LOSI LAZO’BAI RO

LOSI LAZO’BAI RO

¹ Ku Teopila: Buku käti maro ya megyi tase cini Yesu koyebe ago kembabe tana te ṛoni tuse nda keto losi ndaro be si ² madale tuse Lu ru Yesu te vo’buyakuru ya si. Teinye nda uru ako kuru, nda ozo ota te mbara Tori Alokado rosi lidri se nda konjibe lazo’bai ndaro ro ana ri. ³ Odra ndaro vosi, u’duna ’butesu nda ka’darute ànyari perena amba liti se ka’da tate ànyari endaro anjioko nda adrite. Ànya ndre nda te, ago nda atate ànya yibe ta Miri ’Bädri’ba Lu ro rota. ⁴ Ago ondro ànya kikyite voaloya oko, nda ozo ota ono te ànyari ekye: “Nyè’be Yerusalema ko, oko nyòkote ŋgapäṛi se miti tana be ämiri, ŋgapäṛi se Täpi maro ko’ba tana be ’do. ⁵ Yoane bapatisi ’di te gyi si, oko u’du fere si oko abapatisina ami ’da Tori Alokado si.” ⁶ Ondro Lazo’bai kotoyikalate Yesu be oko, ànya ejiyi nda te ekye: “Opi, tu ono si ono migo nyologona Miri ’Bädri’ba ro gi’da Yisaraele riya?” ⁷ Yesu atate ànyari ekye: “Tunai ndi a’donai be arate drikaca Täpi maro modona rosi, ago ko ämiri unine kode ànya ka a’do itu. ⁸ Oko ondro Tori Alokado kikyite ämidri oko, nyà’dona ’da twi mbara be, ago nyà’dona ’da tazevoedre’bai maro Yerusalema ya, Yuda cini yasi ndi Samaria be, ago le ädu ’bädri roya.” ⁹ Ata ono vosi, äru nda te vo’buyakuru ya, ànya uguyi nda ondre te oyivoya ago ’dikolo da’do nda teni ondrevoya ànyari. ¹⁰ Ànya riyite ’du vo ondrene kuru ondro nda kate ugu oyi owo, ago ndriŋwa oko lidri ritu boŋgo onjero be edreyite ànya re ¹¹ ago atayite ekye: “Galilaya’bai, nyèdre nyà ugu voondre vokuru ya etaya? Yesu se ärube ni ami resi vo’buyakuru ya ono, egona kpa oso mìndre nda be oyivoya vo’buyakuru ya ’do ronye.” ¹² ’Dooko lazo’bai goyite kovole Yerusalema ya ni ’Bereŋwa Ice Idoro ro drisi, se ozona oso jä’dijä’dina alo ni ’bakici yasi. ¹³ Ànya ciyite ’bakici ya ago tuyite kuru zoya se ànya kayiugu ori be kigye ana ya! Petero, Yoane, Yakoba, ago Andarea, Filipo ago Toma, Batolimayo ago Matayo, Yakoba ŋgwa Alepayo ro, Simona se äzite ’bädri iro lu’ba ago Yuda ŋgwa Yakoba ro. ¹⁴ Ànya otoyikalate ondoalo voaloya mätune, troalo ’ditoko be ago Maria endre Yesu ro ndi ädrupii ndaro be. ¹⁵ Ago u’du fere vosi oko kalakoto taoma’bai ro a’dote, ànya cini orivoya oso kama alo ’buteritu (120) ronye, ago Petero edrete kuru ta atane. ¹⁶ Nda atate ekye: “Ädrupii maro, taegyi a’dote endaro se Tori Alokado katabe Dawidi si, äŋgu tana teṛo kyeno ta Yuda rota, se lepe ànya se kuru Yesu te kai ni. ¹⁷ Yuda ni alo aza gboko amaro ro, tana anji nda te losi oyene ama yibe.” ¹⁸ (Parata se Yuda kurube taoye undiro ndaro tana ro ana nda gye ämvu te sina, ’dooko e’dete ṛi; nda lehwete ago ici cini yasi i’durute tesi. ¹⁹ Lidri se cini koribe Yerusalema ya eriyi tana te, ago kala ànyaro modona si ànya ziyi ämvu ana te Akeledama, takacina anjioko “Ämvu Kari ro.”) ²⁰ “Tana egyi tate buku Räṛu roya ekye: ‘Ka’do inye zo ndaro yana ka’do awi; ’diaza kori ko kigye.’ Egyi ta kpate ekye: ‘Ka’do inye ’diaza tona kuru vo ruindu ndaro ro.’ ²¹ “Ka’do inye, beṛo ’diaza se ni gboko amaro yasi onjine, se a’do teṛo ama yibe tuse cini Opi Yesu abate ama yibe si, ²² eto ṛoni tuse Yoane pe lazo ndaro bapatisi rote si madale tuse äru Yesu teni ama resi le vo’buyakuru ya si. Alo ’di kwoi ro ri a’done tazevoedre’ba ro ama yibe ta eforo Opi Yesu rota.” ²³ Ago ànya usu ta lidri ritu rote; Yosepa se äzite Baresaba (äzi kpate Yusetu), ago Matio. ²⁴ ’Dooko ànya mätuyite ekye: “Opi, mini ya ’dicini rote, ni ’di ritu kwoi lakosi se minjibe nyaka’da ämäri, ²⁵ ruindune lazo’ba ro vo Yuda roya, vose nda e’bete ana ago oyite vose ndäri a’done kigye ya.” ²⁶ ’Dooko ànya voyi vodo te ŋgaonji oyeza lakole lidri ritu roya, ago anji Matio te, se olocite gboko lazo’bai ’butealo foalo roya.

¹ Ondro tu Penetikoseta ro kesate oko, vo taoma’bai cini ro otoyikalate troalo voaloya. ² Ndriŋwa oko kporo ikyite ni vokuru yasi uwina laba oso oli mbara be kugu usi ronye, ago ga zo se ànya koriyibe kigye ana te twi. ³ ’Dooko ànya kondreyi be ondrena laba oso ladra asi ro ronye se peredrite ago ikyi rite ’dicini alo alo lau ana dri. ⁴ Ànya cini a’dote twi Tori Alokado be ago etoyi ata te kala toto azaka si, oso Tori kozo mbara be ànyari atane ronye. ⁵ Yudai se koriyibe Yerusalema ya, lidri mätu’bai se ikyite ni ’bädri cini ’bädri ya yasi. ⁶ Ondro ànya keriyi kporo ono te oko, lowa amba otoyikalate, ànya cini te orivoya larolaro ro, tana ànya cini alo alo eriyi taoma’bai kayi ugu ata kala modo ndaro rosi. ⁷ Ànya a’doyite lä’bilä’biro ago larolaro ro ànya atayite ekye: “Ànya se ka ugu ata oso nonye kwoi ṛo ko Galilaya’bai ya? ⁸ Oko vo amaro cini, meri ànya te ugu atavoya kala modo amaro rosi ono, eŋwanye ya? ⁹ Ama orivoya ni Paretia, Media, ndi Elama be yasi; ni Mesopotamia, Yuda, ndi Kapadokia be yasi; ni Pondusi ndi Asia be yasi; ¹⁰ ni Ferugia ndi Pamefulia be yasi; ni Ezipeto ndi wari Libiya ro loto Kurene lomvo yasi. Rukä amaro ni Roma ya, ¹¹ Yudai ndi riti atrai se tozarube Yudai ro be, ago rukä amaro ni Kurete ndi Arabia be yasi, caoko ama cini meri ànya te kayi ugu ata kala modo amaro rosi ta tase para Lu koyebe rota!” ¹² A’doyite lä’bilä’biro ago wiriwiriro, ànya kayi ugu azi eji ekye: “Takaci ta ono ro e’di ya?” ¹³ Oko azakana guyi taoma’bai te ekye: “Lidri kwoi fuyi iyi te vino si!” ¹⁴ ’Dooko Petero edrete kuru lazo’bai azi se ’butealo foalo kai yibe, ago eto taope te ṛeṛe lowa ri ekye: “Yudai azi ago ami cini se nyàbe ori Yerusalema ya ono, nyeri ta maro ago mi’ba miti tase ono takacina te ämiri. ¹⁵ Lidri kwoi fu iyi ko wa si, oso mìmabe ronye, ono orivoya toto saa nina kyenoŋbo ro yi. ¹⁶ Oko, ono ni tase nebi Yoele kope tana be owo: ¹⁷ ‘Lu atate ekye, ono ni tase ma oyebe oyene tui äduro ya owo: medena Tori maro ’da ’dicini dri. Ŋgwàagoro amiro ndi ndiriŋwa be openayi lazo maro ’da oso nebii ronye; agoanjii amiro ondrenayi rulofo ’da ago tori ezina ta ’da agoàmbago amiro dri. ¹⁸ Owo, ndi inye tu gi kai si medana Tori maro ’da, ruindu’bai maro àgoro ndi ndiriŋwa robe dri riti, ago ànya openayi lazo maro ’da oso nebii ronye. ¹⁹ Mayena talaro ro ’da vokuru kurusi ya ago mayena rubä ’da ’bädri vurusi ya. Kari, asi, ndi äṛubäni kätu robe a’dona ’da; ²⁰ Otozana kitu ’da ŋgätini ro ago imba tozaruna ’da okaro oso kari ronye, teinye tu ’desi ago liŋgyiekye Opi ro ri esa ako. ²¹ Ago ’dooko, nda se kabe Opi uzi ta ŋgaopa rota apana ’da.’ ²² “Nyèri ata kwoi, Yisaraele’bai azi! Yesu Nazareta ro ni mano se drikaca mbara Lu ro ro ka’date ŋbelero ämiri talaro ro cini si ndi rubä be se Lu ye te ämiri nda si, ami andivo mìni ta ono te, tana a’dote noŋwa ami lako. ²³ Oso taora modo ndaro ronye Lu ra ta ṛote nja anjioko ozo Yesu te ämiri, ago mìfu nda te mì’ba lidri takozi amba be otoyi nda te. ²⁴ Oko Lu eŋga nda teni avo yasi, onji nda te dritai ro ni mbarana yasi, tana orivoya rritiro odra ri nda urune kamba’ba ro. ²⁵ Tana Dawidi atate ta ndaro ta ekye: ‘Mandre Opi te ma mile tu cini si; nda orivoya loto mare, ago ma’dona ko rritiro. ²⁶ Ago ma te yai’dwe amba si, ago ata maro te orivoya twi riyä amba be. Ago ma, ma ca orivoya oŋgwaoŋgwaro, marina ’da mio’ba ŋgye ya, ²⁷ tana nye’bena ma ko ’bädri avo roya; nye’bena ruindu’ba ’diri miro ko oŋgwane ’budri ya ²⁸ Nyaka’da liti se kabe ’di ugu adri ya te märi, ago a’do loto miro o’bana ma ’da twi riyä ro!’ ²⁹ “Ädrupii maro, beṛo märi atane ämiri ŋbelero ta zutu likuekye amaro ’Bädri’ba Dawidi rota. Nda drate ago asete, ago ’budri ndaro orivoya noŋwa ama be gile tu ono si ono. ³⁰ Nda orivoya nebi yi, ago nda ni tao’baro Lu ro ndäri tana ṛote: Lu ’ba tao’ba te anjioko nda o’bana alo aza zelevoi Dawidi ro ro ’da ’bädri’ba ro, kpa oso Dawidi ronye. ³¹ Dawidi ndre tase Lu ka oyebe oyene mileya te, ago nda pe ta eforo Mesiya ro tana te se nda katabe ekye: ‘E’be nda kote ’bädri avo roya; lomvo ndaro ŋgwa kote ’budri ya.’ ³² Lu eŋga Yesu gi ono teni odra yasi, ago ama cini orivoya tazevoedre’bai taŋgye ono ro. ³³ Eŋga nda te drígwo Lu Täpi ndaro roya, ago usu Tori Alokado teni nda resi, oso nda ’batabe ronye. Tase nyàbe ondrena ago nyàbe erina ono orivoya ŋgapäṛi ndaro se nda kedabe ämädri owo. ³⁴ Tana Dawidi oyi kote vo’buyakuru ya oko nda atate ekye: ‘Opi atate Opi maro ri ekye: Miri noŋwa drígwo maro ya ³⁵ madale ma’bana kyila’baazii miro lutu kotopa pa otoro ro pa miro zele.’ ³⁶ “Ka’do inye lidri cini Yisaraele ro ri unine ŋgye Yesu gi se nyòtobe ono, ni nda se Lu ’bate Opi ro ago Mesiya ro owo!” ³⁷ Ondro lidri keri ta ono te oko, ya ànyaro loŋga tawi ago atayite Petero ndi azaka lazo’bai robe ri ekye: “Ädrupii, mayena e’di ya?” ³⁸ Petero atate ànyari ekye; “Beṛo ami cini alo alo ri drietane ni takozi amiro yasi ago a’done bapatisi be ävuru Yesu Kristo roya tana e’be ami robe takozi amiro ta; ago nyusuna ŋgapäṛi Lu ro ndi, se ni Tori Alokado. ³⁹ Tana tao’ba Lu ro a’bate ämiri ndi ŋgwai amiro be, ago ànya se cini lozo di ri, se cini Opi Lu amaro kabe uzina andivo ndaro re ri.” ⁴⁰ Petero petate ànyari ago ata amba azaka si nda atate ànyari ekye: “Mìpa andivo amiro ni taezaro se kabe eziikyi lidri kozi ono dri risi!” ⁴¹ Amba ànyaro mate lazo ndaro ya ago abapatisi te, ago lidri oso kutu nätu (3,000) ronye odro’bete gboko gi tu ana si ana be. ⁴² Ànya riyite ta unine ni lazo’bai resi, dro’beyirute rumora ya, ago uguyi ŋgaonya te voaloyasi ndi mätu oyebe. ⁴³ Lazo’bai uguyi talaro ndi rubä amba be oyena te, ago turi so ’dicini te. ⁴⁴ Taoma’bai cini riyite troalo rumora alo ya, ago lanjiyi ŋgase ànya be sina te azi be. ⁴⁵ Ànya gyeyi lakaza ndi ŋgase ànya be sina be te tesi, ago leweyi parata na te ànya voya, oso ’dialo kolebe iri ronye. ⁴⁶ Tu cini si ànya otoyikalate gboko ro Yekalu ya, ago ànya nyayi ŋgaonya te voaloyasi ’bai ànyaro yasi, uguyi ŋgaonya te yai’dwesi ago driuŋgyiako si, ⁴⁷ uguyi Lu räṛu te ago lidri ata tate kado ta ànyaro ta. Ago tu cini si Opi dro’be ’dise cini apabe te gboko ànyaro ya.

¹ Tu alo si Petero ndi Yoane be oyiyite Yekalu ya kitudiri vosi saa njidriesu, saa mätu ro rosi. ² Lau dereŋwa se äzibe Liŋgyiekye ana kala, mano aza orivoya ka’bo ro ṛoni uti ndaro si. Tu cini si äŋgyi nda te dereŋwa kala parata ejine ni lidri se kabe oci Yekalu ya rigyesi. ³ Ondro nda kondre Petero ndi Yoane be kayi ugu oci Yekalu ya oko, nda eji ànya te ŋga aza ozone ndäri. ⁴ Ànya ndreyivote ŋgye nda dri, ago Petero atate ekye: “Mindrevo ämädri!” ⁵ Ago nda ndrevote ànya dri, mio’ba be ŋga aza usune ni ànya rigyesi. ⁶ Oko Petero atate ndäri ekye: “Ma teinye parata ako, oko mozona ŋgase mabe sina ono ndi miri. Ävuru Yesu Kristo Nazareta rosi miŋga kuru ago nyaba!” ⁷ ’Dooko nda ru nda te drígwo yasi ago eŋga nda te kuru. Dori pa mano ana ro ndi kotoŋbo be a’dote ṛatara ro; ⁸ nda ŋgate ace kuru, edrete pa ndaro dri, ago eto ugu abate gbikyi. ’Dooko nda cite Yekalu ya ànya yibe, ugu ababe, ugu loŋgabe ndi ugu Lu räṛu be. ⁹ Lidri lau ana ndre nda te ugu abavoya ndi ugu Lu räṛu be ¹⁰ ago ondro ànya kuniyite nda ni drilämi’ba se koribe Dereŋwa Liŋgyiekye kala owo oko, ànya cini laroyite ago lä’biyite tase ka’dobe ndäri ana ta. ¹¹ Ondro mano ana lewite Petero ndi Yoane be lomvo, Ndiṛi se äzibe Solomo ro ana ya oko, lidri te lä’bilä’biro ago muyite ànya re. ¹² Ondro Petero kondre lidri te oko, nda atate ànyari ekye: “Yisaraele’bai azi, nyà laro ta ono ta etaya, ago nyà voondre ämädri etaya? Nyùsu amiro be mìkye mbara modo amaro rosi kode a’do lu’ba rosi ma’ba mano ono ni abane ya? ¹³ Lu Abarayama, Yisika ndi Yakoba be ro Lu zutui amaro ro ozo ’desi ndaro te ruindu’ba ndaro Yesu ri. Oko nyòzo nda te drikaca’bai ri, ago mìga nda tezo Pilato kandra, Pilato kora ta ca aba nda ojine owo. ¹⁴ Nda orivoya alokado ago ’di kado yi, oko mìga nda tezo, ago vo nda onji roya nyeji Pilato te yauni oyene ämiri ta tozane ’diufu’ba onjine ayani. ¹⁵ Mìfu nda se kabe ’di loci ni adri ya te, oko Lu eŋga nda te ni odra ya, ago ama ni tazevoedre’bai ta ono ro. ¹⁶ Mbara ävuru ndaro ro tomba mano ka’bo ro ono ni. Tase mìndrebe ago mìnibe ono ayete taoma ävuru ndaro ya si; taoma Yesu ya ede nda ni kado, oso ami cini mìndrebe ono ronye. ¹⁷ “Ago yauono, ädrupii maro, mäni ndi anjioko tase ami ndi dri’bai amiro be mìyebe Yesu ri ono tauniako amiro ’bani oyene. ¹⁸ Lu ayota ṛote kyeno ṛo nebii cini si anjioko Mesiya ndaro ri ṛo ruezana, ago nda ’ba a’dote endaro liti ono yasi. ¹⁹ Ka’do inye, nyètadri, ago mìzami Lu re, tana nda e’bene ami ’da takozii amiro ta. Ondro mìye ndi inye, ²⁰ tu ’ditomba Tori si ro ikyina ’da ni Opi resi, ago nda ezona Yesu ’da, se ni Mesiya nda nji ṛote nja ämiri. ²¹ Beṛo ndäri orine vo’buyakuru ya madale tu esana gwo ŋgacini o’baza to’diro, oso Lu kayo tana be nebii alokado ndaro si ṛo kyeno ana ronye. ²² Tana Musa atate ekye: ‘Opi Lu amiro ezona nebi ’da ämiri, kpa oso nda kezo mabe ronye, ago nda a’dona ’da alo aza lidri amiro ro ronye. Ämiri ŋgase cini nda kabe tana iti ämiri oyene ono orone. ²³ ’Diaza se koro nebi ana kote elewena ’da ni lidri Lu ro resi ago utufuna ’da.’ ²⁴ Ago nebii, ṛoni Samuele si ago ànya se kikyibe nda vosi ana, vo ànyaro cini se lazo be ayo tase ka’dobe tu kwoi si tana te. ²⁵ Tao’baro Lu ro nebii ndaro si orivoya ämiri, ago nyà tao’baro se Lu ko’babe zutui amiro ri la’dona, oso nda katabe Abarayama ri ronye ekye: ‘Zelevoi miro si mäṛuna lidri cini ’bädri ya ’da.’ ²⁶ Ago ta’doro Lu nji Ruindu’ba ndaro te ago ezote käti amire, ami äṛune ugu ami cini o’ba si drietane ni taoye kozi amiro yasi.”

¹ Petero ndi Yoane be drigba ugu ta atavoya lidri ri oko rukä kohanii ro ndi dri’ba vo yekalu ro ondre’bai robe, ndi Sadukei rukä be esayite. ² Ànya a’doyite kyilaro tana lazo’bai ritu kwoi kayi ugu lidri emba ekye: “Yesu efote ni avo yasi,” se ka’date anjioko avo ka adri adri. ³ Ago ànya ruyi ànya te ago ’bayi ànya te kamba ya madale kyenonosi, tana ’dooko teṛo vounivoya. ⁴ Oko amba se keriyi lazo be matate; ago oti lidri ro sate oso kutu nji. ⁵ Kyenonosi oko dri’bai Yudai ro, ’di’desii ndi miemba’bai Ota robe otoyikalate Yerusalema ya. ⁶ Ànya dro’beruyite Kohani Fopara Ana be, ago Kayafa be, Yoane, Alegezanda, ndi azaka se katidri Kohani Fopara ro yasi iyi yibe. ⁷ Ànya edreyi lazo’bai te ànya kandra ago ejiyi ànya te ekye: “Mìye ta ono te eŋwanye ya? Mbara se ami be sina ono e’diro kode mìye tate ävuru a’diro siya?” ⁸ Petero, ro twi Tori Alokado be, zatadri ànyari te ekye: “Dri’bai lidri ro ndi ’di’desii be: ⁹ ondro ka’do ugu ama eji ondro ta taoye kado se ayebe mano ka’bo ro ri ta ago kode ede nda te eŋwanye, ¹⁰ ’dooko beṛo ami cini ri unine, ago beṛo lidri cini Yisaraele ro ri unine, anjioko mano gi kabe edre ami kandra noŋwa ono ede teṛo kpeye kadoro mbara ävuru Yesu Kristo Nazareta rosi, se nyòtote ago se Lu eŋgate ni avo yasi. ¹¹ Yesu ni ’dise taegyi kata tana be ekye: ‘Kuni se ami zoobe’bai nyàmawote ono tozarute a’done para ndrani vona cini drisi.’ ¹² Usuna ŋgaopa toto nda si ayani; vo ’bädri cini ro yasi ’diaza i’do se Lu ozote se unina ndi ama opane.” ¹³ Gbokoi Taäyi’bai ro laroyite ondro kondreyi turiako Petero ndi Yoane be rote ago niyite ànya orivoya ’di ete yi emba kote owo. ’Dooko ànya niyite anjioko ànya orivoya losioyeazi Yesu ro. ¹⁴ Oko ànya niyi kote ta aza atane, tana ànya ndreyi mano se edebe ana te edrevoya lau Petero ndi Yoane be re. ¹⁵ Ago ànya atayite ànyari ofone ni zo taäyiro yasi, ago ’dooko ànya etoyi ta atate ànyavoya. ¹⁶ Ejiyi tate ekye: “Màyena e’di lidri kwoi riya? ’Dicini Yerusalema ya nite anjioko ànya yeyi talaro ro ndra ono te, ago mä̀ni kote kalana ogane. ¹⁷ Oko tase ono lagaza ni ugu rularivoya ndra lidri lako, mì’de muluku lidri kwoi ko ta opene alona ’diaza ri ävuru Yesu rosi.” ¹⁸ Ago ànya go ziyi ànya te zo ya atayite ànyari kote ànyari ta opene kode ŋgaembane ävuru Yesu ro ya. ¹⁹ Oko Petero ndi Yoane be zayitadri ànyaro te ekye: “Ami andivo amiro ri vure se ŋgye oyene ayani Lu mile, ami orone kode Lu orone. ²⁰ Tana mä̀ni kote tase andivo amaro màndrebe ago mèribe ono orine opeako.” ²¹ Ago Taäyi’bai go lukuyi ànya te mbara ndi e’beyi ànya te dritai ro. Ànya niyite anjioko orivoya rritiro ànya ezane, tana lidri kayi ugu Lu räṛu tase ka’dobe ana ta. ²² Mano se aye talaro ro ŋgaedero ono be lomvoigye ana ndroa na ndrani ’butesu drisi ²³ Dori Petero ndi Yoane be e’bena dritai ro vosi oko, ànya goyite gboko ànyaro re ago itiyi tase kohanii ’desi ndi ’di’desii be katabe ana tana te ànyari. ²⁴ Ondro taoma’bai keriyite oko, ànya cini dro’berute troalo mätu oyene Lu ri ekye: “’Desi, ago O’ba’ba vo’buyakuru ro ndi ’bädri be, ndi gyi’desi be, ndi ŋgase cini ànya yasi ono be ono! ²⁵ Tori Alokado si mipe tate zutu amaro Dawidi ruindu’ba miro si, nda atate ekye; ‘Atrai orivoya kyilaro eta; Lidri kayi ta awi ànyaro äyi etaya? ²⁶ ’Bädri’bai ’bädri ro edeyi andivo ànyaro te, ago ’dimiri’bai otoyikalate troalo kyilaro Opi ndi Mesiya ndaro be lomvo.’ ²⁷ Tana ṛo endaro Eroda ndi Poneto Pilato be otoyikalate troalo ’bakici ono ya atrai be ndi lidri Yisaraele robe Yesu, Ruindu’ba alokado miro dri, se mi’babe Mesiya ro ono. ²⁸ Ànya yeyi ŋgase mbara miro ndi ole miro kora tana be ka oyebe a’done ana te. ²⁹ Ago yauono, Opi, mindre ozionya se ànya konyabe ono, ago mi’ba ama, ruindu’bai miro lazo miro opene turiako. ³⁰ Nyozo drí miro ’diedeza, ago mi’ba aye talaro ro ndi rubä be ävuru Ruindu’ba alokado miro Yesu rosi.” ³¹ Ondro ànya kondeyi mätu oyete oko, vose ànya kotoyikalabe kigye ana akandate. Ànya cini a’dote Tori Alokado be ago etoyi lazo Lu ro opete turiako si. ³² Gboko taoma’bai ro a’dote drîalo be ago ya alo si. ’Diaza ata kote ekye ŋgase nda be sina orivoya modo ndaro ro, oko ànya cini la’doyi ŋgase ànya ka’dobe sina te azi be. ³³ Mbara para si lazo’bai edreyitazevo ta efo Opi Yesu ro ni avo yasi rote, ago Lu eda äṛu te amba ànya cini dri. ³⁴ ’Diaza i’do gboko ono lako lemeri be. Ànya se gyini be kode zo be gye ànya te, eziyi parata se ànya kusuyibe ogyena si ’do te, ³⁵ ago ’bayite lazo’bai kandra, ago olonyi parata na te ’di alo alo ri oso a’do lemeri se nda be sina ronye. ³⁶ Ago Yosepa, Lewe’ba ätite Saiporosi ya, se lazo’bai zite Baranaba (anjioko “Agoago Ozo’ba”), ³⁷ nda gye gyini modo ndaro rote, ezi parata na te ago ’ba ànya te lazo’bai kandra.

¹ Oko mano aza orivoya ävuruna Anania, nda ndi toko ndaro Sapira be gyeyi ŋga azaka ànyaro te. ² Oko tadriole toko ndaro be si nda ta telesi parata na rote andivo ndaro ri ago ’ba anjokona te lazo’bai kandra. ³ Petero atate ndäri ekye “Anania, mi’ba Satani gwo mi urune ago mi o’bane kowe ogane Tori Alokado ri telesi parata se nyusube ŋga ogyesi ro etana si etaya? ⁴ Teinye miri ŋga ogyeako anya ṛo orivoya miro ago ogyena vosi parata na ro orivoya miro. Mi’de gwo tausune ta nonye ono oyene inye etaya? Miga kowe ono kote lidri ri oko Lu ri!” ⁵ Dori Anania keri ta ono te oko, nda ’dete vuru ago drate; ago ’dicini se keri ta ono be a’dote turituri ro. ⁶ Agoanjii eciyite, vuyi lomvo ndaro te, ŋgyiyi nda te tesi, ago seyi nda te. ⁷ Oso saa nätu vosi ronye oko toko ndaro ni tase ka’dobe ana ko, ago ecite. ⁸ Petero eji anya te ekye: “Nyiti ta märi, ono gindi ni ŋgase mi ndi ago miro be nyusube ŋga amiro ogyena si owo ya?” Anya zatadrina te ekye: “Owo, otina ndi ni wo.” ⁹ Ago Petero atate anya ri ekye: “Mi ndi ago miro be mira tate Tori Opi ro tana ojone etaya? Lidri se koseyi ago miro be yauono te orivoya käläsi kala, ago ànya uŋgyinayi mi kpa ’da tesi!” ¹⁰ Dori anya ’dete vuru nda pa ago drate. Ago agoanjii eciyite ago ndreyi anya drate, ago ànya ŋgyiyi anya te tesi ago seyi anya te ago anyaro lomvo. ¹¹ Känisa cini ndi ànya se cini keriyi ta ono be a’dote turituri ro. ¹² Lazo’bai yeyi talaro ro amba ndi rubä be te lidri lako. Taoma’bai cini otoyikalate troalo Ndiṛi Solomo roya. ¹³ ’Dise tesi si lekote rudro’bene ànya yibe, lidri kufa ta ànyaro gica amba owo. ¹⁴ Oko lidri amba du ecite gboko ya, lowa mànoagoro ndi ’ditoko be se mayitate Opi ya. ¹⁵ Ago tase lazo’bai kugu oyena be ana si, äŋgyi lidri adravoro te tesi litiŋwà drisi ago a’bete kitapara ndi birisi be drisi tana lindri Petero ro ko’de robe rukä ànyaro dri ondro nda kate ugu lävu nasi owo. ¹⁶ Ago lidri lowaro ikyite ni ’ba’desii gbikyi Yerusalema lomvosi yasi, eziyi ànya se adravoro kode tori undiro be ànya ya kai te; ago ede ànya cini te. ¹⁷ ’Dooko Kohani Fopara ndi azii cini ndaro be, gbokoi Sadukei robe, a’doyite yaoko be amba lazo’bai lomvo. ¹⁸ Ànya ruyi lazo’bai te ago ’bayi ànya te kamba ya. ¹⁹ Oko ŋgäkyi gi ana si malaika Opi ro pi dereŋwa kamba rote, lofo lazo’bai te tesi, ago atate ànyari ekye: ²⁰ “Nyòyi, ago nyèdre Yekalu ya, ago nyìti adri to’di ono tana lidri cini ri.” ²¹ Lazo’bai royitate, ago ’buzevoosivoya oko ànya ciyite Yekalu ya ago etoyi ŋgaemba te. Kohani Fopara ndi azii ndaro be ziyi ’di’desii cini Yudai rote voaloya taäyine troalo; ’dooko ànya zoyi lazo te kamba ya lazo’bai ezine ànya kandra. ²² Oko ondro ànya se azobe ana kesayite oko, ànya usuyi lazo’bai kote kamba ya, ago ànya goyite taäyi’bai re ago itiyi tana te ekye: ²³ “Ondro màsate zo kamba roya oko, mùsute asete anda ndi ago vookwa’bai cini ka vookwa dereŋwa kalasi; oko ondro mä̀pi dereŋwa te oko, mùsu ’diaza kote kigye!” ²⁴ Ondro kohanii ’desi ndi dri’bai ’desi yekalu okwa robe keriyi tana te oko, ànya laroyite tase ka’dobe lazo’bai ri ta. ²⁵ ’Dooko ’diaza ecite ago atate ànyari ekye: “Nyeri! Lidri se mì’babe kamba ya kai orivoya Yekalu ya kayi ugu lidri emba.” ²⁶ ’Dooko dri’ba oyite lidri ndaro be ago eziyi lazo’bai te kovole. Oko ànya yeyi kote mbarasi, tana ànya orivoya turiro ukyi lidri ovo ànya ’da kuni si. ²⁷ Ànya lociyi lazo’bai te, edreyi ànya te taäyi’bai kandra, ago Kohani Fopara eji ànya te ekye: ²⁸ “Mozo tate ämiri ko ŋgaembane ävuru mano ono roya, oko mìndre tase mìyebe ono! Nyàlari ta ŋgaembaro amiro te cini Yerusalema yasi, ago mile ama o’bane nda ufu’ba ro!” ²⁹ Petero ndi lazo’bai azaka be zayitadrite ekye: “Beṛo ämäri Lu orone, ko lidri. ³⁰ Lu zutui amaro ro eŋga Yesu teni avo yasi, se mìfu nda be nda oto si taka dri ana. ³¹ Lu eŋga nda te drígwo ndaro yasi Dri’ba ro ago Opa’ba ro, kandrakado ozoza lidri Yisaraele ro ri drietane ago ànya e’beza ta takozi ànyaro rota. ³² Ama orivoya tazevoedre’bai ŋgase kwoi ro, ama ndi Tori Alokado be, se ŋgapäṛi Lu ro yi ànya se kabe nda oro ri.” ³³ Ondro gboko taäyi’bai ro keriyi ta ono te oko, ànya a’doyite kyilaro ndra ago ànya leyite lazo’bai ufune. ³⁴ Oko alo ànyaro, Parusi yi äzite Gamaliele, se orivoya miemba’ba Ota ro ago lidri cini rote ndra, edrete kurusi Taäyi’bai lako. Nda ozo tate lazo’bai lofone fere tesi, ³⁵ ago ’dooko nda atate Taäyi’bai ri ekye: “Yisaraele’bai azi, mì’ba mi amiro komba tase nyàbe oyene lidri se kwoi ri ta. ³⁶ Miyi tase Teuda kaka’da yibe tuse kyeno ana si ana, ’bayite a’done ’di’desi aza ro, ago lidri oso kama su ronye dro’berute nda be, oko äfu nda te, ago oso’bai nda vo pererute, ago taoye ndaro drate kpeye. ³⁷ Ono vosi, Yuda Galilaya’ba ka’da yite tu ’dioti rosi, nda ese lidri te nda vo, oko äfu nda kpate, ago oso’bai cini nda vo pererute. ³⁸ Ago ka’do inye ta ono ta, mata ämiri mìye ta aza ko lidri kwoi ri. Nyè’be ànya iṛe! Ondro ta gi ànya korabe ago koyeyibe ono ka’dote ni lidri ro, okyene ’da, ³⁹ oko ondro kikyite ni Lu resi, mìnina ko ànya opene ṛe. Nyùsuna andivo amiro ugu kyila oyevoya Lu be!” Taäyi’bai soyite tazevoedre Gamaliele ro vo. ⁴⁰ Ànya ziyi lazo’bai te ecine, ago ’biyi ànya te ago tayi ànya te ko taopene alona ävuru Yesu roya; ago ànya onjiyi ànya te dritai ro, ⁴¹ Ago lazo’bai kayite vo taäyiro e’be oko, a’doyite yai’dwesi, tana Lu ti ànya te takado’bai ro rueza driupi ro uŋgyine ta Yesu rota. ⁴² Ago ondoalo Yekalu ya ago ’ba lidri ro yasi ànya riyite ’du ŋgaemba ago peyi Lazokado te ta Yesu Mesiya rota.

¹ Tu fere vosi ondro oti taeri’bai ro kugu liti oko, kalaope a’dote lakole Yudai se kabe Giriki ata roya ndi Yudai se vokuzupi iyi be. Yudai se kabe Giriki ata atayite ekye ävuzii ànyaro ati tana kote ŋgaonya lanji se abe lanjina ondoalo ya. ² Ta’doro lazo’bai ’butealo foritu ziyi gboko taoma’bai rote voaloya ago atayite ekye: “Ko kado ämäri ata Lu ro opena e’bene ta ŋgaonya lanji rota. ³ Ka’do inye, ädrupii, minji lidri njidrieri ni ami lakosi se uniuniro twi Tori Alokado be ago tavouni be, ago ma’bana ànya ’da a’done dri’ba losi ono ro. ⁴ ’Dooko andivo amaro, mozona saa amaro ambana ’da mätu ndi losi taope robe ugu oyene ayani.” ⁵ Gboko cini a’dote yai’dwesi ta lazo’bai katabe ono rota, ago ànya njiyi Setepano te, mano taoma amba be ago Tori Alokado be, ago Filipo, Porokoru, Nikanora, Timono, Parumona, ndi Nikolau se orivoya Atra yi ni Anetiokia ya se tozayite Yudai ro ṛo kyeno. ⁶ Gboko ezi ànya te lazo’bai re, se mätuyite ago ’bayi drí ànyaro te ànya drisi. ⁷ Ago ata Lu ro larirute ’duro. Oti taeri’bai ro Yerusalema ya ugu litite amba, du, ago lowa amba kohanii ro mayi ta te. ⁸ Setepano, orivoya mano se Lu äṛute ago orivoya twi mbara be, ye talaro ro amba te ndi rubä be lidri lako. ⁹ Oko lidri azaka a’dote kyilaro nda be se ni gboko zoitaeriro Lidri Dritai ro ro yasi (oso äzibe ronye), se orivoya Yudai ni Kurene ndi Alegezandria yasi be. Ànya ndi Yudai azaka ni wari Silisia ro ndi Asia ro yasi be etoyi kaladiṛi te Setepano be. ¹⁰ Oko Tori ozo tavouni te Setepano ri tana ondro nda katate oko, ànya niyi kote kaladiṛine nda be. ¹¹ Ago ànya gyeyi mi lidri azaka rote ta atane ekye: “Mèrite nda ka ugu ta ata Musa lomvo ndi Lu be!” ¹² Ta ono ta ànya eŋgayi ya lidri rote, ’di’desii be ndi miemba’bai Ota robe. Ànya ruyi Setepano te ago uguyi nda te taäyi’bai kandra. ¹³ ’Dooko ànya eziyi lidri azaka te ta itine kowero nda lomvo; ànya atayite ekye: Mano gi ono, ondoalo ka ugu ta ata Yekalu alokado ndi Ota Musa robe lomvo. ¹⁴ Meri nda ka ata ekye: “Yesu gi Nazareta ro ono perena Yekalu ’da riya ago lutwena la’bi cini se ocopebe ämäri ni Musa resi ’da!” ¹⁵ ’Dise cini koribe vo taäyi roya kai edreyi mi ànyaro te Setepano dri, ago ndreyi mi ndaro labate oso mi malaika ro ronye.

¹ Kohani Fopara eji Setepano te ekye: “Takicu se kwoi ndi endaro ya?” ² Setepano zatadrite ekye: “Ädrupii ndi täpii be, nyèri ta maro! Teinye zutu amaro Abarayama ri oyiako Arana ya Lu ’desi para ka’darute ndäri Mesopotamia ya ³ ago atate nda ri ekye: ‘Nye’be katidri miro ndi ’bädri be ago nyoyi wari se maka’dana ’da miri ya.’ ⁴ Ago nda e’be ’bädri ndaro te ago oyite Arana ya. Odra täpi Abarayama ro ro vosi, Lu ’ba nda te iswene wari se nyàbe ori kigye yauono ya. ⁵ Lu ozo telesi na aza kote Abarayama ri a’done modo ndaro ro ca käkpu kode oca kadra alo gyini ro ronye. Oko Lu ’ba ta te ozone ndäri, a’done ndaro zelevoi ndaro ri. Tuse Lu ko’ba tao’ba ono be si, ’dooko Abarayama dri teinye ŋgwa ako. ⁶ Ono ni tase Lu katabe ndäri owo ekye: ‘Zelevoi miro orina ’da ’bädri atra ya, se ànya a’donayi ’da iyeäṛi ro kigye ago ayena ànya ’da koziro ndroa na kama su. ⁷ Oko lidri se ànya kayibe oye ruindu rigye ana mayena vurena ’da, ago voigyesi oko ànya efonayi ’da tesi ni ’bädri ana yasi ago mätunayi ma ’da vo ono ya.’ ⁸ ’Dooko Lu ozo la’bi ’di olo ŋbiṛi ro rote Abarayama ri taka’da tao’baro ro. Ago Abarayama lo Yisika te ŋbiṛi ro u’du njidriena uti ndaro vosi, Yisika lo ŋgwa agoro ndaro Yakoba te ŋbiṛi ro ago Yakoba lo ŋgwàagoro ndaro ’butealo foritu te ŋbiṛi ro, ànya ni zutui likuekye tu’de amaro ro owo. ⁹ “Ŋgwàagoro Yakoba ro a’doyite yaoko be Yosepa ädrupi ànyaro lomvo ago gyeyi nda te a’done iyeäṛi ro Ezipeto ya. Oko Lu orivoya tro nda be ¹⁰ ago lofo nda te londroro ni rriti cini ndaro yasi. Ondro Yosepa kefote ’bädri’ba Ezipeto ro kandra oko, Lu ozo a’do kado te ndäri ndi tavouni be, ago ’bädri’ba ’ba Yosepa te wari’ba ro ’bädri dri ndi ’di zo ’bädri’ba roya be dri. ¹¹ ’Dooko mä’bu ’dete Ezipeto cini ya ndi Kanana be, se ozo rueza amba te. Zutui amaro ni kote ŋgaonya aza usune, ¹² ago ondro Yakoba keri tate inya orivoya Ezipeto ya oko, nda zo ŋgwàagoro ndaro, zutui amaro te, tu käti si lau. ¹³ Pere ṛiri oyi rosi Yosepa ’ba andivo ndaro te unine ädrupii ndaro ri, ago ’bädri’ba Ezipeto ro ni katidri Yosepa ro tana te. ¹⁴ Ago Yosepa zo lazo te täpi ndaro Yakoba ri, taitine ndäri ndi katidri cini ndaro be, lidri cini kigye orivoya ’butenjidrieri fonji, ikyine Ezipeto ya. ¹⁵ ’Dooko Yakoba oyite Ezipeto ya, vose nda drate kigye, ndi ŋgwàagoro ndaro be. ¹⁶ Avo ànyaro äŋgyite Sekeme ya, ase ànya te lau ’budri se Abarayama kogyebe ni käläsikala Amora ro rigye parata si ana ya. ¹⁷ “Ondro tu kesate ti Lu ri tao’ba se nda ko’babe Abarayama ri ana ätine oko, oti lidri amaro ro Ezipeto ya a’dote amba. ¹⁸ Äduro oko ’bädri’ba se ni ta Yosepa ro kote eto ’dimiri te Ezipeto ya. ¹⁹ Nda odo zutui amaro te ago ye ànya te siomba si, gbiri ànya te ŋgwàŋwai ànyaro lofone tesi ni ’bai ànyaro yasi, tana ànya kotodra robe. ²⁰ Äti Musa te tuna gi ono si, nda orivoya ŋgwa liŋgyiekye yi, andre vonate ’bäru imba na nätu, ²¹ ago ondro olofo nda teni ’ba ndaro yasi oko, ŋguti ’bädri’ba ro ru nda te ago eca nda te ŋgwa ro modo anyaro ri. ²² Emba nda te tavouni cini Ezipeto’bai rosi ago a’dote mano para ro ata ya ndi taoye be. ²³ “Ondro ndroa Musa rote ’butesu oko, nda usu tate oyine ori Yisaraele’bai azi ndaro ro ondrene. ²⁴ Nda ndre Ezipeto’ba alo ka aza ànyaro oyena koziro, ago nda oyite nda opane ago logovota rote nda ufu si. ²⁵ (Nda kusu iro be ekye lidri modo ndaro ro unina ndi anjioko Lu ka ugu ànya opa nda si ànya o’baza dritai ro, oko ànya niyi kote.) ²⁶ Kyenonosi nda ndre Yisaraele’bai ritu kayi kyila oye, ago nda ojote taliatokpe o’bane lakole ànyaro ya. Nda atate ekye: ‘Nyeri, mano kwoi, ami orivoya Yisaraele’bai azi yi, nyà kyila oye inye etaya?’ ²⁷ Oko nda se kabe azi oye koziro ana du’du Musa te. Nda eji tate ekye: ‘A’di ’ba mi ni ’dimiri’ba ro ago vureope’ba ro ämädri ya? ²⁸ Inye’do mile kpa ma ufune oso, se mifu Ezipeto’ba ana be tandrobe ronye ya?’ ²⁹ Ondro Musa keri ta ono te oko, nda mute ni Ezipeto yasi, ago oyite orine wari Midiana roya. Nda a’dote ŋgwàagoro ritu be lau. ³⁰ “Ago ondro ndroa ’butesu kälävute oko, malaika aza ka’darute Musa ri leko asi roya ka ce kumvuŋwa uje vocowa ya loto ’Bereŋwa Sinai pa. ³¹ Musa a’dote lä’bilä’biro ŋgase nda kondrebe ana ta, ago oyite loto cekumvuŋwa re ondrene kado. Oko nda eri ata Opi rote ekye: ³² ‘Ma ni Lu zutu miro ro, Lu Abarayama, Yisika ndi Yakoba be ro.’ Musa a’dote turi ro ago le kote ondrene. ³³ Opi atate ndäri ekye: ‘Mitri mvoka miro, tana vose nyedrebe kigye ono orivoya gyini alokado yi. ³⁴ Mandre lidri maro abe ugu ezana siomba si Ezipeto ya ono te, meri leri ànyaro te, mikyite vuru ànya o’bane dritai ro, ka’do inye nyikyi mazo mi robe Ezipeto ya.’ ³⁵ “Musa ni se lidri Yisaraele ro kogabezo owo. Se ànya ejiyi ta te ekye: ‘A’di ’ba mi ni ’dimiri’ba ro ago vureope’ba ro ämädri ya?’ Nda ni se Lu zote lidri mirine ago ànya o’bane dritai ro ŋgaopa malaika se ka’darute ndäri uje cekumvuŋwa roya owo. ³⁶ Nda lofo lidri teni Ezipeto yasi, ye talaro ro ndi rubä be te Ezipeto ya ago Gyi’desi Okaro kala ago ndroa na ’butesu vocowa ya. ³⁷ Musa ni se katabe lidri Yisaraele ro ri ekye: ‘Lu ezina nebi ’da ämiri, kpa oso nda kezo mabe ronye, ago nda a’dona ’da alo aza lidri modo amiro ro.’ ³⁸ Nda ni se a’dote lidri Yisaraele robe se mbikala be vocowa ya ana; nda a’dote lau zutui amaro be ago malaika se atate ndäri ’Bereŋwa Sinai dri ana be, ago nda usu lazo lidriidriro Lu rote ugu copene ämäri. ³⁹ “Oko zutui amaro gatezo nda orone; ànya diyi nda te ago leyite gialo ogone ànyari kovole Ezipeto ya. ⁴⁰ Ago ànya atayite Arona ri ekye: ‘Nyede lu azaka ämäri ama lepene. Mä̀ni tase ka’dobe mano se Musa ono ri kote, se lofo ama teni Ezipeto yasi ono.’ ⁴¹ ’Dooko ànya edeyi ŋga awi te beti ’daŋgo ro ronye, loyi tori te rigye, ago yeyi karama te ŋgase ànya kedeyibe andivo ànyaro si oroza. ⁴² Ago Lu anarute pere ni ànya resi ago e’be ànya te ’bi’bii vo’buyakuru ro mätune, oso se egyi tana be buku nebii roya ronye ekye: ‘Lidri Yisaraele ro! Nyùtufu ago nyòtola koronyai ’ba ro ndroa na ’butesu vocowa ya ana kote märi. ⁴³ Mìŋgyite Mutuguṛi lu Moleka ro, ndi beti Refona lu ’bi’bi ro amiro robe ayani; ànya orivoya ŋga awi yi se nyèdete mätune. Ta’doro mazona ami ’da midiro le Babelona kundusi.’ ⁴⁴ “Zutui amaro a’dote Mutuguṛi a’do lototi Opi ro robe vocowa ya. Edete oso se Lu kiti tana be Musa ri edene ronye, oso se betina aka’dabe Musa ri ronye. ⁴⁵ Ono vosi, zutui amaro se ruyi Mutuguṛi teni täpii ànyaro rigyesi ŋgyiyi te tro ànya be ondro ànya kayite oyi Yosua be wari se Lu konja tu’dei be ni mile ànyaro ya si ana rigyesi. Ago rite lau madale tu Dawidi rosi. ⁴⁶ Ta ndaro si Lu te ago eji Lu te ndäri nda o’bane vo oriro ozone Lu Yakoba ro ri. ⁴⁷ Oko Solomo ni se be zo te ndäri owo. ⁴⁸ “Oko Lu Fopara Ndra ri ko zo se abebe lidri si ya; oso nebi katabe ronye ekye: ⁴⁹ ‘Opi ekye vo’buyakuru ni giti maro, ago ’bädri orivoya kotopa pa maro otoro. Beti zo eŋwani ro mile omone märi ya? Vo oriza märi eŋwaro ya? ⁵⁰ Inye’do andivo maro ma’ba ŋgase cini kwoi ṛo ko niya?’ ” ⁵¹ Setepano ugu atate ekye: “Ami orivoya taeriako! Ya amiro luako’ba ronye, ami orivoya biako ata Lu ro erine! Ami kpa oso zutui amiro ronye; nyà kpa ondoalo gboto Tori Alokado be! ⁵² Nebi aza gi be se zutui amiro ezayi ko ya? Ànya fuyi lazo’bai Lu rote, se ayoyi ikyi Ruindu’ba taŋgye ndaro rote ṛo kyeno. Ago yauono nyòzo drí ndaro te ago äfu nda te. ⁵³ Ami ni se nyùsu ota Lu rote, se ṛo malaika ozote ami rigye, caoko miro kote.” ⁵⁴ Ondro gboko Taäyi’bai ro keriyi ta Setepano rote oko, ànya a’doyite kyilaro ago siyi si ànyaro te nda lomvo kyila si. ⁵⁵ Oko Setepano, twi Tori Alokado be ndrevote vo’buyakuru ya ago ndre ’desi Lu rote ago Yesu edrevoya drígwo Lu roya. ⁵⁶ Nda atate ekye: “Mìndre! Mandre vo’buyakuru äpite ago Ŋgwa Lidri ro edrevoya drígwo Lu roya!” ⁵⁷ Otre amba si Taäyi’bai tisiyi bi ànyaro te drí si. Ago ànya cini lasote äru nda dri, ⁵⁸ lofoyi nda te tesi ’bakici kundu, ago voyi nda te kuni si. Tazevoedre’bai e’beyi boŋgoi ànyaro te mano agoanji ro se äzibe Saulo ana ri vona ondrene. ⁵⁹ Ànya kayi ugu Setepano ovo kuni si oko, nda zi Opi te ṛeṛe ekye: “Opi Yesu, miru adri maro!” ⁶⁰ Nda sokayate vuru ago trete ṛe otre amba si ekye: “Opi! Mi’ba takozi ono ko ànya dri!” Nda kata ta ono te oko ndi drate.

¹ Ago Saulo le ufu ndaro tana ni. Tu gi ana si känisa Yerusalema ya eto rueza te rueza koziro siomba si si. Taoma’bai cini pererute warii Yuda ro ndi Samaria be ro yasi, e’be toto lazo’bai ayani. ² Lidri ’diri Lu ro seyi Setepano te, uguyi liyite nda ta liyi amba si. ³ Oko Saulo ojote känisa perene; ugu ocibe zo yasi zo yasi, nda oro taoma’bai te tesi, mànoago ndi ’ditoko be, ago vo ànya te kamba ya. ⁴ Taoma’bai se kepererube ana oyite vo cini yasi; ugu lazo ope be. ⁵ Filipo oyite ’bakici ’desi ya Samaria ya ago pe ta Mesiya rote lidri lau ana ri. ⁶ Lowa ga bi te tase Filipo katabe erine, ago ànya eriyi ta ndaro te ago ndreyi talaro ro se nda koyebe te. ⁷ Tori undiro efote tesi ni lidri amba yasi otre amba be, ago lidri ciṛiciṛiro amba ndi lidri ka’bo robe edete. ⁸ Ago riyä amba a’dote ’bakici se ana ya. ⁹ Mano aza äzite Simona rite lau, se kyeno ’ba Samaria’bai te larone taläkä ndaro si. Nda atate ekye yi ni ’dise para yi, ¹⁰ ago ’dise cini ’bakici ya, ni gboko cini yasi, ga bi tawi ta ndaro ya. Ànya atayite ekye: “Nda orivoya ni mbara Lu ro se äzibe Mbara Fopara ono owo.” ¹¹ Ànya gayi bi te ta ndaro erine tana ṛo tu kyeno si nda ’ba ànya te larone taläkä ndaro ro si. ¹² Oko ondro ànya komate lazo Filipo ro ta lazokado Miri ’Bädri’ba Lu ro roya ndi ta Yesu Kristo robe oko, abapatisi ànya te, mànoago ndi ’ditoko be. ¹³ Simona andivo na ma ta kpate; ago nda bapatisi vosi oko, rite lototi Filipo re ago a’dote larolaro ro ondro nda kondre talaro ro ’desi ndi rubä be se ayebe ana te owo. ¹⁴ Lazo’bai Yerusalema ya keri tate ekye lidri Samaria ro ruyi ata Lu rote oko, ànya zoyi Petero ndi Yoane be te ànyare. ¹⁵ Ondro ànya kesayite oko, ànya mätuyite taoma’bai ta tana ànya ka’do robe Tori Alokado be. ¹⁶ Tana drigba Tori Alokado ikyi dri ko alo aza ànyaro dri; abapatisi ànya toto ävuru Opi Yesu roya ayani. ¹⁷ ’Dooko Petero ndi Yoane be ’bayi drí ànyaro te ànya dri, ago ànya a’doyite Tori Alokado be. ¹⁸ Simona ndrete ozo Tori te taoma’bai ri drio’ba lazo’bai ro ànya dri si. ’Dooko nda ozo parata te Petero ri ndi Yoane be, ¹⁹ ago atate ekye: “Nyozo mbara ono kpa märi, tana ’diaza se mabe drí maro o’ba driigye ka’do robe Tori Alokado be.” ²⁰ Oko Petero zatadrite ekye: “Parata miro kodra ndi mibe, tana nyusu tate ŋgapäṛi Lu ro ogyene parata si! ²¹ Mi orivoya vo ako ago ŋga aza ako losi amaro ono ya, tana ya miro ko ŋgye Lu mile. ²² Ka’do inye, nyetadri, ni tavoora undiro miro ono yasi, ago nyämätu Opi tana ke’be mi robe tavousu oso nonye ono ta. ²³ Tana mandrebe yaoso mawi ro orivoya twi mi ya ago mi orivoya kamba’ba takozi ro.” ²⁴ Simona atate Petero ndi Yoane be ri ekye: “Gi rägu nyä̀mätu Opi ta maro ta, tana alo aza ŋgase nyàta tana be kwoi ro a’do ’da märi.” ²⁵ Tavoedre ànyaro ndi lazo Opi ro opena be vosi oko, Petero ndi Yoane be gote Yerusalema ya, ogo ànyaro ya ànya uguyi Lazokado ope te ’baŋwà amba Samaria ro yasi. ²⁶ Malaika Opi ro atate Filipo ri ekye: “Miŋga ago nyoyi liti ŋgäṛiŋwa drisi se kabe oyi ni Yerusalema ya le Gaza ya yasi.” (Liti gi ono yauono aba kote kigyesi). ²⁷ Ago Filipo ŋgate ndi oyite. Ago Etiopia’ba se orivoya dri’ba para yi lakazà ’bädri’ba toko ro Etiopia ro ro dri ana orivoya lau. Nda ikyite Yerusalema ya Lu mätune, ²⁸ ago kugu ogo kovole ’bäru. Ago nda rite arabia ndaro ya ago kugu buku Yesaya nebi ro uzina. ²⁹ Tori Alokado atate Filipo ri ekye: “Nyoyi arabia ana re ago miri loto lomvoigye.” ³⁰ Filipo mute lau eri nda kugu tauzi ni buku nebi Yesaya ro yasi. Nda eji nda te ekye: “Mini tase nyabe uzina ono tana ndiya?” ³¹ Dri’ba zatadrite ekye: “Mänina tana eŋwanye e’be gialo ’diaza edrena tavona ni mari ya?” Ago nda eji Filipo te itune orine nda be arabia ya. ³² Vose taegyi ya nda ka ugu uzina be ni ono ekye: “Nda labate oso timele se uguna be ufune ronye, laba oso timelegogo se liyi ako abe kyirina olona ronye. Nda ata ta ko. ³³ Omo’do nda te ago aye vure ndaro kote ŋgye. ’Diaza i’do ta zelevoi ndaro ro tana itine, tana ori ndaro ’bädri ya esate äduna ya.” ³⁴ Dri’ba ana eji Filipo te ekye: “Nyiti tana märi, nebi kugu ta a’di ro atana ya? Ta andivo ndaro ro kode ta ’diaza roya?” ³⁵ ’Dooko Filipo eto ta atate; etote ni vo taegyi ono ro yasi, nda iti Lazokado ta Yesu ro rote ndäri. ³⁶ Ago ànya kayite ugu aba liti yasi oko, ànya esayite vose gyi be ya, ago dri’ba atate ekye: “Gyi orivoya nono, e’di lagana ma ni a’dovoya bapatisi be ya?” ³⁸ Dri’ba ’ba arabia edrete, ago Filipo ndi riti dri’ba be ciyite gyi ya, ago Filipo bapatisi nda te. ³⁹ Ondro ànya kefoyite ni gyi yasi oko Tori Opi ro ru Filipo te. Dri’ba ndre nda kote tona, oko oyite liti ndaro ya, riyä amba si. ⁴⁰ Filipo usu andivo ndaro te Asedoda ya; nda ugu oyite Kaisaria ya, ago liti ya nda ugu Lazokado ope te ’ba’desi cini yasi.

¹ Tu gi ono si Saulo ugu kyila ndaro ozi ’diufu ro onyana te oso’bai Opi vo lomvo. Nda oyite Kohani Fopara re, ² ago ejitate taegyi ’dika’daro ta zoitaeriro Damaseka ya ri, tana ondro nda kusu oso’bai Liti Opi ro vo te oko, nda ka’do robe mbara be ànya urune, mànoago ndi ’ditoko be, ago kezi ànya robe kovole Yerusalema ya. ³ Ondro Saulo kate esa loto ’bakici Damaseka ro lomvo oko dori ŋgaeyi ni vokuru yasi lekote gbikyi nda lomvosi. ⁴ Nda ’dete gyinidri ago eri atate kugu ata nda ri ekye: “Saulo, Saulo! Nya ma eza etaya?” ⁵ Nda ejitate ekye: “Mi a’di owo ya, Opi?” Nda atate ekye: “Ma Yesu, se nyabe ezana ono owo. ⁶ Oko miŋga kuru ago nyoyi ’bakici ya, ago itina tase beṛo oyene miri ’da lau.” ⁷ Lidri se kayi ugu aba Saulo be edreyite, atayi ta kote; ànya eriyi ata te oko niyi kote ’dina ’do ondrene. ⁸ Saulo ŋgate kuru ni gyini drisi ago pi mi ndaro te, oko ni kote ŋga ondrene. Ago ànya ruyi nda te drí si ago lepeyi nda te Damaseka ya. ⁹ Nda rite u’duna nätu voondreako, ago tu gi ana si nda nya ago mvu ŋga aza kote. ¹⁰ Oso’ba aza Yesu vo orivoya Damaseka ya äzite Anania. Nda ndre rulofo te, se Opi atate ndäri ekye: “Anania!” Nda zatadrite ekye: “Ma begi ono, Opi.” ¹¹ Opi atate ndäri ekye: “Miŋga ago nyoyi liti se äzi ävuruna Ŋgyero ana drisi, ago zo Yuda ro ya nyeji ta mano aza ni Taresusi yasi äzite Saulo rota. Nda kugu mätu, ¹² ago rulofo ya nda ndre mano aza äzite Anania ka eci ago ’ba drí ndaro te nda dri tana nda kogo kondrevo robe.” ¹³ Anania zatadrite ekye: “Opi, lidri amba ititate märi ta mano ono rota ndi ŋgase cini koziro nda koyebe lidri miro ri Yerusalema ya robe. ¹⁴ Ago nda ikyite Damaseka ya drikaca be ni kohanii ’desi resi ’dise cini kabe mi mätu urune.” ¹⁵ Opi atate ndäri ekye: “Nyoyi, tana manji nda te ruindune märi, ävuru maro o’bane unine atrai ndi ’bädri’bai ndi lidri Yisaraele robe ri. ¹⁶ Ago andivo maro maka’dana ta ’da ndäri anjioko beṛo ndäri ruezane ta maro ta.” ¹⁷ Ago Anania oyite, cite zo se Saulo be kigye ana ya, ago ’ba drí ndaro te nda dri, nda atate ekye: “Ädrupi Saulo, Opi Yesu andivona, se ka’darube miri liti dri ikyivoya noŋwa ono ezo ma ni. Nda ezo ma te tana migo mindrevo robe ago nya’do robe twi Tori Alokado be.” ¹⁸ Dori ŋga aza laba oso kyiri kä’bägä ti’bi ro ronye e’dete ni mi Saulo ro yasi, ago nda go ndrevote. Nda ŋgate kuru ago abapatisi nda te; ¹⁹ ago ŋgaonya onya ndaro vosi oko, mbara ndaro go egote. Saulo rite u’duna fere Taoma’bai Damaseka ya be. ²⁰ Nda oyite dori zoitaeriro ya ago eto taope te ekye Yesu orivoya Ŋgwa Lu ro. ²¹ ’Dise cini keriyi ta ndaro be laroyite ago ejiyitate ekye: “Inye’do nda ṛo ko ni se Yerusalema ya kabe ànya se kabe mano se Yesu ono mätuna ugu tufuna owo ya? Ago nda ikyi ṛo ko noŋwa ta ono ro ugu lidri se kai urune kamba’bai ro ago ànya logone kohanii ’desi re ya?” ²² Oko taope Saulo ro a’dote mbara be ndra, ago nda ka’date ekye Yesu orivoya Mesiya owo ago ’ba Yudai se koribe Damaseka ya te orine titiro ago niyi kote tadri ndaro ozane. ²³ U’du amba lävuna vosi oko, Yudai otoyikalate voaloya, ago rayitate Saulo ufune, ²⁴ oko tavoora ànyaro iti tana te ndäri. Kitu ndi ŋgäkyi be si ànya kwayi dereŋwà ’bakici rote tana äfu nda robe. ²⁵ Oko ŋgäkyi alo aza si oso’bai Saulo vo ruyi nda te ago e’bayi nda te vuru koṛiga si vouŋbo tiṛi ro yasi. ²⁶ Saulo oyite Yerusalema ya ago ojote rudro’bene taeri’bai be. Oko ànya leko taomane ekye nda orivoya taeri’ba yi ago ànya cini te orivoya turituri ro ni ndäri. ²⁷ ’Dooko Baranaba ikyite nda opane ago ugu nda te lazo’bai re, nda edre tase Saulo ndre Opi te liti dri ago Opi atate ndäri ana tana te ànyari. Nda iti tase Saulo petate turiako si Damaseka ya ävuru Yesu ro ya ana tana kpate ànyari. ²⁸ Ago ’dooko Saulo rite ànya be ago oyite gbikyi Yerusalema yasi, ugu taope te turiako ävuru Opi roya. ²⁹ Nda atate ago diṛikalate Yudai se kabe ugu Giriki ata ana be, oko ànya ojoyite nda ufune. ³⁰ Ondro taoma’bai kusuyi tase ono tana te oko, ànya uguyi Saulo te Kaisaria ya ago zoyi nda te le Taresusi ya. ³¹ Ago ’dooko Känisa Yuda ya, Galilaya ya, ndi Samaria ya be a’dote liatokpe. Ŋgaopa Tori Alokado rosi otombate ago otina litite amba, ago rite taoro si Opi ri. ³² Petero abate vo cini yasi, ago tu alo aza si nda oyite lidri Lu ro se rite Luda ya täkyine. ³³ Ago lau nda ta mano aza äzite Aenea, se orivoya ciṛiciṛiro ago a’dote mbaraako oŋgane ni kitapara drisi ndroa na te njidriena. ³⁴ Petero atate ndäri ekye: “Aenea, Yesu Kristo ka mi ede. Miŋga kuru nyede kitapara miro.” Dori Aenea ŋgate kuru. ³⁵ Lidri cini se kabe ugu ori Luda ya ndi Saroma ya be ndreyi nda te, ago ànya etayidrite Opi re. ³⁶ Yopa ya lau toko aza äzite Tabita, se orivoya taoma’ba yi. (Ävuru anyaro Giriki si ni Doroka, takacina anjioko kaliŋga.) Anya ozo tu cini anyaro te ugu takado oyevoya ndi ugu ati’ba opa be. ³⁷ Tu gi ana si anya a’dote adravo ro ndi drate. Alasa avo anyaro te ago alalate zo kurusi ya. ³⁸ Yopa ko lozo ni Luda lomvosi, ondro taoma’bai se Yopa ya keriyite ekye Petero orivoya Luda ya oko, ànya zoyi lidri ritu te nda re lazo be ekye: “Rägu nyikyi ndrindri amare.” ³⁹ Ago Petero ŋgate ago oyite ànya yibe. Ondro nda kesate oko, ugu nda te zo kurusi ya, ävuzii cini otokalate nda lomvo lau, kayi ugu liyi ago ka’dayi boŋgoi osoro ndi dhudhui se Doroka ko’dibe ’dooko anya dri lidriidriro ana te ndäri. ⁴⁰ Petero lofo ànya cini te tesi ni zo yasi, ago sokayate vuru ndi mätute; ’dooko nda zarute avo re ago atate ekye: “Tabita, miŋga kuru!” Anya pi mi anyaro te, ago ondro kondre Petero te oko, anya rite kurusi. ⁴¹ Petero ru drí anyaro te ago pa anya te oŋgane kuru. ’Dooko nda zi taoma’bai cini te, tro ävuzii be, ago ozo anya te lidriidriro ànyari. ⁴² Lazo ta ono ro larirute Yopa cini yasi, ago lidri amba matate Opi ya. ⁴³ Petero rite Yopa ya u’duna amba kyiniede’ba se äzibe Simona ana be.

¹ Mano aza orivoya Kaisaria ya äzite Korenelio, se orivoya dri’ba kyila’ba Roma’ba ro ro. Kyila’ba se äzite ekye: “Kyila’ba Italia’ba ro.” ² Nda orivoya mano mätu’ba yi; nda ndi katidri cini ndaro be mätuyi Lu te. Nda ye ŋgaopa kpate amba lidri Yudai ro lemeri’ba ro ri ago ugu Lu mätute ’duro. ³ Tu alo aza si te orivoya oso saa njidriesu ronye kitudiri vosi oko, nda ndre rulofo te. Nda ndre malaika Lu rote ṛo ŋbelero keci zo ya ago atate ndäri ekye: “Korenelio!” ⁴ Nda ndrevote malaika dri turi si ago atate ekye: “’Desi, e’di ya?” Malaika zatadrite ekye: “Lu orivoya yai’dwesi ta mätu miro rota ndi ŋgapäṛi se nyabe ozona lemeri’ba ribe, ago te nja tadri miro ozane. ⁵ Ago yauono mizo lidri azaka Yopa ya mano aza vo se äzi ävuruna te Simona Petero. ⁶ Nda orivoya ŋgwazi yi ’ba kyiniede’ba se äzite Simona roya, se ka ori gyi’desi kala.” ⁷ ’Dooko malaika oyite, ago Korenelio zi ruindu’bai ritu zo ndaro rote ndi kyila’ba alo aza be, se orivoya mano mätu’ba yi se kabe losi oye ndäri ana. ⁸ Nda iti tase ka’dobe ana te ànyari ago zo ànya te Yopa ya. ⁹ Kyenoŋbo kinjo si, ànya te liti ya ago kayite esa loto Yopa lomvo oko, Petero tute kuru zo drî kurusi ya mätune te oso kitudiri ronye. ¹⁰ Nda te täbiri ro ago lete ŋga aza onyane; ondro a dri ŋgaonya la’di oko, rulofo a’dote ndäri. ¹¹ Nda ndre vo’buyakuru pirute ago ŋga aza keziikyi vuru andrebe laba oso boŋgo ’desi cuku su be ronye e’bate vuru gyinidri. ¹² Koronyai cini beti toto robe orivoya kigye, ŋga lidriidriro ndi arii be. ¹³ Ago atate ndäri ekye: “Petero, miŋga, mifu ago minya!” ¹⁴ Oko Petero atate ekye: “Endaro ko inye, Opi! Manya ŋgase ko wäṛiro kode undiro ko alona la’bi voro.” ¹⁵ Atate ndäri kpa to’di ekye: “Ŋgase aza Lu kata tana te wäṛiro mindre ko mikye ko wäṛiro.” ¹⁶ Ta ono a’dote perena nätu, ago ’dooko ago äru ŋgase ana te vo’buyakuru ya. ¹⁷ Petero dri wiriwiriro takaci rulofo ono ro tana ro oko, lidri se Korenelio kezobe ana niyi zo Simona rote, ago ànya dri edrevoya dereŋwa kala. ¹⁸ Ànya ziyi läzi te ago ejiyitate ekye: “Inye’do ŋgwazi aza gibe noŋwa se ävuruna Simona Petero ya?” ¹⁹ Petero kadri ugu ruutri takaci rulofo ono ro unine oko, Tori atate ekye: “Simona! Lidri nätu orivoya noŋwa kayi ugu mi uṛi. ²⁰ Ka’do inye miŋga ago mitwe vuru, ago nyeleye ko oyivoya ànya yibe, tana mezo ànya ni.” ²¹ Ago Petero twete vuru ago atate lidri kai ri ekye: “Ma ni mano se nyàbe ugu uṛina owo. Nyikyite etaya?” ²² Ànya zayitadrite ekye: “Korenelio dri’ba kyila’ba ro ezo ama ni. Nda orivoya mano kado yi se ka Lu mätu ago lidri cini Yudai ro royi nda tawi. Malaika Lu ro ititate ndäri mi ejine ikyine zo ndaro ya, tana nda keri tase nyabe atana robe.” ²³ Petero eji lidri kai te ecine zo ya, ago ’ba ànya te u’dune lau ŋgäkyi ana si. Kyenonosi oko nda ŋgate ago oyite ànya yibe; ago rukä taoma’bai ro ni Yopa yasi oyiyite tro nda be. ²⁴ Tu kinjo si oko nda esate Kaisaria ya, Korenelio rite ugu nda kotene, troalo ’didiri be ndi bereazii se loto nda kejibe iyi yibe. ²⁵ Ago Petero kate ezi eci oko, Korenelio utudri ndaro te, ’dete nda pa, ago ändite vuru nda kandra. ²⁶ Oko Petero ’ba nda te oŋgane kuru. Nda atate ekye: “Miŋga kuru, ma andivo toto lidri yi.” ²⁷ Petero ugu atate Korenelio be ago nda kocite zo ya oko, nda usu lidri amba otokalate lau. ²⁸ Nda atate ànyari ekye: “Ami andivo mini ṛote kado ota mätu ro Yudai ro le ko mano aza Yuda ro ri ikyine kode rudro’bene atrai be. Oko Lu ka’da tate märi ekye beṛo ko märi lidri aza uzine ko wäṛiro kode undiro. ²⁹ Ago ondro nyezo lazo te mavo oko, mikyite kalaogaako. Ka’do inye ma mi eji, mizo lazo te ma vo etaya?” ³⁰ Korenelio atate ekye: “Te orivoya oso saa ono ronye u’duna lävute su ’dooko ma mätuvoya zo maro ya saa njidriesu si kitudiri vosi. Ndriŋwa oko mano aza so boŋgo läguläguro edrete mamile, ³¹ ago atate ekye: ‘Korenelio! Lu eri mätu miro te ago nda ndre ŋgapäṛi se nyabe ozona lemeri’bai rite. ³² Mizo ’diaza Yopa ya mano aza se äzite Simona Petero vo. Nda orivoya ŋgwazi yi ’ba Simona kyiniede’ba roya, se ka ori gyi’desi kala.’ ³³ Ago ta’doro mazo lazo te mi vo dori, ago miyete kado para tana nyikyite. Yauono ama cini orivoya noŋwa Lu kandra, tase Opi kemba mi be atane ’do erine.” ³⁴ Petero eto atate ekye: “Yauono mänite anjioko ṛo orivoya endaro Lu gyele ’diaza ko. ³⁵ ’Dise kabe nda mätu ago ka tase ŋgye oyena nda letadrina ndi, nda ka’do ca tu’de to aza yi ta aza i’do. ³⁶ Mini lazo se Lu kezobe lidri Yisaraele ro ri tana te, ugu Lazokado taliatokpe ro opena Yesu Kristo si, nda orivoya Opi ’dicini ro. ³⁷ Mini tase ’desi ka’dobe wari Yisaraele ro yasi tana te, eto ṛoni Galilaya ya tuse Yoane pe lazo bapatisi robe vosi. ³⁸ Mini ta Yesu Nazareta ro ṛote ndi tase Lu eda Tori Alokado te nda dri ndi mbara be. Nda oyite vocini yasi, ugu takado oyebe ago ugu ’dise cini mbara Kicu’ba ro zele edete, tana Lu orivoya tro nda be. ³⁹ Ama orivoya tazevoedre’bai ŋgase cini nda koyebe wari Yisaraele roya ndi Yerusalema ya be ro. ’Dooko ànya fuyi nda te nda oto si taka dri. ⁴⁰ Oko Lu eŋga nda teni avo yasi u’du nina si ago ’ba nda te ruka’dane, ⁴¹ ko ’dicini ri, oko toto tazevoedre’bai se Lu njibe iyi ri, anjioko orivoya ämäri, se nya ŋga te ago mvu ŋga te nda be efo ndaro ni avo yasi vosi. ⁴² Ago nda ta ama te lazokado opene lidri ri ago tazevoedrene anjioko nda orivoya ni ’dise Lu ka’date vureope’ba ro ’dise lidriidri ro ndi se kodrabe ana be. ⁴³ Nebii cini itiyi ta ndaro te, uguyi atate ekye ’dicini se kabe taoma nda ya e’bena ’da ta takozi ndaro rota mbara ävuru ndaro rosi.” ⁴⁴ Ondro Petero dri ugu atavoya oko, Tori Alokado ikyite vuru ànya se cini kayibe lazo ndaro erina ana dri. ⁴⁵ Taoma’bai Yudai ro se kikyiyibe ni Yopa yasi Petero be kai laroyite tana Lu eda ŋgapäṛi ndaro Tori Alokado ro kpate Atrai dri. ⁴⁶ Tana ànya eriyi te ànya kayi ugu ata kala to si ago ànya kayi ugu ’desi Lu ro räṛuna. Petero atate ṛeṛe ekye: ⁴⁷ “Lidri kwoi usuyi Tori Alokado kpate oso ma’dobe sina ronye. Ka’do inye ’diaza unina gi’da ànya lagane bapatisi ako gyi si ya?” ⁴⁸ Ago nda ta ànya te a’done bapatisi be ävuru Yesu Kristo roya. ’Dooko ànya ejiyi nda te orine ànya yibe u’duna fere.

¹ Lazo’bai ndi taoma’bai azaka Yuda yasi be eriyi tate ekye Atrai ruyi ata Lu ro kpate. ² Ondro Petero koyite Yerusalema ya oko, ànya se koleyibe Atrai olone ŋbiṛiro koziyi nda te, atayite ekye: ³ “Nya’dote ŋgwazi ro ’ba Atrai se oloako ŋbiṛiro roya, ago minya ŋga kpate ànya yibe!” ⁴ Ago Petero iti ta tase ka’dobe rote kpeye ànyari ṛoni etovona ya. ⁵ “Ondro ma dri mätu ’bakici Yopa roya oko, rulofo a’dote märi, mandre ŋga aza te ikyivoya vuru se mandrebe betina laba oso boŋgo ’desi cuku su be ugu e’bana vuru ni vo’buyakuru yasi, ago edrete mare. ⁶ Mandre yana te liyaro ago mandre koronyai ’ba rote ndi koronyai vocowa robe, ŋga tegategaŋwà ndi arii vocowa robe. ⁷ ’Dooko meri atate märi ekye: ‘Petero, miŋga, mifu ago minya!’ ⁸ Oko matate makye: ‘Endaro ko inye Opi, ŋgaonya se ko wäṛiro ago undiro ci ko kala maro ya la’bivoro.’ ⁹ Atate kpa to’di ni vo’buyakuru yasi ekye: ‘Mizi ŋgase Lu kedebe wäṛiro ono ko undiro.’ ¹⁰ Ta ono a’dote perena nätu, ago äduro oko ago äru ŋgase ana te kpeye vo’buyakuru ya. ¹¹ Saa gi ana si dori lidri nätu se ezote mare ni Kaisaria yasi ana esayite zo se maribe kigye ana ya. ¹² Tori ititate märi oyine ànya yibe teinye leyeako. Taoma’bai azi gi njidrialo ni Yopa yasi kwoi oyiyite mabe Kaisaria ya, ago ama cini macite zo Korenelio roya. ¹³ Nda iti tase nda ndre malaika edrebe zo ndaro ya ana tana te ämäri, se atate ndäri ekye: ‘Mizo ’diaza Yopa ya mano se äzibe Simona Petero ana re. ¹⁴ Nda ezina lazo ’da miri se o’bana mi ndi katidri miro be ’da a’done ŋgaopa be.’ ¹⁵ Ago ondro meto taope te oko, Tori Alokado ikyite vuru ànya dri kpa oso se ämädri etovoya ronye. ¹⁶ ’Dooko tase Opi katabe ana egate mädri se ekye: ‘Yoane bapatisi ’di te gyi si, oko abapatisi na ami ’da Tori Alokado si.’ ¹⁷ Ṛo orivoya endaro anjioko, Lu ozo ŋgapäṛi se ozobe ämäri tuse mamabe Opi Yesu ya ana si ana kpate Atrai se kai ri, ma a’di owo, Lu lagane!” ¹⁸ Ondro ànya keriyi tase ono te oko, ànya e’beyi ta ànyaro ’dikozi rote ago räṛuyi Lu te ekye: “Ka’do inye, Lu ozo kandrakado kpate Atrai ri drietaza ago oriza.” ¹⁹ Rukä taoma’bai ro se kepererube taezaro se äfu Setepano be risi ana oyiyite le Foenesia, Saiporosi ndi Anetiokia be ya, uguyi lazo itite toto Yudai ri ayani. ²⁰ Oko azaka taoma’bai ro ni Saiporosi ndi Kurene be yasi, oyiyite Anetiokia ya itiyi tate kpa Atrai ri, uguyi Lazokado ta Opi Yesu rota tana itina te ànyari. ²¹ Mbara Opi ro orivoya ànya yibe, ago oti lidri ro amba matate ago etadrite Opi re. ²² Lazo ta ono ro sate Känisa Yerusalema ya ya, ago ànya zoyi Baranaba te Anetiokia ya. ²³ Ondro nda kesate ago kondre Lu äṛu lidri kai te oko, nda a’dote yai’dwesi ago atate ànya cini ri a’done ’diri ago endaro Opi ri ya cini ànyaro si. ²⁴ Baranaba orivoya mano kado yi, twi Tori Alokado be ago taoma be, ago ezi lidri amba te Opi ri. ²⁵ ’Dooko Baranaba oyite Taresusi ya Saulo uṛine. ²⁶ Ondro nda kusu nda te oko, ugu nda te Anetiokia ya, ago cu ndroa alo ànya ritu ono dro’beyi iyi te lidri Känisa robe ago embayi gboko amba te. Ago äzi taoma’bai te käti Kristo’bai Anetiokia ya. ²⁷ Tu gi ana nebii azaka oyiyite ni Yerusalema yasi le Anetiokia ya. ²⁸ Alo ànyaro, äzite Agabu, ŋgate kuru ago mbara Tori rosi äŋgutate ekye mä’bu ’desi koye o’dene ’bädri cini ya. (Ta ono a’dote inye tu Kelaudia ’bädri’ba rosi.) ²⁹ Taeri’bai ’bayitate anjioko aloalo ànyaro ri ŋgapäṛi ozone amba oso se nda nibe ronye taoma’bai azi se koribe Yuda ya ana opaza. ³⁰ ’Dooko, ànya yeyi tase ono te, ago zoyi parata te ’di’desii Känisa ro ri Baranaba ndi Saulo be si.

¹ Tu gi ana si ’Bädri’ba Eroda eto rukä gboko känisa ro ezate. ² Nda ru Yakoba ädrupi Yoane rote, ago fute bando si. ³ Ondro nda kondrete ta ono tana si Yudai te oko, nda ugu taoyete driyaro ago ru Petero te. (Tase ono a’dote tu Karama Ambata Loŋgaako rosi.) ⁴ Ondro Eroda kuru Petero te oko, nda ’ba anya te kamba ya, nda ozo nda te gboko vookwa’bai ro su rigye, gboko alo kyila’bai be su. Eroda ratate vure ndaro opene miamba ya Karama Lävu Odra ro ro vosi. ⁵ Ago a’ba Petero te kamba ya, oko lidri känisa ro ugu mätu oyete ya cini si Lu ri ta ndaro ta. ⁶ Käti ni ŋgäkyi se Eroda koyebe nda lofone ezine lidri re risi oko, Petero u’duvoya lakole vookwa’bai ritu roya, Embe nda te nyori ritu si, ago vookwa’bai kama ya orivoya lau dereŋwa kamba ro kala. ⁷ Ndriŋwa oko malaika Opi ro edrete lau, ago ŋgaeyi eyivote kamba ya. Malaika kanda Petero te kufudri yasi, teŋga nda te, ago atate ndäri ekye: “Miŋga ndrindri kuru!” Dori nyori letrote ni drí Petero ro yasi. ⁸ ’Dooko malaika atate ekye: “Nyembe kyinikundu ro miro ago miso mvoka miro.” Petero yete inye, ago malaika atate ekye: “Mivo boŋgo miro milomvo ago miso mavo.” ⁹ Petero sote nda vo ni kamba yasi, caoko niko, kode tase malaika koyebe ono gindi endaro; nda kusu iro be nda kugu rulofo ondre. ¹⁰ Ànya lävuyite vookwa’bai käti lomvosi ago ’dooko ṛiri na lomvosi, ago äduro oko ikyiyite dereŋwa logo ro lomvo se kabe oci ’bakici ya ana. Dereŋwa pirute ànyari ta iro ronye, ago ànya tweyite tesi. Ànya abayite litiŋwa drisi, ago ndriŋwa oko malaika e’be Petero te. ¹¹ ’Dooko Petero ni tase ka’dobe ndäri ana te, ago atate ekye: “Yauono mänite endaro anjioko orivoya taŋgye yi! Opi ezo malaika ndaro te ma opane ni mbara Eroda ro risi ago ni tase Yudai cini ko’bayi mibe a’done ono yasi.” ¹² Petero kuni a’do ndaro tana te oko, nda oyite ’ba Maria endre Yoane se äzibe Marako ro roya, vose lidri amba kotokalabe kigye mätu oyevoya ana ya. ¹³ Petero ’bi käläsi te tesi si, ago ruindu’ba ŋgutiŋwa ro äzite Roda ikyite tana erine. ¹⁴ Anya ni drî Petero rote ago a’dote yai’dwe amba si ago anya go mute kovole teinye käläsi upiako, ago ayotate ekye Petero orivoya tesi käläsi kala. ¹⁵ Ànya atayite anyari ekye: “Dri miro orivoya koziro!” Oko anya atate gi’du ekye orivoya endaro. Ago ànya zayitadrite ekye: “’Do orivoya malaika ndaro yi.” ¹⁶ Caoko Petero ugu gi ’du käläsi o’bi. Äduro oko ànya piyi käläsi te, ago ondro kondreyi nda te oko, ànya laroyite. ¹⁷ Nda kanda drí ndaro te ànyari a’done titiro, ago nda edretazevo tase Opi lofo nda be tesi ni kamba yasi ana rote ànyari. Nda atate ekye: “Nyìti tase ono tana Yakoba ri ndi rukä taoma’bai robe;” ’dooko nda e’be vo ana te ago oyite vo aza ya. ¹⁸ Ago kyenonosi oko, vookwa’bai a’doyite wiriwiriro tase ka’dobe Petero ri e’di ya? ¹⁹ Eroda ozotate nda uṛine, oko ànya niyi kote nda usune. Ago nda eji vookwa’bai te ago ozotate ànya ufune. Ono vosi, Eroda e’be Yuda te ago oyi rite Kaisaria ya tuna fere. ²⁰ Eroda a’dote kyilaro amba lidri Tura ro ndi Sidona robe, ago ànya oyiyite gboko ro nda ondrene. Käti ono ànya oyiyite Belaseta, dri’ba zo’desi miri ro ro leyene, tana nda kopa ànya robe. ’Dooko ànya oyiyite Eroda re ago ejiyi nda te ta taliatokpe rota, tana ’bädri ànyaro a ŋgaonya ozo rigye ni ’bädri ’bädri’ba ro yasi. ²¹ U’du se anjibe si Eroda so boŋgo runduṛuro ndaro ’bädri’ba rote, rite giti ’bädri’ba ro ndaro dri ago atate lidri ri. ²² Ànya treyite ekye: “Lidri ka koni ata, oko lu yi!” ²³ Dori malaika Opi ro ’bi Eroda te äŋbu vuru, tana nda ye taoro kote Lu ri. Kyiri nya nda te ago drate. ²⁴ ’Dooko ata Lu ro larirute ago mbate. ²⁵ Baranaba ndi Saulo be ndeyi aba ànyaro te ago goyite Yerusalema ya, ruyi Yoane se äzibe Marako ana te ànya yibe.

¹ Känisa Anetiokia roya nebii azaka ndi miemba’bai be orivoya: Baranaba, Simeona (se äzite Uni) Lukio (ni Kurene yasi), Manae (se mbate voaloya wari’ba Eroda be), ago Saulo. ² Ondro ànya kayi ugu ruindu Opi ri ndi ugu akpa be oko, Tori Alokado atate ànyari ekye: “Mìdi Baranaba ndi Saulo be märi, losi se mäzi ànya be kigye oyene.” ³ Ànya akpayite ago mätuyite, ’bayi dríi ànyaro te ànya dri; ago zoyi ànya te. ⁴ Tori Alokado kozo ànya te oko, Baranaba ndi Saulo be oyiyite Seleukia ya ago diyite ni lau le roŋga Saiporosi roya. ⁵ Ondro ànya kesayite Salami ya oko, ànya peyi ata Lu rote zoitaeriro ya. Yoane se äzibe Marako ana orivoya ànya yibe ŋgaopa oyevoya losi ya. ⁶ Ànya oyiyite roŋga drisi le Pafo ya ago ànya usuyi tetedri’ba aza te lau äzite Bara-Yesu, nda orivoya Yuda yi se atate ekye yi nebi yi. ⁷ Nda orivoya bereazi Seregio Paulo, wari’ba roŋga ana ro ro, se orivoya mano tauniekye yi. Wari’ba zi Baranaba ndi Saulo be te nda kandra tana nda le ata Lu ro erine. ⁸ Oko tetedri’ba Eleyema (Ävuru ndaro Giriki si ni wo), edreteŋbi ànya mile, nda ojote wari’ba anane ni taoma ya. ⁹ ’Dooko Saulo, se ävuruna kpa Paulo, ṛo twi Tori Alokado be, nda ndrevo ṛo ŋgye tetedri’ba dri ¹⁰ ago atate ekye: “Mi ŋgwa kicu’ba ro ono! Mi orivoya kyila’baazi ŋgase cini orivoya kadoro ro. Mi orivoya twi ta cini undiro ŋgaodoro robe, ago ondoalo nyugu ruutri taŋgye Opi ro tozane kowero! ¹¹ Drí Opi ro ikyina ’da midri yau; nya’dona ’da miako ago miri ŋgaeyi kitu ro ondrene i’do tuna fere.” Dori vouni lätutu ro e’dete äkpu Eleyema dri ago tako mi ndaro te; ago nda abate täṛitäṛi ruutribe ’diaza usune nda lepene drí si. ¹² Ondro wari’ba kondre tase ka’dobe ana te oko, nda matate; tana nda larote ndra ŋgaemba ta Opi rota ro. ¹³ Paulo ndi abaazii ndaro be diyi teni Pafo yasi ago sayite Perega, ’bakici Pamefulia roya, se ni kigyesi Yoane se äzibe Marako ana e’be ànya te ago gote kovole Yerusalema ya. ¹⁴ Ànya oyiyite ni Perega yasi ago esayite Anetiokia ya Pisidia ya, ago tu Sabata rosi ànya oyiyite zotaeriro ya ago riyite vuru. ¹⁵ Ondro äzi tate ni Ota Musa ro ndi taegyi nebii robe yasi oko, dri’bai zotaeriro ro ozoyi tate ànyari ekye: “Ädrupii, màle ämiri taopene lidri ri ondro nyà’dote lazo agoago ozoro be ànyari owo.” ¹⁶ Paulo edrete kuru, kanda drí ndaro te ago eto taope te ekye: “Yisaraele’bai azi ago Atrai se cini noŋwa kabe Lu mätu ono; nyèri ta maro! ¹⁷ Lu lidri Yisaraele ro ro nji zutui amaro ni ago ’ba lidri ono te tu’de ’desi ro tuse ànya koriyibe atrai ro Ezipeto ya ana si. Lu lofo ànya te tesi ni Ezipeto yasi mbara para ndaro si, ¹⁸ ago ndroa ’butesu nda iŋgyiyate ànya ta vocowa ya. ¹⁹ Nda tufu tu’dei njidrieri te wari Kanana roya ago ’ba lidri ndaro te a’done wari kuzupi’bai ro. ²⁰ Tase cini ono ru ndroa oso kama su ago ’butenji. “Ono vosi nda ozo vureope’bai te ànyari madale tu nebi Samuele rosi. ²¹ Ago ondro ànya kejiyi tate ’bädri’ba ta oko, Lu ozo Saulo ŋgwa Kisi ro ni ’bakala Benjamina ro yasi te ànyari, a’done ’bädri’ba ànyaro ndroa ’butesu. ²² Nda ona vosi, Lu ’ba Dawidi te ’bädri’ba ro ànyari. Ono ni tase Lu katabe ta ndaro ta owo ekye: ‘Musu Dawidi ŋgwa Yisai ro ni mano se mulube owo, mano se oyena tase cini male be oyene ndi.’ ²³ Yesu orivoya ni zelevo Dawidi ro yasi, se Lu ’bate Opa’ba lidri Yisaraele ro ro, oso nda ko’batabe ronye. ²⁴ Teinye Yesu ri losi ndaro eto ako, Yoane petate lidri cini Yisaraele ro ri ekye beṛo ànyari drietane ni takozi ànyaro yasi ago a’done bapatisi be. ²⁵ Ago Yoane ka oyete losi ndaro ondene oko, nda atate lidri ri ekye: ‘Nyusu amiro be ma a’di owo ya? Ma ko nda se nyàbe kotena owo. Oko nyeri! Nda se kabe ikyi mavo ono takado maro i’do amba mvoka otrine ni pa ndaro yasi.’ ²⁶ “Yisaraele’bai azi, zelevoi Abarayama ro, ndi Atrai cini se noŋwa kabe Lu mätu ono be; lazo se ŋgaopa ro ono ezote ämäri! ²⁷ Tana lidri se koribe Yerusalema ya ndi dri’bai ànyaro be niyi kote anjioko Yesu ni Opa’ba owo, ca niyi ata nebii ro se abe uzina Sabata cini si kpa ko. Caoko ’bayi ata nebii rote a’done ŋgye vure Yesu ro opesi. ²⁸ Ago ànya niyi ca ko ta aza usune nda o’baza odrane oko, ànya ejiyi Pilato te nda o’bane odrane. ²⁹ Ago tase cini taegyi katabe ta ndaro ta ànyari oyena vosi oko, ànya ruyi nda te vuru ni taka dri ago seyi nda te ’bu ya. ³⁰ Oko Lu lofo nda teni avo ya, ³¹ ago u’duna amba nda ka’darute ànya se kababe nda be ni Galilaya ya le Yerusalema ya kai ri. Yauono ànya ni tazevoedre’bai ndaro Lidri Yisaraele ro ri. ³² Ago noŋwa ono mèzi Lazokado yi ämiri; tao’baro se Lu ko’ba be zutui amaro ri ³³ yauono nda yete ämäri, ama se ni orivoya zelevoi ànyaro, Yesu eŋga si adri ya. Oso egyi ta be Räṛu ṛiri ya ronye ekye: ‘Mi te Ŋgwa maro; ondro ono ma te Täpi miro.’ ³⁴ Ago ono ni tase Lu katabe ta nda loforo ta ni avo yasi owo, nda oŋgwana ko alona ’budri ya: ‘Mozona äṛu alokado ago endaro ’da miri se, ma’ba tana be Dawidi ri ana.’ ³⁵ Oso nda ata kpate vo aza ya ronye ekye: ‘Milena ta ruindu’ba ŋgye miro ro ko oŋgwane ’budri ya.’ ³⁶ Tana Dawidi indurute ta Lu rota tu modo ndaro roya, ago ’dooko nda drate, ago ase nda te zutui ndaro be, ago avo ndaro ŋgwate ’budri ya. ³⁷ Oko ono a’do kote nda se Lu kolofobe ni avo yasi ri. ³⁸ Ami cini, Yisaraele’bai azi, ämiri ta ono unine ŋgye anjioko Yesu si lazo ta ’die’bero ta takozi rota apete ämiri. ³⁹ Ànya se cini kabe taoma nda ya a’bate dritai ro ni takozi cini risi se Ota Musa ro ni ko ami o’bane dritai ro ni rigye. ⁴⁰ Ka’do inye, nya’do taoti be, ukyi tase nebii katabe ana a’do ’da ämiri. ⁴¹ ‘Mindre, ami ’diugu’bai! Nya’do larolaro ro ago midra! Tana tase mabe oyena ondro ono orivoya ŋgase mìnina ko tana omane owo, ondro ’diaza kedretazevona gica ämiri!’ ” ⁴² Ago Paulo ndi Baranaba be kayi efo ni zotaeriro yasi oko, lidri eji ànya te egone Sabata kinjo si ago ŋgase kwoi itine ànyari ndra. ⁴³ Lidri ri kalakoto e’be vosi oko, Yudai amba ndi Atrai se amba kotozarube mätu Yudai roya ana be soyite Paulo ndi Baranaba be vo. Lazo’bai ozo agoago te ànyari ugu orine tai’dwero Lu roya. ⁴⁴ Sabata kinjo si lidri ’ba’desi ro aba le ṛo ikyine yele ata Opi ro erine. ⁴⁵ Ondro Yudai kondreyi lowa te oko, ànya a’dote twi yaoko be, ànya wasayi tase Paulo kugu atana be te ago ’dayi nda te. ⁴⁶ Oko Paulo ndi Baranaba be atayite ṛeṛe amba driupiako si ekye: “Kadopara anjioko beṛo ata Lu ro opene käti ämiri. Oko mìgabete zo ago nyùsu andivo amiro kote kadoro ta adri äduako rota ono, mè’bena ami gwo ago mòyina te Atrai re. ⁴⁷ Tana ono ni tase Opi kozobe ämäri owo ekye: ‘Ma’ba ami te ŋgaeyi ro Atrai ri, tana apa ’bädri cini robe.’ ” ⁴⁸ Ondro Atrai keri tase ono te oko ànya a’doyite yai’dwesi ago räṛuyi ata Opi rote, ago ànya se anjibe a’done adri äduako be kai a’doyite taoma’ba ro. ⁴⁹ Ata Lu ro larirute vo cini ya wari ana yasi. ⁵⁰ Oko Yudai eŋgaya lidri dri’bai ’bakici ro ndi ’ditoko ’desi gboko Atrai ro ro se kabe ugu Lu mätu rote. Ànya etoyi Paulo ndi Baranaba be ezana te ago lofoyi ànya te tesi ni wari ànyaro yasi. ⁵¹ Lazo’bai yo durufu pa ànyaro rote lämiro ànya lomvo ago oyiyite Ikoniuma ya. ⁵² Taeri’bai Anetiokia ya a’dote riyäro amba ago twi Tori Alokado be.

¹ Ŋga gialo ono a’dote Ikoniuma ya: Paulo ndi Baranaba be oyiyite zotaeriro ya ago peyi tate mbara ago oti Yudai ro amba ndi Atrai be a’dote taoma’bai ro. ² Oko Yudai se taomaako’bai ana eŋgayi ya Atrai rote ago ’bayi ànya te a’done kyilaro taoma’bai be. ³ Lazo’bai riyite lau tuna amba, uguyi taope te turiako si ta Opi rota, se ka’date anjioko lazo ànyaro ta tai’dwero ndaro rota orivoya endaro mbara ozo si ànyari talaro ro ndi rubä be oyene. ⁴ Lidri ’bakici ro lonyirute, rukäna iro Yudai be, azakana iro lazo’bai be. ⁵ ’Dooko rukä Atrai ro ago Yudai ndi tro dri’bai ànyaro be, äyiyitate lazo’bai oyene koziro ago ànya ovone kuni si. ⁶ Ondro lazo’bai kuniyi tana te oko, ànya muyite ’bakici Lisetra ro ndi Derebe be Lukonia ya ya ago warii se gbikyi ana yasi. ⁷ Ànya peyi Lazokado te lau. ⁸ Lisetra ya lau mano aza a’dote ka’bo ro ṛoni uti ndaro si a’dote mbaraako abane. ⁹ Nda rite lau ago eri ata Paulo rote. Paulo ndrete anjioko nda matate ago änina ndi nda edene, ago nda ndrevote ŋgye nda dri ¹⁰ ago atate ndäri ṛeṛe ekye: “Nyedre ŋgye pa miro dri!” Mano ana ŋgate kuru ago eto aba te. ¹¹ Ondro lowa kondre tase Paulo koyebe ana te oko, ànya etoyi otrete kala modo ànyaro Lukonia rosi ekye: “Lui ikyite vuru amare beti lidri ro ronye!” ¹² Ànya ozoyi ävuru te Baranaba ri Zeu, ago Paulo ri Heremesa, tana nda orivoya taope’ba ’desi yi. ¹³ Kohani lu Zeu ro, se yekalu na edrete tesi ’ba’desi kundusi, ezi ’daŋgoi ndi foi be te dereŋwa kala, tana nda ndi lowa be leyite tori olone lazo’bai ri. ¹⁴ Oko ondro lazo’bai, Baranaba ndi Paulo be keriyi tase ànya kayi oye oyene ono te oko, ànya towayi boŋgoi ànyaro te ago muyite lowa lako, ugu otrebe ekye: ¹⁵ “Nyà ugu tase ono oye etaya? Andivo amaro lidri yi kpa oso ami ronye! Mìkyi noŋwa Lazokado opene ämiri drietaza ni ŋgase takadoako kwoi yasi Lu lidriidriro re, se ’ba vo’buyakuru, ’bädri, gyi’desi ndi ŋgase cini kigye ono ni. ¹⁶ Tu kyeno ana si nda ba lidri cini te taoyene taoye modo ànyaro ro ronye. ¹⁷ Oko nda ondoalo edretazevo a’do ndaro rote ŋga kado se nda kabe oyena si, nda kani ’bu ozo ämiri ni vo’buyakuru yasi ago kani ŋga o’ba owane tu ŋgyena si; nda kani ŋgaonya ozo ämiri ago kani ya amiro o’ba a’done twi riyä si.” ¹⁸ Lazo’bai katayi ta kwoi gica nonye oko, usuyite rritiro lowa lagane ni tori olovoya ànyari. ¹⁹ Rukä Yudai ro se kikyibe ni Anetiokia Pisidia roya ago ni Ikoniuma yasi kai; ànya ’bayi lowa epirute ànya resi, voyi Paulo te kuni si ago eseyi nda te tesi ni ’ba’desi yasi, kusuyi iro be ekye nda drate. ²⁰ Oko ondro taoma’bai kotoyikalate nda lomvo oko, nda ŋgate kuru ago gote kovole ’ba’desi ya. Kyenonosi oko nda ndi Baranaba be oyiyite Derebe ya. ²¹ Paulo ndi Baranaba be peyi Lazokado te Derebe ya ago ’ba taeri’bai a’dote amba. ’Dooko ànya goyite kovole Lisetra ya, Ikoniuma ya, ago lävuyite Anetiokia Pisidia roya. ²² Ànya tombayi taoma’bai te ago ozoyi agoago te ànyari orine ŋgye taoma ya. Ànya embayi ŋga te ekye: “Beṛo ämäri oyine rriti amba yasi ociza Miri ’Bädri’ba Lu ro roya.” ²³ Ànya ka’dayi ’desii te känisa cini yasi, ago mätu amba oye si ndi akpa be ànya ozoyi ànya te Opi ri, se ànya koyiyi ta ànyaro be nda ya ono. ²⁴ Oyi wari Pisidia ro yasi vosi oko, ànya ikyiyite Pamefulia ya. ²⁵ Lau ànya peyi lazo te Perega ya ago lävuyite Atalia ya, ²⁶ ago ni nasi ànya diyite kovole Anetiokia ya, vose ozo ànya be ni kigyesi taoti tai’dwero Lu ro rosi ta losi se ànya kondeyibe yauono rota. ²⁷ Ondro ànya kesayite Anetiokia ya oko, ànya otoyikala lidri känisa ro rote voaloya ago itiyi tase cini Lu koyebe ànya si ago tase nda pi käläsi te Atrai ri taomaza ono be tana te ànyari. ²⁸ Ago ànya riyite mada lau taoma’bai be.

¹ Lidri azaka ikyite ni Yuda yasi le Anetiokia ya ago etoyi taoma’bai embate ekye: “Änina ko ami opane e’be gialo alona ami lutu ŋbiṛiro oso Ota Musa ro ronye.” ² Paulo ndi Baranaba be diṛikalate rritiro ànya be ta ono ta, ta ono ta Paulo ndi Baranaba be äyiyitate ndi lidri azaka ni Anetiokia yasi be beṛo oyine Yerusalema ya lazo’bai ndi ’desii be ondrene ta ono ta. ³ Känisa zo ànya te; ago ànya kayite lävu Foenesia ndi Samaria be yasi oko, ànya itiyi ta tase Atrai etadribe Lu re ono tana te, lazo se ono ezi riyä amba te taoma’bai ri. ⁴ Ondro ànya kesayite Yerusalema ya oko, Känisa, lazo’bai ndi ’di’desii be ru ànya te, ago ànya itiyi tase Lu koyebe ànya si ana tana te ànyari. ⁵ Oko rukä taoma’bai ro se ni gboko Parusii ro yasi kai ŋgayite kurusi ago atayite ekye: “Beṛo Atrai olone ŋbiṛiro ago beṛo ta itine ànyari Ota Musa ro orone.” ⁶ Lazo’bai ndi ’desii be otoyikalate taeji ono tavona usune. ⁷ Kalawasa amba vosi oko Petero ŋgate kuru ago atate ekye: “Ädrupii maro, mìnite tu kyeno ana si Lu nji ma teni ami lakosi Lazokado opene Atrai ri, tana ànya keriyi ago komayi ta robe. ⁸ Ago Lu, se kuni tavousu ’dicini robe ono, ka’da tadriole ndaro Atrai ri te Tori Alokado ozo si ànyari. Kpa oso nda yebe ämäri ronye. ⁹ Nda ’ba a’do toto kote lakole amaro ya ànya yibe; nda e’be ànya te takozii ànyaro ta tana ànya mayitate. ¹⁰ Tana e’di nyà ugu ta Lu ro ojo ŋgaläŋgyi se zutui amaro ca ama andivo mä̀ni kote uŋgyine ono o’bana taoma’bai dri niya? ¹¹ Ko inye! Màmate ago apa ama te tai’dwero Opi Yesu rosi, ànya kpa orivoya oso inye.” ¹² Gboko cini a’dote titiro ondro ànya keriyi Baranaba ndi Paulo be kitiyi talaro ro cini ndi rubä be se Lu koyebe ànya si Atrai lako ana tana te owo. ¹³ Ondro ànya kondeyi ata te oko, Yakoba atate ekye: “Nyèri ta maro, ädrupii maro! ¹⁴ Simona edre tase käti Lu ka’da taoti ndaro te Atrai ri ’di uru si ni ànya lako a’done lidri ndaro rote. ¹⁵ Ata nebii ro letadrite kpeye ta ono be. Oso taegyi katabe ronye ekye: ¹⁶ ‘Ono vosi megona ’da, Opi kani ata nonye, ago mologona miri ’bädri’ba Dawidi ro ’da. Mago mabena tandrona ’da ago mago ma’bana ’da to’di ṛatara ro. ¹⁷ Ago anjoko lidri cini ro ikyinayi ’da mare, Atrai cini se mäzite a’done modo maro ri. ¹⁸ Opi atani nonye, se ko’ba tase ono te unine kyeno ono.’ ” ¹⁹ Yakoba ugu atate ekye: “Tavousu maro ni no, beṛo ko ämäri Atrai se kabe ugu drieta Lu re okwone. ²⁰ Oko beṛo ämäri taegyine ànyari ugu ta iti si ànyari ko ŋgaonya se la’bi voro undiro tana alote lui awi ri ’do onyane; ànyari andivo ànyaro gagane ni ronyi oye risi; ago ko koronya ’ba ro se ädu gborona udu ’do onyane ca kari. ²¹ Tana Ota Musa ro äzite tuna amba zoitaeriro yasi Sabata cini si, ago ata ndaro apete ṛo ’ba’desi cini yasi.” ²² ’Dooko lazo’bai ndi ’di’desii, ndi troalo känisa cini be, äyiyitate lidri rukä onjine ni gboko ànyaro yasi ago ànya ozone Anetiokia ya Paulo ndi Baranaba be yibe. Ànya njiyi lidri ritu orooro ro ndra taoma’bai si te, Yuda se äzibe Baresaba, ndi Sila be, ²³ ànya zo taegyi ono te ànya yibe ekye: “Ama lazo’bai ndi ’di’desii ago ädrupii amiro, màzo mede ädrupii cini amaro Atrai ro uti yasi se kabe ori Anetiokia, Siria, ndi Silisia be ya ri. ²⁴ Meri tate rukä lidri ro se oyite ni gboko amaro yasi okwo ago wiriyi ami te ata se ànya kabe atana si; caoko, ànya usuyi ŋgaemba aza koni ama resi. ²⁵ Ago ta ono ta motokalate ago ama cini màletadrite lazo’bai rukä onjine ago mà ànya ozo amire. Ànya oyinayi ’da amire bereazii amaro luluro Baranaba ndi Paulo be be, ²⁶ se ozoyi adri ànyaro te ruindu Opi amaro Yesu Kristo roya. ²⁷ Màzo Yuda ndi Sila be, kpani amire, se itinayi ta ’da ämiri modo ànyaro si kpa oso megyibe ronye. ²⁸ Tori Alokado ndi ama yibe letadrite ko ŋgaläŋgyi aza o’bane ämidri kinja tase arabe kwoi ro ro: ²⁹ mìnya ŋgaonya se ozote lui awi ri ko, mìnya kari ko; mìnya koronya ’ba ro se ädu gborona udu ko; ago nyàgaga ami ni ronyi oye risi. Mìyena ta ’da kado ondro nyà’dote taoti be ŋga kwoi oyeako owo. Mede amaro amba ämiri.” ³⁰ Azo lazo’bai te ago oyiyite Anetiokia ya, se ànya otoyi gboko taoma’bai rote cini kigye ago ozoyi taegyi ana te ànyari. ³¹ Ondro lidri kuzite oko, ànya a’dote twi riyä ro ta lazo se agoago ozoro ono rota. ³² Yuda ndi Sila be se andivo ànyaro orivoya nebii, peyitate ànyari madaro, uguyi agoago ozote ànyari ago tombayi ànya te. ³³ U’du azaka vosi oko, taoma’bai zoyi ànya te tokpero, ago goyite kovole ànya se kezo ànya be kai re. ³⁵ Paulo ndi Baranaba be riyite gafere Anetiokia ya, ago tro ’di amba azaka be ànya embayi ago peyi ata Opi rote. ³⁶ Tu aza si oko Paulo atate Baranaba ri ekye: “Mi’de màgo ädrupii amaro täkyi ’ba’desii cini se màpe ata Opi rote kigye yasi, tana mäni a’do ànyaro robe.” ³⁷ Baranaba lete Yoane se äzibe Marako ana urune ànya yibe, ³⁸ oko Paulo kusube ko kado nda urune, tana nda ri kote ànya yibe le ädu aba taopero ànyaro roya, oko tadrite kovole ago e’be ànya te Pamefulia ya. ³⁹ Kaladiṛi a’dote, ago ànya lewerute: Baranaba ru Marako te ago diyite le Saiporosi ya, ⁴⁰ ago Paulo nji Sila te ago oyiyite, ago taoma’bai ozoyi ànya te taoti tai’dwero Opi ro ri. ⁴¹ Nda oyite Siria ndi Silisia be yasi, ugu känisa tomba be.

¹ Paulo abate Derebe ndi Lisetra be yasi, vose Kristo’ba se äzibe Timoteo ana rite kigye. Endre ndaro, kpa Kristo’ba yi, orivoya Yuda yi, oko täpi ndaro orivoya Giriki yi. ² Taoma’bai cini Lisetra ya ndi Ikoniuma ya be atayi ta Timoteo rote kado. ³ Paulo lete Timoteo urune oyine nda be, ago nda lo nda te ŋbiṛi ro. Nda yete inye tana Yudai se cini koribe vo kai yasi niyite anjioko täpi Timoteo ro orivoya Giriki yi. ⁴ Ondro ànya kayi ugu aba ’ba’desii yasi oko, ànya peyi tase lazo’bai ndi ’desii be korayibe Yerusalema ya ana te ànyari, ago ànya atayite ànyari ota se arabe kai orone. ⁵ Ago a’ba känisa cini te a’done mbara ro taoma ya ago otina ugu ombate ndra u’du cini ya. ⁶ Ànya abayite wari Ferugia ro ndi Galatia be ro yasi tana Tori Alokado leko ànyari lazo opene wari Asia roya. ⁷ Ondro ànya kesayite kishwe Musia roya oko, ànya ojoyite oyine wari Bitunia roya, oko Tori Yesu ro le ko ànyari oyine. ⁸ Ago ànya abayite siyivote Musia yasi ago oyiyite Troasa ya. ⁹ Ŋgäkyi gi ana si rulofo a’dote Paulo ri se kigye nda ndre Makedonia’ba aza te edrevoya ago ka ugu nda eji ekye: “Nyikyi Makedonia ya ama opane!” ¹⁰ Rulofo ono ka’dote Paulo ri dori nonye oko, màŋgate dori oyine Makedonia ya tana maratate anjioko Lu zi ama te oyine Lazokado opene lidri lau ana ri. ¹¹ Moyite toŋbo si ni Troasa yasi ago mä̀dite màsivote màzate Samoterake ya, ago u’du kinjo si le Neapolisa ya. ¹² Ni nasi moyite liti drisi le Filipoi ya, se ni ’bakici käti kägyi Makedonia ro ro; orivoya kpa Roma’ba zele; ago mu’dute amba lau. ¹³ Sabata si moyite tesi ni ’bakici yasi golo kala, se musu amaro be vo mätu ro a’dona ’da lau se Yudai kabe kalakoto kigye ta mätu rota. Màrite vuru ago mìtitate ’ditoko se otoyikalabe lau ana ri. ¹⁴ Alo aza se keri ta amaro be ni Ludia ni Tautira yasi, se ni logye’ba boŋgo lärimiro ro. Anya orivoya toko se kabe Lu mätu owo, ago Opi pi drî anyaro te bi ogane tase Paulo kabe atana erine. ¹⁵ Anya ndi lidri zo anyaro robe bapatisina vosi oko, anya eji ama te ekye: “Nyìkyi ago mìri zo maro ya ondro nyùsutate mìkye ma orivoya taoma endaro be Opi ya owo.” Ago anya leye ama te oyine. ¹⁶ U’du alo si ondro mate ugu oyi vo mätu roya oko, mà’bedrite ŋgutiŋwa aza iyeäṛi robe se orivoya tori undiro be se ozo mbara te anyari tase mileya äŋgune. Anya usu parata amba te kuzupii anyaro ri tase ka oyebe a’done ugu tana iti si. ¹⁷ Anya sote Paulo vo ndi ama yibe, ugu totrebe ekye: “Lidri kwoi orivoya ruindu’bai Lu Fopara ndra ro! Ànya kayi taope ämiri ta ami oparo ta!” ¹⁸ Anya ye tase ono te nonye u’duna amba, madale Paulo a’dote kyilaro ta anyaro ta ago nda zamite ago atate tori ri ekye: “Ävuru Yesu Kristo rosi mata mi efone tesi ni anya yasi!” Ndi tori fote tesi ni anya yasi ndriŋwa. ¹⁹ Ondro kuzupii anyaro kuniyite kandrakado ànyaro parata usuro te i’do oko, ànya ruyi Paulo te Sila be ndi eseyi ànya te drikaca’bai kandra goro ya miamba ya. ²⁰ Ànya eziyi ànya te dri’bai miri ro Roma’ba ro kandra ago atayite ekye: “Lidri kwoi orivoya Yudai ago ànya kayi rriti ezi ’bakici amaro ya. ²¹ Ànya kayi la’bii se orivoya koziro ota amaro lomvo embana, ama orivoya ’bakici’bai Roma ro, ago mä̀ni ko la’bi kwoi urune kode oyene.” ²² Ago lowa dro’berute rutako kyila si Paulo ndi Sila be dri ya. ’Dooko dri’bai miri ro towayi boŋgo teni Paulo lomvosi ndi Sila be ago ozoyi tate ànya o’bine. ²³ O’bi ànyaro rritiro vosi oko avo ànya te kamba ya, ago ata dri’ba kamba rote drî ànyaro osene anda. ²⁴ Ota ono orona si dri’ba kamba ro vo ànya te le zoya yasi kamba roya ago embe pa ànyaro te lakole juṛu ritu kuluturo roya. ²⁵ Oso o’bwaro ronye oko Paulo ndi Sila be kayi ugu mätu oye loŋgo oŋgo be Lu ri, ago kamba’bai azii kayi ugu ta ànyaro eri. ²⁶ Ndriŋwa oko ägbigbi mbaraekye site, se kanda kotopa kamba rote. Dori käläsi cini tupirute, ago nyorii letrote ni kamba’bai cini rigyesi. ²⁷ Dri’ba kamba ro pimite, ago kondre käläsii kamba ro tupirute oko, nda koma iro be kamba’bai mute ago nda eŋgye bando ndaro te aba koyete andivo ndaro ufune. ²⁸ Oko Paulo trete otre amba si ekye: “Miye andivo miro ko koziro! Ama cini orivoya noŋwa!” ²⁹ Dri’ba kamba ro ziläzite asi ta, ŋgovote zo ya, ago ’dete vuru lä’bilä’biro Paulo ndi Sila be kandra. ³⁰ ’Dooko nda lofo ànya te tesi ago ejitate ekye: “’Desii, beṛo märi e’di oyene apa ma robe ya?” ³¹ Ànya zayitadrite ekye: “Mima Opi Yesu ya, ago apana mi ’da ndi katidri miro be.” ³² ’Dooko ànya peyi ata Opi rote ndäri ndi ’di cini azaka zo ndaro ya be. ³³ Saa gialo ŋgäkyina ana rosi dri’ba kamba ro ru ànya te ago ja laza ànyaro te; ago nda ndi katidri ndaro cini be abapatisite dori. ³⁴ ’Dooko nda ru Paulo ndi Sila be te zo ndaro ya ago ozo ŋgaonya te ànyari onyane. Nda ndi katidri ndaro be a’dote twi riyä be; tana yauono ànya mayitate Lu ya. ³⁵ Kyenonosi oko drikaca’bai Roma’ba ro zoyi dri’bai vookwa’bai rote ota be ekye: “Mì’ba lidri se kai koyi ri.” ³⁶ Ago dri’ba kamba ro ititate Paulo ri ekye: “Dri’bai miri ro ezoyi tate mi ndi Sila be onjine, te ämiri oyine ago nyòyi liatokpe ro.” ³⁷ Oko Paulo atate dri’ba vookwa’ba ro ri ekye: “Usu ama kote taenji be taoye kozi aza ro, caoko ànya ’biyi ama te miamba ya, ago ama ’bakici’bai Roma ro! Ago ànya voyi ama te kamba ya. Ago yauono ànya leyite ama ozone ndrwiro ya? Ko inye alona! Dri’bai miri Roma’bai ro andivona beṛo ikyine noŋwa ago o’bana ama ni oyine.” ³⁸ Dri’bai vookwa’ba ro itiyi ta kwoi te dri’bai miri ro Roma’ba ro ri; ago ondro ànya keriyi tate ekye Paulo ndi Sila be orivoya ’bakici’bai Roma ro oko ànya a’dote turi ro. ³⁹ Ago ànya oyiyite koziyi iyi te ànya kandra, ’dooko ànya lofoyi ànya teni kamba yasi ago ejiyi ànya te ’bakici e’bene. ⁴⁰ Paulo ndi Sila be e’beyi kamba te ago oyiyite zo Ludia roya. Ànya tayi iyi te taoma’bai be lau, peyi ata agoago ozoro te ànyari, ndi oyiyite.

¹ Paulo ndi Sila be uguyi abate Amefipolisa ndi Apolonia be yasi ago ikyiyite Tesalonika ya, se zotaeriro orivoya kigye. ² Oso a’do ndaro ondoalo ronye Paulo oyite zotaeriro ya. Tu Sabata nätu rosi nda rite tavo atane lidri be, ugu tavo usi si, ³ ago ugu tavoedrete ni Taegyi yasi ago ugu taka’date ni Taegyi yasi anjioko Mesiya ri ruezane ago efone ni avo yasi. Paulo atate ekye: “Yesu se mabe tana opena ämiri ono ni Mesiya owo.” ⁴ Rukä ànyaro ma ta ṛote ago dro’berute Paulo ndi Sila be be, ndi ’ditoko ’desi amba be ago amba gboko Giriki ro se mätuyi Lu te be. ⁵ Oko Yudai a’doyite yaoko be ago otoyikala rukä tovo’bai se koziro rote ni litiŋwà drisi ago ṛiyi lowa te. Ànya ’bayi ’bakici te kpeye amone ago muyi drî ’ba mano se äzibe Yasona ana rote, ànya ojoyite Paulo ndi Sila be uṛine ago ànya ezine lidri kandra. ⁶ Oko ondro ànya kusuyi ànya kote oko, ànya eseyi Yasona ndi rukä taoma’bai robe te drikaca’bai ’bakici ro kandra, ago treyite ekye: “Lidri kwoi ozoyi rriti te vo cini yasi! Yauono ànya ikyiyite ’bakici amaro ya. ⁷ Ago Yasona rudri ànyaro te zo ndaro ya. Ànya cini kayi ugu otai ’bädri’ba ro perena, kayi ugu ata ekye ’bädri’ba aza orivoya ävuruna Yesu.” ⁸ Ata kwoi si ànya ’bayi lowa ndi drikaca’bai ’bakici robe te amone amba. ⁹ Drikaca’bai ’bayi Yasona ndi ’di azaka be te parata amba se alebe driutweza ana ozone ànya onjiza, ndi ’dooko a’bana ànya gwo oyine. ¹⁰ Ago vo kunite oko, taoma’bai zoyi Paulo ndi Sila be te Berea ya. Ondro ànya kesayite oko, ànya oyiyite zotaeriro ya. ¹¹ Lidri lau ana drî na pirute ndrani lidri Tesalonika ya risi. Ànya eri lazo te ya cini si, ago ondoalo ànya tenyiyi taegyi te leyi unine kode tase Paulo katabe gindi orivoya endaro ŋgye ya. ¹² Amba ànyaro mayitate, ago amba ’ditoko Giriki ro se ’desi ro ndi mànoago amba Giriki robe mayi ta kpate. ¹³ Oko ondro Yudai Tesalonika ya keriyi tate Paulo pe ata Lu ro kpate Berea ya oko, ànya ikyiyite ago uguyi ya lowa ro eŋgate. ¹⁴ Dori taoma’ba zoyi Paulo te le gyi’desi kala; oko Sila ndi Timoteo be riyite Berea ya. ¹⁵ Lidri se kuguyi Paulo be oyiyite nda be le Atenea ya ago ’dooko go egoyite le Berea ya lazo be ni Paulo resi anjioko Sila ndi Timoteo be beṛo ukyine rudro’bene nda be ndrindri. ¹⁶ Ondro Paulo kadri Sila ndi Timoteo be kwotena Atenea ya oko, nda a’dote tusuro amba ondro nda kondre ’bakici te twi lu awi be owo. ¹⁷ Ago nda ru ta ata te zotaeriro ya Yudai ndi Atrai se kabe Lu mätu be, ago kpa goro kalakoto ro se lidri amba kabe kala oto kigye ya. ¹⁸ Epikureana’ba aza ndi miemba’bai Sitoika robe diṛiyi kala kpate nda be. Rukä ànyaro ejiyi tate ekye: “Tauniako’ba ono ka ta e’diro atana ya?” Azaka zatadrite ekye: “Landrebe osoago nda ka ta lui atraro ro atana.” Ànya ’deyibe atane nonye tana Paulo ka ugu ta Yesu ro opena ndi ta eforo be. ¹⁹ Ago ànya ruyi Paulo te eziyi nda te taäyi’ba ’bakici ro Areopagu kandra, ago atayite ekye: “Male ta miemba se to’di se nyabe ugu tana ata ono ro unine. ²⁰ Rukä ŋga azaka ro se meri nyabe atana uwina orivoya to ämäri, ago màle takaci ànyaro unine.” ²¹ (Tana ’bakici’bai cini Atenea ro ndi ’di atrai se koriyibe lau ana leyite tu cini ànyaro enjine ugu ta atane ago ugu ta to’di erine.) ²² Paulo edrete kuru taäyi’bai ’bakici ro kandra ago atate ekye: “Mandrebe ta cini yasi ami Atenea’bai orivoya mätu’bai para. ²³ Tana mugu abate ’bakici cini amiro yasi mandre vose nyàbe mätu oye kigyesi te, musu egyitate vo tori oloro aza dri ekye: ‘Lu uniako ri.’ Se nyàbe mätuna, ago mini tana ca ko oko, ono ni tase mabe opena ämiri yau ono owo. ²⁴ Lu, se ’ba ’bädri ni ndi ŋgase cini kigye be, ni Opi vo’buyakuru ro ndi ’bädri be ago ri kote yekalu se lidri ede beni ya. ²⁵ Nda le ŋga aza se mänina ndi ozone losi oye si ndari ’do ko, tana nda, andivo ni se kozo adri ni ndi lawa be ndi ŋga cini be ’dicini ri owo. ²⁶ Ni mano alo se nda ko’babe ana yasi tu’dei cini beti toto be a’bate ago ’ba ànya te orine ’bädri cini yasi. Nda andivona ratate ṛo kyeno ndi tuna be ndi kishwe voi se ànyari orine kigyesi robe. ²⁷ Nda ye tase ono te nonye tana ànya kuṛiyi nda robe, kode kusuyi nda robe ago ànya kusuyi vona robe. Caoko endaro Lu ko lozo ni aza alo amaro resi; ²⁸ oso ’diaza katabe ronye ekye: ‘Mà ori nda ya ago ma ushwe nda ya ago mà a’do nda ya.’ Loŋgo oŋgo’bai amiro rukäna atate ekye: ‘Ama kpa orivoya ŋgwai ndaro.’ ²⁹ Ama be ni ŋgwai Lu ro ono, ko ämäri taomane makye a’do ndaro orivoya oso beti logo läguläguro ro kode mo’di kode kuni be ronye, edeedero taoye kode tauni lidri rosi. ³⁰ Lu ti tuse lidri kuni nda driko ana tana kote, oko yauono nda ka vo ànyaro cini vo cini yasi ota drietane ni taoye cini undiro ànyaro yasi. ³¹ Tana nda nji tu te se nda opena vure ’bädri cini ro ’da sina taŋgye si mano se nda konjibe ana si. Nda ozo taka’da ta ono rote ’dicini ri mano ana lofona si ni avo yasi!” ³² Ondro ànya keriyi Paulo ka ta eforo ni avo yasi tana ope oko, rukä ànyaro guyi nda te, oko azakana ekye: “Màle miri ta ono opene to’di erine ämäri.” ³³ Ago Paulo e’be kalakotovo te. ³⁴ Rukä lidri ro dro’berute nda be ago mayitate, lakoigyesi ni Dionyesio, alo aza taäyi’bai ro; toko se äzite Damari ana kpa, ndi lidri rukä azaka be.

¹ Ono vosi, Paulo e’be Atenea te ago oyite Korineto ya. ² Lau nda ta Yuda aza äzite Akwila, ätite Pondusi ya, se ikyite ndriro ni Italia yasi toko ndaro Pirisila be, tana ’Bädri’ba Kelaudia ta Yudai cini te Roma e’bene. Paulo oyite ànya ondrene, ³ ago nda rite ago ye losi te ànya yibe, tana nda ka ŋga oriza ndäri usuna zo boŋgo ro o’di si, kpa oso ànya kabe oyena ronye. ⁴ Nda diṛi kalate zotaeriro ya Sabata cini si, ojote kaladiṛine Yudai ndi Giriki be leyene. ⁵ Ondro Sila ndi Timoteo be kesayite ni Makedonia yasi oko, Paulo ozo yi te ugu lazo opene tu cini si, ugu tazevoedre be Yudai ri anjioko Yesu ni Mesiya owo. ⁶ Ondro ànya kogboyite nda be ago katayi ta undiro te nda lomvo, nda kovo durufu teni boŋgo ndaro yasi ago atate ànyari ekye: “Ondro ka’do mijete, beṛo andivo amiro kozine ayani tana ro, ta maro i’do. Etoni yauono oyi gwo mileya moyina te Atrai re ayani.” ⁷ Ago nda e’be ànya te ago oyite orine zo ’di Atra aza se äzibe Tito Yusetu ana roya, se mätu Lu te, zo ndaro orivoya zotaeriro lomvo. ⁸ Kurisepo, nda se orivoya ni dri’ba zotaeriro ana, matate Opi ya, ndi tro katidri ndaro be, ndi lidri azaka se amba Korineto ya keriyi lazo te ana mayitate, ago abapatisi ànya te. ⁹ Ŋgäkyi alo si oko rulofo a’dote Paulo ri se Opi atate ndäri ni kigyesi ekye: “Nya’do ko turiro, oko nyugu taope ri ago nye’be ko, ¹⁰ tana ma orivoya mibe. ’Diaza i’do mbara be mi oyene koziro, tana ’di amba ’bakici ono ya orivoya lidri maro.” ¹¹ Ago Paulo rite lau ndroa alo kpäkyi ugu lidri embavoya ata Lu rosi. ¹² Ondro a’ba Galio Roma’ba te wari’ba Akaya ro oko, Yudai ŋgayite troalo ruyi Paulo te, ago uguyi nda te vure ya. ¹³ Ànya atayite ekye: “Mano gi ono ka ugu lidri o’ba Lu mätune liti se kabe ota amaro enjina si!” ¹⁴ Aba Paulo kaoye dri atane oko Galio atate Yudai ri ekye: “Ondro tase ono ka’dote taenji kozi aza yi kode ayete ŋgakozi yi, a’dona ndi kadoro märi a’done yaiŋgyi be ami Yudai be. ¹⁵ Oko ka’do bete ta kaladiṛi ro ta ata ro ndi ävurui be ro ndi ota modo amiro robe ta ono, mindre amiro tana ri. Male ko a’done vureope’ba ta nonye kwoi ro!” ¹⁶ Ago nda nja ànya te tesi ni vo vure ro yasi. ¹⁷ Ago ànya ruyi Sosetene, dri’ba zotaeriro te, ago ’biyi nda te mile vureope’bai ro yasi. Oko Galio ru tana kote. ¹⁸ Paulo rite taoma’bai be Korineto ya u’duna amba, ’dooko e’be ànya te ago diyite Pirisila ndi Akwila be be Siria ya. Teinye udiako ni Kenekerea ya nda vu drî ndaro te tana ta tao’ba se nda ko’babe ana rota. ¹⁹ Ànya esayite Epeso ya, Paulo e’be Pirisila ndi Akwila be te lau. Nda oyite zotaeriro ya ago diṛikalate Yudai be. ²⁰ Lidri eji nda te orine ga madaro oko nda gazo. ²¹ Nda atate ànyari ekye: “Ondro, ka’do gini ole Lu ro owo, megona ’da amire.” Ago ’dooko nda dite ni Epeso yasi. ²² Ondro nda kesate Kaisaria ya oko, nda oyite Yerusalema ya ago ye mede te Känisa ri, ’dooko oyite Anetiokia ya. ²³ Ori fere lau vosi oko, nda e’be vo ana te ndi oyite wari Galatia ro ndi Ferugia be ro yasi, ugu taoma’bai cini tomba be. ²⁴ Tu ana si Yuda’ba aza äzite Apolo, se ätite Alegezandria ya; ikyite Epeso ya, nda orivoya ta ata’ba yi ŋgälä ago ni Taegyi te kado. ²⁵ Emba nda te liti Opi rosi, ago lomvo ndeṛi be amba nda petate ago emba ta Yesu rote ŋgyero. Caoko, nda ni toto ta bapatisi Yoane ro tana ayani. ²⁶ Nda eto taope te turiako zotaeriro ya. Ondro Pirisila ndi Akwila be keriyi taope ndaro te oko ànya ruyi nda te ’bäru ànya rigä ago edreyitazevo liti Lu ro rote amba ndäri ŋgyero. ²⁷ ’Dooko Apolo ratate oyine Akaya ya, ago taoma’bai Epeso ya payi nda te taegyi si taoma’bai Akaya ya ri, atayite ànyari nda urune. Ondro nda kosate oko, nda a’dote ŋgaopa ’desi ro ànya se tai’dwero Lu rosi a’dote taoma’bai ro ana ri. ²⁸ Tana kaladiṛi mbaraekye ndaro si nda pe Yudai te ṛe kalawasa miamba yasi si ugu taka’date ni Taegyi yasi anjioko Yesu ni Mesiya owo.

¹ Ondro Apolo dri orivoya Korineto ya oko, Paulo lävute kitoriya wari ro yasi ago esate Epeso ya. Nda usu taeri’bai azaka te lau ² ago eji ànya te ekye: “Nyà’dobe taoma’bai ro ono nyùsu Tori Alokado te ya?” Ànya zayitadrite ekye: “Tori Alokado gi orivoya ya, cu mèri tana ko.” ³ Paulo ejitate ekye: “Ka’do inye, bapatisi eŋwani abapatisi ami te sina ya?” Ànya zayitadrite ekye: “Bapatisi Yoane rosi.” ⁴ Paulo atate ekye: “Bapatisi Yoane ro orivoya tana ànya se ketadrite ni takozii ànyaro yasi ri; ago nda ititate lidri Yisaraele ro ri taomane nda se kabe ikyi nda vosi ya, anjioko Yesu ya.” ⁵ Ondro ànya keriyi ta ono te oko, abapatisi ànya te ävuru Opi Yesu roya. ⁶ Paulo ’ba drí ndaro te ànya dri ago Tori Alokado ikyite ànya dri, ànya atayite kalato si ago peyi lazo Lu ro kpate. ⁷ Ànya cini orivoya oso lidri ’butealo foritu ronye. ⁸ Paulo oyite zotaeriro ya ago petate lidri ri turi ako imba na nätu, ’degwo ugu kaladiṛine ànya yibe ago ojote ànya o’bane ta Miri ’Bädri’ba Lu ro ro unine. ⁹ Oko rukä ànyaro eriyi ta ko ago gayizo taomane, ago gboko cini milesi ànya atayi ta undiro te ta Liti Opi rota. Ago Paulo e’be ànya te, ago ru taoma’bai te nda be, ago ondoalo ugu ta atate ànya yibe zo ŋgaembaro Turanu roya. ¹⁰ Tase ono ugu a’dote inye ndroa na ritu, tana ta’doro lidri cini se koribe wari Asia roya, Yudai ndi Atrai be eriyi ata Opi rote. ¹¹ Lu ugu talaro ro amba se aye kätina ko ana oyena te Paulo si. ¹² Ca boŋgo dríoyoro ndi embero kätäti dri se nda kabe drí oyo sina kode ovona iyi ugute adravo re, ago adravo ànyaro kyete, ago tori undiro fote ni ànya yasi. ¹³ Rukä Yudai ro se kabe aba ŋgulu ago kayibe kpa tori undiro lofo iyi ojoyite ta ono oyene ävuru Yesu rosi. Ànya atayite tori undiro ri ekye: “Mata mi ävuru Yesu, se Paulo kabe tana opena rosi.” ¹⁴ Ädrupii njidrieri, se orivoya ŋgwàagoro Kohani Fopara Yudai ro ro se äzibe Sekeva ana ro, kayi ugu ta ono oyena ni. ¹⁵ Oko tori undiro atate ànyari ekye: “Mäni Yesu te ago mäni ta Paulo rote, oko ami a’diyi owo ya?” ¹⁶ Mano se tori undiro be nda ya ana takorute ànya dri mbarasi ago nda pe ànya cini te ṛe. Ànya muyite ni zo ndaro yasi, laza be ago boŋgo ànyaro otowate. ¹⁷ Yudai ndi Atrai se cini koribe Epeso ya be keriyi ta ono tana te oko; turi so ànya cini te, ago ozo taoro para te ävuru Opi Yesu ro ri. ¹⁸ Amba taoma’bai ro ikyiyite tase ànya koloyebe iyi leyitadrina te ago ka’dayite miamba ya. ¹⁹ Amba ànya se koyeyi tetedri te ro eziyi bukui ànyaro te voaloya ago zayi ànya te miamba ya. Ànya tiyi lagye bukui rote, ago oti lagyena ro sate le tonyo mo’di ro kutu ’butenji (50,000). ²⁰ Taoye mbaraekye ono si ata Opi ro ugu rulari gwo ago ugu omba gwo mbara be. ²¹ Ta kwoi ka’dobe vosi oko, Paulo ratate oyine Makedonia ndi Akaya be yasi ago ugu oyine Yerusalema ya, nda atate ekye: “Oyi maro lau vosi, beṛo kpa märi Roma ondrene.” ²² Ago nda zo opa’bai ritu ndaro Timoteo ndi Eraseto be te le Makedonia ya, ago nda ru tu te amba wari Asia roya. ²³ Tuna gi ono si rriti kozipara a’dote Epeso ya ta Liti Opi ro rota. ²⁴ Toka’ba aza äzite Demetrio ede beti mo’di yekalu ro lu tokoro Aretemisa rote, ago losi ndaro ezi ŋga amba te losi’bai ri. ²⁵ Ago nda zi ànya cini te voaloya ndi azaka se losi nai ojobe rere ànyaro be ana be ago atate ànyari ekye: “Mano kwoi mini ṛote ŋgaamba kikyi ämäri ni losi ono yasi. ²⁶ Yauono, andivo amiro mindre ṛote ago nyeri tase mano se Paulo ono kabe ugu oyena ono te. Nda ka ata ekye lu se lidri kede beni ’do ko lu yi, ago yauono nda toza lidri amba, Epeso ya noŋwa ono te ndi wari cini Asia ro yasi be. ²⁷ Rriti orivoya, anjioko losi amaro ono kaoye te a’done ävuru kozi be. Ko gialo ’do ayani, oko rritina aza kpa anjioko yekalu lu tokoro Aretemisa para ro kaoye te a’done ta awi ro ago ’desipara anyaro eperena ’da, lu tokoro se ’dicini Asia ya ndi ’bädri cini yasi kabe mätuna ono.” ²⁸ Ondro lowa keri ata kwoi te oko, ànya a’dote kyilaro ago etoyi totrete ekye: “Aretemisa Epeso ro orivoya ni para!” ²⁹ Amo larirute ’bakici yasi kpeye, lowa ru Gayo ndi Arisetareku, Makedonia’bai se ritu se kayi ugu aba Paulo be ono te ago du’duyi ànya te zo ’desi oji oyero ya. ³⁰ Paulo andivona lete oyine lowa mile, oko taoma’bai lagayi nda tezo. ³¹ Rukä drikaca’bai wari ro, se orivoya bereazii ndaro, zoyi lazo kpate ndäri ugu rulo’basi ko ndäri andivo ndaro ka’dane zo ’desi oji oyero ya. ³² Caoko kalakoto cini a’dote amo ro, lidri rukä ugu totrete ta alo be, azakana ugu totrete ta azaka be tana amba ànyaro niyi tase ànya ’deyibe kalakotone tana ro ko. ³³ Rukä lidri ro lociyi Alegezanda te ta ono ya, ago Yudai ’bayi nda te oyine mileya. ’Dooko Alegezanda kanda drí ndaro te lidri ri a’done titiro, ago ojote ta atane yi gagaza. ³⁴ Oko ondro ànya kuniyi te nda Yuda yi oko, ànya cini treyite troalo ta alo si saa na ritu ekye: “Aretemisa Epeso ro ni para!” ³⁵ Äduro oko egyi’ba ’bakici ro ’ba lidri te a’done njuru. Nda atate ekye: “Epeso’bai azi! ’Dicini ni ṛote anjioko ’bakici Epeso ro orivoya ni gaga’ba yekalu Aretemisa para ro ro ago kuni alokado se e’dete vuru ni vo’buyakuru yasi ro. ³⁶ ’Diaza ni ko kala ŋga kwoi ro ogane. Ka’do inye beṛo ämiri a’done njuru ago ko ämiri ŋgakozi oyene. ³⁷ Nyezi lidri kwoi te noŋwa se ca topayi ŋga yekalu ro kote ago atayi taundiro aza kote lu amaro tokoro lomvo. ³⁸ Ondro Demetrio ndi losi’bai ndaro be ka’doyi te ŋga kicu be ’diaza lomvo, ama orivoya drikaca be ago tu be ondoalo vure oyeza; änina ’di kicune lau ayani. ³⁹ Oko ondro ka’do ta azaka ka’dote drigba se mile ezine, andena tana ’da ŋgyero vo kalakoto ro ’bakici’bai roya. ⁴⁰ Tana tase ka’dobe ondro ono ya, rriti orivoya ikicuna ama ndi ta amo ono rota, kalaogavo i’do ta amo ono rota, ago mänina ko takado atane tana ro.” ⁴¹ Ata ono vosi oko, nda pere kalakoto te.

¹ Okye amo ono ro vosi oko, Paulo zi taoma’bai te voaloya ozo agoago te ànyari ago ye mede te ànyari. ’Dooko nda narute ago oyite le Makedonia ya. ² Nda oyite wari kai yasi ago ozo agoago te lidri ri ata amba si. ’Dooko nda ikyite Akaya ya, ³ nda rite lau imba na nätu. Ondro nda te nja ugu oyine Siria ya oko nda usu vona te anjioko Yudai äyiyitate nda lomvo; ndi nda ratate ogone Makedonia yasi. ⁴ Sopatera ŋgwa Fureusa ro, ni Berea yasi, oyite nda be; ago Arisetareku ndi Sekundu be, ni Tesalonika ya; Gayo, ni Derebe ya; Tukiko ndi Trofimusa be, ni wari Asia roya; ndi Timoteo be. ⁵ Ànya oyiyite mileya ago koteyi ama te Troasa ya. ⁶ Mädite toŋbo si ni Filipoi yasi Karama Ambata Loŋgaako ro vosi, ago u’du nji vosi oko modro’be ama te ànya yibe Troasa ya, marite lau u’duna njidrieri. ⁷ Tandrole Sabata rosi motokalate ta ŋgaonya ro voaloya rota. Paulo petate lidri ri ago ugu taope te madale o’bwaro, tana nda kaoye oyine kyenonosi. ⁸ Eyi lamba amba te vose motokalabe kigye zo ya kurusi ya ana ya. ⁹ Agoanji aza äzite Eutuku rite vouŋbo ya, ago ondro Paulo ka ugu taope oko Eutuku te panapanaro, madale nda u’dute ŋbi ago nda e’dete vuru ni ya nina zo ro kurusi yasi. Ondro ànya keŋga nda te kuru oko nda drate. ¹⁰ Oko Paulo fote vuru ago takorute nda dri ago ovo nda te, atate ekye: “Nyòlo’be mi ko, nda drigba lidriidriro!” ¹¹ ’Dooko nda gotute kuru, wa ambata te, ago nyate. Ondro Paulo kope tate madaro ago kitu kate itu oko nda oyite. ¹² Ago lidri uguyi agoanji ana te ’bäru lidriidriro ago a’doyite yai’dwe amba si. ¹³ Mòyite mileya toŋbo si ago mä̀dite le Asosa ya, mòyite Paulo uŋgyine ni lau. Nda ititate ämäri oyene inye, tana nda ka oyi lau gyini drisi. ¹⁴ Ondro nda ko’bedrite ama yibe Asosa ya oko, märu nda te ago moyite Mitulene ya. ¹⁵ Mädite toŋbo si ni lau ago mesate Kiosa ya kyenonosi. Ago ono vosi mesate Samosa ya ago voigyesi masate Miletu ya. ¹⁶ Paulo ratate udine toŋbo si lävune Epeso ya si, ago ko tu enjine awi wari Asia roya. Nda oyite foroforo osaza Yerusalema ya tu Penetikoseta rosi. Ondro ka’do gindi rritiako owo. ¹⁷ Paulo zo lazo teni Miletu yasi Epeso ya, eji ’di’desii Känisa rote drî ndaro utune. ¹⁸ Ondro ànya kesayite oko, nda atate ànyari ekye: “Mìni ori se maribe te, tu cini se maribe ami yibe si, ṛoni tuse käti mesate wari Asia roya si. ¹⁹ Andivo logo si vuru ndi miendre be si maye losi maro te oso ruindu’ba Opi ro ronye tu rritiekye se kikyibe mädri ta taäyiro Yudai ro rosi ana. ²⁰ Mìni ṛote anjioko meta ta aza se a’dona ndi ŋgaopa ro ämiri ’do kote oko mapetate ago memba ami te miamba ya ago ’ba amiro yasi. ²¹ Mozo miomba lämu’duro te Yudai ri ndi Atrai be anjioko beṛo ànyari drietane ni takozii ànyaro yasi Lu re ago taomane Opi amaro Yesu ya. ²² Ago yauono, Tori Alokado oro si mate ugu oyi Yerusalema ya, teinye tase ka oyebe a’done märi lau uniako. ²³ Mäni toto miomba se Tori Alokado kozobe märi tana ayani se ekye kamba ndi rriti amba be ka ma kwote ’bakici cini yasi. ²⁴ Oko adri modo maro ro a’do kote märi ta amba ro, male toto taope maro ndi losi se Opi Yesu kozobe märi oyene ono ondene, anjioko Lazokado se tai’dwero Lu ro ro ono tana larine. ²⁵ “Mabate ami cini lakosi, ugu Miri ’Bädri’ba Lu ro ro tana ope be. Ago mäni ṛote aza alo amiro ri ogone mi maro ondrene te i’do tona. ²⁶ Ka’do inye ma ta lämu’duro opena ämiri tu gi ono si, ondro alo aza amiro kiwirite ’do kote ta maro. ²⁷ Tana meta ma kote ni ta cini Lu ro tana opevoya ämiri. ²⁸ Ka’do inye mìmba ämidri ndi gboko cini se Tori Alokado kozobe ämiri vona ondrene ono be. Nyà’do lekye’bai Känisa Lu ro ro, se nda ko’babe a’done modo ndaro ri kari Ŋgwa ndaro rosi ono. ²⁹ Mäni ṛote oyi maro vosi, ihwii siombaekye ikyina ’da ami lako, ago ànya e’benayi gboko ko. ³⁰ Tu esana ’da ’dooko lidri rukä ni gboko modo amiro ro yasi oganayi kowe ’da taoma’bai o’baza osone ànya vo. ³¹ Ka’do inye mìkwa ŋga ago mìyi tase miendre amba si, kitu ndi ŋgäkyi be si, memba ami cini te ndroa na nätu ono tana. ³² “Ago yauono ma ami ozo Lu rigye ami gagane ago lazo tai’dwero ndaro se orivoya mbara be ami tombane ago äṛu se Lu be sina lidri cini ndaro ri ono ozone ämiri. ³³ Male mo’di kode logo läguläguro kode boŋgo osoro amiro ko. ³⁴ Ami andivo mini ṛote anjioko maye losi te drí maro kwoi si ŋgase cini azii maro ndi mabe màlebe be usuza. ³⁵ Maka’da ŋga cini te ämiri anjioko losi oye mbarasi liti ono yasi si be ämäri mbaraako’bai opane, ugu ata se Opi Yesu andivo katabe tana oyine se ekye: ‘Ugu ŋga ozone ozo riyä na ndrani ugu ŋga uru drisi.’ ” ³⁶ Ondro Paulo konde ata te oko, nda sokayate vuru ànya yibe ndi mätute. ³⁷ Ànya cini kayi ugu liyi oko ovoyi nda te ago njunjuyi nda te yeyi mede te. ³⁸ Ànya a’doyite tusuro ndra tase nda katabe se ekye ànyari ogone yi ondrene te i’do tona ono ta. Ago ànya ’bayi vo ndaro te toŋbo ya.

¹ Màye mede te ànyari, ago mòyite. Màsivote ŋgyero toŋbo si, màzate Kosa ya; kyenonosi oko màsate Rode ya, ago ni nasi mùgu oyite Patara ya. ² Mùsu toŋbo te ka ugu oyi Foenesia ya, mòyite ago mä̀dite toŋbo si. ³ Ago mèsate vose mä̀ni ndi drî Saiporosi ro ondrene ya, ago ’dooko mä̀dite ŋgäṛiŋwa na yasi mòyite Siria ya. Mòyite kototi Tura roya, se lakazà toŋbo ya abe lofona kigye ana. ⁴ Mùsu taoma’bai azaka te lau ago màrite ànya yibe u’duna njidrieri. Mbara Tori Alokado rosi ànya atayite Paulo ri ko oyine Yerusalema ya. ⁵ Oko ondro tu amaro oriro ànya yibe kokyete oko, mè’be vo ana te ago mùgu oyite liti amaro ya. Vo ànyaro cini otoyikalate voaloya ’ditoko ndi ŋgàga ànyaro be, oyiyite ama yibe ni ’bakici yasi gyikala, lau ama cini màso kayate ago mä̀mätute. ⁶ ’Dooko màye mede te azi ri, ago mòyi màcite toŋbo ya ondro ànya kayite ogo ’bäru owo. ⁷ Mùgu oyite, mùgu udite toŋbo si ni Tura yasi le Petolemai ya, lau màye mede te taoma’bai ri ago màrite ànya yibe u’duna alo. ⁸ Kyenonosi oko mè’be vo ana te ago mèsate Kaisaria ya. Lau màrite zo Filipo lazolari’ba roya, se ni alo aza lidri njidrieri se anjibe ruindu’bai ro Yerusalema ya ana ro. ⁹ Nda orivoya ndiriŋwa ogyeako be su se peyi lazo Lu rote. ¹⁰ Màrite lau u’duna amba oko nebi se äzibe Agabu ana esate ni Yuda yasi. ¹¹ Nda ikyite amare ru kyini kunduro Paulo rote, embe pa modo ndaro rote ndi drí be sina, ago atate ekye: “Ono ni tase Tori Alokado kata tana be owo ekye: Kuzupi kyinikunduro ono ro Yudai Yerusalema ya embane nda ’da oso ono ronye, ago ànya ozonayi nda gwo Atrai ri.” ¹² Ondro meri ta ono te oko, ama ndi azii lau ana be molo’barute Paulo ri ko oyine Yerusalema ya. ¹³ Oko nda zatadrite ekye: “Nyà ’do e’di oye, ugu liyi si ono ronye nyà ya maro okye etaya? Ma orivoya nja ko toto embene embe Yerusalema ya oko kpa odrane lau ta Opi Yesu rota.” ¹⁴ Ago ondro mä̀ni kote nda leyene oko, me’be nda te makye, ayena te ole Opi ro ayani. ¹⁵ U’du azaka lau vosi oko, mä̀ru ŋga amaro te ago mòyite Yerusalema ya. ¹⁶ Rukä taeri’bai ro ni Kaisaria ya oyiyi kpate ama yibe ago uguyi ama te ’ba Menasona roya, mano se mà ugu oyi be orine sina ana. Nda ni Saiporosi yasi, ago alo aza taoma’bai se ṛo kyeno ana ro. ¹⁷ Ondro mèsate Yerusalema ya oko, taoma’bai ruyi ama te yai’dwesi. ¹⁸ Kyenonosi oko Paulo oyite ama yibe Yakoba ondrene, ago ’desii känisa ro cini orivoya. ¹⁹ Paulo ye mede te ànyari ago iti ta cini se Lu koyebe Atrai lako losi oye ndaro si tana te ànyari. ²⁰ Ta ndaro erina vosi oko, ànya cini räṛuyi Lu te. ’Dooko ànya atayite ekye: “Ädrupi Paulo, mindrete Yudai du kutu ro a’doyite taoma’bai ro, ago ànya orivoya Ota äti’bai. ²¹ Ititate ànyari ekye nya ni Yudai se cini koriyibe ’bädri Atrai ro yasi embana Ota Musa ro e’bene, nya ugu ata ànyari ko ŋgwai ànyaro olone ŋbiṛiro ago ko osone la’bi Yudai ro vo. ²² Ànya kaoye ta erine ekye nyesate. Ka’do inye, ayena e’di ya? ²³ Ono ni tase màlebe miri oyene owo. Lidri orivoya su noŋwa se ’bayi tao’ba te. ²⁴ Nyoyi ànya yibe ago nyodro’beru ànya yibe la’bi ’dio’baro wäṛiro roya ago nyozo ŋgase ànyari ozone ŋgana ni ’dooko ànya uvunayi drî ànyaro ndi! Liti ono yasi ’dicini uninayi ndi anjioko taŋgye aza i’do tase itibe ànyari ta miro ta ono ya, oko anjioko mi andivo nya ori Ota Musa ro voro. ²⁵ Oko Atrai se ka’dobe taoma’bai ro, màzo waraga te ànyari taitisi ànyari màratate anjioko beṛo ko ànyari ŋgaonya se ozobe lui awi ri onyane, kode kari, kode ŋga ’ba ro se ädu gboro na udu, ago beṛo andivo ànyaro lagane ni ronyi oyevoya.” ²⁶ Ago Paulo ru lidri kai te ago kyenonosi ye la’bi’dio’baro wäṛiro te ànya yibe! ’Dooko nda oyite Yekalu ya ago ozo u’du se orine te madale ädu tu oriro ’dio’baro wäṛiro roya, ’dooko alona tori ’da ta ànya cini rota. ²⁷ Oko ondro aba ädu u’du njidrieri ro ka oyete okyene oko, rukä Yudai ro ni wari Asia ro yasi ndreyi Paulo te Yekalu ya. Ànya eŋgayi ya lowa rote ago ruyi Paulo te. ²⁸ Ànya treyite ekye: “Lidri Yisaraele ro! Miye ŋgaopa! Ono ni mano se kabe ta emba vo cini yasi lidri Yisaraele ro, Ota Musa ro, ndi Yekalu ono be lomvo owo. Ago yauono nda go ezi Atrai te Yekalu ya ago enji vose alokado ono te!” ²⁹ (Ànya ’deyibe ta ono atane nonye tana ànya ndreyi Trofimusa ni Epeso yasi te Paulo be ’bakici ya, ago ànya kusuyibe ekye Paulo ugu nda te Yekalu ya.) ³⁰ Tagburu larirute ’bakici yasi, ago lowa cini mute troalo ago ruyi Paulo te, ago eseyi nda te tesi ni Yekalu yasi. Ago ase käläsi Yekalu rote dori. ³¹ Lowa ojote Paulo ufune, ago lazo sate otaozo’ba kyila’bai Roma’ba ro ri ekye Yerusalema te twi amo kyila robe. ³² Otaozo’ba ru rukä dri’bai ro ndi rukä kyila’bai robe te ago eŋgoyivote lowa re. Ondro lidri kondre nda te kyila’bai be oko, ànya e’beyi Paulo o’bi te. ³³ Otaozo’ba oyite Paulo re, ru nda te, ago ozo tate nda embene nyori ritu si. ’Dooko nda ejitate ekye: “Mano ono a’di owo ago ŋgase nda koyebe e’diyi ya?” ³⁴ Rukä lowa ro treyite ta azaka be azakana ta to azaka be. Tagburu nonye ono si otaozo’ba kyila’bai ro ni kote tase ka’dobe taŋgyena unine, ago nda ta lidri ndaro te Paulo ugune tiṛi gawa kyila’bai ro ya. ³⁵ Ànya tuyite le kotopa dri nda be, ago ’dooko kyila’bai ŋgyiyi nda te tana äni kote drî lowa ro o’bine. ³⁶ Ànya cini eziyi ikyite nda vo ago uguyi totrete ekye: “Mìfu nda.” ³⁷ Ago ondro aba kyila’bai ka oyete Paulo ugune vo tiṛi gawa kyila’bai roya oko, nda atate otaozo’ba ri ekye: “Mile gi’da märi ta aza atane miri ya?” Otaozo’ba ejitate ekye: “Inye’do nyata kala Giriki ro ndi ya? ³⁸ Ka’do inye mi ko ni mano se Ezipeto’ba ro tu kyeno aza si ogbobe ago ugu kyila’bai kutu su (4,000) be vocowa ya kyila oyene owo ya?” ³⁹ Paulo zatadrite ekye: “Ma orivoya Yuda yi, ätite Taresusi Silisia ya ana ya, orivoya ’di ’bakici se ’desiro ro. Rägu mi’ba mata lidri ri.” ⁴⁰ Otaozo’ba ozo ole te, ago Paulo edrete kotopa dri ago kanda drí ndaro te lidri ri a’done titiro. Ondro kodriyite njuru oko, Paulo atate ànyari kala Ebere rosi.

¹ “Ädrupii ndi täpii be, nyeri ta ma gagaro ma itina ami kandra ono!” ² Ondro ànya keriyite nda ka ugu ata ànyari kala Ebere rosi oko, ànya a’doyite titiro, ago Paulo ugu atate ekye: ³ “Ma orivoya Yuda yi, ätite Taresusi Silisia roya oko ma mbate Yerusalema ya noŋwa ago Gamaliele emba mani. Emba ma te ŋgye Ota zutui amaro rosi ago mozo ma te Lu ri kpa oso ami cini se noŋwa tu ono si ono ronye. ⁴ Meza lidri se kosobe Liti Opi ro ono vo te, märu mànoago ndi ’ditoko be te ago mavo ànya te kamba ya. ⁵ Kohani Fopara ndi Taäyi’bai cini be uninayi ndi tadriolene anjioko ma taŋgye iti. Märu waraga teni ànya rigyesi Yudai azi se Damaseka ya ri, ago moyite lau lidri kwoi urune ago ànya embene nyori si ago ezine Yerusalema ya eza robe. ⁶ “Ondro mugu aba oko mesate loto Damaseka lomvo, aba te oso kitudiri ronye oko ŋgaeyi eyivote ni vokuru yasi ndriŋwa malomvosi gbikyi. ⁷ Ma’dete gyinidri ago meri atate ugu atate märi ekye: ‘Saulo, Saulo! Nya ma eza etaya?’ Mejitate makye: ⁸ ‘Mi a’di owo ya Opi?’ Nda atate märi ekye: ‘Ma orivoya Yesu Nazareta ro, se nyabe ezana owo.’ ⁹ Lidri se mabe kai ndreyi ŋgaeyi ndi, oko eriyi ata nda se kabe ata märi ana ro kote. ¹⁰ Mejitate makye: ‘Mayena e’di ya, Opi?’ Ago Opi atate märi ekye: ‘Miŋga kuru ago nyoyi Damaseka ya, ago itina tase cini Lu kolebe miri oyena tana ’da lau.’ ¹¹ Ma’dote orivoya miako ni ŋgaeyi läguläguro ana ri, ago azii maro ruyi ma te drí si ago uguyi ma te Damaseka ya. ¹² “’Bakici se ana ya mano aza äzite Anania, mano mätu ro se ro Ota amaro te ago Yudai cini se kabe ugu ori lau ana royi nda te ndra. ¹³ Nda ikyite mare, edrete ma lomvo, ago atate ekye: ‘Ädrupi Saulo, migo mindrevo!’ Ndriŋwa oko mago mandre ŋga te ago mandrevote nda dri. ¹⁴ Nda atate ekye: ‘Lu zutui amaro ro nji mi te ole ndaro unine, Ruindu’ba Taŋgye’baro ndaro ondrene, ago ta ndaro se kabe ugu atana mibe ata modo ndaro rosi ana erine. ¹⁵ Tana nya’dona ’da tazevoedre’ba ro ndäri tase cini mindrebe ago nyeribe ono tana itine ’dicini ri. ¹⁶ Ago yauono, nya ori madaro etaya? Miŋga kuru ago nya’do bapatisi be ago takozii miro aja robe ugu mätu oyesi ndäri.’ ¹⁷ “Magote Yerusalema ya ago ma ugu mätu oye Yekalu ya oko, rulofo a’dote märi, ¹⁸ se kigye mandre Opi te, nda ka ata märi ekye: ‘Nyoyi foroforo ndriro ni Yerusalema yasi, tana lidri noŋwa ono olenayi tazevoedre miro ta maro ta zo.’ ¹⁹ Mazatadrite makye: ‘Opi, ànya niyi ṛote kado anjioko moyite zoitaeriro cini ya märu ago ma’bi ànya se kabe taoma miya kai te. ²⁰ Ago ondro tazevoedre’ba miro Setepano abe ufuna, ma andivo orivoya lau, ufu ndaro male tadrina ni ago boŋgo nda ufu’bai ro mandrevona ni.’ ²¹ Opi atate märi ekye: ‘Nyoyi, mazona mi’da lozo di Atrai re.’ ” ²² Lidri gabite ta Paulo ro erine madale nda ata ta ono te; ’dooko ànya etoyi ugu totrete le otre ànyaro äduna ya ekye: “Ana nda zwi, äfu nda! Ojo ko ndäri orine!” ²³ Ànya uguyi totre te, ugu boŋgo ànyaro lovona be, ndi durufu utube kuru oli ya kyila si. ²⁴ Otaozo’ba kyila’bai Roma’ba ro ro ta lidri ndaro te Paulo urune tiṛi gawa kyila’bai ro ya, ago nda atate ànyari nda o’bine tase Yudai kayi ugu totre ago ka’doyibe kyilaro nda be ono tana eṛoza. ²⁵ Oko ondro ànya kembeyi nda te o’bine oko Paulo atate dri’ba kyila’bai ro se kedrebe lau ana ri ekye: “Inye’do ota ata gindi ämiri mano se te Roma ro se ca usu kote taenji be ono o’bine ya?” ²⁶ Ondro dri’ba kyila’bai ro keri ta ono te oko, nda oyite otaozo’ba re ago eji nda te ekye: “Nya e’di oyeya? Mano ana te orivoya Roma’ba yi!” ²⁷ Ago otaozo’ba oyite Paulo re ago eji nda te ekye: “Nyiti ta märi, inye’do mi te orivoya Roma’ba yi ya?” Paulo zatadrite ekye: “Owo.” ²⁸ Otaozo’ba atate ekye: “Ma’debe a’done Roma’ba ro lagyena ru parata amba.” Oko Paulo atate ekye: “Oko maro orivoya uti yasi.” ²⁹ Dori lidri se koyebe Paulo ejine go eŋgyerute kovole ni nda resi ago otaozo’ba te turituriro ondro nda kunite Paulo te orivoya Roma’ba yi owo, tana tase nda kembe nda be nyori si ’do ro. ³⁰ Otaozo’ba lete tase Yudai kicu Paulo be tana ro unine; ago kyenonosi oko nda atate nyori Paulo ro se embe nda be sina ana onjine ago atate kohanii ’desi ndi Taäyi’bai cini be ri kalakotone. Ago nda ru Paulo te ago ’ba nda te edrene ànya kandra.

¹ Paulo ndrevote ŋgye Taäyi’bai dri ago atate ekye: “Yisaraele’bai azi maro! Tavousu maro orivoya kadoro ta liti se maribe Lu kandra le tugi ono si ono rota.” ² Kohani Fopara Anania ozo tate ànya se kedreyibe Paulo re kai ri nda o’bine kala ya. ³ Paulo atate ndäri ekye: “Endaro Lu o’bina mi ’da mi tiṛi gi a’bibe onjero ono! Miri iga vure maro opene Ota voro, caoko nya ugu Ota pere ta ozo si ànyari ma o’bine!” ⁴ Lidri se loto Paulo re ana atayite ndäri ekye: “Nya Kohani Fopara Lu ro o’da!” ⁵ Paulo zatadrite ekye: “Yisaraele’ba azi maro, mäni kote anjioko nda ni Kohani Fopara Lu ro owo! Taegyi kabe ata ekye: ‘Beṛo ko miri takozi miri’ba lidri miro ro tana atane!’ ” ⁶ Ondro Paulo kondrete rukä gboko ro orivoya Sadukei ago azaka Parusii oko, nda atate ṛeṛe Taäyi’bai ri ekye: “Yisaraele’ba azi! Ma orivoya Parusi yi, ŋgwa Parusii ro. A vure maro ope noŋwa ono tana mio’ba se ma’dobe sina se avo efona ’da ana rota.” ⁷ Dori nda kata tase ono te oko, Parusii ndi Sadukei be etoyi kalaopete, ago gboko lonyirute. ⁸ (Tana Sadukei ka ata ekye lidri ri efone ni avo yasi i’do ago malaika kode torii i’do, oko Parusii mayi ndi tase cini nätu ono ya.) ⁹ Amo a’do gwo ndra, ago rukä miemba’bai Ota ro ro se orivoya gboko Parusii ro ana ŋgayite kurusi edreyite ŋgyiri ekye: “Musu ŋgakozi aza ko mano ono be! Kode azayi tori kode malaika ata ndi ni endaro ndäri!” ¹⁰ Kaladiṛi zarute kyilaro ta’doro Otaozo’ba kyila’bai ro te orivoya turiro ukyi otowa Paulo ’da jinyijinyi. Ta’doro nda zo kyila’bai ndaro te oyine gboko lako, Paulo urune ni ànya resi, ago ruyi nda te lociyite tiṛi gawa kyila’bai roya. ¹¹ Ŋgäkyi gi ana si Opi edrete ago atate Paulo ri ekye: “Nya’do ko turiro! Nyedre tazevo maro te Yerusalema ya noŋwa, ago beṛo kpa miri oyene inye Roma ya.” ¹² Kyenonosi oko rukä Yudai ro otoyikalate ago rayitate, ànya äṛuyirute ànyari ŋgaonyane kode ŋga aza umvune i’do madale ànya ufunayi Paulo lutu. ¹³ Ànya orivoya ndrani ’butesu drisi se korayi ta ono be voaloya owo. ¹⁴ ’Dooko ànya oyiyite kohanii ’desi re ndi ’desii be ago atayite ekye: “Mà’ba tao’ba lämu’duro te voaloya ko ŋgaonyane madale mäfuna Paulo lutu. ¹⁵ Ka’do inye, ami ndi Taäyi’bai be mìzo ta Otaozo’ba kyila’bai Roma’ba ro ri Paulo ezine amire, miomba oyesi mìkye ìle taŋgye unine ndra ta ndaro ta. ’Dooko mà’dona ṛo nja nda ufune teinye esaako noŋwa.” ¹⁶ Oko ŋgwaagoro endreŋwa Paulo ro ro eri ta taäyiro ana te; ago nda oyite tiṛi gawa kyila’bai ro ya ago iti tana te Paulo ri. ¹⁷ ’Dooko Paulo zi dri’ba kyila’bai ro alo aza te ago atate ndäri ekye: “Miru agoanji ono nyugu Otaozo’ba re; nda ta aza be itine ndäri.” ¹⁸ Dri’ba ru nda te, ugu nda te Otaozo’ba re, ago atate ekye: “Kamba’ba Paulo zi ma te ago eji ma te agoanji ono ezine mire, tana nda ta aza be atane miri.” ¹⁹ Otaozo’ba ru drí agoanji ana rote, ago ru nda te pere, ago eji nda te ekye: “Tase mibe sina itine märi e’di ya?” ²⁰ Nda atate ekye: “Drikaca’bai Yudai ro leyitadrite mi ejine ondo Paulo ugune Taäyi’bai re, miomba oyesi ekye vure le taŋgye unine ta ndaro ta. ²¹ Ka’do inye, nyeri ta ànyaro ko, tana lidri orivoya ndrani ’butesu drisi se ka oye ruda’done ago kayi oye nda kwotene. Ànya äṛuruyite ko ŋgaonyane kode ŋga aza umvune madale ànya ufunayi nda lutu. Yauono ànya teṛo nja ta ono oyene ago kayi ta miresi kwotena.” ²² Otaozo’ba atate ekye: “Nyiti ta ono ko ’diaza ri mikye yiti ta ono te märi.” Ago nda ’ba agoanji ana te oyine. ²³ ’Dooko Otaozo’ba kyila’bai ro zi dri’bai ritu kyila’bai rote ago atate ekye: “Mìru kyila’bai kama ritu (200) nja oyine Kaisaria ya, ago farasi’bai ’butenjidrieri (70) ndi äzu’bai kama ritu (200) be, ago nyà’do nja oyine saa nina ŋgäkyi rosi. ²⁴ Nyozo rukä farasii ro Paulo ri umuza ago nyugu nda londro ro Wari’ba Felikisi re.” ²⁵ ’Dooko Otaozo’ba egyi te oso nonye: ²⁶ “Ni Kelaudia Lusia resi, Felikisi, wari’ba kado para ri mede be. ²⁷ Yudai ruyi mano ono te ago aba kayi oyete nda ufune, merite nda orivoya Roma’bai, ago moyite kyila’bai maro be ago mapa nda te. ²⁸ Malete tase ànya kikicuyi nda be tana ro unine, ago mugu nda te Taäyi’bai ànyaro re. ²⁹ Musu vona te anjioko nda ye ŋgakozi aza ko se nda ufune kode nda o’bane kamba ya tana ro, tase ikicu nda be tana ro anjioko ta Ota modo ànyaro rota. ³⁰ Ondro ititate märi ekye, äyitate nda lomvo oko, maratate dori nda ozone mire. Mititate nda kicu’bai ri ta ànyaro nda lomvo itine mi kandra.” ³¹ Kyila’bai yeyi tase ozobe ànyari oyene te. Ànya ruyi Paulo te ŋgäkyi ana si ago uguyi nda te le Anetipatrisa ya. ³² Kyenonosi oko kyila’bai se kababe pa si goyite tiṛi ya ago e’beyi farasi’bai te ugu oyine nda be. ³³ Ànya uguyi nda te Kaisaria ya, ozoyi waraga te Wari’ba ri ago eziyi Paulo te nda re. ³⁴ Wari’ba zi waraga te ago eji Paulo te nda ni wari eŋwani yasi. Ondro nda kunite nda ni Silisia yasi oko, ³⁵ nda atate ekye: “Merina ta miro ’da ondro mi kicu’bai kesayite owo.” ’Dooko nda ozotate Paulo gagane vo ’desi wari’ba roya.

¹ U’du nji vosi oko Anania Kohani Fopara oyite Kaisaria ya rukä ’di’desii robe ago ota uni’ba aza se äzite Teretulu ana be. Ànya edreyite Wari’ba Felikisi kandra ago itiyitate Paulo lomvo. ² ’Dooko äzi Paulo te zo ya, ago Teretulu eto nda kicute, nonye ekye: “Mi ’desi se kado para! Tavouni miro a’doro dri’ba ro ono ’ba marite liatokpero tuna te amba, ago ŋga kado amba ayete ta kado ’bädri amaro rota. ³ Màle taliatokpe ono ri a’done ago tu cini si, ago maye aro’boya amba miri. ⁴ “Male ko saa miro enjine amba, caoko, ma mi eji yauni si ago ta amaro erine aree. ⁵ Musu mano ono te ’di koziro rriti ozoozoro, nda ’ba Yudai te amone kyilaro ’bädri cini yasi, ago nda kpani dri’ba gboko Nazareta’bai ro. ⁶ Nda ojo kpate Yekalu enjine, ago märu nda te. ⁸ Ondro nyeji mano ono te, mi andivo minina ŋgase cini mìkicu nda be tana ro tana ’da ni nda resi.” ⁹ Yudai letadri ŋga kicu ono rote ago atayite ekye, ta cini ono orivoya taŋgye yi. ¹⁰ ’Dooko Wari’ba atate Paulo ri ta itine, ago Paulo atate ekye: “Mänite mirite vureope’ba ro Tu’de ono dri ndroa na amba, ago ma orivoya yai’dwesi ta andivo maro ro itine mi kandra. ¹¹ Andivo miro mini ṛote, u’duna ko ndrani ’butealo foritu drisi moyite Yerusalema ya mätune. ¹² Yudai usuyi ma kote ugu kaladiṛivoya ’dialo aza be Yekalu ya, usuyi ma kpa ko ugu ya lidri ro eŋgavoya, ca zoitaeriro ya kode ca ’bakici ya. ¹³ Ànya ka’dayi taŋgye tase ànya kikicuyi mabe tana ro kpa ko miri. ¹⁴ Ma ta ono o’bane unine miri: Ma Lu zutui amaro ro mätuna ugu oso si Liti Opi ro se ànya ekye kowe yi ono vo. Oko mama kpate ŋgase cini egyibe Ota Musa roya ago bukui nebii roya ono ya. ¹⁵ Ma kpa mio’ba alo ono be Lu ya oso ànya se kwoi ka’do be sina ronye, anjioko lidri se äzibe kado ago kozi efona ’da ni avo yasi. ¹⁶ Ago ma andivo mojote ondoalo a’done tavousu ŋgye ya robe Lu kandra ndi lidri be. ¹⁷ “Ndroa amba a’do maro i’do Yerusalema ya vosi, moyite lau parata ugune lidri modo maro ri ago kpa tori olone. ¹⁸ Ondro ma ugu ta ono oye nonye oko, ànya usuyi ma te Yekalu ya la’bi ’diwäṛiro ondena märi vosi owo. Lowa i’do mabe ago tagburu i’do. ¹⁹ Oko rukä Yudai ro ni wari Asia ro yasi orivoya lau; andivo ànyaro beṛo ikyine mikandra ànya kikicuyi ma robe ondro ànya ka’doyite ta aza be malomvo owo. ²⁰ Kode lidri gi noŋwa kwoi kitiyi taenji se ànya kusuyibe mayebe koziro tuse medrete Taäyi’bai kandra ana si, ²¹ e’be gialo ta alodi medrete tuse medrete ànya kandra ana si makye: ‘Nya vure maro opena ondro ono ta taoma se ekye avo efona ’da ono rota.’ ” ²² ’Dooko Felikisi se ni ta Liti Opi ro ono ṛote, shwe tu te mileya. Atate ànyari ekye: “Ondro otaozo’ba kyila’bai ro Lusia kesate oko, marana tu vure ro ’da.” ²³ Nda ta dri’ba kyila’bai ro se kabe vo Paulo ro ondre ana te nda gagane, ago dritai ozone ndäri ago ole ozone bereazii ndaro ri ŋga ozone ta lemeri ndaro rota. ²⁴ U’du fere vosi oko Felikisi ikyite toko ndaro Durusila be, se orivoya Yuda yi. Nda zo lazo te Paulo vo ago eri ta ndaro te ondro nda ka ugu ta iti ta taoma Kristo Yesu ya rota owo. ²⁵ Oko ondro Paulo kugu ta iti te ta takado rota, ta andivo rita rota, ago ikyi Tu Vureopero rota oko, Felikisi a’dote turituri ro ago atate ekye: “Yauono nyoyi amiro ri, mago mäzina mi ’da ondro manji tuna te owo.” ²⁶ Ago tausu ya nda orivoya mio’ba be ekye Paulo ozona parata ’da iri tana ta ono ro nda zi Paulo te ondoalo atane nda be. ²⁷ Ndroa ritu kälävute oko Porekio Feseto gorite vo Felikisi roya wari’ba ro. Oko tana Felikisi le Yudai i’dwene ndi nda e’be Paulo te ’du kamba ya.

¹ U’du nätu Feseto kesabe wari ya vosi oko, nda oyite ni Kaisaria yasi Yerusalema ya. ² Lau kohanii ’desi ndi dri’bai Yudai robe itiyitate Paulo lomvo. Ànya ejiyi Feseto te ³ takado oyene ànyari Paulo ezi si Yerusalema ya, tana ànya äyiyitate nda ufune liti ya. ⁴ Feseto zatadrite ekye: “A’ba Paulo te kamba ya Kaisaria ya ago andivo maro ma oye ogone lau ndriro. ⁵ Mì’ba dri’ba amiro koyiyi Kaisaria ya mabe ago kikicuyi mano ana ondro nda koye ŋga aza te koziro owo.” ⁶ Feseto go rite u’duna njidriena kode ’butealo ànya yibe ago ’dooko oyite Kaisaria ya. Kyenonosi oko nda rite vo vureopero ya ago ozotate Paulo ezine. ⁷ Ondro Paulo kesate oko, Yudai se kikyiyibe ni Yerusalema ya ana edreyite gbikyi nda lomvosi ago etoyi takozi amba itite nda lomvo, se taŋgye i’do kigye. ⁸ Oko Paulo ititate andivo ndaro ta ekye: “Maye ŋga koziro aza kote Ota Yudai ro lomvo, kode Yekalu lomvo kode ’Bädri’ba Roma’ba ro lomvo.” ⁹ Oko Feseto le Yudai i’dwene, ago nda eji Paulo te ekye: “Milena gi’da oyine Yerusalema ya vure miro ape robe makandra lau ya?” ¹⁰ Paulo atate ekye: “Ma edrevoya yau vo vure opero ’Bädri’ba ro modona kandra, se beṛo vure maro opene kigye owo. Maye ŋgakozi aza kote Yudai ri, ago mi andivo minite kado. ¹¹ Ondro mepere Ota te ago maye ŋga azaka te se egyena odra ndi mädri, märi taejine i’do voopaza ni kigyesi. Oko ondro taŋgye ka’dote i’do tase itibe malomvo ono ya, ’diaza unina ko ma ozone ànyari. Moyina ndi ’Bädri’ba re.” ¹² ’Dooko Feseto käyitate taäyi’bai ndaro be oko, zatadrite ekye: “Milebete ’Bädri’ba ondrene nyoyina ndi ’Bädri’ba re.” ¹³ Tu aza si oko ’Bädri’ba Aguripa ndi Berenisa be ikyiyite Kaisaria ya mede oyene Feseto ri. ¹⁴ Ori ànyaro lau u’duna amba vosi oko, Feseto iti ta Paulo rote ’bädri’ba ri ekye: “Mano aza orivoya noŋwa se Felikisi e’bete kamba’ba ro, ¹⁵ ago ondro moyite Yerusalema ya oko, kohanii ’desi Yudai ro ndi ’di’desii be itiyitate nda lomvo ago ejiyi ma te nda ezane. ¹⁶ Oko mititate ànyari makye a’do ama Roma’bai ro ko mano se ikicube taenji aza ro ozone teinye ndäri ta ata ako miya miya nda kicu’bai be ago ta andivo ndaro ro ata ako ŋgakicu ono lomvo. ¹⁷ Ondro ànya kesayite noŋwa oko, meleye ṛo ko, kyenono si marite vo vureopero ya ago mozotate mano ana locine. ¹⁸ Kyila’baazii ndaro edreyite kuru, oko ànya kicuyi nda kote takozi aza se taenjiro musu tana be rota. ¹⁹ Ànya cini a’dote kaladiṛivoya nda be ta mätu modo ànyaro rota ago ta mano se äzibe Yesu ono rota, se drate, oko Paulo ka ata ekye nda orivoya lidriidriro. ²⁰ Musu ta aza kote atane ta nonye ono ta, ago meji Paulo te kode nda a’dona ndi olebe oyine Yerusalema ya ago vure tase kwoi ro ape robe lau. ²¹ Oko Paulo ejitate vure ndaro ugune vure ’desi ya, nda ejitate nda gagane ago ’Bädri’ba ri ni vure ndaro opene. Ago mozotate ndäri a’done vookwa’ba zele madale mazona nda gwo ’Bädri’ba re.” ²² Aguripa atate Feseto ri ekye: “Andivo maro male ta mano ono ro erine.” Feseto zatadrite ekye: “Nyerina ta ndaro ’da ondo.” ²³ Tu kinjo si oko Aguripa ndi Berenisa be ikyiyite taoro amba be ago ciyite ya zo kalakoto roya ndi kyila’bai se ’desii ro iyi yibe ndi lidri dri’bai ’bakici ro yibe, Feseto ozotate, ago oloci Paulo te. ²⁴ Feseto atate ekye: “’Bädri’ba Aguripa ndi ’dicini se orivoya ama be noŋwa ono be: Mindre mano gi ono se lidri cini Yudai ro a’dote kyilaro sina, kpa noŋwa ago kpa Yerusalema ya. Ànya itiyi tate märi nda lomvo, ànya treyite ekye beṛo ndäri odrane. ²⁵ Oko musu ta aza ko se nda koyebe koziro nda o’baza odrane. Ago nda andivo ejitate ’Bädri’ba ondrene, maratate nda ozone. ²⁶ Oko ma ta gya aza ako egyine ’Bädri’ba ri. Ago mezi nda te ami kandra, ago ndrana ro mikandra ’Bädri’ba Aguripa! Tana vure ndaro ondrena vosi, ma’do robe ta aza be egyine. ²⁷ Tana landre ko kadoro märi kamba’ba aza ozone teinye tase itibe nda lomvo tana ka’da ako ŋgye.”

¹ Aguripa atate Paulo ri ekye: “Ozotate miri ta itine ta modo miro rota.” Paulo kanda drí andivo ndaro rote ago ititate andivo ndaro ta nonye ekye: ² “’Bädri’ba Aguripa! Mandrebe andivo maro te kandrakado be tu ondro ono si ma ta maro itina andivo maro ta mikandra ṛo ni tase cini Yudai kicuyi mabe sina yasi. ³ Ndrana mini la’bi Yudai ro tana ṛote kado ndi kaladiṛi be. Ka’do inye meji mi ta maro erine yaiŋgyi si. ⁴ “Yudai cini niyi ori se maribe agoanji si tana te. Ànya niyi ori se maro maribe tana te cini, käti ’bädri modo maro roya ago ’dooko Yerusalema ya. ⁵ Ànya niyi ṛote ondoalo, ondro ànya koleyi ndi tazevona edrene, etovona ṛoni ori käti maro se ma’dobe alo aza gboko oye’ba ndra mätu amaro ro, Parusii ro. ⁶ Ago yauono medre noŋwa vure maro opene ta mio’ba se mabe sina tase Lu ko’babe zutui amaro ri rota. ⁷ Ṛo ni ŋgase modona ’bakalai ’butealo foritu amaro ro mio’ba be a’done sina ro, se ànya kayibe ugu Lu mätu kitu si ago kpa ŋgäkyi si tana ro owo. Ago ta mio’ba ono rota, mise fopara ono, anjioko Yudai kayi ugu ma kicube ono tana ro! ⁸ Ami se noŋwa ono nyusu gwo rritiro taomane tase Lu kabe avo lofo ono ya etaya? ⁹ “Ma andivo musutate anjioko beṛo märi ŋga cini se mänibe oyene ävuru Yesu Nazareta ro lomvo oyene. ¹⁰ Ono ni tase mayete Yerusalema ya owo. Märu drikaca teni kohanii ’desi rigyesi ago mavo lidri amba Lu rote kamba ya; ago ondro ape vure ànyaro te ufune oko, ma alo aza se koletadri odra ànyaro robe owo. ¹¹ Tuna amba meza ànya te zoitaeriro yasi ago mojote ànya o’bane taoma ànyaro kalana ogane. Ma’dote kyilaro ànya yibe ago moyite ’bakici atra ro yasi ànya ezane. ¹² “Ta ono ta moyite Damaseka ya drikaca be ndi ota be ni kohanii ’desi resi. ¹³ Mise fopara ono, te oso kitudiri ronye liti se kabe oyi Damaseka ya dri oko, mandre ŋgaeyi läguläguro ndrani kitu drisi te, kikyi ni vokuru yasi ago eyivote gbikyi ma lomvosi ndi lidri se kayi ugu ababe mabe ana yibe. ¹⁴ Ama cini mà’dete vuru, ago meri ata te ka ata märi kala Ebere si ekye: ‘Saulo, Saulo! Nya ma eza etaya? Nya andivo miro oye koziro migo nya ugu mi lo’be, oso ’daŋgo kabe andivo iro lo’be dofo kuzupi anyaro ro lomvo ronye.’ ¹⁵ Meji tate makye: ‘Mi a’di owo ya Opi?’ Ago Opi zatadri maro te ekye: ‘Ma orivoya Yesu, se nyabe ezana ono owo. ¹⁶ Oko miŋga kuru nyedre pa miro dri, maka’darute miri mi o’bane ruindu’ba ro märi. Miri tase mindrebe ta maro ta tu ono si ono tana itine azii ri ndi tase maka’dana ’da miri mileya be. ¹⁷ Mapana mi ’da ni lidri Yisaraele ro rigyesi ndi Atrai se mabe mi ozo ànyare be. ¹⁸ Miri mi ànyaro upine ago mi ànyaro ezane ni vouni yasi ŋgaeyi re ago ni mbara Satani ro yasi Lu re, ago taoma ànyaro maya si e’bene ànya ’da takozii ànyaro ta ago usunayi vo ànyaro ’da lidri onjionji Lu ro lako.’ ¹⁹ “Ndi inye, ’Bädri’ba Aguripa mari kote rulofo ni vo’buyakuru yasi ono tana oroako. ²⁰ Mape tate käti Damaseka ndi Yerusalema be ya ago Yudai cini ya ago kpa Atrai lako, anjioko beṛo ànyari drietane ni takozi ànyaro yasi ago egone Lu re ago ŋgase ka’dana ’da ànya etadrite ’do oyene ayani. ²¹ Ta ono ta Yudai ruyi ma te ’dooko ma te orivoya Yekalu ya, ago ànya ojoyite ma ufune. ²² Lu ezi ma opa te le tu gi ono ya, ago medre mikandra noŋwa ugu tazevo maro edrene ’dicini ri, ’di giṛiŋwa ndi ’di ’desi be ri. Tase mabe atana ono orivoya kpa ni ŋgase nebii ndi Musa be katayi tana be ka oyebe ugu a’done owo; ²³ ekye beṛo Mesiya ri ruezane ago ṛo ni ’dise käti efone ni avo yasi owo, ta ŋgaeyi ŋgaoparo ro tana ayozana sina Yudai ri ndi Atrai be.” ²⁴ Ago Paulo kata tate andivo ndaro ta nonye oko, Feseto trete nda dri ekye: “Mi ŋgäbä yi, Paulo! Tauni amba miro ka ugu mi o’bani ŋgäbä ro!” ²⁵ Paulo zatadrite ekye: “Ma i’do ŋgäbä ro, mi se fopara ono, ma ugu lazo se ŋgye tana opena. ²⁶ ’Bädri’ba Aguripa! Mänina ndi atane miri teinye turiako, tana mini tase cini kwoi te, mänite endaro mini tavo ànyaro te cini, tana tase ono a’do kote da’doda’doro cuku ya, ²⁷ ’Bädri’ba Aguripa mima ndi ta nebii ro ya ya? Mänibe mima ndi!” ²⁸ Aguripa atate Paulo ri ekye: “Nyusu miro be tu gi fereŋwa ono si mi’bana ma ndi Kristo’ba roya?” ²⁹ Paulo zatadrite ekye: “Tu fereŋwa ya kode tu amba vosi, mätu maro Lu ri orivoya mi ta ndi vona se cini kayi ta maro erina tu ono si ono ka’do robe ma ronye, e’bena gialo nyori se kwoi ayani!” ³⁰ ’Dooko ’bädri’ba, wari’ba, Berenisa be ndi azii cini be ŋgayite kuru, ³¹ ago ugu oyivoya ni nasi vosi ànya atayite iyivoya ekye: “Mano ono ye ŋga aza kote nda ufune tana ro kode o’baza kamba ya.” ³² Ago Aguripa atate Feseto ri ekye: “Mano ono änina ndi onjine aba nda keji ta ko ’Bädri’ba ondrene owo.”

¹ Ondro aratate ämäri oyine Italia ya oko, ànya ozoyi Paulo te rukä kamba’bai robe Yulia rigye, nda orivoya dri’ba kyila’bai Roma’bai ro se äzibe “vo ’Bädri’ba ro ondre ro ’doro.” ² Moyite macite toŋbo ni Adramutiuma yasi ya, se te ṛo nja oyine vo lakazà lofo ro wari Asia ro roya, ago mädite. Arisetareku, Makedonia’ba yi ni Tesalonika yasi orivoya ama yibe. ³ Kyenonosi oko mesate Sidona ya. Yulia a’dote yauni be Paulo ri ago letadrite ndäri oyine bereazii ndaro ondrene, ago ŋgase nda kolebe ozone ndäri. ⁴ Ago moyite ni nasi, ago tana oli eligwo ämädri, mädite vose oli kozi i’do kigye telesi roŋga Saiporosi ro dri. ⁵ Mazadri gyi’desi rote ni Silisia ndi Pamefulia be yasi ago mikyite Mura se Lukia ya ana ya. ⁶ Ni nasi dri’ba usu toŋbo aza teni Alegezandria ya se ka ugu oyi Italia ya, ago nda ’ba ama te kigye. ⁷ Mädite liyaro u’duna amba rriti amba si äduro oko masate le ’ba ’desi Kenido ro lomvo. Oli laga ama zo oyine lozo ni vo ana yasi, ago mädite le vose oli kozi i’do kigye telesi roŋga Kurete ro roya, mugu lävute cuku Salemone ro lomvosi. ⁸ Mugu udite loto gyi kalasi ago rriti amba si mesate vose äzibe Voedrero Kado toŋboi ro ana ya, se ko lozo ni ’ba’desi Lasea ro lomvosi. ⁹ Marite madaro lau, madale a’dote rritiro udine mileya, tana karama ’didro’be ro tuna lävute nja. Ago Paulo edretavote ànyari nonye ekye: ¹⁰ “Mano kwoi, mandrebe oyi amaro ni nosi mileya a’dona ndi rritiro, lakazà enjiruna ’da ndi toŋbo be, ago adrana kpa.” ¹¹ Oko dri’ba kyila’bai ro lete ta otaozo’ba ndi toŋbo kuzupi be ro erine ndra, ni ta Paulo ro ri. ¹² Vo ana ko kado orine meṛi si kigye; ago amba lidri ro lete oyine ni gyi’desi yasi ago ojoyite ruutrine osane Foenesia ya, ondro ka’do gindi rritiako, tana ari robe meṛi si lau. Foenikia orivoya vo edrero yi Kurete ya miäwuvo lakole ŋgäṛiŋwa ro aŋgoya be ago mä’du ro aŋgoya be ya. ¹³ Oli liyaro ni ŋgäṛiŋwa drisi eto oli te, ago lidri usutate ekye änina ndi tase ànyaro ànya korayibe oyene, ago ànya eseyi ŋga toŋbo oyiro te ago diyite loto kototi wari Kurete ro lomvosi. ¹⁴ Ago ndriŋwa oko oli mbaraekye gbiriṛi be, se äzibe lakole mä’dudri ro ’Buzele be roya, elite ni roŋga drisi, ¹⁵ kanda toŋbo te, ago ’dooko te rritiro toŋbo ri udine driya oli mi, me’be ruutrite ago e’bete oli ri ni uŋgyine. ¹⁶ Musu vo edrevo aza te ondro mälävu ŋgäṛiŋwa dri roŋga giṛiŋwa Kauda rote owo. Ago lau rriti amba si, mojote toŋbo giṛiŋwa se toŋbo ’desi ya o’bane kadoro. ¹⁷ Ànya eseyite kototi ago ’dooko embeyi iba te anda gbikyi toŋbo lomvosi. Ànya te orivoya turi ro ukyi ànya umu’da kototi se siŋgwa be wari Libiya roya ya, ndi ànya isiyi boŋgo udiro gwo vuru ago ’bayi toŋbo teni oli ri ubine. ¹⁸ Oli gbiriṛibe rigi ’du oline, ago kyenonosi oko ànya etoyi lakazà azaka toŋbo ya lovote tesi, ¹⁹ ago tu kinja si oko ànya lovoyi lakazà toŋbo ya te tesi. ²⁰ Ago u’duna te amba mäni kote kitu ndi ’bi’bi be ondrene, ago oli ugu usite mbarasi. Äduro ama te mio’ba ako ta ruopa rota. ²¹ Ondro lidri korite tuna amba ŋgaonya ako oko, Paulo edrete ànya lako ago atate ekye: “Mano kwoi, aba nyeri ta maro gwo ’da aba ṛo ko udine ni Kurete yasi; aba mänina ko ŋgase cini kenjirube ago kujebe kwoi ijene. ²² Oko yauono ma rulo’ba ämiri, a’done yaiŋgyibe. Alo aza amiro ri adri ndaro ijene i’do, e’be gialo toŋbo ayani. ²³ Tana ŋgäkyibe malaika Lu se ma ni nda ro ago se mabe mätuna ikyite mare. ²⁴ Ago atate ekye: ‘Paulo, nyuturi ko! Beṛo miri edrene ’Bädri’ba kandra, ago Lu takado ndaro miri si nda pa adri ànya se cini kayi ugu udi mibe kai rote.’ ²⁵ Nyà’do yaiŋgyi be mano kwoi! Tana mayitate Lu ya ta a’dona ndi oso itibe märi ronye. ²⁶ Oko äbina ama ’da kototi roŋga aza roya.” ²⁷ Ŋgäkyina te ’butealo fosu ago oli gbiriṛibe ka drigba ugu ama ubi Gyi’desi Mediteraneana drisi. Te oso o’bwaro oko toŋbo’bai kusuyi iro be ekye mesate loto kototi. ²⁸ Ago ànya voyi iba ŋgaläŋgyiläŋgyi ro embe si kigye te oci gyi ro ojoza ago usuyi oci gyi ro cite kpikpina kama alo ’buteritu (120), fere voigyesi ànya ojoyi kpate ago usuyi ocina te kpikpina ’butenjidriesu (90). ²⁹ Ànya te orivoya turituri ro ukyi toŋbo o’beru’da kuni lomvo, ago ànya evoyi logo ŋga oyiro su teni kundu toŋbo ro yasi ago mätuyite ta voiwi rota. ³⁰ Ago toŋbo’bai ojoyite vo opane ni toŋbo yasi; ànya voyi koṛoŋbe te gyi ya ago yeyi miomba te osoago ànya kayi oye logo ŋgaoyiro azaka evona ni mile toŋbo ro yasi. ³¹ Oko Paulo atate dri’ba kyila’bai ro ri ndi kyila’bai be ekye: “Ondro toŋbo’bai koriyi kote toŋbo ya ami te mio’ba ako ta ruoparo ta.” ³² Ago kyila’bai loyi iba se käti koṛoŋbe be ana te ago e’beyite oyine. ³³ Teinye ’buzevo osiako, Paulo lo’barute ànya cini ri ŋga aza onyane; ekye: “Mirite yauono u’duna ’butealo fosu, ago tu gi cini kwoi ya mìnya ŋga aza kote. ³⁴ Ka’do inye, molo’baru ämiri ŋga aza onyane; tana nyàdri robe, tana ca drikyiri alodi drî amiro ro ri ruenjine i’do.” ³⁵ Ta ono ugu atana vosi oko, Paulo ru ambata aza te ozo aro’boya te Lu ri ànya cini milesi, wa te, ago eto onyana te. ³⁶ Ànya a’dote agoago be ago vo ànyaro cini alo alo nyàyi ŋgaonya kpate. ³⁷ Ago oti amaro cini toŋbo ya orivoya kama ritu ’butenjidrieri fonjidrialo (276). ³⁸ Ondro ŋgaonya kojo ’dicini te oko, ànya ’bayi toŋbo te a’done tefe inya cini lovo si gyi’desi ya. ³⁹ Ondro vokiwite oko, toŋbo’bai niyi wari ana kote, ago ànya ndreyi cuku aza te kototi be ago rayitate ondro ka’do ndi rritiako ànyari te toŋbo ubine lau. ⁴⁰ Ago ànya loyi boŋgoi ŋgaoyiro te ago e’beyi ànya te ocine gyi’desi ya, ago tuna gi ana si ànya onjiyi iba se kabe boŋgo toŋbo ro o’bana ni udine te. ’Dooko eŋgayi boŋgo udiro te mile toŋbo roya tana oli kubi toŋbo robe mileya, ago mugu oyite kototi. ⁴¹ Oko toŋbo ’berute kototi siŋgwa be lomvo ago lelete; mile telesi toŋbo ro cite akpo ago ni kote ruushwene, ago telesina kundu yasi laŋgote ronyoronyo ni gbulä gyi ’desi ro ri. ⁴² Kyila’bai rayitate kamba’bai cini tufune, ni ànyari ugu elevoya kototi ukyi opayivo ’da. ⁴³ Oko dri’ba kyila’bai ro lete Paulo opane, ago nda laga ànya tezo ta ono oyevoya, nda ozo tate lidri cini se kuni gyi ele te ri efone ni toŋbo ya ago elene kototi; ⁴⁴ Ago anjokona soyite, ruyi ice kyelekpe te ndi ŋga azaka se kotoŋgorube ni toŋbo yasi be. Ago ama cini mapavote londroro oso inye.

¹ Ondro mesate londro ro kototi oko, musu vona gwo anjioko äzi roŋga ana te Maleta. ² ’Ba’bai vo ana ro a’doyite bereazi ro ämäri, tana ’bu eto u’dite ago vo i’dwe tawi, ago ànya toyi asi te ama cini ri owine ago ruyi ama te yai’dwesi. ³ Paulo oto drî tiza rote ago nda ka o’bana asi ya oko, ini efote ni voeme ri kigyesi ago baṛirute drí ndaro ya. ⁴ ’Ba’bai ndreyi ini te leyivoya drí Paulo roya ago atayite azi ri ekye: “Mano ono a’dote ṛo ’diufu’ba yi, oko taŋgye le ko ndäri orine, apa nda gica ni gyi’desi yasi owo.” ⁵ Oko Paulo kpe ini gwo aviri asi ya teinye ini ye ŋga aza kote koziro ndäri. ⁶ Ànya riyite nda okwane kode vona ogana ’da kode nda o’dena ’da ndri vuru avo ro. Oko kokwayi vote madaro ago kondreyi ŋga aza a’do kote ndäri oko, ànya tweyi tausu ànyaro te ago atayite ekye: “Nda orivoya lu yi.” ⁷ Ko lozo ni vose ana lomvosi wari azaka orivoya se kuzupi na ni Pubelio, opi roŋga ro. Nda ru ama te yai’dwesi ago mà’dote ŋgwazi ndaro ro u’duna nätu. ⁸ Täpi Pubelio ro, u’duvoya kitapara dri, adravoro driu’bo be ago kundri kari ro. Paulo cite zo ndaro ya, mätute, ’ba drí ndaro te nda lomvo, ago ede nda te. ⁹ Ondro ta ono ka’dote oko, lidri adravoro se cini roŋga ana dri ikyite ago edete. ¹⁰ Ànya ozoyi ŋgapäṛi amba te ämäri, ago ondro mà te ugu udi oko, ànya ’bayi ŋgase ama be lemerina be iyi te toŋbo ya ta aba amaro rota. ¹¹ Imba nätu vosi mädite toŋbo si ni Alegezandria yasi, toŋbo se äzite, “Lu Lezoro” se rite meṛi si roŋga ya. ¹² Mesate ’bakici Surakuse roya ago màrite lau u’duna nätu. ¹³ Ni nasi mugu udite ago mesate ’bakici Regiuma roya. Kyenonosi oli eto olite ni ŋgäṛiŋwa drisi, ago u’du ritu si mesate ’bakici Peteoli roya. ¹⁴ Musu taoma’bai azaka te lau se ejiyi ama te orine ànya yibe u’du njidrieri! ’Dooko mesate Roma ya. ¹⁵ Taoma’bai Roma ya eriyi ta amaro te ago ikyiyite le Vo Ŋgalogyero Apio roya ago utuyidri amaro te Zo Loliro Nätu ya. Ago ondro Paulo kondre ànya te oko, nda ye aro’boya te Lu ri ago a’dote agoago be ndra. ¹⁶ Ondro mesate Roma ya oko, aletadrite Paulo ri orine iṛe kyila’ba alo be ugu nda gagane. ¹⁷ U’du nätu vosi Paulo zi dri’bai Yudai ro se lau ana te voaloya. Ondro ànya kotoyikalate oko, nda atate ànyari ekye: “Yisaraele’ba azi maro, ma gica ta aza ako lidri amaro kode la’bi se musute ni zutui amaro resi lomvo, a’ba ma te kamba’ba ro Yerusalema ya ago ozo ma te drí Roma’bai roya. ¹⁸ Ma eji vosi Roma’bai leyite ma onjine, tana ànya usuyite maye ŋga aza kote odra egyeza mädri. ¹⁹ Oko ondro Yudai gayitezo oko, ta ’do ’ba ma te oyine ’Bädri’ba ondrene, ma gica ta aza ako lidri modo maro ro kicuza owo. ²⁰ Ono ni tase ma’debe ta ejine ami ondrene ago atane ami yibe owo. Taŋgyero, embe ma te nyori si nonye ta nda se lidri Yisaraele ro kabe mio’ba tana ro rota.” ²¹ Ànya atayite ndäri ekye: “Musu ta aza kote ni Yuda yasi ta miro ta, ago ’diaza amaro ikyi ko ni nasi lazo aza kode takozi aza be atane ta miro ta. ²² Oko màle ta miro erine, tana mänite vo cini ka ta ata gboko se nya’dobe kigye ono lomvo.” ²³ Ago ànya rayi tu te Paulo be, ago oti ànyaro amba ikyite u’du gi ana si vose Paulo kabe ugu ori kigye ana ya. Eto ṛoni kyenoŋbosi madale ŋgäkyi si nda edretazevote ànyari ta lazo ndaro miri ’bädri’ba Lu ro rota, ago nda ojote ànya leyene ta Yesu rosi ugu Ota Musa ro ndi taegyi nebii robe uzi si. ²⁴ Rukä ànyaro eleyete ata ndaro si, oko azaka leyizo taomane. ²⁵ Ago ànya oyiyite, leyi tadri kote ànyavoya. Tase Paulo katabe ono vosi se ekye: “Tori Alokado atate ṛo kado nebi Yesaya si ta zutui amiro rota. ²⁶ Tana nda atate ekye: ‘Nyoyi nyata lidri ono ri mikye: Nyerina ’da ago nyerina ’da, oko minina ko; Mindrena ’da ago mindrena ’da, oko mindrena ko. ²⁷ Tana drî lidri ono ro tote, ago ànya tisiyi bi ànyaro te ago ànya seyi mi ànyaro te, ukyi mi ànyaro ondrevo ’da, bi ànyaro eri ta ’da, ago drî ànyaro uni ta ’da, ago ukyi ànya egoyi ’da mare, Lu atani ago ukyi mede ànya ’da.’ ” ²⁸ Ago Paulo nde tate ekye: “Ka’do inye, ämiri ta ono unine, tana lazo Lu ro ŋgaopa ro azote Atrai ri. Ànya erina ’da!” ³⁰ Ndroana ritu Paulo rite vose nda kogyete andivo ndaro ri ana ya, ago nda ru ànya se kikyibe nda ondrene kai te yai’dwesi. ³¹ Nda pe miri ’Bädri’ba Lu ro ro tana te ago emba ta Opi Yesu Kristo rote, ugu taope te turiako ago dritai ro.