YOANE

YOANE

¹ Teinye dri ’bädri o’baako, Ata ṛo orivoya nja, nda ṛo Lu be, ago nda kpa ṛo Lu yi. ² Ṛoni etovoya Ata ṛo Lu be. ³ Nda si Lu ’ba ŋga cini te, ŋgase cini o’bao’baro a’ba kote nda ako. ⁴ Ata ni etovo adri ro, ago adri ono ezi ŋgaeyi ni ’dicini ri. ⁵ Ŋgaeyi kani voeyi vouni yasi, ago vouni izwe anya kote alona. ⁶ Lu ezo lazo’ba ndaro te, manona äzite Yoane, ⁷ se ikyite ta ŋgaeyi ro itine lidri ri, tana vona cini keriyi lazo robe ago komayi robe. ⁸ Nda andivo ko ni ŋgaeyi yi; nda ikyite ta ŋgaeyi ro itine. ⁹ Ono ni ŋgaeyi endaro yi; ŋgaeyi se kate ikyi ’bädri ya ago eyina vo ṛo ’di cini dri. ¹⁰ Ata ṛo orivoya ’bädri ya, ago Lu ’ba ’bädri gica nda si, caoko ’bädri ni nda kote. ¹¹ Nda ikyite ’bädri modo ndaro roya, oko lidri modo ndaro ro ruyi nda kote. ¹² Oko, ànya se kuruyi nda be ago mayite nda ya, nda ozo drikaca te ànyari a’done ŋgwai Lu ro. ¹³ Ànya a’doyi kote ŋgwai ro Lu ri lomvo si, anjioko äti ànya kote ŋgwai ro täpi a’do lomvo ro voro si, Lu andivo ni Täpi ànyaro owo. ¹⁴ Ata a’dote lidri ro, ago yauni be amba ndi taŋgye be, rite ama lako, mandre ’desi ndaro te, ’desi se nda a’dote sina oso Ŋgwa alodi Täpi ro ronye. ¹⁵ Yoane pe ta ndaro te. Nda trete ṛeṛe ekye: “Ono ni nda se mabe ugu tana atana makye: ‘Nda ka ikyi mavo, oko nda para ndrani märi, tana nda ṛo orivoya teinye ma utiako.’ ” ¹⁶ Yauni amba ndaro si nda äṛu ama cini te, ka ugu äṛu ’do ozo ämäri azivoazivo. ¹⁷ Lu ozo Ota te Musa si, oko yauni ndi taŋgye be ikyite Yesu Kristo si. ¹⁸ ’Di alo aza ndre Lu kote. Toto Ŋgwa se kpa oso Lu ronye ago kabe ori gbo Täpi roya, nda ’ba nda te unine. ¹⁹ Drikaca’bai Yudai ro Yerusalema ya zoyi kohanii azaka ndi Lewe’bai be te Yoane re nda ejine ekye: “Mi a’di owo ya?” ²⁰ Yoane gakotezo tadriozane, oko ata ro ṛeṛe ago ṛo ŋbelero ekye: “Ma ko Mesiya owo.” ²¹ Ànya ejiyitate ekye: “Ka’do inye, mi a’di owo ya? Mi ni Eliya owo ya?” Yoane zatadrite ekye: “Hwa, ma ko owo.” Ànya ejiyitate ekye: “Mi orivoya nebi yi ya?” Nda logotate ekye: “Hwa.” ²² Ànya ejiyitate ekye: “Ka’do inye mi a’di owo ya? Nyiti tana ämäri mòlogo tana robe ànya se kezo ama be ri. Nyatana ta e’di ta andivo miro rota ya?” ²³ Yoane zatadrite ata Yesaya ro mina usisi ekye: “Ma orivoya ata ’dialo aza ro ka ugu otre vocowa ya ekye: ‘Nyede liti ŋgye Opi ri abaza!’ ” ²⁴ Lazo’bai se ezote Parusii si ana, ²⁵ ejiyi Yoane te ekye: “Ondro ka’do mi ko Mesiya kode Eliya kode nebi yi, nya bapatisi oye etaya?” ²⁶ Yoane zatadrite ekye: “Ma ami bapatisi gyi si, oko ’diaza orivoya edrevoya ami lako se mìni kote. ²⁷ Nda ikyivoya mavo, oko ma takado ako ca mvoka ndaro eŋgyene.” ²⁸ Tase cini ono a’dote Betaniya ya ’buzele Golo Yaradene ro se Yoane ka ugu bapatisi oye kigye ana ya. ²⁹ U’du kinja si oko Yoane ndre Yesu te ikyivoya nda re, ago atate ekye: “Mindre! Ana ni timelegogo Lu ro, se kabe takozi ’bädri ro uŋgyi owo! ³⁰ ’Do ni nda se mabe ugu tana atana makye: ‘Mano aza ikyivoya mavo, oko nda para ndrani märi, tana nda ṛo orivoya teinye ma utiako.’ ³¹ Ma andivo mäni nda ko’de, oko mikyite bapatisi oyene gyi si tana a’ba nda robe unine lidri Yisaraele ro ri.” ³² Ago Yoane edretazevo ono te ekye: “Mandre tori ka ikyi vuru laba oso tu’bu ronye ni vo’buyakuru yasi ago ka ori nda dri. ³³ Drigba sedri mäni ko kode ana ’bo gini nda owo, oko Lu, se kezo mabe bapatisi oyene gyi si; atate märi ekye: ‘Mindrena Tori ’da ka ikyi vuru ago ka ori mano aza dri; nda ni se kabe bapatisi oye Tori Alokado si owo.’ ” ³⁴ Yoane atate ekye: “Mandrete, ago mata ämiri ono Nda ni orivoya Ŋgwa Lu ro owo.” ³⁵ U’du kinja si oko Yoane orivoya edrevoya kpa to’di lau taeri’bai ritu ndaro be, ³⁶ ondro nda kondre Yesu te ugu abavoya nasi oko, nda atate ekye: “Mìndre! Ana ni Timelegogo Lu ro!” ³⁷ Taeri’bai ritu keriyi nda te ta ono atavoya oko ànya oyiyite Yesu be. ³⁸ Yesu zamite, ndre ànya te esovoya nda vo, ago ejitate ekye: “Nyà ugu a’di uṛi ya?” Ànya zayitadrite ekye: “Rabi” (se takacina anjioko Miemba’ba) “nya ori eŋwaro ya?” ³⁹ Nda zatadrite ekye: “Nyìkyi ago mìndre.” (’Dooko kitu te orivoya tandrolero oso saa ’butealo ronye.) Ago ànya oyiyite nda be ago ndreyi vose nda koribe kigye ana te, ago riyi kitu anjoko ana te nda be. ⁴⁰ Alo ànyaro ni Andarea, ädrupi Simona Petero ro owo. ⁴¹ Ndriŋwa oko nda usu ädrupi ndaro Simona te ago ititate ndäri ekye: “Mùsu Mesiya te.” (Anjioko ni Kristo.) ⁴² ’Dooko nda ugu Simona te Yesu re. Yesu ndrevote nda dri ago atate ekye: “Ävuru miro ni Simona ŋgwa Yoane ro, oko äzina mi ’da Kepa.” (Anjioko Petero, se takacina ni luutu) ⁴³ U’du kinja si oko Yesu ratate oyine Galilaya ya. Nda usu Filipo te ago atate ndäri ekye: “Mi’de mavo!” ⁴⁴ (Filipo ni Betesaida, ’ba’desi se Andarea ndi Petero be rite kigye ana yasi.) ⁴⁵ Filipo usu Natanaele te ndi ititate ndäri ekye: “Mùsu nda se Musa egyi ta ndaro te buku Ota roya ago se nebii egyi tana kpate ono te. Nda ni Yesu ŋgwa Yosepa ro ni Nazareta yasi.” ⁴⁶ Natanaele ejitate ekye: “Inye’do ŋga kado aza unina gi’da efone ni Nazareta ya ya?” Filipo zatadrite ekye: “Nyikyi ondrene.” ⁴⁷ Ondro Yesu kondre Natanaele te ikyivoya nda re oko, nda atate ta ndaro ta ekye: “Yisaraele ŋgye ni no; ta kowero i’do nda ya!” ⁴⁸ Natanaele eji nda te ekye: “Mini ma eŋwanye ya?” Yesu zatadrite ekye: “Mandre mi te ’dooko mi orivoya ce kyi’du ro zele teinye Filipo ri dri mi uziako.” ⁴⁹ Natanaele zatadrite ekye: “Miemba’ba, mi orivoya Ŋgwa Lu ro! Mi orivoya ’Bädri’ba Yisaraele ro!” ⁵⁰ Yesu atate ekye: “Mi’de be taomane ono toto tase mata be miri mandre mi te ’dooko mi orivoya ce kyi’du ro zele ono ta ya? Mindrena ŋga amba para ndrani ono ri ’da!” ⁵¹ Ago nda atate ànyari ekye: “Ma taŋgye iti ämiri, mìndrena vo’buyakuru ’da uŋbo ago malaikai Lu ro oyivoya kuru ago ikyivoya vuru Ŋgwa Lidri ro dri.”

¹ U’du ritu vosi oko, lagyeogye orivoya ’ba’desi Kana ro se Galilaya ya ya. Endre Yesu ro orivoya lau, ² ago Yesu ndi taeri’bai ndaro be äzi kpate lagye ya. ³ Ondro vino kokyete kyiti oko, endre Yesu ro atate ndäri ekye: “Ànya te teinye vino ako.” ⁴ Yesu logotate ekye: “Endre maro, ’do ta miro kode ta maro ya? Tu maro esa ko drigba.” ⁵ ’Dooko endre Yesu ro ititate ruindu’bai ri ekye: “Tase nda kabe atana ämiri mìye ri.” ⁶ Yudai orivoya ota ’diojaro wäṛiro robe, ago ta tase ono rota luku’du njidrialo gyi ro orivoya lau, alona ka kuru gyi ro uru lakole ’buteritu ro ndi ’butenätu be ya. ⁷ Yesu atate ruindu’bai ri ekye: “Mìso gyi twi twi luku’du kwoi yasi.” Ànya sote twi twi le kalana yasi, ⁸ ago ’dooko nda atate ànyari ekye: “Ka’do inye mìndi gyi ni kigyesi nyùgu dri’ba karama ro ri.” Ànya uguyi gyi te ndäri, ⁹ se yauono tozarute vino ro, ago nda tembete. Nda ni kote vino ono ikyini eŋwaro (oko ruindu’bai, se kondiyi gyi be niyite;) ndi nda zi kodrogo te ¹⁰ ago atate ndäri ekye: “’Dicini ka vino kadopara ozo käti, ago ŋgwazii kufu iyi te sina oko, nda ’degwo se osoako ozone. Oko nyeta vino se kadopara te le yauono!” ¹¹ Yesu ye talaro ro käti te Kana Galilaya roya, nda ka’da mbara ndaro te lau, ago taeri’bai ndaro mate nda ya. ¹² Ono vosi, Yesu, ndi endre ndaro, ndi ädrupii ndaro ndi taeri’bai ndaro be oyiyite Kaperenauma ya ago riyite lau u’duna fere. ¹³ Tu Karama Lävu Odra ro rote ti oko, Yesu oyite Yerusalema ya. ¹⁴ Lau nda usu lidri te, ti, timele ndi amoamoi be logyevoya Yekalu ya, ago parata utwe’bai riyi kpate tara’biza ànyaro lomvosi. ¹⁵ Ago nda ede co’da de’bele iba rote ago nja koronyai ’ba ro cini te tesi ni Yekalu yasi, timele ndi riti ti be, nda tako tara’biza parata utwe’bai rote ago pere parata kaci ànyaro te. ¹⁶ Ago nda atate lidri se kayi amoamoi logye ri ekye: “Nyòlofo ànya tesi ni nosi! Mìnina ko zo Täpi maro ro o’bana vo ŋga ogyero ro!” ¹⁷ Tase taegyi katabe ekye: “Ŋgalu maro zo miro ta, Äye Lu, keleko ma ya oso asi ronye.” Tana otote taeri’bai ndaro dri. ¹⁸ Drikaca’bai Yudai ro egoyite ndare taeji be ekye: “Miyena talaro ro eŋwani ka’daza ämäri mi orivoya drikaca be ta ono oyeza ya?” ¹⁹ Yesu zatadrite ekye: “Nyèpere Yekalu ono riya, ago mago mabena ’da u’du nätu ya.” ²⁰ Ànya ejiyi nda te ekye: “Migo mibena gindi u’du nätu ya ya? Yekalu ono obena ru ndroa ’butesu fonjidrialo!” ²¹ Oko Yekalu se Yesu ka ugu tana atana ono anjioko ta lomvo ndaro ro ayani. ²² Ago ondro adri nda teni avo yasi oko, tase nda katabe ono, go otote taeri’bai ndaro dri, ago ànya mayite taegyi ya ndi tase Yesu katabe ana be. ²³ Ondro Yesu orivoya Yerusalema ya tu Karama Lävu Odra ro rosi oko, amba mate nda ya ànya kondreyi talaro ro se nda koyebe te owo. ²⁴ Oko Yesu yi ta kote ànya ya, tana nda ni ànya cini te. ²⁵ ’Diaza ri ta itine ndäri ta ànyaro ta i’do, tana nda andivo ni tase ya ànyaro ya te.

¹ Dri’ba aza Yudai ro äzite Nikodema, se ni gboko Parusii ro lakosi. ² Ŋgäkyi alo si oko nda oyite Yesu re ago atate ndäri ekye: “Rabi, mä̀ni ndi mi ni orivoya Miemba’ba se Lu ezoni owo. ’Diaza ni ko talaro ro se nya ugu oyena be oyene e’be gialo Lu orivoya nda be.” ³ Yesu zatadrite ekye: “Ma taŋgye iti miri, ’diaza alo unina ko Miri ’Bädri’ba Lu ro ro ondrene e’be gialo ätina nda to’di.” ⁴ Nikodema ejitate ekye: “’Dise mbate änina utine to’di eŋwanye ya? Endaro nda unina ko ocine ya endre roya ogo utine pere ṛiri si.” ⁵ Yesu logotate ekye: “Ma ugu taŋgye iti miri, ’diaza unina ko ocine Miri ’Bädri’ba Lu ro roya e’be gialo äti nda te gyi si ago Tori si. ⁶ ’Dise ätite lomvosi uti’bai lomvo si ro, oko nda se ätite tori si Tori ro. ⁷ Nya’do ko larolaro ro tana mabe ata miri ono ro, ‘Beṛo ami utine to’di.’ ⁸ Oli ka oli vose anya le oline kigye ya; nyeri kporo olina ro ndi, oko mini ko anya kikyi ni eŋwaro kode anya ka ugu oyi eŋwaro. Nda se ätite Tori si laba oso inye.” ⁹ Nikodema ejitate ekye: “Ono unina a’done eŋwanye ya?” ¹⁰ Yesu zatadrite ekye: “Mi orivoya miemba’ba ’desi Yisaraele ro, ago mini ta ono ko ya? ¹¹ Ma ugu taŋgye iti miri; mà tase mä̀nibe ago màndrebe tana itina, caoko aza amiro le ko lazo amaro urune. ¹² Mìma ko ma ya ondro mabe ŋga ’bädri ono ro tana itina ämiri; ka’do inye, mìmana maya eŋwanye, ondro ka’do miti ŋga vo’buyakuru ro tana be ämiri ya? ¹³ ’Diaza alo oyi kote vo’buyakuru ya e’be gialo Ŋgwa Lidri ro, se ikyite vuru ni vo’buyakuru yasi. ¹⁴ “Oso Musa eŋga ini atala robe kuru ce cari ro dri vocowa ya ana ronye, kpa oso inye beṛo Ŋgwa Lidri ro eŋgane kuru, ¹⁵ tana ànya se cini kabe taoma nda ya ka’do robe adri äduako be. ¹⁶ Tana Lu lu ’bädri tawi inye, nda ozo Ŋgwa alodi ndaro te, tana ’dise cini kabe taoma nda ya odra na ko oko ka’do robe adri äduako be. ¹⁷ Tana Lu ezo Ŋgwa ndaro kote ’bädri ya a’done vureope’ba na ro oko a’done opa’ba na ro. ¹⁸ “Nda se kabe taoma Ŋgwa ya apena vure na ko, oko nda se koma ta ko ape vure na ṛote nja, tana nda ma ta kote Ŋgwa alodi Lu roya. ¹⁹ Vureope ka losi oye orivoya nonye; ŋgaeyi ikyite ’bädri ya, oko lidri lu vouni ṛo ndrani ŋgaeyi ri, tana taoye ànyaro orivoya undiro. ²⁰ ’Dise kabe ta undiro oye yana ka oso ŋgaeyi lomvo, ago ikyi ko ŋgaeyi re, tana nda le ko taoye undiro ndaro ka’dane tesi. ²¹ Oko nda se kabe tase ŋgye oye ka ikyi ŋgaeyi re tana ŋgaeyi kaka’da robe anjioko tase nda koyebe orivoya taoro yi Lu ri.” ²² Ono vosi, Yesu ndi taeri’bai ndaro be oyiyite wari Yuda roya. Ago nda ri tu azaka te ànya yibe lau ago ye bapatisi te. ²³ Yoane ugu bapatisi oye kpate Aenona ya, loto Salima lomvo, tana gyi orivoya amba vo ana ya. Lidri ugu oyite ndare, ago nda ugu ànya bapatisi te. ²⁴ (Se ono a’dote käti teinye Yoane o’baako kamba ya.) ²⁵ Rukä taeri’bai Yoane ro ro etoyi kaladiṛite azaka Yudai ro be ta la’bi ’diojo ro wäṛi rota. ²⁶ Ago ànya oyiyite Yoane re ago itiyi tana te ndäri ekye: “Miemba’ba, mano se mibe ’buzele Yaradene roya, mipe tana be ’do miyi tana ndiya? Yauono, nda ka ugu ’di bapatisi, ago ’dicini ka ugu oyi ndare!” ²⁷ Yoane zatadrite ekye: “’Diaza alo unina ko a’done ŋga aza be e’be gialo Lu kani ozona ndäri. ²⁸ Ami andivo ni tazevoedre’ba maro matate makye: ‘Ma ko Mesiya owo, oko ezo ma te nda mile.’ ²⁹ Toko se agyebe ni kodrogo ro, oko bereazi kodrogo ro se kedrebe loto ago kabe taeri orivoya yai’dwesi ondro nda keri ata kodrogo rote owo. Ya modo maro ro i’dwe tawi ta ono ro. ³⁰ Beṛo ndäri a’done parandra oko märi a’done giṛiŋwa pari.” ³¹ Nda se kabe ikyi ni kurusi orivoya para ndrani ’dicini drisi. Nda se orivoya ni ’bädri yasi orivoya ’bädri ro ago ka ta ’bädri ro atana ayani, oko nda se ka ikyi ni vo’buyakuru ya orivoya para ni vona cini ri. ³² Nda ka tase nda kondrebe ago keribe itina, caoko ’diaza alo ru tazevoedre ndaro ko. ³³ Oko nda se kabe tazevoedre ndaro uru ta ono si letadrina ndi anjioko Lu orivoya taŋgye yi. ³⁴ Nda se Lu ezoni ka ata Lu ro opena, tana Lu kani Tori ndaro ozo twi ndäri. ³⁵ Täpi lu Ŋgwa ndaro ago ’ba ŋga cini te mbara ndaro zele. ³⁶ Nda se kabe taoma Ŋgwa ya orivoya adri äduako be, nda se ro Ŋgwa ko a’dona ko adri be, oko taezaro Lu ro orina ’da nda dri.

¹ Parusii eriyi tate Yesu ka ugu lidri amba usu ago ka ugu taeri’bai amba bapatisi ndrani Yoane ri. ² (Caoko, Yesu bapatisi ’diaza alo ko, taeri’bai ndaro ye toto ni.) ³ Ago ondro Yesu keri tase ugu atana be ana tana te oko, nda e’be Yuda te oyite kovole Galilaya ya; ⁴ oyi ndaro lau si anjioko ndäri oyine Samaria yasi. ⁵ Samaria ya nda ikyite ’ba’desi se äzibe Sikara ya, se ko lozo ni lowo se Yakoba kozobe ŋgwa ndaro Yosepa ri resi. ⁶ Koro Yakoba ro orivoya lau, ago Yesu te rritiro ni aba ri, rite vuru koro kala. Te oso kitudiri ronye. ⁷ Toko Samaria ro ikyite gyi ondi, ago Yesu atate anyari ekye: “Nyozo gyi umvu ro märi.” ⁸ (Taeri’bai ndaro oyiyite ’ba’desi ya ŋgaonya ogyene.) ⁹ Toko ana zatadrite ekye: “Mi orivoya Yuda yi, ago ma orivoya Samaria’ba yi; nyejina ta gyi umvuro ni mäsi si eŋwanye ya?” (Yudai ri dugyi kala alo ndi lakaza kala alo se Samaria’bai kabe gyi umvu sina umvune i’do.) ¹⁰ Yesu zatadrite ekye: “Ondro aba mini ŋgase Lu kabe ozona gwo ndi nda se kabe ugu gyi umvu ro eji ni misi ono be, nyejina ṛo nda, ago nda ozona gyi uguadri ozoro miri.” ¹¹ Toko ana atate ekye: “’Desi, mi ŋga gyi ondi ro ako, ago koro cite tu. Nyusuna gyi uguadri ozoro ono ni eŋwaro ya? ¹² Zutu amaro Yakoba ni se ozo koro ono be ämäri, nda ndi ŋgwàagoro ndaro ndi gboko voŋgaro cini ndaro robe mvuyite ni kigye. Minina ko a’done ndrani Yakoba ri, nya’dona ndiya?” ¹³ Yesu zatadrite ekye: “’Dise kabe gyi ono umvu, gyilu ufuna kpa to’di, ¹⁴ oko nda se kabe gyi se mozona ’da ndäri umvu gyilu ufuna ko alona. Gyi se mozona ndäri a’dona nda ya gyi legwalegwaro se ozona gyi uguadri ozoro ndäri ago ozona adri äduako ndäri.” ¹⁵ Toko ana zatadrite ekye: “’Desi, nyozo gyi na ’do märi! ’Dooko gyilu ufuna ma ko to’di alona, mikyina kpa ko noŋwa gyi ondine.” ¹⁶ Yesu atate anyari ekye: “Nyoyi mizi ago miro, ago nyego.” ¹⁷ Anya zatadrite ekye: “Ma ago ako.” Yesu logotate ekye: “Ta miro orivoya ŋgye se nyatabe mikye mi ago ako ono. ¹⁸ ’Diàgo nji gye mi te, ago mano se nyabe ori sina yauono ko ago gya miro, nyitite taŋgye ayani märi.” ¹⁹ Toko ana atate ekye: “’Desi, mandrebe mi orivoya nebi yi. ²⁰ Zutui maro Samaria’bai ro mätuyi Lu te ’bereŋwa ono dri, oko ami Yudai nyà ata mìkye Yerusalema ni vose ämäri Lu mätune kigye owo.” ²¹ Yesu atate anyari ekye: “Toko, mima ma ya, tu esana ’da se lidri mätuna Täpi kpa ko ’bereŋwa ono dri ca Yerusalema ya. ²² Ami Samaria’bai nda se nyàbe mätuna ono mìni ko endaro, oko ama Yudai mä̀ni nda se màbe mätuna te, tana ŋgaopa ka ikyi ni Yudai resi. ²³ Oko tu kate eziikyi ago ṛote nja noŋwa, se mbara Tori Lu ro rosi lidri mätuna Täpi ’da taŋgye si oso nda ka’dobe ronye, ugu mätu ŋgye oyesi ndäri se nda lebe ronye. ²⁴ Lu orivoya Tori yi, ago toto mbara Tori ndaro rosi lidri unina ndi nda mätune taŋgye si oso nda ka’dobe ronye.” ²⁵ Toko ana atate ndäri ekye: “Mäni ndi anjioko Mesiya ikyina ’da, ago ondro kikyite oko, nda itina ta cini ’da ämäri.” ²⁶ Yesu zatadrite ekye: “Ma se ma ugu ata mibe ono, ma ni nda owo.” ²⁷ Ndriŋwa oko taeri’bai Yesu ro egoyite, ago ànya larolaro ro amba nda usuvoya ugu atavoya toko ana be. Oko alo aza ànyaro ata kote anyari ekye: “Mile e’di ya?” Ago ejiyi nda kote ekye: “Nya ugu ata anya be etaya?” ²⁸ ’Dooko toko ana e’be luku’du gyi ro anyaro te oyite kovole ’ba’desi ya, ago atate lidri lau ana ri ekye: ²⁹ “Nyìkyi ago mìndre mano se iti tase cini moloyebe kwoi te. Nda a’dona ko ni Mesiya owo ya?” ³⁰ Ago ànya foyite ni ’ba’desi yasi ago oyiyite Yesu re. ³¹ Tuna gialo ono ya taeri’bai ejiyi Yesu te ekye: “Miemba’ba, minya ŋgaonya!” ³² Oko nda zatadrite ekye: “Ma ŋgaonya be onyane se mìni tana ko.” ³³ Ago taeri’bai etoyi andivo ànyaro ejina te iyivoya ekye: “Inye’do ’diaza ezi ŋgaonya te ndäri ya?” ³⁴ Yesu atate ànyari ekye: “Ŋgaonya maro ni ole nda se kezo mabe ono ro oyene ago losi se nda kozobe märi oyene ono ondene. ³⁵ Nyà ata mìkye: ‘Imba e’be drigba su ago ’dooko jalia esana gwo.’ Oko mata ämiri ono, mìndrevo kadoro ämvui ya; yauono ŋga kate oka ago te nja kotone! ³⁶ ’Dise kabe kala ŋga jalia ro koto a päläti ozo rigye ago ka kala ŋga ro otona tana adri äduako; tana ’dise kabe ŋga kyi’di ago ’dise kabe kotona a’donayi ’da troalo yai’dwesi. ³⁷ Tana ata ono orivoya ŋgye. ‘’Diaza kyi’di ŋga ago ’diaza ka iro kotona.’ ³⁸ Mazo ami te ŋga jalia ro kotone ämvu se mìye losi kote kigye ya. ’Di azaka yeyi losi te lau, ago nyìliti ŋgate ni losi ànyaro yasi.” ³⁹ Amba Samaria’bai ro ’bakici ana ya mayite Yesu ya tana toko ana ititate ekye: “Nda iti tase cini moloyebe te märi.” ⁴⁰ Ago ondro Samaria’bai kikyite ndare oko, ànya ejiyi nda te orine ànya yibe, ago Yesu rite lau u’duna ritu. ⁴¹ Amba mate ta lazo ndaro rota, ⁴² ago ànya atayite toko ana ri ekye: “Yauono màmate ko tase nyatabe ta, oko tana andivo amaro mèri ta ndaro te, ago mä̀nite nda ni endaro Opa’ba ’bädri ro.” ⁴³ U’du ritu lau vosi oko, Yesu e’be vo ana te ago oyite Galilaya ya. ⁴⁴ Tana nda andivo atate ekye: “Aro nebi kote ’bädri modo ndaro roya.” ⁴⁵ Ondro nda kesate Galilaya ya oko, lidri lau ana ruyi nda te yai’dwesi, tana ànya oyiyite Karama Lävu Odra ro roya Yerusalema ya ago ndreyi ŋga cini se nda koyebe tu Karama rosi te. ⁴⁶ ’Dooko Yesu oyite Kana se Galilaya ya ana ya, se nda toza gyi be vino ro kigye ana. Dri’ba miri ro orivoya lau se ŋgwaago na orivoya adravoro rritiro Kaperenauma ya. ⁴⁷ Ondro nda keri tate Yesu ikyite ni Yuda yasi Galilaya ya oko, nda oyite ndare ago eji nda te oyine Kaperenauma ya ŋgwaago ndaro edene, se te ti odrane ana. ⁴⁸ Yesu atate ndäri ekye: “Aba mìndre ta rubä ro ndi talaro ro be ko alo aza amiro ri taomane i’do alona.” ⁴⁹ Dri’ba ana zatadrite ekye: “’Desi, nyikyi mabe teinye ŋgwa maro ri odraako.” ⁵⁰ Yesu atate ndäri ekye: “Nyoyi ŋgwaago miro edena ’da!” Mano ana mate ata Yesu roya ago oyite. ⁵¹ Nda kate oyi ’bäru oko ruindu’bai ndaro ’bedrite nda be liti ya lazo be ekye: “Ŋgaga miro edete!” ⁵² Nda eji ànya te ta saa se ŋgwaago ndaro a’dobe sina kado rota, ago ànya zayitadrite ekye: “Tandrobe kitudiri vosi oko driu’bo e’be nda te.” ⁵³ ’Dooko täpi nite anjioko ’do ṛo ni saa modo se Yesu katabe sina ndäri ekye: “Ŋgwaago miro edena ’da.” Ago nda ndi katidri cini ndaro be mayi ta te. ⁵⁴ Ono ni talaro ro ṛiri se Yesu koyebe ikyi ndaro ni Yuda yasi vosi Galilaya ya owo.

¹ Ono vosi, Yesu oyite Yerusalema ya ta karama mätu ro Yudai rota. ² Loto dereŋwa timele ro Yerusalema ya kala cece aza orivoya ndiṛi nji be. Kala Ebere si äzite Betezata! ³ Lowa lidri adravoro ro amba orivoya u’duvoya ndiṛi yasi; miako’bai, ka’boi, ndi ciṛiciṛi’bai be! ⁵ Mano aza orivoya lau se a’dote adravoro ndroa na te ’butenätu fonjidriena. ⁶ Yesu ndre nda te u’duvoya lau, ago nda nite mano ana a’dote adravoro ndroa na te amba: ndi Yesu eji nda te ekye: “Mile ndi mi edene ya?” ⁷ Mano adravoro zatadrite ekye: “’Desi, ma ’diaza ako noŋwa ma o’bane cece ya ondro akanda gyi te owo; ondro ma ugu oŋga ocine kigye oko, ’diaza tona ŋga ci ṛo käti.” ⁸ Yesu atate ndäri ekye: “Miŋga kuru, miŋgyi para miro, ago nyaba.” ⁹ Ede mano ana te dori, nda ŋgyi para ndaro te, ago eto ugu abate. Tase ono a’dote tu Sabata rosi, ¹⁰ ago drikaca’bai Yudai ro atate mano se edebe ana ri ekye: “Ono orivoya tu Sabata ro yi, ago orivoya taenji yi ota lomvo miri para miro uŋgyine Sabata si.” ¹¹ Nda zatadrite ekye: “Mano se kede mabe atani märi para maro uŋgyine ago abane.” ¹² Ànya ejiyi nda te ekye: “Mano se katabe miri ta ono oyene a’di owo ya?” ¹³ Oko mano se edebe ana ni Yesu ko nda ’bo a’di owo, tana lowa orivoya vose ana ya, ago Yesu anarute ndriŋwa. ¹⁴ Ono vosi, Yesu usu nda te Yekalu ya ago atate ekye: “Nyeri, ede mi te yauono, nye’be takozi oye ukyi ŋgakozi aza a’do ’da miri.” ¹⁵ ’Dooko mano ana oyite ago ititate drikaca’bai Yudai ro ri anjioko Yesu ni ’dise kede nda be owo. ¹⁶ Ago ànya etoyi Yesu eza te, tana nda ye ŋgaede ono te tu Sabata rosi. ¹⁷ Yesu zatadri ànyaro te ekye: “Täpi maro ondoalo ka ugu losi oye, ago beṛo kpa märi losi oyene.” ¹⁸ Ata ono ’ba drikaca’bai Yudai ro ratate nda ufune; ko toto ta ota Sabata ro ufuna rota, oko tana nda atate ekye, Lu ni Täpi yi modo ro, ago ata ono si nda ’ba andivo ndaro te ojoojoro Lu be. ¹⁹ Ago Yesu zatadri ànyaro te ekye: “Ma taŋgye iti ämiri; Ŋgwa ni ko ta aza oyene ta modo ndaro ro ronye; nda ka gialo tase nda ndre Täpi ndaro ka ugu oyena be oyena ayani. Tase Täpi kabe oyena, Ŋgwa ka kpa oyena ayani. ²⁰ Tana Täpi lu Ŋgwa ago ka’da tase cini andivo ndaro kabe oyena te ndäri. Nda ka’dana ŋga azaka parandra ’da ndäri oyene ndrani ono drisi, ago ami cini nyà’dona ’da larolaro ro. ²¹ Kpa oso Täpi kabe avo lofo ago kabe adri ozo ànyari ronye, kpa oso inye Ŋgwa ka adri ozo ànya se nda kolebe ozone ànyari kai ri. ²² Ca Täpi pe vure ’diaza alo ro ko. Nda ozo drikaca ndra te Ŋgwa ndaro ri vure opeza, ²³ ago vona cini oronayi Ŋgwa ’da kpa oso inye ànya kayi Täpi oro. Nda se koro Ŋgwa ko ro Täpi se kezo nda be ono ko. ²⁴ “Ma ugu taŋgye iti ämiri nda se kabe ata maro erina ago ka taoma nda se kezo mabe ono ya ni adri äduako be, vure ndaro opene i’do, oko lävute ṛo nja ni odra yasi le adri ya. ²⁵ Ma ugu taŋgye iti ämiri; tu kate eziikyi tu esa ṛote nja; se avo erina ata Ŋgwa Lu ro ro ’da, ago ànya se kabe erina ocinayi ’da adri ya. ²⁶ Kpa oso inye oso Täpi andivo ni etovo adri ro ro kpa oso inye nda ’ba Ŋgwa te a’done etovo adri ro ro. ²⁷ Ago nda ozotate Ŋgwa ri vure opene, tana nda orivoya Ŋgwa Lidri ro. ²⁸ Nyà’do ko larolaro ro ta ono ta; tu kate eziikyi se avo cini erinayi ata ndaro ’da ²⁹ ago efonayi ’da tesi ni ’budrii ànyaro yasi; ànya se yeyi takado te efonayi ’da ago orinayi ’da, ago ànya se yeyi takozi te efonayi ’da ago apena vurenayi ’da. ³⁰ “Mäni ko ŋga aza oyene drikaca modo maro rosi; ma vureope toto oso Lu kabe itina märi ronye, ago vureope maro orivoya ŋgye, tana mojo kote tase malebe oyene ayani, oko toto tase nda se kezo mabe kolebe ayani. ³¹ “Ondro ka’do ma ta modo maro ro edre tase mabe atana äruna ko oso taŋgye ronye. ³² Oko ’diaza kpa orivoya se ka taedre ma ta, ago mäni ndi tase nda kabe atana ta maro ta orivoya endaro. ³³ Yoane ni ’dise mìzo lazo’bai amiro be ndare owo, ago petate ta taŋgye rota, ³⁴ beṛo ko märi tazevo lidri ro edrene ayani; ma tase ono atana gialo tana apa ami robe. ³⁵ Yoane laba oso lamba se ka ugu lekobe ago ka ugu voeyibe ronye, ago tuna fere nyà’dote olebe ago riyä ro ŋgaeyi ndaro tana ro. ³⁶ Oko ma tazevoedre be ta maro ta se kpa para ndrani tazevoedre se Yoane kedrebe ri; tase mabe oyena ono ni orivoya taoye se Täpi maro kozobe märi oyene owo, tase kwoi atate ta maro ta ago ka’da ndi anjioko Täpi ezo ma ni. ³⁷ Ago Täpi, se kezo ma be, edre ta kpate ma ta, nyèri ata ndaro kote alona ago mìndre militi ndaro ko, ³⁸ ago nyä̀ti lazo ndaro kote ya amiro ya, tana mìma kote nda se nda kezobe ono ya. ³⁹ Nyà Taegyii tenyi; tana nyùsu amiro be nyùsuna adri äduako ni ànya yasi. Ago Taegyii gi kwoi ka ta maro ata! ⁴⁰ Caoko mìle ko ikyine mare a’doza adri be. ⁴¹ “Mako ugu räṛu uṛi ni lidri rigyesi. ⁴² Oko mäni a’do ami lidri rote, ago mänite ami ŋgalu ako Lu ri ya amiro ya. ⁴³ Mikyite drikaca Täpi maro robe oko mìru ma kote, caoko, ondro ’diaza kikyi drikaca modo ndaro robe mìruna nda ndi. ⁴⁴ Mìle räṛu usune ni azi resi, nyòjo kote räṛu usune ni nda se orivoya toto ni Lu yi ono resi, ’dooko, mìnina omane ma ya eŋwanye ya? ⁴⁵ Caoko, mìma ko mìkye, ma ni alo aza se kicuna ami ’da Täpi maro ri owo, Musa se mì’ba mi amiro be driigye, nda ni se kicuna ami ’da owo. ⁴⁶ Ondro mìma ndi endaro Musa ya, nyà’dona ndi taoma be ma ya, tana nda egyitate ta maro ta. ⁴⁷ Oko mìma be kote tase nda kegyibe ya ono, mìnina omane tase mabe atana ono ya eŋwanye ya?”

¹ Ono vosi, Yesu zate Fofo Galilaya ro tasi (kode fofo Taberia ro, kpa oso äzi anya be ronye.) ² Lowa du sote nda vo, tana ànya ndreyi talaro ro ŋgaedero ndaro adravo’bai ri te. ³ Yesu tute kuru lutu dri ago rite vuru taeri’bai ndaro be. ⁴ Tana tu Karama Lävu Odra ro rote lototi. ⁵ Yesu ndrevote gbikyi ago ndre lowa du te ikyivoya ndare, ago nda eji Filipo te ekye: “Mänina ŋgaonya amba ogyene lidri ono ri onyane ni eŋwaro ya?” ⁶ (Nda ata tase ono te ta Filipo ro ojoza; oko nda ni tase nda lebe oyene ṛote nja.) ⁷ Filipo zatadrite ekye: “Ka’dobe ca ’di cini ri urune ferefere, lagyena uruna mo’di kaci ndrani kama ritu (200) drisi ambata amba ogyeza.” ⁸ Alo aza taeri’bai ndaro ro, Andarea, seni ädrupi Simona Petero ro, atate ekye: ⁹ “Ŋgagaŋwa aza orivoya noŋwa duŋguṛu nji ambata kaaza ro robe ago ti’bi ritu be. Oko ṛo endaro ànya unina ko a’done amba lidri cini kwoi ojone.” ¹⁰ Yesu atate ànyari ekye: “Mì’ba lidri kori vuru.” (Käyi amba orivoya lau.) Ago lidri cini rite vuru; mànoago oso kutu nji (5,000) ronye. ¹¹ Yesu ru ambata te, ago ozo aro’boya te Lu ri, ago lanji ànya te lidri se koribe vuru lau kai ri. Nda ye ti’bi kpa inye, ago ànya cini nyate amba oso ànya kolebe ronye. ¹² Ondro ya ànya cini ro kogate oko, nda atate taeri’bai ndaro ri ekye: “Nyòto ’bolotona se ke’bebe ono, mì’de mènji se kotabe giṛiŋwa ono ko.” ¹³ Ago ànya otoyi ànya cini te ago otoyi ’bolotona se ke’bebe ana koṛiga na te ’butealo foritu twitwi ni duŋguṛu ambata kaaza ro ro se lidri konyabe ana yasi. ¹⁴ Talaro ro se Yesu koyebe ana ondrena si oko, lidri se lau ana atayite ekye: “Endaro ono orivoya nebi yi! Se ka oyebe ikyine ’bädri ya owo!” ¹⁵ Yesu nite aba ànya kayi oye ikyine nda urune nda o’bane ’bädri’ba ro mbarasi, ’dooko nda andivo oyite kpa to’di lutui dri iṛe. ¹⁶ Ondro te tandrolero oko, taeri’bai Yesu ro oyiyite fofo kala, ¹⁷ ciyite toŋbo ya, kayite drî fofo ro oza ogone kovole Kaperenauma ya oko vo nite, ago Yesu ikyi drigba ko ànyare. ¹⁸ Ago ’dooko oli gbiriṛi be site ago kanda gyi te. ¹⁹ Ondro taeri’bai keletete jä’dijä’di nätu kode su ronye oko, ànya ndreyi Yesu te abavoya gyi drisi, ikyivoya loto toŋbo re, ago ànya a’dote turituri ro. ²⁰ Yesu atate ànyari ekye: “Nyà’do ko turiro ono ma owo!” ²¹ ’Dooko ànya ruyi nda te toŋbo ya ya cini si, ago dori toŋbo sate gyinidri vose ànya kabe ugu oyi kigye ana ya. ²² Kyenonosi oko lowa se koribe fofo tase ana niyite anjioko toŋbo toto sedri alodi lau. Ànya niyite Yesu ci kote kigye taeri’bai ndaro be, oko taeri’bai ndaro oyiyite iṛe nda ako. ²³ Toŋbo azaka, se ni Tiberia yasi, ikyite kototi vose lowa konya ambata be kigye Opi ri aro’boya oye vosi ana ya. ²⁴ Ondro lowa kondre Yesu kote lau, ca taeri’bai ndaro oko, ànya ciyite toŋbo kai ya ago oyiyite Kaperenauma ya, kayi ugu nda uṛi. ²⁵ Ondro lidri kusu Yesu te fofo tasi nasi oko, ànya atayite ndäri ekye: “Miemba’ba, nyeza noŋwa itube ya?” ²⁶ Yesu zatadrite ekye: “Ma ugu taŋgye iti ämiri; nyà ugu ma uṛi ono tana mìnya ambata te ago nyùsu ŋgase cini mìlebe te, ko tana mìni talaro ro maro tana te. ²⁷ Mìye losi ko ta ŋgaonya se kabe ruenjienji rota, oko mìye losi ŋgaonya se kabe ori madaro ta adri äduako rota ta ayani. Ono ni ŋgaonya se Ŋgwa Lidri ro ozona ’da ämiri owo, tana Lu, Täpi si beti taka’daro ndaro rote nda dri.” ²⁸ Ago ànya ejiyi nda te ekye: “Ka’do inye màyena e’di tase Lu kole ama be oyene ono oyeza ya?” ²⁹ Yesu zatadrite ekye: “Tase Lu kole be ämiri oyene anjioko taomane nda se nda kezobe ya.” ³⁰ Ànya logotate ekye: “Talaro ro se miyena ’da ämäri ondrene ago màma robe miya e’di ya? Miyena e’di ya? ³¹ Zutui amaro nyàyi mana te vocowa ya, kpa oso taegyi kabe ata ronye ekye: ‘Nda ozo ambata te ànyari ni vo’buyakuru yasi onyane.’ ” ³² Yesu atate ekye: “Ma ugu taŋgye iti ämiri. Ŋgase Musa kozobe ämiri ko ambata yi ni vo’buyakuru yasi; Täpi maro kani ambata endaro ozo ämiri ni vo’buyakuru yasi. ³³ Tana ambata se Lu kabe ozona ni nda se kikyibe vuru ni vo’buyakuru yasi ago kani adri ozo ’bädri ri owo.” ³⁴ Ànya ejiyi nda te ekye: “’Desi, nyozo ambata ono ämäri ondoalo.” ³⁵ Yesu ititate ànyari ekye: “Ma orivoya ni ambata adri ro. Nda se kabe ikyi mare a’dona ko täbiri ro alona, nda se kabe taoma ma ya a’dona ko gyilu be alona. ³⁶ Ma ta iti ämiri, yauono mìndre ma te, oko mìgazo taomane, ³⁷ vona se cini Täpi maro kabe ozona märi ikyina ’da mare, ago ’dise kabe ikyi mare märi onjane i’do alona. ³⁸ Tana mikyite vuru ni vo’buyakuru yasi ko ole modo maro ro oyene oko ole nda se kezo mabe ro oyene ayani. ³⁹ Ago ono ni ole nda se kezo mabe ro anjioko märi alo aza ànya se cini nda ozote märi ono ro ijene i’do, oko meŋgana ànya cini ’da kuru adri ya tu äduro si. ⁴⁰ Tana tase Täpi maro kolebe anjioko ni vona se cini kabe Ŋgwa ondre ago kabe taoma nda ya a’dona ndi adri äduako be. Ago meŋgana ànya ’da adri ya tu äduro si.” ⁴¹ Ago lidri eto atate ŋguruŋgururo ta ndaro ta, tana nda atate ekye: “Ma ni ambata se kikyite vuru ni vo’buyakuru yasi owo.” ⁴² Ago ànya atayite ekye: “Mano ono ni Yesu ŋgwa Yosepa ro, ṛo ko inye ya? Mäni täpi ndaro te ndi endre be, ka’do inye, yauono nda ka ata ekye; nda ikyite vuru ni vo’buyakuru yasi eŋwanye ya?” ⁴³ Yesu zatadrite ekye: “Nyè’be ata ŋguruŋguru ro amivoya ’do. ⁴⁴ ’Diaza unina ko ikyine mare e’be gialo Täpi se kezo mabe ishwena nda ni mare, ago meŋgana nda ’da adri ya tu äduro si. ⁴⁵ Nebi egyitate ekye: ‘Embana ’di cini ’da Lu si.’ ’Diaza se kabe ta Täpi ro eri ago kabe tauni ni nda resi kani ikyi mare. ⁴⁶ Ono a’do ko ekye ’diaza ndre Täpi te; nda se ni Lu resi ni. toto se ndre Täpi be owo. ⁴⁷ Ma ugu taŋgye iti ämiri; nda se kabe taoma orivoya adri äduako be. ⁴⁸ Ma ni ambata adri ro. ⁴⁹ Zutui amiro nyàyi mana te vocowa ya, oko ànya todrayite. ⁵⁰ Oko ambata se kabe ikyi vuru ni vo’buyakuru yasi orivoya oso nonye ’dise kabe onyana odrana ko. ⁵¹ Ma ni ambata adri ro se ikyite vuru ni vo’buyakuru yasi owo! Ondro ’diaza ka ambata ono onya, nda orina ndi äduako. Ambata se mozona ’da ndäri ni lomvo maro se mabe ozona tana ’bädri kori robe lidriidriro.” ⁵² Tase ono eto ta kalawikya ro kyila si te ànya lako, ànya ejiyitate ekye: “Mano ono unina lomvo ndaro ozone ämäri onyane eŋwanye ya?” ⁵³ Yesu atate ànyari ekye: “Ma ugu taŋgye iti ämiri, ondro ka’do mìnya lomvo Ŋgwa Lidri ro ro ko ago mìmvu kari ndaro ko, ämiri a’done adri be andivo amiro ya i’do. ⁵⁴ Nda se kabe lomvo maro onya ago kabe kari maro umvu ni adri äduako be, ago meŋgana nda ’da adri ya tu äduro si. ⁵⁵ Tana lomvo maro ni ŋgaonya endaro yi, kari maro orivoya ŋgaumvu endaro yi. ⁵⁶ Nda se kabe lomvo maro onya ago kabe kari maro umvu ka ori ma ya, ago ma ori nda ya. ⁵⁷ Täpi lidriidriro ezo ma ni, ago nda si ma kpa ori, kpa oso inye nda se kabe ma onya orina ’da ma si. ⁵⁸ Ka’do inye, ono ni ambata se ikyite vuru ni vo’buyakuru yasi owo, anya ko oso ambata se zutui amiro konyabe ronye, ago ’dooko onyana vosi todrayite. Nda se kabe ambata ono onya orina ’da äduako.” ⁵⁹ Yesu ata ta ono te ’dooko nda ŋgaembavoya zotaeriro ya Kaperenauma ya. ⁶⁰ Amba oso’bai nda vo ro keri ta ono te oko atayite ekye: “Ŋgaemba ono mbara te tu. A’di uruna ni ya?” ⁶¹ Teinye tana itiako, Yesu ni ṛote ànya kayi ata ŋguruŋguru ro ta ono ta, ago nda atate ànyari ekye: “Inye’do ta ono ’ba ami te voozone ya? ⁶² ’Dooko aba, mìndre Ŋgwa Lidri ro gwo oyivoya vose nda ka’do be käti kigye ana ya niya? ⁶³ Tori Lu ro ka adri ozoni, mbara lidri ro iro cu awi. Ata gi matabe ämiri ono kani adri Lu ro Tori kabe ozona ezina. ⁶⁴ Caoko rukä amiro ma ta ko.” (Yesu ni ’dise koma ko ago se kolebe drí ndaro ozone ṛote ni etovoya.) ⁶⁵ Ago nda atate ekye: “Ono ṛoni tase mitibe ämiri makye ’diaza unina ko ikyine mare e’be gialo Täpi o’bana ni rritiako ndäri oyene inye.” ⁶⁶ Ta ta ono rota, amba oso’bai Yesu vo ro gote kovole ago le kote tona oyine nda be. ⁶⁷ Ago nda eji taeri’bai ’butealo foritu te ekye: “Mìle kpate ogone ya?” ⁶⁸ Simona Petero zatadri ndaro te ekye: “Opi, mòyina a’di riya? Mi ni ata se kabe adri äduako ozo be. ⁶⁹ Ago yauono màma ndi ago mä̀ni ndi mi ni nda se Alokado se kikyini Lu resi owo.” ⁷⁰ Yesu logotate ekye: “Manji ami ’butealo foritu ni, ṛoko inye ya? Caoko alo aza amiro orivoya kicu’ba owo!” ⁷¹ Nda ka ugu ta Yuda, ŋgwa Simona Isekariota ro ro atana. Tana Yuda, ca alo aza taeri’bai ’butealo foritu ro oko, kaoye ni dri ndaro ozone.

¹ Ono vosi, Yesu abate Galilaya yasi, nda le kote abane Yuda yasi, tana drikaca’bai Yudai ro lau ana leyi nda ufune. ² Tu karama Mutuguṛi rote lototi, ³ ta’doro ädrupii Yesu ro atayite ndäri ekye: “Nye’be vo ono ago nyoyi Yuda ya, tana oso’bai mivo kondreyi ŋgase nya ugu oyena robe. ⁴ ’Diaza alo da’do tase nda ka ugu oyena kote ondro nda kole ndi yi unine kadoro owo. Nyeto ŋga kwoi ugu oyena bete ono, mi’ba ’bädri cini kuni ta miro!” ⁵ (Ca ädrupii ndaro mayi kote nda ya.) ⁶ Yesu atate ànyari ekye: “Tu kado märi esa ko drigba, oko tu cini ṛo kado ämiri. ⁷ Ya ’bädri ro niko osone ami lomvo, oko yana ka oso malomvo, tana ma ugu taiti anjioko taoye ànyaro orivoya koziro. ⁸ Nyùgu oyi ri karama ya, märi oyine karama ono ya i’do, tana tu gya maro esa dri ko.” ⁹ Nda kata ta ono te oko nda rite Galilaya ya. ¹⁰ Oyi ädrupii ndaro ro karama ya vosi ko, Yesu oyi kpate, caoko nda oyi kote ŋbelero, oko ndrwiro. ¹¹ Drikaca’bai Yudai ro uguyi nda uṛite ni karama ya. Ànya ejiyitate ekye: “Nda eŋwaro ya?” ¹² Ugu ta wayawaya amba atate ta ndaro ta lowa lako. Lidri rukä ka ata ekye: “Nda mano kado yi.” Azakana atate ekye: “Hwa, nda ka lidri wiri.” ¹³ Oko ’diaza ata ta ndaro kote ŋbelero, tana ànya turiro ni drikaca’bai Yudai ro ri. ¹⁴ Karama te ti okyene oko Yesu oyite Yekalu ya ago eto ŋgaemba te. ¹⁵ Drikaca’bai Yudai ro a’dote larolaro ro amba ago atayite ekye: “Mano ono koyi ko cu vo tauni roya oko ko’debe ta unine amba ono eŋwanye ya?” ¹⁶ Yesu zatadrite ekye: “Tase mabe embana ono ko ŋgaemba ma modo ro, oko ikyi ni Lu se kezo mabe ono resi. ¹⁷ Nda se olebe tase Lu kolebe oyene anya unina ndi, kode tase mabe embana kikyi ni Lu resi kode ma ata drikaca ma modo rosi. ¹⁸ ’Dise kabe ata drikaca modo ndaro rosi ka räṛu uṛi andivo ndaro ri. Oko nda se kolebe nda se kezo nda be ono orone ayani ni orivoya ’diri, ago nda ga kowe ko alona. ¹⁹ Musa ozo Ota te ämiri, nda ozo ko ya? Oko alo aza amiro ro Ota ko. Nyà ojo ma ufune etaya?” ²⁰ Lowa zatadrite ekye: “Mi orivoya demona be mi ya. A’di ka ojoni mi ufune ya?” ²¹ Yesu zatadrite ekye: “Maye talaro ro alo te, ago ami cini nyà’dote larolaro ro. ²² Musa ta ami te ŋgwàagoro amiro olone ŋbiṛiro (caoko ko ni Musa owo oko zutui amiro eto tana ni), ago nyà ŋgaga olo ŋbiṛiro Sabata si. ²³ Ondro alo ŋgaga te ŋbiṛiro Sabata si anjioko Ota Musa ro epere kote, tana e’di ami kyilaro mabe tase mede lidri be Sabata si ono rota niya? ²⁴ Nyè’be vureope taŋgye oyeako si ’do ago mìpe vure endaro taŋgye oyesi ayani.” ²⁵ Rukä lidri Yerusalema ro ro atate ekye: “Inye’do ono ṛoko mano se drikaca’bai kayibe ojo ufune owo ya? ²⁶ Mìndre! Nda ka ugu ata ṛo miamba ya, ago ànya atayi ta aza kote nda lomvo. A’dona ànya nite endaro nda ni Mesiya owo ya? ²⁷ Oko tuse Mesiya kabe ikyi, ’diaza unina ko nda ni eŋwaro. Ago ama cini mä̀ni vose mano ono kikyi ni kigyesi ndi.” ²⁸ Ondro Yesu kate miemba Yekalu ya oko nda atate ṛo ṛeṛe ekye: “Inye’do mìni ma ndi endaro ago mìni vose mikyibe ni kigyesi ndi ya? Mikyi kote drikaca modo maro rosi. Caoko, nda se kezo mabe ono ni ŋgye. Mìni nda kote, ²⁹ oko mäni nda ndi, tana mikyi ni nda resi ago nda ezo ma ni.” ³⁰ ’Dooko ànya ojoyite nda urune, oko ’diaza alo do drí kote nda lomvo, tana tu ndaro esa ko drigba. ³¹ Oko amba ni lowa lakosi mayite nda ya ago atayite ekye: “Ondro Mesiya kikyibe nda oyena talaro ro gi’da ndrani mano ono risi ya?” ³² Parusii kerite lowa ka ugu ŋgase kwoi tana wayana ta Yesu rota oko, ànya ndi kohanii ’desi be zoyi rukä vookwa’bai rote nda urune. ³³ Yesu atate ekye: “Marina ’da ami yibe gafere madaro, ago ’dooko moyina ’da lozo nda se kezo mabe re, ³⁴ mìṛina ma ’da oko nyùsuna ma ko, tana mìnina ko oyine vose ma’dona ’da kigye ya.” ³⁵ Drikaca’bai Yudai ro atayite ànyavoya ekye: “Nda kaoye oyine eŋwaro ämäri ko nda usune ya? Nda le oyine ’bakici Giriki ro se lidri amaro kabe ori kigye ya ago Girikii embane ya? ³⁶ Nda ka ata ekye mä̀ṛina yi ’da oko mùsuna yi ko, ago mä̀nina ko oyine vose ya’dona ’da kigye ya. Nda usu ta e’diro atane inye ya?” ³⁷ U’du ädu parandra karama rosi oko Yesu edrete kuru ago atate ṛeṛe ekye: “Nda se gyilu be beṛo ikyine mare ago kumvu robe. ³⁸ Oso taegyi kabe ata ronye ekye: ‘Nda se kabe taoma ma ya golo gyi adri ozoro udina ndi ya ndaro yasi.’ ” ³⁹ Yesu ka ono ta Tori ro atana, se ànya se komabe nda ya ka oyebe urune ono. Tu gi ana si ozo Tori drigba ko’de, tana eŋga Yesu drigba ko dri a’do ’desi ya. ⁴⁰ Rukä lidri ro lowa lako keri nda te ta ono atavoya oko atayite ekye: “Endaro mano ono orivoya nebi yi!” ⁴¹ Azakana ekye: “Nda ni Mesiya owo!” Oko azakana ekye: “Mesiya ikyina ko ni Galilaya ya! ⁴² Taegyi katabe ekye Mesiya ikyina ’da ni zelevo ’Bädri’ba Dawidi ro yasi ago ätina ’da Beteleme ya, ’bakici se Dawidi rite kigye ya.” ⁴³ Ago rulonyi a’dote lowa lako ta Yesu rota. ⁴⁴ Rukäna le nda urune, oko ’diaza alo do drí kote nda lomvo. ⁴⁵ Ondro vookwa’bai kogoyite kovole oko, kohanii ’desi ndi Parusii be ejiyi ànya te ekye: “Nyèzi nda kote etaya?” ⁴⁶ Vookwa’bai zayitadrite ekye: “’Diaza ata kote oso mano ono ronye!” ⁴⁷ Parusii ejiyitate ekye: “Nda mäyu ami kpate ya? ⁴⁸ Mìnibe alo aza drikaca’bai ro kode alo aza Parusii ro ma te nda ya ya? ⁴⁹ Lowa ono ni Ota Musa ro ko, ago ànya te orivoya latri Lu ro zele!” ⁵⁰ Alo aza Parusii ro Nikodema orivoya lau, ni mano se oyi kätina be Yesu ondre owo. Nda atate azii ri ekye: ⁵¹ “Ota amaro voro mä̀nina ko vure ’diaza ro opene käti ta ndaro eri ako ago tase nda koyebe uniako.” ⁵² Ànya zayitadrite ekye: “Mi kpa ni Galilaya ya ya? Nyetenyi Taegyi ago minina ndi nebi aza efo ko ni Galilaya ya.” [ ⁵³ ’Dooko ’dicini oyite ’bäru.

¹ Oko Yesu oyite ’Bereŋwa Ice Idoro ro dri. ² Ṛo kyenoŋboci kyenonosi oko nda gote kovole Yekalu ya. Lidri cini otokalate ŋgulu nda lomvo, ago nda rite vuru ago eto ànya embate. ³ Miemba’bai Ota ro ndi Parusii be eziyi toko aza äru taoyevoya ago drisi, ago ànya edreyi anya te ànya cini kandra. ⁴ Ànya atayite Yesu ri ekye: “Miemba’ba, äru toko gi ono te taoyevoya ago drisi. ⁵ Ota ya Musa katabe toko oso ono ronye beṛo ufune ovone kuni si, oko nyatana miro eŋwanye ya?” ⁶ Ànya atayi ta ono te Yesu odoza, tana ànya kikicuyi nda robe. Oko nda ändite ago egyitate gyinidri driŋgwa ndaro si. ⁷ Ago ànya kedreyite lau kayi ugu nda eji oko, nda edrete kuru ago atate ànyari ekye: “Alo aza amiro se koye takozi ko ’do kovo kuni käti anya lomvo.” ⁸ ’Dooko nda ändite kpa to’di ago egyi tate gyinidri. ⁹ Ondro ànya keriyi ta ono te oko, ànya cini oyite, ba alo alo, eto ni ’desi yasi käti. E’be Yesu te iṛe, toko ana dri ’du edrevoya nda kandra. ¹⁰ Nda edrete kuru ago atate anyari ekye: “Ànya gaŋwaro ya? Inye’do alo aza e’be ko vure miro oyene ya?” ¹¹ Anya zatadrite ekye: “Aza alona i’do, ’desi.” Yesu atate ekye: “Ka’do inye, ca ma vure miro oyene i’do. Nyoyi oko miye takozi ko tona.”] ¹² Yesu ata ta kpate to’di Parusii ri ekye: “Ma ni ŋgaeyi ’bädri ro, nda se kabe oso mavo a’dona ndi ŋgaeyi adri robe ago abana ko vouni yasi alona.” ¹³ Parusii atayite ndäri ekye: “Nya ugu tazevo modo miro ro edrena; tase nyabe atana ono ka’da ta aza ko.” ¹⁴ Yesu zatadrite ekye: “Hwa, ondro ka’do ca ma tazevo modo maro ro edrena, tase mabe atana ni ŋgye, tana mäni vose mikyibe ni kigye ndi vose ma ugu oyi kigye be. Oko mìni vose mikyibe ni kigyesi ko, ca vose ma ugu oyi kigye be. ¹⁵ Nyà vureope ṛo kpeye a’do lidri ro voro; mape vure ’diaza ro ko. ¹⁶ Oko ondro ka’do gwo märi oyene inye, vureope maro a’dona ṛo ŋgye, tana ma ko iṛe opevonaya; oko Täpi se kezo mabe orivoya mabe. ¹⁷ Egyitate Ota amiro ya anjioko ondro tazevoedre ’di ritu ro kojote ojo anjioko tase ànya kabe atana orivoya ŋgye. ¹⁸ Ma tazevo modo maro ro edrena, ago Täpi se kezo mabe ka kpa tazevoedre ma ta.” ¹⁹ Ànya ejiyi nda te ekye: “Täpi miro eŋwaro ya?” Yesu zatadrite ekye: “Mìni ma ko’de ca Täpi maro, ondro aba mìni ma gwo, mìnina Täpi maro kpa.” ²⁰ Yesu ata tase cini ono te ŋgaembavoya Yekalu ya, zoya se a’ba sänduku ŋgapäṛi ozo robe kigye ya. Ago ’diaza alo ru nda kote, tana tu modo ndaro ro esa ko dri. ²¹ Yesu atate ànyari to’dina ekye: “Moyina ’da lozo; mìṛina ma ’da, oko mìdrana ’da takozi amiro ya. Mìnina ko oyine vose ma ugu oyi kigye ya.” ²² Ago drikaca’bai Yudai ro atate ekye: “Nda ka ugu ata ekye mä̀nina ko oyine vose nda ka ugu oyi kigye ya. Inye’do takaci ta’doro nda kaoye andivo ndaro ufune ya?” ²³ Yesu zatadrite ekye: “Ami ’bädri vuru noŋwa ono ro, oko mikyini kurusi. Ami ni ’bädri ono yasi, oko ma ko ni ’bädri ono yasi. ²⁴ ’Doni tase matabe ämiri makye mìdrana ’da takozii amiro ya owo. Ago mìdrana ’da takozii amiro ya ondro mìma kote, Ma ni Nda owo.” ²⁵ Ànya ejiyi nda te ekye: “Mi orivoya a’di owo ya?” Yesu zatadrite ekye: “Miti tate ämiri ṛoni etovoya. ²⁶ Ma ta amba be atane ta amiro ta, ago ta amba be vure amiro opene tana ro. Oko nda se kezo mabe ni ŋgye, ago ma toto tase meribe ni nda resi tana itina ayani ’bädri ri.” ²⁷ Ànya niyi ko anjioko Yesu ka ugu ta Täpi ro ata ànyari. ²⁸ Ago nda atate ànyari ekye: “Ondro nyèŋga Ŋgwa Lidri rote kuru, ’dooko mìnina ’da anjioko Ma ni Nda owo; ’dooko mìnina ’da anjioko maye ŋga aza ko drikaca modo maro rosi, oko ma toto tase Täpi kemba mabe atane atana ayani. ²⁹ Ago nda se kezo mabe ono orivoya mabe, nda e’be ma kote iṛe, tana ondoalo ma ŋgase tana kabe nda usi oyena ayani.” ³⁰ Ambana se keri Yesu te ta ono atavoya mate nda ya. ³¹ Ago Yesu atate Yudai se koma ta be nda ya ri ekye: “Ondro mìro ŋgaemba maro te, ami orivoya endaro taeri’bai maro, ³² mìnina taŋgye ndi, ago taŋgye o’bana ami ’da dritai ro.” ³³ Ànya zayitadrite ekye: “Ama orivoya zelevoi Abarayama ro, ago mà’do kote iyeäṛii ’diaza ro. Nyusu eŋwanye ugu atane ekye: ‘Nyà’dona ’da dritai roya’? ” ³⁴ Yesu atate ànyari ekye: “Ma ugu taŋgye iti ämiri; vona se cini ka takozi oye orivoya iyeäṛi takozi ro. ³⁵ Iyeäṛi ri kote madaro katidri ya, oko ŋgwa ri ndi lau äduako. ³⁶ Ondro Ŋgwa ko’ba ami ni dritai ro, ’dooko nyà’dona ndi endaro dritai ro. ³⁷ Mäni ndi ami ni zelevoi Abarayama ro owo. Caoko nyà ojo ma ufune, tana mìleko ŋgaemba maro urune. ³⁸ Ma tase meribe ni Täpi maro resi atana, oko nyà tase nyèribe ni täpi amiro resi oyena ayani.” ³⁹ Ànya zayitadrite ekye: “Täpi amaro ni Abarayama.” Yesu logotate ekye: “Ondro nyà’do gwo endaro ŋgwai Abarayama ro, mìyena kpa tase nda ye be ayani. ⁴⁰ Ma orivoya mano se kiti taŋgye se merite ni Lu resi te ämiri owo, oko nyà ojo ma ufune. Abarayama ye ŋga aza ko oso inye! ⁴¹ Nyà ugu tase täpi amiro koyebe oyena.” Ànya zayitadrite ekye: “Lu toto ni Täpi se ama be sina owo, ago ama ni ŋgwà ŋgye ndaro owo.” ⁴² Yesu atate ànyari ekye: “Ondro Lu ka’do gwo endaro Täpi amiro, nyùluna ma ndi, tana mikyi ni Lu re ago yauono ma ni no. Mikyi kote drikaca ma modo rosi, oko nda ezo ma ni. ⁴³ Tana e’di mìni tase mabe atana ko niya? Tana mìni ko biogane lazo maro erine. ⁴⁴ Ami orivoya ŋgwai täpi amiro kicu’ba ro, ago mìle osone ole täpi amiro ro vo. Tana ṛoni etovoya nda orivoya ’diufu’ba yi ago a’do ko alona taŋgye resi, tana taŋgye i’do nda ya. Ondro nda ka kowe oga, nda ka ugu ta ndaro oyena, tana nda kowe’ba yi ago täpi kowe cini ro. ⁴⁵ Oko ma taŋgye iti, ago ’do ni tase mì’de ko omane maya owo. ⁴⁶ Alo aza amiro se unina ndi ma kicune ekye ma orivoya taenji be ni a’di ya? Ondro ka’do ma taŋgye ata, tana e’di mìma ko maya niya? ⁴⁷ Nda se kikyi Lu resi ka ata Lu ro erina. Caoko ami ko ni Lu resi, ago ’do ni tase mì’de ko ta erine owo.” ⁴⁸ Yudai ejiyi Yesu te ekye: “Inye’do ama ṛo ko ŋgye ugu atana màkye mi orivoya Samaria’ba yi ago demona be miya ya?” ⁴⁹ Yesu zatadrite ekye: “Ma demona ako, ma Täpi maro oro, oko ami mìro ma ko. ⁵⁰ Ma ko ugu taoro uṛi ma andivo ri. Oko alodi aza orivoya se ka ugu uṛina ago se ka vureope ta maro ta. ⁵¹ Ma ugu taŋgye iti ämiri, nda se kabe ŋgaemba maro oro odrana ko alona.” ⁵² Ànya atayite ndäri ekye: “Yauono màma ndi endaro anjioko mi demona be! Abarayama drate, ago nebii todrate, caoko nya ata mikye nda se kabe ŋgaemba miro oro odrana ko alona. ⁵³ Täpi amaro Abarayama drate, nya mi o’ba a’done ndrani Abarayama ri, inye’do mi ndi inye ya? Ago nebii todra kpate. Nyusu miro be mi orivoya a’di owo ya?” ⁵⁴ Yesu zatadrite ekye: “Ondro aba ma gwo andivo maro oro ayani, ’dooko taoro maro kadona i’do. Nda se kabe ma oro ni Täpi maro; se gi nyàbe tana atana mìkye ni Lu amiro owo ono. ⁵⁵ Mìni nda kote alona, oko mäni nda ndi, oko aba mata gwo makye mäni nda ko, ma’dona ndi koweoga’ba ro oso ami ronye. Oko mäni nda ndi, ago maro ata ndaro ndi. ⁵⁶ Täpi amiro Abarayama a’dote riyäsi tu ikyi maro ro ondrene; ndrete ago a’dote yai’dwesi.” ⁵⁷ Ànya atayite ndäri ekye: “Ndroa miro drigba i’do ’butenji; oko inye’do mindre Abarayama te ya?” ⁵⁸ Yesu logotate ekye: “Ma ugu taŋgye iti ämiri teinye Abarayama utiako, ma ṛo orivoya.” ⁵⁹ ’Dooko ànya ruyi kuniŋwà te nda ovoza, oko Yesu da’do andivo iro te ago e’be Yekalu te.

¹ Ago Yesu ka ugu aba oko, nda ndre mano se ätibe miako ana te. ² Taeri’bai ndaro ejiyi nda te ekye: “Miemba’ba, takozi a’di ro ’ba mano ono ni utine miako ya? Takozi modo ndaro ro kode takozi uti’bai ndaro roya?” ³ Yesu zatadrite ekye: “Miako ndaro tana di ko takozii ndaro kode takozii uti’bai ndaro ro. Nda orivoya miako tana mbara Lu ro andre losi oyena robe nda ya. ⁴ Ago bedri ṛo kitu si ono, beṛo ämäri ugu losi nda se kezo mabe ono ro oyene; ŋgäkyi kate eziikyi ’dooko ’diaza alo unina ko losi oyene. ⁵ Ondro ma dri orivoya ’bädri ya, ma orivoya ŋgaeyi yi ’bädri ri.” ⁶ Ta ono atana ndäri vosi oko, Yesu vo to te gyini dri ago ŋga koro te to si; nda ndru koro gwo mi mano ana roya, ⁷ ago atate ndäri ekye: “Nyoyi ago mijo mi miro Cece Siloama roya.” (Ävuru ono takacina, anjioko Azote.) Ago mano ana oyite, jo mi ndaro te, ago egote kovole voondrebe. ⁸ ’Dooko oriazii ndaro, ndi lidri se kondreyi nda be ŋga ejivoya kätina ono ejiyitate ekye: “Inye’do ono ṛo ko mano se ka oribe vuru ago kabe ŋga eji ’do owo ya?” ⁹ Rukäna atate ekye: “Ndana owo,” oko azakana atate ekye: “Hwa, ko ndana owo! Oko ondrena ya laba gi oso nda ronye.” Ago mano ana andivona atate ekye: “Ma ni nda owo.” ¹⁰ Ànya ejiyi nda te ekye: “Yauono mi’debe voondrene eŋwanye ya?” ¹¹ Nda zatadrite ekye: “Mano se äzibe Yesu ono, ŋga koro gwo, ndrugwo mi maro ya ago atate märi oyine Cece Siloama roya mi maro ojone. Ago moyite, ago majote oko, dori meto voondrete.” ¹² Ànya ejiyitate ekye: “Nda gaŋwaro ya?” Nda zatadrite ekye: “Mäni ko.” ¹³ ’Dooko ànya uguyi mano se sedri miako ana te Parusii re. ¹⁴ Tuse Yesu ŋga koro be ago kede miako ndaro be sina ana orivoya Sabata yi. ¹⁵ ’Dooko, Parusii ejiyi mano ana te to’dina nda a’dote voondrebe eŋwanye. Nda ititate ànyari ekye: “Nda ’ba koro te mi maro ya, majo mi maro te ago yauono mäni voondre ndi.” ¹⁶ Rukä Parusii ro atate ekye: “Mano se koye ta ono be ono a’do ko ni Lu resi, tana nda ro ota Sabata ro ko.” Caoko azakana, atate ekye: “Mano se orivoya takozi’ba yi unina talaro ro oso kwoi ronye oyene eŋwanye ya?” Ago rulonyi a’dote ànya lako. ¹⁷ Ago Parusii ejiyi mano ana te to’dina ekye: “Nyata mikye nda ede miako miro ni; ka’do inye nyatana ta e’di ta ndaro ta ya?” Mano ana zatadrite ekye: “Nda orivoya nebi yi.” ¹⁸ Caoko drikaca’bai Yudai ro, mayi ta kote ekye nda a’dote miako ago yauono kate voondre, madale ànya ziyi uti’bai ndaro te ¹⁹ ago ejiyi ànya te ekye: “Ono ŋgwa amiro ya? Nyà ata mìkye äti nda ṛo miako, oko yauono nda ’debe voondrene eŋwanye ya?” ²⁰ Uti’bai ndaro zayitadrite ekye: “Mä̀ni ndi nda ni ŋgwa amaro ago mä̀ni ndi äti nda te miako. ²¹ Oko mä̀ni ko yauono nda ’debe voondrene eŋwanye, ca mä̀ni nda se kede miako ndaro be ono kpa ko. Nyèji nda; nda te ’desiro, ago nda ozana tadri gini ta andivo ndaro rota.” ²² Uti’bai ndaro ’debe atana nonye tana ànya orivoya turiro ni drikaca’bai Yudai ro ri, se leyi tadrite ṛo nja anjioko ’diaza kata tate ekye Yesu ni Mesiya owo äsina ndi ni zotaeriro yasi. ²³ ’Doni tase ’ba uti’bai ndaro be atana ekye: “Nda orivoya te ’desiro, nyèji nda owo!” ²⁴ Ànya ziyi mano se ätibe miako ro ana te pere ṛirina si ago atayite ndäri ekye: “Mi’ba tao’ba Lu kandra anjioko nyitina ndi taŋgye ayani! Mä̀ni ndi mano gi kede mibe ono orivoya takozi’ba yi.” ²⁵ Mano ana zatadrite ekye: “Kode nda ndi takozi’ba yi kode ko ya, mäni ko. Ŋgase alodi mäni ndi; ma miako’ba yi, ago yauono ma voondre!” ²⁶ Ànya ejiyitate ekye: “Nda ye e’diyi miri ya? Nda ede miako miro eŋwanye ya?” ²⁷ Nda zatadrite ekye: “Miti ṛote nja ämiri, ago nyèri kote. Mìle taerine to’di etaya? Kode mìle a’done taeri’bai ndaro ya?” ²⁸ Ànya ’dayi nda te ago atayite ndäri ekye: “Mi orivoya taeri’ba mano ana ro, ama orivoya taeri’bai Musa ro. ²⁹ Mä̀ni ndi Lu atate Musa ri, caoko, mano ono, mä̀ni vose nda kikyini kigyesi ko!” ³⁰ Mano ana zatadrite ekye: “’Do orivoya talaro ro yi! Mìni vose nda kikyi ni kigyesi ko, oko nda ede miako maro te! ³¹ Mä̀ni ndi anjioko Lu eri ta takozi’bai ro ko, nda ka lidri se kabe nda oro ago kabe tase nda kolebe oyena erina ayani. ³² Tana ṛoni eto ’bädri rosi eri ta ’diaza ro kote se ozo voondre te mano se ätite miako ri. ³³ Mano ono aba kikyi ko ni Lu resi, nda unina ko a’done mbara be ŋga aza oyene.” ³⁴ Ànya zayitadrite ekye: “Äti mi te ago mimba te takozi ya; ago inye’do nya ojoni ama embane ya?” Ago ànya njayi nda teni zotaeriro yasi. ³⁵ Ondro Yesu keri tase ka’dobe ana tana te oko, nda usu mano ana te ago eji nda ekye: “Inye’do mima ndi Ŋgwa Lidri ro ya ya?” ³⁶ Mano ana zatadrite ekye: “’Desi nyiti tana märi nda a’di owo, tana mama ta robe nda ya!” ³⁷ Yesu atate ndäri ekye: “Mindre nda teṛo nja, ago nda ni se kabe ugu ata mibe ono owo.” ³⁸ Mano ana atate ekye: “Mamate Opi!” Ago sokayate vuru Yesu kandra. ³⁹ Yesu atate ekye: “Mikyite ’bädri ono ya vure opene, tana se miako kondre vo robe ago ànya se kabe voondre ka’do robe miako.” ⁴⁰ Rukä Parusii ro se orivoya lau nda be ana keriyi nda be ta ono atavoya ejiyi nda te ekye: “Inye’do mima be mikye ama kpa miako ya?” ⁴¹ Yesu zatadrite ekye: “Ondro nyà’do gwo orivoya miako, ’dooko nyà’dona ko taenji be; oko nyàta ṛote mìkye ya voondre, ono ka’da teṛo anjioko ami orivoya ’du taenji be.”

¹ Yesu atate ekye: “Ma ugu taŋgye iti ämiri: ’dise ci kote gyolo timele roya dereŋwa yasi, oko tu gwo vo to aza yasi, orivoya kugu yi ago ŋgatopa’ba yi. ² Oko ’dise kabe oci dereŋwa yasi orivoya lekye’ba timele ro. ³ Dereŋwa gaga’ba pi dereŋwa te ndäri, timele eri läzi ndaro ndi ondro nda kate timele modo ndaro ro uzi ävuru si owo, ago nda oro ànya te tesi. ⁴ Ondro nda kolofo ànya te tesi oko, nda ’dete käti ànyari, ago timele sote nda vo, tana ànya niyi drî ndaro te. ⁵ Ànya osonayi ko ’di to vo, oko ànya umuna ṛo pere ni ’di inye ’do ri, tana ànya niyi drî ndaro ko.” ⁶ Yesu iti lapidri ono te ànyari, oko ànya niyi takaci tase nda kusube ana ro ko. ⁷ Ago Yesu atate to’di ekye: “Ma ugu taŋgye iti ämiri. Ma orivoya dereŋwa timele ro owo. ⁸ Azaka se cini kikyibe käti ni märi orivoya kuguyi ago ŋgatopa’bai, oko timele eri ta ànyaro kote. ⁹ Ma orivoya dereŋwa yi. Nda se kabe oci ma ya si apana ndi, nda ocina ndi ago ofona ndi tesi ago usuna lowo ndi. ¹⁰ Kugu ka ikyi toto ŋga kugune, ufune ago perene. Mikyite tana nyà’do robe adri be; adri se parandra be. ¹¹ “Ma orivoya ni lekye’ba kado yi, se ṛo olebe odrane ta timele rota. ¹² Mano se kabe päläti uruuru, se ko lekye’ba yi ago timele ko modo ndaro ro, kondre ihwi be ikyivoya, nda e’be timele te ago mu ṛo umu; ago ihwi ru timele te ago pere ànya te. ¹³ Päläti uru’ba mute tana nda toto päläti uru’ba yi ago ti ta timele ro ko. ¹⁴ Ma orivoya ni lekye’ba kado yi, mäni timele maro ndi, ago timele maro ni ma ndi, ¹⁵ kpa oso Täpi kuni mabe ronye ago mäni Täpi be ronye, ago mozo mate odrana timele ta. ¹⁶ Timele azaka orivoya se kpa maro se ànya i’do gyolo ono ya. Beṛo märi ànya ezine kpa; ànya erinayi drî maro ’da, ago ànya a’donayi ’da gboko alo ro lekye’ba alodi be. ¹⁷ “Täpi lu ma tana ma ṛo olebe adri maro ozone, tana mago märu robe kpa to’di. ¹⁸ ’Diaza ri adri maro urune ni märigyesi i’do, mozo ni dritai ro ole ma modo rosi. Ma mbara be anya ozone, ago ma mbara be ogone anya urune. Ono ni tase Täpi maro kota mabe oyene owo.” ¹⁹ Rulonyi go a’dote kpa to’di Yudai lako ta ata kwoi rota. ²⁰ Amba ànyaro uguyi atate ekye: “Nda demona be! Nda orivoya drikoziro be! Nyà ta ndaro erina etaya?” ²¹ Oko azaka uguyi atate ekye: “Mano demona be unina ko atane oso nonye. Demona unina voondre ozone lidri miako ro ri eŋwanye ya?” ²² Te orivoya meṛi si, ago Karama Yekalu Äṛu ro a te oyena Yerusalema ya. ²³ Yesu ka ugu aba ndiṛi Solomo ro Yekalu ya yasi, ²⁴ ondro lidri kotokalate ŋgulu nda lomvo oko ejiyitate ekye: “Nya ama o’ba ugu a’done wiriwiriro tuna mu’du eŋwanye ya? Nyiti ta ŋbelero ämäri: inye’do mi Mesiya owo ya?” ²⁵ Yesu zatadrite ekye: “Miti ta ṛote nja ämiri, oko mìle ko omane ta maro ya. Taoye se mabe oyena drikaca Täpi maro rosi ka ta maro itina, ²⁶ oko mìle ko omane, tana ami ko orivoya timele maro. ²⁷ Timele maro ka drî maro eri, mäni ànya ndi, ago ànya soyi ndi mavo. ²⁸ Ma adri äduako ozo ànyari, ago ànya odrana ko alona. ’Diaza alo unina ko ànya ivune ni märigyesi. ²⁹ Ŋgase Täpi maro kozote märi orivoya ’desipara ndrani ŋga cini ri, ago ’diaza alo unina ko ànya ivune ni Täpi maro rigyesi. ³⁰ Täpi ndi mabe orivoya alo.” ³¹ ’Dooko lidri go ruyi kuniŋwà te nda ovoza sina. ³² Yesu atate ànyari ekye: “Maye taoye amba kado te ami milesi se Täpi kozote märi oyene; taoye kwoi se eŋwani nyà ma ovo tana roya?” ³³ Ànya zayitadrite ekye: “Mà ko mi ovo kuni si ta tase aza kado oye rota, oko ta Lu o’da rota ayani! Mi orivoya toto lidri yi, oko nya ojo andivo miro o’bane a’done Lu ro!” ³⁴ Yesu zatadrite ekye: “Egyitate Ota modo amiro roya anjioko Lu atate ekye: ‘Ami orivoya lui.’ ³⁵ Mä̀ni ndi anjioko tase taegyi kabe atana orivoya endaro äduako; ago Lu zi lidri se kai te lui, lidri se ozo lazo ndaro te ànyari ono. ³⁶ Oko ta maro ta, Täpi nji ma te ago ezo ma te ’bädri ya. Ka’do inye, nyàtana eŋwanye mìkye ma Lu o’da, tana tase matabe makye ma ni Ŋgwa Lu ro ono ta ya? ³⁷ Ka’do inye mìma ko ma ya, ondro ka’do ma kote tase Täpi maro kolebe märi oyene oyena owo. ³⁸ Oko ondro maye ànya ndi, ka’do inye mìma ca ko ma ya, beṛo ämiri omane taoye maro si, tana mìni ṛobe anjioko Täpi orivoya ma ya ago ma orivoya Täpi ya.” ³⁹ Ànya go ojoyi kpate Yesu urune to’di, oko nda pavote ni drí ànyaro yasi. ⁴⁰ ’Dooko Yesu go oyite kovole Golo Yaradene tasi vose Yoane koye bapatisi be kigye ana ya, ago nda rite lau. ⁴¹ Lidri amba ikyite ndare, ànya atayite ekye: “Yoane ye talaro ro kote, oko tase cini nda katabe ta mano ono rota orivoya endaro.” ⁴² Ago amba lidri ro se lau ana mate nda ya.

¹ Mano aza äzite Lazara, se rite Betaniya ya, a’dote adravoro. Betaniya orivoya ni ’ba’desi se Maria ndi endreŋwa anyaro Marata be rite kigye owo. ² (Maria ono orivoya ni se koda ŋga ŋgutruro be pa Opi roya ago koyo ànya be drikyiri anyaro si owo; ädrupi anyaro Lazara ni se a’dote adravoro ono owo.) ³ Endreŋwà zoyi lazo te Yesu ri ekye: “Opi, bereazi miro se nyulu tawi ono orivoya adravoro.” ⁴ Ondro Yesu keri tana te oko, nda atate ekye: “Ta ädu adravo ono ro koni odra Lazara ro; se ono a’dote nonye tana kezi räṛu robe Lu ri, ago a’dona nonye ono Ŋgwa Lu ro usuna taoro ndi sina.” ⁵ Yesu lu Marata ndi endreŋwa anyaro ndi Lazara be tawi. ⁶ Caoko ondro nda keri lazo te ekye Lazara adravoro oko, nda rite vose nda be kigye ana ya u’du aza ritu. ⁷ ’Dooko nda atate taeri’bai ri ekye: “Mì’de mago kovole Yuda ya.” ⁸ Taeri’bai zayitadrite ekye: “Miemba’ba, tu gi fere kälävube ono ya lidri lau ana leyite mi ovone kuni si; ago inye’do nya ugu tavoora oyine kovole ya?” ⁹ Yesu atate ekye: “Kitu alo si saa orivoya ’butealo foritu, ṛo ko inye ya? Tana nda se kabe aba kitu si ’de ko parapara, tana nda ka ŋgaeyi ’bädri ono ro ondre. ¹⁰ Oko ondro nda ka aba ŋgäkyi si nda o’dena ndi parapara, tana nda ŋgaeyi ako.” ¹¹ Yesu ata ta ono te ago ata ta kinja te ekye: “Bereazi amaro Lazara u’dute, oko moyina ’da ago mäpina mi na ’da.” ¹² Taeri’bai zayitadrite ekye: “Opi, ondro nda ka u’duu’du, nda upina mi ’da.” ¹³ Yesu ka iro ta odra Lazara ro atana ayani, oko taeri’bai kusu iro be nda atate ta u’du awi ro ayani. ¹⁴ Ago Yesu ititate ànyari ŋbelero ekye: “Lazara drate, ¹⁵ oko ta amiro ta ma yai’dwesi tana ma ko nda be, tana mìma robe. Mì’de mòyi ndare.” ¹⁶ Toma (äzite Lezo) atate taeri’bai azi ndaro ri ekye: “Ama cini mì’de mòyi troalo Miemba’ba be, tana màdra robe tro nda be!” ¹⁷ Ondro Yesu kesate oko, nda usu ase Lazara te u’duna lävute su. ¹⁸ Betaniya orivoya jä’dijä’di na ni Yerusalema yasi oso nätu ronye, ¹⁹ ago amba Yuda’bai ro ikyite Marata ndi Maria be ondrene ànya i’dwene ta odra ädrupi ànyaro rota. ²⁰ Ondro Marata keri tate Yesu ikyivoya oko, anya fote tesi drî ndaro utune, oko Maria rite zo ya. ²¹ Marata atate Yesu ri ekye: “Ondro aba nya’do gwo noŋwa Opi, ädrupi maro ri odrane i’do! ²² Oko mäni ndi ca yauono Lu ozona ŋgase nyabe ejina ’da miri.” ²³ Yesu atate anyari ekye: “Ädrupi miro adrina ’da.” ²⁴ Anya zatadrite ekye: “Mäni ndi nda adrina ’da tu äduro si.” ²⁵ Yesu atate anyari ekye: “Ma ni efo avoro ago adri yi. Nda se kabe taoma ma ya adrina ’da, nda kodra gica owo; ²⁶ ago nda se lidriidriro ago kabe taoma ma ya odrana ko alona. Mima ndi ta ono ya ya?” ²⁷ Anya zatadrite ekye: “Owo, Opi! Mama ndi mi ni Mesiya, Ŋgwa Lu ro, se kate ikyi ’bädri ya owo.” ²⁸ Ta ono atana Marata ri vosi oko, anya oyite kovole, ago zi endreŋwa anyaro Maria te iṛero. Marata atate anyari ekye: “Miemba’ba orivoya noŋwa, ago ka ta miro eji.” ²⁹ Ondro Maria keri ta ono te oko, anya ŋgate ago fote tiaŋwa tesi drî ndaro utune. ³⁰ (Yesu esa dri ko ’baŋwa ya, oko drigba vose Marata ko’bedribe nda be kigye ana ya.) ³¹ Lidri se zo yasi Maria be kayi ugu anya i’dwe ana soyite anya vo ondro ànya kondreyi anya ŋgate ago fote tiaŋwa tesi owo. Ànya kusuyibe anjioko anya kate ugu oyi ’budri dri liyine lau. ³² Maria esate vose Yesu be kigye ana ya, ago dori anya kondre nda te oko, anya ’dete nda pa, anya atate ekye: “Opi, ondro aba nya’do gwo noŋwa ädrupi maro ri odrane i’do.” ³³ Yesu ndre anya te ugu liyivoya, ago nda ndre lidri se anya be kpate ugu liyivoya oko; ya ndaro ŋgate kugbä ago nda te tusuro amba. ³⁴ Nda ejitate ekye: “Mìse nda te eŋwaro ya?” Ànya zayitadrite ekye: “Nyikyi ago mindre, Opi.” ³⁵ Yesu liyite. ³⁶ Lidri atate ekye: “Mindre nda lu nda tawi.” ³⁷ Oko rukä ànyaro atate ekye: “Nda ozo voondre te mano miako ri, nda ye ko ṛo niya? Inye’do aba ndana unina ṛo ko Lazara o’bane orine ni odravoya ya?” ³⁸ Yesu te tusuro ndra, nda oyite ’budri dri, se orivoya kugyi yi a’ba kuni te kalana ya. ³⁹ Yesu ta ànya te ekye: “Mìna kuni ’do.” Marata endreŋwa mano se kodrabe ro zatadrite ekye: “Opi, a’dona te uŋguuŋguro, ase nda be ono u’duna te su!” ⁴⁰ Yesu atate anyari ekye: “Miti ta ṛo ko miri makye mindrena ’desi Lu ro ndi ondro aba mimate owo ya?” ⁴¹ Ànya anayi kuni te, Yesu ndrevote kuru ago atate ekye: “Maye aro’boya miri, Täpi, tana nyeri ma te. ⁴² Mäni ndi nyeri ma te ondoalo, oko ma ata ono ta lidri noŋwa ono rota, tana ànya komayi robe anjioko nyezo ma ni.” ⁴³ Ta ono atana ndäri vosi oko, nda zi läzi te amba ekye: “Lazara, nyefo tesi!” ⁴⁴ Nda efote tesi, drí ndaro ndi pa be ävute boŋgo avo osero ’budri ya si, ndi boŋgo se ävu mi ndaro be sina be, Yesu atate ànyari ekye: “Nyònji nda, ago mì’ba nda koyi.” ⁴⁵ Amba lidri ro se kikyibe Maria re ana kondre tase Yesu koyebe ana te oko, ànya mayite nda ya. ⁴⁶ Oko rukä ànyaro goyite Parusii re ago itiyi tase Yesu koyebe ana tana te ànyari. ⁴⁷ Ago Parusii ndi kohanii ’desi be otoyikalate Taäyi’bai be ago atayite ekye: “Màyena e’di ya? Mindre talaro ro cini se mano ono ka ugu oyena be ono! ⁴⁸ Ondro mà’ba nda te ugu oyene inye, ’dicini omana ta ndi nda ya, ago drikaca’bai Roma’bai ro oyenayi ta ’da ago perenayi Yekalu amaro ’da ndi tu’de amaro be.” ⁴⁹ Alo ànyaro äzite Kayafa se ni Kohani Fopara yi ndroa ana si, atate ekye: “Ami orivoya amama yi! ⁵⁰ Mìni ṛo ko anjioko ṛo takado yi ämiri se ṛo mano alodi ri odrane ta lidri rota, ndrani tu’de cini tufune riya?” ⁵¹ Nda ata ta ono kote ole drî modo ndaro rosi; caoko, nda ṛo Kohani Fopara yi ndroa ana si, nda äŋgutate anjioko Yesu ka oye ṛo odrane lidri Yudai rota, ⁵² ago ko toto ànya ta, oko kpa lidri cini Lu ro se Kepererube ezine voaloya ’dialo ro. ⁵³ Ṛoni tu gi ana si oyi gwo mileya drikaca’bai Yudai ro rayitate Yesu ufune. ⁵⁴ Ago Yesu aba kote ŋbelero Yuda ya, oko e’be wari ana te ago oyite loto vocowa lomvo, ’ba’desi se äzibe Eperaima ana ya, ndi nda rite kigye taeri’bai ndaro be. ⁵⁵ Ago tu Karama Lävu Odra ro rote ti, ago lidri amba oyite ni ’bädri yasi Yerusalema ya ta a’do wäṛiro ro oyene teinye karama ri esaako. ⁵⁶ Ànya kayi ugu Yesu uṛi, ago ondro ànya kotoyikalate Yekalu ya oko, ànya ejiyi azi te ekye: “Nyusu miro be eŋwanye ya? Nda unina ṛo ko ikyine karama ya.” ⁵⁷ Kohanii ’desi ndi Parusii be ozoyitate ekye ondro ’diaza kuni vose Yesu be kigye te, beṛo ndäri tana itine, tana ànya kuruyi nda robe.

¹ U’du njidrialo teinye Karama Lävu Odra ro ri esaako oko, Yesu oyite Betaniya ya, ’ba Lazara, mano se nda adribe ni avo yasi ana roya. ² Ànya edeyi ŋgaonya tandrwedri rote lau ndäri, se Marata induru teni; Lazara ni alo aza ànya se koriyibe tara’biza lomvo Yesu be kai ro owo. ³ ’Dooko Maria ru kuru ŋga ŋgutruro se lagyena amba ana rote se edete cu ni nareda yasi, ndrite pa Yesu ro yasi, ago yo ànya te drikyiri anyaro si. Tägyi ndeṛindeṛiro ŋgaŋgutruro ro nde ya zo rote kpeye. ⁴ Alo aza taeri’bai Yesu ro ro, Yuda Isekariota; se ka oyebe ni drí ndaro ozone ana atate ekye: ⁵ “Tana e’di aba agye ŋgaŋgutruro ono ko mo’di kaci kama nätu si ago parata na ozo robe ati’bai ri niya?” ⁶ Nda ata ta ono te, ko ekye nda ti ta ati’bai rote, oko tana nda kugu yi. Nda ŋgyi gbolo parata rote ago ka andivo ndaro opana ni kigyesi. ⁷ Oko Yesu atate ekye: “Nye’be anya iṛe! Mi’ba anya koye ŋgase anya be sina ta tu ma osero rota. ⁸ Nyà’dona ondoalo lidri ati’bai robe ami lako, oko nyà’dona ko ondoalo ma be.” ⁹ Oti lidri ro amba keriyi tate ekye, Yesu orivoya Betaniya ya oko, ànya oyite lau, ko toto ta Yesu rota oko kpa Lazara ondrene, se Yesu kadribe ni avo yasi ana. ¹⁰ Ago kohanii ’desi rayitate kpa Lazara ufune, ¹¹ tana ta ndaro si amba Yudai ro kayite ànya ogazo ago kayite taoma Yesu ya. ¹² Tu kinjo si oko lowa amba se ikyibe Karama Lävu Odra ro roya eriyitate ekye Yesu kate ikyi Yerusalema ya. ¹³ Ago ànya ŋgoyi gwoṛi ice okyi ro rote ago foyite tesi dri ndaro utune, uguyi totrete ekye: “Nyäräṛu Lu! Lu käṛu nda se kabe ikyi ävuru Opi roya! Lu käṛu ’Bädri’ba Yisaraele ro!” ¹⁴ Yesu usu doŋgyi te ago rite driigye mute sina, oso se taegyi katabe ronye ekye: ¹⁵ “Nya’do ko turi ro, lidri Yerusalema ro! Mìndre ’bädri’ba amiro kate ikyi, kezi imu doŋgyi ombato’diro dri.” ¹⁶ Sedri käti, taeri’bai ndaro niyi ta ono ko; oko ondro eŋga Yesu te ’desi ya oko, tana egate ànya dri anjioko taegyi ata ono ṛo ta ndaro ta ago anjioko ànya yeyi ta ono te ta ndaro ta. ¹⁷ Lidri se a’dobe Yesu be tuse nda kuzi Lazara teni ’budri yasi ago adri nda teni avo yasi ana itiyi tase ka’dobe ana te. ¹⁸ Ono ni tase lowa ’debe drî ndaro utune owo; tana ànya eriyite nda ye talaro ro ono ni. ¹⁹ ’Dooko Parusii atate azi ri ekye: “Mìndre kadri, takado aza efo ko cu ämäri. Mìndre, ’bädri cini kate ugu oso nda vo!” ²⁰ Rukä Girikii ro orivoya ànya se koyiyibe Yerusalema ya mätune tu Karama Lävu Odra ro rosi ana lako. ²¹ Ànya oyiyite Filipo re (nda se ni Betesaida Galilaya ya yasi) ago atayite ekye: “’Desi, màle Yesu ondrene.” ²² Filipo oyite ago iti tana te Andarea ri, ago ànya riti oyiyite ago itiyi tana te Yesu ri. ²³ Yesu zatadri ànyaro te ekye: “Tu esate yauono Ŋgwa Lidri ro oroza ndra. ²⁴ Ma ugu taŋgye iti ämiri; keci kyifo ro orina ndi iṛe keci alo ro e’be gialo arina lutu gyini ya ago odrana lutu. Ago ondro kodrate oko, owana keci ndi amba. ²⁵ Nda se kabe adri modo ndaro ro lu ijena ’da; nda se yana kabe oso adri ndaro lomvo ’bädri ono ya ätina anya ndi le adri äduako ya. ²⁶ Nda se kolebe ruindune märi beṛo osone mavo, tana ruindu’ba maro orina ’da mabe vose mabe kigye ya. Ago Täpi maro orona ’dise kabe ruindu märi ’da. ²⁷ “Yauono ya maro ka loŋga; ago matana makye e’di ya? Matana te makye: ‘Täpi mi’ba tu ono kikyi ko märi ya?’ Hwa, oko ’doni tase ma’debe ikyine tana ro owo; tana moyi robe tu ruezaro ono yasi. ²⁸ Täpi nyezi taoro ävuru miro ri!” ’Dooko ata ta teni vo’buyakuru yasi ekye: “Mezi taoro te rigye, ago mayena kpa ndi to’di inye.” ²⁹ Lowa se kedrebe ana eri atate, ago rukä ànyaro ata tana te ekye, ’bu hwe ni, ago azakana ekye, “Malaika atani ndäri!” ³⁰ Oko Yesu atate ànyari ekye: “Ata se atabe ono ko ta maro ta, oko ta amiro ta. ³¹ Yauono tu esate vure ’bädri ono ro opeza, yauono miri’ba ’bädri ono ro avona ’da. ³² Ondro eŋga ma te kuru ni gyinidri oko, mesena lidri cini ’da märi.” ( ³³ Ta ono ata si nda ka’da odra se nda koyebe ruezane ono tana te.) ³⁴ Lowa zatadrite ekye: “Ota amaro ititabe ämäri ekye Mesiya orina ’da äduako. Oko, mi’de gwo atane mikye beṛo Ŋgwa Lidri ro eŋgane kuru eŋwanye ya? Ŋgwa se Lidri ro ono a’di owo ya?” ³⁵ Yesu zatadrite ekye: “Ŋgaeyi a’dona ’da ami lako tuna fere. Ami dri ŋgaeyi be ono nyùgu aba ri liti amiro ya, tana ukyi vouni ota ami ’da; tana nda se kabe aba vouni yasi ni vose nda ka ugu oyi kigye ko. ³⁶ Mìma ŋgaeyi ya, ’dooko, ami dri ṛo anya be, tana nyà’do robe lidri ŋgaeyi ro.” Ta ono atana Yesu ri vosi oko, nda oyite ago da’do andivo ndaro teni ànyari. ³⁷ Nda ye talaro ro ca amba ànya milesi oko, ànya mayi kote nda ya, ³⁸ tana tase nebi Yesaya katabe ’do ka’do robe ŋgye se ekye: “Opi, a’di ma ni lazo se mìtibe ono ya ya? Opi ka’da mbara ndaro te a’di riya?” ³⁹ Ago ta’doro ànya te mbaraako taomane, tana Yesaya ata kpate ekye: ⁴⁰ “Lu ini mi ànyaro te ago se tauni drî ànyaro rote, tana mi ànyaro ka’do robe voondreako, ago drî ànyaro ka’do robe tauniako, ukyi ànya egoyi ’da mare, märi ànya edene.” ⁴¹ Yesaya ata ta ono te tana nda ndre ’desi Yesu rote ago atate ta ndaro ta. ⁴² Caoko, drikaca’bai amba Yudai ro mayitate Yesu ya, oko ta Parusii rota ànya atayi tana kote ŋbelero, ukyi äsi ànya ’da tesi ni zotaeriro yasi. ⁴³ Ànya luyi räṛu ni lidri resi te ndrani räṛu ni Lu resi ri. ⁴⁴ Yesu atate ṛeṛe ekye: “Nda se kabe taoma ma ya ka ko toto taoma ma ya ayani oko kpa nda se kezo mabe ono ya. ⁴⁵ Nda se kabe ma ondre ka kpa nda se kezo mabe ono ondre. ⁴⁶ Mikyite ’bädri ya ŋgaeyi ro, tana vona se cini kabe taoma ma ya beṛo ko orine vouni ya. ⁴⁷ “Ondro ’diaza keri lazo maro te oko koro anya kote, mape vure ndaro ko. Mikyite, ko vure ’bädri ro opene, oko anya opane ayani. ⁴⁸ Nda se kabe ma ogazo ago kuru lazo maro ko nda ’diaza be se opena vure ndaro ’da. Ata se matabe opena vure ndaro ’da tu äduro si! ⁴⁹ Ono orivoya ta endaro yi, tana mata kote drikaca ma modo rosi, oko Täpi se kezo mabe ta ma ni tase beṛo atane ago opene ’do opene. ⁵⁰ Ago mäni ndi ota ndaro kani adri äduako ozo. Tase mabe atana, kpani, tase Täpi kitibe märi atane owo.”

¹ Dri käti ni tu Karama Lävu Odra ro risi. Yesu nite anjioko tu esate ndäri ’bädri ono e’beza ago oyine Täpi re. Nda ondoalo lu ànya se ’bädri ya se orivoya nda modo ro ono te, ago nda lu ànya te le ädu ya. ² Yesu ndi taeri’bai ndaro be riyite ŋgaonya tandrwedri ro onya. Kicu’ba ’ba tavousu drí Yesu ro ozoro rote nja ya Yuda ŋgwa Simona Isekariota ro roya. ³ Yesu nite anjioko Täpi ozo mbara ṛote kpeye ndäri, nda nite anjioko nda ikyi ṛoni Lu re ago ka ugu oyi Lu re. ⁴ Ago nda ŋgate ni tara’biza lomvo, ru boŋgo drîyasi ndaro te, ago vu boŋgo lomvo oyoro te kundu ndaro ya. ⁵ ’Dooko nda so gyi te deŋbele ŋgaojoro ya ago eto pa taeri’bai ro ojo te ago yo ànya te boŋgo lomvo oyoro kundu ndaro ya ana si. ⁶ Nda ikyite Simona Petero re, se atate ndäri ekye: “Nya oye pa maro ojone ya Opi?” ⁷ Yesu zatadri ndaro te ekye: “Mini tase mabe ugu oyena yauono ko, oko minina ’da liyaro.” ⁸ Petero atate ekye: “Miri pa maro ojone i’do alona!” Yesu zatadrite ekye: “Ondro majo pa miro kote, miri a’done taeri’ba maro i’do alona.” ⁹ Simona Petero zatadrite ekye: “Opi, mijo ko toto pa maro ayani, ka’do inye; mijo drí maro ndi drî maro be kpa!” ¹⁰ Yesu atate ekye: “’Dise kalasa ṛote orivoya kpeye wäṛiro ago ndäri andivo ndaro ojone i’do, e’be gialo pa ndaro ayani. Ami cini orivoya wäṛiro, e’be toto ’dialo ayani.” ¹¹ Yesu ni nda se ka oyebe drí ndaro ozone ṛote nja; ta’doro ni nda ’degwo atane ekye: “Ami cini orivoya wäṛiro, e’be toto ’dialo ayani.” ¹² Ondro Yesu konde pa taeri’bai ro ojona te oko, nda ’ba boŋgo drîyasi ndaro te kovole ago gote vo ndaro ya tara’biza lomvo. Nda ejitate ekye: “Inye’do mìni tase mayebe ämiri ono ndiya? ¹³ Nyà ma uzi Miemba’ba ago Opi, ago ṛo kado ämiri oyene inye, tana ma ṛo orivoya inye. ¹⁴ Ma, Opi amiro ago Miemba’ba amiro, majo pa amiro te yau. Ka’do inye beṛo kpa ämiri pa azi ro ojone. ¹⁵ Maka’da taka’daro te ämiri, tana mìye ta robe kpa oso mayebe ämiri ronye! ¹⁶ Ma ugu taŋgye iti ämiri: iyeäṛi ko para ndrani ’desi ndaro ri, ago lazo’ba ko para ndrani nda se kezo nda be ri. ¹⁷ Yauono oso mìni taŋgye bete ono ronye, nyà’dona ndi yai’dwesi ondro mì’ba te taoye ya owo! ¹⁸ “Ma ko ta ami cini ro ata; mäni ànya se manji be te. Oko beṛo taegyi ri a’done ŋgye se kabe ata ekye: ‘Mano se konya ŋgaonya be mabe voaloya gozaru gini kyila’baazi ro märi.’ ¹⁹ Ma ta ono itina ämiri yau teinye dri a’do ako, tana ondro kate a’do oko, mìmana ndi anjioko Ma ni Nda owo. ²⁰ Ma ugu taŋgye iti ämiri: nda se kabe ’dise ma ozona uru ka kpa ma uru; ago nda se kabe ma uru nda ka nda se kezo mabe uru.” ²¹ Ta ono atana Yesu ri vosi oko, ya ndaro ŋgate ägbula tusu ro ago ayote ŋbelero ekye: “Ma ugu taŋgye iti ämiri: alo amiro kaoye ni drí maro ozone.” ²² Taeri’bai londrevote azi dri, te kpeye wiriwiriro ’dise nda usu ta be lomvoigye ta. ²³ Alo taeri’bai ro se Yesu kulube, rite gbo Yesu roya. ²⁴ Simona Petero ava nda gwo ago atate ekye: “Nyeji nda, nda ka ugu ta a’diro ata.” ²⁵ Ndi taeri’ba se ana shwete loto ’de Yesu re ago ejitate ekye: “A’di owo ya, Opi?” ²⁶ Yesu zatadrite ekye: “Nda ni se moye ambata ono o’bene deŋbele ya ago ozona rigye owo.” Ndi nda ru kyepeŋwa ambata rote, sote kigye, ago ozote Yuda, ŋgwa Simona Isekariota ro ri. ²⁷ Ago dori Yuda kuru ambata te oko, Satani cite nda ya. Yesu atate Yuda ri ekye: “Tase beṛo miri oyene ono, miye ri ndri!” ²⁸ Alo aza azii ro se tara’biza lomvo ni kote Yesu ’debe atane ndäri nonye eta. ²⁹ Yuda be ṛoni dri’ba gbolo parata ro ro ono, rukä taeri’bai ro kusu iro be Yesu ititate ndäri oyine ŋgase ànya kolebe ta karama rota ogyene, kode ŋga azaka ozone ati’bai ri. ³⁰ Yuda ru ambata te ago fote tesi tiaŋwa ndri. Ago ṛote ŋgäkyi yi. ³¹ Ofo Yuda ro vosi oko, Yesu atate ekye: “Yauono ’desi Ŋgwa Lidri ro ro aka’date, yauono ’desi Lu ro aka’date nda si. ³² Ago ondro ’desi Lu ro aka’date nda si, ’dooko Lu ka’dana ’desi Ŋgwa Lidri ro ro ’da andivo ndaro ya, ago nda oyena ’da inye tiaŋwa ndri. ³³ Ŋgàgaŋwa maro, ma’dona kote ami yibe tuna madaro. Mìṛina ma ’da; oko ma ta iti ämiri yau oso mitibe drikaca’bai Yudai ro ri ronye. ‘Mìnina ko oyine vose mabe ugu oyi kigye ya.’ ³⁴ Ago yauono ma ota to’di ozo ämiri; nyùlu azi. Oso mulu ami be ronye, beṛo kpa ämiri azi lune. ³⁵ Ondro nyà’dote ŋgalu be azi ri, ’dooko ’dicini unina ndi anjioko ami orivoya taeri’bai maro.” ³⁶ Simona Petero eji nda te ekye: “Nya oyi gaŋwaro ya Opi?” Yesu zatadrite ekye: “Minina ko osone mavo yau vose mabe ugu oyi kigye ya, oko misona ’da liyaro mavo.” ³⁷ Petero ejitate ekye: “Opi, mänina ko osone mivo yau etaya? Ma orivoya nja odrane mi ta!” ³⁸ Yesu zatadrite ekye: “Mi ndi endaro nja odrane ma ta ya? Ma ugu taŋgye iti miri: käti gogo ri opeako migana kala maro ’da perena nätu.”

¹ Yesu ititate ànyari ekye: “Nyà’do ko milo’be be ago milaba be. Mìma Lu ya ago mìma kpa ma ya. ² Zoya orivoya amba zo Täpi maro roya, ago ma oyi vo edene ämiri. Mitina ta ono ko ämiri ondro ka’do gwo i’do owo. ³ Ago ondro moyi mede vo te ämiri oko, megona ’da ago märuna ami ’da andivo maro re, tana nyà’do robe vose mabe kigye ya. ⁴ Mìni liti se kabe oyi vose mabe oyi kigye ro ṛote.” ⁵ Toma atate ndäri ekye: “Opi, mä̀ni vose nyabe oyi kigye ko, ka’do inye mä̀nina liti osaza lau eŋwanye ya?” ⁶ Yesu zatadri ndaro te ekye: “Ma ni liti yi, taŋgye yi, ago adri yi, ’diaza ikyi ko Täpi re, e’be gialo ma si.” ⁷ Nda atate ànyari ekye: “Yauono oso mìni mabe ono ronye, mìnina Täpi maro kpa, etoni yau oyi gwo mileya mìni nda te ago mìndre nda te.” ⁸ Filipo atate ndäri ekye: “Opi, nyaka’da Täpi ämäri, ’do ni tase ama cini màlebe owo.” ⁹ Yesu zatadrite ekye: “Ma’dote ami cini be tuna amba; drigba mini ma ko ya Filipo? Nda se ndre ma te ndre Täpi kpate. Ago nyata gwo mikye: ‘Nyaka’da Täpi ämäri eŋwanye ya?’ ¹⁰ Filipo, inye’do mima ko, ma Täpi ya ago Täpi ma ya ya?” Yesu atate taeri’bai ndaro ri ekye: “Ata se matabe ämiri ono, ikyi ko ni mare si. Täpi, se kabe ori ma ya, kani losi modo ndaro ro oye. ¹¹ Mìma ma ya ondro ma te ata makye ma Täpi ya ago Täpi ma ya owo. Ondro ko, mìma ta ŋgase moyebe rosi. ¹² Ma ugu taŋgye iti ämiri: nda se kabe taoma ma ya oyena tase mabe oyena ’do; owo, nda oyena ŋgase ’desipara kpa, tana ma ugu oyi Täpi re. ¹³ Ago mayena ŋgase nyàbe ejina ävuru maro si ndi, tana ’desi Täpi ro aka’da robe Ŋgwa si. ¹⁴ Ondro nyèji ma ta ŋga aza rota ävuru maro si, mayena anya ndi. ¹⁵ “Ondro nyùlu ma, mìrona ota maro ndi. ¹⁶ Mejina Täpi ’da, ago nda ozona Lepe’ba aza ’da ämiri, se orina ’da ami be äduako. ¹⁷ Nda orivoya Tori yi, se kani taŋgye Lu ro ka’da, ’bädri ni ko nda urune, tana ni ko nda ondrene kode unine. Oko mìni nda ni, tana nda ka ori ami be ago orivoya ami ya. ¹⁸ “Ondro moyite me’bena ami ko oso kyemvoi ronye; mago mikyina ’da amire. ¹⁹ Fere iga oko ’bädri ondrena ma ko tona, oko mìndrena ma ’da; ago tana ma gi ori, mìrina kpa. ²⁰ Ondro tu ana kate esa oko, mìnina ndi anjioko ma Täpi maro ya ago ami orivoya ma ya, kpa oso ma orivoya ami ya ronye. ²¹ “Nda se kabe ota maro uru ago kabe ànya oro, nda ni se kabe ma lu owo. Täpi maro luna nda se kabe ma lu ndi, muluna nda kpa ago maka’dana andivo maro ndäri.” ²² Yuda (Ko Yuda Isekariota) atate ekye: “Opi, koye a’done eŋwanye mikye yaka’dana andivo iro ’da ämäri ago ko ’bädri ri niya?” ²³ Yesu zatadri ndaro te ekye: “Nda se kabe ma lu orona ŋgaemba maro ’da. Täpi maro luna nda ’da, ago ma ndi Täpi maro be mìkyina ’da nda re ago màrina ’da nda be. ²⁴ Nda se kulu ma ko ro ŋgaemba maro ko. Ago ŋgaemba se nyèribe ono ko orivoya maro, oko ikyi ni Täpi, se kezo ma be resi. ²⁵ “Miti tase ono te ämiri ’dooko ma drigba orivoya ami yibe. ²⁶ Lepe’ba, seni Tori Alokado se Täpi ezona ’da ävuru maro si, embana ta cini ’da ämiri, ago o’bana ami ’da tase cini mitibe ämiri ono tana oyine. ²⁷ “Taliatokpe ni se mabe e’bena ami be owo; orivoya taliatokpe modo maro ro se mabe ozona ämiri, mozo anya ko oso ’bädri kabe oyena ronye. Nyòlo’be mi ko ago nyàlaba mi ko; nyà’do ko turiro. ²⁸ Nyèri ma te atavoya ämiri makye: ‘Mate ugu oyi, oko megona ’da amire.’ Ondro nyùlu ma ndi, nyà’dona ndi yai’dwesi tana ma ugu oyi Täpi re, tana nda orivoya ’desipara ndrani märi. ²⁹ Miti ta ono te ämiri teinye tana ri a’do ako, tana ondro ka’do te oko, mìmana ’da. ³⁰ Mänina ko atane ämiri amba madaro, tana miri’ba ’bädri ono ro kate eziikyi. Nda mbaraako mädri, ³¹ oko beṛo ’bädri ri unine anjioko mulu Täpi, ’ba ni ma ŋga cini oye oso nda kota mabe ronye. “Nyìkyi mì’de mòyi ni vo ono yasi.

¹ “Ma ni kono endaro yi, ago Täpi maro ni kyi’di’ba yi. ² Nda kani gwoṛi se cini ma ya wa doŋgo ko ogana, ago nda kani gwoṛi se cini wa doŋgo be ofona, tana ka’do robe wäṛiro ago kowa robe amba. ³ Ede ami te wäṛiro nja ŋgaemba se mozobe ämiri si. ⁴ Mìri ma ya ago marina ndi ami ya. Gwoṛi unina ko doŋgo owane andivo anyaro si, unina owane gialo ondro ka ori kono ya. Kpa oso inye mìnina ko doŋgo owane e’be gialo nyà ori ma ya. ⁵ “Ma ni kono yi, ago ami ni gwoṛi yi. Nda se kabe ori ma ya, ago ma nda ya, owana doŋgo ’da amba, tana mìnina ko ŋga aza oyene teinye ma ako. ⁶ Nda se kori ko ma ya agana ndi tesi oso gwoṛi ronye, ago owina gwo; gwoṛi oso iyi ronye otote ago adate asi ya, ndi ànya jete. ⁷ Ondro nyà ori ma ya ago ata maro ka ori ami ya nyèjina ŋga aza se mìlebe ndi, ago nyà’dona ’da sina. ⁸ Aka’da a’do ’desi Täpi maro rote doŋgo owa amba amiro si; ago ta ono si nyà’dote taeri’bai maro. ⁹ Mulu ami kpa oso Täpi maro kulu mabe ronye; mìri ŋgalu maro ya. ¹⁰ Ondro mìro ota maro te, mìrina ndi ŋgalu maro ya, kpa oso maro ota Täpi maro robe ago ma ori ŋgalu ndaro ya ronye. ¹¹ “Miti ta ono te ämiri tana ’dooko riyä maro ka’do robe ami ya ago riyä amiro ka’do robe ndra. ¹² Ota maro ni ono: nyùlu azi, kpa oso mulu ami be ronye. ¹³ Ŋgalu se parandra lidri unina ndi a’done sina bereazii ndaro ri anjioko adri ndaro ozone ànya ta. ¹⁴ Ago ami ni bereazii maro ondro mìye tase mata ami be oyene te owo. ¹⁵ Mäzi ami ko tona ruindu’bai, tana ruindu’ba ni tase ’desi ndaro ka ugu oyena ko. Vona ro, mäzi ami bereazii, tana miti tase cini meribe ni Täpi maro resi te ämiri. ¹⁶ Mìnji ma koni; manji ami ni ago ma’ba ami ni oyine ago doŋgo amba owane, doŋgo se kabe ori madaro ’do. Ago Täpi ozona ŋgase nyàbe ejina ni nda si ävuru maro si ndi. ¹⁷ Ago, ono, ni tase mata ami be sina owo, nyùlu azi. ¹⁸ “Ondro ya ’bädri ro ka oso ami lomvo, mìyi tana anjioko yana osote ṛo malomvo käti. ¹⁹ Ondro nyà’dote ’bädri ro, ’dooko ’bädri luna ami ’da modo ndaro ro ro. Oko manji ami ni ’bädri ono yasi, ago ami ko anyaro, ’do ni tase ya ’bädri ro kabe oso ami lomvo owo. ²⁰ Mìyi tase mitibe ämiri ono tana: ‘Iyeäṛi ko ’desipara ndrani ’desi ndaro ri.’ Ondro ànya kezayi ma te, ànya ezanayi ami kpa ’da; ondro ànya koroyi ŋgaemba maro te, ànya oronayi amiro kpa. ²¹ Oko ànya oyenayi tase cini ono ’da ämiri tana ami orivoya maro; tana ànya niyi nda se kezo mabe ko. ²² Aba ondro ka’do mikyi ko ago mata ko ànyari, a’done ànyari taenji takozi robe i’do. Oko yauono ànya te teinye megyegye aza ako ta takozi ànyaro rota. ²³ Nda se yana kabe oso malomvo yana oso kpa Täpi maro lomvo. ²⁴ Ànya a’donayi ko taenji takozi ro ako aba ondro maye ŋgase ’diaza ye kote ono kote ànya lako; tana, ànya ndreyi tase mayebe te ago ya nai osote malomvo ndi Täpi maro be. ²⁵ Caoko, ono ṛo a’done inye tana tase egyite Ota ànyaro ya ka’do robe ŋgye. Se ekye: ‘Ya ànyaro osote malomvo teinye ta aza ako.’ ²⁶ “Lepe’ba, seni Tori Alokado ikyina ’da, Tori se kani taŋgye Lu ro ka’da ago nda ka ikyi ni Täpi resi. Mezona nda ’da amire ni Täpi resi, ago nda itina ta maro ’da. ²⁷ Ago ami kpa, nyìtina ta maro ’da, tana nyà’dote ṛo mabe ni etovoya.

¹ “Miti ta ono te ämiri, tana ukyi nyè’be taoma amiro ’da. ² Äsina ami ’da tesi ni zoitaeriro yasi, ago tu esana ’da ’dise kabe ami ufu usuna ta ’da ekye, ta ono oyesi nda ka ugu ruindu Lu ri. ³ Lidri oyena ŋgase kwoi ndi ämiri tana ànya niyi Täpi ko ca ma. ⁴ Oko miti ta ono te, tana ondro tuna kesate ànyari ŋgase kwoi oyeza oko, mìyina tase mitibe ämiri ono tana ’da. “Miti ŋgase kwoi tana kote ämiri ni etovoya, tana ma orivoya ami yibe. ⁵ Oko yauono ma ugu oyi nda se kezo mabe re, caoko alo aza amiro eji ma ko ma ugu oyi eŋwaro. ⁶ Tana yauono miti tase kwoi te ämiri, ya amiro te twi tusu be. ⁷ Oko ma ugu taŋgye iti ämiri: a’dona kadopara ämiri ondro ka’do moyite owo, tana ondro moyi kote Lepe’ba ikyina ko amire. Oko ondro moyite, ’dooko mezona nda ’da amire. ⁸ Ago ondro nda kikyite nda lukuna lidri ’bädri ro ’da anjioko ànya orivoya koziro ta takozi rota ago ta tase orivoya ŋgye rota ago ta vure Lu ro rota. ⁹ Ànya orivoya koziro ta takozi rota, tana ànya mayi ta koma ya; ¹⁰ ànya orivoya koziro ta tase taŋgye ro rota, tana ma ugu oyi Täpi re ago mìndrena ma ko tona, ¹¹ ago ànya orivoya koziro ta vure rota, tana miri’ba ’bädri ono ro ape vurena ṛote nja. ¹² “Ma ta amba be itine ämiri, oko yauono a’dona ndi amba ämiri uŋgyine. ¹³ Caoko, ondro, Tori kikyite, se kabe ni taŋgye Lu ro ka’da, nda lepena ami ’da le taŋgye cini ya. Nda atana ko drikaca modo ndaro rosi, oko nda opena tase nda kabe erina ayani ago itina ta ŋgase kabe ikyi ro ’da. ¹⁴ Nda ezina taoro ’da märi tana nda uruna tase mabe atana ’da, ago itina ànya ’da ämiri. ¹⁵ Ŋgase cini Täpi maro be sina orivoya maro; ’bani ma’de gwo atane makye, Tori uruna ŋgase mozobe ndäri ’da ago itina ànya ’da ämiri. ¹⁶ “Fere iga oko mìndrena ma ko tona, ago ’dooko fere voigyesi oko mìndrena ma ’da.” ¹⁷ Rukä taeri’bai ndaro ro ejiyitate iyivoya ekye: “Ata ono takacina e’di ya? Nda ititate ämäri ekye, fere iga oko màndrena nda ko, ago ’dooko fere voigyesi oko màndrena nda ’da, ago nda ata kpa ekye: ‘Tana ma ugu oyi Täpi re.’ ¹⁸ Ata ‘fere iga’ ono takacina e’di ya? Mä̀ni tase nda ka ugu tana ata ono ko!” ¹⁹ Yesu nite anjioko ànya leyite nda ejine, ago nda atate ànyari ekye: “Matate makye: ‘Fere iga oko mìndrena ma ko, ago ’dooko fere voigyesi oko mìndrena ma ’da.’ Ono ni tase nyà ugu tana ejina amivoya owo ya? ²⁰ Ma ugu taŋgye iti ämiri, mì’bena kuku ’da ago nyìliyina ’da, oko ’bädri a’dona ’da riyä si, nyà’dona ’da tusuro, oko tusu amiro ozaruna ’da riyä ro. ²¹ Ondro toko ka oyete utine oko, anya orivoya tusuro tana tu anyaro ruezaro esate; oko ondro kuti ŋgwa te oko, anya ije ta rueza anyaro te, tana anya te riyä ro tana äti ŋgwa te ’bädri ya. ²² Tase ami be oso inye: Yauono ami orivoya tusuro, oko mandrena ami ’da to’di, ago ya amiro a’dona ’da twi riyä be, riyä se ’diaza unina ko urune ni ami rigyesi. ²³ “Tu ana kikyite oko, nyèjina ma ko ta ŋga aza rota. Ma ugu taŋgye iti ämiri; Täpi ozona ŋgase nyàbe ejina ni nda sisi ’da ämiri ävuru maro ya. ²⁴ Ca le yauono nyèji ŋga aza kote ävuru maro ya, nyèji ago nyùsuna ’da, tana riyä amiro ka’do robe twi. ²⁵ “Ma ta kwoi itina ämiri lapidriopi si. Oko tu esana ’da ’dooko matana ta kote lapidriopi si, oko matana ta Täpi ro ṛo ŋbelero ämiri. ²⁶ Ondro tu ana kate esa oko, nyèjina nda ’da ävuru maro ya; ago mata ko makye mejina nda ’da ta amiro ta. ²⁷ Tana Täpi andivona lu ami. Nda ka ami lu tana nyùlu ma ago mìmate anjioko mikyite ni Lu resi. ²⁸ Mikyite ni Täpi resi, ago mikyite ’bädri ya, ago yauono ma ugu ’bädri e’be ago ma ugu oyi Täpi re.” ²⁹ ’Dooko Taeri’bai ndaro atate ndäri ekye: “Yauono nya ugu ata ro ŋbelero teinye lapidriopi ako ta atavoya. ³⁰ Yauono mä̀ni ndi anjioko mini ŋga cini te; mile ’diaza kote mi ejine taeji si. Ta ono ’ba ama te taomane anjioko nyikyite ni Lu resi.” ³¹ Yesu zatadri ànyaro te ekye: “Yauono mìma ndi ya? ³² Tu kate ezi esa ago ṛote nja orivoya noŋwa, ’dooko ami cini nyà’dona ’da rupereperero, ’dialo ogona gi ’ba modo ndaro roya, ago e’bena ma ’da iṛe. Oko ma ko orivoya iṛe, tana Täpi orivoya mabe. ³³ Miti tase ono te ämiri, tana nyà’do robe taliatokpe be a’do rudro’be rosi ma ya. ’Bädri o’bana ami ’da ruezane. Oko nyà’do turiako! Mape ’bädri te ṛe.”

¹ Ata kwoi ondena Yesu ri vosi oko, nda ndrevote vo’buyakuru ya ago atate ekye: “Täpi, tu esate. Miye taoro Ŋgwa miro ri, tana Ŋgwa koye taoro robe miri. ² Tana nyozo drikaca te ndäri ’dicini dri, tana nda kozo adri äduako robe vona se cini nyozobe ndäri kai ri. ³ Ago adri äduako anjioko mi unine, mi toto ni Lu endaro owo, ago Yesu Kristo unine, se nyezobe ono. ⁴ Maka’da ’desi miro te ’bädri ya; mande losi se nyozobe märi oyene te. ⁵ Täpi miye taoro märi mikandra yauono, taoro se ma’dobe sina mibe teinye ’bädri o’baako ono. ⁶ “Ma’ba mi te unine ànya se nyozobe märi ’bädri yasi ono ri. Ànya ni miro, ago nyozo ànya te märi. Ànya royi ata miro te, ⁷ ago yauono ànya niyi ndi ŋgase cini nyozobe märi ono ka ikyi ni miresi. ⁸ Mozo lazo se nyozobe märi ono te ànyari, ago ànya ruyi anya te, ànya niyi ndi endaro anjioko mikyite ni miresi, ago ànya ma ndi anjioko nyezo ma ni. ⁹ “Ma mätu ànya ta, mämätu ko ’bädri ta oko ànya se nyozobe märi ta, tana ànya ni miro. ¹⁰ Ŋgase cini mabe sina orivoya miro, ago ŋga cini se mibe sina orivoya maro; ago ’desi maro aka’date ànya si. ¹¹ Ago yauono ma te ikyi mire, ma ko orivoya tona ’bädri ya, oko ànya orivoya ’bädri ya. Täpi Alokado! Nyäti ànya londroro mbara ävuru miro rosi, ävuru se nyozobe märi ono, tana ànya ka’do robe alo kpa oso mi ndi mabe orivoya alo ono ronye. ¹² Mabe dri orivoya ànya be, mäti ànya te londroro mbara ävuru miro rosi, ävuru se nyozobe märi ono. Magaga ànya te, ago alo aza ànyaro je kote, e’be gialo mano se a’bate ṛo ujene ono; tana Taegyi ka’do robe ŋgye. ¹³ Ago yauono ma te ikyi mire, ago ma tase kwoi ata ’bädri ya tana ànya ka’do robe riyä maro be ya ànyaro yasi twitwi. ¹⁴ Mozo lazo miro te ànyari, ago ya ’bädri ro osote ànya lomvo, tana ànya ko ’bädri ro, kpa oso ma ko ’bädri ro ono ronye. ¹⁵ Ma ko mi eji ànya urune ni ’bädri yasi, oko ma mi eji ànya ätine londroro ni nda se Kozi ono ri. ¹⁶ Kpa oso ma’do ko ’bädri ro ono ronye, ànya a’do ko ’bädri ro. ¹⁷ Midi ànya andivo miro ri taŋgye si; ata miro orivoya taŋgye yi. ¹⁸ Mazo ànya te ’bädri ya, kpa oso nyezo ma te ’bädri ya ronye. ¹⁹ Ago ta ànyaro ta madi andivo maro te miri, tana ta’doro, kodiyi andivo ànyaro robe kpa endaro miri. ²⁰ “Mämätu ko gialo ànya ta, oko kpa ànya se kabe taoma ma ya lazo ope ànyaro si ta. ²¹ Ma mätu tana ànya cini ka’do robe alo. Täpi! Kpa oso mi orivoya ma ya ago ma mi ya ronye, mi’ba ànya ka’do ama ya. Mi’ba ànya ka’do alo, tana ’bädri koma robe anjioko nyezo ma ni. ²² Mozo ’desi segi alo nyozobe märi ono te ànyari, tana ànya ka’do robe alo, kpa oso mi ndi mabe orivoya alo ono ronye. ²³ Ma ànya ya ago mi ma ya, tana ànya ka’do robe troalo, tana ’bädri kuni robe anjioko nyezo ma ni ago anjioko nyulu ànya ndi oso nyulu mabe ronye. ²⁴ “Täpi! Nyozo ànya te märi, ago male ànyari a’done mabe vose mabe kigye ya, tana ànya kondreyi ’desi maro robe, ’desi se nyozobe märi ono; tana nyulu ma teṛo teinye ’bädri o’ba ako. ²⁵ Täpi Taŋgye’ba! ’Bädri ni mi ko, oko mäni mi ndi, ago se kwoi niyi ndi anjioko nyezo ma ni. ²⁶ Ma’ba mi te unine ànyari ago mayena ndi ’duro inye, tana ŋgalu se nya’dobe sina märi ono ka’do robe ànya ya, ago ’dooko ma’do robe kpa ànya ya.”

¹ Mätu ono oyena Yesu ri vosi oko, nda oyite taeri’bai ndaro be goloŋwa Kidrona tasi. Ämvu orivoya vo ana ya, ago Yesu ndi taeri’bai ndaro be oyiyite kigye. ² Yuda, driozo’ba ni vo ana ṛote, tana tuna amba Yesu dro’berute lau taeri’bai ndaro be. ³ Ago Yuda oyite ämvu ana ya, ru gboko kyila’bai Roma’bai rote nda be, ago rukä vookwa’bai Yekalu ro se kohanii ’desi ndi Parusii be zoyite; ànya toyiyi lakaza kyila ro ago ruyi lamba te ndi gala be. ⁴ Yesu ni ŋga cini se ka oyebe a’done ndäri ṛote, ’dooko nda efote mileya ago eji ànya te ekye: “Nyà ugu a’di uṛi ya?” ⁵ Ànya zayitadrite ekye: “Yesu Nazareta ro.” Yesu atate ekye: “Ma ni nda owo.” Yuda, driozo’ba, edrevoya lau ànya be. ⁶ Ondro Yesu katate ànyari ekye: “Ma ni nda owo” oko, ànya shwete kovole ago ’deyite gyini dri. ⁷ Yesu eji ànya te kpa to’di ekye: “Nyà ugu a’di uṛi ya?” Ànya atate ekye: “Yesu Nazareta ro.” ⁸ Yesu atate ànyari ekye: “Miti ta ṛote nja ämiri makye ma ni nda owo. Ondro, ka’do nyà ugu ma uṛi, mì’ba azaka se kwoi koyi.” ( ⁹ Nda ata ta ono te tana tase nda katabe ka’do robe endaro se ekye: “Täpi! Mije aza alo ànya se nyozobe märi ono ro kote.”) ¹⁰ Simona Petero, se ṛo bando be ana, eŋgye anya te ago ga ruindu’ba Kohani Fopara rote ga bi ndaro drígwo yasi te ätu. Ävuru ruindu’ba ana ro Maluku. ¹¹ Yesu atate Petero ri ekye: “Miso bando miro kovole vona ya! Inye’do nyusu miro be ṛo ko märi kofo ruezaro se Täpi maro kozobe märi ono umvune ya?” ¹² ’Dooko kyila’bai Roma’ba ro ndi dri’ba ànyaro ota ozo robe ndi vookwa’bai Yudai robe ruyi Yesu te, embeyi nda te, ¹³ ago uguyi nda te käti Ana re. Nda ni ambago Kayafa ro, se ni Kohani Fopara yi ndroa ana si. ¹⁴ Ono ni Kayafa se edretabe drikaca’bai Yudai ro ri ekye ṛo orivoya kadopara beṛo ’di alo ri odrane lidri cini ta owo. ¹⁵ Simona Petero ndi taeri’ba aza be sote Yesu vo. Taeri’ba se aza ana Kohani Fopara ni ṛote kado, ago nda cite Yesu be goko zo Kohani Fopara ro roya, ¹⁶ ’dooko Petero rite tesi dereŋwa kala. ’Dooko taeri’ba se aza uniuniro Kohani Fopara ri ana gofote tesi, atate ŋguti se dereŋwa kala ana ri, ago oloci Petero te goro ya. ¹⁷ Ŋguti se dereŋwa kala ana atate Petero ri ekye: “Mi ṛo ko kpa alo aza taeri’bai mano ono ro owo ya?” Petero zatadrite ekye: “Hwa, ma i’do.” ¹⁸ Ki’dwe i’dwe tawi, ago ruindu’bai ndi vookwa’bai be leruyi asi te iṛi si ago edreyite gbikyi lomvoigye, kayi ugu asi owi. Ago Petero oyite ago edrete ànya re, ka ugu asi owi. ¹⁹ Kohani Fopara eji Yesu te ta taeri’bai ndaro rota ago ta ŋgaemba ndaro rota. ²⁰ Yesu zatadrite ekye: “Ondoalo matate ṛo miamba ya ’dicini ri, ŋgaemba cini maro ayete ṛo zoitaeriro yasi ago Yekalu ya, vose lidri cini ka kalaoto kigye ya. Mata ta aza alona ko ndrwiro. ²¹ Nya ma eji etaya? Nyeji lidri se keri ta maro be. Nyeji ànya tase mitibe ànyari ta; ànya niyi tase matabe te.” ²² Ondro Yesu katate nonye oko, alo aza vookwa’bai ro lau ana ca nda te ago atate ekye: “Mi’de be atane Kohani Fopara ri nonye etaya?” ²³ Yesu zatadrite ekye: “Ondro ka’do mata ta aza te koziro, nyiti tana ’dicini noŋwa ono ri tana ’do e’diyi. Oko ondro tase matabe ono ndi taŋgye yi, mi’bi ma te etaya?” ²⁴ ’Dooko Ana zo nda te embeembero, Kayafa Kohani Fopara re. ²⁵ Petero dri edrevoya lau ugu asi owivoya oko, ’di azaka atate ndäri ekye: “Mi ṛo ko kpa alo aza taeri’bai mano ono ro owo ya?” Oko Petero gakalate atate ekye: “Hwa, ma i’do.” ²⁶ Alo aza ruindu’ba Kohani Fopara ro ro, diri mano se Petero koga bi na be ätu ana ro, ata ṛo ṛeṛe ejitate ekye: “Inye’do mandre mi ṛo ko nda be ämvu ya ya?” ²⁷ Petero atate kpa to’di ekye: “Hwa.” Ago dori gogo pete. ²⁸ Ṛo kyenoŋboci kyenonosi oko äru Yesu teni zo Kayafa ro yasi ugute zo’desi miri ro wari’ba roya. Drikaca’bai Yudai ro ciyi kote zo’desi miri roya, tana ànya leyite andivo ànyaro o’bane wäṛiro la’bi voro, ta ŋgaonya karama Lävu Odra ro ro onyana rota. ²⁹ Ago Pilato fote tesi ànya re ago ejitate ekye: “Nyà mano ono kicu ta e’di roya?” ³⁰ Ànya zayitadrite ekye: “Aba mä̀nina ṛo ko nda ezine mire ondro aba nda koye ŋgakozi ko owo.” ³¹ Pilato atate ànyari ekye: “Ka’do inye andivo amiro mìru nda ago mìye vure ndaro ota amiro voro.” Ànya zayitadrite ekye: “Ale ko ämäri ’diaza ufune.” ³² (Ono a’dote tana ko’ba tase Yesu katabe se nda kaka’da ta odra se nda ka oyebe odrane sina ana ro robe endaro.) ³³ Pilato gocite zo’desi miri roya ago zi Yesu te, nda eji nda te ekye: “Mi orivoya ’Bädri’ba Yudai roya?” ³⁴ Yesu zatadrite ekye: “Taeji ono gini miro kode ’di azaka iti ta ni miri ta maro ta ya?” ³⁵ Pilato zatadrite ekye: “Nyusu miro be ma orivoya Yuda yi ya? Lidri modo miro ro ndi kohanii ’desi be ozoyi mi ni märi. Miye e’diyi ya?” ³⁶ Yesu atate ekye: “Miri ’bädri’ba maro ro a’do ko ’bädri ono ro; ondro aba miri ’bädri’ba maro ro ka’do gwo ’bädri ono ro, oso’bai mavo oyenayi kyila ndi ma lagaza ni ma ozovoya drikaca’bai Yudai ro ri. Caoko, Hwa, miri ’bädri’ba maro ro a’do ko noŋwa!” ³⁷ Ago Pilato eji nda te ekye: “Mi orivoya ’bädri’ba yi ya?” Yesu zatadrite ekye: “Nyata te ŋgye mikye ma orivoya ’bädri’ba yi. Äti ma te ago mikyite ’bädri ono ya ta alo ono ta, ta taŋgye ro atane. Nda se kabe a’do taŋgye ro ka ta maro erina.” ³⁸ Pilato ejitate ekye: “Taŋgye e’diyi ya?” ’Dooko Pilato gofote tesi lidri re ago atate ànyari ekye: “Mäni kote ta aza usune nda koziza. ³⁹ Oko oso ta la’bi amiro ro ronye, ondoalo ma kamba’ba onji ämiri tu karama Lävu Odra ro rosi. Inye’do mile märi ’Bädri’ba Yudai ro onjine ämiri ya?” ⁴⁰ Ànya zayitadri ndaro te otre si ekye: “Hwa, ko nda! Màle Baraba!” (Baraba orivoya ŋgatopa’ba yi.)

¹ ’Dooko Pilato ozo otate, äru Yesu te ago äkyu nda te. ² Kyila’bai ’diyi tagyia teni kukyi yasi ago ànya soyi te drî ndaro ya; ’dooko ànya soyi boŋgo runduṛuro lärimiro te nda lomvo. ³ Ago ikyiyite nda re ago atayite ekye: “Miri madaro ’Bädri’ba Yudai ro!” Ago ànya oyiyite cayi nda te. ⁴ Pilato gofote tesi kpa to’di ago atate lowa ri ekye: “Mìndre, molofona nda ’da tesi amire ondrene ämiri anjioko mäni kote ta aza usune nda koziza.” ⁵ Ago Yesu efote tesi, so tagyia kukyi rote ndi boŋgo lärimiro runduṛu robe. Pilato atate ànyari ekye: “Mìndre! Mano ono orivoya ni no!” ⁶ Ondro kohanii ’desi ndi vookwa’bai Yekalu robe kondreyi nda te oko, ànya treyite ekye: “Nyoto nda! Nyoto nda!” Pilato atate ànyari ekye: “Mìru nda, nyòto nda, musu ta aza ko nda koziza.” ⁷ Lowa gozatadrite ekye: “Ama orivoya ota be se katabe beṛo ndäri odrane, tana nda ’ba yi te a’done Ŋgwa Lu ro.” ⁸ Ondro Pilato keri ta ono te oko, nda turi te ndra. ⁹ Nda gocite zo’desi miri roya ago eji Yesu te ekye: “Nyikyi ni eŋwaro ya?” Oko Yesu zatadri kote. ¹⁰ Pilato atate ndäri ekye: “Nyata ko mari ya? Mindre, ma drikaca be mi onjine ago kpa mi otone.” ¹¹ Yesu zatadrite ekye: “Nya’dote drikaca be mädri gialo tana ozote miri Lu si. Ago mano se kozo mabe miri orivoya taenji kozi takozi robe.” ¹² Ondro Pilato keri ta ono te oko, nda ojote liti uṛine Yesu onjiza. Oko Yudai gotrete ekye: “Ondro nyonji nda te dritai ro anjioko mi ko orivoya bereazi ’Bädri’ba Roma ro! ’Diaza se kabe ata yi o’ba si ’bädri’ba ro ka ogbo ’Bädri’ba Roma robe!” ¹³ Ondro Pilato keri ata kwoi te oko, nda lofo Yesu te tesi ago rite vuru giti vureopero dri vose äzite “Obeobero Kuni si Toŋgo” ana ya. (Kala Ebere si ävuruna “Gabata.”) ¹⁴ Te oso kitudiri ronye teinye Karama Lävu Odra ro etoako. Pilato atate lidri ri ekye: “’Bädri’ba amiro ni no!” ¹⁵ Ànya gotreyite ekye: “Mifu nda! Mifu nda! Nyoto nda!” Pilato eji ànya te ekye: “Mile märi ’bädri’ba amiro otone ya?” Kohanii ’desi zayitadrite ekye: “’Bädri’ba se ama be sina toto ni ’Bädri’ba Roma ro!” ¹⁶ ’Dooko Pilato ozo Yesu te ànyari otone. Ago ànya ruyi Yesu te. ¹⁷ Nda fote tesi, ugu taka ndaro uŋgyite, ago ikyite “Vo Kowa Drî ro” roya oso äzibe ronye. (Kala Ebere si äzite “Gologota.”) ¹⁸ Ànya otoyi nda te lau; ago ànya otoyi lidri ritu azaka kpa, lamadri ritu yasi, Yesu orivoya lakole ànyaro ya. ¹⁹ Pilato egyitate ago a’bate taka dri ekye: “Yesu Nazareta ro, ’Bädri’ba Yudai ro,” ’doni tase nda kegyibe owo. ²⁰ Lidri amba zite, tana vose oto Yesu be kigye ko lozo ni ’bakici resi. Egyi tase ana te kala Ebere, Latina ndi Giriki be rosi. ²¹ Kohanii ’desi atate Pilato ri ekye: “Nyegyi ko mikye: ‘’Bädri’ba Yudai ro,’ oko, nyegyi mikye manona ono ata ṛoni ekye: ‘Ma ’Bädri’ba Yudai ro.’ ” ²² Pilato zatadrite ekye: “Tase megyite kori egyite ronye.” ²³ Ondro kyila’bai kotoyi Yesu te oko, ànya ruyi boŋgo ndaro te ago lonyiyi ànya te su, kyila’ba alo ri alo. Ànya ruyi boŋgo runduṛuro kpate, se a’dite kpäkualo boŋgo uvuro sina loseako kpakyi ’do be. ²⁴ Kyila’bai atate iyivoya ekye: “Mì’de mòtowa ko, mì’de mavo vodo andre robe a’dona a’di ri.” Ono a’dote tana ko’ba taegyi robe a’done ŋgye, se ekye: “Ànya lonyiyi boŋgo maro te ànyavoya ago voyi vodo te boŋgo runduṛuro maro ta.” Ago ono ni tase kyila’bai koyebe owo. ²⁵ Ago endre ndaro, endreŋwa endre ndaro ro, Maria toko Kelopa ro ndi Maria Magadalene be ugu edrevoya loto taka Yesu ro re. ²⁶ Yesu ndre endre ndaro ndi taeri’ba se nda kulube te edrevoya lau oko, nda atate endre ndaro ri ekye: “Nda orivoya ŋgwa miro.” ²⁷ ’Dooko nda atate taeri’ba ana ri ekye: “Anya orivoya endre miro.” Ṛoni tu gi ana si taeri’ba ana ru anya te orine ’ba ndaro ya. ²⁸ Yesu nite anjioko yauono ande ŋgacini te; ago tana ko’ba taegyi robe a’done ŋgye, nda atate ekye: “Ma gyilu be.” ²⁹ Ago lakaza orivoya lau, twi vino lagye fere robe; ago aso lifo te vino ya a’bate ce ice se äzibe usopa ana ro dri, ago eŋgate a’bate kala ndaro ya. ³⁰ Yesu vu vino te ago atate ekye: “Ta kyete!” ’Dooko nda edi dri ndaro te ndi drate. ³¹ ’Dooko drikaca’bai Yudai ro ejiyi Pilato te ta ozone lidri se otobe kai pa nayi aga robe, ago äru avonayi robe vuru ni taka drisi. Ànya ejiyi ta ono te tana te U’du njidrialo yi, ago ànya leyi ko avo ri orine taka dri Sabata si, tana Sabata gi kabe ikyi ono orivoya tu alokado yi. ³² Ago kyila’bai oyiyite gayi pa mano käti ago mano kinjo aza se otobe Yesu be ana rote. ³³ Oko ondro ànya kikyite Yesu re oko, ànya ndreyite nda dra ṛote nja, ago ànya gayi pa ndaro kote. ³⁴ Caoko, alo aza kyila’bai ro so äzu ndaro gwo lama Yesu roya, ago dori kari ndi gyi be reṛote tesi. ( ³⁵ Nda se kondre tase ka’dobe ono te pe tana te, tana mìma robe kpa. Tase nda katabe orivoya ŋgye, ago nda ni ndi anjioko nda ka taŋgye ope.) ³⁶ Aye ta ono te tana taegyi ka’do robe ŋgye se ekye: “Kowa alodi ndaro aza ogone i’do.” ³⁷ Ago taegyi aza ka ata ekye: “Lidri ondrena vo ’da nda se ànya ku’dibe ana dri.” ³⁸ Ono vosi Yosepa se ni ’ba’desi Arimatayo ro yasi ana eji Pilato te ndäri avo Yesu ro uŋgyine. (Yosepa orivoya oso’ba alo aza Yesu vo ro, oko ndrwiro, tana nda orivoya turi ro ni drikaca’bai Yudai ro ri.) Pilato atate ndäri nda unina ndi avo uŋgyine, ago Yosepa oyite ndi ŋgyite. ³⁹ Nikodema, se kätina oyite Yesu ondrene ŋgäkyi si ana oyite Yosepa be nda ru ŋga ŋgutruro ojona oso ya gäbä ro kama alo (100), dro’bedro’bero koto’boŋwà tägyi ŋgutruro ndi aloa be si te. ⁴⁰ Lidri ritu ono ŋgyiyi avo Yesu rote ago vuyite boŋgo ’bilindriro si ŋga ŋgutruro si oso la’bi Yudai ro avo osero ronye. ⁴¹ Ämvu aza orivoya vose äfu Yesu be kigye ana ya, ago ’bu to’di orivoya kigye se ase ’diaza driko kigye. ⁴² Tana ṛo orivoya u’du se käti ni Sabata ri yi ago tana ’bu orivoya lototi, ànya seyi avo Yesu rote lau.

¹ Ṛo kyenoŋboci kyenoŋbo u’du käti u’du njidrieri rosi, vo drigba ṛo uniro oko, Maria Magadalene oyite ’budri dri ago ndre kuni te ereṛite ni ’bukalasi. ² Anya mute Simona Petero ndi taeri’ba aza, se Yesu kulube re, ago ititate ànyari ekye: “Ànya eweyi Opi teni ’budri yasi, ago mäni kote ànya ’bayi nda te eŋwa!” ³ ’Dooko Petero ndi taeri’ba se aza ana be oyiyite ’budri dri. ⁴ Ànya riti kai ugu umu, oko taeri’ba se ana mute ndrani Petero ri ago sate käti ’budri dri. ⁵ Nda ändite ago ndre boŋgo ’bilindriro te, oko nda ci kote. ⁶ Simona Petero esate nda vosi, ago nda cite dori ’budri ya. Nda ndre boŋgo ’bilindriro te orivoya lau, ⁷ ndi boŋgo se ävu drî Yesu robe sina ana be. Anya ri kote troalo boŋgo ’bilindriro be oko andivona eparute iṛe. ⁸ ’Dooko taeri’ba aza se kosabe käti ’budri dri ana cite; nda ndrete ago mate. ( ⁹ Ànya niyi taegyi drigba ko se katabe ekye beṛo ndäri efone ni odra yasi.) ¹⁰ ’Dooko taeri’bai go oyiyite ’bäru. ¹¹ Maria edrete ’budri lomvo ka ugu liyi. Ondro anya kadri ugu liyi oko, anya ändite ago ndrevote ’budri ya ¹² ago ndre malaikai ritu te soyi boŋgo onjero te, riyite vose sedri avo Yesu robe kigye anya ya, alodi drî yasi ago azana pa yasi. ¹³ Ànya ejiyi anya te ekye: “Toko, nya ugu liyi etaya?” Anya zatadrite ekye: “Ànya eweyi Opi maro te, ago mäni ko ànya ’bayi nda te eŋwa!” ¹⁴ ’Dooko anya ko’bimite oko ndre Yesu te edrevoya lau; oko anya ni kote ana ni Yesu owo. ¹⁵ Yesu eji anya te ekye: “Toko, nya ugu liyi etaya? Nya ugu a’di uṛi ya?” Anya kusube nda orivoya vo ede’ba owo, ago anya atate ndäri ekye: “’Desi, ondro nyewe nda teni, nyiti tana märi mi’ba nda te eŋwaro, moyi robe nda urune.” ¹⁶ Yesu atate anyari ekye: “Maria!” Anya zamite ndare ago atate kala Ebere si ekye: “Raboni!” (Anjioko Miemba’ba). ¹⁷ Yesu atate anyari ekye: “Nyäti ma ko, tana moyi drigba ko kovole Täpi re. Oko nyoyi ädrupii maro re ago nyiti ta ànyari mikye ma te ugu ogo nda se ni Täpi maro ago Täpi ànyaro, Lu maro ago Lu ànyaro ana re.” ¹⁸ Ago Maria Magadalene oyite ititate taeri’bai ri ekye indre Opi te ago iti tase nda kitibe anya ri ana te ànyari. ¹⁹ Te ga liyaro tandrole u’du käti u’du njidrieri rosi, ’dooko taeri’bai kotokalate voaloya käläsi osesi ndindi, tana ànya te turi turiro ni drikaca’bai Yudai ro ri. ’Dooko Yesu ikyite ago edrete ànya lako, nda atate ekye: “Taliatokpe ka’do ami yibe.” ²⁰ Ta ono ata vosi, nda ka’da drí ndaro te ànyari ndi lama ndaro be. Taeri’bai a’dote twi riyä be Opi ondrevoya. ²¹ Yesu atate ànyari kpa to’di ekye: “Taliatokpe ka’do ami yibe. Oso Täpi kezo mabe ronye, mazo ami kpa inye.” ²² ’Dooko nda lawate ànya dri ago atate ekye: “Nyà’do Tori Alokado be. ²³ Ondro nyà takozi lidri ro e’be, e’be ànya ṛote, ondro nyè’be ànya ko, e’be ànya ko.” ²⁴ Alo taeri’bai ’butealo foritu ro Toma (äzite Lezo), i’do ànya yibe tuse Yesu kikyibe ana si. ²⁵ Ago taeri’bai azi ititate ndäri ekye: “Màndre Opi te!” Toma atate ànyari ekye: “Ondro ka’do mandre mberevo ŋbaṛa ro drí ndaro yasi ko ago ma’ba driŋgwa maro ko mberevo se kai ya ago ma’ba drí maro ko lama ndaro ya, mama ko.” ²⁶ Ago u’du njidrieri vosi oko taeri’bai te voaloya zo yasi oko, ago Toma orivoya ànya yibe. Ase käläsii te, oko Yesu ikyite ago edrete ànya lako ago atate ekye: “Taliatokpe ka’do ami yibe.” ²⁷ ’Dooko nda atate Toma ri ekye: “Mi’ba drí miro noŋwa, ago mindre drí maro; ago nyozo drí miro ago mi’ba anya lama maro ya. Nya’do ko wiriwiriro, oko mima ta!” ²⁸ Toma zatadri ndaro te ekye: “Opi maro ago Lu maro!” ²⁹ Yesu atate ndäri ekye: “Mi’debe omane ono tana mindre ma te ya? Ànya se kabe taoma teinye ma ondreako ni kado.” ³⁰ Taeri’bai ndaro milesi Yesu ye talaro ro azaka amba te se egyi tana kote buku ono ya. ³¹ Oko egyi tase kwoi te tana mìma ta robe anjioko Yesu ni Mesiya, Ŋgwa Lu ro, ago ta taoma amiro ro nda ya si nyà’do robe adri be.

¹ Ono vosi, Yesu ka’darute to’dina taeri’bai ndaro ri Fofo Tiberia ro kala. A’dote orivoya oso nonye. ² Simona Petero, Toma (äzibe Lezo), Natanaele (ni Kana Galilaya yasi), ŋgwàagoro Zebedayo ro, ago taeri’bai azaka ritu Yesu robe vonai cini orivoya voaloya. ³ Simona Petero atate azii ri ekye: “Mate ugu oyi ti’bi uru.” Ànya atayite ndäri ekye: “Mòyina ndi mibe.” Ago ànya fote ago ciyite toŋbo ya, oko ŋgäkyi gi ana si ànya ruyi ti’bi kote. ⁴ Ago kitu kate ezi itu oko, Yesu edrete kototi gyi roya, oko taeri’bai niyi kote anjioko ni Yesu owo. ⁵ ’Dooko nda eji ànya te ekye: “Agoanjii ono, mìru ŋga aza ko ya?” Ànya zayitadrite ekye: “Ŋga aza i’do.” ⁶ Nda atate ànyari ekye: “Mìvo kyimba amiro drígwo toŋbo roya, ago mìruna azaka ’da.” Ago ànya voyi kyimba te ago niyi kote esene kovole, tana ànya ruyi ti’bi te amba. ⁷ Taeri’ba se Yesu kulube atate Petero ri ekye: “’Do ni Opi owo!” Ondro Simona Petero kerite ’do ni Opi owo oko, nda vu boŋgo ndaro te nda lomvo (tana nda bägyulu ro) ago odote gyi ya. ⁸ Taeri’bai azii ikyite kototi toŋbo si eseyi kyimba te twi ti’bi be. Ànya ko lozo ni gyini drisi, ozona oso kadrakadra kama alo (100) ronye. ⁹ Ondro ànya kesayite kototi oko, ànya ndreyi iṛi asi be te lau ti’bi be driigye ndi ambata azaka be. ¹⁰ ’Dooko Yesu atate ànyari ekye: “Nyèzi ti’bi se mìrube ndri yauono azana.” ¹¹ Simona Petero cite toŋbo ya, ago ese kyimba te kototi twi ti’bi ’desi be, vona cini orivoya kama alo ’butenji fonätu (153). Ka’do gica amba oko, kyimba lewa kote. ¹² Yesu atate ànyari ekye: “Nyìkyi ago mìnya ŋga.” Alo aza taeri’bai ro lekote nda ejine ekye: “Mi a’di owo ya?” Tana ànya niyite ni Opi owo. ¹³ Ago Yesu oyite, ru ambata te, ago ozote ànyari, ago nda ye ti’bi kpate inye. ¹⁴ Ono ni, pere nina se Yesu ka’darute taeri’bai ri efo ndaro ni avo yasi vosi owo. ¹⁵ Ŋgaonya onya ànyari vosi oko, Yesu atate Simona Petero ri ekye: “Simona ŋgwa Yoane ro, inye’do nyulu ma ndrani azii kwoi riya?” Nda zatadrite ekye: “Owo, Opi, mini ndi mulu mi.” Yesu atate ndäri ekye: “Mindrevo timeleŋwà maro ro.” ¹⁶ Yesu atate ndäri pere ṛirina si ekye: “Simona ŋgwa Yoane ro, inye’do nyulu ma ndi ya?” Nda zatadrite ekye: “Owo Opi, mini ndi mulu mi.” Yesu atate ndäri ekye: “Mindrevo timele maro ro.” ¹⁷ Yesu atate pere ninana si ekye: “Simona ŋgwa Yoane ro, inye’do nyulu ma ndi ya?” Petero a’dote tusuro tana Yesu eji nda te pere ninana si ekye: “Inye’do nyulu ma ndi ya?” Ago nda atate ekye: “Opi, mini ŋga cini te; mini ndi mulu mi!” Yesu atate ndäri ekye: “Nyeca timele maro. ¹⁸ Ma taŋgye iti miri; ondro mibe orivoya agoanji ro, miso boŋgo miro te ago nyoyite vose aza milebe oyine kigye ya; oko ondro midete oko, nyozona drí miro ’da ago ’di to aza osona boŋgo ’da mi lomvo ago uguna mi ’da vose mileko oyine kigye ya.” ¹⁹ (Ta ono atana si, Yesu ka ugu liti se Petero ri odrane kigyesi ago ezina taoro ndi Lu ri ’do ka’dana.) ’Dooko Yesu atate ndäri ekye: “Miso mavo.” ²⁰ Petero zamite ago ndre taeri’ba, se aza Yesu kulube ana te nda kundu; nda se eberube ti Yesu re ŋgaonyavoya ago ejitate ekye: “Opi, a’di kani drí miro ozona ya?” ²¹ Ondro Petero kondre nda te oko, nda eji Yesu te ekye: “Opi, tase mano ono ri oyene e’di ya?” ²² Yesu zatadri ndaro te ekye: “Ondro aba male gwo ndäri orine madale ego maro si, a’dona miri ’bo e’di ya? Miso mavo!” ²³ Ago alari ta ono tana te oso’bai Yesu vo lako ekye taeri’ba ono ri odrane i’do. Oko Yesu ata kote ekye ndäri odrane i’do; nda atate ekye: “Ondro male gwo ndäri orine madale ego maro si, a’dona miri ’bo e’di ya?” ²⁴ Nda ni taeri’ba se pe tase kwoi tana be, ago kpa ni se egyi ànya te owo; ago mäni ndi tase nda katabe ono orivoya ŋgye. ²⁵ Ta azaka orivoya amba se Yesu yete. Ondro aba egyi vona cini gwo ba sirosiro, mamabe ’bädri gi ŋgulu ono unina ko buku gi alebe egyine ono urune kyiti.