EPESO’BAI

¹ Ni Paulo resi, se ole Lu rosi orivoya lazo’ba Kristo Yesu ro, lidri Lu ro Epeso ya ri, se ori ànyaro orivoya ’diri rudro’be Kristo Yesu be ya ono: ² Lu Täpi amaro ago Opi Yesu Kristo kozo tai’dwero ndi taliatokpe be ämiri. ³ Mì’de mòzo aro’boya Lu ago Täpi Opi amaro Yesu Kristo ro ri! Tana rudro’be amaro Kristo be si nda äṛu ama te ŋgaäṛu cini Tori ro ozona si ämäri ni ’bädri vo’buyakuru ro yasi. ⁴ Ca ṛo teinye ’bädri o’ba ako Lu nji ama ṛote nja a’done ndaro rudro’be amaro Kristo be si, tana ma’do robe alokado ago teinye taenji ako nda kandra. Tana ta ŋgalu ndaro rota ⁵ Lu ratate ṛo nja anjioko Yesu Kristo si nda le ama o’bane ŋgwai ndaro ro, ono ni ole ago taora ndaro. ⁶ Mì’de märäṛu Lu ta tai’dwero ’desi ndaro rota, ta ŋgapäṛi dritairo ndaro se nda kozobe ämäri Ŋgwa ndaro se kulu tawi ono si rota! ⁷ Tana odra Kristo ro oso tori oloro ronye onji ama te dritai ro, anjioko, e’be ama te takozi amaro ta. Yauni Lu ro orivoya para, ⁸ se nda ozote ämäri ŋgaojoro ’desi si! Tavouni cini ndaro ya ndi tavousu be si ⁹ Lu ye tase nda korabe te, ago nda ’ba tavoora se ndrwiro nda kora tana be ondene Kristo si ana tana te unine ämäri. ¹⁰ Tavoora se Lu ondena ’da tu ŋgyena si ’do, orivoya ŋgao’bao’baro cini eziza voaloya, ŋgacini vo’buyakuru ya ndi ’bädri ya be, Kristo ni dri’bana ro. ¹¹ Aye ŋgacini te oso tavoora Lu ro ndi tadriolena be ronye; ago Lu nji ama te a’done lidri modo ndaro rudro’be Kristo be si tavoora ndaro ronye, änjute tase nda raa tana be ṛoni etovoya dri. ¹² Ka’do inye, ama se orivoya käti mio’ba be Kristo ya ono, mi’de märäṛu a’do ’desi Lu ro! ¹³ Ago nyà’do kpate lidri Lu ro tuse nyèri lazo ŋgye be si, Lazokado se kezi ŋgaopa be ämiri. Mìmate Kristo ya, ago Lu ebe ŋgaebero ndaro a’do modo ndaro rote ami lomvo Tori Alokado se nda ko’ba tana be ana ozona si. ¹⁴ Tori Alokado ni orivoya taka’daro yi anjioko mùsuna ŋgase Lu ko’ba tana be lidri ndaro ri ’da, ago kani tazevo ŋgye edre ämäri anjioko Lu ozona dritai ’da kpeye ànya se orivoya ndaro ri. Mì’de märäṛu a’do ’desi ndaro! ¹⁵ Tana ta ono ro, ṛoni tuse meri taoma amiro Opi Yesu ya ago ŋgalu amiro lidri cini Lu ro ri tana be si, ¹⁶ medre kote ni ugu aro’boya ozovoya Lu ri ta amiro ta. Ma ta amiro oyina mätu maro ya ¹⁷ ago ma Lu Opi amaro Yesu Kristo ro, Täpi se räṛune ndra ro eji, Tori ozone ämiri, se o’bana ami ’da tavouni be ago Lu ka’dane ämiri, tana mini nda robe. ¹⁸ Ma mätu tana tauni drî amiro ro kupiru robe ŋgaeyi ndaro ondrene, tana ’dooko mìni ta mio’ba se nda kuzi ami be kigye ro robe, ŋga amba liŋgyiekye äṛu ndaro ro se nda ko’ba tana be lidri ndaro ri, ¹⁹ ndi mbara para ndaro se kabe losi oye ama se komabe ya ono be. Mbara gi ka ugu losi oye ama ya ono kpa orivoya oso mbara fopara ²⁰ se nda koye ta be sina tuse nda eŋga Kristo teni avo yasi ago ’ba nda rite drígwo ndaro ya ’bädri vo’buyakuru roya ronye. ²¹ Kristo ka vomiri lau ndrani vomiri’bai cini vo’buyakuru ya, drikaca’ba, mbara’bai ndi opii be drisi; nda orivoya ävuru be ndrani ävuru cini drikaca ro ’bädri ono ya ago ’bädri kinja ya ro drisi. ²² Lu ’ba ŋgacini te pa Kristo ro zele ago ’ba nda te Opi ’desi ro känisa ri ŋgacini dri. ²³ Känisa orivoya lomvo Kristo ro, ni ta onde ro se nda andivo kabe ni ŋgacini vocini yasi ondena ono owo.

¹ Kyeno mìdrate tori ya ta taoroako amiro ndi takozii be rota. ² Tugi ana si mìsote taoye undiro ’bädri ro vo; mìro miri’ba tori vokuru lewe ro rote, tori se yauono kabe ni lidri se koro Lu ko ritana. ³ Ama cini màlaba oso ànya ronye ago màrite oso ole lomvo amaro ro ronye, mùgu taoye te oso tase lomvoi amaro modona ndi tausu amaro kolebe oyene ronye. A’do lomvo amaro ro voro, ama oso ’dicini ronye, a’bate ṛo ruezane kyila Lu rosi. ⁴ Oko yauni Lu ro orivoya amba, ago ŋgalu ndaro ta amaro ta orivoya ’desipara, ⁵ ama bedri orivoya avo ro tori ya taoroako amaro si nda lofo ama te adri ya Kristo be. Tai’dwero Lu rosi apa ami te. ⁶ Rudro’be amaro Kristo Yesu be si Lu eŋga ama te kuru nda be vo mirine nda be ’bädri vo’buyakuru roya. ⁷ Nda ye ta ono te tana tuse cini kabe ikyi ya nda ka’dana tai’dwero ndaro ndi a’do ’desina se parandra be Yesu Kristo si. ⁸ Tana tai’dwero Lu rosi apa ami te taoma si ago ono ko ruutri modo amiro rosi, oko ni ŋgapäṛi Lu ro yi. ⁹ Ko ruutri modo amiro rosi, tana ukyi ’diaza uŋgyi drî ’da tana ro. ¹⁰ Lu ’ba ama ni oso ono ronye, ago rudro’be amaro Kristo Yesu be nda ’ba ama te ori takado oyero orine, se nda ede ṛote nja ämäri oyene. ¹¹ Ami se Atrai ro uti voro ono, Yudai zi ami te “oloako ŋbiṛiro,” Yudai kayi andivo ànyaro uzi “olooloro ŋbiṛiro” (’diolo ŋbiṛiro ànyaro orivoya toto ŋgase aza ànya koye ni lomvo andivo ànyaro ri yi), mìyi a’do kyeno amiro tana. ¹² Tu ana si ami orivoya pere ni Kristo resi. Ami orivoya atrai ago ko lidri onjionjiro Lu ro. Nyà’dote orivoya vo ako tao’baro se änjute tao’bai Lu ro lidri ndaro ri dri, ago mìrite ’bädri ono ya mio’ba ako ago teinye Lu ako. ¹³ Oko yauono, rudro’be Kristo Yesu be si, ami se kyeno nyà’dote lozo ono, ezite lototi kari Kristo rosi. ¹⁴ Tana Kristo andivona ezi taliatokpe te ämäri Yudai ndi Atrai be o’bana si lidri alo ro. Lomvo modo ndaro rosi nda pere tiṛi se kelewe ànya be ago ko’ba ànya be kyila’baazii ro ana te riya vuru. ¹⁵ Nda foro Ota te ndi taorana ndi taoyena be, tana tu’de beti ritu o’baza lidri to’di alo ro rudro’bene nda andivona be, liti ono yasi a’ba taliatokpe te. ¹⁶ Odra Kristo ro taka dri si nda pere a’do kyila’baazi ro ànyaro te; taka si nda dro’be lidri beti toto riti te lomvo alo ya ago go ezi ànya te Lu re. ¹⁷ Kristo ikyite ago pe Lazokado taliatokpe rote ’di cini ri, ami Atrai ri, se orivoya lozo ni Lu resi, ago Yudai ri se orivoya lototi nda re. ¹⁸ Kristo si anjioko vo amaro cini, Yudai ndi Atrai be, ni ndi ikyine Lu Täpi kandra Tori alo si. ¹⁹ Ka’do inye, ami Atrai kote tona atrai kode ’di toro yi alona, tana ami yauono te ’bakici’baazii lidri Lu robe ago gboko katidri Lu ro ro. ²⁰ Abe ami kpate, kotopa se abebe lazo’bai ndi nebii be si dri, kuni goŋgodri na roni Kristo Yesu andivona. ²¹ Nda ni se käti zo modo be voaloya ago kabe anya o’ba ombane yekalu alokado ro odiodiro Opi ri owo. ²² Rudro’be nda be si a kpa ami obe troalo azii cini be vose Lu kabe ori kigye ya Tori ndaro si.

¹ Tana ta ono ro, ma Paulo, kamba’ba Kristo Yesu ro ta ami Atrai rota, ma mätu Lu ri. ² Endaro nyèrite anjioko tai’dwero Lu rosi nda ozo losi ono te märi oyene ta a’do kado amiro rota. ³ Lu ka’da tavoora ndrwi ndaro te ago ’bate unine märi. (Megyi ta ono kätina tana te fere, ⁴ ago aba ondro mìzi tase megyibe ana gwo, mìnina tauni maro tandrwi Kristo rota tana ndi.) ⁵ Tuse kyeno ana si iti tase ndrwi ono kote lidri ri, oko yauono Lu ka’da tana te Tori si lazo’bai alokado ndaro ndi nebii be ri. ⁶ Tandrwi orivoya ni no anjioko lazokado si Atrai urunayi äṛu Lu ro ndi tro Yudai be; ànya orivoya ’di lomvo alo ro ago kayi tao’ba se Lu ko’ba be Kristo Yesu si la’do. ⁷ A’ba ma te ruindu’ba lazokado ro ŋgapäṛi lämu’duro Lu ro tai’dwero rosi, se nda ozote märi losi oye mbara ndaro rosi. ⁸ Ma orivoya tipari ni lidri cini pari Lu ro ri; caoko Lu ozo kandrakado Lazokado ugu ro Atrai ri ta ŋgadriamba äduako Kristo rote märi, ⁹ ago ugu lidri cini o’baro tavoora ndrwi Lu ro ondrene ago o’bane taoye ya. Lu, se ni O’ba’ba ŋga cini ro, äti tandrwi da’doda’doro ndaro te ndroa cini kyeno kai ya, ¹⁰ tana tuse yauono si, känisa si, malaika miri’bai ndi mbara ’bädri vo’buyakuru robe kuniyi tavouni ndaro robe a’do toto ànyaro yasi. ¹¹ Lu ye ta ono te nonye ole äduako ndaro si, se ndete Kristo Yesu Opi amaro si. ¹² Rudro’be Kristo be si ago taoma amaro nda ya si ama turiako oyine Lu kandra taoma cini si. ¹³ Ka’do inye, molo’baru ämiri, ko voozone tana ma rueza ono ta amiro ta; ’do cini orivoya ta kandrakado amiro rota. ¹⁴ Tana ta ono ro ma kaya oso Täpi kandra, ¹⁵ se katidri cini vo’buyakuru ya ndi ’bädri ya be usuyi ävuru ŋgye iro te ni nda resi. ¹⁶ Ma Lu eji ni ŋgadriamba ’desi ndaro ro yasi kozo mbara robe ämiri Tori ndaro si a’doza mbara ro ya andivo amiro roya, ¹⁷ ago ma mätu Kristo ko’ba ’ba ndaro robe ya amiro ya taoma si. Ma mätu tana paji amiro ndi kotopa be ka’do robe ŋgalu ya, ¹⁸ tana ami, ndi trovoaloya lidri Lu robe, nyà’do robe mbara be käkpu ndi oca, ogwa ndi oci ŋgalu Kristo ro robe unine. ¹⁹ Ndi inye, nyòjo ikyine ŋgalu ndaro unine, änina gica ko unine amba owo, ago ka’do inye nyà’do twi a’do Lu modona robe. ²⁰ Lu se mbara ndaro ka losi oye ama ya ono orivoya mbara be taoyene amba ndrani se mä̀nibe ejine ri ago kpa ndrani se ma be tavona usuna ri; ²¹ räṛu ka’do Lu ri känisa ya ago Kristo ya tu cini ya, ’duro ago äduako! Amen.

¹ Ka’do inye, ma se orivoya kamba’ba yi tana ma ruindu Opi ri ono; molo’baru ämiri mìri ori se ’debe ree läzi se Lu kuzi ami be orine voro ayani. ² Nyà’do ondoalo mäwuako, tokyeako, ago yaiŋgyi be. Ŋgalu amiro ka’da si azi ri a’do yaiŋgyi amba be si. ³ Nyòjo mbara cini amiro si a’do kpokoṛo alo se Tori kani ozona taliatokpe ro ami embero voaloya ono ätine. ⁴ Lomvo orivoya alodi ago Tori alodi, kpa oso Lu kuzi ami be mio’ba alodi ya ronye. ⁵ Opi orivoya alodi, taoma alodi, bapatisi alodi; ⁶ Lu orivoya alodi ago Täpi ’di cini ro, nda ni Opi ’di cini ro, ka losi oye ’di cini si, ago orivoya ’di cini ya. ⁷ Ama alo alo mùsu ŋgapäṛi lämu’duro te ojona oso se Kristo kozobe ronye. ⁸ Oso taegyi kabe ata ronye ekye: “Ondro nda koyite lekuru oko, nda ru kamba’bai amba te nda be; nda ozo ŋgapäṛi te ’dicini ri.” ⁹ Oko yauono, tase nda “koyibe kuru” ono takacina e’diya? Takacina anjioko käti ono nda cite le vuru gyini zele voociekye ya. ¹⁰ Ta’dota nda se kukyibe vuru ono kpani nda se koyibe kuru, ndra vo’buyakurui kundusi owo, ’bädri ka’do robe twi a’do ndaro be. ¹¹ Nda ni se “kozo ŋgapäṛi be lidri cini ri owo”; nda nji azakana te a’done lazo’bai ro, azaka nebii ro, azaka lazolari’bai ro, azaka taope’bai ro, azaka ruindu’bai ro ago miemba’bai ro. ¹² Nda ye ta ono te lidri cini Lu ro edeza ta losi ruindu ro Kristo’ba rota, tana amo lomvo Kristo ro robe. ¹³ Tana ama cini mà’do robe troalo a’doalo taoma amaro roya ago tauni amaro Ŋgwa Lu ro unina roya, mà’do robe ’dise nde omba te ronye; osane le ori Kristo roya. ¹⁴ ’Dooko mà’dona kote tona ŋgàgaŋwa ro, luŋgyiluŋgyiro wairo oli miemba ’diodo’bai rosi, se kabe azaka lepe ujene ŋgaodo se ànya kabe oyena si. ¹⁵ Oko vona ro, taŋgye ata tori ŋgalu rosi, màmbana ndi kuru liti cini yasi Kristo ri, se ni orivoya dri’ba yi. ¹⁶ Ŋga rita ndaro zele ŋga cini lomvo ro toto änjute voaloya, ago dusuvo cini lomvo ro se ikicube sina iyi embe lomvo te kpeye voaloya. Ŋga cini lomvo ro se ba iṛeiṛe kate losi oye oso se sibe oyene ronye oko, lomvo cu ka omba ago ka andivo iro omona ŋgalu ya. ¹⁷ Ävuru Opi rosi, ma miomba ozo ämiri; nyùgu ori ko oso Lu uniako’bai ronye, se tavousu ànyaro orivoya awi ¹⁸ ago tauni drî ànyaro ro inite. Ànya vo ako ori se Lu kabe ozona ya, tana ànya orivoya cu tauniako ago taeriako. ¹⁹ Ànya tavousu driupi ro ako; ànya kayi andivo ànyaro ozo taundi ndi ŋgase cini ko kado oyene teinye drî ritaako. ²⁰ ’Do koni tase mìni be ta Kristo rota owo! ²¹ Nyèri ta ndaro te endaro, ago oso oso’bai nda vo ronye emba taŋgye se Yesu ya tana te ämiri. ²² Ka’do inye mìna a’do uku amiro se ’ba ami te orine oso kyeno mìribe ronye, a’do uku se abe tufuna a’do ŋgaodo ole anyaro rosi. ²³ Ya amiro ndi tauni drî amiro robe beṛo o’bane kpeye to’diro, ²⁴ ago beṛo ämiri a’do to’di osone andivo amiro lomvo, se a’bate beti Lu ro ronye ago ka’da andivo iro te ori ŋgye si se orivoya ’diri ago alokado. ²⁵ Ka’do inye, nyè’be kowe oga! Beṛo ’dicini ri taŋgye itine ayani taoma’ba azi ndaro ri, tana ama cini orivoya ŋga lomvo ro yi troalo lomvo Kristo ro ya. ²⁶ Ondro ka’do nya’dote kyilaro mi’ba kyila miro koloci mi ko takozi ya, ago nya’do ko kyilaro kituzwi. ²⁷ Nyozo kandrakado ko Kicu’ba ri. ²⁸ ’Dise se kabe ŋgatopa beṛo ndäri ŋgatopa e’bene ago keto losi oye, tana nda kusu ŋga robe ta’diri si andivo ndaro ri ugu oriza ago ka’do robe mbara be ati’ba opane. ²⁹ Mì’ba ata undiro kefo ko ni kala amiro yasi, oko toto ata ’dioparo ayani, se kabe ’diomo omo ago kabe ŋgase alebe ozona, tana tase nyàbe atana oyena takado ’da ànya se kabe ta amiro erina ri. ³⁰ Ago mì’ba Tori Alokado Lu ro ko tusuro; Tori orivoya taka’daro Lu ro anjioko ami orivoya nda ro. Lu ozo Tori te ämiri ka’dazana anjioko Lu koye ami o’bane dritai ro tu ana si. ³¹ Mìna yaoso cini, yagyorogyoro, ndi kyila be. Totre ndi la’da be ka’do ko, yaoso ka’do ko ta aza ta. ³² Oko, nyà’do yauni be ago yai’dwe be azi ri, ago nyè’be azi, oso Lu ke’be ami be Kristo si ronye.

¹ Ami orivoya ŋgwai lulu ro Lu ro, beṛo ämiri ojo a’done oso nda ronye. ² Beṛo ori amiro ritane ŋgalu si, kpa oso Kristo kulu ama be ago kozo adri ndaro be ta amaro ta ŋgapäṛi tägyi ŋgutruro ozaro ro ago tori oloro se tana kusi Lu ndi ronye. ³ Ami be orivoya lidri Lu ro ono, ko kado ŋga se ronyi ronye kode ŋgase undiro ndi yagäru be ävuruna uzine ami lako. ⁴ Ko kado ata se orivoya tavousu koziro, undiro, kode osoro be atane. Oko vona ro nyòzo aro’boya Lu ri ayani. ⁵ Mìni ta ono, anjioko ’diaza se orivoya ronyi’ba yi, undiro, kode yagäru be (tana yagäru orivoya a’do lu awi mätu ro yi) unina ko a’done vo be Miri ’Bädri’ba Kristo ro ndi Lu ro be ya. ⁶ Mì’ba ’diaza kodo ami ko ata amama rosi; tana ta ŋgase kwoi rota kyila Lu ro ikyina ’da ànya se koroyi nda ko dri. ⁷ Ka’do inye mìye ŋga aza ko alona lidri oso nonye kwoi yibe. ⁸ Ami andivo amiro sedri nyà’dote vouni ya, oko tuse nyà’dobe lidri Lu ro ’do si, ami te orivoya ŋgaeyi ya. Beṛo ämiri orine oso lidri se ka’dobe ŋgaeyi ya ronye. ⁹ Tana doŋgo ŋgaeyi ro usuna ŋgase cini kado ya, ta’diri ndi taŋgye be ya. ¹⁰ Nyòjo tase tana kabe Opi usi unine ayani. ¹¹ Mìye ŋgase takadoako lidri kabe oyena ko, ŋgase ka’dobe vouni ro iyi. Oko nyèzi ànya ŋgaeyi ya. ¹² (Orivoya driupiro amba ca ŋgase ànya kabe oyena ndrwiro tana atane.) ¹³ Ago ondro olofo ŋga cini te ŋgaeyi ya oko, ’dooko a’do ŋgye ànyaro aka’date ṛo ŋbelero; ¹⁴ tana ŋgase aza aka’date orivoya ŋbelero a’dote ŋgaeyi ro. Ta’doro ni atate ekye: “U’du’ba, mipi mi ago miŋga ni avo yasi, ago Kristo eyina vo ’da midri.” ¹⁵ Mì’ba mi amiro komba kado ta ori amiro rota. Mìri ko oso lidri tauniako ronye, oko oso lidri tavouni be ronye. ¹⁶ Kandrakado se cini nyà’dobe sina mìye takado sina, tana kwoi ni tu kozi yi. ¹⁷ Ka’do inye, nyà’do ko amama ro, oko nyòjo tase Opi kolebe ämiri oyene vona uṛine ayani. ¹⁸ Mìfu ami ko wa si, se enjina ami ’da, oko, nyà’do twi Tori be ayani. ¹⁹ Nyàta azi be ata räṛu ro, ndi loŋgoi be oŋgo si, mìŋgo loŋgoi alokado; mìŋgo loŋgo ndi loŋgoi räṛui robe Opi ri räṛu oye si ya amiro ya. ²⁰ Nyòzo aro’boya ondoalo Lu Täpi ri ta ŋga cini rota, ävuru Opi amaro Yesu Kristo rosi. ²¹ Nyòlogo andivo amiro azi zele taoro amiro Kristo ri tana ro. ²² ’Ditoko, nyòlogo andivo amiro àgo amiro zele oso Opi ri ronye. ²³ Tana ago orivoya drikaca be toko ndaro dri kpa oso Kristo ka’dobe drikaca be känisa dri ronye; ago Kristo andivo ndaro ni Opa’ba känisa ro, se ni lomvo ndaro. ²⁴ Ka’do inye beṛo ’ditoko ri andivo ànyaro logone cu àgo ànyaro zele kpa oso känisa kabe andivo anyaro logo Kristo zele ronye. ²⁵ Àgo, nyùlu ’ditoko amiro kpa oso Kristo kulu känisa be ronye ago ozo adri ndaro te tana ro. ²⁶ Nda ye tase ono te känisa ozoza ŋgapäṛi lämu’duro Lu ri. Kristo ye losi te ata ndaro si känisa o’baza wäṛi ro ojana si gyi si, ²⁷ tana känisa ozoza andivo ndaro ri liŋgyiekyero ago taenjiako, mberiako kode birinyoako, ago teinye mämbiako. ²⁸ Beṛo àgo ri ’ditoko ànyaro lune kpa oso ànya kayibe andivo ànyaro lu ronye. Mano se kabe toko ndaro lu ka andivo ndaro lu. ²⁹ (’Diaza yana oso ko lomvo andivo iro lomvo alona. Oko nda ka anya eca ago ka ta anyaro oti, kpa oso Kristo kabe oyena känisa ri ronye; ³⁰ tana ama ni gboko lomvo ndaro ro owo.) ³¹ Oso taegyi kabe ata ronye ekye: “Tana ta ono ta manoago e’bena täpi ndaro ndi endre be ’da ago dro’beruna gwo toko ndaro be, ago ànya riti a’dona ’da lomvo alo ro.” ³² Tandrwi gyuru ro aka’date taegyi ono ya, se mäni be tana di Kristo ndi känisa be. ³³ Oko tana di ami kpa: beṛo ago ri toko ndaro lune oso andivo ndaro ronye, ago beṛo toko ri ago anyaro orone.

¹ Ŋgwai, ono ni kama amiro Kristo’ba ro uti’bai amiro orone, tana ono orivoya takado yi oyene. ² “Miro täpi miro ndi endre be” se ni ota käti yi a’ba tao’ba te driigye: ³ “Tana ta cini ka’do robe kado miri, ago miri robe madaro ’bädri ya.” ⁴ Uti’bai, mìye ŋgwai amiro ko liti se o’bana ànya ndi a’done kyilaro yasi. Oko nyèca ànya ŋgaloto ndi ŋgaemba Kristo ro voro. ⁵ Iyeäṛii, mìro ’desii amiro lidri ro turi ndi lä’bi be si; ago mìye inye ya ŋgye si, oso nyàbe ugu ruindu Kristo ri ronye. ⁶ Mìye ko gialo tuse ànya kabe ugu ami ondre si, tana mìle ta amiro ri ànya usine; oko mìye tase Lu kolebe ayani ya cini amiro si, oso iyeäṛii Kristo ro ronye. ⁷ Mìye losi amiro oso iyeäṛii ronye riyä amba si. Mìye losi oso nyà oyena Opi ri ronye, ko toto oso nyà ruindu lidri ri. ⁸ Mìyi ta ono tana ndi tana Opi ozona päläti ’da ’dicini ri, kode iyeäṛi yi kode dritai ro yi, ta losi kado se nda kabe oyena rota. ⁹ ’Desii, mìye ta kpa oso inye iyeäṛii amiro ri ago nyè’be ta ozionya ro. Mìyi ta ono anjioko ami ndi iyeäṛii amiro be orivoya ’Desi alo be vo’buyakuru ya, se ka vure ’dicini ro opena ojoojoro. ¹⁰ Äduro, nyòtomba ami rudro’be Opi be si ago mbara fopara ndaro si. ¹¹ Mìso ŋga kyila ro cini se Lu kabe ozona ämiri, tana nyà’do robe mbara ro edrene ŋgyiri ta ŋgaodoro undiro Kicu’ba ro mile. ¹² Tana mà ko ugu kyila oye lidri be oko mbara tori koziro vokuru ya robe, ’dimiri’bai, drikaca’bai ndi mbara vouni ro ’bädri ono robe. ¹³ Ka’do inye mìso ŋga kyila ro Lu ro ami lomvo yau! Tana ondro tu kozi kesate oko, nyà’do robe mbara ro gbotoza ŋgagota kyila’baazi ro mile; ago mìye kyila te äduna ya oko, nyèdre robe ’du vo amiro ya. ¹⁴ Ka’do inye nyèdre ŋgyiri, taŋgye embe si anda kyini kunduro ronye ami kundu, takado be oso boŋgo kätäti gagaro ronye, ¹⁵ ago mì’ba a’do nja amiro Lazokado taliatokpe ope ro ka’do oso mvoka ronye pa amiro ya. ¹⁶ Ago mìru taoma tu cini si oso ŋga ’di gagaro kyila ya ronye; tana sina nyà’dona ndi mbara ro ätu asiro Nda se Kozi ono ro izwene. ¹⁷ Ago miru ŋgaopa oso ŋga dritakoro logoro ronye, ago ata Lu ro oso bando ronye se Tori kabe ozona ämiri ono. ¹⁸ Mìye ta cini ono mätu si, ugu taeji si ŋgaopa Lu rota. Nyä̀mätu tu cini si ago mì’ba Tori kelepe ami mätu amiro ya. Ta ono ta nyà’do vookwa be, nyòzo vo ko; nyä̀mätu ondoalo lidri cini Lu rota. ¹⁹ Ago nyä̀mätu kpa ma ta, tana Lu kozo lazo robe märi tuse ma’dote nja taopene si, tana mape ta robe turiako ago ma’ba tandrwi Lazokado ro robe unine. ²⁰ Tana ta Lazokado ono rota ma orivoya lazo’bai yi, yau ma ca kamba ya ono owo. Nyä̀mätu tana mugu lazokado ope robe turiako oso sibe märi opene ronye. ²¹ Tukiko, ädrupi amaro se mulu tawi ago ruindu’ba ’diri ro losi Opi roya, itina ta ’da ami cini ri ta maro ta, tana mini a’do maro tana robe. ²² Tase ma’debe nda ozone ami re ni wo, ta ama cini ro itine ämiri mà ugu ori ’bo eŋwanye, ago kpa agoago ozone ämiri. ²³ Ka’do inye Lu Täpi ago Opi Yesu Kristo kozo taliatokpe ŋgalu ndi taoma be ädrupii cini Kristo’ba ro ri. ²⁴ Ka’do inye tai’dwero Lu ro ka’do ànya cini se kabe Opi amaro Yesu Kristo lu ŋgalu okyeako si be.