1 YOANE

¹ Mà ta Ata adri ro egyina ämiri, se a’dote ṛoni eto si. Se mèrite ago màndrete mi amaro si; owo, màndrete, ago drí amaro tämbite. ² Tuse adri ono ka’dobe ondreondre ro si, màndrete, ago mà ta iti ämiri ta adri äduako rota se ṛo orivoya Täpi be ago a’bate unine ämäri. ³ Ŋgase màndrebe ago mèribe mà ayona kpa ämiri, tana nyòdro’beruna ’da ama yibe rumora se mà’dobe sina Täpi be ndi Ŋgwa ndaro Yesu Kristo be ono ya. ⁴ Mà ta ono egyi ämiri tana riyä amaro ka’do ro be twi. ⁵ Ago ono ni lazo se mèribe ni Ŋgwa ndaro resi owo, ago mà tana ayona ämiri: Lu ni ŋgaeyi yi, ago vouni i’do nda ya alona. ⁶ Ondro ka’do, mà ata màkye mòmorarute nda be, oko mà drigba ori vouni ya, mà koweoga ago mà ori ko a’do taŋgye ro voro. ⁷ Oko ondro mà ori ŋgaeyi ya, kpa oso nda ka’dobe ŋgaeyi ya ’do ronye, ’dooko ama orivoya rumora be azi be, ago kari Yesu, Ŋgwa ndaro ro ka ama wäṛi ni takozi cini risi. ⁸ Ondro mà ata màkye ama takozi ako, mà andivo amaro odo, ago taŋgye i’do ama ya. ⁹ Oko ondro mà takozi amaro eṛona Lu ri, nda ätina tao’ba ndaro ’da ago oyena tase orivoya ŋgye ’da, nda e’bena ama ’da takozii amaro ta ago wäṛina ama ’da ni taoye kozi cini amaro risi. ¹⁰ Ondro mà ata màkye màye takozi ko, mà Lu o’ba kowe’ba ro, ago atà ndaro i’do ama ya.

¹ Ma ta ono egyi ämiri, ŋgwai maro, ukyi mìye takozi ’da; oko ondro ’diaza ka takozi oye, ama ’diaza be se ka Täpi eji vo amaro ya, Yesu Kristo, se ni taŋgye’ba yi. ² Ago Kristo andivona se nda si e’be ama te takozii amaro ta, ago ko toto amaro ayani, oko takozii ’dicini ro kpa. ³ Ondro mà ota Lu ro orona, anjioko ndi endaro mä̀ni nda ndi. ⁴ Ondro ’diaza ka ata ekye mäni nda ndi, oko koro ota ndaro kote, ’di nonye ono orivoya kowe’ba yi ago taŋgye i’do nda ya. ⁵ Oko nda se kabe ata ndaro orona orivoya ’dise ŋgalu ndaro Lu ri a’bate a’done ŋgye endaro owo. Ta ono si mä̀nina ndi endaro anjioko ama orivoya rumora be Lu be: ⁶ nda se kabe ata ekye nda ka ori rumora ya Lu be beṛo orine ŋgye oso Yesu Kristo koyebe ronye. ⁷ Bereazii maro se mulube ono, ota mabe egyina ämiri ono ko to’di yi, anya orivoya ota uku yi, se nyà’dote ṛo sina ni etovoya, ota uku ni orivoya lazo se nyèrite nja owo. ⁸ Caoko, ota se yau mabe egyina ämiri ono orivoya to’di yi, tana taŋgye anyaro andrete Kristo ya ago kpa ami ya. Tana vouni kate ugu lävu ago ŋgaeyi endaro eyivote nja. ⁹ Nda se kabe ata ekye yi orivoya ŋgaeyi ya, oko yana osoro ädrupi ndaro lomvo, orivoya vouni ya gile yauono. ¹⁰ Nda se kabe ädrupi ndaro lu ka ori ŋgaeyi ya, ago ta’doro ta aza i’do nda ya azi o’bane takozi oyene. ¹¹ Oko nda se yana osoro ädrupii ndaro lomvo orivoya vouni ya ago ka aba vouni yasi ago ni vose nda kabe ugu oyi kigye ko, tana vouni ’ba nda te miako. ¹² Ma taegyi ämiri ŋgwai maro, tana e’be ami te ta takozii amiro rota ta Kristo rosi. ¹³ Ma taegyi ämiri, täpii, tana mìni nda se a’dote ni etovoya te. Ma taegyi ämiri màno to’di, tana mìpe nda se koziro ono te ṛe. Ma taegyi ämiri, ŋgwai maro, tana mìni Täpi ndi. ¹⁴ Ma taegyi ämiri, täpii, tana mìni nda se ka’dobe ni etovoya te. Ma taegyi ämiri màno to’di, tana ami orivoya mbara ro, ata Lu ro ka ori ami ya, ago mìpe nda se koziro te ṛe. ¹⁵ Nyùlu ’bädri ko ndi ŋgase cini ’bädri robe. Ondro nyà ’bädri lu, nyùlu Täpi ko. ¹⁶ Ŋgacini se ’bädri ro ni ole cini undiro lomvo ro se lidri kabe ondrena ago kolebe owo, ago ŋgacini ’bädri ono ya se lidri orivoya driuŋgyi amba be tana ro aza alo ŋga kwoi ro ikyi ko ni Täpi resi; vona cini ka ikyi ni ’bädri yasi. ¹⁷ ’Bädri ono ndi ŋgase cini kigye se lidri kabe lemena be kate lävu, oko nda se kabe ole Lu ro oyena orina ndi äduako. ¹⁸ Ŋgwai maro, tu äduro te ti! Ititate ämiri se ekye kyila’baazi Kristo ro ikyina ’da ago yauono kyila’baazii amba Kristo ro ka’darute ṛo nja, ago mä̀ni ndi tu äduro te ti! ¹⁹ Lidri kwoi ṛo endaro ko ni rumora amaro ro, tana ànya e’beyi ama te, aba ànya ka’do yi gwo amaro, ànya riyite ama be, oko ànya foyite ago a’doyite ṛo ŋbelero anjioko ṛo endaro ànya i’do amaro. ²⁰ Oko ami te orivoya Tori Alokado se edate ämidri Kristo si ono be, ago ta’doro vo amiro cini mìni taŋgye te. ²¹ Ka’do inye, ma taegyi ämiri, ko tana mìni taŋgye ko, oko, tana mìni ṛote ago mìni kpate anjioko kowe efo kote ni taŋgye yasi. ²² Ka’do inye, a’di ni kowe’ba yi ya? Anjioko ni ’dise kabe ata ekye Yesu ko Mesiya owo ’do owo. ’Di inye ’do orivoya kyila’baazi Kristo ro, nda ga Täpi ndi Ŋgwa be te riti zo. ²³ Tana nda se kabe Ŋgwa ogazo ka kpa Täpi ogazo; nda se kabe Ŋgwa uru kpa orivoya Täpi be. ²⁴ Ka’do inye mì’ba tase nyèribe ni etovoya ono kori ami ya. Ondro ka’do nyä̀ti tase ana te, ’dooko mìrina ’da ondoalo rumora ya Ŋgwa ndi Täpi be be. ²⁵ Ago ono ni orivoya ŋgase Kristo andivo ko’ba tana be ozone ämäri owo, ni adri äduako. ²⁶ Ma ta ono egyi ämiri ta ànya se kayibe ojo ami odone rota. ²⁷ Oko ämiri ono, Kristo eda Tori ndaro te ämidri. Oso Tori ndaro kabe ori ami ya ronye, mìlena ’diaza ko ami embane. Tana tori ndaro kani ami emba ta ŋgacini rota, ago tase nda kabe embana orivoya endaro, ko kowero. Ka’do inye, mìro ŋgaemba Tori ro, ago mìri rumora ya Kristo be. ²⁸ Owo, ŋgwai maro, mìri rumora ya nda be, tana ondro nda kefote oko mà’do robe agoago amba be ago mà’dona ko driupi ro ruda’done ni ndäri Tuse nda kabe ikyi ana si. ²⁹ Mìnite Kristo ni taŋgye’ba yi; beṛo ämiri unine anjioko ’dicini se kabe tase ŋgye oye orivoya ni ŋgwa Lu ro.

¹ Mìndre Täpi lu ama tawi! Ŋgalu ndaro orivoya ndra tana äzi ama te ŋgwai Lu ro, ago ndi endaro ama ṛo ni owo. Ono ni tase ’bädri ka ko ama uni owo; tana ni Lu ko. ² Bereazii se mulube ono, yauono ama orivoya ŋgwai Lu ro, oko drigba ko ŋbelero a’do amaro ka oye a’done eŋwanye. Oko mä̀ni ndi ondro Kristo koloforute oko, mà’dona ’da oso nda ronye, tana màndrena nda ’da oso nda ka’dobe ronye. ³ ’Dicini se mio’ba ono be Kristo ya ka andivo ndaro gaga wäṛiro, kpa oso Kristo be orivoya wäṛiro ronye. ⁴ Nda se kabe takozii oye ni ota Lu ro pere’ba yi, tana takozi ni ota pere yi. ⁵ Mìni ndi anjioko Kristo loforute anjioko takozii onane, ago tana takozi i’do nda ya. ⁶ Tana ’dicini se kabe ori rumora ya Kristo be ye takozi ko ’duro, oko nda se kabe takozi oye ’duro ndre nda ko ago ni nda kpa ko. ⁷ Mì’ba ’diaza kodo ami ko, ŋgwai maro! Nda se kabe taŋgye oye ni taŋgye’ba yi, kpa oso Kristo be taŋgye’ba ro ronye. ⁸ Nda se kabe ugu takozi oye ’duro nda orivoya Kicu’ba ro tana Kicu’ba ye takozi te ṛo ni etovoya. Ŋgwa Lu ro loforute ta gi ono ro, tase Kicu’ba koyebe perene. ⁹ Nda se orivoya ŋgwa Lu ro ri ko ’duro takozi oyene, tana a’do Lu modo ro orivoya nda ya, ago tana Lu orivoya Täpi ndaro, nda ni ko takozi oyene ’duro. ¹⁰ A’do toto se lakole ŋgwai Lu ro ro ya ndi ŋgwai Kicu’ba ro be ni no: nda se kabe ko taŋgye oye kode lu ädrupi ndaro ko, i’do ŋgwa Lu ro. ¹¹ Lazo se nyèribe ṛoni etovoya ni ono; beṛo ämäri azi lune. ¹² Beṛo ko ämäri a’done oso Kaina ronye, nda orivoya nda se Koziro ono ro ago fu ädrupi modo ndaro Abele te. Kaina fu nda te etaya? Tana ŋgase nda andivo koyebe orivoya koziro, ago ŋgase ädrupi ndaro koyebe orivoya ŋgye. ¹³ Ka’do inye nyàlaro ko, ädrupii maro, ondro lidri ’bädri ro yana kosote ami lomvo owo. ¹⁴ Mä̀ni ndi anjioko mè’be odra te ago mà te lävu adri ya, mä̀ni ndi tana mà ädrupii amaro lu. Nda se lu ’di ko drigba orivoya mbara odra ro zele. ¹⁵ Nda se yana osoro ädrupi ndaro lomvo ni ’diufu’ba yi, ago mìni ndi ’diufu’ba a’do ko adri äduako be nda ya. ¹⁶ Ta ono si mä̀ni ndi ŋgalu orivoya ni ono: Kristo ozo adri ndaro te ta amaro ta. Ka’do inye, beṛo ämäri kpa adri amaro ozone ädrupii amaro ta! ¹⁷ Ondro ’dise ŋgaamba be ndre gindi ädrupi ndaro lemeri be, caoko sikundu gwo ädrupi ndaro ri, nda atana eŋwanye ekye yulu Lu ya? ¹⁸ Ŋgwai maro, beṛo ko ŋgalu amaro ri a’done atà ro toto tana atane ata; beṛo a’done ŋgalu endaro, se abe ka’dana taoye si ro. ¹⁹ Ka’do inye, ta ono si, mä̀nina ndi ama orivoya taŋgye ro, ta ono si mà’dona ’da agoago be Lu kandra. ²⁰ Ondro ta ya amaro ro kope vure amaro ni, mä̀ni ndi Lu orivoya parandra ndrani ta ya amaro ro drisi ago tana nda kani ŋgacini uni. ²¹ Ago ka’do inye, bereazii maro, ondro ya amaro kope vure amaro ko ni, ama orivoya agoago be Lu kandra. ²² Mà ŋgase màbe ejina ni nda rigyesi usuna, tana mà ota ndaro oro ago ŋgase ta kusi nda be oyena. ²³ Nda ta ama te taomane Ŋgwa ndaro Yesu Kristo ya ago azi lune, oso Kristo kota ama be ronye. ²⁴ Nda se kabe ota Lu ro oro ka ori rumora ya Lu be ago Lu ka ori rumora ya nda be. Ago tana Tori se Lu kozobe ämäri si mä̀ni ndi anjioko Lu ka ori rumora ya ama yibe.

¹ Bereazii se mulube ono, mìma ta ko vona se cini kabe ata ekye iyi tori be ’do ya, oko nyòjo ànya unizana kode Tori se ànya ka’dobe sina ’do ikyi ni Lu resi. Tana nebii amba mieywe’ba ro oyite vocini yasi. ² Mìnina ànya ta ono si kode ’bo gi orivoya Tori Lu ro ya: vona se cini kuni ndi ekye Yesu ikyite oso lidri ronye nda orivoya Tori se kabe ikyi ni Lu resi be. ³ Oko ’dise kogakala ta ono ro te ta Yesu rota nda ko Tori be ni Lu resi. Tori se nda be sina ’do ni kyila’baazi Kristo ro resi, se nyèri ta be ekye ikyina ’da ’do, ago yauono ànya orivoya noŋwa ṛote nja ’bädri ya. ⁴ Oko ami orivoya Lu ro, ŋgwai maro, ago mìpe nebii mieywe’ba ṛote ṛe, tana tori se orivoya ami ya ono orivoya mbara be ndrani torii ànya se ka’dobe ’bädri ro ro ri. ⁵ Nebii se mieywe’ba ro kai kayi ta ’bädri ro ata ayani, ago lidri ’bädri ro ka ta ànyaro erina tana ànya orivoya ’bädri ro. ⁶ Oko ama orivoya Lu ro. Nda se kabe Lu uni eri ta amaro ndi, nda se ko orivoya Lu ro eri ta amaro ko, ka’do inye, ono ni, tase mä̀nina a’do toto lakole Tori taŋgye ro ro ndi tori ’diwiri ro be tana itina sina owo. ⁷ Bereazii se mulube ono, mì’de mùlu azi, tana ŋgalu ka ikyi ni Lu resi. Nda se kabe ’di lu orivoya ŋgwa Lu ro ago ni Lu ndi. ⁸ Nda se lu ’di ko ni Lu ko, tana Lu orivoya ŋgalu yi. ⁹ Lu ka’da ŋgalu ndaro te ta amaro ta Ŋgwa alodi ndaro ezona si ’bädri ya, tana mà’do robe adri be nda si. ¹⁰ Ono ni ŋgalu yi, a’do ko ekye mùlu Lu ni, oko tana nda lu ama ni ago ezo Ŋgwa ndaro te se nda si e’be ama te ta takozii amaro rota. ¹¹ Bereazii se mulube ono, ondro ka’do Lu lu ama te oso ono ronye, ’dooko beṛo ämäri azi lune. ¹² ’Diaza alo ndre Lu kote, oko ondro mùlu azi te, Lu ka ori rumora ya ama yibe, ago ŋgalu ndaro a’bate ŋgye ama ya. ¹³ Màmate endaro anjioko mà ori rumora ya Lu be ago nda ka ori rumora ya ama yibe, tana nda ezo Tori ndaro te ämäri. ¹⁴ Ago màndre ṛote ago mà tana itina azii ri anjioko Lu ezo Ŋgwa ndaro te a’done Opa’ba ’bädri ro. ¹⁵ Ondro ’diaza ka ata ekye Yesu orivoya Ŋgwa Lu ro, nda ka ori rumora ya Lu be, ago Lu ka ori rumora ya nda be. ¹⁶ Ago andivo amaro mä̀ni ndi ago màma ndi ŋgalu se Lu ka’dobe sina ämäri ono ya. Lu ni ŋgalu yi, ago nda se kabe ori ŋgalu ya ka ori rumora ya Lu be ago Lu ka ori rumora ya nda be. ¹⁷ A’ba ŋgalu te ŋgye ama ya tana mà’do robe agoago be Tu Vureope rosi, ago mà’dona ndi sina tana ori amaro ’bädri ono ya kpa orivoya oso Kristo ro ronye. ¹⁸ Turi i’do ŋgalu ya, ŋgalu ŋgye ka turi cini usi tesi. Ta’dota a’ba ŋgalu kote ŋgye anya se turiro ya, tana turi ka oyi voaloya si taezaro be. ¹⁹ Mà ’di lu tana Lu lu ama te käti. ²⁰ Ondro ka’do ’diaza ka ata ekye, yulu Lu, oko yana osoro ädrupi ndaro lomvo, nda kowe’ba yi. Tana nda ni kote Lu se nda kondre ko ana lune, ondro ka’do nda kulu ädrupi ndaro, se nda kondre ndi ono kote owo. ²¹ Ota se Kristo kozobe ämäri ni ono: nda se kabe Lu lu beṛo kpa ädrupi ndaro lune.

¹ Nda se komabe ekye Yesu orivoya Mesiya owo orivoya ŋgwa Lu ro; ago nda se kabe täpi lu ka kpa ŋgwa ndaro luna. ² Ta ono si mä̀ni ndi mà ŋgwai Lu ro luna, Lu lu si ago ota ndaro ugu orona si. ³ Tana ŋgalu amaro Lu ri anjioko mà ota ndaro orona. Ago ota ndaro ko orivoya rriti ro ämäri, ⁴ tana ŋgwà cini Lu ro orivoya mbara be ’bädri opene ṛe. Ago mà ’bädri ope ṛe taoma amaro si. ⁵ A’di unina ni ’bädri opene ṛe ya? E’be gialo nda se komabe Yesu ni Ŋgwa Lu ro ’do ayani. ⁶ Yesu Kristo ni nda se ikyite gyi bapatisi ro ndaro be ago kari odra ro ndaro be owo. Nda ikyi kote toto gyi be, oko riti gyi ndi kari be be. Ago Tori andivo ndaro ro ka tazevoedre ekye ta ono orivoya ŋgye, tana Tori orivoya taŋgye yi. ⁷ Tazevoedre’bai orivoya nätu: ⁸ Tori, gyi ndi kari be, ago vona cini nätu ono ka tazevoedre troalo. ⁹ Mà taoma tazevoedre lidri roya; oko tazevoedre Lu ro orivoya mbara ndra be, ago nda edretazevo ono te ta Ŋgwa ndaro rota. ¹⁰ Tana nda se kabe taoma Ŋgwa Lu ro ya orivoya tazevoedre ono be ya modo ndaro ya; oko nda se taomaako Lu ya, ka’da Lu te ŋbelero kowe’ba ro, tana nda ma kote tase Lu katabe ta Ŋgwa ndaro rota ya. ¹¹ Tazevoedre orivoya ni ono: Lu ozo adri äduako te ämäri, ago adri se ono efovona ni Ŋgwa ndaro yasi. ¹² Nda se orivoya Ŋgwa be orivoya adri ono be, nda se Ŋgwa Lu ro ako teinye adri ako. ¹³ Ma ta ono egyi ämiri tana mìni robe anjioko ami orivoya adri äduako be, ami se nyàbe taoma Ŋgwa Lu ro ya ono. ¹⁴ Ama orivoya agoago be Lu kandra, tana màma ndi endaro, nda erina ama ndi ondro mèji nda te ta ŋga aza rota se orivoya ole ndaro ronye owo. ¹⁵ Nda eri ama ndi ondro mèji nda te owo; ago mä̀ni ndi ono orivoya taŋgye yi, ago mä̀ni kpa ndi anjioko nda ozona ŋgase màbe ejina ni nda si ndi ämäri. ¹⁶ Ondro mindre ädrupi miro aza te takozi oyevoya, se loci nda ko odra ya beṛo miri mätu oyene Lu se ozona adri ’da ndäri ri. Ono tana di ànya se takozii ànyaro loci ànya ko odra ya. ’Dooko takozi se kabe ’di loci odra ya orivoya, ago mata ko makye beṛo ämiri mätune tana ro. ¹⁷ Taenji cini orivoya takozi yi, oko takozi azaka orivoya loci ’di ko odra ya. ¹⁸ Mä̀ni ndi anjioko ŋgwa Lu ro aza ni ko ugu takozi oyene ’duro, tana Ŋgwa Lu ro ka nda gaga londro ro, ago se kozi ono unina ko nda oyene koziro. ¹⁹ Mä̀ni ndi ama orivoya Lu ro ’bädri cini ka’do gica orivoya miri nda se kozi ono ro zele owo. ²⁰ Mä̀ni ndi Ŋgwa Lu ro ikyite ago ozo tavouni te ämäri, tana mä̀ni Lu ŋgye robe. Mà ori rumora ya Lu endaro be rudro’be si Ŋgwa ndaro Yesu Kristo be. Ono ni Lu ŋgye yi, ago ono ni adri äduako owo. ²¹ Ŋgwai maro, nyàgaga andivo amiro londroro ni lui awi risi.