ZÃ

ZÃ

¹ Sɩngr wẽnnẽ, Gomd da pĩnd n beeme; la Gomda ra bee ne Wẽnnaam; la Gomda ra yaa Wẽnnaam. ² Al sɩngr wẽnnẽ, b ra bee ne Wẽnnaam. ³ Bũmb fãa gilli yaa bãmb n naane, la bõn-naand ba a ye ka be tɩ ka bãmb n naan ye. ⁴ Vɩɩma ra bee bãmb pʋgẽ, la vɩɩm kãng ra yaa ninsaalb vẽenem. ⁵ La vẽenem yãga lik sʋka, la likẽ dãmba pa reeg vẽenema ye. ⁶ Dao a yembre n zĩndi, Wẽnnaam sẽn da tʋme, t’a yʋʋr boond t’a Zã. ⁷ Yẽ waame n na n kõ kaseto, n na n kõ vẽenem kaseto, tɩ neb fãa tõog n tẽ a kaset yĩnga. ⁸ Yẽ da ka vẽenema meng ye, yẽ waame n na n kõ vẽenem kaseto. ⁹ Gomdã n da ya Vẽenem meng menga, sẽn vẽnegd ninsaal fãa sẽn dog tẽn zugu. ¹⁰ Bãmb da bee dũniya pʋgẽ, bãmb n pʋs n naan dũniya la dũni wã ka bãng-b ye. ¹¹ Bãmb waa b soolem pʋgẽ, la b neba ka reeg-b ye. ¹² Neb niyns fãa sẽn deeg-b bãmba, neb niyns fãa sẽn tẽ-b bãmb yʋʋre, b kõ-b-la tõogo tɩ b lebg Wẽnnaam kamba. ¹³ Sã n ya bãmb menga, b rogame tɩ ka tũ ne zɩɩm, bɩ ne yĩng pãnga, bɩ ne ninsaal tʋlsem ye, tɩ yaa Wẽnd n dog bãmba. ¹⁴ La Gomda lebga neda, la b waa n zĩnda tõnd sʋka, la d yãenda b ziirã, ziir ninga Ba sẽn kõ b Bi-yende sẽn pid ne sõmblem la sɩda. ¹⁵ A Zã kõo bãmb kaseto, n yetẽ: «Yaa bãmb yell la m gom yã: ‹Sẽn wat-b mam poorẽ wã, ad-b sẽn lʋɩ m taoore tɩ b renga maam n beẽ.› » ¹⁶ N-ye! Yaa bãmb pidungẽ wã, la tõnd fãa me paam kũun woo kũuni. ¹⁷ Yaa a Moyiiz n kõ Noorã, la sõmblem la sɩda yita a Zezi Krista nengẽ. ¹⁸ Ned ba a ye nan pa yãe Wẽnnaam ye, la b Bi-yenda bala, sẽn be ne bãmba, yãee bãmb n kɩt tɩ neb bãng-ba. ¹⁹ Ad-a Zã kasetã sẽn yɩ a soaba, Zʋɩf rãmba sẽn waa n tʋm maan-kʋʋdba ne b sõangdba tɩ b tɩ sok-a: «Yãmb yaa ãnna?» ²⁰ A Zã togsame, a pa zãgs leokr ye, a togs-b lame: «Mam ka Krista ye.» ²¹ Tɩ b sok-a: «Yãmb la a bõe? Yãmb la a Eli bɩ?» T’a yeele: «Mam ka a Eli ye.» «Yãmb yaa bãngd bɩ?» T’a leok tɩ ayoo! ²² Tɩ b le sok-a: «Yãmb la ãnna, tɩ d paam n leok sẽn tʋm-b tõnda? Yãmb yeta me tɩ y meng la a bõe?» ²³ T’a Leoke: «Mam yaa sẽn moond-a weoogẽ wã koɛɛga: ‹Maneg-y Soaala sore,› t’a yɩ tɩrga wala bãngda Izayi sẽn yeele.» ²⁴ B sẽn da tʋm b rãmba ra yaa Farizẽ rãmba. ²⁵ La b leb n sokame: «Fo sã n ka Krista, n ka a Eli, n ka bãngd me, yaa bõe yĩnga la fo sood neba?» ²⁶ La a Zã leokame: «Sã n ya maam, mam soda neb koomẽ, la ned a ye n be yãmb sʋka, tɩ yãmb ka mi-b ye, ²⁷ yaa bãmb n na n wa mam poorẽ, la mam pa tog n lok b gãndalsa gĩs ye.» ²⁸ La yell-kãensa fãa maana Betani, Zʋrdẽ kʋɩlg rʋʋnde, a Zã sẽn da be zĩig ning n sood nebã. ²⁹ Vẽkembeoogo, a Zã yãe a Zezi sẽn da wat a nengẽ la a yeelame: «Ad Wẽnnaam Pe-bilã, ad sẽn yẽesda dũni yel-wẽnde. ³⁰ Yaa bãmb yelle la m gom yã m sẽn yeele: ‹Ned a yembre n pʋgd m poorẽ, la a yɩɩda maam, tɩ b renga maam.› ³¹ La mam da ka mi-b ye la yaa sẽn na yɩlẽ tɩ b bãng-b Israyɛl tẽn-peelmẽ, la mam wa yã, n sood neb koomẽ.» ³² A Zã kaseta yɩɩ woto: «Mam yãee a Vʋʋsem Sõng sẽn zĩnd yĩngr n sigd wa walle, n wa yaas b zugu. ³³ La mam da ka mi-b ye, la sẽn tʋm b maam tɩ m wa so neb koomẽ wã ra yeel-m lame: ‹Fo sẽn na n yãend a Vʋʋsem Sõng sẽn sig n yaas ned ninga zugu, yaa yẽ soab n sood neba ne a Vʋʋsem sõngo.› ³⁴ La mam yãeeme, la m kõta kaseto, tɩ bãmb la Wẽnnaam Biiga.» ³⁵ Vẽkẽmbeoog yɛsa, a Zã le waa a zaamẽ zĩigã ne a karen-biis a yiibu. ³⁶ La a sẽn yãee a Zezi sẽn looda, a yeelame: «Ad Wẽnnaam Pe-bila.» ³⁷ La Karen-biis a yiiba wʋma a goama, la b tũ-la a Zezi. ³⁸ La a Zezi wẽnega b poorẽ n yãe tɩ b pʋgd-ba tɩ b sok-ba: «Yãmb baooda bõe?» Tɩ b leoke: «Rabbi, karen-saamba, yãmb yiir bee yɛ?» ³⁹ Tɩ b yeel-ba: «Wa-y n ges-y.» La b kẽngame, la b yãee Zezi sẽn da be zĩig ninga la b paa ne a Zezi badaare, la dẽ tɩ zĩig zoe n maagame. ⁴⁰ Neb a yiib n da wʋm a Zã goama n pʋg a Zezi. Bãmb nin-yend la a Andre, a Simo ba-biiga. ⁴¹ Yẽ n reng n seg a Simo n yeel-a: «Tõnd yãee Krista, Wẽnd Nedã.» ⁴² La a tall-a lame n kẽng a Zezi nengẽ; la a Zezi ges-a lame n yeel-a: «Foom la a Simo, a Zonas biiga, b na bool-f-la a Kefas» – dat n yeelame tɩ Kugri. ⁴³ Vẽkembeoogo, a Zezi sẽn yet tɩ b rabda Galile, b sega a Filip n yeel-a: «Tũ maam!» ⁴⁴ A ra yaa Bɛtsayid neda, a Andre la a Piyɛr tẽnga neda. ⁴⁵ La a Filip sega a Natanayɛl n yeel-a: «A Moyiiz sẽn gom a soab yell Noora sebrẽ tɩ bãngdba me togsã, tõnd yãend-b lame: ya a Zezi, Nazarɛt Zozɛf biiga.» ⁴⁶ La a Natanayɛl leokame: «Kari! Sẽn be bark tõe n yii Nazarɛt bɩ?» T’a Filip yeele: «Bɩ f wa ges!» ⁴⁷ La a Zezi sẽn yãee a Natanayɛl t’a wat b nengẽ, b goma a yell woto: «Ad Israyɛl biig menga sẽn ka tar zãmb ye.» ⁴⁸ T’a Natanayɛl yeel: «Yãmb bãnga maam yɛ?» T’a Zezi leoke: «A Filip sẽn da waa n nan ka bool fooma, fo sẽn da wa n be kankanga tẽngrã, mam yãee foom.» ⁴⁹ T’a Natanayɛl yeele: «Karen-saamba, yãmb yaa Wẽnnaam Biiga, yãmb yaa Israyɛl Dĩma.» ⁵⁰ La a Zezi leokame: «Yaa mam sẽn yeel tɩ m yãe-f-la kankanga tẽngre la fo tẽeda, la fo na yãe sẽn yɩɩd boto.» ⁵¹ La b paasame: «Sɩd-sɩda, mam yeta yãmb tɩ y na n yãee yĩngr sẽn pake tɩ Wẽnnaam malɛk rãmba dʋʋd la b sigd Ned Biiga zugu.»

¹ La dasma a tãab dẽ poore, yikãadem n zĩnd Kana, Galile tẽnga, la a Zezi ma da bee be. ² La b boola a Zezi ne b karen-biisã tɩ b wa kibsã. ³ La rãam waa n paoogame t’a Zezi ma yeel-ba: «B ka le tar dãam ye!» ⁴ T’a Zezi leoke: «Paga, tɩ f yet tɩ m maan bõe? Ad-m wakat nan pa ta ye.» ⁵ La b ma yeela rakõapã: «Bɩ y maan b sẽn na n yeel-y tɩ y maan fãa.» ⁶ La kug sĩms a yoobe n da tẽg beenẽ, tɩ Zʋɩf zakẽ, koom sẽn na n waas ka tog n kong ye. Sĩng fãa da reegda ko-yʋy a yiib bɩ a tãabo. ⁷ A Zezi yeela rakõapã: «Pids-y sĩmsa ne koom.» La b pids-b lame n sãdge. ⁸ T’a Zezi yeel-ba: «Bɩ y toog marsã n tɩ kɩs sẽn geta rɩɩba yelle.» La b tallame n tɩ kɩs-a. ⁹ La yẽ soaba sẽn lemb kooma sẽn lebg rãama – a da ka mi rã-kãng sẽn yitẽ ye, la dakõapa sẽn toog kooma, da miime – a boola pʋg-sɩdã, ¹⁰ n yeel-a: «Ned kam fãa rengd n waa ne rãam sẽn noome tɩ neba sã n yũ n tɩge, bɩ a yaool n wa ne rã-faasgã, la yãmb yẽ kell n yiisa sẽn noome, n ta marsã!» ¹¹ Dẽ yɩ-la a Zezi pipi wẽnd makre, b sẽn maan Kana, Galile tẽnga. Bãmb puka b zɩɩre la b karen-biisa fãa tẽ-b lame. ¹² Dẽn poore, b siga Kafarnaom ne b ma, ne b saam-biisi, ne b karen-biisi la b tɩ zĩnda be dasma a wãn bala. ¹³ Zʋɩf rãmba pak ra kolgame t’a Zezi kẽng Zerizalɛɛm. ¹⁴ La b yãee wẽnd doogẽ wã neb sẽn da be be n koosd lolse, piisi ne wala la b zĩi n tekd ligdi. ¹⁵ La b rɩka wĩ n maan kaase n dig bãmb fãa ne b niis la b piis n yiis wẽnd doogẽ. La b sẽega ligd tɛkdba ligdi, n tus b teedã n lubi. ¹⁶ La b yeela sẽn da koosd-b wala: «Yiis-y fãa ka, la y ra rɩk m Ba roogã n maan teed koosg roog ye.» ¹⁷ La karen-biisa tẽega sẽn gʋlsã: «Yãmb dooga nonglem na n dɩ-m la zãnga.» ¹⁸ Zʋɩf rãmba yeel-b lame: «Yãmb sẽn maan woto wã, bõe n wilgd tõnd tɩ y tara rẽ tõogo?» ¹⁹ T’a Zezi leok-ba: «Wã-y wẽnd do kãnga la dasma a tãab pʋgẽ, m na me-a n yalse.» ²⁰ Tɩ Zʋɩf rãmba leok-ba: «Yaa yʋʋm pis naas la a yoob pʋgẽ la b me wẽnd do-kãnga tɩ yãmb tõe n me-a n yals dasma a tãab pʋgẽ?» ²¹ Mik a Zezi da gomda b menga yĩng sẽn ya wẽnd dooga yelle. ²² Woto me la b sẽn waa n vʋʋg kɩɩms sʋka, b karen-biisa tẽegame tɩ b ra yeel-b la rẽ la b tẽe sebr sõng la gomdã b sẽn da togsã. ²³ A Zezi paa Zerizalɛɛm pak kibsa yĩnga. Neb wʋsg tẽ b yʋʋre, b sẽn yãe wẽnd makr dãmb b sẽn maana. ²⁴ A Zezi yẽ da ka teeg neba woto ye, tɩ b ra mii bãmb fãa sẽn ya-la, ²⁵ b ra ka baood ninsaal kaseto, tɩ bãmb meng ra mii sẽn be ninsaal pʋgẽ.

¹ Ned n da be n boond t’a Nikodɛm; a yʋʋr ra yii Zʋɩf rãmba sʋka la a ra yaa Farizẽ. ² A wa-la a Zezi nengẽ ne yʋngo, n yeel-ba: «Karen-saamba, tõnd miime tɩ Wẽnd n tʋm yãmb d nengẽ tɩ y wa zãms-do. Sɩda ned ba a ye ka tõe n maan wẽnd makr niyns yãmb sẽn maandã, Wẽnnaam sã n ka be ne a soab ye.» ³ La a Zezi leokame: «Sɩd-sɩda, mam yeta yãmba tɩ ned sã n pa le rog yĩngr dogma, a pa tõe n yãend Wẽnd Rĩung ye.» ⁴ La a Nikodɛm yeelame: «Sẽn lebga nin-kẽema na n le roga wãn wãna? A tõe n le kẽe a ma pʋgẽ n le rog bɩ?» ⁵ La a Zezi leokame: «Sɩd-sɩda, mam yeta yãmba, tɩ ned sã n ka rog ne koom la ne Vʋʋsem, a ka tõe n kẽ Wẽnd Rĩung pʋgẽ ye. ⁶ Yĩng sẽn dogde, yaa yĩnga, la Vʋʋsem sẽn dog a soab me tara bãmb wẽnego. ⁷ Bɩ y ra yɛɛse, m sã n yeel-y tɩ yaa modgre tɩ y le roge, yĩngr dogma. ⁸ Sobg fõta a sẽn date, fo wʋmda a sẽn vũudi la f ka mi a sẽn yitẽ la a sẽn dabd zĩig ning ye. Yaa boto ne a Vʋʋsem sẽn dog a soaba.» ⁹ La a Nikodɛm leok-b lame: «Dẽ yɩta a wãna?» ¹⁰ A Zezi yeelame: «Yãmb yaa Israyɛl karen-saamba, n yaool n ka wʋmd rẽnna? ¹¹ Sɩd-sɩda, mam yeta yãmba, tɩ tõnd gomda d sẽn mi, la d sẽn yãe bũmb ningã kaset la d kõta. La yãmb ka reegd d kaseta ye. ¹² Yãmb sã n pa tẽed-ma, mam sã n togsd yãmb tẽng zug yelle, y yɩta a wãn n tẽ-ma, m sã n wa togsd yãmb yĩngr yelle? ¹³ La ned ba a ye ka rʋ arzãna, sã n ka sẽn zĩnda arzãna n sigi: Ned Biigã. ¹⁴ Wala a Moyiiz sẽn zẽk waafa weoogẽ wã, woto me yaa modgre tɩ b zẽk Ned Biigã, ¹⁵ sẽn na yɩlẽ tɩ sẽn tẽ-a bãmba, bɩ a tũ bãmb n paam vɩɩm sẽn kõn sɛ. ¹⁶ Wẽnnaam sẽn nong dũniya al wʋsg yĩnga, b kõ b Bi-yende, sẽn na n yɩlẽ tɩ sẽn tẽed-b bãmba da menem ye, la b paam vɩɩm sẽn kõn sɛ. ¹⁷ Wẽnnaam pa tʋm b Biiga dũniya tɩ b wa kao dũi bʋʋd ye, b tʋm-b lame tɩ dũni paam fãagre, bãmb maasem yĩnga. ¹⁸ Sẽn tẽed-a bãmba, b ka bʋʋd yẽ soab bʋʋd ye; la sẽn pa tẽed-a bãmba, a bʋʋd zoe n bʋʋme, t’a pa sak n tẽ Wẽnnaam Bi-yend yʋʋr ye. ¹⁹ La bũmb ninga sẽn wata ne bʋʋda la woto: Vẽenem waa dũni pʋgẽ, la ninsaalb yam kẽe lika n yɩɩd vẽenem tɩ b tʋʋma ra yaa yoodo. ²⁰ Ned ning fãa sẽn maand wẽnga, kisa vẽenem la a pa wat vẽenemẽ ye t’a tʋʋma wẽnem na n wa puki. ²¹ La ned ninga manesem sẽn tũud sɩda, yẽ soab wata vẽenemẽ, tɩ b bãng vẽenega, t’a tʋʋma tʋma Wẽnd maasmẽ.» ²² Dẽ poore a Zezi kẽnga Zɩɩde ne b karen-biisã la b zĩnda be ne bãmba n kõt neb soobo. ²³ A Zã me ra sooda neba Aeno, Salim baobgo, tɩ kooma ra yaa wʋsg beene tɩ neb wʋsg ra watẽ t’a sood-ba. ²⁴ La rẽ wẽnd tɩ b ra nan pa kẽes a Zã roog ye. ²⁵ La a Zã karen-biisa yika no-koeemd ne Zʋɩf a ye, sooba poorẽ. ²⁶ La b wa a Zã nengẽ n yeel-a: «Karen-saamba, dao ninga sẽn da be-b ne yãmb Zʋrdẽ kʋɩlg rʋʋnde tɩ yãmb kõ a soab kasetã, ad-y yẽ me kõta soob marsã tɩ neb fãa zoet n dabd a nengẽ.» ²⁷ La a Zã leokame: «Ned ka tõe n paam bũmb, tɩ pa yĩngr soabã n kõ-a ye. ²⁸ Yãmb meng yaa m kaset tɩ m da yeelame: ‹Mam pa Krista ye, la b tʋma maam tɩ m deng bãmb taoore.› ²⁹ Sẽn so-a pagã, yẽ la pʋg-sɩda; la pʋg-sɩd zoa sã n yɛs n kelgdẽ, noogda a sũuri a sẽn wʋmd pʋg-sɩda koɛɛgã. Mam sũ-noog la boto, la m sũ-noog pida zãnga. ³⁰ Yaa modgre tɩ bãmb zẽke tɩ mam leb poorẽ. ³¹ Sẽn yit-a yĩngri zʋʋga fãa; la sẽn yit-a tẽng zugu yaa tẽng zug neda, la a gomda tẽng zug yɛl bala. Sẽn yit-a yĩngri, ³² yaa yẽ me sẽn yãe la a sẽn wʋm bũmb ninga kaseto la a kõta, la ned ba a ye pa reegd a kaset ye. ³³ La sẽn deegd-a kaseto, yẽ me maanda kaset n paas tɩ Wẽnnaam yaa sɩda. ³⁴ Wẽnnaam sẽn tʋm a soaba, togsda Wẽnnaam goama, la Wẽnnaam pa kõt yẽ soab a Vʋʋsem Sõng bilf bal ye. ³⁵ Ba nonga Biiga, la b basa bũmb fãa bãmb nugẽ. ³⁶ Sẽn tẽed-a Biiga tara vɩɩm sẽn kõn sɛ, la sẽn pa tẽed-a Biiga, a kõn paam vɩɩm ye, yaa Wẽnnaam sũ-puur bala n paad ne-a.»

¹ Farizẽ rãmba wʋmame t’a Zezi paamda karen-biisi la b sooda neb wʋsgo n yɩɩd a Zã, ² – yaool n da ka a Zezi meng n da sood nebã, yaa b karen-biisã. – A Zezi sẽn bãng rẽ, ³ b yi Zɩɩde n leb Galile. ⁴ La da yaa modgre tɩ b pɩʋʋg Samari. ⁵ B waa n taa Samari tẽng a ye sẽn boond tɩ Sikar; yaa be la a Zakoob da kõo a biig a Zozɛf pʋʋgo. ⁶ Bulg me la a Zakoob ra tuk be. A Zezi ra kẽn n yɛɛ fãa; b waa n zaoonda bulga kogre. Ra yaa wĩnto-sʋka. ⁷ Samari pag a ye n wa n na n toog koom. A Zezi yeel-a lame: «Toog koom n kõ-m tɩ m yũ.» ⁸ Dẽ tɩ b karen-biisa ra kẽnga tẽng pʋgẽ n na n tɩ ra rɩɩbo. ⁹ La Samari paga sok-b lame: «Yaa wãna tɩ yãmb sẽn ya Zʋɩfã kot maam koom, maam ne m ya Samari pagã?» (Sɩd me Zʋɩf rãmba la Samari rãmba da ka sõsd ne taab ye.) ¹⁰ La a Zezi leok-a lame: «Fo sã n da miẽ Wẽnd kũuni, la f miẽ sẽn yet-a fooma: Kõ-m koom tɩ m yũ, fo meng n na n kosẽ, la yaa ko vɩɩg la a na n kõẽ foo.» ¹¹ Tɩ paga yeele: «M zu-soaba! Yãmb pa tar bũmb sẽn na n toog kooma, la bulga zulmame, woto wã yãmb na n yãee ko-vɩɩga yɛɛnẽ? ¹² Yãmb yɩɩda d ba a Zakoob sẽn kõ tõnd bul kãnga, tɩ bãmb meng ne b kamb la b rũmsa yũ a kooma laa?» ¹³ La a Zezi leokame: «Sẽn yũud-a ko kãnga, ko-yũud na le yõk-a. ¹⁴ La sẽn yũud-a koom ninga mam sẽn na n kõ-a wã, ko-yũud kõn le yõk-a abada; la koom ninga mam sẽn na n kõ-a wã na n bula a pʋgẽ n tãoos vɩɩm sẽn kõn sɛ koom.» ¹⁵ La paga yeelame: «Soaala, kõ-y maam ko kãnga tɩ ko-yũud da le yõk ma, tɩ m da le wat n toogd koom ka ye.» ¹⁶ Tɩ b na n yeel-a: «Kẽng n tɩ bool f sɩda la f lɛɛg n wa.» ¹⁷ La paga leokame: «Mam ka tar sɩd ye.» T’a Zezi yeel-a: «Fo bee bʋʋm n yet tɩ f ka tar sɩd ye. ¹⁸ Tɩ fo paama sɩdb a nu, la fo sẽn be ne a soab marsã wã, ka f sɩd ye; woto wã fo togsa sɩda.» ¹⁹ La paga yeelame: «Soaala, mam miime marsã tɩ yãmb yaa bãngda. ²⁰ Tõnd yaab rãmb waooga Wẽnnaam tãn-kãnga zugu, la yãmb yetame tɩ yaa Zerizalɛɛm bala la zĩig ninga b sẽn tõe n waoog Wẽnnaam.» ²¹ La a Zezi yeelame: «Paga, bɩ f tẽ maam, ad sã n yɩ bilfu kõn le yɩ tãn-kãnga zugu bɩ Zerizalɛɛm, la y na n waoog Ba ye. ²² Yãmb waoogda y sẽn pa mi. Tõnd waoogda d sẽn mi, tɩ fãagr yita Zʋɩf rãmba nengẽ. ²³ La sã n yɩ bilfu – la zoe n taame – sẽn waoogd-b Wẽnd sɩdem-sɩdem, na n waooga Ba b yamẽ la ne pʋ-peelem, tɩ yaa waoogr a woto buudu la Ba rata. ²⁴ Wẽnnaam yaa yam bala, Dẽn yĩnga sẽn waoogd-b bãmbã, bɩ b waoog-ba b yamẽ, ne pʋ-peelem.» ²⁵ La paga yeel-b lame: «Mam miime tɩ Wẽnd Nedã, b sẽn boond a soab tɩ Krista, sã n wa, b na n zãms-d-la bũmba fãa.» ²⁶ La a Zezi yeelame: «Mam meng sẽn gomd ne fooma, yaa maam la bãmb bala.» ²⁷ Karen-biisa me lɛɛg n waame, la b pɛleng yɩkame t’a Zezi ra gomda ne paga; la ned ba a ye yaool n pa saag n sok-ba: «Bõe la y baooda?» bɩ «Bõe la y leokd pagã?» ²⁸ Paga basa a yʋʋrã n zoe n kẽng tẽng pʋgẽ n tɩ yeel tẽnga rãmba: ²⁹ «Wa-y n ges rao sẽn wilg maam m yel-manesem fãa, sãnd ka bãmb la Krista?» ³⁰ La tẽnga rãmb sɩd yiime n tees b sẽn da be zĩig ningã. ³¹ Karen-biisa yaool n da yet-b lame: «Karen-saamba, bɩ y rɩ!» ³² Tɩ b yeel-ba: «Yãmb ka mi rɩɩb ning m sẽn na n dɩ wã ye!» ³³ La Karen-biisa soka taaba: «Ned n tall rɩɩb n wa kõ-b bɩ?» ³⁴ T’a Zezi yeel-ba: «Mam rɩɩbo, la m maan sẽn tʋma maama yamleoogo la m baas b tʋʋmda zãnga. ³⁵ Ka yãmb n yete: ‹Keta kiis a naase tɩ ka-kɛɛr ta?› La mam yeta yãmba: zẽk-y y neng n ges pʋto, b pelgame n ta kɛɛbo. ³⁶ La sẽn tigsd-a zoe n paamda a yaood, la a tigsda vɩɩm sẽn kõn sɛ yĩnga, la woto bʋta la tigsda naagda taab n kɩdemnẽ. ³⁷ Sã n ya yãmba, yaa yelbũnd kãnga la sɩda: sẽn bʋta wã toore, sẽn tigsda wã me toore. ³⁸ Mam tʋma yãmb tɩ y tigsi y sẽn pa tʋm n namsẽ. Neb a taab n yãee yaamse tɩ yãmb dokd b namsga yõodo.» ³⁹ Tẽnga pʋgẽ, neb wʋsgo tẽeme, paga gomd kãnga yĩnga: «A togsa maam m sẽn maan fãa.» ⁴⁰ La Samari neba sẽn wa b nengẽ wã kos-b lame tɩ b zĩnd ne bãmba; tɩ b na n pa be dasma a yi. ⁴¹ La sẽn tẽ-ba, a Zezi gomdã yĩng, yɩɩ wʋsgo. ⁴² B ra pus n yeta pagã: «Ka le ya f goama yĩng la tõnd tẽed ye tɩ tõnd meng d toore wʋma bãmba la d bãnga vẽenega tɩ bãmb la dũni Fãagda.» ⁴³ Dasem a yiib kãens sẽn looge, a Zezi yii Samari n kẽng Galile. ⁴⁴ Bãmb meng n da yeele tɩ bãngd zɩ n paam pẽgr a tẽngẽ ye. ⁴⁵ Baasgo b sẽn ta Galile, Galile rãmb deeg-b lame la rẽ yaa b sẽn yãend a Zezi sẽn maan fãa Zerizalɛɛm kibsa wakato, tɩ bãmb me ra waa kibsã. ⁴⁶ B leba Kana, b sẽn tek kooma t’a lebg rãama zĩig ningã. Nin-naab a ye biiga n da bẽede, Kafarnaom tẽnga. ⁴⁷ Nin-naaba sẽn wʋm t’a Zezi yii Zɩɩde n wa Galile, a bʋʋg-b lame n kos-b tɩ b wa sãoog a biigã tɩ bãaga ra lebga toogo. ⁴⁸ La a Zezi yeelame: «Yãmb sã n pʋs n pa yãe bõn-bãna, la wẽnd makre y kõn tẽ bada!» ⁴⁹ La nin-naaba leok-b lame: «Wa-y bala tɩ m biiga nan ka loog ye.» ⁵⁰ A Zezi yeel-a lame: «Kul tɩ f biiga vɩɩme.» A tẽe a Zezi goama la a rɩka sor n kuiisẽ. ⁵¹ A sẽn waa n sigd Kafarnaom, a tees n sega a sõgen-kamba la bãmb togs-a lame t’a biiga ket n vɩɩme. ⁵² La a sẽn sok-b tɩ yaa wakat bʋg la a sãoog yã, b leok-a lame tɩ yaa zaame, wakat a yopoe soaba la a yĩn-wɩngra sig yã. ⁵³ Biiga ba tẽegame tɩ yaa wakat kãng la a Zezi yeel-a t’a biiga vɩɩme, la yẽ ne a zak rãmb fãa tẽe Soaalã. ⁵⁴ Woto la wẽnd makr a yiib soaba a Zezi sẽn maane b sẽn yi Zɩɩde n lebd Galile.

¹ Dẽ poore, Zʋɩf rãmb kibs a ye n zĩnd Zerizalɛɛm t’a Zezi kẽng. ² Bull a ye n be Zerizalɛɛm, n pẽ piisa dignoor, n bond ne Zʋɩf rãmb goam tɩ Bɛtzata, tɩ zãn a nu gũbg-a. ³ La bãad-dãmb kʋʋngo: zoeense, wobse, põya, n da gãe zãna tẽngre n gũud kooma rãmbgo, ⁴ tɩ Soaala malɛk a ye n da miẽ n sigd wakat-wakat, bulla pʋga, n dãmbd kooma la ned ninga sẽn da reng-a n kẽ, kooma rãmbg poore, ra paamd-a laafi zãnga, ba a bãaga sẽn da ya a soaba. ⁵ Dao a yembr n da lʋɩ bãaga al yʋʋm pistã la a nii. ⁶ La a Zezi sẽn yãe t’a gãe la b ra mi t’a yika bãaga al daar zãra, b yeel-a lame: «Fo rat n sãoogame bɩ?» ⁷ Tɩ raoã leoke: «Soaala m pa tar ned sẽn na n kẽes maam bullẽ wã kooma rãmbg wakat ye, mam sã n yet tɩ m na n kẽ fãa, ned a to n dengd maam.» ⁸ T’a Zezi yeel-a: «Yik la f rɩk f gãagã n kẽne.» ⁹ La bãada wẽneg n sãoogame, n yik n dɩk a gãaga n kẽnda. Yaool n da yaa vʋʋsg daare. ¹⁰ La Zʋɩf rãmba yeela raoã sẽn da paam laafi wã: «Dũnna yaa vʋʋsg daare, fo ka tõe n tʋk f gãag ye.» ¹¹ La daoã leok-b lame: «Ned ninga sẽn sãooga maama yeel-m lame: ‹Yik n dɩk f gãag n kẽne.› » ¹² Tɩ b sok-a: «Sẽn yeel-a foo tɩ f yik n dɩk f gãagã n kulã, a soab la ãnna?» ¹³ La sẽn paam-a laafi wã ra ka mi sẽn ya a soab ye, t’a Zezi ra soos n yi neb kʋnga sẽn da be be wã sʋka n looge. ¹⁴ A Zezi yaool n wa yãe-a-la wẽnd doogẽ n yeel-a: «Ad-f sẽn paam laafi marsã, gũs n da le maan yel-wẽnde tɩ yell wa pak foo n yɩɩg pĩnd ye.» ¹⁵ La daoa zoe n tɩ togsa Zʋɩf rãmba tɩ ya a Zezi n sãoog-a. ¹⁶ Yaa rẽnd yĩnga la Zʋɩf rãmba da zabd ne a Zezi tɩ b maana woto vʋʋsg daare. ¹⁷ La a Zezi yeel-b lame: «M Ba ket n tʋmda al ne marsã, tɩ mam me tʋmnẽ.» ¹⁸ La rẽ yĩnga Zʋɩf rãmba ra tʋlla wʋsgo n kʋ-ba, tɩ ka vʋʋsga daar noor bal la b ra tõdgda, b ra paasame tɩ Wẽnd la bãmb Ba menga, n zengd b meng ne Wẽnde. ¹⁹ La a Zezi yeel-b lame: «Sɩd-sɩda, mam yeta yãmb: Biiga ka tõe n maan bũmb b toor ye, sã n ka b yãenda b Ba tɩ b maanda. Ba sẽn maan bũmb ningã, bõn-kãng la bãmb me maanda. ²⁰ Ba nonga Biiga, la b wilgda Biiga b sẽn maand fãa, la b na n wilg-b-la tʋʋm sẽn yɩɩd woto menga al tɩ y pɛleng na n yɩke. ²¹ Wala Ba sẽn vʋʋgd kɩɩmse n leb n kõt-b vɩɩm, woto me Biiga kõta vɩɩm b sẽn dat a soaba ²² Ba meng ka bʋʋd ned ba a ye bʋʋd ye, b basa bʋʋd fãa ne Biiga, ²³ sẽn na yɩlẽ tɩ ned fãa waoog Biiga, wala b sẽn waoogd Ba. Sẽn ka waoogd-a Biiga, ka waoogd Ba sẽn tʋm Biiga ye. ²⁴ Sɩd-sɩda, mam yeta yãmb tɩ sẽn kelgd-a mam goama, la a tẽed sẽn tʋma maama, yẽ soab tara vɩɩm sẽn kõn sɛ la b kõn bʋ a soab bʋʋd ye; yẽ soab yii kũumẽ n kẽ vɩɩm pʋgẽ. ²⁵ Sɩd-sɩda, mam yeta yãmba: wakat kolgame, – la wakat zoe n taame – tɩ sẽn ki-ba na n wʋm Wẽnnaam Biiga koɛɛga, la sẽn na n wʋm-b koɛɛga fãa na n vɩɩndame. ²⁶ Wala Ba sẽn tar vɩɩm b nengẽ, b kɩtame tɩ Biigã me tar vɩɩm b nengẽ ²⁷ la b kõ-b-la tõog tɩ b kao bʋʋdo b sẽn ya Ned Biiga yĩnga. ²⁸ Bɩ y pɛleng ra yɩk ye, tɩ wakat na n taame tɩ sẽn be-b yaadẽ na n wʋm b koɛɛga ²⁹ la b na n vʋʋgame: sẽn maan-b neere na n vʋʋga vɩɩm vʋʋgre tɩ sẽn maan-b wẽnga vʋʋg bʋʋd yĩnga. ³⁰ Mam ka tõe n maan bũmb m toor ye, m kaooda bʋʋdã wala m Ba sẽn wilg-m, la m bʋʋda tɩrga tɩ ka m daab la m tũuda, m tũuda sẽn tʋm-b maama raabo. ³¹ Sã n ya maam n kõt m meng kaseto, m kaset ka kaset ye. ³² Yaa ned a to n kõt-m kaseto, la m miime tɩ kaset kãng yaa sɩda. ³³ Yãmb tʋma neb a Zã nengẽ, la yẽ kõo kaset sɩda. ³⁴ Ka yet tɩ yaa ninsaal kaset la m teegr ye; m sã n gomd woto, yaa yãmb fãagr yĩnga. ³⁵ A Zã da yaa fitil sẽn yõgen t’a bugum wita, la yãmb tʋlg n kɩdma a vẽenemẽ wakat yɛng. ³⁶ La mam yẽ tara kaset sẽn yɩɩd a Zã rẽnna: yaa tʋʋm niyns m Ba sẽn kõ-m tɩ m tʋm n taasã, yaa tʋʋm niyns m sẽn tʋmna menga n kõt-m kaset tɩ yaa m Ba n tʋmd-m. ³⁷ M Ba sẽn tʋm maama yaa bãmb n kõt-m kaseto la yãmb nan pa wʋm b koɛɛga, y nan ka yãe m Ba neng ye, ³⁸ la b goama ka paad ne yãmb daar fãa ye, la rẽ yaa y sẽn ka tẽed b sẽn tʋm a soabã. ³⁹ Yãmb karemda Sebr sõng ne gũusgu, tɩ y tẽdame tɩ yaa sebr sõng n na n kõ-y vɩɩm sẽn kõn sɛ, la yaool yaa sebr sõng n kõt-m kaseto, ⁴⁰ la bõe tɩ y ka rat n wa m nengẽ, n paam vɩɩm! ⁴¹ Mam ka reegd pẽgr sẽn yit ninsaalb nengẽ ye. ⁴² Mam mii-y lame: m miime tɩ Wẽnnaam nonglem ka be y pʋgẽ ye. ⁴³ Mam yaool n wata m Ba yʋʋr yĩnga la y pa reegd-m ye. Ned a to sã n yaool n wa a meng yʋʋr yĩnga, y reegd-a lame. ⁴⁴ La yãmb na n yɩɩ wãna n tẽ, y sã n baood y pẽgr y taab nengẽ n yaool n pa baood pẽgr ninga sẽn yita Wẽnd yenda nengẽ balã? ⁴⁵ Da tẽ-y tɩ m na n ning-y la taale, m Ba taoor ye. Sẽn ningd-a yãmb taale, ya a Moyiiz, yãmb sẽn teeg a soabã. ⁴⁶ Yãmb sã n da tẽedẽ-la a Moyiiz, y tẽedẽ-la mam me, tɩ yaa mam yelle la a Moyiiz gʋls yã. ⁴⁷ La yãmb sã n pa tẽ a sẽn gʋls bũmb ningã, y yɩta a wãna n tẽ m goma?»

¹ A Zezi yaool n dʋʋga Galile mogr sẽn boond tɩ Tiberiyad me. ² Zãma kãseng ra tũud-b lame, tɩ b ra yãeta wẽnd makr dãmba b sẽn da maande bãad-dãmba yĩngã. ³ A Zezi dʋʋ tãngã n zĩnd ne b karen-biisã. ⁴ Dẽ wẽnd tɩ pak sẽn ya Zʋɩf rãmb kibsã yaoome. ⁵ La a Zezi sẽn zẽk b neng n mik tɩ neb wʋsg wʋsg wata b nengẽ, b yeela a Filip: «D na n daa bur yɛ n kõ bãmba tɩ b rɩ?» ⁶ B da sokd-a-la woto n na n ges a sẽn na n yeele, tɩ bãmb meng ra mii b sẽn na n maanega. ⁷ A Filip leokame: «Ba ligda ta koeems kobsi, a bur kõn sek ned kam fãa paam pɛdg meng ye.» ⁸ La b karen-biig a ye, a Andre, a Simo ba-biiga, yeel-b lame: ⁹ «Biig a ye n be ka n tar bur a nu sẽn wẽ ne zom pugsgu n paas kʋɩl-zẽeda yiibu, la dẽ zema bõe zãma woto fãa yĩnga?» ¹⁰ La a Zezi yeelame: «Bɩ y zĩndg nebã.» Mood n da be beenẽ wʋsgo la neba zĩndame, bãmb na ta tus a nu. ¹¹ A Zezi yaool n deega burã n pʋʋs Wẽnnaam bark n pʋɩ rɩtbã; b kõ-b-la zĩma me boto, wala b sẽn da rat tɛka. ¹² La b sẽn waa n dɩ n tɩge, a Zezi yeela b karen-biisã: «Wʋk-y gɩrsa fãa sẽn kellã tɩ bũmb da menem ye.» ¹³ La neba sẽn dɩ bur a nu wã n keesã, bura gɩrs pida pet piig la yiibu. ¹⁴ La nin-bãmba sẽn yãend a Zezi sẽn maan wẽnd makrã, b yeelame: «Sɩd yaa Bãmb la bãngd ninga sẽn na n waa dũni wã.» ¹⁵ La a Zezi sẽn bãng tɩ b ra na n yõk-b lame n modg tɩ b yɩ b dĩma, b zoe n kẽnga tãnga zug, bãmb b yembre. ¹⁶ Zĩiga sẽn maage, b karen-biisa kẽnga mogra noore, ¹⁷ la b kẽe koom-koglgo n dʋʋg mogrã n tees Kafarnaom. Zĩiga waa n sobgame, t’a Zezi ket n pa ta b nengẽ ye. ¹⁸ Sob kãsenga n da yiki tɩ mogra me rãmbe. ¹⁹ Karen-biisa rugsa koglgã n kaoos n yaool n yãe a Zezi tɩ b kẽnd kooma zug n kolgd bãmba, tɩ b yɛɛse. ²⁰ La b yeel-b lame: «Yaa maam, da zoe-y rabeem ye.» ²¹ La karen-biisa sẽn yet tɩ b na n kẽes-b koglga pʋga, vugr bala b taa b sẽn da rabdẽ wã. ²² Vẽkembeoogo, zãma wã paa kʋɩlga rʋʋnde la yaa b sẽn da yãe tɩ koom koglg a ye bala n da zĩnd be la a Zezi ra pa kẽ n naag b karen-biisa ye, yaa b karen-biisa bala n da looge. ²³ Koom-kogend a taab me yii Tiberiyad: da pẽe zĩig ninga neba sẽn da paam burã n dɩ wã; ²⁴ neba sẽn yãe t’a Zezi ra ka be be tɩ b karen-biisa me ra ka be be, b kẽe koom-kogendã n leb Kafarnaom n babs a Zezi. ²⁵ La b sẽn yãend-b, mogra rʋʋnde, b yeel-b lame: «Karen-saamba, y waa ka da-bʋre?» ²⁶ La a Zezi leok-b lame: «Sɩd-sɩda mam yeta yãmba, tɩ y sẽn baood maama, ka y sẽn yãe wẽnd makr dãmba yĩng ye, yaa y sẽn paam burã n dɩ n tɩgã. ²⁷ Da tʋm-y n bao rɩɩb ning sẽn sãamda wã ye, tʋm yã n bao rɩɩb ninga sẽn paada, n kõt vɩɩm sẽn kõn sɛ; la Ned Biiga sẽn na n wa kõ-a yãmb a soaba, tɩ yaa bãmb la Wẽnnaam Ba mak ne b makre.» ²⁸ La b sok-b lame: «Bõe la d na n maane n tʋm Wẽnnaam tʋʋma?» ²⁹ T’a Zezi leok-ba: «Tʋʋmd ning Ba sẽn date, yaa tɩ y tẽ bãmb sẽn tʋm a soabã.» ³⁰ Tɩ b yeele: «Wẽnd makr bʋgo la y na n maan tɩ d yãend n tẽ yãmba? Tʋʋmd bʋgo la y tʋmda? ³¹ Tõnd ba rãmb rɩɩ yĩngr dɩɩba weoogẽ, wala b sẽn gʋlse: ‹B kõ-b la rɩɩb sẽn yi arzãn tɩ b rɩ.› » ³² T’a Zezi yeel-ba: «Sɩd-sɩda mam yeta yãmba, tɩ ka a Moyiiz n tõe n kõ yãmb dɩɩb sẽn yi arzãn ye; yaa m Ba n kõt-y dɩɩb kãnga, arzãn bur menga; ³³ tɩ bur ninga Wẽnnaam sẽn kõtã, yaa sẽn yit-a arzãna, la yẽ n kõt dũni wa vɩɩm.» ³⁴ Tɩ b yeele: «Soaala, kõ-y tõnd bur kãnga daar fãa.» ³⁵ T’a Zezi leok: «Yaa maam la bur sẽn kõt vɩɩm. Sẽn wat-a mam nengẽ, kom kõn yõk a soab abada ye; la sẽn tẽed-a maam, ko-yũud kõn yõk a soab abada ye. ³⁶ La mam zoe n yeel-y lame: y ne-m lame, la y pa tẽed-m ye. ³⁷ Ba sẽn kõ-m ned ninga fãa na n wa-la m nengẽ, la sẽn wat-a m nengẽ, m kõn dig a soab n yiis abada; ³⁸ tɩ mam pa yi arzãn n wa, m yam maaneg yĩng ye, m waa n na n maana sẽn tʋm-b maama yam. ³⁹ La sẽn tʋm-b maama yamleoogo, yaa tɩ m da menes-b sẽn kõ maam b rãmba ned ba a ye, la m vʋʋg-b dũni sɛɛb daare. ⁴⁰ Yaa m Ba sẽn tʋma maama raabo, tɩ ned ning fãa sẽn yãenda Biiga la a tẽ bãmba bɩ a paam vɩɩm sẽn kõn sɛ, la m vʋʋg-a dũni sɛɛb raare.» ⁴¹ Zʋɩf rãmba sɩnga guglengu, la rẽ yaa b sẽn da yeelã: «Maam la rɩɩb sẽn yi arzãna.» ⁴² B ra yetame: «Ka yẽ la a Zezi, a Zozɛf biiga la? D ka mi a ba la a ma bɩ? A yɩta wãn n yeele: ‹Mam yii arzãna?› » ⁴³ Dẽ la a Zezi yeel-ba: «Da guglem-y ye. ⁴⁴ Ned ba a ye ka tõe n wa mam nengẽ m Ba sẽn tʋma maama sã n ka tak-a n kõ-m ye, la m na n vʋʋg a soab yaoolem daare. ⁴⁵ B gʋlsa bãngdba sɛba pʋgẽ: Bãmb fãa na n paama zãmsgo Wẽnnaam nengẽ. Ned ninga fãa sẽn wʋma m Ba koɛɛga, la a reeg b zãmsgo, wata mam nengẽ. ⁴⁶ Pa yet tɩ ned yãenda Ba ye, sã n ka sẽn yi-a bãmb nengẽ wã, yẽ soab bala n yãend Ba. ⁴⁷ Sɩd-sɩda mam yeta yãmba tɩ sẽn tẽeda tar-a vɩɩm sẽn kõn sɛ. ⁴⁸ Mam la bur sẽn kõt vɩɩm. ⁴⁹ Dɩɩb sẽn da yit yĩngr la y ba rãmba dɩ we-raoogẽ la b kiime; ⁵⁰ Ma bura yita arzãnẽ, la f sã n dɩ-a fãa, f kõn ki ye. ⁵¹ Maam la bur vɩɩga sẽn yi arzãna. Sẽn dɩta bur kãnga, a soab na n vɩɩnda daar fãa. La m paasdame tɩ bur ning m sẽn na n kõ a soabã, yaa m yĩngã nemdo, dũni rãmb vɩɩm yĩnga.» ⁵² Dẽ me la Zʋɩf rãmba yik no-koeemd ne taaba n yetẽ: «Nin-kãnga yɩta a wãn n kõ tõnd a yĩng nemd tɩ d wãbe?» ⁵³ T’a Zezi yeel-ba: «Sɩd-sɩdsa mam yeta yãmba, tɩ y sã n pa wãb Ned Biiga yĩng nemdo, la y sã n pa yũ b zɩɩm, y kõn tall vɩɩm y pʋgẽ ye. ⁵⁴ Sẽn dɩt-a mam yĩnga nemdo, la sẽn yũud-a m zɩɩm, yẽ soab tara vɩɩm sẽn kõn sɛ, la m na n vʋʋga a soab dũni sɛɛb daare. ⁵⁵ Mam nemd sɩd yaa bõn-dɩtga la m zɩɩm yaa bõn-yũudga. ⁵⁶ Sẽn wãbd-a mam nemdo la sẽn yũud-a mam zɩɩm, yẽ soab paada ne maam tɩ mam me paad ne a soaba. ⁵⁷ Wala m Ba sẽn vɩ wã sẽn tʋm maama, tɩ mam me vɩ b maasem yĩnga, woto me sẽn dɩ-ta maam, a me na vɩɩnde m maasem yĩnga, ⁵⁸ Ad-y bur ning sẽn yi arzãna; la a pa wẽnd y yaab rãmb sẽn dɩ a soaba, n baas n ki wã ye; sẽn dɩta bur kãnga na n vɩɩnda daar fãa.» ⁵⁹ Yaa woto la a Zezi gom yã n zãms neba b pʋʋsg roogẽ Kafarnaom tẽnga. ⁶⁰ La b karen-biis wʋsg sẽn wʋm b goama, b yeelame: «Gomd kãnga yaa toogo, ãnda n tõe n kelg woto?» ⁶¹ La a Zezi sẽn bãng b yamẽ tɩ karen-biisa meng ra guglemda yell kãng poorẽ, b yeel-b lame: «Woto yɩkda yãmb pɛleng wɛ? ⁶² La yãmb sã n wa yãe Ned Biiga tɩ b rʋʋd yĩngri n na n leb b sẽn da beẽ pĩndã? Dẽ n na n yɩ pɛlen-yɩk menga. ⁶³ Yaa sɩɩga la vɩɩma yẽgre, yĩnga ka yõod ye. Goama m sẽn togs yãmbã yila m nengẽ la bãmb n kõt vɩɩm. ⁶⁴ La neb kẽer n be yãmb sʋk n pa tẽed ye.» A Zezi da pĩnd mi al sɩngrẽ, ãnna rãmb n ka tẽed bãmba la ãnna n na n zãmb bãmbã. ⁶⁵ B yeelame: «Yaa woto la mam wilg yãmb tɩ ned ka wat m nengẽ sã n ka m Ba sẽn kõ a soab ye.» ⁶⁶ Wakat kãng tɛka, karen-biis wʋsg leba b poorẽ n pa le tũud bãmb ye. ⁶⁷ A Zezi soka piig la a yiibã: «Yãmb me rat n basa maam bɩ?» ⁶⁸ T’a Simo-Piyɛr leok ba: «Tõnd na n kẽnga ãnna nengẽ? Yãmb bal n tar vɩɩm sẽn kõn sɛ goama. ⁶⁹ La tõnd tẽedame la d bãngame tɩ yãmb la Wẽnd Nedã.» ⁷⁰ T’a Zezi yeel-ba: «Ka maam n tũus yãmb piig la a yiiba bɩ? La ned a ye yãmb sʋka n ya Sʋtãana.» ⁷¹ B da gomda a Zɩɩda, Iskariyot dao a Simo biiga yelle, tɩ bãmb piig la yiiba sʋka yẽ n da na n zãmb-ba.

¹ Dẽ poore, a Zezi sɩng n saagda Galile. B da pa rat n dig Zɩɩde tɩ Zʋɩf rãmba da baood-b lame n na n kʋ. ² Zʋɩf rãmb kibs ning sẽn boond tɩ Sẽgd kibsa ra kolgdame. ³ La b saam-biisa yeel-b lame: «Bɩ y yik n kẽng Zɩɩde tɩ beelẽ me bɩ karen-biisa paam n yãend y sẽn maandã, ⁴ tɩ ned ka tʋmd ne soosgo, a sã dat tɩ neb bãng-a ye. Yãmb sẽn maand bõn-bãna, bɩ y wilg y meng dũni rãmba.» ⁵ A Zezi saam-biisa mens ra pa tẽed-b ye. ⁶ Dẽ la a Zezi yeel-ba: «Mam wakat nan pa ta ye la yãmb yẽ wakat yɛsa daar fãa. ⁷ Dũni rãmba ka tõe n kisg yãmb ye; maam yẽ, dũni wã kis-m lame tɩ m kõta kaset t’a tʋʋma ka sõmb ye. ⁸ Bɩ y kẽng kibsã, mam yẽ pa rabd-a ye, tɩ mam wakat nan pa ta ye.» ⁹ La a Zezi sẽn yeel woto, b kell n paa Galile. ¹⁰ La b saam-biisa sẽn waa n loog kibsã, b me kẽngame, la b pa kẽng tɩ neb bãng ye, yɩɩ wala soosgo. ¹¹ Zʋɩf rãmba ra baood-b la kibsa wakat n yetẽ: «A bee yɛ?» ¹² La zãma wã ra gomda b yell wʋsgo. Bãmb dãmb yetẽ: «Yaa nin-sõngo.» Tɩ bãmb dãmb me yetẽ: «Ka sɩd ye, a belgda neb bala.» ¹³ La ned ba a ye da pa sakd n pelg a pʋga n gomb b yelle, tɩ b ra zoeta Zʋɩf rãmba. ¹⁴ La Sẽgd kibsa da zoe n ta-la a pʋɩ-sʋka t’a Zezi wa wẽnd doogẽ n na n sɩng neba zãmsgo. ¹⁵ Zʋɩf rãmb pɛlens yɩkame tɩ b yeele: «A yɩɩ wãn n mi Sebr sõngo la a yaool n pa zãmse?» ¹⁶ T’a Zezi na n yeel-ba: «Mam zãmsgã ka mam dẽnd ye, yaa sẽn tʋm-b maama rẽnda. ¹⁷ Ned sã n dat n maan sẽn tʋma maama yamleoogo, a bãngda m karenga sã n yita Wẽnnaam nengẽ bɩ m sã n gomda m meng yelle. ¹⁸ Sẽn gomd-a a meng yelle, baooda a meng pẽgre; Ned ninga sẽn baood sẽn tʋma yẽ wã pẽgre, yẽ la sɩd soaba la zãmb ka bɛ a pʋgẽ ye. ¹⁹ Ka a Moyiiz n kõ yãmb noor sebr bɩ? La bõe yĩng la yãmb ned ba a ye ka tũudi? Yaa bõe yĩng la y baood n na n kʋ-ma?» ²⁰ La neba leok-b lame: «Yãmb yika gãeemdo, ãnna n baood n na n kʋ yã?» ²¹ T’a Zezi yeel-ba: «Mam maana tʋʋmd a ye bala tɩ yãmb yɛɛsdẽ. ²² A Moyiiz kõo yãmb noor tɩ y kẽ bãongo – la yaool n ka a Moyiiz meng n sɩng-a ye, yaa d yaab rãmbã – la vʋʋsg daare, yãmb kẽesda ned bãongo. ²³ Ned sã n kẽed bãong vʋʋsg daare tɩ yaa a Moyiiz noor a ye la a ka rat n bas n ka tũ, yaa bõe yĩng la y zabd ne maam la y puugd-y sũur ne maam? Yĩnga tõr laafi vʋʋsg daar ka yɩɩd wilg a ye bal laafi? ²⁴ Da bʋ-y nif sẽn ne bal bʋʋd ye, bʋ-y sɩd bʋʋdo.» ²⁵ Zerizalɛɛm neba yeelame: «Ka rao kãnga la b sẽn baood n na n kʋ wã bɩ? ²⁶ Ad-a sẽn gomd yɩng tɩ neb fãa wʋmnẽ, la ned ba a ye ka yet tɩ bũmbu ye. Sãnd tẽnga kãsem-dãmb ka yik n tẽed marsã tɩ yẽ sɩd yaa Krista? ²⁷ Tõnd yẽ mii nin-kãnga sẽn yitẽ. Sã n yaẽ Krista, ad-y sã n yaa bãmb n waẽ, ned ba a ye kõn bãng b sẽn yitẽ ye.» ²⁸ Dẽ me la a Zezi sẽn da zãmbsd neba wẽnd doogẽ yik n moone: «Yãmb mii maam, la y mii m sẽn yitẽ; mam yaool pa wa m toor ye, la sẽn tʋma maama yaa sɩd soaba, la yãmb ka mi-b ye. ²⁹ Mam mii-b lame tɩ mam yii bãmb nengẽ, la yaa bãmb n tʋm maam.» ³⁰ Zãma wã da baoodame n na n yõk a Zezi la ned ba a ye ka sɩɩs-b ye tɩ b wakata da nan ka ta ye. ³¹ La zãma wã sʋka, wʋsg tẽ-b lame la bãmb n da yetã: «Krista sã n wa b na maan bõn-bãn n yɩɩg nin kãnga bɩ?» ³² Farizẽ rãmba wʋma neba sẽn da togsd a Zezi poorẽ tɩ b na n tʋm wẽnd dooga gũudba tɩ b tɩ yõk-ba. ³³ La a Zezi yeel-b lame: «M na n le zĩnda ne yãmb tɩ yɩ bilfu, la m yaool n leb sẽn tʋm-b maama nengẽ. ³⁴ Y na n wa baooda maam la y kõn yãe-m ye; la m sẽn na n zĩndẽ wã, yãmb ka tõe n wa be ye.» ³⁵ Tɩ Zʋɩf rãmba sogsd taaba: «Yaa yɛ la a na n kẽng tɩ d ka na tõog n yãend-a? A na n babsa Zʋɩf niyns sẽn be-b pa-weera laa? Bɩ a na n kẽng n tɩ karma bu-zẽmbã? ³⁶ Gomd ning b sẽn leoke: ‹Y na n wa baood-m lame la y kõn yãend-ma, la m sẽn be zĩig ningã, y pa tõe n ta be wã,› gomd kãnga rat n yeelame tɩ bõe?» ³⁷ Tigra baasg raare, sẽn ya kibs kãseng n yɩɩda, a Zezi yaasa yĩngr n zẽk b koɛɛga n moone: «Ko-yuud sẽn tara soab fãa, bɩ a wa mam nengẽ ³⁸ la sẽn tẽed-a maam, bɩ a wa la a yũ. Wala sẽn be sebr sõng pʋgẽ: Ko-bundum na n pusga a pʋgẽ n zoe wa kʋɩlse.» ³⁹ B ra gomda a Vʋʋsem Sõng yelle b sẽn na n kõ sẽn tẽ-b bãmbã. A Vʋʋsem Sõng rag n nan ka sig ye, t’a Zezi ra nan ka ta b pẽgra zĩigẽ ye. ⁴⁰ Zãma wã sʋka, kẽer sẽn wʋm a Zezi goama, b leokame: «Bãmb la bãngdã.» ⁴¹ Tɩ kẽer me yeetẽ: «Yaa bãmb la Krista.» Tɩ kẽer me sokdẽ: «La dẽ yĩnga Krista na n yii Galile la? ⁴² Sebr sõng ka yeel tɩ Krista na n yi a Daviid buudẽ la b na n yii Bɛtelyɛɛm tẽn-bulli, a Daviid tẽngẽ?» ⁴³ Woto neba ra welga taab a Zezi poorẽ. ⁴⁴ Kẽer da rat n yõk-b lame, la ned ba a ye nug ka sɩɩs-b ye. ⁴⁵ Wẽnd dooga gũudba lebg n waa maan-kʋʋdba nanams la Farizẽ rãmba nengẽ tɩ b sok-ba: «Yaa bõe yĩng la yãmb pa yõk-a n wa?» ⁴⁶ Tɩ gũudba leoke: «Ned ba a ye zɩ n gom wa nin-kãnga ye.» ⁴⁷ Tɩ Farizẽ rãmba yeel-ba: «Yãmb me basame t’a lebg y zut laa? ⁴⁸ Kãsem-dãmba bɩ Farizẽ rãmba sʋka ned bee sẽn tẽ-a yẽnda sɩda? ⁴⁹ Ad-y zãma wã sẽn ka mi Noora sebrã, ka bark ye!» ⁵⁰ La bãmb ned a yembre, a Nikodɛm, dao ninga sẽn da wa a Zezi nengẽ ne yʋngã, yeelame: ⁵¹ «Tõnd noora kõt-d la sor tɩ d paalg ned bʋʋdo tɩ d pa reng n kelg a soab koɛɛg n bãng a sẽn maan bɩ?» ⁵² Tɩ b leok-a: «Yãmb me yaa Galile ned laa? Bɩ y maag-y meng n vɛɛse, ad-y bãngd ka yit Galile ye.» [ ⁵³ Dẽ poore ned kam fãa leba a yiri.

¹ Sã n ya a Zezi, b kẽnga Oliviye tãnga zugu. ² Yibeoog pĩnda, b leba wẽnd doogẽ la zãma wã ra wata b nengẽ tɩ b na n zĩnd n karem-ba. ³ La Farizẽ rãmba la Sɛb-mitba talla pag a yembr n wa; b ra ling-a-la yoobẽ, la b yals-a la sʋka, ⁴ n yeel a Zezi: «Karen-saamba, b linga pʋg kãnga yoobẽ. ⁵ La noora sebrẽ, a Moyiiz yeelame tɩ b lab pagb a woto buud ne kug n kʋ, la yãmba, y yetame tɩ bõe?» ⁶ B ra sokd-b la woto n na fɛɛs-ba, n paam bũmb n dogl b zugu. La a Zezi zõondame n gʋlsd tẽng ne b nug-bila. ⁷ La b sẽn da ket n sokd-bã, b doogame n yeele: «Yãmb sʋka sẽn nan pa maana yel-wẽnde, bɩ a soab deng n lobg paga kugri!» ⁸ La b le zõondame n le gʋlsdẽ. ⁹ La neba sẽn wʋm gomdã, b foosa a yembr yembre n kẽ wɩrem, la nin-kẽembã n denge; b basa bãmb ne paga bala b sẽn da yɛs zĩig ningã. ¹⁰ La b sẽn doog n yãend pagã a ye bala, b sok-a lame: «Paga, sẽn da ningd-b foo taala bɛɛ? Ned ba a ye ka kao f bʋʋdo n paalg-f laa?» ¹¹ Tɩ paga yeele: «Ned ba a ye, Soaala!» T’a Zezi yeele: «Dɩlla ma me kõn paalg-f ye. Loog la f da le paas beoog ye.»] ¹² A Zezi le yeel-b lame: «Maam la dũni vẽenem, sẽn tũud-a maam ka kẽnd likẽ ye, la a na n paama vẽenem sẽn kõt vɩɩm.» ¹³ Woto la Farizẽ rãmb yeel-b: «Yãmb n kõt y meng kaseto, yãmb kaset yaa zaalem.» ¹⁴ La a Zezi leok-b lame: «Ne m sẽn kõt m meng kaseto, m kaset yaa sɩda, tɩ mam mii m sẽn yiẽ, la m sẽn dabdẽ la yãmb ka mi m sẽn yiẽ la m sẽn dabdẽ ye. ¹⁵ Y kaooda bʋʋdo wala ninsaalba, mam ka kaood ned bʋʋd ye; ¹⁶ m sã n wa kaood bʋʋdo, mam bʋʋda tũuda sɩda, tɩ mam ka m yembre ye, d yaa d yiibu: maam ne sẽn tʋm-a maama. ¹⁷ B yaool n gʋlsa yãmb noor sebrẽ tɩ neb a yiib kaset yaa sɩda. ¹⁸ Maam n ya m meng kaseto, la m Ba sẽn tʋm-b maama, bãmb me kõta kaset m yĩnga.» ¹⁹ Dẽ la b sok-ba: «Yãmb Ba bee yɛ?» Tɩ b leoke: «Yãmb ka mi maam la y ka mi m Ba me ye; yãmb sã n da miẽ-la maam y na bãngẽ m Ba me.» ²⁰ A Zezi goma woto ligda bĩngr zĩigẽ. Ad-y b ra karemda neba wẽnd doogẽ la ned ba a ye pa sɩɩs b ye tɩ b wakat da nan pa ta ye. ²¹ La a Zezi le yeel-b lame: «M na n loogame tɩ y yõdg n baood-m, la yãmb na ki ne y yel-wẽnde. Mam sẽn dabdẽ wã, y ka tõe wa be ye.» ²² Dẽ la Zʋɩf rãmba ra yet taaba: «A rat n kʋ-la a meng laa, n tõe yeele: ‹Mam sẽn dabdẽ wã yãmb ka tõe n wa be?› » ²³ La a Zezi yeel-b lame: «Yãmb yita tẽngre, la mam yita yĩngri. Yãmb yaa dũni kãnga neba; la mam ka dũni kãnga ned ye. ²⁴ Ya rẽ la m sẽn yeel yãmbã tɩ y na n kii ne y yel-wẽndã. Tɩ yãmb sã n pa tẽeda tɩ maam la sẽn bɛɛ-a soabã, yãmb na n kii ne y yel-wẽna.» ²⁵ Dẽ la b ra yeta Zezi: «Foom la ãnna?» T’a Zezi leoke: «M sẽn togs tɩ m ya a soaba al sɩngrẽ wã la m sẽn ket n gãdã. ²⁶ Mam tara yɛl wʋsgo y poorẽ n na n togse, la m kao y bʋʋdo, tɩ sẽn tʋm-a maama, yaa sɩd soaba, la yaa mam sẽn wʋm bãmb nengẽ wã la mam togsd dũni rãmba.» ²⁷ Zʋɩf rãmba ka wʋm tɩ yaa b Ba yelle la b ra gomd ne b ye. ²⁸ Dẽ la a Zezi yeelyã: «Y sã n wa zẽk Ned Biiga, wakat kãng la y na n bãng tɩ maam la sẽn bɛɛ-a soabã, la m ka maand bũmb m toor ye, yaa m Ba sẽn zãms maama, la m togsda, ²⁹ la sẽn tʋm-b maama bee ne maam, b ka bas maam m yembr ye, tɩ m maanda sẽn tat b yam dar fãa.» ³⁰ Ad-y b sẽn gom woto wã neb wʋsg tẽe bãmba. ³¹ A Zezi ra yeta Zʋɩf rãmba sẽn tẽe-b bãmbã: «Yãmb sã n kell n tall m goama, yãmb lebga m karen-biisi. ³² La y na n bãnga sɩda, la sɩda na n kɩtame tɩ yãmb lebg burkĩmbi.» ³³ Tɩ b leok-ba: «Tõnd ya a Abraam kamba, tõnd nan pa yɩ ned ba a ye yem-daad ye, yaa bõe yĩnga la yãmb yet tɩ d na n lebga burkĩmbi?» ³⁴ Dẽ la a Zezi yeel-ba: «Sɩd-sɩda m yeta yãmba, tɩ sẽn maand-a yel-wẽnde, yaa yem-daoogo. ³⁵ Yem-daoog ka paad zakẽ daar fãa ye la zak biig paada zakẽ daar fãa. ³⁶ Dɩlla Biiga sã n yiis yãmb yemdo, y naa n sɩd lebga burkĩmbi. ³⁷ Mam miime tɩ y yaa a Abraam kamba, la yãmb yaool n baood n na n kʋʋ maam, tɩ mam goama pa kẽed-y ye. ³⁸ M togsda m sẽn yãend bũmb ning m Ba nengẽ, la yãmb maanda y sẽn wʋm y ba nengẽ.» ³⁹ Tɩ b na n leoke: «Tõnd ba yaa Abraam.» T’a Zezi yeel-ba: «Yãmb sã n yaa Abraam kamba bɩ y tʋm a Abraam tʋʋma. ⁴⁰ Yãmb yaool n baooda marsã n na n kʋ maam, m yaool n yaa ned sẽn togs yãmb sɩda, sɩd ninga mam sẽn wʋm Wẽnnaam nengẽ. A Abraam ka maan woto ye! ⁴¹ Dɩlla yaa y ba a to tʋʋm la y tʋmda.» Tɩ b yeele: «Tõnd ka yoob kamb ye, tõnd Ba yaa a ye bala: Wẽnnaam.» ⁴² T’a Zezi na n leok-ba: «Wẽnnaam sã n da yaẽ yãmb ba, y nongẽ la maam me, tɩ yaa Wẽnd nengẽ la m yii n wa; m pa wat m toore, yaa bãmb n tʋm maam. ⁴³ Bõe tɩ m gomd tɩ y ka mi tɩ yaa maam n gomda? Ka y sẽn pa tõe n deeg m gomda laa? ⁴⁴ Yãmb yita Sʋtãan nengẽ, yẽ la y ba, la yaa y ba wã raab la y rat n maane. Sʋtãan yɩɩ nin-kʋʋd al sɩngrẽ, a ka pa sɩd pʋgẽ ye, tɩ sɩd pa tol n be a nengẽ ye: a sã n togsd a zirẽ-beedã, yaa sẽn be a sũurẽ la a yiisda, t’a yaa zirẽ-be-ned la zirẽ-beed ba. ⁴⁵ Mam sẽn togsd sɩda yĩnga, yãmb ka tẽed maam ye. ⁴⁶ La yãmb sʋka, ãnna n tõe n kʋɩdg-m tɩ m maana yel-wẽnde? La m sã n yet sɩda, yaa bõe yĩng la y pa tẽed-ma? ⁴⁷ Sẽn kĩ-a ne Wẽnd, wʋmda Wẽnnaam goama, la yãmb sã n ka wʋmd m goama, yaa y sẽn ka kẽed Wẽndã.» ⁴⁸ Dẽ la Zʋɩf rãmba leok-b: «Tõnd ka be bʋʋm n yet tɩ fo yaa Samari neda la Sʋtãan be-la f pʋgẽ?» ⁴⁹ T’a Zezi leok-ba: «Sʋtãan ka be m pʋgẽ ye, mam waoogda m Ba, la yãmb baood n na n paoog-m lame. ⁵⁰ Mam yẽ ka baood m meng pẽgr ye; nina n be n baood-a la a kaood bʋʋdo. ⁵¹ Sɩd-sɩda mam yeta yãmb, tɩ sẽn deegd-a mam goama n ning a pʋtẽerẽ, yẽ soab kõn ki abada.» ⁵² Tɩ Zʋɩf rãmb leok: «Marsã tõnd miime tɩ Sʋtãan sɩd be f pʋgẽ. A Abraam kiime, bãngdba me kiime tɩ fo yetẽ: ‹Sẽn deegd-a m goama, a kõn ki abada.› ⁵³ Fo geendame tɩ f yɩɩda d ba a Abraam la bãngdbã sẽn ki wã laa? Fo geendame tɩ f yaa ãnna?» ⁵⁴ La a Zezi leok-b lame: «Mam sã n pẽgd m menga, mam pẽgr ka pẽgr ye; la yaa m Ba n pẽgd maam, yãmb yetame: ‹Bãmb la tõnd Wẽnnaam.› ⁵⁵ Yãmb yaool n ka mi-b ye; la mam yẽ mi-b lame; la m sã n da yetẽ tɩ m ka mi-ba, m naan n yɩẽ wala yãmba: zirẽ-be-neda. Mam mi-b lame la mam deegda b goama. ⁵⁶ Yãmb ba a Abraam kɩdma sũ-noogo, a sẽn tags ta na yãend m daara yĩnga. A yãeeme, t’a sũur yɩ noogo.» ⁵⁷ Tɩ Zʋɩf rãmba yeele: «Fo yʋʋm nan ka ta pisnu menga la fo yãenda a Abraam!» ⁵⁸ T’a Zezi yeel-ba: «Sɩd-sɩda mam yeta yãmba, t’a Abraam sẽn da waa n nan ka beẽ, dẽ tɩ mam beeme.» ⁵⁹ B sẽn wʋm woto, b wʋka kuga n na n lab-ba, t’a Zezi lill b meng n yi wẽnd doogẽ.

¹ A Zezi da waa n kẽndame, n yãe dao a yembre sẽn dog ne zondo. ² Karen-biisã n soke: «Karen-saamba, ãnna n maan yel-wẽnde t’a rog ne zondo? Ya a meng bɩ ya a ba rãmba?» ³ T’a Zezi leok: «Ka yẽ, ka a roagdba n maan yel-wẽnd ye, la yaa sẽn na yɩlẽ tɩ Wẽnnaam puk b pãng ne yẽnda. ⁴ Yaa pakr ne maam tɩ m tʋm sẽn tʋm-b maama tʋʋmde, tɩ wĩndg nan ketẽ, tɩ yʋng n wate, la yʋngo ned ka le tõe n tʋm ye. ⁵ M sã n ket dũni pʋgẽ, m yaa dũni wã vẽenem.» ⁶ La b sẽn yeel woto, b tʋbsa kolkoodo n bui tãndo n taag zoanga nini, ⁷ n yeel-a: «Kẽng Siloe bullẽ wã n tɩ widg f nengã» – Siloe dat n yeelame: b sẽn tʋm a soaba. – La zoanga kẽngame, a tɩ widga a nenga, la a sẽn waa n lɛɛg n watẽ a ra yãeta neere. ⁸ La a yagse ne a mitẽns sẽn da mi n yãet-a t’a bõsdẽ, yeelame: «Ka yãoo n da zĩ n bõsdẽ wã bɩ?» ⁹ Tɩ kẽer yeele: «Ad-y yaa yẽ!» Tɩ kẽer yeele: «Ayɛy! Yaa a wẽnego.» La a Rog-ne-zond ra yetame: «Yaa maam bala!» ¹⁰ Tɩ b sok-a: «Fo nina yɩɩ wãna n puki?» ¹¹ T’a leoke: «Dao ning sẽn boond t’a Zezi wã n bui tãndo n taag m nini n yeel-m tɩ m tɩ widg m neng Siloe bullẽ, tɩ mam kẽng n tɩ widg m nenga la m nin pukame.» ¹² Tɩ b sok-a: «B bee yɛ?» T’a leoke: «M ka mi ye.» ¹³ La b talla rog-ne-zondã n tɩ wilg Farizẽ rãmba. ¹⁴ Da yɩɩ vʋʋsg daare la a Zezi bui tãndã n taag daoã nini. ¹⁵ La Farizẽ rãmb sok-a lame t’a yɩɩ wãna n paam nini. T’a leok-ba: «B taaga m nina ne tãndo la m tɩ widga m nenga, la m nin pukame.» ¹⁶ Tɩ Farizẽ rãmb kẽer yeele: «Nin-kãnga ka Wẽnnaam ned ye t’a ka reegd vʋʋsg daar noor ye.» Tɩ kẽer me yeele: «La yel-wẽn-maand na n yɩɩ wãna n maan bõn-bãn woto!» Tɩ b ra tar no-koeemde ne taaba. ¹⁷ B le soka zoangã: «La foom yẽ, fo yetame tɩ bõe, raoã poorẽ la a sẽn puk f nina poorẽ?» T’a leoke: «Yaa bãngda!» ¹⁸ La Zʋɩf rãmba ra ka sak n deeg tɩ raoã yɩɩ zoanga la a nin pukame, tɩ b ka reng n bool a ba ne a ma ye. ¹⁹ B soka ba rãmba: «Ada yaa yãmb biig ning y sẽn yet t’a roga ne zonda bɩ? Yɩɩ wãn t’a ne marsã?» ²⁰ Ba wã ne ma wã leokame: «Tõnd yẽ miime t’a yaa tõnd biiga la a roga ne zondo, ²¹ la yɩɩ wãn t’a ne marsã, tõnd ka tõe n bãng rẽ ye, sok yã a menga, a ka le ya yãag ye, a na togs a toore.» ²² Ba wã ne ma wã leoka woto, Zʋɩf rãmba rabeem yĩnga tɩ b ra yẽsa ne taab tɩ ned ninga sẽn yeela t’a Zezi yaa Krista, bɩ b yiis a soab pʋʋsg roogẽ. ²³ Yaa rẽ yĩnga la ba wã la ma wã yeel t’a ka le ya yãag ye la b sok a menga. ²⁴ La b le boola raoã sẽn yɩ-a zoanga n yeel-a: «Aya, bɩ b f pẽg Wẽnnaam! Tõnd yẽ miime tɩ rao ning sẽn sãooga fooma yaa yel-wẽn-dmaanda.» ²⁵ Zoanga leok-b lame: «A sã n ya yel-wẽn-maanda, mam ka tõe n bãng rẽ ye. Mam mii bũmb a ye bala: m da yaa zoanga la marsã m neeme.» ²⁶ Tɩ b sok-a: «La a maana foom bõe, la a yɩɩ wãn n puk f nini?» ²⁷ T’a leok-ba: «Mam zoe n togsa yãmb, la y pa reeg ye, yaa bõe la yãmb dat n kelg n paase? Yãmb me rat n lebga a karen-biis laa?» ²⁸ La b tʋ-a lame n yeel-a: «Foo la a karen-biiga, tõnd yẽ yaa a Moyiiz karen-biisi. ²⁹ Tõnd miime tɩ Wẽnnaam goma ne a Moyiiz, la yãoo, tõnd ka mi a sẽn yitẽ ye.» ³⁰ Tɩ daoã leok-ba: «Ad-y woto yaa pɛlen-yɩk wɛ! Yãmb ka mi a sẽn yitẽ la a yaool n puka m nini. ³¹ D miime tɩ Wẽnnaam ka kelgd yel-wẽn-maand ye la ned sã n waoogd Wẽnnaam la a maand b yam, Wẽnnaam kelgda yẽ soaba. ³² Abada ne abadabila, d nan pa wʋm tɩ ned puk rog-ne-zond nin ye. ³³ Nin kãnga sã n da pa yitẽ Wẽnnaam nengẽ a kõn tõog n maan ba fɩ.» ³⁴ La b leok-a lame: «Fo roga yel-wẽnd pʋgẽ zãnga la f sẽn dat n karem tõnda!» La b rig-a lame. ³⁵ La a Zezi wʋmame tɩ b rig-a lame la b sẽn waa n seg-a, b yeel-a lame: «Fo tẽeda Ned Biiga bɩ?» ³⁶ T’a leoke: «Bãmb la ãnna, tɩ m tẽ-ba, Soaala?» ³⁷ T’a Zezi yeele: «Fo neb lame, ad sẽn gomd-a ne fooma, yaa bãmba.» ³⁸ T’a na n yeele: «Mam tẽedame, Soaala!» La a wõgemda b taoore. ³⁹ T’a Zezi na n yeele: «Mam waa dũni kãnga pʋgẽ, n na n welg m welgre. M waame tɩ sẽn pa ne-ba nin puki la sẽn ne-bã lebg zoeense.» ⁴⁰ Tɩ Farizẽ rãmb kẽer sẽn da be ne bãmb wʋm b goama n yeele: «Tõnd me yaa zoeens bɩ?» ⁴¹ T’a Zezi leok-ba: «Yãmb sã n da yaẽ zoeense, taal da ka na n zĩnd y zug ye; la yãmb sẽn yet tɩ y neeme wã, y yel-wẽnda keta.

¹ Sɩd-sɩda mam yeta yãmba, sẽn pa tũud-a noor n kẽ piisa bãgr la sẽn gãndgd-a zĩig a to n kẽ, a soab yaa wagdre la fãada. ² Sẽn tũud-a bãgra noor n kẽ, yẽ la pe-yãansa pe-kɩɩma, ³ Bãgra gũuda pakda noore la piisa kelgda pe-kɩɩma koɛɛga la a boonda pe-yãang fãa ne a yʋʋre la a yiisd-b la yɩnga. ⁴ A sã n yiis piisã, a lʋɩta b taoore, la piisa pʋgda yẽ tɩ b mi-la a koɛɛga. ⁵ La b kõn sak n tũ sãan ye, b zoet n bas-a lame, tɩ b ka mi sãan koɛɛg ye.» ⁶ Yaa yelbũnd kãnga la a Zezi wẽ bãmba, la bãmb pa wʋm b gomda võor ye. ⁷ T’a Zezi na n le yeel-ba: «Sɩd-sɩda, mam yeta yãmba, yaa maam la bãgr noore. ⁸ Sẽn deng-b maama fãa yaa wagdba la fãadba; dẽ me la pe-yãansa ka kelg-ba. ⁹ Maam la bãgr noore, sẽn tũud-a maam n kẽ, a na n paama fãagre; a na n kẽedame la a yita, n paamd yamdo. ¹⁰ Wagdr yẽ watame bala n na n zu, n na n kodg la a kʋ. La mam yẽ waame n na n kõ vɩɩm la m kõ-a tɩ gale. ¹¹ Maam la pe-kɩɩm sõngo, pe-kɩɩm sõng rɩkda a meng vɩɩm n kõ a pe-yãanse. ¹² La sẽn ka-a pe-kɩɩma, tɩ b yaood-a t’a kɩɩmd piisã la a yaool n ka piisa soaala, yẽ sã n yãe digd-n-yĩid t’a wata, a zoetame n bas pe-yãansã tɩ we-rũnga yõgd-b la a sẽegd-b. ¹³ Yaa ligda yĩng la a kɩɩmd piisã la a toog ka be ne pe-yãansa ye. ¹⁴ La maam la Pe-kɩɩm sõngo, mam mii m pe-yãanse, tɩ bãmb me mi maam, ¹⁵ wa m Ba sẽn mi maam tɩ m me mi m Ba, la m kõta m meng vɩɩm pe-yãansa yĩnga. ¹⁶ La m tara pe-yãans a taaba sẽn nan ka kẽ m bãgra pʋgẽ ye, la m tog n yɩɩ bãmb me pe-kɩɩma; bãmb me tog n wʋma m koɛɛga, la woto bãgr na yɩ a ye, tɩ pe-kɩɩma me yɩ a ye. ¹⁷ La m Ba sẽn nong-ma, yaa m sẽn kõt m vɩɩma n na n le wa reeg-a. ¹⁸ Ka ned n yãkd m yõor ye, yaa mam meng m toore n kõt-a. M tõe n kõ m vɩɩm la m tõe n le reeg-a lame; la m paama rẽ m Ba nengẽ.» ¹⁹ Gom kãensa, poorẽ no-koeemd n yik Zʋɩf rãmba sʋk yɛsa. ²⁰ Kẽer da yetame: «Sʋtãan n be a pʋgẽ, bɩ a yika gãeemdo. Yaa bõe tɩ yãmb kelgd-a?» ²¹ Tɩ kẽer me yeele: «Goam kãensa ka ned sẽn tar Sʋtãan a pʋgẽ goam ye. Dẽ yĩnga sʋtãan tõe n puka ned nin laa?» ²² B ra maanda Zerizalɛɛm wẽnd dooga bark tẽegr kibsa. Da yaa waood wẽnde. ²³ T’a Zezi ra kẽnd wẽnd doogẽ, a Salomo zãongẽ wã. ²⁴ Zʋɩf rãmba waa n gũbg-b lame n sok ba: «Fo na n basa tõnd ne yam yoaag n ta da-bʋre? Fo sã n ya Krista bɩ f togs-d vẽenega.» ²⁵ T’a Zezi leok-ba: «Mam pĩnd n togsa yãmb la y pa reegd ye. Tʋʋma m sẽn maan m Ba yʋʋr yĩnga, bãmb kõta maam kaseto. ²⁶ La yãmb ka tẽed ye, tɩ yãmb ka mam pe-yãans ye. ²⁷ M pe-yãansa wʋmda m koɛɛga, mam mi-b lame la b tũuda maam. ²⁸ Mam kõt-b la vɩɩm sẽn kõn sɛ la b kõn ki abada la ned me kõn tõog n fãag-b mam nugẽ ye. ²⁹ Ba sẽn kõ maam bãmba n yɩɩd fãa. Ned ka tõe n fãag fɩ Ba nugẽ ye. ³⁰ Maam ne m Ba, tõnd yaa a ye.» ³¹ La Zʋɩf rãmba noga kuga n na n lab a Zezi. ³² T’a Zezi yeel-ba: «M Ba maasem yĩnga, m maana yel-sõma wʋsg yãmb nifẽ, yel-sõmd bʋg yĩng la y rat n lab-ma?» ³³ Tɩ Zʋɩf rãmb yeele: «Ka yel-sõmd yĩng la d rat n lab-f ye, yaa f sẽn tʋʋsd Wẽnnaam yʋʋra yĩnga, tɩ fo sẽn ya ninsaala, fo yetame tɩ f yaa Wẽnde.» ³⁴ T’a Zezi leok-ba: «B ka gʋls woto yãmb noor sebra pʋgẽ bɩ: ‹M yeelame: yãmb yaa wẽnnaam dãmba.› ³⁵ Noor sebra sã n boond tɩ wẽnnaam dãmba, Wẽnd sẽn taas-b rãmb b koɛɛga – la sebr sõng pa tõe n kɩɩs la – ³⁶ Ba sẽn taag a soab kaam n tʋm dũni pʋgẽ, yãmb yetame: ‹Fo tʋʋsda Wẽnnaam yʋʋre,› la rẽ yaa m sẽn yeela bala: ‹M yaa Wẽnnaam Biiga!› ³⁷ Mam sã n pa tʋmd m Ba tʋʋma, bɩ y ra tẽ-m ye. ³⁸ La mam sã n tʋmd-ba, yãmb sã n pa rat n tẽ maam me bɩ y tẽ m tʋʋma tɩ woto la y na n yaa n bãng tɩ Ba bee m pʋgẽ, tɩ mam me be m Ba pʋgẽ.» ³⁹ La Zʋɩf rãmba le yik n baoodame n na n yõk-ba la a Zezi fãaga b nusẽ. ⁴⁰ A Zezi leb n kẽnga Zʋrdẽ rʋʋnde, zĩig ninga a Zã sẽn da sɩng n kõt neb soobã, la b yalsa be. ⁴¹ La neb wʋsg ra wata b nengẽ n yetẽ: «A Zã ka maan wẽnd makr ba a ye. La a sẽn togs bũmb ning rao kãnga poorẽ wã yaa sɩd zãnga.» ⁴² Neb wʋsg tẽe bãmb zĩ kãnga.

¹ Daoa a yembre n da ka laafi n boond t’a Lazar, n be Betani, a Mari ne a kẽema Mart sẽn da kẽed tẽng ningã. ² Yaa Mari ning sẽn da sõoga a Zezi nao ne kaama, n yẽes-b ne a zoobdo, yaa yẽ kẽem a Lazar n da ka laafi wã. ³ Bãada tãop a yiibã tʋmame tɩ b tɩ yeele: «Soaala, yãmb sẽn nong a soaba ka laafi ye.» ⁴ A Zezi sẽn wʋm kibarã, b yeelame: «Bã-kãnga kõn yɩ a yõor bãag ye; a na n waa ne Wẽnnaam pẽgre, a na n waa ne Wẽnd Biiga pẽgre.» ⁵ Bãng-y t’a Zezi ra nonga a Mart ne a yao, a Mari, la a Lazar. ⁶ La ne b sẽn wʋm t’a ka laafi wã, b kell n paa b sẽn da beẽ wã tɩ ta rasma a yi. ⁷ Dẽ poor marsã, b yeela b karen-biisã: «Yik-y tɩ d leb Zɩɩde.» ⁸ Tɩ karen-biisa leoke: «Karen-saamba, ade daar nan ka zãra Zʋɩf rãmba ra baooda yãmb n na n lob ne kug tɩ yãmb lebd be!» ⁹ T’a Zezi leok-ba: «Wĩndg ka so wakat piig la a yiib wɛ? Ned sã n kẽnd wĩndga a kõn lak bũmb ye, t’a nee dũniya vẽenem, ¹⁰ yaa sẽn kẽnd-a yʋngo n lagsde t’a ka tar vẽenem ye.» ¹¹ B sẽn gom woto, b yeelame: «D zoa a Lazar gõeeme la d na n tɩ nek-a lame.» ¹² Tɩ karen-biisa yeele: «A sã n gõeeme, dẽnd a na n paama laafi.» ¹³ A Zezi da gomda kũum yelle la bãmb da tagsdame tɩ b ra gomda gõeem bal yelle. ¹⁴ T’a Zezi yeel-b vẽenega: «A Lazar kiime; ¹⁵ la yãmb yĩnga m sũur yaa noogo, m sẽn pa zĩnd be wã tɩ yãmb na n paamame n tẽ. Yik-y tɩ d kẽng a nengẽ.» ¹⁶ La a Toma sẽn boond t’a Didim yeela a taaba: «Bɩ d yik n kẽng n tɩ naag bãmb n ki!» ¹⁷ La a Zezi sẽn ta, b mikame t’a Lazar da bee yaoogẽ al dasem a naase. ¹⁸ Betani ra pẽe ne Zerizalɛɛm n zems wakat pʋɩ-sʋk kẽnde. ¹⁹ Zʋɩf rãmb wʋsg ra waame n na n pʋʋs a Mart ne a Mari toogo, b kẽema sẽn maan kaalem yĩnga. ²⁰ La a Mart sẽn wʋm t’a Zezi wata, a zoe n tɩ seg-b lame, t’a Mari kell n pa roogẽ. ²¹ La a Mart yeela a Zezi: «Soaala, yãmb da zĩnnẽ ka m kẽema ka na n kiẽ ye. ²² La marsã menga m miime tɩ yãmb sẽn na n kos Wẽnnaam bũmb ning fãa b na n kõ-y lame.» ²³ T’a Zezi leok-a: «Y kẽema na n vʋʋgame.» ²⁴ T’a Mart leoke: «Mam miime t’a na n vʋʋga yĩns vʋgr wakato, dũni sɛɛb raare.» ²⁵ T’a Zezi yeele: «Yaa maam la vʋʋgre. Sẽn tẽed-a maam, ba a ki yã, a na n vɩɩndame. ²⁶ La sẽn vɩ-a, la a tẽed maam, a soab kõn ki abada. Fo tẽeda rẽnna bɩ?» ²⁷ T’a Mart leoke: «N-yẽe! Soaala, mam tẽedame, tɩ yãmb la Krista Wẽnd Biiga sẽn wa dũni kãnga.» ²⁸ La a sẽn gom woto a tɩ boola a yao, a Mari, n soos n yeel-a: «Karen-saamb waame la b boond-f lame.» ²⁹ A Mari sẽn wʋme, a wẽneg n yika tao n kẽng b nengẽ. ³⁰ La a Zezi da nan pa ta tẽnga pʋgẽ ye, b ra ket n bee zĩig ninga a Mart sẽn tɩ seg-bã. ³¹ Zʋɩf rãmba sẽn da be-b zakẽ n belgd a Mari wã, sẽn yãe t’a yii tao, b pʋg-a lame, n tẽed t’a rabda yaoogẽ n na n tɩ kũm be. ³² La a Mari sẽn ta a Zezi sẽn da be zĩig ningã, a wõgemda b taoore n yeel-ba: «Soaala, yãmb da zĩnnẽ ka, m kẽema ka na n kiẽ ye!» ³³ La a Zezi sẽn yãend t’a yãbda, tɩ Zʋɩf rãmb sẽn da pʋgd-b yẽ wã me yãbdã, b yam bondgame, la b digimdame. ³⁴ B sokame: «Y ning-a-la yɛ?» Tɩ b leok-ba: «Soaala, wa-y n ges-y!» ³⁵ La a Zezi yãbame. ³⁶ Tɩ Zʋɩf rãmba yeele: «Ges-y! Ad-b ra nong-a lame koe!» ³⁷ La bãmb sʋkã kẽer yeelame: «La bãmb sẽn puk sẽn doga ne zonda nina, b ra ka tõee tɩ rao kãnga ra ki laa?» ³⁸ A Zezi le rigimdame yɛsa la b kẽnga yaoogẽ wã; dag n yaa tãn-boko tɩ kugr da pag a noorã. ³⁹ La a Zezi yeelame: «Lak-y kugrã.» A Mart, sẽn ki-a wã tão, yeelame: «Ay! Soaala, a zoe n bee yũugu, tɩ yaa dasma naas rũnna la a sẽn be ka wã.» ⁴⁰ T’a Zezi yeel-a: «Mam pa wilg foom tɩ f sã n tẽeda, fo na n yãee bũmb sẽn na n wa ne Wẽnnaam pẽgr bɩ?» ⁴¹ La b laka kugrã, la a Zezi zẽka b neng n tees yĩngr n yeele: «M Ba, mam pʋʋsda yãmb barka, yãmb sẽn deeg m kosg yĩnga. ⁴² Mam yẽ da miime tɩ yãmb deegda m kosg daar fãa, la yaa sẽn gũbg-b maama yĩnga la m yeel woto tɩ b tẽ tɩ yaa yãmb n tʋm maam.» ⁴³ La b sẽn gom woto, b moona ne koe-kãsenga: «Lazar, loog n yi yɩnga!» ⁴⁴ La vugr bala, kũuma yiime la a nao wã ne a nusã ra ket n vila ne pɛɛla la kãsenga ra ket n pila a neng t’a Zezi yeele: «Bɩ y lood n bas-a t’a kẽne.» ⁴⁵ La Zʋɩf rãmba sẽn da wa-b a Mari ne a Mart nengẽ, n yãe wẽnd makr kãnga, a Zezi sẽn maana, wʋsg tẽe bãmba. ⁴⁶ La kẽer kẽng n tɩ togsa Farizẽ rãmba a Zezi sẽn maan fãa. ⁴⁷ La maan-kʋʋdba nanamse ne Farizẽ rãmba tigma kãsem-dãmba tɩ b na n yẽs ne taaba n sãam a Zezi yelle. B yeelame: «Tõnd pʋs m maanda bõe? Daoã maanda wẽnd makr dãmb wʋsgo. ⁴⁸ Tõnd sã n bas-a t’a ket n maand woto, neb fãa na n tẽe-a lame, tɩ Rom rãmb wa wã d tẽnga, n menes d buudu.» ⁴⁹ La bãmb sʋka ned a ye sẽn boond t’a Kaif, n da ya maan-kʋʋd kãseng yʋʋmd kãnga; yẽ n yik n yeel-ba: «Yãmb sɩd ka be yam ye, ⁵⁰ yãmb ka tagsd tɩ nin-yend sẽn na n ki neb fãa yĩnga, tɩ buuda fãa da menem, dẽ n na n sãoog d yĩnga?» ⁵¹ La a Kaif sẽn gom woto wã, a ka gom a menga toor ye. A sẽn da ya maan-kʋʋd kãseng yʋʋmd kãnga, a leoka bãngr koɛɛga, t’a Zezi na n kii buuda yĩnga, ⁵² la ka buuda yĩng bal ye, yaa sẽn na yɩlẽ me tɩ Wẽnnaam kamba sẽn sẽegã le tigim taaba, n yɩ buud a ye. ⁵³ La badaar tɛka kãsem-dãmba tagsa b sẽn na n maanega n paam n kʋ a Zezi. ⁵⁴ Da yaa rẽ me yĩng la a Zezi ra pa le kẽnd Zʋɩf rãmb sʋka tɩ b neẽ ye la b kẽnga zĩig a ye sẽn pẽ ne weoogo, n kẽ tẽng sẽn boond tɩ Efrayim la b zĩnda beene ne b karen-biisã. ⁵⁵ La rẽ tɩ paka, Zʋɩf rãmba kibsã, ra kolgame; la tẽn kãng neb wʋsg kẽnga Zerizalɛɛm n na n tɩ segl b mense, ⁵⁶ la b ra baooda a Zezi la b ra bee wẽnd doogẽ n sõsd ne taaba n yetẽ: «Yãmb tagsda bõe, ad-y b kõn wa kibsa bada!» ⁵⁷ Maan-kʋʋdba nanamse la Farizẽ rãmb ra kõo noor tɩ ned ning fãa sẽn na n bãng b sẽn be zĩig ninga, bɩ a togs tɩ b tɩ yõk-ba.

¹ Pak kibs sẽn waa n ket t’a yoobe, a Zezi kẽnga Betani, tẽng ning a Lazar sẽn da ki n leb n paam vʋʋgrã. ² La be b segla dɩɩb bãmb yĩnga. A Mart n da kɩt rɩɩbã. A Lazar da bee sẽn da rɩtb ne a Zezi wã. ³ A Mari rɩka yubl sẽn pid ne yũ-noog kaam meng menga, la sẽn daad toogo n wa zɛ a Zezi nao la a yẽesd-b ne a zoobdo; rooga wulumda ne kaama yũugu. ⁴ B karen-biig a yembre, sẽn da na n zãmba bãmbã, a Zɩɩda, Iskariyot daoa, yeelame: ⁵ «Bõe yĩng tɩ b ka koos kaama wakɩ koeems kobs-tã n dɩk n pʋɩ naong rãmba?» ⁶ A sẽn gom woto wã ka yet t’a toog bee ne naong rãmb ye, yaa a sẽn da ya wagdrã. Ad-y yẽ n da zãad ligda korgo n da zuud ligda sẽn da suiid a pʋgẽ. ⁷ A Zezi yeel-a lame: «Bas paga laafi t’a beoola m mumbu, ne yũ-noog kaam. ⁸ Naong rãmb na n kell n zĩnda yãmb sʋk daar fãa la m kõn pa y sʋk daar fãa ye.» ⁹ Zãma wã bãngame t’a Zezi bee Betani tɩ b kẽng be, la ra ka a Zezi yĩng bal ye, b kẽng n na n tɩ gesa a Lazar sẽn paam tɩ b vʋʋg-a kɩɩms sʋka. ¹⁰ Maan-kʋʋdba nanams yẽsa ne taaba n na n kʋ a Lazar menga. ¹¹ Sɩda, yẽ yĩnga Zʋɩf rãmba wʋsg da kẽeda a Zezi. ¹² Beoog sẽn vẽege neb wʋsg waa kibsã la b sẽn wʋm t’a Zezi me wata Zerizalɛɛm, ¹³ b bao kãas vãado n yi n tɩ seg-ba la b kaasdẽ: «Kilill! Sẽn wata Soaala yʋʋr yĩnga, Israyɛl dĩma, paam pẽgre!» ¹⁴ A Zezi paama bõan-bila n zomb wala b sẽn gʋlse: ¹⁵ Siõ bi-pugla, da zoe rabeem ye, ad-f dĩma sẽn wate, b zomba bõan-bila. ¹⁶ Karen-biisa kaoos n wʋma yell kãng võore, yaa a Zezi sẽn waa n paam pẽgre la b yaool n tẽeg tɩ rẽ fãa da pĩnd n gʋlsa bãmb poorẽ, la yaa rẽ fãa n pidsi. ¹⁷ Zãma ninga sẽn zĩnda ne a Zezi b sẽn waa n bool a Lazar t’a yi kɩɩms sʋka, zãma kãng n da wɩngd ne kilsgu. ¹⁸ Yaa rẽ me yĩng la Zerizalɛɛm dãmba yi b segbo; b ra paam n wʋmame t’a Zezi n maan wẽnd makrã. ¹⁹ Farizẽ rãmba yẽ ra yeta taab woto: «Yãmb meng ka ne tɩ y pa tõog fɩ, ad neba fãa sẽn zoet n pʋgd yẽnda.» ²⁰ Ad-y sẽn mii n wat-b Zerizalɛɛm n na n waoog Wẽnnaama, bu-zẽnd dãmba, Grɛk rãmba, mii n bee sʋka. ²¹ Bãmb yẽne n waa a Filip nengẽ. A Filip yaa Galile Bɛtsayid daoa, la yẽ sɛɛg la b waa n yõke, n yetẽ: «D kẽema, tõnd tʋll n yãenda a Zezi.» ²² T’a Filip togs a Andre tɩ bãmb b yiibu tɩ taas koɛɛgã. ²³ Ad-a Zezi sẽn leoke: «Wakat taame tɩ Ned Biiga na n paam pẽgre. ²⁴ Sɩd-sɩda mam yeta yãmba, tɩ ka-beel sã n pa bus tẽnga t’a ki fãa, a paada a yembre la a sã n ki a rogda biis wʋsgo. ²⁵ Sẽn nong-a a vɩɩm na n menes-a lame, la sẽn kis-a a vɩɩm dũni kãnga pʋgẽ, a na paam-a, vɩɩm sẽn kõn sɛ yĩnga. ²⁶ Sẽn dat-a n yɩ m sõgne, bɩ a tũ maam; la mam sẽn be zĩig ning fãa, mam sõgna me na n zĩnda be. La m Ba na waoog-a. ²⁷ M yam bondgame marsã, la m na n yeelame tɩ bõe? M Ba, fãag-y maam ne wakat kãnga. La yaool n yaa tʋʋmd ning sẽn na n tʋm wakat kãnga la m wa moogo. ²⁸ M Ba, kɩt-y tɩ y yʋʋr paam pẽgre!» La koɛɛg n yi yĩngri n yeele: «Mam pẽg-b lame la b na n le kell n paama pẽgre!» ²⁹ Zãma wã sẽn da be be n wʋm koɛɛgã yeelame: «Yaa saag n kelme!» Tɩ kẽer yeele: «Yaa malɛk n gom ne bãmba!» ³⁰ T’a Zezi yeel: «Ka mam yĩng la koɛɛga sẽn tãsa ye, yaa yãmb yĩnga. ³¹ Yaa marsã la dũniya bʋʋd na n bʋ; yaa marsã la b na n tus dũni wã Naab n lubi. ³² La maam, b sã n wa zẽk-m yĩngri, mam na n taka bũmb fãa n kolg m menga.» ³³ Woto la b wilg b sẽn na ki kũum ninga. ³⁴ Zãma wã leok-b lame: «Tõnd zãmsa noora sebrẽ tɩ Krista na n paa daar fãa. Yãmb yɩta a wãn n yeele: ‹Yaa tɩlɛ tɩ b zẽk Ned Biiga yĩngri,› Ned Biiga yaa ãnna?» ³⁵ T’a Zezi leok-ba: «Vẽenem nan ket n bee yãmb sʋka, la a kõn kaoos ye, la Vẽenema sẽn nan ketã bɩ y kẽne, tɩ lik ra wa rɩ-y ye tɩ sẽn kẽnda likẽ, ka mi a sẽn dabdẽ ye. ³⁶ La vẽenema sẽn nan ket y yĩngã, bɩ y tẽ vẽenema, n wa yɩ vẽenem kamba.» Yaa woto la a Zezi gom yã, la b looga, bãmb sʋka, tɩ ned pa yãend-b ne a nif ye. ³⁷ Ne b sẽn da maan wẽnd makr dãmb wʋsgo tɩ b yãe wã, Zʋɩf rãmba kell n pa tẽ a Zezi ye. ³⁸ Dẽ me la bãngda Izayi gomda taasyã: Soaala, ãnna n tẽ d goama? La ãnna n yãend Soaala sẽn wilg b pãnga? ³⁹ B pʋs n da ka tõe n tẽ ye t’a Izayi ra yeelame: ⁴⁰ B pẽsa b nini, b kɩtame tɩ b sũur dɩglem, sẽn na yɩlẽ tɩ b nin da yãe ye, la b yam da nek ye, woto b kõn tek b zʋgo la m kõn sãaog-b ye. ⁴¹ A Izayi togsa woto t’a reng n yãee Soaala ne b ziiri la yaa bãmb yell la a gomda. ⁴² Baasgo, ba taoor dãmba sʋka, wʋsgo tẽ-b lame. Ad-y yaa Farizẽ rãmba yĩng bala, la b ra ka togsd sẽn be b sũurẽ, n maand rabeem tɩ b na n wa yiis b pʋʋsga roogẽ. ⁴³ B ra nonga ninsaalb pẽgre n yɩɩd Wẽnnaam dẽnna. ⁴⁴ A Zezi zẽka koɛɛg n yeele: «Sẽn tẽed-a maam fãa, ka maam la a tẽed ye, yaa sẽn tʋm-b maama. ⁴⁵ La sẽn yãet-a maam, yãeta sẽn tʋm-a maama. ⁴⁶ M yaa vẽenem n wa dũni pʋgẽ tɩ sẽn tẽeda maam da pa likẽ ye. ⁴⁷ Sẽn kelgd-a m goama n yaool n pa reegd-b, m ka kaood a soab bʋʋd ye tɩ m ka wa n na n kao dũni bʋʋd ye, m waa dũni fãagre. ⁴⁸ Sẽn zãgsd-a maam, la a pa reegd m goama, yẽ soab tara a bʋ-kaooda: yaa gomdã m sẽn togsã, gom kãng bala n na kao a bʋʋdo yaoolem daare. ⁴⁹ Mam ka gom m toorẽ n gomd ye; yaa sẽn tʋm-b maama, yaa Ba meng n kõ m noorã m sẽn na n togsã la m sẽn na n kɩt tɩ neba bãngã. ⁵⁰ La mam miime tɩ b noora reegr wata ne vɩɩm sẽn kõn sɛ. Woto m sẽn togsd bũmb ningã, yaa wala m Ba sẽn togs-m la m togsda.»

¹ Pak kibsa da nan ka ta ye, la a Zezi sẽn da mi tɩ b wakat yaoome, tɩ b na n yi dũni kãnga n leb b Ba nengẽ, ad-y b sẽn da nong b kamba sẽn be dũniya, b pidsa b nonglma kaset zãnga. ² Rɩɩb la b da rɩta. Dẽ tɩ Sʋtãana da zoe n ninga Iskariyot Simo biig a Zɩɩda yamẽ, t’a zãmb-ba. ³ Dẽ t’a Zezi ra zoe n miime tɩ b Ba ninga bũmb fãa b nugẽ, la b sẽn yi Wẽnnaam nengẽ wã, be la b na n lebe. ⁴ Dẽ me yĩng la b yiki n yeeg b fuugu n dɩk peend n sẽgen b sɛɛga, ⁵ n pʋdg koom ne laaga n sɩng n waasd b karen-biisa nao, la b yẽesd-b ne peend ning b sẽn da sẽbgã. ⁶ La b sẽn ta a Simo-Piyɛr la yẽ sẽn yeel-b: «Soaala, yãmb n na n waas mam naoo?» ⁷ T’a Zezi leok: «Mam sẽn maand bũmb ning marsã wã, fo ka wʋmda võore la f na waa n wʋm.» ⁸ T’a Piyɛr yeel: «Yãmb kõn waas m nao abada!» La a Zezi leokame: «M sã n pa waas f nao, fo kõn paam f pʋɩɩr m nengẽ ye.» ⁹ T’a Piyɛr yeele: «Bɩ y ra waas m nao bal ye, pek-y m nusã la m zuga me.» ¹⁰ T’a Zezi na n yeel-a: «Sẽn so-a koom ka le rat bũmb a to sa n ka a nao waasgo tɩ yĩnga yɩlga zãnga. Yãmb yaa yɩlma la ka y fãa ye.» ¹¹ Bãmb da mii ned ninga sẽn na n zãmba bãmbã, yaa rẽ yĩng la yeel yã: ka yãmb fãa n ya yɩlm ye. ¹² La b sẽn waas karen-biisa nao n sɛ, b leb n yeelga b fuugu n le gãand dɩɩba zĩigẽ la ad-b sẽn paase: «M sẽn maan bũmb ningã, y wʋmda a võor bɩ? ¹³ Yãmb boond-m lame tɩ karen-saamba la Zu-soaba, la y bee bʋʋm, m sɩd yaa boto. ¹⁴ La mam sã n waasd yãmb nao, mam sẽn ya karen-saamb la zu-soaba, yãmb me na waas y taab nao. ¹⁵ M kõo y la yam sõngo, wala mam sẽn maan ne yãmbã, maan-y boto ne y taaba. ¹⁶ Sɩd-sɩda m yet-y lame tɩ sõgen ka yɩɩd a zu-soab ye, la tʋʋm-tʋmd me ka yɩɩd sẽn tʋma yẽ wã ye. ¹⁷ Yãmb sã n mi rẽnna, yãmb la zu-noog rãmba y sã n maand boto. ¹⁸ Ka y fãa yell la m sẽn gomda ye, mam mii m sẽn tũus b rãmba, la yaa sẽn na yɩlẽ tɩ sẽn be Sebr sõnga pʋgẽ taase: ‹Sẽn dɩt-a ne maam, yẽ n zẽk a nao-kãsen-kãare n na n tão-ma.› ¹⁹ Mam pĩnd n togsd-y lame tɩ nan pa ta ye, tɩ sã n wa ta bɩ y tẽ tɩ m yaa sẽn vɩ a soabã. ²⁰ Sɩd-sɩda mam yeta yãmba: ‹Sẽn deegd-a mam sẽn na n tʋm a soaba, yaa maam la a reegda, la sẽn deeg-a maam, deegda sẽn tʋm-b maama.› » ²¹ La a Zezi sẽn yeel woto, b yam bondgame, la b goma vẽenega: «Sɩd-sɩda m yeta yãmb tɩ yãmb nin-yend n na n yõk-m n kɩse.» ²² La b tʋʋm-tʋmdba ra geta taab n ka mi b sẽn gomd a soab yell ye. ²³ Karen-biig a ye n da gãe n dell a Zezi yãoog. A Zezi da nonga yẽ soabã. ²⁴ T’a Simo-Piyɛr na n kams-a n sok yaa ãnda yell la b gomda. ²⁵ La karen-biig ning sẽn da rella yãoogã sokame: «Soaala, yaa ãnna?» ²⁶ T’a Zezi leok-a: «M sẽn na suk bur võr zẽedẽ n kõ a soabã, yaa yẽnda.» La b sẽn suk bur võra zẽedo, b kõ-la a Zɩɩda, Iskariyot Simo biigã. ²⁷ La a sẽn deeg võrã, Sʋtãan kẽe a Zɩɩda pʋgẽ; a Zezi yeelame: «Fo sẽn sed bũmb ningã, bɩ f maan-a tao tao.» ²⁸ La sẽn da rɩt-bã ned ba a ye ka bãng sẽn ya bũmb ning yĩnga la a Zezi gom woto ne a ye. ²⁹ Kẽer da tẽedame t’a Zɩɩda sẽn da zãad ligda korg yĩnga, a Zezi tʋlg n yeel-a lame: «Da d sẽn tar bũmb ninga tʋʋmd kibsa yĩnga, bɩ maan wẽn kosgo ne naong rãmba.» ³⁰ A Zɩɩda sẽn deeg burã, a yik n yiime; ra zoe n lebga yʋngo. ³¹ A Zɩɩda sẽn yi la a Zezi yeel yã: «Marsã Ned Biiga paama pẽgre la Wẽnd me paama pẽgr bãmb nengẽ. ³² La Wẽnnaam sã n paam pẽgr bãmb nengẽ, bãmb me na n paama pẽgr Wẽnnaam nengẽ la b pẽgra wakat ka na n kaoos n ta ye.» ³³ M kom-nongdse, m ket n bee ne yãmba, la kõn kaoos ye. Yãmb me na n wa baooda maam, la wala m sẽn yeel Zʋɩf rãmba: mam sẽn dabdẽ wã, y ka tõe n wa be wã, m leokda yãmb me boto marsã. ³⁴ M kõt-y la no-paalga: «Nong-y taaba; wala m sẽn nong yãmbã, yãmb me nong y taaba. ³⁵ Neba fãa na n bãngame tɩ y yaa m karen-biisi: y sã n tar nonglem ne taaba.» ³⁶ La a Simo-Piyɛr yeelame: «Soaala, yaa yɛ la yãmb dabda?» T’a Zezi leok: «M sẽn dabdẽ wã, fo nan ka tõe n tũ-m be ye, la yɩ bilfu f na waa n tũ-ma.» ³⁷ T’a Simo-Piyɛr yeel: «Yaa bõe yĩng la m ka tõe n tũ-y marsã? Mam na n kõ m meng vɩɩm yãmb yĩnga.» ³⁸ T’a Zezi leok-a: «Fo na n kõo f meng vɩɩm mam yĩnga? Sɩd-sɩda mam yeta foom: noaag kõn kelem tɩ f ka reng n yeel naoor a tã tɩ f ka mi-m ye.

¹ Bɩ y ra sãam-y sũur ye! Yãmb tẽeda Wẽnnaam, bɩ y tẽ maam me. ² Dot wʋsgo n be m Ba zakẽ, sã n da kaẽ boto m naan n togsẽ yã; m dabd n na tɩ segla zĩig n bĩng yã. ³ La m sã n kẽng n tɩ segl zĩigã, m na le wa peeg-y n looge, tɩ mam sẽn be zĩig ninga bɩ y me zĩnd be. ⁴ La m sẽn dabdẽ wã, y mi-la a sore.» ⁵ La a Toma yeelame: «Soaala, tõnd ka mi y sẽn dabdẽ wɛ! D na n yɩɩ wãn n bãng sore?» ⁶ T’a Zezi yeel-a: «Maam la sore, la sɩda, la vɩɩm. Ned ka tat m Ba nengẽ tɩ ka mam maasem yĩng ye. ⁷ Yãmb sã n da bãngẽ maam, y naan n bãngẽ m Ba me, la yãmb pʋs n mi-b lame, la y yãee-b lame.» ⁸ T’a Filip yeel-ba: «Soaala, wilg-y tõnd y Ba tɩ rẽ sekd-d lame.» ⁹ T’a Zezi leok: «Mam bee ne yãmb al daar zãra, Filip, tɩ yãmb ket n pa mi maam? Sẽn yãenda maam, yãenda m Ba. Fo na n yɩɩ wãn n yeele: ‹Wilg-y tõnd y Ba?› ¹⁰ Fo ka tẽed tɩ m bee m Ba pʋgẽ tɩ m Ba me be m pʋgẽ laa? Goam niyns m sẽn gom ne yãmba, m ka gom-ba m meng m toor ye. M ba sẽn be m pʋgẽ wã, n maand b tʋʋma. ¹¹ Tẽe-y-ma! Mam bee m Ba pʋgẽ tɩ m Ba be m pʋgẽ. Ba y ka na n tẽ bũmb a to yĩng me bɩ y tẽ m tʋʋma yĩnga. ¹² Sɩd-sɩda mam yeta yãmba tɩ sẽn tẽed-a maam, a me na n maana tʋʋm niyns m sẽn maandã, la a pʋd n na maana sẽn yɩɩd rẽnna tɩ m dabda m Ba nengẽ. ¹³ La yãmb sẽn na n kos m Ba bũmb ning fãa m yʋʋr yĩnga, m na maane, tɩ m Ba paam pẽgr b Biig maasmẽ. ¹⁴ Yãmb sã n kos-m bũmb m yʋʋr yĩnga, m na maane. ¹⁵ Yãmb sã n nong maam y na reeg m noya. ¹⁶ La m na n kosa m Ba, la b na tʋm yãmb Sõangd a to t’a wa pa ne yãmb daar fãa. ¹⁷ Bãmb la sɩd soaba, Vʋʋsem Sõngo, dũni sẽn ka tõe n deeg a soabã, tɩ dũni ka ne-b la a ka mi-b ye. Yãmb yẽ mi-b lame tɩ b bee ne yãmba. ¹⁸ Mam kõn bas yãmb kɩɩbd ye, m na n wala y nengẽ. ¹⁹ Keta bilfu, la dũni rãmb kõn le yãend-m ye. La yãmb yẽ na bãng tɩ m vɩɩme, la yãmb me na vɩɩnde. ²⁰ Sã n wa beẽ, yãmb na bãng tɩ mam bee m Ba pʋgẽ tɩ yãmb bee m pʋgẽ, tɩ mam me bee y pʋgẽ. ²¹ Sẽn mi-a mam noya la a reegd-b, yaa yẽ soab n nong maam, la sẽn nong-a maam, m Ba me na n nonga yẽ soaba, la mam me na n nong-a lame, la m na n puka m meng ne yẽ.» ²² A Zɩɩda, (ka Iskariyot daoã ye,) yeel-b lame: «Maan a wãna tɩ yãmb na n puk y meng ne tõndo n ka na n puk y meng ne dũni rãmba?» ²³ T’a Zezi yeel-a: «Ned sã n nong maam, a na deega m goama, la m Ba na n nong-a lame la d na n waa a soab nengẽ, d na n tii roog a soab nengẽ. ²⁴ La sẽn pa nong-a maam ka reegd m goam ye, la goama y sẽn wʋmda ka m dẽnd ye, yaa m Ba sẽn tʋm maama rẽnna. ²⁵ M togs-y la rẽ fãa tɩ m ket n be ne yãmba. ²⁶ La Sõangdã, a Vʋʋsem Sõngo, Ba sẽn na n tʋm a soab m yʋʋr yĩnga, bãmb na n zãmsa yãmb bũmb fãa, la b na n le tẽeg-y la m sẽn togs-y bũmb ning fãa. ²⁷ Mam basd-y la m laafi, m kõt-y la m laafi la m laafi wã ka wẽnd dũni wã sẽn kõt a soaba ye. Bɩ y sũur da sãam la y ra zoe rabeem ye. ²⁸ Y wʋma m sẽn yeel-y: m dabdame la m na n le waa y nengẽ, y sã n nong maam, y na noog y sũuri, m sẽn dabd m Ba wã nengẽ tɩ m Ba yɩɩd m la me. ²⁹ La m pĩnd n togsd-y la rẽ marsã tɩ y bãng tiiri tɩ nan pa ta ye tɩ sã n wa ta bɩ y tẽ. ³⁰ La Marsã tɛka m kõn le sõs ne yãmb n kaoos ye tɩ dũni kãnga naab watame; yẽ ka so bũmb m nengẽ ye, ³¹ la yaa sẽn na yɩlẽ tɩ dũni rãmb bãng tɩ m nonga m Ba la m maanda b sẽn yet tɩ m maan a soaba. Aya! Yik-y tɩ d loog ka!

¹ Maam la bugsuntun-sõng menga tɩ m Ba yaa a rõaasa. ² Will ning sẽn pa womd biisi, b na n kɛɛg-a lame, la sẽn womd-a biisi b na maneg-a n kʋʋs t’a wom n yɩɩge. ³ Yãmb zoe n yaa sõma, goama mam sẽn togs yãmba yĩnga. ⁴ Bɩ y kell n pa ne maam, tɩ mam me pa ne yã. Wala will sẽn pa tõe n wom biisa toore, a sã n pa lagem ne tɩɩgã, woto me ne yãmba, yãmb me sã n pa lagem ne maam. ⁵ Maam la bugsuntun-sõngã tɩɩga, yãmb la wila. Sẽn paad-a ne maam, tɩ mam me paad ne a soaba, yẽ womda biis wʋsgo, la y sã n ka lagem ne maam, y ka tõe n wom biis ye. ⁶ Sẽn ka paad-a ne maam, b lobd-a la yɩng wala, kɛɛdo la a na n kʋɩɩme, la b wʋkd-a lame n lob bugmẽ tɩ bugum dɩ. ⁷ Yãmb sã n pa ne maam, la m goama me sã n pa y pʋgẽ, kos-y yãmb sẽn dat bũmb ning fãa, tɩ y na n paamame. ⁸ Y sã n womd biis wʋsgo la y lebg m karen-biisi, dẽ na wa ne m Ba pẽgre. ⁹ Wala m Ba sẽn nong maama, mam me nong-y lame. Bɩ y kell n pa m nonglma pʋgẽ. ¹⁰ Yãmb sã n sakd m noya, y na n kell n paa m nonglma pʋgẽ, wala m sẽn sak m Ba noya n paa b nonglma pʋgẽ. ¹¹ M togsd-y la rẽ faa, tɩ m sũ-nooga wa lebg y rẽnna, la y sũ-nooga wa pid zãnga. ¹² M noora la woto: nong-y taaba, wala m sẽn nong yãmbã. ¹³ Ned nonglem ka pit n yɩɩg woto ye: kõ f vɩɩm f zo-rãmb yĩnga. ¹⁴ Yãmb yaa m zo-rãmba, y sã n maan bũmb ning fãa m sẽn yeel yãmbã. ¹⁵ Mam ka le boond-y tɩ m sõgen-kamb ye, tɩ sõgen ka mi a zu-soab sẽn maand ye; m boond-y lame tɩ m zo-rãmba, tɩ m sẽn wʋm bũmb ning fãa m Ba nengẽ, m togs-y lame. ¹⁶ Ka yãmb n tũus maam ye, maam n tũus yãmb, n tʋm-y tɩ y kẽng la y wom biisi la y biis ra tol n sɛ ye la woto y sẽn na n kos m Ba bũmb ning fãa, m yʋʋr yĩnga, bɩ b kõ-a yãmba. ¹⁷ M sẽn kõt yãmb noor ninga la woto: nong-y taaba. ¹⁸ Dũni wã sã n kis yã, bãng-y t’a reng n kisga maam. ¹⁹ Yãmb sã n da yaẽ la dũni soolem, dũni na n nongẽ la a sẽn so, la yãmb sẽn ka kẽed dũniya tɩ yaa maam n yiis yãmb dũniya, yaa rẽ me yĩng la dũni kis yã. ²⁰ Tẽeg-y gomd ning m sẽn yeelã: Sõgen ka yɩɩd a Zu-soab ye. B sẽn nams maama, b na n namsa yãmb me; la b sã n deega mam goama, b na reeg yãmb me rẽnna. ²¹ Yaa mam yĩng la b kis yãmb la b maand beem ne yãmba, la rẽ yaa b sẽn ka mi sẽn tʋm-b maama. ²² M sã n da ka waẽ la m sã n da pa gomẽ ne-ba, taal kaẽ b zug ye, marsã b yel-wẽnda ka be padõng ye. ²³ Sẽn kisa maam kisa m Ba. ²⁴ M sã n da ka maan b nifẽ tʋʋma ned ba a ye sẽn pa maana, yel-wẽnd kaẽ b zug ye. La marsã ne b sẽn yãend tʋʋm kãensã, b baas n kisa maam, la b kisa m Ba. ²⁵ Yaa sẽn na yɩlẽ tɩ gomd ning sẽn gʋls b noor sebrẽ wã pidsi: ‹B kisg-m la zaalem.› ²⁶ La Sõangda sã n wa, Sõangd ning m sẽn na n zĩnd m Ba nengẽ n tʋm yãmbã, Sɩd soab a Vʋʋsem Sõng sẽn yit Ba nengẽ wã, bãmb na n yɩɩ m kaset soaba. ²⁷ La yãmb me na n yɩɩ m kaset dãmba, tɩ y bee ne maam al sɩngrẽ.

¹ Mam togs-y la rẽ fãa, tɩ y tẽeb da wa sãam ye. ² B na yiisa yãmb pʋʋsg rotẽ. La yɩɩd rẽ, wakat n wate tɩ sẽn na n kʋ-a yãmba na n tẽ t’a maana Wẽnnaam waoogr tʋʋmde. ³ B na n maana yãmb boto, tɩ b ka bãng m Ba la maam ye. ⁴ La m togs-y la rẽnna, tɩ b wakata sã n ta bɩ y tẽeg tɩ m pĩnd n togs-y lame. M ka togs-y rẽ al sɩngrẽ ye, tɩ m da bee ne yãmba. ⁵ La marsã m kuiisa sẽn tʋm-b maama nengẽ, la yãmb ned ba a ye pa sokd-ma: ‹Y rabda yɛ?› ⁶ La m sẽn wilg-y dẽ wã, la y sũur pid ne sũ-sãanga. ⁷ Yaool n yaa sɩd la m togsd-y: m kulb bee yõod ne yã; tɩ m sã n pa kuli, Sõangdã kõn wa y nengẽ ye, la m sã n kuli, m na tʋm-b tɩ b wa. ⁸ A Vʋʋsem sõng waoong raare, b na puka yel-wẽnd sẽn yɩ bũmb ninga n puk sõmblem sẽn yɩ bũmb ninga, n puk bʋʋm sẽn yɛs zĩig ninga. ⁹ Yel-wẽnd sẽn yɩ bũmb ninga: yaa tɩ b pa tẽ maam ye ¹⁰ sõmblem sẽn yɛs zĩig ninga: tɩ m dabda Sõmblem Ba wã nengẽ la y ka na n le yãend maam ye. ¹¹ N puk bʋʋm sẽn be zĩig ninga: tɩ dũni wã naab bʋʋd kaoome la b mong-a la bʋʋm. ¹² M ket n tara koees wʋsgo n na n togsyã, la y nan ka tõe n deeg-b nand ye. ¹³ La Sɩd soab a Vʋʋsem Sõng sã n wa, bãmb na n zãms-y la sɩd zãnga; b kõn gom b toor goam ye, b na n togs-y la b sẽn wʋme, b na n wilg-y la sẽn na n yaool wa fãa. ¹⁴ Bãmb n na n pẽg maam, tɩ bũmb ning b sẽn na n wilg yãmb fãa, b na n deeg-a la mam nengẽ. ¹⁵ M Ba sẽn tar fãa yaa maam n so. Yaa rẽ yĩng la m yeel-y tɩ b na n deega mam nengẽ n togs yãmba. ¹⁶ Keta bilf bala tɩ y ka na n le yãend maam ye la yɩ bilfu y na le yãend-ma.» ¹⁷ La karen-biisa sogsa taaba: «Gomdã b sẽn leok tõndã võor la bõe: ‹Sã n yɩ bilfu, y kõn le yãe-m ye, la sã n yɩ bilfũ y na le yãend-ma,› bɩ: ‹M kuiisa m Ba nengẽ?› ¹⁸ B ra yetame: ‹Sã n yɩ bilfu, Bilfa võor yaa bõe?› Tõnd pa wʋmd b sẽn dat n yeel bũmb ning ye.» ¹⁹ La a Zezi bãngame tɩ b da rat n sok-b lame, dẽ la b yeel-ba: «Yãmb sogsda taab m gomda võore: Sã n yɩ bilfu y kõn le yãe-m ye la sã n yɩ bilfu y na le yãe-ma. ²⁰ Sɩd-sɩda, m yeta yãmba tɩ y na n yãbame la y na n waasame la dũni na n kɩdmame, la yãmb sũur na n sãamame. Yãmb sũ-sãanga yaool n na n tedg n lebga sũ-noogo. ²¹ Pag sã n kũmd dogem, a tara sũ-sãanga, t’a wakat taame, la a sã n dog a biig n sɛ, a pa le tẽegd a namsga yɛs ye, t’a sũur yaa noogo, ninsaal sẽn dog dũni pʋgẽ wã yĩnga. ²² Ad yãmb me sẽn zĩ marsã ne sũ-sãanga, la m na n le yãend-y lame, la y sũur na yɩ noogo, la ned ba a ye kõn tõog n sãam y sũ-nooga ye. ²³ La badaare, y kõn le sok-m bũmb ye. Sɩd-sɩda mam yeta yãmba tɩ y sẽn na n kos m Ba bũmb ning fãa, m yʋʋr yĩnga, b na kõ yã. ²⁴ Al n ta marsã y nan pa kos bũmb m yʋʋr yĩng ye; kos-y tɩ y na n paamame, tɩ y sũ-noog pid zãnga. ²⁵ M togs-y la rẽ ne yelbũna la sã n yɩ bilfu m kõn le wẽ-y yelbũn ye, m na wilg-y m Ba yell vẽenega. ²⁶ Badaare, y na kos m yʋʋr yĩnga la m ka yet tɩ m na n yõka Ba sɛɛg y yĩng ye, ²⁷ tɩ Ba menga nonga yãmba, y sẽn nong maama yĩnga la y sẽn tẽ tɩ m yii Wẽnnaam nengẽ wã yĩnga. ²⁸ M yii m Ba nengẽ n wa dũniya, la marsã m yita dũniya n kuiis m Ba nengẽ.» ²⁹ Karen-biisa yeel-b lame: «Ad marsã yãmb gomda vẽenega, pa le ya ne yelbũn ye! ³⁰ Marsã d bãngame tɩ yãmb mii bũmb fãa, la y pa le tar ned sokr tʋʋmde ye, dẽ la d tẽed tɩ yãmb yii Wẽnnaam nengẽ.» ³¹ T’a Zezi yeel-ba: «Marsã yãmb tẽedame? ³² La wakat n na n ta, la a zoe n taame, yãmb fãa na n sẽegame, ned kam fãa a sẽn teesẽ, n bas maam m yembre. La mam ka m yembr ye, tɩ Ba bee ne maam. ³³ Mam togsa yãmb dẽnna tɩ y paam laafi mam nengẽ. Dũni pʋgẽ y na n yãee toogo, la da bas-y raood ye! Mam tõoga dũniya.»

¹ A Zezi sẽn gom woto, b rooga b neng n ges yĩngri n yeele: «Ba, wakat taame: pẽg-y Biiga tɩ y Biiga me pẽg yãmba! ² Y kõo Biiga tõog Adem biig fãa zugu. Bɩ neb niyns fãa yãmb sẽn dɩk n kõ y Biigã, paam vɩɩm sẽn kõn sɛ! ³ La vɩɩm sẽn kõn sɛ wã, yaa b bãng yãmba, Wẽnd meng sẽn ka to, la b bãng y sẽn tʋm a soaba, a Zezi Krista. ⁴ Mam pẽga yãmb tẽng zugu; m tʋm n baasa tʋʋmd ning y sẽn da kõ-ma. ⁵ Marsã, Ba, pẽg-y maam ne pẽgr ninga m sẽn da tar y nengẽ tɩ dũni nan ka naana. ⁶ Yãmb sẽn welg b rãmba dũni wã pʋgẽ n kõ maama, m wilga bãmb y yʋʋre. Yãmb n da so-ba, la y rɩk-b lame n kõ maam la b reega y gomde. ⁷ Marsã b bãnga me tɩ m sẽn paama fãa yita yãmb nengẽ. ⁸ Goama y sẽn taas maama, mam me taas-b lame la b reegame, la b bãngame tɩ m yila y nengẽ, la b tẽeme tɩ yãmb n tʋm maam. ⁹ Yaa bãmb yĩng la m pʋʋsda, m ka pʋsd dũni wã yĩng ye. M pʋʋsda y sẽn welg b rãmb n kõ maama yĩnga. B yaa yãmb soolem, ¹⁰ Mam sẽn so fãa, yãmb n so. La yãmb me sẽn so, maam n so. La sɩda m paama pẽgr b nengẽ. ¹¹ Marsã m ka le be dũni pʋgẽ ye la bãmb yẽ be a pʋgẽ, tɩ mam yaool n wat y nengẽ. Ba sõngo, bɩ y yõdg n gũ-ba, yʋʋr ning y sẽn kõ-ma maasem yĩnga, tɩ b kell n yɩ a ye wa tõndo sẽn yaa a ye wã. ¹² M sẽn da waa n be ne-ba, m gũ-b la yʋʋra yãmb sẽn kõ-ma maasmẽ la bãmb sʋka ned ba a ye ka menem sã n ka bi-menemdgã, sẽn na n yɩlẽ tɩ sẽn gʋlsa pidsi. ¹³ Marsã m wata y nengẽ la m togsa woto tɩ m ket dũniya tɩ sẽn be-b dũni wã sũur wa pid ne m sũ-nooga zãnga. ¹⁴ M kõ-b la yãmb koɛɛga la dũni kisg-b lame tɩ b ka dũni kamb ye, wala m me sẽn ka dũni biiga. ¹⁵ M pa kot yãmb tɩ y yiis-b dũniya, m kot-y lame bal tɩ y fãag-b ne Wẽnga. ¹⁶ Bãmb ka dũni kamba wala m me sẽn ka dũni biiga. ¹⁷ Bɩ y gomda tus-ba n kẽes y sõmblema pʋga tɩ yãmb gomda yaa sɩda. ¹⁸ Wala y sẽn tʋm maam dũni pʋgẽ mam me tʋmda bãmb dũni pʋgẽ. ¹⁹ Yaa bãmb yĩng la m dɩk m menga n bas Wẽnd nusẽ n dat tɩ bãmb me wa rɩk b meng zãng n kɩs Sɩdã. ²⁰ Mam ka pʋʋsd yãmb b yĩng bal ye, m pʋʋsda sẽn na n tẽ-b maama bãmb me kaseta yĩnga. ²¹ M pʋʋsdame tɩ b fãa wa yɩ bũmb a ye. M Ba, wala yãmb sẽn be m pʋgẽ tɩ mam me bee y pʋgẽ, bɩ bãmb me pa d pʋsẽ, tɩ dũniya wa tẽ tɩ yãmb n tʋm maam. ²² La yãmb sẽn kõ-m pẽgr ningã m kõ-a la bãmba, sẽn na yɩlẽ tɩ b yɩ bũmb a ye wala tõnd sẽn ya a ye wã. ²³ Woto mam bee bãmb pʋgẽ, tɩ yãmb me bee mam pʋgẽ tɩ lagmen-taara pids zãnga, tɩ dũni wã bãng tɩ yãmb n tʋm maam la yãmb nonga bãmb me, wala y sẽn nong maama. ²⁴ Ba, yãmb sẽn kõ maam b rãmbã, m datame tɩ mam sẽn beẽ wã, bɩ bãmb me zĩnd ne maam, n paam n yãend m pẽgre, pẽgr ning y sẽn kõ maama, tɩ y ra nonga maam al tɩ dũni nan pa naan ye. ²⁵ Zemsgo soab, Ba, dũniya ka bãng-y ye, la mam yẽ bãng-y lame la m karen-biisa reegame tɩ yãmb n tʋm maam. ²⁶ Mam wilg-b la y yʋʋre, la m na le wilg-ba, n paase la woto b na paam b pʋsẽ, wala mam sẽn tar m pʋgẽ, nonglem ning y sẽn nong maama.»

¹ B sẽn pʋʋs n sɛ, a Zezi yii ne b Tʋʋm-tʋmdba, n dʋʋg Sedrõ kʋɩlga, la zẽed n da be be tɩ b tɩ kẽe a pʋgẽ. Karen-biisa me tũume. ² A Zɩɩda – ned ninga sẽn na n zãmba bãmba – ra mii zĩiga, t’a Zezi ra kẽnda be naoor wʋsgo ne b karen-biisã. ³ A Zɩɩda da lʋɩɩ tãb-biisa la wẽnd do-gũudba taoore; maan-kʋʋdba nanamse la Farizẽ rãmba n da yiis-b; la b waa ne fitil dãmba la bug vɩlense, la zab teedo. ⁴ La a Zezi sẽn da mi bũmb ning fãa sẽn na n maana, b yik n seg-b lame n yeel-ba: «Yãmb baooda ãnna?» ⁵ Tɩ b leok-ba: «A Zezi, Nazarɛt raoã.» T’a Zezi yeele: «Yaa maam!» Zãmbd a Zɩɩda da bee b sʋka. ⁶ La a Zezi sẽn yeele: «Yaa maam!» B fãa tara poorẽ n lʋɩ tẽnga. ⁷ Tɩ b le sok yɛsa: «Y baooda ãnna?» Tɩ b le yeele: «A Zezi, Nazarɛt nedã!» ⁸ T’a Zezi leok: «M yeel-y lame tɩ yaa maam; la sã n ya maam la y baooda, bɩ y bas bãmba tɩ b looge.» ⁹ B goma woto n na n taas b sẽn da pĩnd n yeele: «Y sẽn kõ maam b rãmbã, m ka bas ba a ye t’a menem ye.» ¹⁰ A Simo-Piyɛr da tara sʋʋga, t’a wõog-a n kɛ maan-kʋʋd kãseng sõgen a ye n kẽbga rɩtg tʋbre, la sõgna yʋʋr da yaa Malkus. ¹¹ T’a Zezi yeel a Piyɛr: «Leb n sui sʋʋgã a wʋʋgẽ; m Ba sẽn tugl maam wamd ningã, m ka na n yũ-a bɩ?» ¹² Tãb-biisa, bʋʋda naaba la ro-gũudba yõka a Zezi n sẽbe, ¹³ n deng n tall-ba n kẽng a An nengẽ t’a da yaa Kaif rɛɛmba. La yaa a Kaif n da so kãsengo yʋʋmd kãnga. ¹⁴ Yaa a Kaif n da sagl Zʋɩf rãmba tɩ sãoome tɩ ned a ye ki b fãa zĩigẽ. ¹⁵ A Simo-Piyɛr da pʋgda a Zezi ne tʋʋm-tʋmd a to. Maan-kʋʋd kãsengã da mii yẽ soabã. Yẽ soaba kẽe ne a Zezi maan-kʋʋd kãsenga zakẽ. ¹⁶ La a Piyɛr da yɛsa yɩnga, zaka noore la maan-kʋʋd kãsenga sẽn da mi a soaba, yii yɩng n yẽs ne zak-noor-gũud poaka t’a bas t’a Piyɛr kẽ. ¹⁷ La zak-noor-gũud poakã yeela a Piyɛr: «Fo ka raoã karen-biig a ye sɩda?» T’a yeele: «Ayoo!» ¹⁸ Sõgen-kamba ne gũudba ra tugla bugum n wootẽ tɩ da yaa waoodo, t’a Piyɛr zĩ ne-ba, n woot bugma. ¹⁹ Maan-kʋʋd kãseng soka a Zezi b karen-biisa yelle, la b karenga yelle. ²⁰ La a Zezi leokame: «M goma ne dũni rãmb vẽenemẽ tɩ b wʋm, daar fãa m zãmsa nebã pʋsg rotẽ la wẽnd doogẽ, Zʋɩf rãmb sẽn tigimd taab zĩig ningã, m ka soos n gom fɩ. ²¹ Yaa bõe yĩng la y sokd-ma? Sok-y neb niyns sẽn kelg-b maama, m sẽn gom bũmb ning yelle ne-ba. Ade, bãmb mii m sẽn yeel bũmb ninga.» ²² La a Zezi sẽn yeel woto, sõgen a ye sẽn da be be wẽ-b la pɛk n yetẽ: «Yaa woto la f leokd maan-kʋʋd kãsenga?» ²³ T’a Zezi yeel-a: «M sã n pa gom neere, bɩ f wilg bõe n ka zems m goama pʋgẽ, la m sã n goma neere, yaa bõe tɩ f wẽed ma?» ²⁴ A An kell n basa Zezi ne b wĩyã n tʋm-b maan-kʋʋd kãsenga a Kaif nengẽ. ²⁵ A Simo-Piyɛr da ket n zĩi n woota bugma tɩ neb yeel-a: «Fo ka a karen-biig sɩda?» T’a kɩɩs n yetẽ: «Ayoo!» ²⁶ Maan-kʋʋd kãseng sõgen a ye, a Piyɛr sẽn kẽbg a soab tʋbra doagda, yeela a Piyɛr: «M ka yãend-f ne a zẽedẽ wã sɩda?» ²⁷ T’a Piyɛr kɩɩse, tɩ no-raoog wẽneg n kelem. ²⁸ La b yi a Kaif nengẽ ne a Zezi, n tall-ba n kẽng bʋʋda zĩigẽ; da yaa tõd-beoogo la b pa sak n kẽ bʋʋda zĩigẽ, tɩ b na n wa rẽgem n pa tõog n dɩ paka rɩɩb ye. ²⁹ T’a Pilat yi yɩng n sok-ba: «Yãmb ningda rao kãnga taale ne bõe?» ³⁰ Tɩ b leoke: «Ad-a sã n da kaẽ bi-bɛɛga, d ka na n yõkẽ yã n wa kɩs yãmb ye.» ³¹ T’a Pilat yeel-ba: «Bɩ yãmb meng tall-a y toore n tɩ bʋ-a wa y noya sẽn date.» Tɩ Zʋɩf rãmb leok: «D ka tar sor n kʋ ned ye.» ³² Da yaa sẽn na n pids gomd ning b sẽn da yiisi n na wilg b sẽn na n ki kũum ninga. ³³ La a Pilat le kẽe doogẽ, bʋʋda zĩigẽ n bool a Zezi n sok-ba: «Yaa foom la Zʋɩf rãmba dĩm bɩ?» ³⁴ T’a Zezi kedg n sok-a: «Fo gomda woto f toor bɩ yaa ned n gom m yelle?» ³⁵ T’a Pilat yeele: «M yaa Zʋɩf bɩ? Yaa f buuda neb ne maan-kʋʋdb nanamse n yõk-f n wa kɩs-ma, fo maama bõe?» ³⁶ La a Zezi leokame: «Mam naama ka dũni kãnga rẽnn ye, m naama da yaẽ-la dũni kãnga rẽnna m neba na n yɩɩsẽ-la tãpo n sõng-ma tɩ m da lʋɩ Zʋɩf rãmb nugẽ ye, la m naam ka dũni kãnga rẽnn ye.» ³⁷ T’a Pilat na n leoke: «Dẽ yĩnga fo yaa dĩma?» T’a Zezi yeel: «Fo togsame, mam yaa dĩma, mam dogame, la mam waa dũni kãnga pʋgẽ bũmb a ye yĩng bala: n na n kõ sɩd kaseto. Sẽn ya-a sɩd soaba, yẽ kelgda m koɛɛga.» ³⁸ T’a Pilat yeel-ba: «Sɩd la bõe?» La a sẽn gom woto, a lebg n kẽnga Zʋɩf rãmb nengẽ n tosg-ba: «Mam ka yãend a sẽn maan yell ning sẽn sek a paalgr ye. ³⁹ La lebga wala minung ne yãmb tɩ pak kibs yĩnga bɩ m yiis bi-bɛɛg a ye roogo n kõ-yãmba, yãmb datame tɩ m yiis Zʋɩf rãmb dĩma n kõ-y bi?» ⁴⁰ La b fãa leokame: «Ayoo! Da yiis yẽ roog ye, yiis a Barabas.» A Barabas da yaa so-gɩta.

¹ A Pilat reega a Zezi n kɩt tɩ b pãb-b ne kaase. ² Tãb-biisa pãnema gõos n maan naam pugla b yĩnga, n dɩk n fõgen b zugu la b yeelg-b la fu miuugu. ³ B ra kolgd-b lame n yetẽ: «Zʋɩf rãmb dĩma, d pʋʋsda yãmba!» La b ra pãbd-b la pegse. ⁴ A Pilat yii yɩng n yeel nebã: «M na n tall-a lame n wa yɩnga, yãmb taoore, tɩ y bãng tɩ m ka yãend bũmb sẽn na n wa ne a bʋʋd paalgr ye.» ⁵ La a Zezi yii yɩnga ne gõosa pugla b sẽn fõgna la ne fu miuugã b sẽn pilã, t’a Pilat yeele: «Ad-y y raoã!» ⁶ La maan-kʋʋdba nanamse ne tãb-biisa sẽn yãend-ba, b kelmame: «Ka-y yẽe pika, ka-y yẽe pika!» T’a Pilat yeel-ba: «Bɩ yãmb meng y toor deeg-a n ka pika, mam ka yãend a sẽn maan yell ning ye.» ⁷ Tɩ Zʋɩf rãmb leok: «Tõnd tara d noya, la sẽn zems ne tõnd noya, a toga ne kũum t’a mamsa a meng ne Wẽnd Biiga.» ⁸ La a Pilat sẽn wʋm gomdã, dabeem yõk-a lame n yɩɩd pĩnda, ⁹ t’a le kẽ bʋʋd doogẽ n sok a Zezi: «Fo yita yɛ?» La a Zezi pa leok tɩ bũmb ye. ¹⁰ T’a Pilat yeel-ba: «Maam la f zãgsd leokre? Fo ka mi tɩ m tõe n ka-f la pika, wala m sẽn tõe n bas-f laa?» ¹¹ T’a Zezi leok-a: «Fo ra kõn tõogẽ n maan maam bũmbu, tõog sã n da ka yiẽ yĩngr tɩ fo paamẽ ye, yaa rẽnd yĩng la sẽn ning-a maam fo nugẽ wã yel-wẽnd yɩɩd fo rẽnna.» ¹² La wakat kãnga tɛka, a Pilat da baood n na n basa a Zezi. Zʋɩf rãmbã n da kelemde: «Fo bas yãoo, f kõn maan wa f yaa Rom naab zoa ye. Ned ning fãa sẽn yet t’a yaa dĩma, a soab bagemd n yii Rom naab soolmẽ.» ¹³ A Pilat sẽn wʋm woto, a talla a Zezi n yɩ yɩnga, bʋʋda zĩigẽ, zĩig ning sẽn maneg n gãneg ne kug peesem, n boond ne Zʋɩf rãmb goam tɩ gabata. ¹⁴ Da yaa pak seglgo daare, sẽn zems wĩnto-sʋka, la a yeela Zʋɩf rãmba: «Ad yãmb dĩma!» ¹⁵ Tɩ b fãa kelem: «B kʋ-a, b kʋ-a, b ka-a pika!» T’a Pilat yeel-ba: «M ka yãmb dĩma pika?» Tɩ maan-kʋʋdba nanams yeel: «Tõnd ka tar dĩma to tɩ ka Rom naab ye.» ¹⁶ La a Pilat basa a Zezi ne Zʋɩf rãmba. Pik la b ra tog n ka a Zezi. B sɩd tall-b lame n looge. ¹⁷ A Zezi yiime, n zɩt b pika n dʋ zu-wang tãnga, la Zʋɩf rãmba boond-a lame tɩ Golgota. ¹⁸ B maga bi-bees a yi n ka pika, a ye a Zezi rɩtgo, a to, b goabga, t’a Zezi be sʋka. ¹⁹ A Pilat da gʋlsa woto walg zugu n yagl pikã: «Zezi, Nazarɛt daoa, Zʋɩf rãmb dĩma.» ²⁰ Zʋɩf rãmba tõog n karma sẽn gʋlsã tɩ pika ra pa zãar ne tẽnga ye. Da gʋlsa ne buuda tãab goama: Zʋɩf rãmba, Grɛk rãmba la Latẽ rãmba. ²¹ Maan-kʋʋdba nanams yeela a Pilat: «Da gʋls: ‹Zʋɩf rãmb dĩm ye,› gʋls tɩ yẽ n yeele t’a yaa Zʋɩf rãmb dĩma.» ²² La a Pilat yeelame: «M sẽn gʋlsã, m gʋlsame.» ²³ Tãb-biis niyns sẽn ka a Zezi pikã wʋka b futã n pʋɩ sags a naase, tɩ tãb-biig fãa paam a ye; b rɩka fu-yorga me. Da ka fuug sẽn tar sẽnesem ye. B wʋg-a la mumdi, sɩngre n ta baasgo. ²⁴ La b yeela taaba: «Wa-y tɩ d da kẽes fu-kãnga ye, d poees n bao a soaala.» La rẽ yaa sẽn na yɩlẽ tɩ Sebr sõng gomda taase: B pʋɩɩ taab m futu, b poeesame n bãng m fu-yorga soaala. Yaa woto la tãb-biisa maan yã. ²⁵ A Zezi pika sɛɛga, b ma n da yɛs be ne b ma-bila, ne a Mari, a Klopas paga, ne a Mari Madelɛn. ²⁶ A Zezi sẽn yãend b ma, n yãend karen-biig ning b sẽn da nong a soaba tɩ b yeg taaba, b yeela b ma: «Paga, ad-y y biiga.» ²⁷ B yeela karen-biigã: «Ad-f ma.» Wakat kãng tɛka karen-biiga reeg-b la a meng yiri. ²⁸ Dẽ poore, a Zezi sẽn da mi tɩ sẽn maana fãa yaa sẽn na yɩlẽ tɩ sẽn be Sebr sõng pʋgẽ taas zãngã, b yeelame: «Ko-yũud n tar maam!» ²⁹ Yʋʋr n da tẽg be n pid ne rã miisga tɩ tãb-biisa los needgo a pʋgẽ, n yaag n sel daoogo, n tugla Zezi. ³⁰ La a Zezi sẽn fõog rã miisgã, b yeelame: «Fãa pidsame!» La b kɩlla b zug la b kiime. ³¹ La sẽn da ya pak seglg daar yĩnga, tɩ b ra pa rat tɩ kũuma pa pika zugu, vʋʋsg daare, tɩ baraar da zoe n yaa kibs kãsenga, Zʋɩf rãmba tɩ kosa a Pilat sore n na kao sẽn ka-b pika karse la b sik-ba. ³² Tãb-biisa waa n kao wagdba a yiiba karse. ³³ La b sẽn taa a Zezi b mikame tɩ b kiime. Woto b ka kao b kars ye. ³⁴ Tãb-biig a ye wedga a Zezi lʋgra ne kãnde tɩ zɩɩm la koom naag n yi. ³⁵ Yaa sẽn yãend-a ne a nifã n kõt kaseto la d miime t’a kaset yaa sɩda, a meng miime t’a yeta sɩda, sẽn na n yɩlẽ tɩ yãmb me paam n tẽ. ³⁶ Dẽ me maaname tɩ Sebr sõng goam kãensa taase: Bɩ b kõbr ba a ye da kaoog ye. ³⁷ Zĩig a to me gʋlsa woto: B na ges b sẽn wedg a soab lʋgrã. ³⁸ Arimati dao a ye, a Zozɛf, da yaa a Zezi karen-biiga, la ra yaa ne soosgo, Zʋɩf rãmba rabeem yĩnga. Yẽ tɩ kosa a Pilat sor n na n tall b yĩngã n loog. A Pilat kõo sore, tɩ b sɩd wa rɩk yĩngã. ³⁹ Dao ninga me sẽn waa a Zezi nengẽ ne yʋngã, a Nikodɛm, kalma kaam buud a yi sẽn tar yũ-noogo la sẽn pit yʋʋre, n wa yaoogẽ wã. ⁴⁰ B rɩka a Zezi yĩngã n zɛ ne tɩdarã n vil ne pɛɛla n tũ Zʋɩf rãmba laagd sẽn mumd kũum to-to. ⁴¹ Zẽed n da be b sẽn ka a Zezi zĩig ningã la yao-paalg la b ra tuk be n nan ka mum ned a pʋgẽ ye. ⁴² Yao-kang pʋg la b mum a Zezi t’a ra pẽeme la pak kibsa seglg ra zoe n sɩngame.

¹ Ata daar yibeoogo pĩnda, zĩig sẽn da nan pa yẽege, a Mari Madelɛn kẽnga yaoogẽ wã la a yãeeme tɩ yaooga kugr lakame. ² A zoe n babsa a Simo-Piyɛr ne Tʋʋm-tʋmd ninga a Zezi sẽn da nong a soabã, n yeel-ba: «B yiisa Soaala yaoogẽ la d ka mi b sẽn tɩ gãneg-b zĩig ning ye.» ³ A Piyɛr yii ne karen-bi kãnga n wa yaoogẽ wã. ⁴ B yiiba naaga taab n wudg, la a Zezi sẽn nong a soaba wudg n looga a Piyɛr, n deng n ta yaoogẽ wã. ⁵ A sẽn zõond n like, a yãee pɛɛla sẽn dɩg la a pa kẽ ye. ⁶ A Simo-Piyɛr ra pʋgdame, la yẽ taa n kẽeme; a yãenda pɛɛlã sẽn dɩg, ⁷ la peend ning sẽn da vil a Zezi zuga da bee toore, a ra kʋʋme n dɩg toore. ⁸ Dẽ marsã la Tʋʋm-tʋmd ninga sẽn denga taabã yaool n kẽ; a yãeeme la a tẽeme. ⁹ B ra nan pa mi, tɩ wala sẽn gʋls Sebr sõng pʋgẽ, da yaa modgr t’a Zezi vʋʋg kɩɩms sʋk ye. ¹⁰ Karen-biis a yiiba yaoolame marsã n leb yiri. ¹¹ A Mari Madelɛn da pẽnega yaoogã n yɛs yɩng n yãbda, la a waa n lɩka yaoogẽ wã, ¹² n yãend malɛk rãmb a yiib sẽn yer fu peelse n zĩi, a ye, zuga zĩigẽ, a to, nao wã sẽn da teesẽ. ¹³ Malɛgsa yeela a Mari: «Paga, yaa bõe yĩng la y yãbda?» T’a leok ba: «B rɩka m Soaala yĩnga la m ka mi b sẽn tɩ gãneg-b zĩig ning ye.» ¹⁴ A sẽn yeel woto, a kedga a poorẽ n yãe t’a Zezi yɛs yĩngri; a ra ka mi tɩ yaa bãmb ye. ¹⁵ A Zezi n yeel-a: «Paga, yaa bõe tɩ f yãbda?» A Madelɛn yõkame tɩ yaa zẽeda soaba, n yeele: «M zu-soaba, sã n ya yãmb n dɩk-ba bɩ y wilg-ma y sẽn gãneg-b zĩig ninga tɩ m tɩ rɩk-ba.» ¹⁶ La a Zezi yeel-a lame: «Madelɛn!» T’a kedg n yeel-ba: «Rabonni», dat n yeelame tɩ karẽn-saamba. ¹⁷ T’a Zezi yeel-a: «Da sɩɩs-m ye, tɩ m nan ka rʋ m Ba nengẽ ye, la kẽng n tɩ yeel m yaopã tɩ m daba m Ba la yãmb me Ba nengẽ, m Wẽnnaam la yãmb me Wẽnnaam nengẽ.» ¹⁸ A Mari Madelɛn kẽngame n tɩ togs Tʋʋm-tʋmdba t’a yãenda Soaalã la bãmb meng n yeel tɩ b wa togs-ba. ¹⁹ Badaar zĩ-sobdo, karen-biisa ra tigma taab doog a ye pʋga; b ra paga kʋɩlensa, Zʋɩf rãmba rabeem yĩnga la a Zezi kẽ n yalsa b sʋka n yeel-ba: «Laafi zĩnd ne yãmba!» ²⁰ La b sẽn yeel woto b wilg-b la b nus la b lʋgre la karen-biisa sũur yɩɩ noogo b sẽn yãend Soaalã. ²¹ A Zezi yeel-b lame: «Laafi zĩnd ne yã! Wala m Ba sẽn tʋm maama, ma me tʋmda yãmba.» ²² La b sẽn gom woto, b fʋʋsa b zut n yetẽ: «Deeg-y Vʋʋsem Sõngo, ²³ y sẽn na kõ neb niyns b yel-wẽna sugri, b na n paama sugri, la y sẽn na n mong b rãmb sugri, b na n konga sugri.» ²⁴ La b sẽn boond a soab t’a Didim, a Toma, piig la a yiiba nin-yend, da pa zĩnd ne a taaba a Zezi likra wakat ye. ²⁵ La karen-biis a taaba yeel-a lame: «Tõnd yãenda Soaalã!» T’a yeele: «M sã n pa yãend b nusẽ, kaadsa bogdo, n pa tʋm m nug-bila kaadsa bogdẽ, n pa tʋm m nug b lʋgrẽ, m kõn tẽ ye.» ²⁶ Dasem a nii dẽ poore, karen-biisa ra le tigma taab dooga pʋga, t’a Toma be b sʋka. A Zezi waame tɩ kʋɩlensa pag yã la b yaasa b sʋk n yeel-ba: «Laafi zĩnd ne yãmba!» ²⁷ B yaool n yeela a Toma: «Tʋm f nug-bil ka, ges m nusã, rɩk f nug n tʋm m lʋgrẽ wã, bɩ f tẽ la f ra le kɩɩs ye.» ²⁸ La a Toma leokame: «M Soaala la m Wẽnnaam!» ²⁹ T’a Zezi yeel-a: «Ya f sẽn yãend-ma la f tẽeda. Ad sũ-noog rãmb la sẽn tẽ-b tɩ b nin ka yãend ye.» ³⁰ A Zezi le maana b Tʋʋm-tʋmdba taoore wẽnd makr dãmb a taaba sẽn pa gʋls ka ye. ³¹ La b sẽn gʋls-b rãmb fãa ka wã, b gʋls b lame tɩ y tẽ t’a Zezi yaa Krista, Wẽnnaam Biiga, tɩ y sã n tẽ-ba y na paam vɩɩm bãmb maasem yĩnga.

¹ A Zezi le lika b karen-biisã Tiberiyad mogr noore la ade, b likra yɩɩ woto: ² A Simo ne a Toma, b sẽn boond a soab tɩ Didim, n paas a Natanayɛl, Galile Kana tẽng neda, la a Zebede kamba n paas karen-biis a yiibu, n da be ne taaba. ³ A Simo-Piyɛr waa n yeel-b lame: «M na n tɩ yẽe zĩma.» A taaba yeelame: «D me na n tũume!» B tɩ kẽe koglg n yẽ la b pa yõk bũmb yʋng kãng ye. ⁴ Zĩig sẽn yẽege, a Zezi waa n yaasa mogra noor tɩ karen-biisa ka miẽ ye. ⁵ La a Zezi yeel-b lame: «Kambã, y ka tar sẽn na rɩ laa?» Tɩ b leoke: «Ayoo!» ⁶ Tɩ b yeel-ba: «Lob-y zulunga koglga rɩtgo tɩ y na paame.» B loba zulungã n da pa le tõe n vuug-a ye, zĩma sẽn ya wʋsg yĩnga. ⁷ T’a Zezi sẽn da nong karen-biig ninga yeel a Piyɛr: «Ad yaa Soaala!» La a Simo-Piyɛr sẽn wʋme: «Yaa Soaala,» yeelga a fuug n sẽbg a sẽbdg t’a ra yaa a zaala la a tiimda koomẽ. ⁸ Karen-biis a taabã n wa ne koglgã n vuud zulunga ne zĩma, la b da pa zãr ne tẽn-koɛɛnga ye, ra zemsa kãntɩɩs kobsi bala. ⁹ B sẽn sig tẽnga, b yãee bug-saala ne bugum tɩ zĩm da rog b zugu, n paas buri. ¹⁰ A Zezi yeel-b lame: «Yãk-y zĩma y sẽn yõgã n wa ne.» ¹¹ T’a Simo na n kẽ koglgã n yiis zulunga koɛɛngẽ. Koglga ra pida ne zĩm bɛd sẽn ta koabg la pisnu la a tãabo. La ne zĩma sõor sẽn yɩ wʋsgã, zulunga ka pãrg ye. ¹² A Zezi yeel-b lame: «Bɩ y wa rɩ.» Karen-biig ba a ye pa saag n soke: «Yãmb la ãnna?» B ra bãngame tɩ yaa Soaalã. ¹³ A Zezi kolg n dɩka burã n pʋɩ ba, n paas zĩma. ¹⁴ Woto n tõkd naoora tã a Zezi sẽn lik b karen-biisã b vʋʋgra poore. ¹⁵ B sẽn dɩɩ n sɛ, a Zezi yeela a Simo-Piyɛr: «Simo, Zã biiga, fo nonga maam n yɩɩd bãmba bɩ?» T’a Piyɛr leoke: «N-yẽe! Soaala, yãmb mi tɩ m nonga yãmba.» T’a Zezi yeel: «Kɩɩm m pe-bi!» ¹⁶ T’a Zezi le sok, naoor a yiib soaba: «Simo, Zã biiga, f nonga maam bɩ?» T’a Piyɛr leok: «N-yẽe! Soaala, yãmb mi tɩ m nong-y lame.» T’a Zezi yeel-a: «Kɩɩm m pe-yãanse!» ¹⁷ Tɩ b le sok-a, naoor a tãab soaba: «Simo, Zã biiga, fo nonga maam bɩ?» La a Piyɛr sũur sãamame, a Zezi sẽn sok yẽ, naoor a tãab marsã: «Fo nonga maam bɩ?» La a yeelame: «Soaala, yãmb mii bũmb fãa la y mi tɩ m nong-y lame sẽ.» T’a Zezi yeel-a: «Kɩɩm m pe-yãanse! ¹⁸ Sɩd-sɩda m yeta foom tɩ f sẽn da waa n ya bi-bɩɩga, fo ra sẽbgda f sɛɛg f toore la f kẽnd f sẽn date, la f sã n wa kʋʋle, fo na n zẽka f nus tɩ ned a to sẽbg-fo n tall-fo n kẽng f sẽn pa ratẽ.» ¹⁹ B yeela woto n na n wilg a Piyɛr a sẽn na n pẽg Wẽnnaam ne kũum ninga. La rẽ poore b paasame: «Tũ maam!» ²⁰ A Piyɛr wẽnega a poorẽ n yãe a Zezi sẽn nong a soaba t’a pʋgda. Yaa karem-bi-kãng n dell a Zezi yãoog, dɩɩba wakat, la yẽ n soke: «Soaala, ãn n na n zãmb yãmba?» ²¹ A Piyɛr sẽn yãend-a, a soka a Zezi: «Soaala, la ada-soaba yell na n yɩɩ wãna?» ²² T’a Zezi leok-a: «M sã n dat t’a kell n pa n ta m waoongo, bõe n pak foom? Fo yee n tũ maam!» ²³ La kibar n sãag karen-biisa sʋka tɩ karen-bi-kãng yẽ kõn ki ye. A Zezi yaool n da pa yeel a Piyɛr: «A kõn ki ye,» b ra yeelame bala: «M sã n dat t’a pa n tãag m waoongo.» ²⁴ Ad-y yaa karen-bi kãng n kõt yell kãensa fãa kaseto, yẽ n gʋls-ba la tõnd miime t’a kaset yaa sɩda. ²⁵ Bũmb wʋsg a Zezi sẽn maan n kete, tɩ b sã n da gʋlsẽ-ba, a yembr-yembre, m pa tẽed tɩ dũni wã na zĩnd weere n deeg sɛba sẽn na n gʋlsa fãa ye.