EFƐƐS RÃMBA

EFƐƐS RÃMBA

¹ Maam a Pol, a Zezi Krista Tʋʋm-tʋmd ne Wẽnd daabo, maam n pʋʋsd nin-sõma la Krista tẽedbã. ² Bɩ Wẽnnaam, tõnd Ba la d Soaal a Zezi Krista sudg yãmb b laafi kũuni! ³ Bɩ Wẽnnaam la d Soaal a Zezi Krista Ba paam pẽgre! Bãmb zĩnda yĩngr n sudg tõnd kũun buud fãa, ne Krista. ⁴ Tũu ne Krista tɩ b tũus tõnd al tɩ dũni nan ka sɩnge, n na n kɩt tɩ d lebg sõma n zãr ne rẽgd buud fãa, bãmb taoore la bãmb nonglma pʋgẽ. ⁵ Bãmb n pĩnd n yals menga tɩ Krista maasem yĩnga, tõnd na n lebga bãmb kom-wubdsi. Woto la b tʋlg ne b yamleoogo, ⁶ la rẽnd me la kũun ning d sẽn paam b Bi-nongra nengẽ ya bũmb sẽn tog ne pẽgr kãsenga. ⁷ Yaa Bi-kãng sẽn daag b zɩɩma nengẽ la d yãet tɩlgre, la d paamd d yel-wẽna yẽesgo, tɩ b nimbãan-zoeerã ka be tɛk ye. ⁸ Wẽnd sudga tõnd b kũuna, b pʋɩɩ tõnd b yam zulungã la b yam pidungã ⁹ Bãmb meng n wilg tõnd b sũura raabo, n wilg b nonglma sẽn da sede, la sẽn da solg al daar zãra ¹⁰ n gũud tɩ wakata sã n ta bɩ b lek bũmb fãa, yĩngr la tẽng zug, n tees b Naab yɛngã, a Zezi Krista. ¹¹ Tũu ne Krista tɩ sẽn so-a la a zãad bũmb fãa wa a sẽn datã, welg tõnd toore, n bak tõnd al zamaan woko, ¹² tɩ d na n lebg neb niyns sẽn pĩnd n paam b teegda; la rẽ toga ne pẽgr kãsenga. ¹³ Yaa bãmb me maasmẽ la yãmb wʋm fãagra Koe-noogo la y reeg-a n paam tɩ b sẽn kãab Vʋʋsem ninga mak-y ne b meng makre. ¹⁴ Yaa Vʋʋsem Sõng kãng la d pʋɩɩra reng-n-lembga, n gũud wakat ning Wẽnd sẽn na n fãag neb niyns sẽn lebg b bãmb soolem, tɩ rẽ me segd ne pẽgr kãsenga. ¹⁵ M sẽn bãng y sẽn tẽed Krista toto la y nonglem ne nin-sõma wã fãa ¹⁶ mam pa vʋʋs ne bark kãntɩɩs kudbu la y yell tẽegr m pʋʋsg wakat ye. ¹⁷ Bɩ Soaal a Zezi Krista Wẽnnaama, Ba sẽn tar ziir sẽn kõn sɛ wã, bɩ bãmb kõ-y yam zulunga, la b puk yɛla fãa sẽn solg b nengẽ tɩ y tɩg b zãnga. ¹⁸ Wẽnd na puk y yama tɩ y bãng saagr ning y sẽn tõe n saage ne bãmb boollã; tɩ y bãng pʋɩɩr ning b sẽn bĩng b nin-sõma, ¹⁹ la y yãend bãmb pãn-kẽengã sẽn puk tõnd tẽedba yĩnga, Krista pʋgẽ, ²⁰ Krist ning b sẽn vʋʋg kɩɩms sʋka la b zĩndig yĩngri, b Ba rɩtgo, ²¹ al tɩ b zʋʋg bũmb ning fãa sẽn tar naam, n tar pãnga, n tar ziiri, bũmb ning fãa sẽn tar yʋʋre, n be marsã zamaana bɩ n na n zĩnd beoog rẽnda. ²² B sulga bũmb fãa bãmb taoore, b zẽk-b la yĩngri tɩ b zʋʋg bũmb fãa n ya Tigengu zugu, ²³ tɩ Tigenga la b yĩngã la b pids-a la ne b kũuna zãnga.

¹ Y ra lebga kũum, y beegre la y yel-wẽna yĩnga, ² Y vɩɩnda bãmb pʋgẽ pĩnda tɩ y ra tũuda zamaana yam wẽnga soaba la a soaala, sẽn ket n tʋmda a tʋʋma ne tõatbã. ³ Yaa tõnd fãa bal n pʋs n yɩ woto; d da tũuda d zʋg wẽnga, n tũud d yĩnga yamleoog la d tʋls wẽnse n tol n wa lebg beem zãng ne Wẽnde, wa ninsaalb a taaba fãa. ⁴ Wẽnnaam nimbãan-zoeera ka be sɛɛb ye tɩ b nonglem ne tõnd yaa nonglem kãsenga. ⁵ Yaa rẽnd yĩng la d yel-wẽna sẽn da kɩt tɩ d fãa lebg kũumã, b baas n naaga tõnd ne Krista n vʋʋg-do, n wilg tɩ d fãagra tũu ne Wẽnd yel-sõmd bala. ⁶ B naagd-d la ne Krista n vʋʋge la b zĩndiga tõnd ne Krista arzãna. ⁷ B tʋlgame n wilg zamaana sẽn watã tõnd ne Krist a Zezi nonglma sẽn pid ne kũun tagd niynsi. ⁸ Tũu ne Wẽnd yamleoogo la y sẽn paam fãagrã, ne tẽeba kũuni. Fãagra ka yit yãmb nengẽ ye, a yaa Wẽnd kũuni. ⁹ Ka ned tʋʋmd me n wat ne a ye, tɩ ned ka tõe n paam pẽgr a meng nengẽ ye. ¹⁰ Tõnd yaa Wẽnd nug bũmbu, b naana tõnd a Zezi Krista maasmẽ, b naana tõnd tʋʋm yĩnga, tʋʋm-sõma niyns b sẽn segl al pĩnd-pĩnda n bĩng-du tɩ d wa tʋma. ¹¹ Bu-zẽmba, tẽeg-y tɩ pĩnda yaa yãmb la b ra boond tɩ ka kẽ-bãong rãmba – la sɩd da yaa boto. Sẽn da boond-b yãmb woto wã me ra teega barga n boond b mens tɩ bãnkomse. ¹² Tẽeg-y tɩ wakat kãnga yãmb da vɩɩ woto, n pa tar Wẽnd Nedã, n pa tar sor n na n kẽ a Israyɛl kamb sʋka, n pa mi Wẽnd zoodo, n pa tar Wẽnd pʋlem noodo, n pa tar kãabga saagre, n ka tar Wẽnd meng dũni kãnga pʋgẽ! ¹³ La yãmb sẽn da be zĩ-zãorgẽ pĩnda, marsã Krista taka yãmb n kolg b meng ne b zɩɩm pãnga. ¹⁴ Ad-y yaa bãmb bal n kõt tõnd laafi, bãmb n kɩt tɩ buud a yiiba fãoog taab buud a ye. Bãmb n menes bũmb ning sẽn da welgd-ba. Bãmb yĩngã n yẽes beema, ¹⁵ n yãk Noorã ne a moadgã fãa. Bãmb yĩngẽ la buud a yiiba sog taaba n lebg Nin-paale n lebg nin-yɛnga, la b zĩ laafi ne taaba. ¹⁶ Bãmb n sõng-b tɩ b lɛɛg n wa kẽ Wẽnde, n paam n lebg Yĩng a ye, ne pika pãnga; ad-y yaa bãmb meng b toore n sɛɛs beema. ¹⁷ Dẽ poor la b waa n moon laafi, n moon-a yãmb sẽn da zãr-ba yĩnga, n moon-a neb niyns sẽn da pẽ-ba yĩnga. ¹⁸ Bãmb pãng yĩng la d yiiba fãa paam Vʋʋsma a ye n tõe n kolg d Ba naana. ¹⁹ Sẽn ya woto wã, yãmb pa le ya bu-zẽmb bɩ sãamb ye, y paama tẽngen-bi-taar ne nin-sõma, y lebga Wẽnnaam zak kamba. ²⁰ Yãmb yaa bũmb b sẽn me la b mee yãmb bãngdba la tʋʋm-tumdba zugu. Rooga kuga ma yaa a Zezi Krista meng b toore. ²¹ Yaa bãmb zugu la rooga tõr lugl yã n tar dʋʋbo n na n wa lebg Ro-sõngo, Soaala maasmẽ. ²² Yaa yãmb me la b rɩk n naag n me Roogã t’a na n lebg wẽnd doog, Vʋʋsma maasmẽ.

¹ Ad maam a Pol, b sẽn sui a soab roog ne Krista raab yãmb bu-zẽmba yĩnga, ad-m sẽn tõe n togse. ² Y paam n bãngame tɩ yaa maam la Wẽnd bobl b kũuna yãmb yĩnga, ³ b wilg-m lame tɩ m mi vẽenega bũmb ning sẽn da solge tɩ m paam n togs-y bilf marsã wã. ⁴ Y sã n karem sebrã y na bãng yam vẽnegre ning m sẽn paame, n mi sẽn da solg Krista pʋgẽ. ⁵ B sũura raab ra solga ninsaalb kamb pĩnda n yaool n puk marsã nanda, ne Vʋʋsma vẽnegre, Tʋʋm-tʋmdb sõma wã la bãngdba nifẽ. ⁶ Marsã tɛka bu-zẽmba naagda tõnd n dɩt Wẽnnaam yõodo: tɩ b lebga Yĩn-yɛnga la b paama kãabg yɛnga, b sẽn kẽ Krista a Zezi ne Koe-nooga deegre. ⁷ Yaa maam n lebg Koe-nooga moanda ne Wẽnd bark b sẽn sudg maam ne bãmb pãnga. ⁸ Sɩda yaa maam, yao-zʋʋga, Krista nin-sõma wãa fãa sʋka, yaa maam la b yãk yã tɩ m wilg bu-zẽmba Krista yõod ka tɛka, ⁹ la m puk vẽenemẽ zãnga bũmb fãa Naanda a Wẽnd sẽn da solge al zamaan woko n ta marsã. ¹⁰ Woto, arzãn kãsem-dãmb la pãn-dãmb na tũ Tigengu n bãng Wẽnnaam sẽn tʋm ne yam la bãngr pidung ninga. ¹¹ B na bãng Wẽnd sẽn tʋlg n pids b sũura sẽn da sede al zamaan woko ne Krista a Zezi, tõnd Soaala. ¹² Ad-y yaa rẽ n kõt tõnd daoodo tɩ d tõe n kolg Wẽnd n ka rigd rabeem ye, ne tẽeb ning d sẽn deeg Krista nengẽ. ¹³ Woto me la m yõkd y sɛɛga: da sak-y n bas raoodo, namsgã m sẽn namsd yãmb yĩnga ye, tɩ bala b na n waa ne yamb zu-zẽkre. ¹⁴ Yaa rẽ yĩng la n na n yĩgimd m Ba taoore, ¹⁵ tɩ bũmb ning fãa sẽn vɩ tẽng zug bɩ yĩngr Ba la bãmba. ¹⁶ Mam kota bãmb sẽn tar kũun sẽn tog ne pẽgr kãsengã tɩ b keng y sũya ne bãmb meng Vʋʋsem, la y nonglma kɩ yẽgna tɩ d pʋgẽ neda paam pãnga; ¹⁷ tɩ ne y tẽebã, bɩ Krista ti b nonglem doog y sũurẽ. ¹⁸ Woto y na paam pãnga, n naag nin-sõma n bãng Krista nonglem ka tɛkã: a woglem, a yalem, a zãndlem la a zulem. ¹⁹ Y na bãng tɩ Krista nonglem zʋʋga ninsaal bãngre. La yaa y bãngrã sẽn wat n pid zãnga la a na n kẽes yãmb Wẽnd pidunga tẽnsʋka. ²⁰ Bɩ ned ninga sẽn tʋmda tʋʋma d pʋsẽ la a tar pãng n tõe n le maan tɩ yɩɩg rẽnda, n tõe n kõ tõnd tɩ zʋʋg d sẽn tõe n kos bɩ d sẽn tõe n saage, ²¹ bɩ nin-kãng soog pẽgre, Tigeng pʋgẽ la Krista a Zezi nengẽ, tɩ daara la yʋʋma tong taab n tõt sɛɛbo! Ami!

¹ Yaa b sẽn balg a soab roogẽ, Soaala yĩngã, n yõkd y sɛɛga, tɩ y mao n vɩɩnde wa sẽn boola yãmba sẽn date, ² ne yam-sulgr la sũ-bʋgsem, n paas sũ-maasem; d vɩɩma ne taab yɩ sũ-tõog la nonglem vɩɩm. ³ Bas-y tɩ Vʋʋsem yɛnga lagem-y n loe ne b laafi loɛtg tɩ y lebg bõn-yɛnga. ⁴ Ad-y Yĩnga yaa a ye la Vʋʋsma me yaa a ye, d fãa yaa Wẽnd booll yɛnga n zĩ ne saagr yɛnga. ⁵ Soaala yaa a ye, tẽebã a ye, soobã a ye. ⁶ Wẽnd yaa b ye, n ya fãa Ba, n yɩɩd fãa, n vɩ la b tʋmd fãa yĩnga. ⁷ Ned kam fãa yaool n paama a pʋɩɩr Wẽnnaam nengẽ, n zems ne Krista raabo. ⁸ Yaa rẽ yĩng la b yeta: «B sẽn dʋ arzãna b dʋʋ ne b yemse, b sudga ninsaalb kamb fãa kũuni.» ⁹ «Sẽn dʋ a soaba» la ãnna tɩ ka sẽn denga n sig bʋg-tẽnga? ¹⁰ Sẽn siga wã bala n leb n dʋ n zʋʋg saaga n na n kɩt tɩ fãa lebg pidungu. ¹¹ Bãmb yɛsa n kɩt tɩ neb kẽer lebg tʋʋm-tʋmdba, kẽer bãngdba, kẽer Koe-nooga moandb, kẽer pe-kɩɩmba la karen-saamb dãmba. ¹² Woto la b kõ nin-sõng fãa a tʋʋmde sẽn na n yɩlẽ tɩ Tigengã, Krista Yĩnga, tõog n me. ¹³ Tʋʋm kãnga ne a na n baase tɩ tõnd fãa lebga bũmb a yembre ne tẽebo la ne Wẽnd Biiga bãngre la d lebg Rao sẽn pid rao, sẽn bɩ zãnga, n lebg Krista zãnga. ¹⁴ Woto tõnd kõn maan wa yãase la d kõn bas d yam t’a lengd yaar ye. D kõn bas tɩ zãms paal sobg rɩk-d n tees a sẽn teesẽ tɩ d tũud ninsaalb zirẽ-beedo la b zãmb tʋʋma b sẽn tʋmd n dat n tudg tõnda ye. ¹⁵ D na n tũu sɩda la nonglem n vɩɩnde; lebga d yaoka tar paasgo ne bũmb fãa tɩ d kẽn n tees Zu-raooga soaba, a Zezi Krista. ¹⁶ Yaa bãmb Yĩngẽ la wilsa fãa kẽ taaba, n sog taab kɛpi ne zɩ wĩisi sẽn kõt wilg fãa a rɩɩbo t’a tõe n tʋm a tʋʋmde tɩ yaoka paasdẽ, tɩ bũmb fãa sũg kẽnkẽ nonglem pʋgẽ. ¹⁷ M le yeta yãmba la m le yõkda y sɛɛga, Soaala yĩnga, tɩ y bas zʋg ning sẽn ya bu-zẽmba zʋgo; bas-y b zirẽ-be-tagsgo; ¹⁸ yaa woto la b zĩ lib-tuu n lebg Wẽnnaam vɩɩma sãamba, tɩ bãngr kaoolg yĩnga b basa b sũur tɩ kidibi. ¹⁹ Wẽng la neer bãngr yama sẽn kẽke, lebga yoobo la b tʋʋmde, al tɩ b rɩk b meng zãnga n kõ tʋʋm yoodã, a yeyn-ye. ²⁰ Ka woto la b zãms yãmb Krista ye, ²¹ sã n yaa sɩd tɩ b wilga yãmb Krista ne kareng sõngo, kareng sẽn tʋʋd sɩd ning sẽn be a Zezi nengẽ. ²² B Pa zãms yãmb sɩda, tɩ yaa modgre tɩ y bas y pĩnd vɩɩma la y yeeg y zʋg kʋdgã sẽn tar y sãoong n dabdã ne a tʋls waglã, ²³ la y teem y tagsgã t’a wẽneg yĩngr dãmb dẽnna? ²⁴ B pa yeel-y tɩ y yeelg wala y fuugu Nim-paalã, Wẽnd sẽn naan ne b zemsgo, ne b sõmblem la b sɩda? ²⁵ Dẽ yĩng bɩ y bas zirẽ-beedo: ned kam fãa gom sɩda ne a to. Ned kam fãa ka a to wilg laa? ²⁶ Yãmb sũur tõeeme n wa puugi, yãmb yee n da maan wẽnga. Da sak-y tɩ wĩndg lʋɩ tɩ y sũur ket n kãbd ne taab ye. ²⁷ Da yõk-y y meng n kõ Sʋtãan ye. ²⁸ Sẽn da zuuda bɩ a bas wagdem, a bao a nug tʋʋmde, a me tõog n maan neere n sõng a taaba sẽn tar naongo! ²⁹ Da sak-y tɩ y noor yiis gom-beed ye; bɩ y gomd sõng sẽn dat-b sõngre, la a maneg sẽn kelgd-ba yelle. ³⁰ Da kõ-y Wẽnd Vʋʋsem sũ-sãang ye; bãmb makre la y zɩta n gũud b Fãagra raare. ³¹ Mo-beedo, sũuri, sũ-toogo, gãgse, la tʋya, n paas wẽnem buud fãa, dẽ fãa tog n zãaga ne yãmba. ³² Vɩɩnd-y ne sũ-bʋgsem la nimbãan-zoeer ne taaba, la nong-y n kõ taab sugri, wa Wẽnd sẽn kõ yãmb sugri, Krista yĩnga.

¹ N-ye! Mao-y n wẽneg Wẽnde wala b kom-nongdse. ² Tũ-y nonglem sora wa Krista; bãmb tõogame n nong yãmba al n sak n dɩk b vɩɩm n kõ Wẽnd wa yũ-noog maoongo. ³ Sã n kella yoob ne a tʋʋm yooda buud fãa, n paas zoe-bõne, bɩ rẽ ra tol n pʋd yãmb sʋk ye: b basg bala n segd ne nin-sõma. ⁴ Gom-yoodo, gom-lɛbla, raab yoodo, dẽ me ka tog ye. Sõng-y bal tɩ bark pʋʋsg sãde. ⁵ Kelg-y neere: yoaada, nin-dẽgdo, raab wagl soaba, – a geta a meng wa wẽnde – bãmb dãmb ka tar pʋɩɩr Wẽnd la Krista Rĩunga pʋg ye. ⁶ Da sak-y tɩ ned wa belg yãmb ne no-noom goam ye, yaa tʋʋm yood a woto buud n takd Wẽnd beem, wẽn-kɩɩsdba zutu. ⁷ Da naag-y bãmb zĩig ba a ye! ⁸ Pinda yãmb da yaa lik kamba, dũnna yãmb lebga vẽenem kamba, Soaala maasmẽ, bɩ y kell n vɩɩnd wa vẽenem kamba. ⁹ Vẽenem tʋʋma yaa sũ-bʋgsem, zemsgo la sɩda, ¹⁰ Bãng-y sẽn noom Soaalã. ¹¹ Da naag-y n tʋm lik tʋʋm yooda ye, ad-y yõod ka ye. Luk-y tʋʋm yooda rãmb bãongo. ¹² Sɩda, b sẽn solgde n tʋmd likẽ wã toagsg meng yaa yãnde, ¹³ Luk-y b bãongo tɩ b yɛla wa vẽenemẽ. ¹⁴ B sã n wa vẽenemẽ wã marsã la b wẽnema na n puki. Yaa rẽ la b yeta: «Sẽn gõe soaba yiki, yik la f bas kɩɩmse tɩ Krista Vẽenem yãg f yĩnga.» ¹⁵ Dɩlla maan-y gũusgu ne y tʋʋma, b ra yɩ yalem tʋʋm ye, b yɩ nin-vẽen-dãmb tʋʋma, ¹⁶ neb sẽn na n tõog n dɩ b rũnna vɩɩm yõodo, tɩ y mi tɩ zamaana yaa toogo. ¹⁷ Dẽ yĩnga da maan-y gãeemd ye; bao-y n bãng Wẽnnaam sẽn dat tɩ y tʋm toto. ¹⁸ Gũus-y ne rã-tɩgre: yaa tʋʋm yood la-a wat ne. Bao-y y sõmblema pidsgu ne Wẽnd Vʋʋsem. ¹⁹ Naag-y taaba n zodg yɩɩla n balem Wẽnde, n kils-ba, n pʋʋs b barka. Yɩɩl-y y sũur pʋgẽ n pẽgd Wẽnnaam. ²⁰ Zĩis fãa la wakat fãa pʋʋs-y Wẽnnaam Ba barka, Soaala Zezi Krista yʋʋr yĩnga. ²¹ Zoe-y Krista la y sak taaba. ²² Bɩ pagba sak b sɩdb rãmba wala b sẽn sakd Soaala. ²³ Sɩda yaa paga zu-soaba wala Krista sẽn ya Tigenga zu-soaba tɩ bãmb la Yĩnga fãagda. ²⁴ Tigeng sakda Krista; dɩlla pagba me tog n saka b sɩdba bũmb fãa pʋgẽ. ²⁵ Sɩdb rãmba, nong-y y pagba wa Krista sẽn nong Tigengu; b kõ-la b vɩɩma Tigenga yĩnga, ²⁶ sẽn na n yɩlẽ t’a paam sõmblem; la yaa koom sẽn sood tɩ Koɛɛg naag n moonẽ n wat ne sõmblem kãnga. ²⁷ B tʋlgame tɩ Tigenga yaas bãmb taoore, n pɩnd ne neerem, n yãgd ne sõmblem, n zãr ne rẽgdo, bɩ kʋʋlem, bɩ bũmb a to sẽn wẽnd rẽnna. ²⁸ Yaa woto me la sɩdb rãmba tog n nong b pagba wa b meng yĩnga; sẽn nong-a a paga nonga a menga. ²⁹ Ned ba a ye zɩ n kisg a meng yĩng ye. Ned kam fãa dɩlgd-a lame la a tar-a neere. La yaa woto la Krista maand ne Tigengu. ³⁰ Tõnd ka bãmb yinga wils laa? ³¹ Ad sẽn gʋlse: «Yaa rẽ yĩng la rao na n bas a ba la a ma n pa ne a paga la b yiiba na n lebga yĩng a yembre.» ³² Ad-y yaa yell kãseng sẽn da solg la b pukyã: M yetame tɩ yaa Krista ne b Tigenga vɩɩm sẽn ya a soaba la b pukyã. ³³ Dɩlla bɩ yãmb ned kam fãa nong a paga wa a menga la pag me waoog a sɩda.

¹ Kamba sak-y y ba rãmba, Soaala yĩnga; dẽ n toge. ² Waoog f ba la f ma la noor sẽn naag n yiis ne pulem-noogo pipi la no-kãnga. ³ Waoog f ba la f ma tɩ f na paam sũ-noogo la f yõor na yɩ wok tẽng zugu. ⁴ La yãmba, ba rãmba, da yɩ-y toog tɩ loog ne y kamba ye; gʋʋl-y b neere ne sɩbgr bɩ saglg sẽn tũud Soaala raabo. ⁵ Yemse, sak-y tẽng zug zu-soaben-dãmba, ne rabeem la rigbu, sak-y b ne pʋ-peelem, wa y sẽn sakd Krista bala. ⁶ Sakra ra yɩ m dat n nooga ninsaal sũur sakr ye, n ka yamleoog ye; sakra yɩ wala y yaa Krista yem-daado, sẽn pidsd Wẽnnaam daab ne b sũur faa. ⁷ Bɩ y zɛɛg n tʋm Soaala yĩnga la ra yɩ ninsaalb yĩng ye. ⁸ La y gãneg y yam tɩ Soaala na n dola ned kam fãa tʋʋm-sõma: f ya yamba bɩ burkĩna. ⁹ Yãmba, zu-soaben-dãmba, yãmb me maan boto ne y yemse, bas-y b rabeem kẽesgo la tags-y tɩ yãmb ne bãmb zu-soaba ya a ye, yaa sẽn be-a arzãna, la zu-soab kãng pa bakd ned ne a to ye. ¹⁰ D na n kʋmsa d goama woto: lebg-y neb sẽn tar pãnga Soaala sɛɛgẽ, neb sẽn wɩɩd ne Wẽnd pãnga. ¹¹ Rɩk-y Wẽnnaam zab teedo n bobe, n tõog n teedg ne Sʋtãana. ¹² Yãmb mens miime tɩ tõnd zabra ka ne ninsaalb sẽn tar yĩng la zɩɩm wa tõnd ye, yaa ne bugum yir la lik kãsem-dãmba la pãn-dãmba, yaa ne malɛgs wẽns sẽn saad yĩngri. ¹³ Yaa rẽnd yĩng la y tog n bob Wẽnd zab-teedo n maan y sẽn tõe fãa n da kong pãnga, ra-beeda wakat ye. ¹⁴ Yals-y yĩngri, rɩk-y sɩda tɩ yẽ yɩ yãmb sẽbdga, la pʋ-peelem n pil y yãoogo; ¹⁵ y neooda wã marsã yɩ y sẽn yãgd n na n moon Koe-noogã ne sũur ningã. ¹⁶ Tall-y y tẽebo, gãd-y y tẽeba kẽnkẽ, wa gãongo, n ligind Sʋtãan pɛɛma tɩ b yaa bugum pɛɛma. ¹⁷ Sẽn kell yaa bõe: yaa Wẽnnaam gomdã tɩ y na n fõgen-a wa y fãagr zug peoogo, la y zãad-a wa a Vʋʋsem Sõng sʋʋga. ¹⁸ Wɩng-y ne pʋʋsgo la Wẽnd sɛɛg yõkre; pʋʋs-y wakat buud fãa ne Vʋʋsem Sõngo, sõng-y n da vʋʋs wakat ba a ye; pʋʋs-y nin-sõma wã fãa yĩnga. ¹⁹ Tẽeg-y mam me yelle y pʋʋsg pʋgẽ tɩ m tõog n yaag m noore n gome la m moon Koe-nooga ne raoodo n puk sẽn solge. ²⁰ Ba b za maam ne bãeense n gãnege, Koɛɛga mooneg la m tʋʋmde. Kos-y tɩ m paam daoodo n moon wa sẽn segde. ²¹ Mam datame tɩ yãmb me bãng m tʋʋmda sẽn ta zĩig ninga la mam me sẽn lebg a soaba; a Tisik na wilg-y rẽ fãa; yaa m saambi-nongre la yẽ la m sõangd wakat buud fãa Soaala tʋʋmda pʋgẽ. ²² Maam bal n tʋm-a yãmb nengẽ t’a kõ yãmb d kibare la a keng y sũya. ²³ Bɩ Wẽnnaam Ba la d Soaala Zezi Krista kõ d saam-biisa fãa laafi, n paas tẽebo la nonglem! ²⁴ Wẽnd bark sig neb niyns fãa sẽn nong-b tõnd Soaala Zezi Krista, vɩɩm sẽn kõn sɛ yĩnga!