1 KORẼNT RÃMBA

1 KORẼNT RÃMBA

¹ Maam, a Pol, Wẽnd sẽn bool a soab ne b raab t’a wa lebg a Zezi Krista Tʋʋm-tʋmdba, maam ne m saam-biig a Sostɛn, ² tõnd n pʋʋsd Wẽnd Tigungu sẽn vigl Korẽnt. Tõnd n le pʋʋsd sẽn paamba a Zezi Krista sõmblem, sõmblem ning b sẽn kõt neb niyns fãa sẽn sẽeg b mooga tõre n waoogd bãmb sẽn ya tõnd Soaala la bãmb me Soaala. ³ Bɩ Wẽnnaam d Ba la d Soaal a Zezi Krista bark la laafi sig y zutu! ⁴ Krista a Zezi pidsa yãmb ne Wẽnd kũuni tɩ m ka vʋʋsd ne bark pʋʋsg ye. Yaa wakat buud fãa la m pʋʋsd Wẽnd bark y yĩnga tɩ b tũnuga a Zezi Krista n kõ-y kũuni. ⁵ Sɩda bãmb maasem yĩnga, y paama kũun buud fãa: goam wɩlengo la bãngr kũuni. ⁶ La rẽ tũu y sẽn gãd kẽnkẽ Krista sẽn kõ-y kaset ningã. ⁷ Yaa rẽ me yĩng la y zĩ n gũud d Soaal a Zezi Krista Pukri tɩ bũmb ba a ye ka na n paoog yã. ⁸ Bãmb n na n sõng-y ne raoodo n tãag raarã, Krista a Zezi Waoonga rarã tɩ b ra yãe kegr buud y nengẽ ye. ⁹ Wẽnd ning sẽn bool-b yãmb tɩ y wa rɩ b Biiga la tõnd Soaal a Zezi Krista yõodo, kõn pa n ka pids b kãabg ye. ¹⁰ M pẽdgd-y lame, m saam-biisi, tõnd Soaal a Zezi Krista yʋʋr yĩnga, tɩ y zems y moora ne taaba tɩ welgr da kẽ y sʋk ye. Sog-y taaba n vɩɩnd yam yɛnga, la tagsg yɛnga. ¹¹ Ade, ya a Kloe zaka rãmb n togs maam tɩ yãmb sʋka lebga zaba, m saam-biisi. ¹² M wʋmda ned kam fãa sẽn gomd ka la ka: «Mam bee a Kefas poorẽ.» «Mam bee a Apolos poorẽ.» «Mam bee Krista poorẽ.» ¹³ Krista welga sags kʋʋng laa? Yaa a Pol n ki pik zug yãmb yĩng laa? Bɩ yaa Pol yʋʋr yĩng la b so yãmba? ¹⁴ M pʋʋsda Wẽnd bark m sẽn ka kõ yãmb ned ba a ye soobã, sã n ka a Krispus la a Gayus. ¹⁵ Wotoone, ned ba a ye, yãmb sʋka, ka tõe n yeel t’a reega soob m yʋʋr yĩng ye. ¹⁶ M tẽegame tɩ m sẽn le kõ soobo, yaa Stefanas ne a zak rãmba la sã n ka bãmb bala m ka le ne ned a to ye. ¹⁷ Krista pa tʋm maam tɩ m wa so neb ye, b yeel-m lame tɩ m moon Koe-noogo, la m bas ninsaal goam minim sẽn tũud soy niynsã, n pa tõe n puk ninsaalba yam tɩ wʋm Krista kũum pika zug võorã. ¹⁸ Moon n wilg tɩ tõnd fãagr yĩnga, Krista kii pik zugu, wẽnda gãeemdo, sẽn ka na n paam-b fãagra yĩnga. Sẽn paam-b fãagra yĩnga, tõnd fãa yĩnga, a yaa Wẽnd pãng kilsgu. ¹⁹ Yaa rẽ la b gʋlsyã: «M na n wãa sɩlma rãmb sɩlem, la yam dãmba yam, m na n bas-b-la kɛɛnga.» ²⁰ Yam pidung soab bɛɛ, sẽn gãe ne bãngr soab bɛɛ, zamaana gom minim soab bɛɛ? Wẽnd pa kɩt tɩ zamaana Sɩlma lebg gãeemdo? ²¹ Zamaana ne a sɩlma sẽn ka tõog n bãng Wẽnd ne Wẽnd yam pidungã, yɩɩ ne goama, pika goam sẽn wẽnd gãeemdã, la Wẽnd tʋlg n fãag tẽedbã. ²² Ade, Zʋɩf rãmb bolgda wẽnd makre tɩ bu-zẽmba bolgd bãngr zulunga. ²³ Sã n ya tõndo, yaa Krista sẽn ka pika la d moonda; la Zʋɩf rãmba yĩnga, pika yaa wa kugr sẽn be sor zugu n lubd kẽndba, n ya wa gãeemdo bu-zẽmba yamẽ. ²⁴ La Wẽnd sẽn bool b rãmba nengẽ, Zʋɩf bɩ bu-zẽna, yaa Krista la b moonda, Krista sẽn ya Wẽnd pãnga la Wẽnd yam pidungã. ²⁵ Sẽn wẽnd gãeemd Wẽnd nengẽ yaa sɩlem sẽn lubd ninsaal sɩlem, sẽn wẽnd ka yõod Wẽnd nengẽ pãng yɩɩda ninsaala dẽnna. ²⁶ Dẽnd yĩnga, m saam-biisi, tẽeg-y tɩ y paama Wẽnd boolgo. Zamaana pʋga, sɩlem dãmb paooda, pãn-dãmb paooda, sẽn paam-b n ya ned zãng paooda. ²⁷ Wẽnd yãka zamaana yam-kaoolg wa fãa-fãa n na n ning sɩlem dãmb yãnde; Wẽnd yãka zamaana koms rãmb wa fãa-fãa n na n lub pãng rãmba. ²⁸ Ned ning sẽn be zamaana tɩ b ka pẽgd a ba, n ka pẽgd a ma, ned sẽn tog ne sãbsgo bala, nin-kãng la Wẽnd yãk yã; Wẽnd tũusa zaalem n na n menes sẽn be. ²⁹ La woto ned kõn zĩndi n tõe n tãoos raood Wẽnd taoor ye. ³⁰ Bãmb maasem yĩng la d kẽ Krista a Zezi la bãmb n lebg tõnd yĩnga, sɩlem sẽn yit Wẽnd nengẽ, n manegd d yelle ne Wẽnde, n kõt d sõmblem, la b fãagd tõndo. ³¹ Yɩɩ woto la sẽn gʋlsa pids yã: «Sẽn baood-a pẽgr bɩ a bao-a Wẽnd nengẽ.»

¹ M sẽn wa y nengẽ, m saam-biisi, m pa wa n na puk sẽn solg Wẽnd nengẽ ye, m pa wa ne goam minim, m pa wa ne sɩlem baaf ye. ² Ayo! M pa tʋlg n bãng bũmb a to yãmb sʋka, sã n ka a Zezi Krista la Zezi Krista ning sẽn kaa pikã. ³ M meng wa-la y nengẽ wa koamsa, wa rabɛɛma, wa ned sẽn digda. ⁴ M goama la m moonegã ka yɩ sɩlem dãmba rẽnd sẽn vẽnegd yam ye. A yɩɩ a Vʋʋsem Sõng kaseto la b pãnga, ⁵ la rẽ yaa sẽn na n yɩlẽ tɩ y tẽeba da rel ninsaal sɩlem, a rel Wẽnd la b pãnga. ⁶ Tõnd sẽn wʋm-b neerã, tõnd me goama yaa sɩlem la d sɩlma ka zamaana rẽnda, ka zamaana na-biisa rẽnd ye, tɩ fãa na n loogame. ⁷ D sẽn gomd a soab yellã, yaa Wẽnd bãngr pidungã, yaa bũmb sẽn yɩɩd-do, bũmb sẽn solg ninsaalba, yaa Wẽnd sẽn tũ a soaba n kãab tõnd ziiri tɩ dũni wã nan ka naana. ⁸ La tẽng zug pãn-dãmba zɩ n paam a taare – sɩda, a sã n da yɩẽ la b pʋɩɩre, b kõn kaẽ pika zugu Ziira soab meng ye – ⁹ la wala sẽn gʋls Sebr pʋgẽ, tõnd togsda ninsaal nif sẽn zɩɩ n yãende, t’a tʋbr zɩ n wʋme, t’a sũur nan ka reege, Wẽnd sẽn segl sẽn nong-b bãmba fãa yĩnga. ¹⁰ Yaa tõnd la Wẽnd tũ a Vʋʋsem Sõng vẽnegre n wilgi, la sɩda, a Vʋʋsem Sõng vɛɛsda fãa n tãag sẽn zulem Wẽnnẽ. ¹¹ Ãnd n be ninsaalb sʋka n mi ninsaal yalẽ tɩ ka tũ ne yam ninga ninsaal sẽn tarã? Wot-ome ned ka mi sẽn solg Wẽnd nengẽ sã n ka Wẽnd Vʋʋsem. ¹² Ka zamaana rãmb yam la d paam ye, yaa Wẽnd Vʋʋsem. La rẽ me yĩng la d tõe n sõdg kũun niyns fãa Soaala sẽn kõ tõndo. ¹³ La d sã n gomd b yelle, ka ne goam biis d sẽn zãms ninsaal nengẽ ye, yaa ne Wẽnd Vʋʋsem tɩ bãmb n tar yĩngr goam biisi n na n puk yĩngr yɛla. ¹⁴ Ned ning sẽn tara tẽng zug yama ka reegd sẽn yita Vʋʋsem Sõng nengẽ ye: dẽ zʋʋga a yam t’a ka tõe n deeg ye. Bũmba sẽn yɩɩd ninsaal yama, dẽnd a paam Wẽnd dẽnna n tõog n bãng b sẽn yala. ¹⁵ Sẽn tar-a yam sẽn zʋʋg tẽng zug rẽnna, tõe n goma bũmb fãa yelle tɩ b pa yãend kegr ye. ¹⁶ Ãnda n bãng Wẽnd tagsg n na n sagl-ba? Tõnd yẽ tar-a lame, tõnd tara a Zezi tagsgã.

¹ Sã n ya ne maam, m ka tõog n gom ne yã wa neb sẽn tar yam sẽn zʋʋg tẽng zug rẽnna ye, m goma ne yãmb wa neb sẽn tar tẽng zug yama bala, m goma ne-y, wa Krista kom peelse. ² Yaa bĩisim la m kõ-y pĩnd tɩ y yũ, ka rɩ taok ye tɩ y ra nan ka tõe n deeg sẽn tagem ye. La ne marsã menga y ket n ka tõe n deeg-a ye, ³ tɩ y yama ket n yaa tẽng zug rẽnna. Sũ-kiir la zab sẽn kẽ y sʋka, ka y zʋga sẽn ket n yaa ninsaal zʋga laa? Y manesma fãa ka ket n ya ninsaal dẽnd laa? ⁴ Y nin-yend sã n gomda: «Mam bela a Pol poorẽ,» tɩ ned a to yetẽ: «Mam yẽ bee a Apolos poorẽ,» ka ninsaalb manesem la y tũuda? ⁵ A Apolos yaa bõe, a Pol me yaa bõe? Ka neb sẽn sõng yãmb tɩ y paam tẽeba laa? La ned kam fãa pa tʋm wa Wẽnd sẽn kõ-a pãnga laa? ⁶ Tɩɩga la mam sel yã, t’a Apolos zãgs-a koom la ka yɩ Wẽnd n kõ-a bɩʋʋng laa? ⁷ Woto sẽn send-a wã ka fɩ, sẽn zãgsd-a wã ka fɩ, sẽn ya-a bũmbu, yaa sẽn kõta bɩʋʋngã: Wẽnnaam. ⁸ Sẽn send-a la sẽn zãgsd-a koom yõod zema taaba; ned kam fãa reegda a rolbo, wala a tʋʋmda sẽn yɩ a soaba. ⁹ Tõnd la sẽn sõngd-b Wẽnd n tʋmnẽ, yãmb la Wẽnd pʋʋgo, yãmb la b roogo b sẽn me. ¹⁰ M tũu Wẽnd sẽn kõ-m kũun ningã n sɩng roogã wa tãm-met-mita. Ned a to n na n wa me n paase, la yaa pakr tɩ ned kam fãa maan gũusg ne a sẽn met to-to. ¹¹ Sã n ya rooga sɩngre, d ka tõe n sɩnga ne Kugr a to tɩ ka sẽn zoe n dɩgl a soaba, a Zezi Krista. ¹² Kug kãng zug marsã ned sã n wa rogl sãnem, bɩ wanzurfu, bɩ kug nɛɛba, bɩ raado, bɩ kãnkẽ bɩ moodo, ¹³ a soab tʋʋmda na puki; Raara-raare a na vẽnege: Bugum n na n vẽneg yɛlã, bugum n na n wilg ned kam fãa tʋʋmd sõmblem. ¹⁴ Sẽn dogl bũmb ninga sã n ka rɩ bugum, tʋʋm-tʋmda reegda rolbo; ¹⁵ Bugum sã n dɩ, rolb me sɛ yã. Tʋʋmda soab na põse la na yɩ wala a tũu bugmẽ n looge. ¹⁶ Y ka mi tɩ y yaa Wẽnnaam doogo, t’a Vʋʋsem Sõng be y pʋsẽ laa? ¹⁷ Sẽn wãad-a Wẽnd doogo, Wẽnd me na n wãa a soaba; Wẽnnaam dooga yaa bõn-sõngo la yaool n yaa yãmb la ro-kãnga. ¹⁸ Bɩ ned da belg a meng ye! Ned sã n be yãmb sʋka n tẽed t’a yaa sɩlem soaba wa zamaana sẽn dat sɩlem ninga, bɩ a lebg gãeenga t’a na paam sɩlem. ¹⁹ Wẽnd nifẽ, zamaana sɩlem yaa gãeemdo; dẽ me yĩng la b gʋls woto Sebra pʋga: «Yaa bãmb n leebd sɩlem dãmba n lubd b sɩlmẽ.» ²⁰ Ad sẽn le gʋls zĩig a to: «Wẽnd mii sɩlem dãmba tagsgo la b neeme tɩ yaa yaoolgo.» ²¹ Dẽn yĩngã, ned da bao a pẽgr ninsaalb nengẽ ye, tɩ bũmba fãa yãmb n so, ²² a Pol woo, a Apolos, a Kefas, zamaana, vɩɩm bɩ kũum, dũnna bɩ beoogo, fãa yãmb n so; ²³ la Krista n so yãmba, tɩ Wẽnd me so Krista.

¹ Togame tɩ neba ges-do wa Krista tʋʋm-tʋmdba la Wẽnd laog ning sẽn solga wã pʋɩtba. ² La bõe sẽ la b kot pʋɩta sã ka a ra zãmb a zu-soaba. ³ Sã n ya maam, m toog ka ne yãmb bʋʋdo bɩ ne ninsaal a to rẽnd ye; yɩɩd rẽ, m ka kaood m meng bʋʋd ye. ⁴ Yaa sɩda, m pa maan yelle n zĩi n bʋʋd ne m meng ye la ka rẽ n ya kaset tɩ m yell manega ne Wẽnd ye. M kaset soab yaa Soaala bala. ⁵ Woto wã, da yãg-y ne bʋʋd ye. Bas-y tɩ Soaala wa. Bãmb n na n vẽneg lika zãnga la b puk bũmb ning fãa ninsaal sẽn sed a sũurẽ. Wakat kãng la ned kam fãa na n deeg Wẽnnaam nengẽ, pẽgr ning a sẽn tog ne. ⁶ M saam-biisi, yaa yãmb yĩng la m dɩk maam ne a Apolos makre; m tʋlgame tɩ y ges tõndo n wʋm yelbũnd kãnga võore: Makr sẽn ya mak faoogo la sẽn ka yiis Sebr sõng pʋgẽ. M dɩka maam ne a Apolos makrã tɩ y ra wa wuk ne nagre n kẽ nin-yend n bas a to ye. ⁷ Ãnda n tõe n welg foo ne f taaba? Bõe la f tar tɩ b ka kõ-fo? La sã n ya ned n kõ foo, bõe yĩng tɩ f pẽgd f meng wa ka ned n kõ foo? ⁸ Yãmb yaa neb sẽn zoe n tɩge, sẽn zoe n lebg arzɛk rãmba; y zoe n lebga dĩm dãmb tɩ ka tũ ne tõnd tʋʋmde. D zug kõn yɩẽ noogo y sã sɩd lebgẽ la rĩm dãmba, tɩ d naag-y n dɩtẽ naam? ⁹ La sã n ya ne mam tagsgo, tõnd, Krista Tʋʋm-tʋmdbã, tõnd n zãr ne naam; b zĩndga tõnd poorẽ zĩigã, wa b sẽn paalg b rãmb kũum bʋʋdo; tõnd n lebg bɛɛb laad dũniya zĩig zãnga, malɛk rãmb la ninsaalb nifẽ. ¹⁰ Tõnd lebga wa gãeemse, Krista yĩnga, tɩ yãmb ket n zĩ ne y yẽesem, Krista maasmẽ. Tõnd koms n dɩgame tɩ yãmb wɩɩd ne pãnga. Yãmb gãee ne waoore tɩ sãbsgo ya tõnd pʋɩɩre. ¹¹ Ba rũnda menga, d tara kom la ko-yũudu la d zĩi d bɩlgemde; ned pa get d yelle la d sẽega mooga zãnga. ¹² D sɛla d pãng ne d nus tʋʋma. B sẽn tar-d tʋʋre, tõnd tara pẽgre, b sẽn tar-d namsgo, tõnd sakdame; ¹³ b sẽn wɩt-do, tõnd bas n mi-la d taab nintãm yẽesgo. Tõnd lebga wa dũni wã tãmpʋʋre, wala dũni sagdo n tãag marsã. ¹⁴ M ka gʋlsd woto n dat n ning y yãnd ye, m datame bal n sagl yã tɩ m nong-y la wʋsgo. ¹⁵ Ba y ya karen-biis sẽn tar neb ka tɛk sẽn get y yelle, Krista tũudma pʋgẽ, bãng-y tɩ y ka tar ba rãmb kʋʋng ye. Yaa maam bal n dog-y Krista buudẽ ne Koe-nooga moonego. ¹⁶ Dẽ la m kot-y tɩ y wẽneg maam. ¹⁷ La yaa rẽ me yĩng la m tʋm a Timote y nengẽ: a yaa m bi-nongre la a pelga a pʋg ne Krista tũudem. A na tẽeg-y m sẽn yals bũmb ninga Krista tũudma poorẽ, la m sẽn zãmsd Tigeng kamba fãa. ¹⁸ Kẽer tẽeme tɩ m ka na n wa y nengẽ n yik n tãoosd daoodo. ¹⁹ Yaool n ka na n le kaoos tɩ m ta y nengẽ, Wẽnd sã n sake. Wakat kãng la m bãngd b tɩtaama sã n yita b pãngẽ bɩ sã n teka noor goam bala. ²⁰ Wẽnd Rĩunga ka goam bala, a naaga ne Wẽnd pãng tʋʋma. ²¹ Bõe la y nonga? M wa y nengẽ ne sãbse bɩ m wa ne nonglem la sũ-maasem?

¹ D wʋmdame tɩ yoob goam bal n gomd yãmb sʋka la yoob buud meng sẽn ka yãet bu-zẽmba nengẽ; b gomdame tɩ yãmb nin-yend n tol n vɩ ne a ba paga. ² Bõe tɩ y ket n wukd ne tɩtaam? Bõe tɩ y ka kelem kʋʋre la y kɩtẽ tɩ b yiis y sʋka, tʋʋm dẽgd a woto soaba? ³ Ade, m ka be y sʋk ne m yĩnga ye; m bee ne m yam la m zoe n kaoo yell a woto soab bʋʋdo wa m beẽ la y sʋka ne m yĩngã. ⁴ Togame tɩ Soaala Zezi yʋʋr yĩnga yãmb ne maam, tɩ m bee y sʋk ne m yama, ba sã n ka ne m yĩngã, togame tɩ d naag taab ne d Soaala Zezi pãnga, ⁵ n bas nin-kãnga ne Sʋtãan t’a sãam a yĩngã, t’a sɩɩga wa paam fãagre, Soaala raare. ⁶ Y zẽk-m-menga ka be zĩig ye! Y ka mi tɩ rabɩll bilfr bal tõeeme tɩ zoma fãa wuki? ⁷ Menes-y y rabɩll kʋdgã n lebg zom paalga, n tõog n yɩ bur sẽn ka lob bɩlle. Bãng-y tɩ Krista, tõnd Pak, kʋʋme. ⁸ Bɩ d kɩdem kibsa sũ-noogo la ra yɩ ne bur sẽn lob bɩll kʋdgã, ra yɩ ne d wẽnema la d pʋ-tooga rabɩlle, d kɩdem ne bur sẽn lob pʋ-peelem la sõmblem rabɩlle. ⁹ M sẽn yeel-y m sebra pʋgẽ tɩ y ra maan zĩnd-n-taar ne yoaadba, ¹⁰ ad-y m da ka gomd dũni wã yoaadba ye, m ka naagd raab waglã la fãadba ye, m ka naagd sẽn pʋʋsdb wẽn-faad ye. Sã n yaẽ la boto, yaẽ la tɩlɛ tɩ y fãa yiẽ dũniya. ¹¹ M yeel-y lame bal tɩ y ra saag n maan zĩnd-n-taare ne ned sẽn yet t’a yaa yãmb saam-biiga a tẽeba pʋgẽ, n yaool n ya yoaada, yão-be-neda, wẽn-faad waoogda, n nong a taab paoogre, n woond arzɛgs n samdẽ. M yeelame menga tɩ y ra sak tɩ ned a woto yɩ y rɩt-n-taag ye. ¹² Sẽn ka lagem-b tõnd ne tẽebo n yaa d saam-biisã, m yɩta wãn n kaood bãmb bʋʋdo? Ka sẽn be-b Tigenga pʋg bʋʋd la y bʋʋd laa? ¹³ Yɩng rãmbã, Wẽnd n kaood bãmb bʋʋdo. Wẽng ning sẽn be yãmb sʋka la y tog n menese.

¹ Zabr sã n yik yãmb ne taab sʋka, bõe tɩ y boond taab bʋʋd bu-zẽmba taoore, n ka na n kẽng Wẽnd kamba taoore? ² Bɩ y yĩmame tɩ yaa bãmb n na n kao dũni wã bʋʋdo? La sã n ya yãmb n na n kao dũni bʋʋdo, bõe tɩ y maand wa y ka tõe n bʋ yell faadã? ³ Y ka mi tɩ ba malɛgsã, tõnd n na n bʋ-b laa? Tɩ b pa gomd vɩɩm kãnga yɛlã! ⁴ Y sã n tar no-koɛɛm ne taab tẽng zug yɛla poorẽ, bõe yɩng la y paasdba na n yɩ Tigengu sẽn ka pẽgd b rãmba? ⁵ Ad-y m zoe n ningd-y la yãnde m sã n sok ned sã n ka be y sʋka n tar yẽesem n tõe n welg y yɛla, ⁶ tɩ y tat y saam-biis n dabd bʋʋd bu-zẽmba taoore! ⁷ Sɩd me, y sẽn tar bʋʋd ne taaba zoe n yaa y kongr kaseto. Y sẽn sakd n deeg kegr ka são? Y sẽn basd tɩ b fã-y ka são? ⁸ La ayɛy! Ka woto la y maand ye; yãmb n lɛɛg n maand y taab kɛga la y fãad-ba, la yaool n yaa y saam-biisi! ⁹ Y zɩ tɩ sẽn maand-b kɛg ka tar pʋɩɩr Wẽnd Rĩung pʋgẽ laa? Da belg-y y meng ye: yoaadba, sẽn waoogd-b bõn-naandse, dataase, sẽn nong-b wẽnga, sẽn maand-b wɩɩbdo, ¹⁰ wagdba, dat-wʋsg-rãmba, dã-yũud bɛda, sẽn paoogd-b taaba, fãadba, bãmb ned ba a ye kõn paam Arzãn Rĩung ye. ¹¹ La ka y zãng me, yãmb wʋsg ra yaa boto. Marsã y pekame, y tara sõmblem, y paama fãagre, Soaal a Zezi Krista la d Wẽnnaama Vʋʋsem pãng yĩnga. ¹² Neb kẽer n gomda: «M tõe n maana m sẽn dat fãa.» La m na leoke tɩ ka m sẽn tõe n maan fãa n ya yõod ne m ye. M tõe n maana fãa la m kõn saag n lebg m manesem yem-daoog ye. ¹³ Dɩɩb bee pʋg yĩnga, tɩ pʋg me be rɩɩb yĩnga la Wẽnd n na n sɛɛs b yiiba fãa. Yĩnga ka be yoob yĩng ye; yĩnga yaa Soaalã n so, la yĩnga me rɩta Soaala yõodo. ¹⁴ Wẽnd sẽn vʋʋg Krista na n vʋʋga tõnd me ne b pãngã. ¹⁵ Y zɩ tɩ y yĩnsa yaa Krista yĩnga wilsi? La maanda a wãna tɩ Krista yĩnga n wa lebg woto n ka bak ne pʋg-yoodr yĩnga? Dẽ ka tõe ye. ¹⁶ Y zɩ tɩ ned ning sẽn lagemd ne pʋg-yoodre lebgda yĩng a ye ne a? Woto la gʋls yã: B yiiba na n lebga yĩng a ye. ¹⁷ Sã n ya sẽn lagma ne Krista, yẽ soab me lebga yam a ye ne Bãmba. ¹⁸ Zoe-y yoobo! Yɛl a taaba ninsaal sẽn maand pa sog ne a yĩng ye la ned ninga sẽn maanda yoob maanda wẽng ne a yĩnga. ¹⁹ Sãnd y miime tɩ y yĩnga yaa a Vʋʋsem Sõng roogo? B bee ne yãmb la Wẽnd n kõ-b yãmba. Y zɩ tɩ y ka so y menga? ²⁰ Ad-y yaa ligd la b kɩs n deeg yã! Modg-y tɩ y yĩnga pẽg Wẽnde.

¹ Sebr ning y sẽn gʋlsã la m na n ges marsã. La y yeta y sebra pʋgẽ tɩ yaa sõmbo rao ne pag sã n zãr taaba. ² La sẽn na n yɩlẽ tɩ y põs ne yɛl kɛga, bɩ rao tar paga, tɩ pag me tar sɩda. ³ Rao sak a paga tɩ paga me sak a sɩda. ⁴ Paga ka so a yĩng ye, yaa sɩdã n so. Botome raoa ka so a yĩnga, yaa pagã n so. ⁵ Da zãgs-y taab ye, sã n ka y seda rẽ, n na n maan pʋʋsgo. La rẽnd poore, bɩ y pa ne taaba tɩ Sʋtãan da wa bẽd y ka tõe y mensã, n kʋɩɩb-y ye. ⁶ M sẽn gom marsa wã yaa yãmb sẽn tõe bũmb ningã, la ka pakr ye. ⁷ M tʋllẽ lame tɩ y fãa yɩẽ wa maam; la m miime tɩ ned kam fãa paamda Wẽnd nengẽ kũun sẽn tog ne-a: yãoo soab wã, yãoo soab woto. ⁸ Neb niyns sẽn ka kẽ-b kãadem la pʋg-kõapa, m yet-b lame tɩ b sã n pa wa maam, yaa neere. ⁹ La b sã n ka tõe b mense, bɩ b kẽ kãadem tɩ rẽ n são bugum sẽn dɩt-b. ¹⁰ Sã n ya kãadbã, ad noore, la ka mam noore ye, yaa Soaala rẽnna: bɩ pag ra welg ne a sɩd ye, ¹¹ -la-la welgr sã n kẽ sʋka, a ra le rɩk sɩda; ka rẽnn bɩ a leb a sɩd kʋdga nengẽ tɩ b le zems taaba. – Daoã me da yiis a pag ye. ¹² Yɛla taab n kete, la ka Soaala n gomd ye, yaa maam: saam-biig sã n tar paga sẽn nan ka tar tẽebo la sẽn sak n na n zĩnd ne-a, bɩ a ra yiis-a ye. ¹³ Pag me sã n tara sɩda sẽn nan ka tar tẽebo la sẽn sakd n na n zĩnd ne-a, a ra bas-a ye. ¹⁴ Sɩda sẽn nan ka paam tẽebã sõmblem na n yi-la a paga nengẽ. Botome pag ning sẽn nan ka paam-a tẽebã sõmblem na n yi-la a sɩda nengẽ. Sã n da kaẽ boto, y kamba yaẽ la kom-dẽgdo la Wẽnd bark yaool n sig-b lame. ¹⁵ Ned ninga sẽn ka paam-a tẽebã sã n dat n loog bɩ a looge: sã n ya woto saam-biiga sẽn tẽedã yi-la a loɛɛgẽ. Wẽnd bool-y lame tɩ y vɩɩnd laafi vɩɩm. ¹⁶ Paga, f mi-la f na fãag f sɩda? Sɩda, f mi-la f na fãag f paga? ¹⁷ Sẽn paase, yaa ned kam fãa kell n vɩɩnd wa Wẽnd boolla sẽn mik-a zĩig ninga. Yaa woto la m zãmsd saam-biisa fãa Tigeng pʋgẽ. ¹⁸ Wẽnd boolla mik-f lame tɩ f ya zũnga, pa zũnga; boolla mik-f lame tɩ f ka kẽ bãongo, bas bãong kõom. ¹⁹ Kẽe bãong yaa zaalem, ka kẽ bãong me yaa zaalem; sẽn pak yaa Wẽnnaam noya reegre. ²⁰ Bɩ ned kam fãa pa Wẽnd boolla sẽn tuk-a zĩig ninga. ²¹ Boolga wakat tɩ f ra yaa yamba, bɩ rẽ ra lebg f zu-loɛɛg ye. F sã n tõe n lebg burkĩnd me bɩ f bao n dɩ f yembda yõodo. ²² Ned ninga sẽn da yaa yamb a boolg wakata bãng t’a lebga Soaala burkĩna La sẽn da yaa burkĩna a boolga wakat lebga Krista yamba. ²³ La sɩda, b raa yãmba! Da leb-y ninsaalb yembdẽ ye. ²⁴ Bɩ ned kam fãa pa Wẽnd taoore wala Wẽnd boolla sẽn tuk-a. ²⁵ Sã n ya kom-pugli sẽn nan ka kẽb kãadma poorẽ, m ka paam Soaala noor ye, m togsda m sẽn tagsde, wala Soaala nimbãan-zoeer sẽn sig a soaba t’a goam sek kelgre la reegre. ²⁶ M tagsdame tɩ ned sã n pa wa m sẽn wilgã n sãoẽ, d sã n get d rũnna-rũnna pɛtã. ²⁷ F kẽe kãadem ne paga, da bao welgr ye. F ka kẽ kãadem ne-a, ra bao kãadem ye. ²⁸ La f sã n baood kãadem bɩ f ra tẽ tɩ f maana wẽng ye. La bi-pugl me sã n kẽ kãadem, a ka maand yel-wẽnd ye. Ya b sẽn na n yãe toog b yĩngẽ wã la m datẽ tɩ b tɩlgẽ dẽ. ²⁹ Maam n yet yã, m saam-biisi: wakata ka zɛɛd ye. Sẽn tar-b pagb vɩɩnd wala b sã n da ka tarẽ ye. ³⁰ Sẽn daagd-b nintãm wala b ka yãbd ye; sẽn langd-b sũ-noogo wala b ka kɩdemd ye; sẽn maand-b leebgo wa b pa tar fɩ ye; ³¹ sẽn dɩt-b zamaana yõodo wala b pa rɩt-a meng ye, tɩ y mi tɩ zamaana neng ka na n zɛ teoong ye. ³² M datẽ lame tɩ y zãrẽ ne yɩɩr buud fãa. Rao ning sẽn ka kẽ kãadem yaa Soaala yɛl la a lʋɩɩsd taoore, n gẽesd a sẽn na n yɩlẽ n ta b yam. ³³ Sẽn kẽ-a kãadem sẽn lʋɩɩsd taoore yaa dũni wã yɛla, yaa a sẽn na n yɩlẽ n ta a pag yam, ³⁴ la ad-a sẽn pʋɩ a yiibu. Pag sẽn ka tar sɩda, la pa-kuli, bãmb me lʋɩɩsda Soaala taoore; b naag n baooda b yĩnga la b sɩɩga sõmblem. Sẽn kul-a sɩd lʋɩɩsda rũnda vɩɩma taoore, n baood n na n noog a sɩd sũuri. ³⁵ M gomda woto y sõngr yĩnga, ka bẽdg la m gãnegd-y ye, m datame tɩ y yama zẽk n tees sẽn ya neere la a tabend Soaala n ka pʋɩ zĩis a yiib ye. ³⁶ Fo maanda wa f sẽn date, kãadem goam sãn zoe n gomame tɩ foo ne bi-pugla nan ket n paoodẽ la f neeme marsã tɩ kãadma sã pa yi na yɩɩ toog ne foo, Fo tõe n kẽe kãadem la f ka maand yel-wẽnd ye. ³⁷ La ned sũur sã n gãd kẽnkẽ, tɩ moadg ka lʋɩ sʋka, t’a sed ne yamleoogo t’a kõn yi kãadem ne biig ning a sẽn da pʋlem a menga, a maanda neere. ³⁸ Dɩlla sẽn kẽeda kãadem ne bi-pugl ning a sẽn da pʋlem a menga, maanda neere, la sẽn ka kẽeda kãadma n maand neer n yɩɩda. ³⁹ Pag bãng t’a sɩd sã n ket n vɩ a ka tõe n welg ne a ye. A sɩda sã n kaẽ la a tõe n kẽ ne a sẽn dat a soaba, la yɩta Soaala maasmẽ bala. ⁴⁰ La sã n ya mam sẽn tagsde, a vɩɩm na yɩ-a noog n yɩɩda, a sã n pa wa a sẽn ya-lã. M me tẽedame tɩ m sẽn leok woto wã yaa ne Wẽnd Vʋʋsma vẽnegre.

¹ Sɩda, sã n ya maanda sẽn kʋʋd wẽn-naandsa yĩnga, d fãa yetame tɩ d miime; m deegame. La ade, bãngr wata ne wilg-m-menga. To nonglem bal n zẽkd ninsaala. ² Ned sã n yet t’a mii bũmbu, a bãng tɩ baasgo, ka waa a sẽn teeda zãng ye. ³ Sẽn nong-a Wẽnnaam, Wẽnnaam me mii yẽ soaba. ⁴ Dẽ wã, sã ya rũmsa nemd wãbre, rũms niyns sẽn kʋʋd bõn-naandsa yĩngã, d miime tɩ wẽn-naand yaa zaalem, dũni pʋgẽ, la Wẽnnaam b ye tãa la Wẽnde. ⁵ Ba bũmb sã n be yĩngri bɩ tẽng zugu tɩ b get-b wa wẽnde -la sɩda wʋsg beeme n boond tɩ wẽnd dãmba, n boond tɩ dũni soaalba – ⁶ tõnd nengẽ Wẽnd yaa b ye tãa, yaa Wẽnd Ba, bũmb fãa sẽn yit a soab nenge la d sẽn vɩ a soab yĩnga, la d Soaala me yaa a ye, a Zezi Krista, bãmb nengẽ la bũmb fãa yita la bãmb yĩng la tõnd be. ⁷ Ka neba fãa n tar bãngr ye. Ade, kẽer sẽn bas wẽn-naandsa pʋgb nan ka zãag ye; la woto b wãbda maanda nemdã n tẽrẽ tɩ rũmsa kʋʋ wẽn-naands yĩnga la b sɩɩga rẽgemdame, b sẽn nan ka wɩsga yĩnga. ⁸ Ka rɩɩb n tõe tɩ d kolg Wẽnd n paas ye. D ka rɩ, bũmb pa woogde, d rɩ yã, bũmb ka paasde. ⁹ Y sã n kõ y meng tɩ y tõeeme bɩ y pa tõe n dɩ, gũus-y bal tɩ y sẽn yalsã da wa ne koms rãmb lʋɩɩs ye. ¹⁰ Wala ned sã n yãend foo, foom a bãng-n-tɩgame soab, tɩ f rɩt wẽn-naands taoore, b waoogr zĩigẽ, nin-kãng sẽn nan ket n ya koamsã, a tẽebẽ wã, a ka na n tags t’a me tõe n wãba maand nemdo? ¹¹ La woto wã, yaa fo bãngrã n lub koamsã yel-wẽndẽ. La yẽ me yaa f saam-biiga, la Krista ki-la a yĩnga. ¹² Y saam-biisa sã n ket n ya koms rãmb b tẽebẽ tɩ yãmb manesma lub-b wẽng pʋgẽ, ad-y yaa Krista meng la y beg yã. ¹³ Woto wã m sã n ne tɩ rɩɩb na n luba m saam-biiga, m na bas nemd kãng zãng-zãnga, n da wa lub m saam-biiga ye.

¹ Maam n pa so m meng bɩ bõe? Maam n pa Soaala tʋʋm-tʋmd bɩ bõe? Maam n pa yãend Soaal a Zezi bɩ bõe? M tʋʋmdã sẽn paam yõod Soaala nengẽ wã, ka yãmb laa? ² M sã n ka tʋʋm-tʋmd neb a taab yĩnga, ne yãmb sẽ, m yaa tʋʋm-tʋmda, tɩ Soaala sã n baood m tʋʋmda kaseto, yaa yãmb la b ne yã. ³ M sẽn tar n na n leok sẽn dõt-b maama la woto: ⁴ d ka tar sor n dɩ la d yũ bɩ? ⁵ Sõangd poaka sẽn ya tẽeda n ka tar sor n yãag-do wala b sẽn yãagd tʋʋm-tʋmdb a taaba, Soaala saam-biisã, la a Kefas bɩ? ⁶ Bɩ yaa maam ne a Barnabe bal n ka tar sore n vʋʋs ne tʋʋmde? ⁷ Yaa ãnd n kẽed tãpo n le rɩt a meng ligdi? Ãnda n send tɩɩga tɩ b rigd a biis rɩɩbo? Ãnda n kɩɩmd rũmsi n ka rɩt b bĩisim? ⁸ La woto yaa ninsaalb n gomd bala, bɩ Noora me paasa bũmbu? ⁹ Yaa a Moyiiz Noora sebrẽ la b gʋls yã: «Naaf sã n tʋmd zɛɛgẽ bɩ f ra loe a noor ne yʋk ye.» La Wẽnd toog bee ne niisi? ¹⁰ Ka tõnd yĩng la a gomd sɩda? N-ye! Yaa tõnd yĩng la b gʋls yɛsa: Sẽn kood-a pʋʋg tẽeda bũmbu, tɩ sẽn pãbd-a ki zɛɛgẽ me tẽed a keoore. ¹¹ D sã n bʋd yĩngr kũuna y sũurẽ, bõe n ka zemse d sã n tigsd sẽn wom y pʋtẽ? ¹² Neb sã n beẽ n tar sor n dɩ y yõodo, ka tõnd n yɩɩde? D yaool n ka sak n maan boto ye. D sẽn mi yaa d sak toog buud fãa, tɩ d pa rat n kẽes gɩdgr Krista Koe-nooga moonegẽ ye. ¹³ Y zɩ tɩ wẽnd doogã n kõt a tʋʋm-tʋmdbã b rɩɩbo, tɩ maan-kugrã kõt a maan-kʋʋdba b rɩɩbo? ¹⁴ Woto-me, Soaala sẽn kõ b rãmb noor tɩ b moone Koe-noogã rɩta Koe-nooga sẽn kõt-b bala. ¹⁵ M yaool n ka rɩ b sẽn da segd n kõ-ma ye. La m ka gʋlsd-y wa m datame n paam n dɩ-y ye. Ayɛy! M sẽn kiid n são. Dẽ la m zu-zẽkre la ned kõn deeg-a n bas m zaalem ye. ¹⁶ Koe-nooga mooneg ne maam ka m zu-zẽkr bal ye, a yaa tʋʋm pakre n loe m zugu. N ye! Yell bela m zug, m sã n ka moon Koe-noogã! ¹⁷ Sã n yaẽ la maam la tʋʋmda zu-raoogo soaba m togẽ la ne rolbo; m sã n ka tar dolbã, dẽnd yaa zɩɩb la neda to zɩlg-ma. ¹⁸ Bõe n na n yɩ m dolbo? M tɛka yaa m paam n moon Koe-noogã tɩ ka tũ ne rolb ye, n ka reeg Koe-nooga sẽn tõe n kõ-m bũmb ning ye. ¹⁹ Ade, yãmb ned ba a ye ka ra maam waa a yamb ye la m sakame n lebg neba fãa yem-daoogo, sẽn na n yɩlẽ n wa paam bãmb ka tɛka. ²⁰ M lebga Zʋɩf ne Zʋɩf rãmba, n na n paam Zʋɩf rãmba; m lebga Noora tũuda ne sẽn tũudb Noorã – la Noora tũub yaool n da ka le pak-m ye – n na n paam sẽn tũud-b Noora rãmba. ²¹ M lebga no-kɩɩsa ne Noora tõatba – m yaool n pa ned sẽn yiis a meng Wẽnd Noora tũudmẽ ye, tɩ m deegda Krista Noore – n na n paam sẽn ka tũud-b Noora rãmba. ²² M lebga koamsa ne koms rãmba n na n paam koms rãmba. M lebga neb fãa bũmbu, n na n fãag-ba, ba sã n ka b zãnga. ²³ M maana rẽ fãa Koe-nooga yĩnga tɩ m me bũmb zĩnd sʋka. ²⁴ Yãmb ka mi tɩ wags taaba zĩigẽ, zoetba fãa zoetame la yaa nin-yend bala n yɩt pipi? Yãmb me mao n lʋɩ taoore n wa paam dolbo. ²⁵ Sẽn wagsd-b taaba tuuba bõn-nood wʋsgo la b tõee rẽnna. La yaool n yaa rolb sɛtga la b baooda. Sã n ya tõndo yaa rolb sẽn kõn sɛ. ²⁶ Yaa woto la m wudgda, m pa zoet n tuumnẽ ye, m nug ka vaad vɩʋʋg ye. ²⁷ M dɩdgda m yĩngã, m talld-a-la toogo tɩ m zoeta m na n moon m taab Koe-noogã n yaool n wa rõb vɩʋʋgẽ.

¹ Ad-y m pa rata, m saam-biisi, tɩ y yĩm tɩ sawadgo n bui d yaab rãmba fãa la b fãa rʋʋga mogr a ye. ² Wẽnd maag a Moyiiz, b reega soob sawadg tẽngr la Mogr pʋga. ³ B fãa rɩlga b mens ne yĩngr dɩɩb yɛnga. ⁴ B fãa yũu yĩngr bõn-yũudl a ye; yaa yĩngr pĩig koom la b ra yũuda la pĩiga ra yãagda bãmba la pĩ kãng ra yaa Krista. ⁵ La ne rẽ fãa sẽn ta-b Wẽnnaam yam sõor yɩɩ bilfu; la rẽ me la b kõaba sẽeg we-raoogẽ wã. ⁶ Yɛla reng n maana woto n na n nek d yam, tɩ da bas tɩ yamleed wẽnsã wa pid d sũur wa bãmb dẽnd ye. ⁷ Da waoog-y bõn-naands wa bãmb kẽer sẽn maane tɩ b kibara gʋls woto: «Zãma wã zĩndame n dɩ la a yũ, la a yikame n na n deem a reem.» ⁸ Da sak-y yoob wala bãmb kẽer sẽn sake, tɩ bãmb tus pisi la a tã na n ki daar a ye wã ye. ⁹ Da kʋɩɩb-y Soaala wa bãmb kẽer sẽn kʋɩɩb-ba tɩ wiis kɛ-b n kʋ wã ye. ¹⁰ Da guglem-y wala bãmb neb kẽer sẽn maane tɩ Tẽn-kũuma na n loog ne b fãa gilla ye. ¹¹ Dẽ fãa maaname n na n nek d yam la rẽ fãa gʋlsa tõnd zãmsg yĩnga, tõnd sẽn pẽneg dũni wã sɛɛbã. ¹² Dẽn yĩnga, sẽn yɛsa yĩngr n pẽgd a menga gũus n da wa lʋɩ ye. ¹³ Y nan pa seg kʋɩɩbgo sẽn zʋʋg ninsaal pãng ye. Wẽnd yɛsa b sɩd zĩigẽ la b kõn sak tɩ y paam kʋɩɩbg sẽn yɩɩd y pãng ye; kʋɩɩbg sã n wa, b na kõ-y dabaare tɩ y rig-a n zãage, b na kõ-y pãng tɩ y maan daoodo. ¹⁴ M kom-sõma, zãag-y y meng ne wẽn-naandsa waoogre. ¹⁵ M gomda ne yã wa neb sẽn tar yam. Wʋm-y m sẽn dat n togsã. ¹⁶ Laok ning d sẽn deeg la d pʋʋsd barkã ka Krista zɩɩm la d pʋɩt taab la? Burã d sẽn kaoodã, ka Krista yĩng la d lagem n dɩtẽ laa? ¹⁷ Wala bura sẽn yaa a ye wã, tõnd me ne d ya kʋʋma d yaa yĩng a ye tɩ d fãa rɩta bur yɛng kãnga. ¹⁸ Tẽeg-y d yaab a Israyɛl rooga kibare. Neb niyns sẽn da rɩt-b maandã, ka maan-kugra yõod la b da rɩt bɩ? ¹⁹ La rẽ rat n yeelame tɩ bõe? Tɩ maanda nemd bee yõodo? Tɩ maanda sẽn waoogd a soaba n tar yõodo? ²⁰ Ka Sʋtãan yĩng la maanda kʋʋd laa, b ka kʋʋd bũmb sẽn ka Wẽnd yĩng laa? M yaool n pa rat tɩ y lagem ne sʋtãamb ye. ²¹ Yãmb pa tõe n yũ Soaala bõn-yũudem la y naag n yũ Sʋtãan dẽn ye, y ka tõe n dɩ Soaala rɩɩb la y le naag n dɩ Sʋtãan dẽn ye. ²² D dat n yika Soaala sũur bɩ d dat n maan-b la pãnga? ²³ Neb n gomd woto: «M tõee fãa.» La d ka tẽed tɩ fãa yaa yõod ye. «M tõee fãa» la m pa tẽed tɩ fãa n wat ne manegr ye. ²⁴ Bɩ ned ba a ye da bao sẽn manegd a meng ye; a bao sẽn manegd a taaba. ²⁵ Wãb-y nemd ning fãa sẽn da koos-roogẽ, n da yɛs n sokd y sũurẽ sẽn ya bũmb ning nemd ye, ²⁶ tɩ tẽnga ne a pʋgẽ teed fãa yaa Soaalã n so. ²⁷ Bu-zẽnd sã n bool yãmb a zakẽ tɩ y sak n kẽnge, bɩ y rɩ a sẽn kõ-y bũmb ning fãa la y ra yɛs n sokd y menga: y tõeeme bɩ y pa tõe n dɩ ye. ²⁸ Ned sã n yeel yã: «Ad-y nemda yaa maoong nemdo» bɩ y vẽ ne a wãbre, sẽn togsa yãmba yĩnga la a sũura koɛɛg sẽn leokd tɩ pa tõe n wãba yĩnga. ²⁹ M sẽn gomd sũur koɛɛgã, m ka gomd yãmb dẽn ye, yaa to wã rẽnda; la sɩda, ned a to sũur koɛɛg yɩta a wãn n leok m yĩnga, m pa so m meng laa? ³⁰ M sã n dɩt bũmb la m pẽgd Wẽnde, b na yɩɩ wãn n zab ma m sã n pẽgd m Soaala m sẽn paam dɩɩb yĩnga? ³¹ Woto wã, y rɩta, y yũuda, bɩ yaa bũmb a to la y maanda, bɩ fãa yɩ Wẽnnaam pẽgr yĩnga. ³² Gũus-y tɩ y manesem da wa ne ned lʋɩɩse, Zʋɩf rãmb sʋka, bɩ bu-zẽmba, bɩ Tigung kamb sʋk ye. ³³ Sã n ya maam, m baood n na n zemsa ne y fãa gill, bũmba fãa pʋgẽ; m ka baood sẽn nafd m menga ye, yaa kʋʋnga nafr la m baooda n dat tɩ b fãa paam fãagre.

¹ Yɩ-y mam togs-n-taase wa m meng sẽn ya Krista togs-n-taaga. ² M pẽgd-y la y sẽn tẽeg m yell bũmba fãa pʋgẽ la y reeg m noya fãa wala m sẽn wilg-y. ³ M datame tɩ y bãng tɩ rao tara zu-soaba, yaa Krista; la pag me zu-soab la raoa, tɩ Krista Zu-soaba ya Wẽnnaam. ⁴ Dao sã n fõgen bũmb a zug n na n pʋʋs Wẽnd bɩ n na n togs b goama, a paoogda a zu-soaba. ⁵ La sã n ya pag n pʋʋsde bɩ a togsda Wẽnd goama t’a zug ka teeg bũmbu, yẽ me paoogda a zu-soaba. Yaa wala a sã n da põnga a zuga koeelle. ⁶ Pag sã n ka rat n teeg a zug peende bɩ a põng zuga zãnga. La a sã n get wa yãnd ne-a, a zoobd sẽn põng bɩ sẽn wõrse, bɩ a teeg peende. ⁷ Rao ka tog n teeg a zug bũmb ye, tɩ rao yaa Wẽnnaam ne b ziira wẽnego; sã n ya paga, yẽ la raoã ziiri. ⁸ Sɩd me, ka pag n deng taoore tɩ rao vɩɩma yi a nengẽ ye, yaa rao n denge. ⁹ Ka raoã la b naan n kõ pag ye, yaa paga la b naan n kõ raoa. ¹⁰ Yaa rẽ yĩnga, la malɛk rãmba waoogr yĩnga, pag zug tog n teeg bũmb sẽn wilgd t’a ka so a meng ye. ¹¹ Soaala nengẽ pag yell ka gomd n zẽng rao ye, rao yell me pa gomd n zẽng pag ye. ¹² Sã n ya ne rao la Wẽnd naan paga, yaa pag me n dogd daoa la b yiiba fãa yita Wẽnd nengẽ. ¹³ Yãmb me ges wɛ! Segdame sɩd tɩ pag pʋʋs Wẽnd n ka lud a zugu? ¹⁴ Ninsaalb nifẽ, rao ne zoob wogd ka yãnd bɩ? ¹⁵ La yaool n ka rẽ la pag zu-zẽkr bɩ? Wẽnd kõ-a la zoob wogd tɩ yɩ wala a zug peende. ¹⁶ Pʋs n seka woto, gomd n pa sɛtẽ soab sã n be y sʋka bɩ a bãng tɩ tõnd ka minim dẽ, la Wẽnd Tigenga me ka minim dẽ ye. ¹⁷ La m sẽn dat tɩ y maan gũusgã, m kõn solg-y tɩ m ka pẽgd y lagmen-taarã sẽn wat ne y bõne n yɩɩd a sẽn wat ne y yõodã ye. ¹⁸ M sẽn wʋm la woto, tɩ y sã n tigime y wẽnegd n welga taaba, la m tẽedame tɩ rẽ yaa sɩd bilfu. ¹⁹ Pʋs n segdame tɩ welegr zĩndi, segdame tɩ b tõog n bak sẽn sĩdb ne neera maanego, n bak-b ne neb a taaba. ²⁰ Y sẽn mii n tigim taabã ka le ya Soaala rɩɩba yĩng ye. ²¹ Rɩɩba sã n na n sɩnge, ned kam fãa yiisda a sẽn wa ne; woto kẽer yãbda kom, tɩ kẽer yũud n gãeemdẽ. ²² Y ka tar zagse n na n dɩ la y yũ be laa? Bɩ yaa Tigengã la y sãbsda n dat n ning sẽn ka tar-ba yãnde? M na n yeel-y lame tɩ bõe? M pẽg yã? Dẽ wã yẽ m kõn saag n pẽg-y ye. ²³ Sã n ya maam, ad-m sẽn paam Soaala nengẽ la yaa rẽ la m wilgd-y: yʋng ning b sẽn zãmb Soaal a Zezi wã, b rɩka buri, ²⁴ la b sẽn pʋʋs bark n sɛ, b wesa burã n yeele: «Wã yaa mam yĩnga m sẽn kõ yãmba; maan-y woto n tẽeg m yelle.» ²⁵ Dẽ poore, yaa yõg-laaga la b rɩk yã n yeele: «Wã yaa zood paalg sẽn yõg m zɩɩmẽ laaga; y sẽn na n tugla raar ning fãa bɩ y tẽeg m yelle.» ²⁶ Ade, wakat ning fãa y sẽn dɩt bur kãngã la y yũud la-kãnga, yaa Krista kũum la y moonda la na n yɩɩ woto n tãag b waoongo. ²⁷ Dẽ yĩnga, sẽn ka tog n dɩ-ɛ burã la a rɩtẽ, sẽn ka tog n yũ Soaala laaga la a yũud-a, yaa Soaala yĩnga taale, yaa Soaala zɩɩma taale la a rɩta, la a yũuda. ²⁸ Bɩ ned kam fãa deng n tɩg a menga la a yaool n dɩ burã, la a yaool n yũ rãama. ²⁹ Ned ning fãa sẽn dɩt-a bɩ sẽn yũud-a yaare, ya a meng bõne la a rɩta, ya a meng bõne la a yũuda. ³⁰ Ad-y yaa rẽn yĩng la bãad-dãmb ne koms rãmb ya wʋsg y sʋka, tɩ wʋsg meng tol n maand yõore. ³¹ La tõnd sã n deng n tɩg d pʋga, d paalgr bʋʋd kõn kao ye. ³² Soaala nug sã n wa zɩsgd d zugu yaa d paam n tek tɩ b ra wa naag ne zamaana rãmb n paalg ye. ³³ Dɩlla, m saam-biisi, y sã n mii n tigim taaba n na n dɩ Soaala rɩɩbo bɩ y maag y yĩng n gũ taaba; ³⁴ sẽn data n dɩ n yiis a kom, tʋg n dɩ yiri n da wa bao yelle n kõ saam-biisa ye. Sẽn ketã, d na yãend taaba m sã n wa.

¹ Sã n ya yĩngr kũna poorẽ, m saam-biisi, m pa rat tɩ y maan wa y ka mi ye. ² Y sẽn waa n nan ka kẽ Soaalã, y mi tɩ yaa y wẽn-mugsã yamleoog n da tar-y n lengdẽ. ³ Marsa wã ad-m sẽn tõe n togs yã: Ned ka bee n paam a Vʋʋsem Sõng kũuna la a le tõog n yeel tɩ «Wẽn na sãam a Zezi ye.» Ned me ka tõe n yeel t’a «Zezi la Soaala» t’a Vʋʋsem Sõng ka vẽneg-a ye. ⁴ Yaa sɩda, a Vʋʋsem Sõng kũuna yaa toor-toore la yaa zĩ-yɛng la b yita. ⁵ Pʋɩɩba yaa toor-toore la Pʋɩta ya Soaal yɛnga, ⁶ tʋʋma yaa toɛ-toɛ la yaa Wẽnnaam b ye bal n tʋmd fãa d fãa pʋsẽ. ⁷ Yaa buuda zãng yĩnga la a Vʋʋsem Sõng pʋɩt b kũuna. ⁸ A Vʋʋsem Sõng kõta nin-yend t’a tõog n zulg gomde; n kõt a to t’a wegs n togs gomde; ⁹ nin-yend paamda tẽebo ne a Vʋʋsem Sõng pãnga, t’a to paamd bãas sãoogr kũuni Vʋʋsem Sõng yɛnga nengẽ. ¹⁰ Nin-yend paamda wẽnd makr dãmb kũuni, t’a to paamd beoog bãngr kũuni; nin-yend paamda a taab pʋg bãngre, t’a to ya goam buud toɛ-toɛ wɩlengo, t’a to ya b võor togsgo. ¹¹ La rẽ fãa yaa Vʋʋsma a ye tʋʋmde, bãmb n pʋɩt b yam, ned fãa ne a rẽnna. ¹² Wala ninsaal yĩnga sẽn yaa a yembr tãa n yaool n tar wils wʋsgo, tɩ wilsa ne b sẽn ya kʋʋma maand yĩng a ye tãa, woto-me Krista nengẽ. ¹³ Dẽ me la tõnd paam soob Vʋʋsma a ye pʋgẽ n lebg yĩng a ye, d ya Zʋɩf bɩ bu-zẽna, yamb bɩ burkĩna; Vʋʋsma a ye tãa la b yũnug tõndo. ¹⁴ Yĩnga ka wilg a ye ye, b yaa kʋʋma. ¹⁵ Naoor sã n da yetẽ: «Ka maam la nugu; dẽ yĩnga m ka naag ne yĩnga ye,» dẽ na kɩt t’a sɩd ka naag ne yĩngã? ¹⁶ La tʋbr sã n yetẽ: «M ka nif ye; dẽnd m ka yĩnga wilg ye,» dẽ na kɩt t’a sɩd kaẽ yĩnga wilga? ¹⁷ Yĩnga fãa sã n dag n yaẽ nifu, tʋbra yaẽ la bʋgo? Fãa sã n dag n yaẽ la tʋbr bala, bõe n yɩtẽ yõore? ¹⁸ Wẽnd n sel wilsã yĩngẽ, wala b sẽn tʋlge. ¹⁹ Yĩnga tõr sã n dag n yaẽ la wilg a ye, yĩnga wẽndẽ la bõe? ²⁰ La ade, wilsa yaa kʋʋma, tɩ yĩnga yaool n yaa a ye. ²¹ Nif ka tõe n yeel nugu: «Ad-m ka tar f tʋʋmd ye.» Zug me ka tõe n yeel nao: «Ad-y m ka tar y tʋʋmd ye.» ²² Yɩɩd rẽ, b sẽn get wils niyns wa bõn-mɛdsã, bãmb me tara b tʋʋmde, ²³ Wils niyns sẽn wẽnd-b pa togẽ ne waoogrã, bãmb la tõnd waoogd n yɩɩda; wils niyns gesg sẽn ya yãndã, bãmb la tõnd koagend n yɩɩda. ²⁴ Sẽn sakd-b gesgã, bãmb ka le tar waoogr tʋʋmd ye. Wẽnd n sigl yĩnga woto, tɩ wilg ning sẽn ka wẽnd b na waoog-a wã paamd waoogr n paase. ²⁵ Woto yĩnga wils zãaga taab ne welegre, tɩ wilg kam fãa be-la a to yĩng zãng-zãnga. ²⁶ Toog n tar wilg a ye, wilsa fãa naagda yẽ n tar toogo; wilg a ye paama waoogre, yaa b fãa sũ-noogo. ²⁷ Sã n ya yãmba, yãmb yaa Krista yĩnga la ned kam fãa yaa wilg n be a zĩigẽ. ²⁸ Wẽnd sẽn yãk b rãmb Tigenga yĩnga, pipi yaa tʋʋm-tʋmdba, a yiib soaba, bãngdba, a tãab soaba, karen-saam-dãmba. B kõo kẽer tõog tɩ b maand bõn-bãna, kẽer yaa sãoogre, kẽer yaa naong rãmb yaoogre, kẽer kʋʋnga zãabo, kẽer goam buud toɛ-toɛ wɩlengo. ²⁹ M sok n gese, yaa b fãa la tʋʋm-tʋmdb bɩ? B fãa la bãngdba? B fãa la karen-saam-dãmba? B fãa gill n maand wẽnd makr dãmba? ³⁰ B fãa gill n tõe n sãoog bãase? B fãa gill n tõe n wɩlem bu-zẽnd goama? B fãa gill n tõe n yɩ bu-zẽnd no-rɛɛsa? ³¹ Bao-y kũun niyns sẽn ya-b sõmb n yɩɩdã. La bas-y tɩ m wilg-y sẽn be neer n yɩɩd wa fãa-fãa.

¹ Ba mam wɩlemd ninsaalb buud fãa goama, n paas malɛgsa rẽnna, m sã n pa tar nonglem, m yaa wa lombr sẽn wẽde, bɩ waaga sẽn kãglemde. ² Ba mam tar beoog yɛl bãngre, la m mi sẽn solg fãa, ba m yama vẽen ne bũmb fãa, ba m tẽeb pid zãnga tɩ sek a vigs tãmsã b zĩisẽ, m sã n ka tar nonglem kũuni, mam yaa zaalem. ³ Ba mam dɩkẽ m paoong fãa n sõng naong rãmba; ba mam sakẽ tɩ b los m yĩnga bugmẽ, m ka tar nonglem, m kõn yãend dẽ yõod ye. ⁴ Nonglem yaa maag-m-menga, nonglem yaa to sõngre, nonglem ka mi sũ-kiir ye, a ka wakr bɩ tɩtaam ye. ⁵ Nonglem ka tʋmd beed ye, a ka mi zoe-bõne, a ka mi sũ-puuri, a ka tẽegd beegr ye. ⁶ A ka kɩdemd a to bõne; a sũur nooma a puk sɩda. ⁷ A ka ningd ned ba a ye taal ye; a tẽeda fãa, a saagda fãa, a sakda fãa. ⁸ Nonglem bal n ka be sɛɛbo. Bãngr na n loogame, goam wɩleng na n loogame, yam vẽenem na n loogame. ⁹ D yam vẽenem pʋs n yaa sãoogo, d bãngr me yaa sãoogo, ka pid ye. ¹⁰ Sãooga fãa na n pida raar a ye, vẽenem la bãngr pidunga raare. ¹¹ M sẽn waa n ya yãaga, m da gomda wa yãaga, m da tagsda wa yãaga; m sẽn lebg bi-kãsenga, m basa yãadre. ¹² Tõnd sẽn ne bũmb ning marsa wã yaa wa ne nin-gɛtga; m sẽn mi marsa wã yaa bõn-wɛdga bala la m na yaool n wa bãnga zãnga, wala b sẽn mi maama. ¹³ Marsã bũmb a tãab n be: tẽebo, saagre la nonglem la sẽn yɩɩd yaa nonglem.

¹ Bao-y nonglem la bao-y Wẽnd kũun a taaba me, sẽn yɩɩda bãngr kũuni. ² Sẽn wɩlemda goam pa gomd ne ninsaalb ye, a gomda ne Wẽnde. Ned pa wʋmd a goama võor ye, a gomda goam bãna a yamẽ. ³ Ned ning sẽn yaool n togsda bãngr goam, gomda ne ninsaalba n manegd b yɛla, n sagendẽ la a yolsdẽ. ⁴ Ned ninga sẽn gomda goam zẽna, ya a meng yell manegre; sẽn gomda bãngr goam manegda a saam-biisa sẽn tigma. ⁵ M datame tɩ y wɩlem bu-zẽn goama la m nongame n yɩɩda tɩ y gom bãngr goama; sẽn gomda bãngr goam yɩɩda sẽn wɩlemda bu-zẽn goama. Bu-zẽn goama soab sã n ka pa poorẽ, yaa a sã n paam n togsa a goama võore, n tõe n naf kʋʋnga sẽn tigm a sɛɛgẽ. ⁶ Ges-y yã, m saam-biisi, mam sã n wa yãmb sʋk n gomd goam zẽna la m goama ka vẽnegd y yam, la b ka paasd y bãngre, la b ka zãmsd-y fɩ, dẽ nafda yãmb bɩ? ⁷ Yaa boto ne yʋʋmba wɩɩg bɩ pɛndga: b rãamda sã n pa sãta, m yɩta a wãn n bãng yɩɩn bʋg la b pebd bɩ b wẽeda? ⁸ Tõntõoga sã n peebd zabr yĩnga, t’a peebga pa sãta, ãnda n na n bob a zab-teedo? ⁹ Yãmb me, y zelemd sã n ka gomd n fasgdẽ, ãnda n wʋmd y sẽn yet bũmb ninga? Y gomda vɩʋʋgẽ. ¹⁰ D ka tar dũni wã goam buud toɛ-toɛ yã sõor ye la b tara võor ne b rãmba. ¹¹ M sã n pa wʋmd ned goama, m yaa bu-zẽnd ne yẽnda; yẽ me sã n pa wʋmd m goama, a yaa bu-zẽnd ne maam. ¹² Y sẽn baood Wẽnd kũuna, bao-y-b wʋsgo n tõog n naf sẽn be-b ne yãmbã. ¹³ Woto wã sẽn wɩlemda bu-zẽn goam pʋʋs Soaala n paam b võor n wilgi. ¹⁴ M sã n pʋʋsd ne bu-zẽn goama, m maanda pʋʋsgo la a võora la m ka tara. ¹⁵ M na n maana wãna? M na n maana pʋʋsgo la m na n bao-la a võore. M bark pʋʋsga yɩɩl na n yɩɩ yɩɩlle m sẽn wʋmd a võore. ¹⁶ Sã n ka boto, fo sẽn pẽgd Wẽnd ne bu-zẽn goama, sẽn ka paam-a kũun ning fo sẽn paama yɩta a wãn n deeg tɩ Wẽnd na paam pẽgre, a sã n ka mi fo sẽn gomd n lebdẽ. ¹⁷ F bark pʋʋsga yaa sõmb wʋsgo, yaa sɩda, la a yɩta a wãn naf yẽnda? ¹⁸ Wẽnd paam bark b sẽn kɩt tɩ m wɩlemd goam n yɩɩd y fãa! ¹⁹ La m gesame tɩ d sã n tigim taab pʋʋsg yĩnga, m sẽn na n yiis goam a nu m sẽn tar b võore, n tõog n zãms m taaba n são m sẽn na n yiis bu-zẽn goam biis tus piiga sẽn pa zãmsd fɩ. ²⁰ M saam-biisi da yɩɩ-y wa kom-bõonese n ka mi sẽn segd tɩ y maan ye. Y sã n ya kom-kɩds n ka mi wẽnga, m saka rẽ; la sã n ya sẽn segd tɩ y maana pʋgẽ, paam-y nin-bɛd yam. ²¹ B gʋlsa Noor sebr pʋga: «Yaa ne bu-zẽmb la ne bu-zẽn dãmb noor la m na n gom ne nin-bãmba la ne rẽ fãa b kõn kelg-m ye. – Soaala n yete –» ²² Dẽn yĩnga bu-zẽn goama ka nafd tẽedba ye, a yaa yõod ne sẽn nan ka paam-b tẽebo; bãngr me kũun pa bu-zẽmba yĩnga, a yaa tẽedba yĩnga ²³ wala Tẽedba sã n tigim, tɩ fãa gomd bu-zẽnd goama, tɩ seg sãan waoongo bɩ sega sẽn ka tar-a tẽeb waoongo, b kõn yeel tɩ yãmb zʋbsdame? ²⁴ La sã n ya bãngr goam la y fãa gomda tɩ seg kẽed paalga bɩ bu-zẽn waoongo, ad-y b na naag taab n wilg-a sẽn be la sẽn segde; ²⁵ b na puk sẽn solg a sũurẽ al t’a wa kɩ a neng tẽng n waoog Wẽnnaam la a moon tɩ b sɩd be-la y sʋka. ²⁶ M saam-biisi, d na n baasa d saglga wãna? Y sã n tigim taaba ned kam fãa tõe n waa ne a yɩɩle, bɩ a zãmsgo, bɩ yell sãang pukri, bɩ goam zẽna, bɩ gomd zẽnd võor pukri. La rẽ fãa tog n waa ne sɩɩga nafre. ²⁷ Bu-zẽn goam la b wɩlemda? Bɩ b yɩ b yiib bɩ b tãabo, la ra loog rẽ ye, la yɩ bal-bale, la ned zĩnd sʋka n wilgd b goama võore. ²⁸ Sẽn na n wilg võora soab sã n ka beẽ bɩ b sĩndi; bɩ ned kam fãa gom ne a meng la Wẽnde. ²⁹ Bãngdba ta b yiib bɩ b tãabo n gomda tɩ sẽn ket-ba kelgdẽ la b pẽgda. ³⁰ Ned a to sã n yik n na n gom a bãngr goama, bɩ pipi soaba bas-a t’a gome. ³¹ Y fãa gill tõee, bal-bal, n yiis y bãngre n zãms la y wɩng y taab tẽebo. ³² Bãngdba ka yiisd b bãngra zond-yaar ye; ³³ Wẽnd yaa laafi Wẽnnaam, b ka zũnd-zãnd Wẽnd ye. Wẽnd kamba sẽn tigimd taab zĩig ninga, ³⁴ bɩ pagba ra yaag b noor ye. B ka tar sor n gom ye; bãmb sẽn tõe yaa sakr bala, la Noorã n dat rẽ. ³⁵ B sã n dat n sok n bãng bũmbu, b gũ yir n sok b sɩdb rãmba. Ka tog tɩ pag gom kʋʋng sʋk ye. ³⁶ Yaa yãmb nengẽ la Wẽnd gomda yi bɩ? Bɩ yaa yãmb y ye bal n paam-a? ³⁷ Ned sã n beẽ n tagsdẽ t’a yaa bãngda, t’a paama a Vʋʋsem sõng vẽnegre, bɩ a reng n bãng tɩ m sẽn gʋls yãmb bũmb ningã yaa Wẽnd noore. ³⁸ Sẽn pʋs n ka rat-a n bãng bɩ a ra bãng ye. ³⁹ Woto wã, m saam-biisi, bao-y n paam bãngr kũuni, la y ra gɩdg bu-zẽn goam wɩleng me ye. ⁴⁰ La modg-y tɩ bũmba fãa maan wa sẽn segde la ra yɩ yaar ye.

¹ M le tẽegda yãmba, m saam-biisi, Koe-noogã m sẽn moon yãmbã; y reeg-a lame la y ket n tar-a-la sõmbo. ² Yẽ n na n fãag yã, y sã n kell n tall-a neere wala m sẽn wilg-a yãmbã, ka rẽ y tẽeba wat n yɩɩ zaalem. ³ Yaa mam meng sẽn da reng n wʋm la m togs yã, tɩ Krista kii d yel-wẽna yĩnga, wa Sebr sõng sẽn togse, ⁴ tɩ b solg-b yaoogẽ, la rasem a tãab raare, b vʋʋgame, wala sẽn le gʋls yɛsa; ⁵ tɩ b lika b meng a Kefas la piig la a yiibã; ⁶ dẽ poore yaa saam-biis sẽn ta kobs-nu la b lik yã – bãmb wʋsg keta ne yõore, kẽer bal n ki – ⁷ tɩ b lika a Zak la tʋʋm-tʋmdba fãa. ⁸ Dẽ poor marsã la b yaool n lik maam me, maam b bõn-mɛdga. ⁹ Sɩda, maam la tʋʋm-tʋmdba fãa yao-zʋʋga; m da pa tog meng ne tʋʋm-tʋmd yʋʋr ye, tɩ m namsa Wẽnd Tigengu. ¹⁰ La Wẽnd bark kɩtame tɩ m ya m sẽn ya-lã la b barkã ka pa n ka wom a biis ye. M ka tõe n ka ges m meng wa tʋʋm-tʋmd ye, tɩ m tʋmame n yɩɩg b fãa; la yaool n ka maam n tʋm ye, yɩ Wẽnd kũuna b sẽn kõ-ma n tʋm b tʋʋmde. ¹¹ Yaa bãmb woo, yaa maam woo, yaa woto la d moonda. La yaa rẽ me la y reeg yã. ¹² La sã n moond tɩ Krista vʋʋga kɩɩms sʋka, maana a wãn tɩ yãmb neb kẽer yik n yet tɩ kũum ka vʋʋgde? ¹³ Kɩɩms sã n pa vʋʋgdẽ, dẽn Krista me ka vʋʋg ye. ¹⁴ La Krista sã n ka vʋʋge, tõnd zãmsga yaa zaalem la yãmb me tẽeba zãng lebga zaalem. ¹⁵ La tõnd n lebg Wẽnd kaset zirẽ-dãmba, d sã n wẽennẽ tɩ b vʋʋga Krista, tɩ b yaool n ka vʋʋg-ba, sã n ya sɩd tɩ kũum ka vʋʋgd ye. ¹⁶ Kɩɩmsa sã n ka vʋʋgde, dẽn Krista me ka vʋʋg ye. ¹⁷ La Krista sã n ka vʋʋge, y tẽeba yaa zaalem; y ka yi yel-wẽndẽ ye, ¹⁸ la sẽn ki-b Krista yĩngã, bãmb me yell sɛɛme. ¹⁹ Sã n ya tẽng zug vɩɩma yĩng bal la d del Krista, tõnd la dũni wã fãa zu-bʋk rãmba. ²⁰ La ayoo! Krista vʋʋga kɩɩms sʋka, la bãmb n deng kɩɩmsa fãa. ²¹ Wala kũuma sẽn tũ nin-yend n wa dũni wã, kɩɩmsa vʋʋgra me na n tũu ne nin-yend maasem. ²² Wala d fãa sẽn tũud a Adem n bãng kũuma, woto me d fãa tũuda Krista n le vɩɩnde, ²³ ned kam fãa ne a wakato: Krista n so taoore, tɩ bãmb la Bi-rẽenga. Bãmb poor marsã neb niyns sẽn ket n be bãmb soolmẽ, b waoonga raare. ²⁴ Dẽ poore bũmb fãa na n yãe-la a baasgo la yaa Wẽnnaam Ba la Krista na n lebs b naama, b sẽn wat n lub na-rɩtba, la soaalba la pãn-dãmb buud fãa. ²⁵ Y mi tɩ yaa tɩlɛ tɩ Krista rɩ naam n tãag wakat ning b naoã sẽn wat n palg b bɛɛba zãnga. ²⁶ B yaoolem na-rɩta b sẽn na n lubi, yaa Kũum. ²⁷ Yẽ lubr poore b sɩd na n paamame tɩ bũmb fãa yaa b soolem. Bãng-y tɩ sã n gʋls tɩ bũmb fãa sura b taoore, ka naag ne ned ninga sẽn sulg bũmb fãa b taoora ye. ²⁸ La bũmb fãa sã n wa lebg bãmb soolem n sɛ, dẽ marsã la Wẽnd Biiga me na n lebg bũmb-fãa-Soaala-soolem, la woto la Wẽnd na n lebg fãa-fãa ned kam yĩnga. ²⁹ Sã n dag n kaẽ boto, bõe la neb niyns sẽn sood-b kɩɩmsa yʋʋr yĩnga na n paamẽ ? Kɩɩmsa sã n ka na n vʋʋg lɛ-lɛ, bõe tɩ b sood kɩɩms yĩnga? ³⁰ Bõe me yĩng la tõnd meng ka na n baoẽ yĩn-maasem n zãag d mens ne yɛl tooda sẽn lʋɩt d zug wakat buud fãa? ³¹ M bee kũum nugẽ beoog sẽn vẽeg fãa la rẽ yaa sɩda, m saam-biisi, sɩd wa y sẽn ya m zu-zẽkre d Soaala Zezi Krista taoore. ³² Sã n da yaẽ la ninsaal geels la m geel yã n zab ne Efɛɛz rãmba, b wẽn-naandsa poorẽ, m yõoda la bʋgo? Sẽn ki-ba sã n ka na n vʋʋge, bɩ d rɩ la d yũ tɩ beoogo d na n kiime. ³³ Da belg-y y mens ye: Tũud-n-ta wẽnse n wat ne vɩɩma sãoongo. ³⁴ M kos tɩ y wɩsg y meng tɩ rẽ n toge la y zãag y meng ne wẽnga. Wʋsg bee yãmb sʋka n ket n ka mi Wẽnd, la rẽ ka yãnd sɩda? ³⁵ La f sã n soke: Sẽn ki-ba na n vʋʋga wãn wãna? Yĩin bʋgo la b na n le wa ne? ³⁶ Ges wɛ, yalma, fo meng sẽn bʋtã ka lebgd bõn-vɩɩla t’a ka reng n ki ye. ³⁷ Fo sẽn bʋta ka bũmb la f võogd n sel ye, yaa bõn-beelle, ka-beelle, bɩ bũmb a to. ³⁸ Wẽnd n kõt yako wala b sẽn date, bõn-buud fãa ne a rẽnna. ³⁹ Yĩnsa fãa ka a yembr ye: ninsaal yĩng toore, rũng yĩng toore, luiil rẽnd toore, kʋɩl-zẽoog me rẽnd toore. ⁴⁰ Saag zug tara a bõn-yood, tɩ saag tẽngr me tar a rẽnna. Yĩngr teeda yãgbo ne tẽng zug rẽnna ka a ye ye. ⁴¹ Wĩntoog yãgb toore, kiuug me rẽnd toore, ãdsa me rẽnd toore. Ãdg a ye meng peelem bakda ne ãdg a to rẽnna. ⁴² Yĩnsa vʋʋgr me na n yɩɩ boto. Yaa bõn-põosg la b bʋta la yaa sẽn ka tõe n le põog n vʋʋgde. ⁴³ Yaa bũmb sẽn ka tar waoor la b bʋta, la bũmb sẽn pid ne ziir n na n vʋʋge; faoor la b bʋta, la pãng n na n vʋʋge; ⁴⁴ tẽng zug bũmb la b bʋta, la yĩngr dẽn n na n yi. Yĩng sẽn tõe n deeg tẽng zug vɩɩma sã n beẽ, yĩng sẽn tõe n deeg yĩngr vɩɩma me beemẽ. ⁴⁵ Yaa rẽ la b gʋlsyã: Pipi Adma naaname t’a ya vɩɩm deegda, Adma a yiib soaba yaa vɩɩma kõata. ⁴⁶ Ka sẽn kõt-a vɩɩma la pipi ye, sẽn deeg-a vɩɩma n deng taoore tɩ yẽ yaool n pʋge. ⁴⁷ Pipi soaba yaa tẽng tom, tɩ tẽng tomẽ la a yita; a yiib soaba yita yĩngri. ⁴⁸ Tẽng zug raoã sẽn yɩ a soaba, a kamb me boto, yĩngr daoã sẽn yɩ a soaba, a neba me boto. ⁴⁹ Wala d sẽn wẽneg tẽng zug soabã, lebga pakre tɩ d wẽneg yĩngr soaba me. ⁵⁰ Maam n yet-y, m saam-biisi, ka yĩn-kãnga sẽn ya neong la zɩɩma n na n kẽ Wẽnd Rĩungẽ ye, ka bõn-põosgã n na dɩ sẽn zɩ a põogra faad ye. ⁵¹ M na n wilga yãmb koɛɛg sẽn yɩɩd ninsaal bãngre: Kũuma, ad-y ka d fãa n na n ki ye; la d fãa yẽ sẽ, d na n tedgame. ⁵² Vugr bala, nif kamsg pʋgẽ, baorga sã n tãse, la sɩda baorg n na n peebe, kɩɩmsa fãa na n vʋʋgame n ka le bãng põogr lɛ-lɛ, la tõnd me, tõnd me na n tedgame. ⁵³ Bala yaa tɩ-lɛ tɩ yĩn-kãnga sẽn ya bõn-põosgã tɩlg põogr zãnga la yĩn-kiidga tɩlg ne kũum zãnga. ⁵⁴ Dɩlla mam yĩn-kãnga sẽn na n põogã sã n wa tɩlg põogr zãnga, la m yĩn-kãnga sẽn na n ki wã sã n wa tɩlg kũum zãnga, dẽ marsã la sebr sõng gomda na n taase: «Pãn-tõog tʋʋmd n tʋʋme n loog ne kũum zãnga. ⁵⁵ Kũum, fo sẽn tʋm daood la bɛɛ? Kũum, fo zab-teed bɛɛ?» ⁵⁶ Mik kũum zab-teed yaa yel-wẽnde la Noorã n kõt yel-wẽnda pãngã. ⁵⁷ La Wẽnd paam bark tɩ bãmb n kɩt tɩ d lub yel-wẽnde, d Soaala Zezi Krista maasem yĩnga. ⁵⁸ Dɩlla, m saam-biisi, modg-y tɩ y raooda ra woog ye la y rabs Soaala tʋʋmna taoore n miẽ t’a kõn yɩ zaalem ye.

¹ Sã n ya ligda lobr nin-sõma sõngr yĩnga bɩ y tũ noor ning m sẽn kõ tẽedba fãa sẽn be Galasi. ² Dasem a yopoe-poe wã pipi daare bɩ ned kam fãa kẽgs n bĩng ligd a nengẽ la y ra gũ tɩ m wa tɩ y yaool n sɩng n tigs ye. ³ M sã n ta, m na gʋls sebr tɩ yãmb sẽn tũus neb niynsa tall y kũuna n ta Zerizalɛɛm; ⁴ la sã n wẽnda m meng na kẽnge, d na tũ taaba. ⁵ M na ta y tẽngẽ, m sã n wa pɩʋʋg Masedoan; na n yɩɩ pɩʋʋgr bala. ⁶ Tõeeme me tɩ m yals y sʋk n kaoose, tõeeme n yɩ sẽooga tõre la m sẽn na n kẽng zĩig ning fãa, y na yãag-ma. ⁷ M yaool n ka rat tɩ d yãend taab yĩngr-yĩngr bal ye, m geenda m na kaoos y sʋka, Soaala sã n sake. ⁸ La sẽn ya a soab fãa, m na n paa Efɛɛz n ta Zãna kibsa, ⁹ tʋʋmda roog paka kẽoong n gũud-ma la bɛɛba me ka paood ye. ¹⁰ A Timote sã n wa, sõng-y tɩ bũmb da yɛɛs-a y sʋk ye, tɩ yẽ me tʋmda Soaala tʋʋmd wala maam. ¹¹ Ned ba a ye da paoog-a ye; sõng-y yã t’a leb mam nengẽ ne laafi. D gũud-a lame, maam ne saam-biisa fãa. ¹² Sã n yaa d saam-biig a Apolos, m wɩnga ne a t’a tũ saam-biisã n wa ges yã la a zãgsa fas; a yeelame t’a ka tõe marsa ye la a sã n wa paam sẽka, a na wa. ¹³ Maan-y gũusgu, tall-y y tẽeba kẽnkẽ, maan-y raoodo. ¹⁴ Sõng-y tɩ bũmb fãa tũ ne taab nonglem, y sʋka. ¹⁵ Ad-m koɛɛg a to, m saam-biisi: yãmb mi tɩ yaa a Stefanas ne a zak rãmb n yɩ Akayi pipi kristneb la bãmb n sõng d saam-biisa fãa gilli. ¹⁶ Bɩ y waoog neb a woto buudu la neb niyns fãa sẽn tʋmd-b la b namsd wa bãmba. ¹⁷ M sũur nooma a Stefanas, a Fortunatus la a Akayikus sẽn waa n ges-ma; b reega yãmb zĩig mam sɛɛgẽ, ¹⁸ la b maasa m sũuri wala b sẽn maas yãmb me rẽnna; dẽ me yĩng la m yet tɩ y waoog neb a woto buudu. ¹⁹ Azi saam-biisa Tigeng n pʋʋsde; a Akila la a Priska tɩ b pʋʋs-y neere ne Soaala pʋʋsem, bãmb ne neb niyns fãa sẽn tigemd-b b zakẽ. ²⁰ D saam-biisa fãa tɩ b pʋʋs yã; pʋʋs-y taab neer n kõ-ma! ²¹ Maam a Pol n gʋlsd-y, ad-m meng nug tikri. ²² Sẽn ka nong-a Soaala fãa bɩ Wẽnd me lak ne yẽ soaba! Maran ata! Soaala, wa-y yã! ²³ Soaala Zezi barka sig yãmba! ²⁴ M nong-y la ne Krista a Zezi meng nonglem.