LUKA
11 Teopila ri: Lidri amba ojote ta ŋgase ayebe ama lako ono tana egyine. 2 Ànya egyiyi ta tase iti tana be ämäri ànya se kondreyi ŋga kwoi be ṛo ni etovoya ago se kopeyi lazona be ono te. 3 Tana ta’doro, mise Fopara ono, tana metenyi tase cini kwoi zevona te liyaro ni etovo ànyaro ya, musu tavona be ni kado tana egyine sirosiro miri. 4 Ma oyena nonye tana mini taŋgye ta cini se emba mibe sina ono robe. 5 Tuse Eroda be ni ’bädri’ba Yuda ro ana si, kohani aza orivoya äzite Zekaria, se ni zelevo Abija kohani ro yasi. Toko ndaro ävuruna Elizabeta; anya kpa ni katidri kohani Arona ro yasi. 6 Ànya riti riyi ori kado te Lu mile ago royi ota ndi ta cini Opi robe te kadoro. 7 Ànya teinye ŋgwai ako tana Elizabeta kondo yi, ago anya ndi Zekaria be riti dete. 8 Tu alo si oko Zekaria ka ugu losi ndaro kohani ro oyena Yekalu ya, ka ugu kama ndaro ruindu ro ondoalo oyena. 9 Oso la’bi kohanii ro ronye, anji nda te vodo ovo si ŋga tägyi tagyiri ro ozane vo tori oloro dri. Ago nda oyite Yekalu Opi roya, 10 ago lowa lidri ro tesi mätuyite saa ŋga tägyi tagyiri ro oza rosi. 11 Malaika Opi ro ka’darute ndäri edrete telesi drígwo vo tori oloro ro se aza ŋga tägyi tagyiri robe kigye ana ya. 12 Ondro Zekaria kondre nda te oko, nda larote ago a’dote turituri ro. 13 Oko malaika atate ndäri ekye: “Nyuturi ko, Zekaria! Lu eri mätu miro te, ago toko miro Elizabeta utina ŋgwa agoro ’da miri, ago mizina ävuru ndaro ’da Yoane. 14 Nya’dona yai’dwesi ago riyä si ago ’di azaka amba a’dona kpa yai’dwesi ondro äti nda te owo! 15 Nda a’dona ’da mano ’desi ro Opi mile. Beṛo ko ndäri vino ndi wa osoekye be umvune. Ṛo ni uti ndaro si nda a’dona ’da twi Tori Alokado be, 16 ago nda ezina amba lidri Yisaraele ro ro ’da Opi Lu ànyaro re. 17 Nda oyina ’da Opi mile, mbara be ago aṛi be oso nebi Eliya ronye. Nda ezina täpii ndi ŋgwai be ’da voaloya kpa to’di, nda ezana mi lidri taoroako’bai ro ’da kovole liti tavousu ro ŋgyero ya, nda edena lidri Opi ro ’da nja ndäri.” 18 Zakaria atate malaika ri ekye: “Ondro ka’do ta ono ka’do ndi endaro mänina eŋwanye ya? Yauono made te, ago toko maro de kpate.” 19 Malaika zatadrite ekye: “Ma Gaberiele, ma edre Lu kandra, nda ezo ma te ta opene miri ago lazo kado ono tana itine miri. 20 Oko mima kote lazo maro ya, se a’dona ’da endaro tu ŋgyena ya. Tana mima kote nya’dona te mbaraako atane, mirina te titiro madale tuse tao’ba maro miri a’dona lutu endaro.” 21 Lidri rite madaro Zakaria kotevoya ago laroyite tu ori ndaro madaro Yekalu ya tana ro. 22 Ondro nda kefote tesi oko, nda ni kote atane ànyari, ago ’dooko ànya niyite anjioko nda ndre rulofo te Yekalu ya. Nda te mbaraako ta atane, nda ye taka’daro te ànyari drí ndaro si. 23 Ondro tu ndaro ruindu ro Yekalu ya kokyete oko, Zekaria oyite kovole ’bäru. 24 Tu fere vosi oko toko ndaro Elizabeta kwo ŋgwa te ago efo kote ni zo yasi imba na nji. 25 Anya atate ekye: “Yauono Opi pa ma te. Nda ana driupi maro se azi mile ono te.” 26 Imba njidrialo Elizabeta ro a’doro kovoro rosi oko Lu zo malaika Gaberiele te ’ba’desi aza Galilaya roya se äzibe Nazareta. 27 Nda lazo be ŋguti se a’be te mano se äzibe Yosepa ana ri, se ni zelevo ’Bädri’ba Dawidi ro yasi. Ävuru ŋguti ro ni Maria. 28 Malaika ikyite anya re ago atate ekye: “Taliatokpe ka’do mibe! Opi orivoya mibe ago äṛu mite ndra!” 29 Maria a’dote rritiro tusuro lazo malaika ro tana ro, ago anya larote lo’bemite ata ndaro takacina ro. 30 Malaika atate anya ri ekye: “Nya’do ko turituri ro, Maria; Lu a’dote yauni be miri. 31 Mikwona ŋgwa ’da ago mitina ŋgwaagoro ’da, ago mizina ävuru ndaro ’da Yesu. 32 Nda a’dona ’da ’desi ro ago äzina ’da Ŋgwa Lu Fopara Ndra ro. Opi Lu o’bana nda ’da ’bädri’ba ro, oso zutu ndaro Dawidi ronye, 33 ago nda a’dona ’da ’bädri’ba ro, zelevoi Yakoba ro ri äduako, miri ’bädri’ba ndaro ro okyena ko alona!” 34 Maria atate malaika ri ekye: “Ma drigba ŋguti kodroŋwa ro, oko ’do a’dona eŋwanye ya?” 35 Malaika zatadrite ekye: “Tori Alokado ikyina ’da midri ago mbara Lu Fopara Ndra ro orina ’da midri. Tana ta ono ro ŋgwa alokado ono äzina ’da Ŋgwa Lu ro. 36 Miyi ta diri miro Elizabeta ro. Atate ekye anya unina ko te a’done ŋgwà be, oko andivo anyaro te kovoro ro yauono imbana te njidrialo; anya gica odeodero pari owo. 37 Tana ŋga aza i’do se Lu unina ko oyene.” 38 Maria atate ekye: “Ma ni ruindu’ba Opi ro owo, mi’ba ka’do ndi märi oso nyatabe ronye.” Ago malaika oyite ni anya resi. 39 Ono vosi Maria ŋgate dori ago oyite foroforo ’ba’desi ’bädri lutu ro Yuda roya. 40 Anya oyi cite zo Zakaria roya ago ye mede te Elizabeta ri. 41 Ondro Elizabeta keri mede oye Maria rote oko ŋgwa ŋgate anya ya, ago Elizabeta a’dote twi Tori Alokado be, 42 ago trete amba ekye: “Äṛu mi te ndrani ’ditoko cini ri, ago ŋgwa se nya oyebe utine ono äṛute! 43 Tase ’desi ro ono a’dote märi etaya, tana e’di endre Opi maro ro ikyite ma täkyine niya? 44 Tana meri mede miro te dori oko, ŋgwa maya ŋgate yai’dwesi. 45 Opi äṛu mite tana mimate anjioko lazo ndaro miri a’dona ndi endaro.” 46 Maria atate ekye: “Ya maro ka Opi räṛu; 47 lindri maro yai’dwesi ta Lu Opa’ba maro rota, 48 tana nda yi ta ma ruindu’ba ndaro mäyuro rote. Etoni yauono le kovole’bai se cini kabe ikyi ya lidri atana ’da ekye äṛu ma te, 49 tana ŋgase ’desi ro Lu Mbarapara koyebe märi ono ta. Ävuru ndaro ni alokado; 50 ni kovole’bai alo ya le vona cini ya nda ka yauni ka’da ànya se koroyi nda be kai ri. 51 Nda pere kufu mbaraekye ndaro te ago pere driuŋgyi’bai te tavoora cini ànyaro be. 52 Nda lofo ’bädri’bai mbaraekye te vuru ni gitii ànyaro drisi, ago eŋga ’di mäyuro te kuru ’desiro. 53 Nda ’ba ya ’dise täbiri be ro gate ŋga kado si, ago nda zo ŋgaamba’bai te drí awiro. 54 Nda äti tao’ba ndaro se nda ko’babe zutui amaro ri te, ago ikyite ruindu’ba ndaro Yisaraele opane. 55 Nda yitate yauni ka’dane Abarayama ri ndi zelevoi cini ndaro be äduako!” 56 Maria rite Elizabeta be oso imba nätu ronye ago ’dooko anya gote kovole ’bäru. 57 Tu esate Elizabeta ri ŋgwa anyaro utiza, ago anya ti ŋgwaagoro te. 58 Oriazii anyaro ndi ’didiri anyaro be eriyi tase kado laroro Opi koyebe anyari ono tana te, ago ànya yeyi riyä te anya be. 59 Ondro u’du ŋgwa rote njidrieri oko ànya ikyiyite nda olone ŋbiṛiro, ago ànya leyi nda uzine Zakaria, täpi ndaro dri. 60 Oko endre ndaro atate ekye: “Hwa! Ävuru ndaro a’done Yoane.” 61 Ànya atayite anya ri ekye: “’Didiri miro aza i’do ävuru ’do be!” 62 ’Dooko ànya ejiyi täpi ndaro te drí si ävuru se nda lebe ŋgwa ri a’done sina uzine. 63 Zakaria ejitate ŋga taegyiro taegyiza driigye ta ago egyite ekye: “Ävuru ndaro ni Yoane.” Ànya cini a’dote larolaro ro. 64 Ago dori Zakaria eto atate, ago eto Lu räṛu te. 65 Oriazii cini a’dote twi turi be, ago lazo tase kwoi ro larirute ’bädri cini lutu ro Yuda ro yasi. 66 ’Dicini se keri tana be usu tavona te ago ejitate ekye: “Ŋgwa ono a’dona eŋwanye ya?” Endaro mbara Opi ro teṛo orivoya ŋbelero nda dri. 67 Täpi Yoane ro Zakaria a’dote twi Tori Alokado be, ago nda äŋgu tate ekye: 68 “Mì’de märäṛu Opi, Lu Yisaraele ro! Nda ikyite lidri ndaro opane ri ago ’ba ànya te dritai ro. 69 Nda ozo Opa’ba aṛiekye te ämäri, ni zelevo Dawidi ruindu’ba ndaro ro yasi. 70 Nda ’batate ṛo kyeno nebii alokado ndaro si, 71 anjioko nda opana ama ’da ni kyila’baazii amaro risi, ago ni mbara ànya se cini yana kabe oso ama lomvo ro yasi. 72 Nda atate nda ka’dana yauni ’da zutui amaro ri ago oyina tao’baro alokado ndaro tana ’da. 73 Ruäṛu lämu’duro si zutu amaro Abarayama ri 74 nda ’batate ama opane ni kyila’baazii amaro ri, tana mìnduru robe ndäri teinye turi ako, 75 tana ma’do robe alokado ago taŋgye’bai ro nda mile tu cini ori amaro rosi. 76 “Mi, ŋgwa maro, äzina mi ’da nebi Lu Fopara Ndra ro. Nyoyina ’da käti Opi mile liti ndaro edene ndäri, 77 ta itine lidri ndaro ri apana ànya ’da takozi ànyaro e’bena si. 78 Lu amaro yauni amba be ago yai’dwe be Nda o’bana voeyi ’buzevoosiro ŋgaoparo ’da itune ämädri. 79 Voeyine ni vo’buyakuru yasi, vona se cini kabe ori lindri uniro odra roya kai dri, aba amaro lepene liti taliatokpe roya.” 80 Ŋgwa mbate ago a’dote mbararo lomvo ya ago tori ya. Yoane rite vocowa ya madale tuse nda ka’dayite ŋbelero lidri Yisaraele ro ri.
21 Tu ana si ’Bädri’ba Auguseto ’batate lidri cini se ŋga miri Roma’ba ro zele cini otine. 2 A’do lidri oti käti ono ro ka a’do oko, Kurini ni orivoya Wari’ba Siria ro. 3 ’Dooko ’dicini oyiyite ävuru andivo ndàro ro egyine, ’dialo oyite ’ba’desi ’ba modo ndaro roya. 4 Yosepa oyite ni ’ba’desi Nazareta ro Galilaya yasi le ’ba’desi Beteleme Yuda ya ya, utivo ’Bädri’ba Dawidi roya, Yosepa oyite lau tana nda ni zelevo Dawidi ro owo. 5 Yosepa oyite yi egyine Maria be, se a’be be tokoro anya ri ana. Anya te kovoro ro, 6 ago ondro ànya te orivoya Beteleme ya oko, tu anyaro ŋgwa utiro esate. 7 Anya ti ŋgwa käti anyaro te agoro, vu nda te boŋgo si ago ’be nda te gbalata ya; tana vo i’do ànyari oriza zo ŋgwazi roya. 8 Lekye’bai azaka orivoya ’bädri ana ya ànya orivoya lowo ya, kayi vo gboko timele ànyaro ondrena ŋgäkyi si. 9 Malaika Opi ro ka’darute ànyari, ago ŋgaeyi Opi ro eyivote ànya dri. Ago ànya a’doyite turi ro amba, 10 oko malaika atate ànyari ekye: “Nyà’do ko turi ro! Ma orivoya lazokado be tana ami, se ezina riyä amba ’da lidri cini ri. 11 Tu gi ondro ono si ono ’ba’desi Dawidi roya äti Opa’ba amiro, Kristo Opi te! 12 Ago ono ni tase tana ka’daza sina ämiri owo; nyùsuna ŋgwa ävute boŋgo si u’duvoya gbalata ya.” 13 Ndri oko lowa amba malaikai vo’buyakuru ro ro efote malaika ana re, kayi ugu Lu räṛu loŋgo oŋgo si ekye: 14 “Räṛu ka’do Lu ri le vo’buyakuru ya, ago taliatokpe ka’do ’bädri ya ànya se tana si nda be ri!” 15 Ondro malaikai koyiyite ni ànya resi kovole vo’buyakuru ya oko, lekye’bai atayite azi ri ekye: “Mì’de mòyi Beteleme ya tase ka’dobe ono ondrene se Opi kiti tana be ämäri ono.” 16 Ago ànya oyiyite foroforo ago usuyi Maria ndi Yosepa be te ago ndreyi ŋgwa te u’duvoya gbalata ya. 17 Ondro lekye’bai kondreyi nda te oko, ànya itiyi tase malaika katabe ta ŋgwa rota ana tana te ànyari. 18 Vonai se cini keriyi tase lekye’bai kitiyibe ana be laroyite. 19 Maria yi tase cini kwoi te ago usu tana te gyuru. 20 Lekye’bai oyiyite kovole, ugu Lu räṛu be loŋgo oŋgo si tase cini ànya keriyibe ago kondreyibe ana ta, a’do ndi oso se malaika kitibe ànyari ana ronye. 21 U’du njidrieri vosi oko, tu kesate ŋgwa oloza ŋbiṛiro oko, äzi ävuru ndaro te Yesu, ävuru se malaika kozobe ndäri teinye nda okwo ako ’do. 22 Tu esate Yosepa ri ndi Maria be la’bi ta a’doro wäṛiro oyene, oso Ota Musa ro katabe ronye. Ago ànya uguyi ŋgwa te Yerusalema ya nda ozone Opi ri, 23 oso egyibe Ota Musa roya ronye ekye: “Ŋgwà se cini abe utina käti àgoro ozone Opi ri.” 24 Ànya oyiyi kpate tu’bu ritu kode amoamo to’diro ritu be ozone, oso Ota Opi ro kolebe ronye. 25 Tu ana si mano aza äzite Simeona ka ori Yerusalema ya. Nda orivoya mano kado yi mano taŋgye’ba yi ago Lu turi’ba yi ago ka ugu ta Yisaraele oparo kwote. Tori Alokado tro nda be. 26 Ago Tori Alokado petate ndäri anjioko ndäri odrane teinye Mesiya se Opi ko’ba tana be ondreako i’do. 27 Tori lepe Simeona te ago nda oyite Yekalu ya. Ondro Yosepa ndi Maria be keziyi ŋgwa Yesu te Yekalu ya ta oyene ndäri oso Ota kolebe ronye oko, 28 Simeona ŋgyi ŋgwa te kufu ndaro ya ago ozo aro’boya te Lu ri ekye: 29 “Yauono Opi, nyäti tao’ba miro te, ago mi’ba ma ruindu’ba miro odrane liatokpe ro. 30 Mi modo maro rosi mandre ŋgaoparo miro te, 31 se nyedete lidri cini milesi: 32 Orivoya ŋgaeyi yi ole miro ka’daza Atrai ri ago ’desi eziza lidri miro Yisaraele ro ri.” 33 Täpi ŋgwa ro ndi endre be larote tase Simeona katabe ta ndaro ta ono ro. 34 Simeona äṛu ànya te ago atate Maria, endre ndaro ri ekye: “Lu nji ŋgwa ono o’deza ago kpa ruopaza amba Yisaraele ro ri. Nda a’dona ’da taka’daro ro ni Lu resi se lidri amba atana ta ’da lomvoigye 35 ago aka’dana tavousu ndrwi ànyaro ’da. Ago tusu, oso bando osiekye ronye, osina ya modo miro ro ’da.” 36 Nebi toko ro odeodero pari aza orivoya, äzite Ana, ŋguti Fanuele ro ’bakala Asera ro yasi. Agye anya be ri toto ago be ndroa njidrieri, 37 ago anya a’dote ävuzi ro ndroa na ’butenjidriena fosu (84). Anya e’be Yekalu kote alona, kitu si ago kpa ŋgäkyi si anya mätu Lu te, ugu akpa si ndi mätu oye be. 38 Saa gi alo ono si anya esate ago ozo aro’boya te Lu ri ago pe ta ŋgwa rote ’dise cini se ka ugu Lu kwote Yerusalema o’bane dritairo ana ri. 39 Ondro Yosepa ndi Maria be kondeyi tase cini Ota Opi ro kolebe oyene te oko, ànya goyite ’ba’desi modo ànyaro ro Nazareta se Galilaya ya ana ya. 40 Ŋgwa mbate, ago a’dote mbararo; nda a’dote twi tavouni be, ago äṛu Lu ro orivoya nda dri. 41 Ndroa cini si uti’bai Yesu ro oyiyite Yerusalema ya ta Karama Lävu Odra ro rota. 42 Ondro ndroa Yesu rote ’butealo foritu oko, ànya oyiyite karama ya oso ondoalo ronye. 43 Ondro karama kokyete oko, ànya etoyi ogote ’bäru, oko ŋgaga Yesu rite Yerusalema ya. Uti’bai ndaro niyi tana kote; 44 ànya kusube ekye nda orivoya lowa lako, ago ànya abayite kituzwi ago ’dooko, etoyi nda uṛite ’didiri ànyaro ndi bereazii be lakosi. 45 Ànya usuyi nda kote, ago ànya oyiyite kovole Yerusalema ya ugu nda uṛi be. 46 U’du nina si oko ànya usuyi nda te Yekalu ya, rite miemba’bai Yudai robe, ka ugu ta ànyaro erina ago ka ugu taeji. 47 ’Dise cini keri ta ndaro be larote tauni ndaro ndi tadrioza ndaro be tana ro. 48 Uti’bai ndaro larote ondro ànya kondreyi nda te owo, ago endre ndaro atate ndäri ekye: “Ŋgwa, miye ta gwo ämäri nonye etaya? Täpi miro ndi mabe lo’bemite tu ugu mi uṛi be.” 49 Nda zatadri ànyaro te ekye: “Mìṛi ma te etaya? Mìni ṛo ko anjioko beṛo märi a’done zo Täpi maro ro ya ya?” 50 Oko ànya niyi tadrioza ndaro takacina kote. 51 Ago Yesu oyite kovole ànya be Nazareta ya, ago a’dote taoro be ànyari. Endre ndaro ’ba tase cini kwoi tana te ya anyaro ya. 52 Yesu mbate lomvo ya ago kpa tavouni ya, ugu a’dote tai’dwero Lu ro ndi lidri ro robe.
31 Ndroa ’butealo fonji miri ’Bädri’ba Tiberia rosi; Poneto Pilato ni wari’ba Yuda ro. Eroda ni miri’ba Galilaya ro, ago ädrupi ndaro Filipo ni miri’ba wari Iturea ndi Trakoniti be ro; Lusania ni miri’ba Abilene ro, 2 ago Ana ndi Kayafa be orivoya ni kohanii fopara ro. Tu ana si ata Lu ro ikyite Yoane ŋgwa Zakaria ro ri vocowa ya. 3 Ago Yoane oyite wari cini Golo Yaradene ro yasi, ugu taope be ekye: “Nyètadri ni takozi amiro yasi ago nyà’do bapatisi be, ago Lu e’bena ami ndi takozi amiro ta.” 4 Oso se egyibe buku nebi Yesaya roya ronye ekye: “’Diaza ka ugu driayo vocowa ya ekye: ‘Nyède liti nja Opi ri nyède liti ŋgye ndäri abaza! 5 Beṛo vodelero cini tisine, lutu cini ndi ’bereŋwa be terine vuru. Liti cini gwa’digwa’di ro beṛo edrene ŋgye, ago liti ŋbarakata ro edene biliro. 6 Lidri cini ondrena ŋgaopa Lu ro ’da!’ ” 7 Lowa lidri ro ikyite Yoane re ndäri ànya bapatisine, nda atate ànyari ekye: “Ami inii ono, a’di emba mi ämiri ni imune ni taezaro se kabe ikyi ono riya? 8 Dia mìye ŋgase ka’dana ndi anjioko nyètadrite ni takozi amiro yasi, ago nyèto ata ko amivoya mìkye, Abarayama ni zutu amiro. Mata ämiri ono Lu ro mbara be zelevoi ozone Abarayama ri ni kuniŋwà kwoi yasi! 9 Koloŋwa te orivoya nja paji ice ro ogaza ice se cini kowa doŋgo kado ko ’do agana ’da vuru ago avona ’da asi ya.” 10 Lidri eji Yoane te ekye: “’Dooko, màyena e’di ya?” 11 Nda zatadrite ekye: “Nda se boŋgo lomvo ro ritu be beṛo ozone mano se akona ri, ago nda se ŋgaonya be koye kpa inye.” 12 Rukä parata koto’bai ro ikyiyite a’done bapatisi be ago ànya ejiyi nda te ekye: “Miemba’ba ämäri e’di oyene ya?” 13 Nda atate ànyari ekye: “Mìru ko ndrani se atibe urune drisi.” 14 Kyila’bai azaka ejiyi nda kpate ekye: “Oko ama ni? Màyena e’di ya?” Nda atate ànyari ekye: “Mìru parata ko ni ’diaza rigye mbara si ago nyìkicu ’diaza ko kowero. Mì’ba päläti amiro kojo ami.” 15 Mio’ba lidri ro eŋga drî te, ago ànya etoyi tausu te kode Yoane a’dona ni Mesiya owo. 16 ’Dooko Yoane atate ànya cini ri ekye: “Ma ami bapatisi gyi si, oko ’diaza ikyivoya se ’desi ndrani mädrisi, takado maro ojo ko ca mvoka ndaro onjine. Nda bapatisina ami ’da Tori Alokado si ago asi si. 17 Nda orivoya ku’bi ndaro ŋga lu’biro be, inya cini lu’biza ago osona gwo kyiro ndaro ya; oko nda ozana kurumu na ’da asi se zwe ko alona ana si.” 18 Yoane pe Lazokado te lidri ri liti toto amba yasi ago eji ànya te liti taoye ànyaro ro tozane. 19 Oko Yoane luku Wari’ba Eroda te, tana nda ru Erodia, toko ädrupi ndaro rote, ago ye ŋga azaka amba undiro te. 20 ’Dooko Eroda ye ŋga kozi ndra kpate Yoane o’ba si kamba ya. 21 Lidri cini bapatisina vosi oko, abapatisi Yesu kpate. Ondro nda kate ugu mätu oko, vo’buyakuru pirute, 22 ago Tori Alokado ikyite vuru nda dri a’do lomvo na ro oso tu’bu ronye. Ago ata ikyite ni vo’buyakuru yasi ekye: “Mi ni Ŋgwa modo maro ro se mulu tawi ono owo. Ta miro si ma ni.” 23 Yesu ka losi ndaro etona oko, ndroa ndaro te oso ’butenätu ronye. Lidri kusube, nda ni ŋgwa Yosepa ro, ni ŋgwa Heli ro, 24 ŋgwa Matata ro, ŋgwa Lewe ro, ŋgwa Meleki ro, ŋgwa Janai ro, ŋgwa Yosepa ro, 25 ŋgwa Matatia ro, ŋgwa Amosa ro, ŋgwa Nauma ro, ŋgwa Eseli ro, ŋgwa Nagai ro, 26 ŋgwa Maata ro, ŋgwa Matatia ro, ŋgwa Semeina ro, ŋgwa Yoseke ro, ŋgwa Joda ro, 27 ŋgwa Joanana ro, ŋgwa Resa ro, ŋgwa Zerubabela ro, ŋgwa Selatiele ro, ŋgwa Neri ro, 28 ŋgwa Meleki ro, ŋgwa Adi ro, ŋgwa Kosama ro, ŋgwa Elimadama ro, ŋgwa Ere ro, 29 ŋgwa Yosua ro, ŋgwa Eliezera ro, ŋgwa Yorima ro, ŋgwa Matata ro, ŋgwa Lewe ro, 30 ŋgwa Simeona ro, ŋgwa Yuda ro, ŋgwa Yosepa ro, ŋgwa Yonama ro, ŋgwa Eliakima ro, 31 ŋgwa Melea ro, ŋgwa Mena ro, ŋgwa Matata ro, ŋgwa Natana ro, ŋgwa Dawidi ro, 32 ŋgwa Yisai ro, ŋgwa Obede ro, ŋgwa Boaza ro, ŋgwa Salemona ro, ŋgwa Nasona ro, 33 ŋgwa Aminadaba ro, ŋgwa Ademina ro, ŋgwa Areni ro, ŋgwa Ezerona ro, ŋgwa Pereza ro, ŋgwa Yuda ro, 34 ŋgwa Yakoba ro, ŋgwa Yisika ro, ŋgwa Abarayama ro, ŋgwa Tera ro, ŋgwa Naora ro, 35 ŋgwa Seruga ro, ŋgwa Reu ro, ŋgwa Pelega ro, ŋgwa Ebera ro, ŋgwa Sela ro, 36 ŋgwa Kainana ro, ŋgwa Arefalada ro, ŋgwa Sema ro, ŋgwa Noa ro, ŋgwa Lameka ro, 37 ŋgwa Metusela ro, ŋgwa Enoka ro, ŋgwa Jareda ro, ŋgwa Mahalaiele ro, ŋgwa Kenane ro, 38 ŋgwa Enosa ro, ŋgwa Sete ro, ŋgwa Adama ro, ŋgwa Lu ro.
41 Yesu egote ni Golo Yaradene yasi twi Tori Alokado be ago Tori ugu nda te le vocowa ya, 2 kicu’ba ojo ta ndaro te lau u’duna ’butesu, tu gi cini ana si nda nya ŋga aza kote, ago okyena vosi nda te täbiri ro. 3 Kicu’ba atate ndäri ekye: “Ondro ka’do mini orivoya Ŋgwa Lu ro owo mita kuni ono kotozaru ambata ro.” 4 Oko Yesu zatadrite ekye: “Taegyi atate ekye: ‘Lidri ni ko orine toto alo ambata si.’ ” 5 ’Dooko kicu’ba lutu nda te kuru ago ka’da ’bädri cini se abe mirina ’bädri’bai si te ndäri ndriŋwa. 6 Kicu’ba atate ndäri ekye: “Mozona mbara cini ono ndi miri ndi ŋgadriamba cini ono be. Ozo vona te cini märi, ago mozona ndi ’dise mabe onjina ri. 7 Vona cini ono a’dona ndi miro, ka’do ondro nyämätu ma te owo.” 8 Yesu zatadrite ekye: “Taegyi atate ekye: ‘Beṛo miri Opi Lu miro mätune ago ruindune toto ndäri ayani!’ ” 9 ’Dooko kicu’ba ugu Yesu te Yerusalema ya ago edre nda te le kuru doṛi Yekalu ro dri, ago atate ndäri ekye: “Ondro ka’do mi ni orivoya Ŋgwa Lu ro owo, nyevo andivo miro vuru ni nosi. 10 Tana taegyi atate ekye: ‘Lu ozona ta ’da malaika ndaro ri ta miro otine.’ 11 Taegyi ata kpate ekye: ‘Ànya okonayi mi ’da drí anyaro ya ukyi kuni oga pa miro ’da.’ ” 12 Oko Yesu zatadrite ekye: “Taegyi atate ekye: ‘Beṛo ko miri ta Opi Lu miro ro ojone.’ ” 13 Ondro kicu’ba konde ta Yesu ro ojona te ta cini yasi oko, nda e’be nda te tiko. 14 ’Dooko Yesu gote Galilaya ya, ago mbara Tori Alokado ro orivoya nda be. Lazo ta ndaro ro larirute wari cini ana yasi. 15 Nda emba ŋga te zoitaeriro ànyaro yasi ago ’dicini räṛu nda te. 16 ’Dooko Yesu oyite Nazareta ya, vose nda mbate kigye ana ya, ago Sabata si nda oyite oso ondoalo ronye zotaeriro ya. Nda ŋgate kuru Taegyi uzine; 17 ago ozo buku nebi Yesaya rote nda rigye, nda pere buku se oroṛobe ana te ago usu vose egyi ta be kigye ekye: 18 “Tori Opi ro orivoya mädri, tana nda nji ma ni lazokado ezine ati’bai ri. Nda zo ma te ta ’dionjiro dritai ro ayone kamba’bai ri, ago ta voondre logoro ayone miako’bai ri, ’dise kamba’bai ro onjine oyine dritai ro, 19 ago ta ayone anjioko tu esate se Opi opana lidri ndaro ’da.” 20 Yesu roṛo buku roṛoroṛo rote, ozote kovole ruindu’ba ri, ago rite vuru. Lidri cini zotaeriro ya mi ànyaro lewite nda dri, 21 nda atate ànyari ekye: “Ondro ono vo taegyi ono ya ono tana sate ŋgye mina ya, oso nyèribe uzivona ya ronye.” 22 Ànya cini atayite kado ta ndaro ta ago laroyite ata se kado nda katabe ŋgälä ana tana ro. Ànya atayite ekye: “Inye’do nda ṛo ko ŋgwa Yosepa roya?” 23 Nda atate ànyari ekye: “Mama ndi endaro misina taoni ono mina ’da märi ekye: ‘Ede’ba nyede andivo miro.’ Nyìtina ta kpa ’da märi ta oyene noŋwa ’ba’desi ’ba maro roya oso ŋgase nyèri tana be ayete Kaperenauma ya ronye.” 24 Yesu go ata te ekye: “Endaro mata ämiri ono, äru nebi kote alona ’ba’desi ’ba modo ndaro roya. 25 “Nyèri ta maro, orivoya taŋgye yi anjioko, ävuzii amba orivoya Yisaraele ya tu Eliya rosi, tuse ’bu ku’di kote ndroa na nätu kpäkyi ago mä’bu kozipara ’dete wari cini ya ana si. 26 Caoko azo Eliya kote ’diaza alo re Yisaraele ya, oko toto ävuzi se koribe Zarefata ya wari Sidona roya re ayani. 27 Ago lidri amba orivoya Yisaraele ya se ka ugu rueza ni adravo koziro kyini ro ri tu nebi Elisa rosi; caoko alo aza ànyaro ede kote, oko toto Namana Siria’ba ro ayani.” 28 Ondro lidri zotaeriro ya keri ta ono te oko, ànya a’dote kyilaro. 29 Ànya ŋgayite kuru, ànya seyi Yesu te tesi ni ’ba’desi yasi, ago lutuyi nda te dridopi lutu se abe ’ba’desi ànyaro be driigye ana ro dri. Ànya leyite nda du’dune kärägu yasi, 30 oko nda abate lowa lakosi ago oyite. 31 ’Dooko Yesu oyite Kaperenauma ’ba’desi se Galilaya ya ana ya nda emba lidri te kigye lau Sabata si. 32 Ànya cini laro tawi liti se nda emba ŋga be kigye si tana ro, tana nda ata ta te drikaca si. 33 Mano aza orivoya zotaeriro ya tori undiro demona robe nda ya, nda trete ṛeṛe kporo amba si ekye: 34 “A! Yesu Nazareta ro, mile e’di ama be ya? Nyikyi noŋwa ono ama tufune ya? Mäni mi te; mini Lazo’ba Alokado Lu ro owo!” 35 Yesu ta tori te ekye: “Nya’do titiro ago nyefo tesi ni mano ono yasi!” Demona vo mano ana te vuru ànya kandra ago efote tesi ni nda yasi teinye ŋga kozi aza oye ako ndäri. 36 Lidri cini larote ago atate azi ri ekye: “Ata nonye kwoi e’di ya? Drikaca ndi mbara be si mano ono kozo ta be torii undiro ri, ànya efo ndi tesi!” 37 Ago ta iti ta Yesu rota tana larirute vo cini yasi wari ana ya. 38 Yesu e’be zotaeriro te ago oyite ’ba Simona roya. Adraŋwa Simona ro orivoya adravo ro driu’bo kozi be; ago ànya peyi ta anyaro te Yesu ri. 39 Nda oyite ago edrete kitapara anyaro lomvo ago ta driu’bo te anya e’bene. Driu’bo e’be anya te, ago anya ŋgate dori kuru ago ozo ŋgaonya te ànyari. 40 Oci kitu ro vosi oko ’dicini se bereazi ànyaro adravoro adravo dritoto be iyi eziyi ànya te Yesu re; nda ’ba drí ndaro te ànya cini lomvo ba alo alo ago ede ànya cini te. 41 Demonai fote tesi ni lidri amba yasi, ugu totrebe ekye: “Mi ni Ŋgwa Lu ro owo!” Yesu ozotate demonai ri ago laga ànya zo atane, tana ànya niyite nda ni Mesiya owo. 42 Voiwivoya oko Yesu e’be ’ba’desi te ago oyite vo iṛero ya. Lidri eto nda uṛite, ago ondro ànya kusuyi nda te oko, ànya ojoyite nda lagane ni oyivoya ni ànya resi. 43 Oko nda atate ànyari ekye: “Beṛo märi Lazokado Miri ’Bädri’ba Lu ro ro tana opene kpa ’ba’desi azaka yasi, tana ono ni tase Lu kezo mabe oyene owo.” 44 Ago nda petate Zoitaeriro Yuda ro yasi.
51 Tu alo si oko Yesu edrevoya kototi Fofo Genesareta ro kala, ’dooko lidri ibirute nda dri ata Lu ro erine. 2 Nda ndre toŋbo ritu ayi te gyikala; ti’biuru’bai e’be ànya te ago kayi ugu kyimbai ànyaro ojona. 3 Yesu cite alo aza toŋbo roya; se ni Simona ro; ago eji nda te ubine fere ni kototi. Yesu rite toŋbo ya ago emba lowa te. 4 Ondro nda konde taope te oko, nda atate Simona ri ekye: “Nyelete toŋbo ga mileya gyi ociekye ya, ago mi ndi azii miro be mìvo kyimba mìru ti’bi robe.” 5 Simona zatadrite ekye: “’Desi, màye losi te mbara madaro ŋgäkyi raa oko mä̀ru ŋga aza kote. Oko ondro ka’do nyata ni inye, mavona kyimba ndi.” 6 Ànya voyi ànya te ago ruyi oti ti’bi rote amba ago aba kyimba koyete lewane. 7 Ago ànya avayi azii ànyaro toŋbo aza ya te ikyine ànya opane. Ànya ikyiyite ago ’bayi ti’bi te twitwi toŋbo riti ya ago aba toŋboi koyete ocine gyi zele. 8 Ondro Simona Petero kondre tase ka’dobe ana te oko, nda sokayate Yesu kandra ago atate ekye: “Nyoyi pere ni maresi Opi ma mano takozi amba be yi!” 9 Nda ndi azii se nda be ana be cini larote ta ti’bi se ànya kurube amba ana rota. 10 Azii Simona ro, Yakoba ndi Yoane be ŋgwàagoro Zebedayo ro kpa inye: Yesu atate Simona ri ekye: “Nya’do ko turi ro, etoni yauono oyi gwo mileya nya’dona ’da lidri uru’ba ro.” 11 Ànya eseyi toŋboi te gyikala, e’beyi ŋga cini te, ago soyite Yesu vo. 12 Tu alo si Yesu orivoya ’ba’desi aza ya se mano aza adravo koziro kyini robe kabe rueza kigye ya. Ondro nda kondre Yesu te oko, nda ’dete vuru militi ndaro be gyini dri ago lo’barute ndäri ekye: “’Desi, ondro mile gindi, minina ndi ma edene wäṛi!” 13 Yesu ozo drî ndaro te ndi do nda te ago zatadrite ekye: “Malete nya’do ri wäṛi!” Dori adravo koziro kyini ro e’be mano ana te. 14 Yesu ta nda te ekye: “Nyiti tana ko ’diaza ri, oko nyoyi dori kohani re, ago mi’ba nda kena mi; ago nyozo ŋgapäṛi se Musa kota ’di be ozone ta ’diede rota ’do; ka’daza lidri cini ri anjioko ede mi te.” 15 Oko lazo ta Yesu rota larirute ndra vo cini yasi, ago lowa lidri ro ikyite ta ndaro erine ago iyi edene ni adravo ànyaro ri. 16 Oko nda oyite vo iṛero ya ago mätute lau. 17 Tu alo si oko Yesu ka ugu ŋgaemba, rukä Parusii ro ndi miemba’bai Ota robe orivoya lau se ikyiyite ni ’ba’desi cini Galilaya ya, Yuda ya ndi Yerusalema robe yasi. Mbara Opi ro orivoya tro Yesu be adravo edeza. 18 Lidri azaka ikyiyite ŋgyiyi mano ciṛiciṛiro aza te kitapara si ago ànya ojoyite nda uŋgyine locine zo ya ago nda o’bane Yesu kandra. 19 Tana ta lowa rota, caoko, ànya niyi kote liti usune nda lociza zo ya. Ta’dota ànya ŋgyiyi nda te kuru zo dri, ṛoyi vouŋbo te drî zo roya, ago e’bayi nda te vuru u’duvoya kitapara ndaro dri kitoriya lowa roya Yesu kandra. 20 Ondro Yesu kondre taoma ànyaro te oko, nda atate mano ana ri ekye: “Bereazi maro, e’be mi te takozi miro ta.” 21 Miemba’bai Ota ro ndi Parusii be etoyi atate ànya voya ekye: “Mano gi kabe Lu o’da ata si nonye ono a’di owo ya? Toto alo Lu unina ni ’di e’bene ta takozi rota!” 22 Yesu ni tavousu ànyaro te ago atate ànyari ekye: “Nyà tavousu nonye etaya? 23 Eŋwani ni rritiako atane, ekye: ‘E’be mi te takozi miro ta?’ kode atane ekye ‘miŋga kuru ago nyaba ya?’ 24 Maka’dana ämiri, anjioko Ŋgwa Lidri ro orivoya drikaca be ’bädri ya ’di e’bene takozii ta.” Ago nda atate mano ciṛiciṛiro ri ekye: “Mata miri, miŋga kuru, miru kitapara miro ago nyoyi ’bäru.” 25 Mano ana ŋgate dori ànya cini milesi, ru kitapara se nda ku’dube driigye ana te, ago oyite ’bäru, ugu Lu räṛu be. 26 Ago ànya cini larote amba! Turi so ànya te, ànya räṛuyi Lu te ekye: “Ondro ono màndre talaro ro ’desi para te.” 27 Ono vosi, Yesu fote tesi ago ndre parata koto’ba aza se äzibe Lewe ana rite losioyevo ndaro ya, ago Yesu atate ndäri ekye: “Miso mavo.” 28 Lewe ŋgate kuru, e’be ŋga cini te, ago sote nda vo. 29 ’Dooko Lewe ’ba karama ’desi te zo ndaro ya Yesu ri, ago ŋgwazii lako oti parata koto’bai ro amba orivoya ndi lidri azaka be. 30 Rukä Parusi ro ndi rukä miemba’bai Ota ro robe gboko ànyaro atayite taeri’bai Yesu ro ri ekye: “Nyà ŋgaonya ndi ŋgaumvu parata koto’bai ndi rukä otapere’bai robe etaya?” 31 Yesu zatadri ànyaro te ekye: “Ànya se jiŋgyiri ro le ’diede’ba ko, oko gialo ànya se adravo ro ayani. 32 Mikyi ko ’dise taŋgye’bai ro uzine drietane, oko otapere’bai ayani.” 33 Lidri azaka atate Yesu ri ekye: “Taeri’bai Yoane ro ka akpa ondoalo ago kayi mätu oye, ago taeri’bai Parusii ro yeyi kpa inye; oko taeri’bai miro kayi ŋgaonya ndi ŋgaumvu be.” 34 Yesu zatadrite ekye: “Inye’do mìma amiro be ŋgwazii se Karama lagye ogyero ya akpanayi ndi ondro kodrogo drigba orivoya ànya yibe owo ya? Endaro ko inye! 35 Oko tu esana ’da, ondro äru kodrogo teni ànya resi oko, ago ’dooko ànya akpanayi ’da.” 36 Yesu iti lapidriopi ono kpate ànyari ekye: “’Diaza wa boŋgo pelepele kote ni boŋgo to’diro yasi losene boŋgo ukuro mina ya. Ondro nda koyete inye, nda wa boŋgo to’diro rote, ago pelepele boŋgo to’diro ro unina ko a’done ojoojoro boŋgo ukuro robe. 37 ’Diaza so vino to’diro ko kuru kyini ro vino ro se ukuro ’do ya, tana vino to’diro oṛona kyini ’da, ago vino ladana gwo vuru, ago kyini lewena gwo. 38 Beṛo vino to’diro osone kuru kyini ro vino ro to’di roya! 39 ’Diaza le vino to’diro ko vino ukuro umvu vosi. Nda atana ṛo ekye: ‘Ukuro ni kadopara.’ ”
61 Sabata alo aza si ondro Yesu ka ugu aba ämvu azaka inya ro yasi oko, taeri’bai ndaro etoyi drî inya ro okyena te kawayi ànya gwo drí ànyaro si, ago nyayi kecina te. 2 Rukä Parusii ro ejiyitate ekye: “Tana e’di nya tase Ota kole be ko oyene Sabata si oyena niya?” 3 Yesu zatadri ànyaro te ekye: “Inye’do mìzi tase Dawidi koyebe tu ana si ’dooko nda ndi lidri ndaro be täbiri ro ana tana ṛo ko ya? 4 Nda cite zo Lu roya, ru ambata se ozobe Lu ri te, nyate, ago ozo aza kpate lidri ndaro ri. Se Ota voro ko ’diaza ri onyane e’be gialo kohanii ri ni ambata ana onyane.” 5 Yesu atate ekye: “Ŋgwa Lidri ro ni Opi Sabata ro.” 6 Sabata aza si oko Yesu oyite zotaeriro ya ago emba ŋga te. Mano aza orivoya lau drí na drígwo yasi ciṛiciṛiro. 7 Miemba’bai azaka Ota ro ndi rukä Parusii robe leyite ta aza usune Yesu kicuza ta taoye koziro rota, ago ànya ojoyite nda okwane ondrene kode nda kaoye ’di edene Sabata si. 8 Oko Yesu ni tavousu ànyaro te nda atate mano se drí na ciṛiciṛiro ana ri ekye: “Miŋga kuru ago nyefo noŋwa mileya.” Mano ana ŋgate kuru ago edrete lau. 9 ’Dooko Yesu atate ànyari ekye: “Ma ami eji: Ota le ämäri e’di oyene Sabata si ya? ’Di opane kode oyene koziro ya? Adri lidri ro opane kode ufune ya?” 10 Nda ndrevote gbikyi ànya cini drisi; ’dooko nda atate mano ana ri ekye: “Nyozo drí miro a’dwi.” Nda yete inye, ago drí ndaro a’dote kado vona ya. 11 Ànya a’doyite kyilaro ago etoyi taäyite ànyavoya tase oyene ànyari Yesu ri ta. 12 Tu gi ana si Yesu oyite kuru lutu dri mätune ago nda ugu mätu oyete lau ŋgäkyi raa Lu ri. 13 Ondro vokiwite oko, nda zi taeri’bai te ndare, ago nji ’butealo foritu ànyaro te, se nda zite lazo’bai: 14 Simona (se nda zite Petero) ago ädrupi ndaro Andarea be, Yakoba ndi Yoane be, Filipo ndi Batolimayo be. 15 Matayo ndi Toma be, Yakoba ŋgwa Alepayo ro, ago Simona (se äzite ’bädri iro lu’ba), 16 Yuda ŋgwa Yakoba ro, ago Yuda Isekariota, se a’dote driozo’ba Yesu ro. 17 Ondro Yesu kefote vuru ni lutu drisi ndi lazo’bai be oko, nda edrete vo jaraŋgala ro ya oti amba taeri’bai ndaro robe. Lowa lidri ro amba orivoya lau ni Yuda yasi ago ni Yerusalema ya ni ’bakici gyikalasi Tura ndi Sidona be ro yasi. 18 Ànya ikyiyite ta ndaro erine ago adravo ànyaro edene. Ànya se tori undiro kabe ezana ikyiyite ago edete. 19 Lidri cini ojoyite nda odone, tana mbara fote tesi ni nda lomvosi ago ede ànya te cini. 20 Yesu ndrevote taeri’bai ndaro dri ago atate ekye: “Ami se ati’ba ro ni kado Miri ’Bädri’ba Lu ro ro ni amiro! 21 “Ami se täbiri ro yauono ni kado ya amiro ogana ’da! “Ami se nyàbe liyi yauono ni kado mìguna ’da! 22 “Ami ni kado ondro ya lidri ro kosote ami lomvo, kogayi ami tezo, ko’dayi ami te, ago katayite ekye ami orivoya undiro, ta Ŋgwa Lidri ro rota! 23 Nyà’do yai’dwesi ondro ta ’do ka’dote owo ago mìto läri riyäsi, tana päläti ’desi a’bate tana ami vo’buyakuru ya. Tana zutui ànyaro yeyi ta kpate inye nebii ri. 24 “Oko a’dona rritiro ami se ŋgaamba be yauono ri; nyà’dote ori rritiako amiro be! 25 “A’dona rritiro ami se yana gate yauono ri täbiri ufuna ami ’da! “A’dona rritiro ami se nyàbe ugu yauono ri, mì’bena kuku ’da ndi liyi be! 26 “A’dona rritiro ondro lidri cini katayi takado ca ta amiro ta, tana zutui ànyaro atayi ta kpate inye ta nebii mieywe’bai rota. 27 “Oko ma ata ami se nyàbe ta maro eri ono ri: Nyùlu kyila’baazii amiro, mìye takado ànya se yana kabe oso ami lomvo ri. 28 Nyä̀ṛu ànya se kayibe ami otri, ago nyä̀mätu ànya se kayibe ami oye koziro ta. 29 Ondro ’diaza koca biṛi alo miro te mi’ba nda koca telesina kpa, ondro ’diaza ka dhudhu miro uru, mi’ba nda kuru boŋgo miro kpa. 30 Nyozo ŋga ’diaza se kabe mi eji ŋga aza ta ri, ago ondro ’diaza ka ŋgase ni miro uruna, nyeji ta ko logone kovole. 31 Mìye ta azii ri oso mìlebe ànyari ta oyene ämiri ronye. 32 “Ondro ka’do nyùlu gialo lidri se kabe ami lu ayani, nyà’dona äṛu be eŋwanye ya? Tana ca takozi’bai luyi ànya se kuluyi ànya be kpa. 33 Ago ondro mìye takado gialo ànya se kabe takado oye ämiri ri ayani, nyà’dona äṛu be eŋwanye ya? Tana takozi’bai ka kpa oyena inye! 34 Ago ondro nyòzo ŋga tiko ro gialo ànya se mì’ba mi be ŋga urune kovole ni ànya rigyesi ri ayani, nyà’dona äṛu be eŋwanye ya? Tana takozi’bai ozoyi ŋga tiko ro kpa takozi’bai azi ri, ogone vona uruna kovole ojone kpa rere! 35 “Oko nyùlu kyila’baazii amiro ago mìye takado ànyari, nyòzo ŋga tiko ro ago mì’ba mi ko ŋga aza ta kovole. ’Dooko nyà’dona ’da päläti ’desi be, ago nyà’dona ’da ŋgwai Lu Fopara Ndra ro. Tana nda orivoya kado aro’boya oyeako’bai ri ndi takozi’bai be. 36 Nyà’do yauni amba be kpa oso Täpi amiro orivoya yauni amba be ronye. 37 “Mìpe vure azii ro ko, ago Lu opena vure amiro ko, nyòzo taezaro ko azii ri, ago Lu ozona taezaro kpa ko ämiri, nyè’be azii ta takozi rota ago Lu e’bena ami ndi takozi amiro ta. 38 Nyòzo ŋga azii ri, ago Lu ozona ŋga ndi ämiri. Endaro, mìruna ’da twi ŋga ŋgaojoro si, ŋgaozo dritairo ŋgaoparo, adate drí amiro yasi mìnina ndi ovone cini. Liti se nyàbe ŋga ozo azii ri sina Lu ozona ŋga kpa sina ämiri.” 39 Ago Yesu iti lapidriopi ono te ànyari ekye: “Mano miako unina ko miako’ba azi lepene, ondro nda koyete inye, ànya riti o’denayi ndi ’bu ya. 40 Ŋgaga se abe embana ko ndrani miemba’ba ndaro ri, oko ŋgàga cini, ondro konde ŋgaemba ndaro te oko, a’dona ’da oso miemba’ba ndaro ronye. 41 “Tana e’di nya kaŋwa giṛiŋwa se mi ädrupi miro roya ondre, oko miti ta juṛu se mi andivo miro roya tana ko etaya? 42 Nyatana ädrupi miro ri eŋwanye mikye: ‘Ädrupi, mi’ba mewe kaŋwa giṛiŋwa ono tesi ni mi miro yasi,’ caoko juṛu se mi miro ya ono mindre ko ya? Mi miomba’ba ono! Nyewe juṛu se mi modo miro roya ono käti, ago ’dooko mindrena vo ndi kadoro kaŋwa giṛiŋwa se mi ädrupi miro roya ono eweza tesi. 43 “Ce kado wa doŋgo kozi ko, ago ce kozi ni ko doŋgo kado owane. 44 Vo ice ro cini änite doŋgo owa ànyaro si, nyotopi kyi’du ko ni kukyi drisi kode kono ni ŋgäṛiŋgofo drisi. 45 ’Di kado ka ŋgase kado nda be sina ya ndaro ya lofona tesi! ’Di kozi ka ŋgase kozi nda be sina ya ndaro ya lofona tesi. Tana kala kani ŋgase twi ya ya atana. 46 “Nyà ma uzi Opi, Opi, oko caoko tase mabe atana mìye ko etaya? 47 ’Diaza se kabe ikyi mare ago kabe ata maro erina ago kabe anya oro; maka’dana ämiri nda laba oso nonye. 48 Nda laba oso mano se, ka zo ndaro obena, ’di ’bu na te ociekye ago be kotopana te ta’ba dri ronye. Gyi gate lwi ago birute zo ana lomvosi oko ni kote kandane, tana abete kadoro. 49 Oko ’diaza se kabe ata maro erina ago ro ànya kote iyi laba oso mano se be zo ndaro te kotopana obeako ronye, ondro gyi gate oko birute zo ana lomvosi ago anya ’dete dori; ago tufurute koziro.”
71 Ondro Yesu konde tase cini kwoi atana te lidri ri oko, nda oyite Kaperenauma ya. 2 Dri’ba kyila’bai Roma’ba ro lau ruindu’ba be se nda lu tawi, ruindu’ba ono orivoya adravoro ago ka oyete odrane. 3 Ondro dri’ba kyila’bai ro keri ta Yesu rote oko, nda zo ’di’desii azaka Yudai rote nda ejine ikyine ruindu’ba ndaro edene. 4 Ànya ikyiyite Yesu re ago ejiyi nda te rulo’ba si ekye: “Endaro mano ono le ŋgaopa miro. 5 Nda lu lidri amaro ago nda andivo be zotaeriro ni ämäri.” 6 Ndi Yesu oyite ànya yibe. Nda kote lozo ni zo lomvo oko, dri’ba kyila’bai ro zo bereazii te ta itine ndäri ekye: “’Desi takado maro ojo ko miri ikyine zo maro ya. 7 Ca musu andivo maro kpa ko kado ikyine mire. Nyata toto ata ago ’dooko ruindu’ba maro a’dona ndi kado. 8 Ma maro kpa, mano drikaca dri’bai ’desiro kyila’bai ro zele yi, ago ma kyila’bai be ma zele. Matabe alona aza ri makye: ‘Nyoyi!’ Nda oyi ndi, ago azana ri makye: ‘Nyikyi!’ Ago nda ikyi ndi, ago mata ruindu’ba maro te makye: ‘Miye ono!’ Ago nda ye anya ndi.” 9 Yesu keri ta ono te oko, nda larote. Nda zamite gbikyi ago atate lowa se ka ugu oso nda vo ri ekye: “Mata ämiri ono, musu ’diaza alo ko Yisaraele ya taoma be oso ono ronye!” 10 Lazo’bai oyiyite kovole zo dri’ba kyila’bai ro roya ago usuyi ruindu’ba ndaro te kadoro. 11 Dori ono vosi Yesu oyite ’ba’desi se äzibe Naina ya, taeri’bai ndaro ndi lowa amba be oyiyite tro nda be. 12 Nda kesate dereŋwa ’ba’desi ro kala oko, ’bedrite lowa be kayi ugu oyi tesi avo ose. Mano kodrabe ana ŋgwa alodi toko aza se ävuzi ro ro ago lowa amba ni ’ba’desi yasi orivoya anya be. 13 Ondro Opi kondre anya te oko, ya ndaro a’dote twi tusu be ta anya rota, ago nda atate anyari ekye: “Nyili ko.” 14 ’Dooko nda lävute mileya ndi do para te, ago lidri se kuŋgyiyi avo be edregwo, Yesu atate ekye: “Mano to’di! Mata miri, miŋga kuru!” 15 Mano se avo ro ana rite kuru ago eto atate, ago Yesu ozo nda te kovole endre ndaro ri. 16 Turi so ànya cini te ago räṛuyi Lu te ekye: “Nebi ’desi efote ama lako!” Ànya atate ekye: “Lu ikyite lidri ndaro opane!” 17 Lazo ta Yesu rota ono sate ’bädri cini Yuda ro yasi ago ’bädri se gbikyi lomvoigyesi yasi. 18 Ondro taeri’bai Yoane ro kitiyi ta cini kwoi tana te ndäri oko, nda zi ritu ànyaro te 19 ago zo ànya te Opi re nda ejine ekye: “Inye’do mi ni se Yoane kata tana be ka oyebe ikyine owo, kode ma’ba mi drigi ’diaza tona ta ya?” 20 Ondro ànya kikyite Yesu re oko, ànya atayite ekye: “Yoane Bapatisi’ba ezo ama ni ta ejine kode mi ni se nda kata tana be ka oyebe ikyine owo, kode ma’ba mi ri aza ta ya?” 21 Tuna gi ana si Yesu ede lidri amba te ni lomvoluwu adravoro ànyaro ndi tori undiro be risi, ago ’ba lidri amba miako te voondrene. 22 Yesu zatadri lazo’bai Yoane ro rote ekye: “Mìgo kovole ago nyìti ta Yoane ri ta tase mìndrebe ago nyèribe rota, miako’ba kate voondrene, ka’bo kate aba, ede ànya se adravo koziro kyini robe te wäṛi, tuṛui kate taeri, adri avo te, ago ape Lazokado te ati’bai ri. 23 Ànya se a’do ko wiriwiriro ta maro ta ni kado.” 24 Lazo’bai Yoane ro oyina vosi oko, Yesu eto ta atate lowa ri ta Yoane rota ekye: “Tuse nyòyibe Yoane re vocowa ya, mì’ba mi te e’di ondrene ya? Bi käyi ro oli kabe kandana ’do ondrene ya? 25 Nyòyi te tesi e’di ondrene ya? Mano se so boŋgo ṛiyäṛiyä be ondrene ya? Lidri se kabe boŋgo oso inye ago ka ori ŋga nyalakpa lako ka ori zoi’desiro ’bädri’bai ro yasi! 26 Nyìti tana märi, nyòyite tesi e’di ondrene ya? Nebi? Owo ndi inye, oko mìndre mano aza te ndrani nebi ri. 27 Tana Yoane ni alo aza se taegyi kata tana be owo se ekye: ‘Lu atate ekye, mazona lazo’ba maro ’da mimile liti edene miri.’ ” 28 Yesu atate ekye: “Mata ämiri ono, Yoane orivoya para ndrani mano aza se koribe kyeno ri. Oko nda se tipari ànya se Lu kabe mirina lako orivoya para ndrani Yoane ri.” 29 Lidri cini eriyi ta ndaro te; ànya ndi parata koto’bai be ni ’dise koroyi taŋgye se Lu kolebe te owo ago abapatisi ànya te Yoane si. 30 Oko Parusii ndi miemba’bai Ota robe leyi taora Lu ro ta andivo ànyaro rota ko ago gayizo a’done bapatisi be Yoane si. 31 Yesu ugu atate ekye: “Mojona lidri tu ono ro ŋga eŋwani be ya? Ànya labayi eŋwanye ya? 32 Ànya labayi oso ŋgàgaŋwa ka ugu ori be vo ŋgalogye roya ronye. Gboko alo ka driayo azi ri ekye: ‘Mà’bi läri lagyeogyero te ämiri, oko mìle ko läri otone! Màŋgo loŋgo avo osero te, oko mìle ko liyine!’ 33 Yoane Bapatisi’ba ikyite, ago nda akpate ago mvu vino ko, ago nyàtate mìkye: ‘Nda orivoya demona be nda ya!’ 34 Ŋgwa Lidri ro ikyite, ago nya ŋga te ago mvu ŋga te, ago nyàtate mìkye: ‘Mìndre mano ono! Nda orivoya ŋgaonya’ba yi ago vino umvu’ba yi, bereazi parata koto’bai ro ndi otapere’bai be ro!’ 35 Caoko, tavouni Lu ro, aka’date ŋgye vona se cini kuru anya be si.” 36 Parusi aza alo eji Yesu te ŋgaonyane nda be, ago Yesu oyite zo ndaro ya ago rite vuru ŋgaonya. 37 ’Ba’desi se ana ya toko aza orivoya se orina koziro. Anya eritate Yesu orivoya ŋgaonyavoya zo Parusi roya oko, anya ezi gäbä se edeni kuni alabasata ro yasi te ido ŋgutruro be 38 ago edrete Yesu kundu, pa ndaro pa, liyi be ago udu pa ndaro te miendre anyaro si. Ago yo pa ndaro te drikyiri anyaro si, ago njunju pa anyaro te ago da ido ŋgutruro te anya drisi. 39 Ondro Parusi kondre ta ono te oko, nda atate andivo iro ri ekye: “Ondro mano ono ka’do gi nebi yi endaro, nda unina toko se ka ugu nda odo ono tana ndi, nda unina ori koziro se anya kabe orina ono ndi.” 40 Yesu atate ṛe ndäri ekye: “Simona, ma ta aza be itine miri.” Nda atate ekye: “Owo miemba’ba, nyiti ri märi.” 41 Yesu eto ta itite ekye: “Lidri ritu ruyi parata teni parata ozo’ba tiko ro rigyesi, alodi ru parata kaci mo’di ro kama nji teni nda rigyesi, ago aza ro ’butenji. 42 Caoko ànya niyi kote logone kovole ndäri, ndi nda e’be ànya riti te ta yuŋgu rota. Ka’do inye, se eŋwani, luna nda ni ndra ya?” 43 Simona zatadrite ekye: “Mamabe a’dona ni nda se e’bete ndra ’do ayani.” Yesu atate ekye: “Ta miro orivoya ŋgye.” 44 ’Dooko nda zamite toko ana dri ago atate Simona ri ekye: “Mindre toko ono te ya? Mikyite zo miro ya, ago nyozo gyi kote tana pa maro, oko anya jo pa maro te miendre anyaro si ago yo anya te drikyiri anyaro si. 45 Miru ma kote ma njunju si, oko anya edre kote ni pa maro njunjuvoya mikyibe gi ono owo. 46 Nyozo ido ice ido ro ro kote tana drî maro, oko anya da ido ŋgutruro te pa maro ya! 47 Ago mata miri ono, ŋgalu se ’desi anya kaka’dabe ono ka’date anjioko takozi se amba anyaro ono e’be anya te tana ro. Oko nda se e’bete ta giṛiŋwa ta ka’date toto ŋgalu giṛiŋwa ayani.” 48 ’Dooko Yesu atate toko ana ri ekye: “E’be mi te takozi miro ta.” 49 Azii se koriyibe nda be tara’biza lomvo kai etoyi ata te ànyavoya ekye: “Mano se kabe takozi e’be ono, a’di owo ya?” 50 Oko Yesu atate toko ana ri ekye: “Taoma miro pa mi te, nyoyi liatokpero.”
81 Tu aza vosi oko Yesu abate ’ba’desii, ’baŋwà be yasi ugu Lazokado Miri ’Bädri’ba Lu ro ro opena be. Taeri’bai ’butealo foritu oyiyite nda be, 2 ago ’ditoko azaka kpa se edete ni tori undiro ndi adravo be ri ’do be. Maria (se äzite Magadalene), se olofo demonai njidrieri be ni yana yasi ’do; 3 Joana, se ago na Kuza ni vo ondre’ba lakaza Eroda ro ro; ago Susana, ndi ’ditoko azaka amba be se ozoyi ŋga ànya modo rote Yesu opaza ndi taeri’bai ndaro be. 4 Lidri ezi ikyite Yesu re ni ’ba’desii cini yasi; ondro lowa kotokalate oko, Yesu iti lapidriopi ono te ekye: 5 “Tu alo si oko mano aza fote kwari orine. Ago nda ka ugu kwari ori ämvu yasi oko, azakana lo’dete liti dri, se abate driigyesi, ago arii nyate. 6 Azakana lo’dete gyini gyirigyiri dri, ago ondro kwari koŋgate oko, anya wite tana gyini i’do nyondro. 7 Azaka kwari ro lo’dete kukyi cuku lako, ago kukyi mbate inya se koŋgabe be ago vo anya te. 8 Ago azaka kwari ro lo’dete gyini kado ya, kwari ŋgate ago mbate ago wa inya te kama alo (100) inya drî alo dri.” Ago Yesu nde tate ekye: “Dia nyèri, ka’do ondro nyà’do gi bi be owo!” 9 Taeri’bai ndaro ejiyi nda te takaci lapidriopi ono rota, 10 ago nda zatadrite ekye: “Tauni tandrwi Miri ’Bädri’ba Lu ro ro ozote ämiri, oko azakana ri takacina aka’dana lapidriopi si, tana ondrena ànya ondrenayi ndi, ago erinayi ndi oko niyi ko. 11 “Lapidriopi ono takacina ni no; kwari ni ata Lu ro. 12 Kwari se lo’debe liti dri ni ànya se kabe taeri, oko kicu’ba ikyi gwo ago ru lazo te zwi ni ya ànyaro yasi ànya lagaza ni taomavoya ukyi apa ànya ’da. 13 Kwari se lo’debe gyirigyiri dri ni ànya se kabe lazo eri ago kabe uruna yai’dwesi. Oko ci ko gyuru ya ànyaro ya, ànya matate toto tuna fere oko ondro tu taojoro kesate oko, ànya ’dete. 14 Kwari se lo’debe kukyi cuku ro lako ni ànya se kabe taeri; oko ta milo’bero ago a’do ŋgadriamba be ndi riyä ori ono robe morute ànya ya ago vo ànya te, ago doŋgo ànyaro wa kote alona. 15 Kwari se lo’debe gyini kado ya ni ànya se kabe lazo eri ago kabe uruna kadoro ago taoro si ya ya ’do, ago ànya iŋgyiyi ya te madaro madale ànya wayi doŋgo te. 16 “’Diaza i’do se keyi lamba te oko tako drî na gwo lakaza si kode ’ba anya gwo kitapara zele, oko ’bate ŋga lamba edrero dri, tana lidri kate eci zo ya oko ànya kondreyi ŋgaeyi robe. 17 “Ŋgase aza ada’dote olofona ’da ŋbelero, ago ŋgase aza atakote usuna ’da ago ezina ’da ŋgaeyi ya. 18 “Ka’do inye, tase nyèrina be, nyà’do taotibe tana ro, tana nda se tauni be ozona ’da rigye ndra, ago nda se tauni ako ca se giṛiŋwa nda kusu ta be ekye yi sina ’do äruna ’da ni nda rigyesi.” 19 Endre Yesu ro ndi ädrupii be ikyiyite ndare, oko niyi kote rudro’bene nda be ta lowa rota. 20 ’Dialo aza atate Yesu ri ekye: “Endre miro ndi ädrupii miro be orivoya edrevoya tesi ago leyi mi ondrene.” 21 Yesu atate ànya cini ri ekye: “Endre maro ndi ädrupii maro be ni ànya se kabe ata Lu ro erina ago kabe ànya oro.” 22 Tu alo si oko Yesu cite toŋbo ya taeri’bai ndaro be ago atate ànyari ekye: “Mì’de mòyi màza fofo tasi.” Ndi ànya eto oyite. 23 Ago ànya kayi ugu udi oko, Yesu u’dute ŋbi. Ndriŋwa oko oli gbiriṛi be site fofo dri, ago gyi eto ogate toŋbo ya, ago ànya cini te rriti ’desi ya. 24 Taeri’bai oyiyite Yesu re ago teŋgayi nda te, atayite ekye: “Miemba’ba, Miemba’ba! Mà oyete odrane!” Yesu ŋgate kuru ago ’bidri oli rote ago gbulä gyi ro edrete; anya a’dote titiro, ago vo edrete ti. 25 ’Dooko nda atate taeri’bai ri ekye: “Taoma amiro eŋwaro ya?” Oko ànya laroyite ago turiyite, ago atayite iyivoya ekye: “Mano ono a’di owo ya? Nda ta oli ndi gbulä gyi robe be, ago ànya royi nda te!” 26 Yesu ndi taeri’bai ndaro be diyite wari Gerasa ro driro, se orivoya Fofo tasi äwumibe Galilaya be ana. 27 Ondro nda kefote tesi fofo kala oko, mano aza ni ’ba’desi yasi ’bedrite nda be se orivoya demonai be nda ya. Tuna te amba mano ono ka aba boŋgo ako ago ri kote ’bäru, oko rite ’budri lako ayani. 28 Ondro nda kondre Yesu te oko, nda trete kporo amba si, vo andivo ndaro te aŋbo vuru pa ndaro pa, ago trete ekye: “Yesu, Ŋgwa Lu Fopara Ndra ro! Mile e’di mabe ya? Molo’baru miri, nyeza ma ko!” 29 Nda atate nonye tana Yesu ta tori undiro te ofone tesi ni nda yasi. Perena amba tori undiro ru nda te, ago a’ba nda ca kamba’ba ro, drí ndaro ndi pa be embe ca nyori si nda ka nyori tokye ago demonai njayi nda te vocowa ya. 30 Yesu eji nda te ekye: “Ävuru miro a’di ya?” Nda zatadrite ekye: “Ävuru maro Legiona” tana demonai amba cite nda ya. 31 Demonai lo’barute Yesu ri ko ànya ozone voociekye ya. 32 Äṛi kizwe ro orivoya amba loto lau, kayi ugu ŋgaonya lutu pa. ’Dooko demonai lo’barute Yesu ri ànya o’bane oyine ocine kizwe ya, ago nda ’ba ànya te oyine. 33 Ànya foyite tesi ni mano ana yasi ago ciyite kizwe ya. Äṛi cini lasote vuru kärägu yasi fofo ya ago gyi imvute. 34 Lidri se kayibe vo kizwe ro ondrena kai kondreyi tase ka’dobe te oko ànya muyite ago lariyi lazona te ’ba’desi ya ago ämvui yasi. 35 Lidri fote tesi tase ka’dobe ana ondrene, ago ondro ànya kikyiyite Yesu re oko, ànya usuyi mano se demonai kofobe ni ya na yasi ana rite Yesu pa, so boŋgo te ago drî na te kadoro; ago ànya cini a’dote turituriro. 36 Ànya se cini kondreyi be ana itiyi tase ede mano se demonai be ana tana te lidri ri. 37 ’Dooko vo lidri cini wari ana ro ro ejiyi Yesu te oyine ni nasi, tana ànya orivoya turituriro ndra. ’Dooko Yesu cite toŋbo ya ndi oyite. 38 Mano se demonai kofobe tesi ni yana yasi ana lo’barute Yesu ri ekye: “Mi’ba moyi mibe.” Oko Yesu zo nda te, atate ekye: 39 “Nyoyi kovole ’bäru ago nyiti tase ’desi Lu koyebe miri ono tana.” Mano ana oyite ’ba’desi yasi, ugu tase Yesu koyebe ndäri ana tana itina be. 40 Ondro Yesu kogo kozate fofo tasi oko, lidri ru nda te yai’dwesi, tana ànya cini a’doyite nda kotevoya. 41 ’Dooko mano aza ävuruna Yairo esate, nda orivoya dri’ba zotaeriro vo ana ro ro. Nda vo andivo ndaro te aŋbo vuru Yesu pa ago lo’barute ndäri oyine ’ba ndaro ya, 42 tana ŋgutiŋwa aloŋwa ndaro, se ndroa na te orivoya ’butealo foritu, kate odra. Ondro Yesu kate ugu oyi oko, lowa ipi nda te lamadri cini yasi. 43 Ànya lako toko aza orivoya se ezarute ni kari oro koziro ri ndroa na te ’butealo foritu, anya enji ŋgase cini anya be sina te kwozoi ri, oko ’diaza alo ede anya kote. 44 Anya ikyite lowa lakosi Yesu kundu ago do si boŋgo ndaro rote, ago oro kari anyaro ro sisite dori. 45 Yesu ejitate ekye: “A’di do ma niya?” ’Dicini gayikalate, ago Petero atate ekye: “Miemba’ba, lidri orivoya gbikyi milomvosi ago kayi ugu mi ipi ni.” 46 Oko Yesu atate ekye: “’Diaza do ma te, tana mäni tana te efo mbara ro ni malomvosi si.” 47 Toko ana nite usu ta anyaro te, ’dooko anya ikyite lä’bilä’biro ago vo andivo anyaro te vuru Yesu pa, mile ’dicini ro yasi, anya iti tase anya do nda be tana ro ana te ndi tase ede anya be dori ana be. 48 Yesu atate anyari ekye: “Ŋguti maro, taoma miro ede mi te kado. Nyoyi liatokpero.” 49 Yesu kadri ugu tase ono ata oko, lazo’ba aza ikyite ni zo dri’ba ro yasi, nda atate Yairo ri ekye: “Ŋgutiŋwa miro drate; nyokwo Miemba’ba ko tona.” 50 Oko Yesu keri tana te oko atate Yairo ri ekye: “Nya’do ko turi ro, mima toto ta ayani, ago anya a’dona ’da kado.” 51 Ondro nda kesate zo ya oko, nda le ko ’diaza ri ocine zo ya nda be e’be gialo Petero, Yoane, ago Yakoba ago täpi ŋgwa ro ndi endre be. 52 ’Dicini lau kayi ugu liyi ndi kuku o’be be ta ŋgwa rota oko, Yesu atate ekye: “Nyìli ko, ŋgwa ono dra ko’de; anya ka u’du toto u’du!” 53 Ànya guyi ndana te, tana ànya niyite anya drate. 54 Oko Yesu ru drí anyaro te ago zi läzi te ekye: “Ŋgwa maro, miŋga kuru!” 55 Adri anyaro egote, ago anya ŋgate kuru dori, ago Yesu ta ànya te ŋga aza ozone anyari onyane. 56 Uti’bai anyaro larote, oko Yesu ta ànya te ko tase ka’dobe ono itine ’diaza ri.
91 Yesu zi taeri’bai ’butealo foritu te voaloya ago ozo mbara te ànyari ndi drikaca be demonai cini lofoza tesi ago adravo edeza. 2 ’Dooko nda zo ànya te Miri ’Bädri’ba Lu ro ro tana ope ago adravo edene, 3 ta ata ànyaro vosi nda atate ekye: “Mìru ŋga aza ko ami be ta aba amiro rota: ca dofo aba ro, ca gbolo drilämi’ba ro, ca ŋgaonya, ca parata, ca boŋgo kinjo. 4 Vose äru ami te kigye, mìri zo gi alo ana ya madale nyè’be ’ba’desi ana gwo; 5 ondro lidri kuru ami kote, nyè’be ’ba’desi ana ago mìyo durufu na ni pa amiro yasi tazevoedreza ànya lomvo.” 6 Taeri’bai oyiyite ago abayite ’baŋwà cini yasi; uguyi Lazokado ope te ago uguyi lidri edete vo cini yasi. 7 Ondro Eroda, Miri’ba Galilaya ro, keri ta tase cini ka ugu a’dobe ana tana te oko, nda a’dote wiriwiriro, tana lidri azaka ka ugu ata ekye, Yoane Bapatisi’ba adrite. 8 Azaka ka ugu ata ekye Eliya loforute, ago azaka ekye alo aza nebii se kyeno kai ro go adrite. 9 Eroda atate ekye: “Mätäṛi drî Yoane rote ätu, oko mano se mabe ta kwoi erina tana ro ono a’diya?” Ago nda ojote Yesu ondrene. 10 Lazo’bai egoyite ago itiyi tase cini ànya koyeyibe tana te Yesu ri. Nda ru ànya te nda be, ago ànya oyiyite iṛe fere le ’ba’desi aza se äzibe Betesaida ana ya. 11 Ondro lowa keri tana te oko, ànya soyite nda vo. Nda ru ànya te, iti Miri ’Bädri’ba Lu ro ro tana te ànyari, ago ede ànya se kolebe iyi edene kai te. 12 Ondro kitu ka ugu oci oko, taeri’bai ’butealo foritu ikyiyite nda re ago atayite ekye: “Mi’ba lidri koyi tana ànya kuniyi robe oyine ’baŋwà yasi ago vorogoŋwà se gbikyi noŋwa ono yasi ŋgaonya ndi orivo be usune ànyari, tana ono orivoya vo lidri ako yi.” 13 Oko Yesu atate ànyari ekye: “Ami modo nyòzo ŋga aza ànyari onyane.” Ànya zayitadrite ekye: “Ŋgase ama sina ambata orivoya nji ago ti’bi ritu. Mile ämäri oyine ŋgaonya ogyene lowa cini ono riya?” 14 (Lidri orivoya kutuna nji lau.) Yesu atate taeri’bai ndaro ri ekye: “Mì’ba lidri kori vuru gboko ro oso ’butenji ronye alona ya.” 15 Ago taeri’bai yeyite inye, ago lidri cini rite vuru. 16 Yesu ru ambata se nji ana te ndi ti’bi se ritu ana be, ndrevote kuru vo’buyakuru ya, ago ye aro’boya te Lu ri, wa ànya te, ago ozo ànya te taeri’bai ri lanjine lidri ri. 17 Ànya cini nyàte ago ojo ànya te, ago taeri’bai otoyi anjoko ŋgase ke’bebe ana rote, koṛiga na ’buteritu. 18 U’du alo si ondro Yesu ka ugu mätu iṛe oko, taeri’bai ikyiyite nda re. Nda eji ànya te ekye: “Lowa ka ata ekye ma a’di owo ya?” 19 Ànya zatadrite ekye: “Rukäna ka ata ekye mi orivoya Yoane Bapatisi’ba owo, ago azakana ka ata ekye mi orivoya Eliya owo, ago azakana ka ata ekye alo aza nebii se kyeno kai ro go adrite.” 20 Nda eji ànya te ekye: “Oko ami ni? Nyà ata mìkye ma a’di owo ya?” Petero zatadrite ekye: “Mi ni orivoya Mesiya Lu ro owo.” 21 ’Dooko Yesu tadri ànyaro te mbara ko ta ono itine ’diaza ri. 22 Nda ata kpate ànyari ekye: “Beṛo Ŋgwa Lidri ro ri ruezane amba ago ’di’desii, kohanii ’desi, ndi miemba’bai Ota robe oganayi nda ’da zo. Äfuna nda ’da oko u’du nina si oko nda adrina ’da.” 23 Ago nda atate ànyari ekye: “Ondro ’diaza kolete o’dene mavo, beṛo ndäri ta andivo ndaro ro ijene, kuŋgyi taka ndaro tu cini si, ago keso mavo. 24 Tana nda se kolebe adri modo ndaro ro opane ijena anya ’da, oko nda se kabe adri ndaro ijena ta maro ta opana anya ndi. 25 Inye’do ’diaza usuna ŋga aza gindi ondro nda kuru ’bädri cini gica oko andivo ndaro jete kode apete ṛe ya? Endaro nda unina ko ŋga aza usune! 26 Ondro ka’do ’diaza driupiro ni märi ago ni ta ŋgaembaro maro ri, Ŋgwa Lidri ro a’dona ’da driupiro ni ndäri ondro nda kikyite ’desi ndaro ya, ’desi Täpi ndaro roya ndi malaikai alokado ndaro roya owo. 27 Endaro mata ämiri ono azakana orivoya noŋwa se uninayi ko odrane madale ànya ondrenayi Miri ’Bädri’ba Lu ro ro lutu.” 28 U’du njidrieri ta kwoi atana vosi oko, Yesu ru Petero, Yoane ndi Yakoba be te nda be ago oyite kuru lutu dri mätune. 29 Ondro nda ka ugu mätu oko, militi ndaro a’dona tozarute to, ago boŋgoi ndaro a’dote onje hwia. 30 Ndriŋwa oko lidri ritu te orivoya lau ugu atavoya nda be, ànya ni Musa yi owo Eliya be, 31 se loforute liŋgyi vo’buyakuru robe ago atayite Yesu be ta liti se nda ka oyebe ta Lu ro se arabe ndäri ondene ndriro odra si Yerusalema ya ana rota. 32 Petero ndi azii ndaro be u’duyite ŋbi, ago kupiyi mi te oko ndreyi ŋgaeyi Yesu rote ndi màno ritu se edrevoya nda be ana be. 33 Ago ’di kai kayi ugu oyi ni Yesu resi oko, Petero atate ndäri ekye: “Miemba’ba, orivoya kado ämäri a’done noŋwa. Màmona mutuguṛi nätu alodi miri, alodi Musa ri, ago alodi Eliya ri.” (Nda ni tase nda ka ugu atana ono ko.) 34 Ondro nda kadri ugu ta ono atana oko, ’dikolo efote ndi tako ànya te lindri iro si; ago taeri’bai a’dote turituriro ikyi ’dikolo ro ànya dri ana ro. 35 Ago ata ikyite ni ’dikolo yasi ekye: “Ono ni Ŋgwa maro, se manjibe owo; nyèri ta ndaro!” 36 Ondro ata kodrite oko, Yesu a’dote iṛe, taeri’bai a’dote titiro tase cini ono ro ago tase ànya kondreyibe tu ana si ana itiyi tana kote ’diaza ri. 37 Tu kinjo si; Yesu ndi taeri’bai nätu ndaro be efoyite vuru ni lutu drisi ago lowa amba ’bedrite Yesu be. 38 Mano aza trete ni lowa lakosi ekye: “Miemba’ba, molo’baru miri, mindrevo ŋgwa maro dri; ni ŋgwa aloŋwa maro owo! 39 Tori ka nda uru ro ndriŋwa otrebe ago ka nda oye agyigyi, ago kamo ka efo kala ndaro yasi, ka ugu nda oye koziro ago e’be nda kote! 40 Meji taeri’bai miro te usine tesi, oko ànya niyi kote.” 41 Yesu zatadrite ekye: “Ami lidri taomaako ago koziro ono! Beṛo märi orine ami yibe tuna mu’du eŋwanye ya? Ago a’bana ma orine ami yibe mu’du eŋwanye ya?” ’Dooko nda atate mano ana ri ekye: “Nyezi ŋgwa miro noŋwa.” 42 Ondro ŋgaga ana kate eziikyi oko, demona vo nda te gyinidri ago yete agyigyi, Yesu ta tori undiro te, ede ŋgaga te, ago logo nda te täpi ndaro ri. 43 Lidri cini larote mbara para Lu ro tana ro. Lidri drigba ugu larolaro ro tase cini Yesu ka ugu oyena be ta oko, nda atate taeri’bai ndaro ri ekye: 44 “Tase ma oyebe atane ämiri ono nyìje tana ko! Ate oye Ŋgwa Lidri ro ozone drí lidri roya.” 45 Oko taeri’bai niyi takaci tase ono ro ko. Tana a’dote da’doda’do ro ànyari, ta’doro ànya niyi tana kote, ago ànya cini a’dote turituriro nda ejine tana ro. 46 Kalawasa a’dote taeri’bai lako ta ’dise a’done parandra ànya lako rota. 47 Yesu ni tase ànya kabe ugu tavona usu te, ago nda ru ŋgagaŋwa aza te, edre nda te gbo ndaro ya, 48 ago atate ànyari ekye: “Nda se kabe ŋgagaŋwa ono uruna ävuru maro ya, ka ma uru, ago nda se kabe ma uru ka kpa nda se kezo mabe uru. Tana nda se tipari ami cini lako ni parandra.” 49 Yoane atate ekye: “Miemba’ba, màndre mano aza te ka ugu demonai lofo tesi ävuru miro si, ago matate ndäri edrene, tana nda ko gboko amaro ro.” 50 Yesu atate ndäri ndi taeri’bai azi be ekye: “Nyèdre nda ko, tana nda se ko kyilaro ami yibe orivoya amiro.” 51 Ondro tu kate esa ti nda uruza vo’buyakuru ya oko nda usutate ago eto oyite Yerusalema ya. 52 Nda zo lazo’bai te nda mile, se oyiyite ’baŋwa aza Samaria roya ŋga cini edene nja ndäri. 53 Oko lidri lau ana leyi ko nda urune, tana nda ka ugu oyi Yerusalema ya. 54 Ondro taeri’bai Yakoba ndi Yoane be kondreyi tase ono te oko, ànya atayite ekye: “Opi, inye’do mile ndi ämäri asi uzine vuru ni vo’buyakuru yasi ànya ozaza ya?” 55 Ago Yesu zamite ago ’bidri ànyaro te. 56 ’Dooko Yesu ndi taeri’bai ndaro be oyiyite ’baŋwa aza ya. 57 Ago ànya kate ugu oyi liti ya oko, mano aza atate Yesu ri ekye: “Masona ndi mivo vose nyabe oyi kigye ya.” 58 Yesu atate ndäri ekye: “Kobai orivoya ’bui be, ago arii orivoya zoi be, oko Ŋgwa Lidri ro orivoya vo ako drî ndaro lalaza.” 59 Nda atate mano aza ri ekye: “Miso mavo.” Oko mano ana atate ekye: “’Desi, mi’ba ma ogone täpi maro osene käti.” 60 Yesu zatadrite ekye: “Nye’be avo kose avo modo anyaro. Nyoyi ago mipe ta Miri ’Bädri’ba Lu ro ro.” 61 Mano aza atate ekye: “Masona ndi mivo ’desi, oko mi’ba ma oyine mede oyene katidri maro ri käti.” 62 Yesu atate ndäri ekye: “’Diaza se eto ŋga oso te ago ’dooko ka ugu voondre kovole kadona i’do Miri ’Bädri’ba Lu ro tana ro.”
101 Ono vosi Opi nji lidri azaka ’butenjidrieri foritu te ago lozo ànya te ba ritu ritu, oyine nda mile ’ba’desi cini yasi ago vose andivo ndaro ka oyebe oyine kigyesi yasi. 2 Nda atate ànyari ekye: “Jalia orivoya ŋga be amba, oko losi’bai toto orivoya fereŋwa kala ŋgana ro kotone. Nyä̀mätu kuzupi jalia ro ri tana nda kezo losi’bai robe ŋga jalia ro ndaro kalana kotone. 3 Nyòyi! Ma ami ozo tesi oso timele ihwii lako ronye. 4 Mìru kpäkä kode gbolo drilämi’bai ro ko, ca mvokai, nyèdre ko mede oyene ’diaza ri liti dri. 5 Ondro nyàte oci zo ya oko, nyàta käti mìkye: ‘Taliatokpe ka’do zo ono be.’ 6 Ondro mano taliatokpe lu ro ka ori lau, mì’ba mede amiro taliatokpe ro kori nda dri, ondro i’do, mìru mede amiro taliatokpe ro kovole. 7 Mìri zo gi alo ana ya, mìnya ago mìmvu ŋgase ànya kozobe ämiri ’do, tana beṛo päläti losi’ba ro ozone ndäri. Nyùgu loci ko zo yasi zo yasi. 8 Ondro nyàte oyi ’ba’desi yasi ago iŋbi ami te oko, mìnya ŋgase a’babe ami kandra ’do, 9 nyède adravo se ’ba’desi ana ya, ago nyàta lidri lau ri mìkye: ‘Miri ’Bädri’ba Lu ro ro ikyite ti amire.’ 10 Oko ondro nyàte oci ’ba’desi ya ago iŋbi ami kote, nyòyi litiŋwa drisi ago nyàta mìkye: 11 ‘Ca durufu ni ’ba’desi amiro yasi se kabe lebe pa amaro ya màyona ndi ami lomvo. Oko ämiri tana oyine anjioko Miri ’Bädri’ba Lu ro ro ikyite ti amire!’ 12 Endaro mata ämiri ono Tu Vure rosi Lu ka’dana yauni ndra Sodomo ri ndrani ’ba’desi se ana ri. 13 “A’dona ’da rritiro miri Korazina! A’dona kpa rritiro miri Betesaida! Ondro ka’do talaro ro se ayebe ami ya kwoi ayegwo Tura ndi Sidona be ya, lidri lau ana aba rite kyeno vuru, soyi boŋgo guniya rote, ago fofoyi torofo te andivo ànyaro lomvosi, ka’daza anjioko ànya etayidrite ni takozi ànyaro yasi! 14 Lu ka’dana yauni ndra Tu Vure rosi Tura ndi Sidona be ri ndrani ämiri. 15 Ago mi Kaperenauma! Inye’do mile andivo miro eŋgane vo’buyakuru ya ya? Evona mi ’da vuru gehena ya!” 16 Yesu atate taeri’bai ndaro ri ekye: “Nda se kabe ta amiro erina ka ta maro erina; nda se kabe ami ogazo ka ma ogazo; ago nda se kabe ma ogazo ka nda se kezo mabe ogazo.” 17 Lidri ’butenjidrieri foritu egoyite riyä amba be, atayite ekye: “Opi, ca demonai royi ama te ondro màta ànya te ävuru miro si owo!” 18 Yesu zatadri ànyaro te ekye: “Mandre Satani te ka e’de oso ’busi ronye ni vo’buyakuru yasi. 19 Nyèri! Mozo drikaca te ämiri, tana mìni robe abane inii drisi ndi kitonii be ago mbara cini Kyila’baazi ro opeza ṛe, ago ŋga aza oyena ami ko koziro. 20 Oko nyà’dona ko yai’dwesi tana torii undiro kabe ami oro ono ro; oko nyà’dona yai’dwesi tana ävuru amiro egyite vo’buyakuru ya.” 21 Tu gi ana si Yesu a’dote twi riyä be Tori Alokado si ago atate ekye: “Täpi, Opi vo’buyakuru ndi ’bädri be ro! Maye aro’boya miri tana nyaka’da ŋgase nyada’dobe ni tavouni’bai ndi tauni’bai be ri ono te tauniako’bai ri. Owo, Täpi, tase ono tana si mi ni a’done inye. 22 “Täpi maro ozo ŋga cini te märi. ’Diaza ni ko Ŋgwa ni a’di e’be gialo Täpi, ago ’diaza ni ko Täpi ni a’di e’be gialo Ŋgwa ago ànya se Ŋgwa kabe onjina nda ka’dane ’do.” 23 ’Dooko Yesu zamite taeri’bai re ago atate ànyari iṛero ekye: “Ami kandrakado be ŋgase nyàbe ondrena ono ondrene! 24 Mata ämiri ono nebii amba ndi ’bädri’bai be leyite ŋgase nyàbe ondrena ono ondrene, oko ànya ndreyi kote, ago ŋgase nyàbe erina ono erine, oko ànya eriyi kote.” 25 Miemba’ba Ota ro ikyite ago ojote Yesu ojone. Nda ejitate ekye: “Miemba’ba, beṛo märi e’di oyene a’done adri äduako be ya?” 26 Yesu zatadri ndaro te ekye: “Taegyi ata ekye e’di ya? Nyabe tazevona edre eŋwanye ya?” 27 Mano ana zatadrite ekye: “Nyulu Opi Lu miro ya cini miro si, lindri cini miro si, mbara cini miro si, ago tauni cini miro si; ago nyulu oriazi miro oso nyulu andivo miro be ronye.” 28 Yesu logotate ekye: “Ta miro ŋgye; miye ’do te ’dooko mirina ndi.” 29 Oko miemba’ba Ota ro lete andivo ndaro ka’dane, ndi nda eji Yesu te ekye: “Oriazi maro ni a’diya?” 30 Yesu zatadrite ekye: “Mano aza alo kate ugu oyi ni Yerusalema yasi le Yeriko ya ’dooko ŋgatopa’bai gota nda te, topayi ŋga ndaro te, ago ’biyi nda te, e’beyi nda te ti odrane, 31 ta ono ka’dote oko kohani aza kate ugu oyi liti ana drisi, oko nda ndre mano ana te, nda abate litibiṛi telesi yasi. 32 Liti gialo ana yasi Lewe’ba ikyi kpate nasi, ikyite ndrevote mano ana dri, ago ’dooko abate litibiṛi telesi yasi. 33 Oko Samaria’ba se kabe ugu aba liti ana yasi ikyite mano ana dri, ago ondro nda kondre mano ana te oko, ya ndaro ni tawi. 34 Nda oyite nda dri, da ido te ndi vino be laza ndaro yasi ago vu anya te, ago nda ’ba mano ana te doŋgyi modo ndaro ro dri ago ugu nda te zo loli roya ago lau nda ndrevo ndaro te. 35 Ago kyenonosi, tu kinjo si nda ru mo’di kaciro ritu te ago ozote zo voondre’ba ri, atate zo voondre’ba ri ekye: ‘Mindrevo ndaro ago ondro megote nosi oko, ŋgase nyozobe ndäri mologona vona ’da miri.’ ” 36 Yesu nde ta ono te taeji si ekye: “Nyusu miro be, ’dise nätu kwoi lakosi a’di ye ta ni oriazi ronye mano se ŋgatopa’bai gotabe ono riya?” 37 Miemba’ba Ota ro zatadrite ekye: “Nda se yana kunibe nda lomvo ana owo.” Yesu logotate ekye: “Ka’do inye, nyoyi, ago miye kpa inye.” 38 Yesu ndi taeri’bai ndaro be oyiyite liti ànyaro drisi, nda ikyite ’baŋwa aza ya se toko se äzibe Marata ana kuru nda be ’ba anyaro ya ana ya. 39 Anya endreŋwa be äzite Maria, se rite vuru pa Opi roya ago ka ugu ŋgaemba ndaro erina. 40 Marata milo’bebe ta losi se cini anyari oyene rota ago anya ikyite ago atate ekye: “Opi, inye’do endreŋwa maro e’be mabe losi cini oyene iṛe ono miti tana ko ya? Nyata anyari ikyine ma opane.” 41 Opi zatadri anyaro te ekye: “Marata, Marata! Nyolo’be mite ago mi rritiro ta ŋgaamba rota, 42 oko ale toto ŋga alodi ayani. Maria nji ŋga kado te, ago äruna ko ni anya rigyesi.”
111 Tu alo si oko Yesu ka ugu mätu oye vo aza ya. Ondro nda kondete oko, alo taeri’bai ndaro ro atate ndäri ekye: “Opi nyemba ama mätune, kpa oso Yoane kemba taeri’bai ndaro be ronye.” 2 Yesu atate ànyari ekye: “Ondro nyàte mätu oko, nyàta nonye mìkye: ‘Täpi, Ävuru alokado miro ka’do orooro ro; Miri ’Bädri’ba miro ro kikyi. 3 Nyozo ŋgaonya màlebe tu ro tu ro ämäri. 4 Nye’be ama takozi amaro ta, tana mà ’dicini se kabe ama oye koziro e’bena. Nyugu ama ko vo taojoro ya.’ ” 5 Ago Yesu atate taeri’bai ndaro ri ekye: “Aba alo amiro koyi gwo zo bereazi roya o’bwaro ago kata gwo ndäri ekye: ‘Bereazi nyozo duŋguṛu ambata ro nätu märi. 6 Bereazi maro aba’ba ro esate yau zo maro ya ago ma teinye ŋgaonya aza ako ozone ndäri.’ 7 Bereazi miro kozatadri miro gwo ni zo yasi ekye: ‘Nyokwo ma ko! Ase käläsi te, ago ŋgwai maro u’duyite kitapara dri, mänina kote oŋgane kuru ŋga aza ozone miri.’ 8 Ka’do inye ’dooko ayena e’di ya? Mata miri ondro ka’do nda koŋga ca ko kuru ambata ozone miri tana mi ni bereazi ndaro, caoko nda oŋga ’da kuru ago ozona ŋga cini se milebe ’da miri tana drî miro pi kote ni ugu ŋga ejivoya. 9 Ago mata ämiri ono: Nyèji, ago ozona ndi ämiri; mìṛi ago nyùsuna ndi; mì’bi, ago äpina käläsi ndi ämiri. 10 Tana ’dise cini kabe ejina ozona ’da rigye, ago nda se kabe uṛina usuna ’da, ago äpina käläsi ’da nda se kabe o’bina ri. 11 Ami se täpii ro ono inye’do alo amiro aza ozona ini ndi ŋgwa ndaro ri ondro nda keji ta be ti’bi ta aya ya? 12 Kode nyozona gi’da kitoni ayani ndäri ondro nda keji ta be ta täu’bo rota aya ya? 13 Ami se koziro ono, mìni ndi ŋgase kado ozone ayani ŋgwai amiro ri, ka’do inye, Täpi amiro se vo’buyakuru ya ozona Tori Alokado te mu’du eŋwanye ànya se kayibe nda eji iyi ri ya.” 14 Yesu ka ugu demona lofo tesi ni ’dise ni ko atane yasi, ago ondro demonai kofote tesi oko, ’dina ’do eto ata te. Lowa larote, 15 oko rukä lidri ro atate ekye: “Belezebula, dri’ba demonai ro kani mbara ozo ndäri ànya lofoza tesi.” 16 Azakana leyite Yesu ojone, ago ànya ejiyi nda te talaro ro oyene ka’daza nda ni Lu resi. 17 Oko Yesu ni tase ànya kabe ugu tavona usu ana te, ago nda atate ànyari ekye: “’Bädri aza se kabe andivo iro lonyina gboko ro se kabe kyila oye azi be ’do unina ko orine madaro; katidri se lonyirute andivo iro voya odrana ’da. 18 Ago ondro miri ’bädri’ba Satani ro ro konyiru gwo gboko ro ka ugu kyila oye azi be, unina orine eŋwanye ya? Nyà ata mìkye ma demonai lofo tesi tana Belezebula kani mbara ozo märi oyezana inye. 19 Ka’do inye a’di kani mbara ozo oso’bai ami vo ri ànya lofoza tesi ya? Tase oso’bai ami vo kayibe oyena ka’date anjioko ami orivoya koziro. 20 Ondro ka’do ma demonai lofo tesi mbara Lu rosi, ono ka’da ndi anjioko Miri ’Bädri’ba Lu ro ro ikyite nja ämidri. 21 “Ondro mano mbäräkä ro aza lakaza cini ndaro kyila robe nja, ka zo modo ndaro ro okwa ni, ŋga cini ndaro orivoya koyo. 22 Oko ondro ’dise mbäräkä ro ndrani nda drisi katakoru gwo nda dri ago kope nda te ṛe, nda ŋgyi lakaza cini se kuzupi ko’ba mi be driigye te ago lonyi ŋgase nda kotopabe gwo. 23 “’Diaza se ko mabe ṛo orivoya endaro kyilaro ma be, ’diaza se pa ma ko kala ŋga ro koto si ṛo endaro ka ugu perena. 24 “Ondro tori undiro kofote tesi ni ’diaza yasi oko, ugu abate ’bädri gyiako yasi ugu vo uṛibe loliza, ondro kuni kote azana usune oko, anya atate andivo iro ri ekye: ‘Magona ndi kovole zo maro ya vose mikyibe ni kigyesi ana.’ 25 Ndi anya gote kovole ago usu zo te wäṛi ro ago ŋga cini arate nja kigye. 26 ’Dooko anya oyite tesi ago ezi torii azaka njidrieri te kozi parandra ni andivo anyaro ri, ago ànya ikyiyite ago riyite lau. Ago ori ’di ana ro kozina a’dote ndrani se käti ri.” 27 Ondro Yesu kata ta ono te oko, toko aza atate ṛe ni lowa lakosi ago atate ndäri ekye: “Toko se kuti mi be ago keca mi be ni kado!” 28 Oko Yesu zatadrite ekye: “Ànya se keriyi ata Lu rote ago koroyite, ṛo ni kado!” 29 Ago lowa koṛikalate gbikyi nda lomvosi oko, nda ugu atate ekye: “Lidri tu ono ro orivoya koziro! Ànya ka taeji talaro rota, oko talaro ro se ozone ämiri toto talaro ro Yona ro ayani. 30 Kpa oso inye nebi Yona orivoya taka’daro ro lidri Ninewe ro ri, ago Ŋgwa Lidri ro a’dona ’da taka’daro ro lidri tu ono ro ri. 31 Tu Vure rosi ’Bädri’ba Toko ro Sheba ro oŋgana ’da kuru ago kicuna lidri tu ono ro ’da, tana anya ikyite ni ’bädri lozo yasi tavouni ’Bädri’ba Solomo ro erine, ago endaro mata ämiri ono, ’diaza orivoya noŋwa, para ndrani Solomo ri! 32 Tu Vure rosi lidri Ninewe ro oŋganayi ’da kuru ago kicunayi ami ’da, tana ànya etayidrite ni takozii ànyaro yasi ondro ànya keriyi taope Yona rote owo; ago endaro mata ämiri ono, ’diaza orivoya noŋwa para ndrani Yona ri! 33 “’Diaza i’do se eyi lamba te oko da’do gwo kode tako drî na gwo lakaza si, oko nda ka edrena ŋga lamba edrero dri, tana lidri kondre ŋgaeyi robe ondro ànya kayite oci zo ya owo. 34 Mi miro laba orivoya oso lamba ronye lomvo ri, ondro ka’do mi miro orivoya kado, lomvo cini miro orivoya twi ŋgaeyi be, oko ondro ka’do mi miro ka’do kote kadoro, lomvo cini miro a’dona ndi ŋgätini ndra ya. 35 Mindre kado, anjioko ŋgaeyi se miya ono ko ŋgätini yi. 36 Ondro lomvo cini miro orivoya twi ŋgaeyi be, azana i’do ŋgätini ya, anya eyina vo ndi gbikyi, oso lamba kabe voeyi midri ŋgaeyi anyaro si ronye.” 37 Ondro Yesu konde ta atate oko, Parusi aza eji nda te ŋgaonyane nda be; ago nda cite zo ya ago rite vuru ŋgaonyane. 38 Parusi a’dote larolaro ro ondro nda kondrete Yesu kojo andivo kote käti ŋgaonyavoya owo. 39 Ago Opi atate ndäri ekye: “Ami Parusii nyà lomvo tesisi kofo amiro ro ndi saani be ro ojona, oko ya yasi amiro orivoya twi kyila ndi taundiro be. 40 Ami amama yi! Inye’do Lu se kede tesina be, ede yasina kpa ko niya? 41 Nyòzo ŋgase orivoya kofoi amiro ya ndi saanii amiro ya be ati’bai ri, ago ŋga cini a’dona ndi wäṛiro ämiri. 42 “Rritiro ämiri Parusii! Nyà telesi alo ’butealo agba ro ozona Lu ri tuna si, oso lawi ago äṛuku ndi agba cini azaka be ronye, oko miti ta taŋgye ndi ŋgalu Lu ri be tana ko. Beṛo ämiri se kwoi oyene, ko azakana e’bene tana otiako. 43 “Rritiro ämiri Parusii! Nyùlu voi ’diororo zoitaeriro yasi, ndi mede oye taoro si be voi ŋgalogye ro yasi aya. 44 Rritiro ämiri Parusii! Ami orivoya oso ’budri jaraŋgala ro ronye se lidri ka aba driigyesi teinye uniako.” 45 Alo aza miemba’bai Ota ro ro atate ndäri ekye: “Miemba’ba nya kpa ama kozi ta ono ata si!” 46 Yesu zatadrite ekye: “Kpa rritiro ämiri ami miemba’bai Ota ro! Nyà ŋgaläŋgyi o’ba lidri kyembe se orivoya rritiro uŋgyine, oko andivo amiro nyòzo driŋgwa amiro ko ànya opane ŋgaläŋgyi kai uŋgyivoya. 47 Rritiro ämiri! Nyà ’budri nebii ro obe liŋgyiekye; nebii segi zutui amiro kutufube kai. 48 Ami modo orivoya tazevoedre’bai, anjioko nyà taoye se zutui amiro koyebe ro oyena; ànya tufuyi nebii te, ago mibe ’budri ànyaro ni. 49 Ta ta ono rota Tavouni Lu ro atate ekye: ‘Mezona nebii ’da ànyari ndi lazo’bai be; ànya tufunayi rukä ànyaro ’da ago ezanayi azakana ’da.’ 50 Ago lidri tu ono ro ezana ’da ta nebii cini tufu rota ṛo ni eto ’bädri o’ba rosi, 51 ṛoni ufu Abele rosi le ufu Zakaria roya, se äfute lakole vo tori oloro ro ndi Vo Alokado robe ya ana. Owo, mata ämiri ono, lidri tu ono ro ezana ’da ta ànya cini rota! 52 “Rritiro ämiri miemba’bai Ota ro! Mìru ŋgase kabe käläsi zo tauniro upina rote, ami andivo mìle ko ocine kigye, ago nyàlaga ànya se kayibe ojo oyine ocine kigye tezo.” 53 Ondro Yesu ke’be vo ana te oko, miemba’bai Ota ro ndi Parusii be etoyi nda kozite yaoso si ago ejiyi nda te taeji amba si, 54 ojoyite nda odone nda o’basi takozi azaka ugu ata si nda uruzana.
121 Ondro kutu lidri ro lowaro kotokalate ago ka ugu lutu azi drisi oko, Yesu atate käti taeri’bai ndaro ri ekye: “Nyàgaga ami ni loŋga Parusii ro ri; ma miomba ànyaro tana atana. 2 Ŋgase atako drî na te äpina drî na ’da, ago tase cini dämbidämbiro a’bana ’da unine. 3 Ka’do inye tase nyàtate vouni ya erina ’da ŋgaeyi ya ago tase nyà atana kayayaro iṛero drî oseosero zo ya ayona tana ’da ni zo drisi. 4 “Mata ämiri, bereazii maro, nyà’do ko turiro ni ànya se kabe lomvo ufu ri oko ufuna vosi uninayi ko ŋga aza oyene koziro. 5 Maka’dana nda se ämiri turine ’da, nyùturi Lu, se lomvo ufu vosi ni drikaca be ovone le gehena ya. Mìma ta maro ya, nda ni se beṛo ämiri turine owo! 6 “Inye’do gyolokoi nji agye ko teṛo mileni ritu si ya? Caoko Lu ije ta gyoloko alodi ro kote. 7 Ca drikyiri drî amiro ro vona cini atite. Ka’do inye nyà’do ko turiro; tana lagye amiro orivoya para ndrani gyolokoi amba ri! 8 “Ma taŋgye iti ämiri, nda se kabe ata ŋbelero miamba ya ekye yi ni maro, Ŋgwa Lidri ro atana kpa inye ta ndaro ta malaikai Lu ro kandra. 9 Oko nda se kabe ma ogazo ŋbelero miamba ya, Ŋgwa Lidri ro ogana nda kpa zo malaikai Lu ro kandra. 10 “’Diaza se kabe ta ata Ŋgwa Lidri ro lomvo änina ndi e’bene; oko nda se kabe ta undiro atana Tori Alokado lomvo änina ko e’bene alona. 11 “Ondro ànya keziyi ami te vure amiro oyene zoitaeriro ya kode wari’bai kode ’dimiri’bai kandra, nyòlo’be mi ko mìkye yagagana iyi eŋwanye kode yatana eŋwanye. 12 Tana Tori Alokado embana ami ’da tu gi ana ya tase ämiri atane si.” 13 Mano aza lowa lako atate Yesu ri ekye: “Miemba’ba, nyata ädrupi maro ri drimbi täpi amaro ke’bebe ämäri lonyine ma be.” 14 Yesu zatadri ndaro te ekye: “Bereazi maro, a’di ozo ta ni märi vureopene kode drimbi lonyine lakole ami ritu roya ya?” 15 Ago nda ugu atate ànya cini ri ekye: “Mìndre kado ago nyàgaga andivo amiro ni yagäru cini risi, tana ori ŋgye lidri ro a’ba ko ŋgase modo ndaro be sina ’do dri, a’do ndaro ŋgadriamba be mu’du eŋwanyeya ’do tana i’do.” 16 ’Dooko Yesu iti lapidri ono te ànyari ekye: “Mano aza orivoya ŋgaamba’ba yi se orivoya gyini be se wa doŋgo te kado. 17 Nda eto tavousute andivo ndaro si ekye: ‘Ma te vo ako ŋga cini maro o’baza, mayena e’di ya? 18 Nda atate andivo ndaro ri ekye, ono ni tase märi oyene owo, meperena kyiroi maro ’da vuru ago mago mamona te ’desi para, se madrona inya maro gwo ndi ŋga azaka cini maro be kigye. 19 ’Dooko matana gwo andivo maro ri makye, ma te kandrakado be! Ma te orivoya ŋga kado se cini malebe a’done sina ndroa na amba be. Miri ori rritiako, minya, mimvu, ago andivo miro nyänjäkyi!’ 20 Oko Lu atagwo ndäri ekye: ‘Mi amama yi! Ŋgäkyi ono si ono oye adri miro urune, ’dooko ŋgase cini andivo miro ka’dobe sina ono a’dona a’di riya?’ ” 21 Ago Yesu atate ekye: “Ono ni tase a’dona be ànya se kayibe ŋgadriamba odro andivo ànyaro ri oko ŋgadriamba ako Lu mile ri owo.” 22 ’Dooko Yesu atate taeri’bai ri ekye: “Mata ämiri ono, nyà’do ko milo’be be ta ŋgaonya se mìlebe ami o’bane orine lidriidriro sina rota kode ta boŋgo se mìlebe osone ami lomvo ono rota. 23 Adri orivoya para ndrani ŋgaonya ri, ago lomvo orivoya para ndrani boŋgo ri. 24 Mìndre korogai te: ànya kyi’diyi ŋga ko ago kotoyi ŋga jalia ro ko, ànya orivoya zoi ŋgaodroro ndi kyiroi be ako, oko Lu kani ànya eca! Ami orivoya kadopara ndrani arii drisi! 25 Inye’do alo aza amiro o’banayi gi’da ombane de’bele ta milo’be rosi ya? 26 Ondro ka’do mìni kote ca ŋga fereŋwa oso nonye ono oyene, nyà milo’be ta ŋga azaka rota etaya? 27 Mìndre dri foi kabe omba: ànya yeyi losi ko ago ’diyi boŋgo ko andivo ànyaro ri. Oko mata ämiri ono, ’Bädri’ba Solomo gica ŋgadriamba cini ndaro be oko, a’do kote boŋgo liŋgyiekye be oso alo aza fo kwoi ro ronye. 28 Lu ni se kabe boŋgo oso käyi vocowa ro lomvo owo; käyi se ondro ono gi orivoya noŋwa ago ondo oko tana kyete, jete vo ŋgaonya la’diro ya. Inye’do nda osona boŋgo ṛo ko para ndra ami lomvo ya? Ami taoma giṛiŋwa be ono! 29 “Nyòlo’be mi ko ondoalo, ta ŋgase ämiri onyane ago ŋgase ämiri umvune rota. 30 (Tana taomaako’bai ’bädri ono ro ondoalo kayi ta ŋgase cini kwoi ro usuna.) Täpi amiro ni te anjioko mìle ŋga kwoi. 31 Oko vona ro, nyà’do tausu Miri ’Bädri’ba ndaro robe, ago nda ozona ŋga kwoi ’da ämiri. 32 “Nyà’do ko turi ro, gboko giṛiŋwa ono, tana Täpi amiro yai’dwesi Miri ’Bädri’ba Lu ro ro ozone ämiri. 33 Nyòlogye ŋga cini amiro ago nyòzo parata na ati’bai ri, kpäkä se lewa ko andivo amiro nyà’do sina, ago mìdro ŋgadriamba amiro Vo’buyakuru ya, se ànya okyena ko alona, tana kugu unina ko ànya kugune, ago ludu unina ko ànya onyane. 34 Tana ya amiro a’dona ’da ondoalo vose ŋgadriamba amiro orivoya kigye ana ya. 35 “Nyà’do nja ŋgase kabe ikyi ta, mìso boŋgo ago nyèyi lamba amiro, 36 oso ruindu’bai se kayibe ugu ’desi ànyaro kwote egovoya ni karama lagye ro yasi ronye. Ondro nda kesate ago ko’bi käläsi te oko, ànya oŋgana ’da upina käläsi ’da ndäri dori. 37 Ruindu’bai se ondro ’desi ànyaro kate ego oko kusu ànya te miuŋbo ago nja ànya ni kado! Mata ämiri ono, nda otrina boŋgo ndaro ’da, ago ejina ànya ’da orine vuru, ago onyana ŋgaonya ’da ànya be. 38 Ànya ni kado ondro nda kusu ànya te nja; ondro nda kesa ca o’bwaro kode liyaro owo! 39 Mìyi ta ono! Aba ondro ka’do zo kuzupi kuni tuse kugu kabe ikyi sina gwo, nda o’bana kugu ko vo oŋgone zo ndaro ya. 40 Ami, kpa inye, beṛo a’done nja, tana Ŋgwa Lidri ro ikyina ’da saa se mì’ba mi ko ikyiza ndäri sina si.” 41 Petero atate ekye: “Opi, inye’do lapidriopi ono mipi toto tana ama, kode mipi tana ’dicini ya?” 42 Opi zatadrite ekye: “Ka’do inye, a’di ni ruindu’ba ’diri ago tavouni be owo ya? Nda ni se ’desi ndaro o’bana ’da dri’ba ro zo ndaro dri ago ŋgaonya ozone ruindu’bai azi ri tu ŋgye na si owo. 43 Ruindu’ba se ondro ’desi ndaro kikyite ’bäru oko kabe nda usu ugu ta oyevoya inye ’do ni kado! 44 Endaro, mata ämiri ono, ’desi o’bana ruindu’ba se ana ’da drikaca be lakaza cini ndaro dri. 45 Oko ondro ruindu’ba kata gwo andivo iro ri ekye, ’desi ndaro uruna tu amba egoza ago ondro nda keto ruindu’bai azi, mànoago ro riti ’ditoko robe o’bina te, ago nya ŋga te ndi ŋga umvu be ago kufu yi te ŋgaumvu si oko, 46 ’desi ruindu’ba gi ana ro egona ’da tu alo aza se ruindu’ba ana ko’ba mi ko nda ta si ago saa se nda kuni ko si. ’Desi togana nda ’da jinyijinyi ago nda usuna andivo ndaro ’da taoroako’bai lako. 47 “Ruindu’ba se ni tase ’desi ndaro kole nda be oyene te, oko ede andivo ndaro ko nja ago ye anya kote, ezana ndi o’bi kozi si. 48 Oko ruindu’ba se ni tase ’desi ndaro lebe ko, ago caoko ye gwo ŋga azaka se ta si la’bi ayani ’do; ezana ndi o’bi fereŋwa si. Ejina ŋgaamba ni ’dise ozobe amba rigye rigyesi, ejina ŋgaamba ’da ni ’dise ozobe parandra rigye rigyesi. 49 “Mikyite asi osone ’bädri dri ago ṛo kado eleru gwo owo! 50 Ma bapatisi be ma bapatisiza, ago ma rritiro madale lävuna lutu! 51 Nyùsube mikyite taliatokpe ezine ’bädri ya ya? Hwa, ko taliatokpe, oko rulonyi ayani. 52 Ni yauono ago mileya ro katidri nji lonyiruna ’da, nätu ritu dri ago ritu nätu dri. 53 Täpii a’dona ’da kyilaro ŋgwàagoro ànyaro be, ago ŋgwàagoro kyilaro täpii ànyaro be, endrei a’dona ’da kyilaro ndiriŋwa ànyaro be ago ndiriŋwa kyilaro endrei ànyaro be, ago ’ditoko a’dona ’da kyilaro adraŋwà ànyaro be, ago adraŋwà kyilaro ’ditoko ànyaro be.” 54 Yesu ata kpate lidri ri ekye: “Ondro mìndre ’dikolo ka ugu ikyi ni aŋgoyasi oko, nyà ata mìkye ’bu koye u’dine; ago ’di ndi. 55 Ondro oli ka ugu eli ni ŋgäṛiŋwadrisi oko, nyà ata mìkye vo koye emene; ago eme ndi. 56 Ami orivoya miomba’bai! Mìni ndi voondrene ’bädri dri ndi vokuru be ago mìni ta oli ro ndi, oko tana e’di mìni tu yauono tana ko etaya? 57 “Ŋgase ŋgye oyene mìpe vurena ko andivo amiro si etaya? 58 Ondro ’dialo aza kyilaro mibe ago ka mi ezi vure ya, nyede kalaope amiro nda be teinye oyiako vure ya, ondro miye kote, nda uguna mi ’da vureope’ba kandra, se ozona mi gwo vookwa’ba rigye, ago avona mi ’da kamba ya. 59 Mata miri ono, mirina ndi lau, madale nyozona mileni ädu dri miro utwero lutu.”
131 Tu ana si lidri azaka orivoya lau se itiyitate Yesu ri ta Galilaya’bai se Pilato kufube ’dooko ànya kayibe tori olo Lu ri ana rota. 2 Yesu zatadri ànyaro te ekye: “Nyùsu amiro be a’debe Galilaya’bai cini kai ufune ’do tana ànya orivoya takozi’bai koziro ndrani Galilaya’bai cini azi riya? 3 Endaro ko inye! Ago mata ämiri ono ondro ka’do nyètadri ko ni takozii amiro yasi, ami cini mìdrana ’da oso ànya ronye. 4 Oko lidri se ’butealo fonjidriena Siloama ya zowiṛa se ke’debe ago kufu ànya be kai ni? Inye’do nyùsu amiro be ’do ka’dobe anjioko ànya orivoya koziro ndrani lidri azaka se kabe ori Yerusalema ya risi ya? 5 Endaro ko inye! Ago endaro mata ämiri ono ondro ka’do nyètadri ko ni takozii amiro risi, mìdrana ’da oso ànya ronye.” 6 Yesu iti lapidriopi ono te ànyari ekye: “Mano aza kyi’di ce kyi’du rote ämvu vino ro ndaro ya. Nda ojote doŋgo uṛine ni kyi’du dri oko usu kote. 7 Ago nda atate ämvuoso’ba ndaro ri ekye: ‘Mindre, ndroa na te nätu ma’dobe ikyivoya noŋwa doŋgo uṛivoya ni ce kyi’du ro ono dri oko musu aza kote. Miga anya vuru! Ka ugu ori dri gi’de etaya?’ 8 Oko ämvuoso’ba zatadrite ekye: ‘’Desi, nye’be anya kori, ndroa alo aza; mä’dina lomvo na ’da ŋgulu ago madana mure ’da pana yasi. 9 Ondro kowa doŋgo te ndroazi, ’do orivoya kadopara, ondro kowa kote ’dooko minina ndi anya ogane vuru.’ ” 10 Sabata alo si Yesu ka ugu miemba zotaeriro ya. 11 Toko aza orivoya lau tori undiro be se ’ba anya te adravoro ndroa na ’butealo fonjidriena; anya a’dote ruguruguro ago ni kote yi ozone a’dwi. 12 Ondro Yesu kondre anya te oko, nda zi anya te ṛe ekye: “Toko mi te dritairo ni adravo miro ri.” 13 Nda ’ba drí ndaro te anya lomvo, ago dori anya ozo andivo iro te a’dwi ago räṛu Lu te. 14 Dri’ba zotaeriro a’dote kyilaro tana Yesu ede ŋga te Sabata si, ago nda petate ago atate lidri ri ekye: “U’du orivoya njidrialo se beṛo ämäri losi oyeza, nyìkyi tu iyi si ayani ede ami robe, oko ko Sabata si!” 15 Opi zatadri ndaro te ekye: “Ami miomba’bai! Alo aza amiro ni ndi ’daŋgo ndaro kode doŋgyi ndaro onjine ni lusi drisi ago ugu gwo tesi gyi ozone rigye Sabata si. 16 Yauono noŋwa ono zelevo Abarayama ro se Satani embete vuru ndroa na ’butealo fonjidriena ruguruguro ono; inye’do ṛo ko onjine Sabata si ya?” 17 Tadrioza ndaro ’ba kyila’baazii ndaro te a’done driupiro ànyavoya, ondro lidri ka’dote riyäro tase cini liŋgyiekye nda koyebe ana ta owo. 18 Yesu ejitate ekye: “Miri ’Bädri’ba Lu ro ro laba oso e’di ronye ya? Mojona anya e’di be ya? 19 Anya laba nonye. Mano aza ru keci ce musetada rote ago kyi’di anya te ämvu ndaro ya. Mbate ago a’dote ce ro, ago arii ikyi gwo moyi zo ànyaro te gwoṛii anyaro yasi.” 20 Yesu ejitate to’di ekye: “Mojona Miri ’Bädri’ba Lu ro ro e’di be ya? 21 Anya laba oso nonye. Toko aza ru loŋga te ago ŋga yana gwo koma nätu kyira rosi lakaza ya madale vona cini a’dote loŋga be.” 22 Yesu oyite ’ba’desii yasi ndi ’baŋwà be, ugu lidri emba be ago ugu oyite Yerusalema driro. 23 Ago ’diaza alo eji nda te ekye: “’Desi, inye’do apana te toto lidri fere ayani ya?” Yesu zatadri ànyaro te ekye: 24 “Mìye mbara amiro ociza käläsi kyiraŋwa yasi, tana lidri amba ojona ’da ocine oko uninayi ko ocine. 25 ’Desi zo ro oŋgana ’da kuru ago osena käläsi ’da, ’dooko ondro nyèdrete tesi oko nyètona käläsi o’bi ’da ago nyàtana gwo mìkye: ‘’Desi, mipi käläsi ämäri!’ Nda ozana tadri amiro gwo ekye: ‘Mäni ami ko nyìkyi ni eŋwa!’ 26 ’Dooko mìzana tadri gwo mìkye: ‘Manya ago mämvu ŋga te mi be; nyemba mi te ’ba’desi amaro ya!’ 27 Oko nda ogo atana gwo ekye: ‘Mäni ami ko nyìkyi ni eŋwaro, nyòyi ni maresi ami cini se lidri koziro ono!’ 28 Nyòtotrena ’da ago mìnyana si amiro ’da ondro mìndre Abarayama, Yisika, ago Yakoba ndi nebii cini Miri ’Bädri’ba Lu roya be te, ondro avo ami te tesi owo. 29 Lidri ikyina ’da ni ’buzelesi ago ni aŋgoyasi, ni mä’dudrisi ago ŋgäṛiŋwadrisi, ago orinayi ’da vuru ŋgaonyane Miri ’Bädri’ba Lu ro roya. 30 ’Dooko ànya se yau a’dobe äduro a’dona ’da käti, ago ànya se yau a’dobe käti a’dona ’da äduro.” 31 Tu gi alo ana si azaka Parusii ro ikyite Yesu re ago atate ndäri ekye: “Beṛo miri ofone ni nosi ago oyine vo aza ya, tana Eroda le mi ufune.” 32 Yesu zatadri ànyaro te ekye: “Nyòyi ago nyàta koba ana ri mìkye: ‘Ma ugu demona lofo ago ma ugu ’diede ondro ago ondo, ago u’du nina si oko mandena losi maro ’da.’ 33 Caoko beṛo märi ta maro oyene ondro, ondo, ago drukäsi, ko kado nebi ufune vo aza ya e’be gialo Yerusalema ya. 34 “Yerusalema, Yerusalema! Mifu nebii ni ago mivo lazo’bai se Lu kezobe mire iyi ni kuni si! Perena te moda se male ndi lidri miro otone voaloya oso täu kabe ŋgwai anyaro otona kufui anyaro zele ronye, oko migazo! 35 Ka’do inye e’bena Yekalu miro ’da. Endaro mata miri ono, miri ma ondrene te i’do madale nyatana lutu mikye: ‘Lu käṛu nda se kabe ikyi ävuru Opi roya ana.’ ”
141 Sabata alo aza si, ondro Yesu koyite ŋgaonya onyane zo Parusi ’desi aza alo roya oko, lidri rite nda ondrene kode nda kaoye e’di oyene ya. 2 Ago mano aza ikyite ndare se orivoya adravo lomvo ogaro be. 3 Ago Yesu eji miemba’bai Ota ro ndi Parusii yibe te ekye: “Inye’do Ota voro ndi ŋgye ’di edene Sabata si kode ko ya?” 4 Oko ànya zayi tadri taeji ndaro kote. Ndi Yesu ru mano ana te, ede nda te ago ’ba nda oyite. 5 Ago Yesu atate Parusii ndi miemba’bai Ota robe ri ekye: “Aba alo aza amiro ŋgwa agoro na kode ’daŋgo na ko’degwo koro ya Sabata si, inye’do mìnina ko anya ewene Sabata si ya?” 6 Oko ànya niyi kote tadri tase ono ro ozane ndäri. 7 Ondro Yesu kondre rukä ŋgwazii rote vo oriro kadopara onjivoya oko, nda pe lapidri ono te ànya cini ri ekye: 8 “Ondro ka’do ’diaza kuzi mi te karama lagye roya oko, miri ko vo parandra ya. Tana azaya ’diaza para ndrani midrisi äzi kpate, 9 ’dooko nda se kuzi ami be ni riti ’do ikyina ’da ago atana gwo miri ekye: ‘Nyozo orivo miro mano ono ri.’ Ago nya’dona gwo driupiro ndi nyoyi mirina gwo vose tipari ’do ya. 10 Ta’dota, ondro äzi mi te oko, nyoyi ago miri vose tipari ya, tana ’dise kuzi mibe ’do kondre mi te oko, nda ikyina ’da mire ago atana gwo miri ekye: ‘Bereazi maro, nyikyi kuru vo kado ono ya.’ Ono ozona taoro miri ŋgwazii azi cini mile. 11 Tana ’dise kabe andivo ndaro eŋgana kuru ologona ’da vuru, ago ’dise kabe andivo ndaro logona vuru eŋgana ’da kuru.” 12 Ago Yesu atate mano se kuzi nda be ana ri ekye: “Ondro ka’do nya lidri uzi ŋgaonya kitudiri ro kode tandrwedri ro onyane oko, mizi ko toto bereazii, kode ädrupii kode ’didiri miro kode ’batiazii miro se ŋgaamba be ’do aya. Tana ànya ogo uzinayi mi kpa ’da ago liti ono yasi, ŋgase miye be ’do ologona vona ndi miri. 13 Ondro nyate karama o’ba oko, mizi lemeri’bai, ànya se ciṛiciṛiro, ka’bo ndi miako’bai be 14 ago äṛuna mi ’da tana ànya ŋga ako vona logone miri. Lu logona vona ’da miri efo tu taŋgye’bai rosi ni avo ya.” 15 Ondro alo aza màno se koribe ŋgaonya Yesu be ana keri ta ono te oko atate ndäri ekye: “Anya se onyana ŋga ’da karama Miri ’Bädri’ba Lu roya ni kado.” 16 Ago Yesu atate ndäri ekye: “Tu alo si mano aza ’ba karama ’desi te se nda läzi lidri amba te. 17 Ondro tu karama oyero kesate oko, nda zo ruindu’ba ndaro te ta itine ŋgwazii ndaro ri ekye: ‘Nyìkyi, ŋga cini te nja.’ 18 Oko ànya cini etoyi atate kala ogasi azivoazivo. Se käti ana atate ruindu’ba ri ekye: ‘Magye lowo te ago beṛo märi oyine ondrene. Molo’baru miri, miletadri taeji maro ro.’ 19 Ago aza atate ekye: ‘Magye ’daŋgo nji akpa akparo te yau, ago ma ukyi ànya ojone. Molo’baru miri, miletadri taeji maro ro.’ 20 Ago aza ata ro ekye: ‘Magye toko te yau, ta’doro mänina ko ukyine.’ 21 Ago ruindu’ba ana egote kovole ago iti tase cini ono tana te ’desi ndaro ri. Ago ’desi a’dote kyilaro ago atate ruindu’ba ndaro ri ekye: ‘Nyoyi tesi ndrindri litii ’desi ndi litii giṛiŋwa ’bakici robe yasi, ago nyezi lemeri’bai, ciṛiciṛi’bai, miako’bai ndi ka’boi be.’ 22 Ndri oko, ruindu’ba ekye: ‘’Desi ota miro ayete, oko vo drigba dri orivoya.’ 23 Ago ’desi atate ruindu’ba ri ekye: ‘Nyoyi tesi litii ’desi ndi litii giṛiŋwa ’baŋwà ro yasi, ago mi’ba lidri kikyi, tana zo maro ka’do robe twi. 24 Mata ämiri ono, alo aza lidri se äläzi be kai ro unina ko ŋgaonya maro karama ro tembene.’ ” 25 Tu alo aza si, ondro lowa tomoyo kate ugu oyi Yesu be oko, nda za mite ago atate ànyari ekye: 26 “Nda se kabe ikyi mare, unina ko a’done taeri’ba maro, e’be gialo nda luna ma ndra ni nda kulu täpi ndaro ndi endre ndaro be, ago toko ndi ŋgwai ndaro be, ago ädrupii ndaro ndi endreŋwà ndaro be ndi andivo ndaro be drisi. 27 Nda se kuŋgyi taka andivo ndaro ro kote ago keso kote mavo, unina ko a’done taeri’ba maro. 28 “Ondro alo aza amiro ka tavo ora zowiṛa ro obene, käti ono nda ka ori vuru oti lagyena ro unine ondreza kode nda gindi parata be amba losi na ondeza. 29 Ondro nda koye kote inye, nda unina ko obe zowiṛa ro ondene, zevona o’ba vosi ago ’dise cini kabe ondrena ugunayi nda ndi ekye: 30 ‘Mano ono eto zo obete, oko ni kote losina ondene.’ 31 “Ondro ka’do ’bädri’ba aza ka oyi tesi lidri kutu ’butealo (10,000) be kyila oyene ’bädri’ba aza se kikyi nda dri lidri kutu ’buteritu (20,000) be, nda kaoye orine käti vuru tavo orane kode nda gindi mbara be kyila oyene ’bädri’ba kinjo ana be. 32 Ondro mbara ndaro kojo kote, nda ozona lazo’bai ’da ’bädri’ba ana re taejine ta taliatokpe rota, ’dooko nda drigba lozo.” 33 Ago Yesu atate ekye: “Kpa oso inye, alo aza amiro unina ko a’done taeri’ba maro e’be gialo nda e’bena ŋgase cini nda be sina ono lutu. 34 “Täyi orivoya kado, oko ondro ka’do täyi kije oci iro te, ago a’bana anya ocine to’di eŋwanye ya? 35 A’do kote kado gyini ri ca tamo ri, ago adate cowa ayani. Dia, nyèri ondro ka’do nyà’do gi bi be owo.”
151 Tu alo aza si, ondro parata koto’bai ndi otapere’bai be kotoyi kala te Yesu lomvo ta ndaro erine oko, 2 Parusii ndi miemba’bai Ota robe etoyi driovi te ekye: “Mano ono ka otapere’bai uru ago ka ŋgaonya onya ànya yibe.” 3 Ago Yesu iti lapidriopi ono te ànyari ekye: 4 “Aba alo amiro aza ka’dogwo timele be kama alo, ndi alona aza kuje gwo, inye’do nda oyena e’di ya? Nda e’bena azaka se ’butenjidriesu fonjidriesu kabe ŋgaonya lowo ya ana gwo ago oyina gwo se kujebe ana uṛine madale nda usuna gwo. 5 Ago ondro nda kusu anya te oko, nda a’dote yai’dwesi nda ŋgyi anya te kufudri ndaro ya, 6 ago oyigwo ’bäru. Ago nda zi bereazii ago oriazii ndaro gwo voaloya ago atagwo ànyari ekye: ‘Miye riyä mabe, tana musu timele se maro kujebe ana te.’ 7 Kpa oso inye, mata ämiri ono, riyä a’dona amba vo’buyakuru ya takozi’ba alodi se ketadri te ta ndrani taŋgye’bai se ’butenjidriesu fonjidriesu si ko drietane ono drisi. 8 “Kode aba ondro ka’do toko aza ka’dogwo parata mo’di ro kaciro be ’butealo, ago alona aza kuje gwo, inye’do nda oyena e’di ya? Nda eyine lamba gwo ago oyona ya zo ro gwo ago ugu vo uṛite liyaro vo cini yasi madale nda usu anya lutu. 9 Ago ondro anya kusu anya te oko, anya zi bereazii ndi oriazii anyaro be te voaloya ago atate ekye: ‘Ma te yai’dwesi, tana musu parata kaciro maro se ’debe di ono te, mì’de màye riyä.’ 10 Kpa oso inye, mata ämiri ono, malaikai Lu ro kai riyä oye takozi’ba alodi se ketadrite ta.” 11 Ago Yesu ugu atate ekye: “Mano aza orivoya ŋgwà àgoro be ritu. 12 Ŋgwa se täduŋwa ro ana atate täpi ri ekye: ‘Täpi, nyozo lakaza se ka oyebe a’done märi drimbi ro teri.’ Ta’dota, mano ana lewe lakaza ndaro gwo ŋgwà àgoro ritu ndaro ri. 13 Ago u’du fere vosi oko, ŋgwa täduŋwa ana otokala ŋgase cini nda be sina ana rote voaloya, ago oyite ’bädri lozo ya, ago lau nda enji ŋgase cini nda be sina te ori kozi si. 14 Ago ondro nda kenji ŋga ndaro te cini oko, mä’bu ’desi ’dete ’bädri ana ya, ago nda te teinye ŋga aza ako. 15 Ta’dota, nda oyite losi oyene alo aza lidri ’bädri ana ro ri se zo nda te ämvu ndaro ya vo kizwe ndaro ro ondrene. 16 Aba nda le gi koso kyiri se kizwe kabe onyana ana onyane, oko cu ’diaza ozo ŋga aza kote ndäri onyane. 17 Äduro oko, nda usutate ŋgye ago atate ekye: ‘Ruindu’bai se ka losi oye täpi maro ri päläti dri orivoya ŋgaonya be amba, oko ma begi odra noŋwa ni täbiri risi ono. 18 Maŋgana ago moyina täpi maro re, ago matana ndäri makye: “Täpi, maye takozi te Lu lomvo ago kpa milomvo. 19 Mojo kote tona ma uzine ŋgwa miro, mi’ba ma a’done oso ruindu’ba alo miro se kabe losi oye päläti dri ’do ronye.” ’ 20 Ta’dota, nda ŋgate ago egote täpi ndaro re. “Ago ondro nda drigba lozo ni ’ba lomvosi oko, täpi ndaro ndre nda te ago yana a’dogwo twi tusu be ndi nda mute ago ovo ŋgwa ndaro te ago njunju nda te. 21 Ndi ŋgwa atate täpi ri ekye: ‘Täpi, maye takozi te Lu lomvo ago kpa milomvo, mojo kote tona ma uzine ŋgwa miro.’ 22 Oko täpi atate ruindu’bai ndaro ri ekye: ‘Nyèzi boŋgo se kadopara ’do ndri ndri ago miso nda lomvo, mìso mäŋgusi dri ŋgwa ndaro ya, ago mìso mvoka pa ndaro ya. 23 ’Dooko nyòyi nyèzi ti joroŋwa oshweekye ago mìfu ago mì’de màye riyä karama oyesi. 24 Tana ŋgwa maro ono drate, oko yauono adrite, nda jete oko yauono usu ndana te.’ Ndi ànya eto karama oyete. 25 “Ŋgwa kayoŋwa iro lowo ya, ondro nda kikyite ti zo lomvo oko, nda eri kporo loŋgo oŋgoro ndi läri otobe rote. 26 Ta’dota, nda zi alo aza ruindu’bai rote, ago eji anya te ekye: ‘Ta e’di ro kani a’do ya?’ 27 Ago ruindu’ba zatadrite ekye: ‘Ädrupi miro egote, ago täpi miro fu ti joroŋwa oshweekye te, tana nda egote kovole londroro ago kadoro.’ 28 “Ädrupi kayoŋwa a’dote kyilaro ago gatezo ocine zo ya. Ago täpi ndaro itwete tesi ago lo’barute ndäri ecine. 29 Oko nda zatadri täpi ndaro rote ekye: ‘Mindre, ndroa gi cini kwoi si maye losi te miri oso iyeäṛi ronye ago ondoalo maro ota miro te. Caoko, nyozo indriŋwa aza kote märi karama oyeza bereazii maro be. 30 Ondro ŋgwa miro se kenji ŋga miro be kpeye ronyi’bai dri ono kesate ’bäru oko, mifu ti joroŋwa oshweekye te ndäri.’ 31 Ago täpi atate ndäri ekye: ‘Ŋgwa maro, ondoalo mi orivoya mabe noŋwa, ago ŋga cini gi ma sina ono orivoya miro. 32 Oko mà karama oye ago mà a’do yai’dwesi si ono, tana ädrupi miro ono drate oko yauono nda adrite, nda jete, oko yauono usu nda te.’ ”
161 Ago Yesu atate taeri’bai ndaro ri ekye: “Ŋgaamba’ba aza orivoya se ikicu voondre’ba lakaza ndaro rote ta parata ’desi ndaro ro enjiro. 2 Ndi nda zi voondre’ba lakaza ro ana gwo ago eji nda gwo ekye: ‘Ta gi mabe erina ta miro ta ono ta e’di roya? Nyegyi ta losi se cini miyebe lakaza maro si ono, tana minina kote a’done voondre’ba lakaza maro ro tona.’ 3 Ago voondre’ba lakaza ro ana atate andivo ndaro ri ekye: ‘Mayena e’di ya, ’desi maro kate oye ma onjine ni losi maro yasi. Ma orivoya mbara ako amba ŋga osone, ago ma orivoya driupiro drí lämine. 4 Mäni tase malebe oyene ono te, tana ondro ka’do ana ma teni losi maro ono yasi oko, ma’dona ’da bereazii yibe ma urune zo ànyaro ya.’ 5 Ta’dota, nda zi lidri se cini yuŋgu ’desi ndaro robe ana te ba alo alo. Ago nda eji se käti ana te ekye: ‘Mi parata ’desi maro robe moda ya?’ 6 Ago anya zatadrite ekye: ‘Malaŋgyi ido ro kutu ritu (2,000).’ Ago voondre’ba lakaza ro atate ànyari ekye: ‘Miru waraga yuŋguro ono ago miri vuru ndrindri ago nyegyi kigye toto kutu alo (1,000).’ 7 Ago nda go eji aza kpate ekye: ‘Mi parata ’desi maro robe moda ya?’ Ago anya zatadrite ekye: ‘Lu’di inya ro kutu alo (1,000).’ Ago voondre’ba lakaza ro atate anyari ekye: ‘Miru waraga yuŋgu ro ono ago nyegyi kigye toto kama njidriena (800).’ 8 Ta’dota, ’desi räṛu voondre’ba lakaza ro anyaro se ta’diriako ana te, tana nda ye losi te tauni si, tana lidri ’bädri ono ro orivoya tauni be taoye anyaro roya ni lidri ŋgaeyi ro ri.” 9 Ago Yesu ugu atate ekye: “Mata ämiri ono, mì’be bereazii andivo amiro ri ŋgadriamba ’bädri rosi tana ondro ŋgadriamba ’do kokyete oko, äru ami robe ’ba äduako ya. 10 Nda se orivoya ’diriro ta giṛiŋwa ya, a’dona kpa ’diriro ta ’desi ya. Nda se ta’diri ako ta giṛiŋwa ya a’dona kpa ta’diri ako ta ’desi ya. 11 Ondro ka’do nya’do kote ’diri ŋgadriamba ’bädri ono ro vona ondrevoya, a’di ozona ŋgadriamba se taŋgyero ono ni ämiri ya? 12 Ago ondro ka’do nya’do be ko ’diri lakaza ’diaza robe, a’di ozona lakaza andivo miro ro ni miri ya? 13 Ruindu’ba aza unina ko ruindune ’desii ritu ri, ya ndaro osona ’da alona lomvo ago luna azana ’da, nda a’dona ’da trwe alona aza ri ago mawona azana ’da. Mìnina ko ruindune Lu ri ago kpa parata ri.” 14 Ago ondro Parusii keriyi tase cini ono te oko, ànya guyi Yesu te, tana ànya lu parata tawi. 15 Ago Yesu atate ànyari ekye: “Nyà ni andivo amiro o’bane landrene ŋgye mi lidri roya, oko Lu ni ya amiro te. Tana ŋgase lidri koti tana be a’done ta ’desi ro orivoya ŋga awi yi Lu mile. 16 “Ota Musa ro ndi taegyi nebii robe a’dote losi oyevoya madale tu Yoane Bapatisi’ba rosi. Ṛoni tu ana si, lazo kado ta Miri ’Bädri’ba Lu ro ro iti tana te, ago ’dicini ka ruutri ocine kigye mbara si. 17 Orivoya rritiako vo’buyakuru ndi ’bädri be ri lävune ni ta tipari giṛiŋwa Ota ro urune tesi ri. 18 “Mano se ka toko ndaro onjina ago kabe toko aza ogye ’do yetate toko drisi ago mano se ka toko se onjite ogyena ’do ye ta kpate toko drisi. 19 “Mano ŋgaamba’ba aza orivoya se ka boŋgo lagye amba be oso ago ka alo ŋgaonya toco onya aya tu cini si. 20 Ago lau mano ŋgaako’ba aza orivoya se ävuruna Lazara, ondoalo a nda ezi käläsi ŋgaamba’ba ana ro kala, lomvo ndaro orivoya kpeye laza ro. 21 Nda ka mio’ba ’boloto ŋgaonya ro se kabe e’de ni tara’biza ŋgaamba’ba ro drisi ’do onyane. Ago ca kokye yi kayi ikyi ago kayi mi laza ndaro ro elena. 22 “Tu esagwo, ndi ŋgaako’ba se ana drate ago malaikai ŋgyiyi nda te orine gbo Abarayama roya. Mano ŋgaamba’ba dra kpagwo ago ase nda te 23 ago nda te rueza ’desi ya ’bädri avo roya, oko nda ndrevote kuru ago ndre Abarayama te lozo, Lazara orivoya gbo ndaro ya. 24 Ago nda zi läzite ekye: ‘Täpi Abarayama, mi’ba ya miro kuni malomvo, ago nyezo Lazara ko’be driŋgwa ndaro ro gyi ya ago ki’dwe ladra maro robe, tana ma te orivoya rueza ’desi ya asi ono ya.’ 25 “Oko Abarayama zatadrite ekye: ‘Ŋgwa maro, miyi ta tu ori miro roya nyusu ŋga kado cini te ago Lazara usute cini ŋga kozi ayani. Oko yauono nda te riyä ro noŋwa, ago mi miro te rueza ya. 26 Ago ta aza kpa ni no, ’bu ociekye orivoya lakole amaro ami yibe ya, tana ànya se kolebe ozane ni noŋwa amire ’do unina ko ozane, ca ’diaza se lau ’do unina ko ezane amare noŋwa.’ 27 Ago mano ŋgaamba’ba zatadrite ekye: ‘Molo’baru miri täpi Abarayama, mizo Lazara zo täpi maro roya, 28 tana ma orivoya ädrupii be nji, mi’ba nda kemba mi ànyaro ukyi ànya ikyi ’da vo gi rueza ro ono ya.’ 29 “Oko Abarayama zatadrite ekye: ‘Musa ndi nebii yibe orivoya mi ädrupii miro ro embane, mi’ba ädrupii miro keriyi tase ànya kabe atana ’do.’ 30 Ago ŋgaamba’ba zatadrite ekye: ‘Ta ’do ojo ko täpi Abarayama, oko ondro ka’do aba ’diaza kefogwo ni avo yasi, ago koyigwo ànyare, ’dooko ànya etanayi drî ndi ni takozi ànyaro yasi.’ 31 Oko Abarayama atate ndäri ekye: ‘Ondro ka’do ànya keriyi Musa ndi nebii yibe kote, ànya unina yi kpa ko drietane ondro ka’do ’diaza kefo ca ni avo yasi owo.’ ”
171 Yesu atate taeri’bai ndaro ri ekye: “Ŋgase kabe lidri o’ba takozi oyene ono ka ṛo endaro a’do, oko aba orivoya rritiro nda se kabe ànya o’ba a’done ’do ri. 2 Aba a’dona kadopara ndäri ondro ka’do embe kuni ’desi inya uyiro gwo kyembe ndaro ya ago avo nda gwo gyi’desi ya, ni ndäri alo aza se giṛiŋwà kwoi ro o’bane takozi oyene. 3 Ka’do inye mi’ba mi amiro komba kado tase nyàbe oyena ya. “Ondro ka’do ädrupi miro koye takozi te, nyuluku nda, ago ondro nda ketadrite, nye’be nda ta takozi ndaro rota. 4 Ago ondro nda koye takozi te milomvo perena njidrieri tu alo ya, ago ondro ka’do nda kegote mire kpa perena njidrieri ago katate ekye: ‘Metadrite,’ beṛo miri nda e’bene.” 5 Ago lazo’bai atate Opi ri ekye: “Mi’ba taoma amaro a’done para ndra.” 6 Ago Opi zatadrite ekye: “Ondro nya’dogo taoma be tigiṛiŋwa oso keci ce Musetada ro ronye, mìnina ndi atane ce ŋgo’ba ro ono ri mikye: ‘Nyeŋgye andivo miro cu paji be ago nyikyi’di andivo miro gyi’desi ya,’ ago anya orona ami ndi. 7 “Aba ondro ka’do alo aza amiro ka’dogwo ruindu’ba be se ka ämvu oso kode vo timele ro ondre, ago ondro ka’do nda kegote ni ämvu yasi oko, inye’do nyatana ndi ndäri oyine ndri ndri ŋgaonya ndaro onya ya? 8 Inye’do nda ata ko ekye: ‘Nyede andivo miro nja ago nyede ŋgaonya maro tandrwedri ro nja ago nyinduru märi madale manya ŋgaonya ago mämvu ŋga lutu, ’do vosi oko minyana ŋgaonya miro ’da.’ 9 Inye’do nda ye aro’boya ndi ruindu’ba ri tana nda ye tase ata nda be oyene ana te ya? 10 Ami kpa oso inye, ondro mìye ŋgase cini ata ami be oyene te, nyàta mìkye: ‘Ama amaro toto ruindu’ba yi, màye amaro ono toto kama amaro yi.’ ” 11 Ago ondro Yesu kate oyi Yerusalema ya oko, nda oyite kishwe lakole Samaria ro ndi Galilaya be ro yasi. 12 Ago ondro nda kate oci ’baŋwa aza ya oko, mànoago ’butealo se adravo koziro kyini robe ana ’bedrite nda be. Ànya edreyite ga pere 13 ago ànya ayoyidrite ekye: “Yesu! Miemba’ba! Nya’do yauni be ämäri.” 14 Ago ondro Yesu kondre ànya te oko, atate ànyari ekye: “Nyòyi, ago mì’ba kohanii kena ami.” Ondro mànoago se ’butealo ana kate oyi oko, ede ànya te wäṛi. 15 Ago ondro alo ànyaro kondrete ede anya te oko, nda egote kovole Lu räṛu be otre amba si. 16 Ago nda ’degwo militi si vuru Yesu pa, ago ye aro’boya gwo ndäri. Mano ana Samaria’ba yi. 17 Ago Yesu atate ekye: “Mànoago orivoya ’butealo se ede be, oko se njidriesu ana gaŋwaro ya? 18 Tana e’di mano atra ono egogwo toto ni kovole aro’boya oyene Lu ri ni ya?” 19 Ago Yesu atate ndäri ekye: “Miŋga kuru ago nyoyi, taoma miro ede mi te kado.” 20 Ago Parusii azaka ejiyi Yesu te ekye: “Miri ’Bädri’ba Lu ro kaoye ikyine itu ya?” Ago Yesu zatadrite ekye: “Miri ’Bädri’ba Lu ro unina ko ikyine oso ŋgase abe ondrena ondre ronye. 21 ’Diaza unina ko atane ekye: ‘Mindre begi ono,’ kode ‘begi ana’ tana Miri ’Bädri’ba Lu ro orivoya ya amiro ya.” 22 Ago Yesu atate taeri’bai ri ekye: “Tu esana ’da se mìlena ’da tu alo aza Ŋgwa Lidri ro ro ondrene, oko mìnina ko ondrene. 23 Ago ’di azaka atana ’da ämiri ekye: ‘Mindre vo lau’ kode ‘Mindrevo noŋwa.’ Oko aba nyoyi ko tesi ugu anya uṛine. 24 Tana tu Ŋgwa Lidri ro ro a’dona ’da oso sionyi ’bu ro kabe leko andria vokuru ya ago kabe eyina ’do ronye, ni lama telesi alo yasi le azana ya. 25 Oko käti beṛo ndäri ruezane amba ago lidri tu ono ro ogana nda ’da zo. 26 Ago oso ka’do be tu Noa rosi ronye, a’dona kpa oso inye tu Ŋgwa Lidri ro rosi. 27 Lidri cini ugu gialo ŋgaonya, ago ŋga umvu ago mànoago ndi ’ditoko be ugu lagye logye te, madale tu se Noa kocibe toŋbo ya ana si, ago gyitändri ikyite ago tufu ànya cini te. 28 Ta ono a’dona kpa oso ka’do be tu Loto rosi ronye. Lidri cini ri gialo ŋgaonya onyane, ŋgaumvu, ŋgaogyene, ŋgalogyene, ŋgakyi’dine ago zo omone. 29 Oko tu gi Loto kefobe tesi ni Sodomo yasi si, asi ndi bäruti be ’dite ni vo’buyakuru ya ago tufu ànya cini te. 30 Kaoye a’done kpa oso inye tuse aka’da Ŋgwa Lidri rote si. 31 “Tu ana si mano se orivoya zo dri beṛo ko ndäri efone ago ocine zo ya lakaza ndaro urune, kpa oso inye, mano se ämvu ya beṛo ko ndäri egone kovole zo ya. 32 Mìyi ta toko Loto ro ro. 33 Nda se kabe ruutri adri modo ndaro ro opane, ijena ’da, oko nda se kabe adri ndaro ijena opana ’da. 34 Mata ämiri ono, ŋgäkyi ana si lidri ritu a’dona ’da u’duvoya para alo dri, äruna alona ’da ago e’bena azana ’da. 35 ’Ditoko ritu a’dona ’da inya uyivoya voaloya, äruna alona ’da ago e’bena azana gwo.” 37 Taeri’bai eji Yesu te ekye: “Ta ono kaoye a’done eŋwaro ya Opi?” Nda zatadri ànyaro te ekye: “Vose avo orivoya kigye koyii otona kala ’da kigye.”
181 Ago Yesu atate taeri’bai ndaro ri lapidriopi si, ànya embaza tana ànya kämätuyi robe ondoalo ago ko vo ozone. 2 Nda atate ekye: “Vureope’ba aza orivoya ’ba’desi aza ya se turi Lu ko, ca ti ta lidri ro kpa ko. 3 Ago ’ba’desi gialo ana ya ävuzi aza orivoya se ondoalo ka ikyi vureope’ba ana re ago ka rulo’ba ta taŋgye ànyaro ta ndäri ekye: ‘Nyaka’da taŋgye märi kyila’baazii maro lomvo.’ 4 Tuna te amba vureope’ba se ana gatezo ta aza oyene. Oko äduro oko nda atate andivo ndaro ri ekye: ‘Muturi Lu ca ko ago mati ta lidri ro ca ko oko, 5 tana ävuzi ono kate ma okwa, beṛo märi ondrene anjioko anya usu taŋgye te!’ ” 6 Ago Opi ugu atate ekye: “Nyèri tase vureope’ba taŋgyeako ono kata be ono. 7 Inye’do Lu unina ko taŋgye oyene lidri onjionji ndaro ri, se kabe liyi ndäri kitu ago ŋgäkyi ono ya? Inye’do nda leyena ndi ni ànya opavoya ya? 8 Mata ämiri ono, nda ondrena ndi anjioko anya usu taŋgye te, ago ṛo ndri ndri. Inye’do Ŋgwa Lidri ro usuna taoma ndi ’bädri ya ondro nda kikyite owo ya?” 9 Ago Yesu iti lapidriopi ono kpate lidri se komayi ta be ekye iyi takado’bai yi ago kayi azii mawo ono ri. 10 “Tu alo aza si oko màno ritu azaka oyite yekalu ya mätune, alo aza Parusi yi ago alo aza parata koto’ba yi. 11 Ago Parusi ana edrete iṛe ago mätute ekye: ‘Lu maye aro’boya miri tana ma ko oso lidri azii ronye yagäru be ta’diriako, taoye’baro toko kode ago drisi, ago kpa ko oso parata koto’ba ono ronye. 12 Ma akpa perena ritu u’du njidrieri alo ya, ago ma telesi alo ’bute ŋgase cini mabe usuna ro ozona miri.’ 13 Oko parata koto’ba edrete pere ago ni kote ca mi ndaro eŋgane vo’buyakuru ya, oko ’bi kätäti ndaro te tana nda tusuro ago atate ekye: ‘Lu nya’do yauni be mase takozi’ba ono ri.’ ” 14 Ago Yesu atate ekye: “Parata koto’ba ono oyite ’bäru ago aka’da nda te orivoya ŋgye Lu mile ni Parusi ana ri, tana nda se kabe andivo ndaro eŋgana kuru ologona ’da vuru, ago nda se kabe andivo ndaro logona vuru eŋgana ’da kuru.” 15 Ago lidri azaka eziyi ŋgwà giṛiŋwa ànyaro te Yesu re nda ko’ba drí ndaro robe ànya dri. Ago ondro taeri’bai kondreyi tase ono te oko, ànya koziyi lidri kai te. 16 Oko Yesu zi ŋgàga giṛiŋwa te ndare ago atate ekye: “Mì’ba ŋgàga giṛiŋwa ikyine mare, ago nyàlaga ànya ko zo, tana Miri ’Bädri’ba Lu ro ro ni se oso nonye kwoi ro. 17 Endaro mata ämiri ono, nda se aza kuru Miri ’Bädri’ba Lu ro ro kote oso ŋgwa giṛiŋwa ronye, ndäri ocine kigye i’do alona.” 18 Ago dri’ba aza alo Yudai ro eji Yesu te ekye: “Miemba’ba kado, mayena e’di ma’do robe adri äduako be ya?” 19 Yesu eji nda te ekye: “Nya ma uzi kado etaya? ’Diaza i’do kado e’be gialo Lu ayani. 20 Mini ota te se ekye: ‘Miye ta ko ago kode toko drisi, mifu läfu ko, nyukugu ŋga ko, nyikicu ’diaza ko kowe si, miro täpi miro ndi endre miro be.’ ” 21 Ago mano ana zatadrite ekye: “Ṛo kyeno agoanji maro si, ota se cini kwoi maro te.” 22 Ago ondro Yesu keri tase ono te oko, nda atate ndäri ekye: “Ŋga alo aza e’be drigba miri oyene. Migye ŋgase cini nya’dobe sina ono tesi ago nyozo parata na ati’bai ri, ago nya’dona ’da ŋgadriamba be vo’buyakuru ya; ’dooko nyikyi ago miso mavo.” 23 Oko ondro mano ana keri ta ono te oko nda a’dote tusuro, tana nda orivoya ŋgaamba be. 24 Ondro Yesu kondrete nda te tusuro oko, nda atate ekye: “Orivoya rritiro lidri ŋgaamba be ri ocine Miri ’Bädri’ba Lu roya. 25 Orivoya rritiako gamele ri ocine mi libira ro yasi ni mano ŋgaamba’ba ri ocine Miri ’Bädri’ba Lu roya.” 26 Lidri se keriyi ta ono be ono atayite ekye: “Ka’do inye apana a’di aya ya?” 27 Oko Yesu zatadrite ekye: “Ŋgase orivoya rritiro lidri ri orivoya rritiako Lu ri.” 28 Ago Petero atate ekye: “Mindre, mè’be ’ba amaro te ago màsote mivo.” 29 Ago Yesu atate ànyari ekye: “Endaro mata ämiri ono, ’diaza se kabe ’ba e’be kode toko, kode ädrupii, kode uti’bai, kode ŋgwà ta Miri ’Bädri’ba Lu ro rota, 30 usuna ŋga amba ndra tu gi yauono ya, ago tuse kabe ikyi ana ya ànya usuna adri äduako ’da.” 31 Ago Yesu ru taeri’bai ’butealo foritu te ga pere, ago atate ànyari ekye: “Nyèri, mà te ugu oyi Yerusalema ya, ago tase cini nebii kegyibe ta Ŋgwa Lidri ro rota a’dona ’da ŋgye. 32 Ozona nda ’da Atrai rigye, se ugunayi nda ’da, o’danayi nda ’da, ago ovonayi to ’da nda lomvo. 33 Ànya o’binayi nda ’da ago ufunayi nda ’da, oko u’du nina si oko nda efona ’da kpa to’di.” 34 Oko taeri’bai niyi tase ono tana kote. Tana ada’do takaci ta ono rote ni ànya risi, ago ànya niyi tase Yesu kugu tana ata kwoi kote. 35 Ago ondro Yesu kesate ti Yeriko lomvo oko, mano miako’ba aza orivoya lau rite liti biṛi ya ka ugu drí lämi. 36 Ago ondro nda keri kporo lowa tomoyo rote lävuvoya oko, nda ejitate ekye: “’Do e’di yi ya?” 37 Ago ànya atate ndäri ekye: “Yesu Nazareta ro kani ugu lävu.” 38 Ago nda trete ekye: “Yesu, Ŋgwa Dawidi ro, nya’do yauni be märi.” 39 Oko lidri se mile ndaro ya ana ’bidri ndaro te ago atate ndäri a’done titiro. Oko nda go tre ro ndra ekye: “Ŋgwa Dawidi ro, nya’do yauni be märi.” 40 Ago Yesu edrete ago ozotate mano miako ana ezine ndare. Ago ondro nda kikyite ti oko, Yesu eji nda te ekye: 41 “Mile märi e’di oyene miri ya?” Ndi nda zatadrite ekye: “’Desi, male voondrene kpa to’di.” 42 Ago Yesu atate ndäri ekye: “Dia mindre vo! Taoma miro ede mi te kado.” 43 Ago dori mi ndaro ndre vote ago nda sote Yesu vo, ugu aro’boya ozobe Lu ri. Ago ondro lidri cini kondrete oko, ànya räṛuyi Lu te.
191 Ago Yesu oyite Yeriko ya ago kate ugu lävu kigyesi. 2 Ago mano aza orivoya lau ävuruna Zakayo nda parata koto’ba ’desi yi, ago orivoya ŋgaamba be. 3 Nda ojote ya cini si Yesu ondrene kode nda a’di owo, oko nda mano nyagoraŋwa yi, ago ni kote Yesu ondrene ni lowa ri. 4 Ta’dota, nda mute driya ago tute ce kyi’du ro dri Yesu ondrene, se kaoye lävune liti ana yasi. 5 Ago ondro Yesu kesate vose ana ya oko, nda ndre vote kuru ago atate ekye: “Zakayo, nyefo vuru ndrindri, tana kitu ondro ono si beṛo märi orine zo miro ya.” 6 Ago Zakayo efote vuru ndrindri, ndi ru Yesu te riyä amba si. 7 Ago lidri cini se kondre ta ono be ono eto atate ŋguruŋguru ekye: “Mano ono oyite ŋgwazi ro ’ba takozi’ba roya.” 8 Ago Zakayo edrete kuru ago atate Opi ri ekye: “Mindre Opi, mozona telesi lakaza maro ro ati’bai ri, ago ondro ka’do moco ’diaza te ŋga aza ro, mologona vona perena su.” 9 Ago Yesu atate ndäri ekye: “Kitu ondro ono si ono ŋgaopa ikyite zo ono ya, tana mano ono kpani zelevo Abarayama ro yasi. 10 Tana Ŋgwa Lidri ro ikyite ’dise kujebe uṛine ago opane.” 11 Ago ondro lidri kadri tase ono erina oko, Yesu ugu atate ago iti lapidriopi ono te ànyari. Nda te lototi Yerusalema lomvo ago lidri koma iro be ekye, Miri ’Bädri’ba Lu ro ro ka oyete esane ndri ro. 12 Ta’dota, nda atate ànyari ekye: “Mano orooro aza oyite ’bädri lozo aza ya nda o’bane ’bädri’ba ro ago ’dovosi ogo egone ’bäru. 13 Oko dri teinye ndäri oyiako, nda zi ruindu’bai ’butealo ndaro te ago ozo parata kaciro logo läguläguro te ànya cini ri ba alo alo ago atate ànyari ekye: ‘Nyòyi nyìliti ŋga parata ono si madale mego lutu.’ 14 Oko lidri ’bädri ndaro ro yana osoro nda lomvo ago ta’dota ànya zoyi lazo’bai te nda vo atane ekye: ‘Màle mano ono ko a’done ’bädri’ba amaro.’ 15 “Caoko, a’ba mano ana te ’bädri’ba ro ago nda egote. Ago nda zo lazo te ruindu’bai se nda kozo parata be ànyari ana vo, tana nda kuni drinju’du se ànya kusube ŋga logye si ana robe. 16 Ruindu’ba käti ikyite ago atate ekye: ‘’Desi parata logo läguläguro alodi se nyozobe märi ono liti parata logo läguläguro te ’butealo.’ 17 Ago nda atate ndäri ekye: ‘Miyete kado, mi orivoya ruindu’ba kado yi. Tana nya’do te ’diri ŋga giṛiŋwa ya, ta ’do ro, nya’dona te drikaca be ’bakici ’butealo dri.’ 18 Ago ruindu’ba ṛiri ikyite, ago atate ekye: ‘’Desi parata logo läguläguro miro liti parata nji aza kpate.’ 19 Ago ’desi atate ndäri ekye: ‘Nya’dona te drikaca be ’bakici nji dri.’ 20 “Ago ruindu’ba aza ikyi kpate ago atate ekye: ‘’Desi parata miro logo läguläguro begi ono, mada’dote lozo joṛo kuru boŋgo ya. 21 Tana ma orivoya turiro ni miri, mi orivoya mano rritibe yi, ago nya ŋgase ko miro uruna, ago ŋgase nyikyi’di kote ni nya olona.’ 22 Ago nda atate ruindu’ba ana ri ekye: ‘Mi ruindu’ba kozi ono, mapena vure miro ata kala miro ro modona si. Minite ma mano rritibe yi, ago ma ŋgase ko maro uruna, ago ŋgase mikyi’di kote ni olona, 23 oko tana e’di mi’de ko parata maro o’ba lutwe ya niya? Tana aba megote oko musu robe drinju’du be.’ 24 “Ago mano ana atate lidri se kedrebe lau ana ri ekye: ‘Miru parata logo läguläguro ’do ni nda rigye, ago nyòzo ruindu’ba se sina ’butealo ana ri.’ 25 Oko ànya atate ekye: ‘’Desi nda te nja parata be ’butealo.’ Ndi nda zatadrite ekye, 26 ‘Mata ämiri ono ’dicini se ŋga be, ozona ’da ànyari ndra, oko ’dise ŋga ako, ca se nda ka’dobe sina giṛiŋwa ’do äruna ’da ni nda rigyesi. 27 Oko ta kyila’baazii maro rota, se koleyi be ko märi a’done ’bädri’ba ànyaro ’do, nyèzi ànya noŋwa ago mìfu ànya ma kandra.’ ” 28 Ago ondro Yesu kata ta ono te oko, nda oyite Yerusalema ya ànya mile. 29 Ago ondro nda kesate loto ti Betefage ndi Betaniya be lomvo, lutu se äzibe ’Bereŋwa Ice Ido ro ro pa oko, nda zo taeri’bai ritu te mileya, ago atate ànyari ekye: 30 “Nyòyi ta ŋgaembaro kwoi be ’baŋwa mile amiro ya ana ya, ago ondro nyate oci kigye oko, nyusuna doŋgyi to’diŋwa aza ayite vuru se ’diaza lämu ko dri sina alona. Mìtri anya ago nyèzi noŋwa. 31 Ago ondro ’diaza keji ami te ekye: ‘Nyà anya otri tana e’di ya,’ nyàta ndäri mikye, Opi le anya ni.” 32 Ago ànya se azo be ana, oyiyite ago usuyi anya gi oso Yesu kata tana be ànyari ronye. 33 Ago ondro ànya kate doŋgyi to’diŋwa ana otri oko, kuzupinai atate ànyari ekye: “Nyà doŋgyi to’diŋwa ’do otri etaya?” 34 Ago ànya zatadrite ekye: “Opi le anya ni.” 35 Ndi ànya eziyi doŋgyi to’diŋwa ana te Yesu ri, ago ’beyi boŋgo ànyaro te driigye ago ’bayi Yesu te driigye. 36 Ago Yesu kate ugu umu sina oko, lidri ’be boŋgo ànyaro te liti drisi. 37 Ago ondro Yesu kesate ti Yerusalema lomvo vose liti na koyibe vurulero ’Bereŋwa Ice Ido ro ro pa oko, lowa tomoyo oso’bai nda vo ro etoyi riyä ndi räṛu be oyete Lu ri otre amba si ta tase cini ’desi ro ànya kondrebe ana ta, 38 ata be ekye: “Lu käṛu ’Bädri’ba se kabe ikyi ävuru Opi roya ono! Taliatokpe ka’do vo’buyakuru ya ago ’desi ka’do Lu ri.” 39 Ago rukä Parusii ro se lowa lako ana atayite Yesu ri ekye: “Miemba’ba, mita taeri’bai miro odrine ti.” 40 Oko Yesu zatadrite ekye: “Mata ämiri ono, ondro ka’do ànya kodrite titiro, ’dooko kunii etona totrete ni.” 41 Ago ondro Yesu kishwete loto ti ’bakici lomvo ago ondro nda kondrete oko, nda liyite ta ta, 42 ekye: “Aba minina gi toto ondro tase kezina taliatokpe ndri miri. Oko yauono ada’dote ni mi miro yasi. 43 Tana tu kaoye esane, se kyila’baazii miro o’bena aga ’da gbikyi milomvo si ago umunayi drî miro ’da ŋgulu ago lagana yi ofovo miro zo cuku cini yasi. 44 Ànya tufunayi mi ’da ndi lidri se tiṛi obe obe miro ya ’do be, anya unina ko kuni giṛiŋwa aza e’bene vo ànyaro ya, tana mini tuse Lu kikyi be mi opane ono ko.” 45 Ago Yesu oyi cite Yekalu ya ndi eto lidri se ka ŋgalogye lau kai onjana te tesi 46 ago atate ànyari ekye: “Egyi ṛote Taegyi ya, Lu atate ekye: ‘Yekalu maro a’dona ’da zo mätu ro,’ oko nyotozate kugyi ŋgatopa’bai ro.” 47 Tu cini si, Yesu emba ŋgate Yekalu ya. Ago kohanii ’desi, miemba’bai Ota ro ndi dri’bai lidri robe etoyi tavo uṛite nda ufune. 48 Oko ànya usuyi liti aza kote oyezana, tana lidri cini rite ’du ta ndaro erine, ago leyi kote ata giṛiŋwa aza ri lävune.
201 Tu alo aza si, ondro Yesu kate lidri emba ago lazo alokado ope Yekalu ya oko, kohanii ’desi, miemba’bai Ota ro ndi ’di’desii be ikyite 2 ago atate ndäri ekye: “Nyiti ta ämäri, nya ŋga kwoi oyena drikaca eŋwani siya? A’di ozo drikaca ono ni miri ya?” 3 Ago Yesu zatadrite ekye: “Mì’ba meji ami kadri taeji ono si ago nyìti ta märi 4 inye’do drikaca Yoane ro bapatisi oyero ikyi ni eŋwaro, ikyi ni Lu resi kode ni lidri resi ya?” 5 Ago ànya etoyi kaladiṛite iyivoya ekye: “Màtana eŋwanye ya? Ondro ka’do màtate màkye: ‘Ni Lu resi’ nda atana ṛo ekye: ‘Ka’do inye mìma ta Yoane ro kote etaya?’ 6 Oko ondro ka’do mata gwo makye: ‘Ni lidri resi,’ lowa cini gi noŋwa ono ovona ama ndi kuni si, tana ànya mayi tate anjioko Yoane orivoya nebi yi.” 7 Ndi ànya zatadrite ekye: “Mäni vose kikyi ni kigye ko.” 8 Ago Yesu atate ànyari ekye: “Ka’do inye, ca drikaca se mabe ŋga kwoi oyena sina ono, mänina kpa ko tana itine ämiri.” 9 Ago Yesu eto lapidriopi ono itina te lidri ri ekye: “Tu alo aza si mano aza kyi’di kono te ämvu ya ago ozo ämvu kono rote losioye’bai ri vona ondrene, ago e’be ’ba te ago oyite vo aza ya tuna amba. 10 Ondro tu doŋgo topi ro kesate oko, nda zo ruindu’ba aza te losioye’bai re telesi ŋga jalia ro se ndäri ana ta ni ànya rigyesi. Oko losioye’bai ’biyi ruindu’ba ana te, ago zoyi nda te kovole teinye ŋga aza ako. 11 Ndi nda go zo ruindu’ba aza kpate, oko losioye’bai ’biyi nda kpate, yeyi nda te koziro ago ’bayi driupi te nda dri ago zoyi nda te kovole teinye ŋga aza ako. 12 Ago nda zo ruindu’ba nina kpate, se losioye’bai gate äträ laza be ago voyi anya te tesi. 13 Ago kuzupi ämvu kono ro atate ekye: ‘Mayena e’di ya? Mazona te ŋgwa maro se mulu tawi ono kode azaya ànya orona nda ’da.’ 14 Oko ondro losioye’bai kondre nda te oko, ànya atayite iyivoya ekye: ‘Ono ni ŋgwa kuzupi ämvu kono ro ro owo, mì’de mä̀fu nda, tana drimbi ndaro a’dona te amaro.’ 15 Ago ànya voyi nda te tesi ni ämvu kono ro yasi ago fuyi nda te.” Ago Yesu ejitate ekye: “Ka’do inye, kuzupi ämvu kono ro ro oyena e’di losioye’bai kai ri ya? 16 Nda ikyina ’da ago tufuna lidri kai ’da ago ozona ämvu kono ro ’da losioye’bai azaka ri.” Ago ondro lidri keri ta ’do te oko, ànya ekye: “Lu ko’ba tase ono ka’do ko.” 17 Ago Yesu ndrevote ànya dri ago ejitate ekye: “Ka’do inye takaci taegyi ono ro e’di ya? ‘Kuni se zoobe’bai kogayibezo ekye koziro ana, go a’dote kadopara ndrani vona cini drisi.’ 18 ’Dicini se kabe o’de kuni ana dri utufuna ’da jinyijinyi, ago ondro kuni ana ke’dete ’diaza dri, onjina anya ’da durufu ro.” 19 Miemba’bai Ota ro ndi kohanii ’desi yibe ojote Yesu urune tu ana si, tana ànya niyite Yesu pi lapidriopi ana ànya lomvo, oko ànya a’doyite turiro ni lidri ri. 20 Ta’dota, ànya ṛiyi liti aza te. Ànya gye mi lidri azaka rote se tozayi iyite a’done oso lidri kado ronye, ago ànya zo ànya te Yesu ojone taeji si, tana ko’ba ànya robe nda ozone drikaca ’Bädri’ba Roma’ba ro rigye. 21 Ago lidri se azo be kayi atate Yesu ri ekye: “Miemba’ba, mä̀nite anjioko ta gi nyabe atana ago embana orivoya ŋgye. Mä̀nite nya ko ’desi lidri ro tana usuna ayani oko ole Lu ro taŋgyena emba lidri ri. 22 Nyiti ta ämäri, inye’do ota letadri gindi ämäri parata driutwero ozone ’Bädri’ba Roma’bai ro ri kode ko ya.” 23 Oko Yesu ndre ŋgaodo ànyaro te ago atate ànyari ekye: 24 “Nyaka’da mo’di kaci märi.” Ago nda eji ànya te ekye: “Beti ndi ävuru kwoi be a’di roya?” Ànya zayitadrite ekye: “’Bädri’ba ro.” 25 Ta’dota Yesu atate ànyari ekye: “Ka’do inye nyòzo ŋgase ’Bädri’ba ro gi ’Bädri’ba ri ago nyòzo ŋgase Lu ro gi Lu ri.” 26 Ago ànya niyi kote nda urune tase nda kabe atana si lau mile lidri roya, ta’dota ànya a’dote titiro ago laroyite amba tadrioza ndaro ta. 27 Rukä Sadukei se kayi be ata ekye lidri ri efone ni avo yasi i’do kai ro ikyiyite Yesu re ago atayite ekye: 28 “Miemba’ba, Musa egyi ota ono te ämäri ekye: ‘Ondro ka’do mano aza kodrate ago ke’be toko te teinye ŋgàga ako, anjioko beṛo ädrupi mano ’do ro ri ocine ävuzi ri tana ànya kutiyi ŋgàga robe, se ka’do robe ŋgwai ro mano se kodrabe ana ri.’ 29 Tu alo aza si, ädrupii njidrieri azaka orivoya, se kayoŋwa gye lagye te ago drate teinye ŋgàga ako, 30 ago ädrupi ṛiri cite toko ana ri 31 ago ädrupi nina ru ànya kpagwo. Tase alo ono a’dote inye vona se cini njidrieri ana ri, ànya cini todrate teinye ŋgàga ako. 32 Äduro oko toko se ana dra kpagwo. 33 Ka’do inye tu eforo avo rosi lidriidriro, anya a’dona toko ro a’di riya? Tana ànya se cini njidrieri ana ciyite anya ri.” 34 Ago Yesu zatadri ànyaro te ekye: “Mànoago ndi ’ditoko tu ono robe kai iyi ogye, 35 oko mànoago ndi ’ditoko se ’diri kaoye efone ni avo ya tu ana si, ago kaoye orine tu ka ikyi ’do ya uninayi ko iyi ogyene. 36 Ànya a’donayi ’da oso malaikai ronye ago uninayi kote odrane. Ànya te orivoya ŋgwà Lu ro tana ànya efote ni avo yasi. 37 Ago Musa ka’da te ŋbelero anjioko avo ka efo efo adri ya. Taegyi se ta uje ce kumvuŋwa rota ’do, nda zi Opi te ‘Lu Abarayama ro, Lu Yisika ro ago Lu Yakoba ro.’ 38 Nda ni Lu ’dise lidriidriro ro ko avo ro, tana ndäri ’dicini orivoya lidriidri ro.” 39 Ago rukä miemba’bai Ota ro zatadrite ekye: “Miemba’ba, nyatate kado.” 40 ’Do vosi, ànya go eji nda kote tona. 41 Ago Yesu eji ànya te ekye: “Lidri ka ata ekye Mesiya a’dona ’da ni zelevoi Dawidi ro yasi ono eŋwanye ya? 42 Tana Dawidi andivona atate Buku Räṛu roya ekye: ‘Opi atate Opi maro ri ekye: Miri noŋwa drígwo maro ya 43 madale ma’bana kyila’baazii miro lutu kotopa pa otoro ro pa miro zele.’ 44 Dawidi zi Mesiya te ‘Opi’, ka’do inye Mesiya a’dona zelevo Dawidi ro eŋwanye ya?” 45 Ago ondro lidri cini kate ta Yesu ro eri oko, nda atate taeri’bai ri ekye: 46 “Mi’ba mi amiro komba kado ni miemba’bai Ota ro ri, se leyi alo ugu abane gbikyi boŋgo runduṛuro ànyaro be, ago ànya luyi alo lidri ri mede oyene ànyari taoro si vo ŋga logyero yasi, se kayi vo oriro se kado zotaeriro yasi onji ndi vo oriro kadopara se karama yasi be. 47 Ànya kayi ni ŋga kandrakado ävuzii ro ro uruna ago kayi ’bai ànyaro topana ni, ago kayi iyi ka’da mätu gyoroŋgolo ro oye si. Taezaro ànyaro a’dona ni kozipara ndra.”
211 Yesu ndrevote ŋgulu ago nda ndre lidri ŋgadriamba be te ŋgapäṛi ànyaro ovovoya vo ŋgapäṛi ro Yekalu roya, 2 ago nda ndre ävuzi ati’ba aza kpate parata kaciro ritu giṛiŋwa ro ovovoya. 3 Ndi nda atate ànyari ekye: “Endaro mata ämiri ono, anjioko ävuzi gi ati’ba ro ono vo ŋga ni amba ndra azii cini ri 4 tana azii kayibe ovona, etayi ŋgadriamba ànyaro azakana kpa, oko anya ca orivoya ati’ba ro oko, ozo se anya kaoye be ŋgaonyane sina ana ro cini.” 5 Ago taeri’bai azaka Yesu ro kayi ta obe Yekalu ro se kuni liŋgyiekye si ana tana ata, ndi ŋgapäṛi se adibe Lu ri ana be. Yesu atate ànyari ekye: 6 “Ŋga gi cini nyà be ondrena kwoi, tu esena ’da se änina ko kuni alo aza e’bene vona ya, vona cini eperena ’da vuru.” 7 Ago taeri’bai ejiyitate ekye: “Miemba’ba, tase cini ono kaoye a’done itu ya? Ago ta e’di a’dona ni ka’daza anjioko tu esate rigye a’doza ya?” 8 Yesu zatadrite ekye: “Mìkwa ŋga, mì’ba ’diaza kodo ami ko. Tana lidri amba ikyina ’da ävuru maro ya, ago anya alo alo atanayi ta ’da ekye: ‘Yi ni Mesiya owo’ ago ‘tu esate.’ Oko mìso ko ànya vo. 9 Nyùturi ko ondro nyèri kporo kyila ro ndi rueza robe te owo tana beṛo ŋga nonye kwoi ri a’done käti oko a’do ko ekye tu äduro esate ti.” 10 Ago Yesu ugu atate ekye: “’Bädri oyena kyila ’da ’bädri azi be, ago tu’dei oyena kyila ’da tu’de azi be. 11 Ägbigbi ’desi a’dona ago vo amba yasi mä’bu ndi adravo be a’dona ’da vo cini yasi ago ŋga beti to ’desi be ikyina ’da ni vokuru ya. 12 Oko teinye dri ŋga kwoi ri a’do ako, äruna ami ’da, ago ezana ami ’da, ago ozona ami ’da ta amiro ojone zotaeriro ya ago avona ami ’da kamba ya, ago ezina ami ’da ’Bädri’bai kandra ndi ’dimiri’bai be ta maro ta. 13 Ono a’dona kandrakado ro ta lazo alokado ro edreza. 14 Ka’do inye, nyède tausu drî amiro ro ṛo nja yau, ko milo’bene kode nyà oye tadri ozane eŋwanye ya? 15 Tana mozona ata ndi tauni be se alo aza kyila’baazii amiro unina ko diṛine kode läpine. 16 Ago uti’bai amiro ozona drí amiro ’da ädrupii amiro be, lidri diri amiro, ndi bereazii amiro be ago azaka amiro äfuna ’da. 17 Ago ya lidri cini ro osona ’da ami lomvo ta maro ta. 18 Oko ca drikyiri alo drî amiro ro ri e’dene vuru i’do alona. 19 Nyèdre ŋgyiri ago mìpana andivo amiro ndi. 20 “Ondro mindre kyila’bai kogota Yerusalema te gbikyi oko, ’dooko minina ’da anjioko oyete anya perene. 21 ’Dooko ànya se orivoya Yuda ya beṛo umune ’bereŋwai dri, ago ànya se ’bakici ya ’do kofo, ago mi’ba ànya se ’baŋwà ya ’do keci ko ’bakici ya. 22 Tana ono orivoya tu ’dieza ro tana tase cini egyibe taegyi ya ka’do robe ŋgye. 23 A’dona ’da rriti ro tu ana si ’ditoko se kovoro ro ndi endrei se ŋgwà na ka drigba ba ondro ri. Tana rueza ’desi a’dona ’da ’bädri ono ya ago taezaro Lu ro a’dona ’da lidri ono dri. 24 Ago utufuna ’di azaka ’da bando si, ago äruna rukäna ’da kamba’bai ro ’bädri cini yasi, ago luako’bai abana yi ’da Yerusalema yasi, madale saa ànyaro okyena ni. 25 “Ago rubä a’dona ’da kitu imba ndi ’bi’bi yibe ya. ’Dooko rueza ’desi a’dona ’da ’bädri ya ago tu’de cini lä’bina ’da ni turi gbulä ndi äruu gyi’desi robe ri. 26 Lidri lo’dena ’da vuru ni turi ri ni ŋgase ka ikyi ’bädri dri ana ri, tana mbara vokuru ro kandaruna ’da. 27 ’Dooko Ŋgwa Lidri ro efona ’da ikyivoya ’dikolo ya mbara be ndi ’desi ndra be. 28 Ondro ŋga kwoi keto a’dote oko, nyèdre kuru ago nyèŋga dri amiro kuru, tana ŋgaopa amiro te ti.” 29 ’Dooko Yesu iti lapidriopi ono te ànyari ekye: “Nyùsu ta kyi’du ro ndi ice azaka be ro. 30 Ondro mìndre kyibi ànyaro kate ugu efo oko, mìnite anjioko duru te ti otine. 31 Kpa oso inye, ondro mìndre ŋga kwoi kate ugu a’do oko, mìnina ndi anjioko Miri ’Bädri’ba Lu ro rote ti. 32 “Mìyi ta ono tana anjioko ŋgase cini kwoi a’dona ’da käti teinye dri lidri se ka ugu ori be yauono ri odraako cini. 33 Vo’buyakuru ndi ’bädri be lävuna ’da oko ata maro ri lävune i’do alona. 34 “Mìmba ämidri, nyòzo andivo amiro ko cu ta karama ro ndi ŋga umvu robe ri ndi milo’be ta ori ’bädri ono ro robe, ukyi Tu ana uruna ami ’da ätruku’du, 35 oso abari ronye. Tana kaoye ikyine ’dise cini ka ori ’bädri ya ono dri. 36 Mìkwa ŋga ago nyä̀mätu tu cini si, tana nyà’do robe mbara be voopane ni ŋgase cini kaoye a’done ana yasi, ago edrene mile Ŋgwa Lidri ro roya.” 37 Ago Yesu ugu ŋgaemba te tu cini si Yekalu ya, ago ŋgäkyi cini si nda ka oyi tesi u’dune lutu se äzibe ’bereŋwa Ice Ido ro ro ana dri. 38 Ago kyenoŋbo cini si, lidri cini ikyite Yekalu ya ta ndaro erine.
221 Ago u’du Karama Ambata Loŋgaako ro esate ti se äzibe Lävu Odra ro ro ono. 2 Ago kohanii ’desi ndi miemba’bai Ota robe uguyi liti uṛite Yesu ufune ndrwiro tana ànya turiro ni lidri ri. 3 ’Dooko Satani cite Yuda se äzibe Isekariota alo aza taeri’bai ’butealo foritu ana roya. 4 Ago Yuda oyi atate kohanii ’desi ndi dri’bai yekalu okwa’ba ro ri ta liti se drí Yesu ro ozoro ànyari rota. 5 Ago ànya a’doyite yai’dwesi ago leyitadrite parata ozone ndäri. 6 Ago Yuda letadrina te ago eto liti se Yesu ozo za sina ànyari ana ro uṛina te teinye lidri ri tana uniako. 7 Ago tu Karama Ambata Loŋga akoro esate, se ni tuse timelegogoi Lävu Odra ro ro ufuza owo. 8 Ago Yesu zo Petero ndi Yoane be te ago atate ànyari ekye: “Nyòyi ago nyède ŋgaonya Lävu Odra ro ro nja onyane ämäri.” 9 Ago ànya eji nda te ekye: “Mile ämäri edene eŋwaro ya?” 10 Ago nda zatadri ànyaro te ekye: “Ondro nyàte oci ’bakici ya oko, mano aza ŋgyi luku’du gyi ro o’bena drî ’da ami yibe. Mìso nda vo le zo se nda kabe oci kigye ’do ya, 11 ago nyàta kuzupi zo ana ro ri mìkye, ‘Miemba’ba ka ata miri ekye, zo ya se ma ndi taeri’bai maro be ri ŋgaonya Karama Lävu Odra ro ro onyane kigye ’do eŋwaro ya?’ 12 Ago nda ka’dana zo ya ’desi se edete nja zo kurusi ya ’do ’da ämiri, se nyèdena ŋga cini ’da nja kigye.” 13 Ànya oyite ago usuyi ŋga cini gi oso Yesu kiti tana be ànyari ronye, ago ànya edeyi ŋgaonya Karama Lävu Odra ro rote. 14 Ago ondro saa kosate oko, Yesu ndi Lazo’bai ndaro be riyite tara’biza lomvo. 15 Ago Yesu atate ànyari ekye: “Male ndi endaro ŋgaonya Karama Lävu Odra ro ro ono onyane ami yibe teinye märi rueza ako, 16 tana mata ämiri ono mänina ko ogo onyane madale a’bana takacina lutu ŋgye inye Miri ’Bädri’ba Lu roya.” 17 ’Dooko Yesu ru kofo te ago ozo aro’boya te Lu ri, nda atate ekye: “Mìru ago mìmvu amivoya si, 18 mata ämiri ono, etoni yau oyigwo mileya, märi ogone vino ono umvune i’do madale Miri ’Bädri’ba Lu ro ikyina lutu.” 19 Ago nda ru ambata te, ago koye aro’boya te Lu ri oko, nda wagwo, ago ozote ànyari, ago atate ekye: “Ono ni lomvo maro, se ozote ami ta owo. Mìye ono rri inye ta maro oyizana.” 20 Ago kpa oso inye, ŋgaonya tandrwedri ro vosi oko, nda ozo kofo gwo ànyari ago atate ekye: “Kofo ono ni tao’ba to’di Lu ro kari maro si, se korobe ami ta ono. 21 “Oko mìndre, nda se ka drí maro ozo be ono orivoya noŋwa ŋgaonyavoya mabe. 22 Ŋgwa Lidri ro odrana ’da oso Lu kora tana be ronye, oko orivoya rritiro nda se kaoye drí na ozo ana ri.” 23 Ago taeri’bai etoyi ta ejite iyivoya si ekye kode ni iyi lakosi a’di kaoye ni ta ono oye ya. 24 Ago kaladiṛi a’dote taeri’bai lako ekye kode ni iyi lakosi a’di ni ’desi para ya. 25 Ago Yesu atate ànyari ekye: “’Bädri’bai luako’bai ro orivoya drikaca be lidri ànyaro dri ago miri’bai kayi iyi uzi, ‘Bereazii lidri ro.’ 26 Oko a’done ämiri oso inye i’do, oko beṛo ’dise ’desi para ami lako ri a’done ’dise giṛiŋwa ronye, ago beṛo dri’ba ri a’done oso ruindu’ba ronye. 27 A’di ni ndra, nda se koribe vuru ŋgaonya, kode nda se kabe ruindu ndäri ana ya? Inye’do ko ni nda se koribe vuru ŋgaonya ana ya? Oko ma orivoya ami lako oso nda se kabe ruindu ronye. 28 “Mirite mabe tu cini taojoro maro si, 29 ago kpa oso Täpi maro kozo drikaca ’dimiri robe märi ronye, mozona drikaca gialo ono kpa ämiri. 30 Ago mìnyana ŋga ago mìmvuna ŋga tara’biza maro dri Miri ’Bädri’ba maro roya, ago mìrina ’da gitii dri vure ’bakalai se ’butealo foritu Yisaraele ro ono opene. 31 “Simona, Simona, mindre dri, Satani usu drikaca te ta ami cini ro ojone, ŋga kado lewene ni ŋga kozi resi, oso ämvuoso’ba kabe inya lewe ni kurumu yasi ronye. 32 Oko mämätu te mi ta Simona, aza taoma miro okye ’da, ago ondro nyegote kovole mare oko, nyozo agoago robe ädrupii miro ri.” 33 Ago Petero atate ekye: “Opi, ma orivoya nja ocine mibe kamba ya ago kpa odrane mibe.” 34 Oko Yesu zatadrite ekye: “Mata miri Petero gogo unina ko opene ŋgäkyi ono si, madale migana kala maro lutu perena nätu.” 35 Ago Yesu atate taeri’bai ndaro ri ekye: “Tuse mazo ami be tesi ana si mazo ami teinye kpäkä ako, gbolo ako ago kpa mvoka ako, oko inye’do nyà’do ndi lemeri ŋga aza robe ya?” Ànya zatadrite ekye: “I’do.” 36 Ago Yesu atate ànyari ekye: “Oko yauono, nda se orivoya kpäkä be kode gbolo be kuru teri. Ago nda se bando ako, kogye boŋgo ndaro tesi ago kogye bando. 37 Mata ämiri ono, tase taegyi kata be ono ka’do robe ŋgye se ekye: ‘Nda la’do kandrakozi taenji’bai rote,’ tana tase egyibe ta maro ta ono a’dote inye.” 38 Oko taeri’bai atate ekye: “Mindre, Opi, bando begi ritu ono.” Oko nda zatadrite ekye: “’Do ojote.” 39 Yesu e’be ’bakici te ago oyite oso nda kabe oyena tu cini si ronye ’bereŋwa Ice Ido ro ro dri, ago taeri’bai oyite tro nda be. 40 Ondro nda kesate vo ana ya oko, atate ànyari ekye: “Nyä̀mätu ukyi mì’de ’da taojoro ya.” 41 Ago Yesu oyite ni ànyare, ga fere, ozona a’dona ndi oso kuni ovo ronye, ago so kaya te vuru ago mätute. 42 “Täpi, ondro aba mile gindi, mina kofo rueza ro ono pere ni maresi. Caoko, ko ole maro, oko mi’ba aye ole miro ayani.” [ 43 Ago malaika Opi ro efote ndare ni vo’buyakuru ya ago ozo agoago te ndäri. 44 Ago lomvo luwu ’desi si, nda mätute, ago kuri ndaro a’dote oso kari ka oti ni gyini dri.] 45 Ago ondro nda koŋgate ni mätu oyevoya oko, nda ikyite taeri’bai re ago usu ànya te u’duvoya ni tusu ri, 46 ago nda atate ànyari ekye: “Tana e’di nya u’du ya? Mìŋga ago nyä̀mätu ukyi mì’de ’da taojoro ya.” 47 Ago ondro Yesu kadri ugu ata oko, lowa tomoyo ikyite, ago mano se äzibe Yuda alo aza taeri’bai ’butealo foritu ro ana ’de ni käti ànyari. Nda ishwete ti Yesu re nda njunjune. 48 Oko Yesu atate ndäri ekye: “Yuda, inye’do nya drí Ŋgwa Lidri ro ro ozona ’di njunju si ya?” 49 Ago ondro taeri’bai se Yesu be ana kondreyi tase kaoye be a’done te oko, ànya ejiyi Yesu te ekye: “Opi, inye ’do màga ’di bando si ya?” 50 Ago alo ànyaro ga bi drígwo yasi ruindu’ba Kohani Fopara rote ätu. 51 Oko Yesu atate ekye: “Ta’do ojote.” Ago nda do bi mano ana rote ago ede nda te. 52 Ago Yesu atate kohanii ’desi ndi dri’bai yekalu okwa’ba robe ndi dri’bai se kikyibe nda uru ana ri ekye: “Nyìkyite bandoi be ndi dofoi be ma urune osoago ma orivoya ota pere’ba yi. 53 Tu cini si ma orivoya ami yibe Yekalu ya, oko mìru ma kote. Oko ono ni saa amiro owo, se mbara vouni ro ka teni vo miri.” 54 Ago ànya ruyi Yesu te ago uguyi nda te zo Kohani Fopara roya. Petero sote kovole lozo si. 55 Ago ondro ede asi te kitoriya goko roya, ago arite vuru oko, Petero kyi rite ànya se kabe asi owi ana lako. 56 Ondro ruindu’ba ŋgutiŋwa ro aza kondre nda rite lau asi owivoya oko, anya ndrevote ŋgye nda dri, ago atate ekye: “Mano ono kpa orivoya Yesu be.” 57 Oko Petero gakala te ekye: “Ŋgutiŋwa ono, mäni nda ko.” 58 Ago saa fere vosi oko, mano aza ndre Petero kpate, ago atate ekye: “Mini alo aza ànyaro owo.” Oko Petero ekye: “Mano ono, ko ma owo.” 59 Ago oso saa alo vosi ronye oko, mano aza sote ndi ago atate mbara si ekye: “Endaro kowe i’do mano ono orivoya Yesu be, tana nda kpa Galilaya’ba yi.” 60 Oko Petero zatadrite ekye: “Mano ono mäni ta gi nyabe ugu atana ’do ko.” Ago ondro nda kadri ugu ata oko, gogo pe dori. 61 Ago Opi za mi te ago ndrevote ŋgye Petero dri. Ago Petero yi tase Opi kata be ndäri ekye: “Dri teinye gogo ri opeako kitu ono si, migana kala maro ’da perena nätu.” 62 Petero fote tesi ndi liyite tu. 63 ’Dooko lidri se kabe Yesu okwa ana guyi nda te ago ’biyi nda te. 64 Ànya embe mi ndaro te ago ejiyi nda te ekye: “Nyäŋgu, a’di ’bi mi ni ya?” 65 Ago ànya ata ta amba azaka te nda lomvo la’da si. 66 Ago ondro vo kiwite oko, ’di’desii, kohanii ’desi ndi miemba’bai Ota robe otoyi kala te ago ezi Yesu te Taäyi’bai kandra. 67 Ago ànya atate ekye: “Nyiti ta ämäri, inye’do mi ni Mesiya owo ya.” Ago Yesu zatadrite ekye: “Miti tana ca ämiri mìnina kpa ko omane, 68 ago meji ami ca, mìnina kpa ko tadrina ozane. 69 Oko etoni yauono Ŋgwa Lidri ro orina ’da drígwo Lu Mbarapara roya.” 70 Ago ànya atate ekye: “Inye’do mi ni Ŋgwa Lu ro owo ya?” Ago nda zatadrite ekye: “Nyàta te ŋgye, mìkye ma ni owo.” 71 Ago ànya atate ekye: “Màle tazevoedre’ba aza kote, andivo amaro mèri tase nda kata be ono te.”
231 Ago gboko cini ŋgate kuru, ago eziyi Yesu te Pilato kandra, 2 ago ànya etoyi nda kicute ekye: “Musu mano ono te drî lidri ro enjivoya, ka ta ata ànyari ko parata driutwero ozone ’Bädri’ba Roma ro ri, ago ka ata ekye yi ni Mesiya ’Bädri’ba owo.” 3 Ago Pilato eji nda te ekye: “Inye’do mini ’Bädri’ba Yudai ro owo ya?” Ago Yesu zatadrite ekye: “Nyata teṛo ŋgye.” 4 Ago Pilato atate kohanii ’desi ri ndi lowa tomoyo ana be ekye: “Musu taenji aza ko mano ono be.” 5 Oko ànya soyite ndi ago atate mbarasi ekye: “Ŋgaemba ndaro si nda ka ya lidri ro eŋgana Yuda cini yasi. Nda etoni Galilaya yasi, ago yauono nda esate le noŋwa.” 6 Ondro Pilato keri ta ono te oko nda ejitate ekye: “Inye’do mano ono Galilaya’ba yi ya?” 7 Ago ondro nda kunite Yesu ni wari se Eroda kabe mirina yasi oko, nda zo nda te Eroda re, se orivoya Yerusalema ya tu ana si. 8 Ondro Eroda kondre Yesu te oko, nda a’dote yai’dwesi, tana nda eri ta Yesu rote kyeno, ago ṛo mio’ba be nda ondrene. Nda mio’ba be Yesu ondrene talaro ro oyevoya. 9 Ta’dota, Eroda eji ta amba teni Yesu si, oko nda zatadrina kote. 10 Ago kohanii ’desi ndi miemba’ba Ota robe efote mileya, ago kicuyi Yesu te mbara. 11 Ago Eroda ndi kyila’bai ndaro be guyi Yesu te, ago yeyi nda te koziro, ago soyi boŋgo liŋgyiekye runduṛuro te nda lomvo, ago logoyi nda te kovole Pilato re. 12 Ago tu ana modona si, Eroda ndi Pilato be a’doyite bereazi ro, oko teinye dri ta ono ri a’doako, ànya orivoya kyila’baazi ro. 13 Ago Pilato zi kohanii ’desi te dri’bai ndi lidri be te voaloya 14 ago atate ànyari ekye: “Nyèzi mano ono te makandra ago nyàtate mìkye nda ka drî lidri ro enjina. Oko yauono mìndre meji nda te ami milesi, ago musu nda kote taenji se cini nyìkicu anya be sina be, 15 ca Eroda usu nda kote taenjibe, tana go logo nda te kovole amare. Ago mìndre, cu mano ono ye ŋga aza kote se nda o’bane odrane. 16 Ta’dota, ma’bana a’bina nda ’da ago onjina nda gwo.” 18 Ago vo lowa ro trete ekye: “Mifu nda. Nyonji Baraba ämäri.” 19 (A’ba Baraba te kamba ya ta ogbo ro ta ’bakici ya, ago kpa ta ’diufu rota.) 20 Ago Pilato le gi ’du Yesu onjine dritai ro ago nda atate kpa to’di ànyari. 21 Oko ànya go tre kpate to’di ekye: “Nyoto nda, nyoto nda.” 22 Ago Pilato ata kpate ànyari pere nina si ekye: “Tase kozi nda koyebe e’di ya? Musu taenji aza kote nda ya se nda o’bane odrane. Ka’do inye, ma’bana a’bina nda ’da ago onjina nda gwo dritai ro.” 23 Oko ànya rite ’du otrene kporo amba si ekye beṛo Yesu otone. Ago äduro otre ànyaro pe ŋgate ṛe. 24 Ago Pilato pe vure Yesu rote oso se ànya keji ta be tana ro ana ronye. 25 Ago nda onji mano se ànya keji ta be tana ro, se avobe kamba ya ta ogbo rota, ago kpa ta ’diufuro ro ana te. Ago nda ozo Yesu te ànya rigye, tase ànya kolebe oyene, ànya koye robe. 26 Ago ondro kyila’bai kai te oyi Yesu be oko, ànya ’beyi drite mano aza be ni Kurene yasi se äzibe Simona ana, ka ikyi ’bakici ya ni ’baŋwa yasi. Ànya ruyi nda te ago ’bayi taka te nda kyembe uŋgyine ago osone Yesu vo. 27 Ago lowa du lidri ro sote nda vo ndi tro ’ditoko se kabe ugu ruṛu o’be ago liyi nda ta ana be. 28 Yesu za mi te ànya dri ago atate ànyari ekye: “Ndiriŋwa Yerusalema ro, nyìliyi ko mata, oko nyìliyi andivo amiro ta ago ŋgàga amiro ta ayani. 29 Tana tu kate eziikyi, se lidri atana ’da ekye: ‘Ànya se kondoro ni kado, se kuti ŋgwà ko’de, ago ’dise ŋgwà kondro ba na ko ’do.’ 30 ’Do ni tuse lidri kaoye atane ’bereŋwa ri ekye: ‘Mi’de ämädri’ ago Lutui ri ekye: ‘Nyada’do ama.’ 31 Tana ondro ŋga oso nonye kwoi ka a’do tu ce lururo si, ’dooko ta e’di ro a’dona teni ondro ka’do ce kowite niya?” 32 Ago màno ago ritu azaka, se ànya riti taenji’bai ana olofo ànya kpate ufune tro Yesu be. 33 Ago ondro ànya kesate vose äzi be “Kowa drî ro” ana ya oko, ànya otoyi Yesu te lau, ndi taenji’ba se ritu kai be, alo drígwo ndaro ya, ago azana gaṛi ndaro ya. 34 Ago Yesu atate ekye: “Täpi nye’be ànya, tana ànya niyi tase ànya kayibe oyena ono ko.” Ago ànya lonyiyi boŋgo ndaro te ànya voya, vodo ovo si. 35 Ago lidri edrete lau voondre, ago dri’bai Yudai ro ’degwo nda ugu ekye: “Nda pa azii te mi’ba nda kopa andivo iro, ondro ka’do nda gi ni Mesiya, se Lu konjibe owo.” 36 Ago kyila’bai guyi nda kpate, ànya ikyite ndare ago ozoyi vino se fere osoro te ndäri, 37 ago atayite ndäri ekye: “Mipa andivo miro ondro ka’do mini ’bädri’ba Yudai ro owo.” 38 Ago kurusi drile ndaro ya egyi ta koyi te ekye: “Ono ni ’Bädri Yudai ro owo.” 39 Ago alo aza taenji’ba ro se otobe lau ana ata te la’da o’da si ndäri ekye: “Inye’do mi ko ni Mesiya owo ya? Mipa andivo miro ndi ama be.” 40 Oko azana ’bidri ndaro te ekye: “Inye’do nyuturi Lu ko ya? Ape vure miro kpate oso ndaro ronye. 41 Oko amaro orivoya ŋgyero tana mùsu ono gi ŋgase màyebe ni taoye amaro si owo, oko mano ono ye ŋga aza ko koziro.” 42 Ago nda atate Yesu ri ekye: “Yesu, miyi ta maro ndi ondro nyikyite ’bädri’ba ro owo.” 43 Ago Yesu zatadrite ekye: “Endaro mata miri ono, kitu ondro ono si nya’dona mabe paradiso ya.” 44 Ago ondro te oso kitudiri ronye oko, ŋgätini tako ’bädri cini te, ago rite inye madale saa njidriesu. 45 Ago kitu eyivo kote ago boŋgo se ayibe Yekalu ya ana yana lesite ritu. 46 Ago Yesu trete otre amba si ekye: “Täpi, mäpäṛi adri maro te drí miro ya.” Ago ondro nda kata ta ono te oko ndi nda dragwo. 47 Ago ondro ’desi kyila’baro kondre tase ka’do be te oko, nda räṛu Lu te ekye: “Endaro mano ono taŋgye’ba yi.” 48 Ago ondro lowa tomoyo se kotokala be lau tase ana ondrene ana kondre tase ka’do be te oko, ànya cini gote ’bäru kätäti o’bi o’biro tusu si. 49 Ago lidri se cini kuni Yesu be ndi tro ’ditoko se kosobe nda vo ni Galilaya ya be edreyite lozo si ta kayi ondrene. 50 Mano aza orivoya ävuruna Yosepa, nda orivoya ni ’ba’desi Yuda ro se äzibe Arimatayo ana yasi. Nda orivoya alo aza gboko Taäyi’bai ro, mano kado ago kpa ’diri yi, 51 se letadri kote tavoora ndi taoye Taäyi’ba robe, nda ka ikyi Miri ’Bädri’ba Lu ro ro kotena. 52 Nda oyite Pilato re ago ejitate avo Yesu rota. 53 Ago nda lofo avo te vuru ago vute boŋgo rendelero ya, ago ’bate ’bu aza se agabe ni kuni se ase ’diaza kätina ro dri ko kigye ana ya. 54 Ago ana ni tu ruedero anjioko Sabata ka oyete etone. 55 Ago ’ditoko se kosobe Yesu vo ṛo ni Galilaya ya ana oyiyite tro Yosepa be, ago ndreyi ’budri Yesu rote ndi lala avo ndaro robe kigye. 56 Ago ànya egoyite ’bäru ago edeyi ŋga tägyi ŋgutruro ndi ido tägyi tagyiri robe te. Ago tu Sabata rosi, ànya lolite oso Ota voro ronye.
241 Ago u’du käti u’du njidrieri rosi, ro vo ri iwivoya oko, ’ditoko oyite ’budri dri ànya ŋgyiyi ŋga ŋgutruro se ànya kedebe ana te. 2 Ànya usuyi ereṛi kuni teni ’budri kala si 3 ’dooko ànya ciyite kigye, oko usuyi avo Opi Yesu ro kote. 4 Ago ànya dri edrevoya lau märäyiro oko, dori lidri ritu boŋgo läguläguro be, edrete ànya re. 5 Ago ni turi ri, ’ditoko kai kändiyite vuru mi ànyaro be gyini dri oko, lidri kai atate ànyari ekye: “Tana e’di nyà ’dise lidriidriro uṛina ni avo lakosi ya? 6 Nda i’do noŋwa, eŋga nda teni avo yasi. Mìyi ta tase nda katabe ämiri tuse nda be dri Galilaya ya ’do se ekye: 7 ‘Beṛo Ŋgwa Lidri ro ozone drí takozi’bai roya, ago otona nda ’da oko u’du nina si oko, nda efona ’da ni avo yasi.’ ” 8 Ago dori ata ndaro se ana tana otote ’ditoko kai dri, 9 egoyi teni ’budri dri, ago itiyi tase cini ono te taeri’bai ’butealo foalo ana ri ndi azakana be. 10 ’Ditoko kai ni Maria Magadalene, Joana ago Maria endre Yakoba ro ndi ’ditoko azaka be, se itiyi ta ono te lazo’bai ri. 11 Oko lazo’bai koma iro be ’ditoko kwoi ka ta amama ata, ago màyi kote ànya ya. 12 Oko Petero ŋgate ago mute ’budri dri. Ondro nda kändi ago kondre vo te oko, nda ndre boŋgo se avo uvuro ’do te iṛe. Ago nda gote ’bäru, larote amba tase ka’do be ana ro. 13 Ago tu gi ana modona si, oso’bai Yesu vo ritu azaka ka oyi ’baŋwa se äzibe Emausi ana ya, orivoya jä’dijä’di ’butealo fonjidriesu ni Yerusalema lomvo, 14 ago ànya ka ugu ata iyivoya ta tase ka’do be ono roya. 15 Ondro ànya ka ugu ata iyivoya inye oko Yesu andivona ishwete ti ago abate ànya be. 16 Ago ànya ndre nda te oko ànya niyi nda kote. 17 Ago Yesu atate ànyari ekye: “Nyà ugu ta e’di ro ata ami voya ugu abavoya inye ya?” Ago ànya edrete ’du mi tusuro be. 18 Alo ànyaro se äzibe Keleopa ana eji nda te ekye: “Inye’do mi toto ni ŋgwazi se Yerusalema ya kuni tase ka’do be u’du ono ya ono ko owo ya?” 19 Ago nda ejitate ekye: “Ta eŋwani ya?” Ànya zatadrite ekye: “Tase ka’do be Yesu Nazareta ro ri ono, nda orivoya nebi yi, taoye ’desi para be ndi ata be Lu mile ago lidri cini mile. 20 Ago kohanii ’desi ndi dri’bai amaro be ozo drí ndaro ni vure ya ufune ago ànya oto nda te. 21 Ago mio’ba amaro ya musu ta be, nda kaoye ni Yisaraele onjine dritai ro. 22 Ago ’ditoko amaro azaka laro ama te amba, ànya oyite voiwivoya, 23 ago usuyi avo ndaro kote, ago ànya egoyite ago atayite ekye yindre rulofo malaika rote, se atate ekye, nda orivoya lidri ro. 24 Ago rukä lidri ro se ama be ana oyi kpate ’budri dri, ago usuyite oso ’ditoko kai kiti tana be ronye, oko ànya ndre nda kote.” 25 Ago Yesu atate ànyari ekye: “Ami orivoya lidri amama ro yi, ya amiro ŋgyite tu omane tase nebii kata be ana ya. 26 Inye’do ṛo ko Mesiya ri ŋga kwoi iŋgyine ago ocine ’desi ndaro ya ya?” 27 Ago Yesu eto ta itite ànyari ta tase taegyi katabe ta ndaro ta, eto ṛoni bukui Musa roya ndi taegyi nebii ro cini be. 28 Ago ondro ànya kesayite loto ’baŋwa se ànya kabe oyi kigye ya oko, Yesu landrete oso nda ka oyi mileya ro, 29 oko ànya lo’barute ndäri ekye: “Miri ama be, tana kitu kate oci ago vo kate uni.” Ta’dota nda cite orine ànya be. 30 Nda rite vuru ŋga onyane ànya be, ru ambata gwo ago ye aro’boya gwo, ago wagwo ago ozogwo ànyari. 31 Ago mi ànyaro pirute, ago ànya ni nda te, oko nda jete ni ànya milesi. 32 Ago ànya atayite iyivoya ekye: “Inye’do a’do ṛo ko ämäri oso asi ka ujeni ya amaro ya saa se nda kabe tazevo taegyiro edre ämäri ana si ya?” 33 Ago ànya ŋgate dori saa ana si, ago goyite Yerusalema ya, ago usuyi taeri’ba ’butealo foalo otokala te tro ndi ’dise ànya yibe ana be, 34 ago atayite ekye: “Opi efote endaro, ago ka’darute Simona ri.” 35 Ago ànya se ritu ono itiyi tase ka’do be liti ya ana te ànyari ndi tase ànya kogo kuni Opi be ambata owa vosi ana. 36 Ago ànya se ritu ono kadri ugu ta ono itina oko, Yesu andivona edrete ànya lako, ago atate ànyari ekye: “Taliatokpe ka’do ami be.” 37 Oko ànya a’dote lä’bilä’biro, ago kpa turituriro amba, ago kusuyi iro be ekye yindre tori yi. 38 Ago nda atate ànyari ekye: “Mì’ba ya amiro ka loŋga etaya, ago nyà a’do wiriwiriro etaya? 39 Mìndre drí maro ndi pa maro be, ago mìndre ono ni andivo maro owo, nyä̀tämbi ma ago mìnina dori, tori orivoya lomvo ako ago kpa kowa ako oso mìndre mabe sina ono ronye.” 40 Ondro nda kata ta ono te oko, nda ka’da drí ndaro ndi pa ndaro be te ànyari. 41 Ago ondro ànya komayi drigba dri ko’de, tana ànya a’dote twi riyä be, ago laroyi kpate oko nda eji ànya te ekye: “Inye’do ami ndi ŋga aza be noŋwa onyane ya?” 42 Ago ànya ozo ti’bi la’dila’diro te ndäri, 43 ago nda nyate mile ànyaro yasi. 44 Ago nda atate ànyari ekye: “Kwoi ni ŋgase mata tana be ämiri owo, tuse ma drigba ami yibe ana si, ŋgase cini egyibe ta maro ta Ota Musa roya, ago kpa taegyi nebii roya ago Räṛu ya, beṛo a’done ŋgye.” 45 Ago nda pi drî ànyaro te Taegyi unine, 46 ago atate ànyari ekye: “Ono ni tase egyibe owo ekye: Beṛo Mesiya ri ruezane ago beṛo ndäri efone ni avo yasi u’du nina si; 47 ago apena ta drietaro ndi ta azii e’bero ta takozi rota ’da tu’dei cini ri ävuru ndaro si, etoni Yerusalema ya. 48 Ami ni tazevoedre’ba ta kwoi ro. 49 Ago andivo maro mezina ŋgase Täpi maro ko’ba tao’baro na be ’da ämidri. Beṛo ämiri orine ’du ’bakici ya madale mbara se ni kurusi ikyina lutu ämidri.” 50 Ago nda lofo ànya te tesi ni ’bakici ya le Betaniya ya, ago nda eŋga drí ndaro te kuru ago äṛu ànya te. 51 Ondro nda kadri ugu ànya äṛu oko, nda oyite ni ànya resi ago äru nda te vo’buyakuru ya. 52 Ago ànya mätuyi nda te ago goyite Yerusalema ya twi riyä ’desi be 53 ago riyite ’du Yekalu ya aro’boya oye Lu ri.