2 TƖMOTE

¹ Maam a Pol sẽn lebga a Zezi Krista Tʋʋm-tʋmda ne Wẽnd daabo la sẽn paam vɩɩm ninga sẽn be a Zezi Krista nengẽ wã pʋlemd noogo, ² maam n pʋʋsd m bi-nongr a Timote. Bɩ Wẽnnaam d Ba la d Soaal a Zezi Krista nimbãan-zoeere la b laafi kũun sig f zugu. ³ M pʋʋsda m Wẽnda barka, Wẽnd ning m sẽn tũud wala m saam-dãmba, ne pʋ-peelem zãnga. M pʋʋsd-b la barka wakat ning fãa m sẽn tẽegd f yelle, m pʋʋsg pʋgẽ, yʋngo wala wĩntoogo. ⁴ Ad-m tẽega f nintãma n dat ne m sũur fãa n le yãend-fo la m kɩdem sũ-noogo. ⁵ M sẽn tar bũmb ning bilgri, yaa f tẽebã sẽn ka keoosdã, tẽeb sẽn deng n kɩ yẽgend f yaab poak a Lois la f ma a Eunis sũurẽ, tẽeb sẽn ket n wit f meng sũurẽ, tɩ m tar a kaseto. ⁶ Yaa rẽ yĩng la m kot-f tɩ f le tẽeg bark ninga Wẽnnaam sẽn ning f sũurẽ ne mam meng nug tikri, ⁷ tɩ f mi tɩ ka rabeem la Wẽnd kẽes d sũurẽ ye, b kõo tõnd b Vʋʋsem sẽn ya pãnga la nonglem la tõog-m-menga. ⁸ Da zoe yãnde ne kaset ninga fo sẽn tog n kõ d Soaala ye; da zoe yãnd ne kaset ning f sẽn tog n kõ maam me sẽn pag roog a ye; sak bal n deeg toog ne maam, Koe-nooga yĩnga. Ad Wẽnd n sõng tõnd ne b pãnga, ⁹ bãmb sẽn fãag tõndo n bool tõnd booll sõngo, tɩ ka tũ ne tõnd tʋʋm-sõma, n tũ ne b yamleoog la b nimbãan-zoeer bala. Bãmb n kõ tõnd b kũuna ne a Zezi Krista tɩ dũni nan ka sɩng ye. ¹⁰ Kũun kãng puka zãnga ne tõnd Fãagd a Zezi Krista waoongo: bãmb n koms kũum zãnga la b kɩt tɩ vɩɩm la vʋʋgr vẽenem bui tõnd ne Koe-noogã. ¹¹ Maam la Koe-no-kãng wilgda, a zãmsda la a moanda. ¹² Yaa rẽ yĩng la m le be namsg pʋgẽ tɩ yãnd pa tar-m ye, tɩ mam mii ned ning m sẽn dell m tẽebã la m miime tɩ yẽ soab tõeeme tɩ m zã bobellã n ta b Raarã. ¹³ Tũ n da bʋdg lɛ-lɛ goam sõma niyns f sẽn wʋm m nengẽ, tũ-b ne tẽebo la Krista a Zezi nonglem. ¹⁴ Tall tẽeba bobelle ne Wẽnd Vʋʋsem Sõng ning sẽn ti a roog d pʋgẽ wã pãnga. ¹⁵ Wala fo meng sẽn mi, Azi neba fãa lak n basa maam; a Fizɛl ne a Ermozɛn be-la b sʋka. ¹⁶ Bɩ Wẽnd bãgb b kũuna a Onezifor ne a zaka, tɩ bãmb n waa n sõng maam naoor wʋsgo la b pa zoe m bãeensa yãnd ye. ¹⁷ A sẽn ta Rom tẽnga a bao ne a sũurẽ n paam n yãend-ma. ¹⁸ Bɩ Wẽnd kɩt t’a me rɩ b nimbãan-zoeer yõodo, Soaala nengẽ, b waoonga raare. Fo meng mii neere sõngr ning a sẽn yaoog maam Efɛɛz tẽnga.

¹ Foom, m bi-sõngo, keng f sũur ne Krista a Zezi nimbãan-zoeere: ² fo sẽn bãng bũmb ning mam poorẽ ne kaset dãmb wʋsg toagsga, bɩ f bao nin-sõma n wilg-ba, tɩ bãmb me wa tõog n zãms b taaba. ³ Wala a Zezi Krista tãb-bi-sõngo, fo me reeg namsg ning b sẽn bok n kõ fooma. ⁴ Tãp weoogo, tãb-biig yĩmda a zak yɛla, a sã n dat n noog a tãnsoab sũuri. ⁵ Wags-taab zĩigẽ, ned kõn paam n lʋɩ taoore, a sã n ka reeg reema siglg noy neer ye. ⁶ Ka-koaad ning sẽn modg-a ne koobo, yẽ soab n tog pipi n deeg a kood biisi. ⁷ Wʋm m goama sẽn dat n yeel bũmb ninga. M pʋs n mi tɩ Soaala na wilg foom b võore. ⁸ Tẽeg a Zezi Krista yelle; ad-y bãmb la a Daviid yagenga sẽn vʋʋg kɩɩms sʋkã wala m Koe-nooga sẽn wilgdã. ⁹ Ad yaa Koe-noog kãng yĩng bala la neb namsd maam n tol n balg maam wa bi-bɛɛga. La ned yaool n ka be n tõe n balg Wẽnd gomda ye. ¹⁰ Yaa rẽ yĩng la m sak fãa, Wẽnd kamba yĩnga, tɩ bãmb me wa paam tɩlgr ning sẽn be Krista a Zezi nengẽ, bãmb me wa paam vɩɩm sẽn kõn sɛ. ¹¹ Gomd sẽn ya sɩd menga la gom kãnga: «Tõnd sã n tũ bãmb n ki, d na n tũu bãmb n vʋʋge. ¹² Tõnd sã n naag bãmba n maan raoodo, d naagda bãmb n dɩ naam; d sã n yeel tɩ d ka mi-ba, bãmb me na yeel tɩ b ka mi tõnd ye. ¹³ Tõnd sã n ka yɛs d sɩd zĩigẽ me, bãmb yɛsa b sɩd zĩigẽ: b pa tõe n kɩɩs b meng ye.» ¹⁴ Tẽeg-b rẽ fãa la wilg-b ne f kaset soaba Wẽnde tɩ b tog n basa b no-koɛɛm yaalsã sẽn ka be yõodo, sã n ka b kẽes kelgdba moogo bala. ¹⁵ Mao n yɩ ned sẽn be yam Wẽnd taoore, n yɩ tʋʋm-tʋmd sẽn ka zoet-a a tʋʋmda yãnd ye la yɩ sɩd Koe-nooga moanda sẽn ka mi yaams ye. ¹⁶ Sã n kella no-noom goam la gom yoodã, zoe b rãmba. B tɛk yaa b tuut neba tɩ b wẽnema paasd n dabda. ¹⁷ B goama rɩta neb wa solenkẽega. Yaa bãmb dãmb la a Imene la a Filɛt, ¹⁸ b tudgame n zãag ne sɩda, n saad n yagd zirẽ tɩ yĩns vʋʋgr taa n logame la woto yaa neb wʋsg tẽeb la b leebd lɛbla. ¹⁹ Kug niyns Wẽnd meeba sẽn tʋɩɩs b rãmb zugã ka bõn-wãadem ye la fãa yɛsa ne bãmb gomda pãnga. Ad-y Wẽnd mi-la b neba la b raab la woto: «Sẽn pʋta bãmb yʋʋr fãa zãag ne wẽnga.» ²⁰ Zak kãseng fãa pʋgẽ, ka sãnem la wanzurf laas bal n be ye, laas kẽer yaa leense, tɩ kẽer ya tãnd laase, kẽer bee waoor tʋʋm yĩng bala, kẽer yaa tʋʋm-yaals yĩnga. ²¹ Dɩlla ned sã n vẽ ne tʋʋm-wẽns niyns m sẽn gomdã, a na yɩ wa waoor laaga, n ya sõngo, n tog ne Soaala, n tõe n dɩk n tʋm tʋʋm-sõma buud fãa. ²² Zãag f meng ne kom-bɩɩba minim wẽnsã; bao zemsgo, tẽebo, nonglem, laafi; naag f pʋʋsgo ne neb niyns sẽn pʋʋsd-b Soaala ne pʋ-peelem. ²³ Sã n kella sogs toodo la sogs yaalsã, zoe-ba, fo meng mi tɩ rẽ n kaood zaba. ²⁴ Mik Soaala tʋʋm-tʋmd ka tog n yɩ zab kaood ye, a tog n deega neb fãa ne sũ-maasem, a bãngr seka a zãms a taaba; Wẽnd sã n fɛɛsd-a, a ka basd raood ye. ²⁵ Yaa ne sũ-maasem la a na n leok tõatba tɩ daare Wẽnd wat n tedga b zʋgo, n vẽneg b yam tɩ b yãe sɩda, ²⁶ tɩ b wĩ wã loode, tɩ Sʋtãan n loe-b ne a wĩ, tɩ b tũud a raabo.

¹ Bɩ f bãng tɩ yaoolem wakata na n yɩɩ toogo wʋsgo. ² Ninsaalba na n lebga beed dãmba, dat wʋsg rãmba, tɩtaam dãmba, wilg-m-meng rãmba, tẽn-kãn-neba, n pa le mi b roagd waoogr ye, n pa le mi sõm ye, n pa waoogd Wẽnd ye. ³ B sũur na n lebga weoglgo, n pa le kũmd b taab nimbãaneg ye, b na n lebga rõatba, yoaadba, sũ-pu-neba, neer bɛɛba, ⁴ bãon-lukdba, zirẽ-be-neba, nong-wukr-dãmba, pẽgd noogo n yɩɩd Wẽnd dãmba. ⁵ B kẽnda yɩnga wa neb sẽn nong Wẽnd waoogre, mik pʋgẽ wã b pa gãd a yẽgra ye. Nin-bãmb me, zoe-ba! ⁶ Neb a taab me n be n saad roto n lebd pʋg-yirsa sẽn pid ne yel-wẽna zutu, pagb sẽn lebg b tʋls wẽnsa yemse; ⁷ bãmb n tar sɩg-sɩge n dat zãmsg daar fãa la b kõn paam n bãng sɩda abada. ⁸ Nin-bãmb wẽnda a Zannɛs la a Zãmbrɛs sẽn yik pĩnda n kɩɩs a Moyiiz; bãmb me kɩɩsa sɩda n lebg neb sẽn tar yam wẽnga la sẽn bʋdg zãnga, b tẽeb pʋgẽ. ⁹ La ka na n zãag ziig ye; neba fãa na n bãnga b gãeemdã wala pĩnd neb a yiiba gãeemda me sẽn puk fãa nifẽ wã. ¹⁰ Sã n ya foom, fo tũ-m lame n sa n zãms nebã, f bãnga m sẽn tʋme, la m sẽn da sed n na n tʋm bũmb ninga, f bãnga m tẽebo, m sũ-maasem, m nonglem, m sũ-keelem, ¹¹ b sẽn waa n pʋgd n namsd-m Antiyos tẽnga la Ikoniyom, la Listr; bõe la m pa namse? La wakat fãa Soaala fãag-m lame. ¹² Neb niyns fãa sẽn dat-ba n vɩɩnd Wẽnnaam vɩɩm ne Krista a Zezi, bãmb dãmb ka tõe n ka nams ye. ¹³ Sã n ya ne nin-wẽns la zirẽ-be-rãmba, b tʋʋm-wẽna sẽn tar paasgo la b sẽn tar paasgo n dabda; bãmb n tudgi, bãmb n le rat n tudg b taaba. ¹⁴ Sã n ya foom, gãd f sẽn zãms bũmb ningã, n mi tɩ rẽ bal la sɩdã. Fo mii f sẽn tũ karen-saam-dãmb niynsi n paam bãngr kãnga. ¹⁵ Yaa al f yãadmẽ la f sɩng n mi sebr sõngo; dẽ n kõ foo yam sõngo sẽn wat ne a Zezi Krista tẽeb la f fãagre. ¹⁶ Sebr sõnga zãng yii Wẽnnaam nengẽ la a yõod ya a sõng fo tɩ f zãmse, tɩ f gom n lubi, tɩ f rems sẽn golme la f wilg sẽn be neere. ¹⁷ Yaa woto la Wẽnnaam ned paamd sẽn sek a zãnga n tõe tʋʋmd sõng buud fãa.

¹ Mam yõkda f sɛɛga, zoe Wẽnnaam la f zoe Krista a Zezi sẽn na n wa kao sẽn vɩ-ba la sẽn ki-ba bʋʋdo, sẽn na n le wa la b dɩ b naama: ² moon Wẽnnaam Koɛɛga, togs la f le togse, noom-b tɩ ka noom-b; ning pãnga n kɩɩse, n tãse; modg n sagl ne maag-m-menga la ne zãmsg tɩrg raab bala. ³ Wakat n wate tɩ neba ka na n le reeg zãmsg sõnga ye; b na n tũla b tʋls wẽnsã; b tʋba sẽn kɩrd tɩ b pa tõe n zĩnd sɩɩ wã, b na n baoo karen-saam-dãmb ka tɛka, neb sẽn gomd b sẽn dat tɩ b gom bũmb ningã, ⁴ n yaool n lak zãng ne sɩda, n kelgd solem-vɩɩdo. ⁵ Sã n ya foom, maan gũusgu ne bũmb fãa, sak namsgo, moon Koe-noogã, modg tɩ yɩ sõmb zãnga. ⁶ Sã n ya maam, m lebga bũmb b sẽn zoe n dɩk n kɩrg maoong zugu la mam loogra wakat zoe n taame. ⁷ Mam zaba zab-sõngã n baase, m zoeesa ta-la a tɛka, m gãda m tẽebo. ⁸ La marsã, pugl ning sẽn ya sõmblem kasetã zoe n wʋga m yĩnga. Keta bʋʋda kao bala tɩ Soaala sẽn ya bʋ-tɩrg soaba rɩk-a n fõgen maam; la ka maam bal n na n paam-a ye, yaa neb niyns fãa sẽn na n gũ b waoonga ne nonglem. ⁹ Ning pãng n wa m nengẽ tao! ¹⁰ A Demas basa maam, dũnna vɩɩma yõod pʋgb yĩnga. A leba Tesalonik, t’a tũud-n-taaga Kresãs leb Galasi, t’a Tit kẽng Dalmasi. ¹¹ A Luk bal n be ne maam. Peeg a Mark me n wa tɩ yẽ bal n tõe n yaoog maam m tʋʋmda pʋgẽ. ¹² Mam tʋma a Tisik Efɛɛz. ¹³ F sã n watẽ bɩ f zɩ m fu-goabgã m sen bas Troas, a Karpos zakẽ, ne m sɛbã, bũmb zãnga sɛb niyns sẽn gʋls-b gãnd zugã. ¹⁴ Yõaka a Aleksãndr maana maam wẽng menga; Soaala na rol-a n zems a tʋʋma. ¹⁵ Fo me gũus ne nin-kãnga tɩ yẽ n yɩ d bɛ menga, n kɩɩs d zãmsgo. ¹⁶ Mam sẽn waa n na n gom n fãag m meng pipi bʋʋda zĩigẽ, ned ba a ye ka sõng maam ye. B fãa basa maam. Wẽnd da ning b taal ye. ¹⁷ Soaala bal n sõng maam la b pidsa maam ne raoodo tɩ mam tõog n zẽk m koɛɛga n moon Fãagda Waoongo tɩ bu-zẽmba fãa wʋm; la Wẽnd meng n deeg-m gɩgemd noorẽ. ¹⁸ Soaala n na n kɩt tɩ m põs geel wẽns buud fãa, n fãag maam la b yãag maam n ta b Arzãn Rĩungẽ. B paam pẽgr yʋʋm sẽn kõn sɛ. Ami! ¹⁹ Pʋʋs a Priska la a Akilas la a Onezifor ne a zak fãa. ²⁰ A Erast paa Korẽnt; mam basa a Trofim sẽn pa keem Milɛ tẽnga. ²¹ Ning pãng n wa tɩ waooda nan ka sɩng ye. A Ewubul tɩ m pʋʋs-fo, n paas a Pudẽns, a Lẽ, a Klodiya la d saam-biisa fãa. ²² Soaala zĩnd ne fo! Wẽnd bark sig yãmb fãa!