1 TESALONIKA’BAI

¹ Ni Paulo, Sila ndi Timoteo be resi, lidri känisa ro Tesalonika ya, se Lu Täpi ro ndi Opi Yesu Kristo robe ri. Tai’dwero ndi taliatokpe be ka’do ämiri. ² Mà aro’boya oye Lu ri ondoalo ami cini ta ago mà ävuru amiro uzi ondoalo mätu amaro ya. ³ Mà taoma amiro mì’babe taoye ya ’do tana oyina Lu Täpi kandra, ŋgalu amiro ’ba ami te losi oyene mbara si, ago mio’ba amiro Opi amaro Yesu Kristo ya orivoya ŋgyiri. ⁴ Ädrupii amaro, mä̀ni ndi anjioko Lu lu ami ago nji ami te a’done lidri modo ndaro ro. ⁵ Tana mezi Lazokado te ämiri, ko toto ata si, oko kpa mbara si ndi Tori Alokado be, ago ŋgaluku taŋgyena rosi. Mìni ori se màribe tuse ama be ami yibe si te, kadona orivoya ta modo amiro rota. ⁶ Mìsote taoye amaro vo ndi Opi robe; ago nyèzaru gica amba oko, mìru lazo te riyä se kabe ikyi ni Tori Alokado resi si. ⁷ Ago nyà’dote taka’daro ro taoma’bai cini Makedonia ndi Akaya ya be ri. ⁸ Tana ko gialo lazo ta Opi rota fote tesi ni ami resi Makedonia yasi ndi Akaya be, oko lazo ta taoma amiro Lu ya rota sate vocini yasi. Ta aza i’do, atane to ämiri. ⁹ Lidri cini lau kayi ka ta uru se mìru ama be, tuse mìkyibe amire si ana, ndi tase mìna ami beni lui awi resi le Lu re, ruindune Lu endaro ago Lu lidriidriro ri ’do tana atana ¹⁰ ndi ta ikyi Ŋgwa ndaro Yesu Kristo ro ni vo’buyakuru yasi kwotena ro se nda eŋgate ni avo yasi ago se kabe ama opa ni kyila Lu ro se kabe ikyi ama dri ono risi be.

¹ Ädrupii ago endreŋwai amaro, andivo amiro mìni ndi anjioko ukyi amaro amire ko ta awi yi. ² Mìni ndi aye ama te nja koziro ago a’da kpate Filipoi ya teinye ikyi ako ämäri Tesalonika ya. Ago edre gica ŋbi ama mile oko, Lu amaro ozo agoago te ämäri Lazokado itine ämiri se kikyibe ni nda resi ’do. ³ Taayo amaro ämiri änju kote ’diwiri kode tavousu undiro dri, ago mòjo kpa kote ’diaza odone. ⁴ Oko, ondoalo mà taope oso Lu kolebe ämäri opene ronye, tana nda pe vure amaro te mojondi ago yitate ama ya Lazokado opene. Mà ko ojo lidri usine, oko Lu usine ayani, se kabe ni ya amaro ondrena ono. ⁵ Mìni ndi kado anjioko mìkyi kote amire ata ’di räṛu rosi, mà kpa ko ojo ata yagäru ro drina, takone, Lu orivoya tazevoedre’ba amaro! ⁶ Mòjo kote räṛu uṛine ni ’diaza resi, kode ni ami resi kode ni ’di azaka resi, ⁷ oso lazo’bai Kristo ro ronye aba ma’dona ndi drikaca be ämidri. Oko ama orivoya tatokyeako tuse ama be orivoya ami yibe si, màlaba oso endre, kabe ugu ta ŋgwai anyaro ro otina ronye. ⁸ Tana ta ŋgalu amaro ro ämiri ta ama orivoya nja ŋga la’done ami yibe ko toto Lazokado ni Lu resi ayani oko ori amaro kpa. Tana mùlu ami tawi! ⁹ Endaro mìyina tana ndi, ädrupii ago endreŋwai amaro, màye losi te ago ṛo mbara si! Màye losi te kitu si ago ŋgäkyi si tana ukyi mà’do ’da ŋgaläŋgyi ro ämiri tuse màpe Lazokado ni Lu resi be ämiri ana si. ¹⁰ Ami ni tazevoedre’bai amaro, ago Lu kpa inye, tana taoye amaro ami se nyàbe taoma ri orivoya wäṛi ŋgye ago teinye taenjiako. ¹¹ Mìni ndi màye ami cini te kado kpa oso täpi kabe ŋgwai modo ndaro ro oye ronye. ¹² Mòzo agoago te ämiri, mì’dwe ami te, ago mùgu atate ämiri ori se tana kabe Lu usi orine ayani, nda se kabe ami uzi miri ’Bädri’ba modo ndaro ro ndi ’desina be la’done ono. ¹³ Ago ata aza se màbe aro’boya oye Lu ri ondoalo tana ro. Tuse mèzi lazo Lu rote ämiri si, nyèrite ago mìrute, ko oso lazo lidri ro ronye, oko oso lazo Lu ro ronye, se ṛo endaro inye. Tana Lu ka losi oye ami se nyàbe taoma ya. ¹⁴ Ädrupii ago endreŋwai amaro, ŋga gi alo ono a’dote ämäri se ka’dobe känisa Lu ro Yuda ya ri, lidri se lau se Kristo Yesu ro ri. Nyèzaru kpate taezaro gialo ono si ni lidri ’bädri modo amiro ro ri kpa oso ànya kezarube ni Yudai, ¹⁵ se kufuyi Opi Yesu ndi nebii be te ago kezayi ama be ronye. Ta ànyaro si Lu ko! Ànya orivoya kyila’baazi ’dicini ro! ¹⁶ Ànya ojoyi kpate ama lagane ni ugu lazo opevoya Atrai ri lazo se kezina ŋgaopa ’da ànyari ana. Liti ono yasi ondoalo ànya yeyi takozi amba te. Ago yau äduro ono oko kyila Lu ro ikyite ànya dri! ¹⁷ Ta amaro ta ädrupii ago endreŋwai tuse mèlewerube ni ami resi tu fere si, ko tavousu amaro ya, oko toto lomvo ya, ya cini si màlete ami ondrene ago mòjote mbara cini si ogone ami ondrene! ¹⁸ Màle ndi ogone amire. Ma andivo mojote ogone ndrani pere alo drisi, oko Satani laga ama zo. ¹⁹ Caoko, ami ago ko ’diazaka, orivoya ni mio’ba amaro ago riyä amaro ago driuŋgyi ŋgaopeṛe ama ro ro ondro Opi amaro Yesu kate ikyi owo. ²⁰ Endaro, ami orivoya driuŋgyi amaro ago riyä amaro owo!

¹ Äduro, mä̀ni kote tana iŋgyine tona. Ago mùsutate orine iṛe Atenea ya ² ago màzo Timoteo, ädrupi amaro se kabe losi oye ama yibe Lu ri ugu Lazokado opevoya ta Kristo rota te. Màzo nda te ami tombane ago taoma amiro opane, ³ tana ukyi alo aza amiro ogo ’da kovole ta rueza kwoi rota. Ami andivo mìni ṛote taezaro se ono orivoya telesi taole Lu ro royi ämäri. ⁴ Tana ama bedri orivoya ami yibe, mìti tana rote ämiri käti ta tu ana rota anjioko oye ṛo ama ezane; ago mìni ṛote kado, anjioko modona a’do ṛote. ⁵ Ta’dota mazo Timoteo te, mäni kote tana iŋgyine tona, ago mazo nda te ta taoma amiro ro uniza. Ago ma’dote turi ro, tana ukyi ta azaka si kicu’ba kicu drî amiro te, ago losi cini amaro a’dote ta awi ro! ⁶ Yauono Timoteo kegobe ni ami resi, nda ezi lazo to’di taoma ndi ŋgalu amiro robe te. Nda ititate ämäri ekye: Nyà ta amaro usuna ondoalo ago mìle ama ondrene kpa oso màlebe ami ondrene ronye. ⁷ Ago, rriti cini amaro ndi ugu rueza be ya ozo agoago te ämäri ta amiro ta, ädrupii ago endreŋwai, taoma amiro ozo agoago te ämäri, ⁸ tana yauono endaro mà ṛo ori ondro nyàte edre ŋgyiri ori amiro rudro’bero Opi be ya owo. ⁹ Yauono mä̀nina ndi aro’boya oyene Lu amaro ri ta amiro ta. Mà aro’boya ozo ndäri ta riyä se mà’dobe sina nda kandra ta amiro ta ro. ¹⁰ Mà nda eji ya cini amaro si kitu ndi ŋgäkyi be si ko’ba ama robe ami ondrene bi ago ŋgase ami orivoya lemerina be taoma amiro ya mòzo robe. ¹¹ Ka’do inye Lu Täpi amaro andivona ndi Opi amaro Yesu be kede liti ämäri ukyiza amire! ¹² Opi ko’ba ŋgalu amiro azi ri ndi lidri cini ri be kiliti amba ndra ago ka’do para oso ŋgalu amaro ämiri ronye. ¹³ Liti ono yasi nda tombana ami ’da ago nyà’dona ’da ŋgye alokado Lu Täpi amaro kandra ondro Opi amaro Yesu kate ikyi ànya se cini ndaro be owo.

¹ Äduro, ädrupii ago endreŋwai amaro, mìni tate ni ama resi beṛo ämiri orine Lu usiusiro. Anjioko, ṛo ori se nyàbe ugu orina si. Ago yauono mà ami eji ago rulo’ba si ämiri ävuru Opi Yesu roya mìye robe ndra. ² Tana mìni ŋgaembai se mozobe ämiri drikaca Opi Yesu rosi te. ³ Lu le ämiri a’done alokado ago ruonane kpeye ni ronyi oye yasi. ⁴ Ami ’diago, beṛo mano alo ri liti alokado orooro ro oriro toko be unine, ⁵ ko ole lomvo ro olene ndra, oso ’dise awi kuni Lu ko ronye. ⁶ Ka’do inye a’do ono voro, beṛo ko mano aza ri ŋgakozi oyene Kristo’ba azi ri ago kode takado ndaro urune. Mìti ta ono rote käti ämiri, ago mèdre tazevo ṛote mbara ämiri anjioko Opi ezana ànya se kabe taoye inye ’da. ⁷ Lu zi ama kote ori undiro orine, oko ori alokado ayani, ⁸ ago ka’do inye, nda se kabe ŋgaemba ono ogazo ka ko lidri ogazo, oko Lu, se kabe Tori Alokado ndaro ozona ämiri ayani. ⁹ Ta ŋgalu ro Kristo’ba azi amiro ri rota, si ko tana egyine egyi ämiri. Ami andivo embate ṛo Lu si beṛo ämiri azi lune. ¹⁰ Ago endaro, nyà’dote ṛo nonye taoye amiro ädrupii ago endreŋwai amiro Makedonia ya ri si. Ago mà ami eji rulo’basi, ädrupii ago endreŋwai amaro, oyene kpa ṛo ndra. ¹¹ Mì’ba tausu amiro ori liyaro orine ayani, losi modo amiro ro oyene, ŋga usuza ori modo amiro rota, kpa oso mìtibe ämiri käti ronye. ¹² Taoye nonye ono si mì’bana ànya se taomaako’bai ro ’da a’done ämiri taoro be, ago mìnina ko mio’bane ’diaza dri ta ŋgase ami be lemerina be rota. ¹³ Ädrupii ago endreŋwai amaro, màle ämiri taŋgye unine ta ànya se kodrabe kai rota, ukyi nyà’do ’da tusu ro, oso ànya se orivoya mio’baako ronye. ¹⁴ Màma ndi anjioko Yesu drate ago go efote, ago màma kpa ndi anjioko Yesu si Lu uruna ànya se kodrabe taoma be nda ya iyi ’da tro nda be kovole. ¹⁵ Ŋgaemba se màbe ugu embana ämiri yauono orivoya ŋgaemba Opi ro; ama se orivoya lidriidri ro tuse Opi kabe ikyi si mòyina ko käti ni ànya se kodrabe ri. ¹⁶ Otre ota ozo ro a’dona ’da, kporo, malaika fopara ro, ndi uwi cekuṛe Lu ro robe, ago Opi andivona ikyina ’da vuru ni vo’buyakuru yasi. Ànya se kodrabe taoma be Kristo ya efona käti adri ya. ¹⁷ ’Dooko ama se mà dri gi ugu ori tu ana si otona kalana ’da troalo kuru ànya yibe ’dikolo ya drio’bene Opi be vokuru ya. Ago mà’dona ’da ondoalo Opi be. ¹⁸ Ka’do inye, nyòzo agoago azi ri ata kwoi si.

¹ Ta tuse ŋgase kwoi a’dona ’da sina rota, ko märi tana egyine egyi ämiri, ädrupii ago endreŋwai. ² Tana andivo amiro mini ṛote kado anjioko Tu Opi ro ikyina ’da oso kugu’ba kabe ikyi ŋgäkyi si ronye. ³ Ondro lidri kate ata ekye: “Ŋgacini orivoya liya ago tokpero kado,” ’dooko rueza esana ’da ànya dri ndriŋwa! Ikyina ’da ndriŋwa oso luwu utiro kabe ikyi toko dri ronye, ago lidri oparuna ko. ⁴ Oko ami, ädrupii ago endreŋwai, ko orivoya vouni ya, ago tu gi ana terona ami ko oso kugu’ba ronye. ⁵ Vo amiro cini orivoya lidri ŋgaeyi ro, ami orivoya lidri kitu ro. Ama ko ŋgäkyi ro kode vouni ro. ⁶ Ka’do inye, beṛo ko ämäri a’done u’duu’du ro oso azaka ronye; beṛo ämäri a’done miuŋbo ago vookwa be. ⁷ Tana lidri ka u’du ŋgäkyi si; lidri ka iyi ufu wa si ŋgäkyi si. ⁸ Oko ama orivoya kitu ro, ago beṛo ämäri a’done vookwa be. Beṛo ämäri taoma osone ndi ŋgalu be oso boŋgo kätäti gaga ro ronye, ago mio’ba ŋgaoparo amaro oso ŋga drî tako ro ronye. ⁹ Lu nji ama kote ruezane ni kyila ndaro ri, oko ŋgaopa usune Opi amaro Yesu Kristo si, ¹⁰ se drate ama ta tana màri robe voaloya nda be, kode ama orivoya lidriidri ro kode avo ro ikyi tu ndaro si. ¹¹ Ago ka’do inye nyòzo agoago azi ri ago mìpa azi, kpa oso nyàbe ugu oyena yauono ronye ¹² Mà rulo’ba ämiri ädrupii ago endreŋwai amaro, taoro oyene ànya se kayibe losi oye ami lako ri, se kayibe ami lepe ago kayibe ami emba ori Kristo’ba ro tana ya ono. ¹³ Mìye ànya taoro ndra ozo si ndi ŋgalu be ta losi se ànya kayibe oyena rota. Nyà’do liatokpero amivoya. ¹⁴ Mòlo’baru ämiri, ädrupii ago endreŋwai amaro, ’dise kabe ori etero embane, nyòzo agoago ànya se turiro ri, mìpa, ’dise mbaraako, nyà’do yaiŋgyi be ’dicini ri! ¹⁵ Mì’ba ’diaza kologo vo takozi ro ko takozi si, oko tu cini si mìye amiro takado ayani azi ri ago lidri cini ri. ¹⁶ Nyà’do riyä ro ondoalo. ¹⁷ Nyä̀mätu tu cini si, ¹⁸ nyà’do aro’boya oye be ta cini ta. Ono ni tase Lu kolebe ni ami resi ori amiro rudro’bero Kristo ya ro owo. ¹⁹ Nyàlaga Tori Alokado ko. ²⁰ Nyàmawo lazo se ozobe mbara Lu rosi ko. ²¹ Nyòjo ŋga cini, nyäti se orivoya kado ’do, ²² ago mìna ŋgacini se a’dona undiro ’do. ²³ Ka’do inye Lu se kabe taliatokpe ozo ämäri ko’ba ami alokado ta cini ya ago kagaga a’do amiro ṛo cu, tori, lindri, ndi lomvo be, ko’ba ami dritai ro ni taenji cini yasi ikyi tu Opi amaro Yesu Kristo rosi. ²⁴ Nda se kabe ami uzi ono oyena ’da, tana nda orivoya ’diri. ²⁵ Nyä̀mätu kpa ama ta, ädrupii ago endreŋwai. ²⁶ Mìye mede taoma’bai cini ri ’dinjunju alokado si. ²⁷ Mata ami drikaca Opi rosi taegyi ono uzine taoma’bai cini ri. ²⁸ Tai’dwero Opi amaro Yesu Kristo ro ka’do ami cini be.