2 TESALONIKA’BAI

¹ Ni Paulo, Sila ndi Timoteo be resi, lidri känisa ro Tesalonika ya ri, se orivoya Lu Täpi amaro ro ndi Opi Yesu Kristo be: ² Ka’do inye Lu Täpi amaro ndi Opi Yesu Kristo be kozo tai’dwero ndi taliatokpe be ämiri. ³ Ädrupii ago endreŋwai amaro, beṛo ämäri aro’boya oyene Lu ri tu cini si ta amiro ta. Ṛo kado ämäri oyene inye, tana taoma amiro kate ugu omba ndra ago ŋgalu ami alo alo ro azii ri kate ugu a’do parandra. ⁴ ’Doni tase ko’ba andivo amaro be a’done driuŋgyi be ta amiro ta känisai Lu roya owo. Mà driuŋgyi ta liti se nyàbe ugu yaiŋgyi ago taoma ’duro amiro rriti ndi rueza cini se nyàbe oyi kigyesi ono rota. ⁵ Ta cini ono kaka’dana anjioko vureope Lu ro orivoya ŋgye ago tase ka oyebe efone ni kigyesi anjioko ta amiro usina nda ’da. Miri ’bädri’ba ndaro roya, tase nyàbe ugu rueza ni rigye ono tana ro. ⁶ Lu oyena tase ŋgye ’da; nda ezina rueza ’da ànya se kabe ami o’ba ruezane dri, ⁷ ago nda ozona ŋgaopa ’da ami se nyàbe rueza ri ago kpa ämäri. Nda oyena ono ’da ondro Opi Yesu kate ruka’da ni vo’buyakuru yasi asilele roya malaikai mbaraekye ndaro be. ⁸ Nda ezana ànya se koga Lu zo ago se koroyi Lazokado ta Opi amaro Yesu ro kote ono ’da. ⁹ Ànya ezaruna ’da rueza äduako ya, ’dooko elewete ni Opi kandra ago ni ’desi fopara ndaro resi, ¹⁰ ondro nda kate ikyi Tu ana si räṛu usune ni lidri cini ndaro resi ago taoro ni vona se cini kabe taoma resi owo. Nyà’dona kpa ’da ànya se koro nda be ana lako, tana mìmate tazevoedre amaro ämiri ono ya. ¹¹ Ta’dota mà mätu ondoalo ta amiro ta. Mà Lu amaro eji ami o’bane kado ori se nda kuzi ami be kigye ono oriza. Ka’do inye nda mbara ndaro si koye ole cini amiro ta takado rota ago konde losi amiro taoma ro. ¹² Liti ono yasi ävuru Opi amaro Yesu ro usuna räṛu ’da ni ami resi, ago nyùsuna räṛu ’da nda resi tai’dwero Lu amaro ro ndi Opi Yesu Kristo robe si.

¹ Ta ikyi Opi amaro Yesu Kristo rota ago ta kalakoto amaro a’done troalo nda be rota: Mòlo’baru ämiri, ädrupii ago endreŋwai amaro, ² ko tavousu amiro ri a’done gburugburu ro kode wiriwiriro ata si ekye Tu Opi ro esate. Màle ko ämiri tausune ekye màta ta ono ni tuse màbe ugu taäŋgu ndi taope be ana si, kode mègyite taegyi ya. ³ Mì’ba ’diaza kodo ami ko liti aza yasi. Tana Tu Opi ro unina ko ikyine madale ogbo äduro a’dona lutu ago Nda se Kozi ana aka’dana ’da, se adite gehena ro. ⁴ Nda gbotona ’da vona se cini äzite lu kode ŋgase abe mätuna iyi be, ago o’bana andivo ndaro ’da para ànya cini drisi. Ndi ocina kpa ’da ago orina ’da vuru Yekalu Lu roya ago o’bana yi ’da a’done Lu ro. ⁵ Miti ta cini ono ṛote ämiri tuse mabe ami yibe si. Mìyi tana ko ya? ⁶ Caoko ŋga aza orivoya se kani ta ono o’ba a’do ako yau, ago mìni ṛote. Tu ŋgyena si oko Nda se Kozi ono landrena ’da. ⁷ Tandrwi taoye koziro ono ro ṛote nja losi oyevoya, oko tase ka oyebe a’done unina ko a’done madale nda se kabe lagana ’do anana lutu ni liti drisi. ⁸ ’Dooko aka’dana Nda se Kozi ono ’da, ondro Opi Yesu kikyite oko, nda ufuna nda ’da lawa kala ndaro rosi ago perena nda ’da ŋgaeyi ndaro si. ⁹ Nda se Kozi ono ikyina ’da mbara Satani robe ago oyena talaro ro ndi rubä miodo robe ’da, ¹⁰ ago oyena beti toto ŋgaodo koziro ro ’da ànya se ka oyebe ruenjine ri. Ànya enjiruna ’da tana ànya ruyi ago luyi taŋgye se a’done ŋgaopa be sina kote. ¹¹ Ago ta’dota Lu ezo mbara uje rote losi oyene ànya ya tana ànya komayi robe ta ŋgaodo roya. ¹² Tase kabe efo ni kigyesi anjioko vona se cini komayi kote taŋgye ya, oko a’do gwo riyä be ta takozi rota iyi, apena vurena ’da. ¹³ Beṛo ämäri aro’boya oyene Lu ri tu cini si ta amiro ta, ädrupii ago endreŋwai, ami se Opi kulube ono. Tana Lu nji ami te ṛo käti a’done ŋgaopa be mbara Tori rosi ami o’bane lidri alokado ndaro ta taoma amiro taŋgye ya rota. ¹⁴ Lu zi ami te ta ono ya Lazokado se màpebe ämiri si; nda zi ami te tana nyàla’do a’do ’desi Opi amaro Yesu Kristo ro robe. ¹⁵ Ka’do inye, ädrupii ago endreŋwai amaro, nyèdre ŋgyiri ago nyäti taŋgye se mèmba ami be sina, riti taope amaro si ndi taegyi amaro ya be. ¹⁶ Ka’do inye Opi amaro Yesu Kristo andivona ndi Lu Täpi amaro, se kulu ama be ago tai’dwero ndaro si ozo agoago okyeako ndi mio’ba ’duro be te ämäri ono, ¹⁷ kozo agoago ämiri ago kotomba ami ondoalo mìye ago nyàta tase orivoya kado robe ayani.

¹ Äduro, ädrupii ago endreŋwai amaro, nyä̀mätu ama ta, tana lazo Opi ro kugu rulari robe ndrindri ago äru robe taoro si kpa oso ka’dobe ami lako ronye. ² Nyä̀mätu kpa tana Lu kopa ama robe ni lidri kozi ago undiro rigyesi, tana ’dicini ma ko lazo ya. ³ Oko Opi orivoya ’diri, ago nda tombana ami ’da ago gagana ami ’da londroro ni Nda se Kozi ono ri. ⁴ Opi ko’ba ama taoyine ami ya, ago màma ndi endaro nyà gi ugu losi oye ago nyùguna tase màbe atana ämiri ono oyena ndi ’duro. ⁵ Opi kelepe ami tauni ndra ŋgalu Lu ro roya ago yaiŋgyi se ozobe Kristo si ya. ⁶ Ädrupii ago endreŋwai amaro, màta ami ävuru Opi amaro Yesu Kristo roya ruonane ni taoma’bai se kabe ugu ori tovo ro iyi resi se soyi kote ta miembaro se mòzobe ànyari ono vo. ⁷ Ami andivo mìni ṛote kado anjioko beṛo ämiri taoyene kpa oso màyebe ronye. Tana ama ko tovo ro tuse ama be ami yibe si. ⁸ Mä̀ru ŋga kote ni ’diaza alo rigyesi teinye awi ŋga ozoako driigye. Oko, màye losi te mbarasi, mùgu losi oyete kitu si ago ŋgäkyi si tana ukyi mà’do ’da ŋgaläŋgyi ro ämiri. ⁹ Màyete nonye, ko tana ama orivoya taŋgyeako päläti amaro urune; oko màyete nonye a’done taka’daro ro ämiri osone voigye. ¹⁰ Ama be ami yibe, mòjote ta itine ämiri màkye: “Nda se kogatezo losi oyene mì’ba konya ŋga ko.” ¹¹ Mà ta ono ata tana mèri ta be ekye lidri azaka orivoya ami lako se kayi ori tovo ro se yeyi ŋga aza ko oko kayi gialo loci losi lidri azi ro yasi. ¹² Ävuru Opi amaro Yesu Kristo rosi màta lidri kwoi ago mà ànya emba orine ŋgyero ago losi oyene ŋga usuza ori modo ànyaro rota. ¹³ Oko ami, ädrupii ago endreŋwai, beṛo ko ämiri okwane ni ugu takado oyevoya. ¹⁴ Ondro ’diaza ka’dote lau koro lazo se màbe ozona ämiri taegyi ono ya ono kote, mìndre nda kado ago mìye ŋga aza ko nda be, tana nda ka’do robe driupi ro. ¹⁵ Oko mìye nda ko kyila’baazi ronye; oko, mìtadrina oso taoma’bai azi ronye. ¹⁶ Opi andivo, se orivoya ni etovo taliatokpe amaro ro, kozo taliatokpe ämiri tu cini si ago taoye cini yasi. Opi ka’do ami cini be. ¹⁷ Ma modo megyi ta ono ni drí modo maro rosi: Mede ni ma Paulo resi. Ono ni liti se mabe taegyi cini onde sina owo; ono ni taegyi maro owo. ¹⁸ Tai’dwero Opi amaro Yesu Kristo ro ka’do ami cini be.