YAKOBA

YAKOBA

¹ Ni Yakoba ruindu’ba Lu ro ndi Opi Yesu Kristo robe resi: Mede ’bakalai ’butealo foritu se kepererube ’bädri cini yasi ri. ² Ädrupii maro, nyà’do yai’dwesi ondro mì’be drî te taojoro cini drî toto be owo, ³ tana mìni ndi ondro taoma amiro ko’bedrite taojoro nonye ono be, ka orivoya yaiŋgyi ezi. ⁴ Mì’ba yaiŋgyi amiro kelepe ami teinye o’deako, tana nyà’do robe wäṛiro ago ŋgye, kyemvo ŋga aza ro ako. ⁵ Oko ondro aza amiro tavouni ako, beṛo ndäri Lu ejine tana ro, se ozona ’da ndäri, tana Lu ka ŋga ozo dritai ro ago yai’dwe si lidri cini ri. ⁶ Oko ondro nyàte mätu, beṛo ämiri taomane, ago ko a’done milo’be be alona. Nda se milo’be be orivoya oso rukanda gyi’desi ya se kabe gbulä ago oli kabe ubina gbulägbulä ’do ronye. ⁷ - ⁸ Lidri se oso ’do ronye, orivoya mbaraako tavo usune drî ndaro si ago ŋgase cini nda kabe oyena ratavona ko; beṛo ko ndäri omane ekye yusuna ŋga aza ’da ni Opi rigyesi. ⁹ Kristo’ba se orivoya ŋgaako beṛo a’done yai’dwesi ondro Lu keŋga nda te kuru owo, ¹⁰ ago Kristo’ba se ŋgaamba be beṛo a’done yai’dwesi ondro Lu kologo nda te vuru owo. Tana ŋgaamba’ba lävuna ’da oso fo ŋga oŋgaoŋgaro vocowa ro ronye. ¹¹ Kitu ka itu voeme be ago ka ŋga oŋgaoŋga ro oza, foi ànyaro lepite, ago liŋgyi ànyaro enjirute. Mano ŋgaamba be enjiruna kpa oso inye ondro ka ca ugu losi ndaro oyena owo. ¹² Mano se kabe ori ’diri ro taojoro ya ni kado, tana ondro nda kope taojoro se oso ono ronye te ṛe oko, nda uruna adri se Lu ko’ba tana be ànya se kulu nda be ri ’do ’da päläti ro. ¹³ Ondro ojo ’dina ’do te taojoro nonye ono si, beṛo ko ndäri atane ekye: “Taojoro ono ikyi ni Lu resi.” Tana änina ko Lu ojone ŋgase aza koziro oyene. ago nda andivo ojo ta ’diaza ro kote. ¹⁴ Oko a ta ’di alo alo ro ojo ondro ole undiro modo ndaro ro kese nda te pere ago kabaṛi nda te owo. ¹⁵ ’Dooko ole undiro ndaro mbate ya ndaro ya ago ti takozi te, ago takozi, ondro kombate ’desi oko, ti odra te. ¹⁶ Mì’ba odo ami ko, ädrupii maro mulube ono! ¹⁷ Ŋga cini kado ndi ŋgapäṛi cini kado be ka ikyi vuru ni vo’buyakuru yasi; ka ikyi vuru ni Lu O’ba’ba ŋgaeyi vo’buyakuru ro resi, se tozaru ko kode ’ba vouni ko rutozane. ¹⁸ Ole modo ndaro rosi nda ezi ama te uti to’di ya ata taŋgye rosi, tana ma’do robe vo be käti ŋga o’bao’ba cini ndaro lako. ¹⁹ Mìyi ta ono tana, ädrupii maro se mulube ono! Beṛo ’dicini ri taerine ndri, ago atane liyaro ago a’done kyilaro liyaro. ²⁰ Tana kyila lidri ro ezi ori taŋgyero se Lu kolebe ko. ²¹ Ka’do inye mìna a’do cini undiro ndi taoye cini undiro be. Nyòzo ami Lu ri ago mìru ata se nda kabe kyi’dina ya amiro ya, se orivoya mbara be ami opane ono. ²² Nyòdo andivo amiro ko toto ugu ata ndaro erina si, oko mì’ba anya taoye ya. ²³ Nda se kabe ata eri oko ko’ba anya ko taoye ya laba orivoya oso mano se kabe yi ena taratara ya ago ndre andivo ndaro te oso nda ronye. ²⁴ Nda ena andivo ndaro te kado ago oyite ago dori beti ndaro se nda kondrebe ana tana jete. ²⁵ Oko nda se kabe ota kado se kabe lidri o’ba dritai ro ondre ti’deti’de, ago se kabe bioga tana erine ago ka ko toto erina ago ndi tana ijene, oko ka anya o’ba taoye ya, ’dina ’do Lu äṛuna ’da tase nda kabe oyena ya. ²⁶ Inye’do ’diaza ka tausu ekye yi orivoya mätu’ba yi ya? Ondro nda kirita ladra ndaro kote, mätu ndaro orivoya kadoako ago nda ka andivo ndaro odo. ²⁷ Tase Lu Täpi kondrebe ka’dobe wäṛiro ago ŋgye ta mätu rota begi ono, ta kyemvoi ndi ävuzii be ro otine rueza ànyaro ya, ago ’dialo ri andivo iro gagane ni ruenjivoya ni a’do ’bädri ro risi.

¹ Ädrupii maro, oso taoma’bai Opi amaro Yesu Kristo, Opi ’desi ndra ya ono ronye, beṛo ämäri ko lidri oyene a’do tesi lomvo ànya ro ro voro. ² Aba ondro mano ŋgadriamba be koso mäŋgusi läguläguro ndi boŋgo kado be gwo kikyi gwo kalakoto amiro ya, ago mano ati’ba boŋgo nyakaca robe ikyi kpa gwo. ³ Ondro nyàka’da taoro gwo ndra mano se koso boŋgo be kadoro ri ago nyàta gwo ndäri mikye: “Miri noŋwa vo oriro kado dri,” oko nyàta gwo mano ati’ba ri mikye: “Nyedre lau, kode miri noŋwa gyinidri ma pa,” ⁴ ka’do inye anjioko ami orivoya taenji ’digyele robe andivo amiro lako ago nyà’dote vureope’bai tavousu undiro be yi. ⁵ Nyèri, ädrupii maro se mulube ono! Lu nji lidri ati’ba ro ’bädri ono rote a’done ŋgaamba be taoma ya ago miri ’bädri’ba ro urune se nda ’ba tana te ànya se kulu nda be ri. ⁶ Oko mìro ’dise ati’bai ro kote! A’di kani ami eza ago kani ami ese vure kandra ya? Ŋgaamba’bai owo! ⁷ Ànya ni orivoya se kayibe taundiro ata ävuru se kado ozobe ämiri lomvo owo. ⁸ Nyà taŋgye oye ondro ka’do nyà ota Miri ’Bädri’ba ro, se usute taegyi ya ono orona owo, se ekye: “Nyulu oriazi miro oso nyulu andivo miro be ronye.” ⁹ Oko ondro nyà lidri oye beti tesi ànyaro lomvo ro voro, ami orivoya taenji takozi robe, ago Ota ka vure amiro ope otapere’ba ro. ¹⁰ Nda se kabe ota alodi pere nda orivoya taenji ànya cini pere robe. ¹¹ Tana nda se katabe ekye: “Miye ta ko toko kode ago drisi,” ata kpani ekye: “Mifu läfu ko.” Ondro ka’do miye ta ca ko toko kode ago drisi, ondro mifu läfu te, nya’do kpate otapere’ba ro. ¹² Nyàta ago mìye ta oso lidri se apena vurena ’da ota se kabe ama o’ba dritai ro si ronye. ¹³ Tana Lu ka’dana yauni ko tuse nda kate vure lidri se a’do ko yauni be ro opena si; oko yauni ni mbara be vure dri. ¹⁴ Ädrupii maro, takado aza gibe mano aza ri atane ekye yi taoma be ondro ka’do taoye ndaro kaka’da kote niya? Inye’do taoma ana unina gi’da nda opane ya? ¹⁵ Ondro ka’do ädrupii kode endreŋwà orivoya se leyi boŋgo ago a’doyi kote ŋga be amba onyane, ¹⁶ ondro alo amiro aza kata gwo ekye: “Lu käṛu ami! Nyà’do ki’dwe ako ago mìnya ŋga kado.” Takado aza gibe ondro ka’do nyòzo ŋga kado ori ro ko ànyari niya? ¹⁷ Taoma kpa inye; ondro anya ka’dobe iṛe ago oloci taoyei kote kigye, ’dooko anya te orivoya avo yi. ¹⁸ Ago ’diaza atana ’da ekye: “Lidri alo aza taoma be, ago azana taoyei be.” Tadrioza maro ekye: “Nyaka’da ’diaza se unina ndi a’done taoma be teinye taoye ako märi. Maka’dana taoma maro miri taoyei maro si.” ¹⁹ Inye’do mima ndi Lu toto alodi ya? Kado yi! Demonai ma kpa, ago kälä’bi turi si. ²⁰ Mi amama ono! Mile aka’da robe miri anjioko taoma teinye taoye ako ta awi yi ya? ²¹ Lu ka’da zutu amaro Abarayama te taŋgye’ba ro eŋwanye ya? Taoyei ndaro si ondro nda kozo ŋgwa ndaro Yisika te vo tori oloro dri owo! ²² Mindre ṛo ko ya? Taoma ndaro ndi taoyei ndaro be ye losi te troalo! Taoma ndaro atite takado ro taoyei ndaro si. ²³ Ago taegyi a’dote endaro, se katabe ekye: “Abarayama mate Lu ya, ago ta taoma ndaro rota Lu ti nda te taŋgye’ba ro.” Ago äzi Abarayama te bereazi Lu ro. ²⁴ Mindre, a lidri ka’da ŋgye Lu be tase anya kabe oyena si ago ko toto taoma anyaro si iṛe ayani. ²⁵ Raba ronyi’ba kpa oso inye, Lu ka’da anya te taŋgye’ba ro taoyei anyaro si, tana anya ru vomari’bai Yisaraele’bai rote ago ’ba ànya te voopane liti to yasi. ²⁶ Ka’do inye, oso lomvo teinye tori ako orivoya avo yi ono ronye, taoma teinye taoyei ako kpa avo yi.

¹ Ädrupii maro, beṛo ko amba amiro ri a’done miemba’bai ro. Oso minibe ronye, ama miemba’bai apena vure amaro para ndrani azii ri. ² Vo ama cini ro mà ujeuje. Oko ondro ’diaza kuje kote tase nda kabe atana ya, nda orivoya mano kado yi ago kpa orivoya mbara be a’do ndaro ritane. ³ Mà logo o’ba kala farasi roya ko’ba anya robe ama orone, ago ama orivoya mbara be anya o’bane oyine vose malebe ya. ⁴ Nyusu ta toŋbo ro; anya orivoya ’desi ago oli mbaraekye bite, äni ndi lodine ŋga giṛiŋwa opina rosi, ago oyi ndi vose opi’ba kolebe anyari oyine kigye ya. ⁵ Ladra kpa oso inye: Orivoya tegiṛiŋwa, oko ni ndi ta ’desi ro atane. Nyusuta vocoko jumu’di ro rote änina ndi ozane asilele giṛiŋwa si! ⁶ Ago ladra orivoya oso asi ronye. Orivoya ’bädri ŋgakozi ro, vo anyaro ori ro orivoya lomvo amaro ya ago ka ugu taundiro lari a’do amaro yasi. Anya ka asi oso ori cini amaro dri, asi se kabe ikyi driigye ni gehena andivo yasi. ⁷ Lidri orivoya mbara be ŋga cini leyene ago leyeyi ŋga cini o’bao’baro te, koronyai vocowa ro ndi arii be te, ŋga tegategaŋwà ndi ti’bi be. ⁸ Oko lidri aza a’do kote mbara be ladra leyene. Anya orivoya undiro ago ritaako, twi äṛi odra robe. ⁹ Màye aro’boya te Opi amaro ndi Täpi be ri sina ago mà’da lidri azi amaro kpate sina, se a’bate oso beti Lu ro ronye ono. ¹⁰ Ata aro’boya ozoro ndi ugu latri otri be efote ni kala gialo ono yasi. Ädrupii maro, se ono beṛo ko a’done! ¹¹ Gyiutivo ti gyi kado ago gyi osoro kote ni ’bu gialo ’do yasi. ¹² Ädrupii maro, ce kyi’du ro unina ko doŋgo ice ido ro ro owane; kono unina ko kyi’du owane, ca gyi täyi ro unina ko gyi kado utine. ¹³ ’Diaza gibe ami lako se orivoya tavouni be ago tauni be ya? Ndäri anya ka’dane ori kado ndaro si, taoye kado ndaro se yete tokyeako si ndi tavouni be si. ¹⁴ Oko ondro mi orivoya yaoko, yaoso ndi ta andivo o’baro käti robe ya miro ya, miye takozi ko taŋgye lomvo driuŋgyi si ta tavouni miro rota. ¹⁵ Tavouni nonye ono ikyi ko vuru ni vo’buyakuru yasi, anya orivoya ’bädri ro, ko tori ro oko demona ro. ¹⁶ Vose yaoko ndi ta andivo o’baro käti robe orivoya kigye, taoroako ndi taundi dritoto be kpa orivoya kigye. ¹⁷ Oko tavouni se ni orivoya kurusi orivoya käti ono wäṛiro, anya kpa orivoya liatokpero, tokyeako, ago bereazi ro; anya orivoya twi yauni be ago ka jalia taoye kado ro owa, orivoya teinye ’dileweako ago miombaako. ¹⁸ Ago takado orivoya ni jalia se kabe efo ni kwari se kasa’bai kabe kyi’dina taliatokpe ya owo.

¹ Kyila cini ndi kalaope be ami lako ’do kayi ikyi ni eŋwaro ya? Ànya kayi ikyi ni ŋgaleme amiro ta riyä rota yasi, se kabe ugu kyila oye ’duro ami ya ono. ² Nyà ŋga ole, oko mìni kote ànya usune, ago nyà’dote orivoya nja ’diufune, nyà ŋga amba leme, oko nyùsu ànya kote, ago nyà kalaope ndi kyila oye be. Nyà’do kote ŋgase mìlebe be tana nyèji Lu kote tana ro. ³ Ago ondro nyèjite oko, nyùsu kote, tana tausu amiro orivoya koziro; nyà ŋga eji riyä modo amiro ro oyeza sina. ⁴ Lidri ta’diriako ono! Mìni ṛo ko anjioko a’done bereazi ’bädri ro nyà’dote kyila’baazi ro Lu riya? Nda se kolebe a’done bereazi ’bädri ro ka andivo ndaro o’bana kyila’baazi Lu ro. ⁵ Nyusu ko mikye taŋgye i’do taegyi ya, se kabe ata ekye: “Tori se Lu ko’babe ama ya orivoya twi ŋgaleme koziro be.” ⁶ Oko tai’dwero se Lu kabe ozona orivoya kpa mbaraekye. Ago taegyi ka ata ekye: “Lu ka ogbo driuŋgyi’ba be, oko ka tai’dwero ka’da driuŋgyiako’ba ri.” ⁷ Ka’do inye, nyòzo andivo amiro Lu ri. Oko nyògbo Kicu’ba be, ago nda umuna ’da pere ni ami re. ⁸ Nyìkyi ti Lu re, ago nda ikyina ’da ti amire. Mìjo dríi amiro, ami takozi’bai! Nyä̀wäṛi ya amiro, ami miomba’bai! ⁹ Nyà’do tusuro, mìtre ago nyìliyi; nyòtoza ugu amiro liyi ro, ago riyä amiro tusuro! ¹⁰ Nyòlogo andivo amiro vuru Opi kandra, ago nda eŋgana ami ’da kuru. ¹¹ Ädrupii maro, nyòkozi azi ko. Nda se kabe ädrupi Kristo’ba ro kozi kode vurena opena, ka Ota kozi ago ka vurena ope. Ondro nya vure Ota ro ope, ’dooko mi kote orivoya tona nda se kabe Ota oro yi, oko nda se kabe vurena ope yi. ¹² Lu orivoya toto ni Otaozo’ba yi ago vureope’ba yi. Nda unina toto ni ’di opane ago ufune. Nyusube mi orivoya a’di owo, vure lidri azi miro ro opene ya? ¹³ Nyèri ta maro, ami se nyàbe ata mìkye: Ondro kode ondo mòyina ’da ’bakici aza ya, màrina ’da kigye ndroa alo ago màyena losi ’da ago mùsuna parata ’da amba. ¹⁴ Mìni tase koyebe a’done adri amiro ri ondo ’do ko! Ami orivoya oso ofo kätu ro ronye, se ka ofo toto fere ago ofona kyete. ¹⁵ Tase beṛo atane ämiri ni ono mìkye: “Ondro Opi kole gini, màrina ’da ago màyena ono kode ana.” ¹⁶ Oko yauono ami orivoya driuŋgyi be, ago mäwu be; mäwu oso ono ronye orivoya koziro. ¹⁷ Ka’do inye, mano se ni takado se beṛo ndäri oyene ndi oko ye anya kote te orivoya taenji takozi robe.

¹ Ami lidri ŋgaamba be, nyèri ta maro! Nyìli ago mì’be kuku rriti se kabe ikyi ämidri ono tana ro! ² Ŋgaamba amiro ŋgwate, ago boŋgoi amiro ludui nyate. ³ Logo läguläguro amiro ndi mo’di be te tokatoka ro, ago tokana ono a’dona ’da tazevoedreza ami lomvo ago onyana iza lomvo amiro ro ’da. Orivoya oso asi se mìdro be tui äduro ta ronye. ⁴ Nyòzo päläti kote lidri se kabe losi oye ämvu amiro ya ri. Nyèri driovi ànyaro tana! Liyi ànya se kayibe ŋga jalia ro amiro kotona ro sate bi Lu, Opi Mbaraekye roya. ⁵ Ori amiro ’bädri ya noŋwa a’dote twi ŋgadriamba be ago riyä ro. Mì’ba andivo amiro te oshweoshwe ro ta tu ŋgatufu rota. ⁶ Mìpe vure te ago nyùtufu lidri taŋgye’bai te, ago ànya ogbo kote ami be. ⁷ Ka’do inye, nyà’do yaiŋgyi be, ädrupii maro, madale Opi kesa gwo. Mìndre yaiŋgyi ämvuoso’ba ro se nda kabe gyini ndaro kotena doŋgo liŋgyiekye owane. Yaiŋgyi si nda ka ’bu duru ro kotena. ⁸ Beṛo kpa ämiri a’done yaiŋgyi be. Mì’ba mio’ba amiro ka’do ndra, tana ikyi tu Opi ro kate ezi esa ti. ⁹ Mìvidri ko azi be, ädrupii maro, ukyi Lu ope vure amiro ’da. Vureope’ba orivoya loto nja ruka’dane. ¹⁰ Ädrupii maro, mìyi ta nebii se kope ta be ämiri ävuru Opi rosi ro. Mìru ànya oso taka’daro yaiŋgyi rriti iŋgyi ro taezaro zele ronye. ¹¹ Mäzi ànya te kado tana ànya iŋgyiyi ya te. Nyèri yaiŋgyi Eyobo ro tana te, ago mìnite äduro oko Opi ozo ŋga te ndäri. Tana Opi orivoya twi yauni ndi yai’dwe be be. ¹² Para ndrana, ädrupii maro, nyàte tao’ba oko nyä̀ṛuru ko, nyä̀ṛuru ko vo’buyakuru si kode ’bädri si kode ŋga aza si. Nyàta toto, mìkye! “Owo” ondro mìlete atane owo, ago “hwa” ondro mìlete atane hwa owo, ukyi nyìkyi ’da vure Lu ro zele. ¹³ Inye’do ’diaza orivoya ami lako rriti be ya? Beṛo ndäri mätune. Inye’do ’diaza orivoya yai’dwesi ya? Beṛo ndäri loŋgo räṛu ro oŋgone. ¹⁴ Inye’do ’diaza orivoya adravoro ya? Beṛo ndäri lazo ozone dri’bai känisa ro ri, se mätuna ’da ta ndaro ta ago oṛinayi ido ice ido ro ro ’da nda lomvo ävuru Opi rosi. ¹⁵ Mätu ono ayete taoma si edena ’di adravoro ’da, Opi edena nda ’da jiŋgyiri ro, ago takozi se nda koyebe e’bena nda ’da tana ro. ¹⁶ Ago ka’do inye, nyèṛo takozi amiro azi ri ago nyä̀mätu azi ta, tana ede ami robe. Mätu mano kadoro ro mbara amba be taoye ya. ¹⁷ Eliya orivoya kpa lidri yi oso ama ronye. Nda mätute ya cini si ko ’bu ri u’dine, ago ’bu ’di kote ’bädri ya ndroa na nätu kpäkyi. ¹⁸ Nda go mätute kpa to’di, ago vokuru eda ’bu te ago gyini lofo doŋgoi iro te. ¹⁹ Ädrupii maro, ondro alo amiro konaru teni taŋgye yasi ago ’diaza kogo kologo nda te kovole kpa to’di, ²⁰ mìyi ta ono; nda se kabe drî takozi’ba ro ezana kovole ni taoye kozi ndaro yasi opana lindri takozi’ba ro ’da ni odra yasi ago ezina ŋgae’bero ’da ta takozi amba rota.