1 TƖMOTE

¹ Maam a Pol sẽn lebg a Zezi Krista Tʋʋm-tʋmd ne Wẽnnaam d Fãagda noore, la Krista a Zezi, d Teegda, raabo, ² maam n pʋʋsd a Timote, m bi-roak menga, tẽeba pʋgẽ. Bɩ Wẽnd Ba la Soaal a Zezi Krista sudg foom b nimbãan-zoeere kũuni la b laafi! ³ M sẽn waa n dabd Masedoan, m kos-f lame tɩ f pa Efɛɛz la f sõng tɩ neb kẽer bas b zãms paala, ⁴ la b lak b mens ne solem vɩʋʋdo, ne saam-dãmb dot sõt-n-ka-sɛtẽ, sẽn wat ne no-koɛɛma n yɩɩd b sẽn pukd Wẽnd sẽn yals bũmb ning ne tẽeb kũuni. ⁵ M da kos-f la rẽ tɩ m datẽ lame tɩ taab nonglma yɩ pʋ-peelem bũmbu, n ka naag ne zãmbo bɩ tẽeb sẽn kedb ye. ⁶ Neb kẽer ka sak rẽ n kẽ moogo, tɩ b goama lebg goam vɩʋʋdo; ⁷ b tẽedame tɩ b yaa Noora karen-saamb bɛda mik b ka tar b goama sore, la b ka mi sẽn ya zabr ning tãnsobend la b reegr ye. ⁸ Sɩda, d miime, Noora yaa sõmbo d sã n dat-a ne a sẽn wat ne bũmb ningã, ⁹ tɩ y mi tɩ b pa yiis-a nin-sõng yĩng ye: yaa tʋb-pa-wʋmda, tõata, sẽn ka pʋʋsda Wẽnde, yel-maanda, wẽn-tʋʋsa, wẽnd bɛyã, ba la ma kʋʋda, nin-kʋʋda, ¹⁰ yoaada, ra-taad-noanga, yembs koaasa, tẽn-wãada, zirẽ-be-neda, pʋlen-sãamda la sẽn tʋmda tʋʋm niyns fãa zãmsg sõnga sẽn gɩdgde. ¹¹ La zãmsg sõngã yaa Koe-noogã Wẽnd sẽn bobl maam a soabã, Wẽnd ning sẽn pida ne ziiri la a ya sũ-noog buud fãa yẽgrã. ¹² M pʋʋsda sẽn ko-a maam pãnga: a Zezi Krista, tõnd Soaalã. B tagsame tɩ m na tõog bãmb tʋʋmnã la yaa rẽnd yĩng la b bool maam, ¹³ maam ne m yɩ wẽn-kɩɩs pĩnda, maam ne m nams m taaba la m yaal-ba. B kõ-m la sugri, tɩ m da ka mi ye, tɩ m da ket n yaa tẽeba sãana. ¹⁴ Yaa tẽeb la nonglem ning sẽn pid Krista a Zezi la b sudg maam n daale. ¹⁵ Gomd sẽn ya sɩda tɩ b tog n deeg-a zãng la woto: Krista a Zezi waa dũnia n na n fãag yel-wẽn-maandba la maam, maam la pipi. ¹⁶ La m sã n paam tɩ Krista zoe m nimbãanega, yaa sẽn na n yɩla tɩ Krista reng ne maam n puk b sũ-maasem zãnga la b kɩt tɩ m lebg makre neb niyns sẽn na n tẽ-b bãmb n paam vɩɩm sẽn kõn sɛ wã yĩnga. ¹⁷ Bɩ zamaan fãa Dĩma, kõn-luk-m-zĩigẽ soaba Wẽnde, nif sẽn ka tõe n teege, sẽn ka be taare, bɩ b paam pẽgre la ziir sẽn kõn sɛ, tɩ yʋʋm tong taab n tõt sɛɛbo. Ami! ¹⁸ Ad-m sẽn yet tɩ f gũus ne bũmb ninga, m biiga Timote, la zĩ kanga m zemsa ne bãngra goama sẽn da yiis f poorẽ al daar zãra, tɩ f tog n maan tẽegre la f zab zab-sõngã, ¹⁹ ne tẽeb la f pʋ-peelma; ad yaa rẽ n paoog neb kẽere, la b tẽeba looga wa koom sẽn lood ne a sẽn vele. ²⁰ Ada Imene, ada Aleksãndr. M kong n bas-b-la ne Sʋtãan tɩ b bãng yam la b ra le saag n tʋʋs Wẽnd ye.

¹ M data ne m sũur fãa tɩ y modg ne kosgo, ne sɛɛg yõkre, ne bark pʋʋsgo Adem biis fãa yĩnga, ² dĩm dãmba, taoor dãmb fãa yĩnga; woto la d vɩɩma yɩt laafi vɩɩm, vɩɩm sẽn be yamleoogo la a tar waoore. ³ Dẽ me n be yõodo la a tat Wẽnnaam, d Fãagda, yam. ⁴ B raaba la ninsaal paam tɩlgre la sɩd bãngre. ⁵ Wẽnd yaa b ye. Ninsaalba me ne Wẽnd sʋka, yaa Wɛɛmb a ye n be: Krista a Zezi, Wẽnd Nedã. ⁶ La bãmb n yao yel-wẽna samde d fãa zĩigẽ. Kaset kãng la sẽn yalse, a wakatẽ, ⁷ la maam n lebg a moanda la a tʋʋm-tʋmda – sɩd la m gomda, m ka yagd zirẽ ye – maam la nin-zẽmba karen-saamba n kõt-b tẽebã ne a sɩdã. ⁸ Woto wã m datame tɩ rapa pʋʋs zĩis fãa, n zẽkd b nus yĩngri, wa neb sẽn mi Wẽnd waoogre, wa neb sẽn ka mi sũ-puur la mo-beedo. ⁹ Pagba me zã b mens neere; b faongã zãag ne wilg-m-meng la tɩtaam, b vẽ ne gɛma, ne sãnem, ne muizãan, ne fut sẽn daad toogo. ¹⁰ B faong yɩɩ b tʋʋm sõma tɩ rẽ n tog ne pagb sẽn tũud Wẽnde. ¹¹ Karẽng wakato, pagba tog n sĩnda b noore la b sak n deeg b sẽn wilgd-b bũmb ninga. ¹² M pa sak tɩ pag zãms raoa, m pa sak t’a rɩ naam a zug ye. A zĩnd sɩɩ! ¹³ Ad-y yaa a Adem la b reng n naan t’a Awa yaool n pʋge. ¹⁴ Kaa Adem n sak kʋɩɩbg ye, yaa pagã n sake la taala lʋɩ-la a zugu. ¹⁵ Bũmb ning sẽn na n fãag-a yaa kamb dogem la rẽ me yaa a sã n sulg a meng n mao ne tẽebo, ne taab nonglem, ne sõmblem baoobo.

¹ Ad bũmb sẽn le ya sɩda: ned ning sẽn dat-a n tʋm kãsem-soab tʋʋmde, yaa tʋʋmd sõng la a rata. ² Kãsem-soab me ra maan bũmb sẽn na n wa ne a wɩdg ye; a yɩ ned sẽn kẽ kãadem vugr bala, ned sẽn ka mi yão-beedo, n mi gũusgu, n ka mi ned paoogr ye, n mi zemsgo, n mi gãag-sobendo, n tõe n zãms a taaba. ³ A ra yɩ rã-yũuda bɩ mo-be-neda, a yɩ nin-noanga, nin-bʋgsgo, ned sẽn ka baood zaba, ned yam sẽn lak ne ligdi. ⁴ A yɩ ned sẽn mi a zak tallgo, t’a kamb sakd-a neere la ne waoogre. ⁵ Ned sã n beẽ n ka tõe n zã a meng zaka, yẽ soab yɩta a wãn n ges Wẽnd Tigeng yelle? ⁶ Da yɩ ned sẽn nan kẽ Krista paalem ye; ka rẽ a watẽ maana zẽk-m-menga la tɩtaam, a me pa yellẽ wa Sʋtãana. ⁷ Togame tɩ neb a taaba, sẽn nan ka naagb ne tõndã, kõ kaset sõng a poorẽ, n wilg tɩ yel-beed ka a zugu, t’a ra wa lʋɩ kʋɩɩbda bẽdgẽ ye. ⁸ Kãsem-dãmba sõangdb me tog n yɩɩ nin-tɩrse, neb sẽn yɛs b sɩd zugu, n gũusd b meng ne rãam, la b zoet yãnd ne bao yõod tɩ looge. ⁹ B tall ne pʋ-peelem b tẽebã ne a yel tagdã. ¹⁰ Bɩ b reng n bãng b zʋgo; yell sã n ka b zug marsã bɩ b yaool n kõ-b tʋʋmna. ¹¹ Sõangdb pogsa me boto: b yɩ nin-tɩrse, n ka mi b taab wɩdse, n ka mi yão-beedo, n maand fãa wa b sẽn wilg-b. ¹² Sõangdba sẽn ya-b rapa yɩta neb sẽn kẽ kãadem vugr bala, n mi b kamba la b zak zãabo. ¹³ Sẽn mi-b tʋʋmda neere paamda waoogre neb sʋka la b sẽn tẽed Krista a Zezi ne tẽeb ninga kɩɩda yẽgna. ¹⁴ M gʋlsd-f la woto la sã n yɩ bilfu m na babs-fo. ¹⁵ Sã n mik tɩ m kaoosda, bɩ f modg n zã f meng neer Wẽnd zakẽ – m dat n yeelame tɩ Wẽnd vɩɩga Tigengẽ – yẽ la sɩda fãa sog yã, yẽ n tʋk sɩda a zugu. ¹⁶ Sã n ya sɩda, tõnd tẽeba pida ne yel-soalma: ad Wẽnd Biig sẽn dogd ne ninsaal yĩnga; ad Wẽnd Vʋʋsem sẽn wat ne b sõmblem kaseto; ad malɛk rãmb sẽn gũbg-ba, ad bu-zẽmb sẽn paam b kibare; ad ninsaalb buud fãa sẽn tẽed-ba; ad-b sẽn dʋʋd yĩngr ne ziiri.

¹ Wẽnd Vʋʋsem togsa vẽenega tɩ yaoolem wakatã neb kẽer na n basa b tẽebo n kẽ zirẽ-be-rãmba la b reeg b zãmsgo, sẽn ya Sʋtãan rẽnna. ² B basame tɩ neb tudg-ba, la nin-bãmb dãmb sũur duuga ne kud moomde, tɩ lebg makr sẽn kõt kaset vẽenega tɩ b yaa zirẽ-be-rãmba, ninsaan-kazukma. ³ Nin-bãmb gɩdgda yikãadem kõom, n gɩdgd bũmb kẽer dɩɩbo. Wẽnd n yaool n da kõ sẽn tẽed-b bãmbã, sẽn bãng-b sɩdã, tɩ b reeg n dɩ la b pẽg Bãmba. ⁴ Wẽnd sẽn naan fãa bee neere la rɩɩb ba a ye ka kisi, f sã n dɩt-a ne Wẽnd bark pʋʋsgo. ⁵ Wẽnd Gomdã la pʋʋsgã sẽn pʋʋs a zugã kɩtdame t’a sɩd lebg bõn-sõngo. ⁶ F sã n tõog n wilg saam-biisa woto fãa, f na lebg Krista a Zezi sõgen sõngo, sẽn dɩlg f meng ne tẽeba sẽn dat tɩ f gãd bũmb ningã, la ne zãms-sõma niyns f sẽn tũ n ta marsã wã. ⁷ Sã n ya zamaana soalma, pʋg-yãan-kʋd zʋbsgã, bas rẽ tɩ looge. Ad Wẽnd waoogrã n tog zãmsgo. ⁸ Yĩnga tʋʋma bee yõodo la yõoda ka loog nug ye. Sã n ya Wẽnd waoogrã, yẽ n manegd fãa, yẽ n wat ne rũnna la beoog vɩɩma pʋlem noogo. ⁹ Dẽ yaa bũmb sẽn ya sɩda tɩ d tog n deege. ¹⁰ Tõnd sã n namsdẽ, tõnd sã n bob zabre, yaa d saagr sẽn be Wẽnd vɩɩga nengẽ, sẽn fãaga ninsaalba, sẽn fãaga tẽedbã n yɩɩda. ¹¹ Woto la f tog n wilg la f zãmse. ¹² Ned da paoog-f tɩ f yaa yãag ye. Kõ tẽedba fãa togs-n-taar sõngo, ne f goama, ne f vɩɩm, ne f nonglem, ne f tẽebo la ne f pʋ-peelem. ¹³ Wɩng ne sebra karengo, ne saglgo, ne zãmsgo tɩ m watẽ. ¹⁴ Da bas yĩngr kũuna t’a maag ye. Yaa kũun ning f sẽn paame, bãngr sẽn waa n lʋɩ sʋka tɩ kãsem-dãmba me lagem taaba n dɩk b nus n tik f zugã. ¹⁵ Gãd rẽ wala f sũur bũmbu n wɩsg zãnga tɩ f taab fãa me yãend f sõmblema paasgo. ¹⁶ Maan gũusg ne f vɩɩm la f zãmsgo; da sak yaams ye. Ad yaa woto la f na n fãag f menga la f fãag sẽn kelgd-b fooma.

¹ Da saag n tãs nin-kẽem ye, maag f yĩng n sagl-a wala f ba menga; ges kom-bɩɩba wala f yaopa, ² pʋg-yãans wala f ma rãmba; pelg f pʋg ne pʋg-sɛdba wala f tãopa. ³ Waoog pʋg-kõapa sẽn ka tar-b teegda. ⁴ B sã n tar kamb bɩ yagense, b zãms-b b roagdba waoogre, la b sõm dolbo. Dẽ n noom Wẽnde. ⁵ Pʋg-kõor menga, sẽn vɩ-a a ye tãa, basa yɛla fãa ne Wẽnde; wĩntoog la yʋngo bɩ a ra viig ne Wẽnd pʋʋsgo la b yell tẽegr ye. ⁶ Pʋg-kõor ning sẽn ka tagsd bũmb a to tɩ ka a yĩnga sũ-noog bala, a bãng t’a zoe n kiime, ba a sã n ket n wẽnda bõn-vɩɩga. ⁷ Tẽeg n togs-b rẽ fãa tɩ b ra wa yãend yell n dogl b zug ye. ⁸ Ned sã n ka get a buud yelle, n ka get sẽn vɩ-b ne yẽnda yelle, yẽ soab sãama a tẽebo la bu-zẽnd n são-a. ⁹ Pag ning sẽn tõe n paam tɩ b gʋls a yʋʋr pʋg-kõap sʋka, yaa sẽn taa yʋʋm pisoobe, la sẽn kẽ-a kãadem vugr bala. ¹⁰ A reng n kõ a vɩɩm sõnga kaseto n gʋʋl a kamb neere, n mi sãando, n mi nin-sõma reegre, n kũmd sẽn zĩ-b ne sũ-sãanga, n wilg t’a tõe n yolsa pakr buud fã. ¹¹ Da yãg n deeg pʋg-kõap niyns sẽn nan ka kʋʋl-ba ye. Bãng tɩ raab sẽn zãr ne Krista rẽnda tõe n wala b sũurẽ tɩ b yik marsã tɩ yaa kãadma bal la b baooda, ¹² la woto taal la b tʋkd b zugu tɩ b lak n basa b pipi pʋlengo. ¹³ N paas me, b tʋʋma sẽn ka waoogã, wat n lebga rot saab bala. Saab yẽnẽ yee n yaẽ la sa-vɩʋʋdo, ayoo! Saadame n tar goama; gomda sẽn ka pak-ba, gomda yaare. ¹⁴ M sẽn nonge: yaa sẽn nan pa kʋʋl-ba fãa le kẽ kãadem, n dog kamba, n ges b zaka tɩ bɛɛba ra wa yãe bũmb n gom wẽng Tigeng poorẽ ye. ¹⁵ D mii pʋg-kõap kẽer sẽn tudg sor n kẽ Sʋtãan tãpo. ¹⁶ Tẽed-poak sã n tar pʋg-kõap a buudẽ bɩ a ges b yelle tɩ b ra wa lebg zɩɩb ne Tigeng ye. Woto me la Tigeng tõogd n sõng sẽn ka tar-b teegda. ¹⁷ Kãsem-dãmba sẽn maand b tʋʋmda nere, toga ne rolb pidungu, bũmb zãnga, sẽn namsd-b ne goam la karengo. ¹⁸ Sebr sõng gʋlsame tɩ naaf sẽn tʋmd zɛɛgẽ noor pa loet ne yʋk ye, tɩ tʋʋm-tʋmd toga ne a yaoodo. ¹⁹ B sã n dogl bũmb b zut bɩ f ra reeg tɩ yaa sɩda, kaset dãmb sã n ka ta a yi bɩ a tãab ye. ²⁰ Kãsem-dãmba me sã n kong bɩ f togs b vẽenega, neb fãa taoore, tɩ sẽn ket-ba me maan dabeem. ²¹ M yet-f lame, Wẽnd taoore, Krista a Zezi la malɛgsa taoore, tɩ f tũ m sẽn wilg fooma n da welg ned ne a to, n da nong ned n yɩɩd a to ye. ²² Da yãg ne ned ba a ye zug tikr ye; da sak n naag f to a yel-wẽnnẽ ye. Tall f pʋ-peelem. ²³ Bas ko-zaalga bal yũubu. Yũ rãam bilfu, f pʋ zabrã la f laafi wã sẽn pa waooga yĩnga. ²⁴ Neb n be tɩ b yel-wẽna pukd b toore tɩ ka tũ ne vɛɛsg ye; kẽer me rẽnd kõn puk sã n ka b vɛɛs-b lame n tɩg ye. ²⁵ Tʋʋm-sõma wã me pukda b mense; ba d sẽn ka ne b rãmb marsã wã ka tõe n pa n ka puk ye.

¹ Neb niyns sẽn ket n ya-b yemse tog n gesa b zu-soaben-dãmb wa neb sẽn tog ne waoogr zãnga, woto Wẽnd yʋʋr la Wẽnd gomd kõn paam tʋʋr ye. ² Yembs niyns zu-soaben-dãmb sẽn ya tẽedba da wa yik n paoog-ba, saam-biira sẽn be sʋka yĩng ye. B modg ne sakr n yɩɩda, b sẽn ya tẽedba la Wẽnd zo-rãmb yĩnga. Ad-f sẽn tog n wilg la f sagl tɩ b tũ bũmb ninga. ³ Ned sã n zãmsd bũmb a to, n basd Soaal a Zezi Krista goam sõma wã, n basd zãmsg ning sẽn sõngd tõnd tɩ d Wẽnnaama waoogr kẽnd taoor n paasdẽ wã, ⁴ yẽ soab yaa zoang sẽn wuk ne nagre, zɩt sẽn pid ne sogs faado la no-koɛɛm yaalse. Rẽ n wat ne sũ-kiiri, yõs-taaba, tʋy, tags wẽnse, ⁵ zabd-n-pa-sɛtẽ, tɩ yẽ soaba yam sobame, a ka tar sɩd ye la a tẽedame tɩ Wẽnd waoogra yaa bao yõodo dũni kãnga pʋgẽ. ⁶ Wẽnd tũudem sɩd bee yõodo ne ned ning sẽn tagsd t’a sẽn tar-a sek-a lame. ⁷ Ka bũmb la tõnd zã n wa dũni ye, ka bũmb la d na n zã n leb ye. ⁸ Woto wã, d sã n tar n dɩtẽ la d tar n yeelgdẽ bɩ d yet tɩ sek-d lame. ⁹ Neb niyns sẽn dat-ba n zam paoong ne paoongo, bãmb dãmb lʋɩɩ Sʋtãan kʋɩɩbgẽ, Sʋtãan bẽdgẽ; b sũur wulumda ne tʋls wẽns ka tɛka sẽn lebgd zutu, n pogendẽ, n wãad la b menesd ninsaal zãnga. ¹⁰ Bãasa fãa yẽgr yaa arzɛk tʋlsem; yaa kẽer sẽn bas tɩ bã-kãng yõk-ba la b bʋdg n zãag ne b tẽebo la b bas tɩ yell tood sẽn ka tõe n sõd wurg b sũuri. ¹¹ Sã n ya foom, Wẽnd neda, zãag f meng ne rẽ fãa. Bao sõmblem, bao Wẽnde, bao tẽebo, nonglem, raoodo la sũ-bʋgsem. ¹² Zab tẽeb zab-sõngã, mao n paam vɩɩm sẽn kõn sɛ tɩ yaa rẽ yĩng la Wẽnd bool-fo la rẽ me yĩng la f pʋlem f pʋleng sõngo, kaset dãmb wʋsg taoore. ¹³ Maam n kot-fo, Wẽnd ning sẽn kõta bũmb fãa vɩɩma taoore, Krista a Zezi taoore, Krist ninga a Põs Pilat sẽn dɩ a soab kaseta taoore, ¹⁴ tɩ f reeg noy-kãensa ne pʋ-peelem la yam sõngo n gũud Soaala Zezi Krista pukri, ¹⁵ a Raara sã n wa ta; la sẽn na n taas-a Raarã yaa sũ-noog buud fãa yẽgrã, d Soaal yɛngã, ¹⁶ dĩm dãmb Dĩma la soaalba fãa Soaalã; bãmb bal n ka sɩngr la b ka be sɛɛbo; bãmb n yals b meng vẽenem sẽn ka tõe n kolg zĩigẽ, ninsaal nif sẽn zɩ n teeg la a sẽn kõn teege bada. B paam ziiri la pãnga, marsã la daar fãa. Ami! ¹⁷ Sagl dũnna arzɛka rãmba tɩ b vẽ ne tɩtaam buud fãa la b ra teeg b arzɛka t’a pa zɛɛd sɛɛb ye. B teeg Wẽnd tɩ bãmb kõt-d-la fãa tɩ gale, tɩ d sũur tõe n yɩ noogo. ¹⁸ B maan neere; b tʋʋm-sõma yɩ zembala, b kõ ne yamleoogo, b sak n pʋɩ ne b taaba. ¹⁹ Woto la b na n tigs arzɛk sẽn ya zɩsgo n wa tõog n paam vɩɩm menga. ²⁰ M biig a Timote, zã Wẽnd bobellã neere. Vẽ ne goam vɩʋʋdo la sẽn ka be barka, vẽ no-koɛɛma ne bãngr yooda rãmba. ²¹ Yaa b sẽn kelg bãmb dãmba la kẽer bʋdg b tẽeba pʋgẽ. Wẽnd barka sig y fãa!