1 TIMOTEO

¹ Ni Paulo lazo’ba Kristo Yesu ro resi, ota Lu Opa’ba amaro ro ndi Kristo Yesu mio’ba amaro be rosi. ² Timoteo, ŋgwa paca maro taoma ya ri: Lu Täpi ago Kristo Opi amaro kozo tai’dwero, yauni ndi taliatokpe be miri. ³ Male miri orine Epeso ya, oso mata mi be tuse mabe oyi Makedonia ya si ronye. Lidri azaka orivoya lau kayi ugu ŋgaemba ŋgaodo si emba, ago miri drî nayi otane. ⁴ Nyata ànyari tase awi ago tase gyoroŋgolo arabe zutui ro kayi e’bene, se ka gialo kalawasa ezi; ànya payi losi Lu ro kote, se unina taoma si. ⁵ Takaci ota ono ro orivoya ni ŋgalu se kefo ni ya wäṛiro, ya tausu kadoro, ago taoma ŋgye be ro yasi. ⁶ Lidri azaka narute pere ni ta kwoi yasi ago ijeyi liti ànyaro ta ata rote ata amaama rosi. ⁷ Ànya leyi a’done miemba’bai ota Lu ro ro, oko ànya niyi ata ànyaro modona ko ca tase ànya kayibe atana turiako si ono niyi tavona edre ko. ⁸ Mä̀ni ndi Ota orivoya kado ondro aye tana te oso se beṛo oyene ronye owo. ⁹ Endaro, beṛo tana oyine a’ba ota ko ta lidri kado rota, oko ta otapere’bai, taoroako’bai, luako’bai, takozi’bai, mätuako’bai, kode ta a’doro Tori voro ako’bai, ànya se kayibe täpii ànyaro kode endrei ànyaro ufuna, ta ’diufu’bai, ¹⁰ ronyi’bai, taoye’bai agoazi be, ànya se kayibe iyeäṛii ogye tesi, koweoga’bai, taedre’ba kowesi ago se kayibe tase ojo ko ta miembaro ŋgye be embana be iyi rota. ¹¹ Ta ŋgaembaro ana usute lazokado se ozobe märi opene ya, lazokado para yi ni Lu ’desi Alokado resi. ¹² Ma aro’boya ozo Kristo Yesu Opi amaro ri, se kozo mbara be märi ta losi maro rota. Ma aro’boya oye ndäri tana nda usu ma te ’diri ago ka’da ma te ruindune ndäri, ¹³ kyenona mata ta gica undiro nda lomvo ago meza nda ca, ago ma’da nda ca. Oko Lu a’dote yauni amba be märi tana ’dooko ma drigba taoma ako ago mäni tase mabe ugu oyena kote. ¹⁴ Ago Opi amaro eda tai’dwero ndra te mädri ago ozo taoma te märi ndi ŋgalu be se ni amaro rudro’be si Kristo Yesu be. ¹⁵ Ata ono orivoya ŋgye, ṛo urune kpeye ago omane; Kristo Yesu ikyite ’bädri ya takozi’bai opane, se ma ni ndrana owo, ¹⁶ oko Lu orivoya yauni amba be märi tana Kristo Yesu kaka’da yaiŋgyi amba ndaro robe taoye si märi, ma se kozipara ndrani takozi’bai azi ri, a’done taka’daro ro ànya se cini kovolesi oko komanayi ’da nda ya ago usunayi adri äduako ’da ri. ¹⁷ Taoro ndi ’desi be ka’do ’Bädri’ba äduako, oŋgwaako ago ondreako, Lu alodi ri ago rriro äduako! Amen. ¹⁸ Timoteo, ŋgwa maro, mozo driba ta ono ro mirigye, se äŋgute taope nebii rosi ṛo kyeno ta miro ta. Miye ta ata kwoi si oso lakàza kyila ro ronye tana miye kyila robe kado sina. ¹⁹ Ago nyäti taoma miro ndi tavousu kado ya robe. Lidri azaka eriyi tavousu kado ya ànyaro ro tana ko ago enjiyi taoma ànyaro te. ²⁰ Se orivoya ànya lako ni Umenaio ndi Alegezanda be, se mezate ànya ozosi mbara Satani ro ri; ta ono embana ànya ’da ko Lu o’dane.

¹ Ka’do inye, käti ono mata mi anjioko rulo’ba, mätu, taeji ago aro’boya ozone Lu ri lidri cini ta. ² Ta ’bädri’bai rota ndi azaka cini se orivoya drikaca ya be, tana màri robe trwe ori liatokpero ori si taoro be Lu ri ndi taoye kado be. ³ Ono orivoya takado yi ago tana ka Lu Opa’ba amaro usi, ⁴ se le ’dicini ri a’done ŋgaopa be ago ikyine taŋgye unine. ⁵ Tana Lu orivoya alodi, ago pa’ba alodi orivoya lakole Lu ro lidri cini be ya, nda andivona lidri yi mano se ni Kristo Yesu, ⁶ se ozo andivo ndaro te drî lidri cini ro utwene. Se aka’date tu ŋgyena si anjioko Lu le ’dicini a’done ŋgaopa be, ⁷ ago se tana ro azo ma te lazo’ba ro ago miemba’ba ro Atrai ri, lazo taoma ndi taŋgye be ro opene. Maga kowe ko; ma taŋgye iti! ⁸ Male mànoago ri Lu mätune känisa cini yasi, lidri se ozo iyi te Lu ri ago uninayi ndi drí ànyaro eŋgane mätu ya teinye kyila kode kalawasa ako. ⁹ Male kpa ’ditoko ri a’done trwe ago tauni be ta boŋgoi ànyaro rota ago osone kadoro, ko drio’di ruegaro kode ruwere logo läguläguro ndi ŋgoŋgo be kode boŋgo lagye amba be oso si, ¹⁰ oko taoye kado si, se orivoya ŋgye ’ditoko se kayibe ata ekye ya Lu mätu ri. ¹¹ Beṛo ’ditoko ri a’done titiiti ro vo ŋgaembaro ya rulogo si cu vuru. ¹² Male ànya ko miembane kode a’done drikaca be mànoago dri, beṛo ànyari a’done titiiti ro. ¹³ Tana a’ba Adama te käti, ’dooko a’ba Awa gwo. ¹⁴ Ago odo kote Adama ayani, oko odote toko ayani ago fu ota Lu rote. ¹⁵ Oko apana ’ditoko ’da ŋgwa uti si, ondro ànya ka gi ugu taoma äti ndi ŋgalu be ndi a’do wäṛiro be, a’do trwe si owo.

¹ Ata ono orivoya ŋgye. Ondro mano aza orivoya nja a’done dri’ba känisa ro, nda le ṛo losi kadopara yi. ² Beṛo dri’ba känisa ro ri a’done koziako; beṛo ndäri a’done toto toko alodi be, a’done trwe, andivo ritarita ro, ago orooro ro, ndäri atrai urune ’ba ndaro ya, beṛo ndäri ŋgaembane; ³ beṛo ko ndäri a’done yi ufuufu ro wa si, ko a’done mano kyila be ro, oko trwe ago tokpero; beṛo ko ndäri parata lune; ⁴ beṛo ndäri a’done mbara ro katidri modo ndaro ro vona ondrene kado ago ŋgwai ndaro o’bane nda orone taoro cini si. ⁵ Tana ondro mano aza kuni kote katidri modo ndaro ro vona ondrene, nda unina känisa Lu ro tana otine eŋwanye ya? ⁶ Beṛo ndäri ko a’done kristo’ba to’di yi, ukyi nda ova ’da driuŋgyi be ago okozi ’da, oso Kicu’ba ronye. ⁷ Beṛo ndäri a’done mano se orooro ro lidri se tesi ko orivoya känisa ya ri, tana ukyi nda a’do ’da oroako ago o’de ’da abari Kicu’ba roya. ⁸ Beṛo känisa opa’bai ri kpa a’done a’do kado be ago a’done ’diri; ànyari ko vino umvune amba kode a’done yagäru be parata ta; ⁹ beṛo ànyari taŋgye taoma ro se aka’dabe ätine ya ŋgye si. ¹⁰ Beṛo ànya ojone käti, ’dooko ondro ànya koyeyi taojoro te kado, ànya kinduru. ¹¹ ’Ditoko ànyaro be kpa ṛo a’done taoye kado be ago beṛo ko kyere oyene; beṛo ànyari a’done trwe ago ’diri ta cini ya. ¹² Beṛo känisa opa’bai ri a’done toto toko alodi be, ago ka’do mbara be ŋgwai ndaro ndi katidri ndaro be vona ondrene kadoro. ¹³ Känisa opa’bai se kayibe losi ànyaro oyena kadoro arona andivo ànyaro ndi kadoro ago a’donayi ndi mbara ro taoma ànyaro Kristo Yesu ya tana opene turiako si. ¹⁴ Ago mabe taegyi ono egyina ämiri ono, ma orivoya mio’ba be ukyine ami ondrene ndriro. ¹⁵ Oko ondro meleyete, taegyi ono o’bana ami ’da unine beṛo andivo amaro ri taoyene zo Lu ro ya eŋwanye; se orivoya ni känisa Lu lidriidri ro ro, läŋgyiri ago kotopa taŋgye ro ono. ¹⁶ ’Diaza unina ko tapara ndrwi mätu amaro ro kalana ogane: Aka’da nda te beti lidri robe, aka’date a’done ŋgye Tori si, ago malaikai ndrete. Ape ta ndaro te tu’dei lako, ama tate nda ya ’bädri cini yasi, ago ärute lekuru vo’buyakuru ya, a’do ’desi ya.

¹ Tori ka ata ŋbelero ekye lidri azaka e’benayi taoma ’da tuse kabe ikyi kovolesi ya; ànya oronayi tori se kabe ugu koweoga ’da ago osonayi ’da ŋgaembai demonai ro vo. ² Ŋgaembai oso ono ronye ka ikyi ni koweoga’bai resi, tausu ŋgye ya ànyaro ro te avo yi, oso azate logo emero si ronye. ³ Lidri nonye ono kayi ŋgaemba ekye orivoya koziro lagye ogyene, ago ŋgaonya azaka onyane. Oko Lu ’ba ŋgaonya kai ni onyane, ago ànya se orivoya taoma’bai ago kuni taŋgye te ri urune aro’boya oye si. ⁴ Ŋgacini se Lu ko’babe orivoya kado; ko ŋga aza ogane zo, oko ŋgacini urune aro’boya oye si, ⁵ tana a’bate alokado ata Lu ro si ndi mätu be. ⁶ Ondro nya taŋgaembaro kwoi ozo ayani ädrupii ri, nya’dona ’da ruindu’ba kado Kristo Yesu ro, tana nyabe andivo miro eca Tori voro ata taoma rosi ago ta ŋgaembaro ŋgye se misote voigye ono ta. ⁷ Oko minaru pere ni tase luako ro se ezi copena be kai resi, se si ko ugu tana itine. Nyugu andivo miro emba ta ori lu’ba ro rosi. ⁸ Lomvo tomba kadona orivoya, oko ŋgatomba Tori voro kadona orivoya parandra liti cini yasi, tana tao’ba be ori yauono ta ago ta ori mileya rota. ⁹ Ono orivoya ata ŋgye yi ṛo urune kpeye ago taomane kigye. ¹⁰ Tana ta ’do ta mä̀trirute ago màye losi te mbara, tana mà’ba mi amaro te Lu lidriidriro dri, se ni Opa’ba vona cini ro ago para ndrana ànya se kabe taoma kwoi ro. ¹¹ Nyozo taŋgaembaro kwoi ànyari ndi ŋgaembai kwoi be. ¹² Mi’ba ’diaza kamawo agoanji miro ko, oko nya’do taka’daro ro taoma’bai ri ata miro si, taoye miro ya, ŋgalu miro ya, taoma ya, ndi a’do wäṛiro be ya. ¹³ Nyozo saa miro ugu Taegyi uzine miamba ya mbara cini si ago ugu taopene ndi miemba be, madale masa gwo. ¹⁴ Nya’do ko ŋgapäṛi Tori ro se mi ya ana tana otiako, se ozote miri taope nebii rosi ago drio’ba ’di’desii se ko’bayi dríi ànyaro be midri rosi. ¹⁵ Miye ŋga kwoi, ago nyozo andivo miro ànya oyene, tana ’dicini kondre omba miro taoma ya robe. ¹⁶ Mindre andivo miro ago mindre ŋgaemba miro. Nyugu ŋgà kwoi oye, tana ondro nya oyena, mipana andivo miro ’da riti ànya se kayibe mi eri be.

¹ Mi’bidri agoambago ro ko, oko nyolo’baru ndäri oso nda orivoya täpi miro. Miye agoanjii oso ädrupii miro ronye, ² tòkoadraŋwai oso endrei ronye, ago ’ditoko ndiriŋwa ro oso endreŋwà ronye, a’do wäṛi cini si. ³ Nyaka’da taoro ävuzii se cini ṛote endaro iṛe ri. ⁴ Oko ondro ävuzi aza orivoya ŋgwai be kode kwozoi be, beṛo ànyari taunine käti ono anjioko kama ànyaro mätu ro oyene katidri modo ànyaro ro ri ago oyena nonye si go kayi ŋga ozo uti’bai ànyaro ri tana ono ni tase kabe Lu usi owo. ⁵ Ävuzi se orivoya ṛote iṛe, teinye ’diaza ako vo anyaro ondrene, ’ba mi anyaro te Lu dri ago ka mätu oye ’duro ago ka nda eji ta ŋgaopa ndaro rota ŋgäkyi si kpa kitu si. ⁶ Oko ävuzi se kabe andivo anyaro ozo riyä awi ri dra ṛote nja, anya ka gica ori owo. ⁷ Nyozo taŋgaembaro kwoi ànyari, ukyi ’diaza kozi ànya ’da. ⁸ Oko ondro ’diaza kotita ’didiri ndaro ro kote, para ndrana gboko katidri modo ndaro ro, anjioko nda ga taoma tezo ago orivoya kozipara ndrani taomaako’ba ri. ⁹ Nyoloci ävuzi aza ko ävuru ävuzii se egyite roya e’be gialo ndroa na kälävu ’butenjidrialo (60) lutu, ago agye anya te, ṛo perena alodi. ¹⁰ Ago a’dote liku kado be takado oyesi; toko se eca ŋgwai anyaro te kadoro, ru atrai te ’ba anyaro ya, ye kama te driuŋgyiako si Kristo’bai azi ri, pa lidri se rriti ya te, ago ozo andivo anyaro te ugu takado oyene. ¹¹ Oko nyoloci ävuzii se mbara ro ko ävuru ävuzii se egyite roya; tana ondro koleyite iyi ogyene, ànya onanayi iyi ndi ni Kristo resi, ¹² ago ’dooko a’donayi ndi taenji tao’ba se ànya ko’babe kyeno Lu ri ’do ro perena robe. ¹³ Ànya orinayi kpa gwo saa ànyaro enjine ugunayi aba kpa gwo zo yasi zo yasi, oko kozi parana ànya embayi iyi te a’done kyere’bai ro, ago loci’bai ro ta cini yasi, ugu ŋgase ko ànyari atane atana be. ¹⁴ Oko male ävuzii mbara ro ri iyi ogyene, a’doza ŋgwai be, ago kotiyi ’ba ànyaro tana robe, ukyi ozo kandrakado ’da kyila’baazii ri ugu taundi ataza ama lomvo. ¹⁵ Tana ävuzii azaka so ṛote nja Satani vo. ¹⁶ Oko ondro toko aza Kristo’ba yi ka’dote ävuzii be katidri anyaro ya, beṛo anyari ta ànyaro otine, ago ko ŋgaläŋgyi o’bane känisa dri, tana ko’ba känisa kotita ävuzii se ṛote iṛe ro robe. ¹⁷ ’Di’desii se kayibe losi kado oye oso dri’bai ronye beṛo tana usune kadoro kuguyi päläti uru robe kadoro amba, para ndrana ànya se kayibe losi mbara oye ugu taope si ndi miemba be iyi. ¹⁸ Tana taegyi ka ata ekye: “Nyembe kala ’daŋgo ro ko ondro nyate ugu losi oye sina inya otone owo,” ago “losioye’ba, beṛo ndi päläti ndaro ozone.” ¹⁹ Ate ’di’desi aza kicu miri nyeri tana ko e’be gialo ezi tazevoedre’bai ritu kode amba lutu. ²⁰ Ànya se cini kayibe takozi oye mi’bi drî na ṛo miamba ya, tana ambana kuturi robe. ²¹ Ṛo orivoya Lu kandra ndi Kristo Yesu be ndi malaikai alokado be ma mi eji taŋgaembaro kwoi orone teinye ’di gyele ako kode ko ’diaza lune ayani ŋgase aza nyabe oyena ya. ²² Miye ta ko karagbagba ro drio’ba si ’diaza se nda odine ruindune Opi ri dri. Nyoloci mi ko takozi azii roya, nyagaga andivo miro wäṛiro. ²³ Mimvu ko toto gyi ayani, oko mimvu vino fere ta ya miro rota, tana mi orivoya adravoro ondoalo. ²⁴ Takozii lidri azaka ro ṛo orivoya ŋbelero ondrene, ago takozi ànyaro ka ànya ugu mileya vure ya; oko takozii azaka ro andrete le kovolesi. ²⁵ Kpa oso inye andre taoye kado te ŋbelero, ago ca ànya se andre kote ŋbelero ro äni kote da’done.

¹ Ànya se orivoya iyeäṛii beṛo ànyari ’desii ànyaro orone, ukyi ’diaza ata ta undiro ’da ävuru Lu ro ndi ŋgaemba amaro be lomvo. ² Iyeäṛii se ’desi nai Kristo’ba ro beṛo ko ànyari ànya mawone, tana ànya orivoya ädrupii ànyaro. Ka’do inye, ànyari ruindune ànyari ndra, tana ànya se kabe takado losi ànyaro ro usuna ànya orivoya taoma’bai se ànya kulube owo. Beṛo miri ŋga kwoi embane ago opene. ³ Nda se kabe ta to aza emba ago koletadri kote ata ŋgye Opi amaro Yesu Kristo robe ago ŋgaemba mätu amaro robe ⁴ vate driuŋgyi be ago ni ŋga aza ko. Nda orivoya ole koziro be kalawasane ago kalaopene ta ata rota, ago nonye ono ka yaoko, kaladiṛi, kalambäri, tausu undiro be ezi, ⁵ kalawasa ’duro ni lidri se drî na usu ta ko ago se orivoya taŋgyeako resi. Ànya kusuyibe ekye mätu orivoya liti a’doro ŋgaamba be ro. ⁶ Oko, mätu ka ’dio’ba ŋgaamba be, ondro ŋgase nda be sina kojo nda te owo. ⁷ Mèzi e’diyi ’bädri ya ya? Mèzi ŋga aza ko! Mä̀nina e’di uŋgyine ni kigyesi ya? Mä̀ŋgyi ŋga aza ko! ⁸ Ka’do inye, ondro ama orivoya ŋgaonya be ago boŋgo be, ’do beṛo ama ojone. ⁹ Oko ànya se koleyibe a’done ŋgaamba be kalapa taojo roya ago abari amba amamaro ndi ole koziro be ru ànya te, se ka ànya ese vuru perene ago enjine. ¹⁰ Tana parata lu orivoya paji ta cini undiro ro. ’Di azaka se kabe ojo a’done sina anarute ni taoma yasi ago ya ànyaro lesite tusu amba be. ¹¹ Oko mi, mano Lu ro, mina andivo miro ni ŋga cini kwoi ri. Nyojo osone taŋgye, a’do lu’baro, taoma, ŋgalu, yaiŋgyi ndi tokyeako be vo. ¹² Mimu umukyekye taoma ro mbara cini miro si, miru adri äduako robe andivo miro ri, tana ta adri ono rota anjioko Lu zi mi te tuse nyedrete ŋgyiri nyayo taoma miro tana te tazevoedre’bai amba kandra owo. ¹³ Mata mi, Lu se kabe adri ozo ni ŋgacini ri ono kandra, ago Kristo Yesu kandra, se edrete ŋgyiri ayo taoma ndaro tana te Poneto Pilato kandra, ¹⁴ ota miro orone ago ànya ätine ŋgyero madale Tu se Opi amaro Yesu Kristo ka’daruna ’da sina si. ¹⁵ Lu o’bana ta ’do ’da a’done tu ŋgye na si, Lu se ni kado ago toto ni ’Dimiri’ba yi, ’Bädri’ba ’bädri’bai ro ago Opi opii ro. ¹⁶ Nda toto ni oŋgwaako, nda ka ori ŋgaeyi se ’diaza ni ko osane kigye ya. ’Diaza alo ndre nda kote, ’diaza alo unina ko cu nda ondrene. Taoro ndi mbara be ka’do ndäri äduako! Amen. ¹⁷ Mita ànya se orivoya ŋgaamba be ŋgà ’bädri ono rosi ko a’done driuŋgyi be, ko mi ànyaro o’bane ŋgà vociako ŋgaamba ro dri, oko Lu dri ayani, se kabe ŋgacini ozo ämäri dritai ro a’doza ämäri riyä si. ¹⁸ Mita ànya takado oyene, a’doza ŋgaamba be losi kado si, ka’doyi robe dritai ro nja ŋgala’done azii be. ¹⁹ Liti ono yasi ànya odronayi ŋga ’da kuru andivo ànyaro ri ŋgaodro se a’dona ’da kotopa ṛatara ro ro tu mileya ta. Ago ’dooko ànya a’donayi ’da mbara ro a’done adri se endaro be. ²⁰ Timoteo, nyäti ŋgase äpäṛite mirigye ’do londro ro. Mina ata undiro ndi kalawasa amaama robe se orivoya koziro lidri azaka kabe uzina “Tauni” ’do. ²¹ Tana azakana ekye iyi sina, ago tana si ànya ijeyi liti taoma rote. Tai’dwero Lu ro kori ami cini be.