MATAYO

MATAYO

¹ Ono ni ora zutui Yesu Kristo ro, zelevo Dawidi ro, se ni zelevo Abarayama ro owo. ² Ni Abarayama ya le ’Bädri’ba Dawidi ya zutui kwoi arate: Abarayama ni täpi Yisika ro, Yisika ni täpi Yakoba ro, Yakoba ni täpi Yuda ro ndi ädrupii ndaro yibe. ³ Yuda ni täpi Pereza ndi Zera be ro (endre ànyaro ni Tamara), Pereza ni täpi Ezerona ro, Ezerona ni täpi Rama ro, ⁴ Rama ni täpi Aminadaba ro, Aminadaba ni täpi Nasona ro, Nasona ni täpi Salemona ro, ⁵ Salemona ni täpi Boaza ro (endre ndaro ni Raba), Boaza ni täpi Obede ro (endre ndaro ni Ruta), Obede ni täpi Yisai ro, ⁶ Yisai ni täpi Dawidi ’bädri’ba ro. ⁷ Dawidi ni täpi Solomo ro (endre ndaro ni se kyeno ka’dobe toko Uria ro ’do), Solomo ni täpi Rehoboama ro, Rehoboama ni täpi Abija ro, Abija ni täpi Asa ro, ⁸ Asa ni täpi Yosapata ro, Yosapata ni täpi Yorama ro, Yorama ni täpi Uzia ro. ⁹ Uzia ni täpi Yotama ro, Yotama ni täpi Aza ro, Aza ni täpi Ezekia ro, ¹⁰ Ezekia ni täpi Manase ro, Manase ni täpi Amosa ro, Amosa ni täpi Josia ro, ¹¹ Josia ni täpi Jehoiakina ro ndi ädrupii ndaro yibe tu ’di ururo si midiro le Babelona ya. ¹² Ago tu ’di ururo midiro se le Babelona ya ana vosi, Jehoiakina ni täpi Salatiela ro, Salatiela ni täpi Zerubabela ro, ¹³ Zerubabela ni täpi Abiuda ro, Abiuda ni täpi Eliakima ro, Eliakima ni täpi Azora ro. ¹⁴ Azora ni täpi Zadoka ro, Zadoka ni täpi Akima ro, Akima ni täpi Eliuda ro, ¹⁵ Eliuda ni täpi Eleazara ro, Eleazara ni täpi Matana ro, Matana ni täpi Yakoba ro, ¹⁶ Yakoba ni täpi Yosepa ago Maria ro ro, se ni endre Yesu se äzibe Mesiya ono ro. ¹⁷ Käti’bai cini ni tu Abarayama rosi le tu Dawidi rosi orivoya ’butealo fosu, ago ni tu Dawidi rosi madale tu ’di ururo midiro le Babelona ya ono si käti’bai kpa ’butealo fosu, ago ni tu ’di ururo si midiro Babelona ya rosi madale tu Kristo rosi käti’bai kpa ’butealo fosu. ¹⁸ Uti Yesu Kristo ro a’dote oso nonye, a’be Maria endre ndaro te Yosepa ri; teinye dri ànyari ruogyeako oko anya usu yite ŋgwa be mbara Tori Alokado rosi. ¹⁹ Ago ago anyaro Yosepa orivoya mano kado yi nda leko Maria o’bane a’done driupiro ago lete anya e’bene ndrwi. ²⁰ Nda kadri tase ono vona usuna oko, malaika Opi ro ka’darute ndäri tori si, atate ekye: “Yosepa, zelevo Dawidi ro nyuturi ko ni Maria toko miro uruvoya ’bäru mire, tana Tori Alokado ’ba anya ni ŋgwa ono okwone. ²¹ Anya utina ŋgwaagoro ’da, ago mizina ävuru ndaro Yesu, tana nda opana lidri ndaro ni takozi ànyaro risi.” ²² Tase cini ono a’dote inye, tase Opi katabe nebi si ana ka’do robe ŋgye se ekye: ²³ “Ŋguti aza okwona ŋgwa ’da ago utina ŋgwaagoro ’da, ago äzina ävuru ndaro ’da Imanuele” (se takacina ni, “Lu tro ama be”). ²⁴ Ago ondro Yosepa kupi mi teni u’duvoya oko, yete oso malaika Opi ro kota nda be ana ronye, ago ru Maria te ’bäru toko ndaro ro, ²⁵ oko u’du kote sina madale anya ti ŋgwa ana lutu. Ago Yosepa zi ävuru ndaro te Yesu.

¹ Äti Yesu te ’ba’desi Beteleme se orivoya Yuda ya ana ya tu Eroda ’bädri’ba rosi. Uti ndaro vosi oko, tavouni’bai ikyiyite ni ’buzelesi le Yerusalema ya ² ejiyitate ekye: “Nda se ätibe a’done ’bädri’ba Yudai ro ono gaŋwaro ya? Tana màndre ’bi’bi ndaro efote ni ’buzelesi, ago mìkyi ono nda mätune.” ³ Ondro Eroda ’bädri’ba keri ta ono te oko yana a’dote loŋgaloŋga ro, ago Yerusalema’bai cini kpa inye. ⁴ Ago ondro nda kokotokala kohanii ’desi ndi miemba’bai Ota robe te oko, nda eji ànya te ekye: “Ätina Mesiya eŋwaro ya?” ⁵ Ànya zayitadrite ekye: “Beteleme Yuda roya; tana ono ni tase nebi kegyibe owo ekye: ⁶ ‘Mi Beteleme se wari Yuda roya ono, mi ko orivoya pari giṛiŋwa ni ’bakicii Yuda ro lakosi; tana ni miya dri’ba efona ’da se lepena lidri maro Yisaraele ’da.’ ” ⁷ ’Dooko Eroda zi tavouni’bai te ndrwi ago usu tuse ’bi’bi kaka’darube sina ana taŋgyena teni ànya resi. ⁸ Ndi nda zo ànya te Beteleme ya, atate ekye: “Nyòyi nyèji tavo ŋgagaŋwa se ono ro ŋgye; ondro nyùsu nda te oko, nyòlogo tana märi mäkyi robe kpa nda mätune.” ⁹ Tavouni’bai oyiyite oso ’bädri’ba kota ànya be ronye; ago ’bi’bi se ànya kondreyibe ṛoni ’buzele ana, ’dete käti ànyari, kyi edrete le vose ŋgagaŋwa ana ku’dube kigye ana dri. ¹⁰ Ondro tavouni’bai kondreyi ’bi’bi te oko, ànya yeyi riyä te ndra ago a’doyite riyäro amba. ¹¹ Ago ànya ciyite zo ya ago ndreyi ŋgagaŋwa se ana te ndi Maria endre ndaro be, ndi ànya soyi kaya te vuru ndi mätuyi nda te. ’Dooko ànya piyi gbolo ànyaro te, ozoyi ŋgapäṛi te ndäri, logo läguläguro, ŋga ŋgutruro yi, ndi Koto’boŋwà tägyi ŋgutruro be. ¹² Ago Lu emba tavouni’bai te tori si ko ànyari ogone Eroda resi, ago ànya goyite ’bädri ànyaro ya liti to yasi. ¹³ Oyi tavouni’bai ro vosi oko, malaika Opi ro ka’darute Yosepa ri tori si ekye: “Miŋga, miru ŋgagaŋwa ’do ndi endre ndaro be, mimu ànya be Ezipeto ya, ago miri lau madale mapena ta ni miri; tana Eroda kaoye tavo uṛine ŋgagaŋwa ’do ufune.” ¹⁴ Yosepa ŋgate ni u’duvoya, ru ŋgagaŋwa ana ndi endre ndaro be te ŋgäkyi si, oyite ànya be Ezipeto ya, ¹⁵ ago rite lau madale Eroda dra lutu. Tase ono a’dote nonye tana tase Opi katabe nebi si ana ka’do robe ŋgye, se ekye: “Mäzi ŋgwa maro teni Ezipeto yasi.” ¹⁶ Ondro Eroda kondrete tavouni’bai odoyi nda te oko, nda a’dote kyilaro, ago ozotate ŋgagaŋwai cini àgoro se Beteleme ya ndi ’batiazi se lomvoigyesi ’do robe tufune, eto ni se ndroa na ritu ya egogwo vuru ro, oso se nda kuni tana be ni tavouni’bai resi ana ronye. ¹⁷ Tase ono ’ba ata se nebi Yeremaya katabe ana sate ŋgye mina ya se ekye: ¹⁸ “Eri kporo teni Rama yasi, liyi ndi ruṛu be. Raele ka liyi ni ŋgàga anyaro ta; anya gatezo yi i’dwene, tana ànya todrate.” ¹⁹ Odra Eroda ro vosi oko, malaika Opi ro ka’darute Yosepa ri tori si Ezipeto ya, ²⁰ atate ekye: “Miŋga teri, miru ŋgagaŋwa ’do ndi endre ndaro be, ago migo wari Yisaraele roya, tana ànya se koleyibe ŋgagaŋwa ’do ufune iyi todrayite.” ²¹ Ta’dota nda ŋgate, ru ŋgagaŋwa se ana te ndi endre ndaro be, ago goyite wari Yisaraele roya. ²² Ondro Yosepa keri tate ekye Erekelausa go rini ’bädri’ba ro Yuda dri vo Eroda täpi ndaro roya oko, nda a’dote turiro ogovoya lau. Ago emba nda te tori si, ago nda pirute wari Galilaya roya ²³ nda oyite ago rite ’ba’desi se äzibe Nazareta ana ya. Tana tase ata be nebi si ana ka’do robe ŋgye, se ekye: “Äzina nda ’da Nazareta’ba.”

¹ Tu kai si Yoane Bapatisi’ba ikyite vocowa Yuda roya ago eto taope te ekye: ² “Nyètadri, tana Miri ’Bädri’ba vo’buyakuru ro te orivoya lototi!” ³ Yoane ni nda se nebi Yesaya kope tana be owo se ekye: “’Diaza ka ugu driayo vocowa ya ekye: ‘Nyède liti nja Opi ri; nyède liti ŋgye ndäri abaza!’ ” ⁴ Boŋgo Yoane ro osoro a’di ni ’bi gamele ro yasi, ago nda embe kyini kyelekpero te nda kundu, ago ŋgaonya ndaro ni tombi ndi epe kogo robe. ⁵ Lidri ikyite ndare ni Yerusalema yasi, ni wari cini Yuda ro yasi, ago ni wari se cini Golo Yaradene kalasi ana yasi. ⁶ Ànya eṛoyi takozi ànyaro te, ago nda bapatisi ànya te Golo Yaradene ya. ⁷ Ondro Yoane kondre amba Parusii ro ndi Sadukei robe te ikyivoya ndare bapatisine oko nda atate ànyari ekye: “Ami inii ono, a’di emba mi amiro ni imune ni taezaro se kabe ikyi ono riya? ⁸ Dia mìye ŋgase ka’dana ndi anjioko nyètadrite ni takozi amiro yasi, ⁹ ago nyùsu ta ko ya si mìkye Abarayama ni zutu amiro, mata ämiri ono, Lu ṛo mbara be zelevoi ozone Abarayama ri ni kuniŋwà kwoi yasi. ¹⁰ Koloŋwa te orivoya nja paji ice ro ogaza; ice se cini kowa doŋgo kado ko ’do agana ’da vuru ago avona ’da asi ya. ¹¹ Ma ami bapatisi gyi si tana kaka’da drieta amiro robe, oko nda se kabe ikyi mavo orivoya ’desipara ndrani mädrisi, takado maro ojo ko ca mvoka ndaro uŋgyine. Nda bapatisina ami ’da Tori Alokado si ago asi si. ¹² Nda orivoya ku’bi ndaro ŋga lu’biro be drí ndaro ya inya cini lu’biza. Nda otona kala inya ndaro ro ’da kyiro ndaro ya, oko nda ozana kurumu na ’da asi se zwe ko alona ana si.” ¹³ Tu ana si Yesu esate ni Galilaya yasi ago ikyite Yoane re Golo Yaradene kala Yoane kabapatisi nda robe. ¹⁴ Oko Yoane ojote nda lagane, Yoane atate ekye: “Aba ṛoni miri ma bapatisine ayani, oko migo nyikyi gwo ni mare etaya?” ¹⁵ Yesu zatadri ndaro te ekye: “Mi’ba ka’do inye, tana oyena si nonye anjioko mà tase cini Lu kolebe oyena.” ’Dooko Yoane letadri ndaro te. ¹⁶ Dori ondro abapatisi Yesu te oko, nda efote ni gyi yasi. ’Dooko äpi vo’buyakuru te ndäri, ago nda ndre Tori Lu rote ikyivoya vuru oso tu’bu ronye ago ka eziikyi orine nda dri. ¹⁷ ’Dooko atate ni vo’buyakuru yasi ekye: “Ono ni Ŋgwa maro se mulu tawi ono owo, ta ndaro si ma ni.”

¹ ’Dooko Tori ugu Yesu te vocowa ya tana ojone kicu’ba si. ² Yesu akpate kituna ’butesu ago ŋgäkyina ’butesu ŋgaonya ako, ’do vosi oko nda te täbiri ro. ³ ’Dooko kicu’ba ikyite ndare ago atate ekye: “Ondro ka’do mi ni orivoya Ŋgwa Lu ro owo mita kuniŋwà kwoi kotozaru ambata ro.” ⁴ Oko Yesu zatadrite ekye: “Taegyi atate ekye: ‘Lidri ni ko orine toto alo ambata si, oko ata se cini kabe efo ni kala Lu ro yasi ayani.’ ” ⁵ ’Dooko kicu’ba ugu Yesu te le Yerusalema ya, ’Bakici Alokado ya, edre nda te doṛi Yekalu ro dri, ⁶ ago atate ndäri ekye: “Ondro ka’do mi ni orivoya Ŋgwa Lu ro owo, nyevo andivo miro vuru, tana taegyi atate ekye: ‘Lu ozona ta ’da malaikai ndaro ri ta miro ta; ànya okonayi mi ’da drí ànyaro ya, ukyi kuni oga pa miro ’da.’ ” ⁷ Yesu zatadri ndaro te ekye: “Taegyi ata kpate ekye: ‘Beṛo ko miri ta Opi Lu miro ro ojone.’ ” ⁸ ’Dooko kicu’ba ugu Yesu te le ’bereŋwa ogwaekye dri, ago ka’da ’bädri cini se abe mirina ’bädri’bai si ndi a’do ’desi cini anyaro be te ndäri. ⁹ Ago kicu’ba atate ndäri ekye: “Mozona ŋgase cini kwoi ndi miri, ondro ka’do mi’dete vuru ago nyämätu ma te owo.” ¹⁰ ’Dooko Yesu atate kicu’ba ri ekye: “Nyoyi teri Satani! Tana taegyi atate ekye: ‘Beṛo miri Opi Lu miro mätune, ago ruindune toto ndäri ayani.’ ” ¹¹ ’Dooko kicu’ba e’be Yesu te; ago malaikai ikyiyite ndi induruyite ndäri. ¹² Ondro Yesu keritate ekye äru Yoane te avote kamba ya oko, nda oyite Galilaya ya. ¹³ Nda ri kote Nazareta ya, oko oyite orine Kaperenauma ya ’ba’desi se loto Fofo Galilaya kala wari Zebuluna ro ndi Nafatali robe ya. ¹⁴ Tase ono a’dote nonye tana ata se nebi Yesaya katabe ana ka’do robe ŋgye, se ekye: ¹⁵ “Wari Zebuluna ro ndi wari Nafatali robe, se liti gyi’desi ya driro, Golo Yaradene tasi nasi, Galilaya, wari Atrai ro! ¹⁶ Lidri se koriyibe vouni ya ana ondrenayi ŋgaeyi ’desi ’da. Ŋgaeyi eyina vo ’da ànya se koriyibe wari vouni lindri odra ro roya ana dri.” ¹⁷ Ni tuse ana si Yesu eto lazo ndaro opena te, atate ekye: “Nyètadri, tana Miri ’Bädri’ba vo’buyakuru rote lototi!” ¹⁸ Ondro Yesu kate ugu aba Fofo Galilaya ro kalasi oko nda ndre ädrupii ritu te, Simona (se äzibe Petero) ndi ädrupi ndaro Andarea be, kayi kyimba ovo fofo ya, tana ànya orivoya ti’biuru’bai. ¹⁹ Yesu atate ànyari ekye: “Mìso ma vo, ago membana ami ’da lidri uru’bai ro.” ²⁰ Dori ànya e’beyi kyimba ànyaro te ago soyite nda vo. ²¹ Ondro Yesu koyite mileya ni nasi oko, nda ndre ädrupii azaka ritu kpate, Yakoba ŋgwa Zebedayo ro, ndi Yoane ädrupi ndaro be, ànya orivoya toŋbo ya Zebedayo täpi ànyaro yibe, kayi kyimba ànyaro edena nja. Yesu zi ànya te, ²² ago dori ànya e’beyi toŋbo te ndi täpi ànyaro be ago soyite nda vo. ²³ Yesu abate gbikyi Galilaya yasi, ugu miemba te zoitaeriro yasi; ugu Lazokado Miri ’Bädri’ba Lu ro ro opena be, ago ugu adravo dritoto ndi lomvoluwu se lidri ka’dobe sina iyi edena te. ²⁴ Liku ndaro larirute ’bädri Siria ro yasi, ago ànya eziyi ’dise cini adravoro adravo dritoto kabe ezana, demona’bai, karipapa’bai ndi ciṛiciṛi’bai be te ndare, ndi Yesu ede ànya cini te. ²⁵ Lowa tomoyo soyite nda vo ni Galilaya yasi, Dekapolisi yasi, Yerusalema yasi, Yuda yasi, ndi Golo Yaradene tasi be yasi.

¹ Yesu kondre lowa te oko nda tute lutu dri, ago nda rite vuru. Ago taeri’bai ndaro otoyikalate ŋgulu nda lomvosi. ² Ago nda eto ànya emba te ekye: ³ “Ànya se kuniyi ndi ànya ätinayi ru toto Lu dri ni kado; tana ànya ni lidri Miri ’Bädri’ba vo’buyakuru ro! ⁴ “Ànya se kabe liyi ni kado; tana Lu i’dwena ànya ’da! ⁵ “Ànya se mäwuako ni kado; tana anya uruna ’bädri se Lu ko’ba tana be ana ni drimbi ro! ⁶ “Ànya se kolebe taŋgye oyene ndra ni ŋgacini drisi ni kado; tana Lu o’bana ŋga ojona ànya ’da! ⁷ “Ànya se yauni be azii ri ni kado; tana Lu a’dona ndi yauni be ànyari! ⁸ “Ànya se ya wäṛi be ni kado; tana ànya ondrenayi Lu ndi! ⁹ “Kasa’bai ni kado; tana Lu uzina ànya ’da ŋgwai ndaro! ¹⁰ “Ànya se ezate ta taŋgye rota ni kado; tana Miri ’Bädri’ba vo’buyakuru ro ni ànyaro! ¹¹ “Ami ni kado ondro lidri ka ami o’da ago ka ami eza ago ka ami kicu kowero takozi cini ata si ta maro ta owo. ¹² Nyà’do yai’dwesi ago riyä si, tana päläti ’desi a’bate tana ami vo’buyakuru ya. Tana ànya ezayi nebii se käti ni ämiri kpate inye. ¹³ “Ami orivoya täyi yi ’bädri ri. Oko ondro ka’do täyi kije oci iro te, ago a’bana anya ocine to’di eŋwanye ya? Anya ni kote a’done kado, oko e’be gialo odane cowa ago otone pa si. ¹⁴ “Ami orivoya ŋgaeyi yi ’bädri cini ri. ’Bakici se abete lutu dri äni kote da’done. ¹⁵ ’Diaza eyi lamba kote drî na takone lakaza si; oko ka edrena ŋga lamba edre ro dri, ago eyivote ànya se cini zo yasi ri. ¹⁶ Kpa oso inye beṛo ŋgaeyi amiro ri voeyine inye lidri mile, tana ondro ànya kondreyi takado se nyàbe oyena ’do te oko, ànya käräṛuyi Täpi amiro se vo’buyakuru ya ono robe. ¹⁷ “Nyùsu ta ko mìkye ŋgaemba maro orivoya Ota Musa ro ndi ŋgaemba nebii robe pere ro. Mikyi ko ànya perene, oko mikyi ŋgaemba ànyaro o’bane a’done ŋgye. ¹⁸ Endaro mata ämiri ono, vo’buyakuru ndi ’bädri be lävuna ndi, oko taegyi giṛiŋwa ca telesi taegyi ro se tipari giṛiŋwa ono unina ko okyene ni Ota yasi madale tase cini beṛo a’done ono a’dona lutu ŋgye. ¹⁹ Ondro ka’do, ’diaza koro tase ca tipari ota ya ono kote ago kemba azii kpa gwo oyene inye, nda a’dona ndi tipari Miri ’Bädri’ba vo’buyakuru roya. Oko nda se kabe Ota oro ago kabe anya emba a’dona ’da ’desiro Miri ’Bädri’ba vo’buyakuru roya. ²⁰ Ka’do inye, mata ämiri ono, ocine ämiri Miri ’Bädri’ba vo’buyakuru roya i’do ondro ka’do taŋgye amiro ka’do kote ndrani miemba’bai Ota ro ndi Parusii robe ri owo. ²¹ “Nyèri tase atabe lidri ri kyeno ana te se ekye: ‘Mifu läfu ko, ’dise kufu ’diaza te beṛo ezine vurena opene.’ ²² Oko mata ämiri ono, nda se orivoya kyilaro ädrupi ndaro be ezina ’da vurena opene, nda se kabe ädrupi ndaro o’dana ’do ezina ’da vure’bai kandra, nda se kabe ädrupi ndaro uzina amama ’do a’dona ndi odra ro ndäri oyine gehena ya. ²³ Ta’dota ondro ka’do nyate ŋgapäṛi miro ozona Lu ri vo tori oloro dri ago ta kegate midri ndriro anjioko ädrupi miro orivoya ta aza be milomvo, ²⁴ nye’be ŋgapäṛi miro lau vo tori oloro mile, nyoyi ndriŋwa ago nyodro’beru ädrupi miro be, ago ’dooko nyego mi’de gwo ŋgapäṛi miro ozone Lu ri. ²⁵ “Ondro ka’do ’diaza ka’dote ta aza be milomvo ago ka mi ezi vure ya oko, nyède kalaope amiro nda be, dri ṛo teinye ociako vo vure roya, ukyi ondro misate lau oko, nda ozo mi ’da vureope’ba ri, se ozona mi ’da vookwa’ba ri, ago avona mi ndi kamba ya. ²⁶ Endaro mata miri ono, mirina ndi lau, madale nyozona parata se cini drî miro utweza ’do lutu kpeye. ²⁷ “Nyèrite atate ekye: ‘Miye ta ko toko kode ago drisi.’ ²⁸ Oko mata ämiri yauono: ’Diaza se kabe voondre toko aza dri ago le anya uzine iri ye ta ṛote sina toko drisi ya ndaro ya. ²⁹ Ka’do inye ondro ka’do mi drígwo yasi miro kani mi o’ba takozi oyene, nyewe anya tesi ago mivo anya cowa! Ni kadopara miri telesi lomvo miro ro ijene ndrani lomvo miro ovone cu gehena ya ri. ³⁰ Ondro ka’do drí drígwo yasi miro kani mi o’ba takozi oyene, nyätäṛi ätu ago mivo cowa! Ni kadopara miri ŋga alodi lomvo miro ro ijene ndrani lomvo miro ovone cu gehena ya ri. ³¹ “Ata kpate ekye: ‘’Diaza se kabe toko ndaro onjina beṛo waraga ruonjiro egyine ozone anyari.’ ³² Oko yauono mata ämiri ono, ondro ka’do mano aza ka toko ndaro ojina ta ronyi oyero anyaro ta, nda ’ba anya ni ta oyene ago drisi ondro anya kogo kuru ago aza te owo; ago mano se kabe anya ogye ’do ka kpa taoye toko drisi. ³³ “Nyèri tase atabe lidri ri kyeno ana te se ekye: ‘Nyepere tao’ba miro ko, oko miye tase nyäṛurube oyene Opi ri ’do.’ ³⁴ Oko mata ämiri yauono nyäṛuru ko ondro nyate tao’ba oye owo. Nyäṛuru ko vo’buyakuru si, tana ni giti Lu ro owo, ³⁵ ca ko ’bädri si, tana ni vo pa otoro ndaro owo; ca ko Yerusalema si, tana anya ni ’bakici ’Bädri’ba ’desi ro owo. ³⁶ Nyäṛuru kpa ko drî miro si, tana minina ko drikyiri alodi o’bane onjero kode uniro. ³⁷ Nyàta toto mìkye: ‘Owo’ kode ‘Hwa’; ta to aza se nyàbe atana ’do ka ikyi ni Nda se Kozi ono resi. ³⁸ “Nyèri tate se atate ekye: ‘Mi ’bedri mi azi be, ago si ’bedri si azi be.’ ³⁹ Oko yauono mata ämiri; nyòlogo votaro ko ’dise kabe ami oye koziro ri. Ondro ka’do ’diaza koca biṛi drígwo yasi miro te, mi’ba nda koca biṛi gaṛi yasi miro kpa. ⁴⁰ Ondro ka’do ’diaza ka mi ugu vure ya ososi mivo ta boŋgo miro rota, mi’ba nda kuru dhudhu miro kpa. ⁴¹ Ago ondro ka’do alo aza kyila’bai ro kuru mite kate mi gbiri ŋga ndaro uŋgyine jä’dijä’di alo, miŋgyi jä’dijä’di ritu. ⁴² Ondro ka’do ’diaza keji mite ŋga aza ta, nyozo ndäri; ondro ka’do ’diaza kolete ŋga aza urune tiko ro ni mirigyesi, nyozo ndäri. ⁴³ “Nyèri tate se atate ekye: ‘Nyulu bereazi miro, oko ya miro koso kyila’baazi miro lomvo.’ ⁴⁴ Oko yauono mata ämiri: Nyùlu kyila’baazii amiro ago nyä̀mätu ànya se kayibe ami eza ta, ⁴⁵ tana nyà’do robe ŋgwai ro Täpi amiro se vo’buyakuru ya ana ri. Tana nda ’ba kitu ndaro ni voeyine lidri kozi ndi kado be dri ojoojoro, ago kani ’bu ozo ànya se kabe takado oye ndi ànya se kabe takozi oye iyi ri. ⁴⁶ Ondro ka’do nyùlu gialo lidri se kabe ami lu ayani Lu ozona ŋgapäṛi eŋwanye ämiri ya? Ca parata koto’bai kayi kpa oyena inye! ⁴⁷ Ago ondro ka’do nyà mede oye toto bereazii amiro ri ayani, inye’do nyà’dona to ni ’diawi ri eŋwanye ya? Tana taomaako’bai kayi kpa oyena inye! ⁴⁸ Beṛo ämiri a’done kadoro, kpa oso Täpi amiro vo’buyakuru ya orivoya kadoro ’do ronye.

¹ “Mì’ba mi amiro komba kado! Ondro nyàte takado oye, mìye ànya ko mile lidri ro yasi ànyari ondrene. Ondro ka’do mìye ’do te, nyà’dona päläti ako ni Täpi amiro se vo’buyakuru ya ana resi. ² “Ondro ka’do nya ŋga aza ozo ’dise ati’ba ro ri, nyayo tana ko, oso miomba’bai kayibe oyena zo mätu ro yasi ago litiŋwà drisi ronye. Ànya kayi oyena inye ekye lidri käräṛu iyi robe. Mata ämiri ono, ànya ṛote nja päläti ànyaro be. ³ Oko ondro nyate ’dise ati’ba ro opana, miye liti se ca bereazi miro ni ko tana unine ’do yasi ayani. ⁴ Miye taoye kado miro ndrwiro. ’Dooko Täpi miro se kabe tase nyabe oyena ndrwiro ondrena ono, ozona päläti ’da miri. ⁵ “Ondro nyàte mätu oko, nyà’do ko miomba’bai ronye! Ànya luyi edrene edre kuru mätu oyene zo mätu ro yasi ago cukuŋwà liti ro yasi, tana ’dicini kondre iyi robe. Mata ämiri ono, ànya ṛote nja päläti ànyaro be. ⁶ Oko ondro nyate mätu oko, mici zo miro ya, mise käläsi, ago nyämätu Täpi miro se ondreako ono. Ago Täpi miro se kabe tase nyabe oyena ndrwiro ondrena ono, ozona päläti ’da miri. ⁷ “Ondro nyàte mätu oko, ata anya takaciako ’da nyàta ko oso Lu uniako’bai kayibe oyena ronye; se kusuyi iro be ekye Lu erina iyi ’da tana mätu iro orivoya kaca. ⁸ Nyà’do ko oso ànya ronye. Täpi amiro ni ŋgase nyàbe ejina ṛote nja teinye ämiri nda eji ako. ⁹ Ondro nyàte mätu oko ämiri mätune nonye mìkye: ‘Täpi amaro se orivoya vo’buyakuru ya ono ävuru alokado miro ka’do orooro ro; ¹⁰ Miri ’Bädri’ba miro ro kikyi; aye ole miro robe ’bädri ya oso vo’buyakuru ya ronye. ¹¹ Nyozo ŋgaonya tu ondro ono ro ämäri. ¹² Nye’be ama takozi se màyebe ta, oso màbe azii se koyeyi takozi be ämäri e’bena ’do ronye. ¹³ Nyugu ama ko vo taojoro ya, oko mipa ama londroro ni Nda se Kozi ono ri.’ ¹⁴ “Ondro ka’do nyà azi e’be takozi se ànya koyeyibe ämiri ta, Täpi amiro se vo’buyakuru ya ono e’bena ami kpa. ¹⁵ Oko ondro ka’do nyè’be azi kote, ’dooko Täpi amiro unina kpa ko ami e’bene takozi se mìyebe ’do ta. ¹⁶ “Ondro nyàte akpa oko, nyìsi mi amiro ko oso miomba’bai kayibe oyena ronye. A’do ànyaro landre gwo to ’dicini kondre robe ekye ya akpa. Endaro mata ämiri ono, ànya ṛote nja päläti ànyaro be. ¹⁷ Ondro nyate akpa oko, mijo mi miro ago nyava drî miro, ¹⁸ ukyi azii uni ’da ekye nya akpa, toto Täpi miro, se orivoya ondreako ono, unina ni. Ago Täpi miro, se kabe tase nyabe oyena ndrwiro ondrena ono, ozona päläti ’da miri. ¹⁹ “Mìdro ŋgadriamba ko andivo amiro ri ’bädri ya noŋwa, vose ludui ndi ŋgatoka be ka ŋga enjienji ago ŋgatopa’bai kayi vooŋgo ago kugu ka ŋga kugu kigye ono ya. ²⁰ Ka’do inye, mìdro ŋgadriamba andivo amiro ri vo’buyakuru ya, vose ludui ndi ŋgatoka be unina ko ŋga enjine, ago ŋgatopa’bai unina ko vooŋgone kigye ago vose kugu ni ko vooŋgone kigye ana ya. ²¹ Tana ya amiro a’done ’da ondoalo vose ŋgadriamba amiro orivoya kigye ana ya. ²² “Mi orivoya oso lamba ronye lomvo ri. Ondro ka’do mi miro orivoya kado, lomvo cini miro a’dona ndi twi ŋgaeyi be; ²³ oko ondro ka’do mi miro ka’do kote kadoro, lomvo miro a’dona ndi ŋgätini ya. Ago ondro ka’do ŋgaeyi se miya ono ka’dote ŋgätini ro, ’dooko ŋgätini a’dona te ndra! ²⁴ “’Dialo aza unina ko ruindune ’desii ritu ri; ya ndaro osona ’da alona lomvo ago luna azana ’da; nda a’dona ’da trwe alona aza ri ago mawona azana ’da. Mìnina ko ruindune Lu ri ago kpa parata ri. ²⁵ “Mata ämiri ono; nyà’do ko milo’be be ta ŋgaonya ndi ŋgaumvu se mìlebe ami o’bane orina sina lidriidriro ono rota, kode ta boŋgo se mìlebe osone ami lomvo ono rota. Inye’do adri ṛo ko orivoya para ndrani ŋgaonya drisi ya? Ago inye’do lomvo ṛo ko orivoya para ndrani boŋgo drisi ya? ²⁶ Mìndrevo te arii se kayibe ugu loŋga gbikyi ami lomvosi iyi dri; ànya kyi’diyi ŋga ko, ago kotoyi ŋga jalia ro kpa ko ago droyi ŋgaonya kpa ko kyiro ya, caoko Täpi amiro vo’buyakuru ya ono kani ànya eca! Inye’do a’do amiro ṛo ko para ndrani arii ro drisi ya? ²⁷ Inye’do alo aza amiro o’bana yi gi’da ombane de’bele ta milo’be rosi ya? ²⁸ “Ago tana e’di nyà milo’be ta boŋgo osoro ta niya? Mìndre dri foi vocowa ro kayi omba be, ànya yeyi losi ko ago ’diyi boŋgo ko andivo ànyaro ri. ²⁹ Oko mata ämiri ono ’Bädri’ba Solomo gica ŋgadriamba cini ndaro be oko, a’do kote boŋgo liŋgyiekye be oso alo aza fo kwoi ro ronye. ³⁰ Lu ni se kabe boŋgo oso käyi vocowa ro lomvo owo, käyi se ondro ono gi orivoya noŋwa ago ondo oko tana kyete, jete kpeye vo ŋgaonya la’diro ya. Inye’do nda osona boŋgo ṛo ko para ndra ami lomvo ya? Ami taoma giṛiŋwa be ono! ³¹ “Ka’do inye nyèto milo’be ko mìkye: ‘Mànyana e’di ya? Kode mä̀mvuna e’di ya? Kode màsona e’di ya?’ ³² Kwoi ni ŋgase cini taomaako’bai kayibe uṛina ondoalo owo, Täpi amiro vo’buyakuru ya nite anjioko mìle ŋgase cini kwoi. ³³ Oko ndrani ŋgase cini kwoi drisi mìṛi Miri ’Bädri’ba Lu ro ayani käti ndi ŋgase nda kolebe ämiri oyene be, ’dooko nda ozona ŋgase cini azaka kwoi ’da ämiri. ³⁴ Ka’do inye nyòlo’be mi ko ta ondo ta; tu ondo a’dona gi milo’be modo iro robe. Tu alo gi rriti iro be.

¹ “Mìpe vure azii ro ko, ’dooko Lu opena vure amiro ko. ² Tana Lu opena vure amiro kpa oso nyàbe vure azii ro opena ’do ronye, ago liti se nyabe taoye azii ri sina Lu oyena ta kpa ämiri sina. ³ Tana e’di nya kaŋwa giṛiŋwa se mi ädrupi miro roya ondre, oko miti ta juṛu se mi andivo miro roya tana ko etaya? ⁴ Nyatana ädrupi miro ri eŋwanye mikye: ‘Mi’ba mewe kaŋwa giṛiŋwa ono tesi ni mi miro yasi’ oko se mi modo orivoya juṛu be mi miro ya ya? ⁵ Mi miomba’ba ono! Nyewe juṛu se mi modo miro roya ono käti, ago ’dooko mindrena vo ndi kadoro kaŋwa giṛiŋwa se mi ädrupi miro roya ono eweza tesi. ⁶ “Nyòzo ŋgase alokado ono ko kokyei ri, tana ànya ezanayi ami ’da ago osinayi ami ’da. Mìvo ŋgoŋgo amiro ko kizwe mile ukyi ànya oto ’da pa si. ⁷ “Nyèji, ago ozona ndi ämiri; mìṛi ago nyùsuna ndi; mì’bi ago äpina käläsi ndi ämiri. ⁸ Tana ’dise cini kabe ejina ozona ’da rigye; ago nda se kabe uṛina usuna ’da, ago äpina käläsi ’da nda se kabe o’bina ri. ⁹ Inye’do ami se täpii ro ono ondro ŋgwa miro keji ta be ta ambata rota, nyozona gi’da kuni ayani ndäri ya? ¹⁰ Kode ondro nda keji ta be ta ti’bi rota, nyozona gi’da ini ayani ndäri ya? ¹¹ Ami se koziro ono, mìni ndi ŋgase kado ozone ayani ŋgwai amiro ri, ka’do inye Täpi amiro se vo’buyakuru ya ono ozona ŋga kado te mu’du eŋwanye ànya se kayibe nda eji iyi ri ya! ¹² “Mìye ta azii ri oso mìlebe ànyari ta oyene ämiri ronye: ono ni takaci Ota Musa ro ro ndi taŋgaembaro nebii robe owo. ¹³ “Mìci dereŋwa kyiraŋwa yasi; tana dereŋwa ociro gehena ya orivoya bäräŋgälä ago liti se kabe oyi kigye orivoya rritiako, ago lidri amba ka aba kigyesi. ¹⁴ Oko dereŋwa ociro adri ya orivoya kyiraŋwa ago liti se kabe oyi kigye orivoya rritiro, ago lidri se kabe usuna orivoya fereŋwa. ¹⁵ “Mì’ba mi amiro komba ni nebii mieywe’bai ri, ànya kayibe ikyi amire ondrena lomvo yasi laba oso timele ronye, oko ya yasi ànyaro orivoya endaro ihwi vocowa ro. ¹⁶ Mìnina ànya ’da tase ànya kayibe oyena yasi. Ce se kukyi be ni ko kono owane; ago ŋgäṛiŋgofo ni ko kyi’du owane. ¹⁷ Ce kado ka doŋgo kado owa, oko ce kozi ka doŋgo kozi owa. ¹⁸ Ce kado ni ko doŋgo kozi owane, ago ce kozi ni ko doŋgo kado owane. ¹⁹ Ago ce se kowa doŋgo kado ko ’do ogana vuru ago ovona asi ya. ²⁰ Ka’do inye mìnina nebii mieywe’bai ’da tase ànya kayibe oyena yasi. ²¹ “Ko vona se cini kabe ma uzi ‘Opi, Opi’ ono kaoye ocine Miri ’Bädri’ba vo’buyakuru roya, oko toto ànya se kayibe tase Täpi maro vo’buyakuru ya kolebe ànyari oyene oyena ’do ayani. ²² Ondro tu vure ro kesate oko, ambana atana ’da märi ekye: ‘Opi, Opi! Mape ta Lu rote ävuru miro ya, ävuru miro si molofo demona amba te tesi ago maye talaro ro amba te!’ ²³ ’Dooko matana ’da ànyari makye: ‘Mäni ami ko’de. Nyòyi ni maresi, ami lidri koziro ono!’ ²⁴ “Ka’do inye, ’diaza se kabe ata maro kwoi erina ago kabe oyena laba oso mano tavouni’ba se kobe zo te luutu dri ronye. ²⁵ ’Bu ’dite, goloi logate, ago oli site mbarasi zo se ana lomvo. Caoko anya ’de kote, tana abe anya te luutu dri. ²⁶ “Oko ’diaza se kabe ata maro kwoi erina ago ro ànya kote iyi laba oso mano amamaro se be zo ndaro te siŋgwa dri ronye. ²⁷ ’Bu ’dite, goloi logate, oli site mbarasi zo se ana lomvo, ago ’dete! Ago o’dena a’dote kozipara!” ²⁸ Ondro Yesu konde tase kwoi atana te oko, lowa laro tawi liti se nda emba ŋga be kigye si tana ro. ²⁹ Tana nda ko oso miemba’bai Ota ro ànyaro ronye; oko, nda emba ŋga te drikaca si.

¹ Ondro Yesu kefote vuru ni lutu drisi oko, lowa tomoyo sote nda vo. ² ’Dooko mano aza adravo koziro kyini robe ikyite ndare, sokayate vuru nda kandra, ago atate ekye: “’Desi, ondro mile gindi, minina ndi ma edene wäṛi.” ³ Yesu ozo drí ndaro te ago do nda te, zatadrite ekye: “Malete nya’do ri wäṛi!” Dori ede mano ana te ni adravo ndaro ri. ⁴ ’Dooko Yesu atate ndäri ekye: “Nyeri, nyiti tase ono ko ’diaza alo ri, oko nyoyi dori kohani re ago mi’ba nda kena mi, ago nyozo ŋgapäṛi se Musa kota ’di be ozone ta ’diede rota ’do; ka’daza lidri cini ri anjioko ede mi te.” ⁵ Ondro Yesu kocite Kaperenauma ya oko, dri’ba kyila’bai Roma’ba ro ro ’bedrite nda be ago lo’barute ta ŋgaopa rota ekye: ⁶ “’Desi, ruindu’ba maro orivoya adravoro kitapara dri ’bäru mbaraako oŋgane, ago ka rueza amba.” ⁷ Yesu atate ekye: “Moyina ’da ago medena nda ’da.” ⁸ Oko dri’ba kyila’bai ro zatadrite ekye: “’Desi, takado maro ojo ko miri ikyine zo maro ya. Nyata toto ata, ’dooko ruindu’ba maro a’dona ndi kado. ⁹ Ma maro kpa, mano drikaca dri’bai ’desiro kyila’bai ro zele yi, ago ma kyila’bai be ma zele. Matabe alona aza ri makye: ‘Nyoyi!’ Nda oyi ndi, ago azana ri makye: ‘Nyikyi!’ Ago nda ikyi ndi, ago mata ruindu’ba maro te makye: ‘Miye ono!’ Ago nda ye anya ndi.” ¹⁰ Ondro Yesu keri ta ono te oko, nda larote ago nda atate lidri se kosobe nda vo ana ri ekye: “Mata ämiri ono, musu ’diaza alo ko Yisaraele ya taoma be oso ono ronye. ¹¹ Mata ämiri ono amba ikyina ’da ni ’buzele ago ni aŋgoya ago orinayi ’da vuru Abarayama, Yisika, ndi Yakoba be be ŋgaonya Miri ’Bädri’ba vo’buyakuru roya. ¹² Oko ànya se aba beṛo ni a’done Miri ’Bädri’ba roya iyi avona ’da le vouni ya, ànya o’dena gwo liyine ndi sionya be.” ¹³ ’Dooko Yesu atate dri’ba kyila’bai ro ana ri ekye: “Nyoyi ’bäru, ago ayena ndi miri oso mimabe ronye.” Ago ede ruindu’ba dri’ba kyila’bai ro ana rote dori saa gi ana si. ¹⁴ Yesu oyite ’ba Petero roya, ago lau nda usu adraŋwa Petero rote u’duvoya kitapara dri rritiro adravo driu’bo robe. ¹⁵ Nda tämbi drí anyaro te, ago driu’bo e’be anya te, ago anya ŋgate kuru ago ozo ŋgaonya te ndäri. ¹⁶ Ago ondro te tandrolero oko, lidri ezi ’di amba se demona be iyi te ndare, Yesu lofo tori undiro te tesi ata si ago ede ’dise cini adravoro te. ¹⁷ Nda yete nonye ko’ba ata se nebi Yesaya katabe ana ka’do robe ŋgye se ekye: “Nda andivona ana lomvoluwu amaro te ago ŋgyi adravo amaro te zwi.” ¹⁸ Ondro Yesu kondre lowa te gbikyi nda lomvosi oko, nda ta taeri’bai ndaro te ozane fofo tasi. ¹⁹ Miemba’ba aza Ota ro ikyite ndare, atate ekye: “Miemba’ba, masona ndi mivo vose nyabe oyi kigye ya.” ²⁰ Yesu zatadri ndaro te ekye: “Kobai orivoya ’bui be, ago arii orivoya zoi be, oko Ŋgwa Lidri ro orivoya vo ako drî ndaro lalaza.” ²¹ Mano aza, se ni alo aza taeri’bai ndaro ro, atate ndäri ekye: “’Desi, mi’ba ma ogone täpi maro osene käti.” ²² Yesu zatadrite ekye: “Mi’de mavo, nye’be avo kose avo azi ànyaro.” ²³ Yesu cite toŋbo ya, ago taeri’bai ndaro oyiyite nda be. ²⁴ Dori oli gbiriṛi be site fofo dri, ago toŋbo kate ugu oci gyi zele. Oko Yesu u’dute. ²⁵ Taeri’bai oyiyite Yesu re ago teŋgayi nda te, treyite ekye: “Mipa ama, Opi! Mà oyete odrane!” ²⁶ Yesu zatadrite ekye: “Ami turiro etaya? Ami taoma giṛiŋwa be!” ’Dooko nda ŋgate kuru ago ’bidri oli rote ago gbulä gyi’desi ro edrete ago a’dote ti. ²⁷ ’Dicini larote. Atayite ekye: “Mano ono e’diyi ya? Ca oli ndi gbulä gyi’desi robe royi nda te!” ²⁸ Ondro Yesu kesate wari Gadara roya fofo tasi oko, lidri ritu demonai be efoyi ni ’budri lakosi ’beyidrite nda be. Ànya orivoya demonai be iyi ya ago orivoya mbara amba be ’diaza alo leko abane liti ana drisi. ²⁹ Ànya treyite ekye: “Mile e’di ama be ya, mi Ŋgwa Lu ro ono? Nyikyi ono ama ezane teinye tu amaro ri esa ako ya?” ³⁰ Äṛi kizwei ro orivoya ŋgaonyavoya loto lau. ³¹ Ta’dota demonai lo’bayirute Yesu ri ekye: “Ondro nyate ama usi tesi oko, mizo ama ocine äṛi kizwei roya ayani.” ³² Yesu atate ànyari ekye: “Nyòyi,” ndi ànya oyiyite ago ciyite kizwei ya. Ago äṛi cini kizwei ro lasoyite kärägu yasi le fofo ya, ago gyi imvu ànya te. ³³ Lidri se kabe vo ànyaro ondre kai muyite ’ba’desi ya, ànya itiyi tase cini ka’dobe lidri se demona be kai ri ana tana te. ³⁴ Ta’dota lidri cini ni ’ba’desi ana yasi fote tesi Yesu ondrene; ago ondro ànya kondreyi nda te oko, ànya lo’bayirute ndäri wari ànyaro e’bene.

¹ Yesu cite toŋbo ya ago zate kovole fofo tasi ’ba’desi modo ndaro roya. ² Ago lidri azaka eziyi mano ciṛiciṛiro aza te ndare, u’duvoya kitapara dri. Ondro Yesu kondre taoma ànyaro te oko, atate mano ciṛiciṛiro ri ekye: “Nyuturi ko, ŋgwa maro! E’be mite takozi miro ta.” ³ ’Dooko miemba’bai azaka Ota ro atayite iyivoya ekye: “Mano ono ka Lu o’da!” ⁴ Yesu ni tase ànya kayibe ugu usuna ana te, ago nda atate ekye: “Nyà ugu tavousu koziro nonye etaya? ⁵ Ta eŋwani ni rritiako atane ya? Atane ekye: ‘E’be mite takozi miro ta,’ kode atane ekye: ‘Miŋga kuru ago nyaba.’ ⁶ Maka’dana ämiri, anjioko Ŋgwa Lidri ro orivoya drikaca be ’bädri ya ’di e’bene takozii ta.” Ta’dota nda atate mano se ciṛiciṛiro ana ri ekye: “Miŋga kuru, miru kitapara miro, ago nyoyi ’bäru!” ⁷ Mano ana ŋgate kuru ago oyite ’bäru. ⁸ Ondro lidri kondrete oko, ànya a’doyite turiro, ago räṛuyi Lu te ta drikaca nonye ono ozo rota lidri ri. ⁹ Yesu e’be vo ana te, ago nda kate ugu lävu oko, nda ndre parata koto’ba aza te, äzite Matayo, rite losioyevo ndaro ya, ago Yesu atate ndäri ekye: “Miso mavo.” Matayo ŋgate kuru ago sote nda vo. ¹⁰ Ondro Yesu kate ŋgaonya zo Matayo roya oko, parata koto’bai amba ndi otapere’bai be ikyiyite dro’berute Yesu ndi taeri’bai ndaro yibe tara’biza lomvo. ¹¹ Rukä Parusii ro ndreyi tase ono te ago ejiyi taeri’bai ndaro te ekye: “Miemba’ba amiro ka ŋgaonya lidri nonye ono be etaya?” ¹² Ondro Yesu keri ta ono te oko atate ekye: “Ànya se jiŋgyiri ro le ’diede’ba ko, oko gialo ànya se adravo ro ayani. ¹³ Nyòyi ago nyùsu takaci tase taegyi katabe ono ro se ekye: ‘Male yauni ayani, ko koronyai olo tori ro.’ Mikyi kote lidri se taŋgye’bai ro uzine, oko otapere’bai ayani.” ¹⁴ ’Dooko taeri’bai Yoane ro ikyiyite Yesu re ejiyitate ekye: “Tana e’di ama ndi Parusii be mà akpa ondoalo oko taeri’bai miro akpayi ko niya?” ¹⁵ Yesu zatadrite ekye: “Inye’do mìma amiro be ŋgwazii se Karama lagye ogye roya uninayi ndi a’done tusuro ondro kodrogo drigi gba orivoya ànya yibe owo ya? Endaro ko inye! Oko tu esena ’da, ondro äru kodrogo teni ànya resi oko; ago ’dooko ànya akpanayi ’da. ¹⁶ “’Diaza alo lose boŋgo pelepelero to’diro ko mi boŋgo uku se kelewabe roya tana boŋgo pelepelero to’diro mociruna ’da ago owana boŋgo se uku ’do gwo ago mina lewana te ndra. ¹⁷ ’Diaza alo so vino to’di kote kuru kyini ro vino ro ukuro ya, tana kyini lesina ’da, ’dooko vino orona ndi, ago kyini enjiruna ’da. Oko ondro aso vino to’diro te kuru kyini ro to’diro ya, ’dooko vona iyi riti orina ndi ruenjiako.” ¹⁸ Ondro Yesu kadri ugu ata oko, dri’ba zotaeriro Yudai ro ro ikyite ndare, sokayate vuru nda kandra, ago atate ekye: “Ŋgutiŋwa maro drate ndri yau; oko nyikyi ago mi’ba drí miro anya lomvo, anya kadri robe.” ¹⁹ Ago Yesu ŋgate ago sote nda vo, ago taeri’bai ndaro oyiyite nda be. ²⁰ ’Dooko toko se ezarute ndroa na ’butealo foritu ni kari oro koziro ro risi ana ikyite Yesu kundu ago do sidri boŋgo ndaro rote. ²¹ Anya atate andivo iro ri ekye: “Ondro ka’do mado gica toto boŋgo ndaro ayani, edena ma ndi.” ²² Oko Yesu zamite ago ndre anya te, ago atate ekye: “Nya’do ŋgyiri, ŋguti maro! Taoma miro ede mite kado.” Dori ede toko ana te. ²³ Ondro Yesu kesate zo dri’ba roya, ago kondre loŋgo oŋgo’bai vo avo roya ndi lowa be te amovoya oko, ²⁴ nda atate ekye: “Vo amiro cini mìfo tesi! Ŋgutiŋwa ono dra ko’de anya ka u’du toto u’du!” Oko ànya guyi ndana te. ²⁵ Oko ondro olofo lidri cini te tesi oko, Yesu cite zo ya ago ru drí anyaro te, ago anya ŋgate ace kuru. ²⁶ Ago lazo tase ono ro larirute ’bädri ana yasi gbikyi. ²⁷ Yesu e’be vo ana te, ago nda ka ugu oyi oko, miako’bai ritu soyite nda vo, ànya treyite ekye: “Ya miro kuni ama lomvo! Ŋgwa Dawidi ro.” ²⁸ Ago ondro Yesu kocite zo ya oko, miako’bai ritu kai ikyiyite ndare, ago nda eji ànya te ekye: “Inye’do mìma ndi mänina ndi ami edene ya?” Ànya zayitadrite ekye: “Owo, ’desi!” ²⁹ ’Dooko Yesu do mi ànyaro te ago atate ekye: “Ka’do ndi inye ämiri, oso mìmabe ono ronye!” ³⁰ Ago mi ànyaro go ndrevote. Yesu tadri ànyaro te ekye: “Nyìti tase ono tana ko ’diaza ri!” ³¹ Caoko ànya oyiyite ago lariyi ta Yesu rote ’bädri ana yasi gbikyi. ³² Ondro màno ritu kayi kate ugu oyi oko, lidri azaka eziyi mano aza ni ata ko demona be te Yesu re. ³³ Dori ondro olofo demona te tesi oko, mano ana eto ata te, ago ’dicini laroyite atayite ekye: “Màndre ta aza alona kote oso ono ronye Yisaraele ya!” ³⁴ Oko Parusii atayite ekye: “’Desi demona ro ozo mbara ni ndäri demona lofoza.” ³⁵ Yesu abate gbikyi ’ba’desii ndi ’baŋwà täkyi be, nda emba mi te zotaeriro yasi, pe Lazokado Miri ’Bädri’ba Lu ro ro tana te, ago nda ede lidri se adravo dritoto ndi lomvoluwu dritoto be te. ³⁶ Ago kondre lowa te oko, ya ndaro nite ànya lomvo, tana ànya a’dote milo’be be ago ŋgaopaako, oso timele lekye’ba ako ronye. ³⁷ Ta’dota nda atate taeri’bai ndaro ri ekye: “Jalia orivoya ŋga be amba, oko losi’bai toto orivoya fereŋwa kala ŋgana ro kotone. ³⁸ Nyä̀mätu kuzupi jalia ro ri tana nda kezo losi’bai robe ŋga jalia ro ndaro kalana kotone.”

¹ Yesu zi taeri’bai ndaro ’butealo foritu te voaloya ago ozo drikaca te ànyari torii undiro lofoza tesi, adravo dritoto ndi lomvoluwu dritoto be edeza. ² Kwoi ni ävuru lazo’bai se ’butealo foritu ana ro owo: käti ni Simona (se äzibe Petero) ndi ädrupi ndaro Andarea be; Yakoba ndi ädrupi ndaro Yoane be, ŋgwà Zebedayo ro; ³ Filipo ndi Batolimayo be; Toma ndi Matayo parata koto’ba be; Yakoba ŋgwa Alepayo ro, ndi Tadayo be. ⁴ Simona ’bädri iro lu’ba, ndi Yuda Isekariota se kozo drí Yesu robe ana be. ⁵ Yesu zo lidri ’butealo foritu kwoi te tesi ŋgaemba nonye kwoi be ekye: “Nyòyi ko wari Atrai roya kode ’ba’desii Samaria’ba roya. ⁶ Oko, ämiri oyine timele se kujebe, lidri Yisaraele ro re. ⁷ Nyòyi, ago mìpe ta mìkye: ‘Miri ’Bädri’ba vo’buyakuru ro te orivoya lototi!’ ⁸ Nyède adravo’ba, nyàdri avo, nyède ànya se kayibe rueza ni adravo koziro kyini ro risi iyi, nyòlofo demonai tesi. Nyùsute teinye ŋga ozoako driigye nyòzo kpa teinye ŋga ozoako. ⁹ Mìŋgyi logo läguläguro ca mo’di ca parata atalaro ko kpäkä amiro ya; ¹⁰ mìŋgyi gbolo drilämi’ba ro ko aba amiro ya, ca boŋgo kinja, ca mvoka ca dofo aba ro. Ozona ŋga ndi losi’ba ri ta lemeri ndaro rota. ¹¹ “Ondro nyàte osa ’ba’desi aza ya kode ’baŋwa aza ya oko, mìci kigye ago mìri ’dise aza le ndi ami urune ’do be, ago mìri nda be madale nyè’be vose ana gwo. ¹² Ondro nyàte oci zo ya oko, nyàta mìkye: Taliatokpe ka’do ami yibe. ¹³ Ondro ka’do lidri zo ana ro kuru ami te, mì’ba mede taliatokpe amiro ro kori kigye; oko ondro ànya kuruyi ami kote, ’dooko mìru mede taliatokpe ro amiro kovole. ¹⁴ Ago ondro ka’do ’ba kode ’ba’desi aza kogatezo ami urune kode ta amiro erine, ’dooko nyè’be vose ana ago mìyo durufu na ni pa amiro yasi. ¹⁵ Endaro mata ämiri ono, Tu Vure rosi Lu ka’dana yauni ndra ’da lidri Sodomo ro ndi Gomora robe ri ndrani lidri ’ba’desi se ana ro ri. ¹⁶ “Nyèri dri! Ma ami ozo tesi, oso timele ihwii lako ronye. Beṛo ämiri a’done tauni be oso inii ronye ago tokyeako oso tu’buii ronye. ¹⁷ Mìkwa ŋga, tana lidri uruna ami ’da ago ugunayi ami ’da vure ya, ago o’binayi ami ’da zoitaeriro yasi. ¹⁸ Ezinayi ami ’da wari’bai ndi ’bädri’bai be kandra ta maro ta, Lazokado itiza ànyari ndi Atrai be. ¹⁹ Ondro ànya keziyi ami te vure ya oko, nyòlo’be mi ko tase nyàbe oye atane kode atane eŋwanyeya ta; ondro tuna kesate oko, ozona tase atane ämiri ’da. ²⁰ Tana ata se nyà oyebe atane ’do ko amiro; oko Tori Täpi amiro ro uguna ata ni ami si. ²¹ “Ädrupi ozona modo ädrupi ndaro ro gini ufune, ago täpii oyenayi kpa inye ŋgwai ànyaro ri; ago ŋgwai ozanayi uti’bai ànyaro ’da kyila’baazii ro ago o’banayi ànya ni ufune. ²² Ya lidri cini ro osona ’da ami lomvo ta maro ta, oko nda se kabe yaiŋgyi le äduna ya apana ’da. ²³ Ondro ànya kayite ami eza ’ba’desi aza ya mìmu azana ya. Ma ata ämiri ono, teinye ämiri losi amiro ’ba’desii Yisaraele ro yasi ondeako oko Ŋgwa Lidri ro esana ’da. ²⁴ “Ŋgaga se abe embana ko ndrani miemba’ba ndaro ri; ca ruindu’ba ko ndrani ’desi ndaro ri. ²⁵ Ta’dota ŋgaga se abe embana ojona ’da kpa a’done oso miemba’ba ndaro ronye, ago ruindu’ba oso ’desi ndaro ronye. Ondro ka’do dri’ba katidri ro äzi bete Belezebula, ’dooko gboko katidri ro äzina te ävuru kozipara si! ²⁶ “Ka’do inye nyà’do ko turiro ni lidri ri. Ŋgase atako drî na te äpina drî na ’da, ago tase cini dämbidämbiro a’bana ’da unine. ²⁷ Tase cini mabe atana ämiri vouni ya ono beṛo ämiri delene ŋgaeyi ya, ago tase nyèrite iṛero ’do beṛo ämiri tana ayone ni zo drisi. ²⁸ Nyà’do ko turiro ni ànya se kabe lomvo ufu oko ni ko lindri ufune ’do ri; oko nyùturi Lu se unina ndi lomvo ndi riti lindri be ufune gehena ya ono ayani. ²⁹ Inye’do gyolokoi ritu agye kote ṛo toto mileni alodi si ya? Caoko Täpi amiro e’be gyoloko alodi ko e’dene vuru teinye ndäri tana uniako. ³⁰ Ami kpa inye, ca drikyiri drî amiro ro vona cini atite. ³¹ Ka’do inye nyà’do ko turiro; tana lagye amiro orivoya para ndrani gyolokoi amba ri! ³² “Nda se ka ata ŋbelero miamba ya ekye yi ni maro, matana ta ndaro kpa inye Täpi maro vo’buyakuru ya kandra. ³³ Oko ondro ka’do ’diaza koga ma tezo ŋbelero miamba ya, magana nda kpa zo Täpi maro vo’buyakuru ya kandra. ³⁴ “Nyùsu ko mìkye mikyi taliatokpe ezine ’bädri ya, mikyi ko taliatokpe ezine, oko bando ayani. ³⁵ Mikyite ŋgwàagoro o’bane kyilaro täpii ànyaro be, ndiriŋwa o’bane kyilaro endrei ànyaro be, ’ditoko o’bane kyilaro adraŋwà ànyaro be; ³⁶ kyila’baazii kozipara mano alo ro a’dona gini gboko katidri modo ndaro ro yasi. ³⁷ “Nda se kabe täpi ndaro kode endre ndaro luna ndrani märi ojo ko a’done taeri’ba maro; nda se kabe ŋgwaagoro kode ŋgwa ŋgutiro ndaro luna ndrani märi ojo ko a’done taeri’ba maro. ³⁸ Nda se ŋgyi taka ndaro ko ago so ko taoye maro vo ojo ko a’done taeri’ba maro. ³⁹ Nda se kabe ruutri adri modo ndaro ro opane ijena ’da; oko nda se kabe adri ndaro ijena ta maro ta usuna ’da. ⁴⁰ “Nda se kabe ami iŋbi ka ma iŋbi; ago nda se kabe ma iŋbi ka nda se kezo mabe ono iŋbi. ⁴¹ Nda se kabe lazo’ba Lu ro iŋbi tana nda be lazo’ba Lu ro yi ’do, usuna päläti ndaro ’da. Ago nda se kabe mano se taŋgye’ba ro iŋbi tana nda be taŋgye’ba yi ’doro, usuna päläti ndaro ’da. ⁴² Ämiri unine kado anjioko nda se kabe ca gyi i’dwe umvuro ozo ’dise aza tipari oso’bai ma vo kwoi ro ri, tana nda be ni oso’ba yi ma vo ono ro, endaro, ka ṛo päläti usu!”

¹ Ondro Yesu konde ta miembaro kwoi ozona te taeri’bai ndaro ri oko, nda e’be vo ana te ago nda oyite dori miembane ago taopene ’ba’desii se lototi lau iyi yasi. ² Ondro Yoane Bapatisi’ba keritate ni kamba yasi ta ŋgase Kristo kabe ugu oyena kai rota oko; nda zo rukä taeri’bai ndaro rote Yesu re. ³ Ànya ejiyi nda te ekye: “Nyiti ta ämäri, inye’do mi ni se Yoane kata tana be ka oyebe ikyine owo, kode ma’ba mi drigi ’diaza tona ta ya?” ⁴ Yesu zatadrite ànyaro te ekye: “Mìgo kovole ago nyìti tase nyàbe ugu erina ago ondrena ono tana Yoane ri; ⁵ miako’bai kate voondre, ago ka’boi kate aba, ede ànya se adravo koziro kyini robe te wäṛi, tuṛui kate taeri, adri avo te, ago ape Lazokado te ati’bai ri. ⁶ Ànya se a’do ko wiriwiriro ta maro ta ni kado!” ⁷ Ondro taeri’bai Yoane ro kayite ugu oyi oko Yesu eto ta atate lowa ri ta Yoane rota ekye: “Tuse nyòyibe Yoane re vocowa ya, mì’ba mi te e’di ondrene ya? Bi käyi ro oli kabe kandana ’do ondrene ya? ⁸ Nyòyi tesi e’di ondrene ya? Mano se koso boŋgo ṛiyäṛiyäro be ondrene ya? Lidri se kabe boŋgo oso inye, kayi ori zoi’desi ro ’bädri’bai ro yasi! ⁹ Nyìti tana märi, nyòyite tesi e’di ondrene ya? Nebi ondrene ya? Owo ndi inye, oko mindre mano aza te ndrani nebi ri. ¹⁰ Tana Yoane ni alo aza se taegyi kata tana be owo; se ekye: ‘Lu atate ekye, mazona lazo’ba maro ’da mimile liti edene miri.’ ¹¹ Ma taŋgye iti ämiri anjioko Yoane Bapatisi’ba orivoya para ndrani mano aza se koribe kyeno ri. Oko nda se tipari ànya se Lu kabe mirina lako orivoya para ndrani Yoane ri. ¹² Ṛoni tuse Yoane kope ta be ana si madale tu yauono ya Miri ’Bädri’ba vo’buyakuru ro ezarute ni uruna mbarasi ri, ago lidri se mbara be ka ojo urune mbarasi. ¹³ Madale tu Yoane rosi nebii cini ndi Ota Musa robe itiyi Miri ’Bädri’ba Lu ro ro tana te. ¹⁴ Ago ondro ka’do mìle gindi omane lazo ànyaro ya, Yoane ni orivoya Eliya, se äŋgu ta ikyina robe owo. ¹⁵ Nyèri tana, ondro ka’do nyà’do gi bi be owo. ¹⁶ “Ka’do inye, mojona lidri tu yauono ro ŋga eŋwani be ya? Ànya laba oso ŋgàgaŋwai se kayi ugu lori vo ŋgalogyero yasi ronye. Gboko alo ka driayo azi ri ekye: ¹⁷ ‘Mà’bi läri lagye ogyero te ämiri, oko mìle ko läri otone! Màŋgo loŋgo avo osero te ämiri, oko mìle ko liyine!’ ¹⁸ Ondro Yoane kikyite oko, nda nya ŋga kote ago mvu vino kote; ago ’dicini atate ekye: ‘Nda orivoya demona be nda ya!’ ¹⁹ Ondro Ŋgwa Lidri ro kikyite oko, nda nya ŋga te ago mvu ŋga te; ago ’dicini atate ekye: ‘Mindre mano ono nda orivoya ŋgaonya’ba yi ago vino umvu’ba yi, bereazi parata koto’bai ro ndi otapere’bai be ro!’ Caoko tavouni Lu ro aka’dana ŋgye doŋgona si.” ²⁰ Lidri ’ba’desii se Yesu koye talaro ro ndaro be ndra kigyesi ro etayidri kote ni takozi ànyaro yasi, ta’doro nda luku ’ba’desii kai te ekye: ²¹ “A’dona ’da rritiro miri Korazina! A’dona kpa rritiro miri Betesaida! Ondro ka’do talaro ro se ayebe ami ya kwoi ayegwo Tura ndi Sidona be ya, aba lidri gi lau ana soyi boŋgo guniya rote kyeno ago fofoyi torofo te andivo ànyaro lomvosi, ka’daza anjioko ànya etayidrite ni takozi ànyaro yasi! ²² Endaro mata ämiri ono Tu Vure rosi Lu ka’dana yauni ndra lidri Tura ndi Sidona be ro ri ndrani ämiri! ²³ Ago mi Kaperenauma! Inye’do mile andivo miro eŋgane vo’buyakuru ya ya? Evona mi ’da vuru gehena ya! Ondro ka’do talaro ro se ayebe miya kwoi aba ayegwo Sodomo ya, aba orina ndi le tu yauono ya! ²⁴ Ṛo ämiri unine endaro Tu Vure rosi Lu ka’dana yauni Sodomo ri ndrani miri!” ²⁵ Tu ana si Yesu atate ekye: “Täpi Opi vo’buyakuru ndi ’bädri be ro! Maye aro’boya miri tana nyaka’da ŋgase nyada’dobe ni tavouni’bai ndi tauni’bai be ri ono te tauniako’bai ri. ²⁶ Owo, Täpi, tase ono tana si mi ni a’done inye. ²⁷ “Täpi maro ozo ŋga cini te märi. ’Diaza alo ni Ŋgwa ko e’be gialo Täpi ayani ago ’diaza alo ni Täpi ko e’be gialo Ŋgwa ago ànya se Ŋgwa kabe onjina nda ka’dane ’do. ²⁸ “Nyìkyi mare vo amiro se cini rritiro ni ŋga läŋgyiekye uŋgyi ri ono, ago mozona loli ’da ämiri. ²⁹ Mìru juṛu maro ago mì’ba ami kyembe, ago mìni ta ni maresi, tana ma orivoya trwe ago mäyuro tori ya; ago nyùsuna loli ’da. ³⁰ Tana juṛu se mabe ozona ämiri uŋgyine ono orivoya rritiako, ago ŋgauŋgyiro maro orivoya läŋgyiako.”

¹ Ono vosi Yesu kate ugu aba ämvu inya ro yasi Sabata si oko; taeri’bai ndaro a’doyite täbiri ro, ago ànya etoyi drî inya ro okyena te ago kecina onyate. ² Ondro Parusii kondreyi tase ono te oko, ànya atayite Yesu ri ekye: “Mindre, taeri’bai miro kayi tase Ota leko oyene Sabata si ono oyena!” ³ Yesu zatadrite ekye: “Inye’do mìzi tase Dawidi koyebe tu ana si ’dooko nda ndi lidri ndaro be orivoya täbiri ro ana tana ṛoko ya? ⁴ Nda cite zo Lu roya, ago nda ndi lidri ndaro yibe nyàyi ambata se ozobe Lu ri ana te, se Ota voro ko ànyari onyane; se toto ni kohanii ri ambata ana onyane. ⁵ Kode mìzi ṛoko ni Ota Musa roya anjioko Sabata cini si kohanii se Yekalu ya iyi enjiyi ota Sabata rote, caoko ati kote taenji ro ànya lomvo ya? ⁶ Mata ämiri ono ŋga aza orivoya noŋwa para ndrani Yekalu ri. ⁷ Taegyi ka ata ekye: ‘Male yauni ayani, ko tori olo.’ Aba ondro ka’do mìni ta ono takacina gwo endaro, aba ämiri lidri se taenjiako ono kozine i’do, ⁸ tana Ŋgwa Lidri ro ni Opi Sabata ro.” ⁹ Yesu e’be vo ana te ago oyite zotaeriro ya. ¹⁰ Mano aza drí ciṛiciṛi robe orivoya zotaeriro ya lau. Lidri azaka orivoya lau se leyite Yesu kicune ta takozi oyero ta, ago ànya ejiyi nda te ekye: “Inye’do ’di edene Sabata si ṛo ko taenji yi Ota amaro lomvo ya?” ¹¹ Yesu zatadrite ekye: “Ondro ka’do alo aza amiro orivoya toto timele alodi be ago ondro aba ko’de gwo ’bu ociekye aza ya Sabata si, inye’do nda uruna anya ko ago ewena anya ko tesi ya? ¹² Lidri orivoya para ndrani timele ri! Ka’do inye Ota amaro le ämäri azi opane Sabata si.” ¹³ ’Dooko nda atate mano se drí ciṛiciṛi robe ana ri ekye: “Nyozo drí miro a’dwi.” Ndi nda ozo drí te a’dwi, ago go a’dote kado, kpa oso äzirina ronye. ¹⁴ ’Dooko Parusii foyite ago äyiyitate Yesu ufune. ¹⁵ Ondro Yesu keri tase äyibe nda lomvo ana tana te oko, nda oyite lozo ni vo ana yasi; ago lowa du soyite nda vo. Nda ede ’dise cini adravoro te ¹⁶ ago ozotate ànyari ko ta ndaro itine azii ri. ¹⁷ Nda yete inye tana ko’ba tase Lu katabe nebi Yesaya si ana ka’do robe ŋgye se ekye: ¹⁸ “Ruindu’ba maro ni no se manjibe ono, se mulube, ago ta ndaro si ma ni. Mezina Tori maro ’da nda dri, ago nda ayona vure maro tana ’da tu’dei ri. ¹⁹ Nda unina ko kala diṛine ago totrene, ago unina ko ugu totrene ata be litiŋwa drisi. ²⁰ Nda unina ko äjäyi se edirute ogone, kode lamba se kate ujwe ezwene. Nda uguna taoye ndi ’duro inye madale nda o’bana taŋgye lutu a’done ŋgaopeṛe be, ²¹ ago lidri cini o’banayi mi ànyaro ’da nda dri.” ²² ’Dooko lidri azaka eziyi mano aza te Yesu re se orivoya miako ago ni ata ko tana nda orivoya demona be. Yesu ede mano ana te, ago nda a’dote mbara be ta atane ago ndrevote. ²³ Lowa cini larote tase Yesu koyebe ana ta. Ànya ejiyitate ekye: “Inye’do ono a’dona ndi ni Ŋgwa Dawidi ro owo ya?” ²⁴ Ondro Parusii keriyi ta ono te oko, ànya zayitadrite ekye: “Nda ka demonai lofo toto tana dri’ba ànyaro Belezebula kani mbara ozo ndäri oyezana inye.” ²⁵ Yesu ni tase ànya kayibe ugu tavona usuna ana te, ta’dota nda atate ànyari ekye: “’Bädri aza se kabe andivo iro lonyi gboko ro se kabe kyila oye azi be ’do unina ko orine madaro. Ago ’ba’desii kode katidri aza se lonyi andivo iro te gboko ro se kabe kyila oye azi be ’do pereruna ’da. ²⁶ Kpa inye ondro ka’do gboko alo aza ka ugu kyila oye azi be miri ’bädri’ba Satani ro roya, anjioko lonyiru ṛote nja gboko ro ago pereruna ’da ndriŋwa! ²⁷ Nyà ata mìkye ma demonai lofo tesi tana Belezebula kani mbara ozo märi oyezana inye. Ka’do inye a’di kani mbara ozo oso’bai ami vo ri ànya lofoza tesi ya? Tase oso’bai ami vo kayibe oyena ka’date anjioko ami orivoya koziro! ²⁸ Ondro ka’do ma demonai lofo tesi Tori Lu rosi, ono ka’da ndi anjioko Miri ’Bädri’ba Lu ro ro ikyite nja ämidri. ²⁹ “Mano aza unina ko vo oŋgone zo mano mbäräkä aza roya lakaza ndaro urune e’be gialo ndäri mano se mbäräkä ’do embene käti, ’dooko nda o’dena gwo ŋga zo ndaro ro topane. ³⁰ “’Diaza se ko mabe ṛo orivoya endaro kyilaro mabe, ’diaza se pa ma ko kala ŋga ro koto si ṛo endaro ka ugu perena. ³¹ Tana ta ono ta mata ämiri, änina ndi lidri e’bene ta takozi aza rota ago tase aza undiro ànya kabe atana rota, oko nda se kabe tase undiro atana Tori Alokado lomvo änina ko ànya e’bene tana ro. ³² ’Diaza se kabe ta ata Ŋgwa Lidri ro lomvo änina ndi e’bene; oko nda se kabe ta ata Tori Alokado lomvo änina ko e’bene alona; ca yauono kode äduako. ³³ “Ka’dobe a’done doŋgo kado be beṛo miri a’done ce kado be, ondro ka’do mi orivoya ce koziro be, nya’dona doŋgo koziro be. Äni ce te beti doŋgo ro se anya kabe owana yasi. ³⁴ Ami inii ono; mìnina takado atane eŋwanye ondro ka’do ami orivoya undiro ya? Tana kala kani ŋgase orivoya twi ya ya ono atana. ³⁵ ’Di kado ka ŋgase kado nda be sina ya ndaro ya ’do lofona tesi; ago ’di kozi ka ŋgase kozi nda be sina ya ndaro ya ’do lofona tesi. ³⁶ “Ṛo ämiri unine endaro Tu Vure rosi ’dicini itina ta iro ’da, ata se cini koziro nda katabe ’do. ³⁷ Ayena vure miro ’da ata miro si; edrena tana ’da miri kode mi orivoya kadoro kode koziro.” ³⁸ ’Dooko miemba’bai azaka Ota ro ndi azaka Parusii robe atayite ekye: “Miemba’ba, màle miri talaro ro oyene.” ³⁹ Oko Yesu atate ekye: “Lidri tu ono ro orivoya koziro ago luako. Nyà ma eji talaro ro ta ya? Hwa! Talaro ro se ozone ämiri toto talaro ro nebi Yona ro ayani. ⁴⁰ Kpa oso Yona koribe kituna nätu ago ŋgäkyina nätu ya ti’bi ’desi roya ronye, kpa oso inye Ŋgwa Lidri ro orina ’da ’budri ya gyini zele kituna nätu ago ŋgäkyina nätu. ⁴¹ Tu Vure rosi lidri Ninewe ro oŋganayi ’da kuru ago kicunayi ami ’da, tana ànya etayidrite ni takozii ànyaro yasi ondro ànya keriyi taope Yona rote owo; ago endaro mata ämiri ono, ’diaza orivoya noŋwa para ndrani Yona ri! ⁴² Tu Vure rosi ’Bädri’ba Tokoro Sheba ro oŋgana ’da kuru ago kicuna ami ’da, tana anya ikyite ni ’bädri lozo yasi tavouni ’Bädri’ba Solomo ro erine, ago endaro mata ämiri ono, ’diaza orivoya noŋwa para ndrani Solomo ri! ⁴³ “Ondro tori undiro kofote tesi ni ’diaza yasi oko, ugu abate ’bädri gyiako yasi ugu vo uṛibe loliza. Ondro kusu vo kote oko, ⁴⁴ anya atate andivo iro ri ekye: ‘Magona ndi kovole zo maro ya vose mikyibe ni kigye si ana.’ Ndi anya gote kovole ago usu zo te awi, wäṛi, ago ŋga cini ara te nja kigye. ⁴⁵ ’Dooko anya fote tesi ago ezi torii azaka njidrieri te kozi parandra ni andivo anyaro ri, ago ànya ikyiyite ago riyite lau. Ago ori ’di ana ro kozina a’dote ndrani se käti ri. Ono ni tase kabe oye a’done lidri koziro tu ono ro ri owo.” ⁴⁶ Ondro Yesu drigba ugu ta atavoya lidri ri oko, endre ndaro ndi ädrupii ndaro be esayite. Ànya edreyite tesi, ànya leyi atane nda be. ⁴⁷ Ta’doro alo aza lidri se lau ana ro atate ndäri ekye: “Mindre, endre miro ndi ädrupii miro be orivoya edrevoya tesi, ànya leyi atane mibe.” ⁴⁸ Yesu zatadrite ekye: “A’di ni endre maro ya? Ago a’di ni ädrupii maro ya?” ⁴⁹ ’Dooko nda ka’davote taeri’bai ndaro dri ago atate ekye: “Mìndre! Kwoi ni endre maro ndi ädrupii maro be! ⁵⁰ Nda se kabe tase Täpi maro vo’buyakuru ya kolebe ndäri oyene oyena ni orivoya ädrupi maro, endreŋwa maro, ago endre maro owo.”

¹ Tu gi alo ana si Yesu fote ni zo yasi ago oyite fofo kala, nda rite lau miembane. ² Ago lowa se kotokalabe ndare ana orivoya amba, ta’dota nda cite toŋbo ya ago rite kigye, ago lowa edrete kototi. ³ Nda itita amba te ànyari lapidriopi si ekye: “Tu alo aza si mano aza fote kwari orine. ⁴ Ago ondro nda kate ugu kwari ori ämvu ya oko, azakana lo’dete liti drisi, ago arii ikyite ago nyayi ànya te. ⁵ Azakana lo’dete gyini gyirigyiri ro dri, se gyini na i’do amba. Kwari hwete ndriŋwa tana gyini na ciko gyuru. ⁶ Oko kitu kitute lekuru oko lunyi inya se koŋgabe to’diro ana te, tana paji nai ci kote gyuru, ago inya wite ndriŋwa. ⁷ Azaka kwari ro lo’dete kukyi cuku lako ago kukyi mbate ago vo inya te. ⁸ Oko kwari azaka lo’dete gyini kado ya ago wa inya te; azakana wate kama alo, azakana ’butenjidrialo, azakana ’butenätu.” ⁹ Ago Yesu ndetate ekye: “Dia, nyèri, ondro ka’do nya’do gi bi be owo.” ¹⁰ ’Dooko taeri’bai ikyiyite Yesu re ago ejiyi nda te ekye: “Ondro nyate ta iti lidri ri oko nya itina gwo lapidri si etaya?” ¹¹ Yesu zatadrite ekye: “Tauni tandrwi Miri ’Bädri’ba vo’buyakuru ro ro ozote ämiri, oko ozo kote ànyari. ¹² Tana nda se tauni be ozona ’da rigye ndra tana nda ka’do robe sina ndra; oko nda se tauni ako ca se nda be sina giṛiŋwa ono äruna ’da ni nda rigyesi. ¹³ Tase mabe ta ata lapidri si ta itivoya ànya ri tana ànya ndreyivo ndi driigye, oko ndreyi ko, ago ànya gayi bi ndi, oko ànya eriyi ko ago niyi ko. ¹⁴ Tana taäŋgu Yesaya ro tana di ànya, se ekye: ‘Lidri ono ugunayi taeri ndi, oko uninayi ko tana unine; ànya ugunayi voondre ndi, oko uninayi ko ondrene. ¹⁵ Tana drî ànyaro tote, ago ànya tisiyi bi ànyaro te, 2 ago seyi mi ànyaro te, ukyi, mi ànyaro ondre ŋga ’da, ago bi ànyaro eri ta ’da, ago drî ànyaro uni ta ’da, ago ànya etayidri ’da mare, ago mede ànya ’da.’ ¹⁶ “Oko ami, ami orivoya kandrakado be! Tana mi amiro ka voondre ago bi amiro ka taeri. ¹⁷ Mata ämiri ono tana nebii amba ago lidri amba Lu ro leyite ŋgase nyàbe ondrena ono ondrene, oko ànya ndreyi kote ago ŋgase nyàbe erina ono erine, oko ànya eriyi kote. ¹⁸ “Dia, nyèri, ago mìni lapidri kwariori’ba ro takacina. ¹⁹ Ànya se keriyi lazo ta Miri ’Bädri’ba Lu ro ro tana te oko kuniyi tana kote iyi orivoya oso kwari se kole’debe liti dri ’do ronye. Nda se aza koziro ono ikyi ru ata se ikyi’dibe ànya ya ono te. ²⁰ Kwari se ko’debe gyini gyirigyiriro dri ni ànya se kabe lazo uru dori yai’dwesi erina ànyari vosi owo. ²¹ Oko ci kote gyuru le ya ànyaro ya, ago ànya riyi ko madaro. Tana ondro rriti kode ’dieza kesate ta lazo rota oko, ànya e’beyite ndriŋwa. ²² Kwari se kole’debe kukyi cuku lako ni ànya se keriyi lazo te, oko ta milo’be ro ori ono rota ndi ta ŋgaamba lu robe vo lazo te, ago ànya wayi doŋgo kote. ²³ Ago kwari se aribe gyini kado ya ni ànya se kayibe lazo eri ago kayibe unina owo; ànya wayi doŋgo te, azakana wate kama alo, azakana ’butenjidrialo, ago azakana ’butenätu.” ²⁴ Yesu iti lapidri aza te ànyari ekye: “Miri ’Bädri’ba vo’buyakuru ro orivoya oso nonye, mano aza ri kwari kado te ämvu ndaro ya. ²⁵ Ŋgäkyi alo aza si ondro ’dicini ku’dute oko, kyila’baazi aza ikyite ago ri kurugyi te kyifo lako, ago oyite. ²⁶ Ondro kyifo kombate kate ofo oko, kurugyi kyi landre kpate. ²⁷ Ruindu’bai mano ana ro ikyiyite ndare ago atayite ekye: ‘’Desi, mirite kwari kado ayani ämvu ya; oko kurugyi ikyite ni eŋwaro ya?’ ²⁸ Nda zatadrite ekye: ‘Kyila’baazi aza ye ta ’do ni.’ Ànya ejiyi nda te ekye: ‘Inye’do mile ndi ämäri oyine kurugyi eŋgyene ya?’ ²⁹ Nda zatadrite ekye: ‘Hwa! Tana ka’dobe ugu kurugyi eŋgyene nyeŋgyena rukä kyifo ro ndi tro sina. ³⁰ Mi’ba kyifo ndi kurugyi be riti kombayi troalo madale tu jalia rosi. ’Dooko matana ’da losi’bai jalia ro ri kurugyi eŋgyene käti, ànya embene drîro drîro ago ànya ozane. ’Dooko a’dena gwo kyifo otone osone kyiro maro ya.’ ” ³¹ Yesu iti lapidri aza te ànyari ekye: “Miri ’Bädri’ba vo’buyakuru ro laba oso nonye. Mano aza ru keci ce musetada rote ago rite ämvu ndaro ya. ³² Se orivoya tipari ni keci cini risi, oko ondro kombate oko, a’dote ’desi para ndrani ŋga cini kyi’dikyi’diro risi, a’dote ce ro, ago arii ikyiyite moyi zoi ànyaro te gwoṛi anyaro yasi.” ³³ Yesu iti lapidri aza kpate ànyari ekye: “Miri ’Bädri’ba vo’buyakuru ro laba oso nonye. Toko aza ru loŋga te ago ŋga yana gwo koma nätu kyira rosi lakaza ya madale vona cini a’dote loŋga be.” ³⁴ Yesu emba ŋga te lapidri si, ŋgase cini kwoi tana itizana lowa ri, nda ata kote ànyari teinye lapidriopi ako. ³⁵ Nda yete nonye ko’ba tase nebi katabe ana ka’do robe ŋgye se ekye: “Ondro ma te ata ànyari oko, matana lapidriopi si; mitina ŋgase uniako ṛoni o’ba ’bädri rosi tana ’da ànyari.” ³⁶ Ondro Yesu ke’be lowa te ago kocite zo ya oko, taeri’bai ndaro ikyiyite ndare ago atayite ekye: “Nyiti takaci lapidri kurugyi ämvu ya ro tana ämäri.” ³⁷ Yesu zatadrite ekye: “Mano se kori kwari kado be ana ni Ŋgwa Lidri ro; ³⁸ ämvu ni ’bädri, kwari kado ni lidri se Miri ’Bädri’ba ro ro; kurugyi ni lidri Nda se Koziro ono ro; ³⁹ ago kyila’baazi se kori kurugyi be ana ni Kicu’ba owo. Jalia ni ädu ’bädri ro, ago losi’bai jalia ro ni malaikai. ⁴⁰ Kpa oso otokala kurugyi ro ago azabe asi si ’do ronye, ta gialo ono a’dona kpa inye ädu ’bädri rosi. ⁴¹ Ŋgwa Lidri ro ezona malaikai ndaro ’da otona kala ’dise cini kabe ’di o’ba takozi oyene ago ’dise cini kabe tase undiro oye ro ’da ni Miri ’Bädri’ba ndaro ro yasi, ⁴² ago avona ànya ’da le asi nyendero ya, vose liyi ndi sionya be orivoya kigye ana ya. ⁴³ ’Dooko lidri Lu ro eyina vo ’da oso kitu ronye Miri ’Bädri’ba Täpi ànyaro roya. Dia, nyèri, ondro ka’do nyà’do gi bi be owo! ⁴⁴ “Miri ’Bädri’ba vo’buyakuru ro laba oso nonye. Mano aza usu ŋgadriamba da’doda’doro te ämvu aza ya. Nda go ku drî na te, ago nda a’dote yai’dwesi, oyite ago logye ŋgase cini nda ka’dobe sina ana te, ago nda gote ago gye ämvu se ana te. ⁴⁵ “Miri ’Bädri’ba vo’buyakuru ro laba oso nonye. Mano aza ka ugu ŋgoŋgo liŋgyiekye uṛi, ⁴⁶ ago ondro nda koyi kusu se liŋgyiekye para ndra ana te oko, nda oyi logye ŋgase cini nda ka’dobe sina ana te, ago gye ŋgoŋgo se ana te. ⁴⁷ “Miri ’Bädri’ba vo’buyakuru ro laba kpa oso nonye. Ti’biuru’bai azaka voyi kyimba ànyaro te fofo ya ago ruyi ti’bi dritoto cini te. ⁴⁸ Ondro kyimba kogate twi oko, ànya eseyite kototi, ago riyite vuru ti’bi topene; kadona avote lakaza ya, se koziro iyi avo gwo cowa. ⁴⁹ A’dona kpa inye tu äduro si; malaikai oyina ’da ago lewena lidri se koziro iyi ’da ni lidri se kadoro iyi lakosi, ⁵⁰ ago avona ànya ’da le asi nyendero ya, vose liyi ndi sionya be orivoya kigye ana ya.” ⁵¹ Yesu eji ànya te ekye: “Mìni ŋgase kwoi tana ndi ya?” Ànya zayitadrite ekye: “Owo.” ⁵² Nda logotate ekye: “Ka’do inye, anjioko, miemba’bai cini Ota ro se a’dote taeri’bai ro Miri ’Bädri’ba vo’buyakuru roya orivoya oso ’bakuzupi se kabe ŋga to’di ndi ŋga uku be lofona tesi ni vo ŋgaodroro ndaro yasi ronye.” ⁵³ Ondro Yesu konde lapidri se kwoi opina te oko, nda e’be vo ana te ⁵⁴ ago nda oyite kovole ’ba’desi ’ba ndaro roya. Nda emba mi te zotaeriro ya, ago ànya se cini keriyi nda be ana laroyite. Ànya ejiyitate ekye: “Nda usu tavouni nonye ono teni eŋwaro ya? A’di ozo mbara ni ndäri talaro ro oyeza ya? ⁵⁵ Inye’do nda ṛo ko ni ŋgwa kyikyi ice ede ro roya? Inye’do endre ndaro koni Maria, ago Yakoba, Yosepa, Simona ndi Yuda be koni ädrupii ndaro owo ya? ⁵⁶ Inye’do endreŋwà cini ndaro ka ṛo ko ori noŋwa ya? Nda usu tase cini ono ni eŋwaro ya?” ⁵⁷ Ago ànya gayi nda tezo. Ago Yesu atate ànyari ekye: “Aro nebi te vo cini yasi, e’be gialo aro nda ko ’ba’desi ’ba modo ndaro ya ago katidri modo ndaro roya.” ⁵⁸ Nda ye talaro ro amba kote lau, tana ànya mayi kote nda ya.

¹ Tu ana si Eroda, miri’ba Galilaya ro eri liku Yesu ro tana te. ² Nda ititate dri’bai losiro ndaro ri ekye: “Endaro nda orivoya Yoane Bapatisi’ba owo, nda go adrite; ’bani nda orivoya mbara ono be talaro ro oyeza wo.” ³ Tana kyeno Eroda ozotate äru Yoane te, ago nda embe nda te ago ’ba nda te kamba ya. Nda ye ta ono te ta Erodia, toko ädrupi ndaro Filipo rota. ⁴ Tana Yoane Bapatisi’ba atate Eroda ri ekye: “Ko kado miri Erodia ogyene!” ⁵ Eroda lete nda ufune, oko nda orivoya turiro ni lidri Yudai ro ri, tana ànya niyite Yoane ni nebi yi. ⁶ Utitu Eroda rosi ŋguti Erodia ro to läri te lowa cini milesi. Tana si Eroda tawi ⁷ ta’dota nda ’ba tao’ba te anyari ekye: “Mäṛu ma te anjioko mozona ŋgase aza nyabe ejina ndi miri!” ⁸ Ta endre anyaro ro ronye anya eji nda te ekye: “Nyozo drî Yoane Bapatisi’ba ro yau noŋwa märi deŋbele si!” ⁹ ’Bädri’ba a’dote tusuro, oko tana ta tao’ba se nda ko’babe ŋgwazii ndaro kandra ana rota nda ozotate anjioko ŋgase anya kolebe ana ndi ozone. ¹⁰ Ta’doro nda täṛi drî Yoane rote kamba ya. ¹¹ Ezi drî ndaro te deŋbele si ago ozote ŋguti ana ri, ndi ugute endre anyaro ri. ¹² Taeri’bai Yoane ro ikyiyite, ŋgyiyi avo ndaro te, ago seyite; ’dooko ànya oyiyite ago itiyi tana te Yesu ri. ¹³ Ondro Yesu keri lazo Yoane rote oko, nda oyite ni nasi cite toŋbo ya ago oyite vo oriro andivo ndaro ro iṛe ya. Ondro lidri keri tana te oko, ànya e’beyi ’ba’desii ànyaro te ago soyite nda vo abayite pa si. ¹⁴ Ondro Yesu kefote ni toŋbo yasi oko, nda ndre lowa amba te, ago ya ndaro nite ànya lomvo, ago nda ede adravo’bai ànyaro te. ¹⁵ Tandrole ana si taeri’bai ndaro ikyiyite ndare ago atayite ekye: “Ono orivoya vocowa yi, ago kitu kate o’de, nyepere lidri ono ànya koyiyi robe ’baŋwà yasi ŋgaonya ogyene andivo ànyaro ri.” ¹⁶ Yesu zatadrite ekye: “Ànyari oyine i’do. Ami modo nyòzo ŋga aza ànyari onyane!” ¹⁷ Ànya zayitadrite ekye: “Noŋwa ono ama toto ambata nji be ago ti’bi ritu be.” ¹⁸ ’Dooko Yesu atate ekye: “Nyèzi ànya mare noŋwa.” ¹⁹ Nda ta lidri te orine vuru käyi dri, ’dooko nda ru ambata nji se ana te ndi ti’bi se ritu ana be, ndrevote kuru vo’buyakuru ya, ago ozo aro’boya te Lu ri. Nda wa ambata te ago ozo ànya te taeri’bai rigyesi, ndi taeri’bai ozo ànya te lidri ri. ²⁰ Vona cini nyate ago ojo ànya te. ’Dooko taeri’bai otoyi anjoko ŋgase ke’bebe ana rote koṛiga na ’butealo foritu twitwi. ²¹ Oti mànoago se konya yibe ana ro orivoya kutu nji (5,000), teinye ’ditoko ndi ŋgàga be otiako. ²² ’Dooko Yesu ’ba taeri’bai te ocine toŋbo ya ago oyine mile ndaro ya fofo tasi, ondro nda kadri lowa lidri ro perena owo. ²³ Ondro pere lidri ro vosi oko, nda andivo tute lutu dri mätune. Vouni ta Yesu te iṛe lau; ²⁴ ago saa ana si toŋbo te le kitoriya fofo roya, te pelepelero ni gbulä gyi ro ri, tana oli kate eli driigyero. ²⁵ Lakole saa nina ndi saa njidrialo ro ya vo ri iwivoya oko Yesu ikyite taeri’bai re, ka ezi aba gyi drisi. ²⁶ Ondro ànya kondreyi nda te abavoya gyi drisi oko, ànya a’doyite turituriro. Ànya atayite ekye: “’Do orivoya tori avo ro!” Ago ànya totreyite turi si. ²⁷ Dori Yesu atate ànyari ekye: “Nyà’do agoago be! Nyùturi ko! Ono ma owo.” ²⁸ ’Dooko Petero atate ekye: “Opi, ondro ka’do gi endaro mi owo oko, mi’ba ma ukyine mire gyi drisi.” ²⁹ Yesu zatadrite ekye: “Nyikyi!” Ndi Petero efote ni toŋbo yasi ago eto oyite gyi drisi Yesu re. ³⁰ Oko ondro nda kondre oli mbaraekye te oko, nda a’dote turiro ago eto ocite gyi zele, ago nda trete ekye: “Opi, mipa ma.” ³¹ Dori Yesu ozo drí te ago ru nda te anda ago atate ekye: “Mi orivoya taoma giṛiŋwa be! Nyolo’be mi te etaya?” ³² Ànya riti ciyite toŋbo ya, ndi oli edrete. ³³ ’Dooko taeri’bai se toŋbo ya ana mätuyi Yesu te. Ànya atayite ekye: “Endaro mi orivoya Ŋgwa Lu ro.” ³⁴ Ànya zayidri fofo rote ago ikyiyite wari Genesareta roya, ³⁵ ago lidri vo ana ro niyi Yesu te. Ago ànya zoyi lazo te lidri adravoro se cini gbikyi ’bädri ana yasi vo ndi eziyi ànya te Yesu re. ³⁶ Ànya lo’baruyite ndäri adravo’bai o’bane toto sidri boŋgo ndaro ro odone ayani, ago vona se cini kodobe ana edete kadoro.

¹ ’Dooko rukä Parusii ro ndi miemba’bai Ota robe ikyiyite ni Yerusalema yasi Yesu re ago ejiyi nda te ekye: ² “Tana e’di taeri’bai miro royi ta ŋgaembaro se zutui amaro embabe ko niya? Ànya joyi drí ànyaro kote käti ŋgaonyaza!” ³ Yesu zatadrite ekye: “Ago tana e’di miro Ota Lu ro ko ago nyà oso ta ŋgaembaro modo amiro ro vo niya? ⁴ Tana Lu atate ekye: ‘Miro täpi miro ndi endre miro be’, ago ‘nda se aza kabe täpi ndaro kode endre ndaro otrina beṛo ufune.’ ⁵ Oko nyà ’diemba mìkye ondro ’diaza ka’dote ŋga aza be nda unina ndi täpi ndaro kode endre ndaro opane sina, oko nyà ata mìkye: ‘Ono orivoya Lu ro’, ⁶ ko ndäri täpi ndaro orone liti ono yasi. Nyùsu tase Lu kabe atana kote, tana mìle osone ta ŋgaembaro modo amiro ro vo ayani. ⁷ Ami orivoya miomba’bai! Tase Yesaya käŋgube ta amiro ta ana, ta ndaro orivoya ŋgye! ⁸ ‘Lu atate ekye, lidri kwoi, kayi ma oro toto kala ànyaro si, oko endaro ya ànyaro orivoya lozo ni mare si. ⁹ Mätu oye ànyaro märi kadona i’do, tana ànya kayi ŋgaemba ota se lidri ko’babe ni si, osoago ànya orivoya ota maro!’ ” ¹⁰ ’Dooko Yesu zi lowa te ndare ago atate ànyari ekye: “Nyèri ago mìni tana! ¹¹ Ŋgase kabe oci lidri ya kala yasi ka koni lidri o’ba undiro; oko, ŋgase kabe efo ni ya yasi kani nda o’ba undiro.” ¹² ’Dooko taeri’bai ikyiyite ndare ago atayite ekye: “Inye’do mini gi’da tase nyatabe ono ’ba Parusii te a’done tusuro ya?” ¹³ Yesu zatadrite ekye: “Ŋgase cini Täpi maro vo’buyakuru ya kikyi’di kote ni ono eŋgyena ’da vuru. ¹⁴ Nyòlo’be mi ko ta ànyaro ta! Ànya orivoya lepe’bai miako miako’bai ro; ondro ka’do mano miako’ba aza kani miako’ba azi lepe, ànya riti o’denayi ndi ’bu ya.” ¹⁵ Petero atate ṛo ṛeṛe ekye: “Nyedretazevo ata ono ro ämäri.” ¹⁶ Yesu atate ànyari ekye: “Ami drigba kpa tauniako azii ronye. ¹⁷ Mìni ta ono tazevona koya? Ŋgase aza kabe oci ya lidri roya kala yasi cite kävuye ya ago go efote tesi. ¹⁸ Oko ŋgase kabe efo kala yasi ka efo ni ya yasi, ago kwoi ni ŋgase kabe lidri o’ba a’done undiro owo. ¹⁹ Tana ni ya ndaro yasi tavousu undiro ka efo se kani nda o’ba ’di ufune, taoyene toko kode ago drisi, ago ŋga azaka undiro loyene; ŋgatopane, kowe ogane, ago azii kyerene. ²⁰ Kwoi ni ŋgase kabe lidri o’ba undiro owo. Oko ŋgaonyane teinye drí miro ojoako oso ànya kayibe atana ämiri beṛo ojone ’do ronye; ’do ’ba lidri ko undiro.” ²¹ Yesu e’be vo ana te ago oyite wari se loto ’bakici Tura ndi Sidona robe lomvo ana ya. ²² Toko aza Kanana’ba ro se koribe wari ana ya ana ikyite ndare. Anya trete amba ekye: “Ŋgwa Dawidi ro! Mi’ba ya miro kuni malomvo! Tana ŋguti maro orivoya demona be ago anya ka rueza koziro.” ²³ Oko Yesu ata ta aza kote anyari. Ago taeri’bai ndaro ikyiyite ndare ago lo’bayirute ndäri ekye: “Mi’ba anya koyi! Tana anya ka ezi totre kporo be ama vo!” ²⁴ ’Dooko Yesu zatadrite ekye: “Ezo ma te toto timele se kujebe kai re, se ni lidri Yisaraele ro.” ²⁵ Oko toko ana ikyite ago ’dete nda pa. Anya atate ekye: “’Desi, mipa ma!” ²⁶ Yesu zatadrite ekye: “Ko kado ŋgaonya ŋgàga ro urune ago ovone kokyei ri.” ²⁷ Anya zatadrite ekye: “’Desi, ’do ṛo taŋgye yi; caoko ca kokye nya ŋgase ke’bebe se kabe layi ni tara’biza ’desi anyaro ro drisi ’do ndi.” ²⁸ Ta’dota Yesu zatadri anyaro te ekye: “Mi orivoya toko taomaekye yi! Ŋgase milebe ono ayena ndi miri.” Ago dori ede ŋguti anyaro te ndriŋwa ²⁹ Yesu e’be vo ana te ago oyite Fofo Galilaya ro kala. Nda tute lutu dri ago rite vuru. ³⁰ Lidri lowaro ikyite ndare, ànya eziyi ka’boi, miako’bai, gboto’bai, tuṛui, ndi lidri amba adravo azaka be te, ànya ’bayi ànya te Yesu pa; ago nda ede ànya te. ³¹ Lidri kondre tuṛui te atavoya, ede gboto’bai te, ka’boi kate ugu aba, ago miako’bai kate ugu voondre oko ànya laroyite; ago ànya räṛuyi Lu Yisaraele rote. ³² Yesu zi taeri’bai ndaro te ndare ago atate ekye: “Ma tusuro ta lidri kwoi rota, tana ànya riyite mabe u’duna te nätu ago yauono ànya te ŋga aza ako onyane. Male ko ànya o’bane oyine teinye ŋgaonya ako, tana ukyi inini ufu ànya ’da liti ya oyivoya ’bäru.” ³³ Taeri’bai ejiyi nda te ekye: “Mùsuna ŋgaonya amba ni eŋwaro vocowa ono ya onyane lowa ono riya?” ³⁴ Yesu ejitate ekye: “Ami orivoya duŋguṛu ambata robe moda ya?” Ànya zayitadrite ekye: “Njidrieri, ndi ti’bi giṛiŋwa fereŋwa be.” ³⁵ Ta’dota Yesu ta lowa te orine vuru gyini dri. ³⁶ ’Dooko nda ru duŋguṛu ambata ro se njidrieri ana te ndi ti’bi se ana be, ozo aro’boya te Lu ri, wa ànya te, ago ozote taeri’bai rigyesi, ago taeri’bai ozote lidri ri. ³⁷ Ànya cini nyayite ago ojo ànya te. ’Dooko taeri’bai otoyi ’bolotona se ke’bebe ana te koṛiga na njidrieri twitwi. ³⁸ Oti mànoago se konyabe ana ro orivoya kutu su (4,000), ati ’ditoko ndi ŋgàga be ko. ³⁹ ’Dooko Yesu pere lidri te, cite toŋbo ya, ago oyite wari Magadana roya.

¹ Rukä Parusii ro ndi Sadukei robe ikyiyite Yesu re leyi nda ojone, ago ànya ejiyi nda te talaro ro oyene ànyari, ka’daza anjioko nda ni Lu resi. ² Oko Yesu zatadrite ekye: “Ondro kitu kate ugu oci oko nyà ata mìkye: ‘Vo kaoye a’done kadoro ämäri, tana vokuru orivoya okaro.’ ³ Ago kyenoŋboci si nyà ata mìkye: ‘’Bu kaoye u’dine, tana vokuru orivoya läwura ro ago uniro.’ Mìnina ndi a’do oli ro unine vo ondre si vokuru ya, oko mìnina ko taka’daro tu kwoi ro takacina unine! ⁴ Lidri tu ono ro orivoya koziro ago luako! Nyà ma eji talaro ta ya? Hwa! Talaro ro se ozone ämiri toto talaro ro Yona ro ayani.” Ta’dota nda e’be ànya te ago oyite. ⁵ Ondro taeri’bai kozayite fofo tasi oko, ànya ijeyi ta ambata uru rote. ⁶ Yesu atate ànyari ekye: “Mìmba ämidri, nyàgaga ami ni loŋga Parusii ndi Sadukei be ro ri.” ⁷ Ànya etoyi atate iyivoya ekye: “Nda ko’de be ta ono atane inye tana mèzi ambata ko’de.” ⁸ Yesu ni tase ànya kayibe ugu atana ana te, ndi nda eji ànya te ekye: “Tana e’di nyà ugu ata amivoya ta a’doro ambata ako ono rota niya? Ami orivoya taoma giṛiŋwa be! ⁹ Ami drigba tauni ako ya? Tase mawa duŋguṛu ambata nji robe mànoago kutu nji (5,000) ri ana mìyi tana ko ya? Koṛiga na se nyòtobe twitwi moda ya? ¹⁰ Ago ambata se duŋguṛu na njidrieri mànoago kutu su (4,000) ri ’do ni? Koṛiga na nyòtobe twitwi moda ya? ¹¹ Tana e’di mì’de be ko unine ekye ma ko ta ambata ro atana ayani ämiri ni ya? Nyàgaga andivo amiro ni loŋga Parusii ro ndi Sadukei be ro ri!” ¹² ’Dooko taeri’bai niyite anjioko nda ka ko ànya emba andivo ànyaro gagane ni loŋga se abe osona ambata ya ri oko ni ta ŋgaembaro Parusii ndi Sadukei be ro risi ayani! ¹³ Yesu oyite wari se lototi ’ba’desi Kaisaria Filipo ro ro ana ya, ni nasi nda eji taeri’bai te ekye: “Lidri kabe ata ekye, Ŋgwa Lidri ro ni a’di owo ya?” ¹⁴ Ànya zayitadrite ekye: “Rukäna ka ata ekye, mi orivoya Yoane Bapatisi’ba owo.” “Azakana ekye mi orivoya Eliya owo, ago azakana ekye mi orivoya Yeremaya owo kode alo aza nebii ro owo.” ¹⁵ Nda eji ànya te ekye: “Oko ami ni? Nyà ata mìkye ma a’di owo ya?” ¹⁶ Simona Petero zatadrite ekye: “Mi ni Mesiya, Ŋgwa Lu lidriidriro ro owo.” ¹⁷ Yesu zatadrite ekye: “Äṛu ka’do miri, Simona ŋgwa Yona ro! Tana taŋgye ono ikyi kote miri ni a’do lidri ro resi, oko ozote miri ṛo dori ni Täpi maro vo’buyakuru ya resi. ¹⁸ Ago mata miri yauono Petero; mi orivoya kuni yi ago mabena känisa maro ’da kuni ono dri, odra unina ko opene ṛe alona. ¹⁹ Mozona ŋga käläsi upiro Miri ’Bädri’ba vo’buyakuru ro ’da miri; ŋgase nyabe embena ’bädri ya embena kpa vo’buyakuru ya, ago ŋgase nyabe onjina ’bädri ya onjina kpa vo’buyakuru ya.” ²⁰ ’Dooko Yesu ta taeri’bai ndaro te ko ta itine ’diaza alo ri ekye nda ni Mesiya owo. ²¹ Ni tu gi ana si Yesu eto ta itite ṛo ŋbelero taeri’bai ndaro ri ekye: “Beṛo märi oyine Yerusalema ya ago rueza amba usune ni ’di’desii, kohanii ’desi, ndi miemba’bai Ota robe resi. Äfuna ma ’da, oko u’du nina si oko madrina ’da.” ²² Petero ru nda te pere ago eto nda luku te, nda atate ekye: “Lu ko’ba ta ’do ka’do ko Opi, ta ’do unina ko a’done inye miri alona.” ²³ Yesu zamite ago atate Petero ri ekye: “Minaru pere ni mare si Satani! Nya edre liti maro dri ma lagane, tana tavousu miro kwoi ikyi koni Lu resi, oko ni lidri resi.” ²⁴ ’Dooko Yesu atate taeri’bai ndaro ri ekye: “Ondro ka’do ’diaza kolete o’dene mavo, beṛo ndäri ta andivo ndaro ro ijene, kuŋgyi taka ndaro, ago keso mavo. ²⁵ Tana nda se kole adri modo ndaro ro opane ijena anya ’da; oko nda se kabe adri ndaro ijena ta maro ta usuna anya ndi. ²⁶ Ondro ka’do ’diaza kuru ’bädri cini gica oko kije adri iro gwo inye ’do nda usuna ŋga aza gindi ya? Endaro nda unina ko ŋga aza usune! Nda unina ko ŋga aza ozone ogone adri ndaro usuza. ²⁷ Tana Ŋgwa Lidri ro kaoye ikyine ’desi Täpi ndaro roya malaikai ndaro be, ’dooko nda ozona ŋga ’da ’dicini ri oso taoye ’dialo ro ronye. ²⁸ Endaro mata ämiri ono, azakana orivoya noŋwa se uninayi ko odrane madale ànya ondrenayi Ŋgwa Lidri ro lutu ikyivoya ’Bädri’ba ro.”

¹ U’du njidrialo vosi oko, Yesu ru Petero, Yakoba, ndi Yoane ädrupi Yakoba robe te nda be ago ugu ànya te le kuru ’bereŋwa ogwaekye dri ago ànya riyite lau iṛe. ² Ago ànya kondreyi oko, beti Yesu ro tozarute, militi ndaro a’dote läguläguro oso kitu ronye, ago boŋgo ndaro a’dote onjero whiya. ³ ’Dooko taeri’bai se nätu kai ndreyi Musa ndi Eliya be te kayi ugu ata Yesu be. ⁴ Ta’dota Petero atate Yesu ri ekye: “Opi, orivoya kado ämäri a’done noŋwa aba ondro ka’do mile gwo, mamona mutuguṛi nätu noŋwa, alodi miri, alodi Musa ri, ago alodi Eliya ri.” ⁵ Ondro nda kadri ugu ata oko, ’dikolo läguläguro ikyi tako ànya te, ago atate ni ’dikolo yasi ekye: “Ono ni Ŋgwa modo maro se mulu tawi ono owo, ta ndaro si ma ni; nyèri ta ndaro!” ⁶ Ondro taeri’bai keriyi ata ana te oko, ànya a’doyite turituriro ago ’deyite militi si vuru gyinidri. ⁷ Yesu ikyite ànyare ago do ànya te atate ekye: “Mìŋga kuru nyà’do ko turiro.” ⁸ Ta’dota ànya kondreyivote kuru oko ànya ndreyi ’diaza kote lau, oko toto Yesu ayani. ⁹ Ondro ànya kayite efo vuru ni ’bereŋwa drisi oko, Yesu ta ànya te ekye: “Nyìti rulofo se mìndrebe ono tana ko ’diaza ri madale eŋga Ŋgwa Lidri ro lutu ni avo yasi.” ¹⁰ ’Dooko taeri’bai ejiyi Yesu te ekye: “Tana e’di miemba’bai Ota ro kayi ata ekye beṛo Eliya ri ikyine käti niya?” ¹¹ Yesu zatadrite ekye: “Ṛo Eliya ri ikyine käti, ago nda o’bana ŋga cini ’da nja. ¹² Oko mata ämiri ono Eliya ikyi ṛote nja oko lidri ni nda kote, oko yeyi nda te oso tana kusi ànya be ronye. Ànya oyenayi Ŋgwa Lidri ro kpa koziro oso inye.” ¹³ ’Dooko taeri’bai ni gwo anjioko nda ka ta Yoane Bapatisi’ba ro itina ayani ànyari. ¹⁴ Ondro ànya kegoyite lowa re oko, mano aza ikyite Yesu re, sokayate nda kandra, ¹⁵ ago atate ndäri ekye: “’Desi, mi’ba ya miro kuni ŋgwa maro lomvo! Nda orivoya karipapa be ago ye nda te koziro ka nda ovo ondoalo asi ya ago gyi ya. ¹⁶ Mezi nda te taeri’bai miro re, oko ànya niyi kote nda edene.” ¹⁷ Yesu zatadrite ekye: “Ami orivoya taomaako ago lidri kozi yi! Marina ami yibe tuna moda ya? Marina ami be tuna mu’du eŋwanye ya? Nyezi ŋgaga ’do mare noŋwa!” ¹⁸ Yesu ta demona te, ago anya fote ni ŋgaga ana yasi, ago ede nda te dori ndriŋwa. ¹⁹ ’Dooko taeri’bai ikyiyite Yesu re iṛe ago ejiyi nda te ekye: “Tana e’di mä̀ni kote demona lofone tesi niya?” ²⁰ Yesu zatadrite ekye: “Tana ami orivoya taomaako amba. Endaro mata ämiri ono ondro ka’do nyà’dote taoma be ’desi oso keci ce musetada ro ronye, mìnina ndi atane ’bereŋwa ono ri mìkye: ‘Nyoyi ni nosi le lau!’ Ago anya oyina ndi. Mìnina ndi ŋga aza oyene!” ²² Ondro taeri’bai cini kikyiyite troalo Galilaya ya oko, Yesu atate ànyari ekye: “Ate oye Ŋgwa Lidri ro ozone drí lidri roya, ²³ ago ànya ufunayi nda ’da; oko u’du nina si oko nda adrina ’da.” Taeri’bai a’doyite tusuro amba. ²⁴ Ondro Yesu ndi taeri’bai ndaro be kikyiyite Kaperenauma ya oko, koto’bai parata yekalu ro driutwero ikyiyite Petero re ago ejiyitate ekye: “Inye’do miemba’ba amiro ka ndi parata driutwero yekalu ro ozona ya?” ²⁵ Petero zatadrite ekye: “Nda ka ozona.” Ondro Petero kocite zo ya oko, Yesu ata ṛo käti ekye: “Simona tavousu miro orivoya eŋwanye ya? A’di kani parata lakaza driutwero kode parata driutwero ozona ’bädri’bai ’bädri ono ro riya? ’Bädri kuzupii kode atrai ya?” ²⁶ Petero zatadrite ekye: “Atrai.” Yesu logotate ekye: “Ka’dobe inye, anjioko ’bädri kuzupii ozoyi ŋga ko. ²⁷ Oko male ko lidri kwoi oyene koziro. Ka’do inye nyoyi fofo ya ago mivo moŋgo gyi ya, nyese ti’bi se miyibe käti ’do, ago nyusuna parata ’da kala na ya lagyena ojona parata driutwero yekalu ro maro ndi miro be ndi. Miru ago nyozo ànya parata amaro driutwero ro.”

¹ Tu gi ana si taeri’bai ikyiyite Yesu re, ejiyitate ekye: “A’di ni parandra Miri ’Bädri’ba vo’buyakuru ro ya ya?” ² Ta’dota Yesu zi ŋgagaŋwa aza te, ago edre nda te ànya kandra, ³ ago atate ekye: “Endaro mata ämiri ono ocine ämiri Miri ’Bädri’ba vo’buyakuru roya i’do alona, e’be gialo nyòtozaruna ago nyà’dona oso ŋgàgaŋwai ronye. ⁴ ’Dise parandra Miri ’Bädri’ba vo’buyakuru roya ni nda se kabe andivo iro logona oso ŋgagaŋwa ono ronye ’do. ⁵ Ago ’dise kabe ŋgagaŋwa oso ono ronye uruna ävuru maro ya, ka ma uru. ⁶ “Ondro ka’do ’diaza ko’ba alo aza se giṛiŋwà kwoi rote taoma ndaro ma ya ijene, ni kadopara kuni ’desi inya uyiro embene ’dina ’do kyembe ago nda imvune gyi’desi ociekye ya. ⁷ Orivoya rritiro ŋgase ’bädri ya kabe lidri o’ba taoma ànyaro ijene ri! Ŋga nonye ono ondoalo ka a’do, oko orivoya rritiro nda se kabe ànya o’ba a’done ri! ⁸ “Ondro ka’do drí miro kode pa miro kani mi o’ba takozi oyene, nyätäṛi anya ätu ago mivo anya cowa! Ni kadopara miri ocine adri ya drí alodi kode pa alodi ako ndrani mi ovone drí riti kode pa riti be asi äduako ya ri. ⁹ Ago ondro ka’do mi miro kani mi o’ba takozi oyene, nyewe anya tesi ago mivo cowa! Ni kadopara miri ocine adri ya mi alodi be ndrani mi ovone mi riti be asi gehena roya ri. ¹⁰ “Mìndre kado aba nyàmawo alo aza se giṛiŋwà kwoi ro ko. Ma ata ämiri ono, malaikai ànyaro vo’buyakuru ya, orivoya ondoalo Täpi maro vo’buyakuru ya kandra. ¹² “Mano aza se timele kama alo be ago alodi ànyaro kuje gwo, nyùsu amiro be nda oyena e’di ya? Nda e’bena azaka se ’butenjidriesu fonjidriesu kabe ŋgaonya loto lutu pa gwo ago oyina gwo timele se kujebe ana uṛine. ¹³ Endaro mata ämiri ono, ondro nda kusu anya te oko, nda a’dote yai’dwe amba si ta timele se alodi ono rota ndrani se ’butenjidriesu fonjidriesu se kuje kote ana ri. ¹⁴ Kpa oso inye Täpi amiro se orivoya vo’buyakuru ya ono leko alo aza se giṛiŋwà kwoi ro ri ujene. ¹⁵ “Ondro ka’do ädrupi miro koye takozi aza te milomvo, nyoyi ndare ago nyaka’da taenji ndaro ndäri. Oko nyà’do ri sina, toto amivoya. Ondro ka’do nda keri mi te, anjioko migo nyologo ädrupi miro te kovole. ¹⁶ Oko ondro ka’do nda keri mi kote, miru ’dialo kode ritu aza tro mibe, tana vure taenjina ’do ro edretazevona robe tazevoedre’bai ritu kode amba rosi, oso taegyi katabe ronye. ¹⁷ Ago ondro ka’do nda koletezo ta ànyaro erine, ’dooko nyiti ta cini ’do känisa ri. Äduro, ondro ka’do nda kogatezo känisa erine, ’dooko miye nda oso ’dise Lu uniako’ba ronye kode parata koto’ba ronye. ¹⁸ “Ago ma ata ämiri ono; ŋgase nyàbe embena ’bädri ya embena kpa vo’buyakuru ya, ago ŋgase nyàbe onjina ’bädri ya onjina kpa vo’buyakuru ya. ¹⁹ “Ma ata ämiri kpa to’di; ondro ami ritu se ’bädri ya ono mìletadri ŋgase nyàbe mätu tana ro ono rote, Täpi maro se orivoya vo’buyakuru ya ono oyena ndi ämiri. ²⁰ Tana vose ’di ritu kode nätu kabe kalaoto kigye ävuru maro ya, ma orivoya lau ànya yibe.” ²¹ ’Dooko Petero ikyite Yesu re ago ejitate ekye: “Opi, ondro ka’do ädrupi maro kagi ugu takozi oye märi, me’bena nda perena moda ya? Perena njidrieri ya?” ²² Yesu zatadrite ekye: “Hwa, ko perena njidrieri, oko pere ’butenjidrieri ro njidrieri. ²³ Tana Miri ’Bädri’ba vo’buyakuru ro laba oso nonye. Tu aza si ’bädri’ba aza ratate oti parata ruindu’bai ndaro ro timone. ²⁴ Nda ketote oko oloci alodi aza ànyaro te nda kandra se orivoya yuŋgu parata tere’benyero ndaro be. ²⁵ Ruindu’ba se ana teinye ŋga aza ako yuŋgu ndaro logoza, ’dooko ’bädri’ba ana ozotate nda ogyene iyeäṛi ronye, toko ndaro, ŋgàga ndaro, ndi ŋgase cini nda ka’dobe sina ana be, yuŋgu logoza. ²⁶ Ruindu’ba se ana sokayate ’bädri’ba kandra, ejitate ekye: ‘Mi’ba ya miro kuni malomvo, mologona ŋga cini ’da kyiti miri!’ ²⁷ ’Bädri’ba ana a’dote tusuro ta ndaro ta, ta’doro nda e’be nda te ta yuŋgu rota ago ’ba nda te oyine. ²⁸ “’Dooko mano ana oyite ago ’bedrite alo aza ruindu’baazi ndaro se kuru yuŋgu parata fereŋwa rote ni nda rigye ana be. Nda ru nda te mbarasi ago eto gboro ndaro ujena te atate ekye: ‘Nyozo ŋga maro se mirube ’do!’ ²⁹ Ruindu’baazi ndaro ’dete vuru ago lo’barute nda ri ekye: ‘Mi’ba ya miro kuni malomvo, mologona vona ’da kpeye!’ ³⁰ Oko nda gatezo, ago vo nda te kamba ya madale nda logona yuŋgu lutu. ³¹ Ondro ruindu’bai azi kondreyi tase ka’dobe ana te oko, ànya a’dote tusuro ago oyiyite ’bädri’ba se ana re, ago itiyi tase cini ana te ndäri. ³² Ta’dota nda zi ruindu’ba se ana te nda kandra, atate ekye: ‘Mi ruindu’ba koziro yi! Me’be mite ŋgase cini mirube amba ni märigyesi ono ta, oso se nyeji mabe ronye. ³³ Ago beṛo miri a’done yauni be ruindu’baazi miro ri, kpa oso ma’dobe yauni be miri ono ronye.’ ³⁴ ’Bädri’ba ana a’dote kyilaro ndra, ago nda vo ruindu’ba se ana te kamba ya eza robe madale nda logona yuŋgu cini lutu kovole.” ³⁵ Yesu ndetate ekye: “Täpi maro se orivoya vo’buyakuru ya ono oyena ta kpa inye ami cini ri ondro ka’do nyè’be ädrupi amiro kote ya amiro ya owo.”

¹ Ondro Yesu konde ta kwoi atana te oko, nda e’be Galilaya te ago oyite wari Yuda roya Golo Yaradene tasi. ² Lowa du sote nda vo, ago nda ede ànya te lau. ³ Rukä Parusii ro ikyiyite ndare ago ojoyite ta ndaro ojone ugu taeji si ekye: “Inye’do Ota letadri gindi mano aza ri toko ndaro onjine oso nda kolebe ronye ta ta azaka rota ya?” ⁴ Yesu zatadrite ekye: “Inye’do mìzi taegyi ṛo ko se katabe ekye ṛoni etosi O’ba’ba ’ba lidri ni agoro ago tokoro ya? ⁵ Ago Lu atate ekye: ‘Tana ta’doro manoago e’bena täpi ndaro ndi endre be ’da ago a’dona gwo kpokoṛo alo toko ndaro be, ago se ritu ono a’dona gwo lomvo alodi ro.’ ⁶ Ta’dota ànya kote tona ritu, oko te lomvo alodi yi. Ka’do inye beṛo ko mano aza ri ’dise Lu kodro’bete troalo ono lewene.” ⁷ Parusii ejiyi nda te ekye: “Ka’do inye, Musa ko’debe ota ozone manoago ri waraga ruonjiro ozone toko ndaro ri anya onjine etaya?” ⁸ Yesu zatadrite ekye: “Musa ozotate ämiri ’ditoko amiro onjine tana orivoya rritiro ami embane. Oko etosi ko oso inye. ⁹ Ka’do inye, mata ämiri ono, ’diaza se kabe toko ndaro onjina ta ta aza rota oko ko ta’diriako ta, anjioko yetate toko drisi ondro ka’do nda kogye toko aza te owo.” ¹⁰ Taeri’bai ndaro atayite ndäri ekye: “Ondro ka’do ta ka’do bete a’done inye lakole manoago ro ndi toko ndaro be ya, ni kadopara ko ruogyene.” ¹¹ Yesu zatadrite ekye: “Ta ŋgaembaro se ono tana di ko ’di cini, oko toto ànya se Lu kozobe ànyari ’do ayani. ¹² Tana tase lidri ko’de be ko ruogyene tana orivoya ba toto; azaka ätibe ṛo orine inye; azaka lidri eŋgye ànya ni roti ro; ago azaka gyeru ko ta Miri ’Bädri’ba vo’buyakuru ro rota. Mi’ba nda se kuni ndi ta ŋgaembaro ono urune koye ndi inye.” ¹³ Lidri azaka eziyi ŋgàga giṛiŋwa te Yesu re ndäri drí ndaro o’bane ànya lomvo ago mätune ànya ta, oko taeri’bai koziyi lidri te. ¹⁴ Yesu atate ekye: “Mì’ba ŋgàga giṛiŋwa ikyine mare, ago nyàlaga ànya ko zo, tana Miri ’Bädri’ba vo’buyakuru ro ni se oso nonye kwoi ro.” ¹⁵ Nda ’ba drí ndaro te ànya lomvo ’dooko oyite. ¹⁶ Tu aza si mano aza ikyite Yesu re, nda ejitate ekye: “Miemba’ba, tase kado beṛo märi oyene a’doza adri äduako be ni e’di ya?” ¹⁷ Yesu zatadrite ekye: “Nya ma eji ta tase kado rota etaya? ’Di Alodi orivoya se toto ni kado. Nyäti ota ondro ka’do mile gindi ocine adri ya owo.” ¹⁸ Nda ejitate ekye: “Ota eŋwani ya?” Yesu zatadrite ekye: “Mifu läfu ko, miye ta ko ago kode toko drisi; nyukugu ŋga ko; nyikicu ’diaza ko kowe si; ¹⁹ miro täpi miro ndi endre miro be; ago nyulu oriazi miro oso nyabe andivo miro lu ronye.” ²⁰ Agoanji se ana zatadrite ekye: “Maro ota se cini kwoi te. Oko azana se märi oyene ni eŋwani ya?” ²¹ Yesu atate ndäri ekye: “Ondro ka’do milete a’done kadoro, nyoyi ago migye ŋgase cini nya’dobe sina ono ago nyozo parata na ati’bai ri, ’dooko nya’dona ’da ŋgadriamba be vo’buyakuru ya, ’dooko nyikyi ago miso mavo.” ²² Ondro agoanji ana keri ta ono te oko, nda oyite tusu ro, tana nda orivoya ŋgadriamba be. ²³ ’Dooko Yesu atate taeri’bai ndaro ri ekye: “Endaro mata ämiri ono; a’dona ndi rritiro amba lidri se ŋgaamba be ri ocine Miri ’Bädri’ba vo’buyakuru roya. ²⁴ Medelena kpa to’di; orivoya rritiako gamele ri ocine mi libira ro yasi ni mano ŋgaamba’ba ri ocine Miri ’Bädri’ba Lu roya.” ²⁵ Ondro taeri’bai keriyi ta ono te oko, ànya laroyi tawi. Ànya ejiyitate ekye: “Ka’do inye, apana a’di aya ya?” ²⁶ Yesu ndrevote ŋgye ànya dri ago zatadrite ekye: “Ono orivoya rritiro lidri ri oko Lu ri ŋga cini orivoya rritiako.” ²⁷ ’Dooko Petero ata ṛo ṛeṛe ekye: “Mindre, mè’be ŋga cini te ago màsote mivo. Oko ŋgase mà’dona sina e’di ya?” ²⁸ Yesu atate ànyari ekye: “Endaro mata ämiri ono, ondro Ŋgwa Lidri ro korite giti ’desi ndaro ro dri Tu To’di ana ya oko, ’dooko ami se ’butealo foritu oso’bai mavo ono mìrina kpa ’da gitii dri, ’bakalai ’butealo foritu Yisaraele ro mirine. ²⁹ Ago vona cini se kabe zoi kode ädrupii kode endreŋwà kode täpi kode endre kode ŋgàga kode ämvui e’bena ta maro ta usuna ŋga perena kama alo ndra ago ozona adri äduako ’da ndäri. ³⁰ Oko ambana se yau käti ono a’dona ’da äduro, ago ambana se yau äduro ono a’dona ’da käti.

¹ “Miri ’Bädri’ba vo’buyakuru ro laba oso nonye. Tu alo aza si mano aza oyite kyenoŋboci lidri azaka läzine losi oyene parata dri ämvu kono ro ndaro ya. ² Nda letadrite päläti tu alo ro ozone ànyari, anjioko tu alo parata mo’di ro alodi, ago zi ànya te losi oyene ämvu kono ro ndaro ya. ³ Nda oyi kpate vo ŋgalogyero ya saa nina si ago ndre lidri azaka te edrevoya lau losi oyeako, ⁴ ago nda atate ànyari ekye: ‘Ami nyòyi kpa losi oyene ämvu kono ro maro ya, ago mozona päläti tu alo ro ’da ämiri.’ ⁵ Ta’dota ànya oyiyite. ’Dooko saa njidrialo si ago saa njidriesu si nda ye ta alo ono kpate oso inye. ⁶ Ago te aba oso saa ’butealo foalo ronye oko nda oyite vo ŋgaogyero ya ago nda ndre lidri azaka ’du edrevoya lau. Nda eji ànya te ekye: ‘Tana e’di miri gwo noŋwa kituzwi teinye losi oyeako niya?’ ⁷ Ànya zayitadrite ekye: ‘’Diaza läzi ama kote.’ Nda atate ànyari ekye: ‘Dia ka’do inye, nyòyi losi oyene ämvu kono ro ya.’ ⁸ “Ondro tandrolero oko kuzupi atate kundueŋga’ba ndaro ri ekye: ‘Mizi losi’bai ago nyozo päläti ànyaro tu alo ro, nyeto ni ànya se äläzibe äduro yasi kosa gwo le ànya se äläzibe käti ya.’ ⁹ Lidri se ketoyi losi be saa ’butealo foalo si ozote parata mo’di ro alodi ayani vona cini alo alo ri. ¹⁰ Ago ondro lidri se äläzibe käti kikyiyite iro urune oko, ànya kusuyi iro be ekye yiruna ndra, oko ozo parata mo’di ro alodi te vona cini alo alo ri. ¹¹ Ànya ruyi parata ànyaro te oko ànya njuyi ago te kuzupi ämvu kono ro lomvo. ¹² Ànya atayite ekye: ‘Äläzi lidri kwoi te äduro yeyi losi toto saa alodi, oko a’ba màye losi te kitu eme ono dri zwi; caoko nyozo päläti te ànyari ojoojoro oso nyozobe ämäri ronye!’ ¹³ “Kuzupi ämvu kono ro zatadrite alo ànyaro ri ekye: ‘Bereazi, nyeri, moco mi ko’de. Inye’do miletadri ṛo koni losi tu aloro oyene parata alodi mo’di ro dri ya? ¹⁴ Miru päläti miro ago nyoyi. Male päläti ozone mano se äläzibe äduro ono ri kpa oso mozobe miri ronye. ¹⁵ Inye’do ma ṛoko taŋgye be ta oyene oso malebe ronye parata modo maro ro siya? Kode ya amiro kwo tana mabe orivoya kado ono roya?’ ” ¹⁶ Ago Yesu atate ekye: “Tana ànya se äduro a’dona ’da käti ago ànya se käti a’dona ’da äduro.” ¹⁷ Ondro Yesu kate ugu oyi Yerusalema ya oko, nda ru taeri’bai ’butealo foritu te pere ago atate ànyari iṛe ondro ànya kayite ugu aba owo. ¹⁸ Nda atate ànyari ekye: “Nyèri, mà te ugu oyi Yerusalema ya, vose ozona Ŋgwa Lidri ro ’da kigye kohanii ’desi ndi miemba’bai Ota robe ri ana ya. Ànya openayi vure ndaro ’da odrane ¹⁹ ago ozonayi nda ’da Atrai ri, ugunayi nda ’da ago o’binayi nda ’da ago otonayi nda ’da; ago u’du nina si oko nda adrina ’da.” ²⁰ ’Dooko toko Zebedayo ro ikyite Yesu re ŋgwàagoro ritu anyaro be, ändite nda kandra, ago eji nda te ta ŋga aza rota. ²¹ Yesu eji anya te ekye: “Mile e’di ya?” Anya zatadrite ekye: “Mi’ba tao’ba märi tana ŋgwàagoro ritu maro kwoi koriyi robe drígwo miro ya ago gaṛi miro ya ondro nya’dote ’bädri’ba ro owo.” ²² Yesu zatadri ànyaro te ekye: “Mìni ŋgase nyàbe taeji tana ro ono ko.” ’Dooko Yesu eji ŋgwàagoro se kai te ekye: “Inye’do mìnina gindi kofo ruezaro se ma oyebe umvune ’do umvune ya?” Ànya zayitadrite ekye: “Mä̀nina ndi.” ²³ Yesu zatadri ànyaro te ekye: “Ndi endaro mìmvuna ŋga ’da ni kofo maro yasi, oko ’dise orine drígwo maro ya ago gaṛi maro ya ma koni onjina. Vo gi iyi orivoya vo ànya se Täpi maro kedebe tana ro kwoi ro.” ²⁴ Ondro taeri’bai se azaka ’butealo ana keriyi ta ono te oko, ànya a’doyite kyilaro ädrupii ritu kwoi be. ²⁵ Ta’dota Yesu zi ànya cini te voaloya ndare ago atate ekye: “Mìni ndi ’dimiri’bai luako’bai ro orivoya mbara be ànya dri, ago dri’bai ni cu drikaca be. ²⁶ Caoko, ono ko tase a’done ami lako owo. Ondro ka’do alo aza amiro kolete a’done ’desiro, beṛo ndäri a’done ruindu’ba ro azi ri; ²⁷ ago ondro ka’do alo aza amiro kolete a’done käti, beṛo ndäri a’done iyeäṛi amiro; ²⁸ oso Ŋgwa Lidri ro ronye, se ikyi kote tana induru robe ndäri, oko nda ikyite ruindune azii ri ago adri ndaro ozone drî lidri amba ro utweza.” ²⁹ Ago ondro Yesu ndi taeri’bai ndaro be kayite Yeriko e’be oko, lowa du sote nda vo. ³⁰ Ago lidri ritu miako se kayibe ori liti biṛi ya ana keriyitate ekye Yesu kani ugu lävu nasi oko, ànya ayoyidrite ekye: “Ŋgwa Dawidi ro nya’do yauni be ämäri!” ³¹ Lowa ’bidri ànyaro te ago atate ànyari odrine titiro. Caoko ànya treyite ndra ekye: “Ŋgwa Dawidi ro nya’do yauni be ämäri!” ³² Yesu edrete ago zi ànya te. Nda eji ànya te ekye: “Mìle märi e’di oyene ämiri ya?” ³³ Ànya zayitadrite ekye: “’Desi, rägu mipi mi amaro!” ³⁴ Ya Yesu ro nite ànya lomvo ago do mi ànyaro te, dori ànya ndreyivote, ndi ànya soyite nda vo.

¹ Ago ondro Yesu ndi taeri’bai ndaro be kayite ikyi loto Yerusalema lomvo oko, ànya ikyiyite Betefage ya ’Bereŋwa Ice Ido ro ro pa, ago Yesu zo taeri’bai ndaro te ni nasi mileya ² ago atate ànyari ekye: “Nyòyi ’baŋwa mile amiro ya ana ya, dori nyùsuna doŋgyi aza ’da ayite ŋgwa anyaro be gbo anyaro ya. Mìtri ànya ago nyèzi märi. ³ Ago ondro ka’do ’diaza kata ta aza te oko, nyàta ndäri mìkye: ‘Miemba’ba le ànya ni’, ’dooko nda o’bana ànya ’da oyine dori.” ⁴ Ta ono a’dote nonye tana ko’ba tase nebi katabe ana ka’do robe ŋgye se ekye: ⁵ “Nyàta ’bakici Zaiona ro ri mìkye: Mindre, ’bädri’ba miro kate ikyi mire! Ta tokyeako ago ka umu doŋgyi si, doŋgyi to’diŋwa rosi.” ⁶ Ta’doro taeri’bai oyiyite ago yeyi tase Yesu katabe ànyari oyene ana te: ⁷ ànya eziyi doŋgyi te ndi ŋgwa na ana be, ànya ’bayi boŋgo ànyaro te ànya drisi ndi Yesu tute driigye. ⁸ Lowa du lidri ro ’beyi boŋgo ànyaro te liti drisi azakana ŋgoyi gwoṛi ice rote ago ’beyite liti drisi. ⁹ Lowa se kabe ugu oyi Yesu mile ndi se kabe eziikyi kovole iyi be etoyi otre te ekye: “Räṛu ka’do Ŋgwa Dawidi ro ri! Lu käṛu nda se kabe ikyi ävuru Opi roya ono! Räṛu ka’do Lu ri!” ¹⁰ Ondro Yesu kocite Yerusalema ya oko, ’bakici a’dote kpeye amoamoro, ago lidri ejitate ekye: “Nda a’di owo ya?” ¹¹ Lowa zatadrite ekye: “Ono nebi Yesu owo, ni ’ba’desi Nazareta se Galilaya ya yasi.” ¹² Yesu oyi cite Yekalu ya ago lanja ànya se cini kayibe ŋgaogye ndi ŋgalogye be kai te tesi, nda tako tara’bizai parata driutwe’bai ro ndi kitaparaŋwà ànya se kayibe amoamo logye iyi robe te vuru, ¹³ ago atate ànyari ekye: “Egyi ṛote taegyi ya Lu atate ekye: ‘Äzina Yekalu maro ’da zo mätu ro.’ Oko nyòtozate kugyi ŋgatopa’bai ro!” ¹⁴ Miako’bai ndi ka’boi be ikyiyite ndare Yekalu ya, ago nda ede ànya te. ¹⁵ Kohanii ’desi ndi miemba’bai Ota robe a’doyite kyilaro ondro ànya kondreyi talaro ro se nda kabe ugu oyena ndi totre ŋgagaŋwà ro Yekalu ya be te owo, se ekye: “Räṛu ka’do Ŋgwa Dawidi ro ri ana!” ¹⁶ Ta’dota ànya ejiyi Yesu te ekye: “Nyeri tase ànya kayibe ugu atana ono teya?” Yesu zatadrite ekye: “Owo! Inye’do mìzi taegyi ono drigba koya? Nyèmba ŋgàga ndi ŋgwà giṛiŋwà be te räṛu oyene kadoro.” ¹⁷ Yesu e’be ànya te ago oyite ni ’bakici ana yasi le Betaniya ya nda kyi u’dute lau. ¹⁸ Ago ondro kyenonosi Yesu kate ogo kovole ’bakici ya oko, nda te täbiri ro. ¹⁹ Nda ndre ce kyi’du ro aza te liti biṛi ya, ago oyite lomvoigye, oko usu ŋga aza kote driigye gialo kyibi ayani. Ta’dota nda atate ce kyi’du ro ana ri ekye: “Miri doŋgo owane to’di te i’do alona!” Dori ce kyi’du ro wite. ²⁰ Ago ondro taeri’bai kondreyi ta ono te oko laroyite. Ejiyitate ekye: “Ce kyi’du ro wigwo ndriŋwa etaya?” ²¹ Yesu zatadrite ekye: “Endaro mata ämiri ono ondro ka’do mìma ndi ago nyà’do kote milo’be be, nyà’dona ndi mbara be ago tase mayebe ce kyi’du ro ono ri ono mìyena kpa. Ago ko toto inye, oko nyà’dona ndi mbara be atane ’bereŋwa ono ri mìkye: ‘Nyeŋgyeru ago mivo andivo miro gyi’desi ya,’ ago anya oyena ndi. ²² Ondro ka’do mìma ndi, ŋgase nyàbe ejina mätu si nyùsuna ndi.” ²³ Yesu kegote Yekalu ya; ago kate miemba oko, kohanii ’desi ndi ’di’desii be ikyiyite ndare ago ejiyitate ekye: “Nya ŋga kwoi oyena drikaca eŋwani siya? A’di ozo drikaca ono ni miri ya?” ²⁴ Yesu zatadri ànyaro te ekye: “Mejina ami kpa taeji alodi ono si, ago ondro ka’do nyòlogo tana te märi oko, ma’dena gwo drikaca se mabe ŋga kwoi oyena sina ono tana itine ämiri. ²⁵ Drikaca Yoane ro bapatisi oyero ikyi ni eŋwaro; ni Lu resi kode ni lidri resi ya?” ’Dooko ànya etoyi kaladiṛite iyivoya ekye: “Màtana eŋwanye ya? Ondro ka’do màzatadrite màkye: ‘Ni Lu resi,’ nda atana ṛo ämäri ekye: ‘Ka’do inye mìma ta Yoane ro kote etaya?’ ²⁶ Oko ondro ka’do màta gwo màkye: ‘Ni lidri resi,’ ama orivoya turiro ni tase lidri ka oyebe oyene ono ri, tana ànya cini màyite anjioko Yoane orivoya nebi yi.” ²⁷ Ta’dota ànya zayitadri Yesu rote ekye: “Mäni ko.” Ago nda atate ànyari ekye: “Ka’do inye, ca drikaca se mabe ŋga kwoi oyena sina ono mänina kpa ko tana itine ämiri. ²⁸ “Ka’do inye tausu amiro ta ono ta eŋwanye ya? Mano aza ŋgwàagoro ritu be. Nda oyi gwo se kätiŋwa ana re ago atate ekye: ‘Ŋgwa, ondro ono nyoyi losi oyene ämvu kono roya.’ ²⁹ Nda zatadrite ekye: ‘Malezo,’ oko kovolesi oko nda go usutate ndi oyite. ³⁰ ’Dooko täpi oyite ŋgwa aza re ago ata kpa inye ndäri. Nda zatadrite ekye: ‘Owo ’desi,’ caoko nda oyi kote. ³¹ ’Dise ritu kwoi lakosi eŋwani ye tase täpi ndaro katabe niya?” Ànya zayitadrite ekye: “Se kätiŋwa ’do.” Ndi Yesu atate ànyari ekye: “Mata ämiri ono, parata koto’bai ndi ronyi’bai be kayi ugu oci Miri ’Bädri’ba Lu ro roya käti ni ämiri. ³² Tana Yoane Bapatisi’ba ikyite amire ka’da liti ŋgye se urune te ämiri; oko mìma kote ta ndaro ya, oko parata koto’bai ndi ronyi’bai be màyi tate ta ndaro ya. Mìndre ta ono gica mìgo nyètadri amiro kote ago mìma kote ta ndaro ya.” ³³ Yesu atate ekye: “Nyèri Lapidri aza ono te. Tu alo aza si oko gyini kuzupi’ba aza kyi’di kono te ämvu ya, ’be aga te gbikyi lomvoigyesi, ago ’di pi’di vino ozwaro te, ago be zowiṛa vookwaro te. ’Dooko ozo ämvu kono ro te losioye’bai ri losi oyene kigye ago e’be ’ba te ago oyite vo aza ya. ³⁴ Ondro tu kesate doŋgo topiza oko, nda zo ruindu’bai ndaro te losioye’bai re doŋgo jalia rota ndäri. ³⁵ Losioye’bai ruyi ruindu’bai ndaro te, ’biyi alona te, ago fuyi azana te, ago voyi azakana te kuni si. ³⁶ Mano ana go zo ruindu’bai azaka kpa to’di, ndrani se käti ana drisi, ago losioye’bai yeyi ànya kpate oso se käti kai ronye. ³⁷ Äduro oko nda zo ŋgwa ndaro te ànyare, nda atate ekye: ‘Endaro ànya oronayi ŋgwa maro ndi.’ ³⁸ Oko ondro losioye’bai kondreyi ŋgwa te oko, ànya atayite iyivoya ekye: ‘Ono ni ŋgwa ämvu kuzupi’ba ro owo, nyìkyi mì’de mäfu nda, tana mä̀ru drimbi ndaro robe!’ ³⁹ Ta’dota ànya ruyi nda te, ago lofoyi nda te tesi ni ämvu kono ro yasi, ago fuyi nda te.” ⁴⁰ Yesu ejitate ekye: “Ka’do inye, ondro kuzupi ämvu kono ro ro kikyite oko, nda oyena e’di losioye’bai kai ri ya?” ⁴¹ Ànya zayitadrite ekye: “Endaro nda tufuna lidri se koziro kai ’da, ago uruna ämvu kono ro ’da ozona ’da losioye’bai azaka ri, se ozonayi ŋga ndaro ’da ndäri tu doŋgo owa rosi.” ⁴² Yesu atate ànyari ekye: “Inye’do mìzi tase taegyi katabe ṛo ko ya? Se ekye: ‘Kuni se koziro zoobe’bai kogayibezo ekye koziro ana go a’dote kadopara ndrani vona cini drisi. Ono ni taoye Opi ro; ondrena liŋgyi tawi!’ ” ⁴³ Yesu atate ekye: “Mata ämiri ono, Miri ’Bädri’ba Lu ro ro äruna ’da ni ämirigyesi ago ozona ’da lidri se kayi oyebe doŋgo kado owane iyi ri. ⁴⁴ Nda se kabe o’de kuni ono dri utufuna ndi jinyijinyi ago ondro kuni ko’de te ’diaza dri, uyina nda ndi durufu ro.” ⁴⁵ Kohanii ’desi ndi Parusii be keriyi lapidriopi Yesu ro ono te oko ànya niyite anjioko nda ka ta ànyaro atana, ⁴⁶ ta’doro ànya ojoyite nda urune, caoko ànya orivoya turiro ni lowa ri, se usuyitate ekye Yesu nebi yi.

¹ Yesu ata ta kpate to’di lidri ri lapidri si ekye: ² “Miri ’Bädri’ba vo’buyakuru ro laba oso nonye. Tu aza si ’bädri’ba aza orivoya se ede karama lagye ogyero te ŋgwa ndaro ri. ³ Nda zo ruindu’bai te ŋgwazi läzine ikyine karama ya, oko ànya gayizo ikyine. ⁴ Ago nda zo ruindu’bai azaka te lazo ono be ŋgwazi ri ekye: ‘Yauono karama maro te nja; ’daŋgoi ndi tii kadokado maro be utufute, ago ŋga cini te nja. Nyìkyi ri karama lagye roya!’ ⁵ Oko ŋgwazii se äläzibe ana tiyi tana kote ago oyiyite losi ànyaro yasi ’dialo oyite ämvu ndaro ya, azana vo ŋgaogyero ndaro ya, ⁶ azakana ruyi ruindu’bai te, ’biyi ànya te, ago fuyi ànya te. ⁷ ’Bädri’ba ana a’dote kyilaro amba, ago nda zo kyila’bai ndaro te se tufuyi ’diufu’bai se kai te ago zayi ’bakici ànyaro te kpeye. ⁸ ’Dooko nda zi ruindu’bai ndaro te ago atate ànyari ekye: ‘Karama maro lagye ogyero te nja, oko lidri se äläzibe kwoi tana si ko. ⁹ Ka’do inye nyòyi litiŋwà ’desiro drisi ago nyäläzi lidri amba ikyine karama ya oso se mìni ndi usune ronye.’ ¹⁰ ’Dooko ruindu’bai oyiyite tesi litiŋwà yasi ago otoyi lidri cini se ànya kusuyibe te, se kadoro ndi se koziro be, ago zo lagyero a’dote twi lidri be. ¹¹ “’Bädri’ba ana cite ŋgwazii ondrene ago ndre mano aza te se so boŋgo lagyero kote. ¹² ’Bädri’ba eji nda te ekye: ‘Bereazi, nyeci teinye boŋgo lagyero ako etaya?’ Oko mano ana ata ta aza kote. ¹³ ’Dooko ’bädri’ba atate ruindu’bai ri ekye: ‘Nyèmbe drí ndaro ndi pa ndaro be, ago mìvo nda tesi vouni ya. Lau a’dona ndäri liyi ndi sionya be.’ ” ¹⁴ Ago Yesu ndetate ekye: “Äläzite amba, oko anjite toto fere.” ¹⁵ Parusii oyiyite ago rayitate Yesu odone taeji si. ¹⁶ ’Dooko ànya zoyi taeri’bai ànyaro azaka te ndare ndi rukä gboko Eroda ro robe, ànya atayite ekye: “Miemba’ba, mä̀ni ndi anjioko nya ni taŋgye iti. Nya ni ole Lu ro taŋgyena embana lidri ri, teinye milo’be ako tase lidri kabe usuna ta. Tana nya ko ’desi lidri ro tana usuna ayani. ¹⁷ Nyiti ta ämäri, inye’do, nyusu miro be eŋwanye ya? Inye’do Ota letadri gindi parata driutwero ozone ’Bädri’ba Roma’ba ro ri kode ko ya?” ¹⁸ Caoko Yesu ni tase koziro ànya korayibe ana tana te, ago nda atate ekye: “Ami miomba’bai! Tana e’di nyà ma ojo niya? ¹⁹ Nyàka’da parata kaciro driutwero märi!” Ànya eziyi parata kaciro te ndäri, ²⁰ ago nda eji ànya te ekye: “Beti ndi ävuru kwoi be a’di roya?” ²¹ Ànya zayitadrite ekye: “’Bädri’ba ro.” Ta’dota Yesu atate ànyari ekye: “Ka’do inye, nyòzo ŋgase ’Bädri’ba ro gi ’Bädri’ba ri, ago nyòzo ŋgase Lu ro gi Lu ri.” ²² Ondro ànya keriyi ta ono te oko, ànya laroyite; ago ànya e’beyi nda te ndi oyiyite. ²³ Tu gialo ana si azaka Sadukei ro se kayi be ata ekye lidri ri efone ni avo yasi i’do kai ikyiyite Yesu re. ²⁴ Ago atayite ekye: “Miemba’ba, Musa katabe ekye, ondro ka’do mano aza kodrate ŋgàga ako, anjioko ädrupi ndaro ri ocine ävuzi ri tana ànya kutiyi ŋgàga robe ka’do robe ŋgwai ro mano se kodrabe ’do ri. ²⁵ Ädrupii njidrieri azaka orivoya se riyite noŋwa, ŋgwa kayoro gye lagye te ago drate teinye ŋgàga ako, ago e’be ävuzi te ädrupi ndaro ri. ²⁶ Tase alo ono a’do kpate ädrupi ṛiri ndaro ri, ago äduro ta ono a’dote vona se cini njidrieri kai ri. ²⁷ Ago äduro oko toko se ana dra kpate. ²⁸ Ka’do inye, tu eforo avo rosi lidriidriro anya a’dona toko ro a’di riya? Tana vo ànyaro cini ciyite anya ri.” ²⁹ Yesu zatadri ànyaro te ekye: “Mìjete! Tana mìni Taegyi ko ca mbara Lu ro. ³⁰ Tana ondro avo kefote lidriidriro oko, ànya a’donayi oso malaikai vo’buyakuru ya ronye, ago uninayi ko lagye ogyene. ³¹ Inye’do, tase Lu katabe ämiri ta efo avo rota mìzi tana ṛo ko ya? Se nda ekye: ³² ‘Ma ni Lu Abarayama ro, Lu Yisika ro, ago Lu Yakoba ro.’ Nda ni Lu ’dise lidriidriro ro, ko avo ro.” ³³ Ondro lowa keri ta ono te oko, ànya laroyite amba ta ŋgaemba ndaro rota. ³⁴ Ondro Parusii keriyitate Yesu ’ba Sadukei te a’done titiro oko, ànya ikyiyite troalo, ³⁵ ago alodi ànyaro miemba’ba Ota ro, ojote nda ojone taeji si. ³⁶ Nda ejitate ekye: “Miemba’ba, ota eŋwani ni parandra Ota ya ya?” ³⁷ Yesu zatadrite ekye: “ ‘Nyulu Opi Lu miro ya cini miro si, lindri cini miro si, ago tauni cini miro si.’ ³⁸ Ono ni Ota se ’desi ago fopara ndra owo. ³⁹ Ṛiri ota se fopara ndra ro oso käti ronye ni no: ‘Nyulu oriazi miro oso nyulu andivo miro be ronye.’ ⁴⁰ Ota cini Musa ro ndi ŋgaemba nebii robe edrete ota se ritu kwoi dri.” ⁴¹ Ondro azaka Parusii ro kotoyikalate troalo oko, Yesu eji ànya te ekye: ⁴² “Nyùsu ta Mesiya robe eŋwanye ya? Nda ni zelevo a’di ro yasi ya?” Ànya zayitadrite ekye: “Nda ni zelevo Dawidi ro.” ⁴³ Yesu ejitate ekye: “Tana e’di Tori ’ba tavousu te Dawidi ya nda uzine ‘Opi’ niya? Dawidi atate ekye: ⁴⁴ ‘Opi atate Opi maro ri ekye: Miri noŋwa drígwo maro ya madale ma’bana kyila’baazii miro lutu pa miro zele.’ ⁴⁵ Dawidi zi Mesiya te ‘Opi’, ka’do inye Mesiya a’dona zelevo Dawidi ro eŋwanye ya?” ⁴⁶ ’Diaza ni kote tadri Yesu ro ozane, ago ṛoni tu gi ana si ’diaza ni kote nda ejine ndra taeji si.

¹ ’Dooko Yesu atate lowa ndi taeri’bai ndaro be ri ekye: ² “Miemba’bai Ota ro ndi Parusii be ni drikaca’bai Ota Musa ro tazevona edre’banai. ³ Ka’do inye beṛo ämiri orone, ago osone tase cini ànya kayibe atana ämiri oyene ’do voro; caoko mìso ko taoye ànyaro voro, tana tase ànya kayibe opena yeyi ko. ⁴ Ànya ’bayi ŋgaläŋgyi se läŋgyiekye ago rritiro uŋgyine ono te lidri kyembe, caoko ànya orivoya oleako ca ŋgaläŋgyi se ànya kai be uŋgyina ana odone driŋgwa ànyaro si. ⁵ Ànya kayi ŋga cini oye ekye lidri kondre iyi robe, mìndre taegyi se ni taegyi yasi ànya koloseyibe gboloŋwà sisi koyiyibe militi ànyaro ndi kufu be yasi ’do, ago mindre a’do ’desi ànyaro! Ago mindre a’do kaca bindi boŋgo runduṛuro ànyaro ro! ⁶ Ànya luyi vo oriro se kadopara ayani karama ya ndi vo oriro se kado zoitaeriro yasi ’do be; ⁷ ànya leyi lidri ri mede oyene iyi ri taoro si vo ŋga logyero yasi, ago leyi iyi uzine ‘Miemba’ba.’ ⁸ Beṛo ko ami uzine ‘Miemba’ba’, tana ami cini orivoya ädrupii amivoya ago ami toto Miemba’ba alodi be. ⁹ Beṛo ko ämiri ’diaza uzine ‘Täpi’ noŋwa ’bädri ya, tana ami toto Täpi alodi be vo’buyakuru ya. ¹⁰ Mì’ba äzi ami ko ‘Dri’ba’, tana ami toto Dri’ba alodi be se ni Mesiya. ¹¹ Nda se ’desi para ami lako ono beṛo a’done ruindu’ba amiro. ¹² Nda se kabe andivo iro eŋgana kuru ologona ’da vuru, ago nda se kabe andivo ndaro logona vuru eŋgana ’da kuru. ¹³ “Rritiro ämiri ami miemba’bai Ota ro ndi Parusii be! Ami miomba’bai ono! Nyà käläsi Miri ’Bädri’ba vo’buyakuru ro osena lidri milesi, oko andivo amiro mìci ko kigye, ago ànya se koleyibe ocine kigye nyàlaga kpa zo! ¹⁵ “Rritiro ämiri ami miemba’bai Ota ro ndi Parusii be! Ami miomba’bai ono! Nyà udi toŋbo si gyi’desii drisi ago mìzate ’bädri cini yasi ’di alodi o’bane drietane, ago ondro ketadrite oko, mì’ba nda te oyine gehena ya perena ritu ndrani andivo amiro drisi! ¹⁶ “Rritiro ämiri ami lepe’bai miako ono! Nyà miemba mìkye: ‘Ondro ka’do ’diaza ka ruäṛu Yekalu si, embe nda ko ta ruäṛu ndaro si; oko ondro ka’do nda ka ruäṛu logo läguläguro Yekalu ya si embe nda te ta ruäṛu ro ndaro si.’ ¹⁷ Ami miako’bai amamaro ono! Se eŋwani ni parandra, logo läguläguro kode Yekalu se kani logo läguläguro o’ba alokado ono ya? ¹⁸ Nyà kpa miemba mìkye: ‘Ondro ka’do ’diaza ka ruäṛu vo tori oloro si, embe nda ko ta ruäṛu ndaro si; oko ondro ka’do nda ka ruäṛu ŋgapäṛi se vo tori oloro dri si, embe nda te.’ ¹⁹ Ami miako ono! Eŋwani ni parandra, ŋgapäṛi kode vo tori oloro se kani ŋgapäṛi o’ba alokado ono ya? ²⁰ Ka’do inye, ondro lidri ka ruäṛu vo tori oloro si, nda ka ruäṛu sina ndi ŋgase cini driigye ’do be; ²¹ ago ondro nda ka ruäṛu Yekalu si, nda ka ruäṛu sina ndi Lu se kabe ori kigye ’do be, ²² ago ondro ’diaza ka ruäṛu vo’buyakuru si, nda ka ruäṛu giti Lu rosi ndi nda se kabe ori driigye ’do be. ²³ “Rritiro ämiri, ami miemba’bai Ota ro ndi Parusii be! Ami miomba’bai ono! Nyà telesi alo ’butealo ŋga oso kwoi ronye ro ozona Lu ri äṛuku, nduṛu ndi lawi be, oko mìti ta ŋgaembaro se endaro ndra Ota oro ro ono kote, oso taŋgye yauni ndi ta’diri be ro ronye ’do. Beṛo ämiri se kwoi oyene, ko azakana e’bene tana otiako. ²⁴ Ami lepe’bai miako ono! Nyà kumu ona ni ŋgaumvuro amiro yasi, oko nyà gamele ote! ²⁵ “Rritiro ämiri, ami miemba’bai Ota ro ndi Parusii be! Ami miomba’bai ono! Nyà lomvo tesisi kofo amiro ro ndi deŋbele amiro robe ojona, oko ya yasi na twi ŋgase miru be kyila si ndi ta andivo o’baro käti be. ²⁶ Ami Parusii miako ono! Mijo ya kofo ndi deŋbele be ro käti, ’dooko lomvo tesisi na a’dona kpa wäṛi! ²⁷ “Rritiro ämiri, ami miemba’bai Ota ro ndi Parusii be! Ami miomba’bai ono! Nyàlandre oso ’budri se ändrube onjero ronye, se ondrena tesisi liŋgyi tawi oko orivoya twi kowa be ago avo oŋgwaoŋgwaro be yana ya. ²⁸ Kpa oso inye, tesisi nyàlandre ndi kado ’dicini mile, oko ya yasi amiro orivoya twi miomba be ago takozi be. ²⁹ “Rritiro ämiri, ami miemba’bai Ota ro ndi Parusii be! Ami miomba’bai ono! Nyà ’budri nebii ro obe liŋgyiekye ago nyà lusi ànya se kori ori kado be ro tirana; ³⁰ ago nyà ata mìkye, ondro aba ka’do yiri gwo ni tu zutui iro rosi, yìle ko tase ànya koyeyibe ago kutufuyi nebii be ’do oyene. ³¹ Ka’do inye mìnite endaro anjioko ami ṛoni zelevoi ànya se kutufuyi nebii be kai ro! ³² Ka’do inye, nyà ugu tase zutui amiro ketoyibe ana ondena! ³³ Ami inii ago ŋgwai ini ro ono! Nyà mio’ba ruopane ni rueza gehena ro yasi ono eŋwanye ya? ³⁴ Ago mata ämiri ono mezona nebii ndi lidri tavouni’bai ndi miemba’bai be ’da amire, nyùtufuna azaka ànyaro ’da, nyòtona azakana ’da ago mìkyuna azaka ànyaro ’da zoitaeriro yasi ago mìjana ànya ’da ni ’ba’desi yasi le ’ba’desi kinjona ya. ³⁵ Taezaro ta lidri taŋgye’bai tufuro ikyina ’da ämidri, etona ṛoni ufu taŋgye’ba Abele roya le ufu Zakaria ŋgwa Berekia ro roya, se mìfute lakole vo tori oloro ndi vo Alokado robe ya ana. ³⁶ Endaro mata ämiri ono, taezaro ta ’dise cini äfube kwoi ro ikyina ’da lidri tu ono ro dri. ³⁷ “Yerusalema, Yerusalema! Mifu nebii ni ago mivo lazo’bai se Lu kezobe mire iyi ni kuni si! Perena te moda se male ndi lidri miro otone voaloya oso täu kabe ŋgwai anyaro otona kufui anyaro zele ronye, oko migazo! ³⁸ Ka’do inye e’bena Yekalu miro ’da ago a’dona ’da awi. ³⁹ Mata miri ono, etoni yauono, miri ma ondrene to’di te i’do alona, madale nyatana lutu mikye: ‘Lu käṛu nda se kabe ikyi ävuru Opi roya ana.’ ”

¹ Ondro Yesu ke’be Yekalu te ago kate ugu oyi oko taeri’bai ndaro ikyiyite ndare ago ka’dayi obe Yekalu rote ndäri. ² Nda zatadrite ago atate ekye: “Mìndre ŋga kwoi te, inye’do mìndre ko ya? Endaro mata ämiri ono änina ko kuni alo aza se noŋwa ono e’bene vona ya, vona cini eperena ’da vuru.” ³ Ondro Yesu korite ’Bereŋwa Ice Ido ro ro dri oko, taeri’bai ikyiyite ndare iṛero atayite ndäri ekye: “Nyiti ta ämäri tase cini ono kaoye a’dona ituya? Ago ta e’di a’dona ni ka’daza anjioko ’do ni tu ikyi miro ro ndi tu äduro robe owo ya?” ⁴ Yesu zatadrite ekye: “Mìkwa ŋga, mì’ba ’diaza kodo ami ko. ⁵ Lidri amba ikyina ’da ävuru maro ya, ago ànya alo alo atanayi ta ’da ekye: ‘Yi ni Mesiya owo!’ Ago ànya odonayi lidri amba ’da. ⁶ Nyèrina kporo kyila ro ’da loto ago nyèrina lazo kyila ro ’da ni lozo si; oko nyòlo’be mi ko, beṛo ŋga nonye kwoi ri a’done, oko ko ekye tu äduro esate. ⁷ ’Bädri oyena kyila ’da ’bädri azi be, ago tu’dei oyena kyila ’da tu’dei azi be. Mä’bu ndi ägbigbi be a’dona ’da vo cini yasi. ⁸ Ŋga kwoi orivoya oso luwu käti ŋgwa utiro ronye. ⁹ “’Dooko äruna ami ’da ago ozona ’da ezane ago äfuna ami ’da. Ya lidri cini ro osona ’da ami lomvo ta maro ta. ¹⁰ Ambana e’bena taoma ànyaro ’da tu gi ana si; ànya ozonayi vo azi ro ’da ago yanai osona ’da azi lomvo. ¹¹ ’Dooko nebii mieywero efonayi ’da ago odonayi lidri amba ’da. ¹² Ta nonye kwoi a’dona ’da ni rulari takozi ro ri ago ŋgalu lidri amba ro okyena ’da. ¹³ Oko nda se kabe yaiŋgyi ndi le äduna ya apana ndi. ¹⁴ Ago Lazokado Miri ’Bädri’ba ro ro apena tana ’da ’bädri cini yasi ta tazevoedre ro ro lidri cini ri, ’dooko tu äduro esana gwo. ¹⁵ “Mìndrena ŋga koziro parandra se nebi Daniele kata tana be ana ’da. Edrena ’da vo alokado ya. (Tase ta ono uzi’bana ri unine: miri ta ono takacina unine kadoro!) ¹⁶ ’Dooko ànya se orivoya Yuda ya beṛo umune lutui dri. ¹⁷ Mano se orivoya kuru zo ndaro dri beṛo ko ndäri saa ndaro enjine efo si vuru ŋga aza urune ni zo ndaro yasi. ¹⁸ Mano se orivoya ämvu ya beṛo ko egone kovole zo ya boŋgo ndaro ta. ¹⁹ A’dona ’da rritiro tu ana si ’ditoko se kovoro ro ndi endrei se ŋgwà na ka drigba ba ondro ri! ²⁰ Nyä̀mätu Lu tana tu lämuro ämiri ono ukyi a’do ’da meṛi si kode Sabata si! ²¹ Tana rriti tu gi ana ro a’dona kozipara ndrani tu azaka se kezi a’do be iyi ri se a’do dri ko inye ṛoni o’ba ’bädri rosi le tu ono si. Ca ŋga aza ri ogone a’done inye i’do alona. ²² Oko Lu go logo oti tu kai ro ṛote nja; aba nda koye ko inye, ’diaza ri orine lidriidriro i’do. Caoko ta lidri onjionji ndaro rota, Lu ogo logona tu kai ’da. ²³ “’Dooko, ondro ka’do ’diaza kata gwo ämiri ekye: ‘Mìndre, Mesiya begi ono! Kode nda begi ana!’ Mìma ta ndaro ko. ²⁴ Tana Mesiyai mieywe’bai ro ndi nebii mieywe’bai robe efona ’da. Ànya oyenayi rubä ’desipara ndi talaro robe ’da lidri onjionji Lu ro odoza, ondro ka’do ndi rritiako owo. ²⁵ Nyèri! Miti ta ono teṛo ämiri käti teinye tuna ri esaako. ²⁶ “Kode lidri kata gwo ämiri ekye: ‘Mìndre, nda orivoya vocowa ya!’ Nyòyi ko lau; kode ànya kata gwo ekye: ‘Mindre, nda ka ruda’do noŋwa!’ Mìma tana ko. ²⁷ Tana Ŋgwa Lidri ro ikyina ’da oso sionyi ’bu ro se kabe leko andria vokuru yasi ni ’buzelesi le aŋgoya ’do ronye. ²⁸ “Vose avo orivoya kigye koyii otona kala ’da kigye. ²⁹ “Dori rriti tu kai ro vosi oko, kitu o’bona ’da, ago imba onjena ko tona, ago ’bi’bii e’dena ’da ni vo’buyakuru yasi, ago mbara vokuru ro kandaruna ’da. ³⁰ ’Dooko andrena taka’daro Ŋgwa Lidri ro ’da vokuru ya, ago lidri cini ’bädri ro liyinayi ’da ondro kondreyi Ŋgwa Lidri rote ikyivoya ’dikolo vo’buyakuru roya mbara be ndi ’desi ndra be owo. ³¹ Avona cekuṛe ’da, ago nda ozona malaikai ndaro ’da cuku su ’bädri ro yasi, ago ànya kotonayi lidri onjionji ndaro ’da ni telesi ädu ’bädri ro yasi le telesina ya. ³² “Mì’ba ce kyi’du ro kemba ami. Ondro gwoṛii ànyaro kate oro ago kate kyibi lofo oko mìni ndi anjioko duru te ti. ³³ Kpa oso inye, ondro mìndre ŋgase cini kwoi te oko, mìnina ndi anjioko tu te ti, te nja etone. ³⁴ Mìyi ta ono tana anjioko ŋgase cini kwoi a’dona ’da käti teinye dri lidri se ka ugu ori be yauono ri odraako cini. ³⁵ Vo’buyakuru ndi ’bädri be lävuna ’da, oko ata maro ri lävune i’do alona. ³⁶ “Caoko, ’diaza ni tu gi ana ndi saa na ikyi robe ko; ca malaikai vo’buyakuru ro ca Ŋgwa, Täpi ni toto ni. ³⁷ Tu ikyi Ŋgwa Lidri ro ro a’dona oso tase ka’dobe tu Noa rosi ana ronye. ³⁸ Tuse käti gyitändri dri i’do si lidri nya ŋga te ago mvu ŋga te, mànoago ndi ’ditoko be gyeyi iyi te, madale tuse Noa kocibe toŋbo ya ana si. ³⁹ Caoko ànya niyi tase kabe oye a’done kote madale gyitändri ikyite ago ŋgyi ànya cini te. Kaoye kpa a’done oso inye ondro Ŋgwa Lidri ro kate ikyi owo. ⁴⁰ Tu gi ana si mànoago ritu a’dona ’da losi oyevoya ämvu ya; äruna alona ’da ago e’bena azana gwo. ⁴¹ ’Ditoko ritu a’dona ŋgauyivoya kuni dri; äruna alodi ’da ago e’bena azana gwo. ⁴² “Ka’do inye, mìkwa ŋga, tana mìni tuse Opi amiro kabe ikyi sina ’do ko. ⁴³ Mìyi ta ono! Aba ondro ka’do zo kuzupi kuni tuse kugu kabe ikyi sina gwo, aba nda unina ndi orine miuŋbo ago o’bana kugu ko vo oŋgone zo ndaro ya. ⁴⁴ Ka’do inye, beṛo kpa a’done ämiri nja, tana Ŋgwa Lidri ro ikyina ’da saa se ami mio’ba ako ndäri ikyine sina si. ⁴⁵ “Ka’do inye, a’di ni ruindu’ba ’diri ago tavouni be owo ya? Nda ni se ondro ’desi ndaro ko’ba nda te drikaca be ruindu’bai azi dri oko kabe ŋgaonya ozo ànyari tu ŋgye na si owo. ⁴⁶ Ruindu’ba se ondro ’desi ndaro kikyite ’bäru oko kabe nda usu ugu ta oyevoya inye ’do ni kado! ⁴⁷ Endaro, mata ämiri ono, ’desi o’bana ruindu’ba se ana ’da drikaca be lakaza cini ndaro dri. ⁴⁸ Oko ondro ka’do nda orivoya ruindu’ba kozi yi, nda atana ’da andivo ndaro ri ekye, ’desi maro unina ko egone ndri, ⁴⁹ ago nda etona ruindu’bai azi ndaro o’bina gwo ago orina gwo ŋgaonyane ago ŋgaumvune wa umvu’bai be. ⁵⁰ ’Desi ruindu’ba gi ana ro egona ’da tu alo aza se ruindu’ba ana ko’ba mi ko nda ta si ago saa se nda kuni ko si. ⁵¹ ’Desi togana nda ’da jinyijinyi ago nda usuna andivo ndaro ’da vo kozi ya miomba’bai lako. Nda o’dena gwo liyine ndi sionya be.

¹ “Tu gi ana si Miri ’Bädri’ba vo’buyakuru ro labana oso nonye. Tu alo si oko ndiriŋwa ’butealo orivoya se ruyi lamba ànyaro te ago foyite drî kodrogo ro utune. ² Nji ànyaro orivoya amamai, ago nji azaka orivoya tavouni’bai. ³ Amamai ruyi lamba ànyaro te oko ruyi ido kinja kote ànya be, ⁴ oko tavouni’bai soyi ido te twi kuru ànyaro yasi. ⁵ Ondro kodrogo kadri ikyi le liyaro oko, ndiriŋwa kai te panapanaro ndi u’duyite. ⁶ “Te le o’bwaro oko eri kporo amo rote ekye: ‘Kodrogo begi ono! Nyìkyi ri drî na utune!’ ⁷ Ndiriŋwa se ’butealo kai piyimite ago edeyi lamba ànyaro te. ⁸ ’Dooko se amamai kai atayite tavouni’bai ri ekye: ‘Nyòzo ido amiro azana ämäri, tana lamba amaro kate uzwe.’ ⁹ Tavouni’bai zayitadrite ekye: ‘Hwa, endaro, ojo ama ko ami yibe. Nyòyi ri vo ogyena roya ago mìgye ri andivo amiro ri.’ ¹⁰ Ago ndiriŋwa se amamai ro ana oyiyite ido aza ogyene; ago ondro ànya dri oyivoya oko, kodrogo esate. Ndiriŋwa se nji nja ana ciyite nda be karama lagye roya, ndi ase käläsi te. ¹¹ “’Dooko ndiriŋwa se azaka kai esayite le liyaro kovolesi. Ànya ayoyidrite ekye: ‘’Desi, ’Desi! Mipi käläsi maci robe.’ ¹² Kodrogo zatadrite ekye: ‘Endaro! Mäni ami ko.’ ” ¹³ Yesu ndetate nonye ekye: “Ka’do inye, mìkwa vo, tana mìni tu ndi saa be ko. ¹⁴ “Tu gi ana si Miri ’Bädri’ba vo’buyakuru ro labana oso nonye. Tu alo si oko mano aza kate ’ba e’be oyine vo aza ya; nda zi ruindu’bai ndaro te ago nda ozo driba lakaza cini ndaro rote ànyari. ¹⁵ Nda ozo ŋga te ’dialo ri mbara ndaro voro; aza ri nda ozo parata mo’di ro nji, aza ri nda ozo ritu, aza ri alo. ’Dooko nda e’be ’ba te oyite. ¹⁶ Ruindu’ba se kuru mo’di nji be ana oyite dori ago ’ba parata ndaro te losi oyene ago nda liti aza kpate nji. ¹⁷ Ruindu’ba se kuru mo’di be ritu ana ye kpate oso inye liti aza kpate ritu. ¹⁸ Oko ruindu’ba se kuru mo’di be alo ana oyite ’di ’bu te gyini ya, ago da’do parata ’desi ndaro rote. ¹⁹ “Tu amba vosi oko ’desi ruindu’bai kai ro egote ago rite oti mo’di ro otine ànya yibe. ²⁰ Ruindu’ba se kuru mo’di nji be ana ecite ago ozo nji aza kpate. Nda atate ekye: ‘’Desi, nyozo mo’di te nji märigye, mindre, militi aza kpate nji, begi ono.’ ²¹ ’Desi ndaro atate ekye: ‘Miyete kado, mi ruindu’ba kado ago ’diri ono! Nya’dote ’diri losi oyevoya ŋga fereŋwa si, ka’do inye ma’bana mi ’da a’done dri’ba ro ŋga ’desi dri, nyeci ri ago màye riyä robe mibe.’ ²² “’Dooko ruindu’ba se ozo mo’di ritu be nda rigye ana ecite ago atate ekye: ‘’Desi, nyozo mo’di ritu te märi, Mindre! Militi ritu aza kpate, begi ono.’ ²³ ’Desi ndaro atate ekye: ‘Miyete kado, mi ruindu’ba kado ago ’diri ono! Nya’dote ’diri losi oyevoya ŋga fereŋwa si, ka’do inye ma’bana mi ’da a’done dri’ba ro ŋga ’desi dri, nyeci ri màye riyä robe mibe.’ ²⁴ “’Dooko ruindu’ba se kuru mo’di alo be ana ecite ago atate ekye: ‘’Desi, mänite mi mano siomba’ba yi, ŋgase nyikyi’di koni nya ŋga jalia na ro olona ayani, ago nya ŋgase miri kwari na koni kotona ayani; ²⁵ ma orivoya turiro, ta’doro moyite mada’do parata miro te gyini ya. Mindre amiro begi ono.’ ²⁶ “’Desi ndaro atate ndäri ekye: ‘Mi orivoya ruindu’ba kozi yi, ago tovo yi. Minite, ŋgase mikyi’di ko ma ŋga jalia na ro olona ayani, ago ŋgase mari kwari na ko ma ŋga na kotona ayani ya? ²⁷ Oko, aba beṛo miri parata maro o’bane lutwe ya, tana megote oko musu robe drinju’du be. ²⁸ Ka’do inye miru parata ni nda rigyesi ago nyozo nda se mo’di ’butealo be ’do ri. ²⁹ Tana ’di cini se ŋga be, ozona kpa ndra ndäri, ago nda a’dona ’da sina ndra, oko ’dise ŋga ako, ca se nda ka’dobe sina giṛiŋwa ono äruna ’da ni nda rigyesi. ³⁰ Mìru ruindu’ba se koziro ono; mìvo nda tesi vouni ya kori robe lau vose liyi ndi sionya be ya.’ ³¹ “Ondro Ŋgwa Lidri ro kate ikyi ’Bädri’ba ro malaikai cini be nda be oko nda orina ’da giti miri ro ndaro dri, ³² ago lidri tu’dei cini ro otona kala ’da nda kandra. ’Dooko nda lonyina ya ànyaro ’da ritu, oso lekye’ba kabe timele lewe ni indri resi ronye. ³³ Nda o’bana lidri taŋgye’bai ’da drígwo ndaro yasi ago taŋgyeako’bai gaṛi ndaro yasi. ³⁴ ’Dooko ’Bädri’ba atana ’da lidri se drígwo ndaro yasi ana ri ekye: ‘Nyìkyi, ami se Täpi maro käṛube ono! Nyìkyi mìru miri ’bädri’ba ro se edete tana ami ṛoni o’ba ’bädri rosi ono. ³⁵ Tana mabe täbiri ro nyòzo ŋgaonya ni märi, ago mabe gyilu be nyòzo gyi ni umvune märi mabe orivoya atra ro mìru ma ni ’ba amiro yasi. ³⁶ Mabe orivoya bägyuluro mìso boŋgo ni malomvo; mabe adravoro mìti ta maro ni, ago mabe kamba ya nyä̀täkyi ma ni.’ ³⁷ “’Dooko taŋgye’bai ozanayi tadri ndaro gwo ekye: ‘Opi, màndre mi täbiriro ago mozo ŋgaonya miri itube, kode gyilu be ago mozo gyi umvune miri itube ya? ³⁸ Màndre mi atra ro ago märu mi te ’ba amaro yasi itube, kode bägyuluro ago màso boŋgo te milomvo itube ya? ³⁹ Màndre mi adravoro kode kamba ya ago mä̀täkyi mi itube ya?’ ⁴⁰ ’Bädri’ba ozana tadri gwo ekye: ‘Mata ämiri ono, tase mìyebe ’dise tipari ädrupii maro kwoi ri ono, mìyete märi.’ ⁴¹ “’Dooko nda atana gwo ànya se gaṛi ndaro yasi kai ri ekye: ‘Nyòyi ri ni maresi, ami se latri Lu ro zele ono! Nyòyi asi äduako ya se edete tana Kicu’ba ndi malaikai ndaro be ono. ⁴² Ma’dobe täbiri ro mìleko ŋgaonya ozone märi, ma’dobe gyilu be mìleko gyi ozone umvune märi; ⁴³ ma’dobe atra ro mìleko ma urune ’ba amiro yasi, ma’dobe bägyuluro mìleko boŋgo osone malomvo; ma’dobe adravoro ago kamba ya, mìleko ta maro otine.’ ⁴⁴ “’Dooko ànya ozanayi tadri ndaro gwo ekye: ‘Opi, màndre mi täbiri ro kode gyilu be kode atra ro kode bägyulu ro kode adravo ro kode kamba ya ago màleko mi opane itubeya?’ ⁴⁵ ’Bädri’ba ozana tadri gwo ekye: ‘Mata ämiri ono, tuse mìgabezo ’dise tipari kwoi opane ana mìgazo ma opane.’ ⁴⁶ ’Dooko azona ’dise kwoi ’da rueza äduako ya, oko taŋgye’bai oyinayi ’da adri äduako ya.”

¹ Ondro Yesu konde ta cini kwoi embana te oko, nda atate taeri’bai ndaro ri ekye: ² “Oso mìnibe ronye, u’du ritu vosi oko Karama Lävu Odra ro ro kaoye a’done, ago ozona Ŋgwa Lidri ro ’da otone.” ³ ’Dooko kohanii ’desi ndi ’di’desii be otoyikalate zo’desi miri ro Kohani Fopara Kayafa roya, ⁴ ago rayitate Yesu urune ndrwi ago nda ufune. ⁵ Ànya atayite ekye: “Beṛo ko ämäri oyene tu karama rosi, ukyi lidri amo ’da.” ⁶ Ondro Yesu te orivoya Betaniya ya zo Simona se sedri orivoya adravo koziro kyini robe roya oko, ⁷ toko aza ikyite ndare gäbä alabasata robe twi ido ŋgutruro lagyena amba be, se anya date nda dri, ’dooko nda ŋgaonya onyavoya. ⁸ Taeri’bai kondreyi ta ono te oko, a’doyite kyilaro ejiyitate ekye: “Enji ido ono te cini etaya? ⁹ Ido ŋgutruro ono änina ndi ogyene parata amba si ozone ati’bai ri!” ¹⁰ Ondro Yesu kuni tase ànya kayibe ugu atana ono te oko, nda atate ànyari ekye: “Nyà toko ono okwona etaya? Anya ye ta liŋgyiekye te märi. ¹¹ Ondoalo ami ṛo orivoya ati’bai be ami lako, oko nyà’dona ko ondoalo mabe. ¹² Tase anya koyebe ido ŋgutruro oda si mädri ono ma edero nja ma oseza. ¹³ Endaro mata ämiri ono, vose aza abe lazokado ono opena kigye ’bädri cini yasi, tase anya koyebe ono itina tana ’da ta anyaro oyiza.” ¹⁴ ’Dooko alo aza taeri’bai ’butealo foritu ro, äzite Yuda Isekariota; oyite kohanii ’desi re ¹⁵ ago ejitate ekye: “Ondro ka’do mozo drí Yesu rote ämiri oko nyòzona e’di märi ya?” Ànya ozoyi parata mo’di ro ’butenätu te ndäri. ¹⁶ Ni tu ana si Yuda eto liti se Yesu ozoza ànyari ana uṛina te. ¹⁷ U’du käti Karama Ambata Loŋgaako ro rosi oko taeri’bai ikyiyite Yesu re ago ejiyi nda te ekye: “Mile ämäri ŋgaonya karama Lävu Odra ro ro edene nja miri eŋwaro ya?” ¹⁸ Nda atate ànyari ekye: “Nyòyi mano aza re ’bakici ya, ago nyàta ndäri mìkye: ‘Miemba’ba ekye: Saa maro esate, ma ndi taeri’bai maro be ri karama Lävu Odra ro ro onyaza zo miro ya.’ ” ¹⁹ Taeri’bai yeyite oso Yesu katabe ànyari ronye ago edeyi ŋgaonya karama Lävu Odra ro rote. ²⁰ Ondro te tandrolero oko, Yesu ndi taeri’bai ’butealo foritu ndaro be riyite vuru ŋgaonyane. ²¹ Ŋgaonyavoya oko Yesu atate ekye: “Endaro mata ämiri ono, alo aza amiro ozona drí maro ’da.” ²² Taeri’bai a’doyite märäyiro, etoyi nda ejite azivo azivo ekye: “Opi, mimabe ni ma owo ya?” ²³ Yesu zatadrite ekye: “Alo aza se kabe ambata ndaro osona mabe deŋbele ya ono ozona drí maro ’da. ²⁴ Ŋgwa Lidri ro odrana ’da oso Taegyi katabe ta ndaro ta ronye, oko orivoya rritiro mano se kabe drí Ŋgwa Lidri ro ro ozone ’do ri! Aba ni kadopara mano na ’do kori gwo ṛo utiako!” ²⁵ Yuda driozo’ba atate ṛe, ejitate ekye: “Miemba’ba, minibe ni ma owo ya?” Yesu zatadrite ekye: “Ndi oso nyatabe ’do ronye.” ²⁶ Ondro ànya kayite ugu ŋgaonya oko, Yesu ru ambata te ago ye mätu aro’boya rote, ago wagwo, ago ozote taeri’bai ndaro ri. Ago atate ekye: “Mìru ago mìnya, ono ni lomvo maro owo.” ²⁷ ’Dooko nda ru kofo te, ozo aro’boya te Lu ri, ago ozote ànyari. Ago atate ekye: “Ami cini, mìmvu ni kigyesi; ²⁸ ono ni kari maro tao’baro, se korobe ’di amba ta ’di e’bero ni takozi ri. ²⁹ Mata ämiri ono, mago mämvuna vino ono ko tona madale tuse mämvuna vino to’di ami yibe Miri ’Bädri’ba Täpi maro roya ana si.” ³⁰ Ondro ànya koŋgoyi loŋgo te oko oyiyite ’Bereŋwa Ice Ido ro driro. ³¹ ’Dooko Yesu atate ànyari ekye: “Ŋgäkyi gi ono si ami cini mìmuna ’da ago nyè’bena ma ’da, tana Taegyi atate ekye: ‘Lu ufuna lekye’ba ’da, ago gboko timele ro pereruna ’da.’ ³² Oko ondro eŋga mate lidriidriro oko, moyina ’da käti ami mile Galilaya ya.” ³³ Petero atate ṛeṛe ago atate Yesu ri ekye: “Me’bena mi ko alona, ondro ka’do azii cini ke’be mi ca owo!” ³⁴ Yesu atate Petero ri ekye: “Endaro mata miri ono, dri teinye gogo ri opeako ŋgäkyi ono si, migana kala maro ’da perena nätu.” ³⁵ Petero zatadrite ekye: “Märi kala miro ogane i’do alona, ka’do gica märi odrane mibe owo!” Ago Taeri’bai cini azii atayi kpate oso inye. ³⁶ ’Dooko Yesu oyite taeri’bai ndaro be vose äzibe Getesemane ana ya, ago nda atate ànyari ekye: “Mìri noŋwa madri oyi mileya mätu oyene.” ³⁷ Nda ru Petero ndi ŋgwai ritu Zebedayo robe te nda be, tana tusu ndi rriti be esate nda dri. ³⁸ Ago nda atate ànyari ekye: “Tusu te ndra ya maro ya ka oyete ma ufune. Mìri noŋwa ago mìkwa ŋga mabe.” ³⁹ Ndi nda oyite fere ga mileya, nda ’dete vuru militi si ago mätute ekye: “Täpi maro, ondro ka’do gindi rritiako, mina kofo ruezaro ono ni maresi! Caoko ko tase malebe ayani, oko tase milebe ayani.” ⁴⁰ ’Dooko nda egote taeri’bai se nätu kai re ago usu ànya te u’duvoya; ago nda atate Petero ri ekye: “Tana e’di ami nätu ono mìni ko vookwane mabe gica saa alodi ya niya? ⁴¹ Mìkwa ŋga ago nyä̀mätu ukyi mì’de ’da taojoro ya. Tori le gindi oko lomvo orivoya mbaraako.” ⁴² Yesu go oyi kpa to’di ago mätute ekye: “Täpi maro, ondro ka’do kofo rueza ro ono äni kote onane madale ka’dote märi umvune lutu oko, ayena ndi ole miro ayani.” ⁴³ Nda egote kpa to’di ago usu taeri’bai u’duyite ŋbi; tana ànya niyi kote orine miuŋbo. ⁴⁴ Yesu e’be ànya kpate to’di, ago oyite, ago mätute pere nina si, ata kpa ta alo ana ayani. ⁴⁵ ’Dooko nda gote taeri’bai re ago atate ekye: “Inye’do nyà drigba ugu u’du ndi loli be ya? Mindre! Saa esate Ŋgwa Lidri ro ozoza drí lidri takozi’bai roya. ⁴⁶ Mìŋga kuru, mì’de mòyi. Mìndre, mano se kabe drí maro ozona begi ono!” ⁴⁷ Ago ondro Yesu kadri ugu ata oko, Yuda se ni alo aza taeri’bai ’butealo foritu ro esate. Lowa du orivoya nda be bando be ago dofo be kohanii ’desi ndi ’di’desii be ezoyi ànya ni. ⁴⁸ Driozo’ba ozo taka’daro te lowa ri ekye: “Mano se mabe njunjuna ’do ni se mìlebe owo. Mìru nda!” ⁴⁹ Yuda oyite dori Yesu re ago atate ekye: “Taliatokpe ka’do mibe, Miemba’ba, ago njunju nda te.” ⁵⁰ Yesu zatadrite ekye: “Bereazi, miye tase milebe oyene ono ri ndrindri!” ’Dooko ànya cini ikyiyite, ruyi Yesu te, baṛiyi nda te anda. ⁵¹ Alo aza ’dise Yesu be kai ro eŋgye bando ndaro te ago ga bi ruindu’ba Kohani Fopara ro rote ätu. ⁵² Yesu atate ndäri ekye: “Nyologo bando miro vona ya. Vona se cini kayibe bando uru odrana ’da bando si. ⁵³ Mini ṛoko mänina ndi Täpi maro uzine ta ŋgaopa rota, ago unina ndi gboko kyila’bai malaikai ro kutu ’butealo foritu ezine märi ya? ⁵⁴ Oko ondro ka’do mayete inye, tase Taegyi kata tana be a’done ono unina a’done ŋgye eŋwanye ya?” ⁵⁵ ’Dooko Yesu atate lowa ri ekye: “Nyìkyite bandoi be ndi dofoi be ma urune, osoago ma orivoya ota pere’ba yi. Tu cini si marite vuru ago memba ŋga te Yekalu ya, oko mìru ma kote. ⁵⁶ Oko tase cini ono a’dote nonye tana tase cini nebii kegyiyibe Taegyi ya ana ka’do robe ŋgye.” ’Dooko taeri’bai cini e’beyi nda te ago muyite. ⁵⁷ Ànya se kuruyi Yesu be ana uguyi nda te zo Kayafa, Kohani Fopara roya, se miemba’bai Ota ro ndi ’di’desii yibe kotoyikalabe voaloya kigye ana. ⁵⁸ Petero sote kovole lozo si ni goko zo Kohani Fopara ro ro lomvosi. Nda oyite cite goko ya ago nda rite vuru vookwa’bai be tase cini ka oyebe a’done ’do ondrene. ⁵⁹ Kohanii ’desi ndi Taäyi’bai cini be ojoyite ta azaka usune kowero Yesu lomvo nda ufuza; ⁶⁰ oko ànya usuyi ta aza kote, lidri amba itweyi gica ago itiyi ta ca kowe si ta ndaro ta owo. Äduro oko lidri ritu itwete ⁶¹ ago atayite ekye: “Mano ono atate ekye: ‘Ma orivoya mbara be Yekalu Lu ro perene ago u’du nätu si oko mago mabena gwo vona ya.’ ” ⁶² Kohani Fopara ŋgate kurusi ago atate Yesu ri ekye: “Inye’do tase itibe milomvo ono mi ta ako tadrina ozane ya?” ⁶³ Oko Yesu a’dote titiro. Ago Kohani Fopara ata kpate to’di ndäri ekye: “Ävuru Lu lidriidriro rosi; yauono ma mi o’ba ruäṛune; nyiti ta ämäri ondro ka’do nya’dote ni Mesiya, Ŋgwa Lu ro owo.” ⁶⁴ Yesu zatadri ndaro te ekye: “Nyatate ṛoni wo. Oko ma ta iti ami cini ri ni tu ono si ono mindrena Ŋgwa Lidri ro ’da orivo ya drígwo Lu Mbarapara ro yasi ago ikyivoya ’dikolo vo’buyakuru rosi!” ⁶⁵ Ata ono ’ba Kohani Fopara wa boŋgo ndaro te ago atate ekye: “Ono Lu o’da yi! Màle tazevoedre’bai ndra aza kote! Yauono nyèri la’dao’da ndaro te! ⁶⁶ Nyùsu amiro be eŋwanye ya?” Ànya zayitadrite ekye: “Nda enjitate ago beṛo ndäri odrane.” ⁶⁷ ’Dooko ànya voyi to te mi ndaro ya, ’biyi nda te, ago ànya se kudiyi nda be kai atayite ⁶⁸ ekye: “Mesiya nyäŋgu, a’di ’bi mi niya?” ⁶⁹ Ondro Petero korite tesi goko ya oko alo aza ruindu’bai ndiriŋwa ro Kohani Fopara ro ikyite ndare ago atate ekye: “Mi kpa orivoya Yesu Galilaya robe.” ⁷⁰ Oko nda gakalate ànya cini milesi ekye: “Ta gi nyabe ugu atana ’do mäni ko”, ⁷¹ ago fote tesi ecivo goko roya. Ago ruindu’ba ŋgutiro aza ndre nda te ago atate lidri se lau ana ri ekye: “Nda orivoya Yesu Nazareta robe.” ⁷² Petero gakala kpate to’di ruäṛu si ekye: “Mäni mano ana ko!” ⁷³ Fere voigyesi oko lidri se kedreyibe lau ana ikyiyite Petero re atayite ekye: “Mi orivoya alo aza ànyaro owo. Tana ata miro ka’da mi ni!” ⁷⁴ ’Dooko Petero äṛurute ago atate ekye: “Ma taŋgye ata! Ka’do inye Lu keza ma ondro ka’do kote inye owo! Mäni mano ana ko!” Dori ndri oko gogo pe te, ⁷⁵ ago ata se Yesu katabe Petero ri ana go otote nda dri se ekye: “Dri teinye gogo ri opeako, migana kala maro ’da perena nätu.” ’Dooko nda fote tesi ago liyite tu.

¹ Ṛo kyenoŋboci oko kohanii ’desi cini ndi ’di’desii be rayitate Yesu lomvo nda ufune. ² Ànya embeyi nda te nyori si, uguyi nda te ago ozoyi nda te Pilato wari’ba Roma’ba ro ri. ³ Ondro Yuda, kunite ape vure Yesu rote oko, nda etadrite ago nda logo mo’di kaciro se ’butenätu ana te kohanii ’desi ndi ’di’desii be ri. ⁴ Nda atate ekye: “Maye takozi te mano taenjiako’ba ono drí na ozo si odrane!” Ànya zayitadrite ekye: “Ta amaro gi du be ya? ’Do te losi miro!” ⁵ Yuda da parata te vuru Yekalu ya ago oyite, ndi nda oyite ago yi andivo ndaro te. ⁶ Kohanii ’desi ku’duyi parata ana te ago atayite ekye: “Ono orivoya parata kari ro, ago Ota amaro voro ko o’bane vo parata Yekalu ro o’baro ya.” ⁷ Tadriole tana ro vosi oko, ànya gyeyi lowo lakazaobe’ba rote parata se ana si, avo atrai ro oseza. ⁸ Ta’doro äzi lowo se ana te Lowo Kari ro le tu ono si. ⁹ ’Dooko tase nebi Yeremaya katabe ana a’dote ŋgye se ekye: “Ànya ruyi mo’di kaciro ’butenätu te, lagye se lidri Yisaraele ro kolebe nda ogyene sina ro, ¹⁰ ago agye lowo lakazaobe’ba rote parata na si, oso Opi kota mabe ronye.” ¹¹ Yesu edrete wari’ba Roma’ba ro kandra, se eji nda te ekye: “Inye’do mi ni ’bädri’ba Yudai ro owo ya?” Yesu zatadrite ekye: “Nyata teṛo ŋgye.” ¹² Oko nda ata ta aza kote tase kohanii ’desi ndi ’di’desii be kikicuyi nda be ana tadrina ozaza. ¹³ Ta’doro Pilato atate ndäri ekye: “Inye’do nyeri tase cini ànya kayibe mi kicu tana ro ono ko ya?” ¹⁴ Oko Yesu gatezo tadri aza alona ozane, se tana ’ba wari’ba laro tawi. ¹⁵ Tu Karama Lävu Odra ro ro cini si wari’ba Roma’ba ro ratate kamba’ba alo aza se lowa kejitate tana ro onjine. ¹⁶ Tu gi ana si kamba’ba aza orivoya uniuniro äzite Baraba. ¹⁷ Ta’dota ondro lowa kotokalate oko, Pilato eji ànya te ekye: “Mìle märi a’di onjine ayani dritairo ämiri ya? Baraba kode Yesu se äzibe Mesiya ono ayani ya?” ¹⁸ Nda ni ṛote kado anjioko drikaca’bai Yudai ro ozoyi Yesu te ndäri tana ànya orivoya yaoko be. ¹⁹ Ondro Pilato dri orivoya vo vureope roya oko, toko ndaro zo lazo te ndäri ekye: “Miye ŋga aza ko mano taenjiako’ba ’do ri, tana ŋgäkyi be tori eza ma te tu ta ndaro ta.” ²⁰ Kohanii ’desi ndi ’di’desii be soyi ya lowa rote Pilato ejine Baraba onjine dritairo ago Yesu ufune ayani. ²¹ Oko Pilato eji lowa te ekye: “’Di ritu kwoi lakosi mìle märi a’di onjine ayani dritairo ämiri ya?” Ànya zayitadrite ekye: “Baraba!” ²² Pilato eji ànya te ekye: “Oko mayena e’di Yesu se äzibe Mesiya ono riya?” Ànya zayitadrite ekye: “Nyoto nda!” ²³ Oko Pilato ejitate ekye: “Tase kozi nda koyebe e’di ya?” ’Dooko ànya go trete ndra kporo amba si ekye: “Nyoto nda!” ²⁴ Ondro Pilato kondrete ta a’do kote kadoro, ago amo kate ugu a’do ndra oko, nda ru gyi te, ago jo drí ndaro te lowa milesi, ago atate ekye: “Ma maro orivoya wäṛi ni odra mano ono ro yasi! Ono orivoya taoye amiro!” ²⁵ Lowa cini zatadrite ekye: “Mi’ba kari ndaro kori ama dri ago ŋgwai amaro dri!” ²⁶ ’Dooko Pilato onji Baraba te dritairo ànyari, ago nda ’ba a’bi Yesu te ago ozo nda te otone. ²⁷ ’Dooko kyila’bai Pilato ro uguyi Yesu te zo’desi miri ro wari’ba roya, ago lowa cini otokalate gbikyi nda lomvosi. ²⁸ Ànya totriyi boŋgo ndaro te ago soyi boŋgo runduṛuro okaro te nda lomvo. ²⁹ Ago edeyi tagyia teni gwoṛi ce kukyi be ro yasi ago soyite nda dri, ago ’bayi dofo te drígwo ndaro ya, ago ànya soyikayate nda kandra, ago guyi nda te atayite ekye: “Miri madaro ’Bädri’ba Yudai ro!” ³⁰ Ànya voyi to te nda lomvo, ago ruyi dofo te ago ’biyi nda te drî ya. ³¹ Ondro ànya kondeyi nda ugu te oko, ànya triyi boŋgo runduṛuro te ago goyi soyi boŋgo ndaro te nda lomvo. ’Dooko lofoyi nda te tesi nda otone. ³² Ondro ànya kayite ugu oyi tesi oko, ànya ’beyidrite mano aza ni Kurene yasi be se äzite Simona, ago kyila’bai gbiriyi nda te taka Yesu ro uŋgyine. ³³ Ànya sayite vose äzibe Gologota ana ya, se takacina ni, vo kowa drî ro ro. ³⁴ Lau ànya ozoyi vino se odro’bebe ŋga osoro si ana te Yesu ri; oko ondro nda ketembe te oko, nda lekote umvune. ³⁵ Ànya otoyi nda te ago lonyiyi boŋgo ndaro te ànya voya vodo ovo si. ³⁶ Ono vosi ànya riyite lau ago kwayi nda te, ³⁷ kurusi drile ndaro ya ànya egyiyi taegyi nda kicuro te ekye: “Ono ni Yesu, ’Bädri’ba Yudai ro owo.” ³⁸ ’Dooko ànya otoyi ŋgatopa’bai ritu te Yesu be, alodi drígwo ndaro yasi ago azana gaṛi ndaro yasi. ³⁹ Lidri se kayibe lävu nasi kai ŋgyiṛiyi drî ànyaro te ago ’dayi Yesu te ṛeṛe ekye: ⁴⁰ “Mise milebe Yekalu perene riya vuru ago ogo obene to’di u’du nätu si ono! Mipa andivo miro, ondro ka’do mi ni Ŋgwa Lu ro owo! Nyefo vuru ni taka drisi!” ⁴¹ Kohanii ’desi ndi miemba’bai Ota robe ndi ’di’desii be guyi nda kpate oso inye ekye: ⁴² “Nda pa azii te, oko nda ni kote andivo ndaro opane! Inye’do ’do ṛo ko ’Bädri’ba Yisaraele ro owo ya? Mì’ba nda kefo vuru ni taka drisi yau, ago màmana ta ndi nda ya! ⁴³ Nda ka taoyi Lu ya ago ka yi o’ba a’done Ŋgwa Lu ro. Kadoyi, dia, mì’de màndre kode Lu kaoye nda opane ya!” ⁴⁴ Ŋgatopa’bai gi se otobe nda be kai ’dayi nda kpate oso inye. ⁴⁵ Ago te oso kitudiri ronye oko ŋgätini tako ’bädri cini te; ago rite inye cu saa nätu. ⁴⁶ Oso saa njidriesu ronye oko Yesu trete otre amba si ekye: “Eli, Eli, lama sabaketani?” Se takacina ni ekye: “Lu maro, Lu maro, nye’be ma te etaya?” ⁴⁷ Rukä lidri ro se kedrebe loto lau ana keriyi otre ndaro te oko atayite ekye: “Nda ka Eliya uzi!” ⁴⁸ Dori alo aza ànyaro mute, ru lifo te sote vino äträ ya, sote drî dofo roya, ago ojote nda o’bane umvune. ⁴⁹ Oko ’di azaka atate ekye: “Dri, mì’de màndre te kode Eliya kaoye ikyine nda opane!” ⁵⁰ Yesu trete kpa to’di amba ago adri ndaro efote. ⁵¹ ’Dooko boŋgo se ayibe Yekalu ya ana yana lesite ritu ni kurusi le vuru. Gyini kandarute, luutui lifute, ⁵² ’budrii tupirute, ago lidri amba Lu ro se kodrabe ana adrite. ⁵³ Ànya e’beyi ’budrii te, ago efo Yesu ro ni avo yasi vosi oko, ànya oyiyite ’Bakici Alokado ya se lidri amba ndreyi ànya te. ⁵⁴ Ondro dri’ba kyila’bai ro ndi kyila’bai se kayibe Yesu okwa ana kondreyi ägbigbi ndi ŋgase cini ka’dobe ana be te oko, ànya turiyi tawi ago atayite ekye: “Endaro nda ni Ŋgwa Lu ro!” ⁵⁵ ’Ditoko amba orivoya, se kayi ta ondre lozo si, se kosoyibe Yesu vo ni Galilaya yasi se payi nda te ana. ⁵⁶ Ànya lako ni Maria Magadalene, Maria endre Yakoba ro ndi Yosepa be, ago toko Zebedayo ro. ⁵⁷ Ondro te tandrolero oko, mano ŋgaamba’ba aza ni Arimatayo yasi esagwo, ävuru ndaro Yosepa, ago nda kpa orivoya taeri’ba Yesu ro. ⁵⁸ Nda oyite Pilato re ago ejitate avo Yesu rota. Pilato ozotate avo ozone Yosepa ri. ⁵⁹ Ndi Yosepa ŋgyi avo te, vu anya te boŋgo rendelero to’diro si, ⁶⁰ ago se nda te ’budri modo ndaro roya, se nda gate lutu lomvo to’diro ana. ’Dooko nda reṛi kuni ’desi te kala ’budri roya ndi oyite. ⁶¹ Maria Magadalene ndi Maria se aza ana be riyite lau, zayimite ’budri dri ro. ⁶² Tu kinjo, se ni Sabata yi ana si, kohanii ’desi ndi Parusii be ikyiyite Pilato re ⁶³ ago atayite ekye: “’Desi, màyi tase kowe’ba ono katabe ’dooko nda drigba lidriidriro ana tana ndi se nda ekye: ‘Madrina ’da u’du nina si.’ ⁶⁴ Ka’do inye nyozo ta, tana akwa ’budri ndaro robe, ukyi taeri’bai ndaro oyi ’da avo ndaro kugune, ’dooko atanayi gwo lidri ri ekye: ‘Nda efo teni avo yasi.’ Koweoga se äduro ono a’dona te ndrani se käti ono drisi.” ⁶⁵ Pilato atate ànyari ekye: “Mìru vookwa’bai ago nyòyi mìndre vo ’budri ro kadoro.” ⁶⁶ Ndi ànya oyiyite yeyi ’budri te kadoro ŋga obeobero o’ba si kuni lomvosi ago e’beyi vookwa’bai te vookwane.

¹ Sabata vosi ’buzevo osivoya tu käti u’du njidrieri rosi oko, Maria Magadalene ndi Maria se aza ana be oyiyite ’budri ondrene. ² Dori ägbigbi site mbarasi lau, malaika Opi ro ikyite vuru ni vo’buyakuru yasi reṛi kuni te pere, ago rite driigye. ³ A’do ndaro laba oso leko ’bu ro ronye, ago boŋgo ndaro onjero oso siya ronye. ⁴ Vookwa’bai a’doyite turiro ànya lä’biyite ago a’doyite oso lidri se kodrate ronye. ⁵ Malaika ana atate ’ditoko kai ri ekye: “Nyà’do ko turi ro, mänite nyà Yesu se otobe ana uṛina. ⁶ Nda i’do noŋwa, nda efote, gi oso se nda katabe ronye. Nyìkyi noŋwa ago mìndre vose alala nda be kigye ono. ⁷ Nyòyi ndrindri, yauono nyàta taeri’bai ndaro ri mìkye: ‘Nda efote ni avo yasi, ago yauono nda kate ugu oyi Galilaya ami mile; ago mìndrena nda ’da lau!’ Mìyi tase mìtibe ämiri ono tana.” ⁸ Ndi ànya oyiyite foroforo ni ’budri drisi turi si ago riyä amba be ago mùyite ta itine taeri’bai ndaro ri. ⁹ Dori Yesu ’bedrite ànya be ago ye mede te ànyari ekye: “Taliatokpe ka’do ami yibe.” Ànya ikyiyite ndare, ovoyi pa ndaro te, ago mätuyi nda te. ¹⁰ Yesu atate ànyari ekye: “Nyà’do ko turiro. Nyòyi ago nyàta ädrupii maro ri koyiyi Galilaya ya, ago ànya ondrenayi ma ’da lau.” ¹¹ Ondro ’ditoko se kai koyiyite liti ànyaro yasi oko, rukä kyila’bai se kayibe ’budri okwa ana ro oyiyite ’bakici ya ago itiyi ta cini se ka’dobe ana tana te kohanii ’desi ri. ¹² Kohanii ’desi dro’beyi iyi te ’di’desii be ago rayi ta ànyaro te, parata amba ozone kyila’bai se kai ri ¹³ atayite ekye: “Ämiri atane mìkyi taeri’bai ndaro ikyiyite ŋgäkyi si ago kuguyi avo ndaro te ’dooko mù’dute. ¹⁴ Ago ondro Wari’ba keri ta ono te oko, màtana ’da ndäri màkye ami orivoya taenjiako, ago ami ta aza ako milo’bene tana ro.” ¹⁵ Vookwa’bai ruyi parata se ana te ago yeyi ta ndi oso se atabe oyene ànyari ana ronye. Ta’doro tase itibe ana larirute Yudai cini lakosi gile tu ono si ono. ¹⁶ Taeri’bai ’butealo foalo oyiyite lutu se Galilaya ya ana ya vose Yesu katabe oyine ànyari kigye ana ya. ¹⁷ Ondro ànya kondreyi nda te oko, ànya mätuyi nda te, rukä ànya ro drigba ca wiriwiriro owo. ¹⁸ Yesu iswete loto ago atate ànyari ekye: “Ozo drikaca cini se vo’buyakuru ya ndi ’bädri be te märi. ¹⁹ Ka’do inye, nyòyi lidri cini re vo cini yasi, ago mì’ba ànya a’done taeri’bai maro; Nyà bapatisi ànya ävuru Täpi roya, Ŋgwa roya, ago Tori Alokado roya, ²⁰ ago nyèmba ànya tase cini mata ami be sina ono orone. Ago mà’dona ndi tro ami be ondoalo, le tu äduro ya.”