KOLOSẼ RÃMBÃ

¹ Maam a Pol, Krista tʋʋm-tʋmd ne Wẽnd raabo, n paas m saam-biig a Timote ² tõnd n pʋʋsd Kolos nin-sõma, d saam-biisa sẽn kẽ-b Krista. Bɩ d Wẽnnaam d Ba sudg-y bark la laafi! ³ Tõnd pa viigd abada ne Wẽnnaam la d Soaal a Zezi Krista Ba wã bark pʋʋsg ye. D pa viigd ne yãmb tẽegr d pʋʋsg pʋgẽ ye. ⁴ La rẽ yaa d sẽn bãng tɛk tɩ yãmb sɩd gãda a Zezi Krista ne tẽebo la y wilga y nonglem ne nin-sõma wã fãa, ⁵ n paas d sẽn bãng tɩ y sũur pida ne b sẽn bĩng yãmb arzãnẽ wã saagre. Y sẽn saagd bũmb ningã, b wilg-a-la yãmb pĩnda ne Sɩda Koɛɛgã, ne Sɩda Koe-noogã. ⁶ Koe-noog kãng taa yãmba wala a sẽn ta dũnia tõre la a tara a biis wom n dabda; yaa woto la a maand yãmb sʋk me, yãmb sẽn wʋm la y bãng tɛka Wẽnnaam kũuna sẽn ya a soaba. ⁷ Yaa a Epafras, tõnd tũud-n-ta-nongre la d sõangda, n zãms-a yãmba; a sɩd deega tõnd zĩiga n taas yãmb neere Koɛɛga zãnga wa Krista tʋʋm-tʋmda. ⁸ Yaa yẽ n wilg tõnd a Vʋʋsem Sõng nonglem ning sẽn wit y sũurẽ tõnd yĩngã. ⁹ Yaa woto yĩng la tõnd me, d sẽn wʋm dẽ tɛka, d ka viigd ne pʋʋsg yãmb yĩng ye, la d kota Wẽnnaam tɩ b tall yãmba tɩ y yam wa vẽneg zãnga ne bãmb menga raabo; b sõng-y ne wʋmbo la ne bãngr sẽn yit yĩngri. ¹⁰ Woto la y tõogd n vɩɩnd vɩɩm sẽn tog ne Soaala la sẽn tat b yam zãnga; woto la y na n tõog n maan tʋʋm sõma buud ka tɛka la y bɩɩs y bãngrã ne Soaalã. ¹¹ Ad-y Wẽnd ziira tẽegre na n kõ-y la pan-kẽengo, a na n kõ-y-la raoodo la sũ-keelem. ¹² Yãmb na pʋʋs Ba wã barka tɩ bãmb meng n segle n na kõ yãmb nin-sõma wã pʋɩɩre, b vẽenem zĩigẽ. ¹³ Yaa bãmb n yiis tõnd Lik naab soolmẽ n kẽes tõnd bãmb Bi-nongra Rĩungẽ, ¹⁴ yaa bãmb nengẽ la d paamd tɩlgre la d beegra sugri. ¹⁵ Bãmb la Wẽnd wẽnego, ninsaal nif sẽn ka tõe n teeg a soaba wẽnego. Bãmb la bũmb fãa-fãa Kãsma. ¹⁶ Tũu ne bãmba tɩ Wẽnd naan bũmb fãa sẽn be-b yĩngri, sẽn be-b tẽng zugu, sẽn toe n yãend la sẽn pa tõe n yãende yĩngr Na-rɩtba, Soaalba, Na-komse, Pãn-dãmba, fãa yii bãmb nugẽ, fãa bee bãmb yĩnga. ¹⁷ Bãmb meng n deng fãa n beẽ, la bãmb n ket n zãad bũmb fãa. ¹⁸ B Yĩngã sẽn boond tɩ Tigengã, bãmb la a Zugu: Bũmba fãa tʋɩɩsa ne bãmba, Bãmb n yɩ pipi n vʋʋg kɩɩmsa sʋka, (da togẽ lame tɩ b soog kãseng bũmb fãa pʋgẽ) ¹⁹ tɩ Wẽnd tʋlgame tɩ b lek bũmb fãa sãoogo ²⁰ B tũu bãmb maasem n le maneg bũmb fãa yelle, sẽn be tẽng zug wala sẽn be yĩngri, n sik laafi ne b zĩma b sẽn daag pika zugu. ²¹ Ba yãmb mense, pĩnda yãmb me ra yaa bu-zẽmba la Wẽnd bɛɛba, ne yãmb tags wẽnse la y tʋʋm wẽna; ²² ad yãmb me sẽn paam tɩ b le maneg y yelle ne b yĩng sẽn bãng kũum pik zugu, sẽn na n yɩlẽ tɩ y tõog n yals b taoore wa nin-sõma la neb sẽn pa tar b toorẽ yelle. ²³ Lebga yãmb kell n gãd y tẽeba la y yals y mens kẽnkẽ n da bas tɩ b loog ne y sẽn saagd bũmb ninga ye, tɩ bõn kãng la b sẽn kãab yãmb a soab ne Koe-noogã. Koe-noog kãng la yãmb sẽn wʋma; Koe-noog kãng waa ninsaalb buud fãa sẽn be saaga tẽngr yĩnga, la maam a Pol n lebga moaanda. ²⁴ Marsã menga mam kɩdemda sũ-noogo ne namsg niyns mam sẽn yãe yãmb yĩnga, la ne mam yĩnga namsgo mam pidsda Krista sẽn nams bũmb ning fãa b Tigeng yĩnga, tɩ Tigenga yaa b meng yĩnga. ²⁵ Ade, mam lebga Tigenga tʋʋm-tʋmda la Wẽnd n kõ maam tʋʋm kãnga tɩ b ratame tɩ Koɛɛga ta yãmba. ²⁶ Yell kãnga ra solga yʋʋm kʋʋma la rot kõn-bãng-n-sõd neba; marsã bal la b puk-a b nin-sõma. ²⁷ Wẽnd tʋlgame tɩ b bãng sẽn da solgã sẽn puk ne ziir ning bu-zẽmba yĩnga. Yell solgra la Krista sẽn zĩ ne yãmbã; bãmb nengẽ la d saagd pẽgre. ²⁸ Krista kãng la d moanda n segend ne yam la d wilgd neba fãa tɩ b lebg sõma zãnga bãmb maasmẽ. ²⁹ Yaa m sẽn dat tɩ rẽ pidsã, la m sak yaamse la m sak maoore la maoora yĩnga, b kɩtame tɩ m wɩɩd ne pãn-kẽengo.

¹ Sɩd me m datame tɩ y bãng zab-bãnd ning m sẽn tog n zab y yĩnga, n zab Laodise rãmb yĩnga, n zab sẽn ket-ba fãa yĩnga, neb sẽn zɩ n teeg-m ne b nifu. ² M maoodame n na n keng b sũya la m fãoog-b ne taab nonglem pʋgẽ tɩ b yama wa tõog n vẽneg zãnga ne yɛl niyns sẽn solg Wẽnd nengẽ. ³ Yaa bãmb nengẽ la solg yã yam pidungu la bãngr zulungu ne b yõod ka tɛkã. ⁴ M gomda woto tɩ m pa rat tɩ ned wa belg yãmb ne goam faad ye. ⁵ M yĩnga n zãar ne yãmba, m yama bee ne yãmba la m nee ne sũ-noogo y sẽn sigl y yɛla ne yam ninga la y tẽebã ne Krista keglem sẽn ya to-to. ⁶ Soaal a Zezi Krista ning b sẽn wilg yãmb a soab taki wã, ad-y yaa bãmb maasmẽ la y tog n kẽne. ⁷ Sud-y y yẽgna n ta bãmba, bas-y tɩ b me-y wa roog bãmb zugu, la rẽ tɩ y rella tẽeb ning b sẽn zãms yãmb a soabã, tɩ y bark pʋʋsg pid n daanẽ. ⁸ Gũus-y tɩ ned da yik yãmb sʋka n belg yãmb n da, wala yemse, ne a sɩlem pidung ye; b bãngra yaa kʋdem-dãmb la dũnia rãmb bãngre, a ka Krista rẽnd ye. ⁹ Bãmb n pid ne wẽndlema fãa pidungu ¹⁰ la yãmb me tũu bãmb n lis pidung kãng pʋgẽ. Bãmb bal la yĩngr dĩm dãmb dĩma la pãn-dãmba fãa Kãsma: ¹¹ Yaa bãmb yĩng la yãmb lebg zũnsi la ka ninsaalba bãong la b kẽes yãmb ye, tɩ yaa y yĩn-gãonga fãa la y yeeg yã. Sẽn kẽe-a Krista bãong kẽe woto: ¹² y sẽn tũ bãmb n mum yaoogẽ ne soobo, y tũu bãmb me n vʋʋge tɩ yãmb tẽe Wẽnd pãnga sẽn vʋʋg-b kɩɩms sʋka. ¹³ Yãmb sẽn da ya kũum y yel-wẽna la y sẽn ka kẽ bãonga yĩnga, Wẽnnaam n kɩt tɩ yãmb le vʋʋge n vɩ ne Krista. Bãmb n bas d yel-wẽna taale. ¹⁴ B pa tũ Noora sẽn da rat a soaba ye, b rɩka tõnd samd yooga sebre n ka pika n sãam-a zãnga. ¹⁵ B yeesa yĩngr Na-komsã la Pãn-dãmbã futu n bas b bɩlma ãndũni rãmb taoore, n kẽnd ned sẽn tõog a bɛɛb kẽnde, tɩ bɛɛb tong b poorẽ. ¹⁶ Da sak-y tɩ ned wɩd yãmb bõn-dɩtl bɩ bõn-yũudr poorẽ ye, yʋʋmd-yʋʋmd kibsa, kiu paale, bɩ sibr daar poorẽ ye. ¹⁷ Dẽ fãa yaa bũmb sẽn wat beoog sulunsuku, la bũmba meng tãa la Krista Yĩnga. ¹⁸ Bɩ ned da sak n bas tɩ b fãag Krista a nugi ye; a ra bas tɩ b wilg-a Wẽnd tũudem so yaalse la malɛgs rãmb waoogr ye. Yẽ soab sẽn lʋɩɩsd taoore yaa sẽn yãend ne a nif bala. Ad-y yaa wilg-m-meng n kɩt t’a wuk n zĩ ne ninsaal bãngr bala. ¹⁹ Yẽ soab pa lagem Krista, tɩ Krista yaool n ya Zugu n kɩtdẽ tɩ yĩnga wilsa lagem n sũg taab ne gĩini n paamd dɩɩb la pãnga, n paam n dɩkd yaok ningã Wẽnd sẽn dat a soab ne-a. ²⁰ Yãmb tũu Krista n ki n bas zamaana yɛla, bõe yĩng la yãmb le loet y zugu ne yell kãensã wa yãmb ket n yaa zamaana soolem? ²¹ Bõe tɩ b yetẽ: «Da rɩke, da lembe, da sɩɩse», ²² dẽ fãa gomda yɛl sẽn sɛt b meng b toore, dẽ me bal la ninsaalb noy la b zãmsgo. ²³ Noy a woto wẽnda yam bũmbu tɩ yaa wa b geta ninsaal sẽn tog n sulg a meng n pʋg Soaalã, la a zã a yĩnga toogo, mik fɩ! Yĩnga ket n tãoosda raoodo, bũmb pa boogd ye.

¹ Yãmb sẽn tũ Krista n vʋʋge, yaa yĩngr la yãmb tog n doog y nenga, zĩig ning Krista sẽn zĩ Wẽnnaam dɩtgo. ² Yaa yĩngr yɛla la yãmb tog n bao la y bas tẽng zug rẽnna. ³ Sɩda, yãmb kiime la yãmb vɩɩma solga Wẽnnaam nengẽ marsã ne Krista. ⁴ La Krista sã n wa puki, bãmb sẽn ya yãmb vɩɩma, wakat kãnga yãmb me na tũ bãmb n puk ne pẽgr sẽn kõn sɛ. ⁵ Dẽ yĩnga sɩbg-y y yĩnga wilsi. Ad-y yaa yoobo, tʋʋm dẽgdo, tʋls wẽnse, arzɛk tʋlsem, wala yẽ n deeg wẽnd zĩiga: ⁶ yaa bãmb n takd Wẽnd beem tõatba zugu. ⁷ Y vɩɩma ra yaa woto pĩnda, y sẽn da waa n be bãmb sʋka. ⁸ Dẽnd yĩnga, zãag-y mens marsã ne rẽ fãa. Sũ-puuri, sũ-toogo, zãmbo, beem tugbu, gom yoodo ka tõe n le yi y noorẽ ye. ⁹ Da le yag-y taab zirẽ ye. Y yeega nin-kʋdrã ne a tʋʋma n base, ¹⁰ n lɛɛg n yeelg nin-paallã. Y rɩka bãngr sɩd sore tɩ woto la y wẽnego ne yãmb Naanda na n le tõog n puk yɛsã. ¹¹ Ade, m yaa Grɛk, bɩ Zʋɩf, zũng bɩ sẽn ka kẽ-a bãongo, weoogẽ neda, bu-zẽna, yamba bɩ burkĩna, ka rẽ n le be yɛs ye. Yaa Krista bal n be n ya fãa la b be fãa yĩnga. ¹² Dɩlla yãmb sẽn ya Wẽnnaam yam nebã, b nin-sõma la b kom-nongdsã, bɩ y mao n yɩ nimbãan-zoetba, neb sẽn nong taaba, yam-sulgr dãmba, sũ-bʋgsem dãmba, sũ-maasem dãmba: ¹³ ned kam fãa tõog a sũur ne a to, tɩ sã n ya zabr me, bɩ y kõ sugri; wala Soaala sẽn kõ yãmb sugrã, yãmb me maan boto. ¹⁴ Bũmb zãnga tall-y nonglem: yẽ bal la sõmblem yẽgre. ¹⁵ Woto wã bɩ Krista laafi kẽe y sũya tɩ yaa rẽnd yĩng la b bool-y n na fãoog-y taab Yĩng a ye. La vɩɩnd-y Wẽnnaam bark pʋʋsg pʋgẽ. ¹⁶ La Wẽnd na kɩt tɩ Krista Koɛɛg kẽ yamb sũya sõmb-sõmbo. Wɩng-y n zãmsdẽ ne yam zulungã la y sagend taaba. Wẽnd yĩnga pʋd-y yɩɩle ne y sũur fãa n pʋʋs barka. Pʋd-y yɩɩl n balem Wẽnde, yɩɩla y sẽn zoe n yɩɩnnẽ bɩ y sẽn naand y toore. ¹⁷ Wẽnd na kɩt tɩ y sẽn na n gome, bɩ y sẽn na n maan fãa yɩ Soaala Zezi yʋʋr yĩnga tɩ yãmb bark pʋʋsga tũ bãmba n ta Wẽnnaam Ba. ¹⁸ Pagba, deeg-y y sɩdb rãmb noore tɩ rẽ n tog Soaala nengẽ! ¹⁹ Sɩdb rãmba nong-y y pagba la y ra maan zʋg ne b ye. ²⁰ Kamba, sak-y y ba rãmb noya, dẽ bal n be neer Soaala nifẽ. ²¹ Ba rãmba, da lak-y y kamb sɩɩg ye ka rẽ b wat n basa raoodo. ²² Yemse, sak-y neere yãmb zu-soaben-dãmba sẽn beb tẽng zugu, la ra yɩ zoe-nif sakre n na n noog ninsaal sũur ye, sak-y b ne pʋ-peelem, ne Zu-soaba rabeem bala. ²³ Y tʋʋmd sẽn ya a soab fãa, tʋm-y ne y sũuri n miẽ tɩ yaa Soaala yĩng la y tʋmda, pa ninsaal yĩng ye. ²⁴ Bãng-y tɩ Soaala na n dola yãmba tɩ y lebg b yõoda rɩtba. Yaa Krista d Soaala yĩng la y tʋmda. ²⁵ Sẽn maanda zãmb na paam a zãmb rolbo, tɩ Wẽnd ka mi bok-n-maneg ye.

¹ Zu-soaben-dãmba, da mong-y y yemse bũmb ning sẽn segd la sẽn tog ne b vɩɩm sõng ye: ad-y yãmb me tara Zu-soaba sẽn be arzãna. ² Da viig-y ne pʋʋsg ye, da vʋʋs-y ne bark pʋʋsg ye! ³ Bũmb zãnga, pʋʋs-y tõnd yĩnga. Pʋʋs-y tɩ Wẽnnaam kell n tuk pʋ-yalengo n kõ-do tɩ d moon b Koe-noogã n puk sẽn da solg Krista nengẽ. Yaa Krista yĩnga la mam zĩ marsã ne bãeense. ⁴ Kos-y b tɩ m tõog n gom b yelle wala m sẽn tog gome. ⁵ Bãng-y neb a taaba me tallg neere. Marsã zamaana zĩnd yõod y yĩnga. ⁶ Bɩ y noor da tol n pʋdg beed ye. Leok-y bũmb fãa a leokr sã n ta la leok-y wala sẽn toge. ⁷ Sã n ya mam kibare, a Tisik na togs-y: a yaa tõnd saam-bi-nongre, m sõangda la m tũud-n-ta-sõngo Soaala tʋʋmnẽ. ⁸ Dẽ n so tɩ m tʋm-a y nengẽ t’a wa kõ-y mam kibare la a keng y sũya. ⁹ Mam naaga ned a to n tʋme: a Onezim, yãmb nin-yende la tõnd me saam-bi-nongre; bãmb n na n wilg y bũmb ning sẽn maan ka. ¹⁰ A Aristark sẽn be roog ne maam, tɩ b pʋʋs-y faã; a Mark me, a Barnabe pʋɩgdenga, n pʋʋsde: yẽ poorẽ la d da togs yãmb woto: a sã n wa y nengẽ, bɩ y reeg-a neere. ¹¹ A Zezi, b sẽn boond a sob yɛs t’a Zustus, n pʋʋsde. Zʋɩf rãmb sʋka, yaa bãmb bal n tʋm Wẽnd Rĩunga tʋʋmde ne maam la b yolsa m sũuri. ¹² Yãmb tẽngen-bi-taag a Epafras n pʋʋsde; sɩda Krista a Zezi tʋʋm-tʋmd kãnga maooda ne pʋʋsgo n kotẽ tɩ y kell n yɩ neb sẽn kɩ yẽgna, nin-sõma sẽn sak Wẽnd sẽn dat fãa b yĩnga. ¹³ Sɩda, mam meng n kõt kaseto t’a namsda wʋsg yãmb yĩnga, n namsd Laodise la Yerapolis tẽns rãmb yĩnga. ¹⁴ Tõnd tɩpd-nongr a Luk ne a Demas, n pʋʋsd-y. ¹⁵ Pʋʋs-y d saam-biisa fãa sẽn be Laodise. Taas-y d pʋʋsgo a Nimfas la Tigenga kamb sẽn segd taab a zakẽ. ¹⁶ Y sã n karem seb kãnga n sɛ bɩ y tool-a Laodise tɩ bãmb me karem, la yãmb me reeg bãmb sebrã, y me karem. ¹⁷ Yeel-y woto a Arkip: «Maan gũusg ne tʋʋmd ninga Soaala sẽn kõ-f tɩ f tʋma la wɩng t’a yɩ neere.» ¹⁸ Wã yaa mam menga, maam a Pol nug pʋʋsem. Tẽeg-y tɩ yaa bãeens la m balg n zĩẽ. Wẽnd nimbãan-zoeerã sig y fãa!