1 TESALONIK RÃMBA

¹ A Pol ne a Silvẽ la a Timote n pʋʋsd Tesalonik Tigeng sẽn vɩ Wẽnd Ba la Soaala Zezi Krista maasmẽ. Bɩ Wẽnd pids-b ne b kũuna la b laafi! ² Yaa wakat fãa la d pʋʋsd Wẽnd bark y yĩnga la d tẽegd y yelle. ³ Sɩda, Wẽnd la d Ba taoore, d tẽegdame tɩ y paama Soaal a Zezi Krista nengẽ tẽeba tʋʋmd yamleoogo, n paas nonglem sẽn vɩ, la saagr sẽn ka mi maagre. ⁴ M saam-biisi la Wẽnd zo-rãmba, d miime tɩ Wẽnd n sɩd tũus yãmba n bak toore. ⁵ La woto, ka tũ ne goam bala la Koe-nooga paam n ta yãmb ye, naaga ne bũmb sẽn paas y raoodo, ne a Vʋʋsem Sõng tʋʋm-bãna sẽn ka be sõore. Yãmb mi d sẽn maan bũmb ning yãmb sʋka, y sõngr yĩnga. ⁶ Yaa ne zʋg sẽn wẽnd tõnd zʋgo la Soaala me zʋgo la yãmb deeg Koe-noogã. Ba y naong sã n yɩ wʋsgo, a Vʋʋsem Sõng kell n pids-y la ne sũ-noogo. ⁷ Yaa rẽ me yĩng la yãmb nao wã rɩkr yamleoog yõk Masedoan la Akayi tẽedba. ⁸ Soaala Gomda sẽn sɩng moonego yãmb tẽnga ka tek Masedoan la Akayi bal ye. Wẽnd sẽn kõ yãmb tẽeb ninga saaga ziig zãnga ne neerem, al tɩ d ka tar sẽn na n yeel n paas ye. ⁹ Y tẽnga rãmb togsda tõnd waoong beelẽ sẽn yɩ a soaba. B togsda yãmb sẽn kẽ Wẽnd to-to; yãmb sẽn bas wẽn faadã n na n kẽ Wẽnd vɩɩga la Wẽnd menga. ¹⁰ Y kẽe bãmba n gũud b Biiga waoong raare, b Biig ning b sẽn vʋʋg kɩɩms sʋka, b Biig a Zezi Krista sẽn na n fãag-a tõndo, tɩ b sũura sẽn na n fudg raar yãkame.

¹ Yãmb miime, m saam-biisi, tɩ d sẽn wa y nengẽ wã pa yɩ zaalem ye. ² Y bãngame, m saam-biisi, tɩ d deng n namsa Filip tẽnga la d yãee tʋʋre, la Soaala Wẽnd sõng-d lame tɩ ne fara sẽn yɩ far tɛka, d tõog n moona b Koe-noogã ne raoodo. ³ D sẽn waa n segend yãmbã, d zãaga d meng ne tudugri, ne kalem-kalem la zãmbo. ⁴ Yɩɩ woto tɩ Wẽnd deng n fɛɛsa tõndo, n yaool n kõ-d Koe-nooga tʋʋmde. Dẽ me la d pa baood n na n noog ninsaal sũuri, d baooda sẽn noom Wẽnde, la bãmb bal n ne sẽn be ninsaal sũurẽ. ⁵ Tõnd zɩ n bao pẽg-faado n pẽg-y ye, d ka gom n yeg n bõs-y bũmb ye. D Wẽnda tara rẽ kaseto. ⁶ D pa gom n bao ninsaal pẽgr ye, yãmb nengẽ bɩ zĩig a to ye. ⁷ D yaool yaa Krista tʋʋm-tʋmda n da tõe n tũ rẽnna n yɩ zɩɩbo y yĩnga. La ade, d sakame n yɩ nin-kom-kom yãmb sʋka. D wẽnega ma sẽn dɩlgd a kamba n pa rat tɩ bũmb paoog-b ye. ⁸ Tõnd nonglma ne yãmb yɩɩ boto la nonglma keelem yĩnga d tʋlgẽ lame n naagẽ ne Koe-noogã n kõ yãmb d meng vɩɩm. ⁹ M saam-biisi, y ket n tẽra d tʋʋma ne d yaamsã. D sẽn waa n moon Koe-noogã, d naagame n tʋm yʋng wala wĩntoogo sẽn na n yɩlẽ tɩ d dɩlgr da wa lebg yãmb nin-yend zɩɩb ye. ¹⁰ Y naaga Wẽnd n ya m kaseto tɩ ne tẽedba d manesema yɩɩ sõmbo n yɩ tɩrga, n zãr ne wɩdga. ¹¹ Y miime, yãmb ned kam fãa, tɩ wala ba sẽn maand ne a kamba ¹² d sagl-y lame, d kenga y pelse, d kos-y la Wẽnd yĩnga tɩ y vɩɩnd vɩɩm sẽn tat b yam, tɩ bãmb n boond yãmba b naama la b pẽgra zĩigẽ. ¹³ Sã n ya ne tõndo, d ka vʋʋsd ne Wẽnd bark pʋʋsg ye. D sẽn taas-y Wẽnd gomd ningã y reeg-a lame; la y pa reeg-a wa ninsaal gomde, y reeg-a la wa Wẽnd dẽnd akɩka. La rẽ me la Gomda wom a biis yãmb tẽedba sũurẽ. ¹⁴ Y modgame, m saam-biisi tɩ y tũudma ya sõmbo; a yaa sõng wa Wẽnd sẽn vigl Tigeng niynsi a Zezi Krista maasmẽ, Zɩɩde tẽnse. Wala Zɩɩde rãmb sẽn yãe naong Zʋɩf rãmba nengẽ, boto la y saam-biisa me nams yãmba. ¹⁵ Ad-y neb niyns sẽn kʋ-b Soaal a Zezi la bãngdbã, yaa bãmb n le nams tõndo. Bãng-y tɩ b zãra ne Wẽnd zoodo la b rɩta Adem biis fãa beem. ¹⁶ Bãmb kɩtame tɩ d ka le tõe n moon Koe-noogã bu-zẽmba tɩ b paam n fãag b sɩɩs ye. B lekda b wẽnema sãoogo tɩ Wẽnd sũ-puura me na n baas n dɩ-ba. ¹⁷ Ade, m saam-biisi, sẽn seg tɩ d zãag taab bilfu – m gomda d nensa sẽn zãag taabã, m pa gomd sũura ye – d waa n yik n yãgdame n dat tɩ d nensa le togl taaba tao-tao. ¹⁸ Dẽ la d sed n na n wa y nengẽ. Sã n ya maam a Pol, dẽn yɩɩ naoor yaka. Yaa Nin-wẽngã n ning gɩdgre. ¹⁹ Sã n ka yãmba, bõe n na n yɩ d saagra pidsgu, d sũ-nooga baasgo, d faonga teedo, d sẽn wat n yɛs Soaal a Zezi Krista taoore b Waoonga raare? ²⁰ Yãmb bal la d zu-zẽkre la d sũ-noogo!

¹ Tooga sẽn waa n tar-d wʋsgo, d kaoolame tɩ d na n pa-la d ye Atɛn Na-tẽnga, ² n yaool marsã n tʋm y nengẽ ned sẽn na n kɩt tɩ y tẽeba kɩ yẽgna la a yẽege, n tʋm a Timote, d saam-biiga la d sõangda ne Krista Koɛɛga moonego. ³ Tẽeba sã n kenge, ned ba a ye kõn sake tɩ namsga wa ne a lʋɩɩs ye tɩ y mi tɩ namsgo la d pʋɩɩre. ⁴ D sẽn waa n be ne taabã, d ka wilg-y tɩ y na yãend toogo. Dẽn n be tɩ y fãa neẽ. ⁵ Dɩlla yɛla sẽn waa n yɩɩd-ma, m tʋma a Timote t’a wa rɩ y tẽeba kaseto. M sẽn zoet yaa Kʋɩɩbda na n wa kʋɩɩb yãmb tɩ tʋʋmda wa mud zãnga. ⁶ A Timote yii yãmb nengẽ n nan wa paalem la kibar ning a sẽn kõ tõnd y tẽeba la y nong taaba poorẽ, yaa kibar noogo. A yeelame tɩ y ket n tẽra d yelle, n pẽgda. A yeelame tɩ yãmb me baooda tõnd yãeebo, wa tõnd sẽn baood n yãend yãmbã. ⁷ Ad-y y tẽeba kõo tõnd daoodo d yɩɩre la d namsga pʋgẽ. ⁸ Marsã vɩɩm le kẽ-la d yĩngẽ, d sẽn bãng tɩ y ka lak ne Soaala bada. ⁹ Sũ-noog la d paam y nengẽ n kɩdemd Soaala taoore la d yɩta a wãn n pʋʋs bark tɩ seke? ¹⁰ Ad-m sẽn kot-y ne pẽdegre, wĩntoog la yʋngo: b sõng tɩ d le yãend y nenga la b sõng tɩ d lek bũmb ning sẽn paoog y tẽebã. ¹¹ Bɩ Wẽnnaam menga, tond Ba la Soaal a Zezi Krista maneg d sor tɩ d ta y nengẽ. ¹² Bɩ Soaala bɩɩs la b paas y nonglma pãnga, nonglem ning y sẽn nong taaba la y nong Adem biis fãa wã. B sõng t’a wẽneg nonglem ning tõnd sẽn nong yãmbã. ¹³ Bɩ b pids-y ne raoodo tɩ y sõmblema yɩ sõmblem akɩk Wẽnd Ba taoore, daar ning d Soaal a Zezi Krista sẽn na n lɛɛg n wa tɩ b nin-sõma wã yãagd-b.

¹ D kot-y lame la d bõsd-y-la Soaal a Zezi Krista yʋʋr yĩnga tɩ y sẽn deeg d saglgo, bɩ y vɩɩnd vɩɩm ninga sẽn tat Wẽnnaam yam. Y pʋs n zoe sɩnga vɩɩm kãnga, la bɩ y modg n paase. ² Soaal a Zezi Krista sẽn kɩt tɩ tõnd taas-y bũmb ninga fãa y mi-a la neere. ³ Ad-y Wẽnd daaba la woto: bao-y sõmblem la y veoog y meng ne yoobo. ⁴ Ned kam fãa bãng n zã a meng yĩnga, n zã-a ne pʋ-peelem la gũusgu. ⁵ Ned da sak t’a yĩnga raab tõog-a wa a sẽn tõe bu-zẽmba sẽn ka mi-b Wẽnda ye. ⁶ D yĩnga zãab poorẽ bɩ ned ba a ye ra saag n yeel tɩ yẽ n tar bãngre n wa tudg a taab ye. Yɛl kãensa n wat ne Wẽnd sɩbg n dok b sũuri, la d zoe n gom-y la rẽ yelle. Y zoe n paama d kaseto. ⁷ Soaala ka rat tõnd ne rẽgd ye, b bool-d lame tɩ d yɩ sõma. ⁸ Woto wã, sẽn pa reega tɩ Wẽnd dat-a-la ne sõmblem, n gir a zugu, ka ninsaal la a kɩɩsd ye, a kɩɩsda Wẽnde la yaa Wẽnd meng n yaool n kõ yãmb a Vʋʋsem Sõngo. ⁹ M pa tẽed tɩ yaa pakre tɩ m le kõ-y sebr taab nonglma poorẽ ye; Wẽnd meng b toore n zãms-a yãmba, tɩ y reeg-a neere. ¹⁰ Boto la y sɩd maand ne saam-biisa fãa sẽn be Masedoan. D kot-y lame bala tɩ y le modg n paase. ¹¹ Y na n gesa wala yaa y zu-zẽkre y sã n tar sũ-maasem, n nong y tʋʋm pakre, n nong nus tʋʋma, wala sẽn wilg yãmbã. ¹² Ad-y yaa woto la y vɩɩma na n yɩ neb sẽn waoogd b mens vɩɩm, yĩngr dãmba nifẽ, la y kõn gũ tɩ neb a taab wa rɩlg-y ye. ¹³ M saam-biisi, d pa rat n bas-y likẽ sẽn ki-ba poorẽ ye. Ka tog tɩ y sãam y sũuri wala neb sẽn ka tar saagr ye. ¹⁴ D sẽn tẽed t’a Zezi Krista kiime n le vʋʋge, bɩ d deeg tɩ sẽn ki-ba ne bãmb tẽebo, Wẽnnaam na n peega bãmb fãa. ¹⁵ Krista vẽnegra la d pamyã n na n togs-y woto: tõnd sẽn nan ket n vɩ-b tẽng zug, Krista Waoonga raare, ka tõnd n na n deng sẽn ki-bã n seg-b ye. ¹⁶ Yaa Soaala meng n na n yi yĩngri n sigi, malɛka koɛɛg sã n tãse tɩ tõntõoga peebe. Krista maasem yĩnga, yaa sẽn ki-bã n na n deng vʋʋgre. ¹⁷ Dẽn poor marsã, tõnd sẽn ket n vɩ-bã n na n lagem pipi rãmbã, tɩ sawadg zẽk-d yĩngri, tɩ d tɩ seg Soaala la d pa wakat buud fãa ne Bãmba. ¹⁸ Bɩ y keng taab pɛlg ne rẽ tẽegre.

¹ Sã n ya Krista Waoonga sasa la a wakato, ka pakre tɩ d le gʋls-y sebr ye. ² Y mens mii vẽenega tɩ Soaala Waoonga na n yɩɩ yʋn sʋka, wala wagdr waoongo. ³ Neba sẽn wat n gomda: Laafi wa yã! Dabeem sɛ yã! Yaa wakat kãng la yel-beeda na n lʋɩ vugr bala b zugu. Toogo wa pag sẽn kũmd dogem toogo, n na n tiig-ba, la põasg ka ye. ⁴ Sã n ya yãmba, m saam-biisi, ka likẽ la y zĩ yã n na n bas tɩ raara wa tiig-y wa wagdr ye. ⁵ Y fãa yaa yɩng neba, y fãa yaa vẽenem kamba, d pa yʋng la likẽ dãmb ye. ⁶ Bɩ d da bas tɩ gõeem tõog-do wa neb a taaba ye, d da gũs ye, d zãag d mens ne yão-beedo. ⁷ Yaa yʋng la gõeema rãmb nong n gũsi la yʋng me la rã-tɩgdba yũud n gãeemnẽ. ⁸ Tõnd sẽn ya vẽenem dãmba bɩ d minim n yõk d mense. Bɩ d tẽebã la d nonglem yɩ d kut fu-yorgo, tɩ fãagra saagr yɩ d kut zug peoogo. ⁹ Ka namsga zĩigẽ la Wẽnd boond tõnd n na n kẽes ye, b boond-d-la fãagra zĩigẽ. ¹⁰ A Zezi Krista kii tõnd yĩnga, la bãmb maasem yĩnga, b ratame tɩ d vɩɩma, rũnna wala beoog soaba, wa sog ne bãmba. ¹¹ Dẽ me yĩng la y tog n kell n kẽne wa y sẽn sɩngã, n kõt taab raoodo la togs-n-taar sõngo. ¹² D kot-y lame, d saam-biisi, tɩ y waoog neb niyns sẽn be-b yãmb sʋka n gãd Krista tʋʋmna zugu, n ya kãsem-dãmba la yãmb sagendba. ¹³ Nong-y-b zãnga ne nonglem kãsenga, b tʋʋmda yĩnga. Zĩnd-y laafi ne taaba. ¹⁴ D kot-y lame, d saam-biisi, tɩ y legl sẽn ka tar-b vɩɩm sõnga la y keng sẽn tar-b rabeem sũya. Kogl-y sẽn pa tar-b pãnga. Wilg-y b fãa gilli tɩ y yaa tõog-m-meng rãmba. ¹⁵ Ned da tug beem n lebs beem ye. Tʋlg-y neer ne taaba la ne neba fãa gilli. ¹⁶ Yɩɩ neb sẽn pid ne sũ-noog wakat buud fãa. ¹⁷ Da viig-y ne pʋʋsg ye. ¹⁸ Y yɛla sẽn be zĩig ning fãa bɩ y ket n tar bark pʋʋsgo tɩ yaa Wẽnd la Krista a Zezi n dat rẽ fãa, y yĩnga. ¹⁹ Da zãgs-y y mens ne a Vʋʋsem Sõng kũuna ye. ²⁰ Da yeel-y tɩ bãngr kũun ka yõod ye. ²¹ Tũus-y sẽn ya sõmbo n gãd rẽnna. ²² Zãag-y y meng ne wẽng buud fãa. ²³ Bɩ laafi Wẽnda pids-y zãnga ne sõmblem. Bɩ bũmb da zĩnd y nengẽ, y sɩɩgẽ bɩ y yĩngẽ, n ka tog ne Soaal a Zezi Krista, b Waoonga raar ye. ²⁴ Sẽn boola tõndã ka mi a pʋlem n ka pids ye. Dẽnd yĩngã d na n paama b kũuna zãnga. ²⁵ Pʋʋs-y tõnd me yĩnga, m saam-biisi. ²⁶ Pʋʋs-y d saam-biisa fãa ne pʋ-peelem pʋʋsem. ²⁷ M kot-y-la Soaala yʋʋr yĩnga, tɩ y karem seb kãnga d saam-biisa fãa. ²⁸ Bɩ Soaal a Zezi Krista bark pa ne yãmba!