2 KORINETO’BAI
11 Ni Paulo lazo’ba Yesu Kristo ro ole Lu rosi resi, ago ni ädrupi amaro Timoteo resi. Känisa Lu ro Korineto ya ri, ago lidri cini Lu ro Akaya yasi ri. 2 Ka’do inye Lu Täpi amaro ago Opi Yesu Kristo kozo tai’dwero ndi taliatokpe be ämiri. 3 Mi’de mozo aro’boya Lu ri ago Täpi Opi amaro Yesu Kristo ro, Täpi yauniekye, Lu se ŋgaopa cini kikyi ni nda resi ono ri! 4 Nda kani ama opa rriti cini amaro yasi, tana mà’do robe mbara be azii se rriti aza ya opane, ŋgaopana gi se kpa alo mùsute ni Lu resi ono ugu oyena si. 5 Kpa oso ama ŋga be la’done rueza amba Kristo roya ronye, ago kpa oso inye Kristo si mà ŋgaopa para Lu ro ŋgaoparo la’dona. 6 Ondro mà rueza, ’do orivoya ta ami oparo ndi ŋgaoparo be; ondro apa ama te, ’dooko apa ami kpate ago ozo mbara te yaiŋgyiza yaiŋgyi si kpa ni rueza segi alona miŋgyibe ono risi. 7 Ago mio’ba amaro ami ya äshwe ko alona, tana mänite anjioko oso nyàbe kpa rueza amaro la’dona ronye, nyà kpa ŋgaopa se mùsube la’done. 8 Màle ta ono tana logone ämidri, ädrupii, ta rriti se ma’dobe sina wari Asia roya ta. Ŋgaläŋgyi se a’babe ämädri ono orivoya ’desi ago läŋgyiekye ago màna mio’ba cini oriro lidriidriro rote. 9 Mùsu ṛote anjioko ape vure amaro ṛote odrane. Oko ono a’dote nonye tana anjioko beṛo ko ämäri mio’bane andivo amaro dri, oko toto Lu dri, se kabe ni avo eŋga ono. 10 Ni rriti kozi odra ro yasi nda pa ama te; ago nda opana ama ’da, ago ma’ba mi amaro te nda dri anjioko nda opana ama ’da to’di, 11 oso nyàbe ama opa mätu amiro ama ta si ronye. Ago a’dona ndi inye anjioko mätu amba ta amaro ta azana tadrina ’da, ago Lu äṛuna ama ’da; ago amba räṛuna nda ’da ugu aro’boya ozo si ta amaro ta. 12 Ama orivoya driuŋgyi be anjioko tavousu ya amaro ro ka tavoedre ŋgye ämäri anjioko ori amaro ’bädri ono ya, ago ndrana bereazi amaro ami be imirite a’do ŋgye ndi taŋgye se orivoya ni Lu resi si. Màyete inye ko tavouni lidri rosi oko mbara tai’dwero Lu rosi. 13 Mà taegyi ämiri gialo ta tase mìnina ndi uzine ago unine rota. Ago mio’ba maro ya 14 oso mìni ta fere be ta amaro ta ronye anjioko mìnina ta cini ta amaro ta ’da kpeye, tana tu Opi amaro Yesu rosi mìnina ’da a’done driuŋgyi be ta amaro ta oso mà’dona ’da ta amiro ta ronye. 15 Ta ono si maratate endaro käti ono ami täkyine, tana nyà’do robe äṛu be ritu. 16 Tana maratate ami täkyine oyi maro Makedonia ya si ago kpa ego maro si, tana musu ŋgaopa robe ni ami resi ta oyi maro Yuda ya rota. 17 Ugu tavo ono ora si ma’do ṛoko ŋgyiri ya? Tuse mabe tavo maro orana, inye’do mara ànya te tavousu andivo o’ba rosi käti, atane ekye: “Owo, owo” ago “Hwa, hwa” saa alo si ya? 18 Endaro oso Lu kabe ni taŋgye ata ronye, tao’ba maro ämiri ko ekye: “Owo” ago “hwa.” 19 Tana Yesu Kristo, Ŋgwa Lu ro, se apete ami lako Sila, Timoteo ndi ma be si, ko orivoya nda se orivoya “Owo” ago “Hwa” yi. Oko nda orivoya “Owo” Lu ro. 20 Tana nda ni orivoya “Owo” tao’ba cini Lu ro ri. Ta’doro Yesu Kristo si “Amen” amaro atate räṛu Lu roya. 21 Ni Lu andivona owo se ’ba ama ni a’done tro ami yibe, a’done ŋgyiri rudro’be ya Kristo be; ni Lu andivona owo se di ama te a’done to, 22 se ’ba mberi yi kuzupi rote ämädri, ago se ozo Tori Alokado te ya amaro ya tao’ba ro ro ŋgase cini nda kodrobe ämäri ta. 23 Ma Lu uzi tazevoedre’ba maro ro, nda ni ya maro te! Tana male ko rriti ezine ämidri, ta’doro maratate ko oyine Korineto ya. 24 Mà ko ojo ami o’bane mbara si taomane; oko mäni ndi anjioko nyà edre ŋgyiri taoma ya. Mà ugu losi oye ami yibe ta riyä ami modo rota.
21 Ago musu tate ko ukyine amire kpa to’di ami o’bane tusuro. 2 Tana ondro ma’ba ami te tusuro e’bena a’di ma o’bane riyä roya? E’be gialo ’dina gi ma’babe tusuro ’do. 3 ’Do ni tase ’ba mabe taegyi ana egyine ämiri owo, male ko ukyine amire ma o’bane tusuro lidri gi alona ka oyebe ma o’bane riyä ro si. Tana mänite anjioko ondro ma’dote riyä ro, ’dooko ami cini kpate riyä si. 4 Megyi tate ämiri rriti ’desi si ago ya tusu rosi ago miendre amba si; tausu maro ko ami o’bane tusuro, oko ami o’bane ta unine anjioko mulu ami cini tawi. 5 Ondro ’diaza ko’ba ’diaza te tusuro, nda ye kote märi oko ṛo ami cini ri, kode azaka amiro ri, (ma ta ono atana tana male ko a’done siomba be nda dri.) 6 Ojote, tana manona ono ezate liti ono yasi amba amiro si. 7 Oko, yauono beṛo ämiri nda e’bene ago agoago ozone ndäri, tana ukyi nda a’do ’da tusuro ndra ago ozo vo’da tiṛi. 8 Ago ma ami eji nda o’bane unine anjioko nyùlu nda teṛo endaro. 9 Megyi taegyi ana te ämiri tana male ta unine kode nyèdre gindi ŋgyiri taojoro ya kode ami gindi orivoya nja ondoalo ŋgaemba maro orone. 10 Ondro nyè’be ’diaza te ta tase nda koyebe rota, me’be nda kpate. Tana ondro ma ’die’be; ondro ndi endaro, male ŋga cini e’bene, ma oyena Kristo kandra ta amiro ta, 11 Satani lagane zo ni a’dovoya drikaca be ämädri; tana mäni tavoora ndaro tana ṛote. 12 Ondro mesate Troasa ya Lazokado ta Kristo rota opene oko, musute anjioko Opi pi liti te ta losi lau ana rota. 13 Oko molo’be mi te tu, tana musu ädrupi amaro Tito kote. Ago maye mede te lidri lau ana ri ago mälävute Makedonia ya. 14 Oko aro’boya ka’do Lu ri! Tana rudro’be Kristo be si Lu ondoalo ka ama lepe riyä ’desi ŋgaopeṛe Kristo ro ya, Lu ka losi oye ama si, ta Kristo uniro kalariru robe vocini yasi oso ŋgaŋgutruro tägyi ndeṛiekye ronye. 15 Tana ama oso ŋga tägyi ndeṛiekye ozaro ronye se Kristo ozote Lu ri, se ka rulari ànya se abe opana ago ànya se kabe uje kai lako. 16 Tana ànya se kabe uje ri, ama orivoya tägyi be oso ŋga odra odra ro ronye, se ka odra ezi. Oko ànya se abe opana ri ama orivoya tägyi ŋgutru ro se kabe adri ezi. Ka’do inye, a’di ni tauni be ta losi nonye ono rota ya? 17 Ama ko oso amba azakana ronye, se kai lazo Lu ro oyena oso ŋgaogyero lagye fereŋwa be ronye, oko tana Lu zo ama ni, mà taope ŋgyero nda kandra, oso ruindu’bai Kristo ro ronye.
31 Inye’do ono wigwo osoago ama orivoya kpa to’di driuŋgyibe ta andivo amaro rota ya? Inye’do a’dona gindi ekye, oso lidri rukä ronye male taegyii ’dika’daro egyine ämiri kode ni ami resi ya? 2 Ami andivo orivoya ni taegyi se ama be sina owo, egyite ya amaro dri ’dicini ri unine ago uzine. 3 Ṛo orivoya ŋbelero anjioko Kristo andivo egyi taegyi ono ni ago zo te ama si, egyite ko iniki si oko Tori Lu lidriidriro rosi, ago ko kuni kalakparo dri oko ya lidri roya. 4 Mà ta ono atana tana ama taoyi be Lu ya Kristo si. 5 Ŋga aza i’do ama ya se ama o’bane atane makye ama orivoya mbara be ugu losi ono oyene. Tana mbara se ama sina ono kikyi ni Lu resi; 6 nda ni se ko’ba ama be mbara be ugu ruindune tao’baro to’di ri owo, se a’do kote ota egyiegyi rosi oko Tori rosi. Ota egyiegyiro kani odra ezi, oko Tori kani adri ozo. 7 Aga Ota te taegyi si kuni kalakparo dri, ago ŋgaeyi Lu ro efote tuse ozobe si. Läguna militi Musa ro dri ka’do gica fuyi oko, läguna a’do dri gi’du ndra ta’doro lidri Yisaraele ro ni kote mi ànyaro ezane ŋgye voondrene nda dri. Ondro ka’do Ota se kabe odra ezi ono ka’dote oko, ikyite ŋgaeyi be oso ono ronye, 8 ka’do inye ŋgaeyi se taoye Tori ro voro a’dona te mu’du eŋwanye ya? 9 Tana ondro ka’do tase kabe ta ’dikoziro ezi ono orivoya ’desi para; ka’do inye tase ’desi ndra kabe ŋgaoparo ezi ono a’dona te mu’du eŋwanye ya? 10 Mä̀nina ndi atane inye tana ta ŋgaeyi läguekye se ndra yauono rota, lägu se orivoya läguläguro kyeno ana kyete. 11 Tana ondro lägu se ana korite toto fere, ’dooko lägu se kabe ori äduako ono läguna te orivoya parandra! 12 Tana ama orivoya mio’ba ono be, ama orivoya turiako. 13 Ama ko oso Musa ronye, se ’ba boŋgo te militi ndaro ya tana ukyi lidri Yisaraele ro ondre ädu lägu se kabe ruonaona ana ro ’da. 14 Tauni drî ànyaro ro asete, ago tu gi ono si ono tauni drî ànyaro ro atakote ŋga mi tako ro gialo ono si ànya kayite ugu bukui tao’baro uku ro uzi owo. Ana boŋgo mi takoro te toto alo ondro lidri kodro’berute Kristo be owo. 15 Ca gi yauono, ondro ànya kuziyi Ota Musa rote boŋgo mi takoro ka gi’du tauni drî ànyaro ro tako. 16 Oko ondro ’diaza keza mite Opi re boŋgo mi takoro ndaro ana te. 17 Yauono Opi orivoya ni Tori yi, ago vose Tori Opi ro orivoya kigye, dritai orivoya kigye. 18 Ka’do inye vo amaro cini, ka ŋgaeyi Opi ro ka’da mi takoako si, ago ŋgaeyi gi alona ’do, ka ikyi ni Opi resi, se ni orivoya Tori yi, toza ama te a’do ndaro ya äduako ŋgaeyi para ndra ya.
41 Lu yauni ndaro si ozo losi Lazokado opero ono te ämäri oyene ago mozovo kote. 2 Màna ta cini dämbidämbiro te ndi taoye driupiro be; màye ta kote ŋgaodo si, ago màpe ata Lu ro kote kowero. Ŋgaeyi amba taŋgye rosi mà ori Lu mile ago mà ojo andivo amaro ka’dane ’dicini ri tavousu kado ya rosi. 3 Tana ondro ka’do lazokado se màbe opena ada’dote, anjioko ada’dote toto ànya se kabe uje kai ri. 4 Ànya mayi ta kote tana tauni drî ànyaro ro inite lu undiro ’bädri ono rosi. Nda ka ànya laga ni ŋgaeyi se kabe ugu voeyi ànya dri ondrevoya, ŋgaeyi se kabe ikyi ni Lazokado ta lägu Kristo ro rota, se lababe Lu modo ronye ono. 5 Tana mà ko ta ama andivo ro opena; mà Yesu Kristo ope oso Opi ronye, ago andivo amaro orivoya ruindu’bai amiro ta Yesu rota. 6 Tana Lu se katabe ekye: “Ŋgaeyi eyina vo ’da ni vouni yasi!” Ni Lu segi alona ko’ba ŋgaeyi ndaro be voeyine ya amaro yasi. Ŋgaeyi ono ka ama o’ba lägu ŋgaeyi Lu ro unine, se kabe lägu ni mi Kristo ro yasi. 7 Caoko ama se ma’dobe ŋgadriamba Tori ro ono be malabate oso lakaza ete ludri ro ronye, tana kaka’da robe anjioko mbara fopara orivoya Lu ro, ko amaro. 8 Ozo rriti te ämäri ondoalo, oko oronyo ama kote; tu azaka si wiriwiriro, oko ko mio’ba ako; 9 kyila’baazi orivoya amba; oko ama ko teinye bereazi ako; ago aye ca koziro pari tu azaka si, äfu ama kote. 10 Tu cini si mäŋgyi odra Kristo rote lomvo oŋgwaoŋgwa amaro ya, tana andre ori ndaro robe kpa lomvo amaro ya. 11 Ori cini amaro ya ama cini orivoya ondoalo rriti odra roya ta Kristo, tana andre ori ndaro robe lomvo oŋgwaoŋgwa amaro ono ya. 12 Se anjioko odra ka losi oye ama ya, oko adri ka losi oye ami ya. 13 Taegyi ka ata ekye: “Matate tana mamate.” Tori taoma ro gialo ono si mà kpa ata tana màma ndi. 14 Mäni ndi anjioko Lu, se eŋga Opi Yesu te adri ya ono, eŋgana ama kpa ’da kuru Yesu be ago uruna ama ’da, troalo ami yibe, le nda kandra. 15 Vona cini ono orivoya ta amiro ta, ago oso tai’dwero Lu ro kabe osa lidri amba amba ri ronye, ànya ozonayi räṛu ’da Lu ri mätu amba si ugu aro’boya oye be. 16 Tana ta’doro mòzo vo ko alona. A’do lomvo voro amaro ka gica ugu oŋgwa owo, caoko a’do amaro tori voro edena to’di ro tu cini si. 17 Ago rriti giṛiŋwa se màbe rueza ni rigye fere ono ezina ama ’da liŋgyi ’desi ndra äduako ya, kadopara ndrani rriti ri. 18 Tana mà mio’ba ko ŋgase ondrena ondre dri, oko ŋgase ondreako dri. Ŋgase abe ondrena ondre ka toto ori tuna fere, oko ŋgase äni ko ondrene ka ori äduako.
51 Tana mäni ndi mutuguṛi se mà be ori kigye, lomvo amaro ’bädri ono ro, kepereru ca riya, Lu orivoya zo be ämäri vo’buyakuru ya oriza kigye, ’ba se nda andivo kedebe, se orina ’da äduako ono. 2 Ago yauono mà lawaäfu, ago ole amaro si male ’ba amaro se kabe ikyi ni vo’buyakuru yasi beṛo osone ama lomvo; 3 osona si mä̀nina ko a’done lomvo ako. 4 Mà bedri ori mutuguṛi ’bädri ono roya mà leri lomvoluwu ruezaro usu be, ko ekye male lomvo amaro ’bädri ro totrine, oko anjioko male lomvo vo’buyakuru ro osone ama lomvo, tana ŋgase kabe oŋgwaoŋgwa ätwe robe adri si. 5 Lu ni se kede ama be ta ruutwe ono rota owo, ago nda ozo Tori ndaro te ämäri oso taka’daro ŋgase cini nda be sina vo ŋgaodroro ya ämäri ronye. 6 Ago ama ondoalo orivoya twi agoago be. Mäni ndi anjioko mà bedri ugu ori lomvo ono ya ronye, ama orivoya lozo ni ’ba Opi ro resi. 7 Tana ori amaro orivoya ta taoma ro, ko ŋgaondre si. 8 Ama orivoya agoago be mbara be ago ole amba si màle ’ba amaro lomvo ya e’bene ago a’done ’bäru Opi be. 9 Caoko, ndrani ŋga aza risi, màle ta amaro ri nda usine, kode ’ba amaro ya noŋwa kode lau. 10 Tana vo amaro cini beṛo efone Kristo kandra, ndäri vurena opene. ’Dialo usuna ŋgase ndäri a’done sina ’da, gi oso ŋgacini se nda koyebe ronye, kado kode kozi, ori ndaro lomvo ya si ronye. 11 Mäni takacina Opi turi rote, ago ta’doro mà ojo lidri leyene. Lu ni ama teṛo kpeye, ago mio’ba maro ya anjioko ya amiro yasi mìni ma kpate. 12 Mà ko ojo ta andivo amaro ro edrene ämiri kpa to’di, oko, mà gialo ojo kandrakado ozone ämiri a’doza driuŋgyi be ta amaro ta, tana nyà’do robe mbara be tadri ànya se kayibe driuŋgyi a’do lomvo ro lidri rota ago ko ta a’do ndaro ya yasi rota ozane. 13 Ondro ka’do ama orivoya drîako, anjioko orivoya ta Lu rota, ago ondro ka’do ama orivoya drî be, anjioko orivoya ta amiro ta. 14 Ŋgalu Kristo ro miri ama te, yauono mäni ndi anjioko ’dialo drate ’dicini ta, se anjioko vona cini la’do odra ndaro te. 15 Nda drate ’dicini ta, tana ànya se kabe drigi ori ono kote orine andivo ànyaro ri, oko toto nda se kodrabe ta ànyaro ta ago adribe ono ri ayani. 16 Etoni yau oyi gwo mileya, màpe vure ’diaza ro kote a’do lomvo ro voro. Sedri màpe vure Kristo rote a’do lomvo ro voro, oko yauono màye kote inye alona. 17 Ondro ’diaza odro’bete Kristo be, nda a’dote ’di to’di ro, a’do uku anarute, a’do to’diro ru vona te. 18 Vona cini ono Lu yeni, se Kristo si toza ama teni a’do kyila’baazii ro yasi a’done bereazii ndaro ago ozo losi te ämäri azii o’bene bereazii ro ndäri. 19 Lazo amaro anjioko Lu ka ugu lidri cini o’be bereazii ndaro ro Kristo si. Lu ru takozii ànyaro tana kote, ago nda ozo lazo se kabe ta iti nda kabe ànya o’be sina bereazii ndaro ro ono te ämäri. 20 Ama begi noŋwa ono, ma ugu ta ata ta Kristo rota, oso Lu andivona ka ugu ta ndaro ayona ama si. Mà rulo’ba ämiri vo Kristo roya; mì’ba Lu kotoza ami ni a’do kyila’baazii ro yasi a’done bereazii ndaro ro! 21 Kristo teinye takozi ako, oko ta amaro ta Lu ’ba nda te takozi amaro la’done tana rumora nda be si màla’do taŋgye Lu ro robe.
61 Ago losi oye amaro Lu be voaloya si ya, mà ami se ka’dobe tai’dwero Lu robe ono eji ko anya o’bane a’done ta awi ro. 2 Nyeri tase Lu kabe atana ekye: “Ondro tu kesate märi yauni ka’dazana ämiri oko, meri ami te, ondro tu kesate märi ami opaza mapa ami te.” Nyeri! Ono ni saa yauni Lu ro usu ro owo; ondro ono orivoya ni tu ŋgaopa ro owo! 3 Màle ko ’diaza ri taenji usune losi amaro ya, ago mà ojo ko o’de toromoga o’bana liti ’diaza roya. 4 Oko, ŋgacini màbe oyena ya màka’da ta te anjioko ama orivoya ruindu’bai Lu ro yaiŋgyi si ma ugu rriti iŋgyi, gboroto ndi rriti be. 5 A’bi ama te, avote kamba ya, amote ämädri; màye losi te ndra oyene drisi ago màrite teinye u’duako ago ŋgaonya ako. 6 A’do amaro wäṛi, tauni, yaiŋgyi ndi yai’dwe be si màka’da andivo amaro te a’done ruindu’bai Lu ro ro, Tori Alokado si, ŋgalu ŋgye amaro si, 7 lazo amaro taŋgye si si, ago mbara Lu rosi. Ama orivoya taŋgye be oso lakaza kyila oyero amaro ronye, ’digotaza ago andivo amaro gagaza. 8 Aro ama te ago aro ama kote, a’da ama te ago äräṛute. Aye ama te oso koweoga’bai ronye, caoko mà taŋgye ata, 9 oso uniako, caoko ’dicini ni ama te, oso ago ama te avo yi, oko oso nyàbe ondrena ronye, mà gi ugu ori. Eza ama ca, äfu ama kote; 10 a’ba ca tusuro, ama orivoya ondoalo yai’dwesi; màlandre te ŋgaako’ba ro, oko mà lidri amba o’ba ŋgaamba be, màlandre oso ama ŋga aza ako, caoko ama orivoya ŋgacini be. 11 Ku bereazii Korineto ya! Mà ata ŋbelero ämiri, màfo ya amaro te uŋbo ämiri. 12 Ama ko ni se kose ya amaro be ni ämiri owo; oko ami ni se mise ya amiro be ni ämäri owo. 13 Ma ata ämiri yauono oso ami ŋgwai maro ronye; ämiri kpa tausu alo ono ka’dane ayani ämäri oso ama be sina ta amiro ta ronye. Nyàfo ya amiro uŋbo. 14 Nyòjo ko a’done losioye’baazi ro taomaako’bai be, ŋgakado ndi ŋgakozi be uninayi a’done losioye’baazi ro eŋwanye ya? Ŋgaeyi ndi vouni be uninayi a’done troalo eŋwanye ya? 15 Kristo unina tadriolene Kicu’ba be eŋwanye ya? Ŋgase aza taoma’ba kala’dona voaloyasi taomaako’ba be ni e’di ya? 16 Yekalu Lu ro unina a’done tadriolebe lui taomaako’ba robe eŋwanye ya? Tana ama orivoya Yekalu Lu lidriidriro ro! Oso Lu andivo katabe ronye ekye: “Ma’bana ’ba maro ’da lidri maro be ago marina ’da ànya lako; ma’dona ’da Lu ànyaro ago ànya a’dona ’da lidri maro.” 17 Ago Opi ka kpa ata ekye: “Beṛo ämiri ànya e’bene ago nyelewe ami ni ànya resi. Mìye ta aza ko tase orivoya undiro be, ago märuna ami ’da. 18 Ma’dona ’da Täpi ro ämiri, ago nyà’dona ’da ŋgwàagoro ago ndiriŋwa ro maro, Opi mbaraekye kani ata nonye.”
71 Tao’ba se cini kwoi a’bate ämäri, bereazii se mulube kwoi. Ka’do inye, mi’de mäwäṛi andivo amaro ni ŋgase cini kabe lomvo ndi lindri be o’ba undiro risi, ago mì’de mà’do cu alokado ugu orine taoro si Lu ri. 2 Nyède vo ämäri ya amiro ya. Màye ’diaza kote koziro, mèpere ’diaza kote, mòjo kpa kote takado ’diaza ro urune. 3 Ma ko ta ono atana ami kozizana, tana oso matabe käti ronye, mulu ami tawi anjioko ama orivoya ondoalo troalo, kode mà ori kode mà odra. 4 Ma orivoya taoyi ndra be ami ya, ago ma driuŋgyi ’desi be ta amiro ta! Rriti cini amaro ya ma orivoya agoago be, ago ma te riyä ro ndra. 5 Ca esa amaro Makedonia ya vosi, mà’do kote loli aza be. Rriti a’dote vocini yasi, kalaope azii be be, turi be ya amaro ya. 6 Oko Lu, se kabe ni ya mbaraako tomba, tomba ama te, ikyi Tito rosi. 7 Ko gialo ikyi ndaro i’dwe ama te, oko taiti ndaro kpa ta tase nyotomba nda te rota. Nda ititate ämäri anjioko mìle ma ondrene, tana ami orivoya tusuro, ago ami orivoya nja ma gagane, ago yauono ma te orivoya yai’dwesi ndra. 8 Ondro ka’do waraga maro ana ko’ba ami gica te tusuro oko, ma kote tusuro tana megyi te. Sedri ma’do ndi tusuro, mandrebe anjioko waraga maro ana ’ba ami te tusuro, oko toto tuna fere. 9 Oko yauono ma orivoya yai’dwesi, ko tana ma’ba ami te tusuro, oko tana tusu amiro ’ba ami te taoye amiro tozane. A’do tusuro se ana Lu ye losi te sina, ta’dota màye ami kote koziro. 10 Tana a’do tusuro se Lu kabe losi oye sina ka rutoza ya ro se lepe ’di te ŋgaopa ya ezina, tana tusu i’do kigye! Oko tusu se a’do lidri ro voro kani odra ezi. 11 Mìndre tase Lu koyebe tusu amiro ono si ono, edete ami te a’done ya cini si, a’do nja si taŋgye amiro ka’dane! Taŋgyeako oso nonye, amo oso nonye, tavousu oso nonye, ŋgalu oso nonye, tadriole oso nonye ugu ŋgakozioye’ba ezane! Nyàka’da andivo amiro te a’done taenjiako ta cini se ka’dobe ono yasi. 12 Ago, ka’do megyi taegyi ana ca, megyi kote ta ’dise koye ŋgakozi be rota, kode ’dise ayebe koziro rota. Oko, megyite kedretavo robe ŋbelero ämiri, Lu mile, anjioko ŋgalu amiro ämäri ṛo orivoya endaro. 13 Ta’doro ni otomba ama te. Ko gialo otomba ama te; oko Tito ’ba ama te riyäsi, riyä ndaro si ŋgaopa se cini mipa nda be nda o’ba si riyäro si! 14 Mäŋgyidrite ta amiro ta ndäri, ago mi’ba ma kote a’done driupi ro. Ondoalo màta taŋgye te ämiri, kpa inye driuŋgyi se mäŋgyibe ta amiro ta Tito ri ka’da taŋgye te. 15 Ago ŋgalu ndaro ämiri a’dote ndra, ondro nda koyi ta a’do se ami cini nya’dote nja taŋgaembaro ndaro orone rote, ago uru se miru nda be turi ndi lä’bi be si ono. 16 Ma orivoya yai’dwesi tana mänina ndi mio’bane cu ämidri!
81 Ädrupii amaro, male ämiri tai’dwero se Lu kozobe Känisa Makedonia ya ya tana unine. 2 Ojo ta ànyaro te koziro rriti se ànya koyibe kigyesi si, oko riyä ànyaro a’dote orivoya ndra ago a’doyite riyä si ndra ugu ŋgapäṛi ozovoya, ànya ka’da gica ati’bai ro pari owo. 3 Mänina ndi taŋgye itine ämiri tana ànya ozoyi ŋga te amba oso ànya kuniyibe ozone ronye, ago kpa ndrani ànya kuniyibe ozone drisi. Ozoyite dritai ro ole modo ànyaro rosi 4 ànya lämiyi drí te ämäri ago lo’bayirute ta kandrakado lidri Lu ro Yuda ya opa ro la’done. 5 Ozoyite ndrani se ma’bamibe tana ro drisi! Käti ono ànya ozoyi andivo ànyaro te Opi ri; ago ’dooko, ole Lu rosi ànya ozoyi andivo ànyaro kpate ämäri. 6 Ago mata Tito se keto losi ono be te, ugu oyene ’duro ago ami opane losi se kado ŋgalu ro ono ondene. 7 Ami orivoya ŋgaamba be ŋgase cini ami sina ya; taoma ya, ata ya, tauni ya, a’do nja amiro ŋgaopa oyene ago ŋgalu amiro ämäri ya. Ago ka’do inye male kpa ämiri a’done dritai ro ruindu ŋgalu ro ono ya. 8 Ma ko ota aza o’ba ämiri. Oko ma ŋgaopa azii ro ya cini si ugu ka’dana, ma ojo ŋgalu endaro modo amiro ro tana unine. 9 Mìni tai’dwero Opi amaro Yesu Kristo ro tana te; nda a’dote ŋgadriamba be, oko ’ba andivo ndaro te lemeri’ba ro ta amiro ta, ami o’baza ŋgadriamba be a’do lemeri ndaro si. 10 Tausu maro anjioko ni kadopara ämiri tase nyètobe ndroazibe ondene yau. Ami ni orivoya käti, ko gialo ta oyene, oko kpa a’done ole be ta oyene. 11 Nyùgu oyena ri ago mìnde losi ri. Nyà’do nja anya ondene oso se nyà’dobe tavona oravoya ronye ago miye anya ŋgase ami be sina yauono si. 12 Ondro ami orivoya nja ŋga ozone, Lu uruna ŋgapäṛi amiro ’da, änjuna tazevona ’da ŋgase ami be sina ozone dri, ko ŋgase ami be akona dri. 13 Ma ko ojo ugu atane azii e’be si orine ŋga ozo ako, ugu ŋgaläŋgyi o’ba si ämidri, 14 oko oso ami be te ŋgaamba be tu ono si ronye, ṛo orivoya kado beṛo ämiri ànya se orivoya lemeri be opane, tana ondro nyà’dote orivoya lemeri be ago ànya ka’doyite ŋgaamba be oko, ànya opanayi ami ’da, liti ono yasi taoye ka’do robe riti ojoojo ro. 15 Oso taegyi kabe ata ronye ekye: “Nda se kabe kotona amba a’do kote sina amba, ago nda se kabe kotona giṛiŋwa a’do kote sina tipari giṛiŋwa.” 16 Màye aro’boya Lu ri tana nda ’ba Tito gwo ole be oso ama ronye ami opane! 17 Ko gialo nda le taeji amaro tadrina te; oko nda orivoya ole be ŋgaopa oyene ole dritai ro modo ndaro rosi nda ratate oyine amire. 18 Ago nda be mà ädrupi se orooro ro ndra känisa cini yasi ta losi ndaro ugu lazokado opero ta ono ozo. 19 Ago aza kpa, anji nda te känisa cini si ugu abane ama yibe mà te ugu ruindu ŋgalu ro ono oyena ta ’desii Opi ro rota ago tana maka’da robe anjioko màle ŋgaopa oyene. 20 Mà’dote orivoya taoti be ko driovi aza ri drieŋgane liti se màbe ŋgapäṛi se ozo be ŋgalu si ono lanjina tana ro. 21 Ta amaro tase orivoya ŋgye oyene, ko toto Lu mile, oko kpa lidri mile. 22 Ago mà ädrupi amaro ozo ànya be, mòjo nda te perena amba ago mùsu nda te orivoya ondoalo nja ŋgaopa oyene. Ago yauono oso nda be te taoma be amba ami ya ono ronye, nda te orivoya nja ŋgaopa oyene ndrani se käti ri. 23 Ago ta Tito rota nda orivoya azi maro ago ka losi oye mabe ami opane; ago ta ädrupii azaka se kayibe ugu oyi nda be rota, ànya orivoya vo känisa roya, ago kayi taoro ozo Kristo ri! 24 Nyàka’da ŋgalu amiro ànyari, tana känisa cini ka’do robe ŋgye tana ro ago kuniyi robe anjioko ta amaro orivoya ŋgye ugu driuŋgyine ta amiro ta.
91 Ta endaro si ko märi ta egyine egyi ta ŋgaopa se abe ozona lidri Lu ro opaza Yuda ya ta. 2 Mäni ndi anjioko ami orivoya ole be ŋgaopa oyene, ago mäŋgyidrite ami ta lidri Makedonia ya ri. Matate makye: Ädrupii Akaya ya a’dote nja ŋgaopa oyene ṛo ndroazibe. A’do nja amiro teŋga ya amba ànyaro rote. 3 Yauono ma ädrupii kwoi ozo, tana driuŋgyi amaro ta amiro ta, ta ono ya aza tana ’da ata awi ro. Oko, kpa oso matabe ronye, a’done ämiri nja ŋgaopa amiro be. 4 Aza kpa ondro aba lidri ni Makedonia yasi kikyi gwo mabe ago kusuyi vo gwo ekye ami ko nja, mà’dona ndi driupi ro, tana màta driupi amiro tana kote, tana mama tate amba ami ya. 5 Oko musube ni kado rulo’bane ädrupii kwoi ri lävune amire käti ni märi ago kokotoyi ŋgapäṛi se mi’ba tana be ozone ’do robe nja. Tana ka’do robe nja ondro masate owo, ago ka’dana ta ’da anjioko nyozo ni tana mile ni ozone, tana a’do kote ami tipitipi ro. 6 Ämiri ta ono tana oyine tana ’dise kabe kwari ori fereŋwa, olona drî na kpa fereŋwa; nda se kabe kwari ori amba olona drî na kpa amba. 7 Ka’do inye ’dialo ri ozone oso se nda kora tana be ronye, ko tausu si kpa ko ya ŋgyi’diŋgyi’di si, tana Lu lu nda se kabe ozona yai’dwesi ayani. 8 Ago Lu orivoya mbara be ozone ämiri ndrani se milebe ri, ’dooko nyà’dona ndi ondoalo ŋgase cini milebe andivo amiro ri be ago nyà’dona ndi sina ndra losi cini kado oyeza. 9 Oso taegyi kabe atana ronye ekye: “Nda ka ŋga ozo dritai ro ati’bai ri; takado ndaro ka ori äduako.” 10 Lu, se kani kwari ozo ori’ba ri ndi ambata be onyane, ozona kwari cini se milebe kpa ’da ämiri ago o’bana ànya ’da ombane ago owana ŋgadriamba jalia ro ’da ni ŋgaozo amiro yasi. 11 Nda o’bana ami ’da ondoalo ŋgaamba be, tana nyà’do robe ŋgaozo dritai robe tu cini si, ago ’di amba oyena aro’boya ’da Lu ri ta ŋgapäṛi amiro se ànya kayibe uruna ni ama rigyesi rota. 12 Tana ruindu se nyàbe oyena ko gialo ta lemeri lidri Lu ro rota, oko kpa aro’boya amba ozone Lu ri. 13 Ago tase ruindu amiro kabe ka’dana si, ’di amba ozona räṛu ’da Lu ri ta taoro amiro ta lazokado Kristo ro rota, se nyàbe opena, ago kpa ta ŋgapäṛi amiro se nyàbe ugu la’dona ànya yibe ndi ’dicini vocini yasi be. 14 Ago ole cini si ànya mätunayi ’da ami ta, ta tai’dwero ndra Lu ro se aka’dabe ämiri rota. 15 Mi’de màye aro’boya Lu ri ta ŋgapäṛi ndaro se lagyeako ono rota.
101 Ma, Paulo, ma driayo ämiri, ma se ata tana be ekye, ma’dote tokyeako ago ŋgo’bo tuse mabe orivoya ami yibe si, oko tadrioleako ami yibe tuse mabe orivoya lozo si owo. Tokyeako ndi takado Kristo robe si molo’baru ämiri 2 ko ma gbirine gbiri a’done siomba be ondro mikyite owo; tana endaro mäni ndi a’done siomba be ànya se kayibe ata ekye mà taoye tavousu ’bädri rosi ri. 3 Ndi orivoya endaro mà ori ’bädri ya, oko màye kyila kote oso tavousu ’bädri ro ronye. 4 Lakaza kyila ro se màbe kyila oye sina kyila amaro ya, ko orivoya lakaza kyila oye ro ’bädri ro oko lakaza mbaraekye Lu ro kyila oyero se mà kyila oye sina vose mbaraekye pereza. Mà kalawasa kowero pere, 5 mèpere kaladiṛi ndi ŋgacini se driuŋgyi be te vuru se eŋgate tauni Lu ro lomvo, ago mä̀ru tavousu cini te kamba’bai ro ago ma’bate Kristo orone. 6 Ago ondro ka’do nyàka’da taoro amiro te endaro oko, mà’dona ’da nja taoye se aza taoroako si ezane. 7 Nyà ugu a’do tesisi ŋgai ro ondrena ayani. Inye’do ’diaza gibe iga se ka tausu ekye nda orivoya Kristo roya? Mì’ba nda kusu ta to’di andivo ndaro ta, tana ama cini orivoya Kristo ro kpa oso nda be Kristo ro ronye. 8 Drî maro pi ko ’de, ondro aba ka’do mäŋgyidri ca ta drikaca se Opi kozobe ämäri rota, drikaca ono ami omozana, ko ami perezana. 9 Male ko rigye a’done oso ma ami gbegbe taegyii maro si. 10 ’Diaza atana gwo ekye: “Taegyii Paulo ro orivoya luwuekye ago mbaraekye, oko ondro nda ka’dote orivoya ama yibe, nda orivoya mbaraako, ago ata ndaro ko ta amba yi!” 11 Lidri oso inye’do beṛo unine anjioko a’do toto i’do tase mègyibe taegyii amaro ya tuse ama be i’do ago tase màyena ’da tuse ama orivoya ami yibe si. 12 Endaro màlena ko andivo amaro o’bane a’done alo kode andivo amaro ojone ànya se kayibe andivo ànyaro eŋgana lekuru iyi yibe. Ànya orivoya amama yi! Ànya kayi ojo modo ànyaro eŋgana andivo ànyaro eŋga si, ago ànya kayi vure andivo ànyaro ro ope rueŋga modo ànyaro rosi! 13 Caoko, ta amaro ta, driuŋgyi amaro a’dona ko ndrani otana drisi, anya orina ’da ädu losi ro se Lu korabe ämäri ya, se ono loci losi amaro ami lako tro kigye. 14 Ago oso ami orivoya äduna ya ronye, moyina ko ndra ànya kundusi tuse mikyite amire si mezi Lazokado ta Kristo rota te ämiri. 15 Ago mä̀ŋgyidri kote losi se azii koyebe ta ndrani äduna se Lu korabe ämäri drisi. Ago ma’ba mi be taoma amiro ombana ndi ago ’dooko ma’dona ndi mbara be losi parandra oyene ami lako, ondoalo äduna se Lu korabe ya. 16 ’Dooko mänina ndi Lazokado opene ’bädri azaka yasi ndra ami kundusi ago beṛo ko ämäri driuŋgyine ta losi se ayete nja ämvu mano aza roya ta. 17 Oko oso taegyi kabe ata ronye ekye: “Nda se kolebe driuŋgyine beṛo ndäri driuŋgyine tase Opi koyebe ta ayani.” 18 Tana Opi kani takado ’dialo ro usuna anjioko nda ’de ndi ree, ago ko tase nda kabe usuna kadoro andivo ndaro ro ’do ayani.
111 Male ämiri yaiŋgyine ma be, ondro ma’do gica fere amama ro owo. Rägu nyìŋgyi mabe! 2 Ma yaoko be ta amiro ta, kpa oso Lu ronye; nyàlaba orivoya oso ŋgutikodroŋwa wäṛiro ma’ba ta be ogyene mano alodi aza ri ronye, se ni Kristo andivona. 3 Ma orivoya turi ro tana tauni drî amiro ro enjina ’da ago nye’bena taoma ’da ndi ŋgalu wäṛiro amiro ndra Kristo ri be, kpa oso odo Awa be tauni ini ro koweoga rosi ronye. 4 Tana nyà ’diaza se kabe ikyi amire ago kabe Yesu to ope ’do uru yai’dwesi, ko se màpe be ’do; ago miru tori ndi lazo se orivoya cu to ni Tori ndi lazo se nyùsube ni ama resi ri ono te! 5 Musu tavo kote makye ma orivoya vuru tipari ni ànya se äzite “lazo’bai” amiro ana ri! 6 Kode mäni ata ca ko kadoro oko, ma ko tauni ako, mà’ba ta ono ṛote ŋbelero ämiri tu cini si, ago ṛo ta cini yasi. 7 Märu ŋga aza kote ni ami rigyesi tuse mape Lazokado Lu ro be ämiri si, mologo andivo maro te vuru tana ma’ba ami robe ndra. Inye’do mayete koziro ya? 8 Tuse mabe ugu losi oye ami lako si, känisa azaka ozoyi päläti ni märi. Mugu ànya oco te ŋgaopa usu si ni ànya resi tana mapa ami robe. 9 Ago tuse mabe ami yibe si mokwo ami kote ta ŋgaopa rota tuse male parata te si; ädrupii se ikyiyite ni Makedonia yasi eziyi ŋgase cini malebe te. Oso tuse kälävube si ronye, ago kpa tu mileya ya ma’dona ko alona ŋgaläŋgyi ro ämiri! 10 Taŋgye Kristo ro maya si, ma tao’ba anjioko driuŋgyi maro ono o’bane a’done titiro i’do vo cini Akaya ro yasi. 11 Inye’do ma ta ono atana tana mulu ami ko ya? Lu ni ndi mulu ami! 12 Tase mabe ugu oyena yauono muguna ndi oyena, tana “lazo’bai” se azaka kai lagaza, ni a’dovoya ta azaka be ugu driuŋgyiza, ago ukyi uguyi ata ’da ekye ànya kayi losi gialo màbe oyena ono oyena. 13 Màno kai ko orivoya lazo’bai ŋgye yi, ànya orivoya lazo’bai kowe’bai, se kayi koweoga ta losi oye ànyaro rota, ago kayi andivo ànyaro tozana a’done oso lazo’bai ŋgye Kristo ro ronye. 14 A’do ko talaro ro! Ca Satani andivo unina ndi andivo ndaro tozane landrene oso malaika ŋgaeyi ro ronye! 15 Ruindu’bai ndaro kotozayi andivo ànyaro ca landrene oso ruindu’bai taŋgye ro ronye ’do ko ta amba yi. Äduro ànya usuna päläti taoye ànyaro ro ’da. 16 Medelena kpa to’di beṛo ko ’diaza ri tavousune ekye ma amama yi. Oko ondro nyusu ndi inye, dia miru ma oso ’di amama ronye, tana ma’do robe driuŋgyi fere be. 17 Tase mabe ugu atana yauono ko tase Opi kolena märi atane owo; ta anya gi driuŋgyi ro ono ta, endaro ma ugu ata oso ’di amama ronye. 18 Oko ’di amba azaka orivoya ka driuŋgyi toto ta a’do lidri rota, mayena kpa inye. 19 Ami andivo orivoya tavouni amba be, ago nyiŋgyi ya kpate yai’dwesi ta ’di amama ro rota. 20 Nyìŋgyi ya te ’dise kabe ami oye iyeäṛi ronye be kode kabe ami odo kode kabe ami lodi miomba si kode kabe voondre ndra ami drisi kode kabe militi amiro o’bi be. 21 Ma orivoya driupiro ta ono ata voya, oko ama orivoya turi ro ŋga kai oyene. Oko ondro ’diaza kolete driuŋgyine ta ŋga aza rota, ma ugu ata oso ’di amama ro ronye, ma’dona kpa driupiako oso ’do ronye. 22 Inye’do ànya orivoya Ebere’bai ya? Ma kpa inye. Inye’do ànya orivoya Yisaraele’bai ya? Ma kpa inye. Inye’do ànya orivoya zelevoi Abarayama roya? Ma kpa inye. 23 Inye’do ànya orivoya ruindu’bai Kristo ro ya? Ma ata oso ’di ŋgäbä ro ronye, oko ma orivoya ruindu’ba kadopara yi ndrani ànyari! Maye losi te amba ndra, avo ma te kamba ya perena amba, a’bi ma te co’da si amba ndra, ago ondroalo ma’dote ti odrane. 24 Perena nji drikaca’bai Yudai ro ’bi yi ma te co’da si ’butenätu fonjidriesu. 25 Perena nätu drikaca’bai Roma’bai ro ’biyi ma te co’da si, ago perena alo avo ma te kuni si. Perena nätu toŋbo se mabe udi sina tisite gyi ya, ago tu alo si marite saa ’buteritu fosu gyi ya. 26 Aba amba maro ya ma’dote rriti ya ni gyitändri ri ago ni ŋgatopa’bai ri, rriti ya ni Yudai azi ri ago ni Atrai ri, rriti a’dote ’bakicii yasi, rriti vocowa yasi, rriti gyi’desii drisi, ago rriti ni bereazii miodo’bai ro ri. 27 Losi ndi rriti be a’dote; ondoalo marite u’duako; ma’dote täbiri ro ndi gyilu be, ondoalo ma’dote ŋgaonya ako amba, vooriro, ndi boŋgo be ako. 28 Ago ŋga azaka tana eṛo ako, ma orivoya tu cini si ŋgaläŋgyi zele milo’be be ta känisa cini rota. 29 Ondro ’diaza orivoya mbaraako, musu ma kpa mbaraako, ondro ’diaza olocite takozi ya, ya maro te orivoya twi milo’be be. 30 Ondro ka’do be märi driuŋgyine, mäŋgyina drî ta ŋgase kabe mbaraako maro ka’da ta ayani. 31 Lu ago Täpi Opi Yesu ro, räṛu ka’do ävuru ndaro ri äduako, nite anjioko maga kowe ko. 32 Tuse mabe orivoya Damaseka ya wari’ba se ’Bädri’ba Aretasa zele nda ’ba vookwa’bai te dereŋwa ’bakici ro kalasi ma urune. 33 Oko e’ba ma te vuru koṛiga si piṛi tiṛi ro yasi, ago mapavote ni ndäri.
121 Beṛo märi a’done driuŋgyi be, koye ŋga aza kadona ca ko owo. Oko yauono ma ta ruka’da ro ndi rulofo se ozote märi Opi si tana atana ayani. 2 Mäni mano aza Kristo’ba rote ndroa na lävute ’butealo fosu, ago ahwete le vo’buyakuru ya (mäni ko kode ta ono a’do gindi endaro kode nda ndre ruka’da yi, gialo Lu ni ni). 3 - 4 Medelena, mäni ndi ahwe mano ono te paradiso ya (kpa to’dina mäni ko kode ta ono a’do gindi endaro kode orivoya ruka’da yi, gialo Lu ni ni), ago lau nda eri ŋga azaka te se änina ko o’bane ata ya, ŋgase kala lidri ro unina ko atane ’do. 5 Ago mäŋgyina drî ’da ta mano ono rota, oko mäŋgyina drî ko ta andivo maro rota, e’be gialo ŋgase kabe mbaraako maro ka’da ’do ayani. 6 Ondro aba male gwo driuŋgyine, mänina ko a’done amama ro, tana aba ma ugu taŋgye ata ayani. Oko mänina ko driuŋgyine, tana male ko ’diaza ri a’done tavousu be ndra ta maro ta ndrani tase nda kondre mabe oyena ago tase nda keribe mabe atana ’do drisi. 7 Oko ma gagane ni a’do ’dieŋga driuŋgyi be risi tana ta ŋgase ’dilaro ro amba mandrebe rota, ozo lomvoluwu adravo rote malomvo; se ka taoye oso lazo’ba Satani ro ronye ma o’bine ago ma lagane ni ugu a’dovoya driuŋgyi be. 8 Perena nätu maye mätu te Opi ri ta ono ta ago meji nda te lomvoluwu onane ni malomvosi. 9 Oko talogo ndaro märi ekye: “Mile tai’dwero maro ayani, tana mbara maro orivoya fopara tuse nya’dote mbaraako owo.” Ma te orivoya yai’dwesi ndra, a’done driuŋgyi be mbaraako maro ta, tana musu ŋgagaga mbara Kristo ro robe malomvo. 10 Mbaraako maro arate oso nonye, la’da, rriti, rueza, ago rriti ta Kristo rota. Tuse ma’dote mbaraako, anjioko ma te mbara ro. 11 Ma ugu taoye oso ’di amama ro ronye, oko mi’ba ma ni oyene. Aba ami ni orivoya ’dise beṛo ma ka’dane owo. Tana ondro ma’do ca ko ta amba yi, ma ko tipari ni ànya se lazo’bai modo amiro ro kai ri. 12 Talaro ro amba ndi mbara be se ayebe si ka’da ndi anjioko ma orivoya lazo’ba yi ayete ami lako yaiŋgyi amba si. 13 Aye ami gindi koziro ndrani känisa azi ri, e’be gialo tase mokwo ami kote ta ŋgaopa ro parata si rota ono ayani ya? Rägu nye’be ma ta tase ma’do kote kadoro ämiri rota. 14 Yauono ni pere nina se mabe orivoya nja ikyine ami täkyine owo, ago malena ŋga aza ko ni ami rigyesi. Oko male ami ayani, ko parata amiro. Tana ṛo ko ni ŋgwai ri ŋga ozone uti’bai ànyaro ri. 15 Ma’dona yai’dwesi ŋgase cini ma sina ozone, ndi andivo maro be, ami opazana. Mile ma lune fereŋwa tana ma ami lu amba ya? 16 Ago, milena tadri ndi, anjioko, ma ko ŋgaläŋgyi ro ämidri. Oko ’diaza atana ’da ekye: Ma ’di odo, ago ma’ba abari te ämiri koweoga si. 17 Eŋwanye ya? Inye’do musu kandrakado aza gi’da ni ami rigye lazo’bai se mazobe si ya? 18 Molo’barute Tito ri oyine, ago mazo Kristo’ba aza ädrupi ro te nda be. Inye’do nyàtana gi’da mìkye Tito usu kandrakado ni ami rigye ya? Inye’do nda ndi ma be ka taoye ṛo ko tausu alo si ago taoye na ojo ro ko rere ya? 19 Kode nyàbe tavousu mìkye ta cini se màbe ugu oyena mà ojo andivo amaro gagane ami mile. Hwa! Mà ata oso Kristo kole ama be atane Lu kandra ronye, ago ädrupii se mulube ono, ŋga cini se màbe oyena, ayete ami opaza. 20 Ma orivoya turi ro tana ondro masate lau musuna ami ṛo to ni se male ami be a’done ri. Ago Nyusuna ma kpa to ni se milebe märi a’done ri. Ma orivoya turi ro tana musuna ami ṛo ugu kalaopevoya, yaoko, oŋga ndri kyilaro ndi ta andivo ’di ro oti robe, la’da o’da ndi kyere be, driuŋgyi ndi a’do patakayiro be. 21 Ma orivoya turi ro tana tu kinjo se mabe ukyi sina si Lu maro logona ma’da vuru ami kandra, ago miliyina ’da ànya se koyeyi takozi te kyeno kai ta ago se etayidri kote ni taundiro se ànya koloyeyibe ole lomvo ro ndi ronyi ànyaro robe ta.
131 Yauono ni pere nina se mabe ukyi ami täkyine sina owo. Oso taegyi kabe ata ronye ekye: “Beṛo ’dikicu ri a’done taiti tazevoedre’bai ritu kode amba rosi.” 2 Male ta itine ami azaka se mìye takozi be kyeno ri, ndi azii cini be, mata ta ono kätina te ämiri ukyi ṛiri maro amire si, oko matana tana kpa to’di yau mabe lozo ono si, tu kinja se mabe ukyi sina si ’diaza oparuna ko ni taezaro maro ri. 3 Nyà’dona ’da taka’daro se cini mìle be ono be anjioko Kristo kani ata ma si. Tuse nda kate taoye ämiri, nda ko orivoya mbaraako, oko, nda ka mbara ndaro ka’da ami lako. 4 Taŋgye itine ayani, abe ndana oto nda orivoya mbaraako. Caoko, mbara Lu rosi nda ka gi ori. Rumora ya nda be ama kpa mbaraako; oko a’do kpokoṛo amaro ami be si mala’dona mbara Lu ro ’da ori ndaro ya. 5 Nyòjo andivo amiro te, ago mìpe vure andivo amiro ro, nyùsu robe kode nyà gindi ugu ori taoma ya. Inye’do mìni ṛoko Kristo Yesu orivoya ami ya ya? E’be gialo ta pe ami te ṛe. 6 Mio’ba maro ya, mìnina ’da anjioko ta pe ama ko’de ṛe. 7 Mà mätu Lu ri ukyi mìye ŋgakozi ’da, ko ka’dane ekye ta pe ama ko ṛe, oko tana anjioko mìye robe tase ŋgye ayani, mà’do gica oso ta pe ama te ṛe ronye. 8 Tana mä̀nina ko ta oyene koziro taŋgye lomvo, oko toto taŋgye oyene ayani. 9 Ama orivoya yai’dwesi tuse mà’dote mbaraako oko nya’dote mbara ro owo. Ago ta’doro mà kpa mätu oye nyà’do robe ’diriro. 10 Ta’doro ni ma ta ono egyi ämiri ’dooko ma i’do ami yibe; ukyi ondro masate amire oko maye ta ’da ämiri siomba si drikaca se Opi kozobe märi si, drikaca se Opi kozobe märi ono ami omozana, ko ami perezana vuru. 11 Ago yauono, ädrupii maro, mede ämiri, mìtriru ta a’do ’diriro ta, nyèri driayo maro, mìletadri azi be, mìri liyaro. Ago Lu ŋgalu ro ndi taliatokpe robe a’dona ndi ami yibe. 12 Mìye mede azi ri ŋga njunju ädrupii rosi. Lidri cini Lu ro zoyi mede ànyaro ämiri. 13 Tai’dwero Opi Yesu Kristo ro, ŋgalu Lu robe ndi rumora Tori Alokado robe ka’do ami cini be.