ROMA’BAI
11 Ni Paulo, ruindu’ba Kristo Yesu ro ago lazo’ba se anjibe ago äzibe Lu si Lazokado ndaro opene resi. 2 Tao’ba Lazokado ro Lu ’bate ṛo kyeno nebii ndaro si, oso egyite Taegyi Alokado ya ronye. 3 Orivoya ta Ŋgwa ndaro, Opi amaro Yesu Kristo rota, a’do ndaro lidri rosi, äti nda te zelevo Dawidi rosi; 4 a’do ndaro alokado Lu rosi, aka’da nda te mbarapara be a’done Ŋgwa Lu ro ro nda eŋga si ni avo yasi. 5 Nda si Lu ozo kandrakado te märi a’done lazo’ba ro ta Kristo rota, tana a’ba lidri tu’dei cini ro robe taomane ago taorone. 6 Ta ono anjioko loci ami se Roma ya kpate kigye, se Lu zite a’done Yesu Kristo ro. 7 Ago ka’do inye ma taegyi ami se cini Roma ya se Lu kulube ago kuzibe a’done lidri modo ndaro ro ono ri. Ka’do inye Lu Täpi amaro ago Opi Yesu Kristo kozo yauni ämiri ndi taliatokpe be. 8 Käti ono, maye aro’boya Lu maro ri Yesu Kristo si ta ami cini rota, tana taoma amiro a te tana iti ’bädri cini yasi. 9 Lu ni tazevoedre’ba maro anjioko tase mabe atana orivoya endaro, Lu se mabe ruindu rigye ya cini maro si ugu Lazokado ta Ŋgwa ndaro rota opesi ono. Lu nite anjioko mayi ta amiro ndi. 10 Tu cini si ma mätu. Ma taeji tana Lu ole kado ndaro si äduro oko ko’ba ka’do robe rritiako märi ukyine amire yau ro. 11 Tana male ṛo ya cini si ami ondrene, tana mala’do äṛu a’do tori voro ro robe ami yibe ami tombaza. 12 Tase malebe atane ni no anjioko ami riti ndi mabe apa robe saa alo si, ami opane taoma maro si ago ma opane taoma amiro si. 13 Ädrupii maro, beṛo ämiri tana oyine, anjioko tuna amba maratate ami täkyine, oko ondoalo ŋga azaka laga ma tezo oyevoya inye. Male kpa ’di azaka ri a’done drieta be ami lakosi, oso ma’dobe sina Atrai azaka lako ronye. 14 Tana ma kama be lidri cini ri, ’di Giriki ro ri ago ’dise ko Giriki ro ri, ’di embaemba ro ndi embaako’ba be ri. 15 Ka’do inye, ma orivoya ṛo nja Lazokado opene kpa ami se nyàbe ori Roma ya ri. 16 Tana ma ṛo cu taoma be ta lazokado roya, anya orivoya mbara Lu ro yi ànya se cini kabe taoma opaza, käti ono Yudai ri, ago kpa Atrai ri. 17 Tana lazokado kani tase Lu kabe ’dio’ba taŋgye’ba ro andivo ndaro be lofona: orivoya taoma si ṛoni etovoya le ondena ya. Oso taegyi kabe ata ronye ekye: “’Dise a’bate taŋgye’ba ro Lu be taoma si orina ndi.” 18 Kyila Lu ro aka’date ni vo’buyakuru yasi takozi cini ndi taundi lidri robe lomvo se taundi nai kani taŋgye laga uniako ono. 19 Lu ka ànya eza tana tase ànyari unine ta Lu rota ṛo orivoya ŋbelero, tana Lu andivona ’bate ŋbelero. 20 Ṛoni Lu ko’ba ’bädri be si, beti ondreako ndaro, riti mbara äduako ndaro ndi a’do ndaro Lu ro robe, andrete ŋbelero, ànya usuyitavona te ŋgase Lu ko’babe si. Ka’do inye lidri kai te kalaogavo ako. 21 Ànya niyi Lu te, oko ànya ozoyi taoro se ndaro ozone ndäri kote, ànya yeyi aro’boya kpa ko ndäri. Oko tavousu ànyaro a’dote kpeye ta awi ro, ago tauni drî ànyaro ro a’dote awi twi ŋgätini be. 22 Ànya kayi ata ekye ànya orivoya tauni’bai, oko ànya orivoya amama yi; 23 Ugu Lu oŋgwaako mätune ayani, ànya kayi ŋgase edete betinai lidri ronye oŋgwaoŋgwaro kode arii kode koronyai kode ŋga tegategaŋwà ronye mätuna ayani. 24 Ago ta’doro Lu ozo lidri se kai te ŋgase ya andivo ànyaro ro kolebe oyene ayani oyene, ago ànya kayi ŋgase undiro loyena ayani ànya voya. 25 Ànya tweyi taŋgye Lu ro drî na gwo ta kowe rosi, ŋgase Lu ko’babe ànya kayi mätu ndi ruindu be oye rigye ayani vo O’ba’ba andivo roya, nda se a’done ni räṛuräṛuro äduako ono! Amen. 26 Ta nonye ono oye si, Lu e’be ànya te ŋgaleme driupiro ruezaro ri, ca ’ditoko enji a’do taloye ànyaro rote taloye se beṛo ko oyene si. 27 Mànoago kpa inye e’beyi taloye ’ditoko be gwo goyi loyeyi ta ṛo ànya voya. Mànoago ka tase driupiro oyena ànya voya ago tana ro ànya eziyi rueza se sindi ànyari usune ta takozi ànyaro loyero te andivo ànyari dri. 28 Tana lidri kai gayizo tauni se endaro ta Lu rota urune drî ànyaro ya, nda e’be ànya te ruenjine tauni drî ànyaro roya, tana ànya koyeyi ŋgase si ko ànyari oyene robe. 29 Tana ya ànyaro twi takozi, taundi, yagäru ndi ta ronyi loyero ànya voya be, ànya orivoya twi yaoko be, ago ’ditufu, kyila oye, ŋgaodo ndi yagyorogyoro robe. Ànya kayi ugu kyere oye 30 ago kayi ugu takozi ndi taundi be ata azi lomvo, ya ànyaro osoro Lu lomvo, yaträkälä be, driuŋgyi ndi mäwu be; ànya kayi liti amba azaka taundi uṛina, ànya royi uti’bai ànyaro ko; 31 ànya teinye tavouniako, ànya ätiyi tao’bai ànyaro ko, ànya ka’dayi takado ndi yauni be kote azii ri. 32 Ànya niyi ndi ota Lu ro kata ekye, lidri se kabe ori liti ono voro ojo odra be. Caoko, gialo ànya kayi ugu ŋga segi kwoi oyena, oko ànya ruyidri kpa azii se kabe ànya loye be.
21 Nyèri, inye’do nyà vure azii ro ope ya? Mi teinye kalaogavo ako, kode mi’bo a’di owo. Tana ondro nya vure azii ro ope ago ’dooko nya kpa ŋgase ànya kabe loyena ’do oyena ayani, mipe vure andivo miro ṛote. 2 Mä̀nite Lu orivoya ŋgye ondro nda kate vure lidri se kabe ŋga nonye kwoi ro oyene owo. 3 Oko mi, bereazi maro, nya kpa ŋgase nyabe vure azii ro opena tana ro kai oye! Nyusu miro be mipana ŋga gi’da ni vure Lu ro riya? 4 Oko nya takadopara ndaro yauni ro ndi yaiŋgyi be mawona. Endaro minite anjioko Lu orivoya takado be, tana nda ka ruutri mi lepene drietane. 5 Oko mi orivoya yauŋgyiekye taeriako robe, ago ta’doro nyugu taezaro odro modo miro dri tuse para kyila Lu ro ndi taŋgye vure opero ndaro oyebe ka’dane si. 6 Tana Lu ozona ŋga lidri cini ri oso tase nda koyebe ronye. 7 Lidri rukä ka ugu takado oye, ago ka räṛu uṛi ndi taoro be, ndi adri oŋgwaako be. Lu ozona adri äduako ’da ànyari. 8 Lidri azaka kayi ta andivo ànyaro ro oye ago gayi tase taŋgye ro zo, tana osoza tase koziro vo. Kyila Lu ro ndi ozi be ikyina ’da ànya dri. 9 Rueza ndi lomvoluwu be a’dona ’da ànya se cini kayibe tase undiro loye ri, a’dona käti Yudai ri ago kpa Atrai ri. 10 Oko Lu ozona räṛu, taoro ndi taliatokpe be ’da ànya se cini kayibe takado oye ri, ozona käti Yudai ri ’dooko kpa Atrai ri. 11 Tana Lu ka vure ’dicini ro ope ojoojoro. 12 Atrai orivoya Ota Musa ro ako, ànya kayi takozi oye ago jeyite Ota ako. Yudai orivoya Ota be, ànya kayi takozi oye ago a vure ànyari opena Ota si. 13 A’ba lidri kote taŋgye’ba ro Lu be ugu Ota eri si, oko tase Ota kabe atana oyena si. 14 Atrai Ota ako, oko caoko ànya kayi tase Ota kabe atana oyena lomvo voro, ànya orivoya ota modo ànyaro ro, ànya ka’do gica Ota ako owo. 15 Taoye ànyaro ka ka’dana anjioko tase Ota kolebe egyi ṛote ya ànyaro ya. Ya ànyaro ka kpa ka’dana anjioko ta ono orivoya endaro, tana tavousu ànyaro tu azakasi ka ànya kicu ago tu azakasi ka ànya gaga. 16 Ago ndi, oso Lazokado se mabe opena ronye, ono ni tase a’dona ’da Tu äduro si owo Lu Yesu Kristo si opena vure tavousu da’doda’do ro ’dicini ro ’da. 17 Oko mi ni? Nya andivo miro uzi Yuda, nya mi äti Ota lomvo ago nya driuŋgyi ta rumora miro Lu be ya; 18 mini tase Lu kolebe miri oyene ndi, ago mini ta teni Ota yasi tase kado onjiza. 19 Nya tausu mikye yi orivoya lepe’ba yi miako’ba ri, ago ŋgaeyi yi ànya se orivoya vouni ya ri, 20 emba’ba yi amamai ri, ago miemba’ba yi tauniako’ba ri, mini ṛote endaro anjioko Ota ya mi orivoya tauni ndi taŋgye cini be. 21 Nya azii emba, nyemba andivo miro ko etaya? Nya taope mikye: “Nyukugu ŋga ko,” oko mi andivo nyukuguna ŋga kpa ya? 22 Nyata mikye: “Miye ta ko ago kode toko drisi,” oko miyena ta kpa toko kode ago drisi ya? Ya miro oso tawi lu awi lomvo, oko nya kpa ni ŋga Yekalu ro topa ya? 23 Nya driuŋgyi ta a’doro Ota Lu robe ta, oko nya kpa ni driupi ezi Lu dri ugu Ota ndaro perena siya? 24 Taegyi ka ata ekye: “Tana ta ami Yudai rosi, Atrai ka taundi ata Lu lomvo.” 25 Ondro nya Ota oro, oloŋbiṛiro amiro orivoya kado be; oko ondro miro Ota kote, nyà’dona ndi osoago alo ami ṛo ko alona ŋbiṛiro. 26 Ondro Atra, se oloako ŋbiṛiro, ka tase Ota katabe oro, inye’do Lu ndre nda ṛo ko olooloro ŋbiṛiro, ya? 27 Ka’do inye ami Yudai, Atrai opena vure amiro ’da, tana nyà Ota Lu ro perena, nyà’do gica sina egyiegyiro vuru ago alo ami ca ŋbiṛiro owo; oko ànya kayi Ota oro, alo ànya ca ko ŋbiṛiro lomvo voro owo. 28 A’di ni Yuda endaro yi, olooloro ŋbiṛiro ya? Ko orivoya ni mano se Yuda yi a’do tesi si ya, se olo ndaro ŋbiṛiro orivoya a’do lomvo ro voro. 29 Ka’do inye Yuda endaro ni nda se Yuda yi ya yasi, anjioko nda se alobe ŋbiṛiro ya ya, se orivoya ni losi Tori Lu ro ro, ko Ota egyiegyi ro yi. ’Di nonye ono usuna räṛu ni Lu resi, ko ni lidri resi.
31 Ka’do inye takado Yudai ro gindi ndrani Atrai ro drisi ya? Kode inye’do takado ’diolo ŋbiṛiro ro gibe ya? 2 Endaro kadona ndi orivoya liti cini yasi! Käti ono Lu ozo lazo ndaro te Yudai ri. 3 Oko ondro azaka Yudai ro ka’do kote ’diri ro oko ya? Inye’do o’bana Lu gwo a’done ta’diri ako ya? 4 Endaro ko inye! Beṛo Lu ri a’done ŋgye, ondro lidri cini ka’do gica kowe’bai ro owo. Tana Taegyi kata ekye: “Beṛo mi ka’dane ŋgye ondro nyate ata owo; beṛo miri vure miro opene ṛe ondro ate vure miro ope owo.” 5 Oko ondro ka’do taoye kozi amaro ro kaka’da taoye ŋgye Lu rote ŋbelero, inye’do mänina gindi atane makye, Lu ka taoye koziro ondro nda kate ama eza owo ya? (Taeji ono orivoya a’do lidri ro voro.) 6 Ko inye! Ondro Lu ka’do gwo orivoya taŋgye ako, nda unina vure ’bädri ro opene eŋwanye ya? 7 Oko ondro ka’do taŋgyeako maro ka taŋgye Lu ro ka’dana ago ka a’do ’desi ndaro o’bane edrene ŋbelero ndra, tana e’di a drigba vure maro opena takozi’ba ronye niya? 8 Tana e’di nyàta ko mikye: “Mì’de màye taundi takado kikyi robe ya?” Endaro, lidri rukä ’da ma te ugu ma kicu si ekye mugu ta gi ’do ata! Apena vure ànyaro ’da oso se sibe oyene ronye. 9 Ka’do inye ama Yudai gibe kadopara ndrani Atrai drisi ya? I’do inye alona. Maka’da rote nja anjioko Yudai ndi Atrai be ojo rere, ànya cini orivoya mbara takozi ro zele. 10 Oso Taegyi kabe ata ronye ekye: “’Diaza alona i’do se orivoya taŋgye’ba ro, 11 ’diaza i’do tavouni’ba ro kode se kabe Lu uṛi. 12 Ànya cini kute ni Lu resi; ànya cini ye takozi te; ’diaza ye tase kado kote, ca gi ’di alodi aza. 13 Ata ànyaro orivoya twi ŋgaodo odraro be; koweoga koziro kereṛi ladra ànyaro drisi, ago ozionya koziro oso äṛi ini ro ronye, ka itwe ni kala ànyaro yasi; 14 ata ànyaro orivoya twi latriotri osoro be. 15 Ànya kayi oŋga ndriŋwa ’di ogane ago ufune; 16 vose ànya kayibe oyi kigyesi ànya kayi e’bena tandro ro ago perepere ro. 17 Ànya niyi liti taliatokpe ro ko 18 Ànya niyi ta Lu oro ro kpa ko.” 19 Ago yauono mä̀nite anjioko ŋga cini se Ota ya ka ata ànya se kayibe ori Ota zele ri, tana ŋgase cini lidri kabe megyegye oye tana ro drî na ritaza ago ezi ’bädri robe cu vureope Lu ro zele. 20 Tana a’ba ’diaza kote ŋgye Lu mile tase Ota kolebe oyena si; tase Ota kabe oyena anjioko ka lidri o’ba unine anjioko nda ye takozi te. 21 Oko yauono liti Lu ro ugu lidri o’baro ŋgye andivo ndaro be aka’date. Ota aza i’do se unina ndi ta ono oyene, Ota Musa ro ndi nebii robe kedretazevo ànyaro gica tana ro owo. 22 Lu ka lidri o’ba ŋgye taoma ànyaro Yesu Kristo ya si. Lu ka ta ono oyena ṛo vona se cini kabe taoma Kristo ya ri; tana a’do toto i’do alona, 23 ’dicini ye takozi te ago orivoya lozo ni ŋgaopa Lu ro resi. 24 Oko ŋgapäṛi teinye awi yauni Lu ro rosi a’ba vona cini te ŋgye nda be Kristo Yesu si, se kabe ànya o’ba dritairo. 25 Lu ozo nda te, tana kari ndaro se korobe si e’be lidri robe ta takozii ànyaro rota taoma ànyaro nda ya si. Nda ye ta ono te tana kaka’da taŋgye ndaro robe, tana tu kyeno ana ya nda orivoya yaiŋgyi be ago ndrevote takozii lidri ro drisi; 26 tana kaka’da robe tu yauono ya anjioko nda andivo orivoya taŋgye’ba yi ago nda kani ’dicini se kabe taoma Yesu ya o’bana ŋgye. 27 Ka’do inye, mä̀ŋgyina drî ndiya? I’do! Ago takaci tana se ono ro ni e’di ya? Inye’do tana màbe Ota oro ono roya? Hwa, oko tana màma ta be ono ro. 28 Tana mä̀nite anjioko a’ba lidri te ŋgye Lu be toto taoma si, ago ko tase Ota kabe ugu atana oyene si ayani. 29 Ka’do inye Lu toto Lu Yudai ro ayani ya? Inye’do nda ko kpa Lu Atrai roya? Endaro nda kpa orivoya Atrai ro. 30 Lu orivoya alodi, ago nda o’bana Yudai ’da ŋgye andivo ndaro be ta taoma ànyaro rosi, ago o’bana Atrai ’da ŋgye taoma ànyaro si. 31 Inye’do mà’do be taoma ono be mà te Ota ovo cowa ya? Hwa, i’do inye alona; vona ro mà Ota äti.
41 Ka’do inye, màtana ’bo gwo màkye e’di ta Abarayama täpi tu’de amaro ro rota ya? Tavousu ndaro e’diya? 2 Aba ondro a’ba Abarayama gwo ŋgye Lu be losi se nda koyebe si, nda a’dona ndi ŋga aza be driuŋgyine tana ro oko ko Lu mile, 3 taegyi ka ata ekye: “Abarayama matate Lu ya, ago ta taoma ndaro rota Lu ti nda te taŋgye’ba ro.” 4 ’Dise kabe losi oye ozo päläti ndaro te, oko andre ànya kote oso ŋgapäṛi ronye, ànya orivoya oso ŋgase nda usube ni ronye. 5 Oko ’dise kabe ruäti taoma ndaro dri, ko taoye ndaro dri, ago se kabe taoma Lu se kabe taenji’ba o’ba taŋgye’ba ro dri, taoma ndaro Lu ka otina ayani nda o’baza taŋgye’ba ro andivo ndaro be. 6 Ono ni tase Dawidi kusube se nda atate ta riyä mano aza se Lu tite taŋgye’ba ro rota, to ni ŋgase mano ana kabe oyena risi ekye: 7 “Ànya se e’be ànya te ta takozi ànya ro rota ni kado, se e’bete ta takozi rota kwoi! 8 ’Dise Opi go ru ta takozi naro kote ’duro ni kado.” 9 Inye’do riyä se Dawidi ata tana be ono toto ta ànya se alote ŋbiṛiro rota ayani ya? Ko inye! Kpa ta ànya se oloako ŋbiṛiro kai rota. Tana mäzite ni taegyi yasi ekye: “Abarayama matate Lu ya, ago ta taoma ndaro ro ta, Lu ti nda te taŋgye’ba ro.” 10 Ta ono a’dote itube ya? A’dote ṛo käti kode a’dote Abarayama oloŋbiṛiro vosi ya? A’dote käti, ko kovolesi. 11 Alo nda te kovolesi, ago oloŋbiṛiro ndaro taka’daro yi taka’daza anjioko ta taoma ndaro rota Lu ti nda te taŋgye’ba ro ṛo teinye nda oloako ŋbiṛiro. Ago ta’doro Abarayama orivoya täpi a’do tori voro ro ànya se cini kabe taoma Lu ya ri ago ànya se atite taŋgye’ba ro ana ri, alo ànya ca ko ŋbiṛiro owo. 12 Nda kpa orivoya täpi ànya se alote ŋbiṛiro ro, se ko toto olooloro ŋbiṛiro oko se kayi kpa ori taoma ro ori oso täpi amaro Abarayama koribe käti nda oloako ŋbiṛiro ronye. 13 Ondro Lu ko’ba tao’ba te Abarayama ndi zelevoi ndaro be ri ekye ’bädri ri a’done ndäri oko, nda yete inye, ko tana Abarayama ro Ota ndaro te, oko tana nda matate ago Lu ti nda te taŋgye’ba ro. 14 Ondro ka’do tase Lu ko’ba tao’ba be tana ro ozote ànya se kabe Ota oro ri, ’dooko taoma lidri rote takaciako ago tao’ba Lu rote takadoako. 15 Ota ka kyila Lu ro ezi, oko vose ota ako, ta ota oroako ro ṛo i’do kigye. 16 Ago änju tao’ba te taoma dri, tana ’dooko tao’ba ka’do robe ŋgapäṛi dritairo Lu ro ro zelevoi cini Abarayama ro ri, ko toto ànya se kayibe Ota oro ri, oko kpa ànya se kayibe taoma oso Abarayama koyebe ronye ri. Tana Abarayama a’do tori ro voro orivoya ni täpi ama cini ro; 17 oso taegyi kabe ata ronye ekye: “Ma’ba mi te täpi ro tu’dei amba ri.” Ago tao’ba orivoya kado mile Lu roya, se Abarayama komatabe kigye, ni Lu se kabe avo adri ago ’ba ŋgase ni ko a’done te a’done. 18 Abarayama matate ago ’bamite, ondro ŋgase abe ugu mio’ba tana ro ka’do ca i’do owo, ago ta ono ro nda a’dote täpi tu’dei amba ro. Kpa oso taegyi kabe ata ronye ekye: “Zelevoi miro a’dona ’da amba oso ’bi’bii ronye.” 19 Ndroa ndaro sa gica le oso kama alo (100) ronye oko, taoma ndaro a’do kote mbaraako nda kusu ta lomvo ndaro ro gica, se a’dote nja avo ro, ago Sara ni kote a’done ŋgwai be. 20 Nda e’be taoma ndaro kote, ago nda a’do kote wiriwiri ro tao’ba Lu ro tana ro, taoma ndaro ’ba nda te twi mbara be, ago nda ozo räṛu te Lu ri. 21 Nda mate endaro anjioko Lu orivoya mbara be ŋgase nda ko’ba tana be ono oyene. 22 Ono ni tase Abarayama, taoma si, “a’degwo nda otine taŋgye’ba ro Lu si owo.” 23 Ata gi, “ati nda be sina taŋgye’ba ro” ono egyi kote ndäri iṛe ayani. 24 Egyi ànya kpate ta amaro ta se alebe kpa otine taŋgye’ba ro, se kabe taoma nda se keŋga Yesu Opi amaro be ni avo yasi ana ya ri. 25 Tana ta takozi amaro rota ozo nda te odrane, ago eŋgate adri ya tana ama o’baza ŋgye Lu be.
51 Yauono a’ba ama te ŋgye Lu be taoma si, mà’dote liatokpe Lu be Opi amaro Yesu Kristo si. 2 Nda ezi ama te taoma si tai’dwero Lu ro ono unine, se màbe ori kigye yauono. Ago mà driuŋgyi mio’ba se màbe riyä Lu ro la’dona ono ya! 3 Ago mà kpa driuŋgyi rriti amaro ya, tana mäni ndi anjioko rriti ka yaiŋgyi ezi, 4 yaiŋgyi ka tadriole Lu ro ezi, ago tadriole ndaro ka mio’ba o’bani. 5 Mio’ba ono ’ba ama kote wiriwiri ro, tana Lu eda ŋgalu ndaro te ya amaro ya Tori Alokado si, se ni ŋgapäṛi Lu ro yi ämäri. 6 Tana ondro ama dri ’du mbaraako oko, Kristo drate takozi’bai ta tuse Lu konjibe ana si. 7 Orivoya rritiro mano aza ri odrane ’di taŋgye’ba rota. Kode mano aza olena azaya ndi endaro odrane mano kado ta. 8 Oko Lu ka’date ämäri anjioko nda lu ama tawi, ama gica takozi’bai oko Kristo drate ama ta! 9 Kari ndaro si yauono a’ba ama te ŋgye Lu be, ndrana ma’dote ruopa be nda si ni kyila Lu ro ri! 10 Ama orivoya kyila’baazii Lu ro, oko nda ’ba ama te bereazii ndaro odra Ŋgwa ndaro rosi. Yauono anjioko ama te bereazii Lu ro, para ndrana apa ama te adri Kristo rosi! 11 Ko gialo inye, oko mà riyä oye ta tase Lu koyebe Opi amaro Yesu Kristo si rota, yauono nda ’ba ama te bereazii Lu ro. 12 Takozi ikyite ’bädri ya mano alo si, ago takozi ndaro ezi odra te, tana si, odra larirute lidri cini beti toto ro dri tana ’dicini ye takozi te. 13 Takozi ṛo ’bädri ya teinye dri Ota ozoako; oko vose ota ako, ati oti takozi ro ko. 14 Oko ṛoni tu Adama rosi le tu Musa rosi odra miri lidri cini te, miri ànya se koye takozi ko liti se Adama koyebe kigyesi ota Lu ro oroako si kpa. Adama orivoya beti nda se ka oyebe ikyine ro. 15 Oko se ritu ono ojo ko rere, tana ŋgapäṛi teinye awi Lu ro laba ko takozi Adama ro ronye. Ṛo orivoya endaro anjioko lidri amba drate ta takozi mano alodi ana rota. Oko tai’dwero Lu ro orivoya parandra, ago ŋgapäṛi teinye awi ndaro kpa inye lidri amba ri tai’dwero mano alodi Yesu Kristo rosi. 16 Ago a’do toto orivoya lakole ŋgapäṛi Lu ro roya ndi takozi mano alo robe. Takozi oye mano alo rosi, vure “Taenji” ro ro opena ikyite, oko takozi amba vosi, ŋgapäṛi awi ikyite, “Ko taenji Be”! 17 Ṛo endaro anjioko takozi mano alo rosi odra eto ’dimiri te ta takozi mano alo ana rota. Oko tase parandra ni tase ayebe mano, Yesu Kristo si ana! Vona se cini kuruyi tai’dwero ndra Lu robe ago a’ba ànya te dritai ro ŋgye nda be mirinayi vo ni adri ya Kristo si. 18 Ka’do inye, oso takozi ’dialo rosi ape vure lidri cini rote ronye, kpa oso inye taoye taŋgye’ba alo rosi a’ba lidri cini te dritai ro ago ozo adri te ànyari. 19 Ago kpa oso lidri cini a’bate takozi’bai ro ta taoroako mano alo rosi ronye, kpa oso inye a’bana ànya cini ’da ŋgye Lu be ta taoro ro mano alo rosi. 20 Ota ikyite tana kiliti takozi oye robe; oko vose takozi kilitibe kigye, tai’dwero Lu ro litite ndra kigye. 21 Ka’do inye, kpa oso takozi kimiri ’di be odra si ronye, kpa oso inye tai’dwero Lu ro ka ’dimiri taŋgye si, ka ama ugu adri äduako re Yesu Kristo Opi amaro si.
61 ’Dooko, màtana gwo màkye e’di ya? Inye’do muguna ori gwo ’du takozi ya tana tai’dwero Lu ro kiliti robe ya? 2 Endaro ko inye! Màdrate takozi ri, ka’do inye muguna ori gwo ’du kigye eŋwanye ya? 3 Tana mini ṛote endaro ondro abapatisi ama te omora ama te Kristo Yesu be, abapatisi ama te olocite rumora odra ndaro roya. 4 Bapatisi amaro si, anjioko ase ama te nda be ago màla’do odra ndaro te, tana kpa oso eŋga Kristo teni avo yasi mbara para Täpi rosi ronye, kpa inye marina ndi adri to’di ya. 5 Tana ondro mà’dote troalo nda be odra si oso nda koyebe ronye, kpa oso inye mà’dona ’da troalo nda be eŋga si adri ya oso nda ronye. 6 Ago mä̀ni ndi anjioko a’do uku amaro äfute Kristo be taka ndaro dri, tana anjioko mbara takozi oye andivo amaro ro, utufute, tana ta’doro kote orine ämäri tona iyeäṛi ro takozi ri. 7 Tana ondro ’diaza kodrate, a’ba nda te dritai ro ni mbara takozi ro risi. 8 Ondro màdrate Kristo be, màmate anjioko marina kpa ’da nda be. 9 Tana mäni ndi anjioko eŋga Kristo teni avo yasi, ago ogo odrana ko alona, odra drikaca ako nda dri alona. 10 Ago ndi inye, tana nda drate, takozi mbaraako nda dri, ago yauono nda ka ori ndaro orina rumora ya Lu be. 11 Kpa oso inye, nyusu ta andivo amiro ro avo ro takozi ri oko lidriidriro rumora ya Lu be Kristo Yesu si. 12 Beṛo ko takozi ri a’done drikaca be tona lomvo oŋgwaoŋgwa amiro ono dri, tana ukyi miro ole andivo amiro ro ’da. 13 Beṛo ko ämiri telesi lomvo amiro ro ozone takozi ri takozi oyeza, oko nyozo andivo amiro Lu ri, oso ànya se olofote ni avo yasi le adri ya ronye, ago nyozo andivo amiro ṛo cu ndäri tase taŋgye ro oyeza. 14 Beṛo ko takozi ri a’done ’desiro ämidri; tana nyà ko ori ota zele oko tai’dwero Lu ro zele ayani. 15 ’Dooko, e’diya? Inye’do màye takozi ri, tana ama ko ota zele oko tai’dwero Lu ro zele ono owo ya? Ko inye! 16 Mìni ṛo endaro ondro ka’do nyòzo andivo amiro te iyeäṛi ronye ’diaza orone, endaro ami orivoya iyeäṛi ’desi se nyàbe orona ro, kode takozi ro se lofona odra, kode taoro ro, se o’bana ’di ŋgye Lu be. 17 Oko aro’boya ka’do Lu ri! Tana tu alo si ami orivoya iyeäṛii ro takozi ri, miro ta te ya cini amiro si taŋgye se usute ŋgaemba se miru be ono ya. 18 A’ba ami te dritai ro ni takozi ri ago nyà’dote iyeäṛii taŋgye ro. 19 (Ma ata kala tu cini rosi tana ta mbarako lomvo andivo amiro rota). Tu alo aza ya nyozo andivo amiro te cu iyeäṛii ro taundi ri ago takozi ri ta takozi oyero si. Kpa oso inye yauono beṛo andivo amiro ozone cu iyeäṛii ro taŋgye ri ta alokado ro ta. 20 Tuse ami be dri iyeäṛii takozi ro, ami orivoya dritai ro ni taŋgye risi. 21 Tase nyùsube ni ŋgase ami orivoya yauono driupiro tana ro yasi e’diya? Tase kefobe ni ŋga kai yasi ni odra! 22 Oko yauono a’ba ami te dritai ro ni takozi ri ago ami te orivoya iyeäṛii Lu ro. Ŋgase nyùsube anjioko andivo amiro ozona cu ndäri, ago takado se kefobe ni kigyesi ni adri äduako. 23 Tana päläti se takozi kabe ozona ni odra; oko ŋgapäṛi awi Lu ro ni adri äduako Kristo Yesu Opi amaro ya.
71 Endaro tase ma oyebe atane ono minina tana ndi, ädrupii maro, tana ami cini mini ta ota ro ndi. Ota ka lidri miri toto tu oriro ànyaro si. 2 Taka’dana anjioko, toko se, agyebe, embete ota si ago anyaro ri tu ori ro ndaro si, oko ondro nda kodra bete, ’dooko anya te dritai ro ni ota se kembe anya be ndäri ana yasi. 3 Kpa inye, ondro anya kurudrite mano aza be ’dooko ago anyaro dri orivoya lidri ro, äzina anya te taoye’ba ago drisi, oko ondro ago anyaro kodrate, ota voro anya orivoya dritai ro ye takozi ko ago drisi ago ondro anya kuru ago aza ca owo. 4 Ami kpa orivoya oso inye, ädrupii maro. Ta ota rosi, midra kpate tana ami ni telesi lomvo Kristo ro, ago yauono ami ni nda se eŋgate ni avo yasi ro tana ma’do robe kadoro ruindu Lu ri ya. 5 Tana ondro ka’do màrite oso a’do amaro lomvo ro voro, eteŋga takozi leme lomvo amaro ya te Ota se kabe losi oye ama lomvo si, ago màte ruindu odra ri oyena ayani. 6 Caoko, yauono ama orivoya dritai ro ni Ota ri, tana màdrate ŋgase kembe ama be kamba’bai ro ri. Minduru kote tona liti uku ota egyi egyi ro ya, oko te tase to’di Tori ro ri. 7 Ka’do inye, màtana ndi màkye, Ota andivo orivoya takozi yi ya? Ko inye! Oko Ota ’ba ma te takozi unine. Ondro aba ota kata ko ekye: “Mi’ba ya ko ŋga ’diaza rota,” aba mänina ko ta yao’ba ro nonye ono tana unine. 8 Oko Ota se ana si takozi usu kandrakado anyaro te yao’ba se cini ma ya ono drî na teŋgane. Ota ako takozi orivoya avo yi. 9 Sedri andivo maro lidriidriro ota ako owo, oko ondro ota kikyite oko, takozi adrite, 10 ago madrate. Ago ota se usu tana be kabe ni adri ezi ono, ta maro ta ezite odra ayani. 11 Takozi usu kandrakado iro te, ago ta ota rosi anya odo ma te ago fu ma te. 12 Ka’do inye, Ota andivo orivoya alokado, ago ota orivoya alokado, ŋgye ago kado. 13 Oko inye’do tase orivoya kado ono ’ba ma ni odrane ya? Ko inye! Takozi owo; anya ezi odra te mädri ŋgase kado si, tana aka’da takozi robe takozi ro. Ago ndi inye, ota si aka’da takozi te a’done koziekyero ndra. 14 Mänite anjioko Ota orivoya tori ro, oko ma orivoya mano oŋgwaoŋgwa ro yi, agyete iyeäṛi ro takozi ri. 15 Mäni tase mabe oyena ko, tana maye tase malebe oyene kote, oko maye ṛo tase ya maro osoro lomvoigye ayani vona ro. 16 Ondro ma tase male ko oyene oyena ayani, ’do ka’date anjioko male tadrite anjioko Ota orivoya kado. 17 Ago ma ko ni nda se kabe ŋga ono oyena owo; oko ni takozi se kabe ori ma ya owo. 18 Mänite anjioko takado ri ko ma ya, anjioko a’do lidri ro maro ya. Tana ole takado oyero gica orivoya ma ya, caoko ma mbaraako oyene. 19 Maye takado se malebe oyene kote, mago maye ṛo tase undiro male ko oyene ayani. 20 Ondro ma tase male ko oyene oyena, ’do ka’date anjioko ma kote ni ’dise kabe oyena owo, oko takozi se kabe ori ma ya ono owo. 21 Ago musuvote anjioko ota se ono orivoya losi oyevoya! Ondro malete tase orivoya kado oyene, tase orivoya kozi mabe sina manji toto ayani. 22 Ya yasi maro le ota Lu ro. 23 Oko mandre ota to aza te orivoya losi oyevoya lomvo maro ya, ota se kabe kyila oye ota se tauni drî maro ro kolebe be. Anya ka ma o’ba kamba’ba ro ota takozi ro se orivoya losi oyevoya lomvo maro ya ri. 24 Ma mano riyä ako yi! A’di opana ma gini lomvo se ka ugu ma o’ba odrane ono risi ya? 25 Aro’boya ka’do Lu ri, se ka ta ono oye Opi amaro Yesu Kristo si! Ono ni, taoye maro, modo maro si mäni ndi ruindune ota Lu ro ri tauni drî maro rosi, oko lomvo maro ka ruindu ota takozi ro ri.
81 Yauono vure i’do ànya se kabe ori rumora ya Kristo Yesu be lomvo. 2 Tana ota Tori ro se kabe adri ezi ämäri rumora Kristo Yesu be rosi, ’ba ma te a’done dritai ro ni ota takozi ndi odra be ro yasi. 3 Tase Ota ni ko oyene, tana a’do lomvo voro mbaraako si, Lu yete. Nda pe vure takozi se lomvo lidri ro ya te, Ŋgwa modo ndaro ro ezo si, se ikyite lomvo be oso lomvo takozi amba be lidri ro ronye, takozi onane. 4 Lu ye ta ono te tana taŋgye se Ota kolebe ande robe ama se kabe ori Tori voro ya, ago ko a’do lomvo ro voro. 5 Ànya se kabe ori tase a’do lomvo voro ànyaro kabe itina ànyari si, tauni drî ànyaro ro iritate ŋgase a’do lomvo ro kabe olena si. Ànya se kabe ori tase Tori kabe itina ànyari si, tauni drî ànyaro ro iritate tase Tori kolebe si. 6 ’Di ritane a’do lomvo ro voro ka odra ezi, ’di ritane Tori si ka adri ndi taliatokpe be ezi. 7 Lidri ka a’do kyila’baazi ro Lu ri ondro a’do lomvo ro ndaro kate ni nda rita owo; tana nda ro ota Lu ro ko, ago ṛo endaro nda ni kote anya orone. 8 Ànya se kabe a’do lomvo voro ànyaro orona ayani tana ni ko Lu usine. 9 Oko mìri ko tase a’do lomvo amiro voro kabe itina voro, oko miri tase Tori kabe itina ämiri voro ayani, ondro endaro Tori Lu ro ka ndi ori ami ya owo. Nda se teinye Tori Kristo ro ako nda i’do ndaro. 10 Oko ondro Kristo ka ori ami ya, Tori orivoya ni adri amiro, tana a’ba ami te ŋgye Lu be, ondro lomvo amiro ka oye ca odrane ta takozi rota owo. 11 Ondro Tori Lu, se keŋga Yesu be ni avo yasi ro ka ori ami ya, ’dooko nda se keŋga Kristo be ni avo yasi ozona adri kpa lomvo oŋgwaoŋgwa amiro ya Tori ndaro se kabe ori ami ya yauono si. 12 Ka’do inye, ädrupii maro, ama orivoya kama be, oko ko ämäri orine oso lomvo amaro kolebe orine voro. 13 Tana ondro nyà ori a’do lomvo amiro ro voro, nyà oye ṛo odrane; oko ondro Tori si mi’ba lomvo amiro takozi oyero kodrate, mirina ndi. 14 Ànya se elepete Tori Lu rosi orivoya Ŋgwà Lu ro. 15 Tana Tori se Lu kozobe ämiri ’ba ami ko iyeäṛi ro ago ’ba ami ko a’done turi ro; oko, Tori kani ami o’ba ŋgwà ro Lu ri, ago mbara Tori rosi mà driayo Lu ri màkye: “Täpi! Täpi maro!” 16 Tori Lu ro dro’be andivo ndaro te tori amaro be tazevoedre si anjioko ama orivoya ŋgwà Lu ro. 17 Ago ama be te orivoya ŋgwà Lu ro ono, mà’dona ndi drimbi se nda ketabe lidri ndaro ri be, ago mà’dona kpa drimbi uruazi ro Kristo be ŋgase Lu ketabe ndäri ta; tana ondro mà ugu rueza Kristo ro la’dona màla’dona räṛu ’desi ndaro ro kpa. 18 Mandrebe rueza se màbe rueza tu yauono si ono änina ko ojone alona liŋgyi se oyebe lofone ämäri be. 19 Ŋga cini o’bao’baro kayi ŋgwai Lu ro lofona kote ya cini si. 20 Tana ŋga o’bao’ba ro cini ape vure na te ta anyaro ijene, oko ko ole modo anyaro rosi, oko tana Lu ’ba tana ni a’done inye. Caoko mio’ba drigba orivoya 21 anjioko ŋga o’bao’baro andivona tu alo si oko onjina ’da dritai ro ni iyeäṛi anyaro oŋgwaro yasi ago la’dona riyä liŋgyiekye dritai ro ŋgwà Lu ro ro ’da. 22 Tana mä̀nite anjioko tu yauono si ŋga o’bao’baro cini ka leri lomvo luwu be, oso luwu ŋgwa utiro ronye. 23 Oko ko ŋga o’bao’baro ka toto ni leri, oko ama se Tori be ŋgapäṛi käti Lu ro ronye mà kpa leri ya andivo amaro roya ondro mà te ta kote Lu ri ama o’baza ŋgwà ndaro ro ago mà mio’ba amaro o’ba a’done cu dritai ro. 24 Tana mio’ba si apa ama te, oko ondro mà ŋgase màbe mio’ba tana ro ondreondre ’dooko ’do kote mio’ba endaro yi. Tana a’di ka mio’ba ni ŋga aza se nda kondrebe ta ya? 25 Oko ondro mà mio’ba ŋgase mandre ko ta, mà anya kote yaiŋgyi si. 26 Kpa oso inye Tori ka ikyi ama opane, ama orivoya mbaraako. Tana mäni kote mätune oso se beṛo ämäri mätune ronye; Tori andivo kani ata Lu be ta amaro ta leri si se ata ni kote tazevona edrene. 27 Ago Lu, se kabe voondre le ya amaro ya, nda ni tavousu Tori rote, tana Tori ka ata Lu be ta lidri ndaro rota oso ole ndaro ronye. 28 Mänite anjioko ŋga cini yasi Lu ka losi oye takado ta ànya se kabe nda lu be, ànya se nda kuzibe oso ta ndaro ronye iyi. 29 Ànya se Lu njite ṛo nja nda di kpate to a’done oso Ŋgwa ndaro ronye, tana anjioko Ŋgwa ka’do robe käti ädrupii amba lako. 30 Ka’do inye ànya se Lu dite to, nda zite, ago ànya se nda zite, nda ’bate ŋgye andivo ndaro be, ago nda la’do räṛu ’desi ndaro te ànya yibe. 31 Ka’do inye, màtana ’bo gwo ta e’diro ta ono ta ya? Ondro Lu orivoya ama resi, a’di edrena ni ŋbi ama mile ya? 32 Nda se eta Ŋgwa modo ndaro ro kote, oko ozo nda te cu ämäri! Nda ozo Ŋgwa ndaro te, inye’do nda ozona ŋga cini ṛo ko ämäri teinye awi ya? 33 A’di kicuna lidri onjionji Lu ro niya? Lu andivona ka’da ànya ko taenji’ba ro! 34 Ka’do inye, a’di opena vure ànyaro niya? Ṛo ko Kristo Yesu, se drate, kode, se eŋgate adri ya ago rite drígwo Lu ro yasi, se kabe taeji nda si ama ta ono! 35 Ka’do inye, a’di unina ni ama lewene ni ŋgalu Kristo ro resi ya? Inye’do rriti, kode ori gboroto si, kode rueza kode täbiri kode ati’ba kode ozionya kode odra ya? 36 Oso taegyi kabe ata ronye ekye: “Ta miro ta ama orivoya ’ditoga odra roya ṛo tu cini si; aye ama te oso timele se abe ugu oyi ufune ronye.” 37 Caoko, ŋga cini kwoi yasi ama orivoya para ŋgaopeṛe be nda se kulu ama be ono si! 38 Tana mäni ṛote endaro anjioko ŋga aza unina ko ama lewene ni ŋgalu ndaro resi; ca odra kode adri, ca malaika ca ’dimiri’bai aza vo’buyakuru ro kode mbarà, ca ŋgase yauono ca ŋgase mileya, 39 ca ’bädri kurusi kode ’bädri vurusi ŋga aza i’do ŋga o’bao’baro cini lakosi a’done mbara be ama lewene ni ŋgalu Lu ro se orivoya amaro Kristo Yesu Opi amaro si ono resi.
91 Ma ugu taŋgye ata, ma orivoya Kristo ro ago maga kowe ko. Tavousu maro se imirite Tori Alokado si, ka kpa tazevo edre märi anjioko maga kowe ko, 2 ma ata makye tusu maro orivoya ’desi, luwu okyeako orivoya ya maro ya 3 ta lidri maro rota, ’didiri modo maro rota uti yasi! Tana ta ànyaro ta male ndi andivo maro ri orine latri Lu ro zele lewelewe ro ni Kristo resi. 4 Ànya orivoya lidri Lu ro; nda ’ba ànya te ŋgwà ndaro ro ago ka’da ’desi ndaro te ànyari; nda ’ba tao’baro ndaro te ànya be; ago ozo Ota te ànyari; ànya orivoya liti ŋgye mätu oyero be; ànya usuyi tao’ba Lu rote, 5 ànya efoyi ni zutui likuekye Ebere’ba ro yasi; ago Kristo oso a’do lomvo si voro, ni beti ànyaro yasi. Ka’do inye, Lu se kabe ni ŋga cini miri ono ka’do räṛuräṛu ro äduako. Amen. 6 Ma ko ugu ata makye tao’ba Lu ro tana kyete; tana lidri cini Yisaraele ro ko orivoya lidri Lu ro. 7 Ca zelevoi cini Abarayama ro ko ŋgwà Lu ro. Lu atate Abarayama ri ekye: “Yisika si anjioko nya’dona ’da zelevoi se ma’ba tana be miri ono be.” 8 Se takacina anjioko ŋgwà se ätibe liti ’di utiro voro orivoya ko ŋgwà Lu ro; oko ŋgwà se ätite tao’ba Lu ro ronye ni zelevoi ŋgye yi. 9 Tana tao’ba Lu ro a’bate ata kwoi si ekye: “Tu ŋgyena si oko, megona ’da ago Sara utina ŋgwaagoro ’da.” 10 Ago ko toto alo ono, oko ŋgwàagoro ritu Rebeka ro a’dote täpi alodi be, se ni zutu amaro Yisika. 11 Oko ta’doro anji ŋgwa alodi ro ko’ba ta tao’baro ro Lu modo ro robe osane mina ya, Lu atate anyari ekye: “Kayoŋwa induruna ’da kovolesi ri.” 12 Nda ata tase ono te teinye ànya utiako, teinye ànya yeyi ŋga aza ca kado kode kozi dri ko, ago ŋgaonji Lu ro änju zevona te läzi ndaro dri, ago ko ŋga aza se ànya koyete dri. 13 Oso taegyi kabe ata ronye ekye: “Mulu Yakoba te, oko ya maro osete Esau lomvo.” 14 Inye’do màtana ndi màkye Lu orivoya taŋgyeako ya? I’do inye. 15 Tana nda atate Musa ri ekye: “Ma’dona ’da yauni be ’dise aza malebe ri; ago ma’dona ’da yai’dwe be ’dise malebe ri.” 16 Ka’do inye, ŋga cini ätirute, ko tase lidri kabe olena oyena dri, oko toto yauni Lu ro dri ayani. 17 Tana taegyi atate ’bädri’ba Ezipeto ro ri ekye: “Ma’ba mi te ’bädri’ba ro tana maye losi robe mi si, mbara maro ka’daza ago liku maro lariza ’bädri cini yasi.” 18 Ka’do inye, Lu orivoya yauni be ’diaza se nda kabe olena ri, ago nda kani ’diaza se nda kolebe o’bane taeriako o’bana. 19 Oko alo amiro atana ’da märi ekye: “Ondro ono ka’do gindi inye, Lu unina taenji usune ’diaza be eŋwanye ya?” A’di lagana ole ndaro zo niya? 20 Oko mi orivoya a’di owo ya, lidri, ogone tadri Lu ro ozane ya? Lakaza ludri ro unina ko obe’ba se kobe anya be ejine ekye: “Mibe ma te nonye etaya?” 21 Caoko, mano se kabe lakaza obe nda orivoya taŋgye be losi oyene ludri si oso nda kolebe ronye, ago obena lakaza ritu ndi ni duŋguṛu alodi ludri ro yasi, alodi aza losi lämu’du aza ta ago azana ta losi menyeŋwa aza rota. 22 Endaro Lu ye ta kpate oso inye. Nda lete kyila ndaro ka’dane ago mbara ndaro o’bane unine. Oko nda a’dote yauni amba be ugu yaiŋgyivoya ta ànya se kyila ndaro kabe a’do sina rota, se te ṛo tufune ono. 23 Ago nda le kpate ’desi ndra ndaro ka’dane se edate ama se yauni ndaro zele ono dri, ama se nda edete ’desi ndaro urune ono. 24 Tana ama orivoya lidri se nda kuzibe owo, ko toto ni Yudai lakosi oko kpa ni Atrai lakosi. 25 Ono ni tase nda katabe buku Osea roya owo ekye: “Lidri se ko orivoya lidri maro mäzina ’da ‘Lidri Maro.’ Tu’de se mulu kote ana mäzina ’da ‘’Dise Mulu Tawi.’ 26 Ago vo modo gi se ititabe ànyari kigye ekye: ‘Ami ko lidri maro’ lau äzina ànya ’da ŋgwai Lu lidriidriro ro.” 27 Ago Yesaya atate ta Yisaraele rota ekye: “Ondro lidri Yisaraele ro ka’do gica amba oso siŋgwa gyi’desi kala ronye, caoko toto fereŋwa ànyaro apana ’da; 28 tana Opi ondena vure ndaro ’bädri be ’da ndriŋwa ago tiṛi.” 29 Ndi oso Yesaya katabe kyeno ronye ekye: “Ondro aba Opi Mbaraekye ke’be zelevoi aza ko ämäri, aba mà’dona ndi oso Sodomo ronye, mà’dona ndi oso Gomora ronye.” 30 Ago ma ata makye Atrai, se kojoyi kote andivo ànyaro o’bane ŋgye Lu be, a’bate ŋgye nda be taoma si; 31 oko lidri Lu ro, se kabe ugu ota uṛi se ekye o’bana iyi ni ŋgye Lu be ono, usuyi anya kote. 32 Usuyi kote etaya? Tana ànya ’bayi mi kote taoma dri oko ’bayi mi te tase kayibe oyena dri ayani. Ago ànya ugunayi pälite kuni ugu päli ro drisi 33 se taegyi kabe ata ronye ekye: “Mindre, ma’ba kuni te Zaiona ya o’bana lidri ’da päline, kuni se o’bana ànya ’da o’dene owo. Oko nda se kabe taoma nda ya a’dona kote driupiro.”
101 Ädrupii maro, ole ya maro ro ndi mätu maro Lu ri ta Yisaraele’bai rota ni anjioko apa ànya robe! 2 Mäni ndi tana itine ämiri endaro, anjioko ànya ozoyi iyi ndi Lu ri mbara, oko ruozo ànyaro änju kote tauni endaro dri. 3 Ànya niyi liti se Lu kabe lidri o’ba ŋgye andivo ndaro be tazevona ko, ago ojoyite taoye andivo ànyaro ro ka’dane ayani; ago ànya logoyi andivo ànyaro kote liti Lu ro se nda ka ugu lidri o’babe sina ŋgye ri. 4 Tana Kristo ezi Ota te ondena ya, se anjioko ’dicini se kabe taoma a’bate ṛo ŋgye Lu be. 5 Musa egyi ta ono te ta ’di o’baro ŋgye Lu be ugu Ota oro si tana ro ekye: “Nda se kabe tase Ota kabe atana oro orina ndi.” 6 Oko tase taegyi kabe atana ta ’di o’baro ŋgye Lu be taoma si orivoya ni ono ekye: “Miri ko andivo miro ejine mikye, a’di oyina ni vo’buyakuru ya ya?” (Se takacina ni Kristo ezine vuru). 7 Kpa ko miri ta ejine mikye: “A’di ocina ni vuru le ’bädri vurusi ya ya?” (Se takacina ni, Kristo lofone ni avo ya). 8 Tase anya kabe atana ni ono ekye: “Lazo Lu ro orivoya loto mire, kala miro ya ago ya miro ya,” se orivoya ni, lazo taoma se màbe opena ro. 9 Ondro nyeṛo tate kala miro si mikye Yesu orivoya Opi yi ago mima ndi ya miro ya mikye Lu eŋga nda teni avo yasi, apana mi ndi. 10 Tana taoma amaro si anjioko a’ba ama te ŋgye Lu be; taeṛo amaro si anjioko apa ama te. 11 Taegyi ka ata ekye: “Nda se kabe taoma nda ya a’dona ko driupi ro.” 12 Ono ṛo tana ’dicini, tana a’do toto i’do lakole Yudai ro ndi Atrai be roya; Lu orivoya Opi alodi ’dicini ro ago ’dise cini kabe nda uzi nda ka äṛuna amba. 13 Oso taegyi kabe ata ronye ekye: “Vona cini se kabe Opi uzi ta ŋgaopa rota apana ndi.” 14 Oko ànya uninayi nda uzine eŋgwanye ta ŋgaopa rota ondro ànya komayi ta kote ya? Ago ànya uninayi taomane eŋwanye ondro ànya keriyi lazo kote ya? Ago ànya uninayi taerine eŋwanye ondro ape lazo kote ya? 15 Ago apena lazo eŋwanye ondro azo lazo’bai kote ya? Oso taegyi kabe ata ronye ekye: “Ikyi lazo’bai se kabe eziikyi lazokado be ro orivoya ta liŋgyiekye yi!” 16 Toto azaka ànyaro ru Lazokado ni, Yesaya andivo atate ekye: “Opi, a’di ma ni lazo amaro ya ya?” 17 Ka’do inye taoma ka ikyi ni lazo erivoya, ago lazo ka ikyi ugu Kristo ope si. 18 Oko ma ta eji makye: Inye’do gindi endaro ànya eriyi lazo ṛo ko ya? Ànya eriyite tana oso taegyi kabe ata ronye ekye: “Uwi ata ànyaro ro sate ’bädri cini yasi; ata ànyaro sate ädu ’bädri roya.” 19 Meji tate to’di makye: Inye’do lidri Yisaraele ro ni ta ṛo ko ya? Musa andivona zatadrite ṛo kyeno ekye: “Mayena ta ndi ’dise ko tu’de rosi lidri maro o’baza yaoko ro tu’de se tauniako si ma’bana lidri maro ’da kyilaro.” 20 Yesaya atate turiako si ekye: “Ànya se uguyi ma uṛi ko usuyi ma te maka’darute ànya se uguyi taeji kote ta maro ta ri.” 21 Oko ta Yisaraele rota nda ka ata ekye: “Tu cini meŋga drí maro te lidri taoroako ndi ogboogbo robe uruza.”
111 Ma taeji makye: Inye’do Lu ga lidri modo ndaro ro tezo ya? Endaro i’do inye! Ma andivo orivoya Yisaraele’ba yi, zelevo Abarayama ro, ’di ’bakala Benjamina ro ro. 2 Lu ga lidri ndaro ko tezo, se nda konjibe ṛoni etosi ono, mini tase taegyi kabe atana ni vose Eliya eji Lu be Yisaraele lomvo rota se ekye: 3 “Opi, ànya tufuyi nebii miro te ago togayi voi tori oloro miro te riya; e’bete toto alodi ma, ago ànya kayi ugu ruutri ma ufune.” 4 Lu zatadri ndaro te eŋwanye ya? “Meta lidri kutu njidrieri (7,000) te andivo maro ri se mätuyi lu awi Bala kote.” 5 Kpa oso inye yauono; oti giṛiŋwa ànya se Lu konjibe tai’dwero ndaro si ro orivoya. 6 Ŋgaonji ndaro änjute tai’dwero ndaro dri, ko tase ànya koyebe dri. Tana ondro ka’do tai’dwero Lu ro änju gwo tase lidri kabe oyena dri, ’dooko yauni ndaro a’dona ko tai’dwero endaro yi 7 ’Do eŋwanye ya? Lidri Yisaraele ro usuyi ŋgase kayibe ugu uṛina kote. Toto gboko giṛiŋwa se Lu konjibe usute ni; ago anjokona a’dote tuṛu ro läzi Lu ro eriako. 8 Oso taegyi kabe ata ronye ekye: “Lu ’ba tauni drî ndi ya ànyaro robe te a’done tauniako, gile tu ono si ono ànya niyi ko voondrene kode ta erine.” 9 Ago Dawidi ekye: “Mi’ba karamai ànyaro kuru ànya ago ka’do abari ro ànyari; mi’ba ànya kolo’deyi ago eza ànya. 10 Mi’ba mi ànyaro kuni tana ànya ka’doyi robe voondreako; ago mi’ba ànya keŋgoru rriti ànyaro zele tu cini si”. 11 ’Dooko ma taeji makye: Ondro Yudai käpäliyite oko, inye’do utufu ànya gindi ya? Ko inye! Tana ànya yeyi takozi te, ŋgaoparo ikyite Atrai ri, ko’ba Yudai robe a’done yaoko be ànya be. 12 Takozi Yudai ro ezi äṛu ’desi te ’bädri ri, ago o’de ànyaro ezi äṛu ’desi te Atrai ri. Ka’do inye, äṛu a’dona te ndra ondro oti Yudai ro olocite kpeye kigye owo. 13 Ma ugu ata yauono ämiri Atrai: oso mabe orivoya ni lazo’ba Atrai ro ono ronye, ma’dona ndi driuŋgyi be losi maro ya. 14 Kode azaya ma’ba lidri beti modo maro ro robe yaoko be, ago ma’do robe mbara be rukä ànyaro opane. 15 Tana ondro Lu koga ànya tezo oko, otoza lidri teni kyila’baazii Lu ro ro a’done bereazii ndaro ro. Äru ànya te oko, ’dooko te e’di a’dona gwo ya? Adri a’dona gwo avo ri! 16 Ondro kye’begye käti ambata ro ozote Lu ri, ’dooko duŋguṛuna kpate orivoya cu ndaro; ago ondro pajii ce ro ozote Lu ri; gwoṛii kpate orivoya ndaro. 17 Rukä gwoṛii ice ido ro ro se ikyi’dibe kyi’di ro aŋgote vuru, ago gwoṛi ice ido ro vocowa ro ro ikicute lomvoigye. Ami Atrai nyàlaba oso ice ido ro ro se vocowaro ono ronye, ago yauono nyà ŋgadriamba ice ido ro ro se ikyi’dibe kyi’di ro la’dona. 18 Ka’do inye, beṛo ko ämiri ànya se aŋgote oso gwoṛii ronye mawone. Minina a’dona driuŋgyi be eŋwanye ya? Ami orivoya gwoṛi yi, nyà ko ni pajii äti, pajii kayi ni ami äti. 19 Oko nyàtana ’da mikye: “Owo, oko gwoṛii aŋgote vuru, vo ozoza märi.” 20 ’Do orivoya endaro. Aŋgo ànya te vuru tana ànya mayi kote, nyà ori tana mima ta yi. Oko nyà’do ko driuŋgyi be tana ro, nya’do turi be. 21 Lu e’be Yudai kote ezaako, se ṛo orivoya gwoṛi modo yi vo dri, inye’do nyusube nda e’bena ami ndi ya? 22 Noŋwa màndre takado ndi siomba Lu robe orivoya. Nda orivoya siomba be ànya se lo’deyite ri, oko takado be ämiri, ondro mìri ndi ’du takado ndaro ya owo. Oko ondro mìri kote, aŋgona ami kpa vuru. 23 Ago ondro Yudai ke’beyi taomaako ànyaro te, ago ologona ànya ’da vose ànya ka’do be kigye ya, tana Lu orivoya mbara be ’do oyene. 24 Ami Atrai nyàlaba oso gwoṛi ice ido ro ro vocowaro ronye aŋgote vuru, ago toni gwoṛi modo risi, änjute ice ido ro ikyi’dibe kyi’di dri; Yudai laba oso ice se ikyi’di be kyi’di ono ronye, ago a’dona ndi pari rritiako Lu ri gwoṛii se aŋgobe vuru ogo kicune ice modo ànyaro ro drisi. 25 Taŋgye ndrwi orivoya, ädrupii maro, se male ämiri unine, se lagana ami ni tavousu ya mikye iyi orivoya tavouni’bai. Anjioko ni taeriako lidri Yisaraele ro ro se ko orivoya ’duro, oko okyena’da gialo andena oti Atrai se kabe ikyi Lu re ro kpeye lutu. 26 Ago apana vo Yisaraele cini ro ’da. Oso taegyi kabe ata ronye ekye: “Opa’ba ikyina ’da ni Zaiona ya ago anana takozi cini ’da ni zelevoi Yakoba ro yasi. 27 Ma’bana tao’baro ono ’da ànya be ondro mana takozii ànyaro te zwi owo.” 28 Tana ànya gayi Lazokado tezo. Yudai orivoya Kyila’baazii Lu ro ta ami Atrai rota. Oko tana ta ŋgaonji Lu ro rota, ànya orivoya bereazii ndaro ta zutui ànyaro rota. 29 Lu läpi drî ndaro kote ta ’dise nda konjibe ago käṛube rota. 30 Ago ami Atrai, kyeno mìro Lu kote, oko yauono nyùsu yauni Lu rote tana Yudai royi ta kote. 31 Kpa oso inye, tana yauni se nyùsube ono si, Yudai yauono royi Lu kote tana anjioko ànya ka’do robe kpa yauni Lu ro be. 32 Tana Lu ’ba lidri cini te kamba’bai taoroako ro, tana nda kaka’da yauni ndaro robe ànya cini ri. 33 Ŋgadriamba Lu ro para! Tavouni ndaro ndi tauni be orivoya gyuru! A’di unina ni taora ndaro tazevona edrene ya? A’di unina ni taoye ndaro unine ya? 34 Oso taegyi kabe ata ronye ekye: “A’di ni tauni drî Opi ro ro niya? A’di ni mbara be miomba ozone ndäri ya? 35 A’di ozo ŋga ni ndäri, nda kologo vona robe ya?” 36 Tana ŋga cini a’bate nda si, ago ŋga cini ka ori nda si ago ndäri. Räṛu ka’do Lu ri äduako. Amen.
121 Ka’do inye, ädrupii maro tana ta yauni para Lu ro ämäri rota, ma rulo’ba ämiri: Nyozo andivo amiro ŋga lidriidriro oloro ronye Lu ri, alokado ago tana ri ugu nda usine usi, ono ni mätu se endaro ämiri ozone owo. 2 Mi’ba taoye andivo amiro ro ko tadriolene taoye ’bädri ono robe, oko mi’ba Lu kotoza ami le ya ya tauni drî amiro ro tozana si kpeye. ’Dooko nyà’dona ndi mbara be ole Lu ro unine, ŋgase orivoya kado ago tana kusi nda be ago orivoya wäṛiro. 3 Ago ta yauni se Lu kozobe märi rota ma ata ami cini ri: Nyusutavo ta andivo amiro ro ko ndrani se beṛo ämiri usune ri. Oko nyà’do ŋgo’bo tavousu amiro ya ago mipe vure andivo amiro ro oso a’do taoma ro se Lu kozobe ämiri ro voro. 4 Ama orivoya ŋga amba be lomvo alodi ya, ago ŋgase cini kwoi kayi losi toto oye. 5 Kpa oso inye, ama ca orivoya amba, ama orivoya lomvo alodi yi rudro’be Kristo be si, ago odro’be ama cini te azi be oso ŋga lomvo ro toto lomvo alo ro ronye. 6 Ka’do inye, ämäri losi oyene ŋgapäṛi se toto Lu kozobe ämäri tai’dwero ndaro si ono voro. Ondro ka’do ŋgapäṛi amaro orivoya ata Lu ro ope, beṛo ämäri oyene taoma se ama be sina si; 7 ondro orivoya ruinduza, beṛo ämäri ruindune; ondro orivoya ŋgaembaza, beṛo ämäri ŋgaembane; 8 ondro orivoya agoago ozoza azii ri, beṛo ämäri oyene inye. Nda se kabe ŋga la’do azii be beṛo oyene ŋgalu si; nda se drikaca be beṛo losi oyene mbarasi; nda se kabe takado oye azii ri beṛo oyene riyä si. 9 Beṛo ŋgalu ri cu a’done kadoro. Ya amiro koso ŋgakozi lomvo. Nyelebe tase kadoro lomvo. 10 Nyulu azi kadoro Kristo’ba ädrupi ro ronye, nyà’do nja taoro ka’dane azi ri. 11 Mìye losi mbarasi ago nyà’do ko tovo ro. Nyinduru Opi ri ya ŋgalu amba be si. 12 Mio’ba amiro ko’ba ami riyäro, nyà’do yaiŋgyi be rriti amiro ya, ago nyämätu tu cini si. 13 Nyàla’do ŋga amiro Kristo’ba azi amiro lemeri be be, ago miru atrai ’bai amiro ya. 14 Nyeji Lu ànya se kabe ami eza ta, nyeji nda ànya äṛune äṛu ko otrine otri. 15 Nyà’do yai’dwesi ànya se yai’dwesi be, nyili ànya se kabe liyi be. 16 Mìri azi be ya alo si. Nyà’do ko driuŋgyi be, oko nyologo ami vuru kama se vuru oyene, nyusutavo ko mikye iyi tavouni’bai. 17 Ondro ’diaza koye takozi te miri, nyologo votaro ko ndäri takozi oyesi. Nyojo tase ’dicini kabe ondrena a’done kadoro ’do oyene ayani. 18 Miye ŋga cini se kogobe mi resi se o’bana mi ndi orine rritiako liatokpero ’dicini be iyi ayani. 19 Nyòlogo vo takozi ro ko alona, bereazii maro, oko mì’ba kyila Lu ro kologo vona ni. Tana taegyi atate ekye: “Mologona votaro ni, mologona ’da, Opi kani ata nonye.” 20 Oko oso taegyi katabe ronye ekye: “Ondro kyila’baazi miro orivoya täbiri ro, nyozo ŋgaonya ndäri, ondro nda orivoya gyilu be nyozo umvune ndäri, tana ugu tase ono oyene si mi’bana nda ndi a’done driupiro.” 21 Mi’ba takozi kope mi ko ṛe; oko mipe takozi ayani takado si.
131 Beṛo ’dicini ri drikaca miri ro orone, tana drikaca aza a’do ṛo ko ole Lu ro ako, ago drikaca’bai se kabe a’do ono a’bate Lu si. 2 Nda se kabe ogbo drikaca se kabe ugu a’do be ka ogbo tase Lu korabe be, ago ’dise kabe oyena inye ezina vure ndi andivo ndaro dri. 3 Tana ’dise kabe takado oye ko a’done turi ro ni ’dimiri’bai ri, oko ànya se kabe takozi oye ayani. Inye’do mile ko a’done turi ro ni ’dise drikaca be ri ya? Ka’do inye dia miye tase kado ago nda räṛuna mi ’da. 4 Tana nda orivoya ruindu’ba Lu ro ka ugu losi oye takado modo amiro ro ta. Oko ondro nya takozi oye, aba nya’do ri turi ro ni ndäri, tana mbara ndaro ’dieza ro ṛo orivoya endaro. Nda orivoya ruindu’ba Lu ro ago ka taezaro Lu ro oye ànya se kabe takozi oye lomvo. 5 Tana ta’doro beṛo ämiri drikaca’bai orone, ko gialo kyila Lu ro tana ro, oko kpa ta ya rota. 6 ’Doni tase nyàbe parata driutwero ozona owo, tana drikaca’bai ka ugu losi oye Lu ri ondro kondeyi kama ànyaro te owo. 7 Ka’do inye, nyozo ŋgase sibe miri ozone ànyari, nyozo ŋga driutwero ni ŋga modo miro ro yasi, ago nyaka’da taoro ago miro ànya cini. 8 Nyà’do ko yuŋgu ’diaza robe, kama se miri oyene gialo azi lune ayani. Nda se kabe oyena nonye ro ota te. 9 Ota ekye: “Miye ta ko toko kode ago drisi; mifu läfu ko; nyukugu ŋga ko, mi’ba ya ko ŋga ’diaza rota,” tase cini kwoi, ndi azakana be aṛikalana te ota aloro ekye: “Nyulu oriazi miro oso nyulu andivo miro be ronye.” 10 Ondro nyulu ’diaza te minina ko ŋgakozi oyene ndäri alona, ’di lu anjioko ota cini orone. 11 Beṛo ämiri ono oyene, tana mini ndi anjioko tu esate ämiri mi upiza ni u’du yasi. Tana yauono tu ama oparo esate ti, ndra ni tuse käti mama ta be ri. 12 Ŋgäkyi lävute para voiwi te orivoya lototi. Mì’de mè’be ŋgase vouni ro oyena, ago mì’de märu lakaza kyila oyero kyila oyeza ŋgaeyi ya. 13 Mì’de màye ta kadoro, oso lidri se kabe ori ŋgaeyi ya kitu si ronye, ko riyä kozi ’ditufu wa si rosi, ko ronyi oye si kode ata kozi ata si ugu kyila oye si kode yaoko o’ba si. 14 Oko miru lakaza cini kyila ro Opi Yesu Kristo ro, miletadri ko ole lomvo miro ro se koziro ono be.
141 Miru ’dise orivoya mbaraako taoma ya, oko nyawasa kala ko nda be ta tavousui modo ndaro rota. 2 Taoma ’dialo ro le ndäri ŋga cini onyane, oko ’dise orivoya mbaraako taoma ya nya gi toto agba ayani. 3 ’Dise kabe ŋga cini onya ko ’dise nya be ko mawone; ago nda se kabe toto agba onya ko vure nda se kabe ŋga cini onya ro opene; tana Lu ru nda te. 4 Mi a’di owo vure ruindu’ba ’diaza ro ro opene ya? ’Desi modo ndaro ro atana ta ndaro ni kode nda koyena kado kode tape nda te. Ago nda oyena ’da kado, tana Opi orivoya mbara be nda o’bane oyene kado. 5 ’Dialo kabe tavousu anjioko u’du aza orivoya para ndrani azi drisi, oko ’diaza ka kpa tavousu anjioko u’du cini ojo rere. Beṛo ’dialo alo ri tavousune kadoro tauni drî modo ndaro rosi. 6 Nda se kabe tavousu ndra ta u’du aza rota ka oyena inye Opi oroza; nda se kabe ŋga cini onya ka oyena inye Opi oroza, tana nda ka aro’boya ozo Lu ri ta ŋgaonya rota. Nda se kogazo ŋga azaka onyane nda ka oyena inye Opi oroza, ago nda ka aro’boya oye Lu ri. 7 Alo aza amaro ka ko ori toto andivo ndaro ri, aza amaro dra kpa ko toto andivo ndaro ri; 8 ondro mà ori se màbe orina ori anjioko mà ori Opi ri, ondro mà odra, anjioko mà odra Opi ri. Ago kode mà ori kode ma odra, ama orivoya Opi ro. 9 Tana Kristo drate ago adrite tana ka’do robe Opi ’di lidriidriro ro ndi se kodrabe be. 10 Oko mi, se kabe toto agba onya, nya vure ädrupi miro ro opena etaya? Ago mi se nyabe ŋga cini onya, nya ädrupi miro mawona etaya? Vo ama cini ro edrena ’da Lu kandra vurena opene nda si. 11 Tana taegyi ka ata ekye: “Endaro ma orivoya Lu lidriidriro yi, Opi kani ata nonye, ’dicini osona kaya ’da makandra ago ’dicini eṛona ta ’da ekye ma orivoya Lu yi.” 12 ’Dooko, vo amaro cini, ba alo alo edrena ta andivo ndaro ro ’da Lu ri. 13 Ka’do inye, mi’de me’be vure azi ro opena. Oko beṛo ko miri ŋgase ko’bana ädrupi miro päline kode o’dene takozi ya oyene. 14 Rudro’be maro Opi Yesu be ’ba mate taŋgye unine anjioko ŋgaonya aza i’do undiro andivo iro si; oko ondro ’diaza komate ekye, ŋgaonya rukä orivoya undiro ndi ’dooko a’dote undiro ndäri. 15 Ondro nya ädrupi miro oye koziro ta ŋga aza se nyabe onyana onya rosi, ’dooko nyate ugu oyena ko ni ŋgalu yasi. Mi’ba ŋgaonya se nyabe onyana kenji ’dise Kristo kodrabe tana ro ’do ko! 16 Mi’ba ŋgase nyusutavona be kadoro ono ka’do ko ävuru kozi be. 17 Tana Miri ’Bädri’ba Lu ro ro tana di ko ugu ŋgaonya ndi ugu ŋgaumvu be, oko tana di taŋgye, taliatokpe, ndi riyä se Tori Alokado kabe ozona be. 18 Ago ondro ’diaza ka ruindu Kristo ri liti ono yasi, ta ndaro si Lu ndi ago ojo azii kpa. 19 Ka’do inye, mi’de màso ondoalo ŋgase ezina taliatokpe ago tombana azi ndi kai vo ayani. 20 Ka’do inye, ta ŋgaonya rosi nyepere tase Lu koyebe ko. Anyana ŋgaonya cini ndi, oko orivoya koziro ko ŋga aza se kabe ’diaza o’ba o’dene takozi ya ’do onyane. 21 Ŋgase kado oyene ruonane ni iza onya yasi, ndi ugu vino umvu be, ago ko ŋgase kabe ädrupi miro o’ba takozi oyene ’do ugu oyene. 22 Nyäti ŋgase mimabe tana ya koyi, lakole miro ndi Lu be ya. Mano se kabe ŋga aza oye oko usu vona ko taenji ro ago kope vurena be takado ro ’do ni kado. 23 Oko ondro nda ka’dote milaba be ta ŋgase nda kabe onyana rota, Lu ka vure ndaro opena ondro nda kate onyana owo, tana taoye ndaro änju kote taoma dri. Ago ŋgase aza änju kote taoma dri orivoya takozi yi.
151 Ama se orivoya mbara ro taoma ya beṛo ’dise mbaraako opane ŋgaläŋgyi ànyaro uŋgyina si. Beṛo ko ta andivo amaro ro ri ama usine ayani. 2 Oko, ta amaro ri ädrupii amaro usine ayani tana takado modo ànyaro rota, tana mamo ànya robe taoma ya. 3 Tana ta Kristo ro si kote andivo ndaro ayani, oko oso taegyi kabe ata ronye ekye: “La’da se a’da ami be sina ono edirute mädri.” 4 Tase cini egyite Taegyi ya egyite ama embaza, tana mà’do robe mio’ba be yaiŋgyi ndi agoago se Taegyi kabe ozona ämäri si. 5 Ago ka’do inye Lu etovo yaiŋgyi ro ndi agoago be ro, kozo tori rumora ro ami lako ugu oso si taka’daro Kristo Yesu ro vo, 6 tana vo amiro cini tro alo käräṛu Lu ago Täpi Opi amaro Yesu Kristo ro robe ata alo si. 7 Ka’do inye, mìru azi amiro, ta a’do ’desi Lu ro rota, oso Kristo kuru ami be ronye. 8 Tana ma ta iti ämiri tana ori Kristo ro ruindu ro orivoya ta Yudai rota, ka’daza anjioko Lu orivoya ’diri, tao’bai se nda ko’ba be zutui ànyaro ri o’basi a’done endaro, 9 ago kpa Atrai o’ba si Lu räṛune ta yauni ndaro rota. Oso taegyi kabe ata ronye ekye: “Ka’do inye, märäṛuna mi’da Atrai lakosi, Maŋgona loŋgo räṛu ro ’da miri.” 10 Ago go ata kpa ekye: “Atrai miye riyä lidri Lu robe!” 11 Go ata kpa ekye: “Nyäräṛu Opi ami Atrai cini; Nyäräṛu nda, lidri cini!” 12 Yesaya go ata kpa ekye: “Zelevo Yisai ro ka’daruna ’da; nda ikyina ’da Atrai mirine, ago ànya o’banayi mi ànyaro ’da nda dri.” 13 Ka’do inye, Lu etovo mio’ba ro, ko’ba ami a’done riyä amba be ndi taliatokpe be ta taoma amiro rota nda ya, tana mio’ba amiro kugu omba robe ’duro mbara Tori Alokado rosi. 14 Ädrupii maro! Ma andivo mänite endaro ami orivoya takado be amba, anjioko ami orivoya tauni cini be, ago tana ami orivoya mbara be azi embane. 15 Oko taegyi ono ya ma ṛo turiako ta ta azaka rota se mologo tana te ämidri. Ma’dote turiako tana ta kandrakado se Lu kozobe märi, 16 a’doro ruindu’ba ro Kristo Yesu ri losi oyene ta Atrai rota. Ma ruindu oso lekye’ba ronye Lazokado ni Lu resi ugu tana ope si, tana anjioko Atrai ka’do robe ŋgapäṛi ro Lu ri ta usiusi ro, adite ndäri Tori Alokado si. 17 Rudro’be Kristo Yesu be si mänina ndi a’done driuŋgyi be ruindu maro Lu ri tana ro. 18 Ma’dona ndi turiako ago matana gialo tase Kristo koyebe ma si Atrai o’baza Lu orone ’do tana ayani. Nda ye ta ono te ata si ago taoye si, 19 mbara rubä ndi talaro robe si, ago mbara Tori Alokado Lu ro rosi. Ago ugu aba si le ni Yerusalema yasi le Ilurikuma ya, mape Lazokado ta Kristo rota ṛo cini. 20 Ole maro ondoalo gialo Lazokado opene vose eri ta Kristo ro ko kigye iyi yasi, ago ko vo obene kotopa se mano aza kobebe dri. 21 Oso taegyi kabe ata ronye ekye: “Ànya se iti ta ndaro kote rigye ondrena ’da, ago ànya se eriyi kote uninayi ’da.” 22 Ago alaga ma te perena amba ni ikyivoya amire. 23 Oko yauono anjioko mande losi vo kwoi yasi te ago oso ma’dobe ṛo ole be ndroa na amba ikyine ami ondrene, 24 ma mio’ba be oyene yau ro. Male ami ondrene ondro mate oyi Sepaina ya owo, ago mipa ma robe oyivoya lau, ami täkyi fere vosi owo. 25 Caoko, tu gi yauono si, mate ugu oyi Yerusalema ya ruindune lidri Lu ro lau ana ri. 26 Tana Känisa Makedonia ya ndi Akaya ya be rayitate dritairo ŋgapäṛi ozone ’dise mäyuro lidri Lu ro lako Yerusalema ya opaza. 27 Se ono ni tavoora modo ànyaro ro, oko ṛo endaro ṛo kama ànyaro ànya opane; kpa oso Yudai kala’do äṛu ànyaro a’do tori voro robe Atrai be ronye beṛo kpa Atrai ri äṛu ànyaro ŋga ’bädri ono ro ro Yudai opane sina. 28 Ondro mande losi ono te ago mozo parata se cini okotobe ànyari ana te ànyari oko, ma’dena gwo oyine Sepaina ya ago mätäkyina ami ’da oyi maro lau si. 29 Ondro mate ikyi amire oko, mäni ndi mikyina ndi äṛu amba Kristo ro robe. 30 Ma rulo’ba ämiri, ädrupii, Opi amaro Yesu Kristo si, ago ŋgalu se Tori kabe ozona si; nyomoraru mabe ugu mätu oyesi Lu ri ya cini si ta maro ta. 31 Nyämätu tana apa ma robe ni taomaako’bai Yuda ya rigyesi ago tana ruindu maro Yerusalema ya tana kusi lidri Lu ro lau robe, 32 ago tana mikyi robe amire riyä amba si, ondro ka’do gi ole Lu ro, ’dooko màye riyä ikyi ro robe ami yibe. 33 Ka’do inye, Lu, etovo amaro taliatokpe ro, ka’do ami cini be. Amen.
161 Masokala endreŋwa amaro Foebe ro ämiri, se kabe ruindu känisa Kenekerea ya ya. 2 Mìru anya ävuru Opi roya, oso beṛo lidri Lu ro ri oyene ronye, ago nyòzo ŋgaopa se aza anya olena ’da ni ami resi anyari, tana anya andivona a’dote bereazi kado ro lidri amba ri ago kpa märi. 3 Maye mede Pirisila ndi Akwila be ri, losi oye’bai azi maro ruindu Opi Yesu Kristo roya, 4 ànya njayite adri ànyaro lomvo ta maro ta, maye aro’boya amba ànyari, ko toto ma, oko känisa cini Atrai ro kpa. 5 Mede kpa Känisa se kabe kalakoto zo ànyaro ya ri. Mede bereazi maro se mulu tawi Epanita ri, se ni mano komatabe käti Kristo ya wari Asia roya owo. 6 Mede Maria ri, se ye losi te mbarasi ta amiro ta. 7 Mede kpa Andronaku ndi Yunia be ri Yudai azi maro se orivoya mabe kamba ya, äni ànya te ṛo kadopara lazo’bai lako; ago ànya a’dote Kristo’bai ro käti ni märi 8 Mede maro Amepeliatu, bereazi maro se mulu tawi rumora Opi ya ya ri. 9 Mede kpa Urebanu losioye’bai azi amaro ruindu Kristo roya ri, ago Setakusa, bereazi maro se mulu tawi ri. 10 Mede Apelesa se a’do ’diri ndaro Kristo ya aka’date ono ri. Mede ànya se katidri Arisetobulu roya ri. 11 Mede Erodiona, Yuda’ba azi ri, ago ädrupii Kristo’ba ro katidri Narekiso roya ri. 12 Mede maro Terufaena ndi Terufosa be ri, se yeyi losi te ruindu Opi ri ya, ago bereazi maro se mulu tawi Peresisa, se ye losi te amba Opi ya ri. 13 Mozo mede Rufusa se losi’ba para ruindu Opi roya ri ago endre ndaro se ondoalo ye ma te oso ŋgwa ronye ri. 14 Mede maro Asune, Pelegona, Eremasa, Pataroba, ndi Eremasa be ri, ndi ädrupii se cini Kristo’ba ro ànya be ri. 15 Mede Filegulosa ndi Julia, be ri, Nereusa ndi endreŋwa ndaro be, Olumepasa ndi lidri cini Lu ro se orivoya ànya yibe ri. 16 Miye mede azi ri runjunju ädrupii rosi. Känisa cini Kristo ro zo mede ànyaro ämiri. 17 Ma rulo’ba ämiri, ädrupii maro; mindre ànya se kabe rulewe ezi ago kabe taoma lidri ro wiri ago ka ta ŋgaemba ro se letadri ko ŋgaemba se ami be sina ’do be ’do kadoro. Minaru ni ànya resi! 18 Tana ànya se ka ugu ta nonye kwoi oye kayi ko ruindu Kristo Opi amaro ri, oko ŋgase ya ànyaro kolebe ri. Ata kado ’di räṛu ro ànyaro si ànya odoyi lidri taŋgye’ba ro te. 19 ’Dicini eriyi a’do ’diri amiro ta Lazokado rota tana te, ago ta ono ta ma yai’dwesi ta amiro ta. Male ämiri a’done tavouni be tase orivoya kado tana ro, oko taŋgye’ba ro tase undiro tana ro. 20 Ago Lu, etovo taliatokpe amaro ro, kyiyina Satani ’da ndriro pa amiro zele. Tai’dwero Yesu Opi amaro ro ka’do ami yibe. 21 Timoteo, losioye’ba azi maro, zo mede ndaro ämiri, ago Lukio, Yasona ndi Sosipato be kpa inye, Yudai azi maro. 22 Ma Teretio egyi’ba taegyi ono ro, mazo mede a’do Kristo’ba ro ro ämiri. 23 Voondre’ba maro Gayo, se känisa kabe kalakoto zo ndaro ya zo mede ndaro ämiri; Eraseto voondre’ba lakaza ’bakici ro ro, ndi ädrupi amaro Kyuratu be zoyi mede ànyaro ämiri. 25 Mì’de mòzo räṛu Lu ri! Nda orivoya mbara be ami o’bane edrene ŋgyiri taoma amiro ya, oso Lazokado mabe opena ta Yesu Kristo rota ago oso ta taŋgye se dämbidämbiro se ada’dote se ndroana kälävute amba ta rulofona rota. 26 Caoko, yauono, taŋgye se ana olofote ŋbelero tesi taegyii nebii rosi; ago ta ata Lu äduako rosi a’ba tana te unine tu’dei cini ri, tana vonai cini komayi ta robe ago koroyi ta robe. 27 Lu alodi, se toto ni orivoya tavouni cini be ono, räṛu ka’do rigye Yesu Kristo si äduako! Amen.