TƲƲMA

TƲƲMA

¹ Teofil, mam pipi sebra pʋgẽ, m wilga Soaal a Zezi sẽn maan la b sẽn zãms, al b tʋʋmna sɩngrẽ, ² n ta raar ning b sẽn baas b koeesã ne b sẽn da yãk-b rãmb n maan b Tʋʋm-tʋmdba ne a Vʋʋsem Sõng vẽnegre, n yaool n dʋ arzãna. ³ Yaa bãmb la b lik naoor yaka, b kũuma poore, n kõ kaseto tɩ b ket n vɩɩme. Sɩda rasem pisnaas pʋgẽ b ra mii n lika b meng bãmba n zãmsd-b Arzãn Rĩunga yelle. ⁴ B sẽn waa n dɩt ne taab, daar a ye, b kõ-b la noore tɩ b ra zãag ne Zerizalɛɛm ye; b yaas be n gũ Ba sẽn da kãabe tɩ bãmb meng b toor deeg n togs ne b noore: ⁵ «A Zã sooba yɩɩ koom soobo, la sã n ya yãmba, yɩ bilfu, y na n soo ne a Vʋʋsem Sõngo.» ⁶ B ra tigma taaba la Tʋʋm-tʋmdba ra sokda a Zezi: «Soaala yaa marsã meng la y na n le vigl naama Israyɛl tẽng bɩ?» ⁷ Tɩ b leoke: «Ka pakr tɩ y bãng yaa sasa bʋgo la yaa wakat bʋgo la Ba yals rẽ ne b toorẽ daab ye. ⁸ Yaa pãng la y na n paame, a Vʋʋsem Sõng pãngã n na n sig yãmba. Y na yɩɩ m kaset dãmba Zerizalɛɛm, Zɩɩde, la Samari, n tãag dũni wã tɛka.» ⁹ La a Zezi sẽn gom woto b zẽka yĩngri, bãmb nifẽ la sawadg n waa n lill-ba. ¹⁰ Karen-biisa sẽn waa n yɛs woto n nak b nens n tees yĩngr t’a Zezi looda, neb a yiibu sẽn yer peelse, waa n yalsa b sɛɛgẽ. ¹¹ B yeel-b lame: «Galile neba, bõe tɩ y yɛs woto n get yĩngri? Zezi ninga sẽn looga woto n bas yãmbã, Zezi ninga y sẽn yãend tɩ kuiis yĩngrã, ad-y b na n lɛɛg n waa boto.» ¹² Tʋʋm-tʋmba siga Oliviye tãng n leb Zerizalɛɛm. Tẽnga ka zãr ye, pa loog kẽnd sẽn tõe n kẽn vʋʋsg daar ye. ¹³ Karen-biisa sẽn leb tẽnga pʋga, b rʋ-la b yĩngr doogã b sẽn nong n paad a soab pʋgẽ wã. Da yaa a Piyɛr, a Zã, a Zak, a Andre, a Filip, ne a Toma, a Bartelemi ne a Matiye, a Alfe biig, a Zak, n paas a Simo: M zabr bee ne buuda bɛɛba la a Zak biiga Zɩɩd. ¹⁴ B fãa ra nonga pʋʋsgã ne nonglem yɛnga, bãmb ne pagb kẽere, wala a Maryam, a Zezi ma la b saam-biisi. ¹⁵ Daar a ye tẽedba ra tigma taaba; b ra taa koabg la pisi t’a Piyɛr na n yik n yeel-ba: ¹⁶ «Bũmb n da gʋls Sebr sõng pʋgẽ n da ka tõe n ka pids ye. Yaa a Vʋʋsem Sõng sẽn da gom ne a Daviid noorã a Zɩɩda poorẽ, Zɩɩda ning sẽn lʋɩ a Zezi bɛɛba taoore tɩ b paam n yõk-ba. ¹⁷ A Zɩɩda ra yaa tõnd nin-yende. Yẽ me ra reega Tʋʋmda pʋɩɩr wala tõnd. ¹⁸ La a sẽn deeg a yel-beeda yaoodo, yaa pʋʋg la a ra yã. A sẽn yi yĩngr n lʋɩ, t’a zug reng tẽnga, a yĩnga kao-la a sʋka, t’a yãad yʋlem tomẽ. ¹⁹ Zerizalɛɛm dãmb fãa bãnga yellã la rẽ me la b pʋd pʋʋgã: Akeldama, dat n yeelame tɩ zɩɩm pʋʋgo. ²⁰ La ad sẽn gʋls Yɩɩla sebr pʋgẽ: ‹Bɩ a zak lebg vɩʋʋgo, bɩ ned da le saag n kẽ a pʋgẽ ye.› La zĩiga to me gʋlsame: ‹Bɩ ned a to reeg a zĩiga.› ²¹ Dẽ wã togame tɩ neb niyns sẽn pʋg-b tõndo, Soaala sẽn waa n be ne-dã, ²² al a Zã soob wakato, n ta raar ning b sẽn yi d sʋka, togame tɩ bãmb dãmba nin-yend wa paas tõnd n yɩ b vʋʋgra kaset kõata.» ²³ Neb a yiib la b tall n wa: a Zozɛf, b sẽn pʋd a soab tɩ Barsabas la a Matiyas, ²⁴ tɩ b na n pʋʋs woto: «Soaala, yãmb sẽn mi ninsaal fãa sũurã, wilg-y tõndo, neb a yiiba sʋka, yãmb sẽn dat tɩ ned ninga ²⁵ reeg Koe-nooga tʋʋmde n tʋm, a Zɩɩda zĩigẽ, zĩig ning a sẽn bas n kẽng a sẽn miẽ wã.» ²⁶ Zu-noog la zu-beed bũmb la b rigl tɩ b yake, la zu-nooga lʋɩ-la a Matiyas, la yẽ la b reeg Tʋʋm-tʋmdba sʋka.

¹ Pentekot raar sẽn ta, dat yeelame tɩ paka loogre, a rasem pisnu poore, b fãa ra tigma zĩ yɛnga. ² La vugr bala bʋʋr wa sob raoog sẽn fõt bʋʋre n yi yĩngri n wa. B sẽn da be roog ninga wulumda ne bʋʋrã. ³ B yãee wa zɛlma sẽn wit bugum, sẽn waa n sig ned kam fãa zugu. ⁴ B fãa pida ne a Vʋʋsem Sõngo n sɩng n gomd bu-zẽn goama wala a Vʋʋsem Sõng sẽn da yet tɩ gome. ⁵ Zerizalɛɛm yaool n da pida ne neb sẽn nong Wẽnd waoogre. B ra yita saaga tẽngr ween-vɩɩs a naasã. ⁶ Bʋʋra sẽn maan yĩnga, zãma wã wudg n fãooga taaba. Ned kam fãa yaool n da wʋmdame tɩ b sẽn gomdã ya a meng buuda goama. ⁷ B Pɛleng yɩkame tɩ b ra sogsd taaba: «Sẽn gomd-ba fãa ka Galile neb laa? ⁸ Maana a wãn marsã la tõnd ned kam fãa sẽn wʋmd a buuda goama? ⁹ Ad Part la Mɛd dãmba, ad Elamit, Mezopotami, Zɩɩde la Kapados rãmba, Põ la Azi rãmba, ¹⁰ Frizi la Pãnfili la Libi kɩreng a ye sẽn tot ne Sirɛn, noakens sẽn yit Rom, ¹¹ Zʋɩf rãmba ne b kẽed-paalse, Krɛt la Arabi rãmba. D sẽn yit zĩig ning fãa, d wʋmdame tɩ b pẽgd Wẽnnaam tʋʋm-bãna ne d buuda goama!» ¹² B pɛleng yɩkame, tɩ b yɛs ne yɩɩre n sogsd taaba: «Wã rat n yeelame tɩ bõe?» ¹³ Kẽer me ra laad-b lame n yetẽ: «Yaa rã toos n tar ba.» ¹⁴ A Piyɛr yik n yalsa yĩngri, yẽ ne Piig la a ye wã, la a zẽka a koɛɛg n yeele: «Zɩɩde rãmba la yãmb fãa sẽn kẽed Zerizalɛɛm, kelg-y m goama la y wʋm neere. ¹⁵ Ad-y ka rãam n tar nin-bãmba, wala yãmb sẽn tẽeda ye tɩ nan yaa yibeoogo, tɩ sõora nan ka paam n zẽk ye. ¹⁶ Yaa bãngda sẽn yeelã n taase: ¹⁷ ‹Bũmb n na n zĩnd yaoolem daarã – Soaala n gomde – m na n sika m Vʋʋsem Adem biis fãa zutu. Y kom-dibli la y kom-pugli na n yiisa bãngr goama. Y kom-bɩɩba na n yãee bõn-bãna tɩ y nin-kẽems zãms-zams bãna. ¹⁸ M na sika m Vʋʋsma m neba zutu, rap wala pagba. ¹⁹ M na n yiisa bõn-bãn yĩngri, saag zugu la wẽnd makr dãmb tẽng zugu, saaga tẽngre ²⁰ Wĩntoog na n lebga yʋngo, tɩ kiuug moog wa zɩɩm tɩ Soaala raarã, b ra-kãsenga yaool n wa. ²¹ La ned ninga fãa sẽn na n kẽ bãmb na n paama fãagre.› ²² Israyɛl kamba, kelg-y woto: Ad-y yaa Nazarɛt Zezi wã la Wẽnd kõ kaset tɩ bãmb be-la b poorẽ, ne wẽnd makr dãmba la bõn-bãna b sẽn maan y nifẽ tɩ y fãa miẽ. ²³ Ad-y yaa bãmb la yãmb zãmb yã. Rẽ yaool n ka ling Wẽnd yam zulunga ye, tɩ b ra nee rẽ al zamaan woko. Nazarɛt Zezi wã la yãmb yõk n kɩs nin-wẽnse tɩ b ka-b pik zugu n kʋ. ²⁴ La Wẽnd vʋʋg-b lame, la b tɩlga Kɩɩmkulg yɛɛsgo. Kɩɩmkulg pʋs n da miime t’a ka tõe n paalg-a a soolmẽ ye; ²⁵ tɩ bãngda Daviid da zoe n goma woto: ‹M da nee Soaala sẽn n kẽnd m taoor wakat fãa; b yegda m dɩtgo tɩ m da latem ye; ²⁶ dẽ me la m noog m sũuri tɩ laad wa n noorẽ tɩ m yĩnga tõr gãe ne saagre, ²⁷ saagr tɩ y kõn bas m sɩɩga t’a pa ne kɩɩms ye, la y kõn bas y nin-sõnga t’a bãng yaoogẽ põogr ye. ²⁸ Y wilg-m la vɩɩm sore la m sã n be ne yãmba m kɩdemda sũ-noogo.› ²⁹ M saam-biisi, ad-y d tõe n togs-y la vẽenega, d yaab a Daviid kiime, tɩ b solg-a yaoogẽ, t’a yaooga ket n be ne rũnna. ³⁰ A Daviid sẽn da ya bãngda, n mi tɩ Wẽnd meng n da kãab-a ne wẽenego, t’a yageng a ye n na n dʋ a naama zaoore, ³¹ a beool n bãnga Krista vʋʋgre, tɩ sɩda Krista ka pa Kɩɩmkulgu, la b yĩnga ka bãng yaoog põogr ye. ³² Zezi kãnga, Wẽnd sɩd vʋʋg-b lame, la d fãa gill tara rẽ kaseto. ³³ Marsã yaa Wẽnnaam Ba rɩtg la b zĩ ne pẽgre. La Ba kõ-b la a Vʋʋsem Sõngo, b sẽn da kãabe. Dẽ me la y nif la y tʋbr tar kaset dũnna. ³⁴ Sã n ya a Daviid, yẽ pa rʋ arzãn ye. Ãnd yell marsã la a gomda: ‹Zu-soaba yeela m Soaalã: zĩnd m dɩtgo ³⁵ n gũ raar ning m sẽn na n gãneg f bɛɛbã, tɩ f teeg-b n zĩẽ.› ³⁶ Bɩ Israyɛl rooga tõr bãng vẽenega, tɩ Zezi ninga Wẽnd sẽn kɩt t’a lebg Soaala la Krista, yaa yãmb sẽn ka a soab pikã.» ³⁷ Yɩɩ wa bũmb n kõs sẽn kelg-ba sũuri, tɩ b yeel a Piyɛr ne Tʋʋm-tʋmdbã: «Yaa bõe la d tog n maane, d saam-biisi?» ³⁸ A Piyɛr leok-b lame: «Tuub-y y manesma la ned kam fãa reeg soob a Zezi yʋʋr yĩnga, n paam a yel-wẽna sugri, la rẽ poore y na paam a Vʋʋsem Sõngo. ³⁹ Yaa yãmb yĩng la kãabga kãabyã, yãmb ne y kamba n paas bu-zẽmbã, wala Soaala sẽn dat n bool-b tɛka.» ⁴⁰ Ne goam buud ka tɛka, a Piyɛr da kõta kaseto la a sagend woto: «Fãag-y y meng ne zamaan yookã.» ⁴¹ Neba me kelga a goama n sak n deeg soobo. A Piyɛr sẽn paam tẽedba baraare, taa tus a tãabo. ⁴² B ra ka viigd ne Tʋʋm-tʋmdba kareng kelgr ye, ne taab sõngre, ne b paoonga lagengo, ne Bura pʋɩɩbo, la ne pʋʋsg ye. ⁴³ Neba fãa ra zĩi ne rabeem tɩ yaa bõn-bãna la wẽnd makr dãmb ka tɛka la Tʋʋm-tʋmdba ra maanda. ⁴⁴ Tẽedba da rɩkda b sẽn tar fãa n fãoogd taaba. ⁴⁵ B ra koosda b pʋto la b teed a taaba n pʋɩt ligdã. Ned kam fãa ra paamda wala a zu-loɛɛga yolsg sẽn dat tɛka. ⁴⁶ Beoog sẽn vẽeg fãa b ra kẽnda wẽnd doogẽ. B zagsẽ wã la b da rɩt lagem taab rɩɩbã la ra yaa sũ-noog ne sũ-noogo tɩ zoenif ka n gɩdgd sɩd pukri ye. ⁴⁷ B ra tara Wẽnd pẽgre la neba taaba me ra waoogd-b lame. Beoog sẽn vẽeg fãa, Wẽnd sẽn fãag b rãmba da wat n paasda Tiginga sõore.

¹ A Piyɛr ne a Zã waa n dabda wẽnd doogẽ zafar pʋʋsg yĩnga. ² Mik põor la b mii n tar n wat n gãnegd beoog sẽn vẽeg fãa wẽnd dooga noorẽ, noor ning sẽn boond tɩ No-neerã. Woto a tõe n bõsa sẽn kẽed-b wẽnd doogã. ³ A Piyɛr ne a Zã sẽn ta n na n kẽ la põora sẽn sɩng-b bõsgo. ⁴ T’a Piyɛr ne a Zã na n ges-a n yeele: «Ges tõndo.» ⁵ A sɩd nooda a nin n get-b la a tẽed bũmbu. ⁶ A Piyɛr yeel-a lame: «Ad-m ka tar wanzurf la sãnem ye, la m na n kõ-f-la m sẽn tare: a Zezi Krista, Nazarɛt daoã yʋʋr yĩnga, m kõt-f la noore tɩ f yik n kẽne.» ⁷ A sẽn gãd-a ne a rɩtgo, a zẽk-a lame. Koamsa karga ne a nao-sũkã soga taaba. ⁸ Vugr bala a yalsa yĩngri n sɩng kẽnde, n tol n tũ n kẽ wẽnd doogẽ. A Kẽndame la a mii n yɩk n tiimde la a pẽgd Wẽnnaam. ⁹ Neba fãa yãenda a sẽn kẽnd la a pẽgd Wẽnde. ¹⁰ Neba fãa bãngame tɩ yaa yẽ n da bõsd wẽnd dooga No-neerẽ wã. Yella yɛɛs-b lame n kẽes-b rabeem kãsenga. ¹¹ Sẽn paam-a laafi wã ra pa le sergd n basa Piyɛr la a Zã ye. Neba kaoogame n waa ne pɛlen-yɩka, a Salomon zãongẽ wã. ¹² A Piyɛr sẽn yãend-ba, a kõ-b la koɛɛga: «Israyɛl kamba, bõe tɩ y ka na n gãneg y yam. Bõe tɩ y tar-d gesgo wa yaa ne d meng pãnga, wa yaa ne d pʋʋsga pãnga la d tõog tɩ raoã kẽnd yĩngri? ¹³ Yaa Abraam, a Izaak la a Zakoob Wẽnnaam n pẽg b Biig a Zezi, rao ning y sẽn yõk n kɩsã. Yãmb yeelame tɩ y ka mi-a, a Pilat taoore. A Pilat yaool n da rat n bas-a lame. ¹⁴ Yɩɩ yãmb n dõd Nin-sõngo, ned sẽn ka tara a toorẽ yelle. Yãmb n kos tɩ b bas a Barabas, nin-kʋʋdã, n pa kʋ ye. ¹⁵ N yaool n yet tɩ b kʋ Vɩɩma Naaba. Bãmb la Wẽnd vʋʋg kɩɩms sʋka la d tara rẽ kaseto. ¹⁶ Ad-y yaa bãmb yʋʋra tẽebo, yaa bãmb yʋʋra pãng yĩnga la koams ning y sẽn ne la y sẽn mi wã, le paam pãnga n yɛs y taoor ne laafi. ¹⁷ La m miime, m saam-biisi, tɩ y sẽn maan woto wã, yãmb wala y buuda kãsem-dãmba, yɩɩ yĩdgu. ¹⁸ Sã n ya Wẽnde, bãmb yẽ ra beool n wilga ne bãngdba fãa gill noore tɩ b Nin-sõnga na n namsame. La sẽn da gom n dɩgla la b pids yã. ¹⁹ Dɩlla maan-y tuubgu, teem-y zʋgo, n paam y yel-wẽna yẽesgo. ²⁰ Sã n ya woto Soaala na n waa ne pems maasg y yĩnga b sã n wa tʋm a Zezi, Fãagd ning b sẽn da kãab yãmb al daar woko. ²¹ Nananda a Zezi Krista tog n paa arzãn n gũud wakatã wakat ninga bũmb fãa sẽn na n leb a zĩigẽ tɩ bãngdb sõma gomd a yell al daar zãrã. ²² A Moyiiz n deng n yeele woto: Yãmb saam-biisa sʋka Soaala Wẽnnaam na n yiisa bãngd a ye sẽn wẽnd maam. A sẽn na n togs-y bũmb ning fãa y na kelge. ²³ Ned ninga fãa sẽn na n zãgs a kelgre bɩ b yiis-a buudẽ. ²⁴ A Moyiiz poore yɩɩ a Samwɛl, la sẽn pʋg-b yẽnna, n gom dasem niyns d sen vɩ dũnna wã yelle. ²⁵ Ya yãmb la bãngdba kamba la zooda kamba, zood ning Wẽnd sẽn yõg ne d yaabrãmbã b sẽn waa n yeel a Abraam: Fo yagensa maasmẽ la Ãdem biig fãa na n paam m barka. ²⁶ Pipi yaa yãmb yĩng la Wẽnd tũus yã la b vʋʋg b Sõgna t’a wa sik bark yãmb ned kam fãa zugu a sã n mik tɩ ned kam fãa zãaga ne a wẽnema.»

¹ B ra ket n gomda ne zãma wã la ade, Maan-kʋʋdba, wẽnd do-gũuba kãsma la Saduseẽ rãmba poogame. ² B sũur pa yɩ noogo b sẽn da karemd nebã n gomd a Zezi yelle, n gomd b sẽn vʋʋg kɩɩms sʋkã yelle. ³ B yõk-b lame n sui roogo n gũud vẽkembeoogo. Zĩiga ra zoe n sobgame. ⁴ Sẽn sak-b tẽeba me yɩɩ wʋsg baraare, neb na ta tus a nu, rapa bala. ⁵ Vẽkembeoogo buuda kãsem-dãmba, nin-kẽemsã, karen-saam-dãmba sẽn be-b Zerizalɛɛma, fãa tigma taaba. ⁶ Ad-a An, maan-kʋʋd kãsenga, a Kaif, a Zã ne a Aleksãndr, la maan-kʋʋdba kãsem-dãmba neba. ⁷ B boola Tʋʋm-tʋmdba bʋʋdo n sɩng b sokre: «Yãmba, yãmb paama sor yɛ la ãnd n tʋm yãmba?» ⁸ T’a Piyɛr sẽn pid ne Vʋʋsem Sõng na n yeele: «Buuda nanamse la nin-kẽemse, ⁹ yaa yel-sõmd la d maan ne koamsã la rũnna, yãmb bool-d la bʋʋdo, tɩ d wa togs d sẽn maan bũmb ning t’a paam laafi. ¹⁰ Bɩ yãmb fãa la Israyɛl tõra bãnge: Yaa Nazarɛt Zezi wã yʋʋr yĩnga. Yaa yãmb sẽn ka a soab pika tɩ Wẽnd vʋʋg kɩɩms sʋkã. Yaa yẽ la yẽ a ye tãa yʋʋr yĩnga la koams kãnga paam laafi n yɛs y taoore. ¹¹ Yaa yẽnda la kugr ninga yãmb tãn-metba sẽn bas kɛɛngã, la yẽ n lebg rooga kug ma. ¹² Saaga tẽngr ka, d pa tar yʋʋr a to sẽn tõe n fãag-d ye.» ¹³ B sẽn yãend t’a Piyɛr ne a Zã gomda wa neb sẽn minim goama, n yaool n ka karem n siki, n yaool n pa vẽen ne rog-n-mika zãngã, bʋʋda rãmb pɛleng yɩkame. B sɩd deegame tɩ b ra tũuda a Zezi. ¹⁴ B ra naag n nee sẽn paam-a laafi wã t’a yɛs b sɛɛgẽ, woto b ra ka tar sẽn na paas ye. ¹⁵ B kɩtame tɩ Tʋʋm-tʋmdba zãag ne bʋʋdbã, tɩ b paam n yẽs ne taaba. ¹⁶ B ra yetame: «Bõe la d na n maan nin-bãmba? Yaa vẽeneg ne Zerizalɛɛm tõre tɩ b maana wẽnd makre la d ka tõe n ka reeg ye. ¹⁷ D sẽn pa rat tɩ yella le yelg n paas zãma wã sʋka, d na n mooga d nin n gɩdg-ba tɩ b ra le pʋd ned ba a ye taoore, a Zezi yʋʋra ye.» ¹⁸ B boola Tʋʋm-tʋmdba tɩ b lɛɛg n wa, la b yeel-b lame tɩ b ra le gome, tɩ b ra le zãms ba fɩ a Zezi yʋʋr yĩng ye. ¹⁹ Dẽ me la a Piyɛr la a Zã leok-ba: «Yãmb n na n ges la y togs do sã n ya sõmbo Wẽnnaam nifẽ tɩ d deeg yãmb noore n yaool n tõdg bãmb dẽnna? ²⁰ Sã n ya tõndo, tõnd yẽ ka tõe n ka moon d sẽn yãend la d sẽn wʋm ye.» ²¹ Bʋʋda rãmb kong n le mooga b nin ne-ba, la b bas-b lame tɩ b ra ka mi sɩbgr ning b sẽn na n sɩbg-b ye. B ra zoeta rabeem tɩ zãma wã ra pẽgda Wẽnd, bãada sãoogr yĩnga. ²² Bãada sẽn sãoogã yʋʋm da pida pisnaas n dogl. ²³ B sẽn pam b mense a Piyɛr ne a Zã leba b tũud-n-taasa nengẽ la b togs-b la maan-kʋʋdba la nin-kẽemsa sẽn gɩdg-b bũmb ninga. ²⁴ B fãa sẽn wʋm dẽ, b naaga taab vugr bala n yeele: «Yãmb n naan yĩngr la tẽnga la mogr ne a pʋgẽ teedo, Soaala. ²⁵ Yaa yãmb n yeel ne a Vʋʋsem Sõng vẽnegre la ne a Daviid noore, yãmb sõgne la tõnd yaaba: ‹Bõe tɩ bu-zẽmba wukd ne tɩtaam bõe tɩ b zĩi n geend b geel yaalse? ²⁶ Dũni wã dĩm dãmba sũu taaba, tɩ b kombɛɛmba tigim taaba n na n tak zabre ne b Soaala, ne Wẽnd sẽn tʋm a soabã?› ²⁷ B sɩd tigma taab tẽn kãnga pʋgẽ n na n zab ne y Sõgna a Zezi, yãmb sẽn tʋm a soabã. Ada Erod, a Põs Pilat, ad bu-zẽmba ne a Israyɛl, ²⁸ b sũu taaba n na n pids yãmb pãnga la y yam pidunga sẽn da sede al zamaan woko. ²⁹ Sẽn lebg woto marsã, Soaala, tɩ b rat tõnd ne wẽngã, la sẽn na n yɩlẽ tɩ y yemsa paam daoodo n moon y Koe-noogã, ³⁰ bɩ y wilg y pãnga, y Sõgna Zezi yʋʋr yĩnga, ne bãad-dãmb sãoogre, ne wẽnd makr dãmba la bõn-bãna.» ³¹ B pʋʋsga wakato, b sẽn da be roog ninga miimame. Fãa gill pida ne a Vʋʋsem Sõngo tɩ b tar Wẽnd Koe-nooga moonego ne sũ-keelem. ³² Ne b sõora sẽn da lebg zembalã, tẽedba ra yaa yam a ye la sũur a ye. Ned da ka tar bũmb n yet tɩ yaa rẽnd ye. Bũmb fãa ra yaa b fãa soolem. ³³ Yaa ne tʋʋm bãna la Tʋʋm-tʋmdba ra kõt a Zezi vʋʋgra kaseto. Neba sũur da nooma ne-ba. ³⁴ Bũmb da ka paoogd ned ba a ye. Sẽn da tar-b pʋto la teed a taaba da koosd-b lame n wat ne ligdã ³⁵ n dɩgend Tʋʋm-tʋmdba taoore. Dẽn marsã la b ra tõe n kõ ned kam fãa wala a zu-loɛɛga yolsg sẽn dat tɛka. ³⁶ Sɩnga ne a Zozɛf; yẽnda la b sẽn pʋd t’a Barnabe, a mi sagl n gãneg sũuri; a yaa Levi buud neda la a ra yita Sɩpr tẽnga. ³⁷ A ra tara pʋʋgo, a koos-a lame n tall ligdã n wa kɩs Tʋʋm-tʋmdbã.

¹ A Anani me ne a pag, a Safir, waa n koosa b pʋʋgo. ² A Anani seda ne a paga n yãk ligdã n yaool n tall sẽn keesã n wa kɩs Tʋʋm-tʋmdbã. ³ Dẽ la a Piyɛr yeel-a: «Anani, bõe yĩng la f sak tɩ Sʋtãan kẽ f sũurẽ tɩ f wedg pʋʋga ligdi n na n tudg Wẽnd Vʋʋsem? ⁴ F Pʋʋga sẽn da waa n ket f soolmẽ, da yaa pakr tɩ f koos-a bɩ? La f sẽn koos-a wã, ka foo n so a ligdã n tõe n maan f sẽn dat ne-a bɩ? Maana a wãna tɩ soos n kell n yet tɩ kɩsa zãnga waa f yamẽ? Ad ka ninsaalb la f yag zirẽ ye, yaa Wẽnd menga.» ⁵ A Anani sẽn wʋm gomdã, a lʋɩɩme n kell n ki. Rabeem kãseng me yõka sẽn wʋm-b kibarã. ⁶ Kom-bɩɩb n wa n pil-a fuugu n dɩk-a n tɩ mum. ⁷ Wakat a tãabo sẽn looge, a paga sẽn da ka mi tɩ yell n maana me waame, la a sẽn kẽ, ⁸ a Piyɛr yeel-a lame: «Yɩɩ woto tɛk la y sẽn koos y pʋʋga bɩ?» Tɩ yẽ leoke: «N-ye! Yɩɩ boto.» ⁹ T’a Piyɛr na n yeel-a: «Yãmb yɩɩ wãn n sed ne taaba, n na n belg a Vʋʋsem Sõngo? Ade, sẽn yɛs-b rignoorẽ wã yaa sẽn tɩ mum-f sɩdã, la fo me la b waa n na n dɩke.» ¹⁰ Nif kamsg pʋgẽ, a Anani lʋɩ-la a Piyɛr taoore n be kũum. Kom-bɩɩba sẽn kẽ wã mikame t’a kiime tɩ b tall-a n loog n tɩ mum-a n yegl a sɩda. ¹¹ Rabeem kãseng yõka Tigingã zãnga la sẽn wʋm-b kibara fãa. ¹² Zãma wã sʋka, yaa bõn-bãna la wẽnd makr dãmb ka tɛka la Tʋʋm-tʋmdba ra maanda. ¹³ B ra zemsa taab n paad a Salomo zãongẽ wã. Ned ba a ye ra ka saagd n yi kɛɛnga n wa lagem ne-b ye. Zãma wã da tara b pẽgr bala. ¹⁴ Tẽedba sõor da tara paasgo, pagb la rapa, ¹⁵ al tɩ b ra wat n dɩgend bãad-dãmba ne b gãas, gãas paal wala kʋda, soya zutu, tɩ ba na yɩ nin-yend, bɩ a Piyɛr maasma bui-a a sã n wa looda. ¹⁶ Zãma wã ra yita Zerizalɛɛm tẽn-toosa meng n wat ne b bãad-dãmba la Sʋtãan yood sẽn kẽ b rãmba la b fãa ra paamda laafi. ¹⁷ Sega maan-kʋʋd kãsenga waoongo, yẽ ne a poorẽ dãmba la Saduseẽ rãmba. Fãa sũur da pida ne beem bala, ¹⁸ tɩ b na n yõg Tʋʋm-tʋmdba n sui bi-bees roogẽ. ¹⁹ La Soaala malɛk waa yʋngo n pags bi-beesa roog kʋɩlemse tɩ b yi t’a yeel-ba: ²⁰ «Dig-y wẽnd doogẽ wã n tɩ wilg zãma wã bũmb ning fãa sẽn get fãagra yelle.» ²¹ Tʋʋm-tʋmdba reega malɛka noore la b tõda beoog n kẽ wẽnd doogẽ wã, n sɩng zãmsgo. Maan-kʋʋd kãsenga waa ne a poorẽ dãmba, n bool bʋ-kaoodba bʋʋda zĩigẽ, ne Israyɛl buuda nin-kẽemse la b yeelame tɩ b tɩ yiis Tʋʋm-tʋmdba bi-beesa roogo n tall n wa. ²² Sẽn kẽng-ba n na tɩ yiis-b bi-beesa roogã ka tɩ yãend-b ye tɩ b lɛɛg n wa yeele: ²³ «D tɩ mikame tɩ bi-beesa roog kʋɩlens paga neere, d yãenda gũud fãa a zĩigẽ. La d sẽn pake d pa yãend b sẽn yõk b rãmba pugẽ ye; ned ba a ye.» ²⁴ B sẽn wʋm woto, gũudba naaba la maan-kʋʋd kãsenga yɛɛsame la b fãa ra baooda yella võore. ²⁵ Wakat kãng la ned waa n yeel-ba: «Yãmb sẽn da kẽes b rãmb roogã, ad-y b bee wẽnd doogẽ n karemd nebã.» ²⁶ Tɩ gũudba kãsma ne a neba na n leb wẽnd doogẽ wã, n tɩ wa ne-ba. B ka maan b pãng ye; b ra zoeta zãma wã, b ra zoeta b na n wa lab-b ne kuga. ²⁷ B sẽn wa, b kẽes-b la bʋ-kaoodb bɛda bʋʋdo tɩ Maan-kʋʋd kãsenga na n sok-ba: ²⁸ «Tõnd da ka yeel yãmb tɩ y ra saag n pʋd Neda yʋʋr laa. Yaool n yaa zãms kãng la y yelg n pid Zerizalɛɛm tõre! Yãmb datame tɩ d dɩ a zɩɩma taal bɩ bõe?» ²⁹ Ta Piyɛr na n leoke ne a taabã: «Yaa Wẽnd noora la d tog n sake n yɩɩd ninsaal dẽnna. ³⁰ D yaab rãmba Wẽnnaam n vʋʋg Zesi ninga y sẽn da ka pik n kʋ wã. ³¹ Zezi kãng la b zĩndg b rɩtgo n kɩt t’a lebg Dĩm la Fãagda, sẽn na n yɩlẽ t’a Israyɛl paam, bãmb maasmẽ, a yel-wẽna tuubgu la b sugri. ³² Tõnd tara yell kãens fãa kaseto, tõnd ne a Vʋʋsem Sõngo, b sẽn kõt sẽn kẽed-b bãmbã.» ³³ B ra kelgda a Piyɛr goama tɩ b sũur fõta, tɩ b kaool b kũum. ³⁴ Dẽ la Farizẽ a ye sẽn boond tɩ Gamaliyɛl yik bʋʋda zĩigẽ. Da yaa Noora karen-saamba, neba fãa sẽn da waoogde. A kosame tɩ b zãag ne Tʋʋm-tʋmdba bilfu, ³⁵ la a yeela bʋ-kaoodbã: «Israyɛl buudu, gũus-y y sẽn dat n maan bũmb ning ne nin-bãmba wã. ³⁶ Bãng-y tɩ raar sẽn vẽsg bilfu a Tewudas yikame n yet tɩ yẽ yaa raoa, tɩ neb na ta kobs-naas yik n pʋg-a. B kʋ-a lame t’a poorẽ dãmba sẽege, la bũmb ka kell ye. ³⁷ Yẽ poore, sõadga wakato, yaa Galile rao a Zɩɩda, n paam tɩ neb sũ a poorẽ. Yẽ me kiime tɩ sẽn da pʋgd-b yẽnda wã sẽege. ³⁸ Dũnna wã, m yet-y lame, bas-y nin-bãmba, da lʋɩɩs-y y toog ye. B goama wala b tʋʋma sã n yit ninsaal nengẽ, b na n menema b toore. ³⁹ La sã n sɩd yaa Wẽnd nengẽ la b yita, y kõn tõog n sãam fɩ. Woto wã da saag-y n wa lebg Wẽnd bɛɛb ye.» Fãa reega a saglgo. ⁴⁰ B le talla Tʋʋm-tʋmdbã n wa sʋka. B pãb-b la ne kaase, n yeel tɩ b ra saag n pʋd a Zezi yʋʋr ye la b bas-b lame. ⁴¹ B yii bʋʋda zĩigẽ la b ra kɩdemda sũ-noogo b sẽn paam paoogre a Zezi Yʋʋr yĩnga. ⁴² Beoog sẽn vẽeg fãa, wẽnd doogẽ wã bɩ b zagsẽ, b ra ka vʋʋsd ne a Zezi Krista Koe-nooga mooneg ye.

¹ Tẽedba sõor sẽn da tar paasg yĩnga, wakat n zĩndi tɩ sẽn gomd-b grɛka guglem ne Ebre rãmbã. B ra yetame tɩ beoog-beoog pʋɩɩra wakato, b wẽgda bãmb pʋg-kõapa. ² Dẽ me la Tʋʋm-tʋmdba tigim karen-biisa zãnga n yeel-ba: «Ka segd tɩ tõnd bas Koe-nooga moonego n ges rɩɩba pʋɩɩr ye. ³ Ges-y yãmb sʋka n yãk neb a yopoe sẽn tar yʋ-noogo, tɩ Wẽnd me pids-b ne a Vʋʋsem Sõng vẽenem, tɩ d kõ-b tʋʋmd kãnga.» ⁴ Sã n ya tõndo, tõnd tʋʋmd na n yii pʋʋsgo la Koe-nooga moonego. ⁵ Koɛɛga taa neba fãa yam tɩ b na n yãk a Etiyɛn ned sẽn pid ne tẽeb la ne Wẽnd Vʋʋsem, n paas a Filip, a Prokor, a Nikanor, a Timon, a Parmenas la a Nikola, Zʋɩf kẽed paalg sẽn yit Antiyos ⁶ B tall-b lame n wa Tʋʋm-tʋmdba taoore tɩ bãmb pʋʋse la b tẽeg b nus b zutu. ⁷ Wẽnd Gomda ra paamda moonego. Karen-biisa sõor da paasda wʋsg Zerizalɛɛm la maan-kʋʋdba wʋsg mens da sak n lebga tẽedba. ⁸ A Etiyɛn sẽn da pid ne sõmblem la pãnga, ra bee b sʋk n maand wẽnd makr dãmba la bõn-bãna. ⁹ La neb n waa n yiki n na n wẽ no-koɛɛm ne a Etiyɛn. Yaa pʋʋsg roog a ye rãmba sẽn yɩ yem-daad Rom la sẽn paam b mens n lɛɛg n wa. Le paasa Sirɛn neba, ne Aleksãndri, Silisi la Azi rãmba. ¹⁰ B ra pa tõe n lub a Etiyɛn ye. A tara yam vẽenem sẽn pa paoode la a Vʋʋsem Sõng da gomda ne a noore. ¹¹ B kong n bao ligd n kõ neb tɩ b wa yeele: «D wʋmame t’a gomd n tʋʋsd a Moyiiz la a tʋʋsd Wẽnde.» ¹² B rãmba Zãma wã, nin-kẽemsã la Noora karen-saam-dãmbã. B soos n yõk-a lame n wa bʋʋda zĩigẽ. ¹³ Be me b waa ne kaset ziri dãmba sẽn yeele: «Nin-kãnga ka vʋʋsd ne wẽnd dooga la Noora sãbsg ye. ¹⁴ D wʋma a noorẽ tɩ Nazarɛt Zezi wã na n wãa wẽnd do-kãnga la a teem a Moyiiz rog-n-mikã.» ¹⁵ Sẽn da be-b bʋʋda zĩigẽ fãa da geta a Etiyɛn laa ra wẽnda malɛka.

¹ Maan-kʋʋd kãsenga sokame: «Sẽn togsa yaa boto bɩ?» ² T’a Etiyɛn leoke: «M ba rãmba, m saam-biisi, Wẽnd ninga sẽn tog ne pẽgrã lika d yaaba a Abraam, a sẽn da waa n ket Mezopotami. A ra nan ka ti a zak Arã tẽng ye. ³ La ad-b sẽn yeel-a: Bas f ba-yiri la f buuda neba la kẽng tẽng ning m sẽn na n wilg-fu. ⁴ A Abraam yii Kalde tẽnga n wa kẽ Arã. Yaa a ba wã kũum poore la Wẽnd yiis-a be n tɩ kẽes-a y sẽn be tẽng ninga marsã wã. ⁵ A pa reeg vẽenem tẽn-kãnga, ba sẽn zems nao-pʋg yalem. A paama Wẽnd kãabgo bala, tɩ yẽ n na n soog tẽngã, la yẽnda yagense, yẽnda loogr poore; la rẽ t’a rag n nan ka rog biig ye. ⁶ Yaa woto la Wẽnd gom yã: ‹A buuda na n paa tẽn-zẽngẽ, b na n kẽes-a-la yembdo la yʋʋm kobs naas tõre, a na n yãee toogo. ⁷ La Buud ninga sẽn na n kẽes-b yembdã, maam n na n kao a bʋʋdo, maam, Naaba-Wẽnde. Dẽn poore, m na n yiis-b la be n wa kẽes ka la ka la m na n waoog-ma.› ⁸ B waa n yõg zoodo. La zood kãng kaset la bãong kẽesgo. Yɩɩ woto la a Abraam kẽes a biig a Izaak bãongo, a rog tɩ rasem a nii. A Izaak me maana boto ne a Zakoob, t’a Zakoob maan boto ne a kamb piig la a yiibã. ⁹ Yaab rãmba maana sũ-kiir ne a Zozɛf n koos-a, tɩ b tall-a n loog Ezipt tẽnga. La Wẽnd da pʋgda a poore. ¹⁰ Beelẽ b yiis-a la a zu-loees fãa pʋgẽ n kõ-a bark la yam pidungu, Ezipt naaba zakẽ. Ezipt naaba kõ-a la kãsengo Ezipt tẽnga la a meng zakẽ. ¹¹ Kom kãsenga la fare n yaool n wa lʋɩ Ezipt la Kanaã. Rɩɩb ra ka bee n dɩtẽ ye. ¹² Yaab rãmb sẽn wʋm tɩ bũmb ket n tõe n paama Ezipt, a Zakoob tʋm-b-la be: dẽ yɩɩ pipi kẽnde. ¹³ B kẽnd a yiib soabã la a Zozɛf lik a menga a kẽem-dãmba la rẽ me la Ezipt naaba bãng a sẽn yitẽ. ¹⁴ A Zozɛf tʋmame tɩ b tɩ wa ne a ba, a Zakoob, la a ba wã zaka rãmba; b zãng ra yaa pisopoe la a nu. ¹⁵ A Zakoob tʋga Ezipt, n tol n tɩ pa be, yẽnda ne d yaab rãmbã. ¹⁶ B yĩnsã la b tall n wa Sikɛm, yaoog ning a Abraam sẽn daa a Emmor kamba nengẽ; a Emmor la a Sikɛm ba. ¹⁷ Wẽnd sẽn da wẽen ne b meng n kãab a Abraam bũmb ninga pidsg ra kolgdame. Buuda waa n fɩɩga zembal Ezipt tẽnga. ¹⁸ Dĩm paalg me n waa n dɩt Ezipt tẽng naam la yẽ ka bãng a Zozɛf ye. ¹⁹ Dĩm kãnga yãenda rabaar buud toor-toore n nams d yaab rãmba. Yẽ n tol n kɩt tɩ b fãsd kambã b ma nusẽ n basd-b tɩ b kiidẽ. ²⁰ Wẽnd kãng la a Moyiiz wa moogo, la Wẽnd meng pẽga a neerma. Kiisa tã la a paa a ba zakẽ. ²¹ La b sẽn waa n kong n lob-a, yɩɩ Ezipt naaba bi-pugl n dɩk-a, n wub-a waa a meng biiga. ²² Yɩɩ woto la b wub a Moyiiz, n weka yama wa Ezipt biiga la a yɩɩ ned sẽn pid zãnga a goamẽ la a tʋʋmẽ. ²³ A yʋʋm sẽn waa n digd pisnaase, a kõ-la a meng yam n na n gilg n ges a saam-biisã, Israyɛl kambã. ²⁴ A sẽn yãend tɩ b namsd bãmb nin-yende, a kʋʋ Ezipt raoã sẽn da namsd-a wã. ²⁵ A ra tẽedame t’a buuda rãmb na bãng tɩ yaa Wẽnd n tʋm-a t’a wa fãag-ba. B ka wʋm dẽ ye. ²⁶ Woto wã beoog a to sẽn vẽege, a yãenda neb a yiib sẽn zabd taab t’a yet t’a na n paas-ba, n yeel-ba: ‹M zo-rãmba, yamb yaa saam-biisi, bõe tɩ y namsd taaba?› ²⁷ Sẽn tara pãnga lebsa a Moyiiz kɛɛnga n yetẽ: ‹Ãnd yeel-f tɩ f soog-do la f kao d bʋʋdo? ²⁸ Sãnd f ka rat n kʋ maam wala f sẽn kʋ Ezipt biiga zaamẽ wã?› ²⁹ A Moyiiz kong n zoeeme n dig Madiã tẽnga. Bee, a roga kamb a yiibu. ³⁰ Yʋʋm pisnaas dẽ poore, Sinayi tãnga zugu, we-raoogẽ, malɛk n lik-a kãgrẽ la yaa kãgr sẽn wit bugum. ³¹ A Moyiiz da ka tar yell kãnga võor ye. La a sẽn da kolgd n na n paam n yãend neere, la a sẽn wʋm Soaala koɛɛga: ³² ‹Maam la f yaab rãmba Wẽnde, a Abraam, a Izaak la a Zakoob Wẽnde.› T’a Moyiiz yɛs n digda, n pa le saagd gesg ye. ³³ Tɩ Soaala na n yeel-a: ‹Piid f neooda wã, tɩ f sẽn yɛs zĩig ninga yaa zĩ-sõngo. ³⁴ M yãenda m neba sẽn zĩ ne sũ-sãang ning Ezipt tẽnga. M wʋma b waasgo tɩ m wa n na n fãag-ba. Wa tɩ m tʋm-f Ezipt tẽnga.› ³⁵ Moyiiz ning b sẽn zãgs Ezipt tẽnga, b sẽn waa n sok-a: ‹Ãnda n yeel-f tɩ f yɩ d kãsma la d bʋ-kaooda?› Moyiiz kãng la Wẽnd kõ-ba, wala b naaba, b fãagda; la rẽ la malɛka lik kãgrẽ wã n togs-a. ³⁶ Ya a Moyiiz n yiis-b Ezipt. La tũu ne bõn-bãna la yɛl-soalma a sẽn maan Ezipt tẽnga la Mog Miuugẽ; we-raoogẽ wã yɩɩ yʋʋm pisnaase. ³⁷ Moyiiz kãng n yeel a Israyɛl kambã: ‹Wẽnd na n gesa y saam-biisa sʋka n yiis bãngd a ye wala maam n kõ yãmba.› ³⁸ B sẽn waa n ti b sika we-raoogẽ, yẽ n da be zĩis a yiibu: yẽ n da be Sinayi tãnga zugu n kelgd malɛka sẽn da gomd ne-a, yẽ n da be ne d ba rãmbã, b sikẽ. Yẽ n deeg Vɩɩma koees n taas-do. ³⁹ Nin-kãng noor la d yaab rãmba tõdg tɩ b kõn deeg ye. N yɩɩd rẽ menga, b yeelame tɩ b pa rat-a ye, tɩ b yama le gõdg n teesd Ezipt tẽnga, ⁴⁰ tɩ b na n yeel a Aarõ: ‹Naan wẽnd dãmba n kõ-do tɩ d lʋɩɩs d taoore tɩ d ka mi yell ning sẽn paam a Moyiiz, rao ninga sẽn yiisa tõnd Ezipt tẽnga ye.› ⁴¹ B yika wẽnd kãnga n maan nag-bila; b kʋʋ maoong n waoog b bõn-naande, b maana sũ-noog kibsa, b nus sẽn yaga soaba yĩnga. ⁴² Wẽnd me zabame n bas-ba. B sẽn teeg b rãmb marsã lebga yĩngr ãdse, wala sẽn gʋls bãngdba sebr pʋgẽ: ‹Maanda buud toɛ-toɛ wã sʋka, maoong bʋg la y kʋʋ m yĩnga, yʋʋm pisnaas pʋgẽ, we-raoogẽ wã, Israyɛl kamba? ⁴³ Y yaool n tii roog n kõ a Molok. Y yaga bõn-yood n togs y wẽn-faoogo, y wẽnd a Refa, ãdga; y yag-a lame n na n waoog-a; la rẽ me yĩng la m na n tall-y n kẽng yembd Babilon yaanga.› ⁴⁴ We-raoogẽ, d yaab rãmba ra tii roogo tɩ zooda kaset bĩngd a pʋgẽ. Rooga ra tii wala Wẽnd sẽn da gom n wilg a Moyiiz, n yet t’a modg tɩ wẽneg a sẽn yãend a soabã. ⁴⁵ La d yaab rãmba waa n baasa rooga ne a teedã n tall ba, a Zozuwe zamaanẽ, n tɩ kẽ tẽns niyns Wẽnd sẽn dig b soaalba tɩ b yii n bas vɩɩdã. Yɩɩ woto n tãag a Daviid. ⁴⁶ Wẽnd yam sẽn da kẽe-a yĩnga, a Daviid kosa sore n na n me Roog a to a Zakoob Wẽnda yĩnga. ⁴⁷ Yɩla a Salomo n me roogã. ⁴⁸ D yaool n miime tɩ yĩngr Soaala ka kẽed doog neb nus sẽn me ye. Bãngd a ye n sɩd yeele: ⁴⁹ ‹Saaga la m naam zaoore. Tẽnga yaa m nao palgr zĩiga. Dẽn la Soaala sokda: ro bʋg la y na n me m yĩnga? Zĩ-bʋg n na n yɩ m vʋʋsg zĩiga? ⁵⁰ Ka mam nug tʋʋmd la rẽ fãa laa?› ⁵¹ Yubl sẽn ka gõmsd dãmba, tʋb kɩd la sũ-rẽgd dãmba, wakat fãa y zãgsda a Vʋʋsem Sõngo! Y ba rãmba sẽn yɩ bũmb ninga, yãmb me boto! ⁵² Bãngd a bõe la y ba rãmba ka namse? B kʋʋ sẽn wilgb fãa tɩ Nin-sõnga na n waame. La ka yɩɩd dasma a wãna, Nin-sõnga yẽnẽ la y sẽn zãmbe n yõk n kʋ wã. ⁵³ Noorã y sẽn paam ne malɛk rãmb wilgrã, y ka reeg-a ye.» ⁵⁴ Neba sẽn wʋm woto b sũura fõda wʋsgo ne a Etiyɛn al tɩ b yẽna ra kẽrsdẽ. ⁵⁵ A Etiyɛn sẽn da pid ne Vʋʋsem Sõngo dooga a neng yĩngri la Wẽnd lik-a la ne b ziiri, t’a Zezi yɛs yingri, b rɩtgo. ⁵⁶ A yeelame: «Ad-y m nee saag sẽn pake tɩ Ned Biiga yɛs yĩngri Wẽnnaam dɩtgo.» ⁵⁷ B kaasame, n yẽd b tʋba, la wala nin-yende, b kẽe a Etiyɛn. ⁵⁸ B tus-a lame n yi tẽngã la b sɩnga a labr ne kuga. Kaset zirẽ dãmba da yeesa b futã n dɩgl bi-bɩɩg a ye naoẽ, a Sol naoẽ. ⁵⁹ B sẽn waa n labd a Etiyɛn a ra pʋʋsda woto: «Soaala Zezi, reeg-y m sɩɩgã.» ⁶⁰ A sẽn yigimdi a kelmame: «Soaala, da ning-y-b taal m kũuma yĩng ye.» La a sẽn gom woto a kiime.

¹ Sã n ya a Sol, yẽ ra tagsdame t’a Etiyɛn kʋʋba zemsame. Baraar bala b yikame n na n sãam Zerizalɛɛm Tigengã sãoong wẽnga. Sã n ka Tʋʋm-tʋmdba bala, tẽedba fãa zoeeme n sẽeg Zɩɩde la Samari weto. ² Nin-sõma n waa n dɩk a Etiyɛn n tɩ mum la b kelem a kʋʋre. ³ A Sol da tara Tigenga wãabo; a ra kẽeda zak woo zaka, n yiisd pagb la rapa n suiid doogo. ⁴ Tẽedba sẽn da sẽegã ra saada tẽng-tẽnga n moon Koe-noogã. ⁵ Woto a Filip sẽn da tɩ kẽ Samari tẽnga ra moonda Krista beelẽ. ⁶ Zãma wã ra pʋgda lame n deegd a zãmsgo. B fãa ra wʋmdame tɩ b gomd la b yãet ne b nini, yel-bãna a sẽn da maande. ⁷ Sʋtãan yooda ra yit n basda neb wʋsgo. B ra yitame la b kaasdẽ. Wobs la koms-rãmb wʋsg me paama laafi. ⁸ Tẽnga rãmb sũ-noog yɩɩ wʋsgo. ⁹ Ned n yaool n da reng a Filip beelẽ. Yaa a Simo. A ra maanda yel-bãna n yɩkd neb pɛlense. A ra geta a meng wa nin-kãsenga. ¹⁰ Dẽ me la neba fãa, bɛd la bõonego, ra pʋgd-a. B ra yetame: «Nin-kãnga pãnga yaa Wẽnd pãn-kẽoongo.» ¹¹ B ra pʋgd-a lame tɩ yaa al daar zãr la a ra yɩkd b pɛlens ne a yel-bãna. ¹² Neba sẽn waa n tẽ Wẽnd Rĩunga la a Zezi Krista Koe-noogã, a Filip sẽn waa n wilg-bã, b sakame tɩ b kõ-b soobo, pagb la rapa. ¹³ A Simo menga waa n tẽeme n deeg soobo, n da ka le rat n serg n bas a Filip ye t’a ra nee yel-bãna la wẽnd makr dãmba sẽn da maand a nifẽ. ¹⁴ Tʋʋm-tʋmdba sẽn da ket Zerizalɛɛm wʋmame tɩ Samari rãmb saka tẽebo tɩ b tʋm a Piyɛr la a Zã beelẽ. ¹⁵ B kẽe Samari rãmb tẽnga la b pʋʋsa b yĩnga, n kos a Vʋʋsem Sõng t’a sig bãmba, ¹⁶ tɩ bãmb ned ba a ye ra nan ka paam-b ye. Yaa Soaala Zezi yʋʋr yĩng la da reeg soob nanda. ¹⁷ A Piyɛr la a Zã ra tẽegda b nus b zutu tɩ b paamd a Vʋʋsem Sõngo. ¹⁸ A Simo sẽn yãende t’a Piyɛr la a Zã tẽegda b nus t’a Vʋʋsem Sõng sigda, a bao ligdi n kõ-ba. ¹⁹ A yeelame: «Kõ-y maam me y pãngã tɩ m nusa sẽn na n tẽeg ned ning fãa zugu bɩ a me reeg a Vʋʋsem sõngo.» ²⁰ T’a Piyɛr na n yeel-a: «Wẽnd na sãam foo ne f ligdã, f sẽn tẽed tɩ Wẽnd kũun tõe n daa ne ligdã! ²¹ Wẽnd nifẽ, f sũura ka tɩrg ye la yõod kõn zĩnd f yĩnga, rũnna wala beoog ye. ²² Sẽn be, yaa f tuub f geel yaalgã la f pʋʋs Wẽnde. Daare f na paam a sugri. ²³ F sũura pida ne tɩɩsem tɩ f yĩnga za ne wẽnem gadre.» ²⁴ La a Simo yeelame: «Bɩ yãmb meng yõk Soaala sɛɛg m yĩnga, tɩ y sẽn gomd yel-beed ninga ra wa pak-m ye.» ²⁵ A Piyɛr la a Zã kõ-la b kaseto, n moon Soaala Koe-noogã. B le rɩka Zerizalɛɛm sore, n karemd Samari tẽns rãmba, la b kẽnda. ²⁶ Soaala malɛk yeela a Filip: «Yik n tũ goabg sorã n yek sor ninga sẽn yit Zerizalɛɛm n dabd Gaza. Neb ka waoog so-kãng zug ye.» ²⁷ A Filip yikame n tɩ yek sorã. La ade, Etiopi ned n da kẽng Zerizalɛɛm n lɛɛg n kuiisẽ. Da yaa Etiopi dĩm-poaka sõgen kãsenga, a kamb naaba la a laoga fãa gũuda. ²⁸ A ra lɛɛg kuiisame, n zao bilim-bilm n karemd a Izayi sebre. ²⁹ Wẽnd Vʋʋsem yeela a Filip: «Aya! Wudg tao n paam bilim-bilma.» ³⁰ A Filip wudgame n ta, la yaa bãngd a Izayi sebr kareng la a ra wʋmda. Dẽ la a sok Etiopi raoã: «Fo wʋmda f sẽn karemda võor bɩ?» ³¹ T’a yeele: «M na n yɩɩ wãn n bãnge ned sã n ka sõng-ma?» A kosa a Filip t’a rʋ n yegl-a. ³² A sẽn da karem n ta zĩig ninga la woto: «Yaa wala pe-yãanga la b tall-a n kẽng kʋʋbo; a yaa sɩɩ wala pe-bila sẽn yɛs a kõbda wõrsd taoore a kõ yaag a noor ye, ³³ a sẽn faool a meng yĩnga, b mong-a-la bʋʋm, a buuda nebã, ãnda n na n gom b yelle? B yiisa a vɩɩm nin-vɩɩs sʋka.» ³⁴ Etiopi neda yeela a Filip: «Yaa ãnda yell la bãngd kãnga gomda, yaa meng yelle bɩ yaa ned a to yelle?» ³⁵ A Filip sɩnga ne Sebr sõng sẽn tʋɩɩs bũmb ningã n wilg-a a Zezi Koe-noogã. ³⁶ B sẽn tar kẽnde b waa n taa bãka tɩ raoã yeele: «Ad koom! Bõe marsã n gɩdgd m soobo?» [ ³⁷ A Filip yeel-a lame: «Fo sã n tẽed ne f sũur fãa, gɩdgr ka ye!» Tɩ yẽ yeele: «M tẽedame t’a Zezi yaa Wẽnnaam Biiga.»] ³⁸ A yalsa bilm bilma. B yiiba fãa kẽe koomẽ, a Filip ne raoã, la a Filip kõ-a-la soobo. ³⁹ B sẽn yi koomẽ wã Wẽnd Vʋʋsem looga ne a Filip. Etiopi neda ka le yãend-a ye, n kel n dɩk a sor ne sũ-noogo. ⁴⁰ Yaa Azot tẽng la b le wa yãend a Filip. A ra kẽnda a kẽnde n moon Koe-noogã a sẽn ta tẽng ning fãa, n wa tãag Sezare.

¹ A Sol yẽ sẽn da mi, yaa kẽes tẽedba rabeem la a kʋ-b bala. Dẽ la a tɩ yãend maan-kʋʋd kãsengã ² n kos-a sɛb sẽn na n pʋɩ Damas pʋʋsg rotẽ n wilg tɩ b sã n yãend So-paalga tũudba, bɩ b yõg-ba n sẽb bãeense n tall n wa Zerizalɛɛm. ³ A sɩd dɩka sore n kolgd Damas; la vugr bala vẽenem tãoo yĩngr n bu-a. ⁴ A lʋɩɩ tẽnga la a wʋma koɛɛg sẽn yeel-a: «Sol, Sol, bõe yĩng la f namsd ma?» ⁵ T’a soke: «Yãmb la ãnda, Soaala?» Koɛɛga yeela woto: «Yaa maam a Zezi la f sẽn namsdã. ⁶ La yiki! Kẽ tẽnga pʋgẽ tɩ be b na wilg-f f sẽn na n maanega.» ⁷ A tũud-n-taasa ra yɛsame, dabeema ra kɩtame tɩ b lebg mugsi; b ra wʋmda goama yẽ, la b ra ka ne ned ye. ⁸ A Sol sẽn yiki, n puk a nini, a ra ka ne fɩ. B kong n tak-a la ne nug n kẽes Damas. ⁹ Maana rasem a tãabo t’a ka ne fɩ, n ka rɩtẽ la a ka yũud fɩ. ¹⁰ Karen-biig a ye n da be Damas n boond t’a Anani. Soaala waa n lika b meng yẽnda n yeel-a: «Anani!» Tɩ yẽ sake: «Soaala, m bee ka.» Tɩ Soaala lɛɛg n yeel-a: ¹¹ «Kẽnge, rɩk sor ning sẽn pʋd tɩ Tɩrgã, n sok a Zɩɩda zaka. Beelẽ f na sok Tars rao a Sol yelle. Nin-kãng pʋʋsdame marsã, ¹² la nin-kãng nee ned sẽn boond tɩ Anani. A nee a Anani sẽn kẽed n na n tẽeg a nus a zug t’a nina le puki.» ¹³ A Anani leokame: «Soaala, m wʋma neb ka tɛk sẽn gom nin-kãnga yelle. Neba fãa togsda wẽng ning a sẽn maan ne Zerizalɛɛm tẽedbã. ¹⁴ A sẽn wa kaalẽ wã menga, a waa ne Maan-kʋʋd kãsensa noore n na n sog bãeense neb niyns fãa sẽn pʋt y yʋʋre.» ¹⁵ Soaala me yeel-a lame: «Kẽng m sẽn tʋm-f zĩig ningã tɩ nedã, maam n yãk-a ne yamleoogo, t’a moon m yʋʋra bu-zẽmbã, dĩm dãmba la a Israyɛl buudu. ¹⁶ Mam meng m toore n na n wilg-a a sẽn na n nams bũmb ning fãa, mam yʋʋra yĩnga.» ¹⁷ A Anani sak n loogame, a kẽe zakẽ, a tẽega a nus a Sol zug n yeel-a: «Sol, Sol, m saam-biiga, sẽn tʋm-a maama, yaa nin kãng n lik foo f sora zugu la a tʋm-m lame tɩ m wa puk f nini la f reeg a Vʋʋsem Sõngo.» ¹⁸ Zĩig pʋgẽ bala yɩɩ wa pagdo n yi a nina n dʋʋg tẽnga. A nina wẽneg n pukame la a reega soobo. ¹⁹ A sẽn paam dɩɩbo, a rɩɩme n le paam pãnga. A Sol maana dasem a wãn ne Damas karen-biisã. ²⁰ A sɩngame n wilgd pʋʋsg rotẽ t’a Zezi yaa Wẽnnaam Biiga. ²¹ Sẽn da kelgdba fãa ra yɛsa ne pɛlen-yɩka la b maanẽ: «Ka rao kãnga n da yik Zerizalɛɛm n maan beem ne sẽn da pʋt-b Nin-kãnga Yʋʋra laa? La a sẽn wa ka wã, a ka wa bal n na n yõg-b n tɩ kɩs maan-kʋʋdba kãsem-dãmb wɛɛ?» ²² Ad a Sol da paamda pãnga beoog sẽn vẽeg fãa n gomd n lubd Damas Zʋɩf rãmbã, n wilgd-b vẽenega t’a Zezi sɩd yaa Krista. ²³ Yʋʋm sẽn maan a wãna, Zʋɩf rãmba seda ne taaba n na n kʋ a Sol. ²⁴ A Sol bãngame tɩ bũmb la b rat n maane, tɩ b ra tol n ninga gũudba tẽnga noor kʋɩlensẽ, tɩ b be be wĩndg la yʋngo, sẽn na yɩlẽ n paam-a n kʋ. ²⁵ Woto wã, yʋng a ye, karen-biisa seda ne taaba n sagl-a peoog pʋga n sik-a lalg poore. ²⁶ A Sol sẽn ta Zerizalɛɛm, a makame n na n fãoog a meng ne karen-biis a taabã la b fãa ra zoeta rabeem; b ra pa tẽed t’a sɩd kẽe Krista ye. ²⁷ A Barnabe n kong n peeg-a, n tall-a n ta Tʋʋm-tʋmdba nengẽ la a wilg-b bũmb ning sẽn maan Damas sor zugu: a yãenda Soaala la Soaala goma ne-a. A wilg-b-la a Sol sẽn moon, ne sũ-keelem ninga a Zezi Krista yʋʋr Damas tẽnga. ²⁸ Dẽ marsã la b ra tũud taab n yit la b watẽ, Zerizalɛɛm pʋgẽ, la b kõt Soaala kaseto tɩ rabeem kaẽ ye. ²⁹ A Sol da sõsda ne Zʋɩf niyns sẽn gomd-b grɛkã, tɩ b wẽed no-koɛɛm ne taaba. La b fãa ra soos n baooda a kũum. ³⁰ Karen-biisa sẽn bãng rẽ b tall-a lame m leb Sezare, n wa tɩ yi be n dig Tars tẽnga. ³¹ Sã n ya Zɩɩde, Galile la Samari, bãmb da tara laafi. Tigenga ra kɩɩda yẽgna. B ra zoeta Wẽnde. A Vʋʋsem Sõng sõngr yĩnga, b ra pida ne sũ-noogo. ³² A Piyɛr da kẽeda tẽnsa fãa; a waa n taa nin-sõma wã nengẽ Lida. ³³ A yãenda ned be sẽn boond tɩ Ene, la yaa yʋʋm a nii la a gãe a gãag zugu: a ra lebga põore. ³⁴ A Piyɛr yeel-a lame: «Ene, a Zezi Krista n kõt-f laafi. Yik la f maneg f gãaga f toore.» A wẽneg n yikame. ³⁵ Lida neba fãa la sẽn be-b Saron bãooga, yãend-a lame la b tẽe Soaala. ³⁶ Zope karen-biisa sʋka pag a ye n da boond tɩ Tabita, tɩ Grɛk rãmb boond tɩ Dorkas (Yãka). A sẽn da sẽbg kall ningã yaa maan tʋʋm sõma la a yols naong rãmb nimbãanega. ³⁷ A waa n lʋɩɩ pakeem n wẽneg n maan kaalem. B sẽn so-a koom b rʋʋ yĩngr doogã n gãneg-a. ³⁸ Lida ne Zope tẽns ra ka zãr taab ye, woto b sẽn bãng t’a Piyɛr bee Zope, karen-biisa tʋma neb a yiibu sẽn tɩ yeel-a: «Wa d nengẽ la ra kaoos ye.» ³⁹ A Piyɛr yik n tũ-b lame n loog. A sẽn ta, a dʋʋ yĩngri doogã. Pʋg-kõapa sẽn da tigim be wã gũbg-a lame n wilgd-a fut buud toor toore a Dorkas sẽn da wʋgda, a sẽn da waa n ket b sʋka. ⁴⁰ A Piyɛr kɩtame tɩ b fãa yi la a yĩgimdame n pʋʋse. A waa n wẽnemd n gesa pagã n yeel-a: «Tabita, yiki!» A puka a nini, n yãend a Piyɛr, n yik n zĩndi. ⁴¹ A Piyɛr gãda a nug n yik-a yĩngri. Yaa nin-vɩɩga la a Piyɛr bool nin-sõma wã la pʋg-kõapã n wilgi. ⁴² Zope tõr wʋma kibarã, tɩ wʋsg na n kẽ Soaalã. ⁴³ A Piyɛr kaoosa bilf Zope, zapa a ye yiri, zapa yʋʋr la a Simo.

¹ Ned n da be Sezare n boond tɩ Kornɛy. A ra yaa tãb-biis koabg taoor soaba, la Kornɛy tãnsoben-dooga neb da yita Itali. ² Yaa ned sẽn da mi Wẽnd waoogre: ne a sẽn ya bu-zẽna, yẽ ne a zak rãmb fãa da gãda Zʋɩf rãmba tẽebo. A ra kõta Zʋɩf rãmba kũun bɛda. A ra ka vʋsd ne pʋʋsg ye. ³ A waa n paama likri. Daar a ye, zafare, a yãenda ne a nif menga, Wẽnd malɛk sẽn kẽ a zakẽ n bool-a: «Kornɛy!» ⁴ A sẽn ges-a, a yɛɛsame. A sokame: «Yaa bõe, Soaala?» Malɛka leokame: «Ad-f pʋʋsgã la f wẽn-kosgã yel-sõmda yɛsa Wẽnd taoore, tɩ Wẽnd tẽr f yelle. ⁵ Dɩlla marsã bala tʋm neb Zope tɩ b tɩ wa ne a Simo, b sẽn boonda soab t’a Piyɛr. ⁶ A yõga zap a ye gãag-sobendo. Zapa me yʋʋr yaa Simo la a yira bee mogra noore.» ⁷ Malɛk ning sẽn da gomda wã sẽn looge, la a Kornɛy sẽn bool a rakõap a yiibu n paas tãb-biig a ye sẽn kẽ Wẽnde la a sẽn da yãk n gũnug a menga. ⁸ A sẽn wilg-ba b sẽn da tog n bãnge, a tʋm-b la Zope. ⁹ Vẽkembeoogo b taame. Zemsa wĩnto-suka, zemsa a Piyɛr sẽn dʋ rooga zug n na n pʋʋse. ¹⁰ Kom waa n yõk-a lame t’a rat bũmb n ning a noorẽ. B sẽn waa n segend dɩɩbã, a yama fʋsga a yĩngã. ¹¹ A yãenda saaga sẽn pake tɩ peen kãseng sẽn loe a noy a naas sigd tẽng wa zãnega. ¹² Zãnega ra pida ne rũms sẽn tar nao a naase la bõn-vuudi la yĩngr luiili. ¹³ La koɛɛg n wẽneg n yeel-a: «Aya! Piyɛr, kʋ n wãbe.» ¹⁴ T’a Piyɛr yeele: «Ayo! Soaala, bũmb sẽn ya rẽgdo, t’a sɩɩsg meng kisa, zɩɩ n kẽ m noorẽ ye.» ¹⁵ Koɛɛga le yeel-a lame, naoor a yiib soaba: «Wẽnd sẽn yɩlg bũmb ningã bɩ f ra saag n bool tɩ rẽgd ye.» ¹⁶ Yella maana woto naoor a tãabo. Dẽ poore, fãa leba a zĩigẽ, yĩngri. ¹⁷ A Piyɛr ra ket n yɛsa ne yɩɩre la a sokd a menga a sẽn yãenda võore. Wakat kãng la a Kornɛy sẽn tʋm b rãmba poog dignoorẽ. ¹⁸ B reng n sokame n bãng a Simo zaka, n bãng rao ning sẽn boond t’a Piyɛr sã n sɩd siga be. ¹⁹ Dẽ t’a Piyɛr ra ket n baooda likra võore la a Vʋʋsem Sõng yeel-a lame: «Ad neb n baood-fo. ²⁰ Yiki, sig n tũ-ba n looge tao-tao tɩ yaa maam n tʋm-ba.» ²¹ A Piyɛr sigame n sok nebã: «Bõe n wa ne y ka?» ²² Tɩ b na n leok: «Yaa Tãnsoab a Kornɛy, yaa nin-sõng sẽn sak Wẽnd tẽebo tɩ Zʋɩf rãmba pẽgd-a, yaa yẽ n paam tɩ malɛk sõng wilg-a t’a bool-f tɩ f waa a nengẽ la a kelg koees niyns f sẽn na n kõ-a.» ²³ T’a Piyɛr na n bas-b tɩ b kẽ la a maan-b gãag-sobendo. Beoog sẽn vẽege, b naaga taab n dɩk sore; Zope saam-biis kẽer yãag-b lame. ²⁴ Da-yɩten-daar la a ta Sezare. A Kornɛy ra tigsa a buudu la a zo-rãmba n gũud-a. ²⁵ A Piyɛr sẽn kolg zaka noor la a Kornɛy sẽn yi n seg-a n wõgemd a taoore. ²⁶ A Piyɛr doog-a lame n yetẽ: «Yik tɩ mam me yaa ned wa foom.» ²⁷ B sɩnga sõasg la b kẽedẽ. Yaa zãma n da tigim zaka pʋga. ²⁸ A Piyɛr yeel-b lame: «Wala y sẽn mi wã, maan zood ne bu-zẽn la f kẽe a zakẽ, yaa kisgu ne Zʋɩf. La ade, Wẽnd Wilg-m-la sẽn ka yɩɩd rasem a wãn bala tɩ m ka tog n bool ninsaal ba a ye tɩ rẽgdo, bɩ n yeel t’a sɩɩsg kisame ye. ²⁹ Yaa rẽnd me yĩnga la y sẽn bool-ma m pa yaas n tadg ye. M kot-y lame tɩ y togs-ma: yaa bõe yĩng la y bool-ma?» ³⁰ A Kornɛy leokame: «Yaa rasem a tãab rũnna la m da be m zakẽ n pʋʋsd zafar pʋʋsgo la ned n waa n yals m taoore ne fut peelem sẽn tʋʋsd nini. ³¹ Raoã yeel-m lame: ‹Kornɛy, f pʋʋsga reegame, Wẽnd tẽega f wẽn-kosga yel-sõmde. ³² Tʋm neb Zope tɩ b wa ne a Simo sẽn boond tɩ Piyɛr. A bee zap a Simo zakẽ, zak sẽn be mogra noore.› ³³ M wẽneg n kɩtame tɩ b babs-fo, la f sẽn wa wã f maana neere. Ad-d fãa sẽn yɛs f taoore n dat n wʋm Wẽnd sẽn kõ-f noor ningã.» ³⁴ A Piyɛr yeelame: «M neeme tɩ Wẽnd ka welg ninsaal ne a to ye. ³⁵ Fo buuda sẽn yaa soaba, f sã n zoet Wẽnde la f maand sẽn zemse, b pʋgda f poore. ³⁶ Yaa Israyɛl kamba la b gom ne, n gom laafi ning Dũni zãng Soaala, a Zezi Krista, sẽn wa ne a soabã. ³⁷ Y tẽra bũmb ning sẽn maan Zɩɩde ween-vɩʋʋgẽ. Y tẽra Nazarɛt Zezi wã yelle. Y tẽra b sɩngr Galile, a Zã sooba poore. ³⁸ Y tẽra Wẽnd sẽn pids-b ne a Vʋʋsem Sõngo la b pãnga. Y tẽra me tɩ Wẽnd sẽn da be ne-bã, b sẽn pɩʋʋg zĩig ning fãa b maana neere la b sãooga Sʋtãan sẽn da kẽ b rãmb fãa. ³⁹ Sã n ya tõndo, d yɩɩ b vɩɩma kaset dãmba, Zʋɩf rãmb tẽngẽ la Zerizalɛɛm. Yaa bãmb la b saag n ka pika zugu n kʋ. ⁴⁰ La Wẽnd vʋʋg-b la rasem a tãab daare tɩ b na lik b menga. ⁴¹ Ka neba fãa la b lik b meng ye, yɩɩ Wẽnd sẽn beool n yãk b rãmba. Yɩɩ tõnd sẽn dɩ la d yũ ne bãmba, b vʋʋgra poore. ⁴² Bãmb n kõ tõnd noor tɩ d moon la d wilg tɩ bãmb la Wẽnd yals yã tɩ b na n kao sẽn vɩ-ba la sẽn ki-ba bʋʋdo. ⁴³ Yaa bãmb yelle la bãngdba fãa gomda n yet tɩ sẽn tẽed-a bãmb fãa na paam a yel-wẽna yẽesgo bãmb yʋʋr yĩnga.» ⁴⁴ A Piyɛr ra ket n gomdame la a Vʋʋsem Sõng siga sẽn da kelgd-ba fãa. ⁴⁵ Zʋɩf rãmba sẽn da tũ a Piyɛr n wa wã yɛɛsame tɩ b yãendame t’a Vʋʋsem Sõng me siga bu-zẽmbã. ⁴⁶ B ra wʋmdame tɩ b wɩlemd bu-zẽn goama n pẽgd Wẽnnaam. Dẽ la a Piyɛr yeel yã: ⁴⁷ «D tõeeme n mong soobo, neb sẽn paam a Vʋʋsem Sõng wala tõnd bɩ?» ⁴⁸ La a kõo noor tɩ b so-ba, a Zezi Krista yʋʋr yĩnga. B kosa a Piyɛr t’a pa ne-ba dasem a wãn yɛsa.

¹ Tʋʋm-tʋmdba ne Zerizalɛɛm saam-biisa waa n wʋmame tɩ bu-zẽmba me reega Wẽnd gomde. ² Woto a Piyɛr sẽn ta Zerizalɛɛm, Zʋɩf rãmba yika ne-a: ³ «Bõe yĩng la f saag n kẽ bu-zẽmb zagsẽ la f zĩnd n dɩ ne-ba?» ⁴ T’a Piyɛr na n dɩk yella nao n wilg-ba: ⁵ «Ad-y m da bee Zope n pʋʋsdẽ, tɩ m yama wa fʋsg m yĩngã; m paama likri. Bũmb n da yit yĩngri sigd m taoore: peen kãseng sẽn loe wa zãnega. ⁶ M nina yõka gesgo n ka kamsdẽ ye la m yãenda tẽng zug rũms sẽn tar nao a naase, we-rũmsi, bõn-vuudi la yĩngr luiili. ⁷ La m wẽneg n wʋma koɛɛga: ‹Aya! Piyɛr, kʋ n wãbe.› ⁸ La m leokame: ‹Ayo! Soaala, bõn dẽgd la bũmb sɩɩsg sẽn kis zɩɩ n kẽ m noorẽ ye.› ⁹ Koɛɛga zĩnda yĩngri n le yeel-ma: ‹Da saag n ges wa rẽgdo Wẽnd sẽn yɩlg ye.› ¹⁰ Bũmba maana woto naoor a tãabo n yaool n wa leb yĩngri. ¹¹ Zemsa neb a tãab sẽn wa. B waa n yalsa tõnd sẽn da beẽ la Sezare ned n da tʋm-ba. ¹² A Vʋʋsem Sõng wilg-m lame tɩ m da maan sãmbg ye la m tũ-ba. M saam-biis a yoobã sẽn zĩ wã me tũu maam la d kẽe zapa yiri. ¹³ Yẽ me togsa tõndo malɛka sẽn lik-a n yeel-a: ‹Tʋm Zope tɩ b wa ne a Simo, b sẽn boonda soab t’a Piyɛr. ¹⁴ Yẽnda n na n kõ foo koɛɛg sẽn na n fãag foo ne f zakã.› ¹⁵ M sẽn sɩng bal tɩ m na n gome la a Vʋʋsem Sõng sẽn sig bãmba, wala b sẽn sig tõnd sɩngrẽ wã. ¹⁶ Wakat kãng la m tẽeg Soaala gomde: A Zã kõo soob ne koom, la sã n ya yãmba y na n soo ne a Vʋʋsem Sõngo. ¹⁷ Wẽnd sã n kõ bãmb wala b sẽn kõ tõnd sẽn tẽ Soaal a Zezi Krista, maam la a bõe n na n gɩdg Wẽnde.» ¹⁸ Gom kãensa maaga b sũuri la b pẽga Wẽnd n yetẽ: «Wẽnd kõo bu-zẽmba me tuubg ning sẽn wat ne vɩɩma.» ¹⁹ Neb niyns sẽn da sẽeg-b, a Etiyɛn namsga wakato, sãag n taa Fenisi, Sɩpr la Antiyos; la yaa Zʋɩf rãmba bal la ra moond Koe-noogã. ²⁰ Sɩpr la Sirɛn tẽng rãmb n yaool n zĩnd bãmb sʋka. B sẽn ta Antiyos b sak n goma ne bu-zẽmbã n moon Soaal a Zezi Krista Koe-noogã. ²¹ Wẽnd da pʋgda b poor ne b pãnga. Woto sẽn sak-b tẽeb n lebg Soaala karen-biis yɩɩ ka tɛka. ²² Rẽ lʋɩɩ Zerizalɛɛm dãmba tʋbrẽ tɩ b tʋm a Barnabe Antiyos. ²³ Yẽ me waame; a yãenda Wẽnd kũuna sẽn yɩ a soaba; a sũur yɩɩ noogo la a sẽn mi saglg yĩnga a kõ-b-la pãnga tɩ b da le bak ne Soaala ye. ²⁴ A Barnabe ra yaa nin-sõngo n pid ne tẽebo la ne a Vʋʋsem Sõngo. Sɩd yɩɩ neb ka tɛk n wa n kẽ Soaalã. ²⁵ A Barnabe babsa a Sol Tars tẽnga. ²⁶ A sẽn yãend-a, a peeg-a lame n wa Antiyos. B paa ne taab yʋʋmd tõre ne Antiyos Tigenga rãmba. Yɩɩ neb ka tɛk yam la b vẽneg yã. Yɩɩ Antiyos la b sɩng n boond karen-biisa tɩ «kristneba». ²⁷ Bãngdba n waa n yi Zerizalɛɛm n wa Antiyos. ²⁸ B nin-yend sẽn boond tɩ Agabus yika ne a Vʋʋsem Sõng vẽnegre n moon tɩ kom kãsenga n na n lʋɩ tẽnga tõre. Kom kãng la sẽn zĩnd a Klod zamaanẽ. ²⁹ Karen-biisa yalsame tɩ ned kam fãa na n maana a sẽn tõe n tool sõngre Zɩɩde saam-biisã. ³⁰ B sakame n tool nin-kẽemsa bũmbu la a Barnabe ne a Sol n na n tall-a n taas.

¹ Yaa rẽ sasa la a Erod yõg Tigenga neb kẽere n namse. ² A kɩtame tɩ b kʋ ne sʋʋga a Zã kẽema, a Zak. ³ Rẽ taa Zʋɩf rãmba yam t’a na n kɩt tɩ b yõk a Piyɛr me. Sega bur sẽn pa lobd bɩlle wakato, ⁴ t’a na n kong n sui-a roogo n gũud Paka poore n na kẽes-a bʋʋdo, buuda gill taoore. ⁵ A Piyɛr sẽn kẽ roogo la Tigenga me sẽn yõk pʋʋsg a yĩnga n ka vʋʋsdẽ ye. ⁶ Ra zoe n lebga yʋngo, ra keta beooga vẽeg tɩ b kẽes a Piyɛr bʋʋdo. A ra paam n gõee tãb-biis a yiib sʋka la bãng n da sog-a ne tãb-biig fãa. B ra ninga gũudb me rooga noore. ⁷ Soaala malɛk siga vugr bala tɩ bi-beesa roog na n yãng ne vẽenem. Malɛka tika a Piyɛr lʋgre t’a yiki. A yeel-a lame: «Yik yĩngr tao!» Bãeensa foosa a nusẽ n dʋʋg tẽnga. ⁸ Malɛka yeelame: «Sẽbg f sẽbdga la ning f gãndalsa.» T’a Piyɛr maan boto. Malɛka le paasame: «Rɩk f fu taokã n palg f bãoko la f pʋg maam.» ⁹ A Piyɛr yiime n pʋgd-a. A ka mi tɩ yella yaa sɩd ye. A bas n tẽedame t’a zãmsdame. ¹⁰ B yõsga pipi gũudba zĩiga, n le yõsg a yiib soaba, n wa ta tẽnga noor kut kʋɩlenga sẽn paka toore tɩ bãmb looge. B kẽname n tɩ yek sor a to la malɛka wẽneg n bas-a lame. ¹¹ Dẽ marsã la a yama leb a zĩigẽ t’a yeele: «Marsã la m ne vẽenega tɩ Soaala tʋma b malɛk t’a wa fãag-ma a Erod nusẽ la a fãag-m ne Zʋɩf rãmba sẽn da gũud bũmb ningã.» ¹² A Piyɛr bãnga a sẽn be zĩig ninga t’a na n tees a Mari zaka. Pʋg kãng ya a Zã ma la a Zã me le boondame tɩ Mark. Neb wʋsgo n da tigim zakã, n da pʋʋsdẽ. ¹³ A Piyɛr sẽn vẽ kʋɩlengã la zak bi-pugl a ye, sẽn boond tɩ Rodɛ, waa n na n ges sẽn yaa soaba, ¹⁴ n wʋm a Piyɛr koɛɛg, n kɩdem sũ-noogo n yĩm kʋɩlenga pakre, n wudg n leb pʋgẽ n na n wilg tɩ ya a Piyɛr n be dignoorẽ. ¹⁵ Pʋgẽ dãmba yeel-a lame: «Ad-f zuga lebgame.» La yẽ ra wẽendame tɩ yaa sɩda. Tɩ b le paase: «Ad yaa Malɛka!» ¹⁶ A Piyɛr ra ket n tara kʋɩlenga kogsgo. B sẽn waa n pake b sɩd mikame tɩ yaa yẽnna tɩ rabeem na n kẽ-ba. ¹⁷ A Piyɛr kams-b la ne nug tɩ b bas bʋʋre; a wilg-b la Soaala sẽn yiis-a rooga toto la a paasame: «Tɩ wilg yã a Zak la saam-biisã.» A sẽn yi, a kẽnga zĩig a to. ¹⁸ Zĩig sẽn yẽege, tãb-biisa nengẽ wulumdame: a Piyɛr kẽe yɛ? A kẽe yɛ? ¹⁹ A Erod sẽn tʋm tɩ b wa ne-a, b pa yãend-a ye. A kɩtame tɩ b sogs gũudbã, a kɩtame tɩ b kʋ ba. A Erod yii Zɩɩde n leb Sezare la a paa be. ²⁰ A Erod ne Tir la Sidõ rãmba ra ka zemsd taab ba bilfu. B waa n tɩ yõka sõgen kãseng, a Blastus, sɛɛga t’a tall-ba n taas dĩma taoore tɩ b yẽs laafi yẽsgo. B tẽnsa sõngr da yita dĩma nẽngẽ. ²¹ Daara sẽn ta, a Erod yeelga a naam futu. A rʋʋ bũmb sẽn zẽke n yɛs n gomda. ²² Zãma wã sɩnga kaasgo: «Ad-y ka ninsaal n gomd ye, yaa wẽnde!» ²³ Zĩig pʋgẽ bala, Soaala malɛk wẽe-a lame t’a ka gom n pẽg Wẽnd ye. Zãnzũy n wẽneg m kẽe a nemsã t’a ki. ²⁴ Wẽnd gomda ra paamda moonego tɩ tẽedba me sõor tar paasgo. ²⁵ A Barnabe ne a Sol pidsa b tʋʋmna Zerizalɛɛm. B lɛɛg n waa Antiyos ne a Zã, b sẽn boonda soab me tɩ Mark.

¹ Bãngdba la karen-saam-dãmba n da be Antiyos Tigenga pʋga. Ad-a Barnabe, a Simeõ, sẽn boond tɩ Sablga, ad Sirɛn Lusiyus, ad-a Manaɛn, kombera, a Erod, deem-n-taaga n paas a Sol. ² Daar a ye b waa n naaga taab n pʋʋsdẽ la b loet b noore t’a Vʋʋsem Sõng yeele: «Welg yã a Barnabe ne a Sol toore tɩ tʋʋmd la m na n kõ-ba.» ³ Pʋʋsga la no-loeera sẽn sɛ b tẽega b nus b zutu tɩ b yik n loog b tʋʋmde. ⁴ B sɩnga tʋʋmd ning b sẽn deeg a Vʋʋsem Sõng nengẽ. Dɩlla b yii Zerizalɛɛm n tees Selewusi, n yi be n kẽ koom koglg n dig Sɩpr. ⁵ B taa Salamin n sɩng Koe-nooga moonego Zʋɩf rãmb pʋʋsg rotẽ. A Zã n da pʋgd n sõngd-ba. ⁶ B saaga Sɩpr n ta Pafos, la be b sega yel-bãn soaba, Zʋɩf sẽn ya zirẽ-be-bãngda, n boond tɩ Bar Zezi. ⁷ A ra yaa sõsd-n-taar ne Komber a Serziyus Pawulus, ned sẽn pid ne sɩlem. Kombera kɩtame tɩ b bool a Barnabe ne a Sol t’a da rat n wʋma Soaala Koɛɛg. ⁸ Yel-bãn soab, a Elimas, da ningda gɩdgre, t’a ra pa rat kombera ne tẽeb ye. ⁹ Rẽ marsã la a Sol – b boond-a lame yɛs t’a Pol – yik ne a Vʋʋsem Sõng pãnga n gẽen-a, ¹⁰ n yeel-a: «Nin-yoog sẽn pid ne zãmb la wẽnem buud fãa, Sʋtãan biiga, zemsg buud fãa bɛyã, wakat bʋg la f na vʋʋs ne Wẽnd so-tɩrsa kedbgo? ¹¹ Soaala na n zɩsga b nug f zug marsã. F na n lebga zoanga, la rasem a wãn pʋgẽ f kõn le yãend wĩntoog vẽenem ye.» La zĩig pʋgẽ bala fãa lebga yʋng la lik a yĩnga t’a ra wẽnesed goabg la rɩtgo n baood tata. ¹² Kombera sẽn yãe woto, a saka tẽebo la sɩda Soaala Zãmsga yɩka a pɛlenga. ¹³ Pafos tẽnga, a Pol ne a tũud-n-taasa le kẽe koom koglg n ta Perze sẽn be Pãnfili tẽn-peelmẽ. Zĩ kãng la a Zã bas-ba n leb Zerizalɛɛm. ¹⁴ Tʋʋm-tʋmdba yẽ kell n sãaga Perze n ta Antiyos a to sẽn be Pisidi. Vʋʋsga raare b kẽe pʋʋsga roogo n zĩndi. ¹⁵ Noora la bãngdba sebr kareng poore, pʋʋsga roog nanams tʋmame tɩ b yeel-ba: «Saam-biisi, y sã n tar Koɛɛg n na n kõ zãma wã n le paas a raoodo bɩ y leoke.» ¹⁶ A Pol yikame n kabs ne a nug la a yeelame: «Israyɛl kamba la yãmb fãa sẽn pʋgd Wẽnde, m kotame tɩ y kelg-ma. ¹⁷ Tõnd sẽn be buud ninga tẽngẽ wã Wẽnde, a Israyɛl Wẽnd, n tũus d yaab rãmbã la bãmb n kɩt t’a neba sõor fɩɩg zembala Ezipt tẽnga, b pa-weer tẽnga. Bãmb n yiis-b tẽn kãng ne b kang pãnga. ¹⁸ Bãmb n zã-b yʋʋm pisnaas we-raoogẽ. ¹⁹ Bãmb n sɛɛs buud a yopoe Kanaã, n deeg b soolma n kõ-ba. ²⁰ Bãmb meng b toore n ges b yell yʋʋm kobs-naase la pisnu. Dẽ poore b kõ-b la Bʋ-kaoodba n tãag bãngd a Samwɛl. ²¹ Ba rãmba waa n yikame n kos dĩma, tɩ Wẽnd na n kõ-b a Sis biig, a Sol, a Bẽzame buudẽ, la a soog-b la yʋʋm pisnaase. ²² Wẽnd waa n lebsa yẽ kɛɛnga n kõ-b dĩm a Daviid; la ad-b sẽn yeel a Daviid poorẽ: ‹M yãenda a Zese biig a Daviid tɩ m yam kẽe-a. Yẽnda n na n pids m daaba fãa.› ²³ Ya yẽnda buudẽ la Wẽnd pids b kãabgã n yiis a Zezi wala a Israyɛl Fãagda. ²⁴ A Zã n lʋɩ taoore n segl b waoongo, n wilg a Israyɛl buud tɩ soob n be n ya sũur tekr soobo. ²⁵ A Zã sẽn waa n na n looge, a ra yetame: ‹Yãmb sẽn tẽed tɩ m yaa ned ningã, ad-y ka maam la yẽ soab ye. B na n waa mam poorẽ la m ka tog n yɩ b sõgen meng ye.› ²⁶ M saam-biisi, a Abraam yagense, la yãmb fãa sẽn be ka la y pʋgda Wẽnde, yaa yãmb fãa yĩng la Fãagr Koɛɛga moon yã. ²⁷ Zerizalɛɛm taoor dãmba pidsa ne yĩdgu, bãngr koees niyns d sẽn karemd sibr daar fãa. ²⁸ Ne b sẽn pa yãend b nengẽ bũmb sẽn sek b bʋʋd paalgre, b baas n kosa a Pilat t’a kʋ-ba. ²⁹ B sẽn taas bũmb ning fãa sẽn gʋls b poorẽ, b sika b yĩnga n mum yaoogẽ. ³⁰ Wẽnd vʋʋg-b lame. ³¹ La rasem sõor sẽn ka paood pʋgẽ b lika neb niyns sẽn yi-b ne bãmb Galile n wa Zerizalɛɛm la nin-bãmb la buuda fãa kaset rãmb marsã. ³² Tõnd kõt-y-la Koe-noogo. Tõnd yet-y lame tɩ Wẽnd sẽn kãab bũmb ning d yaab rãmbã, ³³ b pids-a-la tõnd ned kamb fãa yĩnga, n vʋʋg a Zezi. B kãab-b-la tõnd woto Yɩɩla sebrẽ: Fo yaa mam biiga, rũnda la m dog foo. ³⁴ D sẽn gãd bũmb ning n mi tɩ Wẽnd vʋʋg-b la kɩɩms sʋka, tɩ b na n tɩlg põogre, yaa b sẽn da yeelã: m na n pidsa kãab-sõma niyns m sẽn da kãab a Daviid wala bũmb sẽn ka tõe n vaale. ³⁵ Yaa rẽ me yĩng la b le yet zĩig a to: F kõn bas f nin-sõngã t’a bãng põogr ye. ³⁶ D miime t’a sẽn baas tʋʋmd ning Wẽnd sẽn wilg-a, a Daviid kiime tɩ b mum-a la a bãnga põogre. ³⁷ Wẽnd sẽn vʋʋg a soaba yẽ tɩlga põogre. ³⁸ Dɩlla, m saam-biisi, bãng-y tɩ yaa yẽ soab yʋʋr yĩnga la b moond yel-wẽn yẽesgo. Sõmblem ning a Moyiiz Noora sẽn ka tõog n kõ yãmb a soabã, ³⁹ ned ning fãa sẽn tẽeda bãmb paamd-a lame. ⁴⁰ Gũus-y tɩ bãngdba sẽn yeela ra wa taas ye: ⁴¹ ‹Gesyã, ka mi to pẽgr dãmba. Yɛɛs-y n menem! Bũmb la m na n maan yãmb sʋka m na n maan-a lame ti y ket n vɩ, la ned sã n da yiẽ kɛɛnga n wa togs yã, y kõn deegẽ ye.› » ⁴² Pʋʋsga sẽn sɛ, b kosa a Pol la a Barnabe tɩ b le wa rɩk b rũnna koɛɛgã sibr ning sẽn pʋgdã. ⁴³ Tigsga sɩnga sẽegre la Zʋɩf rãmb wʋsgo ne Kẽed paalse tũ-la a Pol ne a Barnabe. Bãmb me ra sõsda ne-ba n kot-b tɩ b ra bas tɩ Wẽnd kũuna lʋɩ vɩʋʋgẽ ye. ⁴⁴ Vʋʋsg raar ninga sẽn pʋgã, yɩɩ tẽnga zãng la bala n waa n na n kelg Wẽnd Gomdã. ⁴⁵ Zʋɩf rãmba me sẽn yãend rẽnna b yika sũ-kiiri n leood a Pol la b naagd ne wẽn-tʋʋre. ⁴⁶ Dẽ me la a Pol ne a Barnabe keng b sũuri n yeel-ba: «Yaa yãmb la d da togẽ pipi n moon Koe-noogã. La yãmb sẽn pa sakã, la y pa kẽes y mens vɩɩm sẽn kõn sɛ kamba sʋka, ade, tõnd na n wẽnemda d neng n tees bu-zẽmbã. ⁴⁷ No-kãng me la d paam Wẽnd nengẽ: ‹M yals-f la wa bu-zẽmba vẽenem, m yeel-f lame tɩ f taas fãagra Koe-noog dũni wã sɛtmẽ.› » ⁴⁸ Bu-zẽmba sẽn wʋm dẽ, b sũur yɩɩ noogo tɩ b na n pẽg Koe-noogã. Sẽn paam-b Wẽnd zelemd noogã, vɩɩm sẽn ka be sɛɛb kãabgã, faa saka tẽebo. ⁴⁹ Woto la Soaala koɛɛg me paam n moon Pisidi tẽn-peelmẽ. ⁵⁰ Zʋɩf rãmba maana sũdum ne nin-bɛda pagba sẽn da waoogd Wẽnde la ne tẽnga taoor dãmba tɩ b na n yik beem ne a Pol la a Barnabe, n dig-ba n yiis b tẽngẽ. ⁵¹ Bãmb me pĩmsa b nao wã tom la b teesa Ikoniyom. ⁵² Karen-biisa yẽ ra pida ne sũ-noogo la ne a Vʋʋsem Sõngo.

¹ B sẽn ta Ikoniyom, b le kẽe Zʋɩf rãmba pʋʋsg roogẽ la b sẽn gom goam niynsa kɩtame tɩ bu-zẽmba, wala Zʋɩf rãmba, sak tẽebo. ² Zʋɩf rãmb kẽer me zãgsa tẽebo n tus b taab tɩ b yik n maand beem ne saam-biisã. ³ A Pol ne a Barnabe kong n kaoosa beelẽ. B sũur da kegmame tɩ Soaala ra yãagda Koe-nooga moonego rãmba ne wẽnd makr dãmba la yel-bãna b sẽn da maande. ⁴ Tẽnga waa n welga sags a yiibu: bãmb dãmb kẽed Zʋɩf rãmbã tɩ bãmb dãmb kẽed Tʋʋm-tʋmdbã. ⁵ Zʋɩf rãmba ra yikame, bãmb ne b taoor dãmba n baood n na n nams Tʋʋm-tʋmdba la b lab-b ne kuga. ⁶ B bãngame n tɩ soond Likaoni tẽnsẽ: Listr, Derbe la b tẽn-toose. ⁷ Be me b sɩnga Koe-nooga moonego. ⁸ Listr tẽnga b yãee ned sẽn zĩ n ka tõe n yals a nao zug ye. A sẽn dog tɛka a zɩɩ n kẽn ye. ⁹ A kelga a Pol karengo. A Pol me ges-a lame la a sẽn mik t’a tẽeba sekame, ¹⁰ a zẽka a koɛɛg n yeel-a: «Yik n yaas tɩrga f nao zugu!» A sɩd yika vugr n sɩng kẽnde. ¹¹ B sẽn yãenda Pol sẽn maana, neba kelma ne Likaoni tẽng rãmb goama: «Ad-y wẽnd dãmb n dɩk ninsaal wẽneg n sig d sʋka!» ¹² B ra boonda a Barnabe t’a Zewus, n boond a Pol t’a Ermɛs, yẽ sẽn da so goama yĩnga. ¹³ Tẽnga noore, b ra mee roog b wẽnd a Zewus yĩnga la a Zewus maan-kʋʋdba waa ne lolse. B ra zoe n kãama puud n pid lolsã la yaa maoong kʋʋb la b ra naag zãma wã n segendẽ. ¹⁴ A Pol ne a Barnabe sẽn bãng rẽnna, b kẽesa b futu la b wudg n kẽe zãma wã sʋka la b kaasdẽ: ¹⁵ «D Zo-rãmba, yaa bõe la y maand woto? Tõnd me yaa ninsaalb wa yãmba. D waame bala n na n kos-y tɩ y bas y wẽn-yaalsa pʋgbo la y wẽnemd y nenga n tees Wẽnd vɩɩgã, sẽn naana yĩngr la tẽnga, mogra ne a pʋgẽ teed fãa. ¹⁶ Zamaan niyns sẽn looge Wẽnd basa buud kam fãa t’a tũ a sore; ¹⁷ b yaool ka kong b zãab sõnga kaset ye tɩ b zĩnda yĩngr n tool-b saase, n kõ-b sigr sõngo, n tɩgs-b ne koodo la b pids b sũur ne sũ-noogo.» ¹⁸ Gom bãmba pa tõog wʋsgo n lak b yama ne maoonga kʋʋb ye. ¹⁹ Zʋɩf rãmb n yaool n yi Antiyos la Ikoniyom n wa la zãma wã kelg-b lame. Woto wã b laba a Pol ne kuga n vu-a n yiis tẽngã, n tẽed t’a kiime. ²⁰ Karen-biisa waa n gũbg-a lame n getẽ la a tik n yikame n kẽ tẽnga pʋga. Vẽkembeoogo a looga Derbe tẽng ne a Barnabe. ²¹ B sẽn moon Koe-nooga beelẽ n paam karen-biis zembala, b lɛɛg n tuda Listr, Ikoniyom la Antiyos. ²² B ra kengda karen-biisa sũuri n sagend-b tɩ b kell n gãd b tẽebã la a ra yet-b lame: «Wẽnd Rĩunga pʋgẽ pa kẽede tɩ f pa reng n yãe toog ye.» ²³ B kõo Tigeng fãa a kãsem-dãmba. La b maana pʋʋsg sẽn naag ne no-loeere, n yaool n dɩk-ba n gũnug ne Soaala b sẽn teeg a soabã. ²⁴ B sãaga Pisidi n ta Pãnfili, ²⁵ b moona Koe-nooga Perze n yi be n dig Atali, ²⁶ n le tɩ yi be n kẽ koom koglg n tees Antiyos, b pipi tẽnga. Saam-biisa ra yãagd-b la ne Wẽnd bark pʋʋsgo b tʋʋm sõma wã yĩnga. ²⁷ B sẽn ta Antiyos b boola Tigengã n wilg Wẽnd sẽn sõng-b tɩ b maan bũmb ning fãa, n wilg tẽeba sor sẽn pak bu-zẽmba yĩnga. ²⁸ B kaoosa beelẽ ne karen-biisã.

¹ Neb kẽer n da yi Zɩɩde n wa zãmsd saam-biisã woto: «Y sã n ka kẽ bãong wala a Moyiiz Noora sẽn date, fãagr nan ka ye.» ² Bʋʋr la no-koeemd yika bãmb ne a Pol la a Barnabe sʋka. B waa n yeelame tɩ b na n tʋma a Barnabe ne bãmb neb kẽer tɩ b leb Zerizalɛɛm, Tʋʋm-tʋmdba nengẽ tɩ b welg yellã. ³ Tigenga sõng-b la ne sor zug rɩɩbo tɩ b na n pãrg Fenisi la Samari, la b togsd bu-zẽmba sẽn lebg tẽedba tɩ rẽ noogd saam-biisa sũur al wʋsgo. ⁴ B sẽn ta Zerizalɛɛm, Tigengã, Tʋʋm-tʋmdba la nin-kẽemsã, reeg-b la neere la bãmb me togsa b sẽn maan bũmb ning ne Wẽnd sõngre. ⁵ Farizẽ rãmba neb kẽer da saka tẽebo. Bãmb n yik n yeele tɩ rẽnd b yeel bu-zẽmba tɩ b kẽ bãongo la b reeg a Moyiiz Noorã. ⁶ Tʋʋm-tʋmdba la nin-kẽemsã tigma taab n ges yellã. ⁷ B wẽe no-koeemde n kaoos la a Piyɛr wa n yikame n yeele: «Y miime, m saam-biisi, tɩ sɩngrẽ wã maam la Wẽnd yãk yã. B yãk-m lame tɩ bu-zẽmba wʋm m noorẽ Koe-noogã la b tẽ. ⁸ Wẽnd sẽn ne ninsaal sũuri kõo kaset tɩ b ka bas-b kɛɛng ye: b sika a Vʋʋsem Sõngo b zugu wala b sẽn sig tõndã. ⁹ B ka welg-b ne tõnd ye, n pek-b ne tẽeb kũuni. ¹⁰ Yaa bõe tɩ y rat n fɛɛs Wẽnde, bõe tɩ y rat n zɩlg karen-biisã zɩɩbo, d yaab rãmb la tõnd mens sẽn ka tõog n tʋke? ¹¹ Ad-y yaa Krista maasmẽ la tõndo, wala bãmba, tẽed fãagre.» ¹² Zãma wã yɩɩ sɩɩ. B le kelga a Barnabe ne a Pol sẽn maan wẽnd makr la yel-bãn niynsi ne Wẽnd sõngre, bu-zẽmba sʋka. ¹³ B sẽn gom n sɛ la a Zak sẽn yik n yeele: «Kelg-y ma, m saam-biisi; ¹⁴ a Simeõ wilg-y lame Wẽnd sẽn tʋlg al sɩngrẽ n sʋk buud sẽn na yɩ b rẽnna. ¹⁵ ‹La rẽ me n be bãngdba sebrẽ: ¹⁶ M na n lɛɛg n waame m na n yika a Daviid ro-wãoongo m na n yika a raboogo; sẽn lʋɩ wã na n le yalsa yĩngri, ¹⁷ woto la sẽn ket-ba na n bao Soaalã, la na n yɩɩ boto me ne bu-zẽmb niyns m sẽn welg toore: yaa Soaala n yeele, ¹⁸ bãmb n yals rẽ al zamaan woko.› ¹⁹ Yaa rẽnd me yĩnga la ma me tagsda tɩ b ra nams bu-zẽmb niyns sẽn lebg tẽedbã ye. ²⁰ B kos-b bala tɩ b vẽ ne maanda bũmbu, ne yoobo, ne gɩf la zɩɩm. ²¹ Rẽ wã yaa vẽeneg ne ba tɩ yaa al daar zãra la a Moyiiz Noora tar karen-saamb tẽng fãa pʋgẽ t’a karemd-a noora pʋʋsg rotẽ, sibr daar fãa.» ²² Tʋʋm-tʋmdba, nin-kẽemsã la Tigenga gill zemsa taaba n yãk bãmb neb kẽere n tum-b Antiyos ne a Pol la a Barnabe. Yɩ-la a Zɩɩd, b sẽn boond t’a Barsabas la a Silas, neb sẽn da ya sʋk neba. ²³ Ad sebr ning b sẽn ning b nugẽ: «Tʋʋm-tʋmdba la nin-kẽemsã, yãmb saam-biisi, n toond pʋʋsem saam-biis niyns sẽn be-b Antiyos, Siri la Silisi, bu-zẽmba tẽn-peelmẽ. ²⁴ D wʋmame tɩ neb n yi ka n wa y nengẽ la tõnd yaool n ka tʋm-b ye, la b waa n gomame n yɛɛs yã la b kalem yɛlã y yamẽ. ²⁵ Dẽ me la d zĩnd ne taaba n zems taaba n tũus neba n tʋm-b yãmb nengẽ ne d zo-rãmb a Barnabe la a Pol, ²⁶ neb sẽn dɩk b vɩɩm zãnga n kõ Soaala Zezi Krista. ²⁷ D tʋm-y-la a Zɩɩd la a Silas la b na togs-y ne noore sẽn be sebra pʋga. ²⁸ Tõnd naaga a Vʋʋsem Sõng n yalse tɩ d ka na n zɩlg-y zɩɩb a to n zʋʋg sẽn pak bala ²⁹ tɩ y vẽ ne maand nemdo, ne zɩɩm, ne gɩfo la ne yoobo. Modg-y n gũus-y ne rẽ. Wẽnd na taas!» ³⁰ B sẽn pʋʋs taaba n sɛ, sẽn tʋm b rãmba looga Antiyos. B sẽn ta bal la b sẽn tigim tẽedbã n kɩs-b sebrã. ³¹ B reeg-a lame n karem la b sũur yɩɩ noog t’a waa n kenga b raoodo. ³² A Zɩɩd ne a Silas ra yaa bãngdba, bãmb me goma ne saam-biisã n kaoos n le keng b sũya. ³³ Dasem sẽn maan a wãna, saam-biisa lebs-b la sẽn tʋm-ba nengẽ ne laafi toaala. [ ³⁴ A Silas yẽ zãgsame t’a kõn loog ye.] ³⁵ Sã n ya a Pol ne a Barnabe, bãmb me paa Antiyos. B ra naaga neb wʋsgo n zãmsdẽ la b moon kiba-noogã, Soaala Koe-noogã. ³⁶ Sẽn yɩ bilf dẽ poore, a Pol yeela a Barnabe: «D leb n kaag saam-biisã tẽns niyns d sẽn zoe n moon Soaala koɛɛgã n ges b tũudma sẽn be zĩig ninga.» ³⁷ A Barnabe da ratame t’a Zã, b sẽn boond a soab t’a Mark, tũ-ba. ³⁸ A Pol da pa rat t’a tũ ye, tɩ Pãnfili, a ra lɛɛg n bas-b lame la a ka naag bãmb n tʋm ye. ³⁹ Waa n lebga zabre, tɩ b na n kong n welg taaba. A Barnabe ne a Mark kẽe koglg n tees Sɩpr. ⁴⁰ A Pol me looga ne a Silas la b saam-biisa rengame n yõk Soaala sɛɛg b yĩnga. ⁴¹ A Pol pɩʋʋga Siri la Silisi, n maneg n zĩndig Tigengu.

¹ Dẽ poore a taa Derbe la Listr. Karen-biig a ye n da be be n boond t’a Timote. A ma yaa Zʋɩf poak sẽn sak tẽebo la a ba yaa Grɛk. ² Listr la Ikoniyom saam-biisa ra gomda a yell ne pẽgre. ³ Dẽ me la a Pol yeel t’a na n lebga a tũud-n-taaga la a kẽes-a-la bãongo tɩ Zʋɩf rãmb da bee be la b ra miime t’a Timote ba yaa bu-zẽna. ⁴ B sẽn ta tẽng ning fãa b ra wilgda Tʋʋm-tʋmdba la nin-kẽemsa sebrã n sagennẽ tɩ b modg n tũ. ⁵ Tigeng fãa pʋgẽ tẽeba ra kɩɩda yẽgna la tẽedba sõor da paasda beoog sẽn vẽege. ⁶ B saaga Frizi tẽn-peelem la Galat rãmb tẽnga. B ka paam a Vʋʋsem Sõng sore n moon Koe-nooga Azi tẽng ye. ⁷ B waa n taa Mizi sɛtmẽ, n tʋlg n kẽ Bitini la a Vʋʋsem Sõng ka pak sor ye. ⁸ Woto wã b pɩʋʋga Mizi n lɛɛg n sig Troas. ⁹ Yʋng sẽn ta, a Pol zãmsame. A yãenda Masedoan ned a ye, t’a yɛs yĩngr n kot-a: «Tũ Masedoan, wa fãag-do!» ¹⁰ Likra poore, d tʋlgame n ta Masedoan, tɩ d da kõ-la d mens yam tɩ Wẽnd n boond tõndo Koe-nooga yĩnga. ¹¹ D sẽn kẽ koglg Troas d teesa Samotras. Vẽkembeoogo d teesa Neyapolis, ¹² d yii be n dig Filip tẽnga. Yaa tẽn kãseng Masedoan tẽnsa fãa sʋka la Rom dãmb n da waa n kẽed-a. D maana rasem a wãn tẽn kãng pʋgẽ, ¹³ la vʋʋsg daare d yii tẽnga kɛɛnga; kʋɩlg n da be be, la yaa kʋɩlga noor la b ra yãk pʋʋsg zĩiga. D zĩndame la d yãenda koɛɛg n kõ pagba sẽn da tigma. ¹⁴ Bãmb nin-yend n da kelgd neere: a yʋʋra la a Lidi, a ra koosda monom Tiyatir pʋgẽ, a ra waoogda Wẽnde; Wẽnd kõ-a-la vẽenegre la a Pol karengã kɛla a sũurẽ. ¹⁵ Yẽ ne a zak rãmb sẽn deeg soobo, a kos-d la woto: «Y sã n get-m wa Soaala neda, bɩ y wa zĩnd m zakẽ,» la yɩɩ wala modgre. ¹⁶ D waa n dabda pʋʋsg daar a yembre, n seg yem-pog-bil a ye sẽn da bʋgd bagre. A bãgra ra kõta a zu-soaben-dãmba ligd wʋsgo. ¹⁷ A Sɩngame n pʋgd tõnd ne a Pol la a gomda: «Nin-bãmba yaa Yĩngr Wẽnda tʋʋm-tʋmdba, yaa fãagra sor la b wilgd-y.» ¹⁸ A pʋg-d la woto rasem a wãna. A Pol waa n yɛɛme n wẽneg n yeele: «A Zezi Krista yʋʋr yĩnga, m kõt-f la noore, Sʋtãana, tɩ f yi la f bas pagã.» La a sɩd wẽneg n yiime n bas-a. ¹⁹ A zu-soaben-dãmba sẽn mik tɩ b rɩɩba sor menemame, b tɩ yõka a Pol la a Silas n tall-ba n taas tẽnga rãmb sɛk zĩigẽ, bʋ-kaoodb taoore. ²⁰ B yeela tẽnga taoor dãmba: «Nin-bãmba waa n dãmbda tẽngã, yaa Zʋɩf rãmba. ²¹ B wata ne noe tõnd Rom dãmba sẽn ka tõe n deeg la d tũ ye.» ²² Neba yika ne-ba. Taoor dãmba kɩtame tɩ b yees b futã la b pãb-b-la ne kaase. ²³ B Pãb-b la sõmbo n yaool n kẽes-b roogo. B kosa ro-gũudã t’a maan a ni. ²⁴ Ro-gũuda me sẽn wʋm dẽ, a kẽes-b la pʋgẽ doogã n loe b nao wã ne rabõanga. ²⁵ Yʋn-sʋka, a Pol ne a Silas ra pʋʋsdame la b pẽgd Wẽnd ne yɩɩla. ²⁶ Tẽnga waa n yika vugr bal n tar miuungu tɩ ya wa rooga na n lukame. Kʋɩlensa fãa pagsa vugri tɩ bãeensa sẽn da sog bi-beesa foos n dʋʋg. ²⁷ Ro-gũuda nekame n yãe tɩ kʋɩlensa pagsame t’a wõog a sʋʋga n na n kʋ a menga t’a ra tẽedame tɩ bi-beesa fãa loogame. ²⁸ A Pol tãs-a lame: «Da pogl f meng ye tɩ tõnd fãa keta ka.» ²⁹ Ro-gũuda kosame tɩ b widg bugum t’a zoetẽ la a rigda n tɩ wõgemd a Pol ne a Silas taoore. ³⁰ A yiis-b la roogo la a yeel-b lame: «Soaala, yaa bõe la m tog n maan n fãag m sɩɩga?» ³¹ B leok-a lame: «Tẽ Soaal a Zezi tɩ foo ne f zaka na paam fãagre.» ³² B wilg-a-la Soaala Koe-noogã, yẽ ne a zak rãmba. ³³ Yɩɩ zĩig pʋgẽ bala la ne yʋngo la a peeg-ba n tɩ peks b noadã la yẽ ne a zaka rãmb fãa deega soobo. ³⁴ A tall-b lame n kẽes a zakẽ, n bao rɩɩb n kõ-ba la a naaga a zak rãmb n kɩdem sũ-noogo, b sẽn lebg tẽedba yĩnga. ³⁵ Zĩig sẽn yẽege, tẽnga taoor dãmb tʋma rapoy-bi tɩ b wa yeel ro-gũuda: «Yiis-y nin-bãmba roogo.» ³⁶ Ro-gũuda me taasa a Pol b goama: «Tẽnga taoor dãmb tʋmame tɩ b wa yeel tɩ b bas-y tɩ y looge. Dẽnd yĩnga yi-y n loog-y.» ³⁷ Dẽ me la a Pol yeel Dapoy-bi wã: «B kɩtame tɩ b pãb tõnd neba fãa taoore, tõnd ne d sẽn ya Rom tẽngen-bi-taase; b kẽesa tõnd bi-bees roogẽ. La marsã b ratame n soos n yiis-du! Bada! B mens wa b toore n yiis-du.» ³⁸ Dapoy-bi wã taasa tẽnga taoor dãmb b goama. B sẽn wʋm t’a Pol ne a Silas yaa tẽngen-bi-taar ne Rom dãmba, b yɛɛsame. ³⁹ Tẽnga taoor dãmb n sɩd wa b toore n kos-b tɩ b maan yãgbo la b yi tẽngã. ⁴⁰ B sẽn yi roogo a Pol ne a Silas leba a Lidi zakẽ. B le sega saam-biisa be n le keng b tẽeb n yaool n loog.

¹ B kẽe Amfipolis n sãag Apoloni n ta Tesalonik. Beelẽ Zʋɩf rãmba ra tara b pʋʋsg roogo. ² La wala a sẽn maand dasem kam, yaa beelẽ la a Pol tɩ yãend-ba. Vʋʋsga raar tong taaba a tã b sẽn gãneg b sõasgã sebr sõng zugu. ³ A Pol ra gomda ne-ba n wilgd-b tɩ Krista ra tog n namsame la b vʋʋg kɩɩms sʋka, la a ra yetame: «Krista la a Zezi, m sẽn moond a soabã.» ⁴ Bãmb sʋka neb kẽer paamame n yi b likẽ n lebg tũud-n-taar ne a Pol la a Silas. La tõe n paas a Zʋɩf rãmb kẽed-paalse la bu-zẽmba la nin-bɛd pagb ka tɛka. ⁵ Zʋɩf rãmba yika sũ-kiiri, n kẽ raagẽ wã n wool nin-yaalse sẽn gũm taaba n tar bʋʋr tẽnga pʋga. B ta a Zason yiri n baood a Pol la a Silas n na kẽes-b bʋʋd tẽnga soaalba taoore. ⁶ B ka yãend-b be ye la b kora a Zason la saam-biis kẽer n ta kombɛɛmba nengẽ la b kaasdẽ: «Nin-bãmba n leebd ãndũni rãmba zutu, la ad-b sẽn ta ka me. ⁷ La ad-a Zason sẽn deeg-b a zakẽ. Nin-bãmba tõdgda Rom naaba noore, n moonẽ tɩ dĩm a to n be: a Zezi.» ⁸ B bʋʋra yɛɛsa zãma wã la kombɛɛmbã. ⁹ B yeela a Zason la neb a taabã tɩ b wa ne ligdi tɩ b yaool n bas-ba. ¹⁰ Zĩig sẽn sobge, saam-biisa kɩtame t’a Pol ne a Silas loog Bere tẽnga. B sẽn ta be b tɩ kẽe Zʋɩf rãmba pʋʋsg roogẽ. ¹¹ Bãmb da tara zʋg sõngo n yɩɩd Tesalonik rãmbã. B reega Koɛɛga tao-tao. Beoog sẽn vẽeg fãa b ra karemda Sebr Sõngo n get bõe n ka zems a Pol dãmb toagsgẽ. ¹² Bãmb wʋsg saka tẽebo, la bu-zẽmba sʋka, nin-bɛd pagba, la rap me. ¹³ Tesalonik Zʋɩf rãmba sẽn wʋm t’a Pol moona Bere tẽnga Wẽnd koɛɛgã b le waa n dãmba nebã. ¹⁴ Dẽ la Saam-biisa me kɩt t’a Pol yi n tees mogrã. A Silas la a Timote yaool n paa be. ¹⁵ Sẽn da yãagd-ba a Pol yãag-a lame n ta Atɛn n yaool n lɛɛg ne a Pol koɛɛg, a Silas la a Timote yĩnga: tɩ b bʋʋg-a be tao tao. ¹⁶ A Pol ra gũuda a Silas la a Timote Atɛn la a sũura ra kɛɛda wa bugum, a sẽn mik tɩ tẽnga pida ne wẽn-naandse. ¹⁷ Woto a sõasga ra welga sags a yiibu. A Ra sõsda pʋʋsga roogẽ ne Zʋɩf rãmba la sẽn da tũud-b Wẽnde; n sõsd tẽnga rãmb sɛka zĩigẽ ne sẽn wat-b be. ¹⁸ Neb sẽn da karem n sik meng n da mii n wat a nengẽ, wala bãng sẽn noom f yĩnga rãmba, la kũum dabeem ka tar-m dãmba. Bãmb kẽer da sokdame: «Luiin-bag kãnga yetame tɩ bõe?» Tɩ kẽer me yetẽ: «Ad-y yaa bu-zẽnd wẽnd dãmb sor la a wilgda.» La rẽ me yaa b sẽn da wʋmd Zezi yʋʋre la kũum vʋʋgre. ¹⁹ B talla a Pol n zãag bilfu n sokd-a: «D tõeeme n bãng f zãms paalsa bɩ? ²⁰ Fo sẽn leokd tõnd koees niynsa yaa koe-sãamse, dẽ la d dat n wʋm b võore.» ²¹ Atɛn tẽng rãmba la sãamba sẽn waa n nok-bã sɩd da ka tar tʋʋmd a to n zʋʋg kibar paalg yelgre bɩ kelgr ye. ²² A Pol yik n yalsa yĩngr bãmb sʋka n yeele: «Atɛn dãmba, m neeme tɩ y yaa neb sẽn mi wẽnd waoogre n yɩɩd buuda taaba. ²³ M saagame n gilg y tẽngã, la m gesa neere y sẽn me y wẽnd dãmba yĩnga. M tol n yãenda maan-kugri b sẽn gʋls a zug woto: ‹D sẽn ka mi wẽnd ninga rẽnna›. Ad-y yaa yãmb sẽn waoogd n yaool n ka mi a soaba la mam wat n na n wilg yãmba. ²⁴ Wẽnd ning sẽn naana dũnia la bũmb ning fãa sẽn be a pʋgẽ, yĩngr la tẽng Soaala, ad-y b ka kẽed ninsaal sẽn me rot niynsa ye. ²⁵ Ka ninsaal nug n na n yiis bũmb n kõ-ba, wala bũmb n paoog-b tɩ b rat ye, tɩ yaa bãmb n kõt vɩɩm, vʋʋsem la paoong fãa. ²⁶ B tʋlgame tɩ ninsaalba fãa sẽn be tẽng zugã yɩ yẽgr a ye wila. B yalsa bũmb fãa a zĩigẽ, n yals bũmb fãa a toaaga la a wakato. ²⁷ La b raaba yaa b fãa bao la b paam Wẽnd belem kaseto, wala b sẽn tõe, ba sã n na yɩɩ wala ne bablgo, tɩ Wẽnd pa zãr ne tõndo, b pa zãr ne ned kam fãa ye. ²⁸ Sɩda yaa bãmb maasmẽ la d vɩ la d kẽnda la d yaa d sẽn yalã. Pʋs n yaa woto la yãmb neb kẽer yeel yã: ‹D yaa buud a ye ne Bãmba.› ²⁹ Tõnd ne Wẽnd sã n ya buud a ye, d ka tog n mams-ba wala sãnem, wanzurfu bɩ kugr, ninsaal minim la a bãngr sẽn yag ye. ³⁰ Wẽnd basa sẽn looga taale, bãngr kaoolga taale, n yik marsã n na n wilg ninsaalba, b sẽn ya zĩig ning fãa neba, tɩ b teem zʋgo. ³¹ B bãng tɩ b yãka raare n na n kao ne zemsgo ninsaalba fãa bʋʋdo. B yãka bʋ-kaoodã, la kaset ning b sẽn kõt tɩ bãmb n yãk yẽ soabã, yaa b sẽn vʋʋg-a kɩɩms sʋkã.» ³² Atɛn dãmba sẽn wʋm t’a Pol gomd sẽn ki vʋʋgr yellã, kẽer pusga laado. Kẽer me yeelame: «D na kelg gomd kãnga nindaare.» ³³ Boto me la a Pol paam n yi b sʋka. ³⁴ Neb kẽer lebga b tũud-n-taase la b saka tẽebo. A Denis zĩnda b sʋka. Pag a ye me n zĩnd be n boond tɩ Damaris. Neba taab me n paase.

¹ Dẽ sẽn looge, a Pol zãaga ne Atɛn n dig Korẽnt. ² A yãenda Zʋɩf a ye be sẽn boond tɩ Akilas, yaa Põ tẽn-peelmẽ neda la a nan waa paalem, yẽnda ne a pag a Prisil. Itali la b yii n wa Korẽnt tɩ dĩm a Klod da kõo Zʋɩf rãmba noore tɩ b yi Rom. A Pol lebga zood ne bãmba, ³ b nug tʋʋmd sẽn da ya tʋʋm yɛnga. Yaa bãmb la a tɩ noke tɩ b naag taab n tʋmnẽ. Yaa pɛɛl sẽn tar n tiid doto la b ra wʋgda. ⁴ Sibr daar fãa a Pol da maanda kareng pʋʋsga roogẽ n na n vẽneg Zʋɩf rãmba la bu-zẽmba. ⁵ A Silas ne a Timote sẽn yi Masedoan n wa tɛka, a Pol tʋʋmda lebga moon Koe-noogã n wilg Zʋɩf rãmbã t’a Zezi la Wẽnd sẽn tʋm a soabã. ⁶ A sẽn mik tɩ b pa rat n kelge la b gomd n tʋʋsda Wẽnde, a Pol fugumda a fut b taoore n yetẽ: «Y kɩɩsga sẽn wãad yãmba taal pa ne yã. Sã n ya maam, taal ka m zug ye la marsã tɛka yaa bu-zẽmba la m na n babse.» ⁷ A Pol yii be n dig a Zustus yiri; nin-kãng ra pʋʋsda Wẽnde la a zaka ra yega ne pʋʋsga roogo. ⁸ Pʋʋsga roog naab ra boondame tɩ Krispus. Yẽnd me saka tẽebo. Korẽnt neba pʋs n yɩɩ wʋsgo sẽn sak tẽeb la b reeg soobo. ⁹ Yʋng a ye Soaala lika a Pol n yeel-a: «Da zoe rabeem ye, da vʋʋs ne Koɛɛga mooneg ye, da sĩnd ye. ¹⁰ M bee ne foo la ned kõn sɩɩs-fo n maan-f wẽng ye, kaalẽ m tẽeda neb wʋsgo m Tigenga yĩnga.» ¹¹ A Pol paa Korẽnt yʋʋmd la kiis a yoobe, n tar Koɛɛga mooneg bala. ¹² A Galiõ sẽn waa n ya Akayi kombere, Zʋɩf rãmba yika wa nin-yɛnga n na n maan zabr ne a Pol. B kẽes-a la bʋʋdo, ¹³ n yetẽ: «Nin-kãnga sagenda neba tɩ b waoog Wẽnd ne waoogr sẽn pa tũud Noorã.» ¹⁴ A Pol sɩngame t’a na n gome la a Galiõ leoka Zʋɩf rãmbã: «M na n kelgẽ-la y koɛɛgã sã da yaẽ la ned bũmb la a sãam yã, bɩ sã n da yaẽ la yel-yood la a maanyã, tɩ rẽ segdame. ¹⁵ La sã n kella no-koɛɛm goam biis poorẽ, bɩ yʋy poorẽ, bɩ y meng Noora poorẽ, yãmb n na bãnge, mam yẽ kõn lʋɩɩs m toog ye.» ¹⁶ A Yiis-b-la bʋʋda zĩigẽ. ¹⁷ B fãa yii n gãda a Sostɛn, pʋʋsga roog naaba, la b sɩnga a pãbr, bʋʋda zak noor bala, t’a Galiõ sɩd sĩnd waa toog ka ye. ¹⁸ A Pol kell n paa rasem a wãn Korẽnt la a waa n basa a saam-biisã n kẽ koglgo, n tees Siri. A Prisil ne a Akilas yãag-a lame. A Pol ra põnga a zug Sẽnkre tɩ pʋleng la a ra pʋlm yã. ¹⁹ B waa n siga Efɛɛz. Beelẽ a welga ne a tũud-n-taasã. A sẽn tɩ kẽ pʋʋsg roogẽ a sõsa ne Zʋɩf rãmba. ²⁰ Bãmb kos-a lame t’a ra yãg loogr ye, t’a ka sak ye. ²¹ B sẽn waa n pʋʋsd Wẽnd na taas la a yeel-b: «M na n lɛɛg n wala y nengẽ, Wẽnd sã n data.» A yii Efɛɛz. ²² A Sẽn sig Sezare, a tɩ pʋʋsa Tigengã n yaool n tees Antiyos. ²³ A maana rasem a wãn beelẽ n le yi n dɩk a sor n digd Galat la Frizi rãmb tẽnga, n kengd karen-biisa tẽebo. ²⁴ Zʋɩf a ye sẽn boond tɩ Apolos, n yit Aleksãndri baobgo, waa Efɛɛz. Yaa ned sẽn da mi goama la ned sẽn da vẽen ne Sebr sõngo. ²⁵ A ra paam n zãmsa sor ning sẽn boond tɩ Soaala sorã la a ra pelga a sũuri n moonẽ la a gomd a Zezi yell tɩ tũud tɩrga, la yaool n ya a Zã soobã la a so yã. ²⁶ A yika pʋʋsga roogẽ n gomd t’a sũur pa kiuusdẽ ye. A Prisil la a Akilas kelga a goama la b peeg-a lame n tɩ vẽneg-a Sora zãnga. ²⁷ A Apolos da rat n kẽnga Akayi, tɩ saam-biisa yeel-a t’a maan dẽ, a maan neere, la b gʋlsa karen-biisa tɩ b reeg-a neere. Sɩda a sẽn ta be, ne Wẽnd sõngre, tẽedba rɩ-la a yõod zembala. ²⁸ A ra leoodame n lubd Zʋɩf rãmbã, neba fãa nifẽ, n wilgd ne Sebr sõngo t’a Zezi la Wẽnd sẽn tʋm a soabã.

¹ A Apolos sẽn waa n be Korẽnt, dẽ t’a Pol saaga tẽns niyns sẽn zao tãmsa zutu n sig Efɛɛz. A mika karen-biis kẽere. ² A yeel-b lame: «Yãmb sẽn sak tẽebã wakato, y paama a Vʋʋsem Sõng bɩ?» Tɩ b leoke: «Tõnd nan ka wʋm meng tɩ b gomd t’a Vʋʋsem Sõng beeme ye.» ³ T’a Pol le sok-ba: «Yãmb sẽn deeg soob ninga la bʋgo?» Tɩ b yeele: «A Zã soobo.» ⁴ Dẽ la a Pol yeel yã: «Yaa sũur tekr soob la a Zã ra kõta la a yet zãma wã tɩ b tẽ ned ninga sẽn na n wa yẽnda poorẽ wã: a Zezi.» ⁵ B sẽn wʋm dẽ b reega soob Soaal a Zezi yʋʋr yĩnga. ⁶ A Pol sẽn tẽeg a nus b zutu la a Vʋʋsem Sõng sẽn sig-ba tɩ b sɩng n wɩlemd bu-zẽn goam la b gomd bãngr goama. ⁷ B ra yaa bãmb piig la a yiibu. ⁸ A Pol tɩ kẽe pʋʋsga roogẽ la kiis a tã sẽn pʋg taaba a ra gomda ne raoodo. A Sõasga ra yaa Arzãn Rĩunga yelle n dat tɩ kẽ b sũurẽ. ⁹ Kẽer n zĩnd be n da pa reegd saglg ye tɩ b sũura ra kɩʋʋlmame. Bãmb dãmb n da sãbsd Wẽnd sorã, neba fãa taoore. A welga ne bãmb dãmba. A sʋka karen-biisã. Beoog-beoog fãa a ra maand-b la kareng a Tiranos karen-doogẽ. ¹⁰ Kell n talla boto yʋʋm a yi la rẽ me la Azi rãmba, Zʋɩf bɩ bu-zẽmba tõog n wʋm Soaala Koɛɛgã. ¹¹ Wẽnd kõ-la a Pol pãng t’a maand wẽnd makr dãmb sẽn da yɩkd pɛlense. ¹² Sã n dɩk peend buud fãa sẽn sɩɩs a Pol n lɛɛg n sɩɩs bãad-dãmba, b bãasa wẽnegd n sãoogame, bɩ Sʋtãamba yit n loogame. ¹³ La ade, Zʋɩf rãmb kẽer me n da saad n sãoogd neba. Bãmb me makame n pʋd Soaala Zezi yʋʋr n na n sãoog Sʋtãan sẽn da kẽ b rãmba. B ra yetame: «M kot-y lame tɩ y yi, Zezi ninga yʋʋr yĩnga, Zezi ning a Pol sẽn gomd a soab yellã!» ¹⁴ Da yaa a Seva kamb a yopoe n da maand woto la a Seva meng ra yaa Zʋɩf rãmb maan-kʋʋd kãsenga. ¹⁵ Sʋtãan a ye lɛɛg n yeel-b lame: «Sã n ya a Zezi, mam mii bãmba, Sã n ya a Pol, mam mii yẽ me. La yãmba, yãmb la a bõe rãmba?» ¹⁶ La Sʋtãana yiime n wudg n kẽ bãmba, n lubd-ba, a yembr-yembre, n pogend-ba tɩ b na n zoe n yi yɩnga, b bɩlma, la ne sãmpoaga. ¹⁷ Efɛɛz rãmb fãa, Zʋɩf bɩ bu-zẽmb wʋma yellã. Rabeem yõka b fãa, la Soaala Zezi yʋʋr paama pẽgre. ¹⁸ Sẽn sak-b tẽeba waa zembala n deeg b kongre la b wilg bãmb me sẽn da maande. ¹⁹ Sẽn da zãms-b rabaar buud toor toore n tʋmnẽ n yɩkd neba pɛlensã, waa ne b rabaara sɛba la b yõog-b la neba fãa taoore. B geela b sɛba yõodo. Seka neb tus pis nu daar a ye tʋʋmd yaoodo. ²⁰ Ad-y Soaala Koe-nooga ra paamda moonego la a ra kɩɩda yẽgen sẽn tar pãnga. ²¹ Dẽ loogr poore a Pol ninga a yamẽ t’a na n le tũu Masedoan la Akayi n leb Zerizalɛɛm. A ra yetame: «M sã n ta be na yɩ tɩlɛ tɩ m ta Rom me.» ²² A tʋma Masedoan a sõangdba a yiibu, a Timote la a Erast; yẽ meng yaool n paa rasem a wãn Azi tẽn-peelmẽ. ²³ Wakat kãnga, Sora poorẽ, tẽnga wa n dãmbame. ²⁴ Ned a ye n da ya yõaka n boond tɩ Demetriyus. A ra yõgda ne wanzurfu a Artemis wẽnd doto. Woto a ra sõngda tẽnga rãmb wʋsgo ne nug tʋʋmde. ²⁵ A tigsa yẽ sẽn kõ b rãmb tʋʋmna la neba a taab sẽn ya yõgs wa yẽnda n yeel-ba: «M zo-rãmba, tõnd sẽn vɩ tɩ d vɩɩma sakdẽ wã, y miime tɩ rẽ bela d tʋʋmnẽ wã. ²⁶ La ade, wala y sẽn ne la y sẽn wʋmde Azi tẽn-peelma tõre, a Pol ne a saglsã woola neb ka tɛk a poorẽ sẽn maand tɩ wẽnd sẽn dõog ne nug, ka tõe n yɩ wẽnd ye. ²⁷ Woto tõeeme tɩ b pa le ges tõnd tʋʋmna wa bũmb sẽn be võor ye, tõeeme tɩ b wa ges tõnd wẽnd poaka Artemis meng rooga wa zaalem, la rẽ fãa wat n baasa ne paoore, wẽnd ning Azi la dũni wã tõr sẽn waoogda paoore.» ²⁸ Neba sẽn wʋm dẽ, b sũur puuga wʋsgo tɩ b tar kaasgo: «A Artemis, Efɛɛz rãmba wẽnda, yaa wẽn kãsenga!» ²⁹ Waa n lebga tẽnga tõr n wulumdi. Fãa kaoogame n digd reema zĩigẽ al tɩ Masedoan rãmba, a Pol so-toaka neba, a Gayus ne a Aristark, kong n pʋg-ba. ³⁰ A Pol da ratame n tɩ yãend buudã la karen-biisa ka sak ye. ³¹ Azi rãmb neb kẽer sẽn da ya a zo-rãmba, kos-a lame t’a ra koos a yõor ye, la a ra tag reema zĩigẽ ye. ³² Bãmb dãmb da yetame tɩ wãnda, tɩ bãmb dãmb yet tɩ woto. Tẽnga taoor dãmb mens ra ka mi b tigsga võor ye. ³³ Zʋɩf rãmba da ratame t’a Aleksãndr yɩ b norɛɛsa, n yiisa sʋka. A kabsa ne nug n na n gome ne nebã. ³⁴ La b sẽn bãng tɩ yaa Zʋɩf, b fãa lagma taab n kelemd wa nin-yende, na ta wakat a yiib pʋgẽ: «A Artemis, Efɛɛz rãmb wẽn poaka, yaa wẽn kãsenga!» ³⁵ Bʋʋda taoor soab waa n tõogame tɩ b bas bʋʋre t’a yeele: «Efɛɛz rãmba, ãnda be dũni wã pʋga n ka mi tɩ tẽn kãnga n gũud wẽn kãsenga Artemis doogã la a menga nin-naand sẽn yi yĩngr n sigã? ³⁶ No-koeemd sẽn ka be rẽ poorẽ wã, y tog n zĩnda sɩɩ n da wa maan kegr ye. ³⁷ Yãmb sẽn tall-b rãmb n wa ka wã, b ka tʋʋs yãmb wẽndã, b ka paooga ye. ³⁸ A Demetriyus ne a tʋmd-n-taaga sã n tar koɛɛg ne ba, bʋʋd daar beeme, bʋ-kaoodb beeme, b bool-b badaare. ³⁹ Koɛɛg a to sã n beẽ n dat welgre, d tigsga sẽn tar raarã, d na ges rẽnna. ⁴⁰ Bũmb ning sẽn maan dũnna wã tõeeme tɩ b yeel tɩ yaa tõnd n dãmbd tẽngã, tɩ d meng yaool n ka tar rũnna gũm taaba võor ye.» ⁴¹ A sẽn leok woto n sɛ, b fãa sẽegame.

¹ Bʋʋra sẽn yõke, a Pol boola karen-biisã, n sagl-ba, n pʋʋs-b wẽnd na taas la a looga Masedoan. ² A Pɩʋʋga tẽngã n kengd tẽedbã la a rigd Grɛs Tẽn-peelmẽ. ³ Kiis a tãab la b maan be. Segame t’a sẽn waa n dat n kẽ koglg n dig Siri la a Pol sẽn wʋm tɩ Zʋɩf rãmba gãnega bẽdg a yĩnga. Dẽ me la a yeel t’a na n gõdg n leba Masedoan. ⁴ A tũud-n-taas yi-la a Sopatros, a Pirus biiga, Bere tẽng neda; n paas a Aristark ne a Sekundus, Tesalonik rãmba; n paas a Gayus, Doberɛs neda, n paas a Timote la a Tisik, la a Trofim, Azi rãmba. ⁵ Bãmb denga taoore n tɩ gũ-d Troas. ⁶ Tõnd mens kẽe koglg n yi komber a Filip tẽnga. Bur ka lobd bɩlla poore, rasem a nu pʋgẽ, d tɩ paam-b la Troas la bee d paa rasem a yopoe. ⁷ Sibr daar zaabre, d da tigma taab bura kaoob yĩnga. A Pol sẽn da rat n loog vẽkẽmbeooga ra sõsda ne-ba. A gomame n tãag yʋn-sʋka. ⁸ B ra widga fitils rãmb wʋsgo yĩngr doog ning d sẽn da tigma. ⁹ Bi-bɩɩg a ye sẽn boond tɩ Eutik da zĩi rooga võorẽ. Gõeem sẽn ya gõeem meng wa n lub-a lame, dẽ t’a Pol ket n maanda a karengo. Gõeema yĩnga a yii rooga roglem-roglem a tãab soaba n lʋɩ tẽnga. B sẽn zẽk-a, b mikame tɩ yaa kũum. ¹⁰ A Pol sigame n zõond n ges-a, n dɩk-a a nusẽ la a yeelame: «Tõog-y y mense t’a nan pa ki ye.» ¹¹ A leba yĩngri n tɩ kao burã n dɩ; a Gomame tɩ zĩig wa yẽege. Dẽ marsã la a yaool n dɩk a sore. ¹² B talla bi-bɩɩga vɩɩga n tɩ kẽes a zakẽ la zaka rãmb sũ-noog ka yɩ bilfr ye. ¹³ Tõnd denga taoore. D teesa d koglga Asos tɩ be la d da tog n dɩk a Pol n kẽes koglga pʋga wala a meng sẽn da kaoole. ¹⁴ A sẽn paam tõnd Asos d kẽes-a la koglga pʋga n dig Mitilɛn. ¹⁵ D sẽn yi be d taa Kio vẽkembeoogo. Da-yɩten-daare d looga Samos n tek n yaas Trogiliõ la raar ninga sẽn pʋga wã beoog vẽk-d la Milɛt. ¹⁶ A Pol da yeelame t’a ka na n yeg kooma noore n pẽneg Efɛɛz t’a wat n dat n bʋdgame n ta Azi, tɩ kẽnda tadge. A ra yãgdame n dat n kẽ Zerizalɛɛm, Wẽnd sã n sake, Tigsga kibs raare. ¹⁷ A Pol zĩnda Milɛt n tʋm tɩ b bool Efɛɛz Tigenga nin-kẽemsã. ¹⁸ B sẽn ta, a yeel-b lame: «Yãmb fãa miime, al pipi raarã, m naoor sẽn tag Azi tẽng tɛka, m manesem ne yãmb sẽn yɩ a soaba. ¹⁹ M tʋma Soaala tʋʋma ne yam sulgri, ne nintãm, ne namsg ning Zʋɩf rãmba sẽn nams maam ne b no-baoorã. ²⁰ Y mii tɩ m baoo sẽn wat ne yõod yãmb yĩnga. M pa tar n leb poorẽ n mong-y y sẽn da tog n wʋmb bũmb ninga bɩ y sẽn da tog n zãms bũmb ninga, y zagsẽ bɩ y sɛk zĩisẽ ye. ²¹ D kosa Zʋɩf rãmbã wala bu-zẽmbã, tɩ b teem zʋg Wẽnd taoore la b tẽ Soaal a Zezi Krista. ²² Marsã yaa Wẽnd Vʋʋsem n tusd maam tɩ m dabd Zerizalɛɛm la m ka mi yell ning sẽn na n pak-m be ye. ²³ M sẽn yaool n wʋm Wẽnd nengẽ n ta marsã yaa tɩ m sẽn ta tẽng ning fãa yaa naong la pɛt bal n gũud maam. ²⁴ Sã n ya ne maam, m yaool n ka get m vɩɩma wa bũmb sẽn tar yõod ye. Sẽn pak maam yaa m vɩɩma, yaa m tʋʋmda baas neere, tʋʋmd ning Soaala Zezi sẽn kõ-ma. La b tʋʋmna yaa m yɩ Wẽnd kũun kãsenga kaset soaba, b Koe-nooga moanda. ²⁵ Marsã, ad-m sẽn mi bũmb ninga: y kõn le yãend m neng ye; yãmb fãa yaool n yãend-m la y sʋka tɩ m moond Wẽnnaam Rĩunga Koe-noogo. ²⁶ Yaa rẽ yĩng la m tõe n togs, y fãa gill taoore: m zug roka ne yãmb ned kam fãa vɩɩm sãoong taale. ²⁷ M sɩd mao ne bũmb fãa; m wilg-y-la Wẽnd sẽn dat tɩ yɛla fãa pids to-to. ²⁸ Bɩ yãmb mens maan gũusgu la y gũ Wẽnd bãgr ning a Vʋʋsem Sõng sẽn gũnug yãmbã. Kɩɩm-y bãgr ning paoong sẽn tũ ne Biiga zɩɩma raagre. ²⁹ M sẽn mi yaa tɩ m loogra poore digd-n-yĩidsi sẽn ya toose, ka na n bas bãgra ye. ³⁰ M miime tɩ m loogr poore, neb n na n yik yãmb sʋka, n gom n tudug karen-biisã tɩ b yi tõnd poorẽ n tɩ kẽ bãmba. ³¹ Dẽ la m kot-y tɩ y maan gũusgu la y tẽeg tɩ yʋʋm a tãab tõre, wĩndg la yʋngo m yõka yãbre n wilg ned kam fãa a kongre. ³² Marsã m gũnugda yãmb ne Wẽnd la ne b Gomda kũuni: Gomd sẽn tõe tɩ rooga me n yalse, la a tõe tɩ Wẽnd sẽn welg b rãmb toora rɩ b yõodo. ³³ M ka tʋlg yãmb ned ba a ye wanzurf bɩ a sãnem, bɩ a fuug ye. ³⁴ Ad-y yaa m nus bãmba m kõ-m tɩ m yiis m meng la m tũud-n-taasa kom. ³⁵ M kõ-y la kaset toor-toore, tɩ d tog n saka toogo n tõog n yols d taaba nimbãanega la m yeel-y lame tɩ y tẽeg Soaala meng sẽn yeele: sẽn kõt-a sũ-noog yɩɩda sẽn deegd-a.» ³⁶ A sẽn gom woto, a yĩgimdame n pʋʋs ne nin-kẽemsã. ³⁷ B fãa ninga nintãm la b gãda a Pol n tara yubla mogsgo. ³⁸ La bũmb sẽn sãam b sũur wʋsgo, yaa Pol sẽn yeel-ba: y kõn le yãend m neng ye. Bãmb n yãag-a n tãag kooma koglgo.

¹ D sẽn paam n fãagd d meng nin-kẽemsa nusẽ, d teesa Kos tɩrga. Vẽkembeoogo d taa Rod la Patara. ² Be d paama koom koglg sẽn dabd Fenisi. D kẽeme n looge. ³ D yãenda Sɩpr yɩɩga tɩ d bas-a d goabga, n tees Siri la yaa Tir la d sig yã. Koglga ra tog n yalsa be n sik a zɩɩbo. ⁴ D mika karen-biis beelẽ la rasem a yopoe la d paa Tir. A Vʋʋsem Sõng vẽnega karen-biisa tɩ b yeel a Pol t’a ra kẽng Zerizalɛɛm ye. ⁵ Loogra sẽn ta d baas n loogame. B fãa ra yãagd-d lame, pagb la kamb fãa. D sẽn yi tẽngã d fãa yĩgimda mogra noor n pʋʋse. ⁶ D sẽn pʋʋs taaba, d kẽe koglgã. Bãmb me leba b tẽngẽ. ⁷ D sẽn yi Tir d baasa d kẽndã Ptolemayis. D pʋʋsa beelẽ saam-biisã la d paa ne b raar a ye. ⁸ Vẽkembeoogo d yiime n dig Sezare. D siga a Filip zakẽ; a ra moonda Koɛɛga be la a ra yaa Sõangdb a yopoe wã nin-yende. ⁹ A ra tara kom-pugli a naas sẽn nan pa kul sɩdb ye la sẽn da gomd bãngr goama. ¹⁰ D paa be rasem a wãna la bãngd sẽn boond tɩ Agabus yii Zɩɩde n wa. ¹¹ A bʋʋga tõnd a Filip zakẽ la a rɩka a Pol sẽbdgã n kɩt tɩ b loe a karse la a nusi la a gomda: «Ad-a Vʋʋsem Sõng sẽn wilgdi: Rao ninga sẽn soa sẽbdg kãnga bãng tɩ Zʋɩf rãmba na n sẽb-a la woto Zerizalɛɛm n bas-a bu-zẽmba nusẽ.» ¹² D sẽn wʋm dẽ, d naaga ne tẽnga rãmb n bõs a Pol t’a ra keng Zerizalɛɛm ye. ¹³ La ad-a sẽn leok-do: «Yaa bõe tɩ y yãbd n sãamd m sũuri? Ad-y Soaal a Zezi yʋʋr yĩnga m sakda kũum Zerizalɛɛm tɩ b pa gomda bas tɩ b sẽb-m ye.» ¹⁴ D sẽn mik tɩ d gomda vɩʋʋgẽ d basame n kong n yetẽ: «Bɩ Wẽnd maan b sẽn date.» ¹⁵ Dẽ poore, d sẽn waa n segl n sɛ, d dʋ Zerizalɛɛm. ¹⁶ Sezare karen-biis n yãag-do. B tɩ kẽes-d la a Mnason zakẽ, Sɩpr daoa la al sɩngrẽ karen-biiga. ¹⁷ D sẽn ta Zerizalɛɛm la saam-biisa sẽn deeg-d ne sũ-noogo. ¹⁸ Daar ning sẽn pʋgã, a Pol tũ-d lame n kẽng a Zak yiri tɩ yaa be la nin-kẽemsa tigim taaba. ¹⁹ D sẽn pʋʋs taab n sɛ, a Pol sɩngame n wilgd bal-bale a tʋʋmda sẽn yɩ a soab ne Wẽnd sõngr bu-zẽmba sʋka. ²⁰ B sẽn wʋme b pẽga Wẽnde. B yeelame: «Gese, m saam-biiga, yaa Zʋɩf rãmb tus ka tɛka n lebg karen-biisi n yaool n da yaa a Moyiiz Noora tũudb akɩka. ²¹ La b wʋmame tɩ b gomd tɩ sã n ya fo nengẽ wã, fo tusda Zʋɩf rãmba sẽn vɩb ne bu-zẽmbã tɩ b lak ne a Moyiiz, n sagend-b tɩ b ra le kẽes b kamb bãongo la b ra le tũ rog-n-mika ye. ²² Bõe la d na maane? Yaa vẽnega tɩ zãma na n sũu taab n wa. F waoonga ka tõe n ling b ye. ²³ Maan d sẽn na n yeel-fã: Neb a naase n pʋlme n be ka. ²⁴ Tall-ba n looge, tɩ naag-ba n yɩlg f menga la sõng-b ne ligd ning b sẽn na n kɩs n paam b zuta põngre. Woto neba fãa na bãng tɩ b sẽn leok bũmb ning f poorẽ wã, ka sɩd ye, b na bãng tɩ fo me vɩɩma yaa ned sẽn tũud Noora vɩɩm. ²⁵ Sã n ya bu-zẽmba sẽn sak-b tẽebã, d taas-b-la sẽn be nin-kẽemsa sebr pʋga: vẽ-y ne maand nemd, ne zɩɩm, ne gɩfo, ne yoobo.» ²⁶ Vẽkembeoogo, a Pol sɩd looga ne neb a naasã n na n naag bãmb n yɩlge. A kẽe wẽnd doogẽ wã n wilg sẽn ya daar ning la yɩlgra na n baase tɩ b tall b kũuna n wa. ²⁷ Rasem a yopoe yɩlgra ra sɛɛme la bala. Zʋɩf rãmb sẽn yit Azi n yaool n wa yãend-a wẽnd doogẽ wã, n dãmb nebã tɩ b yõk-a, ²⁸ la b kaasdẽ: «Israyɛl kamba waa-y tao, ad-y yaa nin-kãnga n saad n wilgd neba zĩig zãnga tɩ b ra tũ a Moyiiz noorã, la a saad n gomd beedo wẽnd do-kãnga poorẽ.» ²⁹ Ad-y b ra reng n yãenda a Pol ne Efɛɛz rao, a Trofim, tɩ b tũud taaba tẽnga pʋga. Dẽ la b ra tagsd t’a peeg-a lame n kẽ wẽnd doogẽ wã. ³⁰ Tẽnga fãa rãmbame tɩ neba zoet zĩig zãng n watẽ. B gãda a Pol n tall-a n yiis wẽnd doogẽ wã, n lɛɛg n pag kʋɩlemsã. ³¹ B ra baoodame n na n kʋ-a, la tãb-biis kobs-yoob tãnsoaba waa n wʋma me tɩ b moonẽ: «Zerizalɛɛm zũndga zãnga.» ³² Tãnsoab kãsenga yiisa tãb-biisi la tãnsoab-bi tɩ b na n kẽ zãma wã. Neba sẽn yãend tãb-biisa ne b tãnsoaben-dãmbã ka le saag n wẽ a Pol ye. ³³ Tãnsoaben-dãmba kãsma kolgame n gãd a Pol n kɩt tɩ b sẽb-a ne bãeens a yiibu n yaool n sok-a a sẽn ya a soaba la a sẽn maan bũmb ninga. ³⁴ La neba leoob ra ka tũud taab ye, kẽer t’a maana wãnda, kẽer t’a maana woto. Bʋʋra yĩnga tãnsoaba ka tõog n wʋm gomd tirg ye t’a yet tɩ b kẽes a Pol tãnsoben-dooga pʋga. ³⁵ Sẽn ta rʋʋba zĩigẽ, b kong n põka a Pol, neba tusga yĩnga. ³⁶ Neba ra pʋgda zembala, n maanẽ: «Bɩ b kʋ-a.» ³⁷ B sẽn ta n na n kẽes-a roogã la a Pol sẽn yeel tãnsoabã: «Y tõe n kõ-m la sor tɩ m leok koɛɛg bɩ?» T’a lɛɛg n sok-a: «Fo gomda grɛk laa? ³⁸ Dẽnd ka foo la Ezipt rao ning sẽn woole, daar nan ka zãre, so-gɩtb na ta tus a naas n kẽ we-raoogẽ wã wɛ?» ³⁹ T’a Pol yeele: «Maam la a Pol, m yaa Zʋɩf, m doga Tars, Silisi tẽn-peelmẽ. M sẽn ya tẽng ning tẽnga biiga yʋʋr yiime. M kot-f lame tɩ f kõ-m sor tɩ m gome.» ⁴⁰ A sẽn paam sore, a Pol yalsa teedsa zug, n zẽk a nug n kabs zãma wã. A kõ-b la koɛɛg ne Ebre rãmb goama:

¹ «M Saam-biisi la m ba rãmba m kot-y la sor marsã n wĩnig m bʋʋma sẽn yɛs zĩig ninga.» ² B sẽn wʋm tɩ yaa ne Ebre rãmb goam la a leokd bãmbã, bʋʋra wooga zãnga, t’a sɩnge: ³ «M yaa Zʋɩf. M doga Tars, Silisi tẽn-peelmẽ; m yaool wuba tẽn-kãnga la ya a Gamaliyɛl n zãms maam neere d yaab rãmba noora reegre la mam me ra pida ne Wẽnd nonglem wa yãmb sẽn pid rũnna wã. ⁴ M namsa so-paalga tũudba n tol n yãk yõore. M kɩtame tɩ b balg bãeense la b kẽes roogo pagb la rapa. ⁵ Rũnda maan-kʋʋd kãsengã la nin-kẽemsa fãa tara rẽ kaseto. M pʋs n da tɩ reega sɛb bãmb nengẽ Damas saam-biisa yĩnga tɩ m da rabd n na n tɩ sẽb So-palga rãmb n tall-b n wa Zerizalɛɛm tɩ b nams-ba. ⁶ M da rɩka sore n kolgd Damas, la vugr bala, wĩnto-sʋka, vẽenem kãseng n tãoos yĩngri n bui maam. ⁷ M lʋɩɩ tẽnga la m wʋma koɛɛg sẽn da yet ma: ‹Sol, Sol, bõe yĩng la f namsd maam?› ⁸ M leokame: ‹Yãmb yaa ãnda, Soaala?› Dẽ la b leok ma: ‹Yaa maam, Nazarɛt Zezi wã, la f sẽn namsdã.› ⁹ Sẽn da tũud-b maama yãenda vẽenema, la b ka wʋm sẽn da gomda ne maama soab koɛɛg ye. ¹⁰ M le sokame: ‹Bõe la m tog n maane, Soaala?› La Soaala yeel-m lame: ‹Yiki! Kẽ Damas. Beelẽ b na wilg-f f sẽn tog n maan bũmb ninga.› ¹¹ La vẽenema sẽn kiis m nini tɩ m da ka le neẽ wã, m tũud-n-taasa nus la m gãd yã n kẽ Damas. ¹² Ned n da be Damas n boond tɩ Anani. A ra tũuda Wẽnd wala noora sẽn date la tẽnga Zʋɩf rãmb da pẽgd-a lame. ¹³ Yẽnda n waa n yãend maam, la d sẽn pẽneg taaba, a yeel-m lame: ‹Sol, m saam-biiga, bɩ f nina puki.› La wakat kãng bala m tõog n yãend-a lame. ¹⁴ La ad-a sẽn yeele: ‹D yaab rãmba Wẽnnaam yãka foom n na n wilg foom b raabo, n wilg foom b Nin-sõngã tɩ f wʋm b koɛɛgã f toore. ¹⁵ Fo tog n yɩ-la b kaset soab dũni wã rãmb fãa taoore, f sẽn wʋm la f sẽn yãenda kaset soaba. ¹⁶ Bõe la d le gũud yɛsa? Aya! Reeg soobo, tẽ b Yʋʋrã tɩ f yel-wẽna fãa yẽese.› ¹⁷ M sẽn lɛɛg n wa Zerizalɛɛm, daar a yembre, m sẽn waa n be wẽnd doogẽ n pʋʋsdẽ, m yama fʋsga m yĩngã. ¹⁸ M yãenda Soaala, la ad-b sẽn yeel-ma: ‹Maan yãgbo, yi Zerizalɛɛm tao-tao, tɩ kaset ning f sẽn na n kõ maam beelẽ wã, b pa na n deeg-a ye.› ¹⁹ Mam leok-b lame: ‹Soaala, b yaool n mii neere tɩ m da saadame n yõgd n kẽesd doogo la m pãbd ne kaase sẽn da kẽed-b yãmbã. ²⁰ B sẽn wa n daagd y kaset soaba, a Etiyɛn, zɩɩm, yɩla m nifẽ, a kʋʋba ra tata m yam la maam la a kʋʋdba ra gũnug b futu.› ²¹ Tɩ Soaala na n yeel-m marsã: ‹Looge; yaa yɩɩga, yaa bu-zẽmba nengẽ la m na n tʋm-fo.› » ²² B ra tara a Pol kelegre la a sẽn waa n pʋd bu-zẽmbã yʋʋre, b fãa sɩnga kaasgo: «Kʋ-y ned a woto buudu! A pa tog n vɩɩnd ye.» ²³ Da yaa pãrbo, tɩ kẽer lobd b futu, tɩ kẽer fẽed tom yĩngri. ²⁴ Tãnsoaba kɩtame tɩ b kẽes a Pol tãnsoben-dooga pʋga n pãb-a ne kaase, n paam n bãng a sẽn maan bũmb ning tɩ neba kaasd woto a zugu. ²⁵ B sẽn waa n sẽba Pol ne gãn tagdo n na n pãb-a la a sẽn yeel tãnsoab bilã: «Yãmb tara sore n pãb ne kaase Rom tẽnga biiga, n pa reng bʋ a bʋʋdo?» ²⁶ Tãnsoab bila sẽn wʋm dẽ, a tɩ yãenda a naabã n wilg-a woto: «Bõe la f na n maanẽ? Nin-kãnga yaa Rom tẽnga biiga.» ²⁷ Tãnsoaba waa n soka a Pol: «Togs-ma, fo sɩd yaa Rom tẽnga biiga?» T’a Pol leok tɩ: N-yẽe! ²⁸ Tɩ tãnsoaba yeele: «M yiisa ligd wʋsgo n na n paam n lebg Rom tẽnga biiga.» T’a Pol leok-a: «Sã n ya maam, m doga ne.» ²⁹ Tao bala sẽn da na n pãb-bã tarame n leb poorẽ. Tãnsoaba meng ra maanda rabeem, a sẽn ne tɩ yaa Rom tẽnga biiga la a ra kɩt tɩ b balg ne yãndo. ³⁰ Beoog sẽn vẽege, tãnsoaba tʋlg n bãnga bõe taale taki la Zʋɩf rãmba tʋk a Pol zugu. A kɩtame tɩ b lood a bãeensã la a yeel maan-kʋʋdba kãsem-dãmba la bʋ-kaoodbã, tɩ b tigim. A waa ne a Pol marsã tɩ b na n kao-a bʋʋdo.

¹ A Pol gesa bʋ-kaoodba pem n wa yeel-ba: «M saam-biisi m pelga m pʋg m tũ Wẽnde n tãag rũnna.» ² Maan-kʋʋd kãsenga, a Anani, wẽneg n yeela sẽn naag-b yẽnda n kaood bʋʋdã tɩ b va a Pol noore. ³ Dẽ me la a Pol yeel-a: «Yaa Wẽnd meng n na n va foo, ninsaan-kazukma! F zaoo bʋʋda zĩigẽ n na n bʋ-m wala Noora sẽn date, n yaool n yet tɩ b pãb ma tɩ Noora yaool n ka kõt foo so-kãng ye.» ⁴ Bʋ-kaoodb a taaba yeel-a lame: «Foo n saag n tʋʋsd Wẽnd maan-kʋʋd kãsenga.» ⁵ T’a Pol na n leok-ba: «M da ka mi tɩ yaa maan-kʋʋd kãseng a ye. M mii sẽn gʋls sebr sõngẽ: da saag n kãab beedo, f buuda kãsem ye.» ⁶ A Pol da miime tɩ bʋ-kaoodba welga sags a yiibu: ad Farizẽ rãmba, ad Saduseẽ rãmba. Dẽ la a tãs bʋʋda rãmba: «M saam-biisi, mam yaa Farizẽ, la Farizẽ biiga. Yaa tõnd sẽn saagd bũmb ningã, yĩnsa vʋʋgre, yaa rẽnd yĩng la b kẽes maam bʋʋdo.» ⁷ A ka yãee n gom n baase la zabr sẽn yik Farizẽ la Saduseẽ rãmba sʋka la neba welga taab sags a yiibu. ⁸ Saduseẽ rãmba sɩd yetame tɩ yĩns ka vʋʋgde, tɩ malɛk ka be, tɩ sɩɩg ka be. Sã n ya Farizẽ rãmba bãmb tẽeda rẽ faa. ⁹ Dɩlla bʋʋda wulumda ne bʋʋre. Sɛb gʋlsdb kẽer da yaa Farizẽ rãmba. Bãmb n yik n tãs ne pãnga: «Tõnd ka ne nin-kãnga kongr ye. Tõe tɩ sɩɩg bɩ malɛk n gom ne a.» ¹⁰ Zabra wa n wɩngdame n paasdẽ, tãnsoaba zoe-la b na n wa taa a Pol n tõse, t’a kɩt tɩ tãb-biisa sig n wa yiis a Pol sʋka, n tall-a n leb tãnsoben-dooga pʋga. ¹¹ Zĩig sẽn sobge, Soaala bʋʋga a Pol be n yeel-a: «Keng f sũuri! Wala f sẽn yɩ m kaset soab Zerizalɛɛm f togame n yɩ m kaset soab Rom tẽng me.» ¹² Beoog sẽn vẽege, Zʋɩf rãmba le yẽsa ne taaba la b kãaba b meng beedo tɩ rɩɩb bɩ koom kõn kẽ b noorẽ tɩ b pa reng n kʋ a Pol ye. ¹³ La sẽn gom-b woto wã ra yɩɩda neb pis naase. ¹⁴ Bãmb n tɩ yeel maan-kʋʋdba kãsem-dãmba la nin-kẽemsã: «Tõnd kãaba d meng beedo tɩ bũmb kõn kẽ d noorẽ tɩ d pa reng kʋ a Pol ye. ¹⁵ Sẽn ket marsã yaa yãmb ne bʋ-kaoodba zems taaba la y wilg tãnsoabã t’a tog n waa ne a Pol tɩ y maneg n ges a yella neere. Sã n ya tõndo d mi d sẽn na n maanega n kʋ-a t’a nan ka ta y sʋk ye.» ¹⁶ Biig n yaool n wʋm bẽdgã. Bi-kãng yaa a Pol tão biiga, la yẽ n babs a Pol n wɩdg-a. ¹⁷ A Pol me boola tãnsoab bil a ye n yeel-a woto: «Tall bi kãnga n taas y naaba t’a tara bũmb n na n togs-a.» ¹⁸ Tãnsoab bila tall-a lame n taas naabã n yetẽ: «B sẽn kẽes a soab roogã, a Pol, n bool maam n kos tɩ m tall bi-kãnga n wa y nengẽ tɩ bũmb la a rat n wilg yã.» ¹⁹ Tãnsoaba gãda biiga nug n yi kɛɛnga n sok-a: «Yaa bõe la f rat n togse?» ²⁰ T’a leoke: «Zʋɩf rãmba sedame n na n kos-f tɩ b tall a Pol beoogo n wa bʋʋda zĩigẽ tɩ b rat n maneg n baoo yella nao. ²¹ Da tẽ-b ye. Ad bãmb na ta pisnaase n gũusd-a n na n yõke. B kãaba b meng beedo tɩ b kõn dɩ la b kõn yũ bũmb tɩ b pa reng n kʋ a Pol ye. Fãa sẽn gũud marsã, yaa fo ye n sake.» ²² Tãnsoaba basa biiga t’a looge; a yeel-a lame bala: «Da togs ned ba a ye tɩ f wɩdg-m la bũmb ye.» ²³ Naaba boola tãnsoaben-dãmb a yiibu n yeel-ba: «Segl-y n dɩk sor yʋnga bala, neba sẽn wat n kẽed gõeem, yãmb ne tãb-biis kobsi, wed-dʋʋdb pisopoe la kãna rãmb kobsi. ²⁴ Wa-y ne wiidi me, n zombg a Pol, n tall-a ne bãane n taas naab a Feligs.» ²⁵ Woto la a ninga sebrẽ: ²⁶ «A Klod Liziyas n pʋʋsd na-kãseng a Feligs! ²⁷ Zʋɩf rãmba yõka nin-kãnga n da rat n kʋ-a, la mam taa ne m tãb-biisi n fãag-a, m sẽn wʋm t’a yaa Rom tẽnga biiga. ²⁸ M tʋlg n bãnga b sẽn dõt-a ne bũmb ninga n kos tɩ buuda bʋ a bʋʋdo. ²⁹ M yãeeme tɩ yaa b Noora No-koɛɛm la b lʋɩɩs taoore la bũmb ka be sẽn sek a sẽbr meng tɩ b pa gomd a kʋʋb ye. ³⁰ M waa n wʋmame tɩ b yẽsa ne taab n baood a kũum. Dẽ me la m tʋm-a yãmb nengẽ n yaool n wilga rõatba tɩ b sã n tar bũmb n na n dogl a zugu, bɩ yɩ yãmb taoore.» ³¹ Tãb-biisa reega noore n tall a Pol ne yʋngo n kẽng Antipatris. ³² Vẽkembeoogo b basa a Pol ne wiidi wã rãmba n lɛɛg n wa b tãnsoben-doogẽ. ³³ Wiidi wã rãmb sẽn ta Sezare, b kɩsa sebra naabã la b wilg-a-la a Pol. ³⁴ Naaba me karma sebrã la a sokame n bãng a Pol sẽn yit baobg ninga. La a sẽn bãng tɩ yaa Silisi la a yita, a yeel-a lame: ³⁵ «M na bool-f bʋʋdo, f bʋʋd-n-taasa me sã n wa.» A kɩtame tɩ b pag a Pol a Erod sikẽ.

¹ Rasem a nu soaba, maan-kʋʋd Kãseng a Anani waa ne nin-kẽems kẽere n paas bʋʋd mita, a Tertulus. Bãmb n wa naaba taoore n na n boola Pol bʋʋdo. ² A Pol sẽn wa, a Tertulus goma woto n na wilg a Pol a zugẽ yelle: «Fo maasem yĩnga, nin-sõngo Feligs, d zamaana gãee ne laafi zãnga la fo sẽn wa ne f no-paalã, fo manega d tẽnga maneg sõngo ³ tɩ d kokd dẽ, d zãng gilli, la zĩis fãa, ne bark pʋʋsgo. ⁴ D sẽn pa rat-f ne yaamsã, m kotame tɩ f kelg d bilf bala ne d sẽn mi-f ne sũ-bʋgsem ningã. ⁵ Tõnd gesa a Pol n tɩge, a yaa sabaabo. A sẽn ta zĩig ning fãa dũni wã Zʋɩf rãmba ka le tar laafi ye. A yaa Zʋɩf rãmb sull a ye taoor soaba, Nazarɛt daoã sẽn yals sull ningã. ⁶ A makame meng n na n dẽgem tõnd wẽnd doogã, tɩ tõnd yõk-a. Tõnd tʋlgame n kao bʋʋdo wala d noora sẽn yalse, [ ⁷ la a Liziyas waa n fãag-a la d nusẽ ne pãnga, la a yeela tõnd, a bʋʋd-n-taasã, tɩ d wa yãmb taoore,] ⁸ la a meng tõee n wilgame tɩ d sẽn leok bũmb ninga yaa sɩda.» ⁹ Zʋɩf rãmba gõmsame n wilg t’a leoka sɩda. ¹⁰ A Pol paama naaba sore n na n gome la a yeelame: «Ade, kaoosame marsã, Feligs, y sẽn zao y naama zaoorẽ tõnd zamaanẽ; dẽ me la m sũur ya kɛgenga, sẽn ya yãmb taoor la m na n gom n yiis m meng yellẽ wã. ¹¹ Y tõe n dɩɩ kaseto tɩ m sẽn wa Zerizalɛɛm, Wẽnd waoogra yĩng nan ka loog rasem piig ye. ¹² Ned ba a ye kõn tõog n yeele t’a yãend-m la wẽnd doogẽ, bɩ pʋʋsg roogẽ, bɩ tẽnga pʋga tɩ m wẽed no-koeemd bɩ m dãmbda tẽnga ye. ¹³ B sẽn yet tɩ m maana bũmb ningã, b pa tara kaset ye. ¹⁴ M sẽn tar n na n togs-y la woto: B sẽn boond a soab tɩ So-paalã ka bũmb a to n zʋʋg Wẽnd tũudem sor ye. Yaa woto la m waoogd m yaab rãmb Wẽndã, la m gãda sẽn be Noora pʋga la bãngdba sɛba pʋgẽ. ¹⁵ Mam saagda wa bãmb fãa sẽn saagdã tɩ nin-sõma la nin-wẽns na n vʋʋgame. ¹⁶ Yaa rẽnd yĩng la m maood wakat buud fãa n na n yɩ ned sẽn ka tar rẽko, Wẽnd la ninsaalb taoore. ¹⁷ Maana yʋʋma tɩ m yaool n na n lɛɛg n wa Zerizalɛɛm n kɩs saam-biisã sẽn lob buuda yĩnga la m waoog Wẽnd ne m kũuni. ¹⁸ Yaa woto la b yãend-m wẽnd doogẽ. M wa n yɩlga m menga la tus taab ka zĩndi, bʋʋr ka zĩndi. ¹⁹ Yaẽ la Zʋɩf rãmb kẽer sẽn yi Azi, sãooẽ lame. Bãmb n da togẽ n bool m bʋʋdo yãmb taoore, b sã n da tarẽ la bũmb n na n dogl m zugu. ²⁰ Sã n yaa m sẽn yɛs b rãmb taoorã, b kolg n togs b sẽn yãend-m ne yell ninga bãmb meng bʋʋd kãsenga roogẽ. ²¹ M ka ne bũmb n zʋʋg m sẽn moon b taoore tɩ yaa m sẽn gomd kũum vʋʋgra yelle la b bʋʋd-m dũnna.» ²² A Feligs ra mii So-paala yɛla neere, dẽ la a kʋʋg koɛɛga n yetẽ: «Tãnsoab a Liziyas sã n wa d na baas bʋʋdã.» ²³ A yeela tãnsoaba t’a kell n bas a Pol roogo, la a ra yɩ toaag ne a ye, a bas a buuda neb tɩ b sõangd-a. ²⁴ Sẽn maan dasem a wãna, a Feligs lɛɛg n waa ne a pag a Drusil. Da yaa Zʋɩf poaka. A kɩtame t’a Pol wa la a kelga a sẽn gomd a Zezi Krista tẽeba yell toto. ²⁵ A Feligs sẽn mik t’a gomda sõmblem yelle, tõog-m-meng yelle, yaoolem bʋʋda yelle, a yɛɛsame la a yeel-a lame: «F tõe n leba f roogẽ dũnna, la m sẽn paam daar ninga m na le bool fo.» ²⁶ A ra tẽedame t’a Pol na n kõ-a la ligdi; la bool a Pol t’a wa tɩ b sõsa waa n lebga pẽdgem-pẽdgem. ²⁷ A Pol dooga waa n looga yʋʋm a yiibã ta ra ket be. A Feligs bas-a-la roogo n na n noog Zʋɩf rãmba sũuri. A Porsiyus Festus n waa n led a zĩiga.

¹ A Festus sẽn ta Sezare tɩ rabitẽ, a yii n tuda Zerizalɛɛm. ² A sẽn ta la maan-kʋʋdba kãsem-dãmba la tẽnga nin-bɛdã sẽn yeel tɩ b boonda a Pol bʋʋdo yẽnda taoore. B sẽn wilg b raabã, ³ b kos-a lame wala bũmb sẽn na n yãng b zooda ne taaba, t’a sõng t’a Pol lɛɛg n wa Zerizalɛɛm. Ra yaa bẽdgo la b gãneg yã n na n paam-a n kʋ sorẽ. ⁴ A Festus leok-b lame t’a Pol tog n paa Sezare la yaa be la yẽ meng lebd mars-marsã. ⁵ A paasame: «Neb niyns sẽn tõe n kao bʋʋdo n be yãmb sʋka, wa tɩ d loog. B sã n yet tɩ yell be a zugu, b na bool-a bʋʋd Sezare.» ⁶ A Festus maana dasem a nii bɩ piig bala n yaool n leb Sezare. A sẽn vẽeg beoogo, a kẽe bʋʋda zĩigẽ la a kɩtame tɩ b bool a Pol. ⁷ A sẽn wa, Zʋɩf niyns sẽn yi-b Zerizalɛɛma gũbg-a lame n dogend a zugu, yɛl sẽn waooge la sẽn ya tagdo, b mens sẽn ka tar kaset t’a sɩd maaname ye. ⁸ A Pol da kɩɩsdame n yetẽ: «M ka ne m sẽn tõdg Zʋɩf rãmba noor ne bũmb ning ye, m ka paoog wẽnd doogã, m ka paoog Rom naaba ye.» ⁹ A Festus tʋlgame n noog Zʋɩf rãmba sũuri n leok a Pol woto: «Fo ratame n leb Zerizalɛɛm tɩ b kao rẽ fãa bʋʋd mam taoor bɩ?» ¹⁰ T’a Pol yeele: «Yaa Rom naaba bʋʋd la b na n bʋ maam; dẽn yĩnga yaa ka, pa Zerizalɛɛm ye. M ka maan bũmb sẽn wa ne Zʋɩf rãmba bõne, la y meng mii rẽ neere. ¹¹ M sã n sɩd kongame, m sã n maana bũmb sẽn tog ne kũum, m saka kũum. La nin-bãmba sẽn togsda sã n ka sɩda, ned ka be sẽn tõe n dɩk maam n bas b nugẽ ye. Bɩ m bʋʋda yɩ Rom naab taoore!» ¹² A Festus yãenda a sagendbã n yaool n yeel a Pol: «Ka Rom naab taoor la f rat tɩ b bʋ-f laa? Bʋʋda na yɩ Rom.» ¹³ Sẽn maan dasem a wãna, dĩma Agripa waa Sezare ne a paga, a Berenis, la a tɩ pʋʋsa a Festus. ¹⁴ A Festus sẽn paam tɩ dĩma kaoosd Sezare, a goma ne-a, a Pol yell woto: «Ned la a Festus bas bi-bees roogẽ ka. ¹⁵ M sẽn waa n be Zerizalɛɛm, maan-kʋʋdba kãsem-dãmb la nin-kẽemsã wilg-m lame t’a beegame la b kota a bʋʋd paalgre. ¹⁶ M wilg-b lame tɩ Rom dãmb ka minim n basd ned a bɛɛb nusẽ tɩ b ka reng n bool-a bʋʋdo, a bʋʋd-n-taasa taoore t’a gom n paam n yiis a meng yellẽ ye. ¹⁷ B tũu maam n wa ka, la m pa kaoos ye, vẽkẽmbeoog bala, m kẽ-la m bʋʋd doogẽ la m kɩtame ti b wa ne a Pol. ¹⁸ A sẽn ta a bʋʋd-n-taasa taoore, b pa saag n dogl a zugu, yell sẽn ya bedre wa ned fãa sẽn da tõe n tags ye. ¹⁹ B sẽn da tar ne a Pol yaa kɩɩs taaba b Wẽnda tũudem poorẽ, la sẽn yɩɩda, yaa nin-yend sẽn ki poorẽ t’a Pol wẽend t’a ket n vɩɩme, ya a Zezi poorẽ, ²⁰ M da ka mi m sẽn na n maan yell a woto poorẽ ye. Dẽ la m wilg-a t’a leb Zerizalɛɛm tɩ bʋʋda tɩ kao be. ²¹ A Pol kosame t’a bʋʋda kao Rom na kãsenga taoore, dẽ la m yeel tɩ m na n kell n bas-a la roogo n ta wakat ning m sẽn na n taas-a Rom naaba.» ²² A Agripa yeela a Festus: «M me nongẽ lame n kelg nin-kãnga.» T’a yeele: «Beoogo f na kelg-a.» ²³ Vẽkembeoogo a Agripa ne a paga ninga b fan teedo n wa bʋʋda roogẽ. Tãnsoaben-dãmba la tẽnga taoor dãmba tũume. A Festus kɩtame tɩ b wa ne a Pol, ²⁴ la a yeelame: «Dĩma Agripa la yãmb fãa sẽn naag tõnd n zĩ ka, woto la rao ning Zʋɩf rãmba sẽn waa n kos-m ne bʋ-raase, Zerizalɛɛm wala kaalẽ menga, tɩ m da bas-a t’a vɩɩnd ne yõor ye. ²⁵ Sã n ya maam sẽn gesã, m pa ne a sẽn maan bũmb ning tɩ sek a kʋʋb ye. La yẽ meng sẽn yeel tɩ b kao a bʋʋdã Rom tẽnga, m sakame n na n tʋm-a be. ²⁶ M ka tar yell tik n na n gʋls Rom naab a poorẽ ye. Yaa rẽn yĩng la m wa ne a yãmb taoore, dĩma Agripa. A sẽn na n leok bũmb ning ka wã m na paam dẽ n gʋlse. ²⁷ M ka rat n maan yalemdo n tʋm al Rom tẽnga, ned sẽn kẽ roogo, n pa naag n togs a sẽn maan bũmb ning tɩ ya wẽng ye.»

¹ A Agripa yeela a Pol: «Fo tara sor n gom n yiis f meng yellẽ.» A Pol sẽn kabs nebã ne a nugu a sɩngame: ² «M yetame tɩ m zug yaa noogo, dĩma Agripa, m sẽn paam n na n dok m zugẽ yella yãmb taoore. ³ M zu-noogã, yaa y sẽn mi Zʋɩf rãmba rog-n-mik la b no-koɛɛma. Dẽ me la m kot tɩ y bʋk y sũuri n kelg-ma. ⁴ Zʋɩf rãmba fãa tara m vɩɩma buka, m sẽn dog tɛk n tãag rũnna. B mii m vɩɩm sẽn yɩ a soab Zerizalɛɛm, m buuda sʋka. ⁵ B sẽn mi-m al daar zãrã, b tõeeme n kõ kaseto tɩ m vɩɩma yɩɩ Farizẽ vɩɩm, neb sẽn tũud Wẽnd ne b sũur zãnga. ⁶ B sẽn bool-m bʋʋd dũnna mengã, yaa m sẽn saagd tɩ Wẽnd na n pidsa b sẽn pʋlem d yaab rãmba. ⁷ Pʋlem noog kãng pidsgu la buuda sags piig la a yiiba sɩd gũud, wĩndg la yʋngo. Dɩlla ya m saagra yĩnga, dĩma Agripa, la Zʋɩf rãmba bool-m bʋʋdo. ⁸ Bõe la yãmb neb kẽer yet tɩ b kõn deeg bada tɩ Wẽnd na n vʋʋga kɩɩmsã? ⁹ M da waa n yeelame tɩ m na n maana m sẽn tõe n zab ne Nazarɛt dao, a Zezi, sora rãmba. ¹⁰ La sɩd yaa rẽ la m maan Zerizalɛɛm la mam meng m tore kẽesa nin-sõma wʋsg roogo, la yaa maan-kʋʋdba kãsem-dãmb n da kõ-m sore. B sẽn waa n kʋʋd-ba m da kõta kaseto tɩ m saka b kʋʋbo. ¹¹ Naoor wʋsgo yaa pʋʋsga rotẽ la m da kẽeda, n na n modg-b ne kalwaas tɩ b tʋʋs Wẽnde, la m sũura sẽn yik yĩnga, m mii n babs-b la tẽn-zãorgẽ fãa. ¹² Yaa woto la m paam maan-kʋʋdba kãsem-dãmb sɛba la b noore n kẽng Damas. ¹³ Sor zugu, wĩnto-sʋka, m dĩm sõngo, m yãenda vẽenem sẽn yɩɩd wĩntoog rẽnna sẽn yi yĩngri n wa bui maam ne m tũud-n-taasã. ¹⁴ D fãa gill lʋɩɩ tẽnga la m wʋma koɛɛg sẽn leok-m ne Ebre: ‹Sol, Sol, yaa bõe tɩ f namsd maam? Da zãgs n bao toog n paas toog ye.› ¹⁵ Tɩ mam leoke: ‹Yãmb yaa ãnda, m Soaala?› La Soaala yeelame: ‹Yaa maam a Zezi la f sẽn namsdã. ¹⁶ La yik n yals yĩngri. M sẽn lik-fa võor la woto: m datame tɩ f yɩ m sõgne la f kõ f sẽn yãend-m dũnna la f sẽn na n yãend-m beooga kaseto. ¹⁷ La yaa rẽnd me yĩnga la m na n fãag-f ne f buudã la ne bu-zẽmbã, m sẽn tʋmd foom b rãmb nengẽ. ¹⁸ M tʋmd-f lame tɩ f tɩ puk b nini, tɩ b yi b likẽ n wa vẽenemẽ; n yi Sʋtãan soolmẽ n kẽ Wẽnd dẽnnẽ, la b paam, b sẽn na n sak n tẽ maama yĩnga, b yel-wẽna sugri la nin-sõma wã pʋɩɩre.› ¹⁹ Sẽn yɩ woto wã, dĩma Agripa, m pa kɩɩs m sẽn wʋm ne yĩngr likra ye. ²⁰ M pa zãgs ye: yaa Damas woo, yaa Zerizalɛɛm woo, yaa Zɩɩde bɩ bu-zẽmba tẽng woo, m mooname tɩ d tog n tedga zʋgo, n lɛɛg n kẽ d Wẽnde la d tʋm zʋg tekr tʋʋma. ²¹ Yaa rẽnd yĩng la Zʋɩf rãmba yõk-m wẽnd doogẽ n baood n na n kʋ-m. ²² Wẽnd sẽn sõng-m yĩnga, m talla Koɛɛga moonego n tãag rũnna, nin-bɛd wala nin-bõones taoore. M pa tẽed tɩ m paasa bõn-zɛreng meng sẽn ka be a Moyiiz la bãngdba sebrẽ ye. Sɛba yeta woto: ²³ Krista na n namsame. Bãmb n na n vʋʋg pipi kɩɩms sʋka la bãmb Koɛɛgã n na n wa ne vẽenem a Israyɛl la bu-zẽmba yĩnga.» ²⁴ A Pol taa zĩ kãngã t’a Festus zẽk a koɛɛg n yeele: «Pol, fo yika gãeemdo, f bãngr pidunga lebga f zugu.» ²⁵ T’a Pol na n leoke: «Ad-y m pa gãeemd ye, nin-songa Festus, m goama yaa ned sẽn so a menga la sẽn baood sɩd goama. ²⁶ La m sẽn gomd ne rĩm ninga tɩ m sũur pa kiuusdẽ wã zoe n mii yɛla fãa; bũmb ka be a sẽn ka vẽen ne ye, yaa vẽenemẽ la yɛla maan yã, ka maan pẽkẽ la likẽ ye! ²⁷ Yãmb tẽeda bãngdba bɩ, dĩma Agripa? La m neeme tɩ y tẽedame.» ²⁸ Dẽ la dĩma Agripa leok a Pol: «Kellẽ la bilf bala tɩ f kɩt tɩ b gesẽ maam wa Kristneda!» ²⁹ T’a Pol yeele: «Kella bilf bɩ wʋsgo, Wẽnd na sõng dĩma Agripa la yãmb fãa sẽn kelgb maam dũnna wã, tɩ y wa lebg m sẽn yaa soabã, m bãeensa toog sẽn yãke.» ³⁰ Dĩma yikame t’a Festus ne a Berenis la sẽn da zĩ-ba fãa me yiki. ³¹ B waa n yitame la b goamda: «Nin-kãnga ka maan bũmb sẽn tog tɩ b balga bɩ n kʋ-a ye.» ³² Dẽ la a Agripa yeel a Festus: «D da tõe n basẽ la nin-kãnga a sã n da ka kosẽ t’a bʋʋda kaoẽ Rom naaba taoore.»

¹ Itali loogr raar sẽn yãke, b basa a Pol ne bi-bees kẽere, tãnsoab a ye nugẽ. Tãnsoaba ra boondame t’a Zuliyus, tɩ b tãnsoben-dooga boond tɩ Ogusta. ² D kẽe koglg sẽn yi Adramisiom, n looge. Koglga da rabda Azi sẽnẽ. Masedoan dao a ye sẽn da kẽed Tesalonik n da naag tõndo. ³ Vẽkembeoogo d taa Sidõ t’a Zuliyus maan wa ninsaal sẽn mi a to waoogre n bas a Pol t’a sig n kaag a zo-rãmbã la a reeg b sõngre. ⁴ D sẽn yi be, d yega Sɩpr, sobga sẽn da wẽed lebend yĩnga. ⁵ D sẽn kẽn n loog Silisi la Pãnfili, dasem piig la a nu raare, d taa Mir sẽn be Lisi baobgo. ⁶ Tãnsoaba paama Aleksãndri koglg sẽn digd Itali la a kẽesd-d-la a pʋgẽ. ⁷ Maana rasem a wãna, kẽnda ra ka fɩɩd ye la tũu toogo tɩ d ta Knid. Sobga sẽn da ya lebend yĩnga d kong n yega Krɛt n tees Salmone. ⁸ D sẽn paam n yõsg be d ta zĩig a ye koom koglg sẽn tõe n tɩlg sobgo. Zĩ-kãng boondame tɩ Soondg zĩ-neeba la a ra pẽe ne Lasayia tẽnga. ⁹ Waa n kaoosa bilfu la kooma zug kẽnd waa n lebga rabeem. Sugr kosg no-loeera meng da zoe n lokame. A Pol da rat n wilga rẽnna n gom woto: ¹⁰ «M zo-rãmba, m neeme tɩ mogra rʋʋgr marsã tõe n waa ne sãoongo la bõne: koglga bõne, a zɩɩba bõne la tõnd mens bõne.» ¹¹ Tãnsoaba ra kelgda koglga soaba la koglga rugsda n yɩɩd a Pol. ¹² Koglga me tõog n paa a sẽn yɛs zĩig ninga yaa toogo, tɩ sobga yikda waood wẽnde. Woto wã b yeelame tɩ b na n makame n ta Fenigs n soond waooda be. Fenigs bee Krɛt tẽn-peelmẽ la kogenda soondg zĩig gõdg n teesa nin-taoore. ¹³ Sob-bil n waa n yik n fʋʋsd nug rɩtgo tɩ b tags tɩ b raaba tõe n pidsame. Woto b sɩnga kẽnde n yegd Krɛt tẽnga. ¹⁴ La ade, ka yãee n kaoose, nug goabg sob-raoog sẽn boond ti «Erakilõ» wẽneg n yikame. ¹⁵ Sobga fãaga koglgã a soaalba nusẽ tɩ d na n kong n tũ a raabo. ¹⁶ Tẽmbil sẽn puk koomẽ n boond tɩ Koda wa n wooga sobga pãnga tɩ d na n tõog n yiis koglg bilã. ¹⁷ D sẽn yiis koglg bila d maana d sẽn tõe fãa. D sẽba koglga sʋk ne wĩ la d loe ra-peg-yaleng a poorẽ n sõngd-a t’a ra lis ye, tɩ d da zoeta a na n wa tɩ pa Sirt sẽnẽ. Kẽnda yẽ lebga sobg sẽn teesẽ. ¹⁸ Beoog sẽn vẽege, d yãeeme tɩ sobga ket n yaa wʋsgo tɩ d sɩng teeda woogre. ¹⁹ Dasem sẽn maan a tãabo, koglga rãmb mens b toor n yogs wĩ wã la pɛɛlã. ²⁰ Maana rasem a wãn tɩ b pa yãend wĩntoog la ãdg vẽenem ye. Sobga ra ket n fʋʋsda ne pãnga tɩ d yɛɛsdẽ la d pa le tẽed põasg ye. ²¹ D sẽn da paam n dɩ meng ra vẽsgame dẽ la a Pol yik n yaas b sʋka n yeele: «Y ra tog n kelg-m lame, m zo-rãmba, n da yiẽ Krɛt ye. Sãong la bõne kõn n zĩnnẽ ye. ²² La ba sẽn na n yɩ a soaba, m kotame tɩ y ra maan dabeem ye, tɩ yãmb ned ba a ye vɩɩm kõn tõsg ye, koglga bal n na n yɩ bõne. ²³ Yʋngẽ bala Wẽnd ning m sẽn kẽ la m sẽn waoogd a soaba malɛk lika maam ²⁴ la a yeel-m lame: ‹Da maan dabeem ye, Pol, ya tɩlɛ tɩ f bʋʋda kao Rom naaba taoore la fo yĩnga m basda ne vɩɩm sẽn be-b koglga pʋg ne fooma.› ²⁵ Dɩlla, m zo-rãmba, keng-y y sũuri! M saagdame tɩ Wẽnd na n maana wala b sẽn togs-ma. ²⁶ La tɩɩm ka be tɩ d ka pa tẽng a ye sẽn puk koomẽ ye.» ²⁷ Wã n da tõkd d dasem piig la a naase, d sẽn be Adriatik mogra zug n lengdẽ. Yʋn-sʋka, ko-rugsdba bãngame tɩ d kolga tẽn koɛɛnga. ²⁸ B sẽn mak kooma zulum b mikame tɩ yaa kãntɩɩs koabga; b sẽn ta taoor bilfu n le make, b paama kãntɩɩs pisopoe la a nu. ²⁹ B zoe rabeem tɩ d na n wa teem sore n tɩ kẽ pĩisã, tɩ b lob ra-peg-yalens a naase, poorẽ, la b kot ne b sũur fãa, tɩ sõora puki. ³⁰ Ko-rugsdba ra baoodame n na n zoe n loog. Dẽ la b ra baood n na n sik koglg bila koomẽ la b ra yagdame tɩ baood n na n gãda taoor da-peg-yalemsa tɩ koglga rɩk so-yɛnga la a ra le kẽn yaar ye. ³¹ A Pol yeela tãnsoabã la tãb-biisã: «Bãmba sã n ka pa koglga pʋga, y kõn põs ye.» ³² Woto wã tãb-biisa kʋʋsa koglg bila wĩ n bas-a t’a loog. ³³ B ra gũuda sõora yẽegre la a Pol da sagend-b lame tɩ b bao rɩɩbo. A ra yetame: «Yaa rasem piig la a naas rũnna la y zĩi n gũudẽ, n pa rɩtẽ ye. ³⁴ M sagend-y lame tɩ y bao rɩɩb n dɩ, tɩ ka rẽ y kõn põs ye. M le togsd-y lame yɛsa, yãmb sʋka, ned ba a ye zug zoobg kõn menem ye.» ³⁵ A Pol sẽn gom woto, a rɩka buri, n pẽg Wẽnd b fãa taoore, n kaoog burã n sɩng wãbre. ³⁶ Raood le kẽe nebã tɩ b fãa bao rɩɩb n dɩ. ³⁷ Tõnd neb kobsi la pisopoe la a yoob n da be koglga pʋga. ³⁸ Rɩɩba sẽn paam n dɩ, b bao koglga na lebg faasga n yiisd koodã n lobd koomẽ. ³⁹ Zĩig sẽn yẽege, ko-rugsdba ra ka mi b sẽn beẽ ye. B ra nee mogra sẽn wõg n kẽ la sẽn gãneg bĩsri tɩ d da rat n tus koglgã n taas be, sã n tõe. ⁴⁰ B looda ra-peg-yalemsã n bas koomẽ. B yolsa koglga wẽnemdega wĩ; b rʋʋsa taoor peend bilfã tɩ sobga tõog n tus koglgã n kolg kooma noorẽ, bĩsrã sẽn samẽ wã. ⁴¹ B taa zĩig a ye la b suda bĩisrẽ tɩ koglga wa gimb zãnga, a poorẽ, tɩ ko-wiisa pãb a taoorã n wesge. ⁴² Tãb-biisa sedame n na n kʋ bi-beesã tɩ b ra wa rug kooma n loog ye. ⁴³ Tãnsoaba da rat n basa a Pol ne yõore, woto wã, a pa sak ye. Yẽ meng n kõ noor tɩ sẽn mi-b koom deng n looge n paam tẽn-koɛɛnga. ⁴⁴ Sẽn ka mi-b kooma marsã na yi ne ra-pegdo bɩ ne bũmb ning fãa sẽn yi koglga pʋga. La yɩɩ woto la b fãa paam n ta tẽn-koɛɛnga tɩ bũmb ka maan-b ye.

¹ D sẽn paam n põsa la d yaool n bãng tɩ tẽnga boondame tɩ Malt. ² Tẽnga rãmb gesa d yell neere. Saag sẽn ni la sẽn ya waood yĩnga, b yõgna bugum la bugma waolgẽ la b reeg-do. ³ A Pol waa n wolga ribli n na n lob n yãng bugma. Bugma waolg yiisa põeere sẽn vil a Pol nug n wẽneg n be a kɛɛbẽ. ⁴ Tẽnga rãmb sẽn yãend waafã a nugẽ, b yeela taaba: «Yaa vẽnega, nin-kãnga yaa nin-kʋʋda; a paam n põsa mogra koom mars-marsã, tɩ Wẽnd ket n data vɩɩm n na n dok b sũuri.» ⁵ La a Pol mesga põeera bugmẽ. Bũmb ka tol n maan a Pol ye. ⁶ Neba yẽ ra tẽedame t’a nuga na n fɩɩgame t’a lʋɩ n kell n be kũum. B sẽn gũ n kaoos tɩ bũmb ka maan-a wã, b teema goama n yet tɩ nin-kãnga yaa wẽnde. ⁷ Tẽnga kãsem da boondame tɩ Publiyus. A da tara pʋʋgo. Nin-kãng n deeg tõnd n kõ-d doog da-yɩten-daare. ⁸ Segame t’a Publiyus ba ra gãee ne weoogo la ne sãb-noodre. A Pol tɩ pʋʋs-a la tarem, n yõk Wẽnd sɛɛg a yĩnga, a tẽega a nus a zugu, n sãoog-a zãnga. ⁹ Dẽ yĩng la tẽnga bãad-dãmb a taaba me wayã, la bãmb me sãoogame. ¹⁰ D paama waoogr buud fãa tẽnga rãmb nengẽ la d loogra sẽn waa n ta, b sõng-d la ne sor dɩɩbo. ¹¹ Sẽn maan kiuus a tãabo, d paamame n kẽ koglg a to, sẽn yit Aleksãndri, la koglga gũudb yaa wẽnd-bi, a Kastor la a Polugs. ¹² D sẽn ta Sirakuz, d paa be da-yɩten-daare. ¹³ D yii be n yegd kʋɩl kogrã n ta Reziom. Daar ninga sẽn pʋgã, sobg fʋʋsa nug rɩtgo; woto, d da-yɩten-daare, d taa Puzol. ¹⁴ D yãenda saam-biis be. La d zug yɩɩ noog tɩ d pa ne b rasem a yopoe. D sẽn yi be d kẽe Rom. ¹⁵ Beelẽ saam-biisa sẽn wʋm d waoongo, b waa n seg-d la a Apiyus raaga, zĩig ning sẽn pʋd tɩ Rã-rot-a-tã. A Pol sẽn yãend-ba, a pʋʋsa Wẽnd bark wʋsgo la a sũur le kengame. ¹⁶ Tõnd sẽn ta Rom, a Pol paama sore n na n zĩnd a sẽn datẽ, tãb-biig ning sẽn be ne a wã yee n da zãag ye. ¹⁷ Sẽn maan dasem a tãabo a Pol kosa Zʋɩf rãmba tɩ b seg taaba. B sẽn tigim taaba, a yeelame: «B yõk-m la Zerizalɛɛm n kɩs Rom dãmba tɩ m yaool n da ka beeg buudu la m ka tõdg d yaab rãmba dog-n-mik ye. ¹⁸ Rom dãmba sẽn sok n tɩge, b da rat n bas-m lame, tɩ b pa yãend bũmb sẽn sek m kʋʋb ye. ¹⁹ Zʋɩf rãmba yeelame tɩ rẽ ka tõe ye, dẽ la mam me gãd tɩ m bʋʋda kõn kao zĩig a to tɩ ka Rom naaba taoor ye. La rẽ ka rat n yeel tɩ m ningda m saam-biisa taal ye. ²⁰ Ya rẽ yĩng la m tʋlg n seg-y la m taas-y m koɛɛga; bãng-y tɩ yaa Israyɛl sẽn saagd bũmb ninga poorẽ la m sog ne yãndo, n yɛsẽ.» ²¹ Zʋɩf rãmba leoka a Pol: «Sã n ya tõndo d ka paam Zɩɩde rãmb sebre la saam-biisa me sẽn yi be n wa wã ka leok bũmb f poorẽ sẽn ya wẽng ye. ²² D datame tɩ fo meng togs-d sẽn be f sũurẽ tɩ sã n ya So-paalã, yaa zĩig zãng la b kɩɩsda.» ²³ B kõo taab raare n wa wʋsgo a Pol sikẽ wã. A goma ne ba Wẽnd Rĩunga yelle la a togsa bũmb ning fãa sẽn gʋls a Zezi poorẽ, a Moyiiz Noora sebrẽ la bãngdba me rẽnnẽ. La yɩɩ raara zãnga, yibeoog n ta zaabre. ²⁴ Kẽer deega a goama, kẽer me zãgsame. ²⁵ B ra waa n sẽegdame la b tar b no-koɛɛma t’a Pol leok-b woto: «Yaa sɩd bala la a Vʋʋsem Sõng sẽn togs y yaab rãmba ne bãngda Izayi noore: ²⁶ ‹Tɩ yãend buudã la f yeel-a: Y nong bɩ y kelge, y kõn wʋm fɩ y nong bɩ y gese, y kõn yãend fɩ. ²⁷ Buud kãnga yama sobame, b tʋb pagame, b nin mumame, la yaa sẽn na yɩlẽ tɩ b nin da yãend ye la b tʋb da wʋm ye la b yam da vẽneg ye, la b ra teem zʋg ye. B ra tẽ tɩ b bãaga na sãoog koe!› ²⁸ Bɩ y bãng tɩ fãagrã yaa bu-zẽmba la Wẽnd tool yã. Bãmb yẽ sẽ na kelge.» [ ²⁹ A Pol sẽn gom n sɛ, Zʋɩf rãmba me loogame la b tar no-koɛɛm ne taaba.] ³⁰ Yaa yʋʋm a yi para la a Pol paa a sẽn sig zak ningã. A ra sõsda ne neb niyns fãa sẽn da wat-b a nengẽ. ³¹ A ra gomda Wẽnd Rĩunga yelle la Soaala Zezi Krista yelle. A ra gomda a yam la a ka yãend gɩdgr ye.