1 ZÃ

¹ Yaa Gomd ning sẽn wata ne vɩɩma yell la d gʋlsd-y. Gomd kãng la sẽn dag n be-a al dũni sɩngrẽ, tõnd tʋbr wʋma b yelle, tɩ d nif yãend-ba, d paam n ges-b lame n tɩge, d nus sɩɩs-b lame, ² – Vɩɩma sɩd pukame, tɩ d yãend-a la d kõt kaseto; Vɩɩm kãng ka be sɛɛb ye, tɩ d wat n na n wilg-a yãmba, a ra sɩng n bee ne Ba n yaool n wa lik a meng tõndo – ³ d sẽn yãend la d sẽn wʋme la d wilgd yãmba, tɩ yãmb me wa lagem ne tõndo. Tõnd sẽn lagem ne b rãmbã, yaa Wẽnnaam Ba la b Biig a Zezi Krista. ⁴ Yaa rẽ la d gʋlsd-y tɩ y sũ-nooga pid zãnga. ⁵ Ad-d sẽn wʋm b nengẽ n wat n na n wilg yã: Wẽnd yaa vẽenem, lik ka be b nengẽ ye. ⁶ Tõnd sã n kẽnd likẽ, n yaool n yet tɩ d lagma ne bãmba, d yagda zirẽ, d pa togsd sɩd ye. ⁷ La sã n yaa vẽenemẽ la tõnd kẽnda, b meng sẽn be vẽenemẽ wã, bãmb n lagemd tõnd ne taaba, la b Biiga Zezi zɩɩma n pekd tõnd yel-wẽnd buud fãa. ⁸ Tõnd sã n yeele: «D ka tar yel-wẽnd ye», d belgda d mense, sɩd ka be d pʋgẽ ye. ⁹ Tõnd sã n wilg d yel-wẽna, bãmb sẽn pidsd b kãabgo la b ya zemsg soaba, bãmb na n kõo d yel-wẽna sugri la b pek-do ne rẽgd buud fãa. ¹⁰ Tõnd sã n yeele: «D ka tar yel-wẽnd ye», tõnd kɩtdame tɩ b lebg zirẽ-be-neda la b Gomda ka na n pa ne d ye.

¹ M kom-bõonego, m gʋlsd-y la woto tɩ y zãag ne yel-wẽnde. La ned sã n wa maan yel-wẽnde, bɩ a tẽeg tɩ d tara Wɛɛmba d Ba sɛɛgẽ: nin-sõng a Zezi Krista. ² Yaa b maoongã n dond d yel-wẽna samde, la ka tõnd dẽnna bal ye, yaa dũni wã fãa yel-wẽna. ³ Ad bũmb ning sẽn wilgd tõndo tɩ d mi-b lame: b noya reegre. ⁴ Ned ninga sẽn yeela: « M mi-b lame» n yaool n ka reegd b noya, yẽ soab yaa zirẽ-be-neda, la a soab ka tar sɩd a pʋgẽ ye. ⁵ Ned ninga sẽn deegda b Gomdã, yaa yẽ soab pʋgẽ la Wẽnd nonglma paam n pid zãnga. Yaa rẽ n na n kɩt tɩ d bãng tɩ d lagma ne Bãmba. ⁶ Ned ninga sẽn yet t’a lagma ne bãmba, yẽ soab tog n vɩɩnda bãmb meng vɩɩm. ⁷ M kom-nongdse, ka no-paalle la m kõt-y ye, yaa no-kʋdgo, no-kãng la y paam al sɩngrẽ. No-kãng yaa koɛɛg ning y sẽn wʋma. ⁸ La m baas n le paasdame tɩ yaa no-paalle la m kõt yãmba, – la rẽ yaa sɩd ne yãmba, la ne Krista – tɩ lik wɩlgdame tɩ vẽenema meng zoe n yãgda. ⁹ Sẽn gomd-a t’a bee vẽenemẽ n yaool n ket n kis a saam-biiga, ket n bee likẽ. ¹⁰ Sẽn nong-a a saam-biig paada vẽenemẽ la bũmb ka bee n na n tus-a n lub ye. ¹¹ Sẽn kis-a a saam-biig bee likẽ, a kẽnda likẽ, a ka mi a sẽn dabdẽ ye tɩ lika kiisa a nina. ¹² Yaa yãmb la m gʋlsda, m kamba, tɩ y paama y yel-wẽna sugr, bãmb yʋʋr yĩnga. ¹³ M gʋlsd-y lame, ba rãmba, tɩ y paam n bãnga sẽn be-a al sɩngrẽ. M gʋlsd-y lame, kom-bɩɩba, tɩ y tõoga wẽnema naaba. ¹⁴ M gʋlsd-y lame, kom-bõonego, tɩ y mii Ba. M gʋls-y lame, ba rãmba, tɩ y mii sẽn be-a al sɩngrẽ. M gʋls-y lame, kom-bɩɩba, tɩ y tara pãnga, tɩ Wẽnd Gomda be-la y pʋgẽ, la yãmb tõoga Wẽnema naaba. ¹⁵ Da nong-y dũnia bɩ sẽn be a pʋgẽ ye. Ned sã n nong dũnia, a ka le nong Ba ye. ¹⁶ Sẽn be dũnia pʋga, – sẽn noom yĩngã, nina sẽn ne n tʋlla, arzɛk ne a sẽn dogd a soaba: wilg-m-menga – rẽ fãa ka yit Ba wã nengẽ ye, b yita zamaana pʋga. ¹⁷ Zamaana yaool n loogdame, ne a tʋls wẽnsã, la ned ninga sẽn maanda Wẽnnaam yam, yẽ soab paada daar fãa. ¹⁸ M kom-bõonego, yaoolem wakata taame, y wʋmame tɩ Krista bɛ n na n wa, ad-y yaa bãmb wʋsg meng n zoe n wa, la rẽ n wilgd tɩ yaoolem wakata taame. ¹⁹ Bɛɛba yii tõnd sʋk waare, la b ka tõnd neb ye. B sã n dag n yaẽ tõnd neba, b naan n paẽ ne tõndo. Da tog n wa vẽnegame tɩ b ra pa tõnd neb ye. ²⁰ Sã n ya yãmba, yãmb paamame tɩ Wẽnd Neda taag y kaam la y lebga neb sẽn pid ne bãngre. ²¹ M gʋls-y lame, la ka wala y ka mi sɩd ye, ya y sẽn mi-a wã yĩnga, yaa y sẽn mi tɩ zirẽ-beed ka yit sɩd pʋgẽ wã. ²² Zirẽ-be-neda la ãndã, sã n ka sẽn kɩɩsda t’a Zezi la Wẽnd Nedã? Ad-y Krista bɛ la yẽ soaba! A kɩɩsda Ba la Biiga. ²³ Sẽn ka mi-a Biiga fãa ka Ba wã ned ye. Sẽn tẽed-a Biigã yẽ soab bee ne Ba. ²⁴ Sã n ya yãmba, modg-y tɩ y sẽn wʋm bũmb ning sɩngrẽ wã ra yi yãmb pʋtẽerẽ ye. Zãmsg ning y sẽn paam sɩngrẽ wã sã n pa-y y pʋtẽerẽ, yãmb me na lagem ne Biig la Ba. ²⁵ B sẽn kãab yãmb bũmb ninga la woto: vɩɩm sẽn kõn sɛ. ²⁶ Yaa rẽ me la m tʋlg n gʋlsyã sẽn dat-b n tudg yãmbã poorẽ. ²⁷ Sã n ya yãmba, y ket n taaga Wẽnd Neda kaam la y pa le tar zãmsg tʋʋmd ye. La b meng sẽn zãmsd yãmb bũmb fãa wã n dat sɩda la b kis zirẽ-beedã, pa-y ne-ba, wa b sẽn wilgã. ²⁸ N ye! M kom-bõonego, pa-y ne bãmba woto b sã n wa lik b menga d kõn sãmb ye la yãnd kõn yõk-do, wala d paam n zãaga ne bãmba b Waoonga raar ye. ²⁹ Y sã n deeg tɩ b yaa sõngo, bɩ y bãng tɩ ned ning fãa sẽn baood sõmblem yita bãmb nengẽ.

¹ Ges-y Ba sẽn wilg nonglem ning ne tõnd al tɩ d tõe n bool tɩ Wẽnnaam kamba, la d sɩd yaa Wẽnnaam kamba! Zamaana rãmb sã n ka mi tõndo, yaa b sẽn ka reng n bãng Krista. ² M kom-nongdse, tõnd zoe n yaa Wẽnnaam kamba, yaa sẽn pʋgda bal la b nan ka wilg-du. D miime bala tɩ b Waoonga raare, d na n wẽnega bãmba, tɩ d na n yãend-b lame wa b sẽn ya-la. ³ Ned ning fãa sẽn teega bãmba, lebgda yɩlgemd wa Krista sẽn ya yɩlgemdã. ⁴ Sẽn maand-a yel-wẽnd maanda sẽn kisi, tɩ yaa maan sẽn kis la yel-wẽnde. ⁵ Y yaool n wʋmame tɩ b sẽn wa dũnia b waame n na n yẽes yel-wẽnde la bãmb meng ka maan yel-wẽnd ye. ⁶ Sẽn paada ne bãmb ka maand yel-wẽnd ye. Sẽn maanda yel-wẽnd ka yãend-b ye la a ka mi-b ye. ⁷ M kom-bõonego, da bas-y tɩ ned tudg-y ye. Sẽn maand-a neer yaa nin-sõngo wa Krista sẽn ya nin-sõngo. ⁸ Sẽn maand-a yel-wẽnde kẽe Sʋtãana tɩ Sʋtãan yaa yel-maand al sɩngrẽ. Yaa Sʋtãana tʋʋm yooda menesg yĩnga la Wẽnd Biiga wa yã. ⁹ Wẽnd sẽn dog a soab ka maand yel-wẽnde, tɩ yẽ soab tara b zʋgo; woto wã a ka tõe n maan wẽnga, Wẽnd sẽn dog-a wã yĩnga. ¹⁰ Ad bũmb ning sẽn bakd Wẽnnaam kamba la Sʋtãan kamba: sẽn ka maanda neere ka Wẽnd biig ye, wala sẽn kis-a a saam-biig me sẽn ka Wẽnd Biigã. ¹¹ Ad koɛɛg ning y sẽn wʋm sɩngrẽ: d tog n nonga taaba. ¹² D da saag n wẽneg a Kayẽ sẽn kẽ Wẽnema soab tãpẽ n kodg a yao wã ye. La a kodg-a la bõe yĩnga? Yaa a meng tʋʋm sẽn da ya tʋʋm yoodo, t’a yao wã rẽnd ya sõma. ¹³ Da yɛɛs-y ye, m saam-biisi, zamaana rãmb sã n kis-y ye. ¹⁴ Tõnd yẽ miime tɩ d yii kũumẽ n kẽ vɩɩmẽ, la rẽ yaa d sã n nong d saam-biisã. ¹⁵ Sẽn ka nong-a a saam-biig fãa yaa nin-kʋʋda; la y mi tɩ nin-kʋʋd ba a ye ka tar vɩɩm sẽn kõn sɛ ye. ¹⁶ Ad bũmb ning sẽn puk b nonglem: Bãmb dɩka b vɩɩm n kõ tõndo, la woto tõnd me tog n kõ d vɩɩm d saam-biisa yĩnga. ¹⁷ Ned sã n tar tẽng zug arzɛka n ne a saam-biig zu-loɛɛga la a maand wa a ka ne, Wẽnd nonglma yɩta a wãn n pa ne yẽ soaba? ¹⁸ M kom-bõonego, d nonglma ra yɩ bʋʋre la gom nood ye, nonglma yɩ sɩda, a tũ ne tʋʋmde. ¹⁹ Yaa rẽ n na wilg tɩ d bee sɩd pʋgẽ tɩ d sũur me gãe ne laafi, ²⁰ ba d sũura sã da ratẽ lame n ning-d taale, tɩ Wẽnd yɩɩd-a lame, la b mii fãa. ²¹ M kom-nongdse, d sũur koɛɛg sã n ka ningd-d taale d zĩi ne sũ-keelem Wẽnd taoore. ²² D sẽn kos b bũmb ning fãa d paamd-a la bãmb nengẽ, d sẽn deegd b noe wã, la d maand sẽn tat b yama yĩnga. ²³ B noora la woto: d tẽ b Biig a Zezi Krista yʋʋr yĩnga, la d nong taaba wala b sẽn zoe n togsã. ²⁴ Sẽn deegda noor paada ne Wẽnd tɩ Wẽnd me paad ne a soaba; ad bũmb ning sẽn wilgd tõnd tɩ b bee ne do: yaa b Vʋʋsma b sẽn kõ tõndã.

¹ M kom-nongdse, maan-y gũusgu ne neb kẽere, bãng-y b yama sã n sɩd yaa Vʋʋsem Sõng rẽnna, la tẽeg-y tɩ zirẽ-be-bãngdb ka tɛk n wa moogo. ² Ad bũmb ning sẽn wilgd b bãngra sã n yita Wẽnd nengẽ: yaa reeg t’a Zezi Krista waa tẽng zugu ne ninsaal yĩnga. ³ Ned ning fãa sẽn kɩɩsd a Zezi, yẽ soab ka yit Wẽnnaam nengẽ ye; yẽ soab tara Krista bɛ wã yam. Yãmb wʋma b sẽn yeele tɩ bɛ wã na n waame, ade, marsã a zoe bee dũniya. ⁴ Yãmba kom-bõonego, yãmb yaa Wẽnnaam kamba, la yãmb n maan raoodo ne bɛɛbã. Yãmb sẽn tũuda soabã yɩɩda sẽn be-a dũni wã pʋgã. ⁵ Krista bɛɛba la zamaana rãmba; yaa rẽ me yĩng la b gomd wa zamaana rãmba tɩ zamaana rãmb kelgd-b. ⁶ Tõnd yẽ yaa Wẽnd soolem. Sẽn mi Wẽnd kelgda tõndo; sẽn ka mi Wẽnd ka kelgd tõnd ye; la wotome la d bakd sɩda ne zirẽ-beedo. ⁷ M kom-nongdse d nong taaba, tɩ nonglem yita Wẽnd nengẽ la ned ning fãa sẽn tar nonglem, yaa Wẽnd biiga, la a mii Wẽnde. ⁸ Sẽn ka tara nonglem ka bãng Wẽnd ye, tɩ Wẽnd yaa nonglem. ⁹ Ad Wẽnd sẽn puk b nonglma toto ne tõndo: Wẽnd tʋma b Bi-yenda tẽng zugu sẽn na n yɩla tɩ d paam vɩɩm bãmb nengẽ. ¹⁰ B nonglma sẽn tũ sor ninga la woto: ka tõnd n deng Wẽnnaam nonglem ye, bãmb n deng tõnd nonglem n tʋm b Biiga tõnd sʋka tɩ b wa ki d yel-wẽna yẽesg yĩnga. ¹¹ M kom-nongdse, Wẽnd sã n nong tõnda woto segdame tɩ tõnd me nong taaba. ¹² Ned nif zɩ n yãend Wẽnd ye. Tõnd sã n nong taaba Wẽnd bee ne do, b nonglma pida zãng ne tõndo. ¹³ Bũmb ning sẽn wilgd tɩ Wẽnd bee ne do tɩ tõnd me be ne bãmba: yaa b sẽn sudg tõnd b Vʋʋsem. ¹⁴ Sã n ya tõndo, d yãendame la d kõta kaseto tɩ Ba tʋma b Biiga, wala dũniya Fãagda. ¹⁵ Ned ning sẽn tẽed tɩ Krista yaa Wẽnnaam Biiga, Wẽnd bee ne yẽ soaba la yẽ soab me bee ne Wẽnde. ¹⁶ Sã n ya tõndo, tõnd bãnga Wẽnd nonglma ne tõndo la d tẽeme. Wẽnd yaa nonglem. Sẽn pida ne nonglem paada ne Wẽnd tɩ Wẽnd me paad ne yẽ soaba. ¹⁷ Nonglem pidsda a tʋʋmd zãng d pʋgẽ a sã n tõog tɩ d pa yɛɛsd Bʋʋda raare. A Zezi sẽn pa yɛɛsd bũmbã, tõnd me yaa boto dũni kãnga pʋga. ¹⁸ Nonglem ka naagd ne rabeem ye, nonglem sẽn pid zãagda rabeem buud fãa; sɩbgr la f yãeta n digd rabeem; dɩlla sẽn digda rabeem, ka tar nonglem pidung ye. ¹⁹ Sã n ya tõndo, d nong bãmba, tɩ bãmb n yɩ pipi n nong tõndo. ²⁰ Ned sã n yeele: «M nonga Wẽnde» n yaool n kis a to, yẽ soab yagda ziri. Ade, f sã n ka nong f saam-biig f sẽn ne ne f nini, f yɩta wãn n nong Wẽnnaam f nif sẽn ka tõe n yãende. ²¹ D sẽn paam noor ning b nengẽ wã la woto: Sẽn nonga Wẽnd bɩ a nonga saam-biiga.

¹ Ned ning sẽn tẽeda t’a Zezi yaa Krista yẽ soab dɩta rogem ne Wẽnde. La f sã n nong ned ba f nonga a sẽn dog biig ninga. ² D bãngdame tɩ d nonga Wẽnnaam kamba d sã n nong Wẽnd menga n deegd b noore. ³ Wẽnd nonglma yaa bãmb noya reegre la noy wã ka zɩs ye, ⁴ tɩ Wẽnd sẽn dog a soab tõoga dũnia la ad-d sẽn tõog dũnia ne bũmb ningã, yaa d tẽebã. ⁵ Ãnda la sẽn tõoga dũniya, sã n ka sẽn tẽeda t’a Zezi Krista yaa Wẽnd Biiga? ⁶ Ya a Zezi Krista n wa ne koom la zɩɩm, la ka ne koom bal ye, yaa ne koom la zɩɩm. A Vʋʋsem Sõng n kõt kaseto, la Vʋʋsem Sõng kaset yaa sɩda. ⁷ Woto, kaseta rãmb yaa b tãabo: ⁸ a Vʋʋsem Sõngo n paas koom la zɩɩm, la b kaseta ka kɩɩsd taab ye. ⁹ D sã n deegd ninsaalb kaseto, Wẽnd dẽnd n yɩɩde. La yaool n yaa Wẽnd kaseta la d paam b Biiga poorẽ. ¹⁰ Ned ninga sẽn tẽed Wẽnd Biiga yẽ soab reegda kaset kãnga. Sẽn ka tẽed-a Wẽnde, geta bãmb wa zirẽ-be-neda, b pa tẽ kaset ning b sẽn kõ b Biiga ye. ¹¹ La kaset kãng la woto: Wẽnd kõo tõnd vɩɩm sẽn kõn sɛ la vɩɩm kãng be b Biiga nengẽ. ¹² Sẽn tara Wẽnd Biiga tara vɩɩm; sẽn ka tara Wẽnd Biiga ka tar vɩɩm ye. ¹³ Yaa yãmb sẽn tẽed Wẽnd Biiga yʋʋrã la m gʋls woto, tɩ y bãng tɩ y paama vɩɩm sẽn kõn sɛ. ¹⁴ D sũur kegma ne Wẽnde n mi tɩ d sã n kos b bũmbu wala b sẽn date, b kelgd-d lame. ¹⁵ D sã n mi tɩ Wẽnd kelgda, d kosg bud fãa, d miime tɩ d na paam d sẽn kos b bũmb ningã. ¹⁶ Ned sã n yãend a saam-biig t’a maand yel-wẽnde sẽn ka wat ne a kũum, a pʋʋse la Wẽnd na kõ saam-bi-kãng vɩɩm. Ka gomd neb niyns yel-wẽnd sẽn wat ne b kũuma ye, tɩ yel-wẽnd n be n wat ne kũum la ka yell kãng yĩng la m yet tɩ b tog n pʋsame ye. ¹⁷ Maan sẽn kis fãa yaa yel-wẽnde la yɛl kẽer n be n wat ne kũum. ¹⁸ D miime tɩ Wẽnd sẽn dog a soab fãa ka maand yel-wẽnd ye, tɩ Wẽnd Biig gũuda yẽ soaba la woto Wẽnema soab ka tar a gaab ye. ¹⁹ D miime tɩ Wẽnd n so tõndo, tɩ dũni wã tõr yaool n gãe Wẽnema soab soolmẽ. ²⁰ D miime tɩ Wẽnd Biiga waame la b kõ-d la yam tɩ d tõog n bãng Sɩd soaba. Tõnd lagma ne Sɩdã soaba, ne b Biig a Zezi Krista. Bãmb la Wẽnd, Sɩd soabã, bãmb la vɩɩm sẽn ka be sɛɛbo. ²¹ M kamba, da saag-y n waoog wẽn-naandsa ye.