1 Natimotheo

Iwarakha yo upachera i Napaolo wa

Natimotheo

Malhove o uholhelha

Iwarakha yo upachera i Napaolo wa Natimotheo phi iwarakha yo upachera yaalhepiye ni akarumiya Napaolo unrweehelha owiittucha aya Timotheo. Iwarakha yo upachera i Natimotheo veekinaka yaalhepiye iyaakha cho 62-64 baada yo uyaria wa Kuristo. Ni yeyo waari mahuku o umalhelha ukumi u Napaolo. Napaolo yaari ni unlhoko mulhupalhe ni Natimotheo phi nlhatu neehanne aya ukhalha mwaamwanaya mikwaha minchi (Afil. nlhako wo 2:22, 1 Tim nlhako wo 1:2, 1:18).

Ilha phi imoka yo iwarakha ncheshe chaakhumme u Napaolo chaari ni nchina na ntu aarwehelhiye ihikhalhaka nchina no nlhoko wa attu anrumelhenlhe Kuristo. Iwarakha chikina taaru chiyo phi 2 Natimotheo, iwarakha i Natito ni iwarakha i Nafilimoni. Iwarakha yo upachera i Natimotheo ihochara ikano chinchi chinaacha mwaha wo uthimicha mmilhokoni wa attu anrumelhenlhe Kuristo (nlhako wo 2:1-5), iphiro chinothananiya aya ukhalhana aholhelhi o milhoko cha attu anrumelhenlhe Kuristo (nlhako wo 3:1-13), ikano chinaacha meettuchiho o woothachiya (nlhako wo 1:3-11, 4:1-5, 6:2-5). Malhove onkhaye ayo anowooniha rata Napaolo cheera aya wo weettuchiha Natimotheo ukhalha aholhelhi munlhokoni mwa attu anrumelhenlhe Kuristo. Iwarakha yo upachera i Natimotheo ihochara malhove menchi o waalhaka aholhelhi o milhoko cha attu anrumelhenlhe Kuristo o mahuku ihu alha wiira aakavihe uchuwelha iphiro cho uholhelha rata mmithekoni mwaya mwo ushunga milhoko chineemelhelha aya.

Chiri nhina

Anochokholha iwarakha wo waashikuria Natimotheo (nlhako wo 1:1-2).

Tho, anowaavaha Natimotheo malhove o waalhaka o uthepa wiichinanelha ni meettuchiho o woothachiya (nlhako wo 1:3-11).

Napaolo anoothepa uhimia chineera aya wo unshukuru Yesu Kuristo (nlhako wo 1:12-19).

Napaolo anowaalhehera Natimotheo mwaha anaacha unthimicha Nlhuku ni mitheko cha aholhelhi a attu anrumelhenlhe Kuristo (nlhako wo 2-3).

Anomalhiha iwarakha aya wo waavaha Natimotheo ikano cho umalhihera (nlhako wo 4-6).

¹Mii Paolo, karumiya a Kuristo Yesu wo ulheheriya ni Nlhuku Moopolhi ihu ni Kuristo Yesu nikhulhuvelho nihu.

²Kinoolhepa iwarakha iwe uwaninyu Natimotheo anaaka e ikeekhene o munrimani.

Kinoulhapelhelhani nnema, ikiriri, ni mpuha ukhuma wa Nlhuku Athumwanihu ni Kuristo Yesu Athithi.

Waamukiya mwaha wo meettuchiho o woothachiya

³Thoko chenre aka wo ulheherani vaarwaa aka Umakedoniya, mwakhalheke iwani yo Uefeso, mwaachiichihe attu aneettuchiha meettuchiho o woothachiya, ⁴wiira ahiye chechiyo ithelhi chiyo ni uthanana uchuwelha mwaha wo uhimalha wo iyari cha manyaapwiiya chinowiiha mwaha wo uhiiwanana, mena ahivaraka ntheko wa Nlhuku thoko unochuwaniaa wo nrima. ⁵Kinoulheherani chiicho ukurumicha mwaha wo uttunana unkhuma munrimani muteenlhee, nrima wo uthanana upanga chittu chorera ni nrima wo uhikhalha ni unafiki.

⁶Attu akina ahohiya upanga yayo ni urukunuwelha miaha cho uhikhalha ni maana. ⁷Anothananacha ukhalha o wiittuchiha Malhehero a Nlhuku nansho ahichuwelhaka ittu inoolhumacha aya ama inomindelha aya.

⁸Nihochuwelha wiira, Malhehero a Nlhuku ari orera atwariyaka thoko chinothananiya aya. ⁹Nansho nuupuwelheke wiira Malhehero a Nlhuku kheeshiye wo nlhatu ni attu orera nrima, nansho wa attu ahinvara ikekhiaye ni attu o uhilhoka ni attu ahinchuwenlhe Nlhuku ni attu o uwonya ni wa attu anopanga chittu cho unyalha ni attu ahinonthimicha Nlhuku ni attu aneevakacha manyanaangoro aya ni attu o niiviho.

¹⁰Tho, Malhehero eeshiye wa attu o ulhavalhava ni wa attu o ishembwere yo uthelhana ni ashilhopwana nanaya ni attu anaathumiha attu nanaya ni attu o woothacha ni attu anolhupelha wo woothacha ni attu anovara meettuchiho ahirii e ikekhiaye. ¹¹Thoko chihimiye aya nhina Malhove Orera a Nlhuku nototopelhiye arumelhelhiye wiira kivahiye mii kihimiache waattuni.

Upochera ikiriri ya Nlhuku

¹²Kinowaashukuru Athithi Kuristo Yesu akivanhe machiri munthekoni mwaka wo ukoona mii wiira kirii o ukhulhuvelhiya, nkayakithanlha wiira kaakavihe. ¹³Inakhalhaka katashi vawo kahaaruwana ni waatwarusha ni kaari ntu o uhilhokalhoka. Nansho Nlhuku ahokoonelha ikiriri ukhalhawaya kaari kihinaya upisha nrima, kihichuwelhaka ittu kaapanga aka. ¹⁴Nansho Athithi ahokivaha nnema waya mwinchi nkaakihelha nrima wo waarumelhelha ni uttuna urii wawihu muulhutaanani ni Kuristo Yesu. ¹⁵Nna phi nulhumo no ukhulhuvelhiya, tho nikhalhaka no uverecheshiya chinene. Kuristo Yesu aawilhe velhaponi wiira oopolhe attu o uwonya ni mii kihoolhaka waapwaha akina onkhaye ayo, ¹⁶nansho wo yoyo nlhatu uyo Nlhuku ahokoonelha ikiriri, wiira Kuristo Yesu akoonihe uvilhelha wawe wonkhaye mii ntu o uwonya chinene. Kikhalhe phi o utwarihiya ni attu onkhaye anohalha unrumelhelha apochere ukumi wo uhimalha.

¹⁷Wo ayo arii Amwene o mahuku o uhimalha, ahinokhwa, ahinoonia arii Nlhuku o vekha aya ayo, nthimicho ukhalheke uwannyaya, mahuku o uhimalha ni uhimalha! Aye.

¹⁸Anaaka Natimotheo, kinoulheherani alha malhove alha wo ulhikaana ni malhove a anamilhohi aahimiye khalhayi veehaniye inyu, wiira akhalhe ikerero inyu yo waatakanelha rata ikhoto yo winkelha Malhove Orera, ¹⁹ni uvarelha nrima winyu wo nnikwa woombone. Attu akina khayaavarenlhe minikwa chaya, paahi etu aheeva nrima aya. ²⁰Akina aya phi Nahumenayo ni Naalekizanda, attu kinvanhe aka Nakare aatwarushe, ikhalhe phi iphiro yo weettuchiha ahinruwane Nlhuku.

Ulhapelha wa attu a Nlhuku

¹Paahi etu, chihinaaya uchokholha chittu chikina, kinothanana wiira unlhepelha Nlhuku ni ulhapelha ni waalhapelha attu akina ni unshukuru Nlhuku chihimiyeke wo nlhatu na attu onkhaye. ²Mwaalhapelheke mamwene ni attu avarenlhe ikuru wiira nikhalheke rata ni mpuha ni umwoova Nlhuku ni ukhalha makhalhelho ateelhihiye. ³Ulha phi mwaha woombone unonteelhiha Nlhuku Moopolhi ihu, ⁴nothanana attu onkhaye oopolhiye achuwelhe ikeekhene.

⁵Ukhalhawaya Nlhuku rii mmoka ni tho haawo mmoka neewananiha attu ni Nlhuku, yoyo ntu uyo phi Kuristo Yesu, ⁶ekuminhe mwanene wiira oopolhe attu onkhaye. Wowo phi waari uhimiechesha ikatema yaathananiya vaatiminre aya wiira Nlhuku nothanana wookholha attu onkhaye. ⁷Ni mii wo yoyo nlhatu uyo etu kihothanlhiya ukhalha karumiya keettuchihe attu ahiri Ayahudi, kihimiache nttenga wo upisha nrima ni ikeekhene. Kinoolhumacha ikeekhene, mena akinoothacha!

⁸Paahi etu, kila vanokumaana inyu unlhapelha Nlhuku, kinothanana attu onkhaye atheesheke miono chiri chitakatifu ni ulhapelha wo uhithunalha mena wo uhitukutuwacha. ⁹Vavawo tho, kinothanana manyopani amaalheke ni wiitimarikha ni uweha ikuwo chinowara aya, awarelheke rata kuhii wo utiva ikharari uhinophwanelha mena wiipamba wo chittu cho idhahabu ama ilulu ama ikuwo cho nhakhu mwinchi, ¹⁰nansho awarelheke wo mitheko choombone thoko chilheheriye aya uwarelha manyopani anomwoova Nlhuku. ¹¹Manyopani amaalheke ni wiitimarikha vaneettuchihiya aya. ¹²Mii akinaahiyera manyopani weettuchiha manyaalhopwana ama waatawara, amaalheke. ¹³Ukhalhawaya Adamu phi achokhonlhe wuupiya, Ahawa nkaatwara. ¹⁴Mena Adamu khayaathepiachiye nansho opani phi athepiachiye, nkaawonya Malhehero a Nlhuku.

¹⁵Inakhalhaka chiicho etu, opani anowoopolhiya ukumi aya wo waayara ashaana, alhokelhaka ni upisha nrima, uttunana, utakatifu ni nrima woombone.

Aholhelhi o nlhoko wa attu anrumelhenlhe Kuristo

¹Nna nulhumo nna phi no ukhulhuvelhiya, ntu nothanana ushunga nlhoko wa attu anrumelhenlhe Kuristo yoyo hothanana ntheko woombone. ²Paahi etu, ntu noshunga nlhoko wa attu anrumelhenlhe Kuristo akhalheke ntu o uhilhaphachiya, nlhopwana ri ni opani amoka, ntu o wiitawara, ntu o wiitimarikha, ntu o meetelho oombone, ntu naapochera attu, nooria weettuchiha attu, ³ntu o uhihapalhiya ama ntu o mahuchuru nansho o ntu o ikiriri, naathana mpuha, hirii ntu o uttuna nchurukhu chinene. ⁴Ntu noshunga inupa awe rata ni waalhelha achishaana awe ukhalha attu o umanya. ⁵Ukhalhawaya ntu aahorieke weemelhelha inupa awe rata, nohalha wooria chani ushunga nlhoko wa attu a Nlhuku? ⁶Ntu rumelhenlhe katashi hipangiye ukhalha nholhelhi, hiwe eefuna ni uhukumulhiya thoko chenre awe Nakare. ⁷Tho, ahimiecheshiyeke ukhalha ntu o meetelho oombone mwa attu ahinatwara nlhoko wa attu anrumelhenlhe Nlhuku, hiwe aalhaphachiya nkaawaya nriankho wa Nakare.

Akavihi o nlhoko wa attu anrumelhenlhe Kuristo

⁸Akavihi o ntheko wo ukavihera nlhoko wa attu anrumelhenlhe Kuristo akhalheke attu o meetelho oombone, aneemelhelha nulhumo naya, ahinohapalhiya utheka ama o nikakata no uttuna nchurukhu chinene, ⁹anvarechesha ikeekhene yo nrima worera ipatakulhiye. ¹⁰Yayo aphimiyeke thoko, ooniyaka wiira kharina nlhatu wo ukhuwachiya, paahi etu, avareke ntheko wo ukaviha nlhoko wa attu anrumelhenlhe Kuristo uyo. ¹¹Thothoni tho, manyaahanu aya akhalheke attu o meetelho ombone, ahinaapa akhunanaya, o wiitawara ni o ukhulhuvelhiya wo chittu chonkhaye. ¹²Namitheko okaviha nlhoko wa attu anrumelhenlhe Kuristo nothananiya akhalheke nlhopwana o opani amoka nooria weemelhelha rata inupa awe ni waalhelha rata achishaana awe. ¹³Ukhalhawaya akavihi anovara ntheko rata anoothimichiya rata, ni ayo anowooria uhimiacha wo uhoova mwaha unaacha nrima urina aya muulhutaanani ni Kuristo Yesu.

Ikekheene ipatakulhiye

¹⁴Kinolhepa ilha iwarakha ilha uwaninyu kikhulhuvelhaka uwa uwoonani phiyaru. ¹⁵Nansho kacherewihiyaka, paahi etu ilha iwarakha ilha, inouhimeriani meetelho ninothananiya ihu ukhalhana attu o iwani ya Nlhuku, irii nlhoko wa attu anonrumelhelha Nlhuku rii nkumi, rii phi nipoto ni nsingi we ikeekhene. ¹⁶Khaniwo nipampa vachulhu mwaha uvithiye unaacha meetelho ihu o munrimani,

Ahoonia wo iruttu yo munttuni,

Ahohimiecheshiya ni Iphumu wiira ri o uvarechesha ikekhiaye

Ahoonia ni minepa o wiirimu.

Ahohimiachiya mwaattuni,

Ahorumelhelhiya ni attu onkhaye o velhaponi,

Ahokushiya uchulhu unthimichoni.

Owiittuchiha o woothacha

¹Iphumu ya Nlhuku nohimia mwaari wiira mahuku anowa attu akina anowa uhiya nrima aya, anoowa aatwara minepa cho woothacha ni uttwara meettuchiho o mashoka o unanara. ²Meettuchiho thoko yayo anowanelhihiya ni anafiki, mirima chaya cho uchuwelha moombone ama chittu cho uhilhoka chuumaka thoko chipahiye ni iyuuma yo mooro. ³Yayo attu ayo anowaachiichiha attu ahiveke ama ahilhie cholhia chuupilhe awe Nlhuku wiira chipocheriye wo ushukuru ni attu o nrima anochuwelha ikeekhene.

⁴Kila ittu yuupilhe awe Nlhuku irii yorera, khiiwo yo ukhotiya nansho kila ittu ipocheriyeke wo ushukuru, ⁵ukhalhawaya nlhove na Nlhuku ni ulhapelha phi nopanga yeyo phi nohapiha ittu iyo ipocheriye mmiholho wa Nlhuku.

Karumiya o ukhulhuvelhiya a Yesu Kuristo

⁶Mwaahimeriaka ashilhoko ihu alha malhehero alha, nnookhalha karumiya o ukhulhuvelhiya a Kuristo Yesu, mwiilchunnuwihaka mwaanene wo malhove o munnepani o nrima ni meettuchiho o ikeekhene nnotwara inyu mwaanene. ⁷Nansho nhiyeke wiiwelhelha ithelhi cho irusho chihiri cho munnepani chihiri ni maana. Mweettuchiheke attu ukhalha thoko chinothanana awe Nlhuku. ⁸Wiichookolha iruttu unoolhoka nansho makhalhelho anonteelhiha Nlhuku ukhalhawaya ahonilheha upatta ukumi wo vano ni uyo unowa. ⁹Nenno phi nulhumo ne ikekhiaye chinene ni noolhoka chinene. Ukhalhawaya anonikhulhuvelhiha ikekhiaye imphwanelhiya upocheriya. ¹⁰Hii nirii muuvarani ntheko wo machiri ukhalhawaya niheesha nikhulhuvelho nihu wa Nlhuku rii nkumi rii Moopolhi a attu onkhaye, athepaka ayo anonrumelhelha Kuristo ayo.

¹¹Yayo phi malhehero anothananiya inyu weettuchiha ni waakurumicha wiira apangeke chiicho. ¹²Ntu riyoothe huuvehacheni wo nlhatu no ukhalha winyu amirawo. Nansho nkhalheke ntu o utwariya ni attu anrumelhenlhe Kuristo wo moolhumo inyu ni meetelho inyu ni uttuna winyu ni nrima winyu ni makhalhelho orera anokhalha inyu. ¹³Nlhokelheke nshomaka ni uhimiacha ni weettuchiha attu Malhove Matakatifu mpaka vanohalha aka uwa. ¹⁴Nhihiye wooniha mahalha o Iphumu ya Nlhuku nrina inyu, mwaavahiye inyu wo malhove a anamilhohi ni wo weesheriya miono ni ashulhupalhe. ¹⁵Muupuwelheke rata chonkhaye chiyo ni upanga, wiira attu onkhaye ooneke meetelho inyu orera chineera aya wo uthepa. ¹⁶Mwiishungeke rata ni uweha chineera inyu wo weettuchiha attu. Nthepeke chiichammo ukhalhawaya mwapangaka chiicho, nnowiichoopolha mwaanene ni ayo anowiiwani ayo.

Iphiro cho ukhalha rata ni Akuristo naninyu

¹Nhaachacherache ashulhupalhe, nansho mwaalhoheke thoko chineera inyu wo waalhoha athumwaninyu. Mwaalhoheke ashimirawo thoko chinaalhoha inyu achihima inyu, ²mwaalhoheke manyopani olhupalhe thoko chinaalhoha inyu anumwaninyu ni imialhi thoko ashirokorinyu, wo haamirelha ishenye, wo ukhalha makhalhelho orera.

³Mwaalhoheke manyanankhwelhi o ikeekhene. ⁴Nansho manyanankhwelhi ari ni iyari, ashaana ama uchuulhu, apangeke thoko Nlhuku chinothanana awe. Yeyo inokhalha phi iphiro yo waalhiva manyanaangoro ni manyaapwiiya aya inonteelhiha Nlhuku. ⁵Anankhwelhi o ikeekhene, ahiri ni ntu o waalhelha, yayo anonkhulhuvelha Nlhuku anlhapelhaka uhiyu ni uthana wiira oopuwelhiye. ⁶Nansho anankhwelhi anokhalha wo wiipuha, yayo anokhalha thoko ahokhwa, inakhalhaka akumi. ⁷Mwaalhehereke attu wiira apangeke yayo, ahiwe aalhaphachiya. ⁸Yakhalhaka ntu khanaalhoha amuchi awe, athepaka attu o uwannyawe, yoyo horuna nrima awe, ni unanara umpwaha ntu hinapisha nrima wo urumelhelha.

⁹Nhaalhakelhe machina a anankhwelhi ariyoothe yaahikhalhe aphiyenlhe malhipa o iyaakha makhumi sita. Tho yaari opani o nlhopwana mmoka, ¹⁰ni ayo ahimiecheshiye ukhalha o rera nrima, aalhenlhe achishaana aya rata, aapochenre alheto unupani waya, aavanhe maashi o ukhucha attu a Nlhuku, aakavinhe attu aahuva ni ekuminhe upanga chittu choombone.

¹¹Nhaalhakelhe machina a anankhwelhi imialhi, ukhalhawaya iruttu chaya chakelhiyaka ikhwilhu, anoothanana uthelhiya tho nkayanhiya Kuristo, ¹²nkayeehukumulha ukhalhawaya ahohiya nrima waarumelhelha aya katashi vawo. ¹³Anankhwelhi thoko yayo phi nochokholha weetakacha wo uhikhalha ni maana mmanupani. Wo uthepa anowiittucha waapa attu ni wiihelhahelha nkittu nhiri mwawaya, olhumachaka chittu chihaathananiya aya wulhumacha. ¹⁴Paahi etu, kinoona wiira, manyanankhwelhi imialhi ahiiyeke athelhiyeke, aayareke ashaana ni ulhelha inupa chaya, ahiwe aavaha amalhaponi ihu nipesha no unulhumelha chittu cho uhilhoka.

¹⁵Ukhalhawaya anankhwelhi akina ahomalha uwonya ni unttwara Nakare. ¹⁶Nansho yakhalhaka opani anrumelhenlhe Kuristo ahaana alhoko aya arii anankhwelhi o ikekhiaye, yayo phi nophwanelhiya waalhelha, mena kuhiwe uhiya ntheko upangiye ni nlhoko wa attu anrumelhenlhe Kuristo, ikhalhe wiira nlhoko wa attu anrumelhenlhe Kuristo apangeke ntheko wo waalhelha manyanankhwelhi ahiri ni ittu menamena.

¹⁷Ashulhupalhe anaaholhelha rata nlhoko wa attu anonrumelhelha Kuristo ahophwanelhiya uvahiya mahalha velhi, athepaka ayo amminda uhimiacha ni weettuchiha attu. ¹⁸Ukhalhawaya Malhove Matakatifu aneera, “Nhinttuke mwannama uwano vanolhimihiya awe.” Ni chiichammo etu “Anamitheko ahophwanelhiya malhivo.” ¹⁹Nhipochere milhatu cha ashulhupalhe anoholhelha nlhoko wa attu anrumelhenlhe Kuristo, chaahiwihiyeke ni uhimiecheshiya ni attu elhi ama araru. ²⁰Mwaamukeke vaattuni attu anowonya, attu akina ayo yooveke.

²¹Kinoulheherani mmiholho wa Nlhuku ni wa Kuristo Yesu ni wo minepa o wiirimu chithanlhiye, wiira nvarechesheke malhehero alha, mena nhihukumulhe wo ichimwa ama ummweha wiitho ntu riyoothe wo kila nlhatu unowiiheriya inyu. ²²Nhaakuvihe ummaha ntu ntheko wo uholhelha nlhoko wa attu anrumelhenlhe Kuristo. Nhikavihe uwonya wa attu akina, mwiichinanelheke mwaanene nhinanarihiye.

²³Nhiwurie maashiru nansho mmwurieke idivai vakani wo nlhatu no nthunkwa ninyu ukhalhawaya ninouweriani venchi.

²⁴Uwonya wa attu akina unowoonia mwaari ata ahinaya uhukumulhiya. Nansho uwonya wa attu akina unowa woonia vanohalha aya uhukumulhiya. ²⁵Chiichammo etu, meetelho oombone anowoonia mwaari, ata ayo ahinoonia ayo khanooria wiivitha.

¹Attu onkhaye arii mpottani yaathimicheke anene ntheko aya ayo wo kila ittu, nchina na Athithi nihiwe naaruwaniya mena meettuchiho ihu. ²Ipotta cha anene ntheko aarumelhenlhe Athithi, ahaanyoholhache ashinene ntheko aya wo woona ukhalha Akuristo nanaya tu. Nansho apangeke ntheko rata ukhalhawaya ayo ampatta ifaida munthekoni mwa ipotta ayo ni ayo anowaattuna.

Mwiittuchiheke ni uhimiacha ulha mwaha ulha.

Meettuchiho o woothachiya

³Ntu riyoothe neettuchiha chittu chihinlhikaana ni meettuchiho o ukhalha chinothanana awe Nlhuku ni mena hinorumelhelha malhove e ikeekhene a Athithi Yesu Kuristo, ⁴yoyo ntu uyo hochara nikakata no wiititihacha ni mena khachuwenlhe ittu iriyoothe. Yoyo phi ntu o uttuna mwaha wo uvaanyihana ni waahimeriacha attu chittu cho uhikhalha ni maana, aanyulhachaka ihache ni indewo ni uruwanana ni wuupuwelha chittu cho uhilhoka, ⁵ni uvaanyihana uhinomalha ukhuma wa attu o uhikhalha ni irusho, attu ahiri ni ikeekhene. Attu anaanyihera wiira uvara ntheko wa Nlhuku phi iphiro yo upatta nhakhu.

⁶Eiyo we ikekhiaye uvara ntheko wa Nlhuku unommaha ntu nhakhu mwinchi yakhalhaka nooteelhiya wo chittu chirina awe. ⁷Ukhalhawaya khanaawilhe ni ittu iriyoothe velhaponi va ni mena khaninokusha ittu iriyoothe nihuku nihu no uthama velhaponi va.

⁸Paahi etu yakhalhaka nihanaa cholhia ni ikuwo, nipisheke nrima. ⁹Nansho attu o irusho cho uthanana ukhalha ni nhakhu anoowulhuwa mu ulhikachiyani ni uwayihiya nriankho wo nikakata ninchi no uhilhoka no uhikhalha maana ninaapurulhelha uutanganyiyani lhakalhaka. ¹⁰Ukhalhawaya nrima wo uthanana nchurukhu chinene phi machokholhelho o uwonya wonkhaye. Attu akina ahothanana chinene upatta nchurukhu mpaka nkayaakukuriacha, nkayaahiya nrima ni mirima chaya chihopahiya chinene wo ihuzuni.

Malhehero u Natimotheo

¹¹Nansho inyuva nrii ntu a Nlhuku va, nhittware yoyo mwaha uyo. Nvarechesheke ikekhia rata ni unthimicha Nlhuku ni upisha nrima ni uttunana ni uvilhelha ni wiitimarikha. ¹²Mwaatakaneke wo machiri ikhoto yo munrimani wiira nhilhikachiye, nvarechesheke ukumi inyu wo uhimalha mwiihanelhiye inyu mmiholho wa o uhimiechesha enchi wo unrumelhelha Kuristo. ¹³Kinoulheherani mmiholho wa Nlhuku nokumiha ukumi wo chittu chonkhaye ni mmiholho wa Kuristo Yesu nohimiechesha ni urumelhelha ikeekhene mmiholho wa Apontio Pilato, ¹⁴wiira nvarechesheke malhehero inyu, nkhalheke attu o uhikhuwachiya mpaka nihuku Athithi Yesu Kuristo vanohalha aya ukhumelhelha. ¹⁵Ukhumelhelha waya unowa ukhalha ikatema vanohalha aya waaya yeeshiye ni Nlhuku o mpuha nototopelhiya, rii ntawara o vekha awe, Mwene o mamwene ni Athithi o manyaathithi. ¹⁶Yoyo vekha awe phi o uhikhwa rii nokhalha munthukoni nhinaatameriya ni ntu riyoothe. Khaawo ntu pantte umwoona ama nooria umwoona. Nthimicho ni ikuru chikhalheke uwannyawe mahuku o uhimalha! Aye.

¹⁷Mwaalhehereke attu o nhakhu wo velhaponi va wiira ahiifune, ahikhulhuvelhe nhakhu uhinkhulhuvelhiya. Nansho, ankhulhuvelheke Nlhuku nonivaha chittu chonkhaye wo urera wawe wiira nipuheke. ¹⁸Mwaalhehereke wiira apangeke morera ni ukhalha attu o nhakhu wo upanga menchi moombone, akhalheke attu ari tayari waakawelha attu akina nhakhu aya. ¹⁹Yapangaka chiichammo anowiicheeshera nikhupi ninohalha ukhalha thoko nsingi wo ulhama unowa aya ukhulhuvelha mahuku anowa. Vavawo anowa aapatta ukumi urii ukumi we ikeekhene.

²⁰Inyu Natimotheo, nshungeke rata chittu chonkhaye chivahiye inyu. Nhiihelhe malhove o uvaanyihana mwaha wo velhaponi wo uvaanyihana uhiri ni maana waachaka ittu attu ineehana aya Irusho cho ushomiya. ²¹Ukhalhawaya attu akina aheepanga ukhalha attu o irusho cho uchuwelha thoko chechiyo. Ni wo upanga chiicho etu ahoriha nrima waya.

Kinoulhepelhelhani wiira nnema wa Nlhuku ukhalheke ni inyu mwaatti onkhaye!