2 TIMOTEO

¹ Ni Paulo, lazo’ba Kristo Yesu ro ole Lu rosi resi, azote ta adri se a’ba tana te ṛo opene se ma’dote sina rudro’be Kristo Yesu be si. ² Timoteo, ŋgwa se mulu tawi ri: Lu Täpi ago Kristo Yesu Opi amaro kozo tai’dwero, yauni ndi taliatokpe be miri. ³ Ma aro’boya ozo Lu, se mabe ruindu rigye ya ŋgye si, oso zutui maro koyebe ronye. Ma aro’boya oye ndäri mate ta miro oyina ondoalo mätu maro ŋgäkyi ndi kitu be si ya owo. ⁴ Ma miendre miro tana oyina, ago male mi ondrene ya cini si, tana ma’do robe riyä amba be. ⁵ Ma taoma ŋgye se nya’dobe sina tana oyina, taoma se ladra miro Loisi ndi endre miro Yunisi ka’do kpate sina ’do. Mänite endaro anjioko nya’do kpate sina. ⁶ Ta ono ro ma tana logo drî miro ya ŋgapäṛi se Lu kozote miri drí maro o’ba si midri ’do mi’ba ka’do ’du lidriidriro. ⁷ Tana Tori se Lu kozobe ämäri ko ama o’baza turi ro; oko Tori mbara ro, ŋgalu ndi andivo rita be ro. ⁸ Ka’do inye, nya’do ko driupi ro, tazevoedrevoya ta Opi amaro rota; nya’do kpa ko driupi ro ta ma, kamba’ba ta Kristo rota ono ro. Oko, nyala’do rueza ta Lazokado rota, oso Lu kabe mi tomba tana ro ronye. ⁹ Nda pa ama te ago zi ama te a’done lidri modo ndaro, ko tase màyebe rosi, oko ta tausu modo ndaro ro ndi tai’dwero be si. Nda ozo tai’dwero ono te ämäri Kristo Yesu si teinye ’bädri etoako, ¹⁰ oko yauono aka’date ämäri ikyi ’Diopa’ba amaro, Kristo Yesu rosi. Nda pe mbara odra rote ago lazokado si nda ka’da adri oŋgwaako te. ¹¹ Lu ka’da ma te lazo’ba ro ago miemba’ba ro Lazokado opene, ¹² ago ta ta ono rota ma rueza ni ta kwoi ta no. Oko ma’do ko driupi ro, tana mäni nda se mayitate kigye ono te, ago mäni ṛote endaro nda orivoya mbara be ŋgase mäpäṛite nda rigye ta Tu ana rota ätine londro ro. ¹³ Nyäti atà taŋgye ro se memba mibe sina ’do ndi, ka’do taka’daro ro miri osone voigye, ago miri taoma ya ndi ŋgalu se orivoya amaro rudro’be Kristo Yesu be si ya. ¹⁴ Mbara Tori Alokado rosi, se kabe ori ama ya, nyäti ŋga kado se äpäṛite mirigye ’do. ¹⁵ Minite ’dicini wari Asia roya, Fugelu ndi Eremogene be kpa, nayirute ni maresi. ¹⁶ Opi kaka’da yauni katidri Onesiforusa ro ri, tana nda i’dwe ma te tuna amba. Nda a’do kote driupiro a’do maro kamba ya ta, ¹⁷ oko tuse nda kesabe dori Roma ya si, nda eto ma uṛite madale nda usu ma te. ¹⁸ Opi kozo yauni ndaro ndäri Tu gi ana si! Mini ṛote kado nda pa ma te liti amba yasi Epeso ya.

¹ Ka’do inye, mi ŋgwa maro, nya’do mbara ro tai’dwero amaro rudro’be ya Kristo Yesu be si. ² Miru ŋgaemba se nyeri ma be tana opevoya tazevoedre’bai amba kandra ’do, ago nyocope ànya lidri taŋgye’bai ri, se uninayi kpa ndi azii embane. ³ Nyezaru ama yibe oso kyila’ba ’diri Kristo Yesu ro ronye. ⁴ Kyila’ba se kabe kama iro oye dri’ba ndaro se kabe ugu ota ozo ’do usiza dro’beru kote taoye ori ’diawi robe. ⁵ Kyekye’ba se kabe umu kyekye ya unina ko ŋgapäṛi urune e’be gialo nda orona ota lutu. ⁶ Ämvuoso’ba se koye losi te mbarasi onyana doŋgo jalia ro käti. ⁷ Nyusu ta tase mabe atana ono ro, tana Opi ozona tauni ’da miri vona cini uniza. ⁸ Miyi ta Yesu Kristo ro, se eŋgate ni odra yasi, se orivoya ni zelevo Dawidi ro, oso embate Lazokado se mabe opena ya ronye. ⁹ Tana ma Lazokado ope, ma rueza ago embe ma kpate nyori si oso otapere’ba ronye. Oko ata Lu ro embe ko, ¹⁰ ago miŋgyi rriti ŋgacini rote ta lidri onjionji Lu ro rota, tana ànya ka’do robe kpa ŋgaoparo se kabe ikyi Kristo Yesu si ago kabe taoro äduako ezi robe. ¹¹ Ono orivoya ata ŋgye yi ekye: “Ondro màdrate nda be, màrina kpa nda be. ¹² Ondro mà gi’du ugu rriti iŋgyi, mìmirina ’di kpa ’da nda be. Ondro màga kala ndaro te nda ogana kala amaro kpa ’da. ¹³ Ondro mà’do ko ’diri, nda iro gi ’diri, tana nda ni ko kala andivo ndaro ro ogane.” ¹⁴ Nyologo ta ono tana lidri miro dri, ago nyozo ŋgaemba lämu’du ro drî ànyaro otana si Lu kandra ko kyila oyene ta atà rota. Se ye takado ko, oko ka gialo lidri se kabe taeri perena. ¹⁵ Nyojo mbara cini si mi ka’dane ŋgye Lu mile, oso losi’ba se drîna kupi kote ta losi ndaro rota ronye, se kabe lazo Lu ro taŋgye ro embana ŋgyero ronye. ¹⁶ Minaru pere ni ata luako’ba ro resi se ka gialo lidri pere lozo ni Lu resi. ¹⁷ Miemba nonye ono laba orivoya laza nyendero se kabe iza onya ronye. Lidri ritu se kembayi tase nonye ono be ni Umenaio ndi Fileto be. ¹⁸ Ànya e’beyi liti taŋgye rote ago uguyi taoma taoma’bai azaka ro gburute ugu ata si ekye efo amaro ni avo yasi tana kye ṛote nja. ¹⁹ Oko kotopa ŋgyiri se Lu kedrebe änina ko kandane; ago egyi ota kwoi te driigye ekye: “Opi ni ànya se orivoya ndaro kai te” ago “Nda se kabe ata ekye nda orivoya Opi ro beṛo ruonane ni ugu takozi oye yasi.” ²⁰ Zo ’desi ya lakaza saani ro; deŋbele ro, ndi dritoto robe orivoya, azakana edete ni mo’di ndi logo läguläguro be yasi, azakana ni ice ndi ludri be yasi; azakana ta tu lämu’du azaka rota, azakana losi ete oyero. ²¹ Ondro ’diaza ka andivo ndaro o’ba wäṛiro ni ŋgacini undiro kwoi risi, ayena losi lämu’duro ’da nda si, tana adi nda te ago te nja losi ’Desi ndaro ro oyeza, ṛote nja losi cini kado oyeza. ²² Mina taoye agoanji ro, ago miso taŋgye, taoma, ŋgalu ndi taliatokpe be vo, troalo ànya se ya wäṛiro si kayibe Opi uzi ta ŋgaoparo ta yibe. ²³ Oko minaru pere ni amaama ndi kalawasa tauniako si resi; mini ndi ànya kayi kalaope ezi. ²⁴ Ruindu’ba Opi ro beṛo ko kalaopene. Beṛo ndäri a’done yauni be lidri cini ri, miemba’ba kado ago yaiŋgyi be ro, ²⁵ nda se orivoya ata liyaro be ondro kate kyila’baazii ndaro drîna otana owo, a’dona Lu ozona kandrakado ’da ànyari drietaza ago ikyiza taŋgye unine. ²⁶ Ago ’dooko drî ànyaro ogona usuna takado ’da ago opanayi vo ’da ni abari kicu’ba ro yasi, se ru ànya te ago ’ba ànya te ole ndaro orone ono.

¹ Miyi ta ono kado tana rriti a’dona ’da tu äduro si. ² Lidri a’dona andivo iro lulu ro, yagäru be, driuŋgyi be, ago ŋgaodo be; ànya a’donayi ’da la’dao’da o’da ro, uti’bai oroako, aro’boya oyeako, ago mätuako; ³ ànya a’donayi ’da ŋgaluako, yauniako, kyere’bai ro, andivo rita ako ago siomba be; yanai osona ’da takado lomvo; ⁴ ànya a’donayi ’da ta ’diriako, takadoako, ovanayi ’da driuŋgyi be; ànya lunayi riyä awi ’da ndrani Lu drisi; ⁵ ànya urunayi mätu amaro ’da lomvo voro, oko oganayi mbarana zo. Minaru pere ni lidri nonye ono resi. ⁶ Azaka ànyaro koloci zo lidri ro yasi ago kayi drîuru ’ditoko mbaraako be se orivoya te ŋgaläŋgyi be ta taenji ànyaro rosi ago se orokalanate ole toto takozi rosi, ⁷ ’ditoko se ondoalo kayi ugu iyi emba oko se ni kote alona taŋgye unine. ⁸ Ago oso Yanayi ndi Yamebera be edrete ŋbi Musa mile ronye, lidri kwoi edreyi kpate ŋbi inye taŋgye mile, lidri se tauni drina ro ye losi kote ago se taoma na enjirute. ⁹ Ago ànya ri ushwene ga lozo te i’do, tana ’dicini unina ndi anjioko ànya orivoya drîako. ’Do ni ŋgase modona ka’dobe Yanayi ndi Yamebera be ri owo. ¹⁰ Oko miso miro te ŋgaemba maro vo, a’do maro vo, ndi a’do ori maro robe; mindre taoma maro te, yaiŋgyi maro, ŋgalu maro, rriti iŋgyi maro, ¹¹ rueza maro, ndi ta lomvoluwu maro robe te. Mini tase cini ka’dobe märi Anetiokia, Ikoniuma ndi Lisetra be ya te, ta ruezaro se koziro miŋgyibe ana! Oko Opi pa ma teni ànya cini yasi. ¹² ’Dicini se kolebe ori lu’ba ro rudro’bero Kristo Yesu ya orine ezana ndi; ¹³ ago lidri undiro ndi ’diodo’bai be ugunayi a’do ndi koziro para ndra, ugunayi azii odo ndi ago odonayi andivo ànyaro kpa. ¹⁴ Oko mi, miri ’du taŋgye se emba mi te ago mimate ŋgyiri kigye ya. Mini miemba’bai miro te, ¹⁵ ago miyi tana teṛo anjioko ṛoni tuse mibe ŋgagaŋwa rosi, mini Taegyi Alokado te, se orivoya ni mbarabe tavouni se kabe ’dilepe le taŋgaoparo re taoma si Kristo Yesu ya ozone miri. ¹⁶ Taegyi cini tavousuna ni Lu resi, ago ṛo orivoya kado taŋgye embaza, drîo’biza, taenji onaza, ago ugu taŋgaembaro ori ŋgye oriro embaza, ¹⁷ tana mano se kabe ruindu Lu ri ka’do robe embaembaro ago ko’de robe ree taoye cini kado oyene.

¹ Lu ndi Kristo Yesu be kandra, se opena vure ’dise lidriidri ro ndi avo be ro ’da, ago tana nda ka ikyi ’dimirine oso ’Bädri’ba ronye, mata mi ² lazo opene, ugu opene ’duro (tu kado kode ko kado ya), a’done nja ’di leyene, driotane, ago agoago ozone, miri ŋgaembane yaiŋgyi amba si. ³ Tu esana ’da se lidri ogana ’da zo tamiembaro ŋgye erine, oko osonayi ’da ole modo ànyaro ro vo ago kotonayi miemba’bai amba amba ’da andivo ànyaro ri se itinayi tase bi ànyaro kolebe erine ’da. ⁴ Ànya onanayiru ’da ni ugu taŋgye erivoya ago oganayi bi ànyaro ’da ta awi copecopero erine ayani. ⁵ Oko beṛo miri edrene ŋgyiri tu a’do cini na roya, nyiŋgyi rriti, miye losi taope’ba ro Lazokado opero, ago minde kama cini miro oso ruindu’ba Lu ro ronye. ⁶ Oko ma, tu esate adri maro ozoza ŋgapäṛi ronye Lu ri, tu esate märi, ori ono e’beza. ⁷ Maye kyila kado te, mande umukyekye te ago mäti taoma te. ⁸ Ago yauono ŋgapäṛi ŋgaopeṛe ro se ozobe märi ta ori taŋgye si rota ka ma kwote. Ŋgapäṛi ono Opi, vureope’ba ŋgye, ka oye ozone märi Tu ana si ago ko gialo märi, oko kpa vona se cini kabe ruka’da ndaro kwotena ŋgalu si kai ri. ⁹ Nyojo mbara cini si ikyine mare ndriro. ¹⁰ Dema lapate ago go lu te ’bädri ono ayani ago e’be ma te, ugu oyite Tesalonika ya, Keresekene oyite Galatia ya, ago Tito oyi kpate Dalematia ya. ¹¹ Toto Luka ni orivoya mabe. Miru Marako ago nyezi nda mibe, tana nda unina ndi ma opane losi ya. ¹² Mazo Tukiko te Epeso ya. ¹³ Ondro nyate ikyi oko, miru dhudhu maro se me’bebe Troasa ya Karepu be ’do, nyezi bukui kpa, ago para ndrana se egyibe kyini dri ’do. ¹⁴ Alegezanda toka’ba ye ma te pari koziro; Opi logona votaro ’da ndäri ta tase nda koyebe rota. ¹⁵ Nya’do vookwa be andivo miro ta ni ndäri, tana nda edrete ŋbi lazo amaro mile. ¹⁶ Tu käti maro vo vure ro ya si, ’diaza edre kote mabe magaga andivo maro te; vona cini e’be mate iṛe. Lu kologo taezana gi ko ànya dri! ¹⁷ Oko Opi rite mabe ago ozo ŋgatomba te märi, ago ma’dote mbara be lazo opene ŋgye Atrai cini ri erine, ago apa ma teni taezaro odra ro yasi. ¹⁸ Ago Opi opana ma ’da ni ta cini undiro risi ago uruna ma ’da londroro Miri ’Bädri’ba vo’buyakuru ro ndaro ya. Räṛu ka’do ndäri rri äduako ago äduako! Amen. ¹⁹ Mazo mede Pirisila ri ndi Akwila be ago katidri Onesiforusa ro ri. ²⁰ Eraseto rite Korineto ya, ago me’be Trofimusa te Miletu ya, tana nda orivoya adravo ro. ²¹ Nyojo mbara cini si ikyine teinye meṛi ri esaako. Eubulu, Pudena, Lino ndi Kulida be zoyi mede ànyaro ämiri, ago ’di cini azaka se Kristo’ba ro yeyi kpa inye. ²² Opi ka’do tori miro be. Tai’dwero Lu ro ka’do ami cini be.