GALATIA’BAI

¹ Ni Paulo resi, se uzina lazo’ba ro ono ikyi kote ni lidri resi kode äzi kote lidri si, oko ni Yesu Kristo ndi Lu Täpi, se eŋga Yesu be ni avo yasi resi. ² Ädrupii se cini mabe noŋwa ono dro’beyi iyi te mabe mede ozovoya Känisa Galatia ro ri: ³ Ka’do inye Lu Täpi amaro ago Opi Yesu Kristo kozo tai’dwero ndi taliatokpe be ämiri. ⁴ Ama o’baza dritai ro ni tuse yau koziro ono yasi, Kristo ozo andivo ndaro te takozii amaro ta, ole Lu ndi Täpi amaro robe oro ro si. ⁵ ’Desi ka’do Lu ri äduako, äduako! Amen. ⁶ Malarote ta amiro ta! Tuna dri i’do amba oko nyugu ruona teni nda se kuzi ami be tai’dwero Kristo rosi resi, ago nyàte ugu lazokado aza to uruna ayani. ⁷ Taŋgyero, “lazokado aza tona” i’do, oko ma ta ono ata tana lidri azaka orivoya se kayi ugu ami gburu ago kayi ojo lazokado Kristo ro tozane. ⁸ Oko ondro ka’do ca ama kode malaika ni vo’buyakuru yasi kope lazokado se to te ämiri ni se màpebe ämiri risi, mì’ba nda ka’do latri äduako be! ⁹ Kätina matate inye, ago yauono ma kpa atana to’di; ondro ’diaza kope lazokado se to te ämiri ni se mirube risi, mì’ba nda ka’do latri äduako be! ¹⁰ Inye’do ono wigwo oso ma ojo taoye lidri ro usine ya? Ko inye! Tase malebe orivoya ta maro ri Lu usine ayani! Inye’do ma ojo ta maro ri lidri usine ayani ya? Ondro ka’do aba male gwo ’du dri ta maro ri lidri usine, aba mänina ko a’done ruindu’ba Kristo ro. ¹¹ Mi’ba miti ta te ämiri, ädrupii maro, tana lazokado se mabe opena ämiri ono, eto kote orivoya lidri si. ¹² Musu kote ni lidri aza resi, kode ’diaza emba tana ko ni märi, oko Yesu Kristo andivona ka’da ni märi. ¹³ Ori uku maro se maribe mätu Yudai roya iti tana te ämiri, meza känisa Lu ro ṛote yauni ako ago mojote perene kpeye. ¹⁴ Mätu Yudai ro oyene ya ma’dete ni käti drîya amba Yudai ro paazii maro ri, ago mulu la’bi uku zutui amaro rote ndra. ¹⁵ Oko Lu, tai’dwero ndaro si nji ma te teinye ṛo ma utiako, ago zi ma te ruindune ndäri. Ago ondro nda kora tana te ¹⁶ Ŋgwa ndaro ka’dane märi, tana mape Lazokado ta ndaro ro robe Atrai ri oko, moyi kote ’diaza re miomba ta, ¹⁷ moyi kpa ko Yerusalema ya ànya se ka’dobe lazo’bai ro käti ni märi ondrene. Oko moyite dori Arabia ya, ago ’dooko megote Damaseka ya. ¹⁸ Ago ndroa nätu vosi oko ma’de gwo oyine Yerusalema ya atane Petero be, ago marite nda be u’du ’butealo fosu. ¹⁹ Mandre lazo’bai azaka kote, oko mandre toto Yakoba ädrupi Opi ro ayani. ²⁰ Tase mabe egyina ono orivoya taŋgye yi. Lu ni ndi maga kowe ko! ²¹ Ono vosi moyite vo azaka Siria ndi Silisia robe yasi. ²² Tu gi ana si gbokoi känisa ro Yuda ya niyi ma ko gya ro. ²³ Ànya niyi toto tase azii ka ugu atana be ayani ekye: “Mano se sedri kabe ama eza ’do yauono kate ugu ta taoma se nda kojobe perene ono ro opena!” ²⁴ Ago ànya räṛuyi Lu te ta maro ta.

¹ Ndroa ’butealo fosu vosi moyite kovole Yerusalema ya Baranaba be, märu Tito te tro ma be. ² Moyite tana Lu ka’da ta te märi ekye beṛo märi oyine. Rudro’be iṛero dri’bai be si medretazevo lazokado se mapebe Atrai ri ana rote. Male ko losi maro se kyeno kode yauono ri edrene. ³ Azi maro Tito, nda ca orivoya Giriki yi, igbiri kote olone ŋbiṛiro, ⁴ azakana koleyi ca oyene inye owo. Lidri azaka se yeyi iyi te oso taoma’bai azi ronye eciyite gboko amaro ya kugu ro oso vomari’bai ronye, tana ekye dritai se mà’dobe sina rudro’be Kristo Yesu be si ono yusu vona robe. Ànya leyite ama o’bane iyeäṛii ro Ota Yudai ro ri, ⁵ oko ta taŋgye lazokado ro ätiro ta ämiri, mòzovo kote ànyari ca saa giṛiŋwa ya ànyari ca saa menyeŋwa ya. ⁶ Oko dri’bai se kalandrebe tapara ro kwoi, a’do se ànya ka’do be a’do toto na i’do märi, Lu pe vure ko a’do tesi si lomvo ro voro, ma ata makye dri’bai se kai adroayi ŋga aza kote lazo alokado se mabe opena dri. ⁷ Oko to ni ’do ri, ànya ndreyite anjioko Lu ozo losi ugu lazokado opero Atrai ri te märi, kpa oso nda kozo losi ugu lazokado opero Yudai ri te Petero ri ronye. ⁸ Tana mbara Lu rosi a’ba ma te lazo’ba ro Atrai ri, kpa oso a’ba Petero te lazo’ba ro Yudai ri ronye. ⁹ Yakoba, Petero, ago Yoane se andrete dri’bai ro kwoi, ndreyite anjioko Lu ozo losi ndra ono te märi, ànya kandayi drí Baranaba ndi mabe rote, taka’daro ro anjioko ama orivoya lazo’bai azi yi. Màle tadrite anjioko ma ndi Baranaba be ri losi oyene Atrai lako ago ànyari oyene Yudai lako. ¹⁰ Tase ànya kejiyibe anjioko ekye beṛo ämäri ta ati’bai se gboko ànyaro ya oyine, se ṛo orivoya ni ŋgase modona ma’do beṛo nja oyene owo. ¹¹ Oko ondro Petero kikyite Anetiokia ya oko, muluku nda te miamba ya, tana nda yetate koziro. ¹² Teinye drigba dri lidri se azaka Yakoba kozobe kai ri esa ako lau, Petero ugu ŋgaonya te ädrupii se Atrai robe. Oko esa lidri kwoi ro vosi, nda eŋgyerute kovole ago le kote ŋgaonyane Atrai be tana nda orivoya turiro ni ànya se kulu ànya olo ŋbiṛiro be ri. ¹³ Yudai azaka ädrupii ro etoyi taoye kpate turi si tro Petero be; ago ca Baranaba naru kpate taoye turi si ànyaro ’do si. ¹⁴ Ondro mandrete ànya uguyi aba kote liti ŋgye lazokado ro yasi oko, matate Petero ri ànya cini milesi makye: “Mi orivoya Yuda yi caoko nya ori oso Atra ronye ko oso Yuda ronye. Ka’do inye nyojona eŋwanye Atrai gbirine orine oso Yudai ronye ya?” ¹⁵ Endaro, ama orivoya Yudai uti yasi, ago ko “Atrai takozi’bai,” oso äzi ànya be ronye. ¹⁶ Caoko mä̀ni ndi anjioko a’ba lidri te ŋgye Lu be gialo taoma Yesu Kristo ya si, ko tase Ota kolebe ugu oyena si. Ama, kpa, màmate Yesu Kristo ya tana a’ba ama robe ŋgye Lu be taoma amaro Kristo ya si, ago ko tase Ota kolebe ugu oyena si. Tana a’ba ’diaza kote ŋgye Lu be tase Ota kolebe ugu oyena si. ¹⁷ Ondro, ka’do, mà ojo ama o’bane ŋgye Lu be rudro’be amaro Kristo be si, ago usu ama bete orivoya takozi’bai ro kpa oso Atrai ronye, inye’do Kristo ka tadri takozi ro olena ya? Ko inye! ¹⁸ Ondro ka’do mago mamo ŋgase mepere be te, ’dooko maka’da andivo maro te a’done ’dise kabe Ota pere ro. ¹⁹ Caoko, ta Ota rota, ma orivoya avo yi, äfute Ota andivona si, tana yauono mari robe Lu ri. Oto ma te Kristo be taka ndaro dri, ²⁰ ago caoko ma kote ni ori, oko Kristo kate ni ori ma ya. Ori se mabe orina yauono, ma ori taoma Ŋgwa Lu ro yasi, se kulu ma be ago ozo adri ndaro te ta maro ta ono. ²¹ Maga tai’dwero Lu ro ko zo. Oko ondro a’ba ’diaza te ŋgye Lu be Ota si, ’dooko Kristo dra iro te awi.

¹ Ami Galatia’bai amama ro ono! A’di odo ami niya? Odra Yesu Kristo ro taka dri aka’date ṛo ŋbelero ami mile! ² Nyìti ta alo ono ka märi; inye’do nyùsu Tori Lu rote tase Ota kolebe ugu oyena si kode lazokado eri si ago ugu taoma si kigye ya? ³ Mìni a’done amama ro eŋwanye! Nyèto tate Tori Lu rosi, yauono mìlete ondene mbara andivo amiro rosi ya? ⁴ Inye’do nyèzarute awi ya? Endaro ko inye! ⁵ Inye’do Lu ka Tori ozo ämiri ago ka talaro ro oye ami lako tana nyà tase Ota kolebe oyena kode tana nyèri lazokado be ago nyàbe taoma kigye ono roya? ⁶ Nyùsu taoye Abarayama ro tana, oso taegyi katabe ronye ekye: “Nda matate Lu ya, ago ta taoma ndaro rota ati nda te taŋgye’ba ro.” ⁷ Beṛo ämiri unine, anjioko zelevoi ŋgye Abarayama ro orivoya ni lidri se taoma be iyi. ⁸ Taegyi atate ṛo kyeno ekye Lu o’bana Atrai ’da ŋgye andivo ndaro be taoma si. Ago ndi inye Lu ayo Lazokado te Abarayama ri ekye: “Mi si Lu äṛuna ’dicini ’da.” ⁹ Abarayama mate ago äṛute, ka’do inye vona cini se kabe taoma äṛute oso nda ronye. ¹⁰ Ànya se kabe mio’ba ugu Ota oro si ka ori latri zele. Tana taegyi ka ata ekye: “Nda se koro ŋgacini se egyite buku Ota roya kote ondoalo orivoya latri Lu ro zele!” ¹¹ Yauono, ṛo orivoya ŋbelero a’ba ’diaza kote ŋgye Lu be Ota si, tana taegyi ka ata ekye: “’Dise a’bate ŋgye Lu be orina ’da taoma si.” ¹² Oko Ota ta aza ako oyene taoma be, oko taegyi go ka ata ekye: “Nda se kabe ŋgacini se Ota kolebe oye orina ndi.” ¹³ Kristo twe ama teni latri se Ota kabe ezina ri, se a’dote latri ro ämäri, tana taegyi ka ata ekye: “’Diaza se ayite ce dri orivoya latri Lu ro zele.” ¹⁴ Kristo ye tase ono te tana äṛu se Lu ko’ba tana be Abarayama ri ozo robe Atrai ri Kristo Yesu si, tana anjioko taoma si mà’do robe Tori se Lu ko’ba tana be ono be. ¹⁵ Ädrupii maro, ma oye ta ka’dane taoye se abe oyena ondoalo si. Ondro lidri ritu koleyi tadri ta aza ro te ago kegyiyi ävuru te ta tadriolero zele, ’diaza unina ko anya perene kode ta to’di aza locine kigye. ¹⁶ Mindre, Lu ’ba tao’ba ndaro te Abarayama ri ago zelevo ndaro ri. Taegyi ata ko ekye zelevoi, se takacina anjioko lidri amba, oko atate toto zelevo ayani, takacina toto mano alo ayani, se äzibe Kristo. ¹⁷ Tase malebe atane ni no, anjioko Lu ’ba tao’baro te Abarayama be ago ’ba tate ätine. Ota, se ago ozobe ndroa kama su ago ’butenätu vosi ana, unina ko tao’baro Lu ro perene ago forone. ¹⁸ Tana ondro ŋgapäṛi Lu ro ka mio’ba Ota dri, ’dooko anya ’ba mi kote toni tao’ba ndaro dri, caoko, tana ta tao’ba ndaro rota anjioko Lu ozo ŋgapäṛi ana te Abarayama ri. ¹⁹ Ka’dobe inye, ta Ota ro e’di ya? Oloci anya te ŋgakozi se abe ugu oyena ka’daza, ago orine anyari madaro madale zelevo Abarayama ro ikyina si, nda se a’ba tao’ba te rigye ’do. Malaikai ezi Ota te vuru noŋwa, mano se kabe ugu taoye kasa’ba rosi. ²⁰ Ale kasa’ba ko ka’dote toto lidri alodi yi owo; ago Lu orivoya alodi. ²¹ Inye’do Ota ’bote kyilaazi tao’ba Lu ro roya? Hwa, ko inye! Tana ondro aba lidri kusu ota aza gwo se ka adri ezi, ’dooko ’dicini a’bana ndi ŋgye Lu be anya oro si. ²² Oko taegyi ka ata ekye, ’bädri cini orivoya mbara takozi ro zele; ago ŋgapäṛi se a’ba tana be ta taoma Yesu Kristo ya ta ozote ànya se kayibe taoma ri. ²³ Oko teinye dri taoma ono ri esaako, Ota sedri ama cini ro te oso kamba’bai ronye madale taoma se kabe eziikyi ono olofona lutu. ²⁴ Ago ta’doro Ota a’dote lepe’ba ro ämäri ago lepe ama te Kristo re, tana a’ba ama robe ŋgye Lu be taoma si. ²⁵ Oko yauono oso taoma kesabete ono ronye, ama kote tona ŋga ŋga lepe lepe’ba ro zele. ²⁶ Taoma si anjioko ami cini te orivoya ŋgwai Lu ro rudro’be Kristo Yesu be si. ²⁷ Abapatisi ami te rudro’be Kristo be si. Ago yauono mìso a’do Kristo rote ami lomvo. ²⁸ Ka’do inye a’do toto i’do lakole Yudai ro ndi Atrai be roya, lakole iyeäṛii ro ndi dritai’bai be roya, lakole mànoago ndi ’ditoko be roya, ami cini te alo rudro’be Kristo Yesu be ya. ²⁹ Ondro ami orivoya Kristo ro, ’dooko ami te orivoya zelevoi Abarayama ro ago nyùsuna ŋgase Lu ko’ba tana be ’da.

¹ Tase mabe ugu atana ni no, ŋgwa se ka oyebe drimbi täpi ndaro ro urune aye kpate oso iyeäṛi ronye, nda bedri orivoya ŋgaga ro, nda gica orivoya endaro kuzupi ŋgacini ro owo. ² Nda bedri orivoya ŋgaga ro ’di azaka kani vo ndaro ondrena ago kani losi cini ndaro orana madale tuse arabe täpi ndaro si sagwo. ³ Kpa oso inye, ama kpa orivoya iyeäṛii tori se kabe ugu ’bädri miri ro teinye ämäri dri osaako omba tori ro voro roya. ⁴ Oko ondro tu ŋgyena äduro kesate oko, Lu ezo Ŋgwa modo ndaro te. Ätite ’ditoko si ago rite Ota Yudai ro zele, ⁵ drî ànya se Ota zele ro utwene, tana ’dooko mà’do robe ŋgwà ro Lu ri. ⁶ Ka’daza anjioko ami orivoya ŋgwà Lu ro, Lu ezo Tori Ŋgwa ndaro rote ya amaro ya, Tori se kabe drîayo ekye: “Täpi, Täpi maro.” ⁷ Ka’do inye, mi kote tona iyeäṛi yi oko ŋgwa yi, ago mibe ro te orivoya ŋgwa yi ono, Lu ’ba mi kpate a’done drimbi’ba ro. ⁸ Tu kyeno ya mìni Lu kote, ago nyà’dote orivoya iyeäṛii ro ŋgase ko lui ro ri. ⁹ Oko yauono oso mìni Lu be te ono ronye, matana te makye: Yauono Lu ni ami te, oko mìle gwo mi ozane kovole tori se mbaraako ’dimirivoya re eŋwanye ya? Mìle gwo ogo a’done iyeäṛii ro ànyari kpa to’di etaya? ¹⁰ Mìtite ta u’duyi, imbai, tui, ndi ndroai azaka robe ayani. ¹¹ Ma orivoya milo’bebe ta amiro ta! Inye’do losi maro cini ta amiro ta unina te a’done ta awi roya? ¹² Molo’baru ämiri ädrupii maro, nyà’do ma ronye, tana ma kpa oso ami ronye. Mìye ŋgakozi aza kote märi. ¹³ Oso mìnibe ronye mape lazokado te ämiri tu käti ana si tana ma adravoro. ¹⁴ Oko adravo maro ka’do ca taojoro ro ämiri oko, nyàmawo ago miga ma kote zo. Oko miru ma te oso malaika ni Lu resi ronye, ago miru ma te oso ma Kristo Yesu modo owo. ¹⁵ Nyà’dote orivoya yai’dwesi! Ta e’diro gwo a’do ni riyä se cini nyà’dobe sina ono riya? Ma modo mänina ndi tazevoedrene anjioko aba ka’do gwo rritiako aba ono nyèwe mi modo amiro rote ago nyòzo ànya te märi. ¹⁶ Inye’do yauono ma te kyila’baazi amiro tana ma be ugu taŋgye iti ämiri ono roya? ¹⁷ Lidri azaka se kai leyi ämiri a’done ànya resi, oko ko ta takado aza rota ämiri. Ŋgase aza ànya kolebe anjioko ami lewene ni mare si. Tana nyà’do robe ole be ànya ya oso ànya ka’do be sina ami ya ronye. ¹⁸ Oko, ṛo orivoya kado lidri ri a’done ole be ami ezine ànya resi, oko toto ondro ka’do ta ànyaro ka’dote ta takado rota owo. Ono orivoya ondoalo taŋgye yi, ago ko gialo tuse ma te ami be si. ¹⁹ Ŋgàgaŋwai se mulu tawi ono! Kpa to’di oso endre ŋgwa utivoya ronye ma kpa lomvoluwu alo ono usuna ta amiro ta madale a’do Kristo ro a’dona lutu ami ya. ²⁰ Oso aba ma’do gwo ami yibe yauono, tana ko’ba mäni tase atane robe. Ma orivoya milo’belo’be ro ta amiro ta! ²¹ Mì’ba meji azaka amiro se kolebe a’done Ota zele te, inye’do nyèri tase Ota kabe atana koya? ²² Anya ka ata ekye Abarayama orivoya ŋgwàagoro ritu be, alodi ätite toko ruindu’ba ro lomvo, azana toko modo lomvo. ²³ Ŋgwa ndaro toko ruindu’ba ro lomvo ätite abe ’diuti voro, oko ŋgwa ndaro toko modo lomvo ätite tao’ba Lu rosi. ²⁴ Ta kwoi orivoya taka’daro yi. ’Ditoko ritu kwoi ka tao’ba ro ritu ka’da. Anya se ŋgwai anyaro ätite iyeäṛi ro ni Agara, ago anya ka tao’baro se a’bate ’Bereŋwa Sinai pa ka’da. ²⁵ Agara orivoya taka’daro ’Bereŋwa Sinai se Arabia ya ro, orivoya ni taka’daro Yerusalema yauono ro. Yerusalema orivoya oso iyeäṛi ronye ndi lidri cini anyaro be. ²⁶ Oko Yerusalema vo’buyakuru ro orivoya dritai ro, ago anya orivoya endre amaro. ²⁷ Tana taegyi ka ata ekye: “Nya’do yai’dwesi toko ŋgwa ako ono! Mi’be käräyi ago mitre riyä si, mi se nyusu luwu ŋgwa utiro ko ono! Tana toko se äsibe tesi a’dona ’da ŋgwà be amba ndrani toko se ago e’be beko ri.” ²⁸ Oko yauono, ami ädrupii maro, orivoya ŋgwai Lu ro oso ta tao’baro ndaro ro ronye, kpa oso Yisika ka’dobe ronye. ²⁹ Tu gi ana si ŋgwa se ätite abe ’diuti voro eza nda se ätite Tori Lu rosi te, ago yauono kpa oso inye. ³⁰ Oko taegyi ka ata ekye e’di ya? Anya ka ata ekye: “Misi toko ruindu’ba ro ndi ŋgwa anyaro be tesi; tana ŋgwa toko ruindu’ba ro ro unina ko drimbi täpi ndaro ro lewene ŋgwa toko modo robe.” ³¹ Ka’do inye, ädrupii maro, ama ko orivoya ŋgwai toko ruindu’ba ro ro oko toko modo ro ro.

¹ Dritai ni ŋgase ama be sina owo, Kristo onji ama te dritai ro! Ka’do inye nyèdre ŋgyiri oso lidri dritai ro ronye, ago mì’ba andivo amiro ko a’done kpa to’di iyeäṛii ro. ² Nyèri! Ma, Paulo, ma ta iti ämiri ondro ka’do mìlete andivo amiro olone ŋbiṛiro, anjioko Kristo iro te ta awi yi ämiri. ³ Ma tazevoedre kpa to’di mano se lebe andivo ndaro olone ŋbiṛiro anjioko ndäri Ota cini orone. ⁴ Azaka amiro se kabe ojo iyi o’bane a’done ŋgye Lu be ugu Ota oro si iyi, kyeyi andivo ànyaro te lozo ni Kristo resi, ami te orivoya tesi ni tai’dwero Lu ro resi. ⁵ Oko ama, mio’ba amaro anjioko Lu o’bana ama ’da ŋgye nda be; ago ono ni ŋgase màbe kotena owo, mbara Tori Lu ro ro kugu losi oye ama ya taoma si. ⁶ Tana ondro ama rudro’be be Kristo Yesu be, ca ’diolo ŋbiṛiro ca oloako ŋbiṛiro ’ba a’do toto ko; tapara anjioko orivoya ni taoma se kabe losi oye ŋgalu si ’do. ⁷ Mìye tate kadoro! Oko a’di ’ba ami ni edrene ni taŋgye orovoya ya? Nda leye ami te eŋwanye ya? ⁸ Lu se kabe ami uzi ono ye kote ni. ⁹ “Loŋga giṛiŋwa kani ambata o’ba upine duŋguṛu, oso ànya kabe ata ronye.” ¹⁰ Oko ma gi’du mio’ba be ami ya. Ori amaro rudro’be Opi be si kani ma o’ba mio’bane anjioko mìnina ko a’done ta to aza be, ago mano se kabe ami gburu, nda ’bo a’di owo ya, Lu ezana nda ’da. ¹¹ Ädrupii maro, ondro ka’do ma drigba ta ’diolo ŋbiṛiro ro opena, tana e’di a dri gi’du ugu ma eza niya? Ondro ’do ka’do ndi ta endaro yi, ’dooko taope maro ta taka Kristo ro rota unina ko rriti ozone. ¹² Aba male gi ṛo lidri se kabe ugu ami gburu koyi ri ànya enjine ndra, mì’ba ànya keŋgyeyi andivo ànyaro roti ro! ¹³ Oko ami, ädrupii maro, äzi ami te a’done dritai ro. Oko mì’ba dritai amiro ono ko a’done megyegye ro ugu ole lomvo amiro ro ri ami mirine ni. Oko, mì’ba ŋgalu ko’ba ami ruindune azi ri. ¹⁴ Tana Ota cini aṛi kalana te ota alo ono ya. “Nyulu oriazi miro oso nyabe andivo miro lu ronye.” ¹⁵ Oko ondro nyà taoye oso koronyai vocowaro ronye, nyà azi oga ago nyà ugu oyena koziro, mìndre ami kado ukyi nyèpere azi ’da. ¹⁶ Tase mabe atana ni ono: mì’ba Tori kelepe ori amiro ni, ago mìnina ko ole lomvo ro oyene. ¹⁷ Tana ŋgase lomvo amaro kabe olena letadri ko tase Tori kolebe be, ago ŋgase Tori kolebe letadri ko tase lomvo kolebe be. Se ritu kwoi orivoya kyila’baazii, ago ta ono ro mìnina ko tase mìlebe oyene. ¹⁸ Ondro Tori kate ni ami lepe, ’dooko ami kote Ota zele. ¹⁹ Tase a’do lomvo ro kabe oyena orivoya ṛo ŋbelero. Aka’da begi kwoi, ronyi, taundi, taoye undiro, ²⁰ lui awi mätu, läkä. Lidri ka a’do kyila’baazii ro ago kayi kyila oye, ànya kayi a’do yaoko be, kyila be, yao’ba be, ànya kayi rulewe njonjo ago gboko ro, ²¹ mawi o’ba si, ’diufu wa si si, käri kozi si, ndi ŋga azaka oso kwoi ronye oye be. Ma ata ämiri kpa to’di oso maye be käti ronye, ànya se kayibe ta kwoi oyena urunayi Miri ’Bädri’ba Lu ro ro ko drimbi ro. ²² Oko Tori ka ŋgalu, riyä, taliatokpe, yaiŋgyi, yauni, takado, a’do’diri, ²³ mäwuako ndi andivo rita be owa. Ota aza i’do se ka ata ekye ŋga kwoi orivoya koziro. ²⁴ Ago ànya se Kristo Yesu ro ’bayi a’do lomvo ro ànyaro te odrane mbara cini anyaro ndi ŋgalovona be be. ²⁵ Tori ozo adri te ämäri; beṛo kpa ndäri ni ori amaro ritane. ²⁶ Beṛo ko ämäri a’done driuŋgyi be kode ya azi ro ekwone kode a’done yaoko be azi lomvo.

¹ Ädrupii maro, ondro ’diaza ärute taenji aza ya, ami se Tori kabe ni lepena beṛo nda o’bane ŋgye; oko beṛo ämiri oyene liti liyaro yasi. Ago mìndre andivo amiro kado, ukyi ojo ta amiro kpa ’da. ² Mìŋgyi ŋgaläŋgyi azi ro, ago oyene si inye, nyà ota Kristo ro oro. ³ Ondro ’diaza kusu ta te ekye yi orivoya ndra, oko nda orivoya ko, nda ka ugu andivo ndaro odona. ⁴ ’Dialo beṛo vure taoye modo ndaro ro opene. Ondro ka’dote kado, ’dooko nda unina ndi a’done driuŋgyi be tase nda andivo koyebe ta. Ko ndana ri tase nda koyebe tana ojone tase ’diaza koyebe be. ⁵ Tana ’dialo uŋgyina ŋgaläŋgyi modo ndaro ro gini. ⁶ Tana mano se emba mina te lazo Kristo’bai rosi beṛo ndäri ŋga kado se cini nda ka’dobe sina la’done miemba’ba ndaro be. ⁷ Nyòdo andivo amiro ko, ’diaza unina ko Lu mo’done. ’Dialo olona gi ŋgase nda kabe kyi’dina modona. ⁸ Ondro nda ka ole lomvo ndaro ro kyi’dina ayani ämvu ya, ni kigyesi nda kotona gi jalia odra ro; ondro nda kikyi’di Tori ro ayani ämvu ya, ni Tori resi nda kotona jalia adri äduako ro. ⁹ Ka’do inye mì’de mà’do ko rriti ro ni ugu takado oyevoya; tana ondro mòzovo kote, tu esana ’da ämäri ŋga jalia ro kotozana. ¹⁰ Ka’do inye, oso ondoalo ama be te kandrakado be ono, beṛo ämäri takado oyene ’dicini ri, oko ndrana ànya se orivoya katidri taoma’bai roya ri. ¹¹ Mìndre taegyi käṛäbä se megyibe ämiri yau drí modo maro rosi ono! ¹² Lidri se kabe ami gbiri olone ŋbiṛiro ànya ni se kolebe iyi ka’dane ago driuŋgyine ta a’do tesi si rota owo. Caoko, ànya kayi oyena inye, gialo ukyi eza ànya ’da ta taka Kristo ro rota. ¹³ Ca ànya se kayibe ’diolo ŋbiṛiro kwoi ätiyi Ota ko, ànya leyi ami olone ŋbiṛiro tana ’dooko ànya unina ndi driuŋgyine tana ekye nyòzo ami te la’bi lomvo ro ono oyene. ¹⁴ Oko ta maro ta, caoko mäŋgyina drî gialo ta taka Opi amaro Yesu Kristo ro rota ayani, tana ta taka ndaro rosi ’bädri orivoya avo yi märi, ago ma orivoya avo yi ’bädri ri. ¹⁵ Kode alo ’di ŋbiṛiro kode alo ko ’do ko tapara yi; tase tapara ro ’diuti to’diro ayani. ¹⁶ Ànya se kayibe oso taora ono vo ori ànyaro ya, taliatokpe ndi yauni be ka’do ànya yibe ago ànya se taoma’bai ro Yisaraele ya ri. ¹⁷ Äduro, mì’ba ’diaza koko ma ko tona, tana mberei se ma be sina malomvo ono ka’da tate anjioko ma orivoya iyeäṛi Yesu ro. ¹⁸ Tai’dwero Opi amaro Yesu Kristo ro ka’do ami cini be, ädrupii maro. Amen.