2 PƖYƐƐR

2 PƖYƐƐR

¹ A Zezi Krista sõgne la b tʋʋm-tʋmda, maam a Simo Piyɛr, n pʋʋsde. M pʋʋsda neb niyns fãa sẽn paam-b tɩ d Wẽnnaam la d Fãagd a Zezi Krista ko-b tẽeb sẽn be yõodo wala tõnd dẽnna. ² Soaal a Zezi Krista bãngrã sudg-y bark la laafi zembala. ³ Wẽnd ne b pãnga kõo tõnd vɩɩnd-ne-bãmb la waoog-bãmb yamleoogo. B puka tõndo Ned ninga sẽn boola tõndo ne b pãng la b ziiri. ⁴ B kãaba tõnd kãab noodo la kãab bɛda: b kãab-d la b wẽndlema pʋɩɩre. La woto wã b zãaga tõnd ne dũni wã rẽgd la a tʋls wẽnse. ⁵ Rẽ me yĩng la y tog n modge tɩ y tẽeba naag ne vɩɩm sõngo, tɩ vɩɩm sõng naag ne bãngre, ⁶ tɩ bãngr naag ne tõog-m-menga, tɩ tõog-m-meng naag ne beoog beoog fãa modgre, tɩ modgra naag ne Wẽnd waoogre, ⁷ tɩ Wẽnd waoogr naag ne saam-biis nonglem, tɩ saam-biis nonglem naag ne Adem biig fãa nonglem. ⁸ Ade, dẽ fãa sã n beẽ, dẽ fãa sã n pida zãnga, y kõn zĩi n pa tʋmnẽ ye, n pa womd biisi sẽn ya tõnd Soaala a Zezi Krista bãngra ye. ⁹ Ned ning sẽn ka paama kũun kãensa lebgda zoanga, ned sẽn pa ne yɩɩga; sẽn yĩmd t’a paama a pĩnd dẽgda pekre. ¹⁰ Bɩ y le wɩng n paase, m saam-biisi, n kɩ yẽgna Wẽnd sẽn bool-y la b welg-y toora maasmẽ. Sã n ya woto rabeem ka be ne y raar a ye ye lʋɩɩs ye. ¹¹ Yaa woto la b na n pids b kũuna zãnga n kẽes yãmb d Soaala la d Fãagd a Zezi Krista rĩung sẽn ka be sɛɛba pʋgẽ. ¹² Yaa rẽ yĩng la m na n kell n tẽeg-y yell kãnga daar fãa, ba m sã n mi tɩ y ka yĩmi. Modg-y n vigl y mens sɩd kãnga pʋgẽ. ¹³ Mam tẽedame tɩ m sẽn nan ket m tẽng zug zãnda maasmẽ, segdame tɩ m sõng-y ne yell kãnga tẽegre tɩ y ra wa suus ye. ¹⁴ Soaal a Zezi Krista n zoe n wilg-m tɩ m mii tɩ loog n bas m zãnda wakat yaoome. ¹⁵ Woto wã mam me na n wɩngame, tɩ m loogr poore, bɩ yell kãensa kell n pa y pʋtẽerẽ. ¹⁶ Sɩd me, tõnd sẽn wilg yãmb bũmb ninga fãa, Soaal a Zezi Krista sẽn na n wa ne pãng ningã, ad-y ka solem-bãna bɩ yelbũna la d tão-y ye, yaa d sẽn deng n yãend bãmb meng ziirã ne d nifu. ¹⁷ Yaa Wẽnnaam Ba n kõ-b naam la waoogre. Bãmb n yiis b pãng la b naam gomd kãnga: «Ad-y yaa mam Bi-nongre, ad-y m yam kẽe-a la zãnga.» ¹⁸ Koe kãngã, d wʋm-a lame; a ra yita yĩngri d sẽn waa n be ne bãmba tãnga zugu. ¹⁹ Pʋs n yaa rẽ yĩnga la d gãd bãngdba goma sõmb-sõmbo. Y maanda neere, y sã n mams-b wala fitil bugum sẽn wɩt zĩ-sobdo n gũud beoog vẽegre la tõd-beoog ãdg pukri. ²⁰ Reng-y n bãng-y tɩ bãngr gomd sẽn be sebrẽ, ninsaal ka bee n tõe, a menga toore, n wilg-a võor ye. ²¹ Bãngr gomd ka yit ninsaal sũurẽ ye; sẽn gom b rãmba goma Wẽnd zĩigẽ la ne a Vʋʋsem Sõng vẽnegre.

¹ Neb n zĩndi buuda pʋga n yɩ zirẽ-be-bãngdba; la yãmb me sʋka zirẽ-be-neb n na n yik n yet tɩ b yaa karen-saam-dãmba; bãmb n na n wa ne welg yoodo; b na n basa Soaala sẽn fãag-bã la woto b ka na n kaoos n wã b mens ye. ² Neb wʋsg na n kẽ-b lame n bʋdg moogo la b na n kɩtame tɩ sɩda sor sãame. ³ B sẽn dat tɩ b poorẽ yɩ yalengo, b na n yiisa goam noodo n belg yãmba, la bãng-y tɩ b bʋʋd zoe n kaoome la b wãab beoog zoe n vẽegame. ⁴ Wẽnd ka bas malɛgsa taale b yel-wẽnda poor ye. B pagb la namsg zĩigẽ la lik bog-zulungẽ tɩ b zĩ be n gũud Bʋʋda raare. ⁵ B ka bas tẽn-kʋdem wẽnnẽ dãmba taale, sã n ka neba nii, a Nowe sẽn paase, t’a Nowe n da wilgd-b tɩ b bas wẽnga. B kɩtame tɩ sa-kẽeng ni n sãam yel-maandba fãa. ⁶ B tʋlg n zãmsa yel-maandbã sẽn na n pʋga me, woto b kɩtame tɩ Sodom la Gomor tẽns rɩ bugum n sarem zãnga. ⁷ B fãaga nin-sõng a Lot t’a sũur da sãamda ne yoaadba manes wẽna; ⁸ – nin-sõnga Lot ra namsdame t’a sẽn da be bãmb sʋka, a ra neeme la a wʋmd b sẽn maand beoog beoog fãa – ⁹ Wẽnd maana boto n wilg tɩ b tõe n yolsa nin-sõma namsg buud fãa pʋgẽ n yaool n kees nin-wẽnsa n na n sɩbg-b Bʋʋda raare. ¹⁰ Sẽn na n paam-b sɩbgr n yɩɩda, yaa sẽn zĩb ne yoob tʋls wẽnse, sẽn tũud-b yĩnga raabo n sãbsd Ziira Naaba. Nin-wẽnsa tara wʋglem la tɩtaam; b pa zoet b na tʋʋs yĩngr dãmb mens ye. ¹¹ Malɛgsa ne b sẽn yɩɩd-b ne pãng la tõogã, yaool n pa saagd n kãneg la b luk nin-bãmb bãong Soaala taoor ye. ¹² Ad-y karen-saamb yooda wẽnda rũms sẽn ka tar yam tɩ b tɛk yaa yõk n kodg bala. Yaa bãmb n tʋʋsd-b sẽn ka mi la b me na n baasa baasg a woto buudu. ¹³ B wẽnema n wat ne b sɩbg wẽnga. Bãmb dãmb yaa m bao m sũ-noog tɩ wĩndg keta. Bãmb n dẽgem n sãam zãnga; b sũ-noog la b belg yãmba, n naagd yãmb n dɩt noodo. ¹⁴ B gesgo, bãng pʋg-yoodr gesgo; b sẽn pa tɩgd wẽngã, b kẽesda wẽng yamleoog sẽn pa tar-b pãnga sũurẽ; Wẽnd sẽn yãk b barkã, raab wagl bal n pid-ba! ¹⁵ B basa so tirg n kẽ weoog n menem wala a Balaam, a Bosor biiga, zãmb ligd yamleoog sẽn yõke. ¹⁶ Rẽ me n wa ne a kʋɩdgre, tɩ rũng sẽn ya mugtãa n yaag a noor n gom wa ninsaala n kiis bãngd kãng gãeemdo. ¹⁷ B sɩd yaa wa bul-kẽoodo, wa sob raoog sawadgo; b zĩig pida ne lik la lik bala. ¹⁸ Gom faad la b mi. Ne b tʋls wẽns la b yoob tʋʋma, b takda sẽn nan ka paam-b n zãag ne b pipi tudgrã. ¹⁹ B kãabda b taab soog-m-menga, la b mens balgame n zĩi ne wẽng yembdo. La sɩda bũmb sã n yɩɩd f ne pãnga, fo lebga bõn kãng yamba. ²⁰ Neb sã n zoe n zãag ne zamaana rẽgdo, b sẽn bãng Soaala la Fãagd a Zezi Krista yĩnga la b lɛɛg n le lʋɩt a pʋgẽ, tɩ wẽnga le tõog-ba, ka bãmb yell n sãam n yɩɩd pĩnd sɩda? ²¹ B sã n da ka bãngẽ sõmblema sore n são b sẽn bãng la b baas n kɩɩs b sẽn taas-b no-sõng ningã. ²² Yaa woto la b yella lebg sɩda wa yelbũn kãnga: bãaga lɛɛg n vela a meng wʋbdo; bɩ wa b sẽn togs yɛsa: Kurkur yãanga, ka yãe n pek koom n lebd a begdẽ.

¹ Yãmb ne la, m kom-sõma, ka wã la sebr a yiib soaba m sẽn gʋls yã? La yiiba fãa pʋgẽ, m maoome n yalg y pʋtẽer la m kõ-y bãngr sõngo. ² Tẽeg-y bãngdb sõma sẽn wilgi la noor ning Tʋʋm-tʋmdba sẽn kõ yãmba, tɩ yaa d Soaala la d Fãagda meng noore. ³ Bɩ y bãng tɩ yaoolem wakatã neb sẽn nong b taab laado, neb sẽn mi b tab yaalgo n na n tũ b zʋg wẽngã n la yãmba. ⁴ B na n saadame n maanẽ: «Ye! Soaala sẽn kãab tɩ b na n lɛɛg n waame wã bɛɛ? Yaab rãmba sẽn ki raar zãra, la fãa ket n yaa wa dũni wã sɩngrẽ.» ⁵ Ad-y b maanda wala b ka mi tɩ wakat n zĩndi tɩ Wẽnd gome tɩ saaga la tẽnga zĩndi; tɩ Wẽnd gome tɩ tẽnga sẽn da lis koomẽ wa n nug n yi; ⁶ tɩ Wẽnd gome tɩ koom dɩ wakat kãng dũniya. ⁷ Ad-y rũnna saagã la rũnna tẽngã, Wẽnd Gomd yɛnga bas-b la kɛɛnga, b bas-b-la bugum yĩnga, Bʋʋda raare la nin-wẽnsa wãab raare. ⁸ La bũmb n be, m kom-sõma tɩ y ka tog n yĩm ye: Soaala nengẽ daar a ye zema tusri la yʋʋm tusri me ka yɩɩd daar a ye ye. ⁹ Ad-y Soaala ka tadg b kãabga pidsgu, wala neb kẽer sẽn wɩt-ba n yet tɩ b pa yãgda ye. Yaa sũ-maasem la b maand ne yãmba, tɩ b sẽn datã ka ned ba a ye menengo, yaa b fãa paam vɩʋʋg n tuub b yel-wẽna. ¹⁰ Soaala daar yaool n na n tĩiga wa wagdre. Badaare yĩngr teeda fãa na n bõra zãnga, bõn-witi wã fãa na n yẽnegame la tẽnga ne a teeda fãa na n dɩɩ bugum kasi. ¹¹ Bũmba fãa sẽn na n sʋʋgã, y zɩ marsã tɩ y tʋʋmd yaa vɩɩm sõngo la pʋʋsgo. ¹² Yaa y segl n gũudĩ la y rabsd Soaala raare; baraare, saaga ne a bõn-yoodã na n wulumda ne bugum n sʋʋge, tɩ bõn-witsa fãa yẽneg n dʋʋge. ¹³ Ad-y yaa sa paalle la tẽn paalle la tõnd gũuda, wala b meng sẽn kãabe, la sõmblem n na n ti roog b pʋgẽ. ¹⁴ Woto wã, m kom-sõma, wɩng-y marsã ne y sũur fãa n yɩ sõma, la y rok yell buud fãa y zug tɩ b wa mik tɩ y sũur pida ne laafi. ¹⁵ Tags-y tɩ Soaala sũ-maasma ne yãmb yaa y sõngr yĩnga, wala d sam-biiga Pol me sẽn gʋls n togs-y ne yam ning Wẽnd sẽn kõ-a. ¹⁶ A sɩd wilgda rẽ ne sɛb niyns fãa a sẽn gʋls yãmbã. Zĩis kẽer meng wʋmb yaa toog tɩ zɩtba la yam yaals rãmb dat n lebg-b tulumdi – wa b sẽn nong n maan ne Sebr sõngo – la rẽ yaa b meng bõne la b baooda. ¹⁷ Sã n ya yãmba, m kom-sõma, y sẽn mi tiirã, bɩ y maan gũsgu. Da bas-y tɩ nin-yood wa tudg-y la b koms y pãng ye. ¹⁸ Yãmb wee n tar bɩʋʋng bal ne sõmblem la ne Krista a Zezi, d Soaala la d Fãagda bãngre. B pʋs n soog pẽgre, marsã n digd wakat sẽn kõn zĩnd sɛɛbo. Amina!