FILIPOI’BAI

¹ Ni Paulo ndi Timoteo, ruindu’bai Kristo Yesu ro resi. Lidri cini Lu ro Filipoi ya se orivoya rudro’be ya Kristo Yesu be ri, ndi tro dri’bai ndi ’diopa’bai känisa robe ri. ² Lu Täpi amaro ndi Opi Yesu Kristo be kozo tai’dwero ndi taliatokpe be ämiri. ³ Ma aro’boya oye Lu maro ri ami cini ta ma ta amiro usuna tu cini si; ⁴ tu cini si ma mätu ami cini ta, ma mätu riyä si ⁵ tana ta liti se mipa ma be losi lazokado roya eto ṛoni tuse käti si madale yauono. ⁶ Ago mänite endaro anjioko Lu, se keto losi kado ono be ami ya, uguna oyena ndi mileyaro madale andena anya gwo Tu Kristo Yesu roya. ⁷ Ami orivoya ondoalo ya maro ya! Ago ṛo kado märi tausune oso mabe oyena ta amiro ta ronye. Tana ami cini nyàla’do tai’dwero se Lu kozobe märi ono te ma be, ca yau ma kamba ya kode dritai ro lazokado gagavoya ago o’bavoya ŋgyiri si. ⁸ Lu orivoya tazevoedre’ba maro anjioko ma taŋgye iti ämiri ŋgalu maro ta ami cini rota efo ni ya Kristo Yesu andivo ro yasi. ⁹ Ma mätu tana ŋgalu amiro kugu omba robe amba ndra, troalo tauni endaro ndi vureope ŋgye be, ¹⁰ tana nyà’do robe nja tase kado para onjine ayani. ’Dooko nya’dona ndi dritai ro ni taundiro cini ndi ’dikozi be ri Tu Kristo rosi. ¹¹ Ori amiro a’dona ’da twi doŋgo takado endaro robe se Yesu Kristo unina ni owane, ta a’do ’desi ndi Lu räṛu be rota. ¹² Male ämiri unine, ädrupii maro, anjioko tase ka’dobe märi pa omba lazokado rote. ¹³ Tase kofobe ni kigye, vookwa’bai cini zo’desi miri ro ro, ndi ’di azaka se noŋwa be niyite ma’debe a’done kamba ya tana ma orivoya ruindu’ba Kristo ro. ¹⁴ Ago a’do maro kamba ya ’ba ädrupii amba te taomane Opi ya, ago ànya te orivoya driupiako tu cini si lazo Lu ro opene turiako si. ¹⁵ Endaro azaka ànyaro pe Kristo te tana ànya orivoya yaoko be ago kalaope be, oko azakana ka opena ole kado si. ¹⁶ Se kwoi kayi oyena ŋgalu si, tana ànya niyite anjioko Lu ozo losi lazokado gaga rote märi. ¹⁷ Azakana pe Kristo kote ŋgyero, oko ka opena tori andivo o’baro käti si, ànya kusuyibe ekye yozona rriti amba märi tu gi mabe kamba ya ono si. ¹⁸ ’Do ko ta amba yi! Ma orivoya yai’dwesi tana ro ape Kristo te rritiako liti cini yasi nonye, kode tavousu koziro si kode kadoro si. Ago muguna a’do ndi yai’dwe si ’duro, ¹⁹ tana mäni ndi mätu amiro ndi ŋgaopa se kabe ikyi ni Tori Yesu Kristo ro resi o’bana ma ’da a’done dritai ro. ²⁰ Ole gyuru maro ndi mio’ba maro be anjioko ko orivoya kama maro e’bene alona, oko tu cini si, ago ndrana yauono, ma’dona ndi twi agoago be, tana a’do cu maro si mezi taoro robe Kristo ri, kode ma ori kode ma odra. ²¹ Ori e’di ya? Ori märi, ni Kristo, ago odra ezina ŋga usu amba. ²² Oko ondro ka’do ugu ori si mänina ndi losi kado oyene, ’dooko ta’doro ŋgase aza onjine märi mäni dri kote. ²³ Ese ma te liti ritu yasi. Male ṛo kado ori ono e’bene ago a’done Kristo be, se orivoya ni ta kadopara yi; ²⁴ oko ta amiro ta orivoya ta lämu’du yi märi orine lidriidriro. ²⁵ Mama te ono ndi endaro, ago mäni ndi marina ndi. Marina ndi ami cini be, omba amiro copene ndi riyä taoma ya be, ²⁶ tana mago ma’dote kpa to’di ami be oko, nyà’dona ta amba be ago driuŋgyi be ta maro ta ori amiro ya, rudro’be si Kristo Yesu ya. ²⁷ Yauono, tase para ni no beṛo ori amiro ri a’done oso lazokado Kristo ro kabe olena ronye, tana ondro kode ma oyi ami ondre kode moyi ko merina ta ’da anjioko ami orivoya ugu edrevoya ŋgyiri ta alo si ago ole alo si nyà ugu kyila oye troalo taoma lazokado rota. ²⁸ Nyà’do ko turiro ni kyila’baazii amiro ri, nyà’do agoago be ondoalo, ago ono ka’dana ’da ànyari anjioko ànya ozonayi vo ’da ago mipena ŋga ’da ṛe, tana Lu ni se kabe ŋgaopeṛe ozo ämiri owo. ²⁹ Tana ozo kandrakado te ämiri ugu ruinduza Kristo ri, ko gialo taoma si nda ya, oko kpa ugu ruezane ta ndaro ta. ³⁰ Yauono minina ndi rudro’bene mabe kyila ya. Kyila gi se mìndre ma be ugu oyevoya kyeno ana, ago oso nyàbe erina ronye, ma dri gi’du ugu oyena.

¹ Ori amiro Kristo ya kani ami o’ba mbara ro, ago ŋgalu ndaro kani ami i’dwe. Ami rumora be Tori ya, ami orivoya yauni ndi yai’dwe be be azi be. ² Ka’do inye meji ami ma o’bane twi riyä be a’doza tavousu alo ono be, ugu ŋgalu gi alo ono ka’dane, ago a’done lindri alo ndi tauni drî ro alo be. ³ Miye ŋga aza ko andivo o’ba si käti kode ole awi driuŋgyi rosi, oko nyòlogo andivo amiro vuru azi ri, ondoalo mìti ta azi ro ayani ndrani amiro drisi. ⁴ Ago mìndre ŋgase tana kusi azi be ayani ko toto ŋgase tana kusi ami be. ⁵ Taoye se a’done ämiri sina ni se Kristo Yesu ka’do be sina ’do. ⁶ Nda ondoalo orivoya beti Lu robe, oko nda usu ta kote yi o’bane mbara si ojoojoro Lu be. ⁷ Oko, ole modo ndaro rosi nda e’be ŋgase cini nda be sina te, ago ru beti a’do ruindu’ba rote. Nda a’dote lidri ronye ago ru beti lidri rote. ⁸ Nda logorute vuru ago abate liti taoro ro yasi sagwo le odra ya, odra ndaro taka dri si. ⁹ Ta ono ro Lu eŋga nda te le kuru ago ozo ävuru te ndäri se orivoya ndrani ävuru cini azi drisi. ¹⁰ Ndi inye, ävuru Yesu ro orona ya ŋga cini vo’buyakuru ya, ’bädri ya ago gyini zele osonayi kaya ànyaro ’da. ¹¹ Ago vonayi cini ayonayi ta ’da ŋbelero ekye Yesu Kristo orivoya ni Opi yi, räṛu Lu Täpi ro ri. ¹² Ka’do inye, bereazii se mulube ono, oso ondoalo miro mate tuse ma orivoya ami yibe si, orivoya anjioko tapara yi ämiri ma orone mabe i’do ami yibe ono. Nyùgu losi oye ri turi ndi lä’bi be si ta ŋgaopa amiro rota, ¹³ tana Lu ka losi oye ondoalo ami ya ami o’baza ta olene ago a’done mbara be ta modo ndaro ro orone. ¹⁴ Mìye ŋga cini driovi ako kode kaladiṛi ako, ¹⁵ tana nyà’do robe taenjiako ago wäṛiro oso ŋgwai ŋgye Lu ro ronye, se kayibe ori ’bädri taenjiro ndi lidri takozi amba be roya ono. Beṛo ämiri voeyine ànya lakosi oso ’bi’bii kabe ugu vokuru eyi ronye, ¹⁶ oso nyàbe lazo adri ro ozona ànyari ronye. Ondro ka’do mìye te inye, ma orivoya ta be a’doza driuŋgyi be ta amiro ta ikyi Tu ṛiri Kristo rosi, tana ka’dana ndi anjioko ruutri cini maro ndi losi se maye be enjiru kote awi. ¹⁷ Azaya oye kari maro odane ŋgapäṛi ronye tori oloro se taoma amiro kabe ozona Lu ri dri. Ondro ka’dote inye, ma orivoya yai’dwesi, ago ma riyä maro la’do ami cini be. ¹⁸ Kpa oso inye, beṛo kpa ämiri a’done yai’dwesi ago riyä amiro la’done ma be. ¹⁹ Ondro ka’do gini ole Opi Yesu ro, ma mio’ba be anjioko ma’dona ndi nja Timoteo ozone amire ndriro, tana otomba ma robe lazo amiro eri si. ²⁰ Nda toto ni se kabe tavousu maro la’dona ago se kabe ta amiro otina endaro owo. ²¹ ’Dicini ka toto ta modo ndaro ro usuna ayani, ko ta Yesu Kristo ro aya. ²² Ago andivo amiro mini tase nda kaka’da kado ndaro be te, nda ndi ma be, laba oso ŋgwa täpi ndaro be ronye, yeyi losi te troalo ta lazokado rota. ²³ Ta’dota ma mio’ba be nda ozone amire ga yauro ondro mäni tase ka oyebe a’done märi te owo. ²⁴ Ago mayi ta Opi ya anjioko ma andivo ma nja ukyine amire ndriro. ²⁵ Musu tavote ni kado ädrupi amaro Epaferodita ozone amire, se ye losi te ago ye kyila te troalo ma be ago se indurute oso lazo’ba amiro ronye ugu ma opavoya. ²⁶ Nda orivoya milo’bebe ami cini ondrene, ago usutate tu tana nyerite anjioko nda a’dote adravoro. ²⁷ Endaro nda a’dote adravoro ṛo rritiro ago ti odrane. Oko Lu a’dote yauni be ndäri, ko gialo ndäri oko kpa märi, ago ana tusu ’desi teni mädrisi. ²⁸ Ma orivoya nja nda ozone amire, tana nyà’do robe yai’dwesi kpa to’di ondro mindre nda te owo, ago tusu modo maro ro onaruna ’da. ²⁹ Ago miru nda, riyä si, oso ädrupi Opi ya ronye. Nyàka’da taoro lidri cini se oso nda ronye ri, ³⁰ tana nda ozo adri ndaro te ago ti odrane ta losi Kristo ro rota, tana kozo ŋgaopa se andivo amiro mìni kote ozone märi robe.

¹ Äduro ono, ädrupii maro, nyà’do riyäro rudro’be amiro Opi be ya. Ma’do kote rritiro tase megyibe ämiri käti ’do ugu delevoya, nyà’dona ndi kado ondro maye ca inye owo. ² Mimba ämidri ni ànya se kabe taundiro oye ri, kokye se kai, ni lidri se kabe lomvo tolo iyi. ³ Ni ama, ko ànya, se usuyi ’diolo ŋbiṛiro ŋgye be owo, tana mà Lu mätu Tori ndaro si ago ma ugu riyä oye ori amaro rumora Kristo Yesu be ya. Màyi ta kote a’do tesi lomvo ro la’bii oyero ya. ⁴ Aba mänina ndi ta maro oyine ŋgà oso nonye ya. Ondro ’diaza ka tavousu ekye nda unina ndi ta oyine a’do tesi lomvo ro la’bii ro oyena ya, caoko ma gi’du ndra tavousu ya oso inye. ⁵ Alo ma te ŋbiṛiro u’du njidrieri si, ma orivoya Yisaraele’ba yi uti yasi, ’bakala Benjamina ro, ätite uti’bai Ebere’ba rosi. Ta Ota Yudai ro ätina roya, ma orivoya Parusi yi, ⁶ ma’dote ota äti’ba ro ago meza känisa te. Aba ondro ka’do lidri ka gwo a’do taŋgye’ba ro Ota äti ndi orona si, ma’dona teinye taenjiako. ⁷ Oko ta gi cini se matibe ta para ro kwoi yauono matite ŋga awi ro ta Kristo rota. ⁸ Ko gialo ŋgase kai ayani, oko mati ŋgacini te kpeye ŋga awi ro ta ŋgase kadona be ndra rota, tauni Kristo Yesu Opi maro rota. Ta ndaro ta mavo ŋga cini te cowa; ago mati ànya te oso ŋga oŋgwaoŋgwa ronye; tana musu Kristo robe ⁹ ago modro’beru robe troalo nda be. Ma te teinye taŋgye andivo maro ro ako, taŋgye se abe usuna Ota oro si. Yauono ma te takado se ozote märi taoma Kristo yasi be, takado se ka ikyi ni Lu resi ago änjute taoma dri ono. ¹⁰ Tase cini malebe, anjioko Kristo unine ago mbara efo ndaro ro ni avo yasi unine, ugu rueza ndaro la’done oso nda ronye odra ndaro ya, ¹¹ mio’ba si anjioko eŋga andivo maro robe ni odra yasi le adri ya. ¹² Ma ko ata makye masate nja kode a’ba mate ŋgye ondevona ya. Ma dri ugu ruutri ŋgapäṛi se Kristo ka’dobe sina nja märi ago kopa ma be andivo ndaro ri ono tana ro. ¹³ Ndi inye, ädrupii maro, musutavo kote makye märu ṛote nja, caoko, ma ta alodi oye, anjioko ŋgase kovole tana ijene ago ojone mbara si osane ŋgase mileya ta. ¹⁴ Ago ma umu ŋgyero osane ondevona ya tana märu ŋgapäṛi, se ni läzi uzi Lu ro Kristo Yesu si adri se kuru ana ri. ¹⁵ Ama se cini mambate a’do Tori ro voro beṛo a’done tavousu alo ono be. Oko ondro azaka amiro ka’dote tavousu toto be Lu o’bana ta ono ’da ŋbelero ämiri. ¹⁶ Ka’do inye, mì’de mòyi mileyaro ota gi se masote voigye le yauono vo. ¹⁷ Male ämiri taoye maro oyene ayani ädrupii maro. Mìga bi ta ànya se kabe oso taka’daro se ŋgyero vo ri, se maka’dabe ämiri ono. Tausu amiro o’dene anya se kayibe taka’daro ŋgye se maka’dabe ämiri ’do ro vo. ¹⁸ Mata ta ono kätina te ämiri perena, ago yauono ma delena miendre si; ambana orivoya se ori ànyaro ka ànya o’ba kyila’baazii ro odra Kristo ro taka dri ri. ¹⁹ Ädu ànyaro ka oye a’done gehena ya, tana lu ànyaro ni ole lomvo ànya ro ro. Ànya orivoya driuŋgyi be ŋgase beṛo ànyari a’done driupiro tana, ago ànya kayi toto ta ŋgase azaka orivoya ’bädri ono ro tana usuna ayani. ²⁰ Caoko, ama, orivoya lidri ’bakici vo’buyakuru ro ro, ago ama orivoya nja mà Opa’ba amaro Opi Yesu Kristo, se kabe ikyi ni vo’buyakuru yasi kotena. ²¹ Nda tozana lomvo amaro mbaraako oŋgwaoŋgwaro ono ’da ago o’bana ànya ’da oso lomvo liŋgyiliŋgyi modo ndaro ro ronye, mbara se nda be sina si nda ṛo orivoya mbara be ŋga cini ezine miri ndaro zele.

¹ Ka’do inye, ädrupii maro, mulu ami tawi, ago ya cini si male ami ondrene! Nyà ma o’ba yai’dwesi si, ago ma orivoya driuŋgyi be ta amiro ta! Ta ono ro, ädrupii se mulu tawi ono, beṛo ämiri edrene ŋgyiri oso ono ronye, ori amiro ya Opi ya. ² Ewodia ndi Sunetuke be, rägu molo’baru ämiri, nyòjo ruolene oso endreŋwà ronye Opi ya. ³ Ago mi, losi oyeazi ’diri maro, male miri kpa ’ditoko kwoi opane, tana ànya yeyi losi te mbara ma be lazokado larivoya, tro Kelementi be ago losioye’baazii cini maro azaka be, se ävuru nai orivoya buku Lu ro adri roya. ⁴ Ka’do inye nyà’do ondoalo riyä ro rudro’be amiro Opi be ya. Medelena kpa to’di nyà’do riyä ro! ⁵ Nyàka’da taoye bereazi si ’dicini ri. Opi kate ikyi ndriro. ⁶ Nyòlo’be mi ko ta aza ta, oko mätu cini amiro ya nyèji Lu ŋgase ami lemerina be ta, ago ondoalo nyùgu nda eji ya aro’boya oye rosi. ⁷ Ago taliatokpe Lu ro, se ndra tauni lidri ro drisi ono, ko’ba ya amiro ndi tauni drî amiro robe orine londro ro rumora Kristo Yesu be ya. ⁸ Äduro, ädrupii maro, mi’ba tauni drî amiro ro ka’do twi ŋgase orivoya kado, se räṛuräṛuro; ŋgase orivoya ’diri, likuna kado, ŋgye, wäṛiro, se ulu be lu ago orooro ro si. ⁹ Tase mìnibe ago nyùsube ni maresi, riti ni ota maro ndi taoye maro be yasi mì’ba taoye ya. Ago Lu se kabe ni taliatokpe ozo ono a’dona ndi ami yibe. ¹⁰ Ori maro rumora Opi be ya orivoya riyä para yi märi tana tu amba vosi mìgo nyàka’da taoti ndra amiro ma ta tana te. Ma ko ata makye nyèdre taoti amiro ma ta te, miti ndi oko nyùsu kandrakado ka’daza koni. ¹¹ Ma ko ta ono ata tana makye kode anjate malomvo, mäni ta ori ro ŋgase aza mabe sina be te. ¹² Mäni ta ori ro ŋgaako tana te ago mäni ta ori ro ŋgaamba be tana te. Mäni tandrwi ono te, a’doro yai’dwesi kode ma yaoga be kode täbiri ro, ka’do ca vo aza ya kode tu aza ya kode ŋgaamba be kode tegiṛiŋwa ya mäni tana te. ¹³ Ma orivoya mbara be edreza ŋgase cini kabe a’do mile mbara se Kristo kozobe märi si. ¹⁴ Oko miyete kado ma opa si ni rriti maro yasi. ¹⁵ Ami Filipoi’bai mìni ṛote kado ṛoni tuse me’be Makedonia be tui Lazokado opero kyeno ana si, ami toto ni känisa se kopa ma be owo. ¹⁶ Ndrani pere alo drisi male ŋgaopa be Tesalonika ya, nyèzo anya te märi. ¹⁷ Ko ekye male toto ŋgapäṛi urune ayani, oko male ŋgaliti ondrene ta amiro ta. ¹⁸ Ka’do inye, ŋgacini se nyèzobe märi musute, ago te orivoya ndrani se malebe drisi! Ŋgase cini malebe ma te sina yau Epaferodita kezi ŋgapäṛi amiro be ono. Anya laba oso ŋgapäṛi tägyi ŋgaŋgutruro ro Lu ri ronye, tori oloro se uruururo ago tana si nda te ronye. ¹⁹ Ago ŋgadriamba cini ndra ndaro Kristo Yesu si, Lu maro ozona lemeri cini amiro ŋgana ’da. ²⁰ Taoro ka’do Lu Täpi amaro ri ’duro, äduako! Amen. ²¹ Mede ba alo alo lidri cini Lu ro ri, se orivoya Yesu Kristo ro ono. Ädrupii se mabe noŋwa ono zoyi mede ànyaro ämiri. ²² Lidri cini Lu ro se noŋwa ono zoyi mede, ndrana ni ànya se zo’desi ’Bädri’ba roya kai resi. ²³ Ka’do inye, tai’dwero Opi amaro Yesu Kristo ro ka’do ami cini be.