EBERE’BAI

¹ Tu kyeno si Lu atate zutui amaro ri tuna amba ago liti amba yasi nebii si, ² oko tu äduro kwoi si nda atate ämäri Ŋgwa ndaro si. Nda si a’ba ’bädri te, se Lu konji nda be a’done drimbi’ba ŋga cini ro tu äduro si owo. ³ Nda kani lägu ŋgaeyi Lu ro ro ka’da ago a’dona gi gya oso Lu modo ka’dobe ronye, ka ugu ’bädri ätini ata mbaraekye ndaro si. Lidri e’be takozi ta ondena vosi oko, nda rite vuru vo’buyakuru ya drígwo Lu Mbarapara roya. ⁴ A’ba Ŋgwa te ndrani malaikai drisi, ävuru se Lu kozobe ndäri kpa ndrani ànyaro drisi. ⁵ Tana Lu ata kote alona malaika alo aza ndaro ri ekye: “Mi orivoya Ŋgwa maro; ondro ono ma’dote Täpi miro.” Ca Lu ata ta malaika alo aza ro kote ekye: “Ma’dona ’da Täpi ndaro, ago nda a’dona ’da Ŋgwa maro.” ⁶ Oko ondro Lu kate oye Ŋgwa ndaro ezone utine Ŋgwa kayo ro ’bädri ya oko, nda atate ekye: “Malaikai Lu ro vona cini beṛo nda mätune.” ⁷ Oko ta malaikai rota Lu atate ekye: “Lu ’ba malaikai ndaro te oso oli ronye, ago ruindu’bai ndaro te oso leko asi ro ronye.” ⁸ Ta Ŋgwa rota, caoko, Lu atate ekye: “Äye Lu, miri ’bädri’ba miro ro orina ’da äduako ago äduako! Nya lidri miro mirina taŋgye si. ⁹ Nya tase ŋgye lu ago ya miro osoro ŋgase orivoya koziro lomvo. ’Doni tase Lu, Lu miro konji mibe tana ro ago ko’debe riyä taoro ro ozone ndra miri ni se nda kozobe azii miro ri drisi owo.” ¹⁰ Nda ata kpate ekye: “Mi, Opi, etosi mi’ba ’bädri te, ago drí modo miro rosi mi’ba vo’buyakuru te. ¹¹ Ànya a’dona ’da i’do, oko mirina ’da; ànya a’dona ’da uku ro oso boŋgo ronye. ¹² Nyepana ànya ’da oso dhudhu ronye, ago otozana ànya ’da oso boŋgo ronye. Oko mi orivoya ondoalo drí alo dri, ago ori miro äduna i’do alona.” ¹³ Lu ata kote malaikai alo aza ndaro ri ekye: “Miri noŋwa drígwo maro ya madale ma’bana kyila’baazii miro lutu oso kotopa ronye pa miro zele.” ¹⁴ ’Dooko malaikai ni e’diyi ya? Ànya orivoya torii se kabe ruindu Lu ri ago nda zote ànya se kabe ŋgaoparo uru opane.

¹ Ta’doro beṛo ämäri taŋgye se cini mèri tana te ana ätine anda, ukyi mà’do’da ruonaonaro ni kigyesi. ² Lazo se ozote zutui amaro ri malaikai si aka’date endaro, ago ’diaza se koso kote voigye kode koro anya kote usuna taezaro se sindi usune ndäri ndi. ³ Ka’do inye, màpanavo ’bo eŋwanye ondro ka’do màgabi kote ŋgaoparo se para ono tana erine ya? Opi andivo ndaro ayota ŋgaoparo se para ono rote ṛo käti, ago ànya se keriyi nda te ka’dayite ämäri anjioko ànya orivoya endaro. ⁴ Ago tuna gialo ono ya Lu loci tazevoedre ndaro ànyari ya te ugu talaro ro amba ndi rubä be oye si ago ugu ŋgapäṛi Tori Alokado ro ozo si oso ole ndaro ronye. ⁵ Lu ’ba malaikai kote ’dimiri’bai ro ’bädri se to’di kabe ikyi ana dri, ’bädri se mabe tana opena ono. ⁶ Oko, oso atate orivoya vo aza ya taegyi ya ronye ekye: “Lidri ’bo e’diyi ya, Äye Lu, miri ta ndaro usune; se toto lidri yi ono miri tana otine ya? ⁷ Mi’ba nda te giṛiŋwa tipari ni malaikai ri; miso ’desi te nda dri ndi taoro be, ⁸ mi’ba nda te dri’ba ŋga cini ro.” Atate ekye Lu ’ba lidri ni, “ŋgacini miri’ba ro”, ono ṛo orivoya ŋbelero dro’be vona cini. Caoko, màndre lidri kote ugu ŋgacini miri voya yau. ⁹ Oko màndre Yesu ndi se ologote giṛiŋwa ondro a’bate pari vuru tipari ni malaikai ri owo, tana tai’dwero Lu rosi nda kodra robe ’dicini ta. Màndre be yauono aso ’desi ndi taoro be te nda dri ta odra se nda kezarube ana rosi. ¹⁰ Lu toto ni ŋgye, se kani ŋga o’ba ago kani ŋga cini äti, ’ba Yesu ni ŋgye ugu rueza si, tana ŋgwà amba eziza ’desi ndaro la’done. Tana Yesu ni ’dise kabe ànya ugu ŋgaopa re owo. ¹¹ Yesu kani lidri wäṛi ni takozii ànyaro risi, ago nda ndi riti ànya se a’bate wäṛiro be vona cini te Täpi alo be. ’Do ni tase Yesu ’debe kote a’done driupiro ànya uzine ädrupii ndaro owo. ¹² Nda ka ata Lu ri ekye: “Mitina tase miyebe ono tana ’da ädrupii maro ri; märäṛuna mi ’da kalakoto ànyaro ya.” ¹³ Nda ka kpa ata ekye: “Mayina ta maro ’da Lu ya.” Ago nda ka kpa ata ekye: “Noŋwa ono ma orivoya ŋgwai se Lu kozobe märi be.” ¹⁴ Tana ànya ṛote ŋgwai oso Lu kabe ànya uzi ronye, ànya orivoya lidri iza be yi ndi kari be, Yesu andivo a’dote ànya ronye ago la’do a’do lidri ro ànyaro te. Nda ye ta ono te tana odra ndaro si nda kepere Kicu’ba, se mbara odra ro robe ro, ¹⁵ ago oyena inye si nda ’ba ànya se orivoya iyeäṛi ro ori cini ànyaro ya ta turi ànyaro rosi ni odra ri te dritai ro. ¹⁶ Tana ṛo orivoya ŋbelero anjioko nda ka ko malaikai opana ayani. Oko, oso Taegyi kabe ata ronye ekye: “Nda kani zelevoi Abarayama ro opana.” ¹⁷ ’Do takacina anjioko nda a’dote oso ädrupii ndaro ronye liti cini yasi, tana nda ka’do robe Kohani Fopara ànyaro ro ’diri ndi yauni be ruindu ndaro Lu ri ya, tana takozii lidri ro ka’do robe e’bee’be ro. ¹⁸ Ago yauono nda unina ndi ànya se ojo tana te opane, tana nda andivona ojo tana te ago ezarute.

¹ Ädrupii maro Kristo’ba ro, se äzi kpate Lu si ono! Nyùsu ta Yesu ro, se Lu ezote a’done Kohani Fopara ro taoma se màbe tana itina ono ro. ² Nda orivoya ’diri Lu se konji nda be losi ono oyene ri, kpa oso Musa ka’dobe ’diri losi ndaro ya zo Lu roya ronye. ³ Mano se kabe zo omo usu taoro ndrani zo andivo ri. Kpa oso inye Yesu orivoya kadopara orone ndrani Musa ri. ⁴ Tana, zo cini, amote ’diaza si ago Lu ni orivoya se komo ŋga cini be owo. ⁵ Musa orivoya ’diri zo Lu roya oso ruindu’ba ronye, ago nda atate ŋgase Lu kaoyebe tana atane mileya tana ayani. ⁶ Oko Kristo orivoya ’diri oso Ŋgwa ronye dri’ba ro zo Lu roya. Ama orivoya zo ndaro ondro ka’do mäti agoago amaro ndi taoma be gindi anda ŋgase mà be mio’ba tana ro ta owo. ⁷ Ka’do inye oso Tori Alokado kabe ata ronye ekye: “Ondro ono ka’do nyèri ata Lu rote, ⁸ nyà’do ko taeriako oso zutui amiro ka’do be ronye, tuse ànya kogbobe Lu be ana ronye, oso tuse ànya be orivoya vocowa ya oko, kojoyi mbara ndaro be ronye. ⁹ Lau ànya ojoyi mbara maro te ago ojoyi ma te, Lu kani ata nonye, ànya ndreyi tase mayebe gica ndroa na ’butesu owo. ¹⁰ Ago ma’dote orivoya kyilaro lidri se kai be ago matate makye: ‘Ànya orivoya ondoalo taŋgyeako ya ànyaro ya ago gayizo ota maro orone.’ ¹¹ Ma’dote kyilaro ago ma’ba tao’ba lämu’duro te makye: ‘Ànya ri ocine wari se malebe ozone ànyari loliza ana ya te i’do alona!’ ” ¹² Taoma’bai azi maro, nyà’do miomba be ukyi ’diaza alo ni ami lako a’do ’da ya kozi ago taomaako be ago onaru ’da pere ni Lu lidriidriro resi. ¹³ Oko, vona ro, ukyi aza alo amiro odo ’da takozi si ago a’do ’da taeriako, beṛo ämiri azi opane tu cini si, tana ata gi “Ondro” taegyi ya ono ka ata ämäri. ¹⁴ Tana vo amaro cini losioye’bai azi ro Kristo be ondro ka’do mäti taoyi amaro se ama be sina etosi gindi anda le äduro owo. ¹⁵ Ono ni tase taegyi kabe atana owo ekye: “Ondro ono ka’do nyeri ata Lu rote, nyà’do ko taeriako oso zutui amiro ka’dobe ronye, tuse ànya kogboyibe Lu be ana ronye.” ¹⁶ Lidri se keriyi ata Lu rote ago kogboyite nda be ana a’diyi owo ya? Vonai se cini olofote ni Ezipeto yasi Musa si kai owo. ¹⁷ Lu a’dote kyilaro a’diyi be ndroa na ’butesu ya? Lidri se koyeyi takozi be kai be, se lo’deyite vurusi avo ro vocowa ya ana. ¹⁸ Ondro Lu ko’ba tao’ba lämu’duro ndaro te ekye: “Ànya ri ocine wari se malebe ozone ànyari loliza ana ya te i’do alona.” Nda ka ugu ta a’di ro ata ya? Ànya se kogboyite ro. ¹⁹ Ago màndre ndi, anjioko ànya a’dote mbaraako ocine wari ya, tana ànya mayi ta kote.

¹ Yauono, Lu ozo tao’ba te ämäri tana mà’do robe loli se nda kata tana be ono be. Ka’do inye, mi’de mà’do taoti be, ukyi alo aza amiro a’do ’da loli se a’ba tana be ono usuako. ² Tana mèri Lazokado te, kpa oso ànya ronye. Ànya eriyi lazo te, oko ye takado kote ànyari, tana ondro ànya keriyi te oko, ànya ruyi kote taoma si. ³ Ago, ama se màbe taoma, mä̀runa loli se Lu ko’ba tana be ndi. A’dona kpa ndi oso nda katabe ronye ekye: “Ma’dote kyilaro ago ma’ba tao’ba lämu’duro te makye: ‘Ànya ri ocine wari se malebe ozone ànyari loliza ana ya te i’do alona!’ ” Nda atate nonye losi ndaro ande gica te ṛoni tuse nda ko’ba ’bädri be si owo. ⁴ Tana vo aza Taegyi roya ata ta ono te ta u’du njidrieri rota ekye: “Lu lolite u’du njidrieri si ni losi cini ndaro yasi.” ⁵ Ta gialo ono ata kpate to’di ekye: “Ànya ri ocine wari se malebe ozone ànyari loliza ana ya te i’do alona.” ⁶ Ànya se keriyi Lazokado be käti kai usuyi loli se ana kote, tana ànya mayi kote. Ago azakana orivoya se aletadrina te ànya ri urune. ⁷ Ono aka’date ŋgyero anjioko Lu di u’du aza te, se äzite “Ondro.” Ndroa amba vosi nda ata tana te Dawidi si taegyi se äsi mi na be nja ya ekye: “Ondro ono ka’do nyèri ata Lu rote, nyà’do ko taeriako.” ⁸ Ondro aba Yosua kozo loli se Lu ko’ba tana be ana gwo lidri ri, aba Lu unina ko ogone tu aza tana atane kovolesi. ⁹ Ka’do inye, tu dri gi’du orivoya lidri Lu ro ri loliza oso Lu kabe ugu loli u’du njidrieri si ronye. ¹⁰ Tana nda se kabe loli se Lu ko’ba tana be uru lolina ’da ni losi modo ndaro ro risi, oso Lu kololibe ni ndaro ri ronye. ¹¹ Ka’do inye, mojo mbara cini si loli ana usune, tana aza alo amaro ori ’da osaako oso ànya ronye tana ta taoroako ànyaro rota. ¹² Ata Lu ro lidriidriro ago losi oyeoyero, kyaka’da ro ndrani sidri ritu bando ro ri. Ka ŋga olo äbi le vose lindri ndi tori be kabe rudro’be kigye ya, le dusuvo ndi ido kowa robe kabe dridro’be kigye ya; kani ole ndi tavousu lidri robe vurena ope. ¹³ Änina ko ŋga aza da’done ni Lu ri, ŋgacini o’bao’baro äpidrina te ago teṛo orivoya driuŋboro mile ndaro ya. Ago beṛo ama cini ri ta andivo amaro ro itine ni ndäri. ¹⁴ Ka’do inye, mì’de mä̀ti taoma se màbe tana itina ’do anda. Tana ama orivoya Kohani ’desi Fopara be se oyite le Lu kandra, Yesu Ŋgwa Lu ro. ¹⁵ Kohani Fopara amaro ko oso nda se ni ko tausune mbaraako amaro ta ronye. Oko, ama orivoya Kohani Fopara be se ojo tana te ta cini yasi oso ama ronye, oko ye takozi kote. ¹⁶ Ka’do inye, mì’de mà’do turiako, ukyi voya giti Lu ro re, se tai’dwero be ana. Lau mùsuna yauni ’da ago mùsuna tai’dwero ndi ama opaza ondro màlete owo.

¹ Kohani fopara cini anjite orivoya ni lidri azi ndaro lako ago aka’date ruindune Lu ri vo ànyaro ya, ŋgapäṛi ozone ago tori olone ta takozi rota. ² Ago tana andivo ndaro orivoya mbaraako liti amba yasi, nda orivoya mbara be a’done trwe ànya se orivoya tauniako ago kabe ujeuje yibe. ³ Ago tana nda andivona mbaraako ’do ronye, beṛo ndäri ko tori olone toto takozii lidri rota oko kpa takozii modo ndaro rota. ⁴ ’Diaza ka ko andivo ndaro onjina taoro a’doro kohani fopara ro roya. Oko Lu ka toto ni mano se a’bate kohani fopara ro uzi, oso Arona ronye. ⁵ Kpa oso inye, Kristo ezi taoro a’doro kohani fopara ro kote ni andivo ndaro dri. Oko Lu atate ndäri ekye: “Mi orivoya Ŋgwa maro: Ondro ono ma’dote Täpi miro.” ⁶ Nda ata kpate vo aza ya ekye: “Nya’dona ’da kohani ro äduako, oso Melekizedeka ronye.” ⁷ Ori ndaro si ’bädri ya Yesu ye mätu ndaro te ago ka taeji otre amba si ago kiliyi Lu ri, se unina ndi nda opane ni odra yasi. Tana nda logorute vuru ago ezarute, Lu eri nda te. ⁸ Oko nda gica orivoya Ŋgwa Lu ro, nda ni ta te a’done taoro be ni rueza ndaro yasi. ⁹ Ondro a’ba nda te wäṛiro oko, nda a’dote eto’ba ŋgaopa äduako ro ànya se cini kabe nda oro ri, ¹⁰ ago Lu ayo ta ndaro te a’done kohani fopara ro oso Melekizedeka ronye. ¹¹ Ta amba orivoya ämäri atane ta ta ono rota, oko orivoya rritiro tana edrene ämiri tana nyà tauni liyaro. ¹² Tu a’dote amba ämiri ta a’doro miemba’bai ro ta, caoko mile gi’du ’diaza ri ami embane tauniro käti lazo Lu ro rota. Ago ugu ŋgaonya ṛatararo onyane ayani, nyà gi’du leyi umvu ayani. ¹³ ’Diaza se kabe leyi umvu orivoya gi’du ŋgagaŋwa yi, teinye tauniako ta taŋgye rota ndi takozi be. ¹⁴ Ŋgaonya ṛatararo, liti aza yasi, orivoya tana ’di’desii, se taoye si embayi andivo ànyaro te takado ndi takozi be lewene.

¹ Ka’do inye, mì’de mòyi mileya ro ŋgaemba ndra ya ago mè’be etovo lazo Kristo ro ro kovole ama kundu. Beṛo ko ämäri ogone kotopa drieta ro ni taoye se kabe ’diloci odra ya ndi taoma amaro Lu ro etone kpa to’di; ² taŋgaembaro bapatisii ro ndi drio’ba robe; efo avo ro ro ndi vureope äduako robe. ³ Mì’de mòyi mileya! Ago ono ni orivoya tase màyena ’da, ondro Lu kole gini owo. ⁴ Änina ànya se kabe taoma ànyaro e’bena logone kovole drietane eŋwanye ya? Sedri ànya orivoya ŋgaeyi Lu roya ànya tembeyi ŋgapäṛi vo’buyakuru rote ago ruyi ŋgala’do ànyaro Tori Alokado rote, ⁵ ànya niyite ni taoye yasi anjioko ata Lu ro orivoya kado, ago ànya usuyivo mbara se kabe ikyi tu mikya rote. ⁶ Ago ’dooko ànya e’beyi taoma ànyaro te! Orivoya ndi rritiro ogone ànya ezine drietane kpa to’di tana ànya kayi ugu Ŋgwa Lu ro oto kpa to’di ago ’bayi nda te driupiro miamba ya. ⁷ Lu kani, gyini se kabe gyi umvu ni ’bu kabe u’di ondoalo driigye ono si äṛu, se ’ba ŋga kyi’dikyi’di ni ombane kado ànya se ikyi’dite ànyari ri. ⁸ Oko ondro kukyi ndi kaŋwa be kombate oko kadona te i’do, te orivoya rriti ya latri Lu ro zele ago azana ’da asi si. ⁹ Ondro màta gica oso ono ronye oko, bereazii lulu ro ono, mùsuvo ndi endaro ta amiro ta. Mä̀ni ndi anjioko ami orivoya äṛu kadopara be se a’dote ŋgaoparo amiro ro. ¹⁰ Lu ko orivoya takadoako. Losi se mìyebe kode ŋgalu se nyàka’da be ndäri ŋgaopa se mìyebe si ago nyà gi’du ugu oyena Kristo’bai azi ri ono nda ijena tana ko. ¹¹ Tase màlebe para anjioko ami alo alo ri ugu oyene inye ole ndaro si le ädu ya, tana ŋgase nyà mio’ba tana ro ka’do robe endaro. ¹² Màle ko ämiri a’done tovo ro, oko a’done oso ànya se kabe taoma, ago orivoya yaiŋgyi be ronye, ago tana miru ŋgase Lu ko’ba tana be robe. ¹³ Ondro Lu ko’ba tao’ba te Abarayama ri oko, nda äṛurute tao’ba se nda ko’babe oyene. Tana ’diaza i’do ndrani nda andivo ri, ondro nda koye ruäṛu ndaro te oko nda yete ävuru modo ndaro rosi. ¹⁴ Nda atate ekye: “Ma tao’ba miri anjioko mäṛuna mi ’da ago mozona zelevoi amba ’da miri.” ¹⁵ Abarayama a’dote yaiŋgyi be, ago nda usu ŋgase Lu ko’ba tana be te. ¹⁶ Ondro ’diaza kabe ruäṛu, nda kaoyena ävuru ’diaza se ndrani andivo ndaro ri rosi, ago ruäṛu kani kalawasa cini loto. ¹⁷ Ànya se ka oyebe tase nda ko’ba tana be usune, Lu lete tana o’bane ṛo ŋbelero anjioko nda leko taoro ndaro läpine, ago nda loci ruäṛu ndaro te tao’ba ya. ¹⁸ Ka’do inye ta ritu kwoi orivoya se änina ko läpine ago se tana ro Lu unina ko koweogane. Tana ta’doro ama se mùsu dritai te nda si otombate mbara mio’ba se a’babe ama mile ono ätine anda. ¹⁹ Ama te mio’ba ono be oso ŋga ŋgaoyiro ronye ta ori amaro rota. Orivoya londro ro ago endaro, ago ka oyi boŋgo toyitoyiro yekalu vo’buyakuru ro yasi le ya yasi vo alokado roya. ²⁰ Yesu cite lau vo amaro ro ama mile ago a’dote kohani fopara ro äduako oso Melekizedeka ronye.

¹ Melekizedeka ono orivoya ’bädri’ba Salema ro ago orivoya kohani Lu Fopara Ndra ro. Ondro Abarayama ka ezi ego ni kyila se nda kope ’bädri’bai su be ṛe ana ro yasi oko, Melekizedeka ’bedrite nda be ago äṛu nda te, ² ago Abarayama ozo telesi alo ’bute ŋgase cini nda kurube rote ndäri (takaci käti ävuru Melekizedeka ro ro ni “’Bädri’ba Taŋgye ro;” tana nda orivoya ’bädri’ba Salema ro, ävuru ndaro takacina kpa, “’Bädri’ba Taliatokpe ro.”) ³ Tazevoedre i’do uti ndaro kode odra ndaro tana ro. Nda laba orivoya oso Ŋgwa Lu ro ronye, nda ka ori kohani ro äduako. ⁴ Ka’do inye, mindre, nda orivoya para. Abarayama zutu likuekye amaro, ozo telesi alo ’bute ŋgase cini nda kurube ni kyila yasi rote ndäri. ⁵ Ago zelevoi Lewe ro se orivoya kohanii ro kai atate Ota si telesi alo ’bute ŋga ro kotone ni lidri Yisaraele ro rigyesi, lidri ’bädri ànyaro ro gica orivoya kpa zelevoi Abarayama ro owo. ⁶ Melekizedeka efo kote ni Lewe yasi, oko nda koto telesi alo ’bute ŋga ro teni Abarayama rigyesi ago äṛu nda te, mano se usu tao’ba Lu rote ono. ⁷ Ta a’do wiriwiri ro ro i’do nda se kabe ’di äṛu orivoya ndrani nda se äṛube ri. ⁸ Ta kohanii rota okotokala telesi alo ’bute ŋga rote lidri se kabe odra si, oko, ta Melekizedeka rota taegyi atate ekye: Nda se kabe ori lidriidriro ru telesi alo ’bute ŋga rote. ⁹ Ago atana ndi nonye, tuse Abarayama ozo telesi alo ’bute ŋga robe si, Lewe ozo anya kpa. ¹⁰ Tana tuse Abarayama ko’bedribe Melekizedeka be si, äti Lewe drigba ko, oko nda ṛo orivoya lomvo zutu ndaro Abarayama roya. ¹¹ Ozo Ota te lidri Yisaraele ro ri, tazevona njurute a’do Lewe’ba ro kohani ro dri. Yauono, ondro losi kohani ro lewe ro ayete ŋgye, alena kohani aza tona kote a’done, nda se kesobe Melekizedeka vo, ko Arona. ¹² Tana ondro ka’do a’do kohani ro otozate, kpate ota tozane. ¹³ Ago Opi amaro se ata ta kwoi be tana ro, a’dote ni ’bakala to yasi, ago ko ni gboko se kindurube kohani ro ro yasi. ¹⁴ Äni ṛote kado anjioko äti nda te gboko ’bakala Yuda ro rosi, ago Musa ata ta ’bakala ono ro kote tuse nda kata ta kohanii rote ana si. ¹⁵ Tana a’dote ŋbelero kohani to aza efote, se orivoya oso Melekizedeka ronye. ¹⁶ A’ba nda te kohani ro, ko ota lidri ro ndi tavoorai be si, oko mbara ori se äduako rosi. ¹⁷ Tana taegyi ka ata ekye: “Nya’dona ’da kohani ro äduako, oso Melekizedeka ronye.” ¹⁸ Tana ota se uku ana anate tana orivoya mbaraako ago takaciako. ¹⁹ Tana Ota Musa ro ni ko ŋga aza o’bane ŋgye. Ago yauono mio’ba kadopara ozote se sina mà ikyi loto Lu re. ²⁰ Ago kinjona ro ruäṛu Lu ro kpa orivoya. Ruäṛu aza i’do oso nonye tuse a’ba azaka be kohani ro si owo. ²¹ Oko Yesu a’dote kohani ro takacina ta ruäṛu ro se tuse Lu katabe ndäri rosi rota ekye: “Opi ’ba tao’baro lämu’duro te ago nda unina kote drî ndaro läpine tona. ‘Nya’dona ’da kohani ro äduako.’ ” ²² Ago, a’do to ono, ’ba Yesu te a’done tao’baro kadopara ro. ²³ A’do toto aza orivoya; kohanii kai orivoya amba, oko ànya niyi kote orine ’duro losi ànyaro ya, tana ànya todrayite. ²⁴ Oko Yesu ka ori äduako, ago losi ndaro kohani ro coperu kote ’diaza ri. ²⁵ Ago ta’doro nda orivoya mbara be, yauono ago ondoalo ànya se kabe ikyi Lu re nda si opane, tana nda ka ori äduako Lu ejine ta ànyaro ta. ²⁶ Ka’do inye, Yesu, orivoya kohani fopara yi, nda orivoya alokado; teinye taenjiako ago takozi i’do nda ya, elewe nda teni takozi’bai resi ago eŋgate vo’buyakuru ya. ²⁷ Nda ko oso kohani fopara azaka ronye, nda leko torii olone ondoalo käti takozi modo ndaro rota ago ’dooko ta takozii lidri rota. Nda lo tori alodi te, perena ṛo alodi, tuse nda kozo andivo ndaro be si. ²⁸ Ota Musa ro ka lidri se orivoya ko kadoro ka’dana kohanii fopara ro, oko tao’ba Lu ro a’bate ruäṛu be, se ikyite kovolesi Ota vosi, ka’da Ŋgwa te, se a’bate ŋgye äduako.

¹ Tagya se cini màbe ugu tana atana anjioko ama orivoya Kohani Fopara oso nonye ono be, se kabe ori drígwo giti ’Desi Para vo’buyakuru roya. ² Nda ka ruindu kohani fopara ro Vo Alokado Fondra ya, anjioko ni, mutuguṛi se endaro eŋgate kuru Opi si, ko lidri si. ³ Kohani Fopara cini aka’date ŋgapäṛi ozone ago tori olone Lu ri, ago Kohani Fopara amaro beṛo kpa a’done ŋga aza be ozone. ⁴ Ondro aba nda ka’do gwo ’bädri ya, nda olena ko a’done kohani ro alona, tana kohanii se kabe ŋgapäṛi se alebe Ota Yudai ro si ozona ṛo orivoya lau. ⁵ Losi se ànya kayibe oyena kohani ro orivoya toto beti lindri ŋgase vo’buyakuru ya ro, kpa oso Musa ronye. Tuse nda kaoyebe Mutuguṛi Tao’baro omone si, Lu atate ndäri ekye: “Mindre miye ŋga cini ŋgye oso betina se aka’dabe miri ’bereŋwa dri ana ronye.” ⁶ Oko yauono, ozo losi kohani rote Yesu ri se orivoya parandra ni ànyaro drisi. Kpa oso tao’baro se arate lakole Lu ro ndi lidri ndaro be ya orivoya kadopara ronye, tana änjute tao’ba ŋgase kadopara ro dri. ⁷ Ondro aba ta aza ka’do gwo i’do koziro Tao’baro käti be, ’dooko aba ṛirina olene te i’do. ⁸ Oko Lu usu taenji te lidri ndaro be nda ’degwo atane ekye: “Tu kate eziikyi, Opi kani ata, se mayena tao’baro to’di ’da lidri maro Yisaraele ro ndi Yuda robe ri. ⁹ A’dona ko oso tao’baro se ma’babe zutui ànyaro be tuse märu ànya be drisi ago molofo ànya te tesi ni Ezipeto yasi ana ronye. Ànya riyi kote ’diri tao’baro se ma’babe ànya be ya, ago ta’doro maga bi kote ta ànyaro erine. ¹⁰ Ago, ono ni tao’baro se ma oyebe o’bane lidri Yisaraele robe tuse kabe ikyi ana si owo, Opi kani ata nonye ekye: Ma’bana ota maro ’da drî ànyaro ya ago megyina ànya ’da ya ànyaro yasi. Ma’dona ’da Lu ànyaro, ago ànya a’donayi ’da lidri maro. ¹¹ Alo aza ànyaro ri manoazi ndaro ’bakici’baazi ro embane i’do kode ta itine manoazi ndaro ’bakici’baazi ro, ri te i’do ekye ‘Mini Lu.’ Tana ànya cini uninayi ma ’da ni tipari ya le ’desi parandra ya. ¹² Me’bena ànya ’da takozii ànyaro ta ago mayina takozi ànyaro tana ko tona.” ¹³ Tao’baro to’di tana ata si, Lu ’ba se ka’dobe käti te uku ro, ago ŋgase aza te uku ro ndroa na kyete a’dona ’da i’do ndriro.

¹ Tao’baro käti orivoya ota mätu robe ago lidri ede vo mätu ro kpate. ² Eŋga mutuguṛi te kuru, se tesisi na, äzite Vo Alokado, ŋga asi edrero ndi tara’biza ambata se ozote Lu ri be orivoya kigye. ³ Boŋgo ṛiri oyioyiro kundusi mutuguṛi orivoya se äzite Vo Alokado Fondra. ⁴ Vo tori oloro läguläguro ŋga ŋgutruro ozaro ago Sänduku Tao’baro lomvona o’bio’biro logo läguläguro si ago lakaza läguläguro mana be orivoya kigye, dofo Arona ro se kyibii roote driigye, ago kuni kalakparo ritu se egyi ota te driigye be orivoya kigye. ⁵ Beti malaikai kufube orivoya Sänduku dri ka a’do Lu ro lototi ka’dana, kufu ànyaro lararute vose abe ’di e’be ta takozi rota kigye dri. Oko yauono ko orivoya tuse ta ŋga kwoi tazevona edrero sirosiro owo. ⁶ Ono ni ora se ara ŋga kai be owo. Kohanii ka oyi mutuguṛi tesisi ya tu cini si kama ànyaro oyene, ⁷ oko Kohani Fopara kaoyi toto ni ya mutuguṛi yasi roya, ago nda ka oyi toto perena alo ndroa alo ya. Nda ru kari se nda kabe ozona Lu ri ta andivo ndaro rota ago ta takozii se lidri koyebe teinye vona usuako rota. ⁸ Tori Alokado ka ŋgaemba ṛo ŋbelero tase cini arabe kwoi si anjioko liti ociro Vo Alokado Fondra ya äpi drigba ko’de, Ondro ka’do Mutuguṛi tesisi dri gi’du edrevo ya owo. ⁹ Ono ni orivoya taka’daro se kabe tu yauono ka’dana owo. Anjioko ŋgapäṛi ndi koronya se abe olona Lu ri unina ko ya mätu’bai ro o’bane wäṛiro, ¹⁰ tana ànya toto ŋgaonya ndi ŋgaumvu be ro, ago ŋgaojoro la’bi dritoto robe. Kwoi cini orivoya ota tesisi lomvo ro yi, se a’bate madale Lu ozona ota to’di lutu. ¹¹ Oko Kristo ikyi ṛote Kohani Fopara ro ŋgase kadoro se ṛote orivoya nja noŋwa ro. Mutuguṛi se nda kabe ruindu kigye orivoya foparandra ago ŋgye ko orivoya mutuguṛi se lidri kedebe ni yi, anjioko ko telesi ŋgase a’bate ’bädri ya ono ro. ¹² Ondro Kristo kocite mutuguṛi ya perena alodi ṛo ’dicini ta Vo Alokado Fondra ya oko, nda ru kari indri ro ndi ’daŋgoi robe kote ozone tori oloro ro; oko, nda rute kari modo ndaro ro ayani se ozo adri äduako te ämäri. ¹³ Kari indrii ndi ’daŋgoi ndi torofoi tiŋwà se azabe robe uluvute lidri se undiro drisi, tana äwäṛi ànya robe a’do undiro ànyaro onaza. ¹⁴ Ono orivoya ta endaro yi, ande tana te kari Kristo rosi! Tori äduako si nda ozo andivo ndaro te kpeye oso tori olo ŋgye ronye Lu ri. Kari ndaro wäṛina ya amaro ’da ni taawi risi, tana mìnduru robe Lu lidriidriro ri. ¹⁵ Tana ta ono ro Kristo ni ’dise kabe Tao’baro To’di ora, tana ànya se äzite Lu si ka’do robe äṛu äduako se Lu ko’ba tana be ana be. Ayena ta ono ndi tana odra a’dote se kabe lidri o’ba dritai ro ni takozi se ànya koyeyibe tuse tao’baro käti bedri losi oyevoya ana si. ¹⁶ Ta kalapäṛi rota orivoya kado tana ka’dazana anjioko lidri se koye anya be drate, ¹⁷ tana kalapäṛi orivoya ta awi yi ondro ka’do nda se koyebe orivoya lidriidriro owo, ayena tana toto odra ndaro vosi. ¹⁸ Ndi inye tao’baro se käti ayete toto oye kari rosi. ¹⁹ Käti, Musa petate lidri ri oso tase cini arabe Ota ya ronye. ’Dooko nda ru kari ’daŋgoi ndi indrii be rote, dro’bete gyi be, ago luvute buku Ota ro dri ndi lidri cini be, luvute to’bi ice se äzibe usopa rosi ndi kodo okaro be si. ²⁰ Nda atate ekye: “Ono ni kari se tao’baro se Lu kota ami be orone owo.” ²¹ Liti alo ono yasi Musa luvu kari kpate Mutuguṛi Tao’baro dri, ago ŋgase cini abe losi oye sina vo mätu roya dri. ²² Ndi endaro oso ta Ota ro ronye vo ŋgacini ro äwäṛite kari si, ago e’be ’di te ta takozi rota toto ondro kari korote owo. ²³ Ŋgase kai, se orivoya kojoyi ta beti vo’buyakuru robe etosi te ṛo wäṛine liti ana yasi. Oko ŋgà vo’buyakuru ro andivo ànyaro le toriolo kadopara. ²⁴ Tana Kristo ci kote Vo Alokado se lidri kedebe ni ya, se ni orivoya beti modo se endaro ro. Nda oyite vo’buyakuru andivona ya, se yauono nda ka’darute vo amaro ya Lu kandra. ²⁵ Kohani Fopara Yudai ro ka oci Vo Alokado Fondra ya ndroa cini si kari koronyai ’ba ro robe. Oko Kristo ci kote andivo ndaro ozone perena amba, ²⁶ aba ka’do gwo inye nda rite ṛo ruezane perena amba ṛo cu tu o’ba ’bädri ro rosi. Oko; yauono ondro ndroa cini tuna ro kate ugu okye oko, nda ka’darute perena alo ṛo tiṛi, takozi onaza andivo ndaro olona si. ²⁷ Beṛo ’dicini ri odrane perena alo, ago ono vosi vurena opene Lu si. ²⁸ Kpa oso inye ozo Kristo kpate olone tori ro perena alo takozii lidri amba ro onaza. Nda ka’daruna ’da pere ṛiri si, kote ta takozi rota, oko ànya se kabe ugu nda kwote kai opane ayani.

¹ Ota Yudai ro ka gialo ŋga kado se kabe ikyi ro ka’da, oko ko beti endaro anyaro. Tori olo ono alote ’duro, ndroa ro ndroa ro, Ota tori oloro se kwoi unina lidri se kabe ikyi Lu re ono o’bane ŋgye eŋwanye ya? ² Ondro lidri se kabe ugu Lu mätu äwäṛi gwo te endaro ni takozii ànyaro risi, aba ànya a’donayi te tausu taenji ro ako ta takozi rota tona, ago te tori olo cini e’bene. ³ Caoko, tori olo se abe olona ndroa ro ndroa ro ana ka talogo lidri dri ta takozii ànyaro rota. ⁴ Tana kari ’daŋgoi ndi indrii robe unina ko takozii onane alona. ⁵ Tana ta ono ro, ondro Kristo ka oyete ikyine ’bädri ya oko, nda atate Lu ri ekye: “Mile toriolo ndi tori oza be kote, oko nyede lomvo te märi. ⁶ Nya’do kote yai’dwesi ta koronyai ’ba ro ozaro cu vo torioloro dri kode tori olo takozii onaro zwi rota. ⁷ ’Dooko matate makye: ‘Äye Lu, ma begi ono, ole miro oyene kpa oso egyite ta maro ta buku Ota roya ronye.’ ” ⁸ Käti nda atate ekye: “Mile ko ca mi kpa ko yai’dwesi ta tori oloro ndi ŋga ozoro be ta kode koronyai abe ozana vo tori oloro dri ndi tori oloro takozii onaza rota.” Nda ata ta ono te caoko toriolo se cini kwoi ozote ta Ota ro ronye. ⁹ ’Dooko nda atate ekye: “Äye Lu, ma begi ono ole miro oyene.” Tana Lu kate toriolo cini uku onana zwi ago kate olo Kristo ro o’bana vo ànyaro ya. ¹⁰ Tana Yesu Kristo yete tase Lu kolebe ndäri oyene ayani, äwäṛi ama cini teni takozi ri ozo se nda kozo lomvo modo ndaro robe perena alo ago ṛo tiṛi ono si. ¹¹ Kohani cini Yudai ro yeyi ruindu te ṛo tu cini si ago ozoyi toriolo kpate perena amba, oko toriolo se kwoi ni kote alona takozii onane. ¹² Caoko, Kristo, ozo toriolo alodi te ta takozii rota, tori olo se orivoya taoyevoya, ago ’dooko nda rite drígwo Lu roya äduako. ¹³ Yauono nda ka ori lau madale Lu o’bana kyila’baazii ndaro lutu oso kotopa pa ndaro otoro ronye pa ndaro zele. ¹⁴ Ago toriolo alodi si nda ’ba ànya se äwäṛibe kai te kpeye kadoro äduako ni takozi ri. ¹⁵ Ago tori Alokado ka kpa tazevoedre ndaro ozona ama yibe. Käti nda ka ata ekye: ¹⁶ “Ono ni orivoya tao’baro se ma’bana ’da ànya yibe tui se kabe ikyi ana si owo, Opi kani ata nonye ekye: Ma’bana Tori maro ’da ya ànyaro ya ago megyina ànya ’da drii ànyaro ya.” ¹⁷ Ago nda ata kpa ekye: “Mayina takozii ànyaro ndi taoye undiro ànyaro be tana ko madaro.” ¹⁸ Ago ondro e’be takozii se kwoi te oko, toriolo aza takozi ona ro ale kote tona. ¹⁹ Ka’do inye, ädrupii maro, ama te kpeye dritai ro ocine Vo Alokado Fondra ya odra Yesu rosi. ²⁰ Nda pi liti to’di te ämäri, liti adri ro, äbi boŋgo oyioyiro yasi, anjioko orivoya lomvo modo ndaro rosi. ²¹ Ama orivoya Kohani para be dri’ba zo Lu ro ro. ²² Mì’de mìkyi ti Lu re ya ŋgye si ago taoma endaro si, ya se äwäṛite ni taenji ya ro ri ago aja lomvonai te gyi wäṛiro si. ²³ Mì’de mä̀ti mio’ba se meṛo tana be ono anda, tana mä̀nina ndi taoyine Lu ya tao’ba ndaro ätiro. ²⁴ Mì’de màti ta azi ro, azi opane ŋgalu ka’dane ago takado oyene. ²⁵ Mì’de mè’be ta kalakoto ro voaloya ko, oso azaka kabe ugu oyena ronye, oko, mì’de mozo agoago azi ri ndra, tana mìndre ndi anjioko tu Opi ro kate eziikyi lototi. ²⁶ Tana toriolo aza te i’do tona takozii onaza ondro mùgu takozi oye gi lädruro taŋgye se a’babe unine ämäri ono vosi owo. ²⁷ Oko vona se cini e’bete, te orine turi si ta ikyi vure rota ago läriŋbi asi ro ujena ànya se kyila’baazii ro Lu ri ’da! ²⁸ ’Diaza se koro Ota Musa ro kote a’bana ndi odrane teinye yauniako ondro usu nda te taenji be kala tazevoedre’bai ritu kode amba rosi owo. ²⁹ Ka’do inye, mano se kabe Ŋgwa Lu ro mawo, se ti kari tao’baro se käwäṛi nda be ni takozi ri gwo tamenye ro, se kabe Tori tai’dwero ro o’da. Nyusu tana te, taezaro se nda ka oyebe usune kozina a’dona mu’du eŋwanye ya? ³⁰ Tana mä̀ni ndi nda se katabe ekye: “Tavologo ni maro, mologona vona ni,” ago ata kpate ekye: “Opi opena vure lidri ndaro ro ni.” ³¹ Orivoya turi ’desi yi o’dene drí Lu lidriidri roya! ³² Mìyi tase ami be sina kyeno ana tana. Tu kai ya ŋgaeyi Lu ro keyi vo be ämidri vosi, nyèzarute ni ŋga amba risi, caoko rriti pe ami kote ṛe. ³³ A’da ami te tu azakasi miamba ya ago aye ami te koziro, ago tu aza si nyà’dote nja rudro’bene ànya se ayete koziro kpa oso inye ’do be. ³⁴ Nyàla’do rueza te kamba’bai be, ŋga cini amiro ärute, nyìŋgyi rriti te yai’dwesi, tana mìnite anjioko mìru ŋga aza kadopara te, se orina ’da äduako. ³⁵ Ka’do inye, nyìje agoago amiro ko, tana ka päläti ’desi ezi ni ämiri. ³⁶ Le ämiri a’done yaiŋgyi be, tana ole Lu ro oyeza ago ŋgase nda kabe tana o’ba uruza. ³⁷ Tana Taegyi ka ata ekye: “Toto fere iga oko, nda se ka oyebe ikyine ana ikyina ’da; nda leyena ko. ³⁸ Caoko lidri taŋgye’bai maro, omanayi ta ’da ago orinayi ’da; oko ondro aza alo ànyaro kozadrite kovole, ma’dona ko yai’dwesi nda be.” ³⁹ Ama ko lidri se kabe drîoza kovole ago kujebe yi. Oko ama orivoya taoma be, ago apate.

¹ A’done taoma be anjioko orivoya a’done ŋgye ta ŋgase abe mio’ba tana ro ta, ago a’done ŋgye ta ŋgase mäni ko ondrene rota. ² Taoma ànyaro si lidri se tui kyeno kai ro tana si Lu te. ³ Taoma si anjioko mänite a’ba ’bädri te ata Lu rosi, tana ŋgase äni ndi ondrene ono ede ko ni ŋgase andrebe ondre yasi. ⁴ Taoma ’ba Abele te toriolo kadopara ozone Lu ri ndrani Kaina ro drisi. Taoma ndaro si ta ndaro si Lu te aka’da nda te mano taŋgye’ba ro, tana Lu andivo edretazevo ndaro te ŋgapäṛi ndaro olesi. Ta taoma ndaro rota Abele ka gi’du ata, nda kodra gica owo. ⁵ Taoma laga Enoka teni odravoya. Oko äru nda te kuru Lu re, ago ’diaza ni kote nda usune, tana Lu ru nda te kuru. Taegyi ka ata ekye teinye Enoka uruako kuru, ta ndaro si Lu te. ⁶ Ta ’diaza ro ni ko Lu usine teinye taoma ako, tana nda se kabe ikyi Lu re beṛo a’done taoma be anjioko Lu orivoya ago kani ànya se kabe nda uṛi päṛi. ⁷ Taoma ’ba Noa ni ŋgaemba Lu ro ta ŋgase mileya nda ni ko ondrene rota tana erine. Nda ro Lu te ago ede toŋbo te se nda ndi katidri ndaro be apate kigye. Ago tase ka’dobe si ape vure ’bädri rote, ago Noa usu taŋgye teni Lu resi se ka ikyi taoma si. ⁸ Taoma ’ba Abarayama te Lu orone ondro Lu kuzi nda te oyine ’bädri se Lu ko’ba tana be ozone ndäri ya owo. Nda e’be ’bädri modo ndaro rote teinye vose nda kabe ugu oyi kigye uniako. ⁹ Taoma si nda rite ’diatra ronye ’bädri se Lu ko’ba tana be ndäri ya. Nda rite zoi boŋgo ro ya, oso Yisika ndi Yakoba be, se usuyi tao’ba kpate ni Lu resi ronye. ¹⁰ Tana Abarayama ka ugu ’bakici se Lu kaka’dabe ago kobebe, ’bakici se kotopa na ka ori ’duro ana kwotena. ¹¹ Taoma si Sara a’dote mbararo a’done ŋgwa be, nda gica pari odeodero ago Sara modo ni kote a’done ŋgwai be owo. Nda yitate Lu ya tao’ba ndaro ätina si. ¹² Taoye ya Abarayama gica avo ro oko, ni mano gi alo ono yasi zelevoi amba a’dote oso ’bi’bi vo’buyakuru ya ronye, orivoya oso doŋgoṛoŋwa siŋgwa ro kototi otiako ronye. ¹³ Taoma si ’dicini kwoi todrate. Ànya usuyi ŋgase Lu ko’ba tana be kote, oko ni lozo si ànya ndreyi ànya te ago ruyi ànya te, ago leyitadrina te ŋbelero anjioko ànya orivoya ’diatrai ro ago aba’bai ro ’bädri ya. ¹⁴ ànya se kayibe ta nonye kwoi ata ’ba ṛo ŋbelero anjioko ànya kayi ugu ’bädri modo ànyaro ro uṛina. ¹⁵ ’Bädri se ànya ke’beyibe ana ànya e’beyi tavousu tana ro te, aba ondro ànya kori gwo ’du tana usune, aba ànya a’donayi ndi kandrakado be ogone. ¹⁶ Oko tana ’bädri se ànya kayibe voondre tana ro orivoya ’bädri kadopara yi, ’bädri vo’buyakuru ro. Ago Lu ko driupiro ta ànyaro ta ànyari nda uzine Lu ànyaro, tana nda ede ’bakici te ànyari. ¹⁷ Taoma ’ba Abarayama te ŋgwa ndaro Yisika olone tori ro ondro ojo mbara Abarayama rote owo. Abarayama ni orivoya se Lu ko’ba tao’ba be rigye, caoko nda orivoya nja ŋgwa alodi ndaro ozone olone tori ro. ¹⁸ Lu atate ndäri ekye: “Yisika si nya’dona ’da zelevoi se ma’ba tana be ono be.” ¹⁹ Abarayama usutate anjioko Lu orivoya mbara be Yisika eŋgane ni odra ya, ago ata ndi inye, Abarayama go ru Yisika te kovole ni odra yasi. ²⁰ Taoma ’ba Yisika ’ba tao’ba mileya rote Yakoba ndi Esau be ri. ²¹ Taoma ’ba Yakoba äṛu ŋgwàagoro Yosepa rote ba alo alo ondro nda ka oyete odrane owo. Nda ätirute dofo ndaro abaro si ago mätu Lu te. ²² Taoma ’ba Yosepa te, ondro ka oyete odrane oko, nda pe ta oyiro Yisaraele’bai ro ni Ezipeto yasi tana te, ago e’be taŋgaembaro tase beṛo oyene ta avo ndaro rota te. ²³ Taoma ’ba uti’bai Musa rote nda da’done imbana nätu äti nda be vosi. Ànya ndreyite nda orivoya ŋgwa liŋgyiekye yi, ago ànya a’doyi kote turiro orine ota ’bädri’ba ro oroako. ²⁴ Taoma ’ba Musa te, ondro nda kombate oko, gatezo yi uzine ŋgwa ŋguti ’bädri’ba ro ro. ²⁵ Nda lete ruezane lidri Lu robe ndrani riyä takozi ro se tuna orivoya fere ono ri. ²⁶ Nda ’bamite rueza ŋgamawo ro ta Mesiya rota kadona para ndrani lakazà cini Ezipeto ro drisi, tana nda ’ba mi ndaro te päläti se mileya dri. ²⁷ Taoma ’ba Musa e’be Ezipeto te kyila ’bädri’ba ro turiako. Tana osoago nda ndre Lu ondreako te, nda gatezo mi ozane kovole. ²⁸ Taoma ’ba nda te Karama Lävu Odra ro ro oyene ago ozo tate kari luvune käläsi drisi, tana ukyi malaika odra ro ufu ŋgwàagoro se ätibe käti Yisaraele’bai ro ’da. ²⁹ Taoma ’ba Yisaraele’bai te mbararo drî Gyi’desi Okaro ro ozane oso gyini awi drisi ronye, ondro Ezipeto’bai kojoyite oyene inye oko, gyi ivu ànya te. ³⁰ Taoma ’ba tiṛi Yeriko ro tisite vuru aba Yisaraele’bai ro gbikyi ànya lomvosi u’duna njidrieri vosi. ³¹ Taoma pa Raba ronyi’ba ro teni ufuvoya ànya se koroyi Lu kote kai yibe, tana anya ru vomari’bai Yisaraele’bai rote bereazi ro yai’dwesi. ³² Muguna ata ndi driyaro ya? Saa ojo kote märi ta Gideoni, Baraka, Samisona, Yepeta, Dawidi, Samuele ndi nebii be ro itiza. ³³ Taoma ’ba ànya te kyila oyene ’bädrii cini be ago peyite ṛe. Ànya yeyi tase kado te ago ruyi ŋgase Lu ko’ba tana be te, ànya seyi kala ibii rote, ³⁴ izweyi asi mbaraekye te, payivote ni ufuvoya bando si. Ànya orivoya mbaraako, oko a’doyite mbararo, ànya a’doyite mbaraekye ro kyila ya ago peyi kyila’baazii ’diatrai ro rote. ³⁵ Taoma si ’ditoko usu ’didiri ànyaro se kadribe te. Azaka gayizo, leyi dritai ko, drayite rueza ya tana adri ànya robe ori kadopara ya. ³⁶ Rukäna omo’dote ago a’bite, ago azakana embete nyori si ago avote kamba ya. ³⁷ Avo ànya te kuni si, asi yana te ritu, äfu ànya te bando si. Ànya abayite gbikyi soyi kyinii timele ro kode indrii rote, ati’ba ro, ezate, ago ayete koziro. ³⁸ ’Bädri a’do kote kadoro ànyari! Ànya abayite oso aba’bai vocowa yasi ago lutuŋwà drisi ronye, loriyite kugyiŋwà yasi ago ’buŋwà gyini ya yasi. ³⁹ Se cini edretazevona be kwoi peyi ŋgateṛe taoma si! Caoko ruyi tao’ba se Lu ko’ba tana be kote, ⁴⁰ tana Lu ra tavoora kadopara te ta amaro ta. Ta ndaro anjioko toto a’do troalo ama be si a’ba ànya te ŋgye.

¹ Tana ama, orivoya lowa amba tazevoedre’bai ro ono be gbikyi ama lomvosi. Ka’do inye, mì’de mana andivo amaro ni ŋgacini se kabe edre liti dri yasi, ago ni takozi se kabe ama baṛi anda ono risi, ago mì’de mämu ya cini si umukyekye se ama mile ono ya. ² Mì’de mèdre mi amaro ’du Yesu dri, nda se taoma amaro kabe ruäti driigye ni etovona ya le ondevona ya ono. Nda ozovo kote ta taka rota! Nda edrete milena ya, tana riyä se kabe ugu nda kwote ana ta, nda a’do kote tusuro odra taka dri tana ro, ago yauono nda rite drígwo giti Lu ro roya. ³ Nyùsu ŋgase nda koyibe kigyesi tana, se ya takozi’bai ro oso tawi nda lomvo ono! Ago mì’ba andivo amiro ko a’done mbaraako ago ko vo ozone. ⁴ Tana kyila amiro takozi be ono mìye drigba ko le ’diufu ya. ⁵ Nyìje ata se agoago ozoro Lu kabe atana ämiri oso ŋgwai ndaro ronye tana teya? Se ekye: “Ŋgwa maro, migabi ondro Opi kate mi loto owo, ondro nda kate mi luku oko, nya’do ko agoago ako. ⁶ Tana Opi ka ’dicini se nda kabe luna loto, ago ka ’dicini se nda kurube oso ŋgwa ronye ezana.” ⁷ Nyìŋgyi rriti se ka’dobe taezaro täpi ro ronye ’do; rueza amiro kaka’dana anjioko Lu ka ugu ami oye oso ŋgwai ndaro ronye. Inye’do eza ŋgwa aza gi ko täpi ndaro siya? ⁸ Ondro ka’do eza ami kote, oso ŋgwai cini ndaro ronye, anjioko ami kote ŋgwà modo yi, oko ŋgwai märiro yi. ⁹ Täpii amaro a’do lomvo ro voro, ànya ezayi ama te ago màro ànya te. Ka’do inye, beṛo ämäri ama logone vuru Täpi amaro tori ro zele màri robe! ¹⁰ Täpii amaro a’do lomvo ro voro, ànya eza ama te tuna fere, oso se kalandrebe kado ànyari ronye, oko Lu ka oyena kado ama modo rota, tana màla’do a’do alokado ndaro robe. ¹¹ Ondro eza ama te, kalandrebe ämäri tuse aza eza ama be sina si ka ama o’ba tusuro, ko riyä ro. Caoko, voigyesi, ànya se olotote taezaro nonye ono si koto päläti taliatokpe doŋgo taŋgyero rote. ¹² Ka’do inye, nyèŋga drí amiro se okwookwa ro ono kuru ago nyòtomba kaya lä’bilä’biro amiro! ¹³ Nyùgu aba litiŋwà ŋgyero drisi, tana pa se ka’bo ro a’do ’da mbaraako, oko kogo kederu robe. ¹⁴ Nyojo a’done liatokpero ’dicini be ago nyojo ori alokado orine, tana ’diaza unina ko Opi ondrene teinye akona. ¹⁵ Ruona ni tai’dwero Lu ro yasi mindre kado, mi’ba ’diaza ka’do ko ŋgakyi’dikyi’di osoro ronye se kate omba kuru oko ozo rriti amba te äṛi ndaro si. ¹⁶ Mi’ba ’diaza ka’do ko ronyi’ba ro kode toriako oso Esau ronye, se ta ŋgaonya pere alodi rota gye kandrakado ndaro ŋgwa kayo ro rote. ¹⁷ Voigyesi oko, mini ndi, nda lete a’done äṛu täpi ndaro robe; oko azo nda te kovole, tana nda usu liti aza kote tase nda koyebe utweza, nda kuṛi anya gica miendre si owo. ¹⁸ Nyèsa kote oso lidri Yisaraele ro kesabe ronye, ŋgase mìni ndi tämbine, ’Bereŋwa Sinai ro ndi leko asi ro anya robe, votiniro ago uniro ndi likuliku be, ¹⁹ ovo cekuṛe ro, ndi kporo ata robe, ondro lidri keri ata te oko, ànya lo’barute ko ata aza erine, ²⁰ tana ànya ni kote tase atabe ana iŋgyine. “Ondro aba ca koronyai ’ba ro kodo ’bereŋwa gwo, beṛo ànya ovone kuni si ṛi.” ²¹ Musa atate ekye ondrena orivoya koziro para, “ma’dote orivoya lä’bilä’biro ago turituri ro.” ²² Oko, nyèsate ’Bereŋwa Zaiona ndi ’bakici Lu lidriidriro ro re, Yerusalema vo’buyakuru ro, malaikai kuturo anyaro be re. ²³ Nyèsate kalakoto riyä amba be ŋgwai Lu ro ätibe kayoro ono re, se ävurunai egyite vo’buyakuru ya. Nyìkyite Lu re, se ni vureope’ba ’dicini ro, ago tori lidri se kado a’bate taŋgye’bai ro rore. ²⁴ Nyèsate Yesu re, se ra tao’baro to’di te ago nyèsate kari luvu se tao’ba ŋgana ro kadona parandra ni kari Abele ro ri. ²⁵ Ka’do inye, nyà’do taoti be ago mìga ko zo ta nda se kabe ata ro erine. Ànya se kogayibezo ta nda se kope lazo Lu rote ’bädri ya ro erine pavo ko’de. Ka’do inye, màpana ŋga ndi ya, ondro ka’do mànarute pere ni nda se kabe ata ni vo’buyakuru ya resi ya! ²⁶ Ata ndaro kanda ’bädri te tu gi ana si, oko yauono nda ’batate ekye: “Oko tu alo si makandana vo ’da ndra ko toto ’bädri ayani oko vo’buyakuru kpa.” ²⁷ Ata gi “tu alo aza si” ka’da ndi ŋbelero anjioko ŋgase cini a’bate o’ba a’dona ’da kandakanda ro ago ushweushwe ro, ago ŋgase änina ko kandane orina ’da. ²⁸ Ka’do inye, mà’do aro’boya oye amba be, tana mùsu miri ’bädri’ba ro se äni kote kandane rote. Mì’de mà’do aro’boya oye amba be ago mämätu Lu liti se tana usina nda ’da ’do yasi, taoro si ndi turi be, ²⁹ tana Lu amaro orivoya endaro asi ŋgalesiro yi.

¹ Nyùgu azi lu oso ädrupii Kristo’ba ro ronye. ² Mìyi ta ’diatrai ro uru ro ’ba amiro yasi. ’Di azaka yete inye ago ruyi malaikai te teinye uniako. ³ Mìyi ta ànya se kamba ya ro, osoago ami kpa orivoya kamba ya ànya yibe. Mìyi ta ànya se kabe ugu rueza ro, osoago ami kpa orivoya ugu ruezavoya ànya ronye. ⁴ Lagye ri a’done orooro ro ’dicini ri, ago mànoago ndi ’ditoko be beṛo a’done ’diri azi ri. Lu opena vure ànya se ronyi ro ro ’da ndi ànya se kabe ronyi oye toko drisi kode ago drisi be. ⁵ Nyàgaga ori amiro dritai ro ni parata lu ri, ago ŋgase ami be sina ka’do ami ojoojoro. Tana Lu atate ekye: “Me’bena ami ko alona; ago mäsina kundu ko ämiri alona.” ⁶ Ka’do inye, mì’de mà’do driupiako ago màta màkye: “Opi orivoya Opa’ba maro, ma’dona ko turiro. Lidri unina e’di oyene märi ya?” ⁷ Mìyi ta dri’bai amiro kyeno, se kopeyi lazo Lu rote ämiri kai ro. Mìgo nyùsuta ori se ànya koribe ro ago todrayite ago mìso taoma ànyaro vo. ⁸ Yesu Kristo ojorere tandrobe, ondro, ago äduako. ⁹ Mì’ba ŋgaemba cini to kona ami ko ni liti ŋgye yasi. Orivoya kado a’done ŋgatomba yaya be ni tai’dwero Lu ro yasi, ago ko ugu ota ta ŋgaonya ro ro orone, ànya se kayibe ota kwoi oro payi ànya kote. ¹⁰ Kohanii se kabe ruindu vo Yudai ro mätu roya drikaca ako tori aza se alote vo tori oloro dri onyane. ¹¹ Kohani fopara Yudai ro ka kari koronya ’ba ro ro ezi Vo Alokado Fondra ya anya ozone tori oloro takozii ta; oko iza koronyai ’ba ro ro azate tesi gawa kundu. ¹² Tana ta ono ro Yesu dra kpate tesi ’bakici kundu, tana lidri wäṛiza ni takozii ri kari modo ndaro ro si. ¹³ Ka’do inye, mì’de mòyi ndare tesi gawa kundu ago màla’do driupi ndaro. ¹⁴ Tana ’bakici ’duro i’do ämäri ’bädri ya noŋwa, mà ugu voondre ’bakici se kabe ikyi ana ta. ¹⁵ Ka’do inye, mì’de mòzo räṛu Lu ri ondoalo tori olo amaro ro Yesu si, se ni ŋgaozo se äpäṛite kala se kabe nda eṛo Opi ro si. ¹⁶ Nyìje ta takado oyero ko ago mìpa azi, tana kwoi ni tori olo se tana kabe Lu usi owo. ¹⁷ Mìro dri’bai amiro, ago mìso ta ànyaro vo. Ànya kayi lindri amiro vona okwana teinye loliako, tana ànya itinayi ta ruindu ànyaro ro ’da Lu ri. Ondro mìro ànya te, ànya oyenayi losi ànyaro ’da yai’dwesi, ondro ka’do ko inye, ànya oyenayi ṛo tusu si, ago anjioko unina kote a’done ŋgaopa ro ämiri. ¹⁸ Nyùgu mätu oye ama ta endaro ama orivoya tausu kado ya robe, tana màle tase ŋgye oyene tu cini si. ¹⁹ Ago ma ami eji ndra ole cini si mätune tana Lu kozo ma robe kovole amire ndriro. ²⁰ - ²¹ Lu eŋga Opi amaro Yesu teni odra ya, se ni orivoya Lekye’ba ’Desi timele ro, tana ta kari ndaro se korobe rota, se sina tao’baro äduako ebe kalana te. Lu taliatokpe ro kozo ŋgase cini kado mìlebe ole ndaro oyeza ämiri, ago nda, Yesu Kristo si, koye tase kabe nda usi ama ya. Ago räṛu ka’do Kristo ri ’duro, äduako! Amen. ²² Molo’baru ämiri, ädrupii maro, lazo agoago ozoro ono erine yaiŋgyi si, tana taegyi se megyibe ämiri ono ko kaca. ²³ Male unine ämiri ädrupi amaro Timoteo olofote ni kamba yasi, ondro nda kikyi te ga ndriro, nda a’dona ’da tro mabe ondro mikyite ami ondre owo. ²⁴ Mìye mede amaro dri’bai cini amiro ri ago lidri cini Lu ro ri. Ädrupii ni Italia yasi yeyi mede ànyaro ämiri. ²⁵ Tai’dwero Lu ro ka’do ami cini be.