KOLOSE’BAI
11 Ni Paulo resi, se ole Lu rosi orivoya lazo’ba Kristo Yesu ro, ago ni Timoteo ädrupi amaro resi. 2 Lidri Lu ro Kolose ya, se ni ädrupii ’diri amaro rudro’be Kristo be ya ri: Ka’do inye Lu Täpi amaro kozo tai’dwero ndi taliatokpe be ämiri. 3 Ondoalo mà aro’boya oye Lu, Täpi Opi amaro Yesu Kristo ro ri, ondro mà te mätu ami ta owo. 4 Tana meri taoma amiro Kristo Yesu ya ndi ŋgalu amiro lidri cini Lu ro ri be tana te. 5 Tuse lazo ŋgye, Lazokado kikyibe käti amire si, nyeri ta mio’ba se ozobe rote. Ago taoma amiro ndi ŋgalu be änjute tase nyàbe mio’ba tana ro dri, se a’bate nja ämiri vo’buyakuru ya. 6 Lazokado ka ugu äṛu ezi ago ka ugu rulari ’bädri yasi, kpa oso ka’dobe ami lako ṛoni tuse nyeri ta tai’dwero Lu ro robe käti ana si ago minite anjioko ṛo orivoya endaro. 7 Mini tai’dwero Lu ro tana teni Epafera, ruindu’ba azi amaro se mulu tawi, se orivoya losi’ba ’diri Kristo ro vo amaro ya resi. 8 Nda iti ŋgalu se Tori kozobe ämiri tana te ämäri. 9 Tana ta ono ro ondoalo mämätute ami ta, ṛoni tuse meri ta amiro be si, mà Lu eji ami o’bane a’done twi tauni ole ndaro robe, tavouni cini ndi tauni se Tori ndaro kabe ni ozona robe. 10 ’Dooko nyà’dona ndi mbara be orine oso Opi kolebe ronye ago ondoalo miyena ŋgase tana kusi nda be ’da. Ori amiro lofona ŋga cini kadoro ’da ago mimbana ’da tauni Lu roya. 11 Ka’do inye nyà’do mbara ro ŋgatomba se kabe ikyi ni mbarapara ndaro ya si, tana nyà’do robe mbara be ŋgacini tana iŋgyine yaiŋgyi si. 12 Ago nyozo aro’boya Täpi ri riyä si, se ’ba ami te o’dene ree ŋgase nda ka’dobe sina lidri ndaro ri ŋgaeyi miri ’bädri’ba ndaro roya a’done la’do’bana ro. 13 Nda pa ama teni mbara vouni ro ri ago ezi ama te londroro le Miri ’Bädri’ba Ŋgwa ndaro se nda kulu tawi roya, 14 se nda si a’ba ama te dritai ro, anjioko e’be ama te takozii amaro ta. 15 Kristo orivoya beti ondreondrero Lu ondreako robe. Nda orivoya Ŋgwa kayo yi, para ndrani ŋgacini se a’babe drisi. 16 Tana nda si Lu ’ba ŋgacini vo’buyakuru ya ndi ’bädri ya ondreondrero ndi ŋgase ondreako be te, tro mbara tori ro, opii, ’dimiri’bai, ndi drikaca’bai robe. Lu ’ba ’bädri te cu nda si ago ṛo ndäri. 17 Ŋga cini o’baako, Kristo ṛo orivoya käti ago rudro’be nda ya si ŋga cini arate vo ànyaro yasi. 18 Nda ni dri’ba Känisa ro; se ni lomvo ndaro, nda ni etovo adri lomvo ro ro. Nda ni ŋgwa kayo yi, se eŋgate ni avo yasi, tana nda ka’do robe vo käti be ŋga cini ya. 19 Tana taora Lu modo rosi anjioko Ŋgwa orivoya a’do Lu modo robe andivo ndaro ya. 20 Ŋgwa si, Lu, ratate ’bädri cu logone kovole andivo ndaro ri. Lu ’ba taliatokpe te odra Ŋgwa ndaro ro taka dri si ago logo ŋgacini te andivo ndaro ri, ŋgase ’bädri ya ndi vo’buyakuru ya be. 21 Kyeno ami orivoya lozo ni Lu resi ago orivoya kyila’baazii ndaro tana ta ŋgase cini undiro mìyebe ago nyùsu tana be rota. 22 Oko Yauono, kari Ŋgwa ndaro ro se koro be taka dri si, Lu ’ba ami te a’done bereazii ndaro, tana ezi ami robe, alokado, wäṛi ago taenjiako nda kandra. 23 Ka’do inye, beṛo ämiri a’done ’diriro, ’duro ŋgyiri edrevo ŋgye dri, beṛo ko andivo amiro o’bane rukandane ni mio’ba se nyà’dobe sina tuse nyeri lazokado be si. Ta lazokado ono rota ma Paulo, ma’dote ruindu’ba ro lazokado se ono apete ’dicini ’bädri ya ri. 24 Yauono ma orivoya yai’dwesi rueza maro ya ta ami rota, rueza lomvo maro rosi, ma ŋgase e’bebe rueza Kristo ro ya ondena vo lomvo ndaro roya se ni känisa. 25 Ago a’ba ma te a’done ruindu’ba känisa ro Lu si, se ozo losi ono te oyene märi ta kado amiro ta, se ni losi lazokado ndaro ugu opena ro, 26 orivoya ni tandrwi se nda kada’dobe ṛo ndroa kyeno kai ya ni lidri cini ri owo oko yauono aka’date lidri ndaro ri. 27 Tavoorai Lu ro anjioko tandrwi ndaro o’bane unine lidri ndaro ri, tandrwi se liŋgyiekye se nda be sina lidri cini ri ono. Ago tandrwi anjioko ni Kristo orivoya ami ya, se anjioko nyàla’dona ’da ’desi Lu roya. 28 Ago màpe Kristo te ’dicini ri. Tavouni cini rritiako si mà miomba ozo ago mà ànya emba tana keziyi azi robe Lu kandra ba alo alo ombaombaro rudro’be ya Kristo be. 29 Losi ono oyena ya; ma losi oye ma ruutri mbara para si Kristo kani ozona ago se kabe losi oye ma ya si.
21 Mi’ba miti ta losi se mayebe mbara ta amiro ta ago ta lidri Laodikia ya rota ndi azakana se kuniyi modo maro be ko ono tana te ämäri. 2 Mayete nonye tana ànya ka’doyi robe mbara amba be ago ànya ka’doyi robe troalo ŋgalu ya, ago ka’doyi robe ŋgadriamba taŋgye ro se tauni endaro kani ezina ’do be. Liti ono yasi ànya uninayi tandrwi Lu ro ndi se ni Kristo andivona. 3 Nda ni ŋga ŋgaupiro se kani tavouni Lu ro ŋgacini da’do ro upina, ndi tauni be. 4 Ka’do inye, ma ta iti ämiri, mi’ba ’diaza kodo ami ko kalawasa kowero si, ànya kalendre gica kado ’do ta awi yi. 5 Ma’do ca i’do ami yibe lomvo ya, caoko ma orivoya ami yibe tori ya, ago ma orivoya yai’dwesi tana mandre a’do ŋgyiri se nyàbe edre troalo taoma amiro ya Kristo ya ono te. 6 Ṛoni tuse miru Kristo Yesu be Opi ro si, miri rudro’be si nda be. 7 Mì’ba paji amiro koci gyuru nda ya, mìmo ori amiro nda dri, ago nyà’do ṛatararo taoma amiro ya! Oso emba ami be ronye. Ago nyà’do twi aro’boya be. 8 Aba, mìndre kado, mì’ba ’diaza ko’ba ami ko iyeäṛi ro ŋgaodo takadoako tavouni lidri rosi, se kabe efo ni ŋgaemba se lidri ka ugu copena be yasi ago ni tori ’dimiri ro ’bädri ro yasi, se koni Kristo ro. 9 Tana a’do beti Lu ro ro ka ori Kristo ya, a’do ndaro lidri ro ya, 10 ago ozo adri te twi ämiri rudro’be si nda be. Nda orivoya parandra miri’ba tori cini ro ndi drikaca be dri. 11 Rudro’be Kristo be si alo ami te ŋbiṛiro, ’diolo ŋbiṛiro se lidri ye kote ni, oko ’diolo ŋbiṛiro se Kristo ye teni, se kani ami o’ba dritai ro ni mbara takozi amba andivona ono ro risi. 12 Tana tuse abapatisi ami be si, ase ami te Kristo be, ago bapatisi ya eŋga ami kpate Kristo be taoma amiro si taoye mbara Lu ro rosi, se eŋga nda teni avo yasi. 13 Sedri mìdrate tori ya ta takozii amiro rota ago tana ami orivoya Atrai Ota ako. Oko yauono Lu lofo ami te adri ya Kristo si, Lu e’be ama te takozii cini amaro ta; 14 nda foro taegyi se yuŋgu amaro ro ’do te ndi ŋgaemba otana robe ago ana te kpeye otona si taka dri. 15 Ago taka ana drisi Kristo ’ba andivo ndaro te dritai ro ni mbara ’dimiri’bai ro ndi drikaca’bai robe risi; nda ’ba miamba ndre ànya te ànya oro si kamba’bai ronye ŋgaopeṛe ndaro si. 16 Mì’ba ’diaza ko’ba ota ko ta ŋgase nyàbe onyana kode umvuna rota kode tui alokado Karama Imba To’di ro kode Sabata rota. 17 Ŋgase cini oso ono ronye orivoya gialo lindri ŋgase ka oyebe ikyine mileya ro; taŋgyena ni Kristo. 18 Mì’ba ape vure andivo amiro ro ko ’diaza se kabe yi eŋga ndra rulofo lämu’du ondre si ta rulogo ro kowero si ndi ta malaikai mätu robe. Se takacina i’do alona, lidri nonye ono vate tausu lidri rosi, 19 ago e’be ruäti Kristo lomvo te, se ni dri’ba lomvo ro, ŋga rita Kristo ro zele lomvo cini ago a’dite voaloya rudro’bena si kicuvona si ndi embevona be, ago kate omba oso Lu kolebe ombane ronye. 20 Ondro mìdrate Kristo be ago onji ami te dritai ro ni ’dimiri tori ’bädri ro risi. Tana e’di nyà ori gwo osoago ami orivoya ’bädri ono ro niya? Tana e’di nyà ota se ka ata nonye ono orona niya, se ekye: 21 “Miru ono ko, nyetembe ana ko mido azana ko.” 22 Tase cini kwoi tana di ŋgase cini ayete kyeno oko te takadoako iyi; ànya orivoya ota se a’bate toto lidri si yi ndi ŋgaembana be. 23 Ota nonye ono landrebe a’bate tavouni ànyaro malaika mätu rosi, ago a’do rulogoro vuru kowero si; rueza lomvo ro si, oko ta kadona i’do ole lomvo ro opene ṛe.
31 Eŋga ami te adri ya Kristo be, ka’do inye mì’ba ya amiro ŋgase orivoya vo’buyakuru ya, vose Kristo kabe ori giti ndaro dri drígwo Lu roya ana ta ayani. 2 Mì’ba tauni drî amiro ro kusu ŋgase lau ana tana ayani, ko ŋgase ’bädri ono ya ta. 3 Tana mìdrate, ago adri amiro ada’dote Kristo be Lu ya. 4 Adri amiro modona ni Kristo ago ondro nda kefote oko, nyèfona kpa ’da nda be ago nyàla’dona ’desi ndaro ’da! 5 Ka’do inye, beṛo ämiri ole lomvo ro se kabe losi oye ami ya ono tufune, se ni kwoi, ronyi, taundi, ŋgalovo, ŋgakozi ndi yagäru be, (tana yagäru orivoya a’do Lu awi mätu ro). 6 Tana ŋga nonye kwoi kyila Lu ro ka ikyi ànya se koro nda be ko dri. 7 Tana kyeno iga andivo amiro nyòjote orine ori inye ’do voro, ago ori amiro imirite ànya si. 8 Oko yauono beṛo ämiri ŋga cini kwoi onane; kyila, takozi ndi yaoso be. Ca la’dao’da ndi ata taoroako si be beṛo ko efone ni kala amiro yasi. 9 Mìga kowe ko azi ri, tana mìna taoye uku te ndi a’do anyaro be, 10 ago mìso a’do to’di te ami lomvo. Ono orivoya a’do to’di yi se Lu ni O’ba’ba anyaro, ka ugu o’bana ’du to’di ro beti modo ndaro ro voro, tana ezi ami robe nda andivo unine kadoro. 11 Taka’dana anjioko, a’do toto te i’do lakole Atrai ro ndi Yudai be ya, ’dise alote ŋbiṛiro ago oloako ŋbiṛiro, tauniako’bai, siomba’bai, iyeäṛii, ndi ’dise dritai robe roya, oko Kristo orivoya vona cini ro, ago Kristo orivoya vona cini ya. 12 Ami orivoya lidri Lu ro! Nda lu ami ago nji ami te modo ndaro ri. Ka’do inye, beṛo ämiri yauni, ’dilogo, a’do trwe, tokyeako ndi yaiŋgyi be osone andivo amiro lomvo. 13 Nyà’do yauni be azi ri ago nyè’be azi ondro nyà’dote ta be azi lomvo owo. Beṛo ämiri azi e’bene kpa oso Kristo ke’be ami be ronye. 14 Ago nyòloci ŋgalu vona cini kwoi ya, se kani ŋga cini embe troalo rudro’be endaro ya. 15 Taliatokpe se Kristo kabe ozona anjioko ami lepene tavousu se nyàbe usuna ya; tana ta taliatokpe ono rota Lu zi ami te voaloya lomvo alo ya. Ago nyà’do aro’boya be. 16 Lazo Kristo ro ŋgaambana be beṛo orine ya amiro ya. Nyèmba ago nyòzo ta ŋgaembaro azi ri tavouni cini si. Mìŋgo räṛui, loŋgoi ndi loŋgoi alokado be, mìŋgo loŋgo Lu ri ugu aro’boya oye si ya amiro ya. 17 Ŋgacini se nyàbe oyena kode atana, anjioko, beṛo oyene ävuru Opi amaro Yesu roya, nyòzo aro’boya nda si Lu Täpi ri. 18 ’Ditoko, nyòlogo andivo amiro àgo amiro zele, tana ono ni tase oyene ämiri Kristo’bai ronye owo. 19 ’Diàgo, nyùlu ’ditoko amiro, ago mìye ànya ko siomba si. 20 Ŋgwai, orivoya kama amiro Kristo’ba ro uti’bai amiro orone ondoalo, tana ono ni tase kabe Lu usi owo. 21 Uti’bai nyègbe ŋgwai amiro ko ukyi ànya a’do ’da yaiŋgyiako. 22 Iyeäṛii, mìro ’desii amiro lidri ro ta cini yasi, ko gialo ànya se kabe ugu ami ondre si tana mìle mi ànyaro luvune, oko mìye ṛo ya ŋgye si tana ta taoro amiro Opi ri rota. 23 Ŋgase nyàbe oyena, mìye ya cini amiro si, oso nyà ugu losi oye Opi ri ko lidri ri. 24 Miyi ta ono, Opi ozona päläti ’da ämiri ni ŋgase nda ka’dobe sina ozone lidri ndaro ri yasi. Tana Kristo orivoya ni ’Desi ro nyàbe ruindu rigye owo. 25 Ago takozi oye’bai cini ri ago ozona gi ŋgase nda koyebe koziro ’do ayani, tana Lu ka vure ’dicini ro ope teinye ’digyele ako.
41 ’Desii mìye iyeäṛii amiro liti kado ago ŋgye yasi. Mìyi ta ono anjioko ami kpa ’Desi be vo’buyakuru ya. 2 Nyä̀mätu rriro, ago nyà’do vookwa be mätu si, ugu aro’boya oye be Lu ri. 3 Ago nyä̀mätu kpa ama ta, tana Lu kozo kandrakado robe ämäri lazo ndaro tandrwi Kristo rota opeza. Se yauono ma orivoya kamba ya tana ro. 4 Ka’do inye, nyä̀mätu, tana mape ta robe se si beṛo märi opene ronye, tana ka’do robe ŋbelero. 5 Nyà’do tavouni be nyàte taoye ànya se orivoya taomaako iyi ri owo, kandrakado se cini nyà’dobe sina ono mìye losi sina kadoro. 6 Beṛo ata amiro ri ondoalo a’done kado ago ndeṛindeṛi ro, ago beṛo ämiri tadri ’dicini ro ozane ŋgye. 7 Ädrupi maro Tukiko se mulu tawi, se orivoya losi’ba ’diri, ago ruindu’ba azi yi losi Opi roya, itina ta cini ’da ämiri ta maro ta. 8 Ma’debe nda ozone amire agoago ozone ämiri a’do amaro ’bo eŋwanye ya tana itine. 9 Onesima se kabe oyi nda be ono, orivoya ädrupi se mulu tawi ago ’diriro yi, se ni gboko amiro yasi. Ànya itinayi ŋgacini se kabe ugu a’do noŋwa tana ’da ämiri. 10 Arisetareku, se orivoya kamba ya ma be, zo mede ämiri, ago Marako adroa Baranaba ro kpa inye. (Nyusu ta miembaro ṛote nja ta Marako uru rota ondro nda kosate amire owo). 11 Yesu se äzi be Yusetu ono, zo mede kpa ämiri. ’Dise nätu kwoi toto ni taoma’bai Yudai ro losi oye’baazi mabe miri ’Bädri’ba Lu ro owo, ago ànya a’doyite ŋgaopa amba be märi. 12 Mede ni Epafera, alo aza gboko amiro ro ago ruindu’ba Kristo Yesu ro resi. Nda ondoalo kämätu ami ta ya cini si, ka ugu Lu eji ami o’bane edrene ŋgyiri, Kristo’ba se mbate tavousu be, ago taoro be ole Lu ro oyene kpeye ronye. 13 Ma modo mänina ndi tazevoedrene ta losi oyero ndaro mbara si ta amiro ta ndi lidri Laodikia ndi Irapoli ya be rota. 14 Luka, ’diede’ba amaro se mùlu tawi, ndi Dema be zo mede ànyaro ämiri. 15 Mìye mede amaro ädrupii Laodikia ya ri ndi Nyemefu be ndi känisa se kabe kalakoto zo anyaro ya be. 16 Taegyi ono uzina vosi, mì’ba äzi kpa känisa Laodikia roya. Ago kpa inye taegyi se ädrupii Laodikia ya ka oyebe ezone uzine. 17 Ago nyìti ta Arekipo ri mikye: “Be miri losi se ozobe ruindu Opi roya ondene.” 18 Megyi ta ono ni, drí ma modo rosi. Mede ni Paulo resi. Nyìje embe maro nyori si ono tana ko! Tai’dwero Lu ro ka’do ami be.