GALAT RÃMBA

GALAT RÃMBA

¹ Maam a Pol, sẽn lebga Soaala tʋʋm-tʋmda tɩ pa tũ ne ninsaal pãnga bɩ a sõngre: tũu ne Krista a Zezi meng pãnga la ne Ba a Wẽnd sẽn vʋʋg-b kɩɩms sʋka. ² Maam la saam-biisa sẽn be-b ne maama, tõnd n pʋʋsd Wẽnnaam Tigenga kamb fãa sẽn be Galasi. ³ Wẽnd na sudg-y b kũuna, n zĩndig-y ne laafi, d Ba a Wẽnd la d Soaal a Zezi Krista maasmẽ, ⁴ bãmb n kɩs b meng d yel-wẽna yĩnga, bãmb n kɩt tɩ d tɩlg dũnna zamaan wẽngã, wala d Ba a Wẽnd sẽn tʋlge. ⁵ B soog pẽgr yʋʋm sẽn kõn sɛ. Ami! ⁶ M yɛɛsa y sẽn yɩ tao-tao, n bas Wẽnd sẽn bool-y ne Krista sõngre, n na n deeg koe-noog a to, ⁷ wa Koe-nooga ya a yiibu; yaool n yaa neb bal n kẽ yãmb sʋka n baood n na n kẽes sãmbse y yamẽ, la b tedg Krista Koe-noogã. ⁸ Ade, tõnd meng bɩ malɛk sẽn yi yĩngri sã n saag n kõ yãmb koɛɛg sẽn ka tõnd sẽn zoe n wilg yãmb a soabã, bɩ Wẽnd yãk a soab barka! ⁹ Tõnd n yeele la rũnda menga tõnd n le togsde: ned ninga fãa sẽn saag-a n kõ yãmb koɛɛg sẽn ka yãmb sẽn zoe n paam a soabã, bɩ Wẽnd yãk a soab barka! ¹⁰ Togs sɩd sãn beẽ, yaa ninsaal yõod bɩ yaa Wẽnd dẽnna la mam baood marsã? Yaa ninsaal yamleoog la m tũuda? M sã n ket n baood n na n noog ninsaalb sũuri m ka le tõe n yɩ Krista sõgen ye. ¹¹ Bãng-y, m saam-biisi, tɩ m sẽn kõ yãmb Koe-noog ningã ka tek ninsaal bãngra zulum sẽn tekẽ ye. ¹² Ka ninsaal nengẽ la m deeg-a, ka ninsaal nengẽ la m zãms-a ye, ya a Zezi Krista meng n wilg-a maam. ¹³ Mam miime tɩ yãmb bãnga m vɩɩma sẽn yɩ a soab Zʋɩf rãmba sʋka, m sẽn waa n namsd Wẽnd Tigengu ne m pãng fãa, la m da sãamd-a sãang wẽnga, ¹⁴ y wʋma m sẽn da tũud m yaab rãmb sorã ne sũur ningã al tɩ sã n ya zĩ kãng bɩ m lʋɩt m dogd-n-taasa fãa taoore. ¹⁵ Ned ninga sẽn welga maam toor tɩ m nan ket m ma pʋgẽ la a bool-m ne a raabo, ¹⁶ yẽ soab n wilg maam b Biiga, n yet tɩ m wilg-a bu-zẽmbã. M ka le yaas n sok m doagdb la m buudu, ¹⁷ m ka kẽng Zerizalɛɛm n babs sẽn deng-b maam n ya Soaala Tʋʋm-tʋmdbã, ayoo! Yaa Arabi la m tees yã, n le lɛɛg n wa Damas. ¹⁸ Yʋʋm a tãab dẽ poor marsã la m kẽng Zerizalɛɛm n tɩ ges a Kefas la m zĩnda ne-a dasem piig la a nu; ¹⁹ m pa yãend Tʋʋm-tʋmdb a taaba sã n ka Krista saam-biig a Zak ye. ²⁰ M wẽend ne Wẽnd tɩ m sẽn gʋls y woto wã, m ka yagd ziri ye. ²¹ Dẽ poor la m kẽng Siri la Silisi, ²² la rẽ tɩ Zɩɩde Tigenga kamb ra ka mi-m ye; ²³ b ra wʋmdame bal tɩ b gomd tɩ bãmb pĩnd bɛyã yikame marsã n moond tẽeb ning yẽ meng sẽn da rat n sãama, ²⁴ la b ra pẽgda Wẽnd m poorẽ.

¹ Yʋʋm piig la a naas dẽ poore, mam le rʋʋ Zerizalɛɛm ne a Barnabe la m tũud-n-taag a Tit. ² Tũu ne Wẽnd wilgri, la m sẽn wa be wã, m togs-b la Koe-noog ning m sẽn moond bu-zẽmbã – la yɩɩ maam ne kãsem-dãmba bala n zĩnd ne taaba – tɩ m zoe rabeem m tʋʋmda na n wa ka tũ sore. ³ M da tara tũud-n-taag sẽn ya Grɛk, a Tit, la b ka modg-a t’a kẽ bãong ye. ⁴ Neb kẽer bala n belg tɩ b yaa d saam-biisi n soos n kẽ sʋka n na n bãng tõnd sẽn lood d wĩ niyns n na n tũ Krista; bãmb dãmba ra baood n na n kẽes-d la b yembdo. ⁵ Tõnd pa sak n tũ b raabo, ba vugr menga, zoe-nif yĩng ye, tɩ d tʋlg n taasa yãmb Koe-noogã ne a sɩda zãnga. ⁶ Sã n kella sẽn mamsd-b mens ne nin-bɛdã – b sẽn yaa a soab taki dẽ ka pak m ye, tɩ Wẽnd ka welgd ninsaal ne a to ye – bãmb me pa yãend sãoog sẽn na n lek m Koe-nooga pʋgẽ ye. ⁷ B bãngame menga tɩ yaa Wẽnd n yãk maam tɩ m moon Koe-nooga nin-zẽmbã wala b sẽn yãk a Piyɛr Zʋɩf rãmb yĩnga. ⁸ Sẽn kõ-a a Piyɛr tõog Zʋɩf rãmba yĩngã, yẽ soab bala n kõ-m tõog kãnga bu-zẽmba yĩnga. ⁹ Sẽn waa n lebg vẽeneg ne-ba, tɩ Wẽnd bark la m paam yã, a Zak, a Kefas la a Zã, kãsem-dãmba la tẽn-kuga, bãmb me tuda b nug n maan zood ne maam la a Barnabe, la b wilg-d lame tɩ bãmb n na n ges Zʋɩf rãmba yelle tɩ tõnd ges bu-zẽmbã yelle. ¹⁰ D da tog n tẽega naong rãmba yelle; la rẽ me la m maan ne m sũur fãa. ¹¹ A Kefas waa n pɩʋʋga Antiyos la m sãbsa a manesem neba fãa taoore, la yẽ n da kong bʋʋm. ¹² Sɩd me, a Zak tũud-n-taasa sẽn waa n nan ka pooge, a Kefas ra rɩta ne bu-zẽmba. Bãmb waoonga poore, la a sẽn soos n leb kɛɛnga, sẽn kẽ-b bãonga rabeem yĩnga. ¹³ Zʋɩf rãmb a taaba me togs-a lame, al t’a Barnabe meng naag-ba n solge. ¹⁴ M sẽn mik tɩ b pa tũud sɩd sor ning Koe-nooga sẽn wa ne a soabã, m yeela a Kefas, neba fãa taoore: «Fo yaa Zʋɩf, n sak n bas Zʋɩf rãmba dog-n-mik n vɩ wala bu-zẽna, bõe tɩ fo rat n modg bu-zẽmbã tɩ b vɩɩnd wa Zʋɩf rãmba?» ¹⁵ Sã n ya tõndo, d doga Zʋɩf rãmb buudẽ, woto d ka kĩ ne bu-zẽmba sẽn ya yel-wẽn-maandba ye; ¹⁶ la baasgo d miime tɩ ninsaal pa teeg noya reegre n na n paam a yell manegr ne Wẽnd ye; ya a Zezi Krista tẽeb n wat ne rẽ. Yaa rẽ la tõnd me tẽ Krista, a Zezi, n na n paam d yell manegre, d pa teeg noya reegre, tɩ ned pa paamd a yell manegre ne noya reegr ye. ¹⁷ Dɩlla sã n ya Krista nengẽ la tõnd baood sõmblem la d ket n zĩ ne d yel-wẽna wala neb a taaba, Krista tʋʋmd ka lebg yel-wẽnd yaoogr marsã, la rẽ na yɩ sɩda? ¹⁸ Wala m sã n le maneg n me mam sẽn tus n lubi, ka maam n kõ kaset marsã tɩ m tus-n-lubã n yɩ wẽnga la m le lɛɛg n metẽ. ¹⁹ Sã n ya noora poorẽ, m lebga bõn-kɩɩng a yĩnga, sẽn na n yɩlẽ n tõog n vɩɩnd Wẽnd yĩnga. M naaga Krista n ka pika zugu. ²⁰ Pa le ya mam meng n vɩ ye, yaa Krista n vɩ mam pʋgẽ, m sã n vɩ ne m yĩnga marsã, m tɛk yaa m tẽ Wẽnnaam Biiga sẽn nong maam, n dɩk b meng n kõ maama. ²¹ M pa kɩtd tɩ Wẽnd kũuna lebg zaalem ye; la sã n ya ne noor deegr la yell manegda, dɩlla Krista ki zaalem yĩnga.

¹ Galat rãmb sẽn ka tar yam, ãnd n lebg y zutu. B wilga yãmb neere, Krista sẽn lebg bũmb ning pika zugu. ² Sokr bala a ye la m na n sok yãmba: Yaa yãmb sẽn sak noora yĩng la y paam Wẽnd Vʋʋsem, bɩ yaa y sẽn tẽ Koe-nooga? ³ Yama paoog-y la sẽn ta woto fãa tɩ yãmb sɩng ne Wẽnd Vʋʋsem n na n baas ne y toorẽ pãnga? ⁴ Na n yɩɩ zaalem yĩng la y reeg kũuna woto fãa? Ad-y rẽ fãa na n sɩd yɩɩ zaalem bala! ⁵ Sẽn kõt-a yãmb a Vʋʋsem Sõng la a tʋmd tʋʋm bãna yãmb sʋka, a maanda rẽ y sẽn sakd noora yĩnga, bɩ yaa y sẽn deeg Koe-noogã? ⁶ Y mi t’a Abraam tẽe Wẽnde tɩ Wẽnd maaneg a yelle. ⁷ Bɩ y bãng tɩ neb niyns sẽn teeg-b tẽeb, yaa bãmb la a Abraam kamba. ⁸ Sebr sõng sẽn pĩnd n mi tɩ Wẽnd na n tũu tẽeb n fãag bu-zẽmbã, b pĩnd n togsa a Abraam kiba-noog kãngã: «Yaa fo maasmẽ la Adem biis na n paam barka.» ⁹ Dẽ n kɩt tɩ neb niyns fãa sẽn teeg-b tẽebo na n tũu tẽeba ba, a Abraam, n paam barka. ¹⁰ Neb niyns fãa sẽn yet-b tɩ yaa Noora bal la b tũuda, yaa kãab wẽng la b kãab bãmba, tɩ b gʋlsa woto: «Wẽnd na sãam ned ning fãa sẽn ka modga n deeg la a tũ sẽn gʋls fãa sebr sõng pʋgẽ.» ¹¹ – Ad-y yaa vẽenega tɩ noora tũudem ka tõe n maneg ned yelle tɩ nin-sõng teeg-a a tẽebo n na n vɩɩnde. ¹² Ka tẽebẽ wã la Noora yit ye la paka ninsaal t’a reeg sẽn be a pʋgẽ wã fãa n yaool n paam vɩɩm. ¹³ Krista sakame tɩ Noora kãab wẽnga leb bãmba, n kõ-d tɩlgre. Bãmb meng sak n yɩɩ ka bark soaba d fãa yĩnga; tɩ b gʋlsa woto: «Ka bark soab la sẽn yagla pika.» ¹⁴ La yɩɩ woto la a Abraam kãab nooga leb bu-zẽmbã; d sẽn paam tẽebã, d paama b sẽn da kãab tõnd a soabã: a Vʋʋsem Sõngo. ¹⁵ M saam-biisi, m na n kõ-y la ninsaal makre: Raboog welgr sebr sã n gʋls n sɛ, b pa le tõe n yẽes bũmb ye, b pa le tõe n paas bũmb ye, ba gʋlsga sẽn yaa ninsaal n gʋlsã. ¹⁶ Ad-y yaa Abraam ne a buudu la kãabga kãab yã. Sebr sõng pa yeel: a Abraam ne a buud kamb ye, wala yaa kʋʋng yell la b da rat n gom ye; goma nin-yend yelle, buuda nin-yende: Krista. ¹⁷ M sẽn dat n wilg-y bũmb ninga la woto: Wẽnd da yalsa kãabga yɛl fãa b zĩigẽ, woto noora sẽn wa yʋʋm kobs-naas la pistã kãabga poore, a ka tõe n woog a pãnga t’a lebg fãoog ye. ¹⁸ Sã n tũuda ne raboog welgr noy la ku-biig dɩt faado, yaa noor la tũuda, pa tũud kãabga ye. Mik a Abraam barka ka yi zĩig a to tɩ ka Wẽnd kãabga pʋgẽ ye. ¹⁹ Noora bee bõe yĩnga? A wa n paasame bala n na n wilg tɩ ninsaal mii kɩɩsgo. Noora ra kõome n gũud a Abraam yagenga waoongo tɩ yaa yẽnda la kãabga kãabyã. Noora yalsa ne malɛk rãmb toagsg la ne nin-yend sẽn lʋɩ sʋka. ²⁰ Sã n ya kãabgã, Wẽnd yɩla b ye n kãabe, ned a to ka lʋɩ sʋk ye. ²¹ Noya sãama Wẽnnaam kãabg bɩ bõe? Abada! Tõnd sã n da paamẽ la noor sẽn tõe n kõ vɩɩm la d tõogdẽ n yeel tɩ noor deegr n wat ne manegre. ²² Sebr sõng paalga bũmba fãa yel-wẽnd soolmẽ, sẽn na yɩlẽ t’a Zezi Krista tẽedbã dɩ kãabga yõodo. ²³ Tẽeb sẽn da waa n kaẽ, yaa wa b da rɩka tõnd n gũnug ne noya n gẽegd tẽebã waoongo. ²⁴ Dẽ la Noor yɩ karen-saamba n tãag Krista sẽn waa n kɩt tɩ tẽeba wa ne yell manegrã. ²⁵ La tẽeb sẽn wa, tõnd ka le baood karen-saamb yɛs ye. ²⁶ Yãmb fãa sẽn kẽ Krista a Zezi wã, y lebga Wẽnnaam kamba. ²⁷ Yãmb fãa sɩd tũu Krista n so soobo la y yeelg bãmb wa fuugu. ²⁸ Tɩ m yaa Zʋɩf bɩ Grɛk, yamba bɩ burkĩna, pag bɩ raoa: rẽ ka le be ye; yãmb fãa lebga bũmb a ye a Zezi Krista pʋgẽ. ²⁹ Y sẽn tabend Krista bala, yãmb lebga a Abraam yagense, yãmb bal n so kãabgã.

¹ M gomda võor la woto: ku-bi-kẽeng sã n ket n ya yãaga, ad-y ne a sẽn so a ba laoga fãa, bũmb ka welg-a nanda ne yamb ye. ² A tara gũuda la koagenda, n tãag a ba sẽn yals wakat ningã. ³ Tõnd me, d sẽn da waa n ya yãase d da yaa yem-daado, zamaana pãn-dãmba yem-daado. ⁴ La wakat sẽn waa n ta, Wẽnd tʋma b Biiga sẽn yɩ pag biiga la noora rɛɛgda, ⁵ sẽn na n yɩlẽ n tõog n fãag noora yemse, la a kɩt tɩ d lebg Wẽnd kom-wubdsi. ⁶ La kaset ning y sẽn tare n mi tɩ y lebga Wẽnd kamba, yaa Wẽnd sẽn ning yãmb sũurẽ bãmb Biiga Vʋʋsem sẽn tãsde: Aba! (M Ba!) ⁷ Woto fo ka le ya yem-daoog ye, f yaa zak biiga, la f sẽn lebg Wẽnd biiga, f lebga Wẽnd yõod dɩta. ⁸ Pĩnda, y sẽn waa n nan ka mi Wẽnnaama, yaa bõn-yaals sẽn ka wẽnde la yãmb da nok yã wala y wẽnde. ⁹ Marsã, yãmb sẽn bãng-ba, yɩɩd rẽ, bãmb sẽn bãng yãmbã, yãmb na n maana a wãn n leb y bõn-yaalsa nengẽ n tɩ soond bãmb wala pĩndã? ¹⁰ Yãmb ket n sõta dasma, kiisi, zĩ likri ne yʋʋma! ¹¹ Ad-y y maandame tɩ m zoet-m na n wa nams zaalem bal y yĩnga. ¹² M saam-biisi, m yõkda y sɛɛga, modg-y n wẽneg maam tɩ m maoome n na n wẽneg yãmba. Da tẽ-y tɩ y beeg-m lame ye. ¹³ Y mi tɩ bãag n wa ne m ka tɩ m paam n sɩng Koe-nooga mooneg y sʋka. ¹⁴ La ne m bãaga sẽn kɩt tɩ m lebg y zɩɩbo, y pa paoog-m ye, y pa sãbs-m ye; y kell n deega maam wala Wẽnd malɛka, wala Krista a Zezi menga. ¹⁵ Yãmb zoe n yĩma y sẽn da kilsd maam ne sũ-noog ninga laa? M meng tõe n kõo kaseto tɩ wakat kãnga, y sã n da tõee lame, y na kɩɩdẽ y nin-bɛɛl n kõ-ma. ¹⁶ La marsã m sẽn togs yãmb sɩda la m lebg y bɛya? ¹⁷ Neb kẽer zooda ne yãmb ka segd ye. B ratame bal n welg yãmb ne maam tɩ yãmb tabend bãmba. ¹⁸ Tʋlg-y neer maanego tɩ yaa sõmbo, la togame tɩ yɩ daar fãa, la ra yɩ m sẽn pẽ yãmba wakat bal ye. ¹⁹ M kom-bõonego, m sẽn le rogd ne waasgo, ad-y na n kell n yɩɩ boto n tãag y sẽn wat n dɩk Krista wẽnego. ²⁰ M da paam n pẽẽ yãmba m na modgẽ tɩ d wʋm taaba tɩ marsã wã m ka mi m sẽn na m gom to-to ne y ye. ²¹ Aya! Yãmb sẽn yet tɩ y yaa Noora tũudbã, y tẽra sẽn togs noora sebrẽ bɩ? ²² Ad-y gʋlsame t’a Abraam doga kamb a yiibu: a ye yaa yem-poak biiga t’a to wã ya tom pag biiga. ²³ Pʋg rɩkra biig doga wa kamb a taaba; tom paga biig rogma tũu ne kãabgo. ²⁴ Ad-y yaa yelbũndi: pagb a yiiba makda zood buud a yiibu. Pipi zooda yõga Sinayi tãng zugu; zood kãng kamb yaa yem-daado, la b ma la a Agar. ²⁵ (Sinayi tãnga bee Arabi soolmẽ) Yẽ makda dũnna Zerizalɛɛma, yẽ me yaa yem-poaka la a kamba me yaa yemse. ²⁶ Zerizalɛɛm a to wã, sẽn yita Wẽnnaam nengẽ soaba, yẽ la tom paga la yẽ la tõnd ma. ²⁷ Yaa woto la b gʋlsyã: «Bɩ f kɩdem, pʋg-kiiri sẽn pa rogde, kils sõmbo la f lang ne sũ-noogo fo sẽn zɩ n bãng rogem toogo; ad pʋg-beooga kamba sõor yɩɩda rʋmda rẽnna.» ²⁸ M saam-biisi, bɩ y baad tɩ yãmb la zooda kamba wala a Izaak. ²⁹ Biig ninga sẽn doga wa kamb a taabã da namsda biig ning rogem sẽn tũ ne kãabgã. Boto me n ket n maand marsã. ³⁰ Yaa bõe la Sebr sõng togsda? «Bɩ f rig yem-poaka ne a biigã tɩ yem-poaka biig ka tog n naag tom paga biiga, a ba raboogẽ ye.» ³¹ Bɩ d bãnge, m saam-biisi, tɩ tõnd ka yem-poaka kamba, d yaa tom paga kamba.

¹ Krista fãaga tõnd tɩ d kell n vɩɩnd ne d burkĩndlem; dɩlla bɩ d da bas raood ye la d da leb d pĩnd yemdẽ ye. ² Maam a Pol n togsede: ad-y yãmb sã n sak bãong kẽesgo, Krista lebga zaalem yãmb yĩnga. ³ Maam n le togsde: ned ninga fãa sẽn sak-a bãong kõom, lebga modgr ne yẽ soab ta tũ noya fãa gill kɛpi! ⁴ Yãmb sẽn baood y yell manegr ne noor deegre, bãng-y tɩ yãmb welga ne Krista, la y konga b bark zãnga. ⁵ Sã n ya tõndo, yaa Wẽnd Vʋʋsem n kɩt tɩ d gũud tɩ tẽeb wa ne kũun niyns d sẽn saagde, d yella sẽn manegã. ⁶ Sɩd me, a Zezi Krista nengẽ ka be m kẽe bãong bɩ m ka kẽ bãong ye, yaa tẽeba bal n pake: tẽeb sẽn tʋmd nonglem tʋʋma. ⁷ Yãmb wudgra da paam n sɩnga neere, bõe n woogd y tĩiga marsã sɩda reegre pʋgẽ? ⁸ Gɛɛlg a woto pa yit sẽn boond-a yãmba nengẽ ye. ⁹ Rabɩll bilf bala n wukd zom nagdem. ¹⁰ Mam yẽ tẽedame tɩ yãmb sã n be ne Soaala, yãmb kõn tags bũmb a to ye, la ned ninga sẽn na n kɩt tɩ y maan sãmb-sãmbe, yẽ soab kõn põs Wẽnd bʋʋd ye, a sẽn ya a soab fãa. ¹¹ Sã n ya maam, m saam-biisi, n ket n wɩngd-y tɩ y kẽ bãongo, bõe yĩng la b namsd-m yɛsa? Pika ne a pɛlen-yɩkã ka sɛ? ¹² Sẽn kẽesd-b yãmb rabeema kõn fiuus b yĩnga wils fãa gilli! ¹³ Sã n ya yãmba, m saam-biisi ad-y b ratame tɩ y yɩ burkĩmbi, gũus-y bala tɩ y burkĩndlema da wa lebg yĩnga maan a sẽn dat ye. Y burkĩndlema waa ne to nonglem, n kɩt tɩ ned kam fãa sõngd a to. ¹⁴ Noya fãa pidsa noor a ye pʋgẽ: «Nong f to n wẽnd f menga.» ¹⁵ Yãmb sã n yĩid taab marsã la y wãbd taab wa baase, bɩ y gũus tɩ yaa y wãab n sɩnge. ¹⁶ Bɩ y sak tɩ Wẽnd Vʋʋsem gãd yãmba tɩ y na bas y yĩnga raaba pʋgbo. ¹⁷ Yãmb mi tɩ yĩnga maanda sũ-kiir ne Wẽnd Vʋʋsem tɩ Wẽnd Vʋʋsem me maand boto ne yĩngã; bãmb b yiiba zabda taaba; ya rẽ yĩng la yãmb pa tõe n tʋm y yam ye. ¹⁸ Sã n ya Wẽnd Vʋʋsem n kẽ yãmba, yãmb pa le tar noor tʋʋmd ye. ¹⁹ Yĩnga sẽn womd biis niynsã, y mi-b-la fãa: ad pagb yõgbo, yoobo, rataado, ²⁰ wẽn-yaals pʋgbo, tɩt rɩɩbo, kisgu, mo-beedo, sũ-kiiri, sũ-puuri, zaba, zems-taab-kaalem, welegre, ²¹ to paoong tʋlsem, rɩt-n-pa yɛɛdẽ, yũud-n-pa-roogdẽ la yɛl a taab sẽn wẽnd rẽ – la m togsdame wa m sẽn zoe n togsã tɩ yel-maandb a woto buud ka paamd Wẽnd Rĩunga pʋɩɩr ye. ²² Ad Vʋʋsem sõng sẽn womd biis niynsi: to nonglem, sũ-noogo, laafi, sũ-tõogo, taab sõngre, kõt yaare, taab teegre, ²³ sũ-bʋgsem, tõog-m-menga. Noor ka be n gɩdg bõn-sõma a woto ye. ²⁴ Neb niyns fãa sẽn lebg-b Krista a Zezi soolem, bãmb dãmb rɩka b zʋg wẽngã n ka pik zugu ne a tʋls wẽnsa fãa. ²⁵ A Vʋʋsem Sõng sẽn ya tõnd vɩɩma, bɩ b sõng d me tɩ d tʋm. ²⁶ D da bao yʋ-yaals ne wags taab ye, la d da maan sũ-ki-yaals ye.

¹ M saam-biisi, yãmb sʋka nin-yend sã n tudgi, y sẽn tũud Wẽnd Vʋʋsma, bɩ y maag y yĩng n sõng-a. Fo meng maan gũusgu tɩ kʋɩɩbg tõeeme n wa lub foom me. ² Sõng-y taab n zɩ y vɩɩma zu-loeese tɩ woto la y na n deeg Krista noore. ³ Ned sã n tẽed t’a yaa bũmbu, mik a ka fɩ, yẽ soab belgda a menga. ⁴ Ned kam fãa ges a sẽn vɩ to-to, a ges a tʋʋma n bao a zu-zẽkre be, a ra zẽka meng ne a taab tʋʋm ye. ⁵ Ad-y ned kam fãa tog n tʋka a zɩɩbo. ⁶ Bɩ karen-biig modg n sõng sẽn zãmsa yẽ karengã ne a paoong fãa. ⁷ Da belg-y y mens ye; ad-y ned ka laad Wẽnd ye. Ninsaal sẽn bʋd bũmb ning la a tigsda. ⁸ F sã n bʋd sẽn tog ne yĩngã, yaa yĩnga põosgo la f na n tigsi. Fo sã n bʋd sẽn tog ne a Vʋʋsem Sõngo, yaa vɩɩm sẽn kõn sɛ la f tigsda. ⁹ Wa-y tɩ d da bas raood ne neer baoob ye, tɩ tigsg na n wala a wakato, tõnd sã n kell n maan daoodo. ¹⁰ Dẽnd yĩnga, d sẽn tõe wakat ning fãa, bɩ d maan neer ne neba fãa gilli, bũmb zãnga ne d saam-biisã, sẽn tar d tẽebã. ¹¹ Ges-y bẽes bɛd niyns m nuga sẽn bẽes yãmb yĩnga. ¹² Sẽn wɩngd-b yãmb tɩ y kẽ bãongã, yaa zamaan yõod baoodba. Bãmb dãmb dat n põsa namsg ning Krista pika sẽn wat ne a soabã. ¹³ Sẽn kẽ-b bãonga fãa deegda noya sɩda? B ratame bala tɩ yãmb kẽ bãongo tɩ rẽ lebg wa b yẽesem bũmbu. ¹⁴ Mam yẽ sẽ, Wẽnd na laas-m tɩ m bao m meng pẽgre sã n ka ne Soaal a Zezi Krista pika: pik kãng n kɩt tɩ m get dũniya wa bũmb sẽn yaglg pik zugu tɩ dũniya me get maam boto. ¹⁵ Ad-y ka m-kẽe-bãong bɩ m ka kẽ bãong n be yõod ye, bũmb ning sẽn pake, yaa d lebg nin-paalse. ¹⁶ La neb niyns sẽn na n maan-b boto, bɩ Wẽnd laafi la b sõm sig bãmba la a sig Israyɛl paalga kamb fãa. ¹⁷ Marsã tɛka bɩ ned da le bao yelle n kõ-m ye! Mam yĩnga fẽrga ne a Zezi nodãando. ¹⁸ M saam-biisi, Wẽnd na pids yãmba ne tõnd Soaal a Zezi Krista nimbãan-zoeerã! Ami!