TITO

TITO

¹ Ni Paulo, ruindu’ba Lu ro ago lazo’ba Yesu Kristo ro resi. Anji ma te ago azote taoma lidri onjionjiro Lu ro opane ago ànya lepene taŋgye se embate mätu amaro si re, ² se änju zevona te mio’ba adri äduako ta ro dri. Lu se ga kowe ko ono, ’ba ta adri ono ro ni ämäri ṛo teinye ’bädri etoako, ³ ago tu ŋgyena si oko nda ka’date ämäri lazo ndaro ya. Tase ono äpäṛite märi, ago medretazevo te ota Lu Opa’ba amaro ro ronye. ⁴ Ma taegyi Tito, ŋgwa ŋgye maro taoma ya se amaro ono ri. Lu Täpi ago Kristo Yesu Opa’ba amaro kozo tai’dwero ndi taliatokpe be miri. ⁵ Me’be mi te Kurete ya, tana minina ndi ŋgase ko ŋgye ogo o’bane ŋgye ago ’di’desii Känisa ro o’bane ’ba’desii cini yasi. Miyi ta ŋgaembaro maro tana: ⁶ beṛo dri’ba ri a’done koziako; beṛo ndäri a’done toto toko alodi be, ago ŋgwai ndaro beṛo a’done taoma’bai ro ago ko a’done liku siomba kode taoroako robe. ⁷ Tana dri’ba orivoya voondre’ba losi Lu ro ro, beṛo ndäri a’done koziako. Beṛo ko ndäri a’done driuŋgyi’ba ro kode oŋgane ndri kyilaro kode yi ufu’ba ro wa si kode yagäru be ta parata rota. ⁸ Beṛo ndäri a’done ŋgwazi ondre’ba ro ago tase orivoya kado lune, beṛo ndäri andivo ritane, a’done ŋgye, alokado, ago embaemba ro. ⁹ Beṛo ndäri lazo se änina ndi taoyine kigye ago se letadri ndi tamiembaro be ätine anda. Liti ono yasi nda a’dona ndi mbara be miomba ozone azii ri ta ŋgaembaro ŋgye si ago ka’dana uje ànya se kedreyibe ŋbi lazo mile ro kpa. ¹⁰ Tana amba orivoya, se kabe ogbo ago kabe azii odo ataawi ànyaro si, ndrana ndi ni ànya se tozarute ni Yudai lakosi iyi. ¹¹ Beṛo ata ànyaro drîna o’bine, tana ànya kayi katidri cini gburu ŋgaemba se beṛo ko ànyari embane si, se vona cini orivoya driupiro ugu ta parata usuro ta. ¹² Alo aza Kurete’bai ro se orivoya nebi modo ànyaro ro ata te ekye: “Kurete’bai orivoya ondoalo koweoga’bai koronyai vocowaro koziro yi, ago tovo ŋgalote’bai.” ¹³ Tazevoedre ono orivoya ŋgye, ta’doro beṛo miri drî ànyaro o’bine mbara, tana ànya ka’doyi robe taoma ’diriro be ¹⁴ ago ko taawi copecopero Yudai ro ndi ota lidri se koga taŋgye be zo ono ro ugu ätine. ¹⁵ Ŋgacini orivoya wäṛiro ànya se andivo ànyaro orivoya wäṛiro kai ri; oko ŋga aza i’do wäṛiro ànya se orivoya undiro ago taomaako ri, tana tauni drî ànyaro ro ndi tausu ya ànyaro robe a’dote undiro. ¹⁶ Ànya kayi ata ekye yini Lu te, oko taoye ànyaro gakalana te. Ànya orivoya yaoso be ago taoroako, ojo ko ŋga aza kado oyene.

¹ Oko beṛo miri tase koletadri be tamiembaro ŋgye be embane ayani. ² Nyemba agoàmbago a’done trwe, tavousu be, ago andivo ritane, a’done ’diri taoma ànyaro ya, ŋgalu be, ndi rriti iŋgyi be. ³ Kpa oso inye, nyemba tokoadraŋwai ta oyene oso beṛo ’ditoko ri oyene ronye ori alokado orine ayani. Beṛo ko ànyari a’done kyere’bai ro kode iyeäṛi ro wa ri. Beṛo ànyari tase kado embane ayani, ⁴ tana kembayi ’ditokoza robe àgo ànyaro lune ndi ŋgwai be, ⁵ a’done andivo ritaritaro ago wäṛiro, ago a’done ’ditoko kado se kabe andivo ànyaro logo àgo ànyaro zele ronye, tana ukyi ’diaza ata ta undiro ’da lazo se kikyi ni Lu resi ono lomvo. ⁶ Kpa oso ono ronye mita agoànji kpa a’done andivo ritaritaro. ⁷ Ŋga cini yasi beṛo andivo miro ri a’done taka’daro taoye kado ro ro. Nya’do ŋgye ago miye ŋgaemba miro ya cini si. ⁸ Nyemba tase ŋgye se änina ko kozine ’do ayani, tana kyila’baazii miro a’ba robe driupiro ka’doyi robe takozi aza ako itine ama lomvo. ⁹ Iyeäṛii kologoyi andivo ànyaro ’desii ànyaro zele ago ta ànyaro kusi ’desii ànyaro ŋga cini yasi. Beṛo ko ànyari tadri ’desii ànyaro ro ozane kyirikyiri ¹⁰ ago ko ŋga kugune ni ànya rigyesi. Oko, beṛo ànyari ka’dane anjioko ànya ondoalo orivoya kado ago ’diri, tana ànya keziyi liku robe taŋgaembaro Lu Opa’ba amaro ro ri tase cini ànya kayibe oyena ya. ¹¹ Tana Lu ka’da tai’dwero ndaro te ta ŋgaopa rota, ’dicini ri. ¹² Tai’dwero se ana ozo taŋgaembaro te ämäri ugu ori luako e’bene ndi ole ’bädri ono robe, ago ori andivo rita ro orine, ŋgyero, ago orine lu’ba ro ’bädri ono ya, ¹³ ondro màte Tuse kado màbe mio’ba tana ro kwotena, tuse ’desi para Lu ago Opa’ba amaro Yesu Kristo ro ka’daruna ’da sina si. ¹⁴ Nda ozo andivo ndaro te ama ta, ago pa ama teni takozi cini yasi ago ’ba ama te lidri wäṛiro se a’dote modo ndaro ro ago te orivoya nja takado oyene. ¹⁵ Nyemba ŋga kwoi ago miye ta drikaca cini miro si agoago ozo si ago mitadri ta miro eri’bai ro. Mi’ba aza ànyaro kondrevo ko ndra midrisi.

¹ Nyologo ta lidri miro dri andivo ànyaro logone ’dimiri’bai zele ndi drikaca’bai be, ànya orone, ago a’done nja takado oyene ta cini yasi. ² Nyata ànyari ko taundi atane ’diaza lomvo, oko a’done liatokpero ago bereazi ro, ago ondoalo a’do tokyeako ka’dane ayani ’dicini ri. ³ Tana ama andivo sedri orivoya amama ro, taoroako, ago odo ama kpate. Ama orivoya iyeäṛi ŋgaole wairo ndi riyä dritoto be ro. Màri ori amaro te yaoso ndi mawi be ya; ya azii ro osote ama lomvo ago ya amaro osote ànya lomvo. ⁴ Oko ondro yai’dwe ndi ŋgalu Lu Opa’ba amaro ro kaka’darute oko, ⁵ nda pa ama te. Ko ta takado aza se andivo amaro koyebe rosi, oko ta yauni modo ndaro rosi nda pa ama te Tori Alokado si, se kani uti to’diro ozo ämäri ndi ori to’diro be ugu ama ojo si. ⁶ Lu eda Tori Alokado te amba ämädri Yesu Kristo Opa’ba amaro si, ⁷ tana tai’dwero ndaro si a’ba ama robe ŋgye Lu be ago mà’do robe uru’ba adri äduako se màbe mio’ba tana ro ta. ⁸ Ono orivoya ata ŋgye yi. Male miri ta atane amba ta kwoi ta, tana ànya se kayibe taoma Lu ya kuguyi takado oye robe tu ànyaro ya, se ṛo orivoya kado ago ṛo oyene ’dicini ri. ⁹ Oko mina kalawasa amaama ro, ta gyoroŋgoloro zutui ro, kalaope, ndi kyila oye ta ota rota be. Ànya orivoya tavociako yi ago kadoako. ¹⁰ Nyozo ŋgaemba toto perena ritu ’dise kabe ta rulonyi ro ezi ri, ago miye ta aza ko ndra nda be. ¹¹ Mini ndi ’di inye ’do enjirute, ago takozii ndaro ka’date anjioko nda orivoya koziro. ¹² Ondro mazo Aretena kode Tukiko te mire oko, nyojo mbara cini si ikyine mare Nikopoli ya, tana maratate orine meṛi si lau. ¹³ Nyojo mbara cini si Zena ota’ba ndi Apolo be opane aba ànyaro etona ya, ago mindre kado ànya ka’do ŋgacini se ànya kolebe be. ¹⁴ Lidri amaro beṛo ta unine ugu takado oyene tu ànyaro ya, tana kozoyi ŋga robe ta lemeri rota; beṛo ko ànyari ori losiako orine. ¹⁵ Ànya se orivoya mabe zoyi mede miri. Miye mede amaro bereazii taoma ya ri. Tai’dwero Lu ro ka’do ami cini be.