RULOFO

RULOFO

¹ Buku ono orivoya ta edre ta tase ka’dobe se Yesu Kristo lofote ro. Lu ozo rulofo ono te ndäri tana kaka’da tase a’done ga ndriro robe ruindu’bai ndaro ri. Kristo ’ba ŋgase kwoi te unine ruindu’ba ndaro Yoane ri malaika ndaro ezo si nda re, ² ago Yoane iti tase cini nda kondrebe ana tana te. Ono ni ta iti ndaro ta lazo se ni Lu resi ago taŋgye se aka’date Yesu Kristo si ro. ³ Nda se kabe buku ono uzina ni kado, ago ànya se kayibe atà lazo taäŋguro erina ago kayibe tase egyibe buku ono ya orona ni kado! Tana tuse ŋgase cini kwoi a’dona ’da sina te ti. ⁴ Ni Yoane resi känisa njidrieri wari Asia roya ri: Tai’dwero ndi taliatokpe be ka’do ämiri ni Lu, se orivoya yau, orivoya kyeno ago se ka oyebe ikyine resi ago ni tori njidrieri se giti ndaro kandra resi, ⁵ ago ni Yesu Kristo, tazevoedre’ba ’diriro, Ŋgwa kayoro, se efote ni odra yasi ago se kpa orivoya miri’ba ’bädri’bai ’bädri ro ro resi. Nda se kabe ama lu, ago odra ndaro si nda ’ba ama te dritai ro ni takozii amaro risi. ⁶ Ago ’ba ama te miri ’bädri’ba kohanii ro ruindune Lu ndaro ago Täpi ndaro ri. ’Desi ndi mbara be ka’do Yesu Kristo ri ’duro äduako! Amen. ⁷ Mindre, nda ka ikyi ’dikolo si! ’Dicini ondrena nda ’da, ànya se ku’diyi nda be kpa, lidri cini ’bädri ya o’benayi kuku ’da nda dri. Ago a’dona ndi inye! ⁸ Opi Lu Mbarapara se orivoya yau, se orivoya kyeno, ago ka oyebe ikyine ata ni inye ekye: “Ma ni etovo ago ondevo yi.” ⁹ Ma Yoane, ädrupi amiro, ago oso’ba ro Yesu vo ma orivoya azi amiro yaiŋgyi ruezaro se kabe ikyi ànya se ka’dobe miri ’bädri’ba ndaro ro dri iŋgyivoya. A’ba ma te Roŋga Patemo dri tana mape ata Lu rote ndi taŋgye se Yesu kolofobe be. ¹⁰ Tu Opi rosi Tori ru ma te, ago meri kporo ata rote, uwina oso cekuṛe ronye, ka ugu ata ma kundu. ¹¹ Atate ekye: “Nyegyi tase nyabe ondrena ono vuru, ago mizo buku na känisa se ’bakicii njidrieri kwoi ro ri; Epeso, Semurena, Peregamuma, Tautira, Saredisa, Filadelefia ndi Laodikia be ri.” ¹² Mazamite nda se kabe ugu ata märi ono ondrene, ago mandre ŋga lamba edrero läguläguro njidrieri te. ¹³ Mandre ŋga aza a’dona oso lidri ronye te ànya lako, so boŋgo runduṛu royi ca te le pa ndaro ya, ago vu logo läguläguro te ŋgulu kätäti ndaro dri. ¹⁴ Drikyiri ndaro onjero oso kodo ronye kode oso siya ronye, ago mii ndaro lekote oso asi ronye; ¹⁵ pa ndaro lägute oso logo se ätrite ago ililite ronye, ago ata ndaro uwina oso ärru gyi ro kabe ugu oye ruu ronye. ¹⁶ Nda äti ’bi’bi njidrieri te drígwo ndaro si, ago bando sikyaka’da ritu be efote ni kala ndaro yasi, militi ndaro orivoya läguläguro oso kitu kitudiri si ronye. ¹⁷ Ondro mandre nda te oko, ma’dete vuru nda pa oso lidri avo ro ronye. Nda ’ba drígwo ndaro te mädri ago atate ekye: “Nya’do ko turi ro ma orivoya ni käti ago ädu yi. ¹⁸ Ma orivoya lidriidriro. Madra ndi, oko yauono ma orivoya lidriidriro ago te äduako. Ma orivoya drikaca be odra dri ago ’bädri avo ro dri. ¹⁹ Ka’do inye, nyegyi, ŋgase mindrebe, riti ŋgase yauono be ndi ŋgase a’dona ’da voigyesi be. ²⁰ Ono orivoya ni ta dämbidämbiro takaci ’bi’bi njidrieri se nyabe ondrena drígwo maro yasi, ndi ŋga lamba edrero njidrieri logo läguläguro ro owo; ’bi’bi njidrieri orivoya ni malaikai känisa njidrieri ro, ago ŋga lamba edrero njidrieri orivoya ni känisa njidrieri owo.

¹ “Nyegyi malaika känisa ro Epeso ya ri mikye: “Ono ni lazo yi ni nda se kabe ’bi’bi njidrieri äti drígwo ndaro si ago se kabe aba ŋga lamba edrero se orivoya läguläguro njidrieri ana lakosi resi. ² Mäni, tase miyebe te; mäni ndi miye losi te mbarasi ago nya’dote yaiŋgyi be, mäni ndi miletadri kote lidri kozi be, ago nyojo ànya se kayibe ata ekye iyi orivoya lazo’bai oko ko inye te, ago nyusu ànya te kowe’bai ro. ³ Mi orivoya yaiŋgyi be, nyezarute ta maro ta, ago nyozovo kote. ⁴ Oko ono ni tase mabe sina milomvo owo; yauono nyulu ma kote oso miyebe käti ronye. ⁵ Nyusutavo nye’debe mu’du eŋwanye! Nyetadri ni takozii miro yasi ago miye tase miyebe käti ayani. Ondro nyetadri kote ni takozi miro yasi, mikyina ’da mire ago manana ŋga lamba edrero amiro ’da ni vo anyaro yasi. ⁶ Oko ono ni tase miro nya’do be sina owo: ya miro osoro tase Nikolai’bai kabe oyena lomvo, ya maro kpa osoro lomvoigye. ⁷ “Ka’do inye, nya’dote bi be nyeri tase Tori kabe atana Känisai ri ekye : “Ànya se kabe ŋgaopeṛe mayena taŋgye rigye onyana doŋgo ce adri ro ro se kabe omba Ämvu Lu roya ’da. ⁸ “Nyegyi malaika Känisa ro Semurena ya ri mikye: “Ono ni lazo yi ni nda se orivoya käti ago kpa äduro yi, se drate ago adrite kpa to’di ono resi. ⁹ Mäni rriti miro te, mäni ndi mi orivoya ati’ba yi oko endaro ami orivoya ŋga amba be! Mäni ta undiro se atate milomvo ànya se kayibe ata ekye iyi Yuda yi oko ko orivoya inye; ànya orivoya gboko se ka’dobe Satani ro owo! ¹⁰ Nyuturi ko ni ŋgase aza nya oyebe ruezane ni rigye ri. Nyeri! Kicu’ba o’bana mi ’da ojone rukä amiro ovo si kamba ya, ago rriti amiro u’duna a’dona ’da ’butealo. Nyà’do ’diri märi, ondro ka’do gica odra yi owo, ago mozona adri ’da ämiri ŋgapäṛi ŋgaopeṛe amiro ro. ¹¹ “Ka’do inye, ondro nyà’dote bi be, nyeri tase Tori kabe atana känisai ri se ekye: “Ànya se kabe ŋgaopeṛe, odra ṛiri ri oyene koziro i’do. ¹² “Nyegyi malaika känisa ro Peregamuma ya ri mikye: “Ono ni lazo yi ni nda se bando sikyaka’da ritu be resi. ¹³ Mäni vose nyàbe ori kigye te, gya vose Satani ko’ba giti ndaro be kigye ya. Ami orivoya ŋgye märi, ago nyè’be taoma amiro ma ya kote, gica tuse Anitipasi, ruindu’ba ’diri maro se äfube gya vose Satani kabe ori kigye ya. ¹⁴ Oko ma orivoya ta fere be ami lomvo; azaka orivoya ami lako se ka oso ŋgaemba Balama ro vo, se kemba Balaka te lidri Yisaraele ro locine takozi ya ànya leye si ŋgaonya se ozote lui edeedero ri onyane ago ronyi loyene. ¹⁵ Kpa oso inye, ami lidri be ami lako se ka oso ŋgaemba Nikolai’bai ro vo. ¹⁶ Ka’do inye nyètadri ni takozii amiro yasi! Ondro mìye kote, mikyina ’da amire ndriro ago mayena kyila ’da lidri se kai yibe bando se kabe efo ni kala maro ya si. ¹⁷ “Ka’do inye, ondro nyà’dote bi be, nyeri tase Tori kabe atana känisai ri se ekye: “Ànya se kabe ŋgaopeṛe mozona rukä mana da’doda’doro ro ’da ànyari ago mozona kuni onjero ’da ànya alo alo ri se egyi ävuru to’di te driigye se ’diaza ni ko e’be gialo nda se kabe anya uru ’do ayani. ¹⁸ “Nyegyi malaika känisa Tautira ya ri mikye: “Lazo ono orivoya ni Ŋgwa Lu ro, se mi na keleko oso asi ronye, se pa na kabe lägu oso logo se ätrite ronye resi. ¹⁹ Mäni tase nyabe oyena ndi, mäni ŋgalu miro, a’do’diri miro, ruindu miro ndi yaiŋgyi miro be ndi, mäni ndi anjioko yauono nyà ugu losi oye ndrani se miyebe käti drisi. ²⁰ Oko ono ni tase mabe sina milomvo owo: miletadrite toko se Jezebela, se kabe andivo anyaro uzina lazo’ba Lu ro ono be. Ŋgaemba anyaro si anya loci ruindu’bai maro te ronyi loyene ago ugu ŋgaonya se ozote lui edeedero ri onyane. ²¹ Mozo tu te anya ri drietane ni takozi anyaro yasi oko anya gazo drietane ni ronyi anyaro yasi. ²² Ka’do inye mavona anya ’da kitapara se anya ndi ànya se koyeyitabe toko drisi anya be ro dri ànya ezaruna ’da koziro, mayena ta ono ’da yau e’be gialo ànya etanayi drî lutu ni ŋgakozi se ànya koyeyibe anya be yasi. ²³ Mäfuna oso’bai anya vo kpa, ago ’dooko känisa cini uninayi ’da anjioko ma ni nda se kuni tavousu cini ya robe ndi tase abe olena be, mozona ŋga ’da ’di alo alo ri oso tase nda koyebe ronye. ²⁴ “Oko rukä amiro Tautira ya so kote ŋgaemba undiro ono vo; mini tase azaka kuziyibe ‘ŋgaemba gyuru ndrwi Satani ro ono kote.’ Mata ämiri anjioko ma’bana ŋgaläŋgyi aza ko ämidri. ²⁵ Oko beṛo ämiri ŋgase mirube ami yibe ono ätine anda, madale mesa lutu. ²⁶ Nda se kabe ŋgaopeṛe, se kabe tase malebe oyena ’duro le ädu ya ’do, mozona drikaca se musube ni Täpi maro rigye ono kpa rigye: Mozona drikaca ’da ànyari tu’dei dri, ²⁷ ànya miriza dofo logoro si ago ànya tufuza jinyijinyi oso lakaza ludri ro ronye. ²⁸ Mozona ’bi’bi kyenoŋbo ro kpa ’da ànyari. ²⁹ “Ka’do inye, ondro nyà’dote bi be, nyeri tase Tori kabe atana känisai ri ono!

¹ “Nyegyi malaika känisa ro Saredisa ya ri mikye: “Ono ni orivoya lazo yi ni nda se tori njidrieri Lu robe ago ’bi’bi njidrieri be resi. Mäni tase nyabe ugu oyena te; mäni ndi mi orivoya liku a’doro lidriidriro robe, mi gica orivoya avo ro ono owo! ² Ka’do inye mipi mi, ago nyotomba ŋgase mi be ’du sina ’do ukyi odra ’da kpeye. Tana musute tase miyebe ko orivoya ŋgye mile Lu maro roya. ³ Ka’do inye, miyi ta, tase emba mi be sina ro ago tase nyeribe ro; miro anya ago nyetadri ni takozii miro yasi. Ondro mipi mi kote, mikyina ’da midri oso kugu ronye, ago minina tuse mikyina ’da sina kpa ko. ⁴ Oko rukä amiro fere lau Saredisa ya mì’ba boŋgo amiro te wäṛiro. Nyàbana ’da mabe boŋgo onjero be, tana ta amiro sini oyene inye. ⁵ Ànya se kope ŋgateṛe osona boŋgo ’da oso ono ronye onjero, ago moforona ävuru ànyaro ko ni buku adri ro yasi. Matana ta ànyaro ’da ŋbelero Täpi maro ndi malaikai be kandra makye ànya orivoya maro. ⁶ “Ka’do inye, ondro nyà’dote bi be, nyeri tase Tori kabe atana känisai ri ono. ⁷ “Nyegyi malaika känisa ro Filadelefia ya ri mikye: “Ono orivoya lazo yi ni nda se orivoya alokado ago ŋgye resi. Nda orivoya ŋga ŋgaupiro Dawidi robe, ago ondro nda kupi käläsi te ’diaza unina ko anya osene, ago ondro nda kose anya te, ’diaza unina ko upine. ⁸ Mäni tase nyabe oyena ndi, mäni ndi anjioko mi orivoya mbara giṛiŋwa be, misote ŋgaemba maro vo ago nya’dote ’diri märi, mäpi käläsi te mile miro ya, se ’diaza unina ko osene. ⁹ Nyeri! Ago gboko se ka’dobe Satani ro, ànya se kowe’ba ro kayibe ata ekye ànya orivoya Yuda yi oko i’do inye, ma’bana ànya ’da ikyine ago ändinayi ’da vuru mi pa. Ànya cini uninayi ndi anjioko mulu mi. ¹⁰ Tana nyäti ota maro te yaiŋgyi si, mätina mi kpa londro ro ni tu rriti se kabe ikyi ’bädri dri lidri se cini kabe ori ’bädri ya ono ojone risi. ¹¹ Ma ikyi ndriro. Nyäti ŋgase mi be sina londro ro, ukyi ’diaza opa ŋgapäṛi miro ŋgaopeṛe ro ’da. ¹² Ma’bana nda se kabe ŋgaopeṛe ’da läŋgyiri ro Yekalu Lu maro roya, ago nda e’bena ànya ko alona, megyina ävuru Lu maro ro ’da nda dri, ndi ävuru ’bakici Lu maro robe. Yerusalema to’di, se ikyina ’da vuru ni vo’buyakuru yasi ni Lu maro resi. Megyina ävuru to’di maro kpa ’da nda dri. ¹³ “Ka’do inye, ondro nyà’dote bi be, nyeri tase Tori kabe atana känisai ri ono. ¹⁴ “Nyegyi malaika känisa ro Laodikia ya ri mikye: “Ono orivoya lazo yi ni Amen resi, ta’diri’ba ago tazevoedre’ba ŋgye, se ni etovo ŋgase cini Lu ko’babe ro resi. ¹⁵ Mäni tase miyebe te, mäni ndi mi ko i’dwero ca emero, male miri a’done alona ro kode azana ro! ¹⁶ Oko tana yauono mi ko emero ca i’dwero, ma oye ami i’dwene tesi ni kala maro yasi! ¹⁷ Nyata mikye: ‘Ma orivoya ŋgaamba be, ago te ndra; ma orivoya ŋgase cini ma lemerina be ono be.’ Oko mini ko mi orivoya riyäako ago lemeriekye owo! Mi orivoya ati’ba ro, bägyulu ro ago miako. ¹⁸ Ka’do inye, ma tavoedre miri, logo läguläguro wäṛiro ogyene ni märigyesi, tana a’doza ŋgaamba be. Migye boŋgo onjero kpa osone andivo miro ri ago nyatako driupi bägyulu miro ro drî na sina. Migye ido azaka opiro kpa opine mi miro ya, tana mindrevo robe. ¹⁹ Ma ànya se cini mulube drîna ota ago ma ànya se cini mulube ezana, ka’do inye, nyetadri ni takozii miro ya, ya cini si. ²⁰ Nyeri! Ma edre käläsi kala ago ma o’bina; ondro ’diaza ka dri maro erina ago ka käläsi upi, macina ’da zo ndaro ya ago manyana ŋga nda be ago nda onyana ŋga ’da mabe. ²¹ Ànya se kabe ŋgaopeṛe ri, mozona takado ’da ànyari oriza ma lomvo giti maro dri, kpa oso mape ŋgateṛe oko, yauono mabe ori Täpi maro lomvo giti ndaro dri ono ronye. ²² “Ka’do inye, ondro nyà’dote bi be, nyèri tase Tori kabe atana känisai ri ono.”

¹ Tu ono si ma’dote ta ruloforo aza be ago mandre käläsi uŋboro te vo’buyakuru ya. Ago kporo wite oso cekuṛe ronye, se merite ka ugu ata märi tu käti si ekye: “Nyikyi kuru noŋwa, ago maka’dana tase ka oye beṛo a’done ta ono vosi ’da miri.” ² Dori tori ru ma te. Vo’buyakuru ya lau giti orivoya ’diaza rite driigye. ³ Militi ndaro läguna oso kuniŋwà liŋgyiekye oso jasepa ndi kareneliana be ronye, ago mberu betina emeraleda ronye orivoya gbikyi giti lomvosi. ⁴ Ŋgulu giti lomvosi giti azaka orivoya ’buteritu fosu, ’di’desii ’buteritu fosu soyi boŋgo onjero ndi tagyia logo läguläguro robe te ago riyite driigye. ⁵ Leko sionyi ’bu ro ro, uhwena, ndi uwi totrena robe efote ni giti resi, gala eyieyiro njidrieri ugu lekote mile giti roya, se ni orivoya Tori njidrieri Lu ro yi. ⁶ Ago mile giti roya, mandre ŋga aza kpate landre oso gyi’desi madara ro ronye, wäṛiro oso sia ronye. Ŋgulu giti lomvosi, ŋga lidriidriro orivoya su mi be takyi mile yasi ago kundu yasi. ⁷ Kätina landre oso ibi ronye, ṛirina landre oso ’daŋgo ronye, ninana militi be oso militi lidri ro ronye; ago lisuna laba oso ägyiribi oŋgaoŋga ronye. ⁸ Ŋga gi su lidriidriro ono alona orivoya kufu be njidrialo, ago ànya orivoya kpeye mi ro, yasi si ago tesisi. Kitu si kpa ŋgäkyi si edreyi kote ni loŋgo oŋgovoyasi ekye: “Alokado, alokado, alokado, ni Lu Mbarapara, se ṛo kyeno, se orivoya yau, ago se ka oye ikyine.” ⁹ Ŋga lidriidriro su ana ŋgoyi loŋgo räṛu ro, taoro ro ndi aro’boya be rote nda se kabe ori giti dri ri, se kabe ori ’duro, äduako. Ondro ànya kayite oyena inye oko, ¹⁰ ’di’desii ’buteritu fosu ana ’deyigwo vuru nda se koribe giti dri ana kandra, ago kayi nda se kabe ori ’duro äduako ono mätu. Ànya voyi tagyia ànyaro te vuru mile giti roya ago kayi ata ekye: ¹¹ “Opi amaro ago Lu amaro! Ta miro sini räṛu, ŋgaoro ndi mbara be urune. Tana mi’ba ŋga cini ni, ago ole miro si nyozo ori ’duro ndi adri be te ànyari.”

¹ Mandre buku roṛoroṛo te drígwo nda se kabe ori giti dri ana roya; taegyi be lamadri ritu yasi ago ebete ŋga ŋgaebero njidrieri si. ² Ago mandre malaika mbaraekye te, se ayotate otre amba si ekye: “A’di sini ŋga ŋgaebero okyene ago buku roṛoroṛo upine ya?” ³ Oko ’diaza i’do vo’buyakuru ya kode ’bädri ya kode ’bädri zele, se unina ndi buku roṛoroṛo upine kode yana yasi ondrene. ⁴ Ago miliyite amba tana änina kote ’diaza usune se tana sini buku roṛoroṛo upine kode yana yasi ondrene. ⁵ ’Dooko alo aza ’di’desii ro atate märi ekye: “Nyili ko. Mindre! Ibi ni ’bakala Yuda, zelevo para Dawidi ro yasi, peŋgateṛe, ago nda unina ndi ŋga ŋgaebero njidrieri okyene ago buku roṛoroṛo upine.” ⁶ ’Dooko mandre Timelegogo te edrevoya kitoriya giti roya, ŋga su lidriidriro ndi ’di’desii be muyi lomvona te gbikyi. Timelegogo se kaka’darube ana landrete oso äfute. Anya orivoya koyi be njidrieri ago mi be njidrieri, se ni tori njidrieri Lu ro se azote ’bädri cini yasi owo. ⁷ Timelegogo oyite ago ru buku roṛoroṛo teni drígwo nda se koribe giti dri ana roya. ⁸ Ago nda koyete inye oko, ŋga su lidriidriro ndi ’di’desii ’buteritu fosu be ’deyite vuru Timelegogo kandra. Vona alo alo orivoya lekyembe be ago a’ba deŋbelei logo läguläguro rote twi ŋga ŋgutruro be se ni mätui lidri Lu ro ro. ⁹ Ànya ŋgoyi loŋgo to’di te ekye: “Misini buku roṛoroṛo urune ago ŋga obena ro upine. Tana äfu mi te, ago odra miro si migye lidri te Lu ri lidri ni ’bakala cini yasi, kalatoto, tu’de ndi beti toto be. ¹⁰ Mi’ba ànya te Miri ’bädri kohanii ro ro ruindune Lu amaro ri, ago ànya mirinayi ’bädri ’da.” ¹¹ Mandrevote kpa to’di oko, meri malaikai, kuturo ago tere’benye rote! Ànya edreyite ŋgulu giti lomvosi, ŋga su lidriidriro ndi ’di’desii be, ¹² ŋgoyi loŋgo te kporo amba si ekye: “Timelegogo se äfute ono sini mbara, ŋgaamba, tavouni, aṛi, taoro, ’desi ndi räṛu be urune!” ¹³ Ago meri ŋga cini vo’buyakuru ya, ’bädri ya, ’bädri zele vurusi, gyi’desi ya, ndi ŋgase cini ka’dobe lidriidriro ’bädri ya be te, ugu loŋgo oŋgovoya ekye: “Räṛu, taoro, ’desi ndi aṛi be, ka’do nda se kabe ori giti dri ndi Timelegogo be ri ’duro äduako!” ¹⁴ Ŋga su lidriidriro zayitadrite ekye: “Amen!” Ago ’di’desii ’deyite vuru ago mätuyite.

¹ ’Dooko mandre Timelegogo pi ŋgà ŋgaobero käti te, ni ŋgà ŋgaobero se njidrieri ana yasi ago meri alo aza ŋga lidriidriro se su ana rote ka ata kporo si uwina oso ’buuhwe ronye si ekye: “Nyikyi!” ² Mandrevote oko, farasi onjero orivoya. Umu’bana se kabe umu sina ru kusu te, ago ozo tagyia te ndäri. Nda mute tesi oso ŋgaope’ba kabe ŋgaopeṛe ronye. ³ ’Dooko Timelegogo pi ŋga ŋgaobero ṛirina te, ago meri ṛiri ŋga lidriidriro rote ka ata ekye: “Nyikyi!” ⁴ Farasi aza efote okaro. Umu’ba anyaro sina ozo mbara te rigye kyila eziza ’bädri dri, tana lidri kutufu azi robe. Ozo bando ’desi te ndäri. ⁵ ’Dooko Timelegogo pi ŋga ŋgaobero ninana te; ago meri ŋga lidriidriro ninana kata ekye: “Nyikyi!” Mandrevote oko, farasi uniro orivoya, umu’ba anyaro sina ru ŋga ŋgaojoro kpakparo te drí ndaro ya. ⁶ Meri ŋga aza wite oso kporona kefo ni, ŋga lidriidriro su lakosi, se atate ekye: “Nyozo kyifo tegiṛiŋwa päläti kitu alo ro ronye ago nyojo kaaza tegiṛiŋwa oso päläti kitu alo ro ronye. Oko nyenji ice ido ro ndi ämvu kono robe ko!” ⁷ ’Dooko Timelegogo pi ŋga ŋgaobero lisuna te, ago ŋga lidriidriro lisuna ka ata ekye: “Nyikyi!” ⁸ Mandrevote oko, farasi beti ŋborolo ro orivoya. Umu’ba anyaro sina äzite Odra, ago Hadesi sote ’de voigye. Ozo drikaca te ànyari alo lisu ’bädri ro ro dri tufune kyila, mä’bu, adravo ndi koronyai vocowaro be si. ⁹ ’Dooko timelegogo pi ŋga ŋgaobero linjina te oko, vurusi vo tori oloro ya mandre lindri ànya se utufute tana ànya peyi ata Lu rote, ago a’doyite ’diriro tazevoedre ànyaro voya rote. ¹⁰ Ànya treyite otre amba si ekye: “Opi Mbarapara, alokado ago ŋgye! Tuna a’dona mu’du eŋwanye miri lidri se ’bädri ya kutufuyi ama be ono vurena opeza ago ànya ezazana ya?” ¹¹ Ozo boŋgo onjero runduṛuro te ànya alo alo ri, ago ozotate ànyari loline gafere, madale andena oti ruindu’bai azi ànyaro ro ndi ädrupii ànyaro be tufuna lutu se oyebe ufune oso ànya ka’dobe ronye. ¹² Ago mandre Timelegogo pi ŋga ŋgaobero njidrialona te. Ägbigbi mbaraekye a’dote, ago kitu a’dote uniro oso boŋgo liŋgyiako uniro ronye, ago imba tozarute kpeye okaro oso kari ronye. ¹³ ’Bi’bii e’dete vuru ’bädri ya, oso kyi’du okaako kabe layi ni ce drisi oso oli mbaraekye kabe layina ronye. ¹⁴ Vukuru ijerute oso abe buku roṛoroṛo epana ronye, ago ’bereŋwà cini ndi roŋga be äshwete ni vo ànyaro yasi. ¹⁵ ’Dooko ’bädri’bai ’bädri ro, ’dimiri’bai ndi dri’bai kyila’bai robe, ŋgaamba’bai ndi mbara’bai be, ndi lidri azaka be, iyeäṛi ndi dritai’bai be da’doyi andivo ànyaro te kugyii yasi ago luutui zelesi ’bereŋwà drisi. ¹⁶ Ànya ziyi läzite ’bereŋwà ndi luutui be ri ekye: “Mì’de ämädri ago nyàda’do ama ni mile nda se kabe ori giti dri ago ni kyila Timelegogo ro risi. ¹⁷ Tana tu rritiekye kyila ànyaro ro orivoya nono, ago a’di unina ni edrene kuru mile igye ya?”

¹ Ono vosi mandre malaika su te edrevoya cukui su ’bädri ro yasi, ätiyi oli su te kovole tana beṛo ko oli ri oline ’bädri ya kode gyi’desi dri kode ce aza dri. ² Ago mandre malaika aza te ikyivoya ni ’buzelesi ŋga ŋgaobero Lu lidriidriro robe. Nda zi läzi te ṛeṛe malaikai se su se Lu kozo mbara be rigye ’bädri enjiza ndi gyi’desi be kai ri. ³ Malaika atate ekye: “Miye ’bädri, gyi’desi ndi ice be ko koziro, madale ma’ba taka’da lutu ruindu’bai Lu amaro ro lomvo ŋga ŋgaobero si militi ànyaro yasi.” ⁴ Ago ititate märi ekye oti ànya se a’ba taka’da robe ànya lomvo ŋga ŋgaobero Lu robe militi ànyaro yasi orivoya kutu kama alo ’butesu fosu (144,000). Ànya orivoya ni ’bakalai ’butealo foritu Yisaraele ro yasi! ⁵ - ⁸ Ba orivoya kutu ’butealo foritu (12,000) ni ’bakala alo alo Yuda, Rubena, Gada, Asera, Nafatali, Manase, Simeona, Lewe, Yisakara, Zebuluna, Yosepa ndi Benjamina be ro yasi. ⁹ Ono vosi mandrevote oko, lowa tomoyo orivoya ’diaza ni ko lidri na cini otine! Ànya orivoya ni lidri beti, ’bakala, tu’de ndi kala cini be ro lakosi, ago ànya edreyite mile giti ro ndi Timelegogo robe ya, soyi boŋgo onjero runduṛuro te ago ruyi gwoṛi okyi rote drí ànyaro yasi. ¹⁰ Ànya ziyi läzi te ṛeṛe ekye: “Ŋgaoparo kikyi ni Lu amaro se koribe giti dri resi, ago ni Timelegogo resi!” ¹¹ Malaikai cini ’di’desii be, ndi ŋga lidriidriro su be edreyite ŋgulu giti lomvosi. ’Dooko ànya ’deyite militisi vuru giti kandra ago mätuyi Lu te, ¹² ekye: “Amen! Räṛu, ’desi, tavouni, aro’boya, taoro, mbara, ndi aṛi be orivoya Lu amaro ro ’duro äduako! Amen!” ¹³ Alo aza ’di’desii ro eji ma te ekye: “Lidri koso boŋgo onjero runduṛuro be kwoi a’diyi owo, ago ànya ikyiyi ni eŋwaro ya?” ¹⁴ Mazatadrite makye: “’Desi, mäni ko. Mini ni.” Nda atate märi ekye: “Kwoi ni orivoya lidri se kefoyibe londroro rueza rriti ro yasi owo. Ànya jayi boŋgo runduṛuro ànyaro te onjero kari Timelegogo rosi. ¹⁵ ’Bani ànya kayi edre giti Lu ro kandra ago kayi ruindu ndäri kitu si kpa ŋgäkyi si yekalu ndaro ya wo. Nda se kabe ori giti dri ono gagana ànya ’da a’do ndaro loto ono si. ¹⁶ Täbiri ndi gyilu be ufuna ànya ko tona, ca kitu kode voeme lunyina kode ozana ànya ko. ¹⁷ Tana Timelegogo, se orivoya kitoriya giti roya ono, a’dona ’da lekye’ba ànyaro, ago nda lepena ànya ’da gyi legwalegwa se kabe adri ozoni re. Ago Lu oyona miendre cini ’da ni mi ànyaro yasi.”

¹ Ondro Timelegogo kupi ŋga ŋgaobero njidrierina te oko, vo a’dote njuru vo’buyakuru ya, oso saa kpäkyi ronye. ² ’Dooko mandre malaikai njidrieri se kabe edre Lu kandra ana te, ago ozo cekuṛe njidrieri te ànyari. ³ Malaika aza, se orivoya lakaza läguläguro ŋga ŋgutruro robe ana, ikyite ago edrete vo tori oloro lomvo. Ozo ŋga ŋgutruro te amba ndäri adroane mätu lidri cini Lu ro ro dri ago anya ozone vo tori oloro logo läguläguro ro se kedrebe giti kandra ana dri. ⁴ Kätu ŋga ŋgutruro se abe ugu ozana ana ro ofote kuru mätu lidri Lu ro robe ni drí malaika se edrevoya Lu kandra ana ro yasi. ⁵ ’Dooko malaika ana ru lakaza ŋga ŋgutruro rote, so asi te twi kigye ni vo tori oloro drisi, ago vo anya te gyini dri. Ago kporo ndi totre uhwe ’bu ro robe, sionyi leko ’bu ro ro ndi ägbigbi be a’dote. ⁶ ’Dooko malaikai njidrieri cekuṛei njidrieri be ederute ànya ovone. ⁷ Malaika käti vo cekuṛe ndaro te. ’Busiya ndi asi be, dro’berute kari be, ikyi edarute vuru gyinidri. Telesi nina ’bädri ro jete kpeye, telesi nina ice ro, ndi käyibi cini luru robe je kpate. ⁸ ’Dooko malaika ṛiri vo cekuṛe ndaro te, ŋga aza landrete laba oso ’bereŋwa ’desi asi be driigye ronye avote gyi’desi ya. Nina telesi gyi’desi ro zarute kari ro, ⁹ telesi nina ŋgaŋwà lidriidriro ro gyi’desi ya todrate, ago telesi nina toŋbo ro toŋgorute. ¹⁰ ’Dooko malaika nina vo cekuṛe ndaro te. ’Bi’bi ’desi kaleko oso gala ronye, e’dete ni vokuru ya ago ’dete telesi nina goloi ro ndi gyi legwalegwa robe drisi. ¹¹ (Ävuru ’bi’bi ro orivoya “Osoekye.”) Telesi nina gyi ro tozarute osoro, ago lidri amba todrate ni gyi ana umvu risi, tana anya tozarute osoro. ¹² ’Dooko malaika lisu vo cekuṛe ndaro te. Telesi nina kitu ro, ndi telesi nina imba ro ndi telesi nina ’bi’bii robe a’bite, ago telesi nina ŋgaeyi ànyaro ro ije nina lägu iro rote, ŋgaeyi a’dote i’do u’du telesi nina kitu roya ago kpa i’do u’du telesi nina ŋgäkyi roya. ¹³ ’Dooko mandrevote oko, meri ägyiribi ŋgate lekuru vokuru ya ka otre kporo amba si ekye: “Wuu orivoya koziro! Kozina a’dona te ndra vona se cini kabe ori ’bädri ya ri ondro kporo kate uwi ni cekuṛei se malaikai azaka nätu kovona be ri!”

¹ ’Dooko malaika linjina vo cekuṛe ndaro te, mandre ’bi’bi se ke’debe vuru ’bädri dri ana te ago ozo ŋga ŋgaupiro voociekye rote rigye. ² ’Bi’bi pi voociekye te, ago kätu efote tesi ni kigyesi, oso kätu ni asi ’desi nyende ro yasi ronye; ŋgaeyi kitu ro ndi oli be a’dote orivoya uniro ni kätu voociekye ro risi. ³ Tombii efote tesi ni kätu se ’bädri dri ana yasi, ago ozo mbara se kitonii ka’dobe sina ana kpate ànyari. ⁴ Ititate ànyari ko käyi yi ’bädri ro kode ice kode ŋgaluru oyene koziro; ànyari toto lidri se taka’daro ŋga ŋgaebero Lu ro ako militi ànyaro yasi ’do ezane ayani. ⁵ Ale tombii ko lidri kwoi tufune, oko toto ànya ezane imbana nji. Lomvo luwu se a’bibe la’bi si ana laba oso lomvo luwu se kitoni kozabe ro ronye. ⁶ Imba se nji kai si ànya uṛinayi odra ’da, oko ànya usunayi anya ko, ànya olenayi ’da odrane, oko odra umuna ’da ni ànya resi. ⁷ Andre tombi be laba oso farasii te nja kyila ta ronye, drî ànyaro drisi ànya laba oso ŋgase a’dote tagyia läguläguro be ronye, ago militi ànyaro orivoya oso militi lidri ro ronye. ⁸ Drikyiri ànyaro laba oso drikyiri ’ditoko ro ronye, si ànyaro orivoya oso si ibii ro ronye. ⁹ Kätäti ànyaro atakote ŋgase ondrena laba oso boŋgo kätäti gaga ro logo ro ronye, ago kporo oŋga uwi kufu ànyaro ro laba oso kporo farasi kabe arabia ese mbarasi kyila ya ro ronye. ¹⁰ Ànya orivoya tavii be ago ka ’di oza oso kitoni ro ronye, ago tavii ànyaro anjioko ni se mbara be lidri ozane imbana nji. ¹¹ Ànya orivoya ’bädri’ba be ugu ànya mirine, se orivoya dri’ba malaika voociekye ro ro. Ävuru anyaro Ebere si ni Abadona; Giriki si ävuru ni Apoloyona (takacina “’Diufu’ba”). ¹² Ŋgakozi käti lävute. Ono vosi ŋgakozi ritu ka drigba ikyi. ¹³ ’Dooko malaika njidrialona vo cekuṛe ndaro te. Meri kporo te kezi ikyi ni cuku su vo tori oloro logo lägulägu ro ro se kedrebe mile Lu roya ana resi. ¹⁴ Ata atate malaika njidrialona ri ekye: “Nyonji malaikai su se embete Golo ’desi Eferata kala ’do!” ¹⁵ Onji malaikai su te, saa gialo u’du alo ana rosi imba gialo ono si ago ndroa gi embe ànya be nja telesi nina lidri ro ro tufune si. ¹⁶ Kyila’bai se kumuyibe farasi si, ati otina te märi, orivoya tere’benye kama ritu. ¹⁷ Ago rulofo maro ya mandre farasii te ndi umu’bai ànyaro be, ànya orivoya boŋgo kätäti gaga ro okaro oso asi ronye be; lu’buli oso safire ronye, ago walawalaro oso bäruti ronye. Drîi farasi ro orivoya oso drîi ibii ro ronye, ago asi ka efo ni kala ànyaro yasi, kätu ndi bäruti be. ¹⁸ Utufu telesi nina lidri rote taezaro se nätu kai si; asi, kätu, ago bäruti se kabe eziefo ni kala farasii ro yasi ana si. ¹⁹ Tana mbara farasii ro orivoya kala ànyaro yasi ago kpa tavii ànyaro yasi. Tavi ànyaro orivoya oso inii drîi be ronye, ago ànya kayi lidri osi sina. ²⁰ Anjoko lidri ro, vonai se cini äfu kote taezaro se kwoi si, anayiru kote ni ŋgase ànya kedeyibe resi. Ànya e’beyi demonai mätu kote, ca lui awi logo läguläguro, mo’di ro, atala ro, kuni ro ndi ce robe, se ànya niyi kote voondrene, taerine, kode abane. ²¹ Ànya etayidri kpa kote ni takozi ànyaro ’ditufuro, taläkä ànyaro, ronyi ànyaro, ndi ŋga kugu ànyaro be yasi.

¹ ’Dooko mandre malaika aza mbaraekye te ikyivoya vuru ni vo’buyakuru yasi. ’Dikolo te nda te ’biṛi ago mberu be ŋgulu dríi ndaro ya; militi ndaro orivoya oso kitu ronye, ago pai ndaro oso läŋgyiri asi ro ronye. ² Nda orivoya buku giṛiŋwa upiupiro be drí ndaro ya. Nda to pa drígwo ro ndaro te gyi’desi dri ago pa gaṛi ro ndaro gyini dri, ³ ago zi läzi te kporo amba si uwina oso liyi ibii ro ronye. Nda kuzi läzi te oko, uhwe ’bu ro se njidrieri ana zatadrite totre amba si. ⁴ Ago dori ondro ànya katate, aba ma oyete egyine oko, meri ata te ata ana ni vo’buyakuru yasi ekye: “Tase uhwe ’bu ro njidrieri katabe ’do mi’ba ka’do ta da’doda’doro, nyegyi tana ko vuru!” ⁵ ’Dooko malaika se mandrebe ugu edrevoya gyi’desi dri ago gyini dri ana eŋga drí drígwo yasi ndaro te vo’buyakuru ya ⁶ ago ye ta ruäṛu rote ävuru Lu, se kabe ori ’duro äduako, se ko’ba vo’buyakuru, ’bädri, gyi’desi ndi ŋgacini ànya yasi be ni ono rosi. Malaikai atate ekye: “Leye a’dona i’do tona! ⁷ Oko ondro malaika njidrierina kate cekuṛe ndaro ovona oko, ’dooko Lu ondena taoro da’doda’do ndaro ’da, oso nda kayotabe ruindu’bai ndaro nebii ri ronye.” ⁸ ’Dooko ata se meribe ugu atana be ni vo’buyakuru yasi ana atate märi kpa to’di ekye: “Nyoyi ago miru buku roṛoroṛo upiupiro se orivoya drí malaika se kedrebe gyi’desi dri ndi gyini dri ana roya ana.” ⁹ Moyite malaika re ago meji nda te buku giṛiŋwa roṛoroṛo ozone märi. Nda atate märi ekye: “Miru ago minya; anya tozaruna ’da äträ ro ya miro ya, oko a’dona ’da ndiṛi ro oso epe ronye kala miro ya.” ¹⁰ Märu buku giṛiŋwa roṛoroṛo teni drí ndaro yasi ago manya te, ago ndeṛite ndiṛi ro oso epe ronye kala maro ya. Oko ondro mate te oko, anya tozarute äträ ro ya maro ya. ¹¹ ’Dooko ititate märi ekye: “Kpa to’dina beṛo miri lazo Lu ro opene tu’dei, lidri beti toto, kalatoto ndi ’bädri’bai be ri.”

¹ Ozo dofo te märi se andrebe laba oso dofo ŋga ŋgaojoro ronye, ago ititate ekye: “Nyoyi nyojo Yekalu Lu ro ndi vo tori oloro be, ago miti ànya se kabe ugu mätu oye Yekalu ya ’do. ² Oko nyojo gokoi tesi ko, tana ozo ànya te atrai ri, se lotonayi ’bakici Alokado ’da pa si imbana ’butesu foritu. ³ Mazona tazevoedre’bai maro ritu ’da boŋgo guniya robe lomvo ya, ago ànya openayi lazo Lu ro ’da u’du se kutu alo kama ritu ’butenjidrialo (1,260) kai ya.” ⁴ Tazevoedre’bai se ritu kai orivoya ni ice ritu ice ido ro ago lamba ritu se kabe edre Opi ’bädri ro kandra ’do. ⁵ Ondro ’diaza kate ojo ànya oyene koziro oko, asi efona ’da ni kala ànyaro yasi ago tufuna kyila’baazii ànyaro ’da, ago kpa oso inye nda se aza kabe ojo ànya oyene koziro äfuna ’da. ⁶ Ànya orivoya drikaca be vokuru osene ago ta’dota ’bu orina ’da u’diako tu gi ànya kayibe lazo Lu ro opena sina si, ànya kpa orivoya mbara be gyi legwalegwaro dri, ànya tozaza kari ro, ànya kpa drikaca be ’bädri dri, taezaro dritoto be ’bädri ezaza ondoalo oso ànya kolebe ronye. ⁷ Ondro tazevoedre’bai ritu kai kondeyi lazo ànyaro opena te oko, koronyai se kabe efo tesi ni ’buociekye yasi oyena kyila ’da ànya yibe. Nda opena ànya ’da ṛe ago tufuna ànya ’da, ⁸ ago avoi ànyaro lo’dena ’da liti ’desi ’bakici ’desi ro dri, se oto Opi ànyaro be driigye ana. Ävuru ’bakici ana betina ka’daro ni orivoya Sodomo kode Ezipeto. ⁹ Lidri ni tu’dei, ’bakalai, kalatoto ndi betitoto cini be ondrenayi avoi ànyaro ’da u’du nätu kpäkyi ago oganayi zo avo ànyaro osene. ¹⁰ Lidri ’bädri ro a’donayi ’da yai’dwesi ta odra ànya se ritu kwoi rota. Ànya oyenayi riyä ’da ago ozonayi ŋgapäṛi ’da azi ri, tana nebii se ritu kai eziyi rueza amba te ’dicini dri. ¹¹ U’du nätu kpäkyi vosi oko lawa adri ro ikyite ni Lu resi cite ànya ya ago ànya edreyite kuru, ago ànya se cini kondreyi ànya be turiyite. ¹² ’Dooko nebii ritu eriyi kporo ata rote ka ata ànyari ni vo’buyakuru yasi ekye: “Nyitu kuru noŋwa!” Ago kyila’baazii ànyaro ndre ànya te oyivoya vo’buyakuru ya ’dikolo si. ¹³ Ago tuŋwa gi ana si ägbigbi ’desi kandavote, telesi alo ’bute ’bakici ro utufute, ago lidri kutu njidrieri utufute, anjoko lidri ro turisote ago räṛuyi ’desipara Lu vo’buyakuru rote. ¹⁴ Ŋgakozi ṛiri lävute, oko ŋgakozi nina ikyina ’da ndriŋwa. ¹⁵ ’Dooko malaika njidrierina vo cekuṛe ndaro te, ago kporo ata ro amba orivoya vo’buyakuru ya, ugu ata ekye: “Yauono mbara ’bädri miri ro orivoya Opi amaro ndi Mesiya ndaro ro, ago nda mirina vo ’da rri ro äduako!” ¹⁶ ’Dooko ’di’desii se ’buteritu fosu kabe ori giti ànyaro drisi Lu kandra ana andivo ànyaro ’deyite vuru militisi ago mätuyi Lu te ¹⁷ ekye: “Opi Lu Mbarapara, se orivoya yauono, ago se ṛo orivoya kyeno ana! Maye aro’boya miri tana miru mbara ’desi miro rote ago nyeto vo miri te! ¹⁸ Tu’dei te kyilaro, tana tu kyila miro ro esate, tu vure avo ro ro opero. Tu esate päläti ozoza ruindu’bai miro, nebii ri, ago lidri cini miro, vona se cini kabe mi oro ri ’di’desi ndi giṛiŋwà robe. Tu esate ànya se kayibe ’bädri enji tufuza!” ¹⁹ Yekalu Lu ro vo’buyakuru ya äpite, ago andre Sänduku Tao’baro te lau. ’Dooko leko sionyi ’bu ro ro, ndi kporo uhwe ’bu robe, ägbigbi ndi ’busiya be a’dote.

¹ ’Dooko ŋga’desi ago ondrena rritiro ka’darute vokuru ya. Toko aza orivoya, boŋgo na orivoya kitu yi ago anya orivoya imba be pa anyaro zele ago tagyia ’bi’bi ’butealo foritu robe drî anyaro yasi. ² Anya ka oyete utine ndriro, ago luwu ndi rueza ŋgwa utiro be ’ba anya te totrene. ³ Ŋga aza ondrena rritiro ka’darute vokuru ya. Ndilo ’desi okaro drî njidrieri be ago koyi be ’butealo ago tagyia alo alo be drîi ndaro drisi. ⁴ Nda ese telesi nina ’bi’bii rote tavi ndaro si ni vokuru yasi ago evo ànya te vuru ’bädri ya. Nda edrete mile toko ana roya, tana konya ŋgwa anyaro robe dori utina vosi. ⁵ ’Dooko anya ti ŋgwa agoro te, se mirina tu’dei cini ’da drikaca ’desi si. Oko ahwe ŋgwa te ago ugu te Lu re ago giti ndaro re. ⁶ Toko ana mute vocowa ya, vose Lu kedebe anyari ana ya, tana andrevo anyaro robe lau u’du kutu alo kama ritu ’butenjidrialo (1,260). ⁷ ’Dooko kyila ’dete vo’buyakuru ya. Maikolo ndi malaikai ndaro be yeyi kyila te ndilo be ago ndilo ndi malaikai ndaro be yeyi kyila kpate; ⁸ oko ape ndilo te ṛe, ago nda ndi malaikai ndaro be ale kote orine vo’buyakuru ya tona. ⁹ Evo ndilo ’desi te tesi, ini se uku, se äzite Kicu’ba, kode Satani, se odo ’bädri cini te. Evo nda te vuru ’bädri ya, tro malaikai cini ndaro be. ¹⁰ ’Dooko meri kporo ata amba rote vo’buyakuru ya ugu ata ekye: “Yauono ŋgaopa Lu ro esate! Yauono Lu ka’da mbara ndaro te oso ’Bädri’ba ronye! Yauono Mesiya ndaro ka’da drikaca ndaro te! Tana nda se kedrebe Lu amaro kandra ago kikicu ädrupii amaro te kitu ndi ŋgäkyi be si ono evote vuru tesi ni vo’buyakuru yasi. ¹¹ Ädrupii amaro peyi nda te ṛe kari Timelegogo rosi ago taŋgye se ànya kopebe si, ago ànya a’dote ole be adri ànyaro ozone ago odrane. ¹² Ago ta’doro nyà’do yai’dwesi, ami vo’buyakurui, ago ami se cini se nyàbe ori lau ’do! Oko aba te rritiro ’bädri ri ndi gyi’desi be! Tana Kicu’ba efote vuru amire, ago nda te twi kyila be, tana nda ni ndi anjioko tu ndaro e’bete toto fere.” ¹³ Ondro ndilo kunite evo nda te vuru ’bädri ya oko, nda eto oso te toko se kuti ŋgwaagoro be ana vo. ¹⁴ Ozo kufu ritu ägyiribi ’desi rote anyari tana koŋga robe sina vo anyaro ya vocowa ya, vose andrena vo anyaro ’da kigye ndroa nätu kpäkyi londro ro, ni ndilo ri anya gotavoya. ¹⁵ Ago ’dooko ndilo i’dwe gyi te tesi ni kala ndaro yasi toko ana vo, tana kuŋgyi anya robe. ¹⁶ Oko gyini pa toko ana te, anya pi kala iro te ago mvu gyi se kefobe ni kala ndilo ro yasi ana te. ¹⁷ Ndilo a’dote kyilaro toko ana be oyite kyila oyene zelevoi anyaro, vona cini se kabe ota Lu ro orona ago orivoya ’diri taŋgye se aka’date Yesu si ri be. ¹⁸ Ago ndilo edrete gyi’desi kala.

¹ ’Dooko mandre koronya aza ka eziefo gyi’desi yasi. Anya orivoya koyi be ’butealo ago drîi be njidrieri, tagyia orivoya koyi na alo alo iyi drisi, ago drî alo alo drisi ävuru Lu o’da ro orivoya driigye si. ² Koronya na mandrebe laba oso kaa ronye, pa be oso pa mänyisile ro ronye, ago kala na laba oso kala ibi ro ronye. Ndilo ozo mbara modo ndaro ro, giti ndaro ndi drikaca ’desipara ndaro be te koronya ana ri. ³ Alo aza drîi koronya ro landrebe oso orivoya laza ogaogaro be, oko laza zwote. ’Bädri cini a’dote larolaro ro ago sote koronya ana vo. ⁴ ’Dicini mätuyi ndilo te tana nda ozo drikaca ndaro te koronya se ana ri. Ànya mätuyi koronya ana kpate, kayi ugu ata ekye: “A’di laba ni oso koronya ana ronye ya? A’di unina ni kyila oyene anya be ya?” ⁵ Aletate koronya ana ri ta atane driuŋgyi si ugu Lu o’dane, ago ozotate ndäri a’done drikaca be imbana ’butesu foritu. ⁶ Anya eto Lu o’da te, ävuru ndaro be, vose nda kabe ori kigye, ndi ànya se cini kabe ori vo’buyakuru ya be. ⁷ Aletate ndäri kyila oyene lidri Lu robe ago ànya opene ṛe, ago ozo drikaca te ndäri ’bakala, tu’de, lidri kalatoto ndi beti toto cini be dri. ⁸ Lidri cini se kabe ori ’bädri ya mätuna anya ’da, e’bena gialo toto ànya se egyi ävurunai te ṛo kyeno teinye ’bädri o’baako buku adri roya se orivoya Timelegogo se äfube ’do roya ’do ayani. ⁹ “Ka’do inye, nyeri, ondro nyà’do gi bii be owo! ¹⁰ Nda se usutate ṛo urune endaro ’do äṛuna ’da; nda se usutate ṛo ufune bando si ’do äfuna ’da bando si. Läzi ono orivoya yaiŋgyi ro ndi taoma robe lidri Lu ro ri.” ¹¹ ’Dooko mandre koronya aza te, se efote tesi ni gyini yasi. Anya orivoya koyi ritu be oso koyii timelegogo ro ronye, ago atate oso ndilo ronye. ¹² Yetate drikaca ’desi koronya käti ana rosi anya kandra. Ago gbiri ’bädri te ndi ’dicini se kabe ori kigye be koronya käti, se laza na kozwobe ana mätune. ¹³ Koronya ṛiri ono ye talaro ro para te; anya ’ba asi te e’dene vuru ni vo’buyakuru yasi ’bädri ya mile ’dicini ro yasi. ¹⁴ Ago anya odo lidri se cini kabe ugu ori ’bädri ya ono te talaro ro se aletate oyene mile koronya käti ana roya ana rosi. Koronya ana ititate ànyari beti koronya se agate bando si ago ka drigba ori ana ro edene. ¹⁵ Aletate koronya ṛiri ri adri ovone beti koronya se käti ana roya, tana betina kuni robe atane ago ko’ba ànya se cini kogabezo anya mätune ana robe odrane. ¹⁶ Koronya gbiri lidri cini te, giṛiŋwà ro ndi ’desiro be, ŋgaamba be ndi ati’ba ro be, iyeäṛi ro ndi dritai ro be, a’done beti ’dika’da ro se a’babe drígwo ànyaro yasi kode militi ànyaro yasi be. ¹⁷ ’Diaza unina ko ŋga aza ogyene kode logyene e’begialo nda orivoya beti ’dika’daro ono be, anjioko ni ävuru koronya ro kode oti se vo ävuruna ro roya ’do. ¹⁸ Läzi ono orivoya tavouni ro. Nda se orivoya tauni be unina ndi takaci oti koronya ro ro unine tana otina orivoya vo ävuru lidri ro roya. Otina orivoya kama njidrialo ’butenjidrialo fonjidrialo (666).

¹ ’Dooko mandrevote oko, Timelegogo aza orivoya edrevoya ’Bereŋwa Zaiona dri, ago lidri kutu kama alo ’butesu fosu (144,000) se orivoya ävuru ndaro be ago ävuru Täpi ndaro robe egyiegyiro militi ànyaro yasi iyi orivoya edrevoya tro nda be. ² Ago meri ata teni vo’buyakuru yasi se kporona, wite oso kporo ärru gyi ro ronye, oso kporo uhwe ’bu ro ronye, wite oso lekyembe o’bi’bai kayibe loŋgo o’bi lekyembe si ronye. ³ Lidri kutu kama alo ’butesu fosu (144,000), ŋga lidriidri su, ndi ’di’desii be; se kedreyibe giti kandra ana, ànya ŋgoyi loŋgo to’di te, se ànya niyi toto ni. Ànya ni lidri se ’dicini lakosi toto se ätwe drîna be owo. ⁴ Ànya ni mànoago se gaga andivo ànyaro te wäṛiro loyeyi ta kote ’ditoko be; ànya orivoya ’dise loyeyi ta kote ’ditoko be owo. Ànya kayi oso Timelegogo vo vose nda kabe oyi kigye ya. Ätwe drî ànyaro teni ’dicini lakosi ago ànya orivoya ni se ka’dobe käti ozoozoro Lu ri ago Timelegogo ri owo. ⁵ Ànya niyi kote ta itine kowesi alona, ànya orivoya taenjiako. ⁶ ’Dooko mandre malaika aza te oŋgavoya lekuru vokuru ya, lazo äduako Lazokado ro ayona be lidri ’bädri ro ri, lidri beti toto, ’bakala, lidri kalatoto ndi tu’de be ri. ⁷ Nda atate otre amba si ekye: “Miro Lu ago nyäräṛu ’desipara ndaro! Tana tu esate ndäri vure ’dicini ro opeza. Nyämätu nda se ko’ba vo’buyakuru, ’bädri, gyi’desi ndi gyi legwalegwaro be ni ono.” ⁸ Malaika ṛiri sote se käti ana vo ka ugu ata ekye: “Anya ’dete! Babelona ’Desi ’dete! Anya ’ba lidri cini te vino anyaro umvune, vino osoekye ronyi leme anyaro ro!” ⁹ Malaika nina sote se ritu käti kai vo, ka ugu ata otre amba si ekye: “Nda se kabe koronya ana mätu ndi beti anyaro be ago ka’dobe taka’daro be militi ndaro ya kode drí ndaro ya ’do ¹⁰ nda andivo umvuna vino Lu ro ’da, vino kyila ndaro ro, se nda sote twi osoekye kofo kyila ndaro roya! ’Dicini se kayibe ta ono oye ezana ’da asi si ago bäruti si mile malaika alokado ro ndi Timelegogo robe ya. ¹¹ Kätu asi se kabe ànya eza ana ro ofona ’da kuṛi äduako ago rriro. Loli i’do kitu si ca ŋgäkyi si ànya se kayibe koronya mätu ndi beti anyaro be ndi ’di azaka se taka’daro ävuru anyaro robe ri.” ¹² Läzi ono ta yaiŋgyi ro lidri Lu ro ri, ànya se kayibe ota Lu ro orona ago orivoya ’diri Yesu ri ’do. ¹³ ’Dooko meri ata teni vo’buyakuru yasi ka ugu ata ekye: “Nyegyi ta ono: Ànya se tu yauono si kayibe ugu todra ruindu Opi roya ni kado.” Tori ka tadrioza ni ekye: “Owo endaro! Ànya oyenayi riyä ’da loli si ni losi oye mbarasi ànyaro ri, tana taoye ruindu ànyaro ro ka ndi uguoyi ànya be.” ¹⁴ Ago mandrevote oko, ’dikolo onjero orivoya, ago ŋgase koribe driigye ana mandrebe laba oso lidri ronye, tagyia läguläguro be drî ndaro ya ago iṛi kyaka’da robe drí ndaro ya. ¹⁵ ’Dooko malaika aza efote ni Yekalu yasi ago trete otre amba si nda se koribe ’dikolo dri ana ri ekye: “Miye losi iṛi miro si ago milo jalia tana tu esate; tana jalia ’bädri ro kate!” ¹⁶ ’Dooko nda se koribe ’dikolo dri ana evo iṛi ndaro te ’bädri dri, ago alo jalia ’bädri rote. ¹⁷ ’Dooko mandre malaika aza ka efo ni Yekalu vo’buyakuru ya yasi, ago nda kpa iṛi kyaka’da robe. ¹⁸ ’Dooko malaika aza, se ni dri’ba asi ro ana, ikyite ni vo tori oloro yasi. Nda trete otre amba si malaika se iṛi kyaka’da robe ana ri ekye: “Miye losi iṛi miro si, ago milo doŋgo ni ämvu kono ro ’bädri ro yasi, tana doŋgo kate!” ¹⁹ Ago malaika evo iṛi ndaro te ’bädri dri, lo doŋgo teni kono drisi, ago vo anya te pi’di vino ozwaro kyila rritiro Lu ro roya. ²⁰ Azwa vino te tesi ’bakici kundu ago kari idite tesi ni pi’di vino ozwaro yasi udina ocana le jä’dijä’di kama ritu ago ocina oso kpikpi nji.

¹ ’Dooko mandre ta rubä ro aza te vokuru ya, ’desi, ugu ’dilarolaro ro. Malaikai orivoya njidrieri taezaro njidrieri be, se ni äduna yi; tana ànya kayi kyila ädu Lu ro tana itina. ² ’Dooko mandre ŋgase oso gyi’desi madara ro ronye te tasarute asi be, mandre ànya se kopeyi koronya ndi beti anyaro be te ṛe ndi oti ävuru anya robe. Ànya orivoya edrevoya gyi’desi madara ro kala, ruyi lekyembe se Lu kozobe ànyari ana te ³ ago kayi ugu loŋgo Musa ruindu’ba Lu ro ro oŋgona ndi loŋgo Timelegogo robe ekye: “Opi Lu Mbaraekye taoye miro orivoya para ago liŋgyiekye! ’Bädri’ba tu’dei ro, taoye miro ŋgye ago orivoya endaro! ⁴ A’di edrena ko turi si ni miri ya Opi? A’di ogana nizo ’desipara miro tana itine ya? Mi gialo ni orivoya alokado. Tu’dei cini ikyina ’da ago mätunayi mi ’da tana taoye ŋgye miro ’dicini ndrete” ⁵ Ono vosi mandre yekalu vo’buyakuru ya äpite, Mutuguṛi a’do lototi Lu ro orivoya kigye. ⁶ Malaikai njidrieri se orivoya taezaro njidrieri be ana efoyite tesi ni yekalu yasi, aso boŋgo wäṛiro lägulägu te lomvoigye ago embe ŋga läguläguro te ŋgulu kätäti ànyaro yasi. ⁷ ’Dooko alo aza ŋga lidriidriro ro se su ana ozo deŋbele njidrieri logo lägulägu rote malaikai njidrieri se ana ri twi kyila Lu ro be, Lu se kabe ori äduako ago rriro ono. ⁸ Yekalu gate twi kätu be ni ’desi ndi mbara Lu robe ri, ago ’diaza ni ko ocine yekalu ya madale taezaro se njidrieri ezibe malaikai njidrieri si ana kye lutu.

¹ ’Dooko meri kporo amba te ugu ata ni yekalu yasi malaikai njidrieri ri ekye: “Nyòyi mìda deŋbele njidrieri kyila Lu ro ro ’bädri dri!” ² Malaika käti oyite ago da ŋgase deŋbele ndaro ya ana te ’bädri dri. Laza koziro ago luwuekye efote ànya se taka’daro koronya robe ago ànya se kämätuyi beti anyaro te kai lomvo. ³ ’Dooko malaika ṛirina date vuru ni deŋbele ndaro yasi gyi’desi dri. Gyi a’dote oso kari ’dise kodrabe ro ronye, ago ŋga cini lidriidriro gyi’desi ya todrate. ⁴ ’Dooko malaika ninana date vuru ni deŋbele ndaro yasi goloi drisi ndi gyi legwalegwa robe ago ànya tozarute kari ro. ⁵ Meri malaika dri’ba gyi ro kata ekye: “Vure se miyebe orivoya ŋgye, Äye mi se Alokado ono, mi se orivoya yauono, ago se orivoya kyeno ana! ⁶ Ànya edayi kari lidri Lu ro ndi nebii be rote, ago nyozo kari te ànyari umvune. Ànya usuyi tase tana si ànya be te!” ⁷ ’Dooko meri kporo teni vo tori oloro yasi ka ugu ata ekye: “Opi Lu Mbaraekye! Endaro vureope miro orivoya ’diri ago ŋgye.” ⁸ ’Dooko malaika lisuna date vuru ni deŋbele ndaro yasi kitu dri, ago alete anyari lidri ozane eme ndra anyaro si. ⁹ Aza ànya te vo emeekye si, ago ànya ’dayi ävuru Lu, se ni drikaca be taezaro kwoi dri te. Oko ànya etayidri kote ni takozii ànyaro yasi ago räṛuyi ’desipara ndaro kote. ¹⁰ ’Dooko malaika linjina date vuru ni deŋbele ndaro yasi giti koronya ro dri. Ŋgätini a’dote miri ’bädri’ba ro koronya ro dri, ago lidri si ladra ànyaro te tana ta lomvoluwu ànyaro rota, ¹¹ ago ànya ’dayi Lu vo’buyakuru rote ta lomvoluwu ànyaro rota ndi laza be. Oko ànya etayidri kote ni taundiro ànyaro yasi. ¹² ’Dooko malaika njidrialona date vuru ni deŋbele ndaro yasi Golo ’desi Eferata dri. Golo sete kpeye, liti edeza ’bädri’bai se kayibe ikyi ni ’buzelesi ana ri. ¹³ ’Dooko mandre torii undiro nätu te landrete oso tudrui ronye. Ànya kayi ezi efo ni kala ndilo ro yasi, kala koronya ro yasi, ago ni kala nebii mieywe’ba ro yasi. ¹⁴ Ànya orivoya torii demonai se kayibe talaro ro oye ro. Torii nätu kwoi oyiyite tesi ’bädri’bai cini ’bädri ro re, ànya ezine voaloya ta kyila Tu ’desi Lu Mbaraekye ro rota. ¹⁵ “Nyeri! Moye ikyine oso kugu ronye! Nda se kabe ori miuŋbo ago kabe boŋgoi ndaro vona okwa ni kado, tana nda abana ko gbikyi bägyulu ro, ago a’dona ko driupiro miamba ya.” ¹⁶ ’Dooko torii eziyi ’bädri’bai te voaloya vose äzibe kala Ebere rosi Aremagedona ana ya. ¹⁷ ’Dooko malaika njidrierina date vuru ni deŋbele ndaro yasi oli ya. Otre amba efote ni giti resi yekalu yasi, ugu ata be ekye: “Andete!” ¹⁸ Leko sionyi ’bu ro, kporo totre uhwe ’bu ro, ndi ägbigbi koziro be a’dote. Ägbigbi aza a’do kote alona oso nonye ṛoni o’ba lidri rosi, ono ni ägbigbi se kozipara vona cini drisi owo! ¹⁹ ’Bakici tokyerute le nätu, ago ’bakicii ’bädri cini ro eperete, Lu yi ta Babelona ’desi rote ago ’ba anya te vino umvune ni kofo ndaro yasi, vino kyila rritiro ndaro ro. ²⁰ Roŋga cini ijerute ago ’bereŋwà cini anarute. ²¹ Kuniŋwà ’busi ro alona läŋgyi ojona ro oso koma ’butenji ronye, e’dete ni vokuru yasi lidri se kabe Lu o’da ta taezaro ’busi rota kai dri, tana anya orivoya taezaro koziro yi.

¹ ’Dooko alo aza malaikai njidrieri se deŋbele njidrieri be ana ikyite mare ago atate ekye: “Nyikyi, ago maka’dana ta ronyi’ba likuekye ezaro ’da miri, se orivoya ’bakici ’desi se abete loto goloi amba lomvo ana ya. ² ’Bädri’bai ’bädri ro yeyi ronyi te anya be, ago lidri ’bädri ro a’dote iyi ufuufuro ni vino anyaro ronyi ro umvuna risi.” ³ Tori ru ma te ago malaika ŋgyi ma te vocowa ya. Ago lau mandre toko ana rite koronya okaro se orivoya ävurui, Lu o’da robe egyite lomvona cini yasi; koronya ana orivoya drî be njidrieri ago koyi be ’butealo. ⁴ Toko ana so boŋgo lärimi ro ndi oka robe te, ago enjate logo läguläguro ruega rosi, kuni lagyeamba ndi ŋgoŋgo be si. Anya ru kofo läguläguro te drí anyaro ya twi ŋgakozi ndi ŋga undiro be, ta ronyi oye anyaro rota. ⁵ Egyi ävuru se takacina da’doda’doro te militi anyaro ya ekye: “Babelona ’Desi, endre ronyi’bai cini ro ago ka ’di enji ni ’bädri ya.” ⁶ Ago mandre toko ana te yi ufuufuro kari lidri Lu ro ro ndi kari ànya se äfute tana ànya a’doyite ’diri Yesu ri be rosi. Ondro mandre anya te oko, ma’dote cu larolaro ro. ⁷ Malaika eji ma te ekye: “Nya’dote larolaro ro etaya? Mitina ta da’doda’do ro toko ono ro tana ’da miri ndi koronya se drî njidrieri be ago koyi be ’butealo se kabe anya uŋgyi ono. ⁸ Koronya ana sedri orivoya lidriidriro; oko yauono te i’do, oko anya ogo ka’daruna ’da, anya ka oyete efone ni ’buociekye ya, ago anya oyina ’da ago äfuna ’da. Lidri se kabe ugu ori ’bädri ya se ävurunai egyi kote buku adri roya ṛo o’ba ’bädri rosi, vonai cini a’donayi ’da larolaro ro ondro ànya kayite voondre koronya ana dri owo. Sedri anya orivoya, lidriidriro yauono anya te i’do, oko anya ogo ka’daruna ’da. ⁹ “Läzi ono ta tavouni ro ndi tauni be ta. Drî se njidrieri ana orivoya ni lutui njidrieri se toko ana kabe ori driigye owo. Ànya kpa orivoya ’bädri’bai njidrieri owo: ¹⁰ nji ànyaro ’dete, alo ka gi’du miri oye, ago alo aza ikyi drigba ko, ondro nda kikyite oko, beṛo ndäri toto miri oyene tuna fere. ¹¹ Ago koronya se sedri orivoya lidriidriro, oko kori ko madaro ’do, andivo anyaro ni ’bädri’ba njidriena yi se ni alo aza njidrieri ro ago kate oye a’done ufuufuro ro. ¹² “Koyii mindrebe ’butealo ’do orivoya ni ’bädri’bai se eto miri oye dri ko iyi owo, oko ozona drikaca ’da rigye miri oyene oso ’bädri’bai ronye saa alo koronya be. ¹³ Se ’butealo kwoi vonai cini tausu alo be, ago ànya ozoyi mbara ànyaro ndi drikaca be te koronya ri. ¹⁴ Ànya oyenayi kyila ’da Timelegogo be, oko Timelegogo, ndi ’di ndaro se nda kuzibe, konjibe, ago oso’bai ro ’diriro nda vo be, openayi ànya ’da ṛe, tana nda orivoya Opi opii ro ago ’Bädri’ba ’bädri’bai ro.” ¹⁵ Malaika ata kpate märi ekye: “Gyi se mindrebe, se ronyi’ba kabe ori driigye ’do, orivoya ni tu’dei, lidrii, beti toto ndi kalatoto yibe. ¹⁶ Koyi ’butealo se mindrebe ndi koronya be ’do yana osona ’da ronyi’ba lomvo; ànya uruna ŋgacini se anya be sina ana ’da ago e’benayi anya ’da bägyulu ro, ànya onyanayi iza anyaro ’da ago ozanayi anya ’da asi si. ¹⁷ Tana Lu ’ba ta te ya ànyaro ya se oyenayi tausu ndaro ’da ugu taoyesi voaloyasi ago ozona mbara ’da koronya ri ŋgamiriza madale atà Lu ro a’dona lutu endaro. ¹⁸ “Toko se mindrebe ’do orivoya ’bakici ’desi se kabe ’bädri’bai ’bädri ro mirina owo.”

¹ Ono vosi mandre malaika aza te ka eziikyi vuru ni vo’buyakuru yasi, nda orivoya drikaca ’desi be ago ŋgaeyi lägu anyaro ro eyi ’bädri cini te. ² Nda trete kporo amba si ekye: “Anya ’dete! Babelona ’Desi ’dete! Yauono demonai ndi torii undiro be täkyiyi anya te, ŋgacini undiro ndi arii se ya osoro lomvoigye iyi ka teni ori anya ya. ³ Tana tu’dei cini fuyi iyi te vino anyaro si, se ni vino osoekye ronyi leme anyaro ro. ’Bädri’bai ’bädri ro yeyi ronyi te anya be, ago lidri ŋgalogye’bai ’bädri ro a’doyite ŋgaamba be ronyi leme drî ritaako anyaro si.” ⁴ ’Dooko meri kporo aza teni vo’buyakuru yasi, ka ugu ata ekye: “Nyefo tesi, lidri maro! Nyefo tesi ni anya resi! Beṛo ko ämiri rudro’bene takozii oye anyaro be; beṛo ko ämiri taezaro anyaro la’done! ⁵ Tana takozii anyaro te du ago sate le kuru vo’buyakuru ya, ago Lu ka taoye kozi anyaro tana oyina. ⁶ Mìye anya ndi oso anya koye ami be ronye; nyòlogo tavo tase anya koyebe ämiri ro perena ritu. Miso kofo anyaro twi ŋgaumvuro osoekye be perena ritu oso ŋgaumvuro se anya kedebe ämiri ronye. ⁷ Nyozo rueza amba anyari ndi tusu be oso driuŋgyi ndi ŋgaamba se anya kega andivo anyaro be sina ronye. Tana anya ka ugu ata andivo anyari ri ekye: ‘Ma ’bädri’ba toko ro; ma ni ori no! Ma ko ävuzi yi, mänina ko a’done tusu ro alona!’ ⁸ Tana ta ono ro, tu alo si oko ezana anya ’da taezaro si, adravo, tusu ndi mä’bu be si. Ago azana anya ’da asi si, tana Opi Lu, se kabe vure anyaro ope orivoya mbara fopara be.” ⁹ ’Bädri’bai ’bädri ro se kodro’be iyi be ronyi anyaro ya ndi lemena be totrena ago liyina ’da ’bakici dri ondro ànya kondreyi kätu teni leko asi ro se kabe anya uje yasi owo. ¹⁰ Ànya edreyi le pere, tana ànya orivoya turi ro ugu rueza anyaro la’dovoya. Ànya kayi ata ekye: “Orivoya rritiro! ’Bakici ’Desi Babelona ono te orivoya koziro ndra! Eza mi te toto saa alo si!” ¹¹ Ŋgalogye’bai ’bädri ro ka kpa totre ndi ruṛu be ta anyaro ta, tana ’diaza gye ŋga anyaro kote tona, ¹² ’diaza gye logo läguläguro, mo’di kunii liŋgyiekye ndi ŋgoŋgoi anyaro be; ŋga anyaro boŋgo ’bilindriro rendelero, boŋgo lärimiro, ṛiyäṛiyäro ndi boŋgo okaro be; ŋga dritoto cini ice ro ndi ŋgadritoto edeni liwasi yasi be ndi ce lagyeamba be, atala ro, logo ro ndi kuni ’bela robe; ¹³ ago girifa, ŋga tägyi kado be, ŋga tägyi tagyiriro, koto’boŋwà tägyi ŋgutruro, ŋga ŋgutruro, vino ndi ido be, kyira ndi kyifo be, ti ndi timele be, farasii ndi arabia be, iyeäṛii ca lidri be agye kote. ¹⁴ Ŋgalogye’bai atayite anyari ekye: “Ŋgàvo se cini milebe a’done sina modo miro ri kyete, ŋgadriamba miro ndi liŋgyi be kyete, ago migo nyusuna ànya kote kpa to’di!” ¹⁵ Ŋgalogye’bai, se a’doyite ŋgaamba be ni ŋgalogye ànyaro ’bakici ana ya si, edrenayi ’da le pere, tana ànya orivoya turi ro rueza anyaro la’dovoya, ànya liyinayi ago o’benayi ruṛu ’da, ¹⁶ ago atanayi ’da ekye: “Orivoya rritiro! Koziro ndra ’bakici ’desi ri! Anya so boŋgo ’bilindriro, lärimiro ndi okaro be te, ago toyi logo läguläguro ruega ro, kuni liŋgyiekye be, ndi ŋgoŋgoi be te! ¹⁷ Ago anya ije ŋgadriamba cini ono te saa alo ya!” Dri’bai cini toŋboi ro, ndi aba’bai be, opi’bai ndi ’dicini azaka se kayibe ŋga ori iro ro usu losi oyesi gyi’desi dri ana, edreyite le pere, ¹⁸ ago totreyite amba ondro ànya kondreyi kätu teni leko asi ro se kuje anya te ana ro yasi oko atayite ekye: “’Bakici aza alona a’do kote oso ’bakici ’desi ono ronye!” ¹⁹ Ànya dayi durufu te iyi drisi, ànya liyiyite ago ’beyi ruṛu te, atayite ekye: Orivoya rritiro! Orivoya koziro ndra ’bakici ’desi ono ri! Anya orivoya ni ’bakici se toŋboi se cini kabe ugu udi gyi’desi drisi ka’doyibe ŋgadriamba be ŋga anyaro si owo! Ago toto saa alo si oko anya ije ŋgacini te! ²⁰ Nya’do yai’dwesi, vo’buyakuru, ta anya pere rota! Nyà’do yai’dwesi lidri Lu ro lazo’bai ndi nebii be! Tana Lu pe vure anyaro te ta tase anya koyebe ämiri rota! ²¹ ’Dooko malaika mbaraekye ŋgyi kuni te a’do ’desina oso kuni ’desi ŋgauyiro ronye ago vote gyi’desi ya atate ekye: “’Bakici ’desi Babelona ono avona ’da mbarasi vuru ago andrena ko tona. ²² Uwi lekyembei ro ndi kporo oye lidri robe, yeṛi ovo yeṛiovo’bai ro ndi cekuṛe be erina ko tona miya! Usuna lidri ŋgaede’ba kpa ko miya alona, ago erina kporo kuni ŋgauyiro ro ko miya tona! ²³ Andrena ŋgaeyi lamba ro ko miya tona, erina kporo ndiriŋwa abe ogyena ro ndi kodrogoi be ro ko miya tona. Lidri miro ŋgalogye’bai ro ni mbara fondra be ’bädri cini yasi ago taläkä mieywe ro miro si nyodo lidri cini ’bädri ya te!” ²⁴ Eza Babelona te tana ta kari nebii ro ndi lidri Lu ro ro se usube ’bakici ya tana ro, owo, ta kari ànya se cini äfute ’bädri ya rota.

¹ Ono vosi meri kporo aza te oso kporo oye lidri amba ro ronye vo’buyakuru ya, kayi ugu ata ekye: “Nyäräṛu Lu! Ŋgaopa, ’desi ndi mbara be orivoya Lu amaro ro! ² Vureope ndaro orivoya endaro ago ŋgye! Nda pe vure ronyi’ba se kabe ugu ’bädri enji ronyi oye anyaro si te. Lu eza anya te tana anya fu ruindu’bai ndaro te.” ³ Ànya treyi kpate to’di ekye: “Nyäräṛu Lu! Kätu ni leko asi ro se kabe ’bakici ’desi uje ana yasi ka ofo domaa äduako ago rriro!” ⁴ ’Desii ’buteritu fosu ndi ŋga lidriidriro su be ’deyite vuru ago mätuyi Lu, se koribe giti dri ana te. Ànya atayite ekye: “Amen! Nyäräṛu Lu!” ⁵ ’Dooko kporo ata ro ikyite ni giti resi, ugu ata ekye: “Nyäräṛu Lu amaro, ruindu’bai ndaro ndi lidri cini ndaro be, ’desi ro ndi riti giṛiŋwà robe, se kabe nda oro ono!” ⁶ ’Dooko meri kporo aza te oso lowa ro ronye, oso kporo äru gyi ro ronye oso kporo uhwe ’bu ro ronye. Meri ànya te kayi ata ekye: “Nyäräṛu Lu! Tana Opi, Lu Mbaraekye amaro, orivoya ’Bädri’ba yi! ⁷ Mì’de màye riyä ago mà’do yai’dwesi, mì’de märäṛu ’desipara ndaro! Tana tu esate ta lagye Timelegogo ro rota, ago toko ndaro ede andivo anyaro te, tana ro. ⁸ Ozo boŋgo wäṛiro ’bilindri ro läguläguro te anya ri osone.” (Boŋgo ’bilindri ro orivoya taoye kado lidri Lu ro ro.) ⁹ ’Dooko malaika atate märi ekye: “Nyegyi ta ono mikye: Ànya se äzite karama lagye ro Timelegogo roya ni kado.” Ago malaika ata ta kinja te ekye: “Kwoi ni orivoya atà ŋgye Lu ro owo.” ¹⁰ Ma’dete vuru nda pa nda mätune, oko nda atate märi ekye: “Miye ko inye! Ma orivoya ruindu’ba azi miro ago ädrupii miro ro, vona se cini käti taŋgye se Yesu kaka’da be ’do owo. Nyämätu Lu ayani!” Tana taŋgye se Yesu kolofobe ’do orivoya ni tase kabe nebii tomba owo. ¹¹ ’Dooko mandre vo’buyakuru pirute, ago farasi onjero orivoya. Umu’ba na sina äzite ’Di’diri ago Ŋgye. Tana anya ka vure ope ago kyila oye taŋgye si. ¹² Mi ndaro labate oso leko asi ro ronye. Nda so tagyia amba te drî ndaro ya. Nda orivoya ävuru be egyite nda lomvo, oko ’diaza ni ko e’begialo andivo ndaro ni tana ni. ¹³ Boŋgo runduṛuro se nda kosobe ana a’bete kari ya. Ävuru ndaro äzite “Ata Lu ro.” ¹⁴ Kyila’bai vo’buyakuru ro sote nda vo, kayi ugu umu farasii onjero si ago soyi boŋgo wäṛiro onjero ’bilindriro te. ¹⁵ Bando kyaka’da ro efote ni kala ndaro yasi se nda opena tu’dei ’da ṛe sina, nda mirina ànya ’da drikaca ’desi si, ago nda otona vino pi’di vino ozwaro ya ’da tesi yaoso kyila ro Lu Mbaraekye rosi. ¹⁶ Boŋgo runduṛuro ndaro dri ndi miṛi ndaro be egyi ävuru te ekye: “’Bädri’ba ’bädri’bai ro ago Opi opii ro.” ¹⁷ ’Dooko mandre malaika aza te edrevoya kitu dri. Nda trete otre amba si arii cini se kabe ugu oŋga kitoriya vokuru roya ri ekye: “Nyìkyi nyòtokala voaloya karama ’desi Lu roya! ¹⁸ Nyìkyi ago mìnya iza ’bädri’bai ro, dri’bai kyila’bai ro, ndi kyila’bai be, iza farasii ro ndi umu’bai ànya si be, iza lidri cini ro, iyeäṛi ro ndi dritai’ba robe, ’desi ro ndi giṛiŋwà robe!” ¹⁹ ’Dooko mandre koronyai ndi ’bädri’bai ’bädri ro ndi kyila’bai ànyaro be otoyikalate kyila oyene nda se kate ugu umu farasi si ana be ago kyila’bai ndaro be. ²⁰ Äru koronya te kamba’ba ro, tro nebi mieywe’ba se koye talaro robe kandra ndaro ya ana be. (Talaro ro se kai si nda odo ànya se taka’daro koronya robe ago se kämätuyi beti koronya rote ana be.) Koronya ndi nebi mieywe’ba be avote riti lidriidriro fofo asi ro se kabe uje bäruti be ana ya. ²¹ Kyila’bai anyaro utufute bando se kefobe ni kala nda se kabe umu farasi si ro yasi; ago arii cini nyàyi iza ànyaro te oso kuniyibe onyane ronye.

¹ ’Dooko mandre malaika te ikyivoya vuru ni vo’buyakuru yasi, nda ru ŋga ’buociekye upiro te drí ndaro ya ndi nyori läŋgyiekye be. ² Nda baṛi ndilo ini se kyeno, se ni Kicu’ba, kode Satani ana te, ago embe nda te anda ndroa na kuturo. ³ Malaika vo nda te le ’buociekye ya. Se drî anyaro te, ago be drî anyaro te, tana anya kori robe tu’de odoako madale ndroa kuturo okyena ni. Ono vosi oko beṛo nda onjine dritai ro tuna fere. ⁴ ’Dooko mandre gitii te, ago ànya se koriyibe driigyesi ana ozo mbara te rigye vure opeza. Mandre lindri ànya se utufute kai ro kpate tana ànya peyi taŋgye se Yesu kolofobe ndi ata Lu robe ana tana te. Ànya mätuyi koronya ca beti anyaro kote, a’doyi kpa ko taka’daro koronya robe militi ànyaro yasi ca dríi ànyaro yasi. Ànya adriyite ago miriyi ’di te oso ’bädri’bai ronye Kristo be ndroa na kutu alo. ⁵ (Anjoko avo ro adriyi kote madale ndroa kuturo okyena lutu.) Ono ni efo käti avo ro owo. ⁶ Ànya se äṛu ndra be ni ànya se olocite efo avo ro käti ono ya owo. Odra ṛiri mbaraako ànya dri, ànya a’donayi ’da kohanii Lu ro ago Kristo ro, ago ànya mirinayi ’di ’da nda be ndroana kuturo. ⁷ Ndroa kuturo vosi oko, onjina Satani ’da ni kamba ndaro yasi, ⁸ ago nda oyina ’da tesi tu’dei se kepererube ’bädri cini yasi odone, se ni Goga ndi Magoga be. Satani ezina ànya cini ’da voaloya ta kyila oye rota, ṛo amba oso koṛogoŋwà siŋgwa ro kototi gyi’desi ro kala ronye. ⁹ Ànya pererute ’bädri yasi ago muyidri gawa lidri Lu ro rote ndi ’bakici se nda kulube be. Oko asi ikyite ni vo’buyakuru yasi ago je ànya te. ¹⁰ ’Dooko Satani, se kodo ànya be ana, avote fofo asi ro ndi bäruti be roya, se koronya ndi nebi mieywe’ba be avo teṛo nja kigye ago ezana ànya ’da kitu ago ŋgäkyi äduako ago rriro. ¹¹ ’Dooko mandre giti ’desi onjero te, ago ’diaza ka ori driigye. ’Bädri ndi vo’buyakuru be mute ni kandra ndaro yasi ago andre ànya kote tona. ¹² Ago mandre avo te ’di’desi ro ndi ’di giṛiŋwà robe, edrevoya giti kandra. Äpi buku te, ago ’dooko äpi buku aza te, buku ’di lidriidriro ro. Ape vure avo rote tase ànya koyebe voro, oso egyibe buku ya ronye. ¹³ ’Dooko gyi’desi lofo avo iro te. Odra ndi ’bädri avo robe lofo avo se ànya yasi kpate. Ago vona cini ape vurena te oso tase ànya koyebe ronye. ¹⁴ ’Dooko Odra ndi ’bädri avo robe avote fofo asi roya. (Fofo asi ro ono orivoya ni odra ṛiri yi.) ¹⁵ Nda se ävuru ndaro egyi kote buku ’di lidriidriro roya avote fofo asi roya.

¹ ’Dooko mandre vo’buyakuru to’di te ndi ’bädri to’di be. Vo’buyakuru käti ndi ’bädri käti be ijete, ago gyi’desi te i’do. ² Ago mandre ’Bakici Alokado, Yerusalema to’di te, ikyivoya vuru ni vo’buyakuru yasi ni Lu resi, edete ago te nja, oso toko se abe ogyena koso boŋgo be kabe drî ago ro utu ronye. ³ Meri kporo ata rote ugu ata ni giti resi ekye: “Yauono ’ba Lu rote orivoya lidri be! Nda orina ’da ànya be, ago ànya a’dona ’da lidri ndaro. Lu andivo a’dona ’da ànya be, ago nda a’dona ’da Lu ànyaro. ⁴ Nda oyona miendre cini ’da wäṛi ni mi ànyaro yasi, Odra a’dona ko tona, ca tusu kode liyi kode lomvoluwu. Ŋgase uku ijete.” ⁵ ’Dooko nda se koribe giti dri ana atate ekye: “Yauono ma’ba ŋga cini te orivoya to’diro!” Nda ata kpate märi ekye: “Nyegyi ta ono, tana ta kwoi orivoya endaro ago änina ndi taoyine kigye.” ⁶ Ago nda atate ekye: “Andete! Ma orivoya käti ago ädu yi, etovo ago ondevo yi. Nda se aza gyilu be mozona gyi ’da umvune ndäri awi ni gyi legwalegwaro adri ro yasi teinye ŋga ozo ako tana ro. ⁷ Nda se kabe ŋgaopeṛe uruna ŋga ono ni maresi, ma’dona ’da Lu ndaro, ago nda a’dona ’da ŋgwa maro. ⁸ Oko turi’bai, dríozo’bai, taenji’bai, ’diufu’bai, ronyi’bai, taläkä’bai lui awi mätu’bai, ndi koweoga’bai cini be vo ànyaro orivoya fofo asi ro se kabe ugu uje bäruti be ya, se ni odra ṛiri yi.” ⁹ Alo aza malaikai se njidrieri ro se deŋbele njidrieri twi taezaro njidrieri be ro ikyite mare ago atate ekye: “Nyikyi, ago maka’dana toko se abe ogyena ’da miri, toko Timelegogo ro.” ¹⁰ Tori ru ma te, ago malaika ŋgyi ma te le dridopi ’bereŋwa ogwaekye roya. Nda ka’da Yerusalema, ’Bakici Alokado te märi, ka ikyi vuru ni vo’buyakuru yasi ni Lu resi ¹¹ ago läguläguro ŋgaeyi Lu robe. ’Bakici lägute oso kuni lagyeamba be ronye, oso Jasepa ronye, wäṛiro oso ŋga läguläguro ronye. ¹² Anya orivoya tiṛi ogwaekye dereŋwà ’butealo foritu be ago malaikai ’butealo foritu be dri’ba dereŋwà ro. Egyi ävuru ’bakala ’butealo foritu lidri Yisaraele ro rote dereŋwà drisi. ¹³ Dereŋwà orivoya nätu lamadri alona ya, nätu ’buzelesi, nätu ŋgäṛiŋwa drisi, nätu mä’du drisi, ago nätu aŋgoyasi. ¹⁴ Tiṛi ’bakici ro abete kotopa kuni ’butealo foritu dri, egyi ävuru lazo’bai ’butealo foritu Timelegogo ro rote driigye. ¹⁵ Malaika se katabe märi ono orivoya dofo läguläguro ŋgaojoro be ’bakici ojoza, dereŋwà anyaro, ndi tiṛi anyaro be ojoza. ¹⁶ ’Bakici kpeye gämigämiro, bäräŋgälä ago ocaekye. Malaika ojo ’bakici te dofo ndaro ŋgaojoro si. Ocana orivoya jä’dijä’di kutu ritu kama su ago kpa orivoya bäräŋgälä ago kpa ogwaekye oso ocana ronye. ¹⁷ Malaika ojo tiṛi na kpate, ogwana orivoya kadrakadrana ’bute njidrialo, nda ojote ŋgaojo lidri ro si. ¹⁸ Abe tiṛi te jasepa si, ago ’bakici andivona abete kpeye logo lägulägu wäṛiro si, kändrä oso madara ronye. ¹⁹ Kuni kotopa ’bakici ro ro itirate kunii liŋgyiekye si. Kuni kotopa käti ro jasepa yi, ṛirina ro safire yi, ninana ro agati yi, lisuna ro emeraleda yi, ²⁰ linjina ro onuke yi, njidrialona ro kaneliana yi, njidrierina ro kaureteza walawala yi, njidriena na ro berule yi, njidriesuna ro topaza yi, ’butealona ro kalesedonu yi, ’butealo foalona ro turekoise yi, ’butealo forituna ro ametuseta yi. ²¹ Dereŋwà ’butealo foritu orivoya ŋgoŋgo ’butealo foritu yi, dereŋwa alona edete ni ŋgoŋgo alo yasi. Liti ’bakici ro orivoya logo läguläguro wäṛiro, kändrä oso madara ronye. ²² Mandre yekalu kote ’bakici ya, tana yekalu anyaro ni Opi Lu Mbaraekye ndi Timelegogo be owo. ²³ ’Bakici le kitu ndi imba be ko voeyine ni kigye, tana lägu Lu ro kani voeyi kigye, ago Timelegogo orivoya ni lamba na yi. ²⁴ Lidri ’bädri ro abana ’da ŋgaeyi na si, ago ’bädri’bai ’bädri ro ezinayi ŋgadriamba ànyaro ’da kigye. ²⁵ Dereŋwà ’bakici ro orina ’da uŋbo ro tu cini si, ànya osene i’do alona, tana ŋgäkyi a’dona i’do lau. ²⁶ ’Desipara ndi ŋgadriamba tu’dei robe ezina ’da ’bakici ya. ²⁷ Oko ŋga aza se orivoya undiro ecina ko ’bakici ya, ca ’diaza se kabe driupi eziezi, kode koweoga iyi. Toto ànya se egyi ävurunai be buku Timelegogo ’di lidriidriro roya ’do ocinayi ni ’bakici ya.

¹ Malaika ka’da golo gyi adri ro ro kpate märi, kälägu oso madara ronye, ago ka idi ni giti Lu ro ndi Timelegogo robe resi ² ago ka ugu udi vurulero kitoriya liti ’bakici ro ro yasi. Lamadri golo ro riti yasi ce adri ro orivoya, se ka doŋgo owa perena ’butealo foritu ndroa alo ya, imba cini si, ago kyibii anyaro orivoya ugu tu’dei edero. ³ Ŋga aza se latri Lu ro zele usuna ko lau alona. Giti Lu ro ndi Timelegogo robe a’dona ’da ’bakici ya, ago ruindu’bai ndaro mätunayi nda ’da. ⁴ Ànya ondrenayi mi ndaro ’da, ago ävuru ndaro egyina ’da militi ànyaro yasi. ⁵ Ŋgäkyi a’dona i’do ago ànya olenayi lamba ndi ŋgaeyi kitu ro be ko, tana Opi a’dona ’da ŋgaeyi ànyaro, ago ànya mirinayi ’di ’da oso ’bädri’bai ronye äduako ago rriro. ⁶ ’Dooko malaika atate märi ekye: “Ata kwoi orivoya endaro änina ndi taoyine kigye. Ago Opi Lu, se kabe Tori ndaro ozona nebii ri, ezo malaika ndaro te tase koyebe a’done ndriro tana itine ruindu’bai ndaro ri.” ⁷ Yesu ka ata ekye: “Nyeri! Ma oye ikyine ndriro! Ànya se kabe ata buku ono ro orona ni kado!” ⁸ Ma Yoane merite ago mandre ŋga cini kwoi te, ago ondro mande erina ndi ànya ondre be te oko, ma’dete vuru pa malaika se kaka’da ŋga kwoi be märi roya, ago aba ma oyete nda mätune. ⁹ Oko nda atate märi ekye: “Miye ko inye! Ma orivoya ruindu’ba azi miro ago ädrupii miro ro nebii ndi ànya se cini koroyi ata buku ono robe owo. Nyämätu Lu ayani.” ¹⁰ Ago nda atate märi ekye: “Mi’ba ata taäŋguro se buku ono ya ko a’done da’doda’do ro tana tu te orivoya ti ta cini kwoi ri a’dozana. ¹¹ Nda se orivoya koziro beṛo dri ugu takozi oyene, ago nda se orivoya undiro, beṛo ugu tase kabe a’do undiro ugu oyene, nda se orivoya kado beṛo ugu takado oyene, ago nda se alokado beṛo ugu tase kabe a’do alokado oyene.” ¹² Yesu ka ata ekye: “Nyeri! Ma oye ikyine ndriro! Mezina päläti maro ’da mabe, ozone ’di alo alo ri oso tase nda koyebe ronye. ¹³ Ma orivoya ni käti ago ädu yi, etovo ago ondevo yi.” ¹⁴ Ànya se kayibe boŋgoi ànyaro ojona wäṛiro ni kado ago ta si ni doŋgo onyane ce adri ro drisi ago ocine dereŋwà yasi ’bakici ya. ¹⁵ Oko taenji’bai ago ànya se kayibe taläkä oye, ronyi’bai ndi ’diufu’bai be, ànya se kayibe lui awi mätu ndi ànya se koweoga’bai atà si ago taoye si be iro ’bakici kundu tesi. ¹⁶ “Ma, Yesu, mazo malaika maro te ta kwoi ayone ämiri känisa ya. Ma orivoya ni zelevo katidri Dawidi ro yasi; ma orivoya ’bi’bi läguläguro voiwi ro owo.” ¹⁷ Tori ndi Toko se abe ogyena be ka ata ekye: “Nyikyi!” ’Dicini se kabe ta ono erina beṛo atane ekye: “Nyikyi!” Nda se gyilu be; kikyi, kuru gyi adri ro ŋgapäṛi ro, nda se kolebe ono. ¹⁸ Ma, Yoane, ma ta lämu’duro emba ’dicini se kabe atà taäŋguro buku ono ro erina ri; ondro ’diaza kadroa ta aza te ànya dri, Lu adroana taeza se ruezaro edretazevona be buku ono ya ’da nda dri. ¹⁹ Ago ondro ’diaza kona atà taäŋguro aza se buku ono rote tesi, Lu uruna doŋgo ndaro la’do ro ni ce adri ro yasi ’da ni nda rigyesi ago anana nda kpa ni ’Bakici Alokado se edretezevona be buku ono ya yasi. ²⁰ Nda se kabe ta cini ndaro ono tazevona edre kani ata ekye: “Owo ṛo endaro! Ma oye ikyine ndriro!” Ka’do ndi inye. Nyikyi, Opi Yesu! ²¹ Tai’dwero Opi Yesu ro ka’do ’dicini be.