simo rẽnna, n kos tɩ b zãag mogra noor bilfu la b zĩnda koglga pʋg n zãmsd nebã. ⁴ B sẽn gom n sɛ, b yeela a Simo: «Ta-y ko-sʋka n lob y zulumsã n yẽ zĩma.» ⁵ T’a Simo leoke: «Karen-saamba, tõnd namsa yʋnga tõre n pa yõk bũmb ye la y sẽn yeela yĩnga, m na lob zulumsã.» ⁶ La b sẽn lobe, b yõga kʋɩl-zẽed wʋsgo al tɩ zulumsa ra pãrsdẽ. ⁷ B kamsa b tũud-n-taase sẽn da be koglg a to pʋga, tɩ b wa sõng-ba. B waame la b vaagame n pids kogend a yiibã tɩ b rat n lisi. ⁸ La a Simo sẽn yãe rẽ, a wõgemda a Zezi taoore n yeel-ba: «Zãag-y ne maam, Soaala, tɩ m yaa yel-wẽn-maanda.» ⁹ Rabeem kãseng yõk-a lame, yẽ ne a tũud-n-taase, kʋɩl-zẽeda sẽn yõg wʋsga yĩnga. ¹⁰ Rabeem me kẽ-la a Zak la a Zã, a Zebede kamb a yiibã, sẽn da tʋmd ne a Simo. T’a Zezi na n yeel a Simo: «Da zoe rabeem ye tɩ marsã tɛka, yaa neb la f na n paame n kõ-ma.» ¹¹ B lɛɛg n waa ne kogendã mogra noore la b basa fãa n tũ a Zezi. ¹² A Zezi waa n bee tẽng a yembre tɩ rao a ye sẽn da bẽed wãoodo yãend-ba, n wõgemd b taoore n fõgna a neng tẽnga, n pʋʋs-ba: «Soaala, yãmb sã n data, y tõe n sãoog-m lame.» ¹³ A Zezi tẽega b nug n sɩɩs-a n yeele: «Mam datame, sãooge!» La zĩig pʋgẽ bala, a wãooda sãoogame. ¹⁴ Tɩ b na n kõ-a noore t’a ra togs ned ba a ye la b le paasame: «Kẽng n tɩ wilg f meng maan-kʋʋda la f sẽn sãooga yĩnga, kɩs kũuni, wala a Moyiiz noor sẽn date tɩ yɩ kaset b yĩnga.» ¹⁵ A Zezi yʋʋr da yit n paasdame tɩ zãma wã sɩng n tigimd ka tɛka, n na n kelg-ba la b paam b bãas sãoogre. ¹⁶ Bãmb da nong n paa weoogẽ n pʋʋsdẽ. ¹⁷ A Zezi ra karemda neba daar a ye, tɩ Farizẽ la noora karen-saam-dãmb da lagem n zĩ be; b ra yii Zɩɩde la Galile la Zerizalɛɛm tẽn-toose. Soaala pãng ra bee ne a Zezi tɩ b sãoogd nebã. ¹⁸ La ade neb n da zɩt b põor ne a gãaga, n baood n na n sik-a bãmb taoore. ¹⁹ La b sẽn da ka mi b sẽn na n tũ zĩig ning n kẽ ne bãadã, zãma wã yĩnga, b rʋʋ bɛoongã n kɩbg võore n sik-a ne a gãagã, a Zezi taoore. ²⁰ A Zezi yãenda b tẽebo n yeel: «Daoa, fo paama f yel-wẽna sugri.» ²¹ Farizẽ rãmba ne Sɛb-mitba tagsa b sũurẽ: «Yãoo yaa ãnna n mamesd a meng ne Wẽnde? Anna n tõe n kõ yel-wẽnd sugri, sã n ka Wẽnnaam b ye?» ²² A Zezi bãnga b sũur tagsgo la b yeel-b lame: «Yaa bõe tagsgo la yãmb tagsda y sũur pʋgẽ? ²³ Yelsem bʋg la naana: fo paama f yel-wẽnd sugri, bɩ: yik n kẽne? ²⁴ Sẽn na n yɩlẽ tɩ y bãng tɩ Ned Biiga tara tõog tẽng zugu, n kõ yel-wẽnd sugri, põore, maam n kõt f noore: yiki! Tʋk f gãag n kul f yiri!» ²⁵ La Zĩig pʋgẽ bala, a yika bãmb nifẽ, n tʋk a gãag n kuiis a yiri la a pẽgd Wẽnnaam. ²⁶ Neba fãa pɛleng yɩkame tɩ b ra pẽgd Wẽnnaam; rabeem da tar-b lame tɩ b yetẽ: «Dũnna tõnd yãee yel-soalma.» ²⁷ Dẽ poore a Zezi yiime la b yãee rao a yembre sẽn boond t’a Levi, t’a zĩ a tʋʋmd zĩigẽ, fadg reesg tʋʋmde, tɩ b yeel-a: «Tũ maam!» ²⁸ A Levi basa fãa n yik n tũ-ba. ²⁹ A Levi maana kibs kãseng a yiri, n segl dɩɩbo. Sẽn deesd-b yõor yaoodã yɩɩ wʋsgo la neb a taab me waa n paasame, tɩ b ra zĩi n dɩtẽ. ³⁰ Farizẽ rãmba la Sɛb-mitba guglumame la b yeela a Zezi karen-biisã: «Yaa bõe yĩng la yãmb lagemd sẽn deesd-b yõor yaoodã la yel-wẽn-maandbã n dɩtẽ la y yũuda?» ³¹ T’a Zezi na n leok-ba: «Sẽn zĩ-a ne laafi ka tar tɩɩm soab tʋʋmd ye, yaa sẽn pa keem-bã n tar a tʋʋmde. ³² Mam ka wa nin-sõma boolg ye, yaa yel-wẽn-maandba la m wa n na n bool tɩ b tuub b yel-wẽna.» ³³ Nim-bãmb n lɛɛg n yeel a Zezi: «A Zã karen-biisa loeta b noor naoor wʋsgo. Farizẽ rãmba karen-biis me maanda boto. Yãmb karen-biisa bala n nong n dɩtẽ la b yũuda.» ³⁴ T’a Zezi leok-ba: «Pʋg-sɩd zo-rãmb tõe n loee noore tɩ pʋg-sɩd nan ket ne bãmb bɩ? ³⁵ Daar n wate. B sẽn loog ne pʋg-sɩdã raare, b na loe noore.» ³⁶ B wẽ-b la yelbũnd a ye: «Fu-paalg kõ kẽeg n lisg fu-kʋɩds ye, peen-paalg la kʋɩds pa zemsd taab ye. ³⁷ Ned me kõn sui rã-noodo, ko-wao kʋtẽ ye, tɩ rãama na n pusa ko-waoosã n daage la ko-waoosa na n yɩɩ bõne. ³⁸ B suiida rã-noodo ko-wao paalẽ. ³⁹ Ned pa yũud rãam sẽn kũmi n dat rã nood ye. B tol n wẽe yelbũnd kãnga: rã kũmdi la noogo.»

¹ Vʋʋsg daar a ye, a Zezi ra pɩʋʋgda pʋto tɩ karen-biisa ra tẽgd kasãna n wãbdẽ. ² Farizẽ rãmb kẽer yeel-b lame: «Yaa bõe la yãmb maand y sẽn pa tar sor n maan vʋʋsg daare?» ³ A Zezi leok-b lame: «Yãmb pa karem a Daviid sẽn maan bũmb ninga, kom sẽn waa n yõk-a, yẽ ne a tũud-n-taasa la? ⁴ A ka kẽ wẽnd doogẽ n yãk bur b sẽn da kõ Wẽnnaam, n dɩ bɩ? A pa tol n kõ a poorẽ dãmb tɩ bãmb me rɩ bɩ? Yaool n yaa maan-kʋʋdba bal n tõe n dɩ bur kãnga.» ⁵ La b yeelame: «Ned Biig n so al ba vʋʋsg daare.» ⁶ Vʋʋsg raar a to, b kẽe pʋʋsg roogẽ n da karemd neba la rao a ye n da be be t’a rɩtg nug ya kɩɩnga. ⁷ Sɛb-mitba ne Farizẽ rãmba da gũusda a Zezi, n na n gese b sã n na n sãooga bãada, vʋʋsg daare tɩ b paam n ning-b taale. ⁸ A Zezi da mii b tagsgo, dẽ la b yeel nug-kɩɩngã: «Yik n yaas sʋka.» Tɩ raoã yik n yaase, ⁹ la a Zezi yeelame: «Mam sokda yãmba: vʋʋsg daare, d tara sor n maan neer bɩ d tara sor n maan wẽnga? D tara sore n fãag ned bɩ d tara sor n bas-a t’a ki?» ¹⁰ B yaas n gesa b fãa gilli n yaool n yeel raoã: «Tẽeg f nugu!» Tɩ raoã tẽeg a nug la a nuga vʋʋgame. ¹¹ Neba sũur puuga al vʋsgo tɩ b ra yẽsd ne taaba n na n bãng b sẽn na n maan a Zezi bũmb ninga. ¹² Wa n segame tɩ sasa kãnga a Zezi da rʋʋ tãng zug n na n pʋʋse. La yʋnga tõre yii pʋʋsg bala. ¹³ Zĩig sẽn yẽege b boola b karen-biisã n tũus bãmb sʋka neb piig la a yi, n bool-b tɩ b Tʋʋm-tʋmdba. ¹⁴ Yɩla a Simo, b sẽn pʋd a soab t’a Piyɛr (kugri) la a ba-biig a Andre, n paas a Zak, a Zã, a Filip, a Bartelemi; ¹⁵ a Matiye, a Toma; a Alfe biig a Zak; a Simo, yẽ la m sũur be ne buuda bɛ; ¹⁶ a Zak biig a Zɩɩd; a Zɩɩda, Iskariyot tẽng dao, sẽn yɩ a zãmb soabã. ¹⁷ B sẽn sigd tãngã, b tees n yaasa a lʋgrẽ; karen-biisi la zãma ka tɛk n da tigim be; b ra yii Zɩɩde la Zerizalɛɛm, ne Tir la Sidõ sẽn be mogr noore. ¹⁸ Bãmb fãa ra waame n na n kelg-ba la b paam b bãas sãoogre; Sʋtãan yood sẽn da tar b rãmb n namsdẽ wã fãa da paamda yolsgo. ¹⁹ Zãma wã ra baood n sɩɩsa bãmba tɩ pãng n da yit b nengẽ n sãoogd bãmb fãa. ²⁰ A Zezi zẽka b neng n ges b karen-biisã n yeele: «Sũ-noog rãmba la yãmba, naong rãmba, tɩ yãmb n so Arzãn Rĩungu. ²¹ Sũ-noog rãmb la yãmba, sẽn kũmd-b kom dũnna wã, tɩ yãmb n na n tɩge. Sũ-noog rãmb la yãmba, sẽn yãbd-b rũnna, tɩ yãmb n na n la n kaase. ²² Yãmb la sũ-noog rãmba neb sã n wa kis yã, Ned Biiga yĩnga, la b yiisd yãmb buudẽ, la b tar y tʋʋre la b sãbsd y yʋʋrã wa a yaa yʋ-beoogo. ²³ Wakat kãng bɩ y noog y sũuri la y kɩdem tɩ yãmb dolb na n yɩɩ wʋsg arzãnẽ. Yɩɩ woto la yaab rãmba da kis bãngdbã. ²⁴ Yãmb la zu-bʋk rãmba, arzɛk rãmba, tɩ yãmb zoe n tara sẽn na noog y sũuri. ²⁵ Yãmb la zu-bʋk rãmba sẽn tɩgd-b rũnna wã tɩ yãmb la kom na n yõk beoogo. Zu-bʋk rãmba la yãmb sẽn mi laad rũnna wã, tɩ yãmb n na n kelem kʋʋre la y yãb yãb-toogo. ²⁶ Yãmb la zu-bʋk rãmba neb sã n gomd y yelle n pẽgd yã. Ad-y yɩɩ woto la yaab rãmba maan ne zirẽ bãngdba. ²⁷ Yãmb fãa sẽn kelgd maama, m yet-y lame: Nong-y y bɛɛba; sẽn tugd-b beem ne yãmbã, bɩ y maan-b yel sõmde. ²⁸ Sẽn kãabd-b yãmb wẽnga bɩ y kãab-b kãab-noogo la y pʋʋs n kõ sẽn sãamd-b yãmb yʋʋrã. ²⁹ Ned wẽ f yɛgdg a ye pɛka bɩ f wẽnemd f yɛdg a to wã n tees-a. Ned yẽeg fo n deeg f fu-taoko, da mong-a f fu-wok ye. ³⁰ Sẽn bõs-a foom, kõ-a; sẽn dɩka fo bũmbu bɩ f ra sok-a n deeg ye. ³¹ Yãmb sẽn dat tɩ ned maan yãmb bũmb ningã, maan-y boto ne y taaba. ³² Yãmb sã n nong sẽn nong-b yãmba bala, yell sõng la bʋgo? Yel-wẽn-maandba me maanda boto. ³³ La sã n ya sẽn maand-b yãmb neer bala la y maand neere, yell sõnga la bʋgo? Yel-wẽn-maandba me maanda boto. ³⁴ Yãmb sã n penge, n mi tɩ y sẽn peng b rãmba na n wa lebs-y lame, yell sõnga la bʋgo? Yel-wẽn-maandba me pengda b taaba n na n wa reeg b sẽn kɩsa zugu. ³⁵ Sã n ya yãmba, nong-y yãmb bɛɛba, maan-y yel-sõma la y peng n da saag bũmb ye tɩ woto yãmb dolbo wat n yɩɩ wʋsgo la yãmb yɩta Yĩngr Ba wã kamba tɩ bãmb maanda yel-sõm-zɩtb la nin-wẽns neere. ³⁶ Dẽ yĩnga yɩ-y nimbãan-zoetba, wala Ba wã sẽn ya nimbãan-zoetã. ³⁷ Da kao-y ned bʋʋd ye, tɩ b kõn kao yãmb me bʋʋd ye. Da ning-y ned taale tɩ b kõn ning yãmb me taal ye. Kõ-y sugri tɩ b na kõ yãmb me sugri. ³⁸ Kõ-y tɩ b na kõ yãmb me. Y na n kolemda y fuug tɩ b kiig-y wamd pidungu, wamd sẽn yegs yegse n pĩ tɩ baas n sẽegdẽ. Yãmb sẽn dɩk wamd ning n mak n kõ y taabã, wamd kãng la b rɩkd n mak n kõ yãmb me.» ³⁹ A Zezi wẽ-b la yelbũna: «Zoang sã n tat a zon-taaga b yiiba fãa kõn tɩ far n lʋɩ longẽ sɩda? ⁴⁰ Karen-biig ka yɩɩd a karen-saamb ye, karen-biig karm n siki, a yɩta waa a karen-saamba. ⁴¹ Bõe yĩng tɩ fo ne moog sẽn sor f saam-biiga nifu, n yaool n pa ne ra-bed kẽemdã sẽn sel f nifẽ? ⁴² Fo yɩta a wãn n yeel f saam-biiga: yaas tɩ m lɩk mooga sẽn sorg f nifu? Zirẽ-be-neda! Deng n feoog da-bed kẽenga sẽn sel fo nifẽ wã tɩ f na paam nini n lɩk mooga sẽn sorg f saam-biiga nifã. ⁴³ Tɩ sõng zɩ n wom bi-wẽns ye la tɩ wẽng me zɩ n wom bi-sõma ye! ⁴⁴ Tɩɩg fãa bãngda a biisẽ; kankam kõn fãs gõosẽ ye, la sib ka tõsd kãgrẽ ye. ⁴⁵ Nin-sõng sẽn pid sõmblem kẽeda a sũurẽ n yiis yel-sõma, tɩ nin-wẽng sẽn pid wẽnem kẽed a sũurẽ n yiisd sẽn pa sõmbe. F sũur sẽn pid ne bũmb ninga la f noor tar n gomda. ⁴⁶ Yaa bõe tɩ y boond-m tɩ y zu-soaba la y yaool n pa maand m sẽn togsd yãmba? ⁴⁷ Sẽn wat-a mam nengẽ, sẽn kelgd-a mam goama la a tũud-ba, yaas-y tɩ m togs a sẽn wẽnd a soaba. ⁴⁸ Yaa wa ned sẽn met roogo; a tuudame n yẽeg bog zulunga n sɩng rooga pĩig zugu. Sakoom wa yã, a zoee ne pãnga n wẽ roogã la a pa tõog n dĩms-a ye t’a meeb yaa sõmbo. ⁴⁹ Sẽn kelgd-a la a pa tũudẽ, yaa wa ned sẽn me roog tẽn-nabrẽ, bĩisri zugu, koom kaoogame n zoe n wẽ-a ne pãnga, vugr bala doog sirgame la yɩɩ sirgr kãsenga.»

¹ B sẽn togs neba b koeesã, a Zezi yikame n kẽng Kafarnaom. ² Tãb-biis koabg tãnsoab n da tar a yem-daoogo la a ra nong-a-la wʋsgo. Yem-daooga yika pa-keem n dat n ki. ³ A sẽn wʋm a Zezi yelle, tãnsoaba tʋma Zʋɩf rãmb nin-kẽems b nengẽ n dat tɩ b kudg kãntɩɩga tɩ b wa sãoog a nedã. ⁴ B sẽn ta a Zezi nengẽ, b kos-b la ne b sũur fãa n yetẽ: «Togame tɩ y maan bũmb a yĩnga, ⁵ t’a nonga tõnd buudu la a tol n me d pʋʋsg roogã n kõ-do.» ⁶ La a Zezi tũ-b lame la b sẽn waa n kolg yiri, tãnsoaba tʋma a zo-rãmba tɩ b wa yeel-ba: «M zu-soaba, ra nams-y y meng woto ye, tɩ ka tog tɩ y wa kẽ m zakẽ ye. ⁷ M tagsame tɩ m paooda ne m wa m toore n seg yãmba. Yeel-y gomd a ye bala la m yamba na n sãoogame. ⁸ Mam menga tara zu-soaben-dãmba la m soo tãb-biisi. M yeel bãmb nin-yende: Kẽnge, a kẽndame. M yeel a to: Wa! A watame. M yeel m yambã: Maan woto! A maandame.» ⁹ A Zezi sẽn wʋm woto, b pẽga tãnsoaba la b wẽnega b poorẽ n yeel zãma wã sẽn da pʋgdã: «Sɩda m yeta yãmba, al ba Israyɛl pʋgẽ, mam nan pa yãe tẽeb kãseng a woto ye.» ¹⁰ Sẽn tʋm b rãmba sẽn ta zakẽ b mikame tɩ yamba bee laafi. ¹¹ Dẽn sẽn looge, a Zezi waa n dabda tẽng a ye sẽn boond tɩ Nayim, tɩ b karen-biisa la zãma kãseng ra pʋgd-ba. ¹² B sẽn ta tẽnga noore, segame tɩ b tʋka biig sẽn ki n dabd mumbu; biiga ra yaa a ma-bi-yende la ma wã da yaa pʋg-kõore; tẽnga neb wʋsg da yãagd-a lame. ¹³ Soaala sẽn yãe pagã, b kũma a nimbãanega la b yeel-a lame: «Da yãb ye!» ¹⁴ La b kolg n sɩɩsa kũuma; tɩ sẽn tʋk-ba yaase la a Zezi yeelame: «Biiga m kõt-f la noore, yiki!» ¹⁵ Kũuma yikame n sɩng goama t’a Zezi lebs-a a ma. ¹⁶ Dabeem kãseng yõka nebã tɩ b fãa pẽgd Wẽnnaam n yetẽ: «Bãngd kãseng lika tõnd sʋka la Wẽnnaam waa n gesa b buudu.» ¹⁷ Pẽgra taa Zɩɩde soolmẽ la tẽn-kɩremsa fãa n sãage. ¹⁸ A Zã karen-biisa tɩ wilg-a-la rẽ fãa. ¹⁹ Dẽnd la a Zã bool a karen-biis a yiibu n tʋʋm-ba tɩ b tɩ sok a Zezi: «Yaa yãmb la b sẽn da gũud a soab waoongã bɩ yaa ned a to?» ²⁰ B sẽn ta a Zezi nengẽ, karen-biisa yeelame: «A Zã n tʋm tõndo tɩ d wa soke: yãmb la neba sẽn da gũud a soab waoongã bɩ yaa ned a to?» ²¹ Wakat kãng t’a Zezi ra sãoogda bãad-dãmb wʋsgo la koms rãmba, la zĩn dãmba la b pukd zoeens nini. ²² B yeelame: «Kẽng-y n tɩ togs a Zã y sẽn yãe la y sẽn wʋme: zoeens le paamda nini, wobs kẽndame, wãoob sãoogdame, kũum vʋʋgdame la b togsda naong rãmba Koe-noogã. ²³ Zu-noog soaba la sẽn ka na n lak-a maam wa bɛooga n lʋɩ.» ²⁴ A Zã sẽn tʋm b rãmba sẽn looge, a Zezi yeela zãma wã: «Bõe la yãmb kẽng n tɩ maag y meng n ges weoogẽ? Tãnwĩig sobg sẽn lengd bɩ? ²⁵ Yaa bõe la yãmb kẽng n tɩ gese? Ned sẽn yer fʋ-neeb bi? Sẽn yer-b fʋ-neeba la sẽn yãet-b naare bee nanams zagsẽ. ²⁶ Yaa bõe la yãmb tɩ gese? Bãngd bɩ? N-yẽe! Maam n yeele, la yɩɩda bãngda. ²⁷ Yaa yẽ soab yelle la b sẽn gʋlse: Mam tʋmda n tʋʋm-tʋmda t’a reng taoore n segl f soya. ²⁸ Mam yeta yãmba tɩ pagba kamb fãa sʋka sẽn yɩɩd a Zã ka ye. La ade, sẽn yaa yao-zʋʋg Wẽnd Rĩungẽ wã yɩɩd-a lame. ²⁹ Zãma wã la fadga rɛɛsdba sẽn kelg a Zã koɛɛga n sak t’a ko-b soobã, bãmb manesma tũu Wẽnd sẽn date. ³⁰ Farizẽ la noor karen-saam-dãmba sẽn zãgs a soobã, ad-y b kɩtame tɩ Wẽnnaam sẽn da tʋlg bũmb ninga vaale. ³¹ Mam makda zamaan kãnga kambã ne ãndãmba? ³² B wẽnda kamb sẽn zĩ raagẽ n zabd taaba: ‹Tõnd peeba wɩɩse la yãmb pa sao warb ye, d pʋda kʋʋr yɩɩla la yãmb pa kũm ye.› ³³ A Zã waame n zãgs t’a kõn dɩ rɩɩbo la a kõn yu rãam ye tɩ yãmb yet t’a zug ka ye. ³⁴ Ned Biiga waame n dɩtẽ la a yũuda tɩ yãmb yet t’a yaa yão-be-neda la rã-yũuda, sẽn deesd-b fadgã la yel-wẽn-maandba zoa. ³⁵ La Wẽnd kamb naaga taab gilli n kõ kaseto tɩ tʋʋma tũu Wẽnd yam zulunga sẽn yalse.» ³⁶ Farizẽ n bool a Zezi tɩ b wa rɩ ne yẽnda, t’a Zezi kẽ a zakẽ tɩ b sɩng rɩɩbo. ³⁷ La ade pag a ye n da ya tẽnga pʋg-yoaada; a bãngame t’a Zezi rɩta Farizẽ wã yiri, ³⁸ t’a wa ne a yubl sẽn pid ne yũ-noog kaam, a yalsa poorẽ, a Zezi nao wã sẽn tẽesẽ. A ra yãbdame, n madgd a Zezi nao ne a nintãm, n yẽesd-b ne a zoobdo la a zɛɛd-b ne kaama. ³⁹ Farizẽ ninga sẽn bool a Zezi wã sẽn yãend rẽ, yeela a sũurẽ: «Yãoo sã n da yaẽ-la bãngda, paga sẽn sɩɩs-a wã, a na bãngẽ tɩ yaa yel-wẽn-maanda.» ⁴⁰ La a Zezi leok-a lame: «Simo, m dat n togsa yãmb koɛɛga.» T’a yeele: «Karen-saamba, togs-y.» ⁴¹ Neb a yiibu n da tar ned a ye samde: pipi soaba yaa sãnem gil a nu, a to wã wakɩ koeems pisnu bala. ⁴² B sẽn da pa tar n yaood b samda yĩnga, a bas-b la b yiiba fãa taale. Anna n na n nong-a n yɩɩda? ⁴³ A Simo leokame: «M tẽedame tɩ yaa ned ninga samd sẽn yɩɩd a to wã t’a bas taalã.» A Zezi yeel-b lame: «Yãmb togsa sɩda.» ⁴⁴ B wẽnega b poorẽ n ges pagã n yeel a Simo: «Yãmb yãee pagã? Mam kẽe yãmb zakẽ la y pa kõn-m koom tɩ m waas m nao ye la yẽ zãgsa m nao ne a nintãm n yẽes-b ne a zoobdo. ⁴⁵ Yãmb ka mok m yɛgd ye, la yẽ sẽn kẽ tɛka a mogsda m nao n ka basdẽ ye. ⁴⁶ Yãmb ka sõog m zug kaam ye la paga zɛɛ m nao ne yũ-noog kaam. ⁴⁷ Yaa rẽ yĩng la m yet yãmba t’a paama a yel-wẽna sẽn ya wʋsga sugri, a nonglem sẽn yɩ wʋsga yĩnga. B sẽn bas a soab bõn-bilfr taale, yẽ soab nonglma zemsame bala.» ⁴⁸ B yeela pagã: «Fo paama f yel-wẽna sugri.» ⁴⁹ Sẽn da rɩt-b ne bãmba yeela b sũuri: «Yãoo yaa ãnna, n kõt ba yel-wẽnd sugri?» ⁵⁰ La a Zezi yeela pagã: «Fo tẽeba fãag-f lame, kẽng ne laafi.»

¹ Dẽ poore a Zezi da saada tẽn-bɛd la tẽn-bõonego n gomd Wẽnd Rĩung yelle la b moond b Koe-noogo. Tʋʋm-tʋmdb piig la a yiibã n da tũud-ba, ² n paas pagb kẽere. Yaa sʋtãan dẽgd la b ra yiis b pʋsẽ, bɩ yaa b bãas la b ra sãoog yã, wala a Mari b sẽn da boond a soab t’a Madelɛn; Sʋtãamb a yopoe la b yiis a pʋgẽ, ³ wala a Zan, a Erod ligd naab a Kuza paga, la pagb a taab wʋsgo sẽn da sõngd-b ne b paoongo. ⁴ Neb kʋʋng tigma taaba n waa a Zezi nengẽ tɩ b na n tão-b yelbũndi: ⁵ «Bʋt a ye n yi n na n tɩ bʋd a pʋʋgo. A sẽn waa n fẽedã a bõn-buudã, bɛɛl kẽer lʋɩɩ sor zugu; neb tab-b lame, yĩngr luiili rɩ-b lame. ⁶ Kẽer lʋɩɩ zĩ-kʋɩgdgẽ, b sẽn yi, b wẽneg n kiime, tɩ b ra pa tar bʋgsem ye. ⁷ Kẽer lʋɩɩ gõosẽ la b sẽn yi gõosa sʋkã, gõosa wulumd-b lame tɩ b ki. ⁸ Kẽer lʋɩɩ zi sakdgẽ, bãmb yiime n wom biisi, a ye fãa koabg koabga.» A Zezi sẽn yeel woto, b mooname: «Sẽn tar-a tʋb n tõe n wʋm bɩ a wʋm!» ⁹ Tʋʋm-tʋmdba sok-b la yelbũnda võore, ¹⁰ tɩ b leok-ba: «B kõo yãmb tɩ y bãng Wẽnd Rĩunga yɛl-solgdi la sã n ya neb a taabã, yaa ne yelbũna la b gomd ne bãmba, sẽn na yɩlẽ ‹tɩ b sã n getẽ bɩ b ra neẽ ye, tɩ b sã n kelgdẽ bɩ b ra wʋm võor ye.› ¹¹ Ad yelbũnda võore: bõn-buuda yaa Wẽnnaam Gomde. ¹² Sẽn lʋɩ-b sora zugu makda sẽn kelg-ba tɩ Sʋtãan yaool n wa yiis Gomdã b sũurẽ, tɩ b ra wa tẽ n fãag b mens ye. ¹³ Sẽn lʋɩ-b zĩ-kʋɩgdgẽ wã makda sẽn kelg-b Wẽnnaam Gomdã n deeg-a ne sũ-noogo la b pa kɩ yẽgen ye, b tẽeda wakat yɛng bala; kʋɩbg sã n wa, b basda raoodo. ¹⁴ Sẽn lʋɩ-b gõos sʋka makda sẽn kelg-b Gomdã, la sora zugu, zu-loees buud fãa, arzɛka la dũni wã bõn-nooda tʋlsem wulumd-b lame tɩ b ka tõe n bɩ n taas ye. ¹⁵ Sẽn lʋɩ-b zĩ-sakdgẽ wã makda sẽn kelg-b Gomdã ne yẽesem la sũ-tɩrga, la b reeg-a ne sũ-keelem t’a womd biisi. ¹⁶ Ned kõn yõgen fitila n dɩk rʋk n fõgen-a bɩ n dɩgl-a a gãag tẽngr ye; a dogend-a-la a zĩigẽ, tɩ sẽn kẽed-b fãa yãe a vẽenem. ¹⁷ Sẽn lill ka be sẽn ka na n puk ye, sẽn solg ka be sẽn ka na n wa por yɩng ye. ¹⁸ Dẽnd yĩnga, bɩ y modg ne kelegre, tɩ sẽn tar-a, b na n paas-a lame la sẽn pa tara b na n deega a sẽn tẽed t’a tara bũmb ningã.» ¹⁹ A Zezi ma ne b saam-biis waame, la b ka tõog n ta b nengẽ, zãma wã yĩnga. ²⁰ Tɩ b wa yeel-ba: «Y ma la y saam-biis n be yɩnga n baood yãmba.» ²¹ Tɩ b leoke: «Mam ma, mam saam-biisi, yaa neb niynsi sẽn kelgd-b Wẽnnaam Gomde la b reegd-a.» ²² Daar a ye a Zezi kẽe koom koglgo ne b karen-biisi. B yeel-b lame: «Wa-y tɩ d kẽng mogra rʋʋnde.» La b looga ko-sʋka. ²³ B sẽn waa n dabda, a Zezi gũsame. Mik sob-raoog kaooga mogra zugu, tɩ koglga kẽed koom, tɩ rabeem beẽ. ²⁴ La karen-biisa kolga a Zezi n nek-ba n yetẽ: «Karen-saamba, Karen-saamba, d na n ki wɛ!» B nekame, n tãs sobga la ko-wiisã tɩ b yõke, tɩ fãa lebg sɩɩ. ²⁵ Tɩ b na n yaool n yeel-ba: «Yãmb tẽeba bɛɛ?» Dabeem kãseng yõk-b lame tɩ b pɛleng yɩk; la b ra yeta taaba: «Bãmb yaa ãnna n kõt al ba sobg la mogr noor tɩ b sakdẽ?» ²⁶ B taa Gadar dãmb tẽnga sẽn tot ne Galile. ²⁷ A Zezi sẽn yi koglga pʋga, tẽnga rao a yembre n wa n seg-ba. Sʋtãamb wʋsgo n da be nin-kãng pʋgẽ. Al daar zãra a ra pa le yeelgd fuug ye, a ra ka gãe yir ye, dẽnd yaadẽ. ²⁸ A sẽn yãe a Zezi la a sẽn kelme, n wõgemd b taoore n zẽk a koɛɛg n moon woto: «Bõe n be maam ne yãmb sʋka, Zezi, Wẽnnaam Yĩngr soab Biiga? Y sugri la y ra nams-m ye!» ²⁹ Dẽ t’a Zezi ra kõta Sʋtãan dẽgda noore t’a yi la a bas raoã. Sɩda, yaa naoor yaka la a ra yõk daoã, tɩ b mii n sẽb-a n gãneg ne wĩ la bãeense, la a kaooda fãa. Sʋtaana ra kẽesd-a la weoogo. ³⁰ A Zezi sok-a lame: «Fo yʋʋr la a bõe?» T’a leok: «Kʋʋma» tɩ yaa Sʋtãamb wʋsgo n da kẽ raoã pʋgẽ. ³¹ Sʋtãamba yõka a Zezi sɛɛg tɩ b ra yiis ba n lebs-b bog zulungẽ wã ye. ³² Kurkuy ka tɛk n da wãbd yamdo tãnga zugu; Sʋtãamba kosa a Zezi sore n na n yi n kẽ kurkuya; tɩ b kõ-b sore. ³³ Sʋtãamba basa raoã n yi n kẽ kurkuya la kurkuya zãnga siga tãnga n wudg n tɩ lʋɩ mogra pʋga, n pa koomẽ. ³⁴ Sẽn da gũud-b kurkuya sẽn yãe yellã, b zoe n tɩ togsa tẽnga pʋgẽ la tẽn-kɩremsã. ³⁵ Neba yiime n wa ges yella sẽn maana. B taa a Zezi nengẽ n mik Sʋtãamba sẽn yi n bas rao ninga t’a zĩ a Zezi taoor ne laafi n yeer fuug la a mi a nenga. La rabeem yõk-b lame. ³⁶ Sẽn yãend-b yellã togsa raoã sẽn paam a menga toto. ³⁷ Gadar tẽng rãmb fãa sũu taaba n kos a Zezi tɩ b loog n yi b tẽngẽ. Rabeem kãseng da tar-b lame. A Zezi kẽe koom koglgo n lebe b sẽn yiẽ. ³⁸ Sʋtãamba sẽn yi n bas rao ninga yõka a Zezi sɛɛg n na n pa ne bãmba; a Zezi kʋls-a lame n yete: ³⁹ «Leb f yiri la f tɩ togs Wẽnnaam sẽn maan bũmb ning ne foo.» Daoã kẽngame n tɩ moon tẽnga fãa a Zezi sẽn maan bũmb ning a yĩnga. ⁴⁰ A Zezi lɛɛg n waame. Neb kʋʋng reeg-b lame tɩ b ra gũud-b lame ⁴¹ la ade, rao a ye n wa. A ra boondame t’a Zayir, n ya pʋʋsg roog naaba. A wõgemda a Zezi taoore n yõk b sɛɛga tɩ b wa kẽe a zakẽ. ⁴² A ra tara a bi-pugl yende sẽn zems yʋʋm piig la a yi. Biiga ra yaa bãada la bãaga ra lebga toogo. A Zezi rɩka a zaka sore, tɩ neba sɩng b pẽdgre. ⁴³ Pag a ye me n da bẽed mende, yʋʋm piig la a yiibu; ned ba a ye ka tõog n sãoog-a ye. ⁴⁴ A kolga poorẽ n sɩɩs a Zezi fuug zerdo. Zĩig pʋgẽ bala a zɩɩma yõkame. ⁴⁵ La a Zezi sokame: «Anna n sɩɩs maam?» La ned ba a ye pa saag n yeel tɩ yaa yẽ ye. T’a Piyɛr leok-ba: «Karen-saamba, zãma wã n sũ taaba n dɩdgd yãmba.» ⁴⁶ T’a Zezi yeele: «Ned n sɩɩs maam, tɩ m bãngame tɩ pãng n yi m nengẽ.» ⁴⁷ Paga sẽn mik t’a yella pukame, a waame n digda, n wõgemd a Zezi taoore la a togsame tɩ neb fãa wʋm a sẽn sɩɩs-ba võore, la a sẽn wẽneg n sãoog zĩig pʋgẽ balã. A Zezi yeel-a lame: ⁴⁸ «M biiga, fo tẽeb fãag-f lame, kẽng ne laafi.» ⁴⁹ B sẽn da ket n gomda la ned yi naaba yiri n wa yeele: «Y biiga kiime, da le nams-y karen-saamb ye.» ⁵⁰ La a Zezi ra wʋmame tɩ b na n yeel pʋʋsga roog naaba: «Da maan-y rabeem ye, yãmb ye n tẽ bala, biiga na n tɩlgame.» ⁵¹ B sẽn ta yiri, b pa sak tɩ ned ba a ye tũ bãmb n kẽ sã n kaa a Piyɛr la a Zã, la a Zak, n paas bi-pugla ba la a ma. ⁵² B fãa ra yãbdame la b tood b yãoogo, kũuma yĩnga. T’a Zezi yeele: «Da yãb-y ye, biiga pa ki ye, a gõeeme.» ⁵³ Neba ra laada a Zezi tɩ bãmb yẽ ra miime t’a kiime. ⁵⁴ A Zezi yõka biiga nugu, n zẽk b koɛɛg n yeele: «Biiga yiki!» ⁵⁵ Biiga vɩɩm le waame; vugr bala a yikame. A Zezi yeelame tɩ b kõ-a rɩɩbo. ⁵⁶ Bi-pugla ba ne a ma yɛɛsame; a Zezi sagl-b lame tɩ b ra togs ned ba a ye yella sẽn maana ye.

¹ A Zezi boola b Tʋʋm-tʋmdb piig la a yiibã n kõ-b pãng la tõogo tɩ b rig sʋtãamba la b sãoog bãad-dãmba fãa. ² B tʋm-b lame tɩ b sa n moon Wẽnd Rĩungã la b yols bãad-dãmba. ³ B yeel-b lame: «Da zɩ-y bũmb sor zug yĩng ye. Da zɩ-y dasaare bɩ korgo la rɩɩbo bɩ ligd ye. Ned ba a ye ra zɩ fu-yord a yiib ye. ⁴ Y sẽn kẽ yir ninga bɩ y kell n pa be n tãag y loogre. ⁵ B sẽn pa reeg yãmb zĩig ning fãa, y sã n yit b tẽngẽ bɩ y pĩng y gãndalsa tom tɩ rẽ n yɩ zood kaoob kaseto la taal ningri.» ⁶ Tʋʋm-tʋʋmdba kẽngame, b saaga tẽnsa fãa n moon Koe-noogã la b sãoogd bãad-dãmb zĩis fãa. ⁷ A Erod wʋma a Zezi sẽn maan fãa la a ra ka mi a sẽn na n tags bũmb ning ye tɩ kẽer da gomdame: «Yaa a Zã n vʋʋg kɩɩms sʋka.» ⁸ Kẽere: «A Eli n le wa.» Kẽere: «Tẽn-kʋdem-wẽnnẽ bãngd a ye n vʋʋge.» ⁹ La a Erod da yetame: «Sã n ya a Zã, mam n kɩt tɩ b fiuug a zugu. B sẽn gomd rao ning yelle tɩ m wʋmnẽ wã marsã, yẽ la ãnna?» Dẽ la a ra baood n na n yãend a Zezi. ¹⁰ Tʋʋm-tʋmdba sẽn lɛɛg n wa, b togsa a Zezi bãmb sẽn maan fãa. A Zezi peeg-b lame n yi kɛɛnga; b teesa tẽng sẽn boond tɩ Bɛtsayid. ¹¹ Zãma wã bãngame la b rɩka b nao. A Zezi sakame n gom ne-ba, Wẽnd Rĩunga yelle; b sãooga sẽn da tʋl-b laafi wã fãa. ¹² Wĩndg sẽn waa n dat n kẽ, piig la a yiibã kolg n yeela a Zezi: «Kuls-y neba tɩ b leb Bɛtsayid la pʋtẽ wã n bao gãag zĩiga la b paam dɩɩb n dɩ tɩ d sẽn be ka wã yaa weoogo.» ¹³ A Zezi yeel-b lame: «Yãmb meng n tog n kõ-b rɩɩb tɩ b rɩ.» Dẽ la b leok yã: «Bur a nu la kʋɩl-zẽed a yiib bal la d tara. Woto wã d na n kẽnga tẽnga pʋgẽ d toore n tɩ ra rɩɩb n wa, tɩ ka rẽ zãma wã labsa.» ¹⁴ Daopa sẽn da be be sõor da tõe n taa tus a nu. B yeela b karen-biisã: «Zĩndg-y neba pisnu-nu.» ¹⁵ B reega noore, n kɩt tɩ neba zĩndi. ¹⁶ A Zezi reega bur a nu wã ne kʋɩl-zẽed a yiibã n zẽk b neng n tees yĩngri n pʋʋs bark pʋʋsgo. B yaoolame n wes burã n kõ b karen-biisã tɩ b pʋɩ zãma wã. ¹⁷ B fãa rɩɩme n tɩge n tol zɩ pet piig la a yi, n kuli, pet sẽn pid ne bura girs sẽn kellã. ¹⁸ A Zezi ra yii kɛɛng, raar a ye, n pʋʋsdẽ. B karen-biisa bal n da be ne ba. B sok-b lame: «Zãma wã yetame tɩ maam la a bõe?» ¹⁹ Tɩ b leoke: «Kẽer yetame t’a Zã, kẽer t’a Eli. Kẽer tɩ tẽn-kʋdem-wẽnnẽ bãngd a ye sẽn vʋʋge.» T’a Zezi yeel-ba: ²⁰ «La yãmb yẽ, yãmb yetame tɩ m yaa ãnna.» A Piyɛr n leoke: «Krista, Wẽnd Nedã!» ²¹ A Zezi kõ-b la noore tɩ b ra saag n togs ned ye. ²² B yeelame: «Yaa pakr ne Ned Biiga tɩ b nams wʋsgo, tɩ nin-kẽemba, maan-kʋʋdba kãsem-dãmb la sɛb-mitba yiis-b buudẽ la b kʋ-ba; la b na n vʋʋga dasem a tãab daare.» ²³ B yaool n yeela b fãa: «Ned sã n dat n dɩk mam nao, bɩ a bas a meng yamleoogo la a tʋk a pika, beoog sẽn vẽeg fãa, n tũ maam. ²⁴ Sɩd me sẽn tʋll-a n fãag a meng vɩɩm na n menes-a lame la sẽn menesd-a a meng vɩɩm mam yĩnga, na n fãag-a lame. ²⁵ Bõe yõod la ned rokda a sã n paam dũni wã zãng fãa n sooge, n yaool n kẽ moogo la a sãam a meng yelle? ²⁶ Sẽn yeela tɩ maam ne m goama yãnd tar-a lame, Ned Biig me na yeel yẽ soaba t’a yãnd tar-b lame, b sã n lɛɛg n wa ne zɩɩri, ne b Ba la malɛgs sõma pẽgre. ²⁷ Sɩd ne sɩda, mam yeta yãmba tɩ kẽer n be ka n ka na n wʋm kũum yũugu tɩ b pa reng n yãe Wẽnd Rĩunga ye.» ²⁸ Dẽ loogr poore, sẽn maan dasm a nii, a Zezi peega a Piyɛr la a Zak, la a Zã. B tɩ rʋʋ tãng n pʋʋsdẽ. ²⁹ Pʋʋsga wakato, a Zezi neng tedgame. B futa lebga peelse n pɩnda. ³⁰ Ade, neb a yiibu n da sõsd ne bãmba: da yaa a Moyiiz la a Eli n lik ne zɩɩri. ³¹ B da gomda b kũuma sẽn na n yɩ a soab Zerizalɛɛm. ³² Dẽ t’a Piyɛr ne a tũud-n-taasa ra zuka gõeem tɩ gõeema ra tar-b la wʋsgo. B sẽn neke b yãenda a Zezi zɩɩrã ne rapa yiibã sẽn da be-b ne bãmbã. ³³ Nin-bãmb sẽn waa n loogdẽ, a Piyɛr yeelame: «Karen-saamba, tõnd sẽn be ka wã, d sũur yaa noogo. D tilg zãn a tãabo, a ye yãmb yĩnga, a to a Moyiiz yĩnga, a tãab soaba a Eli yĩnga.» A ra ka tar a goama nao ye. ³⁴ La a sẽn waa n gomdã, sawadg n waa n lud bãmba tɩ lebg likã, tɩ b yɛɛsdẽ. ³⁵ La koɛɛg n yi sawadga pʋgẽ n yetẽ: «Bãmb yaa mam Bi-nongre, kelg-y-ba!» ³⁶ B wʋma koɛɛgã la dẽ pore b mikame t’a Zezi lebga b yembre. Karen-biisa me tõoga b noore wakat kãng n pa togs ned ba a ye b sẽn yãend bũmb ninga ye. ³⁷ Vẽkembeoogo, b sẽn sig tãngã la zãma wã sẽn pooge. ³⁸ Ade, dao a ye n zĩnd zãma wã sʋka n kelme: «Karen-saamba, m yõkd-y-la sɛɛga, ges-y m biiga yelle tɩ yaa m bi-yende. ³⁹ Sʋtãan a ye n mii n yõk-a t’a tar kɛlenga. Wakat ninga sʋtãana lubd-a la tẽnga t’a yĩnga vɩgda, t’a noor lasd tãntãnpuudu; a pa yit n bas-a naana ye. A rengd n sɛɛsa a pãnga zãnga. ⁴⁰ Mam kosa y karen-biisa tɩ b rig-a la b pa tõog ye.» ⁴¹ A Zezi yeelame: «Kɩɩsdb la bi-bees buudu, mam na n kaoosa ne yãmb la m tõog m sũurã n ta da-bʋre? Tall f biigã n wa ka.» ⁴² Biiga sẽn wa n kolgdẽ, sʋtãana lub-a-la tẽnga t’a gãe n vigd ne pãnga. A Zezi tãsa sʋtãan dẽgda, n sãoog biigã n lebs-a a ba. ⁴³ B fãa yãenda Wẽnnaam pãngã tɩ b pɛleng yɩke. Ned kam sẽn da pẽgd a Zezi sẽn maana yĩnga, bãmb yeela b karen-biisi: ⁴⁴ «Yok-y y tʋbre n kelg m goama: B na n yõka Ned Biiga n ning ninsaalb nusẽ.» ⁴⁵ La karen-biisa pa wʋmd gomda sẽn lebdẽ ye, t’a Zezi pa tʋlg tɩ yɩ vẽenega tɩ b wʋma võor ye; la soka Zezi b gomda võor da yaa rabeem ne-ba. ⁴⁶ B yika no-koeemd ne taaba n na n bãng, bãmb sʋka, ãnna n yɩɩd a taaba. ⁴⁷ A Zezi sẽn da mi b sũur tagsgo, b zĩndga bi-bilf b sɛɛgẽ n yeel-ba: ⁴⁸ «Sẽn deeg-a bi-bilfã reega mam menga, sẽn deeg-a maam deega sẽn tʋmeb maama. La sẽn yaa yao-zʋʋg yãmb sʋka yẽ n yɩɩd a taaba.» ⁴⁹ A Zã yeelame: «Karen-saamba, tõnd yãee dao a yembre sẽn digd sʋtãan yãmb yʋʋr yĩnga la tõnd gɩdg-a lame t’a pa lagem ne tõnd n tũud yãmb ye.» ⁵⁰ A Zezi yeel-b lame: «Bɩ y ra rig-a ye! Sẽn pa zabd-a ne yãmba bee yãmb poorẽ.» ⁵¹ B daara sẽn waa n kolge tɩ b na n yi dũni kãnga, a Zezi kenga b pɛlga n dɩk Zerizalɛɛm sore. ⁵² Neb la b tʋm tɩ b reng taoore. B rɩka sore la b tɩ kẽe Samari tẽng a ye n na segl b waoongo. ⁵³ B sẽn ta, be rãmb pa reeg-b neer ye, tɩ b yãeeme tɩ yaa Zerizalɛɛm la b da rabda. ⁵⁴ A Zak ne a Zã sẽn yãend woto b yeelame: «Yãmb datame tɩ d kõ noor tɩ saag bugum sig n yõog bãmba bɩ?» ⁵⁵ A Zezi wẽneg n ges-lame m sãbs-ba. ⁵⁶ La b yiime n kẽ tẽng a to. ⁵⁷ B sẽn waa n be sorẽ, ned n yeel bãmba: «Mam na n tũu yãmba, y sẽn na n kẽng tẽng ning fãa.» ⁵⁸ A Zezi leoka yẽ soaba: «Waas tara b bogdo tɩ yĩngr luiili tar b tʋgdo. Ned Biiga yẽ pa tar zĩig n gãnegd b zug ye.» ⁵⁹ B yeela ned a to: «Tũ maam!» T’a soab leoke: «Kõ-y maam sore tɩ m deng n tɩ mum m ba.» ⁶⁰ La a Zezi yeel-a lame: «Bas kɩɩmsa tɩ b mum taaba; la foom, kẽng n tɩ moon Wẽnd Rĩungu.» ⁶¹ Ned a to me n yeel-ba: «M na n pʋga yãmba, Soaala, la bɩ y kõ sore tɩ m deng n tɩ pʋʋs m neba wẽnd na taas la m yaool n wa.» ⁶² T’a Zezi leok-a: «Ned sã n gãd wãka n zõond n na n ko, n wẽneg n ges a poorẽ, a soab ka tog ne Wẽnd Rĩung ye.»

¹ Dẽ poore Soaala le tũusa karen-biis pisopoe la a yiibu n tʋm ba tɩ b reng bãmb taoore, b yiib-yiibu, zĩis fãa la tẽns niyns fãa bãmb meng sẽn dag n na n kẽngẽ. ² B ra yet-b lame: «Ka-kɛɛra waooga la ka-kɛɛdba sõor paoodame. Pʋʋs-y Tigsga Naaba tɩ b yiis tʋʋm-tʋmdba ka-kɛɛra yĩnga. ³ Kẽng-y! La ade, m tʋmda yãmb wa pe-bi digd-n-yĩids sʋka. ⁴ Da zɩ-y korg bɩ waoog ye, bɩ neodr ye la y ra yaas n pʋʋs ned sor zugu ye. ⁵ Yãmb sẽn kẽed zak ninga, reng-y n yeel-y: ‹Laafi sig yi-kãnga!› ⁶ Laafi biig sã n be a pʋgẽ, yãmb laafi na sig a zugu, sã n pa rẽ, a lebda yãmba. ⁷ Bɩ y kell n pa yir kãnga n dɩtẽ la y yũud b sẽn kõt-y bũmb ning fãa, tɩ tʋʋm-tʋmd toga ne yaoodo. Bɩ y ra sa yir woo yir ye. ⁸ Yãmb sẽn kẽ tẽng ning fãa tɩ b reeg yã, bɩ y rɩ la y yũ b sẽn na n tẽgen y taoore. ⁹ Sãoog-y tẽnga bãad-dãmba la y yeel nebã: ‹Wẽnd Rĩung pẽe yãmba.› ¹⁰ La yãmb sẽn kẽ tẽng ninga tɩ b pa reeg yã, kẽng-y b sɛk zĩigẽ la y yeele: ¹¹ ‹Al ba yãmb tẽnga tom sẽn tabend tõnd nao, tõnd pĩmsd-a lame n bas ne yãmba, la baasg fãa bãng-y tɩ Wẽnnaam Rĩung kolgame.› ¹² M yeta yãmb tɩ bʋʋda raare, Sodom sɩbgr toolem kõn zeng tẽn kãng rẽnn ye. ¹³ Na pak foom Korozein! Na pak foom Bɛtsayid! Tɩ wẽnd makr dãmb sẽn maan yãmb sʋka sã n da maanẽ Tir la Sidõ, b ra pĩn n yeelgẽ sũ-pa-noang futu la b bilmẽ tompɛglem n kos sugri al daar zãra. ¹⁴ Dẽ yĩnga, bʋʋd kaoob daare, Tir la Sidõ rãmb sɩbgr toolem kõn kolg yãmb dẽn ye. ¹⁵ La foom, Kafarnaom, fo zẽkd f meng n tãag saag me, b na n sika foom al n tɩ tãag bʋg-tẽnga. ¹⁶ Sẽn kelgd-a yãmb kelgda maam; sẽn zãgs-a yãmb zãgsa maam; sẽn zãgs-a maam, zãgsa sẽn tʋm-a maama.» ¹⁷ Karen-biis pisopoe la a yi wã lebg n waa ne sũ-noog n yeele: «Soaala, al ba sʋtãamba reegda tõnd noore, yãmb yʋʋr yĩnga.» ¹⁸ A Zezi yeel-b lame: «Mam da nee sʋtãan sẽn da yit yĩngri n lʋɩt wa saag sʋʋga. ¹⁹ Ade, mam kõo yãmb tõog, tɩ y tab wiis la namse la bɛyã ne a pãnga fãa kõn tõog n maan y bũmb ye. ²⁰ La baasgo bɩ y ra noog y sũuri sʋtãamba sẽn deegd y noor yĩng ye, noog-y sũuri yãmb yʋy wã sẽn gʋls arzãnẽ yĩnga.» ²¹ Wakat kãnga Wẽnd Vʋʋsem kɩtame tɩ b yeele: «Mam pẽgd-y lame, Ba, yĩngr la tẽng Soaala, yãmb sẽn solg yell bãmba, yam dãmda la yẽesem dãmba, n yaool n wilg-b kom-bõonego. N-yẽe! M Ba, woto la yãmb tʋlgre ne y nimbãan-zoeerã. ²² M Ba rɩka bũmb fãa n kõ maam, ned ba a ye ka mi m Ba sẽn yaa a soaba, sã n ka Biigã, la Biiga sẽn sak n wilg a soaba.» ²³ La b wẽneg n gesa b karen-biisã n yeel-ba, bãmb ne taab bala: «Sũ-noog rãmba la nin sẽn yãet yãmb sẽn yãete! ²⁴ Mam yeta yãmba: bãngdba la nanamse tʋlg n yãee yãmb sẽn yãetã, la b pa yãe ye, la b wʋm yãmb sẽn wʋmd bũmb ningã, la b pa wʋm ye.» ²⁵ La ade, noor karen-saamb a yembre n yik n na n bẽd-ba, n sok-ba: «Karen-saamba, bõe la m tog n maan n paam vɩɩm sẽn kõn sɛ?» ²⁶ T’a Zezi leok-a: «Noor sebre pʋgẽ b gʋlsa bõe? Bõe la y karemda?» ²⁷ T’a leoke: «Nong Soaala, f Wẽnnaam ne f sũur fãa, ne f pɛlg fãa, ne f pãng fãa la ne f yam fãa, la f nong f to n wẽnd f menga.» ²⁸ A Zezi yeelame: «Yãmb leoka neere! Maan-y woto tɩ y na paam Vɩɩm.» ²⁹ Karen-saamba sẽn da rat n kõ a meng bʋʋm, a soka a Zezi: «La m to yaa ãnna sẽ?» ³⁰ T’a Zezi leok-a: «Ned n da yi Zerizalɛɛm n dabd Zeriko n tees n lʋɩ fãadb nusẽ tɩ b rees a teeda fãa n pogl-a, n bas-a t’a rat n ki. ³¹ Maan-kʋʋd a ye n waa n tũud so kãnga n yãend-a la a bas-a lame n looge ³² maan-kʋʋd sõangd a ye n waa n yãend-a, n bas-a n looge. ³³ La Samari dao a yembre n da togd sore n wa lood be. A sẽn yãend-a, a zoe-la a nimbãanega, ³⁴ la a kolgame n dɩk rãam ne kaam n pek a noadã, n vil ne pɛɛla, n zombg-a a meng bõanga, n tall n kẽng a gãag soab yiri, n tɩbs-a. ³⁵ Vẽkembeoogo, a yãka wakɩ koeems a yiibu n kõ a gãag soaba n yeele: ‹Tɩbs-y neda neere, la y sẽn na n sãam ligd ning n paase, m sã n lɛɛg n wa, m na lebs yãmba.› ³⁶ Bãmb b tãaba sʋka, sã n ya ne yãmba, ãnda n ges raoã sẽn lʋɩ fãadba nusẽ wala a to?» ³⁷ Tɩ karen-saamba leok: «Yaa sẽn zoe-a raoã nimbãanega sẽ.» T’a Zezi yeel-a: «Bɩ y kẽnge, la yãmb me maan boto.» ³⁸ A Zezi sẽn dɩk sor ne b karen-biisi, b tɩ kẽe tẽng-a ye tɩ pag a ye sẽn boond t’a Mart reeg-b sãando, a yiri. ³⁹ A Mart da tara yao sẽn boond t’a Mari, la yao wã ra zĩi Soaala taoore n kelgd b goama. ⁴⁰ A Mart da yãgda ne rɩɩba seglgo la ragend tʋʋm a taaba; a waa n yaasa a Zezi taoore n yeele: «M yao wã sẽn bas maam tɩ m segend m yembrã ka pak yãmb ye? Soaala, yeel-y m tão wã t’a yik n wa sõng-m wɛ!» ⁴¹ Soaala leok-a lame: «Mart, Mart, fo maanda yɩɩre, la fo sũkda bũmb wʋsg poorẽ, ⁴² la yaool n yaa bũmb a ye bala n pake. A Mari sẽn yãk pʋɩɩr ningã n são, la b kõn deeg n bas-a ye.»

¹ Daar a ye, a Zezi da bee zĩig a ye n pʋʋsdẽ. B sẽn pʋʋs n sɛ, b karen-biig a yembr yeel-b lame: «Soaala, zãms-y tõnd pʋʋsgo wala a Zã sẽn zãms a karen-biisi.» ² A Zezi yeelame: «Yãmb sã n pʋʋsdẽ, yeel-y woto: ‹Ba, y yʋʋr yi ne pẽgre, y naam wa. ³ Kõ-y tõnd beoog sẽn vẽeg fãa, d daara rɩɩbo. ⁴ Kõ-y tõnd d yel-wẽna sugri, tɩ tõnd me kõta sẽn beeg-b tõnda fãa sugri la y ra bas tɩ kʋɩɩbg yõk-d ye.› » ⁵ B le yeel-b lame: «Yãmb sʋka, ned sã n tar-a zoa t’a bʋʋg-a yʋn-sʋk n yeel-a: ‹M zoa, peng-m bur a tã, ⁶ tɩ m zoa a to n yi sor n wa, tɩ m ka tar bũmb n na n kõ-a ye.› ⁷ Tɩ yãoo soaba zĩnd roogẽ n leoke: ‹Bas-m laafi tɩ m doog pagame, maam ne kamba kẽe gãaga, ad-m ka tõe n yik n bao n kõ-f ye.› ⁸ Mam yeta yãmba, t’a zoa wã sã n pa yik n kõ-a, b zooda yĩng me, pẽdgra yĩnga, a na yik n kõ-a wala a sẽn dat tɛka. ⁹ La mam yeta yãmba: kos-y tɩ b na n kõ-y lame, bao-y tɩ y na n yãeeme; kabs-y tɩ b na pak tɩ y kẽ. ¹⁰ Sɩd me, sẽn bõsd-a paamdame, sẽn baood-a yãetame la sẽn kabsd-a, b pakd n kõ-a lame. ¹¹ Yãmb sʋka, roagd a bõe n be t’a biig kos-a kʋɩl-zẽoogo, t’a bas kʋɩl-zẽegã n kõt-a waafo? ¹² Bɩ a kos-a la gelle, t’a kõ-a nanga? ¹³ Dẽ yĩnga, yãmb ne y wẽnema fãa, yãmb sã n mii n kõt y kamb bõn sõma, yãmb zɩ tɩ yãmb Ba wã sẽn be yĩngri, bãmb na n kõo sẽn bõsd-b bãmbã a Vʋʋsem Sõngo!» ¹⁴ A Zezi ra yiisda Sʋtãan sẽn da kẽ neda t’a lebg muka. Sʋtãana sẽn yi, muka gomame, tɩ neb pɛleng yɩke. ¹⁵ La neb kẽer yeelame: «Ad-y yaa ne sʋtãamb naab a Beelzebul pãnga la a yiisd sʋtãamba.» ¹⁶ La kẽer me da rat n bãnga b pãnga, n kos-b bõn-bãnd a ye sẽn yit yĩngri. ¹⁷ A Zezi sẽn da mi b tagsgo, b yeel-b lame: «Rĩung a ye rãmb sã n welg n maan beem ne taaba, b wãada b rĩungã t’a rot lʋɩ n bʋʋg taaba. ¹⁸ Sʋtãana sã n welg la a maand beem ne a soolem dãmba, a rĩung na n le zĩnda wãna? Yãmb sẽn yet tɩ yaa ne a Beelzebul pãnga la m yiisd sʋtãamba, ¹⁹ la mam sã n digd sʋtãamba ne a Beelzebul pãnga, yãmb digd-b la ne ãnd pãng marsã? Woto yĩnga, yãmb meng n kaood y bʋʋdo. ²⁰ La mam sã n digd sʋtãamba ne Wẽnnaam nug pãnga, dẽnna Wẽnd Rĩunga sɩd waa yãmb sʋka. ²¹ Gãndaoog bob a zab teed n gũud a zaka, a sẽn tar fãa, bũmb kõn maan ye. ²² Gãndaoog a to sã n wa, n yõk-a n lubi, a pidgda a zab teedã a sẽn teeg b rãmbã, n wʋk a laog fãa n pʋɩ. ²³ Sẽn pa tũuda maam, zabda ne maam, sẽn pa sõngd n tigme, a soab sẽegdame. ²⁴ Sʋtãan dẽgd sã n yi ned pʋgẽ, a gõoda zĩ-peen-daagẽ n baood vʋʋsgo n kongdẽ. Dẽ la a wat n yeele: ‹M leb roog ninga mam sẽn yii wã.› ²⁵ A sã n le wa kẽe, a mikdame tɩ b pɩɩsa sagda n maneg-a neere; ²⁶ t’a kẽng n le tɩ wa ne sʋtãamb a yopoe wẽnem sẽn yɩɩd yẽnda, tɩ b fãa kẽ be n maag b meng n zĩndi tɩ nin-kãng yell sãam n yɩɩd pĩnda.» ²⁷ A Zezi sẽn gom woto, la pag a ye sẽn zĩnd bãndurba sʋka n zẽk a koɛɛg n yeele: «Sũ-noog soaba la pag ning sẽn tʋda y pʋga tɩ y yẽsem a bĩisim!» ²⁸ La a Zezi leokame: «Yeel-y tɩ sũ-noog rãmba n yɩɩda la sẽn kelgd-b Wẽnnaam gomde la b reegd-a.» ²⁹ Zãma wã ra yaa wʋsgo tɩ wa lebg pẽdgre t’a Zezi na n yeele: «Zamaan kãnga yaa zamaan yoogo; a bolgda wẽnd makre la a kõn paam makr a to n zʋʋg a Zonas rẽnda ye. ³⁰ Wala a Zonas sẽn yɩ makre Niniv rãmb yĩnga, woto me Ned Biigã na n yɩɩ makre zamaan kãnga yĩnga. ³¹ Bʋʋda raare, dĩm-poaka sẽn yi tẽn-zãorgẽ wã na n yik n bʋʋ zamaan kãnga bʋʋdo n mong-a bʋʋm, tɩ yẽ yii al dũni wã sɛtmẽ, n wa kelg yam soab a Salomo goama; la sẽn yɩɩda a Salomo n be ka. ³² Bʋʋda raare, Niniv rãmb na n yikame n bʋ zamaan kãng bʋʋdo la b na n mong-a la bʋʋm tɩ b sẽn wʋm a Zonas saglgo, b tuuba b yel-wẽna; la ade: sẽn be-a ka wã yɩɩda a Zonas. ³³ Ned kõn yõgen fitila n solg-a bɩ n fõgen-a rʋk ye; a dogend-a-la roagendga zugu tɩ sẽn kẽedba fãa yãe vẽenem. ³⁴ Fo nif la a f yĩng fitila, fo nif sã n ya sõmbo fo yĩnga fãa tara vẽenem; a sã n pa sõmbe, fo yĩnga zãng fãa zĩi ne lika. ³⁵ Ges f sẽn tar vẽenem ninga sã n ka lebg lika! ³⁶ Ad-f yĩnga fãa sã n tara vẽenem t’a wilg ba a ye ka be likẽ, a zãng faa na n yɩɩ vẽenem wala f fitil sẽn vẽnegd-f ne a vẽenem.» ³⁷ A Zezi sẽn da waa n gomdã, Farizẽ a yembre n waa n kos tɩ b wa rɩ a yiiri. Tɩ b kẽ n sɩng rɩɩbo. ³⁸ Farizẽ wã yãee ne pɛlen-yɩka tɩ b pa reng n nudg b nus n yaool n sɩng rɩɩb ye. ³⁹ La Soaala yeel-a lame: «M nong rẽ! Yãmb Farizẽ rãmba nedgda laag la wamd poore tɩ y menga yaool n pid ne wagdem la wẽnem. ⁴⁰ Gãeemse! Sẽn naana poore, ka bãmb n naan pʋg la? ⁴¹ Dɩk-y y sũura sẽn gãd bũmb ningã n maan wẽn-kosgo tɩ sẽn keta fãa na yɩ yɩlgemde y yĩnga. ⁴² La na pak yãmba, Farizẽ rãmba! Yãmb yãkda y zẽ-vãadã la y zẽ-biisa sẽn tar yũ-noogã n kõtẽ, dʋr a ye piig zugu, n yaool n yãk y toog ne pʋ-peelem la Wẽnnaam nonglem: y tog n pidsẽ la boto, la woto me ra ka togẽ n pa sãoog ye. ⁴³ La na pak yãmba, Farizẽ rãmba! Tɩ pʋʋsg rotẽ yãmb nong n zĩnda taoore, waoor zĩigẽ, y nonga pʋʋs-bɛda kʋʋng zĩigẽ, sɛk zĩigẽ. ⁴⁴ Na pak yãmba, Farizẽ rãmba! Tɩ yãmb wẽnda yaad sẽn sarem tɩ neb tabd n pa mii ye!» ⁴⁵ Noor karen-saamb a ye leokame: «Yãmb sẽn gom woto wã, y sãbsda tõnd me.» ⁴⁶ La a Zezi leokame: «Na pak yãmb me, Noor karen-saam-dãmba! Tɩ yãmb tʋkda ninsaalba, zɩɩb b sẽn pa tõe n tʋke, tɩ yãmb menga nug-bil yaool n pa sɩɩsd bũmb ye. ⁴⁷ Na pak yãmba! Tɩ y manegd n meta bãngdba yaado la yaool n yaa y yaab rãmb n kʋ bãngdbã. ⁴⁸ Dẽnd yĩnga yãmb ne bãmb yaa kaset yɛnga: Bãmb n sɩd kʋ, tɩ yãmb, b kamba, tẽeda tɩ y roka b yãnde, n manegd bãngdba yaado! ⁴⁹ Yaa woto la yell kõ-ling-m Wẽnda beool n yeele: M na n tʋm-b la bãngdba la tʋʋm-tʋmdba, b na n kʋʋ kẽere, n dig kẽere, ⁵⁰ sẽn na n yɩ-la tɩ b wa sok zamaan kãnga kamba, bãngdba faa zɩɩm sẽn daag al dũni sɩngre, ⁵¹ sẽn sɩng ne a Abɛl zɩɩm n tãag a Zakari, b sẽn kʋ a soaba maan-kugr la Wẽnd doog sʋka. Sɩd wa m sẽn yetã, zamaan kãnga na rɩ zɩ-kãng fãa taale! ⁵² Na pak yãmba, Noor karen-saam-dãmba! Yãmb looga ne bãngra roog kʋɩlen-bila, yãmb meng n pa kẽede la y yaool n digda sẽn dat-ba me kõom.» ⁵³ A Zezi sẽn yi be, Sɛb-mita la Farizẽ rãmba sɩng n dat-b la ne wẽnga la b pẽdgd bãmb ne sokr dãmb wʋsgo, bũmb wʋsg poorẽ. ⁵⁴ B ra gãnegd-b-la bẽdgo, n dat tɩ b meng noor yiis gomd sẽn na n paalg-ba.

¹ Wakat kãnga, zãma ka tɛk tigmame n gũbg a Zezi n tabd taaba, tɩ b na n sɩng n yeel b karen-biisã: «Gũus-y y meng ne Farizẽ rãmb rabɩlle, ne b zãmbã. ² Sẽn lud ka be tɩ b ka na n wa puk-a ye. Sẽn solg me ka be tɩ b ka na n wa bãng-a ye. ³ Dẽ n so tɩ yãmb sẽn togs bũmb ning fãa yʋngo, b na wʋm-a wĩnto-sʋka, la y sẽn kẽed roog n walm bũmb ning tʋbrẽ, b na rʋ bɛoongo n moon-a. ⁴ Mam yeta yãmba, m zo-rãmba, da zoe-y sẽn kʋʋd-b yĩnga n yaool n pa tõe n paas bũmb a to ye. ⁵ Yaas-y tɩ m wilg yãmba, y sẽn tog n zoe a soaba. Zoe-y sẽn kʋʋda la a leb n tõe n kẽes yãmb bugmẽ. N-yẽe! Mam yeta yãmba, yẽ soab la y tog n zoe. ⁶ Yirs a nu ka koosd tãm a yiib wɛɛ? Ne rẽ fãa Wẽnnaam pa yĩmd bãmb ba a ye yell ye. ⁷ Al ba yãmb zug zobdo, b sõd-b-la zãnga. Bɩ y ra maan rabeem ye, yãmb bee yõod n yɩɩd yirs ka tɛka. ⁸ M yeta yãmba, sẽn yeel-a ninsaalb taoore t’a mii maam, Ned Biiga me na yeel Wẽnnaam malɛk rãmb taoore, tɩ b mii yẽ soaba. ⁹ La sẽn kɩɩsda neb taoore t’a ka mi maam, mam me na kɩɩs Wẽnnaam malɛk rãmb taoore tɩ m ka mi-a ye. ¹⁰ Sẽn gom-a Ned Biiga wẽnga, b na n kõ-a sugri; la sẽn tʋʋs-a a Vʋʋsem Sõng kõn tol n paam sugri ye! ¹¹ B sã n wa vuud yãmb n kẽnd pʋʋsg rotẽ, bʋʋdba la tẽng soaalba taoore, bɩ y ra bʋ y sẽn na n gom to-to, la y sẽn na n yãe dabaar ning n fãag y meng ye. ¹² A Vʋʋsem Sõng n na n wilg yãmb wakat kãng bala y sẽn tog n yeele.» ¹³ Ned n zĩnd zãma wã sʋka n yeel a Zezi: «Karen-saamba, yeel-y m ba-biiga t’a pʋɩ d ba sẽn bas laog ningã, n kõ-m m dẽnna.» ¹⁴ Tɩ b na n leok-a: «Daoa! Ãnda n kõ-m sore tɩ m bʋ yãmb bʋʋdo la m pʋɩ yãmb laogo?» ¹⁵ B le yeela zãma wã: «Gũus-y y meng neere ne y raab waglã, tɩ f tar wʋsg me, ned vɩɩm ka tũud f sẽn tar paoong ninga ye.» ¹⁶ B tãoo yelbũndi: «Dakãagr a ye n da be ta pʋt sak kood sõma. ¹⁷ A ra tagsda a sũurẽ: ‹M na n maana wãna? M ka tar zĩig n na n bĩng m kooda ye.› ¹⁸ T’a yeel a menga: ‹Ad-m sẽn na n maan bũmb ninga: m wãada bao kʋda fãa n lebs n me bɛd-bɛda, m wʋkda m kooda fãa la m paoonga fãa n bĩng be, ¹⁹ n yaool n yeel m menga: M zoa, fo paama paoong wʋsgo n bĩng yʋʋm kʋʋm yĩnga, vʋʋse, rɩ la f yũ la f kɩdme.› ²⁰ La Wẽnnaam yeel-a lame: ‹Yalma, yʋnga bala, b na n deega f yõore la fo sẽn bĩngã ãnna n na n sooge?› ²¹ Yɩta a woto ne sẽn wʋkd-a arzɛk n bĩngd a meng yĩnga, n yaool n pa bĩngd Wẽnnaam yĩng ye.» ²² A Zezi yaool n yeela b karen-biisi: «Bɩ y ra bʋ y vɩɩm poorẽ, n sokdẽ tɩ bõe la y na n dɩ, la yĩnga poorẽ, tɩ bõe fuug la y na n yeelg ye. ²³ Vɩɩm yɩda rɩɩbo tɩ yĩnga yɩɩd fuugu. ²⁴ Ges-y gãabdo: b ka bʋte, b ka tigsdi, b ka tar pilgu, b ka tar baoore, la Wẽnd dɩlgd-b lame. Y são luiili al wʋsgo! ²⁵ Ãnna n tõe, yãmb sʋka, n bʋ n paas a vɩɩm woglem kãntɩɩg a ye? ²⁶ Yãmb sã n pa tõe sẽn paoode, ya bõe tɩ y maand yɩɩre ne sẽn ketã? ²⁷ Ges-y puud sẽn bɩt toto; b pa wĩida, b pa wʋgd sʋndo la m yeta yãmb t’a Salomo meng ne a ziira fãa pa yeelg fu-neer wala puug ye. ²⁸ Wẽnnaam sã n yeelgd woto, moog sẽn be pʋtẽ dũnna tɩ b na n yõog wʋngẽ beoogo, yãmb zɩ tɩ yãmb yĩnga b na maan tɩ yɩɩg boto, tẽeb kɩdg rãmba? ²⁹ La yãmba, bɩ y ra bao bõe la y na n dɩ, bõe la y na n yũ, la y ra maan yɩɩr zaalem ye. ³⁰ Yaa dũniya bu-zẽmba n bolgd dẽ. Yãmb Ba wã mi tɩ yãmb tara rẽ fãa tʋʋmde. ³¹ Bɩ y reng n bao Wẽnnaam Rĩung ne a sõmblem, tɩ sẽn ketã, b na kõ yãmb n paas. ³² Da zoe-y rabeem ye, wubr pa zemb bũmbu, tɩ nooma y Ba tɩ b kõ yãmb b Rĩungu. ³³ Koos-y yãmb sẽn tar fãa n dɩk n maan wẽn-kosgo; bao-y kordo sẽn pa tõe n kʋdg ye la arzɛk sẽn pa tõe n sɛ n bĩng arzãnẽ, tɩ beene, wagdb ka tõe n kolg ye, mogd ka be n tõe n mok ye. ³⁴ Yãmb laoga sẽn be zĩig ninga, y sũura me na n zĩnda be. ³⁵ Rɩk-y sẽbdse n sẽbg-y y sɛɛga, la yõgen-y fitil dãmba n zã y nusẽ. ³⁶ La yãmba, yɩ-y sõgen-kamba sẽn gũud b zu-soaba, n gũud t’a yi pʋg-reem n wa; a sã n wa wẽed nug poaka bɩ b wẽneg n pak t’a kẽ. ³⁷ Sũ-noog rãmb la sõgen-kamb kãense, b zu-soab sã n wa mik tɩ b gũud a waoongo. Sɩd-sida, m yeta yãmba tɩ yẽ meng na n sẽgna fuugu, n zĩndg-b rɩɩb roogẽ, n tall dɩɩbã a toore n wa kõ-ba. ³⁸ A waa yʋn-sʋka, a waa tõd-beoogo n mik tɩ b segl n gũud-a, sõgen-kamb kãens yell manegame. ³⁹ Bãng-y neere, tɩ yir soab miẽ wagdr waoong wakato, a kõn mum a nin ye la a kõn bas tɩ b wa poog a roog ye. ⁴⁰ Yãmb me, segl-y y mens n gũudẽ, tɩ Ned Biiga na n waa wakat ning y sẽn pa tagsd b waoong ye.» ⁴¹ A Piyɛr sok-b lame: «Soaala y wẽe yelbũna tõnd yĩng bɩ neb fãa yĩnga?» ⁴² Tɩ Soaala leok-a: «Yaa ãnd la arzɛk gũuda, pʋ-peelem soaba, yam soaba t’a zu-soab na n gũnug-a a rakõapa t’a kõt-b moende wakat ninga sẽn zemse? ⁴³ Sũ-noog soaba, la sõgen-kãnga, a zu-soaba sãn n wa mik-a t’a maan boto! ⁴⁴ Sɩd-sɩda mam yeta yãmba t’a na n gũnug-a-la a paoonga fãa. ⁴⁵ La sõgna sã n yeel a sũurẽ: ‹M zu-soab kaoosda waoongo› t’a na n sɩng n pãbd zaka rãmba: dapa la pagba, n dɩtẽ la a yũud rãam n tɩgda, ⁴⁶ sõgen-kãng zu-soaba na n waa daar ning a sẽn pa gũud-a la wakat ning a sẽn pa mi; a zu-soaba na yẽeg-a, n dig-a n yiis, n kɩt t’a rɩ pɛt ne yel-wẽn-maandba. ⁴⁷ Sõgna sẽn da mi a zu-soab waoong raare n yaool pa segl ba fɩ, n pa maan wa a zu-soaba sẽn datã, a na n paama pãbr wʋsgo. ⁴⁸ La sẽn pa bãnga a zu-soab raabo la a tʋm sẽn tog ne sɩbgre, a na paam pãbr bilfu bala. B sẽn kõ a soab wʋsgo b na soka bũmb wʋsgo la b sẽn bobl a soab bũmb wʋsgo b na sok yẽnd a soabã n yɩɩge. ⁴⁹ Mam waa n loba bugum tẽng zugu, la bõe la m tʋlla. M nongẽ lame t’a zoe n widgẽ. ⁵⁰ Soob a ye n be tɩ ya modgr tɩ m so la m zʋʋda ali, n gũud soob kãng raare! ⁵¹ Y tẽedame tɩ m waa n kõo laafi tẽnga laa? Ayoo! Maam n yeele: m sẽn kõ yaa welg taaba. ⁵² Marsã tɛka, neb a nu be zak a ye, b na welg taaba. A tãab welgda ne a yiibu, t’a yiib welg ne tãabã. ⁵³ Ba na n welga ne a biiga, tɩ biig welg ne a ba; ma na n welga ne a bi-pugla, tɩ bi-pugl welg ne a ma; pag ne a bi-paga, bi-pag ne a sɩd ma.» ⁵⁴ A Zezi le yeela zãma wã: «Yãmb sã n yãe sawadg nin-taoore, tao-tao bala y yetame tɩ saag wata la yɩta boto. ⁵⁵ Yãmb yãe tɩ sobg kaood goabga, y yetame: zĩiga na n yɩɩ tʋʋlgo la yɩta boto. ⁵⁶ Zãmb dãmba, yãmb mii tẽng la saag neng n bak, bõe n maan tɩ yãmb ka bãng zamaan kãnga yẽ n bake? ⁵⁷ Bõe tɩ yãmb ka bãng n bak y toore sẽn ya tɩrga? ⁵⁸ Fo rabd naab nengẽ ne f bʋʋd-n-taaga, sor zugu, pĩn n tẽbe n põse; ka rẽ a vuuda foom n ta bʋʋda soab taoore, tɩ bʋʋda soab yõk foom n kɩs balgda, tɩ balgda pag f roogo. ⁵⁹ M yeta foom tɩ f kõn yi be, tɩ f ka yao samda zãnga, al ba tãmbr meng kõn pa ye.»

¹ Sega neb sẽn wa n togs yell ning sẽn pak Galile neb kẽere, a Pilat sẽn kɩt tɩ b zɩɩm kalm ne b maand dẽnna. ² T’a Zezi na n leok ba: «Yãmb tẽedame tɩ Galile nin-bãmba ra yaa yel-wẽn-maandb n yɩɩd b taaba bɩ? ³ Ayoo! Mam yeta yãmba tɩ y sã n pa tuub y yel-wẽna, y fãa kida boto. ⁴ La neb piig la a nii Siloe gaosga sẽn lʋɩ n bʋʋg n kʋ wã, yãmb tẽedame tɩ b beeg n yɩɩda Zerizalɛɛm neba fãa bɩ? ⁵ Ayoo! Mam yeta yãmba tɩ y sã n pa tuub y yel-wẽna y fãa kiida kũum a woto buudu.» ⁶ A Zezi wẽ-b la yelbũnd kãnga: «Ned n da sel kankang a pʋʋgẽ. A kẽngame n na n tɩ fãs a biis n pa yãe ye. ⁷ T’a yeel pʋʋga koaada: ‹Yaa yʋʋm a tã marsã la m wat n baood kankanga biisi n pa yãetẽ ye. Bɩ f kɛɛg-a! Bõe yĩng t’a yãmbd zĩig zaalem?› ⁸ Koaada leok-a lame: ‹Bas-y rõandã yɛs n gese, tɩ m tũ bok n gilg n gãneg birga. ⁹ Daare a me na yaa n wom biisi; a pa wom marsã, y na kɛɛg-a.› » ¹⁰ A Zezi ra karemda zãma wã pʋʋsg roogẽ, vʋʋsg daare. ¹¹ Ade, pag a ye n da be be n tar Sʋtãan a pʋgẽ, al yʋʋm piig la a nii. Sʋtãana ra koms-a lame t’a bũndg n ka tõe n doog a meng ba bilfu. ¹² A Zezi sẽn yãend-a, b bool-a lame n yeele: «Fo tɩlga ne f bãagã.» ¹³ La b tẽega b nus a zugu. Zĩig pʋgẽ bala paga dooga a menga, n yaas n pẽgd Wẽnde. ¹⁴ Pʋʋsga roog naab sũur puugame, a Zezi sẽn sãoog paga vʋʋsg daar yĩnga; t’a na n yeel zãma wã: «Dasem a yoob n be yãmb sẽn tog n tʋm, dẽn yĩnga wa-y dasem kãense tɩ b sãoog yã, la y ra wa sibr daar ye.» ¹⁵ Tɩ Soaala leok-a: «Zãmb rãmba, yãmb ned kam fãa ka lokd a bõang bɩ a naf vʋʋsg daar n tɩ yũnug bɩ? ¹⁶ Sʋtãana sẽn za pagã, a Abraam biigã, al yʋʋm piig la a nii, maana a wãna tɩ m pa tõe n zaag a gadr vʋʋsg daare?» ¹⁷ B sẽn gom woto, yãnd yõka sẽn da wẽed-b no-koeemdã, la zãma wã yẽ sũur da nooma al wʋsgo, Wẽnd makr dãmb sẽn da maanda yĩnga. ¹⁸ B le yeelame: «Wẽnd Rĩung wẽnda bõe, la m na n mak-a-la ne bõe? ¹⁹ A wẽnda seneve tɩɩg biiga ned sẽn dɩk n bʋd a zẽedẽ, t’a yi n lebg tɩɩga tɩ yĩngr luiili soond a wilẽ.» ²⁰ B le yeelame: «M makda Wẽnd Rĩung ne bõe yɛsa? ²¹ A wẽnda rabɩlle pag sẽn dɩk n nag zom moen a tã, t’a wuk zoma gilli.» ²² A Zezi da pɩʋʋgda tẽn-bɛd la tẽn-bõonego n karemd neba la b rabd Zerizalɛɛm. ²³ Ned n sok a Zezi: «Sẽn na n fãag-bã, b sõor na n yɩɩ bilf bala?» ²⁴ Tɩ b leok-a: «Nadg-y pãnga n tũ digno-sẽka n kẽ. Tɩ maam n yet yãmba, neb wʋsg wat n makda b na kẽ la b kõn kẽ ye. ²⁵ Yir soab kẽ n sɛ n pag kʋɩlenga tɩ yãmb ket yɩnga n wẽed kʋɩlenga n tarẽ: ‹Soaala! Pak-y tɩ d kẽ!› A leokda yãmba: ‹M ka mi yãmb sẽn yitẽ ye!› ²⁶ Tɩ yãmb na n yaool n yeele: ‹Tõnd dɩɩme la d yũ ne yãmb wɛ! Yãmb karma neba d soy zutu.› ²⁷ T’a leok yãmba: ‹Mam yeta yãmba tɩ m pa mi y sẽn yitẽ ye. Kẽng-y n menem-y la y bas maam, yãmb fãa, sẽn tʋmd-b tʋʋm kɛga.› ²⁸ Na n lebga yãbr la yẽn wãbre, y sã n wa yãe a Abraam, la a Izaak, la a Zakoob la bãngdba fãa tɩ b zĩ Wẽnd Rĩungẽ tɩ b yaool n tus yãmb n yiis yɩnga. ²⁹ Neb na n yii yaang la taoore, goabg la rɩtgo, la b na n zĩnd n dɩɩ Wẽnd Rĩungẽ wã. ³⁰ La ade, sẽn ya-b poorẽ dãmba, kẽer na n lebga taoor dãmba, tɩ sẽn ya-b taoor dãmba, kẽer lebg poorẽ dãmba.» ³¹ Wakat kãng bala, Farizẽ rãmb kẽer waa n yeel-b lame: «Yik-y n kẽng-y zĩig a to t’a Erod dat n kʋʋ yãmba.» ³² B leok-b lame: «Tɩ yeel-y m Ba sɩlem soaba Waaga, ade, maam yiisda sʋtãamba la m sãoogd bãad-dãmb dũna la beoogo la da-yɩten-daara tɩ m sɛɛme. ³³ La ya m sẽn na n kell n kẽnd Zerizalɛɛm dũnna, beoog la ra-yɩta, tɩ bãngd ka tog n ki kɛɛnga tɩ pa Zerizalɛɛm ye. ³⁴ Zerizalɛɛm, Zerizalɛɛm! Kato! Foom n kʋʋd bãngdba! B sẽn tʋm b rãmb f nengẽ, fo labd-b la ne kuga. Naoor a wãna, la m tʋlgre n tigim f kamba wala no-yãang sẽn põgend a kamba a pɩgsẽ? La yãmb pa sak ye! ³⁵ Ges-y! B na n basa yãmb ne ro-vɩʋʋdo la mam yeta yãmba, y kõn le yãe maam, al tɩ tol n ta daar ning y sẽn wat n yeel-ma: ‹Sẽn wat-b Soaala yʋʋr yĩnga paam pẽgre!› »

¹ A Zezi kẽe Farizẽ rãmb kãsem a ye yiri vʋʋsg daare, n na n dɩ, la Farizẽ rãmba ra gũusd-b lame. ² La ade, kapʋg soab n da yɛs bãmb taoore. ³ A Zezi leok-b la koɛɛga, b yeela karen-saam-dãmbã la Farizẽ rãmbã: «Vʋʋsg daare, tõe n sãooga bãad bɩ pa tõe?» ⁴ Tɩ b fãa sĩnd b noore; t’a Zezi yõk bãada nug n sãoog-a, n kuls-a. ⁵ B yaool n yeela Farizẽ rãmbã: «Yãmb sʋka ãnda biig bɩ a naaf n lʋɩt bulgẽ t’a pa na n yiis-a tao tɩ yaa vʋʋsg daare?» ⁶ La b pa tõog n leok-b tɩ bũmb ye. ⁷ A Zezi ra yãeeme tɩ b sẽn bool b rãmba tɩ b wa rɩ wã ra tũusda waoogr zĩisi, la b wẽ-b-la yelbũndi: ⁸ «Ned sã n bool-f tɩ f wa pʋg-reem kibsa, da bao waoogr zĩig n gãand ye, daare a boola ned a to sẽn yɩɩd foom, ⁹ la sẽn bool-a yãmb y yiibã na n wa yeela foo: ‹Yik ka tɩ m ba Zagl gãande.› Tɩ fo yik marsã n tɩ gãand poorẽ ne yãnde. ¹⁰ Ned sã n bool foo rɩɩbo, tɩ gãand poorẽ zĩiga tɩ sẽn bool-a fooma sã n wa bɩ a yeel-fo: ‹M zoa! Wa-y taoor ka wɛ!› La woto na yɩ zu-zẽkr fo yĩnga. ¹¹ Tɩ sẽn zẽkd-a a menga, b na n sulg-a lame la sẽn sikd-a a menga b na n zẽk-a lame.» ¹² A Zezi yeela sẽn bool-a bãmb rɩɩbã: «Yãmb sã n mii n segl dɩɩb wĩndg bɩ yʋngo, bɩ y ra bool y zo-rãmba bɩ y ba-biisi, bɩ y roagdba bɩ y yags sẽn ya rakãagb ye tɩ b na n wa boola yãmb n lebse, tɩ rẽnna yɩɩ y rolbo. ¹³ Yãmb sã n segl dɩɩbo, bool-y naong rãmba, wobse, kar-kegdo, zoeense. ¹⁴ Woto yãmb sũur yita noogo tɩ b pa tar n na n lebs yãmb ye la y na paam dolbo nin-sõma vʋʋgr daare.» ¹⁵ Sẽn da rɩt-b be wã ned a ye sẽn wʋm goama, yeela a Zezi: «Sũ-noog soaba la sẽn na n dɩ-a rɩɩb Wẽnd Rĩung wã!» ¹⁶ La a Zezi leokame: «Dao a yembre n maan kibs kãsenga n segl dɩɩbo la a wilga neb wʋsg tɩ b wa, a raare. ¹⁷ Kibsa raare, a tʋma a sõgne t’a yi n yeel sẽn bool b rãmba tɩ b wa rɩ tɩ fãa segl n sɛɛme. ¹⁸ B fãa maana no-yend n kabs tɩ b ka na n tõog n wa ye. Pipi soaba yeelame: ‹M daa pʋʋgo, yaa pakr tɩ m tɩ ges; m kotame tɩ y kabs y zu-soaba n kõ-ma.› ¹⁹ T’a to yeele: ‹M daa yikay piiga tɩ m dabda n na n tɩ mag b pãng n gese; m kotame tɩ f kabs f zu-soaba n kõ-ma.› ²⁰ T’a to yeele: ‹Mam peega pag marsã, dẽn n so tɩ m pa tõe n wa.› ²¹ Sõgna sẽn kuli, a tɩ togsa a zu-soaba b fãa leokre. Yira soab sũur puugame t’a yeel a sõgne: ‹Yi tao n kẽng neba sɛk zĩigẽ la soy zutu, tall naong rãmba, wobse, zoeens la kar-kegdo n wa ne b ka.› ²² Tɩ sõgna le wa yeele: ‹M zu-soaba, yãmb sẽn kõ noor ninga, d maana me la weer ketame.› ²³ Tɩ zu-soaba yeel a sõgne: ‹Kẽng so-raadẽ la so-bugsẽ, n wool neba tɩ b wa kẽ tɩ m doog pidi. ²⁴ Man yeta yãmba, tɩ b sẽn deng n bool b rãmba fãa ned ba a ye kõn lemb mam dɩɩba ye.› » ²⁵ Zãma kãsenga n da tũud a Zezi tɩ b wẽneg b poorẽ n yeel-ba: ²⁶ «Ned sã n wat mam nengẽ, a sã n pa kis a ba, n pa kis a ma, a paga, a kamba, a ba-biisi, la a tãopa la al ba a meng vɩɩm, a pa tõe n yɩ m karen-biig ye. ²⁷ La sẽn pa zɩt a pika n tũud m nao, pa tõe n yɩ m karen-biig ye. ²⁸ Ãnna n be yãmb sʋka, n dat n me a gaosgo n pa na n deng n zĩndi, n geelg a sẽn na n sãam ligd ninga la a ges a tara sẽn na n sek rooga meebo, ²⁹ t’a na n wa sɩng-a, n yaool n pa tõog n me-a n baase tɩ neb wa yãe n tar-a a laado: ³⁰ ‹Ad daoã sɩnga meebo la pãng paoogame t’a pa baas ye.› ³¹ Bɩ yɛ naaba n bob tãpo n na n tɩ kaoog zabre ne naab a to, n pa na n deng n zĩnd n maag a menga n tagse a sã n tõe n maana raood ne tãb-biis tus piigã, tɩ naaba to wã yaool n segd-a ne tãb-biis tus pisi? ³² A sã n mi t’a ka tõe, naab a to wã nan ket yɩɩga, a na tʋm ned t’a yõk sɛɛga n yẽs laafi yẽsgo. ³³ Woto me, yãmb sʋka ned ninga sẽn pa rat-a n bas a sẽn tar fãa, a ka tõe n yɩ mam tũud-n-taag ye. ³⁴ Yamsem yaa bõn-sõngo. La a sã n sãbge, bõe n na n le wa ne a noosem? ³⁵ A sẽn ka tog ne pʋʋgo t’a ka tõe n yɩ birga, a tɛk yaa lobr bala. Sẽn tara tʋb n dat n wʋm bɩ a wʋm.»

¹ Sẽn deegd-b yõor yaood la yel-wẽn-maandba fãa ra kolga a Zezi n na n kelg-ba. ² Farizẽ rãmba ne Sɛb-mitba da guglumdame n yetẽ: «Yãoo reegda yel-wẽn-maandba la a rɩta ne bãmba.» ³ Yaa rẽ yĩnga la b wẽ-b yelbũndi: ⁴ «Anna n be yãmb sʋka n tar pe-yãans koabga t’a ye meneme, t’a pa na n bas piswɛ la a wɛ wã weoogẽ n tɩ bao sẽn menem-a wã al n wa yãend-a? ⁵ A sã n wa yãend-a, a rɩkd-a lame n palg a bãoko n kɩdemnẽ: ⁶ la a sã n ta yiri, a boonda a zo-rãmb la a yagse n yeel ba: ‹Lagem-y maam n kɩdme tɩ m pe-yãanga sẽn da menem, m le yãend-a lame.› ⁷ Woto me mam n yet yãmba, yel-wẽn-maand a ye tuubgu yĩnga, yɩta sũ-noog arzãnẽ n yɩɩd nin-sõma pis wɛ la a wɛ sẽn pa tar tuubg tʋʋmde. ⁸ Bɩ yɛ paga, n tar a tãm-dãmb piiga t’a ye wa menem t’a pa na n yõgen fitila n pɩɩg a roogo n gẽes neere, al n wa yãend-a? ⁹ A sã n yãee-a, a boonda a zo-rãmb la a yags pogse n yeel-ba: ‹Lagem-y maam n kɩdem tɩ m le yãee m tãmbrã sẽn da menem.› ¹⁰ Woto-me, maam n yet yãmba: yel-wẽn-maand a yembre sẽn maan sɩbgre yĩnga, yɩta sũ-noogo Wẽnnaam malɛk rãmb sʋka.» ¹¹ B le yeelame: «Dao a ye n da tar a kamb a yi. ¹² Tɩ yaoã yeel a ba: ‹M ba, bɩ y pʋɩ y paoongã n kõ maam m dẽnna›; la ba wã weela a paoongã n kõ-ba. ¹³ Sẽn yɩ bilf dẽ poore, yaoã wʋka a sẽn da tar fãa n tog sore, n kẽng tẽn-zãorgẽ, la bee a sãama a laoga fãa ne tʋʋm yoodo. ¹⁴ A sẽn dɩ fãa tɩ sɛ, kom kãseng n lʋɩ tẽngã al t’a na n sɩng n yãe naongo. ¹⁵ T’a kẽng n tɩ nok tẽnga nin-yende, t’a soaba tʋma a pʋtẽ t’a tɩ gũud a kurkuya. ¹⁶ A ra tʋllẽ lame n dɩ tɩ-biisa kurkuyã sẽn da rɩtã, a me pids a pʋga, la ned ba a ye ra pa kõt-a ye. ¹⁷ T’a na n bao yam n kõ a menga la a yeel a sũurẽ: ‹Dakõap a wãn n tʋmd m ba nengẽ tɩ rɩɩb sekd-b n keldẽ tɩ mam yẽ be ka n kiid kom! ¹⁸ M na n yikame n kẽng m ba nengẽ, la m na n tɩ yeel-b lame: M ba, m beega Wẽnde la m beega yãmba. ¹⁹ M pa le tog tɩ y bool-m tɩ y biig ye; bɩ y reeg-ma n tall-m wala y tʋʋm-tʋmd a yembre.› ²⁰ La a yikame n dabd a ba nengẽ. A sẽn waa n ket yɩɩga, a ba yãend-a lame, la a weoog kẽe-a lame; la a wudgame n tɩ yõk a biigã n mobg-a, n mok-a. ²¹ Tɩ biiga yeel-a: ‹M ba, m ba, m beega Wẽnde la m beega yãmba; m pa le tog tɩ y bool-m tɩ y biig ye.› ²² La ba wã yeela a sõgen-kamba: ‹Bɩ y kẽng tao n tɩ wa ne fuug ninga sẽn yaa neer n yɩɩd fãa n wa yeelg-a la y kõ-a nug-bĩng t’a pid a nug-bila la neooda t’a widi. ²³ Wa-y ne nag-bil nobdga tɩ d kʋ. D segl rɩɩbo n maan kibsa. ²⁴ Ade, m biiga ra kiime la a le vʋʋgame; a ra menemame la d le yãee-a lame.› Tɩ b na n sɩng n dɩ b rɩɩbo. ²⁵ Dẽ tɩ bi-kãsenga ra bee pʋʋgẽ; a sẽn lɛɛg n wa kolg yiri, a wʋma yɩɩla la reem rãmde. ²⁶ T’a bool sõgen a ye n sok-a: ‹Yaa bõe?› ²⁷ Tɩ sõgna yeele: ‹Yãmb yao wã leb n waame la y ba sẽn le paam n yãend-a ne laafi b kɩtame tɩ b kʋ nag-bi-nobdga.› ²⁸ La kẽema sũur puugame t’a zãgs t’a kõn kẽ zakẽ ye, t’a ba wã yii n yõk a sɛɛga. ²⁹ A leoka a ba: ‹Yaa al yʋʋm zãra la mam tʋmd y tʋʋma; mam nan pa tol n kɩɩs yãmb noor ye la y nan pa kõ maam bull a ye abada tɩ m deeg n maan kibs ne m zo-rãmb ye. ³⁰ La yãmb biig a to wã sẽn tɩ rɩ yãmb paoongã n sɛ, n lɛɛg n wa, yãmb kʋʋ nag-bi-nobdgã a yĩnga.› ³¹ Tɩ ba wã yeele: ‹Foom, m biiga, fo bee ne maam daar fãa wɛ! La mam sẽn tar fãa, foo n so wɛ! ³² La ra segdẽ lame tɩ d maan kibs la d kɩdem tɩ f yaoã ra kiime la a vʋʋgame, a ra menemame, la d le yãee-a lame!› »

¹ A Zezi le yeela b karen-biisi: «Arzɛk soab a ye n da tar arzɛk gũuda tɩ b wa luk a bãongo a zu-soaba nengẽ t’a rɩta a paoongã. ² T’a bool-a n yeele: ‹Fo maana bõe tɩ b gomd f yelle tɩ m wʋmnẽ? Bɩ f geelg m paoonga fãa tɩ m bãng f sẽn maan bũmb ninga, tɩ rũnna tɛka fo kõn le gũ m paoong yɛs ye.› ³ Tɩ arzɛk gũuda yeel a sũurẽ: ‹Mam na n maana a wãn marsã, m zu-soaba sẽn yiisd maam tʋʋmdã? Koob bɩ? M ka tar gãb n kood ye. Bõsg bɩ? A yãnd tara maam. ⁴ Be neere, mam mi m sẽn na n manega, tɩ b sã n wa yiis maam tʋʋmdã bɩ neb reeg maam b zagsẽ.› ⁵ A boola sẽn da tar-b zu-soaba sama, a yembr yembre, n sok pipi soabã: ‹M zu-soaba samd bʋg la fo tara?› T’a leok: ‹Kaam dʋgd koabga.› ⁶ T’a yeel-a: ‹Rɩk f sebre n zĩnd tao-tao n gʋls pisnu.› ⁷ N le yeel a to: ‹La foo, fo tara bõe samde?› T’a leoke: ‹Ki pet koabga.› T’a yeel-a: ‹Rɩk f sebre n gʋls pisnii.› ⁸ Zu-soaba pẽga arzɛk gũudã ne a wagdma fãa, a sẽn maan dabaara yĩnga. Tɩ zamaana kamb tara yẽesem b vɩɩmẽ, n yɩɩd vẽenem kamba. ⁹ La mam yeta yãmba: rɩk-y y arzɛk yoogã n bao yel-sõmd ne nebã t’a sã n wa yõsg y nugẽ bɩ b reeg yãmb vɩɩm sẽn ka sɛɛb rotẽ wã. Sẽn maand-a pʋ-peelem ne sẽn paoode, ¹⁰ a soab na n maana pʋ-peelem ne sẽn waooge; la sẽn maanda zãmb ne sẽn paoode, a soab maanda zãmb me ne sẽn waooge. ¹¹ Ãnda n ne y sẽn zãad tẽng zug bobellã tɩ yõod kaẽ wã, la a le saag n bobend yãmb sẽn be yõodo? ¹² Y ka bãng tẽng zug yõoda zãabo, yĩngr dẽnna la zãng zãnga. ¹³ Dakõor ba a ye ka tõe n maan zu-soaben-dãmb a yiib yam ye; a yam yita ne a ye, n kẽed a to. A yam kẽeda a ye t’a sãbsd a to. Yãmb pa tõe n kẽ Wẽnnaam la m ba Naaba Ligd ye.» ¹⁴ Farizẽ rãmba sẽn da nong ligdã ra kelgda rẽ fãa, la b laad a Zezi. ¹⁵ Tɩ b yeel-ba: «Yãmb baood n na n yɩɩ nin-sõma neb nifẽ la Wẽnnaam nee y sũuri; tɩ sẽn be bark ninsaalb nifẽ, yaa wɩɩbdo Wẽnnaam taoore. ¹⁶ A Zã sẽn waa n nan ka sɩng a tʋʋmna, Noora la Bãngdba sẽn da togsã n da yɛse. A Zã tɛka, b moona Wẽnd Rĩunga la lebga ned kam fãa nadg pãnga n wẽdg n kẽ. ¹⁷ Yĩngr la tẽng sẽn loogd yaa naana n yɩɩd Noora gomd bil a ye sẽn na n lʋɩ vɩʋʋgẽ. ¹⁸ Sẽn yiisd-a a paga n kẽed ne pag a to, maanda yoobo, la sẽn dɩkda pag a sɩd sẽn bas me maanda yoobo. ¹⁹ Arzɛk soab n da be n yeelgd nufa la beren-dɩgr gĩs bãanes fu peelse, n dɩt a rɩ nood la a yãet naare. ²⁰ Naong soab a ye sẽn boond t’a Lazar n da gãe a sɩmannẽ; a Lazar yĩnga fãa ra yaa noada. ²¹ A ra tʋlla rɩ-zeremsa arzɛk soaba sẽn basd tɩ rʋʋgd tẽnga n dɩ n yiis a kom, la ned ba a ye ra pa kõt-a ye; baasa meng ra wat n lelemda a noada. ²² Naong soaba kiime tɩ malɛk rãmb dɩk-a n kẽng a Abraam nengẽ. Arzɛk soaba me kiime tɩ b mum-a. ²³ Arzɛk soaba waa n tara namsg wʋsg bʋg-tẽnga la a sẽn zẽk a nenga, a yãenda a Abraam yɩɩga la a Lazar ra be-la b naoẽ. ²⁴ Arzɛk soaba kelmame: ‹M ba, Abraam, zoe-y m nimbãanega la y tʋm a Lazar t’a tẽk a nug-bil koom n wa tosg m zelemdã tɩ bugma zabda wʋsgo.› ²⁵ A Abraam leokame: ‹M biiga, tẽeg tɩ f vɩɩm wẽnde, fo yãee naare la a Lazar yãee pɛt bala; marsã yẽ n paam yolsg kaane tɩ fo yẽ tar toogo. ²⁶ La rẽ pʋgẽ me, bog zulung n be yãmb ne tõnd sʋka, tɩ d sã n dat n yi ka n kẽng yãmb nengẽ, ka tõe ye, la ka tõe n yi yãmb nengẽ me n wa ka ye.› ²⁷ La arzɛk soaba yeelame: ‹M ba, Abraam, m yõkd-y sɛɛga tɩ y tʋm a Lazar m ba zakẽ ²⁸ tɩ m tara ba-b-biis a nu; a tɩ kõ bãmb kaseto tɩ b me ra wa namsga zĩigẽ ye.› ²⁹ La a Abraam leokame: ‹B tara a Moyiiz la bãngdba, bɩ b kelg-ba.› ³⁰ T’a yeele: ‹Ayoo! M ba, Abraam, sã n ya ned n yi kɩɩms sʋka n bʋʋg-ba n togse, b na maan sɩbgre.› ³¹ T’a Abraam yeel-a: ‹Bada! B sẽn pa kelg a Moyiiz ne bãngdbã, ned vʋʋg kɩɩms sʋk me b kõn deeg ye.› »

¹ A Zezi yeela b karen-biisi: «Bũmb sẽn tõe n lub ned yel-wẽnd pʋgẽ kõn kong abada la na pak ned ninga sẽn wata ne bõn-kãnga. ² B sẽn dɩkd neer kugri n pid a soab kokore, n tak-a, n tus n lub mogrẽ, dẽ são a sẽn wat ne bi-bilf a ye kʋɩɩbgo. ³ Bɩ y gũus y menga! F saam-biig sã n beeg bɩ f sagl-a, la a sã n tuubame bɩ f kõ-a sugri. ⁴ La a beeg-f tɩ ta naoor a yopoe daar a ye, n lɛɛg n wa fo nengẽ naoor a yopoe n yeele: ‹Mam tuubdame,› fo kõt-a la sugri.» ⁵ Tʋʋm-tʋmdba yeela Soaalã: «Paas-y tõnd tẽebo.» ⁶ Tɩ Soaala na n yeele: «Yãmb da tarẽ tẽeb sẽn zemẽ seneve biiga, yãmb yetẽ la mugnugã: ‹Vik n tɩ sel mogra pʋga!› A na reegẽ yãmb noore. ⁷ Yãmb sʋka, ãnd n tar-a a dakõore sẽn kood pʋʋg, bɩ sẽn gũud rũmsi t’a sã n lɛɛg n wa bɩ b yeel-a: ‹Wa zĩnd tao n dɩ?› ⁸ A ka na n yeel-a sɩda: ‹Segl dɩɩb n kõ-ma tɩ m dɩ la m yũ tɩ f me na yaool n dɩ la f yũ?› ⁹ A na pʋʋs a rakõora bark sɩda t’a reega a noor n maan a tʋʋmde? M ka tẽed ye. ¹⁰ Woto me yãmb sã n maand b sẽn kõ-y noor tɩ y maan bũmb ningã bɩ y yeele: ka tõnd la zu-soaba teegr ye, zu-soaba ka rɩt tõnd yõod ye. D maana d sẽn tog n maan bala.» ¹¹ A Zezi ra togda sore. Yaa Zerizalɛɛm la b da rabda la b tũu Samari la Galile sʋka. ¹² B sẽn waa n kẽed tẽng a yembre, wãoob piig n wa n seg-ba, n yas yɩɩga, ¹³ n zẽk b koɛɛg n kelme: «Zezi! Karen-saamba! Zoe-y d nimbãanega!» ¹⁴ La a Zezi yãenda b nimbãanega n na yeel-ba: «Kẽng-y n tɩ wilg y mens maan-kʋʋdba.» La b sẽn wa n dabda, b tek n sãoogame. ¹⁵ La bãmb nin-yend sẽn mik t’a paama laafi, lebg n waame, n zẽk a koɛɛg n pẽgd Wẽnnaam. ¹⁶ A wõgemda a Zezi taoor n pʋʋs-b barka; yẽ yaool n da yaa Samari neda. ¹⁷ La a Zezi yeelame: «Ka bãmb piigã n paam laafi bɩ? A wɛ wã yẽ bɛɛ? ¹⁸ Yɩɩ nin-yenda bal n lebg n wa pʋʋs Wẽnnaam barka?» ¹⁹ B yaool n yeela raoã: «Yik n kẽng, fo tẽeb fãag-f lame.» ²⁰ Farizẽ rãmb sẽn sok a Zezi n na n bãng Wẽnd Rĩungã wata ra-bʋre, b leok-b lame: «Wẽnd Rĩungã ka wat boto, tɩ neb nin neẽ ye. ²¹ B kõn yeele: ‹A bee ka, bɩ a bee ka-sẽnẽ.› Ges-y, Wẽnd Rĩung zoe n be-la y sʋka.» ²² B yeela b karen-biisi: «Daar n wate, tɩ yãmb na n tʋlg n yãe Ned Biiga zamaana daar a ye bala, la y kõn yãend ye. ²³ B wat n yeela yãmba: ‹B bee ka,› ‹B bee ka-sẽne,› ra kẽng-y, ra zoe-y n kẽng-y ye. ²⁴ Tɩ sɩda, wala saag sẽn tãoosd a bugum yaanga n wẽneg n yãg taoore, na n yɩɩ boto ne Ned Biigã, b likra raare. ²⁵ Yaa modgre tɩ b reng n nams wʋsgo, tɩ zamaan kãnga kamba yiis b buudẽ. ²⁶ Sẽn maan a Nowe wẽnnẽ n na n le maan Ned Biiga waoong wakato. ²⁷ Neb da rɩta b rɩɩbo la b yũuda, tɩ rapa peegd pagba, tɩ pagba rɩkd sɩdba tɩ tol n ta a Nowe sẽn kẽ a koglga pʋgẽ daare, la sa-kẽenga koom waame n dɩ-b zãng fãa. ²⁸ Na n yɩɩ wala a Lot wẽnnẽ. Neba ra rɩta rɩɩbo la b yũuda la b raadẽ la b send tɩɩse la b metẽ, ²⁹ la a Lot sẽn yi Sodom daare, saag nii bugum la kidibri tɩ rɩ-b zãng fãa. ³⁰ Ned Biiga me likr daare na n yɩɩ boto. ³¹ Badaare, sẽn be-a a gaosg zugu t’a teed be roogẽ bɩ a ra sig n wʋk-b ye, la sẽn be-b pʋʋgẽ me ra leb b poorẽ ye. ³² Tẽeg-y pag a Lot yelle. ³³ Sẽn na n bao-a a yõor fãagre, na n menes-a lame; la sẽn menesd-a a yõore, na le pam-a. ³⁴ Mam yeta yãmba, ba daar yʋngo neb a yiib na n naaga taab gãag a ye, tɩ b yãk a ye n bas a ye. ³⁵ Pagb a yiib kẽeda neere, tɩ b yãk a ye n bas a ye. [ ³⁶ Neb a yiib kẽngda pʋʋgẽ, tɩ b yãk a ye n bas a ye.]» ³⁷ Karen-biisa yeela a Zezi: «Na n yɩ yɛ, Soaala?» Tɩ b leoke: «Dɩgre sẽn be zĩig ninga, yibrendã tigimda be.»

¹ A Zezi wẽ-b-la yelbũndi n na n wilg tɩ yaa d sẽn na n pʋʋs daar fãa la d ra yɛ ne pʋʋsg ye: ² «Bʋʋd soab n da be tẽnga pʋgẽ n pa zoet Wẽnde, n pa mi ned waoogr ye. ³ Pʋg-kõor a ye me n da be n wat a nengẽ daar fãa ne a koɛɛg: ‹Bɩ y bʋ maam ne m bʋʋd-n-taaga bʋʋd tɩrga n kõ-m bʋʋm.› ⁴ A zãgsame tɩ kaoos la a yaool n wa yeela a sũurẽ: ‹Ba m pa zoet Wẽnd, tɩ m toog ka be ne neb me, ⁵ baasg zãnga, pʋg-kõorã sẽn yaand maama yĩnga, m na bʋ a bʋʋdã n kõ-a bʋʋm t’a ra le wa pẽdgd maam woto daar fãa ye.› » ⁶ Soaala le yeelame: «Wʋm-y bʋʋda soaba ne a wẽnema sẽn yeele. ⁷ La nin-sõma wã sẽn kelemd wĩndg la yʋngã, y pa tẽed tɩ kaoosd me, Wẽnnaam kõn pa n ka rok b nin-sõma wã sũuri. M yet-y lame tɩ Wẽnd na rok-b sũuri. ⁸ La Ned Biiga sã n wa tẽng zugu, b na n pʋd n yãee tẽeb bɩ?» ⁹ A Zezi le wẽe yelbũnd a ye, neb kẽer sẽn da belgd b mense, n tẽed tɩ b yaa nin-sõma, n paoogd b taaba yĩnga: ¹⁰ «Neb a yiibu n kẽ wẽnd doogẽ n na n pʋʋse: a ye da yaa Farizẽ, t’a ye ya fadg rɛɛsda. ¹¹ Farizẽ wã da yɛsa yĩngri n pʋʋsd woto a sũur pʋgẽ: ‹Wẽnnaam, mam pʋʋsda yãmb barka mam sẽn ka wẽnd neb a taab yĩnga, tɩ bãmb yaa yel-wẽn-maandba, wãgda, yoaadba; la m pʋʋsda m sẽn pa wẽnd sẽn deesd-b fadga me. ¹² Mam loeta m noor naoor a yiib dasma a yopoe-poe; mam weenda m paoong fãa piig piiga, n dokd a ye piig zug n kõt Wẽnde.› ¹³ La faodg rɛɛsda da yɛsa yɩɩga n pa saagd n zẽnk a neng meng n tees yĩngr ye, la a ra wẽeda a yãoog n yetẽ: ‹Zoe-y m nimbãanega, tɩ m yaa yel-wẽn-maanda.› ¹⁴ Mam yeta yãmba tɩ yãoo paamda sõmblem n kul a yiri la ka a to wã yẽ ye, tɩ sẽn zẽkda a menga b na n sik-a lame, la sẽn sikd-a a menga b na zẽk-a lame.» ¹⁵ Neb n tall b kom-bõonego n waa a Zezi nengẽ tɩ b sɩɩs-ba. La b karen-biisa sẽn yãe woto, b ra zabda ne-ba. ¹⁶ T’a Zezi kɩt tɩ kamba kolg la b yeelame: «Bas-y kom-bõonegã tɩ b wa maam nengẽ la y ra rig-b ye tɩ sẽn wẽnd b bãmba n so Wẽnd Rĩungu. ¹⁷ Sɩd-sɩda mam yeta yãmba: Sẽn pa reegd-a Wẽnd Rĩungã wala bi-bilfu, yẽ soab kõn kẽ a pʋgẽ ye.» ¹⁸ Rakãagr a ye soka a Zezi woto: «Karen-saamb sõngo, bõe la m na n maan sẽ n paam vɩɩm sẽn kõn sɛ?» ¹⁹ T’a Zezi yeel-a: «Bõe yĩng tɩ y boond maam tɩ karen-saamb sõngo? Wẽnnaam b ye tãa la sõngo. ²⁰ Yãmb mii noya: ‹Da yo ye, da kʋ ye, da maan kaset zirẽ ye, waoog f ba la f ma.› » ²¹ T’a yeel: «Mam deega noya fãa al m yãadmẽ.» ²² A Zezi sẽn wʋm dẽnna, b yeel-a lame: «Bũmb a ye n paoog yamba: koos-y yãmb sẽn tar fãa n dɩk n pʋɩ naong rãmba tɩ y na paam arzɛk arzãna la y yaool n wa tũ maam.» ²³ Rakãagra sẽn wʋm woto, a sũur sãamame, t’a ra tara arzɛgs wʋsgo. ²⁴ La a Zezi sẽn yãe t’a sũur sãamdã, b yeelame: «Ad-y Wẽnd Rĩungẽ wã kõom toama ne sẽn tar-b arzɛka! ²⁵ Yʋgemd sẽn kẽed n sãag supĩim yõorẽ yaa naana n yɩɩd arzɛk soab sẽn kẽed Wẽnd Rĩungẽ.» ²⁶ Sẽn da kelgd-b bãmba leokame: «Sã n ya woto, ãnna n na tɩlge?» ²⁷ T’a Zezi leok: «Sẽn yɩɩd ninsaal pãng faasa ne Wẽnnaam.» ²⁸ A Piyɛr yeelame: «Ade tõnd basa d sẽn tar fãa n tũ yãmba.» ²⁹ T’a Zezi leok-a: «Sɩda, mam yetame tɩ ned kõn bas a yiri, a paga, a ba-biisi, a ba la a ma, a kamba, Wẽnd Rĩunga yĩnga, ³⁰ n ka paam sẽn yɩɩd rẽ al wʋsgo, zamaan kãnga pʋgẽ ye, la zamaan ning sẽn watã, yaa vɩɩm sẽn ka sɛɛbo.» ³¹ A Zezi peega b Tʋʋm-tʋmdb piig la a yiibã n yi kɛɛnga la b yeel-b lame: «Ade, tõnd dabda Zerizalɛɛm, la bãngdba sẽn gʋls bũmb ninga fãa Ned Biiga poorẽ na n taasame, ³² b na n yõk-b lame n kɩs bu-zẽmba tɩ b yaal ba, n pãb-b ne kaase, n tʋbs b neng ne kolkoodo, ³³ la b sã n wa pãb-b ne kaase, b na n kʋ-b lame la b na n vʋʋga dasma a tãab daare.» ³⁴ La Tʋʋm-tʋmdba pa tol n wʋm dẽ võor ba bilfu; gomd kãnga da yaa gom-binem bãmb yĩnga, tɩ b pa wʋmd a võor ye. ³⁵ A Zezi kolga Zeriko la ade, zoang n da zĩ sor kɩrenga n bõsdẽ. ³⁶ A wʋma zãma wã sẽn looda rãamde, t’a sok tɩ yaa bõe? ³⁷ Tɩ b yeel-a tɩ yaa Nazarɛt Zezi n loogde. ³⁸ T’a kelme: «Zezi, Daviid biiga, zoe-y m nimbãanega!» ³⁹ Sẽn da lʋɩ-b taoor n kẽndã da tãsd-a lame m yet t’a sĩndi tɩ yẽ me ra tãsd n yɩɩda: «Zezi, Daviid biiga, zoe-y m nimbãanega!» ⁴⁰ A Zezi yaasame n kõ noor tɩ b tall-a n wa. La zoanga sẽn kolge, b sok-a lame: ⁴¹ «Fo ratame tɩ m maan-f bõe?» T’a leoke: «Soaala, sõng-y tɩ m yãe!» ⁴² T’a Zezi yeel-a: «Bɩ f yãe, fo tẽeb fãag-f lame.» ⁴³ Wakat kãng bala, a nina pukame la a ra tũuda a Zezi n pẽgd Wẽnnaam. Zãma wã sẽn yãe rẽ, bãmb me kilsa Wẽnnaam yʋʋre.

¹ A Zezi kẽe Zeriko la b pɩʋʋg-a lame bala. ² La ade, b sega dao a yembre. Raoã boondame t’a Zase. A ra yaa sẽn deesd-b yõor yaooda naaba la rakãagre. ³ A ra baood n na n yãe-la a Zezi n bãng-ba la zãma wã yĩnga a ra ka tõe n yãend-b ye t’a ra yaa ra-koɛɛga. ⁴ A wudg n denga taoore n tɩ rʋ kũsga, n na n tõog n yãend-ba, tɩ b ra na n looga zĩ kãnga. ⁵ La a Zezi sẽn ta a sẽn da beẽ wã, b zẽka b neng n yeel-a: «Zase! Sig-y tao-tao tɩ rũnna mam sigda yãmb yiri.» ⁶ A Zase siga ne yãgbo n tɩ reeg b sãando ne sũ-noogo. ⁷ Bɛɛba sẽn yãe woto, b ra tara guglungu n yetẽ: «Yaa yel-wẽn-maand yiri la bãmb tɩ yõg gãag-sobendo.» ⁸ La a Zase yalsa yĩngr Soaala taoor n yeel-ba: «Dũnna tɛka, Soaala, m kõta naong rãmba m paoonga pʋɩ-sʋka la m sã n yẽega ned n deeg bũmbu, m na lebs a soaba naoor a naase.» ⁹ La a Zezi yeelame: «Dũnna, fãagr siga yi-kãnga, t’a soaba me yaa Abraam biiga. ¹⁰ Ned Biiga waame n na n bolg la a fãag sẽn meneme.» ¹¹ Neba ra ket n kelgd-b lame tɩ b le paas yelbũndi, tɩ b ra pẽnega Zerizalɛɛm la neba ra tẽedame tɩ Wẽnd Rĩunga na n wẽneg n puka wakat kãnga. ¹² Dẽ la b yeel-ba: «Na-biig a ye n da rabd tẽng sẽn zãrẽ n na n tɩ reeg naam la a lebg n wa. ¹³ A boola a sõgen-kamb piiga n kõ-b sãnem gil piiga n yeel ba: ‹Bɩ y yõdg n mao tɩ bũmb roglge, tɩ m kẽng la m wa.› ¹⁴ Ad-y naaba soolma rãmb ra kis-a-la waare. B tʋma neb n pʋgl, tɩ b tɩ yeele: ‹Tõnd ka rat tɩ yãoo dɩ naam n soogd-d ye.› ¹⁵ A sẽn tɩ paam naam n lebg n wa, a tʋmame tɩ b bool sõgen-kambã n bãng ned kam fãa sẽn paam n doglg tɛka. ¹⁶ Pipi soaba waame, la a yeelame: ‹M naaba, y sãnem gilga roka gil piiga.› ¹⁷ T’a yeel-a: ‹Be neere! M sõgen sõngo, fo sẽn kell n maan pʋ-peelem ne bũmb bilf woto, deeg naam n zã tẽns piiga.› ¹⁸ T’a yiib soaba wa ta n yeele: ‹M naaba, y sãnem gilga roka gil a nu.› ¹⁹ T’a yeel-a: ‹Fo me reeg naam n zã tẽns a nu.› ²⁰ B nin-yend n waa n yeele: ‹Ad-y y sãnem gilgã, m loe-a-la ne peende n bĩng; ²¹ tɩ mam da zoeta yãmba; tɩ yãmb yaa nin-toaaga; yãmb deegda y sẽn pa boble, la y rat n kẽeba y sẽn pa bʋdẽ.› La naaba leok-a lame: ²² ‹Yaa ne f meng goam bala la m na bʋ f bʋʋdo, sõgen yoogo! Fo ra miime tɩ m yaa nin-toaaga, n deegd m sẽn pa boble la m kẽebd m sẽn pa bʋdẽ, ²³ la maana a wãna tɩ fo pa tɩ bobl m ligdã n kõ-ma? M lebgre m da kõn deegẽ m ligdã ne a roaglga?› ²⁴ La Naaba yeela sẽn da be-b be wã: ‹Bɩ y reeg a sãnema n kɩs sẽn tara piigã.› ²⁵ Tɩ b yeel-a: ‹Naaba, a zoe n tara piig wɛ!› ²⁶ T’a yeel: ‹Man yeta yãmba: sẽn tar-a, b kõt-a lame n paase la sẽn pa tar-a, b reegda a bilfrã a sẽn tarã. ²⁷ Sã n ya neb niyns sẽn da pa nong-b tɩ mam yɩ b naabã, bɩ y tall-ba n wa kood mam nifẽ ka.› » ²⁸ A Zezi sẽn gom woto n sɛ, b lʋɩɩ neba taoore n tees Zerizalɛɛm. ²⁹ B sẽn kolg Betani, tãng ning b sẽn boond tɩ Oliviye tãnga, a Zezi tʋma b karen-biis a yiibu: ³⁰ «Kẽng-y tẽnga sẽn tond y taoorã; y sã n ta be y na yãe tɩ b loee bõan-bil ned sẽn nan pa zombe; bɩ y lok-a n wa ne. ³¹ Ned sã n sok yãmba: ‹Yaa bõe yĩng la y lokd-a› bɩ y leok a soab tɩ yaa Soaala n tar a tʋʋmde.» ³² B sẽn kẽnge, b yãenda fãa wala b sẽn da togs-bã. ³³ B sẽn yet tɩ b na n lok bõan-bilã la b rãmb sẽn sok-ba: «Bõe yĩng la yãmb lokd bõan-bilã?» ³⁴ Tɩ b yeele: «Soaala n tar a tʋʋmde.» ³⁵ La b talla bõangã n wa kõ a Zezi. B palga b fut bõanga poore n kɩt t’a Zezi zombe. ³⁶ Neba ra yɛdgda b fut sora zugu tɩ bõanga tabd n lood. ³⁷ B sẽn waa n kolg Oliviye tãnga pende, b karen-biisa ka tɛkã, kɩdmame n sɩng n zẽkd b koɛɛg n pẽgd Wẽnnaam wẽnd makr dãmb fãa b sẽn yãenda yĩnga. ³⁸ B ra yetame: «Sẽn wat-a soabã, Dĩma sẽn wat Soaala yʋʋr yĩnga paam barka! Wẽnd laafi pid ne yĩngr dãmba yĩngr-yĩngr dãmb pid ne ziiri!» ³⁹ Farizẽ rãmb kẽer zĩnda zãma wã sʋka n yeele: «Karen-saamba, kɩt-y tɩ y karen-biisa sĩndi!» ⁴⁰ Tɩ b leoke: «M yeta yãmba, bãmb sĩnd yã, kugã n deegde!» ⁴¹ A Zezi sẽn waa n kolg Zerizalɛɛm n yãend tẽngã, b yãb-a lame: ⁴² «Fo sã n da tõogẽ la rũnna raarã n deegẽ koɛɛga sẽn ya laafi koɛɛgã! La ayoo fo keta likẽ. ⁴³ Daar n wate, tɩ f bɛɛba na n tũ bogdo n gilg-fu n sege, n pag-f zĩig zãnga, ⁴⁴ n wã foo, n lub f rota sara, n kʋ f kamba fãa la b kõn bas kugr t’a rogl a to zugu, f tẽn-peelem pugẽ ye. La rẽ yaa f sẽn pa bãng f sẽn paam gesga raarã!» ⁴⁵ A Zezi kẽe wẽnd doogẽ la b riga sẽn da be-b be n koosdẽ. ⁴⁶ B ra yet-b lame: «B gʋlsame: mam doog yaa pʋʋsg roogo tɩ yãmb dɩk-a n maan fãadba solgr zĩigã.» ⁴⁷ Beoog sẽn vẽeg fãa a Zezi ra karemda neba wẽnd doogẽ. Maan-kʋʋdba kãsem dãmba ne Sɛb-mitba la tẽnga karen-saam-dãmb ra baood n na kʋ-b lame. ⁴⁸ B yaool n da pa mi b sẽn na n maanega, t’a Zezi goama ra noogda neba sũuri tɩ b ra pa yɛɛd ne b kelgr ye.

¹ Daar a ye, a Zezi ra karemda neb wẽnd doogẽ n moond Koe-noogã tɩ maan-kʋʋdba kãsem dãmba la Sɛb-mitba la nin-kẽembã wa yeel-b wakat kãnga: ² «Bɩ y togs-do, tũu ne ãnda noore, la ãnda n kõ yãmb sor tɩ y maan y sẽn maandã?» ³ T’a Zezi leoke: «Mam me sokd-y la bũmb a ye, bɩ y leok ma: ⁴ A Zã sooba yii Yĩngr Soaba nengẽ bɩ ninsaalb nengẽ?» ⁵ La b tagsa woto b sũurẽ: «Tõnd sã n yeel t’a yii Yĩngri Soaba nengẽ, a na n leokd-d lame tɩ bõe yĩng la d pa tẽ a Zã. ⁶ D sã n yeel me t’a yii ninsaalb nengẽ, neba na n laba tõnd ne kuga tɩ b fãa sɩd da tẽedame t’a Zã yaa bãngda.» ⁷ Woto b leokame tɩ b ka mi a Zã sooba sẽn yitẽ ye. ⁸ T’a Zezi yeel-ba: «Mam me kõn togs yãmba sẽn tũ ne ned ninga noor tɩ m maand m sẽn maanda ye.» ⁹ A Zezi yaool n wẽ-b la yelbũndi: «Dao a ye n sel a bugsuntung sõngo n bao koaadba n sar pʋʋgã la a bas n tog sore. Sora ra na n kaoosa bilfu t’a yaool n lɛɛge. ¹⁰ Bugsuntunga womame n ta wobre, t’a tʋm a rakõore t’a tɩ reeg a keoore n wa kõ-a. Koaadba pãba rakõorã, n kuls-a zaalem. ¹¹ A le tʋma rakõor a ye, tɩ b pãb-a, n yaal-a, n kuls-a zaalem. ¹² Tɩ daoã le tʋm dakõor a to, tɩ b pogl yẽ me, n dig-a. ¹³ Pʋʋga soab yeelame: ‹M maanda a wãna? M na n tʋma m bi-nongre tɩ daare b na reeg-a ne waoogre.› ¹⁴ La koaadba sẽn yãee-a, b yẽsa ne taab n yeele: ‹Yãoo n na n wa reeg a ba wã paoongo, aya! D kʋ-a t’a paoonga lebg d rẽnna.› ¹⁵ Tɩ b sɩd lob-a yãgra poore n kʋ-a. Marsã pʋʋga soab na n wa maan-b la bõe? ¹⁶ A na wa, a na kʋ koaadba fãa la a rɩka pʋʋgã n gũnug neb a taaba.» Neba sẽn wʋm gomdã b yeelame: «Wẽnd na laas d ne yell kãnga!» ¹⁷ A Zezi gẽen-b lame n sok-ba: «Sebr sõng gomd kãnga võor la bõe: ‹Tãn-metba sẽn daag kugr ning n basã, yẽ n lebg kug ma?› ¹⁸ Ned ning fãa sẽn lʋɩ kug kãng zugu a na pogl a menga, la kugra sẽn na n lʋɩ n bʋʋg a soaba me, a na fẽdg-a.» ¹⁹ Maan-kʋʋdba kãsem-dãmba la Sɛb-mitba da rat n yõk-b la wakat kãnga bala tɩ b ra miime tɩ yaa bãmb yĩng la a Zezi wẽ yelbũndã la b ra zoeta nebã. ²⁰ Lebga b gũus a Zezi marsã; tɩ b na n tʋm sũdum dãmba, sẽn belg tɩ b yaa nin-tɩrse, mik b baoodame n na n yõk a Zezi b goamẽ, n tɩ kɩs tẽnga soaalba la Komberã. ²¹ Nin-bãmb n soke: «Karen-saamba, tõnd miime tɩ yãmb gomdame la y zãmsd ne pʋ-peelem bala, la y pa zoet ned ba a ye nif ye, y wilgda Wẽnnaam sor ne sɩd bala. ²² D tara sor n yao Rom dĩma yõora yaood bɩ d pa tar sore?» ²³ A Zezi sẽn da mi b zãmbã leok-b lame: ²⁴ «Wilg-y maam wakɩ-koɛɛng a ye: ãnda nin-naande la ãnda yʋʋre la b gʋl a zugu?» Tɩ b yeele: «Rom naaba.» ²⁵ T’a Zezi na n yeel-ba: «Bɩ y lebs Rom naab a sẽn so, la y lebs Wẽnnaam, bãmb me sẽn so.» ²⁶ B ka tõog n yõk a Zezi b gomd ba a ye pʋgẽ la a Zezi leokra yɛɛs-b lame tɩ b sĩnd b noore. ²⁷ Sẽn yet-b tɩ kũum ka vʋʋgda neb kẽere, Saduseẽ rãmba, kolgame n sok woto: ²⁸ «Karen-saamba, ad-a Moyiiz sẽn kõ tõnd noor ninga: Ned sa n tar paga n wa ki n ka rog kamba, bɩ a ba-biiga deeg pagã n dog kamb a yĩnga. ²⁹ La ade, ba-biis a yopoe n zĩndi, tɩ kẽema tall paga n ki, t’a pa rog biig ye. ³⁰ Tɩ yiib soaba, ³¹ la tãab soaba deeg pʋg-kõorã. Yɩɩ boto ne bãmb b yopoe wã fãa: b kiime n pa tol n dog kamb ye. ³² Paga me waa n maana kaalem. ³³ Kũum vʋʋgr daare, paga na n yɩɩ ãnda paga: a zĩnda ne a yopoe wã fãa la?» ³⁴ A Zezi leok-b lame: «Zamaan kãnga kamba kẽeda ne pagba tɩ pagba rɩkd sɩdb rãmba. ³⁵ Neb niynsi Wẽnd sẽn gese wa b tog n paam n lebga zamaan paalga kamba la b vʋʋg-b kɩɩms sʋka, bãmb pa rɩkd paga, bãmb pa kuiis rao ye. ³⁶ Bãmb pa le tõe n ki ye tɩ b yaa wala malɛk rãmba la b lebga Wẽnnaam kamba b sẽn ya vʋʋgr kambã yĩnga. ³⁷ Kũum na vʋʋgã, yaa a Moyiiz n zãms rẽnna, Wẽnnaam sẽn lik-a tʋgrẽ wã wakato, a sẽn bool Soaala t’a Abraam Wẽnnaam, a Izaak Wẽnnaam la a Zakoob Wẽnnaam. ³⁸ Wẽnnaam ka kɩɩms Wẽnnaam ye, b yaa sẽn tar-b vɩɩm Wẽnnaam, tɩ b fãa vɩ bãmb taoore.» ³⁹ Sɛb-mitb kẽer yeelame: «Karen-saamba, yãmb leoka neere!» ⁴⁰ Ned me da pa le saag n sok-b bũmb ye. ⁴¹ A Zezi yeel-b lame: «D yɩta a wãn n yeel tɩ Krista yaa a Daviid biiga? ⁴² Ad-y yaa a Daviid meng n yeel a yɩɩla sebr pʋgẽ: ‹Zu-soaba yeela m Soaala: zĩnd-m dɩtgo ⁴³ tɩ m kɩt tɩ f bɛɛba zõr f taoore tɩ f palg f nao.› ⁴⁴ A Daviid boonda bãmb t’a Soaala, Krista sã n ya a Daviid Soaala, b yɩta a wãn n le ya a biiga?» ⁴⁵ B leoka b karen-biisa tɩ neba fãa kelgdẽ: ⁴⁶ «Bɩ y gũus y meng ne Sɛb-mitbã; b nongame n kẽnd ne fu-wogdo n baood neb waoogr sor zugu; b nonga taoore, pʋʋsg rotẽ; b nonga sʋka dɩɩb zĩigẽ. ⁴⁷ B rɩta pʋg-kõap paoongo, b nong n maana pʋʋs-wogdo: bãmb na n paama sɩbgr sẽn ya toogo.»

¹ A Zezi rooga b nenga la b yãee arzɛk rãmba sẽn da lobd ligdi wẽnd doog koglgẽ. ² B yãee pʋg-kõor me sẽn ya naong soaba t’a ningd bõones a yiibu. ³ Tɩ b yeele: «Mam yeta yãmba tɩ sɩd-sɩda pʋg-kõora sẽn kɩs bũmb ninga ne a naongã yɩɩda bãmba fãa. ⁴ Taaba yãka b sẽn pa tõe n dɩ n sɛ pʋgẽ n kɩse, paga kɩsa a fãa-fãa, a rɩɩb ligdi zãnga.» ⁵ Neb kẽer da waa n gomda wẽnd dooga yelle tɩ b me-a-la ne kug-neeba, la b maneg-a-la ne te-sõma. A Zezi yeelame: ⁶ «Daar n wate, tɩ yãmb sẽn ne wã, bũmb kõn kelle, kugr kõn dogl a to zug tɩ b pa tus-a n lub ye.» ⁷ B sok-b lame: «Karen-saamba, rẽ na n taasa ra-bʋre? Bõe makr n na n wilg yell bãmba taasgo?» ⁸ A Zezi leokame: «Gũus-y tɩ b ra wa tudg yãmb ye. Wʋsg na n dɩka m yʋʋre n wa yeele: ‹Maam la Krista!› ‹La wakata taame›; bɩ y ra tũ-b ye. ⁹ Yãmb sã n wʋm tɩ b gomd zabr yelle la tẽng zũndugr yelle, bɩ y ra yɛɛs ye, tɩ yaa pakre tɩ rẽnd deng n zĩndi, la kõn wẽneg n yɩ dũni sɛɛb ye.» ¹⁰ B le paasame: «Buud a ye n na n yik zabr ne buud a to, tɩ soolma a ye yik zabr ne soolma a to. ¹¹ Tẽnga na n miima miim-bãna, na n yɩɩ kom la bãas zĩig-zĩiga, tɩ yel-bãn sẽn wat ne pɛlen-yɩk la wẽnd makr dãmba maan saag zugu. ¹² La rẽ tɩ b reng n yõga yãmba, n nams yãmba, n wool yãmb n kẽng pʋʋsg rotẽ la bi-bees rotẽ, b na n ninga yãmb nanamsã la kombɛɛmba nusẽ, mam yʋʋr yĩnga. ¹³ Yaa woto la y na n paam n kõ kaseto. ¹⁴ Ning-y woto y yamẽ: da tags-y bõe la y leokda n yiis y meng yellẽ wã ye. ¹⁵ Mam na n kõo yãmb noor la yam tɩ y bɛɛba no-koɛɛma wẽneg n sɛ. ¹⁶ Bãng-y tɩ yaa y roagdba, y ba-biisi, y buuda neb, y zo-rãmba, n na n zãmb yãmba; b na n kʋʋ neb wʋsg yãmb sʋka. ¹⁷ Neb fãa na n kisga yãmba mam yĩnga. ¹⁸ Yãmb zoobg a yembr meng yaool n kõn menem yãmb zugẽ ye. ¹⁹ Yaa y sũ-tõogã n na n wa ne y sɩɩsa fãagre! ²⁰ Yãmb sã n wa yãe tãb-biis kʋʋngo tɩ b yẽt Zerizalɛɛm, bãng-y t’a wãaba kolgame. ²¹ Wakat kãnga, sẽn be-a Zɩɩde bɩ a zoe n tees tãmsa sẽnẽ. Sẽn be-b Zerizalɛɛm bɩ b yi n zãage, sẽn be-b weoogẽ ra lɛɛg n wa a pʋgẽ ye. ²² Rasem kãens na n yɩɩ ra-beedo, yel-beeda sẽn gʋlsa fãa taasg raare. ²³ Na wʋm pagb niyns sẽn tʋte la sẽn yẽsemd b kamb wakat kãnga! Tẽnga na n wʋma pɛta, b na n dɩɩ beem ne buud kãnga. ²⁴ B na n kooda kẽer ne sʋʋse, b na n talla kẽer n kẽng yembdo, n sẽeg-b dũni wã fãa pʋgẽ tɩ Zerizalɛɛm lebg bu-zẽmba tẽnga n tãag b sẽn kõ-b yʋʋm niynsã sõor pidsgu. ²⁵ Yel-bãn na n zĩnda wĩntoogẽ, kiuugẽ ne ãdsa pʋgẽ; tẽng zugu, ninsaal fãa na n zĩi ne yɩɩre, n yɛɛsd mogrã la ko-wiisa rãamde. ²⁶ Yɛl niyns fãa sẽn na n lʋɩ nin-vɩɩsa tẽnsẽ na n yɛɛsa Adem biis fãa tɩ b kong pãnga tɩ sɩda saag zug bõn-zɩsda fãa na n vigsa b zĩigẽ. ²⁷ Dẽ marsã la b yãet Ned Biiga tɩ b zao sawadgo n wat ne pãng la ziir kãsenga. ²⁸ La yell kãens fãa sã n wa sɩngd taasgo bɩ y zẽk y zut n ges tɩ yãmb fãagr kolgame.» ²⁹ B wẽ-b-la yelbũndi: «Ges-y kankang la tɩɩs a taaba fãa. ³⁰ B sã n bilgd tobre, yãmb sã n ges bala y miime tɩ tʋʋlg kolgame. ³¹ Woto me yãmb sa n wa yãend yɛl kãensa fãa taasgo, bãng-y tɩ Wẽnd Rĩung kolgda. ³² Mam yeta yãmb, sɩd-sɩda, tɩ zamaan kãnga neba kõn looge tɩ yell bãmba fãa nan pa maan ye. ³³ Yĩngr la tẽng na n loogame, la mam goama kõn loog ye. ³⁴ Gũus-y y menga tɩ yão-beoogo, dã-yũur, yɩɩre la dũni wã zu-loeese da wa zɩsg yãmb sũuri tɩ Daara wa tiig yãmba, ³⁵ wa zulung ye; tɩ sɩda a na n lʋɩ sẽn be-b dũni wã fãa zugu. ³⁶ Dẽn yĩnga, gũus-y la pʋʋs-y, n paam pãnga n põs yel-beed ninga sẽn wate la y tɩ yaas yĩngri, Ned Biiga taoore.» ³⁷ Wĩntoogo, a Zezi ra zãmsda neba wẽnd doogẽ la yʋngo, b yit n kẽnda Oliviye tãnga zugu. ³⁸ Yibeoog pĩnda zãma wa ra le bʋʋgd-b la wẽnd doogẽ n kelgd b goama.

¹ Bur sẽn pa lobd bɩll kibsa, b sẽn boond tɩ paka, ra kolgame. ² Maan-kʋʋdba kãsem-dãmb ne Sɛb-mitba ra baooda b sẽn na n maan dabaar ning n kʋ a Zezi, tɩ b ra zoeta nebã. ³ Mik Sʋtãan kẽe a Zɩɩda sũurẽ. Zɩɩda kãng la b sẽn boond tɩ Iskariyot tẽng daoã, la a ra yaa piig la a yiiba nin-yende. ⁴ Yẽ n kẽng n tɩ yẽs ne maan-kʋʋdba kãsem-dãmba la wẽnd-do-gũudba nanamse, a sẽn na n maan seem ninga n yõk a Zezi n kɩs bãmba. ⁵ B sũur yɩɩ noog wʋsgo tɩ b sed ne taaba tɩ b na kõ-a ligdi. ⁶ A Zɩɩda sakame n da baood wakat ning bal a sẽn na n tõog n yõk-ba n kɩse tɩ zãma wã ka bãng ye. ⁷ Bur sẽn pa lobd bɩlla raare, pak maoonga kʋʋb raar, taame. ⁸ A Zezi tʋma a Piyɛr ne a Zã. B yeel-b lame: «Kẽng-y n tɩ segl-y pak kibsa tɩ d pam n dɩ a rɩɩbo.» ⁹ Dẽn la b sok-ba: «Yãmb datame tɩ d segl yɛ?» ¹⁰ Tɩ b leoke: «Ade, yãmb sã n kẽ tẽngã, y na n sega rao a ye sẽn zɩt koom ne yʋʋre, tũu-y raoã n tɩ kẽ a sẽn kẽed zak ningã. ¹¹ Y na n yeela yira soaba: ‹Soaala n sokd yãmba: doog bɛɛ tɩ m wa rɩ pak ne m karen-biisi?› ¹² La a na n wilga do-kãsenga sẽn dog a to zugu tɩ zu-kʋgsa zoe n maneg n tʋɩ n dɩgle; yaa be la y na n segl pak rɩɩbo.» ¹³ B kẽngame, b yãee bũmba fãa wala b sẽn da yeele, la b segla pak. ¹⁴ Wakat sẽn ta, a Zezi tɩ zĩndame n na n dɩ; b Tʋʋm-tʋmdba me zĩnda ne bãmba. ¹⁵ B yeelame: «Mam tʋlga ne tʋlsem kãsenga n dɩ pak kãnga ne yãmba la m yaool n namse, ¹⁶ tɩ mam yeta yãmba tɩ m kõn le rɩ pak a to n tãag Wẽnd Rĩungẽ soaba rɩɩb ye.» ¹⁷ B reega rãama laoko n pʋʋs barka n yeele: «Deeg-y woto n pʋɩ taaba. ¹⁸ Tɩ mam yeta yãmba: marsã tɛka, mam kõn le yũ bugsuntung sõnga biis rãam al n tol n ta Wẽnd Rĩunga waoongo.» ¹⁹ B rɩka buri la b sẽn pʋʋs bark n sɛ, b kaoog-a lame n kõ b Tʋʋm-tʋmdbã n yeel: [«Wã yaa m yĩng m sẽn kõ yãmba, maan-y woto n tẽegd mam yelle.» ²⁰ B sẽn dɩ n sɛ, b maana boto me ne yõg-laagã n yeele: «Zood paalga yõgb yĩnga, ad laag ne m zɩɩm sẽn daag y yĩnga.] ²¹ La ade, sẽn yõkda maam n na n kɩsã, a tʋmda a nug laagẽ ne maam. ²² Ned Biiga na n looga wala b sẽn gʋls n dɩglã. La na pak rao ninga sẽn na n yõka bãmb n kɩsã.» ²³ La karen-biisa sɩnga taab sogsgo: bãmb sʋka ãnna n na maan yell kãngã? ²⁴ No-koeemd me n yik bãmb ne taab sʋka tɩ ãnda la kãsma la taoor saoba? ²⁵ A Zezi yeel-b lame: «Bu-zẽmba nanams rɩta naam b neba zutu la b ratame tɩ b neba bool-b tɩ b Yel-sõm-dãmba. ²⁶ Sã n ya yãmba ka tog n yɩ boto ye. Ad-y kãsma n tog n lebg yao-zʋʋga, tɩ sẽn dɩta naama lebg sõgne. ²⁷ Ãnda n pʋd n ya kãsma? Sẽn zĩ-a n dɩtẽ wã bɩ sẽn kɩt-a rɩɩbã? Ka sẽn zĩ-a n dɩtẽ wã laa? La ad maam, m bee yãmb sʋka wala sõgne! ²⁸ Yãmb la sẽn kell n zĩnd-b ne maam dar fãa m namsga pʋgẽ wã. ²⁹ Wala m Ba sẽn tar zĩig y yĩng b Rĩunga pʋgẽ, mam me tara zĩig y yĩnga. ³⁰ Yãmb na n naag maam n dɩ la y yũ m Rĩungẽ wã, la naam goeels la y na n zaoonde n kao Israyɛl sags piig la a yiiba bʋʋdo. ³¹ Simo, Simo, Sʋtãana kosa yãmba n na n bal wala ki. ³² La mam pʋʋsa f yĩnga tɩ f tẽeb ra koms ye la f tẽeba sã n n lɛɛg n wa a zĩigẽ, bɩ f keng f saam-biisa pɛlga.» ³³ A Piyɛr yeelame: «Soaala mam saka a naag yãmb bi-bees roogẽ la m ki ne yãmba.» ³⁴ T’a Zezi yeel-a: «Piyɛr, mam yeta foom tɩ no-raoog kõn kelem dũnna tɩ fo pa reng n kɩɩs naoor a tãab tɩ fo ka mi maam ye.» ³⁵ B le yeela b karen-biisã: «Mam sẽn waa n tʋm yãmba, tɩ y yi n pa zɩ korgo, waoog bɩ neoodre, bũmb paooga yãmb bɩ?» ³⁶ Tɩ b leok: «Bũmb ka paoog-d ye.» Tɩ b yeel-ba: «Marsã yẽ, sẽn tar-a korg bɩ a zɩ, sẽn tar-a waoog me boto la sẽn ka tar-a ligdi, bɩ a koos a fuug n da sʋʋga. ³⁷ Tɩ mam yeta yãmba, yaa modgre tɩ b sẽn gʋls mam poorẽ wã taase. La sẽn gʋlsa la woto: ‹B sõd-a lame n ning bi-bees sʋka.› la sɩda, bũmb ning sẽn togs mam poorẽ wã fãa na n pidsa zãnga. ³⁸ Wakat kãnga Tʋʋm-tʋmdba yeel-b lame: Soaala, ad sʋʋs a yiibu.» Tɩ b leok-ba: «Woto sekame.» ³⁹ B sẽn yi, a Zezi kẽnga Oliviye tãnga zugu, wala b sẽn mii n maand dasem kam; b karen-biisa tũ-b lame. ⁴⁰ B sẽn ta zĩ kãnga b yeelame: «Pʋʋs-y n da lʋɩ kʋɩɩbg pʋgẽ ye.» ⁴¹ La b zãaga ne bãmba sẽn zems wala b sẽn lobgd kugri, la b yĩgimd n pʋʋsa woto: ⁴² «M Ba, y sã n data, zãag-y maam ne wamd kãnga sẽn pid ne toogã la yãmb daabã n so taoore n yɩɩd mam dẽnna.» [ ⁴³ Wakat kãnga malɛk n yi arzãnẽ n lik ba n keng b raoodo. ⁴⁴ Kũum maasma bui-b lame tɩ b le wɩngd ne pʋʋsgo n yɩɩd pĩnda. B tʋʋlga kaooga wa zɩ-pɛla n dʋʋgd tẽnga.] ⁴⁵ B sẽn pʋʋse, b lɛɛg n tɩ bʋʋga b Tʋʋm-tʋmdba n tɩ mik tɩ b gõe, sũ-sãang keelem yĩnga. ⁴⁶ Tɩ b leok-ba: «Yaa wãna tɩ yãmb gõe! Yik-y la pʋʋs-y n da lʋɩ kʋɩɩbg pʋgẽ ye.» ⁴⁷ A Zezi sẽn da ket n gomda, neb kʋʋng waame la b sẽn boonda soab tɩ Zɩɩda, Tʋʋm-tʋmdb piig la a yiiba nin-yende, n da lʋɩ b taoore; a kolgame t’a na n mobg a Zezi. ⁴⁸ La a Zezi yeel-a lame: «Zɩɩda, foo n na n mobgd Ned Biiga n zãmb-b wɛ?» ⁴⁹ Sẽn da be-b ne a Zezi yãenda yell ninga sẽn na n maana. B yeelame: «Soaala, d kɛɛd-b la ne sʋʋg bɩ?» ⁵⁰ La nin-yend kɛ maan-kʋʋd kãsma sõgne n kẽbg a rɩtg tʋbre. ⁵¹ La a Zezi gomame m yeele: «Bas-y boto.» La b sɩɩsa raoã tʋbre n sãoog-a. ⁵² La b kedg n yeela maan-kʋʋdba kãsem-dãmba la wẽnd doog gũudba nanamse sẽn da wa bãmb yõkrã: «Yãmb waa ne sʋʋs la rasaba wala y babsda wagdre. ⁵³ La mam da yaool n bee ne yãmb beoog sẽn vẽeg fãa la y pa tol n sɩɩs-m ye la marsã yaa y wakato la lik naaba tõogr daare.» ⁵⁴ B sẽn yõk a Zezi b tall-b lame n kẽng maan-kʋʋd kãsma yiri. A Piyɛr da pʋgda yɩɩga. ⁵⁵ B tugla bugum zaka tẽnsʋka la b zĩndame t’a Piyɛr taa n zĩnd ne bãmba. ⁵⁶ La yem-poak a ye sẽn yãee-a t’a zĩ n woot bugma, a ges-a la ges toogo n yeele: «Dao kãnga me ra tũud-a lame.» ⁵⁷ T’a Piyɛr kɩɩs woto: «Paga, ad mam ka mi-a ye!» ⁵⁸ Sẽn yɩ bilf dẽ poore, ned a to n le yãee a Piyɛr n yeele: «Fo me yaa bãmba nin-yende.» T’a Piyɛr yeele: «Daoa, ka sɩd ye.» ⁵⁹ Sẽn kaoos na ta wakat a ye, ned n le wa n togsdẽ n dɩdgdẽ: «Sɩd menga, a zĩnda ne Raoã, a yaa Galile neda.» T’a Piyɛr leoke: ⁶⁰ «Foo waa! Mam ka m mi fo sẽn dat n yeel tɩ bũmb ning ye.» A sẽn da ket n gomda, no-raoog wẽneg n kelmame. ⁶¹ Soaala wẽnega b poorẽ la b gesa a Piyɛr. A Piyɛr tẽega Soaala sẽn da yeel-a: «No-raoog kõn kelem dũnna tɩ f pa reng n kɩɩs naoor a tã tɩ f ka mi maam ye!» ⁶² A Piyɛr yii yɩnga la a yãba yãb-toogo. ⁶³ Sẽn da gãd-b a Zezi wã ra laad-b lame, n pãbd-ba. ⁶⁴ B da luta b neng ne peende n sokd-ba: «Bãng ãnd n wẽ foo!» ⁶⁵ La b ra tʋʋda a Zezi tʋʋr buud fãa. ⁶⁶ Zĩig sẽn yẽege, tẽng nin-kẽemba, maan-kʋʋdba, kãsem-dãmba la Sɛb-mitba tigma taaba n kɩt tɩ b tall a Zezi n wa bʋʋd zĩigẽ. ⁶⁷ B yeelame: «Sã n ya foo la Krista, bɩ f togs-do!» A Zezi leok-b lame: «Mam togs yãmb me, yãmb kõn tẽ ye ⁶⁸ la m sok-y bũmb me y kõn leok-m ye. ⁶⁹ Marsã tɛka Ned Biiga na n zĩnda Wẽnd-Pãng-Soaba rɩtgo.» ⁷⁰ Tɩ b fãa yeele: «Dẽn yĩnga, fo yaa Wẽnnaam Biiga?» La b leokame: «Yãmb yeelame, maam la bãmba.» ⁷¹ Tɩ b na n yeele: «Tõnd le tara kaset dãmb tʋʋmd bɩ, d meng wʋma a noor goama.»

¹ Bãmb fãa yikame n tall a Zezi n taa a Pilat taoore. ² La b sɩnga a Zezi rõadga: «Tõnd linga yãoo t’a rãmbd tẽngã n yet tɩ b tõdg noore, tɩ b ra yao Rom naaba yaood ye, la b baad tɩ yẽ meng la Krista-Dĩma.» ³ A Pilat soka a Zezi: «Fo yaa Zʋɩf rãmb dĩma?» T’a Zezi leoke: «Foo n yeele.» ⁴ A Pilat yeela maan-kʋʋdba kãsem-dãmb la zãma wã: «Mam pa ne nin kãnga sẽn beeg ne yell ning ye.» ⁵ La bãmb da tara dɩdgre: «A rãmbda neba ne a karengã, tɩ b ra sak noor ye; la karengã maana Zɩɩde tõre, la sɩnga Galile n yaool n ta ka.» ⁶ A Pilat sẽn wʋm dẽnna, a sokame tɩ daoã yaa Galile ned laa? ⁷ La a sẽn bãng tɩ b yaa Erod soolem neda, a tʋm-b-la a Erod nengẽ tɩ yẽ me ra bee Zerizalɛɛm wakat kãnga. ⁸ La a Erod sẽn yãe a Zezi, a sũur yɩɩ noog al wʋsgo, t’a ra tʋlla b yãeebo al daar zãra; a ra wʋma b yelle, la a ra tẽedame tɩ b na maan bõn-bãnd a ye t’a yãe. ⁹ A sok-b-la bũmb wʋsgo la a Zezi pa leok ye. ¹⁰ Maan-kʋʋdba la Seb-mitba ra bee be n dõt-b ne b pãng tɛka. ¹¹ La a Erod naaga tãb-biisã n paoog a Zezi, n yaal-ba, n yeelg-b naam fuug sẽn ya neer wʋsgo la a lebs-b-la a Pilat. ¹² Badaar tɛka, a Pilat ne a Erod sẽn da ya beema, lebga zoodo. ¹³ A Pilat tigma maan-kʋʋdba kãsem-dãmba, ne gũudba nanamse la zãma wã n yeel-ba: ¹⁴ «Yãmb talla nedã n wa kɩs maam n yeel t’a zẽkda neb zutu. Ade, mam sok-a la y nifẽ ka, la m pa yãe y sẽn ningda taal ne bũmb ningã, a sẽn sɩd maan ye. ¹⁵ A Erod me pa yãe ye, tɩ b lebs-a t’a wa mam nengẽ. Nedã ka maan bũmb sẽn tog ne kũum ye. ¹⁶ La sẽn ya woto wã, maan na n sɩbg-a lame n yaool n bas-a.» [ ¹⁷ Pak kibs fãa a Pilat da yiisda nin-yend bi-beesa roogẽ.] ¹⁸ La neba fãa lagma taab n kelem: «Bɩ f kʋ nin-kãnga la f yiis a Barabas n kõ-do.» ¹⁹ B ra kẽesa a Barabas bi-bees roogẽ a sẽn kaoog zabr tẽng pʋgẽ la a sẽn kʋ ned yĩnga. ²⁰ A Pilat sẽn da rat n bas a Zezi wã le goma ne zãma wã. ²¹ B fãa da kelemdame: «Ka-a pika! Ka-a pika!» ²² T’a Pilat sok-ba, naoor a tãab soaba: «A maana bõe sẽn ya wẽnga? Mam yẽ pa yãe a sẽn maan yell ninga tɩ sek kũum ye. Dẽn yĩnga mam na n sɩbg-a lame n yaool n bas-a.» ²³ B ra wɩngda ne bʋʋre n kotẽ tɩ b ka a Zezi pika. Bʋʋra sɩd da yãngdame n paasdẽ. ²⁴ A Pilat kaoo bʋʋdã tɩ yɩ wala bãmb sẽn datã. ²⁵ A yiisa ned ning sẽn da rãmba tẽnga, n tol n kʋ ned tɩ b kẽes-a bi-bees roogã, a yiisa yẽndã roogo wala b sẽn da kote, n yaool n bas a Zezi tɩ b maan b sẽn date ne bãmba. ²⁶ B sẽn waa n tar a Zezi n dabda, b yõka Sirɛn daoa a yembre, a Simo, sẽn da kẽng weoogo n lɛɛg n watẽ la b zɩlg-a-la pika zɩɩbo, t’a Zezi be taoore t’a pʋgd poorẽ. ²⁷ Zãma kãseng meng n da tũudi. Pagb me n da naage n tar wiisgu la b pĩisd b yãoogo. ²⁸ A Zezi wẽneg n yeel-b lame: «Zerizalɛɛm pagba, da yãb-y maam ye, yãb-y y menga la yãb-y y kamba! ²⁹ Ade, daar n wate tɩ b na n yeele: Zu-noog rãmba la pig-kiiri la sẽn pa rog-ba, la sẽn pa yẽsem-b kamba! ³⁰ Wakat kanga, b na n yeela tãmse: bɩ y lʋɩ n bʋʋg-do! La b yeel kunkuba bɩ y sirg n bus-du! ³¹ B sẽn maan da-maasr woto, na n yɩla a wãna ne ra-koeenga?» ³² B talla bi-bees a yiib me n na tɩ lagem a Zezi n kʋ. ³³ B sẽn ta zĩig ning sẽn boond tɩ zu-wanga, b kaa a Zezi pika; b kaa bi-bees a yiiba me, a yembre, b rɩtgo, a yembre, b goabga. ³⁴ A Zezi yeelame: «M Ba, kõ-y b sugri tɩ b ka mi b sẽn maand ye.» Tãb-biisa rɩka a Zezi futã n poees n pʋɩ taaba. ³⁵ Zãma wã ra yɛsa be n getẽ. Tẽnga kãsem-dãmba ra laad-b lame n yetẽ: «A fãaga a taaba, bɩ a fãag a menga, a sã n ya Krista, Wẽnd sẽn tũus a soaba.» ³⁶ Tãb-biisa me ra laad-b lame; b kolgame n kõ-b rã-miisga la b maandẽ: ³⁷ «Fo sã n ya Zʋɩf rãmb dĩma bɩ f fãag f meng f toore!» ³⁸ Walg a ye n da be b zugẽ tɩ b ra gʋls woto: «Yãoo yaa Zʋɩf rãmb dĩma.» ³⁹ Bi-bɛɛg a ye sẽn da luund pika, da tara a Zezi tʋʋr n yetẽ: «Fo ka Krista laa? Fãag f menga, la f fãag-do!» ⁴⁰ Tɩ bi-bɛɛg a to wã zab-a n yeele: «Fo me ka zoet Wẽnd laa? Ges tɩ f paama sɩbgr wa bãmba. ⁴¹ Sã n ya tõndo, zemsame, tɩ d paama sɩbgr ninga sẽn tog ne d yel-manesem; la bãmba, b pa tar b toorẽ yell ye.» ⁴² La a yeelame: «Zezi, tẽeg-y m yelle, yãmb sã n lɛɛg n wa n na n dɩ y naama.» ⁴³ A Zezi leok-a lame: «Sɩd-sɩda, mam yeta foom, rũnda bala, fo na n zĩnda arzãnẽ ne maam.» ⁴⁴ Da zemsa wĩnto-sʋka, la zĩig fãa lebga lik tẽng zugu, n tãag zafare. ⁴⁵ Wẽnd dooga peen-lillã kẽega a tẽnsʋka. ⁴⁶ A Zezi moona ne b koɛɛg pãnga: «M Ba, m lebsda m vɩɩsma yãmba.» B sẽn yeel woto, b kiime. ⁴⁷ Tãnsoaba yãe yɛla fãa sẽn maana, a pẽga Wẽnnaam la a yeelame: «No-koeemd ka ye, raoã da yaa nin-sõngo!» ⁴⁸ Kʋʋnga me sẽn da tigim n na n gesã, yãenda yella sẽn baas to-to, tɩ b na n lɛɛg la b tood b yãoogo. ⁴⁹ La a Zezi zo-rãmbã, la pagb niyns sẽn yãag-b al Galile, bãmb fãa ra yɛsa yɩɩg n getẽ. ⁵⁰ Tẽng kãsem-dãmba sʋka, dao a ye n da be n boond t’a Zozɛf. A ra yaa nin-sõngo, nin-tɩrga, ⁵¹ a ra pa lob a toog bʋʋda kaoobẽ, la a taaba manesmẽ ye; a ba yir da yaa Arimati, Zʋɩf rãmba tẽng a yembre, la a ra gũuda Wẽnd Rĩung waoongo. ⁵² A bʋʋga a Pilat n tɩ kos a Zezi yĩnga. ⁵³ A sik-b la pika zugu n pil-b ne peende, n tɩ gãneg-b yaoog a ye sẽn kɩbg pĩigẽ tɩ b ra nan pa mum ned a pʋgẽ ye. ⁵⁴ Da yaa pak kibsa seglgo daare, sibr sẽn nan sɩngde. ⁵⁵ Pagb niyns sẽn yi Galile n wa ne a Zezi wã, yãaga a Zozɛf n tɩ bãng yaooga zĩiga, la b sẽn mum a Zezi to-to, ⁵⁶ la b lɛɛg n tɩ segla yũ-nooda kaam la tɩdarã. La Sibra daare, bãmb vʋʋsame wala noora sẽn date.

¹ At daar yibeoog pĩnda, pagba kẽnga yaoogẽ wã ne tɩdarã la yũ-noodã b sẽn da seglã. ² B taa n mikame tɩ b ra bilga kugrã n zãag ne yaooga noore. ³ B kẽeme la b ka yãe Soaala Zezi yĩnga ye. ⁴ B ra ka mi b sẽn na n tags bũmb ninga yell kãng poorẽ ye. La ade, dap a yiibu sẽn yer fut sẽn pɩnd waa n yaasa bãmb taoore. ⁵ Pagba yɛɛsame n kõs b neng tẽnga. La rapa yeel-b lame: «Bõe yĩng la y baood kɩɩms sʋka sẽn kẽnda ne vɩɩma? ⁶ B ka le be ka ye! B vʋʋgame! Tẽeg-y b sẽn da yeel bũmb ninga tɩ b nan ket Galile: ⁷ ‹Yaa pakre tɩ b yõk Ned Biiga n kɩs yel-wẽn-maandba tɩ b ka-b pika, tɩ b vʋʋg dasma a tãab daare.› » ⁸ La Wakat kãnga pagba sɩd tẽega a Zezi goama. ⁹ Pagba yii yaoogẽ n lɛɛg n tɩ togs rẽ fãa (Tʋʋm-tʋmdb) piig la a ye wã la neb a taaba. ¹⁰ Da yaa Magdala Mari, a Zan, a Mari, a Zak ma wã. Pagb a taaba sẽn da tũud bãmba, bãmb me togsa Tʋʋm-tʋmdba boto. ¹¹ La b pa tẽ b goama n yet tɩ b zʋbsdame. ¹² A Pɩyɛr yikame n wudg n kẽng yaoogẽ wã la a sẽn tɩ zõond n gese, a yãee pɛɛla bal sẽn da rɩge. La a lɛɛg n kula yiri, n yɛɛsd wʋsgo ne bũmb ninga sẽn maana. ¹³ Badaare me, karen-biis a yi n da rabd tẽng a ye sẽn boond tɩ Emmayus; tẽnga ra zemsa wakata yiib kẽnd ne Zerizalɛɛm. ¹⁴ Yaa bũmb ning fãa sẽn maam pẽem-pẽema la b ra gomd ne taaba. ¹⁵ La bãmb sẽn da wa n yẽsdẽ la b wẽed no-koɛɛma ne taaba, a Zezi kolgame n kẽnd ne bãmba. ¹⁶ La yɩɩ wa b ra luda b nina tɩ b ka tõe n bãng-b ye. ¹⁷ A Zezi yeel-b lame: «Yãmb kẽndame la y yẽsd bõe yell ne taaba?» Tɩ b na n yaas ne sũ-sãanga. ¹⁸ La bãmb nin-yend sẽn boond t’a Kleopas, leok-b lame: «Yãmb y ye bala n be Zerizalɛɛm n zɩ bũmb ning sẽn maan dasem kãensã?» T’a Zezi yeel-a: ¹⁹ «Bõe yelle?» Tɩ b yeel-ba: «Nazarɛt Zezi wã yelle. Bãmb sẽn yɩ bãngda, pãng soaba b goamẽ la b tʋʋmnẽ, Wẽnnaam la neba fãa taoore. ²⁰ Tɩ maan-kʋʋdba kãsẽm dãmba la nanamsã yõk ba n kɩs tɩ b kao b kũum bʋʋdo n paalg-ba, n ka-b pika. ²¹ Tõnd da tẽedame tɩ bãmb n da na n fãagẽ Israyɛl, la ade, yaa dasma a tã rũnna, la yell bãmba maan yã. ²² Yaa sɩda, pagb kẽer sẽn be tõnd sʋka n waa n yɛɛs tõnd al wʋsgo; b yeelame tɩ b kẽnga yaoogẽ wã tõd-beoogo, ²³ n pa tɩ yãe-b ye, tɩ b lɛɛg n wa yeel tɩ malɛk rãmba m n lik bãmba, n togs tɩ b vɩɩme. ²⁴ Tɩ tõnd neb kẽer kẽng yaoogẽ wã n tɩ yãe bũmba fãa wala pagba sẽn togsã, la b mengã, b sɩd pa yãe-b ye.» ²⁵ T’a Zezi na n yeel-ba: «Yam kɩds rãmba, y sũura maaga zãnga tɩ y pa tẽed bãngdba sẽn yeel ye. ²⁶ Da ka pakr tɩ Krista nams woto n yaool n kẽ b pẽgr pʋgẽ bɩ?» ²⁷ La b sɩnga ne a Moyiiz n saag bãngdba fãa n vẽnegd bũmb ning fãa sẽn gʋls bãmb poorẽ. ²⁸ B sẽn waa n kolg tẽng ning b sẽn da rabdã, a Zezi maana wa b rat n yõsg n taa taoore. ²⁹ La neb a yiiba pẽdg-b lame n yetẽ: «Bɩ y kell n pa ne tõndo tɩ lebga zaabre la wĩndg rat n kẽeme!» A Zezi kẽeme n zĩnd ne bãmba. ³⁰ La b sẽn da zĩi n dɩt ne bãmba, b rɩka buri n pʋʋs bark pʋʋsgo, n kaoog n kõ-ba. ³¹ Dẽ marsã la b nin yaool n puki tɩ b na n bãng ba; la a Zezi menema b nifẽ. ³² Tɩ b yeel taaba: «Tõnd sũura ra tʋʋla wa bugum b sẽn waa n sõsd ne tõnd sor zugu la b wilgd tõnd sebr sõnga võore.» ³³ Wakat kãng bala b yikame n leb Zerizalɛɛm la b tɩ mika piig la a ye wã, ne b tũud-n-taase, sẽn tigim taaba, ³⁴ la sẽn yeel-ba: «Sãmbg ka ye, Soaala vʋʋgame; b lika b meng a Simo!» ³⁵ Karen-biisa me wẽneg n togs-b la bũmb ning sẽn maan sor zugu ne bãmb b yiibã la b sẽn yɩlẽ n bãng a Zezi, bura kaoogr wakato. ³⁶ Bãmb sẽn da gomd woto ne taaba, a Zezi meng waa bãmb sʋka la b yeel-b lame: ³⁷ «Laafi zĩnd ne yãmba!» La b yɛɛsame tɩ rabeem kãseng yõk-ba tɩ b ra tẽedame tɩ yaa kɩɩma la b sẽn ne wã. ³⁸ A Zezi yeel-b lame «Yaa bõe tɩ yãmb yɛɛsdẽ la yaa bõe tagsgo n wat yãmb sũurẽ? ³⁹ Ges-y mam nus la m nao. Sɩd yaa maam! Bɩ y sɩɩs-m n ges; kɩɩm pa tar nemd la koaba wala yãmb sẽn ne tɩ m tara ye.» ⁴⁰ La b sẽn yeel woto b wilga b nus la b nao. ⁴¹ B sẽn da ket n pa tẽed, sũ-noog keelem yĩnga, la b ket n yɛs ne pɛlen-yɩka, ⁴² a Zezi yeel-b lame: «Yãmb tara bũmb ka sẽn na n dɩ bɩ?» B kɩs b la zĩm sẽedgo la sɩ-vaka ⁴³ tɩ b reeg n dɩ bãmb taoore. ⁴⁴ T’a Zezi yaool n yeel-ba: «Yaa woto la mam sẽn da togs yãmb, m sẽn da waa n ket ne yãmba, da yaa modgre, tɩ b pids sẽn gʋls bũmb ning fãa mam poorẽ, a Moyiiz noora sebrẽ, bãngdba sɛbẽ la yɩɩla sebrẽ.» ⁴⁵ Dẽ poore a Zezi vẽnega b yam tɩ b wʋm sebr sõng võore. ⁴⁶ La b yeel-b lame: «B gʋlsa woto tɩ Krista na n namsame la b vʋʋg kɩɩms sʋka dasem a tã daare. ⁴⁷ Gʋlsame yɛsa tɩ tuubg ning sẽn wat-a ne yel-wẽna sugrã, bɩ b moon-a bãmb yʋʋr yĩnga ãndunĩ rãmba tẽnsẽ la sɩngda Zerizalɛɛm. ⁴⁸ Yãmb tara rẽ fãa kaseto. ⁴⁹ La ade, mam na n tʋma yãmba m Ba sẽn kãab yamb a soabã. La yãmba, kell-y n yaas-y tẽnga pʋga al tɩ b wa sudg-y yĩngri pãnga.» ⁵⁰ A Zezi peeg-b lame n tees Betani sẽne la b zẽka b nus n ning-b barka. ⁵¹ La b sẽn waa n ningd-b barkã, b bas-b lame n dʋ yĩngri. ⁵² Bãmb wõgemdame n waoog-ba la b leba Zerizalɛɛm ne sũ-noog kãsenga, ⁵³ la wakat buud fãa b ra bee wẽnd doogẽ wã n pẽgd Wẽnde.