MARAKO

MARAKO

¹ Ono ni etovo lazokado ro ta Yesu Kristo, Ŋgwa Lu ro rota. ² Oso nebi Yesaya kegyibe ronye ekye: “Lu atate ekye: ‘Mazona lazo’ba maro ’da mimile liti edene nja miri’ ³ ’Diaza ka ugu driayo vocowa ya ekye: ‘Nyede liti nja Opi ri; nyede liti ŋgye ndäri abaza!’ ” ⁴ ’Dooko Yoane oyi rite vocowa ya, ugu bapatisi oyebe ndi taope be, nda atate lidri ri ekye: “Nyètadri ni takozi amiro yasi ago nyà’do bapatisi be, ’dooko Lu e’bena ami ndi takozi amiro ta.” ⁵ Lidri amba ni wari Yuda ro ndi ’bakici Yerusalema robe yasi oyiyite ta Yoane ro erine. Ànya eṛoyi takozi ànyaro te, ago nda bapatisi ànya te Golo Yaradene ya. ⁶ Yoane so boŋgo se edeni ’bi gamele ro yasi te, embe kyini kyelekpero te kundu ndaro ya, ago ŋgaonya ndaro ni tombi ndi epe kogo robe. ⁷ Nda ayotate lidri ri ekye: “Mano se kabe ikyi ma vo orivoya ’desi para ndrani märi, takado maro ojo ko ca ändine vuru mvoka ndaro otrine. ⁸ Ma ami bapatisi gyi si, oko nda bapatisina ami ’da Tori Alokado si.” ⁹ Tu fere vosi oko Yesu ikyite ni Nazareta wari Galilaya ro yasi, ago Yoane bapatisi nda te Golo Yaradene ya. ¹⁰ Ago dori Yesu kate efo ni gyi yasi oko, nda ndre vo’buyakuru pirute ago Tori ka eziikyi vuru nda dri laba oso tu’bu ronye. ¹¹ Ata ikyite ni vo’buyakuru yasi ekye: “Mi ni Ŋgwa modo maro ro se mulu tawi ono owo. Ta miro si ma ni.” ¹² Ndriŋwa oko Tori ’ba nda te oyine vocowa ya, ¹³ nda rite lau u’duna ’butesu, ago Satani ojo ta ndaro te. Koronyai vocowa ro kpa orivoya lau, oko malaikai ikyite ago indurute ndäri. ¹⁴ O’ba Yoane ro kamba ya vosi oko, Yesu oyite Galilaya ya ago pe Lazokado Lu rote. ¹⁵ Nda atate ekye: “Tu kado esate ago Miri ’Bädri’ba Lu ro ro te loto! Nyètadri ni takozi amiro yasi ago mìma ta Lazokado ro!” ¹⁶ Ago Yesu ka aba Fofo Galilaya ro kalasi oko, nda ndre ti’biuru’bai ritu te, Simona ndi ädrupi ndaro Andarea be, kayi kyimba ovo fofo ya, tana ànya ti’biuru’bai. ¹⁷ Yesu atate ekye: “Mìso mavo, ago membana ami ’da lidri urune.” ¹⁸ Dori ànya e’beyi kyimba ànyaro te ago soyite nda vo. ¹⁹ Nda oyite ga loto fere oko, ndre ädrupii azaka ritu te, Yakoba ndi Yoane be, ŋgwà Zebedayo ro, ànya orivoya toŋbo ànyaro ya kayi ugu kyimba ànyaro edena nja. ²⁰ Ago dori ondro Yesu kondre ànya te oko, nda zi ànya te, ago ànya e’beyi Zebedayo täpi ànyaro te toŋbo ya losioye’bai päläti si be ago soyite Yesu vo, ²¹ Yesu ndi taeri’bai ndaro be ikyiyite ’ba’desi Kaperenauma ya, ago Sabata si oko Yesu oyite zotaeriro ya ago eto ŋgaemba te, ²² lidri se keriyi ta be ana laroyi tawi liti se nda emba ŋga be kigye si tana ro, tana nda ko oso miemba’bai Ota ro ronye, oko nda emba ŋga te drikaca si. ²³ Ago mano aza tori undiro be ikyite zotaeriro ya ago trete ekye: ²⁴ “Mile e’di ama be ya Yesu Nazareta ro? Nyikyi noŋwa ono ama tufune ya? Mäni mi te; mi ni Lazo’ba Alokado Lu ro owo!” ²⁵ Yesu ta tori te ekye: “Nya’do titiro, ago nyefo tesi ni mano ono yasi!” ²⁶ Tori undiro kanda mano ana te rriti, trete amba, ago efote tesi ni nda yasi. ²⁷ Lidri cini laro tawi ànya etoyi atate azi ri ekye: “Ono e’diyi ya? Inye’do ono orivoya ŋgaemba to’diro aza yi ya? Mano ono orivoya drikaca be, ozotate tori undiro ri, ago ànya royi nda te!” ²⁸ Ago liku Yesu ro larirute ndrindri vo cini wari Galilaya ro ro yasi. ²⁹ Yesu ndi taeri’bai ndaro be, tro Yakoba ndi Yoane be, e’beyi zotaeriro te ago oyiyite dori ’ba Simona ndi Andarea be roya. ³⁰ Adraŋwa Simona ro a’dote rritiro adravo driu’bo robe u’duvoya kitapara dri, ago dori Yesu kesate oko, itita anyaro te ndäri. ³¹ Yesu kyite anyare, ago ru drí anyaro te, ago eŋga anya te kuru. Dori driu’bo e’be anya te, ago anya ozo ŋgaonya te ànyari. ³² Ago ondro te tandrolero kitu oci vosi oko, lidri ezi adravo’bai cini te Yesu re ndi ànya se ka’dobe demona be ana be. ³³ Lidri cini ’ba’desi ro otoyikalate zo kala. ³⁴ Yesu ede ’di amba se adravo dritoto be ana te ago lofo demonai amba te tesi. Nda leko demonai ri ta aza atane, tana ànya niyi nda te. ³⁵ Ago ṛo kyenoŋboci, vo ri layaako oko, Yesu ŋgate ago fote ni zo yasi. Nda fote ni ’ba’desi yasi oyite vo iṛero ya, ago lau nda mätute. ³⁶ Oko Simona ndi azii ndaro be foyite tesi uguyi nda uṛi te, ³⁷ ago ondro ànya kusuyi nda te oko, ànya atayite ekye: “’Dicini kayi ugu mi uṛi.” ³⁸ Oko Yesu zatadrite ekye: “Beṛo ämäri oyine ’baŋwà azaka se gbikyi noŋwa ono yasi. Mape ta robe kpa kigye, tana mikyite ṛo ta ’do ro.” ³⁹ Ta’dota nda abate gbikyi Galilaya yasi, taope be zoitaeriro yasi ndi demonai lofobe tesi. ⁴⁰ Mano aza se ka rueza ni adravo koziro kyini ro ri ana ikyite Yesu re, sokayate vuru, ago eji nda te ta ŋgaopa rota. Nda ekye: “Ondro mile gindi, minina ndi ma edene wäṛi.” ⁴¹ Yesu teṛo twi yauni be, ago ozo drí ndaro te ago do nda te, nda zatadrite ekye: “Malete nya’do ri wäṛi!” ⁴² Dori adravo koziro se kyini ro ana kyete, ago nda a’dote wäṛi. ⁴³ ’Dooko Yesu atate ndäri mbara ndi dori zo nda te oyine, ⁴⁴ ago atate ndäri ekye: “Nyeri, nyite tase ono ko ’diaza alo ri, oko nyoyi dori kohani re ago mi’ba nda kena mi, ago nyozo ŋgapäṛi se Musa kota ’di be ozone ta ’diede rota ’do; ka’daza lidri cini ri anjioko ede mi te.” ⁴⁵ Oko mano ana oyite ago eto tana larite ṛo vo cini yasi, nda iti tana te amba ago tana ’ba Yesu kote ocine ’ba’desi ya ŋbelero. Ta’dota nda rite tesi vocowa ya, ago lidri ikyite nda re ni vo cini yasi.

¹ U’du fere vosi oko Yesu oyite kovole Kaperenauma ya, ago lazo larirute ekye nda orivoya ’bäru. ² Ago lidri amba ikyite voaloya, ago vo ojo kote zo ya, ca käläsi kala. Yesu ka ugu taope ànyari oko ³ lidri su esate, ŋgyiyi mano aza ciṛiciṛiro te kayi nda ezi Yesu re. ⁴ Tana ta lowa rota, caoko, ànya niyi kote mano ana locine ndare. Ta’dota ànya ṛoyi drî kurusi zo rote gya vose Yesu koribe kigye ana ya. Ondro ànya koṛoyite uŋbo oko, ànya e’bayi mano ana te vuru, u’duu’duro para ndaro dri. ⁵ Ago ondro Yesu kondre taoma ànyaro te oko, nda atate mano se ciṛiciṛiro ana ri ekye: “Ŋgwa maro, e’be mite takozi miro ta.” ⁶ Miemba’bai azaka Ota ro se koriyibe lau kai usuyitate andivo ànyaro si ekye: ⁷ “Nda ’degwo atane inye etaya? Ono orivoya Lu o’da yi! Lu toto ni se kunibe ’di e’bene ta takozi rota owo!” ⁸ Dori Yesu ni tase ànya kusuyibe ana tana te, ndi nda atate ànyari ekye: “Mì’debe tausune oso ’do ronye ya amiro ya etaya? ⁹ Ta eŋwani ni rritiako atane mano ciṛiciṛiro ono ri, e’be mite takozi miro ta, kode atane ekye: ‘Miŋga kuru, miru para miro, ago nyaba ya?’ ¹⁰ Maka’dana ämiri anjioko Ŋgwa Lidri ro orivoya drikaca be ’bädri ya ’di e’bene takozii ta.” Ndi nda atate mano se ciṛiciṛiro ana ri ekye: ¹¹ “Mata miri, miŋga kuru, miru para miro, ago nyoyi ’bäru!” ¹² Mano ana ŋgate kuru, ŋgyi para ndaro te, ago abate dori tesi mile ànya cini ro yasi. Ànya cini laro tawi ago räṛuyi Lu te ekye: “Màndre ta aza kätina ko oso ono ronye alona.” ¹³ Yesu go kpate kovole Fofo Galilaya ro kala. Lowa ikyite ndare, ago nda eto ànya emba te. ¹⁴ Ondro nda ka ugu aba oko, nda ndre parata koto’ba aza te Lewe ŋgwa Alepayo ro, orivoya losioyevo ndaro ya. Yesu atate ndäri ekye: “Miso mavo.” Lewe ŋgate kuru ago sote nda vo. ¹⁵ Ono vosi Yesu rite ŋgaonya onyane zo Lewe roya. Parata koto’bai amba ndi otapere’bai be soyite Yesu vo, ago amba ànyaro dro’berute nda be ndi taeri’bai ndaro be tara’biza lomvo. ¹⁶ Miemba’bai azaka Ota ro se ni Parusii, kondreyite Yesu ka ugu ŋgaonya otapere’bai ndi parata koto’bai be oko, ànya ejiyi taeri’bai ndaro te ekye: “Nda ka ŋgaonya lidri nonye ono be etaya?” ¹⁷ Yesu eri ta ànyaro te ago zatadrite ekye: “Ànya se jiŋgyiri ro le ’diede’ba ko, oko gialo ànya se adravoro ayani, mikyi kote lidri se taŋgye’bai ro uzine, oko otapere’bai ayani.” ¹⁸ Tu alo aza si taeri’ba Yoane Bapatisi’ba ro ndi Parusii be kayite akpa. Lidri azaka ikyiyite Yesu re ago ejiyi nda te ekye: “Tana e’di taeri’bai Yoane Bapatisi’ba ro ndi taeri’bai Parusii robe kayi akpa, oko miro akpayi ko etaya?” ¹⁹ Yesu zatadrite ekye: “Inye’do mìma amiro be ŋgwazii se Karama lagye ogyero ya akpanayi ndi ondro kodrogo drigba orivoya ànya yibe ya? Endaro ko inye. Ago oso kodrogo bedri gba orivoya ànya yibe ono ronye, ànya uninayi ko akpane. ²⁰ Oko tu esana ’da ondro äru kodrogo teni ànya resi oko, ago ’dooko ànya akpanayi ’da. ²¹ “’Diaza lose boŋgo pelepele to’diro ko mi boŋgo uku se kelewabe roya, tana se to’diro ’do mociruna ’da ago owana boŋgo se ukuro ’do gwo ago mina lewana te ndra. ²² ’Diaza so vino to’diro ko kuru kyini ro vino ro se ukuro ’do ya, tana vino oṛona kyini ’da, ago vino ndi riti kyini be enjiruna ’da. Beṛo vino to’di osone kuru kyiniro to’di vino roya.” ²³ Sabata aza si Yesu ugu abate ämvu inya ro yasi. Ondro taeri’bai ndaro kayi ugu aba tro nda be oko, ànya etoyi drî inya ro okyena te. ²⁴ ’Dooko Parusii atate Yesu ri ekye: “Mindre, taeri’bai miro kayi tase Ota le be ko oyene Sabata si ono oyena!” ²⁵ Yesu zatadrite ekye: “Inye’do mìzi tase Dawidi koyebe tu ana si se nda lebe ŋga aza onyane ana ṛo ko ya? Nda ndi tro lidri ndaro be orivoya täbiri ro. ²⁶ Ta’dota nda cite zo Lu roya ago nya ambata se ozobe Lu ri ana te. Ta’do a’dote tu Abiatara Kohani Fopara rosi. Se ota amaro voro toto ni kohanii ri ambata ono onyane; oko Dawidi nyate ago ozo kpate lidri ndaro ri.” ²⁷ Ago Yesu atate ànyari ekye: “A’ba Sabata te ta lidri rota; a’ba lidri ko ta Sabata rota. ²⁸ Ta’dota Ŋgwa lidri ro kpani Opi Sabata ro.”

¹ ’Dooko Yesu oyite kovole zotaeriro ya, se mano aza orivoya kigye lau drí ciṛiciṛi robe. ² Lidri azaka orivoya lau se leyite Yesu kicune ta takozi oyero ta; ànya ciciyivo ndaro te leyi ondrene kode nda le mano ana edene tu Sabata rosi. ³ Yesu atate mano se drí na ciṛiciṛiro ana ri ekye: “Nyefo nyedre kitori noŋwa.” ⁴ ’Dooko nda eji lidri te ekye: “Ota le ämäri e’di oyene Sabata siya? ’Di opane kode oyene koziro ya? Adri lidri ro opane kode ufune ya?” Oko ànya atayi ta aza kote. ⁵ Yesu kondre vote gbikyi ànya drisi oko nda a’dote kyilaro, oko nda a’do kpate tusuro ta ànyaro ta, tana ànya orivoya taeriako ago taoye ànyaro koziro. ’Dooko nda atate mano ana ri ekye: “Nyozo drí miro a’dwi.” Ndi nda ozote a’dwi, ago drí ndaro a’dote kado vona ya. ⁶ Ta’dota Parusii foyite ni zotaeriro yasi dro’beyi iyi te gboko Eroda robe, ago ànya äyiyitate Yesu ufune. ⁷ Yesu ndi taeri’bai ndaro be oyiyite Fofo Galilaya ro kala, ago lowa du sote nda vo, ànya ikyiyite ni Galilaya, Yuda ya, ⁸ ni Yerusalema ya, ni wari Idumea roya, ni wari ’buzelesi Golo Yaradene roya, ago ni vose gbikyi ’bakicii Tura ro ndi Sidona robe yasi. Lidri cini kwoi ikyiyite Yesu re tana ànya eriyi tase cini nda kabe ugu oyena ana tana te. ⁹ Lidri orivoya amba du ta’doro Yesu atate taeri’bai ndaro ri toŋbo o’bane nja ndäri, ukyi lidri ipi nda ’da. ¹⁰ Nda ede lidri amba te, ago ’dicini se adravoro ezi ruibite ukyine ndare nda odone. ¹¹ Ago ondro lidri se tori undiro be ànya ya kai kondreyi nda te oko, ànya ’deyite vuru nda kandra ago treyite ekye: “Mi ni Ŋgwa Lu ro owo!” ¹² Yesu ’bidri torii undiro rote amba ko ta ndaro itine ’diaza alo ri. ¹³ ’Dooko Yesu tute lutu dri ago zi lidri se nda kolebe uzine andivo ndaro re te. Ànya ikyiyite ndare, ¹⁴ ago nda nji lidri ’butealo foritu te, se nda zite lazo’bai, nda atate ànyari ekye: “Manji ami te a’done mabe, mazona ami kpa tesi taopene, ¹⁵ ago nyà’dona ’da drikaca be demonai lofoza tesi.” ¹⁶ ’Dise ’butealo foritu se nda konjibe ni kwoi: Simona se (Yesu ozo ävuru te ndäri Petero); ¹⁷ Yakoba ndi ädrupi ndaro Yoane be, ŋgwà Zebedayo ro (se Yesu ozo ävuru te ànyare Boanerege se anjioko ŋgwà ’Bu uhwe ro); ¹⁸ Andarea, Filipo, Batolimayo, Matayo, Toma, Yakoba ŋgwa Alepayo ro, Tadayo, Simona ’bädri iro lu’ba, ¹⁹ ndi Yuda Isekariota se kozo drí Yesu robe ana be. ²⁰ ’Dooko Yesu oyite ’bäru. Lidri du otokalate kpa to’dina ta’doro Yesu ndi taeri’bai ndaro be a’dote saa ako ŋga onyaza. ²¹ Ondro katidri ndaro keriyi tana te oko, ànya oyiyite nda urune, tana lidri ka ugu ata ekye: “Nda te amama yi!” ²² Rukä miemba’bai Ota ro ro se kikyiyibe ni Yerusalema yasi kai kayi ata ekye: “Nda orivoya Belezebula be nda ya! Dri’ba demonai ro kani mbara ozo ndäri ànya lofoza tesi.” ²³ ’Dooko Yesu zi ànya te ndare ago petate ànyari lapidri si ekye: “Satani lofona Satani azi eŋwanye ya? ²⁴ Ondro ka’do ’bädri aza kolonyi andivo iro gwo ko’de gwo kyila oyene iyivoya ’bädri gi ana o’dena ndi. ²⁵ Ondro ka’do katidri aza kolonyi andivo iro gwo ko’de gwo kyila oyene iyivoya, katidri gi ana o’dena ndi. ²⁶ Ago ondro miri ’bädri’ba Satani ro ro kolonyiru gwo, unina ko orine, ago o’dena ndi okyena gwo. ²⁷ “’Diaza unina ko vo oŋgone zo mano mbäräkä aza roya lakaza ndaro urune e’be gialo ndäri mano se mbäräkä ’do embene käti; ’dooko nda o’dena gwo ŋga zo ndaro ro topane. ²⁸ “Endaro mata ämiri ono änina ndi lidri e’bene takozi cini ànyaro ta ndi tase cini undiro ànya kayibe atana rota. ²⁹ Oko nda se kabe ta undiro atana Tori Alokado lomvo e’bena ko alona, tana nda ye takozi äduako yi.” ³⁰ Yesu ata ta ono te tana lidri azaka kayi ata ekye: “Nda orivoya tori undiro be nda ya.” ³¹ ’Dooko endre Yesu ro ndi ädrupii be esayite. Ànya edreyite tesi zo lomvo ago zoyi lazo te zo ya, nda uzine. ³² Lidri du rite Yesu lomvosi, ago atayite ndäri ekye: “Mindre, endre miro ndi ädrupii miro ndi endreŋwà miro be orivoya tesi, ago ànya leyi mi.” ³³ Yesu zatadrite ekye: “Endre maro ni a’di ya? Ädrupii maro ni a’di ya?” ³⁴ Nda kondrevote lidri se koribe gbikyi nda lomvosi ana dri oko nda atate ekye: “Mìndre, kwoi ni endre maro ndi ädrupii maro be owo! ³⁵ Nda se kabe tase Lu kolebe ndäri oyene oyena ’do ni ädrupi maro, endreŋwa maro, ago endre maro owo.”

¹ Yesu eto ŋgaemba te kpa to’di Fofo Galilaya ro kala, lowa se kotokalabe ndare ana orivoya amba ta’doro nda cite toŋbo ya ago rite kigye. Toŋbo orivoya gyi ya, ago lowa edrete kototisi gyi kala. ² Nda emba tate ànyari lapidri si, atate ànyari ekye: ³ “Nyèri! Tu alo aza si mano aza fote kwari orine. ⁴ Ago ondro nda kate ugu kwari ori ämvu ya oko, azakana lo’dete liti drisi, ago arii ikyite ago nyayi anya te. ⁵ Azakana lo’dete gyini gyirigyiriro dri, se gyini na i’do amba, kwari hwete ndriŋwa, tana gyini na ciko gyuru. ⁶ Ago ondro kitu kitute lekuru oko, lunyi inya se koŋgabe to’diro ana te, tana pajina ci kote gyuru, ago inya wite ndriŋwa. ⁷ Azaka kwari ro lo’dete kukyi cuku lako, ago kukyi mbate ago vo inya se koŋgabe ana te, ago ànya wa inya kote. ⁸ Oko kwari azaka lo’dete gyini kado ya, ago kwari ŋgate, mbate, ago wa inya te, azakana inya be ’butenätu, azakana ’butenjidrialo, ago azakana kama alo.” ⁹ Ago Yesu ndetate ata si ekye: “Dia nyèri, ondro ka’do nyà’do gi bi be owo.” ¹⁰ Ondro Yesu te iṛe oko, azaka se keriyi ta ndaro be kai ikyiyite ndare ndi taeri’bai ’butealo foritu be ago ejiyi nda te tazevo lapidri ro edrene. ¹¹ Yesu zatadrite ekye: “Miri ’Bädri’ba Lu ro ro tandrwi na aka’date ämiri. Oko azakana se tesi ri, erinayi ŋga cini takacina lapidri si, ¹² ta’dota ‘ondrena ànya ondrenayi ndi, caoko ndreyi ko; erina ànya erinayi ndi, caoko uninayi tazevona ko. Tana ondro ka’do ànya kuniyite, ànya egona ndi Lu re, ago nda e’bena ànya ndi ta takozi ànyaro rota.’ ” ¹³ ’Dooko Yesu eji ànya te ekye: “Mìni lapidri ono tana ko ya? ’Dooko ka’do inye, mìnina ta lapidri azaka ro gi’da ya? ¹⁴ Kwariori’ba kani ata Lu ro orina. ¹⁵ Azaka lidri ro laba oso kwari kolo’debe liti dri ’do ronye, ondro ànya keriyi ata te dori oko, Satani ikyite ago ru ata se ikyi’dibe ànya ya te. ¹⁶ Rukä lidri ro laba oso kwari se kolo’debe gyirigyiri dri ’do ronye. Ànya keriyi lazo te oko, ruyite dori yai’dwesi. ¹⁷ Oko ci ko gyuru ànya ya, ago ànya ri ko madaro. Ago ondro rriti kode ’dieza kesate ta lazo rota oko, ànya e’beyite ndriŋwa. ¹⁸ Rukä lidri ro laba oso kwari se arite kukyi cuku lako ’do ronye. Kwoi ni ànya se keriyi lazo te, ¹⁹ oko ta milo’be ro ta ori ono rota, ta ŋgaamba lu robe ndi ta ŋga dritoto amba ole robe cite ago vo lazo te, ago ànya wayi doŋgo kote. ²⁰ Oko rukä lidri ro laba oso kwari se aribe gyini kado ya ronye. Ànya keriyi lazo te oko, ruyite, ago wa doŋgo ’butenätu, azaka ’butenjidrialo, ago azaka kama alo.” ²¹ Yesu atate ànyari ekye: “Inye’do ’diaza ezi lamba ndi zo ya ago tako gwo lakaza si kode ’ba gwo kitapara zele ya? Inye’do nda edre ko ŋga lamba edrero dri ya? ²² Ŋgase da’doda’doro olofona ’da ŋbelero, ago ŋgase atako drîna be äpina drîna ’da. ²³ Ka’do inye, nyèri, ondro ka’do nyà’dote bi be owo.” ²⁴ Nda ata kpate ànyari ekye: “Mìgabi tase nyàbe erina ono erine! Liti se nyabe ŋga ozo azi ri sina kpani liti se Lu kabe oye ŋga ozone miri sina owo, oko Lu ozona te miri ndra. ²⁵ Nda se tauni be ozona ’da rigye ndra, ago nda se tauni ako ca se nda be sina giṛiŋwa ono äruna ’da ni nda rigyesi.” ²⁶ Yesu ugu atate ekye: “Miri ’Bädri’ba Lu ro ro laba oso nonye. Mano aza ri kwari te ämvu ndaro ya. ²⁷ Nda ku’dute ŋgäkyi si, ago koŋgate kyenoŋbo si oko, kwari cini hwete ago kate ugu omba. Caoko nda ni ko kode ka omba eŋwanye. ²⁸ Gyini modo kani ŋgase ikyi’dibe ’do o’ba ombane ago doŋgo owane; käti pa ndrilaŋwa efote, ’dooko drî na, äduro drî wa inya te amba. ²⁹ Ondro inya kokate oko, lidri eto olona te iṛi si, tana tu jalia ro esate.” ³⁰ Yesu ejitate ekye: “Miri ’Bädri’ba Lu ro ro mojona e’di be ya? Lapidri eŋwani mapina ayani tazevona edreza ya? ³¹ Laba oso nonye. Mano aza ru keci ce musetada rote se ni keci se tipari ’bädri ya owo, ago kyi’di anya te gyini ya. ³² Ono vosi anya mbate lekuru ago a’dote ndrani ŋga kyi’dikyi’di cini azi drisi. Anya ra gwoṛi ’desiro te ago arii ikyite moyi zoi ànyaro te lindri anyaro ya.” ³³ Yesu pe lazo ndaro te lidri ri lapidri amba opi si oso kwoi ronye, nda itita amba se ànya uninayi ndi unine te ànyari. ³⁴ Nda leko ta opene ànyari teinye lapidriopi ako, oko ondro nda te iṛe taeri’bai ndaro be oko, nda edretazevo ŋga cini rote ànyari. ³⁵ Tandrole tu gi ana rosi Yesu atate taeri’bai ndaro ri ekye: “Mì’de mòyi maza fofo tasi.” ³⁶ Ta’dota ànya e’beyi lowa te, taeri’bai ciyite toŋbo se Yesu koribe nja kigye ana ya, ago ànya ŋgyiyi nda te ànya be. Rukä toŋbo ro kpa orivoya lau. ³⁷ Ndriŋwa oko oli gbiriṛi be site ago gyi kate kpola toŋbo ya, ago gyi ka oyete ogane twi kigye. ³⁸ Yesu orivoya toŋbo ya kundu yasi, u’dute adroa drî ndaro te ŋga drî adroa ro dri. Taeri’bai teŋgayi nda te ago atayite ekye: “Miemba’ba, mà oyete odrane ono miti tana koya?” ³⁹ ’Dooko Yesu ŋgate kuru ago ’bidri oli rote ekye: “Midri ti!” Ago atate gbulä gyi ro ri ekye: “Nyedre ti.” Si oli ro drate, ago vo a’dote ti. ⁴⁰ ’Dooko Yesu atate taeri’bai ndaro ri ekye: “Nyà turi etaya? Ami drigba taoma ako ya?” ⁴¹ Oko ànya turiyi tawi, ago etoyi atate azi ri ekye: “Mano ono a’di owo ya? Tana ca oli ndi gbulä gyi robe royi nda te.”

¹ Yesu ndi taeri’bai ndaro be esayite Fofo Galilaya ro tasi, wari Gerasa roya. ² Ago Yesu kefote dori ni toŋbo yasi oko, mano aza ka efoni kugyi avo osero yasi ’bedrite nda be. Mano ana orivoya tori undiro be nda ya, ³ ago ka ori ’budrii lako; ’diaza ni ko drîna ritane ca embene nyori si; ⁴ embe pa ndaro ndi drí ndaro be te nyori si tuna amba, oko tu cini si nda tokye nyori te ago toŋgo araca se pa ndaro yasi iyi te. Nda mbara tawi tana ’diaza ni ko nda ritane. ⁵ Kitu si ago ŋgäkyi si nda abate ’budrii lakosi ago lutuŋwà drisi, totre be ago andivo ndaro togana be kuniŋwà si. ⁶ Ondro nda kondre Yesu te lozo si oko, nda mute, sokayate vuru nda kandra, ⁷ ago trete kporo amba si ekye: “Yesu, Ŋgwa Lu Fopara Ndra ro! Mile e’di mabe ya? Ma rulo’ba miri Lu si, nyeza ma ko!” ⁸ (Nda atate nonye tana Yesu ka ugu ata ekye: “Tori undiro, nyefo tesi ni mano ono yasi!”) ⁹ Ago Yesu eji nda te ekye: “Ävuru miro a’di ya?” Mano ana zatadrite ekye: “Ävuru maro Legiona ; tana ama orivoya amba!” ¹⁰ Ago nda eji Yesu te mbara ko ànya onjane tesi ni wari ana yasi. ¹¹ Ago äṛi kizwei ro orivoya amba loto lau, kayi ŋgaonya lutu pa. ¹² Ago torii ejiyi Yesu te ekye: “Mizo ama kizwei lako, ago mi’ba ama ocine ànya ya.” ¹³ Nda ’ba ànya te oyine, ago torii undiro foyite tesi ni mano ana yasi ago ciyite kizwei ya. Äṛi kizwei ro cini orivoya; oso kutu ritu (2,000) ronye, lasoyite vuru kärägu yasi fofo ya ago gyi imvu te. ¹⁴ Lidri se kayibe vo kizwei ro ondrena kai muyite ago lariyi lazona te ’ba’desi yasi ago ämvui yasi, ago lidri fote tesi tase ka’dobe ana ondrene, ¹⁵ ago ondro ànya kikyiyite Yesu re oko, ànya ndreyi mano se ka’dobe demona du be nda ya ana te. Nda rite lau, so boŋgo te ago drî na te kadoro; ago ànya cini a’doyite turi ro. ¹⁶ Ànya se cini kondreyibe ana itiyi tase ka’dobe mano se demona be ana ri ana tana te lidri ri, ago itiyi ta kizwei ro kpa. ¹⁷ Ago ànya ejiyi Yesu te wari ànyaro e’bene. ¹⁸ Ago Yesu ka ugu oci toŋgo ya oko, mano se sedri demonai be ana lo’barute ndäri ekye: “Mi’ba moyi mibe!” ¹⁹ Oko Yesu lezo ndäri oyine. Go ata ṛo ekye: “Migo kovole ’bäru katidri miro lako ago nyiti tase ’desi Opi koyebe miri ago ya ndaro kunibe milomvo ono tana ànyari.” ²⁰ Ago mano ana oyite Dekapolisi yasi, ugu tase Yesu koyebe ndäri ana tana itina be. Ago ’dise cini keri tana be kai larote. ²¹ Yesu oyite kovole zate fofo tasi nasi. Fofo tasi nasi lowa amba otoyikalate ndare. ²² Yairo, dri’ba zotaeriro vo ana ro, esate, ago ondro kondre Yesu te oko ’dete vuru nda pa ²³ ago eji nda te rulo’ba si ekye: “Ŋguti giṛiŋwa maro orivoya adravoro rritiro. Rägu nyikyi ago mi’ba drí miro anya lomvo, tana anya ka’do robe kadoro ago kadri robe!” ²⁴ ’Dooko Yesu eto oyite nda be. Ago lidri amba se kayibe ugu oyi tro Yesu be kai ipiyi nda te lamadri cini yasi. ²⁵ Toko aza orivoya se ezarute ni kari oro koziro ro ri ndroa na te ’butealo foritu. ²⁶ Kwozoi amba ojote anya edene. Anya enji parata cini anyaro te. Caoko ede anya ṛo ko ugu a’do ṛo ndra koziro anyari tu cini si. ²⁷ Anya eri ta Yesu rote, ago anya ikyite lowa lakosi nda kundu. ²⁸ Ago nda atate andivo iro ri ekye: “Ondro ka’do mado boŋgo ndaro te, edena ma ndi.” ²⁹ Anya do boŋgo ndaro te, ago oro kari anyaro ro edrete dori; ago anya usu vona te yilomvo anjioko ede anya teni rriti anyaro ri. ³⁰ Dori Yesu nite mbara fote tesi ni nda lomvosi, ago nda zamite lowa dri ago ejitate ekye: “A’di do boŋgo maro niya?” ³¹ Taeri’bai ndaro zayitadrite ekye: “Mindre lidri ka ezi ruibi midri; tana e’di nya taeji mikyi a’di do yi niya?” ³² Oko Yesu ugu vo ondrete gbikyi le ondrene a’di ye ta ’do ni. ³³ Toko se ana ni tase ka’dobe anyari ana tana te, ago anya ikyite, lä’bilä’biro turi be, vo andivo anyaro te vuru nda pa, ago iti ta cini te ŋgye ndäri. ³⁴ Yesu atate anyari ekye: “Ŋguti maro, taoma miro ede mi te kado, nyoyi liatokpero ago nyederu ni adravo miro yasi.” ³⁵ Yesu kadri ugu tase ono ata oko, lazo’bai azaka ikyiyite ni zo Yairo ro yasi ago itiyitate ndäri ekye: “Ŋgutiŋwa miro drate, nya Miemba’ba okwo etaya?” ³⁶ Yesu ga bi kote tase ànya katabe ana ya, oko atate ndäri ekye: “Nya’do ko turiro, mima toto ta ayani.” ³⁷ Ago nda le ’diaza kote oyine nda be e’be gialo Petero ago Yakoba ndi ädrupi ndaro Yoane be ayani. ³⁸ Ànya sayite zo Yairo roya, se Yesu usu kporo amba te ago eri liyi amba te ndi ruṛu be. ³⁹ Nda cite zo ya ago atate ànyari ekye: “Kporo cini ono e’di roya? Nyà liyi etaya? Ŋgwa ono dra ko’de; anya ka u’du toto u’du.” ⁴⁰ Ànya guyi ndana te, ndi nda lofo ànya cini te tesi, ru täpi ŋgwa ro ndi endre be ndi taeri’bai nätu ndaro be te, ago ciyite zo ya se ŋgwa ku’dube kigye ana ya. ⁴¹ Nda ru drí anyaro te ago atate anyari ekye: “Talita koumi,” se takacina ni ekye: “Ŋguti giṛiŋwa mata miri miŋga kuru!” ⁴² Dori anya ŋgate kuru ago eto aba te gbikyi. (Ndroa anyaro te ’butealo foritu.) Ondro ta ono ka’dote inye oko, ànya a’doyite kpeye larolaro ro. ⁴³ Oko Yesu tadri ànyaro te mbara ko ànyari ta ono itine ’diaza ri, ago nda atate ekye: “Nyòzo ŋga aza anyari onyane.”

¹ Yesu e’be vo ana te ago oyite kovole ’ba’desi ’ba ndaro roya, taeri’bai ndaro soyite nda vo. ² Sabata si oko nda eto ŋgaemba te zotaeriro ya. Lidri amba orivoya lau; ago ondro ànya keriyi ta ndaro te oko, ànya cini a’doyite larolaro ro. Ànya ejiyitate ekye: “Nda usu tase cini ono teni eŋwaro ya? Tavouni se ozobe ndäri ono e’di ya? Nda ka talaro ro oye eŋwanye ya? ³ Inye’do nda ṛo ko ni kyikyi ice edero, ŋgwa Maria ro, ago ädrupi Yakoba, Yosepa, Yuda ndi Simona be roya? Endreŋwa ndaro ka ori ṛo ko noŋwa ya?” Ago ànya gayi nda tezo. ⁴ Yesu atate ànyari ekye: “Aro nebi te vo cini yasi e’be gialo aro nda ko ’ba’desi ’ba modo ndaro roya ago ’didiri ndaro lako ndi katidri modo ndaro roya.” ⁵ Nda ni kote talaro ro oyene lau, toto nda ’ba drí ndaro te lidri fere se adravoro ana lomvo ago ede ànya te. ⁶ Nda laro tawi, tana lidri a’do kote taoma be. ’Dooko Yesu oyite ’baŋwà se gbikyi lau ana yasi, ugu lidri emba be. ⁷ Nda zi taeri’bai ’butealo foritu te voaloya ago zo ànya te ba riri. Nda ozo drikaca te ànyari torii undiro lofoza. ⁸ Ago ta ànya te ekye: “Mìru ŋga aza ko ami yibe aba amiro ya e’be gialo dofo aba ro; ca ambata, ca gbolo drilämi’ba ro, ca parata kpäkä amiro ya. ⁹ Mìso katala, oko mìru boŋgo osoro kinjona ko.” ¹⁰ Nda ata kpate ànyari ekye: “Ondro äru ami te yai’dwesi oko, miri zo alo ’do ya madale nyè’be vo ana gwo. ¹¹ Ondro ka’do nyìkyite ’ba’desi se lidri na ru ami ko yai’dwesi kode eri ta amiro ko ’do ya oko, nyè’be anya ago mìyo durufu na ni pa amiro yasi. Tana ka’do robe tazevoedreza ànya lomvo!” ¹² ’Dooko ànya oyiyite ago peyitate anjioko beṛo lidri ri drietane ni takozi ànyaro yasi. ¹³ Ànya lofoyi demonai amba te tesi, ago mbiṛiyi ido ice ido ro rote lidri amba adravo ro lomvosi ago ede ànya te. ¹⁴ Ago ’Bädri’ba Eroda eri tase cini ono tana te, tana liku Yesu ro larirute vo cini yasi. Lidri azaka kayi ugu ata ekye: “Yoane Bapatisi’ba go adrite! ’Bani nda orivoya mbara ono be talaro ro oyeza wo.” ¹⁵ Caoko, rukäna, atate ekye: “Nda ni Eliya owo.” Azakana ekye: “Nda nebi yi, laba gi oso alo aza nebii se kyeno kai ro ronye.” ¹⁶ Ondro Eroda keri tana te oko, nda atate ekye: “Nda ni Yoane Bapatisi’ba owo, mätäṛi drî ndaro te ätu, oko nda go adrite!” ¹⁷ Eroda andivona ozotate Yoane urune, ago nda embe nda te ago ’bate kamba ya. Eroda yete inye ta Erodia rota, se nda gyete anya gica orivoya toko ädrupi ndaro Filipo ro owo. ¹⁸ Yoane Bapatisi’ba ugu atate Eroda ri ekye: “Ko kado miri toko ädrupi miro ro ogyene!” ¹⁹ Ta’dota Erodia ’ba yaoso te Yoane lomvo ago lete nda ufune, oko anya ni kote oyene inye tana ta Eroda rota. ²⁰ Eroda turituri ni Yoane ri tana Yoane orivoya kado ago mano alokado yi, ta’dota ’ba nda te londro ro kamba ya. Nda le ta ndaro erine, caoko nda a’dote wiriwiriro amba ondro nda keri ta ndaro te tu cini si owo. ²¹ Äduro oko Erodia usu kandrakado anyaro te tu utitu Eroda ro rosi, ondro nda koye karama ’desi te dri’bai ’desi miri ndaro ro ri, ’desi kyila’bai ro ndi ’di’desii Galilaya robe ri owo. ²² Ŋguti Erodia ro ikyi ecite ago to läri te, ago tana si Eroda ndi ŋgwazii ndaro be tawi. Ta’dota Eroda atate ŋguti ana ri ekye: “Ŋgase milebe miri e’di ya? Ŋgase aza milebe mozona ndi miri.” ²³ Nda atate anyari tao’ba amba si ekye: “Ma ruäṛu ŋgase aza nyabe ejina, ka’do ca amba oso miri ’bädri’ba maro telesina ronye mozona ndi miri!” ²⁴ Ndi ŋguti ana fote tesi ago eji endre anyaro te ekye: “Mejina e’di ya?” Anya zatadrite ekye: “Drî Yoane Bapatisi’ba ro.” ²⁵ Ŋguti ana gote kovole ndrindri ’bädri’ba re ago ejitate ekye: “Male miri drî Yoane Bapatisi’ba ro ozone märi noŋwa yau deŋbele si!” ²⁶ Tase ana ’ba ’bädri’ba te a’done tusuro amba, oko ta tao’ba se nda ko’babe ŋgwazii ndaro kandra ana rota nda ni kote ta anyaro ogane zo. ²⁷ Ta’dota nda zo vookwa’ba aza te ota be drî Yoane ro ezine. Vookwa’ba se ana oyite ago cite kamba ya ago täṛi drî Yoane rote; ²⁸ nda ezite deŋbele si ago ozote ŋguti ana ri ago anya ozote endre anyaro ri. ²⁹ Ondro taeri’bai Yoane ro keriyi ta ono te oko, ànya ikyiyite ŋgyiyi avo ndaro te, ago seyite. ³⁰ Lazo’bai egoyite ago dro’beyi iyi te Yesu be, ago itiyi tase cini ànya koyeyibe ago kembayi be te ndäri. ³¹ Ago lidri amba kayi eziikyi ago kayi ugu oyi ta’dota Yesu ndi taeri’bai ndaro be a’doyite teinye saa ako ŋga onyaza. Ta’dota nda atate ànyari ekye: “Mì’de mòyi pere vo aza ya se mà’do robe iṛe kigye tana nyòloli robe fere.” ³² Ta’dota ànya etoyi oyite toŋgo si vo aza ya toto andivo ànyaro iṛe. ³³ Caoko, lidri amba ndreyi ànya te oyivoya ago niyi ànya dori, ànya oyiyite ni ’ba’desii cini yasi muyite mileya gyini drisi ago sayite vo ana ya käti ni Yesu ndi taeri’bai ndaro be ri. ³⁴ Ondro Yesu kefote ni toŋbo yasi oko, nda ndre lowa amba te, ago ya ndaro nite ànya lomvo, tana ànya orivoya oso timele teinye lekye’ba ako ronye. Ta’doro nda eto ànya emba te ta amba si. ³⁵ Ondro te tandrolero oko, taeri’bai ndaro ikyiyite ndare ago atayite ekye: “Ono orivoya vocowa yi ago yauono te tandrole yi. ³⁶ Mi’ba lidri ono koyi, ago mi’ba ànya koyiyi vorogoŋwà se loto iyi yasi ago ’baŋwà yasi ŋga azaka ogyene andivo ànyaro ri onyane.” ³⁷ Yesu zatadrite ekye: “Ami modo nyòzo ŋga aza ànyari onyane.” Ànya ejiyi nda te ekye: “Inye’do mile ämäri oyine ambata ogyene mo’di kaciro kama ritu (200) si ànyari onyane ya?” ³⁸ Ago Yesu eji ànya te ekye: “Ami ambata be moda ya? Nyòyi mìndre.” Ondro ànya kusuyite oko, ànya itiyi tana te ndäri ekye: “Ambata nji ago ti’bi ritu.” ³⁹ ’Dooko Yesu atate taeri’bai ndaro ri lidri cini lonyine o’bane oraoraro ago orine vuru käyi lururo dri. ⁴⁰ Ndi lidri rite vuru oraoraro gboko ro gboko ro rukäna kama alo (100) ago azakana ’butenji. ⁴¹ ’Dooko Yesu ru ambata se nji ana te ndi ti’bi se ritu ana be, ndrevote kuru vo’buyakuru ya, ago ozo aro’boya te Lu ri. Nda wa ambata te, ago ozote taeri’bai ndaro rigye lanjine lidri ri, nda lanji ti’bi ritu se ana kpate ànya cini ri. ⁴² Vona cini nyate ago ojo ànya te. ⁴³ ’Dooko taeri’bai otoyi anjoko ambata ndi ti’bi se ke’bebe ana rote koṛiga na ’butealo foritu twitwi. ⁴⁴ Mànoago se konya ŋga be ana otina orivoya kutu nji (5,000). ⁴⁵ Dori Yesu ’ba taeri’bai ndaro te ocine toŋbo ya ago oyine mile ndaro ya Betesaida ya, fofo tasi nasi, ondro nda kadri lowa lidri ro perena owo. ⁴⁶ Mede oye lowa ri vosi oko, nda tute kuru lutu dri mätune. ⁴⁷ Ondro te tandrolero oko, toŋbo te orivoya kitoriya fofo roya, ’dooko Yesu drigba iṛe kototi. ⁴⁸ Nda ndre taeri’bai ndaro te se te orivoya rritiro ànyari udine, tana oli elite ànya driro kate toŋbo pele; ta’dota lakole saa njidriesu ndi saa ’butealo foalo roya vo ri iwivoya oko Yesu ikyite ànyare, ka ezi aba gyi drisi. Nda aba le lävune ànya lomvosi. ⁴⁹ Oko ondro ànya kondreyi nda te abavoya gyi drisi oko, ànya kusuyi iro be ekye, ’do orivoya tori avo ro, ago ndi ànya trete. ⁵⁰ Ànya cini a’dote turituriro ondro ànya kondreyi nda te owo. Dori Yesu atate ànyari ekye: “Nyà’do agoago be! Nyuturi ko. Ono ma owo!” ⁵¹ ’Dooko nda cite toŋbo ya ànyare, ago oli edrete. Ago taeri’bai laroyi tawi, ⁵² tana ànya niyi ŋgaonya se ozobe lidri kutu nji (5,000) ri ana takacina ko, ago ’bayi tana ri kote drî ànyaro ya. ⁵³ Ànya zayidri fofo rote ago ikyiyite wari Genesareta roya, ago ànya yi toŋbo te lau. ⁵⁴ Ondro ànya kofoyite ni toŋbo yasi oko, dori lidri ni Yesu te. ⁵⁵ Ago ànya imuyite ni wari cini yasi, ànya keriyi vose nda be kigye ana tana te owo, ànya eziyi adravo’bai te ndare para ànyaro si. ⁵⁶ Ago vose cini Yesu koyite kigye, ’baŋwà, ’ba’desii, kode vorogoŋwà yasi, lidri ŋgyi adravo’bai ànyaro te vo ŋgalogyero yasi ago ànya lo’baruyite ndäri adravo’bai o’bane gi toto sidri boŋgo ndaro ro odone ayani; ago vona se cini kodobe ana edete kadoro.

¹ Rukä Parusii ro ndi miemba’bai Ota robe se kikyibe ni Yerusalema yasi ana otoyikalate Yesu re. ² Ànya ndreyite anjioko rukä taeri’bai ndaro ro kayi ŋgaonya dri undi be; anjioko ànya joyi drí ànyaro kote oso se Parusii katabe beṛo lidri ri oyene ronye. ³ (Tana Parusii, ndi Yudai cini be, kayi oso ta ŋgaemba ro se ànya kuru yibe ni zutui ànyaro rigyesi ’do voro, ànya nyayi ŋga ko e’be gialo ànya joyi drí ànyaro lutu! ⁴ Ondro ànya kegoyite ni vo ŋgalogyero yasi, ànya nyàyi ŋga ko, e’be gialo ànya wäṛina andivo ànyaro käti. Ànya kayi oso ota azaka amba se arabe ànya kuruyibe iyi vo, oso ta kofo, lakaza, deŋbele ndi kitapara ojoro kadoro ’do ronye vo.) ⁵ Ago Parusii ndi miemba’bai Ota robe ejiyi Yesu te ekye: “Taeri’bai miro soyi ko ta ŋgaembaro drí ojoro se zutui amaro kembabe vo, oko nyayi ŋga gwo drí undiro be etaya?” ⁶ Yesu zatadri ànyaro te ekye: “Ta Yesaya ro orivoya ŋgye se nda käŋgube ta amiro ta! Ami orivoya miomba’bai, ndi oso se nda kegyibe ronye se ekye: ‘Lu atate ekye, lidri kwoi, kayi ma oro toto kala ànyaro si, oko endaro ya ànyaro orivoya lozo ni mare si. ⁷ Mätu oye ànyaro märi kadona i’do, tana ànya kayi ŋgaemba ota se lidri ko’babe ni si, osoago ànya orivoya ota maro!’ ⁸ “Mìna Ota Lu ro gwo tesi ago mìro gwo ŋgaemba lidri ro ayani.” ⁹ Ago Yesu ugu atate ekye: “Nyà Ota Lu ro ogana zo tauni amba si tana mìle ŋgaemba modo amiro ro eŋgane ayani. ¹⁰ Tana Musa atate ekye: ‘Miro täpi miro ndi endre miro be,’ ago, ‘nda se kabe täpi ndaro kode endre ndaro otrina beṛo ufune.’ ¹¹ Oko nyà ŋgaemba mìkye ondro ka’do ’diaza orivoya ŋga aza be ozone täpi ndaro kode endre ndaro opaza, ka ata ekye: ‘Korebana yi’ (takacina anjioko, anya ni Lu ro), ¹² alaga nda tezo täpi ndaro ndi endre ndaro be opavoya. ¹³ Ŋgaemba se nyàbe copena azii ri nonye ono ka ata Lu ro forona. Ago nyà ŋga amba azaka oso ono ronye oyena.” ¹⁴ ’Dooko Yesu zi lowa te kpa to’di ndare ago atate ànyari ekye: “Nyeri ta maro, ami cini, ago mìni tana. ¹⁵ Ŋgase ni tesi kabe oci lidri ya ni ko nda o’bane undiro. Oko ŋgase kabe efo tesi ni lidri yasi kani nda o’ba undiro.” ¹⁷ Ondro nda ke’be lowa te ago kocite zo ya oko, taeri’bai ndaro ejiyi nda te ata ono tazevona edrene. ¹⁸ Yesu atate ànyari ekye: “Ami kpa tauniako oso azii ronye. Mìni ta ono tazevona koya? Ŋgase ni tesi kabe oci lidri ya ni ko nda o’bane undiro, ¹⁹ tana ci ko ya ndaro ya oko cite kävuye ndaro ya ago ’dooko fote tesi ni lomvo yasi.” (Ta ono atana si, Yesu ekye ŋgaonya cini orivoya kado onyane.) ²⁰ Ago nda ugu atate ekye: “Ŋgase kabe efo tesi ni lidri yasi kani nda o’ba undiro. ²¹ Tana ni ya yasi, ni ya lidri ro yasi, tausu undiro ka efo se kani nda o’ba ŋga koziro oyene ŋgatopane, ’diufune, ²² ronyi oyene ago kode toko drisi, a’done yagäru be, ago kani ’di o’ba ŋga cini se undiro dritoto, ’diodo, a’do undiro, yaoko, taiti kowero, driuŋgyi ndi amaama be oyene. ²³ Ŋgase cini undiro kwoi ka efo ni ya lidri ro yasi ago kani nda o’ba undiro.” ²⁴ ’Dooko Yesu e’be vo ana te ago oyite wari se loto ’bakici Tura ro lomvo ana ya. Nda cite zo ya ago leko ’diaza alo ri unine ekye nda orivoya lau, oko nda ni kote yi da’done. ²⁵ Toko aza, se ŋguti anyaro orivoya tori undiro be anya ya ana eri ta Yesu rote ago ikyite dori ndare ago ’dete pa ndaro ya. ²⁶ Toko ana orivoya atrai ätite wari Foenesia roya Siria ya. Anya lo’barute Yesu ri demona isine tesi ni ŋguti anyaro yasi. ²⁷ Oko Yesu zatadrite ekye: “Dri mi’ba ämäri ŋgàga ecane käti, ko kado ŋgaonya ŋgàga ro urune ago ovone kokyei ri.” ²⁸ Anya zatadrite ekye: “’Desi, kokyei se tara’biza zele nyayi ŋgase ŋgàga ke’bebe ’do kpa!” ²⁹ Ago Yesu atate anyari ekye: “Tana tadrioza miro ono ta, nyoyi kovole ’bäru, ndi endaro nyusuna demona fote ni ŋgutiŋwa miro yasi!” ³⁰ Anya oyite ’bäru ago usu ŋgwa te u’duvoya kitapara dri; demona fote tesi ni anya yasi. ³¹ ’Dooko Yesu e’be wari Tura rote ago oyite Sidona yasi le Fofo Galilaya roya, ugu oyite liti wari Dekapolisi ro yasi. ³² Lidri azaka eziyi mano aza te ndare mano na ana tuṛu yi ago ni ata ko, ago ànya lo’barute Yesu ri drí ndaro o’bane nda lomvo. ³³ Ago Yesu ru nda te iṛe pere, lozo ni lowa resi, ’ba driŋgwa ndaro te bi mano ana roya, vo to te ago do ladra mano ana rote. ³⁴ ’Dooko Yesu ndrevote kuru vo’buyakuru ya, lawate äfu, ago atate mano ana ri ekye: “Efefata” se takacina ni ekye “nya’do uŋbo!” ³⁵ Dori mano ana eritate, ladra ndaro onjirute, ago nda eto atate teinye rritiako. ³⁶ ’Dooko Yesu tadri lidri rote ko tana itine ’diaza alo ri; oko nda tadri ànyaro ca mbara ko tana itine, caoko ànya itiyi tana te ndra. ³⁷ Ago vona se cini keriyi tana be laroyi tawi. Tana nda ye ŋga cini te kado! Ànya ekye: “Nda ’ba tuṛu te taerine ago ataako’ba kpa atane.”

¹ Tuna zwa dri ko amba ta ono vosi oko lowa du aza ikyite voaloya. Ondro lidri te ŋga aza ako onyane oko, Yesu zi taeri’bai ndaro te ndare ago atate ekye: ² “Ma tusuro ta lidri kwoi rota, tana ànya riyite mabe u’duna te nätu ago yauono ànya te ŋga aza ako onyane. ³ Ondro ka’do mazo ànya te ’bäru ŋgaonya ozoako ànyari, inini ufuna ànya ndi liti ya, tana azaka ànyaro ikyi ni lozo si.” ⁴ Taeri’bai ndaro ejiyi nda te ekye: “Vocowa ono ya ono ’diaza unina gi’da ŋgaonya amba usune onyane lidri cini kwoi riya?” ⁵ Yesu ejitate ekye: “Ami orivoya ambata duŋguṛu robe modaya?” Ànya zayitadrite ekye: “Njidrieri.” ⁶ Yesu ta lowa te orine vuru gyini dri. ’Dooko nda ru duŋguṛu ambata ro se njidrieri ana te ozo aro’boya te Lu ri, wa ànya te, ago ozote taeri’bai ndaro rigye lanjine lowa ri; ndi taeri’bai yeyite inye. ⁷ Ànya kpa orivoya ti’bi fere be, Yesu ye aro’boya te tana ro ago ata kpate taeri’bai ri lanjine. ⁸ Vona cini nyayite ago ojo ànya te; ago taeri’bai otoyi ’bolotona se ke’bebe ana te koṛiga na njidrieri twitwi. ⁹ Oti lidri se konya ŋga be ro orivoya oso kutu su (4,000) ronye. ’Dooko ŋgaonya vosi Yesu ’ba lidri te oyine. ¹⁰ Ndi dori nda cite toŋbo ya taeri’bai ndaro be ago oyiyite wari Dalemanuta roya. ¹¹ Rukä Parusii ro ikyite Yesu re ago etoyi kaladiṛite nda be. Ànya leyi nda ojone. Ndi ànya ejiyi nda te talaro ro ni vo’buyakuru yasi oyene kaka’da robe anjioko nda ni Lu resi. ¹² Oko Yesu lawate äfu ago atate ekye: “Lidri tu ono ro kayi taeji talaro rota etaya? Mata ämiri ono, talaro ro ka’dane lidri kwoi ri i’do!” ¹³ Ago nda e’be ànya te, ago cite toŋbo ya, ago zate fofo tasi nasi. ¹⁴ Taeri’bai ijeyi ta ambata uru ro amba tana te, ruyi toto duŋguṛuna alodi ànya yibe toŋbo ya. ¹⁵ Yesu atate ànyari ekye: “Mìmba ämidri, nyàgaga ami ni loŋga Parusii ro ndi Eroda be ro ri.” ¹⁶ Ànya etoyi atate iyivoya ekye: “Nda ko’debe atane inye ’do tana ama ambata ako ono ro.” ¹⁷ Yesu ni tase ànya kayi atana ana te, nda eji ànya te ekye: “Tana e’di nyà ugu ata ta a’doro ambata ako ono rota niya? Mìni ṛoko kode mìni takacina dri ko ya? Drî amiro ka tauni liyaro ya? ¹⁸ Ami orivoya mi be, mìndre ko ya? Ami orivoya bi be, nyèri ko ya? Mìyi ta ¹⁹ ambata njidrieri se motowabe lidri kutu nji (5,000) ri ana tana ko ya? ’Bolotona se ke’bebe ana nyòtobe ru koṛiga twitwi moda ya?” Ànya zatadrite ekye: “’Butealo foritu.” ²⁰ Yesu ejitate ekye: “Tuse motowa ambata njidrieri be lidri kutu su (4,000) ri, ’bolotona se ke’bebe ana nyòtobe ru koṛiga twitwi moda ya?” Ànya zatadrite ekye: “Njidrieri.” ²¹ Nda eji ànya te ekye: “Ami drigba tauniako ya?” ²² Ànya ikyiyite Betesaida ya, ago lidri azaka eziyi mano miako aza te Yesu re ago lo’bayirute ndäri nda odone. ²³ Yesu ru mano miako ana te drí yasi ago lofo nda te tesi ni ’baŋwa yasi. To ovo mi mano ana roya vosi oko, Yesu ’ba drí ndaro te nda lomvo ago eji nda te ekye: “Inye’do mindre ŋga aza gi’da ya?” ²⁴ Mano ana ndrevote kuru ago atate ekye: “Owo, mandre lidri yi, oko ànya laba ṛo oso ice yi ronye ka ugu aba.” ²⁵ Yesu go ’ba drí ndaro te kpa to’di mi mano ana roya. Saa ono ya mano ana ndrevote madaro, tana ologo voondre ndaro te, ago nda ndre ŋga cini te kadoro. ²⁶ ’Dooko Yesu zo nda te ’bäru ago ta nda te ekye: “Migo ko ’baŋwa ana ya.” ²⁷ ’Dooko Yesu ndi taeri’bai ndaro be oyiyite ’baŋwà se lototi Kaisaria Filipo lomvo ana ya. Ànya dri liti ya oko, nda eji ànya te ekye: “Nyìti ta märi, lidri ekye ma a’di owo ya?” ²⁸ Ànya zayitadrite ekye: “Rukäna ka ata ekye mi ni Yoane Bapatisi’ba owo, azakana ka ata ekye mi orivoya Eliya owo,” ago “azaka ka ata ekye mi orivoya alo aza nebii ro owo.” ²⁹ Nda eji ànya te ekye: “Oko ami ni? Nyà ata mìkye ma a’di owo ya?” Petero zatadrite ekye: “Mi ni Mesiya owo.” ³⁰ ’Dooko Yesu tadri ànyaro te ekye: “Nyìti ta maro ko ’diaza alo ri.” ³¹ ’Dooko Yesu eto taeri’bai ndaro embana te ekye: “Beṛo Ŋgwa Lidri ro ri ruezane amba, ago ’di’desii, kohanii ’desi ndi miemba’bai Ota robe oganayi nda ’da zo. Äfuna nda ’da, oko u’du nina si oko nda adrina ’da.” ³² Nda iti ta ono ṛo ŋbelero ànyari. Ta’dota Petero ru nda te pere ago eto nda luku te. ³³ Oko Yesu zamite ago ndrevote taeri’bai ndaro dri, ago luku Petero te. Nda ekye: “Minaru pere ni maresi Satani. Tavousu miro ’do ikyi ko ni Lu resi oko ni lidri resi.” ³⁴ ’Dooko Yesu zi lowa ndi taeri’bai ndaro be te ndare, nda atate ànyari ekye: “Ondro ka’do ’diaza kolete o’dene mavo, beṛo ndäri ta andivo ndaro ro ijene, kuŋgyi taka ndaro, ago keso mavo. ³⁵ Tana nda se kole adri modo ndaro ro opane ijena anya ’da; oko nda se kabe adri ndaro ijena ta maro ta ago ta lazokado rota opana anya ndi. ³⁶ Ondro ka’do ’diaza kuru ’bädri cini gi ca oko kije adri ndaro gwo, nda usuna ŋga aza gi’da ya? Endaro nda unina ko ŋga aza usune! ³⁷ Nda unina ko ŋga aza ozone ogone adri ndaro usuza. ³⁸ Ondro ka’do ’diaza driupi ro ni märi ago ni ta ŋgaemba maro ri tu luako ago koziro ono si, ’dooko Ŋgwa Lidri ro a’dona kpa driupiro ni ndäri ondro nda kate ikyi ’desi Täpi ndaro roya malaikai alokado be owo.”

¹ Ago nda ugu atate ekye: “Endaro mata ämiri ono, azakana orivoya noŋwa se uninayi ko odrane madale ànya ondrenayi Miri ’Bädri’ba Lu ro ro lutu ikyivoya mbara be.” ² U’du njidrialo vosi oko, Yesu ru Petero, Yakoba ndi Yoane be te, ago ugu ànya te lekuru ’bereŋwa ogwaekye dri, ago ànya riyite lau iṛe. Ago ànya kondreyi oko beti Yesu ro tozarute, ³ ago boŋgo ndaro a’dote onjero hwia ndrani ’diaza ’bädri ya ni be boŋgo ojone drisi. ⁴ ’Dooko taeri’bai se nätu kwoi ndreyi Eliya ndi Musa be te kayi ugu ata Yesu be. ⁵ ’Dooko Petero atate Yesu ri ekye: “Miemba’ba, orivoya kado ämäri a’done noŋwa! Màmona mutuguṛi nätu, alodi miri, alodi Musa ri, ago alodi Eliya ri.” ⁶ Tana nda ndi azii be a’doyite turituriro ago niyi tase atane kote. ⁷ ’Dooko ’dikolo efote ago lindri na tako ànya te, ago ata ikyite ni ’dikolo yasi ekye: “Ono ni Ŋgwa modo maro se mulu tawi ono owo; nyèri ta ndaro!” ⁸ Dori ànya kondreyi vote ndri gbikyi oko ndreyi ’diaza tona kote; toto Yesu ni orivoya ànya be. ⁹ Ondro ànya kayite efo vuru ni ’bereŋwa drisi oko, Yesu tadri ànyaro te ekye: “Ŋgase mìndrebe ono nyìti tana ko ’diaza ri, madale Ŋgwa Lidri ro kefo lutu ni avo yasi.” ¹⁰ Ànya royi ta ndaro te, caoko ànya etoyi tana atana te ànyavoya ekye: “Efo ni avo yasi ono takacina e’di ya?” ¹¹ Ago ànya ejiyi Yesu te ekye: “Tana e’di miemba’bai Ota ro kayi ata ekye, beṛo Eliya ri ikyine käti niya?” ¹² Ago nda zatadri ànyaro te ekye: “Ṛo Eliya ri ikyine käti tana ko’ba ŋga cini robe nja. Caoko tana e’di taegyi ka ata ekye Ŋgwa Lidri ro ezaruna ’da amba ago agana ’da zo niya? ¹³ Mata ämiri ono, Eliya ikyi ṛote ago lidri ye nda te oso tana kusi ànya be ronye, oso Taegyi katabe ta ndaro ta ronye.” ¹⁴ Ondro ànya kego kodro’beruyite anjoko taeri’bai robe oko, ànya ndreyi lowa amba te gbikyi ànya lomvosi ago azaka miemba’bai Ota ro ro kayi ugu kaladiṛi ànya yibe. ¹⁵ Ondro lidri kondre Yesu te oko, ànya laroyite amba, muyite ndare ago yeyi mede te ndäri. ¹⁶ Yesu eji taeri’bai ndaro te ekye: “Nyà ta e’diro diṛina ànya yibe ya?” ¹⁷ Mano aza ni lowa lakosi zatadrite ekye: “Miemba’ba, mezi ŋgwa maro mire, tana nda orivoya tori undiro be nda ya ago ni ata ko. ¹⁸ Ondro tori kuru nda te oko, vo nda te gyini dri, ago kamo ka efo kalana yasi, ka si onya, ago egwa nda te, meji taeri’bai miro te tori ono isine tesi, oko ànya niyi kote lofone.” ¹⁹ Yesu atate ànyari ekye: “Ami lidri taomaako ono! Marina ami yibe tuna modaya? Marina ami yibe tuna mu’du eŋwanye ya? Nyezi ŋgwa ’do mare!” ²⁰ Ànya eziyi nda te Yesu re. Ago dori tori kondre Yesu te oko, embe ŋgaga ana te, ago nda ’dete gyini dri ago reṛite ŋguṛiŋguṛi kamo be kala yasi. ²¹ Yesu eji täpi te ekye: “Nda a’dote inye tuna mu’du eŋwanye ya?” Nda zatadrite ekye: “Ṛo kyeno nda dri ŋgagaŋwa ro. ²² Perena amba tori undiro ojote nda ufune nda ovosi asi ya ago gyi ya. Ya miro kuni ama lomvo ago mipa ama, ondro ka’do mini gindi oyene rritiako owo!” ²³ Yesu atate ekye: “Owo, ondro ka’do mi modo mini gindi oyene! Ŋga cini orivoya rritiako ’dise taoma be ri.” ²⁴ Dori täpi ŋgaga ana ro trete ekye: “Ma orivoya taoma be, oko ojo ko. Mipa ma a’done sina ndra.” ²⁵ Ondro Yesu kondre lowa ka ezi ruibi ànya dri oko, nda ta tori undiro te ekye: “Tuṛu ago tori ataako ono, mata mi efone tesi ni ŋgaga ono yasi ago migo mici ko nda ya tona.” ²⁶ Tori trete, ago embe ŋgaga ana te vo anya te vuru, anya yete agyigyi ago efote tesi. Ŋgaga ana landrete oso avo ronye, ago ’dicini atate ekye: “Nda drate!” ²⁷ Oko Yesu ru ŋgaga ana te drí yasi ago eŋga nda te kuru, ago nda edrete kurusi. ²⁸ Ondro Yesu kocite zo ya oko, taeri’bai ndaro ejiyi nda te iṛero ekye: “Tana e’di mä̀ni kote tori lofone tesi niya?” ²⁹ Yesu zatadrite ekye: “Änina ko lofone ŋga aza si, se nonye ono olofona toto mätu si ayani.” ³⁰ Yesu ndi taeri’bai ndaro be e’beyi vo ana te ago oyiyite Galilaya ya. Yesu leko ’diaza ri vose nda be kigye ana unine; ³¹ tana nda kate ugu taeri’bai ndaro embana ekye: “Ozona Ŋgwa Lidri ro ’da drí lidri roya, ago ànya ufunayi nda ’da. Caoko u’du nina si oko, nda adrina ’da.” ³² Oko ànya niyi takaci tase ana ro ko, ago a’doyite turiro nda ejine. ³³ Ànya ikyiyite Kaperenauma ya, ago ànya kociyite zoya oko Yesu eji taeri’bai ndaro te ekye: “Nyà kaladiṛi liti ya etaya?” ³⁴ Oko ànya leyi kote tadri ndaro ozane, tana liti ya ànya kayi kaladiṛi ànyavoya ekye a’di ni parandra. ³⁵ Yesu rite vuru, nda zi taeri’bai ’butealo foritu te, ago atate ànyari ekye: “Nda se kolebe a’done käti beṛo andivo ndaro o’bane äduro ago a’done ruindu’ba ’di cini ro.” ³⁶ ’Dooko nda ru ŋgagaŋwa aza te ago edre nda te ànya kandra. Nda omvo nda te ago atate ànyari ekye: ³⁷ “Nda se kabe alo aza ŋgagaŋwà kwoi ro uruna ävuru maro ya, ka ma uru, ago nda ka ko toto ma uru oko nda se kezo mabe ono kpa.” ³⁸ Yoane atate ndäri ekye: “Miemba’ba, mandre mano aza te ka ugu demonai lofo tesi ävuru miro si, ago màtate ndäri edrene, tana nda ko gboko amaro ro.” ³⁹ Yesu atate anyari ekye: “Nyèdre nda ko, tana ’diaza i’do se ka talaro ro oye ävuru maro ya, ndri voigyesi oko ogone ta undiro atane ta maro ta. ⁴⁰ Tana nda se ko kyilaro ama yibe orivoya amaro. ⁴¹ Endaro mata ämiri ono, ’diaza se kabe gyi umvuro ozona ämiri tana ami be maro ono ro endaro nda usuna päläti ndaro ’da. ⁴² “Ondro ka’do ’diaza ko’ba alo aza se giṛiŋwà kwoi rote taoma ndàro ma ya ijene, ni kadopara kuni ’desi inya uyiro embene ’dina ’do kyembe ago ovone gyi’desi ya. ⁴³ Ondro ka’do drí miro kani mi o’ba takozi oyene, nyätäṛi anya ätu! Ni kadopara miri ocine adri ya drí alodi ako ndrani miri ocine drí be riti gehena ya, le asi se zwe ko alona ana ya ri. ⁴⁵ Ago ondro ka’do pa miro kani mi o’ba takozi oyene, nyätäṛi anya ätu! Ni kadopara miri ocine adri ya pa alodi be ndrani mi ovone pa be riti gehena ya ri. ⁴⁷ Ago ondro ka’do mi miro kani mi o’ba takozi oyene, nyewe anya tesi! Ni kadopara miri ocine Miri ’Bädri’ba Lu ro roya toto mi alodi be ndrani mi ovone mi be riti gehena ya ri. ⁴⁸ Lau kyiri se kabe ànya onya dra ko alona, ago asi se kabe ànya oza zwe ko alona. ⁴⁹ “Äwäṛina ’dicini ’da asi si oso abe tori se alobe wäṛina täyi si ’do ronye. ⁵⁰ “Täyi orivoya ŋga kado yi; oko ondro ka’do kije oci anyaro te, minina o’bane ocine to’di eŋwanye ya? “Nyà’do täyi bereazi robe amivoya, ago mìri liatokpero azi be.”

¹ ’Dooko Yesu e’be vo ana te oyite wari Yuda roya, ago zadri Golo Yaradene rote. Lowa idite ndare kpa to’dina, ago nda emba ànya te oso nda kabe oyena ondoalo ronye. ² Rukä Parusii ro ikyiyite ndare ago ojoyite nda ojone. Ànya ejiyitate ekye: “Nyiti ta ämäri, inye’do ota letadri gindi mano aza ri toko ndaro onjine ya?” ³ Yesu zatadrite taeji si ekye: “Ota se Musa kozobe ämiri ekye e’di ya?” ⁴ Tadrioza ànyaro ekye: “Musa ozo ole te manoago ri waraga ruonjiro ozone toko ndaro ri ago anya onjine.” ⁵ Yesu atate ànyari ekye: “Musa egyi ota ono te ämiri tana orivoya rritiro ami embane. ⁶ Oko ni eto si, tu ’bädri o’baro si, ‘Lu ’ba ànya ni agoro ago tokoro,’ oso taegyi katabe ronye. ⁷ ‘Ago tana ta’doro manoago e’bena täpi ndaro ndi endre be ’da ago a’dona gwo kpokoṛo alo toko ndaro be, ⁸ ago se ritu ono a’dona gwo lomvo alodi ro.’ Ta’dota ànya kote tona ritu oko te lomvo alodi yi. ⁹ Ka’do inye, beṛo ko mano aza ri ’dise Lu kodro’bete troalo ono lewene.” ¹⁰ Ondro ànya koyiyite kovole zo ya oko, taeri’bai ejiyi Yesu te ta tase ono rota. ¹¹ Nda atate ànyari ekye: “’Diaza se konji toko ndaro te ago kogye toko aza te anjioko yetate toko ndaro drisi. ¹² Kpa oso inye, toko se konjirute ni ago anyaro ri ago kuru ago aza te anjioko yetate ago drisi.” ¹³ Lidri azaka eziyi ŋgàga giṛiŋwà te Yesu re tana nda ko’ba drí ndaro robe ànya dri, oko taeri’bai koziyi lidri kai te. ¹⁴ Ondro Yesu kondrete oko, nda a’dote kyilaro ago atate taeri’bai ndaro ri ekye: “Mì’ba ŋgàga giṛiŋwà ikyine mare, ago nyàlaga ànya ko zo, tana Miri ’Bädri’ba Lu ro ro ni se oso nonye kwoi ro. ¹⁵ Endaro mata ämiri ono, nda se aza kuru Miri ’Bädri’ba Lu ro ro kote oso ŋgwa giṛiŋwa ronye, ndäri ocine kigye i’do alona.” ¹⁶ ’Dooko nda ŋgyi ŋgàga kai te kufu ndaro ya, ago ’ba drí ndaro te ànya alo alo drisi, ago äṛu ànya te. ¹⁷ Ago ondro Yesu kate ugu oyi oko, mano aza imute, sokayate nda kandra, ago eji nda te ekye: “Miemba’ba kado, beṛo märi e’di oyene ma’do robe adri äduako be ya?” ¹⁸ Yesu eji nda te ekye: “Nya ma uzi kado etaya? ’Diaza i’do kado e’be gialo Lu ayani. ¹⁹ Mini Ota te, se ekye: ‘Mifu läfu ko; miye ta ko ago kode toko drisi; nyukugu ŋga ko; nyikicu ’diaza ko kowe si; nyoco ’di ko; miro täpi miro ndi endre miro be.’ ” ²⁰ Mano ana atate ekye: “Miemba’ba ṛo kyeno agoanji maro si ota se cini kwoi marote.” ²¹ Yesu ndrevote ŋgye nda dri ŋgalu si ago atate ekye: “Mi toto orivoya lemeri ŋga alodi robe. Nyoyi ago migye ŋgase cini nya’dobe sina ono ago nyozo parata na ati’bai ri, ’dooko nya’dona ’da ŋgadriamba be vo’buyakuru ya; ’dooko nyikyi ago miso mavo.” ²² Ondro nda keri ta ono te oko, mi ndaro e’de ṛo äkpu, ago nda oyite tusuro, tana nda orivoya ŋgadriamba be. ²³ Yesu ndrevote gbikyi taeri’bai ndaro drisi ago atate ànyari ekye: “A’dona ndi rritiro lidri ŋgaamba be ri ocine Miri ’Bädri’ba Lu roya!” ²⁴ Taeri’bai laroyi tawi ta ata kwoi rota, oko Yesu ugu atate ekye: “Ŋgàga maro, orivoya rritiro ocine Miri ’Bädri’ba Lu ro roya! ²⁵ Orivoya rritiako gamele ri ocine mi libira ro yasi ni mano ŋgaamba’ba ri ocine Miri ’Bädri’ba Lu roya.” ²⁶ Ta ono ’ba taeri’bai te larone amba ago ejiyi iyi te ekye: “Ka’do inye apana a’di aya ya?” ²⁷ Yesu ndrevote ŋgye ànya dri ago zatadrite ekye: “Ono orivoya rritiro lidri ri oko ko Lu ri, ŋga cini orivoya rritiako Lu ri.” ²⁸ ’Dooko Petero atate ekye: “Mindre, mè’be ŋga cini te ago màsote mi vo.” ²⁹ Yesu atate ànyari ekye: “Owo, ago endaro mata ämiri ono ’diaza se kabe ’ba e’be kode ädrupi kode endreŋwa kode endre kode täpi kode ŋgàga kode ämvu ta maro ta ago ta lazokado rota, ³⁰ usuna ŋga amba ndra tu gi yauono ya. Nda usuna zoi, ädrupii, endreŋwà, endrei, ŋgàga ndi ämvui be perena kama alo ndra ago usuna rueza kpa; ago tu kabe ikyi ana ya nda usuna adri äduako ’da. ³¹ Oko ambana se yau käti ono a’dona ’da äduro, ago ambana se yau äduro ono a’dona ’da käti.” ³² Yesu ndi taeri’bai ndaro be kayi ugu oyi liti se kabe oyi Yerusalema ya drisi. Yesu ’dete käti taeri’bai mile, se a’doyite larolaro ro amba; ago lidri se kesobe kovole kai a’doyite turiro. Ndi Yesu ru taeri’bai ’butealo foritu te kpa to’dina pere ago iti ta ŋgase cini ka oyebe a’done ndäri ana tana te ànyari. ³³ Nda atate ànyari ekye: “Nyèri, mà te ugu oyi Yerusalema ya vose ozona Ŋgwa Lidri ro ’da kigye kohanii ’desi ndi miemba’bai Ota robe ri ana ya. Ànya openayi vure ndaro ’da odrane ago ozonayi nda ’da Atrai ri, ³⁴ se ugunayi nda ’da, ovonayi to ’da nda lomvo, o’binayi nda ’da, ago ufunayi nda ’da; oko u’du nina si oko nda adrina ’da.” ³⁵ ’Dooko Yakoba ndi Yoane be ŋgwàagoro Zebedayo ro, ikyiyite Yesu re, ànya atayite ekye: “Miemba’ba, màle miri ŋga aza oyene ämäri.” ³⁶ Yesu eji ànya te ekye: “Mìle märi e’di oyene ämiri ya?” ³⁷ Ànya zayitadrite ekye: “Ondro mirite giti miro dri ’desi Miri ’Bädri’ba miro roya oko, màle miri ama o’bane orine mibe, azana drígwo miro yasi ago azana gaṛi miro yasi.” ³⁸ Yesu atate ànyari ekye: “Mìni ŋgase nyàbe taeji tana ro ono ko. Inye’do mìnina gindi kofo ruezaro se beṛo märi umvune ono umvune ya? Inye’do mìnina ndi a’done bapatisi se beṛo ma bapatisine sina ono be ya?” ³⁹ Ànya zayitadrite ekye: “Mä̀nina ndi,” Yesu atate ànyari ekye: “Endaro mìmvuna kofo se beṛo märi umvune ono ndi ago abapatisina ami ndi liti se beṛo ma bapatisine sina yasi. ⁴⁰ Oko ’dise orine drígwo maro ya ago gaṛi maro ya ma ko ni onjina. Vo gi iyi orivoya vo ànya se Lu kedebe tana ro kwoi ro.” ⁴¹ Ondro taeri’bai se azaka ’butealo ana keriyi tana te oko, ànya a’doyite kyilaro Yakoba ndi Yoane be be. ⁴² Ta’dota Yesu zi ànya cini te voaloya ndare ago atate ekye: “Mìni ndi lidri se andrebe ’dimiri’bai luako’bai ro iyi orivoya mbara be ànya dri, ago dri’bai ni cu drikaca be. ⁴³ Caoko, ono ko tase a’done ami lako owo. Ondro ka’do alo aza amiro kolete a’done ’desiro, beṛo ndäri a’done ruindu’ba ro azi ri; ⁴⁴ ago ondro ka’do alo aza amiro kolete a’done käti, beṛo ndäri a’done iyeäṛi ’di cini ro. ⁴⁵ Tana ca Ŋgwa Lidri ro ikyi kote tana induru robe ndäri, oko nda ikyite ruindune azii ri ago adri ndaro ozone drî lidri amba ro utweza.” ⁴⁶ Ànya ikyiyite Yeriko ya, ago ondro Yesu ndi taeri’bai ndaro be ndi lowa amba be kate ugu oyi oko miako’ba drilämi’ba aza ävuruna Batimayo ŋgwa Timayo ro rite liti biṛi ya. ⁴⁷ Ondro nda keritate ekye Yesu Nazareta ro owo oko, nda eto otrete ekye: “Yesu! Ŋgwa Dawidi ro! Nya’do yauni be märi!” ⁴⁸ Lidri amba ’bidri ndaro te ago atate ndäri a’done titiro. Oko nda go tre ro ndra ekye: “Ŋgwa Dawidi ro, nya’do yauni be märi!” ⁴⁹ Yesu edrete ago atate ekye: “Mìzi nda.” Ndi ànya ziyi mano se miako’ba ana te, ànya atayite ekye: “Nya’do yai’dwesi, miŋga kuru, nda ka mi uzi.” ⁵⁰ Dori nda tri boŋgo ndaro te vuru, ŋgate ace, ago ikyite Yesu re. ⁵¹ Yesu eji nda te ekye: “Mile märi e’di oyene miri ya?” Miako’ba se ana zatadrite ekye: “Miemba’ba, male vo ondrene kpa to’di.” ⁵² Yesu atate ndäri ekye: “Nyoyi, taoma miro ede mite kado.” Dori mi ndaro ndrevote, ago nda sote Yesu vo.

¹ Ago ondro Yesu ndi taeri’bai ndaro be kayite ikyi loto Yerusalema lomvo oko ànya ikyiyite ’ba’desii Betefage ndi Betaniya be ya, kikyiyite ’Bereŋwa Ice Ido ro ro pa oko, Yesu zo taeri’bai ritu ndaro te mileya ² ago atate ànyari ekye: “Nyòyi ’baŋwa mile amiro ya anya ya. Ago ondro dori misate lau oko, nyùsuna doŋgyi to’diŋwa aza ayite vuru se ’diaza lämu ko dri sina alona, mitri ago nyèzi noŋwa. ³ Ago ’diaza keji ami te ekye nyà oyena inye etaya oko, nyàta ndäri mìkye Miemba’ba le anya ni ago ologona ’da kovole ndriro.” ⁴ Ndi ànya oyiyite usuyi doŋgyi to’diŋwa te tesi litiŋwa dri, ayite zo kala. Ago ànya kate otrina oko, ⁵ ’dise kedrebe loto ana eji ànya te ekye: “Nyà ’do e’di oye ya, nyà doŋgyi to’diŋwa ’do otrina ya?” ⁶ Ànya zayitadrite oso se Yesu katabe ànyari ronye, ago mano ana ’ba ànya te oyine. ⁷ Ànya eziyi doŋgyi to’diŋwa te Yesu ri, ’beyi boŋgo ànyaro te driigye ago Yesu tute driigye. ⁸ Lidri amba ’beyi boŋgo ànyaro te liti drisi, ago azakana ŋgoyi gwoṛi ice rote ni ämvu yasi ago ’beyite liti drisi. ⁹ Ago lidri se mileya ndi ànya se kesobe kovole ànya vo be etoyi otrete ekye: “Nyäräṛu Lu! Lu käṛu nda se kabe ikyi ävuru Opi roya ono! ¹⁰ Lu käṛu miri ’bädri’ba ro ’Bädri’ba Dawidi, täpi amaro ro se kabe ikyi ono! Räṛu ka’do Lu ri.” ¹¹ Yesu cite Yerusalema ya, oyite Yekalu ya, ago ndrevote gbikyi ŋga cini drisi, oko tana te tandrolero, nda fo oyite Betaniya ya taeri’bai ’butealo foritu ndaro be. ¹² Kyenonosi, ondro ànya kayite ego kovole ni Betaniya yasi oko, Yesu a’dote täbiri ro. ¹³ Nda ndre ce kyi’du ro aza te lozo si kyibi be, ago nda oyite ondrene kode nda usuna doŋgo aza ’da driigye. Oko ondro nda kukyite lototi lomvoigye oko, nda usute toto kyibi ayani, tana ko tu owa ro kyi’du ro owo. ¹⁴ Yesu atate ce kyi’du ro ri ekye: “’Diaza ri doŋgo onyane ni midrisi te i’do alona!” Ago taeri’bai ndaro eriyi ta ndaro te. ¹⁵ Ondro ànya kesayite Yerusalema ya oko, Yesu oyi cite Yekalu ya ago eto ànya se kayibe ŋgaogye ndi ŋgalogye be kai onjana te tesi. Nda tako tara’biza parata utwe’bai rote ndi kitaparaŋwà ànya se kayibe amoamo logye iyi robe te vuru, ¹⁶ ago nda lekote ’diaza ri ŋga aza uŋgyine goko Yekalu ro yasi. ¹⁷ ’Dooko nda emba lidri te ekye: “Egyibe Taegyi ya Lu atate ekye: ‘Äzina Yekalu maro ’da zo mätu ro lidri tu’dei cini ro ri.’ Oko nyòtozate kugyi ŋgatopa’bai ro!” ¹⁸ Kohanii ’desi ndi miemba’bai Ota robe etoyi liti aza uṛina te Yesu ufuza. Tana ànya turiro ni ndäri, tana lidri cini laroyi tawi ta ŋgaembaro ndaro ta. ¹⁹ Ondro te tandrolero oko, Yesu ndi taeri’bai ndaro be e’beyi ’bakici te. ²⁰ Kyenoŋboci kyenonosi oko, ànya kayi ugu aba liti drisi oko, ànya ndreyi ce kyi’du rote. Anya wite ṛo cu paji be. ²¹ Petero yi tase ka’dobe ana tana te ago atate Yesu ri ekye: “Miemba’ba, mindre, kyi’du se mitribe ana wite!” ²² Yesu zatadri ànyaro te ekye: “Nyà’do taoma be Lu ya. ²³ Endaro mata ämiri ono nda se katana lutu ono ri yi eŋgyene ago andivo iro ovone gyi’desi ya ago teinye milo’beako ya ndaro ya, oko ma ndi tase nda kabe atana ono ya a’dona ndi inye, ayena ndi ndäri. ²⁴ Ta ono ta mata ämiri! Ondro nyàte mätu ago nyàte ŋga aza eji, mìmate mìkye yùsuna ndi, ŋgase nyèji ta be tana ro ono ozona ndi ämiri. ²⁵ Ago ondro nyèdrete nyàte ugu mätu oye, ondro nyà’dote ta be ’diaza lomvo nyè’be ’dina ’do tana ro, ’dooko Täpi amiro vo’buyakuru ro e’bena ami kpa takozi se mìyebe ’do tana ro.” ²⁷ Ànya go esayi kpate to’di Yerusalema ya. Ago ondro Yesu kate ugu aba Yekalu yasi oko, kohanii ’desi, miemba’bai Ota ro, ndi ’di’desii be ikyiyite ndare ²⁸ ago ejiyi nda te ekye: “Nya ŋga kwoi oyena drikaca eŋwani siya? A’di ozo drikaca ono ni miri ya?” ²⁹ Yesu zatadri ànyaro te ekye: “Mejina ami taeji alodi ono si, ago ondro ka’do nyòlogo tana te märi ’dooko mitina drikaca se mabe ŋga kwoi oyena sina ono tana ndi ämiri. ³⁰ Nyìti ta märi, inye’do drikaca Yoane ro bapatisi oyero ikyi ni eŋwaro; ikyi ni Lu resi kode ni lidri resi ya?” ³¹ Ànya etoyi kaladiṛite iyivoya ekye: “Màtana eŋwanye ya? Ondro ka’do màtate màkye: ‘Ni Lu resi’, nda atana ṛo ekye: ‘Ka’do inye mìma ta Yoane ro kote etaya?’ ³² Oko ondro màta gwo màkye: ‘Ni lidri resi.’ ” (Tana ànya turiro ni lidri ri, tana lidri cini nite anjioko Yoane orivoya nebi yi.) ³³ Ta’dota ànya zayitadri Yesu rote ekye: “Mäni ko.” Yesu atate ànyari ekye: “Ka’do inye, ca drikaca se mabe ŋga kwoi oyena sina ono, mänina kpa ko tana itine ämiri.”

¹ ’Dooko Yesu petate ànyari lapidriopi si ekye: “Tu alo aza si mano aza kyi’di kono te ämvu ya, ’be aga te gbikyi lomvoigyesi, ’di pi’di te vino ozwaza, ago be zowiṛa vookwaro te. ’Dooko ozo ämvu kono rote losioye’bai ri losi oyene kigye ago e’be ’ba te ago oyite vo aza ya. ² Ondro tu doŋgo topi ro kesate oko, nda zo ruindu’ba aza te losioye’bai re ŋga jalia ro se ndäri ana urune ni ànya resi. ³ Losioye’bai ruyi ruindu’ba ana te ’biyi nda te, ago zoyi nda te kovole teinye ŋga aza ako. ⁴ ’Dooko kuzupi zo ruindu’ba aza te; losioye’bai ’biyi nda te drî ya ago yeyi nda te koziro. ⁵ Ago kuzupi zo ruindu’ba aza kpate, ago ànya fuyi nda te, ago yeyi azakana amba kpate oso inye, ’biyi azaka te ago fuyi azaka te. ⁶ Se alodi ke’bebe ozone te toto ŋgwa modo mano ana ro ayani, ’dooko äduro oko, nda zo ŋgwa ndaro te losioye’bai re, nda atate ekye: ‘Mama ndi endaro ànya oronayi ŋgwa maro ndi.’ ⁷ Oko losioye’bai kai atayite iyivoya ekye: ‘Ono ni ŋgwa kuzupi ämvu kono ro ro owo, nyìkyi ri, mì’de mä̀fu nda, tana drimbi ndaro a’dona te amaro!’ ⁸ Ta’dota ànya ruyi ŋgwa ana te ago fuyi nda te ago voyi avo ndaro te cowa ni ämvu kono ro yasi.” ⁹ Yesu ejitate ekye: “Ka’do inye, ’dooko kuzupi ämvu kono ro ro oyena e’di ya? Nda ikyina ’da ago tufuna lidri kai ’da ago ozona ämvu kono ro ’da losioye’bai azaka ri. ¹⁰ Mìzi taegyi ono ṛo ko ya? Se ekye: ‘Kuni zo obe’bai kogayibezo ekye koziro ana go a’dote kadopara ndrani vona cini drisi. ¹¹ Ono ni taoye Opi ro; ondrena liŋgyi tawi!’ ” ¹² Dri’bai Yudai ro ojoyite Yesu urune, tana ànya niyite anjioko Yesu pi lapidri ono te ànya lomvo, caoko ànya a’doyite turi ro ni lowa ri, ndi ànya e’beyi nda te ago oyiyite. ¹³ Rukä Parusii ro ndi gboko Eroda ro azaka be azote Yesu re nda odone taeji si. ¹⁴ Ànya ikyiyite ndare ago atayite ekye: “Miemba’ba, mä̀ni ndi anjioko nya ni taŋgye ata teinye milo’be ako tase lidri kabe usuna ta. Tana nya ko ’desi lidri ro tana usuna ayani, oko nya ni ole Lu ro taŋgyena emba lidri ri. Nyiti ta ämäri, inye’do ota amaro letadri gindi parata driutwero ozone ’Bädri’ba Roma’ba ro ri kode ko ya? Inye’do mòzona ndi kode ko ya?” ¹⁵ Oko Yesu ndre ŋgaodo ànyaro te ago zatadrite ekye: “Tana e’di nyà ma ojo niya? Nyèzi mo’di kaci aza te, mandre robe.” ¹⁶ Ànya eziyi alodina aza te ndare, ago nda ejitate ekye: “Beti ndi ävuru kwoi be a’di roya?” Ànya zayitadrite ekye: “’Bädri’ba ro.” ¹⁷ Ta’dota Yesu atate ekye: “Ka’do inye, nyòzo ŋgase ’Bädri’ba ro gi ’Bädri’ba ri, ago nyòzo ŋgase Lu ro gi Lu ri.” Ago ànya laroyi tawi ta Yesu ro erivoya. ¹⁸ ’Dooko rukä Sadukei, se kayibe ata ekye lidri ri efone ni avo yasi i’do kai ro, ikyiyite Yesu re ago atayite ekye: ¹⁹ “Miemba’ba, Musa egyi ota ono te ämäri ekye: ‘Ondro ka’do mano aza kodrate ago ke’be toko te teinye ŋgàga ako, anjioko beṛo ädrupi mano ’do ro ri ocine ävuzi ri tana ànya kutiyi ŋgàga robe se ka’do robe ŋgwai ro mano se kodrabe ana ri.’ ²⁰ Tu alo aza si ädrupii njidrieri azaka orivoya, se kayoŋwa gye lagye te ago drate teinye ŋgàga ako. ²¹ ’Dooko ṛirina cigwo toko ana ri, ago nda dra kpate teinye ŋgàga ako. Ta ono a’do kpate inye ädrupi nina na ri, ²² ago a’do kpate inye ädrupii se njidrieri kociyibe toko ana ri kai ri ago todrayite teinye ŋgàga ako. Äduro oko, toko ana drate. ²³ Ka’do inye, tu eforo rosi lidriidriro anya a’dona toko ro a’di riya? Tana vo ànya se cini njidrieri ana ro a’dote àgo ro anya ri.” ²⁴ Yesu zatadri ànyaro te ekye: “Mìjete! Inye’do mìni takacina gindi ya? Tana mìni Taegyi ko ca mbara Lu ro. ²⁵ Tana ondro avo kefote lidriidriro, ànya a’donayi oso malaikai vo’buyakuru ya ronye ago uninayi ko lagye ogyene. ²⁶ Oko, ta efo avoro mìzi tana ro ko ni Buku Musa ro yasi ta uje ce kumvuŋwa ro ana rota ya? Tase egyibe se Lu katabe Musa ri ekye: ‘Ma ni Lu Abarayama ro, Lu Yisika ro, ago Lu Yakoba ro.’ ²⁷ Nda ni Lu ’dise lidriidriro ro, ko avo ro. Mìjete kpeye.” ²⁸ Miemba’ba Ota ro aza orivoya lau se eri tase abe atane ana te. Nda ndrete Yesu zatadri Sadukei rote kado, ago nda ikyite ndare taeji ono be ekye: “Ota se eŋwani ni para ndra vona cini risi ya?” ²⁹ Yesu logotate ekye: “Se alodi parandra ni no ekye: ‘Nyeri, Yisaraele! Opi Lu amaro toto ni Opi yi. ³⁰ Nyulu Opi Lu miro ya cini miro si, lindri cini miro si, tauni cini miro si, ago mbara cini miro si.’ ³¹ Ṛiri ota se foparandra ro ni no ekye: ‘Nyulu oriazi miro oso nyulu andivo miro be ronye.’ Ota aza para ndrani se ritu kwoi ri i’do.” ³² Miemba’ba Ota ro ana atate Yesu ri ekye: “Miemba’ba! ’Do orivoya taŋgye yi, ndi oso nyatabe ronye, anjioko Opi toto ni Lu yi ago Lu aza tona i’do oko toto nda ayani. ³³ Ago beṛo lidri ri Lu lune ya cini ndaro si ago tauni cini ndaro si ago mbara cini ndaro si; ago beṛo ndäri oriazi ndaro lune oso nda kulu andivo ndaro be ronye. Ota ritu kwoi orone orivoya ta ’desi para yi ndrani koronyai ’ba ro ozane vo tori oloro dri ndi ŋgapäṛi azaka ozona be Lu ri drisi.” ³⁴ Yesu ndrete nda zatadrite tavouni si, ’dooko nda ititate ndäri ekye: “Mi ko lozo ni Miri ’Bädri’ba Lu ro ro resi.” Ono vosi ’diaza le kote Yesu ejine taeji aza si tona. ³⁵ Ondro Yesu kate ugu miemba Yekalu ya oko, nda ejitate ekye: “Miemba’bai Ota ro kayi ata ekye Mesiya a’dona ’da ni zelevoi Dawidi ro yasi eŋwanye ya? ³⁶ Tana Tori Alokado ’ba tavousu te Dawidi ya atane ekye: ‘Opi atate Opi maro ri ekye; Miri noŋwa drígwo maro ya madale ma’bana kyila’baazii miro lutu pa miro zele.’ ³⁷ Dawidi andivo zi Mesiya te ‘Opi’; ka’do inye Mesiya a’dona zelevo Dawidi ro eŋwanye ya?” Lowa du eriyi ta Yesu rote yai’dwesi. ³⁸ Ondro nda kate ànya emba oko, nda atate ekye: “Mì’ba mi amiro komba kado ni miemba’bai Ota ro ri, se leyi alo ugu abane gbikyi boŋgo runduṛuro ànyaro be, ago leyi lidri ri mede oyene iyi ri taoro si vo ŋga logyero yasi, ³⁹ se kayi vo oriro se kado zoitaeriro yasi onji ndi vo oriro kadopara se karama yasi be. ⁴⁰ Ànya kayi ni ŋga kandrakado ävuzii ro ro uruna ago kayi ’bai ànyaro topana ni, ago kayi iyi ka’da mätu gyoroŋgolo ro oye si. Taezaro ànyaro a’dona ni kozipara ndra.” ⁴¹ Ondro Yesu korite lototi vo ŋgapäṛi ovoro Yekalu ya lomvo oko, nda ndre lidri te parata ànyaro ovovoya. Lidri amba se ŋgadriamba be voyi parata amba te, ⁴² ’dooko ävuzi ati’ba ro aza ikyite ago vo parata kaciro ritu giṛiŋwa rote, lagyena oso mileni ritu ronye. ⁴³ Nda zi taeri’bai ndaro te voaloya ago atate ànyari ekye: “Mata ämiri ono anjioko ävuzi ati’ba ro ono vo ŋga ni amba sänduku ŋgapäṛi ovoro ya ndrani azii cini ri. ⁴⁴ Tana azii kayibe ovona etayi ŋgadriamba ànyaro azakana kpa, oko anya ca orivoya ati’ba ro oko, ozo se anya kaoye be ŋgaonyane sina ana vona ṛo cini.”

¹ Ondro Yesu kate ugu ofo ni Yekalu yasi oko, alo aza taeri’bai ndaro ro atate ekye: “Miemba’ba, Mindre! Kuni liŋgyiekye ndi zo ono be ono te!” ² Yesu zatadrite ekye: “Mindre zo ’desi ono te ya? Änina ko kuni alo aza se noŋwa ono e’bene vona ya; vona cini eperena ’da vuru.” ³ Ondro Yesu korite ’Bereŋwa Ice Ido ro ro dri, ogone Yekalu resi oko, Petero, Yakoba, Yoane ndi Andarea be ikyiyi te ndare ndrwi. ⁴ Ago ejiyi nda te ekye: “Nyiti ta ämäri tase cini ono kaoye a’dona ituya? Ago ta e’di a’dona ni ka’daza anjioko tu esate ti ŋgase cini kwoi ri a’doza ya?” ⁵ Yesu atate ànyari ekye: “Mìkwa ŋga, ago mì’ba ’diaza kodo ami ko. ⁶ Lidri amba ikyina ’da ävuru maro ya, ago ànya alo alo atanayi ta ’da ekye: ‘Yi ni Mesiya owo!’ Ago ànya odonayi lidri amba ’da. ⁷ Ago nyòlo’be mi ko ondro nyèri kporo kyila ro kate ikyi ti ago nyèri lazo kyila ro ca lozo si owo. Beṛo ŋga nonye kwoi ri a’done, oko ko ekye tu äduro esate. ⁸ ’Bädri oyena kyila ’da ’bädri azi be, ago tu’dei oyena kyila ’da tu’dei azi be. Ägbigbi a’dona ’da vo cini yasi, ago mä’bu o’dena ’da. Ŋga kwoi orivoya oso luwu käti ŋgwa utiro ronye. ⁹ “Beṛo andivo amiro ri vookwane. Tana äruna ami ’da ago uguna ’da vure ya. A’bina ami ’da zotaeriro yasi; nyèdrena ’da ’dimiri’bai ndi ’bädri’bai be kandra ta maro ta lazokado opene ànyari. ¹⁰ Oko teinye dri tu äduro ri esaako, beṛo lazo opene tu’dei cini ri. ¹¹ Ago ondro äru ami te ago ugute vure ya oko, nyòlo’be mi ko käti tase nyà oyebe atane ta, ondro tuna kesate, ’dooko nyàte tase ozobe ämiri atane ’do ayani. Tana ata se nyà oyebe atane ’do ko amiro; oko ànya ikyina ’da ni Tori Alokado resi. ¹² Ädrupi ozona modo ädrupi ndaro ro gini ufune, ago täpii oyenayi kpa inye ŋgwai ànyaro ri; ago ŋgwai ozanayi uti’bai ànyaro ’da kyila’baazii ro ago o’banayi ànya ni ufune. ¹³ Ya ’di cini ro osona ’da ami lomvo ta maro ta. Oko nda se kabe yaiŋgyi ndi le äduna ya apana ndi. ¹⁴ “Mìndrena ŋga koziro parandra ’da edrevoya vose ko ndäri a’done kigye.” (Tase ta ono uzi’bana ri unine: miri ta ono takacina unine kadoro!) se ekye: “’Dooko ànya se orivoya Yuda ya beṛo umune ’bereŋwà dri. ¹⁵ Mano se orivoya kuru zo ndaro dri beṛo ko ndäri saa ndaro enjine efo si vuru ocine zo ya ŋga aza urune ndäri. ¹⁶ Mano se orivoya ämvu ya beṛo ko egone kovole zo ya boŋgo ndaro ta. ¹⁷ A’dona ’da rritiro tu ana si ’ditoko se kovoro ro ndi endrei se ŋgwà na ka drigba ba ondro ri! ¹⁸ Nyä̀mätu Lu ukyi ŋgase kwoi a’do ’da meṛi si! ¹⁹ Tana rriti tu ana ro a’dona ’da koziro para ndrani se ’bädri kondrebe ṛoni eto se Lu ko’ba ’bädri be si madale tu yauono si drisi. Ca ŋga aza ri ogo a’done kpa to’di oso ’do ronye i’do alona. ²⁰ Oko Opi go logo oti tu kai rote; aba ondro ka’do nda koye ko inye, ’diaza ri orine lidriidriro i’do. Oko tana ta lidri onjionji ndaro rota, caoko, nda go logo oti tuse kai rote. ²¹ “’Dooko, ondro ka’do ’diaza kata gwo ämiri ekye: ‘Mindre, Mesiya begi ono!’ Kode ‘mindre, nda begi ana!’ Mima ta ndaro ko. ²² Tana Mesiyai mieywe’bai ro ndi nebii mieywe’bai robe efona ’da. Ànya oyenayi rubä ndi talaro robe ’da lidri onjionji Lu ro odoza, ondro ka’do ndi rritiako owo. ²³ Nyà’do vookwa be! Miti ta cini te ämiri teinye tuna ri esaako. ²⁴ “Tu rriti ana ro vosi kitu o’bona ’da, ago imba onjena ko tona, ²⁵ ’bi’bii e’dena yi ’da ni vo’buyakuru yasi, ago mbara vokuru ro kandaruna ’da. ²⁶ ’Dooko Ŋgwa Lidri ro efona ’da, ikyivoya ’dikolo ya mbara amba be ndi ’desi be. ²⁷ Nda ozona malaikai ’da cuku su ’bädri ro yasi lidri onjionji Lu ro kalana kotone ni telesi ädu ’bädri ro yasi le telesi na ya. ²⁸ “Mì’ba ce kyi’du ro kemba ami. Ondro gwoṛii ànyaro kate oro ago kate kyibi lofo oko, mìni ndi anjioko duru te ti. ²⁹ Kpa oso inye, ondro mìndre ŋga kwoi kate ugu a’do oko, mìnina ndi anjioko tu te ti, te nja etone. ³⁰ Mìyi ta ono tana anjioko, ŋgase cini kwoi a’dona ’da käti teinye dri lidri se ka ugu ori be yauono ri odraako cini. ³¹ Vo’buyakuru ndi ’bädri be lävuna ’da, oko ata maro ri lävune i’do alona. ³² “Caoko, ’diaza ni tu gi ana kode saa na ikyi ro ko’de; ca malaikai vo’buyakuru ro, ca Ŋgwa, Täpi ni toto ni. ³³ Nyà’do nja, mìkwa ŋga, tana mìni ko tu ana kaoye a’done itu. ³⁴ A’dona ’da oso mano aza kabe oyi ni ’bäru, oyi gwo vo aza ya ronye ago e’be ruindu’bai ndaro te vo losi ro ondrene, ondro nda kozo losi te ba ànya alo alo ri oko, nda atate käläsi gaga’ba ri vookwane. ³⁵ Ekye, nya’do vookwa be, tana mìni ko ’desi zo ro kaoye esane itu; esana ’da tandrole si kode o’bwaro kode ’buzevoosiako kode kitu ituvoya. ³⁶ Ondro ka’do nda kesa ca ätruku’du oko, nda usuna ami ko u’duvoya. ³⁷ Tase mabe atana ämiri ono, ma ata ṛo vona cini ri: Vookwane.”

¹ U’du e’bete ritu Karama Lävu Odra ro ro ndi Ambata Loŋgaako robe oyeza. Kohanii ’desi ndi miemba’bai Ota robe uguyi liti uṛite Yesu urune ndrwiro ufune. ² Ànya atayite ekye: “Beṛo ko ämäri oyene tu karama rosi, ukyi lidri amo ’da.” ³ Ago ondro Yesu dri orivoya Betaniya ya zo Simona se sedri adravo koziro kyini robe roya ugu ŋgaonya onyavoya oko, toko aza ikyite gäbä alabasata robe twi ido ŋgutruro se lagyeamba be ana be, ala’dite nareda si. Anya pi gäbä ana te ago da ido ŋgutruro ana te kpeye Yesu dri. ⁴ Ago rukä lidri ro se lau kai a’doyite kyilaro ago atayite iyivoya ekye: “Tana e’di toko ono enji ido ŋgutruro ono gwo awi niya? ⁵ Aba änina ndi ogyene ndrani mo’di keciro kama nätu (300) drisi ago parata na ozone ati’bai ri!” Ago ànya koziyi anya te kyila si. ⁶ Oko Yesu atate ekye: “Nyè’be anya, nyà anya okwo etaya? Anya ye ta liŋgyiekye te märi. ⁷ Ondoalo ami ṛo orivoya lidri ati’bai be ami lako, ago tuse mìlebe si, mìnina ndi ànya opane. Oko nyà’dona ko ondoalo mabe. ⁸ Anya ye tase anya kunibe oyene ono te; anya da ido ŋgutruro te malomvo ma oseza. ⁹ Ka’do inye, endaro mata ämiri ono, vose abe lazokado ope kigye ’bädri cini yasi, tase anya koyebe ono itina tana ’da ta anyaro oyiza.” ¹⁰ ’Dooko Yuda Isekariota, alo aza taeri’bai ’butealo foritu ro, oyite kohanii ’desi re ta drí Yesu ro ozo rota ànyari. ¹¹ Ànya a’doyite yai’dwesi tase nda kabe atana ana erivoya ago ’bayitate parata ozone ndäri. Ago Yuda eto liti se Yesu ozoza ànyari ana uṛina te. ¹² U’du käti Karama Ambata Loŋgaako rosi, tuse äfu timelegogoi ŋgaonya Karama Lävu Odra ro robe sina si oko, taeri’bai Yesu ro ejiyi nda te ekye: “Mile ämäri oyine eŋwaro ŋgaonya Karama Lävu Odra ro ro edene nja miri ya?” ¹³ ’Dooko Yesu zo ritu ànyaro te ta ŋgaembaro kwoi be ekye: “Nyòyi mìci ’bakici ya, ago mano aza ŋgyi luku’du gyi ro o’bena dri ’da ami yibe. Miso nda vo, ¹⁴ zo se nda kabe oci kigye ya ago nyàta kuzupi zo ana ro ri mìkye: ‘Miemba’ba ekye, zo ya se ma ndi taeri’bai maro be ri ŋgaonya Karama Lävu Odra ro ro onyane kigye ’do eŋwaro ya?’ ¹⁵ ’Dooko nda ka’dana zo ya ’desi kurusi ’da ämiri, se nyèdena ŋga cini ’da nja kigye ämäri.” ¹⁶ Taeri’bai kai ŋgayite ago oyiyite ’bakici ya, ago usuyi ŋga cini gi oso se Yesu kiti tana be ànyari ronye, ago ànya edeyi ŋgaonya Karama Lävu Odra ro rote. ¹⁷ Ondro te tandrolero oko, Yesu esate taeri’bai ndaro ’butealo foritu be. ¹⁸ Ondro ànya koriyite tara’biza lomvo ŋgaonya oko, Yesu atate ekye: “Endaro mata ämiri ono alo aza amiro ozona drí maro ’da; se kabe ugu ŋgaonya mabe ono.” ¹⁹ Taeri’bai a’doyite märäyiro ago etoyi nda ejite azivoazivo ekye: “Inye’do ni ma owo ya?” ²⁰ Yesu zatadrite ekye: “Kaoye a’done alo aza ami se ’butealo foritu ono ro, se kabe ambata ndaro osona deŋbele ya mabe ono owo. ²¹ Ŋgwa Lidri ro odrana ’da oso Taegyi katabe ta ndaro ta ronye; oko orivoya rritiro mano se kabe drí Ŋgwa Lidri ro ro ozona ri! Aba ni kadopara mano na ’do kori gwo ṛo utiako.” ²² Ondro ànya kayite ugu ŋgaonya oko, Yesu ru ambata te, ago ye mätu aro’boya rote ago wagwo, ago ozote taeri’bai ndaro ri, ago nda atate ekye: “Miru, ono ni lomvo maro owo.” ²³ ’Dooko nda ru kofo te, ozo aro’boya te Lu ri, ago ozote ànyari; ago ànya cini mvuyite ni kigyesi. ²⁴ Yesu atate ekye: “Ono ni kari maro tao’baro se korobe ’di amba ta owo. ²⁵ Mata ämiri ono, mago mävuna vino ono ko alona madale mago mävuna le vino to’di ayani Miri ’Bädri’ba Lu ro roya.” ²⁶ Ondro ànya koŋgoyi loŋgo te oko oyiyite ’Bereŋwa Ice Ido ro driro. ²⁷ Ago Yesu atate ànyari ekye: “Vo ami cini ro mìmuna ’da ago nyè’bena ma ’da, tana Taegyi atate ekye: ‘Lu ufuna lekye’ba ’da, ago timele cini pereruna ’da.’ ²⁸ Oko ondro eŋga mate lidriidriro oko, moyina ’da käti ami mile Galilaya ya.” ²⁹ Petero zatadrite ekye: “Mè’bena mi ko alona, ondro ka’do azii ke’be mi ca owo!” ³⁰ Yesu atate Petero ri ekye: “Endaro mata miri ono dri teinye gogo ri opeako perena ritu ŋgäkyi gi ono si, migana kala maro ’da perena nätu.” ³¹ Petero zatadrite mbarasi ekye: “Märi kala miro ogane i’do alona, ka’do gi ca märi odrane mibe owo!” Ago taeri’bai cini azii atayi kpate oso inye. ³² Ànya ikyiyite vose äzibe Getesemane ana ya, ago Yesu atate taeri’bai ndaro ri ekye: “Miri noŋwa ma dri mätu.” ³³ Nda ru Petero, Yakoba ndi Yoane be te nda be. Tana tusu ndi rriti be esate nda dri, ³⁴ ago nda atate ànyari ekye: “Tusu te ndra ya maro ya ka oyete ma ufune. Miri noŋwa ago mìkwa ŋga.” ³⁵ Ndi nda oyite fere ga mileya nda ’dete vuru gyinidri, ago mätute ekye ondro ka’do gi rritiako, ko ndäri oyine tu rueza ro ono yasi. ³⁶ Nda mätute ekye: “Täpi, Täpi maro! Ŋga cini orivoya rritiako miri. Mina kofo ruezaro ono pere ni mare si. Caoko ko tase malebe ayani, oko tase milebe ayani.” ³⁷ ’Dooko nda egote ago usu taeri’bai se nätu kai u’dute. Nda atate Petero ri ekye: “Simona, nyu’dute ya? Mini ko orine miuŋbo ca saa alo ya?” ³⁸ Ago nda atate ànyari ekye: “Mìkwa ŋga, ago nyä̀mätu ukyi mì’de ’da taojoro ya. Tori le gindi oko lomvo orivoya mbaraako.” ³⁹ Nda go oyi kpate to’di ago mätute, ata kpa ta alo ana ayani. ⁴⁰ ’Dooko nda egote kpa to’di ago usu taeri’bai u’duyite ŋbi, tana ànya niyi kote orine miuŋbo. Ago ànya niyi tase atane ndäri kote. ⁴¹ Ondro nda kikyite pere nina si oko, nda atate ànyari ekye: “Inye’do nyà drigba ugu u’du ndi loli be ya? Ojote! Mindre! Saa esate Ŋgwa Lidri ro ozoza drí lidri takozi’bai roya. ⁴² Mìŋga kuru, mì’de mòyi. Mìndre, mano se kabe drí maro ozona begi ono.” ⁴³ Ago ondro Yesu kadri ugu ata oko, Yuda se ni alo aza taeri’bai ’butealo foritu ro esate. Lowa du orivoya nda be bando be ago dofo be kohanii ’desi, miemba’bai Ota ro, ndi ’di’desii be ezoyi ànya ni. ⁴⁴ Driozo’ba ozo taka’daro te lowa ana ri ekye: “Mano se mabe njunjuna ’do ni se mìlebe owo. Mìru nda ago mìkwa vo ndaro ondro nyàte nda ugu owo.” ⁴⁵ Dori ondro Yuda kesate oko, nda oyite Yesu re ago atate ekye: “Miemba’ba!” Ago njunju nda te. ⁴⁶ ’Dooko ànya ruyi Yesu te ago baṛiyi nda te anda. ⁴⁷ Oko alo aza ànya se kedrebe lau kai ro eŋgye bando ndaro te ago ga bi ruindu’ba Kohani Fopara rote ätu. ⁴⁸ ’Dooko Yesu trete ṛeṛe ago atate ànyari ekye: “Nyìkyite bandoi be ago dofoi be ma urune osoago ma orivoya otapere’ba yi. ⁴⁹ Tu cini si ma ṛo orivoya ami yibe ugu ŋgaembavoya Yekalu ya, ago mìru ma kote. Oko beṛo Taegyi ri a’done ŋgye.” ⁵⁰ ’Dooko taeri’bai cini e’beyi nda te ago muyite. ⁵¹ Mano agoanji aza, vu toto boŋgo rendelero yi, sote Yesu vo. Ànya ojoyite nda urune, ⁵² oko nda mute bägyuluro, e’be boŋgo te vuru kovole. ⁵³ ’Dooko ugu Yesu te zo Kohani Fopara roya, se kohanii ’desi, ’di’desii ndi miemba’bai Ota robe kotoyi kalabe kigye ana ya. ⁵⁴ Petero sote kovole lozo si oyite cite goko zo Kohani Fopara ro roya. Nda rite vuru lau vookwa’bai be, ka asi owi. ⁵⁵ Kohanii ’desi ndi Taäyi’bai cini be oyiyite tazevoedre’bai azaka uṛine ta itine Yesu lomvo tana ko’ba äfu nda robe, caoko ànya usuyi ta aza kote. ⁵⁶ Tazevoedre’bai amba itiyitate kowero Yesu lomvo, caoko ta ànyaro letadri kote. ⁵⁷ ’Dooko lidri azaka ŋgayite kuru ago itiyi ta ono te kowero Yesu lomvo ekye: ⁵⁸ “Mèri nda ka ata ekye: ‘Meperena Yekalu ono ’da riya se lidri kobebe ni ono, ago u’du nätu ya oko mago mabena aza se lidri kobe koni ’da.’ ” ⁵⁹ Caoko tase ànya kitiyibe ana letadri kote. ⁶⁰ Kohani Fopara ŋgate kuru ànya cini kandra ago eji Yesu te ekye: “Inye’do tase itibe milomvo ono mi ta ako tadrina ozane ya?” ⁶¹ Oko Yesu a’dote titiro ago ata ta aza kote. Kohani Fopara go eji nda te kpa to’di ekye: “Inye’do mi Mesiya, Ŋgwa Lu se abe räṛuna ono ro owo ya?” ⁶² Yesu zatadrite ekye: “Ma ni owo! Ago mindrena Ŋgwa Lidri ro ’da orivo ya drígwo Lu Mbarapara roya ikyivoya ’dikolo vo’buyakuru rosi!” ⁶³ Kohani Fopara wa boŋgo runduṛuro ndaro te kyila si ago atate ekye: “Màle tazevoedre’bai aza kote tona! ⁶⁴ Nyèri la’dao’da ndaro te. Nyùsu amiro be ayena e’di ya?” Ànya cini ’didrite nda lomvo; ekye nda taenji be ago beṛo nda ufune. ⁶⁵ Rukä ànyaro etoyi to ovo te Yesu lomvo, ago ànya embeyi mi ndaro te ago ’biyi nda te, ànya atayite ekye: “Nyäŋgu, a’di ’bi mi niya?” Ago vookwa’bai ruyi nda te ago ’biyi nda te. ⁶⁶ Petero drigba orivoya vuru goko ya oko alo aza ruindu’bai ndiriŋwa ro Kohani Fopara ro ro ikyite lototi. ⁶⁷ Ondro anya kondre Petero te asi owivoya oko, anya ndrevote ŋgye nda dri ago atate ekye: “Nya’do kpate Yesu Nazareta robe.” ⁶⁸ Oko nda gakalate atate ekye: “Mäni ko, ta gi nyabe ugu atana ’do mäni ko.” Ago nda fote tesi ni goko yasi. ⁶⁹ Ruindu’ba ŋguti ro ana ndre nda te lau ago go dele ta te ’dise kedrebe loto kai ri ekye: “Nda orivoya alo aza ànyaro!” ⁷⁰ Oko Petero gakalate kpa to’dina. Fere voigyesi oko ’dise kedrebe kai kicuyi Petero kpate ekye: “Minina ko kalaogane mikye yi ko alo aza ànyaro, tana mi kpa orivoya ni Galilaya yasi.” ⁷¹ ’Dooko Petero äṛurute ago atate ekye: “Ma taŋgye ata! Ka’do inye Lu keza ma, ondro ka’do kote inye owo! Mäni mano gi nyàbe tana atana ono ko!” ⁷² ’Dooko dori gogo pe ope ṛiri te, ago Petero yi tase Yesu katabe ndäri ekye: “Teinye gogo ri opeako perena ritu, migana kala maro ’da perena nätu.” Ago nda eto liyite.

¹ Kyenoŋboci kyenonosi oko kohanii ’desi dro’beruyite ndriro ’di’desii be miemba’bai Ota robe, ndi Taäyi’bai cini be, ago rayi ta ànyaro te Yesu lomvo. Ànya embeyi Yesu te nyori si, uguyi nda te ago ozoyi nda te Pilato ri. ² Pilato eji nda te ekye: “Inye’do mini ’Bädri’ba Yudai ro owo ya?” Yesu zatadrite ekye: “Nyata teṛo ŋgye.” ³ Kohanii ’desi kicuyi nda te ta amba si, ⁴ ago Pilato eji nda te kpa to’dina ekye: “Mizatadri ko etaya? Nyeri ŋgakicu ànyaro!” ⁵ Caoko Yesu gazo ta atane, ago Pilato larote. ⁶ Karama cini Lävu Odra ro rosi Pilato ratate kamba’ba alo aza onjine oso lidri kabe taeji tana ro ronye. ⁷ Tu gi ana si mano aza äzite Baraba orivoya kamba ya alo aza lidri se kufu ’di be ogbo si ana ro. ⁸ Ondro lowa kotokalate ago ketoyi kala Pilato ro ejina te ta yauni ro se abe ṛo oyena ta oko, ⁹ nda eji ànya te ekye: “Inye’do mìle märi ’Bädri’ba Yudai ro onjine ämiri ya?” ¹⁰ Nda ni ṛote kado anjioko kohanii ’desi ozoyi Yesu te ndäri tana ànya orivoya yaoko be. ¹¹ Oko kohanii ’desi soyi ya lowa rote taejine Pilato ri Baraba onjine ayani dritairo ànyari. ¹² Pilato atate kpa to’dina lowa ri ekye: “’Dooko, mìle märi e’di oyene nda se mìzibe ’Bädri’ba Yudai ro ono riya?” ¹³ Ànya treyite ekye: “Nyoto nda!” ¹⁴ Pilato ejitate ekye: “Oko tase kozi nda koyebe e’di ya?” Ànya go trete ndra kporo amba si ekye: “Nyoto nda!” ¹⁵ Pilato le ta ndaro ri lowa usine, ndi nda onji Baraba te ànyari. ’Dooko nda ’bi Yesu te ago ozo nda te otone. ¹⁶ Kyila’bai uguyi Yesu te goko zo’desi miri ro wari’ba roya ago ziyi gboko cini te voaloya. ¹⁷ Ànya soyi boŋgo runduṛuro lärimiro te Yesu lomvo ago ’diyi tagyia kukyi rote ni gwoṛi ce kukyi be ro yasi, ago soyite nda dri. ¹⁸ ’Dooko ànya etoyi mede oga te ndäri ekye: “Miri madaro ’Bädri’ba Yudai ro!” ¹⁹ Ànya ’biyi nda te drî ya dofo si, voyi to te nda lomvo, soyi kaya ànyaro te, ago ändiyite vuru ndäri. ²⁰ Ondro ànya kondeyi nda ugu te oko, ànya triyi boŋgo lärimiro runduṛuro te ago goyi soyi boŋgo modo ndaro rote nda lomvo. ’Dooko ànya lofoyi nda te tesi nda otone. ²¹ Ànya ’beyidrite mano aza se äzibe Simona ni Kurene yasi täpi Alegezanda ndi Rufusa be ro ana be liti ya. Nda ka eziikyi ’bakici ya ni ’bädri yasi, ago kyila’bai gbiriyi nda te taka Yesu ro uŋgyine. ²² Ànya uguyi Yesu te vose äzibe Gologota ana ya, se takacina anjioko vo kowa drî ro. ²³ Ànya ojoyite vino se dro’bedro’bero koto’boŋwà tägyi ŋgutruro si ana ozone ndäri, oko Yesu leko umvune. ²⁴ ’Dooko ànya otoyi nda te ago lonyiyi boŋgo ndaro te ànyavoya, voyi vodo te uniza kode boŋgo eŋwani a’dona a’di ri. ²⁵ Ànya otoyi nda te kyenoŋbo saa nina kitu rosi. ²⁶ Taegyi se nda kicuro ana egyite ekye: “’Bädri’ba Yudai ro.” ²⁷ Ànya otoyi ŋgatopa’bai ritu kpate tro Yesu be, alona drígwo ndaro yasi ago azana gaṛi ndaro yasi. ²⁹ Lidri se kayibe lävu nasi kai ŋgyiṛiyi drî ànyaro te ago ’dayi Yesu te ekye: “Aha! Mise milebe Yekalu perene riya vuru ago ogo obene to’di u’du nätu si ono! ³⁰ Mipa andivo miro! Nyefo vuru ni taka drisi!” ³¹ Kohanii ’desi ndi miemba’bai Ota robe guyi Yesu kpate oso inye, ugu ata be azi ri ekye: “Nda pa azii te, oko nda ni kote andivo ndaro opane! ³² Mì’ba Mesiya, ’Bädri’ba Yisaraele ro kefo vuru yau ni taka drisi màndre robe, ’dooko màmana ta ndi nda ya!” Ago ’dise ritu otobe Yesu be ana ’dayi nda kpate. ³³ Ago te kitudiri oko ŋgätini tako ’bädri cini te, ago rite inye cu saa nätu. ³⁴ Saa njidriesu si oko Yesu trete otre amba si ekye: “Eloi, Eloi, lama sabaketani?” Se takacina ni ekye: “Lu maro, Lu maro, nye’be ma te etaya?” ³⁵ Rukä lidri ro se kedrebe loto lau ana keriyi otre ndaro te oko atayite ekye: “Nyèri, nda ka Eliya uzi!” ³⁶ Alo ànyaro mute lifo be, sote vino äträ ro ya sote drî dofo roya. ’Dooko eŋgate kuru kala Yesu roya ago atate ekye: “Dri, mì’de màndre te, kode Eliya ikyina ’da nda lofone vuru ni taka drisi!” ³⁷ Yesu trete otre amba si ndi drate. ³⁸ Boŋgo se ayibe Yekalu ya ana yana lesite ritu ni kurusi le vuru. ³⁹ Dri’ba kyila’bai ro se kedrebe mile taka roya ana kondre Yesu drate oko, nda atate ekye: “Endaro mano ono orivoya Ŋgwa Lu ro!” ⁴⁰ Rukä ’ditoko ro orivoya lau, vo ondrevoya ni lozo si; Maria Magadalene, Maria endre agoanji Yakoba ndi Yosepa be ro, ndi Salome be orivoya ànya lako. ⁴¹ Ànya soyite Yesu vo ’dooko nda orivoya Galilaya ya, ago payi nda te. ’Ditoko amba se kikyiyibe nda be ni Yerusalema yasi kpa orivoya lau. ⁴² Ago te tandrolero se ni tu ruede ro anjioko u’du käti ni Sabata ri, ⁴³ Yosepa ni Arimatayo yasi orivoya ’di orooro Taäyi’bai ro; se ka ikyi Miri ’Bädri’ba Lu ro ro kwotena, oyite turiako si Pilato re ago ejitate avo Yesu rota. ⁴⁴ Pilato larote amba ondro nda keritate ekye Yesu dra ṛote nja owo. Nda zi dri’ba kyila’bai rote ago eji nda te kode Yesu drate ṛo kyeno. ⁴⁵ Ondro nda keritate ni dri’ba resi oko, Pilato atate Yosepa ri ekye nda kuŋgyi avo teri. ⁴⁶ Yosepa gye boŋgo rendelero te, lofo avo te vuru, vute boŋgo si, ago ’bate ’bu se nda kogabe kuni ṛatararo ya ana ya. ’Dooko nda reṛi kuni ’desi te kala’budri roya. ⁴⁷ Maria Magadalene ndi Maria endre Yosepa robe ndreyi vose ase avo Yesu robe kigye ana te.

¹ Sabata vosi oko, Maria Magadalene, Maria endre Yakoba ro, ndi Salome be gyeyi ido ŋgutruro te oyiza ago undrune avo Yesu ro lomvo. ² Ṛo kyenoŋboci u’du njidrieri rosi kitu ituvoya oko, ànya oyiyite ’budri dri. ³ Oyivoya liti yasi ànya atayite iyivoya ekye: “A’di reṛina kuni gini ämäri ni ’budri kalasi ya?” ⁴ (Tana kuni ana orivoya kuni ’desi yi.) ’Dooko ànya eŋgayi mi te kuru ago ànya ndreyi oko ereṛi kuni te nja. ⁵ ’Dooko ànya ciyite ’budri ya ago ànya ndreyi agoanji aza te rite drígwo yasi, so boŋgo runduṛuro onjero yi; ndi ànya laroyite amba. ⁶ Nda atate ànyari ekye: “Nya’do ko larolaro ro, mänite nyà ugu Yesu Nazareta ro uṛina, se otobe ana. Nda i’do noŋwa; nda efote! Mìndre, ono ni vose ase nda be kigye owo. ⁷ Yauono nyòyi ago mìpe lazo ono taeri’bai ndaro ri, ndi Petero be: Nda kate ugu oyi Galilaya ya ami mile, mìndrena nda ’da lau, oso se nda kitibe ämiri ronye.” ⁸ Ta’dota ànya efoyite tesi ago muyite ni ’budri drisi, lä’bilä’biro ago turituriro. Ànya atayi kote ’diaza alo ri, tana ànya a’doyite turiro. [ ⁹ Efo Yesu ro ni avo yasi vosi kyenoŋboci u’du njidrieri rosi oko, nda ka’darute käti Maria Magadalene ri, se nda lofo demona njidrieri be ni yana yasi ’do. ¹⁰ Anya oyite ago iti tana te azii anyaro ri. Ànya te orivoya tusuro kayi ugu liyi; ¹¹ ago ondro ànya keriyi anya te atavoya ekye Yesu adrite ago anya ndre nda te oko, ànya mayi kote ta anyaro ya. ¹² Ono vosi, Yesu ka’darute a’do to ro yasi ritu ànyaro ri ondro ànya kayite ugu ogo ’bädri ya owo. ¹³ Ànya goyite ago itiyitate azii ri, caoko ànya mayi tana kote. ¹⁴ Ono vosi, Yesu ka’darute taeri’bai ’butealo foalo ri ’dooko ànya kayi ugu ŋgaonya. Nda luku ànya te, tana ànya a’dote taoma ako ago tana ànya a’do gwo taeriako taomane ta ànya se kondreyi nda be efo ndaro avo yasi vosi ana roya. ¹⁵ Nda atate ànyari ekye: “Nyòyi ’bädri cini yasi ago mìpe lazokado lidri cini ri. ¹⁶ Nda se komate ago abapatisite apana ndi, oko nda se koma ko ezana ndi. ¹⁷ Ozona mbara ’da taoma’bai ri talaro ro oyeza; ànya lofona demona ’da tesi ävuru maro si; ànya atanayi ’da kala to si; ¹⁸ ondro ka’do ànya kuruyi ini ca kode kumvuyi äṛi aza ca, oyena ànya ko koziro; ànya o’banayi drí ànyaro ’da lidri adravoro dri, ago edenayi ànya ’da kadoro.” ¹⁹ Ata Opi Yesu ro ànyari vosi oko, äru nda te kuru vo’buyakuru ya ago rite drígwo Lu roya. ²⁰ Taeri’bai oyiyite ago peyitate vo cini yasi ago Opi ye losi te tro ànya yibe ago aka’date anjioko taope ànyaro orivoya ŋgye talaro ro se ayebe kai si.] [ (v 9) ’Ditoko kai oyiyite Petero ndi bereazii ndaro be re ago itiyi tase cini itibe ànyari ana tana te aree ànyari. (v 10) Ono vosi, Yesu andivona zo taeri’bai ndaro teni ’buzelesi le aŋgoya, lazo alokado lidriidriro äduako ŋgaopa robe.]