2 TESALONIK RÃMBA

2 TESALONIK RÃMBA

¹ A Pol ne a Silvẽ la a Timote n pʋʋsd Tesalonik Tigeng sẽn vɩ Wẽnd la Soaal a Zezi Krista maasmẽ, ² Bɩ Wẽnd Ba la Soaal a Zezi Krista pids-y ne b kũuna la b laafi! ³ Yaa wakat buud fãa la d tog n pʋʋs Wẽnnaam bark y yĩnga, m saam-biisi, tɩ y tẽeba kẽnda taoore la y nonglem ne taab me tara paasgo. ⁴ D zug zẽkda y poorẽ, Wẽnd Tigenga pʋgẽ. D zug zẽkame tɩ y tẽeba ka tol n maage ne y naong la y pɛta sẽn yɩ ka tɛkã. ⁵ Woto wã Wẽnd bʋʋd tɩrga zoe n kaoome la b yetame tɩ y toga ne Wẽnd Rĩungu, y me sẽn sak n namsa yĩnga. ⁶ Wẽnd sẽn bʋʋd tɩrga ratame tɩ pɛt ning yãmb sẽn paama leb b rãmba, tɩ yĩn-maasem led toog ning y sẽn deegã. ⁷ A Zezi Waoonga raare, raar ning b sẽn na n puk yĩngri, tɩ malɛk rãmba yegd-ba, n balemd b naam. ⁸ Na n yɩɩ bug-witem sʋka la b na rok b sũuri ne sẽn ka mi-b Wẽndã la sẽn pa reeg-b Soaal a Zezi Koe-noogã. ⁹ Bãmb dãmb n na n deeg sɩbgr sẽn ka be sɛɛbo, b na n zãaga ne Soaala nenga la b ziira yãeebo. ¹⁰ Wakat kãng la Soaala na n deeg pẽgr b nin-sõma wã nengẽ, wakat kãng la sẽn tẽ-b bãmba na n kils-ba – la na n yɩɩ boto ne yãmb baraare. Tɩ yãmb tẽ-la d kaseto. ¹¹ Tẽegra woto buud sẽn be d yamẽ wã, yaa wakat buud fãa la d yõkd Wẽnd sɛɛg y yĩnga. D kota Wẽnnaam sẽn bool yãmbã, tɩ y yɩ neb sẽn tõe n sak b boolgo; d kotame tɩ bãmb pãng bɩɩs y yamẽ raood sõng buud fãa y sẽn tare, neer maaneg la tẽeba tʋʋmd yĩnga. ¹² Yaa woto la Soaal a Zezi Krista yʋʋr na n paam pẽgre, b nengẽ la b Ba wã nengẽ.

¹ Sã n yaa y sẽn wʋmd tɩ b gomd Soaal a Zezi Krista Waoong raare, la b gomd tɩ d fãa na n wa tigma bãmb taoore, ² m kot-y lame tɩ y ra bas tɩ b bondg y yama tao tao ye. M kotane, m saam-biisi, tɩ y ra yɛɛs ye. Tʋʋm kẽer na tʋmame tɩ wẽnda b tʋm-b-la ne a Vʋʋsem Sõng pãnga. Goam la y na n wʋme, bɩ sɛb kẽer sẽn wẽnd b yii tõnd nengẽ la y na n karem. La b yetame tɩ Soaala Waoong raar taame, bɩ y ra yɛɛs ye. ³ Da bas-y tɩ ned tudg-y ba bilf ye. Bũmb n na n deng n zĩndi tɩ Soaala raar yaool n pʋge: wẽn-kɩɩsg n na n deng taoore, sẽn ka mi-a Wẽnd waoogrã, menesg biiga n na n deng n puk a menga. ⁴ Nin-kãng n yikd zabre ne bũmb ning fãa sẽn boond tɩ wẽnde n deegd ninsaalba waoogre, la a tol n tɩ zĩndg a meng wẽnd doogẽ la a yet tɩ yẽ la Wẽnde menga. ⁵ M sẽn waa n be ne yãmbã m wilg-y la rẽnna, la m tẽed tɩ y ket n tẽrame. ⁶ Y mii bũmb ninga sẽn nan gɩdg a nanda t’a zĩi n gũud a pukra raare. ⁷ Ad-y rũnna menga Wẽn-kɩɩsa zoe n sɩnga a tʋʋmde. Bãng-y tɩ sora sã n pak raare, sẽn gɩdg-a wã sã n bas a sor daare, a na n lika a menga. ⁸ La bãng-y tɩ baraare me la Soaala na n wa ne pãnga n menes-a ne b noor pemsem. ⁹ Wẽn-kɩɩsa na n waa ne Sʋtãamba pãnga. A na n maana bõn-bãna n yɩk neb pɛlense, n belg-ba. ¹⁰ Wẽn-kɩɩsa na n kalma bõn-wẽns sẽn wẽnd bõn-sõma, n paam n kẽes moog zãnga sẽn zãgsb Wẽnd nonglma la b sɩda – la nonglma ne sɩda bal n da tõe n fãag bãmba. ¹¹ Sẽn zãgs-b nonglma la sɩda Wẽnd lob-b la zondo la woto b tẽeda zirẽ-beedo. ¹² Ad yaa woto la Wẽnd kao bʋʋdo la b sɩbg kɩɩsda, sẽn zãgsa sɩda n na n sak wẽngã. ¹³ M saam-biisi, Wẽnd kom-nongdse, yaa tɩlɛ ne-do, tɩ d pʋʋs Wẽnd barka wakat buud fãa y yĩnga. Wẽnd welga yãmb al sɩngrẽ n pids-y ne a Vʋʋsem Sõng sẽn kõt sõmblem la a kõt Wẽnd sɩda reegr pãnga. ¹⁴ Wẽnd sɩd bool-y-la ne b Koe-noogã n na n kẽes-y Soaala Zezi Krista ziira pʋgẽ. ¹⁵ Woto wã, m saam-biisi, da bas-y raood ye. Tall-y zãms sõma niyns d sẽn taas yãmba la y sẽn wʋm d noorẽ bɩ y sẽn karem d sɛba pʋsẽ. ¹⁶ Bɩ tõnd Soaal a Zezi Krista menga la Wẽnd Ba sẽn wilg tɩ b nonga tõndo kõ tõnd kũuni sẽn na n maag d sũur daar fãa la saagr sẽn ka na n yɩ fãoog ye. ¹⁷ Bɩ bãmb meng maas y sũuri la b kõ-y raoodo, tɩ y goam la y tʋʋma yɩ sõma.

¹ M Saam-biisi, pʋʋs-y tɩ Wẽnd gomda kẽne n ta zĩig zãnga la b reeg-a ne waoogre wala sẽn ya to-to yãmb zamaanẽ. ² Kos-y tɩ b fãag-do ne nin-wẽnsã la sẽn kẽ-b moogã tɩ y mi tɩ ka neba fãa n tar tẽeba ye. ³ Wẽnd sẽn ka mi belgrã na sõng-y n ligl y bɛyã. ⁴ Soaala yĩnga d pʋg peela ne yã; tõnd sẽn wilg-y bũmb ningã, d neeme tɩ y sẽn sɩng n gãd-a, y ket n tar-a lame. ⁵ Bɩ Soaala tees y sũura Wẽnde, tɩ Wẽnd pids-a ne nonglem la b sõng-y tɩ y ra serg n bas Krista ye. ⁶ Ad-d sẽn kõt-y noor ning Soaala Zezi Krista yʋʋr yĩnga: bɩ ned kam fãa zãag a menga ne saam-biig fãa sẽn ka vɩ wala d sẽn wilg yãmbã. ⁷ Y vɩɩma tog n togsa tõnd dẽnna la y mi tɩ d ka vɩ yaar ye. ⁸ D sẽn dɩtã, d pa modg ned ba a ye t’a kõ-d ye. Yʋngo, wĩntoogo, d pa vʋʋs ne tʋʋmd ye. D saka yaamse, tɩ d pa rat n yɩ zɩɩb yãmb ned ba a ye yĩng ye. ⁹ D da tõeeme n ka maan wala d sẽn maana ye, la d tʋlgame n kõ-y togsen-taar sõngo. ¹⁰ D sẽn da waa n be ne taaba m da yeel-y la woto: sẽn ka rat-a tʋʋmde bɩ a ra tʋlg rɩɩb ye. ¹¹ D wʋmame tɩ neb n be yãmb sʋka n ka vɩ tɩrg ye, n ka tʋmd ba bilf ye, n yaool n lʋɩɩsd b toog bũmb fãa pʋgẽ. ¹² D kota bãmb dãmb ne dɩdgre, Soaal a Zezi Krista yĩnga tɩ b maag b meng n tʋm n wa tõog n dɩ b sẽn bao n paame. ¹³ M saam-biisi, da vʋʋs-y ne neer maaneg ye. ¹⁴ Ned sã n ka tũud sebr kãnga sẽn datã, bɩ y welg-a toore, bɩ y ra saag n le tũ-a ye. ¹⁵ Modg-y bala n da ges-a wala y bɛ ye; a paam y saglgo wa y saam-biis a taaba. ¹⁶ Bɩ laafi Soaala meng b toore kõ yãmb b laafi wã wakat buud fãa la zĩis fãa. Soaala zĩnd ne yãmba! ¹⁷ Yaa maam a Pol n pʋʋsde la yaa m meng sebre. Y mii bũmb ning sẽn welgd m sɛbã ne neba taab rẽnna. Y ne tɩ sɩd yaa m gʋlsem. ¹⁸ Bɩ Soaal a Zezi Krista bark sig y fãa gilli!