2 PETERO

¹ Ni Simona Petero, ruindu’ba ago lazo’ba Yesu Kristo ro resi. Ànya se taŋgye Lu amaro ro ndi Opa’ba Yesu Kristo si kusu taoma ndra te oso amaro ronye ono ri. ² Tai’dwero ndi taliatokpe be ka’do ämiri ndra ago ndra tana tauni amiro Lu uniro ago Yesu Opi amaro unina ro ono ro. ³ Mbara taŋgye Lu ro ozo ŋga cini se màlebe orine sina ori ŋgye mätu’ba ro rote tauni amaro nda se kuzi ama be ’desi ndaro ndi takado ndaro nda uni robe la’done rosi. ⁴ Liti ono yasi nda ozo ŋgapäṛi ’desi para liŋgyiekye se nda ko’ba tana be te ämäri, tana ta ŋgapäṛi kwoi rosi mipavo robe ni ŋgalovo se ’bädri ya kabe ’ditufu ono risi, ago nyàla’dona taŋgye a’do Lu ro ro ’da. ⁵ Tana ta gi ono ro nyojo mbara cini si takado adroane taoma amiro dri, ago takado amiro dri nyadroa tauni, ⁶ tauni amiro dri nyadroa andivo rita; andivo rita amiro dri nyadroa yaiŋgyi, yaiŋgyi amiro dri nyadroa a’do lu’ba ro; ⁷ a’do lu’ba ro amiro dri nyadroa ŋgalu ädrupii ro, ago ŋgalu ädrupii ro amiro dri nyadroa ŋgalu. ⁸ Kwoi orivoya ni a’do se ämiri a’done sina owo, ago ondro nyà’dote ànya be ndra, ànya o’bana ami ko a’done tovo ro oko nyà’dona losi oye oyero tauni amiro Opi amaro Yesu Kristo roya. ⁹ Oko nda se ka’do kote ŋga kwoi be orivoya oso ’diaza se mina ndre vo ko kadoro ronye. Nda orivoya miako ago ije tase äwäṛi nda be ni takozii se uku ri ana tana te. ¹⁰ Ka’do inye, ädrupii maro, nyòjo mbara cini si läzi Lu ro ami uzi ro ndi onji robe unine ’duro, ondro mìye te inye, nyè’bena taoma amiro ko alona. ¹¹ Liti ono yasi ozona takado ’da ociza ämiri Miri ’Bädri’ba äduako Opi amaro ago Opa’ba Yesu Kristo ro roya. ¹² Ago ka’do inye ondoalo mologona ta kwoi tana ’da ämidri, mìni ànya gica ago nyèdre gica ŋgyiri taŋgye se mìru be ono ya owo. ¹³ Musube orivoya kado märi ami teŋgane ta kwoi kogo koto robe ämidri oso mabe drigi ’du orivoya lidriidriro ono ronye. ¹⁴ Mänite anjioko me’bena lomvo oŋgwaoŋgwa ro ono ’da ndriro, oso Opi amaro Yesu Kristo kitibe märi ŋbelero ronye. ¹⁵ Ka’do inye mojona ’da mbara cini si liti usune ämiri ta koyi oyizana drî ya tu cini si odra maro vosi. ¹⁶ Mà’ba mi kote ta itiiti awi dri mà be ta ikyi mbarapara Opi amaro Yesu Kristo ro ro tana o’bana unine ämiri owo. Mi andivo amaro rosi màndre ’desi parandra ndaro te. ¹⁷ Ama orivoya lau tuse ozo taoro ndi ’desi be te ndäri Lu Täpi si ana si, tuse ata ikyite ndäri ni vo Lägulägu Liŋgyiekye yasi ekye: “Ono orivoya Ŋgwa modo maro ro se mulu tawi owo, ta ndaro si ma tawi.” ¹⁸ Andivo amaro meri ata ono te ikyivoya ni vo’buyakuru yasi, tuse ama be nda be ’bereŋwa alokado dri ana si. ¹⁹ Ago lazo se apete nebii si ana a’bate ŋgye ämäri. A’dona kado ämiri biogane tana erine, tana anya orivoya oso lamba kabe voeyi vouni ya ronye madale ’buzevo osina gwo ago tu etona gwo ago ŋgaeyi ’bi’bi kyenoŋbo ro ro eyina vo ’da ya amiro ya. ²⁰ Caoko, ndrani ŋga cini risi, ämiri tana oyine anjioko ’diaza unina ko taegyi nebii ro Taegyi ya tazevona edrene andivo ndaro si. ²¹ Tana lazo nebii ro ikyi ko ni ole lidri ro yasi, ago lidri orivoya ŋga rita Tori Alokado ro zele lazo se ànya kopebe ana ikyite ni Lu resi.

¹ Tu kyeno kai si nebii mieywe’ba efote lidri lako, ago kpa oso inye miemba’bai mieywe’ba ro efona ’da ami lako. Ànya ezinayi ta ’dienji ro ’da, taŋgaembaro se ko ŋgye, ago oganayi Miemba’ba se kogye ànya be zo, ago ànya ezinayi ruenji ndriro ’da andivo ànyaro dri. ² Ago amba osona ’da taoye koziro ànyaro vo; ago ta tase ànya kayibe oyena rota, azaka atanayi taundiro ’da Liti taŋgye ro lomvo. ³ Miemba’bai mieywe’ba ro kwoi orivoya yagäru’bai ago ànya litinayi ŋga ’da ni tase kowero ànya kayi ugu itina ämiri yasi. Vureope’ba ànyaro teṛo nja kyeno ago Tufu’ba ànyaro teṛo mi uŋbo. ⁴ Lu e’be malaikai se yeyi takozi be kote, oko vo ànya te gehena ya, se embe ànya te nyori si vouni ya, kayi ugu Tu Vureope ro kwote. ⁵ Lu e’be ’bädri se uku ana kote, oko ezo gyitändri te ’bädri ya lidri luako dri, ’dise nda kopabe toto orivoya Noa, se pe taŋgye te, ndi lidri njidrieri azaka be. ⁶ Lu pe vure ’bakicii Sodomo ndi Gomora be rote, za ànya te asi si, ago ’ba ànya te taka’daro ro tase ka oyebe a’done luako’ba ri ro. ⁷ Nda pa Loto mano kado, se a’dote rritiro ni taoye kozi lidri otaako’bai ro risi te. ⁸ Mano kado ana rite ànya lako, ago tu cini si nda ezarute ni tusu taoye undiro ànyaro ondrena ndi erina be risi. ⁹ Ago Opi ni ndi lidri lu’ba ro opane ni taojoro ànyaro yasi ago kani takozi’bai äti taezaro zele madale Tu Vureope rosi, ¹⁰ Para ndrana ànya se kabe oso taundiro lomvo ànyaro ro ŋgalovona vo ago kayibe drikaca Lu ro mawona iyi. Miemba’bai mieywe’ba ro kwoi orivoya driupiako ago mäwu’bà yi, ago ka’dayi taoro kote ’desii vokuru ro ri, oko ànya ’dayi ànya te. ¹¹ Ca malaikai, se orivoya mbara amba be ago orivoya aṛi be ndrani miemba’bai se mieywe’ba ro kwoi drisi, kicuyi ànya kote la’da o’da si Opi kandra. ¹² Oko lidri kwoi kayi taoye tauniako si, oso koronyai vocowa ro se ätite urune ago ufune ronye; ànya kayi ŋgase aza ànya kuniyi ko gotana la’da o’da si, utufuna ànya ’da oso koronyai vocowa ro ronye, ¹³ ago ozona rueza ’da ànyari ta taezaro se ànya kozoyibe rota. Ta riyä ro ànyaro orivoya ŋga aza oyene ṛo dritai ro kitu si se kojona ŋgaleme lomvo ànyaro ro ’da ’do; ànya orivoya driupi yi ago liku koziro be ànya kayite rudro’be ami yibe karama amiro ya owo, ànya luyi liti se ànya kayibe ami odo sina tawi! ¹⁴ Ànya leyi ko voondrene ŋga aza dri oko ’ditoko ronyi ro dri ayani, takozi leme ojo ànya ko alona. Ànya kayi lidri mbaraako loci abari ya. Ago ànya embayi ya ànyaro te a’done yagäru be. Anya orivoya latri Lu ro zele! ¹⁵ Ànya e’beyi liti ŋgye te ago ijeyi liti ànyaro te, ànya soyite liti se Balama ŋgwa Beora ro kurube vo, se lu te parata se nda kabe usuna takozi oyesi ¹⁶ ago a’bi drî ndaro te ta takozi ndaro rota. Doŋgyi ndaro atate ata lidri rosi ago ’bidri taoye amaama si nebi rote. ¹⁷ Lidri kwoi laba oso koro se gyi na sete ronye, oso ’dikolo se oli gbiriṛi be ŋgyite ronye, Lu eta vo te ànyari vouniekye gbiṛikyiri roya. ¹⁸ Ànya kayi ta ata driuŋgyi si ago kayi ta amaama ro ata, ago kayi taundiro ŋga lovo lomvo ro ro oye ànya se keto ta be ruopane ni lidri se kayi ori ’diwiri ro ori yasi uruza. ¹⁹ Ànya ’ba tao’ba dritai rote ànyari oko andivo ànyaro orivoya iyeäṛii taoye ’dienji robe, tana lidri orivoya iyeäṛi ro ŋga se aza kope nda te ṛe ri. ²⁰ Ondro lidri koparute ni ŋga ’dienjiro ’bädri ro risi ta Opi ago Opa’ba Yesu Kristo uni rosi, ago ’dooko ago äru kpa gwo to’di ànya se kope ànya be ṛe si, lidri gi nonye ono ori äduna a’dona te koziro ndrani se ànya koribe käti risi. ²¹ Aba a’dona ṛo kadopara ànyari orine liti taŋgye ro uniako ni unine ri ago ’dooko ruonane ni ota se alokado ozote ànyari ana yasi. ²² Tase ka’dobe ànyari ono ka’date anjioko taoni kwoi orivoya ŋgye se ekye: “Kokye ka ogo ŋgase nda ki’dwebe re,” ago ekye: “Kizwe se alasate ka ogo rugburune koro ya.”

¹ Bereazii se mulube ono, ono orivoya ni taegyi ṛiri megyibe ämiri owo. Taegyi riti ya mojote tavousu wäṛiro ya amiro ro teŋgane ta kwoi logona si drî amiro ya. ² Male ämiri atà se atabe kyeno nebii alokado si, ago ota se ni Opi ago Opa’ba resi ozobe ämiri lazo’bai amiro si tana oyine. ³ Käti ono, beṛo ämiri unine anjioko tui äduro si lidri azaka ka’daruna ’da se ori ànyaro iritate ŋgalovo ànyaro modona si. Ànya ugunayi ami ’da ⁴ ago ejinayi ta ’da ekye: “Nda ’batate ikyine, nda ’ba ta ṛo ko inye ya? Nda gaŋwaro ya? Täpii amaro dra rote kyeno, oko ŋgacini iro gi ’du oso ka’dobe o’ba ’bädri rosi ronye.” ⁵ Ànya ijeyi ota se Lu kozobe kyeno ana tana te lädruro, se a’ba vo’buyakurui ndi ’bädri be te sina. A’ba gyini teni gyi yasi ndi gyi be, ⁶ ago kpa gyi si, gyi gyitändri rosi, ’bädri se uku ana utufute. ⁷ Oko vo’buyakurui ndi gyini se yauono be ätite ata gialo Lu ro ono si, tana aza robe asi si. A ànya äti ta tuse apena vure luako’bai ro ’da ago utufuna ànya ’da sina si ta. ⁸ Oko nyìje ta ŋga alo ono ro ko, bereazii se mulube ono! A’do toto i’do mile Opi roya lakole u’du alo ndi ndroa kutu robe roya; ndäri ànya ritu ono ojorere. ⁹ Opi leye ko ni tao’ba se nda ko’babe oyevoya, oso azaka kabe usuna ronye. Oko nda orivoya yaiŋgyi be ta amiro ta, tana nda leko ’diaza alo ri ruenjine, oko nda le vona cini ri drietane ni takozi ànyaro yasi. ¹⁰ Oko Tu Opi ro esana ’da oso kugu ronye. Tu gi ana si vo’buyakurui ojena ’da kporo amba si, azana ŋgacini se ànya ya ’da asi si ago ’bädri ndi ŋgase cini kigye be okyena ’da. ¹¹ Oso a oye be te ŋgacini kwoi tufune oso ono ronye, beṛo ämiri a’done lidri eŋwani roya? Beṛo ori amiro ri a’done alokado ago odiodi ro to Lu ri. ¹² Oso nyàbe Tu Lu ro kwotena ono ronye, mìye ta ri mbarasi ago mi’ba anya kikyi ri ndri, Tu se vo’buyakurui ujena ’da asi si ago utufuna ’da sina owo, ago ŋga cini se vo’buyakurui ya alana ’da ni eme asi ro risi. ¹³ Oko mà tase Lu ko’ba tana be kwotena; se ni vo’buyakurui to’di ndi ’bädri to’di be, vose taŋgye a’dona ’da kigye. ¹⁴ Ago ka’do inye, bereazii maro, oso nyàbe Tu ana kwotena ronye, mìye ta ri mbara cini si a’doza wäṛiro ago taenjiako Lu mile ago a’doza liatokpero nda be. ¹⁵ Mìndrevo yaiŋgyi Opi amaro ro dri oso kandrakado se nda kabe ozona ämiri a’done ŋgaopa robe ronye, kpa oso ädrupi amaro se mulube Paulo kegyibe ämiri ronye, yete tavouni se Lu kozobe ndäri ana si. ¹⁶ Ono ni tase nda katabe taegyi ndaro vona cini yasi ondro nda kate ta ono egyina owo. Ŋga azaka orivoya rritiro taegyi Paulo roya se tavouniako’ba ndi lidri se ko ŋgyiri ro be kayi tazevona edrena kowesi, oso ànya kabe oyena vo azaka Taegyi ro yasi ronye. Ago kayi rueza ezi modo ànya ro dri. ¹⁷ Oko ami, bereazii maro, mìni ta ono ṛote nja. Ka’do inye, nyà’do vo okwa be, ukyi elepe ami ’da wairo wiri lidri otaako’ba rosi ago mì’de ’da ni vo edrero ŋgyiri amiro yasi. ¹⁸ Oko nyùgu omba ’duro tai’dwero ndi tauni Opi amaro ago Opa’ba amaro Yesu Kristo roya. Räṛu ka’do ndäri yauono ago äduako! Amen.