Natito

Iwarakha i Napaolo wa

Natito

Malhove o uholhelha

Iwarakha i Napaolo wa Natito phi imoka yo iwarakha ncheshe chaalhepiye ni Napaolo chaarwenhe aya wa ntu mmoka mmoka ahikhalhaka nlhoko wa attu anrumelhenlhe Kuristo. Iwarakha chikina taaru phi iwarakha yo upachera wa Natimotheo ni iwarakha yo nayelhi wa Natimotheo ni iwarakha wa Nafilimoni. Napaolo yaalhempe iwarakha u Natito nansho yooniaka wiira aalhakenlhe wiira yashomiye vaattuni. Ninochuwelha yoyo mwaha uyo ukhalhawaya anowiihimiacha ipilhi aya thoko karumiya, ittu Natito yaari aya achuwelhaka. Napaolo veekinaka yaalhempe ilha iwarakha ilha iyaakha iriyari yo 63-65 baada yo uyaria wa Kuristo.

Napaolo ahaalhehera Natito wiira avare ntheko wo uholhelha milhoko cha attu anrumelhenlhe Kuristo u ichirumba yo Ukirete. Paahi etu Napaolo aalhepa iwarakha ilha waalhehera Natito wiira yaathanlhe ni wettuchiha aholhelhi o milhoko cha attu anrumelhenlhe Kuristo. Anowaalhelha chittu thoko chaalhempe aya u Natimotheo. Nhina iwarakha mmo, anoohimiacha iphiro chinothananiya aya ukhalha aholhelhi o milhoko cha attu anrumelhenlhe Kuristo chiyo. Paahi etu milhoko cha attu anrumelhenlhe Kuristo ni aholhelhi o milhoko o lhelho va attwariheke chechiyo iphiro chinothananiya aya ukhalhana chiyo vanoholhelha aya.

Chiri nhina

Napaolo anowaalhehera Natito waathanlha attu anonttuna Nlhuku (nlhako wo 1:1-16).

Tho, anowaalhehera weettuchiha attu akhalhe makhalhelho anothananiya ni Nlhuku (nlhako wo 2:1-3:11).

Vanomalhiha aya, Napaolo anomalhihera wo malhove o uttuka iwarakha aya iyo (nlhako wo 3:12-15).

¹Mii Paolo, namitheko a Nlhuku ni karumiya a Yesu Kuristo kinoolhepa.

Mii kihothanlhiya ni urumiya kirwee kaahelhe nrima attu athanlhiye ni Nlhuku ni waaholhelha attu achuwelhe ikeekhene wiira akhalhe iphiro chinothanana awe Nlhuku. ²Yeyo ikeekhene iyo phi nonikhulhuvelhiha upatta ukumi wo mahuku o uhimalha, naalhehiye ihu ni Nlhuku hinoothacha toka machokholhelho ilhapo ihinaya wuupiya. ³Ni ikatema yorera yaayeke ahopatakulha nttenga wawe. Nkakaarumiya wiira kivire kaahimiacha wo urumelhelhiya ni Nlhuku Moopolhi ihu.

⁴Kinolhepa iwarakha iwe uwaninyu inyu Natito anaaka e ikekhiaye munrimani munopisha ihu.

Kinoulhapelhelhani nnema ni mpuha ukhuma wa Nlhuku Athumwanihu ni Kuristo Yesu Moopolhi ihu.

Ntheko u Natito Ukirete

⁵Wo yoyo nlhatu uyo kahoohiyani Ukirete, wiira nrehelhelhe vakittu vawukuwilhe ni waathanlha ashulhupalhe aholhelhi o milhoko cha attu anonrumelhelha Kuristo kila iwani. Muupuwelheke thoko chenre aka wo ulheherani. ⁶Wiira ashulhupalhe aholhelhi o nlhoko wa attu anonrumelhelha Kuristo anophwanelhiya ukhalha attu o uhikhuwachiya, akhalheke nlhopwana a nthiyana amoka ni achishaana awe akhalheke anonrumelhelha Kuristo ahikhalhe o hiiwa aamukiaka ama o tiyamaru.

⁷Ukhalhawaya attu anoshunga nlhoko wa attu anonrumelhelha Kuristo phi o ipilhi yo weemelhelha mitheko cha Nlhuku. Paahi etu, hikhalhe ntu o ukhuwachiya ama o wiititihacha mena hikhalhe ntu o uhipicha uthunalha ama ntu o uhapalhiya ama ntu o waana indewo ama ntu o nlhulha wo uttuna nchurukhu chinene. ⁸Nansho akhalheke ntu o waapochera alheto ni ntu o uttuna upanga chittu choombone. Akhalheke ntu o wiichaamuka, ntu e ikekhiaye, ntakatifu hinokhuwachiya ni ntu neetawara mwanene. ⁹Akhalheke ntu novarechesha rata nttenga we ukhulhuvelhiya thoko chinre awe wo wiittuchihiya wiira oorie waahelha nrima attu wo weettuchiha meettuchiho e ikeekhene ni wookokolha attu anovaanyiha.

¹⁰Ukhalhawaya ahaawo attu anovaanyiha ni waathepiacha attu akina chittu chihiri ni irusho, athepaka alhe akhumme iphiro cha attu enelhiye unyawo munrimani, Ayahudi anrumelhenlhe Kuristo alhe. ¹¹Amaalhihiyeke yayo attu ayo ukhalhawaya naahiyaka anoothepa waapitikusha nrima attu mmanupani mwonkhaye vaneettuchiha aya chittu chihinooria aya wiittuchiha. Anopangacha chiicho wiira apatte nchurukhu wo wiittuchiha chittu cho wulhiha muru. ¹²Ata ntu mmoka mmilhokoni mwa anamilhohi aya, ahoolhumacha wiira, “Attu o Ukirete mahuku onkhaye arii attu o woothacha, ari thoko mashene, attu o ureshi ni attu o nlhulha!” ¹³Ni uyo hohimiechesha we ikekhiaye. Ni wo yoyo nlhatu uyo etu, mwaachacheracheke chinene, upisha nrima waya ulhipeke. ¹⁴Ahiyeke wiiwelhelha ithelhi cha Ayahudi mena ahiiwelhelhe malhehero yeeshiye ni attu akhonte ikeekhene.

¹⁵Kila ittu iri yorera wa attu orera nansho khiiwo ittu iri yoombone wa attu o nyalha ni o nrima uhinrumelhelha. Ukhalhawaya mirima ni irusho chaya chihonanarihiya. ¹⁶Yayo attu ayo aneera wiira anonchuwelha Nlhuku, nansho meetelho aya anowaakhota. Phi attu ahinolhoka mmiithoni mwa ashikhunanaya, o mirima cho itiyamaru, ahinolhoka wo mitheko chiriyoothe chorera.

Meettuchiho e Ikekheene

¹Nansho inyuva mweettuchiheke attu malhove a Nlhuku arii phi e ikeekhene. ²Mwaahimerieke ashulhupalhe wiira eethimicheke, akhalheke attu o weewelhelha ashikhunanaya, o irusho, o upisha nrima ni o waattuna attu ni o uvilhelha. ³Ni chiichammo mweettuchiheke manyopani o wulhuvalha wiira amwooveke Nlhuku. Ahikhalhe attu o waapa akhunanaya ama ipotta cho uhapalhiya utheka. Eettuchiheke akhunanaya iphiro choombone, ⁴wiira aalhake imialhi yaattune manyowannyaya ni achishaana aya, ⁵yiitimarikheke ni vavawo ahikhalhe o unanara, anopangacha chittu chorera wo manyowannyaya, nlhove na Nlhuku nihiwe naaruwaniya.

⁶Thothoni tho, mwaamukeke ashimirawo wiira ni ayo yiithimicheke. ⁷Wo iphiro chonkhaye ni inyu mwaanene nkhalheke ntu o utwarihelhiya wo meetelho inyu oombone. Mwiilhipiheke wo malhove nnetuchiha inyu attu, mena nhipange thoko ncheche. ⁸Malhove aneettuchiha inyu akhalheke o ikuru ahinoovanyihiya, amalhaponi inyu awe oona ishoni ahikhalhaka ni ittu yo unanara yo unihukumulha.

⁹Ipotta ni ayo chiicho eetimarikheke wa manyaapwiiya aya aanaaruma ayo, yaatelhihaka wo mitheko chonkhaye chinopanga aya. Ahaanyihanaka, ¹⁰mena wiiya nhakhu aya. Nansho, ooniheke nrima woombone ni ukhulhuvelhiya, echonihaka wo iphiro chonkhaye wiira meettuchiho a Nlhuku Moopolhi ihu phi o ikeekhene. ¹¹Ukhalhawaya nnema wa Nlhuku unommwiiha noopo uhopatakulhiya wa attu onkhaye. ¹²Nnema wa Nlhuku unoniittuchiha hii ukhota nikakata no velhaponi va, nikhalhe wo uhihapalhiya, wo wiitimarikha ni wo uvarechesha ikekhiaye, uno ninthimichaka Nlhuku ninari bado velhaponi va, ¹³niwehereraka nihuku no mpuha ninokhulhuvelha ihu, vanohalha aya upatakulhiya nthimicho wa Nlhuku mulhupalhe ni Moopolhi ihu, Yesu Kuristo. ¹⁴Yoyo aheekumiha mwanene wo nlhatu wihu wiira anoopolhe mu uhilhokani mwonkhaye anihapihaka ukhalha atakatifu awe, attu anovarechesha upangacha chittu choombone.

¹⁵Mwiittuchiheke chilha chittu chilha, nvarelhelhaka ikuru inyu uno mwaalheheraka ni waamuka attu anowiiwelhelhani. Ni vavawo hikhalhe ntu hinowiwelhelhani.

Makhalhelho a attu anrumelhenlhe Kuristo

¹Mwoopusheke attu wiira yaathimicheke aholhelhi ni attu anotawara, yeewelhelheke ni ukhalha rata wo kila iphiro upangacha mitheko chonkhaye. ²Mwaahimerieke wiira ahinruwane ntu riyoothe, nansho akhalheke attu o mpuha ni o wiiwanana. Ni wo mahuku onkhaye yooniheke nrima woombone wa kila ntu. ³Ukhalhawaya khalhayi vawo hii naari attu o uhikhalha ni irusho, o tiyamaru, ni attu o uwonya. Naari ipotta cho nikakata no wiipuhiha no kila iphiro. Nikhalhaka mu uwonyani ni ihache, attu anivengaka ni hii nivenganaka naashineneru.

⁴Nansho ikatema yo mpuha ni uttuna wa Nlhuku Moopolhi ihu vaapatakulhiye aya, ⁵ahonoopolha, kuhiwe wo nlhatu uriyoothe wo ikekhiaye waapannge ihu hii, nansho wo ikiriri awe, ni wo iphiro yo Iphumu ya Nlhuku nonivahera wiira niyarie tho ni univaha ukumi wo naanano wo unihapiha mmaashini. ⁶Nlhuku ahonivaha wo winchiva Iphumu awe wo iphiro ya Yesu Kuristo Moopolhi ihu, ⁷wiira etu wo nnema wa Nlhuku naalhakelhiye ikekhiaye, niwe naapatta ukumi wo uhimalha unokhulhuvelha ihu. ⁸Nna phi nulhumo no ukhulhuvelhiya.

Kinouthananani inyuva nvarecheshe ulha mwaha ulha, wiira attu onkhaye anonrumelhelha Nlhuku akhalheke ni nrima wo upanga chittu choombone, chinaatelhiha attu mirima. ⁹Nansho nshembeke malhove o uvaanyihana o uhikhalha ni maana anaacha manyaapwiiya, indewo ni uvaanyihana mwaha unaacha Malhehero. Ukhalhawaya yayo khanlhoka ni mena kharina maana ariyoothe. ¹⁰Ntu naaniha attu yoyo mmwamukeke nkwaha wo upacha ni nkwaha wo nayelhi, aahiiweke mummwalhaaneke, ¹¹nchuwelhaka wiira ntu thoko yoyo hopotera ni uwonya. Ukhalhawaya uwonya wawe phi nonhukumulha wiira howonya.

Malhove o umalhihera

¹²Vanohalha aka waaruma Nartema ama Natikiko, mwaavieke iphiro yo uwa Unikopoli mmwe naakumaana, ukhalhawaya kiholhakelha uwa ukhalhani wowo nlhaalha wo uririya. ¹³Mpangeke kila chinohalha inyu wooria, waakaviha ashinna Zeno owiittuchiha Malhehero ni Naapolo, wiira vaneeta aya munkwahani mwaya, ahiwukuwelhiye ittu iriyoothe. ¹⁴Attu ihu ni ayo lazima vano eettucheke upanga mitheko choombone, wiira chaakavihere wimma maphepu ittu ni upatta yo waavaha attu anovekelha, ukumi waya ukhalhe wo urera.

¹⁵Attu onkhaye anaakhalhana aka va, anouvahani isalamu. Ni isalamu chihu mwaapiihereke manyampwana anaattuna ihu anonrumelhelha Kuristo.

Nnema wa Nlhuku ukhalhe vamoka ni inyu mwaatti.