2 KORẼNT RÃMBA

2 KORẼNT RÃMBA

¹ Maam, a Pol, a Zezi Krista Tʋʋm-tʋmd ne Wẽnd daabo, maam ne m saam-biig a Timote, tõnd n pʋʋsd Wẽnd Tigenga sẽn be Korẽnt la d saam-bi sõma wã fãa sẽn be Akayi tẽn-tõre. ² Bɩ Wẽnnaam tõnd Ba la d Soaal a Zezi Krista sik y fãa zutu b bark la b laafi! ³ Bɩ Wẽnd la d Soaal a Zezi Krista Ba, nimbãan-zoeer Ba, toog buud fãa yoalsdã, paam barka! ⁴ Bãmb n maasd tõnd sũuri d namsga pʋgẽ, la b meng sẽn maasd d sũurã, bãmb n sõngd tõndo tɩ d me maasd d taab sũuri, b sẽn zĩ ne toog ning fãa. ⁵ Wala Krista namsga sẽn lebg yõod ka tɛk tõnd yĩnga, boto me, ne Krista maasem, d sũ-noog lebga zembala. ⁶ D sã n namsdẽ, yaa yãmb sũur bʋkr yĩnga la y fãagre. D sũura sã n bʋke, yãmb me rẽnda na bʋke tɩ y sak wakat fãa, namsg niyns tõnd me sẽn namsde. ⁷ La saagr bee wʋsgo tɩ y sẽn naag tõnd n namsã, y na naag n kɩdem sũ-noog ne do. ⁸ M saam-biisi, m ka rat n soolg-y ye: pɛt ning d sẽn paam Azi tẽng nams-d-la wʋsgo al tɩ d da pa tẽed tɩ yõor kõn yãk ye. ⁹ Sɩda tõnd meng d toore n sak tɩ b paalg tõnd d kũum bʋʋdo la woto d bãngame tɩ d ka tog n teeg d meng ye. Yaa Wẽnd la d tog n teeg tɩ bãmb n vʋʋgd sẽn ki. ¹⁰ Yaa bãmb n zãag tõnd ne kũum a woto buud dũnna, n na n le zãag-d beoogo. ¹¹ Yãmb meng na sõngd ne y pʋʋsgo, woto yel-sõmda sẽn ya kʋʋng yel-sõmdã na tak neb ka tɛka tɩ b wa pʋʋs bark d yĩnga. ¹² Bũmb n ya tõnd zu-zẽkre la yaa d sẽn pelg d pʋg n zã d meng zamaana pʋgẽ la yãmb sʋka ne sõmblem la sɩda sẽn ya Wẽnd kũuni. Ad-y rẽ ka tũ ne ninsaal sɩlem ye, a tũu ne Wẽnd sõngre. ¹³ Bũmb ka be tõnd sɛba pʋgẽ n zʋʋg yãmb sẽn karemd la y wʋmd bũmb ninga ye. M tẽed tɩ y na wʋm fãa – ¹⁴ tɩ m neeme tɩ y zoe n wʋma bilfu – m tẽed tɩ m na yɩ y zu-zẽkre wala yãmb me sẽn na n yɩ m zu-zẽkre Soaal a Zezi Krista raare. ¹⁵ Yaa m sũura sẽn da kegem woto la m da rat n deng n tũ y nengẽ n le paas y sũ-noogo. ¹⁶ M sã da yiẽ yãmb nengẽ m na n digẽ la Masedoan, n tɩ yi be n le wa y nengẽ, tɩ y yaoolẽ marsã n taas-m Zɩɩde. ¹⁷ M mii, m tagsame tɩ seke ne m kẽna sẽn sigl woto wã? M mii, m ka kelg m sũura sẽn ya ninsaal sũuri n mi N-yẽe rũnna n yik beoog n mi Ayoo? ¹⁸ Wala Wẽnd sẽn yɛs b sɩd zĩigẽ, tõnd goama ne yãmb ka naag n yɩ N-yẽe la Ayoo ye. ¹⁹ Maam, a Silvẽ la a Timote sẽn moon yãmb Wẽnnaam Biig a Zezi Krista, nin-kãng me pa naag n yɩ N-yẽe la Ayoo ye. Bãmb nengẽ yɩɩ N-yẽe bala. ²⁰ Wẽnd sẽn kãaba fãa, bãmb n gõms ne b zugu tɩ yaool n yɩ, la yaa bãmb maasem yĩnga la b sã n yet tɩ Wẽnd paam pẽgre bɩ tõnd tõe n leok tɩ: Ami! ²¹ Wẽnd n vigl yãmb ne maam Krista maasmẽ la b taag tõnd ne b ka-sõngo. ²² Bãmb n ning b bãnd tõnd dĩirẽ la b pids tõnd sũuri ne a Vʋʋsem Sõng kũuni. ²³ Wẽnd naag-m lame n ya kaseto tɩ yaa m sẽn pa rat gãgs ne yãmbã la m pa wa Korẽnt. ²⁴ Ka yet tɩ d da ratẽ lame n dems y tẽeba ye. Ayoo! Y sũ-noog la d baooda; d miime tɩ sã n ya y tẽeba, y wɩk n yɛsa y nao zutu.

¹ Maam bal n yeel m sũurẽ tɩ m pa na n leb y nengẽ y sũ-sãanga pʋgẽ ye. ² Sã n ya maam n sãamd yãmb sũuri wilg-y m sẽn na n paam sũ-nooga zĩig ninga sã n ka m sẽn sãam b rãmb sũurã nengẽ? ³ M sã n gʋls-y y sẽn mi wã, yaa m sẽn pa rat tɩ m waoonga yɩ sũ-sãang ne neb niyns sẽn da tog n pids-m ne sũ-noogo; m mii vẽenega tɩ m sũ-noog yaa yãmb me rẽnda. ⁴ Sɩda, yaa ne yam-yoodre, ne sũ-weoogre, n paas nintãm la m gʋls yãmba la m da pa maan dẽ n na n sãam y sũur ye; yɩla y bãng nonglem kãseng ning sẽn be m sũurẽ y yĩnga. ⁵ Sã n ya ne ned ninga sẽn waa ne beegrã, ad-y ka maam bal la a beegr ye – la m kõn paas tɩ yɩɩg woto ye – a beega yãmb me. ⁶ Nin-kãng sẽn paam kʋʋnga sɩbgrã, sekame. ⁷ B sẽn pʋs n na n kõ-a sugr la raoodo n são, sã n ka rẽ a sũ-sãanga wat n loogame. ⁸ M kot-y lame tɩ y maan zood ne a n yɩɩge. ⁹ M gʋlsd-y la seb kãngã n na n dɩ kaseto, n na n bãng y sakra sẽn ta zĩig ninga. ¹⁰ Y sẽn kõ a soab sugrã, mam me kõn mong-a ye; la m sã n kõ-a sugr wala a ra tara m sugr tʋʋmde, yaa yãmb nonglem yĩnga la Krista sẽn be d sʋkã yĩnga. ¹¹ D da bas tɩ Sʋtãan belg-do tɩ d mi a geelsa fãa. ¹² M taa Troas n moon Krista Koe-noogã. M mikame tɩ Soaala paka kʋɩlensa yalengo n kõ-m be, ¹³ baasg fãa m sũura pa tol n gãand laafi tɩ m pa yãend m saam-biig a Tit ye. M pʋʋs-b lame n le wẽnemd n dɩk Masedoan tẽng sor. ¹⁴ Wẽnd paam barka! Bãmb tũnuga Krista n peeg tõnd tɩ d pʋgd d Tãnsoab sẽn tõog a bɛɛba la d yelgd zĩig zãnga bãmb bãngrã yũ-noogo. ¹⁵ Wẽnd nifẽ, tõnd sɩd yaa Krista yũ-noogo, sẽn paam b fãagra sʋka wa sẽn na n kong-bã. ¹⁶ Bogr a ye yĩnga yũuga yaa kũum yũugu n wat ne kũum. Bogra to wã yĩnga, yũuga yaa vɩɩm yũugu n wat ne vɩɩm. La ãnda n tõe tʋʋmd a woto? ¹⁷ Tõnd ka ya wa neb wʋsgo sẽn pund koom n paasd Wẽnd gomda ye, ayoo! D yaa neb sẽn pelg b sũuri, n gomd ne Krista sɩda, Wẽnd taoore, wa neb sẽn deeg b tʋʋmda Wẽnd nengẽ.

¹ La d le sɩngdame n lʋɩɩsd d meng taoor bɩ bõe? Sãnd ka wẽnd yaa pakre ne-do, wa sẽn ya pakr ne neb kẽere, tɩ d yiis d tʋʋm-sõnga kaset sɛb n wilg yã, bɩ d deeg d tʋʋm-sõnga kaset sɛb yãmb meng nengẽ? ² D tʋʋm-sõnga kaset sebr yaa yãmb mense, yaa sebr sẽn gʋls y sũurẽ, sebr ned fãa sẽn zãad la a karemnẽ. ³ Vẽeneg fas, yãmb yaa Krista sebre b sẽn kõ-do. Ka sebr sẽn gʋls wa sɛb a taaba ne gʋlsg ko-sablg ye, gʋlsa ne Wẽnd Vɩɩga Vʋʋsem; pa gʋls kug peesem zug ye, yaa yĩn-gãongẽ, yaa sũurẽ. ⁴ D sũura sẽn ya kɛgeng woto Wẽnd taoorã, yaa Krista yĩnga. ⁵ Tõnd meng ka tõe n yeel tɩ bũmb tol n beeme n yit tõnd nengẽ ye, ayoo! D tõog buud fãa yita Wẽnnaam nengẽ. ⁶ Wẽnd n kɩt tɩ d lebg b Zood paalga tʋʋm-tʋmda. Zooda yaool n ka zood ning sẽn tar-a a kaset sebr zuga ye, zooda yõga ne Wẽnd Vʋʋsem. Sebra waa ne kũum tɩ Vʋʋsma wat ne vɩɩm. ⁷ Zood ning sẽn tar-a a kaset kug peesem zug la sẽn waa ne kũuma, paamame t’a siginda yãend pẽgr kãsenga al tɩ Israyɛl kamba da pa tõe n ges a Moyiiz nenga sẽn da yãgd ne ziir ninga ye. A ziira yaool n da yaa bũmb sẽn ka na n kaoos n sɛ ye. ⁸ Zood ning sẽn yõg ne Wẽnd Vʋʋsma, zood kãng Siginda ziir kõn yɩɩg sɩda? ⁹ Tʋʋmd ning sẽn baas-a ne ninsaalb paalgrã sã n kõ a tʋʋm-tʋmda ziiri, sẽn tũ a soab wilgri tɩ zemsg zamaana yalsã, nin-kãng soab pẽgr kõn yɩɩg sɩda? ¹⁰ Ayoo! D kõn yals n mak b ziira ne taab ye tɩ pipi ziira pʋs n ka yɩ zɩɩr meng ye. ¹¹ Bũmb sẽn ka na n kaoos n loog sã n puk ne ziiri, bũmb ning sẽn pa loogdã ziira kõn yɩɩg sɩda? ¹² D sẽn paam saagr a woto fãa kɩtame tɩ d zĩi n ka bʋʋd fɩ. ¹³ D ka ya wa a Moyiiz sẽn da kong n bao peend n lud a nengã, n zoet tɩ Israyɛl kamb na n wa yãend sẽn ka tõe n ka sɛ wã sɛɛbo. ¹⁴ A Israyɛl kamba yama kell n paa lika. Al n tãag rũnda menga, f sã n karemd zood kʋdga sebre, f neeme tɩ peenda ket n ludame. A pa lak ye, tɩ Krista bal n lakd peend kãnga. ¹⁵ N-ye! Sẽn ta ne rũnna, a Moyiiz sebra kareng wakato, yaa wa peend la b gãnegd b sũurẽ. ¹⁶ Ya f sã n kẽ Soaala bal la peenda lakda. ¹⁷ Soaala la Vʋʋsem: tʋʋmd a ye; la Soaala Vʋʋsem sẽn be zĩig ninga, be la burkĩndlem be. ¹⁸ Tõnd fãa sẽn doog d neng t’a tʋʋsd Soaala pẽgrã wa nin-gɛtgã, tõnd lebga b wẽnego la d wẽnega pãng tara paasgo n dabda, ne Soaala Vʋʋsma.

¹ Woto wã, tõnd sẽn paam tʋʋmd kãng ne Wẽnnaam nimbãan-zoeere sẽn maneg tõndo, tõnd ka mi tadgr ye. ² D basda yãnd la zoe-nif buud fãa, n zoet zãmbo la zirẽ-beedo, Wẽnnaam Koɛɛgã mooneg pʋgẽ. D sẽn baood bala, yaa sɩda puki tɩ ned ning fãa sẽn yaa pʋ-peen-neda bãmb taoore bɩ a pẽg tõndo. ³ D sẽn moond Koɛɛg ninga sã n ket n ka vẽenega, yaa ne neb niyns sẽn kẽed-b moogã la a ka vẽenega. ⁴ Yaa pʋ-to-nebã: zamaana soaal sẽn sob b rãmb yama tɩ b pa ne Krista Koe-nooga sẽn yãgd ne ziir ningã. ⁵ D zãmsga pʋgẽ, ka tõnd menga yell la d goamd ye. Yaa Krista a Zezi sẽn ya Soaala la d wilgd yãmba; tõnd yẽ yaa yãmb sõgen-kamba, a Zezi yĩnga. ⁶ Wẽnd ning sẽn kõ noore, tɩ vẽenem pusg lik pʋga, yaa bãmb vẽenem n pusg tõnd sũya tɩ d tõe n wilg neb a taaba, Wẽnnaam pẽgr d sẽn yãend t’a yãgd ne Krista nenga. ⁷ D zɩta yõod a woto fãa ne d yĩn-koamsã, d yĩn-tãndã. Dẽ me n kɩt tɩ d mi vẽenega tɩ tõnd pãnga yita Wẽnnaam nengẽ, a ka tõnd meng pãng ye. ⁸ B tara tõnd n tabd zĩis fãa la d nan ka beds ye. D zĩime n tar saagre la d yam nan ka lak ne d meng ye. ⁹ B tara d yaoolgo la Wẽnd nan ka yi d poorẽ ye. B lub-d la tẽnga la b nan ka yiis-d moog ye. ¹⁰ Sẽn na n yɩlẽ t’a Zezi vɩɩma puk tõnd me yĩngẽ, tõnd me sakda zĩis fãa la wakat fãa a Zezi kũuma namsgo. ¹¹ D nan pa ki ye, yaa sɩda, la yaa wakat fãa la b namsd tõnd a Zezi yĩnga la namsga seka a na kʋ-do. Yaa woto me la a Zezi vɩɩma pukd vẽenega tõnd yĩn-kiidgẽ. ¹² Tõnd nengẽ kũuma tʋmda a tʋʋmde la yãmb nengẽ yaa vɩɩm n tʋmd a tʋʋmde. ¹³ Tõnd tara yam ning tẽeb sẽn kõt a soaba wala sẽn gʋlse: «M tẽeme, la yaa rẽnd yĩng la m gom yã.» Tõnd me tẽedame la yaa rẽnd yĩng la d gomda, ¹⁴ n miẽ tɩ sẽn vʋʋga Soaal a Zezi wã na n vʋʋga tõnd me ne bãmba la b yals tõnd ne yãmba b sɛɛgẽ. ¹⁵ La rẽ fãa yaa yãmb yĩnga, tɩ wʋsg gale ne Wẽnd kũuni, tɩ bark pʋʋsga gale neb wʋsg nengẽ, Wẽnd pẽgr yĩnga. ¹⁶ Yaa rẽnd me yĩng la d raooda ka boogd ye. Ayoo! Yĩnga pãng sã n tar boogre n dabda, d sɩɩga rẽnd tara paasg beoog-beoog fãa. ¹⁷ Daar a wãn namsg segenda tõnd yĩnga, pẽgr sẽn kõn sɛ, pẽgr sẽn zʋʋg saagre. ¹⁸ D sẽn saagd n yɩɩdã, ka nif sẽn tõe n yãend ye. Nif sẽn ne ka zɛɛd sɛɛb ye. Nif sẽn pa ne wã n ka sɛt lɛ-lɛ.

¹ Tõnd sẽn mi, yaa tɩ zãnd ning tõnd sẽn be a soab tẽngrã, tẽng zug ka, sã n wa sirgi, doog a to n be arzãna, Wẽnnaam sẽn segl d yĩnga; roog sẽn kõn sirg abada, sẽn ka ninsaalb nug tʋʋmde la sẽn zao yĩngri. ² D zĩi ne nintãm tẽng zug rooga pʋga n dat ne d sũur fãa tɩ yĩngr dooga me n dogl a zugu. ³ La rẽ yaa d sã n dat tɩ b wa mik tɩ d ka zĩ d zaala, d yera fuugu. ⁴ D zĩi d tẽng zug rooga pʋga n tar waasgo la yɩɩre; yaa rẽ me la d dat fuuga yeelgre n yɩɩd a yeegre; d datame n yeelg fuug a yiib soabã n bʋʋg pipi soabã, tɩ vɩɩma rɩ sẽn tõe n ki a soabã. ⁵ Yaa Wẽnd meng n togl tõnd so-kãnga tɩ bãmb meng n lembd tõnd a Vʋʋsem Sõng kũuni. ⁶ D sũur kegma, ba d sã n mi tɩ kaoos yɩnga ne yĩng ning d sẽn zĩ ne a soaba zãagda tõnd ne Soaalã. ⁷ D kẽnda ne tẽebo, ka ne d nina vẽenem ye. ⁸ Tõnd sũur kegmame tɩ d datẽ meng n bas d yĩn-kãnga n tɩ yegl Soaala. ⁹ Dẽ n so tɩ d vɩ ne d yĩngã bɩ d yeeg-a lame n base, d sẽn baood la Wẽnd daab maaneg bala. ¹⁰ D sẽn ya a soab fãa, d na n yaasa d kãre bʋʋda raare tɩ ned kam fãa reeg a tʋʋm keoore, tʋʋmd ninga a sẽn tʋme, a sẽn da waa n ket ne a yĩnga, a tʋʋm sõng wala a tʋʋm wẽnga. ¹¹ D sẽn zoet tɩ d Soaala waoogr na n wa pa sãoog yĩnga, d modgdame tɩ ninsaalba reegd d saglgo. Sã n ya ne Wẽnde, d miime tɩ d yɛsa d kãr bãmb taoore la d tẽedame tɩ d sũura me rɩga pɛɛlg fas bãmb taoore. ¹² Ka lʋɩɩs d meng taoorã la d rat n le sɩng ye, d wilgd-y lame bala bũmb ning sẽn be d nengẽ tɩ y zug tõe n zẽk ne tõndo la woto y na lub sẽn ka baood b meng pẽgre ne sẽn solg sũurẽ, n baood-a ne sẽn puk yɩnga. ¹³ Sɩda d sã n gomame waa d yika gãeemdo, yaa Wẽnd yĩnga; d sã n gomd tɩ tũudẽ, yaa yãmb yĩnga. ¹⁴ A Zezi Krista nonglem rɩdgd-d lame tɩ d tags tɩ nin-yend sã n ki neb fãa yĩngã, fãa n naag n ki. ¹⁵ B sẽn ki fãa gill yĩngã, yaa sẽn na n yɩlẽ tɩ sẽn vɩ-ba da le vɩɩnd d mens yĩng ye, b vɩɩnd sẽn ki-a la sẽn vʋʋg-a b fãa yĩnga. ¹⁶ Woto wã d ka le ne ned ba a ye ne ninsaal nif ye. Ba sã n da yaa ne d nin la d da bãng Krista, ka boto marsã la d le get-b ye. ¹⁷ Ned sã n kẽ Krista a lebga nin-paalle, nin-kʋdga menemame tɩ paalla led a zĩiga. ¹⁸ La fãa yita Wẽnd nengẽ, bãmb tũu Krista maasem n maneg tõnd yell ne bãmba la b kõ-d la maneg taab yell ne tʋʋmd ning d sẽn deeg b nengẽ wã. ¹⁹ Yaa Wẽnd meng n da tũ Krista n wẽnemd dũniya neng n le tees b menga; b basa ninsaal beegr taale la b kõ tõnd zelemd sẽn na n gom n maneg d taab yelle. ²⁰ Tõnd tʋʋmd yaa d deeg Krista zĩiga. Yaa wa Wẽnd sagenda ne tõnd noore. Yaa rẽ la d kot-y, Krista yĩnga, tɩ y maneg y yell ne Wẽnde. ²¹ Ned ning sẽn ka maana yel-wẽndã, yẽ soab basame tɩ b tʋk-a yel-wẽnd zɩɩb, sẽn na n yɩlẽ bala tɩ Wẽnd tũ a maasem n pids tõnd ne b sõmblem.

¹ Tõnd sẽn ya Wẽnd tʋʋm-tʋmdba, tõnd wɩngda ne yãmba tɩ y da sãam Wẽnnaam kũuna b sẽn kõ yãmba ye. ² Yaa bãmb meng n yete: «Barka daare mam deega f kosgo, fãagra raare, mam sõnga foom.» Barka raar la rũnna, fãagra raar la rũnna. ³ Woto tõnd ka rata tɩ d manesem rɩgl kugr tɩ ned lak n lʋɩ tɩ b wa sãbs tõnd tʋʋmda ye. ⁴ D sẽn pa rat tɩ b sãbs-dã, d modgda d manesem fãa pʋgẽ, n wilg tɩ d yaa Soaala tʋʋm-tʋmdba. D modgdame n sak lengr daar fãa, n sak sũ-beedo la yɩɩre, ⁵ n sak pãbre, n sak roog kõom, n nams zab-kaoodb nusẽ, n sak yaamse, n bas gõeem, n bas rɩɩbo; ⁶ d modgda ne pʋ-peelem, ne bãngr baoobo, ne sũ-tõogo, ne taab sʋk ningri, ne yam sõng baoobo, ne taab nonglem akɩka, ⁷ ne sɩd togsgo, ne Wẽnd pãng bõsgo; d modgda ne sõmblem zab-teed baoobo, zab-teed sẽn zãad n digd bɛɛba, zab-teed sẽn zãad n ligind bɛɛba. ⁸ D sakda waoor wala paoore, yʋ-sõng wala yʋ-beedo. B rõt-d la zirẽ-beedo tɩ d yaool n togsd sɩda, ⁹ b get-d la wa neb sẽn ka yʋʋre, tɩ d yʋʋr yaool n sãt zĩig zãnga, wa neb kũum sẽn yãk raare tɩ d vɩɩma wɩɩd ne pãnga; wa neb sẽn tog ne kaase la d yaool n ka kiid ye; ¹⁰ wa neb sẽn zĩ ne sũ-sãamse, tɩ d noor yõgemd daar fãa; wa naong rãmba tɩ wʋsg yaool n tũud tõnd n lebgd arzɛk rãmba; wa nug sẽn ka zãad rãmba, tɩ d yaool n tar fãa. ¹¹ D ka gom-y ne zoe-nif ye, Korẽnt dãmba, d laka d sũur zãng n wilg yã. ¹² D sũurẽ wã weer be y yĩnga, ya y meng sũurẽ la weer paoogda. ¹³ Lebs-y tõnd d yel-sõmde; m gomda ne yãmb wala m kamba, m kot-y lame tɩ y pak y sũura yalengo. ¹⁴ Da lagem-y ne bu-zẽmbã n dɩk so-yɛng ye. Bõe n be sẽn baood-a sõmblem la sẽn baooda wẽng sʋka, vẽenem ne lik sʋka? ¹⁵ Sɛdg bʋg buud n tõe n sede Krista ne a Beliar sʋka? Sẽn tẽed-a la sẽn ka tẽed-a lagemda taab bõe yĩnga? ¹⁶ Wẽnd dooga maanda a wãn n wa lebg wẽn-naandsa rẽnna? Tõnd yẽne la Wẽnd vɩɩga roogo tɩ b meng n yeele: «M na n ti-la m doog bãmb sʋka la m na n zĩnd n paka bãmba. M na yɩ b Wẽnd tɩ bãmb yɩ m neba.» ¹⁷ Dɩlla welg-y mens ne nin-bãmba, bas-y-b kɛɛnga. Da sɩɩs-y bõn-dẽgd buud ye tɩ m zaka noor na pak y yĩnga. ¹⁸ M na yɩ Ba y yĩnga tɩ y me yɩ m kom-dibli la m kom-pugli – Pãng-Soaba-Wẽnd n yeele.

¹ Tõnd sẽn paam kãab nood a woto fãa, m kom-sõma, d sõng tɩ d yĩnga la d yama lak ne rẽgd buud fãa, d zoe Wẽnnaam la d baas d tʋʋmna, d sõmblem baoob tʋʋmna. ² Pak-y y sũurã d yĩnga. Ned ba a ye ka rɩ bõne d nengẽ ye. Ned ba a ye ka lebg naongo, tõnd ka rɩ ned ba a ye paoong ye. ³ M pa gomd woto n dat n ning y taal ye. M zoe n togs-y lame tɩ y vɩ bɩ y ki yã, y paada tõnd nonglem pʋgẽ. ⁴ D sũur kegma ne yã la d zug zẽka wʋsgo; y maasa d sũuri al tɩ ba ne d sen tar toogã, m sũ-nooga ket n pida zãnga. ⁵ D taa Masedoan la pems maasg ka wẽ d yĩnga ye. D yãee lengre zĩig zãnga. Yɩnga yɩɩ maoore tɩ pʋgẽ ya rabeem. ⁶ Wẽnd sẽn maasd nimbãan-dãmb sũuri, n maag tõnd dẽnna ne a Tit waoongo. ⁷ Ka a waoonga bal ye, yaa yẽ me sẽn leok t’a yãenda sũ-noog y sʋka. A wilg-d lame tɩ y gũud-d la ne y sũur fãa; a wilg-d lame tɩ y sũur sãama y sẽn ka yãend tõndã; a wilga y sẽn da rat neer ning fãa ne tõndo, la woto wã mam nengẽ yɩɩ sũ-noog ne sũ-noogo. ⁸ Sɩda m sebrã sã n sãam y sũuri me, ad-y rẽ pa sek mam lɛɛg n zab ne m meng marsa ye; tõe tɩ m zaba ne m menga a wakatẽ tɩ m mi tɩ sebrã kõ-y la sũ-sãanga, ba sũ-sãanga sã n ka kaoose. ⁹ La marsã m sũur noomame. Ka y sũ-sãangã n wa ne mam sũ-nooga ye, yaa m sẽn yãe t’a waa ne y tuubgu. Yãmb sũ-sãangã yaa Wẽnd sẽn dat a soaba buudu; tõnd ka maan bũmbu n wa ne-a ye. ¹⁰ Sũ-sãang wa Wẽnd sẽn dat a soaba buudu wata ne tuubgu n manegd yelle la woto wã a ka bõn-wẽng ye. Yaa sũ-sãang wa zamaana rãmb sẽn mi a soabã n wat ne kũum. ¹¹ Ad-y y sũ-sãang sẽn naag ne tuubgã tʋma tʋʋm-sõma y sũurẽ. Ad-y y sẽn yãgd marsã n na n bao yella sore, – bõe la m gomd woto? – Ad-y y sẽn pa rat n dɩ a taale, n sãbsda wẽnem, ad-y y sẽn zoet rabeem ne a maanego; ad-y y sẽn tʋl m yãabo, ad-y y sẽn tʋl neere, ad-y y sẽn gẽesd sɩbg-sõngo. Y wilga sõmb-sõmbo tɩ yell kãnga pʋgẽ y ka lʋɩɩs y toog ye. ¹² Dɩlla m sã n gʋls-y sebre, ad-y ka bɛɛgda, ad-y ka b sẽn beeg a soaba me yĩng ye. Yaa sẽn na n yɩlẽ bala tɩ y nonglem kãsenga ne tõnd puk Wẽnd taoore. ¹³ Yaa rẽ n maas d sũuri. La sũ-noog sẽn yɩɩd rẽ n waa n paase: ya a Tit sũ-noogã, t’a yama gãanda y fãa poorẽ. ¹⁴ M sã n saag, yẽ taoore, n pẽg m meng bifu yãmb poorẽ, dẽn ka bũmb sẽn wat ne m yãnd ye. M sẽn minim n togs sɩd bũmb fãa poorẽ, m sẽn togs bũmb ning a Tit poorẽ wã me yɩɩ sɩda. ¹⁵ La woto a nonglem ne yãmb le paasame t’a tẽega y fãa sakr sẽn yɩ a soaba, a tẽega y sẽn deeg-a ne rigbu la sulg-m-menga. ¹⁶ M sũur nooma m sẽn tõe n teeg-y bũmb fãa pʋgẽ.

¹ M saam-biisi, d wilgd-y la kũun ning Wẽnd sẽn kõ Masedoan Tigengu. ² Ne b namsga sẽn yɩ ka tɛka, b kɛ-la b sũ-noog kãsenga la b naonga sẽn yɩ naong menga pʋga n yiis b kõo-n-da-kees kũuni. ³ M kõta kaset tɩ b kõo ne yamleoogo wala b pãng sẽn tõe la sẽn yɩɩg b pãng menga. ⁴ Bãmb meng n kos tõnd ne dɩdgre tɩ bas-ba tɩ b naag n sõng nin-sõma wã. ⁵ B kõome tɩ yɩɩg d sẽn da tẽeda tɩ yaa b mens la b reng n dɩk n kõ Wẽnde, la tõnd me, Wẽnd poore, ne Wẽnd sõngre. ⁶ Dẽ n kɩt tɩ d kos a Tit t’a sõnge, tɩ kũm-taab-nimbãanega tʋʋmde a sẽn sɩng yãmb sʋka, baas neere. ⁷ Y sẽn wɩngd sõma ne bũmb faa wã: ne tẽebo, ne goam, ne bãngre, ne tʋʋmde, ne nonglem, wa tõnd sẽn wilg yãmb a soabã, bɩ y wɩng woto me ne taab sõngre. ⁸ Ka noor la m kõt-y ye, m datame bal tɩ y sẽn wɩngd ne taab sõngrã wilg tɩ y sɩd tara taab nonglem akɩka. ⁹ Yãmb mii neere Soaal a Zezi Krista ne b kõt yaarã. B sẽn da ya arzɛk soaba b lebga naong soab tõnd yĩnga la woto b naonga lɛɛg n pidsa tõnd ne arzɛka. ¹⁰ Dɩlla yaa saglg bala la m kõt yãmba la wã n tog ne yã tɩ yãmb n deng neba fãa rɩẽ, n tags tʋʋmd kãng yelle la y sɩng-a. ¹¹ Baas-y tʋʋmda marsã wala y sẽn da rat ne sũur ningã la ne pãng ningã. ¹² Fo sũura raab sã n pidi, f sẽn wat ne bũmb ning fãa yɩta bõn-sõngo tɩ ka fo sẽn ka tara la b na n ges ye, yaa fo sẽn tarã. ¹³ Pa yet tɩ y kõ y taab la y zĩnd ne naong ye; neera la ned fãa paoong zeng a to rẽnna. ¹⁴ Yãmb paoonga n dɩlgd bãmb naong rũnna, la raar a to tõe tɩ b me paoong wa lek yãmb sãoogo. Woto la zem-taab zĩndida. ¹⁵ Yaa woto la b gʋlsyã: Sẽn deeg-a wʋsgo ka paam tɩ yõsg ye, la sẽn deeg-a bilf me ka yãe tɩ paoog-a ye. ¹⁶ Wẽnnaam paam barka, bãmb sẽn yãnga a Tit nonglem ne yãmba! ¹⁷ A saka m boolle. A sũura nonglem sẽn kɛɛd n yɩɩd pĩnda, a kõ-la a meng yam n na n wa y nengẽ. ¹⁸ D yãka d saam-biig a ye t’a yãag-a; kristneba fãa pẽgda nin-kãng sẽn tʋm tʋʋmd ninga Koe-nooga yĩnga; ¹⁹ la ka rẽ bal ye, yaa kristneba fãa n yãk-a t’a yãag tõnd d so-toaka pʋgẽ, n naag n yãend y vaag-n-kõ zãnga sẽn wat ne Soaala pẽgr ninga la a naag n yãend tɩ yɛla me tũu wa d sẽn date. ²⁰ D maana woto tɩ d ka rat tɩ ned wɩd tõnd ligd kãnga sẽn labsa poorẽ ye: sɩd lebga zɩɩb meng la b tʋk-do. ²¹ Ka Wẽnd taoor bal la d baood tɩ d yɛla tũ sor ye, yaa ninsaalba me taoore. ²² D saam-biig a to la d paas bãmb b yiibã; d yãenda naoor yaka la bũmb wʋsg pʋgẽ tɩ nin-kãng tara tʋʋmda sũuri; so kãngã, a le wɩsg a meng n yɩɩda, a pʋg sẽn peel ne-y yĩnga. ²³ Sã n ya a Tit, yẽ yaa mam tũud-n-taaga la m sõangd yãmb sʋka; sã n ya saam-biis a taabã, yaa Tigengã, Krista zu-zẽkrã, n yãk-ba. ²⁴ Wilg-y-ba, tẽedba fãa taoore, y nonglma sẽn ta zĩig ninga la sẽn tũ ne bũmb ning tɩ d tar zu-zẽkre y fãa gill poorẽ.

¹ M pa na n nams n gʋls yãmb saam-biisa sõngra poorẽ ye. ² M miime tɩ yaa ne y sũur fãa la y baood nin-sõma wã sõngre la m goma y yelle ne Masedoan dãmb n pẽg yãmba; m togsame tɩ yaa al dɩẽ woko la Akayi tẽng segl n sɛ. Yãmb modgra kõo neb wʋsg sũ-keelem. ³ M na n deng n tʋma m saam-biisã tɩ mam sẽn pẽg yãmba da wa yɩ zirẽ-beedo la b mik tɩ yãmb segl n sɛɛme wa mam sẽn yeelã. ⁴ Ka rẽ Masedoan dãmba sã n tũ maam n wa ling yãmba, m sẽn tãoosd raooda na n lebga yãnde; na yɩ yãmb dẽnd n yɩɩda. ⁵ Dẽ la m tʋlg yã tɩ d saam-biisa reng taoore tɩ y segl y sẽn dat n kɩs bũmb ningã tɩ beed ka naag ye, la b yãend tɩ y kõta ne y sũuri. ⁶ Gese, kʋɩɩm sã n zoe bʋdb toogo, a na n tigsa ka-faado la ned ning sẽn bʋta ne sũuri yaa bark buud fãa la a tigsda. ⁷ Bɩ yãmb ned kam fãa tũ a sũur yalem n kõ a sẽn tare la a ra maan wala a ka kõt ne yamleoog ye, wala yaa moadeg ye. Sẽn kõt-a ne yamleoog la Wẽnnaam nonga. ⁸ Bũmb zãnga Wẽnd meng tõeeme n pids yãmb ne sõm buud fãa, al tɩ y tar wakat fãa, la bũmb fãa pʋgẽ sẽn sek y vɩɩma n tol n kell, tɩ yãmb me rɩk rẽ n maan yel-sõmde. ⁹ Yaa woto la b gʋls yã: «Zĩis fãa b maanda sõm bala, b kõo naong rãmba, b sõmblem kõn sɛ abada.» ¹⁰ Wẽnd sẽn kõt ka-koaad ka buud sẽn na n bʋde, la bur sẽn na n dɩ, b na kõ yãmb a yiiba fãa, la y sõmblema na n woma biis zembala. ¹¹ Y arzɛka sã n paase, y na tũ rẽ n lebg kõt yaar dãmba, la tõnd me na tũ y kõt yaarã n sõng tɩ neba fãa wɩng ne Wẽnd bark pʋʋsg kãsenga. ¹² Ka nin-sõma wã bal nimbãaneg la y kũmd ne kũun-sõng a woto ye, kũuna le wata ne Wẽnd bark pʋʋsg neb ka tɛk nengẽ. ¹³ Kũuna wilgd-b-la yãmb sẽn ya neb niynsi la b pẽgda Wẽnnaam b sẽn bãng tɩ yãmb sɩd tũuda Krista Koe-noogã. B pẽgd-y lame yɛsa tɩ y sẽn kõt n pa keesdẽ wã, pukda y zood ne nin-sõma wã la ne tõnd me. ¹⁴ B sã n pʋʋsd yãmb yĩnga, lebga b me wilg b nonglem ne yãmba, b sẽn yãend bark ning Wẽnd sẽn sudg yãmbã. ¹⁵ Wẽnnaam paam barka tɩ b kõ-d la kũuni sẽn yɩɩd noor toagsg!

¹ N-ye! Sẽn kot-a yãmbã, Krista sẽn bʋgs la b ya nin-noang yĩngã, yaa mam meng a Pol, rao ninga sẽn ka tar võore a sã n be yãmb sʋka, t’a sã n yaool n zãr bɩ a ya nin-toaaga, ² maam n kot-y: sõng-y tɩ m sã n wa bɩ m da yik zʋg toaag ning m sẽn dat yik ne neb kẽera ye. Bãmb dãmb tẽedame tɩ m manesma tũuda ninsaalb rẽnna. ³ Tõnd vɩɩ dũni wã pʋga, yaa sɩda, la tõnd ka zabd ne dũni rãmba zab-teed ye. ⁴ N-ye! Tõnd zab-teeda ka zamaana rãmb dẽnd ye, Wẽnd n kõ-b tõndo, b meng yĩnga, la d tõe n tusa tãnsoben-doog buud fãa n lubi. ⁵ Sẽn maand-b wa b ka mi Wẽndã, tõnd n lubd bãmb dãmba sɩlem la b tɩtaam, tõnd n gõdgd yam buud fãa n loe ne Krista tẽebo. ⁶ Yãmb tũudma sã n lebg neer zãnga, d na yik n zab la d sɩbg kɩɩsd fãa. ⁷ Ade, ned sã n beẽ n tẽed tɩ Krista n so-a, a bãng rũnna la beoog tɩ Krista n so yẽnda, la Krista n so tõnd me. ⁸ Yãmb sõmblem paasg yĩnga, ka y bõna yĩng ye, d paama tõog Soaala nengẽ la d sã n pẽgd d meng tɩ loog, yãnd ka tar m ye. ⁹ M ka rat n maan wa m baood n na n fʋʋsa yãmb ne m sɛba ye. ¹⁰ B yetame tɩ m sɛba pʋga m yaa gãndaoogo la nin-toaaga la m sã n yɛs y taoore m ka tar yaoko la m ka mi goam ye. ¹¹ Bãng-y nere tɩ d sẽn be yɩɩg n ya a soab ne d goama, d sã n pẽnege, yaa d tʋʋma n na n wilg tɩ d ka teem ye. ¹² M pa kɩɩs tɩ m kõn saag n zeng m meng bɩ m mak m meng ne neb kẽer ye. Bãmb dãmb sẽn baood yaa b lʋɩ b taab taoore. B sẽn pa rʋʋsd ned a to n ta b sẽn yals b meng zĩig ningã, b yaa yalemse. ¹³ Tõnd yẽ kõn saag n pẽg d meng tɩ loog ye. Tõnd tũuda sor ning Wẽnd sẽn wilg tõnd tɩ d dɩk n ta yãmbã. ¹⁴ D ka na n tũ sor a to wala sor ning d sẽn dɩka ka taas tõnd yãmb nengẽ ye. D taame menga ne Krista Koe-noogo. ¹⁵ Tõnd pa na n pẽg d meng tɩ loog ne d taab tʋʋm ye la d saagdame tɩ y tẽeba sẽn yẽrgd n dabd taoorã, d na waa n lebg y zu-zẽkre wa sẽn yɩ zĩisa taabã. ¹⁶ D na n gãndga yãmb tẽngã n moon Koe-nooga zĩis a taaba, la kõn le yɩ ned a to toaagẽ, la kõn le yɩ ne neb a taab sẽn tʋʋm n dɩglẽ, la d na n pẽgd d meng ye. ¹⁷ Ned sã n baood a pẽgre, bɩ a bao-a Soaala nengẽ. ¹⁸ Ad-y ka ned ning sẽn pẽgd a meng n ya nin-kãseng ye, yaa Soaala sẽn pẽgd a soaba.

¹ Y sã n tõe n sak tɩ m maan wa gãeeng bɩ y sak waare! ² Mam sẽn nong yãmb ne sũ-kiir ningã, yaa ne Wẽnd meng nonglem; m dɩka yãmb n kõ sɩd a ye; m peega yãmb wa pug-bĩngri n tɩ kɩs Krista. ³ La rabeem tar-m lame, m zoeta y na n wa maan wa a Awa sẽn sak waafa sɩlem goama, tɩ y sũya wa rẽgem, tɩ y sãam y pʋ-peelem ne Krista. ⁴ M neeme tɩ ned ninga fãa sẽn wa-a yãmb nengẽ t’a na n wilga yãmb Zezi a to, sẽn ka tõnd sẽn wilg a soabã, bɩ a gom Vʋʋsem Sõng a to sẽn ka yãmb sẽn zoe n paam a soabã, bɩ a moon koɛɛg a to sẽn ka Krista rẽnna, yãmb deegda yẽ soab neere. ⁵ Mik m pa tagsd tɩ nin-bãmb sẽn tẽed tɩ b yɩɩda tʋʋm-tʋmdb a taabã, m pa tẽed tɩ b sãoo maam ye. ⁶ Ba mam sã n ka goam-goamda, ne bãngr yẽ sẽ, m ka paood ye; d wilg-y la y nifẽ, ne bũmb wʋsgo sẽn yɩ vẽenese. ⁷ Dɩlla m kongra bee yɛ? Mam sẽn moon yãmb Koe-noogã n pa tol n bao yõoda bɩ bõe? Bɩ mam sẽn sak n yaal m menga n na n zẽk yãmbã? ⁸ Yaa saam-biis a taab paoong la m deeg n dɩlg m menga, n tõog n sõng yãmba. ⁹ M sẽn ta y nengẽ tɩ bũmb paoog-ma m ka lebg yãmb ned ba a ye zɩɩb ye, yaa Masedoan saam-biisi n yaoog-m. M pa tʋlg, ba vugr menga, n kos yãmb sãando la m kõn saag abada. ¹⁰ Sɩd wa Krista sẽn ya m kasetã, m zug kõn sulg Akayi tẽn-tõre, yell kãnga poorẽ ye. ¹¹ La rẽ ya m sẽn pa nong yãmba bɩ? Ayoo! Wẽnd mi tɩ ka boto ye. ¹² M na kell n maan boto tɩ neb niyns sẽn baood-b n na n kõ b meng bʋʋm, n gomd tɩ b maana wa tõndã, bɩ b ra tõog n paam bʋʋm ye. ¹³ Nin-bãmb ka tʋʋm-tʋmdb akɩk ye, yaa rɩ baoodb sẽn belg tɩ b yaa Krista tʋʋm-tʋmdba. ¹⁴ La rẽ ka tog n yɛɛs-d ye tɩ Sʋtãan meng mi n wẽnda malɛk ne a vẽenem. ¹⁵ Dɩlla Sʋtãana neba sã n yet tɩ yaa Wẽnd sõmblema la b pʋgda, bɩ d da yɛɛs ye. D bãng bala tɩ b kũuma na n wẽnega b vɩɩma: bõn-wẽnga. ¹⁶ M le yet-y lame, da mams-y maam wa gãeeng ye; la rẽ sã n noom-y bɩ y bas tɩ m sɩd yɩ gãeenga n tõog n maan wakr bilfu. ¹⁷ M sẽn na n togsã, m ka na n togs-a ne Soaala yam ye, na n yɩɩ wa ne gãeemdo, tɩ m tara m sẽn na n pẽg m menga. ¹⁸ Neb wʋsg nagda ne zamaana yɛla. M me na maan wa bãmba. ¹⁹ Y moor nooma ne gãeemse la yãmb n yaool n get y mens wa neb sẽn tar b vɩɩma buka. ²⁰ Yãmb sakdame tɩ b kẽesd-y yembdo, tɩ b rɩt yãmba, tɩ b fãad yãmba, tɩ b tar yãmb toogo, tɩ b tʋʋd yãmb, tɩ b laand-y pegse. ²¹ M togsda rẽ ne yãnde; d sɩd basa d meng yog-yoge. M me na n goma wa gãeenga la m yeel tɩ b sẽn lʋɩɩsd bũmb ning taoorã, ma me toe rẽnna. ²² B yet tɩ yaa Ebre rãmb buudu, maam me; tɩ b yaa Israyɛl kamba, maam me; tɩ b yaa Abraam yagense, maam me; ²³ tɩ b yaa Krista Tʋʋm-tʋmdba, mam na gom wa gãeenga: maam n yɩɩd bãmba; m sẽn kẽ bi-bees roogẽ sõor yɩɩd-b lame, b sẽn pãb-m sõor yɩɩd-b lame; yɩɩ naoor yak la kellẽ bilf bal tɩ m kiẽ. ²⁴ M sẽn deeg Zʋɩf rãmba nengẽ kaas pistã la a wɛ – a ye bal n ka pisnaase – yaa naoor a nu. ²⁵ Sãbsa yaa naoor a tãabo; vugr la b lab-m ne kuga; d koglg sẽn paa koomẽ yaa naoor a tã; m tol n paa kooma zug wĩndg la yʋng tõre. ²⁶ Sor zug yaams yɩɩ ka tɛka; ad kʋɩlsa gɩdgre, ad so-gɩtba, ad saam-biisi, ad bu-zẽmba, ad tẽng pugẽ yel-pakre, ad we-raoog rẽnna, mogr dẽnna, ad buuda neb zãmbo, ²⁷ m kõn gom m tʋʋmde, m namsgo, gõeem kaalem, kom la ko-yũud yelle, kom-gãaga, fut sẽn na n yiis waood kaalem. ²⁸ D kõn gom sẽn keta ye: m sẽn zĩ ne yɩɩr ning beoog-beoog fãa, Tigenga yɛl sẽn loe m zug yĩnga. ²⁹ Ãnda la pãn-kaoolg soaba, tɩ m pa naag-a n ya koamsa? Ãnda n lʋɩte t’a lʋɩɩsa ka yõog-m wala bugum? ³⁰ M sẽn tõe n zẽk m meng ne bũmb ning yaa m komsma. ³¹ Tõnd Soaala Zezi Krista Ba a Wẽnde – sẽn so bark yʋʋm tong taab n ka mi sɛɛbã – bãmb miime tɩ m pa yagd ye. ³² Damas tẽng naaba, a Aretas, kɩtame tɩ tãb-biisa gũbg tẽngã n baood n na n yõk-ma. ³³ La yɩɩ peoog pʋga la b sagl maam n tũnug roog võore n sik-m lal-gũbra poore la woto la m tõog n põs-a.

¹ Ka yaa zẽk-m-meng la y baood laa? (Rẽ yaool n pa segd ye) la bas-y tɩ m togs-y bũmb ning fãa Wẽnd sẽn wilg maam la m sẽn yãende. ² M mii kristneda, yʋʋm piig la a naas rũnna (yaa ne a yĩnga, mam pa mi ye, Wẽnd n mi) b tall-a lame n dʋʋs arzãna. ³ La nin-kãnga sẽn dʋʋs arzãna, yaa ne a yĩnga, mam pa tõe n bãng ye, Wẽnd n mi. ⁴ Beene, yẽ soaba wʋma goama ninsaal sẽn ka tõe n le rɩk n togs ne ninsaal noor ye. ⁵ Nin-kãng yĩnga, mam da tõeeme n zẽk m menga, la sã n ya maam, m komsma bal la m na n lʋɩɩs taoore. ⁶ Mam sã n da tʋlgẽ n zẽk m meng dẽ yĩng me, kõn yɩẽ gãeemd ye, tɩ yaẽ la sɩda, la m kõn wɩɩg ye, ka rẽ neba wat n sãmbame tɩ m sõmblema yɩɩda bãmb sẽn ne wã, bɩ b sẽn wʋmdã. ⁷ Sẽn na n yɩlẽ tɩ m zu-nooga ra wa ne m nagre, m paama namsg sẽn wẽnd moog n sorg m yĩngã, wẽnd Sʋtãan n gõod n laand-m pegse – tɩ m da maan nagr ye! ⁸ Al naoor a tãabo mam yõka Soaala sɛɛga tɩ b fãag maam, ⁹ tɩ b leok maam: «Base, m sõngr kõn paoog f ye, m pãnga na keng f komsem.» Woto wã yaa ne sũ-noog kãseng la m lʋɩɩsd m komsma taoore tɩ Krista pãnga tõog n sig m zugu. ¹⁰ Yaa rẽ me yĩng la m pid ne sũ-noogo m sẽn sak Krista yĩnga, komsma, paoogrã, naongã, namsgã, yɩɩrã. La m sẽn waa n lebg koams zãnga la m lebg pãng soaba. ¹¹ Y sẽn maana m ka lebg gãeenga! Yãmb n da togẽ n pẽg maam. Ne m sẽn ka fɩ wã, m ka ne yãmb sẽn boond b rãmb tɩ tʋʋm-tʋmdb bɛda sẽn yɩɩd-m ne bũmb ning ye. ¹² Ad bũmb ning sẽn maand kaset tɩ f yaa tʋʋm-tʋmd tɩ neb fãa miẽ: sũ-tõog namsg pʋgẽ, wẽnd makr dãmba, yel-soalma, bõn-bãna. ¹³ Yaa bõe la tẽns a taaba Tigeng paamyã tɩ yãmb ka paame sã n ka mam meng sẽn pa reeg y bũmbã? La rẽ sã n ya zãmbo bɩ y kõ-m sugri. ¹⁴ M le segendame n na n wa yãmb nengẽ la woto n tõkd m naoor a tãab soaba la m kõn bõs y sãando, tɩ mam sẽn data, pa yãmb paoong ye, ya y mense. Yaa kamb n tigsd b ba rãmb yĩnga, bɩ yaa ba rãmb n tigsd b kamb yĩnga? ¹⁵ Sã n ya maam, m na n sɛ m pãng fãa yãmb sɩɩs yĩnga; yaa m nonglma sẽn paasdã n boogd yãmb dẽnd ne maam? ¹⁶ Beneere, nina na n yeelame tɩ mam pa rɩ yãmb ye, yaa sɩda, la m belg n dɩɩme tɩ m sɩlma yaa sɩlem baafo. ¹⁷ Yaa ne m tʋʋm-tʋmda bõe la m belg yãmb n dɩ? ¹⁸ A Tit la m modgr t’a wa, yẽ ne m saam-biig y sẽn mi neere. Dɩlla yaa Tit n belg yãmb bɩ? Tõnd d yiiba zʋgo n ka yɩ zʋg yɛng sɩda? D ka rɩk taab nao sɩda? ¹⁹ Al daar zãar menga yãmb da tõeeme n yõke tɩ tõnd dat n kõ-la d meng bʋʋm, yãmb taoore, baa fɩ! Tõnd gomda Wẽnnaam la Krista taoore la rẽ fãa yaa yãmb sõngr yĩnga, m kom nongedse. ²⁰ M zoeta m na n wa tũ yãmb nengẽ n ka mik tɩ y yaa wa m sẽn datã, bɩ yãmb me mik tɩ m ka ya wa y sẽn data ye. M zoeta m wa mik tɩ ket n yaa zaba, sũ-kiiri, zoe-bõne, beem, wɩdga, gom yaalse, no-rɩkre, kalem-kalem bala. ²¹ M zoeta m na n wa y sʋka, tɩ Wẽnd ning-m yãnde, yãmb poorẽ, tɩ m wa kiigd nintãm, tɩ yell maandeb kʋdã kẽer ka sak n tuub b tʋʋm wẽna ye: b yoobã la b yell yooda taaba ye.

¹ Woto n tõkd naoora tã marsã m sẽn wat y nengẽ. Koɛɛg buud faa ratame tɩ b welg-a ne kaset dãmb a yiib bɩ a tãabo. ² M zoe n togsa yell mandeb kʋdã la sẽn wẽnd b bãmbã, la m le wilgd-b la rũnna yɛsa, tɩ m nan ket yɩɩga, wala m sẽn wilg-b m waoonga yiib soaba wakato: m sã n wa marsã sugr ka ye. ³ Yãmb dat n bãnga sã n yaa sɩd tɩ Krista gomda ne m noore? Bãmb yẽ la sẽn ka põnegd-y wã la, bãmb wata yãmb sʋk ne pãng la! ⁴ Yaa sɩda, b saka komslem, tɩ b ka-b pika la ne Wẽnd pãnga b ket n vɩɩme. Tõnd me boto. Tõnd me komsame, la Wẽnd ne b pãngã na kõ-d vɩɩm, d tʋʋmda pʋgẽ. ⁵ Kẽe-y y meng sũurẽ, bao-y n gese y sã n tara tẽebo. Sok-y y mense, y ka ne tɩ Krista be y pʋsẽ. Wẽnd na kɩt tɩ y menga sokr ra wa ne y bãon-lukr ye. ⁶ Wala m sẽn tẽedã, y kõn yãend tɩ d bãong lukr ye. ⁷ Tõnd pʋʋsda Wẽnd tɩ y ra maan wẽng ye. Tõnd pa rat n maan waa d yɩɩda d taab toog wakat ye, d datame n maan neere, ba neera sã n na n waa ne toogo. ⁸ Tõnd ka tar pãng n kɩɩs sɩd ye, d pãnga la d sõng sɩd bala. ⁹ D komsma sẽn ya a soab fãa, d bee sũ-noog pʋgẽ, d sã n ne tɩ yãmb wɩɩda pãnga. D sẽn kot bũmb ning d pʋʋsg pʋgẽ, yaa yãmb lebg sõma. ¹⁰ Yaa woto la m gʋls-y tɩ m ket yɩɩga tɩ d sã n wa pẽneg taaba bɩ d bas toolem ne yã; Soaal kõo tõnd pãng kãng manegr yĩnga, ka sãoong yĩng ye. ¹¹ Dẽn yĩnga, m saam-biisi, noog-y y sũuri, bao-y sõmblem bala, sõng-taaba bala; yɩɩ-y sũ-yɛnga, vɩɩnd-y laafi ne taaba, la Wẽnd sẽn ya nonglem la laafi Naaba na zĩnd ne yã! ¹² Pʋʋs-y taab neere. Saam-biisa fãa tɩ d pʋʋs y zãnga. ¹³ Soaala Zezi Krista barka, Wẽnnaam Ba nonglem la a Vʋʋsem Sõng zoodo lagem y ne taaba. Ami!