1 PETERO

¹ Ni Petero, lazo’ba Yesu Kristo ro resi. Lidri onjionjiro Lu ro se kepererube ta ruopa rota warii Pondusi, Galatia, Kapadokia, Asia, ndi Bitunia robe yasi ri. ² Ami orivoya lidri onjionji ro yi oso ta Lu Täpi ro ronye ago a’ba ami te lidri alokado ro Tori ndaro si, Yesu Kristo orone ago a’done wäṛiro kari ndaro si. Ka’do inye tai’dwero ndi taliatokpe be ka’do amiro ago kiliti amba. ³ Mì’de mòzo aro’boya Lu ago Täpi Opi amaro Yesu Kristo ro ri! Tana yauni amba ndaro si nda ozo adri to’di te ämäri Yesu Kristo eŋga si ni odra yasi. Ono ’ba ama te a’done mio’ba lidriidriro robe, ⁴ ago ta’doro mà voondre mileyaro äṛu amba se Lu kabe etana lidri ndaro ri ana urune. Nda ka ànya eta ämiri vo’buyakuru ya, vose ànya unina ko oŋgwane kode ruenjine ago se liŋgyina kye ko ana ya. ⁵ Ànya orivoya tana ami, se taoma si ätite londroro mbara Lu rosi ta ŋgaopa ro se orivoya nja oyebe lofone tu äduro si ana rota. ⁶ Nyà’do yai’dwesi ta ono ro, ca yauono nyà’do gica tusuro ta taojoro dritoto se nyàbe rueza ni rigye ono ro. ⁷ Taojoro kwoi ikyite taoma amiro ka’dane anjioko orivoya ŋgye. Tana ca logo läguläguro, se äni ndi togane ono, ojo mbarana te asi si; ago taoma amiro se kadona orivoya para ndrani logo läguläguro risi, beṛo kpa mbarana ojone tana ka’do robe yaiŋgyi be. ’Dooko nyùsuna räṛu ’desi ndi taoro be ndi, Tuse abe Yesu Kristo ka’da sina si. ⁸ Nyùlu nda te, mindre nda ca ko owo, ago mimate nda ya mìndre nda ca ko owo. Ka’do inye mìye riyä amba riyä räṛu ro se änina ko tana itine ata si, ⁹ tana nyàte ŋgaoparo lindri amiro ro usuna, se ni ta taoma amiro ro nda ya owo. ¹⁰ Ta ŋgaoparo ono rota, nebii ṛite taoti si ago tenyiyi tazevona te, ago ànya äŋguyi ta ŋgapäṛi ono rote se Lu ka oyebe ozone ämiri ono. ¹¹ Ànya ojoyite tazevona uṛine tuna a’dona rota ago ta ikyina rota. Tori Kristo ro se orivoya ànya ya kani ugu tuna ka’dana, rueza se Kristo ka oyebe iŋgyine ndi a’do ’desi se kabe eso voigye be äŋgu tana te ṛo käti. ¹² Lu ka’da ta kwoi te nebii kwoi ri anjioko losi ànyaro ko takado modo ànyaro rota, oko ta amiro ta, oso ànya kopeyi ta ŋgà kai robe ronye se nyeri tana te yauono ni lazo’bai se kopeyi Lazokado te ämiri mbara Tori Alokado se ezote ni vo’buyakuru ya rosi. Kwoi kpa ni orivoya ŋga se malaikai koleyibe unine owo. ¹³ Ka’do inye, mì’ba tauni drî amiro ro ka’do nja taoyeza. Nyà’do vookwa be ago mì’ba mio’ba amiro kpeye äṛu se ozona ’da ämiri tuse Yesu Kristo ka oyebe ruka’dane sina si. ¹⁴ Nyà’do taoro be Lu ri, ago mì’ba ori amiro ka’do ko ole uku se nyà’dobe sina ’dooko ami drigba tauniako kai robe. ¹⁵ Oko nyà’do alokado tase cini nyàbe oyena ya, kpa oso Lu se kuzi ami be orivoya alokado ono ronye. ¹⁶ Taegyi ka ata ekye: “Nyà’do alokado tana ma orivoya alokado.” ¹⁷ Mìzi nda Täpi, ondro nyàte Lu, se kabe vure lidri cini ro ope ojoojoro, oso taoye se ’dialo koyebe ronye mätuna owo; ka’do inye, mìri ori anjoko amiro ’bädri ono ya taoro si ndäri. ¹⁸ Tana mìni ŋgase ozobe ami o’baza dritai ro ni a’do se takadoako ori ro se ocopete ämiri zutui amiro si ono te. Ko orivoya ŋga aza se änina ndi togane oso mo’di kode logo läguläguro ronye; ¹⁹ orivoya kari lagyeamba Kristo ro, se laba oso timelegogo teinye mämbiako biliro ronye. ²⁰ Lu nji Kristo teṛo teinye o’ba ’bädri ro ako ago aka’date tui äduro kwoi ya ta amiro ta. ²¹ Nda si nyà taoma Lu ya, se eŋga nda te ni odra ya ago ozo ’desi te ndäri; ago taoma amiro ndi mio’ba be änjute Lu dri. ²² Ago taoro amiro ata Lu ro ri si nyäwäṛi andivo amiro te ago nyà’dote ŋgalu endaro be taoma’bai azi amiro ri, nyùlu azi ole cini si ago ya cini amiro si. ²³ Tana ata lidriidriro ago äduako Lu rosi äti ami te to’diro oso ŋgwai se uti’bana oŋgwaako ro si, ko oŋgwaoŋgwaro si. ²⁴ Oso taegyi kabe ata ronye ekye: “Vo lidri cini ro orivoya oso käyi ronye, ago liŋgyi ànyaro cini oso foi vocowa ro ronye. Käyi lunyite, ago foi layite, ²⁵ oko ata Opi ro ka ori äduako.” Ata ono orivoya Lazokado se apete ämiri ono owo.

¹ Ka’do inye, mìna andivo amiro ni taundi cini, miomba, kowe, yaoko ndi kalambäri be yasi. ² Nyà’do oso ŋgwai se ätibe to’diro ronye, ondoalo täbiri ro ta leyi wäṛiro tori rota, tana ugu umvuna si mìmba robe ago apa ami robe. ³ Tana yauono nyètembe yauni Lu rote. ⁴ Nyìkyi Opi re, kuni lidriidriro se lidri kogabezo oso ŋga takadoako ronye oko Lu njite ŋga kado para ndra ro. ⁵ Nyìkyi oso kuniŋwà lidriidriro ronye, ago mì’ba amo andivo amiro Yekalu tori ro ro, nyìnduru robe oso kohanii alokado ronye ŋga ozo a’do tori ro voro ozone ago tori olo se ta kusi Lu be ozone Yesu Kristo si ro. ⁶ Tana taegyi ka ata ekye: “Manji kuni kado para ndra te, se mate o’bana kuni goŋgodri ro Zaiona ya, ago nda se kabe taoma nda ya a’dona ko driupiro.” ⁷ Kuni ono kadona orivoya ndra ami se nyàbe taoma ri; oko ànya se koma ta ko ri: “Kuni se zo obe’bai kogabezo oso takadoako ronye gwo zarute a’done para ndrani vona cini risi.” ⁸ Ago taegyi aza ka ata ekye: “Ono ni kuni se o’bana lidri ’da o’dene toromoga, luutu se o’bana ànya ’da lapane owo.” Ànya ’deyite toromoga tana ànya mayi ta kote ata ya, ’do ni tase Lu kora tana be a’done ànyari owo. ⁹ Oko ami orivoya lidri onjionji yi, kohanii ’Bädri’ba ro, tu’de alokado yi, lidri Lu modo ro, anjite taoye liŋgyiekye Lu ro tana opene, se zi ami teni vouni yasi le ŋgaeyi liŋgyiliŋgyi ro modo ndaro roya. ¹⁰ Sedri iga ami ko lidri Lu ro, oko yauono ami orivoya lidri ndaro; sedri iga mìni yauni Lu ro kote, oko yauono nyùsu yauni ndaro te. ¹¹ Ma ami eji ole cini si, bereazii maro, oso atrai ndi lämu’bai ’bädri ono ya ronye! Nyòzo vo ko ole lomvo ro ri se ondoalo kabe kyila oye lindri be ono. ¹² A’do amiro Atrai lako beṛo a’done kadopara tana ondro ànya kikicuyi ami ca oso taundi oye’bai ronye oko, ànya ondrenayi taoye kado amiro ’da ago räṛunayi Lu ’da Tu ndaro ikyi rosi. ¹³ Ta Opi rota nyòlogo andivo amiro vuru drikaca cini lidri ro zele! ’Bädri’ba ri, se orivoya drikaca ’desi be, ¹⁴ ago wari’bai ri, se nda ka’date ànya se taundi oye’bai ezane ago ànya se kayibe takado oye räṛune. ¹⁵ Tana Lu le ämiri ata tauniako lidri amamaro ro drî na o’bine ta kado se nyàbe oyena si. ¹⁶ Mìri oso lidri dritai ro ronye; caoko, mì’ba dritai amiro ka’do ko drî takozi aza ro takoza sina, oko mìri oso ruindu’bai Lu ro ronye. ¹⁷ Mìro ’dicini, nyùlu taoma’bai azi, nyùturi Lu, ago mìro ’bädri’ba. ¹⁸ Ami ruindu’bai nyòlogo andivo amiro vuru ’desii amiro zele ago nyàka’da taoro ànya cini ri, ko gialo ànya se orivoya yauni be ago kabe taoti ri ayani, oko kpa ànya se siomba be ri. ¹⁹ Lu äṛuna ami ’da ta ono ro, ondro nyìŋgyi lomvoluwu rueza taenjiako rote owo tana ya amiro ya mìni ole ndaro te. ²⁰ Ondro ka’do nyènji ta yi ago nyìŋgyi rriti ami o’biro gwo tana ro takado se nyùsuna ämiri iga e’di ya? Oko ondro mìye takado yi nyìŋgyi rriti rueza ro ca tana ro, Lu äṛuna ami ’da tana ro. ²¹ Tana Lu zi ami te ta ono ta, tana Kristo andivo ezarute ta amiro ta ago e’be taka’daro te ämiri, tana mìso robe pavo ndaro vo. ²² Nda ye takozi kote, ago ’diaza eri ata miodo ro kote ni kala ndaro yasi. ²³ Ondro a’da nda ca, nda gologo vona kote la’dao’da si, nda kezaru ca, nda nyaozi kote, oko nda ’ba mi ndaro te Lu, Vureope’ba ŋgye dri ayani. ²⁴ Kristo andivo ŋgyi takozi amaro te lomvo ndaro ya taka dri, tana màdra robe takozi ri ago màri robe taŋgye ri. Tana laza ndaro si ede ami te. ²⁵ Sedri ami orivoya oso timele se ije liti ànyaro te ronye, oko yauono ezi ami te kovole osone Lekye’ba ago Äti’ba lindri amiro ro vo.

¹ Kpa oso inye, beṛo ami ’ditoko ri kpa andivo amiro logone vuru àgo amiro zele, tana ondro azaka ànyaro koma kote ata Lu roya, a’do amiro o’bana ànya ’da taomane. Mìnina ko atane ata, ² tana ànya ondrenayi a’do wäṛiro ndi taoro amiro be ’da. ³ Beṛo ko ämiri ŋga ruega ro tesisi o’bane andivo amiro o’baza liŋgyiekye, oso drio’di, kode kati läguläguro o’ba lomvo yasi, kode boŋgo se nyàbe osona si. ⁴ Oko, liŋgyi amiro beṛo a’done ya yasi ŋgye andivo amiro ro, liŋgyi se odeako, tatokyeako ago tori trwe robe, se kadona orivoya fondra Lu mile ’do. ⁵ Tana ’ditoko se kyeno mätu’bai ro se ko’bayi mi be Lu dri egayi andivo ànyaro te liŋgyiekye andivo ànyaro o’ba si àgo ànyaro zele. ⁶ Sara orivoya oso inye; anya ro Abarayama te ago zi nda te ’desi anyaro. Yauono ami ni orivoya ndiriŋwa anyaro ondro ka’do nyà tase kado oye ondoalo ago nyùturi ŋga aza kote owo. ⁷ Kpa oso inye ami àgo beṛo ämiri orine ’ditoko amiro be kadoro tauni si tana ànya orivoya ’di mbaraako yi. Mìye ànya taoro si, tana ànya urunayi ŋgapäṛi Lu ro adri ro kpa ’da troalo ami yibe. Mìye inye ukyi ŋga aza gburu mätu amiro ’da. ⁸ Äduro, beṛo ami cini ri a’done ya alosi ago tavousu alo be, nyùlu azi oso ädrupii ronye, ago nyà’do yauni be ago nyòlogoru vuru azi ri. ⁹ Nyòlogo vo taundi ro ko taundi si ago latri ro ko latri si, oko nyòlogo vona äṛu si, tana äṛu ni orivoya ŋgase Lu ko’ba tana be ozone ämiri tuse nda kuzi ami be si owo. ¹⁰ Oso taegyi kabe ata ronye ekye: “Nda se kolebe orine riyäsi ago kole ndi tui kado ondrene, beṛo ruonane ni ugu taundi atavoya ago ke’be koweoga. ¹¹ Beṛo ndäri ruonane ni taundi yasi ago koye takado; beṛo ndäri ruutrine taliatokpe ta ya cini ndaro si. ¹² Tana Opi ka voondre taŋgye’bai dri ago ka mätu ànyaro erina; oko nda kyilaro ànya se kayibe taundi oye be.” ¹³ A’di oyena ami ni koziro, ondro ka’do ami orivoya ondoalo nja tase kado oyene ya? ¹⁴ Oko ondro ka’do nyà rueza ta taŋgye oyero ta, nyà’do yai’dwesi! Nyùturi ko ni ’diaza ri, ago nyòlo’be mi ko. ¹⁵ Oko nyà’do taoro be Kristo ri ya amiro ya, ago mìro nda Opi ro. Nyà’do nja tu cini si ’diaza se kabe ami eji mio’ba se nyà’dobe sina ami ya ono ta tazevona edrene, ¹⁶ oko mìye takado ndi taoro be si. Mì’ba tavouni ya amiro ro ŋgye, tana ondro a’da ami te, ànya se kabe taundi ata ami lomvo ta a’do kado amiro oso oso’bai Kristo vo ronye rota, ànya a’donayi ’da driupiro ta tase ànya kayibe atana rota. ¹⁷ Tana orivoya kadopara ruezane ta takado oye rota, ondro ono ka’do gini ole Lu ro owo, kadona orivoya ndrani takozi oye ri. ¹⁸ Tana Kristo drate takozii ta perena alo, ago nde ta cini te, taŋgye’ba ro vo takozi’bai roya, tana nda kugu ami robe Lu re. A’ba nda te odrane lomvo ya, oko adrite tori ya, ¹⁹ ago a’do ndaro tori rosi nda oyite ago petate torii se avote kamba ya ri. ²⁰ Kwoi ni torii ànya se koroyi Lu kote tuse nda kiŋgyi ya be madaro tui se Noa kede toŋbo ndaro be sina ana si owo. Lidri fereŋwa se toŋbo ya, vona cini orivoya njidriena, apate ni gyi yasi, ²¹ se ni orivoya taka’da yi ta bapatisi ro ugu ka’da ro, se yauono ka ami opa. Ko orivoya ugu undi lomvo ya ojo ro, oko tao’ba se a’bate Lu ri ni tavousu ŋgye ya ro yasi ro. Anya ka ami opa efo Yesu Kristo rosi, ²² se oyite vo’buyakuru ya, ago orivoya drígwo Lu roya, ka malaikai, drikacai ndi mbara vo’buyakuru robe mirina.

¹ Tana Kristo ezarute lomvo ya, beṛo kpa ämiri andivo amiro tombane inye tavousu se nda ka’dobe sina si, tana nda se kabe rueza lomvo ya dro’beru kote tona takozi be. ² Ka’do inye, ni tu yauono si le mileyaro, beṛo ämiri ori anjoko amiro ori ’bädri ro ro ritane ole Lu rosi ago ko ole lidri rosi. ³ Tana tuse kyeno kälävube ana si tase taomaako’bai koleyibe oyene nyugu loyena te ayani. Mirite ori undiro, ŋgalovo ro, ’diufu wa si ro, ori kozi, Kärikozi ŋga umvu si ndi mätu undiro lui awi robe. ⁴ Ago yauono taomaako’bai larote ondro nyodro’beru kote tro ànya yibe lori koziro pari se kayibe orina ya owo, ago ta’doro ànya kayi ami lo’da. ⁵ Oko ànya itinayi ta andivo ànyaro ro ’da Lu, se orivoya nja vure ’di lidriidriro ro ndi avo be ro opene ri. ⁶ ’Doni tase a’debe Lazokado opene kpa avo ri owo, ànya se ape vure ànyaro te ori lomvo ànyaro rosi kpa oso aye vure ’dicini rote ronye; apete ànyari tana ori ànyaro tori rosi ànya kori robe oso Lu kabe ori ronye. ⁷ Ädu ŋga cini rote orivoya lototi. Beṛo ämiri a’done andivo rita be ago vookwa be, tana nya’do ro nja mätune. ⁸ Ago ndra ŋgacini drisi, azi lune ya cini si, tana ŋgalu takodri takozii amba ro ndi. ⁹ Nyàfo käläsi ’bai amiro ro uŋbo azi ri teinye drioviako. ¹⁰ ’Dialo oso voondre’ba kado ŋgapäṛi dritoto Lu ro ro, beṛo ndäri ŋgapäṛi ndra se nda kusube ni Lu rigyesi ’do losi kado oyene sina ta azii rota. ¹¹ Nda se kabe taope beṛo lazo Lu ro opene; nda se kabe ruindu beṛo ruindune mbara se Lu kabe ozona ndäri si, tana ŋga cini ya ozo räṛu robe Lu ri Yesu Kristo si, se ’desi ndi mbara be ni ndaro rriro ago äduako. Amen. ¹² Bereazii se mulube ono, nyà’do ko larolaro ro ni taojoro se luwuekye ruezaro abe mbara amiro ojo sina ono ri. Nyùsu ta ko mìkye ŋga aza se ko a’done iri kate a’do. ¹³ Oko nyà’do yai’dwesi tana nyà rueza Kristo ro la’dona, tana nyà’do robe riyä amba be ondro aka’da ’desi ndaro te owo. ¹⁴ Ami ni kado ondro a’da ami te tana ami be oso’bai Kristo vo ono ro owo; tana anjioko Tori ’desiro, Tori Lu ro, ka ugu ori ämidri. ¹⁵ Ondro aza amiro ka rueza, beṛo ko a’done tana nda ’diufu’ba yi kode kugu’ba yi kode taenji’ba yi kode loci’ba yi losi azi ro yasi. ¹⁶ Caoko, ondro nyà rueza tana ami orivoya Kristo’ba yi, nyà’do ko driupiro tana ro, oko mìye aro’boya Lu ri tana nyà ävuru Kristo ro uŋgyina. ¹⁷ Tu vure opero esate ago apena vure lidri modo Lu ro ro käti. Ondro ate etona ama si, äduna a’dona eŋwanye ànya se koma be ko Lazokado ni Lu resi ono ya riya? ¹⁸ Oso taegyi kabe ata ronye ekye: “Ondro ka’do orivoya rritiro lidri kado opane; ka’do inye a’dona te luako’bai ndi takozi’bai be ri eŋwanye ya?” ¹⁹ Ka’do inye, ànya se kabe rueza ole Lu ro ànyari ronye, taoye kado ànyaro si beṛo andivo ànyaro ozone cu O’ba’ba ànyaro ri, se ondoalo kabe tao’ba ndaro ätina ono.

¹ Ma, andivo maro orivoya ’di’desi yi, ma taayo ’di’desii känisa ro ami lako ri. Ma orivoya tazevoedre’ba rueza Kristo ro ro, ago mala’dona ’desi se oyebe ka’dane ana ’da. Ma taayo ämiri ² a’done lekye’bai gboko se Lu kozobe ämiri ro ago mindrevona ya cini si, oso Lu kole ami be oyene ronye, ago ko ya ŋgyi’diŋgyi’di rosi. Mìye losi amiro, ko gialo toto ta päläti rota, oko ya ŋgye ruindu rosi. ³ Nyòjo ko ànya se a’babe taoti amiro zele ono mirine, oko nyà’do taka’daro ro gboko ri. ⁴ Ago ondro Lekye’ba ’Desi kaka’darute oko, nyùsuna tagyia liŋgyiekye ’da se läguna kye kote alona. ⁵ Kpa oso inye ami agoànji beṛo andivo amiro logone vuru ’di’desi zele. Ago vo amiro cini beṛo tokyeako osone ami lomvo, ruindune azi ri; tana taegyi ka ata ekye: “Lu ka ogbo driuŋgyi’bai be, oko nda ka tai’dwero ka’da driuŋgyiako’bai ri.” ⁶ Nyòlogo andivo amiro vuru drí mbaraekye Lu ro zele, tana nda keŋga ami robe kuru tu kado modo ndaro rosi. ⁷ Nyè’be milo’be cini amiro tana nda rigye, tana nda ka ta amiro otina ni. ⁸ Nyà’do nja, vookwa be! Kyila’baazi amiro, Kicu’ba, ka voonde oso ibi kabe ugu liyi vouṛi be ’diaza onyane ronye. ⁹ Nyà’do ŋgyiri taoma amiro ya ago nyògbo nda be, tana mìni ndi anjioko taoma’bai azi amiro ’bädri cini yasi ka ugu oyi rueza gi nonye ono yasi. ¹⁰ Oko ’do vosi ondro nyèzarute fere oko, Lu tai’dwe cini ro, se kabe ami uzi ’desi äduako ndaro la’done rumora Kristo be si, nda andivona o’bana ami ’da ŋgye, ago ozona a’do ŋgyiri, mbara ndi edrevo ŋgye be ’da ämiri. ¹¹ Mbara ka’do ndäri äduako! Amen. ¹² Megyi taegyi fereŋwa ono ämiri ŋgaopa Sila, se musu nda be ädrupi ŋgye Kristo’ba ro ono rosi. Male agoago ozone ämiri ago ma tazevoedre anjioko ono orivoya taŋgye tai’dwero Lu ro ro. Nyèdre ŋgyiri kigye. ¹³ Känisa endreŋwaazi amiro Babelona ya, se anji kpate Lu si, ye mede ämiri, ago ŋgwa maro Marako kpa inye. ¹⁴ Mìye mede azi ri ’dinjunju ŋgalu Kristo’ba rosi. Taliatokpe ka’do ami se cini Kristo ya ri.